﻿ZABURI.
16.
(Ogoteera gwa Daudi) Aye Nyasae, gaki ondende, ekiagera naye ngotamera. 
Nigo ngoteebia Omonene iga: “Aye naye Omonene one, obuya bwonsi ’nde nabwo nigo bokorwa asore.” 
Abanto abachenu bare ase ense nigo bare nobonene bokumete; abwo nabwo bangogeetie mono. 
Abwo bakominyokera chinyasae ching’ao, nigo bakwementera emechando. Tinkoumora okoruegwa kw’amanyinga okwo bakorua, gose tingwatora amarieta abo n’ebikoba biane. 
Omonene nere egetare kiane; nere okong’a onsi aya ’ngwenerete konyora; ere igo arendete aya antungetie. 
Ebintungetie biangwereire agwo aase are aagiya, ee, omwando one nigo ore omuya mono kegima. 
Nigo ngotogia Omonene oyo ogonsemia, ase obotuko enkoro yane nigo egonteebereria gokora igo. 
Botambe, nigo ndigereretie Omonene; ere nigo are ensemo yane y’okorio, igo tinkwoboa. 
Ase igo, enkoro yane amo n’omoyo one nigo bire nomosasoko; nonya n’omobere one nigo omenyete ase ogosemeria. 
Aye Omonene, togontiga agwo aase abakuure gose togotiga omochenu oo agunde. 
Aye Omonene, nonyorokererie enchera ekogenda ase obogima; ase obosio bwao noreo omogooko omonge mono kegima; ase ensemo yao y’okorio mboreo obwansu obuya goika kare na kare. 
