﻿ZABURI.
52.
(Ogoteera gwa Daudi ekero Doegi Omoedomu achierete Saulo komotebia ng’a Daudi ochire mw’Abimeleki) Aye omonto ore nokobua, nase ki ogwetogeria amabe aya ogokora? Obwanchani bwa Nyasae nigo bogendererete kare na kare. 
Aye omong’ainereria, oromeme rwao nigo rokoroberia amang’ana ’ogosaria; nigo ronga buna omoyio otukia omwoge. 
Aye nigo bwanchete amabe kobua amaya, nigo bwanchete gokwana oborimo kobua ekeene. 
Aye ore noromeme rw’obong’ainereria, nigo bwanchete gokwana amang’ana agosaria. 
Nyasae nakoiyerie inse kare na kare, nakobwate na kogotaboria korwa nyomba mwao, nagosimore korwa ase ense y’abare moyo. 
Abanyene oboronge mbarore ayio boboe, bamosekerere bateebe; 
“Rora, omonto oyo bwangete gokora Nyasae abe obotamero bwaye, nigo egenete obonge bw’obonda bwaye omonyene, na akeenenia ase chinguru chiaye chi’ogosaria.” 
Korende inche nigo inga buna omozeituni osebogete ase enyomba ya Nyasae ime. Nigo nsemeretie obwanchani bwa Nyasae botari koera goika kare na kare. 
Aye Nyasae, ngokoiraneria ng’a mbuya mono kare na kare, ekiagera gwakorire ayio. Ase amasio ’abaanto bao bare abegenwa nindarie erieta riao, ekiagera nerigiya. 
