﻿ಇಬ್ರಿಯಾತ್‌ಲ್ಯಾನಾ ಲಿವ್‌ಲ್ಯಾಲ ಪತ್ರ.
1.
ಮಾಗ್‌ಲ್ಯಾ ಕಾಲಾತ್ ದೇವ್ ಖುಬ್ ಖೆಪಾ ಖುಬ್ ತರನಿ ಪ್ರವಾದಿಂಚಿಪ್ನಿ ಆಮ್ಚಾ ವಡ್ಲಾಚೆ ಸಂಗ ಬೊಲ್ಯಾ. 
ಫನ್, ಹ್ಯಾ ಸರ್ತ್ಯಾ ದಿಸಾತ್ ಆಮ್ಚಿ ಸಂಗ ಆಪ್‌ಲ್ಯಾ ಲೇಕಾಚಾ ತೊಂಡಾನಿ ಬೊಲ್ಯಾ. ತ್ಯಲಾ ಸಗ್‍ಳ್ಯಾಚಾ಼ ದನ್ಹಿ ಮನ್ಹುನ್ ಥರಿವ್‍ಲ್ಯಾ ಆನಿ ತ್ಯಚಿಪ್ನಿಸ್ ಸಗ್ಳಿ ದುನ್ಯಾ ಉತ್ಪನ್ ಕೆಲೆ, ತ್ಯಚಿವ ಸಗ್‌ಳ್ಯಾವ ಹುಕುಮ್ ಚಾ಼ಲ್ವಾಯಾ ಸಾಟಿ ತ್ಯಲಾ ನಿವಡ್ಲಾ. 
ದೇವಾಚಿ ಮೈಮಾ ತ್ಯಚಿಪ ಚ಼ಮಾಕ್ಲಿ. ತ್ಯೊ ದೇವಾಚಾ಼ ಪ್ರತಿರುಪ್ ಜಾ಼ಲ್ಯಾ. ತ್ಯೊ ಆಪ್ಲೆ ತಾಕ್ತಿಚೆ ಆಜ್ಞೆನಿ ದುನ್ಯಾ ಸಗ್ಳಿ ಚಾ಼ಲಿವ್ತೊ. ತ್ಯೊ ಲೊಕಾನಾ ತ್ಯಂಚಾ ಪಾಪಾತ್ನಿ ಶುದ್ದ ಕರುನ್ ನಂತರ ಸ್ವರ್ಗಾತ್ ಮೊಟ್ಯಾ ದೇವಾಚೆ ಉಜ಼ವ್ಯಾಂಗ್ನಿ ಬಸ್ಲಾ. 
ದೇವಾನಿ ತ್ಯಲಾ ದೇವ್‌ ದುತಾಂಚಿವ್ನಿ ಕ್ಯವ್ಡ ಮೊಟ ನಾವ್ದಿಲ. ತ್ಯೊ ದೇವ್‍ ದುತಾಂಚಿವ್ನಿ ಕ್ಯವ್ಡಾ ಮೊಟಾ ಜಾ಼ಲ್ಯಾ. 
ಕಾ ಮಂಜೆ ದೇವಾನಿ ಕುಟಲ್ಯಾಸ್ ದುತಾನಾ ಹ್ಯಾ ಗುಶ್ಟಿ ಕವಾಸ್ ಸಾಂಗ್‍ಲ್ಯಾ ನಾಹಿತಾ: “ತು ಮಾಜಾ಼ ಲ್ಯೊಕ್; ಮಿ ತುಜಾ಼ ಬಾ ಜಾ಼ಲ್ಯೊ. ” ದೇವಾನಿ ಯಕಾ ದುತಾಲಾಬಿ ಕಂದಿಸ್ ಆಸ ಸಾಂಗ್ಲ ನಾಹಿ: “ಮಿ ತ್ಯಚಾ ಬಾ ರಾಹನಾರ್, ತ್ಯೊ ಮಾಜಾ಼ ಲ್ಯೊಕ್ ವ್ಹನಾರ್. ” 
ಫನ್ ದೇವಾನಿ ಆಂದಿ ಜ಼ಲಾಮ್‌ಲ್ಯಾಲ್ಯಾ ಆಪ್‍ಲ್ಯಾ ಲೇಕಾಲಾ ಹೆ ದುನೆತ್ ಆನಿಕ್ ಆನತಾನಾ, “ಸ್ವರ್ಗಾತ್ಲ ಸಗ್ಳ ದೇವ್‌ ದುತ್ ತ್ಯಲಾ ವವ್ಯಾಳುಂತ. ” 
ಫನ್ ದೇವಾನಿ ಆಪ್‌ಲ್ಯಾ ದುತಾನಾ ವಾರ. “ಆನಿ ಆಪ್‌ಲ್ಯಾ ಸೇವಕಾನಾ ಇಸತ್ಯಾಚೆ ಜು಼ತಿಚೆಗತ್ ಕರ್ನಾರ್ ಮನ್ಹುನ್ ಸಾಂಗಲ್ಯಾ. ” 
ಫನ್ ದೇವಾನಿ ಆಪ್‍ಲ್ಯಾ ಲೆಕಾಚೆ ಗುಶ್ಟಿತ್ ಆಸ ಸಾಂಗ್‍ಲ್ಯಾ, “ದೇವಾ, ತುಜ಼ ಸಿಂಹಾಸನ ಕವಾಬಿ ರಾನಾರ್. ತು ತುಜಾ ಲೊಕಾಂಚಿವ ನ್ಯಾಯಿಚಾ಼ ರಾಜ್ಬಾರ್ ಕರ್ನಾರ್. 
ತು ಚಾ಼ಂಗಲ್ಯಾಚಿ ಮಾಯಾ ಕರ್ನಾರ್, ಬುರ್ಶಾಂಚಿ ನಕ್ವಾಟ್ ಕರ್ನಾರ್. ಮನ್ಹುನ್ ದೇವ್, ವ್ಹಯ್, ತುಜಾ಼ ದೇವುಸ್ ತುಲಾ ನಿವ್ಡುನ್ ತುಜೆ ಸಂಗಚಾಂಚಿವ್ನಿ ಖುಬ್ ಆನಂದ್ ಆನಿ ಮರ‍್ಯಾದ್ ದಿಲೆ,” 
ಯವ್ಡಸ್‌ನವ್ಹ ದೇವ್‌ ಆಸ ಮಂತ್ಯೊ: “ಪ್ರಭು, ಪೈಲ್ಯಾನಿ ತು ಹಿ ದುನ್ಯಾ ಉತ್ಪನ್ ಕಿಲಿಸ್. ಆಬಾಳ್ ತುಜಾ ಹಾತ್ಸ ಕಾಮ್ ಜಾ಼ಲ್ಯಾ. 
ಹ್ಯ ಸಗ್ಳ ನಾಹಿ ವ್ಹನಾರ್, ಫನ್ ತು ಕವಾಬಿ ಶಾಶ್ವತ್ ರಾನ್ಹಾರ್. ಸಗ್ಳಿ ಸಾಮ್ನ ದಡೊಂತಾಚೆಗತ್ ಜು಼ನಿ ವ್ಹನಾರ್. 
ತು ತ್ಯ ಸಗ್ಳ ಜ಼ಘ್ಯಾಚೆಗತ್ ಘಡಿಕರುನ್ ಥೆವ್ನಾರ್. ತೀ ದಡೊತಾಚೆಗತ್ ಬದಾಲ್‍ತ್ಯಾತ. ಫನ್ ತು ಕಂದಿಸ್ ಬದಾಲ್ನಾರ್ ನಾಹಿ. ತುಜಾ ಜೀವಾಲಾ ಸರ್ತ ಮನ್ಹಾಚ಼ ನಾಹಿ. ” 
ದೇವಾನಿ ಕುಟಲ್ಯಾಸ್ ದುತಾಲಾ ಹ್ಯ ಸಗ್ಳ ಸಾಂಗ್ಲನಾಹಿ: “ಮಿ ತುಜಾ ವಾದಿನಾ ತುಜಾ ಪಾಯಾತ್ಲ ಬಿಸ್ನ ಕರೀ ಪರತ್, ತು ಮಾಜೆ ಉಜ಼ವ್ಯಾಂಗ್ನಿ ಬಸ್. ” 
ದೇವ್‌ದುತ್‌ ಸಗ್ಳ ದೇವಾಚಿ ಸೇವಾ ಕರ್ನಾರಿ ಆತ್ಮ ಜಾ಼ಲ್ಯಾತ ಆನಿ ರಕ್ಷನ್ ಗೆನಾರ‍್ಯಾ ಲೊಕಾಂಚೆ ಮಜ಼ತಿ ಸಾಟಿ ಲಾವುನ್ ದಿಲ್ಯಾಲ ಜಾ಼ಲ್ಯಾತ. 
