﻿ZABURI.
4.
(Ogoteera gwa Daudi) Aye Nyasae, aye okong’a oboronge, ong’iranerie ekero ngokorangeria! Ekero narenge nkomiga‐migwa nobokong’u nigo kwang’ete ribaga rigare. Indorera amaabera, na oigwe ogosaba kwane! 
Inwe Mwanyabaanto, ngoika ririri moragenderere korenta emechando na kobeka echayo ase obonene bwane? Ngoika ririri moragenderere gwancha amang’ana abosa na korigia ay’oborimo? 
Korende manya ng’a Omonene bwechoreire omonyene oboronge. Omonene nigo akonyigwa ekero nkomosaba. 
Nabo morabee, korende timobaisa gokora ebibe; morengereria mono kegima amang’ana ayio ime ye chinkoro chiano ekero mokorara ase amarere aino, na mobe abatoereru. 
Karue ebing’wanso bi’oboronge, na mosemerie Omonene. 
Abanto abange bagokwana iga: “Naki yare koba buya onye ’ntwanyora ayare amaya.” Aye Omonene, tiga omobaso bw’obosio bwao otomorekere. 
Kwang’eire omogooko ase enkoro yane ime ore omuya kobua oyo abanto bande bakonyora, abwo bare nobonge bw’endagera na edivai. 
Ekero ngochia gwetoora koraara, nigo nkorara chitoro inde nomorembe, ekiagera aye Omonene naye okogera imenye ase okorendwa okuya. 
