﻿ZABURI.
62.
(Ogoteera gwa Daudi) Omoyo one nigo oganyete Nyasae bweka ase okonyora obotoereru; ogotooreka kwane nigo gokorwa asare. 
Ere nere bweka egetare kiane, na ogotooreka kwane, nere orwaki rwane, tinkonyegerigwa mono. 
Inee! Inwe mwensi, ngoika ririri moragenderere korwania omonto ore bweka, erinde momoakere inse, inwe mwensi amo, buna nigo are enyasi ere ang’e kogwa na orwaki rwatandokire? 
Abanto abwo nigo bakoroberia bamoiyerie korwa ase obonene bwaye. Barabwo nigo bakogokigwa mono gokwana oborimo; nigo bagosesenia nebikoba biabo bosa, korende ase chinkoro chiabo ime nigo bakoragereria. 
Omoyo one nigo omoganyete Nyasae bweka ase okonyora obotoereru; ogosemeria kwane nigo gokorwa asare. 
Ere bweka negetare kiane, na ogotooreka kwane, na egekengero kiane egekong’u; tinkonyegerigwa. 
Ogotooreka kwane, na obonene bwane, nigo bikonyorekana ase Nyasae. Nyasae negetare kiane gie chinguru, na obotamero bwane. 
Inwe abanto, mwegene Omonene ase chingaki chionsi, morentere emechando yaino; Nyasae nere obotamero bwaito. 
Ekeene, Mwanyabaanto nigo bare buna omooki rioka, abanto baeire obonene nigo bare bosa; ekero bakorengwa nigo bare abagusu; bonsi nigo bare abagusu kobua omooki. 
Timobaisa gosemeria obourereria, timobaisa koba nogosemeria kwa bosa ase ebinto bi’oboibi. Onye obotenenku bwaino bwabeire obonge, timobaisa kobosemeria. 
Nyasae okwanire ara rimo, ee, nabeire nkoyaigwa chintunda ibere, ng’a Nyasae nere omonyene okobua. 
Aye Nyasae, nigo ore nobwanchani bogendererete botambe; aye nigo ogoakana omonto koreng’ana buna emeremo yaye ere. 
