﻿ZABURI.
32.
(Ogoteera gwa Daudi) Nasesenirie omonto oyo bwabeirwe ogosaria kwaye, na ebibe biaye biatubirwe. 
Nasesenirie omonto oyi’Omonene atabarereti okomocha kwaye, oyo otari nobong’ainereria ase omoyo oye ime. 
Ekero konya ntaraorokia ebibe biane, omobere one okoma pa ase okwerera omobaso boira. 
Omobaso na obotuko okoboko kwao gokanditoera negesusuro; chinguru chiane chikaera buna amaache akoera ekero ki’egurugura. 
Erio ngakoorokeria ebibe biane, gose tinakobisete okomocha kwane, ngateeba: “Nimoorokerie Omonene ogosaria kwane,” erio okanyabera ebibe biane bionsi. 
Ase ayio, kera omonto oyokoirogete tiga agosabe ase engaki y’emechando. Ekero amaache amange agotirimboka gocha bwango, tabaisa komoikera. 
Aye naye obwebiso bwane, nondendete korwa ase emechando, nimbe nomogooko na omochengo, ekiagera gwantooririe. 
Ninkworokererie na gokoraa ase enchera ogwenerete kogenda; ningosemie, na amaiso aane nakorigererie. 
Timoba buna chibarasi ne chibarasi chitari nobong’aini, echigwenerete chibekerwe chinkini na ebigobanio bi’ogochigambera. 
Omokori amabe nare namaakwa amange, korende oyomosemeretie Omonene, Omonene nigo amoetananeretie nobwanchani botari koera. 
Inwe abanyene oboronge, mogokere Omonene na komochengera; inwe mwensi abamore ne chinkoro chindonge, aka eriogi nomogooko. 
