﻿ZABURI.
11.
(Ogoteera gwa Daudi) Omonene nere obotemero bwane! Nase ki rende mogonteebia: “Iruruka buna enyoni ogende gochia ebitunwa igoro? 
Rigereria abakori amabe buna batingire amata abo, babekire chinsara chiabo ang’e ase chingori chi’amata, erinde barase abanto bare ne chinkoro chindonge. 
Onye amaroso atagoirwe, ngento ki omonto omooronge arakore?” 
Omonene nigo are ime ye Hekalu yaye enchenu, ekerogo kiaye ki’obonene naaria igoro kere. Amaiso aye nigo amongerete, nigo arigereretie na korenga Mwanyabaanto. 
Omonene arengete abare abaronge na abakori amabe, korende omoyo oye nigo ogechete abakori amabe na abagoita abande ase obotindi bwa bosa. 
Natwerie abakori amabe omorero bw’amakara, amagena agosamba na omwaga ore n’oroguto rw’omorero, ’ng’a bibe egesusuro kiabo. 
Omonene nomonyene oboronge, nigo anchete ogokora kw’oboronge; abanto abare ne chinkoro chindonge mbarore obosio bwaye. 
