﻿OKOIRANERERA.
33.
Oko nakwo ogosesenia Musa, omonto o Nyasae, asesenetie Abaisraeli ekero konya atarakwa. 
Akabora: “Omonene agacha korwa Sinai, akabamorekera korwa Edomu, akabara buna risase korwa ase egetunwa gia Parani; agacha ore amo n’abachenu chilifu ikomi, ogochika kore buna chinsase chi’omorero gokabaachera korwa ase ensemo yaye y’okorio. 
Amaene, nigo anchete abanto b’ebisaku bionsi; abachenu baye bonsi nigo bare ase oborendi bw’okoboko kwaye. Barabwo nigo baikaraansete inse ase amagoro yo Omonene, borokererigwe amang’ana aye. 
Musa agatoa amachiiko, ayio are omwando bw’omosangererekano bw’ abanto ba Yakobo. 
Omonene akaba omorwoti o Yesuruni ekero abatang’ani b’ abanto basangererekanete amo n’abanto b’ebisaku bi’Abaisraeli.” 
Musa agakwana: “Tiga Abareubeni bagenderere koba moyo, tibaabaisa gokwa, nonya abanto abwo bare abake.” 
Agakwana igoro y’Abayuda: “Aye Omonene, igwa okorera kw’Abayuda, obairanie naende babe amo n’abanto bamwabo. Berwanerere boka n’amaboko abo, obakonye ekero ababisa baabo bakobarwania.” 
Agakwana igoro y’Abalawi: “Omonene, obamaanorere babe nobomanyi goetera ase Tumimu na Urimu, ekiagera barabwo nabeegenwa bao bare. Aye’ nkwabateemete aria Masa. ’Nkwaamereranetie nabarabwo ase amaache a Meriba. 
Barabwo nigo bakwanete igoro y’abaise na abaang’ina, ng’a tibaabarooche, bagatigana n’abaamwabo, gose tibaabarete abana babo ng’a ’mbare nengeencho ase bare, ekiagera baigwete ring’ana ria’o, bakabwata okobwatana kw’ogotianania gwakorete na barabwo. 
Barabwo ’mborokererie Abayakobo emeroberio yao echiikire na Abaisraeli amachiiko ao, ’mbarente ubani ase obosio bwao, naende ’mbasambere ebing’wanso bi’ogosambwa ase egesasiimero kiao. 
Omonene, obasesenie amo nebi bionsi babwate, bwanche emeremo eria bagokora, obune chibachwa chi’ababisa baabo baria bagoocha kobarwania, baria baabageechete, tibaabaisa goocha kobarwania naende.” 
Agakwana igoro y’Ababenjamini: “Aba n’abanchwa ba Omonene, ’mbamenye inse y’oborendi bwaye bare n’obotoereru, Omonene nabagitere abaetanane botambe, barabwo mbamenye ase amareko aye.” 
Agakwana igoro y’Abayusufu: “Ogosesenigwa kw’Omonene kobe ase riroba riabo, abae ebiegwa ebiya bikorwa igoro, abae obotooru na ebinto ebiya bire ase riroba ime, 
abae amatunda amaya y’okwama kw’omobaso, abae okwama okonge kw’emetienyi. 
Asesenie ebigoro bia kare bitubwe n’obonge bw’okwama okuya, n’ebitunwa bireo botambe, birue okwama okonge boigo. 
Abae ebinto ebiya korwa ase riroba, na ebiichire ime yaye, amo n’ogwancherwa gokorwa ase are ere oyobweorokereretie ase egetutu keria. Ogosesenigwa okwo kobe igoro y’Abayusufu, ekiagera Yusufu nigo achooretwe akaba omogambi ase egati y’abaamwabo. 
Omotangi oye nigo are n’obonene bw’echinguru buna chieeri, ne ching’unchara chiaye nigo chire buna echi’eng’era, ase chirochio naseerie abanto goikera ase chinsinyo chionsi chi’ense. Echio nachio chilifu ikomi chi’Abaefraimu, naende echio nachio chilifu chinyinge chi’Abamanase.” 
Musa agakwana igoro y’Abasabuloni: “Inwe Abasabuloni, mogooke ekero mogosooka isiko, nainwe Abaisakaru, mogooke ase chiema chiaino ime. 
Barabwo ’mbarangerie abanto b’ebisaku bachiche ase egetunwa kiabo, aroro agwo ’nabarue ebing’wanso ebironge, ekiagera nigo bakonyora obotenenku bwabo korwa ase chinyancha ase chinibo chibisekanete ime y’omokenye.” 
Agakwana igoro y’Abagadi: “Omonene abakwe, oria okogareyia orogongo rw’Abagadi. Abagadi nigo barabe bakoramama inse buna endo, batandora okoboko amo n’ekeore ki’omotwe. 
Bageechoorera abanyene orogongo rwarenge oruya, ekiagera agwo nao egetari ki’omogaambi kiagachetwe. Bakaba amo n’abataang’ani b’ abanto, bakaba bagokora oboronge bw’Omonene na konacha ebiina bi’ekeene ase Abaisraeli.” 
Agakwana igoro y’Abadani: “Abadani nigo banga buna endo ensae egocharoka korwa Basani.” 
Agakwana igoro y’Abanafutali: “Inwe Abanafutali nigo mwanyorire ogwancherwa okonge na ogosesenigwa kw’ogoisaneka korwa ase Omonene, moire orogongo rore ase enyancha ensemo ya Irianyi,” 
Agakwana igoro y’Abaaseri: “Abaaseri basesenigwe kobua ebisaku binde. Tiga barabwo banchwe n’abaamwabo; amagoro abo atache riroba rikomera amazeituni. 
Emekorogoto y’ebiita biaino ebe ey’ebioma ne chitaai, na buna amatuko aino arabe, naboigo ne chinguru chiaino chiraabe. 
“Aye Yesuruni, onde tari ore buna Nyasae oo, oria ogoeta igoro gati ase obonene bwaye goocha kogokoonya. 
Nyasae o kare na kare nere ore obotamero bwaino; Inse aa nao amaboko aye a kare na kare are kogaamba. Naseerie ababisa baino korwa ase more, abateebie inwe: Basirie! 
Ase ayio Abaisraeli nigo baramenye batari n’obwoba, na ororeeria rorwete ase Yakobo nigo roramenye ase obotoereru, ase ense eichire endagera n’edivai ase riime rigotonya korwa igoro. 
Inwe Abaisraeli, imosesenirie! Inwe n’abanto mwatoorigwe n’Omonene. Nere enguba yaino ekobakengera; Nere omoro oino okobarentera obobui! Ababisa baino ’mbebeeke inse ase more, nainwe motaare goetera ase ebigoro biabo.” 
