﻿ZABURI.
41.
(Ogoteera gwa Daudi) Nasesenirie omonto oyo ogwechandera abataka. Ekero aranyorwe nemechando, Omonene namokonye. 
Omonene amorende na komokorera agenderere koba moyo, erinde arokwe oyosesenirie ase ense. Omonene tagotiga ababisa bamokorere buna banchete. 
Omonene namorende ekero are borere arwarete, namogusuerie oborwaire bwaye. 
Inche nigo nateebete: “Omonene, indorera amaabera, ingwenie omoyo one, ekiagera nakorire ebibe asore.” 
Ababisa baane nigo bagokwana amang’ana amabe igoro yane, bateba, “Omonto oyo indi arakwe na erieta riaye riebwe kegima?” 
Onde bwensi ogocha kondora nigo agokwana amang’ana yoborimo, enkoro yaye nigo egosangereria amabe, erio ogenda isiko oraria amang’ana ayio amabe. 
Abwo bonsi bangechete nigo bakomonyererana igoro yane, nigo bakorire omooroberio bw’ogonkora bobe. 
Barabwo nigo bagoteeba: “Noborwaire boramoite bwamonyorire, takoboka naende korwa ase araire”. 
Nonya nomosani one negenete, tware koragera komo, ong’akire chintacho. 
Omonene, ndorera amaabera, ngwenie, erinde ing’akane ababisa baane obobe bwabo. 
Ababisa baane tibagochenga igoro yane. Ase ayio nimanye ng’a aye nogokirie nainche. 
Aye gwankonyire, ekiagera tindi na komocha, kwambekire gotenena ase obosio bwao kogenderera botambe. 
Omonene Nyasae bw’Abaisraeli, atogigwe, buna yarenge korwa kare nabo erabe goika kare na kare. Amina. Amina. 
