﻿AYUBU.
22.
Erio Elifasi Omotemani akairaneria, akabora: 
“Inee! Nenyarekane ng’a omonto abe nengencho ase Nyasae? Ekeene, omonto oria ore nobong’aini nigo akwegwenera ere bweka omonyene. 
Inee! Omogoko onde nore ase Omonguru ng’a nomonyaboronge ore? Gose inki aranyore onye aye kogokora chinchera chiao chibe ching’ikeranu? 
Inee! Nigo okagete ng’a nekiagera omoirogete, nakio gekogera agokoa egesusuro na gokorenta ase ekiina? 
Inee! Amabe gwakorire tari amanene? Ekeene, ebibe biao tibiri nomoerio. 
Aye kwairire bosa ebinto abamino baruete bibe ntenenera, naende kwabachaboire chianga, kwabatigire gesobono. 
Oyo konya orosire tomoeti amaache anywe, na oyo orenge nenchara okamorina endagera. 
Omonto obwate okobua nigo akoira ense yaba eyaye, na oyio oeirwe ogosikwa nere okoyemenya. 
Aye kwabeire kogoseria ababoraka bare namaboko amasa na kobuna amaboko e chintakana. 
Ase ayio emeeto yagoetananire, na obwoba bwa mobosokano nkogochanda bore. 
Oborabu bwao bwabekirwe omosunte, goika tori korora, na amaache amange agotubire. 
“Inee! Nyasae tari aaria igoro mono? Rigereria ching’enang’eni chia igoro buna chire aare mono! 
Ase engencho eyio aye nigo ogoteeba: Inki Nyasae amanyete? Nanyare konacha ekiina goetera ase omosunte ekerima? 
Amare amarito nigo amotubete, takonyara korora, naende nigo agotaara ase obokumbe bwa igoro. 
“Inee! Nenchera enkoro ogochia kobwatia, eria abakori amabe babwatetie? 
Abwo nigo bataboretigwe engaki yabo konya etaraika; na oboroso bwabo bokairwa buna omogooko okoira. 
Barabwo nigo bateebeetie Nyasae: Karue ase tore! Naende bakaboora: Inee! Ngento ki Omobui oyio aratokorere? 
Nonya naboigo Nyasae konya oichoirie chinyomba chiabo n’ebinto ebiya. Ogosemia kw’abakori amabe tiga kobe aare nainche. 
Ekero abanyaboronge bakorora ayio, nigo bakogoka; ee, abwo batari na komocha nigo bagosekerera abakori amabe na kobachecheria, 
bateba: Amaene, ababisa baito basirigwe kegima, na ebinto biabo biatigarete biasambirwe nomorero. 
“Obwatane na Nyasae, nario orabe nomorembe; korakore igo, nonyore amaya. 
Ancha amorokererio akorwa ase omonwa oye; gacha amang’ana aye ime ase enkoro yao. 
Korairanere Omobui, noiranerigwe amaya ao; korende oserie obobe korwa ase obomenyo bwao. 
Otugute chitaabu chiao ime ase amaroba, ne chitaabu chikorwa Ofiri ochibeke ase egati y’amagena ’ebirooche, 
erinde Omobui bweka abe etaabu yao, na efeta yao ere nengencho enene. 
Rirorio nobe gokwegokia ase Omobui oria, onyare korigereria Nyasae. 
Na ekero orabe gokomosaba, nakoigwe; naye nonyare goakana chiira chiao chi’ogotiana. 
Erio ekero orabe gokoroberia gokora gento kende gionsi, ekio nkebe bo, na oborabu mbomoreke chinchera chiao. 
Nyasae nigo agokeyia abaenenu, korende abare abaitongo obatooria. 
Ere nigo agotooria omonto ore nokomocha, omonto buna oyio nigo aratoorigwe goetera ase amaboko ao achenegete.” 
