﻿ZABURI.
60.
(Ogoteera gwa Daudi gw’okworokereria, ekero arwanete n’Abaaramu korwa Naharimu na Soba, na Yoabu akairana goita Abaedomu 12,000 ase Riranya ri’Omonyo) Nyasae, aye gwatwangire na gwatosiareire, kwabeire kore nendamwamu, toiranerie amaya aito. 
Aye gwatengechirie ense na koyetandora; iraneria naende amatandoku ayio, ekiagera nigo egotengecha mono. 
Gwakorire abanto bao babeire nemechando emekong’u; gwatonyoisirie edivai yatotindirie na gotoong’anyia. 
Aye kwaeire abanto abwo bakoirogete ekemanyererio, kenyare koimokererigwa igoro ase ogotenenera ekeene. 
Igo nonyare gotooria abanto abwo gwanchete; otoe obobui goetera ase okoboko kwao gw’okorio, oigwe ogosaba gwaito. 
Nyasae okwanire korwa ase Obomenyo bwaye Obochenu, ogoteeba, “Ase omochengo ninyatanane Sekemu, na ense omweya ya Sukoti inyiate chincherere. 
Gileadi neyane, na Manase neyane; Efraimu nekegogwa kiane gi’ekioma, na Yuda nenyimbo yane y’obogambi. 
Moabu negetaabo kiane ngoisabera; nindute egekoroto kiane igoro ase Edomu, ning’ake eriogi ri’okobua igoro y’ense y’Abafilisti.” 
Ning’o orandaae ansoyie ase omochie ogiteire chindwaki? Ning’o orantang’ane gochia Edomu? 
Aye Nyasae, Inee, ngwatotigire kegima? Aye tori kogenda amo nabarwani baito b’esegi. 
Tokonye torwanie ababisa baito tobabue, ekiagera ogokonywa kwa Mwanyabaanto mbosa. 
Ekero tore amo na Nyasae, inatokore amang’ana amanene, nere orabue ababisa baito na kobatiringera inse. 
