﻿ಪೌಲಾನಿ ಗಲಾತ್ಯಾತಲ್ಯಾನಾ ಲಿವ್‌ಲ್ಯಾಲ ಪತ್ರ.
1.
ಮಾನ್ಸಾಪ್ನಿ ವ್ಹವುನಿ ಮಾನ್ಸಾಚಾ ಅಧಿಕಾರಾನಿ ವ್ಹವುನಿ ಅಪೊಸ್ತಲ್ ವ್ಹಯಾಚೆ ಆಂದಿ ಯೇಸು ಕ್ರಿಸ್ತಾಸ್ ಲಾಗುನ್ ಆನಿ ತ್ಯಲಾ ಮೇಲ್ಯಾಲ್ಯಾತ್ನಿ ಉಠಿವಲ್ಯಾಲ್ಯಾ ಬಾ ಜಾ಼ಲ್ಯಾಲ್ಯಾ ದೇವಾಪ್ನಿಬಿ ಥರಿವ್‌ಲ್ಯಾಲಾ ಅಪೊಸ್ತಲ್ ಪೌಲ್ ಮಂಥ್ಯಾಲಾ ಮಿ 
ಆನಿ ಮಾಜೆ ಸಂಗ ಆಸ್‌ಲ್ಯಾಲಿ ಭನ್ಹಿ ಬಾಹು ಸಗ್ಳ ಗಲಾತ್ಯಾತ್ ಆಸ್‌ಲ್ಯಾಲೆ ಸೆಭೆಲಾ ಲಿವಾಚ಼ ಕ್ಯಾ ಮಂಜೆ: 
ಬಾ ಜಾ಼ಲ್ಯಾಲ್ಯಾ ದೇವಾಪ್ನಿ ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಪ್ನಿ ತುಮಾನಾ ಕ್ರಪಾ ಶಾಂತಿ ವ್ಹವುನಿ. 
ತ್ಯನಿ ಆಮಾನಾ ಆತಾಚಾ ಬುರ್ಶಾ ಕಾಲಾತ್ನಿ ಸೊಡ್ವಾಯಾ ವ್ಹಯಿ ಮನ್ಹುನ್ ಬಾ ಜಾ಼ಲ್ಯಾಲ್ಯಾ ದೇವಾಚಾ ಮನಾಚೆಗತ್, ಆಮ್ಚಾ ಪಾಪಾಸ್ ಲಾಗುನ್ ಆಪ್‌ಲ್ಯಾಲಾ ಮರ್ನಾಚಾ ತಾಬ್ಯಾತ್ ದಿಲಾ. 
ದೇವಾಲಾ ಖಾಯಿಮ್ ಮೈಮೆ ವ್ಹವುನಿ. ತಸಸ್ ವ್ಹವುನಿ. 
ಕ್ರಿಸ್ತಾಚೆ ಕ್ರಪೆನಿ ತುಮಾನಾ ಹಾಕಟ್‌ಲ್ಯಾಲ್ಯಾಲಾ ಸುಡುನ್, ಯವ್ಡೆ ಬಿಗಿ ದುಸ್ರೆ ಖಬರಿಕ್ಡ ತುಮಿ ಪರಾತ್‌ಲ್ಯಾಸಾ ಮನ್ಹುನ್ ಮನಾ ಆಜಾಬ್ ವಾಟ್ಯಾ. 
ಖರ‍್ಯಾನಿಸ್ ದುಸ್ರಿ ಖಬರ್ ನಾಹಿ, ಫನ್ ಥುಡಿ ಜ಼ನ ತುಮ್ಚಿಪ ಬೇದ್ಬಾವ್ ಗಾಲ್ಹುನ್ ಕ್ರಿಸ್ತಾಚಿ ಖಬರ್ ಬದ್ಲಾಯಾ ಯತ್ನ ಕರ್ತ್ಯಾತ. 
ಫನ್ ಆಮಿ ತುಮಾನಾ ಸಾಂಗ್‌ಲ್ಯಾಲೆ ಖಬರಿಲಾ ಆಡ್ವಾ ಜಾ಼ಲ್ಯಾಲ, ಆಮಿಸ್ ವ್ಹವುನಿ ನಾಹಿತ ಸ್ವರ್ಗಾತ್ನಿ ಆಲ್ಯಾಲಾ ದೇವ್ ದುತ್ ವ್ಹವುನಿ, ತುಮಾನಾ ಸಾಂಗ್ಲತ ತ್ಯಲಾ ಸರಾಪ್ ಲಾಗುನಿ 
ಆಮಿ ಆಂದಿ ಸಾಂಗ್‌ಲ್ಯಾಚೆಗತುಸ್ ಆತಾಬಿ ಮೀ ಪರ್ತುನ್ ಸಾಂಗ್ತೊ. ತುಮಿ ಗೆತಲ್ಯಾಲೆ ಖಬ್ರಿಲಾ ಆಡ್ವ ಆಸ್‌ಲ್ಯಾಲ ಕೊನ್ತರಿ ತುಮಾನಾ ಸಾಂಗ್ಲತ ತ್ಯಲಾ ಸರಾಪ್ ಲಾಗುನಿ. 
ಆತಾ ಮೀ ಕುನಾಲಾ ಮಿಳ್ವುನ್ ಗೆತೊ? ಮಾನ್ಸಾನಾ ಕ್ಯಾ ದೇವಾಲಾ? ಮೀ ಮಾನ್ಸಾನಾ ಆವ್ಡಾಯಾಸಾಟಿ ಯತ್ನ ಕರ್ತ್ಯೊ ಕ್ಯಾ? ಆಜು಼ನ್ ಮಾನ್ಸಾನಾ ಆಡ್ವಾಯಾ ಕೆಲ ಆಸ್ಥತ ಮಿ ಕ್ರಿಸ್ತಾಚಾ಼ ಸೇವಕ್ ವ್ಹವುನ್ ರಾಹಿತ್ ನವ್ಥೊ. 
ಬನ್ಹಿ ಬಾವ್ಹಾನು, ಮೀ ಸಾಂಗ್‌ಲ್ಯಾಲಿ ಖಬರ್ ತರಿ ನಿಸ್ಥಿ ಮಾನ್ಸಾಪ್ನಿ ಆಲ್ಯಾಲಿ ನವ್ಹ ಮನ್ಹುನ್ ತುಮಿ ಸಮಜು಼ನ್ ಗಿಹ್ಯಾ ವ್ಹಯಿಸಾ ಮನ್ಹುನ್ ಮಂತೊ. 
ಮೀ ತ್ಯ ಮಾನ್ಸಾಪ್ನಿ ಗೆತ್ಲ ನಾಹಿ, ಮನಾ ಕುನಿ ಸಾಂಗ್ಲ ನಾಹಿ, ಫನ್ ಯೇಸು ಕ್ರಿಸ್ತಾಪ್ನಿಸ್ ತ್ಯ ಮನಾ ಸಮಾಜ಼್ಲ 
ಆಂದಿ ಮಿ ಯೆಹುದಿಂಚೆ ಸಿಕ್ಷೆತ್ ಆಸ್ಥಾನಾ ಮಾಜ಼ ಚಾ಼ಲ್ನ ಕಸ್ಲ ಮನ್ಹುನ್ ತುಮಿ ಐಕ್ಲಸಾ. ಆಮಿ ದೇವಾಚಿ ಸಭಾ ಖುಬ್ ತರಾಸ್ ದಿವುನ್ ಹಾಳ್ ಕರೀತೊ. 
ಯವ್ಡಸ್ ನವ್ಹ ಮಾಜಾ ವಡ್ಲಾಂಚಿಪ್ನಿ ಆಲ್ಯಾಲಿ ಪದ್ದತಿಚೆ ಗುಶ್ಟಿತ್, ಮಾಜೆ ವಯೆಚಾ ಮಾನ್ಸಾತ್ನಿ ಯೆಹುದ ದರ್ಮಾತ್ ಖುಬ್ ಹುರುಪ್ ಆಸ್‌ಲ್ಯಾಲಾ ಜಾ಼ಲ್ತೊ. 
ಫನ್ ಮಿ ಮಾಜೆ ಆಯಿಚಾ ಪೊಟಾತ್ ಆಸ್ಧಾನಾ ನಿವ್ಡುನ್ ಆಪ್ಲೆ ಕ್ರಪೆನಿ ಸೆವೆತ್ ಹಾಕಟ್‌ಲ್ಯಾಲ್ಯಾ ದೇವಾನಿ, 
ಆಪ್‌ಲ್ಯಾ ಲೇಕಾಚಿ ಖಬರ್ ಇಸ್ವಾಸ್ ನಸ್‌ಲ್ಯಾಲ್ಯಾನಾ ಸಾಂಗಾಯಾ ವ್ಹಯಿ ಮನ್ಹುನ್ ದೇವಾಚ಼ ಚಿತ್ ಜಾ಼ಲ್ಥ.ಮಿ ತವಾಸ್ ಮಾನ್ಸಾಂಚಿ ಯವಜ಼್ನಾ ಐಕಾಚೆ ಆಂದಿ. 
ಯೇರುಸಲೇಮಿತ್ ಮಾಜೆ ಆಂದಿ ಅಪೊಸ್ತಲ್ ಜಾ಼ಲ್ಯಾಲ್ಯಾಂಚಿಪಬಿ ಜಾ಼ಯಾಚೆ ಆಂದಿ ಅರಬ ದೆಶಾತ್ ಜಾ಼ವುನ್ ಪರ್ತುನ್ ದಮಸ್ಕ ಪೆಠತ್ ಆಲೊ. 
ತೀನ್ ವರ್ಸ ಜಾ಼ಲ್ಯಾವ ಪೇತ್ರ ವಳಕ್ ಕರುನ್ ಗಿಹ್ಯಾ ವ್ಹಯಿ ಮನ್ಹುನ್ ಯೇರುಸಲೇಮಿತ್ ಜಾ಼ವುನ್ ತ್ಯಚಿಪ ಪಂದ್ರಾ ದೀಸ್ ಹುತ್ತೊ. 
ಫನ್ ಪ್ರಭುಚಾ಼ ಬಾಹು ಜಾ಼ಲ್ಯಾಲಾ ಯಾಕೊಬಾಲಾ ಸುಡುನ್ ಅಪೊಸ್ತಲಾತ್ ದುಸ್‌ರ‍್ಯಾಲಾ ಕುನಾಲಾಸ್ ಮೀ ಬಗ್ಲಾ ನಾಹಿ. 
ಮೀ ತುಮಾನಾ ಲಿವ್‌ತ್ಯಾಲ್ಯಾ ಗುಶ್ಟಿ ಲಬಾಡ್ ನವ್ಹತ ಮನ್ಹಾಯಾ ಹಬಕ್, ದೇವುಸ್ ವಳಕ್. 
ನಂತರ್ ಸಿರಿಯಾ ಆನಿ ಕಿಲಿಕ್ಯ ಸಿಮತ್ ಗೆಲೊ. 
ಫನ್ ಕ್ರಿಸ್ತಾಪ ಆಸ್‌ಲ್ಯಾಲೆ ಯುದಾಯಾಚೆ ಸಬೆಲಾ ಆಜು಼ನ್ ಮಾಜಿ ವಳಕ್ ನವ್ಥಿ. 
ಪೈಲ್ಯಾ ಕಾಲಾತ್ ಆಮ್ಚಿ ನಿಂದಾ ಕೆಲ್ಯಾಲಾ. ಆಪ್ನು ಹಾಳ್ ಕರ್ತ್ಯಾಲಾ ಇಸ್ವಾಸ್ ಆತಾ ಸಾಂಗ್‌ತ್ಯೊ ಮನ್ಯಾಚಿ ಖಬರ್ ತ್ಯಂಚಾನಿ ಐಕ್ಲಿ, 
ಮಾಜೆ ಸಂಗ ದೇವಾಲಾ ವವ್ಯಾಳಾ. 
