﻿ZABURI.
6.
(Ogoteera gwa Daudi) Omonene, tontogonyera ekero ore nendamwamu; tong’a egesusuro gi’okondongeyia ekero ore nekeririanda. 
Omonene, ndorera amaabera, ekiagera ’nde omonyanyuru. Aye Omonene, ’ngwenie, ekiagera amauga aane nigo akonyegerigwa. 
Omoyo one ochandekire nomoondoko. Omonene, ngoika ririri orenane otarankonya? 
Aye Omonene, ing’iranere omboorie! Ontoorie ase engencho y’obwanchani bwao botari koera. 
Ase abwo bakuure onde tari oranyare gokoinyora. Inee! Ning’o oranyare kogotogia korwa aase abakuure? 
Nanyarekire ase okwerera kwane kw’obororo, kera obotuko nigo ngoteremia namariga ase oborere bwane, ebirarero biane biaichoirwe namariga. 
Obosio bwane bwomire pa ase engencho y’emechando, bwareeire ase engencho y’ababisa baane bonsi. 
Inwe mwensi abakori amabe, karue asende ekiagera Omonene oigure eriogi ria ebirero biane. 
Omonene oigure okoboria kwane gw’okonyora amaabera, nere bwancheire ogosaba kwane. 
Ababisa baane bonsi mbarore obosooku, bagoswe na koondokigwa mono kegima, mbairane gochia magega bwango bare nobosooku. 
