﻿ZABURI.
54.
(Ogoteera gwa Daudi ekero omonto oyomo korwa Sifu achierete Saulo komotebia ng’a Daudi nsobo ebisete) Aye Nyasae, ntoorie ase engencho y’erieta riao, ong’e oboronge bwane goetera ase okobua kwao. 
Nyasae, igwa ogosaba kwane; tegerera oigwe amang’ana aane ngokwana. 
Abanto abamwenu bang’umokeire kong’ita, na abanto abatindi nigo baganetie obogima bwane; abwo tibakoirogeti aye Nyasae. 
Nimanyete ng’a Nyasae nere omokonyi one, Omonene nere orendete obogima bwane. 
Nairanerie ababisa baane obobe bwabo. Aye Omonene, obasirie, ekiagera igo ore omwegenwa. 
Omonene, ninkoruere ekeng’wanso inde nenkoro y’ogwancha, nimbe nkoiraneria ng’a mbuya mono ase erieta riao, ekiagera nerigiya. 
Aye gwantooririe ase emechando yonsi, na amaiso aane nigo arigereretie ababisa baane inde nomochengo. 
