﻿ZABURI.
5.
(Ogoteera gwa Daudi) Aye Omonene, tegerera oigwe amang’ana aane; oiraneria egekoe kiane. 
Aye omorwoti one, aye Nyasae one, tegerera oigwe amang’ana ’okorera kwane, ekiagera naye ngosaba. 
Omonene, aye nigo okoigwa ogosaba kwane maambia; kobogokiamoka nigo nkobeka okogania kwane obosio bwao, erio naganya ntegesetie. 
Aye tori Nyasae bwanchete ogokora okobe. Oyogokora ebibe takonyara komenya amo naye. 
Abanto abaenenu tibakonyara gotenena obosio bwao, nigo ogechete abakori amabe bonsi. 
Aye nigo orasirie abanyaborimo bonsi; aye Omonene nigo ogechete abaiteri amanyinga na abang’ainereria. 
Korende ase engencho y’obonge bw’obwanchani bwao botari koera ninsoe nyomba mwao; nigo ndasasime ndigereretie Hekalu yao Enchenu na nimbe ngokoiroka. 
Aye Omonene, nigo mbwate ababisa abange, ase ayio, ondaae ase oboronge bwao; roisia enchera yao ase ngoetera ebe endonge. 
Amang’ana ababisa baane bagokwana nay’oborimo, chinkoro chiabo nigo chire nemeroberio y’ogosiria kegima; emioyo yabo noboina bwasie, chimeme chiabo nigo chigokwana amang’ana amansu ay’ogosiria. 
Aye Nyasae, obae egesusuro ase ebibe biabo: emeroberio eyio bakorire tiga egere bagwe. Obaserie kegima, ekiagera basaririe asore, na ekiagera bangire gokoigwera. 
Abanto bonsi abakogotamera mbabe nomogooko, barabwo mbatere kogenderera botambe na gochenga. Aye igo orakengere abwo banchete erieta riao, erio banyare koba nomogooko omonene ase engencho yao. 
Aye Omonene nigo ogosesenia omonyene oboronge na komotuba n’obuya bwao bw’amaabera buna enguba. 
