﻿ZABURI.
46.
(Ogoteera kwa basinto ba Kora) Nyasae nobotamero bwaito, ne chinguru chiaito, botambe nigo are ang’e gotokonya ase engaki y’emechando. 
Ase ayio titokwoboa, ense neisa gotengechigwa na ebitunwa birutwe ase chindiba chi’enyancha, 
gose emerindo y’enyancha neba ekoruma na koimokerera igoro, na ebitunwa bibe bigotengechigwa ase ogoturubanigwa okwo. 
Orooche ndoreo chindooche chiaye chikogokia omochie o Nyasae, omochie ore obomenyo obochenu bw’Oyore Igoro Mono. 
Nyasae nigo amenyete imeo, tokonyegerigwa, ere nayokonye kobogokia mambia. 
Abanto b’ebisaku babeire neburuburu, amagambi aiyerigwe; Nyasae ogoaka eriogi riaye, ense nenyititoke. 
Omonene bw’Emeganda nigo are amo naintwe, Nyasae o Yakobo nere obotamero bwaito. 
Inchuo morore ay’Omonene akorire, orentire ogosirigwa ase ense. 
Otangire chiseegi ase ense engima, obunire amata, osenyentire amatimo, osambire chigari nomorero. 
“Toerera, momanye ng’a ninche Nyasae; inche inde omonene ase abanto b’ebisaku, omonene ase ense.” 
Omonene bw’Emeganda nigo are amo naintwe, Nyasae o Yakobo nere obotamero bwaito. 
