﻿प्रेरित.
4.
जब वे दुन्या से यो बोली र्‍हा था, ते याजक अरु मन्‍दिर को सरदार अरु सदूकि उन पर चड आया. 
क्युकि वे भोत घुस्सा हुया कि वे इन्सानहोन खे सिखाता था अरु यीशु को उदाहरण दि दिखे मर्या हुया खे जिन्दो उठन को प्रचार करता था. 
उनने उनखे पकडी खे दुसरा दिन तक हआलात मे रख्यो क्युकि संज्जा हुइ गइ थी. 
पन वचन खे सुननआला मे से भोतझन ने विश्वास कर्यो, अरु उनकी गिनती पाच हजार का नजीकपास हुइ गइ. 
दूसरा दिन असो हुयो कि उनका सरदार अरु बापदादाहोन अरु शास्त्री. 
अरु महायाजक हन्ना अरु कैफा अरु यहून्ना अरु सिकन्दर अरु जोत्ता महायाजक का घराना का था, सब यरुशलेम मे जमा हुया. 
वे उनका बीच मे खडा करीखे पूछन लग्या कि तुम ने यो काम कोका सामर्थ्य से अरु कोका नाम से कर्यो हइ. 
तब पतरस ने पवित्र आत्मा पुरो पुरो हुइ, उनसे बोल्यो. 
हे दुन्याहोन को सरदारहोन अरु बापदादाहोन को या दुर्बल इन्सान का साथ जो भलाइ करी गइ हइ, अगर आज हम से उनका बारे मे पूछ ताच करी जास हइ, कि उ कसो अच्छो हुयो. 
ते तुम सब इस्राएल अरु पुरा इस्त्राएली दुन्या जानी ले कि यीशु मसीह नासरी का नाम से जेखे तुम ने क्रुस पर चडायो अरु परमेश्वर ने मर्या हुया मे से जिन्दो कर्यो यो इन्सान तुम्हारा सामने भलो अच्छो हइ. 
यो उ पत्थर हइ जेखे तुमने राजमिस्त्रीहोन ने तुच्छ जान्यो अरु उ कोना को सिरा को पत्थर हुइ गयो. 
कोइ दुसरा का वजेसे उध्दार नी. क्युकि स्वर्ग का नीचे इन्सानहोन मे अरु कोइ दुसरो नाम नी दियो गयो जेका वजेसे हम उध्दार पर सक्ये. 
जब उनने पतरस अरु यहून्ना को हिम्मत देख्यो अरु यो जान्यो कि यो अनाडी अरु साधारन इन्सान हइ ते अच्मबो कर्यो. फिर उनका पैछान्यो कि यो यीशु का साथ र्‍हियो हइ. 
उ इन्सान खे जो अच्छो हुयो थो, उनका साथ खडो देखी खे वे विरोध मे कुछ नी बोली सक्या. 
पन उनखे सभा का भैहिर जान कि आज्ञा दिखे वे आपस मे बिचार करण लग्या, 
हम ये इन्सानहोन का साथ का कर्या? क्युकि यरुशलेम का सब र्‍हेनआला पर प्रगट हइ, कि इन का वजेसे एक प्रसिद्ध चिन्ह दिखायो गयो हइ, अरु हम उनको इनकार नी करी सक्ये. 
पन येका लिये कि या बात दुन्या मे अरु जादा फैली नी जाये, हम उनका धमकाये, कि वे या नाम से फिर कोय इन्सान से बात नी करणु. 
तब उनखे बुलायो अरु चेतावनी दिखे बोल्यो, यीशु का नाम से कुछ भी नी बोलनु अरु नी सिखानी. 
पन पतरस अरु यहून्ना ने उनका जवाब दियो, तुम हि न्याय करण; का यो परमेश्वर का पास भलो हइ कि हम परमेश्वर कि बात से बडीखे तुम्हारी बात मान्ये. 
क्युकि यो ते हम से हुइ नी सक्ये कि जो हम ने देख्यो अरु सुन्यो हइ, वे नी बोल्ये. 
तब उनने उनका धमक्यै छोडी दियो, खे क्युकि दुन्या करण उनखे दण्ड देन को दावो नी मील्यो, येका लिये कि जो घटना हुइ थी ओ का कारन सब दुन्या परमेश्वर कि बडैइ करता था 
उ इन्सान का जेका पर यो अच्छो करण को चिन्ह दिखायो गयो थो, चालीस साल से जादा उम्र को थो. 
वे छुटीखे अपना साथीहोन का पास आया खे अरु जो प्रधान याजकहोन अरु बापदादाहोन ने उनसे बोल्यो थो, उनका सुन्य दियो. 
यो सुनी, उनने एक चित्त हुइ, उचो बोल से परमेश्वर से बोल्यो हे स्वामी, तू उ हइ जेने स्वर्ग अरु जमीन अरु समुद्र अरु जो कुछ उनमे हइ बनायो. 
तोने पवित्र आत्मा का वजेसे अपना सेवक हमारो बाप दाउद का मुडा से बोल्यो. गैरयहूदिहोन ने हुल्लड क्यु मचायो? अरु देश का दुन्या ने बेकार बातहोन सोची 
प्रभु अरु ओका मसीह का विरोध मे पृथ्वी को राजाहोन खडा हुया, अरु शासक एक साथ जमा हुइ गया. 
क्युकि सच्चीई तरा पवित्र सेवक यीशु का विरोध मे जेको तो ने अभिषेक कर्यो, हेरोदेस अरु पुन्तियुस पिलातुस भी गैरयहूदिहोन अरु इस्त्राएलिहोन का साथ या नगर मे जमा हुया. 
कि जो कुछ पैयले से तरी सामर्थ्य अरु मती से ठैरायो थो उ करणु. 
अब हे प्रभु, उनकी धमकिहोन खे देख. अरु अपना सेवकहोन को वरदान देनु कि तरो वचन बडा हिम्मत से सुनाये. 
अच्छो करण का लिये तू अपनो हाथ बडा कि चिन्ह अरु अदभुत काम तरा पवित्र सेवक यीशु का नाम से कर्यो जाये. 
जब वे प्रार्थना करी चुक्या, ते उ जगा जहा वे जमा था हली गया अरु वे सब पवित्र आत्मा से परीपूर्ण हुइ गया, अरु परमेश्वर को वचन हिम्मत से सुनाता र्‍हिये. 
विश्वास करणआला कि मंडली एक चित्त अरु एक मन कि थी, ह्या तक कि कोइ भी अपनी सम्पत्ती अपनी नी करतो थो, पन सब कुछ हिस्सेदार मे थो. 
प्रेरित बडो सामर्थ्य से प्रभु यीशु को जिन्दो उठस कि गवा देता र्‍हिये अरु उन सब पर बडो अनुग्रह थो. 
उनमे कोय भी दरिद्र नी थो क्युकी जिन का पास जमीन या घर था वे उनखे बेची खे बिकी हुइ चिजहोन को दाम लाता, अरु ओका प्रेरितहोन का पायहोन पर रखता था. 
अरु जसी जोकि जरुरत होती थी, ओका जसो हर एक खे बाटी दिया करता था. 
यूसुफ नाम साइप्रस को एक लेवी थो जेको नाम प्रेरितहोन ने बरनबास मंनजे शांती को बेटो रख्यो थो. 
ओकी कुछ जमीन थी जो खे ओने बेच्यो अरु दाम का रुप्या लिखे प्रेरितहोन को पायहोन पर रखी दियो. 
