﻿ZABURI.
58.
(Ogoteera gwa Daudi) Inwe abamokogamba, Inee, ngokwana more amang’ana ’ekeene? Inee! Nkonachera more abanto ebiina bire boronge? 
Yaya, nigo more nemeroberio emekorekanu ime ase chinkoro chiaino, amaboko aino nigo agokora obotindi bw’oborianania ase ense. 
Abakori amabe nigo basirete korwa chinda chi’abang’ina, abanyaborimo nigo bakoba abatantanu korwa engaki y’okoiborwa kwabo. 
Barabwo nigo babwate obosongo bonga buna obw’eng’iti, nigo banga buna rirubi rigoticha amato aye, 
erinde tiriigwa amariogi abanyamosira, gose ay’abaebia b’obong’aini. 
Aye Nyasae, obune amaino ’emenwa yabo; aye Omonene, gokora amagegu e chindo chinsae! 
Abanto abwo tiga basirigwe kegima buna amaache omogooko agoeta asira; ekero bakoruta emegwe yabo, eburoke. 
Barabwo tiga babe buna amakorominyo akonyititoka amarenda aera, na buna oborito bw’omokuungu bokogwa botaraika engaki yaye. 
Omonene nabasirie bwango, ee, bwango kobua chinyongo chiaino chitarabwata riberera ri’omorero bw’amagwa, karabe amabese gose amasusanu. 
Omonyene oboronge nagoke ekero egesiomba kegoakanwa, natiringe amanyinga ’abaanto abanyabibe. 
Erio abanto bateebe, “Ekeene, abanyaboronge nigo bakonyora eng’eria yabo; ekeene, Nyasae nareo okonacha ebiina ase ense.” 
