﻿Egetabu Kw’omobaro.
1.
Ase rituko rie ritang’ani ri’omotienyi o kabere bw’omwaka o kabere magega Abaisraeli kobarure ase ense ya Misiri, Omonene agakwana na Musa ime y’Eema y’Omosangererekano, agwo ase erooro ya Sinai, okomoteebia, 
“Kora omobaro bw’omoganda bwonsi bw’Abaisraeli, eamate ase eamate, na enyomba ase enyomba. Oriike amarieta y’ abanto abasacha bonsi, oyomo ase oyomo. 
Aye amo na Aroni mobare abanto abakoorire emiaka emerongo ebere na goetania, baria baranyare korwana esegi, mobaroberie ase esegi, ekeombe ase ekeombe. 
Naende mochore korwa ase kera egesaku omonto oyomo ore omoteneneri obo. Barabwo babe amo nainwe ase okobakonya. 
Amarieta y’ abanto abwo naro aya: Korwa ase egesaku kia Rubeni, Elisuri, mosinto o Sedeuri. 
Korwa ase egesaku gia Simioni, Selumieli, mosinto o Surisadai. 
Korwa ase egesaku kia Yuda, Nahasoni, mosinto bw’Aminadabu. 
Korwa ase egesaku gia Isakaru, Netaneli, mosinto o Suari. 
Korwa ase egesaku gia Sabuloni, Eliabu, mosinto o Heloni. 
Korwa ase basinto ba Yusufu: ase egesaku gi’Efraimu, Elisama, mosinto bw’Amihudi, na ase egesaku kia Manase, Gamalieli, mosinto o Pedasuri. 
Korwa ase egesaku kia Benjamini, Abidani, mosinto o Gidioni. 
Korwa ase egesaku gia Dani, Ahieseri, mosinto bw’Amisadai. 
Korwa ase egesaku gi’Aseri, Pagieli, mosinto bw’Okirani. 
Korwa ase egesaku kia Gadi, Eliasafu, mosinto o Deueli. 
Korwa ase egesaku kia Nafutali, Ahira, mosinto o Enani.” 
Abaaanto aba nabwo barenge abateneneri ase ebisaku ebio biabo, naende abatang’ani be chiamate chi’Abaisraeli, bachoretwe korwa ase omoganda bwonsi. 
Musa na Aroni bakaira abanto abwo baatoretwe ase amarieta abo, 
na ase rituko rie ritang’ani ri’omotienyi o kabere bagasangereria omoganda bwonsi bw’ abanto amo. Bakariika amarieta y’ abanto abwo konya bakoorire emiaka emerongo ebere na goetania, eamate ase eamate, na enyomba ase enyomba, na omonto ase omonto. 
Musa akabara abanto abwo na kobarika, agwo ase erooro ya Sinai, buna Omonene konya amochiikire. 
Abanto b’ororeria rwa Rubeni, omotangi o Israeli, bakariikwa, omonto ase omonto, ase chiamate chiabo ne chinyomba chiabo. Abaaanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo ene na isano nemo, n’amagana atano (46,500). 
Abanto b’ororeria rwa Simioni bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etano na kianda, n’amagana atato (59,300). 
Abanto b’ororeria rwa Gadi bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo ene naisano, n’amagana atano nomo, namerongo etano (45,650). 
Abanto b’ororeria rwa Yuda bakariikwa, omonto ase omonto, ase chiamate chiabo ne chinyomba chiabo Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etano nebere na inye, n’amagana atano nomo (74,600). 
Abanto b’ororeria rwa Isakaru bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etano nainye, n’amagana ane (54,400). 
Abanto b’ororeria rwa Sabuloni bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etano na isano ibere, n’amagana ane (57,400). 
Abanto b’ororeria rwa Yusufu, narwo orw’Efraimu, bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo ene, n’amagana atano (40,500). 
Abanto b’ororeria rwa Manase bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etato naibere, n’amagana abere (32,200). 
Abanto b’ororeria rwa Benjamini bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etato naisano, n’amagana ane (35,400). 
Abanto b’ororeria rwa Dani bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etano nomo naibere, n’amagana atano n’abere (62,700). 
Abanto b’ororeria rw’Aseri bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo ene nomo, n’amagana atano (41,500). 
Abanto b’ororeria rwa Nafutali bakariikwa, omonto ase omonto, ase chiamate chiabo ne chinyomba chiabo. Abanto bonsi abasacha, aba konya bakoorire emiaka emerongo ebere na goetania, abwo baare konyara korwana esegi, 
nigo barenge chilifu emerongo etano naisato, n’amagana ane (53,400). 
Aba nabwo barigetwe na Musa, na Aroni, na abatang’ani b’Abaisraeli ikomi na babere, abatenenerete kera oyomo egesaku kiaye. 
Abaisraeli bonsi abarigetwe, enyomba ase enyomba, baria konya bakoorire emiaka emerongo ebere na goetania, naende baare konyara korwana esegi, 
nigo barenge chilifu amagana atano nomo na isato, n’amagana atano, namerongo etano (603,550). 
Korende abanto b’ororeria rwa Lawi, barabwo tibaabaretwe amo n’abanto abwo bande, 
ekiagera Omonene nigo atebeetie Musa, 
“Abanto b’egesaku kia Lawi tobaabara amo n’Abaisraeli bande. 
Obeeke Abalawi babe bakorenda Obomenyo Obochenu obwo bore noborori, naende babe bakorenda ebinto bire ase Obomenyo boria ime, na ebikorero biaye. ’Nababe bakobobogoria amo n’ebinto biaye bionsi, na gokora emeremo imeo. Barabwo nigo baratenenie chiema chiabo chi’okomenya chietanane Obomenyo obwo. 
Ekero Obomenyo obwo boraabe bokong’anyigwa, Abalawi nabwo barabosimore, na ekero boraabe bogotenenigwa naende, nabwo barabotenenie aase agwo. Omonto onde bwensi otachikiri aise goika ang’e n’Obomenyo obwo goika aitwe akwe. 
Abaisraeli bande nabatenenie chiema chiabo, kera egesaku ase egetwori kiaye, na kera omonto abeere inse y’ebendera yaye, ase ekeombe kiaye. 
Korende Abalawi nigo baratenenie chiema chiabo chietanane Obomenyo obwo bore noborori, na komenyao, erinde endamwamu yane etangwe tebaisa kogwera omoganda bwonsi bw’Abaisraeli. Abalawi barende Obomenyo obwo bore noborori.” 
Abaisraeli bagakora onsi buna Omonene abachiigete goetera ase Musa. 
