﻿ಮಾರ್ಕ್.
16.
ಸಬ್ಬತ್ ದಿಸ್ ಜಾ಼ಲ್ಯಾ ನಂತರ್. ಮಗ್ದಲಾಚಿ ಮರಿಯಾ, ಯಾಕೊಬಾಚಿ ಆಯಿ ಮರಿಯಾ ಆನಿ ಸಲೊಮಿ, ಹ್ಯಂಚಾನಿ ಯೇಸುಚಾ ಮಡ್ಯಾಲಾ ಲಾವಾಯಾಸಾಟಿ ವಾಸಾಚ಼ ತ್ಯಾಲ್ ಇಕತ್ ಗೆತ್ಲ. 
ಆನಿ ವಾರಾಚಾ ಪೈಲ್ಯಾ ದಿಸಾ ದಿಸಿ ಸಕಾಳ್ಚಾ ದಿಸ್ ಉಗಾವಲ್ಯಾವ ನಸ್ಕಾತ್ ಯೇಸುಚೆ ಮಸುರ್ಡಿಪ ಆಲ್ಯಾ. 
ತವಾ ಮಸುರ್ಡಿಚಾ ತೊಂಡಾವ ಜಾಕ್‌ಲ್ಯಾಲಾ ದೊಂಢಾ ಖುಬ್ ಮೊಟಾ ಹುತ್ತಾ ಮನ್ಹುನ್, “ಹ್ಯೊ ದೊಂಢಾ ಹಿತ್ನಿ ಕಾಡಾಯಾ ಆಮ್ಚಿಸಾಟಿ ಕೊನ್ ಹಾ” ಮನ್ಹುನ್ ತ್ಯಾ ಆಪ್‌ಲ್ಯಾ ಆಪ್‌ಲ್ಯಾತ್ ಬೊಲತ್ಯಾ, ತವಾ ಡುಯಿ ವರ್ ಕರುನ್ ಬಗ್ತಾನಾ ತ್ಯೊ ದೊಂಢಾ ಕಡವ ಶಾರ್ಲ್ಯಾಲಾ ದಿಸ್ಲಾ. 
ತ್ಯಾ ಮಸುರ್ಡಿಪ ಗೆಲ್ಯಾ ತವಾ ಯೊಕ್ ದ್ಯಾನ್ಗಾ ಮಾನುಸ್ ಪಾಂಡ್ರಾ ಜ಼ಘಾ ಗಾಲ್ಹುನ್ ಉಜ್ವೆ಼ ಬಾಜು಼ಕ್ಡ ಬಸ್‌ಲ್ಯಾಲಾ ಬಗುನ್ ತ್ಯಾ ಗಾಭಾರ್ಲ್ಯಾ. 
ತ್ಯೊ ತ್ಯನಾ “ಗಾಭ್ರು ನಕೊಸಾ. ಶಿಲುಬೆಚಾ ಖಾಂಬಾವ ಟ್ಯಾಂಗ್‌ಲ್ಯಾಲ್ಯಾ ನಜ಼ರೆತಿಚಾ ಯೇಸುಲಾ ಶೋತ್ಯಾಸಾ ನವ್ಹ. ತ್ಯೊ ಹಿತ್ಹ ನಾಹಿ, ಜಿ಼ತ್ತಾ ವ್ಹವುನ್ ಉಟ್‌ಲ್ಯಾ; ತ್ಯಲಾ ಥೆವ್‌ಲ್ಯಾಲಾ ಜಾ಼ಗಾ ಹ್ಯೋಚ಼್ ಬಗಾ. 
ಖರ ತುಮಿ ಜಾ಼ವುನ್ ತ್ಯಚಾ ಶಿಶಾನಾ ಪೇತ್ರಾಲಾಬಿ, “ಯೇಸುನಿ ತುಮಾನಾ ಸಾಂಗ್‌ಲ್ಯಾ ಶಾರ್ಕ ತ್ಯೊ ತುಮ್ಚೆ ಮೋರ್ಹ ಗಲಿಲಾಯಾತ್ ಜಾ಼ನಾರ್. ತಿಥ ತ್ಯಲಾ ಬಗ್ಸಿಲಾ ಆಸ ಸಾಂಗಾ” ಮನ್ಹುನ್ ಸಾಂಗ್ಲ. 
ತ್ಯಾ ಬಿಹುನ್ ಗಾಬ್ರುನ್ ಮಸುರ್ಡಿಪ್ನಿ ಬಾಹಿರ್ ಪಳುನ್ ಗೆಲ್ಯಾ; ತ್ಯಾ ಖುಬ್ ಬಿಹ್ಯಾಲ್ಯಾ ಹುತ್ಯಾ ಮನ್ಹುನ್ ಕುನಾಲಾ ಖರ ಸಾಂಗ್ಲ ನಾಹಿ. 
ವಾರಾಚಾ಼ ಪೈಲಾ ದಿಸ್ ಐತ್ವಾರಾದಿಸಿ ಯೇಸು ಜಿ಼ತ್ತಾ ವ್ಹವುನ್ ಉಟ್‌ಲ್ಯಾ ನಂತರ್ ಸಕಾಳಚಾ಼ ಮಗ್ದಲಾಚೆ ಮರಿಯಾಲಾ. ಪೈಲ್ಯಾನಿ ದಿಸ್‌ಲಾ. ತಿಲಾ ಸಾತ್ ಲಾಗಿರ ದರ್‌ಲ್ಯಾಲಿ ಸುಡಿವ್ಲಿತ. 
ತ್ಯೊ ದಿಸಲ್ಯಾಲಾ ತಿನಿ ಜಾ಼ವುನ್ ಆಂದಿ ತ್ಯಚೆ ಸಂಗ ಹುತ ತ್ಯನಾ ಕಳಿವ್ಲ. ಹೆ ಖುಬ್ ಕ್ಯಾಳ್ಜಿ ಕರೀತ್ ರಡತ್ ಬಸ್ಲ ಹುತ್ತ. 
ತ್ಯೊ ಜಿ಼ತ್ತಾ ಹಾ ಮನಾ ದಿಸ್ಲಾ ಮನ್‌ಲ್ಯಾಲ ಐಕ್ಲ ತವಾ ತ್ಯಂಚಾನಿ ಖರ ದರ್ಲ ನಾಹಿ. 
ತ್ಯಾ ನಂತರ್ ಶಿಯಾತ್ಲ ದೊಗ ಯಕಾ ಗಾವಾತ್ ವಾಟನಿ ಚಾ಼ಲತ್ ಜಾ಼ಯಿತ್ ಆಸ್ಥಾನಾ ತ್ಯೊ ತ್ಯನಾ ದುಸ್‌ರ‍್ಯಾ ಆವ್ತಾರಾನಿ ದಿಸ್‌ಲಾ. 
ತ್ಯಂಚಾನಿ ಜಾ಼ವುನ್ ರಾಯ್‌ಲ್ಯಾಲ್ಯಾನಾ ಕಳಿವ್ಲ ತವಾ ತ್ಯಂಚಾನಿಬಿ ಖರ ದರ್ಲ ನಾಹಿ. 
ಮಂಗ್ ಆಕ್ರಾಜಾ಼ನ್ ಶಿಶಾ ಜೆವ್ನಾಲಾ ಬಸ್‌ಲ ತವಾ ತ್ಯೊ ತ್ಯನಾಬಿ ದಿಸ್ಲಾ. ಆಪ್ನು ಜಿ಼ತ್ತಾ ವ್ಹವುನ್ ಉಠುನ್ ಆಲ್ಯಾ ನಂತರ್ ಆಪ್‌ಲ್ಯಾಲಾ ಬಗ್‌ಲ್ಯಾಲ್ಯಾಂಚಾ ಸಬ್ದಾಂಚಿವ ಇಸ್ವಾಸ್ ಥೆವ್ಲಾ ನಾಹಿ ಮನ್ಹುನ್ ತ್ಯನಿ ತ್ಯಂಚಾ ಅವಿಸ್ವಾಸಾಲಾ ಆನಿ ಕಠಿನ್ ಮನಾಲಾ ದಪ್‌ಕ್ಯಾವ್ಲ. 
ಮಂಗ್ ತ್ಯನಾ ಯೇಸುನಿ “ಸರ್ವೆ ಜ಼ಗತಿತ್ ಜಾ಼ವುನ್ ಸರ್ವೆ ಜ಼ಗತಿಲಾ ಸುವಾರ್ತಾ ಸಾಂಗಾ. 
ಇಸ್ವಾಸ್ ಥಿವುನ್ ಕೊನ್ ಬಾಪ್ತಿಸ್ಮಾ ಗಿಹಿಲ್ ತ್ಯಚ಼ ರಕ್ಶನ್ ವ್ಹಯಿಲ್; ಆನಿ ಕೊನ್ ಇಸ್ವಾಸ್ ಥಿವಿತ್ ನಾಹಿ ತ್ಯಲಾ ಮುಟಿ ಶಿಕ್ಶೆ ವ್ಹನಾರ್. 
ಆನಿ ಇಸ್ವಾಸ್ ಥೆವ್‌ಲ್ಯಾಲ್ಯಾಂಚಿಪ್ನಿ ಹಿ ಕಾಮ ವ್ಹತಿಲ, ತೇ ಮಾಜಾ ನಾವಾನಿ ಲಾಗಿರ ಸುಡಿವ್ನಾರ್; ನವ್ಯಾ ನವ್ಯಾ ಬಾಶಾ ಬೊಲ್ನಾರ್. 
ಸಾಪ್ ಉಚ಼ಲ್ನಾರ್. ಕಾಯ್ತರಿ ಇಸಾಚಾ ಜಿ಼ನೊಸ್ ಪಿಯಾಲ ತರಿ ಕಾಯ್ ನಾಸ್ ವ್ಹನಾರ್ ನಾಹಿ. ತ್ಯಂಚಾನಿ ರೋಗಿವ ಹಾತ್ ಥೆವ್‌ಲ್ಯಾವ ರೊಗಿಲಾ ಬರ ವ್ಹನಾರ್” ಮನ್ಲಾ. 
ಯೇಸು ಪ್ರಭು ತ್ಯಂಚಿ ಸಂಗ ಬೋಲ್ಯಾ ನಂತರ್ ವರ್ ಸ್ವರ್ಗಾತ್ ಉಚ಼ಲುನ್ ನೆಲ್ಯಾವ ಪರ್ಮಶ್ವರಾಚೆ ಉಜ್ವೆ಼ ಬಾಜು಼ಲಾ ಬಸ್ಲಾ. 
ಶಿಶಾಂಚಾನಿ ಪರ್ಪಂಚಾತ್ ಜಾ಼ವುನ್, ಸಗ್ಳಿಕ್ಡ ಲೊಕಾನಾ ಸೂವಾರ್ತಾ ಸಾಂಗ್ಲಿ. ಆನಿ ಪ್ರಭು ತ್ಯಂಚೆ ಸಂಗ ರಾಹುನ್ ಮಹತ್ಕಾರ್ಯ ಕರುನ್ ಸುವಾರ್ತೆ ಖರಿ ಮನ್ಹುನ್ ದ್ಯಾವ್ಲಿ).
