﻿ZABURI.
21.
(Ogoteera gwa Daudi) Aye Omonene, omorwoti nigo agokerete chinguru chiao, na gochengera obobui kwamoeire. 
Kwamoeire okogania gw’enkoro yaye; na totangeti aya aboretie korwa asore. 
Aye kwamorenteire ogosesenigwa okuya; kwamobekeire egutwa y’etaabu echenire ase omotwe oye. 
Akagosaba ng’a omoe obogima, naye okabomoa; okamoa amatuko amange amenye kogenderera botambe. 
Amasikani ’omorwoti nigo are amanene, ekiagera aye kwamokonyire; kwamoeire obonene obonge na ogosika okonene. 
Ee, kwamokorire koba ogoseseneka gwa kare na kare, kwamogokeire, ekiagera ore amo nere botambe. 
Omorwoti nigo asemeretie Omonene, na ase engencho y’obwanchani bw’Omonene Ore Igoro bogendererete botambe ere takonyara kwoboa. 
Aye Omorwoti, noikeere ababisa bao bonsi; nobwate nokoboko kwao gw’okorio abwo bakogechete. 
Ekero orabaorokere nobakore booke buna omorero ekebemberi. Omonene nabasirie nendamwamu yaye enene; omorero nobasambe, bayie baere. 
Aye noite abana babo, obasirie korwa ase ense, na ororeria rwabo orosirie kegima korwa ase Mwanyabaanto. 
Kobarabe bagokora emeroberio y’ogokora bobe, gose korengereria chinchera chi’okorenta emechando, tibakobua, 
ekiagera nobaserie batame, nobarenge emegwe ase amasio abo. 
Aye Omonene otogigwe ase engencho ye chinguru chiao, intwe ntobe togotera ogoteera kw’ogotogia okobua kwao. 
