﻿ZABURI.
47.
(Ogoteera kwa basinto ba Kora) Inwe abanto bonsi, aka chinkobi, moterere Nyasae amatera ’omogooko neriogi rinene! 
Omonene ore Igoro Mono nigo are oyo bw’okoirokia, ere nomorwoti omonene bw’ense yonsi. 
Omonene obekire abanto inse yaito, otoeire okobua kogambera abanto b’ebisaku. 
Nigo atochorerete omwando, oyio ore obwari bwa Yakobo, ori’Omonene anchete. 
Nyasae otiirire namariogi ay’ogochengerwa, Omonene nigo akobugerigwa ebitureeri. 
Tera amatera ay’ogotogia Nyasae, tera amatera ay’ogotogia! Tera amatera ay’ogotogia omorwoti oito, tera amatera ay’ogotogia! 
Nyasae nigo are omorwoti bw’ense yonsi, motogie namatera are nengencho. 
Nyasae nere okogamba igoro ase ebisaku; ere nigo aikaransete ase ekerogo kiaye ki’obonene kere egechenu. 
Abagaambi b’abaanto basangererekanire amo, babe abanto ba Nyasae o Aburaamu. Chinguba chi’ense nigo chire echia Nyasae; ere oimokererigwe igoro mono kegima. 
