﻿मत्ती रचित यीशु मसीह को सुसमाचार.
1.
अब्राहम को बेटो दाउद, को बेटो यीशु मसीह की वंशावली असी हइ. 
अब्राहम से इसहाक पैयदा हुयो. इसहाक से याकूब पैयदा हुयो. अरु याकूब से यहूदा अरु ओको भैइ पैयदा हुयो. 
यहूदा अरु तामार से पेरेस व जोरह, पेरेस से हिस्रोन अरु हिस्रोन से एराम, पैयदा हूयो. 
अरु एराम से अम्‍मीनादाब. अरु अम्‍मीनादाब से नहशोन अरु नहशोन से सलमोन पैयदा हूयो. 
सलमोन अरु राहब से बोआज, अरु बोआज अरु रुत से ओबेद. अरु ओबेद से यिशय पैयदा हुयो. 
अरु यिशय से दाउद राजो अरु उरियाह दाउद से सुलैमान उ बय से पैयदा हुयो जो उरीय्याह की लुगेन थी. 
सुलैमान से रहबाम, अरु रहबाम से अबिय्याह, अरु अबिय्याह से आसा पैयदा हुयो. 
आसाफ से यहोशाफात, अरु यहोशाफात से योराम, अरु योराम से उज्जियाह पैयदा हुयो. 
उज्जियाह से योताम से आहाज अरु आहाज से हिजकिय्याह पैयदा हुयो. 
हिजकिय्याह से मनश्शे से पैयदा हुयो, मनश्शे से पैयदा हुयो आमोन, अरु आमोन योशिय्याह पैयदा हुयो, 
अरु गिरपतार हुइखे बाबेल जान का टेम मे योशिय्याह से यकुन्याह, अरु ओको भैइ पैयदा हुयो. 
गिरपतार हुइखे बाबेल पोचान जान का बाद यकुन्याह, से शालतीएल. अरु शालतीएल से जरुब्बाबेल पैयदा हुयो. 
जरुब्बाबेल से अबिहुद. अबिहुद से एलयाकिम अरु एलयाकीम से अजोर पैयदा हुयो. 
अजोर से सादोक, सादोक से अखीम. अरु अखीम से इलीहूद पैयदा हुयो. 
इलीहूद से एलियाजार. एलियाजार से मत्तान. अरु मत्तान से याकूब पैयदा हुयो. 
याकूब से यूसुफ. जो मरियम को अदमी थो, अरु मरियम से यीशु पैयदा हुयो, जो मसीह बोलस हइ. 
यो प्रकार अब्राहम से दाउद तक सब चौदा पिडी हुइ अरु दाउद का टेम से बाबेल को गिरपतार हुइ खे पोचान जाना तक, चौदा पिडी अरु गिरपतार हुइ खे बेबीलोन खे पहुची जाना का टेम से लिखे मसीह तक चौदा पिडी हुय. 
यीशु मसीह को जन्म या रीती से हुय, की जब ओकी माय मरियम की मगनी यूसुफ का साथ हुय गइ, ते उनको भ्याव होना से पैयले वा पवित्र आत्मा का तरप से दिन से हुय गय. 
येकालिये ओका अदमी यूसुफ ने जो धर्मी होन का कारण ओखे बदनाम करणो नी चाहतो थो, या इच्छा से चुपचाप छोडी देन को मन कर्यो. 
जब उ या बात का सोच मे थो ते प्रभु को एक स्वर्गदूत ओखे दृष्‍टान्‍त मे दिखानो अरु बोलन लग्यो. हे यूसुफ! दाउद की सन्तान खे तू मरियम खे अपनी बायको बनाना से डरे मत. क्युकी जो ओका पेट मे हइ, उ पवित्र आत्मा का तरप से हइ. 
उ बेटो पैयदा कर्हे अरु तोने ओको नाम यीशु रखनु. क्युकी वु अपना दुन्याहोन को उनका पाप से उध्दार कर्हे. 
यो सब कुछ येका लिये हुयो की जो वचन प्रभु ने भविष्यव्दक्ता का वजेसे बोल्यो थो. वु पुरो हुये. 
“देख एक कुव्वारी दिन से हुये अरु एक बेटो पैयदा, अरु ओको नाम इम्मानुएल रख्यो जाह्ये,” जेको मतलब यो हइ की परमेश्वर हमारा साथ. 
तब यूसुफ नीद से जागीखे प्रभु का दूत की बात कि आज्ञा का जसो ओने अपनी बायको बनान खे अपना घर मे लयली. 
अरु जब तक मरियम का पास नी गयो जब तक ओने बेटा खे जन्म नी दियो अरु यूसुफ ने ओको नाम यीशु रख्यो. 
