﻿ZABURI.
61.
(Ogoteera gwa Daudi) Aye Nyasae one, igwa ekerero kiane; tegerera oigwe ogosaba kwane. 
Ekero enkoro yane yarusirie moyo, nigo ngokorangeria korwa ase chinsinyo chi’ense. Aye ondaae gochia egetare keria kere egetambe mono kombua. 
Aye naye obotamero bwane, eburi enkong’u egonkengera korwa ase ababisa baane. 
Ing’a ribaga ingenderere komenya botambe ase eema yao; ninganetie inyore oborendi obuya inse y’ekiriri gie chimbaaba chiao. 
Aye Nyasae kwaigure chiira chiane narire ase ogotiana, abanto bairogete erieta riao kwabaeire omwando obo. 
Omentere omorwoti amatuko agenderere koba moyo; emiaka yaye ebe ey’ebiaare ebinge. 
Tiga agenderere botambe koba omorwoti ase obosio bwao aye Nyasae; obwanchani bwao bogendererete botambe, na obwegenwa bwao, bimorende. 
Igo nimbe ngotera ase ogotogia erieta riao botambe, naende rituko ase rituko imbe ngoikerania chiira chiane. 
