﻿ZABURI.
57.
(Ogoteera gwa Daudi ekero atamete Saulo na akebisa ase rikuruma) Aye Nyasae, indorera amaabera, indorera amaabera, ekiagera naye natameire nomoyo one. Nintame nyebise inse ase ekiriri gie chimbaaba chiao, goika omwaga bw’ogosiria oete. 
Inche nigo nkorera ase Nyasae Ore Igoro Mono, ase Nyasae oria okong’ikeraneria onsi. 
Omonene nantomere ogotooreka korwa igoro, nababue abwo bagonkorera bobe babe nobosooku. Nyasae naorokie amaabera aye na ekeene kiaye. 
Omoyo one nigo oetananire ne chindo, nigo ndaire ase egati ya Mwanyabaanto bagoutoka omorero, amaino abo nigo are amoge buna amatimo ne chinsara, chimeme chiabo nigo chire emioro emioge. 
Aye Nyasae, oorokie ng’a nigo ore omonene goetania igoro chionsi, tiga obonene bwao bororekane ase ense yonsi. 
Ababisa bantegeire oboreba ase ngoeta, bamionogoreire inse. Bakunyire eirima ase enchera yane, korende mbarabwo abanyene bagure imeo. 
Aye Nyasae, enkoro yane nigo ere noboremu, ee, nigo ere noboremu; nintere na gochenga. 
Aye omoyo one, boka! Inwe amakano aane onsi, boka! Nainche nimboke mambia chuni. 
Aye Omonene, ase egati y’abanto ninkoiranerie ng’a mbuya mono, nimbe ngotera amatera ay’okogotogia ase egati y’ebisaku. 
Amabera ao nigo are amanene aigete aaria igoro; obwegenwa bwao nigo boigete igoro ase amare. 
Aye Nyasae, oorokia ng’a nigo ore omonene goetania igoro chionsi, tiga obonene bwao bororekane ase ense yonsi. 
