﻿ರೋಮಾಪುರಾತ್‌ಲ್ಯಾನಾ.
3.
ಆಸ ಜಾ಼ಲ್ಯಾ ಯೆಹುದಿ ವ್ಹವುನ್ ಯೆಹುದಿ ನಸ್‌ಲ್ಯಾಲ್ಯಾಂಚೆ ಪಕ್ಷಿ ಉಪಯೊಗ ಕ್ಯಾ? ಮುಂಜಿ ಕರುನ್ ಗೆತಲ್ಯಾಲ್ಯಾಚಿ ಕಿಮ್ಮತ್ ಕ್ಯಾ? 
ವ್ಹಯ್ ಯೆಹುದ್ಯಾನಾ ಸಾಂಗಾಚ಼ ಖುಬ್ ಹಾ. ಸಗ್‌ಳ್ಯಾ ಗುಶ್ಟಿಂಚ಼ ಸಾಂಗಾಚ಼ ಖುಬ್ ಹಾ ಪೈಲ ವಚನ್ ಯೆಹುದ್ಯಾನ ದಿಲ. 
ಫನ್ ತ್ಯಾತ್‍ಲ್ಯಾ ಥೊಡ್ಯಾನಾ ಇಸ್ವಾಸ್ ನವ್ಥಾ ಮನ್ಹುನ್ ಕ್ಯಾ ಜಾ಼ಲ್ಹ? ದೇವ್ ಇಸ್ವಾಸಾತ್ ಚು಼ಕತ್ಯಾಲಾ ಜಾ಼ಲ್ಹಾ ಕ್ಯಾ? 
ಖರ‍್ಯಾನಿಸ್ ನವ್ಹ! ಪರತೇಕ್ ಮಾನುಸ್ ಲಬ್ಡಾ ಜಾ಼ಲ್ಹಾತರಿ ದೇವ್ ಖರಾಸ್ ವ್ಹವುನ್ ರಾನ್ಹಾರ್. ಪವೀತ್ರ ಪುತಿಕಾತ್ ಆಸ ಸಾಂಗಲ್ಯಾ: “ತುಜೆ ಬುಲಿತ್ ತು ನೀಯತಿಚಾ಼ ಮನ್ಹುನ್ ದಾವುನ್ ದಿಯಾ ವ್ಹಯಿ. ತುಜಾ಼ ತೀರ್ಮಾನ್ ವ್ಹತಾನಾ ತು ಜಿತ್ತಾಯಾ ವ್ಹಯಿಸ್. 
ದೇವ್ ನೀಯತಿಚಾ಼ ಮನ್ಹುನ್ ಆಮಿ ಕೇಲ್ಯಾಲಿ ಚು಼ಕ್ ಆನಿ ತ್ಯವ್ಡಿ ಶಾರ್ಕಿ ದ್ಯಾವ್ತಿ ಆಸ ಆಸ್ಥಾನಾ ದೇವ್ ಆಮಾನಾ ಶಿಕ್ಶಾ ದೇತಾನಾ ತ್ಯೊ ಅನೆವ್ ಕರ್ತ್ಯೊ ಮನ್ಹುನ್ ಆಮಿ ಸಾಂಗಾಯಾ ವ್ಹಯಿಲ್ ಕ್ಯಾ? ಕಂದಿಸ್ ನಾಹಿ ಹಿ ಸಜಾ಼ವರಿಚಿ ಬುಲಿ. 
ಖರ‍್ಯಾನಿಸ್ ನಾಹಿ! ದೇವಾನಿ ನ್ಯಾಯಿಚ಼ ನಸ್ಥಾತ, ತ್ಯೊ ದುನೆಚಾ಼ ನ್ಯಾಯಿ ತೀರ್ಮಾನ್ ಕಸಾ ಕರ್ನಾರ್? 
“ಮೀ ಬೊಲ್‌ತ್ಯಾಲ ಲಬಾಡ್ ದೇವಾಚ಼ ಖರ ದಾವುನ್ ದಿಯಾ ಮಾಜಾ ಲಾಬಾಡಾನಿ ದೇವಾಲಾ ಖರ‍್ಯಾನಿಸ್ ಮೈಮಾ ವ್ಹಯಾಚಿ ಜಾ಼ಲ್ಯಾವ. ಮನಾ ಪಾಪಿ ಮನ್ಹುನ್ ಖಡ್ಯಾವಾಚಾ಼ ಕಾ? 
“ಚಾ಼ಂಗ್ಲ ವ್ಹಯಾಸಾಟಿ ವಾಯಿಟ್ ಕರುಯಾ ಮನ್ಹುನ್ ಆಮಿ ಕಾ ಸಾಂಗು ನಾಹಿ? ಆಸ ಮೀಸ್ ಶಿಕಿವತ್ಯೊ ಮನ್ಹುನ್ ಖುಬ್ ಲೊಕ ಮಾಜಿ ನಿಂದಾ ಕರ್ತ್ಯಾತ ತೀ ಲೊಕ ಚು಼ಕಿಚಿ ಮನ್ಹುನ್ ಸಾಂಗಾಚ಼ ಶಾರ್ಕ. 
ತಸಜಾ಼ಲ್ಯಾ ಆಮಿ ಕ್ಯಾ ಸಾಂಗುಯಾ? ಯಹುದಿ ಜಾ಼ಲ್ಯಾಲ ಆಮಿ ಯೆಹುದಿ ನಸ್‍ಲ್ಯಾಲ್ಯಾಂಚಾವ್ನಿ ಚಾ಼ಂಗ್ಲ ಹಾವ್ ಕ್ಯಾ? ಜ಼ರಾಬಿ ನಾಹಿ! ಯಹುದಿ ವ್ಹವುಂತ ಯಹುದಿ ನಸ್‌ಲ್ಯಾಲಿ ವ್ಹವುಂತ ಸಗ್ಳಿ ಪಾಪಾಚಾ ಅಧಿಕಾರಾತ್ ಹಾತ್ತ ಮನ್ಹುನ್ ಮೀ ತುಮಾನಾ ಆಂದಿಸ್ ದಾವುನ್ ದಿಲ್ಯಾ. 
ಪವಿತ್ರ ಗ್ರಂಥ ಆಸ ಸಾಂಗ್ತ: “ನಿಯತಿಚಾ಼ ಯೊಕ್ಬಿ ನಾಹಿ. ನಾಹಿಸ್ನಾಹಿ! 
ಕೊನುಸ್ ಗಿನ್ಯಾನ್ ಆಸ್‌ಲ್ಯಾಲಾ ನಾಹಿ ನಾಹಿತ ದೇವಾಲಾ ಶೊತ್ಯಾಲಾ ಕೊನುಸ್ ನಾಹಿ. 
ಸಗ್ಳಿ ದೇವಾಚೆ ಆಡ್ವಿ ಪರಾತ್ಲಿತ ಸಗ್ಳಿ ಲೊಕ ಕಾಮಾಲಾ ಯಯಿನಸ್ನಾರಿ ಜಾ಼ಲ್ಯಾತ ಚಾ಼ಂಗ್ಲ ಕರ್ತ್ಯಾಲಾ ಯೊಕ್ಬಿ ನಾಹಿ. ನಾಹಿಸ್ನಾಹಿ! 
ಲೊಕಾಂಚಿ ತೊಂಡ ಉಗಾಡ್‌ಲ್ಯಾಲೆ ಮಸುರ್ಡಿಚೆಗತ್ ಹಾತ್ತ. ತ್ಯಂಚಾ ಬೊಲ್ಯಾ ಮೊಸಾನಿ ಬರ್ಲ್ಯಾತಾ ತ್ಯಂಚಾ ಜಿಬಿ ಲಬಾಡಾನಿ ಬರ್ಲ್ಯಾತಾ ತ್ಯಂಚಾ ವಟಾವ ಸಾಪಾಚ಼ ಈಸ್ ಹಾ. 
ತ್ಯಂಚಾ ತೊಂಡಾತ್ ಸರಾಪ್ ಆನಿ ಕಡುಫನ್ ಬರ್ಲ್ಯಾ. 
ತರಾಸ್ ದಿಯಾ ಆನಿ ಮಾರುನ್ ಟಾಕಾಯಾ ತೀ ಕವಾಬಿ ತಯಾರ್ ಹಾತ್ತ. 
ತೆ ಜಾ಼ಯಿಲ್ ತಿಥ ಪಿಡಾ ಆನಿ ನಾಸ್ ತರಾಸ್ ರಾತ್ಯಾತ. 
ತ್ಯನಾ ಸಮಾದಾನಾಚಾ಼ ಮಾರ್ಗ ಸಮಾಜ್ಲಾ಼ ನಾಹಿ.” 
ತ್ಯಂಚೆ ನದ್ರಲಾ ದೇವಾಚ಼ ಭ್ಯಾ ನಾಹಿ. 
ಧರ್ಮಶಾಸ್ತಾರ್ ಕ್ಯಾ ಹಾ ಮನ್ಹುನ್ ಆಮಿ ಸಗ್ಳ ಸಮಜು಼ನ್ ಗೆತಲ್ಯಾ. ಧರ್ಮಶಾಸ್ತಾರಾಚಾ ತಾಬ್ಯಾತ್ ಆಸ್‌ಲ್ಯಾಲ್ಯಾ ಲೊಕಾಂಚೆ ಗುಶ್ಟಿತ್ ಸಾಂಗ್ತ, ಮನ್ಹುನ್ ಸಗ್ಳಿ ತೊಂಡ ಜಾ಼ಕ್ನಾರ್ ಆನಿ ಸಗ್ಳಿ ದುನ್ಯಾ ದೇವಾಲಾ ಲೆಖಾ ದಿಯಾವ್ಹಯಿ. 
ಕಾ ಮಂಜೆ ಧರ್ಮಶಾಸ್ತಾರಾಚೆಗತ್ ಚಾ಼ಲತ್ಯಾಲಾ ಪರತೇಕ್ ಮಾನುಸ್ ದೇವಾಚೆ ನದ್ರಲಾ ನೀಯತಿಚ಼ ವ್ಹಯಾ ಕುನಾಲಾಸ್ ವ್ಹಯಿತ್ನಾಹಿ. ತ್ಯ ಆಮಚ಼ ಪಾಪ್ ತ್ಯವ್ಡಸ್ ದ್ಯಾವ್ತ. 
ಫನ್ ಆತಾ ಮಾನ್ಸಾಸಾಟಿ ದೇವಾನಿ ಹ್ಯ ದಾವುನ್ ದಿಲ್ಯಾ ತ್ಯೊ ದರ್ಮಶಾಸ್ತಾರಾಚೆ ಸಿವಾರ್ ನೀಯತಿಚಾ಼ ಕರ್ತೊ ಯವ್ಡಸ್ ನವ್ಹ ಹೇ ಬುಲಿಚಿ ವಳಕ್ ಮೊಶೆಚಾ಼ ನೇಮ್ ಆನಿ ಪ್ರವಾದಿ ಜಾ಼ಲ್ಯಾತ. 
ದೇವ್ ಲೋಕಾನಾ ಯೇಸು ಕ್ರಿಸ್ತಾವ ಆಸ್‍ಲ್ಯಾಲ್ಯಾ ಇಸ್ವಾಸಾನಿ ತ್ಯನಿ ಭಕ್ತಿಚ಼ ಮನ್ಹುನ್ ಥರಿವ್ಲ ದೇವಾಪ ಕಸ್ಲಾ ಬೇದ್ ಭಾವ್ ನಾಹಿ. 
ಸಗ್ಳಿ ಲೊಕ ಪಾಪ್ ಕರುನ್ ದೇವಾಚಿ ಮೈಮಾ ಗಿಹ್ಯಾಚೆ ಆಂದಿ ಹಾತ್ತ. 
ಫನ್ ಯೇಸು ಕ್ರಿಸ್ತಾಚೆ ಸುಟ್ನುಕಿನಿ ದೇವಾಚೆ ಫುಕಟ್ಚೆ ಕ್ರಪೆನಿ ತ್ಯಚೆ ಮೊರ‍್ಹ ಆಮಿ ನಿಯತಿಚ಼ ಮನ್ಹುನ್ ಥರ್ಲ್ಯಾವ್. 
ದೇವಾನಿ ಇಸ್ವಾಸಾಸ್ ಲಾಗುನ್ ಲೋಕಾಂಚಿ ಪಾಪ ಮಾಪ್ ಕರ್ತ್ಯಾಲಾ ಮಾರ್ಗ ಕೆಲ್ಯಾ. ತ್ಯೊ ಮಾರ್ಗ ಯೇಸು. ಕ್ರಿಸ್ತಾಚಾ ರಕ್ತಾನಿಸ್ ಪಾಪ ಮಾಪಿ ಕೆಲ್ಯಾತ. ದೇವಾನಿ ಕೇಲ್ಯಾಲ ಕವಾಬೀ ಶಾರ್ಕ ರಾಥ ಆನಿ ಶಾರ್ಕ ರಾಥ ಮನ್ಹುನ್ ಹ್ಯ ದ್ಯಾವ್ತ. ದೇವ್ ಮಾಗ್‌ಲ್ಯಾ ಕಾಲಾತ್ ಥಂಡ್ ಫನಾನಿ ರಾಹುನ್ ಲೋಕಾನಾ ತ್ಯಂಚಾ ಪಾಪಾತ್ನಿ ಶಿಕ್ಶಾ ದಿಯಾಚೆ ಆಂದಿ ಗೇಲಾತರಿ ದೇವ್ ನೀಯತಿಚಾ಼ ಜಾ಼ಲ್ಯಾ. 
ಆಸ ದೇವಾನಿ ಆಪ್ನು ನೀಯತಿಚಾ಼ ಮನ್ಹುನ್ ಆನಿ ಯೇಸುವ ಇಸ್ವಾಸ್ ಥೆವ್‌ತ್ಯಾಲಾ ಕೋನ್ಬಿ ವ್ಹವುನಿ ನೀಯತಿಚಾ಼ ಕರ್ತೊ ಮನ್ಹುನ್ ದ್ಯಾವ್ತೊ. 
ತಸಜಾ಼ಲ್ಯಾ ಆಮಾನಾ ಆಮಿ ವವ್ಯಾಳುನ್ ಗಿಹ್ಯಾ ಆವಕಾಸ್ ಕುಠಹಾ? ಕುಠಸ್ನಾಹಿ! ಆನಿ ಹ್ಯಲಾ ಕ್ಯಾ ಕಾರನ್ ಹಾ? ಆಮಿ ಧರ್ಮಶಾಸ್ತಾರ್ ಪಾಳಾಚ಼ ಕಾರನ್ ಹ್ಯ ಕ್ಯಾ? ನಾಹಿ! ಫನ್ ಆಮಿ ಕಚಾವ ಇಸ್ವಾಸ್ ಥೆವ್ತಾವ್ ತ್ಯ ಆಮಚಾ ವವ್ಯಾಳನ್ಯಾಲಾ ಕಾರನ್ ಜಾ಼ಲ್ಯಾ. 
ಸರ್ತ್ಯಾಲಾ ಮೀ ಹ್ಯ ಸಾಂಗ್ತೊ ಕಚಾ಼ ಮಾನುಸ್ ಧರ್ಮಶಾಸ್ತಾರಾಚೆಗತ್ ಚಾ಼ಲ್ತೊ ಮನ್ಹುನ್ ನವ್ಹ. ನಿಸ್‍ಥ್ಯಾ ಇಸ್ವಾಸಾನಿಸ್ ತ್ಯೊ ನೀಯತಿಚಾ಼ ಮನ್ಹುನ್ ಗೆನ್ಹಾರ್. 
ನಾಹಿತ ದೇವ್ ನಿಸ್ಥಾ ಯಹುದ್ಯಾನಾ ತ್ಯವ್ಡಾಸ್ ಕ್ಯಾ? ತ್ಯೊ ಯಹುದಿ ನಸ್‌ಲ್ಯಾಲ್ಯಾನಾ ದೇವ್ ನವ್ಹ ಕ್ಯಾ? ಖರ‍್ಯಾನಿಸ್ ವ್ಹಯ್ ತ್ಯೊ ಯೆಹುದಿ ನಸ್‍ಲ್ಯಾಲ್ಯಾನಾಬಿ ದೇವ್ ಜಾ಼ಲ್ಯಾ. 
ದೇವ್ ಯೊಕುಸ್. ತ್ಯೊ ಯಹುದ್ಯಾಂಚಾ಼ ತ್ಯವಡಾಸ್ ನವ್ಹ. ಯೆಹುದ್ಯಾನಾ ಯಹುದಿ ನಸ್‌ಲ್ಯಾಲ್ಯಾನಾ ತ್ಯಂಚಾ ಇಸ್ವಾಸಾನಿ ನೀಯತಿಚ಼ ಕರ್ತೊ. 
ಆಮಿ ಹ್ಯಾ ಇಸ್ವಾಸಾನಿ ಧರ್ಮಶಾಸ್ತಾರ್ ದುರ್ ಕರ್ತ್ಯಾವ್ ಕ್ಯಾ? ನಾಹಿ ಖರ‍್ಯಾನಿಸ್ ನಾಹಿ! ಹ್ಯಚೆ ಬದ್ಲಿ ಆಮಿ ಧರ್ಮಶಾಸ್ತಾರ್ ಉಚ್ಲು಼ನ್ ದರ್ಥಾವ್. 
