﻿ZABURI.
28.
(Ogoteera gwa Daudi) Aye Omonene, egetare kiane, naye nkorangeria, tibwanga konyigwa. Oise gokira, inche nigo ndabe oyomo bw’abakogenda ase chimbeera. 
Igwa eriogi ri’ogosaba kwane, ekero nkorera asore onkonye, ekero ndamborete amaboko aane igoro gocha ase obomenyo bwao obochenu. 
Tobaisa gonsiria amo nabakori amabe na abasaria, abanto abagokwana amang’ana yo omorembe nabaanto bande, korende ime ase chinkoro chiabo nigo baabagechete. 
Bae egesusuro koreng’ana nogokora kwabo na ebibe biabo, obaakane koreng’ana nemeremo y’amaboko abo, obae eki bagwenerete konyora. 
Abanto abwo tibari kobara ng’a ogokora kw’Omonene, gose emeremo y’amaboko aye, negento; ase ayio nabaiyerie inse, takobaimokia naende. 
Omonene atogigwe! Ere oigure okoboria kwane kw’oboitongo. 
Omonene nere chinguru chiane na enguba yane; nere nsemeretie ase enkoro yane, ere nankonyete. Ase ayio ninde nomosasoko ase enkoro yane; nimbe nkomoterera na komoiraneria ng’a mbuya mono. 
Omonene nigo are chinguru ase abanto baye, na obotamero bw’ogotooreka ase omoakwa amaguta oye. 
Aye Omonene, tooria abanto bao abare omwando oo, obe omorisia obo, obabogorie goika kare na kare. 
