﻿ದರ್ಶಾನ್.
7.
ಹ್ಯ ಜಾ಼ಲ್ಯಾ ನಂತರ್ ಚಾರ್ಜಾ಼ನ್ ದೇವ್ ಧುತ್ ದರ್ಥಿಚಾ ಚಾರ್ ಕೊನ್ಯಾವ್ನಿ ಉಬರಾಯಲ್ಯಾಲ ಮೀ ಬಗ್ಲ ವಾರ ದರ್ಥಿವ ವ್ಹವುನಿ ಸಮಿಂದೊರಾವ ವ್ಹವುನಿ ಜಾ಼ಡ್ಹಾನಾ ಉಡವು ನಾಹಿ ಆಸ ತ್ಯ ದರ್ಥಿವ್ಲ ಚಾರಿಕ್ಲ ವಾರ ಥಾಂಬಿವ್ಲಹುತ್ತ. 
ಮಂಗ್ ದುಸ್ರಾಯೊಕ್ ದೇವ್ದುತ್ ಪುರ್ಬಾಕ್ನಿ ಯತ್ಯಾಲಾ ಮೀ ಬಗ್ಲಾ. ಜೀವ್ ಆಸ್‌ಲ್ಯಾಲ್ಯಾ ದೇವಾಚಾ಼ ಸಿಕ್ಕಾ ಹ್ಯಾ ದೇವ್ದುತಾಪ ಹುತ್ತಾ. ಹ್ಯೊ ದೇವ್ದುತ್ ಚಾರ್ಜಾ಼ನ್ ದೇವ್ ದುತಾನಾ ಜೋ಼ರಾನಿ ಹಾಕಟೊ. ದರ್ಥಿಲಾ ಆನಿ ಸಮಿಂದೊರಾಲಾ ತರಾಸ್ ದಿಯಾ ಹುಕುಮ್ ದೇವಾನಿ ಹ್ಯಾ ಚಾರ್ ದೇವ್ದುತಾನಾ ದಿಲಾ. 
“ಆಮ್ಚಾ ದೇವಾಚಿ ಸೇವಾ ಕರ್ತ್ಯಾಲ್ಯಾ ಲೋಕಾಂಚಾ ಕಪಾಳಾವ ಸಿಕ್ಕಾ ಮಾರೀ ಪರತ್ ದರಥಿಲಾ ವ್ಹವುನಿ ಸಮಿಂದೊರಾಲಾ ವ್ಹವುನಿ ಜಾ಼ಡ್ಹಾನಾ ವ್ಹವುನಿ ತರಾಸ್ ದಿವುನಕೊಸಾ ಮನ್ಹುನ್ ಸಾಂಗ್ಲ. 
ನಂತರ್, ಸಿಕ್ಕಾ ಮಾರುನ್ ಗೆತಲ್ಯಾಲ್ಯಾಂಚಿ ಗತಿ ಮನಾ ಐಕು ಆಲಿ ತ್ಯಂಚಿ ಸಗ್ಳಿ ಏಕ್ ಲಾಕ್ ಚಾಳ್ಸಾವ ಚಾರ್ ಹಾಜಾ಼ರ್ ಜ಼ನ ತೀ ಇಸ್ರಾಲಾಂಚಾ ಬಾರಾ ವಂಶಾನಾ ಮಿಳುನ್ ಹುತ್ತಿತ. 
ಯುದಾಚಾ ವಂಶಾತ್ನಿ ಬಾರಾ ಹಾಜಾ಼ರ್ ರೂಬೇನಾಚಾ ವಂಶಾತ್ನಿ ಬಾರಾ ಹಾಜಾ಼ರ್ ಗಾದಾಚಾ ವಂಶಾತ್ನಿ ಬಾರಾ ಹಾಜಾ಼ರ್ 
ಆಶೇರಾಚಾ ವಂಶಾತ್ನಿ ಬಾರಾ ಹಾಜಾ಼ರ್ ನಫ್ತಾಲಿಚಾ ವಂಶಾತ್ನಿ ಬಾರಾ ಹಾಜಾ಼ರ್ ಮನಸ್ಸೆಚಾ ವಂಶಾತ್ನಿ ಬಾರಾ ಹಾಜಾ಼ರ್ 
ಸಿಮೆಯೋನಾಚಾ ವಂಶಾತ್ನಿ ಬಾರಾ ಹಾಜಾ಼ರ್ ಲೇವಿಚಾ ವಂಶಾತ್ನಿ ಬಾರಾ ಹಾಜಾ಼ರ್ ಇಸ್ಸಾಕಾಚಾ ವಂಶಾತ್ನಿ ಬಾರಾ ಹಾಜಾ಼ರ್ 
ಜೆಬುಲೊನಾಚಾ ವಂಶಾತ್ನಿ ಬಾರಾ ಹಾಜಾ಼ರ್ ಯೊಸೆಪಾಚಾ ವಂಶಾತ್ನಿ ಬಾರಾ ಹಾಜಾ಼ರ್ ಬೆನ್ಯಾಮಿನಾಚಾ ವಂಶಾತ್ನಿ ಬಾರಾ ಹಾಜಾ಼ರ್ 
ಮಂಗ್ ಮೀ ಬಗ್ಲ ತವಾ ಲೊಕಾಂಚಾ಼ ಮೋಟಾ ಹಿಂಡ್ ದಿಸ್ಲಾ. ತೀ ಮೆಜಾ಼ವ್ಹಯಿತ್ನಾಹಿ ಇತ್ಕಿ ಹುತ್ತಿತ. ತ್ಯಾತ್ಲಿ ಸಗ್ಳಿ ಲೊಕ, ದೆಶಾ, ಕುಳ, ಸಗ್ಳಿ ಬಾಶಾ ಬೊಲ್‍ತ್ಯಾಲಿ ಹುತ್ತಿತ ಹೀ ಲೊಕ ಸಿಂಹಾಸನಾಚೆ ಮೊರ‍್ಹ ಆನಿ ಮೆಂಡರಾಚೆ ಮೊರ‍್ಹ ಉಬಿ ಹುತ್ತಿತ. ತೀ ಸಗ್ಳಿ ಪಾಂಡ್ರಾ ಜ಼ಘಾ ಗಾಲ್ಹುನ್ ಖರ್ಜುರಾಚಿ ಪಾನ ಆಪ್‌ಲ್ಯಾ ಹಾತಾತ್ನಿ ದರ್ಲಿ ಹುತ್ತಿತ. 
ತೀ ಜೊ಼ರಾನಿ ಸಿಂಹಾಸನಾವ ಬಸ್‌ಲ್ಯಾಲ್ಯಾ ದೆವಾಪ್ನಿ ಆನಿ ಮಿಂಡುರ್ ಜಾ಼ಲ್ಯಾಲ್ಯಾಪ್ನಿ ಸುಟ್ನುಕ್ ಯತಿ ಮನ್ಹುನ್ ವರಾಡ್ಲಿತ. 
ಜಾಂತ ತಿಥ ಹುತ್ತ. ಆನಿ ಚಾರ್ ಜೀವ್ ತಿಥ ಹುತ್ತ. ತ್ಯಂಚೆ ಸರ್ಬವ್ಹಾರ ಆನಿ ಸಿಂಹಾಸನಾಚೆ ಸರ್ಬವ್ಹಾರ ದೇವ್ದುತ್ಸಗ್ಳ ಉಬ ಹುತ್ತ. ದೇವ್ದುತಾಂಚಾನಿ ಸಿಂಹಾಸನಾಂಚೆ ಮೊರ‍್ಹ ನಡ್ಗ ಟಿಕ್ವುನ್ ದೇವಾಲಾ ವವ್ಯಾಳಾ. 
ತೇ, ತಸಸ್ ವ್ಹವುನಿ! ಆಮ್ಚಾ ದೇವಾಲಾ ಸ್ತೊತ್ರ ಮರ‍್ಯಾದ್ ಗಿನ್ಯಾನ್ ದನ್ಯವಾದ್ ಸ್ತುತಿ ಆದಿಕಾರ್ ಆನಿ ಬಳ್ ಖಾಯಿಮ್ ರಾಹುನಿ ಆಮೆನ್! ಮನ್ಲ. 
ತವಾ ಜಾಂತ್ಯಾತಲ್ಯಾ ಯಕಾನಿ ಪಾಂಡ್ರ ಜ಼ಘ ಗಾಲ್ಹುನ್ ಉಬಿರಾಯ್‌ಲ್ಯಾಲಿ ಹೀ ಲೊಕ ಕೊನ್? ತೀ ಕುಠ್ನಿ ಆಲ್ಯಾಲಿ ಮನ್ಹುನ್ ಮನಾ ಇಚಾರ್ಲ 
ತವಾ ಪ್ರಭು ತೀ ಕೊನ್ತಿ ತುಲಾ ಠಾವಿ ಹಾತ” ಮನ್ಹುನ್ ಉತ್ತರ್ ದಿಲಾ. ತವಾ ಹಿ ಮೊಟಾ ತರಾಸ್ ಖಾವುನ್ ಆಲ್ಯಾಲಿ. ತ್ಯಂಚಾನಿ ಮಿಂಡುರ್ ಜಾ಼ಲ್ಯಾಲ್ಯಾಚಾ ರಕ್ತಾನಿ ಆಪ್ಲ ಜ಼ಘ ದುತ್ಯಾಲ್ಯಾತ ಆತಾ ತೀ ಚಾ಼ಂಗ್ಲಿ ಜಾ಼ಲ್ಯಾತ. 
ಮನ್ಹುನ್ ಹೀ ಲೊಕ ಆತ್ತಾ ದೇವಾಚಾ ಸಿಂಹಾಸನಾಚೆ ಮೊರ‍್ಹ ಹಾತ್ತ. ತೀ ದೇವಾಲಾ ತ್ಯಚಾ ದೇವ್ಳಾತ್ ರ‍್ಯಾತ್ ದೀಸ್ ವವ್ಯಾಳ್‌ತ್ಯಾತ ಸಿಂಹಾಸನಾವ ಬಸ್‌ಲ್ಯಾಲಾ ತ್ಯನಾ ರ‍್ಯಾಕ್ತೊ. 
ತ್ಯಾ ಲೊಕಾನಾ ಆನಿಕ್ ಭುಕ್, ತಾನ್, ದೀಸಾಚ಼ ಉನ್, ಲಾಗ್ನಾರ್ನಾಹಿ. ತ್ಯನಾ ಕಸ್ಲಸ್ ಉನ್ ಬಾಜಿತ್ ನಾಹಿ. 
ಸಿಂಹಾಸನಾಚೆ ಮದ್ದಿ ಆಸ್‌ಲ್ಯಾಲ ಮೆಂಡಾರ್ ಜಾ಼ಲ್ಯಾಲಾ ತ್ಯೊ ತ್ಯಂಚಾ಼ ಕುರುಬುರ್ ಜಾ಼ಲ್ಯಾ. ತ್ಯೊ ತ್ಯನಾ ಜೀವ್ ದೇತ್ಯಾಲ್ಯಾ ಪಾನ್ಯಾಚಾ ಜ಼ರ‍್ಯಾಂಚಿಪ ಹಾಕ್ಟುನ್ ನೆಥೊ. ತ್ಯಂಚಾ ಡೊಳ್ಯಾಂಚಿ ಟಿಪ್ಪ ದೇವ್ ಪುಸ್ತೊ ಮನ್ಹುನ್ ಸಾಂಗ್ಲ. 
