﻿ZABURI.
39.
(Ogoteera gwa Daudi) Ngateeba: “Nindende orogendo rwane, timbaisa gokora ebibe ekero ngokwana. Nimbeke omonwa one ekeokio ekero abakori amabe bare ase obosio bwane.” 
Igo narenge nkirete‐kiri, tinare gokwana, tinaba na koremigwa konde, obororo bwane bokamenteka mono, 
enkoro yane ekaba ekoyia omorero ime yane. Ekero naare ndengereretie aya, omorero ogoka, tinare konyara gwetanga ogokwana kwane. 
Omonene, imanyie omoerio bw’amatuko aane, na ekerengo ki’amatuko aane naki keng’ana, erinde imanye ng’a obogima bwane nobweng’e. 
Naama! Amatuko kwang’ete nameng’e mono. Engaki y’obogima bwane nigo ere buna teri gento ase obosio bwao. Amaene, kera omonto, nonya bwetenenerete bokong’u, nigo agoeta bwango buna omwaga. 
Amaene, Mwanyabaanto nigo agotaara ore buna omogwekano okorora ase okorota; nigo agwechanda bosa; asangereria enibo, korende tamanyeti gose ning’o orache koyeria. 
Nabono aye Omonene, inki nganyete? Naye bweka nsemeretie. 
Ntoorie korwa ase ogosaria kwane, tontiga nsekererwe noyio ore omoriri. 
Nigo nkirete‐kiri, tindi komumora omonwa one, ekiagera aye naye gwakorete ayio. 
Rusia egesusuro kiao asende; naerire ase ogoakwa gw’okoboko kwao. 
Ekero okorongeyia omonto ase okomotogonyera ase engencho y’ebibe, nigo ogosiria obonene bwaye, koreng’ana buna ebigwankwa bikoria chianga. Amaene, Mwanyabaanto nigo anga buna omwaga. 
Aye Omonene, igwa ogosaba kwane, otegerere okorera kwane; tokira‐kiri ekero nkoiyeria amariga, ekiagera inche nomogeni oo inde, na omoeti buna chisokoro chiane chiarenge. 
Intige, inyore chinguru chinyia ntararua ase ense, na ntabeo naende. 
