﻿ZABURI.
30.
(Ogoteera gwa Daudi ekero aatananete Hekalu ekaba enchenu) Aye Omonene, ningotogie, ekiagera kwanyimokirie korwa inse, tigwatigete ababisa baane betogie igoro yane. 
Aye, Omonene Nyasae one, nigo narerete asore ng’a onkonye, na bono kwangwenirie. 
Omonene, gwatooririe omoyo one korwa aase abakuure kwang’iraneirie obogima tingenda ase oboina ime. 
Inwe abachenu baye, tera amatera ay’okobaka Omonene, iraneria ng’a mbuya mono ase erieta riaye richenu. 
Omonene nigo akoba nendamwamu ase engaki ensinini yoka, korende obuya bwaye nigo bokoba ase obogima bw’omonto. Ekerero nabo keranyare kobao ase omogoroba, korende mambia omogooko na omochengo nigo bigocha. 
Ekero amang’ana onsi arenge amaya asende, ngateeba ng’a tinkobugwa. 
Aye Omonene, ase engencho y’obuya bwao ogakora egetunwa kiane kegatenena bokong’u, korende ekero kwabisete obosio bwao nkaba nobwoba. 
Erio nkarera asore, aye Omonene, ngakoboria ase oboitongo: 
Mbitoki ki aye oranyore onye ngokwa na gosoa ase oboina ime? Inee! Orotu rw’amaroba ndonyare kogotogia? Ndonyare koraria obwegenwa bwao? 
Aye Omonene, inyigwe, ondorere amaabera! Omonene, inkonye! 
Aye kwaonchoire omoichano one okaba omochengo; kwandusirie eanga y’emechando, kwambekeire ey’omogooko. 
Ase ayio, omoyo one nogenderere kogotogia, togokira. Aye Omonene, Nyasae one, ninkoiraneria ng’a mbuya mono kogenderera kare na kare. 
