﻿OMOBARO.
33.
Aya naro amarieta y’ebitwori bi’Abaisraeli, ekero baare ase orogeendo korwa ase ense ya Misiri, ase emeganda yabo inse y’oboraai bwa Musa na Aroni. 
Bun’Omonene achiigete Musa, nere akariika kera aase ase baare gotoora. Ebi nabio ebitwori biabo buna baare gotoora na koimoka kogeenda. 
Ase omotienyi bw’eritang’ani, rituko ria ikomi na gatano, rituko riarenge kobwatia eri’Epasaka, Abaisraeli bakang’anya korwa ase ense ya Misiri. Bakaimoka korwa Ramesesi, bare noboremu. Bakarua ase amasio y’Abamisiri, 
ekero barabwo barenge gotindeka abana babo abatangi, bari’Omonene aitete, naende akanachera chinyasae chiabo ekiina. 
Abaisraeli bakarua Ramesesi, bakageenda Sukoti, bagatoora aroro. 
Bakarua Sukoti, bakageenda Etamu, ase ensinyo y’erooro, bagatoora aroro. 
Bakarua Etamu, bakaonchoka bakairana bagaika Pi‐Hahiroti, moocha ya Baali‐Sefoni, bagatoora ang’e na Migidoli. 
Bakarua agwo Pi‐Hahiroti, bakageenda bagaeta egati y’Enyancha Embariri gochia erooro. Erio bakageenda orogeendo rw’amatuko atato ase erooro ya Etamu, bagatoora agwo Mara. 
Bakarua Mara, bakageenda bagaika Elimu, aase chinsoko chi’amaache ikomi na ibere chiarenge amo nemekendo emerongo etano na ebere, bagatoora aroro. 
Bakarua Elimu, bakageenda bagaika ang’e n’Enyancha Embariri, bagatoora aroro. 
Bakarua aase aria bagaika erooro ya Sini, bagatoora aroro. 
Bakarua erooro ya Sini, bakageenda bagaika Dofuka, bagatoora aroro. 
Bakarua Dofuka, bakageenda bagaika Alusi, bagatoora aroro. 
Bakarua Alusi, bakageenda bagaika Refidimu, aase abanto batanyorete amaache bakonywa, bagatoora aroro. 
Bakarua Refidimu, bakageenda bagaika erooro ya Sinai, bagatoora aroro. 
Bakarua erooro ya Sinai, bakageenda bagaika Kibiroti‐Hatawa, bagatoora aroro. 
Bakarua Kibiroti‐Hatawa, bakageenda bagaika Haseroti, bagatoora aroro. 
Bakarua Haseroti, bakageenda bagaika Ritima, bagatoora aroro. 
Bakarua Ritima, bakageenda bagaika Rimoni‐Peresi, bagatoora aroro. 
Bakarua Rimoni‐Peresi, bakageenda bagaika Libuna, bagatoora aroro. 
Bakarua Libuna, bakageenda bagaika Risa, bagatoora aroro. 
Bakarua Risa, bakageenda bagaika Kehelata, bagatoora aroro. 
Bakarua Kehelata, bakageenda bagaika egetunwa gia Seferi, bagatoora aroro. 
Bakarua egetunwa gia Seferi, bakageenda bagaika Harada, bagatoora aroro. 
Bakarua Harada, bakageenda bagaika Makeloti, bagatoora aroro. 
Bakarua Makeloti bakageenda bagaika Tahati, bagatoora aroro. 
Bakarua Tahati, bakageenda bagaika Tera, bagatoora aroro. 
Bakarua Tera, bakageenda bagaika Mitika, bagatoora aroro. 
Bakarua Mitika, bakageenda bagaika Hasimona, bagatoora aroro. 
Bakarua Hasimona, bakageenda bagaika Moseroti, bagatoora aroro. 
Bakarua Moseroti, bakageenda bagaika Bene‐Yakani, bagatoora aroro. 
Bakarua Bene‐Yakani, bakageenda bagaika Hori‐Hagidigadi, bagatoora aroro. 
Bakarua Hori‐Hagidigadi, bakageenda bagaika Yotibata, bagatoora aroro. 
Bakarua Yotibata, bakageenda bagaika Aburona, bagatoora aroro. 
Bakarua Aburona, bakageenda bagaika Esioni‐Geberi, bagatoora aroro. 
Bakarua Esioni‐Geberi, bakageenda bagaika erooro ya Sini (nao Kadeshi), bagatoora aroro. 
Bakarua Kadeshi, bakageenda bagaika egetunwa kia Hori, ang’e norobebe rw’ense ya Edomu, bagatoora aroro. 
Ase rituko rie ritang’ani ri’omotienyi o gatano, omwaka bw’emerongo ene magega Abaisraeli kobarure ense ya Misiri, Aroni Omokuani agatiira gochia igoro ase egetunwa kia Hori, buna Omonene konya amochiikire, agakwera aroro. 
Aroni konya okoorire emiaka rigana erimo, na merongo ebere, na etato (123), ekero akwerete agwo ase egetunwa keria kia Hori. 
Na omorwoti orenge kogamba Aradi, ensemo ya Irianyi ase ense ya Kaanani, akaigwa ng’a Abaisraeli nigo bare inchera gocha. 
Abaisraeli bakarua egetunwa keria kia Hori, bakageenda bagaika Salimona bagatoora aroro. 
Bakarua Salimona, bakageenda bagaika Punoni, bagatoora aroro. 
Bakarua Punoni, bakageenda bagaika Oboti, bagatoora aroro. 
Bakarua Oboti, bakageenda bagaika Iye‐Abarimu, bagatoora aroro ase orobebe rwa Moabu. 
Bakarua agwo Iyumu, bakageenda bagaika Diboni‐Gadi, bagatoora aroro. 
Bakarua Diboni‐Gadi, bakageenda bagaika Alimoni‐Dibulataimu, bagatoora aroro. 
Bakarua Alimoni‐Dibulataimu, bagaika ebitunwa bi’Abarimu kororia Nebo bagatoora aroro. 
Bakarua ebitunwa bi’Abarimu, bakageenda bagaika ase enyancha enyomo ya Moabu, ang’e na Yorodani, kororia Yeriko, bagatoora aroro. 
Bagatoora ang’e na Yorodani, na egetwori kiabo kegachaakera Beti‐Yesimoti, kegaikeera Abeli‐Sitimu, ase enyancha enyomo ya Moabu. 
Agwo ase ebirubo ebiomo bia Moabu mbarabare y’oro rwa Yorodani, kororia Yeriko, Omonene agakwana na Musa, akamoteebia, 
“Kwana n’Abaisraeli, obateebie: Ekero moraabe mwambokire Yorodani na mwaikire ase ense ya Kaanani, 
moseerie abanto ababiare bonsi b’ense eria barue ase amasio aino. Naende mosarie emegwekano yabo eyio bagosasiima eroisirie korwa ase ebioma binyititoire na kobombwa, motagore aase aimokererete igoro ase bagosasiimera. 
Moire ense yabo ebe eyaino momenyeo, ekiagera nabayeere. 
Mwatanane ense eria ase kera egesaku ase ogoaka obomera. Moe abanto b’egesaku ekenene orogongo oronene robe omwando obo, na abanto b’egesaku egeke orogongo oroke robe orwabo. Obomera koboragwere omonto, omwando oria nobe oyo bw’omonto oyio. Kera egesaku keegwe omwando buna obomera borakegwere. Inamoegwe emiando koreng’ana nebisaku bie chisokoro chiaino. 
Korende onye timogoseria ababiare b’ense eria barue ase more, rirorio baria moratige bamenye amo nainwe ’nababe buna chimbambo chinyoge chikobabeta amaiso aino, na buna amagwa akobabeta ase amakere aino; barabwo nababachaande ase ense eyio mogochia komenya. 
Motabasereti, rirorio nimbakore inwe buna konya narengereirie kobakorera barabwo.” 
