﻿ZABURI.
29.
(Ogoteera gwa Daudi) Inwe abana ba Nyasae, motogie Omonene, atora obonene bw’Omonene ne chinguru chiaye. 
Togia erieta ri’Omonene rire nobonene obonge; mosasime Omonene mweboetie obochenu. 
Eriogi ri’Omonene nigo rikoigweka ase chinyancha igoro; Nyasae bw’obonene nigo agoaka enkoba, Omonene nigo akogukura igoro ye chinyancha chinyinge. 
Eriogi ri’Omonene nigo rikoigweka rire nokobua; eriogi ri’Omonene nigo riichire nobonene. 
Eriogi ri’Omonene nigo rikobuna emete emecharake, ee, nigo rikobuna emecharake ya Lebanoni. 
Nigo agotira‐tiria emete eyio buna emori egotiria, na ebitunwa bia Lebanoni na Sirioni buna eng’era ensae. 
Eriogi ri’Omonene nigo rikomesia chinsase chi’omorero. 
Eriogi ri’Omonene nigo rigotengechia erooro; ee, nigo rigotengechia erooro ya Kadeshi. 
Eriogi erio ri’Omonene nigo rikorekeria chingabi, nigo rigosabora emete y’amanani yaba bosa. Ase Hekalu yaye ebitongwa bionsi biatogia obonene bwaye. 
Omonene nigo aikaransete ase ekerogo kiaye ki’obonene kogambera chioora; Omonene nere omorwoti ase ekerogo kiaye kare na kare. 
Omonene nae abanto baye chinguru, naende abasesenie ase okobaa omorembe. 
