﻿ZABURI.
48.
(Ogoteera kwa basinto ba Kora) Omonene nigo are omonene mono, goika atogigwe; ere goika atogigwe agwo ase omochie o Nyasae oito, ase egetunwa kiaye egechenu. 
Sayoni, egetunwa kia Nyasae egeseera, keimokererete igoro agwo sugusu, nigo kere omogooko bw’ense engima; omochie oyio noyo bw’omorwoti omonene. 
Agwo ase chiburi chi’omochie oyio, Nyasae bweorokirie ng’a nere obotamero bw’ogwekengera. 
Rora, abarwoti nigo basangererekanete, bagacha amo. 
Ekero baroche omochie oria, nigo bakumetie, bakaondoka, bagatama. 
Bagasogwa nobwoba, bakaiguswa, bagaichana na koba nobororo buna obw’omokuungu okobina aibore. 
Nigo kwababunete buna chimeeri chia Tarisisi nomwaga okogusa korwa moocha. 
Amang’ana twaigwete, bono twayarorire agwo ase omochie Omonene bw’Emeganda, omochie o Nyasae oito. Nyasae nigo ayorendete na koyokong’ia goika kare na kare. 
Nyasae, ekero tore ase Hekalu yao ime, nigo tokorengereria igoro y’obwanchani bwao bogendererete botambe. 
Nyasae, buna koreng’ana erieta riao rikumete, naboigo nogotogigwa kwao gokumete goikera chinsinyo chi’ense. Okoboko kwao gw’okorio nigo goichire noboronge. 
Tiga abanto b’egetunwa gia Sayoni bagoke; boigo nab’emechie y’Abayuda, ekiagera aye nigo okonacha ebiina bia boronge. 
Taara moetanane Sayoni, mobare emerobiri yaye. 
Rigereria chindwaki chiaye, eta motaare ime ase chiburi chiaye; erio nario morache goteebia ebigori bigochi-gocha: 
“Omonene oyo nere Nyasae oito o kare na kare. Ere nabe omoraai oito kogenderera botambe.” 
