GEN 1:1 Xoossay koyro salotanne sa7a medhis.
GEN 1:2 He wode sa7i giigonanne aybika bayna mela de7ees. Dhumi biitta ma77ida wolqaama haathata bolla de7ees. Xoossa Ayyaanay haathaafe bollara qaaxees.
GEN 1:3 Hessafe guye, Xoossay, “Poo7oy hano” yaagin, poo7oy hanis.
GEN 1:4 Poo7oy lo77o gididaysa Xoossay be7is; poo7uwa dhumape shaakis.
GEN 1:5 Xoossay poo7uwa, “Gallas” gidi sunthis; qassi dhumaa “Qamma” gidi sunthis. Sa7i qammis wontis; hessi koyro gallas.
GEN 1:6 Hessafe guye, Xoossay, “Bollara de7iya haatha garsan de7iya haathaafe shaakiya salo gufanthoy hano” yaagin hanis.
GEN 1:7 Xoossay salo gufantho giigisidi, salo gufanthofe bollara de7iya haatha garsan de7iya haathaafe shaakis.
GEN 1:8 Xoossay he gufanthuwa, “Salo” gidi sunthis. Sa7i qammis; wontis; hessi nam7antho gallasa.
GEN 1:9 Hessafe guye, Xoossay, “Mela bessay qoncanaada Salope garsan de7iya haathi ubbay issi bessi shiiqo” yaagin hanis.
GEN 1:10 Xoossay he mela bessaa, “Biitta” gidi sunthis; qassi issi bessan shiiqida haatha, “Abba” gidi sunthis. Yaatidi, Xoossay hessi lo77o gididaysa be7is.
GEN 1:11 Hessafe guye, Xoossay, “Biittay mithi maata doliso; zeretha ayfey de7iya kathinne zeretha ayfey giddon de7iya mithi dolo” yaagis; hessadaka hanis.
GEN 1:12 Biittay mithi maata iya qommon qommon dolisis. Xoossay hessi lo77o gididaysa be7is.
GEN 1:13 Sa7i qammis wontis; hessi heedzantho gallas.
GEN 1:14 Hessafe guye, Xoossay, “Gallasa qammafe shaakanaw poo7oti salon hano. Enti qamanne, gallas, wodenne laythi erisanaw malla gido.
GEN 1:15 Biitta bolla poo7ana mela enti salo gufanthon hano” yaagis; hessadaka hanis.
GEN 1:16 Xoossay nam7u gita poo7ota medhis. Awi gallas, ageeni qamma poo7ana mela oothis. Hessadaka Xoolintota medhis.
GEN 1:17 Xoossay enti ha sa7a bolla poo7ana mela salon wothis.
GEN 1:18 Hessi, gallasinne qamma haarana melanne poo7o dhumape shaakana melasa. Xoossay hessi lo77o gididaysa be7is.
GEN 1:19 Sa7i qammis wontis; hessi oyddantho gallas.
GEN 1:20 Hessafe guye, Xoossay, “De7oy de7iya dumma dumma medhetethati haathan daro; kafotika sa7ape bollara, salo gufanthofe garsan piradho” yaagis.
GEN 1:21 Yaatidi Xoossay abban de7iya gita do7ata, haatha giddon woxi qaaxiya medhetethata ubbaanne paalliya kafota ubbaa iya qommon qommon medhis. Xoossay hessi lo77o gididaysa be7is.
GEN 1:22 Xoossay enta, “Yeletite, darite, abba kumite, kafoti biitta bolla daro” yaagidi anjis.
GEN 1:23 Sa7i qammis wontis; hessi ichashantho gallas.
GEN 1:24 Hessafe guye, Xoossay, “De7oy de7iya medhetethati enta qommon qommon, meheta, sa7ara gooshetiya medhetethatanne do7ata enta qommon qommon biittay kesso” yaagin hanis.
GEN 1:25 Hessada oothidi enta ubbaa medhis. Xoossay hessi lo77o gididaysa be7is.
GEN 1:26 Hessafe simmin, Xoossay, “Ase nuna daanisidi ane medhoos. Enti abba moluwa, salo kafota, biitta bolla woxi qaaxiya medhetetha ubbaa haaro” yaagis.
GEN 1:27 Hessada Xoossay ase bana daanisidi medhis. I ase Xoosse daanisidi medhis; enta addenne maccas oothidi medhis.
GEN 1:28 Xoossay entana, “Yeletite, darite, sa7a kumite; haarite. Abba molo, salo kafotanne biitta bolla woxi qaaxiya, de7oy de7iya medhetetha ubbaa haarite” yaagidi anjis.
GEN 1:29 Hessafe guye, Xoossay, “Taani biitta ubbaa bolla zeretha ayfey de7iya katha ubbaanne zeretha ayfey giddon de7iya mithi ubbaa hintew immas; hessi hintew kathi gido.
GEN 1:30 Qassika ha sa7an de7iya mehenne do7a ubbaas, salo kafo ubbaasinne sa7ara gooshetiya medhetetha ubbaas miyaba gidana mela, cil7o mithinne maata immas” yaagis; hessadaka hanis.
GEN 1:31 Xoossay ba medhida ubbabaaka xeelliya wode daro lo77o gididaysa be7is. Sa7i qammis; wontis; hessi usupuntho gallas.
GEN 2:1 Salotinne sa7i entan de7iyaba ubbabay haysada medhetidi poletis.
GEN 2:2 Xoossay ba oosuwa polidi, laapuntha gallasan shempis.
GEN 2:3 Xoossay laapuntha gallasan ba oothiya oosuwa ongidi shempida gisho he gallasaa anjis; gallasatape dummayis.
GEN 2:4 Salotinne sa7i hessada hani medhetis. Godaa Xoossay sa7anne salota medhida wode,
GEN 2:5 sa7a bolla iri bukiboona gishonne oothiya asi bayna gisho mithinne maati dolibeenna; aaciyabayka baawa.
GEN 2:6 Gidoshin, sa7ape haathi pultidi, biitta ubbaa laakisees.
GEN 2:7 Hessafe guye, Godaa Xoossay biitta baanape ase medhidi iya siidhera de7o shempo punnidi gelsis. Yaatin, he addey de7ora de7iya ase gidis.
GEN 2:8 Godaa Xoossay doloha baggara Edene gannate giigisis; yan ba medhida addiya wothis.
GEN 2:9 Godaa Xoossay xeellanaw lo77iya, maanawuka mal7iya ubba qommo mithi biittafe dolisis. Gannate giddon de7o immiyanne lo77onne iita erisiya nam7u mithata wothis.
GEN 2:10 Gannate ushshiya shaafa haathay Edenepe goggees. He shaafay Edenepe keydi oyddu shaafu keyidi shaaketees.
GEN 2:11 Koyro shaafa sunthay Fisoone. Fisooney worqey de7iya Hawila biitta bolla goggees.
GEN 2:12 He biitta worqey geeshsha worqa. Qassi al7o shittoynne shuchi yan de7ees.
GEN 2:13 Nam7antho shaafa sunthay Giyoone. Giyooney Tophe biitta yuushuwan goggees.
GEN 2:14 Heedzantho shaafa sunthay Xegroosa. Xegroosi Asoorepe doloha baggara goggees. Qassi oyddantho shaafay Efraxiisa.
GEN 2:15 Godaa Xoossay asi Edene Gannate oothana melanne naagana mela iya efidi yan wothis.
GEN 2:16 Godaa Xoossay ase, “Gannate mitha teera ubbaafe neeni maanaw danda7aasa.
GEN 2:17 Shin lo77onne iita erisiya mitha ayfiyape moopa. Ayis giiko, neeni iyape mida gallas tuma hayqana” yaagidi kiittis.
GEN 2:18 Hessafe guye, Godaa Xoossay, “Addey barka de7eysi lo77o gidenna. Taani iya maaddana mela iyaw injetiya lagge medhana” yaagis.
GEN 2:19 Godaa Xoossay meheta, do7atanne salo kafota ubbaa biittafe medhis. Yaatidi, enta woygidi sunthaneko be7anaw Addaameko ehin, Addaamey de7oy de7iya medhetetha ubbaa sunthida sunthay enta sunthi gididi attis.
GEN 2:20 Hessadaka, Addaamey meheta, salo kafotanne bazzo do7ata ubbaa sunthis. Shin Addaames injetiyanne iya maaddiya laggey bentibeenna.
GEN 2:21 Hessa gisho, Godaa Xoossay Addaame wolqaama dhiskon yeggis. I dhisko hayqidashin iya miye meqethafe issuwa ekidi, he bessaa ashon kunthis.
GEN 2:22 Godaa Xoossay Addaamepe ekida meqetha macca oothidi medhis; yaatidi iyo iyako ehis.
GEN 2:23 Addaamey, “Ha meqethiya ta meqethafe, ha ashshiya ta ashope eketidaro. Iya addefe eketida gisho macca geeteto” yaagis.
GEN 2:24 Hessa gisho, asi ba aawanne ba aayiw aggidi, ba machera issife de7ees; nam7ay issi asi gidoosona.
GEN 2:25 Addaameynne Hewaanna nam7ayka xire kallo de7oosona; shin issoy issuwas yeellatokona.
GEN 3:1 Shooshi Godaa Xoossay medhida do7a ubbaafe aadhida genancho. Issi gallas shooshi maccasiw, “Xoossay tuma hintena, ‘Gannatiyan de7iya mitha ayfe ubbaafe moopite’ gidee?” yaagidi oychis.
GEN 3:2 Maccasiya shooshako, “Akay, Xoossay hessada gibeenna; nuuni gannate giddon de7iya mithata ayfe maanaw danda7oos.
GEN 3:3 Shin Xoossay nuna, ‘Gannate giddon de7iya mitha ayfe moopite, bochofite; ixiko hinte hayqana’ gis” yaagasu.
GEN 3:4 Shooshay maccasiw, “Hinte aykoka hayqeketa.
GEN 3:5 Xoossay hessa giday, he mitha ayfiya hinte miiko akeeka demmidi lo77onne iitaa Xoossada hinte eranaysa I, eriya gishosa” yaagis.
GEN 3:6 Maccasiya mitha ayfey maanaw mal7eysa, be7anaw lo77eysanne, cincatethi demmanaw amoyaba gideysa be7asu. He mitha ayfiyape ekada masu. Qassi ba azinaska immin ika mis.
GEN 3:7 Enti mi simmidi, nam7ayka akeeka demmidosona. Enti xire kallo de7eysa eridosona. Hessa gisho, balase mitha haythi sikidi dancidosona.
GEN 3:8 Sa7i omarsida wode gannate giddon Godaa Xoossay hemetishin iya girsa Addaameynne iya machiya si7idosona. Enti gannate mitha giddon Godaa Xoossafe qosetidosona.
GEN 3:9 Shin Godaa Xoossay Addaame xeegidi, “Addaame, awun de7ay?” yaagis.
GEN 3:10 Addaamey, “Gannate giddon ne girsa si7ada taani kallo de7iya gisho yayyada qosetas” yaagis.
GEN 3:11 Godaa Xoossay, “Neeni kallo de7eysa new odiday oonee? Taani nena moopa gida mitha ayfepe madiyee?” yaagidi oychis.
GEN 3:12 Addaamey, “Taara daana mela neeni immida maccasiya he mitha ayfiyape taw immin mas” yaagis.
GEN 3:13 Godaa Xoossay, maccasiw, “Neeni hessa ayis oothadii?” yaagidi oychis. Maccasiya, “Tana shooshay cimmin mas” yaagasu.
GEN 3:14 Godaa Xoossay shooshaa, “Neeni haysa oothida gisho, mehepenne do7a ubbaafe aadhada baadetidaba gida. Neeni ne ulon biittara gooshetana; ne de7o laytha ubban baana laaccana.
GEN 3:15 Taani, ne giddoninne maccase giddon, ne sheesha giddoninne I sheesha giddon morketethi wothana. I ne huuphiya qoxana, neka iya gindiya dukana” yaagis.
GEN 3:16 Maccasiw Godaa Xoossay, “Ne qanthatida ageenan daro un7etana. Neeni wolqaama waayen na7a yelana. Gidoshin, neeni ne azinaara daanaw amottana; I nena haarana” yaagis.
GEN 3:17 Godaa Xoossay Addaameko, “Neeni ne mache oda si7ida gishonne taani nena moopa gida mitha ayfiyape neeni mida gisho, biittay ne gaason baadetidaysa gido. Neeni ne de7o laytha ubban gita daabursan biitta oothada maana.
GEN 3:18 Biittay new agunthinne harme dolisana; neeni biittafe dolidi kaxiyaba maana.
GEN 3:19 Neeni ne medhetida biitta simmana gakanaw daaburan cawatada oothida ne kathi maana. Neeni biittafe medhetida gisho biitta simmana” yaagis.
GEN 3:20 Addaamey ba machiw de7oy de7iya asa ubbaas aayo gidiya gisho Hewaanno gidi sunthis.
GEN 3:21 Godaa Xoossay Addaamenne iya machiw ite giigisidi mayzis.
GEN 3:22 Godaa Xoossay, “Hiza asi lo77onne iita eron nuupe issuwada gidis. Enti banta kushiya yeddidi, de7o immiya mitha ayfiyape ekidi moonna melanne merinaw de7on doona mela teqetanaw koshshees” yaagis.
GEN 3:23 Hessa gisho, enti banta medhetida biitta oothana mela Godaa Xoossay Edene Gannatepe enta kessis.
GEN 3:24 Yaatidi, de7o immiya mithaako efiya ogiya naagana mela Kirubeela geetetiya de7o medhetethatanne shireti shireti wodhiya tama laco mashshe Edene Gannatepe doloha baggara wothis.
GEN 4:1 Addaamey ba mache Hewaannira aqis. Iya qanthatada adde na7a yelasu. “Goday tana maaddin adde na7a demmas” gada Qaayela gada sunthasu.
GEN 4:2 Iya ishaa Aabela yelasu. Aabeli dorse heemmees qassi Qaayeli biitta oothees.
GEN 4:3 Undenna wodepe guye, Qaayeli ba gaden kaxida kathaafe Godaas yarsho yarshis.
GEN 4:4 Shin Aabeli ba dorsa wudiya giddon bayra yeletidaysa shukidi iya ashuwape modho bagga yarshis. Goday Aabelanne iya yarshuwa ekis.
GEN 4:5 Shin Qaayelanne iya yarshuwa ekibeenna. Hessa gisho, Qaayeli daro yilotis; iya som7oy dhumis.
GEN 4:6 Goday Qaayelako, “Ayis yilotay? Ne som7oy ayis dhumidee?
GEN 4:7 Neeni lo77o oothidaba gidiyako, ne som7oy pashka gidennee? Shin neeni lo77o oothonna ixiko, nagari do7ada ne pengen naagees. I nena haaranaw koyees, shin neeni iya xoonanaw bessees” yaagis.
GEN 4:8 Hessafe guye, Qaayeli ba ishaa Aabelako, “Ane demba bessi boos” yaagis. Enti demban de7ishin, Qaayeli ba ishaa Aabela bolla dendidi iya wodhis.
GEN 4:9 Goday Qaayela, “Ne ishay Aabeli awunee?” yaagidi oychis. Qaayeli zaaridi, “Taani erike; ta isha naagey taneyee?” yaagis.
GEN 4:10 Goday Qaayela, “Haysa ayis oothadii? Heko, ne ishaa suuthay biittafe taako xillo pirdas waassees.
GEN 4:11 Neeni baadetidaba gidiya gisho biitta zaarada oothanaw danda7aka. Ne ishaa wodhadasa iya suuthaaka biittan gussadasa.
GEN 4:12 Neeni oothinka biittay new ayfena; bete asada neeni sa7a bolla toylattada daaburana” yaagis.
GEN 4:13 Qaayeli Godaako, “Ne ta bolla pirdida pirday ta wolqafe bolla.
GEN 4:14 Neeni tana hachi biittafe yedethaasa; ne sinthafeka haassasa. Bete asada taani sa7a bolla daaburana; tana demmiya oonika wodhana” yaagis.
GEN 4:15 Goday iya, “Nena oonika wodhenna; wodhiko, taani laapun toho halo keyana” yaagis. Hessa gisho, iya demmiya oonika wodhonna mela Goday iya bolla naagiso malla wothis.
GEN 4:16 Qaayeli Godaa sinthafe keyidi, Edene baggafe doloha baggan de7iya Nooda, biittan de7is.
GEN 4:17 Qaayeli ba machera aqis; iya qanthatada Heenoke yelasu. He wode Qaayeli katama keexidi, he katama ba na7aa sunthan “Heenoke” gidi sunthis.
GEN 4:18 Heenokey Gayda yelis. Gaydi Ma7eela yelis. Ma7eeli Matusa7eela yelis. Matusa7eeli Laameha yelis.
GEN 4:19 Laamehi Adonne Siilo geetetiya nam7u macho ekis.
GEN 4:20 Ada Yabaala yelasu. Yaabali mehe haariyanne dunkaanen de7iya asata aawa.
GEN 4:21 Iya ishaa sunthay Yubaala. Yubaali qassi diithi diixeysatanne suusul7e punniya asata ubbaa aawa.
GEN 4:22 Siila qassi Tubalqayna geetetiya na7aa yelasu. Tubalqayni naase biratapenne biratape dumma dumma miisheta qoxeysata aawa. Tubalqayna michiya Na7imo.
GEN 4:23 Issi gallas Laamehi ba macheta, “Ade, Siile, si7ite; ta macheto, taani odiyaba hayzite. Issi pantha addey tana dechidi madunxisida gisho, taani iya wodhas.
GEN 4:24 Qaayela haluwa keyanaw laapun kushe koshshiko, Laameha haluwa keyanaw laapun tammanne laapun kushe koshshees” yaagis.
GEN 4:25 Addaame machiya hara adde na7aa yelasu. Yaatada, “Qaayeli wodhida Aabela gisho Xoossay taw hara na7a immis” gada iya Seeta gada sunthasu.
GEN 4:26 Seeti adde na7a yelidi iya “Henoosa” gidi sunthis. Asay Godaa suntha xeegidi goyinno doomiday he wode.
GEN 5:1 Addaame yeletethay haysafe kaallidi xaafetidaysa. Xoossay ase medhida gallas bana daanisidi medhis.
GEN 5:2 I addenne maccas oothi medhidi enta anjis. Enta medhidi Ase (Addaame) gidi sunthis.
GEN 5:3 Addaamey 130 laythi de7idi, bana daaniya adde na7a yelidi iya “Seeta” gidi sunthis.
GEN 5:4 Addaamey Seeta yelidaape guye 800 laythi de7is. Hara adde naytanne macca nayta yelis.
GEN 5:5 Addaamey 930 laythi de7idi hayqis.
GEN 5:6 Seeti 105 laythi de7idi Henoosa yelis.
GEN 5:7 Seeti Henoosa yelidaape guye, 807 laythi de7is. Hara adde naytanne macca nayta yelis.
GEN 5:8 Seeti 912 laythi de7idi hayqis.
GEN 5:9 Henoosi 90 laythi de7idi, Qaynana yelis.
GEN 5:10 Henoosi Qaynana yelidaape guye, 815 laythi de7is. Hara adde naytanne macca nayta yelis.
GEN 5:11 Henoosi 905 laythi de7idi hayqis.
GEN 5:12 Qaynani 70 laythi de7idi, Malal7eela yelis.
GEN 5:13 Qaynani Malal7eela yelidaape guye, 840 laythi de7is. Hara adde naytanne macca nayta yelis.
GEN 5:14 Qaynani 910 laythi de7idi hayqis.
GEN 5:15 Malal7eeli 65 laythi de7idi, Yaareda yelis.
GEN 5:16 Malal7eeli Yaareda yelidaape guye, 830 laythi de7is. Hara adde naytanne macca nayta yelis.
GEN 5:17 Malal7eeli 895 laythi de7idi hayqis.
GEN 5:18 Yaaredi 162 laythi de7idi, Heenoke yelis.
GEN 5:19 Yaaredi Heenoke yelidaape guye, 800 laythi de7is. Hara adde naytanne macca nayta yelis.
GEN 5:20 Yaaredi 962 laythi de7idi hayqis.
GEN 5:21 Heenokey 65 laythi de7idi, Matusaala yelis.
GEN 5:22 Matusaala yelidaape guye, Heenokey 300 laythi Xoosse ufaysiya de7o de7is. Hara adde naytanne macca nayta yelis.
GEN 5:23 Heenokey 365 laythi de7is.
GEN 5:24 Xoossi iya baako ekida gisho simmidi bentibeenna.
GEN 5:25 Matusaali 187 laythi de7idi, Laameha yelis.
GEN 5:26 Matusaali Laameha yelidaape guye, 782 laythi de7is. Hara adde naytanne macca nayta yelis.
GEN 5:27 Matusaali 969 laythi de7idi hayqis.
GEN 5:28 Laamehi 182 laythi de7idi, adde na7a yelis.
GEN 5:29 Yaatidi, “Ha na7ay Goday baaddida biitta bolla ha daabura ooso ubbaafe nuna shempisana” gidi iya Nohe gidi sunthis.
GEN 5:30 Laamehi Nohe yelidaape guye, 595 laythi de7is. Hara adde naytanne macca nayta yelis.
GEN 5:31 Laamehi 777 laythi de7idi hayqis.
GEN 5:32 Nohey 500 laythi de7i simmidi heedzu adde nayta Seema, Kaamanne Yaafeta yelis.
GEN 6:1 Asay sa7a bolla darida wode entaw macca nayti yeletidosona.
GEN 6:2 “Xoossaa nayta” geetetiya medhetethati he macca nayti mala lo77o gideysa be7idi entafe bantaw dooridaysata machidosona.
GEN 6:3 Goday, “Asas de7o immiya ta Ayyaanay asan merinaw deenna. Asi hayqeysa gidiya gisho, hizape iya laythay issi xeetanne laatama gidana” yaagis.
GEN 6:4 He wodenne hessafe guye, Xoossa nayti asa macca nayta ekin, nayti yeletida wode, wogga adussa asati sa7a bolla de7idosona. Enti beni wode olas minonne eretida asata.
GEN 6:5 Goday he wode sa7a bolla de7iya asa iitatethi daridaysanne enta wozanay ubba wode qopiyabay iita xalaala gididaysa
GEN 6:6 be7idi, ase ha sa7a bolla medhidaysan azzanis; ba wozanan daro qiirotis.
GEN 6:7 Taani ase ayis medhadina gada qiirotas. Hessa gisho, Goday, “Taani medhida ase, mehe, do7a, sa7ara gooshetiya medhetethatanne salo kafota sa7a bollafe dhaysana” yaagis.
GEN 6:8 Shin Nohey Godaa sinthan saba demmis.
GEN 6:9 Nohe taarkey haysafe kaallidi xaafetidaysa. Nohey ba wode de7iya asa giddofe Xoossaa ufaysiyanne suure asi.
GEN 6:10 Nohey Seema, Kaamanne Yaafeta geetetiya heedzu adde nayta yelis.
GEN 6:11 He wode biittay kumethi Xoossa sinthan tunis; biitta ubbay geellatethan kumis.
GEN 6:12 Xoossay ha biitta xeelliya wode sa7an de7iya asa ubbay banta ogiya tunisidi de7eysa be7is.
GEN 6:13 Hessa gisho, Xoossay Nohe haysada yaagidi kiittis; “Taani asa ubbaa dhaysana hanayis. Enta gaason biittay geellatethan kumida gisho, ase biittafe dhaysana.
GEN 6:14 Hessa gisho, mino mithafe new markabe keexa. He markabiya giddon daro qol7ata kessa. Yaatada sooranne karera made melaban meesha.
GEN 6:15 Markabiya haysada yaatada keexa; adussatethaa 300 wadha, gompaa 50 wadha, geesa 30 wadha ootha.
GEN 6:16 Markabiyas kaara medha; kaarapenne godaape giddon issi wadha gidiya bessi dooya agga. Pengiya markabiyas miye baggara kessa; markabiya heedzu pooqe kessada keexa.
GEN 6:17 “Taani salope garsan shempora de7iya medhetetha ubbaa dhaysanaw dhayo haatha yeddada ha sa7aa bolla de7iyaba ubbaa dhaysana.
GEN 6:18 Shin taani ta caaquwa neera caaqana. Neeni, ne machiw, ne adde naytanne enta macheta ekada markabiya giddo gela.
GEN 6:19 Enti neera de7on daana mela, de7oy de7iya medhetetha ubbaafe qommon qommon addenne macca nam7a nam7a oothada, markabiya giddo gelsa.
GEN 6:20 Dumma dumma qommo kafotape, dumma dumma qommo mehetapenne sa7ara gooshetiya dumma dumma qommo medhetetha ubbaafe nam7a nam7a gididi de7on daana mela neeko yo.
GEN 6:21 Qassi hintenne do7ati maanaw dumma dumma qommo miya kathi efada, markabiya giddon qola” yaagis.
GEN 6:22 Nohey ubbabaaka Xoossay kiitidaysada oothis.
GEN 7:1 Hessafe guye, Goday Nohe haysada yaagis; “Neeni ne soo asa ubbaara markabiya giddo gela. Ha wodiya yeletethaa giddon ta sheniya poliday ne xalaala gididaysa be7as.
GEN 7:2 Neeni tuna gidonna mehenne do7a ubbaafe iya qommofe qommofe addenne macca laapun laapun, tuna mehenne do7a ubbaafe iya qommofe qommofe issi addenne issi macca gelsa.
GEN 7:3 Qassi salo kafotape iya qommofe qommofe addenne macca laapun laapun oothada, biitta ubbaa bolla dumma dumma kochay de7on daana mela neera ekada gela.
GEN 7:4 Laapun gallasape guye, taani oytamu gallasinne oytamu qamma ha sa7aa bolla ira bukisana. Yaatada taani medhida medhetetha ubbaa biitta bollafe quchana” yaagis.
GEN 7:5 Yaatin, Nohey Goday iya kiitida ubbaba oothis.
GEN 7:6 Dhayo haathay ha sa7aa bolla yida wode Nohes laythi usupun xeeta.
GEN 7:7 Nohey, iya adde nayti, iya machiyanne iya nayta macheti dhayo haathaafe attanaw markabiya giddo gelidosona.
GEN 7:8 Tuna gidonna mehepenne do7ape, tuna mehepenne do7ape kafotapenne biittara goosheteyisata ubbaafe
GEN 7:9 Xoossay Nohe kiitidaysada addenne maccas nam7a nam7a gididi, Noheko markabiya giddo gelidosona.
GEN 7:10 Laapun gallasape guye, dhayo haathay ha sa7a bolla yis.
GEN 7:11 Nohey usupun xeetu laythi de7in, nam7antho ageenan, tammanne laapuntha gallasan, biitta giddon de7iya gita ciimmuwa pulto ubbay dhuuqi aggis. Salon de7iya haatha maskooteti dooyetidosona.
GEN 7:12 Iray ha sa7aa bolla oytamu gallasinne oytamu qamma bukis.
GEN 7:13 Iri buka doomida gallas Noheynne iya machiya, iya adde nayti, Seemi, Kaaminne Yaafeti, iya nayta heedzata macheti issife markabiya giddo gelidosona.
GEN 7:14 Do7a ubbaafe ba qommon qommon, mehe ubbaafe ba qommon qommon, biittara gooshetiya ubbaafe ba qommon qommon, kafo ubbaafe ba qommon qommon entara issife gelidosona.
GEN 7:15 Shempora de7eysati ubbay nam7a nam7a gididi Noheko markabiyan gelidosona.
GEN 7:16 Xoossay Nohe kiitidaysada, medhetetha ubbaafe addenne macca gididi markabiya giddo gelin Nohepe guyera Goday markabiya pengiya gordis.
GEN 7:17 Dhayo haathay oytamu gallas sa7a bolla bukishe de7is. Haathay daridi markabiya biittafe pude denthis.
GEN 7:18 Haathay biitta bolla keehi darin, markabey haatha bolla tooketis.
GEN 7:19 Salope garsan de7iya zumati ubbay mitettana gakanaw haathay sa7a bolla keehi daris.
GEN 7:20 Haathay zumata xeerape aadhidi, tammanne ichashu wadha gakanaw diccis.
GEN 7:21 Yaatin sa7a bolla woxi qaaxiya medhetethati ubbay, kafoti, mehey, do7inne, asi ubbay hayqis.
GEN 7:22 Biitta bolla de7iya ba siidhera de7o shempo shempiya ubbayka hayqis.
GEN 7:23 Sa7a bolla de7oy de7iya ubbay, asay, mehey, do7aynne salo kafoti ubbay sa7ape qushetidosona. Noheynne iyara markabiya giddon de7eyisata xalaali attidosona.
GEN 7:24 He haathay pacconna xeetanne ishatamu gallas sa7a bolla gam7is.
GEN 8:1 Shin Xoossay Nohe, iyara markabiya giddon de7iya do7a ubbaanne mehe ubbaa qopidi sa7a bolla carko carkisin he haathay wodhi wodhi bis.
GEN 8:2 Qassi biitta giddon de7iya ciimmuwa pultoynne salon de7iya haatha maskooteti gordetidosona; irayka salon teqetis.
GEN 8:3 Yaanin, haathay xeetanne ishatamu gallas gakanaw wodhi wodhi bis.
GEN 8:4 Haathay wodhin laapuntha ageenan, tammanne laapuntha gallasan markabey Araraate zumata bolla uttis.
GEN 8:5 Haathay tammantha ageena gakanaw wodhi wodhi bis. Tammantho ageenas koyro gallas zumata xeerati bentidosona.
GEN 8:6 Oytamu gallasape guye, Nohey ba keexida markabiya maskootiya
GEN 8:7 dooyidi issi quuro kare yeddin quuroy haathay biitta bollafe melana gakanaw, yaanne haanne piradhishe gam7is.
GEN 8:8 Qassi Nohey haathay biitta bollafe wodhi wuridaako be7anaw issi holle kare yeddis.
GEN 8:9 Shin he holliya haathay biitta ubbaa bolla ha7ika de7iya gisho, shempiya bessi demmabuku. Hessa gisho, simmada, markabiyako yin, Nohey ba kushiya yeddidi, baako markabiya giddo ekis.
GEN 8:10 Hessafe guye, laapun gallas gam7idi, holliw zaaridi yeddis.
GEN 8:11 He holliya sa7i omarsiya wode iyako simmada yashe shamaho aacape duuthida irxa haythi ba doonan saxa ekada yasu. Yaatin, haathay biitta bollafe wodhidaysa Nohey eris.
GEN 8:12 Qassi Nohey hara laapun gallas gam7idi, he holliw zaaridi yeddis. Shin he holliya iyako simmada yabuuku.
GEN 8:13 Nohey usupun xeetanne issi laythi de7in, koyro ageenan koyro gallas, haathay biitta bollafe xiz7is. Nohey markabiya kamaa qaari xeellidi, biittay xiz7idaysa be7is.
GEN 8:14 Nam7antho ageenan laatamanne laapuntha gallasan, biittay kumethi melis.
GEN 8:15 Xoossay he wode Nohe haysada yaagidi kiittis;
GEN 8:16 “Neeni, ne machiw, ne adde naytanne ne nayta macheta ekada markabiya giddofe keya.
GEN 8:17 Enti yeletidi, darana mela de7oy de7iya medhetetha ubbaafe neera de7eyisata kafota, meheta, do7atanne biittara gooshetiya ubbaa neera kessa” yaagis.
GEN 8:18 Yaatin Nohey ba adde naytara, ba macheranne ba nayta machetara markabiya giddofe keyis.
GEN 8:19 Yaanin, meheynne do7ay, sa7ara gooshetiya medhetethay, kafoynne sa7a bolla woxi qaaxiyaba ubbay ba qommuwan qommuwan markabiya giddofe keyidosona.
GEN 8:20 Hessafe guye, Nohey Godaas yarsho bessi gimbidi tuna gidonna mehenne do7a ubbaafe, tuna gidonna kafo ubbaafe ekidi, giigisida bessan yarsho oothidi xuuggis.
GEN 8:21 Yaatin, Goday he yarshuwa peenuwa singidi, ba wozanan haysada yaagis; “Na7atethafe doomidi asi wozanan qopiyaba ubbay iita gidikoka taani asa qoho gisho gada nam7antho ha sa7aa baaddike. Qassi taani ha7i oothidaysada de7oy de7iya medhetetha ubbaa nam7antho dhaysike.
GEN 8:22 Ha biittay de7ida wode ubban, zeriya wodeynne cakiya wodey, meegoyinne hombey, boneynne balgoy, gallasinne qammi ubba wode daana” yaagis.
GEN 9:1 Xoossay Nohenne iya adde nayta haysada yaagidi anjis; “Yeletite, darite, sa7a ubbaa kumite.
GEN 9:2 Sa7aa do7ati, salo kafoti, biittan woxi qaaxiyabaynne abban de7iya moloti ubbay hintew yashshaninne dagaman de7o. Enti hintew haareto.
GEN 9:3 Taani doliya dumma dumma cil7obata hintew immidaysada, de7oy de7iya woxi qaaxiya medhetetha ubbay hintew kathi gidana mela immas.
GEN 9:4 Shin shempoy giddon de7iya gisho suuthi iya giddon de7iya asho moopite.
GEN 9:5 Oonika shempo wodhiday pirdetana. Qassi asa suuthi gussiya do7aka hayqon pirdana.
GEN 9:6 Xoossay ase bana daanisidi medhida gisho, asa suuthi gussiya oona gidikoka iya suuthayka asa kushen gukana.
GEN 9:7 Hinte yeletite, darite, hinte sheeshayka sa7a bolla daro” yaagis.
GEN 9:8 Hessafe guye, Xoossay Nohenne iyara de7iya iya adde nayta haysada yaagis;
GEN 9:9 “Hiza, taani ta caaquwa hintera, hinte sheesharanne de7oy de7iya medhetetha ubbaara caaqayis.
GEN 9:10 Taani ta caaquwa kafotara, mehiyara, sa7a do7a ubbaaranne, markabiyape hintera keyida, de7oy de7iya medhetetha ubbara caaqayis.
GEN 9:11 Taani hintera caaqidaysa mela hizape de7oy de7iya medhetethati dhayo haathan dhayokona; ha sa7aaka zaari dhayo haathi dhaysena” yaagis.
GEN 9:12 Qassika Xoossay, “Taani taapenne hintefe, de7oy de7iya medhetetha ubbaafe giddon caaqiya caaquwa mallay haysa;
GEN 9:13 Taani ta zuulla shaaran essas. I taapenne sa7a bolla de7iya medhetetha giddon de7iya caaquwas malla gidana.
GEN 9:14 Ta saluwa shaara mayzida wodenne shaaran zuulli eqida wode,
GEN 9:15 taapenne hintefe giddon, de7oy de7iya dumma dumma medhetetha ubbaafe giddon caaqida ta caaquwa akeekana. De7oy de7iya medhetetha ubbaa dhaysanaw hizape guye dhayo haathi yeenna.
GEN 9:16 Zuulli shaaran eqida wode ta iya be7ada taapenne sa7a bolla de7iya dumma dumma medhetetha ubbaafe giddon caaqida merina caaquwa akeekana” yaagis.
GEN 9:17 Xoossay Nohe, “Taani taapenne sa7a bolla de7oy de7iyaba ubbaafe giddon caaqida caaquwa mallay haysa” yaagis.
GEN 9:18 Markabiyape keyida Nohe adde nayti Seema, Kaamanne Yaafeta; Kaami Kanaane aawa.
GEN 9:19 Ha heedzati Nohe nayta; sa7a ubban de7iya asay entafe yeletidosona.
GEN 9:20 Nohey goshshancho; I woyne tokethan koyro asi.
GEN 9:21 Issi gallas Nohey he woyniyape uyidi mathotidi ba dunkaaniya giddon xire kallo zin7is.
GEN 9:22 Kanaane aawa Kaami ba aawa kalluwa be7idi, kare keyidi, ba nam7u ishatas odis.
GEN 9:23 Shin Seeminne Yaafeti afila ekidi, nam7ayka banta hashiyara hashiyara gathi oykidi, guye guthu hemeti gelidi, banta aawa kalluwa kammidosona. Enti banta aawa kalluwa be7oona mela banta ayfiya haraso zaaridosona.
GEN 9:24 Nohey mathoy aadhin, barkidi, iya kaalo na7ay oothidaba eris.
GEN 9:25 Nohey iyako, “Kanaaney baadetidaba gido! I ba ishatas wursetha aylle gido” yaagis.
GEN 9:26 Qassika Nohey, “Goday, Seema Xoossay galatetto! Kanaaney Seema aylle gido;
GEN 9:27 Xoossay Yaafeta biitta aasso. Yaafeta sheeshay Seema sheeshara wolla de7onna; Kanaaney Yaafeta aylle gido” yaagis.
GEN 9:28 Dhayo haathaafe guye, Nohey heedzu xeetanne ishatamu laythi de7is.
GEN 9:29 Nohey uddufun xeetanne ishatamu laythi de7idi hayqis.
GEN 10:1 Nohe nayta, Seema, Kaamanne Yaafeta yeletethay haysafe kaallidi xaafetidaysa. Dhayo haathaafe guye, entaw adde nayti yeletidosona.
GEN 10:2 Yaafeta adde nayti, Gomera, Maagoge, Madaya, Yawaana, Tubaala, Mosahanne Tirasa.
GEN 10:3 Gomera adde nayti, Askanaaza, Irfatanne Togarma.
GEN 10:4 Yawaana adde nayti, Elisha, Tarsesa, Kiximanne Rooda.
GEN 10:5 Haysati Yuushoy abban teqetida biittan de7iya Yaafeta sheeshatas mayzata. Enti banta biittan biittan, banta doonan doonaninne banta kawotethan kawotethan shaaketidi de7iya dereta.
GEN 10:6 Kaama adde nayti, Kuusha, Gibxe, Liibenne Kanaane.
GEN 10:7 Kuusha adde nayti, Saaba, Hawila, Saabita, Ra7imanne Sabtaka. Ra7ime adde nayti; Saabanne Dedaana.
GEN 10:8 Kuushi Namiruude yelis; Namiruudey ha sa7an koyro wolqaama olancho gidis.
GEN 10:9 Godaa maaden wolqaama shankancho gidis. Asay, “Namiruudeda Goday nena wolqaama shankancho kesso” gidi anjey hessa gishosa.
GEN 10:10 Iya kawotethaas koyro katamati Sana7oora biittan de7iya Babiloone, Ereka, Arkadanne Kaline.
GEN 10:11 I he biittafe Asoore bidi, Nanawe, Rehobootanne Kalaha keexis.
GEN 10:12 Qassi Nanawepenne Kalaha katamaape giddon Reseena keexis.
GEN 10:13 Mixiraymi, Luudeta, Anamimeta, Lahabeta, Naftuheta,
GEN 10:14 Patroosatanne Filisxeeme kochaa yelida Kasluheematanne Qaftooreta mayza.
GEN 10:15 Kanaaney ba bayra na7a Sidoonanne Heeta yelis.
GEN 10:16 Qassi Kanaane sheeshati Yaabuseta, Amooreta, Gergeseta,
GEN 10:17 Hiweta, Arketa, Siinata,
GEN 10:18 Arwaadeta, Xamaaratanne Hamaatata yelis. Hessafe guye, Kanaane sheeshati dumma dumma bessi laaletidosona.
GEN 10:19 Kanaane biitta zaway Sidoonape doomidi, Garaaranne Gaazara gakidi, Soodomenne Gamoora, Adaamanne Xaboyma bidi, Lasha7a gaki eqis.
GEN 10:20 Haysati Kaama sheeshata; entaw dumma dumma dooni, dumma dumma biittinne dumma dumma kawotethi de7ees.
GEN 10:21 Seemas nayti yeletidosona. I Yaafetas bayra ishanne Eboora nayta ubbaas mayza.
GEN 10:22 Seema adde nayti, Elama, Asoore, Arfakisaade, Luudenne Araame.
GEN 10:23 Araame adde nayti, Uxa, Hula, Geteranne Masheka.
GEN 10:24 Arfakisaadi Saala yelis. Saali Eboora yelis.
GEN 10:25 Ebooras nam7u adde nayti yeletidosona. Sa7an de7iya asay iya wode shaaketida gisho issuwa Pelega gidi sunthis. Iya ishaa sunthay Yoqxaana.
GEN 10:26 Yoqxaana sheeshati haysata. Entika Almodaada, Salefa, Hasermoota, Yaraha,
GEN 10:27 Hadoraama, Uzaala, Diqila,
GEN 10:28 Obaala, Abmaala, Saaba,
GEN 10:29 Ofira, Hawilanne Yobaaba. Haysati ubbay Yoqxaana sheeshata.
GEN 10:30 Enti de7ida heeray Meesape bidi doloha baggara de7iya derey dariya Safaara biitta gakees.
GEN 10:31 Haysati ubbay Seema sheeshata; entaw dumma dumma dooni, dumma dumma biittinne dumma dumma kawotethi de7ees.
GEN 10:32 Haysati ubbay banta sheeshan sheeshaninne banta kawotethan kawotethan xaafetida Nohe nayta. Dhayo haathaafe guye kawotethati haysatape sa7a ubbaa laaletidosona.
GEN 11:1 Sa7a bolla de7iya asi ubbay koyro issi doonan odetees.
GEN 11:2 Enti doloha baggafe dendidi bida wode Sana7oora biittan demba bessi demmidi yan uttidosona.
GEN 11:3 Enti issoy issuwako, “Haa yiite, xuube medhidi, minnana mela taman xuuggoos” yaagidosona. Enti shucha gisho xuube, urqa gisho made melaba,
GEN 11:4 ekidi, “Haa yiite, nu sunthaa xeegisanawunne qassi nuuni ha sa7a bolla laaletonna attana mela issi gita katamaanne xeeray salo gakiya pooqe keexoos” yaagidosona.
GEN 11:5 Shin Goday asati keexida gita katamaanne pooqiya be7anaw duge wodhis.
GEN 11:6 Goday haysada yaagis; “Heko, enti issi asi; enti ubbayka issi doonan odetidosona. Enti ha7i haysa oothanaw doomidosona. Enti bantaw oothanaw halchidaba polonna aggokona.
GEN 11:7 Yaaniya gisho, haayite; duge wodhidi enti issoy haasayiya doona issoy eronna mela enta doona dummayos” yaagis.
GEN 11:8 Goday enta hessafe sa7a ubbaa bolla laallin, enti katama keexeysa aggaagidosona.
GEN 11:9 Goday sa7an de7iya asa doona yan buqida gisho he katamaa sunthay Babiloone geetetis. Goday enta hessafe sa7a ubbaa bolla laallis.
GEN 11:10 Seema yeletethay haysafe kaallidi xaafetidaysa; dhayo haathaafe guye, nam7u laythi gidin, Seemas laythi xeeta gidida wode, Seemi Arfakisaade yelis.
GEN 11:11 Seemi Arfakisaade yelidaape guye, ichashu xeetu laythi de7is. Hara adde naytanne macca nayta yelis.
GEN 11:12 Arfakisaadi 35 laythi de7idi, Salaha yelis.
GEN 11:13 Arfakisaadi Saala yelidaape guye, 403 laythi de7is. Hara adde naytanne macca nayta yelis.
GEN 11:14 Saali 30 laythi de7idi, Eboora yelis.
GEN 11:15 Saali Eboora yelidaape guye, 403 laythi de7is. Hara adde naytanne macca nayta yelis.
GEN 11:16 Eboori 34 laythi de7idi, Pelega yelis.
GEN 11:17 Eboori Pelega yelidaape guye, 430 laythi de7is. Hara adde naytanne macca nayta yelis.
GEN 11:18 Pelegi 30 laythi de7idi, Ra7a yelis.
GEN 11:19 Pelegi Ra7a yelidaape guye 209 laythi de7is. Hara adde naytanne macca nayta yelis.
GEN 11:20 Ra7i 32 laythi de7idi, Saruga yelis.
GEN 11:21 Ra7i Saruga yelidaape guye, 207 laythi de7is. Hara adde naytanne macca nayta yelis.
GEN 11:22 Sarugi 30 laythi de7idi, Nakoora yelis.
GEN 11:23 Sarugi Nakoora yelidaape guye, 200 laythi de7is. Hara adde naytanne macca nayta yelis.
GEN 11:24 Nakoori 29 laythi de7idi, Taara yelis.
GEN 11:25 Nakoori Taara yelidaape guye, 119 laythi de7is. Hara adde naytanne macca nayta yelis.
GEN 11:26 Taari 70 laythi de7idi, Abrame, Nakooranne Haarane yelis.
GEN 11:27 Taara yeletethay haysafe kaallidi xaafetidaysa; Taari Abrame, Nakooranne Haarane yelis. Yaatin Haraani Looxe yelis.
GEN 11:28 Haraani ba aaway Taari paxa de7ishin, ba yeletida Kaldaaweta biittan, gita Uure kataman hayqis.
GEN 11:29 Abrameynne Naakorey nam7ayka machidosona. Abrame mache sunthay Soora. Qassi Nakoora mache sunthay Milko. Milka Haarana na7iw; Haaraney Milkanne Yosika aawa.
GEN 11:30 Soora maynthi gidida gisho iw na7i baawa.
GEN 11:31 Taari ba na7aa Abrame, ba na7aa Haarane na7aa Looxenne, ba na7aa Abrame machiw Soora ekidi, Kanaane biitta baanaw Kaldaaweta katamaa Uurepe dendis. Shin enti Kaarane katama gakidi yan uttidosona.
GEN 11:32 Taari 205 laythi de7idi Kaaranen hayqis.
GEN 12:1 Goday Abrameko, “Ne biittafe, ne deriyape, ne soo asaape, shaaketada ta nena bessiya biitta ba.
GEN 12:2 Ta nena wolqaama dere oothana, nena ta anjana ne suntha gita kessana; ne haratas anjo gidana.
GEN 12:3 Taani nena anjeyisata anjana; nena baaddeyisata baaddana, biitta bolla de7iya dere ubbay ne gaasora anjetana” yaagis.
GEN 12:4 Hessa gisho, Abramey Xoossay iya kiitidaysada keyis. Looxey iyara issife bis. Abramey Kaaranepe keyiya wode iyaw laythi laapun tammanne ichasha.
GEN 12:5 Abramey ba machiw Soora, ba isha na7a Looxe, Kaaranen de7ishe shiishida shaluwanne ba aylleta ubba ekidi Kanaane biitta bidi gakidosona.
GEN 12:6 Abramey Seekeman de7iya More geetetiya gita mithaako gakanaw kanthidi bis. He wode Kanaane asati he biittan de7oosona.
GEN 12:7 Xoossay Abrames yan qoncidi, “Ha biitta taani ne sheeshas immana” yaagis. Ika ba qoncida Godaas he bessan yarsho bessi giigisis.
GEN 12:8 He bessaafe dendidi Beetelepe doloha baggara de7iya zumako bis. Yan Beetele wuloha baggan, Gaye doloha baggan aggidi, ba dunkaaniya tokis; yan Godaas yarsho bessi giigisidi Godaa sunthaa xeegis.
GEN 12:9 Hessafe guye, Abramey bessafe besse aadhishe Negebe gakis.
GEN 12:10 He wode Kanaane biittan koshi keyis. Koshay minnida gisho guutha wode yan daanaw Abramey Gibxe biitta bis.
GEN 12:11 Gibxe gelanaw matiya wode Abramey ba mache Soorako, “Neeni mala lo77o gideysa taani erayis;
GEN 12:12 Gibxe asati nena be7idi, ‘Hanna iya machiw’ yaagidi tana wodhidi nena aggaagana.
GEN 12:13 Hessa gisho, ne gisho gidi taw lo77oba oothana melanne ta shempiya attana mela ‘Ta iyaw micho’ yaaga” yaagis.
GEN 12:14 Abramey Gibxe biitta gakida mela Gibxe asati Soora mala lo77o maccasi gidoysa be7idosona.
GEN 12:15 Gibxe Paarona moorinnati iyo be7idi daro nashshidi kawa Faaronas odidosona, iyoka kawa sinthe efidosona.
GEN 12:16 I gaason kawoy Abrame bonchidi mokis. Gujidika dorsata, miizata, hareta, gimaleta, adde aylletanne macca aylleta iyaw immis.
GEN 12:17 Shin Goday Abrame mache Soora gaason Gibxe kawanne iya keetha gado hargen shocis.
GEN 12:18 Hessafe guye, kawoy Abrame xeegisidi, “Ne ta bolla oothidabay haysi aybee? Iya ne macho gideysa ayis taw odabikii?
GEN 12:19 Ayis ta micho gada wordotadii? Ta iyo macho oothada ekas, shin attis; ne machiya hannashu eka ba” yaagis.
GEN 12:20 Hessafe guye, Abramenne iya machiw iyaw de7iyaba ubbara kessi yeddana mela Kawoy ba asata kiittis.
GEN 13:1 Abramey ba machiw Sooranne baw de7iyaba ubba ekidi Gibxefe Negebe mela biitta bis. Looxeyka iyara wolla bis.
GEN 13:2 Abramey he wode mehen, biraninne worqan daro duretis.
GEN 13:3 Abramey Nagebepe dendidi bessafe besse aadhishe Beetele gakanaw bis. Beetelepenne Gayepe giddon I koyro dunkaaniya tokida bessaanne
GEN 13:4 Godaas kase yarsho yarshida bessa gakidi, yan Abramey Godaa sunthaa xeegis.
GEN 13:5 Abramera wolla hemetiya Looxesika daro dorsati, deeshati, meheti, soo asatinne aylleti de7oosona.
GEN 13:6 He wode Abramesinne Looxes daro mehey de7iya gisho enti banta meheta heemmiya bessay xuummis.
GEN 13:7 Hessa gisho, Abrame meheta heemmeyisata giddoninne Looxe meheta heemmeyisata giddon kachi keyis. He wode Kanaane asatinne Parze asati he biittan de7oosona.
GEN 13:8 Hessa gisho, Abramey Looxeko, “Nuuni ishanta gidiya gisho nu giddon woyko nu meheta heemmeyisata giddon kachi daanaw bessena.
GEN 13:9 Biittay dalga gidiya gisho nu wolipe shaaketana. Ne haddirsa bagga biiko taani ushacha bagga baana; neeni ushacha bagga biiko taani haddirsa bagga baana” yaagis.
GEN 13:10 Looxey biitta yuuyi aadhidi xeelliya wode Yordaanose zangaaray, Godaa gannatiyada woyko Zo7aare baggara de7iya Gibxe biitta mela haathi kumidaysa be7is. Hessika, haniday Goday Soodomenne Gamoora geetetiya katamata dhaysanape sinthe.
GEN 13:11 Hessa gisho, Looxey Yordaanose zangaara ubba baw dooridi doloha bagga bis. Hessada hanidi issoy issuwafe shaaketidosona.
GEN 13:12 Abramey Kanaane biittan de7is. Shin Looxey Zangaaran de7iya katamata giddon Soodome matan ba dunkaaniya tokis.
GEN 13:13 He wode Soodome asay daro iitanne Godaa sinthan nagaranchota.
GEN 13:14 Looxey Abramepe shaaketidaape guye, Goday Abrameko, “Ne de7iya bessaafe pude dhoqu gada pudeha bagganne dugeha bagga, doloha bagganne wuloha bagga yedda xeella.
GEN 13:15 He neeni be7iya biitta ubba taani merinaw newunne ne sheeshas immana.
GEN 13:16 Taani ne sheesha biitta baanada darsana. Oonika biitta baana taybanaw danda7onaysada ne sheeshayka taybetenna.
GEN 13:17 Taani ha biitta new immana gisho dendada biitta adussatethaninne dalgatethan simereta.”
GEN 13:18 Hessa gisho, Abramey ba dunkaaniya shoddidi Kebroonan de7iya Mamire gita mithata matan de7anaw bis. Yan Godaas yarsho bessi giigisis.
GEN 14:1 Sana7oora kawoy Amrafeeli, Elsaare kawoy Ariyooki, Elama kawoy Kolodogomoorinne Goyma kawoy Tidaley oyddu kawotethati wolla,
GEN 14:2 ichashu kawotethatara, Soodome kawa Beraara, Gamoora kawa Bersara, Adaama kawa Sen7abera, Xiboyma kawa Sambaranne Zo7aara geetetiya Beella kawuwara oletanaw dendidosona.
GEN 14:3 Ha ichashu kawotethati issife shiiqidi Maxine Abba geetetiya Sidima zangaaran banta toora shiishidosona.
GEN 14:4 Ha kawotethati tammanne nam7u laythi Kolodogomooras haaretidosona shin tammanne heedzantho laythan iyaw kiitetonna ixidosona.
GEN 14:5 Tammanne oyddantho laythan Kolodogomoorinne iyara tobbida kawotethati banta olanchota eki bidi Raafaymeta Astarooten de7iya Qarnayman, Zuzayteta Haaman, Emimeta Sawen de7iya Qiratayman;
GEN 14:6 Qassi Hoora biitta asataka derey dariya Sayre biittan oli xoonidi, mela biitta matan de7iya Elfaraana geetetiya bessa gakanaw goodidosona.
GEN 14:7 Yaape simmidi, Qaadesa geetetiya Ayin Mispata yidosona. Amaaleqata biitta ubbanne Hazazon Tamaaren de7iya Amooreta biitta oli xoonidi oykidosona.
GEN 14:8 Hessafe guye, Soodome kawoy, Gamoora kawoy, Adaama kawoy, Zeboyma kawoy, Zo7aare geetetiya Beella kawoy dendidi Sidima zangaaran olas giigidosona.
GEN 14:9 Ha ichashu kawotethati, Elama kawara, Goyma kawara, Sana7oora kawaranne Elsaare kawara ha oyddu kawotethatara oletidosona.
GEN 14:10 He wode Sidima zangaaran madeda oykiyabati de7iya ollati de7oosona. Soodome kawoynne Gamoora kawoti olape attanaw baqatishe he ollan wullidosona. Shin hanko heedzu kawotethati zumako baqatidi attidosona.
GEN 14:11 Oyddu kawotethati Soodomeninne Gamooran de7iyaba ubba hari attoshin, enta kathaaka bonqidi efidosona.
GEN 14:12 Abrame isha na7ay Looxey Soodomen de7iya asi gidiya gisho ika baw de7iyaba ubbara di7etis.
GEN 14:13 Hessafe guye, di7eti bida asaape kessi ekida issi asi yidi hanidaba ubba Ibraawe addiya Abrahaames odis. He wode Abramey Amoore addiya Mamire gita mithata matan de7ees. Mamireynne iya ishati Eskolinne Aneeri olaa zaaranaw Abramera caaqidi uttidosona.
GEN 14:14 Abramey ba isha na7ay di7etidaysa si7ida wode ba son yeleti diccidi loohida 318 tooranchota ekidi enta geedo kaallidi Daane katama gakanaw bis.
GEN 14:15 I baara eki bida tooranchota qamma cugan cugan shaakidi morketa olidi xoonis. Damasqofe pudeha baggara de7iya Hoobe geetetiya bessi gakanaw goodis.
GEN 14:16 Yaatidi de7etidaba ubba, ba isha na7a Looxenne iyaw de7iyaba ubba, maccasaanne hara asata woossis ekis.
GEN 14:17 Abramey Kolodogomoorinne iyara tobbida kawota xoonidi simmiya wode Soodome kawoy, Kawota Zangaara geetetiya Sawe Zangaaran iya mokanaw keyis.
GEN 14:18 Ubbaafe Dhoqa Xoossaa kahiney, Saleema kawoy Malkexaadeqi uythinne woyne ekidi yis.
GEN 14:19 I haysada Abrame anjis; “Salonne sa7a medhida, Ubbaafe Dhoqa Xoossay nena anjo.
GEN 14:20 Ne morketa ne kushen aathidi immida, Ubbaafe Dhoqa Xoossay galatetto” yaagidi anjis. Abramey ba demmidaba ubbaafe asraata kessidi Malkexaadeqas immis.
GEN 14:21 Soodome kawoy Abrameko, “Shaluwa ne ekada, asaa taw imma” yaagis.
GEN 14:22 Shin Abramey Soodome kawako, “Taani Godaas, saluwanne sa7a medhida Ubbaafe Dhoqa Xoossas ta kushiya denthas.
GEN 14:23 Neeni, ‘Abrame dure oothiday tana goonnaada’ hari attoshin kire woyko caamma wodoroka ekike.
GEN 14:24 Ta asati midaysafe attishin ta aybibaaka ekike. Qassi taara bida Aneeri, Askoolinne Mamirey bantana gakiyaba eko” yaagis.
GEN 15:1 Hessafe guye, Goday Abrames amuhon qoncidi, “Abrame babofa, taani new gondalle, Ne woytoy gita” yaagis.
GEN 15:2 Shin Abramey, “Abeeti Ubba Haariya Godaw, neeni immiya woytoy taw aysee? Taw yeloy baawa; buroo tana laattanay Damasqo Eli7azara gidennee?
GEN 15:3 Abramey, neeni taw yelo immaboonna gisho ta keethan de7iya ta aylley tana laattana” yaagis.
GEN 15:4 Goday iyako, “Ha aylley nena laattenna, shin ne gulbatape keyana ne na7ay nena laattana” yaagis.
GEN 15:5 Yaagi simmidi iya kare kessidi, “Pude salo xeella, neeni xoolintota paydanaw danda7iko payda, hiza ne sheeshayka hessada gidana” yaagis.
GEN 15:6 Abramey Godaa ammanis; Goday iyaw hessa xillotethi oothidi ekis.
GEN 15:7 Qassika Goday iyako, “Neeni ha biitta laattana mela Kaldaaweta biittafe Uure katamaape nena kessida Goday tana” yaagis.
GEN 15:8 Shin Abramey iyako, “Abeeti Ubba Haariya Godaw ha biitta ta laatanaysa aybin ero?” yaagis.
GEN 15:9 Goday iyako, “Heedzu laythi gidida issi ussi, issi deeshi, issi dorsenne hessadaka hollenne gorille taw ekada ya” yaagis.
GEN 15:10 Abramey hessata ubba Xoossas ehidi kafoti attishin, harata qanxidi nam7u kessi shaakidi issuwa issuwa ginan wothis.
GEN 15:11 Ankoti he ashuwa maanaw bollafe wodhidosona; shin Abramey enta goodis.
GEN 15:12 Awi wullana haniya wode Abrame wolqaama dhiskoy shoci yeggis. Daganthiya wolqaama dhumi iya bolla wodhis.
GEN 15:13 Goday Abrameko, “Ne sheeshay allaga biittan bete asi gididi daanaysa loythada era; enti aylletethan oyddu xeetu laythi naaqeti haaretana.
GEN 15:14 Shin entana aylletethan haariya deriya ta pirdana; enti he biittafe keyishe daro shalo ekidi keyana.
GEN 15:15 Nena gidiko, neeni ne mayzatako sarotethan baana. Neeni daro cimada moogetana.
GEN 15:16 Ne sheeshay buroo oyddantho yeletethan ha biitta simmana. Ayis giiko, Amooreta nagaray pirdetana likiya buroo gakibeenna” yaagis.
GEN 15:17 Awi wullin sa7i dhuma linxi gin, cooce tama cuyinne tama lacoy bentidi shaaketida ashuwa giddora aadhis.
GEN 15:18 He gallas Goday Abrames, “Gibxe shaafape doomidi Efraxiisa shaafa gakanaw de7iya biitta ubbaa taani ne sheeshas immana.
GEN 15:19 He biittay Qeenata biitta, Qenezata biitta, Qadimooneta biitta,
GEN 15:20 Hiteta biitta, Parzeta biitta, Raafaymeta biitta,
GEN 15:21 Amooreta biitta, Kanaaneta biitta, Gergeseta biittanne Yaabuseta biitta” yaagidi caaqis.
GEN 16:1 Abrame machiya Soora iyaw na7a yelabuuku. Shin iw Gibxefe yida Aggaaro geetetiya gadhindoy de7awusu.
GEN 16:2 Soora Abrameko, “Taani na7a yelonna mela Goday tana yelo diggis. Neeni bada ta ayllera aqa; taani I baggara na7a demmanekonne ooni eri” yaagasu. Abramey I qofa ekis.
GEN 16:3 Abramey Kanaane biittan tammu laythi de7idaape guye, iya machiya Soora Gibxefe yida ba aylliw Aggaaro ba azinaas macho oothada immasu.
GEN 16:4 Abramey Aggaaro ekis, iyaka qanthatasu. Iya baw qanthatidaysa erida wode ba godatiw kadhasu.
GEN 16:5 Soora Abrameko, “Ha qohuwas tana gathiday nena; taani ta aylliw new immin, iya qanthatidysa be7ada tana kadhawusu. Nebaanne tabaa Goday pirdo” yaagasu.
GEN 16:6 Abramey Soorako, “Hanno be7a ne aylliw iya ne kushena; nena lo77idaba ootha” yaagis. Hessafe guye, Soora Aggaaro un7ethin yaape keyada baqatasu.
GEN 16:7 Godaa kiitanchoy Aggaaro mela biittan, pulto haatha matan demmis; he pultoy shuura biitta efiya ogiya matan de7ees.
GEN 16:8 Kiitanchoy Aggaaro, “Soora ayllete, Aggaare, awupe yadii? Awu bay?” yaagidi oychis. Aggaara zaarada, “Taani ta godate Soorape baqatas” yaagasu.
GEN 16:9 Godaa kiitanchoy iiko, “Ne godateko simma bada iw haareta” yaagidi odis.
GEN 16:10 Gujidika Godaa kiitanchoy iiko, “Ne yeletetha oonika taybanaw danda7onnaada oothada darsana” yaagis.
GEN 16:11 Qassika Godaa kiitanchoy iyo, “Heko neeni qanthatadasa, Neeni adde na7a yelana. Xoossay ne waasuwa si7ida gisho Iya neeni Isma7eela gada sunthana
GEN 16:12 I bazzo hare mela gidana, I ba qesiya asa ubba bolla denthana, Qassi asa ubbayka banta qesiya iya bolla denthana. I ba ishata ubbara ixon de7ana” yaagis.
GEN 16:13 Aggaara baara odetida Godaa, “Neeni Tana Be7iya Xoossa” yaagada xeegasu. “Taani tana be7eysa be7as” yaagasu.
GEN 16:14 Hessafe dendoysan he pulto haathay, “Tana Be7iya De7o Xoossa Pultuwa” geetetidi xeegetis. He haatha pultoy Qaadesapenne Bareedape giddon de7ees.
GEN 16:15 Aggaara Abrames adde na7a yelasu; Abramey yeletida na7a Isma7eela gidi sunthis.
GEN 16:16 Aggaara Abrames Isma7eela yeliya wode Abrames laythi hospun tammanne usupuna.
GEN 17:1 Abrames laythi uddufun tammanne uddufuna gidiya wode, Goday iyaw qoncidi, “Taani Ubbaa Danda7iya Xoossa, taw kiiteta, ta sinthan polo gida.
GEN 17:2 Ta giddoninne ne giddon de7iya caaquwa ta minthana; ne zeretha ta taybanaw danda7etonada oothana” yaagis.
GEN 17:3 Abramey ba som7uwara sa7an duge gufannin Xoossay iyako,
GEN 17:4 “Heko ta new caaqiya caaqoy haysa; ne daro kawotethatas aawa gidana.
GEN 17:5 Ta nena daro kawotethatas aawa oothana gisho hizape ne sunthay Abrame gidi xeegetenna, shin ne sunthay Abrahaame gidi xeegetana.
GEN 17:6 Taani ne yeletetha darsana, ta nena daro dere kessana, kawoti neepe keyana.
GEN 17:7 Taani newunne neepe guyen ne sheeshas Xoosse gidana mela merina caaquwa ta giddoninne ne giddon, neepe guyera yaa ne sheesha giddon, yeletethafe yeletetha gakanaw ta caaqas.
GEN 17:8 Neeni ha77i bete gidada de7iya Kanaane biitta ubba newunne neepe guyera yaa ne sheeshas merina laata gidana mela new immana; qassi taani enta Xoossa gidana” yaagis.
GEN 17:9 Qassika Xoossay Abrahaame, “Nena gidiko ta caaquwa naaga; neka neepe guyera yaa ne sheeshati, yeletethafe yeletetha gakanaw naagite.
GEN 17:10 Ta gidduwaninne ne gidduwan, neepe guyera yaa ne sheesha giddon hinte naagana caaqoy haysa; hinte gidduwan de7iya adde ubbay qaxareto.
GEN 17:11 Hinte addetetha koohuwa dookalite; hessi ta giddoninne hinte giddon de7iya caaquwas malla gidana.
GEN 17:12 Hizape yaana yeletethan adde nayti ubbay yeletida hospuntho gallasan qaxareto. Ne son yeletidaysata gidin, woyko allagape miishen shametida aylleta gidin, ne zerethafe gidonayisata dookala.
GEN 17:13 Ne son yeletidaysata gidin woyko miishen shametidaysati qaxaretanaw bessees. Haysan hinte ashuwan de7iya ta caaqoy merina caaqo gidana.
GEN 17:14 Oonika qaxaretona de7iya adde asi ubbay ta caaquwa menthida gisho ba asaape duuxo” yaagis.
GEN 17:15 Xoossay Abrahaameko, “Hizape ne mache sunthay Soora gidi xeegetofo; hachife doomidi I sunthay Saara geeteto.
GEN 17:16 Taani iyo anjana; taani iipe new adde na7a immana. Taani iyo anjana gisho iya kawotethatas aayo gidana; deriya kawoti iipe keyana” yaagis.
GEN 17:17 Abrahaamey ba som7uwara sa7an gufannidi, “Hay asaw, xeetu laytha asi na7a yelanee? Uddufun tammu laythi gidida Saarika na7a yelanee?” yaagidi ba wozanan miicis.
GEN 17:18 Abrahaamey Xoossako, “Isma7eeli tana laattana mela ne iya anjarki” yaagis.
GEN 17:19 Shin Xoossay, “Akay, ne machiya Saara new adde na7a yelana, neeni iya Yisaaqa gada sunthana. Taani iyape guyera yaa iya zerethas merina caaqo gidana mela iyara ta caaquwa caaqana.
GEN 17:20 Isma7eelaba ne tana oychida oysha si7as. Taani iyaka anjana. Ta iya ayfisana, iya yeletetha loytha darsana. I tammanne nam7u haareysatas aawa gidana. Taani iya gita kawotethi kessana.
GEN 17:21 Shin ta caaquwa wonto laythi hanoode Saara new yeliya na7a Yisaaqara caaqana” yaagis.
GEN 17:22 Xoossay Abrahaamera odetidi ongidaape guye iyape shaaketidi pude bis.
GEN 17:23 He gallas Abrahaamey ba na7a Isma7eela, ba son yeletidaysatanne ba miishen shammidaysata, ba son de7iya adde asa ubba Xoossay iya kiitidaysada qaxaris
GEN 17:24 Abrahaamey qaxaretiya wode iyaw laythi uddufun tammanne uddufuna.
GEN 17:25 Iya na7ay Isma7eeli qaxaretiya wode tammanne heedzu laytha na7a.
GEN 17:26 Abrahaameynne iya na7a Isma7eeli nam7atika he gallas qaxaretidosona.
GEN 17:27 Abrahaame son de7iya adde ubbay, iya son yeletidaysatinne miishen shammetidaysati ubbay iyara qaxaretidosona.
GEN 18:1 Abrahaamey Mamire gita mithata garsan ba dunkaaniya pengen seeta gallas uttidashin Goday iyaw qoncis.
GEN 18:2 Abrahaamey dhoqu gidi xeelliya wode iya matan eqida heedzu asata be7is. I enta be7idi entara gahetanaw ba dunkaaniya pengefe dendidi entako woxi bidi enta sinthan ziggis.
GEN 18:3 Yaani simmidi, “Abeeti ta godaw, ta ne sinthan saba demmidaba gidiko tana ne aylliya aggada aadhofa.
GEN 18:4 Guutha haathi yiiko hinte tohoy meecetiko ha mitha kuyan shempi ekite.
GEN 18:5 Hinte taako hinte aylliyako yida gisho xaalidi hinte biya bessi baana mela taani hintew miyaba ehana” yaagis. Entika, “Daro lo77o, ne gidaysada ootha” yaagidosona.
GEN 18:6 Abrahaamey ellesidi Saariko dunkaaniya giddo gelidi, “Ellesada heedzu gabate lo77o dhiille eka munuqada uythu uuka” yaagis.
GEN 18:7 Abrahaamey qassi ba meheta giddo woxi bidi lo77o buldubulda mara dooridi ba issi aylliyas immin I ellesidi shukidi giigisis.
GEN 18:8 Yaatidi Abrahaamey meqa maathinne giigisida mara ashuwa imathata sinthe aathis; enti mishin I mitha garsan enta matan eqis.
GEN 18:9 Enti Abrahaameko, “Ne machiya Saara awunee?” yaagidi oychidosona. Ika, “Hini dunkaaniya giddona” yaagis.
GEN 18:10 Goday iyako, “Wonto laythi hannoode tuma ta neeko simmana; ne machiya Saara adde na7a yelana” yaagis. Saara he wode iyape guye baggara de7iya dunkaaniya pengen eqada hessa si7awusu.
GEN 18:11 Abrahaameynne Saari banta laythan daro cimidosona. Saara na7a yeliya wodepe aadhasu.
GEN 18:12 Hessa gisho, Saara ba wozanan, “Taaninne ta goday nam7ayka cimidaape guye waanidi ha ufaysay hananee?” yaagada miicasu.
GEN 18:13 Goday Abrahaameko, “ ‘Taani cimidaape guye na7a yelane’ gada Saara ayis miicay?
GEN 18:14 Godaas danda7etonabay tuma de7iyee? Ta new gidaysada wonto laythi hannoode ta simmada yaana; he wode Saara adde na7a yelana” yaagis.
GEN 18:15 Saara yashetida gisho, “Taani miicabike” gada lahasu. Shin I, “Ne tuma miicadasa” yaagis.
GEN 18:16 Asati baanaw dendishe Soodome duge xeellidosona. Abrahaamey entana moyzanaw entara keyis.
GEN 18:17 Xoossay iyako, “ta oothanaw haniyaba Abrahaamepe qosaneyee?
GEN 18:18 Abrahaamey tuma gitanne wolqaama kawotethi gidana. Ha biitta kawotethati ubbay iyan anjetana.
GEN 18:19 Xillotethinne suure pirda oothidi Godaa ogiya naagana mela ba naytanne iyape guyera yaa ba soo asaa zorana mela taani iya dooras. Hessika, Xoossay Abrahaames immana gida ufaysa polanaasa” yaagis.
GEN 18:20 Goday Abrahaameko, “Soodome bollanne Gamoora bolla waassiya waasoy daris; enta nagarayka daro deexis.
GEN 18:21 Hessa gisho, enta oosoy enta waasuwa meleko be7anaw taani duge wodhana; qassi hessa mela iita gidonaako shaaka erana” yaagis.
GEN 18:22 Hessafe guye, nam7u asati Soodomeko simmidi bidosona, shin Abrahaamey Godaa sinthan eqidasuwan de7ees.
GEN 18:23 Abrahaamey Godaako shiiqidi, “Tuma neeni xillota iitatara issife dhaysannee?
GEN 18:24 He katamen ishatamu xillo asati de7iko ne dhaysannee? Yan de7iya ishatamu xillo asata gisho he katama ashshikii?
GEN 18:25 Hessa mela oosoy neepe haako; xilluwa iitaara woli gathada wodheysi, xilluwanne iita issi ayfiyan xeeleysi neepe haako. Ha biitta ubba pirdiya neeni xillo pirdikii?” yaagis.
GEN 18:26 Goday, “Ta Soodomen ishatamu xillota demmiyako he bessa ubba enta gisho gada ashshana” yaagis.
GEN 18:27 Abrahaamey zaaridi, “Taani biittanne bido gidada ta Godaara odetanaw minetakichas;
GEN 18:28 ishatamu xillotape ichashati pacikochii? Neeni he ichashata gisho gada he katama ubba dhaysaneyee?” yaagis. Goday, “Taani oytamanne ichashu xillota demmiko he katama dhaysike” yaagis.
GEN 18:29 Abrahaamey zaaridi, “Yan oytamu xalaali de7ikochii?” yaagis. Ika, “Oytamata gisho gada he katama dhaysike” yaagis.
GEN 18:30 Qassika Abrahaamey zaaridi, “Hay ta Godaw, tana hanqetofa, taani gujadaka odetana. Hastamu xalaali de7ikochii?” yaagis. Goday zaaridi, “Taani yan hastamu demmiko dhaysike” yaagis.
GEN 18:31 Abrahaamey, “Taani Godaara odetanaw minetakichas; ooni eri yan laatamu xalaali de7ikochi” yaagis. Godayka, “He laatamata gisho gada dhaysike” yaagis.
GEN 18:32 Abrahaamey qassika, “Hay ta Godaw, tana hanqetofa ta issi toho odetana, yan tammu xalaala demmikochii?” yaagis. Ika, “Tammata gisho gada taani he katama dhaysike” yaagis.
GEN 18:33 Goday Abrahaamera odetidi ongidaape guye bis; Abrahaameyka ba soo simmis.
GEN 19:1 Nam7u kiitanchoti omarsishin Soodome katamaa gakidosona. He wode Looxey he katamaa pengen uttis. Looxey enta be7idi mokanaw dendidi entako bis. Ba som7uwa sa7a gathidi entaw ziggis.
GEN 19:2 I entako, “Ta godato, hinte aylliya soo gelerketi, hinte tohuwa meecetidi qamma haysan aqite; wonta guura hinte biya bessi biite” yaagis. Enti, “Akay, nuuni ha katamaa dabaaban aqana” yaagidi zaaridosona.
GEN 19:3 Shin I enta minthi woossida gisho bidi iya soo gelidosona. I entaw uythi uukidi aathin midosona.
GEN 19:4 Enti zin7ana hanishin Soodome katama adde asa ubbay na7atethinne dondzi issoyka attona yidi keethaa yuuyi aadhidosona.
GEN 19:5 Enti Looxe xeegidi, “Hachi omarsi ne soo gelida adde asati awun de7oona? Nuuni entara gahetana mela enta nuuko kare kessa” yaagidosona.
GEN 19:6 Yaatin Looxey entara odetanaw kare keyishe pengiya guyera gordidi,
GEN 19:7 entako, “Ta dabboto, hayyana ha iita oosuwa oothopite.
GEN 19:8 Taw adde eronna nam7u geela7oti de7oosona. Taani enta hintew kare kessiko hinte koydaba oothite. Shin haysati ta imathe gidiya gisho ta kaarape garsan de7oosona; ha asata bolla aybibaaka oothopite” yaagis.
GEN 19:9 Asati, “Nu sinthafe gede kicha” yaagidosona. Qassi, “Ha addey baw bete asi shin, nu bolla pirdanaw koyees? Nuuni enta bolla oothanaw koyida iitaape aathidi ne bolla oothana” yaagidosona. Enti Looxe guye sugi yeggidi pengiya menthanaw shiiqidosona.
GEN 19:10 Shin nam7u asati banta kushiya kare yeddidi Looxe soo goochi gelsidi pengiya gordidosona.
GEN 19:11 Hessafe guye, enti keetha pengey de7iyasuwa demmona mela guuthafe gita gakanaw qooqisidosona.
GEN 19:12 He nam7u asati Looxeko, “New haysan adde na7i woyko macca na7i, ne macca nayta oychiday woyko hara dabboy ha kataman de7ii? De7iko entana haysafe kessa.
GEN 19:13 Ayis giiko, nu ha katama dhaysanaw hanoos. Enta bolla waassiya waasoy Godaa sinthan gita gidiya gisho ha katama dhaysana mela Goday nuna kiittis” yaagidosona.
GEN 19:14 Yaatin Looxey ba macca nayta oychidaysatako bidi, “Goday, ha katama dhaysana haniya gisho ellessidi ha bessaafe keyte” yaagis. Shin iya macca nayta oychidaysati I qelqisees gidi qopidosona.
GEN 19:15 Sa7i wontanaw gontey zo77iya wode he kiitanchoti Looxeko, “Denda, ne machiwnne haysan de7iya ne nam7u nayta ekada ellesada keya. Akay giiko, ha katamay pirdetiya wode neka dhayasa” yaagi dirgisidosona.
GEN 19:16 Shin Looxey keyanaw gam7in, Goday iyaw qadhetida gisho, he kiitanchoti iya kushiya, iya mache kushiyanne nam7u nayta kushiya oykidi he katamaape kessidosona.
GEN 19:17 Kiitanchoti enta kessida mela he kiitanchotape issoy, “Hinte shempuwa ekidi baqatite! Guye xeellofite! Ha heeran awunka eqofite! Hinte dhayona mela zamaako baqatite” yaagis.
GEN 19:18 Shin Looxey entako, “Hay ta godato, yaagopite.
GEN 19:19 Taani hinte aylley hinte sinthan saba demmida gisho tana ashshanaw taw daro qadhetideta. Shin taani zumako baqatanaw danda7ike; ha dhayoy gakidi tana dhaysana.
GEN 19:20 Heko, haysan issi katami de7ees; yaa woxidi baanaw matanne guutha katama. Ta shempuwa ashshanaw ta yaa baqato? I daro guutha katama gidennee?” yaagis.
GEN 19:21 Kiitanchoy, “Lo77o! Taani ne woosa ekas; he ne odida katamaa dhaysike.
GEN 19:22 He katamaako ellesada baqata; ne yaa gakanaw ta aybibaaka oothike” yaagis. Hessa gisho, he katamaa sunthay Zo7aare geetetis.
GEN 19:23 Looxey Zo7aare gakiya wode buroo xalqey caares.
GEN 19:24 Goday he wode salope tamanne xuuggiya diine Soodome bollanne Gamoora bolla bukisis.
GEN 19:25 Hessada oothidi Goday he katamata, heera ubba, katamatan de7iyaba ubbaa he biittan de7iya mithaanne maata dhaysis.
GEN 19:26 Shin Looxe machiya guye simma xeellada maxine shuchu gidasu.
GEN 19:27 Wontetha gallas wonta guura Abrahaamey dendidi kase I Godaa sinthan eqida bessaa bis.
GEN 19:28 I Soodomenne Gamoora, he heeran de7iya biitta ubbaa duge xeelliya wode xuussa tamada cuyay biittafe dendeysa be7is.
GEN 19:29 Xoossay he heeran de7iya katamata dhaysiya wode Abrahaame qopidi, Looxey de7iya katamata dhaysidi, Looxe dhayope ashshis.
GEN 19:30 Looxey Zo7aaren daanaw yashetida gisho, yaape dendidi ba macca nayta nam7atara zuma bolla keyis. Yan gongolo giddon ba nam7u macca naytara de7is.
GEN 19:31 Issi gallas bayra na7iya ba kaalo micheko, “Nu aaway cimis, biitta ubban de7iya wogaatho nuura aqanaw issi addey haysan baawa.
GEN 19:32 Yaaniya gisho, haaya! Nu aawa ushshu ushshidi, iyara aqidi, nu aawape nuus koche ashshos” yaagasu.
GEN 19:33 He wode qamma banta aawa ushshu ushshidosona. Bayra na7iya gelada iyara aqasu. Iya iyara aqiya wodenne dendiya wode I eribeenna.
GEN 19:34 Wontetha wode bayriya kaaliw, “Zine qamma taani ta aawara aqas; hachi qammaka iya ushshu ushshiko, neka gelada iyara aqa. Yaatidi nuuni nu aawape koche ashshos” yaagasu.
GEN 19:35 He wode qamma banta aawa ushshu ushshidosona. Kaalo na7iya gelada iyara aqasu. Ha77ika iya iyara aqiya wodenne dendiya wode I eribeenna.
GEN 19:36 Yaatidi Looxe macca nayti nam7ay banta aawape qanthatidosona.
GEN 19:37 Bayriya adde na7a yelasu; iya sunthaa Moo7abe gada sunthasu. I hachi gakanaw Moo7abeta mayza.
GEN 19:38 Kaaliyaka adde na7a yelasu; iya sunthaa Beni7aama gada sunthasu. I hachi gakanaw Amooneta mayza.
GEN 20:1 Abrahaamey Mamirepe dendidi Negebe mela biitta heera bidi Qaadesapenne Shura biittatas gidduwan de7is. Geraaranka guutha wode gam7is.
GEN 20:2 Yan de7ishe Abrahaamey ba machiw Saaro, “Iya ta michiw” yaagida gisho, Geraara kawoy Abimelekey kiittidi Saaro baako efis.
GEN 20:3 Shin Xoossay issi qamma amuhon Abimelekeko yidi, “Neeni ehida macaase gaason hayqaasa, iya azinara de7awusu” yaagis.
GEN 20:4 Hanoshin, Abimelekey iyo bochibeenna. I, “Godaw, neeni tananne ta derey qohonna de7ishin coo dhaysaneyee?
GEN 20:5 I, ‘Iya, ta micho’ gibeennee? Qassi iyaka, ‘I, ta isha’ gabikee? Taani ta wozana xillotethaninne ta kushe geeshshatethan haysa oothas” yaagis.
GEN 20:6 Xoossay amuhon iyako, “Ee, neeni ne wozana xillotethan oothidaysa ta erayis. Hessa gisho, neeni iyo bochonaadanne ta sinthan nagara oothonnaada nena taani teqas.
GEN 20:7 Ha77i ha addiya machiw zaara. I nabe gidiya gisho, new Xoossa woossiko ne attana. Shin iyo zaarona ixiko, neeninne new de7iyaba ubbay hayqanaysa era” yaagis.
GEN 20:8 Abimelekey wontetha gallas daro guura ba moorinnata baako xeegis. He hanidaba ubba entaw odin enti daro babidosona.
GEN 20:9 Yaatin Abimelekey Abrahaame xeegidi, “Neeni aybiba nu bolla oothadii? Ne ta bollanne ta kawotetha bolla haysa mela qoho ehanaw ta new ay iitaba oothadina? Neeni ta bolla oosetanaw bessonnaba oothadasa” yaagis.
GEN 20:10 Qassi Abimelekey Abrahaame, “Neeni haysa ayis oothadii?” yaagidi oychis.
GEN 20:11 Abrahaamey zaaridi, “ ‘Ha bessan Xoossas yashetiya asi bayna gishonne qassi ta mache gaason enti tana wodhana’ gada qopida gishosa.
GEN 20:12 Hessa bolla iya tumaka ta micho; iya ta aawa na7ape attishin ta aaye na7a giduku, yaaniya gisho, iya ta macho gidasu.
GEN 20:13 Xoossay tana ta aawa keethafe kessida wode taani iiko, ‘Neeni bida biitta ubban ne taw oothana keehatethay haysa; “I ta isha” gada’ oda yaagas” yaagis.
GEN 20:14 Hessafe guye, Abimelekey dorse, mehe, macca aylletanne adde aylleta kessidi Abrahaames immis; iya machiw Saaro iyaw zaaris.
GEN 20:15 Abimelekey Abrahaameko, “Heko, ta biittay haysish nena lo77oson de7a” yaagis.
GEN 20:16 Saariko, “Taani ne ishas issi mukulu bira santime immayis. Hessi neera de7iya ubba sinthan neeni xillo gideysanne aybi iitabaka oothonaysa eriseysa gido” yaagis.
GEN 20:17 Goday Abrahaame mache Saari gaason Abimeleke keetha ubba maynisida gisho Abrahaamey Xoossa woossin, Abimelekey, iya machiyanne iya macca aylleti na7a yelana mela Xoossay enta pathis.
GEN 21:1 Goday ba odidaysada Saaro anjis; ba gelida qaalaka polis.
GEN 21:2 Saara qanthatada Xoossay gida wodey gakin cimida Abrahaames adde na7a yelasu.
GEN 21:3 Abrahaamey Saara yelida na7a suntha Yisaaqa gidi sunthis.
GEN 21:4 Abrahaamey ba na7a Yisaaqa Xoossay kiitidaysada yeletida hospuntho gallasan qaxaris.
GEN 21:5 Iya na7a Yisaaqi yeletiya wode, Abrahaames laythi xeeta.
GEN 21:6 Saara, “Xoossay taw miiche immis; qassi haysa si7iya ubbay taara miicana” yaagasu.
GEN 21:7 Qassika Saara, “Saara Abrahaames na7a yelada dhanthana giday oonee? Gidikoka taani ha7i iyaw I cimida wode na7a yelas” yaagasu.
GEN 21:8 Guutha na7ay diccidi; dhanthi duuthis; Abrahaamey Yisaaqi dhanthi duuthida gallas wolqaama gibira giigisis.
GEN 21:9 Shin Gibxefe yida Aggaara Abrahaames yelida na7ay Yisaaqa toochishin Saara be7asu.
GEN 21:10 Saara Abrahaameko, “Ha aylle na7ay ta na7a Yisaaqara ubbaka laattonna gisho, gadhindiwunne I na7aa kessada goodda” yaagasu.
GEN 21:11 He oday ba na7a bochiya gisho, Abrahaamey daro metootis.
GEN 21:12 Shin Xoossay Abrahaame, “Ne kochay Yisaaqa baggara xeegetana gisho ne na7aasinne ne ayllees daro metootopa; Saara new odiyaba ubba si7a.
GEN 21:13 Qassi ika ne koche gidiya gisho aylle na7a taani iya gita dere oothana” yaagis.
GEN 21:14 Wonta guura Abrahaamey dendidi guutha kathinne koddan haathe kunthidi, Aggaaro toossidi, I na7a iyo idinthidi kessi goodis. Iya bada, Barsaabe mela biittan daaburasu.
GEN 21:15 Haathay koddaafe wurida wode iya, “Na7ay hayqishin, uttada be7ike” gada, na7a issi buure garsan yeggada, nam7u xeetu wadha gideysa mela bada utta aggasu. Yan uttada, ba qaala dhoqu oothada yeekasu.
GEN 21:17 Xoossay na7a waasuwa si7is. Xoossa kiitanchoy Aggaaro salope xeegidi, “Aggaare, waanadii? Xoossay na7a yeehuwa si7ida gisho babofa;
GEN 21:18 danda eqada, na7a denthada ne kushiyan oyka; taani iya gita dere oothana” yaagis.
GEN 21:19 Xoossay iyo haatha olla bessin, bada koddan haathe kunthada na7aa ushshasu.
GEN 21:20 Na7ay dicciya wode ubban, Xoossay iyara gidis. I mela biittan de7idi, dongen dukiya ase gidis.
GEN 21:21 I Paarana mela biittan de7ishin, iya aayiya Gibxefe iyaw macho immasu.
GEN 21:22 He wode, Abimelekey, ba toora mocona Fikoolara Abrahaameko bidi, “Neeni oothiyaba ubban Xoossay neera de7ees.
GEN 21:23 Neeni ta bolla woyko ta nayta bolla woyko ta zeretha bolla cimmada gene oothonna mela, ha7i haysan, Xoossa sinthan taw caaqa. Taani new keehidaysada, neenika taasinne neeni betetethan de7ida ha biittees keeha” yaagis.
GEN 21:24 Abrahaamey, “Taani caaqayis” yaagis.
GEN 21:25 He wode, Abrahaamey Abimeleke aylleti ekida haatha ollaba Abimelekes maggannis.
GEN 21:26 Shin Abimelekey, “Hessa ooni oothidaako taani erike. Neenika qassi taw odabaaka; taani hachi gakanaw hessa si7abike” yaagis.
GEN 21:27 Hessafe guye, Abrahaamey dorsatanne miizata ehidi, Abimelekes immin, enti nam7ay caaqidosona.
GEN 21:28 Abrahaamey laapun uzzo dorsata wudiyape shaakis;
GEN 21:29 Abimelekey Abrahaame, “Ha neeni dumma shaaka wothida laapun uzzo dorsata ayis shaakadii?” yaagidi oychis.
GEN 21:30 Abrahaamey, “Taani ha haatha olla bookidaysas marka gidana mela, ha laapun uzzo dorsata taape eka” yaagis.
GEN 21:31 Hessan he nam7u asati caaqida gisho, he bessay Barsaabe (Caaqo Haatha Olla woyko Laapun Haatha Olla).
GEN 21:32 Barsaaben caaquwa caaqidaape guye, Abimelekeynne iya toora moconay Fikooli dendidi, Filisxeeme biitta simmidosona.
GEN 21:33 Abrahaamey Barsaaben tamarsiik geetetiya mithi tokis. Hessan Godaa, Merina Xoossa xeegidi iyaw goyinnis.
GEN 21:34 Abrahaamey Filisxeeme biittan daro wode de7is.
GEN 22:1 Hessafe guye, Xoossay Abrahaame paacis; iya, “Abrahaame” yaagidi xeegis. I, “Yee” gidi koyis.
GEN 22:2 Xoossay, “Neeni dosiya ne issi na7a Yisaaqa ekada, Mooriya biitta ba. Yan taani nena bessiya issi dere bolla iya xuussa yarsho oothada taw yarsha” yaagis.
GEN 22:3 Wontetha gallas Abrahaamey guura dendidi, ba hariya caanis. Ba aylletape nam7atanne ba na7a Yisaaqa baara ekidi, xuussa yarshuwas gidiya mitha qeri ekidi, Xoossi iya bessiya bessi baanaw dendis.
GEN 22:4 Heedzantho gallas Abrahaamey dhoqu gidi, he bessa haahora be7is.
GEN 22:5 Abrahaamey ba aylleta, “Hinte hariyara haysan de7ishite. Taara ta na7aara ya bidi Xoossas goyinnidi, hinteko simmana” yaagis.
GEN 22:6 Abrahaamey yarshuwa mitha denthidi, ba na7a Yisaaqa toossis. I baw tamanne mashshe oykis. Enti nam7ay issife bishin;
GEN 22:7 Yisaaqi ba aawa Abrahaame, “Ta aawaw” yaagis. Abrahaamey, “Yee, ta na7aw” yaagis. Yisaaqi, “Tamaynne mithay haysish; shin xuussa yarsho urge dorsay awunee?” yaagis.
GEN 22:8 Yaatin Abrahaamey, “Ta na7aw, xuussa yarsho urge dorsa Xoossay baw immana” yaagis. Yaagin enti nam7ay issife bidosona.
GEN 22:9 Enti Xoossay iyaw odida bessa gakida wode, Abrahaamey yan yarsho bessi giigisidi, mithi hiixis. Ba na7a Yisaaqa qachidi, he mitha bolla zin7isis.
GEN 22:10 Abrahaamey ba na7a shukanaw ba kushiya yeddidi mashshe ekis.
GEN 22:11 Shin Godaa Kiitanchoy salope, “Abrahaame, Abrahaame” yaagidi xeegis. I, “Yee” yaagidi koyis.
GEN 22:12 Kiitanchoy, “Na7a bolla ne kushiya wothofa; iya aybibaaka oothofa. Neeni ne issi na7aa tana diggona gisho, neeni Xoossas yayyeysa taani erayis” yaagis.
GEN 22:13 Abrahaamey dhoqu gidi xeellis; heko kacey turan qaxetida issi dorsi de7eysa be7is. Abrahaamey bidi he dorsa ekidi, ba na7a bessan xuussa yarsho oothidi yarshis.
GEN 22:14 Hessa gisho, Abrahaamey, “Goday immana” gidi he bessa sunthis. Hachi gakanaw hessi, “Godaa zuma bolla imetana” geetetees.
GEN 22:15 Godaa kiitanchoy saluwape nam7antho Abrahaame xeegidi,
GEN 22:16 “Taani Goday, haysada gada taani ta huuphen new caaqayis; neeni haysa oothida gishonne ne issi na7aa tana diggona gisho,
GEN 22:17 taani nena tuma anjana. Ne zeretha taani salo xoolinto melanne abba gaxan de7iya shafe mela oothana. Ne zerethati banta morketa katamata laattana.
GEN 22:18 Neeni taw kiitetida gisho, ha sa7a kawotethati ubbay ne zeretha baggara anjetana” yaagis.
GEN 22:19 Hessafe guye, Abrahaamey ba aylletako guye simmin, enti ubbay issife Barsaabe dendidi bidosona. Abrahaamey Barsaaben de7is.
GEN 22:20 Hessafe guye, Abrahaames, “Milka ne isha Naakoras nayta yelasu;
GEN 22:21 entika bayray Uxa; Uxa ishati Buza,
GEN 22:22 Araame aawa Qameela, Kesada, Haazo, Pildasha, Yidlaafanne Batu7eela geetetoosona” yaagis.
GEN 22:23 Ha hospun nayta Milka Abrahaame isha Naakoras yelasu. Batu7eeli Irbiqa yelis.
GEN 22:24 Re7uma geetetiya iya nam7antho maccasiya qassi Xeba, Gahaama, Tahasanne Maka yelasu.
GEN 23:1 Saara xeetanne laatamanne laapun laythi de7asu.
GEN 23:2 Hessafe guye, iya Kanaane biittan de7iya Qiriyaat-Arba (Kebroona) kataman hayqasu. Abrahaamey Saaris yeekisinne kayotis.
GEN 23:3 Yeeki simmidi, Abrahaamey ba mache aha matape dendidi bidi, Hiteta haysada yaagis;
GEN 23:4 “Taani hinte giddon imathe; ta mache aha mooganaw taw hinte gadiyape duufo bessi bayzerketi” yaagis.
GEN 23:5 Hiteti Abrahaame, “Godaw, nuuni odeysa si7a; neeni nu giddon wolqaama halaqa; neeni ne mache aha nu duufuwape nena lo77idason mooga; neeni ne mache aha mooganaw ba duufuwa oonika nena diggenna” yaagi zaaridosona.
GEN 23:7 Abrahaamey dendi eqidi, Hiteta sinthan ziggis.
GEN 23:8 I entako, “Hinte tana, ‘Ne mache aha mooga’ giiko, taani giyaba si7ite. Zohaara na7a Efroonas iya gadiya gaxan de7iya Makifeela geetetiya gongoluwa ta duufo oothanaw bayzana mela kumetha gaten nuna zal7iserketi” yaagis.
GEN 23:10 Hite addiya Efrooni he wode katama pengen shiiqida ba asa giddon uttis. Hiteti ubbay si7ishin, Abrahaameko yaagis;
GEN 23:11 “Hessada gidenna; ta godaw, ta odeysa si7a; taani gadiyaka iya giddon de7iya gongoluwaka new immayis; taani new iya ta asa sinthan immayis; neeni ne mache aha mooga” yaagis.
GEN 23:12 Abrahaamey he biitta asa sinthan zaari ziggidi,
GEN 23:13 asay si7ishin Efroona, “Ta odeysa si7arki! Taani he gadiya gate qanxana; neeni taape ekarki. Hessan taani ta mache aha moogana” yaagis.
GEN 23:14 Efrooni Abrahaameko zaaridi, “Ta godaw, taani odeysa si7a; gadey oyddu xeetu bira santime kessana; shin hessi ne giddoninne ta giddon aybika gidenna; ne mache aha mooga” yaagis.
GEN 23:16 Abrahaamey Hiteti si7ishin, Efrooni gida gatiya ekis; he wode miishen oyddu xeetu bira santime Efroonas immis.
GEN 23:17 Yaati simmidi, Mamire katama matan Makifeelan de7iya Efroona gadey, yan de7iya gongoloynne he gadiyan de7iya mitha ubbay,
GEN 23:18 katama pengen shiiqida Hiteta ubba sinthan wogatho Abrahaame gade gidis.
GEN 23:19 Hessafe guye, Abrahaamey ba machiw Saara Kanaane biittan (Kebroona) geetetiya Mamire katama matan de7iya Makifeela geetetiya gade gongoluwan moogis.
GEN 23:20 Hessa gisho, he gadeynne yan de7iya gongoloy Hiteta sinthan higgiyan Abrahaames duufo gidis.
GEN 24:1 Abrahaamey daro cimis. Goday iya ubbabanka anjis.
GEN 24:2 Abrahaamey ba aylliya, ba soo asa ubbaas halaqatiya, ba aqo ubbaa bolla sunthetidaysa haysada yaagis, “Ne kushiyan ta gulbata oyka;
GEN 24:3 taani enta giddon de7ida Kanaaneta macca naytape ta na7aas macho oychonna mela, Godan, salonne sa7a Xoossa sunthan taani nena caaqisayis;
GEN 24:4 shin neeni ta yeletida biitta, ta dabbotako bada, ta na7a Yisaaqas macho oycha” yaagis.
GEN 24:5 Iya aylley, “He maccasiya taara yaanaw dosona ixiko, ne na7a neeni yida biitta guye efo?” yaagidi oychis.
GEN 24:6 Abrahaamey, “Ta na7a ay gaasonka yaa efonnaada nena era!
GEN 24:7 Goday, saluwa Xoossay, tana ta aawa soopenne ta yeletida biittafe kessidaysi taw, ‘Ne zerethas taani ha biitta immana’ yaagidi caaqidaysi, neeni ta na7aas yaape macho demmana mela, I ba kiitanchuwa neepe sinthe kiittana.
GEN 24:8 He maccasiya neera yaanaw dosona ixiko, ha taani nena caaqisida caaqoy new gome gidenna; shin ta na7a yaa ubbaka efopa” yaagis.
GEN 24:9 Aylley ba godaa Abrahaame gulbata oykis; he odaas caaqis.
GEN 24:10 Hessafe guye, aylley ba godaa gimaletape tamma ekidi, ba godaa miishiyapeka muruuta muruuta eki bidi Masephexoome biittan Nakoora katama gakis.
GEN 24:11 Omarsi, maccasi haathe tikanaw yaa wode, katamaape gaxan haatha olla matan ba gimaleta gulbatisis.
GEN 24:12 I woossishe, “Godaw, ta godaa Abrahaame Xoossaw, hachi taani qopada yidaysa taw giigisa; qassi ta godaa Abrahaames keehaba ootha.
GEN 24:13 Heko, taani ha haatha pultuwa matan eqayis; ha katama macca nayti haatha tikanaw haa yoosona.
GEN 24:14 Taani, ‘Ane otuwa ziqi oothada tana haathe ushsha’ giya wode, iya, ‘Heko uya; qassi ne gimaleta taani ushshana’ giyara, hinna ne aylliya Yisaaqas neeni dooridaro gido; neeni ta godaas keehaba oothidaysa taani hessan erana” yaagis.
GEN 24:15 Buroo I woosa zaarona de7ishin, Irbiqa haatha oto tookada puttu gasu. Iya Batu7eela na7a, Batu7eeli Milka na7a, Milka Abrahaame isha Nakoora machiw.
GEN 24:16 Irbiqii daro yegelsinne adde eronna geela7o. Pultuwa duge wodhada, ba otuwa kunthada baanaw dendasu.
GEN 24:17 Yaanin, he aylley iiko woxi bidi iyo, “Ne tana guutha haathe ushsharki” yaagis.
GEN 24:18 Iya, “Ero ta godaw, uya” yaagasu. Ellesada otuwa ba hashepe wothada, gedi ootha oykada iya ushshasu.
GEN 24:19 Iya ushshidaape guye, “Ne gimaletika alana gakanaw taani entaw haatha duuqana” yaagasu.
GEN 24:20 Attida haatha ellesada gongen tigada, hara haathe duuqanaw olla woxasu; gimaleti ubbay alana gakanaw, haatha ollafe duuqa duuqa ehada gongen tigada ushshasu.
GEN 24:21 I qopidi yida qofa Goday injeyishe de7iyakonne eranaw addey si77i gidi iyo xeellees.
GEN 24:22 Gimaleti haatha uyi simmin, addey ichashu giraame bagga siidhen aathiya worqa xeetanne tammu giraame gidiya nam7u worqa sagaayota giigisis.
GEN 24:23 Iyo, “Neeni oodde na7ee? Ane taw oda; ne aawa son nuus aqiya bessi daanee?” yaagis.
GEN 24:24 Iya, “Taani Batu7eela na7a; Batu7eeli Milka Naakoras yelida na7a.
GEN 24:25 Nu son gidiya kaleynne harqoy de7ees; qassi hinte aqanaw bessi de7ees” yaagasu.
GEN 24:26 Addey gulbatidi Godaa goyinnidi,
GEN 24:27 haysada yaagis; “Ta godaas keeheysanne ammaneteysa aggiboonna Goday, ta godaa Abrahaame Xoossay galatetto; taani yishin, Goday tana ta godaa dabbota soo kaalethis” yaagis.
GEN 24:28 Na7iya woxa bada, ba aaye son de7iya asaas hanidaba odasu.
GEN 24:29 Irbiqas Laaba geetetiya ishay de7ees. Laabi kare keyidi haatha pultuwa matan de7iya addiyako woxis.
GEN 24:30 Siidhe worqanne ba miche kushen de7iya sagaayota be7ida wode Irbiqa addey bana gidoysa odin si7ida wode, keyidi addiyako bis. Addeyka gimaletara pultuwa matan eqidaysa demmis.
GEN 24:31 Iyako, “Goday nena anjidayso, haaya, neeni karen ayis eqadii? Taani new keethenne gimaletaska besse giigisas” yaagis.
GEN 24:32 Yaatin addey soo gelis. Laabi gimaleta caana billidi, kalenne dhiille gimaletas immas. Toho meeccanaw iyasinne iyara de7iya asaas haathe ehis.
GEN 24:33 Kathi iya sinthe aadhis. Shin, “Taani tana ehidaba hintew odonna de7ashe kathi miike” yaagis. Laabi, “Yaako oda” yaagis.
GEN 24:34 Hessa gisho, I, “Taani Abrahaame aylliya.
GEN 24:35 Goday ta godaa daro anjida gisho I duretis. Dorse, miizi, bira, worqa, adde aylleta, macca aylleta, gimaletanne hareta iyaw immis.
GEN 24:36 Ta godaa machiya Saara ba cimatetha laythan iyaw adde na7a yelasu. Yaatin I baw de7iyaba ubba iyaw immis.
GEN 24:37 Ta goday tana haysada caaqisis, ‘Taani de7iya Kanaane biitta macca naytape ta na7aas macho oychofa.
GEN 24:38 Shin ta aawa asaako, ta dabbotako bada ta na7aas macho oycha’ yaagis.
GEN 24:39 Taani ta godaa, ‘Na7iya taara yaanaw dosona ixikochi?’ yaagada oychas.
GEN 24:40 Ika, taani iya sinthan kiitetida Goday ba kiitanchuwa kiittana; neeni ta na7aas ta aawa asaape, ta kochaafe macho demmana mela, ne beysaka injeyana.
GEN 24:41 Neeni ta kochatako bin, enti new iyo immonna ixiko, he wode new caaqoy gome gidenna” yaagis.
GEN 24:42 “Taani hachi he pultuwako yaa wode yaagas; ‘Godaw, ta godaa Abrahaame Xoossaw, ne shene gidiko, taani biya allalliya giigisa.
GEN 24:43 Heko, taani ha pultuwa matan eqayis; geela7o issinniya haathe tikanaw yiiko, taani iyo, tana ne otuwape guutha haathe ushsharki’ yaagana.
GEN 24:44 Iya, ‘Ero uya, qassi ne gimaletaska taani haathe duuqana’ giyara, Goday ta godaa na7aas dooridaro gido” yaagas.
GEN 24:45 “Taani ta wozanan wooseysa zaarona de7ishin, Irbiqa ba otuwa tookada, puttu gasu; pultuwa duge wodhada haatha duuqasu; taani iyo, ‘Tana haathe ushsharki’ yaagas.
GEN 24:46 “Yaagin iya ellesada ba hashiyape otuwa wothada, ‘Heko uya; qassi taani ne gimaleta ushshana’ yaagasu. Yaatin taani uyas; qassi ta gimaleta iya ushshasu.
GEN 24:47 “Taani iyo, ‘Neeni oodde na7ee?’ yaagas. “Iya zaarada, ‘Taani Batu7eela na7aa; Batu7eeli, Milka Naakoras yelida na7a’ yaagasu. Taani worqa I siidhen, sagaayota I kushen aathas.
GEN 24:48 Hessafe guye, taani gulbatada, Godaas goyinnas. Taani Godaa, ta godaa Abrahaame Xoossa, ta godaa isha na7a na7iw iya na7aas ekanaw tana like ogiya kaalethidaysas galatayis.
GEN 24:49 Ha77ika hinte ta godaas keehanabanne ammanetanaba gidiko, taw odite; gidonna ixikoka odite; hessafe guye taani hananaba erana” yaagis.
GEN 24:50 Laabinne Batu7eeli zaaridi yaagidosona; “Ha oday Godaape yis; nuuni yaa haa gaanaw danda7oko.
GEN 24:51 Irbiqo hanno be7a; ekada ba; Goday gidaysada ne godaa na7aas macho gido” yaagidosona.
GEN 24:52 Abrahaame aylley enti giyaba si7ida wode, sa7an gulbatidi Godaas goyinnis.
GEN 24:53 Aylley bira alleeqo, worqa alleeqo, ma7onne kessidi Irbiqas immis. Qassi al7o miisheta I ishaasinne I aayes immis.
GEN 24:54 Hessafe guye, inne iyara de7eysati midosona uyidosona; yan aqidosona. Enti guura dendin, I, “Tana ta godaako yeddite” yaagis.
GEN 24:55 Yaatin I ishaynne I aayiya, “Na7iya issi tammu gallasa mela nuura tako, hessafe guye iya baana” yaagidosona.
GEN 24:56 Shin I, “Goday ta yidaysa injeyin, hinte tana gam7isopite. Taani ta godaako baana mela tana moyzite” yaagis.
GEN 24:57 Enti, “Na7iw xeegidi ane iyo oychoos” yaagidosona.
GEN 24:58 Irbiqa xeegidi, “Ha addiyara baanee?” yaagidi oychidosona. Iya, “Ee; taani baana” yaagasu.
GEN 24:59 Yaanin, enti banta michiw Irbiqa, iyo dichidaaro, Abrahaame aylliyanne iya asata moyzidosona.
GEN 24:60 Enti Irbiqa, “Nu miche Irbiqe, mukulupe mukulu gakanaw dara; ne kochay banta morketa katamata laatto” yaagidi anjidosona.
GEN 24:61 Hessafe guye, Irbiqinne I macca aylleti dendidi, gimaleta toggidi, addiyara bidosona. Yaatin aylley Irbiqa ekidi bis.
GEN 24:62 He wode Yisaaqi, “Tana Be7iya De7o Xoossa Pultuwa” geetetiya pultuwa mata bidi, Negebe mela biittan de7ees.
GEN 24:63 Issi gallas omarsi Yisaaqi ba wozanan qopishe demba keyidi yuuyees; I dhoqu gidi xeelliya wode, gimaleti yeyisata be7is.
GEN 24:64 Irbiqaka dhoqu gada xeelliya wode, Yisaaqa be7asu; gimaletape wodhasu.
GEN 24:65 Abrahaame aylliyako, “Ha nuura gahetanaw dembara yaa addey oonee?” yaagasu. Aylley, “I, ta godaa” yaagis. Iya ba laxana ekada guuluntasu.
GEN 24:66 Qassi aylley ba oothidaba ubba Yisaaqas odis.
GEN 24:67 Yisaaqi Irbiqa ba aaye Saara dunkaaniya giddo efis. Iyo machis; iyaka iyaw macho gidasu. I iyo dosis; ba aaye kayuwa wothis.
GEN 25:1 Abrahaamey Keexura geetetiya hara macho ekis.
GEN 25:2 Iya Zimiraana, Yoqsaana, Madaane, Midiyaame, Yasboqanne Siwa iyaw yelasu.
GEN 25:3 Yoqsaani Saabanne Dedaana yelis. Dedaani Ashooreta, Lexusetanne Le7umata yelis.
GEN 25:4 Midiyaame nayti Gefera, Efera, Henooha, Abidanne Elda. Haysati ubbay Keexura sheeshata.
GEN 25:5 Abrahaamey babaa ubbaa Yisaaqa laatisis.
GEN 25:6 Shin I paxa de7ishe, hara machetape yelida nayta baw de7iyabaape woytis. Ba na7a Yisaaqape enta shaakidi, doloha bagga biitta yeddis.
GEN 25:7 Abrahaamey kumethi issi xeetanne laapun tammanne ichashu laythi de7is.
GEN 25:8 Abrahaamey daro wode de7idi, lo77o cimidi, hayqidi ba mayzatan gahetis.
GEN 25:9 Iya nayti Yisaaqinne Isma7eeli iya Makifeela geetetiya gongolo duufuwan moogidosona; he gongoloy Mamire matan, Hite addiya Xohaara na7a Efroona gadiyan de7ees.
GEN 25:10 Hessi Abrahaamey Hitetape shammida gadiya. Abrahaamey ba machiya Saara moogetida duufuwan moogetis.
GEN 25:11 Abrahaamey hayqidaape guye, Xoossay iya na7a Yisaaqa anjis. He wode Yisaaqi, Beer-lay-ro7i (Tana Be7iya De7o Xoossa Pulto) geetetiya pultuwa matan de7ees.
GEN 25:12 Saara aylliya, Gibxefe yida Aggaara, Abrahaames yelida na7a Isma7eela yeletethay haysafe kaallidi xaafetidaysa.
GEN 25:13 Isma7eela nayti banta sunthaninne banta yeleta maaran haysata; entika, Nabayoota, Qedaare, Adbeela, Mibsaama,
GEN 25:14 Misima, Duma, Masa,
GEN 25:15 Kudane, Teema, Ixura, Nafisanne Qedima.
GEN 25:16 Isma7eela nayti haysata; enta sunthay enta moothaninne de7iya bessan haysa. Enti banta yaranka tammanne nam7u halaqata.
GEN 25:17 Isma7eeli kumethi xeetanne hastamanne laapun laythi de7idi, hayqidi ba mayzatan gahetis.
GEN 25:18 Isma7eela kocheti Gibxefe doloha baggan de7iya Hawilapenne Suurape gidduwan, Asoore efiya ogiya matan de7idosona. Enti banta ishata ubbara morketethan de7idosona.
GEN 25:19 Abrahaame na7a Yisaaqa yeletethay haysafe kaallidi xaafetidaysa; Abrahaamey Yisaaqa yelis.
GEN 25:20 Yisaaqas laythi oytama gidin, Irbiqa ekis; iya Masephexoomen de7iya Araame addiya Batu7eela na7iwunne Laaba michiw.
GEN 25:21 Yisaaqi ba machiya maynthi gidida gisho, iw Godaa woossis; Goday iya woosa si7is. Yaatin iya machiya Irbiqa qanthatasu.
GEN 25:22 Shin I ulon de7iya nayti mente gidi uttidi, issoy issuwara sugetidosona; iya, “haysi taw ayis hanii?” yaagasu. Hessa gisho, Godaa oychanaw basu.
GEN 25:23 Goday iyo, “Ne ulon nam7u kawotethi de7ees; qassi ne giddon de7iya nam7u dere asati issoy issuwafe shaaketana; issi dere asati hankotape minnana; qassi bayray kaaluwas kiitetana” yaagis.
GEN 25:24 Iwu yelo wodey gakin, I uluwan mente adde nayti de7oosona.
GEN 25:25 Koyro yeletidaysi aarise; iya bolla ubba ikisey ma7is; Hessa gisho, enti iya Eesawe (Iksaama) gidi sunthidosona.
GEN 25:26 Hessafe guye, iya ishay yeletis. I ba kushiyan Eesawe gindiya oykidi keyis, Hessa gisho, iya Yayqooba (Ginde Oykeysa) gidi sunthidosona. Irbiqa enta yelida wode Yisaaqas usupun tammu laythi gidis.
GEN 25:27 Nayti diccidosona; Eesawey shanka hiilla eriya bazzo ase gidis. Shin Yayqoobi dunkaanen de7iya wopa ase gidis.
GEN 25:28 Yisaaqi Eesawe dosis; ayis giiko, I shankateysafe maanaw dosees; shin Irbiqa Yayqooba dosawusu.
GEN 25:29 Issi wode Yayqoobi woxe kathishin, Eesawey koshatidi bazzofe yis.
GEN 25:30 Eesawey Yayqooba, “Tana ha zo7o woxiyape muza, tana koshi wodhees” yaagis. (Hessa gisho, qassi iya sunthay Edoome (Zo7o) geetetis).
GEN 25:31 Yayqoobi iya, “Koyro taw ne bayratetha bayza” yaagis.
GEN 25:32 Yaatin Eesawey, “Heko, taani hayqana hanayis, ha bayratethay tana ay maaddii?” yaagis.
GEN 25:33 Yayqoobi zaaridi, “Ane taw koyro caaqa” yaagis. I caaqis, ba bayratetha Yayqoobas bayzis.
GEN 25:34 Yayqoobi Eesawes uythinne misire woxe immin mis uyis. Hessafe guye dendidi bis. Eesawey ba bayratetha haysada kadhis.
GEN 26:1 He biittan kase Abrahaame wode keyida koshaape hara koshi keyis. Yaanin, Yisaaqi Filisxeeme kawa Abimelekeko Geraara bis.
GEN 26:2 Goday Yisaaqas qoncidi “Gibxe biitta duge boopa, taani new odida biittan de7a.
GEN 26:3 Ha biittan guutha wodiya gam7aasha, taani neera gidana, nena anjana. Ha biitta ubba taani newunne ne sheeshas immana. Taani ne aawa Abrahaames caaqida caaquwa polana.
GEN 26:4 Ne sheesha salo xoollintoda darsana, ha biitta ubba taani entaw immana. Sa7a kawotethati ubbay ne sheesha baggara anjetana.
GEN 26:5 Hessika, Abrahaamey ta qaala si7idi, ta awaajota, ta kiitatanne ta higgeta naagida gishosa” yaagis.
GEN 26:6 Hessa gisho, Yisaaqi Geraaran de7is.
GEN 26:7 He biitta asay Irbiqaba denthidi, “Hanna new aybee?” gidi Yisaaqa oychidosona. I, “Hanna taw micho” yaagis. Hessa I giday, Irbiqa daro mala lo77o gidiya gisho, “Iya ta macho giiko, ha asay I gaason tana wodhana” yaagi qopidi babis.
GEN 26:8 Yisaaqi yan daro wode de7idaape guye, Filisxeeme kawoy Abimelekey maskootera duge xeelliyade, Yisaaqi ba mache Irbiqara kaa7ishin be7is.
GEN 26:9 Hessa gisho, Abimelekey Yisaaqa xeegisidi, “Heko, iya ne macho; neeni ayis iya ta micho gadii?” gidi oychis. Yisaaqi, “Iya ta macho giiko, asay tana I gaason wodhana gada gas” yaagis.
GEN 26:10 Abimelekey, “Haysi neeni nu bolla oothidabay aybee? Ta asaape issi asi ne machera aqis shin atis, neeni nu bolla gome ehadasa” yaagis.
GEN 26:11 Hessa gisho, Abimelekey ba asa, “Ha ura woyko iya machiw bochiya oonika tuma hayqana” yaagidi kiittis.
GEN 26:12 Yisaaqi he biittan kathi zeridi, Goday iya anjida gisho he laythan xeetu kushe ekis.
GEN 26:13 I duretethan eretana gakanaw daro duretishe bis.
GEN 26:14 Yisaaqas dorsa wudey, miiza wudeynne aylleti aadhidi darida gisho, Filisxeeme asati iya qanaatidosona.
GEN 26:15 Hessa gisho, iya aawa Abrahaame wode iya aawa aylleti bookida haatha olla ubba Filisxeemeti biitta ushshidi kunthidosona.
GEN 26:16 He wode Abimelekey Yisaaqako, “Neeni nuupe aadhada minnida gisho nu matape ba” yaagis.
GEN 26:17 Yisaaqi hessafe dendidi, Geraara zangaara bidi dunkaane tokidi yan de7is.
GEN 26:18 Yisaaqi ba aawa Abrahaame wode booketida haatha ollata, Abrahaamey hayqidaape guye, Filisxeemeti kunthidaysata zaari booki kessidi, iya aaway sunthida sunthan xeegis.
GEN 26:19 Yisaaqa aylleti he zangaaran haatha olla bookidi yan lo77o pulto haatha demmidosona.
GEN 26:20 Shin Geraara henthanchoti Yisaaqa henthanchotara, “Haathay nubaa” yaagidi ooyetidosona. Enti palametida gisho, Yisaaqi he haatha olla “Eseeqa” gidi sunthis.
GEN 26:21 Hessafe guye, enti hara haatha olla bookidosona. Shin enti he haatha olla geedonka ooyetidosona. Hessa gisho, Yisaaqi he haatha olla “Siixina” gidi sunthis.
GEN 26:22 Hessafe guuthi sinthe shiiqidi hara haatha olla bookisis. Iya gaason oonika ooyetiboonna gisho, “Xoossay ha7i nuus dalgisis nuuni ha biittan darana” gidi he bessa Rehoboota gidi sunthis.
GEN 26:23 Hessafe dendidi pude Barsaabe keyis.
GEN 26:24 He bida gallas qamma Goday iyaw qoncidi, “Taani ne aawa Abrahaame Xoossa, taani neera de7iya gisho, babofa. Ta aylliya Abrahaame gisho taani nena anjana, ne sheeshaka darsana” yaagis.
GEN 26:25 Yisaaqi yan yarsho bessi giigisidi Godaa suntha xeegis. Yan I ba dunkaaniya tokis, iya aylleti yan haatha olla bookidosona.
GEN 26:26 Hessafe guye, Abimelekey bana zoriya Ahuzanne toora mocona Fikoola ekidi, Geraarape Yisaaqako yis.
GEN 26:27 Yisaaqi entako, “Hinte kase tana ixidi, hinte biittafe kessi yeddibeeketii? Ha7i taako ay ekanaw yidetii?” yaagis.
GEN 26:28 Enti, “Goday neera de7eysa nuuni geeshshi erida. Hessa gisho, sarotetha caaqoy nu giddoninne ne giddon daanaw koshshees.
GEN 26:29 Nuuni nena bochibooko, new keehatetha xalaala oothidi, nena sarotethan moyzidi yeddida. Hessadaka neeni nu bolla iitaba oothonna mela, ane neera caaqoos. Tumaka ha7i nena Goday anjis” yaagidosona.
GEN 26:30 He wode Yisaaqi entaw gibira giigisin midosona, uyidosona.
GEN 26:31 Wontetha gallas wonta guura dendidi enti issoy issuwara caaqidosona. Yisaaqi enta moyzin, enti saro shaaketidi bidosona.
GEN 26:32 He gallas Yisaaqa aylleti yidi, “Nuuni haathe demmida” yaagidi banta bookida haatha ollaba iyaw odidosona.
GEN 26:33 I he haatha olla Saabe (Caaqo) gidi sunthis. Hessa gisho, he katama sunthay hachi gakanaw Barsaabe (Caaqo haatha olla) geetetees.
GEN 26:34 Eesawes laythi oytama gidida wode Hite addiya Bi7eera na7iw Yooditonne Hite addiya Eloona na7iw Basemaato machis.
GEN 26:35 Enti Yisaaqanne Irbiqa azzanthishe de7idosona.
GEN 27:1 Yisaaqi cimin iya ayfey xeelo ixida wode ba bayra na7a Eesawe xeegidi, “Ta na7aw” yaagis. Ika, “Yee” gidi koyis.
GEN 27:2 Yisaaqi, “Heko, ha7i taani cimas, taani awude hayqaneko erike.
GEN 27:3 Yaaniya gisho, ha7i ne shanka dongiya ekada bazzo bada do7a shankatada asho ekada ya.
GEN 27:4 Mal7o kathi ta doseysatho ootha kathada taw eha. Taani hayqanaape sinthe ma simmada nena anjana” yaagis.
GEN 27:5 Yisaaqi ba na7a Eesawes odiya wode Irbiqa si7awusu. Eesawey do7a shankatidi ehanaw bazzo bidaape guye,
GEN 27:6 Irbiqa ba na7a Yayqooba, “Ne aaway ne isha Eesawe,
GEN 27:7 ‘Do7a shankata ehada taw mal7o kathi ta maanaw katha. Taani hayqanaape sinthe ma simmada Godaa sinthan nena anjana’ yaagishin taani si7as.
GEN 27:8 Ta na7aw, ha7i taani new odeysa loytha si7a.
GEN 27:9 Wudiya giddo bada nam7u modho deesha marata taw ekada ya. Taani ne aawas mal7o kathi I doseysada oothada kathana.
GEN 27:10 Ne aaway hayqanaape sinthe midi nena anjana mela iyaw aatha” yaagasu.
GEN 27:11 Shin Yayqoobi ba aayiw, “Ta isha Eesawe bolla ikisey de7ees shin ta bollay liiqo.
GEN 27:12 Ta aaway tana oyki be7idi taani iya cimmidaba daaniko, taani anjuwa gisho baadethi ta bolla ehanaysa erikii?” yaagis.
GEN 27:13 Iya aayiya, “Ta na7aw, he baadethay tana gako. Taani new odeysa ootha, bada deesha marata taw ekada ya” yaagasu.
GEN 27:14 Ehidi ba aayes immin iya aayiya mal7o kathi iya aaway doseysada oothada kathasu.
GEN 27:15 Hessafe guye, Irbiqa bayra na7a Eesawe ma7o lo77uwa ehada Yayqooba mayzasu.
GEN 27:16 Qassi he deeshata itiya iya kushiyanne iya liiqo qoodhiya mayzasu.
GEN 27:17 Ba kathida mal7o kathaanne uythaa ba na7a Yayqoobas immasu.
GEN 27:18 Yaatin, I ba aawako gelidi, “Ta aawaw” yaagis. Ika, “Yee, ta na7aw, neeni oonee?” yaagis.
GEN 27:19 Yayqoobi ba aawa, “Taani ne bayra na7a Eesawe. Neeni tana kiitidaysada taani oothas; ha77i denda uttada, taani shankata ehidaysafe mada, tana anja” yaagis.
GEN 27:20 Yisaaqi ba na7a, “Ta na7aw, waata ellesada demmadii?” yaagidi oychis. Yayqoobi, “Goday, ne Xoossay taw giigisis” yaagis.
GEN 27:21 Yisaaqi Yayqooba, “Ta na7aw, neeni tuma ta na7a Eesaweko ta nena oyka be7ana ane ha shiiqa” yaagis.
GEN 27:22 Yayqoobi ba aawako shiiqin oyki be7idi, “Ne qaalay Yayqooba qaala shin kushey Eesawe kushiya daanees” yaagis.
GEN 27:23 Iya kushey iya isha Eesawe kushiyada ikisera de7iya gisho, shaakidi eriboona iya anjis.
GEN 27:24 Iya, “Tuma neeni ta na7a Eesawee?” yaagidi zaari oychis. Ika, “Ee, tana” yaagis.
GEN 27:25 Yaatin I, “Ta na7aw, taani ne shankata ehidabaape mada nena anjana mela ane ha aatha” yaagis. Yayqoobi aathin mis, qassi iyaw woyne ehin uyis.
GEN 27:26 Hessafe guye, iya aawa Yisaaqi, “Ta na7aw, ha shiiqada tana yeera” yaagis.
GEN 27:27 Yayqoobi shiiqidi iya yeeris. Yisaaqi iya ma77uwa singi si7idi, “Ta na7a peenoy Goday anjida goshshada sawees.
GEN 27:28 Xoossay salo akanne sa7a shica, kathinne woyne darsidi new immo.
GEN 27:29 Kawotethati new haareto, asay new gulbato. Neeni ne ishatas godaa gida, ne aaye sheeshati new gulbato. Nena baaddeysati baadetidaba gido, nena anjeysati anjetidaba gido” yaagidi anjis.
GEN 27:30 Yisaaqi Yayqooba anjidi ongidaape guye, Yayqoobi ba aawa sinthafe buroo keyiya wode Eesawey shankafe puttu gis.
GEN 27:31 Ika qassi mal7o kathi kathidi ba aawas aathidi, “Ta aawaw, danda uttada ta shankatidabaape ma, yaatada tana anja” yaagis.
GEN 27:32 Yisaaqi, “Ne oonee?” yaagidi oychis. Ika, “Taani ne bayra na7a Eesawe” yaagis.
GEN 27:33 Yisaaqi dagammidi kokorishe, “Yaatin do7a shankatidaysafe taw aathiday oonee? Taani ha7i neeni yaana sinthan mada, iya anjas. Ika tuma anjetidaysa gidana” yaagis.
GEN 27:34 Eesawey ba aawa qaala si7ida wode ba qaala dhoqu oothidi, daro iita yeeho yeekishe, “Ta aawaw, tanaka anja” yaagis.
GEN 27:35 Shin I, “Ne ishay cimmidi ne anjuwa eki diggis” yaagis.
GEN 27:36 Eesawey, “I eridi Yayqooba (Cimmeysa) gidi sunthetis. I tana cimmishin haysi nam7antho, kase ta bayratetha ekis, ha7i qassi ta anjuwa ekis” yaagis. Yaatin, “Neeni taw anjuwafe aykoka ashshabikii?” yaagidi oychis.
GEN 27:37 Yisaaqi Eesawe, “Taani iya new godaa oothas. Iya ishata ubbataka iyaw aylle oothas. Qassi taani kathaninne woynen iya minthas. Yaatin, ta na7aw, new ta ay ootho?” yaagis.
GEN 27:38 Eesawey ba aawa, “Ta aawaw, new issi anjo xalaali de7ii? Ta aawaw, tanaka qassi anja” yaagis. Hessafe guye, Eesawey ba qaala dhoqu oothidi yeekis.
GEN 27:39 Iya aawa Yisaaqi zaaridi, “Ne de7iya bessay ha sa7a duretethafe haaho, salo akika new wodhenna.
GEN 27:40 Neeni ne mashshan aqana, ne ishaas haaretana. Shin neeni iyara eqetiya wode iya qambara ne gannaafe holana” yaagis.
GEN 27:41 Yayqooba iya aaway anjida gisho, Eesawey ba ulon iya morkis. I ba wozanan, “Ta aaway hayqanaw matis. I hayqida mela ta isha Yayqooba wodhana” yaagis.
GEN 27:42 Shin Irbiqa he ba bayra na7a Eesawe qaala si7ida gisho, ba kaalo na7a Yayqooba xeegisa ehada, “Ne isha Eesawey nena wodhidi haluwa kessanaw halchees.
GEN 27:43 Hayyana ta na7aw, taani new odeysa ootha. Dendada Kaaranen de7iya ta isha Laabako baqata.
GEN 27:44 Ne isha hanqoy irxana gakanaw guutha wode iyara de7aasha.
GEN 27:45 Ne ishaa yiloy wodhiya wodenne neeni iya bolla oothidaba I dogiya wode taani kiittada nena ehana. Taani issi gallas hinte nam7aafeka mela atanaw koyke” yaagasu.
GEN 27:46 Hessafe guye, Irbiqa Yisaaqako, “Eesawey ekida Hiteta macca nayta gaason taani ta de7uwa shaatetas. Qassi Yayqoobika haysatho Hiteta macca naytape macho ekiko, taw hayqoy lo77o” yaagasu.
GEN 28:1 Hessa gisho, Yisaaqi Yayqooba xeegidi, “Kanaane biitta macca naytape macho ekofa.
GEN 28:2 Dendada ne aaye aawa Batu7eelako Masephexoome biitta bada yaape ne aaye isha Laaba macca naytape macho eka.
GEN 28:3 Ubbaa Danda7iya Xoossay nena anjo, I new nayta immo, daro dere gidana gakanaw I nena darso.
GEN 28:4 Neeni ha7i betetethan uttida ha biitta nebaa oothana mela newunne ne sheeshas Xoossay Abrahaame anjuwa immo” yaagi anjidi kiittis.
GEN 28:5 Yaagidi Yisaaqi Yayqooba yeddis. Yayqoobi Masephexoome biitta Laabako bis. Laabi Yayqoobanne Eesawe aaye Irbiqa ishanne Araame addiya Batu7eela na7a.
GEN 28:6 Yisaaqi Yayqooba anjidi Masephexoome biittafe macho ekana mela iya yedidaysa, I Yayqooba anjida wode, “Kanaane maccas ekofa” gidi kiittidaysanne,
GEN 28:7 Yayqoobi ba aawasinne ba aayes kiitetidi Masephexoome biitta bidaysa, Eesawey eris.
GEN 28:8 Eesawey hessan Kanaane biitta maccas ba aawa Yisaaqi ay mela ixiyako eris.
GEN 28:9 Hessa gisho, Eesawey Abrahaame na7a Isma7eelako bidi, iya na7iw Mahlaato, Nebayoota michiw, ba macheta bolla gujidi ekis.
GEN 28:10 Yayqoobi Barsaabepe Kaarane baanaw keyis.
GEN 28:11 I, issi bessi gakiya wode awi wullin, qamma yan aqis. He bessan de7iya shuchatape issuwa borkotidi he bessan dhiskis.
GEN 28:12 I amuho amuhidi kodo issoy sa7an eqin xeeray salo gakidaysanne, Xoossa kiitanchoti iya bollara pude keyeysatanne duge wodheyisata be7is.
GEN 28:13 He koduwas xeeran Goday eqidi, “Taani Godaa, ne aawa Abrahaame Xoossa, Yisaaqa Xoossa, ha neeni zin7ida biitta newunne ne sheeshas immana.
GEN 28:14 Ne sheesha sa7a shafeda darsana. Neeni doloha bagga, wuloha bagga, pudeha bagganne dugeha bagga dalgana. Biitta bolla de7iya asa ubbay ne baggaranne ne sheesha baggara anjetana.
GEN 28:15 Taani neera de7ayis. Neeni biya bessa ubban taani nena naagana. Taani nena ha biitta guye zaarada ehana. Taani new oothana gidaysa polana, nena aggike” yaagis.
GEN 28:16 Yayqoobi dhiskofe barkidi, “Ta erabikefe attishin, tuma Goday ha bessan de7ees” yaagis.
GEN 28:17 I babidi, “Ha bessay waani yashshi! Ha bessay Xoossa keethife attishin, haraso gidenna. Haysi salo penge” yaagis.
GEN 28:18 Wontetha gallas wonta guura Yayqoobi dendidi, Xoossas dummayanaw ba borkotida shucha ekidi tuussatho essidi iya bolla zayte tigis.
GEN 28:19 Yayqoobi he bessa Beetele (Xoossa keethi) gidi xeegis. Shin he katamay hessafe kase Looza geetetees.
GEN 28:20 Yayqoobi, “Ta biya ogiyan ne tana naagiko, taw kathinne ma7o immiko,
GEN 28:21 ne tana ta aawa soo saro zaariko, ne ta Xoossa gidana.
GEN 28:22 Taani dummayanaw tuussatho essida ha shuchay Xoossa keetha gidana. Tuma neeni taw immiyaba ubbaafe tammaafe issuwa new immana” yaagidi Xoossas caaqis.
GEN 29:1 Hessafe guye, Yayqoobi dendidi, bidi doloha bagga asa biitta gakis.
GEN 29:2 Yanka demba bessan haatha olla demmis. Heedzu dorsa wudeti he haatha olla matan de7oosona. Wude ubbay haathe uyey he ollafe. He haatha olla doona gordiya shuchay gita.
GEN 29:3 Dorsa wude ubbay yaa shiiqiko, wudiya heemmeysati haatha olla doonape he shucha gondorsidi wudiya haathe ushshoosona. Ushshi simmidi he shucha olla doonan zaari wothoosona.
GEN 29:4 Yayqoobi entako, “Hinte awupe yidetii?” yaagidi oychis. Entika, “Nuuni Kaaranepe yida” yaagidosona.
GEN 29:5 I, “Nakoora na7a na7aa Laaba ereetii?” yaagidi oychis. “Ee, iya eroos” yaagidosona.
GEN 29:6 Yayqoobi enta, “I lo77o de7ii?” yaagidi oychis. “Ee, lo77o, iya na7iw Raheelo dorsata laaggada yaaro hini be7a” yaagidosona.
GEN 29:7 Yayqoobi entako, “Heko, ha7i awi dhoqan de7ees. Wude mehey soo simmiya wodey buroo gakibeenna, dorsa ushshi efidi heemmite” yaagis.
GEN 29:8 Shin enti, “Wude ubbay shiiqin shucha haatha olla doonape gondorsana gakanaw nu ushshanaw danda7oko. Hessafe guye, shucha gondorsidi dorsata ushshana” yaagidosona.
GEN 29:9 I buroo odishin, Laaba na7iya Raheela dorsata heemmiya gisho, ba aawa dorsata laagga ekada gakasu.
GEN 29:10 Yayqoobi ba aaye isha Laaba na7iw Raheelo Laaba dorsata laaggada yaaro be7ida wode bidi olla doonape shucha gondorsidi dorsata haathe ushshis.
GEN 29:11 Yayqoobi Raheelo yeeridi, ufaysan ba qaala dhoqu oothidi yeekis.
GEN 29:12 Yayqoobi, “Taani ne aawa miche Irbiqa na7a” yaagidi iw odis. Hessa gisho, iya woxa bada ba aawas odasu.
GEN 29:13 Laabi ba miche na7a Yayqooba yuussaa si7ida mela mokanaw woxidi bis. Iya idimi yeeridi ba soo efis. Yan Yayqoobi hanidaba ubba Laabas odis.
GEN 29:14 Laabi iya, “Neeni tuma ta ashonne ta suuthi” yaagis. Yayqoobi iyara issi ageena kumethi uttis.
GEN 29:15 Hessafe guye, Laabi Yayqooba, “Neeni taw dabbo gidida gisho, taw mela coo oothaneyee? Ane ta new ay qanxanaw koshshiyako taw oda” yaagis.
GEN 29:16 Laabas nam7u macca nayti de7oosona. Bayre sunthay Liya, kaaliya qassi Raheelo geetetawusu.
GEN 29:17 Liya ayfera cuuca, shin Raheela yegelsinne mala lo77o.
GEN 29:18 Yayqoobi Raheelo dosidi, “Taani ne kaalo na7e Raheeli gisho new laapun laythi oothana” yaagis.
GEN 29:19 Laabi, “Iyo hara asas immanaape new imoy lo77o, ne taara haysan de7a” yaagis.
GEN 29:20 Hessa gisho, Yayqoobi Raheelo ekanaw laapun laythi oothis. Shin I iyo daro dosiya gisho, iyaw guutha gallas daanis.
GEN 29:21 Hessafe guye, Yayqoobi, “Ta machiw taw imma, ta laythay wuris taani iyo ekanaw koyayis” yaagis.
GEN 29:22 Hessa gisho, Laabi asa ubba xeegidi yaagano kessis.
GEN 29:23 Shin sa7i qammin Laabi ba na7iw Liya efidi Yayqoobas immis. Yayqoobi iyo ekis.
GEN 29:24 Qassi Laabi ba aylliw Zalafa ba na7e Liyas aylle oothidi immis.
GEN 29:25 Sa7ay wontin I xeelliya wode, heko, Liya. Yayqoobi Laaba, “Haysi neeni ta bolla oothidaysi aybee? Taani new oothiday Raheeli gishosa gidenneyee? Tana ayis cimmadi” yaagis.
GEN 29:26 Laabi iyako, “Nu biittan bayriya de7ishin kaaliw azinas immeysi woga gidenna.
GEN 29:27 Mishiratethan iira saaminta ongiko, qassi kaaliwka taani new immana. Hessafe guye, hara laapun laythi taw oothaasa” yaagis.
GEN 29:28 Yayqoobi oda ma77idi saaminta iira ongis. Hessafe guye, Laabi ba na7iw Raheelo iyaw immis.
GEN 29:29 Qassi Laabi ba aylliw Baalo ba na7e Raheelis aylle oothidi immis.
GEN 29:30 Yayqoobi Raheeloka ekis. Raheelo Liyape aathidi dosis. Hara laapun laythi Laabas oothis.
GEN 29:31 Goday Liya Raheelitho dosetabonaro be7idi, iw yelo uluwa dooyis. Shin Raheela na7a yelonna gam7asu.
GEN 29:32 Liya qanthatada adde na7a yelasu. Iya, “Goday ta metuwa be7is, ha7i tana ta azinay dosana” gada he na7a Robeela gada sunthasu.
GEN 29:33 Iya nam7antho qanthatada adde na7a yelasu. Iya, “Goday taani dosetabonaysa be7ida gisho, taw haysaka gujis” gada Simoona gada sunthasu.
GEN 29:34 Iya heedzantho qanthatada adde na7a yelasu. Iya, “Taani iyaw heedzu adde nayta yelida gisho, ta azinay ha7i taara siiqon waaxetana” gada iya Leewe gada sunthasu.
GEN 29:35 Iya hara qanthatada adde na7a yelasu. Iya, “Ha7i taani Godaa galatana” gada iya suntha Yihuda gada unthasu. Hessafe guye, yelo eqasu.
GEN 30:1 Raheela Yayqoobas nayta yelonnaysa be7ada ba michiw qanaatasu. Hessa gisho, Yayqooba, “Taw na7a imma, ixiko taani hayqana” yaagasu.
GEN 30:2 Yayqoobi Raheelo hanqetidi, “Tana new yelo immanaw woyko digganaw Xoosse gadiyee?” yaagis.
GEN 30:3 Iya, “Ta gadhindiw Baalo hinno be7a. Iya ta gisho yelana mela neeni iira aqa, yaaniko, taani I baggara na7a demmana” yaagasu.
GEN 30:4 Ba gadhindiw Baalo macho oothidi ekana mela iyaw immasu.
GEN 30:5 Baala qanthatada adde na7a Yayqoobas yelasu.
GEN 30:6 Yaatin Raheela, “Xoossay taw pirdis, ta woosaka si7idi taw adde na7a immis” yaagada he na7a Daane gada sunthasu.
GEN 30:7 Raheeli gadhindiya Baala qanthatada Yayqoobas nam7antho adde na7a yelasu.
GEN 30:8 Raheela, “Taani ta michera wolqaama baaxe baaxetada xoonas” yaagada he na7a Niftaaleme gada sunthasu.
GEN 30:9 Liya yelo eqidaysa be7ada, ba gadhindiya Zalafa Yayqoobas macho oothada immasu.
GEN 30:10 Liya gadhindiya Zalafa adde na7a Yayqoobas yelasu.
GEN 30:11 Liya, “La haysi aybi lo77o qaade!” yaagada, he na7a Gaade sunthasu.
GEN 30:12 Liya gadhindiya Zalafa Yayqoobas nam7antho adde na7a yelasu.
GEN 30:13 Liya, “Tana daro ufaysees; maccasi ubbay tana ufaytiyaro gaana” gada he na7a Aseera gada sunthasu.
GEN 30:14 Giste cakiya ageenan Robeeli gade bidi inkoya mitha ayfe demmidi ba aaye Liyas ekidi yis. Raheela Liyako, “Ne na7ay ehida enkoya mitha ayfiyape taw imma” yaagasu.
GEN 30:15 Shin Liya, “Ta azinaa neeni wolqan ekidaysi gidonna ixin ha7i qassi ta na7a inkoya mitha ayfiya ekanee?” yaagasu. Raheela, “Ne na7a inkoya ayfiya taw immiko, Yayqoobi hachi qamma neera aqo” yaagasu.
GEN 30:16 He gallas omarsi Yayqoobi bazzofe yaa wode Liya iya mokanaw keyada, “Neeni taara aqanaw koshshees; taani ta na7a inkoya ayfiyan nena shammas” yaagasu. Hessa gisho, I he qamma iira aqis.
GEN 30:17 Xoossay Liya woosa si7is. Iya qanthatada ichashantho adde na7a Yayqoobas yelasu.
GEN 30:18 Liya, “Taani ta aylliw ta azinas immida gisho, Xoossay hessa taw qanxis” yaagada he na7a Yisakoora gada sunthasu.
GEN 30:19 Liya hara qanthatada usupuntho adde na7a Yayqoobas yelasu.
GEN 30:20 Liya, “Xoossi taw al7o imota immis. Taani ta azinaas usupun adde nayta yelida gisho, ha7i I tana bonchana” yaagada he na7a Zabloona gada sunthasu.
GEN 30:21 Hessafe guye, issi macca na7a yelasu, iyo Diina gada sunthasu.
GEN 30:22 Xoossay Raheelo qopis. I woosa si7idi I yelo uluwa dooyis.
GEN 30:23 Iya qanthatada adde na7a yelasu; “Xoossay ta yeella qaaris.
GEN 30:24 Goday taw hara adde na7aka gujo” yaagada he na7a Yoosefa gada sunthasu.
GEN 30:25 Raheela Yoosefa yelidaape guye, Yayqoobi, “Taani ta aawa biitta simmada bana tana moyza.
GEN 30:26 Taani enta gisho new oothida ta macceetanne ta nayta imma. Taani baana, taani new ay mela ooso oothidaako neeni eraasa” yaagis.
GEN 30:27 Shin Laabi iyako, “Taani new issiba odayis, Goday ne gaason tana anjidaysa taani ta Xoossafe eras.
GEN 30:28 Ne damooziya taw oda, taani new qanxana” yaagis.
GEN 30:29 Yayqoobi, “Taani new waata oothidaako, ne mehetika waani yeletidaako neeni eraasa.
GEN 30:30 Taani yaanape kase new de7iya guuthay ha7i loythi daris. Goday nena taani aadhida bessa ubban anjis. Shin ha7i, taani ta soo asaas oothana wode” yaagis.
GEN 30:31 Laabi, “Yaatin taani new ay immo?” yaagidi iya oychis. Yayqoobi, “Taw aykoka immofa, neeni taw issiba oothana gidiko, taani ne wudiya ha7ika heemmananne naagana.
GEN 30:32 Taani hachi ne wude ubbaa giddora aadhana. Hessan ne dorsatape wancuwa woyko gazza, kareetha marazeta ubbaa, deeshape gazzanne wanco ubbaa taani shaakana, enti ta damooze gido.
GEN 30:33 Hessa gisho, ta xillotethay ne taw qanxida damooziya be7anaw yaa wode taw markatana. Ta deeshape gazza woyko puncare gidonabay woyko kareethi gidonna ay dorsati ta matan bentiko, kaysotetidaada tayba” yaagis.
GEN 30:34 Laabi, “Ero, neeni gidaysada gido” yaagis.
GEN 30:35 Shin he gallasan Laabi kalaade woyko gazza gidida kole ubba, wanco woyko gazza gidida macca deesha ubba, bootha wanco deeshatanne kareetha wanco dorsata ubba kessidi ba adde nayta heenthis.
GEN 30:36 Yaatidi he wudiya heedzu gallasa ogiya Yayqoobape haassidi efis. Shin Yayqoobi attida Laaba wudiya heemmis.
GEN 30:37 Yayqoobi ongafirepe, bar7efenne lawuze mithafe xam7a kessidi, poquwa poqidi giddo bootha bagga qaaridi shiloyis.
GEN 30:38 Wudey haathe uyanaw yaa wode gongen wudiya sinthan poqida xam7a wothis. Biraysi keydaysati haathe uyanaw yidi,
GEN 30:39 he xam7ata sinthan biraysetosona. He biraysidaysati kalaade, wanconne gazza marata yelidosona.
GEN 30:40 Yayqoobi deesha maratanne dorsa wudiyape shaakidi dumma wothis. Attida wudiya kalaadenne kareethi gidiya Laaba mehiyako zaaridi essis. Yaatidi Laaba wudiyara gathonna ba wudiya dummayidi darsis.
GEN 30:41 Wudiyape gooba maccati biraysas keyiya wode he xam7ata matan biraysetana mela Yayqoobi he xam7ata haatha gongen meheta sinthan wothees.
GEN 30:42 Shin meheti laafa gidiko enta sinthan xam7a wothenna. Hessa gisho, laafa meheti Laababa gidin goobati Yayqoobaba gididosona.
GEN 30:43 Hessada oothidi Yayqoobi daro duretidi, daro wudiya, macca aylletanne adde aylleta, daro gimaletanne hareta haaris.
GEN 31:1 Laaba adde nayti, “Yayqoobi nu aawaba ubba ekidigis. Ha shalo ubba nu aawabape demmis” yaagishin Yayqoobi si7is.
GEN 31:2 Yayqoobi Laaba som7oy iyaw kase mela gidonaysa be7is.
GEN 31:3 He wode Goday Yayqooba, “Neeni ne aawata biitta, ne dabbotako guye simma. Taani neera gidana” yaagis.
GEN 31:4 Yayqoobi Raheelonne Liya ba wudey heemetiya bessaa yaana mela kiittidi xeegisis.
GEN 31:5 I entako, “Hinte aawa som7oy taw kase mela gidonaysa taani be7ayis. Shin ta aawa Xoossay taara de7ees.
GEN 31:6 Taani ta kumetha wolqan hinte aawas oothidaysa hinte ereeta.
GEN 31:7 Shin hinte aaway tana cimmidi, ta damooziya tammu toho laammis. Gidikoka Xoossay tana I qohonnaada diggis.
GEN 31:8 I, ‘Puncareti ne damooze gido’ gin wude ubbay puncare yelis. Qassi I, ‘Kalaadeti ne damooze gido’ gin wude ubbay kalaade yelis.
GEN 31:9 Xoossay hessan hinte aawa mehiya wothi ekidi taw immis.
GEN 31:10 “Meheti biraysas keyiya ageenan taani issi amuho amuhas. He amuhuwan taani xeelliya wode mehiya biraysiya deesha urgeti kalaade, puncarenne gazza.
GEN 31:11 Xoossa kiitanchoy amuhon tana, ‘Yayqooba’ yaagis. Taani, ‘Yee’ gada koyas.
GEN 31:12 Ika, ‘Dhoqu gada mehiya biraysiya deesha urge ubba kalaade, puncarenne gazza be7a. Laabi ne bolla oothiyaba ubba taani be7ida gisho hessa oothas.
GEN 31:13 Neeni essida shucha zayte tiyada taw caaqida Beetele Xoossay tana. Ha7i dendada ha biittafe keya. Guye ne yeletida biitta simma’ gis” yaagis.
GEN 31:14 Hessafe guye, Raheeliranne Liyara “Nu aawabape nuna gakiyabay aybee?
GEN 31:15 I nuna allagada xeellees gidennee? I nuna bayzi ekis. Bayzi ekidaba ubbaa midi dhaysis.
GEN 31:16 Xoossay nu aawape wothi ekida shalo ubbay tumaka nubaanne nu naytabaa. Hessa gisho, Xoossay new odidaba ubba ootha” yaagi zaaridosona.
GEN 31:17 Yayqoobi Kanaane biittan de7iya ba aawa Yisaaqako baanaw dendis. I ba naytanne ba macheta gimale togisis. Wude ubba laaggidi, Masephexoomen de7ishe shiishida shalo ubba ekidi bis.
GEN 31:19 Laabi ba dorsata ikisiya qanxanaw bidashin, Raheela ba aawa soo eeqa misileta kaysotasu.
GEN 31:20 Qassi Yayqoobi Araame addiya Laabas ba buussaa odonna ixidi cimmis.
GEN 31:21 I baw de7iyaba ubba ekidi ellesidi Efraxiisa shaafa pinnidi, derey dariya Galada biitta bis.
GEN 31:22 Heedzu gallasape guye, Yayqoobi baqatidi bidaysa Laabi si7is.
GEN 31:23 Ba dabbota baara ekidi, laapun gallasa oge Yayqooba geedo kaalli derey dariya Galada biittan iya gakis.
GEN 31:24 He wode Xoossay qamma Soore Laabako amuhon qoncidi, “Neeni Yayqooba bolla iitaba gidin lo77oba, aybibaaka odetiko nena era” yaagis.
GEN 31:25 Laabi gakiya wode Yayqoobi derey dariya Galada biittan dunkaane tokidi uttis. Laabika dabbotara yan dunkaanidosona.
GEN 31:26 Hessafe guye, Laabi Yayqooba, “Neeni haysada tana ayis cimmadii? Ta macca naytaka olan di7etidabada ayis laagga kessadii?
GEN 31:27 Neeni ayis qosan taape kessa ekada tana cimmadii? Taani nena ufaysaninne yethan, karaaboninne diithan moyzana mela ayis taw odabikii?
GEN 31:28 Neeni hari attoshin, ta nayta naytanne ta macca nayta taani yeera ekona mela diggadasa. Neeni iita oothadasa.
GEN 31:29 Taani nena genanaw taw wolqi de7ees shin ne aawa Xoossay zine qamma tana, ‘Yayqooba bolla iitaba gidin lo77oba aybibaaka odetonaada nena era’ yaagidi taw odis.
GEN 31:30 Ha7i neeni ne aawa soo baanaw daro laamotida gisho keyadasa. Shin ta soo eeqa misileta ayis kaysotadii?” yaagis.
GEN 31:31 Yayqoobi Laaba, “Neeni ne nayta taape wolqan wosisa ekanekonne gada qopida gisho yayada haysada oothas.
GEN 31:32 Shin ne soo eeqa misileta ekida asi oonaka neeni demmiko, he uray hayqo. Nu dabbota sinthan nebaa gididaba ubba koyada eka” yaagis. Yayqoobi Raheela ba aawa soo eeqa misileta kaysotidaysa eribeenna.
GEN 31:33 Hessa gisho, Laabi Yayqooba dunkaaniya giddo, Liya dunkaaniya giddonne nam7u aylleta dunkaaniya giddo gelidi koyis. Shin aykoka demmibeenna. Liya dunkaaniyape keyidi, Raheeli dunkaaniya gelis.
GEN 31:34 Raheela soo eeqa misileta ekada gimale koora garsan qosada iya bolla uttasu. Laabi dunkaaniyan de7iyaba ubba pilgidi koyis. Shin aykoka demmibeenna.
GEN 31:35 Raheela ba aawa, “Ta godaw, tana hanqetofa. Taani new denda eqanaw danda7ike, ta kushe metora de7ayis” yaagasu. I koyidi soo eeqa misileta demmibeenna.
GEN 31:36 Yayqoobi yilotidi Laabako, “Taani ay iissadina? Haysa neeni tana kaallanaw ta ay qoho oothadina?
GEN 31:37 Ha7i neeni ta miishe ubba pilgada koyadasa. Ne soo eeqa misiletape ay demmadii? Enti nu nam7a giddon pirdana mela ne dabbota sinthaninne ta dabbota sinthan haysan wotha.
GEN 31:38 “Taani neera laatamu laythi kumethi de7as. Ne dorsatinne deeshati awucaybokona woyko ne wudiyape issuwaka qottada mabike.
GEN 31:39 Do7i mida gawuxaka ta new eha erike; taani taape ciggayis. Gallas woyko qamma kaysotetidaysata qanxisaasa.
GEN 31:40 Gallasa suulan, qamma meegon taani qohetas. Maara dhisko dhiska erike.
GEN 31:41 Taani haysada hanada ne son laatamu laythi de7as. Tammanne oyddu laythi ne nam7u macca nayta gisho, usupun laythi ne mehiya gisho new oothas. Shin neeni ta damooziya tammu toho laammadasa.
GEN 31:42 Ta aawa Xoossay, Abrahaame Xoossay, Yisaaqi Xoossay taara gidonaba gidiyako, sidhey bayna neeni tana mela kushe kessa yeddadasa. Shin Xoossay ta metuwanne ta daabursa be7idi zine qamma nena hanqis” yaagis.
GEN 31:43 Laabi zaaridi Yayqooba, “Maccasati ta macca nayta, enta nayti ta nayta, ha meheyka ta mehiya, neeni be7iya ubbay taba. Hachi ha macca nayta bollanne enta nayta bolla ay oothanaw danda7ayna?
GEN 31:44 Ane haaya, neeranne taara wolla ane caaqoos. Hessi ne giddoninne ta giddon marka gido” yaagis.
GEN 31:45 Hessa gisho, Yayqoobi issi shucha ekidi tuussatho essis.
GEN 31:46 Ba dabbota, “Shucha shiishite” yaagis. Enti shucha shiishidi keelidosona. He keela matan kathi midosona.
GEN 31:47 Laabi he keela, Yigar-Sahaduta gidi sunthis. Yayqoobi qassi iya Galada gidi sunthis.
GEN 31:48 Laabi, “Ha keelay neepenne taape giddon hachi marka” yaagis. Hessa gisho, iya sunthay Galada geetetis.
GEN 31:49 Laabi, “Nuuni issoy issuwafe haakidi de7iya bessan Goday nenanne tana naago” gidi he bessa Mixipha gidi sunthis.
GEN 31:50 Laabi, “Neeni ta macca nayta naaqiko, woyko neeni ta macca nayta bolla hara macco ekiko, ta eronna ixikoka ne giddoninne ta giddon Xoossay marka gideysa akeeka” yaagis.
GEN 31:51 Laabi qassika, “Keeletida shuchaynne taani ne giddoninne ta giddon essida shucha tuussay haysish.
GEN 31:52 Taani ha keelape nena genanaw neeko kanthonnaada, neka tana genanaw ha keelapenne ha shucha tuussafe haa aadhonada ha keelaynne ha shucha tuussay marka.
GEN 31:53 Abrahaame Xoossay, Nakoora Xoossay, enta aawa Xoossay, nu giddon pirdo” yaagis. Yayqoobi ba aawa Yisaaqa Xoossa sunthan caaqis.
GEN 31:54 Yayqoobi zuma bolla yarsho yarshis. Ba dabbota kathi maanaw xeegis. Enti midi zuma bolla aqidosona.
GEN 31:55 Wontetha gallas guura Laabi dendidi ba nayta naytanne ba macca nayta anjidi, yeeridi ba soo simmis.
GEN 32:1 Yayqoobi dendidi ba ogiya bishin Xoossa kiitanchoti iyara gahetidosona.
GEN 32:2 Yayqoobi enta be7ida wode “Haysati Xoossa olanchota” yaagidi, he bessa Mahanayma (Nam7u guta) gidi sunthis.
GEN 32:3 Yayqoobi Edoome biittan Sayre giya bessan de7iya ba isha Eesaweko kiita baape sinthe kiittis.
GEN 32:4 I enta, “Hinte ta godaa Eesawes gaanabay haysa, ‘Taani ne aylley Yayqoobi, ha77i gakanaw Laaba matan gam7as.
GEN 32:5 Taw miizi, harey, dorsinne deeshi, adde aylletinne macca aylleti de7oosona. Ha7i taani ha kiita ta godaa sinthan saba demmandinasha gada kiittas yaagis’ yaagite” yaagidi kiittis.
GEN 32:6 Kiitetidaysati Yayqoobako simmidi, “Nuuni ne isha Eesaweko bida. Ika qassi neera gahetanaw yees. Iyara oyddu xeetu asay de7oosona” yaagidosona.
GEN 32:7 Yayqoobi daro babidi baara de7iya asa nam7u cugan shaakis. Ba dorsa, deesha, miizanne gimaleta nam7u cugan shaakis.
GEN 32:8 I, “Eesawey yidi issi cuga oliyaba gidiko, attida cugay kessi ekana” gidi qopis.
GEN 32:9 He wode Yayqoobi haysada yaagidi woossis, “Abeeti Godaw, ta aawa Abrahaame Xoossaw, ta aawa Yisaaqa Xoossaw, tana, ‘Ne biitta, ne dabbotako simma, taani new lo77oba oothana gidayso, tana si7arki’,
GEN 32:10 neeni ne aylliyas keehidabasinne ammanetetha ubbaas taani bessona asi. Taani Yordaanose shaafa pinniya wode taw issi xam7a xalaali de7ees; shin ha7i taani nam7u cuga godaa gidas.
GEN 32:11 Taani nena woossayis ta isha Eesawe kushepe tana ashsha. I yidi, tananne aayeta enta naytara dhaysona aggenna gada yayyayis.
GEN 32:12 Shin neeni tana, ‘Taani new tuma lo77oba oothana. Taani ne sheesha taybanaw danda7etona abba shafeda oothana’ gidaysa qopa” yaagis.
GEN 32:13 He gallas qamma I yan aqis. Baw de7iyaba ubbaafe ba isha Eesawes immanaba qoridi kessis.
GEN 32:14 I, nam7u xeetu macca deeshatanne laatamu deesha marazeta, nam7u xeetu macca dorsatanne laatamu dorsa marazeta, hastamu dhanthiya gimaleta enta maratara, oytamu macca miizata, tammu korma boorata, laatamu macca haretanne tammu adde hareta qoridi kessis.
GEN 32:16 Hessata wuden wuden shaakidi ba aylletas immidi, “Taape sinthe bidi wudiya wudiyape haahon haahon laaggite” yaagis.
GEN 32:17 Sinthan kaaletheysa, “Ta ishay Eesawey neera gahetidi, ‘Neeni oodesee? Neeni aw bay? Ne sinthan de7iya mehe ubbay oodebayee?’ yaagidi oychiko,
GEN 32:18 ne iyako, ‘Haysati ne aylliya Yayqoobasa, I ta godaa Eesawes immanaw yeddidaysata. Ika nuupe guyera yees’ yaaga” yaagidi kiittis.
GEN 32:19 Qassi nam7anthuwa, heedzanthuwanne wudiya kaalliya harata ubbaa, “Hinte Eesawera gahetiya wode haysada geeta;
GEN 32:20 ‘Ne aylliya Yayqoobi nuupe guyera yees’ goonna aggofite” yaagidi kiittis. I, “Taani immanaw sinthe yeddidaysan iya irxisana. Ooni eri hessafe guye taani iyara gahetiya wode I tana moki ekana” yaagidi qopis.
GEN 32:21 Hessa gisho, ba immanaba baape sinthe yeddis. Shin I ba huuphen he gallas qamma yan aqis.
GEN 32:22 He qamma Yayqoobi dendidi, ba nam7u macheta, ba nam7u aylleta, ba nayta tammanne issota ekidi, Yaaboqa shaafa pinnis.
GEN 32:23 I enta shaafa pinthi simmidi baw de7iyaba ubbaa pinthidi yeddis.
GEN 32:24 Shin Yayqoobi barka guye attis. He wode issi asi sa7i wontana gakanaw iyara baaxetishe aqis.
GEN 32:25 He uray iya xoonanaw danda7onaysa be7ida wode Yayqoobas bulxiya bochin, iya bulxey kesuwape keyis.
GEN 32:26 Yaatin uray iya, “Sa7i wontana haniya gisho, tana yedda” yaagis. Shin Yayqoobi, “Neeni tana anjonna nena yeddike” yaagis.
GEN 32:27 Uray, “Ne sunthay oonee?” yaagidi oychis. I zaaridi, “Yayqooba” yaagis.
GEN 32:28 Uray, “Neeni Xoossaranne asara baaxetada xoonida gisho, hizape ne sunthay Yayqooba geetetofo, Isra7eele (Xoossara baaxetis) geeteto” yaagis.
GEN 32:29 Yayqoobi uraa, “Ne sunthay oonee?” yaagidi oychis. Shin uray, “Neeni ta suntha ayis oychay?” yaagidi iya anjis.
GEN 32:30 Hessa gisho, Yayqoobi, “Taani Xoossa som7on be7as shin paxa de7ayis” yaagidi, he bessa Phin7eela (Xoossa som7o) gidi sunthis.
GEN 32:31 I Phin7eelape dendiya wode iya bolla xalqey dolis. Iya bulxe kessay sakiya gisho dogees.
GEN 32:32 Yayqooba bulxey wodire ashuwa matan boshetida gisho, Isra7eele asay mehes bulxe asho hachi gakanaw mookonna.
GEN 33:1 Yayqoobi dhoqu gidi xeelliya wode Eesawey ba oyddu xeetu asaara yeysa be7is. Hessa gisho, nayta Liyas, Raheelisinne nam7u aylletas shaaki immis.
GEN 33:2 Aylletanne enta nayta sinthan, Liyanne I nayta enta geedon, Raheelonne Yoosefa wursethan wothis.
GEN 33:3 Shin I baw sinthe aadhidi ba ishaako matishe sa7a gaki gaki laapuntoho ziggis.
GEN 33:4 Shin Eesawey iyara gahetanaw woxi yidi iya qoodhiya qoomidi yeeris. Nam7ayka yeekidosona.
GEN 33:5 Eesawey dhoqu gidi xeellidi maccasatanne nayta be7idi, “Ha neera de7eysati oonantee?” yaagidi oychis. Yayqoobi, “Ta godaw, haysati Xoossay ne aylliyas ba keehatethan immida nayta” yaagis.
GEN 33:6 Aylleti banta naytara shiiqidi iyaw ziggidosona.
GEN 33:7 Kaallidi Liyaranne I naytara yidi ziggidosona. Wursethan Yoosefaranne Raheelira yidi ziggidosona.
GEN 33:8 Eesawey, “Ha sinthan bishe taara gahetida wudey ubbay aybee?” yaagidi oychis. Yayqoobi, “Ta godaw, hessi taani ne sinthan saba demmanaw yeddidaysata” yaagis.
GEN 33:9 Shin Eesawey, “Ta ishaw, taw gidiya shaloy de7ees, nebay new gido” yaagis.
GEN 33:10 Yayqoobi, “Hayyana, ha7i taani ne sinthan saba demmidaba gidiko, ha taani immeysa eka. Neeni tana moka ekida gisho, ta ne som7uwa be7eysi Xoossa som7o be7eysa mela.
GEN 33:11 Taani new ehida ha imota eka. Xoossay taw keehi immida gisho kumis” yaagis. Yayqoobi woossidi aggonna ixida gisho, Eesawey iya imota ekis.
GEN 33:12 Eesawey, “Ane yedha, taani neera issife baana” yaagis.
GEN 33:13 Shin Yayqoobi, “Ta godaw, nayti shugo gideysa eraasa. Qassi taani galo marata dhanthiya dorsatanne miiza naaganaw koshshees. Asay enta hari attoshin, issi gallas minthi laagiko, mehe ubbay hayqana.
GEN 33:14 Hessa gisho, ta godaw, ne aylletape sinthatada ba. Taani Sayren ta godaa gakanaw, ta sinthan de7iya mehiyanne nayta hemethaa mela loddan kaallada ta godaa taani Edoomen gakana” yaagis.
GEN 33:15 Eesawey, “Yaaniko, taani ta asaape guuthara new asho” yaagis. Shin Yayqoobi, “Koshshenna; taani ta godaa sinthan sabetidaysi taw gidana” yaagis.
GEN 33:16 Hessa gisho, Eesawey he gallas ogen wodhidi Sayre simmis.
GEN 33:17 Shin Yayqoobi Sukota bis. Yan baw keethe keexis, ba mehetas shaqara shaqaris. Hessa gisho, he bessa Sukota (Kuya woyko Gaabba) gidi sunthis.
GEN 33:18 Yayqoobi Masephexoomepe simmidi Kanaane biittan de7iya Seekema katama saron gakis. I he katamas sintha baggara dunkaane tokidi uttis.
GEN 33:19 Ba dunkaaniya tokidi uttida gadiya Seekema aawa Hamoora naytape issi xeetu bira santimen shammis.
GEN 33:20 Yan yarsho bessi giigisidi, “Godaa, Isra7eele Xoossa” gidi sunthis.
GEN 34:1 Liya Yayqoobas yelida na7iya Diina, he wode Kanaane maccasata be7anaw keyasu.
GEN 34:2 He biitta haariya Hiwe addiya Hamoora na7a Seekemi iyo be7idi, dafidi iissis.
GEN 34:3 Iya wozanay Yayqooba na7iw Diinas qadhetis. I iw mishetida gisho lo77o qaalara iyo odisis.
GEN 34:4 Seekemi ba aawa Hamoora, “Taw ha na7iw macho oycharki” yaagis.
GEN 34:5 Yayqoobi ba na7iw, Diina, azini dafidaysa si7ida wode iya adde nayti mehera bazzon de7oosona. Hessa gisho, enti yaana gakanaw si77i gis.
GEN 34:6 Hessafe guye, Seekema aawa Hamoori Yayqooba odisanaw yis.
GEN 34:7 Yayqooba adde nayti bazzofe yidi hessa si7idosona. Enti Seekemi Yayqooba na7iw dafidi, iissidi Isra7eele yeellayida gisho daro yilotidosona.
GEN 34:8 Shin Hamoori entako, “Ta na7ay Seekemi hinte na7ees daro mishetees, hayyana iyo iyaw macho immerketi.
GEN 34:9 Nuura eketitenne geletite, hinte macca nayta nuus immite, nu macca naytaka hintew ekite.
GEN 34:10 Hinte nu giddon daanaw danda7eeta. Biittay daro dalga, iya oothidi zal7idi hintew aqo demmanaw danda7eeta” yaagis.
GEN 34:11 He wode Seekemi Diina aawanne I ishata, “Taani hinte sinthan sabetiko, hinte koyiyaba aybiba gidikoka immana.
GEN 34:12 Hinte mishira na7ees immanabaanne koyta hinte koyda mela tana oychite. Taani hinte tana oychidaba ubba immana. Shin taani machanaw na7iw taw immerketi” yaagis.
GEN 34:13 Banta michiw Diina Seekemi tunisida gisho, Yayqooba adde nayti Seekemasinne iya aawa Hamooras wordotidosona.
GEN 34:14 Entako, “Nuuni hessa mela palabaa oothanaw danda7oko, nuuni nu michiw qaxaretiboona asas immoko, hessi nuna kawushiyaba.
GEN 34:15 Hinte nuus issiba ero giiko nu hintew ero gaana. Hessika, hinte biitta adde asa ubbay qaxaretidi nuuda haniko,
GEN 34:16 nuuni nu macca nayta hintew immanaw Ero gaana. Hinte macca naytaka nuus ekana. Nuuni hinte giddon de7idi hintera issi ase gidana.
GEN 34:17 Shin hinte qaxaretanaw ero goonna ixiko, nuuni nu michiw eki baana” yaagidosona.
GEN 34:18 Yaatin ha enti gidabay Hamoorasinne iya na7a Seekemas lo77o daanis.
GEN 34:19 He panthay ba aawa keethan de7iya ubbaafe aadhidi bonchetida gisho koydaba oothanaw iyaw maati de7ees. Yayqooba na7iw daro dosida gisho, enti gidaba oothanaw guye gibeenna.
GEN 34:20 He wode Hamoorinne iya na7ay Seekemi banta katama dabaaba bidi, banta katama asaas haysada yaagidi odidosona.
GEN 34:21 “Ha asati nuura siga de7oosona. Biittay daro dalga gidiya gisho enti ha biittan goyo zal7o. Enta macca naytaka nuuni ekana, entika nu macca nayta ekona.
GEN 34:22 Shin nuura enti issi asada de7anaw nuuni issiba ero gaanaw koshshees. Hessika, enti qaxaretidaysada nu adde asa ubbay qaxaretanaysa.
GEN 34:23 Nuuni hessada oothiko, enta meheynne, enta aqo ubbay nubaa gidennee? Hessa gisho, ane nuuni enti geysa ero goos. Entika nu giddon de7ana” yaagidosona.
GEN 34:24 Katamaa dabaaba shiiqida asati ubbay Hamoorasinne iya na7a Seekemas, “Ero” gidoosona. Yaatin he katama adde asati ubbay qaxaretidosona.
GEN 34:25 Heedzantho gallas, enti ubbay banta qaxara maduntha saketishin, Yayqooba adde naytape nam7ay, Diina ishati, Simoonaranne Leewera banta mashsha ekidi oonika eronna katama gelidi adde asa ubba wodhidosona.
GEN 34:26 Hamooranne iya na7a Seekema mashshan wodhidi, banta michiw Diina Seekema keethafe eki bidosona.
GEN 34:27 Yayqooba hara adde nayti ahata bolla gelidi banta michiw Diina tunisida katama ubbaa bonqidosona.
GEN 34:28 Enta dorsa wudiya, miiza wudiya, hariya, katama giddon de7iyabaanne gaxan de7iyaba ubba ekidosona.
GEN 34:29 Enta keethan de7iya aquwa ubba, enta nayta ubbaanne maccasata ubba di7idosona.
GEN 34:30 Yayqoobi Simoonanne Leewe, “Hinte ta bolla gita meto ehideta. Ha biittan de7iya Kanaanetinne Parzeti tana ixana. Nuuni taybon guutha, enti issife gididi ta bolla dendiko, taaninne ta soo asay dhayana” yaagis.
GEN 34:31 Shin enti, “Yaatin, I nu michiw layma maccasada oothanaw bessii?” yaagidosona.
GEN 35:1 Hessafe guye Xoossay Yayqooba, “Dendada pude Beetele keyada yan de7a. Neeni ne isha Eesawepe baqatida wode new qoncida Xoossas yan yarsho bessi giigisa” yaagis.
GEN 35:2 Hessa gisho, Yayqoobi ba soo asaanne iyara de7eyisata ubba, “Hinte giddon de7iya allaga xoossata diggite. Hintena geeshshite, hinte ma7uwa laammite.
GEN 35:3 Haysafe dendidi pude Beetele boos. Ta metuwa gallas taw si7ida, taani bida bessa ubban taara gidida Xoossas taani yan yarsho bessi giigisana” yaagis.
GEN 35:4 Enti bantaw de7iya allaga xoossata ubbaanne banta haythan aathida worqa ubba kessidi Yayqoobas immidosona. Yayqoobi hessata Seekeman de7iya wolaa garsan moogis.
GEN 35:5 Hessafe guye, Yayqoobinne iya adde nayti dendidi biyade enta yuushuwan de7iya asa bolla Xoossa yashshay wodhida gisho entana kaallidi oykanaw oonika danda7ibeenna.
GEN 35:6 Yayqoobinne iyara de7iya asa ubbay Kanaane biittan de7iya Beetele geetetiya Looza gakidosona.
GEN 35:7 Yan I yarsho bessi giigisis. I he bessa El-Beetele (Beetele Xoossa) gidi sunthis. I ba ishaape baqatidi biya wode Xoossay iyaw qonciday he bessaana.
GEN 35:8 Irbiqa dichiya Diboora yan hayqasu. Beetelepe garsara de7iya wolaa garsan iya moogetasu. Hessa gisho, he mitha sunthay Alon-Bakute (Yeeho Wola) geetetis.
GEN 35:9 Yayqoobi Masephexoomepe simmidaape guye, Xoossay iyaw zaari qoncidi iya anjis.
GEN 35:10 Xoossay, “Ne sunthay Yayqooba. Shin hizape neeni Yayqooba geetetaka, ne sunthay Isra7eele geetetana” yaagidi iya “Isra7eele” gidi sunthis.
GEN 35:11 Qassi Xoossay Yayqooba, “Taani Ubbaa Danda7iya Xoossa. Neeni yeleta, dara. Dereynne kawotethati neepe keyo. Kawotika ne gulbatape keyo.
GEN 35:12 Taani Abrahaamesinne Yisaaqas immida biitta, new immana. Neepe guye taani ha biitta ne sheeshas immana” yaagis.
GEN 35:13 Xoossay iyara odetida bessaafe pude keyis.
GEN 35:14 Yayqoobi Xoossay iyara odetida bessan qofisiya shucha mala essidi iya bolla woyniyanne zayte tigis.
GEN 35:15 Yayqoobi Xoossay iyara odetida bessa “Beetele” gidi sunthis.
GEN 35:16 Enti hessafe guye, Beetelepe dendidi bidosona. Enti Efraata gakanaw guuthu attishin, Raheelo iqethi oykin daro waayetasu.
GEN 35:17 Iqethay iyo waaysida wode iyo yelisiyara, “Babofa; haysika adde na7a” yaagasu.
GEN 35:18 Shin iya hayqos matada shempoy keyana hanishin, ba na7a Benoona (Meto na7a) gada sunthasu. Shin iya aaway Biniyaame (Ta ushacha) gidi sunthis.
GEN 35:19 Hessafe guye, Raheela hayqa aggasu. Beeteleme geetetiya Efraata efiya ogiya gaxan moogetasu.
GEN 35:20 Yayqoobi I duufuwa bolla hawulte shucha essis. He hawultey hachu gakanawuka Raheeli duufuwa erisees.
GEN 35:21 Isra7eeley hessafe dendidi Edera gimbiyafe hefinthan ba dunkaaniya tokis.
GEN 35:22 Isra7eeley he biittan de7ishin, Robeeli ba aawas yelida aylle Baalira aqis. Isra7eeley he odaa si7is. Yayqooba adde nayti tammanne nam7a.
GEN 35:23 Liya nayti Yayqooba bayra na7a Robeela, Simoona, Leewe, Yihuda, Yisakooranne Zabloona.
GEN 35:24 Raheeli adde nayti Yoosefanne Biniyaame.
GEN 35:25 Raheeli aylle Baali adde nayti Daanenne Niftaaleme.
GEN 35:26 Liya aylle Zalafa adde nayti Gaadenne Aseera. Ha nayti Yayqoobas Masephexoomen yeletida adde nayta.
GEN 35:27 Yayqoobi Kebroona geetetiya Qiriyaat-Arba matan Mamiren de7iya ba aawa Yisaaqa soo bis. He bessay kase Abrahaameynne Yisaaqi de7ida bessaa.
GEN 35:28 Yisaaqi xeetanne hospun tammu laythi de7is.
GEN 35:29 I daro wodiya de7idi lo77o cimidi, hayqidi ba mayzatan gahetis. Iya nayti Eesaweynne Yayqoobi iya moogidosona.
GEN 36:1 Edoome geetetiya Eesawe yeletethay haysafe kaallidi xaafetidaysa;
GEN 36:2 Eesawey Kanaane biitta macca naytape baw machota ekis. Entika Hite addiya Eloona na7iw Ado, Hiwe addiya Xiba7oona na7ay Ani yelida Oholbaamonne
GEN 36:3 Isma7eela na7iw, Nebayoota michiw Basemaato.
GEN 36:4 Ada Eesawes Elfaaza yelasu. Basemaata Ragu7eela yelasu.
GEN 36:5 Oholbaama Ye7usa, Ya7ilamanne Qore yelasu. Kanaane biittan Eesawes yeletida adde nayti haysata.
GEN 36:6 Eesawey ba macheta, ba adde naytanne macca nayta, ba soo asa ubbaa, ba miizanne ba hara mehe ubbaa Kanaane biittan haaridaba ubbaa ekidi ba isha Yayqoobape haakidi hara biitta bis.
GEN 36:7 Enta shaloy darida gisho, enti issife daanaw danda7ibookona. Enta mehey darida gisho, enti de7iya biittay enta nam7aas gidonna ixis.
GEN 36:8 Yaanin, Edoome geetetiya Eesawey derey dariya Sayre biittan de7is.
GEN 36:9 Derey dariya Sayre biittan de7ida Edoometa mayza Eesawe yeletethay haysafe kaallidi xaafetidaysa;
GEN 36:10 Eesawe adde nayta sunthay, Eesawe mache Adi na7aa Elfaazanne Eesawe mache Basemaati na7a Ragu7eela.
GEN 36:11 Elfaaza nayti Temaana, Omaara, Xafa, Ga7itamanne Qeneza.
GEN 36:12 Qassi Timnaa7a Eesawe na7a Elfaazas aylle. Iya Elfaazas Amaaleqa yelasu. Haysati Eesawe mache Adi na7aa nayta.
GEN 36:13 Ragu7eela adde nayti Nahaata, Zara, Shamanne Miiza. Haysati Eesawe mache Basemaati na7a nayta.
GEN 36:14 Xiba7oona na7ay Ani yelida Oholbaama adde nayti haysata; Entika Ye7usa, Ya7ilamanne Qore.
GEN 36:15 Eesawe yeleta halaqati haysafe kaallidi xaafetidaysata; Eesawes bayra na7a Elfaaza adde nayti, halaqa gididaysati Temaana, Omaara, Xafa, Qanaza,
GEN 36:16 Qore, Ga7itamanne Amaaleqa; Edoome biittan Elfaazi yelida halaqati haysata; hessati ubbay Adi na7aa nayta.
GEN 36:17 Eesawe na7a Ragu7eela adde nayti, halaqa gididaysati Nahaata, Zaraha, Shamanne Miiza; Edoome biittan Ragu7eeli yelida halaqati haysata; enti Eesawe mache Basemaati na7a nayta.
GEN 36:18 Eesawe mache Oholbaami adde nayti, halaqa gididaysati Ye7usa, Ya7ilamanne Qore; enti Ana na7e, Eesawe mache Oholbaamipe yeletida halaqata.
GEN 36:19 Edoome geetetiya Eesawe adde nayti haysata; enta halaqatika haysata.
GEN 36:20 Edoome biittan de7iya Hoora Sayre adde nayti haysafe kaallidi xaafetidaysata; hessatika Loxaana, Shobaala, Xiba7oona, Ana,
GEN 36:21 Disoona, Exeranne Disaana; hessati, Edoome biittan de7iya Sayre adde nayti, Hoorata halaqata.
GEN 36:22 Loxaana adde nayti Hooranne Hemaama; Loxaana michiya Timnaa7o.
GEN 36:23 Sobaala adde nayti Aliwa, Manahoota, Ebaala, Sifanne Onaama.
GEN 36:24 Xiba7oona adde nayti Ayanne Ana; haysi Ani mela biittan ba aawa Xiba7oona hareta heemmishe bilbo haatha pultuwa demmidaysa.
GEN 36:25 Ana na7ay Disoona; na7iya qassi Oholbaamo.
GEN 36:26 Disoona adde nayti Hemdaana, Esbaana, Yitraananne Kaarana.
GEN 36:27 Exera adde nayti Bilihaana, Zawananne Aqana.
GEN 36:28 Disaana adde nayti Uxanne Arana.
GEN 36:29 Hoorata halaqati haysata; Loxaana, Shobaala, Xiba7oona, Ana,
GEN 36:30 Disoona, Exeranne Disaana. Haysati Sayre biittan banta yaran yaran shaaketida Hoorata halaqata.
GEN 36:31 Isra7eelen Kawoy kawotanaape kase Edoome biittan kawotida kawoti haysafe kaallidi xaafetidaysata.
GEN 36:32 Bi7oora na7ay Balaaqi Edoomen kawotis; iya katamaa sunthay Dinaaba geetetees.
GEN 36:33 Balaaqi hayqin, Baasora addey Zaara na7ay Yobaabi iya bessan kawotis.
GEN 36:34 Yobaabi hayqin, Temaana addey Husami kawotis.
GEN 36:35 Husami hayqin, Badada na7ay Hadaadi, Midiyaameta Moo7abe biittan xoonidaysi kawotis; iya katamaa sunthay Awiita geetetis.
GEN 36:36 Hadaadi hayqin, Masreeqa addey Samili kawotis.
GEN 36:37 Samili hayqin, shaafa matan de7iya Rehoboota addey Saa7uli kawotis.
GEN 36:38 Saa7uli hayqin, Akboora na7ay Ba7al-Hanani kawotis.
GEN 36:39 Akboora na7a Ba7al-Hanani hayqin, Hadaadi kawotis; iya katamaa sunthay Paa7u geetetees; iya machiya Mezahaaba na7iya Maxireeda yelida Mahexabeelo geetetawusu.
GEN 36:40 Eesawe yeleta halaqati banta yaran yaran, banta bessan bessan banta sunthan sunthan haysata; Timina, Aliwa, Yeteta,
GEN 36:41 Oholbaama, Ela, Pinoona,
GEN 36:42 Qanaza, Temaana, Mibsaara,
GEN 36:43 Magdelanne Irama. Haysati banta aysiya biittan, banta de7iyasuwan de7iyasuwan Edoome halaqata. Haysi Eesawey, Edoometa aawa.
GEN 37:1 Yayqoobi iya aaway Yisaaqi de7ida Kanaane biittan de7is.
GEN 37:2 Yayqooba yeletetha taarikey haysafe kaallidi xaafetidaysa. Yoosefi tammanne laapun laytha na7a gidida wode ba aawa machetape, Baalipenne Zilpafe yeletida ba ishatara mehe heemmees. I ba aawas ba ishati oothida iitabata odees.
GEN 37:3 Isra7eeley Yoosefa cimidi yelida gisho, ba hara adde nayta ubbaafe aathidi dosees. Hessa gisho, iyaw alleeqetida ma7o giigisis.
GEN 37:4 Iya ishati enta aaway iya entafe aathidi doseysa be7ida wode iya ixidosona. Mal7o qaalaka iyako odetanaw danda7ibookona.
GEN 37:5 Issi wode Yoosefi amuho amuhidi, ba ishatas odin enti iya kaseysafe aathidi ixidosona.
GEN 37:6 I entako, “Taani amuhida amuhuwa si7ite.
GEN 37:7 Nuuni gaden giste mirqishin ta mirqey dendidi luule eqis. Hinte mirqeti yuuyi aadhidi ta mirqiyas ziggidosona” yaagis.
GEN 37:8 Iya ishati, “Neeni nu bolla kawotada nuna haaranaw qopay?” yaagidi oychidosona. Enti iya amuhuwa gishonne iya odaa gisho, kaseysafe aathidi ixidosona.
GEN 37:9 Qassika Yoosefi hara amuho amuhidi ba ishatas odis. “Heko, taani hara amuhoka amuhas. He amuhuwan awi, ageeninne tammanne issi xoolintoti taw ziggoosona” yaagis.
GEN 37:10 Ba ishatas odida amuhuwa ba aawas odida wode iya aaway, “Haysi waanida amuho? Tuma taani, ne aayanne ne ishati yidi, ne sinthan zigganeyee?” yaagidi hanqetis.
GEN 37:11 Iya ishati iya qanaatidosona, shin iya aaway he odaa ba wozanan wothis.
GEN 37:12 Issi gallas iya ishati Seekeman banta aawa meheta heemmanaw bidosona.
GEN 37:13 Isra7eeley Yoosefa, “Ne ishati Seekeman meheta heemmeysa eraasa. Haaya, taani nena entako kiittana” yaagis. Yoosefika, “Ero” yaagis.
GEN 37:14 I iyako, “Bada ne ishatinne mehey saro gideysa be7ada entaba taw yada oda” yaagidi Yoosefa Kebroona zangaarape kiittis. Yoosefi kiitetidi Seekema bis.
GEN 37:15 Yan demba bessan enta koshshan yaa haa simeretishin, issi asi iya demmidi, “La na7aw, ay koyay?” yaagidi oychis.
GEN 37:16 I, “Ta ishata koyayis; enti mehiya heemmiya bessaa be7idaako, hayyana taw odarkii” yaagis.
GEN 37:17 Uray, “Haysafe bidosona; enti, ‘Nuuni Dootane baana’ gishin si7as” yaagis. Hessa gisho, Yoosefi ba ishata geedo kaalli bidi, enta Dootanen demmis.
GEN 37:18 Shin I haahon de7ishin, enti iya be7idosona. I entako gakonna de7ishin, wodhanaw iya bolla maqetidosona.
GEN 37:19 Enti issoy issuwako, “Hini be7ite, amuhuwa goday yees.
GEN 37:20 Haayite, iya wodhidi, ha ollatape issuwan yeggoos. Hessafe guye, ‘Do7i iya mis’ yaagana. Yaatidi, iya amuhuwa wursethaa be7ana” yaagidosona.
GEN 37:21 Robeeli hessa si7ida wode, enta kushepe iya ashshanaw koydi, “Iya wodhoko;
GEN 37:22 iya wodhanaape mela biittan de7iya ha ollan yeggite; iya bolla kushe wothofite” yaagis. Robeeli hessa giday, iya enta kushepe ashshidi guye aawako zaaranaasa.
GEN 37:23 Yoosefi ba ishatako gakida wode I ma77ida alleeqetida ma7uwa iyape qaari ekidosona.
GEN 37:24 Iya efidi haathi bayna mela ollan yeggidosona.
GEN 37:25 Enti kathi mishin hassayoona Isma7eela asati Galadape Gibxe bishin, dhoqu gidi be7idosona. Enti banta gimaleta bolla sawuwa, madiyanne karbiya caanidosona.
GEN 37:26 Yihudi ba ishata, “Nuuni nu isha wodhidi, iya suuthaa qottiko nuna ay maaddanee?
GEN 37:27 Haayite, iya Isma7eela asaas bayzoos. I nu isha, nu suuthunne nu asho gidiya gisho iya bolla nu kushiya wothoko” yaagis. Iya ishati iya odaa ma77idosona.
GEN 37:28 Hessa gisho, Midiyaame biitta zal7anchoti yaara aadhishin, iya ishati Yoosefa ollafe kessidi, Isma7eela asatas laatamu bira santimen bayzidosona. Enti Yoosefa Gibxe biitta efidosona.
GEN 37:29 Robeeli ollaako simmidi, Yoosefi yan baynaysa be7ida wode, azzanidi ba ma7uwa daakis.
GEN 37:30 I guye ba ishatako bidi, “Na7ay yan baawa; hiza, taani ay hanosha?” yaagis.
GEN 37:31 Enti Yoosefa ma7uwa ekidi, issi deeshe shukidi, he suuthan naaqidosona.
GEN 37:32 Alleeqetida iya ma7uwa banta aawako efidi “Nuuni haysa demmida; haysi ne na7a ma7uwakonne ane be7a” yaagidosona.
GEN 37:33 Yayqoobi ma7uwa eridi, “Haysi ta na7aa ma7uwa; ta na7aa do7i mis. Yoosefi tumaka zaazetis” yaagis.
GEN 37:34 Yayqoobi azzanidi, ba ma7uwa peedhis. Kayo ma7o ma7idi, ba na7aas daro gallas yeekis.
GEN 37:35 Iya adde naytinne macca nayti ubbay iya minthethanaw yidosona. Shin I minettonna ixidi, “Akay, taani yeehoy yeehoshin duufo gelana” yaagidi, Yoosefas yeekis.
GEN 37:36 He wode Midiyaame biitta asati Yoosefa, Gibxe kawa moorinnatanne kawa naageysata halaqa gidida Phoxfaaras bayzidosona.
GEN 38:1 He wode Yihudi ba ishatape shaaketidi, Adulaama kataman de7iya Hira geetetiya uraara daanaw bis.
GEN 38:2 Yan Yihudi Shuu7a geetetiya Kanaane ura na7iw machis.
GEN 38:3 Iya Yihudas qanthatada adde na7a yelasu. I he na7a Era gidi sunthis.
GEN 38:4 Qassika qanthatada adde na7a yelasu. Iya he na7a Onaana gada sunthasu.
GEN 38:5 Zaaradaka hara adde na7a yelasu. Iya he na7aa Seela gada sunthasu. He na7ay yeletiya wode Yihudi Akziiba biittana.
GEN 38:6 Yihudi ba bayra na7a Eras Timaaro geetetiya macho immis.
GEN 38:7 Yihuda bayra na7ay, Eri, Godaa sinthan iita asi gidiya gisho, Goday iya wodhis.
GEN 38:8 Yihudi Onaanako, “Wogay nena kiiteysa mela ne ishaa machera aqa. Ne ishaas na7a yelada iya suntha xeegisa” yaagis.
GEN 38:9 Shin Onani yeletana nayti iyabaa gidonaysa erida gisho, ba ishaa machera aqiya wode ba ishaas na7i yeletonna mela ba attunta sa7an gussees.
GEN 38:10 I oothidabay Godaa sinthan iitaba gidida gisho, Goday iyaka wodhis.
GEN 38:11 Hessafe guye, Yihudi ba na7aa machiw Timaaro, “Ta na7ay Seeli diccana gakanaw ne aawa soo bada, am7etethan de7aasha” yaagis. Hessa I giday, ika ba ishatada hayqanekonne gidi hirgida gishosa. Hessa gisho, Timaara bada ba aawa son de7asu.
GEN 38:12 Daro wodepe guye, Yihuda machiya, Shuu7a na7iya hayqasu. Yihudi ba kayo wodiya ongidi, ba dorsata ikisiya meediya asatako Timina geetetiya bessi ba laggiya Adulaama addiya Hirera bis.
GEN 38:13 Asay Timaaro, “Heko, ne azina aaway Yihudi, ba dorsata ikisiya meedanaw Timina bees” yaagidi odidosona.
GEN 38:14 Iya ba am7etetha ma7uwa laammada, bana balethanaw shaashe ekada guuluntasu. Yaatada, Timina efiya ogiya doonan de7iya Enayme katama gaxan uttasu. Hessa iya oothidaysi, Seeli diccidi gakinka iyaw macho gidada imetonaysa iya erida gishosa.
GEN 38:15 Iya ba som7uwa guuluntida gisho, Yihudi iyo be7ida wode, layma maccas gidi qopis.
GEN 38:16 Ba na7aa machiw gideysa eronna de7ishe, ogiya gaxa iiko shiiqidi “Taara aqanee?” yaagidi oychis. Iya, “Taani neera aqiko, ne taw ay immanee?” gada oychasu.
GEN 38:17 I, “Taani ta mehiyape issi kole new yeddana” yaagis. Iya, “Neeni hessa taw yeddana gakanaw ay oythanee?” yaagasu.
GEN 38:18 I, “Ay oytho?” yaagis. Iya, “Ne maatamiya iya gooshuwaranne ne kushiyan de7iya xam7a oytha” yaagasu. I hessata immidi, iira aqis; iyaka qanthatasu.
GEN 38:19 Iya hessafe dendada bidaape guye, ba guulunthaa qaarada, ba am7etetha ma7uwa ma7asu.
GEN 38:20 Yihudi ba oythidaba he maccaseepe zaari ekanaw deesha ba laggiya Hira bolla iw yeddis. Shin I iyo demmibeenna.
GEN 38:21 I he biitta asaako, “Enayme kataman, oge doonan uttida layma maccasiya awunee?” yaagidi oychis. Asay, “Layma maccas haysan ubbaka baawa” yaagidosona.
GEN 38:22 I Yihudako simmidi, “ ‘Taani iyo demmabike; hessa bollaka he biitta asay, layma maccas haysan ubbaka baawa’ yaagidosona” yaagis.
GEN 38:23 Yihudi, “Ba oykidaysa baw eko, atto giiko, asi nuna miicana. Hiza taani iw deeshe yeddas shin neeni iyo demmabaaka” yaagis.
GEN 38:24 Heedzu ageena gidishin asay, “Ne na7aa maccasiya Timaara laymatada qanthatasu” yaagidi Yihudas odidosona. Yihudi, “Iyo kare kessidi taman xuuggite” yaagis.
GEN 38:25 Iyo kare kessiya wode, “Taani qanthatiday ha miisheta godaasa. Ha maatameynne xam7ay oodebayeko eranaw danda7iko era” gada ba azina aawaka kiittasu.
GEN 38:26 Yihudi he miisheta eridi, “Taani ta na7aa Seelas iyo immaboonna gisho, taape iya xillo” yaagis. Hessafe guye, I iira zaaridi aqibeenna.
GEN 38:27 Iwu yelo qammi gakiya wode, I ulon mente nayti de7eysi eretis.
GEN 38:28 Iya maaretishin, entafe issoy ba kushiya kessin yelisiyara, “Haysi koyro keyis” gaanaw zo7o qacina ekada iya kushen qachasu.
GEN 38:29 Shin I ba kushiya guye ekida wode, iya ishay keyin iya, “Neeni waanada porxu gada keyadii?” yaagasu. Hessa gisho, Paaresa (Porxu gis) gada sunthasu.
GEN 38:30 Hessafe guye, iya kushiyan zo7o qacini de7iya iya ishay yeletis. Iya sunthay Zaara (Zo7o) geetetis.
GEN 39:1 Isma7eela asati Yoosefa Gibxe biitta efidosona. Gibxe kawa moorinatape issuwas, kawa naageysata halaqaas Yoosefa bayzidosona.
GEN 39:2 Goday Yoosefara de7iya gisho, I oothiyaba ubbaa iyaw injeyis. Yaatin, ba Gibxe godaa son de7is.
GEN 39:3 Goday iyara de7eysanne I oothiyaba ubbaa iyaw injeyidaysa Phoxfaari be7ida wode,
GEN 39:4 Yoosefa dosis, baw mata oosancho oothis. Phoxfaari iya ba keetha bollanne baw de7iyaba ubbaa bolla shuumis.
GEN 39:5 He wodepe doomidi, Goday Gibxe ura keetha Yoosefa gisho anjis. Godaa anjoy Phoxfaara sooninne iya gaden de7iyaba ubbaa bolla wodhis.
GEN 39:6 I miya kathiw eriyaripe attishin, baw de7iya haraba ubbaa Yoosefa kushen sheedhis. Yoosefi yegelsinne mala lo77o asi.
GEN 39:7 Guutha wodepe guye, iya godaa machiya Yoosefa be7ada, “Haaya, taara zin7a” yaagasu.
GEN 39:8 Shin I ixidi, iiko, “Be7a, ta goday, baw de7iyaba ubbaa ta kushen yeggida gisho, ba son de7iyabas aykoka hirgenna.
GEN 39:9 Ha son taape aadhey oonika baawa. Neeni iya macho gidiya gisho, neepe attishin, haraa, I taw immonabay baawa. Yaatin, taani waatada haysa mela daro iitaba hanada Xoossa bolla nagara ootho?” yaagis.
GEN 39:10 Iya he odaa wonta wonta Yoosefas odinka, I iira aqonna woyko I mata shiiqona ixis.
GEN 39:11 Shin issi gallas I ba ooso oothanaw soo geliya wode, soo aylletape oonika son baawa.
GEN 39:12 Iya Yoosefa afila oykada, “Taara zin7a” yaagasu. Shin I ba afila I kushiyan yeggi aggidi, soope kare woxi keyis.
GEN 39:13 Yoosefi ba afila I kushiyan yeggi aggidi, soope kare woxi keydaysa iya be7ida wode,
GEN 39:14 ba soo aylleta xeegada, “Heko, ta azinay ehida ha Ibraawe uray tana kawushshanaw oykis. I tana iissanaw ta de7iyasuwa gelis, shin taani waassas.
GEN 39:15 I ba afila ta matan yeggi aggidi, soope kare woxidi keyis” yaagasu.
GEN 39:16 I azinay soo yaana gakanaw iya Yoosefa afila ba matan wothasu.
GEN 39:17 I yin, iyaw haysada gada odasu; “Haysi ne ehida Ibraawe aylley tana iissanaw taako gelis.
GEN 39:18 Shin taani waassin, ba afila ta matan yeggi aggidi, soope kare woxi keyis” yaagasu.
GEN 39:19 Iya goday hanidaba si7ida wode daro yilotis.
GEN 39:20 Iya goday Yoosefa efidi, kawa qasho asay de7iya qasho keethan yeggis.
GEN 39:21 Shin Yoosefi qasho keethan de7iya wode, Goday iyara de7ees. Ba keehatetha iyaw darsidi, qasho keetha kaapuwa sinthan iyaw saba immis.
GEN 39:22 Yaanin, qasho keetha kaapoy qasho asa ubba Yoosefa kushen yeggis. Yan oosetiyaba ubbaas aawatetha immis.
GEN 39:23 Goday Yoosefara gididi, I oothiyaba ubbaa iyaw injeyida gisho, qasho keethaa kaapoy Yoosefa kushen de7iyabas aykoka hirgenna.
GEN 40:1 Guutha wodepe guye, Gibxe kawa ushsha kaapoynne katha kaapoy banta godaa, Gibxe kawa naaqidosona.
GEN 40:2 Kawoy he nam7u kaapota bolla daro yilotidi,
GEN 40:3 Yoosefi qashetida, qasho keetha naageysata kaapuwa son enta qachis.
GEN 40:4 Naageyseta halaqay enta Yoosefas sheedhis, ika entaw kiitetees. Enti qasho keethan daro wode uttidosona.
GEN 40:5 Gibxe kawa ushsha kaapoynne katha kaapoy, qasho keethan de7ishe nam7ayka issi qamma dumma dumma amuho amuhidosona. He amuhotas dumma dumma birshethay de7ees.
GEN 40:6 Yoosefi wonta entako geliya wode enti azzanidi uttidashin be7is.
GEN 40:7 I entana, “Hachi hinte som7oy ayis dhumidee?” yaagidi oychis.
GEN 40:8 Enti, “Nu nam7ayka amuho amuhida, shin nuus birshiya asi dhayis” yaagidosona. Yoosefi entako, “Amuho birshiya eratethay Xoossaba gidenneyee? Ane hinte amuhuwa taw odite” yaagis.
GEN 40:9 Yaatin ushsha kaapoy ba amuhuwa Yoosefas odis; “Taani ta amuhon issi woyne ta sinthan be7as.
GEN 40:10 He woyniyas heedzu tasheti de7oosona. I hayxidi, ciiyi simmidi teeris.
GEN 40:11 Kawo wanci ta kushen de7ees. Taani woyne teera ekada iyan gum7ada, he wanca kawa kushen wothas” yaagis.
GEN 40:12 Yoosefi, “Ha amuhuwa birshethay haysa; heedzu tasheti heedzu gallasata.
GEN 40:13 Heedzu gallasata giddon Kawoy nena qashope billana. I nena kase shuumatethaako zaarana. Kase neeni ushsha kaapo gidada ootheysada neeni kawa wanca iya kushiyan wothana.
GEN 40:14 Shin new sa7i lo77ida wode tana dogopa; taw keeha. Tabaa kawas odada, ha qasho keethafe tana kesisa.
GEN 40:15 Tana Ibraawe biittafe wolqan ehidosona. Hari attoshin, haysan tana qashos gathiyaba aybibaaka oothabike” yaagis.
GEN 40:16 Kathaa kaapoy Yoosefi amuhuwa loythidi birshidaysa be7ida wode Yoosefako, “Taani amuhida amuhoy haysa; ta huuphen heedzu gabate uythi de7ees;
GEN 40:17 bolla bagga gabatiyan Gibxe kawas dumma dumma katha qommofe uuketida uythay de7ees. Shin kafoti he ta huuphen de7iya gabatiyape moosona” yaagis.
GEN 40:18 Yoosefi, “He amuhuwa birshethay haysa; heedzu gabateti heedzu gallasata.
GEN 40:19 Heedzu gallasa giddon Kawoy nena qashope billana. Ne qoodhiya qanxisidi mithan kaqisana; ne ashuwaka kafoy maana” yaagis.
GEN 40:20 Heedzantho gallasan Gibxe Kawoy ba yeletida gallasan ba moorinnata ubbaas gibira giigisis. Ushsha kaapuwanne katha kaapuwa billi ehidi ba asa sinthan essis.
GEN 40:21 Ushsha kaapuwa iya shuumatethaako zaarin, I kawa kushiyan wanca wothis.
GEN 40:22 Shin Kawoy kathaa kaapuwa kaqisis. Ubbayka Yoosefi enta amuhuwa birshidaysada hanis.
GEN 40:23 Shin ushsha kaapoy Yoosefa hassayonna dogi aggis.
GEN 41:1 Nam7u laythafe guye, Gibxe Kawoy amuho amuhis. He amuhuwan I Nayle Shaafa gaxan eqis.
GEN 41:2 Laapun ordenne modho miizati Nayle Shaafape keyidi, maata mishin be7is.
GEN 41:3 Entafe kaallidi, hara laapun gilqa miizati Nayle Shaafape keyidi, shaafa gaxan de7iya hara miizata matan eqidosona.
GEN 41:4 He gilqa miizati laapun ordenne modho miizata mittidosona. Hessafe guye, Kawoy barkis.
GEN 41:5 I zaari dhiskidi, hara amuhoka amuhis. Laapun lo77onne muruuta mor7eti issi maqa bolla keyidosona.
GEN 41:6 Entafe kaallidi, lee7onne doloha bagga carkon shullida hara laapun mor7eti keyidosona.
GEN 41:7 He lee7ida mor7eti lo77onne muruuta mor7eta mittidosona. Hessafe guye, Kawoy barkidi amuho gideysa eris.
GEN 41:8 Sa7ay wontin dhiskofe I dendiya wode iya wozanay yarkis. Hessa gisho, Gibxen de7iya bitanchotanne eranchota ubbaa kawoy xeegisidi entaw ba amuhuwa odis. Shin iyaw he amuhuwa birshiya asi dhayis.
GEN 41:9 Ushsha kaapoy he wode Gibxe kawako, “Taani ta naaquwa hachi hassayayis.
GEN 41:10 Issi wode Kawoy ba aylleta hanqetidi, tananne kathaa kaapuwa qasho keethan yeggis.
GEN 41:11 Yan de7ishe nu nam7ati amuho amuhida. He amuhotas dumma dumma birshethay de7ees.
GEN 41:12 He wode naageysata kaapuwa aylley, Ibraawe panthay, nuura qashon de7ees. Nuuni nu amuhuwa iyaw odin, I nuus huuphen huuphen amuhuwa billis.
GEN 41:13 Yaanin, he hanoti I nuus billidaysada hanidosona. Hessi aybe giiko, taani ta shuumatethaako simmas, hankoy kaqetis” yaagis.
GEN 41:14 Yaatin, Gibxe Kawoy Yoosefa xeegisis. Enti iya qasho keethafe ellesidi ehidosona. I meedetidi ba ma7uwa laammidi, kawako gelis.
GEN 41:15 Kawoy Yoosefa, “Taani amuho amuhas, shin taw issi asika billanaw danda7ibeenna. Taani, ne amuho billanaw danda7eysa si7as” yaagis.
GEN 41:16 Yoosefi, “Taani hessa danda7ike, shin Xoossay kawas lo77onne like birshethi immana” yaagis.
GEN 41:17 Kawoy, “Taani ta amuhora Nayle Shaafa gaxan eqidashin,
GEN 41:18 laapun ordenne modho miizati Nayle Shaafape keyidi, maata moosona.
GEN 41:19 Entafe kaallidi, hara laapun gilqanne laafida miizati keyidosona. Taani hessa mela gilqa miizi Gibxe biittan ubbaka be7a erike.
GEN 41:20 He gilqanne laafida miizati koyro keyida laapun modho miizata mittidosona.
GEN 41:21 Shin enta mittidaape guye kaseysada gilqi uttida gisho, enti mittidaba oonika eranaw danda7ibeenna. Hessafe guye, taani barkas.
GEN 41:22 “Taani ta amuhuwan qassi laapun lo77onne muruuta mor7eti issi maqa bolla keydaysata be7as.
GEN 41:23 Entafe kaallidi, lee7onne doloha bagga carkuwan shullida hara laapun mor7eti keyidosona.
GEN 41:24 He lee7ida mor7eti laapun lo77o mor7eta midosona. Taani ha amuhuwa bitanchotas odas, shin taw amuhuwa birshiya asi bentibeenna” yaagis.
GEN 41:25 Hessafe guye, Yoosefi Gibxe kawako, “kawa amuhota birshethay issino. Xoossay ba oothana haniyaba kawas qoncisis.
GEN 41:26 He laapun lo77o miizati laapun laythata, qassi laapun lo77o mor7eti laapun laythata, ha amuhota birshethay issino.
GEN 41:27 He laapun gilqanne laafida miizati laapun laythata, qassi doloha bagga carkuwan shullida, lee7o laapun mor7eti laapun kosha laythata.
GEN 41:28 “Taani kawas odidaysadaka, Xoossay ba oothana haniyaba kawa bessis.
GEN 41:29 Laapun daro kalo laythati Gibxe biitta ubban yaana.
GEN 41:30 Shin hessafe guye, laapun kosha laythati kaallidi yaana. He wode Gibxe kaaloy ubbay dogetana, koshi biitta caacana.
GEN 41:31 Koshay daro iita gidiya gisho he biitta kaaloy dogetidi attana.
GEN 41:32 Nam7u ogiyan kawas he amuhoy bentiday Xoossay ba qopidaba oothanaw qanxida gishosa. Hessa Xoossay mata woden oothana.
GEN 41:33 “Ha7i hiza, neeni eranchonne cinca asi koyada Gibxe biittan shuuma.
GEN 41:34 Laapun kalo laythan kaxiya kathaafe ichashu kushiyape issuwa shiishana asata shuuma.
GEN 41:35 Enti yaa kalo laythan kathaa shiishidi, banta aawatethan kataman kataman minjidi wothana mela kiita.
GEN 41:36 Biittay koshan dhayona mela ha kathay Gibxe biittan laapun laythan dendana koshas minjetidi de7o” yaagis.
GEN 41:37 Yaatin he oday Gibxe kawasinne iya moorinnatas lo77o gididi bentis.
GEN 41:38 Hessa gisho, Kawoy entako, “Yoosefape aadhiya hara Xoossa Ayyaanara de7iya asi demmanaw danda7oko” yaagis.
GEN 41:39 Hessafe guye Kawoy Yoosefa, “Xoossay haysa ubba nena erisida gisho, ne mela eranchoynne cinca asi oonika baawa.
GEN 41:40 Taani nena ta biittan shuumas. Ta asa ubbay new kiitetana. Taape hari neepe aadhiya oonika baawa.
GEN 41:41 Heko, taani nena Gibxe biitta ubba bolla shuumas” yaagis.
GEN 41:42 Hessafe guye, Kawoy ba paramiya migiduwa ba biradhiyafe kessidi, Yoosefa biradhen aathis. Boncho ma7onne qoodhe worqa iya mayzis.
GEN 41:43 Kawoy ba nam7antho para gaariya Yoosefa togisis. Boncho wotaadarey, “Ziggite! Ziggite!” yaagishe iyape sinthara hemetees. Hessada oothidi, kawoy iya Gibxe biitta ubbaa bolla shuumis.
GEN 41:44 Hessafe guye Kawoy Yoosefa, “Taani kawo gidikoka ne kiittonna oonika Gibxe biitta ubban ba kushiya woyko ba tohuwa qaaxofo” yaagis.
GEN 41:45 Kawoy Yoosefa, “Xafnaat-Pa7ina” gidi sunthis. I iyaw Ona katama kahiniya Phoxfaara na7iw Asnaato macho immis. Yaanin, Yoosefi Gibxe biitta ubbaa bolla maata ekis.
GEN 41:46 Yoosefi Gibxe kawas ooso oykiya wode, iyaw laythi hastama. Yoosefi kawa sinthafe keyidi, Gibxe biitta ubbaa giddon hemetis.
GEN 41:47 He laapun kalo laythan biittan daro kathi kaxis.
GEN 41:48 Yoosefi Gibxe biittan he laapun kalo laytha katha ubbaa shiishidi, katamatan minjis. Issi issi katama yuushuwan de7iya gadiyape katha ubbaa he katamatan shiishis.
GEN 41:49 Yoosefi abba shafiya mela daro katha shiishis. Katha darotethaafe dendoysan makanaw danda7etibona gisho, maki maki qoleysa aggaagis.
GEN 41:50 Kosha laythi yaanape sinthe, Ona katama kahine Phoxfaara na7e Asnaatipe Yoosefi nam7u adde nayta yelis.
GEN 41:51 Yoosefi ba bayra na7aa sunthaa, “Xoossay tana ta metuwanne ta aawa soo asa ubbaa dogisis” gidi Minaase gidi sunthis.
GEN 41:52 Nam7antho na7aa sunthaaka, “Xoossay ta metootida biittan taw na7a immis” gidi Efreema gidi sunthis.
GEN 41:53 Gibxe biittan de7iya he laapun kalo laythati aadhidosona.
GEN 41:54 Yoosefi odidaysada laapun kosha laythati kaalli yidosona. Hara biitta ubban koshi keyis, shin Gibxe biitta ubban kathay de7ees.
GEN 41:55 Gibxe biittay ubbay koshatida wode, asay kathas kawako waassidosona. Kawoy Gibxe asa ubba, “Yoosefako bidi, I odeysa oothite” yaagidi kiittis.
GEN 41:56 Koshay Gibxe biitta ubba gakida wode, Yoosefi katha minjida shaaleta ubba dooydi, kathi Gibxe asaas bayzis.
GEN 41:57 Biitta ubban koshi suullida gisho, sa7an de7iya asa ubbay kathi Yoosefape shammanaw Gibxe yidosona.
GEN 42:1 Yayqoobi Gibxen kathi de7eysa si7ida wode ba adde nayta, “Hinte issoy issuwa ayis xeelleetii?
GEN 42:2 Gibxen kathi de7eysa taani si7as; yaa bidi, nuuni hayqonna mela guutha kathi shammite” yaagis.
GEN 42:3 Yaatin, Yoosefa ishati tammati kathi shammanaw Gibxe bidosona.
GEN 42:4 Shin Yayqoobi I qohetana gidi hirgida gisho Yoosefa isha Biniyaame iya ishatara yeddibeenna.
GEN 42:5 Kanaane biittan wolqaama koshi de7iya gisho, kathi shammanaw beysatara Isra7eele adde nayti Gibxe gelidosona.
GEN 42:6 He wode Yoosefi he biitta aysiya gisho biittan de7iya asa ubbaas kathi bayzees. Hessa gisho, Yoosefa ishati yaa gakida wode banta som7uwa sa7a gathidi iyaw ziggidosona.
GEN 42:7 Yoosefi ba ishata be7ida melaka eri aggis. Shin I enta eronna asada hanidi; entako, “Hinte awupe yideti?” yaagidi oychis. Enti, “Kathi shammanaw, Kanaane biittafe yida” yaagidosona.
GEN 42:8 Yoosefi ba ishata eris, shin enti iya eribookona.
GEN 42:9 Yoosefi entaba amuhida ba amuhuwa akeekidi entako, “Hinte wochanaw yida asi, hinte nu biittan naagoy lepiya baggay awuneko be7anaw yideta” yaagis.
GEN 42:10 Enti, “Akay, nu godaw, nuuni wochanaw yida asi gidoko. Nuuni ne aylleti kathi shammanaw yida.
GEN 42:11 Nuuni ubbayka issi aawa nayta. Nuuni ne aylleti ammanetiya asi” yaagidosona.
GEN 42:12 Yoosefi entako, “Akay, hinte nu biittan naagoy lepiya baggay awuneko be7anaw yideta” yaagis.
GEN 42:13 Shin enti, “Nuuni ne aylleti Kanaane biittan de7iya issi ura nayta; nuuni tammanne nam7u ishanta. Wursetha kaaloy ha7i nu aawara son de7ees, issoy hayqis” yaagidosona.
GEN 42:14 Yoosefi entako, “Taani hintew odidaysada hinte biitta wocheyisata.
GEN 42:15 Hinte paacetanaysi haysana; tuma Kawoy hayqo, hinte wursetha kaalo ishay haysa yoona ixiko, hinte ha bessaafe beeketa.
GEN 42:16 Hinte odeysi tuma gideysa paacanaw, hintefe issuwa kiittite. I hinte isha ekidi yo, attidaysati qasho keethan gam7eeta. Hessi hanona ixiko, Kawoy hayqo, hinte biitta wocheyisata” yaagis.
GEN 42:17 Entana heedzu gallas qasho keethan qachis.
GEN 42:18 Heedzantho gallasan Yoosefi entako, “Taani Xoosse yayiya asi. Yaaniya gisho, hinte issiba oothiko hinte shempuwa ashshana.
GEN 42:19 Hinte tumaka ammanetiya ase gidiko, hinte ishatape issoy haysan qasho keethan de7o; attidaysati koshatiya hinte soo asaas kathi efite;
GEN 42:20 Shin hinte wursetha ishaa taako ehiko, hinte qaalay tumatana; hinteka hayqonna attana” yaagis. Entika iya oda ero gidi ekidosona.
GEN 42:21 Enti issoy issuwako, “Tuma nuuni nu ishas oothidabay nuna kaa7ees. I ba shempuwas watwatidi woossiya wode nuuni si7ishe ixida. Hessa gisho, ha waayey nuna gakis” yaagidosona.
GEN 42:22 Robeeli, “Taani hintena, na7aa bolla nagara oothopite gada odas, Shin hinte si7onna ixideta. Ha7i iya suuthay nuna achees” yaagis.
GEN 42:23 Yoosefi entara turjumaanen odetiya gisho enti giyaba I ereysa enti akeekibokona;
GEN 42:24 I entafe haraso bidi yeekis. Shin zaari entako yidi, entaw gujidika odis. I Simoona enta giddofe kessidi enti be7ishin qachis.
GEN 42:25 Yoosefi ba aylleta, “Katha enta ogoruwan kunthite; enta miishiyaka zaaridi, enta ogoruwan ogoruwan yeggite. Entaw oges shinqeka immite” yaagidi kiittis.
GEN 42:26 Enti I gidaysada oothidaape guye, Yoosefa ishati katha banta hareta bolla caanidi bidosona.
GEN 42:27 Enti qamma aqiya bessan entafe issoy ba hariyas kathaafe yegganaw ba ogoruwa billidi, he ogoruwa doonan de7iya ba miishiya demmis.
GEN 42:28 I ba ishatako, “Ta miishey taw simmis; tuma haysa be7ite; Ta ogoruwan de7ees” yaagis. Enti dagammidi kokorishe, issoy issuwako simmidi, “Xoossay nu bolla oothidabay haysi aybee?” yaagidosona.
GEN 42:29 Enti Kanaane biittan de7iya banta aawa Yayqoobako yidi, bantana gakidaba ubbaa iyaw odidosona.
GEN 42:30 Enti iyako, “He biitta haariya uray, nuna he biitta wochiya asada oothidi nu bolla yilotidi odetis.
GEN 42:31 Shin nuuni iyako, ‘Nuuni ammanetiya asi, biitta wocheyisata gidoko.
GEN 42:32 Nuuni tammanne nam7u ishanti issi aawa nayta. Issoy hayqis; wursetha kaaloy Kanaane biittan ha7i nu aawara de7ees’ yaagida.
GEN 42:33 Yaatin he biitta haariya uray nuna, ‘Hinte ammanetiya ase gideysa taani erana mela hinte ishatape issuwa haysan ta matan aggidi, koshatiya hinte soo asaas kathi ekidi biite.
GEN 42:34 Hinte biitta wocheyisata gidonna, ammanetiya asi gideysa taani erana mela, hinte wursetha isha taako ekidi yiite. Yaatiko, taani han attida hinte ishaa hintew zaarada immana. Hinteka ha biittan de7idi zal7anaw danda7eeta’ ” yaagidosona.
GEN 42:35 Enti banta ogoruwape kathaa qolishe, banta ogoruwan ogoruwan banta miishiya qashuwara uttidaysa demmidosona. Entinne enta aaway he qashuwara de7iya miishiya be7idi yayyidosona.
GEN 42:36 Enta aawa Yayqoobi entako, “Hinte tana ta naytape mela ashshideta. Yoosefi baawa, Simooni baawa, ha7i qassi Biniyaame efanaw koyeeta. Ubbabay taw zoko zaaris” yaagis.
GEN 42:37 Hessafe guye Robeeli ba aawako, “Taani Biniyaame new zaarada ehonna ixiko, ta adde nayta nam7aaka wodha. Tana ammanetada iya ta kushen yegga; taani iya zaarada ehana” yaagis.
GEN 42:38 Shin Yayqoobi entako, “Ta na7ay hintera beenna; iya ishay hayqin, attiday iya xalaala. Hinte efishin, ogen iitabay iya gakiko, hinte ta cimatetha afuthu muzishe ta hayquwa matayeta” yaagis.
GEN 43:1 Kanaane biittan koshay ha77ika kaseysafe aadhidi wolqaamis.
GEN 43:2 Yaanin, enti Gibxefe ehida katha ubba midi ongin, enta aaway, “Qassika Gibxe bidi nuus guutha kathi shammite” yaagis.
GEN 43:3 Shin Yihudi, “He uray nuna, ‘Hinte ishay hintera yoona ixiko, ta som7uwa zaari be7eketa’ yaagidi minthidi odis.
GEN 43:4 Neeni nu isha nuura yeddiko, nuuni Gibxe bidi new kathi shammana.
GEN 43:5 Shin he uray, ‘Hinte ishay hintera yoona ixiko hinte ta som7uwa zaari be7eketa’ ” yaagida gisho, neeni iya yeddonnaba gidiko nuuni booko.
GEN 43:6 Yaatin Isra7eeley, “Hinte, ‘Nuus hara ishi de7ees’ gidi odidi ha metuwa ta bolla ayis ehidetii?” yaagis.
GEN 43:7 Enti zaaridi, “He uray nubaanne nu soo asaaba minthidi oychis. I nuuko, ‘Hinte aaway paxa de7ii? Hintew hara ishi de7ii?’ yaagidi oychis. Nuuni I oychidaysa iyaw zaarida. I nuna, ‘Hinte isha eki yiite’ gaanaba nu awude erido?” yaagidosona.
GEN 43:8 Yihudi ba aawa Isra7eeleko, “Nuuni, neeninne nu nayti koshan hayqanaape na7aa taara yedda, nuuni baana.
GEN 43:9 Na7a ta waasetethan imma; iyabaa tana oycha. Taani iya new saro zaarada ehonna ixiko, ta de7o ubban ne baadethay tana gako.
GEN 43:10 Nu gam7onaba gidiyako, hannoode nam7antho yaa simmana shin” yaagis.
GEN 43:11 Enta aaway Isra7eeley, “Hessa gidiko haareysas kushe genthiyaba, ha biittan kaxiyaba ubbaafe lo77oba doorite. Hessika, qibaate, shitto, dumma dumma sawo, eessinne, ocholone hinte ogoruwan yeggidi, ekidi biite.
GEN 43:12 Hinte ogoruwa doonan simmida miishey baletidaba gidanaw danda7iya gisho, miishiya nam7u kushe oothidi eki biite.
GEN 43:13 Hinte ishaa ekidi, he uraako ellesidi guye biite.
GEN 43:14 I hanko hinte ishaanne Biniyaame hintera yeddana mela Ubbaa Danda7iya Xoossay he uray hintew qadhetanada ootho. Tana gidiko, ta naytape mela attikoka attas” yaagis.
GEN 43:15 Hessa gisho, ishanti wolla banta immiyabata, nam7u kushe miishiyanne Biniyaame bantara ekidi bidosona. Enti Gibxe gakidi, Yoosefa sinthe shiiqidosona.
GEN 43:16 Yoosefi Biniyaame entara be7ida wode ba keetha kaapuwako, “Ha asata ta soo ekada ba. Issi mehe shukada giigisa; enti kathi taara maana” yaagidi kiittis.
GEN 43:17 Yaatin kaapoy, Yoosefi kiitidaysada he asata iya soo efis.
GEN 43:18 Enti Yoosefa soo bishe, yayidi, “Enti nuna haysa ehiday koyro nu ogoruwan simmida miishiya gisho gidonna aggenna. Enti nuna qohidi aylletethan haaronnanne nu hareta ekona aggokona” yaagi hirgidosona.
GEN 43:19 Hessa gisho, enti Yoosefa soo penge gakidi, keetha kaapuwa odisidosona.
GEN 43:20 “Godaw, nuuni koyro kathi shammanaw haysa yida.
GEN 43:21 Guye simmishe nuuni qamma aqiya bessan ogoruwa billiya wode huuphen huuphen nu miishey paconna nu ogoruwan de7eysa demmida. Heko, nuuni he miishiya guye eki yida.
GEN 43:22 Ha7i nuuni katha shammanaw hara miishe oyki yida. Nu miishiya nu ogoruwan ooni yeggidaako eroko” yaagidosona.
GEN 43:23 I zaaridi, “Aykoy baawa, yayofite; hinte Xoossay, hinte aawa Xoossay, hinte ogoruwan hintew miishe immis. Taani hinte ciggida miishiya kumethi ekas” yaagis. Hessafe guye, Simoona entako kessis.
GEN 43:24 He uray he asata Yoosefa soo efidi, enta tohuwas haathe ehin, enti meecetidosona. Enta haretasika miyaba yeggis.
GEN 43:25 Enti Yoosefara kathi maanaysa si7ida gisho banta immanabata Yoosefas giigisidosona.
GEN 43:26 Yoosefi ba soo gelida wode enti ehida banta immiyabata iyaw immidi, iya sinthan sa7a gakidi ziggidosona.
GEN 43:27 I enta sarotetha oychi simmidi, “Hinte taw odida hinte cimida aaway lo77o de7ii? Ha77ika I paxa de7ii?” yaagis.
GEN 43:28 Enti, “Ee, ne aylley, nu aaway paxa de7ees; I lo77o” yaagidi, hokidi iyaw ziggidosona.
GEN 43:29 I ba aaye na7aa Biniyaame be7ida wode entako, “Hinte odida wursetha hinte ishay haysee?” yaagis. Biniyaame, “Ta na7aw, nena Xoossay anjo” yaagis.
GEN 43:30 Yoosefi, iya ishaabay iyaw gompan seellida gisho, ellesidi, qol7a gelidi yan yeekis.
GEN 43:31 I ba som7uwa meecetidaape guye keyidi bana minthethidi, kathi aathana mela kiittis.
GEN 43:32 Enti Yoosefas dumma, iya ishatas dumma aathidosona. Gibxe asay Ibraawe asatara issife meysi bantana kawushiyaba oothi xeelliya gisho iyara miya Gibxe asatas dumma aathidosona.
GEN 43:33 Enti Yoosefa sinthan bayray ba bayratethan, kaaloy ba kaalotethan maaran uttidosona. Enti issoy issuwa xeellidi, enta waatidi utisidaako be7idi malaaletidosona.
GEN 43:34 Yoosefa gaytape entaw qumi gishetees, shin Biniyaames haratape aathidi ichashu kushe immis. Yaanidi, enti Yoosefara midi uyidi ufaytidosona.
GEN 44:1 Yoosefi ba keetha kaapuwa, “Neeni ha asati tookanaw denda7ida keena enta ogoruwan kathi kuntha. Enta ubbaa miishiya enta ogoruwa doonan doonan yegga.
GEN 44:2 Yaatada wursetha kaaluwa ogoruwa doonan ta bira wancaanne I shammanaw ehida miishiya yegga” yaagidi kiittis. I Yoosefi gidaysada oothis.
GEN 44:3 Sa7i wontin he asati banta hareta ekidi baanaw dendidosona.
GEN 44:4 Enti he katamaape keyidi haaki boonna de7ishin, Yoosefi ba keetha kaapuwako, “Ha asata geedo kaalla. Neeni enta gakida wode entako, ‘Hinte ayis keeha iitan zaaridetii?
GEN 44:5 Haysi ta goday uyeysanne xuuraba demmiya wanca gideysa ereketii? Ayis kaysotidetii? Haysi hinte oothidabay daro iitaba’ yaaga” yaagis.
GEN 44:6 Yaatin I enta geedo kaali gakidi, he gidaysadaka entaw odis.
GEN 44:7 Shin enti, “Godaw haysa melaba ayis odetay? Hessa melaba oosoy nuupe ne aylletape haako.
GEN 44:8 Nuuni hari attoshin, nu ogoruwa doonape demmida miishiya Kanaane biittafe guye zaaridi new ehidaysa eraasa. Ne godaa keethaafe nuuni worqa woyko bira waati kaysotanee?
GEN 44:9 Ne aylleta giddon he wancay bentida uray hayqo. Qassi attida nuka nu godaas aylle gidana” yaagidosona.
GEN 44:10 I entako, “Hessa gidiko lo77o, hinte gidaysada hano. Wanca ekida oonika ta aylle gidana; attidaysati saron beeta” yaagis.
GEN 44:11 Hessafe guye, enti ellesidi banta ogoruwa ogoruwa sa7an wothidi billidosona.
GEN 44:12 He kaapoy ubbaafe bayra ogoruwape doomidi wursetha kaaluwaysa gakanaw koyidi, he wanca Biniyaame ogoruwape demmis.
GEN 44:13 Hessan enti azzanidi, banta ma7uwa peedhidosona. Banta ogoruwa hareta bolla caanidi, guye katama simmidosona.
GEN 44:14 Yihudi ba ishatara Yoosefako geliya wode Yoosefi son de7ees; enti iya sinthan sa7an gufannidosona.
GEN 44:15 Yoosefi entako, “Hinte aybi palaba oothidetii? Ta mela asi xuuraba demmanaw danda7eysa hinte ereketiyee?” yaagis.
GEN 44:16 Yihudi, “Ta godaas nuuni ay gaanee? Nuuni ay odetiyabay de7ii? Nu xillotetha nuuni waati bessanee? Xoossay ne aylleta naaquwa qoncisis. Hiza nuunika he wancay bentida urayka ta godaas aylle gidida” yaagis.
GEN 44:17 Shin Yoosefi, “Hessa melaba oothanaysi taape haako; ta wancay iyape bentida ura xalaali ta aylle gidana. Hanko hinte hinte aawako guye saro simmite” yaagis.
GEN 44:18 Yihudi iyako shiiqidi “Ta godaw, neeni kawa mela gidikoka taani neera odetanaw nena woossayis. Tana ne aylliya hanqetofa.
GEN 44:19 Neeni ta goday nuna ne aylleta, ‘Hintew aawi woyko ishi de7ii?’ gada oychadasa.
GEN 44:20 Nuunika, ‘Nuus cimida aaway de7ees. I cimatethan yelida kaalo na7ayka de7ees. He na7aa ishay hayqis, ba Aayen issino, iya aaway iya daro dosees’ yaagida.
GEN 44:21 “Neeni nuuko, ‘Taani iya be7ana mela taw ehite’ yaagadasa.
GEN 44:22 Yaatin nuuni, ‘He na7ay ba aawape shaaketanaw danda7enna; shaaketiko iya aaway hayqana’ yaagida.
GEN 44:23 Shin neeni, ‘Hinte kaalo ishay hintera yoona ixiko, ta ayfiya zaari be7eketa’ yaagadasa.
GEN 44:24 Nuuni nu aawako simmidi bida wode ne gidaysa iyaw odida.
GEN 44:25 “Nu aaway, ‘Guye bidi guutha kathi shammite’ yaagin,
GEN 44:26 nuuni iyako, ‘Nu kaalo ishay nuura boonna ixiko, ura ayfiya be7anaw danda7oko. Nu kaalo ishay nuura biyaba gidiko, nuuni yaa baana’ yaagida.
GEN 44:27 “Yaatin nu aaway nuna, ‘Ta machiya Raheela taw nam7u adde nayta yelidaysa hinte ereeta.
GEN 44:28 Entafe issoy taape shaaketidi bin, iya do7i moonna aggenna yaagas. Hachi gakanaw taani iya be7abike.
GEN 44:29 Haysa qassi taape hinte shaaki efin, iitabay iya gakiko, hinte tana ta cimatethan afuthu muzishe ta hayquwa matayeta’ ” yaagis.
GEN 44:30 “Hessa gisho, ha77i taani guye ta aawako biya wode Biniyaamey taara baanaw bessees. Ta aaway na7aa shempofe dosiya gisho, na7ay nuura baynaysa be7iko hayqana. Nuuni ne aylleti nu aawa cimatetha afuthan duufo gelsoos.
GEN 44:32 Taani ne aylley na7aa ta waasetethan ekas. Qassi, ‘Ta aawaw, taani iya new saro zaarada ehonna ixiko ta de7uwa ubban ne baadethay tana gako’ yaagas.
GEN 44:33 “Yaaniya gisho, taani ne aylley na7aa gisho aylletada haysan attana na7ay ba ishatara guye simmo.
GEN 44:34 Na7ay bayna taani waanada guye ta aawako simmanee? Tana ta aaway seeletana seela bessofo” yaagis.
GEN 45:1 He wode Yoosefi ba aylleta sinthan gencanaw danda7iboona gisho, “Asa ubbaa ta sinthafe kessite” yaagidi waassis. Hessa gisho, Yoosefi ba ishatas bana erisida wode iyara oonika allagi baawa.
GEN 45:2 I ba qaala dhoqu oothidi, Gibxeti iya si7ana gakanaw yeekis; kawa soo asayka he woriya si7idosona.
GEN 45:3 Yoosefi ba ishatako, “Taani Yoosefabay. Ta aaway hanno gakanaw paxa de7ii?” yaagidi oychis. Shin iya ishati daro dagammida gisho, iyaw aykoka zaaranaw danda7ibookona.
GEN 45:4 Yaanin, Yoosefi ba ishatako, “Taako haa shiiqite” yaagis. Enti iyako shiiqin I enta, “Taani hinte tana Gibxe biitta bayzida hinte ishaa Yoosefa.
GEN 45:5 Ha77i hinte tana bayzida gisho, qiirotofitenne hintena baaddofite. Ayis giiko, Xoossay tana hintefe sinthe kiitiday asa shempo ashshanaasa.
GEN 45:6 Ha biitta koshi gelin haysi nam7antho laythi. Asi goyonna woyko cakonna hara ichashu laythati buroo de7oosona.
GEN 45:7 Shin taani sa7an hinte sheeshanne hintena malaalsiya ogen ashshana mela Xoossay tana hintefe sinthe kiittis.
GEN 45:8 Hessa gisho, tana ha bessa kiittiday Xoossafe attishin, hintena gideketa. I tana Gibxe kawas zoriya aawa, iya aqo ubbaa bolla godanne Gibxe biitta haariya asi oothis.
GEN 45:9 “Ha77i ellesidi guye ta aawako bidi iyako, ne na7ay Yoosefi haysada yaagees giite; ‘Xoossay tana Gibxe biitta ubbaa bolla godaa kessis; neeni gam7onna taako haaya.
GEN 45:10 Ne nayta, ne nayta nayta, ne dorsaa, ne deesha, ne mehiyanne new de7iyaba ubbaa ekada haaya; ta matan Geesame biittan de7aasa.
GEN 45:11 Buroo ichashu kosha laythati attidosona. Nena, ne soo asaanne ne mehiya koshi qohonna mela taani nena muzana’ ” yaagis.
GEN 45:12 Qassika Yoosefi entako, “Hinteka, ta ishaa Biniyaameyka, ha hintera odetey tuma tana Yoosefa gideysa hinte ayfiyan be7ideta.
GEN 45:13 Taw Gibxe biittan de7iya gita bonchuwanne hinte be7idaba ubbaa ta aawas odite. Ta aawaka ellesidi haa ekidi yiite” yaagis.
GEN 45:14 Yoosefara Biniyaamera nam7ay wolu qoomidi yeekidosona
GEN 45:15 Yoosefi yeekishe ba ishata ubbaa yeeris. Hessafe guye, iya ishati iyara odetidosona.
GEN 45:16 Yoosefa ishata yuussaa worey kawo keethi gakida wode kawoynne iya moorinnati ufaytidosona.
GEN 45:17 Kawoy Yoosefako, “Neeni ne ishatako yaaga; hinte hareta caanidi, Kanaane biitta simmite.
GEN 45:18 Hinte aawanne hinte soo asa ekidi, guye taako haa yiite. Taani hintew Gibxe biittan ubbaafe lo77iya bessa immiko, he biitta modhuwa hinte kaashana.
GEN 45:19 Qassika, banta nayta, banta machetanne banta aawa ehanaw Gibxefe gita para gaare eki baana mela enta kiita.
GEN 45:20 Gibxe biittan de7iya ubbaafe aadhidi lo77iyabay entassa gidiya gisho, banta aggidi yaa aquwas qoponna mela entaw oda” yaagis.
GEN 45:21 Yaatin Isra7eele adde nayti kawoy gidaysada oothidosona. Yoosefi Kawoy kiitidaysada gita para gaaretanne oges shinqeka entaw immis.
GEN 45:22 Enta ubbaas huuphen huuphen ooratha ma7o immis. Shin Biniyaames tammanne usupun kilo giraame deexiya biranne ichashu kumetha ma7o immis.
GEN 45:23 I ba aawas Gibxen de7iyabaape lo77iyaba ubbaa tammu adde haren caanidi, qassi oges kathi, uythinne hara kathi tammu macca haretan caanidi yeddis.
GEN 45:24 Yaatidi, Yoosefi ba ishata moyzishe, entako, “Ogiyan bishe ooyetofite” yaagis.
GEN 45:25 Enti Gibxefe dendidi, Kanaane biittan de7iya banta aawa Yayqoobako simmidosona.
GEN 45:26 Enti Yayqoobako, “Yoosefi paxa de7ees. I hessafe aadhidi Gibxe biitta ubbaa haarees” yaagidosona. Yayqoobi dagammidi, wozana dhayda gisho, enti giyaba ammanibena.
GEN 45:27 Shin enti Yoosefi entaw odidaba ubbaa iyaw odin, qassika iya eki yaana mela I yeddida gita para gaareta I be7in iyaw shempoy simmis.
GEN 45:28 Isra7eeley, “Hiza ta ammanetas. Ta na7aa Yoosefi hanno gakanaw paxa de7ees. Ta hayqanaape sinthe bada iya be7ana” yaagis.
GEN 46:1 Isra7eeley baw de7iyaba ubbaa ekidi, Barsaabe gakida wode ba aawa Yisaaqa Xoossas yarsho yarshis.
GEN 46:2 Xoossay qamma Isra7eeles qoncidi, “Yayqooba, Yayqooba” yaagis. Ika, “Heko, abe Godaw” gidi koyis.
GEN 46:3 Xoossay iyako, “Taani Xoossaa, ne aawa Xoossa; neeni Gibxe baanaw babofa. Ta ne sheesha yan gita dere kessana.
GEN 46:4 Taani neera issife Gibxe baana; taani ne sheesha yaape kessada haa ehana. Ne hayqiya wode Yoosefi ne ayfiya oykana” yaagis.
GEN 46:5 Hessafe guye, Yayqoobi Barsaabepe dendis. Isra7eele adde nayti banta aawa Yayqooba, banta naytanne banta macheta Gibxe Kawoy entaw yeddida gita para gaare bolla uttisidi efidosona.
GEN 46:6 Enti Kanaane biittan haarida haaruwanne mehe ubbaa eki bidosona. Yayqoobi ba soo asa ubbaa ekidi Gibxe bis.
GEN 46:7 I ba soo asa ubbaa; adde naytanne ba adde nayta nayta, ba macca naytanne ba macca nayta nayta, ubbaa baara ekidi Gibxe bis.
GEN 46:8 Isra7eelera Gibxe biitta bida iya nayta sunthay haysafe kaallidi xaafetidaysa. Yayqooba bayra na7ay Robeela;
GEN 46:9 Robeela adde nayti Hanooka, Pala, Hesiroonanne Karma.
GEN 46:10 Simoona adde nayti Yamu7eela, Yamina, Ohada, Yakina, Xohaaranne Kanaane maccaseepe yelida Saa7ula.
GEN 46:11 Leewe adde nayti Gedisoona, Qahatanne Meraara.
GEN 46:12 Yihuda adde nayti Era, Onaana, Seela, Paaresanne Zaara. Shin Erinne Onani Kanaane biittan hayqidosona. Paaresa adde nayti Hesiroonanne Hamuula.
GEN 46:13 Yisakoora adde nayti Tola, Puu7a, Yoobanne Shimroona.
GEN 46:14 Zabloona adde nayti Sareda, Eloonanne Yahilaala.
GEN 46:15 Ha adde naytinne macca na7iya Diina, Liya Masephexoome biittan Yayqoobas yelidaysata. Diina gujin iya naytinne nayta nayti kumethi hastamanne heedza.
GEN 46:16 Gaade adde nayti Xafoona, Hagge, Shuuna, Exiboona, Eri, Aroodanne Ar7eela.
GEN 46:17 Aseera adde nayti Yimina, Yesuwa, Yisiwanne Beri7a. Enta michiya Saraho. Beri7a adde nayti Hebeeranne Malki7eela.
GEN 46:18 Haysati Laabi ba na7e Liyas immida Zalafa Yayqoobas yelida nayta. Enti kumethi tammanne usupuna.
GEN 46:19 Yayqooba mache Raheeli adde nayti Yoosefanne Biniyaame.
GEN 46:20 Ona katama kahine Phoxfaara na7iya Asnaata Yoosefas Gibxen Minaasenne Efreema yelasu.
GEN 46:21 Biniyaame nayti Beella, Bekera, Asbeela, Geera, Naamane, Eha, Orosha, Mufima, Hufimanne Arada.
GEN 46:22 Haysati Yayqoobas yeletida Raheeli adde nayta. Enti kumethi tammanne oydda.
GEN 46:23 Daane adde na7ay Hushima.
GEN 46:24 Niftaaleme adde nayti Yahixeela, Guna, Yexeranne Shileme.
GEN 46:25 Haysati laapunati Laabi ba na7e Raheelis immida Baali Yayqoobas yelida naytanne nayta nayta.
GEN 46:26 Yayqoobara Gibxe bida, iya gulbatape keyida nayti, iya nayta macheta gujonna usupun tammanne usupuna.
GEN 46:27 Gibxen Yoosefas yeletida nam7u nayta gujiko, Gibxe bida Yayqooba soo asay kumethi laapun tamma.
GEN 46:28 Geesame biittan bantana mokana mela Yayqoobi Yihuda baape sinthe Yoosefako kiittis. Enti yaa gakiya wode,
GEN 46:29 Yoosefi ba para gaariya giigisidi, ba aawa Isra7eelera gahetanaw Geesame bis. Yoosefi ba aawa demmida mela iya qoodhiyan xaaxetidi daro wode yeekis.
GEN 46:30 Isra7eeley Yoosefako, “Neeni paxa de7ishin, taani ne ayfiya be7ida gisho, hiza taani hayqikoka aykoy baawa” yaagis.
GEN 46:31 Hessafe guye, Yoosefi ba ishatanne ba aawa soo asatako, “Taani Gibxe kawako bada iyako, ‘Kanaane biittan de7iya ta ishatinne ta aawa soo asay taako yidosona.
GEN 46:32 Enti mehe haareyisata, enti bantara banta dorsa, banta deesha, mehiyanne bantaw de7iyaba ubbaa ekidi yidosona’ yaagana.
GEN 46:33 Kawoy hintena xeegisidi, ‘Hinte oosoy aybee?’ gidi oychiko,
GEN 46:34 hinte iyako, ‘Nuuni ne aylleti na7atethafe doomidi nu aawatada mehe heemmoos’ yaagite. Dorse haariya asi Gibxe asan kadhetidaba gidiya gisho, I hinte Geesame biittan daana mela oothana” yaagis.
GEN 47:1 Yoosefi ba ishatape ichashata dooridi Gibxe kawako gelidi haysada yaagis; “Ta aawaynne ta ishati, banta dorsa, banta deesha, banta mehiyanne bantaw de7iyaba ubbaa ekidi Kanaane biittafe yidi, ha7i Geesamen de7oosona” yaagis.
GEN 47:3 Kawoy he ishatako, “Hinte oosoy aybee?” yaagidi oychis. Enti kawako, “Nuuni ne aylleti nu aawatada dorse haariya asata” yaagidi zaaridosona.
GEN 47:4 Qassika enti iyako, “Kanaane biittan koshi keyida gishonne nu mehiyas miyabay dhayda gisho, nuuni haysan daanaw yida. Hayyana, nuna ne aylleta Geesame biittan de7o garki” yaagidosona.
GEN 47:5 Kawoy Yoosefako, “Ne aawaynne ne ishati neeko yidosona.
GEN 47:6 Hiza Gibxe biittay ne kushena. Ha biittan ubbaafe aadhidi lo77iya bessan ne aawanne ne ishata wotha; enti Geesame biittan de7ona. Enta giddofe dumma qaratethi de7eysati de7iko, hessata ta mehiya bolla shuuma” yaagis.
GEN 47:7 Hessafe guye, Yoosefi ba aawa Yayqooba gelsidi, kawa sinthe aathis. Yayqoobi Gibxe kawa anjidaape guye,
GEN 47:8 Kawoy Yayqooba, “New aapun laythee?” yaagidi oychis.
GEN 47:9 Yayqoobi kawako, “Taani daabursan de7ida laythay xeetanne hastama. Ta laythay beni ta aawati daabursan de7ida laythafe guuthanne metoy darida laythi” yaagis.
GEN 47:10 Hessafe guye, Yayqoobi kawa anjidi, iya sinthafe kare keyis.
GEN 47:11 Yoosefi kawoy kiitidaysada ba aawanne ba ishata Gibxe biittan Ramse katama matan de7iya ubbaafe aadhida arada biittan enta wothis.
GEN 47:12 Yoosefi ba aawas, ba ishatasinne baara de7iya ubbaas enta nayta taybuwada kathi immis.
GEN 47:13 Biitta ubban koshi suullida gisho biittan ubban kathi baawa; Gibxeynne Kanaane biittay qohetidosona.
GEN 47:14 Yoosefi Gibxe katha bayzidi, Gibxeninne Kanaane biittatan de7iya miishiya ubbaa shiishidi Gibxe kawa keetha gelsis.
GEN 47:15 Gibxe miisheynne Kanaane miishey wurida wode Gibxe asa ubbay Yoosefako yidi “Nuus kathi imma. Nu miishey wurida gisho nuuni ne sinthan ayis koshan hayqanee?” yaagidosona.
GEN 47:16 Yoosefi entako, “Hinte mehiya eki yiite. Hinte miishey wuridaba gidiko, taani katha hinte mehiyara laammana” yaagis.
GEN 47:17 Hessa gisho, enti banta mehiya Yoosefas ehidosona. Yoosefi enta para, dorsa, deesha, miizanne hariya kathara laammis. I he laythi enta mehiya ubbara kathaa laammidi, enta muzidi shaachis.
GEN 47:18 Enti kaalliya laythan iyako yidi “Nuuni nu godaape qosiyabay baawa; nu miishey ubbay wuris. Nu mehiyaka new immi diggida. Nu bollafenne nu gadiyape attishin, nu godaas immanabay harabay baawa.
GEN 47:19 Nuuni ne be7ishin ayis koshan hayqanee? Nu gadeyka ayis dhayii? Nunaka nu gadiyaka shammada nuus kathi imma. Nuuni kawas aylletana, nu gadeyka iyabaa gido. Nuuni hayqonna attana mela nu gadeyka oxonna mela zerethi nuus imma” yaagidosona.
GEN 47:20 Yoosefi Gibxe biitta ubbaa kawas shammis. Koshi suullin, Gibxe asay un7etidi banta gadiya bayzin gadey kawuwaba gidis.
GEN 47:21 Yoosefi asa ubbaa Gibxes ha gaxape hini gaxa gakanaw kawas aylle oothis.
GEN 47:22 Shin kawoy kahinetas kathi immiya gisho Yoosefi enta gadiya shammibeenna. Hessa gisho, banta gadiya bayzibokona.
GEN 47:23 Yoosefi asaako, “Hiza hachi taani hintenanne hinte gadiya kawas shammida gisho, zerethi efidi hinte gaden zerite.
GEN 47:24 Shin kathaa shiishiya wode ayfidabape ichashu kushiyape issi kushiya kawas immite. Attida oyddu kushey hinte gadiyas zerethi, hintewunne hinte soo asaas kathi gido” yaagis.
GEN 47:25 Enti, “Neeni nuna ashshadasa. Nu godaa sinthan nuuni sabetiko, nuuni kawas aylletana” yaagidosona.
GEN 47:26 Hessa gisho, Yoosefi Gibxe biittan ayfidabape ichashu kushiyape issuwa kawas immeysa higge kessis. He wogayka hachi gakana eqidi de7ees. Kahineta gadiyape attishin, hari ubbay kawuwaba gidis.
GEN 47:27 Isra7eeleti Gibxe biittan Geesame giya bessan de7idosona. Enti yan duretidosona; yeleti daridosona.
GEN 47:28 Yayqoobi Gibxe biittan tammanne laapun laythi de7is. Yayqoobi de7ida laythay xeetanne oytamanne laapuna.
GEN 47:29 Isra7eeles hayqiya wodey matatin, ba na7aa Yoosefa xeegisidi haysada yaagis; “Taani ne sinthan sabetidaba gidiko, ne kushiya ta shempuwa bolla wotha. Neeni taw mishetiyaba gidiko tana Gibxen moogike gada taw caaqa.
GEN 47:30 Shin taani hayqiya wode tana Gibxefe efada, ta mayzati moogetidasuwan mooga” yaagis. Yoosefi, “Taani, nena ne gidaysada oothana” yaagis.
GEN 47:31 Yayqoobi iyako, “Ane taw caaqa” yaagis. Yoosefi iyaw caaqis. Hessafe guye, Isra7eeley ba guufiya bolla katidi Xoossaa goyinnis.
GEN 48:1 Hessafe guye asay, “Ne aaway saketees” yaagidi Yoosefas odidosona. I ba nam7u adde nayta Minaasenne Efreema ekidi ba aawa be7anaw bis.
GEN 48:2 Yayqoobi, iya na7ay Yoosefi yidaysa si7ida wode, Isra7eeley bana minthethidi hiixan uttis.
GEN 48:3 Yayqoobi Yoosefa, “Ubbaa Danda7iya Xoossay Kanaane biittan Looza kataman taw qoncidi, tana anjis.
GEN 48:4 I tana, ‘Taani ne yeletetha darsana, nena daro dere oothana. Ha biitta taani neepe guye, ne sheeshas merina laata oothada immana’ ” yaagis.
GEN 48:5 “Hiza, ne nam7u adde nayti, taani neeko haa yaanape sinthe Gibxen new yeletidaysati tabaa. Efreemeynne Minaasey taw Robeela melanne Simoona mela.
GEN 48:6 Entafe guye yeletanaysati nebaa gido. Enti laattana biittay Efreema sunthaninne Minaase sunthan gido.
GEN 48:7 Taani Masephexoomepe simmishin, Efraata gakanaw guuthi attishin, Raheela Kanaane biittan hayqasu. Taani iyo Beeteleme geetetiya Efraata efiya ogiya gaxan moogas” yaagis.
GEN 48:8 Isra7eeley Yoosefa adde nayta nam7ata be7ida wode, “Haysati oonantee?” yaagidi oychis.
GEN 48:9 Yoosefi ba aawako, “Haysati Xoossay taw ha biittan immida nayta” yaagis. Yaatin Isra7eeley, “Taani enta anjana mela, enta taako haa shiisha” yaagis.
GEN 48:10 Isra7eeley cimin iya ayfey ixida gisho, xeellanaw danda7enna. Hessa gisho, Yoosefi ba adde nayta iyako shiishin, Yayqoobi enta idimmidi yeeris.
GEN 48:11 Isra7eeley Yoosefa, “Taani ne ayfiya be7ana gada qopabike, shin Xoossay heko ne naytaka tana bessis” yaagis.
GEN 48:12 Yoosefi ba nayta Yayqooba gulbatape denthidi, ba som7uwa sa7a gathidi ziggis.
GEN 48:13 Yoosefi ba nam7u adde nayta, Efreema Isra7eeles haddirsa baggara, Minaase Isra7eeles ushacha baggara essis.
GEN 48:14 Isra7eeley ba kushiya barbaxidi Efreemi kaalo gidikoka, ba ushacha kushiya huuphen wothis. Minaasey bayra gidikoka, Isra7eeley ba haddirsa kushiya Minaase huuphen wothis.
GEN 48:15 Hessafe guye, Yayqoobi Yoosefa haysada yaagidi anjis; “Ta aawati Abrahaameynne Yisaaqi, iya sinthan de7ida Xoossay, ta de7o ubban hachi gakanaw tana heemmida Xoossay nena anjo.
GEN 48:16 Iitaba ubbaafe tana ashshida, iya kiitanchoy, ha nayta naago. Ta sunthaynne, ta aawata Abrahaame Yisaaqa sunthay entan xeegeto. Enti sa7a bolla daro” yaagidi anjis.
GEN 48:17 Yoosefi ba aaway ba ushacha kushiya Efreema huuphen wothidaysa be7ida wode dosibeenna. Hessa gisho, Efreema huuphiyape denthidi, Minaase huuphen wothanaw ba aawa kushiya oykis.
GEN 48:18 Yoosefi, “Ta aawaw, hessa gidenna. Bayray haysa ne ushacha kushiya iya bolla wotha” yaagis.
GEN 48:19 Shin iya aaway ixidi, “Ta erayis, ta na7aw, ta erayis. Minaaseyka gita dere gidana, shin iya kaalo ishay iyape aadhidi gitatana. Iya sheeshayka daro gita kawotetha gidana” yaagis.
GEN 48:20 I he gallas enta anjishe, “Isra7eeleti anjo anjiya wode, ‘Xoossay hintena Efreemadanne Minaaseda ootho’ yaagidi hinte sunthan anjana” yaagis. Yaatidi Efreema Minaasepe sinthayis.
GEN 48:21 Hessafe guye, Isra7eeley Yoosefa, “Taani hayqanaw matas, shin Xoossay hintera de7ees. I hinte aawata biitta hintena guye zaarana.
GEN 48:22 Taani Amooretape ta mashshaninne ta dongen ekida biitta, ne ishatara ne shaaketada ekiya biitta bolla new gujada immas” yaagis.
GEN 49:1 Hessafe guye, Yayqoobi ba adde nayta xeegidi, “Sinthafe hananaba taani hintew odana mela ha shiiqite” yaagis.
GEN 49:2 “Hinteno Yayqooba nayto, issife shiiqidi si7ite; hinte aaway Isra7eeley odeysa hayzite.
GEN 49:3 “Robeela, ta bayra na7aw, neeni ta wolqaa; ta minotethas koyruwa; neeni bonchonka wolqanka ubbaafe aadhasa.
GEN 49:4 Neeni haatha mela, eqidason de7aka; ne ishata bolla bayratethi new bessena. Neeni ne aawa hiixan keyadasa; ne aawa arsa tunisadasa.
GEN 49:5 “Simooninne Leewey ishata; enti banta mashsha makallatethas denthoosona.
GEN 49:6 Enti banta hanquwan adde wodhidosona, banta amuwa kunthanaw boorata gaadiya qanxidosona. Yaaniya gisho, taani enta zoretan gelike; enta shiiquwanka uttike.
GEN 49:7 Enta wolqaama hanqoy enta wozanaa iitatethay baadetidaba gido. Taani, enta Yayqooba asa giddon laallana. Isra7eele biittan dharcana.
GEN 49:8 “Yihuda, ne ishati nena galatana; Ne kushey ne morketa qoodhe oykana; Ne aawa nayti new hokidi ziggana.
GEN 49:9 Yihudaa, neeni wodala gaammo; Ta na7aw, neeni shankafe wodhi simmidi, cogotidi zin7ida gaammo mela. Nena bochanaw danda7ey baawa.
GEN 49:10 Merinaw haareysi yaana gakanaw kawotetha xam7ay, Yihuda kushepe keyenna; kawotethati iyaw kiitetana.
GEN 49:11 I ba hariya woyne bolla, ba hare mara dooretida woyne bolla qachana; I ba ma7uwa suuthi daaniya woyne ushshan meeccana.
GEN 49:12 Iya ayfey woyne ushshafe aadhidi dulkana; iya achay xaamatape aadhidi booxana.
GEN 49:13 “Zabloni abba doonan daana; I abba doonan markabeti eqiya bessi gidana; iya zaway Sidoona gakana.
GEN 49:14 “Yisakoori mino hare mela, caanata giddon zin7ees.
GEN 49:15 Shin I ba shempiya bessay lo77o gideysanne ba biittay ufayseysa gideysa be7iya wode, caana tookanaw ba hashiya ziqi oothidi, aylletetha ooso oothana.
GEN 49:16 “Daaney Isra7eele zerethafe issuwa gidiya ba asa bolla pirdana.
GEN 49:17 Daaney oge gaxan de7iya shoosha mela, Para shuquliya dukidi, para toggidaysa guye yeggiya gope mela.
GEN 49:18 “Abeeti Godaw, taani ne ashuwa naagayis.
GEN 49:19 “Gaade, bonqeysati qohana; shin I enta geedo kaallidi oykana.
GEN 49:20 “Aseera biittay orde; I kawotas lo77o kathi immana.
GEN 49:21 “Niftaalemey qashetonna yeda de7iya, lo77o marata yeliya gen7e mela.
GEN 49:22 “Yoosefi haatha matan toketidi, dere bolla zaa7ida, ayfey kumida woyne mela.
GEN 49:23 Dongen dukeysati iya bolla dendana; banta dongiyan dukishe iya gooddana.
GEN 49:24 Shin Yayqooba Xoossa wolqan, Isra7eele henthanchuwa naaguwan, iya dongey mino, iya qesey xaala gidana.
GEN 49:25 Ne aawa Xoossay nena maaddana. Ubbaa Danda7iya Xoossay, Bolla salo anjuwan, Garsa ciimmuwa anjuwan, mehenka yelonka nena anjana.
GEN 49:26 Ne aawa anjoy benipe minnidi de7iya zumata anjuwafeka, merinaw de7iya deretape bentiya ufaysiya anjuwafeka aadhees. Haysi ubbay Yoosefa huuphen, ba ishata giddon kaapo gideysa liiphen shempo.
GEN 49:27 “Biniyaamey bonqiya suudhume; ba olidaaba wonta mees; ba di77idabaa omarsi shaakees” yaagis.
GEN 49:28 Haysati tammanne nam7u Isra7eele sheeshata. Enta aaway enta huuphen huuphen entaw bessiya anjuwa anjishe entako gidabay haysa.
GEN 49:29 Hessafe guye, I enta haysada yaagidi kiittis; “Taani ta mayzatan gahetana hanayis. Tana Hite addiya Efroona gaden de7iya gongoluwan ta aawata matan moogite.
GEN 49:30 Hessika, Kanaane biittan, Maammire matan de7iya, Makifeelan de7iya gongoluwa. He gongoloy Abrahaamey moogoos Hite addiya Efroonape iya gadiyara shammida duufuwa.
GEN 49:31 Abrahaameynne iya machiya Saara, Yisaaqinne iya machiya Irbiqa yan moogetidosona. Taani qassi Liyaka yan moogas.
GEN 49:32 He gadeynne iyan de7iya gongoloy Hitetape shametidaysa. Tana yan moogite” yaagis.
GEN 49:33 Yayqoobi, ba nayta kiitaa ongidaape guye ba tohuwa ba hiixan shiishi ekidi, ba mayzatan gahetis.
GEN 50:1 Yoosefi ba aawa aha bolla kundidi, yeerishe iyaw yeekis.
GEN 50:2 Hessafe guye, Yoosefi dhale shiishiya ba oosanchota, ba aawa Isra7eele aha shitto tiyidi melisana mela kiittis. Enti tiyidi melisidosona.
GEN 50:3 Shitto tishsha wogay oytamu gallas kumethi ekees. Gibxe asati iyaw laapun tammu gallas yeekidosona.
GEN 50:4 Yeeho gallasati aadhida wode, Yoosefi Gibxe kawa oosanchota, “Taani hinte sinthan saba demmidaba gidiko, taw kawas haysada yaagidi odite.
GEN 50:5 ‘Ta aaway tana issi caaqo caaqisis. Taani hayqanaw matas. Taani ta huuphen Kanaane biittan bookida gongolo duufuwan tana mooga’ yaagis. Hessa gisho, ‘Ha7i taani yaa bada ta aawa moogada simmana mela tana yeddarki’ yaagite” yaagis.
GEN 50:6 Yaatin Kawoy, “I nena caaqisidaysada bada ne aawa mooga” yaagis.
GEN 50:7 Yaatin Yoosefi ba aawa mooganaw bis. Kawa moorinnati ubbay, kawa keethaninne Gibxen de7iya gita asati ubbay Yoosefa kaallidi bidosona.
GEN 50:8 Yoosefa soo asa ubbay, iya ishatinne iya aawa soo asati Yoosefara bidosona. Enta yooga nayti, enta dorsati, enta deeshatinne enta miiza wudiya xalaali Geesamen attis.
GEN 50:9 Para gaaretinne togati iyara bidosona. Iya kaallidi bida asay daro.
GEN 50:10 Enti Yordaanose Shaafa matan de7iya Axaade geetetiya wudumma gakidi, banta qaala dhoqu oothidi, zeleelidi yeekidosona. Yan Yoosefi ba aawa yeehuwan laapun gallas uttis.
GEN 50:11 He biittan de7iya Kanaane asati Axaade wudumman he yeehuwa be7ida wode, “Gibxeti aybi yibbata yeeho yeekona?” yaagidosona. Hessa gisho, Yordaanose matan de7iya he bessay Abeel-Mixraama (Gibxeta Yeeho) geetetis.
GEN 50:12 Yayqooba nayti enta aaway enta kiitidaysada oothidosona.
GEN 50:13 Enti iya aha Kanaane biitta efidi, Mamirepe ushacha baggan de7iya Makifeela gongoluwan moogidosona. Hessika, Abrahaamey Hite addiya Efroonape moogoos shammida gadiya.
GEN 50:14 Yoosefi ba aawa moogidaape guye, ba ishataranne iya aawa mooganaw iyara bida hara asata ubbatara Gibxe simmis.
GEN 50:15 Banta aaway hayqidaape guye, Yoosefa ishati banta giddon, “Nuuni iyaw oothida iitaba ubbaas Yoosefi nuna ba ulon morkidi halo keyanaw koyiko nuuni waananee?” yaagidosona.
GEN 50:16 Hessa gisho, Yoosefako yaagidi kiita kiittidosona; “Ne aaway hayqanaape sinthe nuuko,
GEN 50:17 ‘Neeni, ne ishata nagaraanne enta iita naaquwa hayyana atto yaaga yaagis gidi odite’ yaagis. Hessa gisho, ha7i hayyana, nu nagara, ne aawa Xoossa aylleta naaquwa atto yaaga” yaagidosona. Yoosefi hessa si7idi yeekis.
GEN 50:18 Hessafe guye, iya ishati banta huuphen iyako yidi, iya sinthan gufannidi, “Nuuni, ne aylleta” yaagidosona.
GEN 50:19 Shin Yoosefi entako, “Babofite, Tana hintew Xoossa gidetiyee?
GEN 50:20 Hinte taw iita oothideta, shin ha7i daro asay hayqonna attana mela Xoossay haysa lo77otethas oothis.
GEN 50:21 Hessa gisho, hiza babofite. Taani hintenanne hinte nayta muzana” yaagidi, enta minthethidi lo77o qaala hassayis.
GEN 50:22 Yoosefi, iyaw laythi xeetanne tamma gidana gakanaw ba aawa soo asaara Gibxen de7is.
GEN 50:23 Efreema naytanne, enta nayta nayta be7is. Qassi Minaase na7aa Makira nayta, ba nayta oothis.
GEN 50:24 Hessafe guye Yoosefi ba ishata, “Taani hayqanaw matas, shin Xoossay hintena maaddanaw xomoosana. I hintena ha biittafe kessidi, Abrahaames, Yisaaqasinne Yayqoobas immana gidi caaqida biitta efana” yaagis.
GEN 50:25 Yoosefi Isra7eele nayta, “Xoossay hintena maaddanaw xomoosiya wode, hinte ta meqetha ha biittafe ekidi biite” yaagidi caaqisis.
GEN 50:26 Yoosefi xeetanne tammu laythi de7idi hayqin, shittuwan iya aha tiyidi melisidaape guye, Gibxe biittan saaxinen wothidosona.
EXO 1:1 Banta soo asaa ubba ekidi, Yayqoobara Gibxe bida Isra7eele adde nayta sunthay haysafe kaallidi xaafetidaysa;
EXO 1:2 Entika Robeela, Simoona, Leewe, Yihuda,
EXO 1:3 Yisakoora, Zabloona, Biniyaame,
EXO 1:4 Daane, Niftaaleme, Gaadenne Aseera.
EXO 1:5 Yayqooba sheeshati ubbay laapun tamma. Yoosefi kaseka Gibxen de7ees.
EXO 1:6 Wodepe guyen Yoosefi, iya ishatinne he yeletetha ubbay hayqidosona.
EXO 1:7 Shin Isra7eele sheeshay yeletidi Gibxe biitta kumana gakanaw taybon daridosonanne minnidosona.
EXO 1:8 Hessafe guye, Yoosefa eronna hara kawoy Gibxe biittan kawotis.
EXO 1:9 He kawoy ba asaa, “Heko, ha Isra7eeleti nuupe aadhidi yeletethaninne wolqan daridosona.
EXO 1:10 Nuuni hiillatonna ixiko enti taybon kaseysafe haa darana. Qoponna oli dendiko enti nu morketara issifidi nuna olidi, biitta yeggidi baanaw danda7oosona” yaagis.
EXO 1:11 Hessa gisho, deexo ooson enta un7ethana mela enta bolla iita kaapota wothidosona. Enti Pitoomanne Ramse geetetiya shallo wothiya katamata kawas keexidosona.
EXO 1:12 Shin Gibxeti enta darsi un7ethinka enti haa daridi yeletidosonanne biitta gakidosona. Gibxeti Isra7eeleta ixida gisho yayyidosona.
EXO 1:13 Entana iita ooso oosisidosona.
EXO 1:14 Urqa yedhison, siminton xuube medhon qassi gade oosison enta de7uwa camisidosona. Qadhey bayna deexo ooso ubbaa enta oosisidosona.
EXO 1:15 Gibxe kawoy qantha Ibraawe maccasata ulo pittiya Sipooronne Puuho geetetiya nam7u maccasatako haysada yaagis;
EXO 1:16 “Ibraawe maccasati yeliya wode yeletida na7ay adde gidiko wodhite, shin macca gidiko paxa aggite” yaagis.
EXO 1:17 Shin ulo piteysati Xoosse babbidi, Gibxe kawoy kiitidaysada oothibookona. Enti adde nayta paxa aggidosona.
EXO 1:18 Hessafe guye, Gibxe kawoy he ulo pitteyisata xeegidi, “Hinte ayis haysa oothidetii? Adde nayta ayis paxa aggetii?” yaagidi enta oychis.
EXO 1:19 Ulo piteysati zaaridi, “Ibraawe maccasati Gibxe maccasata mela gidokona. Enti mino gidiya gisho ulo piteysati gakanaape sinthatidi yeloosona” yaagidosona.
EXO 1:20 Hessa gisho, Xoossay ulo pitteysatas keehis. Isra7eele asay kaseysafe haa darshenne minnishe bidosona.
EXO 1:21 Qassi ulo piteysati Xoossas yayyida gisho Xoossay entaw enta soo asi immis.
EXO 1:22 Hessafe guye, kawoy ba asaa ubbaako, “Ibraawetape yeletiya adde ubbaa Nayle Shaafan yeggite; shin macca na7i yeletiko paxa aggite” yaagidi kiittis.
EXO 2:1 He wode Leewe qommo gidida issi uray Leewe maccas issiw ekis.
EXO 2:2 He maccasiya adde na7a yelasu. Na7ay mala lo77o gideysa be7ada heedzu ageena qosasu.
EXO 2:3 Shin iya hessafe daro qosanaw danda7onnaysa erada, maqafe daacho dadada, made melaba tiyada na7aa iyan wothasu. Yaatada Nayle Shaafa gaxan mayca giddon wothasu.
EXO 2:4 Iya michiya iya gakiyaba be7anaw haahon eqasu.
EXO 2:5 Gibxe kawa na7iya bolla meecetanaw Nayle Shaafa wodhasu. I macca aylleti haatha doonan yaa haa simeretoosona. Iya daacho mayca giddon demmada, ba aylliw bada ehana mela kiittasu.
EXO 2:6 Daacho dooyada he guutha na7aa be7asu. I yeekeysa be7ada qadhetada, “Haysi Ibraaweta guutha naytape issuwa” yaagasu.
EXO 2:7 He wode iya michiya kawa na7eko, “Ha na7aa dhanthana mela Ibraawe maccas new eho?” yaagada oychasu.
EXO 2:8 Iya, “Ee, eha” yaagasu. Na7iya bada na7aa aayiw ehasu.
EXO 2:9 Kawa na7iya maccasiw, “Ha na7aa efada, taw dhantha; dicha; taani new damooze qanxana” yaagasu. Maccasiya na7aa efada dhanthasu.
EXO 2:10 Na7ay diccin, kawa na7eko ehasu; I iw na7a gidis. “Taani haathaafe iya kessa ekas” gada, iya Muse gada sunthasu.
EXO 2:11 Musey diccidaape guye issi gallas ba asaa be7anaw bidi, enti deexo ooso oothishin enta be7is. Gibxe asi issoy Ibraawetape issuwa ba yara wadhishin be7is.
EXO 2:12 I yaa haa xeellin, oonika baynaysa be7idi, he Gibxe ura wodhidi shafen qosis.
EXO 2:13 Wontetha gallas keyidi, nam7u Ibraaweti wadhetishin be7is. Qoheysako, “Neeni ne dabbuwa ayis shocay?” yaagidi oychis.
EXO 2:14 He uray, “Nena nu bolla haareysanne daynna oothiday oonee? Neeni zine Gibxe uraa wodhidaysada, tanaka wodhanaw koyay?” yaagis. Musey he wode, “Taani oothidabay asan eretis” yaagi qopidi yayyis.
EXO 2:15 Kawoy hessa si7ida wode, Muse wodhisanaw koyis. Shin Musey betidi, Midiyaame biittan de7anaw bis. Issi gallas I haatha olla doonan uttis.
EXO 2:16 He wode Midiyaame kahine issuwas laapun macca nayti de7oosona. Enti banta aawa dorsata gongen haathe duuqi ushshanaw yidosona.
EXO 2:17 Henthanchoti yidi macca nayta goodidosona. Shin Musey enta maaddidi enta dorsata haathe ushshis.
EXO 2:18 Enti banta aawa Yetorako yida wode, “Hachi waani ellesi yidetii?” yaagidi oychis.
EXO 2:19 Enti zaaridi, “Gibxe asi issoy nuna henthanchotape ashshis. Haathe duuqidi dorsata ushshis” yaagidosona.
EXO 2:20 I ba macca nayta, “Yaatin I awun de7ii? Hinte he ura ayis aggidi yidetii? Nuura kathi maana mela ane iya xeegite” yaagis.
EXO 2:21 Musey he addiyara yan de7anaw qofa qachis. Yotori ba na7iw Sipooro Muses macho oothidi immis.
EXO 2:22 Sipoora adde na7a yelin, Musey iya, “Taani ha biittan bete asi” gidi Gersaama gidi sunthis.
EXO 2:23 Daro laythafe guye Gibxe kawoy hayqis. Shin Isra7eeleti banta aylletethan un7etidi waassidosona. Banta aylletethan enti waassida waasoy Xoossaako gakis.
EXO 2:24 Xoossay enta waasuwa si7idi, I Abrahaamera, Yisaaqaranne Yayqoobara caaqida caaquwa hassayis.
EXO 2:25 Xoossay Isra7eeleta aylletetha un7aa be7idi entana qopis.
EXO 3:1 Issi wode Musey Midiyaame biitta kahiniya, ba bolluwa Yotora dorsaanne deesha heemmees. I he wudiya laagi ekidi mela biitta gaxan Xoossa zuma geetetidi xeegetiya Koreeba zuma bolla efis.
EXO 3:2 He bessan Godaa Kiitanchoy tushiyan eexiya tama lacuwa giddon iyaw bentis. Musey tushey taman oyketinka tamay tushiya moonnaysa be7idi,
EXO 3:3 “Taani yaa bada, tushey ayis taman meetetonnaako he oorathabaa shiiqada be7ana” gidi qopis.
EXO 3:4 I be7anaw shiiqidaysa Goday be7idi, tushiya giddofe, “Muse! Muse!” gidi xeegis. Musey, “Heko, abe Godaw” gidi koyis.
EXO 3:5 Xoossay iyako, “Haa shiiqopa. Neeni eqida biittay geeshshi gidiya gisho, ne tohuwan de7iya caammaa kessa” yaagis.
EXO 3:6 Goday iyako, “Taani ne aawata, Abrahaame, Yisaaqanne Yayqooba Xoossaa” yaagis. Musey Xoossaa ba7anaw yayyida gisho, ba som7uwa kammis.
EXO 3:7 Goday qassika haysada yaagis; “Taani Gibxen de7iya ta asay ay mela waayako be7as. Enti bantana un7ethidi haareysatape ashshana mela taako waassiya waasuwa si7as. Enta waayaka erayis.
EXO 3:8 Hessa gisho, taani enta Gibxe asaa kushepe ashshanawunne he biittafe enta kessada, ha77i Kanaaneti, Hiteti, Amooreti, Parzeti, Hiwetinne Yaabuseti de7iya biitta, maathinne eessi kumida lo77o biitta ehanaw wodhas.
EXO 3:9 Ta deriya waasoy ha77i tana gakis. Gibxe asati enta qohida qohuwa taani be7as.
EXO 3:10 Hessa gisho, ha77i neeni ta asaa iya biittafe kessana mela Gibxe kawako taani nena kiittayis” yaagis.
EXO 3:11 Shin Musey, “Kawako baanawunne Isra7eeleta Gibxefe kessanaw taani oonee?” yaagis.
EXO 3:12 Xoossay zaaridi, “Taani neera gidana. Qassi taani nena kiittidaysas mallay haysa; neeni ta asaa Gibxefe kessiya wode ha zuma bolla hinte tana goyinnana” yaagis.
EXO 3:13 Musey Xoossaako, “Gidoshin, taani Isra7eeletako bada entako, ‘Hinte aawata Xoossay tana hinteko kiittis’ yaagiko, enti tana, ‘Iya sunthay oonee?’ yaagidi oychiko, taani entaw woygada zaaro” yaagis.
EXO 3:14 “Xoossay Museko, ‘De7eysinne daanaysi, Tana’ neeni Isra7eeletako, ‘TAANI TANA GIDIDAYSI’ tana hinteko kiittis yaaga” yaagis.
EXO 3:15 Xoossay zaaridi, “Neeni Isra7eeleta Goday hinte aawata, Abrahaame, Yisaaqanne Yayqooba Xoossay, tana hinteko kiittis. Haysi ta merina sunthaa; yaana yeletetha ubbay ha sunthan tana xeegana.
EXO 3:16 “Bada Isra7eele cimata shiishada, Goday hinte aawata Xoossay, Abrahaame, Yisaaqanne Yayqooba Xoossay new qoncidaysa oda. Gibxen enti waayetiya waayiya taani xomoosada be7idaysa entaw oda.
EXO 3:17 Taani entana Gibxe waayiyape kessada maathinne eessi kumida, Kanaaneta, Hiteta, Amooreta, Parzeta, Hiwetanne Yaabuseta biitta efanaw qaala gelas.
EXO 3:18 “Isra7eele cimati ne giyaba si7ana. Hessafe guye, neeninne Isra7eele cimati Gibxe kawako bidi, ‘Goday, Ibraaweta Xoossay, nuus qoncis. Ha77i nuuni heedzu gallasa oge mela biitta bidi, Godaas, nu Xoossaas yarshsho yarshana mela nuna yedda’ yaagite.
EXO 3:19 Shin wolqan gidonna ixiko, Gibxe kawoy hintena yeddonnaysa taani erayis.
EXO 3:20 Hessa gisho, taani ta wolqan dumma dumma malaatata oothada Gibxeta shocana. Hessafe guye, I hintena yeddana.
EXO 3:21 “Qassi taani Gibxe asaa sinthan teemo hintew immana. Yaaniya gisho hinte keyiya wode mela kushe keyeketa.
EXO 3:22 Ibraawe maccas ubbay ba shooron de7iya Gibxe maccasaakonne ba son de7iya Gibxe maccasaako bidi, bira alleeqo, worqanne ma7o immite gidi oychana. Hinte hessa ekidi hinte nayta mayzana. Hessada oothidi hinte Gibxe shalo ubbaa ekidi baana” yaagis.
EXO 4:1 Musey, “Enti tana ammanonna ixidi, woyko taani giyaba si7onna ixidi, ‘Goday new qoncibeenna’ giiko woygo?” yaagidi oychis.
EXO 4:2 Goday Museko, “Ne kushiyan de7eysi aybee?” yaagidi oychis. “Xam7a” yaagis.
EXO 4:3 Goday iyako, “Ane sa7an yegga” yaagis. Musey he xam7aa sa7an yeggin, shooshi gidin, Musey iyape woxis.
EXO 4:4 Hessafe guye, Goday, “Ne kushiya yeddada iya goyna oyka” yaagis. Musey ba kushiya yeddidi shoosha oyki denthin shooshay iya kushen simmidi, xam7a gidis.
EXO 4:5 Goday, “Ne aawata Xoossay, Abrahaame, Yisaaqanne Yayqooba Xoossay new qoncidaysa enti ammanana mela haysa ootha” yaagis.
EXO 4:6 Kaallidi Goday Museko, “Ne kushiya ne shophen naaqa” yaagis. Musey ba kushiya shophen naaqis. I kessiya wode iya kushey baro hargen oyketidaada booxis.
EXO 4:7 Goday iyako, “Ne kushiya ne shophen zaarada naaqa” yaagis. Musey ba kushiya ba shophen zaari naaqidi kessiya wode iya kushey simmidi hanko asatethi mela gidis.
EXO 4:8 Goday, “Enti nena woyko koyro malaata ammanonna ixiko, nam7antho malaata ammanana.
EXO 4:9 Shin enti ha nam7u malaatata ammanonna ixiko, woyko neeni giyaba si7onna ixiko, Nayle Shaafape haathe ekada, mela biitta bolla gussa. He haathay biitta bolla suuthan laametana” yaagis.
EXO 4:10 Musey Godaako, “Abeeti Godaw, kaseka woyko ha77i ne tana odiso oykidaysafe doomin odidi ammanthoy taw hanenna. Ta geeshshada odetanaw danda7ike; ta inxarsay lufa” yaagis.
EXO 4:11 Goday iyako, “Asas doona immiday oonee? Muume woyko tulle oothey oonee? Xeeliseynne qooqisey oonee? Tana Godaa gidikinaayee?
EXO 4:12 Ha77i neeni ba; neeni odetana mela ta nena maadana. Ne gaanaba ta new immana” yaagis.
EXO 4:13 Shin Musey, “Godaw, hayyana, hara asi kiitta” yaagis.
EXO 4:14 Hessafe guye, Goday Muse bolla daro hanqetidi iyako, “Leewe gidida ne ishaa Aaroni baawee? I oda loythidi ereysa ta erayis. Ha77i I neera gahetanaw yishe oge bolla de7ees; I nena be7iya wode wozanape ufaytana.
EXO 4:15 Neeni, ‘Yaaga’, gada iyaw odana. Taani hinte nam7ayka woygi odanekonne waatidi oothaneko hintena tamaarsana.
EXO 4:16 I ne doona gididi asas ne gisho odana. Neeni Xoossa bessan gidada I gaanaba iyaw odana.
EXO 4:17 Ha xam7a eka bada iyara malaata oothada bessa” yaagis.
EXO 4:18 Hessafe guye, Musey ba bolluwa Yotarako simmi bidi, “Hanno gakanaw asay paxa de7iyako be7anaw, taani guye Gibxe ta asaako boo?” yaagis. Yotori Museko, “Ee ba; saro gaka” yaagis.
EXO 4:19 Musey Midiyaame biittan de7ishin Goday iyako, “Nena wodhanaw koyida asati ubbay hayqida gisho guye Gibxe simmada ba” yaagis.
EXO 4:20 Musey ba machiwunne ba adde nayta hare togisidi guye Gibxe simmis. Musey Xoossaa xam7a ba kushen oykidi bis.
EXO 4:21 Goday Muse, “Neeni Gibxe simmada biya wode, taani new immida wolqan Gibxe kawa sinthan malaatata oothanaysa balopa. Shin hessanka I asaa yeddonna mela taani iya wozanaa muumisana.
EXO 4:22 He wode taani Goday giyaba kawas hayssada yaagada oda. ‘Isra7eeli ta bayra na7a.
EXO 4:23 I taw goyinnana mela iya yedda gada taani new odas. Shin neeni yeddonna ixadasa. Hessa gisho, taani ne bayra adde na7aa wodhana’ yaagees gada oda” yaagis.
EXO 4:24 Ogen shempo bessan Goday Musera gahetidi iya wodhanaw koyis.
EXO 4:25 Iya machiya Sipoora qara shuchu ekada, ba na7aa qaxarasu. Qaxara shoohuwara Muse tohuwa bochasu. Iya Museko, “Neeni taw tuma suutha medda” yaagasu.
EXO 4:26 Hessa gisho, Goday iya wodhonna aggis. He wode iya Museko, “Ha qaxaruwa gaason neeni attadasa” yaagasu.
EXO 4:27 He wode Goday Aaronako, “Musera gahetanaw mela biitta ba” yaagis. I bidi, Xoossaa zuma bolla Musera gahetidi iya yeeris.
EXO 4:28 Musey Gibxe bidi gaanabaanne oothana malaatata ubba Goday iya kiitidaysa Aaronas odis.
EXO 4:29 Museranne Aaronara Gibxe bidi, Isra7eele cimata ubbaa shiishidosona.
EXO 4:30 Aaroni Goday Muses odida qaala ubbaa entaw odis. Qassi Musey malaatata he asaa sinthan oothis.
EXO 4:31 Entika ammanidosona. Goday entaw qopidaysanne enta waayiya be7idaysa si7ida wode gufannidi goyinnidosona.
EXO 5:1 Hessafe guye, Museynne Aaroni Gibxe kawako bidi, “Goday, Isra7eele Xoossay, ‘Ta asay tana bonchanaw mela biittan, ba7aale oothana mela enta yedda’ yaagees” yaagidosona.
EXO 5:2 Kawoy, “Taani iyaw kiitetada Isra7eele yeddanaw I, Goday oonee? Taani Godaa erike; Isra7eelaka yeddike” yaagis.
EXO 5:3 Enti zaaridi, “Ibraaweta Xoossay nuus qoncis. Ha77i nuuni Godaas, nu Xoossaas, yarsho yarshanaw heedzu gallasa oge mela biitta baana mela nuna yeddarki. Hessa nu oothonna ixiko I nuna hargen woyko olan dhaysana” yaagidosona.
EXO 5:4 Shin Gibxe kawoy, “Muse, Aarona, Asaa ayis ooso diggetii? Guye bidi hinte oosuwa oothite.
EXO 5:5 Heko, ha biittan hinte darideta; qassi hinte asaa ooso diggeta” yaagis.
EXO 5:6 Kawoy he gallas Gibxe kaapotanne Isra7eeleta oosiseyisata haysada yaagidi kiittis;
EXO 5:7 “Kaseysada xuube oothanaw asaas utulla immofite. Enti utulla bantaw koyidi shiisho.
EXO 5:8 Shin kaseysafe taybuwa guuthonna enti xuube medhidi shiishana mela kiittite; issinnoka pacisopite. Enti, ‘Nuuni nu Xoossaas yarshsho yarshana mela nuna yedda’ yaagidi tana oychey entaw oosoy guuxida gishosa.
EXO 5:9 Enti ooson gundana melanne wordo oda si7onnaw entaw wodey doonna mela ooso deexisite” yaagidi kiittis.
EXO 5:10 Gibxe kaapotinne Isra7eeleta oosiseysati keyidi, asaako, “Kawoy, ‘Taani hintew utulla immike.
EXO 5:11 Hinte bidi awupeka koydi demmite. Shin hinte oothiya xuube taybuwape issoyka pacenna’ yaagis” yaagidosona.
EXO 5:12 Hessa gisho asay utulla koyanaw Gibxe biitta ubban laaletidosona.
EXO 5:13 Gibxe kaapoti entaw utulli imetin enti oothiya xuube taybuwa keena oothidi shiishana mela enta un7ethidosona.
EXO 5:14 Gibxe kaapoti bantafe garsara de7iya Isra7eele kaapota, “Hinte kase oothiya xuube keena ayis oothi shiishibeketii?” yaagidi wadhidosona.
EXO 5:15 Hessafe guye, Isra7eele kaapoti kawako bidi, “Abeeti godaw, neeni ne aylleta haysada ayis oothay? yaagidi maggannidosona.
EXO 5:16 Ne aylletas utulli imetenna, shin xuube oothana mela kiitetida. Hessa bolla nuna wadhosona; shin balay ne asaa bollana” yaagidosona.
EXO 5:17 Shin kawoy, “Hinte ooso dosonna azallata; hinte wora wodhida azallata. Hinte, ‘Nuuni Godaas yarshanaw baana; nuna yedda’ yaagidi zaari zaari tana oychey hessa gishosa.
EXO 5:18 Ha77i guye bidi oothite. Hintew ayba utullika imetenna, shin hinte kaseysa keena xuube oothanaw bessees” yaagis.
EXO 5:19 Isra7eele kaapoti, enti kaseysa keena xuube oothana mela kiitetida wode enti meton gelidaysa eridosona.
EXO 5:20 Enti kawa matape keyidi, bantana karen naagiya Musekonne Aaronako bidosona.
EXO 5:21 Enti Musekonne Aaronako, “Hinte nuna kawoynne iya moorinnati ixana melanne wodhana mela hinte oothidaysa Xoossay xeello; I pirdo” yaagidosona.
EXO 5:22 Musey Godaako simmidi, “Godaw, neeni ha asaa bolla meto ayis ehadii? Neeni tana kiittiday hessasee?
EXO 5:23 Taani ne sunthan kawas odanaw bida wodepe doomin I ha asaa bolla meto ha darsis. Qassi neka ne asaa ashshabaaka” yaagis.
EXO 6:1 Hessafe guye, Goday Museko, “Taani Gibxe kawa bolla oothanaba ha77i neeni be7ana. I ta deriya yeddana mela taani ta wolqaa iya bessaana. I enta ba biittafe gooddidi kessana” yaagis.
EXO 6:2 Xoossay Muse, “Taani Godaa.
EXO 6:3 Taani Abrahaames, Yisaaqasinne Yayqoobas Ubbaa Danda7iya Xoossaa gidada qoncas. Shin taani, ‘Godaa’ geetetiya ta sunthan tanatethaa enta erisabike.
EXO 6:4 Qassi taani enti betetethan de7ida Kanaane biitta immana gada entara caaqas.
EXO 6:5 Qassika Gibxe asati aylleyiya Isra7eeleta waasuwa taani si7as; ta caaquwaka qopas.
EXO 6:6 “Hesaa gisho neeni Isra7eeletako, ‘Taani Godaa. Taani hintena Gibxe aylletethaafe ashshada kessana. Taani enta ta mino axan iita pirdaa pirdada hintena wozana.
EXO 6:7 Taani hintena ta dere oothana; taani hinte Xoossaa gidana. Gibxe aylletethaafe taani hintena kessida wode, taani Godaa hinte Xoossaa gideysa hinte erana.
EXO 6:8 Taani Abrahaames, Yisaaqasinne Yayqoobas immana gada caaqida biitta hintena ehana. He biitta taani hintew laata biitta oothada immana. Taani Godaa’ yaaga” yaagis.
EXO 6:9 Musey hessa Isra7eeletas odis, shin enti aylletetha un7afe dendoysan ufaysi qanxida gisho I giyaba si7ibookona.
EXO 6:10 Hessafe guye, Goday Muse,
EXO 6:11 “Bada Gibxe kawas, ‘Isra7eeleta ne biittafe yedda’ yaagada oda” yaagis.
EXO 6:12 Shin Musey, “Ta inxarsay lufa. Isra7eeleti tana si7ibookona, shin Gibxe kawoy tana waanidi si7anee?” yaagis.
EXO 6:13 Goday Musenne Aarona, “Bidi, Isra7eela asaa Gibxefe kessana mela, taani hintena kiitidaysa Isra7eeletasinne Gibxe kawas odite” yaagis.
EXO 6:14 Haysafe kaallidi xaafetidaysati enta mayzata; Yayqooba bayra na7aa Robeela adde nayti, Heenoke, Faalu, Esroomenne Karma. Haysati Robeela soo asaas mayzata.
EXO 6:15 Simoona adde nayti, Yamu7eela, Yamina, Ohada, Yakina, Zohaaranne Kanaane biitta maccaseepe yeletida Saa7ula. Haysati Simoona soo asaas mayzata.
EXO 6:16 Leewe adde nayti Gedisoona, Qahaatanne Maraara. Leewey xeetanne hastamanne laapun laythi de7is.
EXO 6:17 Gedisoona adde nayti Libinanne Same7a geetetoosona. Haysati banta soo asaas mayzata.
EXO 6:18 Qahaata adde nayti Amraama, Izara, Kebroonanne Uzi7eela. Qahaati xeetanne hastamanne heedzu laythi de7is.
EXO 6:19 Maraara adde nayti Mahilanne Muse. Banta yeletethaa maaran hayssafe qommon xaafetidaysati Leewe sheeshata.
EXO 6:20 Amraami ba aawa michiw Yokebeedo machis. Iya Aaronanne Muse iyaw yelasu. Amraami xeetanne hastamanne laapun laythi de7is.
EXO 6:21 Izarada nayti, Qore, Nefeganne Zikira.
EXO 6:22 Uzi7eela adde nayti, Misa7eela, Elzafaananne Sitira.
EXO 6:23 Aaroni Amnadaabe na7iw, Na7asoona michiw Elsebo machis. Iya iyaw Naadabe, Abyooda, Alaazaranne Itamaara yelasu.
EXO 6:24 Qore adde nayti, Asira, Elqaananne Abiyasafa.
EXO 6:25 Aarona na7ay Alaazari Puti7eela naytape issinniw machis. Iya iyaw Pinihaasa yelasu. Haysati Leewe sheeshatanne enta mayzata.
EXO 6:26 Goday, Musenne Aarona Isra7eele asaa yaran yaran enta soo asaara Gibxefe kaalethidi kessana mela kiittis.
EXO 6:27 Isra7eeleta Gibxefe kessi yeddana mela Gibxe kawas odiday enta.
EXO 6:28 Goday Gibxen Muses odida wode,
EXO 6:29 “Taani Godaa; taani new odiyaba ubbaa Gibxe kawas oda” yaagis.
EXO 6:30 Shin Musey, “Ta doonay lufa gideysa ne eraasa, yaatin kawoy taani odiyaba waani si7anee?” yaagis.
EXO 7:1 Goday Museko, “Heko taani nena Gibxe kawas Xoossa mela oothas. Ne ishaa Aaroni ne nabe gididi iyaw odana.
EXO 7:2 Taani nena kiitida kiita ubbaa Aaronas oda. I, Isra7eeleta ba biittafe kessi yeddana mela kawas odana.
EXO 7:3 Shin taani kawa wozanaa muumisana. Taani Gibxe biittan malaatatanne malaalsiyabata oothikoka,
EXO 7:4 I hinte odiyaba si7enna. He wode taani Gibxeta pirdana; ta deriya Isra7eele Gibxefe kessana.
EXO 7:5 Hessi haniya wode taani godaa gididaysa Gibxeti erana” yaagis.
EXO 7:6 Museynne Aaroni Goday kiitidaysada oothidosona.
EXO 7:7 Enti kawas odiya wode, Muses hospun tammu laythi; Aaronas qassi hospun tammanne heedzu laythi.
EXO 7:8 Goday Musenne Aarona,
EXO 7:9 “Kawoy hintena, malaata oothidi tana bessite giiko, Aaroni ba xam7a ekidi kawa sinthan yeggana mela iyaw oda; he xam7ay shooshi gidana” yaagis.
EXO 7:10 Museynne Aaroni kawako bidi Goday enta kiitidaysada oothidosona. Aaroni ba xam7aa kawa sinthaninne iya moorinnata sinthan yeggin xam7ay shooshu gidis.
EXO 7:11 Hessafe guye, kawoy marotanne bitanchota xeegisis. Entika banta bitan hessada oothidosona.
EXO 7:12 Enti ubbay banta xam7aa sa7an yeggida wode xam7ati shooshi gididosona. Shin Aarona xam7ay enta xam7ata mittis
EXO 7:13 Gidoshin Goday gidaysa mela kawa wozanay muumis. I enti geysa si7onna ixis.
EXO 7:14 Goday Muse, “Kawa wozanay muumis; I asaa yeddonna ixis.
EXO 7:15 Wonto wonta guura shooshi laametida xam7aa ekada, Nayle Shaafa matan eqada, kawuwara gahetanaw naaga.
EXO 7:16 Iyako, ‘Goday, Ibraaweta Xoossay ta asay mela biittan taw goyinnana mela yedda’ yaagidi tana neeko kiittis. Shin neeni hanno gakanaw ixadasa.
EXO 7:17 Goday, I, Godaa gideysa I oothiyaban neeni erana. Taani Nayle Shaafa haatha ta kushen de7iya xam7an shociko haathay suuthi laametana.
EXO 7:18 Nayle Shaafan de7iya moloy hayqana; shaafayka xinqana. Gibxeti he shaafa haatha uyanaw danda7okona” yaagada oda.
EXO 7:19 Goday Museko, “Aaroni Gibxen de7iya haathata bolla, shaafata bolla, zara haathata bolla, teqe haatha bollanne duuqetida haathi ubbaa bolla ba xam7aa denthana mela oda. He wode haatha ubbay suuthi laametana. Hari attoshin Gibxe biittan mithafenne shuchafe oosetida haathe tikiya miishetan de7iya haathay ubbay suuthi laametana yaaga” yaagis.
EXO 7:20 Museynne Aaroni Goday kiitidaysada oothidosona. Kawa sinthaninne iya moorinnata sinthan ba xam7aa denthidi, Nayle Shaafa haatha shocis. Haatha ubbay suuthi laametis.
EXO 7:21 He Shaafa haathan de7iya moloti hayqidosona. Shaafa haathay iita xinqida gisho, Gibxe asay uyanaw danda7ibookona. Gibxe biitta ubban suuthi kumis.
EXO 7:22 Shin Gibxe bitanchoti banta bitan hessada oothidosona. Goday gidaysada kawa wozanay muumin, Museynne Aaroni odidaysa si7onna ixis.
EXO 7:23 Kawoy he hanidaba aybinka taybonna yeggi aggidi ba gadho simmidi bis.
EXO 7:24 Gibxe asay Nayle Shaafa haatha uyanaw danda7iboona gisho, uyiya haathi demmanaw Shaafa gaxan olla bookidosona.
EXO 7:25 Goday haatha shoci simmin laapun gallas gidis.
EXO 8:1 Hessafe guye, Goday Museko, “Gibxe kawako bada, ‘Goday, taw goyinnana mela ta asaa yedda.
EXO 8:2 Neeni enta yeddonna ixiko, ne biitta ubban shodhe gado yeddana.
EXO 8:3 Nayle Shaafan shodhey kumana. Enti yaape keyidi ne kawotetha, ne zin7iya kifiliya, ne hiixa, ne moorinnata keethaanne ne deriya keetha ubban gelana. Hessadaka ne cooceninne munuqa miishe ubban gelana.
EXO 8:4 Shodheti ne bolla, ne asaa bollanne ne shuumata ubbaa bolla gupana yaagees’ yaagada oda” yaagis.
EXO 8:5 Goday Museko, “Aaroni Gibxen de7iya haathata bolla, zara haathata bollanne teqe haatha ubbaa bolla ba xam7aa denthana mela oda” yaagis.
EXO 8:6 Aaroni Gibxe haathata bolla ba xam7aa denthida wode shodheti keyidi, Gibxe biitta ma7idosona.
EXO 8:7 Shin marotika banta bitan hessada oothidi Gibxe biittan shodhe kesidosona.
EXO 8:8 Kawoy Musenne Aarona xeegisidi, “Ha shodheta taapenne ta asaape diggana mela Godaa hinte woossiko ta hinte asaa Godaas yarsho yarshana mela yeddana” yaagis.
EXO 8:9 Musey kawako, “Shodheti neepe, ne moorinnatapenne ne asaape kichana mela ta woossanaw qaxaro imma. Hessafe guye, Shaafa shodheti neepenne ne keethaafe kichidi Nayle xalaalan de7ana” yaagis.
EXO 8:10 Kawoy zaaridi, “Wonto gido” yaagis. Musey, “Nu Godaa Xoossaa meli hari oonika baynaysa neeni erana mela ne gidaysada oothana.
EXO 8:11 Shodheti neepe, ne keethaafenne, ne moorinatape kichidi Nayle Shaafa xalaalan attana” yaagis.
EXO 8:12 Museynne Aaroni kawa matape keyidi, kawa bolla Goday ehida shodheta diggana mela Musey Godaa woossis.
EXO 8:13 Goday Musey oychidaysada oothin son, kareninne geeshshan de7iya shodheti hayqidosona.
EXO 8:14 Gibxe asay hayqida shodheta shiishidi dooridosona; biitta ubbay xinqis.
EXO 8:15 Shin shodheti hayqidaysa kawoy be7ida wode iya wozanay zaari muumis. Goday gidaysa mela I Musenne Aarona si7onna ixis.
EXO 8:16 Hessafe guye, Goday Museko “Aaroni ba xam7a denthidi biitta baana shocana mela oda. Gibxe biitta ubban de7iya baanay boxe gidana” yaagis.
EXO 8:17 Enti kiitetidaysada oothidosona. Aaroni xam7ara biitta baana shocis. Gibxen de7iya baana ubbay boxe laametidi mehiyanne asaa ma7is.
EXO 8:18 Marotika banta bitan hessada oothanaw paacidosona, shin xoonetidosona. Boxey asaa bollanne mehiya bolla laaletis.
EXO 8:19 Maroti kawako, “Haysi Xoossaa ooso” yaagidosona. Shin kawa wozanay muumis. Goday gidaysa mela I entana si7onna ixis.
EXO 8:20 Goday Muse, “Guura dendada, kawoy Shaafa bishin iyara gahetada, ‘Goday, tana goyinnana mela ta asaa yedda.
EXO 8:21 Neeni ta asaa yeddona ixiko, taani, ne bolla, ne moorinnata bollanne, ne asaa bolla udunxe gado yeddana. Gibxeta keethaanne enti de7iya biitta ubban udunxey kumana.
EXO 8:22 Shin he gallas ta asay de7iya Geesame biittan udunxey doonada enta teqada ashshana. Taani Goday, He wode ha biittan taani Goday ootheysa neeni erana.
EXO 8:23 Taani, ta asaanne ne asaa shaakana; he gita malaatay wonto hanana’ yaagees gada oda” yaagis.
EXO 8:24 Hessafe guye, Goday gidaysada oothis. Kawa gadhonne iya moorinnata soo daro udunxe gado yeddis. Kumetha Gibxe biittay udunxe gadon qohetis.
EXO 8:25 He wode kawoy Musenne Aarona xeegisidi, “Bidi, ha biittan hinte Xoossaas yarsho yarshite” yaagis.
EXO 8:26 Shin Muse zaaridi, “Hessi hanonnaba. Nuuni Godaas, nu Xoossaas yarshiya yarshoy Gibxeta matan ixetiya gisho, hessa oothoko. Nu yarshishin enti be7iko nuna shuchan caddana.
EXO 8:27 Nuna kiitidaysa mela, nuuni Godaas, nu Xoossaas yarsho yarshanaw heedzu gallas oge mela biitta baanaw bessees” yaagis.
EXO 8:28 Kawoy zaaridi, “Godaas, hinte Xoossaas mela biitta bidi yarshana mela taani hintena yeddana. Shin hinte haakidi boopite; taw woossite” yaagis.
EXO 8:29 Musey zaaridi, “Taani ne matape keyida mela Godaa woossana. Ha udunxey wonto kawuwape, iya moorinnatapenne iya asaape kichana. Shin kawoy asay Godaas goyinnanaysa diggidi zaari nuna cimmofo” yaagis.
EXO 8:30 Hessafe guye, Musey kawa matape keyidi, Godaa woossis.
EXO 8:31 Goday Musey oychidaysada oothis. Udunxey kawuwape, iya moorinnatapenne iya asaape issoyka attonna kichis.
EXO 8:32 Shin ha77ika kawa wozanay muumin asaa yeddonna ixis.
EXO 9:1 Goday Museko, “Gibxe kawako bada, Goday, Ibraaweta Xoossay neeko, ‘Enti taw goyinnana mela ta asaa yedda.
EXO 9:2 Neeni enta yeddonna ixiko,
EXO 9:3 taani ne parata bolla, ne hareta bolla, ne gimaleta bolla, ne mehiya bolla, ne dorsata bollanne ne deeshata bolla iita gado yeggana.
EXO 9:4 Shin taani Goday Isra7eele asaa mehiya giddoninne Gibxe asaa mehiya giddon dummatethi medhana. Isra7eele asaa mehiyape issoyka hayqenna.
EXO 9:5 Wonto taani hessa oothana gidi Goday wode qanxis’ yaaga” yaagis.
EXO 9:6 Wontetha gallas Goday gidaysada oothis. Gibxe asaa mehe ubbay hayqis, shin Isra7eele asaa mehiyape issoyka hayqibeenna.
EXO 9:7 Kawoy hanidabaanne Isra7eeleta mehiyape hari attoshin issoyka hayqonaysa ase kiittidi, oychidi eris. Shin ha77ika iya wozanay muumida gisho asaa yeddonna ixis.
EXO 9:8 Hessafe guye, Goday Musenne Aarona, “Coocepe bido kuuci ekidi, kawoy be7ishin bolla dharcite.
EXO 9:9 Hessi Gibxe biitta ubbaa bolla baana gididi laaletana. Gibxe biittan de7iya asaa bollanne mehey bolla kixa gado ehana” yaagis.
EXO 9:10 Enti coocepe guutha bido ekidi kawa sinthan eqidosona. Musey hessa bolla laallin, asaa bollanne mehiya bolla kixa gadoy wodhi aggis.
EXO 9:11 Gibxe asaa bolla wodhida kixay marota bollaka wodhida gisho Muse sinthan eqanaw danda7ibookona.
EXO 9:12 Shin Goday Muses gidaysa mela, kawoy ba wozana muumisida gisho, Musenne Aarona si7onna ixis.
EXO 9:13 Hessafe guye, Goday Museko, “Kawako guura denda bada, ‘Goday, Ibraaweta Xoossay, taw goyinnana mela ta asaa yedda.
EXO 9:14 Ha77i ne ixas giiko, ne moorinnatanne ne asaa xalaala gidonashin ne bollaka iita gado ehana. He wode alame ubban Godi ta xalaala gideysa neeni erana.
EXO 9:15 Taani ta kushiya denthada nenanne ne asaa gadon shocidaba gidiyako ha77i gakanaw hinte biitta bolla de7eketashin.
EXO 9:16 Shin ta sunthay biitta ubban eretana mela taani ta wolqaa bessanaw nena de7on wothas.
EXO 9:17 Neeni ha77ika otortada ta asaa yeddonna ixadasa.
EXO 9:18 Taani wonto hannoode Gibxe biittay medhotosape hachi gakanaw buki eronna wolqaama shachi bukisana.
EXO 9:19 Ha77i neeni ne mehiyanne karen de7iyaba ubbaa elle soo gelsana mela kiitta. Soo gelonna asaa bollanne mehiya ubbaa bolla shachi bukidi, enta wodhana yaagees’ yaaga” yaagis.
EXO 9:20 Kawa moorinatape issoti issoti Goday gidaysa si7idi yayyida gisho, banta aylletanne banta meheta soo gelsidosona.
EXO 9:21 Shin harati Goday gidaysa si7onna ixidi banta aylletanne banta mehiya karen aggaagidosona.
EXO 9:22 Hessafe guye, Goday Museko, “Gibxe biitta ubbaa bolla, asa bolla, mehiya bollanne gaden de7iya katha bolla shachi bukana mela ne kushiya salo dentha” yaagis.
EXO 9:23 Musey ba xam7aa salo denthida wode, Goday wolqaama deshonne wol7anthi yeddis. Hessada oothidi Goday Gibxen shachi bukisis.
EXO 9:24 Goday gedera haara wolqaama wol7anthi yeddis. Hessa melabay Gibxe biittan asi doosape hani erenna.
EXO 9:25 He shachay Gibxen de7iya asaanne mehiya shocis. Gaden de7iyaba, mithinne maata ubbaa dhaysis.
EXO 9:26 Isra7eeleti de7iya Geesame biitta xalaalan shachi bukibeenna.
EXO 9:27 Kawoy Musenne Aarona xeegisidi, “Taani ha77i nagara oothas. Goday tumancho; taaninne ta asay bala.
EXO 9:28 Deshoynne shachay nu bolla daridi un7ethida gisho nuus Godaa woossite. Taani hintena yeddana; hizape hinte haysan gam7eketa” yaagis.
EXO 9:29 Musey iyako, “Taani ha katamaape keyida wode ta kushiya denthada Godaa woossana. Deshoynne shachay eqiya wode sa7ay Godaaba gideysa neeni hessan erana.
EXO 9:30 Shin nenne ne moorinnati ha77ika Godaa Xoossa yayyonnaysa taani erayis” yaagis.
EXO 9:31 Talbay ciishshe, bangay qorxa gidiya gisho ubbay shachan dhayis.
EXO 9:32 Shin gisteynne murqay gakiboonna gisho shachan dhaybeenna.
EXO 9:33 Musey kawa matape keyidi, katamaape gaxaa bidi ba kushiya denthidi Godaa woossis. Yaatin deshoy, shachaynne iray ellesidi eqi aggis.
EXO 9:34 Shin kawoy he ubbay eqidaysa be7ida wode zaaridi nagara oothis. Iyaranne iya moorinnatara banta wozana gujidi minthidosona.
EXO 9:35 Goday Muse baggara odidaysa mela kawa wozanay muumin, Isra7eeleta yeddonna ixis.
EXO 10:1 Hessafe guye, Goday Museko, “Gibxe kawako ba. Taani ha malaatata enta giddon oothanaw koyada kawa wozanaanne iya moorinnata wozana muumisas.
EXO 10:2 Taani hessa oothiday ta malaatatan waatada Gibxeta seeridaako hinte hinte naytasinne hinte nayta naytas odana mela koyida gishosa. He wode taani Godaa gideysa hinte erana” yaagis.
EXO 10:3 Museynne Aaroni kawako bidi, “Goday, Ibraaweta Xoossay neeko, ‘Neeni taw kiitetethi ixey awude gakanaasee? Tana goyinnana mela ta asaa yedda.
EXO 10:4 Neeni enta yedo ixiko, wonto ne biitta bolla taani boole yeddana.
EXO 10:5 Booley darotethaafe dendoysan biitta ubba kammana. Enti shacha gaduwape attida guuthabanne mitha haythi ubbaa maana.
EXO 10:6 Ne keethaa, ne moorinnata keethaanne Gibxe asaa ubbaa keethaa enti kumana. Hessi ne mayzati ha biittan de7osape hano gakanaw be7ida iitabaape aadhiyaba gidana’ yaagees” yaagidosona. Hessafe guye, Musey kawa sinthafe keyidi bis.
EXO 10:7 Kawa moorinnati kawako, “Ha uray awude gakanaw nuus xihe gidanee? Asay Godaa, banta Xoossaa goyinnana mela enta yedda. Gibxe biittay dhayeysa neeni akeekikii?” yaagidosona.
EXO 10:8 Kawoy Musenne Aarona guye xeegisidi, “Bidi Godaa, hinte Xoossa goynite, shin beysati oonantee?” yaagis.
EXO 10:9 Musey, “Nuuni biya bessan Godaa bonchanaw ba7aale oothana gisho, nuuni nu guutha nayta, nu cimata, nu adde nayta, nu macca nayta, nu dorsatanne nu miizata ekidi issife baana” yaagis.
EXO 10:10 Kawoy, “Hinte hinte naytanne hinte maccasata eki boonna mela taani Godan caaqisayis. Hinte hinte wozanan iitaba qopidaysi eretees.
EXO 10:11 Hinte, bidi Godaa goyinnanaw koyaba gidiko addeta xalaala eki biite” yaagis. Hessafe guye, Musenne Aarona kawa sinthafe goodetidi keyidosona.
EXO 10:12 Goday Museko, “Booley yidi shacha gaduwape attida ubbaa maana mela ne kushiya Gibxe biitta bolla dentha” yaagis.
EXO 10:13 Musey ba xam7aa Gibxe biitta bolla denthida wode, Goday doloha bagga carko he qammanne gallas kumethi biitta bolla carkisis. Wontiya wode he carkoy boole ehis.
EXO 10:14 Booley Gibxe biitta ubbaa gakidi ma7is. Hessa mela boole gadoy he biittan kaseka hanibeenna; sinthafeka hanenna.
EXO 10:15 Biitti dhumana gakanaw booley biitta ubbaa ma7is. He booley shachafe attidi gaden dicciyaba ubbaanne mitha ayfe ubbaa midosona. Gibxe biittan de7iya mitha haythinne cil7oba ubbaa midigis.
EXO 10:16 Kawoy Musenne Aarona ellesi xeegisidi, “Taani Godaa hinte Xoossaanne hintena naaqas.
EXO 10:17 Hiza ta nagara taw issi toho atto giite. Ha dhaysiya gaduwa taape diggana mela Godaa hinte Xoossaa woossite” yaagis.
EXO 10:18 Musey kawa matape keyidi Godaa woossis.
EXO 10:19 Goday wuloha wolqaama carkuwa kiittidi booliya biittafe denthidi, Zo7o Abba yeddis. Gibxe biitta ubban issi booleyka hayqibeenna.
EXO 10:20 Shin Goday kawa wozanaa muumisida gisho Isra7eeleta yeddonna ixis.
EXO 10:21 Goday Muse, “Gibxe biittan asi oyki be7iya dhumi dhumana mela ne kushiya salo dentha” yaagis.
EXO 10:22 Musey ba kushiya salo denthis. Gibxe biitta ubban heedzu gallas kumethi sakana dhumay dhumis.
EXO 10:23 He heedzu gallasatan Gibxeti issoy issuwa be7ibookona woyko oonika ba soope keybeenna. Shin Isra7eeleti de7iya Geesamen poo7oy de7ees.
EXO 10:24 Kawoy Muse xeegisidi, “Bidi hinte Godaa goyinnite. Hinte maccasaynne hinte nayti hintera baanaw danda7oosona. Hinte dorsaa wudiyanne hinte miiza wudiya xalaala aggidi biite” yaagis.
EXO 10:25 Shin Musey, “Nuuni xuussa yarshonne hara yarsho Godaa Xoossaas yarshana mela mehe neeni nuus immanaw koshshees.
EXO 10:26 Issoyka guye attona nu mehey nuura baanaw koshshees. Godaa, nu Xoossaa goyinnanaw mehiyape dooranaw bessey nuna. Nuuni ya gakonna de7ishe ay mehe yarshaneko eranaw danda7oko” yaagis.
EXO 10:27 Shin Goday kawa wozanaa muumisida gisho, I enta yeddanaw koybeenna.
EXO 10:28 Hessafe guye, kawoy Museko, “Ta sinthafe kicha; ta sinthan zaara bentada nena era. Ta ayfiya ne be7ida gallas hayqana” yaagis.
EXO 10:29 Musey iyako, “Tumaka ne gidaysada neeni ta ayfiya zaarada be7aka” yaagis.
EXO 11:1 Goday Museko, “Taani Gibxe kawa bollanne iya asaa bolla issi hara gado yeddana. Hessafe guye, I hintena kessi yeddana. I hintena ubbaa gooddidi kessana.
EXO 11:2 Isra7eele asay, addeynne maccasi banta shoorotape biranne worqa alleeqo oychana mela entaw oda” yaagis.
EXO 11:3 Goday Isra7eele asaas Gibxeta sinthan teemo immis. Gibxe kawa moorinnatinne asay Muse daro bonchetida asada xeellidosona.
EXO 11:4 Musey kawako, “Goday haysada yaagees; ‘Qamma bilahe taani Gibxe biitta giddora kanthana.
EXO 11:5 Gibxe biittan de7iya bayra adde na7i ubbay, kawa araata laattanaw de7iya bayra na7aape doomidi, woxan gaaciya macca aylle bayra na7a gakanaw, bayra yeletida mehe ubbay hayqana.
EXO 11:6 Gibxe biitta ubban hessafe kaseka sinthafeka hanonna gita yeehoy yeekeettana.
EXO 11:7 Shin Isra7eele asaa bolla woyko enta mehiya bolla kanika boccenna.’ He wode taani Goday Gibxeta giddoninne Isra7eele giddon dummatethi medheysa neeni erana.
EXO 11:8 Ne moorinnati ubbay yidi ta sinthan gufannana. Ta asaa ekada ha biittafe keyana mela enti tana woossana. Hessafe guye, taani baana” yaagis. Musey shenen xuugetidi kawa sinthafe keyidi bis.
EXO 11:9 Goday muses kase, “Gibxe biittan taani malaalsiyaba darsada oothana gaso kawoy hintena si7enna” yaagidi odi wothis.
EXO 11:10 Museynne Aaroni malaalsiyaba ubbaa kawa sinthan oothidosona. Shin Goday kawa wozanaa muumisida gisho, Isra7eeleta ba biittafe yeddonna ixis.
EXO 12:1 Goday Gibxe biittan Musenne Aarona haysada yaagis;
EXO 12:2 “Ha ageenay hintew laythas koyro ageena gido.
EXO 12:3 Isra7eele asa ubbaas ha wogaa odite. Ha ageenay gelida tammantho gallasan, issi asi ba soo asaas issi maraze woyko issi kole eko.
EXO 12:4 He keetha asaa tayboy he mehiya wursidi maanaw danda7onna ixiko, iyaranne iya mata shooruwara banta soo asaa taybuwa melanne issi issi asi midi wursanaw danda7iya keena ekidi he mehiya shukidi issife mona.
EXO 12:5 Hinte dooriya mehey dorse woyko deeshe gidanaw danda7ees, shin issi laythi kumidaysanne iya bolla borey bayna adde gido.
EXO 12:6 Ha ageenas tammanne oyddantho gallas gakanaw enta heemmite. He gallas omarsi laadiya wode Isra7eele asaa maabara ubbay enta shukanaw bessees.
EXO 12:7 Asay he suuthaafe ekidi enti miya keetha wula garsa, qomuwanne bokoluwa tiyo.
EXO 12:8 Ashuwa he gallas qamma taman caacidi cammiya boncoranne uythara miite.
EXO 12:9 Ashuwa qaye woyko kathidi moopite. Huuphiya, gedatanne ulo ashota ubbaa caacidi miite.
EXO 12:10 He ashuwape wontana gakanaw aykoka ashshofite. Wontana gakanaw attiko hessa xuuggite.
EXO 12:11 Oges giigiya ma7o ma7idi, hinte caammaa aathidi, hinte xam7aa oykidi eeson miite. Hessi tana Godaa bonchiya Paasika ba7aale hintew gido.
EXO 12:12 “Taani he qamma Gibxera kanthada bayra yeletida ubbaa, asenne mehe wodhana. Gibxe eeqata ubbaa pirdana; taani Godaa.
EXO 12:13 He suuthay hinte de7iya keethaa erisiya malla gidana. Taani Gibxeta pirdiya wode he suuthaa be7ada hintena qohonna agga aadhana.
EXO 12:14 “Ha gallasay taani Goday hintew oothidaysa laythan laythan qofisiya Godaa bonchiya ba7aale gido” yaagis.
EXO 12:15 “Laapun gallas gakanaw irshoy gelonna uythi miite. Koyro gallas irsho hinte soope diggite. He laapun gallasatan irshoy de7iya uythi miya asi Isra7eele asaa giddofe duuxidi kureto.
EXO 12:16 Koyro gallasaninne laapuntha gallasan goyinnanaw shiiqite. He gallasatan aybi oosoka oothopite, shin kathi kathanaw danda7eeta.
EXO 12:17 “Taani Isra7eele deriya Gibxefe kessiday he gallas gidiya gisho ha uytha baaliya laythan laythan bonchite. Hessi hintew merina woga gido.
EXO 12:18 Koyro ageenan, tammanne oyddantho gallas omarsafe doomidi, laatamanne issintho gallas omarsi gakanaw irshoy geliboonna uythaa miite.
EXO 12:19 Laapun gallas gakanaw irshoy hinte son bentofo. Irshoy gelidaba miya biitta aawu na7a gidin woyko asa gade asi gidin, he keetha aaway Isra7eele maabara giddofe kureto.
EXO 12:20 Irshoy gelidaba aykoka moopite. Hinte de7iyason awunka irshoy geliboonna uythu miitepe attishin, irshoy gelida uythu moopite” yaagis.
EXO 12:21 Musey Isra7eele cimata ubbaa xeegisidi haysada yaagis; “Hinte issoy issoy soo bidi paasika ba7aale bonchanaw maraze woyko kole shukite.
EXO 12:22 Hisoophe mitha haythafe danki ekidi, keren de7iya suuthan yeddi ekidi wula garsa, qomuwanne bokoluwa tiyite. Wontana gakanaw hintefe issoyka ba keethaafe kare keyopo.
EXO 12:23 Goday Gibxe bayrata wodhanaw he biittara kanthiya wode, he suuthaa wula garsa, qomuwaninne bokoluwa bolla be7idi aggidi aadhana. Hayqo ehiya kiitanchoy hinte soo gelidi hintena wodhonna mela diggana.
EXO 12:24 “Hintenne hinte nayti ha kiita merinaw naagite.
EXO 12:25 Goday kase immana gidi qaala gelida biitta hinte geliya wode ha wogaa oothite.
EXO 12:26 Hinte nayti hintena, ‘Ha baaliya nu ayis bonchiw?’ gidi oychiya wode,
EXO 12:27 hinte entako, ‘Haysi Godaa bonchiya Paasika yarsho. Hessika Goday Gibxe biittan Isra7eele asa keethaa aggidi, aadhidi, Gibxe bayrata wodhidi, nuna ashshida gishosa’ yaagite” yaagis. Hessafe guye, Isra7eeleti gulbatidi goyinnidosona.
EXO 12:28 Isra7eeleti, Goday Musenne Aarona kiitidaysada oothidosona.
EXO 12:29 Giddi bilahe Goday Gibxen bayra yeletida ubbaa, kawa araata laattanaw de7iya bayra na7aape doomidi, qasho keethan de7iya asata bayra nayta gakanawunne bayra yeletida mehe ubbay hayqidosona.
EXO 12:30 Kawoy, iya moorinnatinne Gibxe biitta asa ubbay qamma dendidosona. Gibxe biittan asi hayqiboona issi keethika bayna gisho, asay banta qaala dhoqu oothidi gita yeeho yeekidosona.
EXO 12:31 He qamma kawoy Musenne Aarona xeegisidi, “Hintenne hinte Isra7eeleti ta biittafe keyidi biite. Hinte tana oychidaysada bidi hinte Godaa goyinnite.
EXO 12:32 Hinte gidaysa mela hinte dorsaanne mehiya wudiya ekidi biite. Qassi hinte Xoossay tana anjana mela woossite” yaagis.
EXO 12:33 Gibxe asay, “Isra7eeleti banta biittafe ellesidi keyana mela dirgisidosona. Hinte keyonna ixiko nu ubbay wuroos” yaagidosona.
EXO 12:34 Hessa gisho, Isra7eele asay irshoy geliboonna munaqa keren kunthidi, banta ma7uwan kammidi, banta hashen tookidosona.
EXO 12:35 Isra7eeleti Musey enta kiitidaysada Gibxeta, bira alleeqo, worqa alleeqonne ma7o immana mela oychidosona.
EXO 12:36 Goday, Isra7eeleti Gibxeta sinthan sabetanaada oothin, Gibxeti enti oychidaba ubbaa immidosona. Hessada yaatidi enti Gibxeta shaluwa bonqi ekidi bidosona.
EXO 12:37 Isra7eeleti Ramse katamaape dendidi Sukota geetetiya bessi tohon bidosona. Asaa tayboy naytanne maccasaa gujonna usupun xeetu mukula.
EXO 12:38 Qassi entara hara daro walaka asay, meheynne dorsa deesha wudey laagetidi bis.
EXO 12:39 Gibxefe enti dirgon keyida gisho kathi kathanaw wode dhayidosona. Enti keyishe eki keyida irshoy geliboonna munuqape ekidi uythi uukidosona.
EXO 12:40 Isra7eeleti Gibxe biittan de7ida laythay oyddu xeetanne hastama.
EXO 12:41 Oyddu xeetanne hastamu laythay wuriya he wursetha gallas Godaa asa ubbay Gibxe biittafe keyidosona.
EXO 12:42 Goday ba asaa naagidi, Gibxefe kessida wode sa7i qamma. He qammay yeletethaafe yeletethaa gakanaw Isra7eele asay barkidi naagishe aqiya, Godaas dummatida qamma.
EXO 12:43 Goday Musenne Aarona, “Paasika gallasaa bonchiya wogay haysa yaagis; asa gade asi paasika kathaafe moopo.
EXO 12:44 Hinte hinte miishen shammida aylley qaxaretidaape guye mo.
EXO 12:45 Shin hintera gam7iya imathinne une oothiya asi iyape moopo.
EXO 12:46 “He Paasika kathay kaxida keethan yan miite. He ashuwape aykoka kare kessofite. Meqethatape issuwaka menthofite.
EXO 12:47 Isra7eele maabara ubbay Paasika ba7aale bonchanaw koshshees.
EXO 12:48 “Asa gade asi gididi hinte giddon de7iya asi Godaa Paasika Ba7aale bonchanaw koyko, iyaranne iya son de7iya adde ubbay qaxareto. Hessafe guye, I biitta aawu na7ada taybetidi Paasika Ba7aale bonchanaw danda7ees. Shin qaxaretiboona asi iyape moopo.
EXO 12:49 Ha wogay biitta aawu naytasinne hara biitta asi gididi hinte giddon de7iya asaas issino” yaagis.
EXO 12:50 Isra7eele ubbay, Goday Musenne Aarona kiitidaysada oothidosona.
EXO 12:51 He gallas Goday Isra7eeleta cugan cugan Gibxe biittafe kessis.
EXO 13:1 Goday Museko,
EXO 13:2 “Bayra yeletida adde ubbaa taw dummaya. Isra7eele asaa giddon bayra yeletida ubbay, ase woyko mehe gidin ubbay tabaa” yaagis.
EXO 13:3 Hessafe guye, Musey asaako, “Ha gallasay, hinte Gibxe aylletethaafe keyida gallas gidiya gisho iya qopite. Goday ba gita wolqan hintena kessiday he gallasaana gidiya gisho, irshoy gelidaba aykoka moopite.
EXO 13:4 Abiiba ageenan, hachi gallasan hinte Gibxefe keydeta.
EXO 13:5 Goday Kanaaneta, Hiteta, Amooreta, Hiwetanne Yaabuseta biitta hintena laatisanaw hinte mayzatas caaqis. Goday hintena maathinne eessi kumida he biitta gathiya wode laythan laythan ha koyro ageenan ha gallasaa bonchite.
EXO 13:6 Laapun gallas kumethi irshoy geliboonna uythi miite. Laapuntha gallasay Godaa bonchiya ba7aale gidana.
EXO 13:7 He laapun gallasatan irshoy geliboonna uythi miite. Irshoy woyko irshoy de7iyabay hinte giddoninne hinte zawan bentofo.
EXO 13:8 He gallas neeni, ‘Taani haysa oothey taani Gibxefe keyiya wode Goday taw oothidaysa qopanaasa’ yaagada ne naytas oda.
EXO 13:9 Ha ba7aaley hinte kushen woyko hinte som7on qashetida malla gididi hintena qofisiyaba gidana. Goday hintena ba gita wolqan Gibxefe kessida gisho, Godaa wogay hinte doonape wodhonna melanne haratas hinte odana mela hintena qofisana.
EXO 13:10 Hessa gisho, hinte ha baaliya laythan laythan ba wodiyan bonchite.
EXO 13:11 “Goday hintewunne hinte mayzatas immana gidi caaqida Kanaaneta biitta gelsidi, he biitta hintew immiya wode,
EXO 13:12 bayra yeletida ubbaa Godaas imma. Ne mehetan bayra yeletiya adde ubbay Godaasa.
EXO 13:13 Bayra yeletiya hare mari ubbaa dorsa maran woza. Wozonna ixiko iya morgiya mentha. Ne adde nayta giddon bayra yeletida ubbaa woza.
EXO 13:14 Sinthara yaana laythatan ne nayti nena, ‘Haysi aybee?’ gidi oychiko neeni, ‘Goday nuna ba gita wolqan Gibxe aylletethaafe kessis.
EXO 13:15 Gibxe kawoy ba wozana muumisidi nuna yeddonna ixin, Goday Gibxe biittan de7iya asape doomidi mehe gakanaw bayra ubbaa wodhis. Nuuni bayra yeletida mehe adde Godaas yarsheynne bayra adde nayta nuuni wozey hessasa yaaga.
EXO 13:16 Goday nuna ba gita wolqan Gibxefe kessida gisho, ha ba7aaley nu kushen woyko nu som7on qashetida malla gididi nuna qofisiyaba gidana’ yaaga” yaagis.
EXO 13:17 Kawoy asaa yeddida wode, Xoossay enta mata gidida Filisxeeme biittara kanthisiya ogiyara kaalethibeenna. Xoossay hessa oothiday, “Asaa oli gakiko, banta qofaa laammidi guye Gibxe simmana” yaagidi qopida gishosa.
EXO 13:18 Hessa gisho, Xoossay asaa mela biitta ogiyara yuushshidi, Zo7o Abbaako kaalethis. Isra7eeleti olas giigidi Gibxe biittafe keyidosona.
EXO 13:19 Yoosefi, “Xoossay tuma hintena ashshanaw yaana. He wode hinte ta meqethaa ha biittafe ekidi biite” yaagidi Isra7eeleta caaqisidi wothida gisho Musey iya meqethaa baara ekidi bis.
EXO 13:20 Enti Sukotape dendidi mela biitta gaxan de7iya Etaaman uttidosona.
EXO 13:21 Enti gallasinne qamma hemetana mela gallas entana kaalethanaw shaara tuussan, qamma poo7isidi enta kaalethanaw tama tuussan enta sinthan bis.
EXO 13:22 Gallas shaara tuussay, qamma tama tuussay asaa sinthafe kichibeenna.
EXO 14:1 Hessafe guye, Goday Museko,
EXO 14:2 “Enti guye simmidi Migdoolapenne Zo7o Abbaafe giddon, Pihahiroota sinthan, Ba7aal-Zafoona matan uttana mela oda.
EXO 14:3 Kawoy, ‘Isra7eeleti mela biitta keyanaw oge dhayidi coo toylatoosona’ yaagidi qopana.
EXO 14:4 Taani kawa wozanaa muumisana; I enta gooddana. Taani kawanne iya olanchota ubbaa xoonada bonchetana. He wode Gibxet taani Godaa gideysa erana” yaagis. Hessa gisho, Isra7eeleti I odidaysada oothidosona.
EXO 14:5 Asay kessi ekidaysa Gibxe kawoy si7idi, iyaranne iya moorinnatara banta qofa laammidi, “Nuuni ayis hessa oothido? Nuuni Isra7eeleta yeddidi, nuna haggaaziya asi ayis dhayane” yaagidosona.
EXO 14:6 Hessa gisho, I ba para gaariya kooridi, ba olanchota ekidi dendis.
EXO 14:7 I usupun xeetu dooretida para gaaretanne Gibxe biittan de7iya hara gaareta ubbaa enta halaqatara ekidi bis.
EXO 14:8 Goday Gibxe biitta kawa wozana muumisida gisho yashshi bayna kessa bolla de7iya Isra7eele asaa yedethis.
EXO 14:9 Gibxe kawa parati, para gaaretinne olanchoti Isra7eeleta kaallidi bidi, Abba doonan Ba7aal-Zafoonanne Pihahiroota matan enti uttidashin demmidosona.
EXO 14:10 Kawoy ba olanchotara yishin Isra7eeleti demmidi yayyidosona; bantana maaddana mela Godaako waassidosona.
EXO 14:11 Enti Museko, “Gibxe biittan nuus duufoy dhayidee? Nuuni mela biitta hayqana mela nuna kessiday hessasee? Nuna Gibxefe ayis ehadii?
EXO 14:12 Gibxen de7ishe haysi hananaysa eridi, ‘Nuna agga nuuni Gibxetas haaretana’ yaagidi new odibooko? Mela biittan hayqanaape entaw haareteysi nuus lo77oshin” yaagidosona.
EXO 14:13 Shin Musey zaaridi, “Yayyofite; minnidi eqite. Goday hachi hintena ashshiya ashuwa hinte be7ana. Hachi hinte be7iya Gibxeta zaari be7eketa.
EXO 14:14 Hinte si77i giite; Goday hinte gisho oletana” yaagis.
EXO 14:15 Goday Museko, “Neeni ayis taako waassay? Isra7eeleti sinthe hemetana mela oda.
EXO 14:16 Ne xam7a Abbaa bolla dentha; haathay shaaketana. Isra7eeleti mela biittara Abbaa pinnidi baana.
EXO 14:17 Taani Gibxeta wozanaa muumisana; enti hinte geedo kaallidi Abban gelana. Taani kawa, iya olanchota, iya para gaariyanne iya para gaariya laageyisata xoonada bonchetana.
EXO 14:18 Ta enta xoonida wode, taani Godaa gideysa Gibxeti erana” yaagis.
EXO 14:19 Xoossaa kiitanchoy, Isra7eele olanchotape sinthara hemeteysi entafe guye aadhidi hemetis. Shaara tuussay enta sinthafe guye bagga aadhidi,
EXO 14:20 Gibxetasinne Isra7eeletas giddon eqis. He shaaray Gibxetas dhumisidi, Isra7eeletas poo7isis. Yaatin qamma kumethi Gibxeti Isra7eeletako shiiqibookona.
EXO 14:21 Musey Abba bolla ba kushiya miccis. Goday he qamma wolqaama doloha carko yeddidi mela biitti bentana gaso Abbaa shocis. Haathay shaaketis.
EXO 14:22 Haathay shaaketidi nam7u baggan godada eqin, Isra7eeleti mela biittara hemetidi pinnidosona.
EXO 14:23 Gibxe kawa parati, iya para gaaretinne iya para gaariya laaggeysati entana kaallidi, Abban gelidosona.
EXO 14:24 Sa7i wontana hanishin Goday tamanne shaara tuussan gididi Gibxe olanchota duge xeellidi, entaw hananaba dhaysis.
EXO 14:25 Para gaareta gertoy genderetonna mela Goday enta para gaareta gertuwa sa7ara oythis. Gibxeti, “Goday Isra7eeleta maaddidi nuna oliya gisho, nuuni enta aggidi baqatoos” yaagidosona.
EXO 14:26 Goday Museko, “Haathay Gibxeta bolla, enta para gaareta bollanne enta para gaariya laageyisata bolla guye simmana mela ne kushiya Abbaa bolla micca” yaagis.
EXO 14:27 Musey ba kushiya Abbaa bolla miccin, sa7i wontiya wode Abbay ba kase bessaa guye simmis. Gibxeti baqatanaw koydosona, shin Goday enta Abban yeggis.
EXO 14:28 Haathay guye simmidi, Isra7eeleta kaallidi Abban gelida para gaareta, para gaareta laaggeysatanne Gibxe olanchota mittis. Entafe issoyka attibeenna.
EXO 14:29 Shin Isra7eeleti Abbaa giddora mela biittara hemetidi, haathay shaaketidi godada eqidashin pinnidosona.
EXO 14:30 Goday he gallas Isra7eele asaa Gibxeta kushepe ashshis. Isra7eeleti hayqidi zin7ida Gibxeta Abbaa doonan be7idosona.
EXO 14:31 Isra7eeleti Goday Gibxeta bolla bessida gita wolqaa be7ida wode Godaa yayyidosona. Godaanne iya aylliya Muse ammanidosona.
EXO 15:1 He wode Museynne Isra7eele asay ha mazmuriya Godaas yexidosona. I ba gita xoonuwan bonchetida gisho, taani ta Godaas galata mazmuriya yexana. Paranne para toggeysa Abban yeggis.
EXO 15:2 Goday ta minotethaanne ta mazmuriya gasuwa, I tana ashsheysa. I ta Xoossaa; taani iya sabbana. I ta aawata Xoossaa; taani iya bonchana; galatana.
EXO 15:3 Goday olancho; iya sunthayka Godaa.
EXO 15:4 Gibxe kawa para gaaretanne iya olanchota Abban yeggis. Gibxe kawa, ubbaafe aadho gidida toora moconata, Zo7o Abban mitisis.
EXO 15:5 Entana ciimmo haathay mittis; enti shuchada ciimmon mitetidosona.
EXO 15:6 “Abeeti Godaw, ne ushacha kushey wolqan gooba; ne kushey morkiya mentherethis.
EXO 15:7 Ne gita xoonuwan, neera eqeteyisata oladasa. Ne sheney tamada eexidi, enta kafleda mis.
EXO 15:8 Ne hanquwan ne Abbaa punnin, haathay godada eqis. Abbaa ciimmoti garsan shuchada minnidosona.
EXO 15:9 “Morkey, ‘Taani enta yedethada oykana; taani enta shaluwa shaakada, ta koydaba ubbaa ekana. Taani ta mashsha shoddada enta dhaysana’ yaagidi ceeqetis.
EXO 15:10 Shin neeni enta punnin, Abbay enta mittis. Enti Abbaa ciimmuwan biratada mitetidosona.
EXO 15:11 Abeeti Godaw, Xoossata giddon ne mali oonee? Geeshshatethan yashshey ne mali oonee? Bonchoy daggantheynne malaalsiyaba oothey ne mali oonee?
EXO 15:12 Neeni ne ushacha kushiya miccida wode, biittay enta mittis.
EXO 15:13 “Neeni wozida asaa ne merina siiquwan kaalethadasa. Neeni ne wolqan enta ne geeshsha biitta gelsadasa.
EXO 15:14 Kawotethati hessa si7idi yashshan kokoridosona. Filisxeeme biitta asatika un7etidosona.
EXO 15:15 He wode Edoome biitta halaqati dagammidosona; Moo7abe biitta haareysati yashshan kokoridosona; Kanaane asati dagaman daaburidosona.
EXO 15:16 Dagaminne yashshi enta oykis. Abeeti Godaw, enti ne wolqaa gitatetha be7idi, ne asay aadhana gakanaw, neeni wozida asay aadhana gakanaw, shuchada toletidi eqidosona.
EXO 15:17 Neeni enta ehada, ne zumaa huuphen tokana. Abeeti Godaw, he bessay neeni new daanaw doorida bessi, neeni ne kushiyan minthada keexida ne keethe.
EXO 15:18 Goday merina gakanaw kawotana” yaagidi yexidosona.
EXO 15:19 Isra7eeleti Abbaa giddora mela biittara pinnin, Gibxe kawa parati, iya para gaaretinne iya para toggeysati Abban gelida wode Goday enta bolla Abbaa haatha zaarin haathay enta mittis.
EXO 15:20 Aarona michiya, nabiya Mayraama karaabo ekasu. Hara maccasati ubbay banta karaabo ekidi baqishenne yexishe iyo kaallidosona.
EXO 15:21 Mayraama, “I ba gita xoonuwan bonchetida gisho, Paranne para toggeyisata I Abban yeggida gisho, Iyaw mazmuriya yexite” yaagada entaw yexasu.
EXO 15:22 Hessafe guye, Musey Zo7o Abbaa matape Isra7eeleta denthidi Shuura mela biitta gakanaw kaalethis. He mela biittan enti heedzu gallas hemetidosona shin haathe demmibookona.
EXO 15:23 Enti Maara geetetiya bessi gakidi haathe demmidosona, shin haathay camo gidiya gisho uyanaw danda7ibookona. Hessa gisho, he bessay Maara geetetis.
EXO 15:24 Asay, “Nuuni ay uyanee?” gidi Muse bolla zuuzumidosona.
EXO 15:25 Yaanin, Musey Godaako waassis; Goday iya issi mithi bessis. Musey he mitha haathan yeggin haathay mal7is. Yan Goday entaw higge immis; yan Goday enta paacis.
EXO 15:26 Musey entako, “Hinte hinte Godaa Xoossaas kiitetite; I koyaba oothite. Hinte taw polo kiitetikonne ta giyaba si7iko Gibxeta bolla ta yeddida hargiyan hintena pirdike. Taani hintena pathiya Godaa” yaagis.
EXO 15:27 Hessafe guye, enti Elima bidosona. Yan tammanne nam7u haatha pultotinne laapun tammu zamba mithati de7oosona. Enti yan haatha doonan uttidosona.
EXO 16:1 Gibxefe keyida nam7antho ageenan, tammanne ichashantho gallas Isra7eele asa ubbay Elimape dendidi, Elimapenne Siinape giddon de7iya Siine geetetiya mela biitta yidosona.
EXO 16:2 Isra7eele asa ubbay mela biittan Muse bollanne Aarona bolla zuuzumidosona.
EXO 16:3 Isra7eeleti entako, “Nuuni Gibxe biittan Godaa kushen hayqida gidorkoshin. Hari atto nuuni yan wodhi uttidi ashuwanne hara kathi ubbaa nu koyida mela moos. Shin hinte nuna ubbaa kessidi ha mela biitta koshan wodhiseeta” yaagidosona.
EXO 16:4 Goday Museko, “Taani hintew salope kathi buksana. Asay gallas gallas keyidi, hachis gidiyaba maxanaw koshshees. Asay taw kiitetiyakonne kiitetonaako taani enta hessan paacana.
EXO 16:5 Saamintan saamintan Usupuntho gallas enti kase maxeysas nam7u kushe maxidi katho” yaagis.
EXO 16:6 Hesaa gisho Museynne Aaroni Isra7eele asaako, “Hintena Gibxe biittafe kessiday Godaa gideysa omarsi hinte erana.
EXO 16:7 Hinte Godaa bolla zuuzumidaysa I si7ida gisho, wonta Godaa bonchuwa hinte be7ana. Hinte nu bolla zuuzumanaw nuuni oonee?” yaagidosona.
EXO 16:8 Hessafe guye, Musey, “Hinte Godaa bolla zuuzumidaysa I si7ida gisho, I hintew omarsi maanaw asho immeynne wonta maanaw hinte koyiya mela uythu immey Godaa gideysa hinte erana. Hinte nu bolla gidonashin Godaa bolla zuuzumeta” yaagis.
EXO 16:9 Musey Aaronako, “Neeni Isra7eele asaa ubbaa, ‘Goday hinte zuuzuntha si7ida gisho, yidi Godaa sinthan eqite’ yaaga” yaagis.
EXO 16:10 Aaroni Isra7eele asaa ubbaas odida wode enti mela biitta simmidi, shaara giddora qoncida Godaa bonchuwa be7idosona.
EXO 16:11 Goday Museko, “Taani Isra7eeleta zuuzuntha si7as. Neeni entaw ‘Omarsi asho hinte maana; wonta hinte koyida mela uythu ekana. He wode hinte taani Godaa hinte Xoossaa gideysa erana’ yaagada oda” yaagis.
EXO 16:13 He gallas omarsi kuraachoti yidi, Isra7eele asay de7iya bessaa ma7idosona. Wonta enta heeran aki biitta ma7is.
EXO 16:14 Akay, xiz7ida wode lee7onne laafabay mela biitta bolla bentis. Ika shachada boothi.
EXO 16:15 Isra7eeleti hessa be7ida wode iya eronna gisho, issoy issuwako, “Haysi aybee?” yaagidosona. Yaatin Musey entako, “Hinte maana mela Goday immida kathay haysa.
EXO 16:16 Goday, ‘Asay issoy issoy baw koshsheysa mela shiisho; son de7iya issi issi asi ba huuphen nam7u litiro eko’ yaaga” yaagidi kiittis.
EXO 16:17 Isra7eeleti kiitetidaysada oothidosona; baggay darsidi, baggay guuthidi shiishidosona.
EXO 16:18 Enti shiishidi litiron makiya wode darsi shiishidaysas palahibeenna; guuthu shiishidaysaska pacibeenna. Issoy issoy baw koshsheysa mela shiishis.
EXO 16:19 Musey entako, “Oonika iyape wontas ashshofo” yaagidi kiittis.
EXO 16:20 Shin entafe issoti issoti Musey odidaysa si7onna ixidi wontas minjidosona. Enti minjidaysi guxuntidi xinqis. Hessa gisho, Musey enta bolla hanqetis.
EXO 16:21 Wonta wonta asa ubbay bantaw koshsheysa mela shiishees. Away michiya wode sa7an attidaysi til7ees.
EXO 16:22 Usupuntho gallas enti kase shiishiya nam7u litiruwa bolla iya mela gujidi issi issi asas oyddu litiro shiisho. Yaatin Isra7eele halaqati bidi hessa Muses odidosona.
EXO 16:23 Musey zaaridi, “Wontoy shempo gallas gididi Godaa bonchiya geeshsha Sambaata. Hessa gisho, hinte uukiyaba uukite; doysiyaba doysite. Palahidaysa wontos wothite” yaagis.
EXO 16:24 Enti Musey kiitidaysada wontos wothin, xinqibeenna woyko guxuntibeenna.
EXO 16:25 Musey entako, “Haysa hachi miite; hachi Godaa bonchiya shempo Sambaata gidiya gisho, hinte hachi denban demmeketa.
EXO 16:26 Hinte kathaa usupun gallasatan shiishanaw danda7eeta, shin laapuntha gallasay shempo gallas gidiya gisho aybi kathika he wode deenna” yaagis.
EXO 16:27 Laapuntha gallasan issi issi asay shiishanaw keyidosona, shin aykoka demmibookona.
EXO 16:28 Yaatin, Goday Museko, “Ta kiitaanne ta higgiya hinte naagonna ixey awude gakanaasee?
EXO 16:29 Taani hintew Sambaata immidaysa akeekite. Usupuntho gallasan I hintew nam7u gallasa kathi immey hessa gishosa. Laapuntha gallasan oonika kare keyonna ba son ba son gam7o” yaagis.
EXO 16:30 Hesaa gisho, asay laapuntha gallasan shempis.
EXO 16:31 Isra7eele asay he katha manna gidi xeegidosona. Mannay deebo ayfe mela gididi boothi. I eessara uukida uythada mal7ees.
EXO 16:32 “Taani hintena Gibxe biittafe kessida wode mela biittan muziday manna gideysa yaana yeletethay be7ana mela iyape nam7u kilo giraame wothite” yaagidi Goday kiitidaysa Musey Isra7eele asaas odis.
EXO 16:33 Musey Aaronako, “Nam7u kilo giraame manna ekada xaaron qolada yaana yeletethaas Goday goyinnetiya bessan wotha” yaagis.
EXO 16:34 Goday Muse kiitidaysada, Aaroni manna Godaa sinthan taabotiya giddon wothis.
EXO 16:35 Isra7eeleti banta de7iya Kanaane biitta zawa yidi gakanaw oytamu laythi manna midosona.
EXO 16:36 He wode asay makiya miishey laatamanne nam7u litiro oykees.
EXO 17:1 Isra7eele asa ubbay Goday kiitidaysada issi bessafe hara bessi yuuyishe, Siin mela biittafe dendidi Rafidima geetetiya bessan uttidosona. Shin enti uyanaw haathi he bessan dhayis.
EXO 17:2 Enti, “Nuus uyanaw haathe imma” yaagidi Musera kacetidosona. Musey zaaridi, “Hinte taara ayis kacceteetii? Godaa ayis paacetii?” yaagis.
EXO 17:3 Shin asay yan haatha saamotidi, “Neeni nuna, nu naytanne nu mehiya saamon wodhanaw Gibxefe kessada haysa ayis ehadii?” yaagidi Muse bolla zaari zaari zuuzumidosona.
EXO 17:4 Yaatin Musey, “Taani ha asaa waato? Enti tana shuchan caddana hanoosona” yaagidi Godaa woossis.
EXO 17:5 Goday Museko, “Neeni Isra7eele asaape cimata neera ekada asaape sinthe aadhada hemeta. Qassi Nayle Shaafa shocida xam7aa ne kushen oykada ba.
EXO 17:6 Taani Koreeba zuman zaalla bolla ne sinthan eqana. He zaalla shoca; asay uyana haathay iyape keyana” yaagis. Musey Isra7eele cimata sinthan hessa oothis.
EXO 17:7 Isra7eeleti, “Tuma Goday nuura de7ii?” yaagidi zuuzumida gishonne Godaa paacida gisho he bessa Masahanne Mariba gidi sunthis.
EXO 17:8 Amaaleqati yidi Rafidiman Isra7eeleta olidosona.
EXO 17:9 Muse Iyyasuko, “Neeni wonto Amaaleqata olanaw guutha asi doora. Taani Xoossaa xam7aa oykada zuma huuphen eqana” yaagis.
EXO 17:10 Musey kiitidaysada Iyyasuy Amaaleqata olis. Musey, Aaroninne Hoori zuma huuphe keyidosona.
EXO 17:11 Musey ba kushiya denthidi gam7iya wode Isra7eeleti xoonosona, shin I ba kushiya wothiya wode Amaaleqati xoonosona.
EXO 17:12 Muse kushey argaacida wode Aaronaranne Huurara shuchi ehidi Muse iya bolla utisidosona. Aaroninne Huuri ushacharanne haddirsara eqidi away wullana gakanaw iya kushiya katisi oykidosona.
EXO 17:13 Hessada oothidi Iyyasuy Amaaleqata mashshan olidi dhaysis.
EXO 17:14 Hessafe guye, Goday Museko, “Haysi ubba wode hassayetana mela ha xoonuwa taarikiya xaafa. Taani Amaaleqata burxora dhaysanaysanne enti dogetanaysa Iyyasus oda” yaagis.
EXO 17:15 Musey yarsho bessi giigisidi, “Goday ta xoonuwa bandira” gidi sunthis.
EXO 17:16 I, “Godaa xoono Bandira dhoqu oothidi oykite. Goday Amaaleqata merinaw olana” yaagis.
EXO 18:1 Midiyaame biitta kahiney, Muse bolloy Yotori, Goday Musesinne ba asaa Isra7eeletas oothidabaanne entana Gibxefe kessidaba si7is.
EXO 18:2 He wode Muse bolloy Yotori, iya matan Musey aggidi bida iya machiw Sipooronne,
EXO 18:3 I nam7u nayta ekidi yis. Musey, “Taani allaga biittan bete asi gidas” gidi bayra na7aa Gersaama gidi sunthis.
EXO 18:4 Kaaluwa qassi, “Ta aawa Xoossay, tana Gibxe kawa mashshafe ashshis” gidi Alaazara gidi sunthis.
EXO 18:5 Muse bolloy Yotori, iya machiwunne I adde nayta baara ekidi, mela biittan, Xoossaa zumaa matan de7iya Museko yis.
EXO 18:6 I banta yuussaa erisanaw Museko kiittis.
EXO 18:7 Hessa gisho, Musey ba bolluwa mokanaw keyidi, iya ziggi sarothidi iya yeeris. Enti issoy issuwa sarothi simmidi Muse dunkaaniya giddo gelidosona.
EXO 18:8 Goday Isra7eeleta ashshanaw Gibxe asaa bollanne enta kawa bolla oothidaba ubbaanne ogen enta gakida metuwa ubban Goday waati maaddidaako Musey ba bolluwas odis.
EXO 18:9 Yotori Goday Isra7eele asaa Gibxeta kushepe ashshanaw oothida lo77o oosotaba si7idi ufaytis.
EXO 18:10 I, “Hintena Gibxetape enta kawa kushiyape ashshidi, Gibxe aylletethaafe kessida Goday, I galatetto.
EXO 18:11 Otoron enta bolla iitaba oothida Gibxetape Isra7eeleta ashshanaw hessa oothida gisho, Goday xoossata ubbaafe gita gideysa taani ha77i eras” yaagis.
EXO 18:12 Hessafe guye, Yotori, Muse bolloy, xuussa yarshonne hara yarsho Xoossaas yarshis. Aaroninne Isra7eele cimati ubbay Xoossaa sinthan iyara geeshsha katha maanaw yidosona.
EXO 18:13 Wontetha gallas Musey asaas pirdanaw uttis. Asay Muse yuushuwan wontafe omarsi gakanaw eqidi de7ees.
EXO 18:14 Muse bolloy Musey asaas ootheysa ubbaa be7idi, “Neeni ne xalaala haysa ayis oothay? Asay wontafe omarsi gakanaw ne yuushuwan essada ayis nerka oothay?” yaagis.
EXO 18:15 Musey ba bolluwako, “Asay Xoossaa sheniya oychanaw koyidi taako yaa gishosa.
EXO 18:16 Enta giddon odi de7iko taako yoosona. Ta enta giddon balinne tumi ooneko shaakayis; Xoossa kiitaanne higgiya entaw odayis” yaagis.
EXO 18:17 Muse bolloy, “Haysi ne ootheysi lo77o gidenna.
EXO 18:18 Neka neeko yaa asa ubbay daabureta. Ha oosoy issi asape daro gidiya gisho, neeni nerka oothanaw danda7aka.
EXO 18:19 Ha77i taani nena zoreysa si7a; Xoossay neera gidana. Neeni ha asaa bessan gidada entaba Xoossas oda.
EXO 18:20 Xoossa kiitaanne higgiya enta tamaarsa. Enti waani daanekonne ay oothaneko enta bessa.
EXO 18:21 Qassi asaa giddon oda shaakidi eriya asata, Xoossaa yayyeyisata, ammantheysatanne wodhaafe ekonnaysati doora. Entana asaa bolla shaalaqata, mato halaqata, hamsalaqatanne asiralaqata oothada shuuma.
EXO 18:22 Enti ubba wode kawushsha odata bantaw pirdo, shin deexo odata neeko eho. Hessada ne oothiko toohoy new kawuyana.
EXO 18:23 Ne oothana mela Xoossi koyey hessa. Qassi ne daaburaka ha asa ubbay ba allalley poletin ba soo ba soo simmana” yaagis.
EXO 18:24 Musey Yotora zoriya si7is; I gidaba ubbaa oothis.
EXO 18:25 Musey Isra7eeleta giddofe oda shaaki eriya asata dooris. Entana asaa bolla shaalaqata, mato halaqata, hamsalaqatanne asiralaqata oothidi shuumis.
EXO 18:26 Shuumati kawusha odata bantaw pirdidosona, shin deexo odata Museko ehoosona.
EXO 18:27 Hessafe guye, Musey ba bolluwa moyzin, I ba biitta simmis.
EXO 19:1 Isra7eele asay Gibxefe keyida heedzantho ageenas koyro gallasan Siina mela biitta gakidosona.
EXO 19:2 Enti Rafidimape dendidi bidi, Siina zuma sinthan de7iya mela biittan uttidosona.
EXO 19:3 Musey Xoossara gahetanaw zuma bolla keyis. Goday zumaa huuphepe iya xeegidi, “Yayqooba sheeshi gidida Isra7eeletas haysada yaaga;
EXO 19:4 ‘Taani Gibxeta bolla oothidabaanne arganthi ba na7a ba qefiyan tookeysda ta hintena waata tookada taako ehidaako hinte hinte huuphen be7ideta.
EXO 19:5 Ha77i hinte taw kiitetikonne ta caaquwa naagiko, biitta kumethay tabaa gidikoka hinte taw dooretida dere gidana.
EXO 19:6 Hinte taw geeshsha dere gidana; hinte kawotethan kahine gididi tana haggaazana.’ Neeni Isra7eeletas odana qaalay haysa” yaagis.
EXO 19:7 Musey guye bidi, zumako cimata xeegi shiishidi, Goday odida qaala ubbaa entaw odis.
EXO 19:8 Enti, “Goday gidaba ubbaa nuuni oothana” yaagidosona. Musey enti gidaysa Godaas odis.
EXO 19:9 Goday Museko “Taani neera haasayishin asay si7anaadanne enti nena ubba wode ammananada taani muumida shaarara neeko yaana” yaagis. Hessafe guye, Musey asay gidaysa Godaas odis.
EXO 19:10 Goday Museko “Neeni asaako bada hachinne wonto taara gahetanaw bantana geeshshana mela entaw oda. Enti banta ma7uwa meeccidi,
EXO 19:11 heedzantho gallasas giigeto. He gallas asa ubbay tana be7ishin taani Siina zuma bolla wodhana.
EXO 19:12 Neeni ha zuma yuushuwan zawa wotha. Asay zuma bolla keyonna mela woyko zumaa xaphuwa bochonna mela entaw oda. Zumaa bochida oonika hayqana.
EXO 19:13 He uray shuchan cadetidi woyko dongen duketidi hayqo; iya kushen oonika bochofo. Mehey woyko asi hessada hayqo. Moyzey punetiya wode enti zumaa bolla keyanaw danda7oosona” yaagis.
EXO 19:14 Musey zumaa bollafe wodhidi, asay Xoossaa goyinnanaw bantana giigisana mela odis. Entika banta ma7uwa meeccidosona.
EXO 19:15 Musey asaako, “Heedzantho gallasaas giigetite; hinte machetara aqopite” yaagis.
EXO 19:16 Heedzantho gallas wonta guura deshoy dechis. Wol7anthinne sakana shaari zumaa ma7idi bentis. Wolqaama moyze waasoy si7etis. Asay dunkaanida bessa ubban yashshan kokoridosona.
EXO 19:17 Hessafe guye, Musey asaa Xoossara gathanaw entana dunkaaniyape kessidi efis; enti zumaa xaphon eqidosona.
EXO 19:18 Goday Siina zumaa bolla tama lacora wodhida gisho Siina derey cuyan kametis. Gita coocepe cuyi keyeysada iyape cuyiya zuley suure keyis. Asa ubbay daro kokoridosona.
EXO 19:19 Moyziya waasoy dari dari bida wode Musey odin, Xoossay deshon iyaw zaaris.
EXO 19:20 Goday Siina zumaa huuphe bolla wodhidi, Muse pude zumaa bolla xeegis. Musey zumaa bolla keyis.
EXO 19:21 Goday iyako, “Neeni duge bada asay tana be7ana gidi, zawa aadhona melanne entafe daroy hayqonna mela entaw oda.
EXO 19:22 Hari atto Godaa mati shiiqiya kahinetika bantana geeshsho. Enti hessa oothonna ixiko ta enta hanqana” yaagis.
EXO 19:23 Musey Godaako, “Neeni zuma dummayida gishonne zawa immida gisho asay zuma huuphe keyanaw danda7okona” yaagis.
EXO 19:24 Goday iyako, “Neeni duge bada Aarona neera ekada ya. Kahinetinne asay zawa kanthidi taako yishe dhayona mela entaw oda” yaagis.
EXO 19:25 Hessa gisho, Musey asaako wodhidi Goday gidaysa entaw odis.
EXO 20:1 Xoossay Isra7eele asaako haysada yaagis;
EXO 20:2 “Nena Gibxefe aylletethaafe kessida Goday ne Xoossay tana.
EXO 20:3 “Taape attishin, hara xoosse goyinnofa.
EXO 20:4 “Bolla saluwan de7iyaba, woyko garsa sa7an de7iyaba, woyko sa7ape garsan haatha giddon de7iyaba aybaka new goyinniya eeqa daanisada oothofa.
EXO 20:5 Entaw hokofa woyko enta goyinnofa. Ayis giiko, taani, Goday ne Xoossay, ta bonchuwa hara xoossatara koxonna Xoosse. Tana ixiya aawata nagaraa gisho nayta heedzantho woyko oyddantho yeletethi gakanaw hanqana.
EXO 20:6 Shin tana siiqeysatanne ta kiita naageysata sheesha mukulu yeletethi gakanaw keehana.
EXO 20:7 “Xoossaa ne Godaa sunthaa hadan denthofa. Goday ba sunthaa hadan dentheyisata seeronna aggenna.
EXO 20:8 “Sambaata Geeshsha gallas oothada naaga.
EXO 20:9 Neeni ooso oothanaw bessiya usupun gallasati de7oosona.
EXO 20:10 Shin laapuntha gallasay neeni Godaa bonchiya shempo gallas. He gallasan ayba oosoka oothofa. Neeni, woyko ne nayti, woyko ne aylleti, woyko ne mehey, woyko ne biittan de7iya asa gade asati he gallasan ooso oothopite.
EXO 20:11 Usupun gallasa giddon Goday salota, sa7aa, abbanne enta giddon de7iya ubbaa medhis, shin laapuntha gallasan shempis. Hessa gisho, Goday Sambaata gallasaa anjisinne dummayis.
EXO 20:12 “Goday ne Xoossay new immiya biittan ne laythay aduqana mela ne aawanne ne aayiw boncha.
EXO 20:13 “Ase wodhopa.
EXO 20:14 “Laammofa.
EXO 20:15 “Kaysotopa.
EXO 20:16 “Ne laggiya bolla wordo markatofa.
EXO 20:17 “Ne laggiya keethaa amottofa. Ne laggiya machiw, woyko iya aylleta, woyko iya mehiya, woyko iya hariya, woyko iyaw de7iyaba aybaka amottofa” yaagis.
EXO 20:18 Asa ubbay deshoy decheysanne moyzey puneteysa si7idi, wol7anthay wol7ameysanne derey cuyeysa be7idi yashshan kokorishe haahon eqidosona.
EXO 20:19 Enti Museko, “Neeni nuus oda; nuuni si7ana. Shin nuuni hayqonna mela Xoossay nuus odopo” yaagidosona.
EXO 20:20 Musey asaako, “Yayyofite; Xoossay hintena paacanawunne hinte iyaw kiitetidi nagara oothonna mela I yis” yaagis.
EXO 20:21 Asay banta de7iyasuwan haakidi eqidashin, Xoossay de7iyasuwa muumida shaarako Musey shiiqis.
EXO 20:22 Hessafe guye, Goday Museko “Isra7eele asaas haysada yaagada oda; ‘Salope taani hintew odishin hinte tana hinte huuphen be7ideta.
EXO 20:23 Yaaniya gisho, bira eeqa woyko worqa eeqa hintew oothidi ta bolla gujidi goyinnofite.
EXO 20:24 Neeni taw yarsho bessi urqafe giigisa. Ne dorsatapenne ne booratape ekada xuussa yarshonne issifetetha yarsho iya bolla yarsha. Hinte tana goyinnana mela taani doorida bessa ubban hinteko yada hintena anjana.
EXO 20:25 Neeni taw yarsho bessi shuchafe keexiyaba gidiko masetida shuchafe keexofa. Neeni massiya miishen iya bochiko tunisaasa.
EXO 20:26 Neeni keyashe kallotonna mela taw yarsho bessi kodora keyiya bessan keexofa’ ” yaagis.
EXO 21:1 Goday Muse baggara ba deriyas immida wogay haysa;
EXO 21:2 “Ne Ibraawe aylle shammiko, I new usupun laythi ootho, shin laapuntha laythan aykoka qanxonna, aylletethaafe coo yedeto.
EXO 21:3 I macho ekona shametidaba gidiko, barka yedeto. I machidi, shametidaba gidiko, iya machiyaka iyara yedeto.
EXO 21:4 Iya goday iyaw macho immidaba gidikonne machiya iyaw adde nayta woyko macca nayta yelidaba gidiko, iya machiyanne I nayti iya godaaba gido; addey barka yedeto.
EXO 21:5 Shin aylley, ‘Taani ta godaa, ta machiwnne ta nayta dosayis’ gidi aylletethaafe keyanaw koyonna ixiko,
EXO 21:6 iya goday, Godaa sinthe iya aatho. Yaatidi, penge woyko penge zizgiya matan iya essidi, iya haythaa goothan luko. Hessafe guye, I ba de7o laytha ubban iyaw aylle gido.
EXO 21:7 “Issi asi ba macca na7iw aylletethas bayziko, adde aylletatho aylletethaafe keyopo.
EXO 21:8 Iyo shammidi machanaw efida goday iyo dosona ixiko, I goday iyo deriyan woziso. I goday I bolla iitabaa oothida gisho, iyo allagas bayzanaw danda7ena.
EXO 21:9 I iyo ba na7aas immanaw koyiko, ba macca na7atho oothidi eko.
EXO 21:10 I hara macho I bolla ekiko, koyro machees kathi, ma7onne indas bessiya woga iw pacisopo.
EXO 21:11 I ha heedzubata iw oothonna ixiko, aybi miisheka qanxonna aylletethaafe keyada boo.”
EXO 21:12 “Ase shocidi wodhiya oonika hayqanaw bessees.
EXO 21:13 I wodhanaw qoponna iyape hayqiyaba gidiko, I baqatidi attana bessi taani iyaw giigisana.
EXO 21:14 Shin asi qopidi hara asi wodhiko, he uray ta yarsho bessi biiko yaape diggada hara bessan wodha.
EXO 21:15 “Ba aawa woyko ba aayiw dechiya oonika hayqo.
EXO 21:16 “Ase bayzanaw woyko haaranaw wolqan oykiya asi hayqanaw bessees.
EXO 21:17 “Ba aawa woyko ba aayiw cayey hayqo.
EXO 21:18 “Nam7u asati ooyetidi, issoy issuwa shuchan caddidi qoo7iko, woyko zhultiko, he deshetidaysi hayqonna attidi hargidi hiixan pee7iko,
EXO 21:19 dendidi guufetidi kare heeran hemetiko, he dechidaysi hayqope attees. Gidikoka I iya oosope ashshida gisho, accanawunne paxana gakanaw hargisanaw koshshees.
EXO 21:20 “Issi asi ba adde aylliya woyko macca aylliw xam7an shocidi wodhiko seeretanaw bessees.
EXO 21:21 Shin he aylley issi woyko nam7u gallasa giddon hayqonna ixiko, iya goday seeretofo. He aylley iya shalo gidiya gisho iya hayqoy baw seera.
EXO 21:22 “Nam7u asati issoy issuwara wadhetidi qanxatida maccasiw dechidi, iya boshetana mela oothiko, hara iita qoho gathonna ixiko, he dechida uray, he mache azinay oychiya aca daynnati pirdiko ciggo.
EXO 21:23 Shin he maccase deshethay dariko, shempo gisho shempo,
EXO 21:24 ayfe gisho ayfe, acha gisho ache, kushe gisho kushe, toho gisho toho,
EXO 21:25 xuussa gisho xuussi, maduntha gisho madunthi, qoo7o gisho qoo7o ekanaw koshshees.
EXO 21:26 “Issi asi ba adde aylliyas woyko macca ayllees ayfe baqidi toysiko, he ayfiya gisho aylletethafe kessi yeddo.
EXO 21:27 Hessadaka, ba aylliya ache woyko ba aylle ache menthiko, he acha gisho aylletethafe kessi yeddo.
EXO 21:28 “Boori ase qaycidi wodhiko, he booray shuchan caddeti hayqo. Iya ashoy meetetofo, shin boora goday seeretofo.
EXO 21:29 Shin booray kaseka qayciyaba gidikonne koyrottidi boora godaas odetin, I qachonna ixidaba gidiko, he booray ase wodhiko, booraynne boora goday issife shuchan cadetidi hayqo.
EXO 21:30 Shin boora goday aca qanxana mela oyshetiko, enti oychidaba qanxidi ba shempuwa wozo.
EXO 21:31 Booray adde na7a woyko macca na7a qaycidi wodhiko pirday iya mela gido.
EXO 21:32 Booray adde aylle woyko macca aylle qaycidi wodhiko, boora goday aylliya godaas hastamu bira santime qanxo; booray shuchan caddetidi hayqo.
EXO 21:33 “Issi asi olla bookidi kammonna aggiko woyko kamaa denthin boori woyko harey he ollan wulliko,
EXO 21:34 he ollaa goday mehiya gatiya qanxo. I iya godaas gatiya qanxidi, hayqida mehiya baw eko.
EXO 21:35 “Issi asa boori hara asa boori caddidi wodhiko, paxa boora bayzidi, iya miishiyanne hayqida boora ashuwa nam7ay shaaki eko.
EXO 21:36 Shin he booray kaseka qayciyaba gideysa erishe, iya goday qachonna aggidaba gidiko, he uray iyaw boori qanxo. Yaatidi, he hayqidaysa baw eko.”
EXO 22:1 “Issi asi boori woyko dorse kaysidi shukiko, woyko bayziko, boora gisho ichashu boorata, dorsaa gisho oyddu dorsata ciggo.
EXO 22:2 “Kaysoy keethe bookishe oyketidi shocetidi hayqiko, shoci wodhidaysi oyshetenna.
EXO 22:3 Shin hessi haniday gallas gidiko, I he gusida suuthaa acuwan oyshetees. Kaysoy ba kaysidaysa zaaro, shin iyaw zaaranabay dhayko ba huuphen aylletethas bayzeto.
EXO 22:4 I kaysida mehey paxa de7ishe iya kushen bentiko, boori woyko hare woyko dorse gidiko, I kaysidaysas nam7u kushe ciggo.
EXO 22:5 “Issi asi ba mehiya denban woyko woyne gaden heemmishin, mehey hara asa kathi miiko, I ba kathaafe woyko ba woyniyape lo77uwa aca qanxo.
EXO 22:6 “Issi asi ba gaden tama xuuggishin tamay buuriya kanthidi hara asa gaden dicciya kathaanne dooriya miiko, tama oythida uray aco qanxo.
EXO 22:7 “Issi asi bira woyko hara al7o miishe ba shooruwas hadara immin, he shooruwa soope kaysoy he miishiya ekikonne he kaysoy oyketiko, he kaysoy miishiya nam7u kushe ciggo.
EXO 22:8 Shin kaysoy bentonna ixiko, uray Xoossaa sinthe shiiqidi, ba shooruwa miishiya, I ekonnaysa erisanaw caaqo.
EXO 22:9 “Nam7u asati boora gaason woyko hare gaason woyko dorsa gaason woyko ma7o gaason woyko hara dhaydaba gaason mootetidi, Xoossaa sinthe shiiqiko, Xoossay iya bolla pirdidaysi nam7u kushe ciggo.
EXO 22:10 “Issi asi hare woyko boori woyko dorse woyko hara mehe hadara immidasuwan hayqiko woyko me7iko woyko oonika be77onna kaysotetiko,
EXO 22:11 hadaro ekidaysi ba laggiya mehiya kaysotonaysa Godaa sinthan caaqo. He mehiya goday caaquwa eko; mehey iyape dhayida uray cigganaw koshshenna.
EXO 22:12 Shin mehey kaysotetidaba gidiko, mehiya godaas ciggo.
EXO 22:13 He mehiya do7i midaba gidiko, marka gidanaada gawuxaa eho; do7i midaba gidiko iyaw ciggofo.
EXO 22:14 “Asi ba shooruwape mehe woossi ekiko iya goday bayna bessan he mehey deshetiko woyko hayqiko, he mehiyas ciga immo.
EXO 22:15 Shin iya goday iyara de7ishin hessi hanidaba gidiko aca qanxofo. Hashe ekidaba gidiko, he hashe miishey aco gate gido.
EXO 22:16 “Issi asi issi geela7iw cimmidi, iira zin7etiyaba gidiko, iw aca immidi, baw macho ootho.
EXO 22:17 I aaway iyo iyaw immanaw koyona ixiko, geela7o ekiya uray aca immiya miishe mela I aawas immidi acco.
EXO 22:18 “Bita bitiya maccasi hayqo.
EXO 22:19 “Mehera tuniya oonika hayqo.
EXO 22:20 “Xoossaafe hara godatas yarshiya oonika hayqo.
EXO 22:21 Hinte Gibxe biittan bete asi gididi, de7ida gisho, bete asi qohopite woyko un7ethofite.
EXO 22:22 Am7etanne yi7ota un7ethofite.
EXO 22:23 Hinte enta un7ethiko, enti taako waassana;
EXO 22:24 taani enta waasuwa si7ana. He wode ta hinte bolla hanqetada hintena olan wursana. Hinte macheti am7o, hinte naytika aawu baynayisata gidana.
EXO 22:25 “Hinte giddon de7iya manqo gidida ta asaape oodeska miishe tal7iko, yelon tal7iya asada yelo oychofite.
EXO 22:26 Neeni issiba gisho, iya ma7uwa oykida asi de7iko, awi wullonna de7ishin iya ma7uwa zaara.
EXO 22:27 I ma7idi aqey I xalaala. I hara ay ma7idi aqanaw danda7ii? Taani qadhetiya Xoossi gidiya gisho, I taako waassiya wode si7ana.
EXO 22:28 “Xoossaa bolla cashsha qaala haasayopa, woyko ne deriya ayseysa baaddofa.
EXO 22:29 Ne kathaafe, ne woyne ushshafenne ne shamaho zaytiyape taw yarsho yarsha. “Bayra gididi yeletida adde na7aa taw imma.
EXO 22:30 Ne miizapenne ne dorsaafe bayra yeletidaysa taw imma. Enti laapun gallas gakanaw, banta aayetara gam7o; hospuntho gallasan enta taw imma.
EXO 22:31 “Hinte taw geeshsha asi gidanaw koshshees. Hessa gisho, do7i menthidi wodhida mehe asho moopite; hessa kanas yeggite.”
EXO 23:1 “Wordo oda gasethofa; wordo markatada bala asi maaddofa.
EXO 23:2 Iitaba oothanaw daro asaa kaallofa. Pirda wobisanaw daro asaara issifada markatofa.
EXO 23:3 Manqoy pirdas shiiqiya wode iya manqotetha be7ada maaddofa.
EXO 23:4 “Ne morkiya booray woyko harey dhayin demmiko, zaarada iyaw efa.
EXO 23:5 Nena ixiya uraa harey caanara kundin be7ada, uraa maaddada denthona aggada aadhofa.
EXO 23:6 “Pirda dabaaban manqoy pirdas shiiqiya wode iya pirdaa wobbisopa.
EXO 23:7 Oonaka malten mootopa; xilluwa wodhopa. Hessa melaba oothidaysa taani pirdonna aggike.
EXO 23:8 Wodhaafe ekofa; wodhaafey suure xeelliya asa ayfe qooqisees, xillota pirdaa mirqees.
EXO 23:9 “Betanchuwa naaqofa. Hinte Gibxe biittan bete asi gididi de7ida gisho, asa gade asi gidoy ay mela si7etiyako ereeta.
EXO 23:10 “Neeni ne gadiya usupun laythi goyada ma.
EXO 23:11 Laapuntha laythan gadiya goyonna shaacha; iyan dolidi kaxiyaba shiishopa. Ne asaa giddon de7iya manqoti iyape mo; qassi entafe attidaysa do7ati mo. Ne woyne gadiyanne ne shamaho gadiya hessada ootha.
EXO 23:12 “Neeni usupun gallas ooso ootha. Ne booraynne ne harey shempana melanne ne son yeletida aylleynne bete asi shempana mela laapuntha gallasan ooso oothofa.
EXO 23:13 Taani hintew odidaba ubbaa minthidi oothite. Hara xoossata sunthaa xeegidi woossofite; enta sunthaa denthofite.
EXO 23:14 “Tana bonchanaw laythan heedzu ba7aale gallasati hintew de7o.
EXO 23:15 Hinte Gibxefe keyida Abiiba geetetiya ageenan, taani hintena kiitidaysada Uytha Ba7aale bonchite. Laapun gallas irsho yeggidi uukida uythi moopite. Tana goyinnanaw yishe mela kushe yoopite.
EXO 23:16 “Qassi hinte, hinte gaden zerin, koyro gakida kathaa cakiya wode Kathaa Cako Ba7aale bonchite. “Laytha wursethan, woyniyanne hessa mela mithata ayfiya hinte gadepe maxiya wode Shaqara Ba7aale bonchite.
EXO 23:17 Laythan laythan bonchetiya ha heedzu ba7aaletan adde ubbay tana, hinte Godaa goyinnanaw yo.
EXO 23:18 “Neeni taw mehe yarshiya wode irsho yeggidi uukida uythara taw yarshofa. Ba7aale bonchiya gallas yarshetida modhuwafe wontas aybika attofo.
EXO 23:19 Hinte gaden bayra kaxida katha ubbaafe lo77uwa Godaa, hinte Xoossaa soo ehite. Deesha mari woyko dorsa mari iya aaye maathan doysopa.
EXO 23:20 “Ne ogiyan nena naagana malanne taani new giigisida bessaa nena efana mela taani kiitancho ne sinthan kiittana.
EXO 23:21 I odiyaba si7ada iyaw kiiteta; iya bolla Makallofa. Ta iyaw maata immida gisho, hinte nagara oothiyaba gidiko, hinte nagaraa maarenna.
EXO 23:22 Hinte iyaw kiitetikonne ta kiita ubbaa poliko, hinte morketa ubbaa morkana; hintera eqeteyisata taani olana.
EXO 23:23 Ta kiitanchoy hinte sinthan bidi, hintena Amooreta, Hiteta, Parzeta, Kanaaneta, Hiwetanne Yaabuseta biitta ehana. Taani enta dhaysana.
EXO 23:24 Enta xoossatas ziggofite woyko goyinnofite, woyko enta ammano wogaa kaallopite. Enta xoossata dhaysite, enta eeqa shuchata mentherethite.
EXO 23:25 Godaa, hinte Xoossaa tana, goyinnite. Hessada hinte oothiko, taani hinte kathaanne hinte haatha anjana; hargiyaka hinte giddofe diggana.
EXO 23:26 Hinte biittan maccasay boshetenna; maynnena. Taani hinte laytha adussana.
EXO 23:27 “Taani ne morketa bolla ta yashsha yeddana. Hintera eqetiya kawotethata ubbaa daganthana. Hinte morketi ubbay hintew zoko zaaridi baqatana mela oothana.
EXO 23:28 Taani hinte morketa bolla kazhe yeddada Hiweta, Kanaanetanne Hiteta hinte sinthafe goodda kessana.
EXO 23:29 Shin biittay mela attonaadanne bazzo do7i hintena waaysonaada issi laythan enta goodike.
EXO 23:30 Shin hinte taybon daridi, minnidi, he biitta laattana gakanaw enta guuthara guuthara goodda kessana.
EXO 23:31 Taani hinte zawa Zo7o Abbaafe Filisxeeme Abbaa, mela biittafe bidi Efraxiisa Shaafa gakanaw dalgisana. He biittan de7iya ubbaa taani hinte kushen aathada immana; hinteka enta gooddidi kessana.
EXO 23:32 Entara woyko enta xoossatara caaqo oothopite.
EXO 23:33 Enta hinte biittan wothofite. Hankoode enti hintena ta bolla nagara oosisana. Enta xoossata hinte goyinniko hintew xihe gidana” yaagis.
EXO 24:1 Goday Museko, “Neeni, Aaroni, Naadabi Abyoodanne Isra7eele cimatape laapun tammu asati taako zuma bolla keyidi, haahon eqidi, gufannidi, taw goyinnite.
EXO 24:2 Shin neeni nerka taako shiiqa; harati ta mati shiiqopo. Qassi asayka neera zuma bolla keyopo” yaagis.
EXO 24:3 Musey bidi, Godaa qaalanne woga ubbaa asaas odin, asa ubbay issi qaalan, “Goday gidaba ubbaa nuuni oothana” yaagidosona.
EXO 24:4 Musey Goday odidaba ubbaa xaafis. Wontetha gallas guura dendidi, zumaa garsan yarsho besse giigisis. Tammanne nam7u Isra7eele sheeshata sunthan, tammanne nam7u shucha tuussi essis.
EXO 24:5 Isra7eele panthata I kiittin, enti bidi xuussa yarshuwanne issifetetha yarshuwas kormata shukidi, Godaas yarshidosona.
EXO 24:6 Musey mehiya suuthaafe bagga ekidi keriyan tigis; attida bagga suuthaa yarsho bessan dharcis.
EXO 24:7 Hessafe guye, Caaqo Maxaafa ekidi, asaas nabbabin, enti, “Goday gidaba ubbaa nuuni oothana; nuuni iya kiita polana” yaagidosona.
EXO 24:8 Hessafe guye, Musey he suuthaa ekidi, asaa bolla dharcidi, enta, “Goday hintew ha kiitata immiya wode hintera gelida caaquwa minthiya suuthay haysa” yaagis.
EXO 24:9 Musey, Aaroni, Naadabi, Abyoodanne Isra7eele cimatape laapun tammay zumaa bolla keyidi,
EXO 24:10 Isra7eele Xoossaa be7idosona. Iya tohuwape garsan saloda geeyida, sanpare geetetiya shuchafe oosetidaba daaniya demba bessi de7ees.
EXO 24:11 Shin Xoossay Isra7eele asaa halaqata wodhibeenna. Enti Xoossaa be7idosona; iya sinthan midosonanne uyidosona.
EXO 24:12 Goday Museko, “Neeni taako zumaa bolla haa keyada, haysan gam7a. Ta asay taw kiitetana mela nam7u loche shuchata bolla ta kushen ta xaafida higgeta new immana” yaagis.
EXO 24:13 Museynne iyaw kiitetiya Iyyasuy baanaw dendidosona; Musey Xoossara gahetanaw zumaa bolla keyis.
EXO 24:14 Musey Isra7eele cimatako, “Nuuni hinteko simmana gakanaw haysan gam7ite. Aaroninne Huuri haysan hintera de7oosona; odi de7iya oonika entako boo” yaagis.
EXO 24:15 Musey zumaa bolla keyida wode shaaray zumaa ma7is.
EXO 24:16 Godaa bonchoy Siina Zumaa bolla uttis. He shaaray usupun gallas zuma bolla ma7is; laapuntha gallas Goday shaara giddon gididi Muse xeegis.
EXO 24:17 Zumaa bolla qoncida Godaa bonchoy Isra7eeletas tama laco daanidi bentis.
EXO 24:18 Hessafe guye, Musey zumaa huuphiya keyidi shaara giddo gelis; yan oytamu gallasinne oytamu qamma gam7is.
EXO 25:1 Goday Museko haysada yaagis;
EXO 25:2 “Taw imota ehana mela Isra7eeletas oda. Iya wozani iya imma imma gidaba immiya imota asa ubbaafe taw eka.
EXO 25:3 Hinte entafe ekana imotay, worqaa, bira, naase birata,
EXO 25:4 kaalose qacina, ocha teera daaniya qacina, zo7o qacinanne al7o liino, deesha ikise,
EXO 25:5 haashetidi zo7o qalamen tiyetida dorsa ite, lo77o do7a ite, soqala mithi,
EXO 25:6 xompes maaddiya shamaho zayte, shuumatetha zayteninne ixaanen guzhetiya sawota,
EXO 25:7 Kahine halaqay ma7iya efuude geetetiya ma7uwa bollanne iya tiran wosetiya margide geetetiya al7o shuchaanne hara alleeqo shuchata eho.
EXO 25:8 Taani enta giddon daana mela enti tana goyinniya bessi giigiso.”
EXO 25:9 Dunkaaniyanne iya giddon de7iya miisheta ubbaa ta nena bessiya maaran ootha.
EXO 25:10 “Soqala mithafe, adussatethay nam7u wadhanne takadho, gompay issi wadhanne takadho, geesay issi wadhanne takadho gidiya saaxine oothite.
EXO 25:11 Gaathaanne kariya walahi bayna worqan kamma; iya yuushuwaka worqan lanxa.
EXO 25:12 He Taabotiyas oyddu worqa sagaayota oothada; oyddu gedata bolla issi baggara nam7u sagaayota, qassi hanko baggara nam7u sagaayota aathada gasetha.
EXO 25:13 Taabotiya tookiya kaso mithata soqala mithafe kessada worqan lanxa.
EXO 25:14 Taabotiya tookanaw iya miyen de7iya sagaayotan kaso mithata aatha.
EXO 25:15 Tookiya kaso mithati Taabotiya sagaayota giddon de7o; enti yaape keyopo.
EXO 25:16 Taabotiya giddon taani new immiya, tammu kiitati xaafetida nam7u loche shuchata wotha.
EXO 25:17 “Walahi bayna worqafe adussatethay nam7u wadhanne takadho, gompay issi wadhanne takadho gidiya nagara atotetha kama ootha.
EXO 25:18 Qefera de7iya nam7u kiruubeta worqafe qoxada ootha.
EXO 25:19 Issi kiruubiya issi bagga gaxan, nam7antho kiruubiya hanko bagga gaxan wothada nam7aa Taabotiya guphiyara oythada ootha.
EXO 25:20 Kiruubeti woliko simmi uttidi, banta qefiya denthidi, atotetha kamaa kammo.
EXO 25:21 Taani new immiya loche shucha bolla xaafetida tammu kiitata Taabotiya giddon wotha. Yaatada, guphiya Taabotiya bolla wotha.
EXO 25:22 Taabotiya guphiya bolla de7iya nam7u kiruubetape giddon gidada taani neera gahetana. Isra7eele asaas immiya kiita ubbaa taani yan new immana.”
EXO 25:23 “Soqala mithafe adussatethay nam7u wadha, gompay issi wadha, geesay issi wadhanne takadho gidiya issi xarpheeza ootha.
EXO 25:24 Yaatada, walahi bayna worqan lanxa; iya yuushuwaka worqan lanxa.
EXO 25:25 Hessadaka, gompay takadho gidiya goossa iya bolla yuushsha aatha. Yaatada, iya yuushuwa worqan lanxa.
EXO 25:26 He xarpheezas oyddu worqa sagaayota oothada, xarpheezaa oyddu tohotara oytha.
EXO 25:27 Xarpheezaa tookanaw kaso mithata aathiya sagaayoti xarpheeza goossaa matan shiiqidi de7o.
EXO 25:28 He tookiya kasota soqala mithafe kessada, worqan lanxa.
EXO 25:29 Hessadaka, shaatetanne cilpata, woyne yarshuwa duuqiya miishetanne xuu7ata walahi bayna worqafe ootha.
EXO 25:30 Xarpheezay Taabotiyas sintha baggara utto. Ta sinthan uttiya geeshsha uythay ubba wode xarpheezaa bollafe dhayopo.”
EXO 25:31 “Xompe wothiya kocaa walahi bayna worqafe ootha. He kocay eqiya tohuwanne tooma worqafe qoxada ootha. Alleeqos oosetiya wallaxati, gambuthatinne ciishshati ubbay issino gididi oosetanaw bessees.
EXO 25:32 Nam7u baggara, heedzu heedzu tasheta iyaw kessa.
EXO 25:33 Usupun tashetas xeeran xeeran heedzu heedzu alleeqo gambuthatinne ciishshati de7iya lawuze mitha ciishshe daaniyabay de7o.
EXO 25:34 Xompiya wothiya kocaa giddon de7iya tooma xeeran oyddu alleeqo gambuthatinne ciishshati de7iya lawuze mitha ciishshe daaniyabay de7o.
EXO 25:35 Tashetape garsan, nam7u tasheti gahetiya bessan issi issi gambuthi de7o.
EXO 25:36 Gambuthay, tasheynne xompiya wothiya kocay issino gididi, walahi bayna worqafe qoxetidi ooseto.
EXO 25:37 “Xompe wothiya kocaa bolla laapun xompeta giigisada, enti sinthe poo7ana mela dhoqu oothada wotha.
EXO 25:38 Xompiya naaganaw maaddiya Qaphetanne enta wothiyabata walahi bayna worqafe ootha.
EXO 25:39 Xompe wothiya kocaynne iya miisheti ubbay hastamanne ichashu kilo giraame gidiya walahi bayna worqafe ooseto.
EXO 25:40 Taani nena zumaa bolla bessida leemisuwa kaallada, akeekada ootha.”
EXO 26:1 “Dunkaaniya gaatha baggaas al7o liinope oosetida, tammu geshe giigisa. Enta kaalose, ocha teera daaneysaninne zo7o qacinan daddada kiruubeta misiliyara alleeqisa.
EXO 26:2 Gesheti ubbay issi like gido; adussatethay laatamanne oydda, gompay qassi oyddu wadha gido.
EXO 26:3 Ichashu gesheta issife gathada sika; hanko attida ichashata hessada ootha.
EXO 26:4 Issife gahetidi siketida nam7u geshetas issuwa issuwa gaxan kaalose afilape oosetida sagaayota ootha.
EXO 26:5 Issife siketida koyro magarajuwa bolla koyro maaran kaalose afilape oosetida ishatamu sagaayota ootha; hessadaka nam7antho magarajuwa bolla wursetha gaxan ishatamu sagaayota ootha.
EXO 26:6 Geeshsha Dunkaaney issino gidana mela nam7un shaaketi siketida gesheta woli gathidi oysethanaw, ishatamu worqafe oosetida oykiyabata ootha.
EXO 26:7 “Geeshsha Dunkaaniya bollara kammana mela tammanne issi gesheta deesha ikisepe ootha.
EXO 26:8 Tammanne issi gesheti issi gina gido; issi issi magarajuwa adussatethay hastamu wadha, gompay oyddu wadha gido.
EXO 26:9 Ichashu gesheta issi baggara, usupun gesheta hanko baggara gathada sika. Usupuntho magarajoy dakoyetidi, dunkaaniyas sintha baggara daabuleto.
EXO 26:10 Woli gathi sikida geshetape issi magarajuwas macara bolla ishatamu sagaayota ootha; qassi hanko magarajuwas macara bolla ishatamu sagaayota ootha.
EXO 26:11 Nam7un shaaketi siketida gesheti issi kama gidana mela ishatamu naase biratape oosetida oykiyabata ootha.
EXO 26:12 He dunkaaniya geshetape palahida baggaa ekada Geeshsha Dunkaaniyas guye baggara kaqa.
EXO 26:13 Dunkaaniya geshetape adusatetha baggara palahida gompay issi issi wadha gidida gesheta Geeshsha Dunkaaniyas nam7u baggara kaqa.
EXO 26:14 “Dunkaaniyas bolla baggara daabulidi kammanaw zo7o qalamen tiyetida maraze itenne lo77o do7a ite ootha.
EXO 26:15 Geeshsha Dunkaaniya tuuqeta soqala mithafe ootha.
EXO 26:16 Issi issi tuuqiya adussatethay tammu wadha, gompay issi wadhanne bagga gido.
EXO 26:17 Nam7u tuuqeti issife oyketana mela issi issi tuuqiyas oysethiyabay de7o. Geeshsha Dunkaaniya tuuqeta ubbaa hessada ootha.
EXO 26:18 Geeshsha Dunkaaniya wuloha baggara laatamu tuuqeta ootha.
EXO 26:19 Entana essanaw enta garsan bira biratape oosetida oytamu luhoy de7iya tohota ootha. Issi issi tuuqiyas nam7u nam7u toho kessa.
EXO 26:20 Geeshsha Dunkaaniya pudeha baggara laatamu tuuqeta ootha.
EXO 26:21 Entana essanaw enta garsan bira biratape oosetida oytamu luhoy de7iya tohota ootha. Issi issi tuuqiyas nam7u nam7u toho kessa.
EXO 26:22 Geeshsha Dunkaaniyas guyera wuloha baggara usupun tuuqeta ootha.
EXO 26:23 Guye baggara de7iya maazanetas nam7u tuuqeta ootha.
EXO 26:24 He maazaniyan de7iya tuuqeti tohope huuphe gakanaw oyketo. Nam7u maazaneta medhiya nam7u tuuqeta hessatho oosetanaw bessees.
EXO 26:25 Hessadaka nam7u nam7u tohoy de7iya hospun tuuqeta oothada, entaw bira biratape oosetida tammanne usupun luhoy de7iya tohota ootha.
EXO 26:26 “Tuuqeta sathidi oythiya soqala mithafe oosetida tammanne ichashu liyoota kessa. Entafe ichashata Geeshsha Dunkaaniyas issi bagga miyen de7iya tuuqetas,
EXO 26:27 qassi ichashata hanko bagga miyen de7iya tuuqetas, hessadaka attida ichashata wuloha baggan de7iya tuuqetas ootha.
EXO 26:28 Ha gaxa tuuqiyapenne ya gaxa tuuqiyape yaa liyooti giddo tuuqiyara oyketo.
EXO 26:29 Tuuqeta worqan lanxa; liyoota oykanaw maaddiya sagaayota worqafe ootha; qassi liyoota worqan lanxa.
EXO 26:30 Geeshsha Dunkaaniya zumaa bolla ta nena bessidaysada ootha.
EXO 26:31 “Al7o liinope issi magarajo oothada, iya kaalose, ocha teera daaneysaninne zo7o qacinan daddada kiruubeta misilen alleeqisa.
EXO 26:32 Iya soqala mithafe oothada, worqan meeshetida kocataninne bira biratape oosetida oyddu tohoy de7iya tuussata bolla kaqa.
EXO 26:33 He magarajuwa Geeshsha Dunkaaniyas kaaran de7iya qaphetape garsan kaqa. Yaatada higgey xaafetida nam7u loche shuchata oykida Caaqo Taabotiya magarajuwas guye baggan wotha. He geshey, Geeshsha Bessaanne Ubbaafe Geeshsha Bessaafe shaakees.
EXO 26:34 Nagara atotetha kaman Caaqo Taabotiya kamma.
EXO 26:35 Xarpheezaa, Ubbaafe Geeshsha Bessaafe karera, Geeshsha Dunkaaniyape pudeha baggan wotha; xompe wothiya kocaa dugeha baggara wotha.
EXO 26:36 “Dunkaaniya penge magarajuwa, al7o liinope giigisada, kaalose, ocha teera daaneysaninne zo7o qacinan daddada alleeqisa.
EXO 26:37 Magarajuwas ichashu tuussata soqala mithafe oothada worqan lanxa; kocatika worqafe oosetidaysata gido. Tuussatas naase biratape ichashu tohota giigisa.”
EXO 27:1 “Soqala mithafe yarsho bessi ootha. Adussatethaynne gompay oyddu wadhanne takadho, geesay heedzu wadha gidida oyddu maazanera de7iya yarsho bessi ootha.
EXO 27:2 Oyddu maazaneta bolla kace daaniyaba kessa; kaceti yarsho bessaara issino gididi ooseto. Yaatada, yarsho bessa ubbaa naase biratan laxa.
EXO 27:3 Iyaw go7etiya miisheta; bido kessiya kereta, akaafata, baldeta, asho qaphetanne cooceta ubbaa naase biratape ootha.
EXO 27:4 Yaatada, naase biratape zarzare daaniyaba oothada, iyaw oyddu maazaneta bolla oyddu sagaayota giigisa.
EXO 27:5 He zarzariya yarsho bessa goossaafe garsan yarsho bessaas bagga zawa gathada wotha.
EXO 27:6 Soqala mithafe yarsho bessa tookiya kaso mithata kessada, naase biratan lanxa.
EXO 27:7 Yarsho bessaa tookiya wode maaddana mela he kaso mithata nam7u miyera de7iya sagaayotan aatha.
EXO 27:8 Taani nena zumaa bolla bessidaysada yarsho bessi xawulape oothada, gidduwa kaysi ootha.”
EXO 27:9 “Geeshsha Dunkaaniya dabaaba gechanaw al7o liinope magarajo giigisa. Geshetas adussatethay dugeha baggara xeetu wadha gido.
EXO 27:10 Iyaw kate gidana mela naase biratape oosetida laatamu tuussatanne laatamu tohota ootha. Enta bolla bira biratape oosetida xam7atanne kaceta ootha.
EXO 27:11 Dabaabas pudeha baggaraka hessada ootha.
EXO 27:12 “Dabaabas wuloha bagga adussatethay ishatamu wadha gidida gesheti oosetidi, entaw tammu tohoy de7iya tuussati de7o.
EXO 27:13 Geliya wulay de7iya, doloha bagga dabaaba gompay ishatamu wadha gido.
EXO 27:14 Dabaaba pengiyafe issi baggara adussatethay tammanne ichashu wadha gidiya gesheti de7o; entaw heedzu tohoy de7iya heedzu tuussati de7o.
EXO 27:15 Hanko baggara de7iya geshetika hessada ooseto.
EXO 27:16 “Dabaaba geliya wulaas adussatethay laatamu wadha gidiya, al7o liinope magarajo giigisada, kaalose, ocha teera daaneysaninne zo7o qacinan daddada alleeqisa. Enti iyan zempana mela oyddu tohora de7iya oyddu tuussata giigisa.
EXO 27:17 Dabaaba yuushuwan de7iya tuussati ubbay bira biratape oosetida xam7atan oyketo; enta kaceti bira biratape, enta tohoti naase biratape ooseto.
EXO 27:18 Dabaaba adussatethay xeetu wadha, gompay oytamu wadha, geesay ichashu wadha gido. Magarajoti al7o liinope, enta tohotika naase biratape ooseto.
EXO 27:19 “Geeshsha Dunkaaniyan go7etiya miishe ubbay, dunkaaniyanne dabaaba dhisheti ubbay naase biratape ooseto.
EXO 27:20 “Xompey qamma poo7ishe aqana mela gum7i xillisida shamaho zayte new ehana mela Isra7eele asaa kiita.
EXO 27:21 Aaroninne iya nayti, poo7oy, Godaa sinthan omarsafe wonta gakanaw poo7ana mela Geeshsha Dunkaaniya giddon, Marka Taabotiya sinthan de7iya magarajuwafe kare baggara eetho. Hessi Isra7eele asaas merina woga gididi de7o.
EXO 28:1 “Ne ishaa Aaronanne iya nayta Nadaaba, Abyooda, Alaazaranne Itamaara neeko xeega. Enti kahine gididi taw haggaazana mela Isra7eele asaa giddofe enta dummaya.
EXO 28:2 Iyaw bonchonne teema immana mela ne ishaa Aaronas boncho ma7ota giigisa.
EXO 28:3 Aaroni kahinetethan dummatidi taw haggaazanaada, taani hiillatethi immida oosanchota ubbaa xeegada, Aaronas ma7ota giigisana mela oda.
EXO 28:4 Enti giigisana ma7otika haysata; tiran ma7etiya ma7o, efuude, adussa qamise, alleeqetidi dadetida shamize, qacenne danco. Ne ishay Aaroninne iya nayti kahine gididi taw haggaazishe ma7ana mela geeshsha ma7ota entaw giigiso.
EXO 28:5 Kushe hiillanchoti he ma7ota worqa cachafe, kaalosepe, ocha teera daaneysafe zo7o qacinapenne al7o liinope giigiso.
EXO 28:6 “Efuude geetetiya ma7uwa worqa cacha qacinape, kaalosepe, ocha teera daaneysafe, zo7o qacinapenne al7o liinope kushe hiillanchoti alleeqisidi giigiso.
EXO 28:7 Nam7u hashiyara wodhidi, nam7u baggaa woli gathidi qachanaw maaddiya qangoti de7o.
EXO 28:8 Efuudey oosetidabaape hiillan oosetida dancoy efuudiyara wolla oosetidaba gididi issife oyketo.
EXO 28:9 Margide geetetiya nam7u shuchata ekada, tammanne nam7u Yayqooba nayta sunthaa enta bolla woocada xaafa.
EXO 28:10 Enta yeleta maarada issi shucha bolla usupun sunthata, hanko shuchaa bolla attida usupun sunthata woocada xaafa.
EXO 28:11 Ha nam7u shuchata bolla tammanne nam7u Yayqooba nayta sunthaa woocadi xaafanaw hiillancho demma; he xaafetida shuchata efuudiya bolla oythanaw iya yuushuwa worqan lanxa.
EXO 28:12 Yaatada tammanne nam7u Isra7eele sheesha qofisiyaba gidana mela ha nam7u shuchata efuudiyara oythada hashiyara aadhiya qanguwa bolla wotha. Taani, Goday, ta asaa ubba wode hassayana mela Aaroni enta sunthaa ba hashiyan tooko.
EXO 28:13 He shuchata oykeysa worqafe ootha.
EXO 28:14 Qassi walahi bayna worqafe wodoroda dooqetida nam7u santhalaata hashiyara aadhiya qanguwara oyketana mela ootha.
EXO 28:15 “Godaa sheniya oychidi eranaw, tiran ma7etiya ma7uwa kushe hiillanchon oosisa. He tiran ma7etiya ma7uwa worqa cacha qacinape, kaalosepe, ocha teera daaneysafe, zo7o qacinapenne al7o liinope efuudiyada alleeqisidi giigiso. Kaalosepe oosetidabaape oothada alleeqisa.
EXO 28:16 Iyaw geesaynne gompay issi issi takadho gididi oyddu maazaney de7o.
EXO 28:17 Iyaw oyddu maaran al7o shuchata wotha. Koyro maaran sardiyoone, toophazenne phooliya al7o shuchata wotha.
EXO 28:18 Nam7antho maaran baluure, sanperenne almaaze geetetiya al7o shuchata wotha.
EXO 28:19 Heedzantho maaran yaakinte, kelqedoonenne ametesxinoosa geetetiya al7o shuchata wotha.
EXO 28:20 Oyddantho maaran birelle, margide, yasphide geetetiya al7o shuchata wotha. Haysati ubbay worqa kaquwa bolla woseto.
EXO 28:21 Isra7eele naytas qofiso gidana mela ha tammanne nam7u al7o shuchata, issi issi Yayqooba nayta sunthay, issi issi shucha bolla woocetidi xaafeto.
EXO 28:22 “Tiran ma7etiya ma7uwas walahi bayna worqafe wodoroda dooqada santhalaata ootha.
EXO 28:23 Nam7u worqa migiddota oothada, tiran ma7etiya ma7uwas qommo gaxa maazaniyan gathada oytha.
EXO 28:24 He nam7u worqa santhalaatata migiddotara gathada oytha.
EXO 28:25 Hanko baggan de7iya nam7u santhalaata gaxa nam7u qangotara gasetha. Hessada oothada sintha baggara, hashiyara wodhiya efuudiya qanguwara gasetha.
EXO 28:26 Qassi nam7u worqa sagaayota oothada, efuudiyape gatha baggara kaallidi de7iya tiran ma7etiya ma7uwas nam7u maazaneta xeeran aatha.
EXO 28:27 Hessadaka, worqafe hara nam7u migiddota oothada, efuudiyas sintha bagga hashiyara wodhiya qanguwas garsa baggara gasetha. Efuudiya sikuwa matan dancuwaafe qommo baggara enta gasethanaw bessees.
EXO 28:28 Tiran ma7etiya ma7uwan de7iya migiddota efuudiyan de7iya migiddotara gathada kaalose qacinan qacha. Hessada oothiko, tiran ma7etiya ma7oy xeessafe qommon de7iya gisho, qashoy dol7enna.
EXO 28:29 “Aaroni Geeshsha bessa geliya wode Isra7eele mayzata sunthaa oykida, tiran ma7etiya ma7uwa ma7o. Yaaniya gisho, taani, Goday ubba wode ta asaa qopana.
EXO 28:30 Qassi saama yeggiya nam7u geeshsha shuchata tiran ma7etiya ma7uwan yegga. Aaroni Geeshsha dunkaaniya geliya wode ba tiran enta tookidi gelo. Ta sheniya Isra7eele asaa erisanaw ta sinthe geliya wode ubban tira kiisiyape dhaysofo.
EXO 28:31 “Efuudiyape bollara ma7iya adussa ma7uwa kumethi kaalose afilape giigisa.
EXO 28:32 He adusse ma7uwas huuphe aathiya luho medha. He luhoy peedhetonna mela guye qalam7ada yuushsha aathada sika.
EXO 28:33 Adussa ma7uwas duge bagga macara yuushuwan kaalose, ocha teera daaneysaninne zo7o qacinape, oromaane teera misile medha. Yaatada enta giddon aatha aatha worqafe oosetida daalata ootha.
EXO 28:34 Worqa daalatinne oromaane teera misileti he adusse ma7uwas duge bagga macara yuushuwan aadho.
EXO 28:35 Aaroni kahinetethan oothiya wode ha adussa ma7uwa ma7o. Godaa sinthe, Geeshsha Bessaa geliya wodenne keyiya wode, daalay giirana; ika hayqenna.
EXO 28:36 Walahi bayna worqafe issi alleeqo oothada, iya bolla ‘Godaas Dummatis’ yaagada woocada xaafa.
EXO 28:37 Yaatada huuphiya qaciya bolla kaalose qacinara qacha.
EXO 28:38 Aaroni iya ba som7uwan wotho. Hessan Isra7eele asay Godaas imota immishe balidabay de7iko, he balaa Aaroni tookees. Asay ehiyaba Goday ekana mela I hessa ubba wode ba som7uwan wothanaw koshshees.
EXO 28:39 “Aarona shamziyanne qacciya al7o liinope dadda. Qassi dancuwaka al7o liinope daddada alleeqisa.
EXO 28:40 Aarona naytas bonchonne puula immana mela shamizeta, dancotanne huuphen wothiya qoobeta giigisa.
EXO 28:41 Neeni ha ma7ota ne ishaa Aaronanne iya nayta mayza. Enti kahinetethan taw haggaazana mela enta shamaho zayten tiyada taw dummaya.
EXO 28:42 Enta kalloy kametana mela garsan ma7iya ma7uwa xeessafe bidi wodire gakanaw kammiyaba al7o liinope sure giigisa.
EXO 28:43 Aaroninne iya nayti Geeshsha Dunkaaniya geliya wode woyko Geeshsha Bessan kahinetethan haggaazanaw yarsho bessi shiiqiya wode ha ma7ota ma7o. Hessada haniko, enti banta bolla hayqo ehokona. Hessi Aaronasinne iya sheeshatas merinaa woga gido.
EXO 29:1 “Aaroninne iya nayti kahinetethan taw haggaazana mela neeni enta dummayanaw haysada ootha; borey bayna wofaanonne nam7u maraze eka.
EXO 29:2 Geeshsha giste dhiille ekada, irsho yeggonna shamaho zaytera gindada uythu uuka. Qassi zaytey gelonna hara uythu uuka; hessadaka, lee7o uythu uukada zayten tiya.
EXO 29:3 Wofaanuwanne nam7u marazeta yarshiya wode he uytha ubbaa gaytan wothada taw shiisha.
EXO 29:4 “Yaatada Aaronanne iya nayta Geeshsha Dunkaaniya penge ehada haathan enti meecetana mela oda.
EXO 29:5 Hessafe guye, kahinetetha ma7ota, shamziya, efuudiya, efuudiya bollara ma7iya adussa ma7uwanne tiran ma7etiya ma7uwa Aarona mayza; dancuwaka dancisa.
EXO 29:6 Qacciya qaccisa; iya bolla, ‘Godaas dummatis’ geetetidi xaafetida worqa alleequwa wotha.
EXO 29:7 Tishsha zaytiya ekada iya huuphiyan tigada tiya.
EXO 29:8 Iya nayta ehada shamziya mayza.
EXO 29:9 Enta xeessaa dancisa; enta huuphiyanka qoobe wotha. Aaronanne iya nayta yaatada kahinetethan shuuma. Hessika, entaw merina woga gido.
EXO 29:10 “Wofaanuwa Geeshsha Dunkaaniya sinthe ehada, Aaroninne iya nayti iya huuphiyan banta kushiya wothana mela ootha.
EXO 29:11 Wofaanuwa Geeshsha Dunkaaniya pengiyan Godaa sinthan shuka.
EXO 29:12 Wofaanuwa suuthaafe guuthu ekada ne biradhiyan, yarsho bessa bolla de7iya kaceta tiya. Attidaysa yarsho bessaafe garsan gussa.
EXO 29:13 Hessafe guye, ulo ashuwa kammida modhuwa ubbaa, tiriyaas lo77o baggaa, nam7u kilahotanne enta kammida modhuwa ekada, yarsho bessaa bolla wothada xuugga.
EXO 29:14 Shin wofaanuwa ulo ashuwa, iya galbaanne maraaciya gutaape gaxa kessada xuugga. Hessi kahineta nagaraa quchiya yarsho.
EXO 29:15 “Nam7u marazetape issuwa ekada, Aaroninne iya nayti banta kushiya iya huuphen wothana mela ootha.
EXO 29:16 He maraziya shukada, suuthaa yarsho bessan oyddu maazanetan wurxa.
EXO 29:17 Iya ashuwa qanxerethada, ulo ashuwanne gedaa meeccada, huuphiya hara qommo ashotara issife yarsho bessan wotha.
EXO 29:18 Hessafe guye, kumetha ashuwa yarsho bessan xuugga. Hessika Godaas xuussa yarsho. He yarshuwa sawoy Godaa ufaysees.
EXO 29:19 “Qassi kahinetetha wogas eketida hanko maraziya ekada Aaroninne iya nayti banta kushiya iya huuphen wothana mela oda.
EXO 29:20 Iya shukada, suuthaafe guuthu ekada, Aaronasinne iya naytas ushacha haythatas gaxaa, enta ushacha kushiyasinne tohuwas wogga biradheta tiya. Attida suuthaa yarsho bessa oyddu maazanetan wurxa.
EXO 29:21 Yarsho bessan de7iya suuthaafenne tiyiya zaytiyape guuthu ekada, Aarona bollanne iya ma7uwa bolla, qassika iya nayta bollanne enta ma7uwa bolla wurxa. Hessan Aaroninne iya nayti banta ma7uwara taw dummatidaysata gidana.
EXO 29:22 “He marazey kahineta shuuma wogaas eketiya gisho, goyna modhuwa, ulo ashuwa kammida modhuwa, tiriya kammida moodhiya, nam7u kilahota, enta kammida moodhiyanne ushacha guye gedaa qanxada shaaka.
EXO 29:23 Godaa sinthan wothida uythatape, zaytey geliboonna uythaa, zaytera uukida uythaanne lee7o uythaafe issuwa eka.
EXO 29:24 Neeni ha katha ubbaa Aarona kushiyaninne iya nayta kushiyan wotha. Enti iya yuusho yarsho oothidi Godaas immiya yarsho oothidi Godaa sinthan shiisho.
EXO 29:25 Hessafe guye, enta kushepe ekada yarsho bessa bolla wotha; xuussa yarshuwara gathada, Godaa sawana mela yarsho bessa bolla taman xuugga.
EXO 29:26 Aaroni kahine gididi shuumetiya wode shukida maraziya angaasuwa ekada, Godaa sinthan yuusho yarsho ootha. Hessi hintena gakiya gisho gidana.
EXO 29:27 “Kahiney shuumetiya wode, Aaronanne iya nayta kahinetethan shuumanaw eketida angaaysuwanne toho ashuwa taw dummaya. Hessika, kahineta gakiya gisho gido.
EXO 29:28 Isra7eeleti ubbay kahine shuumanaw woyko anjetanaw Godaas Angaasonne guye toho yarsho immiya wode ashoy taw dummatidaysa gido. Shin gishoy Aaronasinne iya naytas gako; he wogay laametofo.
EXO 29:29 “Aaroni hayqida wode iya nayti iya kahinetetha ma7uwa laatto. Enti kahinetethan shuumetidaape guye he ma7uwa ma7o.
EXO 29:30 Iya naytape iya bessan kahine gididi, Geeshsha bessan haggaazanaw Geeshsha Dunkaaniya yaa na7i he ma7uwa laapun gallas ma7o.
EXO 29:31 “Aaroninne iya nayti kahine gididi shuumetiya wode shuketida maraziya ashuwa ekada, geeshsha bessan katha.
EXO 29:32 Aaroninne iya nayti maraziya ashuwa gaytan attida uythaara Geeshsha Dunkaaniya pengen mo.
EXO 29:33 Enti kahine gididi shuumetiya wode nagara atotethas yarshetida he ashuwa mona. Shin he kathay geeshshi gidida gisho, kahineta xalaali mo; hara asi oonika moopo.
EXO 29:34 Ashuwapenne kathaafe mishin attidi aqiko, taman xuugeto; geeshshi gidida gisho meetetofo.
EXO 29:35 “Aaroninne iya nayti kahine gididi shuumetiya wode, ta nena kiitida ubbaa ootha; ba7aaley laapun gallasan poleto.
EXO 29:36 Nagaraa atotethas issi issi gallasan issi wofaano shukada yarsha. Hessi yarsho bessa geeshshees. Yaatada yarsho bessa polo geeshshanaw shamaho zayte tiya.
EXO 29:37 Hessa laapun gallas gakanaw gallas gallas ootha. Yaatiko yarsho bessay polo geeshshi gidana. I polo geeshshi gidida gisho, iya bochiya asi woyko haraba ubbay geeyana.
EXO 29:38 “Laythan laythan yarsho bessan gallas gallas issi laythi gidida nam7u marazeta yarsha.
EXO 29:39 Marazetape issuwa wonta, qassi hankuwa omarsi yarsha.
EXO 29:40 Koyro maraziyara issi kilo giraame gidiya geeshsha lo77o giste dhiille, issi litiro shamaho zaytera gindada yarsha. Issi litiro woyne ushsha yarsho oothada gussa.
EXO 29:41 Hanko maraziya omarsi yarshashe wonta yarshoysa mela dhiille, zaytenne woyne ushsha shiisha. Hessi taw yarshetiya katha yarsho; iya sawoy tana ufayseysa gidana.
EXO 29:42 “Laythan laythan he xuussa yarshoy Geeshsha Dunkaaniya pengen, Godaa sinthan paci bayna yashetanaw bessees. He bessan taani ta deriyara gahetana; neeraka yan odetana.
EXO 29:43 Yan taani Isra7eeletara gahetana; ta bonchoy he bessa dummayana.
EXO 29:44 Taani Geeshsha Dunkaaniyanne yarsho bessa dummayana; enti taw kahine gididi haggaazana mela Aaronanne iya nayta dummayana.
EXO 29:45 Yaatada, taani Isra7eeleta giddon daana; enta Xoossaa gidana.
EXO 29:46 Enta giddon daanaw Gibxefe enta kessida Goday, enta Xoossay tana gideysa enti erana. Taani Godaa, enta Xoossaa.
EXO 30:1 “Ixaane cuyisiya bessaa soqala mithafe medha.
EXO 30:2 Iyaw oyddu maazaney de7o. Adussatethaynne gompay issi issi wadha, geesay nam7u wadha gido. Oyddu maazaniyan de7iya kaceti iyara oyketidi oosetonna.
EXO 30:3 Iyaw bolla baggaa, iya oyddu maazanetanne iya kaceta walahi bayna worqan lanxa. Iya yuushuwaka worqan lanxa.
EXO 30:4 Nam7u worqa sagaayota oothada, xarpheeza tookanaw maaddiya kaso mithata aathanaw goossaas nam7u baggara oytha.
EXO 30:5 Kaso mithata soqala mithafe kessada, enta worqan lanxa.
EXO 30:6 He ixaane yarsho xarpheezaa, Caaqo Taabotiya sinthan kaqetida magarajuwafe kare baggara wotha. Yan taani neera gahetana.
EXO 30:7 “Aaroni wonta wonta xompeta giigisanaw yaa wode, sawiya ixaane yarshiya bessan cuyiso.
EXO 30:8 Hessada, Aaroni omarsi xompeta xompiya wodeka ixaane cuyiso. He ixaaniya yarshoy yaana laytha ubban Godaa sinthan cuyo.
EXO 30:9 Ha yarsho bessan hara digetida ixaane, katha yarsho, mehe yarshonne woyne yarsho yarshofa.
EXO 30:10 Aaroni, nagaraa atotethas laythafe issi toho shuketiya mehiya suuthaafe ekidi, he yarsho bessa maazaneta bolla de7iya kaceta wothidi geeshsho wogaa polo. Ha wogay sinthara yaana wode ubban laythan laythan poleto. He yarsho bessay geeshshi gidiya gisho Godaas dummatis” yaagis.
EXO 30:11 Hessafe guye, Goday Museko haysada yaagis;
EXO 30:12 “Neeni Isra7eele asaa taybiya wode, issi issi asi ba shempuwa wozanaw Godaas miishe qanxo. Yaatiko neeni enta taybiya wode gadoy enta bolla yeenna.
EXO 30:13 Taybon geliya asi oonika huuphen huuphen geeshsha dunkaanen eretida mizaane ginan bira ciggo. Issi issi asi hessa taw yarsho oothidi immo.
EXO 30:14 Taybon geliya asi oonika laythi laatamanne iyape bolla gidida ubbay Godaas hessa eho.
EXO 30:15 Enti banta shempuwa wozanaw Godaas imota immiya wode, dureyka manqoyka issi gina immofe attishin, durey darsidi woyko manqoy guuthidi immofo.
EXO 30:16 He miishiya Isra7eele asaape ekada, Geeshsha Dunkaaniya naaganaw peeshsha. He miishey enta shempuwa wozanawunne ta enta naagana mela qofisiyaba gidana” yaagis.
EXO 30:17 Goday Museko haysada yaagis;
EXO 30:18 “Meecha keriyanne iya tohuwa naase biratape medha. Iyan haathe tigada Geeshsha Dunkaaniyapenne yarsho bessaafe giddon wotha.
EXO 30:19 Aaroninne iya nayti banta kushiyanne banta tohuwa yan meeceto.
EXO 30:20 Enti Geeshsha Dunkaaniya gelanaapenne yarsho yarshanaape sinthe hessa oothanaw bessees. Hessa enti oothiko hayqope attoosona.
EXO 30:21 Enti hayqonna mela, banta kushiyanne banta tohuwa meecetanaw bessees. Hessi Aaronasinne iya sheeshatas, yaa yeletetha ubbaas merinaa woga gidana” yaagis.
EXO 30:22 Goday Museko haysada yaagis;
EXO 30:23 “Geeshsha sawota, hessatika; usupun kilo giraame gukiya karbe, heedzu kilo giraame sawiya qarafa, heedzu kilo giraame sawiya maata,
EXO 30:24 usupun kilo giraame burgude eka. He ubbayka geeshsha dunkaanen eretida mizaaniya gina gido. Hessata bolla oyddu litiro zayte guja.
EXO 30:25 Hessata shittoda walakada, sawiya geeshsha zayte oothada,
EXO 30:26 Geeshsha Dunkaaniyanne Caaqo Taabotiya tiya.
EXO 30:27 Xarpheezanne iya miisheta, xompe wothiya kocaanne iya miisheta, ixaane cuyisiya xarpheezaa,
EXO 30:28 xuussa yarsho bessinne iyan bolla de7iya miisheta ubba, meecha keriyanne iya tohuwa tiya.
EXO 30:29 Enti polo geeshshi gidana mela enta dummaya. Enta bochiya oonika geeshshi gidana.
EXO 30:30 “Hessafe guye, Aaroninne iya nayti kahine gididi taw haggaazana mela enta tiyada dummaya.
EXO 30:31 Isra7eele asaas, ‘Haysi Geeshsha shuumatetha zaytey yaa yeletethaas tana haggaazanaw maaddiya zayte gido.
EXO 30:32 He zaytiya coo asa bolla gussofa; qassi ay zayteka iya oothida ogiyan oothofa. Zaytey geeshshi gidida gisho, hinteka iya geeshshatetha erite.
EXO 30:33 He shittuwa giigisiya asi, woyko kahine gidonna hara asi tiyiya oonika ta asaa giddofe hileto’ yaaga” yaagis.
EXO 30:34 Goday Museko haysada yaagis; “Geeshsha sawota, xokiya mitha made, dhaadhe keethan de7iya shitto, sawiya madenne sawiya ixaane eka; enta ubbaa mizaaney issi gina gido.
EXO 30:35 Shittoda walahetida ixaane oothada enta go7eta. Walahi baynanne geeshshi gidana mela iyan maxine yegga.
EXO 30:36 Iyape guuthara ekada liiqisa caddada, taani neera gahetiya Geeshsha Dunkaaniya giddon, Caaqo Taabotiya sinthan wurxa. He ixaaney new polo geeshshi gido.
EXO 30:37 Hintew go7etanaw he ixaaniya ay ogenka giigisopite. Hessi taw dummatidaysa gideysa erite.
EXO 30:38 Hessatho oothidi, iya sawuwa singidi ufaytanaw koyiya oonika, ta asaa giddofe dhayana” yaagis.
EXO 31:1 Goday Museko haysada yaagis;
EXO 31:2 “Taani Yihuda sheeshape gidida Huura na7aa na7aa, Ure na7aa, Basili7eela dooras.
EXO 31:3 Taani iya ta Ayyaanan kunthas; taani hiilla, akeekanne ooso ubbaa oothiya era iyaw immas.
EXO 31:4 Hessika, hiillan oothana oosota halchidi worqafe, birapenne naase biratape dumma dummaba kessidi oothanaasa.
EXO 31:5 Hessadaka, al7o shuchu massidi giigiseysa, mithi masseysanne hara ooso ubbaa oothana mela cincatethi immas.
EXO 31:6 Qassi iya maaddana mela Daane sheeshi gidida Ahisamaaka na7aa Eliyaaba dooras. Taani nena kiittidaba ubbaa enti oothana mela kushe hiilla eriya harata ubbaas gita eratethi immas.
EXO 31:7 Enti oothanabati, Geeshsha Dunkaaniya, Caaqo Taabotiya, iya bolla wothiya nagara atotetha kamaa, Dunkaaniya giddon go7etiya miishe ubbaa,
EXO 31:8 xarpheezanne iya miisheta, walahi bayna worqafe oosetida xompe wothiya kocaanne iya miishe ubbaa, ixaane cuyisiya xarpheezaa,
EXO 31:9 xuussa yarsho bessinne iya miishe ubbaa, meecha keriyanne iya tohuwa,
EXO 31:10 Aaroninne iya nayti kahinetethan haggaazishe ma7iya kahinetetha ma7uwa,
EXO 31:11 shuumatetha zaytiyanne Geeshsha Bessaas haniya sawiya ixaaniya, taani nena kiitidaysada enti oothana” yaagis.
EXO 31:12 Goday Muse haysada yaagidi kiittis;
EXO 31:13 “Isra7eele asaa, ‘Ta Sambaata naagite. Hessi taani, Goday, hintena taw geeshsha dere oothada dooridaysa bessiya malla gididi, yaana yeletetha ubbaas taapenne hintefe giddon de7o.
EXO 31:14 He gallasay geeshshi gidiya gisho, iya bonchite. Sambaata bonchonaynne he gallasan ooso oothiya oonika ta asaa giddofe dhayo woyko hayqo.
EXO 31:15 Hinte ooso oothanaw bessiya usupun gallasati de7oosona. Shin laapuntha gallasay Godaas dummatida, shempo gallas. Sambaata gallasan ooso oothiya oonika hayqo.
EXO 31:16 Isra7eele yeletetha ubbay ha Sambaata gallasaa merina caaqo malla oothidi boncho.
EXO 31:17 Taani usupun gallasan saluwanne sa7aa medhida gishonne laapuntha gallasan ooso aggada shempida gisho, ta giddoninne Isra7eeleta giddon hessi merinaw eqidi de7iya malla gidana’ yaaga” yaagis.
EXO 31:18 Goday Muse Siina zuma bolla odiseysa ongida wode, I ba biradhen xaafida tammu kiitata oykida nam7u loche shuchata Muses immis.
EXO 32:1 Asay, Musey zumaa bollafe wodhanaw gam7idaysa be7ida wode Aaronako yidi, “Nuna kaalethishe naagana xoossata nuus ootha. Gibxe biittafe nuna kessida Musey waanidaako eroko” yaagidosona.
EXO 32:2 Aaroni entako, “Hinte macheta, hinte adde naytanne hinte macca nayta haythan de7iya worqaa kessidi, taw haa ekidi yiite” yaagis.
EXO 32:3 Asi ubbay banta haythafe worqaa kessidi, Aaronas ehidosona.
EXO 32:4 I hessa entafe ekidi, taman sheeshidaape guye, qoxidi, worqa mara misile oothidi medhis. Enti, “Isra7eeleto, nuna Gibxe biittafe kaalethidi kessida nu xoossati haysata” yaagidosona.
EXO 32:5 Aaroni hessa be7ida wode, he maraa sinthan yarsho besse giigisidi, “Wonto Godaa bonchiya ba7aale gallas gidana” yaagidi erisis.
EXO 32:6 Wontetha gallas guura asay dendidi, xuussa yarshonne issifetetha yarsho yarshidosona. Yaatidi, asay maanawunne uyanaw uttidosona. Mi uyi simmidi, duranawunne pokoba hananaw dendidosona.
EXO 32:7 Goday Museko, “Neeni Gibxefe kessada, ehida ne asay nagara oothidi, bantana tunisida gisho ellesada duge wodha.
EXO 32:8 Taani enta kiitida ogiyape enti ellesidi shiretidosona. Worqa sheeshidi mara misile oothidi, bantaw eeqa medhidi iya goyinnidosona. Iyaw yarshidi, ‘Nuna Gibxe biittafe kessida nu xoossay haysa’ yaagidosona.
EXO 32:9 Goday Museko, ha asay ay mela wozana muumeko ta be7as.
EXO 32:10 Ha77i ta hanqoy enta bolla eexin, taani enta dhaysanaw giigetida gisho, neeni tana diggofa. Yaatada, taani nena gita dere oothana” yaagis.
EXO 32:11 Shin Musey ba Godaa, Xoossaa haysada yaagidi woossis; “Abeeti Godaw, neeni ne gita wolqaaninne ne mino kushiyan Gibxefe kessada ehida ne asaa bolla ne hanqoy ayis eexii?
EXO 32:12 Ne hessa oothiyaba gidiko, Gibxeti, ‘Goday entana dereta bolla wodhanawunne biittafe pittidi dhaysanaw kessis’ ayis gaanee? Ne yashshiya hanquwafe simma. Ne asaa dhaysanaw qopidaysa agga.
EXO 32:13 Ne aylleta Abrahaame, Yisaaqanne Yayqooba hassaya. Neeni entaw, ‘Taani hinte sheesha salo xoolintoda darsana; taani hintew immana gida ha biitta ubbaa hinte sheeshatas immana; enti he biitta merinaw laattana’ gada ne huuphen ne caaqida caaquwa qopa” yaagis.
EXO 32:14 Hessa gisho, Goday ba deriya bolla iitabaa ehanaw qopidaysa aggidi, enta maaris.
EXO 32:15 Musey nam7u baggara xaafetida, tammu kiitati de7iya nam7u loche shuchata ba kushen oykidi, zumaape duge wodhis.
EXO 32:16 He masetida shuchata giigisiday Xoossaa; shuchata bolla woocidi xaafidayka Xoossaa.
EXO 32:17 Iyyasuy asaa kooshincha si7ida wode, Museko, “Asay siiratida bessan ola waasoy si7etees” yaagis.
EXO 32:18 Musey zaaridi, “Haysi xoonida asa ceeqo woyko xoonetida asa yeeho gidonashin, yetha waaso” yaagis.
EXO 32:19 Musey gutaako matida wode maranne dursaa be7idi daro hanqetis. He wode ba kushen oykidi yida, masetida shuchata zumaa xaphon holidi mentherethis.
EXO 32:20 Enti medhida maraa ekidi, taman xuuggis. Hessafe guye, liiqana gakanaw gaaccidi haathara maadhidi, Isra7eele asay uyanaada oothis.
EXO 32:21 Musey Aaronako, “Ha asay new ay oothin, enta haysa mela iita nagara banta bolla oothana mela oothadii?” yaagis.
EXO 32:22 Aaroni zaaridi, “Ta godaw, tana hanqetofa. Ha asay iitaba oothanaw ay mela koyaako ne eraasa.
EXO 32:23 Enti, ‘Nuna Gibxefe kessidi ehida, Musey waanidaako nu eroko. Hessa gisho, kaalethiya xoossata nuus ootha’ yaagidosona.
EXO 32:24 Taani entako, ‘Hinte haythan de7iya worqaa kessidi, hammite’ yaagas. Enti taw immida worqaa taani taman yeggin, ha mara misiley keyis” yaagis.
EXO 32:25 Aaroni asaa coo yeddi aggin, asay ba morketa sinthan kawuyidi, kadhetidaysa Musey be7is.
EXO 32:26 Hessa gisho, Musey gutaa geliya pengiyan eqidi, “Godaa bagga gidiya asi oonika taako yo” yaagis. He wode Leeweti ubbay iyako shiiqidosona.
EXO 32:27 I, entako, “Goday, Isra7eele Xoossay, hinte issoy issoy hinte mashshaa shoddidi, gutaas ha pengefe hini penge gakanaw bidi, hinte ishata, hinte laggetanne hinte shoorota wodhite” yaagis.
EXO 32:28 Leeweti Musey kiitidaysada oothidi, he gallas heedzu mukulu gidiya asaa wodhidosona.
EXO 32:29 Musey Leewetako, “Hachi hinte, hinte naytanne hinte ishata wodhanaw kiitetidi hintena Godaas dummayideta. Goday hintena anjis” yaagis.
EXO 32:30 Wontetha gallas Musey asaako, “Hinte iita nagara oothideta; shin ha77i taani Godaako zuma bolla keyada, ooni eri hinte nagaras atotethi demmonna aggike” yaagis.
EXO 32:31 Yaatin Musey Godaako simmidi bidi, “Ha asay iita nagaraa oothidosona; enti bantaw worqafe xoosse medhidosona.
EXO 32:32 Shin hayyana, ha77i enta nagaraa atto yaaga. Hessi hanonnaba giiko, ne asaa ne xaafida mazgabiyape ta sunthaa qucha” yaagis.
EXO 32:33 Goday zaaridi Museko, “Taani ta mazgabiyape quchana asaa sunthay, ta bolla nagara oothidaysata sunthaa.
EXO 32:34 Ha77i bada, ha asaa taani new odida bessaa kaaletha. Ta kiitanchoyka nena kaalethanaysa akeeka, shin taani ha asaa enta nagara gisho seerana wodey yaanaysi attenna” yaagis.
EXO 32:35 Aaroni worqafe mara misiliya medhanaada oothiday asaa gidiya gisho, Goday asaa bolla wolqaama gado yeddis.
EXO 33:1 Hessafe guye, Goday Museko, “Neeninne ne Gibxefe kessida asay ha bessaafe dendidi, taani Abrahaames, Yisaaqas, Yayqoobasinne enta sheeshatas immana yaagada caaqida biitta biite.
EXO 33:2 Taani hinte sinthan kiitanchuwa kiittana. Kanaaneta, Amooreta, Hiteta, Parzeta, Hiwetanne Yaabuseta taani gooddada kessana.
EXO 33:3 Maathinne eessi goggiya he biitta biite. Shin hinte, wozani muumida asi gidiya gisho ta hintena ogen dhaysona mela hintera biike” yaagis.
EXO 33:4 Asay he yashshiya odaa si7idi yeekidosona. He wodepe doomidi ubbay banta alleequwa aathibokona.
EXO 33:5 Goday Museko, Isra7eele asaas haysada yaagada oda yaagis; “Hinte wozana muume asi. Taani hintera hari attoshin guutha wodeska biiko, hinte taape dhayana. Ha77i hinte, hinte alleeqota kessite; taani hinte bolla oothanaba bessaana yaaga” yaagis.
EXO 33:6 He wode Isra7eeleti Koreeba zumaa aggidi bidaape guye, banta alleeqota aathibokona.
EXO 33:7 Isra7eele asay bishe siiratiya guta ubban Musey dunkaaniya gutaape haassidi tokees. He dunkaaney, “Godaara gahetiya Dunkaane” geetetidi xeegetis. Godaa oychanaw koyiya ubbay yaa bees.
EXO 33:8 Musey dunkaaniyako biya wode asa ubbay ba dunkaaniya pengen pengen eqidi, Musey yaa gelana gakanaw iya be7oosona.
EXO 33:9 Musey yaa gelidaape guye, shaara tuussay wodhidi Dunkaaniya pengen eqees. Goday shaara giddon gididi Musera odetees.
EXO 33:10 Asay shaara tuussa Dunkaaniya pengiyan be7ida wode ubban, ba pengen pengen gulbatidi Godaas goyinnoosona.
EXO 33:11 Asi ba laggera odeteysada Goday Musera som7on odetees. Hessafe guye, Musey gutaa simmees. Shin iya maaddiya na7atethay, Nawe na7aa Iyyasuy, Godaara gahetiya Dunkaaniyape shaaketenna.
EXO 33:12 Musey Godaako, “Neeni tana, ha asaa ta gida biitta kaaletha yaagadasa. Shin taara baana mela neeni kiittey ooneko, tana erisabaaka. Neeni, tana ereysanne tanan ufayteysa taw qoncisadasa.
EXO 33:13 Hessi tuma gidiko, ta nena haggaazana melanne guja ufaysana mela ne ogiya tana tamaarsa. Ha asay ne dere gideysa be7a” yaagis.
EXO 33:14 Goday zaaridi, “Taani, neera baana melanne new saro immana mela koyay?” yaagis.
EXO 33:15 Musey zaaridi, “Neeni nuura boonnaba gidiko, haysafe nuna kessofa.
EXO 33:16 Neeni nuura boonnaba gidiko, tananinne ne asan ne ufaytidaysa asa ubbay waatidi eranee? Biitta ubban de7iya hara asa ubbaafe taaninne ne asay dummatey ne nuura de7eysan gidenneyee?” yaagis.
EXO 33:17 Goday Museko, “Taani nena eriya gishonne nenan ufaytida gisho, ne tana oychidaysa ubbaa oothana” yaagis.
EXO 33:18 Musey Godaako, “Hayyana ne kumetha bonchuwa tana bessa?” yaagis.
EXO 33:19 Goday zaaridi, “Taani ta maarotanne ta lo77otetha ubbaa ne sinthara aathana. Ta geeshsha sunthaa ne matan awaajana. Taani Godaa; ta dooridaysata maarananne entaw qadhetana.
EXO 33:20 Shin oonika ta som7uwa be7idi paxa doonna gisho, neeni ta som7uwa be7aka” yaagis.
EXO 33:21 Shin, “Neeni zaalla bolla eqanaw haysan ta matan bessi de7ees.
EXO 33:22 Ta bonchoy aadhiya wode taani za77ida zaalla giddon nena wothana. Ta aadhana gakanaw ta kushiyan nena kammana.
EXO 33:23 Hessafe guye, taani ta kushiya denthana; neeni ta zokuwa be7ana, shin ta som7uwa be7aka” yaagis.
EXO 34:1 Goday Museko, “Koyroyisata daaniya nam7u loche shuchata massada giigisa. Taani he shuchata bolla kase neeni menthida shuchata bolla de7iya qaalata xaafana.
EXO 34:2 Wonto wonta guura taara gahetanaw Siina Zumaa huuphiya keya.
EXO 34:3 Neera oonika keyopo woyko zumaa bolla awunka bentofo. Hari attoshin dorsa woyko mehe wudey zumaa xaphon heemetofo woyko moopo” yaagis.
EXO 34:4 Hessa gisho, Musey koyro shuchata daaniya nam7u shuchata massidi, Goday kiitidaysada, shuchata oykidi wonta guura Siina zuma bola keyis.
EXO 34:5 Goday shaarara wodhidi, iyara yan eqidi, “Taani Godaa” yaagidi ba geeshsha sunthaa awaajis.
EXO 34:6 Goday Muse sinthara aadhishe haysada yaagidi awaajis; “Taani Xoossaa, ta sunthay Godaa. Taani, qadheynne maarotay kumida Xoossaa. Taani danda7aninne merina siiqon kumidaysanne daro ammantheysa.
EXO 34:7 Taani, ta asaas geliya qaala mukulu yeletethi gakanaw naageysanne iitatethaa, makallanne nagaraa atto geysa. Shin heedzanthonne oyddantho yeletethi gakanaw aawata nagara gisho nayta seeronna aggike” yaagis.
EXO 34:8 Musey ellesidi biittan gufannidi goyinnis.
EXO 34:9 I zaaridi, “Abeeti Godaw, neeni tanan ufaytiyaba gidiko, nuura issife yedha. Haysi asay si7onna asi; nu iitatethaanne nu nagaraa atto yaagada, nuna ne ase ootha” yaagis.
EXO 34:10 Goday Museko, “Taani Isra7eele asaara caaqana. Haysafe kase biitta bolla awunka hani eronna malaalsiyaba ne asaa sinthan oothana. Taani Goday, ay mela malaalsiyaba oothiyako, neeni enta giddon de7iya asay be7ana.
EXO 34:11 Hachi taani hintena kiittiya kiita naagite. Hinte sinthafe Amooreta, Kanaaneta, Hiteta, Parzeta, Hiwetanne Yaabuseta taani gooddana.
EXO 34:12 Enti hintew xihe gidonna mela hinte geliya biittan de7iya asaara caaqofite.
EXO 34:13 Enta yarsho bessata laallite; goyinno tuussata mentherethite. Asheera geetetiya macca xoosse misile tuussata qanxerethite.
EXO 34:14 Taani Goday, ta bonchuwa hara xoossatara koxonna Xoosse gidiya gisho, taape hara xoossatas goyinnofite.
EXO 34:15 He biittan de7iya asatara ayba caaqoka caaqofite. Enti banta xoossata goyinniya wodenne entaw yarshiya wode, enti hintena bantara issifana mela oychiko, hinte enti banta xoossatas yarshiya kathaa maanaw paacetidi, taw ammanetona ixana.
EXO 34:16 Qassi hinte enta macca naytape hinte adde naytas immiko, he wode he macca nayti banta xoossata goyinnidi, hinte adde naytika taw ammanetona ixidi, banta xoossata goyinnana mela oothana.
EXO 34:17 “Biratape qoxetidi, medhetida xoossata goyinnofite.
EXO 34:18 “Uythaa Ba7aale bonchite. Hinte Gibxefe keyday, Abiiba ageenan gidiya gisho, taani hintena kiitidaysada, he ageenan, laapun gallas gakanaw uythi miite.
EXO 34:19 “Bayra yeletiya adde na7i ubbaynne bayra yeletiya mehe adde ubbay tabaa.
EXO 34:20 Koyro yeletida hare mari dorsa marara laammada woza. Wozonna ixiko, iya morgiya mentha. Bayra yeletida adde na7a ubbaa woza. “Oonika immiyaba oykonna mela kushe ta sinthan shiiqopo.
EXO 34:21 “Usupun gallas oothite, shin laapuntha gallasan shempite. Zeriya wode gidin woyko kathaa cakiya wode laapuntha gallasan shempite.
EXO 34:22 “Koyro hinte gistiya cako doomiya wode, Katha Shiisho Ba7aale bonchite. Qassi laytha wursetha kathaa shiishiya wode, Shaqara Ba7aale bonchite.
EXO 34:23 Laythan heedzu toho Isra7eele adde ubbay medhetetha Godaa, Isra7eele Xoossaa goyinnanaw yo.
EXO 34:24 Kawotethata taani hinte sinthafe yedetha kessada hinte zawa aassana. Hinte tana goyinnanaw laythan heedzu toho yaa wode, oonika hinte biitta olidi ekanaw amottenna.
EXO 34:25 “Hinte taw mehe yarshiya wode, irsho yeggidi uukida uythara shishopitte. Paasika bonchiya gallasas yarshida yarshuwafe wontas aybaka ashshofite.
EXO 34:26 “Hinte gaden bayra kaxida kathaafe koyro ayfiya Godaa hinte Xoossaa keethi ehite. “Deesha mari iya aaye maathan doysopite” yaagis.
EXO 34:27 Goday Museko, “Taani neeranne Isra7eele asaara caaqo geley ha qaalatan gidiya gisho, ha qaalata xaafa” yaagis.
EXO 34:28 Musey moonnanne uyonna, oytamu gallasinne oytamu qamma Godaara zuma bolla gam7is. I, caaqo qaala gelida tammu kiitata loche shuchatan xaafis.
EXO 34:29 Musey Godaara odetishe gam7idi, tammu kiitata oykida nam7u loche shuchata ekidi Siina Zumaape wodhiya wode iya som7oy phoolees, shin I hessa eribeenna.
EXO 34:30 Aaroninne Isra7eele asa ubbay Muse xeellidi, iya som7oy phooleysa be7idi, iyako shiiqanaw yayyidosona.
EXO 34:31 Shin Musey enta xeegis. Aaroninne Isra7eele halaqati ubbay iyako shiiqin, I enta odisis.
EXO 34:32 Hessafe guye, Isra7eele asa ubbay iyako shiiqin, Goday iyaw Siina zuma bola immida kiita ubbaa I entaw immis.
EXO 34:33 Musey entara odeteysa wursida wode ba som7uwa laxanan kammis.
EXO 34:34 Shin Musey Godaa sinthe, iyara odetanaw geliya wode laxana ba som7uwafe qaarees. Yaape keyiya wode, Goday iya kiittidaba ubbaa Isra7eele asaas odees.
EXO 34:35 He ubban enti iya som7oy phooleysa be7oosona. Hessa gisho, Musey Godaara odetanaw baana gakanaw, ba som7uwa laxanan kammees.
EXO 35:1 Musey Isra7eele asaa ubbaa xeegidi, “Hinte oothana mela Goday kiittidabay haysa;
EXO 35:2 Saaminta giddon usupun gallasa xalaalan ooso oothite; shin laapuntha gallasay hintew geeshsha gallas; Godaaska dummatida shempo Sambaata. He gallasan ooso oothiya oonika hayqanaw bessees.
EXO 35:3 Sambaata gallas hinte son tama eethofite” yaagis.
EXO 35:4 Musey Isra7eele asaako, “Goday haysada yaagidi hintena kiittis;
EXO 35:5 Godaas hinte wozanay immo giyaba immanaw ehite. Hinte immanaw ehiyabati worqaa, bira, naase birata,
EXO 35:6 kaalose qacina, ocha teera daaniya qacina, zo7o qacinanne al7o liino, deesha ikise,
EXO 35:7 zo7o qalamen yeggi kessida dorsa ite, lo77o do7a ite, soqala mithi,
EXO 35:8 xompes shamaho zayte, shuumatetha zayte, iyan yegetiya sawuwanne ixaane sawo,
EXO 35:9 efuudiyasinne tiran ma7etiya ma7uwas haniya margide geetetiya shuchaanne hara alleeqota eho.
EXO 35:10 “Hinte giddon de7iya kushe hiillancho ubbay yidi, Goday kiitidaysa ubbaa ootho.
EXO 35:11 Geeshsha Dunkaaniya, iya gaatha kamaanne kare kamaa, kaqota, tuuqeta, liyoota, tuussatanne enti eqiya tohota;
EXO 35:12 Taabotiyanne iya tookiya kaso mithata, nagara atotetha kamaanne Taabotiya genthiya magarajuwa;
EXO 35:13 xarpheezaa, iya tookiya kaso mithatanne, iya miisheta ubbaanne Godaa sinthan wothiya geeshsha uythaa;
EXO 35:14 xompe wothiya kocaa, iya miisheta, xompiyanne xompe zaytiya;
EXO 35:15 ixaane cuyisiya xarpheezanne iya tookiya kasota, shuumatetha zaytiyanne sawiya ixaane, Geeshsha Dunkaaniya penge magarajuwa;
EXO 35:16 xuussa yarsho bessinne iya naase birata zarzariya, iya tookiya kasotanne iya miisheta ubbaa, naase biratape oosetida meecha keriyanne iya tohuwa;
EXO 35:17 dabaaba godaa gesheta, tuussatanne enta tohota, dabaaba penge magarajuwa,
EXO 35:18 Geeshsha Dunkaaniyanne dabaaba dunkaaniya tole dhishetanne enta wodorota;
EXO 35:19 Aaroninne iya nayti Geeshsha bessan haggaazishe ma7anaw alleeqetidi oosetida boncho ma7ota ootho” yaagis.
EXO 35:20 Hessafe guye, Isra7eele asa ubbay Muse sinthafe keyidosona.
EXO 35:21 Asa ubbay ba wozanan immo immo gidaba Geeshsha Dunkaaniyas, iya giddon oosetiya ooso ubbaasinne boncho kahine ma7otas koshshiyaba ubbaa ehidosona.
EXO 35:22 Immanaw koyida macci adde ubbay worqa alleeqota, siidhe worqata, migidota, qoodhe worqa ehidi, Godaas imo oothidi immidosona.
EXO 35:23 Kaalose qacina, ocha teera daaniya qacina, zo7o qacina, al7o liino, woyko deesha ikise, woyko zo7o qalamen yeggi kessida dorsa ite woyko, lo77o do7a itey de7iya asi ubbay ehis.
EXO 35:24 Bira woyko naase birata immanaw danda7iya ubbay banta imota Godaas immidosona. Qassi soqala mithi de7iya asi ubbay dumma dumma oosuwas ehis.
EXO 35:25 Kushe hiilla maccasa ubbay banta kushen suqida kaalose qacina, ocha teera daaniya qacina, zo7o qacinanne al7o liino ehidosona.
EXO 35:26 Qassika imota immanaw koyida maccasa ubbay deesha itepe dooqetida wodoro ehidosona.
EXO 35:27 Halaqati efuudiyasinne tiran ma7etiya ma7uwas haniya margidenne hara lo77o shuchata,
EXO 35:28 qassika enti ixaanen, shuumatethasinne xompes maaddiya shamaho zayten yegetiya sawo ehidosona.
EXO 35:29 Isra7eele asa ubbay, oothana mela Goday Muse baggara kiitida oosuwas haniya imotata ubbaa banta dosan Godaas ehidosona.
EXO 35:30 Musey Isra7eele asaako haysada yaagis; “Goday Yihuda sheeshape gidida Huura na7aa na7aa, Ure na7aa, Basili7eela dooris.
EXO 35:31 Goday iya ba Ayyaanan, hiillan, akeekaninne ooso ubbaa oothiya eran kunthis.
EXO 35:32 Hessika, hiillan oothana oosota halchidi worqafe, birapenne naase biratape dumma dummaba kessidi oothanaasa.
EXO 35:33 Hessadaka, al7o shuchu massidi giigiso, mithi masethinne hara ooso ubbaa oothana mela cincatethi immis.
EXO 35:34 Qassi iyasinne Daane sheeshi gidida Ahisamaaka na7aa Eliyaabas, banta hiilla harata tamaarsana mela eratethi immis
EXO 35:35 Enti dumma dumma ooso oothana mela ooso halcho kessana mela, kaalosen, ocha teera daaneysaninne zo7o suufe qacinan al7o liino alleeqisidi, daddiya hiillatethi immis. Goday enta, eratethan kunthis. Enti ubbay dumma dumma ooson luxida hiillancho gididosona.
EXO 36:1 “Hessa gisho, Basili7eeli, Eliyaabinne Geeshsha Dunkaaniya keexana mela Goday hiillanne eratethi immida asa ubbay, Goday kiitidaysada ubbaba oothana” yaagis.
EXO 36:2 Musey Basili7eela, Eliyaaba, Goday dumma eratethi immidaysatanne ooso oothanaw koyiya ubbaa xeegidi, oosuwa doomana mela kiittis.
EXO 36:3 Enti, Isra7eele asay Geeshsha Dunkaaniya oothanaw ehida imo ubbaa Muse kushepe ekidosona. Qassi asay ba dosan immiya imota wonta wonta ehuwa aggibokona.
EXO 36:4 Yaatin, Geeshsha Dunkaaniya oothiya hiillanchoti banta oosuwa essidi, museko bidi,
EXO 36:5 “Asay, Goday kiitida oosuwas koshsheysafe aathidi eho bolla de7oosona” yaagidosona.
EXO 36:6 Musey, “Geeshsha Dunkaaniya keexanaw oonika immiyaba ehopo” yaagidi kiittin, asay eheysa aggaagidosona.
EXO 36:7 Enti ehida imotay ooso ubbaa oothi polanaw gididi palahees.
EXO 36:8 Oosuwa ootheysatape hiillan aadheysati Geeshsha Dunkaaniya oothidosona. Enti iya al7o liinope, kaalosen ocha teera daaneysaninne zo7o qacinan alleeqisidi daddida tammu gesheta giigisidi, iya bolla kiruubeta misiliya sikidosona.
EXO 36:9 Magarajoti ubbay issi gina gididi, adussatethay laatamanne oyddu wadha, gompay oyddu wadha.
EXO 36:10 Ichashu gesheta issife gathidi sikidosona; qassi hanko attida ichashu geshetaka hessada oothidosona.
EXO 36:11 Issife gathidi sikida geshetape issi magarajuwas wursetha gaxan kaalose afilape oosetida sagaayota medhidosona. Qassi issife gathidi sikida hanko geshetape issuwa gaxanka hessada oothidosona.
EXO 36:12 Enti issife siketida koyro magarajuwa bolla koyro maaran kaalose afilape oosetida ishatamu sagaayota, hessadaka nam7antho magarajuwa bolla wursetha maaran, hanko sagaayota ginan, ishatamu sagaayota oothidosona.
EXO 36:13 Enti nam7u baggan de7iya gesheta gasethidi issino oothanaw worqafe ishatamu oykiya bessata medhidosona.
EXO 36:14 Geeshsha Dunkaaniya bollara kammanaw tammanne issi gesheta deesha ikisepe daddidosona.
EXO 36:15 Tammanne issi gesheta adussatethaa laatamanne usupun wadha, gompaa oyddu wadha oothidi medhidosona.
EXO 36:16 Ichashu gesheta issi baggara, qassi usupun gesheta hanko baggara gathidi sikidosona.
EXO 36:17 Woli gathidi sikida geshetape wursetha magarajuwa macaran ishatamu sagaayota, qassi woli gathidi sikida hanko geshetape wursetha magarajuwa macaran ishatamu sagaayota medhidosona.
EXO 36:18 Nam7u baggara de7iya gesheta gasethidi issi kama oothanaw naase biratape ishatamu oykiya bessata medhidosona.
EXO 36:19 Dunkaaniya kammanaw zo7o qalamen yeggi kessida dorsa ite, qassi iya bollara kammanaw lo77o do7a ite giigisidosona.
EXO 36:20 Geeshsha Dunkaaniya tuuqeta soqala mithafe kessidosona.
EXO 36:21 Issi issi tuuqiya adussatethay tammu wadha, gompay issi wadhanne takadho.
EXO 36:22 Issi tuuqiya issuwara gasethanaw nam7u luhoti de7oosona. Geeshsha Dunkaaniya tuuqeta ubbaa hessada oothidosona.
EXO 36:23 Geeshsha Dunkaaniyas dugeha baggara laatamu tuuqeta medhidosona.
EXO 36:24 Issi issi tuuqetas nam7u toho medhidi, he tohota oythanaw oytamu luhota biratape giigisidosona.
EXO 36:25 Geeshsha Dunkaaniyas pudeha baggara laatamu tuuqeta medhidosona.
EXO 36:26 Issi issi tuuqetas nam7u toho medhidi, he tohota oythanaw oytamu luhota biratape giigisidosona.
EXO 36:27 Geeshsha Dunkaaniyas guye baggan, wuloha baggara usupun tuuqeta medhidosona.
EXO 36:28 Geeshsha Dunkaaniya guye baggan de7iya maazanetas nam7u tuuqeta giigisidosona.
EXO 36:29 He nam7u maazane tuuqeti xaphope xeera gakanaw oyketi bidosona. Nam7u maazaniyan de7iya nam7u tuuqeti hessada hanidi oosetidosona.
EXO 36:30 Hessa gisho, issi issi tuuqiyas garsan nam7u nam7u tohoti de7oosona. Hospun tuuqetas biratape oosetida tammanne usupun tohoti de7oosona.
EXO 36:31 Qassi enti soqala mithafe tammanne ichashu liyoota kessidosona. Ichashu liyooti Geeshsha Dunkaaniya issi bagga miyen,
EXO 36:32 qassi ichashu liyoota hanko bagga miyen, hessadaka ichashu liyoota guye baggara wuloha baggan wothidosona.
EXO 36:33 Tuuqetas miye baggara giddon de7iya liyoy, ha gaxape ya gaxa gakanaw kanthi keyana mela oothidosona.
EXO 36:34 Tuuqetanne liyoota worqan lanxidosona. Liyooti enta giddora kanthi aadhana mela worqa sagaayota tuuqetara oysethidosona.
EXO 36:35 Magarajuwa al7o liinope kaalosen, ocha teera daaneysaninne, zo7o qacinan alleeqisidi oothidosona. He magarajuwa bolla kiruube misileta sikidosona.
EXO 36:36 Magarajuwa kaqanaw oyddu tuussata soqala mithafe giigisidi, worqan lanxidosona. Yaatidi worqa sagaayota entas giigisidosona. Qassi tuussata essiya oyddu tohota bira biratape medhidosona.
EXO 36:37 Geeshsha Dunkaaniya pengiyas al7o liinope kaalosen, ocha teera daaneysafenne zo7o qacinan alleeqisid magarajo giigisidosona.
EXO 36:38 Qassi iyaw kocati de7iya ichashu tuussata medhidi, entaw xeeranne tohuwa worqan lanxidosona. Tuussatas naase biratappe oosetidi ichashu tohota giigisidosona.
EXO 37:1 Basili7eeli Taabotiya soqala mithafe giigisis. Taabotiya adussatethay nam7u wadhanne bagga, gompaynne geesay issi wadhanne bagga.
EXO 37:2 Taabotiya giigisidi, gaathaanne kariya walahi bayna worqan lanxis. Iya yuushuwa bollaka worqan lanxis.
EXO 37:3 Oyddu worqa sagaayota Taabotiyas oyddu gedata bolla, issi baggara nam7u sagaayota, qassi hanko baggara nam7u sagaayota aathis.
EXO 37:4 Yaatidi soqala mithafe oosetida kasota kessidi enta worqan lanxis.
EXO 37:5 Taabotiya tookanaw, Taabotiyas miyiyan de7iya sagaayotan kasota aathis.
EXO 37:6 Walahi bayna worqafe, adussatethay nam7u wadhanne bagga, gompay issi wadhanne bagga gidida nagara atotetha kamaa oothis.
EXO 37:7 Qefey de7iya nam7u kiruubeta qoxetida worqafe oothidi,
EXO 37:8 issi kiruubiya issi baggan, hanko kiruubiya hanko baggan wothidi, atotetha kamuwara issino oothidi medhis.
EXO 37:9 Kiruubeti banta qefiya miccidi, atotetha kamuwa kammidi, issoy issuwa xeelloosona.
EXO 37:10 Adussatethay nam7u wadha, gompay issi wadha, geesay issi wadhanne bagga gidida xarpheezaa soqala mithafe medhis.
EXO 37:11 Walahi bayna worqan iya lanxidi, yuushuwaka worqan lanxis.
EXO 37:12 Hessadaka, gompay takadho gidiya goosse oothidi, iya worqan yuushshi aathidi lanxis.
EXO 37:13 Taabotiya tookanaw maaddiya oyddu worqa sagaayota medhidi, oyddu gedata oyddu maazaneta bolla wothis.
EXO 37:14 Xarpheeza tookanaw kasota aathiya sagaayoti xarpheezaa goossa matan oosetidosona.
EXO 37:15 Xarpheezaa tookiya kaso mithata soqala mithafe kessidi, worqan lanxis.
EXO 37:16 Hessadaka, xarpheezaa bolla wothiya dumma dumma miisheta walahi bayna worqafe medhis. Hessatika saaneta, cilpata, kereta, woyne yarshsho tigiya xuu7ata.
EXO 37:17 Hessafe guye, Basili7eeli xompe wothiya kocaa walahi bayna worqafe oothis. Kocaa essiya tohuwanne tooma qoxetida worqafe giigisis. Alleeqos oosetiya, iya gambuthata, iya wallaxatanne iya ciishshata ubbaa iyara issife oythidi medhis.
EXO 37:18 Issi baggara heedzu tasheti, qassi hanko baggara heedzu tasheti de7iya usupun tasheta iya miyiyan medhis.
EXO 37:19 Usupun tashetas xeeran xeeran heedzu heedzu alleeqo gambuthatinne ciishshati de7iya lawuze mitha ciishshe daaniyaba medhis.
EXO 37:20 Xompe wothiya kocaa giddon de7iya tooma xeeran oyddu alleeqo gambuthatinne ciishshati de7iya lawuze mitha ciishshe daaniyaba medhis.
EXO 37:21 Waathan de7iya heedzu heedzu tashetape garsan issi issi gambuthi oosetis.
EXO 37:22 Gambuthati, tashetinne xompe wothiya kocay issino gididi, walahi bayna worqafe qoxetidi oosetidosona.
EXO 37:23 Xompe wothiya kocaas laapun xompeta, xompe toysiya qaphetanne enta wothiyabata walahi bayna worqafe oothis.
EXO 37:24 Xompe wothiya kocaanne iyaw go7etiya miishe ubbaa oothanaw hastamanne ichashu kilo giraame gidiya, walahi bayna worqa ongis.
EXO 37:25 Basili7eeli ixaane cuyisiya xarpheeza soqala mithafe giigisis. Iyaw oyddu maazaney de7ees. He xarpheezas adussatethaynne gompay issi wadha; qassi geesay nam7u wadha. Oyddu maazaniyan de7iya kaceti iyara issino gidi oyketidi oosetidosona.
EXO 37:26 Iyaw bolla bagga, oyddu miyanne kaceta walahi bayna worqan lanxis, iya yuushuwaka worqan lanxidi yuushshi aathis.
EXO 37:27 Iyaw gaxa bolla tookanaw maaddiya nam7u worqa sagaayota medhidi, nam7u bagga miyiyan wothis. Enti ixaane xarpheezaa tookiya wode kaso mithata aathanaw maaddeyisata.
EXO 37:28 Kaso mithata soqala mithafe kessidi, worqan lanxis.
EXO 37:29 Geeshsha shuumatetha zaytiyanne sawiya lo77o ixaane shittoda walakidi oothis.
EXO 38:1 Soqala mithafe xuussa yarsho bessi oothis. He yarsho bessa adussatethaynne gompay, ichashu ichashu wadha, qassi geesay nam7u wadhanne takadho. Iyaw oyddu maazaney de7ees.
EXO 38:2 Oyddu maazanetara oyketidi oosetida kaceta medhis. Yaatidi, he yarsho bessa naase biratan lanxis.
EXO 38:3 He yarsho bessan go7etiya miisheta, disteta, baldeta, akaafata, ashuwa qaphiya qaphetanne tama cooceta ubbaa naase biratape medhis.
EXO 38:4 Naase biratape gite daaniya teqe yarsho bessaas giigisidi, yarsho bessaas giddo zawa yuushshi aathidi wothis.
EXO 38:5 Tookanaw maaddiya kasota aathanaw, oyddu sagaayota medhidi, oyddu maazaneta bolla wothis.
EXO 38:6 Soqala mithafe yarsho bessa tookiya kaso mithata kessidi, naase biratan lanxis.
EXO 38:7 Ha kasota nam7u miyen de7iya sagaayotan aathis. Yarsho bessaa xawulape giigisidi, gidduwa kaysi oothis.
EXO 38:8 Naase biratape meecha kerenne iya wothiya toho medhis. He naase biratay, Geeshsha Dunkaaniya pengen oothiya maccasati ehida mastootiyape eketis.
EXO 38:9 Geeshsha Dunkaaniyas dabaaba baggaa gechanaw al7o liinope magarajo oothis. Dugeha bagga geshetas adussatethay xeetu wadha.
EXO 38:10 Geshetas kate gidana mela laatamu tuussatanne enti eqiya tohota naase biratape oothis. Enta xam7atanne kaceta bira biratape oothis.
EXO 38:11 Pudeha bagga dabaabayka hessada hanidi oosetis.
EXO 38:12 Wuloha bagga gesheta adussatethay ishatamu wadha. Entaw tammu tuussatinne tuussati eqiya tammu tohoti de7oosona. Tuussatas bira biratape oosetida xam7atinne kaceti de7oosona.
EXO 38:13 Dabaaba geliya pengey de7iya, doloha bagga magarajuwa gompay ishatamu wadha.
EXO 38:14 Issi baggara de7iya magarajuwa adussatethay tammanne ichashu wadha. Iyaw heedzu tuussatinne tuussati eqiya tohoti de7oosona.
EXO 38:15 Hanko baggara de7iya magarajuwa adussatethay tammanne ichashu wadha. Iyaw heedzu tuussatinne tuussati eqiya tohoti de7oosona.
EXO 38:16 Dabaaba yuushuwan de7iya gesheti ubbay al7o liinope oosetidosona.
EXO 38:17 Tuussati eqiya tohoti naase biratape oosetidosona. Xam7ati, kacetinne tuussata xeera goossati bira biratape oosetidosona. Dabaaba yuushuwan de7iya tuussati ubbay bira xam7atan oyketidosona.
EXO 38:18 Dabaaba pengiyan de7iya magarajuwa al7o liinope oothidi, kaalosen ocha teera daaneysaninne zo7o qacinan daddidi alleeqisis. Iyaw hanko dabaaba geshetada adussatethay laatamu wadha; qassi geesay ichashu wadha.
EXO 38:19 Iya, oyddu tohoti de7iya oyddu tuussata bolla kaqis. Kaceti, xaara kammeysatinne xam7ati bira biratape oosetidosona.
EXO 38:20 Geeshsha Dunkaaniya dhishetinne iya yuushuwan de7iya gesheta dhisheti ubbay naase biratape oosetidosona.
EXO 38:21 Tammu kiitata oykida nam7u loche shuchati de7iya bessan, Geeshsha Dunkaaniyan, go7etiya miisheta mazgabey haysa. He miisheta mazgabana mela kahiniya Aarona na7a Itamaara aawatetha garsan de7iya Leeweta Musey kiittis.
EXO 38:22 Yihuda sheeshape gidida Huura na7aa na7aa, Ure na7aa, Basili7eeli, Goday kiitidaysada ubbaba oothis.
EXO 38:23 Daane sheeshape gidida Ahisamaaka na7aa Eliyaabi, kushe hiillanchoy, oothiyabas koyro halcho kessiya asi; I, kaalose, ocha teera daaneysanne zo7o qacinan al7o liino daddidi alleeqisiya asi.
EXO 38:24 Geeshsha dunkaaniya oosuwas hanana mela Godaas imetida worqay geeshsha dunkaanen eretida mizaanen issi mukulu kilo giraame gidis.
EXO 38:25 Taybon de7iya asaape eketida biray geeshsha dunkaanen eretida mizaanen, heedzu mukulunne oyddu xeetanne hastamu kilo giraame gidis.
EXO 38:26 Hessika, taybon gelida adde asay, issoy issoy geeshsha dunkaanen eretida mizaaniya liken koyetiya ubbaa immidosona. Laatamu laythinne iyape bolla gidida, mazgaben gelida, adde asaa tayboy usupun xeetanne heedzu mukulunne ichashu xeetanne ishatama.
EXO 38:27 Geeshsha Dunkaaniyanne magarajota essanaw maaddiya xeetu tohota oothanaw 3,400 kilo giraame bira birata ekidosona. Hessika, issi issi tohoy hastamanne oyddu kilo giraame bira birata ekis.
EXO 38:28 Basili7eeli, attida hastamu kilo giraame bira biratan xam7ata, kacetanne tuussatas xeera goossata oothis.
EXO 38:29 Asay Godaas immida naase biratay 2,425 kilo giraame.
EXO 38:30 He naase biratan Geeshsha Dunkaaniya pengiya essiya tohota, gite daaniyabara naase birata yarsho bessaanne iya giddon go7etiya dumma dumma miisheta medhis.
EXO 38:31 Qassi dabaaba yuushuwan de7iya dirsaa tohotinne pengiya bolla eqida tohoti, Geeshsha Dunkaaneynne iya yuushuwan de7iya dabaaba dirsaa dhisheti ubbay he naase biratape oosetidosona.
EXO 39:1 Kahineti Geeshsha Dunkaaniyan oothiya wode ma7ana boncho ma7ota, kaalosen, ocha teera daaniya qacinapenne zo7o qacinan daddidosona. Aaroni ma7iya kahinetetha ma7uwa Goday Muse kiitidaysada oothidosona.
EXO 39:2 Qassi efuudiya, worqafe, kaalosepe, ocha teera daaniya qacinape, zo7o qacinapenne al7o liinope daddidosona.
EXO 39:3 Enti worqaa qoxidi, lee7isidi, iya qaraaridi, qacinada kessidosona. Yaatidi kaalosen, ocha teera daaneysan, zo7o qacinaninne al7o liinon alleeqisidi daddidosona.
EXO 39:4 Enti nam7u hashiyara wodhidi, nam7u bagga woli gathidi oysethanaw maaddiya qangota efuudiyas oothidosona.
EXO 39:5 Goday Muse kiitidaysada, hiillanchoy alleeqisida dancoyka efuudey oosetidaysatape oosetidi, worqan, kaalosen, ocha teera daaneysan, zo7o qacinaninne al7o liinon dadetis.
EXO 39:6 Enti margide geetetiya shuchata giigisidi, worqafe oosetida kaquwa bolla wothidosona. Maatame bolla woocidi xaafeysada, he shuchata bolla Isra7eele nayta sunthaa woocidi xaafidosona.
EXO 39:7 Goday Muse kiitidaysada, tammanne nam7u Isra7eele nayta qofisiyaba gidana mela enta, efuudiya qangotan wothidosona.
EXO 39:8 Enti, tiran ma7etiya ma7uwa efuudey oosetidaysatape oothidi, efuudiyada alleeqisidosona.
EXO 39:9 Iyaw oyddu maazaneti de7oosona; geesaynne gompay issi issi takadho gididi, dakoyetees.
EXO 39:10 Iya bolla oyddu maaran inqo geetetiya al7o shuchata wothidosona. Koyro maaran sardiyoone, toophazenne phooliya al7o shuchata;
EXO 39:11 nam7antho maaran baluure, sanparenne almaaze geetetiya al7o shuchata;
EXO 39:12 heedzantho maaran yaakinte, kelqedoonenne ametesxinoosa geetetiya al7o shuchata;
EXO 39:13 oyddantho maaran birille, margidenne yasphide geetetiya al7o shuchata wothidosona. Hessata ubbaa worqafe oosetida kaquwa bolla wothidosona.
EXO 39:14 Tammanne nam7u shuchata bolla issi issi Isra7eele nayta sunthay woocetidi xaafetis.
EXO 39:15 Tiran ma7etiya ma7uwas walahi bayna worqafe wodoroda dooqada santhalaata ootha.
EXO 39:16 Nam7u worqa kaqotanne nam7u worqa sagaayota medhidi, nam7u worqa sagaayota tiran ma7etiya ma7uwas qommo baggan de7iya maazanetara gathidi oysethidosona.
EXO 39:17 He nam7u worqa santhalaatata nam7u worqa sagaayotara gathidi oysethidosona.
EXO 39:18 He santhalaatata, hanko bagga xeeraa, nam7u kaqotara gasethidosona. Yaatidi, efuudiyas sintha baggara, hashiyara wodhiya qangotara gathidi qachidosona.
EXO 39:19 Qassi nam7u worqa sagaayota medhidi, efuudiyas sintha baggara de7iya tiran ma7etiya ma7uwas, gaatha baggara de7iya nam7u maazaneta xeeran aathidosona.
EXO 39:20 Hessadaka, worqafe hara nam7u migiddota oothada, efuudiyas sintha bagga hashiyara wodhiya qanguwas garsa baggara, sikuwa matan dancuwaafe qommo baggara oysethidosona.
EXO 39:21 Goday Muse kiitidaysada, tiran ma7etiya ma7uwa bolla de7iya migiddota efuudiyan de7iya migiddotara gathidi, kaalose qacina qachidosona. Tiran ma7etiya ma7oy xeessafe qommon pee7iya gisho qashoy dol7enna.
EXO 39:22 Efuudiyape bollara ma7etiya adussa ma7oy kumethi kaalose afilape giigisidosona.
EXO 39:23 He adussa ma7uwas huuphe aathiya luho medhidi, peedhetonna mela guye qalam7idi, yuushshi aathidi sikidosona.
EXO 39:24 Adussa ma7uwas duge bagga macara yuushuwan kaalosen, ocha teera daaniya zo7o qacinaninne al7o liinon, oromaane teera misileta medhidosona.
EXO 39:25 Enti walahi bayna worqafe daalata medhidi, adussa ma7uwas duge bagga gaxan, oromaane misileta giddon wothidosona.
EXO 39:26 Goday Muse kiitidaysada, oromaane teera misileta, adussa ma7uwas duge bagga macaraa yuushuwan aathidosona.
EXO 39:27 Enti, Goday Muse kiitidaysada, Aaronasinne iya naytas, shamizeta,
EXO 39:28 huuphe qaceta, uketanne gaatha sureta al7o liinope daddidi giigisidosona.
EXO 39:29 Qassi dancuwa kaalosen, ocha teera daaniya qacinan, zo7o qacinaninne al7o liinon alleeqisidi, giigisidosona.
EXO 39:30 Enti, geeshsha kallacha misiliya walahi bayna worqafe medhidi, iya bolla, “Godaas Dummatis” giya qaala woocidi xaafidosona.
EXO 39:31 Yaatidi, Goday Muse kiitidaysada, huuphe qaciya bolla kaalose qacinara qachidosona.
EXO 39:32 Geeshsha Dunkaaniya ooso ubbay kumethi poletis. Isra7eele asay, Goday Muse kiitidaysada oothidosona.
EXO 39:33 Hessafe guye, enti Geeshsha Dunkaaniyanne iya miisheta Museko ehidosona. Hessatika, kaceta, tuussata, liyoota, tuuqetanne enti eqiya tohota.
EXO 39:34 Bolla kamaas, zo7o qalamen yeggidi kessida dorsa ite, haashetida do7a ite, magarajuwa,
EXO 39:35 Tammu kiitata oykida Taabotiya, iya tookiya kaso mithatanne nagara atotetha kamaa,
EXO 39:36 xarpheezanne iya miisheta ubbaa, Godaa sinthan de7iya geeshsha daabbuwa,
EXO 39:37 walahi bayna worqafe oosetida xompe wothiya kocaa, iya bolla de7iya xompeta, iya miisheta ubbaanne xompe zayte,
EXO 39:38 worqafe oosetida yarsho bessi, shuumatetha zayte, sawiya ixaane, Geeshsha Dunkaaniya penge magarajuwa,
EXO 39:39 naase biratape oosetida yarsho bessi, naase birata teqiya, tooho kaso mithatanne iya miisheta ubbaa, meecha kerenne iya wotheysa,
EXO 39:40 dabaaba geliya penge magarajuwa, tuussatanne, enti eqiya tohota, dabaaba magarajuwa, tole wodorota, dhisheta, Geeshsha Dunkaaniyan go7etiya miisheta ubbaa,
EXO 39:41 kahineti Geeshsha bessan ma7iya boncho ma7ota, Aaroninne iya nayti ma7iya kahinetetha ma7ota.
EXO 39:42 Isra7eele asay ooso ubbaa, Goday Muse kiitidaysada oothidosona.
EXO 39:43 Asay, ooso ubbaa, Goday kiitidaysada oothidaysa Musey be7is. Hessa gisho, Musey enta anjis.
EXO 40:1 Goday Museko haysada yaagis;
EXO 40:2 “Koyro ageenan, koyro gallasan, Geeshsha Dunkaaniya toka.
EXO 40:3 Tammu kiitata oykida Caaqo Taabotiya iya giddon wothada, iya sinthan magarajuwa kaqa.
EXO 40:4 Xarpheezaa gaathi gelsada, koshshiya miisheta ubbaa iya bolla wotha. Xompe wothiya kocaa gelsada iya bolla xompeta wotha.
EXO 40:5 Ixaane cuyisiya worqa xarpheezaa Caaqo Taabotiya sinthan wotha. Geeshsha Dunkaaniya penge magarajuwa kaqa.
EXO 40:6 Xuugetiya yarsho bessi Geeshsha Dunkaaniya sinthan wotha.
EXO 40:7 Meecha keriya Geeshsha Dunkaaniyapenne yarsho bessaafe giddon wothada, iyan haathe kuntha.
EXO 40:8 Geeshsha Dunkaaniyape karera dabaaba yuushsha aatha giigisada, magarajuwa Dunkaaniya penge bolla kaqa.
EXO 40:9 “Yaatada, geeshsha zaytiya ekada, Geeshsha Dunkaaniyanne iya giddon de7iya ubbaba tiyada, dummaya; I geeshshi gidana.
EXO 40:10 Kaallada, xuussa yarsho bessinne iyan go7etiya miishe ubbaa tiyada, dummaya; I polo geeshshi gidana.
EXO 40:11 Meecha keriyanne iya wothiya miisheta tiyada, dummaya.
EXO 40:12 “Aaronanne iya nayta Geeshsha Dunkaaniya penge ehada haathan enta meecca.
EXO 40:13 Kahine ma7uwa Aarona mayzada, I taw kahinetethan oothana mela iya tiyada, dummaya.
EXO 40:14 Iya adde naytaka ehada shamize mayza.
EXO 40:15 Enti taw kahinetethan oothana mela, enta aaway tiyetidaysada, entaka tiya. He tishsha gaason, yaana laytha ubban, enti taw kahine gididi oothana” yaagis.
EXO 40:16 Musey, ubbaba Goday kiitidaysada oothis.
EXO 40:17 Hessa gisho, enti Gibxefe keyida nam7antho laythan, koyro ageenan, koyro gallasan Geeshsha Dunkaaniya tokis.
EXO 40:18 Musey, Dunkaaniya tohota essis, tuuqeta, liyootanne tuussata aathis.
EXO 40:19 Goday kiitidaysada, Musey, garsa kamaanne bolla kamaa Dunkaaniya bolla kammis.
EXO 40:20 Yaatidi, tammu kiitata oykida nam7u loche shuchata, Taabotiya giddon wothis. Tooho kaso mithata Taabotiya sagaayotan aathis; nagara atotetha kamaka Taabotiya bolla wothis.
EXO 40:21 Taabotiya Geeshsha Dunkaaniya giddo gelsidi, geshe magarajuwa kaqis. Yaatidi, Goday kiitidaysada, Caaqo Taabotiya kammis.
EXO 40:22 Musey, xarpheezaa Geeshsha Dunkaaniya giddo gelsidi, magarajuwafe karera, pudeha baggan wothis.
EXO 40:23 Goday kiitidaysada, Godaa sinthan wothiya geeshsha daabbuwa iya bolla wothis.
EXO 40:24 Xompe wothiya kocaa, Geeshsha Dunkaaniya giddo gelsidi, xarpheezape sintha baggara Geeshsha Dunkaaniyas dugeha baggan wothis.
EXO 40:25 Goday kiitidaysada, Musey, Godaa sinthan xompeta oythis.
EXO 40:26 Musey, worqa yarsho bessa Geeshsha Dunkaaniya giddo gelsidi, magarajuwafe sintha baggara wothis.
EXO 40:27 Goday kiitidaysada, sawiya ixaane iya bolla cuyisis.
EXO 40:28 Geeshsha Dunkaaniya pengen magarajuwa kaqis.
EXO 40:29 Xuugetiya yarsho bessi, Geeshsha Dunkaaniya penge sinthan wothis. Goday kiitidaysada, iya bolla xuussa yarshonne katha yarsho yarshis.
EXO 40:30 Meecha keriya Geeshsha Dunkaaniyapenne yarsho bessaafe giddon wothidi, iyan haathe kunthis.
EXO 40:31 Musey, Aaroninne iya nayti banta kushiyanne tohuwa iyan meecetidosona.
EXO 40:32 Goday kiitidaysada, enti Geeshsha Dunkaaniya geliya wode woyko yarsho bessi shiiqiya wode hessa oothosona.
EXO 40:33 Geeshsha Dunkaaniyanne yarsho bessa yuushshi aathidi dabaaba giigisidi, he dabaaba pengen magarajo kaqis. Hessada oothidi, Musey oosuwa polis.
EXO 40:34 Hessafe guye, shaaray Geeshsha Dunkaaniya kammis; Godaa bonchoyka iya kumis.
EXO 40:35 Shaaray Geeshsha Dunkaaniya kammida gishonne Godaa bonchoy iyan kumida gisho, Musey iya giddo gelanaw danda7ibeenna.
EXO 40:36 Isra7eeleti banta de7iya bessaa yeddidi, baanaw dendey, he shaaray Dunkaaniyape dendiya wodena.
EXO 40:37 Shin shaaray dendonna ixiko, enti banta de7iya bessaa yeddidi bookona.
EXO 40:38 Godaa shaaray gallas gallas Geeshsha Dunkaaniya kammees, qamma qamma qassi shaara giddon tamay eexees. Isra7eele asay biya wode ubban he shaara be7oosona.
LEV 1:1 Godaa Xoossay, Geeshsha Dunkaaniya giddon gididi Muse xeegidi yaagis;
LEV 1:2 Isra7eele asaas haysada yaagada oda; hintefe oonika Godaas yarsho yarshiya wode ba mehiyape, ba dorsafenne ba deeshape eho.
LEV 1:3 He yarshoy mehepe xuussa yarshos gidiko borey bayna wofaano gido. Goday he yarshuwa ekana mela Geeshsha Dunkaaniya geliya pengen yarsho.
LEV 1:4 Yarshuwa yarshiya uray xuussa yarshos ehida mehiya huuphen ba kushiya wotho. Hessi iya nagara atotethas Goday ekida yarsho gidana.
LEV 1:5 I he wofaanuwa Godaa sinthan shuko; kahineti, Aarona nayti he suuthaa ekidi, Geeshsha Dunkaane geliya pengen de7iya yarsho bessa oyddu maazaneta bolla wurxo.
LEV 1:6 He mehiya galbaa qaaridi, ashuwa qommon qommon kesso.
LEV 1:7 Kahiniya Aarona nayti yarsho bessan mithi wothidi tama eetho.
LEV 1:8 Kahineti, Aarona nayti he kessida ashuwa bolla huuphiyanne modhuwa gujidi, yarsho bessan taman de7iya mithaa bolla maarayidi wotho.
LEV 1:9 Shin he uray ulo ashuwanne gedata haathan meecco. Kahiney he ubbaa yarsho bessan xuuggo; hessi Godaas taman xuugetiya sawo tonku giya yarsho gidana.
LEV 1:10 Xuugetiya yarshos I immiya imoy dorsaafe woyko deeshape gidiko, borey bayna maraze woyko kole gido.
LEV 1:11 He mehiya yarsho bessaafe pudeha baggara Godaa sinthan shuko. Kahineti, Aarona nayti he suuthaa ekidi yarsho bessa oyddu maazaneta ubbaa bolla wurxo.
LEV 1:12 He uray ashuwa qommon qommon kesso; kahiney he kessida ashuwa bolla huuphiyanne modhuwa gujidi, yarsho bessan taman de7iya mithaa bolla maarayidi wotho.
LEV 1:13 Shin he uray ulo ashuwanne gedata haathan meecco; kahiney he ubbaa yarsho bessan xuuggo; hessi Godaas taman xuugetiya sawo tonku giya yarsho gidana.
LEV 1:14 Godaas yarshetiya xuussa yarshoy kafo gidiko holle woyko kuraacho gido.
LEV 1:15 Kahiney hessa ekidi qoodhiya kushera duutho; huuphiya yarsho bessa bolla de7iya taman xuuggo. Iya suuthay yarsho bessa miyera guko.
LEV 1:16 Ulo ashuwanne qefiya kessidi, yarsho bessaafe doloha baggara bido qoliya bessan yeggo.
LEV 1:17 I he kafuwa qefeta oykidi shaako, shin kumethi shaakofo. Kahiney yarsho bessa bolla de7iya taman wothidi xuuggo; hessi Godaas taman xuugetiya sawo tonku giya yarsho gidana.
LEV 2:1 Oonika katha yarsho Godaas yarshiya wode he yarshoy lo77o dhiille gido; iya bolla zaytenne ixaane gujo.
LEV 2:2 Hessa kahine gidida Aarona naytako eho; kahineti he lo77o dhiilliyafe issi kuuca ekidi, zaytenne ixaane ubbaa gujidi yarsho bessa bolla taman xuuggo. Hessi Godaas taman xuugetiya sawo tonku giya qofiso yarsho gidana.
LEV 2:3 Katha yarshuwafe attidaysi Aaronasinne iya naytas gidana. Hessi Godaas taman xuugetida ubbaafe geeshsha yarsho gidana.
LEV 2:4 Yarshetiya uythay coocen kompetida gidiko, zaytera munuqetida lo77o dhiille gido. He uythay irshoy bayna zayten munuqetidaysa woyko lee7on uuketidi zayten tiyetidaysa gido.
LEV 2:5 Yarshetiya uythay beshen uuketidaba gidiko, irshoy bayna zayten munuqetida lo77o dhiille gido.
LEV 2:6 Iya menthada iya bolla zayte tigada katha yarsho oothada yarsha.
LEV 2:7 Ne yarshiya kathay oton kaxidaba gidiko zayten munuqetida lo77o dhiille gido.
LEV 2:8 Hessada hanidi giigida kathaa yarshuwa Godaas ehada kahiniyas imma; kahiney hessa ekidi yarsho bessan yarsho.
LEV 2:9 Kahiney he katha yarshuwa ekidi, yarsho bessan xuussa yarsho oothidi taman xuuggo. Hessi Godaas taman xuugetiya sawo tonku giya qofiso yarsho gidana.
LEV 2:10 Katha yarshuwafe attidaysi Aaronasinne iya naytas gidana. Hessi Godaas taman xuugetida ubbaafe geeshsha yarsho gidana.
LEV 2:11 Neeni irsho woyko eessi Godaas taman xuuggada yarshanaw bessonna gisho Godaas hinte ehiya katha yarshoy irshoy de7iyaba gidopo.
LEV 2:12 Hayisata bayra yarsho oothidi Godaas yarshanaw danda7eeta, shin sawo tonku giya yarsho oothidi Godaas yarsho bessan xuuggofite.
LEV 2:13 Maxiney, neeni ne Xoossara caaqida caaquwas malla gidiya gisho ne katha yarsho ubban maxine yegga. Ne katha yarsho ubbaa maxinen mal7etha.
LEV 2:14 Neeni kathaafe bayra Godaas ehiya wode caacetidi shirketida tiya gidanaw bessees.
LEV 2:15 Hessi katha yarsho gidiya gisho iya bolla zayte tiga; ixaane wotha.
LEV 2:16 Kahiney he caacetidi shirketidanne zaytey tigetida katha yarshuwafe bagga ekidi ixaane ubbaara qofiso yarsho oothidi Godaas taman xuuggo.
LEV 3:1 Issi asi issifetetha yarshos ba mehiyape borey bayna ussi woyko wofaano Godaa sinthe shiisho.
LEV 3:2 Yarshanaw ehida mehiya huuphen ba kushiya wothidi Geeshsha Dunkaaniya pengen shuko. Kahineti, Aarona nayti suuthaa ekidi yarsho bessa oyddu maazaniya bolla wurxo.
LEV 3:3 Issifetetha yarshuwafe xuussa yarsho oothidi Godaas shiisho; hessika ulo ashuwa kammida moodhiya,
LEV 3:4 nam7u kilahota, enta bolla de7iya moodhiyanne tiriya xeera baggaa eko.
LEV 3:5 Aarona nayti hessa xuussa yarshuwara issife yarsho bessa bolla de7iya mithaa bolla wothidi xuuggo. Hessi Godaas xuugetiya sawo tonku giya yarsho gidana.
LEV 3:6 Issifetetha yarshos shiiqey macca woyko adde dorse gidiko borey baynaba gido.
LEV 3:7 Issi asi dorsa urge yarshiyaba gidiko hessa Godaa sinthan shiisho.
LEV 3:8 He dorsa urgiya huuphen ba kushiya wothidi Geeshsha Dunkaaniya pengen shuko. Aarona nayti suuthaa ekidi yarsho bessa oyddu maazaniya bolla wurxo.
LEV 3:9 Issifetetha yarshuwafe Godaas xuussa yarsho oothidi yarsho; hessika modhuwa, goynaape bidi zoko meqethaa gakanaw de7iya modhuwa, ulo ashuwa kammida moodhiya,
LEV 3:10 nam7u kilahota, enta kammida moodhiya tiriya xeera baggaa eko.
LEV 3:11 Kahiney hessa Godaas xuussa yarsho oothidi yarsho bessan xuuggo.
LEV 3:12 I yarshey deeshe gidiko I hessa Godaa sinthe shiisho.
LEV 3:13 Iya huuphen ba kushiya wothidi Geeshsha Dunkaaniya sinthan shuko. Aarona nayti suuthaa ekidi yarsho bessa yuushuwa wurxo.
LEV 3:14 I he yarshuwafe ekidi Godaas xuussa yarsho oothidi yarsho; hessika ulo ashuwa kammida moodhiya ubbaa,
LEV 3:15 nam7u kilahota, enta kammida moodhiya tiriya xeera baggaa eko.
LEV 3:16 Kahiney hessa Godaas sawo tonku giya yarsho oothidi yarsho bessan xuuggo. Modho ubbay Godaaba.
LEV 3:17 Hinte modhonne suuthi moopite. Hessi hinttesnne yaana yeletethay de7iya bessa awunka naagiya woga gido.
LEV 4:1 Goday Museko haysada yaagis;
LEV 4:2 Neeni Isra7eele asaas haysada yaagada oda; oonika qoponna nagara oothiko woyko Godaa kiitatape issuwa menthiko,
LEV 4:3 Dooretida kahiney nagara oothidi asaa gomen gathiko, I ba oothida nagaraa gisho borey bayna wofaano Godaas nagara yarsho oothidi eho.
LEV 4:4 He wofaanuwa Geeshsha Dunkaaniya penge ehidi, huuphen ba kushiya wothidi Godaa sinthan shuko.
LEV 4:5 Dooretida kahiney wofaanuwa suuthaafe guuthara ekidi Geeshsha Dunkaaniya gelsidi,
LEV 4:6 ba biradhiya suuthan yeddi ekidi Geeshsha Dunkaaniya magarajuwa sinthan Godaa sinthan laapun toho wurxo.
LEV 4:7 Kahiney guutha suuthi ekidi Geeshsha Dunkaaniyan Godaa sinthan sawiya ixaane cuyisiya bessan de7iya kaceta tiyo. Attida suuthaa Geeshsha Dunkaaniya geliya penge baggara de7iya xuussa yarsho bessa garsan gusso.
LEV 4:8 Nagara yarshos shuketida wofaanuwa modhuwa ubbaa, ulo ashuwa ma7ida modhuwa,
LEV 4:9 nam7u kilahota, enta kammida moodhiyanne tiriya xeera baggaa eko.
LEV 4:10 Issifetetha yarshos shuketida wofaanuwa modhuwa kessidaysada iyape modhuwa kesso. Kahiney xuussa yarsho oothidi yarsho bessan xuuggo.
LEV 4:11 Shin wofaanuwa galbaa, iya ashuwa ubbaa, iya huuphiya, iya tohota, ulo ashuwa, tociya,
LEV 4:12 ashuwape attidaysa ubbaa gutaape kare kessidi bido yeggiya woga mela geeshsha bessi efidi yan taman xuuggo.
LEV 4:13 Isra7eele maabara ubbay qoponna nagara oothikonne Godaa kiitatape issuwa menthiko hessi entafe qosetikoka entaw bala gididi taybetana.
LEV 4:14 Enti oothida nagaraa akeekiya wode nagara yarshos haniya wofaano Geeshsha Dunkaaniya sinthe eho.
LEV 4:15 Maabara cimati banta kushiya wofaanuwa huuphen wothidi Godaa sinthan shuko.
LEV 4:16 Dooretida kahiney wofaanuwa suuthaafe guuthara ekidi Geeshsha Dunkaaniya gido gelo.
LEV 4:17 I ba biradhiya suuthan yeddi ekidi magarajuwa sintha baggara Godaa sinthan laapun toho wurxo.
LEV 4:18 Qassi guutha suuthi ekidi, Geeshsha Dunkaaniya giddon Godaa sinthan ixaane cuyisiya bessan de7iya kaceta bolla tiyo. Attida suuthaa Geeshsha Dunkaaniya geliya pengiya baggara de7iya xuussa yarsho bessa garsan gusso.
LEV 4:19 Modho ubbaa ekidi yarsho bessan xuuggo.
LEV 4:20 Ha wofaanuwaka nagara yarshos shuketida wofaanuwa mela oothada shiisha. Hessada oothidi, kahiney nagara atotetha wogaa polana; asaa nagaray atto geetetana.
LEV 4:21 Kahiney wofaanuwa gutaape kare kessidi, koyro wofaanoy xuugetidaysada iyaka xuuggo; hessi maabaraas yarshetiya nagara yarsho.
LEV 4:22 Asaa kaalethiya shuumatape issoy qoponna nagara oothikonne Godaa Xoossaa kiitaape issuwa menthiko he uray bala.
LEV 4:23 I ba oothida nagaraa akeekidaape guye, borey bayna issi kole eho.
LEV 4:24 He koliya huuphen ba kushiya wothidi xuussa yarshoy yarshetiya bessan Godaa sinthan shuko; hessi nagara yarsho.
LEV 4:25 Kahiney ba biradhiya suuthan yeddi ekidi, xuussa yarsho bessan de7iya kaceta bolla tiyo; attida suuthaa qassi xuussa yarsho bessa garsan gusso.
LEV 4:26 Issifetetha yarshos shiiqida modhuwa ubbaa xuuggidaysada ha koliya modhuwa xuuggo. Hessada oothidi, kahiney he uraa nagara qushisees; he uraa nagaray atto geetetana.
LEV 4:27 Maabaraape issi asi qoponna nagara oothikonne Godaa kiitaape issuwa menthiko he uray bala gidees.
LEV 4:28 I ba oothida nagaraa akeekidaape guye borey bayna macca deeshi ba nagaraa gisho eho.
LEV 4:29 Ba kushiya he deeshe huuphen wotho; yaatidi xuussa yarsho bessan nagara yarsho oothidi shuko.
LEV 4:30 Hessafe guye, kahiney he deeshe suuthan ba biradhiya yeddi ekidi xuussa yarsho bessan de7iya kaceta bolla tiyo. Attida suutha ubbaa yarsho bessaafe garsan gusso.
LEV 4:31 Issifetetha yarshos shuketida mehiyape modhuwa kessidaysa mela he deeshe modhuwa qaari kessidi, yarsho bessan Godaas sawo tonku giya yarsho oothidi xuuggo. Hessada oothidi, kahiney he uraa nagaraa qushisees; iya nagaray atto geetetana.
LEV 4:32 He uray ba nagaraa gisho yarshey dorse gidiko, borey bayna macca dorse gido.
LEV 4:33 I ba kushiya he dorse huuphen wotho; yaatidi, xuussa yarsho mehe shukiya bessan shuko.
LEV 4:34 Hessafe guye, kahiney dorse suuthan ba biradhiya yeddi ekidi xuussa yarshoy yarshetiya bessan de7iya kaceta bolla tiyo. Attida suuthaa yarsho bessaafe garsan gusso.
LEV 4:35 Issifetetha yarshos shuketida mehiyape modhuwa kessidaysada he dorse modhuwa qori kessidi, yarsho bessan Godaas xuussa yarsho oothidi xuuggo. Hessada oothidi, kahiney he uraa nagaraa qushisees; iya nagaray atto geetetana.
LEV 5:1 Issi asi ba be7idaba woyko ba eriyaba markatana mela oyshetidi markatonna ixiko he uray nagara oothida gisho seereto.
LEV 5:2 Issi asi eronna de7ishe tunabaa, hessika, hayqida do7a woyko mehe woyko sa7ara gooshetiya do7ata bochiko, hessi tuna gideysa I eronna ixikoka tuna gidiya gisho bala gidees.
LEV 5:3 Issi asi eronna de7ishe asa asatethafe goggidi tunisiyaba bochiko, hessi tuna gideysa I eronna ixiko, tuna gidiya gisho bala gidees.
LEV 5:4 Issi asi iitaba gidin lo77oba oothanaw eeson caaqikonne ba caaqidaysa dogidi, guyepe I akeekida wodepe doomidi bala gidees.
LEV 5:5 Issi asi ha odetida balatape issuwa oothidaba gidiko ba oothida nagaraa paaxo.
LEV 5:6 I ba oothida nagaraa gisho Godaas ba mehiya giddofe macca dorse woyko macca deeshe nagaraa yarsho oothidi shiisho. Kahiney ekidi he uraa nagaraa qushethas yarshana.
LEV 5:7 Issi asi ba oothida nagaraa gisho yarshanaw dorse woyko deeshe shammanaw iyaw gatey gakonna ixiko nam7u kuraachota woyko nam7u holleta, issuwa nagara yarshos qassi issuwa xuussa yarshos oothidi Godaas eho.
LEV 5:8 I enta kahiniyas immo; kahiney nam7u holletape issuwa qoodhiya mirqidi duuthonnashin, nagara yarsho oothidi shiisho.
LEV 5:9 Yaatidi suuthaafe guuthara ekidi, yarsho bessa matan wurxo; attida suuthaa yarsho bessa garsan gusso; hessi nagara yarsho.
LEV 5:10 Hanko holliya qassi higgey kiiteysada xuussa yarsho oothidi xuuggo. Kahiney haysada oothidi, uray oothida nagaraa qushisanaw yarsho yarshees; he uraa nagaray atto geetetana.
LEV 5:11 Shin issi asi nam7u holle woyko nam7u kuraacho ehanaw gatey gakonna ixiko, issi kilo giraame lo77o dhiille ba nagaraa gisho yarsho oothidi eho. He dhiilley nagara yarsho gidiya gisho zaytey woyko ixaaney iya bolla guzhetofo.
LEV 5:12 I hessa ehidi kahiniyas immo; kahiney he dhiilliyafe issi kuuca ekidi, Godaas shiiqiya katha yarshuwara gathidi, qofiso oothidi yarsho bessan xuuggo; hessi nagara yarsho.
LEV 5:13 Issi asi ha nagaratape issuwa oothiko haysada oothidi iya nagara qushisees; he uraa nagaray atto geetetana. He yarshuwafe attidaysi katha yarshuwada kahiniyas gido.
LEV 5:14 Goday Museko haysada yaagis;
LEV 5:15 Oonika Godaa naaqikonne geeshsha miisheta tunisidi qoponna nagara oothiko ba naaquwas ba mehiya giddofe borey bayna issi maraze Godaas eho. Iya gatey geeshsha dunkaanen eretida mizaane ginan cigeto; hessi naaqo yarsho.
LEV 5:16 I geeshsha miisheta bolla nagara oothida gisho koyro cigganaw bessiya gatiya bolla xeetape laatamu kushe gujidi kahiniyas immo. Kahiney hessa maraziyara gathi yarshidi uraa naaquwa qushisees; iya nagaray atto geetetees.
LEV 5:17 Issi asi qoponnashin, Godaa kiitatape issuwa menthidi nagara oothiko I hessa eronna ixikoka bala gidiya gisho ba nagaran seereto.
LEV 5:18 I ba mehiyape borey baynanne gate kunthiya issi maraze naaqo yarshos kahiniyako eho. Kahiney he maraziya yarshidi uraa naaquwa qushisees; iya naaqoy atto geetetees.
LEV 5:19 I tumape Godaa naaqida gisho hessi naaqo yarsho.
LEV 6:1 Goday Museko haysada yaagis;
LEV 6:2 Issi asi hara asi hadara wothidaba woyko tal7idaba lahiko woyko bonqiko woyko cimmiko,
LEV 6:3 woyko dhayidabaa demmidi ta be7abike gidi wordon caaqikonne asi oothiya haysa melabaape issuwa oothiko,
LEV 6:4 hessan nagarancho gididi bentiko, kaysidaba woyko bonqidaba woyko hadara ekidaba woyko dhayin demmidaba,
LEV 6:5 woyko wordon caaqidi ekida kumetha shaluwa godaas zaaro. Qassi ba naaqo yarshuwa yarshiya gallas ba ekidaba bolla xeetape laatamu kushe gujidi shaluwa godaas immo.
LEV 6:6 Qassi ba naaquwa gisho Godaas yarsho yarshiya wode ba mehiya giddofe borey bayna issi maraze kahiniyako eho. He dorsay naaqo yarshos gate kuntheysa gido.
LEV 6:7 Kahiney he dorsaa yarshidi he uraa naaquwa qushisees; he uraa naaqoy atto geetetana.
LEV 6:8 Goday Museko haysada yaagis;
LEV 6:9 Aaronanne iya adde nayta haysada yaagada kiitta; xuussa yarshuwas de7iya wogay haysa; xuussa yarshoy sa7i wontana gakanaw yarsho bessan de7o. Tamay yarsho bessan qamma kumethi eexishe aqo.
LEV 6:10 Kahiney liinope dadetida qamise ma7idi, sure dancidi, xuussa yarshuwa tamay mida biduwa kaashidi yarsho bessa miyen laallo.
LEV 6:11 Yaatidi ma7uwa qaari wothidi hara ma7o ma7idi he biduwa gutaape gaxa efidi wogaada geeshsha bessan qolo.
LEV 6:12 Yarsho bessaa bolla de7iya tamay to7onna ubba wode eexishe de7o. Kahiney wonta wonta mithi iya bolla gujo. Xoossa yarshuwa mitha bolla maaran wothidi, issifetetha yarshuwa modhuwa iya bolla xuuggo.
LEV 6:13 Tamay yarsho bessa bolla ubba wode eexishe de7o; to7anaw koshshenna.
LEV 6:14 Katha yarshos imetida wogay haysa; kahine gidida Aarona nayti yarsho bessaafe sintha baggara Godaa sinthan yarsho.
LEV 6:15 Kahiney issi kuuca lo77o dhiillenne zayte ekidi katha yarshuwa bolla de7iya ixaaniyara yarsho bessan Godaas sawo tonku giya qofiso yarsho oothidi xuuggo.
LEV 6:16 Iyape attidaysa Aaroninne iya adde nayti uythi uukidi Dunkaaniya dabaaban de7iya geeshsha bessan mo.
LEV 6:17 He uythay irshoy bayna uuketo. Taman xuussa yarshuwafe hessa taani entaw gisho oothada immas. Nagara yarshuwa melanne naaqo yarshuwa mela I ubbaafe geeshshi.
LEV 6:18 Godaas taman xuussa yarshuwafe enta gakiya gisho gidiya gisho yaa yeletethan Aarona koche gidida addeti ubbay hessa mo. He yarshuwa, geeshshi gidonna oonika bochofo.
LEV 6:19 Goday Museko haysada yaagis;
LEV 6:20 Aaroninne iya adde nayti kahinetethan tiyetiya wode issi kilo giraame gidiya lo77o dhiille katha yarsho oothidi Godaas eho. Iyape baggaa wonta, baggaa omarsi yarsho.
LEV 6:21 He dhiilley zaytera walaketidi loythi munuqetidi bashen uuketo; iya menthada yarsho bessan sawo tonku giya katha yarsho oothada Godaas yarsha.
LEV 6:22 Qassi Aarona adde naytape iya kahinetetha laattanaw tiyetiya oonika he wogaa giigisees. Hessi Godaas ubba wode yarshetiya yarsho gidiya gisho kumethi xuugeto.
LEV 6:23 Kahiney katha yarshuwa guye ashshona xuugganaw koshshees; I meetetanaw bessenna.
LEV 6:24 Goday Museko haysada yaagis;
LEV 6:25 Aaronasinne iya adde naytas haysada yaaga; “Nagara yarsho wogay haysa; nagaras shuketiya yarshoy xuussa yarshoy shuketiya bessan Godaa sinthan shuketto. He yarshoy ubbaafe geeshsha yarsho.
LEV 6:26 He yarshuwa yarshiya kahiney Dunkaaniya dabaaban de7iya geeshsha bessan mo.
LEV 6:27 He ashuwa bochiya oonika geeshshi gido; qassi shukishin suuthi ma7uwa bochiko he ma7oy geeshsha bessan meeceto.
LEV 6:28 Ashoy kaxida otoy meqo; birata disten kaxidaba gidiko he miishiya qaacidi haathan meeccanaw koshshees.
LEV 6:29 Kahine kochaafe adde gidida oonika he ashuwa mo; he yarshoy ubbaafe geeshshi.
LEV 6:30 Shin Geeshsha bessan nagara atotethas suuthaa ekidi Dunkaaniya giddo gelidaba gidiko he mehiya ashoy meetetanaw koshshenna; I taman xuugetanaw bessees.”
LEV 7:1 Ubbaafe geeshshi gidiya gisho naaqo yarsho wogay haysa;
LEV 7:2 Xuussa yarsho mehey shuketiya bessan naaqo yarsho mehey shuketto; iya suuthay yarsho bessa oyddu baggan wurxeto.
LEV 7:3 Iya modhuwa ubbaa, hessika goynaape bidi zoko meqethaa gakanaw de7iya modhuwa, ulo ashuwa kammida moodhiya,
LEV 7:4 nam7u kilahota, enta kammida moodhiyanne tiriya xeera baggaa ekidi yarsho.
LEV 7:5 Kahiney haysata taman xuussa yarsho oothidi Godaas yarsho; hessi naaqo yarsho.
LEV 7:6 Kahine yara gidida adde ubbay he yarsho ashuwa mo. He yarshoy ubbaafe geeshshi gidiya gisho geeshsha bessan meeteto.
LEV 7:7 Naaqo yarshuwanne nagara yarshuwa wogay issinno. He mehiya ashoy nagara atotethas yarshida kahiniyas imetees.
LEV 7:8 Oonika xuussa yarsho mehe ehin ekidi yarshiya kahiney he mehiya galba baw eko.
LEV 7:9 Coocen kompetida woyko oton kaxida woyko bashen uuketida ubbay he yarshuwa yarshida kahiniyas imetees.
LEV 7:10 Qassi zaytera munuqetida woyko munuqetonna katha yarsho ubbay Aarona adde nayta ubbaas issi gina shaaketidi imetees.
LEV 7:11 Issi asi issifetetha yarsho Godaas yarshiya wode iyaw de7iya wogay haysa;
LEV 7:12 I yarshey galata yarsho gidiko he yarshuwara issife zaytera munuqida uythu, irshoy gelonna uuketidi zayten tiyetida lee7o uythunne lo77o dhiillefe zaytera munuqetida uythu shiisho.
LEV 7:13 He issifetetha yarshuwara issife irshora uuketida uythaa imota oothidi yarsho.
LEV 7:14 He issi issi uythaafe issuwa denthidi Godaas yarsho oothidi eho. Hessi issifetetha yarshuwa suuthaa wurxida kahiniyas imeto.
LEV 7:15 He mehiya ashoy he gallas meeteto; wontas aybika attofo.
LEV 7:16 Shin iya yarshoy gaso yarsho woyko dosa yarsho gidiko he ashoy he yarshetida gallas meeteto; iyape attey de7iko wontetha gallas meeteto.
LEV 7:17 He ashuwape palahidi heedzantho gallas gakanaw gam7iko hessi taman xuugeto.
LEV 7:18 Issi asi shiishida issifetetha yarsho ashoy heedzantho gallasan meetetiko iya yarshoy eketenna; yarshoy yarshetidada taybetenna. He yarshoy tuna; iyape mida oonika ba nagaran oyshetees.
LEV 7:19 Tunabaa bochida ashoy meetetofo; I taman xuugetanaw koshshees. Hara ashuwa wogan tuna gidonna asi oonika maana giiko mo.
LEV 7:20 Shin issi asi tuna gidi uttidi, Godaas shiiqida issifetetha yarsho ashuwape miyaba gidiko, he uray asaa giddofe kuretto.
LEV 7:21 Issi asi tunaba bochiko, asa tunatethi gidin woyko tuna mehe gidin woyko hara ixetiya tunaba bochidi, Godaas yarshetida issifetetha yarsho ashuwape miiko, he uray ba asaa giddofe kureto.
LEV 7:22 Goday Museko haysada yaagis;
LEV 7:23 Isra7eele asaas haysada yaagada oda; korma woyko maraze woyko kole modho ashuwa moopite.
LEV 7:24 Hayqida mehe woyko do7i wodhida mehiya modhuwa harabas go7etitepe attishin, iyape aybaka moopite.
LEV 7:25 Godaas taman xuussa yarshos shiiqiya mehiya modho ashuwa miya oonika ba asaa giddofe kuretto.
LEV 7:26 Hinte de7iya bessan awun gidikoka, kafo suuthi woyko mehe suuthi moopite.
LEV 7:27 Suuthi miya oonika ba asaa giddofe kuretto.
LEV 7:28 Goday Museko haysada yaagis;
LEV 7:29 Isra7eele asaas haysada yaagada oda; Godaas issifetetha yarsho shiishiya oonika he issifetetha yarshuwafe shaakidi ba imota oothidi Godaas dummayidi yarsho.
LEV 7:30 Hessa I Godaas taman xuussa yarsho oothidi, ba kushen ekidi eho. Qassi modhuwa angaasuwara gathi ehidi yuusho yarsho oothidi Godaa sinthan yarsho.
LEV 7:31 Kahiney yarsho bessan modhuwa xuuggo; shin angaasoy Aaronasinne iya adde naytas imeto.
LEV 7:32 Hinte issifetetha yarshuwafe ushacha gedaa imota oothidi kahiniyas immite.
LEV 7:33 He ushacha geday issifetetha yarshuwa suuthaanne modhuwa yarshiya kahiniya gakiya gisho gido.
LEV 7:34 Taani Isra7eele asaa issifetetha yarshuwafe yuusho angaasuwan shiiqida gedaa Isra7eele asaape ekada, kahiniya Aaronasinne iya adde naytas gisho oothada immas. Hessi enta gakiya enta gisho gidiya gisho Isra7eele asay merinaw hessa entaw immishe daana.
LEV 7:35 Aaroninne iya adde nayti kahine gididi shuumetida gallas Godaas shiiqida xuussa yarshuwafe, hesika entaw gisho gididi imetis.
LEV 7:36 Goday enta kahinetethas tiyida gallas, hessa entaw immana mela Isra7eele asaa kiittis; hessi yaana yeletethan eqidi de7iya woga gidana.
LEV 7:37 Hiza xuussa yarshuwa, katha yarshuwa, nagara yarshuwa, naaqo yarshuwa, kahineti tiyetiya wode yarshetiya yarshuwanne issifetetha yarshuwa wogay haysa.
LEV 7:38 Isra7eele asay Siina mela biittan banta yarshuwa Godaas yarshana mela Goday kiitida gallas, Siina zuma bolla Goday Muse kiitida wogay haysa.
LEV 8:1 Goday Muses haysada yaagidi odis;
LEV 8:2 Aaronanne iya adde nayta, entara issife kahinetetha ma7uwa, tiyo zaytiya, nagara yarshuwa shuketiya kormaa, nam7u marazetanne, irshoy geliboonna uuketida uythaa wothiya gayta ekada ya.
LEV 8:3 Qassi Isra7eele asa ubbaa xeegada Dunkaaniya penge shiisha.
LEV 8:4 Musey Goday kiitidaysada oothis; asa ubbay dunkaaniya penge shiiqis.
LEV 8:5 Musey asaako, ta oothana mela Goday kiittidaysi haysa.
LEV 8:6 Musey Aaronanne iya adde nayta ehidi haathan meeccis.
LEV 8:7 Aarona ma7uwa mayzidi, danco dancisis; adussa ma7uwa mayzidi iya bolla efuude ma7uwa mayzis. Efuudiya alleeqisidi daddida saqiyan Aarona xeessara gathidi qachis.
LEV 8:8 Efuudiya bolla tira kiise sikidi iyan Uriimenne Tumiime wothis.
LEV 8:9 Aarona huuphen xaatha qace wothis. Goday Muse kiitidaysada xaatha qaciya sintha baggara Geeshsha worqa guche misiliya wothis.
LEV 8:10 Hessafe guye Musey tiyo zaytiya ekidi, Dunkaaniyanne Dunkaaniya giddon de7iya miishe ubbaa tiyidi dummayis.
LEV 8:11 He zaytiyape ekidi yarsho bessa bolla laapun toho wurxis; iya miisheta, meecha keriyanne iya utuwa dummayanaw he zaytiyara tiyis.
LEV 8:12 He tiyo zaytiyape guuthara ekidi Aarona huuphen tigidi iya dummayis.
LEV 8:13 Goday Muse kiittidaysada Musey Aarona adde nayta sinthe aathidi ma7o mayzidi danco dancisis. Enta huuphen xaatha qace wothis.
LEV 8:14 Musey nagara yarshos yarshetiya kormaa ehis; Aaroninne iya adde nayti he kormaa huuphen banta kushiya wothidosona.
LEV 8:15 Musey he kormaa shukidi iya suuthan ba biradhiya yeddi ekidi, yarsho bessan de7iya kaceta tiyidi yarsho bessa geeshshis. Attida suuthaa yarsho bessaafe garsan gussis; hessada oothidi yarsho bessa Xoossas dummayidi geeshshis.
LEV 8:16 Musey ulo ashuwa kammida modhuwa ubba, tiriya xeera baggaa, kilahotanne enta kammida modhuwa ekidi, yarsho bessan xuuggis.
LEV 8:17 Shin Goday Muse kiitidaysada korma galbaa, attida ashuwanne tociya gutaape gaxa kessidi xuuggis.
LEV 8:18 Hessafe guye, Musey xuussa yarshos maraze ehis; Aaroninne iya adde nayti he maraziya huuphen banta kushiya wothidosona.
LEV 8:19 Musey he maraziya shukis; iya suuthaa yarsho bessa oyddu maazaneta bolla wurxis.
LEV 8:20 Musey maraziya ashuwa qommon qommon qanxerethis; huuphiya, attida ashuwanne modhuwa xuuggis.
LEV 8:21 Goday Muse kiitidaysada ulo ashuwanne gedata meeccidi, kumetha dorsaa Godaas sawo tonku giya xuussa yarsho oothidi yarsho bessan xuuggis.
LEV 8:22 Kahineti shuumetiya wode shiiqiya nam7antho dorsaa Musey ehis; Aaroninne iya adde nayti he dorsaa huuphen banta kushiya wothidosona.
LEV 8:23 Musey he maraziya shukis; iya suuthaafe ekidi, Aaronas ushacha haythaa, ushacha kushiya wogga biradhiyanne, ushacha tohuwa wogga biradhiya tiyis.
LEV 8:24 Qassi Musey Aarona adde nayta sinthe aathidi, he suuthaafe ekidi, enta ushacha haythaa, ushacha kushiya wogga biradhiyanne ushacha tohuwa wogga biradhiya tiyis. Yaatidi, Musey attida suuthaa yarsho bessa oyddu maazaneta bolla wurxis.
LEV 8:25 Modhdhuwa, goynaape bidi zoko meqethaa gakanaw de7iya modhuwa, tiriya xeera baggaa, kilahotanne enta kammida modhuwanne ushacha gedaa ekis.
LEV 8:26 Godaa sinthan de7iya gaytape irshoy bayna uuketida issi uythaa, uuketidi zayten tiyetida issi uythaanne lee7on uuketida uythaa ekidi modhuwa bollanne ushacha gedaa bolla wothis.
LEV 8:27 I he katha ubbaa Aarona kusheninne iya adde nayta kushen wothin, Godaa sinthan yuusho yarsho oothidi yarshidosona.
LEV 8:28 Musey he kathaa enta kushepe ekidi, xuussa yarshuwara gathidi, kahineta shuumiya wode Godaas sawo tonku giya yarsho oothidi yarsho bessan xuuggis.
LEV 8:29 Qassi Musey angaasuwa ekidi, yuusho yarsho oothidi Godaa sinthan yarshis. Goday Muse kiitidaysada, kahineta shuumiya wode yarshetiya maraziya ashuwape hessi Muse gakiya gisho.
LEV 8:30 Musey tiyo zaytiyapenne yarsho bessan de7iya suuthaafe ekidi, Aarona bollanne iya ma7uwa bolla, iya adde nayta bollanne, enta ma7uwa bolla wurxis; Aaronanne iya ma7uwa, iya naytanne enta ma7uwa dummayis.
LEV 8:31 Musey Aaronanne iya adde naytako haysada yaagis; ashuwa Dunkaaniya pengen kathite; Aaroninne iya adde nayti ta kiitidaysada gaytan de7iya geeshsha uythaara miite.
LEV 8:32 He ashuwapenne uythaafe palahiday de7iko taman xuuggite.
LEV 8:33 Kahineta shuumiya wogay laapun gallas ekiya gisho he wogay poletiya laapun gallasay wurana gakanaw Dunkaaniya pengefe kare keyopite.
LEV 8:34 Goday kiittin hachi poletida wogay hinte nagaraa quchanaasa.
LEV 8:35 Dunkaaniya pengen laapun gallas kumethi gallasinne qamma gam7ite; Godaa wogaa naagite; ixiko hinte hayqana. Tana Goday kiittiday haysa.
LEV 8:36 Aaroninne iya adde nayti Goday Muse baggara kiittidaba ubbaa oothidosona.
LEV 9:1 Hospuntha gallas Musey Aarona, iya adde naytanne Isra7eele cimata xeegis.
LEV 9:2 Aaronako haysada yaagis; borey bayna issi korma nagaraa yarshos, qassi issi maraze xuussa yarshos Godaa sinthe shiisha.
LEV 9:3 Borey bayna issi kole nagara yarshos, issi laythi kumida marinne dorsa urge xuussa yarshos bantaw ehana mela Isra7eele asaas oda.
LEV 9:4 Qassi issifetetha yarshos issi korma, issi marazenne katha yarshos zaytera munuqetida dhiille ehana mela entaw oda. Hachi Goday hintew qoncana gisho hessa oothite.
LEV 9:5 Enti Musey kiittidaba ubbaa Geeshsha Dunkaaniya sinthe ehidosona; maabara ubbay shiiqidi Godaa sinthan eqidosona.
LEV 9:6 Musey entako, Godaa bonchoy hintew qoncana mela hinte oothana mela Goday kiittiday haysa.
LEV 9:7 Musey Aaronako haysada yaagis; “Yarsho bessaako shiiqada ne nagaraa gisho nagara yarshonne xuussa yarsho yarsha. Goday kiitidaysada asaa nagaraa atotethas yarsho yarsha.”
LEV 9:8 Aaroni yarsho bessaako yidi, ba nagaraa gisho yarshetiya maraa shukis.
LEV 9:9 Aarona nayti suuthaa ekidi iyaw ehidosona; I, ba biradhiya he suuthan yeddi ekidi, yarsho bessan de7iya kaceta tiyis; attida suuthaa yarsho bessaafe garsan gussis.
LEV 9:10 Goday Muse kiitidaysada, ashuwape modhuwa, kilahotanne tiriya xeera baggaa ekidi yarsho bessan xuuggis.
LEV 9:11 Shin attida ashuwanne galbaa gutaape kare kessidi xuuggis.
LEV 9:12 Aaroni xuussa yarshos shiiqida mehiya shukis; iya nayti suuthaa ekidi iyaw ehidosona. I yarsho bessa oyddu maazaneta bolla wurxis.
LEV 9:13 Enti ashuwa qommon qommon kessidi, huuphiyara wolla iyaw ehidosona; I ekidi yarsho bessan xuuggis.
LEV 9:14 Ulo ashuwanne gedata haathan meeccidi, yarsho bessan de7iya xuussa yarshuwa bolla wothidi xuuggis.
LEV 9:15 Hessafe guye, Aaroni asaa gisho yarsho yarshis. I asaa nagaraa gisho yarshetiya koliya ekidi shukis; I kase ba nagaraa yarshidaysada enta nagaraa gisho yarshis.
LEV 9:16 Wogay kiiteysada xuussa yarshos shiiqiya mehiya ehidi yarshis.
LEV 9:17 Katha yarshuwa ehidi, iyape issi kuuca ekidi, wonta wonta xuussa yarshuwa bolla gujidi yarsho bessan xuuggis.
LEV 9:18 Aaroni kormanne maraziya asaas issifetetha yarsho oothidi shukis; iya adde nayti suuthaa iyaw ehidosona; I he suuthaa ekidi yarsho bessa oyddu maazaneta bolla wurxis.
LEV 9:19 Kormanne maraziya ashuwape modhuwa, goynaape bidi zoko meqethaa gakanaw de7iya modhuwa, ulo ashuwa kammida modhuwa, kilahotanne tiriya xeera baggaa ekidi,
LEV 9:20 enti angaaysuwa bolla wothin, Aaroni yarsho bessan xuuggis.
LEV 9:21 Goday Muse kiitidaysada, Aaroni angaaysuwanne ushacha gedaa yuusho yarsho oothidi Godaa sinthan yuushshis.
LEV 9:22 Hessafe guye, Aaroni ba kushiya asaako denthidi enta anjis. I nagara yarshuwa, xuussa yarshuwanne issifetetha yarshuwa yarshidaape guye yarsho bessaafe wodhis.
LEV 9:23 Museynne Aaroni Geeshsha Dunkaaniya giddo gelidosona; enti yaape keyidi asaa anjidosona. He wode Godaa bonchoy asa ubbaas qoncis.
LEV 9:24 Godaa matape tami wodhidi, yarsho bessan de7iya xuussa yarshuwanne modhuwa mis. Asa ubbay hessa be7ida wode ililidosona; gufannidi bonchidosona.
LEV 10:1 Aarona adde nayti, Naadabinne Abyoodi, banta ixaane cuyisiya miishe ekidi iya bolla tama wothidosona; iya bolla ixaane gujidosona. Goday enta kiittiboona coo tama Godaa sinthan shiishidosona.
LEV 10:2 Hessa gaason Godaa matape tami yidi enta min, enti Godaa sinthan hayqidosona.
LEV 10:3 Musey Aaronako, Goday, “Taani asaa giddofe taako shiiqeyisata, ta geeshshatetha bessaana. Qassi asa ubbaa sinthan ta bonchetana” gidi odidaysa haysa be7a. Aaroni zaaro immonna si77i gis.
LEV 10:4 Musey Aarona aawa ishaa Uzi7eela adde nayta Misa7eelanne Elzafaana xeegidi, “Haa yidi hinte aawa ishaa nayta aha Geeshsha Dunkaaniya sinthafe denthidi, gutaape gaxa kessite” yaagis.
LEV 10:5 Enti yidi, Musey kiitidaysada enta kahinetetha ma7uwara enta aha tookidi, gutaape gaxa kessidosona.
LEV 10:6 Musey Aaronanne iya adde nayta, Alaazaranne Itamaara haysada yaagis; “Hinte hayqonna melanne Goday ba asaa bolla hanqetonna mela hinte huuphiya meedopite; hinte ma7uwaka daakofite. Shin hinte ishati, Isra7eele asay, Goday ba taman wodhidaysatas yeeko.
LEV 10:7 Godaa tiyo zaytey hinte bolla di7iya gisho Dunkaaniya pengefe kare keyopite; keyiko hinte hayqana” yaagis. Enti Musey gidaysada oothidosona.
LEV 10:8 Goday Aaronako haysada yaagis;
LEV 10:9 Hinte hayqonna mela Dunkaaniya gido geliya wode nenne ne nayti woyne ushshi woyko hara mathoyiya ushshi uyopite; hessi sinthafe yaana yeletethaas merinaw eqidi de7iya woga gidana.
LEV 10:10 Hinte geeshshabanne geeshshi gidonaba qassi tunabaanne tuna gidonaba shaakidi erite.
LEV 10:11 Goday Muse baggara odida woga ubbaa Isra7eele asaa tamaarsite.
LEV 10:12 Musey Aaronanne attida iya adde nayta Alaazaranne Itamaara haysada yaagis; Godaas xuussa yarshuwafe attida katha yarshuwa ekidi irsho yeggonna uukite. I ubbaafe geeshshi gidiya gisho yarsho bessaa matan miite.
LEV 10:13 Godaas xuussa yarshuwafe hessi nenanne ne adde nayta gakiya gisho gidiya gisho, hessa hinte geeshsha bessan miite; Haysa hinte oothana mela Goday tana kiittis.
LEV 10:14 Shin yuusho yarshos shiiqida angaaysuwanne gedaa neeni, ne adde naytinne ne macca nayti geeshsha bessan miite. Hessi Isra7eele asay shiishiya issifetetha yarshuwafe nenanne ne adde nayta gakiya hinte gisho.
LEV 10:15 Godaas yarshida gedaanne yuusho yarshos shiiqida angaasuwa modhuwara issife gathidi Godaa sinthan yuusho yarsho oothidi yarshanaw shiiqo. Goday kiitidaysada, hessi newunne ne adde naytas merinaw hintena gakiya gisho gidana.
LEV 10:16 Musey nagara yarshos shiiqida deesha enti waatidaako eranaw koyidi oychis; I xuugetidaysa erida wode attida Aarona adde nayta, Alaazaranne Itamaara bolla hanqetis.
LEV 10:17 “Nagaraa yarshos shiiqida ashuwa ayis geeshsha bessan mibeeketii? I ubbaafe geeshshi. Godaa sinthan asaa nagaraa diggidi asaas atotethi immana mela hessi hintew imetis.
LEV 10:18 He mehiya suuthay geeshsha Dunkaaniya giddo geliboonna gisho, taani hintena kiitidaysada, hinte iya geeshsha bessan maanaw bessees, shin aggideta” yaagis.
LEV 10:19 Aaroni Museko, “Heko, ha asati hachi banta nagaraa yarshuwanne xuussa yarshuwa Godaa sinthe ehidosona. Gidoshin, hessa melabay ta bolla gakis. Taani nagaraa yarshuwa hachi midaba gidiyako, Goday ufaytanashin attidee?” yaagis.
LEV 10:20 Musey hessa si7ida wode iya zaaruwan ufaytis.
LEV 11:1 Goday Musekonne Aaronako,
LEV 11:2 Isra7eele asaas haysada yaagidi odite; “Biitta bolla de7iya mehetapenne do7atape hinte maanaysati haysata;
LEV 11:3 Shuquley phalqetidaysatanne waammotiya meheta miite.
LEV 11:4 Shin waammotishe shuquley phalqetonaysatanne shuquley phalqethi gididi waammotonayisata moopite. Gimaley waammotees, shin shuquley phalqetonna gisho, hintew tuna gido.
LEV 11:5 Gupalley waammotees, shin shuquley phalqetonna gisho, hintew tuna gido.
LEV 11:6 Eshey waammotees, shin shuquley phalqethi gidonna gisho, hintew tuna gido.
LEV 11:7 Guduntho moopite; iyaw shuquley phalqethi, shin waammotonna gisho, I hintew tuna.
LEV 11:8 Hinte hessata moopite; enta bawuta bochofite; enti hintew tuna.
LEV 11:9 “Haatha giddon de7iya medhetetha ubbaafe hinte maanaysati haysata; Abbaa giddon woyko shaafa haatha giddon de7iya ubbaafe qefeynne poqoy de7iya ubbaa miite.
LEV 11:10 Shin abba giddon woyko goggiya haathan de7iya qefeynne poqoy bayna medhetethati hintew tuna gidiya gisho moopite.
LEV 11:11 Haysati hintew tuna; enta moopite; enta bawuta bochofite.
LEV 11:12 Qefeynne poqoy bayna haatha giddon de7iya medhetethati ubbay hintew tuna.
LEV 11:13 “Kafotape hintew tuna gididaysatinne hinte maanaw bessonnaysati haysata; arganthi, anko, molo kafo,
LEV 11:14 xilo, phirco qommo ubbaa,
LEV 11:15 quuro ubbaa
LEV 11:16 yancho, solo, qoolle, gutto ubbaa,
LEV 11:17 guutha gutto, hazazo, diidinthe,
LEV 11:18 haatha kutto, shi7a anko, daare anko,
LEV 11:19 silaago, saabisanne iya qommo ubba, ayyaana kafonne shirshiqo.
LEV 11:20 “Qefera de7iya oyddu tohon hemetiya laafa medhetethati ubbay hintew tuna.
LEV 11:21 Gidoshin, qefey de7iya oyddu tohon hemeteysatape enta tohuwape bollara gupanaw maaddiya tohoy de7eyisata miite.
LEV 11:22 Hessatika, boole qommo ubbaa, xaqo ubbaanne sere ubbaa.
LEV 11:23 Shin hara qefera de7iya oyddu tohoy de7iya medhetethati ubbay hintew tuna.
LEV 11:24 “Haysati hintena tunisana; enta bawuta bochiya oonika omarsi gakanaw tuna gidana.
LEV 11:25 Enta bawuta denthiya oonika ba ma7uwa meecco; shin omarsi gakanaw I tuna gido.
LEV 11:26 Shuquley de7ishe phalqethi gidonnaysati woyko waammotonnaysati ubbay hintew tuna; enta bochiya oonika tunees.
LEV 11:27 Oyddu tohotan hemetiya do7a ubbaafe gindera hemeteysati hintew tuna; enta bawuta bochiya oonika omarsi gakanaw tunees.
LEV 11:28 Enta bawuta denthiya oonika ba ma7uwa meecco; shin omarsi gakanaw I tuna. Entika hintew tuna.
LEV 11:29 “Sa7ara hemeteysatape haysati hintew tuna. Entika giro, ecere, dumma dumma koche,
LEV 11:30 geegge, haylasho, korche, wakallanne shaaqancho.
LEV 11:31 Sa7ara hemetiya ubbaafe haysati hintew tuna; enta bawuta bochiya oonika omarsi gakanaw tuna gidees.
LEV 11:32 Enta bawuta bochiya ay miisheyka tuna gidees; mitha miishey woyko ma7oy woyko galbi woyko ogoroy tuna gidees. Enta bawutay bochida miishe ubbay haathan muuketidi omarsi gakanaw gam7o; hessafe guye geeshshi gidana.
LEV 11:33 Entafe issuwa bawutay oto giddon wodhidi bentiko, iya giddon de7iyaba ubbay tuna; he otuwa menthite.
LEV 11:34 Ay kathi gidin he otuwa giddon de7iya haathaafe xokiko, he kathay tuna gidees; uyetiyaba gidin, he otuwa giddon de7iko tuna gidees.
LEV 11:35 He bawutape issoy wodhida miishe ubbay tuna; cooce woyko oto gidikoka menthite; enti hintew tuna.
LEV 11:36 He bawutay bochida ubbay tuna gidikoka pultoynne haatha olli tunenna.
LEV 11:37 Enta bawutape issoy zeretha katha bolla wodhiko, hessi tunenna.
LEV 11:38 Shin he zerethaa bolla haathi gukidi simmin, enta bawutape issoy iya bolla wodhiko, he zerethay hintew tuna.
LEV 11:39 “Meetetiya mehetape issoy bawutiko, iya bawuta bochiya oonika omarsi gakanaw tuna.
LEV 11:40 Oonika he mehiya bawutape miiko, ba ma7uwa meecco; omarsi gakanaw I tuna. Oonika iya bawuta tookidi denthiko, ba ma7uwa meecco; omarsi gakanaw I tuna.
LEV 11:41 “Sa7ara gooshetiya medhetethi ubbay hintew tuna; iya moopite.
LEV 11:42 Ulora gooshetiyaba gidin, oyddu tohora hemetiyaba gidin, daro tohoy de7iyaba gidin, sa7ara gooshetiya medhetethi ubbay hintew tuna gidiya gisho moopite.
LEV 11:43 Ha sa7ara gooshetiya medhetethatan hintena tunisopite; enta gaason hinte asatethaa tunisopite.
LEV 11:44 Taani Godaa, hinte Xoossaa. Taani geeshshi gidiya gisho, hintena dummayidi geeshshi gidite. Sa7ara gooshetiyabatan hinte asatethaa tunisopite.
LEV 11:45 Taani hintew Xoosse gidanaw hintena Gibxe biittafe kessida hinte Godaa. Hesaa gisho, taani geeshshi gidiya gisho, hinteka geeshshi gidite.
LEV 11:46 “Mehe, kafo, haatha giddon qaaxiya medhetethi ubbaanne sa7ara hemetiya medhetetha ubbaa wogay haysa.
LEV 11:47 Hessan hinte tunanne tuna gidonnayisata giddon, qassi meetetiyanne meetetonna medhetethata giddon de7iya dummatethaa shaakidi erana.”
LEV 12:1 Goday Museko haysada yaagis;
LEV 12:2 Isra7eele asaas haysada yaagada oda; “Issi maccasi qanthatada adde na7a yeliko, ba kushe metuwa be7iya wode tuna gideysada laapun gallas gakanaw tuna gidana.
LEV 12:3 Hospuntha gallas na7ay qaxaretanaw koshshees.
LEV 12:4 Hessafe guye, maccasiya ba yelo suuthay xiz7ana gakanaw hastamanne heedzu gallas gam7o; qassi ba geeyiya gallasay wurana gakanaw geeshshaba bochofo; Geeshsha Dunkaaniyaka gelopo.
LEV 12:5 “Shin issi maccasi macca na7a yeliko, ba kushe meto be7ida wode iya tuna gididaysada nam7u saaminta gakanaw iya tuna gidana. Hessafe guye, ba yelo suuthay xiz7ana gakanaw usupun tammanne usupun gallas gam7o.
LEV 12:6 “Maccasiya adde na7a woyko macca na7a yelada ba geeyiya wodiya ongidaape guye, xuussa yarshos issi laytha dorsenne nagara yarshos qassi issi holle woyko issi kuraacho Geeshsha Dunkaaniya pengen de7iya kahiniyako eho.
LEV 12:7 Kahiney hessa ekidi Godaa sinthan I nagaraa atotethas yarshees. Hessafe guye, iya geeyana. Adde na7a woyko macca na7a yeliya maccasas de7iya wogay haysa.
LEV 12:8 “Shin iya issi laytha dorse ehanaw danda7onna ixiko, nam7u holleta woyko nam7u kuraachota eho. Entafe issoy xuussa yarshos, qassi issoy nagara yarshos gido. Hessada oothidi kahiney I nagaraa atotethas yarshees; iyaka geeshshi gidana.”
LEV 13:1 Goday Musekonne Aaronako haysada yaagis;
LEV 13:2 “Issi asa asatethaa bolla kixi wodhiko woyko shattoy woyko iralley keyiko iya gogay hargen laametiko, he uraa kahiniya Aaronako woyko kahine gidida iya adde naytape issuwako eho.
LEV 13:3 Kahiney iya goga bolla de7iya madunthaa be7o. He madunxida bessan de7iya ikisey booxikonne madunthay ollatiko, hessi goga harge. Kahiney hessa be7idi uray tuna gideysa eriso.
LEV 13:4 Shin iya gogaa bolla de7iya madunthay boothi gididi, gogaape kanthidi ollatiboonaba gidiko he madunthaa bolla de7iya ikisey booxonnaba gidiko, kahiney he uraa dumma keethan laapun gallas gordidi wotho.
LEV 13:5 Laapuntha gallas kahiney iya zaaridi be7o; I be7iya wode madunthay uraa gogaa bolla dalgonna kaseysda de7iko, kahiney he uraa nam7antho dumma keethan laapun gallas gordidi wotho.
LEV 13:6 Qassika laapuntha gallas kahiney iya be7o; I be7iya wode madunthay dalgonna ixidi dhayi dhayi biiko, kahiney I tuna gideysa eriso. Hessi goo7o gideysa eriso; he uray ba ma7uwa meeccidi tuna gidonaysa erisees.
LEV 13:7 Shin I geeyanaw bana kahiniya bessidaape guye, he goo7oy iya gogaa bolla dalgi dalgi biiko I zaaridi bana bessanaw kahiniyako boo.
LEV 13:8 Kahiney iya be7o; he goo7oy uraa gogaa bolla dalgi dalgi biiko, hessi goga harge gidiya gisho kahiney I tuna gideysa eriso.
LEV 13:9 “Oonika goga hargen oyketiko iya kahiniyako eho.
LEV 13:10 Kahiney iya be7iya wode iya gogaa bolla bootha kixi de7iko, ikisey boothi laammikonne he kixa giddon ashoy bentiko,
LEV 13:11 hessi gogaa bolla gam7ida harge gidiya gisho, kahiney I tuna gideysa eriso. I tuna gideysi eretida gisho, iya dumma keethan gordidi wothanaw koshshenna.
LEV 13:12 Kahiney goga hargey addiya asatethaa bolla dalgiko, huuphepe toho gakanaw ubbaa ma77idaba gidiko be7o.
LEV 13:13 He goga hargey iya asatethaa ubbaa ma7iko, iya asatethay kumethi laametidi boothi gidida gisho, I tuna gidonaysa kahiney eriso.
LEV 13:14 Shin he maduntha giddora ashoy bentiko I tuna.
LEV 13:15 Kahiney he ashuwa be7idi he uray tuna gideysa eriso. He ashoy goga harge gidiya gisho I tuna.
LEV 13:16 Shin he ashoy qassika laametidi booxiko, he uray kahiniyako bo.
LEV 13:17 Kahiney iya be7o; iya madunthay booxidaba gidiko, he uray tuna gidonaysa kahiney eriso; I tuna gidana.
LEV 13:18 “Issi asa bolla merkoy wodhidi paxidaba gidiko,
LEV 13:19 iya bessan bootha kixay wodhiko woyko zo77ida iralley keyiko he uray kahiniyako bo.
LEV 13:20 Kahiney iya be7o; he madunthay ollatiko, madunthaa bolla de7iya ikisey laametidi booxiko, he uray tuna gideysa kahiney eriso. Hessi merkoda doomida goga harge.
LEV 13:21 Shin kahiney be7iya wode ikisey booxonnaba gidiko, madunthay gogaa kanthidi ollatiboonaba gidiko, qassi dhayi dhayi biiko, kahiney iya dumma keethan laapun gallas gordidi wotho.
LEV 13:22 Hessi iya gogaa bolla dalgi dalgi biiko, hessi goga harge gidiya gisho he uray tuna gideysa kahiney eriso.
LEV 13:23 Shin he iralley dalgi dalgi boonna issi bessan de7iko, hessi merkoy paxida beeta gidiya gisho, he uray tuna gidonaysa eriso.
LEV 13:24 “Tami issi asi miiko he mida bessan bootha woyko zo7o iralley keyiko,
LEV 13:25 kahiney he bessa be7o. He bessan de7iya ikisey booxikonne he madunthay ollatiko, hessi goga harge. I tamay mida bessaara keyida gisho kahiney I tuna gideysa eriso.
LEV 13:26 Shin kahiney be7iya wode he madunthaa bolla de7iya ikisey booxonnaba gidiko, madunthay gogaa kanthidi ollatiboonaba gidikonne qassi dhayi dhayi bidaba gidiko, kahiney iya dumma keethan laapun gallas gordidi wotho.
LEV 13:27 Laapuntha gallas kahiney iya be7iya wode he bessay dalgi dalgi biiko, hessi goga harge gidiya gisho I tuna gideysa kahiney eriso.
LEV 13:28 Shin he madunthay gogaa bolla dalgonna aggidi issi bessan uttikonne dhayi dhayi biiko, hessi tamay mida bessan attida beeta gidiya gisho, I tuna gidonaysa kahiney eriso.
LEV 13:29 “Issi addey woyko maccasa huuphen woyko gaco bolla madunthi keyiko,
LEV 13:30 kahiney he madunthaa be7iya wode madunthay gogaa kanthidi ollatiko iya bolla de7iya ikisey lee7idi galal7o daaniko, hessi huuphen woyko gaco bolla keyiya qaachiya goga harge gidiya gisho, he uray tuna gideysa kahiney eriso.
LEV 13:31 Qassi kahiney he hargiya be7iya wode gogaa kanthidi ollatiboonaba gidiko, kareetha ikisey iya bolla dhayiko, he qaachiya hargey de7iya uraa kahiney dumma keethan laapun gallas gordidi wotho.
LEV 13:32 Laapuntha gallas kahiney he hargiya be7iya wode qaachiya hargey dalgonnaba gidiko, iya bolla galal7o daaniya ikisey baynaba gidikonne gogaa kanthidi ollatiboonaba gidiko,
LEV 13:33 he ura qaachiya bessan de7iya ikisiya gidonashin, madunthaa yuushon de7iya ikisiya meedo. Kahiney he uraa dumma keethan hara laapun gallas gordidi wotho.
LEV 13:34 Laapuntha gallas kahiney he qaachiya bessaa be7iya wode uraa galbaa bolla dalgonna ixikonne gogaa kanthidi ollatonna ixiko, he uray tuna gidonaysa kahiney eriso. Uray ba ma7uwa meeccidi geeshshi gidana.
LEV 13:35 Shin I geeydaape guye, qaachiya hargey he uraa galba bolla dalgi dalgi biiko,
LEV 13:36 kahiney iya be7iya wode he qaachiya hargey dalgidaba gidiko, he uray tunida gisho kahiney galal7o daaniya ikisiya koyopo.
LEV 13:37 Shin kahiney be7iya wode he qaachiya bessay dalgonnaba gidikonne kareetha ikisey iya bolla dolidaba gidiko, he qaachiya bessay paxis. He uray tuna gidonna gisho, I geeshshi gideysa kahiney eriso.
LEV 13:38 “Issi adde woyko maccasa goga bolla bootha iralley keyiko,
LEV 13:39 kahiney be7iya wode enta gogaa bolla de7iya iralley bulla gidiko, hessi gogaa bolla coo keydaba gidiya gisho he uray tuna gidenna.
LEV 13:40 “Issi asas huuphe binaanay qoqofetiko, bo77a gideesipe attishin, I tuna gidenna.
LEV 13:41 Issi asi sinthara bo77atiko, iya tiishshi misipe attishin, I tuna gidenna.
LEV 13:42 Shin iya bo77i woyko tiishshi midaysa bolla zo7o woyko bootha madunthi keyiko, hessi iya bo77an woyko iya tiishsha bolla keyida goga harge.
LEV 13:43 Iya kahiney be7iya wode iya bo77i woyko tiishshi midaysa bolla de7iya madunthay galba bolla keyiya goga harge mela zo7o gidiko,
LEV 13:44 he uray tuma goga hargen oyketida hargancho. I tuna gidiya gishonne iya hargey iya huuphen de7iya gisho I tuna gideysa kahiney eriso.
LEV 13:45 “Goga hargey oykida asi peedhetida ma7o ma7o; ba huuphiya pixopo; ba doona kammo; ba qaala dhoqu oothidi, ‘Taani tuna, taani tuna!’ yaago.
LEV 13:46 He hargey iya bolla de7ida wode ubban I tuna. I tuna gidiya gisho, asaape shaaketidi, gutaape karen barka de7o.
LEV 13:47 “Ay ma7o bolla buuqida bessi bentiko, he ma7oy suufe gidin woyko liino gidin,
LEV 13:48 qacinape woyko shalope dadetida liino woyko suufe gidin, galba woyko galbafe oosetida ma7o gidin,
LEV 13:49 he ma7uwa bolla bentida buuqay ciliilo woyko zo7o mala bessiko, I qacinape woyko shalope dadetidaba gidin, galba woyko galbafe oosetidaba gidin, hessi asape ase oykiya harge gidiya gisho, hessa kahiney bessanaw koshshees.
LEV 13:50 Kahiney he buuqa be7idi, he buuqida ma7uwa dumma keethan laapun gallas gordidi wotho.
LEV 13:51 Laapuntha gallas kahiney he ma7uwa be7iya wode he ma7uwa bolla de7iya buuqay dalgi dalgi biiko, I qacina woyko shalo gidin, galba woyko galbafe oosetida ma7o gidin, hessi issuwafe issuwa oykiya buuqa harge gidiya gisho he ma7oy tuna.
LEV 13:52 He ma7oy qacina woyko shalo gidin, liino woyko suufe gidin, galbafe oosetidaba ayba gidin, kahiney iya xuuggo. Hessi issuwafe issuwa oykiya buuqa harge gidiya gisho, I xuugetanaw bessees.
LEV 13:53 “Shin kahiney be7iya wode he buuqa ma7uwa bolla dalgiboonaba gidiko, I qacina woyko shalo woyko galbafe oosetidaba ayba gidin,
LEV 13:54 he buuqay de7iya ma7uwa meeccana mela kahiney kiitto. Hessafe guye, he ma7uwa dumma keethan hara laapun gallas gordidi wotho.
LEV 13:55 He ma7oy meecetidaape guye qassika kahiney be7iya wode he buuqay ba malaa laammonnabaa gidikonne dalgi dalgi boonna ixikoka I tuna. He buuqa bessay ma7uwas guye baggara woyko sintha baggara de7ikoka he ma7oy taman xuugetanaw koshshees.
LEV 13:56 Shin he ma7uwa meecci simmin kahiney be7iya wode buuqay dhayi dhayi biiko, I galba gidin, qacina woyko shalo gidin, he buuqay de7iya bessaa kahiney daakidi kesso.
LEV 13:57 Hessafe guye, ma7uwa bolla simmidi keyiko, he ma7oy qacina woyko shalo gidin, galbafe oosetidaba gidin, hessi dalgi dalgi biiko he buuqay de7iya ma7oy taman xuugetanaw bessees.
LEV 13:58 Shin meecetida ma7oy qacina woyko shalo gidin, woyko galbafe oosetidaba ma7o gidin, buuqa malay dhayiko, he ma7oy nam7antho meeceto; Hessafe guye, I geeyees” yaagis.
LEV 13:59 Issi ma7oy suufe woyko liino gidin, qacina woyko shalo gidin, woyko galbafe oosetidaba gidin, he ma7uwa geeshshi woyko tuna yaagisanaw danda7iya wogay haysa.
LEV 14:1 Goday Museko haysada yaagis;
LEV 14:2 Goga hargey oykida uray geeyiya gallas oothanaw koshshiya wogay haysa. He uraa kahiniyako ehanaw koshshees.
LEV 14:3 Kahiney gutaape gaxaa keyidi iya hargiya be7o. I be7iya wode goga hargey uraa asatethafe dhayidabaa gidiko,
LEV 14:4 kahiney nam7u tuna gidonna kafota, ziga mitha qanxo, zo7o qacinanne hisoophe bonco he hargiyafe geeyiya uraa gisho ehana mela kiitto.
LEV 14:5 Hessafe guye, kahiney nam7u kafotape issuwa pultofe duuqidi keren qolida haatha bolla shukana mela kiitto.
LEV 14:6 Hanko kafuwa zo7o qacinaranne hisoophe boncora ekidi, keren de7iya pulto haatha bolla shukida kafuwa suuthan naaqo.
LEV 14:7 He suuthaa, he goga hargiyafe geeyiya uraa bolla laapun toho wurxo; he uray tuna gidonaysa eriso; paxa de7iya kafuwa demba yeddo.
LEV 14:8 He hargiyafe geeyiya uray ba ma7uwa meecco; ba asatethaa bolla de7iya ikise ubbaa meedeto; ba asatethaa meeceto. Hessafe guye, I geeyidi guta gelo, shin ba dunkaaniya giddo gelonna laapun gallas karen gam7o.
LEV 14:9 Laapuntha gallas ba huuphiya, buuchaa, deemuwanne ba asatethaa bolla de7iya hara ikise ubbaa meedeto; qassi ba ma7uwa meecco; ba asatethaka meeceto; Hessafe guye, I geeshshi gidana.
LEV 14:10 Hospuntha gallasan borey bayna nam7u urge dorsatanne issi laythi gidida issi macca dorse eho. Qassi katha yarshos zaytera munuqetida heedzu kilo giraame lo77o dhiillenne issi litiro zaytepe siko eho.
LEV 14:11 Iya geeshshiya kahiney uraanne I ehida yarshotara issife Geeshsha Dunkaaniya pengen Godaa sinthan shiisho.
LEV 14:12 Kahiney nam7u dorsa urgetape issuwa ekidi, issi litiros siko zaytera issife naaqo yarsho oothidi shiisho; he shiiqida yarshuwa yuusho yarsho oothidi Godaa sinthan shiisho.
LEV 14:13 Yaatidi, I he dorsa urgiya nagara yarshonne xuussa yarsho shukiya geeshsha bessan shuko. Nagara yarshuwa mela naaqo yarshoyka kahiniyas imetees; ika ubbaafe aadhida geeshshi.
LEV 14:14 Kahiney naaqo yarshuwa suuthaafe guuthi ekidi, he geeyiya uraas ushacha bagga haythaa, ushacha kushiya wogga biradhiyanne ushacha tohuwa wogga biradhiya tiyo.
LEV 14:15 Hessafe guye, kahiney zaytiyape guuthara ekidi, ba haddirsa kushiya qaaqan tigo.
LEV 14:16 He haddirsa kushiya qaaqan de7iya zaytiya ba ushacha kushe biradhiya yeddi yeddi ekidi, Godaa sinthan laapun toho wurxo.
LEV 14:17 Yaatidi, ba kushiya qaaqan de7iya zaytiyape ekidi, geeyiya uraas ushacha haytha, ushacha kushiya wogga biradhiyanne ushacha tohuwa wogga biradhiya kase naaqo yarshuwa suuthaa tiyida bessan tiyo.
LEV 14:18 Qassi ba kushiya qaaqan attida zaytiya kahiney geeyiya uraa huuphen gusso; yaatidi Godaa sinthan he uraa nagaraa atto yaagiso.
LEV 14:19 Hessafe guye kahiney geeyiya uraa nagara atotethas shiiqida yarshuwa yarshees; kallidi qassi xuussa yarshos shiiqida mehiya shukees.
LEV 14:20 Kahiney xuussa yarshuwa katha yarshuwara issife yarsho bessan wothidi xuuggees; yaatidi uraa nagaraa atto yaagisees; he uray geeyees.
LEV 14:21 Shin uray hessa ubbaa ehanaw danda7onna manqo gidiko, Godaa sinthan iya nagaraa atotethas yuushshanaw naaqo yarshos issi dorsa urge eho. Katha yarshos zaytera munuqetida issi kilo giraame lo77o dhiillenne issi litiro zaytepe sikuwa eho.
LEV 14:22 Baw danda7etida mela nam7u holle woyko nam7u kuraacho issuwa nagaraa yarshos, issuwa xuussa yarshos eho.
LEV 14:23 Hospuntha gallas ba tunatethaafe geeyiya uray Geeshsha Dunkaaniya pengen Godaa sinthe ehidi kahiniyas immo.
LEV 14:24 Kahiney naaqo yarshos yida dorsa urgiyanne zaytiya ekidi, yuusho yarsho oothidi Godaa sinthan yuushsho.
LEV 14:25 Naaqo yarshos yida dorsa urgiya shuko; He urgiya suuthaafe guuthara ekidi, ha geeyiya uraa ushacha haytha, ushacha kushiya wogga biradhiyanne ushacha tohuwa wogga biradhiya tiyo.
LEV 14:26 Kahiney zaytiyape guuthara ba haddirsa kushiya qaaqan tigo.
LEV 14:27 Haddirsa kushiya qaaqan de7iya zaytiyape ushacha kushiya biradhiya yeddi ekidi, Godaa sinthan laapun toho wurxo.
LEV 14:28 Kahiney ba kushiya qaaqan de7iya zaytiyape guuthara ekidi, geeyiya uraas ushacha haytha, ushacha kushiya wogga biradhiyanne ushacha tohuwa wogga biradhiya kase naaqo yarsho suuthaa tiyida bessan tiyo.
LEV 14:29 Godaa sinthan uraa nagaraa atotethas kahiney ba kushen attida zaytiya geeyiya uraa huuphen tigo.
LEV 14:30 Hessafe guye, geeyiya uray baw danda7etidaysa mela holle woyko kuraacho eho.
LEV 14:31 Issuwa nagara yarshos nam7anthuwa xuussa yarshos katha yarshuwara issife shiisho. Kahiney geeyiya uraa nagaraa Godaa sinthan iya nagaraa atto yaagiso.
LEV 14:32 Ba asatethaa bolla de7iya goga hargiyafe geeyanaw manqotethi diggida uraas de7iya wogay haysa.
LEV 14:33 Goday Musekonne Aaronako haysada yaagis;
LEV 14:34 “Taani hintew immiya Kanaane biitta hinte geliya wode he biittan de7iya hinte keethafe issuwan taani buuqa yeddiya wode,
LEV 14:35 he uray kahiniyako bidi, ‘Ta keetha bolla buuqa daaniyabay de7ees’ yaagidi odo.
LEV 14:36 Kahiney soo gelidi buuqa qommuwa be7anaape kasetidi, son de7iyabay ubbay tuna geetetonna mela son de7iyaba ubbaa kare kessana mela kiitto; hessafe guye, kahiney be7anaw soo gelo.
LEV 14:37 I gelidi be7iya wode buuqay godaa bolla ciliilo woyko zo7o malla bessikonne qassi godaa midi ollayidi giddo geliko,
LEV 14:38 kahiney kare keyidi, keethaa laapun gallas gakanaw gordo.
LEV 14:39 Laapuntha gallasan kahiney he keethaa zaaridi xeelliya wode he buuqay keetha godaa bolla dalgiko,
LEV 14:40 buuqay de7iya shucha ubbaa godaape shoddidi, katamaape gaxa kessidi tuna bessan yeggana mela kiitto.
LEV 14:41 Kaallidi godaa meeshida urqa soo baggara bookidi, yuushshi aathidi qoqofana mela ootho; yaatidi he urqa katamaape gaxan de7iya tuna bessan yeggo.
LEV 14:42 Hessafe guye, he shodetida shuchata bessan hara shuchata wotho; hara urqan keethaa meesho.
LEV 14:43 “Shuchay shodetin, urqay qoqofetin, hara urqa meeshi simmin, buuqay keethaa giddon zaari bentiko,
LEV 14:44 kahiney hessa be7o. I be7iya wode buuqay he keethaa giddon dalgiko, hessi asape ase oykiya buuqa harge gidiya gisho he kathay tuna.
LEV 14:45 Hessa gisho, he keethaa, iya shuchaa, iya mithaanne I meeshetida urqa ubbaa laallidi katamaape gaxa efidi, tuna bessan yeggo.
LEV 14:46 He keethay gordan gam7iya wode iya gido geliya oonika omarsi gakanaw tuna.
LEV 14:47 He keethan aqiya woyko kathi miya uray ba ma7uwa meecco.
LEV 14:48 “Shin kahiney yidi xeelliya wode keethay meeshetidi simmin, zaaridi dalgonna ixiko, buuqay dhayida gisho, he keethay tuna gidonaysa kahiney eriso.
LEV 14:49 Keethaa geeshshanaw nam7u kafota, ziga mitha qanxo, zo7o qacinanne hisoophe bonco eho.
LEV 14:50 Kafotape issuwa pultofe duuqidi keren qolida haathan shuko.
LEV 14:51 Hessafe guye, zigaa, hisoophe boncuwa, zo7o qacinanne paxa de7iya kafuwa ekidi, keren de7iya shuketida kafuwa suuthaninne pulto haathan yeddi ekidi laapun toho he keethaa wurxo.
LEV 14:52 Yaatidi, kahiney he keethaa kafuwa suuthan, pulto haathan, paxa de7iya kafuwan, ziga mithan, hisoophe boncuwaninne zo7o qacinan geeshsho.
LEV 14:53 Paxa de7iya kafuwa katamaape gaxa yeddo. Hessada oothidi, keethaa geeshshiya wogaa polees; keethay geeshshi gidees.
LEV 14:54 “Dumma dumma goga hargeesinne goo7o hargees imetida wogay haysa.
LEV 14:55 Ma7o bolla woyko keetha bolla keyiya buuqa harge gidin,
LEV 14:56 kixa gidin, merko gidin, iralle gidin,
LEV 14:57 issibay tuna gideysanne tuna gidonnaysa erisiya wogay haysa.”
LEV 15:1 Goday Musekonne Aaronako haysada yaagis;
LEV 15:2 Isra7eele asaas haysada yaagidi odite; “Issi asa asatethafe goggiyabay de7iko hessi tuna.
LEV 15:3 Goggiyabay de7iya uraa tuna oothiya wogay haysa; he goggiyabay aggin, aggonna ixin, he uraa tuna oothees.
LEV 15:4 “Iya asatethafe goggiyabay de7iya uray zin7iya hiixaynne uttiya oyde ubbay tuna.
LEV 15:5 Iya hiixa bochiya oonika ba ma7uwa meecco; ba asatethaka meeceto; yaatidi omarsi gakanaw tuna gidees.
LEV 15:6 Goggiyabay de7iya uray uttidaba bolla uttiya oonika ba ma7uwa meecco; ba asatethaka meeceto; yaatidi omarsi gakanaw tuna gidees.
LEV 15:7 “Goggiyabay de7iya uraa asatethaa bochiya oonika ba ma7uwa meecco; ba asatethaa meeceto; yaatidi omarsi gakanaw I tuna gidees.
LEV 15:8 “Goggiyabay de7iya asi tuna gidonna asa bolla cutiko, he uray ba ma7uwa meecco; ba asatethaka meeceto; yaatidi omarsi gakanaw I tuna gidees.
LEV 15:9 “Goggiyabay de7iya uray uttiya toga koori tuna.
LEV 15:10 Iyape garsara de7iyaba bochiya oonika omarsi gakanaw tuna gidees; qassi hessa tookiya oonika ba ma7uwa meecco; ba asatetha meeceto; yaatidi omarsi gakanaw I tuna gidees.
LEV 15:11 “Goggiyabay de7iya asi ba kushiya meecetonna bochiya asi oonika ba ma7uwa meecco; ba asatethaa meeceto; yaatidi omarsi gakanaw tuna gidees.
LEV 15:12 “Goggiyabay de7iya uray bochiya oto ubbaa menthite; mithafe oosetida miishe ubbay haathan meeceto.
LEV 15:13 “Goggiyabay de7iya asi he gogiyabape geeyida wodepe laapun gallas gam7o. Ba ma7uwa meecco; ba asatethaa pulto haathan meeceto; yaatidi I geeshshi gidees.
LEV 15:14 Hospuntha gallasan nam7u holleta woyko nam7u kuraachota ekidi, Geeshsha Dunkaaniya penge, Godaa sinthe ehidi kahiniyas immo.
LEV 15:15 Kahiney holletape issuwa nagara yarshos, issuwa qassi xuussa yarshos yarshees; yaatidi kahiney uraa asatethafe goggiyaba gisho Godaa sinthan iya nagaraa atto yaagisees.
LEV 15:16 “Issi addefe iya atunthay gukiko, ba kumetha asatethaka meeceto; yaatidi omarsi gakanaw I tuna gidees.
LEV 15:17 Atunthay bochida ma7o ubbay woyko galba ubbay haathan meeceto; yaatidi omarsi gakanaw tuna gidees.
LEV 15:18 Issi addey maccara aqin, iya atunthay gukiko, nam7ayka haathan meeceto; yaatidi omarsi gakanaw enti tuna gidoosona.
LEV 15:19 “Issi maccasi ba kushe meto be7iko, laapun gallas gakanaw iya tuna; iyo bochiya oonika omarsi gakanaw tuna.
LEV 15:20 “Ba kushe meto wode iya zin7iya hiixaynne iya uttiya oydey ubbay tuna.
LEV 15:21 Iya zin7iya hiixa bochiya ubbay ba ma7uwa meecco; ba asatethaka meeceto; yaatidi omarsi gakanaw tuna gido.
LEV 15:22 Iya uttiyaba bochiya ubbay ba ma7uwa meecco; ba asatethaa meeceto; yaatidi omarsi gakanaw tuna gido.
LEV 15:23 Iya zin7iya hiixa gidin woyko iya uttiyaba bochiya oonika omarsi gakanaw tuna.
LEV 15:24 “Issi maccasi kushe metora de7iya wode addey iira aqiko, he kushe metuwa I bochiko, laapun gallas gakanaw I tuna gidees; I zin7iya hiixa ubbay tuna gidees.
LEV 15:25 “Issi maccasi, ba kushe meto wodey aadhin, suuthi aggonna goggiko woyko kushe meto wodey ba qammafe aadhidi goggiko, kushe meto wode iya tuna gididaysada suuthay eqana gakanaw iya tuna gidawusu.
LEV 15:26 Suuthi iipe goggiya wode iya zin7iya hiixa ubbay, ba kushe meto be7iya wode iya zin7ida hiixa melanne iya uttiya oydiya mela tuna gidees.
LEV 15:27 He tunidabata bochiya oonika tuna gidiya gisho I ba ma7uwa meecco; ba asatethaa meeceto; yaatidi omarsi gakanaw tuna gidees.
LEV 15:28 “Iipe goggiya suuthay eqiko, iya he wodepe doomada laapun gallas gam7o; hessafe guye, iya geeshshi gidana.
LEV 15:29 Hospuntha gallas iya nam7u holleta woyko nam7u kuraachota ehada Geeshsha Dunkaaniya pengen kahiniyas immo.
LEV 15:30 Kahiney holletape issuwa nagaraa yarshos, issuwa xuussa yarshos yarsho. Yaatidi, kahiney iipe goggiya tunatethaa gisho Godaa sinthan I nagaraa atto yaagisees.
LEV 15:31 “Isra7eele asay banta giddon de7iya Geeshsha Dunkaaniya tunisidi, hayqonna mela neeni haysada oothada enti bantana tunisiyabape dummayidi daana mela naaga.”
LEV 15:32 Iya asatethafe goggiyabay de7iya asas, iya atunathay gukin tuniya addes,
LEV 15:33 ba kushe meto gaason tuniya maccasas, adde gidin macca gidin goggiyabay de7iya asaasinne tunida maccara aqiya addes imetida wogay haysa.
LEV 16:1 Aarona adde nayti nam7ay Godaa sinthe shiiqidi hayqidaape guye, Goday Museko haysada yaagis:
LEV 16:2 Taani Taabotiya nagara atotetha kamaa bolla shaaran gidada qonciya gisho magarajuwafe guyen de7iya Ubbaafe Geeshsha Bessaa ba koyida wode gelidi hayqonna mela ne ishaa Aaronas oda.
LEV 16:3 Aaroni nagaraa yarshos issi wofaano, xuussa yarshos issi maraze ekidi Ubbaafe Geeshsha Bessaa gelo.
LEV 16:4 Aaroni liinope oosetida geeshsha adussa qamisenne garsara ma7etiya ma7o ma7o. Liinope oosetida danco danco; hessada ba huuphen liinope oosetida xaatha qace wotho. He ma7oti geeshshi gidiya gisho, ma7anape sinthe ba asatethaa meeceto.
LEV 16:5 Isra7eele maabaray nagara yarshos nam7u koleta, xuussa yarshos issi maraze Aaronas eho.
LEV 16:6 Aaroni ba nagarasinne ba soo asaa nagaraa atotethas issi wofaano yarsho.
LEV 16:7 Hessafe guye, nam7u koleta Geeshsha Dunkaaniya pengen Godaa sinthe eho.
LEV 16:8 He nam7u deeshata ekidi issuwa Godaasa, issuwa qassi Azaazelasa gidi enta bolla saama yeggo.
LEV 16:9 Aaroni saaman Godaas gidida deesha ekidi nagara yarsho oothidi yarsho.
LEV 16:10 Shin saaman Azaazelas gidida deesha asa nagaraa atotethas mela biitta yeddanaw paxa de7ishin Godaas shiisho.
LEV 16:11 Aaroni ba nagarasinne ba soo asaa nagaraa atotethas issi wofaano nagaraa yarsho oothidi shiisho. Yaatidi ba nagaraa gisho he wofaanuwa shuko.
LEV 16:12 Godaa sinthan de7iya yarsho bessaafe ixaane cuyisiya miishen bonqo kunthidi, liiqidi gaacetida sawiya ixaane nam7u kuuca ekidi magarajuwa giddo gelo.
LEV 16:13 Godaa sinthan de7iya taman ixaane wotho. I hayqonna mela ixaaniya cuyay Taabotiya bolla de7iya nagara atotetha kamaa kammo.
LEV 16:14 Wofaanuwa suuthaafe guuthara ekidi, ba biradhiya yeddi ekidi atotetha kamaa sintha baggaa wurxo. Nagara atotetha kamaa sintha baggara de7iya bessaa laapun toho wurxo.
LEV 16:15 Hessafe guye, asaa nagaraa gisho gidiya deesha shukidi, iya suuthaa magarajuwa giddo ehidi, wofaanuwa suutha wurxidaysada nagara atotetha kamaanne Taabotiya sinthaa wurxo.
LEV 16:16 Ubbaafe Geeshsha Bessaa Isra7eele asaa tunatethafenne nagarape geeshshees. Enti tunabaa oothishin, enta giddon de7iya Geeshsha Dunkaaniya haysada oothidi geeshsho.
LEV 16:17 Aaroni Ubbaafe Geeshsha Bessaa gelidi, ba nagaraa, ba soo asaa nagaraanne kumetha Isra7eele asaa nagaraa atotethas yarshidi keyana gakanaw, oonika geeshsha Dunkaaniya giddon de7opo.
LEV 16:18 Hessafe guye, Godaa sinthan de7iya yarsho bessa keyidi iya geeshsho. Wofaanuwa suuthaafenne deesha suuthaafe guuthara ekidi, yarsho bessa yuushuwan de7iya kaceta tiyo.
LEV 16:19 He suuthan ba biradhiya yeddi ekidi laapun toho wurxo; hessada oothidi Isra7eele asaa tunatethaafe he yarsho bessa geeshsho.
LEV 16:20 Aaroni Ubbaafe Geeshsha bessaa, geeshsha Dunkaaniyanne yarsho bessa geeshshiya wogaa polidaape guye, paxa de7iya deesha shiisho.
LEV 16:21 Aaroni ba nam7u kushiya paxa de7iya deesha huuphen wothidi, Isra7eele asaa naaqo ubbaa, enta makalla ubbaa, enta nagara ubbaa paaxo. Yaatidi he deesha huuphen hessa toosso; he deesha efana mela giigisida uraa bolla mela biitta yeddo.
LEV 16:22 Deeshay enta nagara ubbaa tookidi, asi bayna bessi mela biitta bo.
LEV 16:23 Hessafe guye, Aaroni Geeshsha Dunkaaniya bidi Ubbaafe Geeshsha bessaa gelo. Liinope oosetida kase I ma7idi gelida ma7uwa qaaridi yan wotho.
LEV 16:24 Geeshsha bessan ba asatethaa meecetidi, ba kase ma7uwa ma7i keyidi ba nagaraanne asaa nagaraa atotethas xuussa yarsho yarshsho.
LEV 16:25 Nagara yarshuwa modhuwa yarsho bessan xuuggo.
LEV 16:26 Bazzo yedetiya deesha efida uray ba ma7uwa meecco; ba asatethaa meeceto; yaati simmidi guta gelo.
LEV 16:27 Nagara atotethas Aaroni enta suuthaa Ubbaafe Geeshsha bessaa ehida wofaanuwanne deesha galbaa, attida ashuwanne tociya gutaape gaxa kessidi xuuggo.
LEV 16:28 Hessa xuuggida uray ba ma7uwa meecco; ba asatethaa meeceto; hessafe guye, gutaa gelo.
LEV 16:29 Haysi hintew merinaa woga gido; laapuntha ageenay gelida tammantho gallas hintena kawushite; biitta aawu na7a gidin woyko hara biitta asi gidin, ay oosoka oothopite.
LEV 16:30 Ayis giiko he gallasay hinte nagara atotethi demmiya gallas; hinte Godaa sinthan hinte nagara ubbaafe geeyana.
LEV 16:31 Hessi hintew gita Sambaata shempo gallas gidana. He gallas hintena kawushite; hessi hintew merinaa woga gido.
LEV 16:32 Qassi ba aawa bessan kahine gidana mela tiyetiyanne dummatiya kahiney geeshshi gidida liinope oosetida ma7uwa ma7idi, nagaraa atotetha wogaa polo.
LEV 16:33 I ubbaafe Geeshsha bessaa, Geshsha Dunkaaniya, yarsho bessa, kahinetanne Isra7eele asa ubbaa geeshsho.
LEV 16:34 Isra7eele asa ubbaa nagaraa atotethas laythan laythan issi toho oothanaw haysi hintew merina woga gido. Goday kiitidaysada Musey oothis.
LEV 17:1 Goday Museko haysada yaagis;
LEV 17:2 “Aaronas iya adde naytasinne Isra7eele asa ubbaas haysada yaagada oda; Goday kiittidaysi haysa;
LEV 17:3 Isra7eele asaape oonika boori woyko maraze woyko kole gutan woyko gutaape gaxan shukidi,
LEV 17:4 Godaas imota oothidi immanaw Geeshsha Dunkaaniya penge Godaa sinthe ehonna ixiko, I he suuthan oyshetees. He uray suuthu gussida gisho ba asaa giddofe kuretto.
LEV 17:5 Hessa gisho, Isra7eele asay yarsho mehe coo denban shukeysa aggidi, Godaa sinthan Geeshsha Dunkaaniya pengen de7iya kahiniyako eho. Kahiney hessa ekidi, Godaas issifetetha yarsho oothidi shuko.
LEV 17:6 Kahiney Geeshsha Dunkaaniya pengen de7iya yarsho bessa bolla he suuthaa wurxo. Modhdhuwa Godaas sawo tonku giya yarsho oothidi xuuggo.
LEV 17:7 Isra7eele asay Godaa aggidi kaallida tuna ayyaanatas zaaridi banta yarshuwa yarshofo. Hessi entawunne yaana yeletethaa ubbaas merinaa woga gido.
LEV 17:8 “Entako haysada yaaga; Isra7eele asaape gidin woyko enta giddon de7iya allaga biitta asape gidin, oonika xuussa yarsho woyko hara yarsho shiishiya wode,
LEV 17:9 Godaas yarshanaw Geeshsha Dunkaaniya penge ehonna ixiko, he uray ba asaa giddofe kuretto.
LEV 17:10 “Isra7eele asaape woyko enta giddon de7iya allaga biitta asaape oonika suuthu miiko, he suuthaa miya uraa bolla ta zoko zaarana; taani he uraa asaa giddofe kurana.
LEV 17:11 Ayis giiko asho ma7ida ubbaa de7oy iya suuthaa giddon de7ees; suuthi de7oy iya giddon de7iya gisho nagara atto giisees. Hinte nagara atotethas suuthu yarshana mela hintew immas.
LEV 17:12 Taani Isra7eele asaako, hintefe woyko hinte giddon de7iya allaga biitta asaape oonika suuthu moopo yaagiday hessa gishosa.
LEV 17:13 “Isra7eele asaape woyko enta giddon de7iya allaga biitta asaape oonika meetetiya do7a woyko kafo shankatidi wodhiko, iya suuthaa sa7an gussidi biitta kammo.
LEV 17:14 Ayis giiko asho ma7ida ubbaa de7oy iya suutha giddona. Asho ma7ida medhetethata ubbaa de7oy iya suutha giddon de7iya gisho, suuthu moopite; qassi miya oonika ba asaa giddofe kuretto yaagada Isra7eele asaas odas.
LEV 17:15 “Isra7eele asaa gidin woyko enta giddon de7iya allaga biitta asaa gidin, oonika bawuta woyko do7i wodhidaba miiko, ba ma7uwa meecco; ba asatethaa meeceto; yaatidi omarsi gakanaw tuna gidees. Hessafe guye, I geeshshi gidana.
LEV 17:16 Ba ma7uwa meecconna ixiko, ba asatethaa meecetonna aggiko, I ba nagaraa baw tookees.”
LEV 18:1 Goday Museko haysada yaagis;
LEV 18:2 “Isra7eele asaas haysada yaagada oda; taani Godaa, hinte Xoossaa.
LEV 18:3 Hinte kase de7ida Gibxe asay ootheysada oothopite; woyko ha77i taani hintena gelsiya Kanaane biitta asay ootheysada oothopite; enta wogaa kaallopite.
LEV 18:4 Hinte ta kiitta oothite; ta wogaa naagite; taani Godaa, hinte Xoossaa.
LEV 18:5 Ta kiitaanne ta wogaa naagite, hinte hessa oothiko de7on daana. Taani Godaa.
LEV 18:6 “Hintefe oonika ba mata dabbora xaallofo. Taani Godaa.
LEV 18:7 “Ne aayiw xaallada ne aawa kawushofa. Iya ne aayiw gidiya gisho iyo xaallofa.
LEV 18:8 “Ne aawa machiw xaallada ne aawa kawushofa.
LEV 18:9 “Ne michiw xaallofa; son yeletida woyko karen yeletida ne aawa na7iw woyko ne aaye na7iw xaallofa.
LEV 18:10 “Ne na7aa na7iw woyko ne na7e na7iw xaallada ne nena kawushofa.
LEV 18:11 “Ne micho gidiya gisho ne aawa mache na7iw xaallofa.
LEV 18:12 “Ne aawa michiw xaallofa; iya ne aawas mata dabbo.
LEV 18:13 “Ne aaye michiw xaallofa; iya ne aayes mata dabbo.
LEV 18:14 “Ne aawa ishaa machiw xaallofa; iya ne aawa ishaa machiw.
LEV 18:15 Ne na7aa machiw xaallofa; iya ne na7aa machiw.
LEV 18:16 “Ne ishaa machiw xaallada ne ishaa kawushofa.
LEV 18:17 “Aayiwunne I na7iw xaallofa; I na7e na7iw woyko I na7aa na7iw xaallofa. Enti iw mata dabbo gidiya gisho, hessi iita tuna.
LEV 18:18 “Ne machiya paxa de7ishin, ne mache michiw dawuthofa.
LEV 18:19 “Kushe metora de7iya maccasi xaallofa.
LEV 18:20 “Neeni tunonna mela ne shooruwa machiw xaallofa.
LEV 18:21 “Ne Xoossaa sunthay cayetonna mela ne naytape issuwa taman xuuggada, Moloka giya eeqas yarsho oothada immofa. Taani Godaa.
LEV 18:22 “Xoossa sinthan ixetidaba gidiya gisho maccasara gaheteysada addera gahetofa.
LEV 18:23 “Neeni tunonna mela mehera gahetofa; maccasi mehera gahetanaw mehe sinthe aadhofo. Hessi wogan baynaba.
LEV 18:24 “Taani hinte sinthafe yedethiya kawotethati he oosotan tunida gisho, hinte he oosotan enta mela tunopite.
LEV 18:25 Hari attoshin, biittayka tunida gisho, iya nagaraa gisho ta iya seeras. Biittiya banan de7ey asaa cuttasu.
LEV 18:26 Shin hinte ta higgiyanne ta kiita naagite. Hintena gidin woyko hinte giddon de7iya allaga biitta asaa gidin oonika hessa mela tuna ooso oothopite.
LEV 18:27 “Hintefe kase ha biittan de7ida asay hessa mela tunabaa oothida gisho, biittiya tunasu.
LEV 18:28 Hinte ha biitta tunisiko, hintefe kase de7ida kawotethata ha biittiya cuttidaysada hintenaka cuttonna mela naagetite.
LEV 18:29 Hessata daaniya tuna oosotape issuwaka oothiya asi de7iko, he uray ba asaa giddofe kuretto.
LEV 18:30 Hessa gisho, hintefe kase de7ida asati oothida tuna oosota ubbaa oothidi hinte tunonna mela ta kiitta naagite; taani Godaa, hinte Xoossaa” yaagis.
LEV 19:1 Goday Museko haysada yaagis.
LEV 19:2 Isra7eele asa ubbaas haysada yaagada oda; “Taani, Goday, hinte Xoossay, geeshshi gidiya gisho, hinteka geeshshi gidite.
LEV 19:3 “Hintefe issoy issoy ba aawanne ba aayiw boncho; ta Sambaata bonchite. Taani Godaa, hinte Xoossaa.
LEV 19:4 “Tana aggidi eeqata goyinnofite; woyko biratape oosetida xoossata hintew oothopite. Taani Godaa, hinte Xoossaa.
LEV 19:5 “Hinte issifetetha yarsho Godaas yarshiya wode he yarshoy hinte gisho eketana mela besseysada yarshite.
LEV 19:6 He yarshoy hinte yarshida gallas woyko wontetha gallas meeteto; heedzantho gallas gakanaw attiday de7iko taman xuugeto.
LEV 19:7 Heedzantho gallas meetetiko, hessi tunisiyaba; taani hessa ekike.
LEV 19:8 Hessa miya oonika Godaas geeshshi gididaba tunisida gisho ba nagaran oyshetana. He uray ba asaa giddofe kuretto.
LEV 19:9 “Hinte gaden kaxida kathaa hinte cakiya wode gadiya gaxaa gakanaw de7eysa cakofite; caki simmin de7iya poshiliya qoropite.
LEV 19:10 Ne woyne ayfiya maxiya wode mithaa bolla qosetidi attidaysa woyko sa7an wodhida woyne ayfiya maxopa. Hessa manqotasinne bete asaas aggaaga. Taani Godaa, hinte Xoossaa.
LEV 19:11 “Kaysotopite. “Wordotopite. “Issoy issuwa cimmofite.
LEV 19:12 “Ta sunthan wordo caaqofite; hinte Xoossaa sunthaa tunisopite. Taani hinte Godaa.
LEV 19:13 “Ne shooruwa bolla gene oothofa; woyko iya bonqofa. “Une oothiya uraa damooziya diggada, issi qammaka ne matan aysopa.
LEV 19:14 “Tulliya cayopa; woyko qooqiya sinthan dhube wothofa, shin neeni Xoossas yayya. Taani ne Godaa.
LEV 19:15 “Pirda geellayopite; manquwa iya manqotetha gisho maaddada pirdofa; duriya iya duretetha gisho yayyada aggofa. Shin ne shooruwas suure pirda.
LEV 19:16 “Ne asaa giddon iita zigirsi ekada yuuyopa. “Ne shooruwa hayqos gathiyaba aykoka oothofa. Taani ne Godaa.
LEV 19:17 “Ne ishaa ne wozanan ixofa. Ne shooruwa gaason ne nagara oothonna mela iya hanqa.
LEV 19:18 “Halo keyopa; ne asaape issuwa bollaka shifopa. Shin ne shooruwa ne huupheda dosa. Taani ne Godaa.
LEV 19:19 “Ta kiitata naaga. “Issi qommo mehe hara qommo mehera biraysisopa. “Issi shooqan nam7u qommo zerethi zeropa. “Nam7u qommofe oosetida ma7o ma7ofa.
LEV 19:20 “Issi asi azinas oyshetada de7ishin, wozo miishey imetidi wuronnashin woyko la77a keyonnashin, he ayllera aqiko enti seeretanaw bessees, shin enti hayqanaw bessenna.
LEV 19:21 Gidoshin, he uray ba naaqo yarshos gidiya maraze Geeshsha Dunkaaniya pengen Godaa sinthe eho.
LEV 19:22 Kahiney he naaqo yarsho maraziya ekidi, ura nagara atotethas Godaa sinthan yarshees; iya nagaray atto geetetana.
LEV 19:23 “Hinte Kanaane biitta geliya wode ayfe immiya ay qommo mithi tokikoka, he mithaa ayfey meetetonna mela digetidaysa akeekite. Heedzu laythi wurana gakanaw he mithaa ayfey meetetofo.
LEV 19:24 Oyddantho laythan he mithaa ayfey Godaas galatas shiiqiya geeshsha yarsho gidana.
LEV 19:25 Ichashantho laythan he mithaa ayfiya miite. Hinte hessada oothiko, hinte mithaa ayfey darana. Taani Godaa, hinte Xoossaa.
LEV 19:26 “Suuthi iya giddon de7iya asho moopite. Marotopite woyko bitopite.
LEV 19:27 “Hinte huuphe binaana garsara yuushshi aathidi ciiropite; hinte buuchaa yuushshi aathidi meedopite.
LEV 19:28 “Hayqida asa gisho hinte asatethaa gaaropite; woyko cacha beeta hinte asatethaa bolla medhofite. Taani ne Godaa.
LEV 19:29 “Biittiya laymatethaninne tunatethan kumonna mela ne macca na7iw laymatethas aatha immada tunisopa.
LEV 19:30 “Ta Sambaata bonchite; ta goyinnetiya bessaa bonchite. Taani Godaa.
LEV 19:31 “Moytille odisiya asaako woyko marotako boopite; hinte tunonna mela enta koyopite. Taani Godaa, hinte Xoossaa.
LEV 19:32 “Dondza asinne cima asi be7iya wode uttida bessaafe denda eqada enta boncha; ne Xoossaas yayya. Taani Godaa.
LEV 19:33 “Hinte biittan de7iya bete ase sugopite.
LEV 19:34 Hinte biittan de7iya bete asi hinte gade asada xeellite; iya hinte huupheda dosite. Hinte kase Gibxe biittan bete asi gididi de7ideta. Taani Godaa, hinte Xoossaa.
LEV 19:35 “Hinte wadhiyaban, makiyabaninne mizaanen wordotopite.
LEV 19:36 Hinte mizaaney, hinte makiyabaynne wadhiyabay issino gido. Taani hintena Gibxe biittafe kessada ehida Godaa hinte Xoossaa.
LEV 19:37 “Hinte ta higgiyanne ta kiitaa ubbaa naagitenne oothite. Taani Godaa.”
LEV 20:1 Goday Museko haysada yaagis.
LEV 20:2 Isra7eele asaas haysada yaagada oda; “Isra7eele asaape gidin, woyko hinte giddon de7iya allaga asaape gidin, oonika ba na7a moloka geetetiya eeqas aathidi immiko, I hayqo; Isra7eele asay iya shuchan caddidi wodho.
LEV 20:3 Ba na7aa moloka geetetiya eeqas immidi ta Dunkaaniya tuniseynne ta geeshsha sunthaa kawushey ta sinthan ixetidaba gidana. Ta asaa giddofe shaakada taani iya dhaysana.
LEV 20:4 Shin he uraa Isra7eele asay be7ishe qelli gidi aadhikonne wodhonna ixiko,
LEV 20:5 taani he addiyanne iya soo asaa morkana; iyanne Moloka kaallidaysata enta deriya giddofe shaakada dhaysana.
LEV 20:6 “Oonika tana ammanetona ixidi moytille xeegikonne maro soo biiko, taani iyaw morke gidana; asaa giddofe iya dhaysana.
LEV 20:7 “Taani, Goday, hinte Xoossaa gidiya gisho, hinte hintena dummayite; geeshshi gidite.
LEV 20:8 Ta wogaa naagite; iya polite. Taani hintena geeshshiya, hinte Godaa.
LEV 20:9 “Oonika ba aawa woyko ba aayiw cayiko hayqo. I ba aawa woyko ba aayiw cayida gisho, iya suutha acoy iya bolla gido.
LEV 20:10 “Issi asi ba shooruwa machiw xaalliko, enti nam7ay hayqo.
LEV 20:11 Issi asi ba aawa machiw xaalliko, I ba aawa kawushis; enti nam7ay hayqo. Enta suuthaa acoy enta bolla gido.
LEV 20:12 Issi asi ba na7aa machiw xaalliko, enti nam7ay hayqo. Enti tunabaa oothidosona; enta suuthaa acoy enta bolla gido.
LEV 20:13 “Issi addey maccasara gaheteysada addera gahetiko, enti nam7ay ixetidaba oothida gisho hayqo. Enta suuthaa acoy enta bolla gido.
LEV 20:14 Issi asi na7iwunne aayiw macho ekiko, hessi tunabaa. Hinte giddon tunatethi doonna mela inne enti taman xuugeto.
LEV 20:15 “Issi asi mehera gahetiko, I hayqo; he miiziw wodhite.
LEV 20:16 Issi maccasi mehera gahetiko he maccasiyanne he mehey nam7ay hayqo; enta suuthaa acoy enta bolla gido.
LEV 20:17 “Issi asi ba aawa na7iw woyko ba aaye na7iw macho ekiko, hessi tunabaa. Enti banta asaa giddofe shaaketidi hayqo. I ba michiw kawushida gisho, ba nagaran baw oysheto.
LEV 20:18 Issi asi kushe metora de7iya maccasara aqiko, I qetha qaarida gisho, enti nam7ay banta asaa giddofe kuretto.
LEV 20:19 “Ne aaye michiw woyko ne aawa michiw xaallofa; hessa oothey ba mata dabbotetha kawushshees. Enti nam7ay banta nagaran oysheto.
LEV 20:20 Issi asi ba aawa ishaa machiw xaalliko, I ba aawa ishaa kawushis. Enti banta nagaran bantaw oysheto; enti nam7ay na7a yelonna hayqana.
LEV 20:21 Issi asi ba ishaa machiw ekiko, hessi tuna. I ba ishaa kawushis; enti nam7ay yelo dhayana.
LEV 20:22 “Hinte daana mela ta hintena gelsiya biittay hintena cuttonna mela hinte ta higgiyanne ta kiitaa naagite.
LEV 20:23 Taani hinte sinthafe dhaysiya asaa de7uwa wogaa kaallopite. Enti hessa ubbaa oothida gisho, ta enta ixas.
LEV 20:24 Hinte enta biitta laatana; maathinne eessi goggey biitta hintew immana. Taani hintena hara asaape dummayada kessida, Godaa hinte Xoossaa.
LEV 20:25 “Hessa gisho, hinte tunanne tuna gidonna mehetanne kafota shaakidi erite. Taani hessati hintew tuna gada wothida meheta, kafotanne biittan qaaxiyabata ubban hintena tunisopite.
LEV 20:26 Taani Goday geeshshi gidiya gishonne hinte tabaa gidana mela hintena hara asaape dummayida gisho, hinteka taw geeshshi gidite.
LEV 20:27 “Addey woyko macci moytillera haasayiko woyko marotiko, enti hayqanaw bessees. Enti shuchan cadetidi hayqo; enta suuthaa acoy enta bolla gido.”
LEV 21:1 Goday Museko, “Kahine gidida Aarona adde naytas haysada yaagada oda. Hintefe oonika
LEV 21:2 ba mata dabbo, ba aaye, ba aawa, ba adde na7aa, ba macca na7e, ba ishaa,
LEV 21:3 woyko azina gelonna, iya son de7iya ba miche aha gidonna ixiko, hayqida asa aha bochidi bana tunisopo.
LEV 21:4 Ekoninne gelon dabbotida asa aha bochidi bana tunisopo.
LEV 21:5 “Kahineti kayos banta huuphiyanne banta buuchaa meedopo; woyko banta asatethaa gaaropo.
LEV 21:6 Enti Godaas xuussa yarshonne katha yarsho shiishiya kahineta gidiya gisho banta Xoossaas geeshshi gido; banta Xoossaa sunthaa tunisopo. Hessa gisho, enti geeshshi gidanaw bessees.
LEV 21:7 “Kahineti banta Xoossaas geeshshi gidiya gisho, kahineti layma maccasi, geela7o gidonna maccasi woyko azini yeddida maccasi ekofo.
LEV 21:8 Kahineti hinte Xoossaas katha yarsho yarsheyisata gidiya gisho, hinte enta geeshshi oothidi ekite. Hintena geeshshiya Goday, taani, geeshshi gidiya gisho, enti geeshshi gido.
LEV 21:9 Kahiniya na7iya laymatada bana tunisiko, iya ba aawa kawushasu; iya taman xuugetada hayqo.
LEV 21:10 “Kahine halaqay, iya huuphen tiyo zaytey gukidaysinne kahinetetha ma7uwa ma7anaw dummatidaysi, ba huuphiyape xaatha qacciya denthofo; ba ma7uwa daakofo.
LEV 21:11 Ahi de7iya soo gelopo; hari attoshin ba aawa woyko ba aaye aha gidikoka, hessa bochidi bana tunisopo.
LEV 21:12 Iya dummayanaw tiyida Xoossaa zaytey iya bolla de7iya gisho, kahiney Geeshsha Dunkaaniyape keyopo; Geeshsha Dunkaaniya tunisopo. Taani Godaa.
LEV 21:13 “I ekiya machiya geela7o gido.
LEV 21:14 Azini hayqida maccasi woyko azini yeddida maccasi woyko layma maccasi macho ekofo. Shin ba asaa giddofe geela7o macca na7a dooridi macho eko.
LEV 21:15 Hessi hanonna ixiko, ba asaa giddon ba nayta tuna oothees. Taani iya geeshsheysa, iya Godaa.”
LEV 21:16 Goday Museko haysada yaagis.
LEV 21:17 “Neeni Aaronas haysada yaagada oda; ne kochaafe asatethan borey de7iya oonika katha yarsho taw yarshanaw bessenna.
LEV 21:18 Asatethan borey de7iya asi, hessika qooqe woyko wobbe woyko som7oy iitida asi woyko laqoy de7iya asi,
LEV 21:19 woyko tohoy woyko kushey silida asi,
LEV 21:20 woyko kuuna asi woyko daro qantha asi woyko ayfe mulca asi woyko puusoy oykida asi woyko iralley de7iya asi woyko shuufa asi taw katha yarsho yarshanaw bessenna.
LEV 21:21 Kahiniya Aarona kochaafe asatethan borey de7iya asi oonika Godaas xuussa yarshonne katha yarsho shiishanaw yarsho bessa yaanaw bessenna.
LEV 21:22 I geeshsha kathaanne Ubbaafe geeshshi gidida ba Xoossaa kathaa maanaw danda7ees.
LEV 21:23 Shin iya asatethan borey de7iya asi gidiya gisho, I ta Dunkaaniya tunisonna mela magarajuwako woyko yarsho bessaako shiiqopo. Entana geeshshiya Goday tana.”
LEV 21:24 Musey hessa ubbaa Aaronas, iya adde naytasinne Isra7eele asa ubbaas odis.
LEV 22:1 Goday Museko haysada yaagis;
LEV 22:2 Ta geeshsha sunthaa enti tunisonna mela, Isra7eele asay taw dummayida imotata Aaroninne iya adde nayti bonchon ekidi, geeshshatethan naagana mela entaw oda. Taani Godaa.
LEV 22:3 Entako haysada yaaga; “Yaana yeletetha ubban hinte kochaafe oonika tunidi de7ishe, Isra7eele asay Godaas dummayida geeshsha yarshuwako shiiqiko, he uray ta sinthan bentofo. Taani Godaa.
LEV 22:4 “Aarona kochaafe goga hargey de7iya, woyko asatethafe goggiyabay de7iya oonika geeyana gakanaw geeshsha yarshuwa moopo. Aha bochidi tunidaba woyko iya atunthay gukida uraa bochiya oonika tuna.
LEV 22:5 Qassi sa7ara gooshetiya tunisiyabata, woyko aybibanka tuna gididaba bochiya oonika,
LEV 22:6 woyko hessa melaba bochiya oonika, omarsi gakanaw tuna gidees. I ba asatethaa haathan meecetonna de7ishe, geeshsha yarshuwafe maanaw koshshenna.
LEV 22:7 Awi wulliya wode I geeshshi gidees. Hessafe guye, he geeshsha yarshuwafe bana gakiya gishuwa mo.
LEV 22:8 Hayqidaba woyko do7i wodhida mehe asho moopo; hessi tunisiyaba. Taani Godaa.
LEV 22:9 “Kahineti ta wogaa naago; enti iya naagonna ixidi banta balan hayqana. Enta geeshshiya Goday tana.
LEV 22:10 “He geeshsha yarshuwa kahiniya soo asaape attishin, hara asi moopo. Kahiniya soo yida imathe gidin, qaxaretidi oothiya ase gidin moopo.
LEV 22:11 Shin kahiney ba biran shammida aylley woyko iya son yeletida aylley he kathaa mo.
LEV 22:12 Kahine gidonna asi gelida kahiniya na7iya he geeshsha yarshuwafe moopo.
LEV 22:13 Shin I azinay hayqiko woyko iyo yeddiko qassi iw na7i bayna ixiko, iya kase ba geela7otethan de7idaysada simmada ba aawa son de7iko, iya ba aawa gakeysafe mo. Shin hara asi oonika hessafe moopo.
LEV 22:14 “Issi asi eronna de7ishe geeshsha yarshuwafe miiko, he I mida kathaa gatiya bolla xeetaape laatamu kushe gujidi kahiniyas immo.
LEV 22:15 Isra7eele asay Godaas yarshiya geeshsha yarshuwa kahineti tunisopo.
LEV 22:16 Enti banta ehida geeshsha yarshuwa bantaw midi nagaran oyshetana mela oothofo. Enta geeshshiya Goday tana.”
LEV 22:17 Goday Museko haysada yaagis;
LEV 22:18 “Aaronas, iya adde naytasinne Isra7eele asa ubbaas haysada yaagada oda; Isra7eele asi gidin woyko enta giddon de7iya bete asi gidin, oonika Godaas xuussa yarsho ba dosan immey woyko ba qangetha gathey,
LEV 22:19 he yarshoy eketana mela borey bayna wofaano, woyko maraze woyko kole eho.
LEV 22:20 Borey de7iya ay meheyka eketonna gisho hessa shiishopite.
LEV 22:21 “Issi asi ba qangetha gathanaw issifetetha yarsho Godaas yarshiya wode woyko ba mehiyape dosan imota Godaas shiishiya wode hessi eketana mela he mehey borey baynaba gido.
LEV 22:22 Hinte mehiyape qooqe woyko meqo woyko wobbe woyko giyiya madunthi woyko puusoy woyko shattoy de7iyaba Godaas yarshofite. Taman xuussa yarsho oothidi yarsho bessan Godaas shiishopite.
LEV 22:23 Iya bolla laqoy medheti woyko bolla paci de7iya korma woyko dorse issi asi ba dosan immiya yarsho shiishanaw danda7ees; shin qangetha gasos gidiko hessi eketenna.
LEV 22:24 Sanga woyko madunxidaba Godaas yarshofite. Hinte biittan hessa melaba oothopite.
LEV 22:25 Hinte giddon de7iya allaga asatape ekida hessa mela mehiya hinte Xoossaas katha yarsho oothidi shiishopite. Enta bolla borey de7iya gisho hinte gisho eketokona.”
LEV 22:26 Goday Museko haysada yaagis;
LEV 22:27 “Boora na7i woyko marazey woyko koley yeletiya wode laapun gallas ba aayera gam7o. Hospuntha gallasape doomidi, Godaas xuussa yarsho oothidi shiishanaw danda7etees.
LEV 22:28 Miizi woyko dorse I maraara issi gallas shukofite.
LEV 22:29 “Hinte galata yarsho Godaas shiishiya wode hinte yarshoy eketana mela yarshite.
LEV 22:30 Yarshoy yarshetida gallas meetetidi wuranaw koshshees; iyape wontos ashshofite. Taani Godaa.
LEV 22:31 “Ta kiitta naagitenne polite. Taani Godaa.
LEV 22:32 Ta geeshsha sunthaa tunisopite. Ta geeshshi gideysi Isra7eele asaa giddon eretanaw bessees. Hintena geeshshiya Goday tana.
LEV 22:33 Hinte Xoosse gidanaw hintena Gibxe biittafe kessiday tana. Taani Godaa.”
LEV 23:1 Goday Museko haysada yaagis;
LEV 23:2 Isra7eele asaas haysada yaagada oda; Geeshsha shiiqo yaagidi awaajishe, hinte bonchanaw bessiya eretida Godaa ba7aaleti haysata.
LEV 23:3 Hinte usupun gallas ooso ootheeta, shin laapuntha gallasay hinte shempiya Sambaata gallas. He gallas geeshsha shiiqo shiiqite; ay oosoka oothopite; hinte de7iya bessa ubban hessi Godaas Sambaata.
LEV 23:4 Enta woden woden geeshsha shiiqo oothidi hinte bonchanaw bessiya eretida Godaa ba7aaleti haysata;
LEV 23:5 Koyro ageenan tammanne oyddantho gallas sa7i omarsiya wode Godaa Paasikay doomees.
LEV 23:6 He ageenan tammanne ichashantho gallasan Godaas Uytha Ba7aale gallasay doomees. Hessa gisho, laapun gallasatan irshoy geliboonna uythi miite.
LEV 23:7 He gallasatape koyro gallas geeshsha shiiqo shiiqite; ooso oothopite.
LEV 23:8 Laapun gallas ubbaa Godaas xuussa yarsho yarshite; laapuntha gallasan geeshsha shiiqo shiiqite; ooso oothopite.
LEV 23:9 Goday Museko haysada yaagis;
LEV 23:10 Isra7eele asaas haysada yaagada oda; taani hintew immiya biitta gelidi hinte kathi cakiya wode, he kathaa koyro mirqiya kahiniyas ehite.
LEV 23:11 Goday hintebaa ekana mela Sambaata kaalliya wontetha gallas kahiney he mirqiya Godaa sinthan dhoqu oothidi yuushsho.
LEV 23:12 Hinte mirqiya yuushshida he gallas borey bayna issi laytha maraze xuussa yarsho oothidi Godaas shiishite.
LEV 23:13 He yarshuwara issife shamaho zaytera munuqetida nam7u kilo giraame lo77o dhiille katha yarsho oothidi shiishite. Hessi Godaas sawo tonku giya xussa yarsho gidana; iyara issife issi litiro gidiya woyne ushshi shiishite.
LEV 23:14 Ha yarshuwa hinte, hinte Xoossaas shiishiya gallasay gakanaw, wacha kathaafe qaye woyko caaca woyko uukidi moopite. Hessi hinte de7iya bessa ubban yaana yeletethaas merinaa woga gido.
LEV 23:15 Hinte yuusho yarsho mirqiya ehida Sambaata wontetha gallasaape doomidi, laapun saaminta taybite.
LEV 23:16 Laapuntha Sambaata kaalliya wontetha gallasay gakanaw ishatamu gallas taybite; wacha kathaafe yarsho Godaas shiishite.
LEV 23:17 Hinte de7iya bessaafe nam7u kilo giraame gidiya lo77o dhiilliyan irsho yeggidi uukida nam7u uythi yuusho yarshos ekidi yiite. Hessi wacha kathaafe Godaas shiiqiya yarsho gidees.
LEV 23:18 He uythaara issife borey bayna issi laythi gidida laapun dorsa urgeta, issi wofaanonne nam7u marazeta shiishite. Enta katha yarshoranne ushsha yarshora issife Godaas xuugetiya sawo tonku giya yarsho oothidi yarshite.
LEV 23:19 Qassi issi kole nagara yarshos, issi laythi gidida nam7u dorsa urgeta issifetetha yarshos shiishite.
LEV 23:20 Kahiney bayra kathaa, uythaanne nam7u dorsa urgeta yuusho yarsho oothidi, Godaa sinthan dhoqu oothidi yuushsho. Hessati Godaas geeshshi; kahinetas qassi gisho.
LEV 23:21 He gallas hintew geeshsha shiiqo gidana mela awaajite; ooso oothopite. Haysi hinte de7iya bessa ubban yaana yeletethaas merinaa woga gido.
LEV 23:22 Hinte biittan kaxida kathaa cakiya wode gadiya gaxaa gakanaw cakofite; cakishin attida poshiliya qoropite; hessa manqotasinne bete asaas aggaagite. Taani Godaa hinte Xoossaa.
LEV 23:23 Goday Museko haysada yaagis;
LEV 23:24 Isra7eele asaas haysada yaagada oda; laapuntha ageenan koyro gallasaa shempo gallas oothidi bonchite; hassayiso moyze punnishe geeshsha shiiqo shiiqite.
LEV 23:25 He gallas Godaas xuussa yarsho shiishitepe attishin, ooso oothopite.
LEV 23:26 Goday Museko haysada yaagis;
LEV 23:27 Laapuntha ageenan tammantho gallasay nagara atotetha gallas; he gallas geeshsha shiiqo shiiqite. He gallas hintena kawushite; Godaas xuussa yarsho shiishite.
LEV 23:28 He gallasay Godaa hinte Xoossaa sinthan hinte nagaray qushetana mela hinte nagaraa atotetha gallas gidiya gisho he gallasan ooso oothopite.
LEV 23:29 He gallas banatetha kawushonna asi oonika ba asaa giddofe kuretto.
LEV 23:30 He gallas ooso oothiya uraa oonaka taani iya asaa giddofe kurana.
LEV 23:31 He gallas ooso oothopite. Haysi hinte de7iya bessa ubban yaana yeletethaas merinaa woga gido.
LEV 23:32 Hessi hintew dummatida shempo gallas; he gallas hintenatethaa kawushite. He ageenan uddufuntho gallas omarsafe doomidi, tammantha gallas omarsi gakanaw hinte Sambaata bonchite.
LEV 23:33 Goday Museko haysada yaagis;
LEV 23:34 Isra7eele asaas haysada yaagada oda; laapuntha ageenan tammanne ichashantho gallasaape doomidi, laapun gallas gakanaw Godaas Shaqara Ba7aale.
LEV 23:35 He gallasatape koyro gallasan geeshsha shiiqo shiiqite; ooso oothopite.
LEV 23:36 Laapun gallas ubban Godaas xuussa yarsho shiishite; hospuntho gallasan geeshsha shiiqo shiiqite. Godaas xuussa katha yarsho shiishite. He gallasay baaliya wursetha gallas gidiya gisho, ooso oothopite.
LEV 23:37 Xuussa yarsho, katha yarsho, hara yarshotanne ushsha yarsho koshshiya woden Godaas shiishanaw geeshsha shiiqo oothidi awaajana Godaa ba7aaleti haysata.
LEV 23:38 Ha yarshoti Godaa Sambaatatape, Godaas immiya imotatape, qangetha imotatapenne dosan immiya imotatape dumma.
LEV 23:39 Hinte gaden kaxida kathaa shiishidaape guye, tammanne ichashantho gallasaape doomidi laapun gallas gakanaw Godaa ba7aale bonchite. Koyro gallasaynne hospuntho gallasay hintew dumma shempo gallas gidana.
LEV 23:40 Koyro gallas lo77o mitha ayfe, zamba tashe, cil7o mitha haythenne shaafa gaxan dicciya mitha haythi ekidi, Godaa hinte Xoossaa sinthan ufaytishe laapun gallas ba7aale bonchite.
LEV 23:41 He baaliya laythan laythan laapuntha ageenan laapun gallas Godaa bonchite. Hessi yaana yeletethaas merinaa woga gido.
LEV 23:42 He laapun gallasaa shaqaran de7ite; Isra7eele asi gidida ubbay he shaqaran de7o.
LEV 23:43 Taani hintena Gibxe biittafe kessida wode shaqaran daana mela oothidaysa yaana yeletethay erana. Taani Godaa hinte Xoossaa.
LEV 23:44 Hessada oothidi, Musey Godaa ba7aaleta bonchiya wogaa Isra7eele asaas odis.
LEV 24:1 Goday Museko haysada yaagis;
LEV 24:2 Xompey to7onna eexishe daana mela iyaw koshshiya gum7idi xillisida shamaho zayte new ehana mela Isra7eele asaa kiitta.
LEV 24:3 Geeshsha Dunkaaniya giddon de7iya markatetha magarajuwafe kare baggara omarsafe wonta gakanaw Aaroni Godaa sinthan he xompiya ubba wode eetho. Yaana yeletetha ubbaas hessi merinaa woga gido.
LEV 24:4 Xompe wothiya walahi bayna worqa kocaa bolla de7iya xompeti Godaa sinthan ubba wode eexana mela Aaroni naago.
LEV 24:5 Tammanne nam7u kilo giraame gidiya lo77o dhiille ekada tammanne nam7u uythi uuka.
LEV 24:6 He uythata usupuna usupuna nam7u maaran Godaa sinthan de7iya walahi bayna worqa xarpheeza bolla wotha.
LEV 24:7 Godaas xuugetanaw shiiqida katha yarsho gideysa erisanaw, nam7u maarata miyen geeshsha ixaane wotha.
LEV 24:8 Ha uythaa Sambaatan Sambaatan ubba wode Aaroni Isra7eele asaa gisho merinaa caaqo oothidi Godaa sinthan wotho.
LEV 24:9 Hessi Aaronanne iya adde nayta gakiya gisho; enti iya geeshsha bessan mo. Hessi Godaas xuussa yarshuwafe wogaada Aaronanne iya nayta gakiya gisho gidiya gisho Ubbaafe Geeshshi.
LEV 24:10 Ba aayen Isra7eele, ba aawan Gibxe asi gidida issi uray de7ees. Issi gallas I hara Isra7eele asara heeran wadhetis.
LEV 24:11 Ba aayen Isra7eele gidida uray Godaa sunthaa cayis; yaatin iya asay Museko ehidosona. He uraa aayiya Daane koche gidida Debira na7a. I sunthay Salomito.
LEV 24:12 He uraa waataneko Godaa sheney qoncana gakanaw iya naagisidosona.
LEV 24:13 Goday Muse haysada yaagis;
LEV 24:14 He cayida uraa gutaape gaxa kessa. I cayishin si7ida asa ubbay banta kushiya iya huuphiya bolla wotho; Isra7eele maabara ubbay iya shucha caddidi wodho.
LEV 24:15 Isra7eele asaas haysada yaagada oda; issi asi ba Xoossaa cayiko, I ba nagaran oyshetana.
LEV 24:16 Godaa sunthaa cayiya asi hayqo; Isra7eele maabara ubbay iya shuchan caddo. Bete asi woyko gade asi Godaa sunthaa cayiko hayqo.
LEV 24:17 Ase wodhida asi hayqo.
LEV 24:18 Asa mehe wodhida asi oonika ba wodhida mehiya gisho paxa mehiya qanxo.
LEV 24:19 Issi asi ba shooruwa qohiko, I oothidaysada iya bolla ooseto.
LEV 24:20 Menthiko me77o; ayfe gisho ayfe; acha gisho ache. Asa bolla qoho gathida oonika I gathida qohuwada iya bolla gako.
LEV 24:21 Mehe wodhida asi he mehiya gatiya qanxo; shin ase wodhida asi hayqo.
LEV 24:22 Bete asaasinne Isra7eele asas higgey issino gido. Taani Godaa hinte Xoossaa.
LEV 24:23 Musey hessa Isra7eele asaas odis; enti he cayida uraa gutaape gaxa kessidi, shuchan caddidi wodhidosona. Yaatidi Isra7eele asay Goday Muse kiitidaysada oothidosona.
LEV 25:1 Siina zuma bolla Goday Museko haysada yaagis.
LEV 25:2 Neeni Isra7eele asaas haysada yaagada oda; taani hintew immiya biitta hinte geliya wode biittiya ba huuphen Godaa Sambaata boncho.
LEV 25:3 Usupun laythi kumethi hinte gaden zerite; usupun laythi kumethi hinte woyne xeera xunqite; iya ayfiya maxite.
LEV 25:4 Shin laapuntha laythay biittas shempo Sambaata; hessi Godaa Sambaata. He laapuntha laythan gaden zeropite; hinte woyne xeeraa xunqofite.
LEV 25:5 Hinte biittan aasebo kaxidaba shiishopite; woyne xeera xunqofite; ayfiya maxopite. He laythay biittas kumethi shempo laythi gido.
LEV 25:6 He Sambaata laythan biittay oosetonna de7ishin kaxiya kathaa neeni, ne adde aylley, ne macca aylley, ne son une oothey, guutha wodes de7iya bete asi maanaw danda7ees.
LEV 25:7 Hessadaka, ne mehiyasinne ne biittan de7iya do7atas gidiya kathi demmana; biittan kaxiyaba ubbay meeteto.
LEV 25:8 Laythatas giddon de7iya laapun Sambaatata tayba; laapun Sambaatatas laytha tayboy laapun toho laapuna; hessika oytamanne uddufun laythi.
LEV 25:9 Laapuntha ageenan, tammantho gallas bonchetiya nagara atotetha gallasan moyze punniya asi biitta ubbaa kiitta.
LEV 25:10 Ishatammantho laytha dummayidi, he biittan de7iya ubbaas la77atethi awaajite. Hessi hintew Ishatammantho Laytha Ba7aale. He wode hinte ubbay hinte gadiyakonne hinte soo asaako simmite.
LEV 25:11 He laythay hintew Ishatammantho Laytha Ba7aale. He laythan zeropite; aasebo kaxidaba cakofite; xeera xunqonna ayfida woyne ayfiya maxopite.
LEV 25:12 Hessi Ishatammantho Laytha Ba7aale gidiya gisho I hintew geeshshi; goyonna coo denban kaxidaba miite.
LEV 25:13 He Ishatammantho Laytha Ba7aale wode asi ubbay ba gade simmo.
LEV 25:14 Hinte, hinte shooruwape gade shammiko woyko iyaw bayziko issoy issuwa cimmofite.
LEV 25:15 Hinte Ishatammantho Laytha Baaliyape guye de7iya laythata taybuwan hinte shooruwape shammite. Hinte shooroy gadey kathi immanaw de7iya laythata taybuwada bayzo.
LEV 25:16 Laytha tayboy daro gidiko gatey darees; laythata tayboy guuxiko gatey guuxees. Gadiya lo77otethaada hinte shooroy hintew bayzees.
LEV 25:17 Hinte issoy issuwa cimmofite; shin hinte, hinte Xoossaa yayyite. Taani Godaa, hinte Xoossaa.
LEV 25:18 Hinte ha biittan saro daana mela ta kiitta polite; ta higgiya naagite.
LEV 25:19 Biittay ba ayfiya hintew immin hinte kallana gakanaw maana; he biittan hinte saro daana.
LEV 25:20 Heko, nuuni zeronna aggidi, qassi kathi shiishonna aggidi, laapuntha laythan ay maanee? giiko,
LEV 25:21 taani usupuntho laythan ta anjuwa hintew kiittana; biittay heedzu laythas gidiya kathi immana.
LEV 25:22 Hospuntha laythan hinte, hinte biittan zeriya wode shaacha kathaa maana. Hinte zeriya kathaa uddufuntho laythan shiishana gakanaw shaacha kathaa maana.
LEV 25:23 Biittay tabaa gidiya gishonne hinte he biittan imathenne bete gididi de7iya gisho biitta simmonnaada oothidi bayzopite.
LEV 25:24 Hinte oykida gadiya godati, wozana maatay Isra7eele ubban naagetanaw bessees.
LEV 25:25 Issi Isra7eele asi manqidi ba gadiyape bayziko, iya mata dabboy he gadiya iyaw wozo.
LEV 25:26 Iyaw he gadiya woziya dabboy dhayiko, I wonto duretidi woziya miishe demmiko zaaridi wozanaw danda7ees.
LEV 25:27 Ba bayzida wodepe doomidi de7iya laytha taybidi, attida laytha miishiya shammidaysas zaaro; yaatidi I ba gadiya simmo.
LEV 25:28 Shin iyaw he gadiya wozanaw gidiya miishey dhayiko, Ishatammantho Laytha Ba7aaley gakanaw gadey shammida uraa kushen gam7o. Ishatammantho Laytha Ba7aale wode iya gadey iyaw simmo.
LEV 25:29 Issi asi gimbetida katama giddon de7iya keethe bayziko, I bayzida wodiyape bidi issi laythi kumana gakanaw zaaridi wozanaw danda7ees.
LEV 25:30 Shin issi laytha giddon wozanaw danda7etonna ixiko, he gimbetida katamaa giddon de7iya keethay shammida uraasinne iya kochaas gidees. Ishatammantho Laytha Ba7aale wode simmenna.
LEV 25:31 Shin gimbetiboona heeran de7iya keethati gade mela wozetoosona. Ishatammantho Laytha Ba7aale wode bayzidaysas simmoosona.
LEV 25:32 Gidoshin, Leeweti katamatan de7iya banta keethaa banta koyida wode wozanaw danda7oosona.
LEV 25:33 Leewetape issi asi enta katamaa giddon de7iya keethaa bayzidi wozanaw xoonetiko, he enta katamaa giddon de7iya keethay Ishatammantho Laytha Baaliya wode simmees. Leeweta katamaa giddon de7iya keethay Isra7eele asaa giddon Leewetasa.
LEV 25:34 Shin enta katamaa yuushuwan de7iya hentha biittay entaw merinaa aqo gidiya gisho bayzetenna.
LEV 25:35 Issi Isra7eele asi manqidi bana aysanaw xoonetiko, imathada woyko bete asada I neera daana mela maadda.
LEV 25:36 Iya neera wothanaw iyape yelo ekofa woyko wodhe moopa. Shin ne Xoossaa yayya.
LEV 25:37 Ne bira iyaw yelora tal7ofa; ne kathaa iyaw wodhera bayzopa.
LEV 25:38 Hintew Kanaane biitta immanawunne hinte Xoossaa gidanaw, hintena Gibxe biittafe kessida, taani, Godaa hinte Xoossaa.
LEV 25:39 Issi Isra7eele asi manqidi, bana new aylle oothidi bayziko iya aylleda oosisopa.
LEV 25:40 I bete asada une oothidi Ishatammantho Laytha Ba7aaley gakanaw neera de7o.
LEV 25:41 He wode I ba naytara issife ne soope keyidi ba soo asaako boo; ba aawa gade simmo.
LEV 25:42 Isra7eele asay taani Gibxe biittafe kessida ta aylle gidiya gisho enti aylletethas bayzetofo.
LEV 25:43 Neeni enta un7ethada haaropa; shin neeni, ne Xoossaa yayya.
LEV 25:44 New addenne macca aylley daana mela koyiko, ne yuushuwan de7iya kawotethatape shamma.
LEV 25:45 Hinte biittan de7iya bete asaa nayta shammanaw danda7eeta. Hinte biittan de7ishe yeletida enta soo asaape hintew shalo oothanaw danda7eeta.
LEV 25:46 Hintefe guye, hinte nayti enta merinaw laattana mela hinte naytas immite. Hinte enta ubba wode hinte aylle oothanaw danda7eeta; shin Isra7eele asi un7ethidi haaropite.
LEV 25:47 Ne matan de7iya imathi woyko bete asi duretiko, iya matan de7iya Isra7eele uray manqidi, ne matan de7iya imathas woyko bete uraas woyko imatha addiya kochaafe issuwas bana bayziko,
LEV 25:48 I bayzetidi simmin, iya wozanaw danda7etees; iya dabbotape issoy iya wozo.
LEV 25:49 Iya aawa ishay, woyko iya aawa ishaa na7ay woyko iya yaraape mata dabboy iya wozo; woyko I ba huuphen duretidi bana wozo.
LEV 25:50 I bana shammida uraara gididi, I bana bayzida laythafe doomidi Ishatammantho Laytha Ba7aaley gakanaw de7iya laythata taybo. Iya la77atetha gatey, he laytha taybuwa keena gido. I bana shammidaysara gam7ida wodiya gatey issi asi une oothidi demmiya miishiyara gina gido.
LEV 25:51 Ishatammantho Laytha Ba7aaley gakanaw daro laythi attidaba gidiko, ba bayzetida gatiyape he laytha taybon bana woziya gatiya qanxo.
LEV 25:52 Ishatammantho Laytha Ba7aaley gakanaw attida laythay guutha gidiko, bana shammidaysara issife taybidi, he laytha taybon bana woziya gatiya qanxo.
LEV 25:53 I laythan laythan une oothiya asada bana shammidaysara de7o; iya goday iya un7ethidi haaranaw bessenna.
LEV 25:54 Shin I hessa mela hanon wozetonna ixiko, Ishatammantho Laytha Ba7aaley gakiya wode inne iya nayti aylletethafe keyo.
LEV 25:55 Isra7eele asay, ta Gibxe biittafe kessida ta aylle. Taani, Godaa hinte Xoossaa.
LEV 26:1 Goyinnanaw eeqata oothopite; qassi hawulte woyko eeqa tuussu woyko shucha eeqa essofite. Taani Godaa, hinte Xoossaa.
LEV 26:2 Ta Sambaatata naagite; ta goyinno bessaa bonchite. Taani Godaa.
LEV 26:3 Hinte ta higgiya kaallikonne ta kiita naagiko,
LEV 26:4 taani hintew ira woden woden immana; biittay kathaa darsidi dolisana; gaden de7iya mithay ayfana.
LEV 26:5 Hinte kathaa shiishidi ongonna de7ishin woyne maxiya wodey gakana; woyniya maxidi wursonna kathaa zeriya wodey gakana. Hinte kallana gakanaw kathi maana; hinte, hinte biittan saro daana.
LEV 26:6 Taani biittas sarotethi immana; oonika hintena yashisonna hinte zin7ana. Iita do7ata taani biittafe dhaysana; hinte biittan nam7antho oli dendenna.
LEV 26:7 Hinte morketa hinte yedethana; enti hinte sinthan mashshan hayqana.
LEV 26:8 Hintefe ichashay xeeta yedethana; qassi xeetay tammu mukula yedethana. Hinte morketi hinte sinthan mashshan hayqana.
LEV 26:9 Taani hintena maarota ayfen be7ana; hintena ayfisana; hintena darsana; taani ta caaquwa hintera minthana.
LEV 26:10 Hinte shaacha kathaa midi wursonna de7ishe, wacha kathaa wothanaw, shaacha kathaa diggidi besse giigisana.
LEV 26:11 Taani ta de7iya bessaa hinte giddon oothana; taani hintena ixike.
LEV 26:12 Taani hinte giddon hemetana; hinte Xoossaa gidana; hinte ta ase gidana.
LEV 26:13 Hinte Gibxetas aylle gidonna mela he biittafe hintena kessida Goday, taani hinte Xoossaa. Taani hinte aylletetha qambara menthas; hinte dhoqu gidi hemetana mela oothas.
LEV 26:14 Shin hinte taana si7onna ixikonne, ta kiita polonna ixiko,
LEV 26:15 ta wogaa kadhiko, ta kiita ubbaa polonna ixidi ta caaquwa menthanaw ta higgiya boriko,
LEV 26:16 he wode taani hinte bolla haysa oothana; hinte akeekona de7ishin yashshi, gilqatethi, hinte ayfiya teljumisiyanne hinte asatethaa melisiya misha harge hinte bolla yeddana. Hinte morketi maana gisho hinte zeriya zerethay mela gidana.
LEV 26:17 Ta hintena iita ayfen xeellana; hinte morketa sinthan hinte kundana; hintena ixeysati haarana; oonika yedethonna hinte baqatana.
LEV 26:18 Hessa ubbaa oothinka hinte tana si7onna ixiko, taani hinte nagaraa gisho hinte seera laapun dako oothana.
LEV 26:19 Ta hinte otoruwa menthana; saluwa birata; sa7aa naase birata oothana.
LEV 26:20 Hinte biittay kathi, hinte mithay ayfe immonna gisho hinte wolqay coo bessan wurana.
LEV 26:21 Hinte taw ixas giikonne tana si7onna ixiko, hinte nagara mela laapun dako gado taani hinte bolla ehana.
LEV 26:22 Taani hinte bolla bazzo do7ata yeddana; enti hinte nayta bonqana. Hinte meheta dhaysana; hinte taybuwa guuthana; hessa gaason hinte hemetiya ogey husatana.
LEV 26:23 He seera ubban hinte taako simmonna ixiko,
LEV 26:24 he wode taka hintew ixas gaana. Hinte nagaraa gisho taani ta huuphen hintena laapun dako seerana.
LEV 26:25 Ta caaquwa hinte menthida gisho, kushe zaaranaw mashsha hinte bolla ehana. Hinte, hinte katamatan shiiqikoka, taani hinte bolla gado yeddana. Hinte, hinte morketa kushen aadhidi imetana.
LEV 26:26 Hinte kathaa taani dhaysiya wode tammu maccasati issi beshen uythu uukana; he uythaa mizaanen shaakidi ekana; hinte hessa maana shin kalleketa.
LEV 26:27 Ha ubban hinte tana si7onna ixikonne hinte iitatethan gujidi biiko,
LEV 26:28 ta hinte bolla hanqon dendana. Hinte nagaraa gisho taani hintena laapun dako seerana.
LEV 26:29 Hinte, hinte adde naytanne hinte macca nayta ashuwa maana.
LEV 26:30 Taani, hinte dhoqa goyinno bessata dhaysana; hinte ixaane yarshiya bessaa laallana. Taani hinte aha hinte eeqata aha bolla holana; taani hintena polo ixana.
LEV 26:31 Taani hinte katamata baysa oothana; hinte goyinno bessata dhaysana; hinte sawiya yarshuwa singike.
LEV 26:32 Taani hinte biitta dhaysana; he biittan de7iya morketi hessan malaaletana.
LEV 26:33 Taani hintena kawotethata giddon laallana; hinte bolla ta mashshaa shoddana. Hinte biittay baysatana; hinte katamati laaletana.
LEV 26:34 Hinte morketa biittan de7iya wode, baysa giigidi de7iya hinte biittay ba Sambaata bonchana. He wode hinte biittay shempananne ba Sambaata bonchishe ufaytana.
LEV 26:35 Hinte he biittan de7iya wode Sambaatatan demmiboonna shempuwa ha77i baysa gidida wode demmana.
LEV 26:36 Hinte di7etidi biya wode guye attida asata wozanan yashshi yeddana; carkoy qaathiya bonco girsay enta daganthana; enti mashshafe baqatiya mela baqatana; enta oonika yedethonna kundana.
LEV 26:37 Oonika yedethonna olape baqatiyada baqatishe, issoy issuwara dhubetidi kundana. Hinte, hinte morketa sinthan eqanaw hintew wolqi dhayana.
LEV 26:38 Kawotethata giddon hinte dhayana; hinte morketa biittan hinte mitetidi dhayana.
LEV 26:39 Morketa biittan attidaysati banta nagaraa gishonne banta aawata nagaraa gisho gilqidi dhayana.
LEV 26:40 Shin enti banta nagaraanne ta bolla makallidi si7onna ixida banta aawata nagaraa paaxiko,
LEV 26:41 ta enta ixanaadanne enta morketa biitta yedethannaada oothida banta nagaraa aggikonne enta kiitetonna wozanay simmiko,
LEV 26:42 Taani Yayqoobara, Yisaaqaranne Abrahaamera caaqida caaquwa hassayana; enta biitta zaara qopana.
LEV 26:43 Enta biittay baysa attana; he enti dhayin baysa gididi de7ida woden biittay Sambaata bonchishe ufaytana. Enti ta kiitaa kadhida gishonne ta wogaa leqida gisho banta nagaraa seera ekana.
LEV 26:44 Gidoshin, enti banta morketa biittan de7ida wode kumethi dhayana gakanaw entara de7iya ta caaquwa menthike; enta yeggike. Taani, Godaa enta Xoossaa.
LEV 26:45 Taani enta Xoossaa gidanaw, kawotethati xeellishin, Gibxe biittafe kessida enta mayzatara taani caaqida caaquwa enta gisho hassayana. Taani Godaa.
LEV 26:46 Goday Siina zuma bolla Muse baggara baapenne Isra7eele asaape giddon wothida wogati kiitatinne higgeti haysata.
LEV 27:1 Goday Museko haysada yaagis.
LEV 27:2 Isra7eele asaas haysada yaagada oda; issi asi Godaas ase immanaw qangiko, wozo gatiya ne gammatidaysa mela he uraa gisho miishe qanxo.
LEV 27:3 Laatamu laythafe bidi usupun tammu laythi gakanaw de7iya adde gidiko geeshsha dunkaanen eretida mizaanen usupun xeetu bira santime qanxo.
LEV 27:4 Macca gidiko hastamu bira santime qanxo.
LEV 27:5 Ichashu laythafe bidi laatamu laythi gakanaw de7iya adde gidiko laatamu bira santime qanxo; qassi maccas gidiko tammu bira santime qanxo.
LEV 27:6 Issi ageenape bidi ichashu laythi gakanaw de7iya adde gidiko ichashu bira santime qanxo; qassi maccas gidiko heedzu bira santime qanxo.
LEV 27:7 Laythi usupun tammanne iyape bolla gidida adde gidiko, tammanne ichashu bira santime; qassi maccas gidiko tammu bira santime qanxo.
LEV 27:8 Qangida uray neeni gammatidaysa qanxanaw danda7onna manqo gidiko, I ba qangetha gathanaw immida uraa ehidi kahiniya sinthan esso; qangetida uray qanxanaw danda7eysa keena qopidi kahiney gammato.
LEV 27:9 Issi asi Godaas yarsho oothidi immanaw qangiday mehe gidiko Godaas imetiya mehe ubbay geeshshi gidees.
LEV 27:10 He mehiya gisho hara mehe immofo; woyko iya hara mehera laammofo. Lo77uwa iitaara woyko iitaa lo77uwara laammofo; shin I laammiko, koyro meheynne laame immida mehey nam7ayka geeshshi gido.
LEV 27:11 Issi asi Godaas yarsho oothidi immanaw gepida mehey geeshshi gidonna ixiko, he uray he mehiya kahiniya sinthe eho.
LEV 27:12 Lo77o gidin, iita gidin kahiney he mehiya gammato; kahiney gammatidaysi iyaw gate gido.
LEV 27:13 Shin he mehiya goday zaaridi wozanaw koyiko, he mehiya gatiya bolla xeetape laatamu kushe gujo.
LEV 27:14 Issi asi ba keethaa geeshshi oothidi Godaas dummayiko, lo77o gidin, iita gidin kahiney he keethaa gammato; kahiney gammatidaysi iyaw gate gido.
LEV 27:15 Ba keethaa geeshshi oothidi Godaas dummayida uray zaaridi wozanaw koyiko, he keethaa gatiya bolla xeetape laatamu kushe gujo; simmidi keethay iyabaa gidees.
LEV 27:16 Issi asi ba laata gadiyape shaakidi geeshshi oothidi Godaas dummayiko, he gadiya gatey iyan zeretiya zerethan gammateto. Hessika nam7u xeetanne laatamu kilo giraame banga zeriya gade gidiko, ishatamu saqile qanxo.
LEV 27:17 I ba gadiya Ishatammantho Laytha Ba7aalepe doomidi geeshshi oothidi Godaas dummayiko, he gadiya kumetha gatiya qanxo.
LEV 27:18 Shin I ba gadiya Ishatammantho Laytha Ba7aaley aadhin, geeshshi oothidi Godaas dummayiko, kaallidi de7iya Ishatammantho Laytha Ba7aaley gakanaw de7iya laythata kahiney taybidi, iya kumetha gatiyape wodho.
LEV 27:19 He gadiya geeshshi oothidi Godaas dummayida uray zaaridi wozanaw koyiko, gammatetida gatiya bolla xeetape laatamu kushe gujo; simmidi gadey iyabaa gidees.
LEV 27:20 Shin I gadiya zaaridi wozanaape sinthe hara asas bayziko, he gadiya wozanaw danda7enna.
LEV 27:21 Ishatammantho Laytha Ba7aaley gakin gadey yedetiya wode he gadey nam7antho guye simmonna Godaas geeshshi gido; he gadey kahinetaba gidees.
LEV 27:22 Issi asi hara asape shammida gadiya geeshshi oothidi Godaas dummayanaw koyiko,
LEV 27:23 kaalliya Ishatammantho Laytha Ba7aaley gakanaw de7iya gatiya kahiney gammatiko, uray he gallas gammatida gatiya qanxo; He miishey Godaas dummatida miishe gidana.
LEV 27:24 Ishatammantho Laytha Ba7aaley gakiya wode he gadey koyro laatan ekidi bayzida uraas simmees.
LEV 27:25 Enta gatey geeshsha dunkaaniyan eretida mizaanen gammatetees. (Issi saqiley laatamu Geera gidees).
LEV 27:26 Shin oonika bayra yeletida mehe Godaas dummayidi shiishanaw danda7enna; I kaseka Godaaba. Miizi woyko dorse gidin Godaaba.
LEV 27:27 He mehey geeshshi gidonna ixiko, I gammatetida gatiya bolla ichashape issi kushe gujidi iya goday zaaridi wozo. I wozonna ixiko, gammatetida gatiyan hara asas bayzeto.
LEV 27:28 Issi asi Godaas dummayidi immidabay ayba gidikoka, ase woyko mehe woyko iya laata gade gidin, bayzetenanne wozetenna. I dummayidaba ubbay Godaas Ubbaafe geeshshi.
LEV 27:29 Asaa giddofe hayqana mela pirdetida asi oonika wozetofo; he uray hayqo.
LEV 27:30 Gaden kaxida kathi woyko mitha ayfe gidin tammaafe issoy Godaaba. Hessi Godaas geeshshi.
LEV 27:31 Issi asi ba asraata wozanaw koyiko, iya gatiya bolla xeetape laatamu kushe gujidi wozo.
LEV 27:32 Miiza asraata woyko dorsa asraata woyko deesha asraata gidin, henthanchuwa xam7afe garsara aadhiya tammaafe issoy Godaas geeshshi.
LEV 27:33 Tammantho mehey iita gidin, lo77o gidin dooropo; woyko iya haraara laammofo. Laammiko, koyroynne laame immida nam7ay Godaas geeshshi gidoosona; zaaridi wozanaw danda7etenna.
LEV 27:34 Siina zuma bolla Goday Muse baggara Isra7eele asaa kiitida kiitay haysa.
NUM 1:1 Isra7eele asay Gibxe biittafe keyida nam7antho laythan, nam7antho ageenan, he ageena koyro gallasan, Goday Siina mela biittan Geeshsha Dunkaaniyan Museko haysada yaagis;
NUM 1:2 “Neeranne Aaronara Isra7eele asa ubbaa enta kochan kochan, qassi enta soo asan asan taybadi, adde asaa sunthaa xaafite.
NUM 1:3 Laythi laatamanne iyape bolla gidida, oletanaw danda7iya Isra7eele asa ubbaa taybite.
NUM 1:4 Kochape kochape issi issi asi ba soo asaas halaqa gididi hintena maaddo.
NUM 1:5 Hintena maaddana asaa sunthay haysafe kaallidi xaafetidaysa. Robeelape, Shade7ura na7aa Elixura;
NUM 1:6 Simoonape Sursadaya na7a Salumi7eela;
NUM 1:7 Yihudape Amnadaabe na7aa Na7asoona;
NUM 1:8 Yisakoorape Zu7ara na7aa Natina7eela;
NUM 1:9 Zabloonape Heloona na7aa Eli7aaba;
NUM 1:10 Yoosefa naytape, Efreemape Amhuda na7aa Elishama7a; Minaasepe Padazuura na7aa Gamali7eela;
NUM 1:11 Biniyaamepe Gadiyoona na7aa Abdaana;
NUM 1:12 Daanape Amsadaya na7aa Aki7ezera;
NUM 1:13 Aseerape Okraana na7aa Pagi7eela;
NUM 1:14 Gaadape Ragu7eela na7aa Elyaasafa;
NUM 1:15 Niftaalemepe Enaana na7a Akira;
NUM 1:16 Ha asay banta aawata keethaa asaape kaalethanaw dooretida Isra7eele yarata halaqata” yaagis.
NUM 1:17 Yaatin Museynne Aaroni he dooretida asata ekidi,
NUM 1:18 nam7antho ageenan koyro gallasan kumetha maabara xeegidi shiishidosona. Asay banta kochan kochan, qassi banta soo asan asan laatamu laythinne iyape bolla gidida adde ubbay xaafetis.
NUM 1:19 Goday iya Kiittidaysada Musey enta Siina mela biittan taybis.
NUM 1:20 Oletanaw danda7iya adde ubbay, laatamu laythinne iyape bolla gidida adde ubbay taybetidi huuphen huuphen xaafetidosona. Enti banta kochan kochaaninne banta soo asan shaaketidi haysafe kaallidi de7iya taybo maaran mazgabetidosona. Bayra na7aa Robeelape 46,500
NUM 1:22 Simoonape 59,300
NUM 1:24 Gaadape 45,650
NUM 1:26 Yihudape 74,600
NUM 1:28 Yisakoorape 54,400
NUM 1:30 Zabloonape 57,400
NUM 1:32 Yoosefa na7aa Efreemape 40,500
NUM 1:34 Yoosefa na7aa Minaasepe 32,200
NUM 1:36 Biniyaamepe 35,400
NUM 1:38 Daanepe 62,700
NUM 1:40 Aseerape 41,500
NUM 1:42 Niftaalemepe 53,400
NUM 1:44 Musey, Aaroninne banta soo asaape asaape dooretida tammanne nam7u Isra7eele kochaa halaqati taybida asay haysata.
NUM 1:45 Oletanaw danda7iya adde ubbay, laatamu laythinne iyape bolla gidida asay banta soo asan asan taybetidosona.
NUM 1:46 Kumetha asaa tayboy 603,550.
NUM 1:47 Shin Leewe kochati taybetibookona.
NUM 1:48 Gaasoyka kase Goday Museko haysada yaagis;
NUM 1:49 “Leewe kochata taybopa; enta attida Isra7eele asaa taybon gelsofa.
NUM 1:50 Leeweta, Geeshsha Dunkaaniyaninne iyan de7iya miisheta ubbaa bolla halaqa oothada shuuma. Enti Dunkaaniyanne iyan de7iya miisheta tookana; iya giddon oothananne iya yuushon dunkaanana.
NUM 1:51 Geeshsha Dunkaaney shodetiya wode Leeweti shoddo; Geeshsha Dunkaaney eqiya wode Leeweti esso; entafe hari oonika iyako shiiqiko hayqo.
NUM 1:52 Hanko Isra7eele asay banta heeraninne banta cugan cugan shaaketidi, banta dunkaaniya dunkaanona.
NUM 1:53 Shin Godaa hanqoy Isra7eele maabara bolla wodhonna mela Leeweti Dunkaaniya yuushuwan banta dunkaaniya dunkaanidi naago” yaagis.
NUM 1:54 Isra7eele asay Goday Muse kiitida ubbaa oothidosona.
NUM 2:1 Goday Musenne Aarona haysada yaagis;
NUM 2:2 Isra7eele asay banta kochan kochan mallanne banta kocha kocha erisiya bandira kaallidi, Geeshsha Dunkaaniyape guuthi haakidi iya yuushuwan dunkaanona.
NUM 2:3 Doloha baggara Yihuda kochay banta malla kaallidi dunkaanona. Yihuda kochaa kaalethey Amnadaabe na7aa Na7asoona.
NUM 2:4 Iya cugaa tayboy 74,600.
NUM 2:5 Yihuda gakidi dunkaananay Yisakoore kochaa. Yisakoora kochaa kaalethey Zu7ara na7aa Natina7eela.
NUM 2:6 Iya cugaa tayboy 54,400.
NUM 2:7 Iyape kaallidi Zabloona kochay dunkaanees. Zabloona kochaa kaalethey Heloona na7aa Eli7aaba.
NUM 2:8 Iya cugaa tayboy 57,400
NUM 2:9 Yihuda baggan dunkaanida olanchota tayboy 186,400. Isra7eele asay gutaa yeddidi biya wode koyroti keyey enta.
NUM 2:10 Dugeha baggara Robeela kochay banta malla kaallidi dunkaanona. Enta kaalethey Sadiyoora na7aa Elisuura.
NUM 2:11 Iya cugaa tayboy 46,500.
NUM 2:12 Robeela gakidi dunkaaney Simoona kochaa. Simoona kochaa kaalethey Zurishadaya na7a Salumi7eela.
NUM 2:13 Iya cuga tayboy 59,300.
NUM 2:14 Iyape kaallidi Gaade kochay dunkaanees. Enta kaalethey De7u7eela na7aa Eliyasaafa.
NUM 2:15 Enta cugaa tayboy 45,650.
NUM 2:16 Robeela, baggan dunkaanida olanchota tayboy 151,450. Isra7eele asay gutaa yeddidi biya wode nam7antho keyey enta.
NUM 2:17 Hessafe guye, koyro keyiya Yihuda cugaapenne nam7antho keyiya Robeela cugaape giddon Geeshsha dunkaaniya tookidi Leeweti geloosona. Issi issi kochay banta dunkaanida maaran banta malla oykidi keyo.
NUM 2:18 Wuloha baggara Efreema baggay banta malla kaallidi dunkaanona. Entana kaalethey Amhuda na7aa Elishama7a.
NUM 2:19 Enta cugaa tayboy 40,500.
NUM 2:20 Enta gakidi Minaase kochay dunkaanees. Entana kaalethey Padazuura na7aa Gamali7eela.
NUM 2:21 Enta olanchota tayboy 32,200.
NUM 2:22 Iyape kaallidi dunkaaney Biniyaame kochaa. Biniyaame kochaa kaalethey Gidi7oona na7aa Abdaana.
NUM 2:23 Enta cugaa tayboy 35,400.
NUM 2:24 Efreema baggan dunkaanida olanchota tayboy 108,100. Isra7eele asay gutaa yeddidi biya wode heedzantho keyey enta.
NUM 2:25 Pudeha baggara Daane kochay banta malla kaallidi dunkaanona. Entana kaalethey Amsadaya na7aa Aki7ezera.
NUM 2:26 Enta cugaa tayboy 62,700.
NUM 2:27 Entana gakidi Aseera kochay dunkaanees. Aseera kochaa kaalethey Okraana na7aa Pagi7eela.
NUM 2:28 Enta cugaa tayboy 41,500.
NUM 2:29 Iyape kaallidi Niftaaleme kochay dunkaanees. Niftaaleme kochaa kaalethey Enaana na7aa Akira.
NUM 2:30 Enta cugaa tayboy 53,400
NUM 2:31 Daane baggan dunkaanida olanchota tayboy 157,600. Isra7eele asay gutaa yeddidi biya wode wursethan keyey enta.
NUM 2:32 Banta kochan kochan shaaketidi taybetida Isra7eele olanchota tayboy 603,550.
NUM 2:33 Shin Goday Muse kiitidaysada, Leeweti hara Isra7eele asaara taybetibookona.
NUM 2:34 Isra7eele asay, Goday Muse Kiittidaba ubbaa oothidosona. Enti banta mala kaallidi dunkaanidosona; qassi banta kochaanne banta soo asaa asaa kaallidi keyoosona.
NUM 3:1 Goday Siina zuma bolla Musera odetiya wode de7iya Aaronanne Muse soo asay haysafe kaallidi xaafetidaysa.
NUM 3:2 Aarona adde nayta sunthay, bayray Nadaaba, kaalley Abyooda, Alaazaranne Itamaara.
NUM 3:3 He Aarona adde nayti ubbay, kahine gididi oothanaw tiyetidi shuumetidosona.
NUM 3:4 Shin enta giddofe Naadabeynne Abyoodi Siina mela biittan Godaa sinthan geeshshi gidonna taman yarsho yarshidi hayqidosona. Entaw na7i baawa. Hessa gisho, enta aaway Aaroni paxa de7ida laytha ubban Alaazarinne Itamaara xalaali kahine gididi oothidosona.
NUM 3:5 Goday Museko,
NUM 3:6 “Leewe kochata ehada kahiniya Aarona maaddana mela enta iya sinthe shiisha.
NUM 3:7 Enti Aaronanne Isra7eele maabara ubbaa Geeshsha Dunkaaniya sinthan dumma dumma ooso oothidi maaddo.
NUM 3:8 Enti Geeshsha Dunkaaniya giddon de7iya miishe ubbaa aawatethan ayso. Isra7eele asaa gisho Geeshsha Dunkaaniya giddon ooso ubbaa enti oothonna.
NUM 3:9 Aaronanne iya adde nayta maadana mela Leeweta shuuma. Enti Isra7eele asaa giddofe shaaketidi Aarona maaddana mela imetidosona.
NUM 3:10 Aaronanne iya adde nayta kahine oothada shuuma. Entafe hara asi oonika Geeshsha dunkaaniyako shiiqiko hayqo” yaagis.
NUM 3:11 Qassi Goday Museko,
NUM 3:12 “Taani Isra7eelen yeletiya bayra adde nayta gisho Leeweta ekas. Leeweti tabaa.
NUM 3:13 Ayis giiko, bayra yeletida ubbay tabaa. Ta Gibxe biittan bayra yeletida ubbaa wodhida gallasan, Isra7eelen bayra yeletidaba ubbaa ase gidin, mehe gidin, taw dummayas. Enti tabaa gidana. Taani Godaa” yaagis.
NUM 3:14 Qassika Goday Museko Siina mela biittan,
NUM 3:15 “Leeweta enta kochan, qassi enta soo asan asan tayba. Yeletin issi ageenanne iyape bolla gidida adde nayta ubbaa tayba” yaagis.
NUM 3:16 Yaatin Goday kiitidaysada Musey enta taybis.
NUM 3:17 Leewe adde nayti Gedisoona, Qahatanne Maraara.
NUM 3:18 Gedisoona adde nayti Libinanne Same7a geetetoosona.
NUM 3:19 Qahaata adde nayti Amraama, Yizihaara, Kebroonanne Uzi7eela.
NUM 3:20 Meraara adde nayti Mahilanne Musa geetetoosona. Leeweta mayzati haysata.
NUM 3:21 Nam7u Gedisoona kochati Libinanne Sim7a.
NUM 3:22 Yeletin issi ageenanne iyape bolla gidida adde nayta tayboy 7,500.
NUM 3:23 Gedisoona kochati Geeshsha Dunkaaniyape guyen wuloha baggan dunkaanidosona.
NUM 3:24 Gedisoona kochaa soo asaa halaqay La7eela na7aa Eliyasaafa.
NUM 3:25 Gedisoona kochaas Geeshsha Dunkaaniya bolla de7iya aawatethay, Dunkaaniya, gaatha kamaa, kare kamaa, wula magarajuwa,
NUM 3:26 Dunkaaniya yuushon de7iya dabaaba magarajuwa, yarsho bessa magarajuwa, dabaaba wula magarajuwa, wodorotanne iyan go7etiya miisheta ubbaa aawatethan aysoosona.
NUM 3:27 Qahaata kochati Amraama, Yizihaara, Kebroonanne Uzi7eela.
NUM 3:28 Yeletin issi ageenanne iyape bolla gidida adde nayta tayboy 8,600. Qahaata kochati Geeshsha Dunkaaniya aawatethan naagoosona.
NUM 3:29 Qahaata kochati Geeshsha Dunkaaniyape dugeha baggara dunkaanidosona.
NUM 3:30 Qahaata kochaa kaalethey Uzi7eela na7aa Elzafaana.
NUM 3:31 Enti Taabotiya, xarpheeza, xompe wothiya kocaa, yarshsho bessaa, kahineti go7etiya Geeshsha Dunkaaniya miisheta, Ubbaafe Geeshsha Bessaa geliya wula bolla de7iya magarajuwa aawatethan ayso.
NUM 3:32 Leeweta halaqay kahiniya Aarona na7aa Alaazara. I Geeshsha Bessan ootheysatas shuuma.
NUM 3:33 Meraara kochati Mahilanne Musa.
NUM 3:34 Yeletin issi ageenanne iyape bolla gidida adde nayta tayboy 6,200.
NUM 3:35 Meraara kochaa kaalethey Abikaala na7aa Zur7eela. Meraara kochay Geeshsha Dunkaaniyape pudeha baggara dunkaanidosona.
NUM 3:36 Meraara kochay Dunkaaniya tuuqeta, liyoota, tuussatanne tuussati eqiya gedata, hessadaka giddon koshshiya miisheta ubbaa enti aawatethan aysoosona.
NUM 3:37 Gujidika, Dunkaaniya yuushon de7iya dabaaba tuussatanne enta gedata, dhishetanne wodorota aawatethan aysoosona.
NUM 3:38 Geeshsha Dunkaaniya sinthan doloha baggara Musey, Aaroninne iya adde nayti dunkaanidosona. Geeshsha Dunkaaniya giddon Isra7eela asaa gisho oosetiya ooso ubbaa enti aawatethan aysoosona. Hara asi Geeshsha Dunkaaniyako shiiqiko hayqo.
NUM 3:39 Goday, Musenne Aarona Kiittidaysa mela issi ageenanne iyape bolla gidida Leeweta adde nayta tayboy 22,000.
NUM 3:40 Goday Museko, “Yeletin issi ageenanne iyape bolla gidida Isra7eele bayra adde nayta taybada enta suntha xaafa.
NUM 3:41 Isra7eele bayra adde nayta bessan Leeweta, qassi Isra7eele bayra mehiya bessan Leeweta bayra mehiya taw eka. Taani Godaa” yaagis.
NUM 3:42 Goday Muse kiitidaysada Isra7eelen bayra yeletida ubbaa taybis.
NUM 3:43 Yeletin issi ageenanne iyape bolla gidida bayra adde nayta tayboy 22,273.
NUM 3:44 Goday Museko,
NUM 3:45 “Isra7eele bayra adde nayta bessan Leeweta taw dummaya. Qassi Isra7eele bayra meheta bessan Leeweta bayra mehiya taw dummaya; taani Godaa.
NUM 3:46 Isra7eele bayra adde nayta tayboy Leeweta bayra adde nayta taybuwape 273 aadhiya gisho he attidaysata taw woza.
NUM 3:47 Issuwas issuwas geeshsha dunkaanen eretida mizaanen ichashu bira santimen woza.
NUM 3:48 He wozo miishiya Aaronasinne iya adde naytas imma” yaagis.
NUM 3:49 Palahidaysata wozo miishiya Musey shiishis.
NUM 3:50 Geeshsha Dunkaaniya mizaaniya liken Isra7eele bayra adde nayta wozo miishiya 1,365 bira santime ekis.
NUM 3:51 Goday kiitidaysada Musey wozo miishiya Aaronasinne iya adde naytas immis.
NUM 4:1 Goday Musenne Aarona haysada yaagis;
NUM 4:2 “Leewe kochatape Qahaata kochatanne enta soo asaa asaa shaakada tayba.
NUM 4:3 Laythi 30-50 gakida adde ubbaa Geeshsha Dunkaaniyan oothanaw danda7eyisata tayba.
NUM 4:4 Qahaata kochati Geeshsha Dunkaaniyan oothana oosoy Dunkaaniyan go7etiya geeshsha miisheta aawatethan naago.
NUM 4:5 “Asay gutaape baanaw dendiya wode Aaroninne iya adde nayti Geeshsha Dunkaaniya giddo gelidi, Caaqo Taabotiya sinthan de7iya magarajuwa wodhisidi he Caaqo Taabotiya iyara xaaxo.
NUM 4:6 He kamaa bolla liiqo galba kammo; iya bolla gujidi kaalose carqe kammo; tookiya kasota sagaayotan aatho.
NUM 4:7 “Godaas shiiqiya uytha wothiya xarpheezaa bolla kaalose carqe kammo. Xarpheeza bolla saaneta, cilpata, xuu7atanne woyne ushsha yarshuwa duuqiya otota wothona. Uythay ubba wode xarpheeza bolla de7o.
NUM 4:8 He ubbaa bolla zo7o carqe kammidi iya bolla qassi liiqo galba kammo; hessafe kaallidi tookiya kasota sagaayotan aatho.
NUM 4:9 “Kaalose carqe ekidi xompe wothiya kocaa, iya xompetara, iya qaphetara, bido kessiya keretaranne zayte tigiya xaarotara ubbaa kammo.
NUM 4:10 Yaatidi iya miisheta ubbaa liiqo galban kammidi tookiya arsa bolla wothona.
NUM 4:11 “Kaallidi worqa yarsho saaxiniya kaalose carqen kammo; qassi iya bollara liiqo galba yeggo. Yaatidi tookiya kasota sagaayotan aatho.
NUM 4:12 Hessadaka, Geeshsha Dunkaaniya giddon go7etiya miisheta ubbaa kaalose carqen xaaxo; iya bolla liiqo galba yeggidi, tookiya alga bolla wotho.
NUM 4:13 “Naase yarsho bessaafe biduwa pitidi iya bolla ocha teera daaniya carqe kammo.
NUM 4:14 Yarsho bessan go7etiya miisheta ubbaa; tama cooceta, asho qapheta, akaafatanne haatha kereta iya bolla wothidi, liiqo galba kammo. Yaatidi tookiya kasota sagaayotan aatho.
NUM 4:15 Aaroninne iya adde nayti, geeshshabatanne iyan go7etiya geeshsha miisheta ubbaa kammidaape guye Isra7eele asay gutaape dendiya wode Qahaata kochay yidi tooko. Shin enti hayqonna mela geeshsha miisheta bochofo. Geeshsha Dunkaaney bessaafe dendiya wode qahaata kochaas de7iya aawatethay haysa.
NUM 4:16 “Kahiniya Aarona na7ay Alaazari xompe zaytiya, sawiya ixaaniya, yarsho kathaanne tiyo zaytiya, hessadaka Geeshsha Dunkaaniyan de7iya dumma dumma geeshsha miisheta ubbaa bolla aawatethi de7ees” yaagis.
NUM 4:17 Goday Musekonne Aaronako,
NUM 4:18 “Qahaata kochay Leewe kochaa giddofe hayqidi dhayana mela oothopite.
NUM 4:19 Ubbaafe Geeshsha miishiyako shiiqidi hayqonna mela Aaroninne iya adde nayti Geeshsha Dunkaaniya giddo gelidi, Qohaata kochay huuphen huuphen oothana oosuwanne tookana toohuwa shaakidi besso.
NUM 4:20 Qahaata kochay hayqonnaada geeshsha miisheta be7anaw guutha wodeska Dunkaaniya giddo gelopo” yaagis.
NUM 4:21 Goday Museko,
NUM 4:22 “Leewe kochaafe Gedisoona kochaanne enta soo asaa asaa shaakada tayba.
NUM 4:23 Laythi 30-50 gakida adde ubbaa Geeshsha Dunkaaniya giddon oothanaw danda7eyisata tayba.
NUM 4:24 Gedisoona kochati oothana oosoy haysafe kaallidi de7eysa;
NUM 4:25 enti Geeshsha Dunkaaniya gaatha kamaa, kare kamaa, bollara yegetiya liiqo do7a galba, geliya wula bolla kaqetiya magarajuwa tooko.
NUM 4:26 Hessadaka Geeshsha Dunkaaniyanne yarsho bessa yuushuwan de7iya dabaaba magarajota, dabaaba geliya wula bolla de7iya gesheta, wodorotanne iyaw go7etiya miisheta ubbaa tooko. Gedisoona kochay miishetan oothanaw bessiya ooso ubbaa ootho.
NUM 4:27 Tooho gidin, hara ooso gidin, enti oothiya ooso ubbaa Aaroninne iya adde nayti enta kaalli oosiso. Enti tookanaw bessiyabata ubbaa ne aawatethan entaw gisha.
NUM 4:28 Geeshsha Dunkaaniya giddon Gedisoona kochay oothana oosoy haysa. Enta oosuwa kahiniya Aarona na7ay Itamaari kaallidi oosiso.
NUM 4:29 “Leewe kochaafe Meraara kochaanne enta soo asaa asaa shaakada tayba.
NUM 4:30 Laythi 30-50 gakida adde ubbaa Geeshsha Dunkaaniya giddon oothanaw danda7eyisata tayba.
NUM 4:31 “Enti Dunkaaniya tuuqeta, liyoota, tuussata, Dunkaaniya gedata,
NUM 4:32 Dunkaaniya yuushon dabaaban eqiya tuussata, he tuussata gedata, dhisheta, wodorotanne iyan koshshiya miisheta ubbaa tooko. Issoy issoy tookanaw bessiya miishiya iya sunthan shaakada gisha.
NUM 4:33 Geeshsha Dunkaaniya giddon Meraara kochay oothana oosoy haysa. Enti oothana ooso ubbaa kahiniya Aarona na7aa Itamaari aawatethan kaallidi oosiso” yaagis.
NUM 4:34 Musey, Aaroninne Isra7eele halaqati Qahaata kocha enta soo asan asan shaakidi taybidosona.
NUM 4:35 Laythi 30-50 gakida adde ubbaa Geeshsha Dunkaaniya giddon oothanaw danda7eyisata taybidosona.
NUM 4:36 Enta tayboy 2,750.
NUM 4:37 Goday Muse kiitidaysada Geeshsha Dunkaaniya giddon oothana mela Museynne Aaroni taybida Qahaata kochati haysata.
NUM 4:38 Gedisoona kochati banta soo asan asan shaaketidi taybetidosona.
NUM 4:39 Laythi 30-50 gakida addeti ubbaa Geeshsha Dunkaaniya giddon oothanaw danda7eyisata
NUM 4:40 tayboy 2,630.
NUM 4:41 Goday Muse kiitidaysada Geeshsha Dunkaaniya giddon oothana mela Museynne Aaroni taybida Gedisoona kochati haysata.
NUM 4:42 Meraara kochati banta soo asan asan shaaketidi taybetidosona.
NUM 4:43 Laythi 30-50 gakida addeti ubbay, Geeshsha Dunkaaniya giddon oothanaw danda7eyisata
NUM 4:44 tayboy 3,200.
NUM 4:45 Goday Muse kiitidaysada Geeshsha Dunkaaniya giddon oothana mela Museynne Aaroni taybida Meraara kochati haysata.
NUM 4:46 Musey, Aaroninne Isra7eele halaqati Leeweta ubbaa enta kochaaninne enta soo asan asan shaakidi tayba.
NUM 4:47 Laythi 30-50 gakida addeti ubbay, Geeshsha Dunkaaniya giddon oothanawnune miisheta tookanaw danda7iya,
NUM 4:48 Leeweta tayboy 8,580.
NUM 4:49 Goday Muse kiitidaysada, enti huuphen huuphen taybetidosona. Hessadaka Goday Muse kiitidaysada enti oothana oosoynne tookana toohoy imetis.
NUM 5:1 Goday Museko,
NUM 5:2 “Isra7eele asay baro hargen oyketida asi woyko asatethafe goggiyabay de7iya asi woyko aha bochidi tunida asi oonaka banta gutaape kessana mela kiita.
NUM 5:3 Ta enta giddon de7iya gutaa tunisonna mela ha geeshshi gidonna asati macca gidin adde enta giddofe kessada goodda” yaagis.
NUM 5:4 Goday Muse kiitidaysada Isra7eele asay enta ubbaa gutaape kessidi gooddidosona.
NUM 5:5 Goday Museko,
NUM 5:6 “Neeni Isra7eele asaas haysa oda; adde gidin woyko macci gidin oonika Godaas ammanetona ixidi hara asi naaqiko he uray bala oothis.
NUM 5:7 I ba nagara paaxo; ba nagara acciya kumetha aca bolla xeetape laatamu kushe gujidi I naaqida uraas ciggo.
NUM 5:8 Shin he naaqetida uray hayqidaba gidiko, aca ekanaw mata dabboy iyaw dhayko, he acay Godaas gididi kahiniyas imeto. He aca bolla gujidi iya nagara atotethas qoho yarshos gidiya maraze dorsi immo.
NUM 5:9 Qassi Isra7eele asay Godaas immiya geeshsha imo ubbay he kahiniyas gido.
NUM 5:10 Issi issi asi immiya geeshsha imotay he uraaba, shin kahiniyas immiko he imotay kahiniyasa” yaagis.
NUM 5:11 Goday Museko,
NUM 5:12 “Isra7eele asaas yaagada oda; issi addiya machiya kare hemetada iyaw ammanetona ixiko,
NUM 5:13 hara addera aqiko, qassi hessa iya ba azinaape qosiko, iya laymatishin be7ida marki baynaba gidiko,
NUM 5:14 I azinay iyo tunasu gidi sidhiko, woyko iya tunonna de7ishin I ba machiw sidhiko,
NUM 5:15 he addey ba machiw kahiniyako efo. I gisho yarshanaw issi kilo giraame banga dhiille efo. He addey ba machiw sidhida gisho, I qohuwa qoncisiya katha yarsho gidiya gisho, dhiilliya bolla zayte tigopo; ixaane iya bolla wothofo.”
NUM 5:16 Kahiney he maccasiw Godaa sinthan esso.
NUM 5:17 Geeshsha haathi keren eko. Geeshsha Dunkaaniya wuygiyape biitta ekidi he haathan gujo.
NUM 5:18 He maccasiw Godaa sinthan esso; he maccase huuphiya billidi sidhida gisho yarshetiya qohuwa qoncisiya katha yarsho I kushen wotho; qassi kahiney ba kushen baadethi ehiya camo haatha keren oyko.
NUM 5:19 Hessafe guye, maccasiw yaagidi caaqiso; “Neeni hara addera aqabonaba gidiko, nenatethaa tunisaboonaba gidiko, baadethi ehiya haathay new gome gidopo.
NUM 5:20 Shin neeni ne azina aggada hara addera aqada tunidaba gidiko,
NUM 5:21 Goday ne yelo keetha gundisidi, ne uluwa gabbisidi ne asaa sinthan nena baadetidaba ootho.
NUM 5:22 Ha baadethi ehiya haathay ne uluwan gelidi ne uluwa gabbiso; ne yelo keethaa gundiso” yaagidi caaqiso. Maccasiya, “Amin7i, hessi tana gako” yaago.
NUM 5:23 “Haysafe guye, kahiney he baadetha xaafo; he xaafidaysa keriyan de7iya haathan meecco.
NUM 5:24 Qangethi ehiya haatha maccasiw ushshanaape sinthe,
NUM 5:25 kahiney maccase kushepe yarsho dhiilliya ekidi, dentho yarsho oothidi Godaas yarsho.
NUM 5:26 Kahiney yarsho kathaafe zolle ekidi bala qoncisiya yarsho oothidi yarsho bessan xuuggo. Hessafe guye, maccasiw he haatha ushsho.
NUM 5:27 Iya ba azinaas ammanetona ixada tunidaba gidiko baadetha haathay I uluwan camo saho medho. I uloy gabbana; I yelo keethayka gundana; iya ba asaa giddon baadetidaaro gidana.
NUM 5:28 Iya tunaboonabanne xillo maccas gidiko, iya geeshshi gidana; na7a yelanaw danda7awusu.
NUM 5:29 “Issi asi ba machiw laymatasu gidi sidhiko woyko qaanatiko yarsho bessi ehidi iyo esso. Kahiney he wogaa ubbaa I bolla polo.
NUM 5:31 Azinay, qohoy baynaba gidana, shin macciya ba nagaraa gaason gakiya waaye ubbaa tookana” yaagis.
NUM 6:1 Goday Museko,
NUM 6:2 “Isra7eele asaa haysada gada kiita; adde gidin woyko macca bana Godaas dummayidi Naazirawe gidanaw qangiko,
NUM 6:3 woyne woyko hara mathoyiya ushshi uyopo. Caalabanne mathoyaba uyopo; woyne teera, tiyanne mela moopo.
NUM 6:4 I bana Godaas dummayida wode ubban, woyne ayfiya gidin poquwa gidin woyko kochaa gidin moopo.
NUM 6:5 “I bana Godaas dummayida wode ubban, ba huuphiya meedetofo woyko qanxetofo. I ba huuphe binaana adussidi dicho. I bana Godaas dummayida wodey poletana gakanaw geeshshi gidanaw koshshees.
NUM 6:6 I bana Godaas dummayida woden ubban ahako shiiqopo.
NUM 6:7 I bana dummayidaysa erisey iya huuphiya gidiya gisho, iya aaway woyko iya aayiya woyko iya ishay woyko iya michiya hayqiko enta aha bochidi bana tunisopo.
NUM 6:8 I bana Godaas dummayida wode ubban Godaas geeshshi.
NUM 6:9 “Asi iya matan qoponna hayqiko, Godaas geeshshi gidida ba huuphiya tunisiko laapun gallas gam7idi ba huuphiya meedeto.
NUM 6:10 Hospuntha gallasan nam7u holleta woyko nam7u kuraachota Geeshsha Dunkaaniya pengen de7iya kahiniyas eho.
NUM 6:11 Naazirawey aha bochidi tunida gisho nagarape iya geeshshanaw kahiney holletape issuwa nagara yarsho, hankuwa qassi xuussa yarsho oothidi yarsho. He gallas I ba huuphiya wogaada zaaridi Godaas geeshsho;
NUM 6:12 I bana zaaridi Godaas dummayo. Yaatidi issi laytha maraze naaqo yarsho oothidi yarsho. I Godaas dummayida huuphey tunida gisho, kase I bana Godaas dummayidi de7ida wodey taybetenna.
NUM 6:13 “Issi naazirawey ba qangetha wodiya ongida wode polana wogay haysa; Geeshsha Dunkaaniya penge bidi;
NUM 6:14 borey bayna issi laytha dorsa urge xuussa yarshos, issi laytha uzzo dorsi nagara yarshos, issi maraze issifetetha yarshos he bessaa eho.
NUM 6:15 Qassi katha yarshonne ushsha yarsho entara issife yarshanaw eho. He katha yarshoy irshoy geliboonna lo77o dhiille shamaho zaytera uuketida orde uythinne shamaho zayten tiyetida lee7o gaytan eho.
NUM 6:16 “Kahiney he ubbaa nagara yarshonne xuussa yarsho oothidi Godaas yarsho.
NUM 6:17 Kahiney maraziya gaytan de7iya uythaara Godaas issifetetha yarsho oothidi yarsho; kaallidi katha yarshuwanne ushsha yarshuwa yarsho.
NUM 6:18 Naazirawey Godaas dummayida ba huuphiya Geeshsha Dunkaaniya pengen meedetidi, binaana issifetetha yarshoy eexiya taman yeggo.
NUM 6:19 “Naazirawey ba huuphiya meedetidaape guye, kahiney doysetida maraziya gedaa ashuwa gaytan de7iya orde uythaafenne lee7o uythaafe ekidi, Naazirawiya kushen wotho.
NUM 6:20 Yaatidi kahiney he ubbaa yuusho yarsho oothidi, Godaas yarsho. He ubbay kahiniya gisho gidiya angaasuwaranne gedaara kahiniyas geeshsha yarsho gidees. Hessafe Godaas Naazirawey woyne ushsha uyo.
NUM 6:21 Hiza Godaas bana dummayida Naazirawey oothana mela imetida wogay haysa. Shin naazirawey yarshanaw koshshiya yarshotape aathidi immanaw qangidaba gidiko, ba qangetha gathanaw koshshees” yaagis.
NUM 6:22 Goday Museko,
NUM 6:23 “Aaroninne iya adde nayti Isra7eele asaa anjiya wode haysada yaagidi anjite yaaga;
NUM 6:24 “ ‘Goday hintena anjo, Goday hintena naago;
NUM 6:25 Goday ba som7uwa hintew poo7iso; I hintew qadheto;
NUM 6:26 Goday ba keeha ayfiyan xeello; I hintew sarotethi immo’ yaagidi anjite” yaaga.
NUM 6:27 “Enti Isra7eele asaa ta sunthan anjiya wode ta enta anjana” yaagis.
NUM 7:1 Musey Geeshsha Dunkaaniya tokidi ongida wode he Dunkaaniyanne iya miishiya, yarsho bessaanne iya miishiya ubbaa zayten tiyidi geeshshis.
NUM 7:2 Hessafe guye, Isra7eele asaa kochan kochan taybidi kaalethiya wode halaqa gidida ubbay,
NUM 7:3 Godaas imota shiishidosona. Enti immida imotay nam7u halaqa sunthan issi para gaare, qassi issi issi halaqa sunthan issi issi booru oothidi, usupun gaaretanne tammanne nam7u boorata Geeshsha Dunkaaniya ehidosona.
NUM 7:4 Goday Museko,
NUM 7:5 “Geeshsha Dunkaaniya oosuwas go77ana mela neeni he imota entafe ekada, enta oosuwas oosuwas koshsheysada shaakada Leewetas imma” yaagis.
NUM 7:6 Hessa gisho, Musey gaaretanne boorata ekidi Leewetas immis.
NUM 7:7 Gedisoona kochaas koshsheysada shaakidi enta oosuwas nam7u gaaretanne oyddu boorata immis.
NUM 7:8 Meraara kochaas koshsheysada shaakidi, enta oosuwas uyddu gaaretanne hospun boorata immis. Enta oosuwa aawatethan kaalethey kahiniya Aarona na7aa Itamaara.
NUM 7:9 Shin Qahaata kochaa oosoy Dunkaaniya geeshsha miisheta hashen toho gidiya gisho Musey entaw para gaarenne booru immibeenna.
NUM 7:10 Musey yarsho bessi Godaas dummayida gallas halaqati yarsho bessa sinthe banta imota ehidosona.
NUM 7:11 Goday Museko, “Issi issi gallas issi issi halaqay yarsho bessi Godaas dummayanaw ba imota immo” yaagis.
NUM 7:12 Koyro gallas ba imota ehiday Yihuda kochaafe Amnadaabe na7aa Na7asoona.
NUM 7:13 Na7asooni ehida imotay geeshsha dunkaanen eretida mizaanen 1,500 giraame birape oosetida picca Saane, 800 giraame birape oosetida ollatiya saane, nam7aaka katha yarsho yarshanaw zaytera walaketida lo77o dhiille kumidaysa;
NUM 7:14 qassi 110 giraame worqafe oosetida ixaaney kumida shaate;
NUM 7:15 xuussa yarshos, issi wofaano, issi maraze, issi laytha urge dorsi;
NUM 7:16 nagara yarshos issi kole;
NUM 7:17 issifetetha yarshos nam7u boorata, ichashu marazeta, ichashu koletanne ichashu urge dorsata ehis. Kaalliya hanko halaqatika Amnadaabe na7ay Na7asooni immidaysada banta imota ehidosona.
NUM 7:18 Nam7antho gallasan Yisakoora kochaafe Zu7ara na7ay Natina7eeli ba imota ehis.
NUM 7:24 Heedzantho gallasan Zabloona kochaafe Heloona na7ay Eli7aabi ba imota ehis.
NUM 7:30 Oyddantho gallasan Robeela, kochaafe Shade7ura na7ay Elizuuri ba imota ehis.
NUM 7:36 Ichashantho gallasan Simoona kochaafe Zurishadaya na7ay Salumi7eeli ba imota ehis.
NUM 7:41 Usupuntho gallasan Gaade kochaafe Ragu7eela na7ay Eliyasaafi ba imota ehis.
NUM 7:48 Laapuntha gallasan Efreema kochaafe Amhuda na7ay Elishama7i ba imota ehis.
NUM 7:54 Hospuntha gallasan Minaase kochaafe Padazuura na7ay Gamali7eeli ba imota ehis.
NUM 7:60 Uddufuntho gallasan Biniyaame kochaafe Gida7oona na7ay Abdaani ba imota ehis.
NUM 7:66 Tammantho gallasan Daane kochaafe Amsadaya na7ay Aki7ezeri ba imota ehis.
NUM 7:72 Tammanne issintho gallasan Aseera kochaafe Okraana na7ay Pagi7eeli ba imota ehis.
NUM 7:78 Tammanne nam7antho gallasan Niftaaleme kochaafe Enaana na7ay Akira ba imota ehis.
NUM 7:84 Yarsho bessay tiyetiya wode Godaas dummayanaw Isra7eele halaqati ehida imotay haysafe kaallidi de7eysa. Birape oosetida tammanne nam7u picca saanetanne ollatiya saaneta; worqafe oosetida tammanne nam7u ixaaney kumida shaateta ehidosona.
NUM 7:85 Issoy issoy 1,500 giraame birape oosetida picca Saane; qassi issoy issoy 800 giraame birape oosetida ollatiya saane, geeshsha dunkaanen eretida mizaanen he ubbaa 28 kilo giraame ehidosona.
NUM 7:86 Ixaaney kumida tammanne nam7u worqa shaateta 1.4 kilo giraame geeshsha dunkaanen eretida mizaanen shiishidosona.
NUM 7:87 Xuussa yarshos shiiqida mehey katha yarshuwara wolla tammanne nam7u wofaanota, tammanne nam7u maraze, tammanne nam7u issi laytha urge dorsinne, tammanne nam7u koleta nagara yarshos shiishidosona.
NUM 7:88 Issifetetha yarshos laatamanne oyddu boorati, usupun tammu marazeta, usupun tammu koleta, usupun tammu issi laytha urge dorsata shiishidosona. Geeshsha Dunkaaniya dummayanaw tiya wode shiiqida yarshoti haysata.
NUM 7:89 Musey Godaara odetanaw Geeshsha Dunkaaniya geliya wode caaqo taabotiya kamaa bolla de7iya nam7u kiruubetape giddon gididi Goday odishin si7is.
NUM 8:1 Goday Museko,
NUM 8:2 “Aaroni laapun xompeta kocaa bolla wothiya wode poo7oy sintha baggara de7iya heera poo7isana mela oothidi wotho gada oda” yaagis.
NUM 8:3 Goday Muse kiitidaysada, Aaroni xompeta kocaa bolla wothidi sintha baggara de7iya heera poo7isana mela oothis.
NUM 8:4 Xompe wothiya kocay, Goday Muse bessidaysada toomape bidi bolla ciishsha gakanaw qoxetida worqafe oosetis.
NUM 8:5 Goday Museko,
NUM 8:6 “Isra7eele asaa giddofe Leeweta shaakada wogaada enta geeshsha.
NUM 8:7 Neeni enta geeshshanaw haysada ootha; geeshshiya haatha ekada enta bolla wurxa; enti banta asatethaa ubbaa meedeto; banta ma7uwa meecco; yaanidi enti wogaada geeshshi gidana.
NUM 8:8 Kaallidi enti issi wofaanonne katha yarshos gidiya zaytera walahetida lo77o dhiille eko; qassi neeni nagara yarshos hara issi wofaano eka.
NUM 8:9 Hessafe guye Isra7eele asa ubbaa shiishada, Leeweta Geeshsha Dunkaaniya sinthe ehada essa.
NUM 8:10 Isra7eele asay enta huuphiya bolla banta kushiya wotho.
NUM 8:11 Leeweti Isra7eele asaa giddofe taw dummatidi oothana mela yuusho yarsho oothidi Aaroni ta sinthe shiisho.
NUM 8:12 Leeweti banta kushiya nam7u wofaanota huuphen wotho. Leeweta nagara atotethas issuwa nagara yarsho, qassi hankuwa xuussa yarsho oothada Godaas yarsha.
NUM 8:13 “Leeweta shaakada taw dummaya; Aaronanne iya adde nayta enta bolla shuuma.
NUM 8:14 Hessada oothada Leeweta Isra7eele asape taw dummaya; enti tabaa gidana.
NUM 8:15 “Neeni enta geeshshidaapenne dummayidaape guye Leeweti Geeshsha Dunkaaniyan banta oosuwa oothanaw yo.
NUM 8:16 Isra7eele asaa giddofe kumethi enti taw imetidosona; Isra7eelen bayra yeletida adde nayta bessan Leeweta taw ekas.
NUM 8:17 Isra7eele asaa giddon bayra yeletida ase gidin mehe gidin ubbay tabaa. Taani Gibxe biittan bayra ubbaa wodhida wode enta taw dummayas.
NUM 8:18 Isra7eelen bayra yeletida adde nayta bessan taw Leeweta ekas.
NUM 8:19 Isra7eele asaa giddofe Leeweta Aaronasinne iya adde naytas immas. Isra7eele asay Geeshsha Dunkaaniyako shiiqidi qohetonna mela Leeweti Isra7eele asaa gisho Geeshsha Dunkaaniyan oothanawunne nagara atotethi ehanaw dooretidosona” yaagis.
NUM 8:20 Goday Muse kiitidaysada, Musey, Aaroninne Isra7eele asa ubbay Leeweta dummayidosona.
NUM 8:21 Leeweti bantana geeshshidosona; banta ma7uwa meeccidosona. Aaroni enta Godaas dumma imo oothidi shiishis; entaw nagara atotethas yarshidi enta geeshshis.
NUM 8:22 Hessafe guye, Leeweti Aaronanne iya adde nayta aawatetha garsan gididi Geeshsha Dunkaaniya giddon banta oosuwa oothanaw yidosona. Goday Muse Leeweta dummayanaw kiitidaysada enti oothidosona.
NUM 8:23 Goday Museko,
NUM 8:24 “Haysi Leeweti oothana wogaa; laythi laatamanne ichashanne iyape bolla gidida Leewe adde ubbay Geeshsha Dunkaaniyan oothanaw yo.
NUM 8:25 Shin laythi ishatamu gidiya wode banta oosuwape shempo; zaari oothofo.
NUM 8:26 Enti Geeshsha Dunkaaniyan oothiya banta ishata oothi maaddanaw danda7oosona. Shin enti bantaw ay oosoka oothofo. Hiza neeni Leeweta haysada oosisa” yaagis.
NUM 9:1 Isra7eele asay Gibxefe keyida nam7antho laythan koyro ageenan Siina mela biittan Goday Museko haysada yaagis;
NUM 9:2 “Isra7eele asay Paasika Ba7aale iya qamman boncho.
NUM 9:3 Ha ageenan tammanne oyddantho gallasan iya qamman omarsi iya woga ubbaadanne iya kiita ubbaada boncho” yaagis.
NUM 9:4 Hessa gisho, Musey Isra7eele asay Paasika Ba7aale bonchana mela entaw odis.
NUM 9:5 Goday Muse kiitidaysada, Isra7eele asay koyro ageenan tammanne oyddantho gallasan, omarsi Siina mela biittan Paasika Ba7aale bonchidosona.
NUM 9:6 Shin entafe baggati aha bochidi tunida gisho he gallas Paasika Ba7aale bonchanaw danda7ibookona. Hessa gisho, enti he gallas Musekonne Aaronako yidi,
NUM 9:7 “Nuuni aha bochida gisho tunida, shin he qamman hara Isra7eele asaara Godaas yarsho yarshonna mela ayis digetido?” yaagidosona.
NUM 9:8 Musey zaaridi, “Goday hintebaa taw odana gakanaw gam7ishite” yaagis.
NUM 9:9 Goday Museko,
NUM 9:10 “Isra7eele asaako haysada yaaga; hintefe woyko hinte kochaafe oonika aha bochidi tuniko woyko ogetidabaa gidiko, Paasika Ba7aale bonchanaw danda7ees.
NUM 9:11 Nam7antho ageenan tammanne oyddantho gallas omarsi Paasika Ba7aale boncho. Paasika dorsa uytharanne camo boncora mo.
NUM 9:12 Sa7ay wontana gakanaw dorsa ashuwape aybika attofo; qassi iya meqethafe issuwaka menthofo. Paasika Baaliya woga ubbaa ootho.
NUM 9:13 Shin geeshshinne ogetonna as Paasika bonchona ixiko, I ta asaa giddofe kuretto. Godaa yarshuwa iya qamman yarshiboona gisho ba nagaraa gisho pirda ekees.
NUM 9:14 “Hinte giddon de7iya bete asi Paasika Ba7aale bonchanaw koyko, Paasika wogaada boncho. Betanchoynne biitta aawu na7i ubbay he wogaatho ootho” yaagis.
NUM 9:15 Geeshsha Dunkaaney toketida gallas shaaray Geeshsha Dunkaaniya ma7is. Omarsafe doomidi, wonta gakanaw Geeshsha Dunkaaniya bollara de7iya shaaray tama daanees.
NUM 9:16 Hessada gallas gallas shaaray ma77ees; qamma qamma he shaaray tamada poo7ees.
NUM 9:17 He shaaray Geeshsha Dunkaaniya bollafe dendiya wode ubban Isra7eele asay banta dunkaanida gutaape dendoosona. Qassi he shaaray wodhiya bessan Isra7eele asay dunkaanosona.
NUM 9:18 Isra7eele asay Godaa kiitan gutaape dendoosona; qassi Godaa kiitan dunkaanosona. Shaaray Geeshsha Dunkaaniya bolla gam7iya wode ubban banta dunkaanida gutan gam7oosona.
NUM 9:19 Shaaray Geeshsha Dunkaaniya bolla daro gallas gam7ikoka, Isra7eele asay Godaa kiita naagosonape attishin, awuka bookona.
NUM 9:20 Issi issi toho shaaray Geeshsha Dunkaaniya bolla guutha gallas gam7ees. Gidikoka enti Godaa kiitan dunkaanosona; qassi Godaa kiitan gutaape dendoosona.
NUM 9:21 Issi issi toho shaaray omarsafe wontana gakanaw xalaala gam7ees; shaaray dendiya wode enti dendoosona. Gallas gidin, qamma gidin, shaaray dendiya wode enti dendoosona.
NUM 9:22 Shaaray Geeshsha Dunkaaniya bolla nam7u gallas gidin woyko issi ageena woyko issi laythi gam7in Isra7eele asay banta dunkaanida gutan gam7osonape attishin, bookona. Shin shaaray dendiya wode entika dendoosona.
NUM 9:23 Goday Muse Kiittidaysada enti Godaa kiitan dunkaanosona qassi Godaa kiitan gutaape dendidi boosona.
NUM 10:1 Goday Museko,
NUM 10:2 asaa shiiqos xeeganawunne dunkaanida gutaape denthanaw maaddiya nam7u moyzeta birape qoxada medha.
NUM 10:3 Ha nam7u moyzeti punetiya wode asa ubbay Geeshsha Dunkaaniya pengen neeko shiiqo.
NUM 10:4 Shin issi moyze xalaali punetiko, Isra7eele kochaa halaqati ne sinthe shiiqo.
NUM 10:5 Moyzey koyro punetiya wode Geeshsha Dunkaaniyape doloha baggan dunkaanida kochay dendo.
NUM 10:6 Moyzey nam7antho punetiya wode dugeha baggan dunkaanida kochay dendo. Moyzey hessatho punetiya wode gutaape dendanaw malla gido.
NUM 10:7 Asa shiishanaw moyze punna, shin hankoysada dumma mallara punnofa.
NUM 10:8 Kahineti, Aarona nayti moyze punno. Haysi newunne yaana yeletetha ubbaas merina woga gido.
NUM 10:9 “Hinte gadiya bolla ola denthida hinte morkiyara hinte oletanaw keyiya wode he moyzeta goochidi punnite. He wode Goday, hinte Xoossay hintena akeekidi, hinte morketape ashshana.
NUM 10:10 Hinte ufaysa gallasatan hessika ageena xeeron, eretida ba7aaletan, xuussa yarsho wodeninne issifetetha yarsho wode moyze punnite. Hessi Xoossaa sinthan hintena akeekisiyaba gidana. Taani Godaa, hinte Xoossaa” yaagis.
NUM 10:11 Asay Gibxefe keyin, nam7antho laythan, nam7antho ageenan, laatamantho gallasan, shaaray Geeshsha Dunkaaniya bollafe dendis.
NUM 10:12 Yaatin asay Siina mela biittafe maaran maaran dendidosona; shaaray Paarana mela biitta gakidi wodhis.
NUM 10:13 Goday Muse kiitidaysada enti baanaw koyro dendidosona.
NUM 10:14 Koyro Yihuda kochaa baggan dunkaanida kochay banta mala ekidi keyidosona. Entana kaalethey Amnadaabe na7aa Na7asoona.
NUM 10:15 Yisakoora kochaa kaalethey Zu7ara na7aa Natina7eela.
NUM 10:16 Zabloona kochaa kaalethey Heloona na7aa Eli7aaba.
NUM 10:17 Yaatin, Geeshsha Dunkaaney shodetin, Gedisoona kochatinne Meraara kochati tookidi dendidosona.
NUM 10:18 Kaallidi Robeela kochaa baggan dunkaanida kochay banta mala oykide keyidosona. Robeela kochaa kaalethey Shade7ura na7aa Elizuura.
NUM 10:19 Simoona kochaa kaalethey Zurishadaya na7aa Salumi7eela.
NUM 10:20 Gaade kochaa kaalethey Ragu7eela na7aa Eliyasaafa.
NUM 10:21 Yaatin Qahaata kochay geeshsha miisheta tookidi dendidosona. Enti kaalliya guta gakanaape sinthe Geeshsha Dunkaaney toketidi uttees.
NUM 10:22 Kaallidi Efreema kochaa baggan dunkaanida kochati banta malla oykidi keyoosona. Efreema kochaa kaalethey Amhuda na7aa Elishama7a.
NUM 10:23 Minaase kochaa kaalethey Padazuura na7aa Gamali7eela.
NUM 10:24 Biniyaame kochaa kaalethey Gadiyoona na7aa Abdaana.
NUM 10:25 Wursethan Daane kochaa baggan dunkaanida kochay, ubbaas guye baggara kate gididi, banta malaoykidi keyidosona. Daane kochaa kaalethey Amsadaya na7aa Aki7ezera.
NUM 10:26 Aseera kochaa kaalethey Okraana na7aa Pagi7eela.
NUM 10:27 Niftaaleme kochaa kaalethey Enaana na7aa Akira.
NUM 10:28 Isra7eele asay banta zerethan zerethan gutaape dendidi biya maaray hessa.
NUM 10:29 Musey Midiyaame addiya Ragu7eela na7aa Hobaabako, “Goday nuus immana gida biitta laattanaw boos; Goday Isra7eele anjana gida gisho nuura yedha; nuuni new lo77oba oothana” yaagis.
NUM 10:30 Yaatin Hobaabi, “Akay, taani ta biitta ta dabbotako baana” yaagis.
NUM 10:31 Musey zaaridi, “Hayyana, nuna yeggada boopa. Nu biya mela biittan nuuni dunkaanana bessaa ne eraasa; nu baana ogiya nuna kaalethanaw danda7aasa.
NUM 10:32 Neeni nuura biiko, Goday nuus immiya anjuwa ubbaa Nu new shaakana” yaagis.
NUM 10:33 Asay Godaa zumaape dendidi, heedzu gallasa oge bidosona. Godaa caaqo Taabotey enti shempana bessi koyishe heedzu gallas entafe sinthe sinthe bis.
NUM 10:34 Enti dunkaanida gutaape dendiya wode ubban Godaa shaaray gallas gallas entafe bollara de7ees.
NUM 10:35 Taabotey dendiya wode ubban Musey, “Abeeti Godaw, denda; ne morketi laaleto; nena ixeysati ne sinthafe baqato” yaagees.
NUM 10:36 Taabotey shempiya wode ubban Musey, “Abeeti Godaw, daro mukulan taybetiya Isra7eele asaako simma” yaagees.
NUM 11:1 Isra7eele asay bantana gakida metuwan Godaa bolla zuuzumidosona. Enta zuuzuntha Goday si7ida wode iya hanqoy eexin, xuuggiya tama enta bolla yeddis; he tamay enti dunkaanida gutaape issi bagga gaxaa mis.
NUM 11:2 Yaatin Musey enta gisho Godaa woossana mela enti Museko yidi yeekidosona. Musey woossin tamay to7is.
NUM 11:3 Godaa tamay enta giddon eexida gisho, he bessay Tabeera geetetidi xeegetis.
NUM 11:4 Isra7eeletara Gibxefe keyida dumma dumma derey hara kathi maanaw daro amotidosona. Enti, “Nu asho awupe demmanee?
NUM 11:5 Nuuni Gibxen de7iya wode miishe qanxonna miya moluwa, leehiya, habaabe, shunkurte, miskati bayna shunkurtenne tuumuwa hassayoos.
NUM 11:6 Shin ha77i nu qoodhey gordetis; nu ayfeyka ha mannafe attishin, haraba aybaka be7enna” yaagidi yeekidosona.
NUM 11:7 Mannay deebbo ayfe daanees; iya malay bootha adil7e ciishshe daanees.
NUM 11:8 Mannay qamma wodhees; asay yuuyidi iya maxidi woxan gaaccidi woyko udulan caddidi kathoosona. Yaatidi uukosona; iya mal7oy shamaho zaytera uuketida uytha mela.
NUM 11:9 Manni qamma enta gutan akara wodhees.
NUM 11:10 Asay banta dunkaaniya pengen pengen eqidi yeekishin Musey si7is. Enti Godaa hanquwa denthethida gisho, Musey un7etis.
NUM 11:11 Musey Godaako, “Ne aylliya, ta bolla ayis ha metuwa ehadii? Ne tanan ayis ufaytabikii? Ne ha asa ubbaa toohuwa ta bolla ayis wothadii?
NUM 11:12 Ha asa ubbaa ta qanthatadinayee? Woyko enta ta yeladinaayee? Ne enta mayzatas, immana gada caaqida biitta gatho gada na7a idimmada dichiya aseeda ta ki7on ayis enta yeggadii?
NUM 11:13 Ha asa ubbaas ta asho awupe ehanee? Enti taako yidi, ‘Maanaw nuus asho imma’ yaagidi yeekosona.
NUM 11:14 Taani ha asa ubbaa tarka tookanaw danda7ike; taw hessi deexo tooho.
NUM 11:15 Hiza neeni tana haysada oothanaape taw qadheta; ha77i tana wodha; ha metuwape ta shempa aggana” yaagis.
NUM 11:16 Goday Museko, “Asaa kaalethanaw danda7iya Isra7eele halaqatape laapun tammu cimata doora. Enta Geeshsha Dunkaaniyako ehada ne matan essa.
NUM 11:17 Taani wodhada neera yan odetana; ta new immida Ayyaanape shaakada enta bolla wothana. Neeni asaa toohuwa nerka tookonna mela enti nena maaddana.
NUM 11:18 “Neeni asaako haysada yaaga; ‘Wonto hinte asho maana gisho hintena geeshshite. Nu asho awupe demmanee? Nuus Gibxen sa7i lo77oshin’ yaagidi hinte yeekida yeehuwa Goday si7is. Ha77i Goday asho immana; hinteka maana.
NUM 11:19 Hinte maanay issi gallas woyko nam7u gallas woyko ichashu gallas woyko tammu gallas woyko laatamu gallas xalaala gidenna.
NUM 11:20 Shin ‘Hinte giddon de7iya Godaa hinte kadhida gishonne Gibxefe keyonna attidaako nuus lo77oshin gida gisho, hintew siidhera keyana gakanawunne hinte saletana gakanaw issi ageena kumethi hinte asho maana’ yaaga” yaagis.
NUM 11:21 Shin Musey Godaako, “Heko, ta 600,000 asaa kaalethashe de7ayis. Neeni issi ageena kumethi enti asho maana mela immana gaasa.
NUM 11:22 Miiza wudenne dorsa wude ubbaa shukin entaw gidanee? Abban de7iya molo ubbaa shiishiyako entaw gidanee?” yaagis.
NUM 11:23 Yaatin, Goday Museko, “Godaa kushey qantheyee? Taani new odiyabay tumeekonne wordoko neeni ha77i be7ana” yaagis.
NUM 11:24 Hessa gisho, Musey kare keyidi, Goday gidaysa asaas odis. Isra7eele cimatape laapun tammu asaa shiishidi, Geeshsha Dunkaaniya yuushon essis.
NUM 11:25 Yaatin, Goday shaarara wodhidi iyara odetis; iya bolla de7iya Ayyaanape ekidi, he laapun tammu cimata bolla wothis. Ayyaanay enta bolla shempida wode enti nabeda tinbite odidosona. Shin hessafe guye, zaaridi tinbite odibookona.
NUM 11:26 He laapun tammu cimatara xaafetida asatape Eldaadanne Modaada geetetiya nam7ati dunkaanida gutan attidi Geeshsha Dunkaaniyako yibookona. Shin enta bollaka Ayyaanay wodhin, dunkaanida gutan tinbite odidosona.
NUM 11:27 Issi pantha addey Museko woxi yidi, “Eldaadinne Modaadi dunkaanida gutan tinbite odoosona” yaagis.
NUM 11:28 Yaanin, ba na7atethafe doomidi, Muse maaddiya Nawe na7aa Iyyasuy Museko, “Ta godaw, Muse, enta teqa” yaagis.
NUM 11:29 Shin Musey zaaridi, “Ta gisho ne qanaatay? Goday ba asa ubbaa bolla ba ayyaana wothidi nabeda tinbite odisiyaba gidiyako ta ufaytayis” yaagis.
NUM 11:30 Yaatidi, Museynne Isra7eele cimati dunkaanida gutaa simmidosona.
NUM 11:31 Qoponna Goday carko denthidi, sa7ape nam7u wadha mela dhoqu gidi piradhiya kuraachota abbafe ehis. Enta dunkaaniya yuushuwan ubba baggara issi gallasa oge mela sa7an wodhidosona.
NUM 11:32 He gallasinne he qamma ubbaa, qassi wontetha gallasika asay kare keyidi, he kuraachota oykidi shiishidosona. Entafe oonika 10 kilo giraamepe guuthu shiishibenna. Enti dunkaaniya guta yuushon melisanaw miccidosona.
NUM 11:33 Shin ashoy buroo enta doonan de7ishininne meetetidi wuronna de7ishin, Godaa hanqoy asaa bolla eexis; Goday asaa wolqaama boshan shocis.
NUM 11:34 Asho amotidi hayqida asaa enti he bessan moogida gisho he bessay Kebroot-Hataaba geetetidi sunthetis.
NUM 11:35 Asay he bessaafe dendi bidi Haxeroota geetetiya bessan dunkaanidosona.
NUM 12:1 Musey Tophe biitta maccas ekida gisho, Mayraamanne Aaroni Muse yaagidi boridosona.
NUM 12:2 “Goday Muse baggara xalaala odetidee? I nu baggara odibeennee?” yaagidosona. Goday enti gidaysa si7is.
NUM 12:3 Musey biittan de7iya asa ubbaafe aadhiya aada asi.
NUM 12:4 Qoponna Goday Muse, Aaronanne Mayraamo, “Hinte heedzati Geeshsha Dunkaaniyako keyte” yaagis. Entika keyidosona.
NUM 12:5 Goday shaara tuussara wodhidi Geeshsha Dunkaaniya pengen eqidi, Aarona! Mayraame! yaagidi xeegis. Enti nam7ay iya sinthe shiiqin,
NUM 12:6 Goday, “Ta odeysa si7ite; hinte giddon nabey de7iko, ta iyaw qoncayis; qassi iyaw amuhon odayis.
NUM 12:7 Shin ta aylley Muse hessada gidenna; I ta keetha ubban ammanetidaysa.
NUM 12:8 Taani Musera som7on odetasipe attishin, leemison odike. I ta malaa be7ees. Yaatin, hinte ta aylliya Muse boranaw ayis yayyibeketii?” yaagis.
NUM 12:9 Godaa hanqoy enta bolla eexin, I enta aggidi bis.
NUM 12:10 Shaaray Geeshsha Dunkaaniya bollafe dendida wode Mayraama baro hargen milxi gada booxasu. Aaroni iiko simmidi xeelliya wode baro hargen oyketidaaro be7is.
NUM 12:11 Aaroni Museko, “Hay ta godaw, nuuni eeyatethan oothida nagaraas nuna haysada seeropa.
NUM 12:12 Iyo ba aaye ulope keyiya wode I asatethafe baggay meetetin, hayqidi yeletida na7a mela oothofa” yaagis.
NUM 12:13 Yaatin, Musey, “Abeeti Godaw, iyo patharki” yaagidi Godaa woossis.
NUM 12:14 Goday Museko, “I aaway I som7on cuttiyaba gidiyako, iya laapun gallas yeellara gam7awusu gidikee? Hessa gisho, laapun gallas dunkaaniya gutaape iyo gaxa kessada dumma bessan wotha; hessafe guye, simmada yo” yaagis.
NUM 12:15 Yaatin, Mayraama dunkaaniya gutaape gaxa keyada laapun gallas uttasu. Iya simmana gakanaw asay gutaa aggidi baanaw dendibeenna.
NUM 12:16 Hessafe guye, asay Haxeroota geetetiya bessaafe dendidi, Paarana mela biittan dunkaanidosona.
NUM 13:1 Goday Museko,
NUM 13:2 “Taani Isra7eeletas immana Kanaane biitta wochana mela tammanne nam7u Isra7eele kochaafe issi issi asi halaqa oothada kiitta” yaagis.
NUM 13:3 Yaatin Musey Goday kiitidaysada Paarana mela biittafe Isra7eele kochaafe tammanne nam7u halaqata kiittis.
NUM 13:4 Enta sunthay haysafe kaallidi xaafetidaysata. Robeela kochaafe Zakura na7aa Samu7a;
NUM 13:5 Simoona kochaafe Hoora na7aa Shaafaxa;
NUM 13:6 Yihuda kochaafe Yoofona na7aa Kaaleba;
NUM 13:7 Yisakoora kochaafe Yoosefa na7aa Yigi7aala;
NUM 13:8 Efreema kochaafe Nawe na7aa Awuse;
NUM 13:9 Biniyaame kochaafe Raafu na7aa Falxa;
NUM 13:10 Zabloona kochaafe Sooda na7aa Gadi7eela;
NUM 13:11 Yoosefa na7aa Minaase kochaafe Suusa na7aa Gaade;
NUM 13:12 Daane kochaafe Gamaala na7aa Ami7eela;
NUM 13:13 Aseera kochaafe Mika7eela na7aa Satura;
NUM 13:14 Niftaaleme kochaafe Waafisa na7aa Nahiba;
NUM 13:15 Gaade kochaafe Maka na7aa Ge7u7eela.
NUM 13:16 He biitta wochana mela Musey kiitida asata sunthay haysata. Musey Nawe na7aa Awuse sunthaa Iyyasu gidi sunthaa laammis.
NUM 13:17 Musey enta, “Negebe mela biitta kanthidi pude derey dariya biitta keyte.
NUM 13:18 Biittay ay mela biittako, asay ay mela minookonne taybon guutheko daroko be7ite.
NUM 13:19 Enti de7iya biittay lo77oko iiteko, enta katamati diretidaakonne mela de7iyako,
NUM 13:20 biittay araddeko laddeko, biittay woran kametidaakonne quu7eko be7ite. Minnite; he biittan de7iya katha ayfiyape ekonna yoopite” yaagis. He wodey woyney teeridi maxetiya wode.
NUM 13:21 Enti keyidi Siina mela biittafe doomidi, Lebo-Hamaata matan de7iya Rehooba gakanaw de7iya biitta wochidosona.
NUM 13:22 Negebe mela biitta kanthidi, Kebroona gakidosona. He bessan Akmaana, Sesayanne Talmaya geetetiya Enaaqa kochati de7oosona. Kebrooni Gibxen de7iya Xo7aane katamaape laapun laythi koyrottidi keexetis.
NUM 13:23 Yaara kanthidi, Eshkola Zangaara bidi gakiya wode teera woyne tashiyara qanxidosona. He tashey deexo gidiya gisho nam7u asi kaso aathidi tookidosona. Iya bolla gujidi oromaanenne balase mithaa ayfe ekidi yidosona.
NUM 13:24 Isra7eele asay he bessaafe woyne tashiya qanxida gisho he bessaa Eshkola Zangaara gidi xeegidosona.
NUM 13:25 Enti he biitta oytamu gallas wochidi guye simmidosona.
NUM 13:26 Paarana mela biittan Qaadesan de7iya Museko, Aaronakonne Isra7eele maabara ubbaako yidosona. Enti be7idaba asa ubbaas odidosona; he biittafe ekidi yida ayfiyaka enta bessidosona.
NUM 13:27 Enti Museko, “Neeni nuna yeddida biitta bida; he biittan maathinne eessi goggees; he biitta ayfiyaka haysa be7a.
NUM 13:28 Shin he biittan de7iya asay wolqaama; enta katamatika gimbe dirsan diretidaysatanne gita. Nuuni ubbaafe aathidi Enaaqa kochata yan be7ida.
NUM 13:29 Amaaleqati Negebe mela biittan; Hitetinne, Yaabuseti derey dariya Amooreta biittan; qassi Kanaaneti Medetiraane Abbaa doonaninne Yordaanose shaafa gaxan de7oosona” yaagidosona.
NUM 13:30 Yaatin Kaalebi asaa Muse sinthan si77i oothidi, “Nuuni xoonanaw danda7iya gisho, ha77i keyidi he biitta yegisidi ane oykoos” yaagis.
NUM 13:31 Shin Kaalebara bida asati, “He biitta asay nuupe aadhidi minniya gisho, nuuni enta xoonanaw danda7oko” yaagidosona.
NUM 13:32 Enti yuuyidi wochida biittaba Isra7eele asaas haysada yaagidi iita oda odidosona. “Nuuni wochida biittay yan de7iya asaaka miya biitta; yan de7iya asayka daro adusse.
NUM 13:33 Nuuni yan Enaaqa koche gidida Nifilime asata be7ida. Enta be7ida ayfen nuna xeelliya wode nuuni xaqo mela; entika nuna hessada be7oosona” yaagidosona.
NUM 14:1 He wode qamma maabara ubbay banta qaala dhoqu oothidi yeekidosona.
NUM 14:2 Isra7eele asay Muse bollanne Aarona bolla zuuzumidosona. Kumetha maabaray, “Nuuni Gibxe biittan de7ishe woyko ha mela biittan hayqida gidorko.
NUM 14:3 Nuuni mashshan wurana mela Goday ha biitta nuna ayis ehii? Nu machetinne nu nayti di7etana; hessa hananaape guye Gibxe simoy nuus keehennee?” yaagidosona.
NUM 14:4 Enti issoy issuwako, “Nuna kaalethiya asi dooridi guye Gibxe simmoos” yaagidosona.
NUM 14:5 Yaatin, Museynne Aaroni he bessan shiiqida Isra7eele maabara sinthan som7ora sa7an gufannidosona.
NUM 14:6 Biittaa wochanaw bida asaa giddofe Nawe na7aa Iyyasuynne Yoofona na7aa Kaalebi banta ma7uwa peedhidosona.
NUM 14:7 Isra7eele maabaraako, “Nuuni kanthi keyidi wochida biittay daro lo77o.
NUM 14:8 Goday nunan ufaytiyaba gidiko maathinne eessi goggiya biitta nuna gelsana; he biitta nuus immana.
NUM 14:9 Hessa gisho, Godaa bolla makallofite. He biitta asaas yayyofite; enti nuus oythika gidokona. Entaw eeshoy baawa; Goday nuura de7ees; hinte entaw yayyofite” yaagidosona.
NUM 14:10 Yaatin Isra7eele maabaray enta shuchan caddanaw dendis. He wode Godaa bonchoy Xoossaa Dunkaaniyan Isra7eele asa ubbaas qoncis.
NUM 14:11 Goday Museko, “Ha asay tana kadhey awude gakanaasee? Taani enta giddon oothida malaatata be7ishe, awude gakanaw tanan ammanonna ixanee?
NUM 14:12 Taani enta gadon shocada dhaysana, shin nena entafe dariyanne minniya kawotethas aawa oothana” yaagis.
NUM 14:13 Musey zaaridi Godaako, “Neeni ne wolqan ha asaa Gibxefe kessidaysa eriya Gibxeti hessa si7iko woyganee?
NUM 14:14 Enti he biittan de7iya asaas hessa odana. Abeeti Godaw, neeni ha asaara de7eysa enti si7idosona. Abeeti Godaw, nuuni nena be7idaysa, ne shaaray nu bolla kuyatidaysanne gallas shaara tuussan, qamma tama tuussan neeni nuna kaalethidaysa enti be7idosona.
NUM 14:15 Yaatin, ha77i neeni ha asa ubbaa issi toho wodha dhaysiyaba gidiko ne kase oothidaysa si7ida kawotethati,
NUM 14:16 ‘Goday, ha asaas immana gidi caaqida biitta enta gelsanaw danda7iboona gisho mela biittan wodhi dhaysis yaagidi’ odana.
NUM 14:17 “Hessa gisho, Godaw, ne wolqaa nuna bessa; ne nuus gelida qaala qopa.
NUM 14:18 ‘Goday elle hanqetenna; maarotinne siiqoy kumidaysa nagaranne geellatethi atto geysa; shin balida uraa seeronna aggenna. Yelidaysata nagaraa gisho heedzanthonne oyddantho yeletethi gakanaw nayta seerana’ yaagadasa.
NUM 14:19 Ha asay Gibxefe keyoosope doomada hachi gakanaw enta maaridaysada ne merinaa siiquwan ha asaa nagaraa atto garki” yaagis.
NUM 14:20 Goday zaaridi, “Ne oychidaysada ta enta maarana.
NUM 14:21 Shin ta de7o gideysadanne ta bonchoy sa7a ubbaa kumidaysada,
NUM 14:22 ha asaape issi asika he biitta be7enna. Gibxe biittaninne mela biittan oothida malaatata ha asati be7idosona; shin enti tammu toho tana paacidi taw kiitetonna ixidosona.
NUM 14:23 Hessa gisho, ta enta mayzatas immana gada caaqida biitta tana kadhidaysatape issoyka gelenna.
NUM 14:24 Shin ta aylley Kaalebi entafe dummatiya gishonne tana polo wozanape kaallida gisho, I kase wochida biitta iyaw immana; iya zerethayka he biitta laattana.
NUM 14:25 Shin ha77i Amaaleqatinne Kanaaneti zangaaran de7iya gisho, wonto Zo7o Abbaako efiya ogiya oykidi mela biitta guye simmite” yaagis.
NUM 14:26 Goday Musekonne Aaronako,
NUM 14:27 “Ha iita asay ta bolla awude gakanaw zuuzumanee? Taani Isra7eele asaa zuuzuntha si7as.
NUM 14:28 Hessa gisho, neeni entaw haysada gada oda; ‘Taani ta de7uwan caaqayis; hinte gidaysada ta hintew oothana.’ Taani, Goday haysa odayis.
NUM 14:29 Asay taybetiya wode laythi laatamanne iyape bolla gidida asi ubbay ta bolla zuuzumida gisho, hinte ahay ha mela biittan kundana.
NUM 14:30 Yoofona na7a Kaalebapenne Nawe na7a Iyyasupe attishin, hintefe oonika ta hintena laatisanaw caaqida biitta gelenna.
NUM 14:31 Hinte, ‘Nu nayti di7eti attana’ gida hinte nayta, he hinte kadhida biitta gelsana; he biittay entaw laata gidana.
NUM 14:32 Shin hinte ahay ha mela biittan kundidi attana.
NUM 14:33 Hinte ammanetibona gisho, hintefe wursetha ahay ha mela biittan kundana gakanaw, hinte nayti ha mela biittan waayetishe oytamu laythi dorse heemmana.
NUM 14:34 Hinte biitta wochida oytamu gallasaa taybon, issi gallasas issi laythi, oytamu laythi hinte nagaraa gisho waayetana; he wode ta hinte bolla ay mela hanqetidaako hinte erana.
NUM 14:35 Issife ta bolla dendida ha iita maabara bolla ta haysada oothana; enti ha mela biittan kundi attana; haysan enti hayqana; ta Goday haysa odayis” yaagis.
NUM 14:36 He biitta wochana mela Musey kiitida asati simmidi, he biittaba iita oda odidi, Muse bolla asay zuuzumana mela oothidaysati,
NUM 14:37 Godaa sinthan boshan hayqidosona.
NUM 14:38 He biitta wochanaw bida asaape Yoofona na7ay Kaalebinne Nawe na7ay Iyyasu xalaali attidosona.
NUM 14:39 Musey hessa Isra7eele asaas odida wode asay daro yeekis.
NUM 14:40 Wontetha gallas wonta guura dendidi, gezze biitta keyidi, “Nuuni nagara oothida, shin ha77i Goday nuus immana gida bessaa pude keyana” yaagidosona.
NUM 14:41 Shin Musey entako, “Godaa kiitaa hinte ayis menthetii? Hintew hanenna.
NUM 14:42 Goday hintera doonna gisho, boopite; hinte morketi hintena xoonana.
NUM 14:43 Amaaleqa asaaranne Kanaane asaara hinte oletidi mashshan hayqana. Godaas hinte kiitetonna ixida gisho, Goday hintera deenna” yaagis.
NUM 14:44 Shin enti Godaa Caaqo Taaboteynne Musey gutaape dendonna de7ishin, derey dariya biitta baanaw minnidi dendidosona.
NUM 14:45 Yaanin derey dariya biittan de7iya Amaaleqa asaynne Kanaane asay enta ollan xoonidi, Horma gakanaw enta yedethidosona.
NUM 15:1 Goday Museko,
NUM 15:2 “Isra7eele asaa haysada yaaga; hinte daana mela ta hintew immiya biitta geliya wode,
NUM 15:3 xuussa yarsho gidin woyko gaso yarsho gidin woyko dosan yarshiya yarsho gidin woyko ba7aale gallasa yarsho gidin, mehepe woyko dorsaafe Godaas taman xuugetiya sawiya yarsho yarshite.
NUM 15:4 Yarshuwa yarshiya uray katha yarshuwas issi kilo giraame lo77o dhiille sayso litiro shamaho zayten munuqetidaysa eho.
NUM 15:5 Qassi xuussa yarshos woyko hara yarshos ehiya issi issi dorsaara sayso litiro woyne ushsha yarsho oothidi giigisite.
NUM 15:6 Maraze yarshiya wode nam7u kilo giraame lo77o dhiille issi litironne bagga shamaho zayten munuqetidaysa ehite.
NUM 15:7 Ushsha yarshuwas siko litiro woyne ushsha yarshuwas ehite. Hessi Godaas sawiya yarsho gidana.
NUM 15:8 Gaso woyko issifetetha yarshos wofaano xuussa yarsho oothada Godaas yarshiya wode,
NUM 15:9 wofaanuwara issife heedzu kilo giraame lo77o dhiille, nam7u litiro shamaho zayten munuqetidaysa katha yarsho oothada eha.
NUM 15:10 Ushsha yarshuwas bagga litiro woyne ushsha ehite. Hessi Godaas sawiya xuussa yarsho gidana.
NUM 15:11 “Issi issi wofaanoy woyko issi issi marazey woyko issi issi koley yarshetiya wode haysada hanidi ooseto.
NUM 15:12 Daro mehey yarshetiya wode yarshetiya katha yarshoyka hessada daro.
NUM 15:13 Isra7eele asi gidida oonika sawiya xuussa yarsho Godaas yarshiya wode ubban haysada oothanaw koshshees.
NUM 15:14 Yaana yeletethan hinte giddon de7iya bete woyko hara asi oonika sawiya xuussa yarsho Godaas yarshanaw koyiko hessada oothanaw koshshees.
NUM 15:15 Hintewunne hinte giddon de7iya bete asaas he wogay issino; hessi yaana yeletethaaska eqidi daana woga; Hinteka bete asatika Godaa sinthan issino.
NUM 15:16 Hintewunne hinte giddon de7iya bete asaas higgeynne wogay issino” yaagis.
NUM 15:17 Goday Museko,
NUM 15:18 “Isra7eele asaas haysada gada oda; taani hintena efiya biitta hinte gelidi,
NUM 15:19 he biittan kaxiya kathi hinte miya wode he kathaafe xeera kessidi hinte Godaas yarshite.
NUM 15:20 Hessika, bayra kaxida kathaafe uukida koyro uythi, gidishin, kathi bukiya wudumaafe immiya yarsho oothidi yarshite.
NUM 15:21 Yeletetha ubban hinte biittan kaxida kathaafe koyruwa uukidi Godaas yarsho yarshite.
NUM 15:22 “Goday, Muses odida kiitaa hinte eronna ixidi naagonna attiko,
NUM 15:23 woyko Goday iya baggara immida kiita ubbaa, Goday immida gallasaape doomidi yaana yeletetha gakanaw naagonna ixiko,
NUM 15:24 qassi hessa Isra7eele maabaray eronna oothidaba gidiko maabara ubbay Godaas issi wofaano sawiya xuussa yarsho oothidi, wogay kiiteysada katha yarshuwaranne ushsha yarshuwara yarsho; qassi nagara yarsho oothidi issi kole yarsho.
NUM 15:25 Kahiney kumetha Isra7eele maabaraas nagara atotetha yarsho shiishees. Enti eronna balida banta naaquwa gisho Godaas xuussa yarshonne nagara yarsho yarshida gisho enta nagaray atto geetetana.
NUM 15:26 Isra7eele maabaraynne enta giddon de7iya bete asay eronna he bala oothida gisho asa ubbaa nagaray atto geetetana.
NUM 15:27 “Issi asi eronna nagara oothiko issi laytha kole nagara yarsho oothidi yarsho.
NUM 15:28 Eronna de7ishe nagara oothida uraas kahiney Godaa sinthan nagara atotetha wogaa polo; iya nagaray atto geetetana.
NUM 15:29 Eronna nagara oothida uraas kahiney Godaa sinthan nagara atotetha wogaa polo; iya nagaray atto geetetana.
NUM 15:30 “Shin Isra7eele asi gidin woyko bete asi gidin erishe otoron nagara oothiya uray Godaa cayees. He uray deriya giddofe dhayo.
NUM 15:31 He uray Godaa kiitaa erishe kadhida gishonne iya kiitaa kawushida gisho iyaw dhayoy bessees. Iya balay iya bolla gido” yaagis.
NUM 15:32 Issi gallas Isra7eele asay mela biittan de7ishin, issi uray Sambaata gallas mithi mixishe oyketis.
NUM 15:33 He uraa asay Museko, Aaronakonne Isra7eele maabaraako ehidosona.
NUM 15:34 Enti iya bolla oothanaba eriboona gisho qashon gam7isidosona.
NUM 15:35 Hessafe guye, Goday Museko, “Ha uray hayqanaw bessees; Isra7eele maabaray banta gutaape gaxa kessidi shuchan caddidi wodho” yaagis.
NUM 15:36 Yaatin Isra7eele maabara ubbay Goday Muse kiitidaysada, gutaape gaxa kessidi shuchan caddidi wodhidosona.
NUM 15:37 Goday Museko,
NUM 15:38 “Isra7eele asaas haysada gada oda; hintenne yaana yeletethay hinte afilaa gaxan macara kessidi he macara gaxan kaalose qacina sikite.
NUM 15:39 He macaraa hinte be7iya wode ubban ta kiitata, akeekidi poleeta; taape haakidi hinte ayfiya amuwanne hinte wozanaa qofaa kaallidi laameteketa.
NUM 15:40 He macaraa be7idi hinte ta kiita ubbaa akeekidi polananne Xoossaas dummatidaysata gidana.
NUM 15:41 Taani Godaa, hinte Xoossaa; ta hinte Xoossaa gidanaw hintena Gibxefe kessas. Taani Godaa, hinte Xoossaa yaaga” yaagis.
NUM 16:1 Leewe kochaafe Qahaata koche gidida Yisi7ara na7ay Qorey, Robeela kochaafe Eli7aaba nayti Daataneynne Abeeroy qassi Faleta na7ay Oni,
NUM 16:2 Muse bolla dendidosona. Entara nam7u xeetanne ishatamu asati de7oosona; he asati asan eretidaysatanne maabara kaaletheyisata.
NUM 16:3 Enti Musenne Aarona sinthe shiiqidi, “Hinte darsideta; maabara ubbay geeshshi; Goday entara de7ees. Yaatin, Godaa maabara bolla hintena ayis dhoqu dhoqu oothetii?” yaagidosona.
NUM 16:4 Musey hessa si7ida wode Godaa sinthan gufannis.
NUM 16:5 Qorekonne iya cugaako, “Goday wonto wonta ooni iya baggekonne ooni geeshsheko bessana; he I doorida uraa baako shiishana; he uray iyako shiiqana.
NUM 16:6 Wonto wonta neeranne ne asaara haysa oothite; ixaane cuyisiya miishe ekidi,
NUM 16:7 bonqo tama iyan wothidi, Godaa sinthan ixaane cuyisite. Goday dooriya uray I geeshshi gidana. Hinte, Leeweti zawape aadhideta.”
NUM 16:8 Qassika Musey Qoreko, “Hinte Leeweti si7ite.
NUM 16:9 Isra7eele Xoossay hintena ba maabara giddofe dummayidi, geeshsha dunkaaniyan oothana melanne ba asaa sinthan eqidi haggaazana mela baako shiishidaysi hintew guuxidee?
NUM 16:10 I hintenanne hinte ishata Leeweta ubbaa baako shiishis; shin ha77i hinte kahineta bessaa koyeeta.
NUM 16:11 Neeninne ne cuga ubbay Godaa bolla makallidi dendideta; hinte iya bolla zuuzumanaw I Aaroni oonee?” yaagis.
NUM 16:12 “Yaatidi, Musey, Eli7aaba nayta, Daatanenne Abeero xeegisis; shin enti, ‘Nuuni booko’ yaagidosona.
NUM 16:13 Neeni mela biittan nuna wodhanaw maathinne eessi goggiya biittafe nuna kessidaysi guuxis gada ha77i nu bolla halaqa gidanaw koyay?
NUM 16:14 Neeni nuna maathinne eessi goggiya biitta gelsabaaka; woyko neeni nuus laata oothada goshsha gadenne woyne gade immabaaka; neeni nuna cimmaasa; nuuni booko” yaagidosona.
NUM 16:15 Yaatin, Musey daro hanqetidi, Godaako, “Neeni enta yarshuwa ekofa; ta entafe issuwaka qohabike; qassi hari attoshin issi hareka entafe ekabike” yaagis.
NUM 16:16 Qassi Musey Qoreko, “Wonto neeranne ne asaara hessada Aaronika Godaa sinthe shiiqite.
NUM 16:17 Issi issi asi ba ixaane cuyisiya miishiya eko; ixaaneka iyan wotho; ubbay issife nam7u xeetanne ishatamu ixaane cuyisiya miishe gidees; ixaane iyan wothidi Godaa sinthe shiisho. Neeninne Aaroni hinte ixaaniya hessada shiishite” yaagis.
NUM 16:18 Yaatin, issi issi asi ba miishen ixaanenne tama bonqo wothidi geeshsha dunkaaniya pengen Museranne Aaronara issife eqidosona.
NUM 16:19 Qorey ba asaara geeshsha dunkaaniya pengen Muse sinthaninne Aarona sinthan eqidosona. He wode Godaa bonchoy kumetha maabaraas qoncis.
NUM 16:20 Goday Musekonne Aaronako,
NUM 16:21 “Taani issi toho ha asaa dhaysana gisho, entafe shaaketite” yaagis.
NUM 16:22 Shin Museynne Aaroni sa7an gufannidi, “Abeeti Xoossaw, asa shempo ubbaa medhida Xoossaw, issi asi nagara oothiko, neeni kumetha maabara hanqetayee?” yaagidosona.
NUM 16:23 Yaatin, Goday Museko,
NUM 16:24 “Asaas ‘Qore, Daatanenne Abeero dunkaaniya matape kichite’ gada oda” yaagis.
NUM 16:25 Musey dendidi, Daatanekonne Abeeroko bin, Isra7eele cimati iya kaallidosona.
NUM 16:26 I Maabaraako, “Ha iita asaa dunkaaniya matape kichite; entaba aybibaaka bochofite. Akay, giiko, enta nagara gaason hinteka pitetidi dhayana” yaagidi minthidi odis.
NUM 16:27 Yaatin asay Qore, Daatanenne Abeero dunkaaniya matape kichidosona. Daataneynne Abeeroy kare keyidi, banta machetaranne banta naytara banta dunkaaneta pengen eqidosona.
NUM 16:28 Musey asaako, “Taani ha ooso ubbaa oothana mela, Goday tana kiittidaysanne taani ta shenen oothonaysa hinte eranay haysana.
NUM 16:29 Ha asati asi hayqeysada hayqiko woyko asa bolla gakiyaba xalaali enta bolla gakiko Goday tana Kiittibeenna.
NUM 16:30 Shin, Goday oorathaba oothidi, biittay dooyetidi entanne entaw de7iyaba ubbaa mittikonne enti paxa de7ishe duufo geliko he wode ha asati Godaa kadhidaysa hinte erana” yaagis.
NUM 16:31 I yaagidi ongida wode enti eqida biittay dooyetidi,
NUM 16:32 entanne enta soo asaa, Qore cuga ubbaanne entaw de7iyaba ubbaa mittis.
NUM 16:33 Yaatin enti bantaw de7iyaba ubbaara paxa de7ishe, duufo gelidosona. Biittay enta bolla gordetis; enti maabara giddofe dhayidosona.
NUM 16:34 Enta waasuwa gaason enta matan de7iya Isra7eele asa ubbay, “Biittay nunaka mittana hanees” yaagidi baqatidosona.
NUM 16:35 Qassi tami Godaa matape yidi ixaane cuyisiya nam7u xeetanne ishatamu asaa mis.
NUM 16:36 Hessafe guye, Goday Museko,
NUM 16:37 “Kahiney, Aarona na7aa Alaazari naase biratape oosetida ixaane cuyisiya miisheta xuugetida asaape ekidi, he miisheti geeshshi gidiya gisho, bonqo tama hara soo efidi laallana mela oda.
NUM 16:38 He miisheti banta de7uwa dhaysanaw nagara oothida asay ixaane cuyisiya miishe. He miisheti Godaas imetida gishonne geeshshi gidiya gisho lee7isa qoxada yarsho bessa lanxa. Hessi Isra7eele asaas naagiso malla gido” yaagis.
NUM 16:39 Yaatin kahiney Alaazari ixaane cuyisiya miisheta ekidi yarsho bessa lanxanaw lee7isidi qoxis.
NUM 16:40 Goday Muse baggara kiitidaysada, Aarona koche gidonna oonika Godaa sinthan ixaane cuyisanaw shiiqonna mela, ixas giiko, Qore bollanne iya kaalleyisata bolla gakidaysi iya gakonna mela Isra7eele asaa akeekisanaw haysata oothis.
NUM 16:41 Wontetha gallas Isra7eele maabara ubbay, “Godaa asaa hinte wodhideta” yaagidi Muse bollanne Aarona bolla zuuzumidosona.
NUM 16:42 Enti Musenne Aarona bolla dendanaw shiiqidi, enti geeshsha dunkaaniya xeelliya wode shaaray geeshsha dunkaaniya kammin, Godaa bonchoy qoncis.
NUM 16:43 Hessafe guye, Museynne Aaroni geeshsha dunkaaniya sinthe yidi eqidosona.
NUM 16:44 Yaatin Goday Museko,
NUM 16:45 “Ha asaa giddofe kichite; ta enta issi tohon dhaysana” yaagis. Museynne Aaroni sa7an gufannidosona.
NUM 16:46 Musey Aaronako, “Ixaane cuyisiya ne miishiya ekada yarsho bessaafe bonqo tama ekada iyan wotha; iya bolla ixaane gujada Isra7eele maabaraako efa. Godaa hanqoy iya matape keyi kichis; boshayka doomis” yaagis.
NUM 16:47 Yaatin Aaroni, Musey kiitidaysada ba ixaane cuyisiya miishiya ekidi maabara giddo woxidi gelis. Boshay asaa wodho oykis shin, Aaroni ixaane cuyisidi asaas atotethi ehis.
NUM 16:48 Yaatidi, I hayqidaysatanne paxata giddon eqin, boshay aggis.
NUM 16:49 Qore gaason hayqida asay attishin, he boshan hayqida asaa tayboy 14,700.
NUM 16:50 Boshay eqidaape guye, Aaroni geeshsha dunkaaniya pengen de7iya Museko simmis.
NUM 17:1 Goday Museko,
NUM 17:2 “Isra7eele asay issi issi kochaa halaqatape issi issi xam7a ekidi tammanne nam7u xam7a new ehana mela entaw oda. He xam7aa bolla issi issi asaa sunthaa xaafa.
NUM 17:3 Issi issi kochaa halaqaas issi xam7a koshshiya gisho, Leewe xam7aa bolla Aarona sunthaa xaafa.
NUM 17:4 He xam7ata geeshsha dunkaaniya giddon ta neera gahetiya Taabotiya sinthan wotha.
NUM 17:5 Ta dooriya uraa xam7ay aacana; hessada oothada hinte bolla Isra7eele asaa zuuzuntha ta teqana” yaagis.
NUM 17:6 Hessa Musey Isra7eele asaas odin, tammanne nam7u halaqati huuphen huuphen issi issi xam7a ehidosona. Aarona xam7ayka he xam7ata giddon de7ees.
NUM 17:7 Musey he xam7ata ubbaa geeshsha dunkaaniya giddon Godaa sinthan wothis.
NUM 17:8 Wontetha gallas Musey geeshsha dunkaaniya giddo geliya wode Leewe koche gidida Aarona xam7ay aacidaysa, gambuxidaysa, ciiyidaysanne lawuze mitha ayfe ayfidaysa be7is.
NUM 17:9 Musey xam7a ubbaa Godaa sinthafe ehidi Isra7eele asaa bessis. Enti hanidaba be7idaape guye issi issi halaqay banta xam7aa xam7aa ekidosona.
NUM 17:10 Goday Museko, “Aarona xam7aa Taabotiya sinthan zaarada wotha. Makallida Isra7eele asay ta bolla zuuzuntha aggonna ixiko hayqanaysa entaw malaata oothada wotha” yaagis.
NUM 17:11 Musey, Goday kiitidaysada oothis.
NUM 17:12 Isra7eele asay Museko, “Hessa gidiko, nu ubbay hayqana; dhayana.
NUM 17:13 Geeshsha dunkaaniyako shiiqiya ubbay hayqana gidiko, nu ubbayka hayqoos guusseyee?” yaagidosona.
NUM 18:1 Goday Aaronako, “Geeshsha dunkaaniyan oosetiya nagaraas neeni, ne adde naytinne ne aawa soo asay oyshetana; hinte kahinetetha oosuwan poletiya nagaraa nenne ne adde nayta xalaali oyshetana.
NUM 18:2 Neeninne ne adde nayti geeshsha dunkaaniya sinthan oothiya wode hintena oothidi maadana mela Leewe koche gidida ne dabbota eha.
NUM 18:3 Enti hintefe garsan geeshsha dunkaaniya ooso ubbaa oothonna; shin entika hinteka hayqonna mela enti geeshsha dunkaaniya miishiyakonne yarsho bessaako shiiqopo.
NUM 18:4 Enti hintera issife gididi geeshsha Dunkaaniyan de7iya ooso ubbaa ootho. Shin Leewetape attishin, hara asi oonika hinte de7iya bessaa shiiqopo.
NUM 18:5 Zaaridi Isra7eele asaa bolla hanqoy wodhonna mela geeshsha dunkaaniyaninne yarsho bessan oosetiya oosuwa hinte xalaala oothite.
NUM 18:6 Leeweta, hinte dabbota, Isra7eele asaa giddofe ta dooras. Enti geeshsha dunkaaniya oosuwa oothana mela taani enta taw dummayas.
NUM 18:7 Shin yarsho bessaaninne magarajuwafe gaatha baggan de7iya oosuwa nenne ne adde nayta xalaali oothite. Kahinetetha oosuwa taani hintew imota oothada immas; hara asi oonika he bessaa shiiqiko hayqo” yaagis.
NUM 18:8 Goday Aaronako, “Isra7eele asay taw immiya geeshsha imota ubbaa ta new immas. Taani newunne ne adde naytas merinaa gisho oothada immas.
NUM 18:9 Taw imetiya daro geeshsha imuwape taman xuugetonna baggay hintebaa gidana. Enti taw immiya geeshsha imo ubbay katha yarsho gidin nagara yarsho gidin naaqo yarsho gidin newunne ne adde naytas gidana.
NUM 18:10 Hinte hessa geeshsha bessan miite; adde ubbay hessa mo; hessi hintew geeshshi gidana.
NUM 18:11 “Qassi Isra7eele asay taw yarshiya yuusho yarsho ubbaa new, ne adde naytasinne ne macca naytas merinaw gisho oothada immas; hinte soo asaa giddon wogada tuna gidonna ubbay hessa mo.
NUM 18:12 “Isra7eele asay taw bayra oothidi immiya koyro ayfiyape, shamaho zayte ubbaa, yalaga woyne ubbaanne katha ubbaa new immas.
NUM 18:13 Enti Godaas ehiya gaden koyro gakida ayfey hintesa; hinte soo asaa giddon wogaada tuna gidonna ubbay hessa mo.
NUM 18:14 “Isra7eele asaa giddofe Godaas dummatida ubbay hintesa.
NUM 18:15 Bayra yeletida asi woyko mehey Isra7eele asay Godaas immida ubbay hintesa. Shin bayra yeletida adde na7anne bayra yeletida geeshshi gidonna mehe hinte wozanaw bessees.
NUM 18:16 Issi ageena nayta wozanaw geeshsha dunkaanen eretida mizaanen ichashu bira santime wozo gate qanxite.
NUM 18:17 Shin enti geeshshi gidiya gisho mehe, dorsenne deesha bayra hinte wozanaw koshshenna. Enta suutha yarsho bessa bolla gussa; Godaas sawiya xuussa yarsho oothada enta modho ashuwa taman xuugga.
NUM 18:18 Angaasoynne ushacha geday yuusho yarshon nebaa gididaysada enta ashoyka nebaa.
NUM 18:19 Isra7eele asay Godaas immiya geeshsha yarsho ubbaa new, ne adde naytasinne ne macca naytas merinaw gisho oothada immas. Hessi taani neeranne ne kochaara caaqiya merinaa caaquwa.”
NUM 18:20 Qassika Goday Aaronako, “Enta biittafe nena gakiya gishoy woyko laati baawa; Isra7eele asaa giddon ne laataynne nena gakiya gishoy tana.”
NUM 18:21 Goday, “Leeweti geeshsha Dunkaaniyan oothiya oosuwas damooze gidana mela Isra7eele asay taw ehiya asraata ubbaa entaw immas.
NUM 18:22 Hachife doomidi Isra7eele asay banta nagara gaason hayqonna mela geeshsha dunkaaniyako shiiqopo.
NUM 18:23 Geeshsha dunkaaniya giddon ootheysatinne iya giddon poletiya nagaraa tookey Leeweta. Hessi yeletetha ubbaas merinaa woga. Leewetas Isra7eele asaa giddon laati baawa.
NUM 18:24 Hessa gisho, Isra7eele asay Godaas immiya asraata, ta Leewetas immas. Taani, entaw Isra7eele asaa giddon laati baawa giday hessasa” yaagis.
NUM 18:25 Qassi Goday Museko,
NUM 18:26 “Neeni Leewetako haysada yaaga; taani hintew laata oothada immida asraata hinte Isra7eele asaape ekiya wode hinte he asraatape asraata Godaas immite.
NUM 18:27 Hinte imoy wudummafe shiiqida kathada woyko gum7iya bessaafe ha77i keyida woyneda hintew taybetana.
NUM 18:28 Hessadaka Isra7eele asaape hinte ekiya asraata ubbaafe dumma imo Godaas immite; hinte asraatape Godaa gisho gidida imota kahiniya Aaronas immite.
NUM 18:29 Hinte ekiya imota ubbaafe lo77uwanne geeshsha Godaas gisho oothidi immanaw bessees.
NUM 18:30 Ubbaafe lo77o imuwa hinte immiya wode attidaysi hintew buketiya wudumma kathaadanne gum7etiya woyniyada taybetana.
NUM 18:31 Attidaysi geeshsha Dunkaaniyan hinte oothiya oosuwas damooze gidiya gisho hintenne hinte soo asay awunka maanaw danda7eeta.
NUM 18:32 Lo77o baggaa Godaas immidaape guye hinte miiko hessi hintew nagara gidenna. Lo77o baggaa kessonna de7ishe he imotape midi hinte Isra7eele asaa imota tunisonna mela naagetite; hessa hinte oothonna ixiko hinte hayqana” yaagada Leewetas oda.
NUM 19:1 Goday Musekonne Aaronako,
NUM 19:2 “Goday higgiyan kiitetida wogay haysa; borsoy bayna, I gannan qambari wodhiboonna zo7o ussu ehana mela Isra7eele asaas odite.
NUM 19:3 Kahiniya Alaazaras iyo immite; gutaape iyo gaxa kessidi kahiniya sinthan shuko.
NUM 19:4 Kahiney Alaazari I suuthaafe guuthara ekidi ba biradhiyan geeshsha dunkaaniyako simmidi laapun toho wurxo.
NUM 19:5 Kahiney be7ishin ussiya xuugeto; galbay, ashoy, suuthaynne tocey xuugeto.
NUM 19:6 Kahiney ziga mithi, hisoophe tashenne zo7o qacina ekidi ussiya eexiya taman yeggo.
NUM 19:7 Hessafe guye, kahiney ba ma7uwanne ba asatethaa meecetidi gutaa gelo; shin omarsi gakanaw wogaada tuna gidana.
NUM 19:8 He ussiw xuuggidaysi ba ma7uwanne ba asatethaa meeceto; ika omarsi gakanaw wogaada tuna gidana.
NUM 19:9 “Hessafe guye, hara geeshsha asi ussiya xuugetida biduwa shiishidi gutaape gaxan geeshsha bessan wotho. Isra7eele asay tunatethaafe geeshshiya haathan go7etanaw hessi naagetidi uttana; hessi nagaraape geeshshanaw go77ees.
NUM 19:10 Qassi ussee biduwa shiishida urayka ba ma7uwa meecco; I omarsi gakanaw wogaada tuna gidana. Ha wogay Isra7eele asaasinne enta giddon de7iya hara dere asaas merinaa woga gidana.
NUM 19:11 “Aha bochiya oonika laapun gallas wogaada tuna gidana.
NUM 19:12 Tunatethaafe geeshshiya haathan heedzantho gallasinne laapuntha gallas I bana geeshsho; hessafe guye, I wogaada geeshshi gidana. Shin heedzantho gallasinne laapuntha gallas I bana geeshshona ixiko I geeshshi gidenna.
NUM 19:13 Hayqida asa aha bochiya oonika bana geeshshonna ixiko I Godaa dunkaaniya tunisees; he uray Isra7eele asaa giddofe kuretto. Tunatethaafe geeshshiya haathay iya bolla wurxetiboona gisho I tuna; I tuna gididi gam7ees.
NUM 19:14 “Issi asi dunkaaniya giddon hayqiko oothana wogay haysa; unkaaniya giddo geliya oonika, qassi dunkaaniya giddon de7iya oonika laapun gallas gakanaw tuna gidana.
NUM 19:15 Hessadaka, kamettonna dooya de7iya miishe ubbay tuna gidana.
NUM 19:16 Qassi denban hayqida asa aha woyko hargetidi hayqida asa aha woyko meqethi woyko duufo bochiya oonika laapun gallas gakanaw tuna gidana.
NUM 19:17 “Tunatethaafe geeshshanaw xuugetida ussee biduwape guuthara ekada oton yeggada pulto haathe iya bolla tiga.
NUM 19:18 Geeshsha asi hisoophe wurco ekidi haathan naaqi kessidi, dunkaaniya, iya giddon de7iya miishiyanne asa ubbaa bolla wurxo. Qassi hayqida asa aha woyko meqethi woyko duufo woyko hargeti hayqida asi bochida asa bolla wurxo.
NUM 19:19 Geeyida asi heedzantho gallasinne laapuntha gallas geeyiboonna uraa bolla wurxo. I laapuntha gallas he uraa tunatethaafe geeshsho; he geeyida addey, ba ma7uwanne ba asatethaa meeceto; he gallas omarsi I geeshshi gidana.
NUM 19:20 “Shin tuna uray bana geeshshonna ixiko, he uray geeshsha dunkaaniya tunisida gisho, Isra7eele asaa giddofe kuretto; tunatethaafe geeshshiya haathay iya bolla wurxetiboona gisho I tuna.
NUM 19:21 Haysi hintew merina woga gidana. Tunatethaafe geeshshiya haatha wurxiya uray ba ma7uwa meecco; qassi tunatethaafe geeshshiya haatha bochiya oonika omarsi gakanaw tuna gidana.
NUM 19:22 Tuna uray bochiya aybibayka tunees; qassi he miishiya bochiya oonika omarsi gakanaw tuna gidees” yaagis.
NUM 20:1 Koyro ageenan Isra7eele asa ubbay Siina mela biitta gakidi, Qaadesa geetetiya bessan dunkaanidosona. Mayraama yan hayqada moogetasu.
NUM 20:2 He bessan asaas haathi dhayin, asay Muse bollanne Aarona bolla dendidosona.
NUM 20:3 Enti, “Nu ishati Godaa sinthan hayqida wode nuka hayqida gidorkoshin.
NUM 20:4 Nunne nu mehey ha mela biittan hayqana mela Godaa maabara ha bessa ayis ehidetii?
NUM 20:5 Gibxefe kessidi ha iita bessaa nuna ayis ehidetii? Haysan kathi woyko balasey woyko woyney woyko oromaaney baawa; hari attoshin uyetiya haathika haysan baawa” yaagidi Musera kacetidosona.
NUM 20:6 Yaatin Museynne Aaroni asaa matape geeshsha dunkaaniya penge bidi sa7an gufannidosona; Godaa bonchoyka entaw qoncis.
NUM 20:7 Goday Museko,
NUM 20:8 “Ne xam7a eka; neeranne ne ishaa Aaronara maabara shiishite. Enta sinthan zaallay haathe kessana mela oda. Hinte zaallafe haathe kessidi, entanne enta mehiya ushshana” yaagis.
NUM 20:9 Goday kiitidaysada Musey Godaa sinthafe xam7aa ekis.
NUM 20:10 Museynne Aaroni maabara zaalla sinthan shiiqana mela oothidi, asaako, “Hinteno geellato, si7ite; ha zaallafe hintew nuuni tuma haathe kessanee?” yaagis.
NUM 20:11 Musey ba xam7a denthidi zaalla nam7u toho shocis; haathi dhuuqidi keyin entinne enta meheti uyidosona.
NUM 20:12 Shin Goday Musekonne Aaronako, “Isra7eele asaa sinthan hinte ta geeshshatetha bessanaw ammanetibona gisho ta entaw immiya biitta ha asaa kaalethidi hinte geleketa” yaagis.
NUM 20:13 Isra7eele asay Godaara kacetida gishonne Goday ba geeshshatetha enta giddon qoncisida gisho he bessay Mariba haatha geetetis.
NUM 20:14 Edoome kawako Musey Qaadesape haysada yaagidi kiita yeddis. “Ne ishay Isra7eeley haysada yaagees; nuna gakida meto ubbaa ne si7adasa.
NUM 20:15 Nu mayzati duge Gibxe wodhidosona; yan nuuni daro laythi de7ida. Gibxeti nunanne nu aawata un7ethidosona.
NUM 20:16 Nuuni Godaako waassin, I nu waasuwa si7idi, ba kiitanchuwa Kiitidi nuna Gibxefe kessis. Ha77i nuuni ne biitta gaxan de7iya Qaadesa kataman de7oos.
NUM 20:17 Hayyana, nuuni ne biittaara kanthidi aadhana mela ootharki; nuuni ogepe gaxa keyoko; ne goshsha woyko woyne gade giddo geloko; nuuni haatha ollafe haathe uyoko. Nuuni kawo oge oykidi baana; nuuni ne biittara kanthidi aadhana gakanaw haddirsi woyko ushachi gooko” yaagis.
NUM 20:18 Shin Edoome asay, “Nu biittaara kanthisoko; hinte haysara kanthanaw qopiko, nuuni dendidi hintena olana” yaagidosona.
NUM 20:19 Yaatin Isra7eele asay, “Nuuni kawo ogiyara baana; nuuni woyko nu mehey hinte haathaafe uyiko, nuuni hessas gate ciggana; nuuni tohora aadhetha xalaala koyoos; haraba aykoka koyoko” yaagidosona.
NUM 20:20 Edoome asay zaaridi, “Hinte haysara aadhanaw danda7eketa” yaagis. Kaallidi, daronne wolqaama olanchota ekidi Isra7eele asaa olanaw keyis.
NUM 20:21 Edoome asay banta biittara Isra7eele asaa aathona ixin, Isra7eele asay simmidi hara ogera bidosona.
NUM 20:22 Isra7eele asa ubbay Qaadesape dendidi Hoora zumako bidosona.
NUM 20:23 Edoome zawan de7iya Hoora zuman, Goday Musekonne Aaronako,
NUM 20:24 “Aaroni ba mayzatan gahetiya wodey gakis. Hinte nam7ay Mariba haatha matan ta kiitaa bolla geellatida gisho Isra7eele asaas ta immiya biitta I gelenna.
NUM 20:25 Aaronanne iya na7aa Alaazara ekada Hoora zuma bolla keya.
NUM 20:26 Aarona kahinetetha ma7uwa qaarada, iya na7aa Alaazara mayza. Aaroni yan hayqana” yaagis.
NUM 20:27 Goday kiitidaysada Musey oothis; Isra7eele asa ubbay be7ishin, enti Hoora zuma bolla keyidosona.
NUM 20:28 Musey Aarona kahinetetha ma7uwa qaaridi iya na7aa Alaazara mayzis. Aaroni he zuma huuphen hayqis. Museynne Alaazari zumaape wodhidosona.
NUM 20:29 Aaroni hayqidaysa Isra7eele asay erida wode Isra7eele asay Aaronas hastamu gallas yeekidosona.
NUM 21:1 Kanaane biittan, Negebe mela biittan de7iya Arada Kawoy, Isra7eele asay Ataarima efiya ogiyara yeysa si7ida wode Isra7eele asaara oletidi entafe guutha asaa di7idosona.
NUM 21:2 He wode Isra7eele asay, “Neeni ha asaa nu kushen aathada immiko, nuuni entanne enta katamata kumethi dhaysana” yaagidi Godaas qangidosona.
NUM 21:3 Goday Isra7eele asaa woosa si7idi, Kanaaneta enta kushen aathidi immin, enti Kanaanetanne enta katamata kumethi dhaysidosona. Hessa gisho, he bessay Horma geetetidi sunthetis.
NUM 21:4 Isra7eele asay Hoora zumaape dendidi, Edoome biitta yuushuwara baanaw Zo7o Abbaako efiya ogiyara bidosona; shin oge bolla asaas danda7ay wuris.
NUM 21:5 Asay, “Nuuni mela biitta hayqana mela Gibxefe nuna ayis kessidetii? Kathi baawa; haathi baawa; ha iita kathay nuna shaattis” yaagidi Xoossaa bollanne Muse bolla zuuzumidosona.
NUM 21:6 Yaatin, Goday asaa giddo marzera de7iya shooshi yeddin, Isra7eele asaape daroti duketidi hayqidosona.
NUM 21:7 Asay Museko yidi, “Nuuni Godaa bollanne ne bolla zuuzumidi, nagara oothida. Goday ha shooshata nuupe haassana mela nuus woossarki” yaagidosona. Yaatin, Musey asaa gisho woossis.
NUM 21:8 He wode Goday Museko, “Naase biratape shooshi medhada, enta sinthan mitha bolla kaqa; shooshan duketida oonika iya be7iko paxana” yaagis.
NUM 21:9 Yaatin, Musey naase biratape shooshi medhidi, mitha bolla kaqis. Shooshan duketida asa ubbay naase birata shooshaa be7idi paxidosona.
NUM 21:10 Isra7eele asay Hoorape dendidi Obota geetetiya bessan dunkaanidosona.
NUM 21:11 Obotape dendidi, Moo7abepe sintha baggan de7iya mela biittan, doloha baggan Abariiman dunkaanidosona.
NUM 21:12 Yaape dendidi, Zareeda Zangaaran dunkaanidosona.
NUM 21:13 Yaape dendidi, Amooreta biitta gaxa gakanaw de7iya mela biittan Arnoona Shaafape hefinthan dunkaanidosona. Arnoona Shaafay Moo7abe biittasinne Amoore biittas giddon de7iya zawa.
NUM 21:14 Hessa gisho, Godaa ola taarikiya odiya maxaafan, “Suufa heeran de7iya Waaheba katamaanne Arnoona Shaafa zangaara,
NUM 21:15 Era katamaanne Moo7abe biitta zawa gakanaw de7iya zangaara” yaagetidi xaafetis.
NUM 21:16 Enti yaape dendidi, Goday Museko, “Asaa shiisha; ta entaw haathe immana” yaagidi odida Beera geetetiya haatha ollaako bidosona.
NUM 21:17 He wode Isra7eele asay ha mazmuriya yexidosona. “Haatha ollaw, pulta; Hinteka yexite.
NUM 21:18 Halaqati bookida haatha ollaas, kaaletheysati kawotetha xam7aninne banta xam7an bookida haatha ollaas yexite” yaagis. Enti he mela biittafe dendidi Mataana geetetiya bessaa bidosona.
NUM 21:19 Maatanape Nahili7eela, Nahali7eelape Baamota geetetiya bessaa bidosona.
NUM 21:20 Baamotape dendidi, Moo7aben de7iya zangaara bidosona; he zangaaray Pisga zumaape garsan bazzuwa ginan de7ees.
NUM 21:21 Hessafe guye, Isra7eele asay Amoore kawa Sihooneko haysada yaagidi kiita yeddidosona.
NUM 21:22 “Hayyana, nu ne biittara kanthidi aadhana mela ootharki; nuuni ogepe gaxa keyoko; ne goshsha woyko woyne gade giddo geloko; nuuni haatha ollafe haathe uyoko. Nuuni ne biittara kanthidi aadhana gakanaw haddirsi woyko ushachi gooko” yaagis.
NUM 21:23 Sihooney Isra7eele asay ba biittara kanthonna mela diggis. I ba olanchota ubbaa shiishidi, Isra7eele asaa olanaw mela biitta bis; Yahaaxa geetetiya bessaa bidi Isra7eele asaara oletis.
NUM 21:24 Isra7eele asay olan Amooretape darota mashshan wodhidi, Arnoona Shaafape doomidi, Amooneta zawan de7iya Yaaboqa shaafa gakanaw oykis. Amoone asaa biitta zaway gimbetidi de7iya gisho, enti yaa gelibookona.
NUM 21:25 Isra7eele asay Amooreta, Haseboonanne iya yuushuwan de7iya katamata ubbaa xooni ekidi yan uttidosona.
NUM 21:26 Haseboona katamay Amooreta kawa Sihoone uttiya katama. Sihooney kase Moo7abe biitta kawa olidi, Arnoona shaafa gakanaw de7iya biitta ubbaa ekis.
NUM 21:27 Hessa gisho, leemison haysada yaagidosona; “Haseboonako haayite; ha katamay zaaridi keexeto; Sihoone katamay kase ba bessaa simmo.
NUM 21:28 Tami Haseboonape keyis; lacoy Sihoona kataman bentis; Moo7aben de7iya Era dhaysis; Arnoona dhoqa bessata mis.
NUM 21:29 Moo7abe, nena ayye! Kamoosha asay dhayideta. Hinte adde nayti baqatanaada, hinte macca nayti di7etanaada, Amooreta kawa Sihoones immis.
NUM 21:30 Nuuni hinte kochata Haseboonape doomidi, Diboona gakanaw kumethi dhaysida. Medeba matan de7iya Noofa gakanaw de7iya ubbaa tami dhaysis” yaagidosona.
NUM 21:31 Yaatidi, Isra7eele asay Amooreta biittan de7idosona.
NUM 21:32 Qassi Musey wocheyisata Ya7izeera katamaa yeddin, Isra7eele asay he katamaanne iya heeran de7iya guutha katamata oykidi, yan de7iya Amooreta kessidi goodidosona.
NUM 21:33 Hessafe guye, Isra7eele asay simmidi, Baasane efiya ogiyara keyidosona. Baasane kawoy Oogey ba olanchotara Edraa7a kataman entara oletanaw keyis.
NUM 21:34 Shin Goday Museko, “Ha uraas babofa; hiza, kawa Ooge, iya asaanne iya biitta ubbaa ne kushen aathada immas. Haseboonan uttidi haarida Amooreta kawa Sihoone bolla ootheysada neeni iya bolla oothana” yaagis.
NUM 21:35 Hessa gisho, Isra7eele asay Ooge, iya naytanne iya asa ubbaa issoy attonna wodhidi iya biitta laattidosona.
NUM 22:1 Isra7eele asay dendidi, Iyaarko ginan, Yordaanosepe hefinthan de7iya Moo7abe denban dunkaanidosona.
NUM 22:2 Isra7eele asay Amooreta bolla oothidaysa ubbaa Sifoora na7ay Balaaqi si7is.
NUM 22:3 Isra7eele asay daro gidida gisho, Moo7abeti daro dagammidi yayidosona.
NUM 22:4 Moo7abeti Midiyaame cimatako, “Boori maata pitidi midi dhayseysada ha wude asay nu yuushuwan de7iya ubbaa midi dhaysana” yaagidosona. He wode Moo7abe kawoy, Sifoora na7ay Balaaqi,
NUM 22:5 Amawa biittan, Efraxiisa shaafa matan, Patoora kataman de7iya Bi7oora na7aa Balaamako haysada yaagidi kiittis. “Gibxefe keyida daro asay biitta ubbaa ma7idi, ta matan dunkaanidosona.
NUM 22:6 Enti taape daro wolqaama gidiya gisho, hayyana yada enta baaddarki. Ooni eri, ta enta xoonanawunne biittafe kessanaw danda7ana. Hiza, neeni anjeysi anjeteysa qassi neeni baaddeysi baadetidaba gideysa taani erayis” yaagis.
NUM 22:7 Moo7abe cimatinne Midiyaame cimati baadetha miishiya ekidi Balaamako bidi Balaaqi gidaysa iyaw odidosona.
NUM 22:8 Balaami entako, “Hachi qamma haysan aqite; Goday taw odeysa ta hintew odana” yaagis. Yaanin, Moo7abe halaqati Balaamara gam7idosona.
NUM 22:9 Xoossay Balaama, “Haysati neera de7iya asati oonee?” yaagidi oychis.
NUM 22:10 Balaami Xoossaako, “Moo7abe kawoy, Sifoora na7ay Balaaqi,
NUM 22:11 ‘Gibxefe keyida daro asay, enti biitta ubbaa kumidosona. Neeni yada, enta baaddarki. Ooni eri, ta enta xoonanawunne biittafe kessanaw danda7onna aggike’ yaagidi enta taako Kiittis” yaagis.
NUM 22:12 Yaatin Xoossay Balaamako, “Neeni entara boopa; Isra7eele asay anjetida dere gidiya gisho, neeni enta baaddofa” yaagis.
NUM 22:13 Wontetha gallas wonta Balaami dendidi, Balaaqa halaqatako, “Taani hintera boonnada Goday diggida gisho, hinte biitta simmite” yaagis.
NUM 22:14 Moo7abe halaqati Balaaqako guye simmidi, “Balaami nuura yoonna ixis” yaagidosona.
NUM 22:15 Zaaridi Balaaqi kaseysatape aadho bonchetidanne taybon daro halaqata iyako kiittis.
NUM 22:16 Enti Balaamako bidi, “Sifoora na7ay Balaaqi, ‘Neeni taako yaanaysa nena aybika teqofo.
NUM 22:17 Ta new daro woyto immana; ne oychiyaba ubbaa ta new oothana. Hayyana yada ha asaa baaddarki’ yaagis” yaagidi odidosona.
NUM 22:18 Shin Balaami entako, “Balaaqi hari attoshin ba kawotethan kumida biraanne worqaa taw immiyaba gidikoka Godaa, ta Xoossaa kiitaa menthada aykoka pacisanaw woyko gujanaw danda7ike.
NUM 22:19 Goday taw bessiya harabay de7iko ta erana mela hinteka hachi qamma haysan aqite” yaagis.
NUM 22:20 He qamma Xoossay Balaamako, “Ha asay nena xeeganaw yida gisho, neeni entara ba; shin ta new odeysa xalaala ootha” yaagis.
NUM 22:21 Yaatin wontetha gallas Balaami ba hariw kooridi Moo7abe halaqatara bis.
NUM 22:22 Shin I biya gisho Xoossay hanqetis. He wode Balaami ba hariw toggidi, ba nam7u aylletara bishin Godaa kiitanchoy iya teqanaw ogen eqis.
NUM 22:23 Godaa kiitanchoy mashsha shoddidi ogen eqidaysa hariya be7ada, ogiya aggada goshsha giddo gelasu. Balaami hariw ogen zaaranaw shocis.
NUM 22:24 Yaatin, Godaa kiitanchoy nam7u woyne gadetape giddon ya baggaranne ha baggara gimben diretida xuntha ogen eqis.
NUM 22:25 Hariya Godaa kiitanchuwa be7ida wode gimbe dirsaako shiiqida, Balaama tohuwa gimbe dirsara oythasu; yaatin I hariw nam7antho shocis.
NUM 22:26 Hessafe guye, Godaa kiitanchoy sintha aadhidi, haddirsi woyko ushachi simmanaw ogey bayna xuntha bessan eqis.
NUM 22:27 Hariya Godaa kiitanchuwa be7ada, Balaami toggidi de7ishin zin7asu; Balaami daro yilotidi, ba xam7an hariw shocis.
NUM 22:28 Hessafe guye, Goday harey doona dooyin, hariya Balaama, “Ta new ay iissin tana heedzu toho shocadii?” yaagasu.
NUM 22:29 Balaami zaaridi, “Neeni tana yiloyida gishosa; ta kushen mashshi de7iyaba gidiyako ta nena ha77i wodhanashin” yaagis.
NUM 22:30 Hariya Balaamako, “Neeni hachi gakanaw toggiya ne hariw gidikina? Taani new haysada hana eriyana?” yaagasu. Balaami zaaridi, “Hana eraka” yaagis.
NUM 22:31 He wode Goday Balaama ayfiya dooyin, Godaa kiitanchoy shodetida mashsha oykidi ogen eqidaysa be7is. I lichi gidi som7ora sa7an gufannis.
NUM 22:32 Godaa kiitanchoy, “Ne hariw heedzu toho ayis shocadii? Ne ogey ta sinthan geella gidiya gisho ta nena teqanaw yas.
NUM 22:33 Hariya tana be7ada ta sinthafe heedzu toho hara soo simmasu. Hariya hara soo simmaboonnaba gidiyako, hannoode ta nena wodhada hariw ashshanashin” yaagis.
NUM 22:34 Balaami zaaridi, “Taani nagara oothas; neeni tana teqanaw oge bolla eqidaysa ta erabike. Ne dosonnaba gidiko ta ha77i guye simmana” yaagis.
NUM 22:35 Shin kiitanchoy Balaamako, “Neeni ha asatara ba; shin ta new odeysa xalaala oda” yaagis. Yaatin, Balaami Balaaqa biitta halaqatara bis.
NUM 22:36 Balaami yeysa Balaaqi si7ida wode Arnoona shaafa gaxan ba biitta zawan de7iya Moo7abeta kataman iya mokanaw bis.
NUM 22:37 Balaaqi Balaamako, “Neeni ellesada yaana mela ta kiittabikina? Neeni ayis taako ellesada yabikii? Taani new kushe zaaranaw danda7ikina?” yaagis.
NUM 22:38 Balaami Balaaqako, “Heko, ha77i ta neeko yas; shin ta aykoka taape gaanaw danda7ike. Xoossay tana oda gidaba xalaala odana” yaagis.
NUM 22:39 Yaatin, Balaami Balaaqara Qiriyat-Haxoota katamaa bis.
NUM 22:40 Yan Balaaqi mehenne dorse yarshidi, ashuwape guuthara Balaamasinne iyara de7iya halaqatas immis.
NUM 22:41 Wontetha gallas Balaaqi Balaama Baamot-Ba7aali geetetiya bessa kessis; Balaami yan eqidi Isra7eele asape baggaa be7is.
NUM 23:1 Balaami Balaaqako, “Haysan taw laapun yarsho bessata gimba; qassi laapun kormatanne laapun marazeta taw giigisa” yaagis.
NUM 23:2 Balaami gidaysada Balaaqi oothis; enti nam7ay issi issi yarsho bessan issi kormanne issi maraze yarshidosona.
NUM 23:3 Yaatidi, Balaami Balaaqako, “Neeni ne yarshuwa matan de7aasha; taani gede baana. Ooni eri Goday taara gahetanaw yoonna aggenna; I taw qoncisiyaba ubbaa ta new odana” yaagidi issi dere bolla keyis.
NUM 23:4 Yan Xoossay Balaamara gahetin, Balaami, “Taani laapun yarsho bessata giigisas; issi issi yarsho bessan issi kormanne issi maraze yarshas” yaagis.
NUM 23:5 Balaami gaanaba Goday iyaw odidi, “Neeni Balaaqako simmada iyaw ha kiita oda” yaagis.
NUM 23:6 Balaami simmiya wode Balaaqi Moo7abe halaqata ubbaara ba yarshuwa matan eqis.
NUM 23:7 Balaami haysada yaagidi tinbite odis; “Moo7abe kawoy, Balaaqi, doloha bagga deretape, Soore biittafe tana ehis; ‘Haa ya; Yayqooba taw bada; Isra7eele asaa baadda’ yaagis.
NUM 23:8 Xoossi baaddiboonaysa ta waatada baaddo? Goday, baaddiboonaysa ta waatada baaddo?
NUM 23:9 Ta dhoqa zaalla huuphen eqada enta xeellayis; zumaa bolla eqada enta be7ayis. Enti bantarka de7iya dere; enti hara kawotethatape dumma gideysa eroosona.
NUM 23:10 Yayqooba baana ooni taybi onganee? Isra7eele saysuwa ooni taybi kanthanee? Xillota hayquwa ta hayqarkina; ta wursethay entaysada hano” yaagis.
NUM 23:11 Balaaqi Balaamako, “Neeni ta bolla oothiyabay aybee? Taani nena ta morketa baaddana mela ehas, shin neeni enta anjadasa; haraba aykoka oothabaaka” yaagis.
NUM 23:12 Balaami zaaridi, “Goday taw odeysafe haraa odoyee?” yaagis.
NUM 23:13 Balaaqi Balaamako, “Enta neeni be7anaw danda7iya hara bessi taara yedha; yanka ne entafe guuthara be7aasape attishin, ubbaa be7aka. Neeni yan eqada enta baaddarki” yaagis.
NUM 23:14 Pisga deriya huuphen de7iya Xofima demba efis. Yan laapun yarsho bessata gimbidi, issi issi yarsho bessan issi kormanne issi maraze yarshis.
NUM 23:15 Balaami Balaaqako, “Neeni haysan ne yarshuwa matan de7aasha; taani Godaara gahetanaw gede baana” yaagis.
NUM 23:16 Goday Balaamara gahetidi, “Neeni Balaaqako simmada iyaw ha kiita oda” yaagis.
NUM 23:17 Balaami simmidi yaa wode Balaaqi Moo7abe biitta halaqatara yarshuwa matan eqidaysa demmis. Balaaqi iyako, “Goday new ay odidee?” yaagis.
NUM 23:18 Balaami haysada yaagidi tinbite odis; “Sifoora na7aw, Balaaqa, denda; ta odeysa loythada si7a.
NUM 23:19 Wordotanaw Xoossay ase gidenna; ba qofaa laammanaw asa na7a gidenna. Odidi, ba odidaysa oothennee? Woyko ba gidaysa polennee?
NUM 23:20 Taani anjanaw kiita ekas; I anjis; ta laammanaw danda7ike.
NUM 23:21 Yayqooba kochaa bolla iitabay yeenna; Isra7eele asaa metoy gakenna. Goday, enta Xoossay entara de7ees; I entaw kawo gideysa awaajosona.
NUM 23:22 Xoossay enta Gibxefe kessis; I mino menthada entaw oletees.
NUM 23:23 Yayqooba kochaa bolla biti oothenna; Isra7eele asaa qohana murunnoy baawa. Heko, Yayqoobasinne Isra7eeles ‘Xoossay oothidaba be7ite’ yaagana.
NUM 23:24 Ha asay macca gaammoda dendees; ba oykidaba maana gakanaw, ba wodhidaysa suuthaa uyana gakanaw, shemponna gaammoda dendoosona” yaagis.
NUM 23:25 Yaatin, Balaaqi Balaamako, “Ne enta ubbaka baaddofa; ubbaka anjofa” yaagis.
NUM 23:26 Balaami zaaridi, “Taani Goday giyaba xalaala oothana gada new odabikina?” yaagis.
NUM 23:27 Balaaqi Balaamako, “Haaya; ta nena hara bessi efana. Ooni eri, hessan Xoossay ufaytidi, neeni yan eqada enta baaddana mela oothanaw danda7ees” yaagis.
NUM 23:28 Balaaqi Balaama bazzuwa duge xeelliya Paa7ora zuma bolla efis.
NUM 23:29 Balaami, “Neeni haysan taw laapun yarsho bessata gimba; qassi laapun kormatanne laapun marazeta taw giigisa” yaagis.
NUM 23:30 Balaami gidaysada Balaaqi oothis; issi issi yarsho bessan issi kormanne issi maraze yarshis.
NUM 24:1 Balaami Isra7eele anjeysi Godaa ufaysidaysa I be7ida wode kase I ootheysada bita malla koybeenna, shin ba som7uwa mela biittako zaaris.
NUM 24:2 I dhoqu gidi xeelliya wode Isra7eele asay ba kochan kochan dunkaanidi uttidaysa be7iya wode Xoossaa Ayyaanay iya bolla wodhis.
NUM 24:3 I haysada yaagidi tinbite odis; “Bi7oora na7aa Balaama tinbitiya; iya ayfey dooyetin xeelliya addiya tinbitiya;
NUM 24:4 Xoossay giyaba si7eysa tinbitiya; I som7ora gufannin, iya ayfey dooyetidaysi; Ubbaa danda7iya Xoossaa qoncethaa be7ida addiya tinbitey haysa.
NUM 24:5 Yayqooba, ne dunkaaneti, Isra7eele, ne gutati, ayba lo77oona.
NUM 24:6 Enti micetida zangaarada, shaafa gaxan de7iya atakiltiya bessada, Goday tokida godare uuthada, haatha gaxan de7iya ziga mithada hanoosona.
NUM 24:7 Enta xuggay haathan kumana; enta kochay gidiya haathi demmana. Enta kawoy kawa Agaagape aadhana; enta kawotethay bonchetana.
NUM 24:8 Xoossay enta Gibxefe kessis; I mino menthada entaw oletees. Enta morketa mentherethees; enta meqethaa gaaccees; ba dongiyan caddees.
NUM 24:9 Enti gaammoda zin7idosona; macca gaammoda zaqullidosona; enta boshechanaw danda7ey oonee? Enta anjiya ubbay anjetana; enta baaddiya ubbay baadetana” yaagis.
NUM 24:10 Yaatin, Balaaqi Balaama bolla yilotis. Ba kushiya baqidi Balaamako, “Ta morketa baaddana mela ta nena ehas, shin neeni heedzu toho enta anjadasa.
NUM 24:11 Ha77i ellesada ne soo ba; ta nena darobaa woytana gas, shin neeni woytuwa ekonna mela Goday nena diggis” yaagis.
NUM 24:12 Balaami Balaaqako zaaridi, “Neeni taako kiitida asaako,
NUM 24:13 ‘Balaaqi hari attoshin ba kawotethan kumida biraanne worqaa taw immiyaba gidikoka Goday odidaysa menthada lo77o woyko iita ta shenen oothanaw danda7ike. Taani Goday giyaba xalaala odana’ gada new odabikinayee?” yaagis.
NUM 24:14 Balaami Balaaqako, “Taani ha77i ta asaako bayis; shin ne haaya; Isra7eele asay yaana wodiyan ne asaa oothanaba ta new odana” yaagis.
NUM 24:15 I ba tinbitiya haysada yaagidi odis; “Iya ayfey tishshi oothidi xeelliya, Bi7oora na7aa Balaama tinbitey haysa.
NUM 24:16 Haysi Xoossay giyaba si7eysa tinbitiya, Ubbaa danda7iya Xoossafe gidida eratethi de7iya uray. Lichi gidi som7ora gufannin, iya ayfey dooyetidaysinne Ubbaa Danda7iya Xoossaa qoncethaa be7eysa tinbitey haysa.
NUM 24:17 “Taani iya be7ayis, shin wodey ha7i gidenna; ta iya xeellayis, shin matan deenna. Yayqooba sheeshape xoolintoy keyana; Isra7eelepe kawotetha xam7ay keyana. Moo7abe asaa som7uwa I gaaccana; Seeta asaa ubbaa huuphiya I tinchana.
NUM 24:18 Edoomey xoonetana; iya morkey Sayrey oyketana; shin Isra7eeley minni minni baana.
NUM 24:19 Yayqoobape haareysi keyana; kataman paxa attidaysata dhaysana” yaagis.
NUM 24:20 Hessafe guye, Balaami Amaaleqa be7idi haysada yaagidi tinbite odis; “Amaaleqi kawotethata giddon koyro, shin enta wursethay dhayo” yaagis.
NUM 24:21 Qassi Balaami Qeena be7idi haysada yaagidi tinbite odis. “Hinte de7iya bessay saro bessi; hinte keethay zaalla bolla keexetis.
NUM 24:22 Shin Asooreti hintena di77iya wode, hinte Qeena asay dhayana” yaagis.
NUM 24:23 Wursethan Balaami haysada yaagidi tinbite odis; “Xoossay hessa oothiya wode, ooni de7on daanaw danda7ii?
NUM 24:24 Markabeti Qophiroosape yaana; enti Asoorenne Ebeera xoonana; shin entika qassi dhayana” yaagis.
NUM 24:25 Hessafe guye, Balaami dendidi ba soo simmis; Balaaqika ba ogiya bis.
NUM 25:1 Isra7eele asay Seexima geetetiya bessan dunkaanidi de7ishin, Isra7eele addeti Moo7abe maccatara laymato doomidosona.
NUM 25:2 He maccasati banta xoossata yarshuwa maana mela xeegidosona. Enti he yarsho kathaa midi enta xoossata goyinnidosona.
NUM 25:3 Isra7eeleti Bi7eel-Fagoora geetetiya eeqa goyinnida gisho Goday enta bolla hanqetis.
NUM 25:4 Yaatin, Goday Museko, “Godaa hanqoy Isra7eelepe simmana mela kaalethiya asa ubbaa efada seeta gallas Godaa sinthan kaqa” yaagis.
NUM 25:5 Musey Isra7eele daynnatako, “Hinte issoy issoy Bi7eel-Fagoora geetetiya eeqa goyinnida asa ubbaa wodhite” yaagis.
NUM 25:6 Museynne maabaray ubbay geeshsha dunkaaniya pengen yeekishin, Isra7eeletape issoy Midiyaame maccasiw enta sinthara aathidi, ba keetha asaako ehis.
NUM 25:7 Kahiniya Aarona na7aa Alaazara na7ay Pinihaasi hessa be7ida wode maabara giddofe dendidi, toora ekidi,
NUM 25:8 Isra7eele addiya kaallidi dunkaaniya giddo gelidi, uraanne maccasiw tooran caddidi kanthi kessis. Hessi hanin Isra7eeleta wursiya gadoy eqis.
NUM 25:9 Shin he gadoy laatamanne oyddu mukulu asaa wodhis.
NUM 25:10 Goday Museko,
NUM 25:11 “Kahiniya Aarona na7aa Alaazara na7ay Pinihaasi Isra7eele asaa giddon taani ta bonchuwas misheteysada mishetida gisho, taani hinte bolla hanqetida hanquwa doshisis. Taani ta qaanatiyan enta polo dhaysabike.
NUM 25:12 Hessa gisho, taani ta sarotetha caaquwa iyara caaqanaysa Pinihaasas oda.
NUM 25:13 I ba Xoossaa bonchuwas mishetida gishonne Isra7eele asaas nagara atotetha ehida gisho, inne iya kochay merinaw kahine gidana” yaagis.
NUM 25:14 Midiyaame maccaseera hayqida uraa sunthay Saalu na7aa Zimira geetetees. Saalu Simoona kochan issi kochaa halaqa.
NUM 25:15 Hayqida Midiyaame maccase sunthay Kozibo; I aaway Zuri Midiyaameta kochaa halaqa.
NUM 25:16 Goday Museko,
NUM 25:17 “Midiyaame biitta asaa morkidi enta wodhite.
NUM 25:18 Enti hintena morkidi Paa7oran cimmidosona qassi bosha gallas Paa7oran hayqida Midiyaameta kochaa halaqa na7e Kozibi gaason hintena morkidosona” yaagis.
NUM 26:1 Boshaape guye, Goday Musekonne kahiniya Aarona na7aa Alaazarako,
NUM 26:2 “Laythi laatamanne iyape bolla gidida Isra7eeleta, olanaw danda7eyisata ubbaa, enta keethan keethan taybite” yaagis.
NUM 26:3 Yaatin, Museynne kahiney Alaazari Yordaanose Shaafape hefinthan, Iyaarko matan, Moo7abe denban asaa shiishidi,
NUM 26:4 “Goday Muse kiitidaysada, laythi laatamanne iyape bolla gidida asaa taybidosona.” Gibxefe keyida Isra7eele asay haysata.
NUM 26:5 Isra7eele bayra na7aa Robeela kochati banta kochan kochan, Hanooka kochaa, Faalu kochaa,
NUM 26:6 Hesiroona kochaanne Karma kochaa;
NUM 26:7 Haysati Robeela kochata; enta kumetha tayboy 43,730.
NUM 26:8 Faalu na7ay Eli7aaba;
NUM 26:9 Eli7aaba adde nayti Nemu7eela, Daatanenne Abeero. Daataninne Abeeroy maabaray dooridaysata, shin enti Qorenne iya kaalleysatara tobbidi Godaa bolla makallidi Muse bollanne Aarona bolla dendidosona.
NUM 26:10 Biittay dooyetidi enta Qorera issife mittis; enta kaalliya 250 asaa tami min hayqidosona. Yaatin, harati enta be7idi naagetana mela malla gididosona.
NUM 26:11 Shin Qore adde nayti ubbay hayqidi dhaybookona.
NUM 26:12 Simoona kochati banta kochan kochan, Nemu7eela kochaa, Yamina kochaa, Yakina kochaa,
NUM 26:13 Zaara kochaanne Saa7ula kochaa.
NUM 26:14 Haysati Simoona kochata; enta kumetha tayboy 22,200.
NUM 26:15 Gaade kochati banta kocha kochan, Xifoona kochaa, Haggi kochaa, Shuuna kochaa,
NUM 26:16 Esina kochaa, Era kochaa,
NUM 26:17 Arooda kochaanne Ari7eela kochaa.
NUM 26:18 Haysati Gaade kochata; enta kumetha tayboy 40,500.
NUM 26:19 Yihuda adde nayti Erinne Onani Kanaane biittan hayqidosona.
NUM 26:20 Yihuda kochati banta kochan kochan, Seela kochaa, Faaresa kochaanne Zara kochaa.
NUM 26:21 Faaresa kochay Hesiroonanne Hamuula.
NUM 26:22 Haysati Yihuda kochata; enta kumetha tayboy 76,500.
NUM 26:23 Yisakoora kochati banta kochan kochan, Toolla kochaa, Puu7a kochaa,
NUM 26:24 Yasuuba kochaanne Shimroona kochaa.
NUM 26:25 Haysati Yisakoora kochata; enta kumetha tayboy 64,300.
NUM 26:26 Zabloona kochati banta kochan kochan, Sareda kochaa, Eloona kochaanne Yahilaala kochaa.
NUM 26:27 Haysati Zabloona kochata; enta kumetha tayboy 60,500.
NUM 26:28 Yoosefa nayta Minaasenne Efreema kochati banta kochan kochan,
NUM 26:29 Minaasey Makira yelis, Makiri Galada yelis.
NUM 26:30 Galada kochati, Izera koche, Kelega koche,
NUM 26:31 Asir7eela koche, Seekema kochaa,
NUM 26:32 Shamida kochenne Hefeera koche.
NUM 26:33 Hefeera na7ay Selophaadi macca na7a xalaala yelis; iyaw adde na7i baawa. Selophaada macca nayta sunthay Mahilo, No7o, Hoglo, Milkonne Tirxo.
NUM 26:34 Haysati Minaase kochata; enta kumetha tayboy 52,700.
NUM 26:35 Efreema kochati banta kochan kochan, Shutula kochaa, Bekera kochaa, Tahana kochatanne
NUM 26:36 Shutula na7aa Erana kochata.
NUM 26:37 Haysati Efreema kochata; enta kumetha tayboy 32,500. Yoosefa kochati banta kochan kochan haysata.
NUM 26:38 Biniyaame kochati banta kochan kochan, Beella kochaa, Asbeela kochaa, Akira kochaa,
NUM 26:39 Shufaama kochaa, Hufama kochaa,
NUM 26:40 Beella na7aa Arada kochaanne Beella na7aa Naamane kochaa.
NUM 26:41 Haysati Biniyaame kochata; enta kumetha tayboy 45,600.
NUM 26:42 Daane kochati Saama kochaa.
NUM 26:43 Shuhaama kochaa kumetha tayboy 64,400.
NUM 26:44 Aseera kochati banta kochan kochan, Yimina kochaa, Yisiwa kochaa, Beri7a kochaa,
NUM 26:45 Beri7a na7a Hebeera kochaanne Beri7a na7aa Malki7eela kochaa.
NUM 26:46 Aseeras Saraho geetetiya macca na7i de7awusu.
NUM 26:47 Haysati Aseera kochata; enta kumetha tayboy 53,400.
NUM 26:48 Niftaaleme kochati banta kochan kochan, Yahixeela kochaa, Guna kochaa,
NUM 26:49 Yexera kochaanne Shileme kochaa.
NUM 26:50 Haysati Niftaaleme kochata; enta kumetha tayboy 45,400.
NUM 26:51 Taybetida Isra7eele adde asaa tayboy kumethi 601,730.
NUM 26:52 Goday Museko,
NUM 26:53 “Ha kochatas enta sunthaa sunthaa taybuwan biitta shaakada laata oothada entaw imma.
NUM 26:54 Taybon dareysatas darsada qassi taybon guuxeysatas guuthada imma. Ubbayka xaafetida banta taybuwa keena eko.
NUM 26:55 Shin biittay saaman shaaketo; issi issi kochay laata ekey ba kochaa sunthan gido.
NUM 26:56 Issi issi laatay taybon darota giddoninne taybon guuthata giddon saaman shaaketees” yaagis.
NUM 26:57 Banta zerthan zerthan taybetida Leewe kochati haysata; Gedisoona kochaa, Qahaata kochaanne Meraara kochaa.
NUM 26:58 Haysatika qassi Leewe kochata; Libina kochaa, Kebroona kochaa, Mohoola kochaa, Muse kochaanne Qore kochaa. Qahaati Amraama yelis.
NUM 26:59 Amraama mache sunthay Yokebeedo; iya Gibxen Leewepe yeletida Leewe na7a. Iya Aarona, Musenne enta michiw Mayraamo yelasu.
NUM 26:60 Aaronas Naadabe, Abyooda, Alaazaranne Itamaara geetetiya oyddu nayti de7oosona.
NUM 26:61 Shin Naadabeynne Abyoodi Godaa sinthan geeshshi gidonna taman yarsho yarshida gisho boshan hayqidosona.
NUM 26:62 Laythi issi ageenanne iyape bolla gidida Leewe adde nayta tayboy laatamanne heedzu mukula. Isra7eele asaa giddon entaw laata biitti imetiboonna gisho enti Isra7eeletara taybetibookona.
NUM 26:63 Yordaanose Shaafape hefinthan, Iyaarko matan, Moo7abe denban Museynne kahiney Alaazari Isra7eele asaa taybida wode taybetida asay haysa.
NUM 26:64 Museynne kahiney Aaroni koyro Siina mela biittan Isra7eele taybida wode taybetida asaape mexi issi asika attibeenna.
NUM 26:65 Goday ha Isra7eeletaba, “Enti ubbay mela biittan hayqana” yaagidi odida gisho, Yoofona na7aa Kaalebapenne Nawe na7aa Iyyasupe attishin, hari issi asika attibeenna.
NUM 27:1 Selophaadi Hefeera na7a; Hefeeri Galada na7a; Galadi Makira na7a; Makiri Minaase na7a; Minaasey Yoosefa na7a. Selophaada macca nayti Mahilo, No7o, Hoglo, Milkonne Tirxo.
NUM 27:2 Ha macca nayti geeshsha dunkaaniya pengen Muse sinthan, kahiniya Alaazara sinthan, halaqata sinthaninne maabara ubbaa sinthan eqidi,
NUM 27:3 “Nu aaway mela biittan hayqis; I ba nagaraa gaason hayqisipe attishin, Godaa bolla dendida Qore kaalleyisata giddon deenna. Iyaw adde na7i baawa.
NUM 27:4 Yaatin, nu aaway adde na7a yeliboona gisho iya sunthay iya kochaa giddofe waanidi dhayii? Nu aawa dabbota giddon nuus laata biitta imma” gidoosona.
NUM 27:5 Yaatin, Musey enta oysha Godaa sinthe shiishis.
NUM 27:6 Goday Museko,
NUM 27:7 “Selophaada macca nayta oyshay like; enta aawa dabbota giddon neeni entaw laata biitta imma; iya gishoy enta laata gido.
NUM 27:8 Qassi Isra7eele asaako, ‘Issi asi adde na7a yelonna hayqiko iya macca nayti laatto.
NUM 27:9 Iyaw macca na7i baynaba gidiko iya ishati laatto.
NUM 27:10 Iyaw ishi baynaba gidiko iya aawa ishati laatto.
NUM 27:11 Iyaw aawa ishi baynaba gidiko iya mata dabboy laatto. Taani Goday nena kiitidaysada haysi Isra7eele asaas woga gido’ ” yaagis.
NUM 27:12 Goday Museko, “Abariima Zumaa bolla keyada ta Isra7eele asaas immida biitta be7a.
NUM 27:13 Ne be7idaape guye, ne ishaa Aaronada neka hayqada ne mayzatan gahetana.
NUM 27:14 Xiina mela biittan, Mariba haatha matan asay ta bolla zuuzumida wode hinte nam7ay enta sinthan tana geeshshi oothidi bonchibeeketa” yaagis. (Mariba haathay Xiina mela biittan, Qaadesa geetetiya bessan de7iya pulto.)
NUM 27:15 Musey Godaako,
NUM 27:16 “Asa ubbaas de7o immiya Godaa Xoossaw, ne asay henthanchoy bayna wude mela gidonnaada,
NUM 27:17 ha asaa sinthan keyaanne geliya qassi enta kaalethidi kessiyanne gelsiya issi asi ha maabara bolla shuuma” yaagis.
NUM 27:18 Goday Museko, “Ayyaanay iyan de7iya Nawe na7aa Iyyasu ekada ne kushiya iya bolla wotha.
NUM 27:19 Iya kahiniya Alaazara sinthaninne maabara ubbaa sinthan essada enti be7ishin shuuma.
NUM 27:20 Isra7eele ubbay iyaw kiitetana mela ne maatape iyaw shaakada imma.
NUM 27:21 Ika Uriimen Godaa sheniya oychidi shaakiya kahiniya Alaazara sinthan eqo. Iyyasuynne Isra7eele maabaray ubbay Alaazara kiitan keyonne gelo” yaagis.
NUM 27:22 Musey Goday kiitidaysada oothis; Iyyasu efidi, kahiniya Alaazara sinthaninne maabara ubbaa sinthan essis.
NUM 27:23 Goday kiitidaysada Musey ba kushiya iya bolla wothidi shuumis.
NUM 28:1 Goday Museko,
NUM 28:2 “Isra7eele asaa haysada yaagada kiitta; xuugetiya sawiya katha yarsho woden woden taw yarshite.
NUM 28:3 Godaas taman xuugetidi yarshetiya yarshoy haysa; kumetha bollara de7iya issi laythi kumida nam7u marazeta wonta wonta xuussa yarsho oothidi yarshite.
NUM 28:4 Marazetape issuwa wonta issuwa qassi omarsi yarshite.
NUM 28:5 Qassi he maraziyara issi litiro shamaho zayten munuqetida issi kilo giraame lo77o giste dhiille katha yarsho yarshite.
NUM 28:6 Haysi Godaa ufaysiya xuussa yarsho. Ika Siina zuma bolla yarshetida koyro xuussa yarsho.
NUM 28:7 Koyro maraziyara issi litiro caala woyne ushsha yarsho oothidi yarsho bessan Godaas gussite.
NUM 28:8 Omarsi nam7antho maraziya yarshiya wode koyroysa mela katha yarshuwanne ushsha yarshuwa gujidi yarshite. Ika Godaa ufaysiya sawo yarsho gidana.”
NUM 28:9 “Sambaata gallas borey bayna issi laythi kumida nam7u marazeta zayten munuqetida nam7u kilo giraame lo77o giste dhiille ekidi katha yarshonne ushsha yarsho oothidi yarshite.
NUM 28:10 Gallas gallas yarshetiya xuussa yarshuwa bolla Sambaatan Sambaatan hinte yarshana xuussa yarshoynne ushsha yarshoy haysa.”
NUM 28:11 “Ageeni xeeriya koyro gallas nam7u wofaanota, issi marazenne issi laythi kumida borey bayna laapun dorsa urgeta xuussa yarsho oothidi Godaas yarshite.
NUM 28:12 Issi issi wofaanuwara shamaho zayten munuqetida heedzu kilo giraame gidiya lo77o giste dhiillera katha yarsho oothidi yarshite. Qassi shamaho zayten munuqetida nam7u kilo giraame gidiya lo77o giste dhiilliya maraziyara wolla yarsha.
NUM 28:13 Laapun marazetape issi issi maraze shamaho zayten munuqetida issi kilo giraame lo77o giste dhiillera xuugetiya sawiya katha yarsho oothada Godaas yarishsha.
NUM 28:14 Qassi ushsha yarshuwa issi issi wofaanuwas nam7u litiro woyne, issi maraziyas issi litironne bagga woyne ushshaanne issi issi dorsa urgiyas issi litiro gidiya woyne ushshi shiishite. Haysi laytha giddon ageeni xeeriya koyro gallasan oosetiya xuussa yarsho.
NUM 28:15 Gallas gallas yarshetiya xuussa yarshuwa bollanne ushsha yarshuwa bolla issi kole nagara yarsho oothidi Godaas yarshite.”
NUM 28:16 “Koyro ageenan tammanne oyddantho gallasay Godaa Paasika bonchiya gallas gido.
NUM 28:17 Qassi he ageenan tammanne ichashantho gallasan Uytha ba7aaley bonchetees; he gallasaape doomidi laapun gallas gakanaw irshoy geliboonna uytha miite.
NUM 28:18 He gallasatape koyro gallasan goyinnanaw shiiqite; he gallasan ay oosoka oothopite.
NUM 28:19 Borey bayna nam7u wofaanota, issi marazenne issi laythi kumida laapun dorsa urgeta xuussa yarsho oothidi Godaas yarshite.
NUM 28:20 Issi wofaanuwara shamaho zayten munuqetida heedzu kilo giraame lo77o giste dhiille, issi maraziyara nam7u kilo giraame dhiillenne
NUM 28:21 laapun dorsa urgetape issi issi dorsaara issi kilo giraame dhiille yarshite.
NUM 28:22 Qassi issi deeshi deriya nagaraas atotethi gidana mela nagara yarsho oothidi yarshite.
NUM 28:23 Hessa ubba wode gallas gallas yarshetiya yarshuwa bolla gujidi yarshite.
NUM 28:24 Ubba wode oosetiya xuussa yarshuwa bollanne ushsha yarshuwa bolla gujidi laapun gallasi Godaas sawiya katha yarsho oothidi yarshite.
NUM 28:25 Laapuntha gallasan goyinnoos shiiqite; he gallas ay oosoka oothopite.”
NUM 28:26 “Katha Shiisho Ba7aale saamintan koyro gallas goyinnoos shiiqiya wode hinte ooratha kathaafe yarsho yarshite; he wode ay oosoka oothopite.
NUM 28:27 Nam7u wofaanota, issi maraziyanne issi laythi kumida laapun dorsa urgeta Godaas sawiya xuussa yarsho oothidi yarshite.
NUM 28:28 Issi issi wofaanuwara shamaho zayten munuqetida heedzu kilo giraame lo77o giste dhiille, issi dorsa urgiyara nam7u kilo giraame dhiillenne
NUM 28:29 laapun dorsa urgetape issi issi urgiyara issi kilo giraame giste dhiille ekidi yarshite.
NUM 28:30 Iya bolla gujidi issi kole nagara atothetha yarsho oothidi yarshite.
NUM 28:31 Gallas gallas yarshetiya yarshuwa bollanne ushsha yarshuwa bolla katha yarsho yarshite. Hinte yarshiya meheti borey baynaba gido.”
NUM 29:1 “Laapuntha ageenas koyro gallasan goyinnanaw shiiqite; ay oosoka oothopite; he gallasay moyzey punetiya gallas.
NUM 29:2 Borey bayna issi wofaano, issi marazenne issi laythi kumida laapun dorsa urgeta sawiya xuussa yarsho oothidi Godaas yarshite.
NUM 29:3 He wofaanuwara shamaho zayten munuqetida heedzu kilo giraame lo77o giste dhiille, issi maraziyara nam7u kilo giraame giste dhiillenne,
NUM 29:4 laapun dorsa urgetape issi issi urgiyara issi kilo giraame dhiille yarshite.
NUM 29:5 Qassi issi kole hintew nagaraa atotethas yarshite.
NUM 29:6 Wogay kiiteysatho, ageena xeeron yarshetiya xuussa yarsho bolla, katha yarsho bolla, gallas gallas yarshetiya xuussa katha yarsho bollanne ushsha yarsho bolla gujidi yarshite; hessi Godaa sawiya xuussa yarsho.
NUM 29:7 “Laapuntha ageenan tammantho gallasan ay oosoka oothopite; hintena kawushidi goyinnoos shiiqite.
NUM 29:8 Borey bayna issi wofaano, issi marazenne issi laythi kumida laapun dorsa urgeta sawiya xuussa yarsho oothidi Godaas yarshite.
NUM 29:9 Katha yarsho oothidi issi wofaanora shamaho zayten heedzu kilo giraame lo77o giste dhiille, issi dorsa urgiyara nam7u kilo giraame dhiillenne
NUM 29:10 laapun dorsa urgetape issi issi urgiyara issi kilo giraame dhiille yarshite.
NUM 29:11 Qassi nagara yarsho oothidi issi kole yarshite. Nagara atothetha yarshuwa bolla, gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla hessa gujidi yarshite.
NUM 29:12 “Laapuntha ageenan tammanne ichashantho gallasan, deexo ooso oothopite; laapun gallas kumethi Godaa bonchanaw Shaqara Ba7aale bonchite.
NUM 29:13 Borey bayna tammanne heedzu wofaanota, nam7u marazeta, issi laythi kumida tammanne oyddu dorsa urgeta sawiya xuussa yarsho oothidi Godaas yarshite.
NUM 29:14 Katha yarsho gidana mela tammanne heedzu wofaanotape issi issi wofaanuwara shamaho zayten munuqetida heedzu kilo giraame lo77o giste dhiille, nam7u marazetape issi issi urgiyara nam7u kilo giraame dhiillenne
NUM 29:15 tammanne oyddu dorsa urgetape issi issi urgiyara issi kilo giraame dhiille yarshite.
NUM 29:16 Qassi nagara yarshuwas issi kole yarshite. Hessi gallas gallas xuussa yarshuwa bolla, katha yarshuwa bollanne ushsha yarsho bolla gujidika yarshite.
NUM 29:17 “Nam7antho gallasan tammanne nam7u borey bayna wofaanota, nam7u marazetanne issi laythi kumida tammanne oyddu urgeta yarshite.
NUM 29:18 Wofaanotara, marazetaranne dorsa urgetara katha yarshuwanne ushsha yarshuwa wogay kiitteysa mela enta taybuwada yarshite.
NUM 29:19 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla gujidi nagara yarshuwas issi kole yarshite.
NUM 29:20 “Heedzantho gallasan borey bayna tammanne issi wofaanota, nam7u marazeta issi laythi kumida tammanne oyddu dorsa urgeta yarshite.
NUM 29:21 Wofaanotara, marazetaranne dorsa urgetara katha yarshuwanne ushsha yarshuwa wogay kiitteysa mela enta taybuwada yarshite.
NUM 29:22 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla nagara yarshos issi kole gujidi yarshite.
NUM 29:23 “Oyddantho gallasan borey bayna tammu wofaanota, nam7u marazetanne issi laythi kumida tammanne oyddu dorsa urgeta yarshite.
NUM 29:24 Wofaanotara, marazetaranne dorsa urgetara katha yarshuwanne ushsha yarshuwa wogay kiitteysa mela enta taybuwada yarshite.
NUM 29:25 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla gujidi nagara yarshos issi kole yarshite.
NUM 29:26 “Ichashantho gallasan borey bayna uddufun wofaanota, nam7u marazetanne issi laythi kumida tammanne oyddu dorsa urgeta yarshite.
NUM 29:27 Wofaanotara, Marazetaranne dorsa urgetara katha yarshuwanne ushsha yarshuwa wogay kiiteysada enta taybuwada yarshite.
NUM 29:28 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla gujidi nagara yarshos issi kole yarshite.
NUM 29:29 “Usupuntho gallasan borey bayna hospun wofaanota, nam7u marazetanne issi laythi kumida tammanne oyddu dorsa urgeta yarshite.
NUM 29:30 Wofaanotara, Marazetaranne dorsa urgetara katha yarshuwanne ushsha yarshuwa wogay kiitteysa mela enta taybuwada yarshite.
NUM 29:31 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla gujidi nagara yarshos issi kole yarshite.
NUM 29:32 “Laapuntha gallasan laapun wofaanota, nam7u marazetanne issi laythi kumida tammanne oyddu dorsa urgeta yarshite.
NUM 29:33 Wofaanotara, Marazetaranne dorsa urgetara katha yarshuwanne ushsha yarshuwa wogay kiitteysa mela enta taybuwada yarshite.
NUM 29:34 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla gujidi nagara yarshos issi kole yarshite.
NUM 29:35 “Hospuntha gallasan goyinnanaw shiiqite; ay oosoka oothopite.
NUM 29:36 Borey bayna issi wofaano, issi maraze, issi laythi kumida laapun dorsa urgeta sawiya xuussa yarsho oothidi Godaas yarshite.
NUM 29:37 Wofaanotara, Marazetaranne dorsa urgetara katha yarshuwanne ushsha yarshuwa wogay kiiteysada enta taybuwada yarshite.
NUM 29:38 Gallas gallas yarshetiya xuussa yarshuwa bolla, katha yarshuwa bollanne ushsha yarshuwa bolla gujidi nagara yarshos issi kole yarshite.
NUM 29:39 “Hinte gaso yarshuwa bollanne hinte dosa yarshuwa bolla xuussa yarsho, katha yarsho, ushsha yarshonne issifetetha yarsho Baaliya bonchanaw kiitetida wodiyan yarshite” yaagis.
NUM 29:40 Musey, Goday bana kiittidaysa ubbaa Isra7eele asaas odis.
NUM 30:1 Musey Isra7eele zeretha halaqatako, “Godaa kiitay haysa;
NUM 30:2 Issi asi Godaas issiba oothanaw caaqiko woyko issibaape bana naaganaw qangiko guye goonna polo.
NUM 30:3 “Ba aawa son de7iya geela7iya Godaas issiba oothanaw caaqiko woyko issibaape bana naaganaw qangiko,
NUM 30:4 I aaway iya caaqidaysa woyko iya qangetidaysa si7idi, iyo diggonna ixiko, iya polanaw koshshees.
NUM 30:5 Shin I aaway hessa si7idi iyo diggiko I caaqoynne I qangethay attanaw danda7ees. I aaway iyo diggida gisho Goday iw atto gaana.
NUM 30:6 “Gelonna macca na7iya caaqada de7ashe woyko issibaape bana naaganaw qangetada de7ashe azina geliko,
NUM 30:7 I azinay hessa si7idi iyo diggonna ixiko iya ba caaquwanne ba qangetha polanaw koshshees.
NUM 30:8 Shin I azinay hessa si7idi iyo diggiko iya caaqida caaqoy woyko qangetida qangethay iyo gomenna. Hessa Goday iw atto gaana.
NUM 30:9 “Shin am7iya woyko sayo maccasi caaqida caaquwa woyko qangida qangetha polanaw bessees.
NUM 30:10 “Azinara de7iya maccasi caaqiko woyko issiba oothanaw qangiko,
NUM 30:11 I azinay hessa si7idi iyo diggonna ixiko, iya caaqida caaquwanne qangetida qangetha polo.
NUM 30:12 I azinay hessa si7ida gallas iyo diggiko I caaqoy woyko iya oothanaw qangetida qangethay iyo gomenna. I azinay diggida gisho Goday iw atto gaana.
NUM 30:13 I azinay iya caaqida caaquwa woyko iya bana kawushanaw qangetida qangetha laallanaw woyko minthanaw danda7ees.
NUM 30:14 Shin I azinay he gallas woyko wontetha gallas aykoka goonna ixiko, I caaquwa woyko I qangetha minthis guussu. I hessa si7idi, si77i giiko I qofaa ma7is guussu.
NUM 30:15 Shin I hessa si7i gam7idi zaari diggiyaba gidiko hessas oyshetey iya” yaagis.
NUM 30:16 Hiza haysi azina giddoninne machi giddon, ba aawara son de7iya geela7o giddoninne I aawa giddon de7iya gahetethaba Goday Muses immida wogaa.
NUM 31:1 Goday Museko,
NUM 31:2 “Isra7eele asaa qohida gisho Midiyaame asaa olada halo keya; hessafe guye, neeni hayqada ne mayzata gakana” yaagis.
NUM 31:3 Hessa gisho, Musey asaako, “Midiyaame asaa olidi Godaa halo keyana mela hinte giddofe guutha asaa olas dancisite.
NUM 31:4 Issi issi Isra7eele kochaafe issi mukulu adde asaa olas yeddite” yaagis.
NUM 31:5 Hessa gisho, issi issi Isra7eele kochaafe issi issi mukulu asay keyidi, tammanne nam7u mukulu olanchoti olas giigidosona.
NUM 31:6 Musey kahiniya Alaazara na7aa Pinihaasa aawatethan, issi issi kochaafe issi issi mukulu asi dooridi olas yeddis; Pinihaasi bishe geeshsha miishetanne mallas punniya zaye ekidi bis.
NUM 31:7 Goday Muse kiitidaysada, enti Midiyaame asaa olidi adde ubbaa wodhidosona.
NUM 31:8 Ichashu Midiyaame kawota, Ewa, Reqeema, Zura, Huranne Reeba geetetiya asata wodhidosona; qassi Bi7oora na7aa Balaamaka mashshan wodhidosona.
NUM 31:9 Isra7eele asay Midiyaame maccasaanne nayta di7idosona; enta mehiya, dorsaanne deesha wudiyanne enta miishe ubbaa di7idosona.
NUM 31:10 Enti de7iya katamatanne enta gutata ubbaa xuuggidosona.
NUM 31:11 Asaa mehiyanne de7idaba ubbaa ekidi bidosona.
NUM 31:12 Enti di7ida asaa, mehiyanne shalo ubbaa Iyaarkofe hefinthan, Yordaanose shaafa matan de7iya Moo7abe denban dunkaanida Museko, kahiniya Alaazarakonne Isra7eele maabaraako ehidosona.
NUM 31:13 Musey, kahiniya Alaazarinne maabara halaqati ubbay dunkaanida gutaape gaxa keyidi entana mokidosona.
NUM 31:14 Musey olape simmida tora moconata, shaalaqatanne mato halaqata bolla hanqetis.
NUM 31:15 Musey entako, “Maccasa ubbaa ayis wodhibeeketii?
NUM 31:16 Enti Balaama zoriya si7idi, Pe7oora geetetiya bessan Isra7eele asay Godaa aggidi, boshan hayqanaada oothiday maccasa gideysa dogidetii?
NUM 31:17 Hessa gisho, ha77i adde naytanne addera aqida maccas ubbaa wodhite.
NUM 31:18 Shin addera aqiboona macca nayta ubbaa hintew ashshite.
NUM 31:19 Hinte giddofe ase wodhida asi woyko aha bochida oonika gutaape gaxan laapun gallas utto; heedzantho gallasaninne laapuntha gallasan hintenanne hinte di77ida asaa geeshshite.
NUM 31:20 Hessadaka ma7o ubbaa, galbafe, deesha ikisepenne mithafe oosetidabata ubbaa geeshshite” yaagis.
NUM 31:21 Kahiney Alaazari olape simmida olanchotako, “Goday Muses immida higgiya maaray haysa;
NUM 31:22 Worqa, bira, naase, birata, qorqoro, irsaase,
NUM 31:23 taman meetetonnabati ubbay taman geeyanaw bessees. Shin taman meetetiyabati geeshsho haathan geeyanaw bessees.
NUM 31:24 Laapuntha gallasan hinte ma7uwa meeccite; hintena geeshshite. Hessafe guye, gutaa gelite” yaagis.
NUM 31:25 Goday Museko,
NUM 31:26 “Neera, kahiniya Alaazararanne Isra7eele maabara halaqati di7etida asaanne mehiya taybite.
NUM 31:27 Ola bidaysatasinne boonnaysatas nam7u kessidi shaakite.
NUM 31:28 Ola bidaysata gishuwape ase gidin miizi gidin hare gidin dorse woyko deeshe gidin ichashu xeetape issino Godaas immite.
NUM 31:29 Enta gishuwape ekida Godaa imota kahiniya Alaazaras immite.
NUM 31:30 Hanko Isra7eeleta gakida gishuwape, ase gidin miizi gidin hare gidin dorse woyko deeshe gidin ishatammaafe issino ekidi Godaa Dunkaaniya aawatethan aysiya Leewetas immite” yaagis.
NUM 31:31 Museynne kahiney Alaazari Goday kiitidaysada oothidosona.
NUM 31:32 Olanchoti bantaw ekin attida di7oy 675,000 dorsata, 72,000 miizata, 61,000 haretanne 32,000 geela7o macca nayta.
NUM 31:36 Ola bidaysata gakida gishoy 337,500 dorsata;
NUM 31:37 entafe Godaas imetiday 675.
NUM 31:38 Miizati 36,000; entafe Godaas imetiday 72.
NUM 31:39 Hareti 30,500; entafe Godaas imetiday 61.
NUM 31:40 Maccasati 16,000; entafe Godaas imetiday 32.
NUM 31:41 Goday Muse kiitidaysada Godaa imota kahiniya Alaazaras immis.
NUM 31:42 Ola boonna Isra7eele maabara gakida gishoy ola bida asaa gishuwara issi gina; ika 337,500 dorsata, 36,000 miizata, 30,500 haretanne 16,000 geela7o macca nayta.
NUM 31:47 Isra7eele maabara gakida gishuwape ishatamu asaapenne mehiyape isso isso kessidi Goday iya kiitidaysada geeshsha Dunkaaniya aawatethan aysiya Leewetas immis.
NUM 31:48 Hessafe guye, tora moconati, shaalaqatinne mato halaqati Museko shiiqidi,
NUM 31:49 “Nuuni ne aylleti nu aawatetha garsan de7iya olanchota taybin issoyka pacibeenna.
NUM 31:50 Goday nu shempuwa ashshida gisho, nu issoy issoy ekida worqa alleeqota, sagaayota, toho albota, migiddota, haytha worqatanne qoodhe worqata Godaas immanaw ekidi yida” yaagidosona.
NUM 31:51 Museynne kahiney Alaazari worqa alleeqota ubbaa entafe ekidosona.
NUM 31:52 Shaalaqatinne mato halaqati Godaas immida worqay nam7u xeetu kilo giraame gidis.
NUM 31:53 Hanko olanchoti ehida di7uwa bantaw ekidosona.
NUM 31:54 Museynne kahiney Alaazari shalaqatapenne mato halaqatape ekida worqa Godaa sinthan Isra7eele asaa hassayisiyaba oothidi geeshsha dunkaaniya giddo ehidosona.
NUM 32:1 Robeelanne Gaade kochaas daro mehey de7ees. Enti Ya7izeera biittaynne Galada biittay mehes inje gideysa,
NUM 32:2 be7idi Museko, kahiniya Alaazarakonne Isra7eele maabara halaqatako yidi haysada yaagidosona.
NUM 32:3 “Isra7eele asay laattana mela Goday maaddida biittay, Axaarotey, Dibooni, Ya7izeeri, Nimiri, Hasebooni, Eliyaali, Sebami, Naboynne Ba7ooni mehes inje biitta; nuus hinte aylletas daro mehey de7ees.
NUM 32:5 Nuuni hinte sinthan saba demmidaba gidiko, he biitta nuus hinte aylleta laata oothidi immite; nuna Yordaanose shaafape hefinthi pinthofite” yaagidosona.
NUM 32:6 Musey Gaade kochatakonne Robeela kochatako, “Hinte bagga gidida Isra7eele asay olas biya wode hinte haysan uttanaw koyeetii?
NUM 32:7 Goday entaw immida biitta enti pinnonna mela hinte ayis enta wozanaa shugiseetii?
NUM 32:8 Qaadesa Barnefe ha biitta wochana mela hinte aawata ta yeddida wode entika haysada oothidosona.
NUM 32:9 Enti Eshkola Zangaara gakanaw bidi he biitta be7i simmidi Isra7eeleti Goday entaw immida biitta gelonna mela Isra7eeleta wozanaa shugisidosona.
NUM 32:10 Goday he gallas daro hanqetidi haysada yaagidi caaqis;
NUM 32:11 ‘Banta kumetha wozanaape tana kaalliboonna gisho, Gibxe biittafe keydaysatape laythi laatamanne iyape bolla gidida adde asaape issoyka Abrahaames, Yisaaqasinne Yayqoobas immana gada caaqida biitta gelekona.
NUM 32:12 Banta kumetha wozanape kaallida gisho, Qeneza Yoofona na7aa Kaalebapenne Nawe na7aa Iyyasupe attishin, hari oonika gelenna’ yaagis.
NUM 32:13 Godaa hanqoy Isra7eele asaa bolla eexida gisho Godaa sinthan iita oothida he yeletetha ubbay dhayana gakanaw mela biittan oytamu laythi toylatidosona.
NUM 32:14 Hinteno, nagaranchota nayto hinte aawata bessan eqidi Goday Isra7eele asaa bolla gujidi hanqetana mela ootheeta.
NUM 32:15 Hinte Godaa kaallonna ixiko, I qassika ba deriya mela biittan aggana. Entana gakiya dhayuwas hinte oyshetana” yaagis.
NUM 32:16 Enti Museko shiiqidi, “Nuuni haysan nu mehiyas dara, nu naytasinne nu machetas katama keexanaw koyoos.
NUM 32:17 Shin Isra7eele asay banta bessaa ekana gakanaw nuuni ola miishe dancidi enta sinthan keyidi oletanaw giigetida. He wode he biittan de7iya asay nu naytanne nu macheta qohonna mela gimbetidi uttida katamatan de7ona.
NUM 32:18 Isra7eele asa ubbay banta laata laata ekana gakanaw, nuuni nu soo simmoko.
NUM 32:19 Nuuni nu laata Yordaanose shaafape hafinthan doloha baggan laattida gisho, Yordaanosepe hefinthan wuloha baggan entara laata ekoko” yaagidosona.
NUM 32:20 Musey entako, “Hinte geysi tuma gidiko haysan Godaa sinthan ola baanaw dancetite.
NUM 32:21 Goday ba morketa ba sinthafe gooddana gakanaw hinte ola miishiya dancidi, Yordaanose shaafa Godaa sinthan pinniko,
NUM 32:22 he biitta Goday xoonidaape guye hinte simmanaw danda7eeta. He wode hinte Godaasinne Isra7eele asaas oletidi polideta guussu. Qassi he biittay Godaa sinthan hintew laata gidana.
NUM 32:23 “Hinte hessa oothonna ixiko Godaa bolla nagara ootheeta; hiza, hinte nagaraa gisho hintena seeri gakanaysa loythi erite.
NUM 32:24 Hinte hintew katamata, hinte mehiyas dara keexite, shin hinte gelida qaala polite” yaagis.
NUM 32:25 Gaade kochaynne Robeela, kochay Museko, “Nuuni ne aylleti ne kiitidaysada oothana.
NUM 32:26 Nu nayti, nu macheti, nu dorsatinne nu mehey haysan Galada katamatan de7ishshona.
NUM 32:27 Shin nuuni ne aylleti, olanchoti ubbay, neeni nu goday gidaysada oletanaw Godaa sinthan Yordaanose shaafa pinnana” yaagidosona.
NUM 32:28 Hessa gisho, Musey kahiniya Alaazara, Nawe na7a Iyyasunne Isra7eele kochata halaqata entaba yaagidi Kiittis.
NUM 32:29 “Gaade kochaynne Robeela kochay ubbay ola miishiya dancidi, Godaa sinthan hintera Yordaanose shaafa pinnikonne hinte he biitta xooniko, hessafe guye, Galada biitta hinte enta laatisite.
NUM 32:30 Shin enti ola miishiya dancidi, hintera pinnidi olas boonna ixiko, hinteda entaw Kanaane biittan laati imeto” yaagis.
NUM 32:31 Yaatin. Gaade kochaynne Robeela kochay zaaridi, “Nuuni ne aylleti Goday gidaysa oothana.
NUM 32:32 Nuuni ola miishiya dancidi, Godaa sinthan Kanaane biitta gelanaw pinnana; shin nuuni laattiya laatay Yordaanosepe hafintha bagga gido” yaagidosona.
NUM 32:33 Hessa gisho, Musey Gaade kochaas, Robeela kochaasinne Yoosefa na7aa Minaase kochaafe baggaas Amoore kawa Sihoona kawotethaanne Baasane kawa Ooge kawotethaa enta yuushuwan de7iya katamatara immis.
NUM 32:34 Gaade kochay Diboona, Axaarota, Aro7eera
NUM 32:35 Axiroot-Shafaana, Ya7izeera, Yogiba,
NUM 32:36 Beet-Nimiranne Beet-Harana geetetiya gimben diretida katamata zaaridi keexidosona; banta mehiyas dara keexidosona.
NUM 32:37 Robeela, kochay Haseboona, Eli7aala, Qiratayma,
NUM 32:38 Naaba, Ba7aal-Ma7oonanne Sebama geetetiya katamata zaarethi keexidosona; he katamata sunthaa laammidosona.
NUM 32:39 Minaase na7aa Makira kochati Galada biitta oli oykidi yan de7iya Amooreta goodidosona.
NUM 32:40 Hessa gisho, Minaase na7aa Makira kochaas Musey Galada biitta immin enti yan de7idosona.
NUM 32:41 Minaase kochi gidida Ya7iri he si olli oykidi, “Ya7ira katamata” yaagidi sunthis.
NUM 32:42 Nooba Qanaata katamaanne iya yuushuwan de7iya gutata ollan oykide, ba sunthan “Nooba” gidi sunthis.
NUM 33:1 Museynne Aaroni kaalethin, Isra7eele asay, banta cugan cugan Gibxefe keyidi siiratida gutata odiya taarikey haysa.
NUM 33:2 Goday Kiittidaysa mela Musey enti siiratida bessata sunthaa ubbaa kaali kaali xaafis.
NUM 33:3 Isra7eele asay koyro ageenan, tammanne ichashantho gallasan, Paasika bonchiya nam7antho gallas dendidi, Gibxe asa ubbay be7ishin, yayyonna Ramisepe keyidosona.
NUM 33:4 He wode Gibxe asay Godaa gadon hayqida banta bayra nayta moogosona. Hessada oothidi, Goday enta xoossata bolla pirda ehis.
NUM 33:5 Isra7eele asay Ramisepe dendidi Sukota geetetiya bessan dunkaanidosona.
NUM 33:6 Sukotape dendidi mela biitta gaxan de7iya Etaaman dunkaanidosona.
NUM 33:7 Etaamape dendidi Ba7ali-Xafoonape doloha baggan de7iya Pihahiroota simmidi Migdoola matan dunkaanidosona.
NUM 33:8 Pihahirootape dendidi, Zo7o Abbaa pinnidi, Suuza mela biitta bidosona. Etaama mela biittan heedzu gallas hemetidi Maaran dunkaanidosona.
NUM 33:9 Maarape dendidi tammanne nam7u pultotinne laapun tammu zambati de7iya Eliman dunkaanidosona.
NUM 33:10 Elimape dendidi Zo7o Abbaa matan dunkaanidosona.
NUM 33:11 Zo7o Abbaa matape dendidi Siina mela biittan dunkaanidosona.
NUM 33:12 Siina mela biittafe dendidi Rafaqan dunkaanidosona.
NUM 33:13 Rafaqape dendidi Elusan dunkaanidosona.
NUM 33:14 Elusape dendidi haathi bayna bessan Rafidiman dunkaanidosona.
NUM 33:15 Rafidimape dendidi Siina mela biittan dunkaanidosona.
NUM 33:16 Siina mela biittafe dendidi Kibirooti Hati7awan dunkaanidosona.
NUM 33:17 Kibirooti Hati7awape dendidi Haxerootan dunkaanidosona.
NUM 33:18 Haxerootape dendidi Irtiman dunkaanidosona.
NUM 33:19 Irtimape dendidi Irmoon-Pareezan dunkaanidosona.
NUM 33:20 Irmoon-Pareezape dendidi Libinan dunkaanidosona.
NUM 33:21 Libinape dendidi Irisan dunkaanidosona.
NUM 33:22 Irisape dendidi Qahelatan dunkaanidosona.
NUM 33:23 Qahelatape dendidi Shefara zuman dunkaanidosona.
NUM 33:24 Shefara zumaape dendidi Haraadan dunkaanidosona.
NUM 33:25 Haradape dendidi Maqhelotan dunkaanidosona.
NUM 33:26 Maqhelotape dendidi Tahatan dunkaanidosona.
NUM 33:27 Tahatape dendidi Taaran dunkaanidosona.
NUM 33:28 Taarape dendidi Mitiqan dunkaanidosona.
NUM 33:29 Mitiqape dendidi Hashimoonan dunkaanidosona.
NUM 33:30 Hashimoonape dendidi Moserootan dunkaanidosona.
NUM 33:31 Moserootape dendidi Ben-Ya7iqanan dunkaanidosona.
NUM 33:32 Ben-Ya7iqanape dendidi Hoor-Hagidigaadan dunkaanidosona.
NUM 33:33 Hoor-Hagidigadape dendidi Yoxibaatan dunkaanidosona.
NUM 33:34 Yoxibaatape dendidi Abroonan dunkaanidosona.
NUM 33:35 Abroonape dendidi Exiyoon-Gabiran dunkaanidosona.
NUM 33:36 Exiyooni-Gabirape dendidi Siina mela biittan Qaadesan dunkaanidosona.
NUM 33:37 Qaadesape dendidi Edoome biitta zawan de7iya Hoora zuman dunkaanidosona.
NUM 33:38 Kahiney Aaroni Godaa kiitan Hoora zuma bolla keyidi, Isra7eele asay Gibxe biittafe keyida oytamantho laythan, ichashantho ageenan, koyro gallasan yan hayqis.
NUM 33:39 Aaroni Hoora zuma bolla hayqiya wode iyaw laythi xeetanne laatamanne heedza.
NUM 33:40 Negebe mela biittan Kanaanen de7iya Arada Kawoy Isra7eele asaa yuussaa si7is.
NUM 33:41 Isra7eele asay Hoora zumaape dendidi Xalmoonan dunkaanidosona.
NUM 33:42 Xalmoonape dendidi Punoonan dunkaanidosona.
NUM 33:43 Punoonape dendidi Obotan dunkaanidosona.
NUM 33:44 Obotape dendidi Moo7abe biitta zawan de7iya Abariiman dunkaanidosona.
NUM 33:45 Abariimape dendidi Diboon-Gaadan dunkaanidosona.
NUM 33:46 Dibon-Gaadape dendidi Almoon-Dibilatayman dunkaanidosona.
NUM 33:47 Almoon-Dibilataymape dendidi Nabo zuma sinthan Abariima zumata bolla dunkaanidosona.
NUM 33:48 Abariima zumatape dendidi Iyaarkofe hefinthan, Yordaanose shaafa matan de7iya Moo7abe denban dunkaanidosona.
NUM 33:49 Yordaanose shaafa matan de7iya Moo7abe denban, Beet-Yashimootapenne Abeel-Saxima Zangaarape giddon dunkaanidosona.
NUM 33:50 Iyaarkofe hefinthan, Yordaanose shaafa matan de7iya Moo7abe demban Goday Museko,
NUM 33:51 “Isra7eele asaas yaagada oda; Yordaanose shaafa pinnidi, Kanaane biitta hinte geliya wode
NUM 33:52 he biittan de7iya asa ubbaa hinte sinthafe yedethite. Shuchafe masetidi oosetida misiletanne sheeshidi medhida eeqata dhaysite. Dhoqa goyinno bessata ubbaa laallite.
NUM 33:53 He biitta ta hintew immida gisho iya laattidi yan de7ite.
NUM 33:54 Hinte kochan kochan saama kessidi biitta shaaketite. Taybon dariya kochatas dalga laata immite; taybon guuxiya kochatas guutha laata immite. Saaman enta gakida biittay entaba gidana. Biittaa hinte mayzata kochan kochan shaakidi ekite.
NUM 33:55 Shin he biittan de7iya asaa hinte yedethonna ixiko, hinte ashshidaysati hinte ayfiyas pinco, hinte miyiyas agunthu gidana; hinte daana biittan ubba wode ola denthidi hintena waaysana.
NUM 33:56 Hinte enta yedethonna ixiko, ta enta bolla oothanaw halchidaba hinte bolla oothana gada oda” yaagis.
NUM 34:1 Goday Museko,
NUM 34:2 “Isra7eele asaas haysada gada oda; hinte Kanaane geliya wode ta hintew laata oothada immana biitta zaway haysa.
NUM 34:3 Dugeha bagga zaway Siina mela biittafe dendidi Edoome zawa kanthees. Doloha baggara hinte zaway Maxine Abbaafe duge baggara doomidi,
NUM 34:4 Aqirabima aadhiya bessaa shaakidi Siina biitta bazzuwa kanthidi dugeha baggara Qaades-Barne gakees. Yaape Hadar-Adaara kanthidi Aximoona gakees.
NUM 34:5 Aximoonape dendidi Gibxe shaafa guye simmidi Medetiraane Abbaa gakees.
NUM 34:6 “Wuloha bagga zaway Medetiraane Abbaa gaxa gidana.
NUM 34:7 “Pudeha bagga zaway Medetiraane Abbaa kaallidi Hoora zuma gakanaw bees.
NUM 34:8 Hoora zumaape Hamaata geliya bessaa gakanaw bees; he zawa wursethay Xadaada.
NUM 34:9 Yaape dendidi Zifiroona gakidi, Haxar-Enaanan eqees; pudeha bagga zaway haysa.
NUM 34:10 “Doloha bagga zaway Haxar-Enaanape Safaama mallaa gakees.
NUM 34:11 Safaama mallafe dendidi Aynape doloha baggara Irbila duge wodhidi Kenereeta Abbaafe doloha baggara de7iya zumata gakees.
NUM 34:12 Hessafe hinte zaway duge Yordaanose shaafa wodhi zawaydi Maxine Abbaa gakees. Hinte biitta yuusho zawati haysata” yaagis.
NUM 34:13 Musey Isra7eele asaa haysada yaagidi Kiittis; “Uddufun bagga kochaas hinte saama yeggidi shaakana laata biittay haysa.
NUM 34:14 Robeela kochay, Gaade kochaynne Minaase kochaafe baggay,
NUM 34:15 banta laata Iyaarkofe hefinthan, Yordaanose Shaafape doloha baggan ekidosona” yaagis.
NUM 34:16 Goday Museko,
NUM 34:17 “Kahiniya Alaazaranne Nawe na7aa Iyyasuy he biitta asaas shaako.
NUM 34:18 Qassi biitta shaakanaw maadana mela issi issi kochaafe issi issi halaqa doorite.”
NUM 34:19 Enta sunthay haysafe kaallidi de7eysa. Yihuda kochaafe Yoofona na7aa Kaaleba;
NUM 34:20 Simoona kochaafe Amhuda na7aa Salam7eela;
NUM 34:21 Biniyaame kochaafe Kisiloona na7aa Eldaada;
NUM 34:22 Daane kochaafe Yogila na7aa Buuqa;
NUM 34:23 Yoosefa na7aa Minaase kochaafe Sufeeda na7aa Hani7eela;
NUM 34:24 Yoosefa na7aa Efreema kochaafe Shifixaana na7aa; Qamu7eela;
NUM 34:25 Zabloona kochaafe Farnaaka na7aa Elsafaana;
NUM 34:26 Yisakoora kochaafe Hooza na7aa Palxi7eela;
NUM 34:27 Aseera kochaafe Salooma na7aa Ahuda;
NUM 34:28 Niftaaleme kochaafe Amhuda na7aa Padahi7eela;
NUM 34:29 Kanaane biitta Isra7eele asaas laata oothidi shaakidi immana mela Goday kiitida asati haysata” yaagis.
NUM 35:1 Iyaarkofe hefinthan, Yordaanose shaafa matan de7iya Moo7abe denban, Goday Museko haysada yaagis;
NUM 35:2 “Isra7eeleti banta laatape Leeweti daana katamatanne enta yuushuwan hentha biitta immana mela entaw oda.
NUM 35:3 He katamati entaw duussa bessi gido; hentha biittati enta miizas, enta dorsaasinne enta hara mehetas gido.
NUM 35:4 Hinte entaw immiya hentha biittay ubba baggara katamaa gimbe dirsaafe issi mukulu wadha gido.
NUM 35:5 Katamaa giddo oothidi doloha baggara nam7u mukulu wadha, dugeha baggara nam7u mukulu wadha, wuloha baggara nam7u mukulu wadhanne pudeha baggara nam7u mukulu wadha wadhite. Leeweti he heera banta katamaas hentha biitta ootho.
NUM 35:6 “Leewetas hinte immida katamati, ase wodhida uray baqatidi attiya usupun katamata; hessata bolla gujidika, oytamanne nam7u hara katamata entaw immite.
NUM 35:7 Oytamanne hospun katamata enta hentha biittara issife Leewetas immite.
NUM 35:8 Isra7eele asaa laatape enta laata mela daro kochaafe daro katama, guutha kochaafe guutha katama ekidi Leewetas immite” yaagis.
NUM 35:9 Goday Museko,
NUM 35:10 “Isra7eele asaako haysada yaaga; Yordaanose shaafa pinnidi, Kanaane biitta hinte geliya wode,
NUM 35:11 issi asi qoponna ase wodhidaba gidiko he uray baqatidi attana mela katamata hintew doorite.
NUM 35:12 Yan suuthu zaaranaw koya hayqida uraa dabbotape I attees. Shempo wodhida deriya sinthan pirdas shiiqonna hayqanaw bessenna.
NUM 35:13 Ha hinte immiya usupun katamati hinte baqatidi attiya katama gido.
NUM 35:14 Heedzu katamati Yordaanose shaafape doloha baggan gido; qassi attida heedzati Kanaane biittan gido.
NUM 35:15 Ha usupun katamati eronna ase wodhida Isra7eele asay, betanchotinne guutha wodes hinte giddon de7iya asati baqatidi attiya bessi gido.
NUM 35:16 “Issi asi hara asi birata miishen shocidi wodhiko he uray shempo wodhis; I hayqo.
NUM 35:17 Issi asi wodhanaw danda7iya shuchan hara asi caddidi wodhiko he uray shempo wodhis; I hayqo.
NUM 35:18 Issi asi wodhanaw danda7iya mitha miishen hara asi shocidi wodhiko he uray shempo wodhis; I hayqo.
NUM 35:19 Suuthu zaariya mata dabboy he shempo wodhidaysa demmiko wodho.
NUM 35:20 “Issi asi hara asi ba wozanan morkidi sugi yeggiko woyko hayqo gidi iya bolla issiba holin he uray hayqiko,
NUM 35:21 woyko morkidi ba kushe cuucummidi dechin he uray hayqiko, I shempo wodhis; I hayqo. Suuthu zaariya mata dabboy shempo wodhidaysa demmiko wodho.
NUM 35:22 “Shin morketethi baynan, issi asi hara asi akeekona sugidi woyko qoponna iya bolla issiba holiko,
NUM 35:23 woyko wodhanaw danda7iya shuchu I be7onna iya bolla holin, he uray hayqiko, hessan morketethi bayna gishonne iya qohanaw qopidi dendonna gisho,
NUM 35:24 duulatay iya giddoninne iya suutha zaaranaw koya uraa giddon pirdiya wogay kaallidi de7iya wogaatho gido.
NUM 35:25 Eronna wodhidaysa suuthaa zaaranaw koyeysa kushepe he uraa duulatay ashshidi, I baqatidi attiya katamaa zaaro. He wode de7iya zayten tiyetida kahine halaqay hayqana gakanaw I yan de7o.
NUM 35:26 “Shin eronna wodhidaysi baqatidi attiya katamaa zawape betiko,
NUM 35:27 hayqida uraa dabboy iya demmidi wodhiko, shempo wodhon oyshetenna.
NUM 35:28 He wode de7iya kahine halaqay hayqana gakanaw he eronna wodhida uray baqatidi attiya kataman utto. Shin he kahine halaqay hayqidaape guye eronna wodhida uray ba soo simmanaw danda7ees.
NUM 35:29 “Ha wogaynne higgey hinte de7iya biittan hintewunne hinte zerethaas eqidi de7iya woga gido.
NUM 35:30 “Ase wodhida oonika I shempo wodhidaysa nam7u woyko heedzu marki markatiko hayqo, shin issi asa markatethan oonika hayqanaw bessenna.
NUM 35:31 Qassi shempo wodhida asape aca ekofite; I hayqanaw bessees.
NUM 35:32 Baqatidi attiya katama betida oodefeka kahine halaqay hayqanaape sinthe ba soo simmana mela aca iyape ekofite.
NUM 35:33 Suuthi biitta tunisiya gisho suuthu gussofite. Suuthu gussida uraa suuthaafe attishin, suuthi gukida biitta hara ogera tunatethaafe geeshshiya wogi baawa.
NUM 35:34 Taani, Goday Isra7eele asaa giddon de7iya gisho, hinte de7iya biitta, taani aqiya biitta tunisopite” yaagis.
NUM 36:1 Yoosefa kochaafe, Minaase na7aa Makira na7aa Galada kochaa halaqati Musekonne Isra7eele halaqatako yidi
NUM 36:2 “Nu godaw, Isra7eele asaas laata biitta saaman shaakada immana mela Goday nena kiittis; qassi nu ishaa Selophaada laata iya macca naytas immana mela nena kiittis.
NUM 36:3 Enti hara koche gidida Isra7eele asi geliko enta laatay nu aawata laatape eketidi enta ekiya zerethas guzhetees. Hessa gisho, nuus saaman imetida laatay guuxees.
NUM 36:4 Isra7eele asaas Ishatamantho Laytha bonchiya ba7aaley gakiya wode enta laatay enta ekida asaa kochaas guzhetees; hessa gidiko enta laatay nu aawata kochaa laatape eketana” yaagidosona.
NUM 36:5 Hessa gisho, Musey Godaape ekida kiitaa Isra7eele asaas haysada yaagidi odis; “Yoosefa kochay gidaysi like.
NUM 36:6 Goday Selophaada macca naytabaa kiittidaysi haysa; enti bantaw dosida azina gelanaw danda7oosona, shin enta kochaafe gidanaw koshshees.
NUM 36:7 Isra7eele asaa laatay issi kochaafe hara kochaas aadhofo; Isra7eele asay banta kochaa laata biitta minthidi naago.
NUM 36:8 Isra7eele asa giddon laata biitta ekida maccasi oonika ba aawa koche gidida azina gelanaw koshshees. Hessada oothiko enta kochaa laatay enta kushen gam7ees.
NUM 36:9 Yaatiko, laatay issi kochaafe hara kochaako aadhenna. Issi issi kochay ba laata biitta oykida mela daana” yaagis.
NUM 36:10 Yaatin, Selophaada macca nayti Goday Muse kiitidaysada oothidosona.
NUM 36:11 Selophaada macca nayti, Mahilo, Tirxo, Hoglo, Milkonne No7o geeteteysati banta aawa ishata nayta gelidosona.
NUM 36:12 Enti Yoosefa na7aa Minaase nayta kochaafe azina gelidosona; enta laatay enta aawa kochaas gidis.
NUM 36:13 Iyaarkofe hefinthan, Yordaanose shaafa matan, de7iya Moo7abe Denban Muse baggara, Goday Isra7eele asaas kiitida higgetinne wogati haysata.
DEU 1:1 Ha maxaafan xaafetida qaala ubbay Yordaanose shaafape hefinthan de7iya mela biittan enti de7ishin, Musey Isra7eele asaas odida qaala. He wode enti Suufape sintha baggara Paarana katamaas issi baggara, qassi Tofeela, Laabana, Haxerootanne Dizaaba katamata giddon de7iya Yordaanose zangaaran de7oosona.
DEU 1:2 Sayre deriya baggara Koreeba zumaape bidi Qaades-Barne gakanaw tohon tammanne issi gallasa oge.
DEU 1:3 Gibxefe enti keyida oytamantho laythan, tammanne issintho ageenan, koyro gallasan, Goday entaba Muse kiittidaba ubbaa Isra7eele asaas odis.
DEU 1:4 Hessi haniday Haseboona kataman kawotidi Amooreta haariya Sihoonanne Astarootaninne Edraa7an kawotidi Baasane haariya Ooge, Musey xoonidaape guyena.
DEU 1:5 Asay Yordaanosepe doloha baggara, Moo7aben de7ishin, Musey ha higgiya haysada yaagidi entaw qoncisethi doomis.
DEU 1:6 Nuuni Koreeba Zumaa bolla de7ishin, Goday, nu Xoossay nuuko haysada yaagis. “Hinte ha deriya bolla daro gam7ideta.
DEU 1:7 Dunkaaniya laallite; dendidi derey dariya Amooreta biittanne Araban de7iya enta yuushuwan de7iya biitta ubbaa biite. Hessika Yordaanose zangaara, gezzenne gadha biitta, Negebanne Medetiraane Abbaa gaxa aadhite. Kanaane biitta biite; Libaanose dereta kanthidi, Efraxiisa Shaafa gakanaw biite.
DEU 1:8 Heko, taani hintew ha biitta immas. Bidi hinte aawatas, Abrahaames, Yisaaqas, Yayqoobasinne enta sheeshas immanaw Goday caaqida biitta laattite” yaagis.
DEU 1:9 Musey asaako, “He wode taani hintew haysada yaagada odas; taani tarka hintena tookanaw danda7ike.
DEU 1:10 Goday, hinte Xoossay hinte taybuwa salo xoolintoda darsis.
DEU 1:11 Goday hinte aawata Xoossay, hintena haysafe aathidi mukulu toho gujidi darsonne I gidaysada hintena anjo.
DEU 1:12 Shin hinte metuwa, hinte toohuwanne hinte ooshsha ubbaa taani tarka waata tookanaw danda7ayna?
DEU 1:13 Hinte kochatape cinca, akeekanchonne bonchetida asata doorite; taani hinte bolla enta halaqa oothana” yaagis.
DEU 1:14 Hinte zaaridi, “Ne qofay lo77o” yaagideta.
DEU 1:15 Hessa gisho, taani hinte kochaafe cincanne bonchetida asata ekada, shaalaqa, mato halaqa, hamsalaqanne asiralaqa, hintena ayseysata oothada hinte bolla shuumas.
DEU 1:16 Taani enta, “Hinte ishata giddon de7iya odaa si7ite; he oday issi Isra7eele asaapenne iya ishaape giddon woyko Isra7eele asaapenne hara dere asape giddon de7iyaba gidikoka, odaa si7idi suure pirdite.
DEU 1:17 Pirdi Xoossaba gidiya gisho, hinte pirdan issi baggaa maaddofite; gitaa si7eysada guuthaa si7ite; asa som7os yayyofite. Daro deexo gidida odata taako ehite; hessa taani si7ana.”
DEU 1:18 Hinte oothanaba ubbaa ta he wode hintena kiittana.
DEU 1:19 Hessafe guye, “Nuuni Koreeba zumaape dendida; Goday nu Xoossay nuna kiittidaysada, derey dariya Amooreta biitta biya ogen de7iya he hinte be7ida gitanne yashshiya mela biitta kanthidi Qaades-Barne gakida.
DEU 1:20 Goday nu Xoossay nuna laatisiya, derey dariya Amooreta biittay haysa.
DEU 1:21 Goday hinte Xoossay ha biitta hintew immis. Goday hinte aawata Xoossay hintew odidaysada keyidi, ha biitta laattite; yayofite; ufaysi qanxofite” yaagas.
DEU 1:22 Hinte ubbay taako yidi, “He biitta xomoosidi, nu baanaw bessiya ogiyabanne gelana katamata hanota new ehiya asata nuupe sinthe yeddoos” yaagideta.
DEU 1:23 He qofay taw lo77o daanin, hintefe tammanne nam7u asi, kochaafe kochaafe issi asi dooras.
DEU 1:24 Enti bidi, he derey dariya biitta kanthidi, Eshkola zangaara gakanaw de7iya biitta wochidosona.
DEU 1:25 He biittan doliyabape guutha ayfe banta kushen oykidi nuuko yidosona. Qassi, “Goday nu Xoossay nuus immiya biittay lo77o biitta” giya wore ekidi yidosona.
DEU 1:26 Shin hinte Godaa hinte Xoossaa kiitta ixas gidi yaa boonna ixideta.
DEU 1:27 Hinte dunkaaniya giddon issoy issuwara haysada yaagidi zuuzumideta. “Goday nuna ixida gisho, dhaysanaw Amoore biitta asata kushen aathidi immanaw Gibxe biittafe kessis.
DEU 1:28 Yaatin yaa ayis baanee? Nu ishati, ‘He biittan de7iya asati nuupe daroosonanne aduqosona. Katamatika gitanne salo gakanaw gimbetidaysata. Hessa bolla qassi Anaaqe geetetiya daro adussa asata yan be7ida’ yaagidi, nu wozana til7isidosona” yaagideta.
DEU 1:29 Yaatin taani, “Yayyofite woyko dagammofite.
DEU 1:30 Hinte sinthara biya Goday hinte Xoossay kase Gibxen hinte ayfiya sinthan hintew oothidaysada ha77ika hintew I oletana.
DEU 1:31 Qassi hinte ha mela biitta gakanaw yida oge ubban asi ba na7a tookeysada Goday hinte Xoossay hintena tookidaysa be7ideta” yaagas.
DEU 1:32 Ha ubbay haninka, hinte dunkaanana bessaanne hinte baana ogiya bessanaw qamma tama tuussan, gallas shaara tuussan hintena kaalethida Godaa hinte Xoossaa ammanibeketa.
DEU 1:34 “Goday hinte haasaya si7idi hanqetis; haysada yaagidi caaqis;
DEU 1:35 taani hinte mayzatas immana gada caaqida ha lo77o biitta, ha iita yeletethaafe issoyka be7enna.
DEU 1:36 Ha biitta be7anay Yoofona na7aa Kaaleba xalaala. I yedhida biitta iyasinne iya kochaas immana; I ba kumetha wozanaape Godaa kaallis” yaagidi caaqis.
DEU 1:37 Hinte gaason Goday ta bollaka hanqetidi, haysada yaagis; “Hari attoshin, neka he biitta gelaka.
DEU 1:38 Shin nena maaddiya Nawe na7ay, Iyyasuy he biitta gelana. I Isra7eele asaa he biittaa laatisanaw de7iya gisho neeni iya minthetha.
DEU 1:39 Hinte, nu nayti di7etana gida guuthati, iitanne keeha shaakidi eronna hinte nayti he biitta gelana. Taani he biitta entaw immana; entika laattana.
DEU 1:40 Shin hinte guye simmidi, Zo7o Abbaa efiya ogiya oykidi, mela biitta biite” yaagis.
DEU 1:41 Hinte zaaridi, “Nuuni Godaa bolla nagara oothida; ha77i nuuni Goday nu Xoossay kiiteysada, keyidi oletana” yaagideta. Hinte ubbay ola miishe dancidi, derey dariya biitta keyidi oletanaysa laafaba oothidi qopideta.
DEU 1:42 Shin Goday taako, “Taani entara doonna gisho, enti keyidi oletona mela oda. Akay, giiko, enta morketi enta xoonana” yaagis.
DEU 1:43 Yaagin, taani hintew odas, shin hinte Godaa kiitta ixidetape attishin, ta odeysa si7ibeeketa; yaatidi otoron derey dariya biitta keydeta.
DEU 1:44 He derey dariya biittan de7iya Amooreti hintera ola gahetidi, hintena mathi gooddeysada gooddidi, Sayre biittafe bidi Horma gakanaw shocidosona.
DEU 1:45 Hinte guye simmidi, Godaako yeekideta; shin Goday hinte yeehuwa si7ibeenna woyko hayzibeenna.
DEU 1:46 Hessa gisho, hinte Qaadesan adussa wode gam7ideta.
DEU 2:1 Hessafe guye, Goday tana kiittidaysada, nuuni Zo7o Abbaa efiya ogiya oykidi guye simmidi mela biitta metootishe, derey dariya Sayre biittan daro gallasa toylatishe yuuyida.
DEU 2:2 Hessafe guye, Goday taako haysada yaagis.
DEU 2:3 “Ha derey dariya biitta adussa wode yuuyidaysi hintew gidana; pudeha bagga simmidi biite.
DEU 2:4 Asaa neeni yaagada kiitta; ‘Sayren de7ey Eesawe nayta hinte ishata gidiya gisho enta biittara hinte kantheeta. Enti hintew yayyana, shin hinte keehi naagetite.
DEU 2:5 Taani enta biittafe tohoy yedhiya bessa mela hintew immonna gisho entara oletofite. Taani derey dariya Sayre biitta laata oothada Eesawes koyrottada immas.
DEU 2:6 Hinte miya kathaanne uyaa haatha entafe miishen shammite’ ” yaagada kiitta.
DEU 2:7 Goday hinte Xoossay hinte oothidaba ubbaa anjis; hinte ha wolqaama mela biittan hemetiya wode hintena naagis. Oytamu laytha ubban Goday hinte Xoossay hintera de7is; hintew aybaaka pacisibeenna.
DEU 2:8 Hessa gisho, “Nuuni nu ishata gidiya Eesawe nayti de7iya Sayre biittara kanthidi bida. Qassi Elaatanne Exiyoon-Gabira katamatape dendidi, Maxine Abbaako gathiya ogiya aggidi, Moo7abe mela biittara aadhida.
DEU 2:9 Goday taako, ‘Taani enta biittafe aybaka hintew immonna gisho, Moo7abe asaara kacetofite woyko enta olopite. Era katamaa taani laata oothada Looxe kochaas koyro immas’ ” yaagis.
DEU 2:10 (He biittan kase minonne daro gidida, qassi Anaaqe kochatada adusse gidida Emimeta geetetiya asati de7idosona.
DEU 2:11 Enti Anaaqetada Raafaymeta geetetoosona. Shin Moo7abe asay enta Emimeta gidi xeegosona.
DEU 2:12 Hoora biitta asay kase Sayren de7idosona, shin Isra7eele asay laattana mela Goday entaw immida biittan enti oothidaysada Eesawa kochati Hoorata enta biittafe shoddidosona. Qassi banta sinthafe enta dhaysidi enta bessan uttidosona.)
DEU 2:13 Goday nuuko, “Ha77i dendite, Zareada Shaafa pinnite” yaagin, nuuni Zareda Shaafa pinnida.
DEU 2:14 Nuuni Qaades-Barnefe dendidi, Zareda Shaafa pinnana gakanaw hastamanne hospun laythi aadhis. He wode Goday entaw caaqidaysada olas gakida adde ubbay wuris.
DEU 2:15 Dunkaanida gutaape enti kumethi dhayana gakanaw, Godaa kushey enta bolla deexis.
DEU 2:16 Olas gakida adde asa ubbay kumethi dhaydaapenne asaa giddofe hayqidi wuridaape guye,
DEU 2:17 Goday taako,
DEU 2:18 “Era ogiyara hachi hinte Moo7abe biitta kantheeta.
DEU 2:19 Hinte Amoone asaa biitta gakiya wode enta bochofite woyko entara ooyetofite. Amoone asata biittafe aybibaaka taani hintew laata oothada immike. Taani he biitta Looxe kochaas laata oothada koyro immas” yaagis.
DEU 2:20 [He biittay kase yan de7iya asay xeegetiya sunthaa Raafaymeta biitta geetetidi xeegetees. Qassi Amooneti enta Zamzumeta gidi xeegosona.
DEU 2:21 Enti Anaaqetada adusse, minonne daro dere, shin Goday enta dhaysin, Amooneti enta biitta laattidi uttidosona.
DEU 2:22 Goday Sayren de7iya Eesawe kochaas oothidaysada, enta bolla oothis. Hessika I he biittan de7iya Hoorata dhaysin, Eesawe kochay enta biitta laattidi hachi gakanaw uttidosona.
DEU 2:23 Gaaza gakanaw de7iya heeran de7iya Aweeti, Kaftoore biittafe yida Kaftooreti enta dhaysidi enta biittan uttidosona.]
DEU 2:24 Qassika Goday nuuko, “Dendite; Arnoona Shaafa pinnite. Heko, Amoore biitta asi gidida Haseboona kawa Sihoonanne iya biitta ta hinte kushen aathada immas; iya olidi iya biitta laattite.
DEU 2:25 Hachife doomin salope garsan de7iya asa ubbay hintew yayyana mela taani oothana. Enti hintebaa si7iya wode ubban yashshan kokorana” yaagis.
DEU 2:26 Hessafe guye, Qidemoota mela biittafe Haseboona kawa Sihoonas kiitanchota bolla haysada yaagada saro qaala kiittas.
DEU 2:27 “Nuna ne biittara aatharki; nuuni wogga ogiya xalaala oykidi baana; iyape ushachi woyko haddirsi gooko.
DEU 2:28 Nuuni miya kathasinne uyaa haathas miishe qanxana. Nu koyey ne biittara kanthi aatha xalaala.
DEU 2:29 Sayren de7iya Eesawe kochatinne, Eran de7iya Moo7abe kochati nuna aathidaysada Goday nu Xoossay, nuus immiya biittas Yordaanose shaafa nuuni pinnana gakanaw yaara nuna aatha” yaagas.
DEU 2:30 Shin Haseboona kawoy Sihooney nuna aathona ixis. Goday hinte Xoossay ha77i oothidaysada iya hinte kushen aathidi immanaw koyida gisho iya wozanaa muumisisdi, otorancho oothis.
DEU 2:31 Hessafe guye Goday taako, “Heko, Sihoonanne iya biitta ta new aathada immo doomas; ha77i xoonada iya biitta laatta” yaagis.
DEU 2:32 Sihooney ba olanchota ubbaa ekidi Yahaaxa geetetiya bessan nuura oletanaw keyis.
DEU 2:33 Shin Goday nu Xoossay nuus iya aathidi immin, iya, iya adde naytanne iya olanchota ubbaa nuuni wodhida.
DEU 2:34 He wode nuuni iya katamata ubbaa oykidi, iyan de7iya adde, maccanne na7a ubbaa ashshona dhaysida.
DEU 2:35 Enta mehiyanne nuuni oykida katamatape di77idaysa xalaala nuus ekida.
DEU 2:36 Arnoona Zangaara gaxan de7iya Aro7eerapenne he zangaara giddon de7iya katamaape bidi Galada biitta gakanaw nuura eqetida issi katamika deenna. Goday nu Xoossay enta ubbaa nu kushen aathidi immis.
DEU 2:37 Shin nuuni Amoone biittako, Yaaboqa Shaafa gaxan de7iya biittako, gezze biittan de7iya katamatakonne Goday nu Xoossay nuuni boonna mela diggida bessaa ubbaa shiiqibooko.
DEU 3:1 Hessafe guye, nuuni simmidi Baasane efiya ogiyara keyida. Baasane kawoy Oogey, ba olanchota ubbaara Edraa7a geetetiya bessan nuura oletanaw keyis.
DEU 3:2 Shin Goday taako, “Iyaw yayyofa; taani iya, iya olanchotanne iya biitta ubbaa ne kushen aathada immas. Haseboonan uttidi kawotida Amooreta kawa Sihoona bolla oothidaysada neeni iya bolla oothana” yaagis.
DEU 3:3 Hessa gisho, Goday nu Xoossay Baasane kawa Oogenne iya asa ubbaa nu kushen aathidi immis; nuuni entafe issuwaka ashshona wursidi wodhida.
DEU 3:4 He wode nuuni iya katamata ubbaa oykida; nuuni oykiboonna issi katamika deenna; hessika, Baasane kawa Oogey Argoba biittan aysiya usupun tammu katamata ubbaa oykida.
DEU 3:5 Ha katamati ubbay adussa gimben diretidaysatanne pengeti kobetidaysata. Gimbe dirsi bayna daro gutatika de7oosona.
DEU 3:6 Haseboona kawa Sihoona bolla oothidaysada nuuni enta kumethi dhaysida. Enta katamatan de7iya adde, maccanne na7a ashshona dhaysida.
DEU 3:7 Shin mehe ubbaanne katamatape di77idabaa nuus ekida.
DEU 3:8 He wode nuuni Arnoona zangaarape bidi Armoona zumaa gakanaw de7iya biitta, Yordaanose Shaafape doloha baggara de7iya nam7u Amoore biittata kawotape ekida.
DEU 3:9 (Sidoona biitta asay Armoona zumaa, Siriyoona gidi xeegiya wode, Amoore biitta asay Sanira gidi xeegosona.)
DEU 3:10 Nuuni demba biittan de7iya katamata ubbaa, Galada biitta ubbaa, Baasane biitta ubbaanne Baasane biittan Oogey haariya Salakanne Edraa7a katamata gakanaw de7iya bessaa oykida.
DEU 3:11 (Raafaymetape attiday Baasane kawa Ooge xalaala. Iya arsay birata arsi; he arsay hachi gakanaw Raaba geetetiya Amooneta kataman de7ees; iya adussatethay hospun wadha; gompay oyddu wadha.)
DEU 3:12 He biitta nuuni laatidaape guye, Arnoona shaafa doonan de7iya Aro7eera katamaape doomidi de7iya bessaanne derey dariya Galada biittafe baggaa gujada iya katamatara Robeelasinne Gaade kochaas taani immas.
DEU 3:13 Galadape attidaysanne Oogey haariya Baasane biitta ubbaa Minaase kochaa baggaas immas; hessika, Argoba kawotethaa. (He Baasane biittay ubbay Raafaymeta biitta geetetidi xeegetees.
DEU 3:14 Minaase kochaafe Ya7iri kumetha Argoba biitta laattis; hessika Geeshuretanne Ma7ikata biitta gaxaa gakanaw de7iya Baasane biitta. I he katamata ba sunthan xeegetana mela oothis; hessa gisho, enti hachi gakanaw, Ya7ira katamata geetetidi xeegetoosona.)
DEU 3:15 Galada biitta Minaase koche gidida Makiras immas.
DEU 3:16 Robeelanne Gaade kochaas Galadape bidi Arnoona shaafa mata gakanaw de7iya biitta immas. Dugeha baggara Arnoona Shaafape baggay enta zawa; qassi pudeha baggara Amooneta biittas gaxa gidida Yaaboqa shaafay zawa.
DEU 3:17 Wuloha baggara, enta zaway Araban de7iya Yordaanose shaafa gakees; hessika Galila Abbaafe doomidi Pisga zuma xaphon de7iya Maxine Abbaa (Hayqo Abbaa) gakanaasa.
DEU 3:18 He wode taani hintena haysada yaagada kiittas. “Goday hinte Xoossay he biitta hinte laattana mela hintew immis. Hiza hintew de7iya tooranchota ubbaa ola miishe dancisidi, hinte ishata gidida Isra7eele asaape sinthe aathite.
DEU 3:19 Hintew daro mehey de7eysa taani erayis; hessa gisho, hinte macheti, hinte naytinne hinte mehey taani hintew immida katamatan de7ishshona.
DEU 3:20 Goday hintena shempisidaysada hinte ishata shempisana gakanawunne Yordaanose shaafape hefinthan Goday, hinte Xoossay entaw immiya biitta enti ekana gakanaw entaw oletite. Hessafe guye, taani hintew immida biitta simmeta” yaagis.
DEU 3:21 Taani he wode Iyyasu haysada yaagada kiittas. “Goday, hinte Xoossay ha nam7u kawota bolla oothidaba ubbaa neeni ne ayfen be7adasa; hinte oykanaw biya kawotethata ubbaa bolla Goday hessada oothana.
DEU 3:22 Hintew oletey Godaa hinte Xoossaa gidiya gisho, entaw yayyofite” yaagis.
DEU 3:23 He wode taani haysada yaagada Godaa minthada woossas.
DEU 3:24 “Ubbaa Haariya Godaw, ne gitatethaanne ne mino kushiya tana, ne aylliya bessanaw doomadasa. Ne oothiya wolqaama oosota oothanaw danda7ey salon gidin sa7an hara xoossi de7ii?
DEU 3:25 Godaw, taani bada Yordaanose shaafape hefinthan de7iya derey dariya lo77o biittanne Libaanose deriya be7ana mela tana yeddarki” yaagas.
DEU 3:26 Shin Goday hinte gaason tana hanqetidi si7onnan ixis. Goday taako, “Hiza new gidana; ha odaa nam7antho denthada haasayopa.
DEU 3:27 Hessa aggada denda; Pisga zuma bolla keya; yan eqada he biitta wuloha bagga, pudeha bagga, dugeha bagganne doloha bagga ne ayfiya dhoqu oothada xeella. Neeni ha Yordaanose shaafa polo pinnaka.
DEU 3:28 Shin neeni Iyyasu kiitta; iya zoranne minthetha. I ha asaa kaalethidi pinthananne ha neeni be7iya biitta enta laatisana” yaagis.
DEU 3:29 Hessa gisho, nuuni Beet-Pa7oora sinthan de7iya zangaaran gam7ida.
DEU 4:1 Ha77ika Isra7eele asaw, hinte de7on daana melanne Goday, hinte mayzata Xoossay, hintew immiya biitta hinte laattana mela ta hintena tamaarsiya wogaanne higgiya si7itenne oothite.
DEU 4:2 Ta hintena kiittiya, Godaa hinte Xoossaa kiitta naagitepe attishin, iya bolla aykoka gujofite; iyape aykoka pacisopite.
DEU 4:3 Bi7eel-Fagoora zuma bolla Goday oothidaba hinte, hinte ayfen be7ideta. Goday, hinte Xoossay Bi7eel-Fagoora eeqa goyinnidaysata ubbaa hinte giddofe dhaysis.
DEU 4:4 Shin hinte Godaas, hinte Xoossaas ammanetida gisho, hachi gakanaw ubbayka de7on de7eeta.
DEU 4:5 Heko, hinte laattanaw geliya biittan oothana mela Goday, ta Xoossay tana kiitida wogaanne higgiya ta hintena tamaarsas.
DEU 4:6 Hinte enta naagitenne oothite. Hinte hessa oothiko, hinte ay mela cinceko hara asay hintena be7ana. Enti ha wogabaa si7iya wode, “Tumaka ha gita kawotethay cincanne akeekancho kawotethi” yaagana.
DEU 4:7 Nuuni iya xeegiya wode ubban Goday, nu Xoossay nuus mata gideysada xoossi mata gidida hara ay wolqaama kawotethi de7ii?
DEU 4:8 Taani hachi hinte sinthan wothiya ha higge ubbaa mela xillo gidida woginne higgey de7iya hara ay gita kawotethi de7ii?
DEU 4:9 Hiza ne de7o laytha ubban ha ne be7idaba ubbaa dogonna melanne ne wozanan wothana mela naageta. Ne naytanne ne nayta nayta tamaarsa.
DEU 4:10 Koreeba zumaa bolla Godaa, hinte Xoossaa sinthan hinte eqida wode Goday taako, “Ta qaala enti si7idi, banta laytha ubban taw yayyana melanne banta nayta hessa tamaarsana mela asaa taako shiisha” gidaysa akeekite.
DEU 4:11 He wode hinte shiiqidi zumaa xaphon eqideta; salo gakanaw tami eexis. He zumaa xaphoy sakana dhumaninne shaaran goozetis.
DEU 4:12 Goday tama giddon gididi hintew odis. Hinte iya girsa si7idetape attishin, iya malaa be7ibeeketa.
DEU 4:13 Hinte oothana mela I hintena kiitida ba caaquwa hintew odis; hessika Tammu Kiitata. I enta nam7u loche shuchata bolla xaafis.
DEU 4:14 Hinte laattanaw biya biittan oothana mela wogaanne higgiya hintena tamaarsana mela Goday tana he wode kiittis.
DEU 4:15 Goday Koreeba zumaa bolla tama giddon gididi hintew odida gallas hinte iya malaa be7iboona gisho loythi naagetite.
DEU 4:16 Adde woyko macca medhon oosetidaba gidin,
DEU 4:17 sa7an de7iya do7a ubbaa leemison gidin, salora paalliya kafo ubbaa leemison gidin,
DEU 4:18 sa7a bolla ulora gooshetiya medhetetha leemison gidin, haatha giddon de7iya molo leemison gidin, hinte tunonna mela hintew xoosse oothidi medhofite.
DEU 4:19 Salo pude xeellida, Goday ne Xoossay salope garsan de7iya kawotethatas imida awa, ageena, xoolintotanne salo medhetethata ubbaa be7ida, ne entaw goyinnada balonna mela naageta.
DEU 4:20 Shin Goday hintena hachi hinte hanidaysada baw dummatida ase oothanaw birata seerisiya cooce mela gidida Gibxefe kessidi ehis.
DEU 4:21 Hinte gaason Goday tana hanqetidi, Yordaanose pinnonna melanne Goday hinte Xoossay, laata oothidi hintew immiya lo77o biitta taani gelonna mela caaqis.
DEU 4:22 Hessa gisho, taani Yordaanose shaafa pinnonna ha biittan hayqana, shin hinte pinnidi he lo77o biitta laatteeta.
DEU 4:23 Hiza Goday, hinte Xoossay hintera caaqida caaquwa dogopite. Goday, ne Xoossay nena oothofa gida ay medhon oosetida misile new eeqa oothonna mela naageta.
DEU 4:24 Goday, ne Xoossay miya tamanne qanaatiya Xoossi.
DEU 4:25 Ne naytanne, nayta nayta yelada he biittan adussa wode de7iya wode ay medhon oosetida misile goyinnada tuniko, qassi Godaa, ne Xoossa hanqethanaw iya sinthan iitaba oothiko,
DEU 4:26 hinte Yordaanose shaafa pinnidi laattanaw biya biittafe issoyka attonna elle dhayanaw de7eysas, ta hachi hinte bolla salonne sa7a markayayis. Hinte polo dhayanape attishin, he biittan adussa wode de7eketa.
DEU 4:27 Goday hintena hara asaa giddon laallana; hintena I laaliya kawotethata giddon hinte tayboy guutha gidana.
DEU 4:28 Yan hinte mithafenne shuchafe asa kushen giigida be7onna, si7onna, moonnanne singonna xoossata goyinnana.
DEU 4:29 Shin yan de7ashe ne Godaa, ne Xoossaa koyana; ne iya kumetha wozanapenne kumetha shempofe koyko demmana.
DEU 4:30 He meto ubbaa giddon ne un7etada de7iya wode wursethan Godaako, ne Xoossaako simmananne iya qaalas kiitetana.
DEU 4:31 Goday, ne Xoossay maarotethan kumida Xoosse gidiya gisho, I nena aggenna woyko dhaysena; ne mayzatas caaqida caaquwa dogenna.
DEU 4:32 Goday biittan ase medhida gallasape doomidi, hintefe kase aadhida wodiya ane pilgite; hessa mela gitabay polo hani eriyako woyko si7etidi eriyako saluwas ha gaxape ya gaxaa gakanaw ane oychite.
DEU 4:33 Tama laco giddon Goday haasayin si7idi, hinte dhayona de7on de7eysada Goday odishin si7idi, de7on de7ida hara asi de7ii?
DEU 4:34 Woyko Goday, hinte Xoossay hinte xeellishin, Gibxe biittan hintew oothidaysada paacen, malaatan, malaalsiyaban, olan, wolqaama kusheninne micetida qesen, gita yashshan hara kawotetha giddo gelidi, issi kawotethaa baw ekanaw butetida hara xoossi de7ii?
DEU 4:35 Goday, Xoosse gideysa hinte erana mela hessa I hintena bessis; iyape attishin, hara xoossi baawa.
DEU 4:36 I hintena tamaarsanaw koyida gisho, ba girsaa salope sissis. Qassi ha sa7an ba gita tama hintena bessis; he tama giddofe hinte iya qaala si7ideta.
DEU 4:37 I hessa oothiday hinte aawata siiqidi, entafe guye yeletiya enta sheeshata doorida gisho, hintena Gibxefe ba gita wolqan kessis.
DEU 4:38 Hachi hinte be7eysada, hintena gelsanawunne enta biitta hintew laata oothidi immanaw, hintefe dariyanne wolqaamiya kawotethata hinte sinthafe yedethidi kessis.
DEU 4:39 Hiza, bolla salon gidin, garsa sa7an gidin, Goday Xoosse gideysa erite; hinte wozanan wothite; hara xoossi baawa.
DEU 4:40 Hessa gisho, hintewunne hintefe guye hinte naytas ubbabay lo77o gidana mela, qassi Goday hinte Xoossay hintew merinaw immiya biittan hinte laythay aduqana mela, taani hachi hintena kiittiya wogaanne higgiya naagite.
DEU 4:41 Hessafe guye, Musey Yordaanose hefinthan doloha baggara heedzu katamata dummayis.
DEU 4:42 Hessa I dummayiday kase morketethi bayna de7ishin, eronna de7ishe ase wodhida asi yaa baqatana melasa. He uray he katamatape issuwau baqatidi ba shempuwa ashshanaw danda7ees.
DEU 4:43 Hessa gisho, Robeela kochaas gadhan dere bolla de7iya Boosora katamaa, Gaade kochaas Galadan de7iya Ramootanne Minaase kochaas Baasanen de7iya Goolana katamata dummayis.
DEU 4:44 Musey Isra7eele asaas immida Godaa higgey haysa;
DEU 4:45 Musey ha wogaa, awaajuwanne higgiya enti Gibxefe keyida wode immis.
DEU 4:46 Hessi entaw imetiday enti Beet-Pa7oora katamaa sinthan de7iya Yordaanosepe doloha baggara de7iya zangaaran de7ishina. He bessay Museynne Isra7eele asay Gibxefe keyida wode olidi xoonida, Haseboonan uttidi Amoore haariya kawa Sihoona biitta.
DEU 4:47 He wode enti iya biittanne Baasane kawa Ooge biitta, hessika Yordaanosepe doloha baggan de7iya nam7u Amoore kawota laattidosona.
DEU 4:48 He biittay Arnoona zangaaran Aro7eera katamaape bidi, Siriyoona deriya gakees; Siriyoona geetetidi xeegetiya derey Armoona zuma.
DEU 4:49 He biittay Yordaanosepe doloha baggara de7iya Araba biitta ubbaa ekidi bidi, Pisga deriya xaphon de7iya Maxine Abbaa gakees.
DEU 5:1 Musey Isra7eele asaa ubbaa issife xeegidi, haysada yaagis; “Hinteno, Isra7eele asaw taani hachi hintew odiya wogaanne higgiya si7ite; enta tamaarite; minthidi naagite.
DEU 5:2 Goday, nu Xoossay Koreeba zumaa bolla nuura caaqis.
DEU 5:3 Goday he caaquwa caaqiday nu aawata xalaalara gidonashin, hachi de7on de7iya nu ubbaara caaqis.
DEU 5:4 He zumaa bolla eexiya tama giddon gididi, Goday som7on hintera haasayis.
DEU 5:5 Taani he wode Goday giyaba hintew odanaw, Godaapenne hintefe giddon eqas. Hinte tamas yayyidi zumaa bolla keyibeketa. Goday haysada yaagis.
DEU 5:6 “Gibxe biittafe, aylletetha keethaafe nena woziday taani Godaa, ne Xoossaa.
DEU 5:7 “Taape attishin, hara xoossati new de7opo.
DEU 5:8 “Bolla salon de7iyaba gidin, garsa sa7an de7iyaba gidin, woyko haatha giddon de7iyaba gidin, ay misile new eeqa oothofa.
DEU 5:9 Ne iyaw hokofa woyko iyaw goyinnofa. Taani tana ixeyisata aawata nagaraa gisho, nayta heedzanthonne oyddantho yeletaa gakanaw seerayis. Taani, Goday, ne Xoossay qanaatiya Xoossaa.
DEU 5:10 Shin taani tana siiqeysatanne ta kiita naageysata mukulu yeletaa gakanaw ta merinaa siiquwa bessayis.
DEU 5:11 “Godaa, ne Xoossaa sunthaa coo xeegopa. Goday ba sunthaa coo xeegiya uraa seeronna aggenna.
DEU 5:12 “Goday, ne Xoossay nena kiittidaysada Sambaata gallasaa geeshshi oothada naaga.
DEU 5:13 Neeni ne ooso ubbaa usupun gallasan ootha.
DEU 5:14 Shin laapuntha gallasay Godaas, ne Xoossaas Sambaata. He gallas ay oosoka oothofa. Neeni woyko ne adde na7ay woyko ne macca na7iya woyko ne oosanchoy woyko ne oosanchiya woyko ne booray woyko ne harey woyko ne hara meheti woyko ne kataman de7iya bete asi he gallas ay oosoka oothopite. Neeni shempeysada ne adde aylleytinne macca aylleti shempo.
DEU 5:15 Neeni Gibxe biittan aylle gidada de7idaysa dogopa. Goday, ne Xoossay ba wolqaama kushiyaninne ba micetida qesiyan yaape nena kessidaysa dogopa. Goday, ne Xoossay Sambaata gallas neeni naagana mela kiitiday hessa gishosa.
DEU 5:16 “Goday, ne Xoossay new immiya biittan ne laythay aduqana malanne new lo77ana mela Goday, ne Xoossay nena kiittidaysada ne aawanne ne aayiw boncha.
DEU 5:17 “Wodhopa.
DEU 5:18 “Laammofa.
DEU 5:19 “Kaysotopa.
DEU 5:20 “Wordo markatofa.
DEU 5:21 “Hara asa macho amottofa; iya keethaa, iya shooqa, iya adde aylliya woyko iya macca aylliw woyko iya boora woyko iya hariya woyko iyaw de7iyaba aybaka amottofa” yaagis.
DEU 5:22 Zumaa bolla tama, shaaranne dhumaa giddofe Goday dhoqu gida girsan duulata ubbaas odida qaalati haysata. I enta bolla aybaka gujibeenna; enta nam7u loche shuchata bolla xaafidi taw immis.
DEU 5:23 Zumay taman xuugetishin, dhumaa giddofe girsaa hinte si7ida wode hinte kochaa halaqatinne cimati taako yidi,
DEU 5:24 haysada yaagidosona; “Nuuni Godaa, nu Xoossaa girsaa tamaa giddofe si7ida wode Goday, nu Xoossay ba bonchuwanne ba gitatetha nuna bessis. Xoossi asara haasayin si7idi asi de7on daanaw danda7eysa hachi nuuni be7ida.
DEU 5:25 Shin ha wolqaama tamay nuna dhaysanaw danda7ees; yaatin, nuuni ayis hayqanee? Godaa, nu Xoossaa qaala nuuni nam7antho si7iko hayqana.
DEU 5:26 Asho ma7ida asan nuuni si7idaysada tama giddon gididi odishin, de7o Xoossaa qaala si7idi de7on de7ida asi oonee?
DEU 5:27 Hessa gisho, neeni shiiqada Goday, nu Xoossay giyaba ubbaa si7a; Goday, nu Xoossay new odiyaba nuus oda; nuka si7idi kiitetana” yaagideta.
DEU 5:28 Hinte taw odishin Goday, hinte giyaba si7idi, taako haysada yaagis; “Ha asay new odiyaba ubbaa si7as; enti gidaba ubbay like.
DEU 5:29 Entawunne enta naytas merinaw ubbabay injetana mela taw yayyanawunne ta kiita naaganaw entaw ubba wode hessa mela wozani de7eerenne.
DEU 5:30 Ha77i neeni bada enti banta dunkaaniya simmana mela oda.
DEU 5:31 Shin neeni haysan ta matan gam7a. Enti laattana mela taani entaw immiya biittan enti oothanaba neeni enta tamaarsana ta kiita, ta awaajuwanne ta higgiya ubbaa ta new odana” yaagis.
DEU 5:32 Hinteno, Isra7eele asaw, Goday, hinte Xoossay hintena kiittidaba ubbaa oothanaw naagetite; iyape ushachi woyko haddirsi goopite.
DEU 5:33 Hinte de7on daana mela, ubbay hintew injetana melanne hinte laattiya biittan hinte laythay aduqana mela, Goday hinte Xoossay hintena kiitida kiita naagite.
DEU 6:1 Hinte laattanaw biya biittan hinte oothana mela ta hintena tamaarsana mela Goday, hinte Xoossay tana kiitida kiitay, awaajoynne higgey haysa.
DEU 6:2 Ne laythay aduqana mela ne, ne naytinne ne nayta nayite Godaa ne Xoossaa yayya; ta hachi new immiya Godaa awaajiyanne higgiya ne laytha ubban naaga.
DEU 6:3 Neno, Isra7eele si7a; ubbabay new injetana melanne Goday ne aawata Xoossay, new gidaysada maathinne eessi goggiya biittan ne darana mela ha higgeta si7a; minthada naaga.
DEU 6:4 Neno, Isra7eele si7a; Goday nu Xoossay issi Xoossi.
DEU 6:5 Ne Godaa, ne Xoossaa ne kumetha wozanaape, ne kumetha shempuwafenne ne kumetha wolqaafe dosa.
DEU 6:6 Hachi ta nena kiittiya ha kiitaa ne wozanan wotha.
DEU 6:7 Enta neeni ne nayta tamaarsa; neeni ne son uttiya wode, oge hemetiya wode, zin7iya wodenne dendiya wode entaba haasaya.
DEU 6:8 Malla oothada ne kushen enta qacha; qassi ne som7on mallada wotha.
DEU 6:9 Ne penge zizgeta bollanne ne dirsa pengiya bolla enta xaafa.
DEU 6:10 Goday, ne Xoossay new immana gidi ne aawatas Abrahaames, Yisaaqasinne Yayqoobas caaqida, ne keexaboonna gitanne lo77o katamati kumida biitta new immana.
DEU 6:11 Neeni shiishaboona duretethan kumida keethata, ne bookaboona haatha ollata, ne tokaboonna woynenne shamaho new immiya wode, neeni mada kallida wode,
DEU 6:12 nena Gibxe aylletetha biittafe kessida, Godaa dogonna mela naageta.
DEU 6:13 Godaa, ne Xoossaa yayya; iya xalaala goyinna; iya sunthan caaqa.
DEU 6:14 Ne yuushon de7iya asay goyinniya hara xoossata goyinnofa.
DEU 6:15 Ne giddon de7iya Goday, ne Xoossay qanaatiya Xoossu. Iya hanqoy ne bolla eexana; I nena biitta bollafe pitidi dhaysana.
DEU 6:16 Masahan hinte iya paacidaysada Godaa hinte Xoossaa paacopite.
DEU 6:17 Goday, hinte Xoossay hintena kiitida iya kiita, iya wogaanne iya awaajuwa minthidi naagite.
DEU 6:18 New ubbabay injetana mela Godaa sinthan ne surebaanne lo77oba ootha. Hessa oothiko, new immanaw Goday ne aawatas caaqida, he lo77o biitta ne laattana.
DEU 6:19 Goday gidaysada neeni, ne morketa ubbaa ne sinthafe gooddana.
DEU 6:20 Wodepe ne nayti, “Goday, nu Xoossay hintena kiitida ha wogaa, awaajiyanne higgiya birshethay aybee?” yaagidi hintena oychiya wode,
DEU 6:21 ne entaw haysada yaagada zaarana; “Nuuni Gibxe biittan Gibxe kawa aylleta, shin Goday ba mino kushiyan nuna Gibxefe kessis.
DEU 6:22 Goday nu xeellishin, Gibxe biitta bolla, Gibxe kawa bollanne iya shuumata ubbaa bolla gitanne yashshiya malaatatanne malaalsiyabata oothis.
DEU 6:23 Shin I nu mayzas immana gidi caaqida biitta nuus immanaw nuna Gibxefe kessis.
DEU 6:24 Yaatidi hachi hinte be7eysada nuus ubba wode lo77o gidana melanne nuuni de7on daana mela, Goday, ha awaajota ubbaa nuni naagana melanne Godaas nu Xoossaas yayyana mela kiittis.
DEU 6:25 I nuna kiittidaysada, Godaa, nu Xoossaa sinthan ha kiita ubbaa minthidi naagiko, hessi nuus xillotethi gidana” yaagite.
DEU 7:1 Goday, ne Xoossay ne laattanaw biya biitta nena gelsiya wodenne neepe wolqaamanne minniya laapun kawotethata, hessatika Hiteta, Gergeseta, Amooreta, Kanaaneta, Parzeta, Hiwetanne Yaabuseta ne sinthafe gooddiya wode,
DEU 7:2 Goday ne Xoossay ne kushen aathidi immin, ne enta xooniya wode, enta kumethi dhaysa. Entara aybibaaka caaqofa; entaw qadhetofa.
DEU 7:3 Entara eketofa; geletofa. Ne macca nayta enta adde naytas immofa woyko enta macca nayta ne adde naytas ekofa.
DEU 7:4 Enti ne nayta tana kaalleysa aggidi hara eeqata goyinnana mela oothana. He wode Godaa hanqoy ne bolla eexana; nena ellesidi dhaysana.
DEU 7:5 Hessa gisho, enta yarsho bessa laallite; goyinno shucha eeqata mentherethite. Asheera geetetiya eeqa misiliya tincherethite; kushen oosetida misileta taman xuuggite.
DEU 7:6 Neeni, ne Godaa Xoossaas geeshsha dere. Goday, ne Xoossay nena baw dumma asi oothidi biitta bolla de7iya asa ubbaafe nena dooris.
DEU 7:7 Goday hintena dosidaynne dooriday hinte hara asaape taybon darida gisho gidenna. Hinte hara asa ubbaafe taybon guutha.
DEU 7:8 Shin Goday hintena dosida gishonne hinte mayzatas caaqida caaquwa naagida gisho, I hintena aylletetha biittafe, Gibxe kawa kushepe, ba wolqaama kushiyan kessisinne wozis.
DEU 7:9 Hessa gisho, Goday, hinte Xoossay Xoosse gideysa erite. I bana doseysatasinne ba kiita naageysatas mukulu yeletethi gakanaw, ba siiquwa naagiya ammanetiya Xoossi.
DEU 7:10 Shin I bana ixeyisata seeranawunne dhaysanaw guye geenna.
DEU 7:11 Hessa gisho, taani hachi new immiya kiita, awaajuwanne higgiya naaga.
DEU 7:12 Ne ha kiita sa7ada mintha naagiko, Goday, ne Xoossay hinte mayzatas caaqidaysada ba siiqo caaquwa new naagana.
DEU 7:13 I nena dosana; nena anjana; ne taybuwa darsana. Qassi I new immanaw ne mayzatas caaqida biittan ne ulo ayfiya, biitta ayfiya; kathaa, woyniya, zaytiya, mehe maratanne dorsa marata darsidi nena anjana.
DEU 7:14 Ne hara asaape aadhada anjetidaysa gidana. Addey woyko macci woyko ne mehey maynnena.
DEU 7:15 Goday harge ubbaafe nena naagana. Neeni Gibxe biittan eriya iita hargiya ne bolla ehenna, shin I nena ixiya ubbaa bolla he hargiya ehana.
DEU 7:16 Goday, ne Xoossay new aathidi immiya asa ubbaa qadhetonna dhaysa. Hessi new xihe gidana gisho, enta xoossata goyinnofa.
DEU 7:17 Neeni, ne wozanan, “Ha kawotethati taape minnoosona; yaatin, ta enta waatada gooddada kessanee?” gaanaw danda7aasa.
DEU 7:18 Shin entaw yayyofa. Goday, ne Xoossay, Gibxe kawa bollanne Gibxe biitta ubbaa bolla oothidaysa akeeka.
DEU 7:19 Goday, ne Xoossay nena Gibxefe kessiya wode oothida gita gadota, malaatata, malaalsiyabata, iya wolqaama kushiyanne iya micetida qesiya ne, ne ayfen be7adasa. Hachi ne yayiya asa ubbaa bolla Goday, ne Xoossay hessada oothana.
DEU 7:20 Qassi neepe baqatidi qosetidaysati dhayana gakanaw Goday, ne Xoossay enta giddon kazhe yeddana.
DEU 7:21 Hessa gisho, ne entaw yayyofa; neera de7iya Goday, ne Xoossay, gitanne yashshiya Xoossi.
DEU 7:22 Goday, ne Xoossay he kawotethata guuthara guuthara gooddidi, ne sinthafe dhaysana. Ne enta ubbaa issi toho dhaysaka; hessa ne oothiko, biittan de7iya do7ati daridi nena waaysana.
DEU 7:23 Shin Goday, ne Xoossay enta ne kushen aathidi immana; enti dhayana gakanaw I enta daganthana.
DEU 7:24 Enta kawota ne kushen aathidi immana. Ne enta suntha salope garsan quchada dhaysana. Oonika neera eqetidi danda7enna; ne enta dhaysana.
DEU 7:25 Kushen oosetida enta eeqa misileta taman xuugga. He misileta bolla de7iya bira woyko worqaa amottofite; nebaa oothada ekofa. Hessi Godaas, ne Xoossaas tuna gidiya gisho, iyape ne ekiko new xihe gidana.
DEU 7:26 Enti banta huuphen baadetidaysata gidiya gisho, ne he tuna eeqata ne soo gelsada, enta mela baadetidaysata gidopa. Enta kumethi ixa; shaateta.
DEU 8:1 Hinte de7on daana mela, hinte tayboy darana melanne Goday kase hinte mayzatas immana gidi caaqida biitta gelidi, hinte laattana mela hachi ta hintena kiittiya kiita ubbaa minthidi naagite.
DEU 8:2 Goday, ne Xoossay new immida kiita ne naagiyakonne naagonnaako, ne wozanaa qofaa eranaw nena paacanawunne nena aada oothanaw oytamu laythi kumethi nena mela biittan waati kaalethidaako akeeka.
DEU 8:3 Aadatethi erisanaw nena koshaysis; yaatidi ne woyko ne mayzati eronna Manna nena muzis. Hessa I oothiday asi Godaa doonape keyiya qaala ubbaanape attishin, katha xalaalan de7onnaysa nena tamaarsanaasa.
DEU 8:4 Ha oytamu laythata giddon ne ma7ida ma7oy wuribeenna; ne tohoy kixibeenna.
DEU 8:5 Asi ba na7a seereysada Goday, ne Xoossay nena seeroysa akeeka.
DEU 8:6 Iyaw yayyashenne iya bonchashe Godaa ne Xoossaa kiitaa naaga.
DEU 8:7 Goday ne Xoossay nena zangaarapenne deriyape goggiya shaafatinne pultoti de7iya lo77o biitta gelsanaw ehis.
DEU 8:8 He biittay gisteynne bangi, woyneynne balasey, oromaaney, shamaho zayteynne eessi kumida biitta.
DEU 8:9 He biittay aykoyka paconna hinte kallidi miya biitta. He biittay birati shuchada gela gidida biitta. Zumaape madabe birata bookidi ekiya biitta.
DEU 8:10 Ne mada kallida wode new I immida lo77o biitta gisho, Godaa ne Xoossaa galata.
DEU 8:11 Ta hachi nena kiittiya iya kiita, iya higgiyanne iya awaajuwa naagonna ixada, Godaa ne Xoossaa dogonna mela naageta.
DEU 8:12 Ne mada kalliya wode, lo77o keethi keexada iyan de7iya wode,
DEU 8:13 ne meheynne dorsay dariya wode, new birinne worqi dagaayetiya wode, new de7idabay ubbay dariya wode,
DEU 8:14 he wode, ne wozanay otortonna mela, Gibxe aylletetha keethaafe nena wozida Godaa, ne Xoossaa dogonna mela naageta.
DEU 8:15 I nena iita shooshaynne korney kumida, haathi bayna, gitanne yashshiya mela biittara nena kaalethidaysa dogopa. I new mela biittan zaallafe haathe dhuusis.
DEU 8:16 Ne mayzati eronna mannaa I nena mela biittan muzis. Wursethan new ubbabay injetana mela nena aada oothanawunne paacanaw hessa oothis.
DEU 8:17 Neeni, “Ta wolqaynne ta kushe minotethay ha duretetha taw ehis” goonna mela naageta.
DEU 8:18 Shin ne duretana mela new wolqa immiday Godaa, ne Xoossaa gideysa akeeka. I hessa oothiday, hachi ne be7eysada, ne mayzatara caaqida caaquwa minthanaasa.
DEU 8:19 Shin hinte Godaa hinte Xoossaa aggidi, hara xoossata kaalliko, entaw hokikonne goyinniko, hinte tuma dhayanaysa ta hachi markatayis.
DEU 8:20 Goday, hinte Xoossay hara kawotethata hinte sinthafe dhaysidaysada hinte iyaw kiitetonna ixiko hintenaka dhaysana.
DEU 9:1 Neno, Isra7eele si7a; neepe gitatiyanne wolqaamiya kawotethata, gimbey salo gakida gita katamata laattanaw hachi Yordaanose pinnaasa.
DEU 9:2 He biittan de7iya asay minonne adusse. Neeni, “Oonika entara eqetanaw danda7onna Anaaqe kochata” gishin si7adasa.
DEU 9:3 Shin miya tamada neepe sinthara bey Godaa, ne Xoossaa gideysa hachi era. I enta dhaysananne ne sinthan enta kawushana. Goday new gidaysada ne enta gooddada kessananne ellesada dhaysana.
DEU 9:4 Goday, ne Xoossay enta ne sinthafe gooddidaape guye, ne wozanan, “Taani xillo gidiya gisho, ha biitta ta laattana mela Goday tana ehis” goopa. Goday enta ne sinthafe yedethidi kessiday enti iita gidiya gishosa.
DEU 9:5 Ne enta biitta laattanaw yiday ne xillonne suure gidiya gisho gidenna. Shin Goday, ne Xoossay enta ne sinthafe gooddiday ha kawotethati iita gidiya gishonne beni ne mayzatas Abrahaames, Yisaaqasinne Yayqoobas caaqida caaquwa naaganaassa.
DEU 9:6 Hiza ne hessa akeeka. Goday, ne Xoossay ha lo77o biitta nena laatisey ne xillotethaa gishosa gidenna; neeni wozani muumida asi.
DEU 9:7 Godaa, hinte Xoossaa mela biittan waatidi yiloyidaako dogopite. Hinte Gibxe biittafe keyida gallasape doomidi, hachi ha bessaa gakanaw Godaa bolla makallideta.
DEU 9:8 Koreeba zumaa bolla Goday hintena dhaysanaw dendana gakanaw hinte Godaa yiloyideta.
DEU 9:9 Goday hintera caaqida caaqoy xaafetida loche shuchata ekanaw taani zumaa bolla keyida wode, yan kathi moonnanne haathe uyonna oytamu gallasinne oytamu qamma gam7as.
DEU 9:10 Hessafe guye, Xoossa biradhen xaafetida nam7u loche shuchata Goday taw immis. Hinte zumaa xaphon shiiqida wode tama giddon Goday hintew immida kiitati he loche shucha bolla xaafetidi uttidosona.
DEU 9:11 Oytamu gallasapenne qammafe guye, Goday ba caaqo qaalay xaafetida nam7u loche shuchata taw immis.
DEU 9:12 Hessafe guye, Goday taako, “Ellesada haysafe duge wodha; neeni Gibxefe kessida ne asay tunis; enti ta kiitaa eeson aggidi, kushen oosetida eeqa goyinnanaw simmidosona” yaagis.
DEU 9:13 Qassika Goday taako, “Taani ha asaa be7as; enti tuma wozana muume asi.
DEU 9:14 Hiza ta enta dhaysona melanne enta sunthaa biitta bollafe quchonna mela tana diggofa. Ta nena entafe minonne dariya kawotethi kessana” yaagis.
DEU 9:15 Taani caaqo qaalay xaafetida nam7u loche shuchata ta kushen oykada zumaa bollafe wodhas; he wode tama lacoy zumaa bolla bentees.
DEU 9:16 He wode Godaa, hinte Xoossaa bolla hinte nagara oothidaysa be7as. Hinte mara misilen oosetida worqa eeqa giigisideta. Goday, hintena kiitida ogiyape eeson hara soo simmideta.
DEU 9:17 Taani ta kushen oykida nam7u loche shuchata holada hinte be7ishin menthas.
DEU 9:18 Hessafe guye, Godaa yiloyanaw hinte iya sinthan iita ooso oothidi, nagara oothida gisho, kaseysada oytamu gallasinne oytamu qamma Godaa sinthan gufannada gam7as; he wode ta kathi mabike; haathe uyabike.
DEU 9:19 Goday hinte bolla yilotidi dhaysanaw dendida gisho taani yayyas. Shin Goday zaaridi tana si7is.
DEU 9:20 Qassi Goday yilotidi Aaronaka dhaysanaw koyis; shin taani he wode Aaronas woossas.
DEU 9:21 Taani hinte nagaran kumida he mara misiliya ekada, taman xuuggas. Iya tincheretha gaaccada dhiille kessas; he dhiilliya zumaape goggiya haathara yeddas.
DEU 9:22 Qassi hinte Taaberan, Masahaninne Qibiroot-Hatawan Godaa yiloyideta.
DEU 9:23 Goday hinteko, “Bidi, taani hintew immida biitta laattite” yaagidi, Qaades-Barnefe yeddida wodeka hinte Godaa, hinte Xoossaa kiita ixidi makallideta. Iyaw ammanetibeketa woyko iya qaalas kiitetibeketa.
DEU 9:24 Taani hintena erida wodiyape doomidi, hinte Godaas makallideta.
DEU 9:25 Goday hintena dhaysana gida gisho, taani oytamu gallasinne oytamu qamma Godaa sinthan gufannada gam7as.
DEU 9:26 Taani Godaa Xoossaako haysada yaagada woossas; “Abeeti Ubbaa Haariya Godaw, neeni ne gita wolqan wozidanne ne mino kushen Gibxefe kessida, ne laata gidida ne asaa dhaysofa.
DEU 9:27 Ne aylleta, Abrahaame, Yisaaqanne Yayqooba qopa; enta wozanaa minotethaa, enta iitatethaanne enta nagaraa taybopa.
DEU 9:28 Hessi hanonna attiko, neeni nuna yaape kessida Gibxe asay, ‘Goday entaw immana gida biitta gelsanaw danda7iboona gishonne enta ixida gisho, mela biittan wodhanaw enta kessis’ yaagana.
DEU 9:29 Gidoshin, ha asay neeni ne gita wolqaaninne ne micetida qesen Gibxefe kessida ne laata gidida ne asaa” yaagas.
DEU 10:1 He wode Goday taako, “Koyroysa mela nam7u loche shuchata giigisada taako zumaa bolla keya. Qassi iya wothanaw mithafe taabote ootha.
DEU 10:2 Taani kase ne menthida shuchata bolla de7iya qaalata ha shuchata bolla xaafana; ne enta taabotiya giddon wotha” yaagis.
DEU 10:3 Taani soqala mithafe taabote oothas. Kaseysa mela nam7u loche shuchata giigisas; he shuchata ta kushen oykada zumaa bolla keyas.
DEU 10:4 Hinte zumaa xaphon shiiqida gallas, tama giddofe Goday hintew odida qaalata, hessika Tammu Kiitata, kase xaafidaysata he shuchata bolla Goday xaafidi enta taw immis.
DEU 10:5 Hessafe guye, taani zumaa bollafe wodhada, Goday tana kiittidaysada, he shuchata ta oothida Taabotiya giddon wothas; ha77ika enti yan de7oosona.
DEU 10:6 Isra7eele asay Ba7aarota Benyaqanape dendidi, Musera bidosona. Aaroni yan hayqidi moogetis; iya na7ay Alaazari iya laattidi, iya bessan kahine halaqa gidis.
DEU 10:7 Enti yaape Gudgoda geetetiya bessa bidosona; yaape qassi goggiya haathati de7iya Yoxibaata geetetiya bessa bidosona.
DEU 10:8 He wode Godaa caaqo Taabotiya tookana mela, Godaa sinthan eqidi iya haggaazana melanne hachi gakanaw enti ootheysa mela Godaa sunthan anjana mela Leewe kochaa Goday baw dummayis.
DEU 10:9 Hessa gisho, Leewe kochaas enta ishata giddon gishoy woyko laati baawa; Goday, hinte Xoossay entaw gidaysada enta laatay Godaa.
DEU 10:10 Taani kaseysada oytamu gallasinne oytamu qamma zumaa bolla gam7as. Goday zaaridi ta woosa si7idi hintena dhaysanaw koybeenna.
DEU 10:11 Goday taako, “Taani enta aawatas immana gada caaqida biitta enti gelana melanne laattana mela ha asaa kaaletha” yaagis.
DEU 10:12 Neno, Isra7eele, Goday neepe koyey haysa; Godaa, ne Xoossaa yayya; iya ogiya ubban ba; iya dosa; ne kumetha wozanapenne ne kumetha shempuwafe Godaa ne Xoossaas ootha.
DEU 10:13 New injetana mela taani hachi new immiya Godaa kiitatanne awaajota naaga.
DEU 10:14 Saloynne salope bollara de7iya saloti, qassi sa7inne sa7an de7iya ubbay Godaa, ne Xoossaaba gideysi tuma.
DEU 10:15 Gidoshin, Goday hinte mayzatan ufaytidi, enta siiqis; hachi hinte be7eysada entafe guyen enta sheeshi gidida hintena kawotethata ubbaafe aathidi dooris.
DEU 10:16 Hessa gisho, hinte wozanaa qaxarite; hizape hinte wozanaa minthofite.
DEU 10:17 Goday, hinte Xoossay xoossata Xoossinne godata Godaa. I gita Xoossi; I wolqaamanne yashshiya Xoossi. I som7o be7idi pirdenna; wodhaafe ekenna.
DEU 10:18 I yi7otasinne am7etas suure pirdees; betanchuwa siiqidi, iyaw kathinne ma7o immees.
DEU 10:19 Hinteka betanchota siiqite; hinte hinte huuphen bete asi gididi Gibxen de7ideta.
DEU 10:20 Godaa, ne Xoossaa yayya; iyaw ootha; iyara oyketa; iya sunthan caaqa.
DEU 10:21 Neeni ne ayfen be7ida gitanne yashshiya malaalsiyabata new oothiday, I ne galataa; ne Xoossaa.
DEU 10:22 Gibxe biitta wodhida hinte mayzati kumethi laapun tamma; ha77i Goday, hinte Xoossay hintena salo xoolintotada darsis.
DEU 11:1 Hiza Godaa, ne Xoossaa dosa; iya awaajuwa, wogaa, iya higgiyanne iya kiita ubba wode naaga.
DEU 11:2 Hinte nayti be7onnabaanne eronnabaa gidikoka, hinte hachi Godaa seera, iya gitatetha, iya wolqaama kushiyanne micetida qesiya be7idaysa akeekite.
DEU 11:3 Hinte I oothida malaatatanne Gibxe kawa bollanne iya biitta ubbaa bolla oothida malaalsiyabata be7ideta.
DEU 11:4 Enti hintena kaallidi gooddida wode, Goday Gibxe biitta olanchota, enta paratanne para gaareta Zo7o Abban mitisidi, hachi gakanaw enta kumethi dhaysidaysa be7ideta.
DEU 11:5 Hinte ha bessaa gakanaw mela biittan Goday hintew oothidaba hinte ereeta.
DEU 11:6 Robeela kochaafe Eli7aaba nayta gidida Daatane bollanne Abeero bolla Goday oothidaysa akeekite. Isra7eele asa ubbay be7ishin, biittay dooyetidi, enta, enta soo asaa, enta dunkaaniyanne shempora de7iya entaba ubbaa mittis.
DEU 11:7 Goday oothida ha gita oosota ubbaa hinte, hinte ayfen be7ideta.
DEU 11:8 Hiza hinte mino gidana melanne Yordaanose pinnidi hinte ekanaw biya biitta laattana mela taani hachi hintena kiittiya kiita ubbaa naagite.
DEU 11:9 Hinte kiitetiko, Goday hinte mayzatasinne enta kochaas immana gidi caaqida, maathinne eessi goggiya biittan hinte adussa laythi daana.
DEU 11:10 Ne laattanaw biya biittay, ne keyada yida Gibxe biitta mela gidenna. Gibxen ne kathi zerada, goshsha biitta ubbaa atakilte bessada haathe ushshaasa.
DEU 11:11 Shin Yordaanose pinnidi hinte laattanaw biya biittay, dereynne zangaaray de7iya, salo iran aliya biitta.
DEU 11:12 He biittay, Goday ne Xoossay naagiya biitta; laytha doomethaafe bidi laytha wursethaa gakanaw Godaa, ne Xoossaa ayfey iya bolla de7iya biitta.
DEU 11:13 Hessa gisho, Godaa, hinte Xoossaa siiqiko, hinte kumetha wozanapenne hinte kumetha shempuwafe iya goyinniko, taani hachi hintew immiya kiita hinte naagiko,
DEU 11:14 ne kathi, woyney zaytey paconna shiishana mela torchenne sila ira woden woden bukisana.
DEU 11:15 Goday ne mehiyas maata darsana; ne maana; kallana.
DEU 11:16 Hinte wozanaa hara soo zaaridi, hara xoossata goyinnona melanne hokonna mela naagetite.
DEU 11:17 Hessa hinte oothiko, Godaa hanqoy hinte bolla eexana; iray bukonna melanne kathi dolonna mela I saluwa gordana. Hinte Goday hintew immiya lo77o biittafe eeson dhayana.
DEU 11:18 Hiza, ha kiitata hinte wozanaaninne hinte qofan wothite. Mallada enta hinte kushen qachite; qassi hinte som7on qachite.
DEU 11:19 Hinte nayta tamaarsite. Hinte son de7iya wode, ogen hemetiya wode, zin7iya wodenne dendiya wode entaw odite.
DEU 11:20 Hinte penge zizgiya bollanne hinte dirsa pengiya bolla xaafite.
DEU 11:21 Hessa hinte oothiko, Goday hinte mayzatas immana gidi caaqida biittan, hinte laythaynne hinte nayta laythay sa7ape bollara de7iya salo mela gidana.
DEU 11:22 Hinte Godaa, hinte Xoossaa dosiko, iya oge ubban hinte biiko, iyaw ammanetiko, ta hachi hintew immiya kiita hinte minthidi naagiko,
DEU 11:23 Goday ha kawotethata ubbaa hinte sinthafe gooddidi kessana. Hintefe dariyanne wolqaamiya kawotethata biitta yegisidi ekana.
DEU 11:24 Tohon hinte yedhida biitta ubbay hintebaa gidana. Hinte zaway dugeha mela biittafe bidi Libaanose gakanawunne Efraxiisa shaafape bidi Gita Abbaa gakanaw gidana.
DEU 11:25 Hintera ay asika eqetanaw danda7enna; Goday, hinte Xoossay hintew gidaysada hinte biya soo ubban asay hintena be7idi dagammana melanne hintew yayyana mela oothana.
DEU 11:26 Heko, ta hachi hinte sinthan anjonne baadethi wothayis.
DEU 11:27 Ta hachi hintena kiittiya Godaa, hinte Xoossaa kiita naagiko, hinte anjetana.
DEU 11:28 Shin taani hintena hachi kiittiya Godaa, hinte Xoossaa kiita naagonna ixidi, hara xoossata goyinnanaw iya ogiyape deshiko, hinte baadetana.
DEU 11:29 Goday, hinte Xoossay hinte laattanaw biya biitta hintena gelsiya wode, baadetha Garzaana zuma bolla, anjuwa Ebaala zuma bolla awaajite.
DEU 11:30 Ha zumate Yordaanose shaafape hefinthan ogiyape wuloha baggan, Araban de7iya Kanaaneta biittan, Galgala sinthan de7iya Moore mitha matan de7oosona.
DEU 11:31 Hinte ha77i Goday, hinte Xoossay hintew immiya biitta laattanaw Yordaanose shaafa pinnana haneeta. Hinte he biitta ekidi yan de7iya wode,
DEU 11:32 ta hachi hintew immiya awaajotanne higgiya ubbaa minthidi naagite.
DEU 12:1 Hinte laattana mela Goday, hinte aawata Xoossay hintew immida biittan hinte de7ida wode ubban hinte oothanaw bessiya awaajotinne higgeti haysata.
DEU 12:2 Hinte laattiya biittan de7iya kawotethatis deriya bolla, zumaa bollanne issi issi mitha garsan de7iya goyinno bessata dhaysite.
DEU 12:3 Enta yarsho bessata laallite; enta goyinno shucha tuussata mentherethite. Asheera geetetiya enta eeqa misiliya taman xuuggite; kushen oosetida enta xoossata misileta dhaysite; enta sunthata he bessaafe quchite.
DEU 12:4 Godaa, hinte Xoossaa enti banta xoossaa goyinniya ogen goyinnofite.
DEU 12:5 Goday, hinte Xoossay hinte koche ubbaa giddofe ba sunthay yan xeegetana mela doorida bessaa koyte. He bessaa hinte baanaw koshshees.
DEU 12:6 Hinte xuussa yarshuwa, hara yarshuwa, hinte asraata, hinte imuwa, hinte qangetha, hinte dosidi immiya imuwa, hinte mehiyapenne dorsaafe bayraa he bessaa ehite.
DEU 12:7 Goday, hinte Xoossay hintena anjida gisho, hessan, Goday, hinte Xoossay de7iya bessan, hintenne hinte soo asay maana; hinte kushey oothidaba ubban hinte ufaytana.
DEU 12:8 Hachi haysan hinte issoy issoy, dosidaba ootheysada he wode ootheketa.
DEU 12:9 Goday, hinte Xoossay hintew immiya shempo biitta buroo gakibeketa.
DEU 12:10 Shin hinte Yordaanose pinnidi, Goday hinte Xoossay immiya he biitta laattidi yan uttana. Hintena teqida morketape I hintena shempisiya gisho yan wopu gidi hinte daana.
DEU 12:11 He wode Goday, hinte Xoossay ba sunthay hessan xeegetanaw doorida he bessan, ta hintena kiittiyaba ubbaa, xuussa yarshuwa, hara yarshuwa, hinte asraata, hinte imuwanne hinte qangetha ubbaa yaa eheeta.
DEU 12:12 Hinte, hinte adde naytinne hinte macca nayti, hinte adde aylletinne macca aylleti hintera laata ekiboonna hinte kataman de7iya Leewetara issife yan Godaa, hinte Xoossaa sinthan ufaytana.
DEU 12:13 Neeni xuussa yarshuwa ne koyida bessan coo yarshonna mela naageta.
DEU 12:14 Neeni, ne kochaafe issuwan, Goday doorida bessan, ne xuussa yarshuwa yarsha; ta nena kiitida ubbaa yan ootha.
DEU 12:15 Gidoshin ne de7iya bessan awunka ne mehiyape Goday nena anjidaysada shukada ma. Wogaada tuna gidin woyko tuna gidonna asi oonika gaaranne gen7e meysada ne mehiyape shukada ma.
DEU 12:16 Shin suuthi haathada sa7an gussafe attishin, moopa.
DEU 12:17 Ne kathaafe, woyniyapenne zaytiyape immiya asraata, ne mehiyapenne dorsa wudiyape immiya bayraa, Godaas qangidaba ubbaanne ne dosan immiya imuwa ubbaa ne de7iya heeran moopa.
DEU 12:18 Shin neeni, ne adde naytinne ne macca nayti, ne adde aylletinne macca aylleti neera laata ekiboonna ne kataman de7iya Leewetara issife Goday, ne Xoossay doorida bessan, Godaa, ne Xoossaa sinthan, ha yarsho ubbaa ma. Ne daaburada shiishidaban Godaa, ne Xoossaa sinthan ufayta.
DEU 12:19 Ne de7o laytha ubban Leeweta qelli goonna mela naageta.
DEU 12:20 I new gelida qaalada Goday ne Xoossay ne zawa daligisiya wode nena asho maanaw koshshiya wode ne koyida mela ma.
DEU 12:21 Shin Goday, ne Xoossay ba sunthay yan xeegetana mela doorida bessay new haakiko, Goday new immida ne mehe woyko dorsaa wudiyape ta nena kiittidaysada, ne koyida mela ne kataman shukada ma.
DEU 12:22 Wogaada tuna gidin woyko tuna gidonna asi oonika gaara woyko gen7e meysada mo.
DEU 12:23 De7oy suuthan de7iya gisho, suuthi de7iya asho moonna mela naageta; hessa gisho, de7o ashora gathada moopa.
DEU 12:24 Suuthi haathada biittan gussafe attishin, moopa.
DEU 12:25 Newunne neepe guyera yaana ne naytas injetana mela suuthi moopa. Hessa ne oothiko Godaa ufaysaasa.
DEU 12:26 Shin ne Godaas dummayidabaanne iyaw qangidaba ekada, Goday doorida bessaa ba.
DEU 12:27 Xuussa yarsho ashuwanne suuthaa Godaa, ne Xoossaa yarsho bessan yarsha. Hara yarsho suuthaa Godaa, ne Xoossaa yarsho bessa matan gussada ashuwa ma.
DEU 12:28 Newunne ne naytas injetana mela ta nena kiittiya kiitaa minthada naaga. Hessa ne oothiko, Godaa ne Xoossaa ufaysiyabaanne suureba oothaasa.
DEU 12:29 Ne laattanaw biya kawotethaa, Goday ne Xoossay ne sinthafe dhaysiya wodenne ne enta biitta laattiya wode,
DEU 12:30 enti ne sinthafe dhaydaape guye, ne enta xoossata goyinnada, xihen oyketonna mela naageta. Neeni, “Ha kawotethati banta xoossata waatidi goyinnona?” yaagada kaallada oychonna mela naageta.
DEU 12:31 Enti banta xoossata goyinniya wode Goday ixiya ubbaa oothiya gisho, Godaa ne Xoossaa ne hessada goyinnanaw bessenna. Enti hari attoshin, banta adde naytanne macca nayta banta xoossatas yarsho oothidi taman xuuggoosona.
DEU 12:32 Hiza ta nena kiittidaba ubbaa ootha; iya bolla gujofa; iyape pacisopa.
DEU 13:1 Ne giddon tinbite odiya woyko amuho birshiya asi dendidi, malaatanne malaalsiyabata oothiko,
DEU 13:2 I odida malaatay woyko malaalsiyabay tuma gididi poletin, I neeko, “Ane kase ne eronna hara xoossata goyinnoos” yaagiko,
DEU 13:3 ne iya ubbaraka si7opa. Hinte kumetha wozanapenne kumetha shempuwafe Godaa hinte Xoossaa dosiyakonne dosonaako paacanaw hessa oothees.
DEU 13:4 Godaa hinte Xoossaa kaallite; iyaw yayyite; iya kiita naagite; iya qaala si7ite; iyaw goyinnite; iyape duuxofite.
DEU 13:5 Hintena Gibxe aylletethaafe wozida Godaa, hinte Xoossaa bolla hinte makallana mela tamaarsiya nabe woyko amuho birshiya uraa wodhite. Hessa mela asi hinte Godaa, hinte Xoossa kiitaape kare keyana mela oothiya gisho, iya wodhite; iitaa hinte giddofe diggite.
DEU 13:6 Hari attoshin, ne ishay woyko ne adde na7ay woyko ne macca na7iya woyko ne dosiya machiya woyko ne mata laggey, “Kase nenne ne mayzati goyinni eronna xoossata goyinnanaw yedha.
DEU 13:7 Biittaa ha gaxape ya gaxaa gakanaw de7iya, ne yuusho ubban mataninne haahon de7iya asa ubbay goyinniya xoossata goyinnanaw yedha” yaagidi balethiko,
DEU 13:8 iyaw ero goopa; I geysa si7opa. Iyaw qadhetada iya shempuwa ashshofa;
DEU 13:9 iya wodhanaw bessees. Iya wodhanaw koyro ne dooma; hessafe guye, asa ubbay kaallidi wodho.
DEU 13:10 I hayqana gakanaw shuchan cadda; I nena Gibxe biittafe, aylletetha keethaafe kessida Godaa, ne Xoossaafe nena shaakanaw koyees.
DEU 13:11 Isra7eele asay hessa si7idi yayyana; qassi hessa mela iitabaa zaaridi hinte giddon oonika oothenna.
DEU 13:12 Goday, ne Xoossay ne daana mela immida katamaape issuwan ne de7iya wode,
DEU 13:13 ne asaa giddon iitati dendidi, asaako, “Nuuni eronna xoossata goyinnanaw dendite” yaagidi balethishin ne si7iko,
DEU 13:14 he hanota oycha; minthada pilga. He ne giddon oosetida tunabay tuma gideysa shaakada eriko,
DEU 13:15 he kataman de7iya asa ubbaa mashshan wursa; he katamaanne iyan de7iya mehiya ashshona dhaysa.
DEU 13:16 He katamaape ne ekida di7o ubbaa katamaa dabaaba shiishada, he katamaanne iya di7uwa ubbaa Godaas, ne Xoossaas, xuussa yarsho oothada wursada xuugga. I merinaw zaaridi keexetonna laaletha doore gididi attana.
DEU 13:17 Ha digetida miishetape aybika ne kushen bentofo. Goday ba wolqaama hanquwafe simmidi, nena maarana; I new qadhetana. Kase ne mayzatas caaqida caaquwada ne taybuwa darsana.
DEU 13:18 Taani hachi nena kiittiya kiita ubbaa ne naagada, Godaa, ne Xoossaas kiitetiko, Godaa ne Xoossaa ufaysiyabaa oothiko, ha gidabay new poletana.
DEU 14:1 Hinte, Godaa hinte Xoossaa nayta; hayqida asaas hinte asatethaa gaaropite; hinte huuphiya buluusopite.
DEU 14:2 Hinte, Godaa hinte Xoossaas geeshsha dere; Goday hintena ba ase gidana mela biittan de7iya asa ubbaafe baw dooris.
DEU 14:3 Neeni tunaba aybaka moopa.
DEU 14:4 Ne maana mehetinne do7ati haysata; boori, dorse, deeshe,
DEU 14:5 doge, baacho, woshi7e, wora deeshi, waaliya, gaaranne zuma dorse.
DEU 14:6 Shuquley phalqetidaysanne waammotiya mehetanne do7ata ubbaa miite.
DEU 14:7 Shin shuquley phalqetonaysatanne waammotonnayisata moopa; hessika gimale, eshenne gupalle. Haysati waammotoosona, shin enta shuquley phalqetiboona gisho, enti hintew tuna.
DEU 14:8 Gudunthos shuquley phalqethi, shin waammotonna gisho I hintew tuna. Iya ashuwa moopa; iya bawuta bochofite.
DEU 14:9 Haatha giddon de7iya medhetethata giddofe hinte maanaysati haysata; molo mela qefeynne poqoy de7iya ubbaa miite.
DEU 14:10 Shin molo mela qefeynne poqoy baynayisata moopite hessi hintew tuna.
DEU 14:11 Tuna gidonna kafo ubbaa miite.
DEU 14:12 Shin kafotape hinte moonna aggana kafoti haysata; arganthi, bazzo anko, kareetha anko,
DEU 14:13 phirco, xilo koche ubbaa,
DEU 14:14 qoorase koche ubbaa,
DEU 14:15 yancho, haatha kafo, qamma kafo koche ubbaa,
DEU 14:16 laafa gutto, diidinthe, haatha kutto,
DEU 14:17 bazzo gutto, molo kafo, solee, hazazo,
DEU 14:18 saabisa geetetiya kafo koche ubbaa, ayyaana kafonne shirshiqo.
DEU 14:19 Qefera de7iya laafa medhetethati ubbay hintew tuna; enta moopite.
DEU 14:20 Shin qefera de7iyabatape tuna gidonayisata miite.
DEU 14:21 Neeni, Godaa ne Xoossaas geeshsha asi gidiya gisho, bawuta ubbaa moopa. Hessa hinte kataman de7iya bete asay maana mela entaw immanaw danda7eeta; woyko hara biitta asas bayzanaw danda7eeta. Deesha na7a iya aaye maathara kathofa.
DEU 14:22 Ne gaden laythan laythan kaxiya katha ayfe ubbaafe asraata kessa.
DEU 14:23 Ne ubba wode Godaas ne Xoossaas, yashshi tamaarana mela ba sunthay xeegetana mela I doorida bessan, ne kathaa, woyne ushshaanne zaytiya asraata, ne dorsafenne mehiyape bayra yeletidaysa yan, Godaa, ne Xoossaa sinthan ma.
DEU 14:24 Goday ne Xoossay ba sunthay xeegetana mela doorida bessay, ne de7iya bessaafe daro haaho gidiko, Goday nena anjana mela ne asraata yaa efanaw danda7onnaba gidiko,
DEU 14:25 he asraata bayzada miishiya Goday, ne Xoossay doorida bessaa efa.
DEU 14:26 He miishiyan ne koyida miizi woyko dorse woyko woyne ushshi woyko hara mino ushshi woyko hara ne koyiyaba shammada, nenne ne soo asay Godaa, ne Xoossaa sinthan hessa mada ufayta.
DEU 14:27 Enti neera shaaketidi ekida hara laati entaw bayna gisho, hessa ne oothiya wode ne kataman de7iya Leeweta dogopa.
DEU 14:28 Heedzantho laythan laythan ne katha asraata ehada ne kataman shiisha.
DEU 14:29 Hessa ne kataman de7iya, neera shaakitidi ekida hara laati bayna Leeweti, bete asay, yi7o naytinne am7eti yidi mo. Yaatiko, ne oothiya ooso ubban Goday, ne Xoossay nena anjana.
DEU 15:1 “Laapuntha laytha wursethan tal7e aco ubbaa maara.
DEU 15:2 Ne aco maarana wogay haysa; Isra7eele gidida ba ishaas tal7ida oonika he acuwa maaro. Godaa maarotethay awaajetida gisho, Isra7eele gidida ba ishaas tal7ida ba tal7iya oychofo.
DEU 15:3 Hara biitta asas ne tal7ida acuwa ekanaw danda7aasa, shin ne kochaas tal7idaba ubbaa maara.
DEU 15:4 “Ne laattana mela Goday, ne Xoossay new aqo oothidi immiya biittan, Goday nena anjana gisho ne giddon manqoy deenna.
DEU 15:5 Ne Godaas ne Xoossaas kiitetiko, ta hachi nena kiittiya kiita ubbaa naagiko, ne polo anjetana.
DEU 15:6 Goday, ne Xoossay new odidaysada nena anjana; daro kawotethati hintefe tal7ana, shin hinte issuwafeka tal7eketa. Qassi ne kawotethata haarana, shin issoyka nena haarenna.
DEU 15:7 “Goday, ne Xoossay new immiya biittan de7iya katamatape issuwan de7iya Isra7eele asi manqidi bentiko, iyaw ulo minnofa; ne kushiya shiisha ekofa.
DEU 15:8 Ne kushiya iyaw birsha; iya koshshiyaba tal7a.
DEU 15:9 “Aco maariya laapuntha laythi matis” gada, manqo Isra7eele asi tal7e diggofa; hessa mela iita qofi ne wozanan gelopo. Ne iyaw tal7onna ixin, I Xoossako yeekiko, hessi new nagara gidana.
DEU 15:10 Ne iyaw keehatethan imma; ne wozanan ayis immiyana gada uuzettofa. Hessa ne oothiko, Goday ne Xoossay nena oykidaban yedhidaban ubban anjana.
DEU 15:11 Awudeka gidin, biitta bollafe manqoy dhayonna gisho, ne Isra7eeletas, manqotasinne metootanchotas hinte keeha gidana mela kiittayis.
DEU 15:12 Adde gidin macca gidin, Isra7eele asi, aylle oothidi shammiko, I new usupun laythi ootho; laapuntha laythan aylletethafe la77a keyo.
DEU 15:13 Neeni aylletethaafe iya kessa yeddiya wode mela kushe yeddofa.
DEU 15:14 Goday ne Xoossay nena anjidaysa mela ne mehiyape, shaaliyapenne woyne gum7ethaafe entaw keehatethan imma.
DEU 15:15 Neeni kase Gibxe biittan aylle gididaysanne Goday ne Xoossay nena yaape wozidaysa dogopa. Ta hachi ha kiitaa new immey hessasa.
DEU 15:16 Shin ne aylley nenanne ne keetha asaa dosida gishonne neera de7oy iyaw lo77o gidiya gisho, “Taani ne soope biike” yaagiko,
DEU 15:17 iya penge efada, goothi ekada, iya haytha luka. Yaatiko, I new merinaw aylle gidana; qassi macca aylleska hessada ootha.
DEU 15:18 Iya neeni aylletethaafe kessada yeddiya wode neeni qohetas gada qopofa. I ha usupun laythata giddon asi une ootheysafe dako daro new oothis. Hessa gisho, neeni oothiyaba ubban Goday, ne Xoossay nena anjana.
DEU 15:19 Ne mehiyapenne ne dorsaa wudiyape bayra yeletida adde ubbaa Godaas, ne Xoossaas dummaya. Ne dummayida mehiyape bayra yeletida boora goyopa; ne dorsaa wudiyape bayra yeletida dorsaa ikisiya meedopa.
DEU 15:20 Nenne ne soo asay Goday dooriya bessan Godaa, ne Xoossaa sinthan hessata laythan laythan ma.
DEU 15:21 Shin ne yarshiya mehiya bolla borsiyabay bentiko, I wobbe woyko qooqe woyko hara iita borisiyabay iya bolla de7iko, hessa Godaas, ne Xoossaas yarshofa.
DEU 15:22 Hessa ne de7iya ne kataman ma; wogaada tuna gidonna asi gidin woyko tuna asi gidin gaaranne gen7e ashoda mo.
DEU 15:23 Gidoshin, ne iya suuthaa haathada sa7an gussafe attishin, moopa.
DEU 16:1 Abiiba ageenan Godaa, ne Xoossaa Paasika Ba7aale boncha; Goday, ne Xoossay nena Abiiba ageenan qamma Gibxefe kessis.
DEU 16:2 Neeni dorsafenne mehe wudiyape Goday ba sunthay xeegetana mela doorida bessan, Godaas, ne Xoossaas, Paasika yarsha.
DEU 16:3 He yarshuwa ne miya wode irshoy gelida uythara moopa. Neeni Gibxe yeddada eeson keyiya wode oothidaysada irshoy geliboonna meto uythaa laapun gallas kumethi ma. Ne de7o laytha ubban ne Gibxefe keyida gallasaa hassayana.
DEU 16:4 Ne biitta ubban laapun gallassas ayba irshoy bentofo. Qassi ne koyro gallas omarsi yarshida ashuwape wontas aybika attofo.
DEU 16:5 Ne Paasika yarshuwa Goday ne Xoossay new immiya katama awunka coo shukofa.
DEU 16:6 Goday ne Xoossay ba sunthay xeegetana mela dooriya bessan ne Paasika yarshuwa shuka. Qassi awi wulliya wode Gibxefe ne keyida gisho he saatiyan shuka.
DEU 16:7 Goday, ne Xoossay dooriya bessan, yan kathada ma; yaatada sa7i wontiya wode ne soo soo ba.
DEU 16:8 Usupun gallas kumethi irshoy geliboonna uythaa ma; laapuntha gallas Godaa, ne Xoossaa goyinnanaw shiiqa; he gallas ay oosoka oothofa.
DEU 16:9 Ne katha caka oykida koyro wodiyape doomada, laapun saaminta kumethi tayba.
DEU 16:10 Yaatada, Goday, ne Xoossay nena anjidaysa mela ne, ne dosan immiya imuwa ehada, Godaa, ne Xoossaa Saaminta Ba7aale boncha.
DEU 16:11 Hessan neeni, ne adde nayti, ne macca nayti, ne adde aylletinne ne macca aylleti, ne kataman de7iya Leeweti, bete asay, yi7o naytinne ne giddon de7iya am7eti ubbay, Goday, ne Xoossay ba sunthay xeegetana mela dooriya bessan ufaytite.
DEU 16:12 Neeni Gibxe biittan aylle gididaysa hassayada ha wogaa naaga.
DEU 16:13 Ne wudumaafe ne kathaa, woyne yedhiya bessaafe ne woyniya shiishidaape guye, laapun gallas Shaqara Ba7aale boncha.
DEU 16:14 Neeni, ne adde naytinne macca nayti, ne adde aylletinne macca aylleti, ne kataman de7iya Leeweti, bete asay, yi7o naytinne am7eti ubbay he baaliyan ufaytite.
DEU 16:15 Goday dooriya bessan laapun gallas Godaa, ne Xoossaa, Ba7aale boncha. Ne ufaytana mela ne ayfisidabaninne ne kushe ooso ubban Goday, ne Xoossay nena anjana.
DEU 16:16 Hinte biittan de7iya adde ubbay laythan heedzu toho, Uytha Ba7aale wode, Saaminta Ba7aale wodenne Shaqara Ba7aale wode Godaa, hinte Xoossaa sinthan, I dooriya bessan bento. Enti Godaa sinthe yishe, mela kushe yoopo.
DEU 16:17 Goday, ne Xoossay nena anjidaysa mela issoy issoy baw danda7eysa mela immo.
DEU 16:18 Goday, hinte Xoossay immiya katamatan issi issi kochaas daynnanne halaqa hintew shuumite; enti asaas xillo pirda pirdo.
DEU 16:19 Xillo pirdaa wobbisopa; som7o be7ada maaddofa; wodhaafe ekofa. Wodhaafey cincata ayfiya qooqisees, xillota qaala geellayees.
DEU 16:20 Ne de7on daana malanne Goday ne Xoossay new immiya biitta ne laattana mela xillo pirda.
DEU 16:21 Neeni Godaa, Xoossaa yarsho bessa matan Asheera eeqa misiliya essofa.
DEU 16:22 Hinte Goday, Xoossay ixiya goyinno shucha tuussu new essofa.
DEU 17:1 Godaas, ne Xoossaas, borisiyabay de7iya mehe woyko dorse yarsho oothada shiishopa; hessi Xoossa sinthan ixetidaba.
DEU 17:2 Goday, ne Xoossay new immiya katamatape awunka adde woyko macca gidin Godaa, ne Xoossaa sinthan iitaba oothikonne iya caaquwa menthidi bentiko,
DEU 17:3 ta kiita aggidi, hara xoossata, awa woyko ageena woyko salo xoolinto goyinnida asi de7iko,
DEU 17:4 hessa melaba hinte si7iko, he odaa minthidi pilga. Hinte koyin, hessa mela tunabay Isra7eele giddon oosetidaysi tumanne geeshshi gidiko,
DEU 17:5 he iitaa oothida addiya woyko maccasiw ne katamaape gaxa kessada, shuchan caddada wodha.
DEU 17:6 Issi asi nam7u woyko heedzu marki markatonna de7ishin hayqofo; issi asa markan ay asika hayqofo.
DEU 17:7 Iya bolla markatida asati koyro iya shuchan caddo; enta kaallidi hanko asay caddo. Hessada oothada, iitaa ne giddofe digga.
DEU 17:8 Hinte sinthe shiiqiya mootoy deexo gidiko, hessika, shempo wodho, shoche, madunthi, dumma dumma mootota Goday, ne Xoossay doorida bessaa eha.
DEU 17:9 Kahine gidida Leewetakonne daynnatako he mootuwa shiisha; he mootuwa enti pirdo.
DEU 17:10 Goday doorida bessan enti pirdidaysada ootha; ne oothana mela enti kiittiyaba ubba akeekada ootha.
DEU 17:11 Enti nena tamaarsida higgiyadanne enti odida pirdada ootha; enti pirdida pirdaafe ushachi woyko haddirsi goopa.
DEU 17:12 Godaas, ne Xoossaas oothiya daynnas woyko kahiniyas kiitetonna ixiya asi de7iko, he uray hayqo. Hessada oothada, iitaa Isra7eele giddofe digga.
DEU 17:13 Asa ubbay hessa si7idi yayyana; zaaridi hessa mela iita oothiya asi deenna.
DEU 17:14 Goday, ne Xoossay new immiya biitta laattada, yan de7o doomiya wode, ne yuushon de7iya kawotethatada, “Nuka nu bolla kawo kawothana” yaagiko,
DEU 17:15 ne kawothana kawoy Goday, ne Xoossay new dooridaysa gidanaw bessees. Hessika, ne asaa giddofe dooretidaysa gidope attishin, hara biitta asi ne bolla kawothofa.
DEU 17:16 Goday, “He ogiyara Gibxe simmopite” yaagida gisho, he kawoy daro para shiishanaw bessenna; ba asaaka para shammana mela Gibxe yeddofo.
DEU 17:17 Iya wozanaa balethonna mela kawoy daro macco ekofo; daro worqanne bira shiishopo.
DEU 17:18 I ba araatan uttiya wode Leewe koche gidida kahineti naagiya maxaafape ha higgiya duuqidi baw eko.
DEU 17:19 I ha higgiya qaalanne wogaa naagonne polo eridi Godaas, ba Xoossaas, yashshi tamaarana mela, ha maxaafay iyara de7o; ika ha maxaafa ba de7o laytha ubban nabbabo.
DEU 17:20 I ba wozanan, “Taani ta laggetape aadhayis” gidi ba ishata bolla otortenna. Ika Xoossaa higgiyafe haddirsi woyko ushachi geenna. I ba kawotethan adussa laythi kawotana; iya nayti Isra7eele biittan daro laythi kawotana.
DEU 18:1 Leewe koche gidida kahinetasinne attida enta kochaas Isra7eele giddon laata biitti baawa. Asay Godaas shiishiya xuussa yarshoy enta gisho gidiya gisho iya mishe daana.
DEU 18:2 Entaw enta ishata giddon laati deenna; Goday entaw gidaysada I enta laata.
DEU 18:3 Korma woyko dorse asay yarshos shiishidaysafe kahineta gishoy haysa; missay, gacoynne ulo ashoy entaw imeto.
DEU 18:4 Ne kathaafe, woyniyapenne zaytiyape koyro gakida ayfiyanne ne dorsa ikisiyape bayraa kahinetas imma.
DEU 18:5 Leeweti Godaa sunthan merinaw kahine gididi oothana mela ne kochaa giddofe Goday, ne Xoossay enta dooris.
DEU 18:6 Issi Leewey Isra7eele biittan de7iya issi katamaape dendidi, Goday dooriya bessaa baanaw koyiko,
DEU 18:7 I biya bessan de7iya Leeweti Godaa sinthan eqidi ootheysada ika Godaa ba Xoossaa sinthan eqidi ootho.
DEU 18:8 Bana gakiya gishuwa ekidaba gidikoka, kahineti go7etiya ubbaa entara gina shaaketidi eko.
DEU 18:9 Goday ne Xoossay immida biitta ne geliya wode he biittan de7iya asay oothiya ixetida oosota oothofa.
DEU 18:10 Ba adde na7aa woyko macca na7iw yarshos taman xuuggiya oonika ne giddon bentofo. Biti, maraace be7ey, marotey, higishey,
DEU 18:11 moytille be7ey, hayqida asa ayyaana xeegey, woyko hayqida asa ayyaanara odetey ne giddon de7opo.
DEU 18:12 Hessa melaba oothiya oonika Godaa matan ixetida asi. Enti hessa mela tunaa oothiya gisho, Goday ne Xoossay he kawotethata ne sinthafe gooddana.
DEU 18:13 Shin neeni Godaa ne Xoossaa sinthan borey baynaysa gida.
DEU 18:14 Neeni laattanaw biya biittan de7iya kawotethati murunneysatanne biteyisata; shin ne hessa oothonna mela Goday ne Xoossay nena diggis.
DEU 18:15 Goday, ne Xoossay ne kochaa giddofe ta mela nabe new denthana. Ne I geysa si7a.
DEU 18:16 Koreeba zumaa bolla ne shiiqida wode Godaa ne Xoossaa haysada yaagada oychadasa; “Ta hayqonna mela Godaa, ta Xoossaa girsaa zaarada si7ike; ha wolqaama tama zaarada be7ike” yaagadasa.
DEU 18:17 Goday taako, “Enti tuma gidoosona.
DEU 18:18 Ta enta kochaa giddofe ne mela nabe entaw denthana; taani ta qaala iya doonan wothana; i, ta kiittiya ubbaa entaw odana.
DEU 18:19 I ta sunthan odiya ta qaala si7onna oonaka ta oychana.
DEU 18:20 Shin ta kiittonnaba ta sunthan odiya woyko hara xoossata sunthan odiya he nabey hayqo” yaagis.
DEU 18:21 Neeni, “Nabey odiya qaalay Xoossafe gidonnaysa ta aybin shaakada eranee?” yaagiko,
DEU 18:22 he nabey Godaa sunthan odida qaalay poletonna ixiko, hessi Goday odiboonna qaala gideysa eraasa. He nabey odiya qaalay wordo gidida gisho iya yayyofa.
DEU 19:1 Goday, ne Xoossay new immiya biittan de7iya kawotethata dhaysiya wodenne ne enta gooddada, enta katamataninne enta keethatan duussu doomiya wode,
DEU 19:2 Goday, ne Xoossay laata oothidi immiya biittan de7iya katamatape heedzu katamata new dummaya.
DEU 19:3 Goday, ne Xoossay new laata oothidi immiya biitta heedza kessada shaaka. Yaatada ase wodhida oonika he katamatako eeson baqatidi attana mela oge giigisa.
DEU 19:4 Issi asi kase morketethi bayna de7ishin, eronna ba laggiya wodhiko, I he katamatape issuwako baqatidi ba shempuwa ashsho.
DEU 19:5 Nam7u asati mithi qanxanaw wora bin, issoy mithaa qanxishin, mithaafe kalta ayfey koletidi hankuwa wodhiko, wodhida uray ha heedzu katamatape issuwako baqatidi, ba shempuwa asho.
DEU 19:6 Baqatidi attiya katamay issinni xalaala gidiko, wodhida uray eeson woxidi gakanaw ogey adusse gidiko, suuthi zaariya mata dabboy gooddi gakidi, yilon dendidi hayqanaw bessonna uraa wodhanaw danda7ees. I ba laggiya wodhiday kase morketethi de7iya gisho gidenna.
DEU 19:7 Hinte heedzu katamata dummayi wothana mela ta nena kiittey hessasa.
DEU 19:8 Goday, ne Xoossay kase ne mayzatas caaqidaysada ne zawa dalgisikonne ne mayzatas immana gida biitta ubbaa new immiko,
DEU 19:9 ha heedzu katamata bolla hara heedzu katamata guja. Hachi ta nena kiittiya ubbaa ne poliko, Godaa ne Xoossaa dosikonne I nena tamaarsida ogiyan minnada de7iko, ha biittay new imetana.
DEU 19:10 Hessa ne oothiko, Goday, ne Xoossay laata oothidi new immiya biittan xillo asa suuthi gukenna; neka suuthi gussada oyshetaka.
DEU 19:11 Shin issi asi ba shooruwa ixidi, qoseti naagidi iya wodhidi, ha katamatape issuwako baqatiko,
DEU 19:12 I de7iya kataman de7iya cimati I baqatida katamaape ehisidi, kushe zaaranaw koyeysas aathidi immo.
DEU 19:13 Iyaw aybaka qadhetofa; new ubbabay injetana mela, xillo suuthi gussida uraa Isra7eele giddofe digga.
DEU 19:14 Goday ne Xoossay neeni laattana mela immiya biittan, beni asay essida gade zawa shoddofa.
DEU 19:15 Issi asi bala oothanaw issi marka xalaali gidenna. Nam7u woyko heedzu marki markatin, he mootoy pirdetanaw koshshees.
DEU 19:16 Issi asi hara asi wordon mootiko,
DEU 19:17 mooteysinne mooteteysi nam7ay Godaa sinthan, kahineta sinthaninne daynnata sinthan eqo.
DEU 19:18 Daynnati he odaa minthidi pilgo; he uray ba ishaa wordon mooteysi tuma gidiko,
DEU 19:19 he mooteteysi ekanaw de7iya seera mooteysi seereto. Hessada oothada, iita uraa ne giddofe digga.
DEU 19:20 Hessada oothiko, hara asay hessa si7idi yayyana; hessa mela iita oosoy zaaridi oosetenna.
DEU 19:21 Hessa mela iita ooso oothidaysas qadhetofa; shempo gisho shempo; ayfe gisho ayfe; acha gisho ache; kushe gisho kushe; gedaa gisho gedaa mentha.
DEU 20:1 Neeni morketara oletanaw biya wode, enta parati, para gaaretinne enta olanchoti neepe darin be7ada, entaw yayyofa; nena Gibxefe kessida Goday, ne Xoossay neera de7ees.
DEU 20:2 Hinte ola doomanaape koyro, kahiney olanchota sinthe aadhidi haysada yaago;
DEU 20:3 “Isra7eele asaw, si7ite; hachi hinte, hinte morketara oletanaw haneeta. Hiza hinte wozanay dagammofo; yayyofite; enta sinthan kokoropite; hirgofite.
DEU 20:4 Goday, hinte Xoossay hintera biya gisho, hinte morketa olidi, hintew xoono immana” yaago.
DEU 20:5 Toora moconati olanchotako, “Ooratha keethi keexidi geliboonna asi de7iko, I olan hayqin, hara asi iya keethan gelonna mela I soo simmo.
DEU 20:6 Woyko woyne tokidi, ayfe moonna asi de7iko, I olan hayqin, hara asi iya woyne ayfiya moonna mela I soo simmo.
DEU 20:7 Macho oychidi ekiboonna asi de7iko, I olan hayqin, hara asi iya machiw ekonna mela I soo simmo” yaago.
DEU 20:8 Olaa kaaletheysati gujidi haysada yaago; “Ha asaa giddon yayyanne hirgiya oonika de7iko, I ba laggeta wozanaa yashshan til7isanaape soo simmo” yaago.
DEU 20:9 Olaa kaalethaysati hessa asaas odi wursiya wode cugaas cugaas toora moconata dooro.
DEU 20:10 Issi katamaa olanaw bada ne iyako matiya wode, koyrottidi sarora enti kushe immana mela oycha.
DEU 20:11 Enti sarora banta kushiya immidi, banta gimbe pengiya dooyidi nena gelsiko, he kataman de7iya asa ubbay new deexo ooso oothidi haggaazo.
DEU 20:12 He katamaa asay new sarora kushe immonna ixidi, olas giigetiko, ne he katamaa yuushuwa teqa.
DEU 20:13 Goday, ne Xoossay enta new aathidi immiya wode he kataman de7iya adde ubbaa mashshan wursa.
DEU 20:14 Gidoshin, maccasa, nayta, mehiyanne kataman de7iya ubbaba new di77a. Goday, ne Xoossay new immiya ne morketa shaluwa go7eta.
DEU 20:15 Ne de7iya bessaafe haakidi de7iya katamata ne oykiya wode hessada ootha.
DEU 20:16 Shin Goday, ne Xoossay new laata oothidi immiya biittan shempora de7iyaba issuwaka ashshona wodha.
DEU 20:17 Goday, ne Xoossay kiittidaysada Hiteta, Amooreta, Kanaaneta, Parzeta, Hiwetanne Yaabuseta wursada wodha.
DEU 20:18 Hessi hanonna ixiko, enti banta xoossata goyinnishe oothiya ixetida oosota hinte oothana mela hintena tamaarsidi, Godaa hinte Xoossaa bolla hinte nagara oothana mela denthethana.
DEU 20:19 Issi katama oykanaw yuushuwa ne teqada, daro gallas oletashe gam7iya wode, iyan de7iya ayfe immiya mithaa ayfiya mape attishin, qanxofa. Ne yuushuwa teqidi oley asepe attishin, denban de7iya mithaa gidenna.
DEU 20:20 Gidoshin, ne ayfe immonna hara mithata qanxada, neera oletiya katamay kundana gakanaw yan miixa keexa.
DEU 21:1 Ne laattana mela Goday, ne Xoossay new immiya biittan, ooni wodhidaako eretonna ahi kundidi bentiko,
DEU 21:2 hinte daynnatinne cimati bidi, ahay kundida bessaafe mata katamata gakanaw de7iya haahotetha wadho.
DEU 21:3 Hessafe guye, ahay kundida bessaas matiya katamaa cimati, wadhetaboonnanne morgen qambari wodhiboonna ussi eko.
DEU 21:4 Iyo goggiya haathi de7iya goyetidi eronnanne zeretidi eronna zangaara efidi, he ussee qoodhiya mirqidi mentho.
DEU 21:5 Hessa mela qohuwanne ooshsha shaakidi pirdanaw Goday, hinte Xoossay ba sinthan oothana melanne ba sunthan anjana mela enta doorida gisho, Leewe koche gidida kahineti he bessaa boo.
DEU 21:6 Hessafe guye, ahay kundida bessaas matiya katamaa cimati zangaaran qoodhe mirqidi wodhida ussee bolla banta kushiya meecetidi,
DEU 21:7 “Nu kushey ha suuthaa gussibeenna; nu ayfey hessa be7ibeenna.
DEU 21:8 Abeeti Godaw, neeni wozida ne asaa, Isra7eele maara; ha xillo suuthaa ne asaa bolla naaqo oothada taybopa. Ha xillo suuthaa gisho nu nagaray atto ga” yaago.
DEU 21:9 Neeni Godaa ayfiya sinthan hessada oothada, xillo suuthay gukida nagara ne giddofe digga.
DEU 21:10 Ne morketara ne oletanaw keyin, Goday, ne Xoossay enta ne kushen aathidi immin, enta di7iya wode,
DEU 21:11 di7etida asaa giddon issi mala lo7o maccas be7ada, iw mishetada machanaw koyiko,
DEU 21:12 iyo ne soo eha. I huuphiya meeda; I xuguntha cigga;
DEU 21:13 di7etiya wode de7iya ma7uwa laammada, issi ageena ne son uttada, ba aawasinne ba aayes kayoto. Hessafe guye, iyo macha.
DEU 21:14 Yaata simmada, iira duussay nena ufaysonna ixiko, iya ba koyida soo baana mela iyo yedda. Neeni iyo macho oothada iira issife aqida gisho, iyo miishen bayzanaw woyko aylle oothanaw bessenna.
DEU 21:15 Issi asas I dosiyanne dosonna nam7u macheti de7iko, he nam7ayka iyaw adde na7a yeliko, bayray I dosonna macceepe yeletidaba gidiko,
DEU 21:16 I ba nayta ba shaluwa laatisiya wode, I dosonnaripe yeletida bayray de7ishin, I dosiyaripe yeletida kaaluwa bayrayanaw bessenna.
DEU 21:17 Hara naytas immeysafe iyaw nam7u kushe aathidi immidi I dosonnari na7ay bayra gideysa erisanaw bessees. He na7ay iyaw kushe toho phalqida bayra gidiya gisho, bayratetha I ekanaw bessees.
DEU 21:18 Aawasinne aayes kiitetonna ixida, enti seerinka simmonna, wozana muumenne makallancho gidida na7i de7iko,
DEU 21:19 aawaynne aayiya he katamaa pengen de7iya cimatako iya eho.
DEU 21:20 Enti cimatako, “Haysi nu na7ay wozana muumenne makallancho; I nuus kiitetenna; I yarambanne ushshancho” yaagidi odo.
DEU 21:21 Hessafe guye, he kataman de7iya adde ubbay iya shuchan caddidi wodho. Hessada oothidi hinte giddofe iita uraa dhaysite; Isra7eele ubbay hessa si7idi yayyana.
DEU 21:22 Issi asi hayqo pirdisiya bala oothiko, ne iya mitha bolla kaqada wodhiko,
DEU 21:23 he mithaa bolla iya ahay aqopo; iya he gallas mooga. Mitha bolla kaqetidi hayqiya oonika Xoossan baadetidaysa. Goday, ne Xoossay new laata oothidi immiya ne biitta tunisopa.
DEU 22:1 Isra7eele asa boori woyko dorsi dhayidi bishin demmiko agga aadhofa; laagga ehada iya godaas imma.
DEU 22:2 He mehiya goday ne heera asi gidonna ixiko woyko iya goday ooneko ne eronna ixiko, iya goday koyishe yaana gakanaw ne soo efa; I koyishe yiiko iyaw imma.
DEU 22:3 Hessada hare woyko ma7o woyko aybaka dhayidabaa demmiko, hessada ootha.
DEU 22:4 Isra7eele asa harey woyko boori ogen kundin be7iko, maaddada denthafe attishin, aggada aadhofa.
DEU 22:5 Maccasi adde ma7o ma7ofo; addeyka maccasa ma7o ma7ofo. Hessa melaba oothiya oonaka Goday, hinte Xoossay ixees.
DEU 22:6 Ne oge bishin, mitha bolla gidin, sa7an ba na7aa woyko ba phuuphulliya haphida kafo demmiko, iyo, I naytara oykada ne soo efopa.
DEU 22:7 Nayta efanaw danda7aasa; shin aayiw baana mela yedda agga. Hessada oothiko, neeni duretada adussa laythi daana.
DEU 22:8 Ooratha keethi keexiya wode kaarape asi kundi hayqin ne oyshetonna mela keetha bolla kate giigisa.
DEU 22:9 Ne woyne gaden nam7u qommo kathi zeropa; hessada oothiko, ne zerida kathaynne woyney nam7ayka iitana.
DEU 22:10 Boorinne hare issife waaxada goyopa.
DEU 22:11 Suufepenne liinope oosetida ma7o ma7ofa.
DEU 22:12 Ne ma7iya ma7oy oyddu baggara macari de7iyaba gido.
DEU 22:13 Issi asi macho eki simmidi iyo dosona ixidi,
DEU 22:14 “Ha machiw ta ekiya wode kumethi giduku” yaagidi iyo iissidi odetiko,
DEU 22:15 na7e aawaynne na7e aayiya I geela7otetha malla efidi, katamaa pengen de7iya cimata besso.
DEU 22:16 Na7e aaway cimatas haysada yaagidi odo; “Taani ta na7iw ha uraas macho oothada immas, shin I, iyo ixis.
DEU 22:17 I, ‘Ne na7iya kumethi giduku’ yaagidi iyo iissidi odis. Gidoshin, ‘Ta na7e geela7otetha mallaa haysa be7ite’ ” yaagidi, I geela7otetha erisiya carqiya besso.
DEU 22:18 Yaatiko, he katamaa cimati iya garaafo.
DEU 22:19 I Isra7eele geela7e sunthaa iissida gisho, cimati iya xeetu bira santime acisidi, na7e aawas immo. Na7iya iyaw macho gidada de7o; ba de7o laytha ubban iyo yeddanaw bessenna.
DEU 22:20 Iya mootoy tuma gididi, na7iya kumethi gidonna ixiko,
DEU 22:21 iya ba aawa son de7ashe laymatida gisho, na7iw I aawa kare ehidi, he katamaa addeti iyo shuchan caddidi wodho. Isra7eele giddon iya borsoba oothasu; hessada oothada ne giddofe iitaa digga.
DEU 22:22 Issi asi hara asa machira laymatishe oyketiko, inne iyara laymatida maccasiya hayqo. Hessada oothada ne giddofe iitaa digga.
DEU 22:23 Issi asi hara asas oysheta giigida geela7iw katama giddon demmidi iira laymatiko,
DEU 22:24 enta nam7aa katamape gaxa kessidi, shuchan caddidi wodhite. Na7iya hayqey, katama giddon de7ashe, asi ashshana mela waassaboonna gishosa. Na7ay hayqey, hara asas giigida geela7iw iissida gishosa. Hessada oothada ne giddofe iitaa digga.
DEU 22:25 Issi asi asas giigida geela7iw asi bayna bessan wolqan oykidi, iyo iissiko, iya xalaali hayqo.
DEU 22:26 Iya hayqos gathiya nagara oothaboonna gisho, na7e bolla aybaka oothopite. Hessi issi asi coo dendidi hara asi wodheysa mela.
DEU 22:27 I iyo asi bayna bessan demmidi oykin, he geela7iya waassasu, shin iyo ashshiya asi bentibeenna.
DEU 22:28 Issi asi oyshetaboonna geela7iw oykidi, I geela7otetha ekidi oyketeko,
DEU 22:29 na7e aawa ishatamu bira santime acco. Yaatidi na7iw baw macho ootho. Ba de7o laytha ubban iyo yeddofo.
DEU 22:30 Issi asi ba aawa machiw ekidi, ba aawa kawushofo.
DEU 23:1 Sangatida woyko qaaratetida addey Godaa shiiquwa gelopo.
DEU 23:2 Laymatethan yeletida asi Godaa shiiquwa gelopo. Hari attoshin tammantho yeletethi gakanaw, iya kochaafe oonika Godaa shiiquwa gelopo.
DEU 23:3 Amoone asi gidin woyko Moo7abe asi gidin, Godaa asaa shiiquwa gelopo. Hari attoshin tammantho yeletethi gakanaw enta ase gidida oonika Godaa asaa shiiquwa gelopo.
DEU 23:4 Neeni Gibxefe keyada bishin, enti katharanne haathara nena mokibookona. Enti Masephexoomen Patoora kataman de7iya Bi7oora na7aa Balaami nena baaddana mela shammidosona.
DEU 23:5 Goday, ne Xoossay nena dosida gisho Balaama si7ibeenna; iya baadetha new anjon laammis.
DEU 23:6 Ne de7o laytha ubban enti saro daana melanne duretana mela amottofa.
DEU 23:7 Edoometi new dabbo gidiya gisho enta kadhopa; ne enta biittan bete asi gidada de7ida gisho Gibxeta kadhopa.
DEU 23:8 Enta heedzantho yeletethay Godaa shiiquwa gelanaw danda7oosona.
DEU 23:9 Ne morketa olanaw keyada dunkaanida bessan nena tunatethafe naaga.
DEU 23:10 Qamma amuhon atuntethay gukin, irxabay iya bolla de7iya oonika gutaape gaxa keyidi yan gam7o.
DEU 23:11 Sa7i omarsiya wode ba asatethaa meecetidi, awi wulliya wode gutaa simmo.
DEU 23:12 Ne wora sheeshi uttiya bessi gutaape karen giigisa.
DEU 23:13 Sheeshas uttiya olla bookiya miishe ola miishera gathada oyka; sheeshas utta simmada ollan biitta zaara.
DEU 23:14 Goday, ne Xoossay nena naaganawunne ne morketa ne kushen aathidi immanaw, ne gutan simeretees. I yan shaatiyaba be7idi, nena aggidi simmonna mela ne gutay geeshshi gidanaw koshshees.
DEU 23:15 Ba godaape baqatidi, neeko yida aylliya zaarada iya godaas immofa.
DEU 23:16 I ne katamatape issuwan, ba koyida bessan ba koyida wode gakanaw de7o; iya un7ethofa.
DEU 23:17 Isra7eele asaape oonika adde gidin woyko macca gidin, eeqa goyinniya asay ootheysada laymatopo.
DEU 23:18 Adde gidin woyko maccas gidin, laymatethan demmida miishe qaangethi gathanaw Godaa ne Xoossaa keethi ehopo. Enta nam7aa Goday ne Xoossay ixees.
DEU 23:19 Hinte koche gidida Isra7eele asaas miishe woyko kathi woyko haraba tal7ada yelo ekofa.
DEU 23:20 Hara biitta asape yelo ekanaw danda7aasa; shin neeni laattanaw geliya biittan ne oothiyaba Goday, ne Xoossay anjana mela ne koche gidida Isra7eele asaas yelora tal7ofa.
DEU 23:21 Godaas, ne Xoossaas, immanaw qangetidaba gathanaw gam7ofa. Goday ne Xoossay ne qangidaysa kumethi neepe koyiya gisho, polonna ixiko new nagara gidana.
DEU 23:22 Shin ne qangonna aggiko hessi nagara gidenna.
DEU 23:23 Godaas ne Xoossaas, immana gida ne doonan odetidaba neeni dosan immana gida gisho, ne inxarsan odetidaba pola.
DEU 23:24 Neeni issi asa woyne gade giddora aadhiya wode woyniyape koyda mela ma, shin iyape aybaka ne oykida miishen yeggofa.
DEU 23:25 Issi asa gadera neeni aadhiya wode he gadiyan de7iya tiyape duuthada ma; shin kathaafe cakada ne soo efopa.
DEU 24:1 Issi asi macho eki simmidi, issi iitabaa I bolla demmidi iyo ixidi, pirimaa daakidi, yeddiko,
DEU 24:2 iya soope keyada, hara azina geliko,
DEU 24:3 he nam7antho azinay iyo dosonna ixidi, pirimaa daakidi, iyo ba soope kessidi yeddiko, woyko iyo ekida nam7antho azinay hayqiko,
DEU 24:4 iya tunida gisho, koyro ekida azinay, zaaridi iyo ekofo. Hessi Godaa sinthan ixetidaba; ne Goday, ne Xoossay ne immiya biittan hessa mela nagara oothofa.
DEU 24:5 Ooratha macho ekida asi olas boopo; hara deexo ooso oothofo. Issi laythi aadhana gakanaw awuka boonna ba machiw ufayso.
DEU 24:6 Issi asa woxa woyko mayde acos oykofa; hessi keetha asay miyaba dhayidi hayqo guussu.
DEU 24:7 Issi Isra7eele gidida ba ishaa kaysoti efidi, aylle kessey woyko haras bayziya uray hayqo. Hessada oothada iita uraa ne giddofe digga.
DEU 24:8 Goga hargefe nena minthada naaga; Leewe koche gidida kahineti nena tamaarsiya ubbaa pola; ta entaw immida kiita naaga.
DEU 24:9 Neeni Gibxefe keyada ogen de7ishin, Goday ne Xoossay Mayraami bolla oothidaysa akeeka.
DEU 24:10 Issi asas issiba tal7ada, oythiyaba oychanaw iya soo gelopa.
DEU 24:11 Neeni karen eqidashin, ne tal7ida uray oothiyaba soope kessidi new immo.
DEU 24:12 I manqo gidiko, neeni acos oykida iya ma7uwa ne son aysopa.
DEU 24:13 I ma7idi aqana mela sa7i omarsiya wode iyaw guye zaara; I nena galatana. Hessi Godaa ne Xoossaa sinthan new xillotetha ooso gididi taybetana.
DEU 24:14 Manqonne maade koyidi dookaletida, Isra7eele gidida ne ishaa gidin woyko ne katamatape issuwan de7iya hara biitta asi naaqofa.
DEU 24:15 I hachi oothidaysa hachi ekanaw minthidi koyiya gisho, awi wullonna iyaw qanxa. Hessi hanonna ixiko, manqoy Godaako waassin hessi new nagara gidana.
DEU 24:16 Nayti oothida nagaraa gisho, aawata wodhanaw bessenna; qassi aawati oothida nagaraa gisho nayta wodhanaw bessenna. Oonika ba oothida nagaran nagaran hayqanaw bessees.
DEU 24:17 Hara biitta asaa pirdaanne yi7o nayta pirdaa wobbisopa; am7e ma7uwa aco gisho oykofa.
DEU 24:18 Neeni Gibxe biittan aylle gididaysanne Goday ne Xoossay nena yaape wozidi kessidaysa akeeka. Taani nena kiittey hessa gishosa.
DEU 24:19 Neeni kathi cakiya wode ne dogida mirqiya ekanaw guye simmofa. Goday, ne Xoossay ne kushe ooso ubban nena anjana mela hessa bete asas, yi7o naytasinne am7etas aggaaga.
DEU 24:20 Neeni shamaho ayfe maxiya wode wursada maxanaw nam7antho guye simmofa. Attidaysa bete asaas, yi7o naytasinne am7etas aggaaga.
DEU 24:21 Neeni woyne ayfe maxiya wode wursada maxanaw nam7antho guye simmofa. Attidaysa bete asas, yi7o naytasinne am7etas aggaaga.
DEU 24:22 Neeni Gibxe biittan aylle gidada de7idaysa dogopa. Taani nena kiittey hessa gishosa.
DEU 25:1 Nam7u asati ooyetidi pirda keethi biiko, daynnati xilluwa ne like gidi, naaqidaysa ne bala gidi pirdo.
DEU 25:2 Balidaysa garaafo bessiyaba gidiko, iya tirara zin7isidi zokon shocana mela daynnay kiitto. I garaafetey daynna sinthaninne I oothida balaa mela gido.
DEU 25:3 I oytamu gakanaw garaafetanaw danda7ees, shin hessafe daropo. Hessafe dariko ne ishay ne sinthan kawuyana.
DEU 25:4 Wudumman kathi yedhiya boora doona qachofa.
DEU 25:5 Issife de7iya ishatape issoy na7a yelonna hayqiko, iya machiya hara asi gelopo. I azinaa ishay iyo ekidi, iw koshshiyaba kuntho.
DEU 25:6 Hayqida ishaa sunthay Isra7eele asaa giddofe qushetidi dhayonna mela iya, koyro yeliya adde na7ay hayqida ishaa sunthan xeegeto.
DEU 25:7 Gidoshin, I ba ishaa machiw ekanaw koyona ixiko, maccasiya katamaa pengen de7iya cimatako bada, “Ta azinaa ishay ba ishaa sunthay Isra7eelen daana mela koybeenna; tana ekidi, taw koshshiyaba kunthonna ixis” yaagada odo.
DEU 25:8 Katamaa cimati iya xeegidi oychin, I ha77ika, “Taani iyo ekike” giiko,
DEU 25:9 maccasiya cimata sinthan iyako shiiqada, iya caammaafe issuwa kessada, iya som7on cuttada, “Ba ishaas zerthi daana mela koyonna asa bolla haysa mela kawushi gakanaw bessees” yaago.
DEU 25:10 Yaatin, he uraa soo asay Isra7eele kochaa giddon, “Caamma kessida asaa soo” geetetidi xeegetishe daana.
DEU 25:11 Nam7u asati wadhetishin, issuwa machiya yada, ba azinaa shoceysa kushepe ashshanaw, ba kushiya yeddada hankuwa addetetha oykiko,
DEU 25:12 I kushey qadhey bayna qanxeto.
DEU 25:13 Gitanne guuthi gidida nam7u mizaane oykofa.
DEU 25:14 Daronne guuthi makiya nam7u maka miishey new doopo.
DEU 25:15 Goday, ne Xoossay new immiya biittan adussa laythi ne daana mela like mizaaneynne maka miishey new de7o.
DEU 25:16 Goday ne Xoossay hessa melaba oothidi, balethiya oonaka ixees.
DEU 25:17 Ne Gibxefe keyada oge bolla de7ishin, Amaaleqati ne bolla oothidaba akeeka.
DEU 25:18 Enti Xoosse yayyonna dere; ne ogiyan enti neera eqetidosona. Ne bishin, daaburidi guye attida asa ubbaa wodhidosona.
DEU 25:19 Hessa gisho, Goday ne Xoossay nena he biitta laatisidi, ne yuushuwan de7iya morketape nena shempisiya wode ha biittan enta hassayiya asi dhayana gakanaw Amaaleqata ubbaa dhaysa; hessa oothanaysa dogopa.
DEU 26:1 Goday, ne Xoossay nena laatisiya biitta gelada, wopu gada duussi oykiya wode,
DEU 26:2 Goday, ne Xoossay new immiya biittan mokida katha ubbaafe bayraa, Goday ne Xoossay ba sunthay xeegetana mela doorida bessaa ekada ba.
DEU 26:3 He wode aawatiya kahiniyako bada, “Goday taw immana gidi kase nu mayzatas caaqida bessaa nuna gelsida Godaas, nu Xoossaas, hachi markatayis” yaagite.
DEU 26:4 Kahiney kathaa ne kushepe ekidi, Godaa ne Xoossaa yarsho bessa sinthan wotho.
DEU 26:5 Hessafe guye, Godaa ne Xoossaa sinthan haysada yaaga; “Ta mayzay bessafe besse yuuyishe de7ida Soore biitta asi; I taybon guutha asatara Gibxe wodhidi yan de7is. I yan de7ishe gita, wolqaamanne taybon daro dere gidis.
DEU 26:6 Shin Gibxeti nuuni aylle gididi oothana mela un7ethidosona; kawushidosona.
DEU 26:7 Yaatin, nuuni Godaako, nu aawata Xoossaako waassida. Goday nu waasuwa si7is; nu waayiya, nu daaburanne nu un7etetha be7is.
DEU 26:8 Goday ba wolqaama kushiyan, ba micetida qesiyan, gita dagaman, malaataninne malaalsiyabatan nuna Gibxefe kessis.
DEU 26:9 Ha bessaa nuna ehidi, maathinne eessi goggiya ha biitta nuus immis.
DEU 26:10 Heko, Goday nuus immida biitta ayfiyape bayraa ehas” yaagada, kathaa Godaa ne Xoossaa sinthan wothada, iya sinthan gufanna.
DEU 26:11 Newunne ne soo asaas Goday, ne Xoossay immida lo77oba ubban ufaytashe, Godaa galata. Leewetinne ne giddon de7iya bete asa ubbayka neera ufayto.
DEU 26:12 Asraata kessiya heedzantho laythan, ne kathaafe asraata kessa ongidaape guye ne kataman de7iya Leewetas, bete asaas, yi7otasinne am7etas immada enti kallidi maana mela ootha.
DEU 26:13 Godaa, ne Xoossaako, “Taani ta soope dummatida katha imota kessada, ne tana kiittidaysada Leewetas, bete asaas, yi7otasinne am7etas immas. Taani ne kiitaape issuwaka menthabike; issuwaka doga aggabike.
DEU 26:14 Ta kayotiya wodeka, he asraatape aybaka mabike; ta tunida wodeka iya bochabike; hayqida asas iyape immabike. Taani Godaa, ta Xoossaa bonchas; I tana kiittidaba ubba polas.
DEU 26:15 Ne de7iya geeshsha bessaafe, salope duge xeella; ne deriya Isra7eele anja; kase nu mayzatas ne immana gada caaqida maathinne eessi goggiya biitta nuus anja” yaaga.
DEU 26:16 Ne ha awaajotanne wogata naagana mela Goday ne Xoossay hachi nena kiittis. Hessa gisho, ne kumetha wozanapenne kumetha shempuwafe enta naaga.
DEU 26:17 Goday, new Xoosse gideysanne neeni iya ogiyan baanaw, iya wogaa, iya kiitaanne higgiya naaganaysa hachi erisadasa.
DEU 26:18 Goday ba gelida qaalada ne iya dere gideysa, iyaw buzo miishe gideysanne iya kiita ubbaa naageysata gideysa hachi nena erisis.
DEU 26:19 Hessa ne oothiko, I medhida dere ubbaafe aathidi nena galatan, sunthaninne bonchon gita dere oothana. I gelida qaalada ne iyaw geeshsha dere gidana.
DEU 27:1 Hessafe guye, Museynne Isra7eele cimati asaako, “Taani hachi hintena kiittiya kiitaa naagite.
DEU 27:2 Yordaanose shaafa pinnada, Goday ne Xoossay new immiya biitta geliya wode gita shuchata essada noora tiya.
DEU 27:3 Goday, ne aawata Xoossay new immana gidaysada maathinne eessi goggiya biitta, Goday ne Xoossay new immiya biitta ne pinniya wode ha higgeta ubbaa he shuchata bolla xaafa.
DEU 27:4 Neeni Yordaanose pinnida wode ta nena hachi kiittidaysada ha shuchata Ebaala zuma bolla essada enta bolla noora tiya.
DEU 27:5 He bessan Godaas, ne Xoossaas, birati bochonna shuchafe yarsho bessi giigisa.
DEU 27:6 Godaas, ne Xoossaas yarsho bessi masetiboonna shuchafe ootha; iya bolla Godaas, ne Xoossaas xuussa yarsho yarsha.
DEU 27:7 Issifetetha yarshuwa shiishada mashe Godaa, ne Xoossaa sinthan ufayta.
DEU 27:8 Ha higgeta bentana mela oothada ha shuchata bolla qoncen xaafa” yaagis.
DEU 27:9 Museynne Leewe gidida kahineti issife asaako, “Isra7eele, si77i gada wozanape si7a; hachi ne Godaa, ne Xoossaa dere gidadasa.
DEU 27:10 Ta hachi new immiya Godaa, ne Xoossaa awaajota naaganne kiiteta” yaagis.
DEU 27:11 He gallas Musey asaa haysada yaagidi kiittis.
DEU 27:12 “Hinte Yordaanose pinnidaape guye Garzaana zuma bolla eqidi asaa anjanaysati, Simoona, Leewe, Yihuda, Yisakoora, Yoosefanne Biniyaame kochata.
DEU 27:13 Qassi Ebaala zuma bolla eqidi asaa baaddanaysati, Robeela, Gaade, Aseera, Zabloona, Daanenne Niftaaleme kochata.
DEU 27:14 “Leeweti banta qaala dhoqu oothidi, Isra7eele asaako haysada yaago.
DEU 27:15 Godaa sinthan ixetidaba gidiya gisho, kushe hiillanchchoy mithi massidi, birata sheeshidi woyko shuchi qoxidi oothida eeqa geeman goyinniya oonika baadetidaysa gido” giiko,
DEU 27:16 “Ba aawa woyko ba aayiw kawushiya oonika baadetidaysa gido” giiko,
DEU 27:17 “Ba shooruwa zawa sugiya asi baadetidaysa gido” giiko,
DEU 27:18 “Qooqey baanaw bessiya ogiyape hara soo zaariya asi baadetidaysa gido” giiko,
DEU 27:19 “Bete asaa, yi7o naytanne am7eta pirda geellayiya asi baadetidaysa gido” yaagiko,
DEU 27:20 “Ba aawa machiw xaallidi, ba aawa bonchuwa qaariya asi baadetidaysa gido” giiko,
DEU 27:21 “Mehera tuniya asi baadetidaysa gido” giiko,
DEU 27:22 “Ba micho gidida aawa woyko aaye na7era tuniya asi baadetidaysa gido” giiko,
DEU 27:23 “Ba mache aayera tuniya asi baadetidaysa gido” giiko,
DEU 27:24 “Ase geeman wodhiya asi baadetidaysa gido” giiko,
DEU 27:25 “Miishen shametidi, xillo asi wodhiya asi baadetidaysa gido” giiko,
DEU 27:26 “Ha higgeta naagonna asi baadetidaysa gido” giiko,
DEU 28:1 Neeni Godaa ne Xoossaas polo kiitetiko, hachi ta new immiya kiita ubbaa minthada naagiko, Goday, ne Xoossay biittan de7iya kawotethata ubbaafe aathidi nena dhoqu dhoqu oothana.
DEU 28:2 Neeni Godaa, ne Xoossaas kiitetiko, haysafe kaallidi de7iya anjo ubbay nebaa gidana.
DEU 28:3 Ne katamaninne ne goshshan anjetidaysa gidana.
DEU 28:4 Ne ulo ayfey, ne kathay, ne mehey, ne dorsatinne ne deeshati anjetidaysata gidana.
DEU 28:5 Ne keesheynne ne munaqa miishey anjetidaysa gidana.
DEU 28:6 Ne kessaynne ne geloy anjetidaysa gidana.
DEU 28:7 Ne bolla dendiya ne morketa, Goday ne sinthan xoonetidaysata oothana. Enti ne bolla issi ogera yaana, shin laapun ogera ne sinthafe baqatana.
DEU 28:8 Goday ne kushey oykiyabaanne ne shaaliya anjana; Goday, ne Xoossay new immiya biittan nena anjana.
DEU 28:9 Neeni Godaa, ne Xoossaa kiita naagikonne iya ogiyan biiko, I new caaqidaysada Goday nena baw geeshsha dere oothidi essana.
DEU 28:10 Hessafe guye, biittan de7iya asa ubbay Goday ba sunthan nena xeegidaysa be7idi yayyana.
DEU 28:11 Goday new immanaw ne mayzatas caaqida he biittan, ne ulo ayfiya, ne mehiya, ne goshsha ayfiya darsidi anjana.
DEU 28:12 Ne kushe ooso ubbaa anjanawunne, Goday ne biittas ira woden woden bukisanaw ba minja keethaa, salo pengiya new dooyana. Neeni daro kawotethatas gede tal7anaape attishin, oodefeka haa tal7aka.
DEU 28:13 Goday nena ubbaas kace kessanaape attishin, goyna kessenna. Hachi ta new immiya, Godaa, ne Xoossaa kiita si7ada, minthada naagiko, ne bolla gidanaape attishin, garse gidaka.
DEU 28:14 Ta new hachi immida kiitaape haddirsi woyko ushachi gada, hara xoossata kaallofa; enta goyinnofa.
DEU 28:15 Shin neeni Godaa, ne Xoossaas kiitetonna ixada, hachi ta nena kiittiya wogaanne higgiya ubbaa naagonna ixiko, haysafe kaallidi de7iya baadethati ubbay ne bolla yaananne nena demmana.
DEU 28:16 Ne katamaninne ne goshshan baadetidaysa gidana.
DEU 28:17 Ne keesheynne munaqa miishey baadetidaysa gidana.
DEU 28:18 Ne ulo ayfey, ne katha ayfey, ne mehey, ne dorsaynne deeshay baadetidaysa gidana.
DEU 28:19 Ne kessaynne ne geloy baadetidaysa gidana.
DEU 28:20 Neeni iita ooso oothada tana aggida gisho, neeni eeson dhayana gakanaw ne oothiya ooso ubban Goday baadethi, dagamanne kawushatethi yeddana.
DEU 28:21 Neeni laattanaw biya biittafe dhayana gakanaw Goday, gadoy neepe duuxonna mela oothana.
DEU 28:22 Goday nena gilqatethan, mishan, madunthan, xuuggiya awan, koshan, wol7oninne kathi dhaysiya harmen ne dhayana gakanaw shocana.
DEU 28:23 Neepe bollara de7iya saloy naase birata gidana; neepe garsara de7iya biittay birata gidana.
DEU 28:24 Goday ne biittan bukiya ira bidonne baana kessana; neeni dhayana gakanaw salope baani bukana.
DEU 28:25 Goday nena ne morketan xoonisana. Neeni enta olanaw issi ogera keyana; shin laapun ogera ne enta sinthafe baqatana. Biittan de7iya kawotethi ubbay ne bolla gakidaba be7idi, yashshan kokorana.
DEU 28:26 Ne ahay salo kafotasinne bazzo do7atas kathi gidana; enta yedethiya oonika deenna.
DEU 28:27 Goday nena paxoy bayna Gibxe gadon, kixan, madunthaninne puuso hergen shocana.
DEU 28:28 Goday nena gooshshatethan, qooqetethaninne dagaman shocana.
DEU 28:29 Seeta gallas neeni qooqey tattafeysada tattafana; ne oothiyaba ubbay new giigonna ixana. Ne de7o laytha ubban ne un7etananne bonqetada daana. Nena maaddiya asi demmaka.
DEU 28:30 Ne macho oycha giigisana, shin iyo hari dafi ekidi iissana. Neeni keethe keexana, shin iyan de7aka. Woyne tokana, shin iya ayfiya maaka.
DEU 28:31 Ne booray ne sinthan shuketana, shin iya ashuwa maaka. Ne harey neepe wolqan eketana, shin new guye simmenna. Ne dorsati ne morketas imetana, enta ashshanaw nena maaddiya asi deenna.
DEU 28:32 Ne ayfey be7ishin ne adde naytinne macca nayti hara kawotethas imetana. Enti simmin be7ana gada xeellishin, ne ayfey tollu gidi attana; hessa digganaw new wolqi deenna.
DEU 28:33 Ne biitta ayfiyanne ne cawa ubbaa ne eronna asi maana; ne de7o laytha ubban un7etidaysanne naaqetidaysa gidana.
DEU 28:34 Ne be7iya iitati nena gooshshana.
DEU 28:35 Goday paxoy bayna iita madunthan ne gulbatanne ne wodiriya hargisana; tohope huuphe gakanaw, nena he madunthan shocana.
DEU 28:36 Goday nenanne ne kawa, nenanne ne mayzata eronna asa biitta efana. Hessan neeni mithafenne shuchafe oosetida hara xoossata goyinnana.
DEU 28:37 Goday nena laaliya hara kawotethata giddon neeni miichasinne kaassas attana.
DEU 28:38 Neeni daro kathi ne goshshan zerana; shin booley midigin, guutha kathi shiishana.
DEU 28:39 Woyne tokada iya harmana, shin guxuney iya midigin, iyape ayfe demmaka woyko iyape uyaka.
DEU 28:40 Ne biitta ubban shamahoy dolana, shin ayfey qoqofetidi wuriya gisho, shamaho zayte demmaka.
DEU 28:41 Ne addenne macca yelana, shin oli di77idi efiya gisho enti neera dookona.
DEU 28:42 Ne mithaanne ne biitta ayfiya booley wursana.
DEU 28:43 Ne giddon de7iya bete asay ne bolla dhoqu dhoqu gaana, shin ne guye attada ziqi ziqi gaana.
DEU 28:44 I new tal7anaape attishin, ne iyaw tal7aka; I huuphe gidana; neeni goyna gidana.
DEU 28:45 Godaa, ne Xoossaa, ne kiitetonna ixida gishonne iya wogaanne higgiya naagonna ixida gisho, ne dhayana gakanaw ha baadethati ubbay ne bolla wodhana; nena enti yedethana.
DEU 28:46 Ha baadethati ne bollanne ne kochaa bolla merinaw malaatanne malaalsiyaba gidana.
DEU 28:47 New sa7i injetida wode Godaa, ne Xoossaa ufaysaninne galatan goyinnona gisho,
DEU 28:48 nena koshan, saamon, kallotethaninne meton ubbaba dhayada, Goday ne bolla yeddiya ne morketas haaretana. Goday nena dhaysana gakanaw ne morgen birata qambara wothana.
DEU 28:49 Goday ne enta qaala eronna kawotethata, biitta gaxape ankoy piradhidi wodheysada ne bolla ehana.
DEU 28:50 Enti wozana minota; cima bonchonayisata; naytas qadhetonayisata.
DEU 28:51 Ne dhayana gakanaw enti ne mehiyanne goshsha ayfiya maana. Neeni dhayana gakanaw ne kathaa, ne woyniya, ne zaytiya, ne miizanne ne dorsa wudiya maarokona.
DEU 28:52 Goday, ne Xoossay new immiya biittan de7iya ne ammanetiya adussenne mino dirsati laaletana gakanaw ne katamaa yuushuwa teqidi nena un7ethana.
DEU 28:53 Ne morketi katamaa teqidi nena un7ethiya wode miyaba dhayada, Goday ne Xoossay new immida ne ulo ayfe gidida ne adde naytanne ne macca nayta maana.
DEU 28:54 Ne giddon hari attoshin kase injen de7ida asika ba ishaas, ba dosiya machesinne ba yelida naytas ba kathaafe shaakenna.
DEU 28:55 Morketi katamaa teqidi un7ethiya wode maanabay hari bayna gisho, miya ba nayta ashuwape hara oodeska immenna.
DEU 28:56 Ne giddon kase injen de7ida, ba injiyafe dendoysan sa7a yedhanaw shaatetiya maccasiya, ba dosiya azinaasinne ba yelida naytas uuzettana.
DEU 28:57 Morketi iya de7iya katamaa teqidi iyo un7ethida gishonne waaysida gisho, iw hari miyabay dhayin, ba yelida na7aanne do7aa enta gathonna geeman barka maana.
DEU 28:58 Ha maxaafan xaafetida higgeta ne naagonna ixiko, malaalsiyanne yashshiya Godaa, ne Xoossaa suntha bonchona ixiko,
DEU 28:59 ne bollanne ne kochaa bolla Goday, yashshiya gado, daro wode gam7iya, paxoy bayna iita harge yeddana.
DEU 28:60 Kase Gibxe asaa bolla be7ada, ne yayyida Gibxe harge ubbaa zaaridi ne bolla ehana; he hargey nena yeddenna.
DEU 28:61 Gujidika, ha higge maxaafan xaafetiboonna hargetanne gadota ubbaa ne dhayana gakanaw Goday ne bolla ehana.
DEU 28:62 Godaa, hinte Xoossa hinte si7onna ixida gisho, salo xoolintoda darida hintefe guuthi attana.
DEU 28:63 Goday, hintew lo77oba oothiya wodenne hinte tayboy dariya wode ufaytidaysada ha77i hinte bolla gado ehiya wodenne hintena dhaysiya wode ufaytana; hinte laattanaw biya biittafe shodetidi dhayana.
DEU 28:64 Goday nena ha gaxape ya gaxa gakanaw kawotethata ubbaa giddon laallana. Yan neeni woyko ne mayzati eronna hara mithinne shucha xoossata goyinnana.
DEU 28:65 He kawotethata giddon hinte shempo demmeketa; tohoy yedhiya bessika new deenna. Yan Goday new qofan kumida guugge, amon argaacida ayfenne ufaysi qanxida wozana immana.
DEU 28:66 Ne de7oy hirgan kumana; gallasinne qamma dagamaninne hayqo yashshan un7etada daana.
DEU 28:67 Ne wozanan kumida yashshaafenne ne ayfey be7iya palabaape dendoysan, wontiya wode neeni, “Awude qammandeesha” qassi qammiya wode, “Awude wontandesha” yaagana.
DEU 28:68 Ta nena, “Zaarada ha ogiyara baaka” gida ogiyara Goday nena zaaridi markaben guye Gibxe yeddana. Yan neeni aylle gidanaw ne morketas nena bayzanaw koyana, shin hintena aylleyanaw shammiya asi demmeketa.
DEU 29:1 Goday Koreeba zuman, Isra7eele asaara caaqida caaquwa bolla gujidi Moo7aben entara caaqanaw Muse kiitida caaqo qaalati haysata.
DEU 29:2 Musey Isra7eele asaa ubbaa xeegi shiishidi, haysada yaagis. Goday Gibxe kawa bolla, iya olanchota bollanne iya biitta ubbaa bolla oothidabaanne gathidaba hinte, hinte ayfen be7ideta.
DEU 29:3 Enta bolla gathida iita metota, malaalsiyabatanne gita malaatata hinte, hinte ayfen be7ideta.
DEU 29:4 Shin hachi gakanaw Goday, hintew akeekiya wozana, xeelliya ayfenne si7iya haythi immibeenna.
DEU 29:5 Goday oytamu laythi kumethi hintena mela biittan kaalethiya wode hinte ma7oy wuribeenna, hinte caammay cimibeenna.
DEU 29:6 Goday, hinte Xoossaa gideysa hinte erana mela uythi mibeeketa; woyne woyko hara mathoyiya ushshi uyibeeketa.
DEU 29:7 Nuuni ha bessa gakida wode Haseboona Kawoy Sihooninne Baasane Kawoy Oogey nuura oletanaw keyidosona, shin nuuni enta xoonida.
DEU 29:8 Enta biitta ekidi, Robeelanne Gaade kochaas, qassi Minaase kochaafe baggaas laata oothidi immida.
DEU 29:9 Hinte oykiyabaynne yedhiyabay hintew anjetana mela ha caaqo qaalata ammanetidi naagite.
DEU 29:10 Hachi hinte ubbay, kochata halaqati, cimati, shuumatinne Isra7eele asa ubbay haysan Godaa sinthan eqideta.
DEU 29:11 Hinte naytara, hinte machetara, hinte giddon de7idi, mithi mixiyanne haathe tikiya hara biitta asaara issife haysan eqideta.
DEU 29:12 Godaa, hinte Xoossara qaala gelanaw haysan eqideta. Goday ha qaala hachi hintera caaqon minthana.
DEU 29:13 Goday hintena ba ase oothidi minthana; hintewunne hinte mayzatas, Abrahaames, Yisaaqasinne Yayqoobas caaqidaysada I hintew Xoosse gidana.
DEU 29:14 Goday ha caaqo qaala essey hinte xalaalara gidenna.
DEU 29:15 Hachi haysan, Godaa, nu Xoossaa sinthan eqida nu ubbaaranne sinthafe yaana yeleta ubbaara essees.
DEU 29:16 Nuuni Gibxen waanidi de7idaakonne ha77i gakanaw ogen de7iya kawotethata giddora waanidi kanthidi yidaako ereeta.
DEU 29:17 Enta giddon de7iya ixetida mitha, shucha, biranne worqa eeqa misileta be7ideta.
DEU 29:18 Ha hintefe oonika adde gidin macca gidin, issi soo asi gidin, issi kochi gidin Godaa, nu Xoossaafe, haakidi hara kawotethata xoossata goyinnona mela naagetite. Hessa mela cammiyanne wodhiya ayfe ayfiya asi hinte giddon de7opo.
DEU 29:19 Ha caaqo qaala si7idi, ba wozanan, “Ta shenen taani biikoka, metoy baawa” yaagidi bana cimmiko, hessa mela asi lo77ota bollanne iitata bolla dhayo ehees.
DEU 29:20 Godaa hanqoynne qanaatey hessa mela ase bolla eexidi keyana. Ha maxaafan xaafetida baadethi ubbay iya bolla yaana; salope garsan iya suntha Goday quchana.
DEU 29:21 Goday ha higge maxaafan xaafetida baadetha caaqo qaalada he uraa Isra7eele giddofe shaakidi dhaysana.
DEU 29:22 Yaana yeletethay, hinte sheeshaynne haaho biittafe yaa hara biitta asay, Goday hinte bolla ehida gaduwanne hargiya be7ana.
DEU 29:23 Biitta ubbay diinneninne maxinen kumana; toketiyabay deenna; doliyabay bentenna; maatinne mithi dolenna. Goday ba hanqon dhaysida Soodomadanne Gamoorada, Adaamadanne Xaboyma katamatada hanana.
DEU 29:24 Kawotethati, “Goday ha biitta bolla haysa melaba ayis oothidee? Ha wolqaama hanquwas gaasoy aybee?” yaagana.
DEU 29:25 Asay zaaridi, “Enti Goday, enta aawata Xoossay, enta Gibxefe kessida wode entara gelida caaqo qaala menthida gishosa.
DEU 29:26 Enti eronna xoossatasinne I goyinnofite gida xoossata goyinnidosona.
DEU 29:27 Hessa gisho, Goday hanqetidi, ha maxaafan xaafetida baadethata ubbaa enta bolla ehis.
DEU 29:28 Goday wolqaama hanqo hanqetidi, enta biittafe entana shoddidi hara biitta yedethis” yaagana.
DEU 29:29 Xuuray nu Godaa nu Xoossasa, shin nuuni ha higge qaala oothana mela qoncidaysati merinaw nuusanne nu naytasa.
DEU 30:1 Hachi ta ne sinthan wothida anjoynne baadethay ne bolla gakiya wode Goday, ne Xoossay nena laaliya hara kawotethata giddon de7ishe haysa ne akeekiko,
DEU 30:2 nenne ne nayti Godaa, ne Xoossaako, simmada, ne kumetha wozanapenne ne kumetha shempuwafe taani hachi nena kiittiya higgiyas kiitetiko,
DEU 30:3 yan Goday, ne Xoossay ne di7etida biittafe nena zaarana. I hintew qadhetidi hintena laallida kawotethata ubbaa giddofe zaaridi shiishana.
DEU 30:4 Biitta gaxape gaxa gakanaw ne laaletikoka, yaape Goday, ne Xoossay nena zaaridi shiishana.
DEU 30:5 Ne aawati kase laattida biitta, neka laattana mela Goday, ne Xoossay nena he biitta ehana. Yan nena ne aawatape aathidi dureyana; ne taybuwa darsana.
DEU 30:6 Ne de7on daana melanne Godaa, ne Xoossaa ne kumetha wozanapenne ne kumetha shempuwafe dosana mela I newunne ne naytas kiitetiya wozana immana.
DEU 30:7 Goday, ne Xoossay ha baadethata ubbaa ne morketanne nena gooddeyisata bolla ehana.
DEU 30:8 Hachi ta nena kiittiya higgiya ne naagana; zaarada Godaas, ne Xoossaas kiitetana.
DEU 30:9 He wode Goday ne Xoossay nena ne kushe ooso ubban, ne ulo ayfiyan, mehiyaninne ne goshsha ayfiyan nena darsidi anjana. Goday kase ne aawata anjidi ufaytidaysada nena anjidi ufaytana.
DEU 30:10 Hessi hananay ha higge maxaafan xaafetida Godaa, ne Xoossaa higgiyanne wogaa naagada, Godaa, ne Xoossaako ne kumetha wozanapenne ne kumetha shempuwafe simmiko.
DEU 30:11 Hachi ta nena kiittiya kiitati hessa mela deexo gidokona; neepe haakokona.
DEU 30:12 Neeni, “Nuuni si7idi kiitetana mela salo keyidi nuus wodhisanay oonee?” goonna mela salona gidenna.
DEU 30:13 “Nuuni si7idi kiitetana mela nuus abba pinnidi ehanay oonee?” goonna mela abbaafe hefinthana gidenna.
DEU 30:14 Qaalay new daro matan de7ees; ne oothana mela qaalay ne wozanaaninne ne doonan de7ees.
DEU 30:15 Heko, ta hachi ne sinthan de7onne lo77otethi, hayqonne dhayo wothas.
DEU 30:16 Ne Godaa, ne Xoossaa dosiko, iya ogiyan biiko, iya kiitaa, iya awaajuwanne iya higgiya naagiko, ne de7on daananne darana. Ne laattanaw geliya biittan Goday, ne Xoossay nena anjana.
DEU 30:17 Shin ne wozanay Godaape haakin, iyaw kiitetonna ixada, hara xoossatas gufannada enta goyinniko,
DEU 30:18 hinte ubbay dhayanaysa ta hachi hintew odayis. Yordaanose pinnidi hinte laattanaw biya biittan hinte laythay aduqenna.
DEU 30:19 Ta hinte sinthan de7onne hayqo, anjonne baadethi wothidaysas hachi salonne sa7a hinte bolla markayana. Hiza hintenne hinte sheeshay de7on daana mela de7o doorite.
DEU 30:20 Godaa ne Xoossaa dosa; iya qaala si7a, iyaw kiiteta; iyara oyketa. Hessada haniko, Goday kase ne mayzatas, Abrahaames, Yisaaqasinne Yayqoobas immanaw caaqida biittan nenne ne sheeshay adussa laythi daana.
DEU 31:1 Musey ba odaa wursidaape guye Isra7eele asaako haysada yaagis;
DEU 31:2 “Ha77i taw xeetanne laatamu laythi gidida gisho, hizape guye kaalethanaw danda7ike. Goday taako, ‘Ne Yordaanose pinnaka’ yaagis.
DEU 31:3 Goday, ne Xoossay ne sinthe aadhidi nena kaalethana. Yan de7iya kawotethata I dhaysana gisho, enta biitta ne laattana. Goday gidaysada Iyyasuy hintena kaalethana.
DEU 31:4 Goday Amoore kawota Sihoonanne Ooge xoonidi, enta biitta dhaysidaysada hinte morketa hessada oothana.
DEU 31:5 Goday enta hintew aathidi immin, hinte enta bolla ta hintena kiittidaysada oothana.
DEU 31:6 Minnite; gencite; yayyofite. Enta be7idi dagammopite. Goday hinte Xoossay hintera gidana; I hintena yeggenna, aggenna” yaagis.
DEU 31:7 Musey Iyyasu xeegidi, Isra7eele asaa ubbaa sinthan haysada yaagis; “Minna; genca. Ne ha asaara issife Goday enta mayzatas immana gidi caaqida biitta gelaasa; he biitta enta laatisaasa.
DEU 31:8 Goday, I ba huuphen neera gididi nena kaalethana. I nena yeggenna; aggenna. Hessa gisho, yayyofa; ufaysi qanxofa” yaagis.
DEU 31:9 Musey ha higgiya xaafidi, Godaa qaala caaqo Taabotiya tookiya kahine gidida Leewe naytasinne Isra7eele cimatas immis.
DEU 31:10 Musey entako, “Aco ubbay atto geetetiya laapuntha laytha wursethan, Shaqara Ba7aaley bonchetiya gallas, ha higgiya dhoqu oothidi nabbabite.
DEU 31:11 Godaa, hinte Xoossaa sinthan, I doorida bessan, iya goyinnanaw Isra7eele asa ubbay shiiqiya wode entaw nabbabite.
DEU 31:12 Enti ubbay si7idi, Godaa, hinte Xoossaas yashshi tamaarana mela ha higge qaala ubbaa naagana mela addeta, maccasata, naytanne hinte biittan de7iya hara biitta asaa issife shiishite.
DEU 31:13 Ha higge qaala eronna enta naytika Yordaanose pinnidi, hinte laattanaw biya biittan, hinte de7iya laytha ubban ha higgiya si7o; Godaas, hinte Xoossaas, yashshi tamaaro” yaagidi kiittis.
DEU 31:14 Goday Museko, “Ne hayqiya wodey matis. I kaalethana wogaa ta iyaw immana mela Iyyasu xeegada, iyara issife Dunkaaniya penge shiiqite” yaagin, Museynne Iyyasuy Dunkaaniya pengiyako shiiqidosona.
DEU 31:15 Goday Dunkaaniya pengen eqida shaara tuussan entaw qoncis.
DEU 31:16 Goday Museko, “Neeni mata wode hayqada ne aawatan gahetaasa. Neepe guye, ha asay taw ammanetonayisata gidana; ta entara gelida caaquwa menthana. Enti tana aggidi, banta laattiya biittan de7iya eeqata kaallana.
DEU 31:17 Hessi haniya wode ta hanqoy enta bolla eexana; ta enta aggaagana; ta som7uwa entafe hara soo zaarana. Enti dhayana; iita metoynne dhayoy enta bolla yaana. He wode enti, ‘Tuma ha metoy nuna gakiday nu Xoossay nu giddon bayna gisho gidennee?’ yaagana.
DEU 31:18 Hara xoossata goyinnidi, enti oothida iita oosuwa gisho, ta he gallas ta som7uwa entafe hara soo zaarana.
DEU 31:19 “Ha77i ha mazmuriya xaafada, Isra7eele asaa ubbaa tamaarsa. Ha mazmurey taw Isra7eele asaa bolla marka gidana mela enta yexisa.
DEU 31:20 Enta mayzatas gelida qaalada, maathinne eessi goggiya biitta ta enta gelsa simmin, enti mi kallidi goobidaape guye, hara xoossata goyinnidi, tana kadhana; ta caaquwa menthana.
DEU 31:21 Daro metoynne dhayoy enta bolla gakida wode ha mazmurey enta naytape baletonna gisho, enta bolla marka gidana. Taani caaqida biitta enta buroo gelsonna de7ishin, haara enti qopiya qofaa taani erayis” yaagis.
DEU 31:22 Musey he gallas mazmuriya xaafidi, Isra7eele asaa tamaarsis.
DEU 31:23 Hessafe guye, Goday Nawe na7aa Iyyasuko, “Minna, genca; ta entaw immanaw qaala gelida biitta Isra7eele asaa efada gelsa. Ta neera gidana” yaagis.
DEU 31:24 Musey ha higgeta koyrope wursethi gakanaw xaafidi wursidaape guye,
DEU 31:25 Godaa, Qaala caaqo Taabotiya tookiya Leeweta haysada yaagidi kiittis;
DEU 31:26 “Godaa higgey xaafetida ha maxaafa efidi, Godaa, hinte Xoossaa Qaala caaqo Taabotiya matan wothite. Yan I hinte bolla marka gidana.
DEU 31:27 Hinte ay mela geellekonne wozana iiteko ta erayis. Tuma, ta hintera de7ida laytha ubban hinte Godaas makallata, shin ta hayqin, ubba hintte waanidi makallandetii?
DEU 31:28 Hessa gisho, haysa ubbaa ta entaw odanawunne salonne sa7a ta enta bolla markayanaw hinte kochaa halaqatanne deriya kaalethiya asaa ubbaa taw shiishite.
DEU 31:29 Ta hayqidaape guye, hinte tuma iita ase gidanaysanne taani hintena tamaarsida kiitaape hara soo simmanaysa taani erayis. Hinte iya sinthan iitabaa oothidi, Godaa yiloyiya gisho, wodepe I hinte bolla iita gado ehana” yaagis.
DEU 31:30 Hessafe guye, Musey ha mazmure qaalata wurana gakanaw shiiqida Isra7eele maabara ubbaa nabbabidi sissis.
DEU 32:1 Saloto, taani odeysa si7ite; biittay ta doona qaala hayzo.
DEU 32:2 Ta timirtey ira mela buko; ta qaalay akada wodho. Maata bolla wodhiya xaasada dola bolla wodhiya puuseda wodho.
DEU 32:3 Taani Godaa sunthaa awaajana; gitatetha nu Xoossaas immite.
DEU 32:4 I nu Zaalla; iya oosoy polo; iya ogey suure. Xoossay ammantheysa; wordoy baynaysa; I tumanchonne suure.
DEU 32:5 Iya sinthan banta tunatethaa bessidosona; enti iya na7a gidokona; enti iitanne geella yeletethi.
DEU 32:6 Hinteno, eeyanne akeeki bayna asaw, hinte Godaas immiya zaaroy haysee? I hintena medhida hinte Aawa gidennee? hintena medhidi minthi essiday iya gidennee?
DEU 32:7 Beni wodiya qopa; aadhida yeletethaa akeeka. Ne aawa oycha; I new odana; cimata oycha; enti new qoncisana.
DEU 32:8 Ubbaafe Wolqaamay kawotethatas enta laata shaakida wode, asa zerethika dummayida wode, Isra7eele asaa taybuwa mela, asaas enta zawa essis.
DEU 32:9 Godaa gakida gishoy Isra7eele; Yayqoobi iya gakida laata.
DEU 32:10 I enta mela biittan, aykoy bayna mela biittan, carkoy baqishin demmis. Iyaw gondalle gidis, iya naagis; ba ayfe na77eda minthidi naagis.
DEU 32:11 Arganthi ba na7a paalo tamaarseysada, ba miccida qefiyan gakidi ashsheysada, Goday ba qefiyan haphidi enta ashshis.
DEU 32:12 Goday ba xalaala enta kaalethis; hara allaga xoossi iyara baawa.
DEU 32:13 I biittas dhoqa bessaa enta kessis; goshsha ayfiya enta muzis. Zaalla qophope enta eessi kalsis; shucha biittafe bentiya zayte ushshis.
DEU 32:14 Enta mehiyape qeesa maathi, dorsafenne deeshape xamaata maathi, modho dorsenne deesha asho midosona. Baasane dorsaanne deesha ashuwa, lo77o giste uythara midosona; suuthi daaniya woyne ushsha uyidosona.
DEU 32:15 Shin Isra7eeley ordis; makallis; midi kallidi moollotis. Bana medhida Xoossaa aggis; ba Atotethaa Zaalla kawushis.
DEU 32:16 Enti allaga xoossata goyinnidi, iya qanaatisidosona. Ixetida banta eeqatan iya hanqethidosona.
DEU 32:17 Xoosse gidonaysatas, kase enti eronna xoossatas, zine dendidaysatas, enta aawati goyinniboona xoossatas yarshidosona.
DEU 32:18 Entaw de7o immiya Zaalla dogidosona; yelidi dichida Xoossa aggidosona.
DEU 32:19 Adde naytinne macca nayti iya yiloyidosona; Goday hessa be7idi enta kadhis.
DEU 32:20 I, “Enti geellanne ammanetona dere gidiya gisho, taani ta som7uwa entafe genthana; enta wursethaa si77i gada be7ana” yaagis.
DEU 32:21 Xoosse gidonaysatan tana qanaatisidosona; banta eeqatan tana yiloyidosona. Taani enta kadhetida asan qanaatisana; eeya asan enta yiloyana.
DEU 32:22 Ta hanqoy tamada eexana; Si7oole gakanaw xuuggana. Biittan de7iyaba ubbaa maana, deriya baasuwa gakanaw xuuggana.
DEU 32:23 “Taani enta bolla meto doorana; ta dongiyan enta dukana.
DEU 32:24 Ta enta bolla iita kosha yeddana; enti hargeninne gadon wurana. Enta bolla iita bazzo do7atanne dukidi wodhiya iita shooshata yeddana.
DEU 32:25 Enta, mashshi oge bolla wursana; keetha garsan dagami kawotana. Na7atetha addetinne maccati wurana; guutha naytinne cimati attokona.
DEU 32:26 Ta enta dhaysanawunne enta hassayiya asi doonna mela oothanaw qopas.
DEU 32:27 Shin enta morketi, ‘Xooniday nuna; ha ubbaa oothiday Godaa gidenna; yaagidi otoron ceeqetonna mela gada aggaagas’ ” yaagis.
DEU 32:28 Isra7eele asay wozani bayna asi; enti akeekokona.
DEU 32:29 Enti cincidi akeekidako haysa erana, banta wursethaka shaakanashin.
DEU 32:30 Goday enta Xoossay enta bayzonaako, enta medhida Wolqaamay aathidi immonaako, waatidi issi asi mukulu asaa, num7u asi tammu mukulu asaa xoonii?
DEU 32:31 Nu Zaallay nu morketa zaalla mela gidonnaysa enti eroosona.
DEU 32:32 Enta woyney Soodome woyniyape yees, enti Gamoora goshshan dolidosona; ayfiyan marzeynne camoy kumis.
DEU 32:33 Enta woyney shoosha marze; wodhiya soggo.
DEU 32:34 Goday, “Ta hessa dogadina? Ta mazgaben xaafabikina?
DEU 32:35 Entaw dhayo gallasi matis; enta bolla gakanabay ellesees. He wode enta tohoy dhubetana; ta halo keyananne kushe zaarana.”
DEU 32:36 Enta wolqay wuridaysanne enta maaddiya asi baynaysa be7ida wode, Goday ba asaas pirdana; ba aylletas qadhetana.
DEU 32:37 Xoossay entako, “Enti ammanetiya enta xoossati awunee? Enti baqatidi qosetiya enta zaallay awunee?” yaagana.
DEU 32:38 Enta modho yarshuwa midaysati, enta woyne ushsha yarshuwa uydaysati, ha77i dendidi enta maaddo; enta asho.
DEU 32:39 “Tuma, Godi tana; Xoossi ta xalaala; taape attishin, hara Xoossi baawa. Wodheynne paathey tana; ta madunxisayis; ta pathayis; ta kushepe oonika ashshena.
DEU 32:40 Ta kushiya denthada haysada yaagana; Taani merinaw de7o;
DEU 32:41 Phooliya ta mashsha leefada, pirdanaw ta kushen oykiya wode, ta morketa bolla ta halo keyana; tana ixeysatas kushe zaarana.
DEU 32:42 Ta dongey enta suuthan mathotana; ta mashshay enta ashuwa maana. Tana ixiya ubbaa maarike; madunxidaysatinne di7etidaysati hayqana.”
DEU 32:43 Kawotethato, Godaa asaara ufaytite; I ba aylleta suutha accana. Ba morketa bolla halo keyana; biittan de7iya ba asaa nagaraa atto gaana.
DEU 32:44 Museynne Nawe na7ay Iyyasuy Isra7eele asaa shiishidi, ha mazmuriya ubbaa asay si7ishin yexidosona.
DEU 32:45 Musey ha qaala ubbaa Isra7eele asaas odi wursidaape guye,
DEU 32:46 entako, “Ha higge qaala ubbaa hinte nayti naagana melanne kiitetana mela hachi ta hintew marka oothada immiya qaala ubbaa hinte wozanan wothite.
DEU 32:47 Ha qaalay hintew de7ope attishin, coo qaala gidenna. Hinte ha qaala naagiko, Yordaanose pinnidi laattana biittan adussa laythi daana” yaagis.
DEU 32:48 He gallas Goday Muse haysada yaagis;
DEU 32:49 “Moo7aben, Iyaarko katamape sintha baggara de7iya Abariima Zumatape issuwa gidida Nabo Zuma bolla keya; yan Isra7eele asaa ta laatisana, Kanaane biitta haahon xeella.
DEU 32:50 Ne ishaa Aaroni Hoora Zuma bolla hayqidi, ba mayzata gakidaysada neka ha zumaa bolla hayqada ne mayzata gakana.
DEU 32:51 Hinte nam7ay Isra7eele asaa sinthan taw ammanetibeketa. Siina mela biittan, Qaadesa matan de7iya Mariba haatha matan ta geeshshatetha Isra7eele asaa bessibeketa.
DEU 32:52 Hessa gisho, neeni he biitta haahon xeellanaape attishin, ta Isra7eele asaa laatisana biitta gelaka” yaagis.
DEU 33:1 Xoossa asi gidida Musey hayqanaape sinthe, Isra7eele asaa anjida anjo qaalay haysa.
DEU 33:2 Musey, “Goday Siina zumaape yis; Sayre zumaape nu bolla poo7is. Paarana zumaape phoolis. Mukulan taybetiya kiitanchoti iyara de7oosona; Iya ushachan tama lacoy de7ees.
DEU 33:3 Godaw neeni ne asaa dosadasa; Geeshshati ubbay ne kushen de7oosona. Ne tohuwa garsan ubbay gulbatidi goyinnoosona; neepe kiita ekoosona.
DEU 33:4 Musey immida higgiya Isra7eele asaa laata ekoosona.
DEU 33:5 Isra7eele zerethati deriya halaqatara shiiqida wode, Goday ba asaa, Isra7eele bolla kawotis.
DEU 33:6 “Robeela kochay taybon guutha gidikoka, I hayqofo; paxa de7o.”
DEU 33:7 Musey Yihuda kochaaba, “Godaw, Yihuda waasuwa si7a; hanko iya yaratara iya bu7a. Enta kushiya minthetha; enti banta morketara oletiya wode enta maadda.
DEU 33:8 Musey Leewe kochaaba, ne Tumiimeynne Uriimey, neeni Masahan paacidanne Mariban palamida, ne geeshsha asaasa.
DEU 33:9 Bantana yelidaysatape, banta ishatapenne banta naytape aathidi, enti new ammanetidosona; ne caaqo qaala naagidosona.
DEU 33:10 Enti ne wogaa Yayqooba, ne higgiya Isra7eele tamaarsoosona. Enti ne sinthan ixaane cuyisoosona; yarsho bessan xuussa yarsho yarshoosona.
DEU 33:11 Abeeti Godaw, Leeweta anja; enta kushe oosuwan ne ufayta. Enta bolla dendiya morketa mentheretha zaari dendonna mela enta morketa cadda.”
DEU 33:12 Biniyaame kochaaba, “Godan dosetiday iyan ammanetidi de7ees; qamma gallas I enta naagees; ba hashiyan tookidi shempisees.”
DEU 33:13 Yoosefa kochaaba, “Goday, salope iran, sa7ape pulto haathan enta biitta anjo.
DEU 33:14 Awan kaxidi dooretida ayfeninne woden woden kaxiya ayfen anjeto.
DEU 33:15 Benipe de7iya deretinne zumati lo77o ayfen anjeto.
DEU 33:16 Enta biittay lo77obay kumida biitta gido; tushiya giddon eexiya taman qoncida Goday iya anjo. Ha anjoti ubbay Yoosefa kochaa gako; I ba ishata giddon halaqa gido.
DEU 33:17 Yoosefi koyro yeletida kormada mino; iya kaceti mentha kaceda mino. Iya kaceti tammu mukulan taybetiya Efreema kochata; mukulun taybetiya Minaase kochata. He kacetan I kawotethata qaycana; biitta gaxaa gakanaw I enta sugana.”
DEU 33:18 Zabloona kochaaba, “Zabloona, neeni ne kessan ufayta; Yisaakora, neeni ne dunkaaniyan ufayta.
DEU 33:19 Enti asaa banta zumako xeegana; yan enti geeshshatetha yarsho yarshana. Banta aquwanne banta duretetha, abbaafenne abba gaxan de7iya shafiyape demmana” yaagis.
DEU 33:20 Gaade kochaaba, “Enta biitta dalgisida Goday galatetto; Gaadi morke som7o woyko qese menthanaw, gaammoda naagees.
DEU 33:21 Enti lo77o biitta bantaw dooridosona; halaqatas gida biitta enti ekidosona. Isra7eele halaqati shiiqida wode, Godaa geeshsha sheniya shaakidi eridosona Isra7eeles suure pirdaa pirdidosona” yaagis.
DEU 33:22 Daane kochaaba, “Daaney wodala gaammo mela; I Baasanepe gupidi keyana” yaagis.
DEU 33:23 Niftaaleme kochaaba, “Niftaalemey Godaa aadho keehatethan, iya anjuwan duretis; enta biittay Abbaafe dugeha bagga gakees” yaagis.
DEU 33:24 Aseera kochaaba, “Aseeri hara kochatape aadhidi anjetidaysa; ba ishatan dosetidaysa gido; iya biittay shamaho zayten dureto.
DEU 33:25 Iya katamati birata pengen gordetidi naageto; ba laytha ubban I wolqaama gido.
DEU 33:26 Isra7eele, salope nena maaddanaw, ba gitatethan shaara bolla hemetiya, ne Xoossaa mela xoossi oonee?
DEU 33:27 Merinaa Xoossay ne de7iya bessi; iya merinaa kusheti neepe garsara de7oosona. I ne morketa ne sinthafe kessidi, ‘enta dhaysa’ yaagis.
DEU 33:28 Hessa gisho, Isra7eele kochay, salo iray bukiya bessan, kathinne woyney kumida biittan, hirgi bayna saro daana.
DEU 33:29 Isra7eele, ne anjetadaysa; Goday ashshida ne meli oonee? I new gondallenne maaddiya mashsha; ne morketi ne sinthan gufannana; ne enta baasuwa laallana” yaagis.
DEU 34:1 Musey Moo7abe dembaafe dendidi, Nabo zuma huuphiya, qassi Iyaarkofe doloha baggara de7iya Pisga zuma huuphiya gakis. Yan Goday Daane gakanaw de7iya Galada biitta,
DEU 34:2 Niftaaleme biitta ubbaa, Efreemenne Minaase biitta, wuloha baggara bidi Medetiraane Abbaa gakanaw de7iya Yihuda biittanne
DEU 34:3 dugeha baggara Zo7aarepe dendidi, zambi de7iya Iyaarko katamaa, zangaaran de7iya demba ubbaa bessis.
DEU 34:4 Goday Museko, “Taani hinte sheeshas immana gada Abrahaames, Yisaaqasinne Yayqoobas, caaqida biittay haysa. Ha77i neeni ne ayfen be7ana mela oothas, shin neeni yaa pinnaka” yaagis.
DEU 34:5 Godaa aylley, Musey, Goday gidaysada, yan Moo7abe biittan hayqis.
DEU 34:6 Goday Beet-Pa7oora katamaape sintha baggan Moo7abe zangaaran iya moogis. Shin hachi gakanaw I moogetida duufuwa eriya asi baawa.
DEU 34:7 Musey hayqiya wode iyaw laythi xeetanne laatama; shin iya ayfey ixibeenna; iya wolqay daaburibeenna.
DEU 34:8 Isra7eele asay Moo7abe denban hastamu gallas Muses yeekidosona. Hessafe guye, baley dendin, yeeho wodey wuris.
DEU 34:9 Musey, ba bessan oothana mela, iya bolla ba kushiya wothida gisho, Nawe na7ay Iyyasuy cincatetha ayyaanan kumis. Isra7eele asay Iyyasus kiitetidosona; Goday Muse baggara immida kiita naagidosona.
DEU 34:10 Godaa som7on odisida, Muse mela nabey, Isra7eele biittan dendibeenna.
DEU 34:11 Goday Muse Gibxe kawako, iyara oothiya moorinnatakonne kumetha asaako yeddidi, iya baggara malaatatanne malaalsiyabata ubbaa oothida, Muse mela hara nabey oonika baawa.
DEU 34:12 Isra7eele ubbaa sinthan gita wolqan malaalsiyaba oothida, Muse mela asi oonika baawa.
JOS 1:1 Godaa aylley Musey hayqidaape guye, Goday Muse maaddiya Nawe na7aa Iyyasu, haysada yaagis.
JOS 1:2 “Ta aylley, Musey hayqis. Hessa gisho, neeranne ha asa ubbay dendidi, taani Isra7eele asaas immanaw de7iya biitta gelanaw, Yordaanose shaafa pinnite.
JOS 1:3 Taani Muses odidaysada, hinte tohoy yedhiyaso ubba hintew immas.
JOS 1:4 Hinte zaway dugeha Negebe mela biittafe dendidi, pudehan de7iya Libaanose zuma gakanaasa. Qassi doloha baggan de7iya Efraxiisa wogga shaafape dendidi, Hiteta biitta ubba ekidi wuloha baggan de7iya Medetrane abba gakanaasa.
JOS 1:5 Iyyasu, ne laytha ubban oonika neera eqetanaw danda7ena. Taani Musera gididaysada, neeraka gidana. Taani nena yeggike; aggike.
JOS 1:6 Aykoy baawa minna. Taani enta mayzatas immana gada caaqida biitta neeni ha asaa laatisana.
JOS 1:7 Aykoy baawa minna. Ta aylley Musey new immida higgiya ubbaa minthada naaga. Neeni biya bessa ubban new injetana mela iyape ushachi woyko haddirsi goopa.
JOS 1:8 Ha higge maxaafay ne doonape shaaketofo. Iyan xaafetidaba ubbaa minthada naaganaw gallasinne qamma iya qopa. Hessa ne oothiko, new ubbabay injetananne poletana.
JOS 1:9 Ne biya bessa ubban taani Goday ne Xoossay neera de7iya gisho, babofa; hirgofa; yaagada new odayis” yaagis.
JOS 1:10 Hessafe guye, Iyyasuy deriya halaqata haysada yaagis;
JOS 1:11 “Asay dunkaanidi de7iya guta bidi, heedzu gallasa garsan, ‘Goday, hinte Xoossay, hintew immiya biitta laattanaw Yordaanose shaafa pinniya gisho, hintew shinqe giigisite’ yaagidi deriyas odite” yaagis.
JOS 1:12 Iyyasuy, Robeelanne Gaade kochata qassi Minaase kochatape bagga haysada yaagis;
JOS 1:13 “Goday, hinte Xoossay, hintena shempisana, ha biittaa hintew immana yaagidi, Godaa aylley Musey odidaysa qopite.
JOS 1:14 Hinte macheti, hinte naytinne hinte mehey Yordaanose Shaafape hafinthan Musey hintew immida biittan de7ishshona. Shin hinte olanchoti banta ola miishiya oykidi, hinte asaape sinthatidi, oletanaw Yordaanose shaafa pinnona.
JOS 1:15 Goday hintena shempisidaysada, entaka shempisana gakanawunne Goday hinte Xoossay entaw immiya biitta enti laattana gakanaw, enta maaddite; oletite. Yaatidi, simmi yidi, Yordaanose Shaafape hafinthan doloha baggan, Godaa aylley Musey immida hinte buzo biittan de7ite” yaagis.
JOS 1:16 Enti zaaridi Iyyasuko, “Ne nuna kiitida ubbaa nuuni oothana; ne kiittiyaso ubbaa baana.
JOS 1:17 Nuuni Muses ubbaban kiitetidaysada, newuka kiitetana. Goday, ne Xoossay Musera gididaysada, neeraka gido.
JOS 1:18 Neera eqeteynne ne kiita ixiya oonika de7iko, hayqo. Gidoshin neeni minna” yaagidosona.
JOS 2:1 Nawe na7ay Iyyasuy, biitta wochi be7iya nam7u asata Seexima geetetiya bessaafe qosan kiittishe, “Bidi biitta wochite; qassi Iyaarko katama dummayidi wochite” yaagidi kiittis. Enti bidi, Raabo geetetiya laymatethan aqiya ase soo aqanaw gelidosona.
JOS 2:2 Iyaarko kawoy, “Isra7eele asape kiitetidaysati ha biitta wochanaw hachi qamma yidosona” giya odaa si7is.
JOS 2:3 Yaatin, Iyaarko kawoy Raabiko, “Ne soo gelida asati biitta wochanaw yida asi gidiya gisho, entana kessada imma” yaagidi kiittis.
JOS 2:4 Shin maccasiya he nam7u asata qottada, “Ee asati taako yidosona, shin enti awupe yidaako ta erike.
JOS 2:5 Omarsi katama pengiya gordana haniya wode, enti keyidi bidosona. Enti awu bidaako ta erike. Ellesidi enta hinte kaalliko, oykana” yaagada entaw odasu.
JOS 2:6 Shin iya asata dasa bolla kessada talba coyna giddon qosasu.
JOS 2:7 Yaatin, kawoy kiitida asati wocheyisata koyishe, Yordaanose Shaafa pinthiya ogiya gakanaw bidosona. Enti katamaape buroo keyida mela katama pengey gordetis.
JOS 2:8 Wocheysati dhiskanaape kasetada, iya entako keyada,
JOS 2:9 haysada yaagasu; “Goday ha biitta hintew immidaysa ta erayis. Gaasoyka, hintefe dendidaysan gita yashshan asa ubbay til7is.
JOS 2:10 Gibxe biittafe hinte keyida wode, Goday hinte sinthan Zo7o Abbaa waati melisidaako nu si7ida. Qassi Yordaanose Shaafape doloha baggara de7iya Amoore kawota nam7ata, Sihoonanne Ooge hinte waatidi wodhidakonne enta katama waatidi dhaysidaako nu si7ida.
JOS 2:11 Nuuni hessa si7ida wode, nu wozanay yashshan til7is. Hiza, hinte Goday, Xoossay saluwaka sa7aaka haareysi iya gideysa nu erida.
JOS 2:12 Hessa gisho, ta hintew keehidaysada hinte ta aawa soo asaas keehanaada Godaa sunthan caaqite. Hessas ammanthiya malla taw immite.
JOS 2:13 Ta aawanne ta aayiw, ta ishatanne ta micheta eta soo asaa ubbaa wodhoko gidi caaqite” yaagasu.
JOS 2:14 He asati zaaridi, “Nu new caaqida caaquwa polonna ixiko, Xoossay nuna wodho. Nu oothiyaba ne asas qoncisonna ixiko, Goday ha biitta nuus immiya wode, nuuni new ammanetananne keehana” yaagidosona.
JOS 2:15 Ra7aabi keethay katama gimbe dirsara oyketidi keexetida gisho, maskootiyara wodoro duge yeddada, entana duge wodhisasu.
JOS 2:16 Ra7aaba entako, “Hintena koyeysati demmonna mela deriyako, bidi enti simmana gakanaw yan heedzu gallas qosetite. Yaani simmidi, hinte biya bessa baanaw danda7eeta” yaagasu.
JOS 2:17 Asati zaaridi, “Nuuni ha biitta oykanaw geliya wode, ha zo7o wodoruwa ne nuna wodhisida maskootiyan qachonna ixikonne ne aawa, ne aayiw, ne ishatanne ne soo asa ubbaa ne soo shiishonna ixiko, ne nuna caaqisida caaqoy nuus gome gidenna.
JOS 2:19 Oonika ne soope kare keyidi hayqiko, hessi iya gome. Nuuni hessas oyshetoko. Neera son de7ishe oonika qohetiko, iya suuthaa gomey nuna gako.
JOS 2:20 Shin nu oothiyaba neeni asas qoncisiko neeni nuna caaqisida caaqoy nuus gome gidenna” yaagidosona.
JOS 2:21 Iya zaarada, “Hinte qaalada hano” gada enta moyzasu. Enti bidaape guye, he zo7o wodoruwa maskootiyan qachasu.
JOS 2:22 Enti deriyako bidi, enta koyeysati Iyaarko simmana gakanaw yan heedzu gallas qosetidosona. Enta koyeysati oge ubban koydosona, shin demmibookona.
JOS 2:23 Hessafe guye, he nam7u asati deriyape wodhidosona. Yordaanose pinnidi, Nawe na7aa Iyyasuko yidi, bantana gakidaba ubbaa odidosona.
JOS 2:24 Enti Iyyasuko, “Goday tuma he biittiw nuus aathidi immis. Qassi he biittan de7iya asa ubbay, nuus yayyidi til7idosona” yaagidosona.
JOS 3:1 Wontetha gallas, wonta guura Iyyasuynne asay Seexima geetetiya bessaafe dendidi, Yordaanose shaafa bidi, pinnonna yan dunkaanidosona.
JOS 3:2 Heedzu gallasape guye, halaqati enti dunkaanida guta gelidi,
JOS 3:3 “Leewe koche gidida kahineti tookida, Godaa, hinte Xoossaa caaqo taabotiya hinte be7ida wode dunkaanida gutaape dendidi enta kaallite.
JOS 3:4 Hinte kase ha ogiyara bidi eronna gisho, hinte baana ogiya enti bessaana. Shin caaqo taabotiyako shiiqopite. Hinte giddoninne caaqo taabotiya giddon nam7u mukulu wadha gidiya haahotethi de7o” yaagidi odidosona.
JOS 3:5 Iyyasuy asaako, “Goday wonto hinte giddon malaalsiyaba oothana gisho, hintenatethaa geeshshite” yaagis.
JOS 3:6 Qassi kahinetas, “Caaqo taabotiya tookidi, asape sinthe aadhite” yaagidi kiittis. Kahineti caaqo taabotiya tookidi, asape sinthe aadhidosona.
JOS 3:7 Goday Iyyasuko, “Taani Musera gididaysada, neeraka gidanaysa asa ubbay erana mela hachi Isra7eele ubbaa sinthan nena dhoqu dhoqu ooso doomana.
JOS 3:8 Neeni, caaqo taabotiya tookiya kahinetas, ‘Yordaanose shaafa doona gakiya wode haatha gido gelidi eqite’ gada kiita” yaagis.
JOS 3:9 Iyyasuy Isra7eele asaako, “Haa yidi Godaa, hinte Xoossaa qaala si7ite.
JOS 3:10 De7o Xoossay hinte giddon de7eysa hinte eranay, Kanaaneta, Hiteta, Hiweta, Parzeta, Gergeseta, Amooretanne Yaabuseta hinte sinthafe I gooddidi kesseysana.
JOS 3:11 Biitta ubba Godaa caaqo taabotey hintefe sinthatidi, Yordaanose shaafa pinnana.
JOS 3:12 Hiza tammanne nam7u Isra7eele zerethatape issi issi asi doorite.
JOS 3:13 Biitta ubba Godaa caaqo taabotiya tookida kahineta tohoy Yordaanose haatha yedhiya wode haathay eqana. Qommofe duge goggiya Yordaanose haathay issi bolla shiiqidi dooretana” yaagis.
JOS 3:14 Asay Yordaanose shaafa pinnanaw dunkaanida gutaape dendiya wode, caaqo taabotiya tookida kahineti asaa sinthan boosona.
JOS 3:15 Kathi shiishiya wode Yordaanose shaafay medhaysada kixikoka, caaqo taabotiya tookida kahineti Yordaanose shaafa gakidi, enta tohoy haatha gaxa yedhida wode,
JOS 3:16 qommofe duge goggiya haathay eqis. Zartaana matan de7iya Adaama katama gakanaw shiiqidi dooretis. Duge Hayqo abbaako goggiya haathay eqis. Yaanin, asay Iyaarko katama pinnidosona.
JOS 3:17 Isra7eele asay mela biittara pinnidi wurana gakanaw Godaa caaqo taabotiya tookida kahineti Yordaanose shaafa giddon mela biittan eqidosona.
JOS 4:1 Asa ubbay Yordaanose pinnidaape guye Goday Iyyasuko,
JOS 4:2 “Issi issi Isra7eele kochaafe issi issi asi ekada tammanne nam7u asata doora.
JOS 4:3 He asati Yordaanose shaafa giddon kahineti eqida bessaafe tammanne nam7u shuchata ekana melanne he shuchata hachi hinte dunkaanidi aqiya bessan wothana mela oda” yaagis.
JOS 4:4 Iyyasuy Isra7eele zerethatape dooretida tammanne nam7u asata xeegis.
JOS 4:5 Entako, “Godaa hinte Xoossaa caaqo taabotey de7iya bessa guye Yordaanose shaafa gelidi, issi issi Isra7eele zerethata taybon ubbay issi issi shuchi hinte hashen tookite.
JOS 4:6 Ha shuchati, Goday hachi oothidaba hintena qofisiya malaata gidana. Wonto hinte nayti, ‘Ha shuchati aybisee?’ yaagidi oychiya wode,
JOS 4:7 hinte zaaridi, ‘Godaa caaqo taabotey pinniya wode Yordaanose haathay gogethi aggis. Hessa gisho, ha shuchati ha bessan hanidaba Isra7eele asaa ubba wode qofisiyaba gidana’ ” yaagis.
JOS 4:8 He asati Iyyasuy kiitidaysada oothidosona. Goday Iyyasus odidaysada, Isra7eele zerethata taybon Yordaanose shaafape tammanne nam7u shuchata efidi, enti aqiya bessan wothidosona.
JOS 4:9 Iyyasuy, Kahineti Yordaanose shaafan caaqo taabotiya tookidi, eqida bessan tammanne nam7u shuchata essis. He shuchati hachi gakanaw yan de7oosona.
JOS 4:10 Musey Iyyasu kiitidaysa mela, Goday Iyyasu kiittidaba ubbay poletana gakanaw, caaqo taabotiya tookida kahineti Yordaanose shaafan eqidi gam7idosona. Asay ellesidi shaafa pinnidosona.
JOS 4:11 Asa ubbay, pinnidaape guye, Godaa caaqo taabotiya tookida kahineti asaape sinthe aadhidi kaalethidosona.
JOS 4:12 Musey kiitidaysada, Robeelanne Gaade kochati, qassi Minaase kochaafe baggay olas dancetidi, asaape sinthatidi pinnidosona.
JOS 4:13 Darotethan oytamu mukulu gidiya olanchoti, Godaa sinthan, Iyaarko matan de7iya denban oletanaw shiiqidosona.
JOS 4:14 He gallas, Goday Iyyasu Isra7eele asa ubbaa sinthan dhoqu dhoqu oothis. Enti Muse bonchidaysada Iyyasuka iya de7o laytha ubban bonchidosona.
JOS 4:15 Goday Iyyasuko,
JOS 4:16 “Caaqo taabotiya tookida kahineti Yordaanose shaafape keyana mela oda” yaagis.
JOS 4:17 Iyyasuy kahineti Yordaanose shaafape keyana mela odis.
JOS 4:18 Godaa caaqo taabotiya tookida kahineti Yordaanose shaafape keyidosona. Enta tohoy mela biitta yedhida wode ellesidi, Yordaanose haathay ba bessa simmidi, kase goggeysada gaxa gakidi gogethi oykis.
JOS 4:19 Asay koyro ageenan tammantho gallasan Yordaanose shaafa pinnidi, Iyaarkos doloha baggan de7iya Galgalan dunkaanidosona.
JOS 4:20 Iyyasuy Yordaanose shaafape eketida tammanne nam7u shuchata Galgalan essidi,
JOS 4:21 Isra7eele asaako haysada yaagis; “Wonto hinte nayti, ‘Ha shuchati aybisee?’ yaagidi hintena oychiya wode,
JOS 4:22 ‘Isra7eele asay Yordaanose shaafa mela biittara yedhidi pinnidaysa qofisiyaba’ yaagidi odeeta.
JOS 4:23 Nuuni pinnana gakanaw, Goday, nu Xoossay Zo7o Abbaa kase nu sinthan melisidaysada, hinteka pinnana gakanaw, Goday, hinte Xoossay Yordaanose shaafa hinte sinthan melisidaysa odite.
JOS 4:24 Hessa gisho, biittan de7iya asa ubbay, Godaa wolqay ay mela giteeko erana; hinteka Godaa, hinte Xoossaa, merinaw bonchana” yaagis.
JOS 5:1 Yordaanose shaafape wuloha baggan de7iya Amooreta kawotinne Medetiraane Abbaa lanqen de7iya Kanaaneta kawoti ubbay, Isra7eele asay pinnana gakanaw Yordaanose shaafa Goday waati melisidaako si7ida wode enta wozanay til7in, Isra7eele asaara eqetanaw xaalatethi dhayidosona.
JOS 5:2 He wode Goday Iyyasuko, “Salo shuchu qarayada Isra7eele adde asaa nam7antho qaxara” yaagis.
JOS 5:3 Iyyasuy qara salo shucha ekidi, “Qaxara Dere” geetetiya bessan Isra7eeleta qaxaris.
JOS 5:4 I hessa oothiday, Gibxefe keyda addetan laythi olas gakida ubbay mela biittan hayqi wurida gishosa.
JOS 5:5 Gibxefe keyida adde asa ubbay, qaxaretidosona, shin Gibxefe bishe mela biittan yeletida adde nayti qaxaretibookona.
JOS 5:6 Gibxefe keyiya wode laythi olas gakida adde asa ubbay Godaas kiitetonna ixida gisho, enti hayqidi wurana gakanaw Isra7eeleti mela biittan oytamu laythi yuuyidosona. Goday, nuus immana gidi enta mayzatas caaqida eessinne maathi goggiya aradda biittaa hayqida enta nayti laattonna mela kase caaqis.
JOS 5:7 Hessa gisho, Iyyasuy qaxariday Goday enta bessan denthida enta nayta. Enti oge bolla yeletida gisho qaxaretibookona.
JOS 5:8 Asa ubbay, qaxaretidaape guye, enta madunthay paxana gakanaw enti dunkaanida bessan gam7idosona.
JOS 5:9 Goday Iyyasuko, “Hachi taani Gibxeta boriya hintefe diggas” yaagis. Hessa gisho, he bessaa sunthay hachi gakanaw Galgala geetetidi xeegetees.
JOS 5:10 Isra7eele asay Iyaarko denban Galgala geetetiya bessan dunkaanidi, koyro ageenan tammanne oyddantho gallasan omarsi Paasika Baaliya bonchidosona.
JOS 5:11 Paasikape guye, wontetha gallas, he gadiyan dolida katha ayfiya, uythunne tiya caaca midosona.
JOS 5:12 He gadiyan mokida kathaa enti mida wontetha gallas mannay wodheysa aggis. He wodepe doomidi Isra7eele asay manna demmibookona. Hessafe guye, enti Kanaanen kaxida katha midi de7idosona.
JOS 5:13 Iyyasuy Iyaarko matan de7iya wode mashsha oykidi ba sinthan eqida issi adde be7is. Iyyasuy iyako shiiqidi, “Neeni nu baggaye woyko nu morketa baggee?” yaagidi oychis.
JOS 5:14 Addey zaaridi, “Taani oodde baggaka gidike. Shin ta Godaa tora mocona gidada yas” yaagis. Iyyasuy sa7an kundi goyinnidi, “Ta godaw, ta oothanaba taw odaa” yaagis.
JOS 5:15 Godaa toora moconay Iyyasuko, “Neeni eqida bessay geeshshi gidiya gisho, ne tohuwape caammaa kessa” yaagis. Yaatin Iyyasuy I gidaysada oothis.
JOS 6:1 Isra7eele asaas yayyida gisho, Iyaarko katama gimbe dirsaa pengeti gordetidosona. Oonika katamaa gelanawunne keyanaw danda7enna.
JOS 6:2 Goday Iyyasuko, “Iyaarko katamaa iya kawaranne iya mino olanchotara ne kushen aatha immas.
JOS 6:3 Neeranne ne olanchotara salpidi, gallasan issi toho usupun gallas gakanaw, katamaa gimbe dirsaa yuushuwa yuuyite.
JOS 6:4 Laapun kahineti issoy issoy moyze oykidi, Godaa caaqo taabotiya sinthan boo. Laapuntha gallas kahineti moyze punniya wode hinte katamaa laapun toho yuuyite.
JOS 6:5 Kahineti moyze goochidi punuwa hinte si7iya wode, asa ubbay ellesidi banta qaala dhoqu oothidi waasso. Hessafe guye, katamaa gimbe dirsay kundana. He wode asa ubbay gido lawuhu gidi gelana” yaagis.
JOS 6:6 Nawe na7a Iyyasu kahineta xeegidi, “Godaa caaqo taabotiya tookite. Hintefe laapun kahineti moyze oykidi, caaqo taabotiyape sinthe aadhidi boo” yaagis.
JOS 6:7 Asaako qassi, “Bidi, katamaa yuushuwan yuuyite; olanchoti Godaa caaqo taabotiya sinthan hemetonna” yaagidi kiittis.
JOS 6:8 Iyyasuy odidaysada, laapun kahineti laapun moyze punnishe Godaa sinthan hemetidosona; qassi Godaa caaqo taabotey enta kaallis.
JOS 6:9 Olas dancidaysati moyze punniya kahineta sinthan hemetoosona. Kahineti qanxonna moyze punniya wode derey taabotiyape guyera kaallees.
JOS 6:10 Shin Iyyasuy, “Ta hintena waasso goonnashin waassofite woyko hinte qaala sissofite; hari attoshin issi qaalaka odetofite. Ta hintena waasso giya he gallas waassite” yaagidi asaa kiittis.
JOS 6:11 Hessa gisho, Godaa caaqo taabotey he katamaa issi toho yuuyanaada oothis. Yaatidi asay banta dunkaanida guta simmidi, yan aqidosona.
JOS 6:12 Wontetha gallas Iyyasuy guuridi dendis; kahinetika Godaa caaqo taabotiya tookidosona.
JOS 6:13 Laapun moyzeta oykida laapun kahineti banta moyziya qanxonna punnishe caaqo taabotiya sinthan boosona. Moyzey qanxonna punetiya wode olanchoti kahinetape sinthan qassi derey taabotiyape guyera kaallees.
JOS 6:14 Nam7antho gallas katamaa issi toho yuuyidi, banta dunkaanida guta simmidosona. Usupun gallas gakanaw hessada oothidosona.
JOS 6:15 Laapuntha gallas gontey wadhishin dendidi, kaseysada katama laapun toho yuuyidosona. He gallasa xalaala katamaa laapun toho enti yuuyidosona.
JOS 6:16 Laapuntha yuushuwan, kahineti moyze punniya wode, Iyyasuy asaako, “Goday ha katamaa hintew aathidi immida gisho, waassite” yaagidi kiittis.
JOS 6:17 “Katamaynne iya giddon de7iyaba ubbay Godaas qangetidaba gididi dhayanaw bessees. Nuuni biitta xomoosana mela yeddida asata qosada ashshida, laymiya Raabanne I son de7iya asaa xalaali attanaw bessees.
JOS 6:18 Shin hinte metonne qoho Isra7eele guta bolla ehona mela dhayanaw bessiyabape aybaka amotidi ekonnaada hinte huuphes naagetite.
JOS 6:19 Biraynne worqey, naase biratape oosetida miisheti ubbay, Godaas dummatidaba gido. Enti Godaa miishiya minjiya shaaliyan de7o” yaagis.
JOS 6:20 Hessa gisho, moyzey punetis; asay waassis. Derey moyze punuwa si7ida wode banta qaala dhoqu oothi waassin, katamaa gimbiya dirsay kundis. He saaten asay lawuhu gidi gelidi katamaa oykidosona.
JOS 6:21 Banta mashsha denthidi, macca adde, na7a cima, mehe, dorse, harenne kataman shempora de7iyaba ubbaa wodhidosona.
JOS 6:22 Iyyasuy biitta xomoosanaw kiitetida nam7u asatako, “Layme Raabi soo bidi, kase hinte iw caaqidaysada, iyonne I soo asa ubbaa kessite” yaagis.
JOS 6:23 Enti bidi, Raabo, I aawa, I aayiw, I ishatanne I dabbota ubbaa Isra7eele asay dunkaanida gutaape gaxa kessidi wothidosona.
JOS 6:24 Yaati simmidi katamaanne iya giddon de7iyaba ubbaa xuuggidosona. Shin biranne worqaa, naase biratape oosetida miisheta Godaa miishiya minjiya shaaliyan wothidosona.
JOS 6:25 Shin laymiya Raaba Iyaarko xomoosana mela kiitetida asata qosada ashshida gisho, Iyyasuy iyo, I aawa soo asaanne iira de7iya dabbota ubbaa hayqope ashshis. I kochati hachi gakanaw Isra7eele biittan de7oosona.
JOS 6:26 He wode Iyyasuy, “Iyaarko katamaa zaari keexanaw dendiya oonika, Godaa sinthan baadetidabaa gido. Buroo baasiya wode iya bayra na7ay hayqo, Pengiya aathiya wode iya tesho na7ay hayqo” yaagidi baaddis.
JOS 6:27 Goday Iyyasura gidida gisho, iya sunthay biitta ubbaa gakis.
JOS 7:1 Isra7eele asay digetidabaa bochidi, Godaas kiitetonna ixidosona. Yihuda koche gidida Karma na7ay, Zebda na7aa na7ay, Zaara na7ay Akaani, digetidabatape ekidi Isra7eele bolla Godaa hanquwa denthis.
JOS 7:2 Isra7eele asay Iyaarko matan dunkaanidi de7ishin, Iyyasuy Beet-Aweena matan Beetelepe doloha baggan de7iya Gayee katamanne iya heera xomoosidi yaana mela guutha asata kiittis. Kiitetida asati bidi, Gayee katamaa xomoosidosona.
JOS 7:3 Enti Iyyasuko simmi yidi, “Gayee katamaa olanaw asa ubbay baanaw koshshenna; nam7u woyko heedzu mukulu olanchoti biiko gidana. Yan guutha asi de7iya gisho, asa ubbay daaburanaw bessena” yaagidosona.
JOS 7:4 Yaatin, heedzu mukulu gidiya asati olanaw Gayee katamaa bidosona. Shin Isra7eeleti Gayee katamaa asaa sinthafe baqatidosona.
JOS 7:5 Gaye katamaa asay Isra7eele asaape hastamanne usupun asaa wodhidi, katamaa dirsaa pengiyafe doomidi, Shebarime gakanaw Isra7eele asaa wodhishe goodidosona. Isra7eele asaa wozanay til7idi, haathe gidis.
JOS 7:6 Yaanin, Iyyasuynne Isra7eele cimati azzanidi, banta ma7uwa daakidosona. Godaa taabotiya sinthan omarsi gakanaw gufannidosona. Banta huuphen bido qolidosona.
JOS 7:7 Yaatin, Iyyasuy, “Hay7i Godaa Xoossaw, Yordaanose shaafa pinthada ne nuna ehiday Amooretas nuna aatha immanaasee? Yordaanosepe hefinthan de7idaako nuus lo77oshin.
JOS 7:8 Abeeti Godaw, Isra7eele asay xoonetidi, banta morketa sinthafe baqatiko, ta woygo?
JOS 7:9 Kanaanetinne ha biittan de7iya asa ubbay, hessa si7idi, nuna teqidi, biittafe dhaysana. Yaatin, ne gita sunthaa gisho ne oothanay aybee?” yaagis.
JOS 7:10 Goday Iyyasuko, “Ayis gufannadii? Denda eqa.
JOS 7:11 Isra7eele asay qohidosona; ta entana kiitida kiita naagonna ixidi, caaquwa menthidosona. Enti digetidabaape ekidosona; kaysotidosona; wordotidosona; qassi he miishiya banta miishiyara walakidosona.
JOS 7:12 Hessa gisho, Isra7eele asay banta morketa sinthan eqanaw danda7ibookona. Enti dhayanaw bessiya gisho, banta morketa sinthafe guye simmidi baqatidosona. Hinte giddofe dhayanaw bessiyaba hinte dhaysona ixiko, hizape ta hintera gidike.”
JOS 7:13 Bada asaa geeshsha. Goday, Isra7eele Xoossay, “Hinte ekanaw bessonnaba ekida gisho, wontos hintenatethaa geeshshite” yaagees gada oda. Isra7eele asaw, hessa hinte giddofe diggona ixiko, hinte morketa sinthan eqanaw danda7eketa.
JOS 7:14 Wonto wonta, hinte zariyan zariyan shiiqite. Goday shaakiya zarey ba kochan kochan shiiqo. Goday shaakiya kochay ba soo asan asan shiiqo; qassi Goday shaakiya soo asay, issoy issoy baw shiiqo.
JOS 7:15 Digetidabaa ekida uray Godaa caaquwa menthidaynne Isra7eele asaa qohiday iya gidiya gisho, inne iyaw de7iyaba ubbay taman xuugeto.
JOS 7:16 Iyyasuy wontetha gallas guura dendidi, kochan kochan Isra7eele asaa shiishin, Goday Yihuda kochay bala gideysa bessis.
JOS 7:17 Iyyasuy Yihuda kochaa shiishin, Goday Zaraha kochay bala gideysa bessis. Zaraha kochaa shiishin, Goday Zabida soo asay bala gideysa bessis.
JOS 7:18 Zabida soo asay issoy issoy baw shiiqin, wursethan Goday Zabida na7a na7aa, Karma na7aa Akaani bala gideysa qoncisis.
JOS 7:19 Iyyasuy Akaanako, “Ta na7aw, Godaa, Isra7eele Xoossaa boncha; ane ne oothidaba taw qosonna oda” yaagis.
JOS 7:20 Akaani zaaridi, “Ee tuma, taani Godaa Isra7eele Xoossaa naaqas. Taani oothiday haysa;
JOS 7:21 Nuuni di77idi ekida miishiya giddofe issi lo77o Sana7oora biitta kaaba, nam7u kilo gidiya birata biranne bagga kilo gidiya worqa be7ada amottas; ekas. Yaatada ta dunkaaniya giddon biitta bookada bira garsara wothada moogas.”
JOS 7:22 Yaatin, Iyyasuy ase kiittis. Enti woxi bidi dunkaaniya giddon bira garsara wothidi moogida miisheta demmidosona.
JOS 7:23 Kiitetidi bida asati he miisheta dunkaaniyape Iyyasukonne Isra7eele asa ubbaako ehidi, Godaa sinthan wothidosona.
JOS 7:24 Yaatin Iyyasuynne Isra7eele asa ubbay, Akaana, bira, kaaba, worqaa, iya adde naytanne iya macca nayta, iya mehiya, iya hareta, iya dorsata, iya dunkaaniyanne iyaw de7iyaba ubbaa Meto Zangaara geetetiya bessa efidosona.
JOS 7:25 Iyyasuy Akaanako, “Ha metuwa nu bolla ayis ehadii? Goday hachi ne bolla meto ehana” yaagis. Yaatin Isra7eele asa ubbay, Akaananne iya soo asaa shuchan caddi wodhidi, iyaw de7iyaba ubbaara woli gathidi taman xuuggidosona.
JOS 7:26 Enti Akaana bolla hachi gakanaw bentiya daro shuchi keelidosona. Yaatin, Goday ba eexiya hanquwafe simmis. Hachi gakanaw he bessay Meto Zangaara geetetidi xeegetees.
JOS 8:1 Goday Iyyasuko, “Yayyofa; hirgofa; olanchota ubbaa neera ekada, Gayee katamaa olanaw keya. Gaye kawa, iya asaa, iya katamaanne iya biitta ta ne kushen aathada immas.
JOS 8:2 Neeni Iyaarko bollanne iya kawa bolla oothidaysada Gaye bollanne iya kawa bolla oothana. Shin hinte ha77i olidi di7iya shalonne mehe hintew ekite. Katamaape guye baggara qoponna mentha gelanaw giigeta.”
JOS 8:3 Hessa gisho, Iyyasuynne olanchoti ubbay, Gaye katamaa olanaw dendidosona. Iyyasuy ba olanchota giddofe hastamu mukulu gidiya mino olanchota dooridi qamma yeddishe,
JOS 8:4 entana haysada yaagidi kiittis; “Bidi katamaape guye baggara qosetidi naagite. Katamaape haakidi boonnashin, menthi gelanaw giigidi naagite.
JOS 8:5 Tanne taara de7iya asa ubbay, katamaako shiiqana. He wode Gaye katamaa asay nuna olanaw yaa wode kaseysada nu enta sinthafe guye simmidi baqatana.
JOS 8:6 Enti kesseysada nu enta sinthafe baqatiya daanin, nuupe baqatoosona gidi, katamaape nu enta haassana gakanaw nuna kaallana.
JOS 8:7 He wode hinte qosetida bessaafe keyidi katamaa oykite. Goday hinte Xoossay katamaa hinte kushen aathidi immana.
JOS 8:8 Katamaa oykidaape guye, Goday kiitidaysa mela taman xuuggite. Ta hintena kiittas” yaagis.
JOS 8:9 Hessafe guye, Iyyasuy olanchota kiittis. Enti bidi Gayee katamaape wuloha baggan Beetelepenne Gayeepe giddon qosetidi naagidosona. Shin Iyyasuy he qamma asaara aqis.
JOS 8:10 Wontetha gallas guura Iyyasuy dendidi, olanchota xeegis. Yaatidi, inne Isra7eele cimati olanchota kaalethidi Gaye katamaa bidosona.
JOS 8:11 Iyara de7iya olanchoti ubbay, sinthe bidi Gaye katama matidi, katamaape pudeha baggan dunkaanidosona. Entafenne Gaye katamaape giddon zangaari de7ees.
JOS 8:12 Iyyasuy ichashu mukulu olanchota dooridi, katamaape wuloha baggara, Beetelepenne Gayeepe giddon qosidi wothis.
JOS 8:13 Olanchotape baggaa katamaape pudeha baggara, qassi katamaa menthidi gelana olanchota wuloha baggara besse besse oythis. He qamma Iyyasuy he zangaaran aqis.
JOS 8:14 Gaye katamaa kawoy hessa be7ida wode, ba olanchota ubbaa ekidi, Isra7eele asaara oletanaw demba biitta keyidosona. Shin kawoy katamaape guye baggara qoseti uttida olanchoti de7eysa eribeenna.
JOS 8:15 Iyyasuynne Isra7eele asa ubbay xoonetidaba daanidi, enta sinthafe mela biitta simmidi baqatidosona.
JOS 8:16 Gaye kataman de7iya asa ubbay, enta yedethanaw xeegereti keyidi, Iyyasu goodishe katamaape haakidi bidosona.
JOS 8:17 Gayen woyko Beetelen de7iya asa ubbay, Isra7eele asaa yedethanaw katamaa yeggidi keyin katama pengiya naagiya asi dhayida gisho; dooya attis.
JOS 8:18 Hessafe guye, Goday Iyyasuko, “Ne toora Gaye katamaa bolla dentha. Taani Gaye katamaa ne kushen aathada immana” yaagis. Yaatin Iyyasuy ba toora katamaa bolla denthis.
JOS 8:19 Iyyasuy ba toora denthida wode qosetida olanchoti banta bessaafe dendidi, katamaa geli oykidi, ellesidi taman xuuggidosona.
JOS 8:20 Gaye katamaa asay guye simmidi xeelliya wode, katamaa cuyay salo dendishin be7idosona. Mela biitta baqatida Isra7eele asay, bantana yedethiya asaa bolla guye simmida gisho, enti awu baggaraka kessi ekanaw danda7ibookona.
JOS 8:21 Iyyasunne iyara de7iya asa ubbay, qoseti uttida olanchoti katamaa oykidaysanne cuyay salo dendidaysa be7ida wode guye simmidi, Gaye katamaa asaa wodhidosona.
JOS 8:22 Katamaa gelidi oykida olanchotika katamaape enta bolla keyidosona. Yaatin, Gaye asay Isra7eele olanchotan ubba baggara teqetida gisho, issoyka attona woyko kessi ekonna ubbaa wodhidi wursidosona.
JOS 8:23 Shin Gaye katamaa kawa de7idi, Iyyasuko ehidosona.
JOS 8:24 Isra7eele asay Gaye katamaa asa entana yedethida bessan mashshan wodhidi ongidaape guye, ubbay guye katamaa simmidi, kataman attida asaa ubbaa mashshan wodhidosona.
JOS 8:25 He gallas Gaye kataman hayqida addeynne macci tammanne nam7u mukula.
JOS 8:26 Iyyasuy Gaye kataman de7iyaba ubbaa ongana gakanaw katamaa bolla denthida toora duge wothibeenna.
JOS 8:27 Shin Goday Iyyasu kiitidaysa mela Isra7eele asay he katamaa mehiyanne shaluwa bantaw di7idosona.
JOS 8:28 Iyyasuy Gaye katamaa xuuggis; he katamay hachi gakanaw laaletha doorenne asi baynna bessi gididi attis.
JOS 8:29 Iyyasuy, Gaye katama kawa wodhidi omarsi gakanaw mitha bolla kaqis. Awi wulliya wode, iya aha katamaa geliya pengen yeggana mela oothis. Iya bolla daro shucha keelidosona; he keela shuchay hachi gakanaw he bessan de7ees.
JOS 8:30 Hessafe guye, Iyyasuy Ebaala deriya bolla Godaas Isra7eele Xoossaas yarsho bessi keexis.
JOS 8:31 Godaa aylley Musey Isra7eele asaa kiitidaysadanne higge maxaafan xaafetidaysada, yarsho bessaa masetiboonnanne birati bochiboona shuchafe keexidi, iya bolla Godaas xuussa yarshonne issifetetha yarsho yarshidosona.
JOS 8:32 Iyyasuy, Isra7eele asaa sinthan, Muse higgiya shuchaa bolla zaari xaafis.
JOS 8:33 Isra7eele asaa anjana mela Godaa aylley Musey kiitidaysada Isra7eele asa ubbay, asa gade asata, enta cimati, enta shuumatinne daynnati ubbay, Godaa caaqo taabotiya tookida Leewe koche gidida kahineta sinthan ushacha bagganinne haddirsa baggan eqidosona. Entafe baggay Garzaana zuma sinthan, qassi baggay Ebaala deriya sinthan eqidosona.
JOS 8:34 Higge maxaafan xaafetidaysada, Iyyasuy higge qaala ubbaa, anjuwanne baadetha nabbabis.
JOS 8:35 Musey kiitida higgiya Iyyasuy, Isra7eele asa ubbaas, maccasas, naytasinne, asa gade asaas issi qaalaka ashshona nabbabis.
JOS 9:1 Yordaanose shaafape wuloha baggan derey dariya biittaninne gadhan Medetrane abbaafe bidi Libaanose gakanaw de7iya Hiteta, Amooreta, Kanaaneta, Parzeta, Hiwetanne Yaabuseta kawoti ubbay, Gaye asay xoonetidaysa si7ida wode,
JOS 9:2 Iyyasunne Isra7eeleta olanaw issife shiiqidi zoretidosona.
JOS 9:3 Gaba7oona asay Iyyasuy Iyaarko bollanne Gaye katamaa bolla oothidaba si7idi,
JOS 9:4 Iyyasu cimmanaw koydosona. Enti shinqe qachidi, cima woyne ogoronne curqa qarxiita hare bolla caanidi, Iyyasuko ase kiittidosona.
JOS 9:5 Kiitetida asati wurida caamma aathidosona; peedhetida afila ma7idosona; enti oykida shinqeyka melidabaanne meqertidaba.
JOS 9:6 Enti Isra7eele asay dunkaanida guta Galgala bidi, Iyyasukonne Isra7eele asaako, “Nuuni haaho gadepe yida. Nu yiday hintera caaqetidi saro daanasa” yaagidosona.
JOS 9:7 Yaatin, Isra7eele asay Gaba7oone asaako, “Hinte nu matan de7iya asaakosh? Nu aybin eridi hintera caaqetanee?” yaagidosona.
JOS 9:8 Enti Iyyasuko, “Nu ne aylleta” yaagidi zaaridosona. Iyyasuy zaaridi, “Hinte oonantee? Awupe yidetii?” yaagidi oychis.
JOS 9:9 Enti zaaridi, “Nuuni ne aylleti Goday hinte Xoossay Gibxen oothidaysa si7ida gisho, daro haaho gadepe yida.
JOS 9:10 Qassi Yordaanose shaafape hefinthan wuloha baggan de7iya nam7u Amoore kawota, Haseboona kawa Sihoonanne Astarooten de7iya Baasane kawa Ooge bolla I oothidaysa nu si7ida.
JOS 9:11 Nu biitta cimatinne nu biittan de7iya ubbay, oges shinqe giigisi oykidi bidi entara gahetidi, entako, ‘Nu hinte aylleta; nu yiday hintera caaqetidi saro daanasa’ yaagite.
JOS 9:12 “Nu oykida shinqiya be7ite. Nu soope ekidi keyiya wode ho77o, shin ha77i melidaysanne puulumidaysa be7ite.
JOS 9:13 Ha woyniya ogorotan nu kunthiya wode oorathi, shin ha77i daaketidaysa be7ite. Ogiya haahotethaafe dendoysan nu ma7oynne nu caammay wuris” yaagidosona.
JOS 9:14 Shin Godaa sheniya oychonna de7ishe, Isra7eele asay enta shinqiyafe guuthara ekidosona.
JOS 9:15 Yaatin, Iyyasuy hintena wodhoko gidi saro caaqo entara caaqetis. Isra7eele cimatika he caaquwa menthoko gidi caaqidosona.
JOS 9:16 Entara caaqida heedzantho gallasan he asati enta biittan de7eysanne entaw shooro gideysa Isra7eele asay si7idosona.
JOS 9:17 Isra7eele asay heedzu gallas hemetidi, he asati de7iya katamata gakidosona. Enta katamati Gaba7oona, Kafira, Baarotenne Qiriyat-Yi7aarima geetetidi xeegetoosona.
JOS 9:18 Shin Isra7eele cimati entaw Godaa, Isra7eele Xoossaa sunthan caaqida gisho, Isra7eele asay enta wodhibookona. Yaatin, asa ubbay cimata bolla zuuzumidosona.
JOS 9:19 Shin Isra7eele cimati, “Nu entaw Godaa Isra7eele Xoossaa sunthan caaqida gisho, ha77i enta bochanaw danda7oko.
JOS 9:20 Nuuni entaw haysada oothana; nuuni entaw caaqida caaquwa menthin Godaa hanqoy nu bolla yoonnaada enta wodhoko.
JOS 9:21 Enti de7o giite. Gidoshin Isra7eele asa ubbaas mithinne haathe shiisheyisata gido” yaagidosona. Hessa gisho, cimati banta caaquwa naagidosona.
JOS 9:22 Iyyasuy Gaba7oona asaa xeegidi, “Nu matan de7ishe, ‘Nuuni daro haaho biittafe yida’ gidi, nuna ayis cimmidetii?
JOS 9:23 Hinte hessa oothida gisho, baadetidaysata. Hinte merinaw ta Xoossaa keethan mithin haathe shiishiya aylle gidana” yaagis.
JOS 9:24 Enti zaaridi, “Nuuni ne aylleti, Goday hinte Xoossay ha biittan de7iya asa ubbaa dhaysidi, biitta hintew immanaw ba aylliya Muses odidaysa si7ida. Hessa gisho, hintew babidi haysa oothida.
JOS 9:25 Ha77i nu ne kushen de7oos. New lo77onne suure daanidi bentidaba ootha” gidi zaaridosona.
JOS 9:26 Iyyasuy Isra7eele asay enta wodhonna mela ashshis.
JOS 9:27 He gallas Iyyasuy, Gaba7oona asata Isra7eeletasinne Goday doorida bessan de7iya iya yarsho bessaas haathenne mithi shiishiya asi gidana mela oothis. Gaba7oona asati hachi gakanaw hessa oothosona.
JOS 10:1 Iyyasuy Iyaarko katamaa oli dhaysidi, iya kawa wodhidaysada, Gayee katamaa oli dhaysidi, iya kawa wodhidaysa Yerusalaame kawoy Adooni-Xedeqi si7is. Qassi Gaba7oona asay Isra7eele asaara saro daanaw caaqetidaysa si7is.
JOS 10:2 Gaba7ooni hanko kawo katamatada gita katama; he katamay Gaye katamaape aadhees; iyan de7iya addetika mino olancho gideysa eriya gisho, Adooni-Xedeqinne iya asay daro yayyidosona.
JOS 10:3 Hessa gisho, Yerusalaame kawoy Adooni-Xedeqi, Kebroona kawa Hoohamas, Yarmuta kawa Piraamas, Laakiso kawa Yafi7asinne, Egloona kawa Dabiras haysada yaagidi kiittis;
JOS 10:4 “Gaba7oona asay Iyyasuranne Isra7eele asaara saro de7anaw caaqida gisho, enta olanaw yidi tana maaddite” yaagis.
JOS 10:5 Ha ichashu Amoore kawoti banta olanchota issife gathidi, Gaba7oona olidosona.
JOS 10:6 Gaba7oona asay Galgalan dunkaanida Iyyasuko, “Nuna ne aylleta aggofa; ellesa yada nuna ashsha. Derey dariya biittan de7iya Amoore kawoti ubbay nuna olanaw banta olanchota issino oothida gisho, ne nuna maadda” yaagidi kiittidosona.
JOS 10:7 Hessa gisho, Iyyasuy, baara de7iya olanchotanne mino asata ubbaa, Galgalape ekidi bis.
JOS 10:8 Goday Iyyasuko, “Entaw babofa; taani enta ne kushen aathada immas. Entafe issi asika neera eqetanaw danda7enna” yaagis.
JOS 10:9 Iyyasuy Galgalape qamma kumethi hemetishe aqidi, Gaba7oone asay qoponna de7ishin enta bolla ola denthis.
JOS 10:10 Goday Isra7eele asa sinthan entaw wozana kaha dhaysis. Isra7eele asay enta Gaba7oonan wodhidosona. Isra7eeleti enta Beet-Horona efiya ogiya oythidi goodishe, Azeeqanne Maqeda gakanaw goodidosona.
JOS 10:11 Enti Beet-Horonape duge Azeeqa efiya ogiyara Isra7eele asaa sinthafe baqatishin, Goday gita shacha shuchu salope enta bolla bukisis. Isra7eele asay wodhida asape, shachay wodhida asay daro.
JOS 10:12 Goday Isra7eele asaas Amooreta, aathidi immida gallas, Isra7eele asay si7ishin, Iyyasuy, “Away Gaba7oona bolla wullonna eqo. Ageenayka Eloona zangaara bolla eqo” yaagidi Godaa woossis.
JOS 10:13 Isra7eele asay banta morketa xoonana gakanaw, away wullonna eqis; ageenayka ba de7iya bessaafe qaaxibeenna. Hessi Yaashara maxaafan xaafetis. Away salos giddon qaaxonna eqis; issi gallas kumethi away wullonna gam7is.
JOS 10:14 Goday asa qaala si7ida he gallasa mela gallas haysafe kaseka haysafe sinthanka deenna. Tumaka Goday Isra7eele asaas oletis.
JOS 10:15 Hessafe guye, Iyyasuynne iya olanchoti banta dunkaanida guta Galgala simmidosona.
JOS 10:16 He ichashu Amoore kawoti baqatidi, Maqeda gongoluwan qosetidosona.
JOS 10:17 Ichashu kawoti, Maqeda gongoluwan qosetidi de7ishin demmidaysa Iyyasus odidosona.
JOS 10:18 Iyyasuy zaaridi, “Gita shuchata gondorsidi, gongoluwa doona gordite; enta naagana mela ase yan wothite.
JOS 10:19 Shin hinte yan gam7ofite; enti banta katamaa gelidi attona mela hinte morketa gooddidi enta wodhite. Goday hinte Xoossay enta hinte kushen aathidi immis” yaagis.
JOS 10:20 Guutha asati baqatidi banta gimbetida katamaa gelidi attikoka, Iyyasuynne Isra7eele asay asa ubbaa wodhidosona.
JOS 10:21 Hessafe guye, Isra7eele asa ubbay saron simmidi, Iyyasuy dunkaanidi de7iya guta Maqeda yidosona. He wodepe doomidi oonika Isra7eele asaa bolla issi qaalaka odetanaw xaalida asi baawa.
JOS 10:22 Hessafe guye, Iyyasuy, “Gongoluwa doona dooyidi, he ichashu kawota kessidi, taw ha ekidi yiite” yaagis.
JOS 10:23 Gongoluwa doona dooyidi, Yerusalaame kawa, Kebroona kawa, Yarmuta kawa, Laakiso kawanne Egloona kawa iyako ehidosona.
JOS 10:24 Enti he kawota iyako ehida wode, Iyyasuy Isra7eele asa ubbaa baako xeegidi, baara bida toora moconatako, “Haa yidi, hinte tohuwa ha kawota qoodhiyan wothite” yaagis. Enti yidi kiitetidaysada oothidosona.
JOS 10:25 Iyyasuy entako, “Hinte oletiya hinte morketa bolla Goday haysada oothana gisho, aykoy baawa yayyofite; minnite” yaagis.
JOS 10:26 Iyyasuy he ichashu kawota wodhidi, ichashu mitha bolla kaqis; enta ahay omarsi gakanaw yan pee7is.
JOS 10:27 Awi wulliya wode Iyyasuy, “Aha wodhisidi, enti kase qosetida gongoluwan holite. Yaatidi, he gongoluwa doona gita shuchan gordite” yaagidi kiittis. He shuchati hachi gakanaw yan de7oosona.
JOS 10:28 He gallas Iyyasuy Maqeda katamaa oykis; katamaa kawaka wodhis; kataman de7iya asa ubbaa issi asika ashshona dhaysis. Iyaarko katamaa kawa bolla oothidaysada, Maqeda katamaa kawa bolla oothis.
JOS 10:29 Yaape simmidi, Iyyasuynne iya olanchoti ubbay Maqedape bidi Libina katamaa olidosona.
JOS 10:30 Goday he katamaanne katamaa kawa enta kushen aathidi immis. Iyyasuy kataman de7iya asaape issuwaka ashshona mashshan wodhis. Iyaarko katamaa kawa bolla oothidaysada Libina katamaa kawa bolla oothis.
JOS 10:31 Iyyasuynne iya olanchoti Libina katamaape Laakiso katama bidi, he katama olidosona.
JOS 10:32 Goday Laakiso katama Isra7eele asa kushen aathidi immin, Iyyasuy he katamaa yuushuwa teqidi nam7antho gallasan oykis. Libina kataman oothidaysada Laakiso kataman de7iya asa ubbaa mashshan wodhis.
JOS 10:33 He wode, Gezera kawoy Horami, Laakiso kawa maaddanaw yis, shin Iyyasuy iyanne iya olanchota dhaysis; entafe issi asika attibeenna.
JOS 10:34 Hessafe simmidi, Iyyasuynne iya olanchoti ubbay Laakiso katamaape Egloona katamaa bidi, he katama yuushuwa teqidi olidosona.
JOS 10:35 He gallas Egloona katamaa oykidi, Laakiso kataman oothidaysada mashshan ase ubbaa wodhidosona.
JOS 10:36 Yaati simmidi, Iyyasuynne iya olanchoti Egloonape Kebroona yidi, olidosona.
JOS 10:37 He katamaanne iya yuushuwan de7iya guutha katamata oykidi iyan de7iya asaanne kawa wodhidosona. Iyyasuy Egloonan oothidaysada he katamaa bollaka oothis.
JOS 10:38 Hessafe guye, Iyyasuynne iyara de7iya Isra7eele olanchoti guye simmidi Dabira katamaa olidosona.
JOS 10:39 He katamaanne iya yuushuwan de7iya guutha gutata oykidi, iyan de7iya asaanne kawa wodhidosona. Iyyasuy Kebroonanne Libina katamata bolla oothidaysada Dabira bolla oothis.
JOS 10:40 Iyyasuy he biittan de7iya katamata ubbaa oykis. Derey dariya biittan, Negebe gadhan, loobuwanne enta kawota ubbaa oykis. Goday Isra7eele Xoossay iya kiitidaysada, biitta bolla de7iya asi issuwaka ashshona ubbaa wodhidi dhaysis.
JOS 10:41 Iyyasuy Qaades-Barnefe bidi Gaaza gakanaw qassi Goshena biittafe bidi Gaba7oona gakanaw de7iya ubbaa olidi xoonis.
JOS 10:42 Goday, Isra7eele Xoossay, Isra7eeletas oletida gisho Iyyasuy ha kawotanne enta biitta ubbaa olidi oykis.
JOS 10:43 Hessafe guye, Iyyasuynne Isra7eele olanchoti banta dunkaanida gutaa Galgala simmidosona.
JOS 11:1 Hazoora kawoy Yaabini, Isra7eeleta xoonuwa si7ida wode Madoona kawa Yobaabas, Shimroona kawas, Azifa kawas,
JOS 11:2 pudeha gezzen de7iya kawotas, Kenereeta abbaafe dugeha baggan Yordaanose zangaaran de7iya kawotas, Nafat-Doorape wuloha baggara gadhan de7iya kawotas kiita yeddis.
JOS 11:3 Qassi dolohanne wuloha baggan de7iya Kanaanetas, Amooretas, Hitetas, Parzetas, derey dariya biittan de7iya Yaabusetasinne Mixiphan Armoona zumaape garsan de7iya Hiwetas kiittis.
JOS 11:4 Enti ubbay, banta olanchota, paratanne para gaareta issife gathidi yidosona. Enta tayboy abba gaxan de7iya shafe mela.
JOS 11:5 He kawoti ubbay banta wolqaa issife gathidi, Isra7eeleta olanaw Meroome haatha matan dunkaanidosona.
JOS 11:6 Goday Iyyasuko, “Ne entaw babofa; taani wonto hannoode enta ubbaa wodhada Isra7eele asaas aatha immana. Neeni enta parata gaadiya qanxana; enta para gaaretaka taman xuuggana” yaagis.
JOS 11:7 Iyyasuynne iya olanchoti ubbay enti qoponna de7ishin Meroome haatha matan enta bolla keyidi olidosona.
JOS 11:8 Goday entana Isra7eeleta kushen aathidi immis. Isra7eeleti enta olidi, gita Sidoonanne Masroota gakanaw, qassi doloha baggan de7iya Mixipha zangaara gakanaw entana yedethidosona. Entafe issi asika ashshona ubbaa wodhidosona.
JOS 11:9 Iyyasuy, Goday kiitidaysada ubbaa bolla oothis; enta parata gaadiya qanxis; enta gaareta xuuggis.
JOS 11:10 Yaatidi, Iyyasuy guye simmidi, Hazoora oli oykidi, kawuwaka mashshan wodhis. He wode Hazoora kawotethay hara kawotethaa ubbaas huuphe.
JOS 11:11 Isra7eele asay Hazooran de7iya asaa ubbaa mashshan wodhida gisho shempora attida asi baawa. He katamay taman xuugetis.
JOS 11:12 Godaa aylley Musey kiitidaysada, Iyyasuy he katamatanne enta kawota ubba di77is. Issi asika ashshona asa ubbaa mashshan wodhis.
JOS 11:13 Gidoshin, Iyyasuy xuuggida Hazoora katamaape attishin, zooze bolla keexetida katamata Isra7eele asay xuugibookona.
JOS 11:14 Isra7eele asay he katamatape bonqida, miishiyanne mehe ubbaa bantaw ekidosona. Issi asika ashshona asa ubbaa mashshan wodhidosona.
JOS 11:15 Goday ba aylliya Muse kiitidaysada, Musey Iyyasu kiittis; Iyyasuyka kiitaa polis. Goday Muse kiitidabaape issibaaka Iyyasuy ashshibeenna; ubbaa oothis.
JOS 11:16 Iyyasuynne iya olanchoti derey dariya biitta, Negebe mela biitta, Goshena biitta ubbaa, wuloha baggan de7iya gadhaanne Yordaanose zangaara olidi oykis.
JOS 11:17 I Sayre kanthisiya Halaqa zumaape bidi, Armoona zumaape garsa baggan de7iya Libaanose zangaaranne Ba7aal-Gaade gakanaw de7iya biittata oykis. Enta kawota ubbaa shocis; di77idi wodhis.
JOS 11:18 Iyyasuy daro wode he kawota ubbaara oletis.
JOS 11:19 Gaba7oonan de7iya Hiwetape attishin, hara katami Isra7eeletara saro daanaw caaqiday baawa. Isra7eeleti hara katamata ubbaa olan xoonidi oykidosona.
JOS 11:20 Goday Muse kiitidaysada, Iyyasuy enta maaroti baynna ubbaa wodhana mela Goday enta wozana muumisidi Isra7eeleta olana mela denthethis.
JOS 11:21 He wode Iyyasuy bidi derey dariya Kebroonan, Dabiran, Anaaban, derey dariya Yihudaninne Isra7eelen de7iya adusata, Anaaqe kochata wodhidi ongis. Iyyasuy entanne enta katamata kumethi dhaysis.
JOS 11:22 Anaaqe kochatape oonika Isra7eele biittan attibeenna, shin Gaazan, Gaataninne Ashdoodan guuthati attidosona.
JOS 11:23 Goday Muse kiitidaysada Iyyasuy biitta ubbaa oykidi, Isra7eele asaa kochan kochan shaakidi laatisis. Hessafe guye, biittay olape shempis.
JOS 12:1 Isra7eele asay Yordaanose shaafape doloha baggara de7iya Arnoona zangaarape bidi Armoona zumaa gakanaw, qassi doloha baggara Yordaanose zangaara gakanaw de7iya biitta ubbaa olidi oykis. He xoonetida kawoti haysafe kaallidi xaafetidaysata;
JOS 12:2 Haseboonan uttidi haariya Amooreta kawa Sihoona. I Galada biittas baggaa ekidi, Arnoona zangaara matan de7iya Aroorape dendidi, Amooneta zawa Yaaboqa shaafa gakanaw de7eysa haarees.
JOS 12:3 Qassi doloha baggara Yordaanose zangaaran Kenereeta abbaafe bidi, Beet-Yashimoota baggara Maxine Abbaa kanthidi, Pisga deriyape garsa baggara de7iya biittata haarees.
JOS 12:4 Hessadaka, Raafaymeta sheeshape wursethi gidida, Astarootenne Edraa7a haariya, Baasane kawa Ooge xoonis.
JOS 12:5 Oogey, haariya zaway pudehan Armoona zumaa, dolohan Salaka katamaa gakidi, wulohan Geeshuretanne Makata zawa gakanaw de7iya Baasane biitta ubbaa gakees. Haseboona kawa Sihoona biitta Galada pudeha baggaa gujidi haarees.
JOS 12:6 Godaa aylley Musey kaalethin, Isra7eele asay ha kawota xoonidosona. Godaa aylley Musey enta biitta Robeela kochatas, Gaade kochatasinne Minaase kochaafe baggaas shaakidi laatisis.
JOS 12:7 Iyyasuynne Isra7eele asay Yordaanose shaafape wuloha baggan de7iya kawota ubba xoonidosona. He biittay Libaanose zangaaran de7iya Ba7aal-Gaadepe bidi, dugeha baggara Sayre matan de7iya Halaqa deriya gakees. Iyyasuy he biittaa shaakidi, Isra7eele kochatas laata biitta oothidi immis.
JOS 12:8 He I immida biittay, derey dariya biitta, wuloha baggan de7iya gadha, Yordaanose zangaara, Yihudanne Negebe mela biitta. He biittay kase Hiteti, Amooreti, Kanaaneti, Parzeti, Hiwetinne Yaabuseti de7iya biitta.
JOS 12:9 Isra7eele asay xoonida kawoti haysafe kaallidi xaafetidaysata; Iyaarko kawa, Beetele matan de7iya Gaye kawa,
JOS 12:10 Yerusalaame kawa, Kebroona kawa,
JOS 12:11 Yarmuta kawa, Laakiso kawa,
JOS 12:12 Egloona kawa, Gezera kawa,
JOS 12:13 Dabira kawa, Gedera kawa,
JOS 12:14 Horma kawa, Arada kawa,
JOS 12:15 Libina kawa, Adulaama kawa,
JOS 12:16 Maqeda kawa, Beetele kawa,
JOS 12:17 Tapuha kawa, Hefeera kawa,
JOS 12:18 Afeeqa kawa, Saarona kawa,
JOS 12:19 Madoona kawa, Hazoora kawa,
JOS 12:20 Shimroon-Maroona kawa, Azifa kawa,
JOS 12:21 Tanaka kawa, Magido kawa,
JOS 12:22 Qaadesa kawa, Qarmeloosan de7iya Yoqinaame kawa,
JOS 12:23 Gezzen de7iya Doora kawa, Galgalan de7iya Goyma kawanne
JOS 12:24 Tirsa kawa. Enti kumethi hastamanne issi kawota.
JOS 13:1 Iyyasuy daro cimida wode Goday iyako, “Neeni cimadasa; ne laythayka sugetis, gidoshin oyketona attida daro biittati de7oosona.
JOS 13:2 Oyketiboonna biittati haysata; Filisxeemetanne Geeshureta biitta ubbaa.
JOS 13:3 Gibxefe doloha baggan de7iya Shihoora Shaafape bidi, pudeha baggan de7iya Ekroona biitta gakanaw de7iya biitta ubbaa. He biittati Kanaane biitta geetetoosona. Entika ichashu Filisxeeme kawoti aysiya Gaaza, Ashdooda, Asqeloona, Gaatenne Ekroona geetetiya katamata. Aweeta biittayka buroo oyketibeenna.
JOS 13:4 Dugeha baggan de7iya Kanaaneta biittanne, Sidoonata biitta gidida Maarape bidi Amooreta zawa Afeeqa gakanaw de7iya biittay oyketibeenna.
JOS 13:5 Gebaalata biittaynne Ba7aal-Gaadepe doloha baggan de7iya Armoona zumaape bidi, Hamaata pino gakanaw buroo oyketibeenna.
JOS 13:6 Libaanosepe bidi Maseroona gakanaw gezze biittan de7iya Sidoonata ubbaa taani Isra7eeleta sinthafe goodda kessana. Taani nena kiitidaysada he biitta Isra7eele asaas laata oothada shaaka.
JOS 13:7 Neeni he biitta uddufun kochatasinne Minaase kochaafe baggaas shaaka” yaagis.
JOS 13:8 Robeela kochaas, Gaade kochaasinne Minaase kochaafe baggaas Godaa aylley Musey Yordaanosepe hefinthan, doloha baggan de7iya biitta kase laata oothidi entaw immis.
JOS 13:9 Enta biittay Arnoona Zangaara matan de7iya Aro7eerape bidi, he zangaaran de7iya katamaape bidi, Medeba gezziya kanthidi Diboona gakanaasa.
JOS 13:10 Qassi Haseboonan uttidi Amooneta zawa gakanaw haariya Amooreta kawa Sihoona katamata ubbaa gakees.
JOS 13:11 Hessadaka, Galadata, Geeshuretanne Ma7ikata biitta ubbaa, Armoona zuma ubbaanne Salaka gakanaw de7iya Baasane biitta ubbaa oykees.
JOS 13:12 Astarooteninne Edraa7an uttidi, haarida Baasane kawa Ooge biitta ubbaa oykees; He biittay kase Raafaymetape attida biitta. Musey enta xoonidi biittafe gooddidi kessis.
JOS 13:13 Shin Isra7eele asay Geeshuretanne Ma7ikata gooddidi kessibookona. Enti hachi gakanaw Isra7eele asaa giddon de7oosona.
JOS 13:14 Musey Leewe kochaas laata biitta immibeenna. Goday, Isra7eele Xoossay, entaw kiitidaysada taman xuussa yarsho entaw laata oothidi immis.
JOS 13:15 Musey Robeela kochaas enta kochan kochan laata immis.
JOS 13:16 Enta biittay Arnoona Zangaara matan de7iya Aro7eerape bidi, he zangaaran de7iya katamaa kanthidi gezze Medeba gakees.
JOS 13:17 Haseboona, gezze katamata, Diboona, Baamot-Ba7aala, Beet-Baal-Me7oona,
JOS 13:18 Yahaaxa, Qedemoota, Mefaata,
JOS 13:19 Qiratayma, Sebama, derey dariya zangaaran de7iya Xeret-Shahaare,
JOS 13:20 Beet-Pa7oora, Pisga zumaape garsan de7iya biittanne Beet-Yashimoota geetetiya biittata ubbaa gakees.
JOS 13:21 Qassi gezzen de7iya katamatanne Haseboonan uttidi haarida Amooreta kawa Sihoona biitta ubbaa gakees. Musey kawa Sihoonanne Midiyaameta halaqata Ewa, Reqeema, Xuura, Huranne Reeba olidi xoonis. Haysati kawa Sihoonape garsan he biitta haareyisata.
JOS 13:22 Isra7eele asay maruwa, Bi7oora na7aa, Balaama wodhidosona.
JOS 13:23 Robeela kochaas wuloha bagga zaway Yordaanose shaafa. Robeela kochaas kochan kochan laata gididi imetida katamatinne gutati haysata.
JOS 13:24 Musey Gaade kochaas enta kochan kochan laata biitta shaakidi immis.
JOS 13:25 Enta biittay Ya7izeera, Galadan de7iya katamata ubbaanne Amooneta biittafe baggaa ekidi, Raaba doloha baggan de7iya Aro7eera gakees.
JOS 13:26 Hessadaka, Haseboonape dendidi, Ramoot-Mixiphanne Bexonima gakees. Qassi Mahinaymape bidi Dabeera zawa gakees.
JOS 13:27 Qassi Yordaanose zangaaran, Haseboona kawa Sihoona kawotethaafe attida, Beet-Harame, Beet-Nimira, Sukotanne Xafoona geetetiya katamata ekees. Enta zaway wuloha baggan Yordaanose shaafa, qassi pudeha baggan Kenereeta abba gakees.
JOS 13:28 Gaade kochaas kochan kochan laata biitta gididi imetida katamatinne gutati haysata.
JOS 13:29 Musey Minaase kochaafe baggaas enta kochan kochan laata biitta immis.
JOS 13:30 Enta biittay Mahinaymanne Baasane biitta ubbaa gaki oykees. Baasane kawa Ooge kawotetha ubbaanne Baasanen de7iya usupun tammu Ya7ira katamata oykees.
JOS 13:31 Qassi Galadape bagganne Baasanen Ooge kawotethaas waanna katamaa gidida Astarootenne Edraa7a geetetiya katamata gakees. He ubbay Minaase na7a Makira kochaas enta kochan kochan gakidaysa.
JOS 13:32 Musey Yordaanosepe hefinthan, Iyaarkofe doloha baggan de7iya Moo7abe denban de7ishe shaakidi immida biittay haysa.
JOS 13:33 Shin Musey Leewe kochaas laata biitta immibeenna. Goday, Isra7eele Xoossay enta laata.
JOS 14:1 Kahiney Alaazari, Nawe na7ay Iyyasuynne Isra7eele soo asaa halaqati, Kanaane biitta enta kochan kochan shaakin, Isra7eele asaa gakida biittay haysafe kaallidi de7eysa.
JOS 14:2 Goday Muse kiitidaysada laata biittay uddufunanne bagga kochaas saaman shaaketis.
JOS 14:3 Musey kase nam7anne bagga kochaas Yordaanosepe doloha baggan de7iya biitta immis, shin Leewe kochaas enta giddon laata biitta immibeenna.
JOS 14:4 Yoosefa nayti Minaaseynne Efreemey nam7u koche gididosona. Leewe kochaas duussa katamatanne mehe heemmiya biitta immisipe attishin, laata biitta immibeenna.
JOS 14:5 Goday Muse kiitidaysada Isra7eele asay biitta shaaketidi ekidosona.
JOS 14:6 Issi gallas Yihuda asay Iyyasuko Galgala yidosona. Entafe issoy, Qeneza kochay, Yoofona na7ay Kaalebi Iyyasuko, “Nuuni Qaades-Barnen de7iya wode Goday nabiya Muse baggara nebaanne tabaa odidaysa eraasa.
JOS 14:7 Godaa aylley Musey ha biitta wochana mela Qaades-Barnefe tana kiittiya wode taw laythi oytama. He wode taani ammanthiya oda Muses ehas.
JOS 14:8 Taara bida asati asaa wozanaa yashshan til7isidosona, shin taani Godaa, Xoossaa polo kaallas.
JOS 14:9 He gallas Musey, ‘Neeni, Godaa, Xoossaa polo kaallida gisho, ne tohoy yedhida biittay newunne ne kochaas merinaa laata biitta gidana’ gidi taw caaqis.
JOS 14:10 Iyyasu, ane qopa; Goday hessa Muses odi simmin hachi oytamanne ichashu laythi gidis. Isra7eele asay mela biittan simeretiya wode ubban hachi gathanaw Goday tana paxa wothis. Ha77i taw laythi hospun tammanne ichasha gidis.
JOS 14:11 Taw he wode de7iya minotethay hachika de7ees. Oletanaw, keyanawunne gelanaw taw ha77ika wolqinne xaalatethi de7ees.
JOS 14:12 He wode Goday taw immana gidi caaqida he derey dariya biitta taw imma. He biittan Anaaqeti de7eysanne enta katamati gitanne gimbetida katama gideysa he wode ne si7adasa. Gidikoka Goday gidaysada I taara gidiko, enta he biittafe taani gooddana” yaagis.
JOS 14:13 Iyyasuy Yoofona na7a Kaaleba anjidi, Kebroona iyaw laata oothi immis.
JOS 14:14 I Godaa, Isra7eele Xoossaa polo kaallida gisho, Kebroona hachi gakanaw Qeneza kocha Yoofona na7aa Kaaleba kochaas laata biitta gidis.
JOS 14:15 Kase Kebroona sunthay Qiriyaat-Arba geetetees. Arbi, Anaaqeta giddon eretida gita ase. Hessafe guye, biittay olape shempis.
JOS 15:1 Yihuda kochaas enta kochan kochan shaaketida biittay Edoomen zawatidi, dugeha baggan de7iya Xiine mela biitta wursethaa gakees.
JOS 15:2 Dugeha baggan enta zaway Maxine Abbaafe dugeha baggan wursetha gaxa gakees.
JOS 15:3 Akraabima Pinuwa kanthidi, Xiinepe bidi, Qaades-Barnes dugeha bagga gakees. Qassi Hexroona kanthidi, Adaare keydi, Qarqako simmees.
JOS 15:4 Hessafe qassi Aximoona kanthidi, Gibxe shaafa gakidi, Medetiraane Abban zawatees. Dugeha baggan de7iya Yihuda zaway hessa.
JOS 15:5 Doloha bagga zaway Maxine Abbaa bidi, Yordaanose shaafa wursethaa gakees. Pudeha bagga zaway qassi Yordaanose shaafay geliyasuwap bidi,
JOS 15:6 Beet-Hogila keyees. Yaape Beet-Araba baggara kanthidi, Robeela na7aa Bohaana qofiso shuchan zawatees.
JOS 15:7 Yaape zaway Akoora Zangaarape Dabira keyidi, zangaarape dugeha baggan de7iya Adumima Pinuwa sintha baggan aggidi pudeha baggara Galgala simmees. Hessafe qassi Enshemeshe pultuwa kanthidi, Enrogeelan zawatees.
JOS 15:8 Hessafe Hinooma Zangaara kanthidi, Yaabuseta katama gidida Yerusalaame dugeha baggaa gakees. Kaallidi zaway Hinoome Zangaarape wuloha baggan de7iya zumaa huuphiya keyidi, pudeha baggan Raafayme Zangaara gakees.
JOS 15:9 He zumaa huuphiyape bidi, Naftooha pultuwa kanthidi, Efroona zumaa bolla de7iya katamatako keyees. Hessafe qassi Ba7aala woyko Qiriyat-Yi7aarima simmees.
JOS 15:10 Baala pudeha baggara zawaydi, Sayre zumako wuloha bagga mirqetidi, Yi7aarime woyko Kisaloone deriya gakidi, iyape duge Beet-Sameesa wodhidi, Timina pinnees.
JOS 15:11 He zaway Eqroona pudeha baggara kanthidi, Shikroona mirqetidi, Baala zumaara bidi, Yabni7eelan zawatees. He zawa wursethay Medetiraane abba gididi,
JOS 15:12 wuloha bagga zaway Medetiraane abbas gaxa gidees. Yihuda kochay de7ida biitta zaway haysa.
JOS 15:13 Goday kiitidaysada, Iyyasuy, Yoofona na7aa Kaaleba gakiya laata Yihuda biittafe Qiriyaat-Arba geetetiya Kebroona immis. Arbi Anaaqe aawa.
JOS 15:14 Kaalebi Anaaqe kochata, Sesaya, Akmaananne Talmaya geetetiya heedzata Kebroonape kessis.
JOS 15:15 Hessafe dendidi, Dabiran de7iya asaa olanaw bis. Dabira katamay kase Qiriyat-Sefera geetetees.
JOS 15:16 Kaalebi, “Qiriyat-Sefera olidi, oykiya addiyas taani, ta na7iw Akiso immana” yaagis.
JOS 15:17 Yaatin, Kaaleba ishaa Qanaza na7ay, Gotoniyali he katama olidi oykin, Kaalebi ba na7iw Akiso iyaw immis.
JOS 15:18 Aksa Gotoniyala geliya wode I aaway iw gade immanaada woossana mela Gotoniyali iyo zoris. Iya baqulo bollafe wodhin, Kaalebi iyo, “Ay koyay?” yaagidi oychis.
JOS 15:19 Iya zaarada, “Ne kase taw woytida biittay mela biitta gidiya gisho, haatha pultoy de7iya biitta taw gujada immarki” yaagasu. Yaatin, Kaalebi qommoninne garsan de7iya pulto haatha iw immis.
JOS 15:20 Yihuda kochati banta kochan kochan ekida laatay haysafe kaallidi xaafetidaysa.
JOS 15:21 Dugeha baggan Edoome gaxan de7iya Yihuda katamati, Qabdu7eela, Edera, Yaagura,
JOS 15:22 Qiina, Dimoona, Adaada,
JOS 15:23 Qaadesa, Haxoora, Yitinaana,
JOS 15:24 Ziifa, Xelema, Baalota,
JOS 15:25 Haxoor-Hadaata, Qiriyot-Hexiroona woyko Haxoora,
JOS 15:26 Amaama, Shama7a, Moloda,
JOS 15:27 Haxar-Gaade, Heshmoona, Beet-Palexa,
JOS 15:28 Haxar-Shu7aala, Barsaabeh, Biziyoota,
JOS 15:29 Ba7aala, Iyuma, Exema,
JOS 15:30 Eltolaada, Kesila, Horma,
JOS 15:31 Xiqilaaga, Madmaana, Sansana,
JOS 15:32 Lebawoota, Shilihaama, Aynanne Irmoona. Ha katamati banta gutatara issife laatamanne uddufuna.
JOS 15:33 Wuloha baggan zuma xaphon de7iya katamati, Eshta7oola, Xor7a, Ashina,
JOS 15:34 Zanoha, Enganima, Tapuha, Enama,
JOS 15:35 Yarmuta, Adulaama, Sooko, Azeeqa,
JOS 15:36 Sha7irayma, Aditayma, Gederanne Gederotayma. Ha katamati banta gutatara issife tammanne oydda.
JOS 15:37 Qassi hara katamati, Xinana, Hadasha, Migidaal-Gaade,
JOS 15:38 Dil7ana, Mixipha, Yoqiti7eela,
JOS 15:39 Laakiso, Boxiqaata, Egloona,
JOS 15:40 Kaboona, Lahimaasa, Kitiliisha,
JOS 15:41 Gederoota, Beet-Daagona, Na7imaananne Maqeda. Ha katamati banta gutatara issife tammanne usupuna.
JOS 15:42 Qassi Libina, Etera, Ashena,
JOS 15:43 Yiftaahe, Ashina, Nexiba,
JOS 15:44 Qa7ila, Akziibanne Mareesa. Ha katamati banta gutatara issife uddufuna.
JOS 15:45 Hessadaka, Eqroona katamay ba gutaara yan de7ees.
JOS 15:46 Eqroonape wuloha baggan Ashdooda katamaynne iya gutati de7oosona.
JOS 15:47 Qassi Ashdoodanne Gaaza katamati banta gutatara bidi, Gibxe shaafa zawanne Medetiraane abba lanqiya gakanaw de7oosona.
JOS 15:48 Derey dariya katamati, Samira, Yatira, Sooko,
JOS 15:49 Daane, Qiriyat-Sefera woyko Dabira,
JOS 15:50 Anaaba, Eshtamoo7a, Anima,
JOS 15:51 Goshena, Holonanne Gilo. Ha katamati banta gutatara issife tammanne issino.
JOS 15:52 Qassi Araba, Duma, Esh7ana,
JOS 15:53 Yanima, Beet-Tapuha, Afeeqa,
JOS 15:54 Humixa, Kebroona woyko Qiriyat-Arbanne Xi7oora. Ha katamati banta gutatara issife uddufuna.
JOS 15:55 Qassi Ma7oona, Qarmeloosa, Ziifa, Yuuxa,
JOS 15:56 Izra7eele, Yoqidi7aama, Zanoha,
JOS 15:57 Qayna, Gib7anne Timina. Ha katamati banta gutatara issife tamma.
JOS 15:58 Hessadaka Halhula, Beet-Xura, Gadoora,
JOS 15:59 Ma7irata, Beet-Anotanne Eltiqoona. Ha katamati banta gutatara issife usupuna.
JOS 15:60 Qassi Qiriyaat-Ba7aale woyko Qiriyat-Yi7aarimanne Raaba. Ha katamati banta gutatara issife nam7a.
JOS 15:61 Mela biittan qassi Beet-Araba, Midina, Sekaka,
JOS 15:62 Nibishaana, Maxine katamaanne Engaade. Ha katamati banta gutatara issife usupuna.
JOS 15:63 Gidoshin, Yihuda asay Yerusalaamen de7iya Yaabuseta gooddidi kessanaw danda7ibookona. Hessa gisho, Yaabuseti hachi gakanaw Yerusalaamen Yihuda asaara issife de7oosona.
JOS 16:1 Yoosefa kochata gakida laata biittay dugeha baggara Iyaarko matan de7iya Yordaanosen doomees. Iyaarko pultuwas wuloha bagga gaxape bidi, mela biitta kanthidi, derey dariya biitta ekidi, Beetele gakees.
JOS 16:2 Beetelepe bidi, Arketi de7iya Axaroot-Adaare kanthidi, Looza gakees.
JOS 16:3 Hessafe wuloha baggan de7iya Yafleexata biitta duge wodhidi, garsa Beet-Horona gakidi, yaape Gezera kanthidi, Medetiraane abban zawatees.
JOS 16:4 Yoosefa kochati, Minaasenne Efreema kochati, bantana gakiya biitta laattidosona.
JOS 16:5 Efreema kochaa enta kochan kochan gakida biittay haysa; enta zaway doloha baggara de7iya Axaroot-Adaarepe bidi, qommo bagga Beet-Horona keyees.
JOS 16:6 Yaape kanthidi Medetiraane abban zawatees. Qassi pudeha baggara de7iya zaway Mikmaatata. Yaape doloha baggara de7iya Taanat-Seeloko mirqetidi, Yanoha gakees.
JOS 16:7 Yanohaape dendidi, Axarootenne Na7araate wodhidi, Iyaarko gakidi, wursethay Yordaanose shaafan eqees.
JOS 16:8 Gaxa zaway Tapuhape bidi, wuloha baggara de7iya Qaana shaafa lanqiya oykidi, Medetiraane abban eqees. Efreema kochay banta kochan kochan laattida biittay haysa.
JOS 16:9 Hessi Minaase kochaa laata giddon Efreema kochaas imetida katamatanne enta gutata ubbaa gujees.
JOS 16:10 Gidoshin, Efreema kochay Gezeran de7iya Kanaaneta gooddidi kessibookona. Hessa gisho, Kanaaneti hachi gakanaw Efreema kochaa giddon de7oosona. Shin Efreema kochaas aylletidi oothosona.
JOS 17:1 Yoosefa bayra na7aa Minaase kochaas imetida laata biittay kaallidi de7eysa; Galada aaway Makiri Minaase bayra na7a. Makiri mino olancho gidida gisho, Galadanne Baasane biitta ekidosona.
JOS 17:2 Yordaanose shaafape wuloha baggara de7iya biittay hanko attida Minaase kochaas, Abi7ezeras, Heleqas, Asir7eelas, Seekemas, Hefeerasinne Shamida7as imetis. Haysati Yoosefa na7aa Minaase kochata.
JOS 17:3 Hefeera na7aa Selophaada, Galada na7aa Hefeera, Makira na7aa Galada, Minaase na7aa Makira. Selophaadas macca na7ape attishin, adde na7i baawa. He macca nayta sunthay Mahilo, No7o, Hoglo, Milkonne Tirxo.
JOS 17:4 Enti kahiniya Alaazarako, Nawe na7aa Iyyasukonne deriya cimatako bidi, “Nu dabbotada nuuska laata biitta immana mela Goday Muse kiittis” yaagidosona. Yaatin, Goday kiitidaysada enta dabbotada entawuka laata biitta immis.
JOS 17:5 Minaase kochati Yordaanose shaafape doloha baggan de7iya Galadanne Baasane bolla gujidi tammu biittata saaman ekidosona.
JOS 17:6 Hessa gisho, Minaase kochaafe macca nayti adde naytara issife laata biitta shaaketidosona. Galada biittay attida Minaase kochaas gidis.
JOS 17:7 Minaase kochaa biitta zaway Aseerape bidi, Seekemape doloha baggan de7iya Mikmaatata gakees. He zaway yaape kanthidi, dugeha baggan Antapuhan de7iya deriya gujees.
JOS 17:8 Tapuha biittay Minaase kochaasa, shin Minaase zawan de7iya Tapuha katamay Efreema kochaasa.
JOS 17:9 Qassi he zaway yaape bidi, Qaana shaafan zawatees. Minaase katamata giddon Efreema katamatika de7oosona. Shin Minaase zaway Qaana shaafape pudeha baggara bidi Medetiraane abban eqees.
JOS 17:10 Shaafape dugeha baggan de7iya biittay Efreemasa; qassi pudeha baggan de7iya biittay Minaasesa. Minaase biitta zaway Medetiraane abba gakees. Iyaw pudeha baggara Aseeri, qassi doloha baggara Yisakoori zawatees.
JOS 17:11 Yisakooranne Aseera biittata giddon, Beet-Saana, Yiblaama, Doora, Endoora, Tanakanne Magido geetetiya katamatinne gutati Minaasesa.
JOS 17:12 Shin Minaase kochati he katamatan de7iya asata kessidi katamata oykanaw danda7ibookona. Hessa gisho, Kanaaneti yan duussi oykidosona.
JOS 17:13 Isra7eele asay wolqan minnikoka, Kanaaneti wolqa ooso oothana mela un7ethidosonape attishin, enta kumethi gooddidi kessibookona.
JOS 17:14 Yoosefa kochay, “Goday nuna anjidi, darsis; yaatin, ayis issi saama xalaala laata biitta nuus immadii?” yaagidi Iyyasu oychidosona.
JOS 17:15 Iyyasuy zaaridi, “Hinte daro gidiko, derey dariya Efreema biittay hintew guuxidaba gidiko, Parzetinne Raafaymeti de7iya biitta bidi wora qeexite” yaagis.
JOS 17:16 Yoosefa kochay, “He derey dariya biittayka nuus gidenna. Qassi Beet-Saana katamaninne iya gutan de7eysatasinne Izra7eele zangaaran de7iya Kanaanetas birata para gaareti de7oosona” yaagidosona.
JOS 17:17 Yaatin Iyyasuy Yoosefa koche gidida Efreemanne Minaase, “Hinte daronne wolqaama; hintew issi saama xalaala gidanaw bessenna.
JOS 17:18 Hessa gisho, derey dariya biittay hintebaa gidana. He gezzey wora gidikoka qeexidi, gaxa gakanaw hintebaa oothite. Kanaanetas birata para gaareti de7ikoka, qassi enti ay mino gidikoka hinte enta gooddidi kessanaw danda7eeta” yaagis.
JOS 18:1 Biitta oli xoonidi oykidaape guye, Isra7eele asa ubbay Seelon shiiqidi, Goda goyinno dunkaaniya yan essidosona.
JOS 18:2 Shin Isra7eele asape laata biitta ekiboonna laapun kochati attidosona.
JOS 18:3 Hessa gisho, Iyyasuy Isra7eele asaako, “Goday hinte aawata Xoossay hintew immida biitta laattonna awude gakanaw gam7anee?
JOS 18:4 Issi issi kochaafe heedzu heedzu asata doorite. Issi issi kochay laattana biitta enti yuuyidi, xomoosi be7idi, mazgabidi yaana mela ta enta kiittana. Enti he biittaba xaafi ekidi, simmidi taako yaana.
JOS 18:5 He biitta laapun bessan shaakana. Yihuda kochay dugeha baggan, Yoosefa kochay pudeha baggan de7iya banta biitta oykida mela daana.
JOS 18:6 Ha laapun bessan shaaketana biitta qoncisi xaafidi ekidi yiite. Godaa, nu Xoossaa sinthan entaw saama yeggana.
JOS 18:7 Gidoshin, Leewe kochati kahine gididi, Godaas oothiya gisho, hintera laata biitta ekokona. Gaade kochay, Robeela kochaynne, Minaase kochaafe baggay Yordaanose shaafape doloha baggan, Godaa aylley, Musey entaw immida biitta koyrottidi laatidosona” yaagis.
JOS 18:8 He asati biitta xomoosidi, xaafanaw baanape sinthe, Iyyasuy, “Bidi biitta yuuyidi xomoosidi xaafite; simmidi taako yiite. Taani haysan, Seelon, Godaa sinthan hintew saama yeggana” yaagidi kiittis.
JOS 18:9 Asati bidi, biitta ubbaa yuuyidosona. Katamata ubbaa xaafidi, biitta waati laapun bessan shaakaneko qoncisidosona. Yaati simmidi, Iyyasuy dunkaanida gutaa, Seelo simmidosona.
JOS 18:10 Iyyasuy Godaa sinthan, Seelon entaw saama yeggis. Attida Isra7eele zerethata gakiya laata biitta shaakidi immis.
JOS 18:11 Koyro saamay Biniyaame kochaa enta kochan kochan gakis. Enta gakida biittay Yihudapenne Yoosefa kochaafe giddon de7ees.
JOS 18:12 Pudeha baggara enta zaway Yordaanosepe dendidi, Iyaarko pude keyidi, wuloha baggan de7iya derey dariya biitta kanthidi, Beet-Aweena mela biittan eqees.
JOS 18:13 He zaway dugeha baggara kase Looza geetetidi xeegetiya Beetele kanthidi, dugeha Axaroot-Adaare wodhidi, Beet-Horonape dugeha baggan de7iya zuman zawatees.
JOS 18:14 He zaway dugeha baggara Beet-Horona sinthan de7iya zumaape wuloha bagga xaaxetidi, Yihuda kochaa katama gidida, Qiriyaat-Ba7aale woyko Qiriyat-Yi7aarima aadhees. Hessi wuloha baggara de7iya zawa.
JOS 18:15 Dugeha bagga zaway wuloha baggara Qiriyaat-Yi7aarimepe dendidi, Naftooha pultotan zawatees.
JOS 18:16 Hessafe he zaway duge bidi Raafayme zangaarape pudeha baggan de7iya Henooma zangaarape sintha baggara duge wodhees. Yaape Yaabuseta katamaape dugeha baggan de7iya lanqiya oykidi, Hinoome zangaara wodhidi, Enrogeelan zawatees.
JOS 18:17 Yaape pudeha bagga mirqetidi Enshemeshe baggara Adumima zuma sinthan de7iya Geliloota gakees. Yaape qassi Robeela na7aa Bohaana shuchaako duge wodhees.
JOS 18:18 Qassi Beet-Araba pudeha bagga lanqiya oykidi, duge Yordaanose zangaara wodhees.
JOS 18:19 Hessafe Beet-Hogila pudeha lanqiya kanthi bidi, Yordaanose shaafay goggidi geliya Maxine Abbaafe pudeha bagga gaxa gakees. Haysi dugeha bagga zawa.
JOS 18:20 Doloha bagga zaway Yordaanose shaafa. Biniyaame kochati laattida biittay ubba baggara zawatida zaway haysa.
JOS 18:21 Biniyaame kochay banta kochan kocha laattida katamati, Iyaarko, Beet-Hogila, Emeq-Qaxixa,
JOS 18:22 Beet-Araba, Zamarayme, Beetele,
JOS 18:23 Awiime, Paara, Ofira,
JOS 18:24 Kefaar-Amoona, Ofinanne Gib7a. Enti kumethi tammanne nam7u katama. Enta yuushuwan de7iya gutatika enta bolla guzhetoosona.
JOS 18:25 Qassi Gaba7oona, Rama, Be7erota,
JOS 18:26 Mixipha, Kefira, Mooxa,
JOS 18:27 Reqeema, Yirpha7eela, Tarala,
JOS 18:28 Xela7a, Elefa, Yerusalaame geetetiya Yaabuseta katama, Gib7anne Qiriyat-Yi7aarima. Enti kumethi tammanne oyddu katama. Enta yuushuwan de7iya gutatika enta bolla guzhetoosona. Biniyaame kochay banta kochan laattida biittay haysa.
JOS 19:1 Nam7antho saamay Simoona kochaa enta kochan kochan gakis. Enti laattida biittay Yihuda kochati laattida biitta giddon de7ees.
JOS 19:2 Enti laattida katamati, Barsaabe woyko Seeba, Molada,
JOS 19:3 Haxar-Shu7aala, Bala, Exema,
JOS 19:4 Eltolaada, Batula, Horma,
JOS 19:5 Xiqilaaga, Beet-Markaboota, Haxar-Suusa,
JOS 19:6 Beet-Laba7ootanne Sharuha. Enti kumethi tammanne heedza katama. Enta yuushuwan de7iya gutati enta bolla guzhetoosona.
JOS 19:7 Qassi hara bessan Ayna, Irmoona, Eteranne Ashana geetetiya oyddu katamatanne enta yuushuwan de7iya gutata oykidosona.
JOS 19:8 Simoona biittay dugeha baggan de7iya Ba7ilaat-Ba7eera woyko Rama katamatanne enta yuushuwan de7iya gutata ubbaa gakees. Simoona kochay banta kochan kochan laattida biittay haysa.
JOS 19:9 Yihuda kochata gakida biittay dalga gidida gisho, iyape shaaketidi, Simoona kochatas imetis.
JOS 19:10 Heedzantho saamay Zabloona kochaa enta kochan kochan gakis. Enti laattida biittay Sarida gakees.
JOS 19:11 Yaape dendidi zaway wuloha baggan de7iya Mar7ala kanthidi, Dabasheeta bochishe, Yoqinaama matan de7iya haatha gakees.
JOS 19:12 Saridape doloha bagga mirqetidi, Kisiloot-Taabora kanthidi Dabirataninne Yaafan zawatees.
JOS 19:13 Yaape wuloha baggara kanthidi, Gaat-Hefeeranne It-Qaxinaana gakidi, Irmoonakonne Ne7ako mirqettees.
JOS 19:14 Pudeha bagga zaway Hanatoone yuuyidi, Yiftaahe zangaaran zawatees.
JOS 19:15 He zaway Qaxata, Nahilaala, Shimroona, Yidaalanne Beeteleme geetetiya katamata oykees. Enti kumethi tammanne nam7u katama; enta yuushuwan de7iya gutati enta bolla guzhetoosona.
JOS 19:16 Zabloona kochati banta kochan kochan laattida katamatinne enta yuushuwan de7iya gutati haysata.
JOS 19:17 Oyddantho saamay Yisakoora kochaa enta kochan kochan gakis.
JOS 19:18 Enta zaway Izra7eele, Kasulota, Suneema,
JOS 19:19 Hafarayma, Shi7oona, Anahaarata,
JOS 19:20 Rabita, Qisoona, Abeexa,
JOS 19:21 Rameta, Enganima, Enhadanne Beet-Phaxexa oykees.
JOS 19:22 He biitta zaway Taabore, Shahaxumanne Beet-Sameesa bochishe bidi, Yordaanose shaafan zawatees. Enti kumethi tammanne usupun katama; enta yuushuwan de7iya gutati enta bolla guzhetoosona.
JOS 19:23 Yisakoora kochay banta kochan kochan laattida biitta giddon de7iya katamatinne enta yuushuwan de7iya gutati haysata.
JOS 19:24 Ichashantho saamay Aseera kochaa enta kochan kochan gakis.
JOS 19:25 Enta biitta zaway, Helqata, Hala, Bexena, Azifa,
JOS 19:26 Alameleke, Amadanne Mishaala ekees. Wuloha baggara Qarmeloosaninne Sihoor-Libnaatan zawatees.
JOS 19:27 Qassi doloha baggara Beet-Daagonako mirqetidi, Zabloonanne Yiftahi7eela zangaara bochishe bidi, pudeha baggara Beet-Emeqanne Ni7eela gakees. Qassi pudeha baggara Kaabula,
JOS 19:28 Ebroona, Rehooba, Hamoonanne Qaana kanthidi, Sidoonan zawatees.
JOS 19:29 He zaway Rama yuuyidi, gimben diretida Xiroosa katamaa gakidi, Hoosako mirqetidi, Medetiraane abban zawatees. Qassi Mahalaba, Akziiba,
JOS 19:30 Uma, Afeeqanne Rehooba geetetiya katamata gakidi zawatees. Enti kumethi laatamanne nam7u katama; enta yuushuwan de7iya gutati enta bolla guzhetoosona.
JOS 19:31 Aseera kochay banta kochan kochan laattida katamatinne enta yuushuwan de7iya gutati haysata.
JOS 19:32 Usupuntho saamay Niftaaleme kochaa enta kochan kochan gakis.
JOS 19:33 Enta zaway Helefapenne Zananime wolaape bidi, Adaam-Neqeba, Yabni7eelanne Laquma kanthidi, wursethay Yordaanose shaafan eqees.
JOS 19:34 Qassi he zaway wuloha baggara Aznoot-Taboorako mirqetidi, Huqooqan eqees. He zaway dugeha baggan Zabloona, wuloha baggan Aseera, doloha baggan Yordaanose shaafa kanthidi Yihudan gakees.
JOS 19:35 Gimben diretida katamati, Xidima, Xeera, Hamaata, Raqata, Kenereeta abba,
JOS 19:36 Adaama, Rama, Haxoora,
JOS 19:37 Qeedesha, Edraa7a, Enhaxoora,
JOS 19:38 Yir7oona, Magdela, Horema, Beet-Anaatanne Beet-Sameesa katamata oykees. He katamati kumethi tammanne uddufuna; enta yuushuwan de7iya gutati enta bolla guzhetoosona.
JOS 19:39 Niftaaleme kochay banta kochan kochan laattida katamatinne enta yuushuwan de7iya gutati haysata.
JOS 19:40 Laapuntha saamay Daane kochaa enta kochan kochan gakis.
JOS 19:41 Enti laattida katamati Xor7a, Eshta7oola, Irshemesha,
JOS 19:42 Sha7albima, Eloona, Yitala,
JOS 19:43 Eloona, Timina, Eqroona,
JOS 19:44 Eltaqa, Gibtoona, Balata,
JOS 19:45 Yehuda, Benebaraaqa, Gaat-Rimoona,
JOS 19:46 Mayarqoona, Raqoonanne Yoophe katama yuushuwan de7iya heerata oykees.
JOS 19:47 Daane kochay enta laata biittay entafe eketin, Lashema katama bidi, olan xoonidi, he kataman de7iya asaa mashshan wodhidi, he biitta bantaba oothidosona. He katama sunthaa laammidi, banta aawa Daane sunthan Daane gidi sunthidosona.
JOS 19:48 Daane kochati banta kochan kochan laattida katamatinne enta yuushuwan de7iya gutati haysata.
JOS 19:49 Isra7eele asay biitta shaahuwa ongida wode, Nawe na7aa Iyyasus laata biitta immidosona.
JOS 19:50 Goday kase kiittidaysada Iyyasuy derey dariya Efreeman de7iya Timnaat-Saara katama immana mela oychin, iyaw immidosona. He katamaa zaari giigisidi, yan de7is.
JOS 19:51 Kahiney Alaazari, Nawe na7aa Iyyasuynne Isra7eele soo asaa halaqati Seelon, Godaa sinthan Xoossaa dunkaaniya pengen saama yeggidi, shaakida laata biittay haysa. Enti biitta shaakidi ongidosona.
JOS 20:1 Hessafe guye, Goday Iyyasuko haysada yaagis;
JOS 20:2 “Taani Muse baggara kiitidaysada, ‘Asay baqatidi attiya katamata dummayana mela’ Isra7eele asaas oda.
JOS 20:3 Oonika qoponnanne eronna ase wodhiko, yaa baqatidi gukida suuthaa gisho suuthi zaaranaw koya uraape attana.
JOS 20:4 Ase wodhidaysi he katamatape issuwako baqatidi bidi, katamaa pengen eqidi, hanidaba ubbaa he katamaa cimatas odo. Hessafe guye, enti banta katamaa efidi, I daana bessi immiko entara yan de7o.
JOS 20:5 Suuthaa gisho suuthi zaaranaw koya uray iya kaallidi yiiko, I ba ishaa eridi, qohanaw koyidi wodhiboonna gisho he katamaa cimati iya aathidi immofo.
JOS 20:6 Shango sinthan shiiqidi, pirdetana gakanawunne he wode de7iya kahine halaqay hayqana gakanaw he kataman de7o. Hessafe guye, baqatidi keyida katamaa guye simmidi ba soo gelo” yaagis.
JOS 20:7 Yaatin Isra7eele asay derey dariya Niftaalemen Galilan de7iya Qaadesa, derey dariya Efreeman de7iya Seekemanne derey dariya Yihudan de7iya Qiriyaat-Arba woyko Kebroona dummayidosona.
JOS 20:8 Yordaanose shaafape hefinthan, Iyaarkofe doloha baggan dhoqan, mela biittan, Robeela, kochata biittan de7iya Boosora, Gaade kochata biittan, Galadan de7iya Ramotanne Minaase kochata biittan, Baasanen de7iya Goolana dummayidosona.
JOS 20:9 Isra7eele asaynne enta giddon de7iya betanchoti baqatidi attana mela dummatida katamati haysata. Oonika eronna de7ishe ase wodhiko, shango sinthan pirdetonna de7ishe, hayqonna attanaw ha katamatape issuwako baqatanaw danda7ees.
JOS 21:1 Hessafe guye, Isra7eele asay Kanaane biittan, Seelon dunkaanidi de7ishin, Leewe soo asaa halaqati kahiniya Alaazarako, Nawe na7aa Iyyasukonne Isra7eele halaqatako yidi, “Nuuni daana katamatanne mehe heemmiya biitta nuus immana mela, Goday Muse baggara kiittis” yaagidosona.
JOS 21:3 Hessa gisho, Goday kiitidaysada, Isra7eele asay Leewetas katamatanne mehe heemmiya biitta banta biittafe shaakidi, immidosona.
JOS 21:4 Koyro saamay Qahaata kochaas keyis. Kahiniya Aarona kochay, Yihuda, Simoonanne Biniyaame kochaafe tammanne heedzu katamata saaman ekidosona.
JOS 21:5 Attida Qahaata kochay, Efreema, Daanenne wuloha baggan de7iya Minaase kochaafe tammu katamata saaman ekidosona.
JOS 21:6 Gedisoona kochay, Yisakoora, Aseera Niftaalemenne doloha baggan de7iya Minaase kochaafe tammanne heedzu katamata saaman ekidosona.
JOS 21:7 Meraara kochay, Robeela, Gaadenne Zabloona kochaafe tammanne nam7u katamata ekidosona.
JOS 21:8 Goday Muse baggara kiitidaysada, Isra7eele asay ha katamatanne mehe heemmiya biitta Leewetas saaman shaakidi immidosona.
JOS 21:9 Isra7eele asay Yihudanne Simoona kochaafe kaallidi sunthan xeegetida katamata immidosona.
JOS 21:10 Koyro saamay Leewe kochaafe yeletida, Qahaata koche gidida Aarona yaraas keyin, entaw imetida katamati haysata;
JOS 21:11 Derey dariya Yihudan de7iya Qiriyaat-Arba woyko Kebroonenne iya yuushuwan de7iya hentha biittata entaw immidosona. (Arbi Anaaqe aawa.)
JOS 21:12 Shin koyro he katama yuushuwan de7iya biittanne gutata Yoofona na7aa Kaalebas laata oothidi immidosona.
JOS 21:13 Kahiniya Aarona yaraas ase wodhida asi baqatidi attiya Kebroonenne hentha biitta, Libinanne hentha biitta,
JOS 21:14 Yatiranne hentha biitta, Eshtamoo7anne hentha biitta,
JOS 21:15 Holonanne hentha biitta, Dabiranne hentha biitta,
JOS 21:16 Aynanne hentha biitta, Yuuxanne hentha biitta, Beet-Sameesanne hentha biitta. Haysati Yihudapenne Simoonape eketida, katamati kumethi uddufuna.
JOS 21:17 Biniyaame kochaafe eketida oyddu katamati, Gaba7oonanne hentha biitta, Gib7anne hentha biitta,
JOS 21:18 Anatootenne hentha biitta, Almoonanne hentha biitta.
JOS 21:19 Aarona koche gidida kahinetas imetida katamatinne hentha biittati tammanne heedza.
JOS 21:20 Leewe koche gidida, attida Qahaata kochaas, Efreemas imetida biittafe shaaketidi imetis.
JOS 21:21 Qassi entaw derey dariya Efreeman, ase wodhida asi baqatidi attiya oyddu katamati Seekemanne hentha biitta, Gezeranne hentha biitta,
JOS 21:22 Qibxaymanne hentha biitta, Beet-Horonanne hentha biitta immidosona.
JOS 21:23 Daane kochaafe shaaketi imetida oyddu katamati, Eltaqanne hentha biitta, Gibetonanne hentha biitta,
JOS 21:24 Eloonanne hentha biitta, Gaat-Rimoonanne hentha biitta.
JOS 21:25 Minaase kocha baggafe shaaketi imetida nam7u katamati, Tanakanne hentha biitta, Gaat-Rimoonanne hentha biitta.
JOS 21:26 Attida Qahaata kochati hentha biittara issife tammu katama ekidosona.
JOS 21:27 Hara Leewe koche gidida Gedisoona kochaas imetida biittay, Minaase kocha baggaafe ase wodhida asi baqatidi attiya nam7u katamati, Baasanen de7iya Goolananne hentha biitta, Be7eshtiranne hentha biitta.
JOS 21:28 Yisakoora kochaafe imetida oyddu katamati, Qisoonanne hentha biitta, Debraatanne hentha biitta.
JOS 21:29 Yarmutanne hentha biitta, Enganimanne hentha biitta.
JOS 21:30 Aseera kochaafe shaaketi imetida oyddu katamati Mishaalanne hentha biitta, Abdoonanne hentha biitta,
JOS 21:31 Helqatenne hentha biitta, Rehoobanne hentha biitta.
JOS 21:32 Niftaaleme kochaafe shaaketi imetida heedzu katamati, ase wodhida asi baqatidi attiya, Galilan de7iya Qaadesanne hentha biitta, Hamoot-Dooranne hentha biitta, Qartananne hentha biitta.
JOS 21:33 Gedisoona kochati hentha biittara issife tammanne heedzu katamata ekidosona.
JOS 21:34 Leewe koche gidida attida Meraara kochati, Zabloona kochaafe shaaketi imetida oyddu katamati, Yoqnaamanne hentha biitta, Qartananne hentha biitta,
JOS 21:35 Diminanne hentha biitta, Nahilaalanne hentha biitta ekidosona.
JOS 21:36 Robeela, kochaafe shaaketidi imetida oyddu katamati, Boosoranne hentha biitta, Yahaaxanne hentha biitta,
JOS 21:37 Qidemootanne hentha biitta, Mefaatanne hentha biitta.
JOS 21:38 Gaade kochaafe shaaketidi imetida oyddu katamati, Galadan ase wodhida asi baqatidi attiya, Ramotanne hentha biitta, Mahinayme,
JOS 21:39 Haseboona, Ya7izeera.
JOS 21:40 Leewe koche gidida attida Meraara kochay ekida katamati tammanne nam7a.
JOS 21:41 Isra7eele asay laattida biittafe Leewe kochaas imetida katamati hentha biittara issife oytamanne hospuna.
JOS 21:42 He katamata ubbaa yuushuwan hentha biittati de7oosona.
JOS 21:43 Goday enta aawatas immana gidi caaqida biitta ubbaa Isra7eele asaas immis. Enti he biitta laattidi, yan de7idosona.
JOS 21:44 Goday enta aawatas caaqidaysada, enta saron wothis. Enti olas keyida wode ubban enta morketi entara eqetanaw danda7ibookona.
JOS 21:45 Goday Isra7eele asaas immana gidi caaqida lo77oba ubbaa polisipe attishin, issoyka attibeenna.
JOS 22:1 Hessafe guye, Iyyasuy Robeela, Gaadenne Minaase kochaafe baggaa xeegidi,
JOS 22:2 “Godaa aylley Musey hintena kiitida ubbaa polideta; qassi taw kiitetideta.
JOS 22:3 He ubban hachi gakanaw hinte ishata yeggibeeketa. Godaa, hinte Xoossaa kiitta ubbaa polideta.
JOS 22:4 Goday hinte Xoossay hintew caaqida qaalada, hinte ishata shempisis. Hessa gisho, Godaa aylley Musey hintew Yordaanose shaafape doloha baggan immida, laata biittan de7iya hinte soo soo simmite.
JOS 22:5 Godaa aylley Musey hintena kiitida higgiya minthidi naagite. Godaa hinte Xoossaa siiqite. Iya ogiyape deshopite; iya kiita polite. Iyara shiphi gidi de7ite; hinte kumetha wozanapenne kumetha shempuwafe iyaw oothite” yaagis.
JOS 22:6 Iyyasuy enta anjidi yeddin enti banta soo simmidosona.
JOS 22:7 Iyyasuy, Minaase kochaa baggaas Baasanen laata biitta immis. Attida bagga kochaas qassi Yordaanosepe wuloha baggan laata biitta immis. Iyyasuy enta anjidi moyzishe,
JOS 22:8 Hinte, “Daro mehe, bira, worqa, naase, biratanne daro ma7o ekidi hinte soo simmana haneeta. Hessa gisho, hinte morketape di77idaysa hinte ishatara shaaketite” yaagis.
JOS 22:9 Robeela, Gaadenne Minaase kochaa baggay banta laata biitta simmidosona. Enti, Goday Muse baggara kiittin laattida Galada biitta, Kanaane biittan, Seelon de7iya Isra7eele asaape shaaketidi bidosona.
JOS 22:10 Robeela, Gaadenne Minaase kochaafe baggay Yordaanose matan Kanaane biittan de7iya Galiloota yidi, shaafa matan malaalsiya gita yarsho bessi keexidosona.
JOS 22:11 Robeela, Gaadenne Minaase kochaafe baggay Yordaanose matan, Galilootan, Kanaane biittan yarsho bessi keexidaysa attida Isra7eele asay si7idosona.
JOS 22:12 Isra7eele asay hessa si7idi, enta olanaw Seelon shiiqidosona.
JOS 22:13 Hessafe sinthe Isra7eele asay, kahiniya Alaazara na7aa Pinihaasa, Galadan de7iya Robeela, Gaadenne Minaase kochaafe baggatako yeddidosona.
JOS 22:14 Issi issi kochay ba soo halaqatape issi issi ase dooridi, tammu asi Pinihaasara yeddidosona.
JOS 22:15 Enti Robeela, Gaadenne Minaase kochaafe baggay Galada bidi,
JOS 22:16 “Godaa asay, ‘Isra7eele Xoossaa bolla de7iya hinte ammanuwa ayis paciseetii? Hintew yarsho bessi keexidi, Godaape haakideta. Iya bolla ayis makallidetii?
JOS 22:17 Pe7ooran nu oothida nagaray gidennee? Godaa asaa bolla boshi wodhis; hachi gakanaw nuuni he nagaraape geeyibooko.
JOS 22:18 Godaa bolla hachi hinte zoko zaarideta. Hachi hinte iya bolla zoko zaariko wonto I kumetha Isra7eele asaa hanqana.
JOS 22:19 Hinte de7iya biittay tunidaba gidiko, Godaa dunkaaney de7iya biitta, haa nuuko yidi, nu laata shaaketite. Shin Godaa, nu Xoossaa yarsho bessaafe hara yarsho bessi keexidi Xoossaa bolla woyko nu bolla makallofite.
JOS 22:20 Zaara na7ay Akaani digetidaba ekidi, nagara oothida gisho, kumetha Isra7eele asaa bolla Godaa hanqoy wodhibeenneyee? Iya nagara gaason hayqiday iya xalaala gidenna’ ” yaagidosona.
JOS 22:21 Yaatin Robeela, Gaadenne Minaase kochaafe baggay haysada yaagidi zaaridosona.
JOS 22:22 “Godaa xalaali Xoosse! Godaa xalaali Xoosse! Nuuni haysa ayis oothidaako I erees; hinteka erana mela nu koyoos. Nuuni Godaa bolla makallidabaanne kiitetonna ixidaba gidiko, hachi nuna paxa wothofite.
JOS 22:23 Nu Godaas kiitetonna ixidi, xuussa yarshuwa, katha yarshuwanne issifetetha yarshuwa yarshanaw yarsho bessi keexidaba gidiko, Goday nuna hanqo.
JOS 22:24 Nu hessa qopidi keexibooko. Nuuni yarsho bessi keexiday, wonto hinte nayti, nu naytako, ‘Hintew Godaa, Isra7eele Xoossara ay gahetethi de7ii?
JOS 22:25 Goday nu giddoninne Robeelanne Gaade kochaa giddon Yordaanose shaafa zawa wothis. Hessa gisho, Godaara hintew gahetethi baawa’ gandeshsha gidi yayyida gishosa. Qassi hinte kochay nu kochaa Godaa goyinno diggonna aggokona” yaagidi qopida.
JOS 22:26 “Nu yarsho bessi keexiday hessasa. Xuussa woyko hara yarsho yarshanaasa gidenna.
JOS 22:27 Nuuni yarsho bessi keexiday, xuussa, issifetethanne hara yarshuwa yarshishe de7idaysasinne Godaa dunkaaniya sinthan goyinnishe de7idaysas, nu giddoninne hinte giddon qassi kaalliya yeleta giddon hessi marka gidana melasa. Hessi hinte nayti nu naytako, ‘Hintew Godaara ay gahetethika baawa’ yaagonna mela maadana.
JOS 22:28 Enti wodepe nuuko woyko nu kochaako hessada giiko, nu nayti zaaridi, ‘Nu aawati Godaas keexida yarsho bessa leemisuwa haysa be7ite. Hessi hinte giddoninne nu giddon marka gidana melasafe attishin, xuussa woyko hara yarsho yarshanaasa gidenna’ gaanaw danda7ana melasa.
JOS 22:29 Nu Godaa bolla makallanaysi nuupe haako. Godaa nu Xoossaa dunkaaniya sinthan de7iya yarsho bessaafe haraa xuussa, kathaanne hara yarsho bessi keexidi Xoossaa goyinno aggoko” yaagidi zaaridosona.
JOS 22:30 Kahiney Pinihaasinne iyara de7iya Isra7eele halaqati, Robeela, Gaadenne Minaase kochaafe baggay odidaysa si7idi, ufaytidosona.
JOS 22:31 Kahiniya Alaazara na7ay Pinihaasi, Robeela, Gaadenne Minaase kochatako, “Goday nuura de7eysa nu hachi erida. Hinte Godaa bolla makallibeeketa. Hinte Isra7eele asaa Godaa pirdaafe ashshideta” yaagis.
JOS 22:32 Kahiniya Alaazara na7ay Pinihaasinne iyara de7iya halaqati Galadan de7iya Robeelanne Gaade kochaa matape Kanaanen de7iya Isra7eele asaako simmidi, hanidaba entaw odidosona.
JOS 22:33 Isra7eele asay ufaytidi, Xoossaa galatidosona. Hessafe guye, Robeelanne Gaade asati de7iya biitta olidi dhaysanaw odetibookona.
JOS 22:34 Robeelanne Gaade kochay, “Ha yarsho bessay Godaa xalaali Xoossaa gideysas nuus marka” yaagidi, he yarsho bessa “Marka” gidi sunthidosona.
JOS 23:1 Daro wode gakanaw Goday Isra7eele asaa enta yuushuwan de7iya morketape shempisis. He wode Iyyasuy cimin, laythi sugetis.
JOS 23:2 Iyyasuy, Isra7eele asa ubbaa, cimata, halaqata, daynnatanne toora moconata issife xeegidi, “Taani ha77i daro cimas.
JOS 23:3 Goday, hinte Xoossay ha biittan de7iya kawotethata oli xoonana mela waatidi hintena maaddidaako be7ideta.
JOS 23:4 Dolohan Yordaanose shaafa, wulohan Medetiraane abba gakanaw de7iya oyketida biittanne oyketonna biitta ubbaa hinte kochaas shaaka immas.
JOS 23:5 Goday, hinte Xoossay enta hinte sinthafe gooddidi kessana. Goday, hinte Xoossay hintew caaqidaysada hinte enta biitta laattana.
JOS 23:6 “Muse higge maxaafan xaafetida ubbaa minnidi naagitenne polite; iyape ushachi woyko haddirsi goopite.
JOS 23:7 Hinte giddon attida deriyara walaketofite. Enta xoossata sunthaa xeegopite woyko enta sunthan caaqofite. Entaw oothopite woyko entaw goyinnofite.
JOS 23:8 Shin hachi gakanaw hinte oothidaysada Godaa hinte Xoossaas ammanetite.
JOS 23:9 “Goday, gitanne mino kawotethata hinte sinthafe gooddidi kessis. Hintera hachi gakanaw oonika eqetanaw danda7ibeena.
JOS 23:10 Goday, hinte Xoossay hintew caaqidaysada, I hintew oletiya gisho, hintefe issi asi mukulu asaa yedethana.
JOS 23:11 Godaa, hinte Xoossaa ubba wode siiqite.
JOS 23:12 Shin hinte guye simmidi, hinte giddon attida deriyara walaketiko, hinte enta maccasa, qassi enti hinte maccasa ekidi entara qashetiko,
JOS 23:13 Goday, hinte Xoossay he deriya hinte sinthafe gooddidi kessonnaysa erite. Goday, hinte Xoossay hintew immida ha lo77o biittafe hinte dhayana gakanaw, enti hintew xihenne gite gidana. Enti hinte zokuwas lisso, hinte ayfiyas agunthu gidana.
JOS 23:14 “Ha77i ta hayqanaw matas. Goday, hinte Xoossay hintew immana gidi caaqida lo77oba ubbaafe issoyka attiboonaysa hinte ubbay, hinte wozananinne shempuwan ereeta. I hintew immana gidi caaqidabape issoyka attona ubbay poletis.
JOS 23:15 Goday, hinte Xoossay hintera caaqida caaquwa hinte menthidi, hara xoossatas oothikonne goyinniko, Godaa hanqoy hinte bolla eexana.
JOS 23:16 Goday, hinte Xoossay hintew immana gidi caaqida lo77oba ubbaa ashshona polidaysada, I hintew immida ha lo77o biittafe hintena dhaysana gakanaw iita ubbaa hinte bolla ehana. I hintew immida lo77o biittafe ellesidi hinte dhayana.”
JOS 24:1 Iyyasuy Isra7eele asa ubbaa Seekeman xeegis. Cimata, halaqata, daynnatanne toora moconata xeegin, enti Xoossa sinthan shiiqidosona.
JOS 24:2 Iyyasuy asaako, “Goday Isra7eele Xoossay haysada yaagees; ‘Beni hinte aawati Efraxiisa shaafape hefinthan, hara xoossatas goyinnishe de7idosona. Entafe issoy Abrahaamenne Nakoora aawa Taara.
JOS 24:3 Shin hinte aawa Abrahaame, Efraxiisa shaafape hefinthan de7iya biittafe xeegada, Kanaane biittan kaalethas. Iya kochaa darsas; Yisaaqaka iyaw immas.
JOS 24:4 Yisaaqas Yayqoobanne Eesawe immas. Derey dariya Sayre biitta Eesawe laatisas, shin Yayqoobinne iya nayti Gibxe bidosona.
JOS 24:5 “ ‘Guyepe Musanne Aarona kiittada Gibxe biitta gadon shocas; wursethan hintena kessas.
JOS 24:6 Hinte aawata Gibxefe kessida wode Zo7o Abbaako bidosona. Gibxeti parataninne para gaaretan hinte aawata guye zaaranaw yedethidosona.
JOS 24:7 Enti taako waassida wode enta giddoninne Gibxeta giddon dhumaa yeggas. Yaatada, abbay enta bolla simmanaadanne enta mittanaada oothas. Taani Gibxeta bolla oothidaba hinte hinte ayfen be7ideta. Hinte mela biittan daro wode de7ideta.
JOS 24:8 Hessafe guye, Yordaanose shaafape doloha baggan de7iya Amooreta biitta hintena ehas. Enti hintena olidosona, shin ta hintew xoono immas. Ta enta dhaysin, hinte enta biitta laattideta.
JOS 24:9 Hessafe guye, Moo7abe biitta kawoy, Sifoora na7ay Balaaqi, dendidi, Isra7eeletara oletis. I hintena baaddana mela Bi7oora na7aa, Balaama xeegis.
JOS 24:10 Shin ta Balaama si7abike; I hintena anjana mela oothada, hintena Balaaqa kushiyape ashshas.
JOS 24:11 Hinte Yordaanose shaafa pinnidi, Iyaarko yideta. Iyaarko asay, Amooreti, Parzeti, Kanaaneti, Hiteti, Gergeseti, Hiwetinne Yaabuseti hintera oletanaw dendidosona, shin ta hintena xoonisas.
JOS 24:12 Yordaanose shaafape doloha baggan de7iya nam7u Amoore kawota bolla oothidaysada, kazhe kiittada entana hinte sinthafe goodda kessas. Hessi haniday, hinte mashshaana woyko hinte dongiyana gidenna.
JOS 24:13 Hinte qeexi kessiboonna biittanne hinte keexiboonna katamata taani hintew immin de7eeta. Ha77i hinte tokiboonna woyne ayfiyanne shamaho ayfiya meeta’ ” yaagees.
JOS 24:14 Qassika Iyyasuy kaallidi, “Godaa bonchite; polo ammanetethaninne suure wozanan iyaw kiitetite. Hinte mayzati Efraxiisa shaafape hefinthaninne Gibxen goyinnida eeqata aggidi Godaa goyinnite.
JOS 24:15 Hinte Godaa goyinnanaw koyonna ixiko, hinte aawati Efraxiisa shaafape hefinthan de7ishe goyinnida eeqata gidin, woyko ha77i hinte de7iya Amooreta eeqata gidin, hinte goyinnana Xoossa hachi doorite. Shin taani, ta soo asaara nu Godaa goyinnana” yaagis.
JOS 24:16 Asay zaaridi, “Godaa aggidi, hara eeqa xoossata goyinnanaysi nuupe haako.
JOS 24:17 Nu Godaa Xoossay nunanne nu aawata Gibxe aylletethaafe kessis; I oothida gita malaatata be7ida. Nu kanthidi aadhida biitta ubban Goday nuna naagis.
JOS 24:18 Goday Amooretanne he biittan de7iya hara kawotethata nu sinthafe gooddidi kessis. Hessa gisho, I nu Xoossaa gidiya gisho nu iya goyinnana” yaagidosona.
JOS 24:19 Iyyasuy zaaridi, “Goday geeshshinne qanaatiya Xoossi gidiya gisho, hinte iya goyinnanaw danda7eketa. I hinte naaquwa woyko hinte nagara atto geenna.
JOS 24:20 Hinte Godaas zoko zaaridi, eeqa xoossata goyinniko, I hintew kase lo77o gidikoka simmidi hintena qohananne dhaysana” yaagis.
JOS 24:21 Asay zaaridi, “Nu hara eeqa xoossata goyinnoko; nuuni Godaa, iya xalaala goyinnana” yaagis.
JOS 24:22 Iyyasuy, “Hinte Godaa goyinnana gidaysas hinte, hinte huuphen marka” yaagis. Entika, “Ee nuuni marka” yaagidosona.
JOS 24:23 Iyyasuy zaaridi, “Hinte giddon de7iya eeqa xoossata diggite; hinte wozanaa Godaako, Isra7eele Xoossaako zaarite” yaagis.
JOS 24:24 Entika, “Nuuni Godaa, nu Xoossaa goyinnana; iya kiita naagana” yaagidosona.
JOS 24:25 He gallas Iyyasuy, Seekeman asay Xoossara caaqana mela oothis. Enti kaallana higgiya entaw giigisidi,
JOS 24:26 higge maxaafan xaafis. Hessafe guye, issi gita shuchi ekidi, Godaa dunkaaniya matan de7iya wolaa garsan essis.
JOS 24:27 Iyyasuy asaako, “Ha shuchaa be7ite; I nu bolla marka. Goday nuus odidaba ubbaa ha shuchay si7is. Hinte Xoossaa bolla makalliko, ha shuchay hinte bolla marka gidana” yaagis.
JOS 24:28 Yaatidi, Iyyasuy asaa ubbaa moyzis. Asa ubbay banta laata biitta simmidi bidosona.
JOS 24:29 Godaa aylley, Nawe na7aa Iyyasuy xeetanne tammu laythan hayqis.
JOS 24:30 Asay iya Ga7aasa zumaape pudeha baggan, derey dariya Efreeman de7iya iya laata biittan, Timnaat-Saaran iya moogidosona.
JOS 24:31 Iyyasuy paxa de7ida wode ubban Isra7eele asay Godaa goyinnidosona. Iyape guye, Xoossay Isra7eele asaas oothida ooso ubbaa banta ayfen be7ida cimata wode ubban Godaa goyinnidosona.
JOS 24:32 Isra7eele asay Gibxe biittafe eki keyida, Yoosefa meqethaa Seekeman moogidosona. He bessaa Yayqoobi Seekema aawa Hamoora naytape issi xeetu bira santimen shammis. He biitta guyepe Yoosefa kochay laattidosona.
JOS 24:33 Aarona na7ay Alaazari hayqidi, iya na7aa Pinihaasas imetida derey dariya Efreema biittan de7iya Gib7an moogetis.
JDG 1:1 Iyyasuy hayqidaape guye Isra7eele asay, “Kanaane biitta olanaw nu kochatape koyrottidi keyanay oonee?” yaagidi Godaa oychidosona.
JDG 1:2 Goday, “Yihuda kochay koyrottidi keyo. Taani biitta iya kushen aathada immas” yaagis.
JDG 1:3 Yihuda asay banta ishata, Simoona kochata, “Nuuni Kanaaneta olana mela nuna gishon gakida biitta nuura yedhite. Nuka hintena gishon gakida biitta hintera baana” yaagis. Simoona kochay Yihuda kochaara issife olanaw bis.
JDG 1:4 Goday Kanaanetanne Parzeta enta kushen aathidi immin, Beezeqa kataman tammu mukulu asaa wodhidosona.
JDG 1:5 Beezeqa kataman kawa Adooni-Beezeqa demmidi, iyara oletidi Kanaanetanne Parzeta xoonidosona.
JDG 1:6 Adooni-Beezeqi baqatiya wode enti yedethi oykidi, iya kushiyanne iya tohuwa wogga biradheta qanxidosona.
JDG 1:7 Adooni-Beezeqi, “Kushenne toho wogga biradheta taani qanxida laapun tammu kawoti ta gaytape wodhida tiifiya maxidi moosona. Taani enta bolla oothidaysada Xoossay ta bolla oothis” yaagis. Iya Yerusalaame ehin yan hayqis.
JDG 1:8 Yihuda asay Yerusalaame oli oykidi asaa mashshan wodhidi, katamaa taman xuuggidosona.
JDG 1:9 Hessafe guye, Yihuda asay derey dariya biittan, Negeba mela biittaninne gadhan de7iya Kanaaneta olanaw bidosona.
JDG 1:10 Kase Qiriyaat-Arba geetetiya Kebroona kataman de7iya Kanaaneta olidi Sesaya, Akmaananne Talmaya geetetiya kochata xoonidosona.
JDG 1:11 Yaape dendidi Yihuda asay Debira kataman de7iya asaa olanaw bidosona. Debira katamay kase Qiriyat-Sefera geetetees.
JDG 1:12 Kaalebi, “Qiriyat-Sefera olidi oykiya uraas taani ta na7iw Akiso immana” yaagis.
JDG 1:13 Kaaleba kaalo isha Qanaza na7ay Gotoniyali he katamaa olidi oykin, Kaalebi ba na7iw Akiso iyaw immis.
JDG 1:14 Aksa Gotoniyala geliya wode, I aaway iw gade immanaada woossana mela Gotoniyali iyo zoris. Iya baqulo bollafe wodhishin Kaalebi ta naatte, “Ay koyay?” yaagidi oychis.
JDG 1:15 Iya, “Taw woyto imma. Neeni kase taw immida biittay qaa7e gidida gisho haatha pultota taw immarki” yaagasu. Kaalebi qommo pultuwanne garsa pultuwa iw immis.
JDG 1:16 Musey bolluwa Qenaati kochati Yihuda asaara Zamba Katama geetetiya Iyaarko katamaape dendidi Arada katamaape dugeha baggara, Negeban de7iya Yihuda mela biitta bidi yan de7iya asaa giddon uttidosona.
JDG 1:17 Yihuda asay Simoona asaara issife bidi, Xafaata kataman de7iya Kanaaneta xoonidi katamaa kumethi dhaysidi, he katamaa Horma gidi sunthidosona.
JDG 1:18 Yihuda asay gujidi Gaaza, Asqaloona, Eqroonanne enta yuushuwan de7iya gutata oykidosona.
JDG 1:19 Goday Yihuda asaara de7iya gisho, derey dariya biitta laattidosona. Shin demba biittan de7iya asatas biratape oosetida ola para gaareti de7iya gisho, Yihuda asay enta gooddidi kessanaw danda7ibookona.
JDG 1:20 Musey kiittidaysada, Kebroona katamaa Kaalebas immin Kaalebi Anaaqe koche gidida heedzu kochata gooddidi kessis.
JDG 1:21 Shin Biniyaame kochati Yerusalaamen de7iya Yaabuseta gooddidi kessibookona. He wodepe doomin Yaabuseti Biniyaame kochatara issife Yerusalaamen de7idosona.
JDG 1:22 Qassi Yoosefa kochati Beetele katamaa olidosona; Xoossay entara de7ees.
JDG 1:23 Yoosefa kochati kase Looza geetetiya Beetele katamaa wochiya asata kiittidosona.
JDG 1:24 Enti katamaape keyiya issi addiya demmidi, “Katamaa giddo waanidi gelanaw danda7etiyako nuna bessa; nuuni new keehana” yaagidosona.
JDG 1:25 I enta bessin kataman de7iya asaa mashshan buthidosona; shin he addiyanne iya soo asa ubbaa ashshidosona.
JDG 1:26 Guype he addey Hiteta biitta bidi, yan katamaa keexidi Looza gidi sunthis. Hachi gakanaw he katamay he sunthan xeegetees.
JDG 1:27 Minaase kochati Beet-Saana, Tanaka, Doora, Yiblaama Magidonne enta yuushuwan de7iya gutatan de7iya asata gooddidi kessibookona. Yaatin, Kanaaneti yan duussu oykidosona.
JDG 1:28 Isra7eele asay minnida wode Kanaaneta bantaw wolqan oosisidosona; shin enta kumethi biittafe kessidi goodibookona.
JDG 1:29 Efreema kochatika Gezera kataman de7iya Kanaaneta gooddidi kessibookona; yaatin, Kanaaneti yan entara de7idosona.
JDG 1:30 Zabloona kochati Qitiroonaninne Nahilaalan de7iya asata gooddidi kessibookona; yaatin, Kanaaneti yan entara issife de7idosona. Shin Zabloona kochati enta bantaw wolqan oosisidasona.
JDG 1:31 Aseera kochati Akon, Sidoonan, Ahilaaban, Akziiban, Helban, Afeeqaninne Rehooban de7iya asata gooddi kessibookona.
JDG 1:32 Kanaaneti keyonna attida gisho Aseera kochati entara yan issife de7idosona.
JDG 1:33 Niftaaleme kochati Beet-Sameesaninne Beet-Anaatan de7iya asata gooddi kessibookona; shin Kanaanetara yan issife de7idosona. Beet-Sameesanne Beet-Anata asata bantaw wolqan oosisidosona.
JDG 1:34 Amooreti Daane kochata derey dariya biitta yedethidosona; enti demba biitta wodhonna mela teqidosona.
JDG 1:35 Amooreti Hereesa deriyan, Eloonaninne Sha7albiman duussu oykidosona; shin Yoosefa kochati minni minni bidi bantaw wolqan oosisidosona.
JDG 1:36 Amooreta biitta zaway Sela7a matan de7iya Akraabima pudetha keyees.
JDG 2:1 Godaa kiitanchoy Galgalape Bookima bidi, Isra7eele asaako haysada yaagis; “Taani hintena Gibxefe kessada beni hinte mayzatas immana gada caaqida biitta hintena gelsada, ‘Taani hintera caaqida caaquwa menthike;
JDG 2:2 hinte ha biittan de7iya asatara caaqofite; enta yarsho bessa laallite’ yaagas. Shin hinte taw kiitetibeketa; ayis hessa hanidetii?
JDG 2:3 Hessa gisho, taani enta hinte sinthafe gooddike; enti hintew morke gidana; enta xoossati hintew xihe gidana” yaagis.
JDG 2:4 Godaa kiitanchoy Isra7eele asaas hessa odida wode asay banta qaala dhoqu oothidi yeekidosona.
JDG 2:5 Yaatidi he bessaa Bookima yaagidi sunthidi yan Godaas yarshidosona.
JDG 2:6 Iyyasuy Isra7eele asaa yeddidaape guye, asay issoy issoy bana gakida laata biitta ekanaw bis.
JDG 2:7 Iyyasuy paxa de7iya laythaninne Goday Isra7eele asaas oothida gita ooso ubbaa be7ida cimati de7iya wode asay Godaas kiitetidosona.
JDG 2:8 Godaa aylley, Nawe na7ay Iyyasuy laythay xeetanne tamma gidin hayqis.
JDG 2:9 Enti iya Ga7aasa zumaape pudeha baggan, Efreema gezze biittan, Timnaat-Saraha geetetiya bessan iya laata biittan moogidosona.
JDG 2:10 He yeletetha ubbay hayqidi banta mayzatan gahetidosona. Hessafe guye Godaa woyko Goday Isra7eele asaas oothidaba eronna hara yeletethi dendis.
JDG 2:11 Hessafe guye, Isra7eele asay Godaa sinthan iitabaa oothidosona; Ba7aale eeqa misileta goyinnidosona.
JDG 2:12 Gibxe biittafe enta kessida Godaa, banta mayzata Xoossaa aggidosona. Enta yuushuwan de7iya asaa eeqatako simmidi, entaw goyinnidosona; hessan Godaa hanqethidosona.
JDG 2:13 Qassi Godaa aggidi, Ba7aalenne Astaroote eeqa goyinnidosona.
JDG 2:14 Yaatin, Godaa hanqoy Isra7eele asaa bolla eexis; bonqeysati enta bonqana mela oothis. Enta yuushuwan de7iya morketas aathidi immis. Yaatin, enti banta morketara eqetanaw danda7ibookona.
JDG 2:15 Enti oletanaw keyiya wode ubban, Goday kase entaw odidaysadanne caaqidaysada enti xoonetana mela I enta bolla dendis. Yaatin, enti daro un7etidosona.
JDG 2:16 Yaatin, Goday ayseysata entaw denthin, enti Isra7eele asaa bonqeyisata kushepe ashshidosona.
JDG 2:17 Gidoshin Isra7eele asay haareysatas kiitetibookona; Godaas ammanetona ixidi hara xoossata goyinnidosona. Enta aawati Godaas kiitetidi hemetida ogiya aggidi hara soo simmidosona.
JDG 2:18 Goday entaw ayseysata denthida wode ubban I ayseysatara issife gididi he ayseysi paxa de7iya laytha ubban enta morketa kushepe ashshis. Enti un7aninne meton gididi Godaako waassiya wode ubban Goday entaw qadhetees.
JDG 2:19 Shin ayseysi hayqidaape guye, asay guye simmidi, kase enta aawati oothida iitaape aadhida iita oothidosona. Enti hara xoossatako simmidi, entaw goyinnidosona. Banta iita oosuwanne geella ogiya aggonna ixidosona.
JDG 2:20 Goday Isra7eele asaa bolla yilo eexidi, “Ha asay taani enta mayzatas caaqida caaquwa menthida gishonne taw kiitetonna ixida gisho,
JDG 2:21 Iyyasuy hayqiya wode biitta bolla attida kawotethatape issuwaka taani enta sinthafe gooddada kessike.
JDG 2:22 Isra7eele asay kase banta mayzatada ta ogiya kaalliyakonne kaallonnaako paacanaw taani ha attida kawotethata go7etana” yaagis.
JDG 2:23 Hessa gisho, Goday he kawotethati biittafe goodetonna gam7ana mela oothis. I enta ellesidi gooddi kessibeenna; enta Iyyasus aathidi immibeenna.
JDG 3:1 Kanaanen ola meezetiboonna Isra7eele asaa paacanaw Goday Kanaanen ashshida asay haysata.
JDG 3:2 I hessa oothiday haysafe kase ola meezetiboonna Isra7eele yeletethaa ola hiilla tamaarsanaasa.
JDG 3:3 Hessatika ichashu Filisxeeme halaqata, Kanaaneta, Sidoonatanne Ba7aal-Armoona zumaape doomidi Hamaata gakanaw Libaanose zumaa bolla de7iya Hiweta.
JDG 3:4 Goday Muse baggara kase Isra7eele mayzatas immida kiita enti kiitetiyakonne kiitetonaako paacanaw enta kessonna aggis.
JDG 3:5 Yaatin, Isra7eele asay Kanaanetara, Hitetara, Amooretara, Parzetara, Hiwetaranne Yaabusetara issife de7idosona.
JDG 3:6 Enta macca nayta bantaw ekidosona; banta macca nayta enta adde naytas immidosona. Yaatidi enta xoossata goyinnidosona.
JDG 3:7 Isra7eele asay Godaa sinthan iitabaa oothidosona. Enti Godaa banta Xoossaa dogidi, Ba7aalenne Asheera geetetiya xoossata goyinnidosona.
JDG 3:8 Hessa gisho, Godaa hanqoy Isra7eele asaa bolla eexis. Goday Masephexoome kawa Kushan-Rishataymi enta haarana mela aathidi immin, enti iyaw hospun laythi haaretidosona.
JDG 3:9 Shin Isra7eele asay Godaako waassida wode enta ashshiya, Kaaleba kaalo ishaa Qanaze na7aa Gotoniyala denthis.
JDG 3:10 Godaa Ayyaanay iya bolla wodhin, I Isra7eele bolla pirdeysa gidis. I olas keyida wode Goday Masephexoome kawa Kushan-Rishatayma iyaw aathidi immin xoonis.
JDG 3:11 Yaatin, biittay oytamu laythi wopu gidi de7is. Hessafe guye, Qanaze na7ay Gotoniyali hayqis.
JDG 3:12 Isra7eele asay zaaridi Godaa sinthan iitabaa oothidosona. Hessa gisho, Goday Moo7abe kawoy Eglooni Isra7eele bolla wolqatanaada oothis.
JDG 3:13 Eglooni Amoonetanne Amaaleqata shiishidi Isra7eele asa oli xoonidi, Zamba katamaa Iyaarko oykis.
JDG 3:14 Yaatin, Isra7eele asay Moo7abe kawa Egloonas tammanne hospun laythi haaretidosona.
JDG 3:15 Shin Isra7eele asay Godaako waassida wode enta ashshiya, Biniyaame koche gidida Geera na7aa Naa7oda, haddirsa kushen ootheysa denthis. Isra7eele asay Naa7oda Moo7abe kawa Egloonako giirara kiittis.
JDG 3:16 Naa7odi nam7u baggara qaratida issi wadha mashshe giigisidi ushacha baggan ba ma7uwa garsan dancis.
JDG 3:17 Hessafe guye, daro orde gidida Moo7abe kawa Egloonas giira efidi immis.
JDG 3:18 Naa7odi giira kawas immidaape guye, giira tookidi bida asaa moyzis.
JDG 3:19 Shin Naa7odi Galgala matan de7iya masetida shuchata matape Egloonako guye simmi bidi, “Kawaw, ta new odiya issi xuuri de7ees” yaagis. Kawoy, “Si77i ga” yaagis. Iya naageysati ubbay kare keyidosona.
JDG 3:20 He wode kawoy pooqiya bolla issi kifiliyan barka uttidashin, Naa7odi iyako shiiqidi, “Xoossay new kiittidabay de7ees” yaagin, kawoy ba uttida bessaafe dendi eqis.
JDG 3:21 Naa7odi ba haddirsa kushiya yeddidi, ushacha bagga xeessan de7iya mashsha shoddidi, kawa uluwan dirgim oothis.
JDG 3:22 Mashshaa tuytey attonna ulo giddo gelidi, zokuwara kanthi keyis. Modhoy kammida gisho Naa7odi mashsha kawa uluwape shoddiboonna.
JDG 3:23 Hessafe guye, Naa7odi kare keyidi, kifiliya pengiya gordidi iya bolla qulpis.
JDG 3:24 Naa7odi bidaape guye aylleti yidi, pengey gordetidaysa be7idi, “Kawoy giddo kifiliyan sheeshas uttonna aggenna” yaagidi qopidosona.
JDG 3:25 Enti saletana gakanaw naagidosona. Shin kawoy pengiya dooyonna ixin, qulpe ekidi pengiya dooyidi, banta goday hayqidi, wuygen kundidaysa be7idosona.
JDG 3:26 Enti yan eqidi naagishin, Naa7odi kessi ekidi eeqa shuchata matara aadhidi Sa7iira baqatis.
JDG 3:27 I bidi derey dariya Efreema biitta gakida wode Isra7eele asay olas shiiqana mela moyze punnin, asay iya kaallidi duge wodhidosona.
JDG 3:28 I entako, “Tana kaallite; Goday hinte morketa, Moo7abeta hinte kushen aathidi immis” yaagis. Enti iya kaalli wodhidi, Yordaanose shaafa pinniya bessaa oykidosona. Moo7abe asape issi asika yaara aadhona mela teqidosona.
JDG 3:29 He wode Moo7abe asaape tammu mukulu gidiya dooretida mino olanchota wodhidosona; issi asika kessi ekibeenna.
JDG 3:30 He gallas Isra7eele asay Moo7abe asaa xoonidosona. Biittay hospun tammu laythi wopu gidi de7is.
JDG 3:31 Na7odaape guye, Anaata na7ay Samgaari dendidi, Filisxeeme asaape usupun xeetu asaa booru laagiya birata xam7an wodhidi Isra7eele asaa ashshis.
JDG 4:1 Naa7odi hayqidaape guye Isra7eele asay Godaa sinthan zaaridi iitabaa oothidosona.
JDG 4:2 Hessa gisho, Goday Haxoora kataman de7iya Kanaane kawa Iyaabisas enta aathidi immis. Iya tora moconay Haroseeti Hagoyma kataman de7iya Sisaara.
JDG 4:3 Iyaabisas uddufun xeetu birata para gaareti de7iya gishonne I Isra7eele asaa qadhey bayna laatamu laythi un7ethida gisho enti maado demmanaw Godaako waassidosona.
JDG 4:4 He wode Lafidoota machiya, nabiya Diboora Isra7eele asaa kaalethawus.
JDG 4:5 Diboora derey dariya Efreema biittan, Ramapenne Beetelepe giddon de7iya Diboora zamba garsan uttada pirdawusu. Isra7eele asay pirda demmanaw iiko yoosona.
JDG 4:6 Issi gallas Diboora Abinooma na7aa Baaraqa Niftaaleme biittan de7iya Qaadesape xeegisada, “Goday Isra7eele Xoossay nena haysada yaagidi kiittis; ‘Niftaalemenne Zabloona zariyape tammu mukulu asaa ekada Taabore zumaa bolla keya.
JDG 4:7 Taani Yabina tora moconata Sisaari para gaaretanne olanchota ekidi, Qisoona shaafan nena olanaw yaana mela oothana. Yan taani new iya aathada immana’ yaagees” yaagasu.
JDG 4:8 Baaraqi, “Neeni taara biiko taani baana; shin neeni taara boonna ixiko taani biike” yaagis.
JDG 4:9 Iya zaarada, “Ero, taani neera baana; shin Goday Sisaara maccasa kushen aathidi immana gisho ta buussay new boncho gidenna” yaagasu. Hessa gisho Diboora dendada, Baaraqara Qaadesa basu.
JDG 4:10 Baaraqi Niftaalemenne Zabloona kochata Qaadesa xeegin, tammu mukulu asi iya kaallidi keyis; Dibooraka iyara basu.
JDG 4:11 He wode Qeena asi gidida Hebeeri, Muse bolloy, Hobaaba yaray hara Qeenatape shaaketidi Qaadesa matan Zenaanimen de7iya wolaa matan ba dunkaaniya tokis.
JDG 4:12 Abinooma na7ay Baaraqi Taabore zuma bidaysa Sisaari si7ida wode,
JDG 4:13 uddufun xeetu birata para gaaretanne baara de7iya asa ubbaa xeegisidi, Haroseet-Hagoymape Qisoona shaafa shiishis.
JDG 4:14 Yaatin Diboori Baaraqako, “Hachi Goday Sisaara ne kushen aathidi immiya gallas gidiya gisho denda. Heko, Goday new sinthe aadhis” yaagasu. Baaraqi tammu mukulu olanchota kaalethidi, Taabore zumaape wodhis.
JDG 4:15 Goday Sisaara, iya para gaaretanne iya olanchota ubbaa Baaraqa mashshas aathidi immis. Yaatin, Sisaari ba para gaariyape wodhidi tohon baqatis.
JDG 4:16 Baaraqi para gaaretanne olanchota Haroseet-Hagoyma gakanaw yedethis. Sisaara olanchoti ubbay mashshan hayqidosona; issi asika attibeenna.
JDG 4:17 He wode Haxoora kawoy Yaabini Hebeera keethaa asaara saro de7ees. Hessa gisho, Sisaari tohon baqatidi, Qeena asi gidida Hebeera mache Ya7eeli dunkaaniya gakis.
JDG 4:18 Ya7eela Sisaara mokanaw keyada, “Ta godaw, gela; haa gela; yayyofa” yaagasu. I dunkaaniya giddo iiko gelin iya afilara kammas.
JDG 4:19 Sisaari, “Tana saamees; haathe tana ushsharki” yaagis. Iya maatha ogoro dooyada ushshasu; yaatada zaarada kammasu.
JDG 4:20 Hessafe guye i, “Dunkaaniya pengen eqa. Ay asika yidi, ‘Haysan asi de7ii?’ yaagidi oychiko, ‘Baawa’ yaaga” yaagis.
JDG 4:21 Sisaari daro daaburida gisho dhisko hayqi aggis. Hebeera machiya Ya7eela naariqanne dunkaane dhishe ekada, loddara iyako shiiqada dhishiya haytha karen dhishada, sa7ara oythin Sisaari hayqis.
JDG 4:22 Baaraqi Sisaara koyishe yin, Ya7eela iya mokanaw kare keyada, “Haaya; ne koyiya addiya taani nena bessaana” yaagasu. Hessa gisho, iira dunkaaniya giddo gelidi, Sisaara haytha karen dhishey gelin iya ahay sa7an zin7idaysa be7is.
JDG 4:23 He gallas Xoossay Isra7eele asay Kanaane kawa Yabina xoonana mela oothis.
JDG 4:24 Yabina kawa dhaysana gakanaw Isra7eele asay iya bolla minni minni bis.
JDG 5:1 He gallas Dibooranne Abinooma na7ay Baaraqi ha mazmuriya yexidosona.
JDG 5:2 Halaqati Isra7eele asaa kaalethida gisho, asayka bana aathidi immida gisho, Godaa galatite.
JDG 5:3 Hinteno kawoto, si7ite; Hinteno haareysato, hayzite; Taani Godaas yexana. Isra7eele Xoossaa galatana.
JDG 5:4 Abeeti Godaw, neeni Sayre zumaape dendiya wode, Edoome biittafe ne keyiya wode, biitti qaaxis; Salope iri bukis; haathi shaarape goggis.
JDG 5:5 Siina Godaa, Isra7eele Xoossaa sinthan, dereti qaaxidosona;
JDG 5:6 Anaata na7aa Samgaara wodenne Ya7eela wode ogey dogetis; zal7anchoti yuusho ogera boosona.
JDG 5:7 Diboori Isra7eele asaas, aayo gidada dendana gakanaw, Isra7eele gutati baysatidosona;
JDG 5:8 Isra7eele asay allaga xoossata doorida wode, biitta bolla oli dendis. Oytamu mukulu Isra7eele olanchota giddon, issi gondalley woyko issi toori bentibeenna.
JDG 5:9 Ta wozanay Isra7eele toora moconatara, Asaa giddofe dosan bantana aathidi, immidaysatara de7ees. Godaa galatite;
JDG 5:10 Hinteno, bootha hareta toggeysato, lo77o gilaasiya bolla uttidi dincaketeysato, oge gaxara hemeteysato haysa si7ite.
JDG 5:11 Haatha ollata matan, shiiqida asaa yetha si7ite. Enti Godaa xoonuwa yexoosona; Isra7eele asaa xoonuwa odoosona. Hessafe guye, Godaa asay katamaa pengetako wodhidosona.
JDG 5:12 Diboora, Denda! Denda! Denda! Dendada mazmure yexa. Abinooma na7aw, Baaraqa, denda! ne di77idabaa ekada ya.
JDG 5:13 Hessafe guye, attida asati, halaqatako wodhidosona. Godaa asati oletanaw giigidi Baaraqako yidosona.
JDG 5:14 Amaaleqa kochati beni de7ida bessan de7iya Efreema asati yidosona. Biniyaame asati enta kaallidosona. Makirape halaqati, Zabloonape kawotetha xam7a oykeysati yidosona.
JDG 5:15 Yisakoora halaqati Diboorara de7oosona; ee, Yisakoore asay Baaraqara yidosona; enti iya kaallidi, zangaara gelidosona. Shin Robeela kochati qofan shaaketidi, banta wozanan heettidosona.
JDG 5:16 Enti ayis attidonaa? Dorsata heemmanaseyee? Robeela kochati qofan shaaketidi, banta wozanan heettidosona.
JDG 5:17 Gaade kochati Yordaanose pinthan attis, Daana kochati markabetan attidosona. Aseera kochati banta de7iyason, Abbaa gaxan attidosona.
JDG 5:18 Zabloona kochati, bantana hayqos aathidi immidosona. Niftaaleme kochati, toora denban bantana aathidi immidosona.
JDG 5:19 Magido pultota matan Tanakan, kawoti oletidosona. Kanaane kawoti yan oletidi, bira woyko haraba di77ibookona.
JDG 5:20 Salope xoolintoti oletidosona; banta yuushan Sisaara olidosona.
JDG 5:21 Qisoona shaafay enta efis; benipe de7iya Qisooni enta shokis. Ta shempe, minna; sinthe hordofa.
JDG 5:22 Parati adarsishe yidosona, banta tohuwan biitta giirsoosona.
JDG 5:23 Godaa kiitanchoy haysada yaagis; “Merooza baaddite! Yan de7iya asaa iissidi baaddite! Enti Godaa maaddanaw yibookona; iya wolqaama morketa olanaw keybookona.”
JDG 5:24 Qeena asi gidida Hebeera machiya, Ya7eeli maccasa ubbaafe anjetidaaro gido. Dunkaanen de7iya maccasa ubbaafe, iya anjetidaaro gido.
JDG 5:25 Sisaari iyo haathe oychin maathi immasu; lo77o ogoron meqida maathi ehasu.
JDG 5:26 Ba haddirsa kushen dunkaane dhishe, ba ushacha kushen oosanchota naariqa oykasu. Sisaara huuphen dhishasu; iya haytha karera kantha kessasu.
JDG 5:27 I tohuwa garsan kundis; I tohuwa matan zohetis. I tohuwa garsan kundis; he kundida bessan hayqis.
JDG 5:28 Sisaara aayiya maskootera kare xeellasu; “Ta na7aa para gaarey ayis gam7idee? Parati ayis ellesidi simmibokona?” yaagada bana oychasu.
JDG 5:29 I cinca maccasati I oysha zaaridosona; shin iya ba qofan zaara zaarada yaagasu.
JDG 5:30 “Enti di77o demmidi shaaketonna aggokona; Issi issi addes issi geela7oy woyko nam7u geela7oti gakonna aggenna. Enti Sisaaras lo77iya ma7o immana; tawka qoodhen ma7iya, alleeqetida ma7o ehana” yaagasu.
JDG 5:31 Abeeti Godaw, ne morketi ubbay haysada hayqo; shin nena doseysati wonta xalqeda phoolo. Hessafe guye, biittay oytamu laythi wopu gidi de7is.
JDG 6:1 Isra7eele asay Godaa sinthan zaaridi iitabaa oothidosona. Hessa gisho, Goday enta Midiyaame asaas aathidi immin laapun laythi enta haaridosona.
JDG 6:2 Midiyaame asay Isra7eele asaa un7ethin, entafe attanaw dere bolla, gongoloninne hom7on banta katha qosidosona.
JDG 6:3 Isra7eele asay kathi zeriya wode ubban, Midiyaame asay Amaaleqa asaaranne doloha bagga asaara yidi enta oloosona.
JDG 6:4 Enti he biittan dunkaanidi, Gaaza gakanaw, biitta bolla dolidaba ubbaa dhaysoosona. Dorse, mehenne hare laaggidi efiya gisho, Isra7eele asaas aybaka ashshokona.
JDG 6:5 Banta mehiyanne banta dunkaaniya ekidi, booley yada daridi yoosona. Entanne enta gimaleta taybanaw danda7etenna; enti yishe biitta dhaysoosona.
JDG 6:6 Isra7eele asay Midiyaameta gaason daro metootidosona; maade demmanaw Godaako waassidosona.
JDG 6:7 Midiyaameta gaason Isra7eele asay Godaako waassida wode,
JDG 6:8 Goday entaw issi nabe Kiittin, nabey entako, “Goday Isra7eele Xoossay haysada yaagees; Gibxefe, aylletetha biittafe ta hintena kessas.
JDG 6:9 Taani hintena Gibxe asaa kushepenne un7ethiya asa ubbaa kushepe ashshas. Hinte sinthafe un7ethiya asaa gooddada enta biitta hintew immas.
JDG 6:10 Taani hintena, ‘Taani Godaa hinte Xoossaa; hinte enta biitta laattida Amooreta xoossata goyinnofite’ yaagas. Shin hinte ta qaala si7onna ixideta” yaagis.
JDG 6:11 Hessafe guye, Godaa kiitanchoy Ofira geetetiya bessan de7iya Abezeera addiya Iyo7aasa wolaa garsan uttis. He wode Iyo7aasa na7ay Gediyooni Midiyaame asaape qosetedi woyne gum7iya bessan giste bukees.
JDG 6:12 Yan Godaa kiitanchoy iyaw qoncidi, “La neno, mino olanchaw, Goday neera de7ees” yaagis.
JDG 6:13 Gediyooni, “Ta godaw, Goday nuura de7iyaba gidiko ha meto ubbay nuna ayis gakidee? Nu aawati, ‘Goday nuna Gibxe biittafe kessis’ yaagidi nuus odida malaalsiya iya oosoti ubbay awun de7ii? Shin ha77i Goday nuna kumethi aggis; Midiyaame asaas aathidi immis” yaagis.
JDG 6:14 Hessafe guye, Goday iyako simmidi, “New de7iya ha wolqan bada Isra7eele asaa Midiyaame kushepe ashsha. Nena kiittey tana” yaagis.
JDG 6:15 Gediyooni zaaridi, “Abeeti Godaw, taani Isra7eele asaa waatada asho? Ta yaray Minaase kocha ubbaafe aadhida laafa; taani ta aawa soo asa ubbaafe guutha” yaagis.
JDG 6:16 Goday, “Taani neera gidana; issi asi shociya mela neeni Midiyaame asaa shocada xoonana” yaagis.
JDG 6:17 Gediyooni, “Neeni tanan ufaytiyaba gidiko, tuma taara odetey neeni Godaa gidiko, nena erisiya malla tana bessa.
JDG 6:18 Taani guye simma bada ta yarshuwa ehana gakanaw hayyana haysafe boopa” yaagis. Goday, “Neeni simmana gakanaw taani haysan naagana” yaagis.
JDG 6:19 Gediyooni soo gelidi, urge deeshi shukidi kathis; tammu kilo giraame gidiya dhiille ekidi uythi uukis. Ashuwa gaytan wothidi, cambaa shaaten tigidi, wolaa garsan uttida Godaa kiitanchuwas shiishis.
JDG 6:20 Xoossaa kiitanchoy, “Ashuwanne uythaa ha shuchaa bolla wotha; cambaa iya bolla tiga” yaagis. Gediyooni kiitetidaysada oothis.
JDG 6:21 Godaa kiitanchoy ba kushen oykida xam7aa xeeran ashuwanne uythaa bochin tami shuchaa giddofe keyidi, ashuwanne uythaa mis. Hessafe guye, Godaa kiitanchoy iya sinthafe geemmis.
JDG 6:22 Gediyooni be7iday Godaa kiitanchuwa gideysa akeekida wode, “Godaa Xoossaw, tana ayye! taani Godaa kiitanchuwa ta ayfen be7as” yaagis.
JDG 6:23 Shin Goday, “Saroy new gido; Yayyofa! Ne hayqaka” yaagis.
JDG 6:24 Gediyooni Godaas yarsho bessi yan giigisidi, “Goday Saro Xoossi” yaagidi xeegis. He yarsho bessay Abi7ezeera kochaaba gidida Ofiran hachi gakanaw eqidi de7ees.
JDG 6:25 He qamma Goday Gediyoonako, “Ne aawa kormatape laapun laythi gidida lo77o korma eka. Ne aaway Ba7aale eeqas yarshiya bessaa laalla; iya matan de7iya Asheera eeqa misiliya mentheretha yegga.
JDG 6:26 Ha zumaa huuphen Godaas ne Xoossaas, shuchan yarsho bessi loythada giigisa. Hessafe guye, neeni mentherethida Asheera eeqa misiliya qeretha eethada, he kormaa xuussa yarsho oothada yarsha” yaagis.
JDG 6:27 Gediyooni ba oosanchotape tammata ekidi, Goday iyaw odidaysada oothis. Shin I ba aawa soo asaasinne kataman de7iya asaas yayyida gisho gallas oothanaysa aggidi qamma oothis.
JDG 6:28 Wonta guura katamaa asay dendiya wode Ba7aale eeqa yarsho bessay laaletin, iya matan de7iya Asheera misiley meqidi wodhidaysa be7idosona. Qassi he bessan yarsho bessi giigidaysanne iya bolla korma yarshidaysa be7idosona.
JDG 6:29 Enti issoy issuwa, “La haysa oothiday oonee?” yaagidi oychidosona. Enti hessa pilgidi be7ida wode hessa oothiday Iyo7aasa na7aa Gediyoona gideysa eridosona.
JDG 6:30 Hessafe guye, katamaa asay Iyo7aasako, “Ba7aale yarsho bessa laallida gishonne iya matan de7iya Asheera misiliya mentherethidi yeggida gisho ne na7aa haa kessa; nu iya wodhana” yaagidosona.
JDG 6:31 Shin Iyo7aasi ba bolla dendida asaako, “Hinte Ba7aales mootetetii? Woyko hinte iya ashshanaw koyeetii? Hinte giddofe iyaw mootetiya asi de7iko, sa7i wontanaw I hayqo. Ba7aaley xoosse gidiko ba yarsho bessa laallidaysara I baw mooteto” yaagis.
JDG 6:32 He gallas Iyo7aasi, “Laaletiday iya yarsho bessa gidiya gisho iyara Ba7aaley mooteto” yaagidi Gediyoona Yeruba7aala gidi sunthis.
JDG 6:33 Hessafe guye, Midiyaame, Amaaleqanne doloha bagga biitta asay issife shiiqidi, Yordaanose shaafa pinnidi Izra7eela zangaaran dunkaanidosona.
JDG 6:34 Godaa Ayyaanay Gediyoona bolla wodhin Abi7ezera kochi gidida asa ubbay bana kaallana mela enta xeeganaw moyze punnis.
JDG 6:35 Minaase kocha ubbaas kiita yeddidi, bana kaallana mela enta xeegisis. Qassi Aseera, Zabloonanne Niftaaleme kochatas kiita yeddin, enti iyara olas baanaw keyidosona.
JDG 6:36 Gediyooni Xoossaako, “Ne taw qaala gelidaysada Isra7eele asaa ashshanaw tana dooridaba gidiko,
JDG 6:37 Heko, taani giste bukiya wudumman paadetida dorse ikise wothana. Hara biitta ubbay mela gididi he ikisiya bolla xalaala aki wodhiko ne odidaysada Isra7eele asaa ta kushen ashshanaysa ta erana” yaagis.
JDG 6:38 I gidaysada hanis. Wontetha gallas wonta guura dendidi, dorsa ikisiya gum7ida wode issi xaaro gidiya haathi iyape keyis.
JDG 6:39 Qassi Gediyooni, “Hayyana hanqetofa; taani nena gujadaka hara oysho oychana. Dorsa ikisiya bolla hara malla bessaana mela oychayis. Ha77i dorsa ikisey mela gidin yuushuwan de7iya biittay akatidi laakanada ootha” yaagis.
JDG 6:40 He qamma Xoossay he malla oothis. Wontetha gallas dorsa ikisey mela gidin biitta ubbay akatidi laakis.
JDG 7:1 Wontetha gallas Yeruba7aala geetetiya Gediyooninne iyara de7iya asa ubbay wonta guura dendidi bidi, Harooda pultuwa matan dunkaanidosona. Midiyaame asay entafe pudeha baggara More zumaa matan de7iya zangaaran dunkaanidosona.
JDG 7:2 Goday Gediyoonako, “Neera de7iya asay daro gidiya gishonne Isra7eele asay, ‘Nuuni nu wolqan xoonida’ gidi ta bolla ceeqetonna mela taani Midiyaameta hinte kushen aathada immike.
JDG 7:3 Hessa gisho, asaako, ‘Yayyiya asi de7iko Galada zumaape simmidi guye ba soo soo boo’ yaagada awaaja” yaagis. Yaatin, laatamanne nam7u mukulu asay guye simmin tammu mukulu asi attis.
JDG 7:4 Gidoshin, Goday Gediyoonako, “Ha77ika asay daro. Ne enta ekada duge shaafa wodha; taani enta yan paacana. Taani, ‘Haysi neera boo’ geysi neera boo; taani, ‘Haysi neera boopo’ geysi boopo” yaagis.
JDG 7:5 Gediyooni asaa shaafu ekidi bis. Goday iyako, “Ha asaa giddofe gulbatidi haathe uyeysatanne kanada haathe inxarsan uyeyisata shaaka” yaagis.
JDG 7:6 Banta kushen haathe uyeyisata tayboy heedzu xeeta; shin attidaysati ubbay haathe gulbatidi uyidosona.
JDG 7:7 Goday Gediyoonako, “Banta kushen haathe kophetidi uyida heedzu xeetu asatan taani hintena ashshana; Midiyaameta hintew aathada immana. Shin attida asa ubbay ba soo soo simmo” yaagis.
JDG 7:8 Hessa gisho, Gediyooni asata shinqiyanne enta moyziya ekida heedzu xeetu asata baara ashshidi, hanko asa ubbaa enta soo soo yeddis. Ha ubbay haniya wode Midiyaame olanchoti entafe garsa baggara de7iya zangaaran dunkaanidi uttidosona.
JDG 7:9 He qamma Goday Gediyoonako, “Taani new aathada immida gisho dendada enti dunkaanida bessan de7ishin ola.
JDG 7:10 Neeni enta olanaw yayyiko ne oosanchuwa Puura ekada enti dunkaanida bessaa duge wodha.
JDG 7:11 Enti giyaba si7a. Hessafe guye, neeni enta olanaw minotethi demmana” yaagis. Gediyooninne iya aylley Puuri, Midiyaameti dunkaanida bessaa matan naagiya olanchotako bidosona.
JDG 7:12 He wode booleda darida Midiyaameti, Amaaleqatinne doloha bagga asa ubbay zangaaran dunkaanidi uttidosona. Enta gimaleti abba gaxan de7iya shafe mela taybanaw danda7etenna.
JDG 7:13 Gediyooni yaa gakiya wode issi addey ba amuhuwa ba laggiyas odishin si7is. Hessika, “Issi banga uythi okoleti gakidi Midiyaameta dunkaaniya dom7is; dunkaaney shireti wodhidi micetis” yaagis.
JDG 7:14 Iya laggey zaaridi, “Hessi Isra7eele addiya, Iyo7aasa na7aa Gediyoona mashshafe attishin, haraba gidenna. Xoossay Midiyaamenne Midiyaametara de7iya olanchota ubbaa Gediyoonas aathidi immis” yaagis.
JDG 7:15 Gediyooni he amuhuwanne iya birshethaa si7ida wode gulbatidi Xoossaa goyinnis. Isra7eele asay dunkaanida bessaa guye simmidi, “Dendite; Goday Midiyaame olanchota hinte kushen aathidi immis” yaagis.
JDG 7:16 Heedzu xeetu asata heedzu cugan shaakidi entaw huuphen huuphen issi issi moyzenne giddon eexiya xompey de7iya issi issi xaaro immis.
JDG 7:17 Gediyooni entako, “Tana xeellite; taani enti dunkaanida bessaa gakiya wode ootheysada hinteka oothite.
JDG 7:18 Tanne taara de7eysati ubbay moyze punniy wode hinteka enti dunkaanida bessaa yuushuwan eqidi moyze punnishe, ‘Godaasanne Gediyoonasa’ yaagidi waassite” yaagis.
JDG 7:19 Giddi bilahe gidiya wode naageysati laametidaape guye Gediyooninne iyara de7iya xeetu asati bidi, Midiyaameti dunkaanida bessaa gakidi banta moyziya punnidosona; oykida xaaruwa menthidosona.
JDG 7:20 Hara baggara de7iya nam7u cugay hessada oothidosona. Banta haddirsa kushen eexiya xompe, banta ushacha kushen moyze oykidi, “Godaanne Gediyoona mashshaa” yaagidi waassidosona.
JDG 7:21 Asa ubbay Midiyaameti dunkaanida bessaa yuushon ba bessan bessan eqidashin, Midiyaame olanchoti ubbay waassishe baqatidosona.
JDG 7:22 Heedzu xeetu asay banta moyziya punnida wode morke olanchoti banta mashshaa issoy issuwa bolla denthana mela Goday oothis. Attida olanchoti Xararako simmidi Beet-Shixa gakanaw, yaape aadhidi, Xabaata matan de7iya Abeel-Mahoola gakanaw baqatidosona.
JDG 7:23 Hessafe guye, Niftaaleme, Aseeranne Minaase kochati xeegetidi, shiiqidi Midiyaameta yedethidosona.
JDG 7:24 Derey dariya Efreema biittan de7iya asaako Gediyooni kiittidi, “Midiyaameta olanaw duge wodhidi Beet-Baara gakanaw de7iya Yordaanosen geliya shaafata entafe kasetidi oykite” yaagis. Efreema asa ubbay xeegetidi, shiiqidi Beet-Baara gakanaw Yordaanosen geliya shaafata oykidosona.
JDG 7:25 Enti Oreebanne Zeba geetetiya nam7u Midiyaame halaqata di77idosona. Oreeba, “Oreeba Zaalla” geetetiya bessan, qassi Zeba, “Zeba Woyne Gum77iya Bessi” geetetiya bessan wodhidosona. Hessafe guye, attida Midiyaameta yedethidi, Oreebanne Zeba qoodhiya qanxidi enta huuphiya, Yordaanose shaafape hefinthan de7iya Gediyoonako ehidosona.
JDG 8:1 Efreema asay Gediyoonako, “Midiyaameta olanaw bashe nuna ayis xeegabikii? Nu bolla hessa melaba ayis oothadii?” yaagidi yilotidosona.
JDG 8:2 Shin Gediyooni, “Hinte oothidaysi ta oothidaysafe aadhenee? Ta kochay Abi7ezeri shiishida kathaafe hinte Efreema kochati qorida budhey aadhenee?
JDG 8:3 Midiyaame halaqata, Oreebanne Zeba Xoossay hinte kushen aathidi immis. Hinte oothidaysa mela taani ay oothanaw danda7iyana?” yaagis. I yaagin enti zarbidosona.
JDG 8:4 Gediyooninne iyara de7iya heedzu xeetu asay Yordaanose shaafa pinnidosona. Enti ay daaburikoka banta morketa yedetho aggibokona.
JDG 8:5 Enti Sukota gakida wode Gediyooni he katamaa asaako, “Ta asay daaburida gisho, hayyana guutha kathi immerketi. Taani Midiyaame kawota Zebanne Salmoona yedethashe de7ayis” yaagis.
JDG 8:6 Sukota katamaa halaqati, “Zebanne Salmoona neeni di77abakashin ne olanchotas ayis kathi immanee?” yaagidosona.
JDG 8:7 Gediyooni, “Lo77o aykoy baawa; Goday Zebanne Salmoona ta kushen aathidi immiya wode taani bazzo agunthaninne xunduqen hintena wadhana” yaagis.
JDG 8:8 Yaape dendidi Panu7eela bidi, yan de7iya asaaka he oysha oychin, Panu7eela asay Sukota asay zaaridaysada zaaridosona.
JDG 8:9 I Panu7eela asaako, “Taani xoonada saro simmiya wode hinte katamaa naagiya ha adussa gimbiya laallana” yaagis.
JDG 8:10 He wode Zebinne Salmooni doloha baggafe yida olanchotape attida 15,000 olanchotara Qarqoran de7oosona. Entafe 120,000 olanchoti olan hayqidosona.
JDG 8:11 Gediyooni Noobapenne Yogibape doloha baggan de7iya bazzo ogiyara bidi, yan de7iya olanchoti qoponna de7ishin ola denthis.
JDG 8:12 Nam7u Midiyaame kawoti Zebinne Salmooni baqatidosona; shin Gediyooni enta yedethi gakidi di77is. Enta olanchoti ubbay wolqaama dagaman kundidosona.
JDG 8:13 Iyo7aasa na7ay Gediyooni Hereesa baggara olape simmis.
JDG 8:14 Sukotape issi na7atetha na7aa oykidi oychis. He na7ay laapun tammanne laapun Sukota halaqatanne cimata sunthaa xaafidi iyaw immis.
JDG 8:15 Hessafe guye, Gediyooni Sukota yidi, “ ‘Zebanne Salmoona neeni di77abakashin, daaburida ne asaas ayis kathi immanee?’ gidi ta bolla qelqisideta; shin Zebanne Salmoona haysa be7ite” yaagis.
JDG 8:16 Gediyooni bazzo agunthinne xunduqe ekidi Sukota halaqata wadhis.
JDG 8:17 Qassi Panu7eelan katamaa adussa gimbe shakuwa laallidi kataman de7iya addeta wodhis.
JDG 8:18 Yaatidi Gediyooni Zebanne Salmoona, “Hinte Taaboren ay mela asi wodhidetii?” yaagidi oychis. Enti, “Ne mela asi; enti kawo na7a daanosona” yaagidi zaaridosona.
JDG 8:19 Gediyooni, “Enti ta ishata; enti ta aaye nayta. De7o Xoossi eriya mela enta hinte wodhonnaba gidiyako ta hintena wodhikeshin” yaagis.
JDG 8:20 Ba bayra na7aa Yeterako, “Dendada, haysata wodha” yaagis. Yeteri buroo yooga gidiya gisho yayyidi ba mashshaa shoddibeenna.
JDG 8:21 Zebinne Salmooni Gediyoonako, “Hiza ne nuna wodha; adde ooso oothanaw adde koshshees” yaagidosona. Yaatin, Gediyooni enta wodhis; enta gimaleta qoodhen de7iya alleeqo ubbaa ekis.
JDG 8:22 Isra7eele asay Gediyoonako, “Neeni nuna Midiyaametape ashshida gisho neeni, ne na7aynne ne na7aa na7ay nuna haarite” yaagis.
JDG 8:23 Shin Gediyooni, “Taani hintena haarike; ta na7ayka hintena haarenna; Goday hintena haarana” yaagis.
JDG 8:24 I entako, “Ta hintena issiba oychayis; hinte ubbay di77idi ehida haytha worqiyafe taw immite” yaagis. (Isma7eela asaas haythan worqa aasoy woga.)
JDG 8:25 Isra7eele asay zaaridi, “Ero, ufaytidi immana” yaagidosona. Afila hiixidi, asa ubbay di77idi ehida haytha worqiya yeggidosona.
JDG 8:26 Gediyooni ekida haytha worqey laatamu kilo giraame deexees. Hessika, hara alleeqota, qoodhen aathiya gozddata, Midiyaame kawoti ma7iya ocha teera daaniya ma7otanne enta gimaleta qoodhiyape eketida alleeqota gujonnashina.
JDG 8:27 Gediyooni worqa eeqa misiliya giigisidi, ba de7iya Ofira kataman wothis. Isra7eele asa ubbay Godaa aggidi he eeqa misiliya goyinnidosona; hessi Gediyoonasinne iya soo asaas xihe gidis.
JDG 8:28 Hessada hanidi, Midiyaame asay Isra7eele asaas haaretis; enti Isra7eele asaa bolla nam7antho dendibookona. Gediyooni hayqana gakanaw oytamu laythi biittay wopu gidi de7is.
JDG 8:29 Yeruba7aala geetetiya Gediyooni, Iyo7aasa na7ay ba soo simmidi de7is.
JDG 8:30 Gediyooni daro macho ekida gisho, iyaw laapun tammu adde nayti yeletidosona.
JDG 8:31 Seekeman de7iya laggethiya iyaw adde na7aa yelin, iya sunthaa Abimeleke yaagidi sunthis.
JDG 8:32 Iyo7aasa na7ay Gediyooni lo77o cimidi hayqis; ba aawa Iyo7aasa duufon moogetis. He duufoy Abezeera kochati de7iya Ofiran de7ees.
JDG 8:33 Gediyooni hayqidaape guye, Isra7eele asay Godaa aggidi Ba7aale xoossata goyinnidosona. Ba7aal-Biriita geetetiya eeqa bantaw xoosse oothidosona.
JDG 8:34 Isra7eele asay banta yuushuwan de7iya morketa ubbaafe enta ashshida Godaa banta Xoossaa hassaybookona.
JDG 8:35 Isra7eele asaas oothida lo77o oosuwa gisho Yeruba7aala geetetiya Gediyoona soo asaas lo77o kushe zaaribookona.
JDG 9:1 Gediyoona na7ay, Abimelekey Seekeman de7iya ba aaye dabbotako bidi, entanne ba aaye kochata haysada yaagis;
JDG 9:2 “Seekeman de7iya asaa, ‘Gediyoona laapun tammu nayti ubbay hintena haariko lo77oyee? Woyko issi asi haariko lo77o?’ yaagidi oychite. Taani hinte ashonne hinte meqethi gideysa dogopite” yaagis.
JDG 9:3 Iya aaye dabboti ha qaala ubbaa iya gisho Seekema asaas odin, Abimelekey entaw dabbo gidida gisho Seekema asay iya kaallanaw dosidosona.
JDG 9:4 Enti Ba7aal-Biriita eeqa keethaafe laapun tammu bira santime ekidi iyaw immidosona. Abimelekey he biran iita asatanne bonqeyisata shammidi bana kaallanaada oothis.
JDG 9:5 Ofran de7iya ba aawa soo bidi, laapun tammu ba ishata Gediyoona nayta, issi shucha bolla goyris. Shin Gediyoona na7ay, teshoy, Iyo7atami qosetidi hayqonna attis.
JDG 9:6 Hessafe guye, Seekema asaynne Beet-Milo asay issife shiiqidi, Seekeman eeqa tuussa matan de7iya goyinno wolaako bidi yan Abimeleke kawothidosona.
JDG 9:7 Iyo7atami hessa si7ida wode Garzaana deriya bolla keyidi ba qaala dhoqu oothidi, “Hinteno Seekema asaw, Xoossay hintena si7ana mela ta odeysa si7ite.
JDG 9:8 Issi gallas mithati ubbay shiiqidi, banta bolla kawo kawothanaw bidi shamaho, ‘Haaya, nu bolla kawota’ yaagidosona.
JDG 9:9 Shin shamahoy, ‘xoossatanne asata bonchisiya zayte immeysa aggada mithata bolla kawoto?’ yaagidi zaaris.
JDG 9:10 “Yaatin, mithati balase mithaa, ‘Haaya, nu bolla kawota’ yaagidosona.
JDG 9:11 Shin balasey, ‘Mal7onne lo77o gidida ayfe immeysa aggada mithata bolla kawotanaw boo?’ yaagidi zaaris.
JDG 9:12 “Yaatin, mithati woyneko, ‘Haaya, nu bolla kawota’ yaagidosona.
JDG 9:13 Shin woyney, ‘Xoossatanne asata ufaysiya ushsha immeysa aggada mithata bolla kawotanaw boo?’ yaagidi zaaris.
JDG 9:14 “Yaatin, wursethan mithati ubbay xunduqeko, ‘Haaya, nu bolla kawota’ yaagidosona.
JDG 9:15 Xunduqey, ‘Hinte tuma tana hinte bolla kawothanaw koyiko, haa yidi ta kuyan shempite. Hessa hinte ixiko, xunduqe tashiyape tami keyidi Libaanose zigaa mo’ yaagis.
JDG 9:16 “Hinte Abimeleke kawothiday tumatethaninne suuretethanee? Gediyooni hintew oothidaba akeekidi iya soo asaas lo77o kushe zaaridetii?
JDG 9:17 Ta aaway hintew oletidaysa akeekite; Midiyaame asaape hintena ashshana yaagidi, bana hayqos aathidi immis.
JDG 9:18 Shin hinte hachi ta aawa soo asaa bolla dendidi, iya laapun tammu nayta issi shucha bolla goyrideta. Gediyoona ayllefe yeletida Abimelekey hintew dabbo gidida gisho Seekeman kawothideta.
JDG 9:19 Ha77i simmidi Gediyoonasinne iya soo asaas hinte oothida oosoy tumatethaninne suuretethan gidiko Abimelekera ufaytite; ika hintera ufayto.
JDG 9:20 Shin hessi hanonna ixiko Abimelekepe tami keyidi Seekemanne Beet-Milo asaa mo. Qassi Seekema asaapenne Beet-Milo asaape tami keyidi Abimeleke mo” yaagis.
JDG 9:21 Iyo7atami ba ishaa Abimelekes yayyida gisho baqatidi Beera bidi yan de7is.
JDG 9:22 Abimelekey Isra7eele biittan heedzu laythi kawotis.
JDG 9:23 Hessafe guye, Xoossay Abimeleke giddoninne Seekema asaa giddon iita ayyaana kiittin Seekema asay Abimeleke bolla makallidosona.
JDG 9:24 Xoossay hessa oothiday, Abimelekey ba ishata wodhida gishonne enta wodhana mela Seekema asay iya minthethida gishosa.
JDG 9:25 Seekema asay guutha asi dooridi deriya huuphiyan uttidi Abimeleke bolla morketethan dendana mela oothidosona. Enti ogera aadhiya asa ubbaa bonqidosona; Abimelekey hessa si7is.
JDG 9:26 He wode Ebeeda na7ay Gaali ba ishatara Seekema yin, Seekema asay iyan ammanetidosona.
JDG 9:27 Ubbay banta gade bidi woyne maxidosona; woyniya aggidi gita gibira giigisidosona. Banta eeqa keethaa gelidi yan mishenne uyishe Abimeleke cayidosona.
JDG 9:28 Ebeeda na7ay Gaali, “Nuuni Seekema asay iyaw haaretanaw Abimelekey oonee? I Yeruba7aala na7aa gidennee? Zabuli ha katamaa haarana mela Abimelekey shuumidaysa gidennee? Hessafe Seekema sheeshi gidida Hamoore asaas haaretana.
JDG 9:29 Ha asaa kaalethey tana gidiyako Abimeleke digganashin. Abimeleke xeegada, ‘Ne olanchota darsa ekada oletanaw haaya’ yaaganashin” yaagis.
JDG 9:30 Ebeeda na7ay Gaali gidaysa katamaa haariya Zabuli si7ida wode daro yilotis.
JDG 9:31 Qosan Abimelekeko ase kiittidi, “Ebeeda na7ay Gaalinne iya ishati Seekema yidi yan de7iya asaa ne bolla denthethoosona.
JDG 9:32 Hessa gisho, neeninne neera de7iya asay qamma dendidi issi bessan zugidi naagite.
JDG 9:33 Wontetha gallas awi doliya wode enti qoponna katamaa olite. Gaalinne iyara de7iya asay hintena olanaw keyiya wode hinte koyida mela enta bolla oothite” yaagis.
JDG 9:34 Abimelekeynne iyara de7iya asa ubbay qamma dendidi Seekemape karera oyddu cugan shaaketidi zugidosona.
JDG 9:35 Abimelekeynne iyara de7iya asay Ebeeda na7ay Gaali keyidi katamaa pengiyan eqidaysa be7idi qosetida bessaafe keyidosona.
JDG 9:36 Gaali asaa be7ida wode Zabulako, “Heko, asay deriya huuphiyape wodhees” yaagis. Zabuli, “Haysi deriya eeshope attishin, ase gidenna” yaagidi zaaris.
JDG 9:37 Gaali zaaridi, “Heko, asay deriyas gidduwa oykidi wodhees; hara cugi qassi marota wolay de7iya ogiyara yees” yaagis.
JDG 9:38 Zabuli Gaalako, “ ‘Nuuni iyaw haaretanaw Abimelekey oonee?’ yaagida ne doonay ha77i aw bidee? Haysati neeni kadhida asaa gidokonaayee? Ha77i keyada entara oleta” yaagis.
JDG 9:39 Gaali Seekema asaa kaalethi keyidi Abimelekera oletis.
JDG 9:40 Abimelekey yedethin Gaali baqatis; katamaa pengiya gakanaw daroti deshetidi kundidosona.
JDG 9:41 Abimelekey Aruman de7in, Zabuli Gaalanne iya ishata Seekemape yedethidi kessis.
JDG 9:42 Wontetha gallas Seekema asay goshshas bidaysa Abimelekey si7is.
JDG 9:43 I ba asaa ekidi heedzu cugan shaakidi, issi bessan zugidi naaganaada oothis. Asay katamaape keyeysa be7ida wode enta wodhanaw qosetida bessaafe keyis.
JDG 9:44 Abimelekeynne iyara de7iya cugay sinthe woxi bidi, katamaa pengiyan eqidosona. Attida nam7u cugay goshshan de7iya asaa olidi wodhidosona.
JDG 9:45 Gallas kumethi Abimelekey asaara oletidi oykidaape guye kataman de7iya asa ubbaa wodhis; katamaa dhaysis; biitta bolla maxine laallis.
JDG 9:46 Seekema Adussa Gimbiya giddon de7iya asa ubbay hessa si7ida wode Ba7aal-Barta eeqa keethan de7iya gongoluwan qosetidosona.
JDG 9:47 Abimelekey enti yan shiiqidaysa,
JDG 9:48 si7idi inne iyara de7iya asa ubbay Salmoona deriya keyidosona. Abimelekey kalta ekidi mitha tashe qanxidi, ba hashiyan tookis. Baara de7iya asaako, “Taani oothishin be7idaysada hinte ellesidi oothite” yaagis.
JDG 9:49 Asa ubbay mitha tashe qanxi ekidi, Abimeleke kaallis. He tasheta sa7a keethaa bolla dooridi asay iya giddon de7ishin tama oythidosona. Iyan de7iya asa ubbay hayqidosona. Hayqida addeynne maccasa tayboy issi mukulu gidana.
JDG 9:50 Abimelekey Temeesa bidi katamaa teqidi oykis.
JDG 9:51 He katamaa giddon issi mino adussa gimbey de7ees. Katamaa asay macci, addey, kaaletheysatinne hara asa ubbay attonna woxidi adussa gimbiya giddo gelidosona. Pengiya gordidi gimbiya huuphe keyidosona.
JDG 9:52 Abimelekey olishe adussa gimbiya gakidi taman xuugganaw pengiyako shiiqis.
JDG 9:53 Shin issi maccasiya Abimeleke huuphen woxa mayde holada iya guuggiya phalqa yeggasu.
JDG 9:54 Iya ola miishiya tookiya na7atetha ellesi xeegidi, “Abimeleke maccasi wodhis goonnaada ne mashshaa shoddada tana wodha” yaagis. Yaagin na7atethay caddin I hayqis.
JDG 9:55 Isra7eele asa ubbay Abimelekey hayqidaysa be7idi ba soo soo bis.
JDG 9:56 Abimelekey laapun tammu ba ishata wodhidi, ba aawa bolla I oothida gomiya Xoossay iya bolla zaaris.
JDG 9:57 Xoossay Seekema asaa iitatetha ubbaa enta bolla zaaris. Hessada hanidi Gediyoona na7ay Iyo7atami baaddida baadethay enta gakis.
JDG 10:1 Abimelekey hayqidaape guye, Yisakoora koche gidida Dooda na7aa, Puuha na7ay Toli, Isra7eele asaa ashshanaw dendis. I derey dariya Efreema biittan Samiran de7is.
JDG 10:2 Toli Isra7eele asaa laatamanne heedzu laythi aysis. Toli hayqidi, Samiran moogetis.
JDG 10:3 Tolape kaallidi, Galada addey Ya7iri dendis. I Isra7eele asaa laatamanne nam7u laythi aysis.
JDG 10:4 Iyaw hastamu baqulo toggiya hastamu adde nayti de7oosona. Entaw Galada biittan hastamu katamati de7oosona. He katamati hachi gakanaw Ya7ira katamata geetetidi xeegetoosona.
JDG 10:5 Ya7iri hayqidi Qamoonan moogetis.
JDG 10:6 Qassika Isra7eele asay Godaa sinthan iitabaa oothidosona. Enti Ba7aalenne Astaroota eeqata, Soore xoossata, Sidoona xoossata, Moo7abe xoossata, Amoone xoossatanne Filisxeeme xoossata goyinnidosona. Enti Godaa aggaagidosona; iya goyinnibookona.
JDG 10:7 Goday Isra7eele asa bolla hanqetidi, enta Filisxeeme asaasinne Amoone asaas aathidi immis.
JDG 10:8 He laythi Filisxeemetinne Amooneti Isra7eele asaa un7ethidosona. Yordaanose shaafape doloha baggan, Amooreti kase de7ida Galada biittan de7iya Isra7eele asaa enti tammanne hospun laythi haaridosona.
JDG 10:9 Qassika Amoone asay Yihuda, Biniyaamenne Efreema kochata olanaw Yordaanose shaafa pinnidosona; Isra7eele asay daro un7etidosona.
JDG 10:10 Hessafe guye, Isra7eele asay, “Nuuni nena nu Xoossaa aggidi, Ba7aale goyinnidi, nagara oothida” yaagidi Godaako waassidosona.
JDG 10:11 Goday entako, “Gibxeti, Amooreti, Amooneti, Filisxeemeti,
JDG 10:12 Sidoonati, Amaaleqatinne Mo7aaneti hintena un7ethin, hinte taako waassin, taani hintena enta kushepe ashshabikina?
JDG 10:13 Shin hinte tana aggidi hara xoossata goyinnideta; hizape taani hintena ashshike.
JDG 10:14 Bidi hinte doorida xoossaako waassite. Hintena metoy gakiya wode ane enti asho” yaagidi zaaris.
JDG 10:15 Shin Isra7eele asay zaaridi Godaako, “Nuuni nagara oothida. Ne koydaba nu bolla ootha; shin hayyana hachi nuna ashsha” yaagidosona.
JDG 10:16 Allaga xoossata banta giddofe diggidi, Godaa goyinnidosona. Goday Isra7eele asaa un7etetha be7idi mishetis.
JDG 10:17 Hessafe guye, Amoone olanchoti olas giigidi, Galadan shiiqidosona. Isra7eele asay issife shiiqidi Galadan Mixiphan dunkaanidosona.
JDG 10:18 Galada biitta halaqati banta giddon, “Amoone olanchotara koyrottidi ola gahetanay oonee? He addey Galada biittan de7iya asa ubbaas halaqa gidana” yaagidosona.
JDG 11:1 Galada biittan de7iya Yoftaahey mino olancho. Iya aawa sunthay Galada; shin iya aayiya layma maccas.
JDG 11:2 Galada machiya iyaw adde nayta yelasu. Enti diccidi gakida wode banta ishaa Yoftaahe, “Neeni hara maccasape yeletida na7a gidiya gisho nu aawa aquwape aykoka laattaka” yaagidi soope yedethidosona.
JDG 11:3 Yaatin, Yoftaahey ba ishatape baqatidi, Tooba biittan de7is. Yan I de7ishin guutha worandzoti iyako shiiqidi iya kaallidosona.
JDG 11:4 Guutha wodepe guye Amooneti Isra7eeletara oletidosona.
JDG 11:5 Amooneti Isra7eeletara oletida wode Galada biitta cimati Toobape Yoftaahe zaaridi ehanaw bidosona.
JDG 11:6 Enti iyako, “Amooneta nuuni olana mela yada nuus halaqa gida” yaagidosona.
JDG 11:7 Shin Yoftaahey, “Tana ixidi, ta aawa keethaafe yedethibeeketii? Ha77i hintena metoy gakin taako ayis yidetii?” yaagis.
JDG 11:8 Galada cimati, “Gidoshin ha77i nuuni neeko simmida; neeni ola kaalethada Amooneta nuus olana melanne Galada biittas halaqa gidana mela koyoos” yaagidosona.
JDG 11:9 Yoftaahey, “Amoonetara oletana mela hinte tana guye zaarin, Goday enta ta kushen aathidi immiko, hinte tuma tana halaqa oothanee?” yaagis.
JDG 11:10 Galada cimati, “Goday nu giddon marka; neeni giyaba nu oothana” yaagidosona.
JDG 11:11 Yoftaahey Galada cimatara bis; enti iya banta halaqanne kaaletheysa oothidosona. Yoftaahey Mixiphan Godaa sinthan zaaridi qaala gelis.
JDG 11:12 Yoftaahey Amoone kawako ase kiittidi, “Neeni nu biitta olana mela nuuni new ay oothido?” yaagidi oychis.
JDG 11:13 Amoone kawoy Yoftaahey kiitida asaako, “Isra7eele asay Gibxefe keyida wode Arnoona shaafapenne Yaaboqa shaafape giddon, Yordaanose shaafa gakanaw de7iya ta biitta ekidosona. Ha77i ta biitta taw saron zaarite” yaagidi zaaris.
JDG 11:14 Yoftaahey nam7antho Amoone kawako ase kiittis.
JDG 11:15 Kiitetida asay, “Isra7eele asay Moo7abe biitta woyko Amoone biitta ekibeenna.
JDG 11:16 Isra7eele asay Gibxefe keyida wode bazzo kanthi bidi, Zo7o Abbaa gakis; yaape Qaadesa bis.
JDG 11:17 Isra7eele asay Edoome kawako, ‘Ne biittara nuna aatharkii?’ yaagidi ase kiittis; shin Edoome kawoy aathona ixis. Hessadaka, Moo7abe kawako kiittin, ika aathona ixis; yaatin, Isra7eele asay Qaadesan gam7is.
JDG 11:18 “Wursethan enti bazzuwa kanthidi, Edoomenne Moo7abe biitta gaxaa oykidi, Moo7abe biittafe doloha baggara yidi Arnoona shaafape hefintha baggan dunkaanidosona. Shin Arnoona shaafay Moo7abe zawa gidida gisho Moo7abe bagga pinnibookona.
JDG 11:19 “Hessafe guye, Isra7eele asay Haseboona kataman de7iya Amooreta kawa Sihoonako ase kiittidi, ‘Hayyana, ne biittara nuna aatharki’ yaagidi oychis.
JDG 11:20 Shin Sihooney Isra7eele asaa ammanetona gisho aathanaw koybeenna. I ba olanchota ekidi Yahaaxan dunkaanidi Isra7eele asaa olis.
JDG 11:21 Goday Isra7eele Xoossay Sihoonanne iya olanchota Isra7eele asaa kushen aathidi immin, enta xoonidosona. Yan de7iya Amooreta biitta ubbaa laattidosona.
JDG 11:22 Arnoona shaafape bidi Yaaboqa shaafa gakanaw, bazzuwafe bidi Yordaanose shaafa gakanaw de7iya Amooreta biitta ubbaa ekidosona.
JDG 11:23 “Hessada oothidi Goday, Isra7eele Xoossay ba asaa Isra7eele sinthafe Amooreta yedethidi dhaysis. Yaatin, neeni zaarada new ekanaw waata qopay?
JDG 11:24 Neeni ne xoossay kamooshi new immeysa ekikii? Shin nuuni, Goday nu Xoossay nuus immidaba ubbaa laattidi daana.
JDG 11:25 Gidoshin neeni Sifoora na7aa, Moo7abe kawa Balaaqape minnay? I Isra7eele asaara ooyetide woyko oletidee?
JDG 11:26 Isra7eele asay Haseboona, Aro7eeranne enta yuushuwan de7iya gutata ubbaa, qassi Arnoona shaafa matan de7iya katamata ubbaa laattidi heedzu xeetu laythi de7is. Yaatin, he wode ayis wotha ekabikii?
JDG 11:27 Taani hintena aykoka qohabike; shin tana olanaw dendada naaqey nena. Pirdiya Goday hachi Isra7eelepenne Amoonepe giddon pirdo” yaagis.
JDG 11:28 Shin Yoftaahey kiitida kiitaa Amooneta kawoy si7onna ixis.
JDG 11:29 He wode Godaa Ayyaanay Yoftaahe bolla wodhin, Galadanne Minaase biitta kanthi bidi, Galada biittan de7iya Mixipha simmis. Yaape olanchota kaalethidi Amoone biitta bis.
JDG 11:30 Yoftaahey Godaas qangetidi, “Neeni Amooneta ta kushen aathada immiko,
JDG 11:31 taani olaa xoonada soo simmiya wode tana mokanaw ta soope keyiya aybika neesa; taani iya xuuggiya yarsho oothada new shiishana” yaagis.
JDG 11:32 Hessafe guye, Yoftaahey Amooneta olanaw zawa bin, Goday enta iya kushen aathidi immis.
JDG 11:33 Aro7eerape bidi Minitanne Abeel-Kiramima gakanaw de7iya laatamu katamata olidi dhaysis; daro asaa wodhis. Hessafe guye, Amooneti Isra7eeletas haaretidosona.
JDG 11:34 Yoftaahey ba soo Mixipha simmiya wode iya na7iya karaabo oykada yexashenne durashe iya mokanaw keyasu. Iyaw iipe attishin, hara na7i baawa.
JDG 11:35 I iyo be7ida wode azzanidi ba ma7uwa daakidi, “Hay ta naate! Tana kawushadasa; tana meton yeggadasa. Taani Godaas qangas; gathonna agganaw danda7ike” yaagis.
JDG 11:36 Na7iya, “Ta aawaw, neeni Godaas qangidaba gidiko, Goday ne morketa, Amooneta bolla neeni halo keyida gisho ne qangidaba ta bolla pola” yaagasu.
JDG 11:37 Shin iya ba aawako, “Taw issiba ootharki. Taani azina gelonna attiya gisho, ta laggetara bada zumaa bolla ta geela7otethaas yeekana mela nam7u ageenas tana yeddarki” yaagada oychasu.
JDG 11:38 I, “Ba” yaagidi, nam7u ageenas iyo yeddis. Iya ba laggetara zumaa bolla keyada ba geela7otethaas entara yeekasu.
JDG 11:39 Nam7u ageenape guye, ba aawako simmada yasu. I aaway Godaas qangida ba qangetha gathis; iya geela7oshin hayqasu. He wodepe doomidi,
JDG 11:40 Isra7eele macca nayti laythan laythan oyddu gallas banta soope haaki bidi, Galada addiya Yoftaahe na7ees yeekeysinne kayoteysi meeze gidis.
JDG 12:1 Efreema asay ola baanaw xeegetidi, Yordaanose shaafa pinnidi, Xafoona gakida wode Yoftaaheko, “Amooneta olanaw zawa pinnada bashe nuuni neera baana mela ayis xeegabikii? Nuuni ne bolla gordidi ne keethan tama yeddana” yaagidosona.
JDG 12:2 Yoftaahey entako, “Taaninne ta asay Amoonetara daro baaxen gelida wode hintena xeegas; shin hinte tana entafe ashshibeketa.
JDG 12:3 Hinte tana ashshonaysa be7ida wode zawa pinnada ta shempuwas qadhetonna Amooneta olanaw bas; Goday enta ta kushen aathidi immis. Yaatin, hinte hachi ayis tana olanaw yidetii?” yaagis.
JDG 12:4 Yoftaahey Galada asa ubbaa shiishidi, Efreema asaara oletin Galada asay xoonidosona. Efreema asay kase enta, “Hinte Galada asay kase Efreemanne Minaase kochata kaddidi yidaysata gideketii?” yaagosona.
JDG 12:5 Efreema asay kessi ekonnaada Yordaanose shaafa pinuwa ubbaa Galadati oykidosona. Kessi ekanaw koyiya Efreema asi pinnanaw oychiya wode Galadati, “Neeni Efreema asee?” yaagidi oychoosona. I, “Gidike” giiko,
JDG 12:6 enti, “Ane, ‘Shiboleete’ ga” yaagosona. Shin i, “Shi” geetetiya pidaliya loythi xeeganaw danda7onna gisho, “Siboleete” yaagees. I hessa giya wode oykidi, Yordaanose shaafa pinniya bessan wodhoosona. He wode yan Efreema asaape oytamanne nam7u mukulu asay hayqis.
JDG 12:7 Yoftaahey Isra7eele asaa usupun laythi aysis. Galada addey Yoftaahey hayqidi Galadan de7iya issi kataman moogetis.
JDG 12:8 Yoftaahepe kaallidi, Beetelemen Ibxani Isra7eele asaa haaris.
JDG 12:9 Ibxanas hastamu adde naytinne hastamu macca nayti de7oosona. I ba macca nayta ba koche gidonna adde naytas immis; ba adde naytas ba koche gidonna macca nayta giigisidi immis. Ibxani Isra7eele laapun laythi aysis.
JDG 12:10 Hessafe guye, Ibxani hayqidi Beetelemen moogetis.
JDG 12:11 Ibxanape kaallidi Zabloona koche gidida Elooni Isra7eele asaa tammu laythi haaris.
JDG 12:12 Hessafe guye, Elooni hayqidi Zabloona biittan de7iya Ayaloonan moogetis.
JDG 12:13 Eloonape kaallidi, Piratoona addey, Hilaala na7ay Abdooni Isra7eele aysis.
JDG 12:14 Abdoonas laapun tammu baqulota toggiya oytamu adde naytinne hastamu na7a na7i de7ees. Abdooni Isra7eele hospun laythi aysis.
JDG 12:15 Hessafe guye, Hilaala na7ay Abdooni hayqidi derey dariya Amaaleqan, Efreema biittan, Piratoona geetetiya duufon moogetis.
JDG 13:1 Isra7eele asay Godaa sinthan qassika iitabaa oothidosona. Yaatin, Goday enta oytamu laythi Filisxeeme asaa kushen aathidi immis.
JDG 13:2 He wode Xor7a kataman Maanuhe geetetiya issi addey de7ees. I Daane koche; iya machiya maynthi gidida gisho iyaw na7a yelabuuku.
JDG 13:3 Issi gallas Godaa kiitanchoy he maccasees qoncidi, “Neeni maynthi; new na7i baawa; shin ne qanthatana; adde na7aka yelana.
JDG 13:4 Hessa gisho, woyne woyko mathoyiya ushshi uyonna melanne tunabaa aybaka moonna mela naageta.
JDG 13:5 Ne qanthatada adde na7a yelana. Na7ay yeletida wodiyape doomidi Xoossas dummatida Naazirawe gidiya gisho iya huuphiya meedopa. I Isra7eele Filisxeemeta kushepe asho doomana” yaagis.
JDG 13:6 Maccasiya bada, ba azinaas haysada yaagada odasu; “Issi Xoossa asi taako yis; iya medhoy Xoossa kiitancho mela daro yashshees. I awupe yidaako taani iya oychabike; ika ba sunthaa taw odibeenna.
JDG 13:7 Shin I taako, ‘Ne qanthatana; adde na7a yelana. Na7ay yeletida wodepe doomidi hayqana gakanaw Xoossas dummatida Naazirawe gidiya gisho woyne woyko mathoyiya ushshi uyopa; tunabaaka moopa’ yaagis” yaagasu.
JDG 13:8 Hessafe guye, Maanuhey, “Abeeti Godaw, na7ay yeletiya wode ay oothanaw koshshiyako erisana mela neeni kiitida Xoossa uray nuuko simmidi yaana mela ootharki” yaagidi Godaa woossis.
JDG 13:9 Xoossay Maanuhe woosa si7is. Machiya gaden uttidashin Xoossa kiitanchoy nam7antho yis; shin he wode I azinay Maanuhey iira deenna.
JDG 13:10 Machiya ellesada ba azinaako bada, “Heede taako yida addey hachi taw qoncis” yaagasu.
JDG 13:11 Maanuhey uttida bessaafe dendidi, ba machiw kaalli bidi uraako, “Ta machera odetiday nenee?” yaagidi oychis. Uray, “Ee, tana” yaagis.
JDG 13:12 Maanuhey, “Neeni odida qaalay poletiya wode yeletana na7aa de7uwasinne oosuwas wogay aybee?” yaagidi iya oychis.
JDG 13:13 Godaa kiitanchoy, “Ne machiya taani odida ubbaafe naageto.
JDG 13:14 Woyne mithafe bentiyaba aybaka moopo; woyne woyko mathoyiya ushshi uyopo; tuna gididaba moopo. Taani iw odida ubbaa ootho” yaagis.
JDG 13:15 Maanuhey Godaa kiitanchuwako, “Nuuni new issi urge deeshi shukidi giigisana gakanaw hayyana guuthu gam7arki” yaagis.
JDG 13:16 Godaa kiitanchoy, “Taani gam7iyakoka ne kathaa miike. Shin neeni xuussa yarsho giigisanaw koyiko, Godaas yarshanaw danda7aasa” yaagis. I Godaa kiitancho gideysa Maanuhey eribeenna.
JDG 13:17 Maanuhey Godaa kiitanchuwako, “Neeni odida qaalay poletiya wode nuuni nena bonchana mela ne sunthay oonee?” yaagidi oychis.
JDG 13:18 Godaa kiitanchoy, “Ne ta sunthaa ayis oychay? Ta sunthay malaalseysa” yaagidi zaaris.
JDG 13:19 Maanuhey urge deeshinne katha yarshuwa ekidi shucha bolla Godaas yarshis. Maanuheynne iya machiya xeellishin, Goday malaalsiyaba oothis.
JDG 13:20 Yarsho bessaafe tama lacoy pude laxidi keyishin, Godaa kiitanchoy tama lacuwa giddora salo keyis. Maanuheynne iya machiya hessa be7idi som7ora sa7an gufannidosona.
JDG 13:21 Godaa kiitanchoy Maanuhesinne iya machees zaari bentonna aggin, maanuhey I Godaa kiitancho gididaysa he wode akeekis.
JDG 13:22 Maanuhey ba macheko, “Nuuni Xoossaa be7ida gisho hayqana” yaagis.
JDG 13:23 Shin iya machiya, “Goday nuna wodhanaw koydaba gidiyako, xuussa yarshuwanne katha yarshuwa nuupe ekenna woyko ha ubbaa nuna bessenna woyko haysa nuus odenna” yaagada zaarasu.
JDG 13:24 Machiya adde na7a yelasu; iya sunthaa Samsoona gada xeegasu. Na7ay diccis; Godayka iya anjis.
JDG 13:25 Na7ay Xor7afenne Eshta7oolape giddon de7iya Daane gutan de7ishin Godaa Ayyaanay iya denthetho doomis.
JDG 14:1 Issi gallas Samsooni Timina wodhis; yan issi Filisxeeme geela7iw be7is.
JDG 14:2 I Soo simmidi ba aawanne ba aayiw, “Taani Timinan issi Filisxeeme geela7iw be7as; ha77i iyo taw oychidi immite” yaagis.
JDG 14:3 Shin iya aawanne aayiya, “Macho oychanaw ha qaxaretiboona Filisxeemetako baanaw nena ay koshshidee? Nu kochaa giddon woyko nu asa ubbaa giddon new haniya macca na7a demmanaw danda7abikii?” yaagidi oychidosona. Shin Samsooni ba aawako, “Taani iyo dosida gisho, iyo oychada taw imma” yaagis.
JDG 14:4 Filisxeemeta olanaw Goday gaaso koyidi, hessa enta bolla ootheysa Samsoona aawaynne aayiya eribookona. He wode Filisxeemeti Isra7eeleta haaroosona.
JDG 14:5 Samsooni ba aawaranne ba aayera Timina wodhis. Enti Timina woyne gade matara kanthidi aadhiya wode issi wodala gaammoy gudishe iya bolla keyis.
JDG 14:6 He wode Godaa Ayyaanay Samsoona bolla wolqan wodhis; I deesha mari duuseretheysada ba kushen aykoka oykonna gaammuwa duuserethi yeggis. Ba oothidaysa ba aawasinne ba aayes odibeenna.
JDG 14:7 Hessafe guye, bidi geela7iw odisis; iyo dosis.
JDG 14:8 Guutha wodepe guye iyo ekanaw yaa simmidi bis. Ogiya bishe ba wodhida gaammo bawuta be7anaw ogepe gaxa keyidi biya wode gaammo bawuta giddon mathi eessi eessidaysa be7is.
JDG 14:9 He eessaafe guuthara qanxi ekidi mishe ogiya bis. Ba aawanne ba aayiw gakidi, ba oykida eessaafe guuthara immin, entika midosona. Shin Samsooni he eessa gaammo bawuta giddofe ekidaysa entaw odibeenna.
JDG 14:10 Iya aaway geela7iw be7anaw I soo bin, Samsooni yan gibira giigisis. Hessa mela gibiray yaaganon na7atethati oothiya meezetida woga.
JDG 14:11 Filisxeeme asay iya be7ida wode iyara gam7ana mela hastamu na7atethata dooridi yeddidosona.
JDG 14:12 Samsooni enta, “Ane hinte eriyako issi qan77ishe ta hintena oychana. Yaaganoy bonchetiya laapun gallasa giddon ha qan7ishiya birshethaa taw hinte odiyaba gidiko taani hintew hastamu liino afilanne hastamu kumetha ma7o immana.
JDG 14:13 Shin hinte taw birshethaa odanaw danda7onna ixiko hinte taw hastamu liino afilanne hastamu kumetha ma7o immeeta” yaagidi oychis. Enti, “Ero, ne qan7ishiya nuus oda” yaagidosona.
JDG 14:14 I, “Meysafe meetetiyabay bentis; minuwa garsafe mal7iyabay keyis” yaagis. Heedzu gallas gakanaw enti qan7ishiya birshanaw danda7ibookona.
JDG 14:15 Oyddantho gallas enti Samsoona machiw, “Ne azinaa cimmada qan7ishiya birshethaa I nuus odana mela ootha. Hessi hanonna ixiko, nuuni nenanne ne aawa keethaa taman xuuggana. Hinte nuna xeegiday nuna manqisanaasee?” yaagidosona.
JDG 14:16 Yaatin, Samsoona machiya yeekashe iyako shiiqada, “Neeni tana dosaka; ne tana daro ixaasa. Neeni ta biitta asaa qan7ishe oychada birshethaa taw odabaaka” yaagasu. I zaaridi, “Hessa taani ta aawasinne ta aayes odabike. Yaatin, new ayis odo?” yaagis.
JDG 14:17 Yaaganoy bonchetiya laapun gallasa ubban yeekada shempo diggasu. Laapuntha gallas qan7ishiya birshethaa iw odis; iya bada ba biitta asaas odasu.
JDG 14:18 Yaatin, laapuntha gallas awi wullanaape sinthe katamaa asay, “Eessaafe aadhidi mal7iyabay, gaammofe aadhidi minniyabay aybee?” yaagidi qan7ishiya birshethaa odidosona. Samsooni entako, “Hinte ta ussen goyonnaba gidiyako, ta qan7ishiya birshethaa ereketashin” yaagis.
JDG 14:19 Hessafe guye, Godaa Ayyaanay iya bolla wolqan wodhin, Asqaloona wodhidi, hastamu asi wodhis. Enta ma7uwa qaari ekidi qan7ishiya birshida asaas immis. Hanidaba ubban daro shenetidi ba aawa soo simmis.
JDG 14:20 Samsoona machiya waanna laazanthi gidida iya laggiyas imetasu.
JDG 15:1 Guutha wodepe guye, giste caka wode Samsooni ba machiw be7anaw issi urge kole ekidi bis. Na7ee aawako, “Taani ta machiya de7iya kifiliya gelanaw koyayis” yaagis. Shin I aaway I gelonnaada diggis.
JDG 15:2 I aaway Samsoonako, “Neeni iyo ixidaba daanin iyo ne laazanthas immas. Shin I, kaalo michiya iipe aadhada mala lo77o gidekee? Iyo eka” yaagis.
JDG 15:3 Samsooni, “Taani ha77i Filisxeeme asaa bolla iitabaa oothiko bala gidike” yaagis.
JDG 15:4 Hessafe guye, bidi heedzu xeetu workanata oykidi nam7aa nam7a goyna issife gathi qachidi goynatape giddon xompe wothidi qachis.
JDG 15:5 Xompiyan tama oythidi buroo caketiboona Filisxeemeta kathaa giddo workanata yeddis. Tamay caketida kathaa, eqon de7iya kathaa, woyniyanne shamahuwa mis.
JDG 15:6 Filisxeemeti, “Haysa oothiday oonee?” yaagidi oychidosona. Asay, “Hessa oothiday Samsoona. Timina asi gidida iya bolloy, iya machiw iya laazanthas immida gisho hessa oothis” yaagidosona. Filisxeemeti bidi iyonne I aawa taman xuuggidosona.
JDG 15:7 Samsooni entako, “Hinte hessa oothida gisho ta halo keyonna aggike” yaagis.
JDG 15:8 I enta wolqaama iita shochi shocidi darota wodhis. Hessafe guye bidi, Etaama gongoluwan de7is.
JDG 15:9 Filisxeeme asay yidi Yihudan dunkaanidi Leha katamaa olis.
JDG 15:10 Yihuda asay, “Ayis nuna olanaw yidetii?” yaagidi oychidosona. Enti, “Nuuni Samsoona oykidi qachanawunne I nu bolla oothidaysada iya bolla oothanaw yida” yaagidi zaaridosona.
JDG 15:11 Yaatin, Yihudape heedzu mukulu asay Etaama gongoluwa bidi, Samsoona, “Nuna haarey Filisxeeme gideysa erikii? Yaatin, nu bolla haysa mela palaba ayis oothay?” yaagidosona. I zaaridi, “Enti ta bolla oothidaysada taanika enta bolla oothas” yaagis.
JDG 15:12 Enti zaaridi, “Nuuni yiday nena qachidi, Filisxeemetas aathidi immanaasa” yaagidosona. Samsooni zaaridi, “Hinte nu nena wodhoko gidi taw caaqite” yaagis.
JDG 15:13 Enti, “Ero, nuuni nena qachidi entaw aathidi immanaape attishin, wodhoko” yaagidi zaaridosona. Hessa gisho, nam7u ooratha wodoron qachidi gongoluwape kessidi efidosona.
JDG 15:14 Samsooni Leha bida wode Filisxeemeti buraaqishe iyako yidosona. Godaa Ayyaanay iya bolla wolqan wodhis. Iya kushey qashetida wodoroy shaloy tama be7idi duuxereteysada duuxereti wodhis.
JDG 15:15 Mata wode hayqida hare gaco demmidi, iyara mukulu asi wodhis.
JDG 15:16 Samsooni, “Hare gacon, aha bolla aha dooras. Hare gacon mukulu asi wodhas” yaagis.
JDG 15:17 Haasaya wursidaape guye, ba oykida gacuwa holidi he bessaa Ramat-Leha yaagidi xeegis.
JDG 15:18 Samsooni daro saamotidi, “Neeni haysa mela gita xoono taw ne aylliyas immadasa. Yaatin, taani ha77i saamon hayqo? Ha qaxaretonna asaa kushen wodho?” yaagidi Xoossaako waassis.
JDG 15:19 Xoossay Lehan de7iya aafo kakaa phalqin iyape haathi keyis. Samsooni he haatha uyidi alida wode iyaw shempoy simmis. Hessa gisho, he bessaa Ayn-Haqore yaagidi xeegis. He bessay hachi gakanaw Lehan de7ees.
JDG 15:20 Filisxeemeti biitta haariya wode Samsooni Isra7eele laatamu laythi aysis.
JDG 16:1 Issi gallas Samsooni Filisxeeme katama gidida Gaaza katamaa bis; Yan issi layma maccas be7idi iira aqanaw I soo gelis.
JDG 16:2 Gaaza katamaa asay Samsooni enta katamaa yidaysa si7idi keetha teqidi qamma kumethi naagishe katamaa pengiyan aqidosona. Sa7i wontiko wodhana gidi naagishe doona phuqona aqidosona.
JDG 16:3 Shin Samsooni yan gidi bilahe gakanaw gam7is. Bilahe dendidi katamaa dirsa pengiya, pengiya oykiya nam7u tuussatanne kobe biratata issife shoddis. He ubbaa hashen tookidi Kebroonape sintha baggara de7iya zumaa huuphe kessis.
JDG 16:4 Guutha wodepe guye Samsooni Soreqa zangaaran de7iya issi Dalilo geetetiya maccasiw dosis.
JDG 16:5 Filisxeeme halaqati iiko bidi, “Neeni iya cimmada, he wolqa ubbaa I awupe demmiyakonne nuuni iya waati xoonidi qachanaw danda7iyako oycha. Nuuni issoy issoy new tammanne issi kilo giraame bira santime immana” yaagidosona.
JDG 16:6 Hessa gisho Dalila Samsoonako, “Haysa mela minotethi ne awupe demmidaako, hayyana taw odarkii. Asi nena qachidi waatidi ne wolqaa daabursanaw danda7ii?” yaagasu.
JDG 16:7 Samsooni, “Tana laapun irxa dafora asi qachiko daaburada hara asada hanana” yaagidi zaaris.
JDG 16:8 Filisxeeme halaqati Dalilas laapun irxa dafota ehin iya Samsoona qachasu.
JDG 16:9 Qol7an ase qotta wothada, “Samsoona, Filisxeemeti yidosona” gada xeegasu. Shin shaloy tami oykin duuxereteysada dafota duuserethi yeggis. Ha77ika iya minotethaa xuuray eretibeenna.
JDG 16:10 Dalila Samsoonako, “Neeni tana eeya oothaasa; ne taw wordo odadasa. Ha77ika nena waati qachanaw danda7etiyako hayyana taw oda” yaagasu.
JDG 16:11 I zaaridi, “Asi go7etiboonna ooratha wodoron tana qachiko daaburada hara asada hanana” yaagis.
JDG 16:12 Dalila ooratha wodoro ekada Samsoona qachasu. Qol7an ase qotta wothada, “Samsoona, Filisxeemeti yidosona” yaagasu. Shin I wodoruwa ba qesiyape shaloda duuserethi yeggis.
JDG 16:13 Dalila Samsoonako, “Ha77i gakanaw ne tana cimmaasa; neeni taw wordo odadasa. Ha77ika nena waatidi qachanaw danda7etiyako hayyana taw oda” yaagasu. I zaaridi, “Ta huuphiya laapun binaana dathata qacinara gathada, quxarada daddiko, taani daaburada hara asada hanana” yaagis.
JDG 16:14 Hessafe guye, Samsooni dhiskidashin, Dalila iya huuphiya laapun binaana dathata qacinara gathada dooqasu. Hessafe guye, “Samsoona, Filisxeemeti yidosona” yaagasu. I dhiskofe barkidi, ba binaanay dooqetidi toletida bessaafe shoddi ekis.
JDG 16:15 Yaatin iya, “Ne wozanay taara deenna, ‘Woygada ta nena dosayis’ gay? Heedzu toho tana cimmadasa. Neeni ha minotethaa awupe demmiyako taw oda” yaagasu.
JDG 16:16 Gallas gallas oychada I hayqo amottana gakanaw iya waaysasu.
JDG 16:17 Wursethan Samsooni, “Ta aaye ulope doomin taani Xoossaas dummatida Naazirawe gidida gisho, ta huuphe binaanay meedetidi erenna. Ta binaanay meedetiko, ta wolqay taape eketin, taani daaburada hara asada hanana” yaagidi, ba xuura ubbaa iw odis.
JDG 16:18 Ba wozanan de7iyaba ubbaa I odidaysa Dalila be7ida wode, “Ba wozanan de7iyaba ubbaa taw odida gisho, ane issi toho simmidi yiite” yaagada Filisxeeme halaqatas kiita yeddin enti bira ekidi iiko yidosona.
JDG 16:19 Dalila Samsoona ba wodire bolla dhiskisada issi asi xeegin yidi, iya huuphiya laapun datha binaana meedin iya wolqay iyape dhayis. Hessafe guye, iya waayso doomasu.
JDG 16:20 Iya, “Samsoona, Filisxeemeti yidosona” yaagasu. I dhiskofe barkidi, kaseysada duuserethada baana yaagidi qopis; shin Goday iyape shaaketidaysa eribeenna.
JDG 16:21 Filisxeemeti iya oykidaape guye, iya nam7u ayfeta wooci kessidosona. Gaaza katamaa efidi naase birata santhalaatan qachidi qasho keethan kathi gaacisidosona.
JDG 16:22 Enti iya huuphiya binaana meedidaape guye, binaanay simmidi dolo doomis.
JDG 16:23 Filisxeeme halaqati, “Nu xoossay nu morkiya Samsoona nu kushen aathidi immis” yaagidi banta xoossaa Daagonas yarsho yarshanawunne ufaytanaw issife shiiqidosona.
JDG 16:24 Asi ubbay iya be7ida wode, “Nu biitta dhaysidanne nuupe darota wodhida nu morkiya, nu xoossay nu kushen aathidi immis” yaagidi banta xoossaa galatidosona.
JDG 16:25 Enti daro ufaytida gisho, “Duridi nuna ufaysana mela Samsoona xeegite” yaagidosona. Samsoona qasho keethafe xeegidi ehin, I enta sinthan duridaape guye tuussatape giddon essidosona.
JDG 16:26 Samsooni ba kushiya oykidi kaalethiya na7aako, “Taani entan zempada eqana mela keethaa tookida tuussata tana oytha” yaagis.
JDG 16:27 Keethaa giddon addeynne maccasi, hessadaka Filisxeeme halaqati ubbay kumidi de7oosona. Samsooni durishin, pooqiya bolla uttidi be7iya heedzu mukulu gidiya addeynne maccasi be7oosona.
JDG 16:28 He wode Samsooni, “Abeeti Ubbaa Haariya Godaw, tana qoparki. Abeeti Xoossaw, Filisxeemeti ta nam7u ayfeta kessida gisho, halo keyana mela tana issi toho mintharki!” yaagidi Godaa woossis.
JDG 16:29 Samsooni keethaa tookida giddo tuussata nam7aaka oykis. Issuwa ushacha kushen, issuwa, haddirsa kushen oykidaape guye,
JDG 16:30 “Taani Filisxeemetara issife hayqana” yaagidi waassis. Baw de7iya wolqa ubban sugin, keethay halaqata bollanne garsan de7iya asa ubbaa bolla kundis. Samsooni paxa de7ishe wodhida asaape hayqishe wodhida asay daro.
JDG 16:31 Iya ishatinne iya dabboti ubbay yidi, iya aha ekidosona. Xor7afenne Eshta7oolape giddon iya aawa Maanuhe duufuwan moogidosona. Samsooni Isra7eele laatamu laythi aysis.
JDG 17:1 Derey dariya Efreema biittan Mika geetetiya issi addey de7ees.
JDG 17:2 Issi gallas Miiki ba aayiw, “Neepe asi tammanne issi kilo giraame bira santime kaysin neeni he kaysida addiya baaddishin ta si7as. He miishey ta matan de7ees; taani ekas” yaagis. Iya aayiya, “Ta na7aw, nena Godi anjo” yaagasu.
JDG 17:3 Na7ay tammanne issi kilo giraame bira santime aayes zaaris. Iya aayiya, “Baadethay ta na7aa gakonna mela taani ha miishiya Godaas dummayana. Biraa sheeshidi, mithafe oosetida eeqa misiliya tiyanaw go7etana; bira ta new zaarana” yaagasu.
JDG 17:4 Na7ay miishiya ba aayes zaarin, iya he birape nam7u xeetu bira santime ekada, mithi massidi, bira sheeshi tiyidi, eeqa misile medhiya, issi hiillas immasu. I oothida misiley Mika son uttis.
JDG 17:5 Mikas eeqa goyinniya keethi de7ees. I efuudenne soo giddo eeqa misileta giigisidi, he keethan ba naytape issuwa kahine oothidi shuumis.
JDG 17:6 He wode Isra7eele biittan kawoy baawa; asi ubbay baw lo77o daanidaba oothees.
JDG 17:7 He wode Yihuda biittan Beeteleme kataman Leewe koche gidida issi na7atethay de7ees.
JDG 17:8 Ha addey baw de7iya bessi koyanaw Beeteleme katamaape dendidi derey dariya Efreema biittan de7iya Mika soo gakis.
JDG 17:9 Miki, “Awupe yadii?” yaagidi oychis. Addey, “Taani Yihuda biitta Beeteleme katamaape yas; taani Leewe koche. Ha77i taani de7iya bessi koyayis” yaagidi zaaris.
JDG 17:10 Miiki iyako, “Taara de7a; taw aawanne kahine gida. Taani new laythan laythan tammu bira santime, kumetha afilanne miyaba immana” yaagis.
JDG 17:11 Na7atetha Leewey Mikara issife daanaw gelis; Mikas yelida na7ada hanis.
JDG 17:12 Miiki iya ba kahine oothidi shuumin iya son de7is.
JDG 17:13 Miiki, “Issi Leewey taw kahine gidida gisho Goday tabaa loythanaysa erayis” yaagis.
JDG 18:1 He wode Isra7eele biittan kawoy baawa. He wodey gakanaw Daane kochati Isra7eele kochata giddon laattida biitti baawa. Enti bantaw de7iya biitta koyishe de7oosona.
JDG 18:2 Hessa gisho, Daane kochati banta giddofe ichashu mino olanchota dooridi biitta wochana mela Xor7afenne Eshta7oolape enta kiittidosona. Enti derey dariya Efreema biitta gakidi Mika son aqidosona.
JDG 18:3 Enti Mika son de7iya wode Leewe koche gidida na7atetha iya odan eridosona. Enti iyako shiiqidi, “Nena haysa ehiday oonee? Haysa ayis yadii?” yaagidi oychidosona.
JDG 18:4 I zaaridi, “Miiki taw damooze qanxin, taani iyaw kahine gidada oothayis” yaagis.
JDG 18:5 Enti, “Nuuni biya ogey nuus suurane, suurenne hayyana nuus Xoosse oycha” yaagidosona.
JDG 18:6 Kahiney, “Saro biite; hinte biya ogiyan Goday hintera gidana” yaagis.
JDG 18:7 Hessape guye, ichashu asati yaape dendidi, Laysha katamaa gakidosona. Yan de7iya asay Sidoona biitta asaada saron de7eysa be7idosona; asati oonika sidhonna wopu gida asi; entaw aykoyka paconna ubbabay kumida asi. Ay asaraka gahetonna Sidoona asaape haakidi bantaw dumma de7oosona.
JDG 18:8 Ichashu asati Xor7aninne Eshta7oolan de7iya banta ishatako simmidosona; enta ishati, “Ay wore ekidi yidetii?” yaagidosona.
JDG 18:9 Enti zaaridi, “Biittay daro aradda gideysa nu be7ida. Ane dendidi Laysha oloos. Haysan ooso dhayidi coo uttofite; elle bidi oykite.
JDG 18:10 Hinte yaa bidi, oonanne sidhonna uttida asaako gakana. Biittay dalga; asas koshshiya ubbabay he biittan de7ees. Xoossay he biitta hintew immis” yaagidosona.
JDG 18:11 Yaatin, Daane kochaafe toora dancida usupun xeetu asati Xor7apenne Eshta7oolape dendidi bidosona.
JDG 18:12 Yihuda biittan Qiriyat-Yi7aarimape wuloha baggara uttidosona. Hessa gisho, he bessay hachi gakanaw Daane Gutaa geetetidi xeegetees.
JDG 18:13 Yaape dendidi derey dariya Efreema biittan de7iya Mika soo yidosona.
JDG 18:14 Laysha biitta wochanaw bida ichashu asati banta ishatako, “Ha bessan, ha keethatape issuwan efuudey, soo giddo eeqa misiletinne mithafe oothidi bira sheeshidi tiyida misiley de7eysa ereetii? Ane ay oothanaw koshshiyako qopite” yaagidosona.
JDG 18:15 Enti ogiyape simmidi, Leewe koche gidida na7atetha kahiney de7iya Mika soo bidi iya sarothidosona.
JDG 18:16 He wode usupun xeetu Daane olanchoti ola miishe oykidi penge bolla eqidosona.
JDG 18:17 Enti he kahiniyara yan eqidashin, biitta wochiya ichashu asati Mika soo gelidi, mithafe oothidi, bira sheeshidi, tiyida eeqa misiliya, efuudiyanne soo giddo eeqa misileta ekidosona.
JDG 18:18 He wode kahiney enta, “Waatetii?” yaagidi oychis.
JDG 18:19 Enti iya, “Hayza, issi qaalaka pogopa. Nuura bada nuus aawanne kahine gida. Issi keetha asas kahine gideysafe Isra7eele gidiya issi kochas kahine gideysi new lo77enee?” yaagidosona.
JDG 18:20 Kahiney hessa si7idi ufaytidi efuudiya, soo giddo eeqa misiletanne mithafe oothidi bira sheeshidi tiyida misiliya ekidi entara bis.
JDG 18:21 Yaape dendidi, banta nayta, banta mehiyanne bantaw de7iyaba ubbaa sinthe aathidi bidosona.
JDG 18:22 Enti Mika soope haakidi bidaape guye, Miiki ba shoorota xeegin, Daane asata kaallidi gakidosona.
JDG 18:23 Enta gakidi waassin, Daane asati guye simmidi, “Waanadii? Ha asa ubbaa ayis shiishadii?” yaagidi Mika oychidosona.
JDG 18:24 Miiki zaaridi, “Taani medhida ta xoossatanne taw oothiya kahiniya bonqideta. Yaatin taw attidabay aybee? Tana, ‘Woygidi waanadi, geetii?’ ” yaagis.
JDG 18:25 Daane asati, “Ane doona pogada nena era! Ha shenera de7iya asaa neeni denthethiko, enti ne bolla dendana; nenanne soo asa ubbaa dhaysana” yaagidosona.
JDG 18:26 Daane asati banta ogiya bidosona. Mikika enti baape daro mino gideysa be7idi ba soo simmis.
JDG 18:27 Daane asati Miiki medhida xoossatanne iya kahiniya ekidi, Leesan oonaka sidhonna saro de7iya asatako bidi, asa ubbaa mashshan wodhidi katamaa taman xuuggidosona.
JDG 18:28 Laysha katamay Sidoonape haakidi de7iya gishonne enti hara asara gahetidi eronna gisho enta ashshanaw oonika danda7ibeenna. Laysha katamay Beet-Rehooba geetetiya bessaa matan de7iya zangaaran de7ees. Daane asati katamaa zaari keexidi yan de7idosona.
JDG 18:29 Katamaa sunthaa beni banta mayza Yayqooba na7aa Daane sunthan laammidi, Daane yaagidi sunthidosona; shin koyro he katamay Laysha geetetees.
JDG 18:30 Daane asati bantaw eeqa misiliya yan wothidi, Muse na7aa Gedisoonape yeletida Yoonataana banta kahine oothidosona. Iya kochati asay di77etidi bida wode gakanaw yan kahine gididosona.
JDG 18:31 Hessada hanidi, Geeshsha Dunkaaney Seelon de7ida laytha ubban Miiki oothida misileti yan gam7idosona.
JDG 19:1 Isra7eele biittan kawoy bayna wode derey dariya Efreema biittan, haaho bessan, Leewe koche gidida issi uray de7ees. He uray Yihuda biittan, Beeteleme katamaape issi laggetho baw ehis.
JDG 19:2 Shin iyara ooyetada Yihuda biittan Beeteleme kataman de7iya ba aawa soo bada yan oyddu ageena uttasu.
JDG 19:3 I azinay iyo cimatidi soo zaaranaw ba aylliyanne nam7u hareta ekidi bis. I yaa gakiya wode iya moka ekada ba aawa soo gelsasu; I aaway iya be7ida wode ufaytidi mokis.
JDG 19:4 Na7ee aaway iya yeddonna ixin, yan iyara mishenne uyishe heedzu gallas gam7is.
JDG 19:5 Oyddantho gallas wonta guura dendidi, baanaw giigidosona. Shin na7e aaway ba na7e azinaako, “Guutha kathi mada gashtada ba” yaagis.
JDG 19:6 Nam7u asati uttidi issife midosonanne uyidosona. Hessafe guye na7e aaway iyako, “Hayyana, hachi ufaytada haysan aqa” yaagis.
JDG 19:7 Leewey baanaw dendin, na7e aaway boonna mela woossin qassika yan aqis.
JDG 19:8 Ichashantho gallas wonta guura baanaw dendin, na7e aaway, “Hayyana, guutha kathi mada, gashtada omarsi ba” yaagis. Enti nam7ayka issife kathi midosona.
JDG 19:9 Leewey ba laggetheranne ba aylliyara baanaw keyin, na7e aaway, “Heko, sa7i qammis; ha77ika aqite; wonta guura dendidi hinte soo biite” yaagis.
JDG 19:10 Shin I yan aqanaw koyiboona gisho ba laggethiw, ba aylliyanne nam7u caanetida hareta ekidi Yaabuse geetetiya Yerusalaame katamaa gakidosona.
JDG 19:11 Enti Yaabuse matiya wode sa7i daro omarsin, aylley, “Haysan, Yaabuseta kataman aqiko waananee?” yaagidi ba godaa oychis.
JDG 19:12 Shin iya goday, “Haysan, Isra7eele asi bayna allaga katamaa booko. Gib7a katamaa gakanaw baana” yaagis.
JDG 19:13 Qassika ba aylliyako, “Haaya, nuuni Gib7an woyko Raman aqiya bessi demmana” yaagis.
JDG 19:14 Hessa gisho banta ogiya oykidi bidosona. Biniyaame biittan Gib7a katamaa enti matiya wode awi wullis.
JDG 19:15 Enti Gib7a katamaa gelidi aqanaw yaa bidosona. He katamaa asay duulata uttiya bessan uttidosona; shin enta ba soo efidi aysiya asi bentibeenna.
JDG 19:16 Enti yan uttidashin, sa7i omarsin gadepe ba soo simmiya issi cima addey enta matara aadhis. Ha addey kase derey dariya Efreema biittafe yida asi; shin ha77i Gib7a kataman de7ees. He biittan Biniyaame kochaafe yeletida asay de7oosona.
JDG 19:17 He cima addey, katamaa asay duulata uttiya bessan uttida addiya be7idi, “Awupe yadii? Awu bay?” yaagidi oychis.
JDG 19:18 Leewey zaaridi, “Nuuni Yihuda biittan Beeteleme katamaape yida. Ha77i derey dariya Efreema biittan, haaho bessan de7iya Xoossa keethinne nu soo boos. Nuna ba soo efidi aysiya asi demmibooko.
JDG 19:19 Nu haretas utullinne kaley de7ees; taw, ta laggethesinne ta aylliyas gidiya kathinne woyne ushshi de7ees; nuus koshshiyaba ubbaa oykida” yaagis.
JDG 19:20 Cima addey, “Saroy hintew gido; ta soo yedhite; ta son aqite; hinte koyaba ubbaa ta hintew immana. Ha katamaa dabaaban hinte aqanaw bessenna” yaagis.
JDG 19:21 Enta ba soo efis; enta haretas miyaba yeggis. Imathati banta tohuwa meecetidi kaho midosona.
JDG 19:22 Enti ufaytishin, katamaape iita asati yidi, keethaa teqidi, pengiya qoxethi doomidosona. Enti cima addiyako, “Ha ne soo gelida addiya haa kessa; nuuni iyara gahetanaw koyoos” yaagidosona.
JDG 19:23 He keethaa goday, “Hanenna; ta ishato, hessa mela palaba oothopite; ha addey ta imathe.
JDG 19:24 Heko, ta geela7o na7iyanne iya laggethiya haysan de7oosona. Taani enta hintew kare kessana; hinte enta bolla koydaba oothite; shin ha addiya bolla hessa mela iitabaa oothopite” yaagis.
JDG 19:25 Shin asati I gidaysa si7onna ixidosona. Leewey ba laggethiw kare holis. Sa7i wontana gakanaw qamma kumethi taran taran iira wolqan gahetidi, iyo paxa kaa7ishe aysidosona; sa7i wontana hanishin iyo yeddi aggidosona.
JDG 19:26 Wontanaw gontey zo77iya wode yada, I goday aqida cima addiya keethaa pengen kundasu; xalqey dolana gakanaw yan zin7asu.
JDG 19:27 Wonta I goday dendidi, ba ogiya baanaw pengiya dooyidi keyiya wode iya laggethiya keethaa pengen ba kushiya miccada gufannidaaro be7is.
JDG 19:28 I goday, “Denda; ane boos” yaagis. Shin iya aykoka zaarabuuku. Yaatin, I aha haren caanidi ba soo bis.
JDG 19:29 I ba soo gakida wode mashsha ekidi, ba laggethe aha tammanne nam7u bessan qanxerethidi, issi issi qanxuwa tammanne nam7u Isra7eele kochatas yeddis.
JDG 19:30 Hessa be7ida ubbay, “Isra7eele asay Gibxe biittafe keyoodepe hachi gakanaw haysa melabay hanibeenna; nuka be7ibooko. Ane haysa qopi be7idi, akeekan zoretidi, ay oothaneko nuus odite” yaagidosona.
JDG 20:1 Daanepe Barsaabe gakanaw Galadan de7iya Isra7eele asi ubbay issi asada Mixiphan Godaa sinthan issife shiiqidosona.
JDG 20:2 He shiiqida Xoossaa asaara, Isra7eele zare ubbaa halaqati de7oosona. Enta giddon mashshe dancidi oletanaw danda7iya 400,000 olanchoti de7oosona.
JDG 20:3 He wode Isra7eele asay Mixiphan shiiqidaysa Biniyaame asay si7idosona. Isra7eele asay, “Ha iitabay waanidi hanidaako nuus odite” yaagidosona.
JDG 20:4 Hayqida laggethe azinay, Leewey, haysada yaagidi zaaris; “Taaninne ta laggethiya sa7i qammin aqanaw Biniyaame biittan de7iya Gib7a katamaa yida.
JDG 20:5 Gib7a katamaa asati tana wodhanaw yidi, keethaa yuushuwa teqidosona. Shin guyepe ta laggethera wolqan, taran taran gahetidi iyo wodhidosona.
JDG 20:6 Taani I aha ekada qanxerethas; enti ha iitabaanne yeellaba Isra7eelen oothida gisho Isra7eele asay de7iya biitta ubbaa issi issi qanxo yedas.
JDG 20:7 Hiza, hinte ubbay Isra7eele asi; zoretidi bessiya pirdaa immite” yaagis.
JDG 20:8 Asa ubbay issife dendidi, “Nu giddofe oonika ba dunkaaniya woyko ba keethaa guye simmenna.
JDG 20:9 Nuuni Gib7a bolla haysa oothana; saama yeggidi, Gib7a katamaa olanaw baana asata doorana.
JDG 20:10 Isra7eele zare ubbaafe ola biya asaas shinqe giigisana mela xeetape tamma, mukulaape xeetaa, tammu mukulaape issi mukula dooridi ekana. Attida olanchoti Biniyaame biittan de7iya Gib7a bidi, Isra7eele bolla haysa mela iitabaa oothida asaa bolla halo keyanaw boo” yaagidosona.
JDG 20:11 Isra7eele asa ubbay katamaa olanaw issife shiiqidosona.
JDG 20:12 Isra7eele kochati Biniyaame kocha ubbaas haysada yaagidi ase kiittidosona; “Hinte giddon hanida ha iitabay aybee?
JDG 20:13 Nuuni enta wodhidi, Isra7eelepe iitabaa dhaysana mela Gib7an de7iya he iita asata kessidi nuus immite” yaagidosona. Shin Biniyaameti Isra7eele asay odidaysa si7onna ixidosona.
JDG 20:14 Enti Isra7eele asaara oletanaw banta katamatape keyidi issife Gib7an shiiqidosona.
JDG 20:15 He gallas Biniyaame katamatape yida mashshan oletiya laatamanne usupun mukulu olanchota shiishidosona. Hessika Gib7an de7iya asaa giddofe dooretida laapun xeetu asaape hara.
JDG 20:16 Ha olanchota giddofe laapun xeetu asati haddirsa kushen ootheyisata; enti yambarshan shuchu holidi, hari attoshin issi binaanaka balokona.
JDG 20:17 Biniyaame asaa gujonna, Isra7eele asay mashshan oletiya 400,000 olanchota shiishidosona.
JDG 20:18 Isra7eele asay dendidi, Beetele bidi, “Biniyaame asaa olanaw nuupe sinthatidi keyanay oonee?” yaagidi Xoossaa oychidosona. Goday, “Yihuda kochay sinthatidi keyo” yaagis.
JDG 20:19 Wontetha gallas wonta guura Isra7eele asay dendidi Gib7a katamaa matan shiiqidosona.
JDG 20:20 Hessafe guye Isra7eele asay Biniyaame asaa olanaw bidi Gib7a katamaa matan salpidosona.
JDG 20:21 He gallas Biniyaame asay Gib7ape keyidi, Isra7eele asaape 22,000 olanchota wodhidosona.
JDG 20:22 Isra7eele asay issoy issuwa minthethin, koyro gallas enti olas salpida bessan nam7antho salpidosona.
JDG 20:23 Isra7eele asay bidi sa7i qammana gakanaw Godaa sinthan yeekidosona. Enti, “Nu ishatara, Biniyaame asatara oletanaw nam7antho keyino?” yaagidi Godaa oychidosona. Goday, “Ee, entara oletanaw keyite” yaagis.
JDG 20:24 Isra7eele asay Biniyaame asaara oletanaw nam7antho shiiqidosona.
JDG 20:25 Nam7antho gallasika Biniyaame asay Gib7a katamaape keyidi, Isra7eele olanchotape mashshan oletiya 28,000 asaa wodhidosona.
JDG 20:26 Hessafe guye, Isra7eeleti ubbay Beetele bidi yeekidosona; yan xoomishe sa7i qammana gakanaw, Godaa sinthan uttidosona. Godaa sinthan xuussa yarshonne issifetetha yarsho shiishidosona.
JDG 20:27 He wode Xoossaa caaqo Taabotey Beetele kataman de7iya gisho Isra7eele asay Godaa oychidosona.
JDG 20:28 He wode Aarona na7ay, Alaazara na7ay Finihaasi kahinetethan oothees. Isra7eele asay, “Nu isha gidida Biniyaame asaara oletanaw keyinoye attino” yaagidi Godaa oychidosona. Goday, “Bidi oletite; taani enta wonto hinte kushen aathada immana” yaagis.
JDG 20:29 Isra7eele asay guutha olanchoti Gib7a katamaa yuushuwan zugidi naagana mela oothidosona.
JDG 20:30 Heedzantho gallas Isra7eele olanchoti kaseysada Biniyaame olanchota olanaw bidi, Gib7a katamaape sintha baggara salpidosona.
JDG 20:31 Biniyaame asay entara oletanaw katamaape keyidi, enta kaalli keyidi haakidi bidosona. Kaseysada Beetelenne Gib7a efiya dalga ogetaninne dembatan Isra7eele asaape hastamu gidiya asaa wodhidosona.
JDG 20:32 Biniyaame asay, “Nuuni kaseysada enta xoonida!” yaagidosona. Shin Isra7eele asay, “Enti katamaape haakidi, ogiya bolla keyana mela ane nuuni baqatoos” yaagidi woxidosona.
JDG 20:33 Isra7eele asa ubbay banta bessaafe dendidi, Ba7aal-Tamaara geetetiya bessan salpiya wode Gib7a denban zugidi uttida Isra7eeleti keyidosona.
JDG 20:34 Isra7eele asaape dooretida tammu mukulu asay Gib7a bolla ola denthidosona; olay daro wolqaamis. He ubbay haniya wode Biniyaame asaas dhayoy matidaysa eribookona.
JDG 20:35 Isra7eeleti Biniyaame asaa bolla xoono demmana mela Goday oothis. He gallas Isra7eele asay Biniyaame asaape mashshan oletiya laatamanne ichashu mukulunne issi xeetu olanchota wodhidosona.
JDG 20:36 Hessafe guye, Biniyaame asay xoonetidaysa eridosona. Isra7eele asay Gib7a katamaa yuushuwan zugidi uttida olanchotan ammanetida gisho, Biniyaame asan xoonetidaba daanidi guye shiiqida gishosa.
JDG 20:37 Qosetidi naagiya olanchoti Gib7a katamaa ellesi woxi gelidi katamaa giddon demmida ubbaa wodhidosona.
JDG 20:38 Qosetidi naagiya asatinne Isra7eele asay cuyaa shaarada denthana mela kase zoreti uttidosona.
JDG 20:39 Ola denban de7iya Isra7eele asay baqateysa aggidi, guye simmidi, enta olidosona. Biniyaame asay Isra7eele asaape hastamu gidiya asaa wodhidi, “Kaseysada ha77ika nu enta xoonida” yaagidosona.
JDG 20:40 Shin malla cuyay katamaape pude kessi doomis. Biniyaame asay guye xeelliya wode katamay taman xuugetin, cuyay pude keyeysa be7idosona.
JDG 20:41 Hessafe guye, Isra7eeleti Biniyaame asaa bolla guye simmidosona. Biniyaame asay wurana haneysa erida gisho dagammidosona.
JDG 20:42 Hessa gisho, enti Isra7eele asaa sinthafe bazzo simmidi baqatidosona; shin kessi ekanaw danda7ibookona. Katamatape keyida Isra7eele olanchoti gidduwan enta wodhi wursidosona.
JDG 20:43 Isra7eeleti Biniyaame asaa teqidi, Gib7a katamaape doloha baggara de7iya bessaa gakanaw yedethidi darota wodhidosona.
JDG 20:44 Yan Biniyaame asaape tammanne hospun mukulu mino olanchoti hayqidosona;
JDG 20:45 Entafe attidaysati guye simmidi, bazzuwa kanthidi, Irmoona zaallako baqatidosona. Isra7eeleti entafe ichashu mukulu asaa oge bolla wodhidosona. Entafe attidaysata Gidooma gakanaw yedethidi nam7u mukulu asaa wodhidosona.
JDG 20:46 He gallas Biniyaame asaape mashshan oletiya laatamanne ichashu mukulu mino olanchoti hayqidosona.
JDG 20:47 Shin usupun xeetu asati bazzuwa kanthidi, Irmoona Zaallako baqatidi, yan oyddu ageena gam7idosona.
JDG 20:48 Isra7eele asay attida Biniyaame asaako guye simmidi, addenne macca, naytanne mehiya ubbaa wodhidosona; heeran de7iya katamata ubbaa taman xuuggidosona.
JDG 21:1 Isra7eele asay Mixiphan shiiqida wode, “Nu giddofe oonika Biniyaame asas ba na7a macho immofo” yaagidi caaqi uttidosona.
JDG 21:2 Isra7eeleti Beetele katamaa bidi, yan sa7i qammana gakanaw Xoossaa sinthan uttidi, banta qaala dhoqu oothidi yeekidosona.
JDG 21:3 Enti, “Abeeti Godaw, Isra7eele Xoossaw, haysi Isra7eelen ayis hanidee? Hachi Isra7eele asaa giddofe issi kochay ayis pacidee?” yaagidosona.
JDG 21:4 Wontetha gallas guura dendidi, yarsho bessi giigisidi, xuussa yarshonne issifetetha yarsho shiishidosona.
JDG 21:5 Isra7eeleti, “Isra7eele zare ubbaafe Godaa sinthan shiiqiya bessaa yoonna kochay oonee?” yaagidi oychidosona. Enti hessa oychida gaasoy, “Mixipha kataman Godaa sinthan shiiqanaw yiboona asi oonika hayqo” yaagidi kase caaqida gishosa.
JDG 21:6 Isra7eele asay banta ishatas, Biniyaame kochatas qadhetidi, “Hachi Isra7eelepe issi kochay dhayis.
JDG 21:7 Nuuni nu macca nayta entaw immonna mela Godan caaqida gisho hayqope attida Biniyaame kochati macho ekana mela nuuni ay oothinoo?” yaagidosona.
JDG 21:8 Qassika enti, “Isra7eele kochatape Mixiphan Godaa sinthe yoonnay oonee?” yaagidi oychidosona. Galadan de7iya Yaabesa katamaape issi asika qangethi gathanaw yoonnaysa be7idosona.
JDG 21:9 Enti asa taybida wode Galadan de7iya Yaabesape issi asika bentibeenna.
JDG 21:10 Hessa gisho, maabaray 12,000 mino olanchota Galadan de7iya Yaabesa katamaa kiittidosona. Enti bidi, “Yaabesan de7iya maccasaanne nayta issuwaka ashshona mashshan buthite.
JDG 21:11 Hessada oothidi; addenne addera aqida macca ubbaa wodhite” yaagidi kiittidosona.
JDG 21:12 Yaabesa kataman de7iya asaa giddofe addera aqiboona oyddu xeetu geela7o macca nayta demmidosona. Enta Kanaane biittan, Seelon dunkaanida gutaa ekidi yidosona.
JDG 21:13 Hessafe guye, kumetha maabaray Irmoona Zaalla matan de7iya Biniyaame asaara sigetanaw cima yeddidosona.
JDG 21:14 Biniyaame asati simmidi yidosona. Isra7eele asay Yaabesa katamaape wodhonna ehida geela7o nayta entaw immidosona. Shin geela7ota tayboy addeta taybuwara ginibeenna.
JDG 21:15 Isra7eele kochata giddon de7iya issifetethay duuxana mela Goday oothida gisho asay Biniyaametas daro qadhetidosona.
JDG 21:16 Maabara cimati, “Biniyaame kochatape maccasi hayqidi wurida gisho, hayqope attida addetas nuuni maccas waatidi demmanee?
JDG 21:17 Isra7eele asaa giddofe qushetidi dhayonna mela Biniyaame kochatape attidaysata laattiya na7i daanaw koshshees.
JDG 21:18 Gidoshin, nuuni nu macca naytape entaw immanaw danda7oko. Isra7eele asay kase, ‘Ba na7a Biniyaame kochaas immiya uray baadetidaysa gido’ yaagidi caaqetidi uttidosona” yaagidosona.
JDG 21:19 Yaatin, cimati, “Heko, laythan laythan Seelon Godaa bonchiya ba7aaley matis” yaagidosona. Seeloy Beetelepe pudeha baggara, Laboonape dugeha baggara, Beetelepe Seekema efiya ogiyape doloha baggara de7ees.
JDG 21:20 Hessa gisho, cimati, Biniyaame asata haysada yaagidi kiittidosona; “Bidi woyne gade giddon qosetidi,
JDG 21:21 naagite. Seelo katamaa macca nayti ba7aale gallas karaabo oykidi, yexishenne durishe yaa wode hinte woyne gade giddofe keyite. Seelo macca naytape dafi ekidi, Biniyaame biitta efite.
JDG 21:22 Enta aawati woyko enta ishati nuuko maggannanaw yaa wode nuuni entako, ‘Hayyana, enta nuus immite; nuuni enta ola bessaafe un7ethidi ekibooko. Hinte dosidi immiboona gisho bala gideketa’ yaagana” yaagidosona.
JDG 21:23 Biniyaame asay Isra7eele cimati gidaysada oothidosona. Issoy issoy Seelon yexiya macca naytape baw macho dafidi ekis. Enti banta laata biitta simmidi, katamata zaari keexidi yan de7idosona.
JDG 21:24 He wode Isra7eele asay yaape laaletidi, issoy issoy ba kochaako, ba kochaakonne ba soo asaako bis.
JDG 21:25 He wode Isra7eele biittan kawoy baawa; asi ubbay baw lo77o daanidaba oothees.
RUT 1:1 Isra7eele biitta daynnati aysiya wode he biittan koshi keyis. Issi addey ba macheranne ba nam7u adde naytara Yihuda biittan Beeteleme katamape dendidi Moo7abe biitta guutha wode yan daanaw betis.
RUT 1:2 He addiya sunthay Abemeleke, iya mache sunthay Nuhaamo, iya nam7u adde nayta sunthay Mahaloonanne Kelewoona. Enti Yihuda Beetelemen de7iya Efraata yara. Enti Moo7abe bidi yan de7idosona.
RUT 1:3 Enti yan de7ishin Nuhaami azinay Abemelekey hayqin, iya ba nam7u naytara attasu.
RUT 1:4 He nayti Moo7abe biitta macca naytape Orfanne Uruuto geeteteyisata machidi, tammu laythi de7aape guye,
RUT 1:5 Mahalooninne Kelewooni nam7ayka hayqidosona. Nuhaama I azinaynne nam7u nayti hayqin barka attasu.
RUT 1:6 Iya Moo7aben de7ishin, Goday ba asa Isra7eeles keehidi kathi entaw immidaysa si7ada ba nam7u nayta machetara Moo7abe biittafe guye simmanaw dendasu.
RUT 1:7 Iya ba de7iya bessaafe nam7u ba nayta machetara guye Yihuda efiya oge bolla keyidosona.
RUT 1:8 Nuhaama ba nayta machetako, “Hinte ubbatika hinte aaye soo, aaye soo simmite. Hinte hayqidaysatasinne taw keehidaysada Goday hintew keeho.
RUT 1:9 Hinte gelana azinata son Goday hintew shempo immo” yaagada yeerada entana anjasu. Entika banta qaala dhoqu oothidi yeekidi,
RUT 1:10 “Nuka neera ne asako baana” yaagidosona.
RUT 1:11 Shin Nuhaama entako, “Ta nayto hinte soo simmite. Hinte taara ayis beetii? Hintew azina gidana adde nayta hizape guye yelana daanii?
RUT 1:12 Ta nayto simmite, taani azina gelonnaada cimas. I wona taani yelana giyako ubba hachi qamma azina gelada adde na7a yeliyakoka,
RUT 1:13 hessati diccidi gakanaa gaso entana naaganeyee? Enta gisho gidi azina gelonna attanayee? Ta nayto, hessi hanonnaba gideysa hinte ereeta. Goday tana un7ethida gisho hintefe ta aadho cametas” yaagasu.
RUT 1:14 Hessan enti banta qaala dhoqu oothidi darsi yeekidosona. Orfi ba azina aayiw yeerada guye simmasu. Shin Uruuta iipe shaaketike gada ganta kana shasho gidasu.
RUT 1:15 Nuhaama zaarada, “Be7a, ne azina isha machiya ba asaakonne ba xoossatako simmasu, neka iira simmada ba” yaagasu.
RUT 1:16 Shin Uruuta zaarada, “Taani neepe shaaketana melanne nena aggada guye simmana mela tana waaysopa. Neeni biya soo awu gidikonne ta baana, neeni de7iya soo awunka taani daana. Ne derey ta dere gidana, ne Xoossay ta Xoossa gidana.
RUT 1:17 Ne hayqiya son ta hayqana, yan moogetana. Hayqope attishin, harabay tana neepe shaakiko, Goday tana pirdo.”
RUT 1:18 Uruuta iira baanaw qanxidaysa Nuhaama erada si77i gasu.
RUT 1:19 Yaape nam7u maccasati Beeteleme gakanaw bidosona. Bidi enti Beeteleme gakida wode he katama asa ubbay entaban malaaletidosona. Qassi maccasay, “Hanna Nuhaamo?” yaagidosona.
RUT 1:20 Iya zaarada ubba danda7iya Xoossay ta de7uwa daro camethida gisho, “Tana Nuhaamo goopite; ‘Maara’ giite.
RUT 1:21 Taani kumethi keyada bas, shin Goday tana mela kushe zaaris. Goday tana kawushshis; ubbaa danda7iya Xoossay tana un7ethis. Tana ayis Nuhaame gidi xeegetii?” yaagasu.
RUT 1:22 Hessada hanada Nuhaama ba na7aa mache Moo7abe Uruutira simmasu. Enti Beeteleme gakiday bangi buroo caka doometiya wodena.
RUT 2:1 Nuhaamis I azina Abemeleke baggara dabbothiya, Boo7eza geetetiya issi eretida dure addey de7ees.
RUT 2:2 Issi gallas Moo7abe Uruuta Nuhaamo, “Taw qadhetiya asi kaallada budhe qoranaw kathi cakiya bessi boosha?” yaagasu. Iyaka, “Ee ta naate ba” yaagasu.
RUT 2:3 Hessa gisho, Uruuta bada katha cakiya asa geeduwaape budhe qoro doomasu. Piko mela budhiya qoriya gadey Abemeleke dabbuwa Boo7eza gade gidis.
RUT 2:4 Heko, guutha wodepe Boo7ezi Beetelemepe gade bidi, kathi cakiya asaa, “Godi wolqa immo” gidi sarothis. Enti zaaridi, “Godi anjo” yaagidosona.
RUT 2:5 Yaatin, Boo7ezi kathi cakeyisata kaapuwa, “Hanna na7atetha maccasiya oonee?” yaagidi oychis.
RUT 2:6 Katha cakeyisata kaapoy zaaridi, “Hanna yegelsiya Nuhaamira Moo7abe biittafe yida Moo7abe maccasi.
RUT 2:7 Iya tana, ‘Katha cakeyisata geeduwa kaallada mirqiya giddofe budhe qoro?’ gada oychasu. Ha77i buroo shempanaw uttawus; wonta guura yoodepe hano gakanaw haysan qorashe gam7asu” yaagis.
RUT 2:8 Boo7ezi Uruuto, “Ta naate si7a; hizape budhe qoranaw hara gade boopa. Qassi haysafe awuka qaaxofa. Ta macca aylletara haysan pee7a.
RUT 2:9 Asay kathi cakiya bessaa xeella xeellada macca aylletara gidada enta geedo kaallada qora. Adde aylleti nena bochonaada taani entaw odas. Qassi nena saamiko, adde aylleti tikidi wothida haathaafe paqada uya” yaagis.
RUT 2:10 Uruuta shoca ziggada, “Taani allaga gidikina? Neeni haysa mela taw qadhetiday aybise?” yaagasu.
RUT 2:11 Boo7ezi zaaridi, “Ne azinay hayqosaape doomin, neeni ne azina aayes oothidaba ubba, neeni ne aayiw, ne aawanne ne yeletida biitta aggada, ne eronna deriyara daanaw yidaysa taani geeshshada si7as.
RUT 2:12 Neeni oothidabaas Godi new kushe zaaro. Neeni iya qefiya garsan attana gada yida, Isra7eele Goday Xoossay new kumethaba immo” yaagis.
RUT 2:13 Uruuta, “Ta godaw, neeni taw daro qadhetadasa; taani ne aylletape issiniwuka gakike, shin taw keehaba hasayada, tana minthethadasa” yaagasu.
RUT 2:14 Quma miya wode Boo7ezi, “Haa shiiqa; uythu ekada woyniyan tushada ma” yaagis. Iyaka katha cakiya asa matan uttasu. Boo7ezi iw banga shaashshi immis; iya mada kallin kathay gididi palahis.
RUT 2:15 Iya budhe qoranaw dendiya wode, Boo7ezi ba aylleta, “Mirqiya giddofeka iya qoriko iyo yeellayopite.
RUT 2:16 Ubbaka mirqiyaafe shoddidi iw yeggite iya eko; iyo kaccofite” yaagis.
RUT 2:17 Hessan Uruuta omarsi gakanaw qorasu. Iya qora pe7idaysa qoxin, tammu kilo giraame banga gideysa ekasu.
RUT 2:18 Iya he katha ba77a ekada katama simmasu; iya ay mela qoridaako ehada ba azina aayiw bessasu. Qassi iya mishin attida kathi ehidaysa kessada iw immasu.
RUT 2:19 I azina aayiya, “Hachi haysa awupe qoradii? Awun ootha pee7adii? New haysada keehida uray anjeto” yaagasu. Yaagin Uruuta iya ba ootha pee7ida gadiya godaaba ba azina aayes odasu. “Taani hachi oothada pee7ida gadiya godaa sunthay Boo7eza geetetees” yaagasu.
RUT 2:20 Nuhaama zaarada, “Hayqidaysatasinne de7on de7eysatas ba keehatetha aggiboonna Goday iya anjo” yaagasu. Gujadaka, “Ha addey nuus mata dabbo; nuna ubba wozanaw gathiya asatape issoy iya” yaagasu.
RUT 2:21 Moo7abe Uruuta, “I tana, ‘Ta kathay caketidi wurana gakanaw, ta oosanchotape shaaketonashin yada budhe qora’ yaagis” yaagasu.
RUT 2:22 Nuhaama ba na7a mache Uruutiko, “Ta naate, tumaka Boo7eza gadiyan oothiya maccasatara biiko new lo77o. Hara asa gade biiko nena metoothana” yaagasu.
RUT 2:23 Hessa gisho, bangaynne gistiya cakay wurana gakanaw Uruuta Boo7eza macca aylletako shiiqada, budhiya qorashe gam7asu. Qassi ba azina aayera issife de7asu.
RUT 3:1 Issi gallas Nuhaama ba na7a machiw, “Ta naate, neeni giigin daana mela taani new wula koyaako waananee?
RUT 3:2 Neeni entara gam7ida macca aylleta goday, Boo7ezi, nuus mata dabbo gidenneyee? I hachi qamma wudumman banga punana.
RUT 3:3 Neeni meecetada shitto tiyeta; ne lo77o ma7uwa ma7ada, duge wudumman ba; Bada Boo7ezi midi uyidi simmana gakanaw iya ayfen keyopa.
RUT 3:4 I hiixa aadhiya wode I awun dhiskiyako be7ada, iya afila qaarada iya tohoson zin7a agga. Neeni hananaba I new odana” yaagasu.
RUT 3:5 Uruuta, “Neeni gidaba ubba ta oothana” yaagasu.
RUT 3:6 Hessa gisho, Uruuta dendada duge moothi bada, I azina aayiya iw odidaba ubba oothasu.
RUT 3:7 Boo7ezi midi uyidi ba bolla pashkisidaape guye, katha cacha matan aadhidi zin7is. Uruuta lepara shiiqada, iya tohuwa qaarada zin7asu.
RUT 3:8 Giddi bilahe gidiyade I dagami dendidi shiretiya wode, issi maccasi iya tohoson zin7idaaro demmis.
RUT 3:9 Ika, “Neeni oonee?” yaagidi oychis. Iya, “Taani ne aylliw Uruuto; neeni ta azinaas mata dabbonne tana wozanaw danda7ey nena gidiya gisho ta bolla ne afilaa yegga” yaagasu.
RUT 3:10 Boo7ezi zaaridi, “Ta naate, Goday nena anjo! ha keehatethay kase ne oothidaysafe aadhees. Neeni manqo woyko dure gidida na7atetha adde koyabaaka.
RUT 3:11 Ha7i ta naate babofa. Neeni oychidaba ubba new taani oothana. Ta kataman de7iya asa ubbay neeni lo77o maccasi gideysa erees.
RUT 3:12 Taani mata dabbo gideysi tuma; shin taape daro matey de7ees.
RUT 3:13 Hachi qamma haysan aqa. Wonto I nena wozanaw koyiko lo77o, wozo. Shin I wozanaw koyonna ixiko, De7o Goday eriya mela, taani nena wozana. Sa7i wontana gakanaw haysan zin7a” yaagis.
RUT 3:14 Hessa gisho, iya Boo7eza tohoson sa7i wontana gakanaw zin7ada aqasu. Boo7ezi, “Maccasi katha moothi yidaysa oonika eropo” gida gisho Uruuta asi ase shaakidi eronna wode wonta, daro guura dendasu.
RUT 3:15 Boo7ezi iyo, “Ne ma7ida yida laxana ha bessa” yaagis. Iya bessin laatamu kilo giraame banga maki qolidi iyo ba7isis. Ika ba7ada guye katama basu.
RUT 3:16 Uruuta ba azina aayeko simmada yin, Nuhaama, “Ta naate, ne bida allaley waanidee?” yaagada oychasu. Uruutaka Boo7ezi oothidaba ubba odasu;
RUT 3:17 Gujadaka, “ ‘Ne azina aayeko mela kushe boopa’ gidi haysa laatamu kilo giraame banga immis” yaagasu.
RUT 3:18 Yaagin Nuhaama, “Ta naate, aybi hananeeko eretana gakanaw naaga. Addey hachi ha allaley oge oykonna shempenna” yaagasu.
RUT 4:1 Boo7ezi pude katama pengiya matan de7iya dabaaban keyidi uttis. I yan uttidashin kase I odida mata dabboy he bessa yin, Boo7ezi iyako, “La, ha shiiqada haysan utta” yaagis. Ika, shiiqidi uttis.
RUT 4:2 Boo7ezi he katama cimatape tammu asata dooridi, “Haysan uttite” yaagis. Entika uttidosona.
RUT 4:3 Boo7ezi ba mata dabbuwako “Moo7abe biittafe simmada yida Nuhaama, nu isha Abemeleke gadiya bayzana gawusu.
RUT 4:4 Hessa gisho, haysan uttida asa sinthaninne ta katama cimata sinthan, woza gada ta new odanaw qopas. Neepe hari maati bayna gisho neeni wozanaw koyiko woza; ixiko, neepe kaalliya maata dabboy tana gidiya gisho tana erisa” yaagis. I “Taani wozana” yaagis.
RUT 4:5 Boo7ezi, “Nuhaamipenne Moo7abe Uruutipe gadiya ne shammiya gallas am7iw Uruutoka woza; yaatiko hayqidaysa sunthay iya laata gadiyan xeegetana” yaagis.
RUT 4:6 Ha mata dabboy, “Hessa gidiko, taani wozanaw danda7ike; ayis giiko, hessi ta buzo laata qohees. Hessa gisho, neeni woza, taani danda7ike” yaagis.
RUT 4:7 Beni wode Isra7eele biittan wozuwanne laata duuthanaw bayziya woyko laatisiya baggay ba caammaa tohuwape kessidi, hanko shammiya woyko laattiya baggaas immees. Isra7eele biittan zal7esinne laatas maaray haysa.
RUT 4:8 Hessa gisho, he mata dabboy Boo7ezako, “Neeni woza” gidi, ba caammaa tohuwape kessidi immis.
RUT 4:9 Yaatin, Boo7ezi cimatanne asa ubba, “Taani Abemelekes, Keliwoonasinne Mahiloonas de7iyaba ubba Nuhaamipe shammidaysas hachi hinte marka.
RUT 4:10 Qassi hayqidaysa sunthay enta soo asaa suntha giddofe woyko katama asaa taybuwape dhayonnaada iya suntha iya laata gadiyan xeegisanaw kase Mahiloona machiw Uruutoka taani wozeysas hachi hinte ubbay marka” yaagis.
RUT 4:11 Katama pengiya dabaaban de7iya cimatinne asa ubbay, “Ee, haysas nuuni marka! Goday hanno ne ekiya maccasiw, Isra7eele asa mayza aayeta gidida Raheelidanne Liyada ootho. Neenika Efraatan dure gida, ne sunthay Beetelemen ereto.
RUT 4:12 Ne keethay, Goday, ha na7atetha maccaseepe new immiya zerethan Timaara Yihudas yelida Faaresa keethada ootho” yaagis.
RUT 4:13 Hessadaka oothidi, Boo7ezi Uruuto ekis iyaka iyaw macho gidasu. Goday iyo qanthatana mela oothin adde na7a yelasu.
RUT 4:14 Maccasati Nuhaamo, “Hachi nena heemmana asi dhaysiboonna Goday galatetto! Iya sunthay Isra7eelen dhoqu go!
RUT 4:15 Iyan new sa7i simmana, ne cimiya wode I nena heemmana. Ayis giiko, laapun adde naytapeka aathada nena siiqiyaranne new keehiyara, ne na7a machiya new na7a yelasu” yaagidosona.
RUT 4:16 Nuhaama na7aa idimmasu; loytha dichasu.
RUT 4:17 I shooro maccasati, “Nuhaamis adde na7i yeletis” yaagidi iya sunthaaka Yoobeda gidoosona. Yoobedi Dawita aawa Isseye yelidaysa.
RUT 4:18 Faaresa yeletethay haysafe kaallidi xaafetidaysa; Faaresi Hesroona yelis;
RUT 4:19 Hesrooni Raame yelis; Raamey Amnadaabe yelis;
RUT 4:20 Amnadaabey Na7asoona yelis; Na7asooni Salmoona yelis;
RUT 4:21 Salmooni Boo7eza yelis; Boo7ezi Yoobeda yelis;
RUT 4:22 Yoobedi Isseye yelis; Isseyey Dawita yelis.
1SA 1:1 Derey dariya Efreema biittan, Rama kataman de7iya, Efreema kochenne Zuufa koche gidida, Hilqaana geetetiya issi addey de7ees. I Yirohaama na7a; Yirohaami Elihu na7a; Elihu Toohu na7a; Toohuy Zuufa na7aa.
1SA 1:2 Hilqaanas nam7u macheti de7oosona; issinne sunthay Haanno; hankoori sunthay Pinaano. Pinaanis nayti de7oosona, shin Haannas na7i baawa.
1SA 1:3 Hilqaani laythan laythan Ubbaafe Wolqaama Godaa goyinnanawunne iyaw yarshanaw Seelo bees. Eeli nayti nam7ay, Afnaninne Finihaasi Godaa kahine gididi Seelon haggaazosona.
1SA 1:4 Hilqaani yarsho yarshiya wode ubban ashuwape issi issi kushe ba mache Pinaanis, ba adde naytasinne macca naytas huuphen huuphen immees.
1SA 1:5 Goday Haanno yelo diggikoka, Hilqaani iyo dosiya gisho, iw nam7u kushe immees.
1SA 1:6 Goday Haanno yelo diggida gisho, I dawuthiya iyo toochada yiloyawusu.
1SA 1:7 Hessi laythan laythan ubba wode haniyaba. Haanna Godaa keethi bida wode ubban I dawuthiya iya yeekana gakanawunne kathi ixana gakanaw yiloyawusu.
1SA 1:8 I azinay Hilqaani, “Haanne, ne ayis yeekay? Ayis kathi miikii? Ne wozanay ayis azzanii? Taani new tammu naytape aadhikinayee?” yaagees.
1SA 1:9 Issi gallas enti Seelon midaapenne uyidaape guye, Haanna denda eqasu. Kahiney Eeli Godaa keetha pengiya matan ba uttiya bessan uttis.
1SA 1:10 Haanna daro azzanida gisho cametada yeekashe Godaa woossasu.
1SA 1:11 Iya haysada yaagada qangetasu; “Ubbaafe Wolqaama Godaw, tana ne aylliw be7a. Ta metuwa be7ada, tana hassaya; tana ne aylliw dogopa. Neeni taw ne ayllees adde na7a immiko, iya de7o laytha ubban taani iya new immana; iya huuphey polo meedetenna” yaagasu.
1SA 1:12 Haanna Godaa woosa adussida wode Eeli I doona be7ees.
1SA 1:13 Haanna ba wozanan Xoossaa woossiya wode I mettershay qaaxees, shin I qaalay si7etenna; hessa gisho, Eeli iyo mathotidaada qopis.
1SA 1:14 I, “Neeni awude gakanaw mathotay? Woyne ushsha neepe digga” yaagis.
1SA 1:15 Haanni zaarada, “Ta Godaw, gidenna; taani daro azzanida maccas; taani ta shempuwafe Godaa woossaysipe attishin, woyne woyko mathoyiya ushshu uyabike.
1SA 1:16 Taani metoynne azzanoy darida gisho woossayis. Tana ne aylliw pathenna maccas oothada qopofa” yaagasu.
1SA 1:17 Eeli zaaridi, “Saro ba; neeni woossiyaba Isra7eele Xoossay new immo” yaagis.
1SA 1:18 Haanna, “Ne aylliya ne sinthan saba demmo” yaagasu. Hessafe guye, iya ba ogiya bada kathi masu; hessafe simmada iya azzanabuuku.
1SA 1:19 Wontetha gallas guura dendidi, Hilqaaninne iya soo asay Godaa goynidaape guye, Rama kataman de7iya banta soo simmidosona. Hilqaani ba mache Haannira aqis; Goday iyo qopis.
1SA 1:20 Iya qanthatada adde na7a yelasu. Haanna, “Taani Godaa woossin I tana si7is” gada iya sunthaa Sameela sunthasu.
1SA 1:21 Hilqaani ba soo asa ubbaara laytha yarsho Godaas yarshanawunne qangetha gathanaw Seelo bis.
1SA 1:22 Shin Haanna babuku. Iya ba azinaako, “Na7ay dhanthi duuthidaape guye, iya efada, Godaas immana; I merinaw yan daana” yaagasu.
1SA 1:23 Hilqaani, “Nena lo77idaba ootha; I dhanthi duuthana gakanaw son gam7anaw danda7aasa; Goday ba gelida qaala new polo” yaagis. Haanna ba na7aa dhanthi duuthana gakanaw son gam7asu.
1SA 1:24 Haanna na7ay dhanthi duuthidaape guye, na7aanne heedzu laytha wofaano laatamu kilo giraame dhiillenne ogoro kumetha woyne ushshu ekada Seelon de7iya Godaa keethi basu; he wode na7ay guutha.
1SA 1:25 Enti wofaanuwa shukidaape guye na7aa Eeliko efidosona.
1SA 1:26 Haanna, “Ta godaw, ne shempoy ero; ne sinthan eqada Godaa woossida maccasiya tana.
1SA 1:27 Ha na7aa immana mela woossin, Goday ta woossidaba immis.
1SA 1:28 Hessa gisho, taani iya Godaas immas; I ba de7o laytha ubban Godaas imetis” yaagasu. Enti yan Godaa goyinnidosona.
1SA 2:1 Haanna haysada yaagada woossasu; “Ta wozanay Godan ufaytees; ta kacey Godan dhoqu gis. Ta morketa bolla taani ceeqetayis; ne ashoy tana ufaysees.
1SA 2:2 Godaa mela geeshshi baawa; ne meli oonika baawa. Nu Xoossaafe attishin, hara Zaalli baawa.
1SA 2:3 Otoro haasaya aggite; otoro qaali hinte doonape keyopo. Godaa Xoossay ubbaa erees; asa ooso yiggidi xeellees.
1SA 2:4 Olanchota dongey meqis; shin daaburanchoti wolqa demmidosona.
1SA 2:5 Kallidaysati koshatidi unetidosona; shin koshatidaysati ha77i kallidosona. Maynthiya laapun nayta yelasu; shin daro nayta yelidaara barka attasu
1SA 2:6 Goday wodhees, pathees; Si7oolen yeggees, yaape kessees.
1SA 2:7 Goday dureyees; Goday manqethees; kawushshees; dhoqu oothees.
1SA 2:8 I manqota baanape denthees; metootanchota bidope denthees. Enta boncho asaara utisees; boncho araata laatisees. Biittaa baasoti Godaasa; enta bolla alamiya essis.
1SA 2:9 “I geeshshata tohuwa naagees; shin iitata dhuman si77i oothana; asi ba wolqan xoonenna;
1SA 2:10 Godaara eqeteysati liiqana; Goday salope enta bolla dadada dechana. Goday sa7an de7iya ubbaa pirdana; I ba kawas minotethi immana; I ba tiyidaysas xoono immana.”
1SA 2:11 Hessafe guye, Hilqaani Raman de7iya ba soo bis; shin na7ay Sameeli kahiniya Eelipe garsara Godaas oothees.
1SA 2:12 Eeli adde nayti iita; enti Godaa bonchokona.
1SA 2:13 He wode kahineti asaara de7iya gahetethan oothiya wogi de7ees. Hessika asay yarsho yarshiya wode kahiniya oosanchoy heedzu achara de7iya qaphe ekidi buroo ashoy kaxishin yees.
1SA 2:14 Doysiya otuwan woyko distiyan woyko xaaruwan ba qaphiya yeddidi, ay qommo asho gidikoka kessi efidi kahiniyas immees. Yarsho yarshanaw Seelo yaa Isra7eele asa ubbaa bolla enti haysada oothosona.
1SA 2:15 Qassi modhuwa yarsho bessan xuugganaape sinthe kahiniya oosanchoy yarsho yarshiya addiyako bidi, “Kahiney qaye ashope attishin, kaxida asho neepe ekonna gisho, iyaw caacanaw asho hamma” yaagees.
1SA 2:16 Addey zaaridi, “Koyrottidi modhoy xuugeto; hessafe guye, ne koyeysa eka” yaagees; shin kahiniya aylley, “Akay, taw ha77i imma, ne diggiko, taani wolqan ekana” yaagees.
1SA 2:17 Godaas immiya yarshuwa Eeli nayti kadhida gisho, enta nagaray Godaa sinthan aadhidi daris.
1SA 2:18 Shin Sameeli na7a de7ishe liinope oosetida efuude ma7o ma7idi Godaa sinthan oothees.
1SA 2:19 Sameela aayiya laythan laythan guutha qolle giigisada, laytha yarsho yarshanaw ba azinaara bashe iyaw ekada bawusu.
1SA 2:20 Eeli Hilqaananne iya machiw, “Hinte Godaas dummayidi immida ha na7aa bessan Goday new ha machefe hara nayta immo” yaagidi anjees; yaatin, enti banta soo simmoosona.
1SA 2:21 Goday Haanna anjin, qanthatada heedzu adde naytanne nam7u macca nayta yelasu. Na7ay Sameeli Godaa sinthan diccis.
1SA 2:22 Eeli daro cimis. Iya nayti Isra7eele asa ubbaa bolla oothida iitabaanne Geeshsha Dunkaaniya pengen Godaas oothiya maccasatara tunidaysa si7is.
1SA 2:23 Hessa gisho entako, “Hinte haysa melaba ayis oothetii? Hinte iita oosuwa taani asa ubbaafe si7as.
1SA 2:24 Ta nayto, hessa aggite; Godaa asay hintena giyabay lo77o gidenna.
1SA 2:25 Issi asi ase naaqiko, Xoossay iyaw gaannatana; shin asi Godaa naaqiko, iyaw gaannatanay oonee?” yaagis. Goday entana wodhanaw koyida gisho enti banta aawa zoriya si7onna ixidosona.
1SA 2:26 Na7ay Sameeli Godaa sinthaninne asa sinthan diccisinne sabetis.
1SA 2:27 Issi gallas nabey Eeliko yidi, “Goday haysada yaagees. ‘Ne aawa soo asay Gibxe biittan Paarona kushen de7iya wode ta entaw qoncabikina?
1SA 2:28 Ne aaway kahine gididi ta yarsho bessa keyana mela, ixaane cuyisana melanne ta sinthan efuude ma7idi oothana mela Isra7eele zare ubbaafe iya dooras. Isra7eele asay taman yarshiya yarsho ubbaa taani ne aawa kochaas immas.
1SA 2:29 Taani ta de7iya bessan shiiqana mela kiitida ta yarshuwanne imuwa hinte ayis kadhidetii? Ta asa Isra7eele, taw shiishida yarsho ubbaafe dooretidaysa midi modhana mela oothada ne nayta taape aathada ayis bonchadii?’
1SA 2:30 “Hessa gisho, Goday, Isra7eele Xoossay haysada yaagees. Ne kochaynne ne aawa kochay merinaw taw oothana. Shin ha77i hessi taape haako; tana boncheyisata bonchana; tana kadheysati kadhetana.
1SA 2:31 Ne kochan asi ceeggonna mela taani ne wolqaanne ne aawa soo asaa wolqaa dhaysiya wodey yaana.
1SA 2:32 Neeni ta keethan meto be7ana; taani Isra7eele asaas immiya anjuwa neeni be7ada qanaatana; shin ne soo asan ceeggana asi oonika baawa.
1SA 2:33 Taani ta yarsho bessaafe dhaysona asi de7iko, iya gaason ne ayfey afuxishe qooqana; ne wozanay azzanon xuugetana; ne kocha ubbay na7atethan hayqana.
1SA 2:34 Ne nayti nam7ay, Afnaninne Finihaasi issi gallas hayqana; hessa new malla gidana.
1SA 2:35 Ta wozanaadanne ta qofaada oothiya taw ammanetiya kahine denthana. Taani iyaw ammanetida soo asi immana; taani tiyida kawa sinthan enti ubba wode oothana.
1SA 2:36 Ne kochaa giddofe attida ubbay guutha miishe woyko baso uythi woossanaw yidi, iya sinthan gufannidi, ‘Taani miyaba demmana mela kahine oothada tana shuumarki’ yaagana” yaagis.
1SA 3:1 Na7ay Sameeli Eelipe garsara Godaas oothees; Godaa qaalay he wode daro al7o; qoncethika baawa.
1SA 3:2 Ayfey daaburin waayetidi xeelliya Eeli issi qamma ba bessan zin7is.
1SA 3:3 He wode Xoossa xompey buroo to7ibeenna; Godaa Taabotey de7iya keethan Sameeli dhiskis.
1SA 3:4 Goday Sameela xeegis; Sameeli, “Yee” gidi koyis.
1SA 3:5 I Eeliko woxi bidi, “Neeni xeegin Heko yas” yaagis. Shin Eeli, “Ta nena xeegabike; bada zin7a” yaagin, Sameeli bidi zin7is.
1SA 3:6 Qassi Goday, “Sameela” yaagidi nam7antho xeegin, Sameeli dendidi, Eeliko bidi, “Neeni xeegin Heko yas” yaagis. Shin Eeli, “Ta na7aw, ta nena xeegabike; bada zin7a” yaagis.
1SA 3:7 Godaa qaalay buroo iyaw qonciboonna gisho, Sameeli Godaa gideysa eribeenna.
1SA 3:8 Goday Sameela heedzantho xeegin dendidi, Eeliko bidi, “Neeni xeegin Heko yas” yaagis. Hessan Goday na7aa xeegidaysa Eeli akeekidi,
1SA 3:9 “Bada zin7a; I nena xeegiyaba gidiko, ‘Godaw, oda; ta ne aylley si7ayis’ yaaga” gidi, Eeli iyaw odin, Sameeli ba bessaa bidi zin7is.
1SA 3:10 Hessafe guye, Goday yidi iya matan eqidi, kaseysada, “Sameela, Sameela” yaagidi xeegis. Sameeli, “Ne aylley si7ees, oda” yaagis.
1SA 3:11 Goday Sameela, “Heko, taani asa haythas iitiya issiba Isra7eele bolla oothana hanayis.
1SA 3:12 He gallas taani Eeli soo asaa bolla oothana gada odida ubbaa koyrope wursethi gakanaw polana.
1SA 3:13 Eeli eridi seeronna aggida iya nayta nagaraa gisho, taani iya soo asaa bolla merinaw pirdanaysa iyaw kase oda wothas.
1SA 3:14 Hessa gisho, ‘Eeli soo asaa nagaray yarshoninne imon polo atto geetetenna’ yaagada taani iya soo asaas kase caaqas” yaagis.
1SA 3:15 Sameeli wontana gakanaw dhiskis; wontin dendidi, Xoossa keetha pengiya dooyis. Sameeli qoncidaba Eelis odanaw yayyis.
1SA 3:16 Eeli, “Ta na7aw, Sameela” yaagidi xeegis. Sameeli, “Yee” gidi koyis.
1SA 3:17 Eeli, “Goday new odiday aybee? Taape aykoka qosopa; neeni Xoossay new odidabaape issibaaka taape qosiko, Xoossi nena pirdo” yaagidi oychis.
1SA 3:18 Sameeli aykoka qosonna ubbaa Eelis odis. Eeli, “I Godaa; bana lo77idaba ootho” yaagis.
1SA 3:19 Sameeli diccishe bis; Goday iyara de7ees. Sameeli odidabaape issi qaalika sa7an wodhenna.
1SA 3:20 Daanepe Barsaabe gakanaw, Sameeli tuma Godaa nabe gideysa Isra7eele asa ubbay eris.
1SA 3:21 Goday Seelon qoncees; yan ba qaalan banatetha Sameelas qoncisees.
1SA 4:1 Sameeli odida qaalay Isra7eele ubbaa gakis. Isra7eeleti Filisxeematara oletanaw keyidosona; Isra7eeleti Aben7ezeran dunkaanin, Filisxeemeti Afeeqan dunkaanidosona.
1SA 4:2 Filisxeemeti cugan cugan gididi, Isra7eeletara oletanaw dendidosona; olay minnida wode Filisxeemeti Isra7eeleta xoonidi oyddu mukulu gidiya asaa wodhidosona.
1SA 4:3 Olanchoti dunkaanida gutaa simmida wode Isra7eele cimati, “Hachi Goday nuna Filisxeemeta kushen ayis aathidi immidee? Nuura baana melanne nu morketa kushepe nuna ashshana mela Godaa Taabotiya Seelope ane ehoos” yaagidosona.
1SA 4:4 Hessa gisho, asay Seelo kiittin, kiruubeta giddon araatan uttiya Ubbaafe Wolqaama Godaa Taabotiya ehidosona. Eeli nayti nam7ay Afnaninne Finihaasi caaqo Taabotiyara yan de7oosona.
1SA 4:5 Godaa Caaqo Taabotey asay dunkaanida gutaa gakida wode Isra7eele ubbay biitti qaaxana gakanaw banta qaala dhoqu oothidi, “Godaa Caaqo Taabotey gakis” yaagidi waassidosona.
1SA 4:6 Isra7eeleta waasuwa Filisxeemeti si7idi, “Ibraaweta gutan si7etiya wolqaama waasoy aybee?” yaagidosona. Godaa Taabotey enta gutaa yidaysa Filisxeemeti erida wode,
1SA 4:7 Yayyidi haysada yaagidosona; “Xoossay enta gutaa yis; nuna ayye! Haysa melabay haysafe kase hani erenna.
1SA 4:8 Nuna ayye! ha wolqaama Xoossaa kushepe nuna ashshanay oonee? Ha Xoossay Gibxeta mela biittan dumma dumma gadon shocis.
1SA 4:9 Hinteno Filisxeemeto, minnite! Adde gidite! Hessi hanonna ixiko, hinte enta kase aylletethan haaridaysada enti hintena haarana. Adde gidite; oletite” yaagidosona.
1SA 4:10 Filisxeemeti oletidi, Isra7eeleta xoonin Isra7eeleti banta soo soo baqatidosona. He olan daro asay hayqidosona; Isra7eele toho olanchotape hastamu mukulu asay hayqidosona.
1SA 4:11 Xoossaa Taabotey di7etis; Eeli nayti nam7ay, Afnaninne Finihaasi hayqidosona.
1SA 4:12 He gallas Biniyaame koche gidida issi addey ola dembafe woxishe yidi Seelo gakis. Ba azzanuwa erisanaw I ba ma7uwa daakidi, ba huuphen biitta qolis.
1SA 4:13 He addey gakiya wode Eeli ba wozanan Xoossa Taabotiyas hirgida gisho naagishe oge doonan de7iya ba oydiyan uttis. Addey katama gelidi, hanidaba odin, katama ubbay waaso goochi aggis.
1SA 4:14 Eeli he waasuwa si7idi, “Haysi aybi waaso?” yaagis. Addey ellesi bidi Eelis odis.
1SA 4:15 Eeli uddufun tammanne hospun laythi gidida cima; iya ayfey daaburidi xeelo aggis.
1SA 4:16 Addey Eeliko, “Ola dembafe yiday tana; taani hachi yaape baqatada yas” yaagis. Eeli, “Ta na7aw, yaatin waanidee?” yaagidi oychis.
1SA 4:17 Addey, “Isra7eeleti Filisxeemeta sinthafe baqatidosona; daro asi wuris; ne nayti nam7ay Afnaninne Finihaasi hayqidosona; Xoossaa Taabotey di77etis” yaagis.
1SA 4:18 Addey Xoossa Taabotiyabaa odida wode pengiya matan de7iya ba oydiyape Eeli guye kundis. I cimanne moollo gidiya gisho morgey meqin hayqis. Eeli Isra7eele biitta oytamu laythi haaris.
1SA 4:19 Eeli na7aa Pinihaasa machiya yelanaw wodey wurida qanthe. Xoossaa Taabotey di7etetha, ba bolluwanne ba azinaa hayquwa si7ida wode qoponna iqethi iyo oykin yelasu.
1SA 4:20 I shempoy keyiya wode yeliseysati, “Adde na7a yeladasa; yayyofa” yaagidosona. Shin entaw aykoka zaarabuuku; enti giyabaka si7abuku.
1SA 4:21 Iya ba na7aa Ikabooda gada sunthasu; Xoossaa Taabotey di7etida gishonne ba bolloynne ba azinay hayqida gisho, “Bonchoy Isra7eelepe shaaketis” yaagasu.
1SA 4:22 Iya, “Xoossaa Taabotey di7etida gisho bonchoy Isra7eelepe shaaketis” yaagasu.
1SA 5:1 Filisxeemeti Xoossa Taabotiya di77idaape guye Aben7ezerape Ashdooda efidosona.
1SA 5:2 Xoossa Taabotiya efidi, Daagone eeqa keethan gelsidi, Daagone misiliya matan wothidosona.
1SA 5:3 Ashdooda asay wontetha gallas guura dendidi be7iya wode Godaa Taabotiya sinthan Daagoni gufannidaysa be7idosona. Daagone denthidi, kase bessan essidosona.
1SA 5:4 Qassi wontetha gallas guura dendidi be7iya wode Godaa Taabotiya sinthan Daagoni sa7an gufannidaysa be7idosona. He wode Daagone huupheynne iya nam7u kushey meqidi pengiya bolla de7ees; hanko asatethay dumma attis.
1SA 5:5 Hachi gakanaw Daagone kahinetinne Ashdoodan de7iya Daagone keetha geliya asati ubbay Daagone pengiya yedhonna xambaali aadhey hessa gishosa.
1SA 5:6 Ashdooda katamaa bollanne iya heeran de7iya asaa bolla Godaa kushey deexis; Goday kixa harge yeddidi enta seeris.
1SA 5:7 Ashdooda katamaa asay hanidaba be7ida wode, “Isra7eele Xoossaa kushey nu bollanne nu xoossaa Daagone bolla deexida gisho, Isra7eele Xoossaa Taabotey nu matan gam7ofo” yaagidosona.
1SA 5:8 Hessa gisho, ichashu Filisxeeme halaqata ubbaa xeegidi, “Isra7eele Xoossaa Taabotiya waatino?” yaagidi oychidosona. Halaqati, “Isra7eele Xoossaa Taabotey Gaate katamaa boo” yaagidi zaaridosona. Isra7eele Xoossaa Taabotiya Gaate efidosona.
1SA 5:9 Shin Taabotey Gaate gakidaape guye, Godaa kushey he katamaa bolla deexidi, daro daganthis. Kataman de7iya asaa na7ape cima gakanaw kixa hargen shocis.
1SA 5:10 Hessa gisho, Xoossaa Taabotiya Eqroona katama yeddidosona. Xoossaa Taabotey Eqroona geliya wode, Eqroona asay, “Nunanne nu asaa dhaysanaw Isra7eele Xoossaa Taabotiya nuuko ehidosona” yaagidi waassidosona.
1SA 5:11 Hessa gisho, enti Filisxeeme halaqata xeegidi, “Nunanne nu asaa dhaysanaape sinthe Isra7eele Xoossaa Taabotiya haysafe diggite; iya iya bessaa guye zaarite” yaagidosona. Godaa kushey katamaa bolla deexida gisho Katama ubbay hayqo dagaman oyketis.
1SA 5:12 Hayqope attida asaa kixa hargey un7ethida gisho he katamaa asaa yeehoy salo gakis.
1SA 6:1 Godaa Taabotey Filisxeeme biittan laapun ageena uttis.
1SA 6:2 He wode Filisxeeme asay banta kahinetanne marota xeegidi, “Godaa Taabotiya nuuni waatino? Nuuni guye iya bessaa iya waati yeddaneeko nuus odite” yaagidosona.
1SA 6:3 Enti zaaridi, “Isra7eele Xoossaa Taabotiya guye yeddishe mela kushe yeddofite. Ay hanidika nagara yarshora yeddite. Hessa oothiko hinte paxana; iya kushey hinte bollafe ayis kichiboonako hinte erana” yaagidosona.
1SA 6:4 Filisxeeme asay, “Nuuni yeddanaw bessiya nagara yarshoy aybee?” yaagidi oychidosona. Enti, “Hintenanne hinte halaqata gakida gadoy issino gidiya gisho, Filisxeeme halaqata taybon ichashu worqa kixatanne ichashu worqa ecereta yeddite.
1SA 6:5 Hinte he kixatanne hinte biitta dhaysiya he ecereta misileta medhidi, Isra7eele Xoossaas boncho immite. Ooni eri I hinte bollafe, hinte xoossata bollafenne hinte biitta bollafe ba kushiya denthana.
1SA 6:6 Gibxe asaynne enta kawoy zore ekonna ixidaysada hinte ayis zore ekeketii? Goday enta daro seerin Isra7eeleti banta ogiya baana mela yeddibookona?
1SA 6:7 Ha77i issi ooratha gaare giigisite; qambara wothiboona nam7u dhanthiya miizata he gaariyan waaxite; shin marata entafe duuthidi son ashshite.
1SA 6:8 Godaa Taabotiya gaariya bolla wothite; nagara yarshos giigisida worqa kixatanne worqa ecereta saaxinen yeggidi Godaa Taabotiya matan wothidi I baana mela yeddite.
1SA 6:9 Shin I biya bessa be7ite; I ba zawa oykidi, Beet-Sameesa simmidi biyaba gidiko, ha gaduwa nu bolla ehiday Godaa gideysa bessees. Shin I hara soo biiko haysi nu bolla coo gakisipe attishin, nuna dechiday Godaa kushe gidonnaysa erana” yaagidi zaaridosona.
1SA 6:10 Enti geetetidaysada oothidosona; nam7u dhanthiya miizata ekidi, gaaren waaxidosona; marata soo zaaridi gordidosona.
1SA 6:11 Enti Godaa Taabotiya, worqa kixanne ecere misileti de7iya saaxiniya gaaren wothidosona.
1SA 6:12 Hessafe guye, miizati Beet-Sameesa efiya ogiya oykidi gede haa goonna “Himbaa” gidi waassishe bidosona. Filisxeeme halaqati miizata geedo kaallidi, Beet-Sameesa zawa gakanaw bidosona.
1SA 6:13 Beet-Sameesa asay he wode zangaaran giste cakoosona; enti dhoqu gidi xeellidi, Taabotiya be7idi ufaytidosona.
1SA 6:14 Gaarey Beet-Sameesan de7iya Iyyasu geetetiya uraa gade gakidi, issi gita shuchaa matan eqis. Enti gaariya mithaa qeridi, xuussa yarsho oothidi he miizata Godaas yarshidosona.
1SA 6:15 Leeweti Godaa Taabotiyanne worqa miisheti de7iya saaxiniya gaariyape wodhisidi, gita shucha bolla wothidosona. He gallas Beet-Sameesa asay Godaas xuussa yarshonne hara yarshota yarshidosona.
1SA 6:16 Ichashu Filisxeeme halaqati hanidaba ubbaa be7idi he gallas Eqroona simmidosona.
1SA 6:17 Worqa kixati Filisxeeme halaqati nagara yarsho oothidi Godaas kiitida Ashdooda, Gaaza, Asqaloona, Gaatenne Eqroona geetetiya ichashu katamata sunthan issuwa issuwa immidosona.
1SA 6:18 Worqa ecereta tayboy Filisxeeme halaqata ichashay de7iya gimbetida katamatanne heeran de7iya gutata taybuwa mela. Beet-Sameesan de7iya Iyyasu geetetiya uraa gaden Godaa Taabotiya wothida gita shuchay hachi gakanaw marka gididi de7ees.
1SA 6:19 Shin enti Godaa Taabotiyas giddo baggaa be7ida gisho Goday Beet-Sameesa asaape laapun tammu asata wodhis. Goday entafe daro asaa wodhida gisho asay yeekidosona.
1SA 6:20 Hessa gisho, Beet-Sameesa asay, “Godaa sinthan, ha geeshsha Xoossaa sinthan ooni eqanaw danda7ii? Taabotey nuupe keyidi oodeko baanee?” yaagidosona.
1SA 6:21 Qiriyat-Yi7aariman de7iya asaako kiita yeddidi, “Filisxeeme asay Godaa Taabotiya zaaridosona; yidi iya hinteko ekite” yaagidosona.
1SA 7:1 Qiriyat-Yi7aarima asay yidi, Godaa Taabotiya efidi dere huuphen de7iya Amnadaabe son wothidosona. Godaa Taabotiya naagana mela Amnadaabe na7aa Alaazara dummayidi sunthidosona.
1SA 7:2 Taabotey Qiriyat-Yi7aariman daro wode gam7is; yan laatamu laythi uttis. Isra7eele asa ubbay azzanidi Godaa koydosona.
1SA 7:3 Sameeli Isra7eele asaako, “Kumetha wozanape hinte Godaako simmidaba gidiko, allaga xoossatanne Astaroote eeqa hinte giddofe diggite. Hintenatethaa Godaas sheedhite; iya xalaalas kiitetite; I hintena Filisxeemeta kushepe ashshana” yaagis.
1SA 7:4 Hessa gisho, Isra7eele asay Ba7aalenne Astaroote eeqa banta giddofe diggidi, Godaa xalaala goyinnidosona.
1SA 7:5 Hessafe guye, Sameeli, “Isra7eeleta, ubbay Mixipha shiiqite; taani yan hintew Godaa woossana” yaagis.
1SA 7:6 Enti Mixipha shiiqidi haathe duuqidi, Godaa sinthan gussidosona; he gallas xoomidosona; he bessan, “Nuuni Godaa bolla nagara oothida” yaagidi paaxidosona. Mixiphan Sameeli Isra7eele asaa bolla daynnatis.
1SA 7:7 Isra7eeleti Mixiphan shiiqidaysa Filisxeeme asay si7ida wode enta olanaw keyidosona. Isra7eeleti hessa si7idi, Filisxeemetas yayyidosona.
1SA 7:8 Isra7eele asay Sameelako, “Filisxeeme asaa kushepe nuna ashshana mela neeni Godaa, nu Xoossa woosa aggofa” yaagidosona.
1SA 7:9 Sameeli issi dhammiya dorsa na7a ekidi, kumethi xuussa yarsho oothidi Godaas yarshis; Isra7eele asaa gisho Godaa woossis; Goday iya woosa si7is.
1SA 7:10 Sameeli xuussa yarsho yarshiya wode Filisxeemeti Isra7eeleta olanaw shiiqidosona. Shin he gallas Filisxeemeta bolla Goday gita dada gunthidi daganthin, enti Isra7eeleta sinthafe baqatidosona.
1SA 7:11 Isra7eeleti Mixiphafe keyidi, Filisxeemeta yedethidi, Beet-Kaarape garsa baggara de7iya bessaa gakanaw oge bolla wodhidosona.
1SA 7:12 Hessafe guye, Sameeli issi shuchu ekidi, Mixiphafenne Shenape giddon essis; “Ha77i gakanaw Goday nuna maaddis” yaagidi he bessaa Aben7ezera gidi sunthis.
1SA 7:13 Filisxeeme asay xoonetidosona; enti Isra7eele biitta bolla nam7antho dendibookona. Sameeli de7ida laytha ubban Godaa kushey Filisxeeme asaa bolla deexis.
1SA 7:14 Filisxeeme asay Eqroonape Gaate gakanaw Isra7eelepe di77ida katamati Isra7eeles simmidosona. Isra7eele asay banta kase zawa Filisxeeme asaa kushepe wothi ekidosona. Isra7eele asaynne Amoore asay saro de7is.
1SA 7:15 Sameeli ba de7o laytha ubban Isra7eele bolla pirdees.
1SA 7:16 Sameeli laythan laythan Beetele, Galgalanne Mixipha yuuyidi Isra7eele bolla pirdees.
1SA 7:17 Iya keethay Raman de7iya gisho yaa simmidi he bessanka Isra7eele bolla pirdees. I Raman Godaas yarsho bessi keexis.
1SA 8:1 Sameeli cimida wode ba nayta Isra7eele bolla daynna oothidi shuumis.
1SA 8:2 Iya bayra na7aa sunthay Iyyu7eela; kaalo na7a sunthay Abiya; enti Barsaaben pirdoosona.
1SA 8:3 Shin iya nayti banta aawa ogiya kaallibookona. Enti bessonna go77a demmanaw guye simmidosona; wodhaafe ekidosona, suure pirda wobbisidosona.
1SA 8:4 Hessa gisho, Isra7eele cimati issife shiiqidi, Sameelako Rama yidi,
1SA 8:5 “Heko neeni cimadasa; ne nayti ne ogiya kaallokona; hara kawotethati ootheysada nuna aysiya kawo ha77i nuus shuuma” yaagidosona.
1SA 8:6 Enti, “Nuna aysiya kawo nuus imma” gidi oychidaysi Sameela ufaysibeenna. Hessa gisho, Sameeli Godaa woossis.
1SA 8:7 Goday Sameela, “Taani enta bolla kawotonnaada nena gidonashin tana ixida gisho asay neeko giyaba ubbaa si7a.
1SA 8:8 Enta taani Gibxefe kessida wodiyape doomidi hachi gakanaw tana aggidi, hara xoossata goyinnishe de7idosona. Ha77i enti ta bolla oothida ubbaa ne bolla oothosona.
1SA 8:9 Ha77i enti giyaba si7a; shin enta bolla kawotana kawa wogaa entaw minthada oda” yaagis.
1SA 8:10 Kawo oychida deriyas Goday odida qaala ubbaa Sameeli yaagidi odis.
1SA 8:11 “Hinte bolla kawotana kawoy oothanabay haysa; I hinte adde nayta ekidi, para gaare asatanne para asata oothana; enti iya gaariya sinthan woxana.
1SA 8:12 Entafe attidaysata shaalaqatanne hamsalaqata, harata iya biitta goyeyisata iya kathaa cakeyisata, qassi harata iya ola miishenne para gaare miishe ootheyisata kessana.
1SA 8:13 Hinte macca naytaka efidi, baw shitto giigiseyisata, katheysatanne uukeyisata oothana.
1SA 8:14 Hinte goshshaafe, woyne gadepenne shamaho gadepe lo77o bessata ekidi, ba moorinnatas immana.
1SA 8:15 Kathaafenne woyniyape tammaafe issi kushiya ekidi ba shuumatasinne ba moorinnatas immana.
1SA 8:16 Hinte adde aylletape, macca aylletape, hinte na7atethatafenne hinte hariyape lo77eysa baw go7etanaw ekana.
1SA 8:17 Hinte dorsafenne deeshape tammaafe issi kushe ekana; hinte iya oosancho gidana.
1SA 8:18 He gallasay gakida wode hinte doorida kawoy gathiya qohuwa gisho waassana; shin he gallas Goday hinte waasuwa si7enna” yaagis.
1SA 8:19 Gidoshin, asay Sameela qaala si7onna ixidi, “Akay, nuus kawoy de7o.
1SA 8:20 Hara kawotethata mela nuna kaalethiya, nu sinthan biyanne nu olaa oletiya kawoy de7o.”
1SA 8:21 Sameeli asaa qaala ubbaa si7idi, Godaas odis.
1SA 8:22 Goday Sameelako, “Enta qaala si7a; enta bolla kawo kawotha” yaagis. Sameeli Isra7eele asaako, “Hinte soo soo simmite” yaagis.
1SA 9:1 Biniyaame koche gidida issi Qiisa geetetiya addey de7ees; I eretida asi. I Abi7eela na7a; Abeeli Xaroora na7a; Xaroori Bakoraate na7a; Bakorati Biniyaame koche gidida Afeeqa na7a.
1SA 9:2 Iyaw Saa7ola geetetiya issi mala lo77o gidida pantha na7i de7ees. Isra7eeleta giddon iya mela mala lo77oy baawa; I asi ubbay iya hashepe garsan attiya adussa asi.
1SA 9:3 Issi gallas Saa7ola aawa Qiisa hareti dhayidosona; Qiisi ba na7aa Saa7olako, “Oosanchotape issuwa ekada hareta koyanaw ba” yaagis.
1SA 9:4 Enti derey dariya Efreema biittaranne Shalisha biittara koyishe aadhidosona, shin hareta demmibookona. Qassi Sha7alima biittara koyishe aadhidosona, shin yanka hareti dookona. Biniyaame biittara aadhidosona, shin yanka demmibookona.
1SA 9:5 Enti Zuufa biitta gakida wode Saa7oli baara de7iya oosanchuwako, “Haaya; ane guye simmoos; aaway haretaba qopeysa aggidi, nuus hirgana” yaagis.
1SA 9:6 Shin oosanchoy, “Heko, issi bonchetida Xoossa asi ha kataman de7ees; I odiya ubbay poletees. Ane ha77i yaa boos; ooni eri nu baana ogiya I nuus odaneko” yaagis.
1SA 9:7 Saa7oli, “Nu biyaba gidiko iyaw ay immanee? Nu oykida kathay wuris; nu Xoossa asas immiyabay baawa. Nuus aybi de7ii?” yaagis.
1SA 9:8 Oosanchoy zaaridi, “Ta kushen guutha bira santimey de7ees; nu baana ogiya nuus odana mela Xoossa uraas hanno immana” yaagis.
1SA 9:9 (Beni wode Isra7eele biittan issi asi Xoosse oychanaw bishe, “Ane qoncethi be7iya asako boos” yaagees. Ha77i nabe geeteteysi he wode qoncethi be7iya asi geetetees.)
1SA 9:10 Saa7oli zaaridi, “Lo77o; yedha” yaagin, Xoossa uray de7iya katamaa bidosona.
1SA 9:11 Enti pude katamaa keyishin, haathe tikanaw yaa geela7otara ogen gahetidi, “Qoncethi be7iya asi haysan de7ii?” yaagidi oychidosona.
1SA 9:12 Enti, “Ee de7ees; I hintefe sinthan de7ees; ellesidi biite. Hachi asay dhoqa goyinno bessan yarsho yarshiya gisho, I nu katamaa yis.
1SA 9:13 Hinte katamaa geliya wode I maanaw dhoqa goyinno bessaa keyonna de7ishin hinte iya demmana. I yarshuwa anjanaw koshshiya gisho I gakonna de7ishin asay kathaa meenna. I anjidaape guye xeegetidaysati maana. Elle keyite; hinte iya ha77i demmana” yaagidosona.
1SA 9:14 Enti katamaa geliya wode Sameeli goyinno bessaa keyanaw bishe entara gahetis.
1SA 9:15 Saa7oli yaanape kase gallas Sameelas Goday haysada yaagidi qoncisis;
1SA 9:16 “Wonto hannoode Biniyaame biittafe issi asi ta neeko yeddana; I ta asaa Isra7eele kaalethana mela tiya. I ta asaa Filisxeeme kushepe ashshana; ta asa waasoy taako gakida gisho ta enta be7as” yaagis.
1SA 9:17 Sameeli Saa7ola be7ida wode Goday, “Taani new odida uray haysa; I ta asaa kaalethana” yaagis.
1SA 9:18 Saa7oli gimbe dirsa pengiya matan de7iya Sameelako shiiqidi, “Qoncethi be7iya ura soy awuneko taw odarkii?” yaagis.
1SA 9:19 Sameeli zaaridi, “Qoncethi be7ey tana. Hachi hinte taara miya gisho taape sinthatidi goyinno bessaa biite. Taani nena wonto guura yeddana; ne wozanan de7iya ubbaa ta new odana.
1SA 9:20 Heedzu gallasape sinthe dhayida haretaba gidiko enti bentida gisho hirgofa. Isra7eele asa ubbaa amoy oonee? Nenanne ne aawa soo asaa gidennee?” yaagis.
1SA 9:21 Saa7oli zaaridi, “Shin taani Isra7eele zare ubbaafe laafa gidida Biniyaame koche gidikina? Ta soo asay Biniyaame kochaa giddon guutha gidennee? Neeni ayis taw haysa melaba oday?” yaagis.
1SA 9:22 Hessafe guye, Sameeli Saa7olanne iya oosanchoy efidi, dalga keethi gelsidi he bessaa xeegetida hastamu gidiya asaa giddon boncho bessan utisis.
1SA 9:23 Sameeli kathi katheysako, “Ne matan dumma wothashsha gada taani new immida ashuwa hamma” yaagis.
1SA 9:24 Kathi katheysi missa ashuwa ehidi, Saa7ola sinthan wothis. Sameeli Saa7olako, “Ta new dumma shaakada wothida ashoy haysa; ekada ma. Taani imathata xeegida wodepe doomada haysa new ashshas” yaagis. He gallas Saa7oli Sameelara mis.
1SA 9:25 Enti goyinno bessaafe duge katama wodhin, keetha bolla de7iya bessan Sameeli Saa7olara odetis.
1SA 9:26 Sa7i wontin, Sameeli Saa7ola keetha bollafe xeegidi, “Denda; ta nena moyzana” yaagis. Saa7oli dendin, nam7ay oge bolla keyidosona.
1SA 9:27 Enti katama gaxa gakishin, Sameeli Saa7olako, “Ne oosanchoy sinthe baana mela oda” yaagis. Oosanchoy sinthe aadhidi bin, Sameeli Saa7olako, “Xoossi gidaba ta new odana mela haysan guuthu gam7a” yaagis.
1SA 10:1 He wode Sameeli tigiyabara zayte ekidi, Saa7ola huuphen tiyis. Saa7ola yeeridi, haysada yaagis; “Ba asaa Isra7eele kaalethana mela Goday nena tiyis.
1SA 10:2 Neeni hachi taape shaaketada biya wode Raheeli duufuwa matan Biniyaame zawan de7iya Xalxaha geetetiya bessan nam7u asatara gahetana. Enti nena, ‘Ne koyanaw bida hareti bentidosona; ha77i ne aaway hareta qopeysa aggidi, ta na7ay waanidesha?’ yaagidi new hirgees” yaagidi odana.
1SA 10:3 Neeni he bessaafe dendada, Taabore gita mithaa gakanaw baana. Xoossaako Beetele biya heedzu asati yan neera gahetana. Entafe issoy heedzu deesha mari tookis; nam7anthoy heedzu uythi tookis; heedzanthoy ogoro kumitha woyne tookis.
1SA 10:4 Enti nena sarothana; new nam7u uythu immana; ne enta kushepe he uythaa ekanaw koshshees.
1SA 10:5 “Hessafe guye, neeni Filisxeeme olanchota cugay de7iya Xoossa deriya Gib7a baana. Neeni he katamaa gakiya wode diithara karaabora, suusul7enne zaye punnidi kaa7ishenne tinbite odishe, goyinno bessaafe wodhiya nabe cugara gahetana.
1SA 10:6 Godaa Ayyaanay ne bolla wolqan wodhana; neeni entara tinbite odana; neeni laametada hara asi gidana.
1SA 10:7 Ha mallati poletiya wode Xoossay neera de7iya gisho ne oothanaw danda7iyaba ubbaa ootha.
1SA 10:8 “Neeni taape sinthatada Galgala wodha. Taani xuussa yarshonne sarotetha yarsho yarshanaw neeko baana. Ta neeko bada ne oothanaba odana gakanaw laapun gallas gam7a” yaagis.
1SA 10:9 Saa7oli Sameelape shaaketida wode Xoossay Saa7ola wozanaa laammis; Sameeli odida mallati ubbay he gallas hanidosona.
1SA 10:10 Saa7olinne iya aylley Gib7a gakiya wode nabe cugay iyara gahetis. Xoossa Ayyaanay iya bolla wolqara wodhin I enta giddon tinbite odetis.
1SA 10:11 Saa7ola kase eriya ubbay I nabetara tinbite odeteysa be7ida wode, “Qiisa na7ay waanidee? Saa7oli nabe yaree?” yaagidosona.
1SA 10:12 He bessan de7iya issi uray, “Nu enta aaway ooneko eriw?” yaagidi oychis. Hessa gisho, “Saa7oli nabe kochee?” geysi hayse gidis.
1SA 10:13 Saa7oli tinbite odeysa wursidaape guye goyinno zumaa bolla keyis.
1SA 10:14 Saa7ola aawa ishay Saa7olanne iya aylliya, “Awu bidetii?” yaagis. Saa7oli, “Hareta koyanaw bida; hareti bentonna ixin Sameela oychanaw bida” yaagis.
1SA 10:15 Saa7ola aawa ishay, “Hayyana Sameeli new gidaba taw odarkii” yaagis.
1SA 10:16 Saa7oli, “Hareti bentidaysa nabey Sameeli nuus geeshshidi odis” yaagis. Shin “Ne kawo gidana” gidi Sameeli iyaw odidaysa ba aawa ishas odibeenna.
1SA 10:17 Hessafe guye, Sameeli Mixiphan Isra7eele asaa Godaa sinthan shiishis.
1SA 10:18 Enta, “Goday, Isra7eele Xoossay haysada yaagees; ‘Taani Isra7eele Gibxefe kessas; Gibxe asaa kushepenne hintena un7ethiya kawotethata ubbaa kushepe ashshas.’
1SA 10:19 Shin hachi hintena hinte metuwapenne waayiyape ashshiya tana hinte Xoossaa ixideta. ‘Akay, nuus kawo kawotha’ yaagideta. Hessa gisho, ha77i hinte, hinte kochan kochan gididi Godaa sinthe shiiqite” yaagis.
1SA 10:20 Sameeli Isra7eele zare shiishin, Biniyaame kochay dooretis.
1SA 10:21 Biniyaame kochaa shiishin, Maxira kochay dooretis. Wursethan Qiisa na7ay Saa7oli dooretis; enti iya koydosona, shin I bentibeenna.
1SA 10:22 Hessa gisho enti, “Addey ha bessaa yidee?” yaagidi Godaa oychidosona. Goday, “Ee, Saa7oli miishe giddon qosetidi uttis” yaagis.
1SA 10:23 Enti woxi bidi, qosetida bessaafe kessi ehidosona. Asaa giddon I eqiya wode asi ubbay iya hashepe garsara attiya adussa asi.
1SA 10:24 Sameeli asaako, “Goday doorida addiya be7itee? Iya daaniya asi ha asa giddon oonika baawa” yaagis. Asa ubbay banta qaala dhoqu oothidi, “Kawoy birata tuussi gido” yaagis.
1SA 10:25 Hessafe guye, Sameeli kawotetha wogaa asaas odis; xaatha maxaafan he wogaa xaafidi Godaa sinthan wothis. Yaatidi Sameeli asa ubbaa ba soo soo moyzis.
1SA 10:26 Saa7oli ba soo Gib7a bis; Xoossay enta wozanaa bochida mino asati Saa7olara bidosona.
1SA 10:27 Shin issi issi pathonna asati, “Ha addey nuna waatidi ashshanee?” yaagidosona. Enti iya kadhidi, iyaw ay imotaka immibookona. Shin Saa7oli si77i gis.
1SA 11:1 Issi ageenape guye, Amoone kawoy Na7oosi dendidi, Galadan de7iya Yaabesa katamaa teqis. Yaabesa asay, “Neeni nuura caaqa; nuuni new haaretana” yaagidosona.
1SA 11:2 Na7oosi, “Taani hintera caaqanay hinte ushacha ayfiya wooca kessada Isra7eele kawshidaape guyena” yaagis.
1SA 11:3 Yaabesa cimati Naa7osako, “Isra7eele biitta ubbaa nuuni kiita yeddana mela laapun gallas taka; nuna ashshiya asi dhayiko nuuni new kushe immana” yaagidosona.
1SA 11:4 Kiitetida asay Saa7oli de7iya bessaa Gib7a gakidi ha odaa asaas odidosona; asa ubbay banta qaala dhoqu oothidi yeekidosona.
1SA 11:5 He wode Saa7oli ba boorata laaggidi goshshafe yishe, “Asay waanidee? Ayis yeekona?” yaagidi oychis. Enti Yaabesa asay gidaba iyaw odidosona.
1SA 11:6 Ha qaala Saa7oli si7ida wode Xoossa Ayyaanay iya bolla wolqan wodhis; Saa7oli shene eexis.
1SA 11:7 Saa7oli waaxa boorata muxerethidi, “Saa7olanne Sameela kaallidi, keyonna asa boorati haysada muxetana” yaagidi kiitetida asata bolla Isra7eele biitta ubba yeddis. He wode asa ubbay Godaas yayyidosona; enti issi asada hanidi keyidosona.
1SA 11:8 Saa7oli Beezeqan enta shiishidi taybida wode Isra7eele asay heedzu xeetu mukulu; Yihuda asay hastamu mukulu gidis.
1SA 11:9 Kiitetida asay, “Bidi Yaabesa Galada asaas, ‘Wonto xalqey michiya wode nuuni hintena ashshana yaagidi odite’ ” yaagidosona. Kiitetida asay bidi, Yaabesa asaas hessa odin, enti daro ufaytidosona.
1SA 11:10 Yaabesa asay Amoonetako, “Nuuni wonto hintew kushe immana; hinte nu bolla dosidaba oothite” yaagidosona.
1SA 11:11 Wontetha gallas Saa7oli ba asaa heedzu cugan shaakis. Enti sa7i wontiya wode Amoone asay dunkaanida gutaa gelidi, xalqey michana gakanaw Amooneta goyridosona. Goyretethaafe attidaysati nam7u asi issife doonnaada baw baw baqaatis.
1SA 11:12 Isra7eele asay Sameelako, “Saa7oli nu bolla kawotane yaagida asati oonantee? Enti ooneko kessite; nu enta wodhana” yaagis.
1SA 11:13 Shin Saa7oli, “Hachi Goday Isra7eele ashshida gisho issi asika hayqenna” yaagidi zaaris.
1SA 11:14 Sameeli, “Haayite; Galgala bidi, yan Saa7oli kawo gideysa zaaridi erisoos” yaagis.
1SA 11:15 Hessa gisho, asa ubbay Galgala bidi, Godaa sinthan Saa7oli kawo gideysa erisidosona. Yan issifetetha yarsho Godaa sinthan yarshidosona. Saa7olinne Isra7eele asa ubbay he bessan ba7aale ufaysan bonchidosona.
1SA 12:1 Sameeli Isra7eele ubbaako, “Hinte taw odida ubbaa si7ada, hinte bolla kawo kawothas.
1SA 12:2 Ha77i hintena kaalethanaw kawoy de7ees. Taani daro cimada puulumas; ta nayti hintera de7oosona. Taani ta na7atethafe doomada hachi gakanaw hintena kaalethas.
1SA 12:3 Heko, taani hinte sinthan eqas; Godaa sinthaninne I tiyida kawa sinthan ta bolla markatite. Taani oodde booru ekadina? Oodde hare ekadina? Oona cimmadina? Oona un7ethadina? Be7ashe be7onnaada hananaw oodefe wodhaafe ekadina? Haysatape issuwa taani oothidaba gidiko taw odite; ta qanxana” yaagis.
1SA 12:4 Enti zaaridi, “Neeni nuna cimmabaaka; woyko nuna un7ethabaaka; ne oodde kushepe aybaka ekabaaka” yaagidosona.
1SA 12:5 Sameeli, “Hinte ta kushen ay balaka demmiboonaysa Godaynne I tiyida kawoy hachi hinte bolla marka” yaagis. Asay, “Ee, Xoossay marka” yaagidosona.
1SA 12:6 Qassika Sameeli, “Musenne Aarona dooridaynne hinte mayzata Gibxefe kessiday Godaa.
1SA 12:7 Ha77i hintewunne hinte mayzatas Goday oothida xillo ooso ubbaas taani hintenera Godaa sinthan mootetana mela haysan eqite.
1SA 12:8 Yayqoobinne iya soo asay Gibxen de7ishin, Gibxe asay enta un7ethida wode hinte mayzati Godaako waassidosona. Goday Musenne Aarona kiittis; enti hinte mayzata Gibxefe kessidi haysan wothidosona.
1SA 12:9 “Shin Isra7eele asay Godaa banta Xoossaa dogidosona. Goday enta Haxoora tora mocona Sisaara kushen, Filisxeeme asaa kusheninne Moo7abe kawa kushen aathidi immin enta olidosona.
1SA 12:10 Enti, ‘Nuuni nagara oothida; Godaa aggidi, Ba7aalenne Astaroota goyinnida. Shin ha77i ne nuna nu morketa kushepe ashsha; nuuni nena goyinnana’ yaagidi Godaako waassidosona.
1SA 12:11 Goday Gediyoona, Baaraqa, Yoftaahenne Sameela kiittidi, hinte yuusho ubban de7iya morketa kushepe hintena ashshis. Yaatin, hinte saro de7ideta.
1SA 12:12 “Amoone kawoy Na7oosi hinteko yidaysa be7ida wode Goday hinte Xoossay hinte kawo gidikoka, hinte, ‘Akay, nuuni kawo koyoos’ yaagideta.
1SA 12:13 Ha77i hinte dooridanne oychida kawoy haysish. Heko, Goday hinte bolla kawothis.
1SA 12:14 Hinte Godaas yayyiko, iyaw kiitetiko, iya qaala si7iko, iya kiitaa bolla makallonna ixiko, hintenne hinte bolla kawotiya kawoy Godaa hinte Xoossaa kaalliko ubbabay suurana.
1SA 12:15 Shin hinte Godaa qaalas kiitetonna ixikonne iya kiitaa bolla makalliko, Godaa pirday kase hinte aawata bolla yidaysada hinte bollaka yaana.
1SA 12:16 “Hiza minnidi eqite; Goday hinte ayfiya sinthan oothana gitaba be7ite.
1SA 12:17 Ha77i giste caka wode gidennee? Goday dadanne ira yeddana mela taani Godaa woossana. Hinte kawo oychidi, Godaa sinthan ay mela iitaba oothidaako hinte akeekana” yaagis.
1SA 12:18 Sameeli Godaa woossis; Goday he gallas dadanne ira yeddis; hessa gisho, asay Godaanne Sameela daro yayyidosona.
1SA 12:19 Asay, “Nuuni kawo oychidi, nu nagara ubbaa bolla ha iitatethaa gujida gisho nuuni ne aylleti hayqonna mela nuus Godaa ne Xoossaa woossarki” yaagis.
1SA 12:20 Sameeli asaako, “Yayyofite; hinte ha iitatetha ubbaa oothideta; shin hinte kumetha wozanan Godaas kiitetite; iya kaalo aggofite.
1SA 12:21 Pathonnaba gidiya gisho maaddonnanne ashshona eeqata kaallopite.
1SA 12:22 Goday ba gita sunthaa gisho ba asaa aggenna; I hintena ba ase oothanaw ufaytees.
1SA 12:23 Hinte gisho woosa aggada Godaa qohoy taape haako; taani hintena lo77onne suure ogiya tamaarsana.
1SA 12:24 Godaa yayyite; hinte kumetha wozanan ammanetidi, iyaw kiitetite; hintew I oothida gitaba hassayite.
1SA 12:25 Shin hinte zaari zaari nagara oothiko, hintenne hinte kawoy dhayana” yaagis.
1SA 13:1 Saa7oli kawotiya wode iyaw laythi hastama; I Isra7eele bolla nam7u laythi kawotidaape guye,
1SA 13:2 Isra7eeleta giddofe heedzu mukulu asi dooris. Entafe nam7u mukulu asay Mikmaasaninne derey dariya Beetele biittan Saa7olara de7ees. Issi mukulu asay qassi Biniyaamen de7iya Gib7an Yoonatanara de7ees; attida asaa Saa7oli enta soo soo yeddis.
1SA 13:3 Yoonataani Gib7an de7iya Filisxeeme olanchota olis; Filisxeeme asay hessa si7idosona. Hessafe guye, Saa7oli, “Ibraaweti haysa si7o” gidi biitta ubban moyze punisis.
1SA 13:4 Saa7oli Filisxeeme asaa olidi xoonidaysa Isra7eele asay si7idosona; Isra7eele asay Filisxeeme asaa matan ixetidaysata gideysa eridosona. Isra7eele asay Saa7ola kaallanaw xeegetidi Galgalan shiiqidosona.
1SA 13:5 Filisxeeme asay Isra7eele asaa olanaw heedzu mukulu para gaaretara, usupun mukulu para asataranne abba doonan de7iya shafeda darida olanchotara shiiqidosona. Enti bidi, Beet-Aweenape doloha baggara de7iya Mikmaasan zugidi uttidosona.
1SA 13:6 Isra7eele asay sa7i entaw iita gideysanne olanchoti dagammidaysa be7ida wode gongolon, buuren, zaalla giddon, kakan, haatha ollan qosetidosona.
1SA 13:7 Ibraawetape guuthati Yordaanose shaafa pinnidi, Gaadenne Galada biitta bidosona. Shin Saa7oli Galgalan attis; iyara de7iya olanchoti ubbay yashshan kokoridosona.
1SA 13:8 Saa7oli Sameeli keerida laapun gallas gakanaw gam7is; shin Sameeli Galgala yibeenna; yaatin, Saa7olara de7iya olanchoti laaletethi doomidosona.
1SA 13:9 Hessa gisho, Saa7oli, “Xuussa yarshonne issifetetha yarshota taw ehite” yaagidi, xuussa yarsho yarshis.
1SA 13:10 Saa7oli xuussa yarshuwa yarshidi polidaape guye Sameeli yis. Yaatin, Saa7oli Sameela mokanaw kare keyis.
1SA 13:11 Sameeli, “Ha neeni oothidabay aybee?” yaagidi Saa7ola oychis. Saa7oli, “Asay laaletanaw matidaysa, neka gida wodiyan yaanaw gam7idaysanne Filisxeemeti Mikmaasan shiiqidaysa taani be7as.
1SA 13:12 Hessa gisho, ‘Filisxeemeti taara oletanaw Galgala wodhana hanoosona; taani Godaa maado oychabike’ gada qopas. Yaatin, xuussa yarsho yarshanaysi taw attonnaba gidis” yaagidi zaaris.
1SA 13:13 Sameeli, “Neeni boozaba oothadasa; Goday, ne Xoossay new immida kiitaa naagabaaka. Neeni naagidaako Goday hachi ne kawotethaa Isra7eele bolla merinaw minthanashin.
1SA 13:14 Shin ha77i ne kawotethay gam7enna; neeni Godaa kiita naagaboonna gisho, Goday ba wozanaada oothiya asi demmis; ba asaa kaalethana mela iya dooris” yaagis.
1SA 13:15 Sameeli Galgalape dendidi, Biniyaamen de7iya Gib7a bis. Saa7oli baara de7iya asaa taybin, asay usupun xeetu gidis.
1SA 13:16 Saa7oli, iya na7aa Yoonataaninne entara de7iya asay Biniyaamen de7iya Gib7an gam7idosona; Filisxeeme asay Mikmaasan dunkaanidosona.
1SA 13:17 Filisxeeme olanchoti heedzu cugan shaaketidi keyidosona. Entafe issi cugay Shu7aala biittan de7iya Ofirako simmidi bis;
1SA 13:18 Nam7anthoy Beet-Horonako bis; heedzantho cugay mela biitta sinthan de7iya Saboyma zangaara duge xeelliya zawa ogiya oykidi bis.
1SA 13:19 Filisxeeme asay, “Ibraaweti mashshenne toora qoxofo” gida gisho, Isra7eele biittan birata qoxiya asi baawa.
1SA 13:20 Hessa gisho, Isra7eele asay banta marasha, konte, kaltanne baaca poshisanaw Filisxeeme boosona.
1SA 13:21 Marashanne konte poshisanaw hospun giraame deexiya bira qanxoosona; kaltanne xooxe poshisanaw oyddu giraame qanxoosona.
1SA 13:22 Hessa gisho, ola gallas Saa7olinne iya na7aa Yoonataani attishin, harata kushen toorinne mashshi baawa.
1SA 13:23 Filisxeeme cugay Mikmaasa pinthi baanaw keyis.
1SA 14:1 Issi gallas Saa7ola na7ay Yoonataani ba ola miishiya tookiya panthaako haysada yaagis; “Haaya; hefinthan de7iya Filisxeemeti dunkaanida gutaa ane boos” yaagis. Shin ba aawas hessa odibeenna.
1SA 14:2 He wode Saa7oli Gib7a matan Migroonan, oromaane mitha garsan de7ees. Iyara usupun xeetu asati de7oosona.
1SA 14:3 Seelon Godaa kahine gidida Eeli na7ay, kahiney Finihaasi yelida Ikabooda ishay, Akxuuba na7ay, Akiyi efuude ma77idi, enta giddon de7ees. Yoonataani enta giddon baynaysa oonika eribeenna.
1SA 14:4 Yoonataani Filisxeemeti dunkaanida gutaa pinnanaw biya ogiya bolla ushacha bagganinne haddirsa baggan, issoy Boxexa, hankoy Sana geetetiya nam7u pooxetida gita zaallati de7oosona.
1SA 14:5 Zaallatape issoy pudeha baggan Mikmaasa sinthan de7iya wode, issoy qassi dugeha baggan Gib7a sinthan de7ees.
1SA 14:6 Yoonataani ba ola miishiya tookiya panthaako, “Haaya; ha qaxaretiboona asay dunkaanida gutaa ane boos. Goday nu gisho oletonna aggenna; daro asan gidin guutha asan, ashshanaysi Godaa xoonenna” yaagis.
1SA 14:7 Iya ola miishiya tookeysi, “Neeni qopidaba ubbaa ootha; guye goopa; ta wozanay neera de7ees” yaagis.
1SA 14:8 Yoonataani, “Yaako haaya; hefinthi pinnidi asaas bentoos.
1SA 14:9 Enti, ‘Nuuni hinteko yaana gakanaw yan naagite’ giiko, nuuni de7iya bessan naaganaape attishin, entako booko.
1SA 14:10 Shin enti, ‘Nuuko haa yiite’ giiko, nuuni entako keyana. Hessi Goday enta nu kushen aathidi immidaysas malla gidana” yaagis.
1SA 14:11 Enti nam7ay keyidi Filisxeemetas bentida wode Filisxeemeti, “Heko, Ibraaweti banta qosetida ollafe zuumidi keyoosona” yaagidosona.
1SA 14:12 Filisxeeme olanchoti, Yoonatananne ola miishiya tookeysa xeegidi, “Haa nuuko keyite; nuuni hintena issiba bessaana” yaagidosona. Hessa gisho, Yoonataani ba ola miishiya tookeysako, “Tana kaallada ha keya. Goday enta Isra7eele kushen aathidi immis” yaagis.
1SA 14:13 Yoonataani ba ola miishiya tookeysa kaalethidi, tohoninne kushen zuumidi keyis. Filisxeemeta Yoonataani shocidi yeggin, iya ola miishiya tookeysi kaallidi enta wodhis.
1SA 14:14 He koyro olan Yoonataaninne iya ola miishiya tookeysi bagga boora soo gaden laatamu gidiya asi wodhidosona.
1SA 14:15 Hessafe guye, gutanin goshshan, olas keyida asatinne naagon de7iya Filisxeemeti dagammidosona. Biitti qaaxis; he dagamay Xoossafe kiitetis.
1SA 14:16 Saa7oli Biniyaame biittan, Gib7an wothida wochiya asati, Filisxeeme olanchoti yaara haara piski gidi laaleteysa be7idosona.
1SA 14:17 Yaatin, Saa7oli baara de7iya asaako, “Ane olanchota shiishidi nu giddofe ooni bidaako be7ite” yaagis. Enti shiishidi taybiya wode Yoonataaninne iya ola miishiya tookeysi baynaysa be7idosona.
1SA 14:18 Saa7oli kahiniya Akiya, “Xoossaa Taabotiya haa ekada ya” yaagis. He wode Taabotey Isra7eelera de7ees
1SA 14:19 Saa7oli kahiniyara haasayishin, Filisxeemeti dunkaanida gutan wocamay dari dari bis. Hessa gisho, Saa7oli kahiniya, “Taabotiyape ne kushiya kessa” yaagis.
1SA 14:20 Hessafe guye, Saa7olinne iya olanchoti shiiqidi olaa bidosona. Filisxeeme asa ubbay hanana ba dhayidi, banta mashshan issoy issuwa buthidosona.
1SA 14:21 Kase Filisxeeme asaara wolla olla bessa bida Ibraaweti enta aggidi, Saa7olaranne Yoonatanara de7iya Isra7eele asaara walaketidosona.
1SA 14:22 Derey dariya Efreema biittan qosetida hara Isra7eeletika Filisxeemeti baqateysa si7idosona. Entika Isra7eeletara walaketidi yedetho oykidosona.
1SA 14:23 Goday he gallas Isra7eele asaa ashshis. Beet-Aweenape hefinthi gakanaw olay kanthis.
1SA 14:24 He gallas Isra7eele asay koshan labbanidosona. Saa7oli, “Sa7i qammanaape sinthe taani ta morketa halo keyonna de7ishin, kathi miya oonika baadetidaysa gido” yaagidi asaa caaqisidi wothis. Hessa gisho, olanchotape kathi doonako shiishida asi oonika baawa.
1SA 14:25 Olanchoti ubbay wora giddo geliya wode mitha bolla eessi de7ees.
1SA 14:26 Enti wora giddon eessi xokeysa be7idosona; shin caaquwa yayyida gisho, issi asika ba kushiya doonako shiishibenna.
1SA 14:27 Shin Yoonataani iya aaway asara oda qachidaysa si7ibeenna. Hessa gisho, ba kushen de7iya xam7a xeeraa ililo eessan yeddi kessidi, laacin iya ayfey xeellis.
1SA 14:28 Hessafe guye, olanchotape issoy, “Ne aaway olanchota ubbaa, ‘Hachi kathi miya asi baadetidaysa gido’ yaagidi, caaqisidi wothis; asa ubbay labbaniday hessasa” yaagis.
1SA 14:29 Yoonataani, “Ta aaway biittas meto medhis. Taani ha eessaafe guuthara laaccida ay mela minnidaako be7a.
1SA 14:30 Asay ba morketape di77ida kathaafe hachi midaba gidiyako lo77oshin; enti wodhana Filisxeemeta tayboyka ay mela daraneshin” yaagis.
1SA 14:31 He gallas Isra7eele asay Mikmaasape Eloona gakanaw Filisxeemeta shoci simmidi daaburidosona.
1SA 14:32 Enti di77ida dorsata, miizatanne marata shukidi suuthaa gussonna midosona.
1SA 14:33 Issi asi Saa7olako, “Heko, asay suuthara de7iya asho midi, Godaa sinthan nagara oothosona” yaagis. Saa7oli, “Hinte nagara oothideta; gita shuchu gondorsidi elle taako haa shiishite” yaagis.
1SA 14:34 Hessafe guye, “Asaa giddo bidi, ‘Hinte issoy issoy hinte mehetanne dorsata taako haa ehite; haysan wogaada shukidi miite. Suuthara de7iya asho midi, Godaa sinthan nagara oothopite’ yaaga” yaagis. Hessa gisho, he qamma issoy issoy ba boora ehidi yan shukidosona.
1SA 14:35 Saa7oli he bessan Godaas yarsho bessi gimbis; Godaas yarsho bessi gimbishin haysi iyaw koyro.
1SA 14:36 Saa7oli, “Hachi qamma Filisxeemeta kaalli, bidi sa7i wontana gakanaw entaba ubbaa bonqos; entafe issuwaka ashshona wodhoos” yaagis. Enti, “Ero, nena lo77idaba ootha” yaagidi zaaridosona. Shin kahiney, “Ane Xoossaa sheney aybeko oychoos” yaagis.
1SA 14:37 Hessa gisho, Saa7oli, “Filisxeeme asaa kaallada boo? Neeni enta Isra7eele kushen aathada immanee?” yaagidi Xoossaa oychis. Shin he gallas Xoossay iyaw zaaro immibeenna.
1SA 14:38 Saa7oli, “Kaaletheyisata xeegidi, ubbay haayite; hachi ayba nagari oosetidaako ane qoridi demmoos.
1SA 14:39 Isra7eele ashshiya de7o Goday eriya mela. Ta na7a Yoonataana gidikoka, hayqanaw bessees” yaagis. Shin asaape issi asika doona pogibeenna.
1SA 14:40 Hessafe guye, Saa7oli Isra7eele asaako, “Hinte ubbay ya baggan eqite; taaninne ta na7aa Yoonataani ha baggan eqana” yaagis. Asay, “Ero, nena lo77idaba ootha” yaagidosona.
1SA 14:41 Hessafe guye, Saa7oli, “Taw like zaaro imma” yaagidi Godaa Isra7eele Xoossaa woossis. Saamay Saa7ola bollanne Yoonataana bolla wodhin asay geeyis.
1SA 14:42 Qassi Saa7oli, “Ta bollanne ta na7aa Yoonataana bolla saama yeggite” yaagis. Saamay Yoonataana bolla wodhis.
1SA 14:43 Saa7oli Yoonataana, “Ane neeni oothidaba oda” yaagis. Yoonataani, “Taani guutha eessa ililo ta xam7aa xeeran bochada laacas. Heko taani haysan de7ayis; hayqos giigetas” yaagis.
1SA 14:44 Saa7oli, “Yoonataana, neeni hayqonna ixiko, Xoossi tana pirdo” yaagis.
1SA 14:45 Shin asay Saa7olako, “Yoonataani, Isra7eeles hessa mela gita xoonuwa ehidaysi hayqanee? Hessi polo hanenna! De7o Xoossi eriya mela! Iya huuphiyape issi binaanika biittan wodhenna. I hachi haysa Xoossa maadon oothis” yaagidosona. Yaatidi asay Yoonataana ashshin, I hayqope attis.
1SA 14:46 Hessafe guye, Saa7oli Filisxeeme asaa yedetheysa aggin enti banta biitta simmidosona.
1SA 14:47 Saa7oli Isra7eele bolla kawotidaape guye, ubba baggara de7iya ba morketa olis. Hessatika, Moo7abeta, Amooneta, Edoometa, Suubba kawotanne Filisxeemeta. Olanaw bida bessa ubban xoonis.
1SA 14:48 I minnidi oletis; Amaaleqata xoonis; Isra7eele asaa bonqeyisata kushepe ashshis.
1SA 14:49 Saa7ola adde nayti Yoonataana, Yesuwanne Malkisa; iyaw bayra na7e sunthay Meraabo; kaalo na7e sunthay Melkoolo.
1SA 14:50 Iya machiya, Akmaasa na7iya Aknahoomo. Iya tora moconay iya aawa ishaa Neera na7aa Abeneera.
1SA 14:51 Saa7ola aawa Qiisinne Abeneera aawa Neeri Abi7eela nayta.
1SA 14:52 Saa7oli de7ida laytha ubban Filisxeemetara morketethan oletida mela de7is. Mino asi woyko xaala asi demmida wode ubban I he uraa ba olanchotan gujees.
1SA 15:1 Sameeli Saa7olako, “Ba asaa Isra7eele bolla neeni kawotanaada tiyana mela Goday kiittiday tana. Hessa gisho, Godaa qaala si7a.
1SA 15:2 Ubbaafe Wolqaama Goday haysada yaagees; ‘Isra7eeleti Gibxefe keyidi yaa wode Amaaleqati ogen entara eqetida gisho taani Amaaleqata seerana.
1SA 15:3 Ha77i bada Amaaleqata shoca; entaw de7iyaba ubbaa polo dhaysa. Enta ashshofa; Maccanne adde, naytanne yooga nayta, miizinne dorse, gimalenne hare ubbaa wodha’ ” yaagis.
1SA 15:4 Saa7oli asaa xeegidi, Xelaame geetetiya bessan taybis. Taybiya wode Isra7eelepe nam7u xeetu mukulu toho olanchota; Yihudape tammu mukulu asi demmis.
1SA 15:5 Saa7oli Amaaleqata katamaa bidi issi shaafan qosetidi uttis.
1SA 15:6 Saa7oli, “Isra7eeleti Gibxefe keyiya wode hinte entaw keehida gisho taani hintena Amaaleqatara issife dhaysona mela dendidi enta giddofe keyite” yaagidi Qeena asaas odis. Yaatin Qeena asay Amaaleqata giddofe keyidi bidosona.
1SA 15:7 Saa7oli Amaaleqata Hawilape doomidi, Gibxefe doloha baggan de7iya Shuura gakanaw shocis.
1SA 15:8 Amaaleqata kawa Agaaga paxa di77is; iya asa ubbaa mashshan wodhidi wursis.
1SA 15:9 Shin Saa7olinne iya olanchoti, Agaaganne lo77o dorsata, miizata, anqara maratanne marazeta, hessadaka hara lo77obata ubbaa ashshidosona. Enti haysata polo wodhanaw koybookona; shin enti laafatanne pathonayisata dhaysidosona.
1SA 15:10 Goday Sameelako,
1SA 15:11 “Saa7oli tana kaalleysa aggidi, ta kiita naagiboonna gisho, taani Saa7ola kawothidaysan qiirotas” yaagis. Sameeli hessa si7ida wode un7etidi qamma kumethi Godaako waassis.
1SA 15:12 Sameeli wonta guura dendidi, Saa7olara gahetanaw bis. Shin asay, “Saa7oli Qarmeloosa katamaa bidi, yan bana hassaysiya hawulte essidaape guye, Galgala wodhis” yaagidi odidosona.
1SA 15:13 Sameeli Saa7ola demmida wode Saa7oli Sameelako, “Goday nena anjo; taani Godaa kiitta polas” yaagis.
1SA 15:14 Shin Sameeli Saa7olako, “Yaatin, ha taani si7iya dorsa waasoynne mehe waasoy aybee?” yaagis.
1SA 15:15 Saa7oli, “Olanchoti haysata Amaaleqatape ehidosona; enti Godaas, ne Xoossaas yarshanaw, ubbaafe lo77iya dorsatanne meheta ashshidosona, shin harata ubbaa dhaysida” yaagis.
1SA 15:16 Sameeli, “Ane aggaaga; Goday zine qamma taw odidaba ta new odana” yaagis. Saa7oli, “Ero oda” yaagis.
1SA 15:17 Sameeli zaaridi, “Ne ayfe sinthan ne guutha gidikoka, Isra7eele zerethaas kawo gidabikii? Isra7eele bolla kawotana mela Goday nena tiyis.
1SA 15:18 Goday, ‘Neeni bada iita gidida Amaaleqata kumethi dhaysa; enti wurana gakanaw wodha’ yaagidi kiittis.
1SA 15:19 Yaatin, ayis Godaas kiitetabikii? Di7os yaaretada Godaa sinthan ayis iitabaa oothadii?” yaagis.
1SA 15:20 Saa7oli, “Taani Godaas kiitetas; I tana kiittidaysada bada Amaaleqata wodha wursas; enta kawa Agaaga ehas.
1SA 15:21 Shin olanchoti di7uwape lo77iya dorsenne mehiya Godaas, ne Xoossaas, Galgalan yarshanaw ehidosona” yaagis.
1SA 15:22 Sameeli, “Goday ba qaalas kiiteteysan ufayteysa mela xuussa yarshoninne hara yarshon ufaytii? Heko, kiitetethi yarshofe aadhees; iya sissi dorsa modho yarsheysafe aadhees.
1SA 15:23 Geellatethi marotho nagara mela; qassi otoroy iita eeqa goyinno mela. Neeni Godaa qaala ixida gisho Goday ne kawo gidonna mela ixis” yaagis.
1SA 15:24 Saa7oli, “Taani nagara oothas; Godaa kiitaanne ne qaala toochas. Taani asaas yayyida gisho enti gidaba oothas.
1SA 15:25 Ha77i ta nagaraa atto garki; taani Godaa goyinnana mela taara yedharki” yaagis.
1SA 15:26 Sameeli, “Taani neera simmada biike; neeni Godaa qaala ixida gisho ne Isra7eele bolla kawo gidonna mela Goday ixis” yaagis.
1SA 15:27 Sameeli baanaw dendin, Saa7oli iya ma7uwa macaraa oykin, ma7oy daaketis.
1SA 15:28 Sameeli, “Goday hachi Isra7eele kawotethaa neepe daakidi neepe lo77iya hara asas immis.
1SA 15:29 Isra7eele bonchoy, Xoossay wordotenna woyko ba qofaa laammenna; ba qaala laammanaw I asi gidenna” yaagis.
1SA 15:30 Saa7oli, “Taani nagara oothas; shin ta biitta cimata sinthaninne Isra7eele asaa sinthan tana boncha. Taani Godaa, ne Xoossaa goyinnana mela taara yedharki” yaagidi woossis.
1SA 15:31 Hessa gisho, Sameeli iyara issife bin, Saa7oli Godaa goyinnis.
1SA 15:32 Sameeli, “Amaaleqata kawa Agaaga taako ehite” yaagis. Agaagi kokorishe Sameelako yidi, “Tuma hayqoy haysada cammii?” yaagis.
1SA 15:33 Sameeli Agaagako, “Ne mashshay maccasa naytape mela ashshidaysada ne aayaka maccasa giddon naytape mela attana” yaagis. Sameeli Agaaga Godaa sinthan Galgalan qanxerethis.
1SA 15:34 Sameeli dendidi, Rama bis; Saa7olika ba soo Gib7a bis.
1SA 15:35 Sameeli hayqana gakanaw Saa7ola be7anaw simmidi bibeenna, shin Sameeli Saa7ola gisho yeekis. Saa7ola Isra7eele bolla kawo oothidaysas Goday azzanis.
1SA 16:1 Goday Sameelako, “Isra7eele bolla I kawo gidonna mela taani ixida Saa7olas neeni awude gakanaw yeekay? Ane kacen zayte kunthada Beetelem addiya Isseyeko ba; kawo gidana mela taani iya nayta giddofe issuwa doora wothas” yaagis.
1SA 16:2 Sameeli, “Taani waanada boo? Saa7oli si7idi tana wodhana” yaagis. Goday, “Issi ussi eka bada, ‘Taani Godaas yarshanaw yas’ yaaga.
1SA 16:3 Isseyeka yarshos xeega. Ne oothanaba ta nena bessaana; ta nena besseysa tiya” yaagis.
1SA 16:4 Sameeli Goday odidaysa oothis; Beeteleme bidi katamaa cimatara gahetida wode enti kokorishe iyako yidi, “Ne saro yadii?” yaagidi oychidosona.
1SA 16:5 Sameeli, “Ee, saro yas; ta Godaas yarshanaw yas; hinteka geeyidi taara yarshos yedhite” yaagis. Qassi Isseyenne iya nayta geeshshidi enta yarshos xeegis.
1SA 16:6 Enti yaa gakiya wode Sameeli Isseye na7aa Eliyaaba be7idi, “Tuma iya sinthan eqida, Goday tiya uray haysa” yaagidi qopis.
1SA 16:7 Shin Goday Sameela, “Iya malaa woyko iya adussatethaa xeellofa; taani iya kadhas. Taani Goday asi be7eysada be7ike; asi som7o be7ees, shin Goday wozanaa be7ees” yaagis.
1SA 16:8 Isseyey Abinadaabe xeegidi, Sameela sinthe aathin, Sameeli, “Goday haysaka dooribeenna” yaagis.
1SA 16:9 Isseyey Saama aathin, Sameeli, “Goday haysaka dooribeenna” yaagis.
1SA 16:10 Hessada oothidi, Isseyey ba nayta laapunata Sameela sinthe aathis; shin Sameeli Isseyeko, “Goday haysata dooribeenna” yaagis.
1SA 16:11 Sameeli, “New de7iya adde nayti haysata xalaalee?” yaagidi Isseye oychis. Isseyey, “Ubbaafe kaalo na7ay attis; shin I dorse heemmanaw bis” yaagis. Sameeli, “Kiittada iya ehisa; I yaana gakanaw nu maanaw uttoko” yaagis.
1SA 16:12 Isseyey kiittidi na7aa ehisis; he na7ay aarise; ayfey lo77onne mala lo77o na7a. Goday Sameela, “Ta dooriday haysa gidiya gisho denda eqada tiya” yaagis.
1SA 16:13 Sameeli kacen kumida zayte ekidi, iya ishata sinthan Dawita tiyis. He gallasape doomidi, Godaa Ayyaanay Dawita bolla wolqan wodhis. Hessafe guye, Sameeli dendidi, Rama bis.
1SA 16:14 Godaa Ayyaanay Saa7olape shaaketin Godaape kiitetida iita ayyaanay Saa7ola waaysees.
1SA 16:15 Saa7ola aylleti, “Xoossaafe kiitetida iita ayyaanay nena waaysees.
1SA 16:16 Nuuni diithi diixiya asi koyidi ehana mela nu goday ba aylleta kiitto. Xoossaafe kiitetida iita ayyaanay nena oykiya wode he uray diithi diixiko new lo77o gidana” yaagidosona.
1SA 16:17 Saa7oli ba aylleta, “Diithi diixiya asi koyidi taw ehite” yaagis.
1SA 16:18 Aylletape issoy, “Beetelemen Isseyes diithi diixiya issi na7i de7ees. He na7ay xaalanne toorancho. I mala lo77onne cinca; Goday iyara de7ees” yaagis.
1SA 16:19 Saa7oli Isseyeko kiittidi, “Dorse heemmiya ne na7aa Dawita taw yedda” yaagis.
1SA 16:20 Isseyey uythunne ogoro woyne ushshu haren caanidi, issi kole gooshisidi ba na7aa Dawitara Saa7olas yeddis.
1SA 16:21 Dawiti Saa7olako yidi ooso doomis. Saa7oli Dawita daro dosis; Dawiti Saa7olas ola miishe tookeysa gidis.
1SA 16:22 Saa7oli, “Dawiti taw oothishe ta matan gam7o; taani iya dosas” yaagidi Isseyeko kiittis.
1SA 16:23 Hessafe simmin, Xoossafe kiitetida iita ayyaanay Saa7ola oykiya wode ubban Dawiti diithi ekidi diixees. I diixiya wode iita ayyaanay Saa7ola yeddeesinne iyaw lo77ees.
1SA 17:1 Filisxeemeti banta olanchota Yihudan de7iya Sooko geetetiya bessan olas shiishidosona. Enti Sokopenne Azeeqape giddon de7iya Efees-Damima geetetiya bessan shiiqidi uttidosona.
1SA 17:2 Saa7olinne Isra7eeleti Ela zangaaran shiiqidi, Filisxeemetara oletanaw keyidosona.
1SA 17:3 Filisxeeme olanchoti issi bagga zuma bolla salpin, Isra7eeleti hanko bagga zuman salpidosona; zangaaray entaw giddon de7ees.
1SA 17:4 Gaate kataman de7iya Gooliyada geetetiya issi toora qara addey Filisxeemeti dunkaanida gutaape keyis; iya geesay usupun wadhanne takadho.
1SA 17:5 I ishatammanne laapun kilo giraame deexiya naase birata xurure ma7is; qassi naase birata barneexa ba huuphen wothis.
1SA 17:6 Naase birata gambaale ba tohon aathis; ba hashiyan naase birata toora tookis.
1SA 17:7 Iya toora toomay wandaraashe mela orde; iya toora ayfey laapun kilo giraame deexees; iya gondalliya tookiya issi addey iya sinthan hemetees.
1SA 17:8 Gooliyadi eqidi ba qaala dhoqu oothidi, “Isra7eele olanchota bolla haysada yaagidi gayrees; hinte waanana gidi olas keydetii? Taani Filisxeeme asi; hinte qassi Saa7ola aylleta gideketii? Ane hinte giddofe issi asi doorite; he addey taako duge wodho.
1SA 17:9 He addey taara oletidi tana wodhiko, nuuni hinte aylle gidana; shin taani iya xoonada wodhiko hinte nu aylle gidananne nuus haaretana” yaagis.
1SA 17:10 Qassika he Filisxeeme addey, “Taani hachi Isra7eele olanchota mandayis; taw issi asi immite; ane nam7ay oletana” yaagis.
1SA 17:11 Saa7olinne Isra7eeleti Filisxeeme addiya qaala si7idi dagammidosona, daro yayyidosona.
1SA 17:12 Dawiti Yihuda biittan Beetelemen de7iya Efraata addiya Isseye na7a. Isseyes hospun adde nayti de7oosona; Saa7ola kawotetha laythan Isseyey daro laythi de7ida cima.
1SA 17:13 Isseye heedzu bayra adde nayti Saa7ola kaallidi olaa bidosona. Enta sunthay:- bayray Eliyaaba; kaaloy Amnadaabe; heedzanthoy Saama.
1SA 17:14 Dawiti nayta ubbaafe kaalo; bayra heedzu nayti Saa7ola kaallidosona.
1SA 17:15 Shin Dawiti ba aawa dorsata heemmanaw Saa7ola matape Beeteleme simeretees.
1SA 17:16 He Filisxeeme addey oytamu gallas wontanne omarsi yidi Isra7eeleta mandees.
1SA 17:17 Issi gallas Isseyey ba na7aa Dawita haysada yaagis; “Ha caacetida tiyape laatamu kilo giraamenne ha tammu uythata ekada ne ishatas efada ne ishati dunkaanida gutaa elle gatha.
1SA 17:18 Ha tammu nuka pila enta shaalaqas efa; ne ishati waani de7iyako be7ada, enti saro de7eysas malaata entafe ekada ya.
1SA 17:19 Kawoy Saa7oli, ne ishatinne Isra7eele asa ubbay Filisxeemetara oletishe Ela Zangaaran de7oosona” yaagis.
1SA 17:20 Dawiti guura dendidi dorsata hara asi henthidi, Isseyey kiittidaba caani ekidi bis. Isra7eele olanchoti banta qaala dhoqu oothidi gayrishe olas keyishin Dawiti gakis.
1SA 17:21 Isra7eeletinne Filisxeemeti issoy issuwako simmidi salpidosona.
1SA 17:22 Dawiti ba ehidaba shinqe naageysa kushen wothidi, olaa salpiya giddo woxi bidi, ba ishata sarothis.
1SA 17:23 Dawiti ba ishatara haasayishin, Gaatepe yida toora qaray, Filisxeeme Gooliyadi ba salpiyafe gaxa keyidi kaseysada Isra7eeleta mandishin Dawiti si7is.
1SA 17:24 Isra7eele asa ubbay he addiya be7ida wode daro yayyidi baqatidosona.
1SA 17:25 Isra7eele asay issoy issuwako, “Ha keyiya addiya be7idetii? I tuma Isra7eele mandanaw keyis. Ha addiya wodhiya uraas kawoy Saa7oli daro shalo immana; ba na7iwuka iyaw immana; iya aawa keethaa asay Isra7eelen kawo giira giirenna” yaagidosona.
1SA 17:26 Dawiti ba matan eqida asaa, “Ha Filisxeeme addiya wodhidi, ha yeellaa Isra7eelepe denthiya uraas aybe oosetanay? Ha qaxaretiboona Filisxeemey de7o Xoossaa olanchota mandey I oonee?” yaagidi oychis.
1SA 17:27 Enti, “Ha addiya wodhiya uraas haysi haysi oosetana” yaagidi kaseysada zaaridosona.
1SA 17:28 Dawiti asaara odeteysa iya bayra ishay Eliyaabi si7idi, Dawita bolla shene eexis. “Neeni ha bessaa ayis yadii? He guutha dorsata bazzon ooddes yeggadii? Ne otoruwanne ne wozanaa iitatethaa ta erayis; neeni olaa be7anaw yadasa” yaagis.
1SA 17:29 Dawiti, “Taani ha77i ay oothadina? Hari attoshin odetanawuka danda7ikina?” yaagis.
1SA 17:30 Dawiti ba ishaa aggidi, hara asaako simmidi, kaseysada oychin asay iyaw kaseysada zaaridosona.
1SA 17:31 Dawiti odidaysa si7ida asay Saa7olas odin, Saa7oli Dawita xeegisis.
1SA 17:32 Dawiti Saa7olako, “Ha addiya gaason oodde wozanika til7ofo; taani ne aylley bada, ha Filisxeeme addiyara oletana” yaagis.
1SA 17:33 Saa7oli Dawitako, “Neeni na7a; I ba na7atethafe doomidi ola meezetidi diccida gisho, ha Filisxeeme addiyara neeni oletanaw danda7aka” yaagis.
1SA 17:34 Shin Dawiti, “Taani, ne aylley ta aawa dorsata heemmiya wode gaammoy woyko garmafeeley keyidi dorse oykiya wode,
1SA 17:35 iya kaalla bada iya doonape wotha ekayis. Taako simmiya wode qoodhiya cuullada wodhayis.
1SA 17:36 Taani ne aylley gaammonne garmafeele wodhas; ha qaxaretiboona Filisxeeme addey de7o Xoossaa olanchota guuthida gisho I entafe issuwada hanana.
1SA 17:37 Gaammofenne garmafeelepe tana ashshida Goday, ha Filisxeeme addiya kushepe tana ashshana” yaagis. Saa7oli Dawitako, “Ba, Goday neera gido” yaagis.
1SA 17:38 Saa7oli ba ma7uwa Dawita mayzis; Dawita huuphen naase birata barneexa wothis; naase birata xururiya Dawita mayzis.
1SA 17:39 Dawiti ba ola ma7uwa bolla mashsha dancidi hemetidi be7is. Shin hessa mela ma7o ma7idi eronna gisho hemetanaw danda7ibeenna. Hessa gisho, Dawiti Saa7olako, “Taani haysa mela ma7o ma7ada meezetaboonna gisho haysara baanaw danda7ike” yaagidi ola ma7uwa qaaris.
1SA 17:40 Dawiti ba hentha xam7a oykidi, shaafape ichashu mulumuqe shuchu doori ekidi, ba hentha qarxiitan yeggidi, ba yambarsha oykidi, Goolyadako shiiqis.
1SA 17:41 Gooliyadi ba gondalliya tookiya addiyara issife hemetishe Dawitako matis.
1SA 17:42 I Dawita tishshi oothi xeellidi, Dawiti aarise, mala lo77onne na7a gideysa be7idi kadhis.
1SA 17:43 I Dawitako, “Neeni xam7a oykada taako yaanaw tana kana gadii?” yaagis. Ba xoossata sunthan Dawita baaddis.
1SA 17:44 Kaallidi Dawitako, “Haaya; taani ne ashuwa salo kafotasinne sa7a do7atas immana” yaagis.
1SA 17:45 Dawiti, “Neeni mashsha, tooranne gumba oykada taako yaasa; shin taani Ubbaafe Wolqaama Godaa sunthan, neeni guuthida Isra7eele olanchota Xoossaa sunthan ne bolla yayis.
1SA 17:46 Hachi Goday nena ta kushen aathidi immana; taani nena shocana; ne qoodhiya muuca holana. Filisxeeme olanchota aha salo kafotasinne sa7a do7atas hachi immana. He wode Isra7eelen Xoossi de7eysa sa7an de7iya asa ubbay erana.
1SA 17:47 Goday ba asaa ashshanaw toora woyko mashshe koyonnaysa haysan shiiqida asa ubbay erana. Olay Godaaba gidiya gisho, I hintena ubbaa nu kushen aathidi immana” yaagis.
1SA 17:48 Filisxeeme addey dendidi, Dawitara olaa gahetanaw shiiqida wode Dawiti iyara gahetanaw ola demba woxidi bis.
1SA 17:49 Dawiti ba qarxiitan kushe yeddidi, issi shuchu eki yambaridi, Filisxeeme addiya som7uwan caddis. Shuchay iya som7uwa lukidi gelis; yaatin, addey ba som7uwara sa7an kundis.
1SA 17:50 Dawiti Filisxeeme addiya yambarshaninne shuchan xoonis. Dawiti ba kushen mashshi bayna Filisxeeme addiya caddidi wodhis.
1SA 17:51 Dawiti woxi bidi, iya bolla keyi eqidi, iya wodhidi, Filisxeeme addiya mashshaa shoohuwape shoddidi, iya qoodhiya muuci yeggis. Filisxeemeti banta toora qaray hayqidaysa be7ida wode baqatidosona.
1SA 17:52 Isra7eele asaynne Yihuda asay dendidi gereerishe, Filisxeemeta Gaatenne Eqroona pengeta gakanaw yedethidosona. Filisxeeme asaa ahay Gaatenne Eqroona gakanaw Sha7irayma efiya ogiya ubban kundis.
1SA 17:53 Isra7eele asay Filisxeemeta yedethi simmidi, enti dunkaanida gutaa bonqidosona.
1SA 17:54 Dawiti Filisxeeme addiya huuphiya Yerusalaame ehis; shin Filisxeeme addiya ola miishiya ba dunkaaniya giddon wothis.
1SA 17:55 Dawiti Filisxeeme addiyara oletanaw bishin, Saa7oli be7idi, tora mocona Abeneera, “Ha na7ay oodde na7ee?” yaagidi oychis. Abeneeri zaaridi, “Kawaw, tuma ne asho taani iya erike” yaagis.
1SA 17:56 Kawoy zaaridi, “Ha na7ay oodde na7eko ane oycha” yaagis.
1SA 17:57 Dawiti Filisxeeme addiya wodhidi simmida wode Abeneeri iya Saa7ola sinthe ehis. He wode Dawiti muucida Filisxeeme addiya huuphiya ba kushen oykidi utisis.
1SA 17:58 Saa7oli, “Ta na7aw, ne oodde na7ee?” yaagidi oychis. Dawiti zaaridi, “Taani Beetelemen de7iya ne oosanchuwa, Isseye na7a” yaagis.
1SA 18:1 Dawiti Saa7olara haasaya wursidaape guye, Saa7ola na7ay Yoonataani Dawitara daro mata dabbotethi medhis; Yoonataani Dawita ba shempuwada dosis.
1SA 18:2 He gallasape doomidi, Saa7oli Dawita baara wothis; ba aawa soo guye simmonna mela diggis.
1SA 18:3 Yoonataani Dawita ba huupheda dosiya gisho iyara caaqis.
1SA 18:4 Yoonataani ba ma7ida kaaba, ba ola ma7uwa, ba mashshaa, ba dongiyanne ba saqiya kessidi Dawitas immis.
1SA 18:5 Saa7oli kiitida ubbaa Dawiti naagetidi oothiya gisho, Saa7oli Dawita ba olanchota giddon halaqa oothidi shuumis. Hessi asa ubbaanne iya moorinnata ufaysis.
1SA 18:6 Dawiti Filisxeeme addiya Gooliyada wodhin, asay soo simmiya wode maccasay ufaysa yethi yexishenne durishe, karaabo baqishenne diithi diixishe, kawa Saa7ola mokanaw Isra7eele katamata ubbaafe keyidosona.
1SA 18:7 Maccasati durishe, “Saa7oli mukulata wodhis; Dawiti tammu mukulata wodhis” yaagidi yexidosona.
1SA 18:8 Saa7ola ha yethay shaatin, daro hanqetis. Saa7oli ba qofan, “Dawita, ‘Tammu mukulata wodhadasa gidi, tana mukulata wodhadasa’ gidoosona. Yaatin, kawotethaafe attishin hari aybi attidee?” yaagis.
1SA 18:9 He wodepe doomidi Saa7oli Dawita qanaate ayfen xeellees.
1SA 18:10 Wontetha gallas iita ayyaani Xoossafe kiitetidi Saa7ola oykin, Saa7oli ba son elmotees. Dawiti kaseysada diithi diixishin Saa7oli toora ba kushen oykidi uttis.
1SA 18:11 I, “Dawita godaara gathada sikana” yaagi qopidi toora xongis. Shin Dawiti nam7u toho iyape attis.
1SA 18:12 Goday Saa7ola aggidi Dawitara de7iya gisho Saa7oli Dawita yayyis.
1SA 18:13 Saa7oli Dawita ba sinthafe haassanaw koyidi mukulu olanchotas halaqa oothis. Yaatin, Dawiti ba cugaa olas kaalethis.
1SA 18:14 Goday Dawitara de7iya gisho I oothiyabay ubbay iyaw injetees.
1SA 18:15 Dawiti oothiyaba ubbay injeteysa Saa7oli be7idi iyaw daro yayyis.
1SA 18:16 Shin Dawiti enta olan kaalethiya gisho Isra7eele asaynne Yihuda asa ubbay iya dosoosona.
1SA 18:17 Saa7oli Dawitako, “Ta na7a bayriya Meraaba hannashu; taani iyo new macho immana; neeni mino asi gida; Godaa olaa oleta” yaagis. Saa7oli ba wozanan, “Taani iya bochike; Filisxeemeti iya wodho” yaagidi qopis.
1SA 18:18 Shin Dawiti, “Kawora bollotanaw taani oonee? Ta soo asay aybee? Woyko ta aawa yaray Isra7eele asaa giddon aybee?” yaagis.
1SA 18:19 Shin Saa7ola na7iya Meraaba Dawitas imetiya wodey gakin, Mahoola addiya Adri7eelas imetasu.
1SA 18:20 Gidoshin, Saa7ola na7iya Melkoola Dawita dosasu; Saa7oli hessa si7idi ufaytis.
1SA 18:21 I ba wozanan, “Iyaw xihe gidana melanne Filisxeemeti iya wodhana mela taani Milkoolo Dawitas immana” yaagidi qopis. Hessa gisho, Saa7oli Dawita, “Neeni taara bollotanaw nam7antho qaada new immas” yaagis.
1SA 18:22 Saa7oli ba oosanchota xeegidi, “ ‘Kawoy nenan ufaytis; iya aylleti ubbay nena dosoosona; ha77i neeni kawuwara bollota’ yaagidi dumma Dawitas odite” yaagidi kiittis.
1SA 18:23 Saa7oli gidaysada enti Dawitas odidosona. Shin Dawiti, “Kawora bollotanaysi hintew laafaba daaniyee? Taani manqonne eretonna asi” yaagidi zaaris.
1SA 18:24 Saa7ola moorinnati Dawiti gidaba Saa7olas odidosona.
1SA 18:25 Saa7oli ba aylletako, “Dawitas haysada yaagidi odite; ‘Kawoy ba morketa halo keyanaw xeetu Filisxeeme asata qaaratidi ehana melape attishin, neepe hara koyta koyenna’ yaagite” yaagis. Saa7oli hessa giday Dawiti Filisxeemeta kushen hayqana mela qopida gishosa.
1SA 18:26 Saa7ola aylleti Saa7oli gidaba Dawitas odidosona; kawuwara bollotanaysi Dawita ufaysis. Wodey aadhanape sinthe,
1SA 18:27 Dawitinne iya asay dendi bidi Filisxeemetape nam7u xeetu asaa wodhidosona. Dawiti kawuwara bollotanaw he asata qaarati ehidi, kawas kumethi taybidi sheedhis. Saa7oli ba na7iw Melkoolo Dawitas immis.
1SA 18:28 Saa7oli Goday Dawitara de7eysanne iya na7iya Milkoola Dawita doseysa eris.
1SA 18:29 Saa7oli Dawitas kaseysafe aathidi yayyis. Saa7oli ba de7o laytha ubban Dawitas morke gidis.
1SA 18:30 Filisxeeme olanchoti olas kessi aggibokona. Shin olas keyida wode ubban Saa7ola toora moconatape aathidi xoonoy haney Dawitasa; hessa gisho, I eretida asi gidis.
1SA 19:1 Dawita wodhana mela Saa7oli ba na7aa Yoonatanasinne ba oosanchotas odis. Shin Saa7ola na7ay Yoonataani Dawita daro dosees.
1SA 19:2 Hessa gisho, Yoonataani Dawitako, “Ta aaway Saa7oli nena wodhanaw koyiya gisho wonto wonta nena naaga; issi bessan qosetada de7aasha.
1SA 19:3 Taani ta aawara bada, neeni qosetida gadiyan eqana; taani nebaa iyaw odada, iyape si7iyaba new odana” yaagidi kiittis.
1SA 19:4 Yoonataani Dawita nashshidi, ba aawa Saa7olako haysada yaagis; “Kawoy ba aylliya Dawita qohidi nagara oothofo; I nena qohibeenna; I oothidabay nena daro go77is.
1SA 19:5 I Filisxeeme addiya wodhida wode ba shempuwas qadhetibeenna. Goday Isra7eele ubbaas gita xoono immis; hessa be7ada neka ufaytadasa. Yaatin, neeni geeshsha asi qohanaw ayis qopay? Gaasoy bayna Dawita wodhanaw ayis koyay?” yaagis.
1SA 19:6 Saa7oli Yoonataani odidaba si7idi, “De7o Xoossi eriya mela, taani Dawita wodhike” yaagidi caaqis.
1SA 19:7 Yoonataani Dawita xeegidi enti odetidaba ubbaa iyaw odis. Yaatidi Dawita Saa7olako ehin Dawiti kaseysada Saa7olara de7is.
1SA 19:8 Filisxeemetara zaaridi hara oli dendis; Dawiti keyidi Filisxeemetara oletidi, enta gita shochu shocin, enti iya sinthafe baqatidosona.
1SA 19:9 Hessafe simmin, Saa7oli toora oykidi ba son uttidashin, iita ayyaani Godaape kiitetidi iya oykis. Yaatin, Dawiti diithi diixishin,
1SA 19:10 Saa7oli Dawita godaara gathidi sikanaw toora xongis; Shin Dawiti iyape deesh gidi attin, tooray godan toketis. He qamma Dawiti kessi ekidi baqatis.
1SA 19:11 Dawita keethan naagidi wonta wodhana mela Saa7oli ase kiittis. Dawita machiya Melkoola, “Hachi qamma neeni ne shempuwa ashshona ixiko, wonto hayqaasa” yaagada Dawitas odasu.
1SA 19:12 Milkoola Dawita maskootera kessin, Dawiti kessi ekidi baqatis.
1SA 19:13 Hessafe guye, Melkoola eeqa misile ekada arsan zin7isasu; huupheson deesha ikise wothada afila mayzasu.
1SA 19:14 Dawita oykidi ehana mela Saa7oli ase kiittin Milkoola, “Dawiti saketis” yaagasu.
1SA 19:15 Dawita be7ana mela Saa7oli he asata guye kiittidi, “Taani Dawita wodhana mela iya algara tookidi eki yiite” yaagis.
1SA 19:16 Shin asati soo geliya wode eeqa misiley arsan zin7idaysanne iya huupheson deesha ikisey de7eysa demmidosona.
1SA 19:17 Saa7oli Melkoolo, “Neeni ayis haysada oothada tana cimmadii? Ta morkey kessi ekana mela ayis oothadii?” yaagis. Milkoola zaarada, “I taako, ‘Tana kessada yedda; ixiko ta nena wodhana’ yaagis” yaagasu.
1SA 19:18 Dawiti kessi ekidi Raman de7iya Sameelako bidi Saa7oli bana oothida ubbaa iyaw odis. Dawitinne Sameeli Nayoota bidi yan uttidosona.
1SA 19:19 Saa7oli Dawiti Raman de7iya Nayootan de7eysa si7is.
1SA 19:20 Dawita oykidi ehana mela ase yaa kiittis. Shin nabe cugay Sameela kaalethuwan tinbite odishin be7ida wode Saa7oli yeddida asata bolla Xoossa Ayyaanay wodhin, entika tinbite odidosona.
1SA 19:21 Saa7oli hessa si7ida wode hara asi yeddis; entika qassi tinbite odidosona. Saa7oli heedzantho ase yeddin entika tinbite odidosona.
1SA 19:22 Wursethan, Saa7oli ba huuphen Rama bidi, Seekun de7iya gita ollaa gakidi, “Sameelinne Dawiti awun de7oona?” yaagidi oychis. Enti, “Hinin Raman de7iya Nayootan de7oosona” yaagidi zaaridosona.
1SA 19:23 Hessa gisho, Saa7oli Raman de7iya Nayoota bis; qassi Xoossa Ayyaanay iya bollaka wodhin, Raman de7iya Nayoota gakanaw tinbite odishe bis.
1SA 19:24 I ba ma7uwa qaaridi, Sameela sinthan tinbite odis; gallasinne qamma kumethi kallo zin7is. Asay, “Saa7olika nabetape issuwa gidideye” geysi hessasa.
1SA 20:1 Dawiti Raman de7iya Nayootape baqatidi, Yoonatanako bidi, “Taani ay oothadina? Ta balay aybee? Ne aaway tana wodhanaw koyey taani iya ay qohinee?” yaagidi oychis.
1SA 20:2 Yoonataani, “Hessi neepe haako; neeni hayqaka. Guuthaba gidin, gitaba gidin, ta aaway taape qosidi aykoka oothenna. Ta aaway taape ayis hessa qosidee? Hessi hanenna” yaagidi zaaris.
1SA 20:3 Shin Dawiti, “Ne tana doseysa ne aaway loythi erees. I ba wozanan, Yoonataani ha oda eropo; I eriko azzanana” yaagis. Shin, “De7o Xoossi eriya mela, ne shempoy ero; taapenne hayqope giddon issi tango xalaali attis” yaagidi caaqis.
1SA 20:4 Yoonataani, “Neeni ootha gidaba aybaka taani new oothana” yaagis.
1SA 20:5 Dawiti zaaridi, “Wonto ageena xeero ba7aale bonchiya gallas; taani kawuwara kathi maanaw koshshees. Shin wonti pee7in omarsi gakanaw taani gaden qosetana.
1SA 20:6 Ne aaway tana koyiko, neeni, ‘Dawiti ba asaara laytha yarsho yarshiya wode gidiya gisho ba soo Beeteleme baanaw tana oychidi bis’ yaaga.
1SA 20:7 I, ‘Yaako lo77o’ giiko, taw ne aylliyas saro; shin I hanqetiko, I tana qohanaw ba wozanan qopidaysa hessan era.
1SA 20:8 Shin neeni taw ne aylliyas lo77oba ootha; Neeni taara ne aylliyara Godaa sinthan caaqadasa. Taani bala gidiko, tana ne wodha; ne aawas tana aathada immofa” yaagis.
1SA 20:9 Yoonataani, “Hessi neepe haako; ta aaway nena qohanaw qopidaba ta eridaako, new odikina?” yaagis.
1SA 20:10 Dawiti “Ne aaway new iita zaaro zaariko, taw odanay oonee?” yaagidi oychis.
1SA 20:11 Yoonataani, “Haaya; gade boos” yaagin, nam7ay gade bidosona.
1SA 20:12 Yoonataani Dawitako, “Goday Isra7eele Xoossay ero, taani wonti pee7in ta aaway nebaa giyaba si7ada new I qopiya qofay lo77o gidiko taani kiittada nena erisana.
1SA 20:13 Shin ta aaway nena qohanaw koyaba gidiko, hessa taani nena erisonnanne neeni saron kessa ekana mela oothonna ixiko, Goday tana pirdo; Goday ta aawara gididaysada neera gido.
1SA 20:14 Ta de7o laytha ubban ta hayqonna mela Godaa siiquwa tana bessa.
1SA 20:15 Goday Dawita morketa ubbaa biittafe dhaysiya wodeka ne siiquwa ta soo asaas bessa” yaagis.
1SA 20:16 Hessa gisho, Yoonataani, “Goday Dawita morketa pirdo” yaagidi Dawita soo asaara caaqis.
1SA 20:17 Yoonataani Dawita ba huupheda dosiya gisho, “Neeni tana tuma doseysa qoncisanaw taw ane nam7antho caaqa” yaagis.
1SA 20:18 Hessafe guye, Yoonataani, “Wonto ageena xeero ba7aale bonchiya gallas; neeni uttiya bessay mela attiko ne baynaysi eretana.
1SA 20:19 Wonti pee7in omarsi bada, ha metoy doomida gallas neeni qosetida bessan, Exela zaallafe guyera qosetta.
1SA 20:20 Taani issiba bolla xongiya asada hanada heedzu donge toorata he zaalla miye yeddana.
1SA 20:21 Hessafe guye, ‘Bada donge toorata koya’ yaagada issi na7a kiittana. Taani iyako, ‘Donge toorati neepe ha baggara de7oosona; haa ekada ya’ giyaba gidiko, haaya; de7o Goday eriya mela, new sa7i saro; nena aykoyka bochenna.
1SA 20:22 Shin taani na7aako, ‘Donge toorati neepe hini baggara de7oosona’ giyaba gidiko, neeni aggada ba; Goday ne baana mela koyiya gisho ba.
1SA 20:23 Neera taara odetida odaas Goday nu giddon merinaw marka” yaagis.
1SA 20:24 Hessa gisho, Dawiti gaden qosetis. Ageena xeero ba7aale bonchiya gallas gakida wode kawoy Saa7oli gibira bolla uttis.
1SA 20:25 Kawoy ba uttiya bessan godaa matan uttis; Yoonataani iyape sintha baggan, Abeneeri Saa7ola matan uttis; shin Dawita bessay mela de7ees.
1SA 20:26 Saa7oli he gallas aykoka gibeenna. Saa7oli ba wozanan, “Dawiti wogaada geeyonna mela issibay iya gakis; I geeybeenna” yaagidi qopis.
1SA 20:27 Shin wontetha gallas, ageenay xeerin nam7antho gallas Dawita bessay mela de7ees. Saa7oli ba na7aa Yoonataana xeegidi, “Isseye na7ay zineka hachika gibira maanaw ayis yibennee?” yaagidi oychis.
1SA 20:28 Yoonataani, “Dawiti Beeteleme baana gidi tana minthidi oychis.
1SA 20:29 I taako, ‘Nu soo asay kataman yarsho yarshiya gishonne ta yan bentana mela ta ishay tana kiitida gisho tana yeddarki. Ta ne sinthan saba demmidaba gidiko taani ta ishata be7ana mela tana yedda’ yaagidi oychis. Kawa gibiraape maanaw I yoonnay hessa gishosa” yaagidi zaaris.
1SA 20:30 Saa7oli Yoonataana bolla shene eexi keyidi, “La, geellanne makallancho maccase na7aw, neeni new kawushe, ne aayes yeella ehanaw Isseye na7aara laggeteysa ta erikinayee?
1SA 20:31 Isseye na7ay ha sa7a bolla de7ida peeshan ne woyko ne kawotethay eqenna. Ha77i kiittada elle ehisa; I hayqanaw bessees” yaagis.
1SA 20:32 Yoonataani ba aawa, “I ayis hayqii? I ay iitabaa oothidee?” yaagidi oychis.
1SA 20:33 Saa7oli Yoonataana wodhanaw toora iya bolla xongis. Hessa gisho, Yoonataani ba aawa Saa7oli, Dawita wodhanaw qopidaysa geeshshidi eris.
1SA 20:34 Yoonataani shenetidi gibira bollafe dendis; ba aaway, Dawita kawushida gisho Yoonataani azzanidi, ageena xeero ba7aale bonchiya nam7antho gallas kathi mibeenna.
1SA 20:35 Yoonataani baara issi na7a ekidi wonta guura Dawitara gahetanaw gade bis.
1SA 20:36 Yoonataani, “Taani dukiya donge toorata woxa bada ekada ya” yaagis. Na7ay woxiya wode issi donge toora hefinthi dukis.
1SA 20:37 Na7ay Yoonataana donge tooray wodhida bessaa gakiya wode Yoonataani na7aa xeegidi, “Donge tooray neepe hini baggara de7ennee?”
1SA 20:38 Yoonataani na7aa, “Ellesa; ba; eqofa” yaagidi ba qaala dhoqu oothidi odis. Na7ay donge toora maxidi ba godaas ehis.
1SA 20:39 Yoonatanapenne Dawitape attishin, na7ay he xuura erenna.
1SA 20:40 Yoonataani ba ola miishiya na7aas immidi, “Haysa katama ekada ba” yaagis.
1SA 20:41 Na7ay bidaape guye, Dawiti he zaalla guyepe keyidi Yoonataana sinthan gulbatidi, ba som7uwa sa7a gathidi heedzu toho ziggis. Hessafe guye, issoy issuwara yeeretidi yeekidosona, shin Dawiti Yoonatanape aadho yeekis.
1SA 20:42 Yoonataani, “Saro ba; ‘Ne giddoninne ta giddon, ne kochaa giddoninne ta kochaa giddon, Goday merinaw marka gido’ yaagidi nu nam7ay Godaa sunthan caaqida” yaagis. Hessafe guye, Dawiti dendidi bis; Yoonatanika katamaa guye simmis.
1SA 21:1 Dawiti kahiniya Abimelekeko Nooba bis. Abimelekey Dawitara gahetanaw kokorishe yidi, “Neeni nerka waanada yadii? Neera asi waanidi baawee?” yaagidi oychis.
1SA 21:2 Dawiti kahiniya Abimeleke, “Kawoy taako, ‘Taani nena kiitida kiitaanne ta new odidaba oonika eropo’ yaagidi tana kiittis. Ta asati issi bessan taara gahetana mela oda wothas.
1SA 21:3 Ha77i ne kushen aybi de7ii? Ichashu uythi woyko new de7iyaba taw imma” yaagis.
1SA 21:4 Kahiney zaaridi, “Coo asi miya uythi taw baawa; shin ne asati bantana maccasape naagidaba gidiko, enti maanaw danda7iya geeshsha uythi de7ees” yaagis.
1SA 21:5 Dawiti zaaridi, “Tuma nuuni ha kiita ekidi keydaape doomidi, maccasape naagetida; hari attoshin hara kiittaka ekidi keyiya wode enti banta geeshshatetha naagoosona. Shin hachi waanidi geeyanaw koshshennee?” yaagis.
1SA 21:6 Hessa gisho, kahiney Dawitas geeshsha uythaa immis. Kahiniyas de7iya uythay, Godaa sinthan wothanaw he gallas ho77o uythara laametida uythaafe attishin, hari baawa.
1SA 21:7 Saa7ola aylletape issoy, iya mehiya heemmeyisata halaqay, Doyqa geetetiya Edoome addey, he gallas Godaa sinthan naagishe de7ees.
1SA 21:8 Dawiti Abimelekeko, “Toori woyko mashshi new dandeesha? Kawa kiitay eesoya gisho taani ta mashshaa woyko hara ola miishe ehabike” yaagidi oychis.
1SA 21:9 Abimelekey, “Neeni Ela Zangaaran wodhida Filisxeeme addiya Gooliyada mashshay haysan de7ees; curqara xaaxetidi, efuude ma7uwape guye baggara de7ees. Neeni koyaba gidiko iya eka; iyape attishin, hara mashshi haysan baawa” yaagis. Dawiti, “Iya mela mashshi baawa; iya taw hamma” yaagis.
1SA 21:10 He gallas Dawiti Saa7olape baqatidi, Gaate kawa Ankusako bis.
1SA 21:11 Shin Ankusa moorinnati, “Haysi Dawiti ba biittan kawo gidennee? Maccasay yexishenne durishe, ‘Saa7oli mukulu wodhis; Dawiti tammu mukulu wodhis’ yaagidi sabbida addiya gidennee?” yaagidosona.
1SA 21:12 Dawiti enta haasaya ba wozanan si7idi, Gaate kawa Ankusa daro yayyis.
1SA 21:13 Hessa gisho, Dawiti enta sinthan gooshshu daanis. Enti iya oykana haniya wode gooshshada penge ibitha qaacethi oykis; buuchaara saasso qolis.
1SA 21:14 Ankusi ba oosanchotako, “Heko, ha addey gooyees; hinte ayis iya taako ehidetii?
1SA 21:15 Ha addey ta sinthan gooyanaada hinte ehiday, ta matan hari gooyey dhayineyee? Ha addey ta soo gelanaw bessii?” yaagis.
1SA 22:1 Dawiti Gaatepe baqatidi, Adulaama matan de7iya gongoluwa bis. Iya ishatinne iya aawa soo asa ubbay hessa si7ida wode yaa iyako bidosona.
1SA 22:2 Metootiday, acotidaynne sa7i iitida ubbay Dawitako shiiqin, enta tayboy oyddu xeetu gidis; I enta halaqa gidis.
1SA 22:3 Dawiti yaape dendidi Moo7aben de7iya Mixipha bidi Moo7abe kawa, “Xoossay taw oothanaba ta erana gakanaw ta aawanne aayiw ne matan wotharki” yaagidi woossis.
1SA 22:4 Dawiti enta Moo7abe kawa matan wothis; Dawiti qosetida bessan de7iya wode ubban enti kawa matan de7idosona.
1SA 22:5 Hessafe guye, nabey Gaadi Dawitako yidi, “Qosetida bessan gam7ofa; haysafe dendada Yihuda biitta ba” yaagis; Dawiti yaape keyidi Hereta wora bis.
1SA 22:6 Dawitinne iya asay bentidaysa Saa7oli si7is. Saa7oli Gib7a matan de7iya dere bolla, tamarsike mitha garsan toora oykidi uttis; iya moorinnati iya yuushuwan eqidosona.
1SA 22:7 Saa7oli entako, “Hinteno, Biniyaame asaw, si7ite; Isseye na7ay gadenne woyne tokiya bessi hinte ubbaas immanee? Shaalaqatanne mato halaqata oothidi hintena shuumanee?
1SA 22:8 Hinte ubbay ta bolla maqetideta; ta na7ay Isseye na7aara caaqidaba taw oonika odibeenna. Hintefe issi asika taw qadhetenna; hachi hanidaysada ta na7ay ta aylliyan tana wodhisanaw denthethidaysa taw oonika odibeenna” yaagis.
1SA 22:9 Saa7ola moorinnatara eqida Edoome addey Doyqi, “Isseye na7ay Akxuuba na7aa Abimelekeko Nooba bidaysa taani be7as.
1SA 22:10 Dawiti ay oothaneko Abimelekey Godaa oychis; yaatidi Dawitas shinqenne Filisxeeme addiya Gooliyada mashshaa iyaw immis” yaagidi Saa7olas odis.
1SA 22:11 Hessafe guye, Akxuuba na7aa kahiniya Abimelekenne Nooban kahine gididi de7iya iya aawa soo asa ubbaa kawoy xeegisin, enti kawako yidosona.
1SA 22:12 Saa7oli, “Akxuuba na7aw, si7a” yaagis. Abimelekey, “Ero ta godaw” yaagis.
1SA 22:13 Saa7oli, “Neera Isseye na7aara ta bolla ayis maqetidetii? Neeni iyaw uythinne mashshe immada, I tana wodhanaw dendana mela iya gisho Xoossaa ayis oychadii?” yaagis.
1SA 22:14 Abimelekey, “Ne oosanchota ubbaa giddon Dawita mela ammanetey, kawa bolloy, nena naageysata kiitteynne ne soo asaa giddon daro bonchetey iya meli oonee?
1SA 22:15 Taani iya gisho Xoossaa oychishin, haysi taw koyro? Gidenna, kawaw, tana ne aylliya woyko ta aawa soo asa ubbaa aykoka mootopa. Taani ne aylley ha odabaa guutha gidin woyko gita gidin erike” yaagis.
1SA 22:16 Kawoy, “Abimeleke, nenne ne aawa soo asa ubbay hayqana” yaagis.
1SA 22:17 Saa7oli ba matan eqidi naageysata, “Godaa kahineta wodhite; enti Dawita maaddidosona. Dawiti baqatidaysa erishe taw odibookona” yaagis. Shin kawa naageysati Godaa kahineta bolla banta kushiya denthonna ixidosona.
1SA 22:18 Kawoy Doyqa, “Enta ne wodha” yaagidi kiittis. Edoome addey Doyqi kahineta shocidi, he gallas efuude ma7ida hospun tammanne ichashu kahineta wodhis.
1SA 22:19 Qassi Doyqi kahineta katamaa, Nooba mashshan wursis; he kataman de7iya addenne macca, naytanne yooga nayta, meheta, haretanne dorsata mashshan wodhis.
1SA 22:20 Shin Akxuuba na7aa Abimeleke naytape Abyataara geetetiya issi na7ay kessi ekidi, Dawitako baqatis.
1SA 22:21 I, Saa7oli Godaa kahineta wodhidaysa Dawitas odis.
1SA 22:22 Dawiti Abyataara, “Edoome addey Doyqi he bessan de7eysa taani be7ida wode I Saa7olas odanaysa he gallas eras. Ne aawa soo asa ubbaa hayqos gathiday tana.
1SA 22:23 Hiza neeni taara de7a; yayyofa. Nena wodhanaw koyiya uray tana wodhanaw koyees; neeni ta matan saro daana” yaagis.
1SA 23:1 Filisxeemeti Qa7ila olidi, wudumman de7iya kathaa bonqidaysa Dawiti si7is.
1SA 23:2 Dawiti, “Taani bada Filisxeemeta olo?” yaagidi Godaa oychis. Goday, “Ba; Filisxeemeta ola; Qa7ila ashsha” yaagis.
1SA 23:3 Shin Dawita kaalleysati, “Nuuni haysan Yihuda biittan de7ishe daroban yayyoos. Filisxeemetara oletanaw Qa7ila nu biiko nuna ubbaa sa7i metana” yaagidosona.
1SA 23:4 Dawiti zaaridi Godaa oychin Goday, “Filisxeemeta taani new aatha immana; dendada Qa7ila ba” yaagis.
1SA 23:5 Dawitinne iya kaalleysati Qa7ila bidi, Filisxeemetara oletidi enta mehiya di77idosona. Entafe daro asaa wodhidi, Dawiti Qa7ila asaa ashshis.
1SA 23:6 Abimeleke na7ay Abyataari Dawitako Qa7ila baqatida wode efuude ma7uwa ekidi bis.
1SA 23:7 Dawiti Qa7ila bidaysa Saa7oli si7idi, “Xoossay Dawita ta kushen aathidi immis; Dawiti gimben diretida katama gelidi bana baw qachis” yaagis.
1SA 23:8 Qa7ila bidi, Dawitanne iya asaa teqana mela Saa7oli ba olanchota ubbaa xeegis.
1SA 23:9 Saa7oli ba bolla iitaba oothanaw maqidaysa Dawiti eridi kahiniya Abyataarako, “Efuudiya haa eka ya” yaagis.
1SA 23:10 Dawiti, “Abeeti Godaw, Isra7eele Xoossaw, ta gaason Saa7oli Qa7ila dhaysanaw maqidaysa taani ne aylley si7as.
1SA 23:11 Qa7ila asay tana Saa7olas aathidi immanesha? Taani ne aylley si7idaysada Saa7oli tumaka haa yaaneshsha? Abeeti Godaw, Isra7eele Xoossaw, taw ne aylliyas oda” yaagis. Goday Dawitako, “Ee; Saa7oli yaana” yaagidi zaaris.
1SA 23:12 Dawiti, “Qa7ila asay tananne ta asaa Saa7olas aathidi immanesha?” yaagidi zaaridi Godaa oychis. Goday, “Ee; enti hintena aathidi immana” yaagis.
1SA 23:13 Dawitinne usupun xeetu gidiya addeti Qa7ilape keyidi, issi bessafe hara bessi yuuyidosona. Dawiti Qa7ilape baqatidaysa Saa7oli si7ida wode baanaw qopidaysa aggaagis.
1SA 23:14 Dawiti bazzo miixataninne Ziifa mela biittan de7iya zumata bolla de7is. Saa7oli iya demmanaw ubba gallas koyees, shin Xoossay iya Saa7ola kushen aathidi immibeenna.
1SA 23:15 Dawiti Ziifa mela biittan de7iya Horesan de7ishin, Saa7oli iya wodhanaw keydaysa Dawiti eris.
1SA 23:16 Saa7ola na7aa Yoonataani dendidi, Dawitako Horesa bidi Dawiti Godaa wolqan minnanaada zoridi,
1SA 23:17 “Yayyofa; ta aawa Saa7oli nena kusheraka bochenna; neeni Isra7eele bolla kawotana; taanika neepe garsara haarana; ta aaway Saa7oli hessa loythidi erees” yaagis.
1SA 23:18 Enti nam7ay Godaa sinthan issoy issuwara caaqidosona; Dawiti Horesan gam7in Yoonataani ba soo bis.
1SA 23:19 Ziifa asay Saa7olako Gib7a bidi, “Dawiti Yasmoonape dugeha baggan, Hakila zuma bolla Horesa miixatan nu matan qosetidi de7ees.
1SA 23:20 Kawaw, ha77ika ne dosida wode duge wodha; nuuni iya ne kushen aathidi immana” yaagidosona.
1SA 23:21 Saa7oli, “Hinte taw qopida gisho hintena Goday anjo.
1SA 23:22 Bidi ane gujidika geeshshite; Dawiti daro toho awu biyakoka ooni iya be7idaako, shaakidi erite; I gene asi gideysa ta si7as.
1SA 23:23 Dawiti qosetiya bessata ubbaa be7idi, muruuta oda ekidi taako simmidi yiite. Hessafe guye, taani hintera baana; I he heeran de7iko, taani iya Yihuda biitta ubban demmana gakanaw koyana” yaagis.
1SA 23:24 Hessa gisho, enti Saa7olape sinthatidi Ziifa bidosona. He wode Dawitinne iya asay Yasmoonape dugeha baggara de7iya Ma7oona mela biittan Araba gadhan de7oosona.
1SA 23:25 Saa7olinne iya asay Dawita koyanaw bidosona. Dawita hessa si7ida wode zaallako wodhidi, Ma7oona bazzuwan uttis. Saa7oli hessa si7ida wode Ma7oona bazzuwan Dawita koyishe bis.
1SA 23:26 Saa7oli zumaape issi bagga miyiyara bees; Dawitinne iya asay hanko bagga miyiyara boosona. Enti Saa7olape baqatanaw eesotoosona; Saa7olinne iya asati, Dawitanne iya asata oykanaw mati uttidosona.
1SA 23:27 Shin, “Ellesada haaya; Filisxeemeti nu biitta olanaw yidosona” giya hara kiiti Saa7ola gakis.
1SA 23:28 Saa7oli Dawita koyeysa aggidi, Filisxeemetara oletanaw bis. Hessa gisho, he bessay “Kessi ekidi attiya zaalla” geetetis.
1SA 23:29 Dawiti he bessaafe keyidi, Engaada matan de7iya miixatan uttis.
1SA 24:1 Saa7oli Filisxeemeta olidi simmidaape guye, Dawiti Engaada bazzuwan de7ees geysa si7is.
1SA 24:2 Saa7oli Isra7eele giddofe dooretida heedzu mukulu asaa ekidi, Dawitanne iya asaa koyanaw, “Bazzo Deeshata Zaalla” geetetiya bessaa mata bis.
1SA 24:3 Saa7oli ogiya doonan dorsa girbiya matan de7iya gongoluwa giddo gelidi shee7anaw uttis. Dawitinne iya asay gongoluwas guye baggara shiiqidi uttidosona.
1SA 24:4 Dawita asay, “ ‘Heko, taani ne morkiya ne kushen aatha immana; neeni iya bolla koydaba oothana’ yaagidi Goday new odida gallasay hachi” yaagidosona. Dawiti Saa7ola erisonna shiiqidi Saa7ola ma7uwa macaraape qanxi ekis.
1SA 24:5 Dawiti Saa7ola ma7uwa macaraa qanxida gisho iya wozanay qiirotis.
1SA 24:6 Dawiti ba asaako, “Goday tiyida kawa, ta godaa bolla taani hessa oothanaysi woyko iya bolla ta kushiya denthanaysi taape haako; Goday tiyidi iya kawothis” yaagis.
1SA 24:7 Dawiti haysada gidi, Saa7ola ba asan boshisonna diggis. Saa7oli gongoluwa giddofe keyidi ba ogiya bis.
1SA 24:8 Saa7oli bidaape guye, Dawiti gongoluwa giddofe keyidi, “Ta godaw, kawaw” yaagidi Saa7ola xeegin, Saa7oli guye simmidi xeellis. Dawiti sa7an gufannidi Saa7olas ziggis.
1SA 24:9 Dawiti Saa7olako, “Dawiti nena qohanaw koyees” giya asaa neeni ayis si7ay?
1SA 24:10 Hachi ha gongoluwan Goday nena taw aathidi immidaysa neeni ne ayfen be7adasa. Taani nena wodhana mela guutha asati tana denthethidosona. Shin, “I, Goday tiyidi kawothidaysa gidiya gisho taani ta godaa bolla ta kushiya denthike” yaagada nena aggas.
1SA 24:11 Ta aawaw, ta kushen de7iya ne ma7uwa maccara haysa xeella. Ne ma7uwa macaraape qanxa ekas, shin nena wodhabike. Taani nena qohonnaysanne ne bolla makallonnaysa akeeka; taani nena qohabike, shin neeni tana wodhanaw shankataasa.
1SA 24:12 Nebaanne tabaa Goday pirdo; Goday neeni tana qohidaysa haluwa kesso, shin taani ne bolla ta kushiya denthike.
1SA 24:13 “Iita ootheysatape iiti keyees” giya beni leemisoy de7ees. Hessa gisho, taani nena kushenka bochike.
1SA 24:14 “Isra7eele kawoy oodde bolla dendii? Oona oykanaw kaallii? Hayqida kana woyko kastolle goodiyee?
1SA 24:15 Goday nu bolla daannato; nebaanne tabaa I pirdo; ta gisho I mooteto; ne kushepe tana I asho” yaagis.
1SA 24:16 Dawiti haasaya wursida wode Saa7oli Dawitako, “Ta na7a Dawita, hessi ne qaalee?” yaagidi Saa7oli ba qaala dhoqu oothidi yeekis.
1SA 24:17 “Neeni taape aadhida xillo; taani new iitabaa oothin, neeni taw lo77oba oothadasa.
1SA 24:18 Goday tana hachi new aathidi immin neeni tana wodhaboonna gisho neeni taw lo77oba oothada bessadasa.
1SA 24:19 Asi ba morke demmidi qohonna yeddiyee? Neeni taw hachi oothida keehatetha gisho, Goday nena anjo.
1SA 24:20 Neeni Isra7eele kawo gidanaysanne Isra7eele kawotethay ne maata garsan eqanaysa ta erayis.
1SA 24:21 Hiza ta kochaa dhaysona melanne ta sunthaa ta aawa soo asaa giddofe quchonna mela Godaa sunthan taw caaqa” yaagis.
1SA 24:22 Dawiti Saa7olas caaqis. Hessafe guye, Saa7oli ba soo simmidi bis; Dawitinne iya asay banta miixaa bidosona.
1SA 25:1 Sameeli hayqin, Isra7eele asa ubbay shiiqidi, iyaw yeekidosona; Rama kataman iya moogidosona. Hessafe guye, Dawiti Ma7oona mela biitta bis.
1SA 25:2 Ma7oona mela biittan, Qarmeloosan shaloy de7iya issi dure addey de7ees. Iyaw issi mukulu deeshatinne heedzu mukulu dorsati de7oosona. I enta ikisiya Qarmeloosan meedees.
1SA 25:3 He addiya sunthay Naabala, I Kaaleba yara; iya mache sunthay Abigiya. Iya akeekanchonne mala lo77o maccas, shin I azinay wozani bayna iita asi.
1SA 25:4 Dawiti mela biittan de7ishe, Naabali dorsaa ikise meedeysa si7is.
1SA 25:5 Dawiti tammu panthata haysada yaagidi kiittis; “Naabalako Qarmeloosa bidi, ta sunthan iya sarothite.
1SA 25:6 ‘Ne barey aduqo! Saroy newunne ne soo asaas gido; new de7iya ubbaas saroy gido!
1SA 25:7 Ne dorsa ikise meedeysa taani si7as; ne dorsaa heemmeysati nuura de7ida wode nuuni enta genibooko; enti Qarmeloosan de7ida wode ubban entabaape aybika pacibeenna.
1SA 25:8 Hessa neeni ne aylleta oychiko enti new odana. Nuuni hachi gibira gallas neeko yida gisho, ta panthatas hayyana keeha. Ne kushen de7iyabaape ne aylletasinne ne na7aa Dawitas hayyana imma’ yaagite” yaagidi kiittis.
1SA 25:9 Dawita asati Naabalako gakidi, Dawita sunthaanne kiitaa iyaw odidi, I gaanaba naagishe yan uttidosona.
1SA 25:10 Naabali, “Dawiti oonee? Isseye na7ay oonee? Ha wodiyan daro aylleti banta godatape baqatoosona.
1SA 25:11 Ta kathaa, ta haathaanne ta dorsaata meedeysatas shuketida ashuwa ekada, guuyeyi eretonna asas ayis immo?” yaagis.
1SA 25:12 Dawita asati simmi guye bidi Naabali gidaba ubbaa Dawitas odidosona.
1SA 25:13 Dawiti, “Hinte mashshaa dancite” yaagin, ubbay banta mashshaa dancidosona; Dawitika ba mashshaa dancis. Dawiti oyddu xeetu gidiya asatara dendidi bis; nam7u xeetu asay entaba naagidi attis.
1SA 25:14 Naabala aylletape issoy Naabala mache Abigiyako haysada yaagis; “Dawiti mela biittan de7ishe nu godaa saro gaanaw ase kiittis, shin I enta cayidi yeddis.
1SA 25:15 Gidoshin, ha asati nuus daro lo77o; enti nuna genibookona; nuuni entara bazzon pee7ida wode ubban nubaape aykoyka pacibeenna.
1SA 25:16 Nuuni nu dorsa wudiya enta matan heemmiya wode, qammanne gallas enti nuus dirsi gididosona.
1SA 25:17 Nu godaa bollanne iya soo asaa bolla iitabay gakana haniya gisho, hayyana ha odaa waataneko qopa. Nu goday asa zore si7onna iita asi gidiya gisho, oonika iya haasayisanaw danda7enna” yaagis.
1SA 25:18 Abigiya eeson nam7u xeetu uythu, nam7u ogoro woyne ushshu, ichashu caacetida dorsata, ishatamu kilo giraame caacetida tiya, issi xeetu uuketida woyne mor7enne nam7u xeetu balase nuka ekada hareta bolla caanasu.
1SA 25:19 Ba aylletako, “Hinte sinthatidi biite; ta hintena kaallana” yaagasu; shin ba azinaa Naabalas aykoka odabuuku.
1SA 25:20 Ba hariya toggada zumaa loobuwa duge wodhiya wode Dawitinne iya asay yishe iira gahetidosona.
1SA 25:21 Dawiti, “Iyabape aykoyka paconna mela taani ha addiya shaluwa naagiday coo mela; taani oothida lo77o oosuwas I taw iita kushe zaaris.
1SA 25:22 Wonto wonta gakanaw, iyabaa gidida addetape issuwa ta paxa aggiko, Xoossi tana pirdo” yaagis.
1SA 25:23 Abigiya Dawita be7ida wode hariyape eesota wodhada, Dawita sinthan gufannada ziggasu.
1SA 25:24 Iya tohuwa bolla kundada, “Ta godaw, ta balay ta bolla gido! Ta issiba odana; ta ne aylliya giyaba si7a.
1SA 25:25 Ha wozani bayna addey, Naabali giyaba si7opa; I ba sunthada eeya. Ta godaw, ne kiitida asata ta ne aylliya be7abike.
1SA 25:26 De7o Goday eriya mela, ne shempoy erin, ne suuthu gussonnaadanne halo keyonnaada nena teqiday Godaa. Ne morketinne nena qohanaw koyeysati Naabalada hano.
1SA 25:27 Ha imotay taani ne aylliya new, ta godaas ehidaysi nena kaalliya asatas imeto.
1SA 25:28 Ta godaw, ne aylle nagaraa atto yaaga! Neeni Godaa olaa oletiya gisho, Goday nenanne ne sheesha kawoyana. Ne de7o laytha ubban iitatethi ne bolla bentofo.
1SA 25:29 Ay asika nena wodhanaw koyiko, issi asi ba al7o shaluwa naageysada Goday, ne Xoossay nena saro naagana. Shin yambarshan shuchu holeysada I ne morketa holana.
1SA 25:30 Goday, ta godaas oothanaw qaala gelida keehatetha ubbaa oothiya wodenne Isra7eele bolla kawothiya wode,
1SA 25:31 ta goday azzaniya gaasoy woyko qiiroyabay baawa. Gaasoy bayna suuthu gussidabay woyko halo keydabay bayna gisho ne wozanay dagammenna. Goday new lo77oba oothida wode tana ne aylliw dogopa” yaagasu.
1SA 25:32 Dawiti Abigiyako, “Taara gahetana mela hachi nena kiitida Goday, Isra7eele Xoossay galatetto.
1SA 25:33 Taani asa suuthu gussonnaadanne halo keyonnaada ne lo77o qofay tana teqida gisho neeni anjeta.
1SA 25:34 Ta nena qohonnaada teqida de7o Goday, Isra7eele Xoossay eriya mela ne taara gahetanaw ellesada yoonnaako, sa7i wontana gakanaw Naabala asaape issi addeyka paxa attenna” yaagis.
1SA 25:35 Abigiya iyaw ehida imota I kushepe Dawiti ekidi, “Ne soo saro ba; taani ne gidaba si7as; ne oyshaaka ekas” yaagis.
1SA 25:36 Abigiya simmada Naabalako yaa wode, kawo son giigiya gibira mela gibira muzishe son uttis. Naabali daro mathotidi, ba wozanan ufaytiya gisho sa7i wontana gakanaw Abigiya iyaw aykoka odabuuku.
1SA 25:37 Wonta Naabala mathoy simmidaape guye, iya machiya hanidaba ubbaa iyaw odasu; Naabala wozanay wodhin, I daaburis.
1SA 25:38 Tammu gallasape guye Goday Naabala shocin, I hayqis.
1SA 25:39 Naabali hayqidaysa Dawiti si7ida wode, “Goday galatetto! Naabali tana cayidaysa halo Goday kessis. Taani iya aylley iitaba oothonna mela tana teqis. Naabali oothida iitabaa Goday iya bolla zaaris” yaagis. Hessafe guye, Dawiti Abigiya ekanaw koyidi kiita yeddis.
1SA 25:40 Dawita aylleti Qarmeloosan de7iya Abigiyako bidi, “Dawiti nena machanaw dosida gisho nuuni nena ekanaw yida” yaagidosona.
1SA 25:41 Abigiya gufanna ziggada, “Taani ne aylliya new kiitetanawunne ne aylleta tohuwa meeccanaw giigeta uttas” yaagasu.
1SA 25:42 Abigiya ellesa dendada ba hariya toggasu, iya ba ichashu macca aylletaranne Dawita kitida asara bada Dawita gelasu.
1SA 25:43 Dawiti kase Izira7eele maccasiw Aknahoomo ekidi de7ees; enti nam7ay iya macheta.
1SA 25:44 Saa7oli Dawita machiw, ba na7iw Melkoolo Galima addiya Leesa na7aa Falxas immis.
1SA 26:1 Ziifa asay Saa7olako Gib7a bidi, “Dawiti Yasmoona sinthan de7iya Hakila zuman qosetis?” yaagidosona.
1SA 26:2 Saa7oli, Isra7eeletape dooretida heedzu mukulu asi ekidi, Dawita koyanaw Ziifa mela biitta bis.
1SA 26:3 Saa7oli Yasmoona sinthan de7iya Hakila zumaa bolla de7iya ogiya matan dunkaanis; shin Dawiti he mela biittan uttis. Saa7oli iya kaallidi yidaysa Dawiti erida wode,
1SA 26:4 wochiya asi yeddidi, Saa7oli tuma he bessaa gakidaysa shaakidi eris.
1SA 26:5 Dawiti dendidi, Saa7oli dunkaanida bessaa bidi Saa7olinne toora moconay Neera na7ay Abeneeri zin7ida bessa be7is. Saa7oli dunkaanida gutan olanchoti iya yuushuwa teqin I dhiskis.
1SA 26:6 Dawiti Hite addiya Abimelekenne Xaruya na7aa Iyo7aaba ishaa Abisaya, “Saa7oli dunkaanida bessaa taara baanay oonee?” yaagidi oychis. Abisayi, “Taani neera baana” yaagis.
1SA 26:7 Hessa gisho, Dawitinne Abisayi he qamma olanchotako yaa wode Saa7oli ba huuphe son toora essidi, dunkaaniya giddon zin7idaysa demmidosona. Abeneerinne olanchoti iya yuushuwan zin7idosona.
1SA 26:8 Abisayi, “Xoossay ne morkiya hachi ne kushen aathidi immis; taani tooran iya issi toho sa7ara oythada caddana; iya zaara caddanaw koshshenna” yaagis.
1SA 26:9 Shin Dawiti Abisayako, “Neeni iya wodhopa; Goday tiyida kawa bolla ba kushiya denthiya oonaka Goday seerana.
1SA 26:10 De7o Goday eriya mela, Xoossay iya wodhana; I ba gallasan woyko olan hayqana.
1SA 26:11 Goday tiyida kawa bolla ta kushiya denthonaada tana Goday teqo. Ane iya huuphe son de7iya tooranne haatha oykiya miishiya ekidi boos” yaagis.
1SA 26:12 Dawiti Saa7ola huuphe son de7iya tooranne haathe oykiya miishiya ekin, enti bidosona. Enta oonika be7ibeenna woyko oonika eribeenna woyko oonika barkibeenna. Goday enta bolla wolqaama dhisko yeddida gisho ubbay dhisko hayqi aggidosona.
1SA 26:13 Dawiti hefinthi pinnidi, entafe haakidi hara dere bolla keyidi eqis.
1SA 26:14 Dawiti Saa7ola olanchotanne Neera na7aa Abeneera xeegidi, “Abeneera, taani xeegiya wode si7ikii?” yaagidi waassis. Abeneeri, “Qaala dhoqu oothi xeegidi kawa dhisko diggey oonee?” yaagis.
1SA 26:15 Dawiti, “Neeni wozanaama asi gidikii? Isra7eele giddon ne mela asi oonee? Yaatin, kawa, ne godaa ayis naagikii? Issi asi kawa, ne godaa wodhanaw bis.
1SA 26:16 Ne oothidabay lo77o gidenna. De7o Goday eriya mela, nenne ne olanchoti Xoossay tiyida hinte godaa naagiboonna gisho hinte hayqanaw bessees. Kawa tooraynne iya huuphe son de7iya haathe oykiya miishey awun de7iyako be7a” yaagis.
1SA 26:17 Dawita qaala gideysa Saa7oli eridi, “Ta na7aw Dawita, hessi ne qaalee?” yaagis. Dawiti, “Ee, ta godaw, kawaw, hessi ta qaala.
1SA 26:18 Ta godaw, tana ne aylliya neeni ayis kaallay? Taani ay oothadina? Ta balay aybee?
1SA 26:19 Ta godaw, kawaw, neeni ne aylliya qaala si7ana mela ta nena woossayis. Goday nena ta bolla denthidaba gidiko, I yarsho eko. Shin asi nena denthidaba gidiko, ‘Bada hara xoossata goyinna’ yaagidosona. Godaa biittan taw de7iya laatape enti tana gooddida gisho enti Godaa sinthan baadetidaba gido!
1SA 26:20 Ha77i Godaa sinthafe haakidi, allaga biittan de7iya uraa suuthaa gussofa. Issi asi kuraacho shankatanaw dere bolla keyeysada, Isra7eele kawoy kastolle koyanaw keyis” yaagis.
1SA 26:21 Saa7oli, “Taani nena qohas. Ta na7aw, Dawita, haa simma! Hachi ne ta shempiw hayqope ashshida gisho taani nena zaarada genike. Tuma taani eeyaba hanas; gita bala balas” yaagis.
1SA 26:22 Dawiti zaaridi, “Kawaw, ne tooray haysish, ne asaape issi asi yidi eko.
1SA 26:23 Issi issi asas iya xillotethaa melanne iya ammanetetha mela Goday gate qanxees. Hachi Goday nena ta kushen aathidi immis; shin Goday tiyida kawa bolla taani ta kushiya wothanaw koyabike.
1SA 26:24 Hachi ne shempuwa ta ashshidaysada Goday tana meto ubbaafe ashshidi boncho” yaagis.
1SA 26:25 Saa7oli, “Ta na7aw, Dawita, neeni anjeta. Neeni gitaba oothana; new injetana” yaagis. Dawiti ba ogiya bis; Saa7olika ba soo simmis.
1SA 27:1 Dawiti ba wozanan, “Issi gallas taani Saa7ola kushen daafatana; taani Filisxeeme biitta baqatanaape attishin, harabay taw lo77enna. Yaaniko, Saa7oli Isra7eele biitta ubban tana koyeysa aggana; taani iya kushepe kessa ekana” yaagidi qopis.
1SA 27:2 Hessa gisho, Dawitinne iyara de7iya usupun xeetu asati dendidi, Gaate kawa Ma7oka na7aa Ankusako bidosona.
1SA 27:3 Dawitinne iya asay Ankusara Gaaten uttidosona. Asa ubbay ba soo asa asa ekidi bis; Dawitika ba macheta, Izira7eele Aknahoomonne Naabala am7iw, Qarmeloosa maccasiw, Abigiya ekidi bis.
1SA 27:4 Dawiti Gaate baqatis geysa si7idi, Saa7oli zaaridi iya koyeysa aggis.
1SA 27:5 Dawiti kawa Ankusako, “Neeni tanan ufaytiko, taani yan daana mela ne kawotethan de7iya katamatape issuwa taw imma. Taani ne aylley kawoy de7iya kataman neera ayis uttanee?” yaagis.
1SA 27:6 He gallas Ankusi Xiqilaaga katamaa Dawitas immis; hachi gakanaw Xiqilaaga katamay Yihuda kawotaba gididi attis.
1SA 27:7 Dawiti Filisxeeme biittan issi laythinne oyddu ageena de7is.
1SA 27:8 Dawitinne iya asati pude keyidi, Geeshureta, Garzetanne Amaaleqata oloosona. Benipe doomidi, he asati Shuurape bidi Gibxe gakanaw de7iya biittan de7idosona.
1SA 27:9 Dawiti he biitta oliya wode ubban he biittan de7iya macca gidin, adde gidin, paxa aggibeenna. Dorsenne mehe, harenne gimale ma7o di77ees; yaatidi Ankusako simmees.
1SA 27:10 Ankusi, “Hachi awun olidetii?” gidi Dawita oychees. Dawiti, “Yihuda dugeha baggaa woyko Yirama7eela dugeha baggaa woyko Qeena dugeha baggaa olida” yaagees.
1SA 27:11 Entafe issi asi Gaate bidi, “Dawiti haysa oothis” gidi odonna mela Dawitinne iya asati macca adde ashshona wodhidosona. Dawiti Filisxeeme biittan de7ida wode ubban haysada oothis.
1SA 27:12 Ankusi Dawitan ammanetidi, “Dawiti ba asan, Isra7eelen daro ixetis; hesaa gisho, I taw merinaw aylle gidana” yaagidi qopis.
1SA 28:1 He wode Filisxeeme asati Isra7eeleta olanaw banta olanchota shiishidosona. Ankusi Dawitako, “Nenne ne asati taara olas baanaysa tuma era utta” yaagis.
1SA 28:2 Dawiti, “Hessa gidiko, ta ne aylley oothanaba ne be7ana” yaagis. Ankusi, “Daro lo77o; taani nena ta de7o laytha ubban tana naageysa oothana” yaagis.
1SA 28:3 Haysafe kase Sameeli hayqin, Isra7eele asa ubbay iyaw yeekidi, iya kataman Raman iya moogidosona. Saa7oli moytille xeegeysatanne marota Isra7eele biittafe yedethidi kessis.
1SA 28:4 Filisxeeme olanchoti shiiqidi, Suneema kataman dunkaanidosona; Saa7oli Isra7eele asa ubbaa shiishidi, Gilbo7a zuman dunkaanis.
1SA 28:5 Saa7oli Filisxeeme olanchota be7idi yayyis; iya wozanay daro dagammis.
1SA 28:6 Hessa gisho, ay oothaneko Godaa oychis; shin Goday amuhon woyko Uriimen woyko nabeta baggara iyaw odibeenna.
1SA 28:7 Hessafe guye, Saa7oli ba aylleta, “Moytille xeegiya maro taw koyte; taani iiko bada iyo oychana” yaagidi kiittis. Saa7ola aylleti, “Moytille xeegiya issi maroy Endooran de7ausu” yaagidosona.
1SA 28:8 Yaagin Saa7oli bana erisonna mela hara ma7o ma7idi, nam7u asata ekidi, qamma he mareeko bidi, maccasiw, “Hayyana, taw issi moytille xeegarki; taani suntha odiya asa taw dentharki” yaagis.
1SA 28:9 Yaagin maccasiya, “Moytille xeegeysatanne marota Isra7eele biittafe Saa7oli waati yedethi kessidaako, tuma neeni eraasa. Tana wodhisanaw neeni taw ayis xihe yeggay?” yaagasu.
1SA 28:10 Yaagin Saa7oli maccasiw, “De7o Xoossay eriya mela, neeni haysa gisho seeretaka” yaagidi Godan caaqis.
1SA 28:11 Maccasiya, “Taani new oona dentho?” yaagada oychasu. Saa7oli, “Sameela taw dentha” yaagis.
1SA 28:12 Maccasiya Sameela be7ada, waaso goochada, Saa7olako, “Neeni tana ayis cimmadii? Neeni Saa7ola gidiki!” yaagasu.
1SA 28:13 Kawoy, “Yayyofa! New aybe bentey?” yaagis. Maccasiya, “Issi moytilley biitta giddofe keyishin be7as” yaagasu.
1SA 28:14 Saa7oli maccasiw, “I ay daanii?” yaagis. Maccasiya, “Kaabba ma7ida issi cima addey keyis” yaagasu. Saa7oli he addey Sameela gideysa eridi, iya sinthan sa7an gufannis.
1SA 28:15 Sameeli Saa7olako, “Tana denthada ayis waaysay?” yaagis. Saa7oli, “Taani daro un7etas; Filisxeeme asati tana oloosona; Xoossay taape shaaketis; nabeta baggara woyko amuhon I taani oychiyaba odenna. Hessa gisho, taani oothanaba ne taw odana mela nena xeegas” yaagis.
1SA 28:16 Sameeli, “Goday shaaketidi new morke gidiko tana ayis zore oychay?
1SA 28:17 Goday ta baggara kaseti odidaba oothis; Goday kawotethaa neepe ekidi, ne shooruwa Dawitas immis.
1SA 28:18 Neeni Godaas kiitetaboonna gishonne iya eexiya iya sheniya Amaaleqa bolla polaboona gisho Goday hachi haysa ne bolla ehis.
1SA 28:19 Nenanne Isra7eele, Goday Filisxeemetas aathidi immana; nenne ne adde nayti wonto tanan gahetana; Goday Isra7eele olanchota Filisxeemetas aathidi immana” yaagis.
1SA 28:20 Saa7oli Sameela odaa si7idi yayyida gisho daaburidi, bana dogidi sa7an kundis. Saa7oli qammanne gallas kathi miboonna gisho iyaw wolqi ixis.
1SA 28:21 He maccasiya Saa7olako yada, I daro kokoreysa be7ada, “Taani ne aylliya new kiitetas; neeni tana oychidaba ta shempuwa dogada oothas.
1SA 28:22 Ha77i taani ne aylliya giyaba hayyana si7a; neeni mada gashtada ne ogiya baana mela taani new guutha kathi giigisas” yaagasu.
1SA 28:23 Saa7oli, “Miike” yaagis. Shin iya asati he maccaseera gididi iya woossidosona; enta woosa si7is; biittafe dendidi hiixan uttis.
1SA 28:24 He maccasiya ba son de7iya anqara maraa shukasu; dhiille eka munuqada, uythi uukasu.
1SA 28:25 Yaatada kathaa Saa7olasinne iya asatas aathin, enti midosona. He qamma dendidi bidosona.
1SA 29:1 Filisxeemeti banta olanchota ubbaa Afeeqan shiishidosona. Isra7eeleti Izira7eelen de7iya pulto haatha matan dunkaanidosona.
1SA 29:2 Filisxeeme halaqati banta olanchota xeetaninne mukulu cugan salpisidosona; Dawitinne iya asay Ankusara issife gididi guye baggara salpidosona.
1SA 29:3 Filisxeeme halaqati enta be7idi, “Ha Ibraaweti haysan ay oothona?” yaagidosona. Ankusi, “Haysi Isra7eele kawa Saa7ola aylliya Dawita gidennee? I daro wode taara aathis; I Saa7ola kaddidi keyoodepe hachi gakanaw taani iyape bala demmabike” yaagis.
1SA 29:4 Shin Filisxeeme halaqati Ankusa bolla hanqetidi, “Ha addiya neeni iyaw immida katamaa guye zaara. Olay goobiya wode I nu bolla simmidi dendonna mela I nuura olaa boopo. I ba godaara sigetanaw nu asata qoodhiya qaanxofe attishin, haraa ay oothanee?
1SA 29:5 Haysafe kase maccasay, ‘Saa7oli mukulata wodhis; Dawiti tammu mukulata wodhis’ yaagidi durishenne yexishe sabbiday Dawita gidennee?” yaagidosona.
1SA 29:6 Hessa gisho, Ankusi Dawita xeegidi, “De7o Goday eriya mela, neeni ammanthiya asi; neeni taara olas beysa ta dosayis. Neeni taako yoosape hachi gakanaw taani ne bolla bala demmabike. Shin halaqati neeni olas beysa dosokona.
1SA 29:7 Neeni guye simmada saro ba; Filisxeeme halaqata ufaysonnaba aykoka oothofa” yaagis.
1SA 29:8 Dawiti, “Taani ay oothadina? Taani neera de7oodepe hachi gakanaw ne taape ay bala demmadii? Yaatin, kawa, ta godaa morketara ayis oletikinaa?” yaagis.
1SA 29:9 Ankusi, “Xoossa kiitanchoda neeni taw lo77o gideysa taani erayis. Shin Filisxeeme halaqati, ‘I nuura ola boopo’ yaagidosona.
1SA 29:10 Nenne neera yida ne godaa aylletara wonto guura dendidi biite” yaagis.
1SA 29:11 Hessa gisho, Dawitinne iya asati Filisxeeme simmanaw wonta guura dendidosona; Filisxeemeti Izira7eele bidosona.
1SA 30:1 Dawitinne iya asati heedzantho gallas Xiqilaaga gakidosona. Amaaleqati Negebanne Xiqilaaga olidi, Xiqilaaga taman xuuggidosona.
1SA 30:2 Xiqilaagan de7iya maccasaanne na7ape cima gakanaw de7iya ubbaa di77idosona; entafe issi asika wodhonna enta ubbaa di77idi efidosona.
1SA 30:3 Dawitinne iya asati Xiqilaaga gakiya wode katamay taman xuugetidaysanne enta macheti, adde naytinne macca nayti di7etidaysa be7idosona.
1SA 30:4 Dawitinne iyara de7iya asay banta wolqay ixana gakanaw waassidi yeekidosona.
1SA 30:5 Dawita macheti Izira7eele Aknahoomanne kase Naabala machiya Qarmeloosa Abigiya nam7ayka di7etidosona.
1SA 30:6 Iya asay banta adde naytinne macca nayti di7etida gisho yilotidi Dawita shuchan caddanaw odetin, Dawiti daro un7etis. Gidoshin, Dawiti Godan ba Xoossan minetis.
1SA 30:7 Dawiti Abimeleke na7aa kahiniya Abyataarako, “Efuudiya ekada ya” yaagin, Abiyatari efuudiya Dawitas ehis.
1SA 30:8 Dawiti, “Taani, tana oliya asata kaallada gakanee?” yaagidi Godaa oychis. Goday, “Ee; enta kaallada ba; tuma enta ne gakana; tuma di7uwa zaarana” yaagis.
1SA 30:9 Dawitinne iyara de7iya usupun xeetu asati dendidi Boosora shaafa gakiya wode entafe guutha asati yan attidosona.
1SA 30:10 Nam7u xeetu asay shaafa pinnanaw daro daaburidosona. Shin Dawitinne oyddu xeetu asay kaallidosona.
1SA 30:11 Enti issi Gibxe asi denban demmidi, Dawitako ehidi, iyaw haathenne kathi immidosona.
1SA 30:12 Balase ongochonne nam7u woyne nuka iyaw immin midi gashtisis. I heedzu gallasinne heedzu qamma kathi moonna haathe uyonna gam7is.
1SA 30:13 Dawiti, “Neeni oodde ayllee? Awupe yadii?” yaagidi addiya oychis. Addey, “Taani Amaaleqa addiyas aylletida Gibxe asi; heedzu gallasape kase ta saketin, ta goday tana yeggi aggidi bis.
1SA 30:14 Nuuni Yihuda zawa, Keltaaweta dugeha bagganne Kaaleba dugeha baggaa olidi Xiqilaaga taman xuuggida” yaagis.
1SA 30:15 Dawiti, “Neeni tana he olida cugatako kaalethanaw danda7ay?” yaagidi oychis. I zaaridi, “Neeni tana wodhonna melanne ta godaas aathada immike gada taw Xoossan caaqa; taani nena entako kaalethana” yaagis.
1SA 30:16 Dawita kaalethidi entako gathis. Enti Filisxeemepenne Yihudape daro di7o di77ida gisho ufaytidi mishenne uyishe laaletidi uttidosona.
1SA 30:17 He gallas omarsafe doomidi wontetha gallas omarsi gakanaw Dawiti enta shocis. Gimale toggidi baqatida oyddu xeetu panthatape attishin, hari issi asika attibeenna.
1SA 30:18 Amaaleqa asati efida ubbaa, ba nam7u machetara issife Dawiti wosisidi ekis.
1SA 30:19 Asati di77idi efidabaape issibayka pacibeenna; na7i woyko cimi, addey woyko macci, hessadaka enti di77idi efida haraba ubbay paconna de7ishin Dawiti ubbaa zaaris.
1SA 30:20 Dawiti dorse, deeshenne mehe ubbaa di77is; Dawita asay I di77ida mehiya hanko mehiyape sinthara laaggishe, “Haysi Dawita di7o” yaagidosona.
1SA 30:21 Dawiti daaburidi Boosora shaafa achan attida nam7u xeetu asaako yis. Enti Dawitanne iyara de7iya asaa mokanaw keyidosona. Dawiti ba asaara shiiqidi enta sarothis.
1SA 30:22 Shin Dawitara bida asata giddofe pathonna iita asati, “Enti nuura boonna gisho nuuni zaaridi ehidabaape aykoka entaw shaakoko; enti banta naytanne banta macheta ekidi boonna” yaagidosona.
1SA 30:23 Dawiti zaaridi, “Ta ishato, Goday nuus immidaban hinte haysada oothanaw bessenna. I nuna naagidi, nuna olida cugata nuus aathidi immis.
1SA 30:24 Hinte giyaba oonika ekenna. Oletanaw bidaysatanne nubaa naagishe haysan gam7idaysata gishoy issino; ubbay gina shaaketana” yaagis.
1SA 30:25 He gallasape doomidi hachi gakanaw Isra7eele biittan hessi higgenne woga gidis.
1SA 30:26 Dawiti Xiqilaaga gakida wode ba lagge gidida Yihuda cimatako, “Godaa morketape di7etidabaape taani hintew immeysa ekite” yaagidi guuthara yeddis.
1SA 30:27 I hessa Beetelen, Raamota Negebaninne Yatiran de7eysatas,
1SA 30:28 Aro7eeran, Sifimootan, Eshtamoo7aninne
1SA 30:29 Rakaalan, Yirahima7eelan, Qeena katamatan,
1SA 30:30 Hormana, Boraasana, Atakaninne
1SA 30:31 Kebroonan de7eysatas yeddis. Inne iya asati yuuyida bessa ubban de7iya asaas yeddis.
1SA 31:1 Filisxeemeti Isra7eeletara oletidosona; Isra7eeleti Filisxeemeta sinthafe baqatidosona; daro Isra7eeleti Gilbo7a deriya bolla hayqidosona.
1SA 31:2 Filisxeemeti Saa7olanne iya adde nayta yedethidi, iya adde nayta Yoonataana, Amnadaabenne Malkisa wodhidosona.
1SA 31:3 Olay teqidi Saa7ola un7ethis; dongen dukeysati iya caddidi daro madunxisidosona.
1SA 31:4 Saa7oli ba ola miishiya tookeysako, “Ha qaxaretiboonaysati yidi, tana caddidi kaa7onna mela ne mashshan tana caddada wodha” yaagis. Shin iya ola miishiya tookeysi yayyidi ixin, Saa7oli ba mashshaa sa7an essidi, iya bolla kundis.
1SA 31:5 Iya ola miishiya tookeysi Saa7oli hayqidaysa be7idi, ika ba mashshaa sa7an essidi, iya bolla kundidi iyara issife hayqis.
1SA 31:6 Haysada hanidi, Saa7olinne iya heedzu adde nayti, iya ola miishiya tookeysinne iya asati ubbay he gallas hayqidosona.
1SA 31:7 Zangaaraninne Yordaanose shaafape hefintha baggara de7iya Isra7eele asay, Isra7eele olanchoti baqatidaysa, Saa7olinne iya nayti hayqidaysa be7idi banta katamaa aggidi baqatidosona. Filisxeemeti yidi, he katamata oykidosona.
1SA 31:8 Wontetha gallas Filisxeemeti aha bollafe ola misheta qaaridi ekanaw yidi, Saa7olinne iya heedzu adde nayti Gilbo7a deriya bolla hayqidi zin7idaysata demmidosona.
1SA 31:9 Enti Saa7ola qoodhiya qanxidi iya ola miishiya qaari ekidosona. Yaatidi banta eeqa keethaninne banta asaa giddon xoonuwa awaajana mela Filisxeeme biitta ubbaas kiita yeddidosona.
1SA 31:10 Saa7ola ola miishiya Astaroote geetetiya enta macca xoosse keethan wothidosona. Saa7ola aha Beet-Saana katama gimbiya bolla mismaaren dhishidi kaqidosona.
1SA 31:11 Filisxeemeti Saa7ola oothidaba Galadan de7iya Yaabesa asay si7ida wode,
1SA 31:12 mino asati qamma dendi bidi, Saa7ola ahaanne iya nayta aha Beet-Saana katama gimbiya bollafe wodhisidi Yaabesa katamaa ehidi, yan xuuggidosona.
1SA 31:13 Hessafe guye, enta meqethaa maxi ekidi, Yaabesan de7iya tamarsike mithaa garsan moogidosona; yaatidi laapun gallas xoomidosona.
2SA 1:1 Saa7oli hayqidaape guye, Dawiti Amaaleqata xooni simmidi Xiqilaagan nam7u gallas gam7is.
2SA 1:2 Heedzantho gallas issi addey ba ma7uwa daakidi, ba huuphen baana qolidi, Saa7oli dunkaanida gutaape yis. I Dawitako yidi sa7an gufannidi ziggis.
2SA 1:3 Dawiti, “Neeni awape yadii?” yaagidi oychis. I zaaridi, “Taani Isra7eeleti dunkaanida gutaape kessa ekada yas” yaagis.
2SA 1:4 Dawiti, “Ane hanidaba taw oda” yaagis. I zaaridi, “Nu olanchoti olape baqatidosona; nu asaape daroti hayqidosona; Saa7olinne iya na7ay Yoonataani hayqidosona” yaagis.
2SA 1:5 Dawiti iyaw odida panthaa, “Saa7olinne iya na7aa Yoonataani hayqidaysa neeni aybin eray?” yaagidi oychis.
2SA 1:6 Panthay, “Taani Gilbo7a deriya bolla de7ishin, Saa7oli ba toora guufetidi eqidaysa be7as; para gaaretinne para asati Saa7olako matatidosona.
2SA 1:7 He wode Saa7oli guye simmidi tana demmidi xeegis. Taani, ‘Yee’ yaagada koyas.
2SA 1:8 Saa7oli, ‘Neeni oonee?’ yaagidi oychin, ‘Taani Amaaleqa asi’ yaagada zaaras.
2SA 1:9 Hessafe guye, Saa7oli, ‘Taani madunxada, hayqos gakas; neeni ta bolla keyiya eqada tana wodha’ yaagis.
2SA 1:10 I kundidaape guye hayqope attonnaysa erida gisho taani iya bolla keya eqada iya wodhas. Iya huuphen de7iya kallachanne iya qesen de7iya ambaariya ekada neeko ta godaako yas” yaagis.
2SA 1:11 Dawitinne Dawita asay kayotidi, banta ma7uwa daakidosona.
2SA 1:12 Enti Saa7oli, Yoonataani, Godaa olanchotinne Isra7eele asay olan wurida gisho omarsi gakanaw kayotidosona; yeekidosona; xoomidosona.
2SA 1:13 Dawiti hessa entaw ehida panthaa, “Ne awupe yadii?” yaagidi oychis. I zaaridi, “Taani bete asi gididi de7iya Amaaleqa addiya na7a” yaagis.
2SA 1:14 Dawiti, “Goday tiyida kawa wodhanaw ne kushiya denthashe waanada yayyabikii?” yaagis.
2SA 1:15 Dawiti ba asatape issuwa xeegidi, “Iya wodha” yaagin, I Amaaleqa panthaa caddidi wodhis.
2SA 1:16 Dawiti Amaaleqa addiyako, “Goday tiyida kawa taani wodhas” yaagada “Neeni ne doonan markatida gisho ne suuthaa gomey nena oyko” yaagis.
2SA 1:17 Dawiti Saa7olasinne iya na7aa Yoonatanas haysada yaagidi zeleelis.
2SA 1:18 Yihuda asay, “Donge yeeho” geetetiya ha zelelsa tamaarana mela kiittis; ha zelelsay Yaashara maxaafan xaafetis.
2SA 1:19 “Neno Isra7eele, ne halaqati, dhoqa bessan hayqidosona. Wolqaamati waanidi kundidona!
2SA 1:20 Filisxeeme macca nayti hessa si7idi ufaytonna mela, qaxaretiboona asaa macca nayti hashshu goonna mela, haysa Gaate kataman odopite Asqaloona ogetan awaajofite.
2SA 1:21 Hinteno Gilbo7a dereto, hinte bolla iri bukofo; aki wodhofo. He bessan wolqaamata gondalley tunida gisho, Saa7ola gondalley zayten qushetiboona gisho, he gadiyan kathi dolopo.
2SA 1:22 Goyretidaysata suuthaafe, wolqaamata modhuwafe, Yoonataana dongey guye gibeenna; Saa7ola mashshay kallonna simmibeenna.
2SA 1:23 Saa7olinne Yoonataani doseteyisata; hayqoninne paxan shaaketibookona. Enti arganthafe aadhidi eeso; gaammofe aadhidi mino.
2SA 1:24 Hinteno Isra7eele maccasaw, zo7onne alleeqo ma7o mayzidaysas, hinte ma7uwa worqan alleeqisida Saa7olas yeekite.
2SA 1:25 Wolqaamati olan waanidi kundidona? Yoonataani dhoqa bessan hayqis.
2SA 1:26 Ta ishaa Yoonataana, ta new azzanayis; ne taw daro al7o. Neeni tana dosiya dosoy malaalsees; macca siiqopeka aadhees.
2SA 1:27 Wolqaamati waanidi kundidona? Ola miisheyka waanidi dhayidee?” yaagidi Dawiti zeleelis.
2SA 2:1 Hessafe guye, Dawiti, “Yihuda katamatape issuwa boo?” yaagidi Godaa oychis. Goday, “Ee, ba” yaagis. Dawiti, “Awu boo” yaagidi oychis. Goday, “Kebroona ba” yaagidi zaaris.
2SA 2:2 Dawiti ba nam7u macheta, Izira7eele Aknahoomanne kase Naabala machiw Qarmeloosa Abigiya ekidi Kebroona katamaa bis.
2SA 2:3 Dawiti baara de7iya asatanne enta soo asa ubbaa ehin, Kebroonaninne iya heeran de7iya katamatan de7idosona.
2SA 2:4 Yihuda asati Kebroona katamaa yidi, Dawita tiyidi Yihuda bolla kawothidosona. Dawiti Yaabesa Galada asay Saa7ola moogidaysa si7ida wode,
2SA 2:5 I ase kiittidi, “Hinte hinte godaa Saa7ola moogida gisho he keehatethas Goday hintena anjo.
2SA 2:6 Goday siiquwanne tumatethaa hintew qonciso; taanika ha keehatetha gisho hintew lo77o kushe zaarana.
2SA 2:7 Hiza minnite; xaalite; hinte goday Saa7oli hayqis. Yihuda asay tana tiyidi, banta bolla kawothidosona” yaagis.
2SA 2:8 Saa7ola tora moconay Neera na7ay Abeneeri Saa7ola na7aa Iyabuste ekidi, Mahinayma geetetiya bessaa efis.
2SA 2:9 Iya Galadan, Aseeran, Izra7eelan, Efreeman, Biniyaameninne Isra7eele biitta ubban kawothis.
2SA 2:10 Saa7ola na7ay, Iyabustey Isra7eele bolla kawotiya wode iyaw oytamu laythi; I nam7u laythi kawotis. Gidoshin, Yihuda asay Dawita kaallidosona.
2SA 2:11 Dawiti Kebroonan Yihuda bolla laapun laythinne bagga kawotis.
2SA 2:12 Neera na7ay Abeneerinne Saa7ola na7ay Iyabuste asay Mahinaymape Gaba7oona bidosona.
2SA 2:13 Xaruya na7ay Iyo7aabinne Dawita asay Gaba7oona olla haatha matan entara gahetidosona. Issi cugay olla haathaafe hefinthan uttin, issi cugay hafinthan uttis.
2SA 2:14 Abeneeri Iyo7aabako, “Ane hintefenne nuupe panthati dendidi, nu sinthan oleto” yaagis. Iyo7aabi, “Ero, dendidi oleto” yaagis.
2SA 2:15 Hessa gisho, Biniyaamepe Saa7ola na7aa Iyabustes tammanne nam7u asati keyidi, Dawitas eqida tammanne nam7u asatara ola gahetidosona.
2SA 2:16 Issoy issoy ba morkiya huuphiya oykidi, mashshan miyen caddis; hessada hannidi laatamanne oydday hayqidosona. Hessa gisho Gaba7oonan de7iya he bessay Mashsha biitta geetetis.
2SA 2:17 He gallas wolqaama ola oletidi, Dawita asay Abeneeranne Isra7eele asaa xoonis.
2SA 2:18 Xaruya nayti heedzay Iyo7aabi, Abisinne Asaheeli he bessan de7oosona; Asaheeli woshi7eda eeson woxidi,
2SA 2:19 Asaheeli Abeneera ushachi woyko haddirsi goonna yedethis.
2SA 2:20 Abeneeri guye simmidi, “Asaheela, nenee?” yaagidi oychis. Asaheeli, “Ee tana” yaagis.
2SA 2:21 Abeneeri, “Ushachi woyko haddirsi simmada, asatape issuwa oykada iya ola miishiya eka” yaagis. Shin Asaheeli iya yedetheysa aggonna ixis.
2SA 2:22 Qassika Abeneeri, “Taani nena sa7ara gathada oythonna de7ishin, tana yedetheysa agga! Nena wodhada taani ne ishaa Iyo7aaba som7uwa waatada xeellanee?” yaagidi waassis.
2SA 2:23 Shin Asaheeli iya yedetheysa aggonna ixis. Hessa gisho, Abeneeri toora guye yeddidi, Asaheela uluwa caddin tooray zokora kanthidi keyis. Asaheeli he bessan kundidi hayqis; Asaheeli hayqida bessaa gakida asa ubbay yan eqis.
2SA 2:24 Shin Iyo7aabinne Abisi Abeneera gooddidosona; awi wulliya wode Gaba7oona mela biittako efiya ogiyan Gaadape sintha baggara de7iya Ama zumako gakidosona.
2SA 2:25 Biniyaame asay Abeneerako shiiqidosona; issi cuga medhidi issi zumaa bolla eqidosona.
2SA 2:26 Abeneeri Iyo7aaba xeegidi, “Merinaw oletishe daaneyee? Haysa wursethay camo gidanaysa neeni erikii? Ne asay, banta ishata gooddeysa aggana mela ayis odikii?” yaagis.
2SA 2:27 Iyo7aabi, “De7o Xoossay ero! Neeni odonnaba gidiyako ta asay ba ishata sa7i wontana gakanaw goodda aggokona” yaagis.
2SA 2:28 Iyo7aabi moyze punnin asa ubbay essis. Isra7eeleta zaari goodibookona woyko olibookona.
2SA 2:29 Abeneerinne iya asay he qamma kumethi hemetidi Araba gadha gakidosona. Yordaanose shaafa pinnidi, Betroona kanthidi Mahinayme yidosona.
2SA 2:30 Iyo7aabi Abeneera gooddeysa aggidi, ba asa ubbaa issi bessi shiishidi xeelliya wode, Asaheela gujonna Dawita asaape tammanne uddufun asi pacis.
2SA 2:31 Shin Dawita asay Abeneerara de7iya Biniyaame kochatape heedzu xeetanne usupun tammu asi wodhidosona.
2SA 2:32 Asaheela aha ekidi, Beeteleme kataman de7iya iya aawa duufon moogidosona. Iyo7aabinne iya asay qamma kumethi hemetidi sa7i wontiya wode Kebroona gakidosona.
2SA 3:1 Saa7ola soo asaynne Dawita asay daro wode oletidosona; Dawiti olan minni minni biya wode Saa7ola asay daaburi daaburi bis.
2SA 3:2 Kebroonan Dawitas nayti yeletidosona; Izira7eele Aknahooma yelida bayra na7ay Amnoona;
2SA 3:3 Qarmeloosa Abigiya kase Naabala machiya yelida Kil7aabi nam7antho na7a. Gashura kawa Talmaya na7iya Ma7ika yelida Abeseloomey heedzantho na7a.
2SA 3:4 Oyddanthoy Haagita na7aa Adoona; ichashanthoy Abixaala na7aa Safaaxa.
2SA 3:5 Usupunthoy Dawita mache Egili na7aa Yitra7aama; ha nayti ubbay Kebroonan yeletidosona.
2SA 3:6 Saa7ola soo asaaranne Dawita soo asaara oletiya wode Abeneeri Saa7ola asaa bolla minni minni bis.
2SA 3:7 Saa7olas Iyoheela na7a gidida Irxifo geetetiya issi laggethiya de7awusu; Iyabustey Abeneerako, “Ta aawa laggethera ayis aqadii?” yaagidi oychis.
2SA 3:8 Abeneeri iya odan daro yilotidi, “Tana neeni Yihudako simmida gaata kana gadiyee? Taani ne aawa Saa7olas, iya ishatasinne iya dabbotas ammanetada de7as; nenaka Dawitas aathada immabike. Shin ha77i neeni tana ha maccase gisho mootaasa!
2SA 3:9 Xoossay Dawitas oothana gidi caaqida qaala taani polonna ixiko, Xoossi tana pirdo.
2SA 3:10 Saa7ola kochaafe kawotethaa wosisidi, Daanepe Barsaabe gakanaw Isra7eele bollanne Yihuda bolla, Dawita araata minthanaw Goday caaqis” yaagis.
2SA 3:11 Iyabustey Abeneeras yayyida gisho hara qaala pogibeenna.
2SA 3:12 Abeneeri Dawitako, “Biittay oossee? Neeni taara caaqa; Isra7eele asa ubbay neeko simmana mela ta nena maaddana” yaagidi ase kiittis.
2SA 3:13 Dawiti, “Lo77o! Ta neera caaqana. Shin taani nena issiba oychayis; neeni tana be7anaw yaa wode Saa7ola na7iw Melkoolo ekonna yoopa” yaagis.
2SA 3:14 Hessafe guye, Dawiti Saa7ola na7a Iyabusteko, “Xeetu Filisxeemeta qaaratada koyta oothada immida ta machiw Melkoolo taw imma” yaagidi ase kiittis.
2SA 3:15 Iyabustey ase kiittidi I azina Lawusha na7a Palxi7eelape kessi ekis.
2SA 3:16 I azinay Biraqima katama gakanaw yeekishe I geedo kaallis. Abeneeri iyako, “Guye soo ba” yaagin addey guye simmidi bis.
2SA 3:17 Abeneeri Isra7eele cimatako bidi, “Dawiti hinte bolla kawotana mela daro wode amotideta.
2SA 3:18 Ha77i polite! Goday, ‘Ta asaa Isra7eele, Filisxeemeta kushepenne enta morketa ubbaa kushepe ta aylliya Dawita baggara ashshana’ gidaysa hassayite” yaagis.
2SA 3:19 Abeneeri Biniyaame kochatas hessa odis. Isra7eele asaynne Biniyaame asa ubbay oothanaw koyida ubbaa Dawitas odanaw Abeneeri Kebroona bis.
2SA 3:20 Abeneeri baara laatamu asi ekidi, Kebroona bin, Dawiti iyawunne iya asaas gibira giigisis.
2SA 3:21 Abeneeri Dawitako, “Enti neera caaqana melanne ne wozanay amotiya ubbaa ne haarana mela ta bada Isra7eele asaa kawas ta godaas shiishana” yaagis. Yaagin Dawiti Abeneera moyzidi saro yeddis.
2SA 3:22 He wode Dawita asaynne Iyo7aabi olape darobaa di77idi simmidosona. Shin Dawiti iya saro ba gidi yeddida gisho, Abeneeri Kebroonan Dawitara deenna.
2SA 3:23 Iyo7aabinne iyara de7iya olanchoti gakiya wode asay, “Neera na7aa Abeneeri kawa Dawitako yin, kawoy iya yeddin saro bis” yaagidi odidosona.
2SA 3:24 Hessa gisho, Iyo7aabi kawako bidi, “Hessi waanidi hanidee? Abeneeri neeko yin, ayis yeddadii? Heko I bikichis!
2SA 3:25 Neera na7ay Abeneeri nena cimmanaw, neeni geliyasonne keyaso be7anawunne neeni oothiya ubbaa eranaw yis” yaagis.
2SA 3:26 Iyo7aabi Dawita sinthafe keyidi, Abeneera geedo kiitaa yeddin, enti iya Siira olla haatha matape guye zaaridosona; shin Dawiti hessa erenna.
2SA 3:27 Abeneeri Kebroona simmidi yida wode Iyo7aabi iyara dumma odetanaw koyida daanisidi dirsa pengiyako de7iya kifiliyanne iya efis. Ba ishaa Asaheela suutha zaaranaw Abeneera ulon caddin Abeneeri he bessan hayqis.
2SA 3:28 Dawiti guyepe hessa si7ida wode, “Taaninne ta kawotethay Neera na7aa Abeneera suuthaa gisho Godaa sinthan merinaw oyshetoko.
2SA 3:29 Iya suuthay Iyo7aabanne iya aawa soo asa acho; madunthi de7iya asi woyko goga hargey de7iya asi woyko wobbe asi woyko mashshan hayqiya asi woyko koshatiya asi Iyo7aaba kochan dhayopo” yaagis.
2SA 3:30 Gaba7oonan keyida olan banta ishaa Asaheela Abeneeri wodhida gisho, Iyo7aabinne iya isha Abisi Abeneera wodhidosona.
2SA 3:31 Dawiti Iyo7aabanne iyara de7iya asaa, “Hinte ma7uwa daakite; baana qolite; Abeneera halaa sinthan yeekite” yaagis. Kawo Dawiti hala kaallidi duufo bis.
2SA 3:32 Abeneeri Kebroonan moogetis; kawoy ba qaala dhoqu oothidi duufon yeekis; asa ubbay yeekidosona.
2SA 3:33 Kawoy Abeneeras, “Abeneeri eeya asada hayqanaw bessii?
2SA 3:34 Ne kushey qashetibeenna; Ne tohoy santhalaatan oyketibeenna. Asi iita asa kushen hayqeysada hayqis” yaagidi zeleelis. Asa ubbay Abeneeras zaaridi yeekidosona.
2SA 3:35 He gallas Dawiti kathi maana mela asay iya shoobbidosona. Shin Dawiti, “Awa ayfey de7ishin, kathi woyko haraba baariko Xoossi tana pirdo” yaagidi caaqis.
2SA 3:36 Kawoy oothidaba asa ubbay be7idi ufaytidosona; tumaka kawoy oothidaba ubbay asaa ufaysis.
2SA 3:37 Hessa gisho, he gallas Dawita asaynne Isra7eele asa ubbay kawoy Neera na7aa Abeneera wodhisiboonaysa eridosona.
2SA 3:38 Kawoy ba aylletako, “Isra7eele biittan gita asinne halaqi hayqidaysa hinte akeekeketii?
2SA 3:39 Taani Xoossay tiyida kawo gidikoka, taani daaburancho; haysati Xaruya nayti ta bolla minnidosona; iita oothidaysatas Goday enta oosuwada zaaro” yaagis.
2SA 4:1 Saa7ola na7ay Iyabustey Abeneeri Kebroonan hayqidaysa si7ida wode iya wozanay til7is; Isra7eele asa ubbayka dagammis.
2SA 4:2 Saa7ola na7aa Iyabustes ola kaalethiya nam7u halaqati de7oosona; issuwa sunthay Ba7ana; hankoy qassi Rakaaba. Enti Biniyaame koche gidida Ba7aarote addiya Irmoona nayta. Ba7aarotey Biniyaame baggada taybetees.
2SA 4:3 Ba7aarotan de7ida koyro asati Gitayma biitta baqatidi, hachi gakanaw bete asada yan de7idosona.
2SA 4:4 Saa7ola na7aa Yoonatanas nam7u tohoy silida na7i de7ees; Saa7olanne Yoonataana hayquwa worey Izra7eelepe si7etiya wode I ichashu laytha na7a. He na7aa dichiyara iya ekada baqatishin na7ay kundin iya tohoy silis; he na7aa sunthay Mempiboste.
2SA 4:5 Ba7aarote addiya Irmoona nayti Rekaabinne Ba7aani Iyabuste soo bidi seeta gallas gakidosona. Enti gakiya wode I shempanaw alga bolla zin7is.
2SA 4:6 Enti giste koyiya asada hanidi soo gelidi, iya uluwan caddidosona. Rekaabinne iya ishaa Ba7aani lepara keydi bidosona.
2SA 4:7 Iyabustey qol7an arsan zin7idaysa demmidi, iyaw uluwan caddidi wodhidosona; iya huuphiya qanxi ekidi, Araba gadha efiya ogiya oykidi, qammara bidosona.
2SA 4:8 Iyabuste huuphiya Kebroonan de7iya Dawitas ehidosona. Kawa, “Nena wodhanaw koyiya ne morkiya Saa7ola na7aa Iyabuste huuphiya haysa be7a. Saa7ola bollanne iya nayta bolla kawa nu godaa gisho Xoossay hachi halo keyis” yaagidosona.
2SA 4:9 Shin Ba7aarote addiya Irmoona nayta Rekaabanne iya ishaa Ba7ana Dawiti haysada yaagis; “Meto ubbaafe tana ashshida de7o Goday eriya mela.
2SA 4:10 Taw mishiraacho odiya asada, ‘Saa7oli hayqis’ yaagidi taw odin, taani iya Xiqilaagan oykada wodhas; taani iya mishiraachuwas immida woytoy haysa.
2SA 4:11 Ba son ba arsan zin7ida xillo addiya wodhida iita asatas iya haluwa keyeysi ay mela iitandesha! Iya suuthaa taani hinte kushepe achana; hintena taani biitta bollafe dhaysana!” yaagis.
2SA 4:12 Rekaabanne Ba7ana wodhana mela Dawiti ba olanchota kiittin, olanchoti enta wodhidosona. Enta kushiyanne tohuwa qanxidi, Kebroonan olla haatha matan kaqidosona. Iyabuste huuphiya efidi, Abeneera duufon Kebroonan moogidosona.
2SA 5:1 Isra7eele zare ubbay Dawitako Kebroona yidi, “Nuuni ne ashonne ne suuthu.
2SA 5:2 Kase Saa7oli nuus kawo gididi de7iya wodeka Isra7eele asaa olas kaalethiday nena. Goday nena, ‘Neeni ta asaa Isra7eele heemmana; enta bolla kawotana’ yaagidi qaala gelis” yaagidosona.
2SA 5:3 Isra7eele cimati ubbay kawa Dawitako Kebroona yidosona; I entara Kebroonan Godaa sinthan caaqis; Isra7eele bolla kawotana mela Dawita tiyidosona.
2SA 5:4 Dawiti kawotiya wode iyaw hastamu laythi; I oytamu laythi kawotis.
2SA 5:5 Kebroonan Yihuda bolla laapun laythinne usupun ageena kawotis; Yerusalaamen Isra7eele bollanne Yihuda bolla hastamanne heedzu laythi kawotis.
2SA 5:6 Yerusalaamen de7iya Yaabuse asaa olanaw Dawitinne iya asay bidosona. Yaabuse asay, “Dawiti ha katamaa gelanaw danda7enna” gidi qopida gisho hari attoshin, “Qooqetinne wobbeti nena teqanaw danda7oosona; ne ha katamaa gelaka” yaagidosona.
2SA 5:7 Gidoshin, Dawiti Xiyoonen de7iya enta miixa oykin, iya Dawita katama gidasu.
2SA 5:8 He gallas Dawiti, “Yaabuse asaa olidi oykiya oonika Dawita morke gidida wobbetinne qooqeti de7iya bessaa gakanaw shaafara pude keyanaw koshshees” yaagis. Hessa gisho, “Qooqetinne wobbeti gadho gelokona” geetetis.
2SA 5:9 Dawiti he miixaa oykidi, yan de7is; he miixaa Dawita katamaa yaagidi sunthis. Dawiti Miilope doomidi he katamaa yuushshidi gimbis.
2SA 5:10 Ubbaafe Wolqaama Goday Xoossay iyara de7iya gisho Dawiti minni minni bis.
2SA 5:11 Xiroosa kawoy Kiraami Dawitas kawo gadho keexana mela ziga mithi, anaaxetanne shuchu masseyisata yeddin, enti iyaw keethe keexidosona.
2SA 5:12 Goday Isra7eele bolla iya kawo oothidi minthidaysanne ba asaa Isra7eele gisho iya kawotethaa dhoqu oothidi bonchidaysa Dawiti eris.
2SA 5:13 Dawiti Kebroonape Yerusalaame yidaape guye, hara laggethotanne macheta gujidi ekin, hara macca naytinne adde nayti iyaw yeletidosona.
2SA 5:14 Yerusalaamen iyaw yeletida adde nayta sunthay Samu7a, Shobaaba, Naatana, Solomone,
2SA 5:15 Yibhaara, Elishu7a, Nefega, Yafi7a,
2SA 5:16 Elishama7a, Eliyaadanne Elfalaxa.
2SA 5:17 Dawiti Isra7eele bolla kawo gididi tiyetidaysa Filisxeemeti si7ida wode enti ubbay Dawita koyanaw keyidosona; shin Dawiti hessa si7idi miixan bidi gelis.
2SA 5:18 Filisxeemeti bidi, Raafayme zangaaran laaletidi uttidosona.
2SA 5:19 Hessa gisho, Dawiti, “Taani bada Filisxeemeta olo? Neeni enta taw aathada immanee?” yaagidi Godaa oychis. Goday, “Ee ola; tuma ta enta new aathada immana” yaagis.
2SA 5:20 Dawiti Ba7al-Parasime geetetiya bessaa bidi, yan enta xoonis. I, “Di7o haathi menthidi keyeysada Goday ta morketa ta sinthan mentherethis” yaagis. Hessa gisho, he bessa sunthay Ba7al-Parasime geetetis.
2SA 5:21 Filisxeemeti banta eeqata he bessan yeggidi bin, Dawitinne iya asay he eeqata ekidi bidosona.
2SA 5:22 Filisxeemeti guye bidi, nam7antho Raafayme zangaaran laaletidi uttidosona.
2SA 5:23 Dawiti Godaa nam7antho oychin, Goday, “Enta guye baggara teqada wolaa sinthan enta ola, shin entaw som7on keyopa.
2SA 5:24 Wola mithaa xeeran salpe qaala neeni si7iya wode Filisxeeme olanchota shocanaw Goday neepe sinthe aadhidaysa erada ellesa” yaagis.
2SA 5:25 Dawiti Goday kiittidaysada oothis; Geebape Gezera gakanaw Filisxeeme olanchota wodhis.
2SA 6:1 Isra7eele giddofe dooretida hastamu mukulu asata Dawiti zaaridi shiishis.
2SA 6:2 Dawitinne iya asa ubbay Yihuda Baala katamaape dendidi, kiruubetape giddon ba kawotetha araata bolla uttida Ubbaafe Wolqaama Godaa sunthan xeegetida Xoossa Taabotiya ehanaw bidosona.
2SA 6:3 Enti Xoossa Taabotiya ooratha gaaren wothidi, dere huuphen de7iya Amnadaabe soope ehidosona. Amnadaabe nayti Oozinne Ahiyoy ooratha gaariya kaalethoosona.
2SA 6:4 Dere huuphen de7iya Amnadaabe soope Xoossa Taabotiya ehiya wode Ahiyoy Taabotiyape sinthara hemetees.
2SA 6:5 Dawitinne Isra7eele asa ubbay diithan, maasinqon, karaabon daalaninne shaashshoten kaa7ishe banta kumetha wolqan Godaa sinthan ufaytidi bonchoosona.
2SA 6:6 Naakoni katha bukiya wudumma gakiya wode boorati dhubetin, Oozi ba kushiya yeddidi, Xoossa Taabotiya oykis.
2SA 6:7 Oozi Taabotiya bochida gisho Godaa hanqoy iya bolla eexis. Xoossay iya shocin he bessan Xoossaa Taabotiya matan hayqis.
2SA 6:8 Godaa hanqoy Ooza shocida gisho Dawiti azzanis. He bessay hachi gakanaw Oozi shocetida bessaa geetetees.
2SA 6:9 He gallas Dawiti Godaa yayyida gisho “Godaa Taabotey taako waanidi yaanee?” yaagis.
2SA 6:10 Hessa gisho, I Godaa Taabotiya baara Dawita Katamaa ehanaw koybeenna. Hessa aggidi Gaate addiya Abidaara soo efis.
2SA 6:11 Godaa Taabotey Abidaara son heedzu ageena gam7is; Goday Abidaaranne iya soo asaa ubbaa anjis.
2SA 6:12 Xoossa Taabotiya gisho Goday Abidaara soo asaanne iyaw de7iya ubbaa anjidaysa kawoy Dawiti si7is. Hessa gisho, Dawiti Abidaara soo bidi, Xoossa Taabotiya Dawita Katamaa ufaysan ehis.
2SA 6:13 Dawiti Godaa Taabotiya tookida asati usupuna tango tangida wode enta essidi, issi kormanne issi anqara mari yarshis.
2SA 6:14 Dawiti liinope oosetida efuude ma7idi, baw de7iya wolqa ubban Godaa sinthan duris.
2SA 6:15 Dawitinne Isra7eele asa ubbay ufaysan ililishenne moyze punnishe Godaa Taabotiya Dawita Katama ehidosona.
2SA 6:16 Godaa Taabotey Dawita Katama geliya wode Saa7ola na7iya Melkoola maskootera xeellada, kawoy Dawiti Godaa sinthan gupishininne durishin be7ada ba wozanan kadhasu.
2SA 6:17 Dawiti Godaa Taabotiya wothanaw tolida dunkaaniya giddon Taabotiya wothin, Dawiti xuussa yarshonne issifetetha yarsho Godaas yarshis.
2SA 6:18 Dawiti xuussa yarshonne issifetetha yarsho yarshidaape guye Ubbaafe Wolqaama Godaa sunthan asaa anjis.
2SA 6:19 Isra7eele asa ubbaas, maccas addes huuphen huuphen issi issi uythi, issi issi qanxo ashonne issi issi woyne nuka gishis. Hessafe guye asa ubbay ba soo soo simmis.
2SA 6:20 Dawiti ba soo asaa anjanaw soo simmida wode Saa7ola na7iya Melkoola iya mokanaw keyada, “Pathonna asati kallo hemeteysada hachi Isra7eele kawoy ba macca aylleta sinthan kallotidi ay mela bonchetide!” yaagasu.
2SA 6:21 Dawiti, “Ne aawapenne iya soo asape aathidi ba asaa Isra7eele kaalethana mela tana doorida Godaa sinthan duras. Taani Godaa bonchoos dursa aggike.
2SA 6:22 Taani haysafe aathada buroo tana toochana; tanatethaa ziqi oothana. Shin neeni gida macca aylleta sinthan ta bonchetana” yaagis.
2SA 6:23 Saa7ola na7iya Melkoola hayqana gakanaw na7a yelabuuku.
2SA 7:1 Kawoy ba gadhon wopu gidi uttidaapenne Goday iya yuushuwan de7iya iya morketape shempisidaape guye,
2SA 7:2 nabiya Naatanako, “Taani zigape keexetida keethan de7ayis, shin Xoossa Taabotey dunkaanen de7ees” yaagis.
2SA 7:3 Naatani, “Oothanaw ne wozanan qopidaba ubbaa ootha; Goday neera de7ees” yaagis.
2SA 7:4 Shin he qamma Godaa qaalay Naatanako yidi,
2SA 7:5 “Bada ta aylliya Dawita haysada yaaga; ‘Taani daana keethaa keexanay nena gidaka.
2SA 7:6 Taani Isra7eeleta Gibxe biittafe kessida wodepe doomada hachi gakanaw keethan de7abike; taani dunkaanen yaanne haanne yuuyashe de7as.
2SA 7:7 Taani Isra7eele asaara yuuyida bessa ubban ta asa Isra7eele heemmana mela taani shuumida asaa, “Taw ziga mithan ayis keethe keexabikii?” gada oychabike’ yaagis.
2SA 7:8 “Hiza, ta aylliya Dawitas oda; ‘Ubbaafe Wolqaama Goday neeko haysada yaagees; taani nena hentha bessafe, dorse heemmiya soope denthada ta asaa Isra7eele kaalethana mela oothas.
2SA 7:9 Neeni bida bessa ubban taani neera gidas; ne morketa ubbaa ne sinthafe dhaysas. Ha77i zaarada taani ha sa7an eretida gita asatada ne sunthaa gitayana.
2SA 7:10 Taani ta asaa Isra7eeles besse immada, enta he bessan tokana. Enti banta bessan daana; nam7antho dagammokona. Kase daynnata wodepe doomidi hanidaysada hizape guye enta iita asi haarenna.
2SA 7:11 Taani nena ne morketa ubbaafe shempisana. “ ‘Hessa bolla gujidi Goday ba huuphen taani new keethe keexana yaagidi odis.
2SA 7:12 Ne barey wurin, hayqada ne mayzata ne gakiya wode ne gulbatape keyida na7a taani denthana; iya kawotethaa minthana.
2SA 7:13 Ta sunthaas keethe keexanay iya; taani iya araata merinaw mintha essana.
2SA 7:14 Taani iyaw aawa gidana; ika taw na7a gidana. I baliya wode taani iya asa xam7an, asi shociya lisson seerana.
2SA 7:15 Shin taani ne sinthafe diggida Saa7olape ta keehatethay eketidaysada iyape kumthi eketenna.
2SA 7:16 Ne kochatinne ne kawotethay ta sinthan merinaw daana; ne araatay merinaw minnidi eqana’ ” yaaga.
2SA 7:17 Naatani Goday iyaw qoncethan bessida qaala ubbaa Dawitas odis.
2SA 7:18 Hessafe guye, kawoy Dawiti giddo gelidi Godaa sinthan uttidi haysada yaagidi woossis. “Abeeti ta Godaa xoossaw, hachi gakanaw neeni haysa ubbaa oothanaw ta oonee? Ta soo asayka aybee?
2SA 7:19 Abeeti ta Godaw, Xoossaw, haysi ne ayfe sinthan guutha daanin, sinthafe ne aylliya kochatas oothanaba odadasa. Ta Godaa Xoossaw, neeni asara odetiya ogey haysee?
2SA 7:20 “Haysafe aadhiyaba taani, Dawiti ay gaanaw danda7iyana? Ta Godaa Xoossaw, neeni tana ne aylliya eraasa.
2SA 7:21 Neeni ne qaala gisho, ne wozanaa qofaada ha gitaba oothada tana ne aylliya bessadasa.
2SA 7:22 “Abeeti Ta Godaa Xoossaw, neeni gita. Ne meli baawa; nuuni nu haythan si7idaysada neepe attishin, hara xoossi baawa.
2SA 7:23 Ne ase oothanaw Gibxefe wozida ne asaa Isra7eele daaniya hara kawotethi sa7a bolla baawa. Neeni entaw oothida gitanne malaalsiya oosota gaason ne sunthay biittan eretis. Neeni ne asa sinthafe hara kawotethatanne enta xoossata goodda kessadasa.
2SA 7:24 Ne asaa Isra7eele merinaw nebaa oothadasa; minthadasa. Abeeti Godaw, ne enta Xoossa gidadasa.
2SA 7:25 “Abeeti ta Godaw, Xoossaw, neeni ne aylliyasinne iya keethaas oothana gada gelida qaala merinaw naaga; ne qaalatho ootha.
2SA 7:26 Hessan ne sunthay merinaw gita gidana. Asay nena, ‘Ubbaafe Wolqaama Goday Isra7eele Xoossaa’ yaagana. Ne aylliya Dawita kochatika ne sinthan minnidi eqana.
2SA 7:27 “Abeeti Ubbaafe Wolqaama Godaw, Isra7eele Xoossaw, neeni, ‘Ne kochati merinaw kawotana’ yaagada taw ne aylliyas caaqadasa. Hessa gisho, taani ne aylley ha woosa woossanaw xaalas.
2SA 7:28 Abeeti Ta Godaa Xoossaw, neeni Xoosse! Ne qaalay tuma; neeni ha lo77obata oothana gada taw ne aylliyas odadasa.
2SA 7:29 Ne sinthan merinaw daana mela ne aylliya kochaa anja. Abeeti Ta Godaa Xoossaw ne gidaysada ne anjiko ne aylliya keethay merinaw anjetana” yaagidi woossis.
2SA 8:1 Hessafe guye, kawoy Dawiti Filisxeemeta xoonidi haaris; yaatidi Meteg-Ama katamaa Filisxeemeta kushepe ekis.
2SA 8:2 Dawiti qassi Moo7abeta xoonis. I enta biittan zin7isidi kushen wadhis; entafe nam7u kushiya wodhidi, heedzantho kushiya paxa aggis. Yaatin Moo7abeti Dawitas haaretidi giiridosona.
2SA 8:3 Rehooba na7ay, Suubba kawoy, Adraazari Efraxiisa shaafa matan de7iya ba zawa zaaranaw bida wode Dawiti iya olidi xoonis.
2SA 8:4 Dawiti iya asaape issi mukulunne laapun xeetu para asatanne laatamu mukulu toho asata di77is. Dawiti gaareta goochanaw xeetu parata ashshidi hara parata ubbaas gaadiya gildayis.
2SA 8:5 Damasqon de7iya Soore olanchoti Suubba kawa Adraazara maaddanaw yida wode Dawiti entafe laatamanne nam7u mukulu asaa wodhis.
2SA 8:6 Dawiti Soore kawotethan, Damasqon, olanchotas miixa medhis. Yaatin Soore asay Dawitas haaretidi giiridosona. Dawiti bida bessaa ubban Goday iyaw xoono immis.
2SA 8:7 Adraazara toora moconati oykiya worqa gondalliya Dawiti ekidi Yerusalaame ehis.
2SA 8:8 Bexahanne Beroota geetetiya Adraazara katamatape kawoy Dawiti daro naase birata ekis.
2SA 8:9 Adraazara olanchota ubbaa Dawiti xoonidaysa Hamaata kawoy To7i si7is.
2SA 8:10 Dawiti Adraazara olidi xoonida wode Hadadizeri To7ara oletishe gam7ida gisho iya hashshu gaanawunne sarothanaw ba na7aa Yoraama Dawitako kiittis. Yoraami worqafe, birapenne naase biratape oosetida imotata Dawitas ehis.
2SA 8:11 Kawoy Dawiti kase giirisiya kawotethata ubbaafe ekida worqanne bira oothidaysada ha imotataka Godaas dummayis.
2SA 8:12 I xoonida kawotethati Edoome, Moo7abe, Amoone, Filisxeemenne Amaaleqa. Hessadaka Rehooba na7aa, Suubba kawa Adraazara ekida di7uwa Godaas dummayis.
2SA 8:13 Maxine zangaaran tammanne hospun mukulu Edoome asata Dawiti wodhidi simmidaape guye iya sunthay keyis.
2SA 8:14 Dawiti Edoome biittan olanchota miixa medhis; he biittay Dawitas haaretis. Dawiti bida bessa ubban Goday iyaw xoono immis.
2SA 8:15 Dawiti Isra7eele ubbaa bolla kawotis; ba asa ubbaa xillotethaninne suure pirdan aysis.
2SA 8:16 Xaruya na7ay Iyo7aabi tora mocona gidishin, Ahiluda na7ay Iyosaafexi taarike xaafe.
2SA 8:17 Ahixuuba na7ay Saadoqinne Abyataara na7ay Abimeleke kahine gidishin, Sarayi qassi xaafe.
2SA 8:18 Yoodahe na7ay Banayasi kawa naageysata halaqa gidishin, Dawita adde nayti kawa zoreyisata.
2SA 9:1 Dawiti, “Yoonatana gisho taani iyaw keehatethi oothanaw Saa7ola keethafe attida asi de7isha?” yaagidi oychis.
2SA 9:2 He wode Siiba geetetiya issi aylley Saa7ola son de7ees. I Dawita sinthe yaana mela xeegin, kawoy, “Neeni Siibee?” yaagidi oychis. Siibi, “Ee, taani ne aylliya Siiba” yaagis.
2SA 9:3 Kawoy, “Xoossa keehatethi taani bessaana mela Saa7ola keethafe attida asi baawee?” yaagis. Siibi, “Nam7u tohoy silida Yoonataana naytape issoy hanno gakanaw paxa de7ees” yaagis.
2SA 9:4 Kawoy, “I awun de7ii?” yaagis. Siibi, “Lodobaara geetetiya bessan Ami7eela na7aa Makira son de7ees” yaagis.
2SA 9:5 Kawoy Dawiti Lodobaarape Ami7eela na7aa Makira soope Mempiboste ehisis.
2SA 9:6 Saa7ola na7aa Yoonataana na7ay Mempibostey Dawitako yidi, Dawita sinthan ziggidi bonchis. Dawiti, “Mempiboste” yaagidi xeegis. I, “Abe ta godaw, ta ne aylliya” yaagis.
2SA 9:7 Dawiti, “Yayyofa; ne aawa Yoonataana gisho taani new keehana. Ne aawa aawa Saa7ola gadiya ubbaa taani new zaarana; qassi neeni ubba wode ta gaytape maana” yaagis.
2SA 9:8 Mempibostey ziggidi, “Hayqida kana daaniya tana neeni wudada xeellanaw ne aylley taani oonee?” yaagis.
2SA 9:9 Kawoy Saa7ola aylliya Siiba xeegidi, “Saa7olabaanne iya soo asaaba gididaba ubbaa taani ne godaa na7aa na7aas immas.
2SA 9:10 Ne godaa na7aa na7ay maana mela neeni, ne naytinne ne aylleti iya gadiya goyidi, kaxida kathaa iyaw ehite. Gidoshin, ne godaa na7aa na7ay Mempibostey ubba wode ta gaytape maana” yaagis. Siibas tammanne ichashu adde naytinne laatamu aylleti de7oosona.
2SA 9:11 Siibi, “Neeni ta goday, kawoy ne aylliya kiitida ubbaa taani ne aylley oothana” yaagis. Hessa gisho, Mempibostey kawa naytape issuwa mela kawo gaytape mees.
2SA 9:12 Mempibostes Mika geetetiya guutha na7i de7ees. Siiba son de7iya asa ubbay Mempibostes aylle gididosona.
2SA 9:13 Nam7u tohoti silida Mempibostey ubba wode kawa gaytape mishe Yerusalaamen de7is.
2SA 10:1 Hessafe guye, Amooneta kawoy hayqin iya na7ay Hanuni iya bessan kawotis.
2SA 10:2 Dawiti, “Iya aaway taw keehidaysada Na7oosa na7aa Hanunas taka keehana” yaagis. Hessa gisho, iya minthethanaw Dawiti ase iyako kiittis. Dawiti kiitida asay Amoone biitta gakida wode,
2SA 10:3 Amoone halaqati banta godaa Hanunako, “Dawiti ha asaa kiittiday ne aawa bonchidi nena minthethanaw koyida gisho daanii? I ase kiittiday ha katamaa wochi be7idi olanaasa” yaagidosona.
2SA 10:4 Hanuni Dawiti kiitida asata oykidi, enta buuchaafe baggaa meedis; enta ma7uwa garsafe dulle gakanaw qanxidi enta yeddis.
2SA 10:5 Dawiti hessa si7idi, enti yeellatida gisho, “Hinte buuchay diccana gakanaw Iyaarkon de7ishite; hessafe guye, haa yiite” yaagidi ase kiittis.
2SA 10:6 Amooneti Dawiti enta morkidaysa erida wode Beet-Rehoobanne Suubban de7iya Araame asaape laatamu mukulu toho olanchota, Xoobape tammanne nam7u mukulu asatanne Maka kawuwape issi mukulu asata shammidosona.
2SA 10:7 Dawiti hessa si7ida wode Iyo7aaba kumetha olanchotara enta bolla yeddis.
2SA 10:8 Amooneti keyidi, katamaa pengiyan olas salpidosona; Suubbafenne Rehoobape yida Araame asati, Xooba asatinne Maka asati denban dumma salpidosona.
2SA 10:9 Iyo7aabi bana oli sintharanne guyera teqidaysa be7idi, Isra7eele olanchotape minota dooridi Soore asata sinthan essis.
2SA 10:10 Attida asata ba ishaa Abisi kiittana mela oothidi Amooneta sinthan salpisis.
2SA 10:11 Iyo7aabi Abisako, “Soore asati ta bolla wolqaamiko ne yada tana maadda; Amoone asati ne bolla wolqaamiko ta bada nena maaddana.
2SA 10:12 Hiza minna! Nu asaa gishonne nu Xoossaa katamata gisho, ane minni oletoos. Goday bana lo77iyaba ootho” yaagis.
2SA 10:13 Iyo7aabinne iyara de7iya olanchoti Soore asata olanaw keyidosona; Soore asati iya sinthafe baqatidosona.
2SA 10:14 Soore asati baqatidaysa Amoone asati be7ida wode entika Abisa sinthafe baqatidi, katama gelidosona. Iyo7aabi Amooneta oleysa aggidi, Yerusalaame simmis.
2SA 10:15 Soore asati Isra7eele asay enta xoonidaysa erida wode banta olanchota ubbaa shiishidosona.
2SA 10:16 Kawoy Hadadizeri Soore asata Efraxiisa Shaafa hefinthafe kiittidi ehisin, Elama bidosona. Adraazara tora moconay Shobaaki enta kaalethees.
2SA 10:17 Dawiti hessa si7ida wode, Isra7eele olanchota shiishidi, Yordaanose shaafa pinnidi Elama gakis. Soore asati besse oykidi, giigidi, Dawitara oletidosona.
2SA 10:18 Shin Soore asati Isra7eeleta sinthafe baqatidosona. Dawiti Soore olanchotape para gaare laagiya laapun xeetu asatanne oytamu mukulu toho olanchota wodhis. Enta toora mocona Sobaakika he bessan shocetidi hayqis.
2SA 10:19 Adrazaras haaretidi de7iya kawoti Isra7eeleti enta xoonidaysa erida wode Isra7eeletara sigetidi, entaw haaretidosona. Hessafe simmin, Soore asati Amoone asata maaddanaw yayyidosona.
2SA 11:1 Laytha laamen kawoti olas keyiya wode Dawiti ba asaaranne Isra7eele olanchotara issife Iyo7aaba olas yeddis. Enti Amoone olidi, Raaba katamaa teqidosona. Shin Dawiti Yerusalaamen attis.
2SA 11:2 Issi gallas omarsi Dawiti ba hiixape dendidi, keethaa bolla de7iya bessaa keyidi hemetishe bolla meecetiya issi maccasi be7is; he maccasiya daro mala lo77o.
2SA 11:3 Dawiti iya ooneko eranaw koyidi ase kiittis. Kiitetida addey, “Iya Eliyaaba na7iw, Hite addiya Ooriyoona machiw Barsaabo” yaagis.
2SA 11:4 Dawiti ase kiittidi, iyo ehisis, iira aqis. He wode iya kushe metoy aadhin, geeyada de7awusu. Iya ba soo simmada basu.
2SA 11:5 Guyepe iya qanthatidaysa erida wode Dawitako, “New qanthatas” yaagasu.
2SA 11:6 Dawiti, “Hite addiya Ooriyoona haa yedda” yaagidi Iyo7aabako kiittis. Iyo7aabi Ooriyoona Dawitako yeddis.
2SA 11:7 Ooriyooni yin Dawiti, “Iyo7aabi ay melee? Olanchoti ay melee? Olay waanii?” yaagidi oychis.
2SA 11:8 Dawiti Ooriyoonako, “Soo bada shempa” yaagin, Ooriyooni kawo gadhope keyidi bis. Kawoy Ooriyoona guyera kathi yeddis.
2SA 11:9 Shin Ooriyooni soo boonna kawo gadho dirsa pengiyan ba godaa aylletara aqis.
2SA 11:10 Ooriyooni ba soo boonnaysa Dawiti si7idi, “Neeni haahosoope yadasa gidikii? Ne soo ayis babikii?” yaagidi oychis.
2SA 11:11 Ooriyooni Dawitako, “Taabotey, Isra7eele asay, Yihuda asay, ta halaqay Iyo7aabinne kawa asay denban dunkaanen de7oosona. Yaatin ta waanada soo bada mo, uyo, qassi ta machera waanada aqo? Ne shempoy ero! Taani haysa melaba oothike” yaagidi zaaris.
2SA 11:12 Dawiti, “Issi gallas haysan gam7a; wonto nena guye yeddana” yaagis. Ooriyooni he gallasinne wontetha gallas Yerusalaamen gam7is.
2SA 11:13 Dawiti shoobbin Ooriyooni iyara mis; I mathotana gakanaw Dawiti iya ushshis. Shin he wode omarsi Ooriyooni ba soo boonna, ba hiixa hiixidi ba godaa aylletara aqis.
2SA 11:14 Wontethe Dawiti Iyo7aabas dabdaabe xaafidi, Ooriyoona bolla yeddis.
2SA 11:15 Dawiti ba dabdaabiyan, “Ooriyoona olay goobiya bessan sintha bagga aatha. I shocetidi hayqana mela iya matape haakite” yaagis.
2SA 11:16 Iyo7aabi he katamaa teqida wode I eriya mino morke olanchoti de7iya bessan Ooriyoona essis.
2SA 11:17 Katamaa asati keyidi Iyo7aabara oletidosona. Dawita olanchotape guutha asati hayqidosona; Ooriyooni Hite addeyka hayqis.
2SA 11:18 Iyo7aabi olan hanidaba ubbaa Dawitas kiittis.
2SA 11:19 Iyo7aabi kiitetidi biya addiyako, “Olan hanidaba ne kawas oda wursida wode,
2SA 11:20 kawoy shenetidi, ‘Hinte entara oletanaw katamaako ayis shiiqidetii? Enti gimbiya bolla eqidi dongen dukanaysa ereketii?
2SA 11:21 Gediyoona na7ay Abimelekey waanidi hayqidaako akeekeketii? Mayde gimbiya bollara duge holada Tebesa geetetiya bessan wodhiday issi maccas gidekee? Yaatin, hinte gimbiyako ayis shiiqidetii?’ yaagidi oychiko, neeni, ‘Ne aylley, Hite addey Ooriyoonika hayqis’ ” yaaga.
2SA 11:22 Kiitetidaysi bidi Iyo7aabi kiittidaba ubbaa Dawitas odis.
2SA 11:23 Addey, “Nu morketi nuupe wolqaamidosona; nuura oletanaw katamaa gaxan de7iya demba bessaa keyidosona. Shin nu enta katama pengiya gakanaw guye zaaridi yedethida.
2SA 11:24 Hessafe guye, dongen dukeysati gimbiya bolla gididi ne aylleta dongen dukidosona. Kawaw, ne asatape guuthati hayqidosona; ne aylley, Hite addey Ooriyoonika hayqis” yaagis.
2SA 11:25 Dawiti kiitetidaysako, “Neeni Iyo7aabako haysada yaaga; ‘Toori gedeka haaka miya gisho haysas azzanopa; katamaa olada oykanaw minna’ yaagada iya minthetha” yaagis.
2SA 11:26 Ooriyoona machiya ba azinay hayqidaysa si7ida wode iyaw yeekasu.
2SA 11:27 Iya kayo wotha simmin, Dawiti kiittidi iyo ba soo ehis. Iya iyaw macho gidada adde na7a yelasu. Shin Dawiti oothida oosoy iita gidiya gisho Goday ufaytibeenna.
2SA 12:1 Goday nabiya Naatana Dawitako kiittin, Naatani iyako yidi, “Issi kataman nam7u asati de7oosona; entafe issoy dure; qassi hankoy manqo.
2SA 12:2 Dure addiyas daro dorsinne mehey de7ees.
2SA 12:3 Shin manqo addiyas shammidi heemmiya issi dorsa mareepe attishin, hari baawa. He dorsiya iya son iya naytara issife diccasu. I ba miya kathaafe muzees; ba uyaa ushshafe ushshees; iya iya ki7one zin7awusu. He dorsiya iyaw macca na7a mela.
2SA 12:4 “Issi gallas issi imathi duriya soo yis. Durey ba dorsaafe woyko ba mehepe shukidi, imathe mokanaw koybeenna. Shin I he manqo addiya dorsiw ekidi, he imathaas miyaba giigisis” yaagis.
2SA 12:5 Dawiti he dure addiya bolla shene eexidi, “De7o Goday eriya mela, haysa oothida addey hayqanaw bessees.
2SA 12:6 Qassi qadhey bayna I hessa oothida gisho, he dorsa mare gisho oyddu kushe zaaranaw koshshees” yaagis.
2SA 12:7 Naatani Dawitako, “He addey nena! Goday Isra7eele Xoossay haysada yaagees; ‘Taani nena Isra7eele bolla tiyada kawothas; Saa7ola kushiyape nena ashshas.
2SA 12:8 Taani ne godaa, Saa7ola keethaa new immas; ne godaa macheta ne ki7on yeggas. Isra7eele asaanne Yihuda asaa taani new immas. Ha ubbay guuxis giiko, taani new haraa guja immanashin.
2SA 12:9 Haysa mela iitabaa Godaa sinthan oothada, ayis Godaa qaala kadhadii? Hite addiya Ooriyoona mashshan wodhadasa; iya machiw ne ekadasa. Amoone asata mashshan iya wodhadasa.
2SA 12:10 Neeni tana kadhada, Hite addiya Ooriyoona machiw ekida gisho ne soo asaape mashshi shaaketenna’ ” yaagees.
2SA 12:11 Goday haysada yaagees; “Taani ne soo asaa giddofe ne bolla iita ehana; ne macheta neeni xeellishin denthada, new matiya addiyas immana; seeta gallas he addey ne machetara zin7ana.
2SA 12:12 Neeni hessa geeman oothadasa; shin taani seeta gallas Isra7eele asa ubbaa sinthan oothana” yaagis.
2SA 12:13 Yaatin, Dawiti, “Taani Godaa bolla nagara oothas” yaagis. Naatani, “Goday ne nagaraa atto gis; neeni hayqaka.
2SA 12:14 Shin ne haysa oothada, Godaa morketi iya kadhana mela oothida gisho yeletida na7ay tuma hayqana” yaagis.
2SA 12:15 Naatani ba soo bidaape guye, Ooriyoona machiya Dawitas yelida na7aa Goday shocin I hargis.
2SA 12:16 Dawiti ba na7aa gisho Xoossaa woossis; Dawiti xoomis; ba kifiliya gelidi qamma qamma sa7an zin7i aqees.
2SA 12:17 Iya soo cimati iya sa7ape dendana mela iya matan eqidi woossidosona; shin I dendonna ixis; I entara kathi mibeenna.
2SA 12:18 Laapuntha gallas na7ay hayqis. Dawita aylleti na7aa hayquwa odanaw yayyidi, “Na7ay paxa de7ishin nuuni Dawita odisin, si7onna ixis. Yaatin, na7ay hayqidaysa nuuni waatidi iyaw odanee? Ooni eri, I bana qohanekoshii?” yaagidosona.
2SA 12:19 Ba aylleti issoy issuwara kalkasheysa Dawiti si7ida wode na7ay hayqidaysa eris. Dawiti, “Na7ay hayqidee?” yaagidi oychis. Enti, “Ee hayqis” yaagidosona.
2SA 12:20 Yaatin, Dawiti sa7ape dendidi meecetis; qibaate tiyetis; ba ma7uwa laammidi, Godaa keethi gelidi goyinnis. Hessafe guye ba soo bidi, kathi oychin, enti iya sinthe aathin mis.
2SA 12:21 Iya aylleti, “Neeni haysada ayis hanadii? Na7ay paxa de7ishin xoomadasanne yeekadasa; shin na7ay hayqin dendada, kathi madasa” yaagidosona.
2SA 12:22 Dawiti, “Na7ay paxa de7ishin taani xoomasinne yeekas; Goday tana maarin, na7ay paxanekonne” gada qopas.
2SA 12:23 Shin, “Na7ay hayqin, taani ayis xoomo? Taani na7aa guye zaaranaw danda7iyana? Taani iyako baana, I taako yeenna” yaagis.
2SA 12:24 Hessafe guye, Dawiti ba machiw Barsaabo minthethis. Dawiti iiko gelidi iira aqis; iya iyaw adde na7a yelasu. Na7aa Solomone gidi sunthis; Goday he na7aa dosis.
2SA 12:25 Goday na7aa dosida gisho, iya sunthaa “Yididiya” gidi sunthana mela nabiya Naatana kiittis.
2SA 12:26 He wode Iyo7aabi Amooneta katama Raaba olidi kawo miixaa oykis.
2SA 12:27 Iyo7aabi Dawitako, “Taani Raaba katama olada, haathe duuqiya bessaa oykas.
2SA 12:28 Ha77i attida olanchota shiishada katama olada oyka. Hessi hanonna ixiko, taani katamaa oykada ta sunthan xeegetana mela oothana” yaagis.
2SA 12:29 Dawiti ba olanchota ubbaa shiishidi, Raaba katama bidi, olidi oykis.
2SA 12:30 Enta kawa kallachaa iya huuphepe ekis. He worqa kallachay hastamanne ichashu kilo giraame deexees. Iya giddon inqo geetetiya al7o shuchi de7ees. He kallacha Dawiti huuphen wothis. Dawiti katamaape daro di7o di77is.
2SA 12:31 He kataman de7iya asaa kessidi, magaazen, birata konteninne birata kaltan oothana mela oothis. Qassi enti xuube medhana mela oothis. Amoone katama ubban de7iya asaa I haysada oothis. Hessafe guye, Dawitinne iya olanchoti Yerusalaame simmidosona.
2SA 13:1 Issi wode haysada hanis. Dawita na7aa Abeseloomes Timaaro geetetiya issi mala lo77o micha de7awusu. Dawita na7ay Amnooni Timaaro dosis.
2SA 13:2 Amnooni ba michiw Timaaro dosida gisho iyo qopishe daro gilqis. Iya geela7o gidida gisho iyo aykoka oothanaw danda7etonnaba iyaw daanis.
2SA 13:3 Shin Amnoonas Dawita ishaa Saama na7aa Iyonadaaba geetetiya laggey de7ees; Iyyonadaabi daro eca asi.
2SA 13:4 Iyyonadaabi, “Neeni kawo na7a gidashe wonta wonta ayis gilqay? Neeni taw ayis odikii?” yaagidi Amnoona oychis. Amnooni, “Ta ishaa Abeseloome michiw Timaaro taani dosas” yaagis.
2SA 13:5 Iyyonadaabi, “Hargetiya asada hanada hiixan zin7a. Ne aaway nena be7anaw yaa wode, ‘Ta michiya Timaara yada taw miyaba immo; taani iyo be7ishin ta sinthan kathada tana barso’ yaagada oycha” yaagis.
2SA 13:6 Amnooni hargetida asada hanidi hiixan zin7is. Kawoy iya be7anaw yaa wode Amnooni, “Ta michiya Timaara yada, ta be7ishin ta sinthan uythi uukada tana ba kushera barso” yaagis.
2SA 13:7 Dawiti, kawo gadhon de7iya Timaariko kiittidi, “Ne ishaa Amnoona soo bada iyaw kathi katha” yaagis.
2SA 13:8 Timaara ba ishaa Amnoona soo basu; he wode I hiixan zin7is. Timaara guutha dhiille munuqada Amnooni be7ishin uythi uukasu.
2SA 13:9 Timaara uythaa bashepe kessada iyaw aathasu; shin I moonna ixis. Amnooni, “Asa ubbaa kare kessite” yaagin, asa ubbay iya matape keyis.
2SA 13:10 Hessafe guye, Amnooni, “Taani ne kushepe maana mela kathaa haa qol7a ekada ya” yaagis. Timaara ba uukida uythaa ekada, ba ishaa Amnoona sinthe shiishasu.
2SA 13:11 Timaara kathaa iyako shiishiya wode iyo oykidi, “Ta miche, haaya! Taara zin7a” yaagis.
2SA 13:12 Iya, “Ta ishaw, akay hanenna! Tana wolqanthofa! Haysa melabay Isra7eelen hani erenna; haysa mela borsoba oothofa.
2SA 13:13 Ta pokuwa taani waatada genthanaw danda7iyana? Qassi neka Isra7eele giddon kawusha asi gidana. Hayyana kawa oycha; taani nena gelanaysa I diggenna” yaagasu.
2SA 13:14 Shin I iyo si7onna ixis. I wolqaama gidiya gisho, iyo wolqan oykidi iissis.
2SA 13:15 Hessafe guye, Amnooni iyo daro ixis; kase iyo dosidaysafe aathidi ixis. Amnooni, denda, “Keya! Keyada ba!” yaagis.
2SA 13:16 Iya, “Neeni tana keyada ba geysi kase ne ta bolla oothida iitaape aadhees” yaagasu. Shin I iyo si7onna ixis.
2SA 13:17 Amnooni ba aylliya xeegidi, “Ha maccasiw ta sinthafe kessa; iyo kare kessada wulaa gorda” yaagis.
2SA 13:18 Aylley iyo kare kessidi wulaa gordis. Geela7o gidida kawo macca nayti ma7iya alleeqo ma7o ma7asu.
2SA 13:19 Timaara bido ba huuphen qolada, ba ma7ida alleeqo ma7uwa daakada; ba huuphiya oykada, waaso goochashe basu.
2SA 13:20 I ishaa Abeseloomey iyo be7ida wode, “Ne ishay Amnooni nena iissidee? Ta miche, neeni ha77i si77i ga. I ne ishaa; ha odaa ne ulon oykofa” yaagis. Yaatin, Timaara azzanashe, asan keyonna ba ishaa Abeseloome son de7asu.
2SA 13:21 Kawoy Dawiti ha odaa si7ida wode daro yilotis.
2SA 13:22 Abeseloomey Amnoonako camma mal7a pogibeenna. Ba michiw Timaaro iissida gisho Amnoona morkis.
2SA 13:23 Nam7u laythafe guye, Efreema zawa matan Haxoora geetetiya bessane Abeseloomey dorsa ikise meedees. Kawa adde nayti ubbay he bessaa yaana mela Abeseloome enta xeegis.
2SA 13:24 Abeseloomey kawako bidi, “Taani ne aylley ta dorsata ikisiya meedisayis; nenne ne moorinnati nuura yedherketii?” yaagis.
2SA 13:25 Kawoy, “Akay, ta na7aw! Nu ubbay biiko, new tooho gidana” yaagis. Abeseloomey kawa daro shoobbinka kawoy boonna ixis; shin Abeseloome anjis.
2SA 13:26 Abeseloomey, “Neeni boonna ixiko, ta ishaa Amnooni nuura boo” yaagis. Kawoy, “I neera ayis bii?” yaagis.
2SA 13:27 Shin Abeseloomey shoobbidi aggonna ixin, Dawiti Amnoonanne ba adde nayta iyara yeddis.
2SA 13:28 Abeseloomey ba aylletako, “Amnooni woyne uyidi mathotiya wode taani hintena, ‘Amnoona shocite’ yaagada kiittiya wode iya wodhite. Yayyofite! Hintena kiittey tana. Minnite! Xaalite!” yaagidi kiittis.
2SA 13:29 Abeseloome aylleti I kiittidaysada Amnoona wodhidosona. Hessafe guye, kawa adde nayti ubbay dendidi, banta baquluwa baquluwa toggidi baqatidosona.
2SA 13:30 Enti buroo oge bolla de7ishin, “Abeseloomey kawa nayta ubbaa wursis; entafe issoyka attibeenna” geetetiya worey Dawita gakis.
2SA 13:31 Kawoy dendi eqidi, azzanidi, ba ma7uwa daakidi biittan zin7is. Iya aylleti ubbay banta ma7uwa daakidi, iya matan eqidosona.
2SA 13:32 Dawita ishaa Saama na7ay Iyyonadaabi, “Ta godaw, kawo nayti ubbay hayqidosona gada qopofa; Amnoona xalaali hayqis. Amnooni ba michiw Timaaro iissida gallasape doomin, Abeseloomey iya bolla oothanaw qopidabay hanis.
2SA 13:33 Hiza hayqiday Amnoona xalaala gidiya gisho, ‘Kawa adde nayti ubbay hayqidosona’ giya woriya kawoy tuma goopo” yaagis.
2SA 13:34 He wode Abeseloomey baqatis. Naagiya addey dhoqu gidi xeelliya wode wuloha baggara de7iya ogiyara dere lanqiya oykidi daro asay yeysa be7idi kawas odis.
2SA 13:35 He wode Iyyonadaabi, “Heko, taani ne aylley odidaysada kawa adde nayti yidosona” yaagis.
2SA 13:36 I odi wursiya wode kawa adde nayti gelidi banta qaala dhoqu oothidi waassidosona. Qassi kawoynne iya moorinnati ubbay yibbata yeeho yeekidosona.
2SA 13:37 Abeseloomey baqatidi, Geshura kawo gidida Amhuda na7aa Talmayako bis. Shin kawoy Dawiti ba na7aas daro gallas yeekis.
2SA 13:38 Abeseloomey baqatidi Geshura biitta bidaape guye yan heedzu laythi de7is.
2SA 13:39 Kawoy Dawiti Amnoona hayquwan gakida azzaniyape minnida gisho, Abeseloome be7anaw laamotis.
2SA 14:1 Xaruya na7ay Iyo7aabi Kawoy Dawiti Abeseloome laamotidaysa eris.
2SA 14:2 Hessa gisho, Iyo7aabi Tequhe katamaa kiittidi, issi cinca maccas ehisis. Iiko, “Neeni kayotiya asada hana; kayo ma7o ma7a; qibaate tiyettofa; daro wodepe doomidi, hayqida asas kayotiya maccasada hana.
2SA 14:3 Kawako bada ha qaala iyaw oda” yaagis. Iyo7aabi iya kawas odanaba iw odis.
2SA 14:4 Tequhe maccasiya kawako bada biittan gufannada, “Kawaw, tana maaddarki!” yaagasu.
2SA 14:5 Kawoy, “Nena aybe metiday?” yaagidi oychis. Iya, “Taani azini hayqida maccas.
2SA 14:6 Taw ne ayllees nam7u adde nayti de7oosona. Enti issoy issuwara denban wadhetidosona; enta shaakanaw asi dhayin, issoy issuwa shocidi wodhis.
2SA 14:7 Ta dabboti ubbay ta bolla dendidi, ‘Ba ishaa I wodhida gisho nuuni iya wodhana mela ba ishaa wodhida uraa nuus hamma; yaatidi nuuni laattiya asi dhaysana’ yaagidosona. Enti taw laatas attida issi duncha toysoosona; ta azinaa sunthaanne iya kochaa biittafe dhaysoosona” yaagasu.
2SA 14:8 Kawoy maccaseeko, “Ne soo ba; ta ne gisho kiittana” yaagis.
2SA 14:9 Shin Tequhe maccasiya, “Ta godaw, kawaw, gomey tananne ta aawa soo asaa oyko; shin kawoynne iya araatay geeshshi gido” yaagasu.
2SA 14:10 Kawoy, “Ne bolla doona pogiya oonaka taako eha; I nena nam7antho bochenna” yaagis.
2SA 14:11 Maccasiya, “Suuthu zaariya uray qoho bolla qoho ehonadanne ta na7aaka wodhonnaada kawoy Godaa, ba Xoossaa sunthan taw caaqo” yaagasu. Kawoy, “De7o Goday eriya mela, ne na7aa binaanape issoyka sa7an wodhenna” yaagis.
2SA 14:12 Maccasiya zaarada, “Ta godaw, ta kawaw, ta issiba odeto” yaagasu. Kawoy, “Haasaya” yaagis.
2SA 14:13 Maccasiya, “Yaatin, neeni Xoossa deriya bolla haysa mela qoho ayis oothadii? Kawoy dhayida ba na7aa guye zaaribeenna. Ba odida qaalan kawoy bala gidennee?
2SA 14:14 Nu ubbay hayqana; gukida haathi simmonnaysada nu simmoko. Shin Xoossay shempo dhayo dosenna; dogetida asi kumethi dhayonna mela iyaw oge giigisees.
2SA 14:15 “Tana asay yashisiya gisho ta godaa, kawas, haysa odanaw ha77i yas. ‘Taani ne aylliya, taani kawas odana; ooni eri, taani iya aylliya oychidaba kawoy oothonna aggenna.
2SA 14:16 Kawoy si7idi, Xoossay nuus immida laatape tananne ta na7aa dhaysanaw koyiya asaa kushepe ashshana’ gada qopas.
2SA 14:17 Hessadaka kawoy lo77onne iita shaakanaw Xoossa kiitancho mela gidiya gisho, ta godaa kawa qaalay tana shempiso. Goday, ne Xoossay neera gido” yaagasu.
2SA 14:18 Kawoy, “Taani nena oychana; neeni taape qottofa” yaagis. Maccasiya, “Ta goday, kawoy odeto” yaagasu.
2SA 14:19 Kawoy maccasiw, “Haysa ubban Iyo7aaba kushey neera de7ii?” yaagidi oychis. Maccasiya, “Ta godaw, kawaw, ne shempoy ero! Neeni ta goday, kawoy, odida ubbaafe ushachi woyko haddirsi gaanaw danda7iya asi baawa. Ee, haysa tana kiittiday, ne aylle doonan haysa wothiday ne aylliya Iyo7aaba.
2SA 14:20 Ne aylley Iyo7aabi haysa oothiday ha77i de7iya hanota laammanaasa. Kawaw, new Xoossa kiitancho mela cinca gidiya gisho biittan haniyaba ubbaa eraasa” yaagasu.
2SA 14:21 Kawoy Iyo7aabako, “Lo77o! Taani haysa oothana! Bada he na7atetha Abeseloome ekada ya” yaagis.
2SA 14:22 Iyo7aabi kawa sinthan gufannidi, “Ta godaw, kawaw, ba aylley oychidaba oothanaw ero gida gisho, ne sinthan saba demmidaysa ne aylley hachi eris” yaagis.
2SA 14:23 Hessafe guye, Iyo7aabi dendidi Geshura bidi Abeseloome Yerusalaame ekidi yis.
2SA 14:24 Shin kawoy, “Abeseloomey ba soo baanaw bessees; I ta som7on keyopo” yaagis. Abeseloomey ba soo bis; kawa som7uwa be7ibeenna.
2SA 14:25 Isra7eele giddon mala lo77otethan Abeseloome mela sabetida asi baawa. Huuphepe toho gakanaw iyan boriyabay baawa.
2SA 14:26 I bana deexiya wode ba huuphiya qanxisees. Ba huuphiya qanxisiya wode ubban mizaanen mazzanees; iya binaanay kawo mizaane liken nam7u kilo giraamepe aadhees.
2SA 14:27 Abeseloomes heedzu adde na7inne issi macca na7i yeletidosona; macca na7e sunthay Timaaro; iya mala lo77o na7a.
2SA 14:28 Abeseloomey nam7u laythi kumethi kawa som7o be7onna Yerusalaamen de7is.
2SA 14:29 Abeseloomey, “Taani nena kawako kiittanaw koyiya gisho taako haaya” yaagidi Iyo7aabako kiittis; shin Iyo7aabi yoonna ixis. Nam7antho kiittis; shin Iyo7aabi ha77ika yoonna ixis.
2SA 14:30 Abeseloomey ba aylletako, “Heko, ta gadiya matan Iyo7aabas gadey de7ees; iyan bangi de7ees. Bidi iyan tama yeddite” yaagis. Abeseloome aylleti Iyo7aaba bangan tama yeddidosona.
2SA 14:31 Iyo7aabi Abeseloome soo bidi, “Ne aylleti ta bangan ayis tama yeddidonaa?” yaagidi oychis.
2SA 14:32 Abeseloomey, “Ta xeegin ne yoonna ixida gishosa. Neeni kawako bada, ‘Taani Geshurape ayis yadina? Taani hanno gakanaw yan de7idaako lo77oshin’ yaagees gada taw oychana mela koyas. Ha77i taani kawa som7o be7anaw koyayis; taani bala gidiko, I tana wodho” yaagis.
2SA 14:33 Iyo7aabi kawako bidi, Abeseloomey gidaysa odis. Kawoy Abeseloome xeegisis; Abeseloomey soo gelidi, kawa sinthan gufannidi ziggis; kawoy Abeseloome yeeris.
2SA 15:1 Hessafe guye, Abeseloomey issi para gaare, paratanne ba sinthan woxanaw ishatamu asata giigisis.
2SA 15:2 Abeseloomey guura dendidi, katamaa pengiyan eqees. Mootoy de7iya ay asika kawa sinthe pirdas biya wode Abeseloomey xeegidi, “Neeni awu katamape yay?” yaagidi oychees. He uray, “Ta ne aylley Isra7eele zare issuwafe yas” yaagidi iyaw zaarees.
2SA 15:3 Abeseloomey, “Heko, ne oday lo77onne suure; shin kawa baggafe nena si7anay baawa” yaagees.
2SA 15:4 Abeseloomey gujidi, “Ta Isra7eele bolla pirdanaw shuumetidaba gidarkinashin. Hessi hanidaako, mootoy woyko odi de7iya oonika taako yin, taani iyaw suure pirda pirdanashin” yaagees.
2SA 15:5 Oonika iyako yidi iyaw ziggiya wode Abeseloomey ba kushiya yeddidi he addiya oykidi yeerees.
2SA 15:6 Pirdetanaw kawako yaa Isra7eele ubbaas Abeseloomey hessada hanidi Isra7eele asaa wozanaa ekis.
2SA 15:7 Oyddu laythafe guye, Abeseloomey, “Taani Godaas qangida qangetha gathanaw Kebroona baana.
2SA 15:8 Taani ne aylley Soore biittan Geshura kataman de7ashe, ‘Tana Goday Yerusalaame guye zaariko, Godaas goyinnana’ yaagada qangas” yaagis.
2SA 15:9 Kawoy, “Saro ba” gin, I dendidi Kebroona katamaa bis.
2SA 15:10 Shin Abeseloomey Isra7eele zare ubbaas qosan kiita yeddidi, “Moyze puno hinte si7ida wode, ‘Abeseloomey Kebroonan kawotis’ yaagite” yaagis.
2SA 15:11 Abeseloomey xeegin, Yerusalaamepe iyara bida asata tayboy nam7u xeeta. Enti he hanotaba aykoka eronna ashketethan bidosona.
2SA 15:12 Abeseloomey yarsho yarshiya wode Dawita zoriya asaape issuwa Akxoofela Gilo katamaape xeegisis. Kawa bolla dendida maqoy goobis; Abeseloome kaalliya asaa tayboy guji guji bis.
2SA 15:13 Issi kiitetida asi yidi Dawitako, “Isra7eele asaa wozanay Abeseloomera de7ees” yaagis.
2SA 15:14 Dawiti baara Yerusalaamen de7iya ba moorinnatako, “Dendite! Nuuni baqatoos! Yaanona ixiko, nu giddofe ay asika Abeseloomepe kessi ekenna. Nuuni ellesidi baanaw koshshees; hankoode, I ellesi yidi nuna dhaysana; nu katama mashshan buthana” yaagis.
2SA 15:15 Kawa moorinnati, “Nu goday, kawoy doorida ubbaa nuuni ne aylleti oothanaw giigidi uttida” yaagidosona.
2SA 15:16 Kawoy keydi tohora bis; iya soo asaynne iya moorinnati ubbay iyara bis; shin ba gadhuwa naagana mela tammu laggethota son ashshis.
2SA 15:17 Kawoy keyin asa ubbay iyara haahon de7iya issi keetha matan eqidosona.
2SA 15:18 Iya asati ubbay iyape sinthara salpidi aadhidosona; enta kaallidi kawa naageysati salpidosona. Qassi enta kaallidi Gaate katamaape yida usupun xeetu asati, kawa sinthara salpidi aadhidosona.
2SA 15:19 Kawoy Gaate addiya Itayako, “Neeni nuura ayis yay? Guye simmada, kawa Abeseloomera de7aasha. Neeni asa biitta asi; ne di7etada yida asi.
2SA 15:20 Neeni zine yadasa; taani ta huuphen biya soo eronna de7ashe, nena waatada daaburso? Guye simma; ne biitta asi neera efa. Goday new keehonne ammaneto!” yaagis.
2SA 15:21 Shin Itayi, “De7o Goday eriya mela, ta goday kawoy eriya mela, ta goday kawoy de7iya awunka, paxan gidin hayqon taani ne aylley neepe shaaketike” yaagis.
2SA 15:22 Dawiti, “Lo77o! Ba, aadha” yaagis. Gaate addey Itayi asaaranne naytara asa ubbaara bis.
2SA 15:23 He asa ubbay biya wode he biitta asay banta qaala dhoqu oothidi yeekidosona. Kawoy Qediroona zangaara pinnis; asa ubbay mela biittako simmidi bis.
2SA 15:24 Kahiney Saadoqi he bessan de7ees; Xoossa caaqo Taabotiya tookiya Leewetinne kahiniya Abyataari yan de7oosona. Asa ubbay katamaape keyidi wurana gakanaw Xoossa Taabotiya sa7an shempisidosona.
2SA 15:25 Hessafe guye, kawoy Saadoqako, “Xoossa Taabotiya katama guye zaara. Goday tanan ufaytiyaba gidiko, issi gallas guye zaaridi ba Taabotiyanne ba keethaa bessaana.
2SA 15:26 Shin i, ‘Nenan ufaytike’ giiko, I bana lo77iyaba ootho; taani giigeta uttas” yaagis.
2SA 15:27 Qassi kawoy kahiniya Saadoqako, ane akeeka “Neeni ne na7aa Akmaasanne Abyataara na7aa Yoonataana ekida katamaa saro ba.
2SA 15:28 Hinte taw kiittana gakanaw taani mela biittan de7iya shaafa pinuwan de7ashshana” yaagis.
2SA 15:29 Hessa gisho, Saadoqinne Abyataari Xoossa Taabotiya Yerusalaame guye efidi yan de7idosona.
2SA 15:30 Shin Dawiti yeekishe Shamaho deriya bolla keyis. I azzanon ba huuphiya guuluntidi mela tohon hemetis; iyara de7iya asati guuluntidi yeekishe pude keyidosona.
2SA 15:31 Akxoofeli Abeseloomera maqetidaysa Dawiti si7ida wode “Godaw, Akxoofela zoriya eeyatethi laamma” yaagidi woossis.
2SA 15:32 Dawiti asay Xoossaa goyinniya zumaa huuphe gakida wode, Arkaya addiya Kuussi ba ma7uwa daakidi, ba huuphiyan baana qolidi, Dawitara gahetanaw yis.
2SA 15:33 Dawiti, “Neeni taara biiko taw tooho gidana.
2SA 15:34 Shin neeni katamaa guye simmada Abeseloomeko, ‘Kawaw, haysafe kase taani ne aawa aylle gididaysada ha77i newuka aylle gidana’ yaagiko, Akxoofela zoriya laallada tana maaddana.
2SA 15:35 Kahineti Saadoqinne Abyataari neera yan de7oosona gidokona? Neeni kawo gadhon si7iyaba ubbaa entaw oda.
2SA 15:36 Saadoqa na7aa Akmaasinne Abyataara na7aa Yoonataani yan entara de7oosona; neeni si7iyaba ubbaa enta bolla taw kiitta” yaagis.
2SA 15:37 Abeseloomey Yerusalaame gelishin, Dawita laggey Kuussi katama gakis.
2SA 16:1 Dawiti deriya huuphiyara hefinthi aadhishin, Siiba geetetiya Mempiboste aylley iyara gahetis. Nam7u xeetu uythu, issi xeetu zabibe nuka, issi xeetu tiya ayfe, issi ogoro woyne ushshu nam7u haretan caanis.
2SA 16:2 Kawoy, “Haysa ayis ehadii?” yaagidi oychis. Siibi, “Hareta, kawa soo asay toggana mela, uythaanne tiyiya ayfiya asay maana melanne woyne ushshay bazzon daaburiya asati uyana melasa” yaagis.
2SA 16:3 Kawoy, “Ne godaa na7aa na7ay awun de7ii?” yaagidi oychis. Siibi, “ ‘Isra7eele asay ta aawa kawotethaa hachi taw zaari immana’ yaagidi Yerusalaamen uttis” yaagis.
2SA 16:4 Kawoy, “Mempibostes de7iyaba ubbay new gido” yaagis. Siibi, “Abeeti godaw, kawaw! Taani ne sinthan teemo demmayis” yaagidi biittan gufannida ziggayis.
2SA 16:5 Kawoy Dawiti Biraqima katama yaa wode Saa7ola dabbo gidida issi addey yaape keyis. Iya sunthay Geera na7aa Saami. I Dawita baaddishe keyis.
2SA 16:6 Olanchotinne kawa naageysati ushacharanne haddirsara Dawita teqidi de7ishin, Saami Dawita bollanne kawa moorinnata bolla shuchu holis.
2SA 16:7 Saami Dawita baaddishe, “Kicha; ha iitay kicha! Asa suuthu gussiya ha pathonaysi kicha.
2SA 16:8 Neeni Saa7ola bessan kawotadasa; neeni gussida Saa7ola soo asaa suutha ubbaa Goday ne bolla zaaris. Goday kawotethaa ne na7aa Abeseloomes immis; neeni suuthu gussida asi gidiya gisho, new dhayo wodey gakis” yaagis.
2SA 16:9 Hessafe guye, Xaruya na7ay Abisi, Kawako, “Ha bawuta kanay, ta godaa kawa ayis baaddii? Taani bada iya qoodhiya qanxana” yaagis.
2SA 16:10 Kawoy, “Hinteno, Xaruya nayto, hintera taara aybi gathii? Goday, ‘Dawita baadda’ yaagida gisho I baaddiyaba gidiko, ‘Neeni ayis hessa oothay?’ yaagidi oychanaw danda7ey oonee?” yaagis.
2SA 16:11 Hessafe guye, Dawiti Abisanne ba moorinnata, “Ta na7ay, ta ashoy, tana wodhanaw koyees; yaatin, ha Biniyaame addey waati aggane! Goday iya kiitida gisho I baaddees, iya bochofite.
2SA 16:12 Ooni eri, Goday ta metuwa be7idi, taani hachi ekiya baadetha gisho taw keeha qopaneeko” yaagis.
2SA 16:13 Hessafe guye, Dawitinne iya asay ogiya oykidi boosona. Saami zumaa miyara bishe Dawita baaddees; shuchu holees; iya bolla biitta laallees.
2SA 16:14 Kawoynne iyara de7iya asati banta biya bessa daaburidi gakin kawoy yan shempis.
2SA 16:15 Abeseloomeynne Isra7eele asa ubbay Yerusalaame gelidosona; Akxoofeli entara de7ees.
2SA 16:16 Dawita laggey Arkaya kochay Kuussi Abeseloomeko yidi, “Kawoy birata tuussu gido! Kawoy mukulu laythi kawoto!” yaagis.
2SA 16:17 Abeseloomey, “Neeni ne laggiya dosiya dosoy haysee? Ne laggiyara ayis babikii?” yaagis.
2SA 16:18 Kuussi, “Akay! Goday, ha asaynne Isra7eele asay dooridaysas taani aqana; taani iyara attana.
2SA 16:19 Hiza taani ta godaa na7aas oothonna ooddes oothanee? Taani ne aawas oothidaysada ha77i newuka oothana” yaagis.
2SA 16:20 Abeseloomey Akxoofelako, “Neeni ane nuna zora; nuuni ay oothino?” yaagis.
2SA 16:21 Akxoofeli, “Kawo gadho naaganaw son attida ne aawa laggethotara bada zin7a. Neeni ne aawa kawushidaysa Isra7eele asa ubbay si7ana; neera de7iya ubbaa kushey minnana” yaagis.
2SA 16:22 Kawo keethaa pooqiya bolla Abeseloomes dunkaane tokidosona; asa ubbay xeellishin Abeseloomey gelidi ba aawa laggethotara zin7is.
2SA 16:23 He wode Akxoofeli zoriya zorey issi asi Godaa oychidi ekiya zore mela. Dawitinne Abeseloomey Akxoofela zoriya hessada oothidi ekidosona.
2SA 17:1 Hessafe guye, Akxoofeli, “Hachi qamma taani tammanne nam7u mukulu asata doorada Dawita yedethada oykana.
2SA 17:2 I daaburidi wolqa dhayidi de7ishin taani iya bolla wodhana. Taani iya daganthana; yan iyara de7iya asa ubbay baqatiya wode taani kawa xalaala shocana.
2SA 17:3 Yaatada taani asa ubbaa neeko zaarana. Neeni issi asa xalaala wodhanaw koyaasa; hanko asay saro attana” yaagis.
2SA 17:4 Akxoofela zorey Abeseloomenne Isra7eele cimata ubbaa ufaysis.
2SA 17:5 Abeseloomey, “Qassi Arkaya kocha Kuussa xeegite; I giyaba ane si7oos” yaagis.
2SA 17:6 Kuussi iyako yida wode Abeseloomey, “Akxoofeli zorida zorey haysa; nuuni I giyaba oothanaw bessii? Bessonnaba gidiko, ne qofay aybee?” yaagis.
2SA 17:7 Kuusi, “Akxoofeli zorida zorey ha wodiyan lo77o gidenna.
2SA 17:8 Ne aawaynne ne aawa asati mino olanchota gideysanne ba marata bonqetida maahe mela yashsheyisata gideysa neeni eraasa. Ne aaway ola meezetida asi; I qamma ba olanchotara aqena.
2SA 17:9 I hannoode gongolo giddon woyko hara bessan qosetidi uttis. I hinte cugata koyrottidi qohiko, hessa si7ida oonika, ‘Abeseloome kaallidi bida asay shocetidosona’ yaagana.
2SA 17:10 Ne aaway toora qara gideysanne iyara de7iya asay mino gideysa Isra7eele asa ubbay eriya gisho, hari attoshin gaammoda minota wozanay til7ana.
2SA 17:11 “Shin taani nena zorey haysa; abba gaxan de7iya shafe mela darida, Daanepe Barsaabe gakanaw de7iya Isra7eele ubbaa neeko shiisha; yaatada neeni enta olas kaaletha.
2SA 17:12 Nuuni iya demmida bessa awunka shocana; aki sa7an wodhiyada nuuni iya bolla wodhana. Iya gidin woyko iyara de7iya asaa gidin issoyka paxa attenna.
2SA 17:13 I katamaa gelikoka, Isra7eele asa ubbay wodoro ehidi, katamaa giddon issi shuchi aggonna he katamaa goochidi zangaaran yeggana” yaagis.
2SA 17:14 Abeseloomeynne Isra7eele asa ubbay, “Arkaya kocha Kuussa zorey Akxoofela zoriyape lo77o” yaagidosona. Goday Abeseloome bolla iitabaa ehanaw qopidi gisho Akxoofela zoriya ekonnaada oothis.
2SA 17:15 Kuussi kahineta Saadoqanne Abyataara, “Akxoofeli Abeseloomenne Isra7eele cimata haysa haysa gidi zoris; taanika enta haysa haysa gada zoras.
2SA 17:16 Ha77i Dawitako eeson kiittidi, ‘Bazzon de7iya shaafa gaxan hachi qamma aqopa; hefinthi pinna kicha! Hessi hanonna ixiko, kawoynne iyara de7iya asa ubbay dhayana’ yaagidi odite” yaagis.
2SA 17:17 Yoonataaninne Akimaasi qoncen katamaa gelishin enta asi be7onna mela Aynogeela geetetiya bessan uttidi naagoosona. Issi macca aylliya yada entaw odin, enti bidi kawa Dawitas odoosona.
2SA 17:18 Shin issi panthay enta be7idi Abeseloomes odis. Hessa gisho, enti nam7ay he bessaafe eeson kichidi Biraqima kataman issi addiya soo gakidosona. He addiya soo matan haatha olli de7ees; enti he ollan gelidosona.
2SA 17:19 He addiya machiya oonika eronnaada ollaa doona kammada iya bolla kathi miccasu.
2SA 17:20 Abeseloome aylleti addiya soo yidi machiw, “Akmaasinne Yoonataani awun de7oona?” yaagidi oychidosona. Machiya, “Enti shaafa pinnidi bidosona” yaagasu. Enti koyin, bentonna ixin, Yerusalaame simmidosona.
2SA 17:21 He asati bidaape guye, nam7u asati ollafe keyidi, kawa Dawitas odanaw bidosona. Dawitako, “Akxoofeli hinte bolla haysa haysa oothana gidi zori wothida gisho eeson dendidi, shaafa pinnite” yaagidosona.
2SA 17:22 Dawitinne iyara de7iya asa ubbay Yordaanose pinnidi bidosona. Sa7i wontiya wode ubbay pinnidi wuridosona.
2SA 17:23 Akxoofeli ba zorey eketiboonaysa erida wode ba hariya kooridi ba de7iya katamaa bis. Akxoofeli ba soo giigisidi suletidi, hayqidi ba aawa duufon moogetis.
2SA 17:24 Abeseloomeynne iyara de7iya asa ubbay Yordaanose pinniya wode Dawiti Mahanayma katamaa gakis.
2SA 17:25 Abeseloomey ba olanchota bolla Iyo7aaba bessan Amasaya shuumis. Amasayi Isra7eele addiya Yotora na7a. Yotori Na7oosa na7iw, Iyo7aaba aayiw Xaruya michiw Abigiya ekis.
2SA 17:26 Isra7eeletinne Abeseloomey Galada biittan dunkaanidosona.
2SA 17:27 Dawiti Mahanayma katamaa gakiya wode Amoone biittan Raabape yida Na7oosa na7ay Shoobi, Lodobaara katamape yida Ami7eela na7ay Makirinne Orogalma katamape yida Galada addey Barziley,
2SA 17:28 hiixiyabata, keretanne shaateta ehidosona. Qassi enti giste, banga, dhiille, shaashshi, qom7olonne misire,
2SA 17:29 eessi, pila, meqa maathinne dorse Dawitinne iya asay maana mela ekidi yidosona. Hessa enti ehiday, “Asay bazzon koshatis, daaburis, saamotis” gidi qopida gishosa.
2SA 18:1 Dawiti baara de7iya asaa taybidi shaalaqatanne mato halaqata enta bolla shuumis.
2SA 18:2 Dawiti asa heedzu cugan shaakis; issi cugaa Iyo7aabi, nam7antho cugaa Iyo7aaba ishay, Xaruya na7ay Abisi, heedzantho cugaa Gaate addey Itayi kiittees. Kawoy asaako, “Tuma ta hintera issife baana” yaagis.
2SA 18:3 Shin asay, “Neeni baanaw bessenna! Nuuni baqatiyako enti nuna koyokona; hari attoshin nuupe baggay hayqiyakoka nubaa wuda gookona. Shin neeni ne xalaala tammu mukulupe daraasa. Hessa gisho, neeni kataman uttada nuus maado kiittiko lo77o” yaagis.
2SA 18:4 Kawoy, “Hintena lo77iyaba ta oothana” yaagis. Dawiti dirsa pengiya matan eqidi, asa ubbay xeetaninne mukulan salpidi keyishin be7is.
2SA 18:5 Kawoy Iyo7aaba, Abisanne Itaya, “Ta gisho gidi, he na7atetha addiya Abeseloome qohopite” yaagidi kiittis. Kawoy hessa halaqatas odiya wode olanchoti ubbay si7idosona.
2SA 18:6 Dawita olanchoti Isra7eeletara oletanaw Efreema woran salpidosona.
2SA 18:7 He bessan Dawita olanchoti Isra7eele olanchota xoonidosona. He gallas daro asi wuris, laatamu mukulu asi hayqis.
2SA 18:8 Olay gaxare ubbaa gakis; he gallas wori wursida asay mashshi wursida asaape daro.
2SA 18:9 Abeseloomey qoponna de7ishe Dawita asaara gahetis. Abeseloomey ba baquluwa toggidashin daashsha wola garsi baquloy gelin, Abeseloome huuphey mithan oyketis. I toggida baquloy iya tohuwa garsafe bin, Abeseloomey carko bolla kaqatidi attis.
2SA 18:10 Asaape issoy hessa be7idi, “Abeseloomey issi wola bolla kaqetidaysa ta be7as” yaagidi Iyo7aabas odis.
2SA 18:11 Iyo7aabi baw odida addiya, “Yee, be7as gay? Yaatin ayis iya wodhabikii? Ne hessa oothidaba gidiyako, taani new tammu bira santimenne issi saqe immanashin” yaagis.
2SA 18:12 Addey zaaridi, “Neeni mukulu bira santime ta kushen wothiyakoka taani kawa na7aa bolla ta kushiya denthike! Nuuni ubbay si7ishin, kawoy nena, Abisanne Itaya, ‘Ta gisho gidi, na7atetha Abeseloome qohopite’ yaagidi kiittis.
2SA 18:13 Taani kawa kiitta ixada Abeseloome wodhidaba gidiyako, kawoy ubbaa si7eysada hessa si7anaysi attenna. He wode neeni haaki eqiya asaape issuwa gidana” yaagis.
2SA 18:14 Iyo7aabi, “Taani neera odetashe wode wursike” yaagidi heedzu toora ekidi, Abeseloomey wolaa bolla kaqetidi, paxa de7ishin wozana ayfen caddis.
2SA 18:15 Iyo7aaba ola miishiya tookiya tammu asati Abeseloome yuushuwa teqidi iya shocidi wodhidosona.
2SA 18:16 Hessafe guye, Iyo7aabi olaa essanaw moyze punnin asay Isra7eeleta yedetheysa aggis.
2SA 18:17 Enti Abeseloome efidi woran de7iya gita ollan yeggidi, gita shuchu iya bolla dooridosona. He wode Isra7eele asa ubbay ba soo soo baqatis.
2SA 18:18 Abeseloomey paxa de7ishe, “Ta sunthan xeegetiya adde na7i taw baawa” yaagidi, bana qofisiya shuchu massida hawulte kawo zangaaran essidi he hawultiya ba sunthan xeegis. Hachi gakanaw he hawultey “Abeseloome hawultiya” geetetees.
2SA 18:19 Hessafe guye, Saadoqa na7aa Akimaasi Iyo7aabako, “Iya morketa kushepe Goday iya ashshida mishiraachuwa sissanaw taani kawako woxa bada odana” yaagis.
2SA 18:20 Iyo7aabi, “Akay! Hachi neeni mishiraacho odiya gallas gidenna; hara gallas odanaw danda7aasa. Kawa na7ay hayqida gisho hachi odanaw koshshenna” yaagis.
2SA 18:21 Iyo7aabi Tophe asi gidida issi addiya xeegidi, “Bada, ne be7idaba kawas oda” yaagis. He addey Iyo7aabas gufanni ziggidi woxis.
2SA 18:22 Saadoqa na7ay Akimaasi nam7antho Iyo7aabako, “Aybika hano; taani ha Tophe addiya geedo woxana” yaagis. Iyo7aabi, “Ta na7aw, new woytoy baynaban ayis woxanaw koyay?” yaagis.
2SA 18:23 Akimaasi, “Aybika hano; taani woxanaw koyayis” yaagis. Iyo7aabi, “Yaako woxa” yaagis. Hessa gisho, Akimaasi demba ogiya oykidi woxishe bidi Tophe addiya yeggidi aadhis.
2SA 18:24 Dawiti soo pengiyafenne kare pengiyafe giddon uttidashin, naagiya uray keethaa bolla keyidi, issi addey barka woxishe yeysa be7is.
2SA 18:25 Naagiya uray kawa xeegidi odis. Kawoy, “I barka de7iko, mishiraacho ekidi yees” yaagis. Woxiya addey entako matishe yis.
2SA 18:26 Naageysi hara woxiya asi be7idi pengiya naagiya addiyako, “Hara asika barka woxishe yees” yaagis. Kawoy, “Ha addeyka qassi mishiraacho ekidi yees” yaagis.
2SA 18:27 Naageysi, “Koyro addiya wothay Saadoqa na7aa Akmaasa wotha taw daanees” yaagis. Kawoy, “I lo77o asi; I lo77o odara yees” yaagis.
2SA 18:28 Akimaasi kawa xeegidi, “Ubbabay lo77o!” yaagis. Kawa sinthan gufanni ziggidi, “Ta godaa, kawa bolla banta kushiya denthida asata new aathidi immida Goday, ne Xoossay galatetto” yaagis.
2SA 18:29 Kawoy, “Na7atethay, Abeseloomey saro?” yaagidi oychis. Akimaasi, “Iyo7aabi tana kiittana haniya wode wolqaama waaso si7as, shin I aybeko taani erabike” yaagis.
2SA 18:30 Kawoy, “Yaa shiiqa eqa” yaagin I haakidi eqis.
2SA 18:31 Hessafe guye, Tophe addey gakidi, “Ta godaw, kawaw, ta new mishiraacho odayis! Ne bolla dendiya ubbaa kushepe Goday hachi nena ashshis” yaagis.
2SA 18:32 Kawoy Tophe addiyako, “Na7atetha addey Abeseloomey saro?” yaagidi oychis. Tophe addey, “Ta godaw, kawaw, ne morketinne ne bolla iitabaa oothanaw dendeysati ubbay he na7atetha addiyada hanona” yaagis.
2SA 18:33 Kawoy daro azzanis; pengiyafe qommo baggan de7iya keethaa gelidi yeekis. Kawoy, “Yii, ta na7aw Abeseloome taassa! Ta na7aw taassa! Ne gisho ta hayqarkina! Yii, ta na7aw Abeseloome taassa!” yaagidi yeekis.
2SA 19:1 Kawoy, “Ba na7aa Abeseloomes yeekesinne zeleeles” yaagidi Iyo7aabas odidosona.
2SA 19:2 Kawoy ba na7aas yeekeysa si7ida gisho, he gallas enti ubbay xoonida xoonoy yeehon laametis.
2SA 19:3 Olape baqatidi yeellan guye simmida olanchoda he gallas asay doona pogonna katama gelidosona.
2SA 19:4 Kawoy guuluntidi, ba qaala dhoqu oothidi, “Yii, ta na7aw Abeseloome! Yii, ta na7aw! Abeseloome yii!” yaagidi zeleelis.
2SA 19:5 Hessafe guye, Iyo7aabi kawa soo bidi, “Nena, ne adde nayta, ne macca nayta, ne machetanne ne laggethota ashshida ne asa ubbaa hachi neeni kawushadasa.
2SA 19:6 Nena ixeyisata neeni dosaasa; nena doseyisata neeni ixaasa. Ne olanchotinne enta halaqati new aykoka gidonnaysa neeni hachi qoncisadasa. Nuuni ubbay hayqin, Abeseloomey hachi paxa attidaako neeni ufaytanaysa ta be7as.
2SA 19:7 Ha77i denda! Kare keyada ne asaa minthetha. Ta Godaa sunthan caaqayis; neeni keyonna ixiko, hachi qamma neera issi asika attenna. Na7atethafe hachi gakanaw nena gakida iita ubbaafe haysi new aadhida iita gidana” yaagis.
2SA 19:8 Hessa gisho, kawoy dendidi pengiya matan uttis. Kawoy pengen uttidaysa asa ubbay si7ida wode kawako yidosona. He wode Isra7eele asa ubbay banta soo soo baqatidosona.
2SA 19:9 Isra7eele kochati ubbay issoy issuwara haysada yaagidi palamidosona; “Kawoy Dawiti nuna nu morketa kushepe ashshis; nuna Filisxeemeta kushepe wosisis; shin I ha77i Abeseloome gaason biitta aggidi baqatis.
2SA 19:10 Nu bolla kawotanaada nuuni tiyida Abeseloomey olan hayqis. Yaatin, kawa guye ehanaba hinte ayis si77i gidetii?” yaagidosona.
2SA 19:11 Kawoy Dawiti kahineta Saadoqanne Abyataara kiittidi, Yihuda cimatako haysada yaagis; “Isra7eele asa ubbay odetiya oday kawa gakis. Yaatin, kawa iya gadho zaari ehanaw hinte ayis guye atteetii?
2SA 19:12 Hinte ta ishata; hinte ta ashonne ta suuthu. Yaatin, kawa guye zaari ehanaw hinte ayis haratape guye atteetii?” yaagis.
2SA 19:13 Qassi Dawiti Amaasako, “Neeni ta ashonne ta suuthu gidikii? Hachife doomin, taani nena Iyo7aaba bessan ta tora mocona oothonna ixiko, Xoossi tana pirdo” yaagis.
2SA 19:14 I Yihuda asa ubbaa wozanaa issino oothidi shammis. Hessa gisho, enti kawako kiittidi, “Neera ne asaara ubbay haa simmite” yaagidosona.
2SA 19:15 Kawoy simmidi, Yordaanose shaafa gakanaw yis. Yihuda asay kawa Yordaanose shaafa pinthanaw Galgala bidosona.
2SA 19:16 Biraqima addey, Biniyaame kochay, Geera na7ay Saami Dawita mokanaw ellesidi Yihuda asaara bis.
2SA 19:17 Iyara Biniyaame koche gidida mukulu asay, Saa7ola aylley Siibi, tammanne ichashu iya naytinne laatamu aylleti iyara de7oosona. Enti kawoy de7iya bessaa Yordaanose shaafa dirgishe bidosona.
2SA 19:18 Kawa soo asaa ehanawunne kawa ufaysiyabaa oothanaw pinniya bessaara pinnidosona. Geera na7ay Saami Yordaanose shaafa pinnida wode kawa sinthan gufannidi,
2SA 19:19 “Kawaw ta nagaraa taybopa. Ta goday, kawoy, Yerusalaamepe keyiya wode taani ne aylley qohida qohuwa hassayopa. Hesaa ne ulon oykofa.
2SA 19:20 Ne aylley taani nagara oothidaysa erayis; shin ta godaa, kawa mokanaw Yoosefa soo asa ubbaafe koyrottada taani hachi yas” yaagis.
2SA 19:21 Xaruya na7ay Abisi, “Saami Goday tiyida kawa baaddida gisho hayqanaw besseneyee?” yaagis.
2SA 19:22 Dawiti Abisako, “Hinteno, Xaruya nayto, hintena gathiyabay aybee? Hinte hachi taw morke gideeti! Hachi Isra7eelen ay asika hayqenna! Hachi Isra7eele kawoy tana!” yaagis.
2SA 19:23 Kawoy Saami, “Ne hayqaka” yaagidi caaqis.
2SA 19:24 Qassi Saa7ola na7ay Mempibostey kawa mokanaw duge wodhis. Kawoy bida gallasape doomidi I saron guye simmiya gallas gakanaw Mempibostey ba tohuwanne ba ma7uwa meeccibeenna; ba buuchaa meedibeenna.
2SA 19:25 Mempibostey kawuwara gahetanaw Yerusalaamepe yida wode kawoy, “Mempiboste, neeni taara ayis babikii?” yaagidi oychis.
2SA 19:26 Mempibostey, “Ta godaw kawaw, taani ne aylley sila gidiya gisho ‘Taani toggada kawuwara baana mela ta hariya koora’ yaagas. Shin ta aylley Siibi tana cimmis.
2SA 19:27 Ta godaa, kawas wordo odidi ta sunthaa iissis. Neeni ta goday, kawoy Xoossa kiitancho mela gidiya gisho nena lo77idaba ootha.
2SA 19:28 Ta aawa soo asa ubbay hayqanaw bessees, shin taani ne aylley ne gaytape meysatara maana mela taw besse immadasa. Yaatin, hessafe aadhiyaba kawa oychanaw taw ay maati de7ii?” yaagis.
2SA 19:29 Kawoy zaaridi, “Neeni darobaa odetanaw koshshenna. Neera Siibara gadiya shaaketidi ekana mela kiittas” yaagis.
2SA 19:30 Mempibostey, “Ta goday, kawoy saro soo simmaafe attishin, ubbay Siibas gido” yaagis.
2SA 19:31 Galada addey Barziley kawuwara issife Yordaanose pinnidi iya moyzanaw Roogalimape yis.
2SA 19:32 Barziley laythi hospun tammu gidida cima asi. I daro dure gidiya gisho kawoy Mahanayma kataman de7iya wode kawas koshshiyaba immis.
2SA 19:33 Kawoy iyako, “Neeni taara Yerusalaame yedha; taani new koshshiyaba immana” yaagis.
2SA 19:34 Shin Barziley, “Taani hizape daro laythi de7ike; taani kawuwara Yerusalaame ayis boo?
2SA 19:35 Taani ha77i hospun tammu laytha asi; taani iitanne lo77o shaakada eranaw danda7iyana? Taani ne aylley ta miyabaanne uyaaba mal7uwa shaakada eranaw danda7iyana? Taani addenne macca yethi shaakada si7anaw danda7iyana? Yaatin, taani ne aylley, ta godaw kawaw ayis tooho gido?
2SA 19:36 Taani ne aylley nena Yordaanose pinthana. Shin kawoy taw kushe zaaranaw ayis koshshii?
2SA 19:37 Taani ta aawanne ta aaye duufuwa matan ta kataman hayqana mela simmayis. Ne aylley Kimihaami haysish; ta godaa, kawuwara I boo; nena ufaysiyabaa iyaw ootha” yaagis.
2SA 19:38 Kawoy, “Kimihaami taara pinno; nena ufaysiyabaa taani iyaw oothana. Qassi neeni tana oychiyaba ayba gidikoka taani new oothana” yaagis.
2SA 19:39 Hessafe guye, asa ubbay Yordaanose pinnidosona; kawoyka pinnis. Kawoy Barzile yeeridi anjis; Barziley ba soo simmis.
2SA 19:40 Kawoy Yordaanose pinnidi Galgala biya wode Kimihaami iyara issife bis. Yihuda olanchoti ubbaynne Isra7eele olanchotape baggati kawuwara bidosona.
2SA 19:41 Isra7eele ubbay kawako bidi, “Nu ishati, Yihuda asay kawanne iya soo asaa qosidi, iya asaara issife Yordaanose ayis pinthidona?” yaagidosona.
2SA 19:42 Yihuda asay, “Nuuni hessa oothiday kawoy nuus mata dabbo gidiya gishosa. Yaatin, hinte hessas ayis yilotetii? Nuuni kawuwape ayko mido? Woyko nuuni iyape ayko ekido?” yaagidosona.
2SA 19:43 Isra7eele asay, “Kawuwape tammu kushey nuusa; Dawita matan nuus hintefe aadho maati de7ees! Yaatin, hinte nuna ayis kadhidetii? Kawa guye zaaridi ehanaw koyrottidi odiday nuna gidoko?” yaagidosona. Shin Isra7eele asaape Yihuda asay daro wolqanthidi haasayidosona.
2SA 20:1 Biniyaame koche gidida Bikira na7ay Saabe7a geetetiya meto medhiya addey yan de7ees. He addey moyze punnidi, “Nuus Dawitara gishoy baawa! Isseye na7aara nuus laati baawa! Isra7eele asaw, ubbay hinte soo soo gelite!” yaagis.
2SA 20:2 Isra7eele asa ubbay Dawita aggidi, Bikira na7aa Sabe7erara bidosona. Shin Yihuda asay Yordaanosepe Yerusalaame gakanaw aggonna banta kawa kaallidosona.
2SA 20:3 Dawiti Yerusalaamen de7iya ba gadho simmida wode, kawo gadho naagana mela ashshida tammu laggethota efidi issi keethan naagisidi wothis. Entaw koshshiyaba immis, shin entara aqibeenna. Enti he keethan naagetidi, hayqana gakanaw am7o gididi de7idosona.
2SA 20:4 Kawoy Amaasako, “Yihuda asa ubbaa heedzu gallasan taw xeegada shiisha; neka entara shiiqa” yaagis.
2SA 20:5 Amaasi Yihuda asaa xeeganaw bis; shin kawoy gida gallasan simmanaw danda7ibeenna.
2SA 20:6 Dawiti Abisako, “Ha77i Bikira na7aa Saabe7i Abeseloomepe aathidi nuna qohana. Ne godaa olanchota ekada neeni iya geedo kaalla. Hessi hanonna ixiko I gimbetida katamata demmidi nuupe kessi ekana” yaagis.
2SA 20:7 Iyo7aaba asay, kawa naageysatinne mino olanchoti ubbay Abisara Bikira na7aa Saabe7a geedo kaallanaw Yerusalaamepe keyidi bidosona.
2SA 20:8 Enti bidi Gaba7oonan de7iya wogga zaalla gakiya wode Amaasi entara gahetanaw yis. Iyo7aabi ola ma7uwa ma7i uttis; ba xeessan mashsha dancis. I tangishin iya mashshay shoohuwape kessi ekidi wodhis.
2SA 20:9 Iyo7aabi, “Ta ishaw, ne saro de7ay?” yaagidi, Amaasa yeeranaw ba ushacha kushiyan iya buuchaa oykis.
2SA 20:10 Shin Amaasi Iyo7aaba haddirsa kushiyan de7iya mashshaa be7iboona gisho, iyape naagetibeenna. Iyo7aabi iya uluwan caddidi maraaciya biittan zaazis. Amaasi issi cachan hayqida gisho zaari caddibeenna. Iyo7aabinne iya ishaa Abisi Bikira na7aa Saabe7a geedo kaallidosona.
2SA 20:11 Iyo7aaba asaape issoy Amaasa aha matan eqidi, “Iyo7aaba doseynne Dawitaba gidiya oonika Iyo7aaba kaallo” yaagis.
2SA 20:12 Amaasi suuthan iitidi ogiyas giddon kundidi zin7is. Olanchoti ubbay yidi, he bessan eqidaysa he addey be7idi, Amaasa aha ogiyape shooqan goochi kessidi, iya bolla ma7o yeggis.
2SA 20:13 Amaasa ogepe diggidaape guye, Bikira na7aa Saabe7a geedo kaallanaw olanchoti ubbay Iyo7aabara bidosona.
2SA 20:14 Saabe7i Isra7eele kochata biittara kanthidi, Abeel-Beet-Ma7ika katamaa gakis. Berata biittara kanthishin, asa ubbay shiiqidi iya kaallidosona.
2SA 20:15 Iyo7aabara de7iya asay gakidi, Saabe7i de7iya Abeel-Beet-Ma7ika katama teqidosona. Enti katamaa gimbiyas guye baggara biitta dooridosona. Iyo7aabara de7iya asay gimbiya laallanaw qoxoosona. Enti qoxishin,
2SA 20:16 katamaape issi cinca maccasi enta xeegada, “Si7ite! Si7ite! Bidi, Iyo7aaba xeegite. Taani iyaw odanabay de7ees” yaagasu.
2SA 20:17 I maccaseeko yin, iya, “Neeni Iyo7aabee?” yaagada oychasu. Iyo7aabi, “Ee, tana” yaagis. Maccasiya, “Taani ne aylliya giyaba si7a” yaagasu. Iyo7aabi, “Taani si7ayis” yaagis.
2SA 20:18 Maccasiya, “Beni wode asay, ‘Ne oyshaas Abi7eela katamaa ba’ giiko odi wurees.
2SA 20:19 Isra7eele giddon saronne ammanthiya asi nuna. Isra7eele biittan aayo gidida katamiw neeni dhaysanaw qopaasa. Neeni Godaa laata biitta ayis dhaysanaw koyay?” yaagasu.
2SA 20:20 Iyo7aabi, “Hessi taape haako! Katamaa dhaysoy woyko laalethi taape haako!
2SA 20:21 Nu qofay hessa gidenna. Derey dariya Efreema biittan Bikira na7aa Sabe7a geetetiya addey kawa Dawita bolla dendis. He addiya taw immite; taani katamaa yeddada baana” yaagis. Maccasiya, “Iya huuphiya gimbiya bollara new holana” yaagasu.
2SA 20:22 Hessafe guye, maccasiya ba cinca zoriyara asaako basu. Asay Bikira na7aa Saabe7a qoodhepe qanxidi huuphiya Iyo7aabas holidosona. Yaatin, Iyo7aabi moyze punnin asa ubbay katamaape keyidi, ba soo soo bin, Iyo7aabi kawako Yerusalaame simmis.
2SA 20:23 Iyo7aabi Isra7eele olanchota ubbaa halaqa gidishin, Yoodahe na7ay Banayasi Dawita naageysata halaqa.
2SA 20:24 Adoniraami wolqa ooso ootheyisata halaqa gidishin, Ahiluda na7ay Iyosaafxi hanidaba xaafeysa.
2SA 20:25 Suusi waanna xaafe gidishin, Saadoqinne Abyataari kahine.
2SA 20:26 Qassi Ya7ira addey Irki Dawita kahinetape issuwa.
2SA 21:1 Dawita kawotetha laythan biittay heedzu laythi kumethi koshatis. Hessa gisho, Dawiti Godaa oychin, Goday, “Hessi haniday Saa7olinne iya soo asay Gaba7oona asaa wodhida gisho suuthaa gomey enta gakis” yaagis.
2SA 21:2 Yaatin kawoy Gaba7oona asaa xeegidi odisis. Gaba7oona asati Isra7eele zare gidonashin, enti Amoore asaape attidaysata. Isra7eeleti enta ashshanaw entara caaqidosona; shin Saa7oli Isra7eelesinne Yihudas mishetida gisho, enta kumethi dhaysanaw koyis.
2SA 21:3 Dawiti Gaba7oona asaa, “Taani hintew ay ootho? Godaa laata hinte anjana mela taani hintena ay acco?” yaagis.
2SA 21:4 Enti zaaridi, “Nuuni Saa7olape woyko iya soo asaape worqa woyko bira oychoko. Qassi Isra7eele giddofe issi asika wodhanaw nuus maati baawa” yaagidosona. Dawiti, “Yaatin, taani hintew ay oothana mela koyeetii?” yaagidi oychis.
2SA 21:5 Enti, “Saa7oli nuna dhaysis; nuupe ay asika Isra7eele biittan awunka paxa doonna mela maqetis.
2SA 21:6 Hessa gisho, Saa7ola kochaafe laapun addeta nuus imma. Goday dooridi iya kawothida Saa7ola kataman, Gib7an, Godaa sinthan nuuni enta kaqana” yaagidosona. Kawoy, “Taani enta hintew aathada immana” yaagis.
2SA 21:7 Saa7ola na7ay Yoonataaninne Dawiti Godaa sinthan caaqida caaquwa gisho, Saa7ola na7aa, Yoonataana na7aa Mempiboste kawoy ashshis.
2SA 21:8 Shin kawoy Dawiti Iyoheela na7iya Raxifa Saa7olas yelida nam7u adde nayta, Armoonanne Mempiboste, qassi Saa7ola na7iya Merooba, Mahoola addiya Barzile na7aa Adir7eelas yelida ichashu adde nayta ekis.
2SA 21:9 Gaba7oona asaas aathidi immin, enti Godaa sinthan zumaa huuphen kaqidosona; laapunay issife hayqidosona. Enti banga caka doomiya wode hayqidosona.
2SA 21:10 Iyoheela na7iya Raxifa kayo afila ekada zaalla bolla baw hiixada, kathi cakiya wodiyape bidi ahata bolla iri bukana gakanaw gallas kafoy, qamma do7i bochonaada naagasu.
2SA 21:11 Saa7ola laggethiya, Iyoheela na7iya Raxifa oothidaysa Dawiti si7is.
2SA 21:12 Dawiti bidi, Saa7ola meqethaanne iya na7aa Yoonataana meqethaa Galadan de7iya Yaabesa asaape ekis. Filisxeemeti Saa7olanne iya nayta Gilbo7a deriya bolla wodhidi, Beet-Saana gutarape Yaabesa asay kaysotidi ekidosona.
2SA 21:13 Dawiti Saa7ola meqethaanne iya na7aa Yoonataana meqethaa he bessaafe ehis. Qassi kaqetida laapun asata meqethaaka shiishis.
2SA 21:14 Saa7ola meqethaanne iya na7aa Yoonataana meqethaa Biniyaame biittan Xela kataman iya aawa Qiisa duufuwan moogidosona. Kawoy kiittidaba ubbaa enti polidosona. Hessafe guye, enti he biitta gisho woossida woosa Xoossay si7is.
2SA 21:15 Filisxeemeta giddoninne Isra7eele asaa giddon zaaridi oli dendin, Dawiti ba asaara bis. Filisxeemetara oletidi Dawiti daaburis.
2SA 21:16 Rafaya yaraape Yishibibinooba geetetiya addey de7ees. Naase biratape oosetida, I oykiya tooray heedzu kilo giraamenne bagga; I ooratha mashshi dancidi, Dawita wodhanaw qopidi de7ees.
2SA 21:17 Shin Xaruya na7ay Abisi Dawita ashshis; I Filisxeeme addiya wodhis. Hessafe guye, Dawita asay, “Isra7eele xompey to7onnaada neeni zaarada nuura olaa baaka” yaagidi caaqidosona.
2SA 21:18 Gooba geetetiya bessan Filisxeemetara hara oli dendis. He wode Kusata addey Sabaki, Raafa yara gidida Saafa geetetiya uraa wodhis.
2SA 21:19 Qassika he bessan Filisxeemetara hara oli dendin, Beetelemepe yida Ya7ira na7aa, Elhanaani, toora toomay wandaraashe mela gidida Gaate addiya Gooliyada wodhis.
2SA 21:20 Qassika Gaaten hara oli dendis. He bessan issi adussa addey de7ees. He addiyas issi issi kushiyaninne issi issi tohuwan usupun, woli bolla laatamanne oyddu biradheti de7oosona. Ika Raafa yaraape gidida asi.
2SA 21:21 He addey Isra7eele bushayida wode Dawita ishaa Saama na7ay Yoonataani iya wodhis.
2SA 21:22 Ha oyddati Gaaten de7iya Raafa yarata. Enta Dawitinne iya asay wodhidosona.
2SA 22:1 Goday Saa7ola kushepenne iya morketa ubbaa kushepe ashshida gallas Dawiti Godaas ha mazmuriya yexis.
2SA 22:2 Goday ta zaalla; taw miixaa; I tana ashsheysa.
2SA 22:3 Ta Xoossay taani baqatada attiya zaalla; I ta gondalliya; I ta atotetha wolqaa. I taani baqatada attiya bessi; ne tana makallanchota kushepe ashshaasa.
2SA 22:4 Galati bessiya Godaa taani xeegana; taani ta morketape attana.
2SA 22:5 Hayqo zuley tana teqis; dhayo di7oy tana daganthis.
2SA 22:6 Si7oole wodoroy tana qachana hanees; hayqoy xiheda tana oykis.
2SA 22:7 Tana metoy un7ethin Godaa xeegas; tana maaddana mela ta Xoossaako waassas. I ba keethan ta qaala si7is; ta waassida waasoy iya haythan wodhis.
2SA 22:8 Xoossay hanqetida gisho, biitti qaaxis; buqetis; salota xaphoy kokoris; qaaxis
2SA 22:9 Iya siidhiyape cuyay keyis; iya doonape tama lacoynne xuuggiya bonqoy keyis.
2SA 22:10 Saluwa phalqidi duge wodhis; iya tohuwape garsara sakana dhumi de7ees.
2SA 22:11 Kiruubetan uttidi paallis; carko qefiya bolla uttidi bis.
2SA 22:12 Bana dhuman teqis; iya dunkaaney irara siketida shaara.
2SA 22:13 Iya sinthan de7iya poo7uwape tama bonqoy keyees.
2SA 22:14 Goday salope guummis; Ubbaafe dhoqa Xoossay ba qaala sissis.
2SA 22:15 Ba dongiya dukidi, ba morketa laallis; wol7antha poo7o kiittidi, enta yedethis.
2SA 22:16 Goday seerida wodenne hanqetidi peenuqida wode, abba giddon biittay bentis; Sa7aa baasoyka qoncis.
2SA 22:17 Goday bollafe kushe yeddidi, tana oykis; ciimmo haathaafe tana kessis.
2SA 22:18 I tana ta wolqaama morketape, ta wolqaafe bolla gidida tana ixeysatape ashshis.
2SA 22:19 Ta metuwa gallas enti ta bolla dendidosona; shin Goday tana zempiseysa.
2SA 22:20 I tana dalga bessi kessis; tanan ufaytida gisho tana ashshis.
2SA 22:21 Ta xillotethaada Goday taw qanxis; ta kushe geeshshatethaada taw zaaris.
2SA 22:22 Ayis giiko taani Godaa ogiya kaallas; qassi ta Xoossaa aggada iita oothabike.
2SA 22:23 Taani iya higgiya ubbaa naagas; iya wogaa polanaysa aggabike.
2SA 22:24 Taani iya sinthan suure de7as; tana nagarape naagas.
2SA 22:25 Goday taw ta xillotethaadanne ta geeshshatethaada zaaris.
2SA 22:26 Neeni keehatas keeha; suuretas neeni suure.
2SA 22:27 Geeshshatas neeni geeshshi; shin geellatas neeni morke.
2SA 22:28 Bantana kawusheyisata ashshaasa; shin otoranchota kawushaasa.
2SA 22:29 Abeeti Godaw, ta xompey nena; Goday ta dhumaa poo7isis.
2SA 22:30 Ne maaduwan ta morketa yedhada baana; ta Xoossan gimbe dirsa gupa aadhana.
2SA 22:31 Xoossaa ogey suure; Godaa qaalay geeshshi; iyako baqatiya ubbaas I gondalle.
2SA 22:32 Goday attishin, hara xoossi oonee? Nu Xoossay attishin, hara zaalli oonee?
2SA 22:33 Xoossay taw mino miixaa; I ta ogiya polo oothees.
2SA 22:34 I ta tohuwa gen7e tohoda minthees; tana dhoqa bessan minthidi essees.
2SA 22:35 I ta kushiya olas loohisees; ta qesey naase birata donge dukees.
2SA 22:36 Tana ashshiya ne gondalliya taw immadasa; ne katisoy tana gitayees.
2SA 22:37 Ta hemethaa dalgisaasa; ta gaadiya minthaasa.
2SA 22:38 Ta morketa yedethada mentherethas; enti dhayonna de7ishin guye simmike.
2SA 22:39 Enti zaaridi dendonna mela shocas; ta tohuwape garsan kundidosona.
2SA 22:40 Olas taw wolqa dancisadasa; ta morketa taw gulbatisadasa.
2SA 22:41 Ta morketa ta sinthafe baqatisadasa; tana ixeyisata dhaysas.
2SA 22:42 Maade koyidi waassidosona; shin oonika enta ashshibeenna. Godaa enti xeegidosona; shin I entaw koybeenna.
2SA 22:43 Taani enta baanada liiqisas; oge urqada enta yedhas.
2SA 22:44 Makalla ta asaape tana ashshadasa; kawotethata bolla tana shuumadasa; ta eronna asay taw haaretis.
2SA 22:45 Allaga derey tana aaddashees; ta woriya si7idi taw kiitetoosona.
2SA 22:46 Enti wolqa dhayidosona; banta miixape kokorishe keyidi yoosona.
2SA 22:47 Goday de7on de7ees! Ta zaallay anjeto. Tana ashshiya zaallay dhoqu dhoqu go.
2SA 22:48 I ta haluwa keyiya Xoossaa; kawotethata taape garsan haarisees.
2SA 22:49 Ta morketape tana ashshees; ta morketa bolla tana dhoqu dhoqu oothaasa; Oda medhiya asape tana ashshaasa.
2SA 22:50 Abeeti Godaw taani kawotethata giddon nena galatana; ne sunthaa yexana.
2SA 22:51 Xoossay ba kawas gita xoono immees; ba tiyida Dawitasinne iya kochaas, merinaa siiquwa bessees.
2SA 23:1 Haysi Dawiti wursetha haasaya. Isseye na7aa Dawita wuresethay haysa; I Yayqooba Xoossan tiyetidaysa; Xoossay iya dhoqu dhoqu oothidaysa; Isra7eelen lo77o mazmure yexeysa.
2SA 23:2 “Godaa Ayyaanay ta baggara odees; iya qaalay ta inxarsan de7ees.
2SA 23:3 Isra7eele Xoossay taw odis; Isra7eele Zaallay haysada yaagis. ‘Xillotethan haariya kawoy, Xoossa yashshan aysiya kawoy,
2SA 23:4 I shaari bayna guura doliya xalqe poo7o mela. I iri bukidi aadhin, biittafe maata dolisiya booqalsa mela.’
2SA 23:5 Tuma ta keetha asay Xoossa sinthan suure; I taara merinaw caaqis; ha caaqoy giigidi, minnidinne naagetidi de7ees. Xoossay taw xoono immana; ta amotidaba ubbaa I tuma polana.
2SA 23:6 Shin iita asati ubbay kushen shiishanaw hanonna agunthada wora holetana.
2SA 23:7 Agunthu bochiya oonika wale woyko xam7a ba kushen oykanaw koshshees; hessi ba de7iya bessan eexana” yaagis.
2SA 23:8 Mino Dawita asata sunthay haysafe kaallidi de7eyisata. Koyroy, Takmoona yeleta gidida Yoseeb-Bestibeete geetetees; I heedzata halaqa; issi toho olan ba tooran hospun xeetu asi wodhis.
2SA 23:9 Heedzatape issoy, iya kaalliya nam7anthoy, Ahoha sheeshi gidida Dodo na7aa Alaazara. Issi gallas inne Dawiti olas shiiqida Filisxeemeta mandidosona; Isra7eele asay guye simmis.
2SA 23:10 Shin I ba bessan minni eqidi, iya kushey argaacidi mashshaara oyketana gakanaw Filisxeemeta shocis. He gallas Goday gita xoono immis. Olay eqin, olanchoti Alaazarako simmidi yidosona; shin enti hayqida Filisxeemetape ola ma7o qaaridosonape attishin, haraba oothibookona.
2SA 23:11 Iyape kaalley qassi Arooda yeleta gidida Aga na7aa Saama. Issi gallas Filisxeemeti misirey kumida shooqan, Leehi geetetiya bessan shiiqin, Isra7eeleti enta sinthafe baqatidosona.
2SA 23:12 Shin Saami shooqa giddon murti eqidi oletis. Filisxeemeta wodhis; he gallas Goday wolqaama xoono immis.
2SA 23:13 Katha caka wode hastamu mino asatape heedzati Adulaama gongoluwa Dawitako bidosona. He wode Filisxeeme olanchoti Raafayme zangaaran dunkaanidosona.
2SA 23:14 He wode Dawiti miixan de7ees; Filisxeeme olanchota cugay qassi Beetelemen olla kambe de7ees.
2SA 23:15 Dawiti haathe uyanaw amotidi, “Beeteleme katamaa pengiya matan de7iya olape haathe tana oone ushshanay” yaagis.
2SA 23:16 Ha heedzu mino asati Filisxeeme olanchota gutaa kanthidi, Beeteleme katama pengen de7iya ollafe haathe duuqidi Dawitas ehidosona. Shin I uyonna ixidi, Godaa sinthan tigidi,
2SA 23:17 “Abeeti Godaw, haysa uyanaysi taape haako! Ha haatha banta shempuwa bayzidi ehida asata suuthu gidennee?” yaagidi uyonna ixis. Ha heedzu mino asati haysa oothidosona.
2SA 23:18 Xaruya na7aa Iyo7aaba ishay Abisi hastamata halaqa; I heedzu xeetu asata ba tooran olidi wodhis; ika heedzatada eretis.
2SA 23:19 I hastamatape aadhidi bonchetida asi; I heedzata mela eretida asi gidonna ixikoka hastamatas halaqa.
2SA 23:20 Qabxi7eela yeleta gidida Yoodahe na7ay Banayasi mino ooso oothida gita asi. I nam7u eretida Moo7abe asata wodhis. Issi wode shachi wodhiya gallas ollan wodhidi gaammo wodhis.
2SA 23:21 Qassi issi gita Gibxe addiya wodhis; Gibxe addey toora oykis; shin I xam7a oykidi iyako bidi, iya kushepe toora dafi ekidi, iya toorara iya wodhis.
2SA 23:22 Yoodahe na7ay Banayasi haysa oothis; iya sunthay heedzataysada eretis.
2SA 23:23 I hastamata giddon daro bonchetida asi, shin I heedzata taybuwan deenna. Dawiti iya bana naagiya wotaadaretas tora mocona oothis.
2SA 23:24 He hastamata giddon de7eysati, Iyo7aaba ishaa Asaheela, Beeteleme yeleta gidida Dooda na7aa Eliyaana,
2SA 23:25 Arooda yeleta gidida Saamanne Eliqa,
2SA 23:26 Falxa yara gidida Selesa, Taqoha addiya Esika na7aa Irasa,
2SA 23:27 Anatoote yeleta gidida Abi7ezera, Kuussa yeleta gidida Mabunaya,
2SA 23:28 Ahoha yara gidida Xalmoona,
2SA 23:29 Naxoofa yeleta gidida Mahirayanne Ba7ana na7aa Heleba. Biniyaame biittan, Gib7a yeleta gidida Ribaaya na7aa Itaya,
2SA 23:30 Phir7atoona yeleta gidida Banaya, Ga7aasa zangaara matape yida Hidaya,
2SA 23:31 Araba yeleta gidida Abalboona, Barhuuma addiya Azmoota,
2SA 23:32 Sha7alboona yeleta gidida Eliyaaba, Asana nayta, Yoonataana,
2SA 23:33 Arooda yeleta gidida Saamanne Shaara na7aa Ahi7aama,
2SA 23:34 Ma7ika yeleta gidida Ahasbaya na7aa Elfalaxa, Gilo yeleta gidida Akxoofela na7aa Eli7aama,
2SA 23:35 Qarmeloosa yeleta gidida Hexira, Araba yeleta gidida Pa7aara,
2SA 23:36 Suubba yeleta gidida Naatana na7aa Yigi7aala, Gaade yeleta gidida Baana,
2SA 23:37 Amoone yeleta gidida Seleqa, Xaruya na7aa Iyo7aaba ola miishiya tookiya Ba7eroota yeleta gidida Nahiraya,
2SA 23:38 Yatira yara gidiya Irayanne Gareeba,
2SA 23:39 Hite addiya Ooriyoona. Enti kumethi hastamanne laapuna.
2SA 24:1 Godaa hanqoy qassika Isra7eele bolla eexis; Goday Dawita enta bolla denthethidi, “Bada Isra7eelenne Yihuda asaa tayba” yaagis.
2SA 24:2 Hessa gisho, kawoy tora moconata Iyo7aabanne baara de7eysatako haysada yaagis; “Isra7eele kochata Daanepe Barsaabe gakanaw taani erana mela Isra7eele asaa bidi taybite” yaagis.
2SA 24:3 Shin Iyo7aabi, “Goday ne Xoossay ha de7iya asaa bolla xeetu kushe gujo! Hessa ta godaa, kawa ayfey be7o! Shin ta goday, kawoy ayis hessa melaba oothanaw koyii?” yaagis.
2SA 24:4 Shin kawa qaalay Iyo7aabanne tora moconata xoonin, enti kawa sinthafe keyidi, Isra7eele asaa taybanaw bidosona.
2SA 24:5 Enti Yordaanose pinnidi dugeha baggan de7iya, zangaara giddon de7iya Aro7eera kataman dunkaanidosona; yaape Gaade kanthidi Iyazeera gakidosona.
2SA 24:6 Yaape enti Galadanne Hiteta biittan de7iya Qaadesa bidosona; yaape qassi Daane bidosona; yaara Sidoona gakidosona.
2SA 24:7 Yaape dendidi, Xiroosa miixanne Hiwetanne Kanaaneta katamaa ubbaa bidosona. Wursethan Yihuda Negeban de7iya Barsaabe bidosona.
2SA 24:8 Enti biitta ubbaa yuuyishe uddufun ageenanne laatamu gallas gam7idi, Yerusalaame simmidosona.
2SA 24:9 Iyo7aabi asaa taybuwa kawa erisis; Isra7eelen mashshan oletanaw danda7iya hospun xeetu mukulu mino olanchoti, Yihudan qassi ichashu xeetu mukulu olanchoti de7oosona.
2SA 24:10 Asaa taybidaape guye, Dawita wozanay hirgin, Dawiti, “Taani ha oosuwan gita nagara oothas. Shin ha77i abeeti Godaw, taani nena woossayis; ta nagaraa, ne aylliya nagaraa atto ga. Taani daro boozaba hanas” yaagis.
2SA 24:11 Wontetha gallas Dawiti hiixape dendiya wode Dawitas qoncethi be7iya, nabiya Gaadeko Godaa qaalay yis.
2SA 24:12 “Bada, Dawitako, ‘Taani nena heedzubaape issuwa doorana mela bessayis; taani ne bolla polanaw entafe issuwa doora’ yaagees Goday” yaagis.
2SA 24:13 Gaadi Dawitako bidi, “Heedzu laythi ne biitta bolla kosha ehoyee? Woyko ne morketi nena yedethin, heedzu ageena enta sinthafe baqataneyee? Woyko ne biitta bolla heedzu gallas gadoy yaanaysa dooray? Ane ha77i qopada taani tana kiittidaysas zaaranaba oda” yaagis.
2SA 24:14 Dawiti Gaadeko, “Taani daro un7etas. Godaa maarotay gita gidiya gisho, nuuni iya kushen kundana; tana asa kushen yeggofo” yaagis.
2SA 24:15 Hessa gisho, wontafe bidi I gida gallasay gakanaw Goday Isra7eele biittan gado kiittis. Isra7eele biittan Daanepe bidi Barsaabe gakanaw laapun tammu mukulu asi hayqis.
2SA 24:16 Yerusalaame dhaysanaw kiitanchoy ba kushiya miccida wode asaa bolla gakida gadoy Godaa azzanthida gisho, asaa shociya kiitanchuwako, “Gidana! Ne kushiya zara” yaagis. Godaa kiitanchoy he wode Yaabuse addiya Orna wudumman de7ees.
2SA 24:17 Asaa shociya kiitanchuwa Dawiti be7ida wode Godaako, “Nagaraa oothiday tana; ta balas! Ha dorsati ay oothidona? Hayyana, tananne ta aawa soo asaa ne seerana mela taani woossayis” yaagis.
2SA 24:18 He gallas Gaadi Dawitako yidi, “Bada, Yaabuse addiya Orna wudumman Godaas yarsho bessi giigisa” yaagis.
2SA 24:19 Dawiti, Goday Gaade baggara kiittidaysada oothanaw pude bis.
2SA 24:20 Orni duge xeelliya wode, kawoynne iya asati baako yeysa be7is. I gaxa keyidi, gufannidi kawas ziggis.
2SA 24:21 Orni, “Ta goday kawoy ba aylliyako, ayis yidee?” yaagis. Dawiti, “Asaa bollafe gadoy simmana mela taani Godaas yarsho bessi giigisanaw ne wudumma shammanaw yas” yaagis.
2SA 24:22 Orni, “Ta goday, kawoy ba koydaba ekidi yarsho! Xuussa yarshos boorati de7oosona; eeso mithas qassi kathi bukiya miisheynne boora qambari de7ees.
2SA 24:23 Kawaw, haysa ubbaa Orni kawas immis” yaagis. Gujidi Orni, “Goday ne Xoossay ne yarshuwa eko” yaagis.
2SA 24:24 Shin kawoy, “Akay, taani ta miishen shammana. Ta Godaa, Xoossaas xuussa yarsho gatey bayna yarshike” yaagis. Hessa gisho, kawoy wudummaanne boorata Ornafe ishatamu bira santimen shammis.
2SA 24:25 Dawiti he bessan yarsho bessi giigisidi xuussa yarshonne issifetetha yarsho Godaas yarshis. Goday biitta gisho woosetida woosa si7idi, gaduwa Isra7eelepe diggis.
1KI 1:1 Kawoy Dawiti daro cimidi wode sugis. Iya aylleti ma7o iya bolla doorinka iya ho77onna ixis.
1KI 1:2 Hessa gisho, iya moorinnati, “Kawa matan daana melanne iya heemmana mela issi geela7o nu new koyana. Nu godaa kawa ho7ethanaw iya matan zin7anaw danda7awusu” yaagidosona.
1KI 1:3 Enti Isra7eele biitta ubban koyidi Abisa geetetiya issi mala lo77o geela7o Sunaama katamaape demmidi, kawas ehidosona.
1KI 1:4 He geela7iya daro mala lo77o. Iya kawa heemmasunne iyaw oothasu; shin kawoy iira aqi erenna.
1KI 1:5 Haagita na7ay Adooni, “Ta kawotanaw koyayis” yaagidi dendis; para gaareta, paratanne ba sinthan woxiya ishatamu asata giigisis.
1KI 1:6 Iya aaway, “Ne haysa ayis oothay?” gidi iya oychi erenna. Adoniyaasi daro mala lo77o; I Abeseloome kaallidi yeletis.
1KI 1:7 Adoniyaasi Xaruya na7aa Iyo7abaranne kahiniya Abyataarara zoretin, enti iya maaddanaw giigidosona.
1KI 1:8 Shin kahiniya Saadoqi, Yoodahe na7ay Banayi, nabiya Naatani, Saami, Resimnne Dawita naageysati Adoniyaasara dookona.
1KI 1:9 Issi gallas Adoniyaasi Enrogeela pultuwa matan Zoheleta Zaalla geetetiya bessan dorsata, mehetanne marata yarshis. Kawo nayta ba ishata ubbaanne kawas oothiya Yihuda asata ubbaa ba yarsho bessa xeegis.
1KI 1:10 Shin nabey Naatana, Banaya, kawa naageysatanne ba isha Solomone xeegibeenna.
1KI 1:11 Hessafe guye, Naatani Solomone aayiw Barsaabeko bidi, “Nu goday, Dawiti eronna de7ishin, Haagita na7ay Adoniyaasi kawotidaysa ne si7abikii?
1KI 1:12 Ne ne shempuwanne ne na7aa Solomone shempuwa waatada ashshaneko ta nena zorayis.
1KI 1:13 Kawa Dawitako gelada, ‘Ta godaw, Kawaw tuma, taape guye ne na7ay Solomoney kawotana; I ta araatan uttana’ yaagada taw ne ayllees caaqabikii? Yaatin, Adoniyaasi waanidi kawotidee?
1KI 1:14 Neeni kawuwara haasayishin ta gelada, ne oday tuma gideysa odana” yaagis.
1KI 1:15 Barsaaba kawa haasayisanaw I de7iya keethaa gelasu; Sunaamape yida Abisa kawa heemmawusu.
1KI 1:16 Barsaaba kawa sinthan bonchon som7uwa sa7a gathada ziggasu. Kawoy, “Ay koyadii?” yaagidi oychis.
1KI 1:17 Iya, “Ta godaw, taw ne ayllees, ‘Taape guye ne na7ay Solomoney kawotana; I ta araatan uttana’ gada Godan, ne Xoossan, taw caaqadasa.
1KI 1:18 Heko, ha77i Adoniyaasi kawotis; ne ta goday, kawoy hessa eraka.
1KI 1:19 I daro meheta, maratanne dorsata yarshidi, kawa nayta ubbaa, kahiniya Abyataaranne toora mocona Iyo7aaba xeegis; shin ne aylliya Solomone xeegibeenna.
1KI 1:20 Ta godaw kawaw, ta godaape kawuwape guye ooni ne araatan uttaneeko eranaw Isra7eele asa ubbaa ayfey nena xeellees.
1KI 1:21 Hessi hanonna ixiko ta goday kawoy hayqidi ba mayzatan gahetiya wode tanne ta na7ay Solomoney daafaba oothida asada taybetana” yaagasu.
1KI 1:22 Barsaaba buroo kawuwara haasayishin, nabey Naatani kawo keethi gakis.
1KI 1:23 Nabey yidaysa asay kawas odidosona. Naatani kawa sinthe aadhidi, ba som7uwa sa7a gathidi ziggis.
1KI 1:24 Naatani, “Ta godaw kawaw, neepe guye Adoniyaasi kawotanaysanne ne araatan uttanaysa odadii?
1KI 1:25 Hachi I daro meheta, maratanne dorsata yarshidi, kawa nayta ubbaa, toora moconatanne kahiniya Abyataara xeegis. Enti ha77i iyara mishenne uyishe, ‘Kawoy Adoniyaasi birata tuussi gido’ yaagishe de7oosona.
1KI 1:26 Shin tana ne aylliya, kahiniya Saadoqa, Yoodahe na7aa Banayanne ne aylliya Solomone xeegibeenna.
1KI 1:27 Haysi ta godaa kawuwape guye iya araatan ooni uttaneeko ba aylleta erisonna de7ishe ta goday kawoy oothidabayee?” yaagis.
1KI 1:28 Kawoy Dawiti, “Barsaabo taw xeegite” yaagin kawoy de7iya bessaa gelada iya sinthan eqasu.
1KI 1:29 He wode kawoy, “Tana meto ubbaafe ashshida Goday eriya mela.
1KI 1:30 Godan, Isra7eele Xoossan ta new caaqida caaquwa tuma hachi polana; taape guye ne na7ay Solomoney kawotana; ta araatan, I ta bessan uttana” yaagidi caaqis.
1KI 1:31 Barsaaba kawa sinthan ba som7uwa sa7a gathada ziggada, “Ta goday, Kawoy Dawiti merinaw kawoto!” yaagasu.
1KI 1:32 Hessafe guye Kawoy Dawiti, “Taw kahiniya Saadoqa, nabiya Naatananne Yoodahe na7aa Banaya xeegite” yaagin, enti gelidi, kawa sinthan eqidosona.
1KI 1:33 Kawoy “Ta aylleta hintera ekidi bidi, ta na7aa Solomone ta toggiya baquluwa togisidi, Giyoone pultuwako efite.
1KI 1:34 Yan kahiniya Saadoqinne nabiya Naatani iya tiyidi Isra7eele bolla kawoyo. Moyze punnishe, hinte qaala dhoqu oothidi, ‘Kawoy Solomoney birata tuussu gido’ yaagite.
1KI 1:35 Hinte iya ajabidi iyara biite; I ta araatan uttidi, ta bessan kawoto. Taani Isra7eelenne Yihuda haariya asi oothada iya shuumas” yaagis.
1KI 1:36 Yoodahe na7aa Banayi zaaridi, “Amin7i! Goday, ta godaa kawa Xoossay hessa polo!
1KI 1:37 Goday ta godaara kawuwara gididaysada Solomonera gido; iya araata ta godaa Kawa Dawita araatape aathidi gitayo” yaagis.
1KI 1:38 Hessa gisho, kahiney Saadoqi, nabey Naatani, Yoodahe na7ay Banayinne kawa naageysati Solomone Kawoy Dawiti toggiya baquluwa togisidi, Giyoone efidosona.
1KI 1:39 Kahiney Saadoqi Geeshsha Dunkaaniyape zayte kacen tigi ekidi, Solomone tiyidi kawothis. Enti moyze punnin, asa ubbay ba qaala dhoqu oothidi, “Kawoy Solomoney merinaw kawoto!” yaagidosona.
1KI 1:40 Asa ubbay iya kaallidi bidosona; enti biitti qaaxana gakanaw suusul7e punnishenne durishe daro ufaytidosona.
1KI 1:41 Adoniyaasinne iyara de7iya imathati gibira midi wursishe hessa si7idosona. Iyo7aabi Moyze puno si7idi, “Ha kataman si7etiya wocama girsay aybee?” yaagidi oychis.
1KI 1:42 I buroo odetishin, kahiniya Abyataara na7ay Yoonataani gaki wodhis. Adoniyaasi, “Ane haa gela. Ne mela lo77o asi lo77o wore ehonna aggenna” yaagis.
1KI 1:43 Yoonataani, “Akay, taani lo77o wore ehabike! Nu goday Kawoy Dawiti Solomone kawothis.
1KI 1:44 Iya ajabana mela kawoy kahiniya Saadoqa, nabiya Naatana, Yoodahe na7aa Banayanne kawa naageysata iyara yeddis; enti kawoy toggiya baquluwa iya togisidosona.
1KI 1:45 Kahiney Saadoqinne nabey Naatani, Giyoone pultuwa matan iya tiyidi kawothidosona; enti ililishenne durishe bidosona; kataman si7etiya girsay hessa.
1KI 1:46 Solomoney araatan uttis.
1KI 1:47 Hessa bollaka, kawa moorinnati nu godaa Kawa Dawitako shiiqidi, ‘Ne Xoossay Solomone sunthaa neysafe aathidi kesso; iya araata neysafe aathidi gitayo!’ yaagidi anjidosona. Kawoy ba algan de7ishe hokidi Xoossa goyinnis.
1KI 1:48 Gujidika, ‘Ta bessan kawothidi, ta araatan utisidi, tana hachi ta ayfen bessiya Goday, Isra7eele Xoossay galatetto!’ ” yaagis.
1KI 1:49 Adoniyaasa imathati ubbay hessa si7ida wode dagammidi, laaletidosona.
1KI 1:50 Adoniyaasi Solomone yayyidi, yarsho bessa kaceta oykidi woossis.
1KI 1:51 Asay Solomone, “Adoniyaasi Kawa Solomone yayyidi, yarsho bessa kaceta oykidi, ‘Kawoy Solomoney tana ba aylliya mashshan wodhike gidi hachi taw caaqo’ ” yaagees gidi odidosona.
1KI 1:52 Solomoney zaaridi, “I ba hanuwa loythiko, hari attoshin iya huuphe binaanape issoyka boshetenna; shin iyan iitatethi bentiko I hayqana” yaagis.
1KI 1:53 Kawoy Solomoney, Adoniyaasa yarsho bessaafe ehana mela ase kiittis. Adoniyaasi yidi, Solomones ziggis; Solomoney iyako, “Ne soo ba” yaagis.
1KI 2:1 Dawitas hayqiya wodey matin, ba na7aa Solomone haysada yaagidi kiittis;
1KI 2:2 “Ta hayqiya wodey matis. Hessa gisho, minna; ase gida.
1KI 2:3 Goday ne Xoossay kiittidaba naaga; iya ogiyan hemeta; Muse maxaafan xaafetida iya awaajuwa, iya kiitaa, iya higgiyanne iya wogaa naaga. Hessa ne oothiko, ne oothiyaba ubbaynne ne biya bessa ubbay new injetana.
1KI 2:4 Goday, ‘Ne kochati banta de7uwan naagetidi de7iko, enti ta sinthan banta kumetha wozanapenne banta kumetha shempuwafe ammanetidi hemetiko, Isra7eele araatan uttiya asi new dhayenna’ ” yaagida ufaysa qaala taw polana.
1KI 2:5 Gujidika, “Xaruya na7ay Iyo7aabi Isra7eele nam7u toora moconata Neera na7aa Abeneeranne Yetera na7aa Amaasa wodhidi, I oothidaba ne eraasa. Hessika, oli baynashin saro wode enta wodhidi, he suuthan ba xeessaa saqiyanne ba tohuwa caammaa tiyis.
1KI 2:6 Ne iya ne cincatethaada ootha; I ceeggidi saro hayqanaada oothofa.
1KI 2:7 “Shin taani ne isha Abeseloomepe baqatiya wode enti taw miye gidida gisho, Galada biittan de7iya Barzile naytas keehaba ootha; enti ne gaytape miya asaara mo.
1KI 2:8 “Taani Mahanayma katama bida wode tana iita baadethi baaddida Biniyaame biittan Biraqima katamape yida Geera na7aa Saami neera de7eysa qopa. I taara gahetanaw Yordaanose Shaafa yida wode, ‘Ta nena wodhike’ gada Godan iyaw caaqas.
1KI 2:9 Shin ha77i neeni iya xillo asada taybopa. Ne cinca asi gidiya gisho ay oothaneko eraasa. Ne he cima addiya suuthara mooga” yaagis.
1KI 2:10 Dawiti hayqidi, ba mayzatan gahetis; ba kataman moogetis.
1KI 2:11 Dawiti Isra7eele bolla oytamu laythi kawotis; Kebroonan laapun laythi, Yerusalaamen hastamanne heedzu laythi kawotis.
1KI 2:12 Solomoney ba aawa Dawita araatan uttis; iya kawotethay daro minnis.
1KI 2:13 Haagita na7ay Adoniyaasi, Solomone aaye Barsaabiko bin Barsaaba, “Ne taako saro yadii?” yaagada iya oychasu. I, “Ee; saro yas” yaagidi zaaris.
1KI 2:14 Gujidika, “Taani nena oychiyabay de7ees” yaagis. Iya, “Oycha” yaagasu.
1KI 2:15 Adoniyaasi, “Kawotanaw bessey tana gideysanne Isra7eele asa ubbay tana bantaw kawoda xeelleysa neeni, ne huuphen eraasa. Shin hanoy Xoossafe gidida gisho oday laametin kawotethay ta ishaako yuuyis.
1KI 2:16 Ha77i taani nena issiba oychana. Hayyana tana yeellayopa” yaagis. Iya, “Oycha” yaagasu.
1KI 2:17 I, “Kawoy Solomoney nena ixas geenna; hessa gisho, Sunaama maccasiw Abiso taw macho oothada ekana mela hayyana taw iya oycharki” yaagis.
1KI 2:18 Barsaaba, “Daro lo77o; ta hessa kawas odana” yaagasu.
1KI 2:19 Hessa gisho, Barsaabey Adoniyaasa kiitaa odanaw Solomoneko gelin, kawoy dendi eqidi, iw ziggis. Ba araatan uttis; ba aayes hara araata ehisidi, baape ushacha baggan utisis.
1KI 2:20 Barsaaba, “Ta nena issi guuthaba oychiyabay de7ees; hayyana tana yeellayopa” yaagasu. Kawoy zaaridi, “Ta aaye, oycha. Ta nena yeellayike” yaagis.
1KI 2:21 Iya, “Sunaama maccasiw Abiso ne ishay Adoniyaasi macho oothidi ekanaw koyiya gisho iyaw immarki” yaagasu.
1KI 2:22 Kawoy Solomoney zaaridi, “Sunaama maccasiw Abiso ne Adoniyaasi ayis oychay? I ta bayraa gidennee? Neeni iyaw kawotethi ayis oychikii? Qassi kahiniya Abyataarinne Xaruya na7ay Iyo7aabi iyara de7oosona gidokona?”
1KI 2:23 Kawoy Solomoney Godan caaqidi, “Adoniyaasi haysa oychida gisho taani iya wodhonna ixiko, Goday tana pirdo!
1KI 2:24 Tana, ta aawa Dawita araatan utisidi, ta kawotethaa minthi essidi, ta kochatas ba qaala polida Goday eriya mela, Adoniyaasi hachi hayqana!” yaagis.
1KI 2:25 Kawoy Solomoney Yoodahe na7a Banaya kiittin, I bidi Adoniyaasa shocidi wodhis.
1KI 2:26 Hessafe guye, kawoy Solomoney, kahiniya Abyataarako, “Neeni ne biitta Anatoota ba. Neeni hayqanaw bessaasa, shin ta nena wodhike. Neeni ta aawa Dawita sinthan Ubbaa Haariya Godaa Taabotiya tookadasa; qassi ta aawa metuwa ubbaa iyara ekadasa” yaagis.
1KI 2:27 Solomoney, Abyataari Godaa kahine gidida bessaafe diggidi, Goday Seelon Eele soo asaas odida qaala polis.
1KI 2:28 Abeseloome ixidi, Adoniyaasa maaddida Iyo7aaba ha oday gakin, baqatidi Godaa Dunkaaniyako bidi, yarsho bessa kaceta oykis.
1KI 2:29 Iyo7aabi baqatidi Godaa Dunkaaniyako bidi, yarsho bessa matan de7eysa kawa Solomoney si7ida wode, Yoodahe na7aa Banaya, “Bada iya wodha” gidi kiittis.
1KI 2:30 Banayi Godaa Dunkaaniya giddo gelidi Iyo7aabako, “Kawoy nena ha bessaafe keya gees” yaagis. Shin I zaaridi, “Keyike! Ta haysan hayqana” yaagis. Banayi, bidi Iyo7aabi gidaysa kawas odis.
1KI 2:31 Kawoy, “I gidaysada iya ootha; iya wodhada mooga! Iyo7aabi xillo asaa suuthu gussida daafape tananne ta aawa soo asaa geeshshaasa.
1KI 2:32 I gussida suuthaa acuwa Goday iyaw qanxana. I, ta aawa Dawiti eronnashin, baape xillo gidida nam7u asata mashshan wodhis. Isra7eele toora moconay, Neera na7ay Abeneerinne Yihuda toora moconay Yetera na7ay Amaasi, suure asi shin wodhis.
1KI 2:33 Iyo7aabi ha asata wodhida gisho, enta suuthaa acoy merinaw Iyo7aaba bollanne iya kochaa bolla wodho. Dawita bollanne iya soo asaa bolla, iya kochaa bollanne iya araata bolla merinaw Godaa saroy gido” yaagis.
1KI 2:34 Hessa gisho, Yoodahe na7ay Banayi keyidi, Iyo7aaba shocidi wodhin, I mela biittan de7iya ba gaden moogetis.
1KI 2:35 Kawoy Yoodahe na7aa Banaya Iyo7aaba bessan toora mocona oothidi shuumis; qassi Abyataara bessan kahiniya Saadoqa shuumis.
1KI 2:36 Hessafe guye, Kawoy Solomoney Saama xeegidi, “New Yerusalaamen keethe keexada, yan de7a; hara soo awuka boopa.
1KI 2:37 Ne katamaape keyada, Qediroona Zangaara pinnida gallas hayqanaysa era. Ne suuthaa gomey nena oykana” yaagis.
1KI 2:38 Saamii zaaridi, “Neeni geysi lo77o; taani ne aylley ne ta goday kawoy gidaysada oothana” yaagis. Saamii Yerusalaamen daro wode de7is.
1KI 2:39 Shin heedzu laythafe guye, Saami aylletape nam7ati Ma7ika na7aa, Gaate kawa Ankusako bidi, “Ne aylleti Gaaten de7oosona” gidi Saamas odidosona.
1KI 2:40 I ba hariya kooridi, ba aylleta koyanaw Ankusako Gaate bidi, yaape ba aylleta zaaridi ehis.
1KI 2:41 Saamii Yerusalaamepe Gaate bidi simmiidaysa Solomoney si7ida wode,
1KI 2:42 Saama xeegidi, “Neeni Yerusalaamepe hara soo bida wode hayqanaysa era” gada ta nena Godan caaqisabikina? He wode neeni, “Ne geysi lo77o; ero, ta kiitetana” gadasa.
1KI 2:43 Yaatin, “Godan caaqida caaquwanne ta kiitaa ayis naagabikii?
1KI 2:44 Ta aawa Dawita bolla ne oothida iita ooso ubbaa ne wozanay erees. Ne oothida iita oosuwa Goday new zaarana.
1KI 2:45 Shin Kawoy Solomoney anjetana; Dawita araatay Godaa sinthan merinaw saro daana” yaagis.
1KI 2:46 Kawoy, Yoodahe na7aa Banaya kiittin, I bidi, Saami shocidi wodhis. Yaatin, kawotethay Solomone kushen minnidi attis.
1KI 3:1 Solomoney Gibxe kawara bollotidi, iya na7iw baw macho ekis. Ba kawo gadho, Xoossa keethaanne Yerusalaame yuushuwa dirsa gimbidi ongana gakanaw iyo Dawita Kataman wothis.
1KI 3:2 Godaa sunthan Xoossa keethay buroo keexetiboonna gisho asay he wode dhoqa goyinno bessan yarshishe gam7is.
1KI 3:3 Solomoney Godaa dosiya ba aawa Dawita wogan hemetis. Shin dhoqa goyinno bessan yarshishenne ixaane cuyisishe gam7is.
1KI 3:4 Kawoy yarsho yarshanaw Gaba7oona bis; he bessay hara ubbaafe aadhidi koshshiya dhoqa goyinno bessi. Solomoney mukulu mehe ehidi, he yarsho bessan xuussa yarsho yarshis.
1KI 3:5 Goday Solomones Gaba7oonan qamma amuhon qoncidi, “Ta new ay immana mela koyay?” yaagis.
1KI 3:6 Solomoney, “Ne aylley, ta aaway Dawiti new ammanetida, xillonne suure asi gidida gisho, neeni iya dosadasa. Neeni ha keehatethan, hachi iya araatan uttiya adde na7aa iyaw immadasa.
1KI 3:7 “Abeeti Godaw, ta Xoossaw, neeni tana ne aylliya, ta aawa Dawita bessan kawothadasa. Shin taani guutha na7a gidiya gisho, asaa waatada kaalethaneeko erike.
1KI 3:8 Taani, ne aylley ne doorida asaa giddoninne tayboy bayna asaa giddon de7ayis.
1KI 3:9 Hessa gisho, taani ne asaa aysanaw lo77onne iita shaakada erana mela taw ne aylliyas akeeka wozana imma. Hessi hanonna ixiko, ha ne gita asaa ooni kaalethanaw danda7ii?” yaagis.
1KI 3:10 Solomoney hessa oychida gisho, Goday ufaytis.
1KI 3:11 Xoossay iyako, “Neeni new laythi aduqana mela woyko dure gidanaw woyko ne morketi hayqana mela oychonashin, ha asaa suure pirdan aysiya cincatethi oychida gisho,
1KI 3:12 Heko, ne oychidaysa ta new immana. Haysafe kase ne meli baynaysada hizape guye ne mali dendonnaada cincatethinne akeeka wozana new immana.
1KI 3:13 Qassi ne oychonabaaka ta new immana; neeni de7ida laytha ubban hara kawoy demmonna duretethaanne bonchuwa ta new immana.
1KI 3:14 Ne aaway Dawiti hemetidaysada ta ogiyan ne hemetiko, ta woganne ta kiitaa naagiko, ta ne laytha adussana” yaagis.
1KI 3:15 Solomoney dhiskofe barkidi, Heko, Xoossay iyaw amuhon odidaysa akeekis. I, Yerusalaame simmidi, Godaa caaqo taabotiya sinthan eqidi, xuussa yarshonne issifetetha yarsho yarshis. Yaatidi, ba moorinnatas gibira giigisis.
1KI 3:16 Issi gallas nam7u layma maccasati kawa Solomoneko yidi, iya sinthan eqidosona.
1KI 3:17 Entafe issinniya, “Ta godaw, taaninne ha asiya issi keethan de7oos. Yan iya taara issife de7ishin, ta issi na7a yelas.
1KI 3:18 Ta na7ay yeletida heedzantho gallas ha maccasiyaka issi na7a yelasu. He keethan nuupe, nam7aafe hara asi oonika baawa.
1KI 3:19 “Issi qamma iya bana na7aa bolla zin7ida gisho, ha maccase na7ay hayqis.
1KI 3:20 Iya qamma dendada, taani, ne aylliya dhiskidashin, ta na7aa ta miyepe ekada, ba ki7on wothada, ba hayqida na7aa ta ki7on wothasu.
1KI 3:21 Wonta taani ta na7aa dhanthanaw dendiya wode, Heko hayqis. Shin taani wonta poo7on tishshi oothada xeelliya wode, Heko, ta na7aa gidenna” yaagasu.
1KI 3:22 Hanko maccasiya, “Akay, paxa de7eysi ta na7aa; hayqidaysi ne na7aa” yaagasu. Shin koyro maccasiya zaarada, “Akay, hayqidaysi ne na7aa; paxa de7eysi ta na7aa” yaagasu. Hessada gidi enti kawa sinthan palamidosona.
1KI 3:23 Kawoy Solomoney, “Ha maccasiya, ‘Paxa de7iya na7ay taysa; hayqidaysi neysa’ yaagawusu; hankiyaka, ‘Akay, ne na7ay hayqidaysa; ta na7ay paxa de7eysa’ yaagawusu” yaagis.
1KI 3:24 Kawoy, “Taw mashsha ekidi yiite” yaagin, enti iyaw mashsha ehidosona.
1KI 3:25 Kawoy, “Paxa de7iya na7aa nam7u kessidi qanxidi; issi baggaa hannis immite; issi baggaa hinnis immite” yaagis.
1KI 3:26 Paxa de7iya na7ay ibaa gidida maccasiya ba na7aas mishetada, “Ta godaw, paxa de7iya na7aa iw imma! iya wodhopa” yaagasu. Shin hankiya, “Tawka newuka gidopo; nam7u keyidi qanxeto” yaagasu.
1KI 3:27 Kawoy, “Na7aa wodhopite; ha paxa de7iya na7aa ha koyro maccasees immite; na7aa aayiya iyo” yaagidi pirdis.
1KI 3:28 Isra7eele asa ubbay kawoy pirdida pirdaa si7ida wode, enti kawa daro bonchidosona. Asaas xillotethan pirdanaw iyaw cincatethi Xoossafe imetidaysa be7idosona.
1KI 4:1 Kawoy Solomoney Isra7eele biitta ubbaa bolla kawotis.
1KI 4:2 I shuumida asay haysafe kaallidi xaafetidaysata; Saadoqa na7ay Azaariyasi kahine;
1KI 4:3 Shiisha nayti Elihorefinne Akiyi waanna xaafeta; Ahiluda na7ay Iyosaafexi taarike xaafe;
1KI 4:4 Yoodahe na7ay Banayi toora mocona; Saadoqinne Abyataari kahineta.
1KI 4:5 Naatana na7ay Azaariyasi deriya ayseysata halaqa; Naatana na7ay kahiney, Zabuudi kawa zoreysa;
1KI 4:6 Ahisaari kawo gadho halaqa; Abda na7ay Adonraami madda ootheyisata halaqa.
1KI 4:7 Qassi Solomones Isra7eele biittan tammanne nam7u dere aysiya halaqati de7oosona; enti kawasinne kawa son de7iya asa ubbaas miya katha eheyisata. Entafe issoy issoy laytha giddon issi issi ageena kathi ehees.
1KI 4:8 Enta sunthay haysafe kaallidi xaafetis. Benihuuri derey dariya Efreema biitta ayseysa.
1KI 4:9 Banxeqaari Maqaxa, Sha7albima, Beet-Sameesanne Elon-Beet-Hana katamata ayseysata.
1KI 4:10 Benihesedi Aruboota biitta ayseysa; Sooko biittaynne Hefeera biittay ubbay iyabaa.
1KI 4:11 Ben-Aminadaabi, Benafoota Doora biitta ayseysa; I Solomone na7iw Xaafato ekis.
1KI 4:12 Ahiluda na7ay Ba7ana, Tanakanne Magido katamata, Izira7eelepe garsan Xartaana matan de7iya Beet-Saana biitta ubbaa, Beet-Saanape bidi Abeel-Maholara kanthidi, Yoqima7aama pinthi gakanaw de7iya katamata aysees.
1KI 4:13 Bengibeeri Galadan Raamota katama, Galadan Minaase na7aa Ya7ira katamata, Baasanen Argoba biittanne yuushon gimbeynne gimbe pengetas naase birata liyooti de7iya usupun tammu katamata aysees.
1KI 4:14 Ido na7ay Ahinadaabi Mahanayma biitta aysees.
1KI 4:15 Akmaasi Niftaaleme biitta aysees; I Solomone na7iw Basmaato ekis.
1KI 4:16 Kuusa na7ay Ba7aani Aseera biittanne Baalota katamaa aysees.
1KI 4:17 Paruha na7ay Iyosaafexi Yisakoora biitta aysees.
1KI 4:18 Ela na7ay Saami Biniyaame biitta aysees.
1KI 4:19 Ure na7ay Gabeeri, Galada biittan Amoore kawoy Sihooninne Baasane kawoy Oogey kawotida biitta aysees; he biittata aysey iya xalaala.
1KI 4:20 Yihuda asaynne Isra7eele asay abba gaxan de7iya shafeda daridosona; enti mishenne uyishe ufaytidi de7idosona.
1KI 4:21 Solomoney Efraxiisa Shaafape doomidi Filisxeeme biitta gakanaw, yaape kanthidi Gibxe zawa gakanaw de7iya kawotethata ubbaa haaris. He biitta asati iyaw giira giiridosona; iya de7o laytha ubban iyaw haaretidosona.
1KI 4:22 Solomones gallas gallas shiiqiya kathi; ishatamu kuntaale lo77o dhiille, xeetu kuntaale coo dhiille,
1KI 4:23 dhiiketida tammu sangata, yedan mida laatamu mehenne xeetu dorsata; qassi cofoshota, gaarata, gen7etanne orde kuttota koshshees.
1KI 4:24 Solomoney Efraxiisa Shaafape doloha baggara de7iya kawotethata ubbaa Tifisa katamaape doomidi Gaaza katamaa gakanaw haaris; ba yuushuwan de7iya biitta ubbaara saro de7is.
1KI 4:25 Iya de7o laytha ubban Yihuda asaynne Isra7eele asay Daanepe Barsaabe gakanaw, ubbay ba woyne garsaninne balase garsan saro de7idosona.
1KI 4:26 Solomones ola para gaareta goochiya oytamu mukulu gaaxata paratinne tammanne nam7u mukulu para asati de7oosona.
1KI 4:27 He deriya ayseysati ageenan ageenan kawoy Solomoneynne iya gibira maanaw yida asa ubbay miyaba shiishosona. Enti iyape aybaka pacisokona.
1KI 4:28 Enti gaare paratinne hanko parati maanaw banganne peedhen enta gakida dalaa ehidi iya minja keethan wothidosona.
1KI 4:29 Xoossay Solomones cincatethi, akeekanne dalga wozana immis.
1KI 4:30 Solomone cincatethay doloha baggara de7iya asaa cincatethaafenne Gibxeta cincatethaafe aadhees.
1KI 4:31 I asa ubbaafe aadhiya cinca; iya cincatethay, Ezirahe addiya Etaanape, Mahoola nayta Hemaanape, Kalkolapenne Darda7ape aadhees. Iya sunthay yuushuwan de7iya kawotethata ubbaa gakis.
1KI 4:32 I heedzu mukulu leemisota odis; iya mazmureti issi mukulunne ichasha.
1KI 4:33 Solomoney Libaanose zigape doomidi, gimbe keetha bolla doliya hisoophe mithaa gakanaw leemisidi odis. Hessadaka, mehetaba, do7ataba, kafotaba, sa7ara gooshetiya medhetethataba molotaba tamaarsis.
1KI 4:34 Iya cincatethaa si7ida sa7an de7iya kawoti ubbay kiittin, kawotetha ubbaafe asay Solomone cincatethaa si7anaw yoosona.
1KI 5:1 Xiroosa kawoy Kiraami Dawitara sigan gam7ida gisho, Solomoney ba aawa Dawita bessan kawotanaw tiyetidaysa si7idi, ase Solomoneko kiittis.
1KI 5:2 Solomoney zaaridi,
1KI 5:3 “Goday iya morketa iya tohuwape garsan haarisana gakanaw, ta aawa Dawita bolla dendida olaa gaason, Godaa ba Xoossaa sunthaas Xoossa keethi keexiboonnaysa ne eraasa.
1KI 5:4 Shin ha77i Goday ta Xoossay taw shempo immis; taw ayba morkey woyko iitabaa oothey baawa.
1KI 5:5 Goday ta aawa Dawitas, ‘Taani ne bessan, ne araatan kawothiya ne na7ay ta sunthaas keethe keexana’ gidaysada taani Godaa ta Xoossa sunthaas keethi keexanaw halchas.
1KI 5:6 Hessa gisho, Libaanosepe ziga massiya asata yedda; ta asati ne asatara oothana. Ne asatas ne qanxa gidaba ta qanxana. Sidoona asatada mithaa masetha hiilla nu asay eronnaysa ne eraasa” yaagis.
1KI 5:7 Kiraami Solomone kiitaa si7idi daro ufaytis; “Ha gita kawotethaa haarana mela Dawitas ha cinca na7aa immida Goday galatetto” yaagis.
1KI 5:8 Hessafe guye Kiraami Solomoneko haysada yaagidi kiittis; “Ne kiitida kiitay tana gakis. Neeni koydaba taani oothana; ziganne xiidda ta new shiishana.
1KI 5:9 Ta asay duruma ciinetha Libaanosepe abbaako gaazana. Taani qashisada, abba bollara tooketidi ne koyiya bessi gathanaada oothana; yan enti birshidi ne asaas immana. Hessafe guye, neeni ne baggara ta kawo keethan de7iya asaas miyaba kiittada ta amuwa polana” yaagis.
1KI 5:10 Hessada oothidi Kiraami Solomoney koyida keena ziganne Xiidda immis.
1KI 5:11 Solomoney kawo keethan de7iya asay maana mela 20,000 kuntaale gistenne 400,000 litiro shamaho zayte laythan laythan paconna Kiraamas immis.
1KI 5:12 Goday Solomones immana gidaysada, iyaw cincatethi immis. Kiraaminne Solomoney banta giddon saro de7idosona; enti nam7ay banta giddon caaqidosona.
1KI 5:13 Kawoy Solomoney Isra7eele 30,000 madda ootheyisata dooridi kessis.
1KI 5:14 Adonraama geetetiya addiya enta bolla halaqa oothidi shuumis. He oosanchota tammu tammu mukulan shaakidi, heedzu cuga kessis; issi issi cugay taran taran bidi, issi ageena Libaanosen oothanaadanne nam7u ageena banta son daanada oothis.
1KI 5:15 Solomones tooho tookiya 70,000 asatinne shuchu qoo7iya 80,000 asati gezze biittan de7oosona.
1KI 5:16 Enta bolla halaqa gididi oosisiya 3,300 asata shuumis.
1KI 5:17 Kawa Solomone kiitan, Xoossa keethaa baasuwas gidana mela gita shuchata qoo7idi giigisidosona.
1KI 5:18 Solomone asaynne Kiraama asay kushe hiilla ereysati, Gebaala asaara gididi, Xoossa keethaa keexanaw mithi qanxidi, shuchaa qoo7idinne massidi giigisidosona.
1KI 6:1 Isra7eele asay Gibxe biittafe keyida 480 laythan, Solomoney Isra7eele bolla kawotida oyddantho laythan, Ziifa geetetiya nam7antho ageenan, Solomoney Godaa Xoossaa keethi keexanaw doomis.
1KI 6:2 Solomoney keexida Xoossa keethay adussatethay usupun tammu wadha; gompay laatamu wadha; geesay hastamu wadha.
1KI 6:3 Xoossa keethi geliya bessan de7iya barandaa gompay Xoossaa keethaa gompaa mela laatamu wadha; keetha adussatethay Xoossa keetha geliya bessa gakanaw tammu wadha.
1KI 6:4 Xoossa keethaas soo baggara dalga, kare baggara xuuntha maskooteti de7oosona.
1KI 6:5 Xoossa keethaa matan, Geeshsha Bessaanne Ubbaafa Geeshsha Bessaa yuushuwan hara pooqe keexis; he yuushuwan kifileta keexis.
1KI 6:6 Koyro pooqiya gompay ichashu wadha; nam7antho pooqiya gompay usupun wadha; heedzantho pooqiya gompay laapun wadha. Issi issi pooqiya goday garsa baggara de7iya godaape lee7o. Geeshsha bessaa kanthidi gelonna mela xoossa keethaa godaas kare baggara teqe wothis.
1KI 6:7 Xoossa keethay shucha qoo7iya bessan masetida shucha xalaalan gimbetis; Xoossa keethay gimbetiya wode naariqa, kalta, woyko hara ay birata girsi Xoossa keethan si7etibeenna.
1KI 6:8 Garsara de7iya pooqiya geliya pengey Xoossa keethaafe dugeha baggara de7ees; he bessaafe nam7antho pooqiyanne heedzantho pooqiya baanaw yedhidi keyiya dethati de7oosona.
1KI 6:9 Hessada oothidi, Solomoney keetha keexidi wursis; kornisiya masetida ziga mithan kammis.
1KI 6:10 Xoossa keetha yuushuwan pooqeta keexidi ongis; enta issuwa issuwa geesay ichashu wadha gididi, godaara ziga mithan oyketis.
1KI 6:11 Goday Solomoneko,
1KI 6:12 “Ha neeni keexiya Xoossa keethan, neeni ta awaajuwa kaalliko, ta wogaa oothiko, ta kiita naagikonne ta kiitaa kiitetiko, taani ne aawa Dawitas immida ufaysa qaala ne baggara polana.
1KI 6:13 Taani Isra7eele asaa giddon daana; taani ta asaa Isra7eele aggike” yaagis.
1KI 6:14 Solomoney Xoossa keetha keexidi ongis.
1KI 6:15 Xoossaa keetha gaatha bagga godaa, wuygepe bidi kaara gakanaw masetida ziga mithan kammis; wuygiyan masetida xiidda mithi hiixis.
1KI 6:16 Xoossa keetha giddon Ubbaafe Geeshsha Bessaa medhanaw guye baggara laatamu wadha gidiya besse shaakidi, wuygepe kaara gakanaw masetida ziga godaa essis.
1KI 6:17 He Ubbaafe Geeshsha Bessaafe sintha baggara de7iya wuygiya adussatethay oytamu wadha.
1KI 6:18 Xoossa keetha soo baggay gosenne ciishsha misiliya medhida masetida ziga mithan kametis; ubbay zigape oosetis; ay shuchika bentenna.
1KI 6:19 Solomoney Godaa caaqo taabotiya wothanaw Xoossa keetha giddon Ubbaafe Geeshsha Bessaa giigisis.
1KI 6:20 Ubbaafe Geeshsha bessay laatamu wadha adusse, laatamu wadha dalganne laatamu wadha dhoqa. Solomoney he Ubbaafe Geshsha bessaa gaatha baggaa walahi bayna worqen lanxis; yarsho bessay masetida ziga mithan kametis.
1KI 6:21 Solomoney Xoossa keetha gidduwa walahi bayna worqen lanxis; worqan lanxetida qol7a geliya pengiya bolla yaanne haanne gakiya worqa santhalaata tolidi alleeqisis.
1KI 6:22 Keetha giddo baggaa worqan lanxis; Ubbaafe Geeshsha Bessaa sinthan de7iya yarsho bessa worqan lanxis.
1KI 6:23 Ubbaafe Geeshsha bessan wothanaw issoy issoy tammu wadha aduqiya shamahope oosetida nam7u kiruube misileta massidi giigisis.
1KI 6:24 Koyro kiruubiya qefey, issoy ichashu wadha; nam7anthoy ichashu wadha; koyro qefiya xeerape bidi nam7antho qefiya xeera gakanaw tammu wadha.
1KI 6:25 Nam7antho kiruubey tammu wadha; nam7u kiruubeta hanotaynne medhoy issi mela.
1KI 6:26 Issi kiruubiya geesay tammu wadha; nam7antho kiruubiya geesay hessa mela.
1KI 6:27 Solomoney Xoossa keethan de7iya Ubbaafe Geeshsha bessan kiruubeta wothis. Enta qefey micetidi uttis; issi kiruubiya qefey issi bagga godaa bochiya wode, hanko kiruubiya qefey hanko bagga godaa bochees; enta nam7aa qefey soo giddon issoy issuwa bochoosona.
1KI 6:28 Solomoney kiruubeta worqan lanxis.
1KI 6:29 Qol7anne wuyge godaa ubbaa kiruubeta, zambanne ciishsha misilen alleeqisis.
1KI 6:30 Xoossa keetha giddo kifiliya wuygiya kare bagga kifiliya wuygiya worqan lanxis.
1KI 6:31 Ubbaafe Geeshsha bessa geliya pengiyan shamaho mithafe sanqa giigisis. Penge gobanetas ichashu baggara maazaney de7ees.
1KI 6:32 Shamaho mithafe oosetida nam7u sanqata bolla kiruubeta, zambanne ciishsha misile giigisidi sanqata, kiruubetanne zamba worqan lanxis.
1KI 6:33 Hessadaka, Xoossa keethaa geliya pengiya shamahope oosetida oyddu maazanera de7iya sanqa giigisis.
1KI 6:34 I he pengiya issi issi sanqay giddon dakotidi dooyetiya nam7u sanqata kessis.
1KI 6:35 Kiruubeta, zambanne ciishsha misileta enta bolla wothis; enta bolla worqa issi gina oothidi lanxis.
1KI 6:36 Soo baggara de7iya dabaaba gimbis; he gimbiya bolla masetida heedzu shuchu, issuwa issuwa bolla wothidi, issi masetida ziga enta bolla wothidi gimbis.
1KI 6:37 Xoossaa keethaa baasoy Solomoney kawotida oyddantho laythan, Ziifa geetetiya nam7antho ageenan baasetis.
1KI 6:38 Solomoney kawotida tammanne issintho laythan, Bula geetetiya hospuntho ageenan Xoossa keethay halchidaysa mela keexetidi wuris. Solomoney Xoossa keethaa laapun laythan keexidi wursis.
1KI 7:1 Solomoney ba gadhuwa tammanne heedzu laythan keexidi wursis.
1KI 7:2 “Libaanose Woraa Keethaa” geetetiya keethaa Solomoney keexis; he keetha adussatethay xeetu wadha; gompay ishatamu wadha; geesay hastamu wadha. Ziga tuuqeti oyddu maaran eqidosona; masetida ziga mithati enta bolla wodhidosona;
1KI 7:3 ziga mithati heedzu maaran, issi issi maaran tammanne ichashu mithati de7oosona; enti kumethi oytamanne ichasha.
1KI 7:4 He keethaas maskooteti heedzu maaran de7oosona; enti issoy issuwa sinthan de7oosona.
1KI 7:5 Pengetinne maskooteti oyddu maazanera de7oosona; maskooteti heedzu maaran gididi, issoy issuwa sinthan de7oosona.
1KI 7:6 Solomoney, “Tuuqey Kumida Keethi” geetetiya keethi keexis; he keetha adussatethay ishatamu wadha; gompay hastamu wadha. He keetha sinthan daro tuuqen zempidanne bollara kaaran kametida barandi de7ees.
1KI 7:7 Solomoney pirda araatay de7iya “Pirda Keethi” keexis; he keethay wuygepe bidi kaara gakanaw zigan kametidi uttis.
1KI 7:8 Pirda Keethaafe guye baggara de7iya hara dabaaban baw daanaw kawo gadho hanko keethatada oothidi keexis. Ba mache, Gibxe kawa na7ees, he keetha mela hara keethe keexis.
1KI 7:9 Ha keethati ubbay, karepe doomidi dirsaafe soora de7iya gita gutaraa gakanaw, baasuwape doomidi kaara gakanaw, likidi massidanne sooranne karera giigisida lo77o shuchan oosetidosona.
1KI 7:10 Gimbey hiixetiday tammu wadha woyko hospun wadha gidiya lo77o masetida gita shuchana.
1KI 7:11 Bolla baggara liketidi masetida lo77o shuchinne ziga mithi de7ees.
1KI 7:12 Gita dabaaba yuushuwan de7iya gimbey Xoossa keethadanne barandada masetida heedzu shuchu, issuwa issuwa bolla wothidi, issi masetida ziga enta bolla wothidi gimbis.
1KI 7:13 Kawoy Solomoney, Kiraama geetetiya addiya Xiroosape ehis.
1KI 7:14 Kiraama aayiya am7o; iya Niftaaleme koche. Iya aaway Xiroosa asi. Kiraami naase birata qoxiya hiilli de7iya ase; I naase birata qoxidi oothiyaban daro loohida asi; I Solomoneko yidi iya ooso ubbaa oothis.
1KI 7:15 Kiraami issuwa issuwa geesay tammanne hospun wadha aduqidi, yuushoy tammanne nam7u wadha dalgida nam7u tuussata naase birata seerisidi kessis. He tuussa ordetethay oyddu biradhe. Nam7antho tuuqeyka hessa mela.
1KI 7:16 Hessadaka, tuussata huuphen wothanaw nam7u gumbota naase birata sheeshidi, medhis; issi issi gumboy ichashu wadha aduqees.
1KI 7:17 Tuussaa huuphen de7iya issi issi gumbota giteda oothida laapun santhalaata oothis.
1KI 7:18 Tuussata xeeran de7iya gumbota alleeqisanaw nam7u maaran oromaane misile alleeqisis.
1KI 7:19 Barandan eqida tuussata bolla de7iya gumboti ciishsha medhon alleeqetidosona; enta geesay oyddu wadha.
1KI 7:20 Nam7u tuuqeta huuphen de7iya gumbotan gerto gididi uttida bessaafe bolla baggara, santhalaata gitiya kaallidi, nam7u xeetu oromaane misileti nam7u maaran yuuyi aadhidi de7oosona.
1KI 7:21 Kiraami he nam7u tuussata Xoossaa keethaa barandaa matan essis. Ushacha baggara eqida tuussaa Yakina gidi sunthis; haddirsa baggara eqida tuussaa Boo7eza gidi sunthis.
1KI 7:22 Tuussata huuphen de7iya gumboti ciishshe daanidi medhetidosona. Hessada hanidi tuussata oosoy poletis.
1KI 7:23 Kiraami Abba Saaniya geetetiya issi daro gita saaniya naase birata sheeshidi medhis. He Abba Saaniya doonay ha gaxape ya gaxa gakanaw tammu wadha; geesay ichashu wadha; yuushoy hastamu wadha.
1KI 7:24 Abba Saaniya doonan kare baggara ziqi gidi, iyara oyketidi medhetida gose misileti de7oosona; he goseta misileti nam7u maaran, issi issi wadhan tammay tammay yuuyi aadhidi shuuyetidosona.
1KI 7:25 Abba Saaney naase biratape medhetida tammanne nam7u boorata misileta zokuwan uttis. Boora misiletape heedzati pudeha bagga, heedzati doloha bagga, heedzati dugeha bagga, heedzati wuloha bagga simmidi xeelloosona. Abba Saaney enta bolla uttis.
1KI 7:26 Abba Saaney oyddu biradhe orde; iya doonay wanca doona mela; ciishshe daanees. Abba Saaney oytamanne ichashu mukulu litiro gidiya haathe oykees.
1KI 7:27 Kiraami tammu gaareta naase biratape medhis. He gaareti issoy issoy oyddu wadha adusse; oyddu wadha dalganne heedzu wadha dhoqa.
1KI 7:28 He gaareti haysada oosetidosona; pude eqida oyddu birata bolla piddi gida loche naase biratati oyketidi uttidosona.
1KI 7:29 He birata bolla gaammo, boorinne kiruube misileti de7oosona; gaammonne boora misiletape huupheranne tohora de7iya biratata bolla qoxidi medhida ciishsha encursa misileti de7oosona.
1KI 7:30 Issi issi gaariyas naase biratape oothida oyddu gertotinne gertota gathidi waaxiya naase birata kasoti de7oosona. Hessadaka, oyddu maazanen keriya zempisiyabati de7oosona. He zempisiyabati ciishsha encursa misiletan alleeqetidi uttidosona.
1KI 7:31 Gaariya zempisiya miisheta huuphen gertoti uttida dooya bessi de7ees; he dooyay gaariya xeerape pude issi wadha dhoqu gidi, duge takadho ziqi gidi medhetis. He dooya bessaa doona yuushoy misilen alleeqetis.
1KI 7:32 Gertota geesay issi wadhanne takadho; gertoti loche naase biratatas garsa baggara de7oosona. Gertoti oyketidi uttida kasoti gaariyara oyketidi uttidosona.
1KI 7:33 Gertoti ola para gaare gertota mela medhetidosona; gertota gathidi oykiya kasoti, macaratinne enta oykiya miisheti ubbay naase biratape oosetidosona.
1KI 7:34 He gaareta ubbaa maazanetas enta tohosoora tohosoora entara isso gididi oyketida naase biratape oosetida zempoti de7oosona.
1KI 7:35 Issi issi gaariya huuphe bagga yuushuwan takadho aduqiya kirkiroy de7ees; zempotinne loche naase biratati gaariyara oyketidi, isso gididi oosetidosona.
1KI 7:36 Ha zempotapenne loche naase biratatape giddon de7iya dooya bessa ubbay kiruuben, gaammoninne zamba misileten alleeqetidi uttidosona; enta yuushoy ciishsha encursa misilen alleeqetidi uttis.
1KI 7:37 Hiza tammu gaareti haysada oosetidosona; enta lanxida miishey issino gidiya gisho enta geesaynne enta medhoy issi mela.
1KI 7:38 Kiraami meecetiya tammu kereta naase biratape medhis; issi issi keriya gompay oyddu wadha dalga gididi, hospun xeetu litiro haathe oykees; tammu gaaretas huuphen huuphen issi issi meecetiya kerey de7ees.
1KI 7:39 Kiraami ichashu gaareta Xoossa keethaafe pudeha baggara, ichashu gaareta Xoossa keethaafe dugeha baggara wothis; naase biratape oosetida Abba Saaniya Xoossaa keethaafe dugeha doloha bagga zaaridi essis.
1KI 7:40 Kiraami qapheta, akaafatanne xaarota medhis; yaatidi kawa Solomones Xoossa keetha oosuwa oothidi polis.
1KI 7:41 I oothida oosoti, nam7u tuussata, tuussata huuphen de7iya saane daaniya nam7u gumbota, tuussata bolla de7iya nam7u gumbota alleeqisiya nam7u santhalaatata,
1KI 7:42 issi issi gumbuwa bolla nam7u maaran naase biratape oosetida issi issi xeetu oromaane misileta, kumthi oyddu xeetu oromaane misileta,
1KI 7:43 Tammu gaareta, gaareta bolla uttiya tammu meecha kereta,
1KI 7:44 Abbaanne iya katisiya tammanne nam7u boora misileta,
1KI 7:45 Kereta, akaafatanne xaarota. Kiraami kawa Solomones Xoossa keetha oosuwas medhida miisheta ubbaa qushetida naase biratape medhis.
1KI 7:46 Kawoy Solomoney Sukotapenne Xartaanape giddon, Yordaanose denban de7iya, naase birata sheeshiya bessan haysata oosisis.
1KI 7:47 Naase biratape oosetida miishey daro gidida gisho, Solomoney iya mazzanisibeenna; hessa gisho, ay mela deexiyako likey eretibeenna.
1KI 7:48 Solomoney Xoossa keethaa giddon de7iya miisheta ubbaa worqafe medhisis. Hessatika, worqafe oosetida yarsho bessa, Godaa sinthan wothiya uythay uttiya xarpheeza,
1KI 7:49 Ubbaafe Geeshsha Bessaafe sinthan ushacha baggaranne haddirsa baggara eqida ichashu ichashu xompe wothiya kocata, ciishshata, xompetanne qapheta,
1KI 7:50 xuu7ata, xompe toysiyabata, xaarota, ixaane cuyisiyabata, tama ekiya miisheta, Ubbaafe Geeshsha Bessaa qol7a pengetanne Xoossa keetha kare bagga pengeta oykida maxaafeta. Ha miisheti ubbay walahi bayna worqafe oosetidosona.
1KI 7:51 Kawoy Solomoney Xoossa keetha oosuwa ubbaa polidaape guye, iya aaway Dawiti Godaas dummayidi wothida bira, worqanne hara miisheta ubbaa ehidi, Xoossa keetha shalo minjiya keethan wothis.
1KI 8:1 Hessafe guye, kawoy Solomoney Godaa taabotiya Dawita katamaape, Xiyoonepe kessidi, Xoossa keethi ehanaw Isra7eele cimata, kochata halaqatanne Isra7eele soo asata kaaletheyisata Yerusalaame kataman shiishis.
1KI 8:2 Etaanima geetetiya laapuntha ageenan, Shaqara Ba7aaley bonchetiya wode Isra7eele asa ubbay kawa Solomoneko shiiqidosona.
1KI 8:3 Isra7eele cimati ubbay shiiqin, kahineti Taabotiya denthidosona.
1KI 8:4 Leewetinne kahineti, Godaa taabotiya, Dunkaaniyanne iya giddon de7iya geeshsha miisheta ubbaa tookidi ehidosona.
1KI 8:5 Kawoy Solomoneynne iyara de7iya Isra7eele asay Taabotiya sinthan shiiqidi, taybanaw danda7etonna daro dorsenne mehe yarshidosona.
1KI 8:6 Hessafe guye, kahineti Godaa caaqo taabotiya Xoossa keethan Ubbaafe Geeshsha bessa ehidi, kiruubeta qefetape garsa baggara wothidosona.
1KI 8:7 Micetidi uttida kiruubeta qefeti taabotiyanne taabotiya tookiya kasota kammidosona.
1KI 8:8 Kasoti daro adusse gidiya gisho enta xeeray Ubbaafe Geeshsha Bessa sinthan qoncen bentoosona. Shin Geeshsha bessaafe karera bentanaw danda7enna. Enti hachi gakanaw he bessan de7oosona.
1KI 8:9 Isra7eele asay Gibxe biittafe keyida wode Goday entara caaqida Koreeba zuman Musey wothida nam7u loche shuchata xalaalape attishin, Taabotiya giddon harabay aybika baawa.
1KI 8:10 Kahineti Xoossa keethafe keyida wode Xoossa keethay shaaran kumis.
1KI 8:11 He shaara gaason kahineti banta oosuwa oothanaw danda7ibookona; Godaa bonchoy Xoossa keetha kumis.
1KI 8:12 Hessafe guye, Solomoney, “Abeeti Godaw, neeni, ‘Taani dhuma shaaran daana’ yaagadasa.
1KI 8:13 Taani new boncho keethi, merinaw neeni yan daana bessi keexas” yaagis.
1KI 8:14 Isra7eele maabaray kumethi yan eqidashin, kawoy entako simmidi, haysada yaagidi entaw woossis.
1KI 8:15 “Goday Isra7eele Xoossay galatetto! Ta aawa Dawitas ba doonan odida ufaysa qaala ba kushen polis. I odida ufaysa qaalay,
1KI 8:16 ‘Taani ta asaa, Isra7eele Gibxefe kessida gallasape doomin, ta sunthay iyan daana mela keethe keexanaw Isra7eele kochata giddon issi katamaka doorabike. Shin ta asaa Isra7eele kaalethana mela taani Dawita dooras’ yaagis.
1KI 8:17 “Ta aaway Dawiti, Godaa Isra7eele Xoossaa sunthaas keethe keexanaw ba wozanan qopis.
1KI 8:18 Shin Goday, ta aawa Dawitako, ‘Neeni ta sunthaas keethe keexanaw ne wozanan qopida gisho lo77oba oothadasa.
1KI 8:19 Gidoshin, keethe keexanay nena gidaka; ta sunthaas keethe keexanay ne gulbatape yeletana ne na7aa’ yaagis.
1KI 8:20 “Goday gelida ba ufaysa qaala polis. Goday kase gelida ufaysa qaalada taani ta aawa Dawita bessan kawotas; Isra7eele kawotetha araatan uttas. Godaa Isra7eele Xoossaa sunthaas keethe keexas.
1KI 8:21 Goday nu aawata Gibxefe kessida wode entara caaqida caaqo taabotiya wothana bessi giigisas” yaagis.
1KI 8:22 Hessafe guye, Solomoney Godaa yarsho bessa sinthan, kumetha Isra7eele maabara giddon eqidi, ba kushiya miccidi,
1KI 8:23 haysada yaagidi woossis; “Abeeti Godaw, Isra7eele Xoossaw, bolla saluwan garsa sa7an ne mela xoossi baawa. Neeni ne caaquwa naagasa. Ba kumetha wozanan ne sinthan hemetiya ne aylleta ne merinaa siiquwan dosadasa.
1KI 8:24 Ne aylliyas, ta aawa Dawitas, neeni oothana gada gelida qaala naagadasa. Neeni kase ne doonan odidaysa hachi ne kushen poladasa.
1KI 8:25 “Ha77ika Godaw, Isra7eele Xoossaw, neeni ne aylliyas, ta aawa Dawitas, ‘Neeni ta sinthan hemetidaysada ne naytika ta sinthan hemetidi banta ogiya naagiko, ta sinthan Isra7eele kawotetha araatan uttiya asi neeni dhayaka’ yaagida qaala pola.
1KI 8:26 Abeeti Isra7eele Xoossaw, neeni ne aylliyas, ta aawa Dawitas gelida ne qaala ha77ika pola.
1KI 8:27 “Shin Xoossay tuma sa7an daaneyee? Heko, saloti, ubbaafe dhoqa saloyka nena oykanaw danda7enna. Yaatin, taani keexida keethay new ay mela guuxandesha!
1KI 8:28 Gidoshin, abeeti Godaw, ta Xoossaw, taani ne aylley hachi woossiya woosanne waasuwa si7a.
1KI 8:29 ‘Ta sunthay he bessan daana’ gida ha keethaa ne ayfey qammanne gallas xeello. Taani ne aylley ha bessaako simmada woossiya woosa si7a.
1KI 8:30 Taani ne aylleynne ne asay Isra7eeley, ha Xoossa keethaako simmidi, woossiya woosa si7a. Ne de7iya bessan salon si7ada nuus atto yaaga.
1KI 8:31 “Issi asi ba laggiya qohidi, qohabike gidi kaddin, iya caaqisanaw Xoossa keethi ehin, iya giddon de7iya yarsho bessa sinthan I caaqiko,
1KI 8:32 neeni salon si7ada ootha. Ne aylleta giddon pirda. Naaqida uraa bolla pirdada, I oothidaba iya bolla zaara; xilluwas pirdada iya xillotethaa qoncisa.
1KI 8:33 “Ne asay Isra7eeley ne bolla nagara oothida gisho banta morketan xoonetidi, neeko simmidi ne sunthaa xeegiko, ha keethan nena woossikonne neeko waassiko,
1KI 8:34 neeni salon si7a. Ne asaa Isra7eele nagaraa atto ga; yaatada neeni kase enta mayzatas immida biitta enta guye zaara.
1KI 8:35 “Ne asay ne bolla nagara oothida gisho saloy gordetin, iri bukonna ixin, enti ha bessaa simmidi, woossikonne neeni enta un7ethida gisho ne sunthaa xeegidi, banta nagaraape simmiko neeni salon si7a.
1KI 8:36 Ne aylleta, Isra7eele nagaraa atto ga. Enti hemetanaw bessiya lo77o ogiya enta tamaarsa; ne asaa laatisida biittan ira bukisa.
1KI 8:37 “Biitta bolla koshi woyko gadoy yaa wode, carkoy kathaa shocidi woyko harmey dhaysiya wode, booley woyko gumburoy biitta bolla yaa wode, morkey enta katamata teqiya wode, gadoynne hargey yaa wode,
1KI 8:38 ne asa Isra7eelepe oonika nena woossikonne neeko waassiko qassi ay asika ba wozanan un7etidi ha Xoossa keethaako simmidi ba kushiya micciko,
1KI 8:39 ne de7iya bessan salon si7a. Enta nagaraa atto ga; enta maadda. Neeni asa wozana ereysada asa ubbaas iya oosuwada oosuwada imma. Asa ubbaa wozana erey ne xalaala.
1KI 8:40 Yaaniko, neeni nu mayzatas immida biittan de7iya wode ubban enti new yayyana.
1KI 8:41 “Ne asaa Isra7eelepe gidonashin, allaga biitta asay, ne gita sunthaa gisho haaho biittafe yida asi de7iko,
1KI 8:42 ne gita sunthaa si7idi, haaho biittafe yidi, ha Xoossa keethaako simmidi nena woossiko,
1KI 8:43 neeni de7iya bessan salon si7a. Ne asati, Isra7eeleti ereysada sa7an de7iya asa ubbay ne sunthaa erana melanne new yayyana mela, taani keexida ha Xoossa keethay nena goyinniya bessi gideysa enti erana mela allaga biitta asay woossiyaba entaw pola.
1KI 8:44 “Ne asati banta morketa olana mela ne kiitida bessaa bidi, enti neeni doorida ha katamaakonne taani ne sunthaas keexida keethaako simmidi Godaa nena woossiko,
1KI 8:45 enta woosanne waasuwa salon si7ada entaw xoono imma.
1KI 8:46 “Nagara oothonna asi bayna gisho enti ne bolla nagara oothin, neeni enta hanqetada morketas aathada immin, morketi enta di77idi, haaho gidin mata bessi efikoka,
1KI 8:47 enti he di7etida biittan de7ishe, banta wozanan nagarape simmiko, he di7etida biittan de7ishe, ‘Nuuni nagara oothida; nuuni balida; nuuni iita hanida’ yaagidi neeko waassiko,
1KI 8:48 entana di77idi efida morketa biittan de7ishe, banta kumetha wozananinne banta kumetha qofan neeko simmiko, neeni enta mayzatas immida enta biittako, ne doorida katamaakonne taani ne sunthaas keexida keethaako simmidi, nena woossiko,
1KI 8:49 enta woosanne enta waasuwa ne de7iya bessan salon si7ada entaw pirda.
1KI 8:50 Ne asay ne bolla oothida nagaraanne qohida qohuwa atto ga; enta di77idi efida asati entaw qadhetana mela ootha.
1KI 8:51 Enti, birata seerisiya cooce tamada xuuggiya Gibxe biittafe neeni kessida ne asatanne ne buzo laatata.
1KI 8:52 “Taani ne aylleynne ne asay Isra7eeley woossiya woosa ne ayfey xeello. Enti waassiya wode awudeka neeni enta alla.
1KI 8:53 Abeeti Godaw, Xoossaw, neeni kase nu aawata Gibxefe kessiya wode ne aylliya Muse baggara odidaysada enta sa7an de7iya kawotethata ubbaa giddofe new buzo oothanaw dummayida dere” yaagidi woossis.
1KI 8:54 Solomoney woosa polidaape guye, ba kushiya miccidi yarsho bessa sinthan gulbatida bessaafe dendi eqis.
1KI 8:55 Isra7eele maabara ubbaa ba qaala dhoqu oothidi haysada yaagidi anjis;
1KI 8:56 “Ba gelida qaalada ba asa Isra7eele shempisida Goday galatetto; I ba aylliya Muse baggara immida lo77o ufaysa qaala ubbay poletis.
1KI 8:57 Goday nu Xoossay kase nu aawatara de7idaysada nuuraka de7o; I nuna kumethi aggenna; yeggenna.
1KI 8:58 Nuuni iya ogetan hemetana melanne I nu aawatas immida kiitaanne wogaa naagana mela nu wozanaa baako zaaro.
1KI 8:59 Gallas gallas nuus koshshiyaba immanaw Goday tana ba aylliyanne ba asaa Isra7eele maaddana mela, taani Godaa sinthan woossida woosati qammanne gallas Godaako, nu Xoossaako, shiiqo.
1KI 8:60 Hessan, sa7an de7iya asa ubbay Goday Xoosse gideysanne iyape attishin, hara xoossi baynaysa erana.
1KI 8:61 Hachi hinte oothidaysada hinte iya wogaada iyaw kiitetanaw hinte wozanay Godaas, nu Xoossaas ammaneteysa gido” yaagidi anjis.
1KI 8:62 Hessafe guye kawoynne Isra7eele asa ubbay issife Godaa sinthan yarsho yarshidosona.
1KI 8:63 Solomoney Godaas issifetetha yarsho yarshanaw 22,000 booratanne 120,000 dorsata shiishis. Hessada oothidi kawoynne Isra7eele asa ubbay Godaa keethaa anjisidosona.
1KI 8:64 Kawoy Solomoney Xoossa keetha sinthan de7iya dabaaba giddo kifiliya he gallas dummayis. He bessan xuussa yarsho, katha yarshonne issifetetha yarshuwafe modhuwa yarshis. I hessa oothiday Godaa sinthan de7iya naase biratape oosetida yarsho bessay xuussa yarsho, katha yarshonne issifetetha yarshuwafe modhuwa yarshanaw guuxida gishosa.
1KI 8:65 He wode Solomoneynne Isra7eele asa ubbay laapun gallas Shaqara Ba7aale bonchidosona; Isra7eele zawan Hamaata Pinuwape bidi Gibxe shaafa gakanaw de7iya daro asay Godaa sinthan ba7aale bonchanaw shiiqis.
1KI 8:66 Wontetha gallas kawoy asaa moyzis; asay kawa anjidi, Goday ba aylliya Dawitasinne ba asaa Isra7eeles oothida keehatethan wozanape ufaytishe ba soo ba soo bis.
1KI 9:1 Solomoney Xoossa keethaanne kawo gadho keexidi wursida wode ba wozanan oothanaw amotida ubbaa polidaape guye,
1KI 9:2 Gaba7oonan kase qoncidaysada Goday zaaridi iyaw qoncis.
1KI 9:3 Goday, “Neeni ta sinthan woossida woosaanne waasuwa taani si7as. Neeni keexida keethay merinaw ta sunthay iyan xeegetana mela oothada geeshshas. Ta ayfeynne ta wozanay ubba wode yan daana.
1KI 9:4 Shin neeni ne aaway Dawiti hemetidaysada borey bayna suuretethan ta sinthan hemetiko, ta kiita ubbaa oothikonne ta wogaanne ta higgiya naagiko,
1KI 9:5 taani ne aawa Dawitas, ‘Isra7eele kawotetha araatan uttiya asi neeni kumethi dhayaka’ ” gidaysada ne araata Isra7eele bolla merinaw minthada essana.
1KI 9:6 “Shin ne woyko ne nayti tana kaalo aggidi guye simmiko, taani hintena kiitida ta kiitaanne ta wogaa naagonna ixidi allaga xoossata goyinniko,
1KI 9:7 Isra7eele asaa taani kase entaw immida biittafe shoddana; taani ta sunthaas geeshshida ha keethaa aggana. Isra7eeleti asa ubbaa giddon kadhesinne miichas attana.
1KI 9:8 Ha malaalsiya Xoossa keethay laaletidi laaletha doore gidana. Matara aadhiya asa ubbay dagammidi, ‘Goday ha biittanne ha Xoossa keethaa ayis haysada oothidee?’ yaagana.
1KI 9:9 Asay zaaridi, ‘Enta mayzata Gibxefe kessida, Godaa banta Xoossaa enti aggidi, allaga xoossata kaallida gishonne enta goyinnida gisho Goday enta bolla ha iitabaa ubbaa ehis’ ” yaagidi zaarana.
1KI 9:10 Solomoney ha nam7u keethata, Xoossa keethaanne ba kawo gadho keexida laatamantho laytha wursethan,
1KI 9:11 Xiroosa kawoy Kiraami xiidda, ziganne worqa ubbaa immida gisho, Galilan de7iya laatamu katamata Solomoney iyaw immis.
1KI 9:12 Shin Kiraami Xiroosape keyidi, Solomoney iyaw immida katamata be7anaw bida wode katamati iya ufaysibookona.
1KI 9:13 Kiraami Solomoneko, “Ta ishaw, haysati ne taw immida katamati ayba katamee?” yaagis. Hessa gisho, I he katamata, “Pathonna biitta” yaagidi sunthis. He heeray hachi gakanaw he sunthan xeegetees.
1KI 9:14 Kiraami 4,000 kilo giraame worqaa kawa Solomones kase yeddis.
1KI 9:15 Xoossa keethaa, kawo gadho, Miilo, Yerusalaame katama gimbiya, Haxoora, Magidonne Gezera gimbanaw kawa Solomones oosanchoti de7oosona.
1KI 9:16 Gibxe kawoy kase Gezera oykidi taman xuuggis. Kataman de7iya Kanaane asata wodhis; Solomoney ekida ba na7iw woyto oothidi immis.
1KI 9:17 Solomoney Gezeranne garsa Beet-Harona zaaridi keexis.
1KI 9:18 Ba7ilaata, Yihuda mela de7iya Tamaara,
1KI 9:19 buqura minjiya katamata ubbaa, ba paratanne para gaareta naagiya katamata, Yerusalaamen, Libaanoseninne I haariya biitta ubban keexanaw koyida ubbaa keexis.
1KI 9:20 Amooretape, Hitetape, Parzetape, Hiwetapenne Yaabusetape attida asati ubbay Isra7eele ase gidokona.
1KI 9:21 Enti Isra7eele asay biittafe wursidi dhaysanaw danda7onna ixin he biittan attida asaa kochata. Solomoney enta aylle oothin, enti hachi gakanaw aylletethan oothosona.
1KI 9:22 Shin Solomoney Isra7eele asaape oonaka aylle oothibeenna. Enti iyaw moorinnata, olanchota, toora mocona, para gaare laagiya asaas halaqanne para asi gididi oothidosona.
1KI 9:23 Enti Solomoney oosisiya keethaa keexeyisata halaqata; enti ichashu xeetanne ishatama.
1KI 9:24 Gibxe kawa na7iya Dawita katamaape Solomoney iw keexisida keetha yidaape guye, I Miilo katamaa gimbis.
1KI 9:25 Solomoney Godaas gimbida yarsho bessan xuussanne issifetetha yarsho laythan heedzu toho yarshees. Godaa sinthan ixaane cuyisees; hessan Xoossa keethay poletis.
1KI 9:26 Hessafe guye, kawoy Solomoney Edoome biittan Zo7o Abbaa gaxan, Eloota matan de7iya Exiyoon-Gabiran markabeta oothis.
1KI 9:27 Kawoy Kiraami Solomone asaara oothana mela markabe laagon loohida ba asata kiittis.
1KI 9:28 Enti Ofira biitta bidi 14,000 kilo giraame worqaa kawa Solomones ekidi yidosona.
1KI 10:1 Saaba kawiya Goday Solomones qoncisida malaalsiya cincatetha woriya si7ada, deexo oyshata ekada iya paacanaw basu.
1KI 10:2 Sawuwa, daro worqanne al7o shuchu caanida daro gimale cugara daro ajaban Yerusalaame gakada Solomone sinthe shiiqasu. Ba wozanan de7iya ubbaa Solomone oychasu.
1KI 10:3 Solomoney iya oychidaba ubbaa zaaris; iw birshonnashin, iyape geemmidi attidabay aybika baawa.
1KI 10:4 Saaba kawiya Solomone cincatetha, I keexida kawo gadhuwa,
1KI 10:5 iya gaytan shiiqiya kathaa, iya moorinnati uttiya utethaa, iya aylleti oothiya oosuwa, enti ma7iya ma7uwa, eessi duuqeysatanne Xoossa keethan shiishiya xuussa yarshuwa be7ida wode I wozanay daro malaaletis.
1KI 10:6 Iya, kawa Solomoneko, “Nebaanne ne cincathaba taani ta biittan de7ashe si7idaysi tuma.
1KI 10:7 Shin taani yada, ta ayfen be7ana gakanaw enti taw odidaba ammanabike. Heko, asay taw odidaysi bagga gakenna; ne cincatethaynne ne duretethay taani si7idaysafe daro aadhees.
1KI 10:8 Ubba wode ne sinthan eqidi, ne cincatetha si7iya ne asatinne ne moorinnati ay mela qaadara de7iya ase!
1KI 10:9 Nenan ufaytidi, nena Isra7eele kawotetha araatan utisida Goday ne Xoossay galatetto! Goday Isra7eele asa merinaw siiqida gisho neeni suure pirdanne xillotethi oothana mela I nena kawothis” yaagasu.
1KI 10:10 Saaba kawiya 4,000 kilo giraame worqa, daro sawonne al7o shuchu kawa Solomones immasu. Saaba kawiya kawa Solomones immidaysa mela daro sawo hessafe simmin oonika ehibeenna.
1KI 10:11 (Kawa Kiraama markabeti, Ofirape worqa ehidaysati yaape daro sandale mithinne al7o shuchu ehidosona.
1KI 10:12 Kawoy Solomoney he sandalepe Xoossa keethaanne kawo gadho tuuqeta, zammaaretas diithinne maasinqo oosisis. Hessa mela sandaley he wodepe simmin yidi erenna; benti erenna.)
1KI 10:13 Kawoy Solomoney immanaw bessiya imotatape haraa, Saaba kawiya amottada iya oychidaba ubbaa iw immis. Hessafe guye, Saaba kawiya ba ajabara dendada ba biitta simmasu.
1KI 10:14 Solomoney laythan laythan ekiya worqay 23,000 kilo giraame.
1KI 10:15 Hessi zal7anchotape ekiya qaraxa, Arabe kawotapenne Isra7eele biittan haareysatape ekiya giira gujenna.
1KI 10:16 Solomoney nam7u xeetu gita gondalleta worqafe qoxidi oosisis. Issi issi gondalliyan usupun kilo giraame gidiya worqey gelis.
1KI 10:17 Qassi heedzu xeetu guutha gondalleta worqafe qoxidi oosisis. Issi issi guutha gondalliyan nam7u kilo giraame gidiya worqey gelis. Kawoy he gondalleta “Libaanose Woraa” geetetiya ba kawo gadhon wothis.
1KI 10:18 Qassi kawoy issi gita araata dangarsa zaalepe oosisidi geeshsha worqan lanxisis.
1KI 10:19 Araatay de7iya bessa pude keyanaw yedhiya usupun dethati de7oosona. He araatas guye baggara huuphiya bolla gertoy de7ees. Araatas nam7u baggara qese zempisiya bessati de7oosona; he nam7u bessata miyen eqida issi issi gaammo misiley de7ees.
1KI 10:20 He araata bolla keyiya usupun dethatas ya baggaranne ha baggara issi issi gaammo misiley, kumethi tammanne nam7u misileti de7oosona. Hessa mela araati hara kawotethan awunka oosetibeenna.
1KI 10:21 Kawoy Solomoney ushshu uyaa miishe ubbay worqafe oosetis; “Libaanose Wora” geetetiya kawo gadhon de7iya miishe ubbay walahi bayna worqafe oosetis. Solomone wode biras go77i bayna gisho birape oosetidabay baawa.
1KI 10:22 Kawa Kiraama markabetara zal7iya gita markabeti abban de7oosona. He markabeti worqa, bira, dangarsa zaale, geleshsho, qaarenne ayyaana kafo caanidi heedzu laythafe issi toho simmoosona.
1KI 10:23 Kawoy Solomoney duretethaninne cincatethan sa7an de7iya kawota ubbaafe aadhees.
1KI 10:24 Sa7an de7iya asi ubbay iyako yaanawunne Xoossay iya wozanan wothida cincatethaa si7anaw koyees.
1KI 10:25 Laythan laythan yaa ubbay iyaw worqa, bira, ma7o, ola miishe, sawo, paranne baqulo imota ekidi yoosona.
1KI 10:26 Solomoney para gaaretanne parata shiishis; iyaw 1,400 para gaaretinne 12,000 parati de7oosona. I enta para gaareta katamataninne baara Yerusalaamen wothis.
1KI 10:27 Kawoy Yerusalaamen biri shuchada, zigi zuma xaphon dicciya boobbada daranaada oothis.
1KI 10:28 Solomone parati Gibxefenne Qaawe biittafe yoosona. Kawa zal7anchoti enta Qaawepe shammidi ehoosona.
1KI 10:29 Enti issi issi para gaare usupun xeetu bira santimen, issi issi para xeetanne ishatamu bira santimen Gibxefe shammidi ehoosona. Enti Hiteta kawotasinne Soore kawotas bayzoosona.
1KI 11:1 Kawoy Solomone daro allaga biitta maccasata dosis. Hessati Gibxe kawa na7epe haraa Moo7abeta, Amooneta, Edoometa, Sidoonatanne Hiteta maccasata.
1KI 11:2 Goday Isra7eele asaas, “Enti hinte wozana balethidi banta eeqatako zaariya gisho ha asatara ekoninne gelon walaketofite” yaagidi kase odis. Shin Solomone enta siiquwan qashetis.
1KI 11:3 Solomones kawo na7a gidida laapun xeetu machetinne heedzu xeetu laggethoti (qubaateti) de7oosona. He macheti iya Xoossafe haassidosona.
1KI 11:4 Solomoney cimishe biya wode iya macheti iya wozanaa hara xoossatako zaaridosona. Iya aawa Dawiti kumetha wozanan Godaas haaretidaysada I ba Godaa Xoossaas haaretibeenna.
1KI 11:5 Solomoney Astarooto geetetiya Sidoonata xoosseesinne Moloka geetetiya ixetida Amooneta eeqa goyinnis.
1KI 11:6 Solomoney Godaa sinthan iitabaa oothis; iya aawa Dawiti kaallidaysada Godaa polo kaallibeenna.
1KI 11:7 Solomoney Kamoosha ixetida eeqasinne Moloka geetetiya Amooneta eeqas Yerusalaamepe wuloha baggan de7iya dere huuphen dhoqa goyinno bessata keexis.
1KI 11:8 Allaga biittafe ekida ba machetas hessada giigisin, enti banta eeqatas yan ixaane cuyidosonanne yarsho yarshidosona.
1KI 11:9 Iyaw nam7u toho qoncida Godaa Isra7eele Xoossaafe Solomone wozanay haakida gisho, Goday iya hanqetis.
1KI 11:10 Hara xoossata kaallonnaada Goday Solomone kiittis, shin Solomoney Godaa kiitaa naagibeenna.
1KI 11:11 Hessa gisho, Goday Solomoneko, “Neeni haysada hanida gishonne ta caaquwanne ta wogaa ne naagonna gisho taani ne kawotetha neepe ekada ne aylletape issuwas immana.
1KI 11:12 Gidoshin, ne aawa Dawita gisho taani haysa ne de7o laythan oothike, ne na7aa kushepe ekana.
1KI 11:13 Hessi hanikoka, kawotetha ne na7aa kushepe ubbaa ekike; ta aylliya Dawita gishonne taani doorida Yerusalaame gisho issi koche iyaw immana” yaagis.
1KI 11:14 Hessafe guye, Goday Edoome biitta kawota koche gidida, Edoome addiya Hadaada Solomone bolla morke oothidi denthis.
1KI 11:15 Kase Dawiti Edoome asatara oletida wode hayqidaysata mooganaw bida toora moconay Iyo7aabi Edoomen de7iya addeta ubbaa wodhidi wursis.
1KI 11:16 Edoomen de7iya addeta ubbaa dhaysana gakanaw Iyo7aabinne Isra7eele asa ubbay yan usupun ageena uttidosona.
1KI 11:17 Shin he wode guutha na7a gidida Hadaadi, ba aawas oothida Edoome moorinatape guuthatara Gibxe baqatis.
1KI 11:18 Enti Midiyaamepe dendidi Paarana bidosona; Paraanepe bantara ase ekidi Gibxe kawako bidosona. Kawoy Hadaadas issi keethinne gade immidi kathi iyaw yeddis.
1KI 11:19 Hadaadi kawa daro ufaysin, kawoy ba mache, Xafinaasi michiw iyaw macho oothidi immis.
1KI 11:20 Iya Ganubaata geetetiya na7a iyaw yelasu. Xafinaasa iya kawo gadhon dichasu; Ganubaati yan kawa naytara issife de7is.
1KI 11:21 Hadaadi Gibxen de7ishe Dawitinne iya toora moconay Iyo7aabi hayqidaysa si7idi, kawako, “Taani ta biitta simmana mela tana yedda” yaagis.
1KI 11:22 Kawoy iya, “New haysan aybi pacin, ne biitta baanaw koyay?” yaagidi oychis. Hadaadi, “Taw aybika pacibeenna, shin taani baana” yaagis.
1KI 11:23 Qassika Xoossay Eliyaada na7aa Razoona Solomone bolla morke oothidi denthis. Razooni Suubba kawa Adraazarape baqatis.
1KI 11:24 Dawiti Suubba olanchota dhaysida wode Razooni baw ase shiishidi paannota halaqa gidis. Paannoti Damasqo bidi, oykidi yan uttidi Razoona kawothidosona.
1KI 11:25 Hadaadi medhida metuwa bolla gujidi, Solomoney de7ida laytha ubban Razooni Isra7eeletas morke gidis. Razooni Sooren kawotidi Isra7eele asaas morke gidis.
1KI 11:26 Hessadaka Nabaaxa na7ay Iyorbaami Solomone bolla makallidi dendis. I Solomone aylletape issuwa. I Efreema biittan de7iya Xareedape yida asi; iya aaye sunthay Xiru7a; iya am7o.
1KI 11:27 Kawa bolla I makallidi dendida taarikey haysafe kaallidi xaafetidaysa. He wode Solomoney Miilo gimbeesinne ba aawa Dawita katamaa gimbe dirsaa yuushuwan de7iya ollaa kunthees.
1KI 11:28 Iyorbaami mino asi; Solomoney ha na7atethay ba oosuwa waatidi loythi oothiyako be7idi, Yoosefabiittan oothiya madda oothiya asaa bolla halaqa oothidi shuumis.
1KI 11:29 Issi gallas Iyorbaami Yerusalaamepe keyidi bishin, Seelope yida nabey Akiyi ooratha ma7o ma7idi iyara ogen gahetis. Denban enta nam7aa xalaali de7oosona.
1KI 11:30 Akiyi ba ma77ida ooratha ma7uwa oykidi, tammanne nam7a kessidi daakis.
1KI 11:31 Iyorbaamako, “Tammu daakethaa new eka. Goday Isra7eele Xoossay haysada yaagees; ‘Heko, taani kawotethaa Solomone kushepe ekada tammu kochata new immana.
1KI 11:32 Shin ta aylliya Dawita gishonne Isra7eele zare ubbaa giddofe taani doorida Yerusalaame gisho issi koche iyaw aggana.
1KI 11:33 Taani hessa oothiya gaasoy, Solomoney tana aggidi Sidoona xoossiw Astarooto, Moo7abe xoossa Kamooshanne Amoone xoossaa Moloka goyinnida gishosa. Qassi ta ogiyan hemetonna ixida gishonne iya aaway Dawiti kiitetidaysada ta wogaanne ta higgiya naagonna ixida gishosa.
1KI 11:34 “ ‘Gidoshin, taani kawotethaa Solomone kushepe wursa ekike. Taani dooridaysa gishonne ta kiitaanne ta wogaa naagida ta aylliya Dawita gisho Solomoney de7on de7ishin hessa oothike.
1KI 11:35 Taani kawotethaa iya na7aa kushepe ekada tammu kochata new immana.
1KI 11:36 Ta sunthay yan xeegetana mela taani doorida Yerusalaamen, ubba wode ta aylliya Dawita kochay kawotana mela taani issi koche iya na7aas immana.
1KI 11:37 Taani nena ekana; ne wozanay dosida ubbaa neeni haarana; neeni Isra7eele bolla kawotana.
1KI 11:38 Taani nena kiittiyaba neeni oothiko, ta ogiyan hemetikonne ta aylley Dawiti naagidaysada ta wogaanne ta kiitaa naagada, ta sinthan suureba oothiko, ta neera gidana. Dawitas oothidaysada ne kochati kawotethan minnanaada oothana; Isra7eele new immana.
1KI 11:39 Solomone nagaraa gisho taani Dawita kochaa seerana; shin merinaw seerike’ ” yaagis.
1KI 11:40 Solomoney Iyorbaama wodhanaw koyis; shin Iyorbaami Gibxe kawa Shishaaqako baqatidi, Solomoney hayqana gakanaw Gibxen gam7is.
1KI 11:41 Solomone hanida harabay, I oothidabay, iya cincatethay Solomone Taarike Maxaafan xaafetis.
1KI 11:42 Solomoney Isra7eele bolla Yerusalaamen oytamu laythi kawotis.
1KI 11:43 Hessafe guye, Solomoney hayqidi, ba mayzan gahetis; ba aawa Dawita Kataman moogetis. Iya na7ay Robi7aami iya bessan kawotis.
1KI 12:1 Isra7eele asa ubbay Orobi7aama kawoyanaw Seekema bida gisho ika yaa bis.
1KI 12:2 Kawa Solomonepe baqatidi, Gibxen de7iya Nabaaxa na7ay Iyorbaami hessa si7ida wode Gibxefe simmidi yis.
1KI 12:3 Isra7eele asay Iyorbaama kiittidi xeegisin, inne Isra7eele maabara ubbay Robi7aamako bidi,
1KI 12:4 “Ne aaway nuna deexo qambara toossis; shin ha77i I nuna oosisiya wolqaama oosuwanne deexo qambara nuus kawusharki. Yaatiko, nuuni new haaretana” yaagidosona.
1KI 12:5 Robi7aami entako, “Bidi heedzantho gallas simmidi taako yiite” yaagin asay bidosona.
1KI 12:6 Hessafe guye, kawoy Robi7aami, iya aaway Solomoney de7on de7iya wode, Solomone zoriya cimata, “Ha asaas woygada zaara geetii?” yaagidi zore oychis.
1KI 12:7 Cimati zaaridi, “Hachi neeni ha asaas aylle gidada oothikonne enta oyshaas lo77o qaala zaariko, ubba wode enti new aylle gidana” yaagidosona.
1KI 12:8 Shin Robi7aami cimati zorida zoriya aggidi, iyara diccidi iyaw oothiya na7atethata zore oychis.
1KI 12:9 I entako, “Hinte tana ay zoretii? ‘Ne aaway nuna toossida deexo qambara nuus kawusharki’ giya ha asaas woygada zaaro?” yaagidi oychis.
1KI 12:10 Na7atethati zaaridi, “ ‘Ne aaway nuna deexo qambara toossis; shin neeni nuus kawusharki’ giya asaas, ‘Ta guutha biradhey ta aawa xeessaafe ordees.
1KI 12:11 Ta aaway hintew qambara deexethis; shin taani iyape aathada deexethana. Ta aaway hintena lisson garaafis; shin taani hintena korneda dukiya lisson garaafana’ yaagada zaara” yaagidosona.
1KI 12:12 Kawoy, “Heedzantho gallas simmidi taako yiite” gidaysada Iyorbaaminne asa ubbay heedzantho gallas Orobi7aamako simmidi yidosona.
1KI 12:13 Kawoy cimata zoriya aggidi entaw hanqon zaaris.
1KI 12:14 Na7atethati zorida zoriya kaallis. I entako, “Ta aaway hinte qambara deexethis; shin taani iyape aathada deexethana. Ta aaway hintena lisson garaafis; shin taani hintena korneda dukiya lisson garaafana” yaagidi zaaris.
1KI 12:15 Goday Seelope yida Akiya baggara kase Nabaaxa na7aa Iyorbaamas odida qaalay poletana mela hessi Godaape hanida gisho kawoy asay giyaba si7onna ixis.
1KI 12:16 Isra7eele asa ubbay kawoy enti geysa si7onna ixidaysa be7idi haysada yaagidosona; “Dawitape nuna gakiya gishoy aybee? Isseye na7aape nuuni laattiyabay aybee? Isra7eele asaw, hinte soo hinte soo simmite. Dawita, ne keethaa naaga” yaagidi, Isra7eele asa ubbay banta soo banta soo simmidosona.
1KI 12:17 Shin Robi7aami Yihudan de7iya Isra7eele asaa bolla kawotis.
1KI 12:18 Kawoy Robi7aami madda ootheyisata halaqaa Adoniraama Isra7eele asaako kiittin, enti shuchan caddidi wodhidosona. Yaatin, kawoy Robi7aami ba para gaariyan gelidi Yerusalaame baqatis.
1KI 12:19 He wodepe doomidi hachi gakanaw tammu Isra7eele kochati Dawita kochaafe kawotida kawota bolla makallidosona.
1KI 12:20 Iyorbaami Gibxefe simmidaysa Isra7eele asa ubbay si7ida wode iya banta maabaraako xeegidi Isra7eele bolla kawothidosona. Dawita kochaafe kawotida kawotas ammanetiday Yihuda kochaa xalaala.
1KI 12:21 Solomone na7ay Robi7aami Yerusalaame gakida wode, Isra7eele asaara oletidi, kawotethaa baw zaarana mela Robi7aami Yihudapenne Biniyaamepe dooretida 180,000 olanchota shiishis.
1KI 12:22 Shin Xoossa qaalay Xoossa asi gidida Samayeko haysada yaagidi yis.
1KI 12:23 “Solomone na7aa, Yihuda kawa Orobi7aamas, Yihudas, Biniyaamesinne attida asa ubbaas haysada yaaga;
1KI 12:24 Goday hinteko, ‘Hinte dabbotara, Isra7eeletara oletanaw boopite. Haysa taani oothida gisho hinte ubbay hinte soo hinte soo simmite’ yaagada oda” yaagis. Enti Godaa qaala si7idi soo bidosona.
1KI 12:25 Hessafe guye Iyorbaami derey dariya Efreema biittan de7iya Seekema miixa oothi gimbidi, yan de7is; yaape keyidi bidi Phin7eela gimbis.
1KI 12:26 Iyorbaami ba wozanan, “Kawotethay Dawita kochaas simmana.
1KI 12:27 Ha asay Xoossa keethan yarsho yarshanaw Yerusalaame biyaba gidiko, enti banta godaako, kawa Robi7aamako simmana. Enti tana wodhidi, Yihuda kawa Robi7aamako simmana” yaagidi qopis.
1KI 12:28 Kawoy zoretidaape guye worqafe nam7u mara misileta medhidi, asaako, “Hinte hizape Yerusalaame buussay gidana. Hinteno Isra7eele asaw, Heko, hintena Gibxefe kessida hinte xoossati haysata!” yaagis.
1KI 12:29 Entafe issuwa Beetelen, issuwa Daanen wothis.
1KI 12:30 Ha hanotay entaw nagara gidis; asay he mara misiliya goyinnanaw Daane gakanaw bidosona.
1KI 12:31 Iyorbaami dere huuphen dhoqa goyinno bessata giigisidi Leewe koche gidonna ixikoka oonaka kahine oothidi shuumis.
1KI 12:32 Yihudan boncheysada hospuntho ageenan tammanne ichashantho gallasan ba7aale bonchanaada Iyorbaami qamma qachidi yarsho yarshis. I haysada hanidi Beetele bidi, ba medhida mara misiliyas yarsho yarshis. Ba medhida dhoqa goyinno bessatan kahineta Beetelen shuumis.
1KI 12:33 I ba huuphen doorida hospuntho ageenan, tammanne ichashantho gallas Beetele bidi he gallasay Isra7eele asaas ba7aale gidana mela awaajis. Ixaane cuyisanaw yarsho bessa keyis.
1KI 13:1 Heko, Iyorbaami yarsho shiishanaw yarsho bessa matan eqidashin, Goday kiitida, Xoossa asi gidida issi nabey Yihudape yis.
1KI 13:2 Goday kiittin he yarsho bessa bolla haysada yaagidi waassis; “Yarsho bessaw, yarsho bessaw, Goday neeko yaagees. Heko, Dawita keethaas Iyosyaasa geetetiya issi na7i yeletana. He na7ay ha77i haysan dhoqa yarsho bessan yarshishe de7iya kahineta ne bolla yarshana; asaa meqethaa ne bolla xuuggana” yaagis.
1KI 13:3 He gallas Xoossa addey haysada yaagidi malaata immis; “Goday odida malaatay haysa; Heko, ha yarsho bessay phalqetana; iya bolla de7iya bidoy laaletana” yaagis.
1KI 13:4 Kawoy Iyorbaami Xoossa addey Beetelen de7iya yarsho bessa bolla waassida waasuwa si7ida wode yarsho bessaafe ba kushiya mallidi, “He addiya oykite!” yaagis. Shin I, addiya mallida kushey bessan melidi attin, ba kushiya guye zaaridi ekanaw danda7ibeenna.
1KI 13:5 Xoossa addey Godaa qaalan immida malaatan yarsho bessay phalqetidi wodhin, iya bolla de7iya bidoyka laaletis.
1KI 13:6 Kawoy Iyorbaami Xoossa addiya, “Ta kushey kaseysada hanana mela taw gaannata; Godaa ne Xoossaa woossa” yaagis. Xoossa addey kawas gaannatidi Godaa woossin, kawa kushey simmidi kaseysada hanis.
1KI 13:7 Kawoy nabiyako, “Taara ta soo yedha; kathi ma; ta new imota immana” yaagis.
1KI 13:8 Shin Xoossaa addey, “Hari attoshin neeni ne aquwape baggaa taw immiyakoka, taani neera biike; haysan kathi miike, haathe uyike.
1KI 13:9 Godaa qaalay, ‘Neeni kathi moopa, haathe uyopa, ne yida ogiyara simmada boopa’ yaagis gidi kawas zaaris.”
1KI 13:10 Hessa gisho, I hara ogera bis; I Beetele yida ogiyara simmidi bibeenna.
1KI 13:11 He wode Beetelen issi cima nabey de7ees. He gallas Xoossaa addey Beetelen oothidaba ubbaa he cima addiya nayti yidi iyaw odidosona. Qassi he addey kawas odida qaala enti banta aawas odidosona.
1KI 13:12 Aaway, “I awu baggara bidee?” yaagin, Yihudape yida Xoossa addey bida ogiya mallidosona.
1KI 13:13 I ba naytako “Taw elle hare koorite” yaagin, enti iyaw hare koorin toggis.
1KI 13:14 Xoossa addiya geedo kaallidi bis. Issi wolaa kuyan uttidaysa demmidi, “Yihudape yida Xoossa addey nenee?” yaagidi oychis. Addey, “Ee tana” yaagis.
1KI 13:15 Cima nabey, “Kathi maanaw taara ta soo yedha” yaagis.
1KI 13:16 Xoossa addey zaaridi, “Taani guye simmada neera baanaw woyko ha bessan neera kathi maanaw woyko haathe uyanaw danda7ike.
1KI 13:17 Godaa qaalay taako ‘Neeni he bessan kathi moopa, haathe uyopa, ne yida ogiyara simmada boopa’ yaagis” yaagis.
1KI 13:18 Cima nabey, “Taka needa nabe. Goday kiitida kiitanchoy taako, ‘Kathi maana melanne haathe uyana mela iya zaarada neera ne soo ekada ya’ ” yaagis. Shin cima addey iyaw wordo odis.
1KI 13:19 Hessa gisho, Xoossa addey simmidi iyara iya soo bidi misinne uyis.
1KI 13:20 Enti gayta bolla uttidashin, Godaa qaalay iya guye zaarida ehida cima nabiyako yis.
1KI 13:21 Yihudape yida Xoossa addiyas ba qaala dhoqu oothidi, “Goday haysada yaagees; ‘Neeni Godaa qaala kiitetabaaka; Goday ne Xoossay nena kiitida kiitaa naagabaaka.
1KI 13:22 He bessan moopa woyko uyopa’ gida bessaa guye simmada yan kathi madasa; haathe uyadasa. Hiza ne ahay ne aawata duufon moogetenna” yaagis.
1KI 13:23 Xoossa addey midi uyidi simmin iya guye zaaridi ehida cima nabey ba hariya iyaw kooris.
1KI 13:24 I ogiya bishin gaammoy keyidi iya wodhin, ahay ogiyan kundis; hareynne gaammoy nam7ay aha matan eqidosona.
1KI 13:25 Heko, he ogiyara aadhiya asay ahi ogen kundidaysanne gaammoy aha matan eqidysa be7idi, bidi cima nabey de7iya kataman odidosona.
1KI 13:26 Iya guye zaarida cima nabey hessa si7ida wode haysada yaagis; “Hessi Godaa qaalas kiitetonna ixida Xoossa addiya. Godaa qaalay iyaw koyrottidi odidaysada Goday gaammon iya gathis; yaatin, gaammoy iya mentherethidi wodhis” yaagis.
1KI 13:27 Hessafe guye, cima nabey ba nayta, “Taw hare koorite” yaagin enti iyaw hare kooridosona.
1KI 13:28 I keyidi biya wode ogiyan kundida aha, aha matan eqida hariyanne gaammuwa demmis. Gaammoy aha mibeenna woyko hariya menthibeenna.
1KI 13:29 Cima nabey Xoossa addiya aha denthidi, hariya zokon wothidi, yeekanawunne mooganaw guye ba katama ekidi bis.
1KI 13:30 Baw giigisidi wothida duufon aha moogis. Iyaw, “Ta ishaw taassa! ta ishaw taassa!” yaagidi yeekis.
1KI 13:31 Iya moogi simmidi ba naytako haysada yaagis; “Ta hayqiya wode Xoossa addey moogetida duufon tana moogite. Ta meqethaa iya meqethaa matan wothite.
1KI 13:32 Beetele kataman de7iya yarsho bessa bollanne Samaare kataman de7iya dhoqa goyinno bessata bolla Goday kiittin, he addey waassidi odida tinbitey tuma poletana” yaagis.
1KI 13:33 Hessi haninka Iyorbaami ba iita ogiyape simmibeenna. Dhoqa goyinno bessatas Leewe koche gidonna oonaka kahine oothidi shuumis. Kahine gidanaw koyiya oonaka dhoqa goyinno bessan shuumees.
1KI 13:34 Iyorbaama keetha asaa dhaysanawunne biitta bollafe quchanaw gathida nagaray hessa.
1KI 14:1 He wode Iyorbaama na7ay Abiyi hargetis.
1KI 14:2 Iyorbaami ba machiw, “Denda; neeni Iyorbaama macho gideysa oonika eronna mela ne ma7uwa laammada Seelo ba. Heko, taani ha asaa bolla kawotanaysa taw odida nabey Akiyi yan de7ees.
1KI 14:3 Tammu uythu, guutha daabbonne issi oto eessi iyaw ekada ba. Ha hargida na7aba I new odana” yaagis.
1KI 14:4 Iyorbaama machiya I gidaysada oothada Akiya soo Seelo basu. Akiyi cimida gisho iya ayfey xeellanaw danda7enna.
1KI 14:5 Shin Goday Akiyako, “Heko, Iyorbaama machiya hargetida ba na7aba oychanaw neeko yawusu. Neeni iw haysa haysa yaagada oda. Iya neeko gakiya wode hara maccas daanana” yaagis.
1KI 14:6 Akiyi pengen toho girsi si7idi haysada yaagis; “Iyorbaama mache, ane haa gela. Neeni ayis haysa mela hara asi daanadii? Taani iita kiita new odana.
1KI 14:7 Neeni Iyorbaamako bada, Goday Isra7eele Xoossay haysada yaagees yaaga; ‘Taani nena asaa giddofe dhoqu oothas; ta asaa Isra7eele bolla nena kawothas.
1KI 14:8 Dawita kochaafe kawotethaa ekada new immas; shin neeni ta aylliya Dawita mela gidaka. I ta kiitta naagis; ta sinthan suureba xalaala oothishe ba kumetha wozanan tana kaallis.
1KI 14:9 Neepe kase de7iya ubbay oothidaysafe aadhiya iitaba neeni oothadasa. Neeni new hara xoossatanne birape medhida eeqata medhadasa. Yaatada tana hanqethadasa; taw zoko zaaradasa.
1KI 14:10 Hessa gisho, taani Iyorbaama keetha asaa bolla iitabaa ehana. Isra7eele biittan Iyorbaama keetha asaape aylle gidin womaanno issi addeka ashshona dhaysana. Kem7eley taman xuugetidi wureysada taani Iyorbaama keethaa xuuggada wursana.
1KI 14:11 Iyorbaama koche gididi kataman hayqiya oonaka kanati maana; gaxaren hayqeyisata salo kafoti maana. Taani Goday haysa odas!’ ” yaagis.
1KI 14:12 Iyorbaama macheko, “Neeni dendada ne soo ba. Ne tohoy katamaa geliya wode na7ay hayqana.
1KI 14:13 Isra7eele ubbay na7aas yeekidi moogana. Iyorbaama keethan Godaa Isra7eele Xoossaa sinthan iyan lo77obay bentida gisho, Iyorbaama keethaafe iya xalaali moogetana.
1KI 14:14 Qassi Iyorbaama keethaa dhaysiya kawo Goday baw Isra7eele bolla denthana.
1KI 14:15 Goday Isra7eele shocana; haatha giddon mayrey qaaxeysada Goday he wode Isra7eele qaathana. Asheera geetetiya xoosse misile essidi, Godaa hanqethida gisho, enta aawatas I immida lo77o biittafe enta shoddana; enta Efraxiisa shaafape hefinthan laallana.
1KI 14:16 Iyorbaami oothida nagaraa gishonne Isra7eele asaa nagaraa oosisida gisho Goday Isra7eele aggana” yaagis.
1KI 14:17 Iyorbaama machiya bada Tirsa gakada, penge yedhiya wode na7ay hayqis.
1KI 14:18 Ba aylliya nabiya Akiya baggara Goday odidaysada iya moogidosona; Isra7eele asa ubbay iyaw yeekidosona.
1KI 14:19 Iyorbaami oothida harabay, I oletida olaynne iya ayso maaray, heko, Isra7eele Kawota Taarike Maxaafan xaafetidi de7ees.
1KI 14:20 Iyorbaami laatamanne nam7u laythi kawotidi hayqis. Iya bessan iya na7ay Naadabi kawotis.
1KI 14:21 Solomone na7ay Robi7aami Yihudan kawotis; Robi7aami kawotiya wode iyaw laythi oytamanne issino. Goday ba sunthay xeegetana mela Isra7eele kochata biitta ubbaa giddofe doorida Yerusalaame kataman, Robi7aami tammanne laapun laythi kawotis. Iya aaye sunthay Na7imo; iya Amoone biitta asi.
1KI 14:22 Yihuda asay Godaa sinthan iitabaa oothidosona. Banta oothida nagaran banta aawatape aadhidi Godaa hanqethidosona.
1KI 14:23 Qassi enti dhoqa goyinno bessata, eeqa shuchatanne Asheero geetetiya xoosse misileta dere bollanne irxa mithata garsan essidosona.
1KI 14:24 Hari attoshin, enta dhoqa goyinno bessan, goyinno woga oothidi addey addera gahetees. Goday Isra7eele sinthafe kessida kawotethati oothiya ixetida oosota ubbaa Isra7eele asay oothidosona.
1KI 14:25 Robi7aami kawotida ichashantho laythan Gibxe kawoy Shishaaqi Yerusalaame katamaa bola ola denthis.
1KI 14:26 Xoossa keethaanne kawo gadhon de7iya shaluwa, Solomoney qoxisida worqa gondalleta ubbaa bonqidi ekis.
1KI 14:27 Yaatin, kawoy Robi7aami he gondalleta gisho naase biratape hara gondalleta oosisis. Enti naagetana mela kawo gadho pengiya naageysata halaqatas immis.
1KI 14:28 Kawoy Xoossa keethi biya wode naageysati gondalleta oykoosona; I simmidi biya wode enti zaaridi naageysata keethan wothoosona.
1KI 14:29 Robi7aami hanida harabaynne I oothida ubbay Yihuda kawota Taarike Maxaafan xaafetis.
1KI 14:30 Robi7aaminne Iyorbaami ubba wode olan de7idosona.
1KI 14:31 Robi7aami hayqidi ba mayzatan gahetis; Dawita Kataman de7iya ba aawata duufon moogetis. Iya aaye sunthay Na7imo; iya Amoone biitta asi; Orobi7aama bessan iya na7ay Abiyi kawotis.
1KI 15:1 Nabaaxa na7ay Iyorbaami kawotida tammanne hospuntho laythan Abiyi Yihudan kawotis.
1KI 15:2 Abiyi Yerusalaamen heedzu laythi kawotis. Iya aayiya Abeseloome na7a; I sunthay Ma7iko.
1KI 15:3 Iyape kase, iya aaway oothida nagara ubbaa oothis. Iya wozanay iya aawa aaway Dawita wozanay polo gididaysada Godaa, ba Xoossaa sinthan polo gidenna.
1KI 15:4 Gidoshin, iyape guye Yerusalaamen kawotana melanne Yerusalaame sarotethaa naagana mela Goday iya Xoossay, Dawita gisho Abiyas issi adde na7aa immis.
1KI 15:5 Goday hessa oothiday, Dawiti Hite addiya Ooriyoona bolla nagara oothidaysafe attishin, ba de7o laytha ubban Godaa kiitaape issibaaka balibeenna.
1KI 15:6 Abiyi de7ida laytha ubban Robi7aaminne Iyorbaami oletishe de7idosona.
1KI 15:7 Abiyi hanida harabaynne I oothidaba ubbay Yihuda Kawota Taarike Maxaafan xaafetis. Abiyinne Iyorbaami oletishe de7idosona.
1KI 15:8 Abiyi hayqidi ba mayzatan gahetis; I Dawita Kataman moogetis; iya bessan iya na7ay Asi kawotis.
1KI 15:9 Isra7eele kawoy Iyorbaami kawotida laatamantho laythan Asi Yihudan kawotis.
1KI 15:10 Asi Yerusalaamen oytamanne issi laythi kawotis. Iya wogga aaye sunthay Ma7iko; iya Abeseloome na7a.
1KI 15:11 Asi ba mayzay Dawiti oothidaysada, Godaa sinthan suureba oothis.
1KI 15:12 Goyinno woga oothidi addey addera laymatesata Asi biittafe dhaysis. Iyape kase de7iya kawoti medhida eeqa misileta ubbaa mentherethis.
1KI 15:13 Iya wogga aayiya Ma7ika Asheera geetetiya xoossees tuna eeqa misile medhida gisho, kawo aayo geetetiya boncho bessaafe iyo diggis. Asi he eeqa misiliya qanxerethidi Qediroona Zangaaran xuuggis.
1KI 15:14 Asi dhoqa goyinno bessata ubbaa dhaysona aggikoka, I ba de7ida laytha ubban Xoossas ammanetiya asi gididi de7is.
1KI 15:15 Inne iya aaway Xoossas dummayidi wothida bira, worqanne hara miisheta ehidi, Xoossa keethan wothis.
1KI 15:16 Yihuda kawoy Asinne Isra7eele kawoy Ba7oosi, banta laytha ubban olan de7idosona.
1KI 15:17 Isra7eele kawoy Ba7oosi Yihuda bolla dendidi, Yihuda kawa Asa biittafe oonika gelonna melanne keyonna mela teqanaw Rama yuushuwa gimbis.
1KI 15:18 Hessa gaason kawoy Asi Xoossa keethaninne kawo gadhon de7iya worqanne bira ubbaa kessidi ba moorinnata kushen wothis. Heziyoona na7aa na7aa, Xabirmoona na7aas, Damasqon de7iya Araame kawa Ben-Hadaada imota oothidi yeddishe haysada yaagis;
1KI 15:19 “Kase ta aawaranne ne aawara caaqidaysada, ane taaranne neera caaqoos. Heko, taani ha biraanne worqaa taani new imota oothada yeddas. Isra7eele kawoy Ba7oosi ba olanchota ta biittafe kessana mela neeni kase iyara caaqida caaquwa mentha” yaagis.
1KI 15:20 Ben-Hadaadi kawoy Asi gidaysa ekidi, ba toora moconata Isra7eele katamata olanaw yeddis. Enti Iyoona, Daanenne Abeel-Beet-Ma7ika katamata, Galila Abbaa matan de7iya biittanne Niftaaleme biittara gathidi oykidosona.
1KI 15:21 Kawoy Ba7oosi hessa si7idi, Rama gimbeysa aggidi Tirsa bis.
1KI 15:22 Hessafe guye kawoy Asi Yihudan de7iya asa ubbaa kiittin, issoyka attonna dendidi, Ba7oosi yan go7etiya shuchaanne mithaa Ramape gaazidosona. Kawoy Asi Mixiphaninne Biniyaamen de7iya Gib7a gimbis.
1KI 15:23 Asi hanida harabay, iya minotethay ubbay, I oothidaba ubbaynne I keexida katamati Yihuda Kawota Taarike Maxaafan xaafetis. Shin I cimida wode ba tohuwa saketis.
1KI 15:24 Asi hayqidi, ba mayzatan gahetidi ba mayza Dawita Kataman moogetis. Iya na7ay Iyosaafexi iya bessan kawotis.
1KI 15:25 Yihuda kawoy Asi kawotida nam7antho laythan Iyorbaama na7ay Naadabi Isra7eelen kawotis; I Isra7eele biittan nam7u laythi kawotis.
1KI 15:26 Naadabi kase ba aawa ogiyaninne Isra7eele asaa oosisida iya nagara ogiyan hemetidi Godaa sinthan iitabaa oothis.
1KI 15:27 Yisakoora koche gidida Akiya na7ay Ba7oosi Nadaaba bolla maqetis. He wode Naadabeynne iya olanchoti Filisxeemen de7iya Gibatoona katamaa yuushon de7oosona.
1KI 15:28 Yihuda kawoy Asi kawotida heedzantho laythan Ba7oosi Nadaaba wodhidi iya bessan I baw kawotis.
1KI 15:29 Ba7oosi kawoto doomida mela Iyorbaama soo asa ubbaa wodhidi wursis. Goday Seelope yida ba aylliya, nabiya Akiya baggara odidaysada Iyorbaama keetha asa ubbay hayqi wuris.
1KI 15:30 Hessi haniday, Iyorbaami ba huuphen oothida nagaraninne Isra7eele asaa I oosisida nagaran Godaa Isra7eele Xoossaa hanqethida gishosa.
1KI 15:31 Naadabi hanida harabaynne I oothidaba ubbay Isra7eele Kawota Taarike Maxaafan xaafetis.
1KI 15:32 Yihuda kawoy Asinne Isra7eele kawoy Ba7oosi banta kawotetha laytha ubban oletida mela de7idosona.
1KI 15:33 Yihuda kawoy Asi kawotida heedzantho laythan Akiya na7ay Ba7oosi Isra7eele bolla kawotis; I Tirsa kataman uttidi laatamanne oyddu laythi kawotis.
1KI 15:34 Iyorbaami Isra7eele asaa nagara oosisidaysada ika he ogiyan hemetidi Godaa sinthan iitabaa oothis.
1KI 16:1 Hanaana na7aa gidida, Iyyu baggara Godaa qaalay Ba7oosaba haysada yaagis;
1KI 16:2 “Taani nena baanape denthada ta asaa Isra7eele bolla halaqa oothas; shin neeni Iyorbaama ogiyan hemetadasa. Qassi ta asaa Isra7eele nagara oosisada enta nagaran tana hanqethadasa.
1KI 16:3 Heko, taani Ba7oosanne iya soo asaa pittana hanayis. Ba7oosa, taani ne soo asaa Nabaaxa na7aa Iyorbaama soo asaada oothana.
1KI 16:4 Ba7oosa koche gididi kataman hayqiya oonaka kani maana; qassi gaxaren hayqiya oonaka salo kafoti maana” yaagis.
1KI 16:5 Ba7oosi hanida harabay, I oothidabaynne iya minotethay Isra7eele kawota Taarike Maxaafan xaafetis.
1KI 16:6 Ba7oosi hayqidi ba mayzatan gahetidi, Tirsa kataman moogetis. Iya na7ay Eli iya bessan kawotis.
1KI 16:7 Gujidika, Goday, nabiya Iyyu baggara Ba7oosa bollanne iya soo asaa bolla tinbite odida gaasoy, Ba7oosi oothida nagara gishonne Iyorbaaminne iya soo asay oothidaysada iitabaa oothidi, Godaa hanqethida gishosa. Qassi I Iyorbaama soo asa ubbaa wodhidi wursida gishosa.
1KI 16:8 Yihuda Kawoy Asi kawotida laatamanne usupuntho laythan, Ba7oosa na7ay Eli Isra7eelen kawotis. Tirsa kataman uttidi nam7u laythi kawotis.
1KI 16:9 Kawa toora moconatape issuwa gididi, iya para gaaretape baggaa kiittiya Zimiri kawa bolla maqetis. Kawoy Eli he wode Tirsan de7iya kawo gadho aawatethan aysiya Arxa son mathotidi uttis.
1KI 16:10 Yihuda kawoy Asi kawotida laatamanne laapuntha laythan Zimiri, Arxa soo gelidi kawa wodhidi iya bessan baw kawotis.
1KI 16:11 Zimira kawotida mela Ba7oosa soo asa ubbaa wodhis. Ba7oosi dabbo gidin lagge gidin issi addeka paxa ashshibeenna.
1KI 16:12 Nabiya Iyyu baggara Goday Ba7oosa bolla odida qaalada Zimiri Ba7oosa soo asa ubbaa wodhidi dhaysis.
1KI 16:13 Hessi haniday Ba7oosinne iya na7ay Eli banta eeqa goyinnidi oothida nagaraa gaasoninne Isra7eele asa oosisida nagaraa gaason, Godaa Isra7eele Xoossaa hanqethida gishosa.
1KI 16:14 Eli hanida harabaynne I oothidabay Isra7eele Kawota Taarike Maxaafan xaafetis.
1KI 16:15 Yihuda kawoy Asi kawotida laatamanne laapuntha laythan Zimiri Tirsan laapun gallasa xalaala kawotis. He wode Isra7eele olanchoti Gibatoona geetetiya Filisxeeme katamaa yuushuwa teqidosona.
1KI 16:16 Isra7eele asay Zimirii kawa bolla maqetidi iya wodhidaysa si7ida wode toora mocona Omira he gallas he bessan Isra7eele kawo oothidi kawothidosona.
1KI 16:17 Omirinne Isra7eele asay Gibatoonape keyidi Tirsa katamaa teqidosona.
1KI 16:18 Katamay oyketidaysa be7ida wode Zimiri kawo gadho giddon de7iya gimbiya gelidi kawo gadho taman oythis; ika hayqis.
1KI 16:19 Hessi haniday Iyorbaami oothida nagaranne Isra7eele asaa oosisida nagaraa kaallidi Zimiri Godaa sinthan iitabaa oothida gishosa.
1KI 16:20 Zimiri hanida harabaynne I maqida maqoy Isra7eele Kawota Taarike Maxaafan xaafetis.
1KI 16:21 He wode Isra7eele asay nam7u keyidi shaaketis. Asaape baggay Ginata na7aa Tibina kawothanaw koyin, baggay qassi Omira kawothanaw koyis.
1KI 16:22 Shin Omira maaddiya asay Ginata na7aa Tibina maaddiya asaape minnida gisho Tibini hayqin Omiri kawotis.
1KI 16:23 Yihuda Kawoy Asi kawotida hastamanne issintho laythan, Omiri Isra7eele bolla kawotidi tammanne nam7u laythi haaris; iyape usupun laytha Tirsan haaris.
1KI 16:24 Omiri Samaariya zuma Samira geetetiya addiyafe 6,000 bira santimen shammidi, yan katama keexis. He katamaa he zuma godaa sunthan Samaare gidi sunthis.
1KI 16:25 Shin Omiri Godaa sinthan iitabaa oothis; I kase de7ida kawota ubbaafe aathidi nagara oothis.
1KI 16:26 Omiri Nabaaxa na7ay Iyorbaami oothida nagaraanne Isra7eele asaa oosisida nagaraa kaallis; he pathonna eeqa gaason Godaa, Isra7eele Xoossaa hanqethis.
1KI 16:27 Omiri hanida harabay, I oothidabaynne iya minotethay Isra7eele Kawota Taarike Maxaafan xaafetis.
1KI 16:28 Omiri hayqidi ba mayzatan gahetidi, Samaaren moogetis. Iya na7ay Akaabi iya bessan kawotis.
1KI 16:29 Yihuda Kawoy Asi kawotida hastamanne hospuntho laythan, Omira na7ay Akaabi Isra7eelen kawotis. Omira na7ay Akaabi Samaaren Isra7eele bolla laatamanne nam7u laythi kawotis.
1KI 16:30 Omira na7ay Akaabi baape sinthe kawotida kawota ubbaafe aadhiya iitabaa Godaa sinthan oothis.
1KI 16:31 Nabaaxa na7ay Iyorbaami oothida nagaraa laafaba gidi qofo xalaala gidonashin, Sidoona kawa Etbaala na7iw Elzabeelo baw macho ekidi, Ba7aale eeqas oosonne goyinno doomis.
1KI 16:32 Samaaren I keexisida Ba7aale Eeqa Keethan yarsho bessi keexis.
1KI 16:33 Qassi Akaabi Asheera geetetiya xoosse misiliya essidi, baape sinthe de7ida kawota ubbaafe aathidi Godaa Isra7eele Xoossaa hanqethiya nagara oothis.
1KI 16:34 Akaaba kawotethaa wode Beetelepe yida, Hi7eela addey Iyaarko zaaridi keexis. Nawe na7aa Iyyasu baggara Goday odidaysada, Hi7eeli Iyaarko keexanaw baasiya wode Abeero geetetiya bayra na7ay hayqis. Qassi sanqa aathiya wode Saguba geetetiya kaalo na7ay hayqis.
1KI 17:1 Galadan Tesibape yida nabey, Eeliyaasi kawa Akaaba haysada yaagis; “Taani iyaw oothiya Goday, Isra7eele Xoossay ero! Kaallidi yaana laythatan, taani odonna de7ishin, sa7an iri bukenna woyko xaasatenna” yaagis.
1KI 17:2 Hessafe guye, Godaa qaalay Eeliyaasako yidi haysada yaagis;
1KI 17:3 “Haysafe dendada doloha bagga ba; yan Yordaanose shaafape doloha baggara de7iya Koraata zangaaran qosetta.
1KI 17:4 Neeni he shaafape haathe uyana; quuroti nena he bessan kathi muzanaada ta enta kiittas” yaagis.
1KI 17:5 Eeliyaasi Goday gidaysada oothis; Yordaanose shaafape doloha baggara de7iya Koraata zangaara bidi yan uttis.
1KI 17:6 Wontanne omarsi quuroti uythinne asho Eeliyaasas ehoosona; I shaafape haathe uyis.
1KI 17:7 Biittan iri bukonna gisho, guutha wodepe guye shaafay melis.
1KI 17:8 Hessafe guye, Godaa qaalay Eeliyaasako haysada yaagis;
1KI 17:9 “Ha bessaafe dendada, Sidoona matan de7iya Sarapta bada yan de7aasha. Heko, issi am7iya kathi nena muzana mela taani kiittas” yaagis.
1KI 17:10 Eeliyaasi dendidi Sarapta bidi katama pengiya gakiya wode, Heko, issi am7iya mithi mixawusu. Eeliyaasi maccasiw xeegidi, “Hayyana, taw haathe uyanaw bulera ekada ya” yaagis.
1KI 17:11 Maccasiya haathe ehanaw bishin I xeegidi, “Hayyana guutha baso uythika ekada ya” yaagis.
1KI 17:12 Maccasiya zaarada, “Goday, ne de7o Xoossay ero! Taw uythi baawa. Taw oton issi kuuca dhiilleynne guutha zayte xalaali xaaron de7ees. Taani haysa yiday guutha mithi mixada, soo simmada, hinno tawunne ta na7aas issi toho uukidi midi hayqana” yaagasu.
1KI 17:13 Eeliyaasi zaaridi, “Aykoy baawa, yayyofa; bada ne kathaa katha. Shin koyro ne dhiilliyafe guutha uythi laqada taw ekada ya; hessafe guye, newunne ne na7aas uuka.
1KI 17:14 Goday, Isra7eele Xoossay, ‘Sa7aa bolla iri bukana gakanaw dhiilley otuwape zaytey xaaruwape wurenna’ yaagees” yaagis.
1KI 17:15 Hessa gisho, maccasiya bada, Eeliyaasi gidaysada oothasu; hessada hanin, Eeliyaasi, maccasiyanne I soo asay daro wodes gidiya kathi demmidosona.
1KI 17:16 Goday Eeliyaasa baggara odida qaala naagidi, otuwape dhiilley xaaruwape zaytey wuribeenna.
1KI 17:17 Guutha wodepe guye he maccase na7ay hargis; hargey goobishe bin, wursethan na7ay hayqis.
1KI 17:18 Maccasiya Eeliyaasako, “Xoossa addiyaw, ne ta bolla haysada ayis oothadii? Ne ta nagaraa hassaysada ta na7aa wodhanaw yadii?” yaagasu.
1KI 17:19 Eeliyaasi, “Ne na7aa haa ekada ya” yaagis. Na7aa I ki7uwape ekidi, pude ba de7iya pooqiya efidi ba arsan zin7isis.
1KI 17:20 Yaatidi Godaako haysada yaagidi waassis; “Abeeti Godaw, ta Xoossaw, ha taani de7iya am7e na7aa wodhada, haysa mela meto I bolla ayis ehay?” yaagis.
1KI 17:21 Hessafe guye, na7aa bolla heedzu toho zaqullidi, “Abeeti Godaw, ta Xoossaw, ha na7aa patha” yaagidi woossis.
1KI 17:22 Goday Eeliyaasa woosa si7is. Na7aa shempoy simmin, na7ay paxis.
1KI 17:23 Eeliyaasi na7aa ekidi pooqiyape duge wodhis; na7aa aayes immidi, “Heko ne na7ay paxis” yaagis.
1KI 17:24 Maccasiya, “Neeni Xoossa asi gideysanne ne doonape keyiya Godaa qaalay tuma gideysa taani ha77i eras” yaagasu.
1KI 18:1 Iri bukonna aggin heedzantho laythan, Goday Eeliyaasako, “Bada kawa Akaabas qonca. Ta biittan ira bukisana” yaagis.
1KI 18:2 Eeliyaasi Akaabas qoncanaw dendidi bis. He wode Samaaren wolqaama koshi keyis.
1KI 18:3 Akaabi ba kawo gadhuwa aawatethan aysiya Abdiyu xeegis. Abdiyuy Godaa minthidi ammaniya asi.
1KI 18:4 Elzabeela Godaa sunthan nabeta wodhida wode Abdiyuy entafe xeetata ekidi, ishataman ishataman shaakidi, gongolo giddon qosidi, kathinne haathe immishe gam7is.
1KI 18:5 Akaabi Abdiyu xeegidi, “Maata demmidi paratanne baqulota hayqope ashshanaw biittan pultoy de7iya bessinne shaafa gaxan ubbaa ba” yaagis.
1KI 18:6 Enti biittan awu bagga baaneko shaaketidi ekin, Akaabi issi ogiya oykidi barka bis; Abdiyuy hara oge oykidi barka bis.
1KI 18:7 Abdiyuy ba ogiya oykidi bishin, Heko, Eeliyaasi iyara gahetis. Abdiyuy Eeliyaasa eridi ba som7uwan gufannidi, “Ta godaw Eeliyaasa, haysi nenee?” yaagis.
1KI 18:8 Eeliyaasi, “Ee tana; neeni bada, heko, Eeliyaasi haysan de7ees yaagada ne godaas oda” yaagis.
1KI 18:9 Abdiyuy zaaridi, “Ta nena ay qohin ne tana ne aylliya hayqo gada Akaaba kushen aathada immay?
1KI 18:10 Goday, ne de7o Xoossay ero! Ta goday nena koyana mela kiitiboonna biitti woyko kawotethi baawa. Enti, ‘Eeliyaasi haysan baawa’ giya wode ne yan baynaysi tuma gideysa eranaw Akaabi deriya ayseysata caaqisees.
1KI 18:11 Ha77i neeni, ‘Bada, Eeliyaasi haysan de7ees’ yaagada oda” yaagasa.
1KI 18:12 “Ta nena aggada biya wode Godaa Ayyaanay nena denthidi, ta eronna bessi efana. Ta Akaabas odin, I nena demmona ixiko, tana wodhana. Taani ne aylley na7atethafe doomada Godaa yayiya asi.
1KI 18:13 Elzabeela Godaa nabeta wodhida wode, taani entafe xeeta ekada, ishataman ishataman shaakada issi gongolon qosada, kathinne haathe immas. Yaatin, taani oothidabay new ta godaas odetibeennee?
1KI 18:14 Ha77i neeni, ‘Bada, heko, Eeliyaasi haysan de7ees’ yaagada oda yaagasa. Ta odiko I tana wodhana” yaagis.
1KI 18:15 Eeliyaasi, “Taani iyaw kiitetiya, Ubbaafe Wolqaama Goday ero! Tuma taani hachi Akaabas qoncana” yaagis.
1KI 18:16 Abdiyuy Akaabako bidi Akaabas odin, Akaabi Eeliyaasara gahetanaw bis.
1KI 18:17 Akaabi Eeliyaasa be7ida wode, “Isra7eele biitta buqey nenee?” yaagis.
1KI 18:18 Eeliyaasi zaaridi, “Isra7eele biitta buqey tana gidonashin, Godaa kiita aggidi, Ba7aale eeqata goyinnidi, biitta buqey nenanne ne aawa soo asaa.
1KI 18:19 Ha77i, Isra7eele asa ubbaa Qarmeloosa zuma bolla taako shiisha. Elzabeeli gibira miya oyddu xeetanne ishatamu Ba7aale nabetanne oyddu xeetu Asheera nabeta issife ha bessaa shiisha” yaagis.
1KI 18:20 Hessa gisho, Akaabi kiittidi, Isra7eele asa ubbaanne nabeta Qarmeloosa zuma bolla shiishis.
1KI 18:21 Eeliyaasi shiiqida asaako bidi, “Awude gakanaw nam7u wozanan daanee? Goday Xoosse gidiko iya goyinnite; Ba7aaley Xoosse gidiko iya goyinnite” yaagis. Gidoshin, asay iyaw issi qaalaka zaaribeenna.
1KI 18:22 Hessafe guye, Eeliyaasi, “Godaa nabetape ta xalaali attas; shin Ba7aale nabeti oyddu xeetanne ishatama.
1KI 18:23 Ane nuus nam7u kormata imeto. He kormatape issuwa enti dooro; kormaa shukidi qanxeretho; ashuwa mitha bolla wotho; shin tama eethofo. Taani nam7antho korma giigisada, mitha bolla wothana; taka tama eethike.
1KI 18:24 Hinte, hinte xoossaa sunthaa xeegite; taka Godaa sunthaa xeegana. Si7idi yarshuwa miya tama kiittiya xoossay, i, Xoosse gido” yaagis. Asay, “Ne giya qofay lo77o” yaagidosona.
1KI 18:25 Hessa gisho, Eeliyaasi Ba7aale nabetako, “Hinte daro gidiya gisho, issi korma dooridi koyrottidi giigisite. Hinte xoossaa sunthaa xeegite; shin iyan tama eethofite” yaagis.
1KI 18:26 Enti bantaw imetida kormaa ekidi giigisidosona. Wontafe seeta gallas gakanaw Ba7aale sunthaa xeegidi, “Ba7aale, nuna si7a” yaagidi woossidosona. Shin si7etiya girsi baawa; zaariya asi bentibeenna. Banta giigisida yarsho bessa yuushuwan duridosona.
1KI 18:27 Sa7i seeta gallasa gidin, Eeliyaasi, “Hinte qaala dhoqu oothidi woossite! I Xoosse gidenne! Ooni eri, I qofan gelidaako woyko iyaw oosoy daridaako woyko mandaridaako woyko dhiskidaba gidiko denthanaw koshshees” yaagidi qelqisis.
1KI 18:28 Enti banta qaala dhoqu oothidi woossidosona. Kase banta goyinniya wogaada banta asatethara suuthi goggana gakanaw tooraninne mashshan bantana caddidosona.
1KI 18:29 Omarsi yarsho shiishiya wodey gakanaw enti tinbite odidosona; shin si7etiya girsi baawa; entana hayzidi zaaro immiya asi dhayis.
1KI 18:30 Hessafe guye, Eeliyaasi, “Haa taako shiiqite” yaagis. Asay iyako shiiqin, laaletida Godaa yarsho bessaa zaaridi gimbis.
1KI 18:31 Godaa qaalay Yayqoobako, “Ne sunthay Isra7eele gidana” yaagidi odida, Yayqooba nayta kochata taybuwan tammanne nam7u shuchata ekis.
1KI 18:32 Godaa sunthan he shuchata keelidi, yarsho bessi gimbidi, tammanne oyddu litiro haathe oykiya olla yarsho bessa yuushon bookis.
1KI 18:33 Hessafe guye, yarsho bessan mithi wothidi, kormaa ashuwa iya qommuwan qommuwan qanxerethidi, mithaa bolla wothis. Asaako, “Oyddu baathe haathe kunthidi, yarshuwa bollanne mithaa bolla gussite” yaagis; enti gussidosona.
1KI 18:34 Qassika, Eeliyaasi, “Nam7antho gujite” yaagis; enti nam7antho gujidosona. Qassika, Eeliyaasi, “Heedzantho gujite” yaagis; heedzantho gujidosona.
1KI 18:35 Haathay yarsho bessa yuushuwan goggidi, ollan kumis.
1KI 18:36 Omarsa yarsho shiishiya wode nabey Eeliyaasi yarsho bessaako shiiqidi haysada yaagidi woossis; “Abeeti Godaw, Abrahaame Xoossaw, Yisaaqa Xoossaw, Isra7eele Xoossaw, neeni Isra7eele biittan Xoosse gideysa, taani ne aylle gideysanne taani haysa ubbaa ne qaalan oothidaysi hachi ereto.
1KI 18:37 Abeeti Godaw, taw koya. Neeni, Goday Xoosse gideysanne enta wozanaa neeko zaarey nena gideysa ha asay erana mela taw koya!” yaagis.
1KI 18:38 Godaa tamay salope wodhidi, xuussa yarshuwa, mithaa, shuchaanne biitta mis; ollan de7iya haatha laacis.
1KI 18:39 Asa ubbay hessa be7ida wode, banta som7ora sa7an gufannidi, “Goday Xoosse! Godaa xalaali Xoosse!” yaagidosona.
1KI 18:40 Eeliyaasi, “Ba7aale nabeta oykite; entafe issi asika kessi ekofo” yaagis. Asay enta oykidosona; Eeliyaasi enta Qisoona Shaafa efidi wodhis.
1KI 18:41 Eeliyaasi Akaabako, “Keyada ba; ma; uya; taani, wolqaama ira guunthi si7ayis” yaagis.
1KI 18:42 Hessa gisho, Akaabi maanawunne uyanaw bis. Shin Eeliyaasi Qarmeloosa zuma bolla keyidi, ba som7uwa ba gulbata giddo gelsidi hokis.
1KI 18:43 Eeliyaasi ba aylliyako, “Ane bada, abbaako simmada xeella” yaagis. Iya aylley bidi xeellidi, “Aybika bentenna” yaagis. Eeliyaasi ba aylliya laapun toho, “Qassika bada xeella” yaagis. Iya aylley laapun toho xeellis.
1KI 18:44 Laapunthon, “Kushe qaaqape daronna guutha shaari abbafe keyishin be7as” yaagis. Eeliyaasi, “Bada, ‘iri nena buussu diggonna mela ne para gaariyan uttada ne soo ba’ yaagada Akaabas oda” yaagis.
1KI 18:45 Guutha wodepe guye saloy kareetha shaaran dulkis; carkoy carkis; wolqaama iri bukis. Akaabi para gaariyan uttidi Izra7eela katamaa bis.
1KI 18:46 Godaa wolqay Eeliyaasa bolla wodhis. Eeliyaasi ba ma7uwa xeessan pude siqidi, Izra7eela katamaa gakanaw Akaaba sinthan woxis.
1KI 19:1 Eeliyaasi oothidaba ubbaanne Ba7aale nabeta ubbaa mashshan wodhidaysa Akaabi Elzabeelis odis.
1KI 19:2 Elzabeela, “Neeni he nabeta bolla oothidaysada wonto hannoode taani ne bolla oothonna ixiko, xoossati tana pirdo” yaagada Eeliyaasako kiittasu.
1KI 19:3 Eeliyaasi ba shempuwas yayyidi, ba aylliya ekidi, Yihuda biittan de7iya Barsaabe bis.
1KI 19:4 Issi gallasa oge mela biittan hemetis. I hemethaa aggidi issi sankara kuya garsan uttidi, “Abeeti Godaw, taw gidana; taani ta mayzatape aadhidike; ta shempuwa eka” yaagidi hayqo woossis.
1KI 19:5 Hessafe guye, sankara kuya garsan zaqullidi dhiskis. I dhiskidashin, Heko, issi kiitanchoy iya bochidi, “Denda; ma” yaagis.
1KI 19:6 I dendidi xeelliya wode, Heko, shucha mishan uuketidi, kaxida uythinne oto haathi iya huupheson be7is. I midi uyidaape guye simmidi dhiskis.
1KI 19:7 Godaa kiitanchoy nam7antho yidi, “Eeliyaasa, neeni baana ogey daro adusse gidiya gisho, dendada ma” yaagis.
1KI 19:8 Eeliyaasi dendidi mis, uyis. He I mida kathaa wolqan Xoossa Zumaa Koreeba gakanaw oytamu gallasinne oytamu qamma hemetis.
1KI 19:9 I yaa gakidi, gongolo giddo gelidi aqis. Goday, “Eeliyaasa, haysan ay oothay?” giya Xoossa qaalay iyako yis.
1KI 19:10 Eeliyaasi, “Ubbaafe Wolqaama Godaa Xoossaas taani daro mishetas. Isra7eele asay neera caaqida caaquwa menthis; ne yarsho bessa laallidosona; ne nabeta mashshan wodhidosona. Taani tarka attas; ha77i enti ta shempuwa wodhanaw koyoosona” yaagis.
1KI 19:11 Goday, “Haysafe keyada deriya huuphen ta sinthan eqa” yaagis. Eeliyaasi eqidashin, Heko, Goday iya matara aadhis. He wode wolqaama carkoy zumaa phalqerethis; zaallata tincherethis; shin Goday he carkuwa giddon baawa. Carkuwafe guye biitti qaaxis; shin Goday he biitta qaaxuwan baawa.
1KI 19:12 Biitta qaaxuwape guye tami keyis; shin Goday tama giddon baawa. Tamape guye kalkashi si7etis.
1KI 19:13 Eeliyaasi he kalkashaa si7ida wode ba som7uwa afilan kammidi, kare keyidi gongoluwa pengen eqis. Heko, issi girsi Eeliyaasako, “Eeliyaasa, haysan ay oothay?” yaagis.
1KI 19:14 Eeliyaasi, “Ubbaafe Wolqaama Godaa Xoossaas taani mishetas. Isra7eele asay neera caaqida caaquwa menthidosona; ne yarsho bessa laallidosona; ne nabeta mashshan wodhidosona. Taani tarka attas; enti ta shempuwa ekanaw koyoosona” yaagis.
1KI 19:15 Goday iyako, “Neeni yida ogiyara guye simmada Damasqo mela biitta ba. Neeni yaa gakiya wode Azaheela, Soore bolla kawo oothada tiya.
1KI 19:16 Namisa na7aa, Iyyu Isra7eele bolla kawo oothada tiya. Ne bessan nabe oothada Abeel-Mahoola addiya Safaaxa na7aa Elsa tiya.
1KI 19:17 Azaheela mashshafe kessi ekiya ubbaa Iyyuy wodhana; Iyyu mashshafe kessi ekiya ubbaa Elsi wodhana.
1KI 19:18 Shin Ba7aale eeqa goyinnona woyko banta doonan Ba7aale eeqa yeeronna 7,000 asaa taani Isra7eelen taw ashshana” yaagis.
1KI 19:19 Eeliyaasi he bessaafe dendidi bishe Safaaxa na7ay Elsi tammanne nam7u waaxa booran gade goyishin demmis; Elsi tammanne nam7antho waaxan goyees. Eeliyaasi iya matara aadhishe ba afila iya bolla yeggis.
1KI 19:20 Elsi boorata essidi, Eeliyaasa geedo woxi bidi, “Taani ta aawanne ta aayiw yeera sarothada yaana; yaape simmada nena kaallana” yaagis. Eeliyaasi, “Ero ba; ta nena diggike” yaagis.
1KI 19:21 Hessa gisho, Elsi guye simmidi waatha boorata shukis; boora miishiya qeridi ashuwa kathidi, asaas aathin asay midosona. Hessafe guye, dendi bidi, Eeliyaasas kiitetis.
1KI 20:1 Soore kawoy Ben-Hadaadi ba olanchota ubbaa shiishis. Hastamanne nam7u kawotan, enta parataninne para gaaretan maadetidi, Samaare katamaa teqidi; iya olis.
1KI 20:2 Isra7eele kawa Akaabako ase kiittidi haysada yaagis;
1KI 20:3 “Ne biraynne ne worqay tabaa; ne machetinne ne naytape lo77oti tabaa” yaagis.
1KI 20:4 Isra7eele kawoy zaaridi, “Ee, ta godaw kawaw, ne gidaysa mela; taka taw de7iyaba ubbay nebaa” yaagis.
1KI 20:5 Qassika, kiitetida asati nam7antho bidi, “Ben-Hadaadi haysada yaagees; ‘Ne biraanne ne worqaa, ne machetanne ne nayta taw sheedha’ gada kiittas.
1KI 20:6 Shin wonto hannoode ne kawo gadhuwanne ne moorinnata keethaa pilgana mela ta oosanchota yeddana. Enti ne lo77oba gada wothidaba ubbaa efana” yaagidosona.
1KI 20:7 Isra7eele kawoy biitta cimata ubbaa shiishidi, “Ha addey nuna dhaysanaw koyeysa be7ite. I ta machetanne ta nayta, ta biraanne ta worqaa ekanaw kiittin, ta ixabike” yaagis.
1KI 20:8 Cimatinne asa ubbay, “I odiyaba si7opa! Woyko iyaw ero goopa” yaagidosona.
1KI 20:9 Hessa gisho, Akaabi Ben-Hadaadi kiitida asatako, “Hinte ta godaa kawa, ‘Neeni koyro kiitida kiitaa ta polana; shin ha nam7antho kiita polanaw danda7ike’ yaagees gidi odite” yaagis. Kiitetida asati bidi hessa Ben-Hadaadas odidosona.
1KI 20:10 Ben-Hadaadi, “Tana kaalliya asaas Samaare kataman issi kuuca biitti gakiko xoossati tana pirdo” yaagis.
1KI 20:11 Isra7eele kawoy kiitetidi yidaysatako, “ ‘Tuma olanchoy olape simmishe gayresipe attishin, buroo bishe gayrenna’ yaagidi odite” yaagis.
1KI 20:12 Ben-Hadaadinne kawoti, banta dunkaaniya giddon ushshu uyishe hessa si7ida wode kawoy ba olanchotako, “Olanaw salpite” yaagidi kiittin, enti katamaa olanaw salpidosona.
1KI 20:13 Heko, issi nabey Isra7eele kawa Akaabako, “Goday ‘Ha daro olanchota ubbaa be7a? Taani hachi enta ne kushen aathada immana; ta Godaa gideysa neeni he wode erana’ yaagees” yaagis.
1KI 20:14 Akaabi, “Olaa doomanay oonee?” yaagis. Nabey, “Awuraja haareysati kiittiya na7atetha olanchoti doomo” yaagis. Kawoy, “Attiya olanchota ooni kiittanee?” yaagis. Nabey, “Neeni kiitta” yaagis.
1KI 20:15 Hessa gisho, Akaabi awuraja haareysati kiittiya na7atetha olanchota, 232 shiishis. Qassi 7,000 attida Isra7eele asaa shiishis.
1KI 20:16 Ben-Hadaadi bana maaddida hastamanne nam7u kawotara issife dunkaaniyan uttidi ushshan mathotidashin, seeta gallas Isra7eele olanchoti olas keyidosona.
1KI 20:17 Awuraja haareysati kiittiya na7atetha olanchoti koyro keyidi bidosona. Ben-Hadaadi xomoosana mela kiitida asati, “Samaarepe asay keyidi yuussaa bolla de7ees” yaagidi odis.
1KI 20:18 Ben-Hadaadi, “Enti sigetanaw yin, woyko oletanaw yin, enta paxa oykite” yaagis.
1KI 20:19 Awuraja haareysati kiittiya na7atetha olanchoti salpidi, katamaape gaxa keyidosona; Isra7eele olanchoti enta kaallidi keyidosona.
1KI 20:20 Issoy issoy baara ola gahetida morkiya wodhidosona. Soore asay baqatin, Isra7eele asati kaallidi yedethidosona. Qassi Soore Kawoy Ben-Hadaadi ba para asatara ba paran kessi ekidi bis.
1KI 20:21 Isra7eele kawoy olas keyidi, paratanne para gaareta di77is; Soore asaaka wodho buthis.
1KI 20:22 Hessafe guye, nabey Isra7eele kawako bidi, “Bada nena mintha. Oothanaw bessiyaba akeekada ootha. Wonto laythi bone Soore kawoy nena nam7antho olanaw yaana” yaagis.
1KI 20:23 Soore kawa moorinnati iya haysada yaagidi zoridosona; “Enta xoossati dere xoossata; enti nuna xooniday hessa gishosa. Shin nu entara denban oletiyako tuma nu enta xoonana.
1KI 20:24 Neeni issiba ootha; hastamanne nam7u kawota kiittiya halaqatethafe denthada enta bessan hara halaqata shuuma.
1KI 20:25 Nuuni Isra7eeletara denban oletidi xoonanaw danda7ana mela new kase wurida olanchota bessan olanchota, parata bessan parata, para gaareta bessan para gaareta wothada giigisa” yaagidosona. Kawoy Ben-Hadaadi enta zoriya ekidi hessada oothis.
1KI 20:26 Kaalliya laythi bone Ben-Hadaadi Soore olanchota shiishidi, Isra7eeletara oletanaw Afeeqa bis.
1KI 20:27 Isra7eele olanchoti shiiqidi, shinqenne ola miishe ekidi, entara oletanaw nam7u cuga gididi keyidosona. Isra7eeleti nam7u guutha deesha wude daanidi, entako simmidi uttidosona; shin Sooreti gaxariya ubbaa ma7idosona.
1KI 20:28 Issi Xoossa nabey Isra7eele kawako bidi, “Goday haysada yaagees; ‘Soore asay, Xoossay dere Xoossefe attishin, demba Xoossi gidenna yaagida gisho, ha daro olanchota taani ne kushen aathada immana. He wode taani Godaa gideysa neeninne ne asay erana’ ” yaagis.
1KI 20:29 Sooretinne Isra7eeleti woliko simmi salpidi, laapun gallas takidosona. Laapuntha gallasan ola gahetidosona. Isra7eeleti issi gallasan Soore asaape 100,000 toho asaa wodhidosona.
1KI 20:30 Entafe attidaysati kessi ekidi, Afeeqa katamaa gelidosona. Gelidaysatape 27,000 asaa bolla katamaa dirsa gimbey kundidi wodhis. Ben-Hadaadi katamaa giddo baqatidi, issi keetha qol7an qosetis.
1KI 20:31 Iya moorinnati, “Heko, Isra7eele kawoti, maariya kawota gideysa nu si7ida. Nuuni kayo ma7o ma7idi, nu xeessan wodoro dancidi, Isra7eele kawako boos; ooni eri, I nena paxa ashshona aggenna” yaagidosona.
1KI 20:32 Enti kayo ma7o ma7idi, wodoro banta xeessan dancidi, Isra7eele kawako bidosona. Iyako “Ne aylley Benihadad, tana wodhopa yaagidi woossees” yaagidosona. Kawoy, “I hanno gakanaw paxa de7ii? I ta ishaa” yaagis.
1KI 20:33 Akaabi lo77o malla haasaya daanin, asati iya odaa ellesi ekidi, “Ee, ne ishay Benihadad paxa de7ees” yaagidosona. I entako, “Bidi iya haa ekidi yiite” yaagis. Benihadad yin, Akaabi iya ba para gaariya bolla kessidi utisis.
1KI 20:34 Benihadad Akaabako, “Ta aaway ne aawape ekida katamata ta new zaarana. Ta aaway Samaaren giya essidaysada neka Damasqon giya essa” yaagis. Akaabi zaaridi, “Taani ha caaquwa gaasoyada nena yeddana” yaagis. Iyara caaqidi iya yeddis.
1KI 20:35 Nabeta cugaape issi addey, Goday kiittin, issi ba lagge nabiyako, “Tana shoca” yaagis; shin he nabey shoconna ixis.
1KI 20:36 He nabey iyako, “Neeni Godaa kiitaa ixida gisho, Heko, ne taape shaaketada biya wode nena gaammoy wodhana” yaagis. Nabey iyape shaaketidi biya wode gaammoy keyidi iya wodhis.
1KI 20:37 Nabey hara issi adde demmidi, “Tana shoca” yaagis. Addey iya shocin, nabey madunxis.
1KI 20:38 Nabey iya oonatethay eretonna mela guuluntidi kawa naagishe oge doonan eqis.
1KI 20:39 Kawoy aadhiya wode, nabey kawa xeegidi, “Taani ne aylley olan de7ishin, Heko, issi addey taako yidi, ‘Ha di7etida addiya naaga. Ha addey dhayiyaba gidiko, ne shempoy iya shempuwara gade woyko 3,000 bira santime qanxaasa’ yaagis.
1KI 20:40 Taani ne aylley oosoy darin, yaa haa gishin, addey kessi ekidi dhayis” yaagis. Isra7eele kawoy, “Neeni ne bolla pirdadasa” yaagis.
1KI 20:41 Nabey ba guulunthaa qaari yeggiya wode nabetape issuwa gideysa kawoy eris.
1KI 20:42 Nabey kawako, “Goday, ‘Taani, I hayqanaw bessees yaagida addiya ne yeddida gisho, ne shempoy iya shempuwa bessan, ne asay iya asaa bessan gidana’ ” yaagis.
1KI 20:43 Isra7eele kawoy yilotishenne azzanishe Samaaren de7iya ba gadho simmis.
1KI 21:1 Samaare Kawa Akaaba gadho matan Naabutes Izira7eelen woyne gadey de7ees.
1KI 21:2 Akaabi Naabuteko, “Ta gadhuwa matan de7iya gisho, ta atakilte tokiya bessi oothanaw ne woyne gadiya taw imma. Iya gisho new ta hara lo77o woyne gade immana; woyko ne dosiko iya gatiya ta new qanxana” yaagis.
1KI 21:3 Naabutey zaaridi, “Taani ta aawatape laattida gade new imisiyabaape Goday tana asho” yaagis.
1KI 21:4 Izira7eele addey Naabutey, “Taani ta aawatape laattida gade new immike” gida gisho, Akaabi yilotishenne azzanishe ba soo bidi, godaako simmi zin7idi, kathika moonna ixis.
1KI 21:5 Iya machiya Elzabeela iyako gelada, “Nena haysada yiloyiday aybee? Ayis kathi moonna ixay?” yaagada oychasu.
1KI 21:6 Akaabi, “Izira7eele addey Naabutey, ‘Ne woyne gadiya taw bayza woyko ne dosiko iya gisho ta new hara woyne gade immana’ yaagin, I, ‘Ta woyne gadiya new immike’ yaagin, ta hessa gisho yilotis” yaagis.
1KI 21:7 Elzabeela, “Ne Isra7eele bolla kawo gida uttada haysada hanay? Dendada ma! Wozanape ufayta! Izira7eele addiya Naabute woyne gadiya taani new imisana” yaagasu.
1KI 21:8 Hessa gisho, iya Akaaba sunthan dabdaabe xaafada, iya bolla maatame wothasu. Naabutera issife kataman de7iya cimatasinne gita asatas kiittasu.
1KI 21:9 Dabdaabe haysada yaagada xaafasu; “Issi gallas xooma awaajite; asaa issife shiishite; Naabute boncho bessan utisite.
1KI 21:10 Naabutey, ‘Xoossaanne kawa cayis’ yaagidi markatiya nam7u markata shiishidi, markatanaada oothite. Hessafe guye, katamaape gaxa kessidi, shuchan caddidi wodhite” yaagada xaafasu.
1KI 21:11 Hessa gisho, Naabutera issife kataman de7iya cimatinne gita asati Elzabeela entaw xaafida dabdaabiyan gidaysada oothidosona.
1KI 21:12 Enti xooma awaajidi, Naabute asaa giddon boncho bessan utisidosona.
1KI 21:13 Nam7u wordo markati yidi, iyako simmi uttidi, asaa sinthan, “Naabutey Xoossaanne kawa cayis” yaagidi wordo markatidosona. Naabute katamaape gaxa kessidi, shuchan caddidi wodhidosona.
1KI 21:14 Cimati Elzabeeliko, “Naabutey shuchan cadetidi hayqis” yaagidi kiittidosona.
1KI 21:15 Naabutey shuchan cadetidi hayqidaysa Elzabeela si7ida wode, “Izira7eele addiya Naabutey new miishen bayzanaw ixida woyne gadiya bada eka. I ha77i hayqis” yaagasu.
1KI 21:16 Izira7eele addey Naabutey hayqidaysa Akaabi si7idi, Naabute woyne gadiya baw ekanaw dendidi bis.
1KI 21:17 Hessafe guye, Tesiba addiya Eeliyaasako Godaa qaalay yidi,
1KI 21:18 “Samaaren kawotida Isra7eele Kawa Akaabara gahetanaw ba. Heko, I Naabute woyne gadiya ekanaw bidi, yan de7ees.
1KI 21:19 Goday haysada yaagees gada iyaw oda; ‘Addiya wodhada iya gadiya new ekadasa gidikii?’ yaaga. Qassi Goday, ‘Naabute suutha kanati laaccida bessan ne suuthaaka kanati laaccana’ ” yaagis.
1KI 21:20 Akaabi Eeliyaasa be7ida wode, “Ta morkiyaw, tana demmadii?” yaagis. Eeliyaasi, “Ee, nena demmas. Neeni Godaa sinthan iitabaa oothanaw nena nagaras bayzadasa.
1KI 21:21 Goday neeko haysada yaagees; ‘Heko, taani ne bolla iitabaa ehana. Taani ne kochata dhaysana; taani Isra7eele biittan Akaaba soo asaape aylle gidin womaanno gidin, issi addey attonna dhaysana.
1KI 21:22 Neeni Isra7eele asaa nagara oosisada tana hanqethida gisho, ta ne soo asaa Nabaaxa na7aa Iyorbaama soo asaadanne Akiya na7aa Ba7oosa soo asaada oothana.’
1KI 21:23 Qassi Goday Elzabeeliba odishe, ‘Izira7eele katama gimbe dirsaa lanqen kanati Elzabeelo maana’ yaagees.
1KI 21:24 Akaaba koche gididi kataman hayqiya oonaka kani maana; gaxariyan hayqiya oonaka salo kafoti maana” yaagis.
1KI 21:25 Ba machiya Elzabeela denthethin, Godaa sinthan iitabaa oothanaw bana nagaras bayzida Akaaba mela asi baawa.
1KI 21:26 Akaabi, Goday Isra7eele asaa sinthafe gooddidi kessida Amooreta eeqa goyinnidi daro ixetidaba hanis.
1KI 21:27 Akaabi hessa si7ida wode ba ma7uwa daakidi, kayo ma7o ma7idi xoomis. Kayo ma7o ma7idi dhiskees; azzanishe hemetees.
1KI 21:28 Hessafe guye Godaa qaalay Tesiba addiya Eeliyaasako yidi,
1KI 21:29 “Akaabi bana ta sinthan waatidi kawushidaako be7adii? I ta sinthan bana kawushida gisho, taani dhayuwa iya wode ehike. Shin taani iya na7aa woden iya soo asaa bolla ha dhayuwa ehana” yaagis.
1KI 22:1 Sooreynne Isra7eeley oletonna heedzu laythi saro de7idosona.
1KI 22:2 Heedzantho laythan, Yihuda kawoy Iyosaafexi Isra7eele kawa be7anaw bis.
1KI 22:3 Isra7eele kawoy ba moorinnatako, “Galadan de7iya Raamota katamay nubaa gideysanne nuuni hanno gakanaw he katamaa Soore kawuwape ekanaw aykoka oothonaysa ereketii?” yaagis.
1KI 22:4 I, Iyosaafexa, “Galadan de7iya Raamota katamaa olanaw taara baanee?” yaagidi oychis. Iyosaafexi zaaridi, “Ee, neeni olaa baanaw giigiya wode ta neera baana. Ta olanchoti ne olanchota; ta parati ne parata” yaagis.
1KI 22:5 Qassi, Iyosaafexi Isra7eele kawa, “Gidoshin, sinthatada Godaa oycha” yaagis.
1KI 22:6 Isra7eele kawoy oyddu xeetu nabeta issife shiishidi, “Galadan de7iya Raamota katama olanaw booye boopo” yaagidi oychis. Enti, “Ba; Goday he katamaa kawa kushen aathidi immana” yaagidosona.
1KI 22:7 Shin Iyosaafexi, “Nuuni Godaa oychanaw danda7iya hara nabey haysan baawee?” yaagis.
1KI 22:8 Isra7eele kawoy zaaridi, “Nuuni iya baggara Godaa oychanaw danda7iya issi addey de7ees. I, Yimila na7aa Mikiyaasa. Shin I ubba wode tabaa iitabaape attishin, lo77oba odonna gisho ta iya ixayis.” Iyosaafexi, “Kawoy hessa goopo!” yaagis.
1KI 22:9 Hessa gisho, Isra7eele kawoy ba moorinatape issuwa xeegidi, “Yimila na7aa Mikiyaasa elle ekada ya” yaagis.
1KI 22:10 Isra7eele kawoynne Yihuda kawoy Iyosaafexi banta kawotetha ma7uwa ma7idi, Samaare katamaa geliya pengiya matan de7iya wudumman banta kawotetha araatan uttidosona; nabeti ubbay enta sinthan tinbite odoosona.
1KI 22:11 Entafe issoy, Kanaane na7ay Sedeqiyaasi birata kaceta giigisidi, “Goday haysada yaagees; ‘Sooreti dhayana gakanaw ne enta ha kacetan qaycana’ ” yaagis.
1KI 22:12 Hara nabeti ubbay, “Galadan de7iya Raamota katamaa bada ola; xoona. Goday he katamaa, kawa kushen aathidi immana” yaagidi odidosona.
1KI 22:13 Mikiyaasa xeeganaw kiitetidi bida addey, “Heko, nabeti ubbay issi doona gididi, ‘Kawoy ha olaa xoonana’ yaagidi odidosona. Hessa gisho, hayyana ne odayka entaysa mela gido; ne lo77oba oda” yaagis.
1KI 22:14 Shin Mikiyaasi, “Goday eriya mela, Goday taw odiyaba ta odana” yaagis.
1KI 22:15 Mikiyaasi kawako yida wode, kawoy, “Mikiyaasa, nu Galadan de7iya Raamota katamaa olanaw biino boopo” yaagidi oychis. Mikiyaasi, “Bada ola; ne xoonana. Goday he katama kawa kushen aathidi immana” yaagis.
1KI 22:16 Kawoy, “Ne Godaa sunthan taw tuma odana mela ta nena aapun toho caaqetho?” yaagis.
1KI 22:17 Mikiyaasi, “Isra7eele olanchoti ubbay henthanchoy bayna dorsada deriya bolla laaletidaysa ta be7as. Goday, ‘Haysatas godi baawa. Enti ubbay banta soo soo saro boo’ ” yaagis.
1KI 22:18 Isra7eele kawoy Iyosaafexako, “I tabaa iitabaa odeesipe attishin, lo77oba odi erenna gada, ta new odabikina?” yaagis.
1KI 22:19 Mikiyaasi gujidi, “Hiza Goday giyaba si7a! Goday ba araatan uttin, salo kiitanchoti ubbay iya ushachaninne haddirsan eqidashin be7as.
1KI 22:20 Goday, ‘Akaabi Galadan de7iya Raamota katamaa bidi, yan hayqana mela balethanay oonee?’ yaagis. Issoy haysada giya wode hankoy qassi hessada gees.
1KI 22:21 Wursethan issi ayyaani keyidi Godaa sinthan eqidi, ‘Ta iya balethana’ ” yaagis.
1KI 22:22 Goday, “Ne waata balethanee?” yaagis. Ayyaanay, “Ta bada, iya nabeta ubbaa doonan wordo ayyaana gidana” yaagis. Goday, “Ne iya balethana; new hessi hanana. Bada baletha” yaagis.
1KI 22:23 Mikiyaasi gujidika, “Heko, Goday ne bolla dhayo ehanaw qachida gisho ne nabeta ubbaa doonan wordo ayyaana wothis” yaagis.
1KI 22:24 Hessafe guye, Kenaana na7ay Sedeqiyaasi shiiqidi, Mikiyaasa baqidi, “Godaa Ayyaanay tana aggidi waanidi new odanaw bidee?” yaagis.
1KI 22:25 Mikiyaasi, “Heko, neeni qosetanaw qol7a geliya gallas hessa demmana” yaagis.
1KI 22:26 Isra7eele kawoy ba olanchotape issuwa, “Mikiyaasa oykada katama haariya Amoonesinne ta na7aa Iyo7aasas efada imma.
1KI 22:27 Kawoy simmana gakanaw ha addiya qasho keethan wothite. Taani saro simmana gakanaw, guutha uythafenne haathaafe haraba aykoka iyaw immopite” yaagis.
1KI 22:28 Mikiyaasi, “Tuma ne saro simmiyaba gidiko, Goday taw odibeenna” yaagis. Qassika, Mikiyaasi, “Asa ubbay ta odidaysa akeekite” yaagis.
1KI 22:29 Hessafe guye, Isra7eele kawoynne Yihuda kawoy Iyosaafexi Galadan de7iya Raamota katamaa bidosona.
1KI 22:30 Isra7eele kawoy Iyosaafexi, “Ta ma7uwa laammada, hara asi daanada olaa gelana; shin neeni ne kawo ma7uwa ma7a” yaagis. Isra7eele kawoy ma7uwa laammidi, hara asi daanidi olaa gelis.
1KI 22:31 Soore kawoy ba para gaareta kiittiya hastamanne nam7u asatako, “Kawa xalaali attishin, hara ooderaka oletofite” yaagidi kiittis.
1KI 22:32 Para gaariya kiitteysati Iyosaafexa be7ida wode, “Tuma haysi Isra7eele kawa” yaagidosona. Iyara oletanaw simmin Iyosaafexi waassis.
1KI 22:33 Para gaareta kiitteysati, I Isra7eele kawa gidonnaysa be7idi, iya yedetheysa aggaagidosona.
1KI 22:34 Gidoshin, issi addey coo ba dongiya bolla dukidi, Isra7eele kawa olaa ma7oy gahetiya bessaara caddin, Isra7eele kawoy ba gaariya laagiya addiyako, “Gaariya guye zaarada, tana olaa giddofe kessa; taani iita cache cadetas” yaagis.
1KI 22:35 He gallas olay goobiya wode, Isra7eele kawoy Akaabi ba para gaariya giddon zempidi, Sooreta sinthan takis. Iya suuthay para gaariya giddo gukin, I omarsi hayqis.
1KI 22:36 Away wullanaw matishin, “Asa ubbay ba katamaa katamaa boo! Asa ubbay ba biitta biitta boo!” giya kiiti si7etis.
1KI 22:37 Enti kawa Samaare katamaa efidi yan moogidosona.
1KI 22:38 Layma maccasati meecetiya, teqetidi uttida Samaare haathan gaariya meeccidosona. Goday kase odida qaalada iya suuthaa kanati laacidosona.
1KI 22:39 Akaabi hanida harabay, I oothidaba ubbay, dangarsa zaalen kawo gadho keexidabaanne gimbida katamatabay ubbay Isra7eele kawota Taarike Maxaafan xaafetis.
1KI 22:40 Akaabi hayqidi ba mayzatan gahetis; iya bessan iya na7ay Akaziyaasi kawotis.
1KI 22:41 Isra7eele kawoy Akaabi kawotida oyddantho laythan Asa na7ay Iyosaafexi Yihudan kawotis.
1KI 22:42 I kawotiya wode laythi iyaw hastamanne ichasha; I Yerusalaamen laatamanne ichashu laythi kawotis. Iya aayiya Shiliha na7iw Azuubo.
1KI 22:43 Iyosaafexi ba aawa Asa ogiyan hemetis; I he ogiyape gede haa gibeenna; Godaa sinthan suureba oothis. Gidoshin, dhoqa goyinno bessata dhaysibeenna; asay he bessan yarshonne ixaane cuyisethi aggibeenna.
1KI 22:44 Iyosaafexi Isra7eele kawuwara sigetis.
1KI 22:45 Iyosaafexi hanida harabay, iya minotethaynne I oletida olay Yihuda kawota Taarike Maxaafan xaafetis.
1KI 22:46 Iya aaway Asi kawotida wodiyape doomin, attida addera addera laymateyisata biittafe diggis.
1KI 22:47 He wode Edoome biittan kawoy baawa; he biittan shuumetida halaqi haaris.
1KI 22:48 Ofira biittafe worqa ehana mela Iyosaafexi gita markabeta oosisis; shin he markabeti Exiyoon-Gabiran meqeretidosonape attishin, kumthi bibookona.
1KI 22:49 He wode Akaaba na7ay Akaziyaasi, “Ta oosanchoti ne oosanchotara issife markabiyan boo” yaagis; shin Iyosaafexi ixis.
1KI 22:50 Iyosaafexi hayqidi ba mayzatan gahetis. Ba mayza Dawita Kataman moogetis. Iya bessan iya na7ay Iyoraami kawotis.
1KI 22:51 Yihuda kawoy Iyosaafexi kawotida tammanne laapuntho laythan, Akaaba na7ay Akaziyaasi Isra7eele bolla Samaaren kawotis; Isra7eele bolla nam7u laythi kawotis.
1KI 22:52 Akaziyaasi Godaa sinthan iitabaa oothis; ba aawanne ba aaye ogiyaninne Isra7eele asa nagara oosisida, Nabaaxa na7aa Iyorbaama ogiyan hemetis.
1KI 22:53 Akaziyaasi Ba7aale eeqas oothis; iya goyinnis. Iya aaway kase oothidaysada, Godaa Isra7eele Xoossaa hanqethis.
2KI 1:1 Akaabi hayqidaape guye, Moo7abe asay Isra7eele bolla dendidosona.
2KI 1:2 He wode kawoy Akaziyaasi Samaare katama bolla de7iya pooqiya barandaafe kundidi deshetis. Hessa gisho, asatako, “Bidi, taani ha hargiyafe paxaneko paxonnaako Eqroona xoossaa Bi7eel-Zebuula ane oychite” yaagidi kiittis.
2KI 1:3 Shin Godaa kiitanchoy Tesiba addiya Eeliyaasa haysada yaagis; “Pude bada, Samaare kawoy kiitida asatara gahetada, ‘Hinte Eqroona xoossaa Bi7eel-Zebuula oychanaw biday, Isra7eelen Xoossi dhayineyee?’
2KI 1:4 Goday haysada yaagees; ‘Kawaw, neeni hayqanaape attishin, ha zin7ida hiixape dendaka’ yaagees” yaaga. Hessa gisho, Eeliyaasi bidi entaw odis.
2KI 1:5 Kiitetida asati kawako guye simmin, “Ayis simmidetii?” yaagidi enta oychis.
2KI 1:6 Enti, “Issi addey nuura gahetanaw yidi, hintena kiitida kawako simmidi, haysada yaagidi odite. Goday neeko, ‘Eqroona xoossa Bi7eel-Zebuula oychanaw neeni ase kiittey, Isra7eelen xoossi dhayneyee? Hessa gisho, neeni hayqanaape attishin, ha zin7ida hiixape dendaka’ yaagees” yaagidosona.
2KI 1:7 Kawoy, “Hintera gahetanaw yidi, haysa hintew odida addey ay mela asee?” yaagidi oychis.
2KI 1:8 Enti, “Ikisepe oosetida ma7o ma7idi, ba xeessan dafo dancees” yaagidi zaaridosona. Kawoy, “Hessi Tesiba addiya Eeliyaasa” yaagis.
2KI 1:9 Hessafe guye, kawoy issi toora mocona ishatamu wotaadaretara kiittis. Toora moconay dere huuphen uttida Eeliyaasako keyidi, “Xoossa aso, kawoy nena, duge wodhada haaya” yaagees.
2KI 1:10 Shin Eeliyaasi toora moconaako, “Taani Xoossaa asi gidiko, tami salope wodhidi, nenanne ne wotaadareta mo” yaagidi zaaris. Tami salope wodhidi, iyanne iya wotaadareta mis.
2KI 1:11 Kawoy hara toora mocona ishatamu wotaadaretara Eeliyaasako kiittis. Tora moconay Eeliyaasako, “Xoossa aso, kawoy nena duge wodhada haaya” yaagees.
2KI 1:12 Eeliyaasi, “Taani Xoossaa asi gidiko, tami salope wodhidi, nenanne ne wotaadareta mo” yaagis. Xoossa tami salope wodhidi, iyanne iya wotaadareta mis.
2KI 1:13 Kawoy heedzantho hara tora mocona ishatamu wotaadaretara Eeliyaasako kiittis. tora moconay Eeliyaasako bidi, iya sinthan gulbatidi, “Xoossa aso, hayyana tawunne taara de7iya asaas qadheta; nu shempuwa hayqope ashsha.
2KI 1:14 Heko, tami salope wodhidi, kase nam7u toora moconatanne enta wotaadareta mis. Shin ha77i taw qadheta!” yaagidi woossis.
2KI 1:15 Godaa kiitanchoy Eeliyaasako, “Yayyofa! Iyara duge wodha” yaagis. Eeliyaasi dendidi, iyara kawako duge bis.
2KI 1:16 “Goday haysada yaagees; ‘Isra7eelen Xoossi dhayine, neeni Eqroona xoossaa Bi7eel-Zebuula oychanaw ase kiittiday? Neeni haysa oothida gisho, hayqana! Ne zin7ida hiixape dendaka’ ” yaagees.
2KI 1:17 Eeliyaasi odida Xoossaa qaalada Akaziyaasi hayqis; Akaziyaasas adde na7i bayna gisho, iya ishay Iyoraami iya bessan kawotis. Hessi haniday Iyosaafexa na7ay Iyoraami Yihudan kawotida nam7antho laythana.
2KI 1:18 Akaziyaasi oothida haraba ubbay Isra7eele Kawota Taarike Maxaafan xaafetidi de7ees.
2KI 2:1 Goday Eeliyaasa goten salo efanaw haniya wode, Eeliyaasinne Elsi Galgalape dendidi bidosona.
2KI 2:2 Eeliyaasi Elsako, “Goday tana Beetele kiitida gisho, hayyana neeni haysan gam7aasha” yaagis. Shin Elsi, “Goday eriya mela, ne shempoy ero! Taani neepe shaaketike” yaagis. Enti duge Beetele wodhidosona.
2KI 2:3 Beetelen de7iya nabeta cugay Elsako keyidi, “Goday hachi ne godaa neepe shaakidi efana haneysa eray?” yaagidi oychidosona. Elsi, “Ee erayis; shin hinte si77i giite” yaagidi zaaris.
2KI 2:4 Eeliyaasi Elsako, “Goday tana Iyaarko kiitida gisho, hayyana neeni haysan gam7aasha” yaagis. Shin Elsi, “Goday eriya mela, ne shempoy ero! Taani neepe shaaketike” yaagidi zaaris. Hessa gisho, enti Iyaarko bidosona.
2KI 2:5 Iyaarkon de7iya nabeta cugay Elsako keyidi, “Goday hachi ne godaa neepe shaakidi efana haneysa eray?” yaagidi oychidosona. I, “Ee erayis; shin hinte si77i giite” yaagidi zaaris.
2KI 2:6 Eeliyaasi Elsako, “Goday tana Yordaanose Shaafa kiitida gisho, hayyana neeni haysan gam7aasha” yaagis. Elsi, “Goday eriya mela, ne shempoy ero! Taani neepe shaaketike” yaagis. Enti nam7ay issife bidosona.
2KI 2:7 Nabetape ishatamu asati enta kaallidi, Yordaanose Shaafa gakanaw bidosona. Eeliyaasinne Elsi shaafa doonan eqidashin, nabeti entafe guuthu haakidi eqidosona.
2KI 2:8 He wode Eeliyaasi ba afilaa ekidi xaaxidi, iyara haatha shocin, haathay yaanne haanne shaaketin mela biittara pinnidosona.
2KI 2:9 Eeliyaasi Elsako, “Taani neepe eketanaape sinthe, new ay oothana mela koyay?” yaagis. Elsi, “Ne ayyaanay ta bolla nam7u kushe gidana mela, taani nena woossayis” yaagidi zaaris.
2KI 2:10 Elsi, “Neeni waaysiya oysho oychadasa. Shin taani neepe eketiya wode neeni tana xeelliyaba gidiko, hessi new hanana. Ne be7onna ixiko hanenna” yaagis.
2KI 2:11 Enti issife odetishe hemetishin, tama paratinne tama gaareti enta nam7aafe giddon gelidi, shaakis. Eeliyaasi goten salo keyis.
2KI 2:12 Elsi hessa be7idi, “Ta aawaw, ta aawaw! Isra7eele paratonne para gaareto!” yaagidi waassis. Hessafe simmin, I Eeliyaasa zaaridi be7ibeenna. Elsi azzanidi, ba ma7uwa nam7a kessidi, daakis.
2KI 2:13 Eeliyaasape wodhida ma7uwa denthidi, guye simmidi, Yordaanose Shaafa doonan eqis.
2KI 2:14 Eeliyaasape wodhida ma7uwa ekidi, iyara haatha shocidi, “Goday Eeliyaasa Xoossay awun de7ii?” yaagis. Elsi haatha shocida wode, haathay yaanne haanne shaaketin, shaafa pinnis.
2KI 2:15 Iyaarko yida nabeta cugay Elsa be7ida wode, “Eeliyaasa ayyaanay Elsa bolla shempis” yaagidosona. Enti iyara gahetanaw yidi, iya sinthan gufannidosona.
2KI 2:16 Enti, “Nuuni ne aylleti ishatamu mino asati haysan de7oos. Hayyana nuuni ne godaa koyanaw baana. Ooni eri, Godaa Ayyaanay iya ekidi, issi zuma huuphen woyko zangaara giddon yeggonna aggenna” yaagidosona. Elsi, “Akay, boopite” yaagis.
2KI 2:17 Shin akay guussay iya yeellayana gakanaw, enti iya woossidi aggonna ixin, “Biite” yaagis. Enti ishatamay bidi heedzu gallas kumethi koyidi, iya demmibookona.
2KI 2:18 Elsi Iyaarkon de7ishin, enti iyako simmidi yidosona. I, “Taani hintena ‘Boopite’ yaagabikinaa?” yaagis.
2KI 2:19 Hessafe guye, Iyaarkon de7iya asati Elsa, “Neeni nu goday be7eysada ha katamay duussas lo77o. Shin haathay iita; qassi biittayka ayfena” yaagidosona.
2KI 2:20 I, “Ane ooratha keren maxine yeggidi, eki yiite” yaagidi kiittin, iyaw ehidosona.
2KI 2:21 Elsi pultuwako bidi, maxiniya iyan yeggidi, “Goday, ‘Taani ha haatha pathas; hizape ha haathay hayqos gaaso gidenna; biittayka ayfana’ yaagees” yaagis.
2KI 2:22 Elsi odidaysada hachi gakanaw, he haathay xillo gidis.
2KI 2:23 Elsi yaape dendidi, pude Beetele keyis. I oge bolla de7ishin, yalaga adde nayti katamape keyidi, “La ha bo77aw, keya! La ha bo77aw, keya” yaagidi iya qelqisidosona.
2KI 2:24 Elsi guye simmi xeellidi, enta Godaa sunthan baaddis. Yaatin, nam7u macca babanthati keyidi, naytape oytamanne nam7u yalagata puuzerethidi wodhidosona.
2KI 2:25 Elsi yaape dendidi, Qarmeloosa zuma bolla keyis; yaape qassi Samaare simmis.
2KI 3:1 Yihuda kawoy Iyosaafexi kawotida tammanne hospuntho laythan, Akaaba na7ay Iyoraami Samaaren Isra7eele bolla kawotis; I tammanne nam7u laythi kawotis.
2KI 3:2 I, Godaa sinthan iitabaa oothis. Shin ba aawanne ba aaye Elzabeeli mela iita gidenna; iya aaway oothida Ba7aale eeqa diggis.
2KI 3:3 Nabaaxa na7ay Iyorbaami Isra7eele asa oosisida nagaran oyketis; iyape haakibeenna.
2KI 3:4 Moo7abe kawoy Moosi dorse heemmiya asi. I Isra7eele kawas 100,000 anqara dorsatanne 100,000 urge dorsata ikisiya laythan laythan giirees.
2KI 3:5 Shin Isra7eele kawoy Akaabi hayqidaape guye, Moo7abe kawoy Moosi Isra7eele bolla makallis.
2KI 3:6 He wode kawoy Iyoraami Samaare keyidi, Isra7eele ubba shiishis.
2KI 3:7 Yihuda kawa Iyosaafexi kiita yeddidi, “Moo7abe kawoy ta bolla makallis; Moo7abera oletanaw neeni taara baanee?” yaagis. Iyosaafexi, “Ee baana; taani nena; ta asay ne ase; ta paray ne para yaagidi” zaaris.
2KI 3:8 Iyosaafexi, “Nuuni awura bidi enta olanee?” yaagidi oychis. Kawa Iyoraami, “Edoome mela biitta ogiyara kanthi bidi olana” yaagidi zaaris.
2KI 3:9 Hessa gisho, Isra7eele kawoy, Yihuda kawoynne Edoome kawoy olas keyidosona. Enti laapun gallasa oge yuuyidi bidaape guye, olanchotasinne enta mehiyas aybi haathi attibeenna.
2KI 3:10 He wode Isra7eele kawoy, “Goday nuna ha heedzu kawota issife Moo7abe kawas aathidi immanaw xeegida gisho nuna ayye!” yaagis.
2KI 3:11 Shin Iyosaafexi, “Nuuni iya baggara Godaa oychanaw haysan nabey baawee?” yaagidi oychis. Isra7eele kawa toora moconatape issoy, “Eeliyaasa kushen haathe qoliya Safaaxa na7ay Elsi haysan de7ees” yaagidi zaaris.
2KI 3:12 Iyosaafexi, “Ee, I tuma nabe” yaagis. Isra7eele kawoy, Iyosaafexi, Edoome kawoynne Elsako bidosona.
2KI 3:13 Elsi Isra7eele kawako, “Tananne nena gathey aybee? Bada ne aawaynne ne aayiya oychida nabeta oycha” yaagis. Isra7eele kawoy zaaridi, “Akay, ha heedzu kawota issife Moo7abe kawas aathidi immanaw nuna xeegiday Godaabay!” yaagis.
2KI 3:14 Elsi, “Taani iyaw oothiya De7o Goday ero! Yihuda Kawa Iyosaafexa gisho goonnako taani nena ayfenka xeellikeshin.
2KI 3:15 Ane ha77i taw diithi diixiya asi ehite” yaagis. Diixeysi diixishin, Godaa wolqay iya bolla wodhis.
2KI 3:16 Elsi, “Ha mela zangaara ubban olla bookite.
2KI 3:17 Goday, ‘Carko woyko ira be7eketa, shin ha bookida zangaaran haathi kumana; hinte, hinte meheynne hinte caana mehey uyana’ yaagees.
2KI 3:18 Haysi Xoossa sinthan laafaba; qassi I Moo7abe hintew aathidi immana.
2KI 3:19 Gimbetida katamatanne gita katamata ubbaa hinte xoonana. Lo77o mithata ubbaa qanxana; haatha pultota ubbaa hinte barana; aradda shooqata ubbaa iissidi shuchi kumida biitta oothana” yaagis.
2KI 3:20 Wontetha gallas wonta yarsho yarshiya wodey gakin, Edoome baggara haathi goggidi, biittan eellis.
2KI 3:21 Moo7abe asay, heedzu kawoti enta olanaw yidaysa si7idi, na7atethi, cimi, ola miishe tookanaw danda7iya asa ubbay xeegetidi, banta biitta zawa naagidosona.
2KI 3:22 Enti guura dendiya wode haatha bolla wodhida xalqey zo77idi, entaw suuthu daanidi bentis.
2KI 3:23 Enti, “Haysa suuthaa be7ite! Kawoti banta giddon issoy issuwara oletidi, hayqi wuridosona. Moo7abe bidi, ane enta miixaa qociroos” yaagidosona.
2KI 3:24 Moo7abe asay Isra7eela miixaa bin, Isra7eeleti dendidi, enta shocidosona. Shocidi enta biitta oykidi, Moo7abe asaa wodhidosona.
2KI 3:25 Katamata olidi dhaysidosna. Asa ubbay huuphen huuphen issi issi shuchu ekidi, aradda shooqati ubbay kametana gakanaw, enta bolla holidosona. Pulto ubbaa baridi, lo77o mitha ubbaa qanxidosona. Qir-Hereesera katama gimbiya xalaali attis; shin yambarshan oliya asati he katamaa shocidosona.
2KI 3:26 Moo7abe kawoy olay ba bolla goobidaysa be7ida wode mashsha dancida laapun xeetu asata ekis. Ola gidduwa daakidi, Edoome kawako pinnanaw dendis; shin iyaw hanonna ixis.
2KI 3:27 Hessafe guye, ba bessan kawotanaw de7iya ba bayra na7aa ekidi, katama gimbiya bolla taman xuuggidi yarshis. Moo7abeti Isra7eeleta bolla hanqo suullidosona. Isra7eeleti he katamaa aggidi, banta biitta simmidosona.
2KI 4:1 Nabetape issuwa machiya Elsako bada, “Ne aylley, ta azinay hayqis. I Godaa yayiya asi gideysa neeni eraasa. Shin ha77i iya aco aaway ta nayta nam7a baw aylle oothanaw koyees” yaagada iyaw odasu.
2KI 4:2 Elsi, “Yaatin taani new ay ootho? Ne son aybe de7ey? Ane taw oda” yaagis. Maccasiya, “Taw, ne ayllees guutha xaaron de7iya zaytepe attishin, harabay aybika baawa” yaagasu.
2KI 4:3 Elsi, “Bada ne shoorota ubbaafe kaysa otota garxa. Garxashe guuthu garxofa.
2KI 4:4 Hessafe guye, soo gelada, ne bollanne ne nayta bolla kariya gorda. Oto ubban zayte tiga; zaytey kumida otota issi bagga aatha” yaagis.
2KI 4:5 Maccasiya bada, kariya ba bollanne ba nayta bolla gordasu. Enti iw otota shiishin, iya zaytiya tigethi oykasu.
2KI 4:6 Oto ubbay kumida wode, maccasiya ba na7aako, “Ane taw hara oto ekada ya” yaagasu. Shin na7ay zaaridi, “Hari issi otoyka deenna” yaagis. Hessafe guye, zaytey goggeysa aggaagis.
2KI 4:7 Maccasiya simma bada Elsas odasu. I, “Bada zaytiya bayzada, ne acuwa qanxa. Attidaysa neeninne ne nayti go7etidi daanaw danda7eeta” yaagis.
2KI 4:8 Issi gallas Elsi issi dure maccasiya de7iya Suneema katama bin, maccasiya shoobbada, iya kathi muzasu. He gallasape doomin, I yaara aadhiya wode ubban kathi maanaw I soo gelees.
2KI 4:9 Iya ba azinaako, “Heko, ubba wode nu matara aadhiya addey Xoossaa asi gideysa taani erayis.
2KI 4:10 Ane issi guutha kifile pooqiya bolla iyaw keexoos; iya giddon arsi, oyde, xarpheezanne xompe wothoos. I nuuko yida wode ubban yaa gelanaw danda7ees” yaagasu.
2KI 4:11 Issi gallas Elsi Sunaama katama yidi, ba kifiliya pude keyidi yan shempis.
2KI 4:12 Ba aylliya Giyaazako, “Bada maccasiw xeega” yaagin, Giyaazi xeegin, iya yada Elsa sinthan eqasu.
2KI 4:13 Elsi Giyaazako, “Ha maccasiya ha ubbaa nuus oothasu. Nuuni new ay oothino? Nuuni bidi, kawa woyko toora mocona odisanabay aybi de7iyako iyo oycha” yaagis. Maccasiya, “Taani haysan ta asaa giddon de7ayis” yaagasu.
2KI 4:14 Elsi Giyaaza, “Yaatin, taani iw ay ootho?” yaagidi oychis. Giyaazi, “Iw na7i baawa; I azinay cimis” yaagis.
2KI 4:15 Elsi, “Maccasiw xeega” yaagis. Giyaazi iyo xeegis; iya yada, pengen eqasu.
2KI 4:16 Elsi, “Wonto laythi hannoode neeni adde na7a idimmana” yaagis. Maccasiya, “Akay, ta godaw, neeni Xoossaa asi gidiki, taw wordotopa” yaagasu.
2KI 4:17 Shin maccasiya qanthatasu; Elsi iw odidaysada, kaalliya laythi adde na7a yelasu.
2KI 4:18 Na7ay diccis; issi gallas katha cakiya asatara de7iya ba aawako bis.
2KI 4:19 Ba aawako, “Woo! Tana huuphey wodhees; woo! Tana huuphey wodhees” yaagis. Iya aaway issi aylliya, “Tookada aayeko efa” yaagidi kiittis.
2KI 4:20 Aylley na7aa ekidi, aayeko efis. Seeta gallas gidana gakanaw, na7ay ba aaye ki7on uttis; hessafe guye, na7ay hayqi aggis.
2KI 4:21 Maccasiya na7aa pude efada, Xoossa addiya arsan zin7isasu. Yaatada iya bolla kare gordada basu.
2KI 4:22 Ba azina xeegada, “Taani Xoossa addiyako elle bada yaana mela, aylletape issuwanne haretape issuwa taw yedda” yaagasu.
2KI 4:23 I, “Hachi ageena xeero gallas woyko Sambaata gidenna; nena iyako efey aybee?” yaagis. Iya zaarada, “Aybika baawa” yaagasu.
2KI 4:24 Iya hare caanada, ba aylliya, “Hariya laagga! Taani new odana gakanaw, lepi oothada laaggofa” yaagasu.
2KI 4:25 Maccasiya yaape dendada, Qarmeloosa zuman de7iya Xoossa addiyako basu. Elsi maccasiya haahon be7idi, ba aylliya Giyaaza, “Be7a, Sunaaman de7iya maccasiya yawusu.
2KI 4:26 Iyo mokanaw woxa bada, ‘Neeni saro? Ne azinay saro? Ne na7ay saro?’ yaagada oycha” yaagis. Maccasiya, “Nuuni ubbayka saro” yaagasu.
2KI 4:27 Maccasiya zumaa bolla de7iya Xoossaa addiyako gakida wode, hokada iya tohuwa oykasu. Giyaazi maccasiw digganaw shiiqis; shin Xoossa addey, “Agga! iya gita meton de7awusu; shin Goday taape hessa genthis. I metuwa taw odibeenna” yaagis.
2KI 4:28 Maccasiya, “Ta godaw, neeni taw na7a immana mela taani nena oychadina? Taani nena, ‘Tana coo cimmofa yaagabikinaa?’ ” yaagasu.
2KI 4:29 Elsi Giyaazako, “Ne adussa ma7uwa ne saqiyan sirqa; ta xam7a ekada ellesa. Ogen ooderaka gahetiko, sarothofa; oonika nena sarotiko, zaarada saro goopa. Ta xam7a na7aa som7uwa bolla wotha” yaagis.
2KI 4:30 Shin na7aa aayiya, “De7o Goday eriya mela, ne shempoy ero! Taani nena yeggada biike” yaagasu. Elsi dendidi, iyo kaallis.
2KI 4:31 Giyaazi entafe sinthatidi bidi, xam7a na7aa som7uwa bolla wothis. Shin girsi woyko shempoy baawa. Yaatin Giyaazi Elsara gahetanaw simmi yidi, “Na7ay barkibeenna” yaagidi odis.
2KI 4:32 Elsi soo gelidi, Heko, na7aa ahay iya arsan zin7idaysa be7is.
2KI 4:33 Ba bollanne na7aa bollanne kariya gordidi, Godaa woossis.
2KI 4:34 Na7aa aha bolla keyidi, ba doona iya doonan, ba ayfiya iya ayfiyan, ba kusheta iya kushetara gathidi zin7is; na7aa asatethay ho77is.
2KI 4:35 Elsi dendidi, soo giddon yaa haa simeretis. Nam7antho simmidi, na7aa bolla zin7is; na7ay laapun toho hadhishidaape guye xeellis.
2KI 4:36 Elsi Giyaaza xeegidi, “Sunaama maccasiw xeega” yaagis. Giyaazi iyo xeegin, iya yida wode, Elsi, “Ne na7aa eka” yaagis.
2KI 4:37 Maccasiya Elsa tohuwa bolla kundada, sa7an gufannasu; ba na7aa ekada kare keyasu.
2KI 4:38 Elsi Galgala simmidi yida wode, biittan koshi de7ees. Nabeta cugay iya sinthan uttidi de7ishin, I ba aylliya, “Wogga oto tama bolla wothada, nabetas woxe katha” yaagis.
2KI 4:39 Entafe issoy bonco maxidi ehanaw wora bidi, ecere leehe daaniyaba demmis. Tookanaw danda7eysa keena daro ecere leehe ekidi yis; I aybeko eronna ancidi, otuwan yeggis.
2KI 4:40 Asay maana mela woxiya kessidosona; enti woxiya tushi bari be7idi, “Nabiyaw, ha otuwan wodhiyabay de7ees” yaagidi waassidosona. Asay maanaw danda7ibookona.
2KI 4:41 Elsi, “Ane taw dhiille ekidi yiite” yaagis. He dhiilliya otuwan qolidi, “Asay maanada woxiya tigite” yaagis. Hessafe guye, otuwan iitabay bentibeenna.
2KI 4:42 Koyro gakida kathaafe uuketida laatamu banga daabbuwa, tiya kathara issife ba ogoruwan yeggidi, Xoossa addiyas ehiya issi addey Ba7aal-Shalishapee yis. Elsi ba aylliya, “Maana mela asaas aatha” yaagis.
2KI 4:43 Iya aylley, “Taani xeetu asaa sinthe haysa waatada aatho?” yaagidi oychis. Shin Elsi, “Maana mela asaas aatha; Goday ‘Enti midi kallin, tiifey attana’ ” yaagis.
2KI 4:44 Hessa gisho, aylley enta sinthe aathin, enti midosona; Goday gidaysada tiifey attis.
2KI 5:1 Araame kawas mino toora mocona gidida Ni7imaani, ba godan daro dosetidanne bonchetida asi. Iya baggara Goday Araame olanchotas xoono immis. Ni7imaani toora qara; shin goga hargey iya bolla de7ees.
2KI 5:2 Issi wode Araame biittafe paannoti Isra7eele biitta bidi, issi macca na7a Isra7eelepe di77idosona. He na7iya Ni7imaane machees aylle gidasu.
2KI 5:3 He na7iya ba godateko, “Ta goday Samaaren de7iya nabiyako bida gidiyako, I paxanashin” yaagasu.
2KI 5:4 Ni7imaani ba godaako bidi, Isra7eelepe yida na7iya gidaysa iyaw odis.
2KI 5:5 Araame kawoy Ni7imaaneko, “Ba, taani Isra7eele kawas dabdaabe xaafana” yaagis. Ni7imaani 3,000 bira santime, 6,000 worqa santime tammu kumetha ma7o ekidi bis.
2KI 5:6 I, ekidi bida dabdaabey, “Ha goga hargiyafe neeni ta aylliya, Ni7imaane pathana mela ha dabdaabiyara taani iya neeko yeddas” yaagis.
2KI 5:7 Isra7eele kawoy dabdaabiya nabbabida wode, ba ma7uwa daakidi, “Taani iya wodhanawunne pathanaw Xoosseyee? Taani issi asi iya goga hargefe pathana mela ha addey taako ayis kiittidee? I taara ooyetanaw gaaso koyeysa be7ite” yaagis.
2KI 5:8 Xoossa asi gidida Elsi Isra7eele kawoy ba ma7uwa daakidaysa si7ida wode ase kiittidi, “Ne ma7uwa ayis daakadii? Iya haa taako yedda; Isra7eelen nabey de7eysa taani iya erisana” yaagis.
2KI 5:9 Ni7imaani ba paratanne para gaaretara bidi, Elsa karen eqis.
2KI 5:10 Elsi, “Bada Yordaanose Shaafan laapun toho meeceta; ne hargiyafe neeni paxananne geeyana” yaagidi odana mela ba aylliya iyako kiittis.
2KI 5:11 Shin Ni7imaani hanqetidi, “I taako yidi, Godaa ba Xoossaa sunthaa xeegidi, ba kushiya ta maduntha bolla wothidi, tana ha goga hargiyafe pathees gada qopas.
2KI 5:12 Damasqo shaafati, Abaaninne Farfari Isra7eelen de7iya shaafatape aadhokonayee? Yaatin taani entan meecetada geeyikina?” yaagidi hanqetidi, guye simmis.
2KI 5:13 Iya aylleti iyako shiiqidi, “Nu Godaw, nabey gitaba oothana mela new odidaako, neeni oothikiyee? I nena, ‘Bada meecetada geeyiya’ gidaysi ayis deexidee?” yaagidosona.
2KI 5:14 I duge wodhidi, Xoossa addey iyaw odidaysada Yordaanose Shaafan laapun toho muuketidi meecetis. Iya asatethay na7a asatethada hanis; paxidi geeyis.
2KI 5:15 Hessafe guye, Ni7imaaninne iyara yida asa ubbay Elsako guye bidosona. Ni7imaani iya sinthan eqidi, “Heko, Isra7eele Xoossaafe attishin, hara Xoossi baynaysa taani ha77i eras. Hayyana ha77i taani, ne aylley immiya imota eka” yaagis.
2KI 5:16 Elsi, “Taani iyaw oothiya Goday eriya mela, taani neepe aybaka ekike” yaagis. Elsi imota ekanaada Ni7imaani woossin ixis.
2KI 5:17 Ni7imaani, “Neeni ekonna ixiko, taw nam7u baqulo caana biitta immana mela taani nena woossayis. Taani ne aylley hachife doomada xuussa yarsho ne Xoossaa yarshanaape attishin, hara xoossatas yarshike.
2KI 5:18 Shin Goday taw ne aylliyas issiba atto go. Ta kawoy Irmoona eeqa goyinnanaw geliya wode, taanika iya ajabada gelada goyinnanaw koshshees. Goday taw ne aylliyas hessa atto go” yaagis.
2KI 5:19 Elsi, “Saro gaka!” yaagis. Ni7imaani dendidi bis. I guuthu haakidi bishin,
2KI 5:20 Xoossa asi gidida Elsa aylley Giyaazi, “Ta goday, Elsi Soore Ni7imaani ehidabaape aybaka ekonna coo yeddis. Goday eriya mela, taani iya geedo woxa bada, iyape issiba ekana” yaagidi qopis.
2KI 5:21 Hessa gisho, Giyaazi Ni7imaane kaallis. Ba geedo woxiya Ni7imaane be7idi, iyara gahetanaw para gaariyape wodhidi, “Aybe, saro gidennee?” yaagidi oychis.
2KI 5:22 Giyaazi, “Aykoy baawa; saro! Shin tana ta goday, ‘Derey dariya Efreema biittafe nabeta bagga gidida nam7u panthati taako yidosona. Hayyana entaw heedzu mukulu bira santimenne nam7u kumetha ma7o imma’ yaagidi kiittis” yaagis.
2KI 5:23 Ni7imaani, “Hiza hayyana usupun mukulu bira santime eka” yaagis. Ni7imaani Giyaaza shoobbidi, bira nam7u karxiitan yeggidi, nam7u kumetha ma7onne nam7u aylleta toossidi, Giyaazape sinthe yeddis.
2KI 5:24 Giyaazi de7iya zuma enti gakida wode, biraanne ma7uwa entafe ekidi, soo gelsis. Yaatidi enta moyzin, enti bidosona.
2KI 5:25 Hessafe guye, soo gelidi, ba godaa Elsa sinthan eqis. Elsi, “Aw badii?” yaagidi oychis. Giyaazi, “Taani ne aylley awuka babike” yaagidi zaaris.
2KI 5:26 Shin Elsi, “Addey neera gahetanaw para gaariyape wodhiya wode, ta ayyaanay neera de7ees gidennee? Ha wodey, miishenne ma7o, woyko shamahonne woyne gade, woyko dorsa wudenne miiza wude, woyko addenne macca aylle ekiya wodee?
2KI 5:27 Hessa gisho, Ni7imaane oykida goga hargey nenanne ne kocha ubbaa merinaw oykana” yaagis. Giyaazi Elsa sinthafe keyidi bishin, he hargey iya oykin, iya gogay shachada booxis.
2KI 6:1 Nabeta cugay, Elsako, “Heko, nuuni de7iya bessay nuus daro xuummis.
2KI 6:2 Nuuni ubbay mithi qanxanaw Yordaanose Shaafa boos. Yan nuus duussa bessi keexoos” yaagidosona. Elsi, “Biite” yaagis.
2KI 6:3 Nabetape issoy, “Hayyana neenika nuura ne aylletara yedharkii?” yaagis. Elsi, “Ero baana” yaagidi zaaris;
2KI 6:4 Entara issife bis. Enti Yordaanose gakida wode mithi qanxo doomidosona.
2KI 6:5 Shin entafe issoy mithi qanxishin, beexiya ayfey kessi ekidi, haathan wodhis. He addey, “Ta godaw, taani garxa ekida beexe; taani hiza waano!” yaagidi waassis.
2KI 6:6 Elsi, “Awun gelidee?” yaagidi oychis; addey gelida bessa bessis. Elsi xam7a qanxidi, haathan holis; beexiya ayfey haatha bolla tooketis.
2KI 6:7 Elsi addiya, “Kessada eka” yaagis. Addey ba kushiya yeddidi ekis.
2KI 6:8 Araame kawoy Isra7eeletara oletishe de7ees. I ba toora moconatara, “Taani dumma dumma bessan miixa medhana” yaagis.
2KI 6:9 Elsi, “Araame asay he bessan qosetida gisho, he bessaara yaa boopa” yaagidi Isra7eele kawas kiitta yeddis.
2KI 6:10 Hessa gisho, Isra7eele kawoy Xoossaa asi mallida bessaa ase kiittidi, yan de7iya asay naagetana mela odis. Kawoy naagetana mela Elsi woden woden odees.
2KI 6:11 Ha hanotay Araame kawa daro hanqethin, ba toora moconata xeegidi, “Nu giddon Isra7eele kawa bagga gididi de7ey ooneko ane taw odite” yaagidi oychis.
2KI 6:12 Iya toora moconatape issoy, “Ta godaw, kawaw, nu giddon hessa oothiya oonika baawa. Shin neeni ne qol7an odetiyaba ubbaa Isra7eelen de7iya nabey Elsi Isra7eele kawas odees” yaagis.
2KI 6:13 Kawoy, “Taani ase kiittada iya di7ana mela bidi awun de7iyako koyite” yaagis. Enti, “Heko, I, Dootanen de7ees” yaagidi odidosona.
2KI 6:14 Kawoy daro olanchota parataranne para gaaretara yaa yeddis. I yeddida asati qamma yidi, katama teqidosona.
2KI 6:15 Elsa aylley wontetha gallas guura dendidi, kare keyiya wode, olanchoti parataranne para gaaretara katamaa teqidosona. He aylley, “Heko, nuuni dhayida! Ta godaw, nu waanino?” yaagidi oychis.
2KI 6:16 Elsi, “Yayyofa! Nuura de7eysati entara de7eysatape aadhosona” yaagidi zaaris.
2KI 6:17 Hessafe guye, Elsi, “Abeeti Godaw, I be7ana mela iya ayfiya dooya” yaagidi woossis. Goday Elsa aylliya ayfiya dooyin, Heko, Elsa yuusho ubban de7iya tama paratinne para gaareti zumaa ma7is.
2KI 6:18 Sooreti iya teqida wode Elsi, “Ha asata ayfiya qooqisarki” yaagidi Godaa woossis. Elsi woossidaysada Goday enta ayfiya qooqisis.
2KI 6:19 Hessafe guye, Elsi, “Ogey haysara deenna; katamay haysa gidenna. Hinte koyiya uraa ta hintena bessaana; tana kaallite” yaagidi, enta kaalethidi, Samaare katamaa efis.
2KI 6:20 Enti Samaare katamaa gelida wode Elsi, “Abeeti Godaw, ha asati xeellana mela enta ayfiya dooya” yaagis. Goday enta ayfiya dooyin, Heko, enti Samaare giddon de7eysa be7idosona.
2KI 6:21 Isra7eele kawoy enta be7ida wode, “Ta aawaw, taani enta wodho? Taani enta wodho?” yaagidi oychis.
2KI 6:22 Elsi, “Akay, wodhopa! Hari attoshin, neeni ne mashshaninne ne dongiyan di77idaysataka wodhanaw bessenna. Enti midi uyidi banta godaako baana mela kathi enta muza” yaagis.
2KI 6:23 Hessa gisho, Isra7eele kawoy entaw gibira giigisin, enti midaapenne uyidaape guye, enta yeddin, banta godaako simmidosona. He wodepe doomin, Araameti Isra7eeleta bolla dendeysa aggaagidosona.
2KI 6:24 Hessafe guye, Araame kawoy Wolde-Adari ba olanchota ubbaa shiishidi, Samaare katama teqis.
2KI 6:25 Hessa gaason Samaare kataman gita koshi gelin, issi hare huuphey hospun tammu bira santimen, nam7u xeetu giraame gidiya holle shi7i ichashu bira santimen bayzetis.
2KI 6:26 Isra7eele kawoy katamaa dirsa gimbiya bollara aadhishin, issi maccasiya, “Ta godaw, kawaw, tana maaddarki” yaagada waassasu.
2KI 6:27 Kawoy, “Nena Goday maaddonna ixiko, taani new maado awupe ehanee? Katha bukiya wudummafeye, woyne ayfiya gum7iya bessaafee?” yaagis.
2KI 6:28 Kawoy, “Ne metoy aybee?” yaagidi oychis. Maccasiya zaarada, “Ha maccasiya, ‘Hachi maanaw ne na7a ekada ya; qassi wonto ta na7aa maana’ yaagasu.
2KI 6:29 Yaatin, ta na7aa kathidi mida; wontetha gallas taani, ‘Nuuni maanaw ne na7aa ekada ya’ yaagas. Shin iya ba na7aa qosasu” yaagasu.
2KI 6:30 Kawoy maccasiya odidaysa si7idi, ba ma7uwa daakis. I gimbiya bollara aadhishin, asay garsa baggara I ma7ida kayo ma7uwa be7idosona.
2KI 6:31 Kawoy, “Safaaxa na7aa Elsa guuggey iya bolla hachi pee7iko, Xoossi tana pirdo!” yaagis.
2KI 6:32 He wode Elsi ba son uttis; cimatika iyara issife de7oosona. Kawoy baape sinthe ase kiittis; shin he addey gakanaape sinthe, Elsi cimatako, “Ha shempo wodheysi ta qoodhiya muucisanaw ase kiittidaysa hinte be7eetii? He kiitetidaysi yida wode ibithe gordidi gelsofite; iya godayka iya kaallidi yishe de7ees” yaagis.
2KI 6:33 I cimatara odetishin, Heko, kiitetidaysi gaki wodhis; I, “Ha metoy Godaape yis. Yaatin, taani Godaa ayis naagiyana?” yaagis.
2KI 7:1 Elsi, “Godaa qaala si7a! Goday haysada yaagees. Wonto hannoode heedzu kilo giraame giste dhiilley woyko usupun kilo giraame bangi Samaare katama pengen issi bira santimen bayzetana” yaagis.
2KI 7:2 Kawas matatiya halaqay Xoossa addiyako, “Goday salo maskooteta dooyakoka hessi hanenna” yaagis. Shin Elsi zaaridi, “Neeni hessa ne ayfiyan be7ana; shin iyape maaka” yaagis.
2KI 7:3 Katamaa geliya pengiyan gita goga hargey oykida oyddu asati de7oosona. Enti issoy issuwako, “Nuuni hayqana gakanaw, haysan ayis gam7anee?
2KI 7:4 Nuuni katama geliko, koshi de7iya gisho, nuuni yan hayqana. Qassi haysan gam7ikoka hayqana. Hessa gisho, Araameta miixa ane boos. Enti nuna ashshiko attana; enti wodhiko hayqana” yaagidosona.
2KI 7:5 Sa7i dhumiya wode dendidi, Araameta miixaa bidosona. Enti bidi miixaa gakiya wode, Heko, issi asika yan baawa.
2KI 7:6 Hessi haniday, Goday para gaareta, paratanne daro olanchota qaala Araame asaa sissis. Yaatin enti issoy issuwako, “Heko, Isra7eele kawoy nuna olisanaw, Hitenne Gibxe kawota uneyidi ehis” yaagidosona.
2KI 7:7 Hessa gisho, enti dendidi, banta miixaa, banta dunkaaniya, banta paratanne banta hareta kumethi yeggi aggidi, sa7i dhuma de7ishin, banta shempuwa ashshanaw baqatidosona.
2KI 7:8 He gita goga hargey oykida asati Araameta miixaa gakidi, enta dunkaanetape issuwa gelidi, midosonanne uyidosona; bira, worqanne ma7o ekidi qottidosona. Nam7antho simmidi, hara dunkaaniya, gelidi iyape ekidaysa qottidosona.
2KI 7:9 Hessafe guye, enti issoy issuwa, “Nuuni lo77oba oothibooko. Hachi mishiraacho gallas; shin nuuni si77i gida. Sa7i wontana gakanaw, si77i gidi uttiko, nuuni seeretana. Ane, ha77i bidi, kawo gadhon de7iya asaas odana” yaagidosona.
2KI 7:10 Hessa gisho, enti bidi, katamaa pengiya naageysata xeegidi, “Nuuni Araame miixaa bida; shin, Heko, issi asi woyko asa girsi he bessan baawa. Qashetida parata xalaalinne hareti de7oosona; qassi enti aggidi bida dunkaaneti de7oosona” yaagidosona.
2KI 7:11 Pengiya naageysati xeegidi, kawo gadhon de7iya asaas odidosona.
2KI 7:12 Kawoy qamma dendidi, “Araameti nuna oothidaba taani hintew odana. Nuuni koshatidaysa enti eroosona. Hessa gisho, banta heerape keyidi, gaxariyan qosetidi, enti katamaape kare keyin, nuuni enta paxa oykidi, katama gelana yaagidi qopidosona” yaagidi ba shuumatas odis.
2KI 7:13 Kawa halaqatape issoy, “Ha kataman attida asay kase hayqida asaa mela hayqope attenna. Hessa gisho, hanidaba eranaw ane asaa dooroos. Attida ichashu paratara ane enta Sooreta miixaa yeddoos” yaagis.
2KI 7:14 Guutha asatanne nam7u para gaareta dooridosona. Kawoy enta Soore olanchota geedo yeddidi, “Bidi haniyaba be7ite” yaagidi kiittis.
2KI 7:15 Asati enta geedo kaallidi, Yordaanose Shaafa gakanaw bidosona. Araame asati baqatishe yeggida ma7oynne ola miishey ogiyan kumis. Kiitetida asati guye simmidi, kawas odidosona.
2KI 7:16 Asay bidi, Araameta miixaa bonqidosona. Goday gidaysada heedzu kilo giraame giste dhiilley woyko usupun kilo giraame bangi issi bira santimen bayzetis.
2KI 7:17 Kawoy baw matiya halaqaa penge naageysata halaqa oothidi shuumis; shin asay iya pengen yedhis. Kawoy Elsako bida wode, Elsi ha halaqa bolla odidaysada addey hayqis.
2KI 7:18 Xoossaa asi gidida Elsi kase kawas, “Wonto hannoode heedzu kilo giraame giste dhiilley woyko usupun kilo giraame bangi Samaare kataman issi bira santimen bayzetana” yaagis.
2KI 7:19 He wode halaqay Elsako, “Goday salo maskooteta dooyakoka hessi hanenna” yaagis. Elsi, “Heko, neeni hessa ne ayfen be7ana; shin iyape maaka” yaagidi zaaris.
2KI 7:20 Elsi odidaysada, he addey, asay pengen yedhin hayqis.
2KI 8:1 Elsi, hayqida I na7aa pathida maccasiw, “Ne soo asaa ekada haysafe bada neeni danda7iya bessan awunka de7a. Goday laapun laytha koshaa ha biitta bolla yeddis” yaagis.
2KI 8:2 Maccasiya Elsi odidaysada ba soo asaara bada, Filisxeeme biittan laapun laythi de7asu.
2KI 8:3 Laapuntha laytha wursethan maccasiya Filisxeeme biittafe simmasu. Ba keethaanne ba gadiya oychanaw kawako basu.
2KI 8:4 He wode kawoy Xoossaa asi gidida Elsa aylliya Giyaazara odetishe, “Elsi oothida gita ooso ubbaa ane taw oda” yaagis.
2KI 8:5 Elsi hayqida na7aa waatidi pathidaako, Giyaazi kawas odishin, Heko, Elsi I na7aa pathida maccasiya ba keethaanne ba gadiya oychanaw yasu. Giyaazi, “Ta godaw, kawaw, maccasiya hannashu; Elsi hayqope pathida I na7ayka haysish” yaagis.
2KI 8:6 Kawoy maccasiw oychin, iyaw odasu. Hessa gisho, kawoy halaqaa xeegidi, “Ha maccaseeba gidida ubbaanne iya agga bida wodiyape hachi gakanaw I gaden mokida ubbaa iw zaara” yaagidi kiittis.
2KI 8:7 Elsi Damasqo katama bidi gakiya wode, Soore kawoy Wolde-Adari saketees. I, “Xoossaa asi haysa yis” giya wore si7is.
2KI 8:8 Kawoy Azaheelako, “Immiyaba ekada Xoossa addiyara gahetanaw bada, ‘Taani ha hargiyafe paxanee?’ yaagada Godaa oycha” yaagis.
2KI 8:9 Hessa gisho, Azaheeli Damasqon de7iya dumma dumma qommo muruutape oytamu gimalen caanidi, Elsara gahetanaw bis. Elsa sinthan eqidi, “Ne na7ay Araame kawoy Wolde-Adari, ‘Taani ha hargiyafe paxanee?’ yaagidi, nena oychanaada tana neeko kiittis” yaagis.
2KI 8:10 Elsi Azaheelako, “Neeni bada iyako, ‘Tuma neeni paxana’ yaaga. Shin I tuma hayqanaysa tana Goday bessis” yaagis.
2KI 8:11 Azaheeli yeellatana gakanaw, Elsi iya tishshi oothidi xeellidi yeekis.
2KI 8:12 Yaatin, Azaheeli, “Ta goday ayis yeekii?” yaagidi oychis. Elsi, “Neeni Isra7eele asa bolla oothana iitabaa taani eriya gisho yeekayis. Enta miixaa neeni taman xuuggana; enta panthata neeni mashshan wodhana. Qassi enta yooga naytaka neeni shuchan mentherethana; enta qantha maccasata uluwa neeni daakana” yaagidi zaaris.
2KI 8:13 Azaheeli zaaridi, “Taani ne aylley, pathenna kanay, haysa mela gitaba waatada oothanaw danda7iyana?” yaagis. Elsi zaaridi, “Neeni Araame biittan kawotanaysa tana Goday bessis” yaagis.
2KI 8:14 Hessafe guye, Azaheeli Elsafe shaaketidi, ba godaako simmis. Wolde-Adari, “Elsi nena woygidee?” yaagidi oychis. Azaheeli, “Neeni tuma paxana” yaagis.
2KI 8:15 Shin wontetha gallas Azaheeli bulluko ekidi, haathan muukidi, kawa iyara tuccin, kawoy hayqis. Azaheeli iya bessan baw kawotis.
2KI 8:16 Akaaba na7ay, Isra7eele kawoy Iyoraami kawotida ichashantho laythan, Yihuda Kawa Iyosaafexa na7ay Iyoraami Yihudan kawotis.
2KI 8:17 Iyoraami kawotiya wode iyaw laythay hastamanne nam7a; I Yerusalaamen hospun laythi kawotis.
2KI 8:18 Iyoraami Akaaba na7iw macho ekida gisho, Akaaba soo asay hemetidaysada kase Isra7eele kawota ogiyan hemetis; Godaa sinthan iitabaa oothis.
2KI 8:19 Gidoshin, ba aylliya Dawita gisho, Goday Yihuda dhaysanaw koybeenna; Dawita kochay merinaw kawotanaw de7eysa Goday ufaysa qaala immis.
2KI 8:20 Iyoraami kawotida wode, Edoome asay Yihuda kawa bolla makallidi, bantaw kawo kawoydosona.
2KI 8:21 Hessa gisho, Iyoraami ba para gaareta ubbaara Xa7ira geetetiya bessa bis. Edoome asati iyanne iya para gaareta halaqata teqidosona; shin Iyoraami qamma dendidi, kessi ekidi bis. Iya olanchoti baqatidi, guye soo simmidosona.
2KI 8:22 He wodepe doomidi hachi gakanaw, Edoome asay Yihuda asaas haaretibookona. Libina asay qassi he wode makallis.
2KI 8:23 Iyoraami hanida harabaynne I oothidaba ubbay Yihuda Kawota Taarike Maxaafan xaafetis.
2KI 8:24 Iyoraami hayqidi, ba mayzatan gahetis. Ba mayza Dawita Kataman moogetis; iya bessan iya na7ay Akaziyaasi kawotis.
2KI 8:25 Akaaba na7ay, Isra7eele kawoy Iyoraami kawotida tammanne nam7antho laythan, Yihuda kawa, Iyoraama na7ay Akaziyaasi Yihudan kawotis.
2KI 8:26 Akaziyaasi kawotida wode, iyaw laythi laatamanne nam7a; I Yerusalaamen issi laythi kawotis. Iya aaye sunthay Gotolo; iya Isra7eele kawa Omira na7aa na7iw.
2KI 8:27 I entaw bollo gidida gisho, Akaaba soo asa ogiyan hemetis; Akaaba soo asay oothidaysada, I Godaa sinthan iitabaa oothis.
2KI 8:28 Akaziyaasi Araame kawa Azaheelara Galadan de7iya Raamota kataman oletanaw bidi, Akaaba na7aa Iyoraamara issife bin, Araame asati Iyoraama caddidosona.
2KI 8:29 Iyoraami Araame kawa Azaheelara oletiya wode, Araame asati caddida cachafe paxanaw Izra7eele simmis. Iyoraama na7ay, Yihuda kawoy Akaziyaasi, cadetida Akaaba na7aa Iyoraama oychanaw duge Izra7eele bis.
2KI 9:1 Nabey Elsi nabeta cugaape issi asi xeegidi, “Ne ma7uwa ma7ada, xaaro zaytiya ne kushen oykada, Galadan de7iya Raamota ba.
2KI 9:2 Yaa gakada, Iyosaafexa na7aa, Namisa na7aa na7aa Iyyu koya. Iya demmada, iya laggetape iya shaakada qol7a gelsa.
2KI 9:3 Hessafe guye, xaaro zaytiya ekada, iya huuphiyan tigada, ‘Nena Isra7eele bolla kawo ootha tiyana mela Goday tana kiittis’ yaaga. Yaatada pengiya dooyada, ellesada baqata” yaagis.
2KI 9:4 Hessa gisho, pantha nabey Galadan de7iya Raamota bis.
2KI 9:5 I yaa gakida wode toora moconay issife zoretishin demmidi, “Godaw, taani new odiyabay de7ees” yaagis. Iyyuy, “Nu giddofe ooddes odanee?” yaagidi oychis. Nabey, “Godaw, new odana” yaagidi zaaris.
2KI 9:6 Iyyuy dendidi soo gelin, nabey iya huuphen zayte tigidi, “Goday Isra7eele Xoossay, nena haysada yaagees, ‘Neeni Godaa deriya, Isra7eele bolla kawotana mela taani nena tiyas.
2KI 9:7 Neeni ne godaa Akaaba kochaa dhaysana. Taani Elzabeela gussida nabeta, ta aylleta suuthaanne ta hara aylleta suuthaa haluwa kessana.
2KI 9:8 Akaaba kocha ubbay dhayana; taani Isra7eelen Akaaba kochaafe aylle gidin, womaanno gidin, adde ubbaa dhaysana.
2KI 9:9 Akaaba kochaa Nabaaxa na7aa Iyorbaama kochaadanne Akiya na7aa Ba7oosa kochaada oothana.
2KI 9:10 Elzabeelo, Izra7eela goshshan kanati maana; oonika iyo moogenna’ ” yaagis. Hessa odidaape guye, pengiya dooyidi baqatis.
2KI 9:11 Iyyuy ba lagge gidida toora moconatako bida wode, enti, “Sa7i saro? Ha gooshshay neeko ayis yidee?” yaagidi oychis. Iyyuy, “Ha addiyabanne iya odaa hinte ereeta” yaagis.
2KI 9:12 Enti, “Haysi wordo. Ane neeni nuus oda” yaagidosona. Iyyuy, “Neeni Isra7eele bolla kawo gidana mela taani nena tiyanaada Goday tana kiittis” yaagis.
2KI 9:13 He wode enti banta ma7uwa qaaridi, Iyyuy yedhidi keyiya dethan hiixidi, moyze punnidosona. Banta qaala dhoqu oothidi, “Iyyuy kawotis” yaagidosona.
2KI 9:14 Iyosaafexa na7ay, Namisa na7aa na7ay Iyyuy, Iyoraama bolla maqetis. Hessi haniya wode, Isra7eele asa ubbay Araame kawa Azaheela Galadan de7iya Ramootan naaganaw bidosona.
2KI 9:15 Shin entafe kawoy Iyoraami Soore kawa Azaheelara oletida wode, Araame biitta asay iya caddida cachas Izra7eele yis. Iyyuy halaqata, “Hinte qofay hessa gidiko, ha katamaape issi asika keyidi, Izra7eele kataman ha odaa odonnaada teqite” yaagis.
2KI 9:16 Hessafe guye, Iyyuy para gaariyan keyidi, Izra7eele bis. Iyoraami paxiboonnaysi yan shempees. Qassi Yihuda kawoy Akaziyaasi iya oychanaw yaa duge bis.
2KI 9:17 Izra7eela gimbiya bolla eqidi wocheysa xeegidi, “Issi cuga yeysa taw bentees” yaagis. Iyoraami, “Entara gahetanaada issi para yedda. Paraaway bidi, ‘Sa7i saro?’ yaago” yaagis.
2KI 9:18 Paraaway Iyyura gahetanaw bidi, “Kawoy nena, ‘Sa7ay saro?’ yaagees” yaagis. Iyyuy, “Saroban nena gathiyabay baawa. Ta guye aadhada tana kaalla” yaagidi zaaris. Wocheysi kawa, “Kiitetidaysi entako, gakis; shin guye simmibeenna” yaagidi odis.
2KI 9:19 Hessa gisho, kawoy nam7antho paraawa entako kiittis. I entako yidi, “Kawoy hintena, ‘Sa7i saro?’ yaagees” yaagis. Iyyuy, “New sarora ay gahetethi de7ii? Ta guye aadhada tana kaalla” yaagis.
2KI 9:20 Wocheysi, “Nam7antho paraaway entako gakis; shin guye simmidi yibeenna. Qassi gaariya laagoy Namisa na7aa na7aa Iyyu laaguwa mela; I gooya asada laaggees” yaagidi odis.
2KI 9:21 Kawoy Iyoraami, “Taw para gaare giigisite” yaagidi kiittis. Enti para gaare giigisidosona; Isra7eele kawoy Iyoraami Yihuda kawoy Akaziyaasi banta gaariyan gaariyan uttidi, Iyyura gahetanaw bidi, Izra7eele Naabute gaden iya demmidosona.
2KI 9:22 Iyoraami Iyyu be7ida wode, “Iyyu, sa7i saro?” yaagidi oychis. Iyyuy, “Ne aaye Elzabeeli laymatethaynne bitay de7ishin, saroy awun de7ii?” yaagidi zaaris.
2KI 9:23 Iyoraami ba para gaariya guye zaaridi baqatidi, Akaziyaasa xeegidi, “Akaziyaasa, haysi makalla” yaagis.
2KI 9:24 Iyyuy, ba dongiya ba kumetha wolqan dafidi, Iyoraama nam7u katisotape giddon dukis. Donge tooray iya wozanaara kanthidi keyin, ba gaariya giddon kundis.
2KI 9:25 Iyyuy toora mocona Bidiqaarako, “Iyoraama denthada, Naabute gaden ola. Neera taara issife Iyoraama aawa Akaaba kallidi toggidi bishin, Goday iya bolla tinbite odidaysi akeeka.
2KI 9:26 He wode Goday, ‘Naabute suuthaanne iya adde nayta suuthaa taani zine be7as; hessa acuwa taani nena tuma ha gaden qanxisana’ yaagis. Ha77i simmidi Goday gidaysada, Iyoraama denthada, ha gaden hola” yaagis.
2KI 9:27 Yihuda Kawoy Akaziyaasi hessa be7ida wode, Beet-Hagana baqatis. Iyyuy iya kaallidi yedethidi, “Iyaka wodhite” yaagis. Enti iya kaallidi, Yiblaama matan de7iya Guura pudethan iya gaariya bolla caddidosona. I Magido baqatidi, yan hayqis.
2KI 9:28 Iya aylleti gaariyan iya ekidi, Yerusalaame efidosona; iya mayzata matan Dawita Kataman moogidosona.
2KI 9:29 Akaaba na7ay Iyoraami kawotida tammanne issintho laythan Akaziyaasi Yihudan kawotis.
2KI 9:30 Hessafe guye, Iyyuy Izra7eela bis. Elzabeela hessa si7ida wode, ba ayfiya tiyada, ba huuphiya pixada, maskootiyara duge ogiya xeellasu.
2KI 9:31 Iyyuy pengera gelishin, “La ne godaa wodhida Zemira haysa saro yadii?” yaagasu.
2KI 9:32 Iyyuy pude maskootiyako xeellidi, “Ta bagga gidanay oonee? Oonee?” yaagis. Nam7u woyko heedzu shuufati iya xeellidosona.
2KI 9:33 Iyyuy, “Iyo duge holite” yaagis. Enti iyo duge holidosona. I suuthay godaa bollanne parata bolla dharcetis; parati banta tohuwan iyo yedhidosona.
2KI 9:34 Iyyuy kawa keethi gelidi, misinne uyis. I, “Ha baadetida maccasiw efidi moogite; ay gidikoka iya kawo na7a” yaagis.
2KI 9:35 Shin enti iyo mooganaw bidi, I guuggiyafe, tohotapenne kushetape attishin, haraba demmibookona.
2KI 9:36 Enti simmidi, iyaw odidosona; i, “Goday ba aylliya Tisiba Eeliyaasa baggara, ‘Izra7eele gaden Elzabeeli ashuwa kanati maana.
2KI 9:37 Attidaysi Izra7eelan pito mela yegetana. Hessa gisho oonika, “Hanna Elzabeelo” gaanaw danda7enna’ yaagidi odida qaalay haysa” yaagis.
2KI 10:1 Akaabas Samaare kataman laapun tammu adde nayti de7oosona. Iyyuy Samaare katama halaqatas, cimatasinne Akaaba kochata dicheysatas haysada yaagidi dabdaabe xaafis.
2KI 10:2 “Hiza hinte godaa kochati, parati, para gaareti, yuushoy gimbetida katamatinne ola miisheti hintew de7iya gisho, ha dabdaabey hintena gakida mela,
2KI 10:3 hinte godaa naytape lo77o gididaysa dooridi, iya aawa araatan utisite; hinte godaa keethaas oletite” yaagis.
2KI 10:4 Shin enti daro yayyidi, “Heko, nam7u kawoti iya sinthan eqanaw danda7ibookona, shin nuuni waanidi eqanee?” yaagidosona.
2KI 10:5 Hessa gisho, kawo gadho aawatethan ayseysi, katama halaqay, cimatinne Akaaba kochata dicheysati, Iyyuko haysada yaagidi kiittidosona; “Nuuni ne aylleta; neeni giyaba ubbaa nuuni oothana. Nu bolla oonaka kawoyoko. Nena lo77idaba aybaka ootha” yaagidi kiittidosona.
2KI 10:6 Iyyuy entaw nam7antho dabdaabe xaafishe, “Hinte ta bagga gididi, taw kiitetanaw giigidaba gidiko, hinte godaa nayta qoodhiya muucite; enta guuggiya ekidi, wonto hannoode Izra7eele yiite” yaagis. Laapun tammu kawa kochati bantana dichiya, kataman eretida asatara de7oosona.
2KI 10:7 He kawa kochata dichiya asatako dabdaabey gakida wode, laapun tammu kawa kochata wodhidosona. Enta qoodhiya muucidi, enta guuggiya keeshen ekidi, Izra7eelan de7iya Iyyus yeddidosona.
2KI 10:8 Kiitetida asay, “Enti kawa kochata guuggiya ekidi yidosona” yaagidi Iyyus odidosona. Iyyuy, “Wonto wonta gakanaw, katama geliya pengiyan enta nam7u bessan dooridi wothite” yaagidi kiittis.
2KI 10:9 Wontetha gallas wonta Iyyuy kare keyidi, asa ubbaa sinthan eqidi, “Hinte xillo; Heko, ta godaa bolla maqetada wodhiday tana. Shin haysata ubbaa wodhiday oonee?
2KI 10:10 Goday Akaaba kochata bolla odida qaalape issoyka sa7an wodhonnaysa hinte erite. Goday ba aylliya Eeliyaasa baggara odidaba polis” yaagis.
2KI 10:11 Hessa gisho, Iyyuy Izra7eelan attida Akaaba kochata, iya gita asata, iya laggetanne iya kahineta ubbaa, issoyka attonna wodhis.
2KI 10:12 Hessafe guye, Iyyuy dendidi, Samaare bidi Henthanchota Moothu gakidi,
2KI 10:13 Yihuda kawa Akaziyaasa dabbotara gahetidi, “Hinte oonee?” yaagidi oychis. Enti, “Nuuni Akaziyaasa dabbota; kawa kochatanne kawe Elzabeeli nayta sarothanaw boos” yaagidosona.
2KI 10:14 Iyyuy ba asata, “Enta paxa oykite” yaagidi kiittin, enta paxa oykidi, henthanchota moothan de7iya haatha olla matan enta oytamanne nam7ata wodhidosona; I entafe issuwaka ashshibeenna.
2KI 10:15 Iyyuy he bessaafe dendidi, Rakaaba na7aa Iyonadaabara gahetidi, iya sarothidi, “Ta qofaynne ne qofay issino. Neeni ta bagga gidanee?” yaagis. Iyyonadaabi, “Ee gidana” yaagidi zaaris. I “Ane ta kushiya oyka” yaagis. Iya kushiya oykin pude gaariya bolla kessis.
2KI 10:16 “Taara yedha; taani Godaas waanada mishetiyako be7a” yaagis; iya ba gaariya bolla utisis.
2KI 10:17 Iyyuy Samaare yida wode, Akaaba kochaafe attida ubbaa wodhis; Goday Eeliyaasas odida qaalada enta dhaysis.
2KI 10:18 Hessafe guye, Iyyuy asa ubbaa issife shiishidi, “Akaabi Ba7aale eeqa guuthara goyinnis; shin taani iyape daro goyinnana.
2KI 10:19 Ha77i Ba7aale nabeta, iya goyinneyisata, iya kahineta ubbaa xeegidi shiishite. Entafe issi asika paconnaada naagite. Taani Ba7aale eeqas daro yarsho yarshana hanayis. He bessaa yoonna asi paxa attenna” yaagis. Shin Iyyuy Ba7aale eeqa goyinneyisata cimmidi dhaysanaw hessa oothis.
2KI 10:20 Iyyuy, “Ba7aale eeqa goyinnana gallasaa awaajite” yaagin, enti awaajidosona.
2KI 10:21 Hessafe guye, Iyyuy Isra7eele biitta ubbaa kiittin, Ba7aale eeqa goyinneysatape issi asika attonna ubbay yidosona. Ubbay Ba7aale eeqa keetha gaxape gaxa gakanaw qilxi gidi kumis.
2KI 10:22 Iyyuy, ma7o keethaa naagiya addiyako, “Ba7aale goyinneyisata ubbaas ma7o kessa” yaagis. Addey entaw ma7o ehis.
2KI 10:23 Hessafe guye, “Iyyuynne Rakaaba na7ay Iyyonadaabi Ba7aale eeqa keetha gelidosona. Iyyuy, Ba7aale eeqa goyinneysatape attishin, Godaa aylletape issi asika hinte giddon doonnaada xeellite” yaagis.
2KI 10:24 Hessafe guye, enti xuussa yarshotanne hara yarshota yarshanaw giddo gelidosona. Iyyuy Ba7aale eeqa keethaafe karera hospun tammu asata giigisidi wothis. Entako, “Hintefe issi addey taani hinte kushen immiya asaape issuwa yeddiko, iya shempoy he addiya shempuwa bessan gelana” yaagis.
2KI 10:25 Iyyuy xuussa yarshuwa polidaape guye, naageysatanne halaqata, “Giddo gelidi, enta wodhite. Entafe issi asika kessi ekonna mela” yaagidi kiittin, enta mashshan wursidosona. Enta aha kare goochidi kessidosona; Ba7aale eeqa keetha qol7a gelidosona.
2KI 10:26 Ba7aale eeqa keethaafe eeqa tuussata kessidi xuuggidosona.
2KI 10:27 Ba7aale eeqa shuchata tincherethidosona; Ba7aale eeqa keethaaka laallidosona. He bessaa sheesha keethi kessidosona; hachi gakanaw he bessay sheesha keethi gididi attis.
2KI 10:28 Hessada oothidi, Iyyuy Ba7aale eeqa Isra7eelepe dhaysis.
2KI 10:29 Gidoshin, Nabaaxa na7ay Iyorbaami Isra7eele asaa oosisida nagara ooso aggibeenna. Beeteleninne Daanen Iyorbaami essida worqa mara misileta goyinnis.
2KI 10:30 Goday Iyyuko, “Neeni ta sinthan suureba oothida gishonne ta qofan de7iyaba ubbaa neeni Akaaba kochata bolla polida gisho, ne kochati oyddantho yeleta gakanaw, Isra7eele araatan uttana” yaagis.
2KI 10:31 Iyyuy Godaa Isra7eele Xoossaa higgiya ba kumetha wozanaape minthidi naagibeenna; qassi Isra7eele asaa nagara oosisida Iyorbaama nagaraape haakibeenna.
2KI 10:32 He wode Goday Isra7eele biittafe baggaa shaako doomis. Araame kawoy Azaheeli Isra7eele biittafe daro bessata xoonidi oykis.
2KI 10:33 Yordaanose Shaafape doloha baggara de7iya Galadanne Baasane biitta ubbaa oykis. He biittay Arnoona Shaafa matan de7iya Aro7eera katamaape doomidi, Robeela biitta, Gaade biittanne Minaase biitta gakees.
2KI 10:34 Iyyuy hanida harabay, oothidaba ubbaynne iya minotethay ubbay Isra7eele Kawota Taarike Maxaafan xaafetis.
2KI 10:35 Hessafe guye, Iyyuy hayqidi, ba mayzatan gahetis; I Samaaren moogetis. Iya bessan iya na7ay Iyo7akaazi kawotis.
2KI 10:36 Iyyuy Samaaren uttidi Isra7eele bolla laatamanne hospun laythi kawotis.
2KI 11:1 Akaziyaasa aayiya Gotola ba na7ay hayqidaysa be7ida wode, dendada kawa kocha ubbaa dhaysasu.
2KI 11:2 Shin kawa Iyoraama na7iya, Akaziyaasa michiya Yosabeeta, hayqanaw de7iya kawa nayta giddofe Akaziyaasa na7aa Iyo7aasa kaysada ekasu. Iyanne iya dichiyaro efada keethan qosada, Gotolo wodhonnaada ashshasu.
2KI 11:3 Gotola biitta haariya wode ubban, na7ay Yosabeeti matan, Xoossa keethan usupun laythi qosetidi de7is.
2KI 11:4 Laapuntha laythan Yoodahey kawa naageysatanne kawo gadho naageysata halaqatas kiittidi, baako Xoossa keethi ehis. Entara caaqidi, enta Xoossa keethan caaqisis; enta kawa na7aa Iyo7aasa bessis.
2KI 11:5 I enta, “Hinte oothanabay haysa; Sambaatan naaganaw geliya maaray gakida hinte heedzu cugaape issi cugaa kawa keethaa naago.
2KI 11:6 Issi cugay Suura pengiya naago; issi cugaa naageysatape guye baggara de7iya pengiya naago.
2KI 11:7 Sambaata galas naagope keyiya hanko nam7u cugay kumethi kawa bolla metoy gakonna mela Xoossa keetha naago.
2KI 11:8 Ola miishe oykidi, kawa giddon wothidi, kawoy keyiya wodenne geliya wode ubban iyara issife de7o. Hinteko shiiqiya oonaka wodhite” yaagis.
2KI 11:9 He halaqati, kahiney Yoodahe kiittidaba ubbaa oothidosona. Enti ubbay Sambaata gallasan naago maaray gakidaysatanne naaguwa maara polidaysata ekidi, kahiniya Yoodaheko yidosona.
2KI 11:10 Kahiney Xoossa keethan de7iya, beni kawa Dawita gondalletanne toorata ubbaa halaqatas immis.
2KI 11:11 Naageysati issoy issoy ola miisheta banta kushen oykidi, Xoossa keethaafe haddirsa baggafe doomidi, ushacha bagga gakanaw, yarsho bessa mataninne Xoossa keetha matan kawa yuushuwan eqidosona.
2KI 11:12 Yoodahey kawa na7aa kare kessidi, iya huuphen kallacha wothis. Higge Maxaafaa iyaw immidi, tiyidi, iya kawothis. Asay kushe baqidi, ba qaala dhoqu oothidi, “Kawoy birata tuussu gido!” yaagis.
2KI 11:13 Kawiya Gotola naageysata wocamaanne asaa wocamaa si7ida wode, asaako Xoossa keethi basu.
2KI 11:14 Kawoy kase kawoti haneysada tuussa matan eqidysa be7asu. Halaqatinne moyze punneysati kawa matan de7oosona. He biitta asa ubbay ufaytidi, moyze punnin, Gotola ba ma7uwa daakada, “Heko, haysi makalla! Haysi makalla!” yaagada waassasu.
2KI 11:15 Kahiney Yoodahey tora moconatako, “Gotola Xoossa keethan wodhopite! Iipe yaaranne haara salpida salpeta giddon wothite; iyo ashshanaw qopiya asi de7iko wodhite!” yaagis.
2KI 11:16 Enti iyo oykidi, kawo gadho efidi, Para Pengiyan iyo wodhidosona.
2KI 11:17 Asay Godaa asi gidana mela, kawoy Yodaaheynne asay Godaara caaqana mela oothis. Qassi kawuwapenne asaape gidduwan caaqisis.
2KI 11:18 He wode Yihuda asa ubbay Ba7aale eeqa keethi bidi, he keethaa laallis; yarsho bessatanne iya misileta tincherethis. Ba7aale eeqa kahiniya Mataana yarsho bessata sinthan wodhidosona. Hessafe guye, kahiniya Yoodahey Xoossa keethan naageysata wothis.
2KI 11:19 Baara toora moconata, kawa naageysata, kawo gadho naageysatanne Yihuda asa ubbaa ekin, enti kawa Xoossa keethafe duge ehis. Naageyisata Pengiya baggara kawo keethi issife gelidi, kawoy ba araatan uttis.
2KI 11:20 Yihuda asa ubbay ufaytidosona; Gotola kawo gadhon mashshan hayqidaape guye katamay wopu gis.
2KI 11:21 Iyo7aasi kawotiya wode laapun laytha na7a.
2KI 12:1 Iyyuy, Isra7eele biittan kawotida laapuntho laythan, Iyo7aasi Yihudan kawotis; I Yerusalaamen oytamu laythi kawotis. Iya aaye sunthay Saabo; iya Barsaabe maccas.
2KI 12:2 Kahiney Yoodahey, iya tamaarsidanne zorida gisho, I de7ida laytha ubban Iyo7aasi Godaa sinthan suureba oothis.
2KI 12:3 Asay he bessan yarshonne ixaane cuyisethi aggiboonna gisho, dhoqa goyinno bessata dhaysibeenna.
2KI 12:4 Iyo7aasi kahineta xeegidi, “Xoossa keetha yaa geeshsha miishe ubbaa shiishite. Hessika huuphe taybuwa wode imetiya miishiyanne asay ba shenen Xoossa keethi ehiya miishiya.
2KI 12:5 Kahineti ubbay he miishiya ehiya asaape banta gishuwa gishuwa ekidi, Xoossa keetha giddon iitida ubbaa loythana” yaagis.
2KI 12:6 Shin kawoy Iyo7aasi kawotida laatamanne heedzantho laythi gakanaw, kahineti Xoossa keetha oorathibookona.
2KI 12:7 Kawoy Iyo7aasi kahiniya Yoodahenne hara kahineta xeegidi, “Xoossa keetha giddon iitida bessata ayis ooratheketii? Miishe Xoossa keetha oorathanaw immitepe attishin, hintew imetiya miishiya hinte kushen oykofite” yaagis.
2KI 12:8 Kahineti, “Asaape hara miishe ekoko; Xoossa keetha giddon iitida bessaa oorathana” yaagidi zaaridosona.
2KI 12:9 Yaatin, kahiniya Yoodahey issi saaxine ekidi, iya kamaa lukidi, yarsho bessa matan Xoossa keethi geliya pengiya ushacha baggara wothis. Pengiya naagiya kahineti Xoossa keetha yida miishiya ubbaa saaxiniyan yeggoosona.
2KI 12:10 Enti saaxiniyan daro miishey dagaayetidaysa be7ida wode ubban, kawo xaafeynne kahine halaqay yidi, miishiya taybidi, karxiitan qoloosona.
2KI 12:11 Taybetida miishiya salla7idaape guye, Xoossa keetha oosuwa xeellana mela sunthetida asaas immoosona. Enti miishiya ekidi, Xoossa keethan anaaxetasinne gimbeysati immoosona.
2KI 12:12 Miishiya shuchu masseysatasinne qoo7eysatas qanxanaw, Xoossa keetha oorathanaw, sanqa, shuchunne koshshiya harabata shammanaw go7etoosona.
2KI 12:13 Xoossa keetha yida miishiyape Xoossa keetha bira burcukota, qapheta, keretanne moyzeta woyko worqanne bira miisheta oothanaw kessibookona.
2KI 12:14 He miishe ubbay Xoossa keetha oorathiya asaas qanxetis.
2KI 12:15 Xoossa keetha oosuwa xeellanaw sunthetida asati ammanetida asi gidida gisho, “Miishiyan ay ay oothidetii?” yaagidi oychida asi oonika baawa.
2KI 12:16 Naaqo yarshonne nagara yarshos qanxetiya miishey kahinetas gelesipe attishin, Xoossa keetha oorathiya miishe saaxiniyan gelenna.
2KI 12:17 He wode Araame kawoy Azaheeli bidi, Gaate katama olidi oykis. Kaallidi Yerusalaame olanaw simmis.
2KI 12:18 Shin Yihuda kawoy Iyo7aasi iyape kase kawotida Yihuda kawoti Iyosaafexi, Iyoraaminne Akaziyaasi Godaas dummayida miisheta, ba imota, Xoossa keetha imotanne kawo gadho shalo minjiya bessan de7iya worqa ubba ekis. Araame kawas Azaheelas yeddin, Azaheeli Yerusalaame olanaw dendoysa aggaagis.
2KI 12:19 Kawoy Iyo7aasi hanida harabaynne I oothidaba ubbay Yihuda kawota Taarike Maxaafan xaafetis.
2KI 12:20 Hessafe guye, iya moorinnati iya bolla maqetidi, Siila efiya ogiyan Miilo geetetiya keethan wodhidosona.
2KI 12:21 Iya wodhida oosanchoti Sim7ata na7aa Yozakaaranne Shomeera na7aa Yozabaata. Iyo7aasi Dawita Kataman ba mayzata duufon moogetis; iya bessan iya na7ay Amasiyaasi kawotis.
2KI 13:1 Akaziyaasa na7ay, Yihuda Kawoy Iyo7aasi kawotida laatamanne heedzantho laythan, Iyyu na7ay Iyo7akaazi Isra7eele bolla kawotis; I Samaaren uttidi tammanne laapun laythi kawotis.
2KI 13:2 I, Isra7eele asaa balethida Iyorbaama soo asaa nagara kaallidi, Godaa sinthan iitaba oothis; I he nagaraa ooso aggibeenna.
2KI 13:3 Hessa gisho, Godaa hanqoy Isra7eele bolla suullis; Goday enta daro wode Araame kawa Azaheela, hessadaka iya na7aa Wolde-Adara kushen aathidi immis.
2KI 13:4 Hessafe guye, Iyo7akaazi Godaa woossis. Goday iya woosa si7is; Soore kawoy Isra7eele ay mela iita meton un7ethidaako Goday be7is.
2KI 13:5 Isra7eele asa ashshiya asi immin, enta Araame kushepe kessi ekidosona. Isra7eele asay kaseysada banta son saron de7idosona.
2KI 13:6 Hessi haninka Isra7eele asaa balethida Iyorbaama soo asaa nagaraape simmibokona; enti he nagaraa ooso aggibokona. Qassi Asheera geetetiya xoosse eeqa misiley Samaaren eqidi de7ees.
2KI 13:7 Iyo7akaazas ishatamu para asata, tammu gaareta, 10,000 toho olanchota, hara olanchota xalaali attidosona. Araame kawoy enta dhaysis; I enta wudumman de7iya suullada oothis.
2KI 13:8 Iyo7akaazi hanida harabay, I oothidaba ubbaynne iya minotethay Isra7eele Kawota Taarike Maxaafan xaafetis.
2KI 13:9 Iyo7akaazi hayqidi, ba mayzata gakis; iya bessan iya na7ay Yo7aasi kawotis.
2KI 13:10 Yihuda kawoy Iyo7aasi kawotida hastamanne laapuntho laythan, Iyo7akaaza na7ay Yo7aasi Samaaren Isra7eele bolla kawotis; I tammanne usupun laythi kawotis.
2KI 13:11 Yo7aasi Godaa sinthan iitabaa oothis. Isra7eele asaa balethida Nabaaxa na7aa Iyorbaama nagaraape issuwaka ashshona oothis; I he nagara ooso aggibeenna.
2KI 13:12 Yo7aasi hanida harabay, I oothidaba ubbaynne Yihuda Kawa Amasiyasara oletida olay Isra7eele Kawota Taarike Maxaafan xaafetis.
2KI 13:13 Yo7aasi hayqidi, ba mayzata gakis; Samaaren Isra7eele kawotara moogetis. Iya bessan iya na7ay Iyorbaami kawotis.
2KI 13:14 Elsi hayqos gathiya harge hargetis; Isra7eele kawoy Yo7aasi iya be7anaw bidi, “Ta aawaw; ta aawaw, neeni Isra7eele asaas wolqanne gondalle!” yaagidi yeekis.
2KI 13:15 Elsi, “Dongenne donge toora ekada ya” yaagin, Yo7aasi ehis.
2KI 13:16 Elsi kawako, “Dongiya giigisa oyka” yaagis; I dongiya giigisidi oykidashin, Elsi ba kushiya kawa kushiya bolla wothis.
2KI 13:17 Elsi, “Doloha bagga maskootiya dooya” yaagis. I dooyin, Elsi, “Donge tooran duka” yaagis. I dukin Elsi, “Haysi Godaa donge! Haysi Araame asaa xooniya donge! Neeni Araame asaa Afeeqan xoonana gakanaw olana” yaagis.
2KI 13:18 Hessafe guye, Elsi kawako, “Donge toorata eka” yaagis. I ekin, Elsi, “Biittaa cadda” yaagis. I heedzu toho biitta caddidi aggaagis.
2KI 13:19 Xoossa addey, kawa bolla hanqetidi, “Ichashu toho woyko usupun toho biitta caddidaba gidiyako, neeni Araame asaa xoonada kumethi dhaysanashin! Neeni ha77i enta heedzu toho xalaala xoonana” yaagis.
2KI 13:20 Elsi hayqidi moogetis. Moo7abe paannoti Isra7eele biitta bolla laythan laythan dendoosona.
2KI 13:21 Issi gallas guutha Isra7eele asati issi uraa aha moogishe, Heko, Moo7abe paannota be7idosona. Uraa aha Elsa duufuwa giddo holidi baqatidosona. Ahay Elsa meqethaa bolla wodhidi, paxidi dendi eqis.
2KI 13:22 Iyo7akaazi kawotida laytha ubban Soore Kawoy Azaheeli Isra7eele un7ethis.
2KI 13:23 Shin Goday Abrahaamera, Yisaaqaranne Yayqoobara caaqida caaquwa gisho, entaw keehis, qadhetis, qopis. Hachi gakanaw I enta dhaysibeenna woyko ba sinthafe diggibeenna.
2KI 13:24 Araame kawoy Azaheeli hayqin, iya bessan iya na7ay Wolde-Adari kawotis.
2KI 13:25 Azaheeli iya aawa Iyo7akaazi olan oykida katamata, Iyo7akaaza na7ay Yo7aasi Azaheela na7aa Wolde-Adarape ekis. Yo7aasi iya heedzu toho xoonidi, Isra7eele katamata zaaris.
2KI 14:1 Iyo7akaaza na7ay, Isra7eele kawoy Yo7aasi kawotida nam7antho laythan, Yihuda kawa Iyo7aasa na7ay Amasiyaasi kawotis.
2KI 14:2 I kawotiya wode laythi iyaw laatamanne ichasha; I Yerusalaamen laatamanne uddufun laythi kawotis. Iya aaye sunthay Yoodanoo; iya Yerusalaame maccas.
2KI 14:3 Amasiyaasi Godaa sinthan suureba oothis; shin iya mayzay Dawiti oothidaysada gidonashin, ba aawa Iyo7aasa ogiya kaallis.
2KI 14:4 Asay dhoqa goyinno bessata dhaysibeenna; asay he bessan yarsho yarsheysanne ixaane cuyiseysa aggibokona.
2KI 14:5 Amasiyaasi kawotethaa minthidi oykidaape guye, kase kawa, ba aawa Iyo7aasa wodhida shuumata wodhis.
2KI 14:6 Muse higge maxaafan xaafetidaysada, Goday, “Nayti oothida nagara gisho, aawata wodhanaw bessenna; qassi aawati oothida nagaraa gisho, nayta wodhanaw bessenna. Asi ubbay ba oothida nagaran nagaran hayqanaw bessees” yaagidi kiittidaysada ba aawa wodhida asaa nayta wodhibeenna.
2KI 14:7 Amasiyaasi Maxine Zangaaran tammu mukulu Edoome asaa wodhidi, Seela katamaa olan oykidi, he bessa Yoqiti7eela gidi sunthis; hachi gakanaw he sunthan xeegetees.
2KI 14:8 Hessafe guye, Amasiyaasi Iyyu na7aa na7aa, Iyo7akaaza na7aa, Yo7aasako, “Haaya; ane nam7ay ola gahetoos” yaagidi ase kiittidi mandis.
2KI 14:9 Shin Isra7eele kawoy Yo7aasi, Yihuda kawa Amasiyaasako, “Libaanosen de7iya kinchotey, Libaanosen de7iya zigaako, ‘Ne na7iw ta na7aas imma’ yaagis. Shin Libaanosen de7iya issi do7ay yaara kanthidi, he kinchotiya yedhis.
2KI 14:10 Ee, neeni tuma Edoome biitta xoonadasa; ha77i otortadasa. Neeni ne xoonuwan ufaytada, ne son wopu gada utta. Ne bollanne ne biitta Yihuda bolla metonne dhayo ehiyaba ayis denthethay?” yaagidi zaaris.
2KI 14:11 Shin Amasiyaasi iya si7ibeenna. Isra7eele kawoy Yo7aasi olas keyin, inne Yihuda kawoy Amasiyaasi Yihudan de7iya Beet-Sameesa kataman ola gahetidosona.
2KI 14:12 Isra7eeley Yihuda xoonin, Yihuda asa ubbay baqatidi, banta soo banta soo bidosona.
2KI 14:13 Isra7eele kawoy Yo7aasi Akaziyaasa na7aa na7aa, Iyo7aasa na7aa, Yihuda kawa Amasiyaasa Beet-Sameesa kataman di77is. Yerusalaame dirsa gimbiya, Efreema Pengiyafe bidi, Maazane Pengiya gakanaw de7iya oyddu xeetu wadha gidiya bessaa laallis.
2KI 14:14 Xoossa keethaninne kawo gadhon shalo minjiya keethan de7iya worqaa, biraanne miishe ubbaa ekis; qassi oythi gididi di7etida asaaka ekidi, Samaare simmis.
2KI 14:15 Yo7aasi hanida harabay, I oothidabay, iya minotethaynne Yihuda kawa Amasiyasara oletidabay Isra7eele kawota Taarike Maxaafan xaafetis.
2KI 14:16 Yo7aasi hayqidi, ba mayzata gakis; Samaaren Isra7eele kawotara moogetis. Iya bessan iya na7ay Iyorbaami kawotis.
2KI 14:17 Iyo7akaaza na7ay, Isra7eele kawoy Yo7aasi hayqidaape guye, Yo7aasa na7ay, Yihuda kawoy Amasiyaasi tammanne ichashu laythi de7is.
2KI 14:18 Amasiyaasi hanida harabay Yihuda kawota Taarike Maxaafan xaafetis.
2KI 14:19 Amasiyaasa wodhanaw asay Yerusalaamen maqetis; yaatin I Laakiso katama baqatis. Shin enti iya geedo Laakiso katama ase kiittin, iya yan wodhidosona.
2KI 14:20 Wodhidi iya aha paran caani ehidi, Dawita kataman Yerusalaamen iya mayzatara moogidosona.
2KI 14:21 Hessafe guye, Yihuda asa ubbay tammanne usupun laytha na7aa Azaariyasa iya aawa Amasiyaasa bessan kawothidosona.
2KI 14:22 Iya aaway Amasiyaasi hayqidaape guye, Azaariyasi Elata katama zaari keexidi, Yihudan gathis.
2KI 14:23 Iyo7aasa na7ay, Yihuda kawoy Amasiyaasi kawotida tammanne ichashantho laythan, Isra7eele kawa Yo7aasa na7ay Iyorbaami Samaaren kawotis; I oytamanne issi laythi kawotis.
2KI 14:24 Nam7antho Iyorbaami Godaa sinthan iitabaa oothis; Isra7eele asaa nagara oosisida Nabaaxa na7aa Iyorbaami ogiyape haakibeenna.
2KI 14:25 Gaat-Hefera addiya Amaate na7aa nabiya, ba aylliya Yoonasa baggara Goday Isra7eele Xoossay ba qaalan odidaysada, Hamaata Pinuwa geetetiya bessaafe doomidi, Maxine Abbaa gakanaw de7iya Isra7eele zawa Yo7aasa na7ay Iyorbaami xoonidi zaaris.
2KI 14:26 Isra7eelen asa ubbay aylle gidin, womaanno gidin, ay mela un7etidaako, Goday be7is; enta maaddiya oonika baawa.
2KI 14:27 Goday Isra7eele asaa sunthaa salope garsan quchana gibeenna. Hessa gisho, Goday enta Yo7aasa na7aa Iyorbaama baggara ashshis.
2KI 14:28 Iyorbaami hanida harabay, I oothidaba ubbay, oletidabaynne Yihuda bagga gidida Damasqonne Hamaata katamata Isra7eeles zaaridabay Isra7eele kawota Taarike Maxaafan xaafetis.
2KI 14:29 Iyorbaami hayqidi, ba mayzata, Isra7eele kawota gakis; iya bessan iya na7ay Zakaryaasi kawotis.
2KI 15:1 Isra7eele kawoy Iyorbaami kawotida laatamanne laapuntha laythan, Yihuda kawa Amasiyaasa na7ay Azaariyasi kawotis.
2KI 15:2 I kawotida wode, iyaw laythi tammanne usupuna; I Yerusalaamen ishatammanne nam7u laythi kawotis. Iya aaye sunthay Yikoolo; iya Yerusalaame maccas.
2KI 15:3 Iya aaway Amasiyaasi oothidaysada, ika Godaa sinthan suureba oothis.
2KI 15:4 Gidoshin, he bessan yarsho yarsheysanne ixaane cuyiseysa asay aggiboonna gisho, dhoqa goyinno bessata dhaysibeenna;
2KI 15:5 Goday Azaariyasa guutha goga hargen oythis; hayqana gakanaw he hargey iya yeddiboonna gisho, dumma keethan barka de7is. He wode kawa na7ay Iyo7atami kawo gadhon de7idi, biitta haaris.
2KI 15:6 Azaariyasi hanida harabaynne I oothidaba ubbay Yihuda Kawota Taarike Maxaafan xaafetis.
2KI 15:7 Azaariyasi hayqidi, ba mayzata gakis; Dawita Kataman ba mayzatara moogetis. Iya bessan iya na7ay Iyo7atami kawotis.
2KI 15:8 Yihuda kawoy Azaariyasi kawotida hastamanne hospuntho laythan, Iyorbaama na7ay Zakaryaasi Isra7eele bolla Samaaren kawotis; I usupun ageena kawotis.
2KI 15:9 Iya mayzati oothidaysada, ika Godaa sinthan iitabaa oothis; Nabaaxa na7ay Iyorbaami Isra7eele asa oosisida nagaraa ooso aggibeenna.
2KI 15:10 Iyabeesa na7ay Saloomi Zakaryaasa bolla maqetidi, Yiblaama geetetiya bessan wodhidi iya bessan baw kawotis.
2KI 15:11 Zakaryaasi hanida harabaynne I oothidaba ubbay Isra7eele Kawota Taarike Maxaafan xaafetis.
2KI 15:12 Hessada hanidi, Goday Iyyus, “Ne kochay oyddantho yeleta gakanaw, Isra7eele kawotetha araatan uttana” yaagidi odida qaalay poletis.
2KI 15:13 Yihuda kawoy Ooziyani kawotida hastamanne uddufuntho laythan, Yaabesa na7ay Salumi kawotis; I Samaaren issi ageena kawotis.
2KI 15:14 Gaade na7ay Minaheemi Tirsa katamaape Samaare bis. Samaaren de7iya Yaabesa na7aa Saluma wodhidi iya bessan baw kawotis.
2KI 15:15 Salumi hanida harabaynne I maqetida maqoy Isra7eele Kawota Taarike Maxaafan xaafetis.
2KI 15:16 He wode Minaheemi Tirsafe dendidi, Tifisanne, yan de7iya asaanne katamaa heeran de7iya biittata ubbaa olis. Enti banta katamaa dirsa pengiya iyaw dooyonna ixida gisho, Tifisa olidi dhaysis; qassi yan de7iya qantha maccasa ubbaa uluwa daakis.
2KI 15:17 Yihuda kawoy Azaariyasi kawotida hastamanne uddufuntho laythan, Gaade na7ay Minaheemi Isra7eele bolla kawotis; I Samaaren tammu laythi kawotis.
2KI 15:18 I Godaa sinthan iitabaa oothis; Nabaaxa na7ay Iyorbaami Isra7eele asaa oosisida nagaraape haakibeenna.
2KI 15:19 Hessafe guye, Asoore kawoy Telgeltelfelisoori Isra7eele bolla dendis. Kawotethan bana minthana melanne maaddana mela, Minaheemi Telgeltelfelisooras 34,000 kilo giraame bira santime immis.
2KI 15:20 Minaheemi he miishiya Isra7eele asaa wolqan kessis; Asoore kawas immanaw dure asi ubbay issoy issoy ishatamu bira santime kessidosona. Hessada oothin, Asoore kawoy Isra7eele biitta aggidi, ba biitta simmis.
2KI 15:21 Minaheemi hanida harabaynne I oothidaba ubbay Isra7eele Kawota Taarike Maxaafan xaafetis.
2KI 15:22 Minaheemi hayqidi, ba mayzatan gahetis; iya bessan iya na7ay Paqsiyaasi kawotis.
2KI 15:23 Yihuda kawoy Azaariyasi kawotida ishatamantho laythan, Minaheema na7ay Paqsiyaasi Isra7eele bolla Samaaren kawotis; I nam7u laythi kawotis.
2KI 15:24 Paqsiyaasi Godaa sinthan iitabaa oothis; Nabaaxa na7ay Iyorbaami Isra7eele asa oosisida nagaraa ooso aggibeenna.
2KI 15:25 Iya toora moconatape issoy, Ramala na7ay Paaquhey iya bolla maqetidi dendis. Galada asaape ishatamu addeta baara ekidi, Samaaren kawo gadhon de7iya miixaa gelis. Paaquhey, Paqsiyaasa, Argobanne Ariya issife wodhidi iya bessan baw kawotis.
2KI 15:26 Paqsiyaasi hanida harabaynne oothidaba ubbay Isra7eele Kawota Taarike Maxaafan xaafetis.
2KI 15:27 Yihuda Kawoy Azaariyasi kawotida ishatammanne nam7antho laythan, Ramala na7ay Paaquhey Isra7eele bolla Samaaren kawotis; I laatamu laythi kawotis.
2KI 15:28 Paaquhey Godaa sinthan iitabaa oothis; Nabaaxa na7ay Iyorbaami Isra7eele asaa oosisida nagaraape haakibeenna.
2KI 15:29 Isra7eele kawa Paaquhe wodiyan Asoore Kawoy Telgeltelfelisoori yidi, Iyoona, Abeel-Beet-Ma7ika, Yanoha, Qaadesanne Haxoora olidi oykis; qassi Galada, Galilanne Niftaaleme biitta ubbaa olidi, asaa di77idi Asoore biitta efis.
2KI 15:30 Azaariyasa na7ay Iyo7atami kawotida laatamantho laythan, Ela na7ay Hosey Ramala na7aa Paaquhe bolla maqetidi wodhidi, iya bessan baw kawotis.
2KI 15:31 Paaquhey hanida harabaynne oothidaba ubbay Isra7eele Kawota Taarike Maxaafan xaafetis.
2KI 15:32 Ramala na7ay, Isra7eele kawoy Paaquhey kawotida nam7antho laythan, Yihuda kawa Azaariyasi na7ay Iyo7atami kawotis.
2KI 15:33 Iyo7atami kawotiya wode iyaw laythi laatamanne ichasha; I Yerusalaamen tammanne usupun laythi kawotis. Iya aaye sunthay Yarusho; Yarusha Saadoqa na7iw.
2KI 15:34 Ba aaway Azaariyasi oothidaysada, Iyo7atami Godaa sinthan suureba oothis.
2KI 15:35 Gidoshin, he bessan yarshonne ixaane cuyisethi aggiboonna gisho, asay dhoqa goyinno bessata dhaysibeenna. Iyo7atami Xoossa keetha geliya qommo bagga pengiya zaaridi keexis.
2KI 15:36 Iyo7atami hanida harabaynne oothidaba ubbay Yihuda Kawota Taarike Maxaafan xaafetis.
2KI 15:37 He wode Goday Araame kawa Ra7asoonanne Ramala na7aa, Isra7eele kawa Paaquhe Yihuda biitta olana mela denthethis.
2KI 15:38 Iyo7atami hayqidi, ba aawa Dawita Kataman ba mayzatara moogetis; iya bessan iya na7ay Akaazi kawotis.
2KI 16:1 Ramala na7ay Paaquhey kawotida tammanne laapuntho laythan, Iyo7atama na7ay Akaazi Yihudan kawotis.
2KI 16:2 I kawotiya wode laythi iyaw laatama; Yerusalaamen tammanne usupun laythi kawotis. Iya mayzay Dawita suureba oothidaysada, Godaa ba Xoossaa sinthan suureba oothibeenna.
2KI 16:3 I kase de7ida Isra7eele kawota ogiyan hemetis. Qassi Goday Isra7eele asa sinthafe gooddidi kessida asata wogaa, ixetida ogiya kaallidi, ba adde na7aa tamara aathidi yarshis.
2KI 16:4 Akaazi dhoqa goyinno bessatan, zumata bollanne daashsha mithata ubbaa garsan yarsho yarshis; ixaane cuyisis.
2KI 16:5 Hessafe guye, Araame kawoy Ra7asooninne Ramala na7ay, Isra7eele kawoy Paaquhey Yerusalaame olanaw yidi teqidosona; shin Akaaza xoonanaw danda7ibookona.
2KI 16:6 He wode Araame kawoy Ra7asooni Elata katama zaari ekidi, Yihuda asa gooddidi kessis. Yaatin Edoome asati Elata katama yidi, hachi gakanaw yan de7oosona.
2KI 16:7 Hessa gisho, Akaazi Asoore kawa Telgeltelfelisoorako kiita yeddidi, “Taani ne na7anne ne aylle. Hayyana haaya; tana oliya Araame kawa kushepenne Isra7eele kawa kushepe ashsha” yaagis.
2KI 16:8 Qassi Akaazi Xoossa keethaanne kawo gadhon shalo minjiya bessan de7iya biraanne worqaa ekidi, Asoore kawas imota oothidi yeddis.
2KI 16:9 Akaaza oysha ekidi, Asoore kawoy Damasqo katama oli oykidi, asaa di77idi, Qiira efis; kawa Ra7asoonaka wodhis.
2KI 16:10 Kawoy Akaazi Asoore kawa Telgeltelfelisoorara gahetanaw Damasqo bis. Damasqon de7iya yarsho bessa be7idi, iya daaniya yarsho bessi keexana mela, he yarsho bessa misiliyanne keexiya hanota kahiniya Uraya kiittis.
2KI 16:11 Kawoy Akaazi Damasqofe simmidi yaanas, kahiney Urayi iya daaniya yarsho bessi giigisis.
2KI 16:12 Kawoy Damasqofe simmida wode, yarsho bessay oosetidi poletidaysa be7idi, yarsho bessaako shiiqidi,
2KI 16:13 xuussa yarshonne katha yarsho yarshis. Qassi ushsha yarshuwa gussis; issifetetha yarsho suuthaaka yarsho bessa bolla dharcis.
2KI 16:14 Naase biratape oosetidi, Godaas dummatidi uttida yarsho bessay, ooratha yarsho bessaafenne Xoossa keethaafe giddon de7ees. Akaazi he gal7a yarsho bessa denthidi, ba oosisida ooratha yarsho bessaafe pudeha baggan wothis.
2KI 16:15 Kawoy Akaazi kahiniya Uraya haysada yaagidi kiittis; “Ha gita yarsho bessan wonta xuussa yarsho, omarsi shiishiya katha yarsho, kawoy shiishiya xuussa yarshonne katha yarsho, asa ubbay shiishiya xuussa yarsho, katha yarshuwanne ushsha yarshuwa yarsho bessan shiisha. Naasepe oosetida hanko yarsho bessa taani taw oychiya bessi oothana” yaagis.
2KI 16:16 Urayi kawoy Akaazi kiittidaysada oothis.
2KI 16:17 Kawoy Akaazi Xoossa keetha giddon go7etiya, naase biratape oosetida gaareta loche birata qanxidi, miyepe diggidi meecetiya kereta gaareta bollafe denthis. Qassi gita kereta, iya zempisida naase birata boora misileta bollafe denthidi, shucha baasuwa bolla wothis.
2KI 16:18 Asoore kawa gisho, Akaazi Sambaata gallas Xoossa keetha giddon kawa araatay micetiya dhoqu gida bessaanne kawoy Xoossa keethi geliya kare ogiya gordidi, yuuyi aadhidi gelana mela oothis.
2KI 16:19 Kawoy Akaazi hanida harabaynne I oothidaba ubbay Yihuda Kawota Taarike Maxaafan xaafetis.
2KI 16:20 Akaazi hayqidi, ba mayzatan gahetis; Dawita Kataman ba mayzatara moogetis; iya bessan iya na7ay Hizqiyaasi kawotis.
2KI 17:1 Yihuda kawoy Akaazi kawotida tammanne nam7antho laythan, Ela na7ay Hosey Isra7eele bolla Samaaren kawotis; I uddufun laythi kawotis.
2KI 17:2 I, Godaa sinthan iitabaa oothis; gidikoka, iyape kase de7ida Isra7eele kawoti oothidaysa mela iitabaa oothibeenna.
2KI 17:3 Asoore kawoy Salminasoori yidi, iyara ola gahetin, Hosey xoonetidi, iyaw giiris.
2KI 17:4 Shin guutha laythafe guye, kawoy Hosey, Gibxe kawa Segoras kiita yeddidi, bana maaddana mela oychis. Kaseysada Asoore kawas giira immeysa aggaagis. Kawoy Salminasoori hessa si7ida wode iya oythidi, qasho keethi gelsis.
2KI 17:5 Asoore kawoy Isra7eele biitta ubbaa bolla dendidi, heedzu laythi gakanaw Samaare katama teqis.
2KI 17:6 Hosey kawotida uddufuntho laythan Asoore kawoy Samaare katama oykis; Isra7eele asaa ekidi, Asoore biitta efis. Entafe baggaa Alahaninne Abooran, baggaa qassi Gozaana shaafa matan, attidaysata Meedona katamatan wothis.
2KI 17:7 Haysi ubbay haniday, Isra7eele asay Godaa banta Xoossaa bolla, enta Gibxefe, Gibxe kawa kushepe kessidaysa bolla nagara oothida gishosa. Qassi enti hara xoossatas goyinnidi,
2KI 17:8 Goday enta sinthafe gooddidi kessida hara kawotethata wogaa kaallida gishosa. Hessa bolla qassi Isra7eele kawoti doomida iita wogaa kaallida gishosa.
2KI 17:9 Isra7eele asay Godaa banta Xoossaa bolla geeman iitabaa oothidosona; guutha moothafe bidi, gita katama gakanaw de7iya bessa ubban bantaw dhoqa goyinno bessata medhidosona.
2KI 17:10 Qassi enti eeqa shuchatanne Asheera geetetiya xoosse misileta zuma huuphe ubbaaninne daashsha mitha ubbaa garsan essidosona.
2KI 17:11 Goday beni enta sinthafe gooddidi kessida allaga asay oothidaysada, dhoqa bessa ubban ixaane cuyisidosona. Enti iitabaa oothidi Godaa hanqethidosona.
2KI 17:12 Goday enta, “Goyinnofite” yaagida eeqa goyinnidosona.
2KI 17:13 Goday Isra7eele asaanne Yihuda asaa ba nabeta baggaranne qoncethi be7iya ubbaa baggara, “Hinte iita ogiyape simmite; taani nabeta, ta aylleta baggara, hinte aawati kiitetanaada immida higgiyan xaafetida wogaanne awaajuwa naagite” yaagis.
2KI 17:14 Shin enti si7onna ixidosona. Godaa banta Xoossaa ammanetibona banta aawatada morge minthidosona.
2KI 17:15 Enti iya wogaa, I enta aawatara caaqida caaquwanne iya naagisuwa kadhidosona. Enti laafa eeqata goyinnidi, banta huuphenka laafa gididosona. Goday enta, “Hinte yuushuwan de7iya allaga asay ootheysada oothopite” yaagida kiitaa ixidi, enta de7uwa wogaa kaallidosona.
2KI 17:16 Godaa banta Xoossaa kiita ubbaa aggaagidosona. Mari daaniya, nam7u goyinno misiletanne Asheera geetetiya eeqe misiliya medhidosona. Salon de7iya xoolinto ubbaa goyinnidosonanne Ba7aale eeqa haggaazidosona.
2KI 17:17 Enti banta adde naytanne macca nayta tama giddora aathidosona. Marotanne moytille xeegeyisata zore oychidosona. Hessa mela iitabaa oothanaw bantana bayzidi, Godaa hanqethidosona.
2KI 17:18 Hessa gisho, Goday Isra7eele bolla hanqetidi enta ba sinthafe diggin, Yihuda kochaa xalaali attis.
2KI 17:19 Qassi Yihuda asayka, Godaa banta Xoossaa kiita naagibookona; enti Isra7eele asaa wogaa kaallidosona.
2KI 17:20 Hessa gaason, Goday Isra7eele kochata ubbaa aggaagis. I enta un7ethidi, ba sinthafe diggana gakanaw, bonqiya asaa kushen yeggis.
2KI 17:21 Goday Isra7eele asaa Dawita kochaa kawotethaafe beni shaakida wode, Isra7eele asay Nabaaxa na7aa Iyorbaama bantaw kawothidosona. Hessafe guye, Isra7eele asay Godaa kaallonnaada Iyorbaami diggis; I enta gita nagara oosisis.
2KI 17:22 Isra7eele asay Iyorbaami oothida nagaraa ubbaa oothidosona; iyape simmibokona.
2KI 17:23 Goday nabeta, ba aylleta ubbaa baggara kase odidaysada enta ba sinthafe diggis. Isra7eele asay banta yeletida biittafe di7etidi, Asoore biitta bidi, hachi gakanaw yan de7idosona.
2KI 17:24 Asoore kawoy Babiloone biittan de7iya Kuuta, Awaana, Hamaatanne Safarwayma katamatan de7iya asa ehidi, Isra7eele asaa bessan, Samaare katamatan wothis. Enti he katamata oykidi, yan de7idosona.
2KI 17:25 Enti koyro yan duussu doomida wode, Godaa goyinnibookona. Hessa gaason, Goday enta giddo gaammota yeddin, gaammoti enta giddofe baggata mentherethidi wodhidosona.
2KI 17:26 Yaatin, Asoore kawas, “Neeni ehada Samaare katamatan wothida asay, ha biitta xoossaa wogaa erokona. Heko, yaatin, enta mentherethi wodhiya gaammota enta bolla yeddis” yaagidi odidosona.
2KI 17:27 Asoore kawoy, “Hinte Samaarepe di77idi ehida kahinetape issuwa zaaridi, yaa yeddite. I yaa bidi, he biitta xoossaa wogaa enta tamaarso” yaagidi kiittis.
2KI 17:28 Hessa gisho, Samaarepe di77idi ehida kahinetape issoy Beetelen daanaw yidi, Godaa goyinno wogaa enta tamaarsis.
2KI 17:29 Gidoshin, Samaaren uttida asay bantaw bantaw goyinniya eeqa misileta ba de7iya bessan bessan medhidosona. Enti de7iya katamatan, kase bantaw keexida dhoqa goyinno bessatan efidi wothidosona.
2KI 17:30 Hessada oothidi, Babiloone asay Sukot-Banooba geetetiya eeqa misileta medhidosona. Kuuta asay Argaala geetetiya eeqa misileta medhidosona. Hamaata asay Ismaata geetetiya eeqa misileta medhidosona.
2KI 17:31 Awaawa asay Albazaranne Tartaqa geetetiya eeqa misileta medhidosona. Safarwayma asay qassi Adramelekinne Anameleka geetetiya banta xoossatas banta nayta taman xuuggidi yarshidosona.
2KI 17:32 Enti Godaa goyinnidosona; shin banta giddofe dumma dumma asaa dooridi, dhoqa goyinno bessatan kahine oothidi shuumidosona.
2KI 17:33 Enti Godaa goyinnidosona; gidikoka, banta yida biitta biitta asaa meeziya kaallidi, banta xoossataka goyinnidosona.
2KI 17:34 Enti hachi gakanaw kase meezetidaysada oothosona. Enti tuma Godaa goyinnokona woyko Goday Isra7eele gidi sunthida Yayqooba zerethaas immida awaajuwanne wogaa, higgiyanne kiitaa naagokona.
2KI 17:35 Goday Isra7eele asaara beni caaqida wode, enta haysada yaagidi kiittis; “Hara xoossata goyinnofite; entaw gulbatopite; entaw oothopite woyko entaw yarshofite.
2KI 17:36 Shin Gibxefe hintena ba gita wolqaaninne ba micetida kushen kessida Godaas oothite; iyaw gulbatite; iyaw yarsho yarshite.
2KI 17:37 Goday hintew xaafida awaajuwanne wogaa, higgiyanne kiitaa ubba wode naagite; hara xoossata goyinnofite.
2KI 17:38 Taani hintera caaqida caaquwa dogopite; hara xoossata goyinnofite.
2KI 17:39 Hessa aggidi, Godaa hinte Xoossaa goyinnite. Hinte morketa ubbaafe hintena ashshanay tana” yaagidi kiittis.
2KI 17:40 Shin enti iyaw ero goonna ixidi, kase banta meeziya kaallidosona.
2KI 17:41 He asati Godaa goyinnisheka, issi baggara banta eeqa misileta goyinnoosona. Hachi gakanaw enta kochay enta aawati goyinneysada goyinnishe de7oosona.
2KI 18:1 Ela na7ay Hosey Isra7eelen kawotida heedzantho laythan, Yihuda kawa Akaaza na7ay Hizqiyaasi Yihudan kawotis.
2KI 18:2 I kawotiya wode laythi iyaw laatamanne ichasha; Yerusalaamen laatamanne uddufun laythi kawotis. Iya aaye sunthay Abiya geetetees; iya Zakaryaasa na7iw.
2KI 18:3 Iya mayzay Dawiti oothidaysada, Hizqiyaasi Godaa sinthan suureba oothis.
2KI 18:4 Asay dhoqa goyinno bessata diggis. Eeqa tuussata mentherethis. Asheera geetetiya xoosse misiliya qanxi yeggis. Qassi Musey naase biratape medhida, Nahushitana geetetiya shoosha misiliya mentherethis. He wodey gakanaw Isra7eele asay iyaw ixaane cuyisishe gam7is.
2KI 18:5 Hizqiyaasi Godaa Isra7eele Xoossaa ammanis; Yihuda kawota ubbaa giddon iya mela kawoy iyape kase gidin, iyape guye gidin bentibeenna.
2KI 18:6 I Godaara oyketis; Godaa kaalo aggibeenna; Goday Muse kiitida kiitata naagis.
2KI 18:7 Goday iyara gidis; I oothiyaba ubbay iyaw injetis. I Asoore kawa bolla makallidi, iyaw haaretonna ixis.
2KI 18:8 I, Filisxeeme asaa olidi guutha moothatape bidi, gita katama gakanaw, Gaazanne iya yuushon de7iya biittati attonna enti de7iya bessata ubbaa xoonis.
2KI 18:9 Kawoy Hizqiyaasi kawotida oyddantho laythan, Ela na7ay Isra7eele kawoy, Hosey kawotida laapuntho laythan, Asoore kawoy Salminasoori Isra7eele bolla dendidi, Samaare katamaa teqis.
2KI 18:10 Heedzantho laythi Samaare katama xoonis. Yaatin, Hizqiyaasi kawotida usupuntho laythan, Isra7eele kawoy Hosey kawotida uddufuntho laythan, Samaare katamay xoonetis.
2KI 18:11 Asoore kawoy Isra7eele asaa Asoore biitta efidi, entafe baggaa Alahaninne Aboora katamatan, baggaa Agooza shaafa matan baggaa qassi Meedona katamatan wothis.
2KI 18:12 Hessika enti Godaas banta Xoossaas kiitetonna ixidi, Godaa caaquwa, Godaa aylley, Musey kiitida kiita ubbaa menthida gishosa. Enti iya kiita si7anawunne kiitetanaw koybookona.
2KI 18:13 Kawoy Hizqiyaasi kawotida tammanne oyddantho laythan, Asoore kawoy Sanakreemi gimbetida Yihuda katamata ubbaa olidi oykis.
2KI 18:14 Yaatin, Yihuda kawoy Hizqiyaasi Laakiso kataman de7iya Asoore kawa Sanakreemas kiitaa yeddidi, “Taani balas; hayyana ta biitta yeddada keya. Neeni tana oychidaba aybaka ta new immana” yaagis. Asoore kawoy, Yihuda kawa Hizqiyaasako, “Neeni 10,000 kilo giraame biranne 1,000 kilo giraame worqa taw yedda” yaagis.
2KI 18:15 Hizqiyaasi Xoossa keethan, kawo gadhon shalo minjiya bessan de7iya bira ubbaa iyaw yeddis.
2KI 18:16 He wode Yihuda kawoy Hizqiyaasi, Xoossa keetha pengiya sanqata tiyida worqanne I ba huuphen penge tuuqeta tiyida worqaa qaaridi, Asoore kawas yeddis.
2KI 18:17 Asoore kawoy, Tartana, Rafeesanne Rasfaqisa geetetiya heedzu toora moconata, daro olanchotara Laakiso katamaape kawa Hizqiyaasako Yerusalaame yeddis. Enti bidi, Yerusalaame gakidi, Ma7o Meecciya addiya gade efiya ogiyape qommo baggara de7iya, dagatida haathay goggiya zara lanqen eqidosona.
2KI 18:18 Enti kawa xeegin, kawo gadho aawatethan aysiya Kalqe na7ay Eliyaqeemi, waanna xaafey Saminasinne Asaafa na7ay taarike xaafey Yo7aasi iyako kare keyidosona.
2KI 18:19 Asooreta halaqay, “Hizqiyaasas haysada yaagidi odite. Asoore kawoy, wolqaamay nena haysada yaagees; ‘Neeni aybin ammanetadii?
2KI 18:20 Olaa oletanaw new cincatethinne wolqi de7ees yaagasa. Shin neeni aybin ammanetada ta bolla haysa makalladii?
2KI 18:21 Heko, neeni Gibxe kawoy maaddana gada qopiyaba gidiko, meqida mayre xam7an katiya asa mela. Xam7ay meqin, pincoy kushe caddesinne madunxisees. Gibxe kawoy banan ammanetiya asa ubbaas hessa mela’ ” yaagis.
2KI 18:22 Shin neeni, “Nuuni Godan nu Xoossan ammanetoos” yaagiko, Hizqiyaasi, Yihuda asaanne Yerusalaame asaa, “Hinte Yerusalaamen de7iya yarsho bessan goyinnanaw koshshees” gidi, dhoqa goyinno bessatanne yarsho bessata diggiday iya gidennee?
2KI 18:23 Ha77i haaya; ta godaa Asoore kawuwara mandeta. Neeni togganaw danda7iya, gidiya asi demmiko, nam7u mukulu parata taani new immana.
2KI 18:24 Neeni, “Gibxeti para asatanne para gaareta taw yeddana” gada ammaniko, ta godaa tora moconatape issi guuthaaka zaaranaw danda7aka.
2KI 18:25 Hessa bolla qassi, taani ha77i tuma Godaa kiiti bayna ha biitta dhaysanaw koyadina? Goday ba huuphen tana, “He biitta bada, olada dhaysa” yaagis.
2KI 18:26 Hessafe guye, Kalqe na7ay Elyaqeemi, Saminasinne Yo7aasi Asooreta toora moconaako haysada yaagidosona; “Nuuni birshethi eriya gisho, hayyana nuus ne aylletas Aramike doonan oda. Dirsa gimbiya huuphe son de7iya asay si7onna mela, Ibraawetho doonan odopa” yaagidosona.
2KI 18:27 Shin toora moconay zaaridi, “Ha qaala taani hintewunne hinte godaa xalaalas odanaw ta goday tana kiittideyee? Hintera issife banta shi7a maanawunne banta sheesha uyanaw de7iya, ha dirsa gimbiya bolla uttida asa ubbaasa gidenneyee?” yaagis.
2KI 18:28 Asoore toora moconay dendi eqidi, ba qaala dhoqu oothidi, Ibraawetho doonan haysada yaagis; “Asoore kawoy wolqaamay hintena giyaba si7ite!
2KI 18:29 Kawoy hinteko haysada yaagees; ‘Hizqiyaasi hintena cimmofo; I hintena ta kushepe kessi ekanaw danda7enna.
2KI 18:30 Goday tuma nuna ashshana; ha katamayka Asoore kawa kushen gelenna’ yaagidi hinte Godan ammanetanna mela oothofo” yaagees.
2KI 18:31 Hinte Hizqiyaasi odiyaba si7opite. Asoore kawoy, “Taara sigetite; haa taako keyite. Hinte ubbay hinte woyniyapenne hinte balasiyape maana; hinte bookida ollafe haathe uyana.
2KI 18:32 Taani yada, hintena hinte biitta daaniya biitta efana. He biittay kathinne woyney, uythinne woyne gadey kumida biitta; shamaho zayteynne eessi kumida biitta. Hinte taw kiitetiko, de7on daana; hayqeketa. Hizqiyaasi, ‘Goday nuna ashshana’ yaagidi hintena cimmeysa si7opite.
2KI 18:33 Hara kawotethata xoossatape ba biitta Asoore kawa kushepe ashshida xoossi de7ii?
2KI 18:34 Hamaata xoossatinne Arfada xoossati awun de7oona? Safarwayma, Heenanne Iwa xoossati awun de7oona? Enti Samaare ta kushepe kessi ekidona?
2KI 18:35 Ha biittata xoossata ubbaa giddon, ba biitta ta kushepe ay xoossi ashshidashin, Goday Yerusalaame ta kushepe ashshanee?” yaagis.
2KI 18:36 Kawoy kase, “Entaw aykoka zaaropite” yaagidi odida gisho, asay issi qaalaka zaaronna si77i gidoosona.
2KI 18:37 Kalqe na7ay kawo gadho aawatethan aysiya Eliyaqeemi, waanna xaafey Saminasinne taarike xaafey Asaafa na7ay Yo7aasi banta ma7uwa daakidi, Hizqiyaasako bidi, Asooreta toora moconay gidaba ubbaa iyaw odidosona.
2KI 19:1 Kawoy Hizqiyaasi hessa si7ida wode, ba ma7uwa daakidi, kayo ma7o ma7di, Xoossa keethi gelis.
2KI 19:2 Kawo gadho aawatethan aysiya Eliyaqeemi, waanna xaafey Saminasinne cima kahineti kayo ma7o ma7idi, Amoxe na7aa nabiya Isayaasako baana mela kiittis.
2KI 19:3 Enti Isayaasako bidi, “Hizqiyaasi haysada yaagees; ‘Hachi gallasay meto gallas, seera gallasinne yeella gallas. Hessika na7i yeletanaw wodey gakin, bannakada yelanaw wolqi dhayda maccasa mela.
2KI 19:4 De7o Xoossaa cayana mela, iya goday, Asoore kawoy, kiitida toora mocona qaala ubbaa, Goday ne Xoossay si7onna aggenna. Qassi Goday, ne Xoossay he si7ida qaala gaason iya seeronna aggenna. Hessa gisho, nu asaa giddofe palahidi attidaysatas woossa’ ” yaagidosona.
2KI 19:5 Kawa Hizqiyaasa aylleti Isayaasako bida wode,
2KI 19:6 Isayaasi enta haysada yaagis; “Hinte godaas haysada yaagidi odite; ‘Asoore kawa aylleti tana cayishin, neeni si7ida cashsha qaalas yayyofa.
2KI 19:7 Heko, taani iya giddo issi ayyaana yeddana; I he woriya si7idi ba biitta simmana. I ba biitta bidi, yan mashshan hayqanaada oothana’ ” yaagis.
2KI 19:8 Asoore kawoy Laakiso katamaape dendidi bidaysa Asooreta toora moconay si7idi, guye simmidi kawoy Libina kataman oleteysa demmis.
2KI 19:9 Kawoy Sanakreemi, “Heko, Tophe kawoy Tirhaaqi nena olanaw yis” giya woriya si7idi, Hizqiyaasas haysada yaagidi kiittis.
2KI 19:10 “Yihuda kawaw Hizqiyaasa, neeni ammanetiya xoossay, ‘Yerusalaamey Asoore kawa kushen gelenna’ yaagidi cimmofo.
2KI 19:11 Asoore kawoti biitta ubbaa dhaysidi, oothidaba neeni si7adasa. Yaatin, neeni attana daanii?
2KI 19:12 Beni ta mayzati dhaysida biitta xoossati, hessatika, Gozaana, Kaaranenne Rafeesa biitta xoossatinne Talasaaran de7iya Edene xoossati he biitta dhayope ashshidonaa?
2KI 19:13 Hamaata kawoy, Arfada kawoy, Safarwayma kawoy, Heena kawoynne Iwa kawoy awun de7oona?” yaagidi kiittis.
2KI 19:14 Hizqiyaasi dabdaabiya kiitetida asaape ekidi nabbabis. Dabdaabiya Xoossa keethi efidi, Godaa sinthan miccis.
2KI 19:15 Yaatidi, Godaa haysada yaagidi woossis; “Abeeti Godaw, kiruubetape giddon uttiya Isra7eele Xoossaw, sa7aa kawotethata ubbaa bolla ne xalaali Xoosse; saluwanne sa7aa neeni medhadasa.
2KI 19:16 Abeeti Godaw, ne haythaa haa zaarada si7a. Abeeti Godaw, ne ayfiya dooyada xeella. Nena, de7o Xoossaa cayanaw Sanakreemi yeddida qaala si7a.
2KI 19:17 Abeeti Godaw, Asoore biitta kawoti kawotethatanne enta biitta dhayseysi tuma.
2KI 19:18 Enta xoossata taman xuuggidi dhaysidosona; enta xoossati kaseka asaa kushey massidi kessida mithinne shuchu gidiya gisho, tuma xoossata gidokona; hessa gisho, enti enta dhaysidosona.
2KI 19:19 Abeeti Godaw, ne xalaali Xoosse gideysa sa7aa kawotethati ubbay erana mela, ha77i zaarada, Godaw, nu Xoossaw, neeni nuna iya kushepe ashsha” yaagidi woossis.
2KI 19:20 Hessafe guye, Amoxe na7ay Isayaasi Hizqiyaasako haysada yaagidi kiittis; “Goday Isra7eele Xoossay haysada yaagees. Neeni Asoore kawa Sanakreema gaason tana woossida woosa si7as.”
2KI 19:21 Goday Sanakreemaba haysada yaagees. “Xiyoone geela7iya nena kadhawusu; nena borawusu; Yerusalaame macca na7iya ba huuphiya qaathidi nena qelqisawusu.
2KI 19:22 Neeni cayidaynne toochiday oonee? Neeni ne qaala oodde bolla dhoqu oothadii? otoron dhoqu gada oona xeelladii? Hessa neeni oothiday ta bolla, Isra7eele Geeshshaa bolla gidenne!
2KI 19:23 Neeni kiitida asaa baggara Godaa cayadasa. Qassi haysada yaagadasa; Taani taw de7iya daro para gaaretan dhoqa dereta huuphe, Libaanose zumaa huuphiya keyas. Keyada ubbaafe aduqiya zigatanne ubbaafe lo77iya xiiddata qanxas. Taani iyaw wursetha gaxaanne sikida wora gakas.
2KI 19:24 Taani allaga biittatan haatha olla bookada, haatha yaape uyas. Gibxe biittan goggiya haathe ubbaa taani ta tohuwan yedhada melisas” yaagadasa.
2KI 19:25 “Daro wodepe kase neeni gimbetida katamata laallada, laaletha doore kessana mela, taani qofa qachidaysa neeni si7abikii? Taani ha77i poliya halchota beni halcha wothas.
2KI 19:26 Hessa gisho, enta asaas wolqi ixin, enti kawuyidosonanne yeellatidosona. Enti gade maata mela; goshshan mokida carsha mela. Enti keetha huuphen doliya sharaafa mela kaxonna de7ishin, leegey mida kathada hanidosona.
2KI 19:27 Shin neeni uttiya bessaa, keyiyanne geliya bessaa, ta bolla neeni shenetida sheniya taani erayis.
2KI 19:28 Neeni ta bolla yilotida gishonne ne otoruwaka taani si7ida gisho, taani ne siidhiyan dafo aathana; ne doonan bixaala barsana. Yaatada ne yida ogiyara taani nena guye zaarana” yaagis.
2KI 19:29 Isayaasi kawa Hizqiyaasako haysada yaagis; “Haysi poletanaysas malaatay haysa; ha laythi hinte aasebo kaxida kathi maana; laythi qassi ha laythi kaxida aasebo maana. Shin kaalliya laythi hinte, hintew zeritenne cakite; woyne tokitenne iya miite.
2KI 19:30 Yihuda asaape attidaysati xapho yeddidi, ayfe ayfiya mitha mela gidana.
2KI 19:31 Attidaysati Yerusalaamepe keyana, palahidaysati Xiyoonepe yaana. Ubbaafe Wolqaama Godaa mishay hessa oothana.
2KI 19:32 “Hessa gisho, Asoore kawuwaba Goday haysada yaagees; ‘Asoore kawoy ha katama gelenna; woyko haysan ba donge dukenna. I ba gondalliya oykidi, ha katama sinthe aadhenna; woyko katama yuushuwa biitta dooren teqetenna.
2KI 19:33 Asoore kawoy ba yida ogiyara guye simmana; I ha katama gelenna. Taani Goday haysa odas.’
2KI 19:34 Taani ta bonchuwa gishonne ta aylliya Dawita gisho, ha katama teqada ashshana” yaagis.
2KI 19:35 He qamma Godaa kiitanchoy keyidi, Asoore asay dunkaanida bessan issi xeetanne hospun tammanne ichashu mukulu addeta wodhis. Yaatin asay wonta dendidi be7iya wode, Heko, ahi heeran kumis.
2KI 19:36 Asoore kawoy Sanakreemi dendidi, guye simmi bidi, Nanawe kataman uttis.
2KI 19:37 Issi gallas Sanakreemi ba xoossaa Nasaraaka Eeqa Keethan goyinnishin, iya nayti Adramelekinne Sarsari mashshan iya wodhidi, Araraate biitta baqatidosona. Iya na7ay Asradooni iya bessan kawotis.
2KI 20:1 He wode kawoy Hizqiyaasi hargidi, hayqanaw matis. Amoxe na7ay nabey Isayaasi iyako bidi, “Goday, ‘Neeni ne hargiyafe paxaka; ne hayqana; hessa gisho, ne keetha giigisa’ ” yaagis.
2KI 20:2 Hizqiyaasi godaako simmidi, Xoossaa woossis.
2KI 20:3 “Abeeti Godaw, taani ne sinthan tumatethan, kumetha wozanan hemetidaysanne nena ufaysiyabaa oothidaysa neeni qopana mela taani ne woossayis” yaagidi, daro cametidi, yeekidi woossis.
2KI 20:4 Isayaasi kawa sinthafe keyidi, kawo gadho dabaaba kanthidi boonna de7ishin, Godaa qaalay haysada yaagishe iyako yis.
2KI 20:5 “Guye simmada bada ta asaa kaalethiya Hizqiyaasas haysada yaagada oda. Goday, ne mayza Dawita Xoossay haysada yaagees; ‘Taani ne woosa si7as; ne afuthaa be7as. Heko, taani nena pathana; heedzu gallasape guye, neeni Xoossa keethi baana.
2KI 20:6 Ne laytha bolla taani new tammanne ichashu laythi gujana. Taani nenanne ha katamaa Asoore kawa kushepe ashshana. Taani ta bonchuwa gishonne ta aylliya Dawita gisho, ha katamaas oletada ashshana’ yaagees” yaagis.
2KI 20:7 Isayaasi, “Balase teera daaxidi, iya kixa bolla wothite; I paxana” yaagis.
2KI 20:8 Hizqiyaasi Isayaasa, “Goday tana pathanaysanne taani heedzantho gallas Xoossa keetha baanaysas malaatay aybee?” yaagidi oychis.
2KI 20:9 Isayaasi, “Goday ba gida qaala polanaw new malaata immana. Hiza neeni haysatape awusa dooray? Kuyay tammu dethaa sintha baana mela koyayee? Tammu dethata guye baana mela koyay?” yaagidi oychis.
2KI 20:10 Hizqiyaasi, “Kuyay sinthe baanaysi metenna; kuyay guye simmanaada ootha” yaagis.
2KI 20:11 Nabey Isayaasi Godaa woossin, Goday Kawoy Akaazi gimbisida dethaa bolla shempida kuyay tammu dethaa guye zaaris.
2KI 20:12 He wode Baldaana na7ay, Babiloone kawoy, Marodaaki Baldaani Hizqiyaasi hargidaysa si7ida gisho, dabdaabenne imota Hizqiyaasas yeddis.
2KI 20:13 Hizqiyaasi kiitetidi yida asata mokis. Ba shalo minjiya keethan de7iya bira, worqaa, sawuwa, al7o zaytiya, ba ola miishiyanne ba shalo minjiya keethan de7iyaba ubbaa enta bessis. Ba son woyko ba gadhon de7iyaba ubbaafe Hizqiyaasi enta bessonna aggidabay aybika baawa.
2KI 20:14 Nabey Isayaasi kawa Hizqiyaasako bidi, “Ha asati woygidona? Enti awupe yidona?” yaagidi oychis. Hizqiyaasi, “Enti taako haaho biittafe, Babiloonepe yidosona” yaagis.
2KI 20:15 Isayaasi, “Enti ne son ay ay be7idonaa?” yaagis. Hizqiyaasi, “Enti ta gadhon de7iya ubbaa be7idosona; ta shalo minjiya keethan de7iyabaape taani enta bessaboonabay baawa” yaagis.
2KI 20:16 Isayaasi Hizqiyaasako, “Goday giyaba si7a.
2KI 20:17 ‘Heko, ne gadhon de7iyaba ubbaynne ne mayzati hachi gakanaw shiishidaba ubbay di7etidi, Babiloone biitta baana gallas yaana; iyape aybika attenna.
2KI 20:18 Qassi new yeletana, ne ashonne ne suuthu gidida ne adde nayti di7etidi bidi, Babiloone kawo gadhon shuufa gididi oothana’ ” yaagis.
2KI 20:19 Hizqiyaasi zaaridi, “Neeni odida Godaa qaalay lo77o” yaagis. Hizqiyaasi, “Taani de7ida laythan saroynne wopatethi daana gidenne” yaagidi qopis.
2KI 20:20 Hizqiyaasi hanida harabay, iya minotethaynne haatha zeeridi, biitta giddora haathe katama gelsidabay Yihuda kawota Taarike Maxaafan xaafetis.
2KI 20:21 Hizqiyaasi hayqidi, ba mayzatan gahetis; iya bessan iya na7ay Minaasey kawotis.
2KI 21:1 Minaasey kawotiya wode iyaw laythi tammanne nam7a; I Yerusalaamen ishatammanne ichashu laythi kawotis; iya aaye sunthay Hefseebo.
2KI 21:2 Goday Isra7eele asa sinthafe gooddidi kessida asata de7uwa wogaa kaallidi, Minaasey Godaa sinthan iitaba oothis.
2KI 21:3 Iya aaway Hizqiyaasi laallida, dhoqa goyinno bessata I zaaridi keexis; Isra7eele kawoy Akaabi oothidaysada, Ba7aale xoossaas yarsho bessatanne Asheera xoosse misileta medhis. Qassi salo xoolintota ubbaa goyinnis; entana haggaazis.
2KI 21:4 Goday, “Taani ta sunthaa Yerusalaamen xeegisana” yaagidi odida Xoossa keethan hara xoossatas yarsho bessata giigisis.
2KI 21:5 Xoossa keethan de7iya nam7u dabaabatan salo xoolintota ubbaas yarsho bessata giigisis.
2KI 21:6 Ba na7aa tama giddora aathis. I ba huuphen bitanchonne murunniya asi gididi, marotanne moytilleta zore oychis. Godaa sinthan daro iitabaa oothidi, iya hanqethis.
2KI 21:7 Masetidi keyida Asheera xoosse misiliya ehidi, Xoossa keetha giddon essis. He Xoossa keethay, Goday Dawitanne iya na7aa Solomone, “Isra7eele zare ubbaa giddofe taani doorida ha Xoossa keethan Yerusalaamen taani ta sunthaa merinaw xeegisana.
2KI 21:8 Isra7eele asa taani kiitida kiita ubbaanne ta aylley Musey entaw immida higgiya ubba naagidi oothiko, taani enta mayzatas immida biittafe enta denthada dhaysike” yaagida Xoossa keetha.
2KI 21:9 Shin asay si7onnan ixis; Goday Isra7eele asaa sinthafe dhaysida hara kawotethatape aadhidi iita oothana mela Minaasey enta balethis.
2KI 21:10 Goday ba aylle gidida nabeta baggara haysada yaagis;
2KI 21:11 “Yihuda kawoy Minaasey ha tuna oosuwa oothis; baape kase de7ida Amoore asa ubbaa nagaraape aadhiya iita nagara oothis. Yihuda asa ba medhida eeqa misiliya goyinnisidi, nagara oosisis.
2KI 21:12 Goday, Isra7eele Xoossay haysada yaagees; ‘Heko, si7iya asa ubbaa haythas iitiya dhayo Yerusalaame bollanne Yihuda bolla ehana hanayis.
2KI 21:13 Samaare bolla yeggida wadha wodoruwa, Yerusalaame bolla yeggana; Akaaba soo asaa bolla yeddida tumbiya, Yerusalaame bolla yeddana. Issi asi kere meeccidi gufanthidi meliseysada, taani Yerusalaame quchada gufanthana.
2KI 21:14 Ta asaape attidaysata taani yegga aggana; taani enta enta morketa kushen aathada immana. Enta morketi ubbay enta oykananne bonqana.
2KI 21:15 Enta mayzati Gibxefe keyoosope hachi gakanaw, enti ta sinthan iitabaa oothida gishonne tana hanqethida gisho, taani haysa oothana’ ” yaagis.
2KI 21:16 Minaasey Yihuda asaa, Godaa sinthan nagara oosisidaysa bolla gujidi, xillo asaa wodhis; Yerusalaame gaxape gaxa gakanaw, suuthan kunthis.
2KI 21:17 Minaasey hanida harabay, I oothidabay, I oothida nagaray Yihuda Kawota Taarike Maxaafan xaafetis.
2KI 21:18 Minaasey hayqidi, ba mayzatan gahetis; ba gadhuwa matan de7iya Oza gaden moogetis; iya bessan iya na7ay Amooni kawotis.
2KI 21:19 Amooni kawotiya wode, iyaw laythi laatamanne nam7a; I Yerusalaamen nam7u laythi kawotis. Iya aaye sunthay Masulaamo; iya Yooxiba addiya Haruse na7a.
2KI 21:20 Iya aaway, Minaasey oothidaysada, Amooneyka Godaa sinthan iitabaa oothis.
2KI 21:21 I ba aaway hemetida ogiyan hemetis; ba aaway oothida eeqatas ika oothis; enta goyinnis.
2KI 21:22 Godaa, ba mayzata Xoossaa aggis; Godaa ogiyan I hemetibeenna.
2KI 21:23 Amoone shuumati iya bolla maqetidi, kawo gadhon iya wodhidosona.
2KI 21:24 Hessafe guye, Yihuda asay Kawa Amoone bolla maqetida ubbata wodhidosona. Amoone bessan iya na7aa Iyosyaasa kawothidosona.
2KI 21:25 Amooni hanida harabaynne I oothidaba ubbay Yihuda Kawota Taarike Maxaafan xaafetis.
2KI 21:26 Amooni Oza gaden ba duufuwan moogetis; iya bessan iya na7ay Iyosyaasi kawotis.
2KI 22:1 Iyosyaasi kawotiya wode, iyaw laythi hospuna; I Yerusalaamen hastamanne issi laythi kawotis. Iya aaye sunthay Yidida; iya Baxuroota addiya Adaya na7a.
2KI 22:2 Iyosyaasi Godaa sinthan suureba oothis; ushachi haddirsi goonna ba mayza Dawita ogiyan hemetis.
2KI 22:3 Kawoy Iyosyaasi ba kawotida tammanne hospuntho laythan, Masulaama na7aa na7aa, Ezalaasa na7aa, waanna xaafiya Safaana, Xoossa keethan haysada yaagidi kiittis.
2KI 22:4 “Asay Xoossa keethi ehin, Xoossa keetha pengiya naageysati asaape shiishida miishiya taybanaada, kahine halaqa Kalqeko ba.
2KI 22:5 Kahine halaqay miishiya Xoossa keetha oorathanaw halaqatas immana mela oda. Entika Xoossa keetha oorathiya oosanchotas,
2KI 22:6 anaaxetas, gimbeysatsinne shuchu masseysatas qanxo. Qassi Xoossa keetha oorathanaw, mithinne qoo7etida shuchu shammeysatas qanxo.
2KI 22:7 Oosuwa aawatethan xeelleysati ammanthiya asi gidiya gisho, enta kushen gelida miishiyan ay ay oothidaako, enta oychanaw koshshenna” yaagis.
2KI 22:8 Hessafe guye, kahine halaqay Kalqey waanna xaafiya Saafanako, “Higge Maxaafa Xoossa keethan demmas” yaagis. Maxaafa Saafanas immin Safaani ekidi nabbabis.
2KI 22:9 Waanna xaafey Safaani kawako bidi, “Xoossa keethan de7iya miishiya ne shuumati ekidi, Xoossa keetha oorathanaw halaqatas immidosona” yaagis.
2KI 22:10 Kaallidi, waanna xaafey Safaani, “Kahiney Kalqey taw immida maxaafaa haysa be7a” yaagidi kawa sinthan maxaafaa nabbabis.
2KI 22:11 Nabbabin Kawoy Higge Maxaafan de7iya qaala si7ida wode, azzanidi ba ma7uwa daakis.
2KI 22:12 Kawoy, kahiniya Kalqe, Safaana na7aa Akqaama, Mikiyaasa na7aa Akboora, waanna xaafiya Saafananne kawa oosanchuwa Asaya haysada yaagidi kiittis.
2KI 22:13 “Bidi, ta gisho, ha asaa gishonne Yihuda ubbaa gisho, ha bentida maxaafa qaalaba ane Godaa oychite. Nuuni xaafetida ubbaba oothanaw, nu mayzati ha maxaafa qaalas kiitetiboonna gisho, nu bolla suullida Godaa hanqoy daro” yaagis.
2KI 22:14 Yaagin kahiney Kalqiyaasi, Akqaami, Akboori, Safaaninne Asayi macca nabiw Hildaana oychanaw bidosona. Hildaana Harihaasa na7aa Tiqiwa na7a, Xoossa keetha ma7uwa naagiya Saleema macho. Iya Yerusalaamen nam7antho gutan de7awsu. He bida asati iira odetidosona.
2KI 22:15 Hildaana, “Goday Isra7eele Xoossay haysada yaagees; hintena taako kiitida addiyas odite.
2KI 22:16 Goday haysada yaagees; ‘Yihuda kawoy nabbabida maxaafan xaafetida iita qaala ubbaa taani ha bessaaninne iyan de7iya asaa bolla ehana hanayis.
2KI 22:17 Enti tana aggidi, hara xoossatas ixaane cuyisidosona; enti banta kushen oothidaba ubban tana hanqethidosona. Hessa gisho, ta hanqoy ha bessaa bolla eexis; to7anaw danda7enna’ yaagees.
2KI 22:18 Godaa oychanaw hintena kiitida kawako haysada yaagite; ‘Goday Isra7eele Xoossay neeni si7ida qaalaba haysada yaagees.
2KI 22:19 Taani ha bessaanne iyan de7iya asa baadethasinne dhayos aathada immana gida qaala si7ida wode, ne wozanay shuggin, ta sinthan nena kawushida gishonne ne ma7uwa daakada, ta sinthan yeekida gisho, taani ne woosa si7as.
2KI 22:20 Hessa gisho, taani nena saron ne mayzatan gathana; neeni saro moogetana. Taani ha bessaa bollanne ha bessan de7iya asaa bolla ehana iitaba ne ayfey be7enna’ yaagees” yaagasu. Enti bidi, ha odetidaba kawas odidosona.
2KI 23:1 Kawoy Iyosyaasi Yihuda cimatanne Yerusalaame cimata ubbaa shiishis.
2KI 23:2 Kawoy pude Xoossa keethi keyis; Yihuda asay, Yerusalaamen de7iya asay, kahinetinne nabeti, guuthafe gita gakanaw ubbay iyara issife pude Xoossa keethi keyidosona. Xoossa keethafe bentida caaqo qaala maxaafa ubbaa kawoy entaw nabbabis.
2KI 23:3 Kawoy tuussa matan eqidi, enti Godaa ogiyan hemetananne, iya higgiya, iya wogaanne iya kiita kumetha wozananine kumetha qofan naaganaw, qassi ha maxaafan xaafetida caaquwa oothanaw Godaa sinthan caaqis. Asa ubbayka iyara caaqidosona.
2KI 23:4 Kawoy kahine halaqa Kalqe, iyape garsara de7iya kahinetanne penge naageysata Ba7aale, Asheeranne salo xoolintota goyinnanaw giigisida miisheta ubbaa Xoossa keethafe kessanaada kiittis. Kawoy hessata Yerusalaamepe gaxa kessidi, Qediroona Zangaaran xuuggidi, biduwa Beetele efis.
2KI 23:5 Yihuda katamataninne Yerusalaame yuushuwan de7iya dhoqa goyinno bessa ubban ixaane cuyisanaw Yihuda kawoti sunthida eeqata kahineta ubbaa oosope kessis. Ba7aales, awas, ageenas, xoolintotasinne salon de7iya hara medhetethatas ixaane cuyiseyisata ubbaa diggis.
2KI 23:6 Asheera xoosse misiliya Xoossa keethafe kessidi, Yerusalaame katamaape gaxa efidi, Qediroona Zangaara efidi, yan xuuggis. Xuugetidaysi gaaccidi, dhiille kessis; baana deriya duufo bolla laallis.
2KI 23:7 Xoossa keetha giddon goyinno woga oothidi, addey addera laymatiya keethata laallis; he keethatan maccasati Asheera xoossees geshe suqoosona.
2KI 23:8 Iyosyaasi kahineta ubbaa Yihuda katamatape ehidi, kase kahineti ixaane cuyisiya dhoqa goyinno bessata, Gib7ape bidi Barsaabe gakanaw de7eyisata tunisis. Katamaa haariya Iyyasu Pengiyafe haddirsa baggara de7iya dhoqa goyinno bessaaka laallis.
2KI 23:9 Dhoqa goyinno bessaa kahineti Yerusalaamen Godaa yarsho bessa pude yookona; shin enti hara kahinetara issife irshoy geliboonna daabbo moosona.
2KI 23:10 Kawoy Iyosyaasi Henooma zangaaran de7iya Toofeta yarsho bessa tunisis. Moloka xoossas issi asika ba adde na7aa woyka macca na7a tama giddora aathona mela diggis.
2KI 23:11 Yihuda kawoti Xoossa keethaa geliya pengiyan awas dummayidi wothida parata diggis. Awa parati Naatan-Meleka halaqaa kifiliya matan de7iya dabaaban de7oosona. Hessafe guye, awas dummayidi wothida para gaareta Iyosyaasi taman xuuggis.
2KI 23:12 Akaaza keethaa pooqiya bolla Yihuda kawoti giigisida yarsho bessatan Minaasey Xoossa keethan de7iya nam7u dabaabata giddon giigisida yarsho bessata Kawoy Iyosyaasi laallis. Enta he bessaafe diggidi tincherethidi, Qediroona Zangaaran holis.
2KI 23:13 Kawoy Yerusalaame katamaape doloha baggara, tunatetha zumaape dugeha baggan de7iya dhoqa goyinno bessata tunisis. He dhoqa bessati Isra7eele kawoy Solomoney, tuna xoossata, Sidoona xoosse Astarooto, Moo7abe xoossaa Kamooshanne Amoone xoossaa Moloka goyinnanaw giigisida dhoqa bessata.
2KI 23:14 Kawoy Iyosyaasi goyinno shucha tuussataka mentherethidi, Asheera xoosse misiletaka qanxerethis. Enti eqida bessan hayqida asa meqethi kunthis.
2KI 23:15 Isra7eele asaa, nagara oosisida Nabaaxa na7ay Iyorbaami Beetelen dhoqa bessan giigisida yarsho bessa Kawoy Iyosyaasi laallis. Laallidi he yarsho bessa shuchataka mentherethidi, dhiille kessis; Asheeri misiliyaka xuuggis.
2KI 23:16 Hessafe guye, Iyosyaasi yuushuwa xeellidi, zumaa lanqen de7iya duufota be7is; meqethata duufotape kessidi, yarsho bessa bolla wothidi, taman xuuggis. Yaatidi yarsho bessa tunisis. Hessi haniday Xoossa asi kase awaajida Godaa qaala maarana.
2KI 23:17 Hessafe guye kawoy, “Ha benteysi oodde duufo?” yaagidi oychis. Beetele asay, “Yihudape yidi, Beetele yarsho bessa bolla ha77i neeni oothidabay poletanaysa kasetidi odida nabiya duufo” yaagidosona.
2KI 23:18 Kawoy, “De7o giite; oonika iya meqetha haysafe qaathofo” yaagis. Hessa gisho, Samaarepe yida nabeti addiya meqethaara issife iya meqetha bochonna aggaagidosona.
2KI 23:19 Isra7eele kawoti Samaare katamatan oosisidi, Godaa hanqethida, dhoqa goyinno bessata Iyosyaasi diggis; Beetelen oothidaysada, enta bollaka oothis.
2KI 23:20 I goyinno dhoqa bessan oothiya kahineta ubba yarsho bessa bolla wodhis; qassi he yarsho bessa bolla asaa meqethaa xuuggis. Hessa ubbaa oothidi, Yerusalaame simmis.
2KI 23:21 Kawoy asa ubbaa, “Ha caaqo Maxaafan xaafetidaysada Godaas, hinte Xoossaas Paasika Ba7aale bonchite” yaagidi kiittis.
2KI 23:22 Isra7eele haariya daynnata wodepe doomidi, Isra7eele kawota wodenne Yihuda kawota wode ubban haysa mela Paasika Ba7aale kumethi boncheti erenna.
2KI 23:23 Shin Kawoy Iyosyaasi kawotida tammanne hospuntho laythan Yerusalaame kataman Godaa bonchanaw Paasika Ba7aaley bonchetis.
2KI 23:24 Kahine halaqay Kalqiyaasi Xoossa keethan bentida maxaafan xaafetida higgiya qaala minthanaada, tuna ayyaana xeegeysatanne marota, soo giddo eeqa misileta, eeqa miishetanne Yihuda biittaninne Yerusalaame kataman bentida hara ixetidabata ubbaa Iyosyaasi dhaysis.
2KI 23:25 Muse higgiyada ba kumetha wozanan, ba kumetha shempuwaninne, ba kumetha wolqan Godaako simmida Iyosyaasa mela kawoy, iyape kase gidin, iyape guye dendibeenna.
2KI 23:26 Minaasey Godaa hanqethanaw oothida iita ooso ubbaa gisho, Goday Yihuda bolla hanqetida ba sheniyape simmibeenna.
2KI 23:27 Goday, “Taani Isra7eele ta sinthafe diggidaysada, Yihudaka ta sinthafe diggana; taani doorida katama, Yerusalaamenne ‘Ta sunthay haysan daana’ gida ha keethaa diggana” yaagis.
2KI 23:28 Iyosyaasi hanida harabaynne I oothidabay ubbay Yihuda Kawota Taarike Maxaafan xaafetis.
2KI 23:29 Iyosyaasa wode Gibxe Kawoy Naakoy, Asoore kawa olan maaddanaw Efraxiisa Shaafa bis. Kawoy Iyosyaasi iyara oletanaw ba olanchota ekidi keyis. Shin kawoy Naakoy iyara Magidon gahetidi, iya wodhis.
2KI 23:30 Aylleti iya aha para gaare bolla wothidi, Magidope Yerusalaame ehidi, iya buzo duufuwan moogidosona. He biitta asay Iyosyaasa na7aa Iyo7akaaza dooridi, iya aawa bessan iya tiyidi kawothidosona.
2KI 23:31 Iyo7akaazi kawotiya wode, laythi iyaw laatamanne heedza; I Yerusalaamen heedzu ageena kawotis. Iya aaye sunthay Hamuxaalo; iya Libina katama de7iya Ermiyaasa na7a.
2KI 23:32 Iya mayzati oothidaysada, Iyo7akaazi Godaa sinthan iitaba oothis.
2KI 23:33 Iyo7akaazi Yerusalaamen kawotennaada Gibxe Kawoy Naakoy Hamaata biittan Irbilan iya qachidi heedzu mukulunne oyddu xeetu kilo giraame deexiya biranne hastamanne oyddu kilo giraame deexiya worqa Yihuda asaa giirisis.
2KI 23:34 Kawoy Naakoy Iyosiyaasa na7aa Eliyaqeeme iya aawa bessan kawothis; iya sunthaa Iyo7aqeema yaagidi laammis. Shin Iyo7akaaza Gibxe efin, I yan hayqis.
2KI 23:35 Iyo7aqeemi, kawoy Naakoy oychida biranne worqa giira iyaw immis. He giira qanxanaw Iyo7aqeemi he biitta asay demmiya keena birapenne worqafe giira shiishis.
2KI 23:36 Iyo7aqeemi kawotiya wode laythi iyaw laatamanne ichasha; I Yerusalaamen tammanne issi laythi kawotis. Iya aaye sunthay Zabido; iya Ruuma kataman de7iya Padaya na7a.
2KI 23:37 Iyo7aqeemi ba mayzati oothidaysada, Godaa sinthan iitabaa oothis.
2KI 24:1 Iyo7aqeema wode Babiloone Kawoy Nabukadanaxoori Yihuda bolla dendis. Iyo7aqeemi iyaw heedzu laytha haaretidaape guye, Nabukadanaxoora bolla makallis.
2KI 24:2 Goday Kaldaaweta paannota, Soore paannota, Moo7abe paannotanne Amoone paannota Iyo7aqeema bolla yeddis; ba aylleta nabeta baggara Goday kase odidaysada, Yihuda biitta dhaysanaada haysata yeddis.
2KI 24:3 Kawoy Minaasey oothida nagara gaason Goday Yihuda asaa ba sinthafe digganaw ha dhayuwa yeddis.
2KI 24:4 I xillo asa suuthu gussidi, Yerusalaamen kunthida gisho, Goday Minaases he nagaraa atto gaanaw koybeenna.
2KI 24:5 Iyo7aqeemi hanida harabaynne I oothidaba ubbay Yihuda Kawota Taarike Maxaafan xaafetis.
2KI 24:6 Iyo7aqeemi hayqidi, ba mayzata gakis; iya bessan iya na7ay Yo7akini kawotis.
2KI 24:7 Gibxe kawoy nam7antho ba biittafe dendidi, olas yibeenna; Gibxe Shaafape doomidi, bidi Efraxiisa Shaafa gakanaw, Gibxe kawoy haarida biitta ubbaa Babiloone kawoy ekis.
2KI 24:8 Yo7akini kawotiya wode laythi iyaw tammanne hospuna; Yo7akini, Yerusalaamen heedzu ageena kawotis. Iya aaye sunthay Nasta; iya Yerusalaame addiya Elnaatana na7a.
2KI 24:9 Yo7akini ba aaway oothidaysada, Godaa sinthan iitabaa oothis.
2KI 24:10 He wode Babiloone kawa Nabukadanaxoora olanchoti Yerusalaame yidi, katama teqidosona.
2KI 24:11 Babiloone kawoy Nabukadanaxoori he katama yis.
2KI 24:12 Yihuda kawoy Iyo7akina, iya aayiya, iya aylleti, iya halaqatinne kawo gadho shuumati ubbay Babiloone kawas kushe immidosona. Yo7akini kawotida hospuntho laythan, Babiloone kawoy Yo7akina qachis.
2KI 24:13 Xoossa keethaanne kawo gadhon de7iya shaluwa ubbaa he bessaafe denthidi efis. Goday kase odidaysada kawoy Solomoney Xoossa keethan giigisida worqa miisheta ubbaa Babiloone kawoy qanxerethis.
2KI 24:14 Nabukadanaxoori Yerusalaame asa, halaqata ubbaa, olanchota ubbaa, kushe hiillanchotanne birata qoxeyisata ubbaa, 10,000 asaa Yerusalaamepe di77idi efin, biittan manqo asa xalaali attis.
2KI 24:15 Nabukadanaxoori Iyo7akina di77idi, iya aayiw, iya macheta, iya moorinnatinne biittan de7iya gita asa ubbaa Babiloone efis.
2KI 24:16 He asape 7,000 asati olanchota; 1,000 asati dumma dumma kushe hiillanchota; enti ubbay minonne olaa oletanaw danda7eyisata.
2KI 24:17 Hessafe guye, Babiloone kawoy Yo7akina bessan iya aawa ishaa Mataana kawothis; iya sunthaa Sedeqiyaasa yaagidi laammis.
2KI 24:18 Sedeqiyaasi kawotiya wode, laythi iyaw laatamanne issino; I tammanne issi laythi Yerusalaamen kawotis. Iya aaye sunthay Amxaalo; iya Libana kataman de7iya Ermiyaasa na7a.
2KI 24:19 Iyo7aqeemi oothidaysada, Sedeqiyaasi Godaa sinthan iitaba oothis.
2KI 24:20 Goday hanqetida gisho, Yerusalaame asa bollanne Yihuda asaa bolla haysi hanis; wursethan enta I ba sinthafe diggis. Sedeqiyaasi Babiloone kawa bolla makallis.
2KI 25:1 Sedeqiyaasi kawotida uddufuntho laythi, tammantho ageenan, tammantho gallas, Babiloone kawoy Nabukadanaxoori ba olanchota ubbaa ekidi, Yerusalaame teqis; iya yuushuwan biitta dooridi teqis.
2KI 25:2 Sedeqiyaasi kawotida tammanne issintho laythi gakanaw, katamay teqetidi gam7is.
2KI 25:3 Hessa gaason biittan koshi suullin, he laythi oyddantho ageenan, uddufuntho gallasan asas miyabay dhayis.
2KI 25:4 Katamaa yuusho gimbey issi baggara meqin, Kaldaaweti yuuyi aadhidi naagikoka, Yihuda kawa olanchoti kumethi qamma kawo gade efiya ogiya oykidi, nam7u dirsa gimbeti gahetiya pengiyara keyidi baqatidosona. Enti Yordaanose dilbaako simmidi baqatidosona.
2KI 25:5 Shin Babiloone olanchoti kawa yedethidi, Iyaarko demba gathishe oykidosona. Iya olanchoti ubbay iyape shaaketidi laaletidosona.
2KI 25:6 Hessafe guye, enti iya Rabila kataman de7iya Nabukadanaxoorako efidosona. Babiloone kawoy Sedeqiyaasa bolla pirdis.
2KI 25:7 Sedeqiyaasa nayta, Sedeqiyaasi xeellishin wodhidosona. Iya ayfeta wooci kessidi, santhalaatan qachidi, Babiloone biitta efidosona.
2KI 25:8 Nabukadanaxoori Babiloonen kawotida tammanne uddufuntho laythan, ichashantho ageenan, laapuntho gallasan, kawa moorinatape issoy, kawa naageysata halaqay Nabuzardaani Yerusalaame gelis.
2KI 25:9 Xoossa keethaa, kawo gadhonne Yerusalaamen de7iya keetha ubbaa, gita keethi geetetiya ubbaa xuuggis.
2KI 25:10 Babiloone olanchoti ubbay kawa naageysata halaqaa kiitan Yerusalaame katama yuushuwan de7iya dirsa gimbiya ubbaa laallidosona.
2KI 25:11 Nabuzardaani katamaninne Yihudan attida asata, kaddidi Babiloone olanchotan gahetida asata ubbaa oykidi, di77idi efis.
2KI 25:12 Shin Nabuzardaani wursetha manqotape guuthata woyne tokanaadanne gade goyanaada Yihudan ashshis.
2KI 25:13 Babiloone asati Xoossa keethan de7iya naase biratape medhida tuussata, caana gaaretanne gita kereta mentherethidosona; naase birata ubbaa Babiloone efidosona.
2KI 25:14 Kereta, akaafata, xompe xeera pittiyabata, cilpatanne yarsho wode go7etiya naase birata miisheta ubbaa efidosona.
2KI 25:15 Kawa naageysata halaqay Nabuzardaani worqafe oosetida miisheta worqatho, birape oosetida miisheta biratho oothi ekidi, ixaane cuyisiya shaatetanne xaarota ubbaa efis.
2KI 25:16 Kawoy Solomoney Xoossa keetha oosos giigisida nam7u tuussata, gita keretanne caana gaareta, naase birata mizaanen likanaw danda7etibeenna.
2KI 25:17 Nam7u tuussati issi mela gididi, issuwa issuwa geesay tammanne hospun wadha; qassi issi issi tuussa huuphen de7iya gumboti heedzu wadha adusse. He gumbota yuushoy naase birata giteninne oromaane teera misilen alleeqetis.
2KI 25:18 Kawa naageysata halaqay Nabuzardaani, kahine halaqaa Saraya, iya kaalliya kahiniya Sofoniyaasanne penge naagiya hara heedzu asata oykis.
2KI 25:19 He wodey gakanaw, kataman de7iya asape Yihuda toora mocona, kawa zoreysatape ichashu asata, toora moconata xaafiya, olanchota dooriya hara usupun tammu asata efis.
2KI 25:20 Halaqay Nabuzardaani enta ubbaa, Babiloone kawako Rabila katama efis.
2KI 25:21 Babiloone kawoy enta ubbaa Hamaata biittan Rabila kataman wodhis. Hessada hanidi, Yihuda asay banta biittafe di7etidi bidosona.
2KI 25:22 Kawoy Nabukadanaxoori Safaana na7aa na7aa, Akqaama na7aa Godoliya Yihudan attida asaa bolla shuumis.
2KI 25:23 Kushe immiboona Yihuda toora moconatinne olanchoti hessa si7ida wode, Mixiphan de7iya Godoliyara gahetidosona. He halaqati Naatana na7aa Isma7eela, Qareya na7aa Yohaana, Naxoofa addiya Tanhumeta na7aa Sarayanne Makata addiya Yazaana na7aa.
2KI 25:24 Godoliya entawunne enta olanchotas “Haysatasinne enta halaqatas yayyofite. Ha biittan de7ite; Babiloone kawas haaretite; hessa hinte oothiko ubbabay hintew injetana” yaagidi entaw caaqis.
2KI 25:25 Shin laapuntho ageenan, kawo kochi gidida Elisaama na7aa Naatana na7ay Isma7eeli tammu asara Mixipha bidi, Godoliya, Yihuda asaanne iyara de7iya Babiloone asa ubbaa wodhis.
2KI 25:26 Hessafe guye, Babiloone asaas yayyidi, Yihuda asay, guuthi giti attonnashin, toora moconati ubbay Gibxe biitta baqatidosona.
2KI 25:27 Yo7akini di7etidi bida hastamanne laapuntho laythan, tammanne nam7antho ageenan, laatamanne laapuntho gallasan, Yoor-Marodaaki kawotida laythi, Yihuda kawa Yo7akina maaridi qashope billis.
2KI 25:28 Yoor-Marodaaki, Yo7akinara lo77o qaala odetidi, Babiloonen di7on de7iya hara kawota ubbaafe aathidi, iya bonchis.
2KI 25:29 Hessa gisho, Yo7akini qasho keethan ma7ida ma7uwa laammidi, attida ba de7o laytha ubban kawo gaytape mis.
2KI 25:30 Gallas gallas iyaw koshshiyaba ubbaa Babiloone kawoy immis.
1CH 1:1 Addaamey Seeta yelis; Seeti Henoosa yelis; Henoosi Qaynana yelis;
1CH 1:2 Qaynani Malal7eela yelis; Malal7eeli Yaareda yelis;
1CH 1:3 Yaaredi Heenoke yelis; Heenokey Matusaala yelis; Matusaali Laameha yelis;
1CH 1:4 Laamehi Nohe yelis; Nohey Seema, Kaamanne Yaafeta yelis.
1CH 1:5 Yaafeta adde nayti Gamera, Maagoge, Madaya, Yawaana, Tobeela, Mosahanne Tirasa.
1CH 1:6 Gamera adde nayti Askanaaza, Irfatanne Tegarma.
1CH 1:7 Yawaana adde nayti Elisa, Tarsesa, Kiximanne Rooda.
1CH 1:8 Kaama adde nayti Kuusha, Mixirayma, Fuuxanne Kanaane.
1CH 1:9 Kuusha adde nayti Saaba, Ewulaaxe, Sabita, Ra7imanne Sabqata. Ra7ima adde nayti Saabanne Didaana.
1CH 1:10 Kuushi Namiruude yelis. Namiruudey biitta bolla wolqaama olancho gidis.
1CH 1:11 Mixiraymi Luudeta, Anamimeta, Lahabeta, Naftuheta,
1CH 1:12 Patroosata, Filisxeemeta, mayza gidida Kasluheematanne Qaftooreta kochata mayza.
1CH 1:13 Kanaaney bayra na7aa Sidoonanne iya kaaluwa Heeta yelis.
1CH 1:14 Kanaaney Yaabuseta, Amooreta, Gergeseta,
1CH 1:15 Hiweta, Arketa, Siinata,
1CH 1:16 Ardaaweta, Samaaretanne Hamaateta yelis.
1CH 1:17 Seema adde nayti Elama, Asoore, Arfakisaade, Luude, Araama, Uxi, Hula, Geteranne Mosaha.
1CH 1:18 Arfakisaadi Saala yelis; Saali Eboora yelis.
1CH 1:19 Eboori nam7u nayta yelis; issoy yeletida wode sa7i shaaketida gisho iya sunthay Faleqa geetetis; iya ishaa sunthay Yoqxaana.
1CH 1:20 Yoqxaani Almodaada, Salefa, Hazarmoota, Yaraha,
1CH 1:21 Hadoraama, Uzaala, Diqila,
1CH 1:22 Obaala, Abmaala, Saaba,
1CH 1:23 Ofira, Awulaxanne Yobaaba yelis. Haysati Yoqxaana kochata.
1CH 1:24 Seemape Abrahaame gakanaw de7iya yeletay haysafe kaallidi xaafetidaysata; Seema, Arfakisaade, Saala,
1CH 1:25 Eboora, Faleqa, Raga,
1CH 1:26 Saruga, Nakoora, Taaranne
1CH 1:27 Abrahaame geetetiya Abrame.
1CH 1:28 Abrahaame adde nayti Yisaaqanne Isma7eela.
1CH 1:29 Enta yeletay haysafe kaallidi xaafetis. Isma7eela bayra na7ay Nabayoota; hessafe kallidi, Qedaare, Adbeela, Mibsaama,
1CH 1:30 Misima, Duma, Masa, Kudane, Teema,
1CH 1:31 Ixura, Nafisanne Qedima yelis. Haysati Isma7eela nayta.
1CH 1:32 Abrahaamey Keexurape yelida adde nayti Zimiraana, Yoqsaana, Madaane, Midiyaame, Yasboqanne Siwa. Yoqsaana adde nayti Saabanne Didaana.
1CH 1:33 Midiyaame adde nayti Gefera, Efera, Henooha, Abidanne Elda. Haysati Keexura kochata.
1CH 1:34 Abrahaamey Yisaaqa yelis. Yisaaqa adde nayti Eesawenne Isra7eele.
1CH 1:35 Eesawe adde nayti Elfaaza, Ragu7eela, Ye7usa, Ya7ilamanne Qore.
1CH 1:36 Elfaaza adde nayti Temaana, Omaara, Sifo, Gotoma, Qeneza, Timinanne Amaaleqa.
1CH 1:37 Ragu7eela adde nayti Nahoota, Zaara, Saamanne Miza.
1CH 1:38 Edoomen koyro de7ida Sayre adde nayti Looxane, Sobaala, Ziba7oona, Ana, Disoona, Exeranne Disaana.
1CH 1:39 Looxane adde nayti Hooranne Hemaama; Looxane michiya Timnaa7o.
1CH 1:40 Sobaala adde nayti Aliwa, Manahoota, Ebaala, Sifanne Onaama. Xiba7oona adde nayti Ayanne Ana.
1CH 1:41 Ana na7ay Disoona. Disoona adde nayti Hemdaana, Esbaana, Yitraananne Kaarana.
1CH 1:42 Exera adde nayti Bilihaana, Zawananne Aqana. Disaana adde nayti Uxanne Arana.
1CH 1:43 Isra7eelen kawoy kawotanaape kase Edoome biittan kawotida kawoti haysafe kaallidi xaafetidaysata. Bi7oora na7ay Balaaqi kawotis; iya katamaa sunthay Dinaaba.
1CH 1:44 Balaaqi hayqin, Baasora addey Zaara na7ay Yobaabi iya bessan kawotis.
1CH 1:45 Yobaabi hayqin, Temaana addey Husami iya bessan kawotis.
1CH 1:46 Husami hayqin, Moo7abe biittan Midiyaameta xoonida Badada na7ay Hadaadi iya bessan kawotis; iya katamaa sunthay Awiita.
1CH 1:47 Hadaadi hayqin, Masreeqa addey Samili iya bessan kawotis.
1CH 1:48 Samili hayqin, shaafa matan de7iya Rehoboota addey Saa7uli iya bessan kawotis.
1CH 1:49 Saa7uli hayqin, Akboora na7ay Ba7al-Hanani iya bessan kawotis.
1CH 1:50 Ba7al-Hanani hayqin, Hadaadi iya bessan kawotis; iya katamaa sunthay Paa7u. Iya machiya Mezahaaba na7e Maxireedi na7iw Mahexabeelo. Hessafe guye, Hadaadi hayqis.
1CH 1:51 Edoome kochata halaqati haysata; Timnaa7a, Aliwa, Yeteta,
1CH 1:52 Oholbaama, Ela, Pinoona,
1CH 1:53 Qanaza, Temaana, Mibsaara,
1CH 1:54 Magdelanne Irama. Haysati Edoome halaqata.
1CH 2:1 Isra7eele adde nayti haysata; Robeela, Simoona, Leewe, Yihuda, Yisakoora, Zabloona,
1CH 2:2 Daane, Yoosefa, Biniyaame, Niftaaleme, Gaadenne Aseera.
1CH 2:3 Kanaane maccase Sewape Yihudi yelida heedzu adde nayti Era, Onaananne Seela. Yihuda bayra na7ay Eri Godaa sinthan iitabaa oothida gisho Goday iya wodhis.
1CH 2:4 Yihudi ba na7aa mache Timaaripe Faaresanne Zaara yelis. Yihudas ichashu adde nayti de7oosona.
1CH 2:5 Faaresa adde nayti Hesiroomanne Hamuula.
1CH 2:6 Zaara adde nayti Zimira, Etaana, Hemaana, Kalkolanne Dara; enti kumethi ichasha.
1CH 2:7 Zaara koche gidida Karma na7ay Akaani Xoossas dummatida di7uwape kaysotidi Isra7eele asaa un7ethidaysa.
1CH 2:8 Etaana na7ay Azaara.
1CH 2:9 Hesrooni yelida nayti Yiram7eela, Araamenne Kaaleba.
1CH 2:10 Araami Amnadaabe yelis. Amnadaabey Yihuda kochata halaqa Na7asoona yelis.
1CH 2:11 Na7asooni Salmoona yelis; Salmooni Boo7eza yelis;
1CH 2:12 Boo7ezi Iyyobeda yelis; Iyyobedi Isseye yelis.
1CH 2:13 Isseyey ba bayra na7aa Eliyaaba, kaalo na7aa Amnadaabe, heedzantho na7aa Saama,
1CH 2:14 oyddantho na7aa Natina7eela, ichashantho na7aa Radaya,
1CH 2:15 usupuntho na7aa Asama, laapuntho na7aa Dawita yelis.
1CH 2:16 Isseye macca nayti Xaruyonne Abigiya. Xaruyi nayti heedzati Abisaya, Iyo7aabanne Asaheela.
1CH 2:17 Abigiya Amaasa yelasu; Amaasa aaway Isma7eela addiya Yetera.
1CH 2:18 Hesiroona na7aa Kaalebas Azuubonne Yir7ooto geetetiya nam7u macheti de7oosona. I Azuubipe Yesaara, Sobaabanne Ardoona yelis.
1CH 2:19 Azuubi hayqin, Kaalebi Efraato ekis; Efraata Huura yelasu.
1CH 2:20 Huuri Ure yelis; Urey Basli7eela yelis.
1CH 2:21 Hesiroonas laythi usupun tammu gidin, Galada aawa Makira na7iw ekidi Saguba yelis.
1CH 2:22 Sagubi Ya7ira yelis. Ya7iri Galada biittan de7iya laatamanne heedzu katamata haaris.
1CH 2:23 Shin Geshuranne Soore kawoti Ya7ira katamata Qanaatanne iya yuushuwan de7iya usupun tammu katamata olidi oykidosona; yan de7iya asa ubbay Galada aawa Makira koche.
1CH 2:24 Hesrooni Kaaleba Efraata geetetiya bessan hayqidaape guye, Hesiroona machiya Abiya Tequhe aawa Ashihuura yelasu.
1CH 2:25 Hesiroona bayra na7aa Yirama7eela bayra na7ay Rama; kaaloti Buna, Orena, Oxeemanne Akiya.
1CH 2:26 Yirahim7eelas Ataaro geetetiya hara macha de7awusu; Ataara Onaama aayiw.
1CH 2:27 Yirama7eela bayra na7aa Rama nayti Ma7asa, Yaaminanne Eqera.
1CH 2:28 Onaama nayti Shamayanne Yada. Samaye nayti Naadabenne Abisura.
1CH 2:29 Abisura machiya Abikaala Ahbaananne Molida yelasu.
1CH 2:30 Nadaaba adde nayti Selidanne Afayma; Selidi na7a yelonna hayqis.
1CH 2:31 Afayma na7ay Yishi7a; Yishi7a na7ay Soosana; Soosana na7ay Ahilaya.
1CH 2:32 Shamaya ishaa Yada nayti Yeteranne Yoonataana; Yeteri na7a yelonna hayqis.
1CH 2:33 Yoonataana nayti Felitanne Zaaza. Haysati Yirama7eela kochata.
1CH 2:34 Soosanas macca na7ape attishin, adde na7i baawa. Soosanas Iyoheela geetetiya Gibxefe aylley de7ees.
1CH 2:35 Soosani ba na7iw ba aylliya Iyoheelas immin, Ataya na7a yelasu.
1CH 2:36 Atayi Naatana yelis; Naatani Zabada yelis;
1CH 2:37 Zabadi Eflaala yelis; Eflaali Obeeda yelis;
1CH 2:38 Obeedi Iyyu yelis; Iyyuy Azaara yelis;
1CH 2:39 Azaariyasi Kelesa yelis; Kelesi El7aasa yelis;
1CH 2:40 El7aasi Sisimaya yelis;
1CH 2:41 Sisimayi Salooma yelis; Saloomi Yiqaama yelis; Yiqaami Elisaama yelis.
1CH 2:42 Yirama7eela ishaa Kaaleba bayra na7ay Moosa. Moosa na7ay Ziifa; Ziifa na7ay Mereesa; Mereesa na7ay Kebroona.
1CH 2:43 Kebroona nayti Qoraha, Tefuwa, Reqeemanne Shamaya.
1CH 2:44 Shamayey Yorqa7aama aawa Rahaama yelis. Reqeemi Shamaya yelis.
1CH 2:45 Shamaya na7ay Ma7oona. Maa7oni Beet-Xura yelis.
1CH 2:46 Kaaleba laggethiya Efa, Harana, Moodanne Gazeeza yelasu; Haraani Gazeeza geetetiya hara adde na7a yelis.
1CH 2:47 Yahidaya nayti Regema, Iyo7atama, Geshana, Falexa, Efanne Shafa.
1CH 2:48 Kaaleba laggethiya Ma7ika Sheberanne Tirihaana yelasu.
1CH 2:49 Qassika Medmaana aawa Shafanne Makibeenanne Gib7a aawa Susana yelasu. Kaaleba macca na7e sunthay Akiso.
1CH 2:50 Kaaleba nayti harati haysafe kaallidi xaafetidosona. Kaalebi ba bayra na7aa Huura ba mache Efraatape yelis. Huura nayti Qiriyat-Yi7aarima aawa Sobaala,
1CH 2:51 Beeteleme aawa Salmonanne Beet-Gadera aawa Hareefa.
1CH 2:52 Qiriyat-Yi7aarima aawa Sobaala yarati Haro7eetatanne Manuhoota yaratape baggata.
1CH 2:53 Qiriyat-Yi7aarima yarati Yatireta, Puuteta, Shumaatetanne Mishireta. Xor7atinne Eshta7ooleti haysatape yeletidosona.
1CH 2:54 Beeteleme aawa Salmoona yarati Naxoofata, Axiroot-Beeteyo7abeta, Manuhoota yaratape baggatanne Xor7ata.
1CH 2:55 Yaabexa kataman de7iya xaafeta yarati Tir7eta, Shim7atanne Sukata. Haysati Rekaabata aawa Hamaatape yeletida Qeenata.
1CH 3:1 Kebroona kataman Dawiti yelida nayti haysafe kaallidi xaafetidaysata; Izira7eele maccase Aknahoomipe yelida bayra na7ay Amnoona. Qarmeloosa maccase Abigiyape yelida nam7antho na7ay Daanela.
1CH 3:2 Geshura kawa Talmaya na7iya Ma7ika yelida heedzantho na7ay Abeseloome. Agita yelida oyddantho na7ay Adoniyaasa.
1CH 3:3 Abixaala yelida ichashantho na7ay Safaaxa. Egila yelida usupuntho na7ay Yitirhaama.
1CH 3:4 Dawiti ha usupun nayta Kebroonan yelis. Dawiti Kebroonan laapun laythinne usupun ageena kawotis. Yerusalaamen hastamanne heedzu laythi kawotis.
1CH 3:5 Dawiti Yerusalaamen Ami7eela na7e Barsaabepe yelida oyddu nayti Saamusa, Sobaaba, Naatanenne Solomone.
1CH 3:6 Qassi hara uddufun adde nayti Iyabhaara, Elishu7a, Elfalaxa,
1CH 3:7 Noga, Nefeqa, Yafaya,
1CH 3:8 Elsama, Eldahenne Elfalaxa.
1CH 3:9 Ha adde nayta ubbaa bolla Dawitas laggethotape yeletida hara adde nayti de7oosona; Timaaro geetetiya micha entaw de7awusu.
1CH 3:10 Kawa Solomone yeletay haysafe kaallidi xaafetidaysa. Solomone na7ay Orobi7aama; Orobi7aama na7ay Abiya; Abiya na7ay Asa; Asa na7ay Iyosaafexa;
1CH 3:11 Iyosaafexa na7ay Iyoraama; Iyoraama na7ay Akaziyaasa; Akaziyaasa na7ay Iyo7aasa;
1CH 3:12 Iyo7aasa na7ay Amasiyaasa; Amasiyaasa na7ay Azaariyasa; Azaariyasa na7ay Iyo7atama;
1CH 3:13 Iyo7atama na7ay Akaaza; Akaaza na7ay Hizqiyaasa; Hizqiyaasa na7ay Minaase;
1CH 3:14 Minaase na7ay Amoxe; Amoxe na7ay Iyosyaasa.
1CH 3:15 Iyosyaasa na7ay bayray Yohaanana; nam7anthoy Iyo7aaqeme; heedzanthoy Sedeqiyaasa; oyddanthoy Salooma.
1CH 3:16 Iyo7aaqeme nayti Ikoniyaananne Sedeqiyaasa.
1CH 3:17 Di7etidi Babiloone bida Ikoniyaana adde nayti Salatiyaala,
1CH 3:18 Malkiraama, Padaya, Shenaxaara, Yiqaama, Hoshamanne Nadaaba.
1CH 3:19 Padaya adde nayti Zarubaabelanne Same7a. Zarubaabela adde nayti Masulaamanne Hanaana; enta michiya Salomito.
1CH 3:20 Hayisata bolla hara ichashu adde nayti Zarubaabelas de7oosona; entika Hashuba, Oheela, Baraka, Hasadiyanne Yoshab-Heseda.
1CH 3:21 Hanaana adde nayti Palaxanne Yeshaya. Yeshaya na7ay Rafaya; Rafaya na7ay Arnaana; Arnaana na7ay Abdiyu; Abdiyu na7ay Sakana;
1CH 3:22 Sakana na7ay Shamaya. Shamaya nayti ichashati Haxusa, Yigi7aala, Bariha, Na7aranne Shaafaxa.
1CH 3:23 Na7ara nayti heedzati Eliyo7ana, Hizqiyaasanne Aziriqaama.
1CH 3:24 Eliyo7ana nayti laapunati Hodawa, Eliyaseeba, Palaya, Aquba, Yohaanana, Dalayanne Aneena.
1CH 4:1 Yihuda kochati Paaresa, Hesiroona, Karma, Hooranne Sobaala.
1CH 4:2 Sobaala na7ay Rayi Yahaata yelis; Yahaati Ahumayanne Lahada yelis. Haysati Xor7ata yarata.
1CH 4:3 Exaama adde nayti Izira7eele, Yishmanne Yidibaasha; enta michiya Haxilelpoono.
1CH 4:4 Panu7eeli Gadoora yelis. Exeri Husha yelis. Huuri ba aaye Efraatas bayra na7a; Huuri Beeteleme aawa. Haysati Huura yarata.
1CH 4:5 Tequhe aawa Ashihuuras Heelonne Na7ira geetetiya nam7u macheti de7oosona.
1CH 4:6 Na7ira Ahuzama, Hefeera, Teminanne Ashitaara Ashihuuras yelasu; haysati Na7iri nayta.
1CH 4:7 Heela adde nayti Dereta, Yixhaaranne Etnaana.
1CH 4:8 Qooxe adde nayti Anuba, Xobebanne Aharheela.
1CH 4:9 Yaabexi ba ishatape aadhidi bonchetida asi. Iya aayiya, “Taani iya iita iqethan yelida gisho, iya sunthay Yaabexa” gada xeegasu.
1CH 4:10 Yaabexi Isra7eele Xoossaa xeegidi, “Abeeti Xoossaw, tana anja; ta zawa dalgisa. Ne kushey taara gido; tana azzanthonna mela qohiyabaape naaga” yaagidi woossin Xoossay iya woosa si7is.
1CH 4:11 Shuha ishay Kaluba Mahira yelis; Mahiri Eshtoona yelis.
1CH 4:12 Eshtooni Beet-Raafa, Pasehanne Irnahasha aawa Tahina yelis. Tahini Nahaasa katamaa asaa yelis. Haysati Reka biittan de7idosona.
1CH 4:13 Qeneza adde nayti Gotoniyalanne Saraya; Gotoniyala adde nayti Hatatanne Ma7onotaya.
1CH 4:14 Ma7onotayi Ofira yelis. Sarayi Iyo7aaba yelis. Iyo7aabi Kushe Hiillata Zangaara geetetiya bessan de7iya asaa yelis.
1CH 4:15 Yoofone na7aa Kaaleba nayti Ira, Eelanne Na7aama. Ela na7ay Qeneza.
1CH 4:16 Yihali7eela nayti Ziifa, Zifaha, Tirayanne Asar7eela.
1CH 4:17 Ezira adde nayti Yetera, Mereeda, Eferanne Yaalona. Mereedi Gibxe kawa na7iw Bitiya ekin iya Mayraamo, Shamayanne Yishiba yelasu. Yishibi Eshtamoo7a yelis.
1CH 4:18 Yihuda biittafe ekida machiya Gadoora aawa Yereda, Sooko aawa Hebeeranne Zanoha aawa Yaqit7eela yelasu.
1CH 4:19 Nahama miche, Hodiya mache nayti Gariman de7iya Qa7ila aawanne Ma7ikan de7iya Eshtamoo7a aawa.
1CH 4:20 Shimoona nayti Amnoona, Irna, Benihananne Tiloona. Yishi7a nayti Zoheetanne Benzoheeta.
1CH 4:21 Yihuda na7aa Seela kochati Leeka aawa Era, Mareesa aawa Le7adanne Beet-Ashibe7a kataman de7iya liino ma7o daddeyisata yarata.
1CH 4:22 Harati qassi Yoqima, Iyo7aasa, Yashubileheema, Moo7abe haarida Sarafanne Kozeba kataman de7iya asata. Ha yeletaa mazgabey benipe doomidi de7ees.
1CH 4:23 Haysati Naxa7imaninne Gadeeran de7iya meqa miishe medhiya asata. Enti kawa ooso oothanaw iyara issife de7idosona.
1CH 4:24 Simoona nayti Nemu7eela, Yamina, Yariba, Zaaranne Saa7ula.
1CH 4:25 Saa7ula na7ay Saluma; Saluma na7ay Mibsaama; Mibsaama na7ay Masmaa7a;
1CH 4:26 Masmaa7a na7ay Hamu7eela; Hamu7eela na7ay Zakura; Zakura na7ay Same7a.
1CH 4:27 Same7i tammanne usupun adde naytanne usupun macca nayta yelis. Shin iya ishati daro na7a yelibookona. Yihuda kochaada Simoona kochay daribookona.
1CH 4:28 Simoona kochati Barsaabe katamaninne Molada, Haxar-Shu7aala,
1CH 4:29 Baala, Exema, Tolada,
1CH 4:30 Batu7eela, Horma, Xiqilaaga,
1CH 4:31 Beet-Markaboota, Hoxar-Susima, Beet-Biranne Sha7aarima katamatan de7idosona. Dawiti kawotana gakanaw haysati katamata gididi de7idosona.
1CH 4:32 Qassi enta gutati Exaama, Ayna, Irmoona, Tokenanne Ashshana. Enti kumethi ichashu katamata.
1CH 4:33 Ba7aale gakanaw ha katamata yuushuwan de7iya gutati ubbay entan gujetoosona. Haysati enti de7iya bessatanne banta yeletaa maara mazgaben xaafidi oykidosona.
1CH 4:34 Simoona yarata halaqati haysafe kaallidi xaafetidaysata. Enti Mashobaaba, Yamileka, Amasiyaasa na7aa Iyosiya,
1CH 4:35 Iyyu7eelanne Yoshiba na7aa Iyyu. Iyyu aawa aaway Asa7eela na7a Saraya.
1CH 4:36 Hara halaqati qassi Eliyo7ana, Yayqooba, Yashohaya, Asaya, Adi7eela, Yasmi7eela, Banayanne
1CH 4:37 Ziiza. Ziizi Shifa na7a; Shifi Aloona na7a; Alooni Yadaya na7a; Yadayi Shimira na7a; Shimiri Shamaya na7a.
1CH 4:38 Simoona yarata halaqati haysata. Enta aawata kochay darishe bis.
1CH 4:39 Enti banta mehiyas heemmiya bessi koyishe Gadoora geliya bessaa matan de7iya zangaarape doloha baggara de7iya bessaa gakanaw bidosona.
1CH 4:40 Yan araddanne lo77o heemmiya bessi demmidosona; he biittay wopatethinne saroy kumida dalga biitta. Beni wode he biittan de7idaysati Kaama kochaa.
1CH 4:41 Haysafe qommon sunthay xaafetida Simoona kochati Yihuda kawa Hizqiyaasa wode Gadoora biitta bidi yan de7iya Kaama kochaanne Ma7uuna asata olidi dhaysidosona. He biittan enta mehiyas heemmiya bessi de7iya gisho, Simoona kochati hachi gakanaw yan uttidosona.
1CH 4:42 Simoona kochaafe ichashu xeetu asay Sayre zuma bidosona. Enta halaqati Yishi7a nayta Palaxa, Naara, Rafayanne Uzi7eela.
1CH 4:43 Baqatidi attida Amaaleqa asaa dhaysidi enti hachi gakanaw he biittan de7oosona.
1CH 5:1 Isra7eele bayra na7aa Robeela yeletay haysafe kaallidi xaafetidaysa. Robeeli bayra na7a; shin ba aawa hiixa tunisida gisho, bayratetha maatay Isra7eele na7aa Yoosefa naytas imetis. Hessa gisho, iya yeletay bayratetha maara naagidi xaafetibeenna.
1CH 5:2 Yihudi ba ishatape aadhidi mino; bayratethay Yoosefas imetidaba gidikoka, Isra7eele asaa haareysi Yihudape keyis.
1CH 5:3 Isra7eele bayra na7aa Robeela adde nayti Henooha, Pala, Hesiroonanne Karma.
1CH 5:4 Iyyu7eela na7ay Shamaya; Shamaya na7ay Googa; Googa na7ay Same7a;
1CH 5:5 Sama7a na7ay Mika; Mika na7ay Raya; Raya na7ay Bi7eela.
1CH 5:6 Bi7eela na7ay Asoore kawoy Telgeltelfelisoorii di77idi efida Bi7eera; Bi7eeri Robeela kochata halaqa.
1CH 5:7 Bi7eera dabboti, banta yeleta mazgaben xaafida Robeela yarata halaqati Iyyu7eelanne, Zakaryaasa.
1CH 5:8 Bi7eeli Azaaza na7a; Azaazi Shama7a na7a; Shama7i Iyyu7eela koche. Iyyu7eela kochati Aro7eera kataman, Nebo biittaninne Ba7aal-Ma7oona biittan de7idosona.
1CH 5:9 Robeela kochatas mehey Galadan darida gisho, enti yaape doloha bagga bidi, Efraxiisa shaafa gakanaw de7iya mela biittan uttidosona.
1CH 5:10 Saa7ola laythan Aggaara yaratara Robeela yarati oletidi xoonidosona. Galadape doloha baggara de7iya Aggaara yarata biittan uttidosona.
1CH 5:11 Gaade kochati Robeela kochatape pudeha baggan, Salka gakanaw de7iya Baasane biittan uttidosona.
1CH 5:12 Iyyu7eeli koyro yaratas halaqa; Safaami nam7antho yaratas halaqa. Yanaynne Safaami Baasanen uttida yaratas halaqa.
1CH 5:13 Enta dabboti, banta soo asan asan, Mika7eela, Masulaama, Saaba, Yoraya, Yaqkana, Zu7enne Ebeera. Enti kumethi laapuna.
1CH 5:14 Haysati Abikaala nayti Buza kochata. Buzi Yedaya yelis; Yedayey Iyesaya yelis; Iyesayi Mika7eela yelis; Mika7eeli Galada yelis; Galadi Idaya yelis; Idayi Huura yelis; Huuri Abihaala yelis.
1CH 5:15 Enta soo asaa halaqay Guna na7aa na7aa Abdi7eela na7aa Aka.
1CH 5:16 Enti Galadaninne Baasanen, yan de7iya katamataninne Saarona biittan mehey heemetiya bessatan uttidosona.
1CH 5:17 Hayisata yeletay Yihuda kawa Iyo7atama wode Isra7eele kawa Iyorbaama wode mazgaben xaafetis.
1CH 5:18 Robeela kochaafe, Gaade kochaafenne Minaase kochaa baggaafe gondalle oykeysati, mashshe danceysatinne donge dukeysati minonne olan loohidaysati 44, 760.
1CH 5:19 Enti Aggaara yaraara, Ixura yaraara, Nafesaranne Nodabaara oletidosona.
1CH 5:20 Enti he asaara oletishe Xoossako waassida gisho, maado demmidosona. Enti Xoossan ammanetida gisho, I entaw woosetis. Hessa gisho, Aggaara yaratinne entara de7iya harati enta kushen gelidosona.
1CH 5:21 Banta morketape ishatamu mukulu gimaleta, nam7u xeetanne ishatamu mukulu dorsata, nam7u mukulu haretanne xeetu mukulu asaa di77idi efidosona.
1CH 5:22 Olay Xoossaba gidida gisho daroti hayqidosona. Di7etetha wodey gakanaw he biittan de7idosona.
1CH 5:23 Minaase kochaafe bagga yaray Baasanepe doomidi, Ba7aal-Armoona, Saniranne Armoona zumaa gakanaw de7iya biittan uttidosona; enti he biittan daridosona.
1CH 5:24 Enta soo halaqati Efera, Yish7a, Eli7eela, Azri7eela, Ermiyaasa, Hodawanne Iyodi7eela. Haysati enta soo asan eretidaysata, xaalanne wolqaama.
1CH 5:25 Shin banta mayzata Xoossaas ammanetibokona; Xoossay enta sinthafe dhaysida he biitta xoossata goyinnidosona.
1CH 5:26 Hessa gisho, Isra7eele Xoossay Asoore kawa Pooha (hessika Telgeltelfelisoora) ayyaana denthethidi Robeela kochaa, Gaade kochaanne Minaase kochaafe baggaa di77idi, Halaha, Habooranne Haara biittanne Gozaana Shaafa efis. Enti hachi gakanaw yan de7oosona.
1CH 6:1 Leewe adde nayti Gedisoona, Qahaatanne Maraara.
1CH 6:2 Qahaata adde nayti Amraama, Yisihaara, Kebroonanne Uzi7eela.
1CH 6:3 Amraama adde nayti Aarona, Musenne Mayraamo. Aarona adde nayti Nadaaba, Abyooda, Alaazaranne Itamaara.
1CH 6:4 Alaazari Pinihaasa yelis; Pinihaasi Abisu yelis; Abisuy Buuqa yelis;
1CH 6:5 Buuqi Oza yelis;
1CH 6:6 Ozi Zara yelis; Zarahi Marayoota yelis;
1CH 6:7 Marayooti Amaare yelis; Amaarey Akxooba yelis;
1CH 6:8 Akxoobi Saadoqa yelis; Saadoqi Akmaasa yelis;
1CH 6:9 Akimaasi Azaariyasa yelis; Azaariyasi Yohaana yelis;
1CH 6:10 Yohaani Azaariyasa yelis. Solomoney Yerusalaamen keexisida Xoossa keethan oothida kahiney Azaariyasa.
1CH 6:11 Azaariyasi Amaare yelis; Amaarey Akxooba yelis;
1CH 6:12 Akxoobi Saadoqa yelis; Saadoqi Saluma yelis;
1CH 6:13 Salumi Kalqe yelis; Kalqey Azaariyasa yelis;
1CH 6:14 Azaariyasi Saraya yelis; Sarayi Iyosadeqa yelis.
1CH 6:15 Goday Yihudanne Yerusalaame Nabukadanaxooran di7etana mela oothida wode Iyosadeqi di7etidi bis.
1CH 6:16 Leewe adde nayti Gedisoona, Qahaatanne Maraara.
1CH 6:17 Gedisoona adde nayta sunthay Libinanne Same7a.
1CH 6:18 Qahaata adde nayti Amraama, Yisihaara, Kebroonanne Uzi7eela.
1CH 6:19 Maraara adde nayti Mahilanne Muse. Banta soo asan asan xaafetida Leewe yaray haysa.
1CH 6:20 Gedisoona na7ay Libina; Libina na7ay Yahaata; Yahaata na7ay Zamata.
1CH 6:21 Zamata na7ay Yo7aaka; Yo7aaka na7ay Ado; Ado na7ay Zaara; Zaara na7ay Yatira.
1CH 6:22 Qahaata na7ay Amnadaabe; Amnadaabe na7ay Qore; Qore na7ay Aseera;
1CH 6:23 Aseera na7ay Helqaana; Helqaana na7ay Abisaafa; Abisaafa na7ay Aseera;
1CH 6:24 Aseera na7ay Tahata; Tahata na7ay Uri7eela; Uri7eela na7ay Ooziyana; Ooziyana na7ay Saa7ola.
1CH 6:25 Helqaana adde nayti Amaasanne Akmoota.
1CH 6:26 Akmoota na7ay Helqaana; Helqaana na7ay Xofaya; Xofaya na7ay Nahaata;
1CH 6:27 Nahaata na7ay Eliyaaba; Eliyaaba na7ay Yirohaama; Yirohaama na7ay Hilqaana.
1CH 6:28 Sameela bayra na7ay Iyyu7eela; kaaloy Abiya.
1CH 6:29 Maraara adde nayti Mahila; Mahila na7ay Libina; Libina na7ay Same7a; Same7a na7ay Ooza;
1CH 6:30 Ooza na7ay Sam77a; Sam77a na7ay Hagiya; Hagiya na7ay Asaya.
1CH 6:31 Dawiti Taabotiya Yerusalaame ehidaape guye, Godaa keethan shuumida zammaareta halaqati haysafe kaallidi xaafetidaysata.
1CH 6:32 Solomoney Yerusalaamen Godaa Xoossaa keetha keexana gakanaw, Godaa Taabotey de7iya Dunkaaniya sinthan issoy issoy ba maaran maaran mazmure yexishe Godaas oothidosona.
1CH 6:33 Banta adde naytara yexidaysati haysafe kaallidi xaafetidaysata. Qahaata yaraape zammariya Hemaana; Hemaani Iyyu7eela na7a; Iyyu7eela Sameela na7a;
1CH 6:34 Sameeli Helqaana na7aa; Hilqaani Yirohaama na7a; Yirohaami Eli7eela na7a; Eli7eeli Toha na7a;
1CH 6:35 Tohi Xofaya na7a; Xofaya Helqaana na7a; Hilqaani Mahaata na7a; Mahaati Amasaya na7a;
1CH 6:36 Amasayi Helqaana na7a; Helqaani Iyyu7eela na7a; Iyyu7eela Azaariyasa na7a; Azaariyasi Sofoniyaasa na7a;
1CH 6:37 Sofoniyaasi Tahata na7a; Tahati Aseera na7a; Aseeri Abisaafa na7a; Abisaafi Qore na7a;
1CH 6:38 Qorey Yisara na7a; Yisari Qahaata na7a; Qahaati Leewe na7a; Leewey Isra7eele na7a.
1CH 6:39 Hemaana dabboy Asaafi iya ushacha baggara eqidi oothees. Asaafi Baraka na7a; Baraka Sim7a na7a;
1CH 6:40 Shim7i Mika7eela na7a; Mika7eeli Ba7asaya na7a; Ba7aasi Malkiya na7a;
1CH 6:41 Malkey Etaana na7a; Etaani Zaara na7a; Zaari Adaya na7a;
1CH 6:42 Adayi Etaana na7a; Etaani Zamata na7a; Zamati Same7a na7a;
1CH 6:43 Same7i Yahaata na7a; Yahaati Gedisoona na7a; Gedisooni Leewe na7a.
1CH 6:44 Entafe haddirsa baggara enta dabboti, Maraara yarati eqoosona. Etaani Qiisa na7a; Qiisi Abdi na7a; Abdi Maluka na7a;
1CH 6:45 Maluki Hashabaya na7a; Hashabaya Amasiyaasa na7a; Amasiyaasi Kalqe na7a;
1CH 6:46 Kilqey Ameesa na7a; Ameesi Baana na7a; Baani Samara na7a;
1CH 6:47 Samari Mahila na7a; Mahili Muse na7a; Musi Maraara na7a; Maraari Leewe na7a.
1CH 6:48 Enta dabo gidida Leeweti Xoossa Dunkaaniyan oothanaw sunthetidosona.
1CH 6:49 Shin Aaroninne iya kochati ixaane cuyisoosona; yarsho bessan xuussa yarsho yarshoosona. Xoossa aylley Musey kiitidaysada Ubbaafe Geeshsha Bessan goyinniya goyinno ubbaasinne Xoossay Isra7eele nagaraa atto yaagisiya yarshuwa yarshanaw aawatethi entaw de7ees.
1CH 6:50 Aarona yeletay haysafe kaallidi xaafetidaysata. Aarona na7ay Alaazara; Alaazara na7ay Pinihaasa; Pinihaasa na7ay Abisu;
1CH 6:51 Abisu na7ay Buuqa; Buuqa na7ay Oza; Oza na7ay Zaraha.
1CH 6:52 Zaraha na7ay Marayoota; Marayoota na7ay Amaare; Amaare na7ay Akxuuba;
1CH 6:53 Akxuuba na7ay Saadoqa; Saadoqa na7ay Akmaasa.
1CH 6:54 Aarona kochati daana mela entaw imetida bessati haysafe kaallidi xaafetidaysa. Koyro saamay Qahaata yaraas keyida gisho
1CH 6:55 Yihudan de7iya Kebroona katamaanne iya yuushuwan de7iya hentha bessata entaw immidosona.
1CH 6:56 Shin Kebroona goshsha gadetanne iya yuushuwan de7iya gutata Yoofone na7aa Kaalebas immidosona.
1CH 6:57 Aarona naytas baqatidi attiya katamata, Kebroona, Yatira, Libina, Eshtamoo7anne enta heeran de7iya hentha bessata.
1CH 6:58 Holona, Dabiranne enta heeran de7iya hentha bessata,
1CH 6:59 Asana, Beet-Sameesanne enta heeran de7iya hentha bessata immidosona.
1CH 6:60 Qassi Biniyaame biitta zawape Gib7a, Galemata, Anatootenne enta heeran de7iya hentha bessata entaw immidosona. Aarona naytas imetida katamati kumethi tammanne heedza.
1CH 6:61 Minaase yaraa baggaa biittafe tammu katamata attida Qahaata yaraas immidosona.
1CH 6:62 Yisakoora, Aseera, Niftaalemenne Baasanen de7iya Minaase yaraa biitta zawape tammanne heedzu katamata Gedisoona yaraas immidosona.
1CH 6:63 Robeela, Gaadenne Zabloona biitta zawape tammanne nam7u katamata Maraara yaraas immidosona.
1CH 6:64 Hessada oothidi, Isra7eele asay Leewetas ha katamatanne enta heeran de7iya hentha biitta immidosona.
1CH 6:65 Yihudape, Simoonapenne Biniyaame biitta zawape haysafe qommon xaafetida katamata entaw immidosona.
1CH 6:66 Qahaata yaraape guuthati Efreema biitta zawape katamatanne enta heeran de7iya hentha bessata ekidosona.
1CH 6:67 Entaw asay baqatidi attiya katamata, derey dariya Efreema biittan de7iya Seekema, Gezera,
1CH 6:68 Yoqim7aama, Beet-Horona,
1CH 6:69 Eloona, Gaat-Rimoonanne enta heeran de7iya hentha bessata immidosona.
1CH 6:70 Minaase kocha baggaafe Aneera, Bil7aamanne enta heeran de7iya hentha bessata, attida Qahaata yaraas immidosona.
1CH 6:71 Minaase kocha baggaafe Baasanen de7iya Goolana, Astarootanne enta heeran de7iya hentha bessata Gedisoona yaraas immidosona.
1CH 6:72 Yisakoora kochaafe Qaadesa, Dabiraatenne enta heeran de7iya hentha bessata,
1CH 6:73 Raamota, Anemananne enta heeran de7iya hentha bessata immidosona.
1CH 6:74 Aseera kochaafe Mashala, Abdoona,
1CH 6:75 Huqooqa, Rehoobanne enta heeran de7iya hentha bessata immidosona.
1CH 6:76 Niftaaleme kochaafe Galilan de7iya Qaadesa, Hamoona, Qirataymanne enta heeran de7iya hentha bessata immidosona.
1CH 6:77 Attida Maraara yaraas Zabloona kochaafe Irmoona, Taaborenne enta heeran de7iya hentha bessata immidosona.
1CH 6:78 Robeela kochaafe Iyaarkofe hefinthan Yordaanosepe doloha baggara, dhoqa denban de7iya Boosora, Yaasane,
1CH 6:79 Qidimoota, Mefaatanne enta heeran de7iya hentha bessata immidosona.
1CH 6:80 Gaade kochaafe Galadan de7iya Raamota, Mahanayma,
1CH 6:81 Haseboona, Iyazeeranne enta heeran de7iya hentha bessata immidosona.
1CH 7:1 Yisakoora oyddu adde nayti Tola, Puuwa, Yasuubanne Shimiroona.
1CH 7:2 Tola adde nayti Oza, Rafaya, Yir7eela, Himaya, Yibsaamanne Shimu7eela; haysati Tola soo asaa halaqata. Enti wolqaamanne mino asi. Dawita wode enta tayboy 22,600.
1CH 7:3 Oza na7ay Yizraaha. Yizraaha nayti Mika7eela, Abdiyu, Iyyu7eelanne Yishiya; ha ichashati soo asaa halaqata.
1CH 7:4 Banta soo asaa yeletada Oza yaraape olanchoti 36,000; entaw daro machetinne nayti de7oosona.
1CH 7:5 Yisakoora kochaafe olanchoti banta yeletaa mazgaben taybetidi, kumethi 87,000 gididosona.
1CH 7:6 Biniyaame heedzu adde nayti Beella, Bekeranne Yidi7eela.
1CH 7:7 Beella adde nayti Eseboona, Oza, Uzi7eela, Iyarmootanne Ira; ha ichashati soo asaa halaqata. Enti wolqaamanne mino asi. Banta yeletada taybetida olanchoti 22,034 gididosona.
1CH 7:8 Bekera adde nayti Zamira, Iyo7aasa, Alaazara, Eliyo7ana, Omira, Iyarmoota, Abiya, Anatootanne Alemeeta.
1CH 7:9 Banta yeletaa mazgaben taybetida wolqaamanne mino asati 20,200 gididosona.
1CH 7:10 Yidi7eela na7ay Bilihaana. Bilihaana adde nayti Yi7uusa, Biniyaame, Ehuuda, Kin7ana, Zetana, Tarsesanne Aksaara;
1CH 7:11 haysati banta soo asaa halaqa; wolqaamanne mino asi. Banta yeletada taybetida olanchoti 17,200.
1CH 7:12 Sufiminne Hufimi Ira nayta. Hushimi Ahere na7a.
1CH 7:13 Niftaaleme nayti Yahixi7eela, Guna, Yexeranne Shilema; haysati Baala kochata.
1CH 7:14 Minaase kochati haysafe kaallidi xaafetidaysata. Minaase Soore laggethefe yelida adde nayti Asiri7eelanne Galada aawa Makira.
1CH 7:15 Makiri Hufimapenne Safimape issi issi macho ekis. Makira miche sunthay Ma7iko. Makira na7ay kaaloy Selophaada; Selophaadi macca na7a xalaala yelis.
1CH 7:16 Makira machiya Ma7ika Pareesanne Suroosa geetetiya nam7u adde nayta yelasu. Paaresa nayti Ulamanne Raqeema.
1CH 7:17 Ulama na7ay Badaana. Haysati Minaase na7aa na7a Makira na7aa Galada kochata.
1CH 7:18 Galada michiya Hamoleketa, Isude, Abi7ezeranne Mahila yelasu.
1CH 7:19 Shamida adde nayti Ahiya, Seekema, Liqanne Ani7aama.
1CH 7:20 Efreema na7ay Shutula; Shutula na7ay Bareda; Bareda na7ay Tahata; Tahata na7ay Elada; Elada na7ay Tahata;
1CH 7:21 Tahata na7ay Zabada; Zabada na7ay Shutula. Efreemas Ederanne Elada geetetiya hara nam7u nayti de7oosona. Enti Geete asaa mehe kaysin asay enta wodhis.
1CH 7:22 Hessa gisho, enta aaway Efreemi daro wode azzanin iya ishati iya minthethanaw yidosona.
1CH 7:23 Hessafe guye, I ba machera aqis; iya qanthatada adde na7a yelasu. Efreema soo gakida iita metuwa gisho I ba na7aa Bari7a gidi sunthis.
1CH 7:24 She7ira geetetiya Efreema na7iya de7awusu; Garsan Beet-Horona, Qommon Uzen-Sheera geetetiya katamata keexasu.
1CH 7:25 Efreema adde na7ay Raafa; Raafa na7ay Resheefa; Resheefa na7ay Teela; Teela na7ay Tahana;
1CH 7:26 Tahana na7ay Laadana; Laadana na7ay Amhuda; Amhuda na7ay Elsama;
1CH 7:27 Elsama na7ay Nawe; Nawe na7ay Iyyasu.
1CH 7:28 Efreema kochati ekidi bantaw daana bessi oothida biittay, Beetelenne iya yuushuwan de7iya gutata; doloha baggan Na7ara, wuloha baggan Gezeranne enta yuushuwan de7iya gutata, Seekema, Ayanne enta yuushuwan de7ya gutata ubbaa oykees.
1CH 7:29 Minaase biitta zawan de7iya Beet-Saananne iya yuushuwan de7iya gutata, Tanakanne iya yuushuwan de7iya gutata, Magidonne iya yuushuwan de7iya gutata, Dooranne iya yuushuwan de7iya gutata. Isra7eele na7aa Yoosefa kochati ha katamatan de7idosona.
1CH 7:30 Aseera adde nayti Yimina, Yesuwa, Yisiwanne Beri7a; enta michiya Saraho.
1CH 7:31 Beri7a adde nayti Hebeeranne Berzaaweta aawa Malka7eela.
1CH 7:32 Hebeeri Yaafilexa, Sameera, Hotama yelis; enta miche sunthay Soosano.
1CH 7:33 Yaafilexa adde nayti Pasaka, Bimihaalanne Asita.
1CH 7:34 Sameera adde nayti Aka, Rooga, Yahuubanne Araame.
1CH 7:35 Hotama adde nayti Xoofa, Yimina, Selesanne Amala.
1CH 7:36 Xoofa adde nayti Suha, Harnefera, Sogala, Beera, Yimira,
1CH 7:37 Bexera, Hoda, Saama, Selisa, Yitiraananne Bi7eera.
1CH 7:38 Yetera adde nayti Yorona, Pispanne Ara.
1CH 7:39 Ula adde nayti Era, Han7eelanne Irxa.
1CH 7:40 Haysati ubbati Aseera kochata. Enti banta soo asaa halaqatanne dooretida wolqaamanne mino asi. Banta yeletada taybetida olanchoti 26,000 gididosona.
1CH 8:1 Biniyaame bayra na7ay Beella; kaaloy Asbeela; heedzanthoy Ahira;
1CH 8:2 oyddanthoy Nohe; ichashanthoy Raafa.
1CH 8:3 Beella adde nayti Adaare, Geera, Abhuuda,
1CH 8:4 Abisu Na7imaane, Ahoha,
1CH 8:5 Geera, Safufaamanne Kiraama.
1CH 8:6 Ehuuda adde nayti Na7imaane, Akiyanne Geera. Enti Gib7an de7idanne guyepe Manahaata biitta di7etidi bida banta soo asaa halaqata. Enta yaa kaalethidi efiday Ozanne Ahuda aawa Geera.
1CH 8:8 Shaharaami ba macheta Hushimonne Ba7iira yeddidaape guye Moo7abe biittan adde nayta yelis.
1CH 8:9 Shaharaami ba mache Hodishipe Yobaaba, Dibaya, Meesa, Malkaama,
1CH 8:10 Ye7uxa, Sakiyaanne Mirma yelis. Iya nayti ubbay banta soo asaa halaqata gididosona.
1CH 8:11 I ba mache Hushimipe, Abixubanne Elfa7aala yelis.
1CH 8:12 Elfa7aala adde nayti Ebeera, Mashemanne Shameda. Shamedi Ononne Looda katamatanne enta heeran de7iya gutata keexis.
1CH 8:13 Shaharaami Beri7anne Shem77a yelis. Enti Eloona kataman de7iya banta soo asaa halaqata. Enti Geete kataman de7iya asaa gooddidosona.
1CH 8:14 Beri7a adde nayti Shaharaama, Ahiya, Shashaqa, Yiremoota.
1CH 8:15 Zabada, Arada, Edera,
1CH 8:16 Mika7eela, Yishphanne Yooha.
1CH 8:17 Elfala7a adde nayti Zabada, Masulaama, Hizqa, Hebeera,
1CH 8:18 Yishmaraya, Yuzilanne Yobaaba.
1CH 8:19 Same7a adde nayti Yaqma, Zikira, Zibada
1CH 8:20 Elanaya, Xiltaya, Elela,
1CH 8:21 Adaya, Birayanne Shimirata.
1CH 8:22 Shashaqa adde nayti Yishphana, Ebeera, Eli7eela,
1CH 8:23 Abdoona, Zikira, Hanaana,
1CH 8:24 Hanaaniya, Elama, Antota,
1CH 8:25 Yifdayanne Panu7eela.
1CH 8:26 Yirohaama adde nayti Shemshiraya, Shehaara, Ataala,
1CH 8:27 Yaaresha, Eelyiaasanne Zikira.
1CH 8:28 Haysati banta yeletan Yerusalaamen uttida banta soo asaa halaqata.
1CH 8:29 Gaba7oona aaway Yi7eeli Gaba7oona kataman de7is; iya mache sunthay Ma7iko.
1CH 8:30 Iya na7aa bayray Abdoona; hara iya adde nayti Xuraya, Qiisa, Ba7aala, Neeranne Nadaaba,
1CH 8:31 Gedoora, Ahiya, Zekeranne
1CH 8:32 Maqloota. Maqlooti Shim7a yelis. Haysati Yerusalaamen de7iya banta dabbota matan de7idosona.
1CH 8:33 Neeri Qiisa yelis; Qiisi Saa7ola yelis. Saa7oli Yoonataana, Malkisa, Abinadaabenne Asba7eela yelis.
1CH 8:34 Yoonataana na7ay Marba7aala yelis; Marba7aali Mikiyaasa yelis.
1CH 8:35 Mikiyaasa adde nayti Pitoona, Meleka, Tare7anne Akaaza.
1CH 8:36 Akaazi Yaho7ada yelis. Yaho7aadi Alemeeta, Azmaawetanne Zimira yelis. Zimiri Mooxa yelis;
1CH 8:37 Mooxi Bin7a yelis; Bin77i Raafa yelis; Raafi El7aasa yelis; El7aasi Axeela yelis.
1CH 8:38 Axeelas usupun adde nayti de7oosona. Enta sunthay Azirqaama, Bokeera, Isma7eela, Sha7aara, Abdiyunne Hanaana.
1CH 8:39 Axeela ishaa Esheqas heedzu nayti de7oosona. Iya na7ay bayray Ulama; kaaloy Yi7uusa; heedzanthoy Elfalaxa.
1CH 8:40 Ulama nayti wolqaamanne mino asi; enti dongen dukeyisata. Ulamas xeetanne ishatamu gidiya naytinne nayta nayti de7oosona. Haysati ubbay Biniyaame kochata.
1CH 9:1 Isra7eele asa ubbay ba yeletan yeletan, Isra7eele kawota maxaafan xaafetidi de7ees. Yihuda asay Godaas ammanetibona gisho Babiloone biitta di7etidi bidosona.
1CH 9:2 Koyro simmidi banta biittaninne banta katamatan uttiday guutha Isra7eele asata, kahineta, Leewetanne Xoossa keetha oosanchota.
1CH 9:3 Yihudape, Biniyaamepe, Efreemapenne Minaasepe guutha asati yidi Yerusalaamen de7idosona.
1CH 9:4 Yihuda na7aa Paaresa yaraape Utayi Yerusalaamen de7eysatas halaqa. Utayi Amhuda na7a; Amhudi Omira na7a; Omiri Imira na7a; Imiri Baana na7a.
1CH 9:5 Yihuda na7aa Seela yaraape Asayinne iya nayti Yerusalaamen de7eysatas halaqa.
1CH 9:6 Yihuda na7aa Zaara yaraape Yi7u7eeli Yerusalaamen de7eysatas halaqa. Yihuda kochaa tayboy usupun xeetanne uddufun tamma.
1CH 9:7 Biniyaame yaraa halaqati haysafe kaallidi xaafetidaysata. Masulaama na7aa Saalu, Hodawa na7aa Masulaama, Hasenaa7u na7aa Hodawa,
1CH 9:8 Yirohaama na7aa Yibinaya, Oza na7aa Ela, Mikira na7aa Oza, Safaaxa Masulaama, Ra7uula na7aa Safaaxa, Yibina na7aa Ragu7eela.
1CH 9:9 Biniyaame kochaa tayboy uddufun xeetanne ishatammanne usupuna. Haysati ubbay banta soo asaa halaqata.
1CH 9:10 Yerusalaamen de7ida kahineti haysafe kaallidi xaafetidaysata. Enti Yodaha, Yoraba, Yakinanne
1CH 9:11 Xoossa keethan aawatiya Azaariyasa. Azaariyasi Kalqe na7a; Kalqey Masulaama na7a; Masulaami Saadoqa na7a; Saadoqi Mariyoota na7a; Mariyooti Akxooba na7a.
1CH 9:12 Harati qassi Yirohaama na7aa Adayanne Adi7eela na7aa Ma7iseya. Yirohaami Paskora na7a; Paskori Malkiya na7a. Adi7eeli Yahizeera na7a; Yahizeeri Masulaama na7a; Masulaami Mashilmoota na7a; Mashilmooti Imera na7a.
1CH 9:13 Banta soo asaas halaqa gidida kahineta tayboy 1,760. Haysati Xoossa keethan oothanaw danda7iya asata.
1CH 9:14 Yerusalaamen de7iya Leeweti haysafe kaallidi xaafetidaysata. Hashuba na7ay Shamayey Maraara yara. Hashubi Aziriqaama na7a; Aziriqaami Hasabaya na7a.
1CH 9:15 Harati qassi Baqbaqara, Hereesa, Galaalanne Mataana. Mataani Mika na7a; Miki Zikira na7a; Zikiri Asaafa na7a.
1CH 9:16 Harati qassi Naxoofata gutan uttiday Abdiyunne Baraka. Abdiyuy Shama7iya na7a; Shama7ey Galaala na7a; Galaali Yedutuuna na7a; Baraki Asa na7a; Asi Elqaana na7a.
1CH 9:17 Kawo pengiya naageysati, Saluma, Aquba, Talmoona, Ahimaananne enta ishata; salumi enta halaqa.
1CH 9:18 Enti wuloha baggara de7iya, Kawo Pengiya naagidosona. Haysafe kase enti Leeweti dunkaanida gutaa naagoosona.
1CH 9:19 Abisaafa na7aa na7ay Qore na7ay Salumi Qore yara. Qore yaray kase Godaa Dunkaaniya naagidaysada Saluminne Qore koche gidida iya dabboti Xoossa keetha pengiya naagoosona.
1CH 9:20 Alaazara na7ay Pinihaasi kase Qore yaraa halaqa; Goday iyara de7ees.
1CH 9:21 Masulaama na7ay Zakariyasi Dunkaaniya giddo geliya pengiya naagees.
1CH 9:22 Pengiya naaganaw dooretidaysati kumethi nam7u xeetanne tammanne nam7a; hessati banta gutan gutan taybetidi xaafetidosona. Enta yaras ha aawatetha immiday kawa Dawitanne nabiya Sameela.
1CH 9:23 Hessa gisho, entinne enta nayti Xoossa keetha pengiya naagoosona.
1CH 9:24 Oyddu baggara dolohan, wulohan, pudehan dugehan issi issi pengey de7ees; he pengeta naageysati de7oosona.
1CH 9:25 He gutan de7iya enta dabboti laapuntha gallasan gallasan laametidi, naagidi enta maaddoosona.
1CH 9:26 Pengiya naagiya oyddu Leeweti halaqa; enti Xoossa keethaa kifiletanne kifileta giddon de7iya miisheta aawatethan aysoosona.
1CH 9:27 Xoossa keethaa naageynne wonta guura kariya dooyey enta gidiya gisho yan aqoosona.
1CH 9:28 Leewetape guuthati goyinno wode go7etiya miisheta naagoosona; he miisheta kare kesseynne soo gelsey enta.
1CH 9:29 Entafe issoti issoti Xoossa keethan go7etiya hara miisheta, dhiille, woyne ushshu, zayte, ixaanenne sawota aawatethan aysoosona.
1CH 9:30 Shin kahineta naytape baggati sawuwa walakoosona.
1CH 9:31 Qore kochaafe Saluma bayra na7ay Mataatas yarsho uytha uukisiya aawatethi de7ees.
1CH 9:32 Qahaata yara gidiya enta dabbotape baggati Sambaatan Sambaatan xarpheeza bolla wothiya uythaa giigisiya aawatethi ekidosona.
1CH 9:33 Leewe kochaafe guutha halaqati Xoossa keethan yexeyisata. Qammanne gallas enti oothiya gisho hara ooso oothonna Xoossa keetha dirsa giddon de7iya keethatan de7oosona.
1CH 9:34 Haysati ubbay Leewe soo asaa halaqata; enti Yerusalaamen de7idosona.
1CH 9:35 Gaba7oona aaway Yi7eeli Gaba7oona kataman de7is; iya mache sunthay Ma7iko.
1CH 9:36 Iya na7ay bayray Abdoona; iya nayti harati Xuraya, Qiisa, Ba7aala, Neera, Nadaaba,
1CH 9:37 Gadoora, Ahiya, Zakariyasanne Mikloota.
1CH 9:38 Miklooti Sim7a yelis. Haysati Yerusalaamen de7iya banta dabbota matan de7idosona.
1CH 9:39 Neeri Qiisa yelis; Qiisi Saa7ola yelis. Saa7oli Yoonataana, Malkisa, Abinadaabenne Eshba7aala yelis.
1CH 9:40 Yoonataana na7ay Marba7aala yelis; Marba7aali Mikiyaasa yelis.
1CH 9:41 Mikiyaasa nayti Pitoona, Meleka, Tare7anne Akaaza.
1CH 9:42 Akaazi Ya7ira yelis. Ya7iri Alemeeta, Azmaawetanne Zimira yelis. Zimiri Mooxa yelis;
1CH 9:43 Mooxi Bin7a yelis; Bin7i Rafaya yelis; Rafayi El7aasa yelis; El7aasi Axeela yelis.
1CH 9:44 Axeelas usupun adde nayti de7oosona. Enta sunthay Azirqaama, Bokeera, Isma7eela, Sha7aara, Abdiyunne Hanaana.
1CH 10:1 Filisxeemeti Isra7eele asaara oletidosona. Isra7eeleti Filisxeemeta sinthafe baqatidosona. He wode daro Isra7eele asay Gilbo7a deriya bolla hayqidosona.
1CH 10:2 Filisxeemeti Saa7olanne iya adde nayta gooddi efidi Saa7ola nayta Yoonataana, Abinadaabanne Malkisa wodhidosona.
1CH 10:3 Olay Saa7ola teqidi un7ethis; dongen dukeysati Saa7ola demmidi madunxisidosona.
1CH 10:4 Saa7oli ba ola miishiya tookeysako, “Ha qaxaretiboona Filisxeemeti tana kaa7onna mela ne mashshan tana wodha” yaagis. Shin iya ola miishiya tookeysi daro yayyida gisho ixis; hessa gisho, Saa7oli ba mashsha sa7an essidi iya bolla kundidi hayqis.
1CH 10:5 Iya ola miishiya tookeysi Saa7oli hayqidaysa be7idi, ika ba mashsha sa7an essidi iya bolla kundidi hayqis.
1CH 10:6 Hessada hanidi Saa7oli, iya heedzu naytinne iya soo asa ubbay he gallas hayqidosona.
1CH 10:7 Zangaaran de7iya Isra7eeleti ubbay banta olanchoti baqatidaysa, Saa7olinne iya nayti hayqidaysa be7ida wode banta katamata aggidi baqatidosona. Filisxeemeti yidi he katamatan de7idosona.
1CH 10:8 Wontetha gallas Filisxeemeti ahata bollafe ola miisheta qaari ekanaw yidi, Saa7olinne iya nayti Gilbo7a deriyan hayqidi, zin7idaysata demmidosona.
1CH 10:9 Enti Saa7ola qoodhiya qanxidi iya ola miishiya qaari ekidosona. Yaatidi banta eeqata keethaninne banta asaa giddon xoonuwa awaajana mela Filisxeeme biitta ubbaas ase kiittidosona.
1CH 10:10 Enti Saa7ola ola miishiya banta xoossata keethatape issuwan wothidosona; iya huuphiya banta Xoossa Daagona eeqa keethan kaqidosona.
1CH 10:11 Filisxeemeti Saa7ola bolla oothidaba ubbaa Galadan de7iya Yaabesa katamaa asay si7ida wode,
1CH 10:12 mino asati ubbay bidi, Saa7ola ahaanne iya nayta aha ekidi Yaabesa katama ehidosona. Yaabesan de7iya wolaa garsan enta moogidosona; yaatidi laapun gallas xoomidosona.
1CH 10:13 Saa7oli Godaas ammanetibona gisho hayqis. Godaa qaala I naagibeenna; Godaa zore oycheysa aggidi,
1CH 10:14 moytille xeegiya asi zore oychis. Hessa gisho, Goday iya wodhidi iya kawotetha Isseye na7aa Dawitas aathidi immis.
1CH 11:1 Hessafe guye, Isra7eele asa ubbay issife Kebroonan de7iya Dawitako bidi, “Nuuni ne suuthunne ne asho.
1CH 11:2 Kase Saa7oli kawo gididi de7iya wodeka, Isra7eele asaa olas kaalethiday nena. Goday ne Xoossay, ‘Ta asaa Isra7eele neeni heemmana; enta bolla neeni kawotana’ ” yaagis.
1CH 11:3 Isra7eele cimati ubbay kawa Dawitako yida wode I entara Kebroonan Godaa sinthan caaqis. Goday Sameela baggara odida qaalada Dawiti Isra7eele bolla kawotanaada enti iya tiyidosona.
1CH 11:4 Dawitinne Isra7eele asa ubbay Yerusalaame katamaa bidosona. He wode Yaabuse asay he bessan de7iya gisho he katamay Yaabuse geetetees.
1CH 11:5 Yaabuseti Dawitako, “Neeni ha katamaa gelanaw danda7aka” yaagidosona. Gidoshin, Dawiti Xiyoonen de7iya enta miixaa oykin, Xiyooney Dawita Katama geetetis.
1CH 11:6 Dawiti ba olanchota, “Yaabuseta koyrottidi oliya oonika toora mocona gidana” yaagis. Xaruya na7ay Iyo7aabi koyrottidi olidi halaqa gidis.
1CH 11:7 Dawiti he miixan de7ida gisho he katamay Dawita Katama geetetis.
1CH 11:8 Dawiti Miilope doomidi he katamaa zaaridi keexis; attida baggaa Iyo7aabi zaaridi keexis.
1CH 11:9 Ubbaafe Wolqaama Goday iyara de7iya gisho Dawiti minni minni bis.
1CH 11:10 Mino gidida Dawita asati haysafe kaallidi xaafetidosona. Goday Isra7eeles gida qaalada Dawiti kawotana mela ha asati Isra7eele asaara daro maaddidosona. Qassi iya kawotethaa minthidosona.
1CH 11:11 Mino gidida Dawita asati haysafe kaallidi de7eyisata. Entafe heedzati daro eretidaysata. Heedzatape koyroy Hakmoona addiya Yashobi7aama; I issi toho olan heedzu xeetu asaa ba tooran wodhis.
1CH 11:12 Iya kaalley, heedzu mino asatape issoy Ahoha addiya Dooda na7a Alaazara.
1CH 11:13 Filisxeeme asay oletanaw Pasdamima geetetiya bessaa shiiqida wode Alaazari Dawitara de7ees. Isra7eele olanchoti Filisxeeme asata sinthafe baqatiya wode Alaazari banga gaden de7ees.
1CH 11:14 Inne iya asati gadiya giddon Filisxeeme asaara oletin, Goday gita xoono immidi enta ashshis.
1CH 11:15 Filisxeeme olanchoti Raafayme zangaaran dunkaanida wode hastamu halaqatape heedzati Dawiti de7iya Adulaama gongoluwan de7iya zaallako bidosona.
1CH 11:16 He wode Dawiti miixan de7ees; Filisxeeme olanchotape issi cugay Beeteleme olidi oykis.
1CH 11:17 Dawiti haathe uyanaw amotidi, “Beeteleme pengiya matan de7iya pulto haathaafe tana ushshanay oone!” yaagis.
1CH 11:18 Heedzu mino asati Filisxeemeti dunkaanida bessaa kanthi bidi Beeteleme pengiya matan de7iya pulto haathaafe duuqidi Dawitas ehidosona. Shin Dawiti uyonna ixidi haatha Godaa sinthan tigis.
1CH 11:19 “Ha haatha ushshi taape haako! Banta shempuwa bayzidi ehida ha asata suuthaa taani uyo? Enti banta shempuwa aathidi immidi ehidosona” yaagis. Hessa gisho, Dawiti haatha uybeenna. Heedzu mino asati hessa oothidosona.
1CH 11:20 Iyo7aaba ishay Abisi hastamu olanchotas halaqa. I ba tooran heedzu xeetu asaa wodhidi, ika ha heedzatada eretida asi gidis.
1CH 11:21 Abisi heedzatara taybetonna ixikoka, I heedzatape aadhidi bonchetida asi; I entaw halaqa gidis.
1CH 11:22 Qabxeela addey Yoodahe na7ay Banayi mino asi; I mino ooso oothis. I nam7u eretida Moo7abe asata wodhis. Qassi shachi wodhida issi gallas olla giddo gelidi gaammo wodhis.
1CH 11:23 Banayi ichashu wadha gidiya Gibxe addiya wodhis. Gibxe addiya kushen wandaraashe mela toori de7ees; shin Banayi xam7a oykidi addiyako bidi iya kushiyan de7iya toora dafi ekidi iya tooran iya wodhis.
1CH 11:24 Yoodahe na7ay Banayi haysa oothis. Iya sunthay he heedzataysada eretis.
1CH 11:25 I hastamata giddon daro bonchetis; shin I heedzata taybuwan deenna. Dawiti iya bana naageysata halaqa oothis.
1CH 11:26 Mino asati Iyo7aaba ishaa Asaheela, Beeteleme addiya Dooda na7aa Eliyaana,
1CH 11:27 Harooda addiya Samoota, Piloona addiya Selesa,
1CH 11:28 Tequhe addiya Esika na7aa Ira, Anatoota addiya Abi7ezera,
1CH 11:29 Kusata addiya Sabaka, Ahoha addiya Elaya,
1CH 11:30 Naxoofa addiya No7eeranne Banaha na7aa Heleda,
1CH 11:31 Biniyaamen de7iya Gib7a addiya Rabaya na7a Etaya, Pir7atoona addiya Banayasa,
1CH 11:32 Ga7aasa Zangaara matape yida Uraya, Araba addiya Abi7eela,
1CH 11:33 Barhuuma addiya Azmoota, Sa7alboona addiya Abi7eela,
1CH 11:34 Gizoona addiya Hasema, Harara addiya Shaage na7a Yoonataana,
1CH 11:35 Harara addiya Sakara na7a Ahi7aama, Ure na7aa Elfala,
1CH 11:36 Makeera addiya Hefeera, Piloona addiya Akiya,
1CH 11:37 Qarmeloosa addiya Hexira, Ezbaya na7aa Na7iraya,
1CH 11:38 Naatana ishaa Iyyu7eela, Hagira na7aa Mibhaara,
1CH 11:39 Amoone addiya Xeleqa, Xaruya na7aa Iyo7aaba ola miishiya tookiya Ba7eroota addiya Nahiraya,
1CH 11:40 Yatira addiya Iranne Gareeba,
1CH 11:41 Hite addiya Ooriyoona, Ahilaya na7aa Zabada,
1CH 11:42 Robeela koche gidida Shiiza na7aa Adina. I Robeela kochata halaqa; hastamati iyara issife de7oosona.
1CH 11:43 Hara mino asati Ma7ika na7aa Hanaana, Mitaane addiya Iyosaafexa,
1CH 11:44 Astaroota addiya Ooziyana, Aro7eera addiya Hotama nayta Shama7anne Yi7eela,
1CH 11:45 Shimira na7aa Yidi7eelanne iya ishaa Tiixa addiya Yooha,
1CH 11:46 Mahaawa addiya Eli7eela, Elnaama nayta Yiribayanne Yoshawa, Moo7abe addiya Yitima,
1CH 11:47 Xooba addiya El7eela, Obeedanne Ya7isi7eela.
1CH 12:1 Dawiti Qiisa na7aa Saa7olape baqatidi Xiqilaagan uttida wode iyako yida asati haysafe kaallidi xaafetidaysata. Enta kase Dawita olan maaddida mino asata giddon de7oosona.
1CH 12:2 Enti dongen dukeyisata; qassi ushacha kusheninne haddirsa kushen yambaranawnne donge dukanaw danda7oosona. Enti Biniyaame koche gidida Saa7ola kochata.
1CH 12:3 Enta halaqay Ahi7ezera; iyape kaallidi Iyo7aasa; enti Gib7a addiya Shama7a na7a. Harati qassi Azmaawe nayta gidida Yizi7eelanne Palaxa, Baraka, Anatoote addiya Iyyu,
1CH 12:4 hastamata giddon wolqaama gididi, enta kaalethiya Gaba7oona addiya Yishima7iya, Ermiyaasa, Yahazi7eela, Yohaana, Gedaara addiya Yozabaata,
1CH 12:5 Eluzaya, Yarmoota, Balaya, Samara, Harifa addiya Safaaxa,
1CH 12:6 Qore koche gidida Elqaana, Yishiya, Azari7eela, Yoo7ezeranne Yashobi7aama,
1CH 12:7 Gadoora addiya Yirohaama nayta Yo7eelanne Zabada.
1CH 12:8 Dawiti bazzon de7iya miixan de7ishin, Gaade kochaafe guutha asati iyako yidosona. Enti minonne olas giigidaysata; gondallenne toora oykanaw danda7eyisata. Enta som7oy gaammo som7o mela; enti dere huuphera gupiya gen7e mela eesotoosona.
1CH 12:9 Enta halaqay Exera; nam7anthoy abdiyu; heedzanthoy Eli7aaba;
1CH 12:10 oyddanthoy Mismaana; ichashanthoy Ermiyaasa;
1CH 12:11 usupunthoy Ataya; laapunthoy Eli7eela;
1CH 12:12 hospunthoy Yohaana; uddufunthoy Elzabaada;
1CH 12:13 tammanthoy Ermiyaasa; tammanne issanthoy Makibanaya.
1CH 12:14 Haysati Gaade kochaa olanchotas halaqata. Entafe ziqay mato halaqa; dhoqay qassi shaalaqa gidis.
1CH 12:15 Yordaanose shaafay, gaxape gaxa gakidi kixida koyro ageenan pinnidaysati haysata. Enti zangaaran dolohanne wuloha baggan de7iya asaa ubbaa yedethidosona.
1CH 12:16 Biniyaame kochaafenne Yihuda kochaafe guutha asati Dawiti de7iya miixa bidosona.
1CH 12:17 Dawiti entara gahetanaw keyidi, “Hinte tana maaddanaw saro taako yidaba gidiko ta wozanay hintera gidana. Shin hinte tana ta morketas aathidi immanaw yidaba gidiko, hintena erite! Taani oothida iitabay bayna gisho nu aawata Xoossay hessa be7o; I hintena pirdo!” yaagis.
1CH 12:18 Hessafe guye, hastamata halaqa Amasaya bolla Xoossa Ayyaanay wodhin, “Dawita, nuuni neyisata! Isseye na7aw, nuuni neera de7oos! Saroy new gido! Nena maaddeysatas saroy gido! Ne Xoossay nena maaddana” yaagis. Dawiti enta ekidi ba olanchotas halaqa oothis.
1CH 12:19 Dawiti Filisxeemetara gididi Saa7ola olanaw bida wode, Minaase kochaafe guutha asati Dawitara gahetidosona. Shin Filisxeemeta halaqati Dawitinne Dawita asay bantara boonnada diggidosona. Dawitinne Dawita asay, enta kawa Saa7olas aathidi immaneko gidi yayyida gisho Filisxeemeti zoretidaape guye enta guye zaaridosona.
1CH 12:20 Dawiti Xiqilaaga simmida wode Minaase kochaafe Dawita maaddanaw keyida asati Adina, Yozabaata, Yidi7eela, Mika7eela, Yozabaata, Elihanne Xiltaya. Haysati kase Minaase biittan shaalaqa.
1CH 12:21 Enti ubbay minonne wolqaama asi gidiya gisho Dawita zugidi oliya asaa olidi iya maaddidosona.
1CH 12:22 Dawita olanchoti, Xoossa olanchoda darana gakanaw iya maaddiya asay gallas gallas guzhetees.
1CH 12:23 Goday iyaw gidaysada Saa7ola kawotethaa Dawitako zaaranaw dancetidi Dawitako Kebroona bida olanchota tayboy haysafe kaallidi xaafetidaysata.
1CH 12:24 Gondallenne toora oykidi olas giigida Yihuda kochay 6,800.
1CH 12:25 Simoona kochaafe olas giigida minonne wolqaama olanchoti 7,100.
1CH 12:26 Leewe kochaafe 4,600.
1CH 12:27 Aarona kochaa halaqay Yoodahe; Yoodahera issife 3,700 asati de7oosona.
1CH 12:28 Saadoqi na7atethi, minonne wolqaama asi; Saadoqa soo asaape laatamanne nam7u halaqati iyara de7oosona.
1CH 12:29 Biniyaame koche gidida Saa7ola dabboti 3,000. Shin Biniyaame kochaafe dariya baggay Saa7ola soo asaas he wode gakanaw ammanetidosona.
1CH 12:30 Efreema kochaafe banta soo asan eretida minonne wolqaama asati 20,800.
1CH 12:31 Dawita kawoyanaw baanaw dooretida Minaase kochaafe baggati 18,000.
1CH 12:32 Isra7eele asay ay oothanaw bessiyako wodiyaba shaakidi eriya akeekancho asati, Yisakoora kochaa halaqati, nam7u xeeta; enta dabboti ubbay entaw kiitetoosona.
1CH 12:33 Ola miishe ubbaa oykidi banta kumetha wozanan Dawita maaddanaw giigida olanchotan Zabloona kochay 50,000.
1CH 12:34 Niftaaleme kochaafe 1,000 halaqatinne gondallenne toora oykiya 37,000 asati entara de7oosona.
1CH 12:35 Daane kochaafe olas giigida asati 28,600.
1CH 12:36 Olas keyanaw Aseera kochaafe giigida asati 40,000.
1CH 12:37 Yordaanose shaafape hefintha doloha baggan de7iya Robeela kochaafe Gaade kochaafenne Minaase koche baggaafe ola miishe ubbaa oykidi yida asati 120,000.
1CH 12:38 Ha ubba olanchoti Dawita Isra7eele bolla kawothanaw banta qofaa qachidi, Kebroona katamaa yidosona. Qassi Isra7eelepe attidaysati Dawita kawothanaw issi wozanan gididosona.
1CH 12:39 Enta dabboti entaw koshshiyaba giigisida gisho mishenne uyishe Dawitara heedzu gallas uttidosona.
1CH 12:40 Isra7eele asaas ufaysi gidiya gisho, pudeha baggan de7iya Yisakoorape, Zabloonapenne Niftaalemepe daro asay dhiille, balase nuka, woyne teera, woyne ushshunne zayte haren, baqulon, gimaleninne booran caanidi ehidosona; qassi enti mehenne dorse shukidi maanaw ehidosona.
1CH 13:1 Dawiti shaalaqataranne mato halaqatara zoretis.
1CH 13:2 Isra7eele asa ubbaa, “Hintew lo77o daaniyaba gidikonne Godaa nu Xoossaa shene gidiko, Isra7eele biitta gaxan de7iya nu dabboti, hessadaka banta katamataninne hentha bessatan de7iya kahinetinne Leeweti nuuko shiiqana mela ase kiittoos.
1CH 13:3 Saa7ola kawotethaa wode qeli geetetida nu Xoossaa Taabotiya ane zaaridi ehoos” yaagis.
1CH 13:4 Dawita oday lo77o gidida gisho asa ubbay ma7is.
1CH 13:5 Hessa gisho, Dawiti Xoossa Taabotiya Qiriyaat-Yi7aarimepe ehana mela Gibxe zawape doomidi Hamaata Pino gakanaw de7iya Isra7eele asa ubbaa shiishis.
1CH 13:6 Dawitinne Isra7eele asa ubbay kiruubetape giddon ba araata bolla uttida Godaa sunthay xeegetida Xoossa Taabotiya ehanaw Yihuda biittan de7iya Baala geetetiya Qiriyat-Yi7aarima bidosona.
1CH 13:7 Xoossa Taabotiya ooratha para gaaren wothidi, Amnadaabe soope ehidosona; Oozinne Ahiyoy gaariya laaggoosona.
1CH 13:8 Dawitinne Isra7eele asa ubbay diithinne maasinqo kaa7ishe, karaabo baqishe, daala giirsishe, zaye punnishe banta kumetha wolqan Xoossa sinthan ufaytidi, yexishe Xoossaa bonchidosona.
1CH 13:9 Enti Kidoona wudumma gakiya wode boorati dhubetida gisho Oozi Taabotiya oykanaw ba kushiya yeddis.
1CH 13:10 Ooza kushey Taabotiya bochida gisho, Godaa hanqoy Oza bolla eexis. Hessa gisho, Goday iya xadikin, I he bessan Xoossa sinthan hayqis.
1CH 13:11 Goday hanqetidi Ooza wodhida gisho, Dawiti yilotis. Hachi gakanaw he bessay Oozi dhuketida bessaa geetetees.
1CH 13:12 He gallas Dawiti Xoossaa yayyida gisho, “Xoossa Taabotiya taako waata ehanaw danda7iyana?” yaagis.
1CH 13:13 Dawiti Taabotiya Yerusalaame efanaape gidi Gaate addiya Abdaara soo efis.
1CH 13:14 Xoossa Taabotey Abdaara son iya soo asaara heedzu ageena gam7is. Goday iya soo asaanne iyaw de7iya ubbaa anjis.
1CH 14:1 Xiroosa kawoy Kiraami Dawitas gadho keexana mela kiitetiya asata, shuchu masseysatanne anaaxeta ziga mithara yeddis.
1CH 14:2 Goday Isra7eele bolla iya kawo oothidi minthidaysanne ba asaa Isra7eele gisho iya kawotethaa bonchidaysa Dawiti eris.
1CH 14:3 Hessafe guye, Dawiti Yerusalaamen hara macho ekidi adde naytanne macca nayta yelis.
1CH 14:4 Dawiti Yerusalaamen yelida adde nayti Samuusa, Sobaaba, Naatana, Solomone,
1CH 14:5 Yibhaara, Elisu7a, Elfalaxa,
1CH 14:6 Noga, Nafega, Yafaya,
1CH 14:7 Elisaama, Eldaana, Elfalaxa.
1CH 14:8 Dawiti Isra7eele ubbaa bolla kawo gididi tiyetidaysa Filisxeemeti si7ida wode ubbay Dawita olidi oykanaw keyidosona. Dawiti hessa si7idi entara oletanaw keyis.
1CH 14:9 Filisxeemeti Raafayme zangaara yidi oykidosona.
1CH 14:10 Dawiti, “Taani Filisxeemeta olo? Neeni enta taw aatha immanee?” yaagidi Xoossaa oychis. Goday, “Bada ola; taani enta new aatha immana” yaagis.
1CH 14:11 Dawitinne iya asay Ba7al-Parasime geetetiya bessaa bidi yan enta xoonidosona. Dawiti, “Haathi dhuusidi keyeysada Xoossay ta morketa giddora tana kanthisis” yaagis. He bessaa sunthay Ba7al-Parasime geetetis.
1CH 14:12 Filisxeemeti banta eeqata he bessan yeggidi bin, Dawiti kiittidi enta eeqata xuugisis.
1CH 14:13 Filisxeemeti zaari he zangaara yidi olidosona.
1CH 14:14 Dawiti Xoossaa zaaridi oychis. Xoossay, “Enta guyera yuuya aadhada wolaa matan eqada olape attishin, sintha baggara keyopa.
1CH 14:15 Wola huuphen salpe girsi neeni si7iya wode olanaw keya. Hessi Filisxeeme olanchota shocanaw Xoossay neepe sinthe aadhidaysas malla” yaagis.
1CH 14:16 Xoossay kiitidaysada Dawiti oothis. Gaba7oonape Gezera gakanaw Isra7eele asay Filisxeeme olanchota wodhidosona.
1CH 14:17 Dawita sunthay biitta ubbaa gakis. Kawotetha ubbay Dawitas yayyana mela Goday oothis.
1CH 15:1 Dawiti ba kataman baw keethe keexis; Xoossa Taabotiyas besse giigisidi, dunkaane essis.
1CH 15:2 Dawiti, “Xoossa Taabotiya tookanaadanne merinaw Xoossas oothanaada Goday dooriday Leeweta gidiya gisho hari oonika Xoossa Taabotiya tookanaw bessenna” yaagis.
1CH 15:3 Dawiti Godaa Taabotiyas giigisida bessaa Taabotiya ehana mela Isra7eele asa ubbaa Yerusalaame shiishis.
1CH 15:4 Kaallidi Dawiti Aarona kochatanne Leeweta xeegidi shiishis.
1CH 15:5 Qahaata yaraape halaqay Uri7eelinne issi xeetanne laatamu iya dabboti yidosona.
1CH 15:6 Maraara yaraape halaqay Asayinne nam7u xeetanne laatamu iya dabboti yidosona.
1CH 15:7 Gedisoona yaraape halaqay Iyyu7eelinne xeetanne hastamu iya dabboti yidosona.
1CH 15:8 Elzafaana yaraape halaqay Shama7inne nam7u xeetu iya dabboti yidosona.
1CH 15:9 Kebroona yaraape halaqay Eli7eelinne hospun tammu iya dabboti yidosona.
1CH 15:10 Uzi7eela yaraape halaqay Amnadaabeynne xeetanne tammanne nam7u iya daboti yidosona.
1CH 15:11 Dawiti kahineta Saadoqanne Abyataara, Leeweta Uri7eela, Asaya, Iyyu7eela, Shama7a, Eli7eelanne Amnadaabe xeegis.
1CH 15:12 Entako, “Hinte Leewe kochaas halaqata. Godaa Isra7eele Xoossaa Taabotiya taani giigisida bessaa ehanaw hintenne hinte dabboti geeyite.
1CH 15:13 Hinte Leeweti koyro Xoossa Taabotiya tookiboonna gishonne nuuni iya woga mela waati efaneko Xoossaa oychiboona gisho, Goday nu Xoossay nuna seeris” yaagis.
1CH 15:14 Godaa Isra7eele Xoossa Taabotiya ehanaw kahinetinne Leeweti bantana geeshshidosona.
1CH 15:15 Goday Muse baggara kase kiitidaysada Leeweti Xoossaa Taabotiya banta hashiyan kasora tookidosona.
1CH 15:16 Diithi, maasinqonne daala kaa7ishe ufaysa yethi yexana mela banta dabbo gidida Leewetape zammaareta shuumana mela Dawiti kiittis.
1CH 15:17 Leeweti Iyyu7eela na7aa Hemaana, iya dabbotape Baraka na7aa Asaafanne enta dabbotape Maraara yaraa Qusaya na7aa Etaana shuumidosona.
1CH 15:18 Qassi nam7antho dethan Zakariyasa, Yazi7eela, Shamramoota, Yi7eela, Una, Eli7aaba, Banaya, Ma7iseya, Matita, Elfala, Miqineyanne penge naagiya Abdiyunne Yi7eela shuumidosona.
1CH 15:19 Naase daala qaathana mela Hemaani Asaafinne Etaani shuumetidosona.
1CH 15:20 Qassi Zakariyasi, Ya7izi7eeli, Shamramooti, Yi7eeli, Uni, Eli7aabi, Ma7iseynne Banayi maasinqo kaa7oosona.
1CH 15:21 Matita, Elfali, Miqineyi, Abdiyuy Yi7eelinne Azaazey diithi diixoosona.
1CH 15:22 Leeweta halaqay Kanaaney mazmure eriya gisho enta kaalethanaw shuumetis.
1CH 15:23 Barakinne Elqaani Taabotiya dunkaaniya pengiya naaganaw dooretidosona.
1CH 15:24 Kahineti Sabaani, Iyosaafexi, Natina7eeli, Amasayi, Zakariyasi, Banayinne Alaazari Xoossa Taabotiya sinthan moyze punnanaw dooretidosona. Obeed-Edoomeynne Yihey Taabotiya naaganaw dooretidosona.
1CH 15:25 Dawiti, Isra7eele cimatinne shaalaqati Godaa caaqo Taabotiya Abdaara soope ehanaw ufaytishe bidosona.
1CH 15:26 Godaa caaqo Taabotiya tookida Leeweta Xoossay maaddida gisho enti laapun kormanne laapun maraze yarshidosona.
1CH 15:27 Dawiti, Taabotiya tookida Leeweti, mazmure yexeysatinne enta halaqay Kanaaney liinope oosetida ma7o ma7idosona. Dawitika liinope oosetida efuude ma7is.
1CH 15:28 Hessada oothidi, Isra7eele ubbay ufaytidi moyzenne zaye punnishe, daala qaathishe, diithinne maasinqo kaa7ishe Godaa caaqo Taabotiya ehidosona.
1CH 15:29 Godaa caaqo Taabotey Dawita katamaa gelida wode Saa7ola na7iya Melkoola kawoy Dawiti ufaytidi durishininne kaa7ishin maskootera be7ada ba wozanan kadhasu.
1CH 16:1 Enti Xoossa Taabotiya ehidi Dawiti Taabotiya wothanaw essida dunkaaniya giddon wothidi, xuussa yarshonne issifetetha yarsho Xoossas yarshidosona.
1CH 16:2 Dawiti xuussa yarshonne issifetetha yarsho yarshidi polidaape guye Godaa sunthan asaa anjis.
1CH 16:3 Isra7eele asa ubbaas maccasinne addes, huuphen huuphen issi muume uythi, issi qanxo ashonne issi woyne nuka gishis.
1CH 16:4 Godaa Taabotiya sinthan oothana melanne Godaa Isra7eele Xoossaa sabbana mela, galatana melanne bonchana mela guutha Leeweta Dawiti shuumis.
1CH 16:5 Leeweta halaqay Asaafa; Asaafa kaallidi Zakariyasa. Zakariyasa kaallidi de7ey Yi7eela, Shamramoota, Yi7eela, Matita, Eli7aaba, Banayanne Obeed-Edoome. Enti maasinqonne diithi diixanaw shuumetidosona; shin Asaafi daala girsanaw shuumetis.
1CH 16:6 Kahiney Banayinne Yahazi7eeli Xoossa caaqo Taabotiya sinthan ubba wode moyze punnanaw shuumetidosona.
1CH 16:7 He gallas Dawiti Asaafinne iya dabboti Godaa sabbana mela ha mazmuriya koyro kiittis.
1CH 16:8 Godaa galatite; iya sunthaa xeegite; Iya oosuwa kawotethata giddon odite.
1CH 16:9 Iya sabbite; galata mazmuriya iyaw yexite; Malaalisiya iya ooso ubbaa odite.
1CH 16:10 Iya geeshsha sunthan ceeqetite; Godaa koyeyisata wozanay ufayto.
1CH 16:11 Godaanne iya wolqaa be7ite; ubba wode iya sinthaa koyite.
1CH 16:12 Hinteno, Isra7eele kochato, dooretida Yayqooba nayto, Iya malaata, I immida pirdaanne malaalsiyabata hassayite.
1CH 16:14 I Godaa nu Xoossaa; iya pirday biitta ubbaa bollana.
1CH 16:15 Iya caaquwa merinaw mukulu yeletethaa gakanaw, iya qaala naagite.
1CH 16:16 Abrahaamera caaqida caaquwa naagees; Yisaaqas gelida qaala minthees.
1CH 16:17 Yayqoobas wogaa, Isra7eeles merinaa caaquwa, oothidi minthis.
1CH 16:18 “Taani new Kanaane biitta immana; I ne kochaas laata gidana” yaagis.
1CH 16:19 Hessi hinte taybon guuthanne Kanaanen bete gididi de7iya wode hannis.
1CH 16:20 Issi deriyape hara dere pinnidosona; issi kawotethaafe hara kawotethi yuuyidosona.
1CH 16:21 Xoossay enta oonika naaqana mela immibeenna; enta gisho kawota seeris.
1CH 16:22 “Taani tiyidaysata bochofite; ta nabeta qohopite” yaagis.
1CH 16:23 Sa7an de7iya asa ubbay Godaas yexite; iya ashuwa gallas gallas odite.
1CH 16:24 Kawotethata giddon iya bonchuwa, malaalsiya iya oosuwa asa ubbaa giddon awaajite.
1CH 16:25 Goday gita; aadho galatay iyaw bessees; xoossata ubbaafe aadhidi bonchetanaw bessees.
1CH 16:26 Hara kawotethata xoossati ubbay eeqata; shin Goday salota medhida Xoossaa.
1CH 16:27 Iya sinthan bonchoynne teemi de7ees; minotethinne ufaysi I de7iya bessan de7ees.
1CH 16:28 Hinteno, biitta kawotethato, Godaa bonchonne wolqa immite.
1CH 16:29 Iya sunthaas bessiya boncho immite; yarsho ekidi iya sinthe yiite; iya geeshshatetha teeman Godaa goyinnite.
1CH 16:30 Biittan de7iya asa ubbay iya sinthan kokorite; Sa7ay minni eqida gisho qaaxenna.
1CH 16:31 Saloti ufayto; sa7i hashshu go! Kawotethata giddon enti “Goday kawotis!” yaago.
1CH 16:32 Abbaynne iya giddon de7iya ubbay guummo; gadeynne iyan de7iya katha ubbay ufayto.
1CH 16:33 He wode woran de7iya mitha ubbay ufaysan Godaa sinthan yexana. I sa7aa bolla pirdanaw yees.
1CH 16:34 Goday keeha gidiya gishonne iya siiqoy merinaasa gidiya gisho, Godaa galatite.
1CH 16:35 “Abeeti nuna ashshiya Xoossaw nuna ashsha; Nuuni ne geeshsha suntha galatana melanne ne bonchuwan nu bonchetana mela, kawotethata giddofe shiishada nuna ashsha” yaagite.
1CH 16:36 Goday Isra7eele Xoossay, merinaape merinaa gakanaw galatetto! Asa ubbay, “Amin7i” gidi, Godaa galatidosona.
1CH 16:37 Godaa caaqo Taabotiya sinthan gallas gallas goyinnoos koshshiyaba ubba wode enti oothana mela Dawiti Asaafanne iya dabbota wothis.
1CH 16:38 Qassi Obeed-Edoomenne usupun tammanne hospun iya dabbota entara oothana mela wothis; Yedutuuna na7aa Obeed-Edoomenne Hosa pengiya naagana mela wothis.
1CH 16:39 Kahiney Saadoqinne iyara oothiya kahineti Gaba7oonan de7iya dhoqa bessan, Dunkaaniya sinthan oothana mela enta yan aggis.
1CH 16:40 Goday Isra7eeles immida higgiyan xaafetidaysada enti wontanne omarsi ubba wode xuussa yarsho yarshana mela oothis.
1CH 16:41 Iya siiqoy merinaasa gidiya gisho Godaa mazmuren galatana mela Hemaana, Yedutuunanne dooretida harata Dawiti entara issife wothis.
1CH 16:42 Hemaaninne Yedutuuni moyze punnoosona, daala giirsoosona galata mazmure yexishe kaa7iya hara miisheta kaa7oosona. Yedutuuna adde nayti pengiya naaganaw shuumetidosona.
1CH 16:43 Hessafe guye asa ubbay ba soo soo bis. Dawitika ba soo asaa anjanaw simmis.
1CH 17:1 Dawiti ba gadhon uttidaape guye nabiya Naatanako, “Taani zigape keexetida keethan de7ayis; shin Godaa caaqo Taabotey dunkaane giddon de7ees” yaagis.
1CH 17:2 Naatani Dawitako, “Goday neera de7iya gisho ne wozanay qopidaba ubbaa ootha” yaagis.
1CH 17:3 Shin he qamma Godaa qaalay Naatanako haysada yaagishe yis;
1CH 17:4 “Bada ta aylliya Dawitako haysada yaaga; ‘taani daana keethe keexanay nena gidaka.
1CH 17:5 Taani Isra7eele Gibxefe kessida wodepe doomada hachi gakanaw keethan de7abike; taani dunkaanepe dunkaane, bessafe bessi yuuyashe de7as.
1CH 17:6 Taani Isra7eele asa ubbaara yuuyida bessa ubban, ta asaa heemmana mela taani shuumida asaape oona Taw ziga keethi ayis keexabikii?’ gada oychabike” yaagees.
1CH 17:7 “Hessa gisho, ta aylliya Dawitako bada Ubbaafe Wolqaama Goday haysada yaagees; ‘Taani nena dorse heemmiya bessape denthada ta asaa Isra7eele kaalethana mela ehas.
1CH 17:8 Neeni bida besse ubban taani neera gidas; ne morketa ubbaa ne sinthafe diggas. Hiza taani ha sa7an eretida gita asaada ne sunthaa gitayana.
1CH 17:9 Taani ta asaa Isra7eeles besse immada, enta he bessan tokana. Hessa gisho, enti banta bessan de7ana; enti zaaridi waabaqokona. Kase taani ta asaa Isra7eele bolla daynnata shuumada wode morketi naaqidaysada,
1CH 17:10 zaaridi iita asati enta naaqokona. Taani ne morketa ubbaa new haarsana. “ ‘Hessa bolla Goday ba huuphen new keethe keexanaysa odees.
1CH 17:11 Ne hayqada ne mayzatan gahetiya wode taani neepe guye ne naytape issuwa denthada iya kawotethaa minthana.
1CH 17:12 Taw keethe keexanay iya; taani iya araata merinaw mintha essana.
1CH 17:13 Taani iyaw aawa gidana; ika taw na7a gidana. Neepe sinthe kawotida Saa7olape ta maarotetha ekidaysada taani iyape ekike.
1CH 17:14 Taani iya ta asaa bollanne ta kawotethaa bolla merinaw shuumana; iya araatay merinaw minni eqana’ ” yaagis.
1CH 17:15 Naatani Xoossay iyaw qoncisida qaala ubbaa Dawitas odis.
1CH 17:16 Hessafe guye, kawoy Dawiti dunkaaniya giddo gelidi, Godaa sinthan uttidi, haysada yaagidi woossis; “Abeeti Godaw, Xoossaw neeni haysa ubbaa taw oothanaw taani oonee? Ta soo asayka aybee?
1CH 17:17 Abeeti Godaw, hessi ne ayfiya sinthan guutha daanin, ne aylliya soo asaas sinthafe hananaba odadasa. Neeni tana gita asi oothada xeelladasa.
1CH 17:18 Neeni tana ne aylliya bonchida gisho, Dawiti ay gaanaw danda7ii? Neeni tana ne aylliya eraasa.
1CH 17:19 Abeeti Godaw, ne aylliya gishonne ne wozanaa qofaada ha gitaba ubbaa oothada, ha gita ufaysa qaala ubbaa tana erisadasa.
1CH 17:20 Abeeti Godaw, ne meli oonika baawa. Nuuni nu haythan si7idaysada neepe attishin, hara xoossi baawa.
1CH 17:21 Neeni ne ase oothanaw wozida ne asaa Isra7eele daaniya hara kawotethi sa7a bolla baawa. Neeni oothida gitanne malaalsiya oosota gaason ne sunthay biittan eretis. Neeni Gibxefe wozida ne asaa sinthafe kawotethata goodda kessadasa.
1CH 17:22 Neeni ne asaa Isra7eele merinaw nebaa oothadasa. Abeeti Godaw, neeni enta Xoosse gidadasa.
1CH 17:23 “Abeeti Godaw, neeni ne aylliyasinne iya soo asaas odidabay merinaw minnidi de7o; neeni oothana gidaysada ootha.
1CH 17:24 ‘Ubbaafe Wolqaama Goday, Isra7eele Xoossay tuma Isra7eele Xoosse’ asay gaanada ne sunthay merinaw minnidi daananne gita gidana. Ne aylliya Dawita soo asay ne sinthan minnidi daana.
1CH 17:25 “Abeeti ta Xoossaw, neeni ne aylliyas keethe keexana gada qoncisadasa. Hessa gisho, taani ne aylley ha woosa woossanaw minnas.
1CH 17:26 Abeeti Godaw, neeni Xoosse! Neeni ha lo77o ufaysa qaala taw ne aylliyas oothana gadasa.
1CH 17:27 Ne sinthan merinaw daana mela ne aylliya soo asaa anjanaw koyadasa. Abeeti Godaw, ne anjidaysi merinaw anjetidaysa gidana” yaagidi woossis.
1CH 18:1 Hessafe guye, Dawiti Filisxeemeta xoonidi haaris; Geete katamaanne iya gutata Filisxeemeta kushepe ekis.
1CH 18:2 Dawiti Moo7abe asaa xoonin, enti iyaw haaretidi giiridosona.
1CH 18:3 Hamaata katamaa matan de7iya Suubba kawoy Adraazari, ba kawotetha Efraxiisa shaafa gakanaw aassanaw bishin Dawiti iya olis.
1CH 18:4 Dawiti Adraazarape issi mukulu para gaareta, laapun mukulu para asatanne laatamu mukulu toho asata di77is. Dawiti xeetu gaaretas gidiya parata ashshidi hara parata ubbaas gedaa xaphuwa qanxis.
1CH 18:5 Damasqo kataman de7iya Sooreti Suubba kawa Adraazara maaddanaw yida wode Dawiti entafe 22,000 asaa wodhis.
1CH 18:6 Hessafe guye, Soore biittan Damasqo kataman ola miixa medhis. Soore asati Dawitas haaretidi giiridosona. Dawiti bida bessa ubban Goday iyaw xoono immis.
1CH 18:7 Dawiti Adraazara oosanchoti tookida worqa gondalleta ekidi Yerusalaame efis.
1CH 18:8 Qassi Dawiti Adraazari haariya Xebahanne Kuna katamatape daro naase birata ekis. Hessafe guye, Solomoney he naase biratape oosetida kereta, tuussatanne dumma dumma miisheta oothis.
1CH 18:9 Dawiti Suubba kawa Adraazara olanchota ubbaa xoonidaysa Hamaata kawoy Toyi si7is.
1CH 18:10 Toyi Adrazaarara oletishe gam7ida gisho Dawiti Adraazara olidi xoonida gisho iya hashshu gaanawunne sarothanaw ba na7aa Hadoraama kawa Dawitako kiittis. Hadoraami worqafe, birapenne naase biratape oosetida miisheta imota ekidi bis.
1CH 18:11 Kawoy Dawiti Edoomepe, Moo7abepe, Amoonepe, Filisxeemetapenne Amaaleqatape di77idi ekida biraanne worqa ha miishetara gathidi Godaas dummayidi wothis.
1CH 18:12 Xaruya na7ay Abisi Edoome asaape 18,000 asaa, Maxine Zangaaran wodhis.
1CH 18:13 Dawiti Edoomen ola miixa medhis; yaatin, he biitta asa ubbay Dawitas haaretis. Dawiti bida bessa ubban Goday iyaw xoono immis.
1CH 18:14 Hessada oothidi, Dawiti Isra7eele ubbaa bolla kawotidi ba asa ubbaa xillotethaninne suure pirdan aysis.
1CH 18:15 Xaruya na7ay Iyo7aabi toora mocona; Ahiluda na7ay Iyosaafexi taarike xaafe.
1CH 18:16 Ahixuuba na7ay Saadoqinne Abyataara na7ay Abimelekey kahine; Sarayi waanna xaafe.
1CH 18:17 Yoodahe na7ay Banayi Dawita naagiya asaa halaqa; Dawita adde nayti iya kawotethan dhoqa bessa oykida halaqata.
1CH 19:1 Hessafe guye, Amoone kawoy Na7oosi hayqin iya na7ay iya bessan kawotis.
1CH 19:2 Dawiti, “Iya aaway Na7oosi taw keehida gisho taani iya na7aa Hanunas keehana” yaagis. Hanuna aaway hayqida gisho Dawiti iya minthethanaw ase kiittis. Dawiti kiitida asati Hanuna minthethanaw Amoone gakida wode,
1CH 19:3 Amoone moorinnati Hanunako, “Dawiti ne aawa bonchidi nena minthethanaw ha asata kiittis gada na qopay? I ha asaa kiittiday ha katamaa wochidi, olanaasa” yaagidosona.
1CH 19:4 Hanuni Dawiti kiitida asata oykidi, enta buuchaa meedis; enta ma7uwa garsafe dulle gakanaw qanxidi enta yeddis.
1CH 19:5 Hessa gisho, asati daro yeellatidosona. Dawiti hessa si7idi, entara asi kiittidi, “Hinte buuchay diccana gakanaw Iyaarko kataman de7ite; hessafe guye haa yiite” yaagis.
1CH 19:6 Amooneti banta kushen Dawiti enta morkana mela oothidaysa erida wode Masephexoomeninne Sooren de7iya Ma7ikanne Suubba katamatape para gaaretanne parata garxanaw 34,000 kilo giraame bira santime yeddidosona.
1CH 19:7 32,000 para gaareta, parata, Ma7ika kawanne iya olanchota miishen garxin yidi Medaban dunkaanidosona. Qassi Amooneti banta katamaape keyidi olas giigetidosona.
1CH 19:8 Dawiti hessa si7ida wode Iyo7aabanne olanchota yeddis.
1CH 19:9 Amooneti keyidi katamaa pengen olas salpidosona. Enta maaddanaw yida kawoti banta bessaa oykidi denban shiiqidosona.
1CH 19:10 Iyo7aabi oli sintharanne guyera teqidaysa be7ida wode Isra7eeleta giddofe mino olanchota dooridi, Soore olanchota sinthan salpisis.
1CH 19:11 Attida asaa ba ishaa Abisa aawatetha garsan wothis; enti Amooneta sinthan salpidosona.
1CH 19:12 Iyo7aabi ba ishaa Abisako, “Soore asati ta bolla wolqaamiko, neeni yada tana maadda. Amoone asati ne bolla wolqaamiko, taani yada nena maaddana.
1CH 19:13 Hiza minna! Nu asaa gishonne nu Xoossaa katamata gisho ane minnidi oletoos. Goday bana lo77iyaba ootho” yaagis.
1CH 19:14 Hessafe guye, Iyo7aabinne iyara de7iya asay Soore olanchotara oletanaw keyidosona. Yaatin, Soore asay iya sinthafe baqatidosona.
1CH 19:15 Soore asay baqatidaysa Amoone asay be7ida wode entika iya ishaa Abisaya sinthafe baqatidi katama gelidosona. Hessafe guye, Iyo7aabi Yerusalaame simmis.
1CH 19:16 Soore asay Isra7eele asay enta xoonidaysa erida wode ase kiittidi Efraxiisa shaafape hefinthara de7iya Soore asaa ehidosona. Toora moconay Adraazari, Shofaaki enta kaalethees.
1CH 19:17 Dawiti hessa si7ida wode Isra7eele olanchota shiishidi, Yordaanose shaafa pinnidi Soore asaara oletanaw enta sinthan salpidosona. Dawiti entara oletanaw salpin entika iyara oletidosona.
1CH 19:18 Soore asay Isra7eeleta sinthafe baqatidosona; Dawiti Soore asaape para gaare laagiya 7,000 asaanne 40,000 toho asaanne enta toora mocona Shoofaka wodhis.
1CH 19:19 Adraazara olanchoti Isra7eeletan xoonetidaysa erida wode Dawitara sigetidi, iyaw haaretidosona. Hessafe guye, Soore asay Amoone asaa maaddanaw dosibookona.
1CH 20:1 Laytha laamen kawoti olas keyiya wode Iyo7aabi olanchota kaalethidi Amoone biitta olidi Raaba katamaa oykis. Shin Dawiti Yerusalaamen attis; Iyo7aabi Raaba katamaa olidi dhaysis.
1CH 20:2 Hessafe guye, Dawiti yidi enta kawa worqa kallachaa iya huuphepe ekis. Kallacha deexoy hastamanne oyddu kilo giraame gidis; iya giddon al7o shuchi de7ees. He kallachaa ekidi Dawiti ba huuphen wothis. Qassi Dawiti he katamaape daro di7o di77is.
1CH 20:3 Kataman de7iya asaa kessidi magaazen, konteninne kaltan oosisis. Amoonen de7iya asa ubbaa hessada oosisis. Hessafe guye, Dawitinne iya asa ubbay Yerusalaame simmis.
1CH 20:4 Hessafe guye, Filisxeemera Gezeran oli dendin, Kusata addey Sabaki, Raafayme yara gidida Sifaya wodhis. Yaatin, Filisxeemeti xoonetidosona.
1CH 20:5 Filisxeemetara dendida hara olan qassi Ya7ira na7ay Eliyaani, toora toomay wandaraashe mela gidida, Geete addiya Gooliyada ishaa, Lahima wodhis.
1CH 20:6 Qassi hara oli Geeten dendis. He bessan issi wogga adussa addey de7ees. He addiyas issi issi kushiyaninne issi issi tohuwan usupun, woli bolla laatamanne oyddu biradheti de7oosona. Ika Raafa yara.
1CH 20:7 He uray Isra7eeletara qeeletida wode Dawita ishaa Sam7a na7ay Yoonataani iya wodhis.
1CH 20:8 Haysati Geeten de7iya Raafa yarata; enti Dawita kusheninne iya asaa kushen hayqidosona.
1CH 21:1 Xalehey Isra7eele bolla meto ehanaw koyidi, Dawiti Isra7eele asaa taybana mela denthethis.
1CH 21:2 Dawiti Iyo7aabakonne toora moconatako, “Daanepe Barsaabe gakanaw bidi, Isra7eele asaa taybite. Yaatidi, asaa tayboy aapuneko tana erisite” yaagis.
1CH 21:3 Shin Iyo7aabi, “Goday, ha de7iya ba asaa bolla xeetu kushe gujo! Ta godaw, kawaw, enti ubbay ta godaa aylleta gidokonaayee? Ta goday hessa melaba oothanaw ayis koyii? Isra7eele bolla ayis bala oothay?” yaagis.
1CH 21:4 Shin kawa qaalay Iyo7aaba xoonin, Iyo7aabi keyidi Isra7eele biitta ubbaa yuuyidi Yerusalaame simmis.
1CH 21:5 Iyo7aabi taybida asaa taybuwa Dawitas immis. Isra7eele biitta ubban mashshan oletanaw danda7iya issi 1,100,000 asati de7oosona. Qassi Yihuda biittan mashshan oletanaw danda7iya 470,000 asati de7oosona.
1CH 21:6 Iyo7aabi kawa kiitta dosiboonna gisho Leewetanne Biniyaame kochata taybeenna.
1CH 21:7 Xoossay hessan ufaytiboonna gisho Isra7eele seeris.
1CH 21:8 Dawiti Xoossaako, “Taani haysan gita nagara oothas. Shin ha77i nena woossayis; ne aylliya nagaraa atto ga; taani daro eeyaba hanas” yaagis.
1CH 21:9 Goday Dawita qoncethi be7iya Gaadeko haysada yaagis;
1CH 21:10 “Bada Dawitako, Goday, ‘Taani nena heedzu dooro bessayis; taani ne bolla oothana mela entafe taw issuwa doora’ yaagees” yaaga.
1CH 21:11 Gaadi Dawitako bidi, “Goday haysatape issuwa doora yaagees;
1CH 21:12 heedzu laytha kosha woyko heedzu ageena ne morketa kushen aadhada imetanaysa woyko heedzu gallas Godaa mashshay ne biitta shocanaysanne gado Isra7eele bolla ehiya hayqo kiitancho kiitteysafe awusa dooray? Tana kiittidaysas odanaba taw oda” yaagis.
1CH 21:13 Dawiti Gaadeko, “Taani daro un7etas. Godaa maarotay gita gidiya gisho taani iya kushen kundana; asa kushen kundike” yaagis.
1CH 21:14 Hessa gisho, Goday Isra7eele bolla gado yeddin, 70,000 Isra7eele asati hayqidosona.
1CH 21:15 Xoossay Yerusalaame dhaysanaw kiitancho kiittis. Shin kiitanchoy Yerusalaame dhaysanaw doomida wode Goday azzanis. Dhaysiya kiitanchuwako, “Agga! Hiza gidana!” yaagis. He wode Godaa kiitanchoy Yaabuse addiya Orna wudumma matan eqis.
1CH 21:16 Kiitanchoy ba mashsha ba kushen oykidi Yerusalaame dhaysanaw sa7apenne salope giddon eqidaysa Dawiti be7is. He wode Dawitinne cimati kayo ma7o ma7idi, sa7an gufannidosona.
1CH 21:17 Dawiti, “Asay taybetana mela oothiday tana gidikina? Naaqidaynne iitabaa oothiday tana. Shin ha dorsati ay oothidona? Abeeti Godaw, ta Xoossaw, hayyana ne kushey tananne ta soo asaa seero. Ne kushey ne asaa seeropo!” yaagis.
1CH 21:18 Godaa kiitanchoy Gaadeko haysada yaagis; “Dawiti Yaabuse addiya Orna wudumma bidi Godaas yarsho bessi gimbana mela oda” yaagis.
1CH 21:19 Godaa sunthan Gaadi odidaysa si7idi Dawiti bis.
1CH 21:20 He wode Orninne iya oyddu adde nayti wudumman giste qoxoosona. I guye simmidi kiitancho be7is; iyara de7iya oyddu nayti be7idi qosetidosona.
1CH 21:21 Dawiti Ornako yida wode Orni iya be7idi, wudummaafe gaxa keyidi ziggidi sarothis.
1CH 21:22 Dawiti, “Gadoy asaa bollafe kichana mela taani Godaas yarsho bessi keexana mela ne wudumma taw bayza. Taani new kumetha gatiya qanxana” yaagis.
1CH 21:23 Orni, “Eka; ta goday kawoy bana ufaysiyabaa ootho. Heko, boorat xuussa yarshos, katha bukiya miishiya eethanaw, giste kathaa yarshos immana. Taani ha ubbaa new immana” yaagis.
1CH 21:24 Shin kawoy Dawiti, “Akay, taani kumetha gate qanxada shammana. Taani nebaanne ta miishen shammonnaba ekada xuussa yarsho oothada Godaas yarshike” yaagis.
1CH 21:25 Dawiti wudumma usupun xeetu worqa santimen shammis.
1CH 21:26 Dawiti yan Godaas yarsho bessi keexis. Yaatidi xuussa yarshonne issifetetha yarsho yarshis. Godaa woossin, Goday xuussa yarshuwa bolla salope tama yeddidi iyaw zaaris.
1CH 21:27 Goday kiitanchuwa kiittin, kiitanchoy ba mashsha shoohuwan zaaris.
1CH 21:28 Dawiti, Goday iya woosa zaaridaysa be7idi, Yaabuse addiya Orna wudumman zaaridi yarshis.
1CH 21:29 Musey mela biittan giigisida, Godaa Dunkaaneynne xuussa yarsho bessay he wode Gaba7oonan goyinniya dhoqa bessan de7ees.
1CH 21:30 Shin Dawiti Godaa kiitanchuwa mashsha yayyida gisho Xoossaa oychanaw he bessaa baanaw danda7ibeenna.
1CH 22:1 Hessafe guye, Dawiti, “Godaa Xoossaa keethaynne Isra7eele asay xuussa yarsho bessay haysan gidana” yaagis.
1CH 22:2 Dawiti Isra7eele biittan de7iya bete asata shiishana mela kiittis. Xoossa keetha keexanaw shuchu masseysati massidi loythana mela enta giddofe dooris.
1CH 22:3 Dawiti, dirsa pengiya giigisanaw misimaarenne maxaafe qoxanaw daro biratanne zawi bayna naase birata giigisis.
1CH 22:4 Sidoonanne Xiroosa asati Dawitas ziga ehiya gisho Dawiti, tayboy bayna ziga giigisis.
1CH 22:5 Dawiti, “Ta na7ay Solomoney yooganne eratethan loohibeenna. Godaas keexetiya keethay biitta ubban eretidanne bonchetida lo77o keethe gidanaw bessees. Hessa gisho, iyaw koshshiyaba taani giigisana” yaagis. Dawiti hayqanaape sinthe darobaa giigisidi wothis.
1CH 22:6 Hessafe guye, Dawiti ba na7aa Solomone xeegidi, Godaas Isra7eele Xoossaas keethe keexana mela kiittis.
1CH 22:7 Dawiti Solomoneko, “Ta na7aw, taani Godaa ta Xoossaa sunthaas keethi keexanaw ta wozanan qopas.
1CH 22:8 Gidoshin, Godaa qaalay, ‘Neeni daro suuthi gussadasa; daro ola oletadasa. Neeni ha sa7aa bolla ta sinthan daro suuthi gussida gisho ta sunthaas keethe keexaka.
1CH 22:9 Gidoshin, saronne shempo gidida na7i yeletana; Iya yuushuwan de7iya morketape taani iya shempisana. Iya sunthay Solomone; taani iya kawotetha laythan Isra7eele asaas sarotethinne wopa immana.
1CH 22:10 I ta sunthaas keethe keexana. I ta na7a gidana; taani iyaw aawa gidana. Iya araata Isra7eelen merinaw minthada essana’ ” yaagis.
1CH 22:11 “Hiza ta na7aw, Goday neera gido. Godaa ne Xoossaa keetha keexana mela Goday kase odidaysada nena poliso.
1CH 22:12 Goday nena Isra7eele asaa bolla kawo oothiya wode, Godaa ne Xoossaa higgiya naagana mela Goday new cincatethinne akeeka immo.
1CH 22:13 Goday Muse baggara Isra7eele immida wogaanne kiitaa neeni naagiko ubbay new hanana. Minna; yayyofa; dagammofa, ufaysi qanxofa!
1CH 22:14 Taani taw danda7etida mela Godaa keetha keexanaw 3,400 kilo giraame worqa, 34,000 kilo giraame bira, zawi bayna naasenne birata shiishas; hessadaka mithinne shuchu giigisas. Neka ne baggara hessa bolla haraa gujanaw koshshees.
1CH 22:15 Ne matan daro oosanchoti shuchu qoo7eysatinne masseysati, anaaxetinne ubba ooso oothanaw danda7iya hiillanchoti de7oosona.
1CH 22:16 Worqa, bira, naasenne birata oothiya asaas zawi baawa. Hiza neeni oosuwa dooma; Goday neera gido” yaagis.
1CH 22:17 Isra7eele kaaletheysati ubbay ba na7aa Solomone maaddana mela Dawiti haysada yaagidi kiittis;
1CH 22:18 “Goday, hinte Xoossay ha77i gakanaw hintera de7eneyee? I hintena ubba baggara shempisibenneyee? Ha biittan de7iya asaa I ta kushen aathidi immida gisho ha biittay Godaasinne iya asaas haaretis.
1CH 22:19 Hiza Godaa hinte Xoossaa koyanaw hinte wozanaanne hinte shempuwa immite. Godaa sunthaas keexetida keethaa giddon Godaa caaqo Taabotiyanne Xoossaa geeshsha miisheta ehidi wothana mela dendidi Godaa Xoossaa keethaa keexite” yaagis.
1CH 23:1 Dawiti cimida wode ba na7aa Solomone Isra7eele bolla kawothis.
1CH 23:2 Dawiti Isra7eele kaaletheyisata ubbaa, kahinetanne Leeweta issife shiishis.
1CH 23:3 Laythi hastamanne iyape bolla gidida Leeweti taybetidi kumethi 38,000 gididosona.
1CH 23:4 Entafe Godaa keetha aawatethan aysiya 24,000 leeweta kawoy wothis; 6,000 leeweta halaqatanne pirda daynnata oothidi wothis.
1CH 23:5 4,000 leeweta penge naageysata oothidi wothis. Qassi Godaa galatanaw Dawiti giigisida yetha miishen Godaa galatiya 4,000 leeweta wothis.
1CH 23:6 Dawiti Leewe adde nayta Gedisoona, Qahaatanne Maraara enta yaran yaran heedzu cugan shaakis.
1CH 23:7 Gedisoona adde nayti La7idanenne Sam7a.
1CH 23:8 La7idane heedzu adde nayti Yi7eela, Zetaamanne Iyyu7eela.
1CH 23:9 Same7a heedzu adde nayti Salomoota, Hazi7eelanne Harana; haysati La7idane yaraa halaqata.
1CH 23:10 Sama7a oyddu adde nayti Yahaata, Ziiza, Usanne Bar7a.
1CH 23:11 Usi bayraa, Ziizi kaalo. Shin Usasinne Bar7as nayti daronna gisho enti issi yarada taybetidosona.
1CH 23:12 Qahaata oyddu adde nayti Anbaraama, Yisihaara, Kebroonanne Uzi7eela.
1CH 23:13 Anbaraama adde nayti Aaronanne Muse. Aaroninne iya kochay ubbaafe geeshshi gidana mela dummatidosona. Enti Godaa sinthan ixaane cuyisanaw, Godaas oothanawunne Godaa sunthan asaa anjanaw merinaw dummatidosona.
1CH 23:14 Xoossa ase gidida Muse nayta Leewe kochatara gathidi taybidosona.
1CH 23:15 Muse nayti Gedisoona Alaazara.
1CH 23:16 Gedisoona nayta giddofe halaqay Sabu7eela.
1CH 23:17 Alaazara na7ay Rahaaba. Alaazaras hara na7i baawa; shin Rahaabas nayti daro.
1CH 23:18 Yisihaara nayta halaqay Salomita.
1CH 23:19 Kebroona na7ay bayray Yiriya; kaaloy Amaare; heedzanthoy Yahazi7eela; oyddanthoy Yaqim7aama.
1CH 23:20 Uzi7eela bayra na7ay Mikiyaasa; kaaloy Yishiya.
1CH 23:21 Maraara nayti Mahilanne Musa. Mahila nayti Alaazaranne Qiisa.
1CH 23:22 Alaazari macca na7ape attishin, adde na7a yelonna hayqis. Hessa gisho, enta aawa ishaa Qiisa nayti enta machidosona.
1CH 23:23 Musa heedzu nayti Mahila, Ederanne Yiremoota.
1CH 23:24 Leewe yeletan banta kochaaninne soo asan banta sunthan mazgabetida Leewe kochati haysata. Laythi laatamanne iyape bolla gidida Leewe kochati ubbay Godaa Xoossaa keethan oothidosona.
1CH 23:25 Dawiti, “Goday, Isra7eele Xoossay ba asaa shempisis. Goday Yerusalaamen merinaw daana.
1CH 23:26 Leeweti Dunkaaniyanne iya giddon go7etiya miisheta hizape guye tookanaw bessenna” yaagis.
1CH 23:27 Dawita wursetha kiitan, laythi laatamanne iyape bolla gidida Leeweti taybetidosona.
1CH 23:28 Enti Godaa Xoossa keethan oothiya Aarona kochata maaddoosona. Godaa Xoossa keethan kareranne soora oothosona; geeshsha miishe ubbaa tunonna mela naagoosona.
1CH 23:29 Enti Xoossa sinthan wothiya uythaa, katha yarshos shiishiya dhiilliya, irshoy bayna uythaanne zaytera munuqetiya dhiilliya aawatethan aysoosona; Xoossa keethan maketiyabanne likeyabaa ubbaa aawatethan xeelloosona.
1CH 23:30 Qassi enti ubba gallas wontanne omarsi Godaa galatanawunne sabbanaw eqoosona.
1CH 23:31 Sambaata gallas, ageena xeeron, wogay kiittiya hara ba7aale gallasay gakiya wode Godaas xuussa yarsho yarshoosona. Entaw imetida taybuwadanne kiitaada ubba wode Godaa sinthan oothosona.
1CH 23:32 Dunkaaniyanne Godaa Xoossa keetha naagana melanne banta isha gidida, Aarona adde nayta, maaddana mela aawatethi Leewetas imetis.
1CH 24:1 Aarona kochati banta ooso maaran haysafe kaallidi xaafetidaysata. Aarona adde nayti Nadaaba, Abyooda, Alaazaranne Itamaara.
1CH 24:2 Shin Naadabeynne Abyooda na7a yelonna banta aawape sinthe hayqidosona. Hessa gisho, Alaazarinne Itamaari kahine gididosona.
1CH 24:3 Dawiti Alaazara yaraape Saadoqa, Itamaara yaraape Abimeleke ekidi Aarona kochata enta oosuwa maaran cugan cugan shaakis.
1CH 24:4 Alaazara yarata halaqati Itamaara yarata halaqatape dari bentida gisho Alaazara yarati tammanne usupun cugan shaaketin Itamaara yarati hospun cugan shaaketidosona.
1CH 24:5 Alaazara yarata giddoninne Itamaara yarata giddon Xoossa keetha halaqatinne Xoossa oosuwas bessiya halaqati de7iya gisho oosoy entaw saaman shaaketees.
1CH 24:6 Alaazara yaratinne Itamaara yarati banta maaran maaran saama kessidosona. Leewe koche gidida Natina7eela na7ay xaafey Shamayey enta mazgabees. Kawoynne iya moorinnati, kahiney Saadoqinne Abyataara na7ay Abimelekey, kahinetanne Leeweta yarata halaqati ubbay hessas marka.
1CH 24:7 Koyro saamay Yo7aaribas keyis; nam7anthoy Yadayas keyis.
1CH 24:8 Heedzanthoy Harimas keyis. Oyddanthoy Sa7oorimas keyis.
1CH 24:9 Ichashanthoy Malkiyas keyis. Usupunthoy Miyaaminas keyis.
1CH 24:10 Laapunthoy Aqoosas keyis; Hospunthoy Abiyas keyis.
1CH 24:11 Uddufunthoy Iyyasus keyis. Tammanthoy Sakanas keyis.
1CH 24:12 Tammanne issinthoy Eliyaseebas keyis. Tammanne nam7anthoy Yaqinas keyis.
1CH 24:13 Tammanne heedzanthoy Hupas keyis. Tammanne oyddanthoy Yeshebas keyis.
1CH 24:14 Tammanne ichashanthoy Bilgas keyis. Tammanne usupunthoy Imeras keyis.
1CH 24:15 Tammanne laapunthoy Heziras keyis. Tammanne hospunthoy Hafixeexas keyis.
1CH 24:16 Tammanne uddufunthoy Patahas keyis. Laatamanthoy Yezekelas keyis.
1CH 24:17 Laatamanne issinthoy Yakinas keyis. Laatamanne nam7anthoy Gamulas keyis.
1CH 24:18 Laatamanne heedzanthoy Dalayas keyis. Laatamanne oyddanthoy Maazas keyis.
1CH 24:19 Goday Isra7eele Xoossay enta mayza Aarona kiittin, I entaw wothida wogaatho, banta Xoossa keetha geliya wode, enti oothana maaray haysa.
1CH 24:20 Hara Leewe kochata halaqati, haysafe kaallidi xaafetidaysata. Yehidayi Sabu7eela baggara Amraama koche.
1CH 24:21 Yisheyi Rahaaba koche.
1CH 24:22 Yahaati Salomita baggara Yisihaara koche.
1CH 24:23 Yiriyey, Amaarey, Yahazi7eelinne Yiqam7aami Kebroona koche.
1CH 24:24 Shamiri Mikiyaasa baggara Uzi7eela koche.
1CH 24:25 Zakariyasi Mikiyaasa ishaa Yishiya baggara Uzi7eela koche.
1CH 24:26 Mahili, Musinne Ya7izi Maraara kochata.
1CH 24:27 Ya7iza heedzu adde nayti Shohaama, Zakuranne Ibara.
1CH 24:28 Mahila nam7u adde nayti Alaazaranne Qiisa. Alaazaras adde na7i baawa.
1CH 24:29 Qiisa Yirahima7eela geetetiya adde na7i de7ees.
1CH 24:30 Musa heedzu adde nayti Mahila, Ederanne Yiremoota. Haysati Leewe kochata halaqata.
1CH 24:31 Kase enta dabboti Aarona koche gidida kahineti oothidaysada haysatika kawoy Dawiti, Saadoqi, Abimelekey, kahinetanne Leeweta halaqati de7iya bessan saama yeggidosona. Bayraa ishaa soo asaasinne kaalo ishaa soo asaas issi gina saami wodhis.
1CH 25:1 Dawitinne Leeweta halaqati, Asaafa, Hemaananne Yedutuuna naytape suusul7en, diithaninne daalan tinbite odana mela dummayidosona. Ha oosuwas dummatida asaa sunthay haysafe kaallidi xaafetidaysa.
1CH 25:2 Asaafa nayti Zakura, Yoosefa, Naatananne Asar7eela. Asaafa nayti Asaafape garsara oothosona; Asaafi kawa kiitan tinbite odees.
1CH 25:3 Yedutuuna nayti Gadaaliya, Xaara, Yashaya, Sam7a, Hasabayanne Matita. Ha usupunati maasinqon Godaa galatishenne bonchishe banta aawa, nabiya Yedutuunape garsara kiitetoosona.
1CH 25:4 Hemaana nayti Buqaya, Mataana, Uzi7eela, Sabu7eela, Yarmoota, Hanaaniya, Hanaana, Eli7aata, Gidalta, Oromanti7ezera, Yoshbaqaasha, Maalota, Hotiranne Mazi7aata.
1CH 25:5 Haysati ubbay kawas qoncethi be7iya Hemaana nayta. Xoossay immana gidaysada Hemaana dhoqu dhoqu oothana mela ha tammanne oyddu adde naytanne heedzu macca nayta iyaw immis.
1CH 25:6 Haysati ubbay Xoossa keethan daala qaathanaw, diithinne maasinqo kaa7idi goyinnanaw banta aawape garsara de7oosona. Asaafi, Yedutuuninne Hemaani kawuwape garsara de7oosona.
1CH 25:7 Hessati banta dabbotara gididi Xoossas shiiqiya mazmuren loohidaysata; enti kumethi 288.
1CH 25:8 Enti banta oosuwa shaakidi eranaw na7i cimi, astamaarey tamaarey shaahoy bayna saama yeggidosona.
1CH 25:9 Koyro saamay Asaafa na7aa Yoosefas keyis. Nam7antho saamay Gadallas keyis; I, iya naytinne iya dabboti kumethi tammanne nam7a.
1CH 25:10 Heedzantho saamay Zakuras keyis; I, iya naytinne iya dabboti kumethi tammanne nam7a.
1CH 25:11 Oyddantho saamay Xaras keyis; I, iya naytinne iya dabboti kumethi tammanne nam7a.
1CH 25:12 Ichashantho saamay Nataanas keyis; I, iya naytinne iya dabboti kumethi tammanne nam7a.
1CH 25:13 Usupuntho saamay Buqayas keyis; I, iya naytinne iya dabboti kumethi tammanne nam7a.
1CH 25:14 Laapuntha saamay Yishira7eelas keyis; I, iya naytinne iya dabboti kumethi tammanne nam7a.
1CH 25:15 Hospuntho saamay Yashayas keyis; I, iya naytinne iya dabboti kumethi tammanne nam7a.
1CH 25:16 Uddufuntho saamay Matanas keyis; I, iya naytinne iya dabboti kumethi tammanne nam7a.
1CH 25:17 Tammantho saamay Sam7as keyis; I, iya naytinne iya dabboti kumethi tammanne nam7a.
1CH 25:18 Tammanne issintho saamay Uzi7eelas keyis; I, iya naytinne iya dabboti kumethi tammanne nam7a.
1CH 25:19 Tammanne nam7antho saamay Hasabayas keyis; I, iya naytinne iya dabboti kumethi tammanne nam7a.
1CH 25:20 Tammanne heedzantho saamay Sabu7eelas keyis; I, iya naytinne iya dabboti kumethi tammanne nam7a.
1CH 25:21 Tammanne oyddantho saamay Matitas keyis; I, iya naytinne iya dabboti kumethi tammanne nam7a.
1CH 25:22 Tammanne ichashantho saamay Yarmootas keyis; I, iya naytinne iya dabboti kumethi tammanne nam7a.
1CH 25:23 Tammanne usupuntho saamay Hanaana keyis; I, iya naytinne iya dabboti kumethi tammanne nam7a.
1CH 25:24 Tammanne laapuntho saamay Yoshibaqaashas keyis; I, iya naytinne iya dabboti kumethi tammanne nam7a.
1CH 25:25 Tammanne hospuntho saamay Hanaaniyas keyis; I, iya naytinne iya dabboti kumethi tammanne nam7a.
1CH 25:26 Tammanne uddufuntho saamay Maalotas keyis; I, iya naytinne iya dabboti kumethi tammanne nam7a.
1CH 25:27 Laatamantho saamay Eli7aatas keyis; I, iya naytinne iya dabboti kumethi tammanne nam7a.
1CH 25:28 Laatamanne issintho saamay Hotiras keyis; I, iya naytinne iya dabboti kumethi tammanne nam7a.
1CH 25:29 Laatamanne nam7antho saamay Gidaltas keyis; I, iya naytinne iya dabboti kumethi tammanne nam7a.
1CH 25:30 Laatamanne heedzantho saamay Mahzi7aata keyis; I, iya naytinne iya dabboti kumethi tammanne nam7a.
1CH 25:31 Laatamanne oyddantho saamay Oromanti7ezeras keyis; I, iya naytinne iya dabboti kumethi tammanne nam7a.
1CH 26:1 Xoossaa keetha pengiya naageysati haysafe kaallidi xaafetidaysata. Koyroy Qore kochaafe Asaafa adde naytape Qore na7a Masulaama.
1CH 26:2 Masulaami laapun adde nayta yelis; enti banta yeletaa maaran Zakariyasa, Yidi7eela, Yozobaata, Yatini7eela,
1CH 26:3 Elama, Yihoonanne Elhoona.
1CH 26:4 Xoossay Obeed-Edooma anjida gisho, I hospun adde nayta yelis. Enti banta yeletaa maaran Shamaya, Yozabaata, Iyo7aasa, Sakara, Natina7eela,
1CH 26:5 Ami7eela, Yisakooranne Pulaata.
1CH 26:6 Obeed-Edooma na7ay Shamayey usupun adde nayta yelis; enti mino asi gidida gisho, banta aawa soo asaas halaqa gididosona.
1CH 26:7 Shamaya nayti Otina, Rafa7eela, Yobeedanne Elzabaada; enta ishati Elihuynne Samaki qara asata.
1CH 26:8 Haysati ubbay Obeed-Edooma kochata; enti, enta naytanne enta dabboti oosos mino. Obeed-Edooma kochati kumethi usupun tammanne nam7a.
1CH 26:9 Masulaamas mino naytinne mino dabboti de7oosona; enti kumethi tammanne hospuna.
1CH 26:10 Maraara yaraape Hosa geetetiya addiyas oyddu adde nayti de7oosona. Shimiri bayra na7a gidenna, shin iya aaway iya halaqa oothis.
1CH 26:11 Iya ishati Kalqe, Zabalanne Zakariyasa. Hosa naytinne iya dabboti kumethi tammanne heedza.
1CH 26:12 Xoossa keetha pengiya naageysati banta soo asaa halaqata cugan cugan shaaketidosona. Hara Leewetada entaka Xoossa keetha oosoy shaahon gakis.
1CH 26:13 Issi issi pengiya naaganaw banta soo asan asan na7a cima goonna saama yeggidosona.
1CH 26:14 Doloha Pengiya naaganaw saamay Salamas keyis. Lo77o zore zoriya iya na7aa Zakariyasa pudeha Pengiya naaganaw saami keyis.
1CH 26:15 Obeed-Edoomas dugeha pengiya naaganaw saami keyis. Iya naytas buqura minjiya keethaa naaganaw saami keyis.
1CH 26:16 Wuloha pengiyanne qommo baggara de7iya Shalekota pengiya naaganaw saami Sufimasinne Hosas keyis. Naagoy maaran maaran gakees.
1CH 26:17 Gallas gallas doloha baggara usupun, pudeha baggara oydda, dugeha baggara oyddu Leeweti naagoosona. Qassi buqura minjiya keethaa nam7u nam7u Leeweti naagoosona.
1CH 26:18 Wuloha baggara dabaabako efiya ogiya oyddu, qassi dabaaba nam7u Leeweti naagoosona.
1CH 26:19 Hiza Qoresinne Maraara kochaas imetida penge naago oosoy haysa.
1CH 26:20 Akiya geetetiya Leewey Xoossa keethan de7iya buquranne Xoossas dummayi wothida imotata naaganaw shuumetis.
1CH 26:21 Gedisoona na7aa Laadanna yaraape Yi7eeli dumma dumma soo asaas aawates.
1CH 26:22 Yi7eela nayti Zetaamanne iya ishaa Iyyu7eela; enti Xoossa keethan de7iya buqura naaganaw shuumetidosona.
1CH 26:23 Amraama, Yisihaara, Kebroonanne Uzi7eela yaratas oosoy shaaketidi imetis.
1CH 26:24 Muse na7aa Gedisoona yara gidida Sabu7eeli Xoossa keethan de7iya buqura naageysata halaqata bolla shuumetis.
1CH 26:25 I Gedisoona ishaa Alaazara baggara Salomootas dabbo. Al77azari Rahaabiya yelis; Rahaabi Yeshaya yelis; Yeshayi Yoraama yelis; Yoraami Zikira yelis; Zikiri Salomita yelis.
1CH 26:26 Salomootinne iya dabboti kawoy Dawiti, iya soo asaa halaqati, shaalaqati, mato halaqatinne toora moconata Xoossas dummayida miishe ubbaa bolla shuumetidosona.
1CH 26:27 Ha asati olan di7etidi yida miishetape baggaa Xoossa keethan dummayidi wothidosona.
1CH 26:28 Qoncethi be7iya Sameeli, Qiisa na7ay Saa7oli, Neera na7ay Abeneerinne Xaruya na7ay Iyo7aabi kase dummayidi wothida imota ubbaa Salomootinne iya dabboti naagoosona.
1CH 26:29 Yisihaara yaratape Kanaaneynne iya nayti Xoossa keethafe karera de7iya ooson Isra7eele asaa aysanawunne daynnatanaw shuumetidosona.
1CH 26:30 Kebroona yaratape Hashabinne iya dabboti 1,700 mino asati, Godaa oosuwasinne kawa oosuwas Yordaanosepe wuloha baggara de7iya Isra7eele asaa bolla shuumetidosona.
1CH 26:31 Kebroona yarata mazgabiya maaran Yiriyi enta halaqa. Dawiti kawotida oytamantho laythan mazgaben koyin enta asaa giddofe mino asati Galada biittan Ya7izeera geetetiya bessan bentidosona.
1CH 26:32 Enta soo asaas halaqa gidida Yiriya dabboti minoti 2,700. Kawoy Dawiti Xoossa oosuwasinne kawa oosuwas Robeela, Gaadenne Minaase kochatape baggata bolla enta shuumis.
1CH 27:1 Banta cugan cugan kawotethaa aysiya Isra7eele soo asaa halaqati, shaalaqatinne mato halaqati haysafe kaallidi xaafetidaysata. Issi issi cugan 24,000 asati de7oosona. Issi issi cugay laythan issi ageena maaran maaran kawotetha ooso oothanaw keyees.
1CH 27:2 Koyro ageenan keya cugaa kaalethey Zabdi7eela na7aa Yashobi7aama; iya cugan 24,000 asi de7ees.
1CH 27:3 Yashobi7aami Paaresa koche; I koyro ageenas tora moconata.
1CH 27:4 Nam7antho ageenan keyiya cugaa kaalethey Ahoha addiya Dodaya; iya cugan 24,000 asi de7ees. He cugaa kaalethiya nam7antho halaqay Mikloota.
1CH 27:5 Heedzantho ageenan keyiya cugaa kaalethey kahiniya Yoodahe na7aa Banaya; iya cugan 24,000 asi de7ees.
1CH 27:6 Banayi hastamu eretida asata giddon mino asi; qassi hastamata halaqa. Iya bessan iya na7ay Amzabadi halaqa gidis.
1CH 27:7 Oyddantho ageenan keyiya cugaa kaalethey Iyo7aaba ishaa Asaheela; iya cugan 24,000 asi de7ees. Iya bessan iya na7ay Zabadi halaqa gidis.
1CH 27:8 Ichashantho ageenan keyiya cugaa kaalethey Yisihaara yaraape Shamhuuta; iya cugan 24,000 asi de7ees.
1CH 27:9 Usupuntho ageenan keyiya cugaa kaalethey Tequhe addiya Iska na7aa Ira; iya cugan 24,000 asi de7ees.
1CH 27:10 Laapuntha ageenan keyiya cugaa kaalethey Efreema koche gidida Piloona addiya Selesa; iya cugan 24,000 asi de7ees.
1CH 27:11 Hospuntha ageenan keyiya cuga kaalethey Husha addiya Sibakaya; iya cugan 24,000 asi de7ees. Sibakayi Yihuda kochenne Zaara yara.
1CH 27:12 Uddufuntho ageenan keyiya cugaa kaalethey Biniyaame koche gidida Anatoote addiya Abi7ezera; iya cugan 24,000 asi de7ees.
1CH 27:13 Tammantho ageenan keyiya cuga kaalethey Naxoofa addiya Zaara yara gidida Mahira; iya cugan 24,000 asi de7ees.
1CH 27:14 Tammanne issintho ageenan keyiya cugaa kaalethey Efreema koche gidida Pir7atoona addiya Banaya; iya cugan 24,000 asi de7ees.
1CH 27:15 Tammanne nam7antho ageenan keyiya cugaa kaalethey Gotoniyala yaraape gidida Naxoofa Heldaya; iya cugan 24,000 asi de7ees.
1CH 27:16 Isra7eele kochata aysanaw shuumetidaysati haysafe kaallidi xaafetidaysata. Robeela kochaa aysey Zikira na7aa Alaazara. Simoona kochaa aysey Ma7ika na7aa Safaaxa.
1CH 27:17 Leewe kochaa aysey Qamu7eela na7aa Hasabaya. Aarona kochaa aysey Saadoqa.
1CH 27:18 Yihuda kochaa aysey Dawita ishaa Elihu. Yisakoora kochaa aysey Mika7eela na7aa Omira.
1CH 27:19 Zabloona kochaa aysey Abdiyu na7aa Yashimaya. Niftaaleme kochaa aysey Azri7eela na7aa Yarmoota.
1CH 27:20 Efreema kochaa aysey Azaaza na7aa Hose7a. Minaase kochaafe baggaa aysey Padaya na7aa Iyyu7eela.
1CH 27:21 Galadan de7iya Minaase kochaafe baggaa aysey Zakariyasa na7aa Ido. Biniyaame kochaa aysey Abeneera na7aa Ye7isi7eela.
1CH 27:22 Daane kochaa aysey Yirohaama na7aa Azari7eela. Haysati Isra7eele kochaa ayseysata.
1CH 27:23 Goday Isra7eele asaa salo xoolintoda darsana gida gisho Dawiti laatamu laythinne iyape garsara de7eyisata taybon gelsibeenna.
1CH 27:24 Xaruya na7ay Iyo7aabi asaa taybo doomidi wursonna aggis. Asaa taybida gisho Goday Isra7eele asaa bolla hanqetida gisho enta tayboy kawa Dawita taarike mazgaben xaafetibeenna.
1CH 27:25 Kawo buqura minjiya bessaa aawatethan aysiya asaa sunthay haysafe kaallidi xaafetidaysata. Adi7eela na7aa Azmooti kawo keetha buqura aawatethan aysees. Ooziyana na7ay Yoonataani gaxaren, katamaninne gutan de7iya kawo keetha miisheta aawatethan aysees.
1CH 27:26 Kaluba na7ay Iziri goshshanchota aawatethan aysees.
1CH 27:27 Rama addey Same7i woyne gadeta aawatethan aysees. Safaama addey Zabdi woyne ushsha minjiya keethaa aawatethan aysees.
1CH 27:28 Gadara addey Ba7al-Hanani zuma bolla de7iya zayte shamahuwanne boobba aawatethan aysees. Zayte wothiya keethaa aawatethan aysey Iyo7aasa.
1CH 27:29 Saarona denban heemetiya mehiya aawatethan aysey Saarona addiya Saxira. Zangaaran heemetiya mehiya aawatethan aysey Adilaya na7aa Shaafaxa.
1CH 27:30 Gimaleta aawatethan aysey Isma7eela addiya Ubisa. Hareta aawatethan aysey Meronoota addiya Yehidaya.
1CH 27:31 Dorsatanne deeshata aawatethan aysey Agara addey Yaziza. Haysati ubbay Dawita shaluwa bolla aawateyisata.
1CH 27:32 Dawita aawa ishay, xaafey Yoonataani akeekanne kawa zoriya asi. Hakmoona na7ay Yi7eeli kawa nayta tamaarsees.
1CH 27:33 Akxoofeli kawa zoreysa. Arka addey Kuussi kawa lagge.
1CH 27:34 Akxoofeli hayqin, iya bessan Banaya na7ay Yodaaheynne Abyataari kawa zoriya asi gididosona; Iyo7aabi kawa toora mocona.
1CH 28:1 Isra7eele halaqati ubbay Yerusalaamen shiiqana mela kawoy Dawiti kiittis. Hessa gisho, issi issi kochaa halaqati, kawo moorinnati, shaalaqati, mato halaqati, kawuwasinne kawa naytas de7iya shaluwanne mehiya ayseysati, kawo gadhon ootheysati, eretidanne mino asati ubbay Yerusalaamen shiiqidosona.
1CH 28:2 Kawoy Dawiti dendi eqidi haysada yaagis; “Ta ishato, ta asaw, si7ite! Godaa caaqo Taabotiya wothiyanne nu Xoossaa tohoy shempiya keethaa keexanaw ta wozanan qopas; koshshiyaba ubbaa giigisas.
1CH 28:3 Shin Xoossay, ‘Neeni olanchonne suuthi gussida asi gidiya gisho ta sunthaas keethe keexaka’ yaagis.
1CH 28:4 Taani Isra7eele bolla merinaw kawotanaada, Goday Isra7eele Xoossay ta aawa soope tana dooris. Kaalethanaada koyro Yihuda kochaa dooris; Yihuda kochaafe ta aawa soo asaa dooris; ta aawa nayta giddofe tana dooridi Isra7eele ubbaa bolla kawoyanaw dosis.
1CH 28:5 Goday taw daro nayta immis; ta nayta ubbaafe Godaa kawotetha araatan uttidi Isra7eele bolla kawotanaada ta na7aa Solomone dooris.
1CH 28:6 “Goday, ‘Ta keethaanne ta dabaaba keexanay ne na7aa Solomone. I taw na7a gidana mela taani iya dooras; taani iyaw aawa gidana.
1CH 28:7 I ha77i ootheysada ta kiitaanne ta higgiya minnidi naagiko taani iya kawotethaa merinaw minthana’ yaagis.
1CH 28:8 Hiza Godaa shiiqo gidida Isra7eele asa ubbay be7ishin, nu Xoossay si7ishin, Godaa hinte Xoossaa kiita ubbaa hinte minthidi naagana mela taani hintew odayis. Yaatiko, hinte ha lo77o biitta laattana; hinte naytaka merinaw laatisana.
1CH 28:9 “Solomone, ta na7aw, Xoossay asa wozananne qofa ubbaa eriya gisho ne aawa Xoossaa era; kumetha wozananinne shenen iyaw ootha. Neeni iya koyiko I new bentana; shin neeni iya aggiko I nena merinaw aggana.
1CH 28:10 Xoossaa keetha keexana mela Goday nena dooridaysa dogopa; ooso ubbaa minnada ootha” yaagis.
1CH 28:11 Hessafe guye, Dawiti ba na7aa Solomones Xoossa keethaa, barandaa, buqura minjiya keethaa, pooqiyanne giddo kifileta, hessadaka nagara atotetha kama wothiya kifiliya halchuwanne qofaa immis.
1CH 28:12 Dawiti Godaa keetha dabaaba keexanaw ba wozanan de7iya qofaa, iya yuushuwan de7iya ubba kifileta halchuwanne Xoossa keethaa buqura wothiya kifiliyanne Godaas dummatida imotata wothiya kifileta oosuwa qofaa immis.
1CH 28:13 Hessadaka Dawiti kahinetanne Leeweta ooso maara, Xoossa keetha ooso maaranne Xoossa keetha miisheta naagiya maara odiya qofaa iyaw immis.
1CH 28:14 Dumma dumma oosos go7etiya miisheta oothanaw maaddiya worqanne bira mizaanen likisidi Solomones immis.
1CH 28:15 Hessika xompe wothiya worqa kocatanne iya xompeta, xompe wothiya bira kocatanne iya xompeta,
1CH 28:16 Godaa sinthan uythu wothiya worqa xarpheezata, bira xarpheezata,
1CH 28:17 worqa qapheta, worqa kereta, worqa wancata, worqa xaarota, bira xaarota
1CH 28:18 ixaane cuyisiya geeshsha worqa saaxine, Godaa caaqo Taabotiya bolla banta qefiya miccidi kammiya kiruubeta wothiya worqa gaariya giigisiya halchuwa iyaw immis.
1CH 28:19 Dawiti, “Goday ba kushiya ta bolla wothidi ha xaafetida qofa ubbaa tana erisis” yaagis.
1CH 28:20 Dawiti ba na7aa Solomoneko, “Hiza minna! Oosuwa ootha! Goday ta Xoossay neera de7iya gisho yayyofa; dagammofa! Xoossa keetha oosoy poletana gakanaw Xoossay nena yeggennanne aggenna.
1CH 28:21 Xoossa keethan de7iya ooso ubbaas kahinetinne Leeweti shuumetidosona. Kushe hiilli de7iya asa ubbay nena ooso ubban maaddana. Halaqatinne asa ubbay new kiitetana” yaagis.
1CH 29:1 Hessafe guye, Kawoy Dawiti shiiqida asa ubbaa haysada yaagis; “Xoossay doorida ta na7aa Solomoney yooganne eratethan loohibeenna. Ha keexetana keethay asa keethi gidonashin Godaa Xoossaa keethi gidiya gisho oosoy gita.
1CH 29:2 Taani taw de7iya wolqa mela ta Xoossa keethaas worqan oosetiyabas worqaa, biran oosetiyabas bira, naase biratan oosetiyabas, naase birata, biratan oosetiyaba biratanne mithan oosetiyabas mithi giigisa wothas. Qassi margide, ibnebarade, dumma dumma mali de7iya alleeqo shuchata, al7o shuchatanne hara shuchata giigisada wothas.
1CH 29:3 Xoossa keetha taani daro dosiya gisho, taani ta Xoossa keethaas giigisidaysafe hara ta buzo shaluwape worqanne bira immas.
1CH 29:4 Keethaa godaa lanxanaw 100,000 kilo giraame Ofira worqanne 240,000 kilo giraame walahi bayna bira immas.
1CH 29:5 Kushe hiillanchoti oothana ooso ubbaas worqan oosetiyabas worqaa, biran oosetiyabas bira immas. Yaatin, hachi hintefe ba shenen bana Godaas dummayey oonee?” yaagis.
1CH 29:6 Isra7eele kochata soo asaa halaqati, kochata halaqati, shaalaqati, mato halaqatinne kawo moorinnati banta shenen bantaw de7iyaba dosan immidosona.
1CH 29:7 Enti Xoossa keetha oosuwas 170,000 kilo giraame worqaa, 340,000 kilo giraame bira, 620,000 kilo giraame naase biratanne 3,000,000 kilo giraame birata immidosona.
1CH 29:8 Al77o shuchi de7iya asa ubbay buqura aysiya Gedisoona yara gidida Yi7eela baggara Godaa Xoossa keetha buqura minjiya keethaas immis.
1CH 29:9 Asay ba shenen ba kumetha wozanan Godaas immida gisho ufaytis; kawoy Dawitika daro ufaytis.
1CH 29:10 Hessa gisho, Dawiti deriya ubbaa sinthan haysada yaagidi Godaa galatis; “Abeeti Godaw, nu aawa Isra7eele Xoossaw neeni merinaape merinaw galateta.
1CH 29:11 Abeeti Godaw, saloninne sa7an de7iya ubbay nebaa! Gitatethi, wolqi, bonchoy, xoonoynne angi nebaa! Abeeti Godaw, maati nebaa; neeni ubbaafe bollanne huuphe.
1CH 29:12 Duretethinne bonchoy neepe yees; neeni ubbaba haarasa. Wolqinne minotethi ne kushena; neeni asa ubbaa gitanne mino oothanaw danda7aasa.
1CH 29:13 Ha77ika nu Xoossaw, nuuni nena galatoos; ne boncho sunthaa sabboos.
1CH 29:14 “Nuuni haysa mela immanaw tanne ta asay oonee? Ubbay neepe yees; nuuni ne kushepe ekidaba new zaaridi immida.
1CH 29:15 Kase nu aawatada nuka ne sinthan bete asinne imathe. Ha sa7an nu de7o laythay ufaysi bayna kuya mela.
1CH 29:16 Abeeti Godaw, nu Xoossaw, ne geeshsha sunthaas nuuni keethe keexanaw shiishida ubbay ne kushepe yidaba; ubbay nebaa.
1CH 29:17 “Ta Xoossaw neeni wozanaa paaceysanne suuretethi doseysa taani erayis. Taani ta wozana suuretethan ta shenen hessa ubbaa immas. Ha bessan de7iya ne asay new ba shenen ufaysan immidaysa taani be7as.
1CH 29:18 Abeeti Godaw, nu mayzata Abrahaame, Yisaaqanne Isra7eele Xoossaw, ne asaa wozanan ha gita siiquwa merinaw naaga; enta wozanaa neeko zaara.
1CH 29:19 Ne wogaa, ne kiitaanne ne higgiya naagana melanne taani qopada giigisadaban Xoossa keetha keexana mela ta na7aa Solomones kumetha wozana imma” yaagidi woossis.
1CH 29:20 Hessafe guye, Dawiti deriyako, “Godaa hinte Xoossaa galatite” yaagis. Dere ubbay Godaa banta aawata Xoossaa galatidosona. Sa7an gufannidi Godaa goyinnidosona; kawuwasika boncho immidosona.
1CH 29:21 Wontetha gallas asay yarshonne xuussa yarsho Godaas yarshidosona. Hessika issi mukulu kormaa, issi mukulu maraze, issi mukulu dorsa urge, ushsha yarshonne hara daro yarsho yarshidosona.
1CH 29:22 Asay he gallas Godaa sinthan daro ufaytidi misinne uyis. Yaatidi asay kawa Dawita na7aa Solomone nam7antho zayte tiyidi iya kawotethan minthis. Saadoqa kahine gidana mela Godaa sinthan tiyidosona.
1CH 29:23 Hessafe guye, Solomoney ba aawa Dawita bessan Godaa kawotetha araatan uttis. Iyaw ubbabay injetis; Isra7eele ubbay iyaw kiitetidosona.
1CH 29:24 Halaqati, mino asatinne kawa Dawita nayti kawa Solomones kiitetanaw qaala gelidosona.
1CH 29:25 Goday Solomone Isra7eele asa ubbaa sinthan dhoqu dhoqu oothis; kase Isra7eele kawotas imetiboonna boncho Solomones immis.
1CH 29:26 Isseye na7ay Dawiti Isra7eele ubbaa bolla kawotis.
1CH 29:27 Dawiti Isra7eele bolla oytamu laythi kawotis; Kebroonan laapun laythi, Yerusalaamen hastamanne heedzu laythi kawotis.
1CH 29:28 Dawiti daro laythi de7idi, duretidi, bonchetidi, lo77o cimidi hayqis. Iya bessan iya na7ay Solomoney kawotis.
1CH 29:29 Dawiti koyrope doomidi wursethi gakanaw oothidabay, qoncethi be7iya Sameela, nabiya Naatananne qoncethi be7iya Gaade taarike maxaafan xaafetis.
1CH 29:30 I waati haaridako, waanida wolqaama aseeko, I oothidabay, Isra7eele asaynne heeran de7iya kawotethati ubbay hanidabay he maxaafatan xaafetis.
2CH 1:1 Goday iya Xoossay iyara de7iya gishonne iya daro gitayida gisho Dawita na7ay Kawoy Solomoney ba kawotethaa minthis.
2CH 1:2 Solomoney Isra7eele ubbaa, shaalaqata, mato halaqata, daannata, Isra7eele asaa kaalethiya ubbaanne soo asaa halaqata xeegidi shiishis.
2CH 1:3 Hessafe guye, Solomoneynne shiiqida asa ubbay Gaba7oonan de7iya dhoqa goyinno bessaa bidosona. Godaa aylley Musey mela biittan oothida Dunkaaney yan de7ees.
2CH 1:4 Kase Dawiti Taabotiyas Yerusalaamen dunkaane tokidi, Qiriyaat-Yi7aarimepe I giigisidi wothida bessaa ehis.
2CH 1:5 Huura na7aa Ure na7ay Baxal7eeli naase biratape oothida yarsho bessay, Gaba7oonan Godaa Dunkaaniya sinthan de7ees. Solomoneynne shiiqida asay Godaas yan goyinnidosona.
2CH 1:6 Solomoney Dunkaaniya sinthan de7iya naase biratape oosetida yarsho bessaako, Godaa sinthe bidi, issi mukulu xuussa yarsho yarshis.
2CH 1:7 He gallas qamma Xoossay Solomones qoncidi, “Ta new ay immana mela koyay?” yaagis.
2CH 1:8 Solomoney, “Ne ta aawa Dawita gita siiqon dosadasa; tana iya bessan kawothadasa.
2CH 1:9 Abeeti Godaw, Xoossaw, ne ta aawa Dawitas kase gida qaalay poleto. Ne tana sa7an de7iya baanada darida asaa bolla kawothida gisho,
2CH 1:10 ta ha asaa kaalethana mela taw cincatethinne akeeka imma. Hessi hanonna ixiko, ha gita asaa ooni aysanaw danda7ii?” yaagis.
2CH 1:11 Xoossay Solomoneko, “Ne duretethi woyko shalo demmanaw woyko bonchetanaw woyko ne morketi hayqana mela woyko ne laythay aduqana mela oychonashin ta nena kawothida ta asaa aysanaw cincatethinne akeeka oychida gisho,
2CH 1:12 new cincatethinne akeeka immana. Qassi neepe kase de7ida kawotas woyko neepe guye dendana kawotas bayna duretethi, shalonne boncho new immana” yaagis.
2CH 1:13 Solomoney Dunkaaney Gaba7oonan de7iya, dhoqa goyinno bessaafe simmidi, Yerusalaame bidi Isra7eele bolla kawotis.
2CH 1:14 Solomoney para gaaretanne parata shiishis. Iyaw issi mukulunne oyddu xeetu para gaaretinne tammanne nam7u mukulu parati de7oosona. I enta para gaareta katamataninne baara Yerusalaamen wothis.
2CH 1:15 Kawoy worqaynne biray Yerusalaamen shuchada dooretanaada, gadhan boobbi dicciya mela ziga mithi darana mela oothis.
2CH 1:16 Solomone parati Gibxefenne Qaawe biittafe yidosona. Kawa zal7anchoti enta Qaawepe miishen shammidi ehoosona.
2CH 1:17 Enti issi issi para gaariya usupun xeetu bira santimen, issi issi para issi xeetanne ishatamu bira santimen Gibxefe shammidi, Hiteta kawota ubbaasinne Soore kawotas bayzoosona.
2CH 2:1 Solomoney Godaa sunthaas keethenne baw gadho keexanaw halchis.
2CH 2:2 Solomoney toohos laapun tammu mukulu asaanne gezze biittan shuchu qoo7anaw hospun tammu mukulu asaa dooris. Qassi enta wochiya heedzu mukulunne usupun xeetu asata enta bolla shuumis.
2CH 2:3 Solomoney Xiroosa Kawa Kiraamas kiita kiittidi, “Ta aaway Dawiti ba gadho keexana mela neeni ziga yeddidaysada tawka yedda.
2CH 2:4 Heko, ha77i ta Godaa, ta Xoossaa sunthaas keethe keexanaw hanayis. Ta yan sawo tonku giya ixaane cuyisanaw, ubba wode Godaa sinthan uythaa wothanawunne wontanne omarsi, Sambaata gallasan, ageeni xeeriya wodenne Godaa nu Xoossaa ba7aale gallasatan xuussa yarsho yarshanaw, Xoossa keethaa dummayana. Isra7eele asay merinaw oothana mela kiitetida oosoti haysata.
2CH 2:5 “Nu Xoossay hara xoossata ubbaafe gita gidiya gisho, ta keexanaw haniya Xoossaa Keethay gita.
2CH 2:6 Shin iyaw keethe keexanaw danda7ey oonee? Salope dhoqa saloy iyaw gidenna! Yaatin, ta iya sinthan ixaane cuyisanawnne ta iyaw keethe keexanaw oonee?
2CH 2:7 “Hiza alleeqo ooso, worqa, bira, naasenne birata seerisiya oosuwanne zo7o ma7uwa, ocha teera daaniya ma7uwanne kaalose ma7uwa giigisiya eratethi de7iya ase taw yedda. Ta aaway Dawiti Yihudaninne Yerusalaamen de7iya kushe hiillanchota doori wothis; I entara issife oothana.
2CH 2:8 Libaanosen de7iya ne asati mithaa waati qanxiyaako ereysa ta erayis. Hessa gisho, neeni taw Libaanosepe zigaa, xiiddanne xaytha mithi yedda. Ta asati ne asatara gididi,
2CH 2:9 daro mithaa giigisana. Taani keexiya Xoossaa keethay gitanne malaalsiyaba.
2CH 2:10 Mithi qanxiya ne aylleta taani laatamu mukulu kuntaale gistenne laatamu mukulu kuntaale banga, oyddu xeetu mukulu litiro woynenne oyddu xeetu mukulu litiro shamaho zayte immana” yaagis.
2CH 2:11 Xiroosa kawoy Kiraami Solomoneko dabdaabe yeddishe, “Goday ba asaa dosiya gisho, I nena enta bolla kawothis.”
2CH 2:12 Kiraami gujidi, “Xoossa keethaanne baw gadho keexana mela cinca, akeekanne hiilla na7aa kawa Dawitas immida, salo sa7aa medhida Goday, Isra7eele Xoossay galatetto.
2CH 2:13 “Taani Kiraam-Abi geetetiya hiillanchonne akeeka addiya new yeddas.
2CH 2:14 Iya aayiya Daane koche; iya aaway Xiroosa biitta asa. I worqaa, bira, naase birata, birata, shuchunne mithi oothiya asi; ocha teera daaniya ma7o, kaalose ma7o, zo7o ma7onne liino ma7o giigisiya ooso erees. I dumma dumma alleeqota kessidi, odeysada ubbaa oothanaw danda7ees. I kushe hiillan loohida ne asaaranne kase ne aawa, Dawitas oothida asaara iya oosisa.
2CH 2:15 Hiza ne ta goday immana gida gistiyanne banga, zaytiyanne woyniya yedda.
2CH 2:16 Neeni Libaanosepe koyida mithi nu qanxidi qachidi, abba bollara tooketidi, neeko Yoophe baanada oothana. Yaape neeni Yerusalaame gakanaw efisana” yaagis.
2CH 2:17 Iya aaway Dawiti kase taybidaysada, Solomoney Isra7eele biittan de7iya kare biitta asaa ubbaa taybis. Enti xeetanne ishatammanne heedzu mukulunne usupun xeeta gididosona.
2CH 2:18 Solomoney he asaape laapun tammu mukulu asaa toohos, hospun tammu mukulu asaa gezze biittan shucha qoo7anaw dooris; enta kalanaw heedzu mukulunne usupun xeetu asaa shuumis.
2CH 3:1 Solomone aaway Dawiti xoossaa keethay keexetana bessaa More deriyan Yerusalaamen giigisis. He bessay Goday Dawitas qoncida Yaabuse addiya Orna wudumma.
2CH 3:2 Solomoney ba kawotida oyddantho laythan, nam7antho ageenan Xoossa keethaa keexanaw doomis.
2CH 3:3 Solomoney Xoossa keethaa keexanaw baasida baasuwa adussatethay usupun tammu wadha; gompay laatamu wadha.
2CH 3:4 Xoossa keetha geliya bessan de7iya barandaa gompay Xoossa keethaa gompaada laatamu wadha; adussatethay laatamu wadha.
2CH 3:5 Penge godaa xiidda xalaalan licidi kammis; geeshsha worqan tiyis; zamba misilenne santhalaata misilen alleeqisis.
2CH 3:6 Xoossa keethaa al7o shuchan alleeqisis; I alleeqisida worqay Parwayma biittafe yida worqaa.
2CH 3:7 Godata, tuuqeta, gobanetanne pengeta worqan tiyis; godaa bolla kiruube misile medhis.
2CH 3:8 Solomoney Ubbaafe Geeshsha Bessaa keexis. He bessaa adussatethaa Xoossa keethaa gompaada laatamu wadha; gompaay laatamu wadha. He bessaa godaa laatamu mukulu kilo giraame muruuto worqan tiyis.
2CH 3:9 Enti go7etida misimaarey ichashu xeetanne laapun tammu giraame worqafe medhetis. Pooqen de7iya kifiletaka worqan tiyis.
2CH 3:10 Solomoney Ubbaafe Geeshsha Bessan nam7u kiruube misileta giigisidi worqan tiyis.
2CH 3:11 He kiruubeta qefey micetidi, laatamu wadha; koyro kiruubiya koyro qefey ichashu wadha gididi, Xoossa keetha godaa bochees; nam7antho qefey ichashu wadha gididi, hara kiruubiya qefiya bochees.
2CH 3:12 Nam7antho kiruubiya koyro qefey ichashu wadha gididi, Xoossa keetha godaa bochees; nam7antho qefey ichashu wadha gididi, koyro kiruubiya qefiya bochees.
2CH 3:13 Ha nam7u kiruubeta qefey micetidi, laatamu wadha gidis; enti banta som7uwa Geeshsha bessaako zaaridi, banta tohon eqidosona.
2CH 3:14 Solomoney kaalose ma7uwa, ocha teera daaniya ma7uwapenne, zo7o ma7uwape liinope dadetida ma7uwape magarajo oothidi, iya bolla kiruubeta misile medhis.
2CH 3:15 Solomoney Xoossa keethaa sinthan issuwa issuwa adussatethay hastamanne ichashu wadha gidida nam7u tuussata oosisidi, enta huuphen ichashu wadha gumbota wothis.
2CH 3:16 Qassi santhalaata giteda medhisidi, tuussata huuphen wothis; xeetu oromaane teera misileta medhisidi, santhalaata bolla wothis.
2CH 3:17 Tuussatape issuwa Xoossa keethaa sinthan ushacha baggara, nam7anthuwa qassi haddirsa baggara essis. Ushacha baggara de7iya tuussaa Yakina sunthidi, haddirsa baggara de7iya tuussaa Boo7eza sunthis.
2CH 4:1 Hessafe guye, Solomoney adussatetha laatamu wadha, gompay laatamu wadha, dhoqatethay tammu wadha gidiya yarsho bessa naase biratape oosisis.
2CH 4:2 Qassi naase birata seerisidi, doonay ya gaxape ha gaxaa gakanaw tammu wadha, adussatethay ichashu wadhanne yuushoy hastamu wadha gidiya Abba saane medhisis.
2CH 4:3 Abba Saane doonan kare baggara yuuyi aadhidi, iyara oyketidi medhetida misileti de7oosona; he misileti nam7u maaran de7iya boorata misileta.
2CH 4:4 He Abba Saane naase biratape medhetida tammanne nam7u boorata misiletas zokuwan uttis. Booratape heedzati pudeha bagga, heedzati wuloha bagga, heedzati dugeha bagga, heedzati qassi doloha bagga simmidi xeelliyaba daanosona. Abba Saane enta bolla uttis; entaasi guye baggay giddoko simmi uttis.
2CH 4:5 Abba Saaney issi takadho mela orde; iya doonay wanca doona mela; suufe ciishshi daanees. He Abba Saaney usupun tammu mukulu litiro gidiya haatha oykeysa.
2CH 4:6 Solomoney meecetiya tammu kereta; oosisidi, ichashaa ushacha garsa baggara, ichashaa haddirsa baggara wothis. Entan xuussa yarsho ashoy meecetees; shin Abba Saane haathan kahineti meecetoosona.
2CH 4:7 Hessafe guye, Solomoney entaw imetida halchuwada xompe wothiya tammu kocata worqafe oothidi, ichashaa ushacha baggara, ichashaa haddirsa baggara Xoossa keethan wothis.
2CH 4:8 Tammu xarpheezata oothidi, ichasha ushacha baggara, ichasha haddirsa baggara Xoossa keetha giddon wothis. Qassi xeetu disteta worqafe oothis.
2CH 4:9 Solomoney kahinetas giddo dabaaba, kare bagga gita dabaaba giigisis; dabaabas pengeta giigisidi, pengeta naase biratan lanxis.
2CH 4:10 Abba Saaniya Xoossa keethafe garsan doloha baggan wothis.
2CH 4:11 Kiraami kereta, akaafatanne xaarota medhis; Kiraami kawa Solomones Xoossaa keethan ooso oothidi polis.
2CH 4:12 I oothida oosotika nam7u tuussata, tuussata huuphen wothiya saane mela nam7u gumbota, tuussata bolla de7iya nam7u gumbota alleeqisiya nam7u gite daaniya santhalaata,
2CH 4:13 issi issi tuuqiya bolla nam7u maaran naase biratape oosetida issi issi xeetu oromaane teera misileta, kumethi oyddu xeetu oromaane teera misileta,
2CH 4:14 oydetanne oydeta bolla uttiya meecha tammu kereta,
2CH 4:15 Abba Saaneynne iyape garsan de7iya tammanne nam7u boora misileta,
2CH 4:16 kereta, akaafata, qaphetanne hara miisheta ubbaa. Kiraam-Abi kawa Solomones Xoossa keethaa oosuwas medhida ha miisheta ubbaa geeshsha naase biratape medhis.
2CH 4:17 Kawoy Solomoney Sukotapenne Xareedape giddon, Yordaanose denban de7iya naase birata sheeshiya bessan ha ubbaa oosisis.
2CH 4:18 Naasepe medhetida ha miishe ubbay daro gidida gisho, ay mela deexiyako likey eretibeenna.
2CH 4:19 Solomoney Xoossa keethan de7iya miisheta ubbaa worqafe oosisis. Hessika worqafe oosetida yarsho bessa, Godaa sinthan wothiya uythay uttiya xarpheeza,
2CH 4:20 wogaa mela Ubbaafe Geeshsha Bessaa sinthan poo7ana mela xompe wothiya worqa kocaa, worqa xompeta,
2CH 4:21 walahi bayna worqafe oosetida ciishsha misileta, xompetanne qapheta,
2CH 4:22 xompe toysiyabata, xaarota, ixaane cuyisiyabatanne tama ekiya qapheta. Ha miisheti ubbay geeshsha worqafe oosetidosona. Xoossaa keethas kare bagga pengetanne Ubbaafe Geeshsha Bessaa geliya pengeta worqan tiyis.
2CH 5:1 Solomoney Xoossa keetha ooso ubbaa polidaape guye iya aaway Dawiti Godaas dummayidi wothida bira, worqanne hara miisheta ubbaa ehidi, Xoossa keetha buqura minjiya bessan wothis.
2CH 5:2 Hessafe guye, Kawoy Solomoney Godaa Qaala caaqo Taabotiya Dawita Katama gidida Xiyoonepe ehana mela Isra7eele cimata, Isra7eele kochatanne soo asaa halaqata Yerusalaame shiishis.
2CH 5:3 Isra7eele asa ubbay laapuntho ageenan, Shaqara Ba7aaley bonchetiya wode kawako shiiqidosona.
2CH 5:4 Isra7eele cimati ubbay gakin, Leeweti Taabotiya denthidosona.
2CH 5:5 Leewetinne kahineti Taabotiya, Dunkaaniyanne iya giddon de7iya geeshsha miisheta ubbaa tookidi ehidosona.
2CH 5:6 Kawoy Solomoneynne iyara de7iya Isra7eele maabara ubbay Taabotiya sinthan shiiqidi, taybanaw danda7etonna daro dorsenne mehe yarshidosona.
2CH 5:7 Kahineti Caaqo Taabotey Xoossaa keethaa Ubbaafe Geeshsha Bessaa ehidi, kiruubeta misileta qefetape garsara wothidosona.
2CH 5:8 Micetidi uttida kiruubeta qefeti Taabotiyanne Taabotiya tookiya kasota kammidosona.
2CH 5:9 Kasoti daro adusse gidiya gisho, enta xeeray Ubbaafe Geeshsha Bessaa sinthan de7iya Geeshsha bessan eqida asi be7anaw danda7ees; shin Geeshsha bessaafe karera bentenna. Enti hachi gakanaw he bessan de7oosona.
2CH 5:10 Isra7eele asay Gibxe biittafe keyida wode Goday entara caaqida Koreeba zuman Musey wothida nam7u loche shuchatape attishin, Taabotiya giddon harabay baawa.
2CH 5:11 He bessan de7iya kahineti ubbay banta oothiya bessan bessan shaaketonna de7ishe bantana Godaas dummayidosona.
2CH 5:12 Mazmure zammariya Leeweti ubbay, Asaafi, Hemaaninne Edotape, enta naytinne enta dabboti liino geetetiya ma7o ma7idosona. He ma7uwa ma7idi, daala, diithinne maasinqo oykidi, yarsho bessaafe doloha baggara eqidosona.
2CH 5:13 Xeetanne laatamu kahineti moyze punnanaw entara eqidosona. Enti ubbay moyze punnishe, daala qaathishe, diithi diixishenne hara miisheta kaa7ishe, “Goday keeha! iya siiqoy merinaasa” yaagidi Godaa sabboosona.
2CH 5:14 Godaa bonchoy Xoossa keethaa kumida gisho, shaara gaason kahineti banta oosuwa oothanaw danda7ibookona.
2CH 6:1 Solomoney, “Abeeti Godaw, ‘Ta dhuma shaaran daana’ yaagadasa.
2CH 6:2 Shin taani neeni yan merinaw daana lo77o keethe new keexas” yaagis.
2CH 6:3 Isra7eele shiiqoy yan eqidashin, kawoy entako simmidi, enta haysada yaagidi anjis;
2CH 6:4 “Goday Isra7eele Xoossay galatetto! Ta aawa Dawitas ba doonan odida ufaysa qaala ba kushen polis. He I odida ufaysay,
2CH 6:5 ‘Taani ta asaa Isra7eele Gibxefe kessada ehida wodepe doomin, ta sunthay iyan xeegetana mela taw keethe keexanaw Isra7eele kochata giddon ay katamaka doorabike; woyko I ta asaa Isra7eele kaalethana mela oonaka doorabike.
2CH 6:6 Shin ha77i ta sunthay Yerusalaamen xeegetana mela taani Yerusalaame dooras; qassi ta asaa Isra7eele kaalethana mela Dawita dooras.’
2CH 6:7 “Ta aaway Dawiti Godaa Isra7eele Xoossaa sunthaas keethe keexanaw ba wozanan qopis.
2CH 6:8 Shin Goday ta aawa Dawitako, ‘Neeni ta sunthaas keethe keexanaw ne wozanan qopida gisho lo77o oothadasa.
2CH 6:9 Gidoshin, taw keethe keexanay nena gidaka; ta sunthaas keethe keexanay ne gulbatape keyana ne na7aa.’
2CH 6:10 “Goday ba gida ufaysa qaala polis. Goday kase immida ufaysada taani ta aawa Dawita bessan kawotada Isra7eele kawotetha araatan uttas. Qassi Godaa Isra7eele Xoossaa sunthaas keethe keexas.
2CH 6:11 Goday Isra7eelera caaqida caaqoy xaafetida loche shuchati de7iya Taabotiya iya giddon wothas” yaagis.
2CH 6:12 Solomoney adussatethay ichashu wadha, gompay ichashu wadhanne dhoqatethat heedzu wadha gidida madirake naase biratape oothidi dabaaba giddon wothis. Solomoney Godaa yarsho bessa sinthan, Isra7eele maabaray de7iya bessan eqidi, ba kushiya miccidi Isra7eele shiiquwa sinthan gulbatis.
2CH 6:14 I haysada yaagidi woossis: “Abeeti Godaw, Isra7eele Xoossaw, salon woyko sa7an ne mela xoossi baawa. Neeni ne ufaysa qaala naagasa; banta kumetha wozanaape ne sinthan hemetida ne aylleta merina siiquwan dosadasa.
2CH 6:15 Ne aylliya, ta aawa Dawitas neeni oothana gada odida qaala naagadasa. Neeni kase ne doonan odidaysa ne kushen hachi poladasa.
2CH 6:16 Abeeti Godaw, Isra7eele Xoossaw neeni ne aylliya, ta aawa Dawitas, ‘Neeni ta sinthan hemetidaysada ne naytika ta higgiyan hemetanaw banta ogiya naagiko, Isra7eele araatan uttiya ase dhayaka’ yaagida qaala pola.
2CH 6:17 Abeeti Godaw, Isra7eele Xoossaw, neeni ne aylliya Dawitas odida ne ufaysa qaalay poleto.
2CH 6:18 “Shin Xoossi tuma, asara sa7an de7iyee? Heko, saloy, ubbaafe dhoqa saloy nena oykanaw danda7enna. Yaatin, ha ta keexida keethay new ay mela guuxandesha!
2CH 6:19 Gidoshin, abeeti Godaw, ta Xoossaw, ta woosa, ne aylliya woosaanne xeessaa si7a. Taani ne aylley ne sinthan woossiya woosaanne waasuwa si7a.
2CH 6:20 Neeni, ‘Ta sunthay he bessan xeegetana’ gida ha Xoossa keethako, ne ayfey qamma gallas xeello. Taani ne aylley ha keethako simmada woossiya woosa si7a.
2CH 6:21 Taani ne aylleynne ne asay Isra7eeley ha ne keethako simmidi woossiya woosa si7a. Ne de7iya bessan salon si7ada nuus atto yaaga.
2CH 6:22 “Issi asi ba shooruwa qohidi akay gin, iya caaqethanaw ha ne keethaa ehin, iya giddon de7iya yarsho bessa sinthan I caaqiko,
2CH 6:23 neeni salon si7ada ootha. Ne aylleta giddon pirda. Qohida uraa bolla pirdada, I oothidaba iya bolla zaara; xilluwa xoonisada iyaw iya xillotethaada zaara.
2CH 6:24 “Ne asay Isra7eeley ne bolla nagara oothidi, morken xoonetidi, neeko simmidi, ne sunthaa xeegidi, ha keethan nena woossiko,
2CH 6:25 ne salon si7a. Ne asaa Isra7eele nagaraa atto yaaga; ne kase entawunne enta mayzatas immida biitta enta zaara.
2CH 6:26 “Ne asay ne bolla nagaraa oothin, saloy gordetiko, iri bukonna ixin, enti ha bessaa simmidi, woossiko ne enta un7ethida gisho, ne sunthaa xeegidi, banta nagaraape simmiko,
2CH 6:27 ne salon si7a. Ne aylleta nagaraa, ne asaa Isra7eele nagaraa atto yaaga. Enti hemetanaw bessiya lo77o ogiya enta tamaarsa; neeni ne asaas immida biittan ira bukisa.
2CH 6:28 “Biittaa bolla koshi woyko boshi woyko leegey woyko booley woyko gondoy dhaysin woyko morkey enta katamata teqin woyko dhayoy woyko hargey yin,
2CH 6:29 ne asaa Isra7eelepe oonika woyko ne asa ubbay nena woossiko, ay asika ba wozanan un7etiyabanne azzaniyaba eridi, ha Xoossa keethako simmidi, ba kushiya micciko,
2CH 6:30 ne de7iya bessan salon si7a. Enta nagaraa atto yaaga; entaw ootha. Neeni asa wozana ereysada asa ubbaas iya oosuwada oosuwada imma. Asa ubbaa wozanaa erey ne xalaala.
2CH 6:31 Hessika ne nu mayzatas immida biittan banta de7o laytha ubban new yayyana melanne ne ogiyan hemetana melasa.
2CH 6:32 “Isra7eele gidonna hara biitta asi ne gita sunthaa gishonne neeni ne asaas oothida malaalsiya oosota gisho haaho biittafe yidi, ha Xoossa keethako simmidi woossiko,
2CH 6:33 ne de7iya bessan salon si7a. Hara biitta asay oychiyaba ubbaa ootha. Ha alamiyan de7iya asa ubbay ne sunthaa eranaadanne ne ase gidida Isra7eeleda new yayyanaada ta keexida ha keethay ne goyinnetiya bessi gideysa enti eranaada hara biitta asay nena woossiyaba ubbaa ootha.
2CH 6:34 “Enti banta morketa olana mela ne kiittiya wode ne doorida ha katamaakonne ta ne sunthaa gisho keexida ha keethaako simmidi nena woossiko,
2CH 6:35 enta woosaanne enta oysha salon si7a; enta oysha zaara.
2CH 6:36 “Nagara oothonna asi bayna gisho ne ase gidida Isra7eeley nagara oothidi nena qohiko neeni shenetada morketas aatha immin morketi enta di77idi haaho woyko mata biitta enta efin,
2CH 6:37 enti he di7etida biittan de7ishe banta wozanan nagarape simmiko, ‘Nuuni nagara oothida; nuuni qohida; nuuni iitabaa hanida’ yaagidi nena woossiko,
2CH 6:38 bantana di7idi efida morketa biittan de7ishe enti banta kumetha wozanaaninne kumetha qofan neeko simmiko, neeni enta mayzatas immida biittako, neeni doorida katamaakonne taani ne sunthaa gisho keexida keethako simmidi nena woossiko,
2CH 6:39 enta woosaanne oysha ne de7iya bessan salon si7a; entaw pirda; enta nagaraa atto” yaaga.
2CH 6:40 “Abeeti ta Xoossaw, ha bessan woossiya woosa ne ayfey xeello; ne haythay si7o.
2CH 6:41 “Abeeti Godaw, Xoossaw, denda; wolqaama ne Taabotiyara ne shempo bessaa gela. Abeeti Godaw, Xoossaw, ne kahineti atotethi eko; ne geeshsha asati ne keehatethan ufayto.
2CH 6:42 Abeeti Godaw, Xoossaw, neeni tiyida kawa aggofa; Ne aylliya Dawitas ne caaqida merinaa siiquwa qopa” yaagis.
2CH 7:1 Solomoney woosa polida wode salope tami wodhidi xuussa yarshuwanne hara yarshuwa mis. Godaa bonchoy Xoossa keethaa kumis.
2CH 7:2 Godaa bonchoy Xoossa keethaa kumida gisho kahineti Xoossa keethaa gelanaw danda7ibookona.
2CH 7:3 Isra7eele asa ubbay tami salope wodhishininne Godaa bonchoy Xoossa keethaa kumishin be7ida wode banta som7uwa sa7a gathidi goyinnidosona. “Goday keeha! iya siiqoy merinaasa” yaagidi Godaa galatidosona.
2CH 7:4 Kawoynne asa ubbay Godaa sinthan yarsho yarshidosona.
2CH 7:5 Kawoy Solomoney laatamanne nam7u mukulu kormatanne xeetanne laatamu mukulu dorsata yarshis. Hessada oothidi, kawoynne asa ubbay Xoossa keethaa Godaas dummayidosona.
2CH 7:6 Kahineti bantaw giigida bessan eqin, Leeweti kawoy Dawiti Godaa sabbanaw kase oothida mazmure yexiya miisheta oykidi enta sinthan eqidi, “Iya siiqoy merinaasa” yaagidi yexishe Godaa galatidosona. Kahineti Leeweta sinthan eqidi moyze punnin Isra7eele asa ubbay eqis.
2CH 7:7 Solomoney xoossaa keethaa sinthan de7iya giddo dabaaba dummayis. He bessan xuussa yarshonne issifetetha yarshuwafe modhuwa yarshis. I hessa oothiday, Godaa sinthan de7iya naase biratape oosetida yarsho bessay, xuussa yarshuwa, katha yarshuwanne issifetetha yarshuwafe modhuwa yarshanaw guuxida gishosa.
2CH 7:8 He wode Solomoneynne Isra7eele asa ubbay laapun gallas ba7aale bonchidosona. Isra7eele asay Hamaatape bidi Gibxe shaafa gakanaw de7iya daro asay he bessan shiiqidosona.
2CH 7:9 Asay yarsho bessa anjisiya ba7aale laapun gallas qassi Shaqara Ba7aale hara laapun gallas bonchidosona. Hospuntha gallas wursetha shiiqo shiiqidosona.
2CH 7:10 Solomoney laapuntha ageenan, laatamanne heedzantho gallasan asaa moyzis. Asay, Goday Dawitas, Solomonesinne ba asaa Isra7eeles oothida keehatethan ufaytishe ba soo soo bidosona.
2CH 7:11 Solomoney Xoossa keethaanne kawo gadho keexidi wursis. Solomoney Xoossa keethaninne ba gadhon oothanaw ba wozanan qopidaba ubbaa polis.
2CH 7:12 Goday Solomones qamma qoncidi, “Taani ne woosa si7as; taani ha Xoossa keethaa yarsho bessi gidana mela dooras.
2CH 7:13 Iri bukonna mela ta saluwa gordiya wode woyko kathi maana mela boole kiittiya wode woyko ta asaa bolla gado yeddiya wode
2CH 7:14 ta sunthan xeegetida ta asay banta asatethaa kawushidi woossiko, tana koyiko, banta iita ogiyape simmiko, ta salon enta woosa si7ana; enta nagaraa atto gaana; enta biitta pathana.
2CH 7:15 Ha77i ha bessan woosetiya woosa ta ayfey xeellana; ta haythay si7ana.
2CH 7:16 Ha77i ta sunthay merinaw iyan daana mela ha keetha doorasinne geeshshas. Ta ayfeynne ta wozanay ubba wode ha keethan daana.
2CH 7:17 “Ne aaway Dawiti oothidaysada neeni ta sinthan hemetiko, ta kiitaa ubbaa oothiko, ta wogaanne ta higgiya naagiko,
2CH 7:18 taani ne aawa Dawitara, ‘Ne kochaafe Isra7eele bolla kawo gidiya asi dhayaka’ yaagada caaqidaysada ne araata minthada essana.
2CH 7:19 “Shin hinte tana aggidi ta hintew immida wogaanne higgiya aggiko, hara xoossata goyinnikonne entaw oothiko,
2CH 7:20 taani kase hintew immida biittafe hintena dhoqollana; ta sunthaas dummayida ha keethaaka aggaagana. Ta ha keethaa kawotetha ubbaa giddon miichasinne qelqisethas oothana.
2CH 7:21 Ha Xoossa keethay daro malaalsiyaba gidikoka, iya matara aadhiya ubbay malaaletidi, ‘Goday ha biittanne ha Xoossa keethaa ayis haysada oothidee?’ ” yaagana.
2CH 7:22 Asay zaaridi, “Haysa ubbaa enta bolla ehiday, entana Gibxefe kessida enta mayzata Xoossaa aggidi hara xoossata kaallida gishonne enta goyinnida gishosa” yaagana.
2CH 8:1 Solomoney Xoossa keethaanne baw gadho keexida laatamantho laytha wursethan,
2CH 8:2 Kawoy Kiraami immida katamata Solomoney zaari keexidi Isra7eele asaa he katamatan wothis.
2CH 8:3 Solomoney Hamaatanne Suubba geetetiya biitta bidi oykis.
2CH 8:4 Yaatidi mela biittan de7iya Tadmoora katamaanne shalo minjiya katamata Hamaata biittan keexis.
2CH 8:5 Hessadaka, Solomoney Qommo Beet-Horonanne garsa Beet-Horona geetetiya katamata zaaridi keexis. He katamati dirsi, pengeynne kobey de7iya diretidi uttida katamata.
2CH 8:6 Balata katamaa, buqura minjiya katamata ubbaa, ba paratanne para gaareta wothiya katamata ubbaanne I keexanaw amotida ubbaa Yerusalaamen, Libaanoseninne ba haariya biitta ubban keexis.
2CH 8:7 Isra7eele gidonashin hara biitta asatape attida Hiteta, Amooreta, Parzeta, Hiwetanne Yaabuseta,
2CH 8:8 Isra7eele asay wursidi dhaysona aggida asaa wolqa ooso oothana mela Solomoney dooris; hachi gakanaw enti oothosona.
2CH 8:9 Shin Solomoney Isra7eele asaape oonaka aylle oothidi oosisibeenna. Enti iya olanchota, toora moconata, para gaare laaggeyisata halaqatanne para asata gididi oothidosona.
2CH 8:10 Enta giddofe nam7u xeetanne ishatamu asati kawa Solomone oosuwa aawatethan oosisosona.
2CH 8:11 Solomoney, “Godaa Taabotey gelida bessay geeshshi gidiya gisho, ta machiya, Faarona na7iya, Isra7eele kawa Dawita gadhon daanaw bessuku” yaagidi, Gibxe kawa na7iw Dawita katamaape denthidi iw keexetida keethan wothis.
2CH 8:12 Solomoney he wode Xoossa keethaa sinthan Godaas keexida yarsho bessan xuussa yarsho Godaas yarshis.
2CH 8:13 Muse higgey kiitteysada gallas gallas xuussa yarsho yarshees. Solomoney Sambaatan gallas, ageena xeeroninne laythan heedzu toho bonchetiya ba7aaletan, hessika Uytha Ba7aalen, Saaminta Ba7aaleninne Shaqara Ba7aalen Godaas yarsho yarshees.
2CH 8:14 Iya aaway Dawiti kase kiittidaysada kahineta enta ooson ooson shaakidi shuumis; gallas gallas mazmuren sabbana melanne kahineta maaddana mela Leeweta shaakidi shuumis. Xoossa asi gidida Dawiti kiittidaysada penge naagiya asata issi issi pengiya naagana mela shuumis.
2CH 8:15 Hessadaka, kase Dawiti buqura minjiya bessaanne hara allaletaba kahinetanne Leeweta kiittidaysada issoyka attonna ubbay poletis.
2CH 8:16 Solomoney qopida ooso ubbay oosetidi wuris; Xoossa keethay baasetida wodiyape doomidi poletana gakanaw ooso ubbay lo77o oosetis.
2CH 8:17 He wode kawoy Solomoney Edoome biittan Zo7o Abbaa doonan de7iya Exiyoon-Gabiranne Eloota bis.
2CH 8:18 Kawoy Kiraami markabetanne markabiya laagon loohida asata Solomones yeddis. Enti Solomone asatara issife Ofira biitta bidi yaape 15,000 kilo giraame worqaa kawa Solomones ehidosona.
2CH 9:1 Saaba kawiya Solomone woriya si7ada, sedhemenken iya paacanaw sawo, daro worqanne al7o shuchu caanetida daro gimalera, daro azhaban Yerusalaame basu. Ba wozanan de7iyaba ubbaa Solomones odasu.
2CH 9:2 Solomoney iya oychidaba ubbaas zaaro immis; I iw birshonna iyape geemmidi attidabay aybika baawa.
2CH 9:3 Saaba kawiya Solomone cincatetha, I keexida gadhuwa,
2CH 9:4 iya gaytan shiiqiya kathaa, iya moorinnati uttiya utethaa, iya oosanchoti oothiya oosuwanne ma7iya ma7uwa, iya ushsha tigiya asati ma7iya ma7uwanne Godaa keethan I yarshiya xuussa yarshuwa be7ida wode I wozanay daro malaaletis.
2CH 9:5 Iya kawako, “Nebaanne ne cincatethaa taani ta biittan de7ashe si7idaysi tuma.
2CH 9:6 Shin ta yada ta ayfen be7ana gakanaw enti taw odidaba ammanabike. Ne cincatetha gitatethaas baggaaka taw odibookona; ta si7idaysafe ne daro gitataasa.
2CH 9:7 Ubba wode ne sinthan eqidi ne cincatethaa si7iya ne asatinne ne moorinnati ay mela anjetidona!
2CH 9:8 Nenan ufaytidi, nena ba kawotetha araatan utisida Goday ne Xoossay galatetto! Ne Xoossay Isra7eele siiqida gishonne merinaw minthi essanaw koyida gisho neeni suure pirdaanne xillotethaa oothana mela I nena enta bolla kawo oothis” yaagasu.
2CH 9:9 Kawiya oyddu mukulu kilo giraame worqa, daro sawonne al7o shuchu kawa Solomones immasu; Saaba kawiya kawa Solomones immida shittuwa mela shittoy baawa.
2CH 9:10 Qassi Ofirape worqa ehida Kiraamanne Solomone asati yaape sandale mithinne al7o shuchu ehidosona.
2CH 9:11 Kawoy sandale mithaa Xoossa keethasinne kawo gadhos dethe medhanaw, hessadaka zammaaretas maasinqonne diithi oothanaw go7etis. Hessa mela yetha miisheti haysafe kase Yihuda biittan bentibeenna.
2CH 9:12 Kawoy Solomoney Saaba kawiya koyidabaanne oychidaba ubbaa iw immis. Iya, iyaw ehidaysafe aathidi iw immis. Hessafe guye, Saaba kawiya ba azhabaara dendada ba biitta simmasu.
2CH 9:13 Solomoney laythan laythan ekiya worqay laatamanne heedzu mukulu kilo giraame.
2CH 9:14 Hessika zal7anchotape ekiya qaraxa, Arabe biitta kawotapenne Isra7eele biittan haareysatape ekiya worqanne bira gujonnashina.
2CH 9:15 Kawoy Solomoney issi issi gondalley laapun kilo giraame gidiya nam7u xeetu wogga gondalleta worqafe oosisis.
2CH 9:16 Issoy issoy heedzu kilo giraame gidiya heedzu xeetu guutha gondalleta worqafe oosisis. Kawoy he gondalleta “Libaanose Woraa” geetetiya kawo gadhon wothis.
2CH 9:17 Kawoy dangarsa zaalepe issi gita araata oosisidi walahi bayna worqan lanxis.
2CH 9:18 Araatay de7iya bessaa keyanaw yedhiya usupun dethati de7oosona. Araatara oyketidi uttida worqafe oosetida toho yedhiya bessi de7ees. Araatas nam7u baggara kushe shempisiya zempoti de7oosona; he zempota matara ya bagganinne ha baggan eqida issi issi gaammo misiley de7ees.
2CH 9:19 He araatay de7iya bessaa keyiya usupun dethata bolla ya baggaranne ha baggara eqida tammanne nam7u gaammo misileti de7oosona. Hessa mela araati hara kawotethan awunka oosetibeenna.
2CH 9:20 Kawoy Solomoney ushshu uyaa miishe ubbay worqafe oosetis; “Libaanose Woraa” geetetiya kawo gadhon de7iya miishe ubbay walahi bayna worqafe oosetis. Solomone wode biri darida gisho taybon gelenna.
2CH 9:21 Kawas Kiraama asati laagiya zal7e markabeta de7oosona. He markabeti worqanne bira, dangarsa zaale, qaaretanne geleshshota caanidi heedzu laythafe issi toho ehoosona.
2CH 9:22 Kawoy Solomoney duretethaninne cincatethan sa7an de7iya kawota ubbaafe aadhees.
2CH 9:23 Sa7an de7iya kawoti ubbay Xoossay iya wozanan wothida cincatethaa si7anaw koyoosona.
2CH 9:24 Laythan laythan iyako yaa ubbay iyaw worqanne bira, ma7ota, ola miishe, shitto, paranne baqulota imota ehoosona.
2CH 9:25 Solomone paratasinne gaaretas oyddu mukulu zadaloti de7ees; tammanne nam7u mukulu para asati de7oosona. Solomoney hessata dumma dumma katamataninne Yerusalaamen wothis.
2CH 9:26 Solomoney Efraxiisa shaafape doomidi, Filisxeeme biittanne Gibxe zawa gakanaw de7iya kawota ubbaa haaris.
2CH 9:27 Kawoy Yerusalaamen biri shuchada keeletanaada ziga mithi Yihuda zumata xaphon dicciya boobbada darana mela oothis.
2CH 9:28 Solomoney parata Gibxefenne hara biitta ubbaafe ehisees.
2CH 9:29 Koyrope wursethi gakanaw Solomone taarikey nabiya Naatana taarike maxaafan, Seelo addiya nabiya Akiya maxaafaninne Nabaaxa Na7aa Iyorbaama wode gakanaw de7iya nabiya Ido qoncetha maxaafan xaafetis gidennee?
2CH 9:30 Solomoney Isra7eele bolla Yerusalaamen oytamu laythi kawotis.
2CH 9:31 Hessafe guye, Solomoney hayqidi ba mayzatan gahetis; ba aawa Dawita kataman moogetis. Iya na7ay Robi7aami iya bessan kawotis.
2CH 10:1 Isra7eele asa ubbay Orobi7aama kawoyanaw Seekema bida gisho ika yaa bis.
2CH 10:2 Nabaaxa na7ay Iyorbaami kawa Solomonepe baqatidi Gibxen de7eysi, hessa si7ida wode Gibxefe yis.
2CH 10:3 Isra7eele asa ubbay Iyorbaamas kiittidi xeegisin, inne shiiqida Isra7eele asa ubbay Orobi7aamako bidi,
2CH 10:4 “Ne aaway nuna deexo qambara toossis; shin ha77i I nuna oosisiya wolqaama oosuwanne deexo qambara nuus kawushisa; yaatiko, nu new haaretana” yaagidosona.
2CH 10:5 Robi7aami, “Heedzantho gallas simmidi, taako yiite” yaagis. Asay simmidi bidosona.
2CH 10:6 Hessafe guye, kawoy Robi7aami iya aaway Solomoney paxa de7iya wode Solomone zorida cimata, “Ha asaas woygada zaara geetii?” yaagidi entana zore oychis.
2CH 10:7 Cimati Orobi7aamako, “Ne ha asaas keehiko, enta ufaysikonne entaw lo77o qaala zaariko enti ubba wode new haaretana” yaagidosona.
2CH 10:8 Shin Robi7aami cimati zorida zoriya aggidi iyara diccidi, iyara oothiya yalagata zore oychis.
2CH 10:9 I entako, “Hinte tana zoriyabay aybee? ‘Ne aaway nuna toossida deexo qambara nuus kawushisa’ giya ha asaas woygada zaaro?” yaagidi oychis.
2CH 10:10 Iya laggeti zaaridi, “ ‘Ne aaway nuna deexo qambara toossis; shin ne nuus kawusharki’ giya asaas, ‘Ta gil7a biradhey ta aawa xeessaafe orde.
2CH 10:11 Ta aaway hintena deexo qambara toossis; shin ta iyape aathada deexethana. Ta aaway hintena lisson wadhis; shin ta hintena korneda dukiya lisson wadhana’ yaagada zaara” yaagidosona.
2CH 10:12 Kawoy, “Heedzu gallasape guye simmidi taako yiite” gidaysada Iyorbaaminne asay simmidi yidosona.
2CH 10:13 Kawoy Robi7aami cimati zorida zoriya aggidi entaw iita zaaro zaaris.
2CH 10:14 Iya laggeti zorida zoriya kaallidi, “Ta aaway hintena qambara toossis; shin taani iyape aathada deexethana. Ta aaway hintena lisson wadhis; shin taani hintena korneda dukiya lisson wadhana” yaagidi zaaris.
2CH 10:15 Goday Seelo addiya nabiya Akiya baggara Nabaaxa na7aa Iyorbaamas odida qaalay poletana mela Xoossafe hanida gisho kawoy asay geysa si7onna ixis.
2CH 10:16 Isra7eele asa ubbay kawoy enti geysa si7onna ixidaysa be7idi kawako, “Dawitape nuna gakiyabay aybee? Isseye na7aape nuuni laattanabay baawa! Isra7eele asaw, hinte soo soo biite! Dawita, neeni ne keethaa naaga!” yaagidosona. Hessa gisho, Isra7eele asay banta soo soo bidosona.
2CH 10:17 Shin Robi7aami Yihuda biittan de7iya Isra7eele asaa bolla kawotis.
2CH 10:18 Kawoy Robi7aami ba oosanchota halaqaa Adoraama Isra7eele asaako kiittis; enti iya shuchan caddidi wodhidosona. He wode kawoy Robi7aami ba para gaaren uttidi Yerusalaame baqatis.
2CH 10:19 He wodepe doomidi hachi gakanaw tammu Isra7eele zareti Dawita kochaafe kawotida kawota bolla makallidosona.
2CH 11:1 Robi7aami Yerusalaame katama gakida wode Isra7eele biitta asaara oletidi kawotethaa baw zaarana mela Yihudapenne Biniyaame kochaafe dooretida 180,000 olanchota shiishis.
2CH 11:2 Shin Godaa qaalay Xoossaa asi gidida Shamayako yis.
2CH 11:3 “Solomone na7aa, Yihuda Kawa Orobi7aama, Yihudaninne Biniyaamen de7iya Isra7eele asa ubbaa haysada yaaga;
2CH 11:4 ‘Hinte isha gidida Isra7eeletara oletanaw boopite. Hessa taani oothida gisho hinte ubbay hinte soo soo simmite’ yaagees” yaaga. Enti Godaa qaala si7idi Iyorbaama olanaw beysa aggidi simmidosona.
2CH 11:5 Robi7aami Yerusalaamen uttidi haysafe kaallidi xaafetida Yihudanne Biniyaame katamatan miixata keexis.
2CH 11:6 He katamati Beeteleme, Exaama, Tequhe,
2CH 11:7 Beet-Xura, Sooko, Adulaama,
2CH 11:8 Geete, Mareesa, Ziifa,
2CH 11:9 Adorayma, Laakiso, Azeeqa,
2CH 11:10 Xor7a, Eloonanne Kebroona.
2CH 11:11 Robi7aami katamata minthidi entaw halaqata shuumis; kathi, zaytenne woyne ushsha yan wothis.
2CH 11:12 He keexetida katamata ubban gondallenne toora wothis; yaatidi enta daro minthis. Hessada oothidi Yihudanne Biniyaame haaris.
2CH 11:13 Isra7eele ubban de7iya kahinetinne Leeweti ubbay banta de7iya bessaafe Orobi7aamako yidosona.
2CH 11:14 Leeweti banta hentha biittanne banta shaluwa aggidi Yihudanne Yerusalaame yidosona. Enti kahine gididi Godaas oothonna mela Iyorbaaminne iya nayti diggidosona.
2CH 11:15 Iyorbaami dhoqa goyinno bessaaninne I essida deeshenne mara misiletas oothiya hara kahineta shuumis.
2CH 11:16 Isra7eele Xoossaa banta wozanape goyinnanaw koydaysati Godaas banta aawata Xoossaas yarsho yarshanaw kumetha Isra7eelepe Leeweta kaallidi Yerusalaame yidosona.
2CH 11:17 Enta yuussay Yihuda kawotethaa minthis; enti heedzu laythi kumethi Solomone na7aa Orobi7aama maaddidosona. Enti kawa Dawita ogiyanne kawa Solomone ogiya kaallidi, heedzu laythi saro de7idosona.
2CH 11:18 Robi7aami Mahlaato geetetiya macho ekis. Mahilaati aaway Dawita na7aa Yarmoota; I aayiya Isseye na7aa Eliyaaba na7iw Abikaalo.
2CH 11:19 Mahilaata Orobi7aames Ye7usa, Samaarenne Zahaama geetetiya adde nayta yelasu.
2CH 11:20 Hessafe guye, Abeseloome na7iw Ma7iko ekis; Ma7ika Abiya, Ataya, Ziizanne Salomita geetetiya adde nayta yelasu.
2CH 11:21 Robi7aami ba machetape ba laggethotape aathidi Abeseloome na7iw Ma7iko dosis. Iyaw tammanne hospun machetinne usupun tammu laggethoti de7oosona. I laatamanne hospun adde naytanne usupun tammu macca nayta yelis.
2CH 11:22 Robi7aami Ma7iki na7aa Abiya ba bessan kawoyanaw qopida gisho iya ishata bolla iya halaqa oothidi shuumis.
2CH 11:23 Robi7aami cincidi ba adde nayta Yihudan, Biniyaame biittaninne gimbetida katamatan shaaki shaaki shuumis; entaw daro kathinne daro macho demmis.
2CH 12:1 Orobi7aama kawotethay minnidi eqida wode inne Isra7eele asa ubbay Godaa higgiya aggaagidosona.
2CH 12:2 Enti Godaas ammanetona ixida gisho Robi7aami kawotida ichashantho laythan Gibxe kawoy Shishaaqi Yerusalaame bolla dendis.
2CH 12:3 Iyaw issi mukulunne nam7u xeetu para gaareti, usupun tammu mukulu para asatinne tayboy bayna Liibe, Sukanne Tophe olanchoti de7oosona.
2CH 12:4 Kawoy Shishaaqi gimbetida Yihuda katamata oykidi Yerusalaame gakanaw yis.
2CH 12:5 Hessafe guye, nabey Shamayey Orobi7aamanne Shishaaqa yayyidi Yerusalaamen shiiqidi de7iya Yihuda halaqatako yidi, “Goday, ‘Hinte tana aggida gisho, ta hintena Shishaaqa kushen yeggas’ ” yaagis.
2CH 12:6 Isra7eele halaqatinne kawoy Robi7aami, bantana kawushidi, “Goday xillo” yaagidosona.
2CH 12:7 Enti bantana kawushidaysa Goday be7ida wode Shamayako haysada yaagis; “Enti bantana kawushida gisho ta enta dhaysike; ta enta ashshana. Ta hanqoy Shishaaqa baggara Yerusalaame bolla gukenna.
2CH 12:8 Gidoshin, taw haareteysaninne hara kawotas haareteysan de7iya dummatethaa enti erana mela Shishaaqas haaretana” yaagis.
2CH 12:9 Gibxe kawoy Shishaaqi Yerusalaame olidi, Xoossa keethaninne kawo gadhon de7iya shalo ubbaa ekis. Solomoney worqafe oosisida gondalleta bonqis.
2CH 12:10 I efida worqa gondalleta gisho kawoy Robi7aami naase biratape hara gondalleta oosisidi kawo gadho penge naageysata halaqata kushen wothis.
2CH 12:11 Kawoy Xoossa keethi geliya wode ubban pengiya naageysati he gondalleta oykidi iya kaalloosona. Kawoy simmiko enti zaaridi naageysata keethan wothoosona.
2CH 12:12 Robi7aami bana kawushida gisho I dhayonna mela Godaa hanqoy iyape simmis. Yihuda biitta ubban qassi sa7i injetis.
2CH 12:13 Kawoy Robi7aami bana minthidi Yerusalaamen kawotis; Robi7aami kawotida wode iyaw laythi oytamanne issino. Goday ba sunthay yan xeegetana mela Isra7eele biitta ubban doorida, Yerusalaamen tammanne laapun laythi kawotis. Robi7aama aayiya Amoone maccas Na7imo.
2CH 12:14 Robi7aami Godaa wozanape goyinnanaw koyiboona gisho iitabaa oothis.
2CH 12:15 Robi7aami ba kawotetha wodiyan oothidabay koyrope wursethi gakanawunne iya yeletaa maaray, Nabiya Shamaya taarike maxaafaninne qoncethi be7iya Ido taarike maxaafan xaafetis gidennee? Robi7aaminne Iyorbaami ubba wode oletishe de7idosona.
2CH 12:16 Robi7aami hayqidi ba mayzata gakis; I Dawita kataman moogetis. Iya bessan iya na7ay Abiyi kawotis.
2CH 13:1 Kawoy Iyorbaami kawotida tammanne hospuntho laythan Abiyi Yihudan kawotis.
2CH 13:2 Abiyi Yerusalaamen heedzu laythi kawotis. Iya aaye sunthay Mikayo; iya Gib7a addiya Uri7eela na7a. Abiyinne Iyorbaami oletishe de7idosona.
2CH 13:3 Abiyi dooretida oyddu xeetu mukulu mino olanchota ekidi olas keyis. Iyorbaami dooretida hospun xeetu mukulu mino olanchota ekidi Abiyara oletanaw keyis.
2CH 13:4 Hessafe guye, Abiyi derey dariya Efreema biittan de7iya Xamarayma deriya huuphen eqidi, haysada yaagis; “Neno, Iyorbaama, hinteno, Isra7eele asaw, ubbay ta giyaba si7ite!
2CH 13:5 Goday Isra7eele Xoossay Dawitinne iya kochay Isra7eele bolla merinaw kawotana mela Dawitara Maxinen caaqidaysa ereketiyee?
2CH 13:6 Gidoshin, Dawita na7aa Solomone aylley, Nabaaxa na7ay Iyorbaami dendidi ba godaa bolla makallis.
2CH 13:7 Robi7aami yooga, eri baynaysanne entara eqetanaw danda7onna wode pathonna laafa asati Iyorbaamako shiiqidi Solomone na7aa Orobi7aama bolla dendidosona.
2CH 13:8 “Goday Dawita kochaas immida kawotethaara hinte eqetanaw qopeeta. Hinte hessa qopiday hinte daro gidiya gishonne xoossata gidana mela Iyorbaami worqafe medhida marati hintera de7iya gishosa.
2CH 13:9 Godaas oothiya Aarona koche gidida oothiya kahinetanne Leeweta hinte yedethideta. Hara biitta asay ootheysada hintew hara kahineta shuumideta. Bana dummayanaw issi wofaanonne laapun maraze ekidi yaa oonaka wordo xoossatas kahine oothidi shuumata.
2CH 13:10 “Gidoshin, nuus Goday nu Xoossaa; nuuni iya aggibooko. Kahine gididi oothiya Aarona kochati nuus de7oosona; Leeweti enta maaddoosona.
2CH 13:11 Enti ubba gallas wontanne omarsi Godaas xuussa yarsho yarshoosonanne sawiya ixaane cuyisoosona. Godaa sinthan wothiya uythaa geeshsha xarpheeza bolla wothoosona. Omarsi omarsi xompe wothiya kocaa bolla tama oythoosona. Nuuni Godaa nu Xoossaa kiita naagoos; shin hinte iya aggideta.
2CH 13:12 Xoossay nuura de7ees; I nuna kaalethees. Ola moyze punniya iya kahineti nuura de7oosona; nuuni hintera olaa doomanaw moyze punnana. Isra7eele asaw, Godaara hinte aawata Xoossara oletofite! Hinte iya xoonanaw danda7eketa” yaagis.
2CH 13:13 He wode Iyorbaami ba olanchotape issi cugaa entafe guyera zugidi naagana mela yeddis. Attida Isra7eele olanchoti Yihuda olanchota sinthan de7iya wode zugidi naagiya olanchoti entafe guyera de7oosona.
2CH 13:14 Yihuda olanchoti guye simmidi xeelliya wode enta olanaw yidaysati guyeranne sinthara de7eysa be7ida wode Godaako waassidosona; kahineti moyze punnidosona.
2CH 13:15 Yihuda olanchoti ola waaso waassida wode Goday Iyorbaamanne Isra7eele asaa ubbaa Abiya sinthaninne Yihuda sinthan xoonis.
2CH 13:16 Isra7eele olanchoti Yihuda olanchota sinthafe baqatin Xoossay enta Yihuda olanchota kushen aathidi immis.
2CH 13:17 Abiyinne iya olanchoti enta diifi oothidi wursidosona. He olan 500,000 dooretida Isra7eele olanchoti hayqidosona.
2CH 13:18 Isra7eele asay he wode xoonetidosona; Yihuda asay Godan banta aawata Xoossan ammanetida gisho enta xoonidosona.
2CH 13:19 Abiyi Iyorbaama yedethidi iyape Beetele, Yishananne Efroona enta gutatara oykis.
2CH 13:20 Abiyi de7ida laythan Iyorbaami simmidi minnibeenna. Goday Iyorbaama shocin hayqis.
2CH 13:21 Gidoshin, Abiyi minni minni bis. Abiyi tammanne oyddu macho ekidi laatamanne nam7u adde naytanne tammanne usupun macca nayta yelis.
2CH 13:22 Attida Abiyi taarikey, I oothidabaynne I odidabay nabiya Ido taarike maxaafan xaafetis.
2CH 14:1 Abiyi hayqidi ba mayzata gakis; I Dawita kataman moogetis. Iya bessan iya na7ay Asi kawotis. I kawotida wode biittay tammu laythi wopu gidi de7is.
2CH 14:2 Asi Godaa ba Xoossaa sinthan lo77obaanne suureba oothis.
2CH 14:3 Asi allaga xoossatas yarshiya bessatanne dhoqa goyinno bessata dhaysis. Goyinnanaw shuchafe oosetida tuussata mentherethis. Asheera geetetiya Xoossa misileta qanxerethidi yeggis.
2CH 14:4 Yihuda asay Godaa banta aawata Xoossaa koyana mela, iya higgiyanne iya wogaa naagana mela Asi kiittis.
2CH 14:5 Dhoqa goyinno bessatanne ixaane cuyisiya bessata Yihuda katamatape dhaysida gisho iya kawotetha laythan biittay wopu gidi de7is.
2CH 14:6 Kawoy Asi Yihuda katamatas miixata keexis. Goday iya shempisida gisho biittay shempis; iya laythan iyara oonika oletibeenna.
2CH 14:7 Asi Yihuda asaako, “Ane nuuni ha katamata essoos; enta yuushon miixata keexoos; adussa shako, pengetanne gordeta giigisoos. Nuuni Godaa nu Xoossaa koyida gisho biittay ha77ika nubaa. Nuuni iya koyida; I nuus ubba baggara shempo immis” yaagis. Hessa gisho, enti katamata keexidi polidosona.
2CH 14:8 Asas Yihuda kochaafe wogga gondalletanne toorata dancida heedzu xeetu mukulu olanchoti de7oosona. Biniyaame kochaafe guutha gondalleta dancidanne dongen dukeysati nam7u xeetanne hospun tammu mukulu olanchoti de7oosona. Hessati ubbay mino olanchota.
2CH 14:9 Zaraha geetetiya issi Tophe addey issi miloone olanchotanne heedzu xeetu para gaareta ekidi Yihuda olanaw yidi Marisa gakis.
2CH 14:10 Asi iyara oletanaw keyidi ba olanchota Marisa matan de7iya Xafaata zangaaran salpisis.
2CH 14:11 Asi Godaa ba Xoossaa haysada yaagidi woossis; “Abeeti Godaw, wolqi bayna olanchota wolqaama olanchotape ashshey ne meli baawa. Abeeti Godaw, nu Xoossaw, nuuni nenan ammanetidi, ha wolqaama olanchotara oletanaw ne sunthan yida gisho ne nuna maadda. Abeeti Godaw, ne nu Xoossaa; nena asi xoonenna” yaagis.
2CH 14:12 Goday Tophe olanchota Asa sinthaninne Yihuda olanchota sinthan shocin Tophe olanchoti baqatidosona.
2CH 14:13 Asinne iyara de7iya asay enta Geraara gakanaw yedethidosona. Tophe olanchotape daroy hayqida gisho enti simmidi minnanawunne oletanaw danda7ibookona. Hessada hanidi, Tophe olanchoti Godaaninne iya olanchotan xoonetidosona. Kawa Asa olanchoti daro di7o di77idosona.
2CH 14:14 He heeran de7iya asay Goday oothidaba be7idi daro dagammis. Asa olanchoti Geraara yuushuwan de7iya katamata ubbaa bonqidi dhaysidosona.
2CH 14:15 Qassi mehe moothata olidi, daro dorsaanne gimaleta di77idi, Yerusalaame simmidosona.
2CH 15:1 Odeeda na7aa Azaariyasa bolla Xoossaa Ayyaanay wodhis.
2CH 15:2 Kawa Asara gahetanaw Azaariyasi bidi, “Asa, Yihuda asawnne Biniyaame asaw si7ite! Hinte Godaara gidiko ika hintera gidana. Hinte iya koyiko I hintew bentana; shin hinte iya aggiko I hintena aggana.
2CH 15:3 Isra7eele asay tuma Xoossi bayna, tamaarsiya kahineynne higgey bayna daro wode de7idosona.
2CH 15:4 Shin bantana metoy gakida wode enti Godaako, Isra7eele Xoossaako simmidi iya koyin I entaw bentis.
2CH 15:5 He wode biittan de7iya asa ubbay dagaman de7iya gisho sarotethan keyidi geliya oonika baawa.
2CH 15:6 Xoossay enta dumma dumma meton yeggida gisho derey deriya, katamay katamaa un7ethees.
2CH 15:7 Gidoshin, hinte, hinte oosuwas woytoy de7iya gisho minnite; guye goopite!” yaagis.
2CH 15:8 Kawoy Asi ha qaalanne Odeeda na7ay nabey Azaariyasi odida qaala si7ida wode minnis. Asi Yihudanne Biniyaame biitta ubbaafenne I oykida derey dariya Efreema biittan de7iya ixetida eeqa misileta dhaysis. Xoossa keethaa sinthan de7iya Godaa yarsho bessa oorathis.
2CH 15:9 Iya Goday Xoossay iyara de7eysa be7ida gisho daro asay Isra7eelepe iyako yidosona. Yihuda asaanne Biniyaame asa ubbaa, entara de7iya Efreema kochata, Minaase kochatanne Simoona kochata Asi shiishis.
2CH 15:10 Asi kawotida tammanne ichashantho laythan, heedzantho ageenan asay Yerusalaamen shiiqidosona.
2CH 15:11 He gallas enti di77idi ehidabaape laapun xeetu kormatanne laapun mukulu dorsata Godaas yarshidosona.
2CH 15:12 Godaa banta aawata Xoossaa banta kumetha wozanaaninne banta kumetha shempuwan koyanaw caaqidosona.
2CH 15:13 Godaa Isra7eele Xoossaa koyonna asi, na7a gidin cimi, adde gidin macci hayqo.
2CH 15:14 Hessa gita waason, ililsan, moyzeninne zayen banta Godaas caaqidosona.
2CH 15:15 Yihuda asa ubbay banta kumetha wozanan ha caaquwa caaqida gisho ufaytidosona. Godaa enti minthidi koyin I entaw bentis. Goday entaw ubba baggara wopa immis.
2CH 15:16 Qassi, kawoy Asi ba aawa aayiya Ma7ika Asheera geetetiya macca Xoossee eeqa misile oothida gisho kawa aayiw geetetiya bonchuwafe iyo diggis. Asi he eeqa misiliya qanxerethidi Qediroona Zangaaran xuuggis.
2CH 15:17 Dhoqa goyinno bessata Isra7eele biittafe dhaysona ixikoka Asi ba de7ida laytha ubban Godaas ammanetida asi gididi de7is.
2CH 15:18 Inne iya aaway Godaas dummayida bira, worqanne hara miisheta ehidi Xoossa keethan wothis.
2CH 15:19 Asi kawotida hastamanne ichashantho laythi gakanaw oli baawa.
2CH 16:1 Asi kawotida hastamanne usupuntho laythan Isra7eele kawoy Ba7oosi Yihuda bolla dendis. Yihuda kawa Asako oonika gelonna melanne keyonna mela teqanaw Raman miixa keexis.
2CH 16:2 Kawoy Asi Xoossa keethaninne ba kawo gadhon de7iya buqura minjiya keethaafe worqanne bira ekidi Damasqon de7iya Soore kawa Wolde-Adaras haysada yaagidi yeddis.
2CH 16:3 “Kase ta aawaranne ne aawara caaqidaysada taaranne neera caaqoos. Heko, ta new biranne worqa yeddas. Isra7eele kawoy Ba7oosi ba olanchota ta biittafe kessana mela ne kase iyara caaqida caaquwa laalla” yaagis.
2CH 16:4 Kawoy Wolde-Adari, Asi gidaysa ekidi ba toora moconata Isra7eele olana mela yeddis. Enti Iyoona, Daanenne Abeel-Mayma geetetiya katamatanne Niftaaleme biittan de7iya buqura minjiya katamata ubbaa xoonidosona.
2CH 16:5 Ba7oosi hessa si7idi Raman oothiya miixa aggaagis.
2CH 16:6 Kawoy Asi Yihuda asaa ubbaa shiishis; asay Ba7oosi kase yan go7etiya shuchaanne mithaa Ramape ekidi Gib7anne Mixipha katamatan miixa keexis.
2CH 16:7 He wode qoncethi be7iya Anaani Yihuda kawa Asako yidi, “Neeni Soore kawan ammanetada, Godan ne Xoossan, ammanetabona gisho Soore kawa olanchoti ne kushepe kessi ekidosona.
2CH 16:8 Tophenne Liibe asati daro para gaaretinne parati de7iya daro olanchota gidokonaayee? Shin neeni Godan ammanetida gisho Goday enta ne kushen aathidi immis.
2CH 16:9 Ba kumetha wozanan Godan ammanetiya asi minthethanaw Godaa ayfey sa7aa ubbaa xeellees. Neeni eeyatetha ooso oothida gisho hizape oli neepe shaaketenna” yaagis.
2CH 16:10 Asi qoncethi be7iya ura bolla daro hanqetida gisho iya santhalaatan qachidi qasho keethan yeggis. Asi he wode issi issi asata daro un7ethis.
2CH 16:11 Heko, Asi oothidabay koyrope wursethi gakanaw Yihuda kawotanne Isra7eele kawota taarike maxaafan xaafetis.
2CH 16:12 Asi kawotida hastamanne uddufuntho laythan toho saketis; sahoy darikoka, I aakimeta koyisipe attishin, Godaa koybeenna.
2CH 16:13 Asi kawotida oytamanne issintho laythan hayqidi ba mayzata gakis.
2CH 16:14 Enti iya Dawita kataman zaalla woocidi kessida duufon moogidosona. Iya aha dumma dumma shitton tiyetida arsa bolla wothidosona. Enti iya bonchuwas daro mithi doori eethidi yeekidosona.
2CH 17:1 Asa na7ay Iyosaafexi ba aawa bessan kawotis; Iyosaafexi Isra7eele olanaw bana giigisis.
2CH 17:2 Miixi oosetida Yihuda katamatan olanchota wothis; Yihuda biittaninne iya aaway Asi olidi oykida Efreema biittan olanchota wothis.
2CH 17:3 Iyosaafexi, iya aaway Dawiti koyro hemetida ogiyan hemetida gishonne Ba7aale eeqa goyinnona ixida gisho Goday iya anjis.
2CH 17:4 Iyosaafexi ba aawa ogen hemetidi Godaa kiita polis. Isra7eele kawoti oothida iita oosota oothibeenna.
2CH 17:5 Goday iya Yihuda kawotethan minthidi essis. Yihuda asa ubbay iyaw imota ehidosona; I daro duretisinne bonchetis.
2CH 17:6 Iyosaafexi Godaas kumetha wozanan oothiya asi. Dhoqa goyinno bessatanne Asheera geetetiya xoosse eeqa misileta Yihuda biittafe dhaysis.
2CH 17:7 Iyosaafexi kawotida heedzantho laythan Yihuda katamatan tamaarsana mela ba moorinnata Benihaala, Abdiyu, Zakariyasa, Natina7eelanne Mikiyaasa yeddis.
2CH 17:8 Entara guutha Leeweta Shamaya, Naatana, Zabada, Asaheela, Samiramoota, Yoonataana, Adoniyaasa, Xoobanne Xobadoona yeddis; qassi entara kahineta Elsamaananne Iyoraama yeddis.
2CH 17:9 Enti Godaa higge maxaafa ekidi Yihuda biittan de7iya katamata ubbaa bidi yan asaa tamaarsidosona.
2CH 17:10 Yihuda yuushon de7iya kawotethata ubbaa Goday yashisin, enti Iyosaafexara oletibookona.
2CH 17:11 Filisxeemepe guutha asati Iyosaafexas imotanne bira giira ehidosona; Arabati iyaw laapun mukulunne laapun xeetu dorsa urgetanne laapun mukulunne laapun xeetu koleta ehidosona.
2CH 17:12 Iyosaafexi minni minni bis. Yihudan miixatanne shalo minjiya katamata keexis.
2CH 17:13 Yihuda katamatan darobaa minjis. Yerusalaamen iyaw mino olanchoti de7oosona.
2CH 17:14 Enti banta aawata soo asan asan haysafe kaallidi xaafetidosona. Yihuda kochaafe shaalaqay Adina; iyara heedzu xeetu mukulu mino olanchoti de7oosona.
2CH 17:15 Adina kaallidi de7iya halaqay Yohaana; iyara nam7u xeetanne hospun tammu mukulu mino olanchoti de7oosona.
2CH 17:16 Godaas ba shenen bana dummayida Zikira na7ay Amasayi iya kaallidi de7iya heedzantho halaqa; iyara nam7u xeetu mukulu mino olanchoti de7oosona.
2CH 17:17 Biniyaame kochaafe halaqay mino olanchuwa Eliyaada; iyara dongenne gondalle oykiya nam7u xeetu mukulu olanchoti de7oosona.
2CH 17:18 Eliyaada kaallidi de7iya halaqay Yozabaata; iyara ola baanaw dancida issi xeetanne hospun tammu mukulu olanchoti de7oosona.
2CH 17:19 Haysati kawas Yerusalaamen oothidaysata; haysati Yihudan gimbetida katamatan de7iya kawoy wothida olanchotape haraa.
2CH 18:1 Iyosaafexi daro duretethinne boncho demmidaape guye Akaabara bollotis.
2CH 18:2 Guutha laythafe guye Iyosaafexi Akaaba be7anaw Samaare bis. Akaabi iyawunne iyara de7iya asaas daro dorsinne booru shukis. Yaatidi Iyosaafexa Galadan de7iya Raamota olanaw baara baana mela maqis.
2CH 18:3 Isra7eele kawoy Akaabi Yihuda kawa Iyosaafexako, “Galadan de7iya Raamota olanaw taara baanee?” yaagidi oychis. Iyosaafexi, “Ee, ta neera baana; ta olanchoti ne olanchota; nu neera baana” yaagis.
2CH 18:4 Iyosaafexi Isra7eele kawako, “Gidoshin, ne koyrottada Godaa oycha” yaagis.
2CH 18:5 Isra7eele kawoy oyddu xeetu nabeta shiishidi, “Ta Galadan de7iya Raamota olanaw booye boopo?” yaagidi oychis. Enti, “Ba; Xoossay ne kushen aathidi immana” yaagidosona.
2CH 18:6 Shin Iyosaafexi, “Nu Godaa oychanaw danda7iya hara nabey haysan baawee?” yaagis.
2CH 18:7 Isra7eele kawoy Iyosaafexako, “Nu iya baggara Godaa oychanaw danda7iya hara nabey Yimila na7ay Mikiyaasi de7ees. Shin I ubba wode taw iitabaa odeesipe attishin, lo77oba odi eronna gisho ta iya dosike” yaagis. Iyosaafexi, “Kawoy haysada gaanaw bessenna” yaagis.
2CH 18:8 Isra7eele kawoy ba moorinatape issuwa xeegidi, “Yimila na7aa Mikiyaasa elle ekada ya” yaagis.
2CH 18:9 Isra7eele kawoynne Yihuda kawoy Iyosaafexi kawo ma7o ma7idi, Samaare katamaa geliya pengen banta araatan uttin nabeti ubbay enta sinthan tinbite odoosona.
2CH 18:10 Entafe issoy, Kin7ana na7ay Sedeqiyaasi biratape kaceta giigisidi Akaabako, “Goday, ‘Sooreti dhayana gakanaw ne enta ha kacetan qaycana’ yaagees” yaagis.
2CH 18:11 Hara nabeti ubbay, “Goday Raamota ne kushen aathidi immana gisho ba; olada xoona” yaagidosona.
2CH 18:12 Mikiyaasa xeeganaw kiitetidi bida uray, “Heko, hara nabeti ubbay issi doona gididi kawoy xoonanaysa odidosona. Ne odayka enta odaa mela gido; lo77oba oda” yaagis.
2CH 18:13 Shin Mikiyaasi, “De7o Goday eriya mela, Xoossay taw qoncisidaba odana” yaagis.
2CH 18:14 Mikiyaasi kawako yida wode kawoy, “Mikiyaasa nuuni Galadan de7iya Raamota olanaw biinoye boopino?” yaagidi oychis. Mikiyaasi kawako, “Enti ne kushen aadhidi imetana gisho bada ola” yaagis.
2CH 18:15 Kawoy, “Godaa sunthan tumaa oda; haraba taw odonna mela taani nena aapun toho caaqiso” yaagis.
2CH 18:16 Mikiyaasi, “Ta Isra7eele olanchoti ubbay henthanchoy bayna dorsada deriya bolla laaletidaysa be7as. Goday, ‘Hayisata kaalethiya asi baawa; enti ubbay banta soo soo saro boo’ yaagees” yaagis.
2CH 18:17 Isra7eele kawoy Iyosaafexako, “I taw iitape attishin, lo77o odi erenna gada taani new odabikina?” yaagis.
2CH 18:18 Mikiyaasi gujidi haysada yaagis; “Ha77i, Goday giyaba si7a! Goday ba araatan uttin salo olanchoti iya ushacha bagganinne iya haddirsa baggan eqidaysata be7as.
2CH 18:19 Goday, ‘Isra7eele kawoy Akaabi Galadan de7iya Raamota bidi yan hayqanaada iya balethanay oonee?’ ” yaagis. Issoy, “Haysada giya wode hankoy hessada” gis.
2CH 18:20 Wursethan issi ayyaani keyidi Godaa sinthan eqidi, “Taani iya balethana” yaagis. Goday, “Waatada balethanee?” yaagis.
2CH 18:21 Ayyaanay, “Ta bada, iya nabeta ubbaa doonan wordo ayyaana gidana” yaagis. Goday, “Ee, ne iya balethana; new hanana; bada baletha” yaagis.
2CH 18:22 Mikiyaasi, “Heko, Goday nena dhaysanaw qopida gisho ne nabeta doonan wordo ayyaana wothis” yaagis.
2CH 18:23 Kin7ana na7ay Sedeqiyaasi shiiqidi, Mikiyaasa baqidi, “Godaa Ayyaanay tana aggidi new odanaw awura aadhidee?” yaagis.
2CH 18:24 Mikiyaasi, “Heko, ne qosetanaw qol7a geliya wode hessa demmana” yaagis.
2CH 18:25 Isra7eele kawoy ba olanchotape issuwa xeegidi, “Mikiyaasa oyka efada katamaa haariya Amoonesinne ta na7aa Iyo7aasas imma.
2CH 18:26 Kawoy entako, ‘Ha addiya qasho keethan yeggite; ta saro simmana gakanaw guutha uythafenne haathaafe attishin, haraba aybaka iyaw immopite’ ” yaagidi kiittis.
2CH 18:27 Mikiyaasi, “Tuma, ne saro simmanaba gidiko, Goday taw odibeenna. Qassi, asaw, ta odiyaba akeekite” yaagis.
2CH 18:28 Hessafe guye, Isra7eele kawoynne Yihuda kawoy Iyosaafexi Galadan de7iya Raamota bidosona.
2CH 18:29 Isra7eele kawoy Iyosaafexako, “Taani ta ma7uwa laammada hara asi daanada olaa gelana; shin neeni ne kawo ma7uwa ma7a” yaagis. Isra7eele kawoy ba ma7uwa laammidi hara asi daanidi olaa gelis.
2CH 18:30 Soore kawoy ba para gaareta kiittiya asatako, “Gita gidin guuthi, hara ooderaka oletofite; Isra7eele kawa xalaala koyidi wodhite” yaagidi kiittis.
2CH 18:31 Para gaareta kiitteysati Iyosaafexa be7ida wode, “Haysi Isra7eele kawa” yaagidi iyara oletanaw simmidosona. Iyosaafexi waassin Goday iya maaddidi enta kushepe ashshis.
2CH 18:32 Para gaareta kiitteysati I Isra7eele kawa gidonnaysa be7idi iya gooddeysa aggaagidosona.
2CH 18:33 Issi uray coo ba dongiya dukiya wode Isra7eele kawa ola ma7oy gahetiya hashiyan caddis. Kawoy ba gaariya laagiya addiyako, “Gaariya guye zaarada tana olaa giddofe kessa; taani iita cache cadetas” yaagis.
2CH 18:34 Olay goobiya wode Isra7eele kawoy Akaabi ba para gaariya giddon zempidi, omarsi gakanaw Sooreta sinthan gam7is. Awi wulliya wode I hayqis.
2CH 19:1 Hessafe guye, kawoy Iyosaafexi Yerusalaamen de7iya ba gadho saro simmis.
2CH 19:2 Qoncethi be7iya, Anaana na7ay Iyyuy kawa Iyosaafexara gahetanaw keyidi, “Neeni iitata maaddanaw woyko Godaa ixeyisata dosanaw bessii? Hessa gisho, Godaa hanqoy ne bolla yis.
2CH 19:3 Gidoshin, Asheera eeqa misileta biittafe diggida gishonne Xoossaa koyanaw ne wozanaa giigisida gisho neeni lo77oba oothadasa” yaagis.
2CH 19:4 Iyosaafexi Yerusalaamen de7is. Barsaabepe doomidi derey dariya Efreema biitta gakanaw asaa giddon yuuyidi, Godaako, enta aawata Xoossaako enta zaaris.
2CH 19:5 Yihuda biittan de7iya gimbetida katamata ubban daynnata shuumis.
2CH 19:6 Entako, “Hinte pirdey asasa gidonashin, hinte pirdiya wode Goday hintera de7iya gisho hinte pirdiya wode naagetite.
2CH 19:7 Ha77ika Godaas yayyite; Godaa nu Xoossaa matan naaqoy, som7o xeellidi maaddeynne wodhaafe ekoy bayna gisho akeekidi pirdite” yaagis.
2CH 19:8 Qassi, Godaa higgiya polisana melanne asaa giddon dendiya mootuwa pirdana mela Leewetape, kahinetapenne Isra7eele asaa soo halaqatape guutha asata Iyosaafexi Yerusalaamen shuumis.
2CH 19:9 Iyosaafexi enta haysada yaagidi kiittis; “Godaas yashshan, ammanetethaninne kumetha wozanan oothite.
2CH 19:10 Banta kataman de7iya hinte ishati shempo wodhon, higge woyko kiita woyko awaajo menthon hinteko yiiko, enti Godaa sinthan bala gidonnaada, iya hanqoy hinte bollanne hinte ishata bolla yoonnaada enta seerite. Hinte enta seeriko hinte hinte huuphen bala gideketa.
2CH 19:11 Godaaba gidida ubban kahineta halaqaa Amaare; kawoba gidida ubban Yihuda kochaas halaqa gidida Isma7eela na7aa Zabada shuumas. Leeweti hinte bolla halaqa gidana. Hinte minnidi oothite; suureba ootheysara Goday gido” yaagis.
2CH 20:1 Hessafe guye, Moo7abetinne Amooneti Ma7uunati Iyosaafexa bolla dendidosona.
2CH 20:2 Guutha asati Iyosaafexako yidi, “Maxine Abbaafe hefinthan de7iya Edoomepe daro olanchoti nena olanaw yidosona. Enti Hasasoon-Tamaaran de7oosona” yaagidi odidosona. (Hasasoon-Tamaari Engaadas hara sunthu.)
2CH 20:3 Iyosaafexi yayyida gisho Godaa oychanaw qofa qachis; Yihuda biitta ubban xooma awaajis.
2CH 20:4 Yihuda asa ubbay Godaape maado koyanaw shiiqidosona; enti Godaape maado koyanaw Yihuda katama ubbaafe yidosona.
2CH 20:5 Iyosaafexi, Yihudanne Yerusalaame shiiquwa giddon, xoossaa keethan de7iya ooratha dabaaba sinthan eqis.
2CH 20:6 Ba qaala dhoqu oothidi, “Abeeti Godaw, nu aawata Xoossaw, salon de7iya Xoossay nena gidikii? Sa7an de7iya kawotethata ubbaa haarey nena. Gitatethinne wolqi ne kushen de7iya gisho neera eqetanaw danda7ey baawa.
2CH 20:7 Abeeti nu Xoossaw, kase ha biittan de7iya asaa, Isra7eele sinthafe yedethada ne laggiya Abrahaame zerethaas merinaw immiday nena gidikii?
2CH 20:8 Enti ha biittan de7idosona; yan ne sunthaas keethe keexidi,
2CH 20:9 ‘Nu bolla iita metoy woyko oli woyko gadoy woyko koshi gakiko, ne sunthay de7iya ne keethaa sinthaninne ne sinthan eqidi, nu metuwan neeko waassana. Ne nu waasuwa si7ada nuna ashshana’ yaagidosona.
2CH 20:10 “Heko, ha77ika, Isra7eele asay Gibxefe keyida wode, enta biitta olonna mela oothada enta dhaysona mela diggida Amooneti, Moo7abetinne Sayreti ha biittan de7oosona.
2CH 20:11 Nu oothidobas enti nuus zaaridaba be7a. Ne nuus immida laata biittafe enti nuna yedethanaw yidosona.
2CH 20:12 Abeeti nu Xoossaw, ne enta pirdikii? Nuna olanaw yida ha daro olanchotara oletanaw nuus wolqi baawa. Nuuni oothanaba eroko; shin nu ayfeti nena xeelloosona” yaagis.
2CH 20:13 Yihuda asa ubbay banta naytaranne banta machetara shiiqidi Godaa sinthan eqidosona.
2CH 20:14 He wode Zakariyasa na7ay Yahazi7eeli shiiquwa giddon eqidashin Godaa Ayyaanay iya bolla wodhis. Zakariyasi Banaya na7a; Banayi Yi7eela na7a; Yi7eeli Mataana na7a; Mataani Leewe kochenne Asaafa yara.
2CH 20:15 Godaa Ayyaanay Yahazi7eela bolla wodhin, “Kawaw Iyosaafexa, Yihudaninne Yerusalaamen de7iya asaw, ubbay si7ite! Goday hintena yaagees. ‘Ha daro olanchota gaason yayyofitenne dagammopite. Olay hintebaa gidonashin Xoossaba.
2CH 20:16 Wonto enta bolla keyidi Xiixa geetetiya bessaa pude keyishin Yiru7eela mela biittan de7iya zangaara wursethan hinte enta demmana.
2CH 20:17 Ha olaa oletey hintena gideketa. Yihudanne Yerusalaame asaw, hinte bessaa bessaa oykidi minnidi eqite. Goday hintena ashshiya ashuwa be7ite. Yayyofite; dagammofite; wonto enta bolla keyite; Goday hintera gidana’ ” yaagis.
2CH 20:18 Iyosaafexi som7o sa7a gathidi goyinnis; Yihuda asa ubbay Yerusalaamen de7iya asa ubbay Godaa sinthan kundidi goyinnidosona.
2CH 20:19 Qahaatanne Qore kochaafe guutha Leeweti eqidi banta qaala dhoqu oothidi, Godaa Isra7eele Xoossaa galatidosona.
2CH 20:20 Enti wonta guura dendidi Tequhe mela biitta bidosona. Enti keyida wode Iyosaafexi dendi, “Yihudaninne Yerusalaamen de7iya asaw taani geysa si7ite. Godan, hinte Xoossan ammanetite; hinte minnana; nabeta ammanite ubbay hintew injetana” yaagis.
2CH 20:21 Iyosaafexi asaara zoretidaape guye, “Godaa galatite, iya siiqoy merinaasa” yaagidi yexishenne iya geeshsha bonchuwa sabbishe olanchota sinthara biya asata shuumis.
2CH 20:22 Enti mazmure yethinne galata doomida wode Yihuda olanaw yida Amooneta bolla, Moo7abeta bollanne Sayreta bolla Goday dagama yeddis.
2CH 20:23 Amoonetinne Moo7abeti Sayreta bolla dendidi, enta kumethi dhaysidosona. Enti Sayreta dhaysidaape guye banta giddon issoy issuwa dhaysidosona.
2CH 20:24 Yihuda asay mela biittan de7iya olanchota be7anaw yida wode banta morketi de7iya bessaa be7idosona. Enta ahay biittan zin7idaysa demmidosona; entafe issi asika kessi ekibeenna.
2CH 20:25 Hessafe guye, Iyosaafexinne iya asay di7o ekanaw bidi shinqe, ola miishe, ma7otanne hara al7o miisheta demmidosona. Shin di7o ubbaa efanaw danda7ibookona; di77idabay daro gidida gisho shiishanaw heedzu gallas ekis.
2CH 20:26 Enti oyddantho gallasan Baraka Zangaaran shiiqidi Godaa galatidosona. Hessa gisho he bessaa “Anjo Zangaara” yaagidi sunthidosona.
2CH 20:27 Hessafe guye, Yihuda asaynne Yerusalaame asa ubbay Iyosaafexi kaalethin, ufaysan Yerusalaame simmidosona.
2CH 20:28 Enti Yerusalaame gakidi diithara, maasinqoranne zayera Xoossa keethi gelidosona.
2CH 20:29 Isra7eele morketa Goday olidaysa biittan de7iya kawotethati ubbay si7ida wode yayyidosona.
2CH 20:30 Yaatidi Xoossay Iyosaafexas ubba baggara shempo immida gisho iya kawotethay sarotethi demmis.
2CH 20:31 Iyosaafexi Yihudan kawotiya wode iya laythi hastamanne ichasha; I Yerusalaamen laatamanne ichashu laythi kawotis. Iya aayiya Shiliha na7iw Azuubo.
2CH 20:32 Iyosaafexi ba aawa Asa ogiyan hemetis; I he ogiyape haddirsi ushachi gibeenna; Godaa sinthan suureba oothis.
2CH 20:33 Gidoshin, dhoqa goyinno bessata dhaysibeenna; asay buroo ba kumetha wozanan banta aawata Xoossaako simmibeenna.
2CH 20:34 Iyosaafexi oothidabay koyrope wursethi gakanaw Isra7eele kawota taarike maxaafan, Hanaana na7aa Iyyu taarike maxaafan xaafetis.
2CH 20:35 Issi wode Yihuda kawoy Iyosaafexi iitabaa oothida Isra7eele kawa Akaziyaasara issifetethi oothis.
2CH 20:36 Nam7ay zal7e markabe medhanaw zoretidosona; Exiyoon-Gabiran markabeta medhidosona.
2CH 20:37 Gidoshin Mareesa addey Dooda na7ay Alaazari, “Neeni Akaziyaasara issifetethi medhida gisho ne oothidaba Goday dhaysana” yaagidi Iyosaafexa bolla tinbite odis. Hessa gisho, markabeti meqidosona; enti zal7e oosuwa oothanaw danda7ibookona.
2CH 21:1 Hessafe guye, Iyosaafexi hayqidi ba mayzatara gahetis. Dawita kataman ba mayzata duufon moogetis. Iya bessan iya na7ay Iyoraami kawotis.
2CH 21:2 Iyoraama ishati Azaariyasa, Yi7eela, Zakariyasa, Azaariyasa, Mika7eelanne Safaaxa; haysati Yihuda kawa Iyosaafexa nayta.
2CH 21:3 Enta aaway Iyosaafexi entaw daro bira, worqa, al7o miishenne gimbetida katamata immis. Shin Iyoraami iyaw bayra na7a gidiya gisho kawotethaa iyaw immis.
2CH 21:4 Iyoraami ba aawa kawotetha ekidi minnida wode ba ishata ubbaanne issi issi Isra7eele halaqata mashshan wodhis.
2CH 21:5 Iyoraami kawotiya wode iyaw laythi hastamanne nam7a; Yerusalaamen hospun laythi kawotis.
2CH 21:6 Iyoraami Akaaba na7iw ekida gisho Akaaba soo asay hemetidaysada kase Isra7eele kawota ogiyan hemetis; Godaa sinthan iitabaa oothis.
2CH 21:7 Gidoshin, Goday kase Dawitara caaqida caaquwa gisho Dawita kochaa dhaysanaw koybeenna. Dawita kochay merinaw kawotana mela Goday iyaw caaqis.
2CH 21:8 Iyoraama kawotetha laythan, Edoome asay Yihuda kawa bolla makallidi bantaw kawo kawothidosona.
2CH 21:9 Hessa gisho, Iyoraami toora moconatanne para gaareta ekidi Edoome olanaw bis. Edoome asay iyanne iya para gaareta halaqata olidosona. Shin Iyoraaminne iya asay qamma dendidi baqatidosona.
2CH 21:10 He wodepe doomidi hachi gakanaw Edoome asay Yihuda asaas haaretibookona. Iyoraami Godaa, ba aawata Xoossaa aggida gisho Libina asay he wode Yihuda kawa bolla makallidosona.
2CH 21:11 Iyoraami Yihuda gezze biittan dhoqa goyinno bessata giigisis; Yerusalaamen asaa laymatana mela oothis; Yihuda asaaka balethis.
2CH 21:12 Nabey Eeliyaasi Iyoraamas dabdaabe haysada yaagidi xaafis; “Goday, ne aawa Dawita Xoossay, ‘Neeni ne aawa Iyosaafexa woyko Yihuda kawa Asa ogiyan hemetanaysa aggada,
2CH 21:13 Isra7eele kawota ogiyan hemetadasa. Akaaba soo asay oothidaysada Yihudaninne Yerusalaamen de7iya asay eeqa goyinnana mela oothadasa. Qassi neepe lo77iya, ne aawa soo asaa, ne ishata wodhadasa.
2CH 21:14 Hessa gisho, Goday ne asaa, ne nayta, ne machetanne new de7iya ubbaa wolqaama gadon shocana.
2CH 21:15 Nena maraace hargey oykin, maraacey kare keyana gakanaw ne iita saketana.’ ”
2CH 21:16 Goday Filisxeemetanne Tophe matan de7iya Arabeta Iyoraama olana mela denthethis.
2CH 21:17 Enti Yihuda bolla dendidi kawo gadhon de7iya miishe ubbaa, kawa adde naytanne iya macheta di77idosona. Qassi, Iya nayta ubbaafe kaalo gidida Akaziyaasape attishin, hara issi na7ika attibeenna.
2CH 21:18 Hessafe guye, Goday paxanaw danda7onna maraace hargen Iyoraama shocis.
2CH 21:19 Nam7u laytha giddon hargey iya bolla goobis; iya maraacey kare keyis; I iita saketidi hayqis. Iya moogiya wode asay kase mayzatas oothidaysada iya bonchoos mithi dooridi tama eethibookona.
2CH 21:20 Iyoraami kawotiya wode iyaw laythi hastamanne nam7a; I Yerusalaamen hospun laythi kawotis. I hayqiya wode oonika azzanibeenna. Iyoraami Dawita kataman moogetisipe attishin, kawota duufon moogetibeenna.
2CH 22:1 Arabetara yida pangati, Iyoraama bayra nayta ubbaa wodhida gisho Yerusalaame asay Iyoraama na7aa, ubbaafe kaaluwa, Akaziyaasa iya bessan kawothidosona. Hessa gisho, Iyoraama na7ay Akaziyaasi enta bolla kawo gidis.
2CH 22:2 Akaziyaasi kawotiya wode iyaw laythi laatamanne nam7a. I Yerusalaamen issi laythi kawotis; iya aayiya Gotola, Zanbira na7aa na7a.
2CH 22:3 Akaziyaasi iitatethan baanada iya aayiya zorida gisho I Akaaba soo asaa ogiyan hemetis.
2CH 22:4 Iya aaway hayqidaape guye Akaaba soo asay iya zoriya gisho dhayana gakanaw Akaaba soo asaada ika Godaa sinthan iitabaa oothis.
2CH 22:5 Akaziyaasi Akaaba soo asaa zoriya kaallidi, Akaaba na7aa, Isra7eele kawa Iyoraamara issife Soore kawa Azaheela olanaw Galadan de7iya Raamota bis. Yan Soore asati Iyoraama caddidosona.
2CH 22:6 Iyoraami, Soore kawa Azaheelara oletida olan cadetida gisho paxanaw Izira7eele bis. Iyoraama na7ay, Yihuda kawoy, Akaziyaasi, cadetida Akaaba na7aa Iyoraama, oychanaw Izira7eele bis.
2CH 22:7 Akaziyaasi Iyoraama oychanaw bida buussaa, Xoossay Akaziyaasas hayqo gaaso oothis. Akaziyaasi Iyoraama soo gakida wode Akaaba kochaa dhaysana mela Goday doorida, Namisa na7aa Iyyu, mokanaw nam7ay keyidosona.
2CH 22:8 Iyyuy Akaaba kochaa bolla pirdaa poliya wode Yihuda halaqatanne Akaziyaasa maaddiya iya dabbota nayta demmidi wodhis.
2CH 22:9 Iyyuy Akaziyaasa koyishin Samaaren qosetidi de7iya bessaafe Iyyu asati demmidi iyako ehidi wodhidosona. “Ba kumetha wozanan Godaa koyida Iyosaafexa na7a” yaagidi moogidosona. Hessa gisho, Akaziyaasa soo asaape kawotanaw danda7iya asi oonika attibeenna.
2CH 22:10 Akaziyaasa aayiya Gotola ba na7ay hayqidaysa si7ida wode dendada Yihuda kawa koche ubbaa dhaysasu.
2CH 22:11 Shin kawa Iyoraama na7iya Yosabeeta hayqanaw de7iya kawo nayta giddofe Akaziyaasa na7aa Iyo7aasa kaysada ekasu. Iyanne iya dichiyaro qol7an qosasu. Hessada oothada Gotola wodhonnaada kawa Iyoraama na7iya Akaziyaasa michiya kahiniya Yoodahe machiya Yosabeeta iya qosasu.
2CH 22:12 Gotola haariya wode ubban na7ay enta matan Xoossa keethan usupun laythi qosetidi de7is.
2CH 23:1 Laapuntha laythan Yoodahey minnidi mato halaqata Yirohaama na7aa Azaariyasa, Yihoona na7aa Yisma7eela, Obeeda na7aa Azaariyasa, Adaya na7aa Ma7iseyanne Zikira na7aa Elsafaaxa shiishidi entara caaqis.
2CH 23:2 Enti Yihuda ubbaa bidi yan de7iya Leewetanne Isra7eele yarata halaqata ubbaa ekidi Yerusalaame yidosona.
2CH 23:3 He shiiqida asa ubbay Xoossa keethan kawuwara caaqidosona. Yoodahey, “Kawa na7aa haysa be7ite! Goday kase Dawita kochaas qaala gelidaysada I kawoto.
2CH 23:4 Hinte oothanaw bessiyabay haysa; sambaata gallas Xoossa keethi geliya kahinetapenne Leewetape sikoy pengiya naagite.
2CH 23:5 Qassi sikoy kawo gadho naagite; sikoy qassi Baaso Pengiya naagite. Asa ubbay Xoossa keethaa dabaaban shiiqo.
2CH 23:6 Oothiya kahinetapenne Leewetape attishin, oonika Xoossa keethi gelopo. Enti geeshshi gidiya gisho gelonna; shin hara asa ubbay Godaa kiita naagishe Xoossa keethaafe karera de7o.
2CH 23:7 “Leeweti ola miishe banta kushen kushen oykidi kawa giddoyidi I keyiya wodenne geliya wode iyara gido. Xoossa keethi geliya oonika hayqo” yaagis.
2CH 23:8 Leewetinne Yihuda asa ubbay kahiney Yoodahey kiitida ubbaa oothidosona. Kahiney Yoodahey oosope keyanaw bessiya Leeweta kessidi yeddiboonna gisho, issoy issoy Sambaata gallas ooso geleysatanne oosope keyiya ba asaa ekis.
2CH 23:9 Kahiney Yoodahey Xoossa keethan de7iya, kawa Dawita toora, gitanne guutha gondalleta toora moconatas immis.
2CH 23:10 Kahiney Yoodahey asa ubbay ola miishe ba kushen kushen oykidi Xoossa keethaa dugehape pudeha gakanaw yarsho bessa mataninne Xoossa keethaa matan kawa yuushon eqanaada oothis.
2CH 23:11 Yoodahe kawa na7aa Iyo7aasa kare kessidi, iya huuphen kallacha wothis; kawota higge maxaafaa iyaw immidi kawoyis. Yodaaheynne iya nayti Iyo7aasa tiyidi, “Kawoy birata tuussu gido” yaagidosona.
2CH 23:12 Asay yexishenne kawa sabbishe ufayteysa Gotola si7ida wode asaako Xoossa keethi basu.
2CH 23:13 Kawoy pengen tuussa matan eqidaysa be7asu. Halaqatinne zaye punneysati kawa matan de7oosona; Yihuda asa ubbay ufaytishe zaye punnoosona; mazmure yexeysati sinthe aadhidi banta yetha miishen galatoosona. Gotola ba ma7uwa peedhada, “Haysi geellatethi! Haysi geellatethi!” yaagada waassasu.
2CH 23:14 Kahiney Yoodahey tora moconatako, “Gotola Xoossa keethan wodhopite; iyo salpiya giddora aathidi kare kessite; iyo ashshanaw koyiya asi de7iko wodhite!” yaagis.
2CH 23:15 Hessa gisho, enti iyo oykidi kawo gadho efidi Para Pengen iyo wodhidosona.
2CH 23:16 Kahiney Yoodahey ba huuphen, asa ubbaynne kawoy, Godaa asi gidanaw caaqidosona.
2CH 23:17 He wode asa ubbay Ba7aale Eeqa Keethi bidi, keethaa laallidi; yarsho bessatanne misileta tincherethidosona. Mataana geetetiya Ba7aala kahiniya yarsho bessata sinthan wodhidosona.
2CH 23:18 Yoodahey kahinetanne Leeweta Xoossa keetha oosuwas halaqa oothidi shuumis. Enta oosoy Muse higgiyan xaafetidaysadanne kawoy Dawiti odidaysada yarsho yarshanaysa. Qassi kawoy Dawiti odidaysada mazmure yexishe bonchanaysa.
2CH 23:19 Higgiyan xaafetidaysada tuna asi gelonna mela Yoodahey Xoossa keetha pengen naageysata wothis.
2CH 23:20 Yoodahey tora moconata, gita asata, deriya haareysatanne he biitta asa ubbaa ekidi kawa Xoossa keethafe duge ehis. Qommo bagga pengera kawo gadho gelidi kawa araata bolla utisidosona.
2CH 23:21 Yihuda asa ubbay ufaytis. Gotola mashshan hayqidaape guye katamay wopu gis.
2CH 24:1 Iyo7aasi kawotiya wode iyaw laythi laapuna; I Yerusalaamen oytamu laythi kawotis. Iya aaye sunthay Saabo; iya Barsaabe maccas.
2CH 24:2 Kahiney Yoodahey de7ida laytha ubban Iyo7aasi Godaa sinthan suureba oothis.
2CH 24:3 Yoodahey kawa Iyo7aasas nam7u macho immin enti iyaw adde naytanne macca nayta yelidosona.
2CH 24:4 Guutha wodepe guye Iyo7aasi Xoossa keethaa oorathanaw qopis.
2CH 24:5 Iyo7aasi kahinetanne Leeweta shiishidi, “Yihuda bidi hinte Xoossa keethaa laythan laythan oorathanaw Isra7eele ubbaafe miishe shiishite; hessa ha77i ellesidi oothite” yaagis. Shin Leeweti ellesidi oothibookona.
2CH 24:6 Hessa gisho, kawoy kahine halaqaa Yoodahe xeegidi, “Godaa aylley Museynne Yerusalaame asay Xoossa dunkaaniya oosuwas kessana mela kiitida giira Yerusalaamepenne Yihudape shiishana mela Leeweta ayis kiittabikii?” yaagis.
2CH 24:7 He wode iita maccase Gotola nayti Xoossa keethaa menthidosona. Enti Godaa keethan de7iya geeshsha miishe ubbaa ekidi Ba7aale goyinnanaw go7etidosona.
2CH 24:8 Kawoy Leeweta kiittin, enti saaxine giigisidi, Xoossa keethaa pengiyafe kare baggara wothoosona.
2CH 24:9 Xoossaa aylley Musey mela biittan de7ishe, Isra7eele asaape shiishana mela kiitida giira Godaas ehana mela Yihudaninne Yerusalaamen Leeweti awaajidosona.
2CH 24:10 Halaqatinne asa ubbay ufaytidi saaxiney kumana gakanaw giira yeggidosona.
2CH 24:11 Saaxiney Leeweta baggara kawo moorinnatako gakin saaxiniya giddon daro miishey dagaayetidaysa be7ida wode ubban kawo xaafeynne kahine halaqay yidi saaxiniyape miishe kessidi saaxiniya bessan zaari wothoosona. Enti ubba wode hessa oothidi daro miishe dagaayidosona.
2CH 24:12 He miishiya kawoynne Yoodahey Xoossa keetha oosuwa oothana mela shuumetida asatas immoosona. Enti Xoossa keethaa oorathanaw shuchu masseyisata, anaaxeta, biratanne naase birata oosanchota qaxaridosona.
2CH 24:13 Oosanchoti Xoossa keethaa minni oothidi kaseysada oorathidosona.
2CH 24:14 Xoossa keetha ooratho oosoy wurida wode palahida worqanne bira kawuwakonne Yoodaheko ehidosona. Enti he worqanne bira Xoossa keethaa gaatha oosuwas go7etiya miisheta, xuussa yarshos haniya saanetanne hara dumma dumma miisheta oothidosona. Yoodahey de7ida laythan ubban Xoossa keethan xuussa yarshoy yashetees.
2CH 24:15 Yoodahey daro cimmidi hayqis; I hayqiya wode iyaw laythi xeetanne hastama.
2CH 24:16 Yoodahey Isra7eelen Xoossasinne Xoossa keethaas lo77oba oothida gisho Dawita kataman kawota duufon iya moogidosona.
2CH 24:17 Yoodahey hayqidaape guye Yihuda halaqati yidi kawa sinthan gufannidosona; kawoy enta oysha si7is.
2CH 24:18 Enti Godaa banta mayzata Xoossa keethaa aggidi, Asheeri misiletanne eeqata goyinnidosona. Enti qohuwa gisho Yihuda bollanne Yerusalaame bolla Godaa hanqoy wodhis.
2CH 24:19 Enta zaarana mela Goday nabeta entako kiittis. Nabeti entaw markatidosona; shin enti si7onna ixidosona.
2CH 24:20 Hessafe guye, kahiniya Yoodahe na7aa Zakariyasa bolla Xoossaa Ayyaanay wodhin Zakariyasi asaa sinthan eqidi, “Xoossay, ‘Hinte Godaa kiitaa ayis menthetii? Hessi hintew iita. Hinte Godaa aggida gisho ika hintena aggis’ ” yaagees.
2CH 24:21 Enti iya bolla maqetidosona. Kawoy enta kiittin, Xoossa keethaa dabaaban, iya shuchan caddidi wodhidosona.
2CH 24:22 Kawoy Iyo7aasi Zakariyasa aaway Yoodahey iyaw oothida keehatetha hassayonna aggidi iya na7aa Zakariyasa wodhisis. Zakariyasi hayqishe, “Goday haysa be7o; I halo keyo” yaagis.
2CH 24:23 Laytha laamen, Soore olanchoti Iyo7aasa olanaw yidosona. Yihudanne Yerusalaame olidi halaqata ubbaa wodhidi, di7uwa ekidi Damasqon de7iya banta kawas yeddidosona.
2CH 24:24 Soore olanchoti taybon guutha; shin Yihuda asay Godaa banta aawata Xoossaa aggida gisho, Goday daro gidida enta olanchota Soore olanchota kushen aathidi immis. Enti haysada oothidi Iyo7aasa bolla pirdidosona.
2CH 24:25 Soore olanchoti iyape shaaketiya wode Iyo7aasi daro madunxidi de7ees. Kahiniya Yoodahe na7aa suuthaa gisho iya shuumati iya bolla maqetidi, I ba hiixan zin7idashin wodhidosona. I hayqin Dawita kataman moogidosona; shin kawota duufon iya moogibookonna.
2CH 24:26 Iyo7aasa bolla maqetidaysati Amoone maccase Simaati na7aa Zabadanne Moo7abe maccase Simariti na7aa Yozabaata.
2CH 24:27 Heko, Iyo7aasa adde nayta taarikey, iyaw odetida tinbiteynne I Xoossa keethaa oorathidabay kawota taarike maxaafan xaafetidi de7ees. Iyo7aasi hayqin iya bessan iya na7ay Amasiyaasi kawotis.
2CH 25:1 Amasiyaasi kawotiya wode iyaw laythi laatamanne ichasha; I Yerusalaamen laatamanne uddufun laythi kawotis. Iya aaye sunthay Yo7aado; iya Yerusalaame maccas.
2CH 25:2 Amasiyaasi Godaa sinthan suureba oothis; gidoshin, kumetha wozanape gidenna.
2CH 25:3 Amasiyaasi kawotethaa minthidaape guye ba aawa wodhida asata wodhis.
2CH 25:4 Gidoshin, enta nayta wodhibeenna. Enta nayta wodhonna aggida gaasoy, Goday, Muse higge maxaafan kiittidaysada, “Nayti oothida nagaraa gisho aawata wodhanaw bessenna; aawati oothida nagaraa gisho nayta wodhanaw bessenna. Asi ubbay ba oothida nagaran nagaran hayqanaw bessees” yaagida gishosa.
2CH 25:5 Amasiyaasi Yihuda asaa shiishidi banta aawata keethan keethan shaalaqatanne mato halaqata shuumis. I laatamu laythinne iyape bolla gidida Yihuda kochatanne Biniyaame kochata ubbaa taybidi gondallenne toora oykidi olas giigida heedzu xeetu mukulu dooretida asata demmis.
2CH 25:6 Isra7eelepe issi xeetu mukulu mino asata heedzu mukulunne oyddu xeetu kilo giraame biran Amasiyaasi shammis.
2CH 25:7 Shin issi Xoossa asi iyako yidi, “Kawaw, Goday Isra7eeleranne Efreemara doonna gisho, Isra7eele olanchoti neera boopo.
2CH 25:8 Enti tana minthana gada ne qopiko, xoonoynne xoonetethi Xoossaba gidiya gisho Xoossay nena ne morketa sinthan kawushana. Gidoshin, ne xalaala ba; minnada oleta” yaagis.
2CH 25:9 Amasiyaasi Xoossa addiyako, “Taani Isra7eele olanchotas qanxida biray ubbay waananee?” yaagis. Xoossa addey, “Goday new hessafe aathidi immanaw danda7ees” yaagis.
2CH 25:10 Hessa gisho, Amasiyaasi Efreemape yida olanchoti banta soo soo baana mela oothis. Enti Yihuda asaa bolla daro hanqetishe banta soo soo simmidosona.
2CH 25:11 Hessafe guye, Amasiyaasi bana minthidi, ba olanchota kaalethidi, Maxine zangaara bin iya olanchoti Sayrepe tammu mukulu asaa wodhidosona.
2CH 25:12 Hara tammu mukulu olanchota paxa di77idi, enta aafo doona efidi, aafuwan duge holin, garsan de7iya shuchan asa ubbay meqeretidi wuridosona.
2CH 25:13 Shin he wode Amasiyaasi baara olas boonna mela guye zaarida Isra7eele olanchoti Samaarepe Beet-Horona gakanaw de7iya Yihuda katamata olidosona. Enti Yihuda asaape heedzu mukulu wodhidi daro di7o ekidosona.
2CH 25:14 Amasiyaasi Edoometa wodhidi simmiya wode enta eeqata ekidi yis. Enta xoosse oothi essidi enta goyinnis; ixaane cuyisis.
2CH 25:15 Godaa hanqoy Amasiyaasa bolla eexin, Goday Amasiyaasako nabe kiittis. He nabey bidi, “Banta asaa ne kushepe ashshanaw danda7iboona xoossata ayis zore oychadii?” yaagis.
2CH 25:16 Nabey buroo oda bolla de7ishin kawoy, “Nena kawo zoriya asi oothiday oonee? Si77i ga! Ne ayis hayqanaw koyay?” yaagis. Nabey odaa essidi, “Ne haysa oothida gishonne ta zoriya si7onna ixida gisho Xoossay nena dhaysanaw qopidaysa ha77i eras” yaagis.
2CH 25:17 Hessafe guye, Yihuda kawoy Amasiyaasi bana zoriya asatara zoretidi, Isra7eele kawa Iyyu na7aa na7aa, Iyo7akaaza na7aa, Iyo7aasako ase kiittidi, “Haaya; ane nam7ay olaa gahetoos” yaagidi mandis.
2CH 25:18 Isra7eele kawoy Iyo7aasi Yihuda kawa Amasiyaasako haysada yaagis; “Libaanosen de7iya kinchotey Libaanosen de7iya zigaako kiita yeddidi, ‘Ne na7iw ta na7aas imma’ yaagis. Shin Libaanosen de7iya issi do7i yaara aadhishe kinchotiya yedhis.
2CH 25:19 ‘Taani Edoome xoonas’ gada ne wozanan otoron kumadasa. Shin ha77i ne son wopu gada utta; ne bollanne Yihuda bolla metonne dhayo ehanaw ayis denthethay?” yaagidi zaaris.
2CH 25:20 Shin Amasiyaasi si7onna ixis. Enti Edoome xoossata goyinnida gisho Xoossay enta, enta morketa kushen aathidi immanaw koyis.
2CH 25:21 Hessa gisho, Isra7eele kawoy Iyo7aasi olanaw keyin inne Yihuda kawoy Amasiyaasi Yihudan de7iya Beet-Sameesan ola gahetidosona.
2CH 25:22 Yihuda asay xoonetidosona; Yihuda asa ubbay baqatidi banta soo soo bidosona.
2CH 25:23 Kawoy Iyo7aasi Akaziyaasa na7aa na7aa, Iyo7aasa na7aa, Yihuda kawa Amasiyaasa Beet-Sameesan di77idi, Yerusalaame ehis. Efreema dirsa pengiyafe bidi maazane pengiya gakanaw de7iya oyddu xeetu wadha gidiya Yerusalaame dirsa gimbiya laallis.
2CH 25:24 Xoossa keethan de7iya worqanne bira ubbaa, Obeed-Edoomey naagiya miishiyanne kawo gadhon de7iya miishiya ubbaa ekis; qassi oythu oothidi oykida asata ekidi Samaare simmis.
2CH 25:25 Iyo7akaaza na7ay, Isra7eele kawoy Iyo7aasi hayqidaape guye Iyo7aasa na7ay, Yihuda kawoy Amasiyaasi tammanne ichashu laythi de7is.
2CH 25:26 Amasiyaasi oothidaba ubbay koyrope wursethi gakanaw Yihuda kawotanne Isra7eele kawota taarike maxaafan xaafetidi de7ees gidennee?
2CH 25:27 Amasiyaasi Godaa kaalo aggidaape guye enti iya bolla Yerusalaamen maqetidosona. I Laakiso baqatis. Shin enti iya geedo ase kiittin enti iya yan wodhidosona.
2CH 25:28 Iya aha paran caani ehidi, Dawita kataman iya mayzatara moogidosona.
2CH 26:1 Hessafe guye, Yihuda asa ubbay tammanne usupun laythi gidida Ooziyana iya aawa Amasiyaasa bessan kawothidosona.
2CH 26:2 Iya aaway Amasiyaasi hayqidaape guye I Eloota katamaa zaari keexis.
2CH 26:3 Ooziyani kawotiya wode iyaw laythi tammanne usupuna; I Yerusalaamen ishatammanne nam7u laythi kawotis. Iya aaye sunthay Yikoolo; iya Yerusalaame maccas.
2CH 26:4 Iya aaway Amasiyaasi oothidaysada ika Godaa sinthan suureba oothis.
2CH 26:5 Xoossas yashshi tamaarsida Zakariyasa wode I Xoossas ammanetidi oothis. Godaa I koyida wode ubban Xoossay iya anjis.
2CH 26:6 Ooziyani Filisxeemetara oletanaw keyidi Gaate katamaanne iya heera, Yabina katamaanne iya heeranne Ashdooda katamaanne iya heera laallis. Yaatidi Ashdooda katamaa mataninne Filisxeeme giddon katamata keexis.
2CH 26:7 Xoossay Ooziyaanas Filisxeemeta, Gurbaalan de7iya Arabetanne Ma7uuneta bolla xoono immis.
2CH 26:8 Amooneti Ooziyaanas giiridosona. Ooziyani daro minnida gisho iya sunthay Gibxe zawa gakanaw keyis.
2CH 26:9 Ooziyani Maazane Pengiya matan, Zangaara Pengiya mataninne dirsaa Maazaniya matan adussa gimbe shakota essidi, Yerusalaame baasuwa minthis.
2CH 26:10 Iyaw zuma xaphoninne denban daro mehey de7iya gisho he bessatan adussa gimbe shakota gimbidi daro haatha ollata bookis. I goshshe dosiya gisho dere bollanne aradda biittan iyaw daro goshshanchotinne woyney tokeysati de7oosona.
2CH 26:11 Ooziyaanas olaw giigida daro olanchoti de7oosona. Olanchota xaafey Yi7eelinne halaqay Ma7iseyi olanchota sunthaa mazgaben xaafidosona. Enta halaqay Hanaana.
2CH 26:12 Banta aawata soo asaa bolla halaqatiya mino asati nam7u mukulunne usupun xeeta.
2CH 26:13 Kawa morketara oletidi, banta kumetha wolqan kawa maaddanaw keyiya heedzu xeetanne laapun mukulunne ichashu xeetu olanchoti enta garsan de7oosona.
2CH 26:14 Ooziyani olanchota ubbaas gondalle, toora, birata barneexa, tiran ma7iya xurure, dongenne yambarsha shuchu giigisis.
2CH 26:15 Ooziyani Yerusalaamen de7iya hiillanchoti wochiya adussa gimbe shakotanne katamaa dirsa gimbe maazaneta bolla donge dukiya miishetanne gita gita shuchata pixiridi holiya miisheta oosisis. Xoossay iya maaddin I daro minnis; iya sunthay ubba bessan keyis.
2CH 26:16 Shin Ooziyani minnida wode otortis; otoroy iya kundethas gathis. Ooziyani Godaa ba Xoossa ammanetona ixidi ixaane cuyisiya bessan ixaane cuyisanaw Xoossa keethi gelis.
2CH 26:17 Kahiney Azaariyasinne mino gidida hospun tammu Godaa kahineti iya kaallidi gelidosona.
2CH 26:18 Kahineti iyako, “Ooziyana, neeni Godaas ixaane cuyisanaw bessaaka. Ixaane cuyisanaw bessey, geeyidi de7iya Aarona koche gidida kahineti xalaala. Ha geeshsha bessaafe keya! Neeni Godaa Xoossa bolla nagara oothadasa; neeni iyape boncho demmaka” yaagidosona.
2CH 26:19 Gidoshin, ixaane cuyisanaw ba kushen ixaane cuyisiya miishe oykidi de7ishe hanqetis. Ooziyani kahineta hanqetishe Xoossa keethan ixaane cuyisiya bessaa matan kahineta sinthan eqidashin, iya som7on baro hargey bentis.
2CH 26:20 Kahine halaqay Azaariyasinne hara kahineti ubbay iya xeelliya wode iya som7on baro hargey bentidaysa be7idi, ellesidi iya Xoossa keethafe kessidosona. Ika Goday iya seeridaysa erida gisho ellesidi yaape keyidi bis.
2CH 26:21 Kawoy Ooziyani hayqana gakanaw he hargiyara de7is; Xoossa keethi gelonna mela digetis. He hargiya gaason dumma keethan barka de7is. He wode iya na7ay Iyo7atami, kawo gadho aawatethan oykidi biitta haarees.
2CH 26:22 Kawoy Ooziyani oothida haraba ubbaa koyrope wursethi gakanaw Amoxe na7ay, nabey Isayaasi xaafis.
2CH 26:23 Ooziyani hayqidi ba mayzata gakis. Asay iya, “Baro hargen oyketidaysa” yaagidi, kawota duufuwa matan moogidosona. I hayqin iya bessan iya na7ay Iyo7atami kawotis.
2CH 27:1 Iyo7atami kawotiya wode iyaw laythi laatamanne ichasha; I Yerusalaamen tammanne usupun laythi kawotis. Iya aaye sunthay Yarusho; iya Saadoqa na7a.
2CH 27:2 Iya aaway Ooziyani oothidaysada Iyo7atami Godaa sinthan suureba oothis. Iya aaway Xoossa keethi gelidaysada I gelibeenna; gidoshin, asay nagara ooso aggibeenna.
2CH 27:3 Iyo7atami Xoossa keethi geliya Qommo Pengiya zaaridi oothis; Yerusalaame Ofeela deriya bolla daro ooso oothis.
2CH 27:4 Derey dariya Yihuda biittan katamata keexis; wori dariya zumaa bolla miixanne adussa gimbe shakota gimbis.
2CH 27:5 Iyo7atami Amoone kawuwara oletidi xoonis. Amooneti he laythi heedzu mukulunne oyddu xeetu kilo giraame bira, tammu mukulu kuntaale gidiya gistenne tammu mukulu kuntaale gidiya banga iyaw giiridosona. Amooneti nam7antho laythinne heedzantho laythi hessada iyaw giiridosona.
2CH 27:6 Iyo7atami Godaa ba Xoossaa sinthan suure hemetida gisho daro minnis.
2CH 27:7 Iyo7atama wode oosetida oosoti, I oletida olaynne I oothidaba ubbay Isra7eele kawotanne Yihuda kawota taarike maxaafan xaafetis.
2CH 27:8 Iyo7atami kawotiya wode iyaw laythi laatamanne ichasha; I Yerusalaamen tammanne usupun laythi kawotis.
2CH 27:9 Iyo7atami hayqidi ba mayzata gakis. Enti iya Dawita kataman moogidosona. Iya bessan iya na7ay Akaazi kawotis.
2CH 28:1 Akaazi kawotiya wode iyaw laythi laatama; I Yerusalaamen tammanne usupun laythi kawotis. Akaazi ba mayzay Dawiti suureba oothidaysada Godaa sinthan suureba oothibeenna;
2CH 28:2 I kase de7ida Isra7eele kawota ogiyan hemetis. Gujidi, Ba7aale eeqa goyinnanaw misileta medhis.
2CH 28:3 Hinooma Zangaaran ixaane cuyisis; Goday Isra7eele asaa sinthafe gooddidi kessida asaa, ixetida ogiya kaallidi ba adde nayta taman xuuggidi eeqas yarshis.
2CH 28:4 Akaazi dhoqa goyinno bessatan, dere huuphenne mitha kuya garsan yarsho yarshisinne ixaane cuyisis.
2CH 28:5 Hessa gisho, Goday iya Xoossay iya Soore kawa kushen aathidi immis. Enti iya xoonidi, iya asaape darota di77idi, Damasqo efidosona. Qassi, Goday iya Isra7eele kawa kushen aathidi immin, kawoy iita shochi shocis.
2CH 28:6 Yihuda asay Godaa, banta mayzata Xoossaa aggida gisho Ramala na7ay Paaquhey Yihuda olanchotape issi xeetanne laatamu mukulu mino asata issi gallas wodhis.
2CH 28:7 Efreema koche gidida mino olanchoy Zikiri, kawa na7aa Ma7iseya, kawo gadho shuuma Azirqaamanne kawa kaallidi de7iya Elqaana wodhis.
2CH 28:8 Isra7eele asay banta dabbotape nam7u xeetu mukulu maccasa, adde naytanne macca nayta di77idosona; enti daro di7uwa ekidi Samaare bidosona.
2CH 28:9 Godaa nabey Odeeda geetetiya addey Samaaren de7ees. Odeedi Samaare biya olanchotara gahetanaw keyidi, “Goday, hinte aawata Xoossay Yihuda hanqetida gisho hinte kushen aathidi immis. Shin hinte enta salo gakida hanqon wodhideta.
2CH 28:10 Hessi gidonna ixin Yihudanne Yerusalaame maccanne addiya hinte aylle oothanaw qopeeta. Yaatin, hinte entada hanidi Godaa, hinte Xoossaa bolla nagara oothideta gideketii?
2CH 28:11 Ha77i ta hintew odeysa si7ite. Godaa hanqoy hinte bolla wodhida gisho hinte di77idi, qachida hinte dabbota yeddite” yaagis.
2CH 28:12 Hessafe guye, Efreema kochaa halaqatape Yohaanana na7ay Azaariyasi, Mashilmoota na7ay Baraki, Salooma na7ay Yiziqanne Hadilaya na7ay Amaasi olape simmidaysata bolla dendidosona.
2CH 28:13 Enti “He di7etida asata nuuko ehopite! Kase nuuni Godaa bolla oothida nagaraanne naaquwa bolla haraa gujeeta. Koyroka nu nagaray daro gidiya gisho Isra7eele bolla Godaa hanqoy wodhis” yaagidosona.
2CH 28:14 Hessa gisho, olanchoti di7etida asatanne miishiya halaqata sinthaninne de7iya sinthan immidosona.
2CH 28:15 Sunthay haysafe qommon xaafetida asati dendi eqidi, di7etida asaa ekidosona. Enta giddon kallo de7eysatas di7uwape ma7onne caamma immidosona. Enta muzidosonanne ushshidosona; enta madunthaa bolla zayte tiyidosona. Daaburidaysata hare togisidi enta ishatako zambi de7iya Iyaarko katama efidosona. Hessafe guye, enti Samaare simmidosona.
2CH 28:16 He wode kawoy Akaazi Asoore kawoy bana maaddana mela kiita yeddis.
2CH 28:17 Edoome asati nam7antho Yihuda bolla dendidi, daro asaa di77idi efidosona.
2CH 28:18 Filisxeemeti zuma xaphoninne Yihuda gadhan, Negebe mela biittan de7iya katamata olidi Beet-Sameesa, Eloona, Gaderoota, Sooko, Timina, Gimizonne enta heeran de7iya gutata oykidi yan de7idosona.
2CH 28:19 Yihuda kawoy Akaazi Yihuda asaa nagara oosisida gishonne Godaas ammanetibona gisho Goday Yihuda kawushis.
2CH 28:20 Asoore kawoy Telgeltelfelisoori Akaazako yidi iya meto bessisipe attishin, maaddibeenna.
2CH 28:21 Akaazi Xoossa keethafe, kawo gadhopenne halaqatape darobaa ekidi, Asoore kawas immis. Shin hessi iya aykoka maaddibeenna.
2CH 28:22 Kawoy Akaazi un7etida wode Godaas ammanetona ixidi meto bolla meto gujis.
2CH 28:23 Bana xoonida Damasqo xoossatas yarshishe, “Soore kawota xoossati enta maaddida gisho tanaka enti maaddana mela taani entaw yarshana” yaagis. Shin he xoossati iyawunne Isra7eele asaa ubbaas dhayo ehidosona.
2CH 28:24 Akaazi Xoossa keetha miisheta ubbaa shiishidi tincherethis. Xoossa keethaa pengeta gordis. Yerusalaamen dumma dumma bessan baw yarsho bessi keexis.
2CH 28:25 Akaazi hara xoossatas ixaane cuyisanaw Yihudan de7iya katamata ubban dhoqa goyinno bessata medhis. Yaatidi Godaa, ba aawata Xoossa hanqethis.
2CH 28:26 Heko, Akaaza woden oosetida hara oosoti koyrope wursethi gakanaw Yihuda kawotanne Isra7eele kawota taarike maxaafan xaafetis.
2CH 28:27 Akaazi hayqidi, ba mayzata gakis. Yerusalaame kataman iya moogidosona; shin iya Isra7eele kawota duufuwan moogibookonna. Iya bessan iya na7ay Hizqiyaasi kawotis.
2CH 29:1 Hizqiyaasi kawotiya wode iyaw laythi laatamanne ichasha; I Yerusalaamen laatamanne uddufun laythi kawotis. Iya aaye sunthay Abu; iya Zakariyasa na7a.
2CH 29:2 Iya mayzay Dawiti oothidaysada Hizqiyaasi Godaa sinthan suureba oothis.
2CH 29:3 Hizqiyaasi ba kawotida koyro laythan, koyro ageenan, Xoossa keethaa pengeta dooyidi oorathis.
2CH 29:4 Kahinetanne Leeweta Xoossa keethaa doloha baggara de7iya dabaaban shiishis.
2CH 29:5 Entako, “Leeweto, ta odeysa si7ite! Hintenatethaa geeshshite; Godaa hinte aawata Xoossa keethaa geeshshite; Xoossa keethaa tunisiyaba ubbaa diggite.
2CH 29:6 Nu aawati ammanetibokona; Godaa, nu Xoossaa sinthan iitabaa oothidosona. Enti Godaa aggidi, Goday de7iya bessaafe banta som7o hara soo zaaridi, iyaw banta zokuwa zaaridosona.
2CH 29:7 Qassi, enti Xoossa keethaa pengeta gordidosona; xompeta toysidosona. Xoossa keethan Isra7eele Xoossaas ixaane cuyisibookona woyko xuussa yarsho yarshibookona.
2CH 29:8 Hessa gisho, Godaa hanqoy Yihuda bollanne Yerusalaame bolla wodhis. Hinte, hinte ayfen be7eysada Goday enta bolla yashshi, dagamanne hirga yeddis.
2CH 29:9 Hessa gaason, nu aawati mashshan hayqidosona; nu naytinne nu macheti di7etidosona.
2CH 29:10 Godaa hanqoy nu bollafe kichana mela taani Godaara, Isra7eele Xoossara caaqanaw ta wozanan qopas.
2CH 29:11 Ta nayto, hinte Godaa sinthan eqana mela, iyaw oothana mela, iya oosancho gidana melanne ixaane cuyisana mela Goday hintena doorida gisho qelli goopite” yaagis.
2CH 29:12 He bessan de7iya Leeweti haysafe kaallidi xaafetidaysata. Qahaata yaraape Amasaya na7aa Mahaatanne Azaariyasa na7aa Iyyu7eela. Maraara yaraape Abda na7aa Qiisanne Yihali7eela na7aa Azaariyasa. Gedisoona yaraape Ziima na7aa Iyo7akinanne Yo7aaha na7aa Edena.
2CH 29:13 Elxafaana yaraape Shimiranne Uzi7eela. Asaafa yaraape Zakariyasanne Mataana.
2CH 29:14 Amaana yaraape Yi7eelanne Same7a. Edotaame yaraape Shamayanne Uzi7eela.
2CH 29:15 Enti banta dabbota shiishidi bantana geeshidaape guye kawoy enta kiittidaysada Godaa higgiyada Xoossa keethi geeshsho doomidosona.
2CH 29:16 Hessa gisho, kahineti Godaa keethaa geeshshanaw gelidosona; Xoossa keethaa giddon de7iya tunaba ubbaa kessidi, Xoossa keethaa dabaaba ehidosona. Yaatin Leeweti ekidi Qediroona Zangaaran holidosona.
2CH 29:17 Enti koyro ageenan, koyro gallas Xoossa keethaa geeshsho doomidosona; he ageenan hospuntho gallas barandaa gakidosona. Hara hospun gallas Xoossa keethaa goyinnoos giigisidosona. Koyro ageenan tammanne usupuntho gallas enti oosuwa polidosona.
2CH 29:18 Leeweti kawa Hizqiyaasako gelidi, “Nuuni Xoossa keethaa, xuussa yarsho bessaanne yarsho bessan go7etiya miishe ubbaa, Godaa sinthan wothiya uythaa xarpheezanne he xarpheezan de7iya miisheta ubbaa geeshshida.
2CH 29:19 Kawoy Akaazi kawotidi de7iya wode Xoossas ammanetona ixidi efida miishe ubbaa nu zaaridi geeshshida. Heko, nu geeshshida miishe ubbay Godaa yarsho bessa sinthan de7ees” yaagidosona.
2CH 29:20 Kawoy Hizqiyaasi wontetha gallas wonta guura dendidi katamaa halaqata shiishidi, entara issife Xoossa keethi bis.
2CH 29:21 Enti kawotethaa gisho, Xoossa keethaa gishonne Yihuda asaa gisho, laapun kormata, laapun marazeta, laapun dorsa urgetanne laapun koleta nagara yarshos ehidosona. Aarona koche gidiya kahineti, Godaa yarsho bessan haysata yarshana mela kawoy kiittis.
2CH 29:22 Kahineti kormata shukidi suuthaa yarsho bessa bolla dharcidosona. Marazeta shukidi suuthaa yarsho bessa bolla dharcidosona. Dorsa urgeta shukidi suuthaa yarsho bessa bolla dharcidosona.
2CH 29:23 Nagara yarshos haniya koleta kawa sinthenne asaa sinthe ehidosona; enti ubbay banta kushiya deeshata bolla wothidosona.
2CH 29:24 Kawoy xuussa yarshonne nagara yarsho yarshana mela enta kiitida gisho kahineti deeshata shukidi Isra7eele asa ubbaa nagaray atto geetetana mela enta suuthaa yarsho bessan yarshidosona.
2CH 29:25 Goday kawas qoncethi be7iya Gaadenne nabiya Naatana baggara kawa Dawiti kiitida kiita Hizqiyaasi kaallidi, Leeweta, daala, diithinne maasinqo oythidi Xoossa keethan essis.
2CH 29:26 Leeweti Dawiti go7etiya yetha miisheta oykin, kahineti zaye oykidi eqidosona.
2CH 29:27 Enti xuussa yarsho yarshana mela Hizqiyaasi kiittis. Xuussa yarshoy yarshetiya wode zayeynne Isra7eele kawa Dawita yetha miishetan Godaas yethi doometees.
2CH 29:28 Xuussa yarshoy poletana gakanaw shiiqo ubbay Godaa goyinnees; yexeysati yexoosona; zaye punneysati punnoosona.
2CH 29:29 Kahineti yarshuwa polida wode kawoynne iyara de7iya asa ubbay gulbatidi goyinnidosona.
2CH 29:30 Kawoy Dawitinne qoncethi be7iya Asaafi xaafida galataa mazmure Godaas yexana mela kawoy Hizqiyaasinne halaqati Leeweta kiittidosona; Enti ubbay ufaysan galatishe gulbatidi goyinnidosona.
2CH 29:31 Hessafe guye, Hizqiyaasi, “Ha77i hinte hintena Godaas dummayideta. Yarshonne galata yarsho Xoossa keethi ehite” yaagis. Shiiqida asay yarshonne galata yarsho ehidosona; wozani dosida asay xuussa yarsho ehidosona.
2CH 29:32 He shiiqida asay ehida xuussa yarsho tayboy laapun tammu kormata, xeetu marazetanne nam7u xeetu dorsa urgeta; he ubbay Godaas xuussa yarsho.
2CH 29:33 Issifetetha yarshos usupun xeetu kormatanne heedzu mukulu dorsati shiiqidosona.
2CH 29:34 Gidoshin, xuussa yarsho ubbaa shukidi, galbaa qaaranaw de7iya kahineti taybon guutha gidiya gisho oosoy wurana gakanawunne hara kahineti bantana geeshshana gakanaw enta dabbo gidida Leeweti maaddidosona. Bantana geeshon Leeweti kahinetape aadhidi ammanetosona.
2CH 29:35 Xuussa yarshora shiiqiya issifetetha yarshuwa, modhuwanne ushsha yarshuwa gujiya wode xuussa yarshoy daro. Hessada hanidi Xoossa keethaa oosoy zaaridi doomis.
2CH 29:36 Hizqiyaasinne asa ubbay oosuwa ellesidi polana mela Xoossay enta maaddida gisho daro ufaytidosona.
2CH 30:1 Hizqiyaasi Godaa Isra7eele Xoossaa Paasika Ba7aale bonchanaw Yerusalaamen de7iya Xoossa keetha Isra7eele asaynne Yihuda asay yaana mela kiittis. Qassi, Efreema asaasinne Minaase asaas dabdaabe xaafis.
2CH 30:2 Kawoy, halaqatinne Yerusalaamen shiiqida asa ubbay Paasika Ba7aale nam7antho ageenan bonchanaw qofa qachidosona.
2CH 30:3 Gidiya kahineti bantana geeshshiboonna gishonne daro asay Yerusalaamen shiiqiboona gisho asay Paasika iya woden bonchanaw danda7ibookona.
2CH 30:4 He qofay kawanne shiiqida asaa ufaysis.
2CH 30:5 Hessa gisho, Godaa Isra7eele Xoossaa Paasika Yerusalaamen bonchanaw Barsaabepe doomidi Daane gakanaw de7iya Isra7eele asa ubbay yaana mela awaajanaw qofa qachidosona. Ha Paasika Baaliya kase higgiyan xaafetidaysada daro asi bonchibeenna.
2CH 30:6 Kawoy kiitan, kiitetidaysati, kawanne shuumata dabdaabiya ekidi Isra7eelenne Yihuda ubbaa bidosona. Dabdaabey haysada yaagees; “Isra7eele asaw, Asoore kawa kushepe attida hinteko simmana mela hinteka Godaako, Abrahaame, Yisaaqanne Isra7eele Xoossaako simmite!
2CH 30:7 Hinte kase be7idaysada enta bores aathidi immana gakanaw banta Godaas, banta aawata Xoossaas ammanetibona hinte aawatadanne hinte ishatada hanopite.
2CH 30:8 Hinte Godaas kiitetite; kase hinte aawatada si7ishe ixas goopite! Hintenatethaa Xoossas immite. Goday merinaw geeshshida Xoossa keethaa yiite. Godaa hanqoy hintefe simmana mela Godaa hinte Xoossaa goyinnite.
2CH 30:9 Hinte Godaako simmiko hinte ishatinne hinte nayti bantana di77idaysata sinthan maarota demmidi ha biitta simmana. Goday hinte Xoossay qadheteysanne maareysa gidiya gisho hinte iyako simmiko ba som7uwa hintefe qosenna” yaagis.
2CH 30:10 Kiitetidaysati Efreemanne Minaase biitta kanthidi Zabloona biitta gakanaw katamaape katamaa bidosona. Shin he katamatan de7iya asay enta kadhidi enta bolla miicidosona.
2CH 30:11 Gidoshin, Aseerape, Minaasepenne Zabloona guutha asati bantana kawushidi Yerusalaame yidosona.
2CH 30:12 Kawoynne kawa shuumati Godaa qaala maaran kiittidaysa polanaw issi wozanan gidana mela Xoossa kushey Yihuda bolla de7ees.
2CH 30:13 Nam7antho ageenan Uytha Ba7aale bonchanaw daro asi Yerusalaamen shiiqis.
2CH 30:14 Enti dendidi, Yerusalaamen de7iya yarsho bessata laallidi, ixaane cuyisiya miishe ubbaa diggidi, Qediroona Zangaaran yeggidosona.
2CH 30:15 Nam7antho ageenan, tammanne oyddantho gallasan Paasika dorsaa shukidosona. Bantana geeshshiboonna kahinetinne Leeweti yeellatidi, bantana geeshshidosona; xuussa yarsho Xoossa keethi ehidosona.
2CH 30:16 Xoossa asi gidida Muse wogaada Xoossa keetha giddon banta bessan bessan eqidosona; kahineti Leeweta kushepe ekida suuthaa dharcidosona.
2CH 30:17 Asaa giddofe daroti bantana geeshshiboonna gishonne dorsata shukonna mela digetida gisho Leeweti entaw Paasika dorsata shukidosona.
2CH 30:18 Efreemape, Minaasepe, Yisakoorapenne Zabloona kochaafe daro asay higgey kiitteysada bantana geeshshiboonnaba gidikoka Paasika Ba7aale gibira midosona. Gidoshin, Kawoy Hizqiyaas, “Abeeti keeha Godaw,
2CH 30:19 higgey kiitteysada haysati bantana geeshshonnaba gidikoka enti nena Godaa, banta aawata Xoossaa koyanaw banta wozanaa giigisida gisho ne entaw atto yaaga” yaagidi woossis.
2CH 30:20 Goday Hizqiyaasa woosa si7idi entaw atto gis.
2CH 30:21 Yerusalaamen shiiqida Isra7eele asay laapun gaalasi kumethi Uytha Baaliya gita ufaysan bonchidosona. Leewetinne kahineti yetha miishen yexishe gallas gallas Godaa galatoosona.
2CH 30:22 Hizqiyaasi Godaa goyinno wogaa kaaleson eretida Leeweta minthethis. Asa ubbay issifetetha yarsho yarshishe, Godaa banta aawata Xoossaa galatishe, mishenne uyishe ba7aale laapun gallas bonchidosona.
2CH 30:23 Shiiqoy hara laapun gallas gujidi ba7aale bonchanaw zore qachidi laapun gallas ufaytidi bonchidosona.
2CH 30:24 Yihuda kawoy Hizqiyaasi yarsho yarshanaw issi mukulu kormata, laapun mukulu dorsatanne deeshata asaas immis; qassi halaqati issi mukulu kormatanne tammu mukulu dorsata asaas immidosona; daro kahineti bantana geeshshidosona.
2CH 30:25 Yihuda asay, kahineti, Leeweti, Isra7eelepe yida asay, ba7aale bonchanaw yida bete asaynne Yihuda biittan de7ida asa ubbay ufaytidosona.
2CH 30:26 Dawita na7aa, Isra7eele kawa Solomone wodiyape doomin hachi gakanaw Yerusalaamen hessa mela ba7aaley bonchetidi eronna gisho Yerusalaamen asay daro ufaytidosona.
2CH 30:27 Kahinetinne Leeweti dendidi, Goday asaa anjana mela woossin Xoossay salon, ba de7iya geeshsha bessan enta woosa si7is.
2CH 31:1 Ba7aaley poletida wode he bessan de7iya Isra7eele ubbay Yihuda katamata bidi eeqa shuchata tincherethidosona; Asheera eeqa misileta qanxerethidosona. Yihudan, Biniyaamen Efreemaninne Minaase biittan de7iya dhoqa goyinno bessatanne yarsho bessata laallidosona. Enti he ubbaa dhaysidaape guye Isra7eele asa ubbay banta katamaanne banta soo soo simmidosona.
2CH 31:2 Hizqiyaasi kahinetanne Leeweta enta ooso maaran cugan cugan shaakidi essis. Enti xuussa yarshonne issifetetha yarsho Godaas yarshana melanne Xoossa keetha pengen Godaa galatananne sabbana mela oothis.
2CH 31:3 Godaa higgiyan xaafetidaysada wontanne omarsi xuussa yarshonne Sambaatan, ageena xeeroninne hara ba7aale gallasatan shiiqiya yarshuwas koshshiya meheta kawoy baape immees.
2CH 31:4 Godaa higgiyan xaafetidaysada kahinetinne Leeweti banta kumetha wodiya Godaa oosos peeshshana mela entaw bessiyaba immana mela Yerusalaame asaa kawoy kiittis.
2CH 31:5 Isra7eele asay kawa kiitaa si7ida wode kathaafe, woyne ushshafe, zaytiyape, eessafenne gaden kaxidabaape bayraa Godaas immidosona; bantaw de7iyaba ubbaafe asraata kessidosona.
2CH 31:6 Yihuda katamatan de7iya Isra7eele asaynne Yihuda asay banta mehetape, dorsatape asraata immidosona; Godaa, banta Xoossaas, dummayidi wothidaba ehidi dooridosona.
2CH 31:7 Enti heedzantho ageenan eho doomidi laapuntha ageenan polidosona.
2CH 31:8 Hizqiyaasinne halaqati dooretidaysa yidi be7ida wode enti Godaanne Godaa asi gidida Isra7eele anjidosona.
2CH 31:9 Hizqiyaasi dooretida imotaba kahinetanne Leeweta oychis.
2CH 31:10 Saadoqa yara gidida kahine halaqay Azaariyasi, “Banta imuwa Xoossa keethi eho doomin nu midi kallida. Goday ba asaa anjida gisho daro palahis” yaagis.
2CH 31:11 Hizqiyaasi Xoossa keethan minja kifileta giigisana mela kiittin asay giigisidosona.
2CH 31:12 Asraata, bayrabanne dummatida imotata ammanetethan kifileta gelsidosona. Leewe gidida Konaaney minja keetha bolla waanna gididi shuumetis. Iya ishay Same7i iyaw nam7antho gididi shuumetis.
2CH 31:13 Kawoy Hizqiyaasinne kahine halaqay Azaariyasi shuumin Konaanepenne Same7ape garsara oothiya Leeweti, Yi7eela, Azaaza, Nahaata, Asaheela, Yarmoota, Yozabaata, Eli7eela, Yismaaka, Mahaatanne Banaya.
2CH 31:14 Doloha bagga pengiya naageysata halaqay Leewey, Yimina na7ay, Qorey, asay dosan Xoossas ehida imuwa ekanawunne gishanaw shuumetis.
2CH 31:15 Kahineti de7iya katamatan gitape guuthu gakanaw de7iya banta ishatas ammanetidi, enta oosuwada oosuwada shaakidi immana mela Edeni, Miniyamini, Iyyasuy, Shama7ey, Amaareynne Sakani Qorepe garsara shuumetidosona.
2CH 31:16 Banta cugan cugan banta oosuwa gallas gallas Xoossa keethan ootheysatas laythi, heedzanne iyape bolla gidida adde ubbaas enta gishuwa shaakidi immidosona.
2CH 31:17 Banta aawata soo asan asan taybetida kahinetasinne laythi, laatamanne iyape bolla gidida Leewetas banta oosuwada oosuwada banta cugan cugan de7eysatas gishidosona.
2CH 31:18 Enti ammanetidi bantana geeshshida gisho enti banta yeletaa maaran taybetiya wode banta naytaranne machetara issife xaafetidosona.
2CH 31:19 Banta katamata yuushon de7iya hentha gadetan woyko hara katamatan de7iya kahine gidida Aarona sheeshas, enta giddon de7iya adde ubbaasinne Leeweta yeleta mazgaben xaafetidaysatas kathi gishanaw shuumetidosona.
2CH 31:20 Kawoy Hizqiyaasi Godaa ba Xoossaa sinthan lo77o, suurenne tuma gididaba Yihuda biitta ubban oothis.
2CH 31:21 Hizqiyaasi Xoossa keethas oothida ooso ubban, Xoossa higgiyanne wogaa naagidi Xoossaa ba kumetha wozanan koyida gisho iyaw ubbay injetis.
2CH 32:1 Kawoy Hizqiyaasi ammanetethan Godaas oothidaape guye Asoore kawoy Sanakreemi Yihuda biitta bolla dendis; xoonidi baw ekanaw qopidi gimbetida katamata teqis.
2CH 32:2 Sanakreemi Yerusalaame olanaw yidaysa Hizqiyaasi be7ida wode,
2CH 32:3 katamaape karera goggiya pulto haathata teqanaw ba shuumatanne toora moconata zore oychis; enti iya maaddidosona.
2CH 32:4 Daro asay shiiqidi, “Asoore kawoti yidi ayis haathe demmanee?” yaagidi pultotanne goggiya haathata teqidosona.
2CH 32:5 Hessafe guye, Hizqiyaasi minni oothidi, laaletida dirsa gimbe ubbaa zaaridi gimbis; iya bolla adussa shako shakis. He dirsa gimbiyafe kare baggara hara dirsa gimbe gimbis. Dawita kataman de7iya Miilo geetetiya bessaa minthis; daro ola miishenne gondalle giigisis.
2CH 32:6 Ola halaqata asaa bolla shuumis; enta ubbaa katamaa pengiya matan de7iya dabaaban shiishidi,
2CH 32:7 “Minnite; gencite; nuura de7eysi entara de7eysafe aadhiya gisho Asoore kawanne iya olanchota be7idi yayyofite, dagammopite.
2CH 32:8 Iyara asa wolqi de7ees; shin nuura Goday nu Xoossay nuna maaddanawunne nuus oletanaw de7ees” yaagidi enta minthethis. Yihuda kawoy Hizqiyaasi odan asay minetis.
2CH 32:9 Hessafe guye, Asoore kawoy Sanakreemi ba olanchotara Laakiso katamaa teqidi de7ishin, Yihuda kawa Hizqiyaasakonne Yerusalaamen de7iya Yihuda asaa ubbaako ba shuumata kiittis.
2CH 32:10 Asoore kawoy Sanakreemi, “Teqetida Yerusalaame kataman hinte oonan ammanetidi uttidetii?
2CH 32:11 Hizqiyaasi, ‘Goday, nu Xoossay nuna, Asoore kawa kushepe ashshana’ yaagidi cimmidi hintena koshaninne saamon wodhanaw hanees.
2CH 32:12 Dhoqa goyinno bessatanne yarsho bessata diggidi, Yihudanne Yerusalaame asaa, ‘Issi yarsho bessa sinthan goyinnite; yarshuwa iya bolla xuuggite’ yaagey Hizqiyaasa gidennee?
2CH 32:13 “Tanne ta aawati hara kawotethata bolla oothidaba hinte ereketii? Enta xoossati banta biitta ta kushepe ashshanaw danda7idonaa?
2CH 32:14 Ta aawati dhaysida ha kawotethata xoossata ubbaa giddon ba asaa ta kushepe ashshanaw danda7iday oonee? Yaatin, hinte Xoossay hintena ta kushepe waati ashshanaw danda7ii?
2CH 32:15 Hiza Hizqiyaasi hintena balethofo woyko hessada cimmofo. Hinte Hizqiyaasa ammanopite. Iya asaa ta kushepe woyko ta aawata kushepe ashshanaw danda7ida hara biitta xoossati woyko kawotethata xoossati baawa. Yaatin, hessi hinte Xoossay hintena ta kushepe ashshanaw waanidi danda7ii?” yaagidosona.
2CH 32:16 Sanakreema shuumati Godaa Xoossaa bollanne iya aylliya Hizqiyaasa bolla hara darobaa haasayidosona.
2CH 32:17 Sanakreemi Godaa Isra7eele Xoossaa cayidi, “Sa7a bolla de7iya kawotethata xoossati banta asaa ta kushepe ashshonaysada Hizqiyaasa Xoossayka ba asaa ta kushepe ashshanaw danda7enna” yaagidi dabdaabe xaafis.
2CH 32:18 Sanakreema shuumati katamaa oykanaw koyidi, dirsa gimbe bolla uttida Yerusalaame asaa yashisanawunne daganthanaw banta qaala dhoqu oothidi, Ibraawetho doonan enta bolla waassidosona.
2CH 32:19 Asa kushen oosetida, ha sa7an de7iya hara kawotethata xoossata bolla odetidaysada Yerusalaame Xoossaa bollaka odetidosona.
2CH 32:20 Kawoy Hizqiyaasinne Amoxe na7ay, nabey Isayaasi hessa gisho woosan salo Xoossaako pude waassidosona.
2CH 32:21 Xoossay ba kiitanchuwa kiittidi Asoore olanchotanne toora moconata dhaysis. Hessa gisho, Asoore kawoy kawuyidi, ba biitta simmis; I ba Xoossa keethaa gelida wode iya nayti iya he bessan mashshan wodhidosona.
2CH 32:22 Hessada oothidi, Goday Hizqiyaasanne Yerusalaame asaa Asoore kawa Sanakreema kushepenne hara morketa kushepe ashshis; enta shooro biittata ubbaafe enta shempisis.
2CH 32:23 Daro asay Godaas imota, Yihuda kawa Hizqiyaasas al7o miishe ehidosona. He wodepe doomidi kawotetha ubbay Hizqiyaasa daro bonchidosona.
2CH 32:24 He wode Hizqiyaasi hargidi, hayqanaw matidi Godaa woossis. Goday woosetidi iya pathanaw malla immis.
2CH 32:25 Shin Hizqiyaasi otortida gisho Goday iyaw keehida keehas bessiya zaaro immibeenna. Hessa gaason, iya bolla, Yihuda bollanne Yerusalaame bolla Godaa hanqoy yis.
2CH 32:26 Gidoshin, wursethan Hizqiyaasi ba otoruwa aggidi Yerusalaame asatara banatetha kawushis. Hizqiyaasi kawo gididi de7iya wode Godaa hanqoy enta bolla yibeenna.
2CH 32:27 Hizqiyaasas daro duretethinne bonchoy de7ees. Hizqiyaasi ba bira, worqaa, al7o shuchaa, sawo, gondallenne hara al7o miishe ubbaa minjiya keethi keexis.
2CH 32:28 Kathaa, woyne ushshaanne zayte wothiya keethe keexis. Mehe daranne dorsinne deeshi eqiya girbe oothis.
2CH 32:29 Xoossay iyaw daro aqo immida gisho baw katamata keexis; daro dorsenne mehe shiishis.
2CH 32:30 Qommo baggan de7iya Giyoone pulto haatha zeeridi, haathay wuloha baggan de7iya Dawita katamaako duge goggana mela oothiday Hizqiyaasa. Hizqiyaasi oothidaba ubban injetida asi.
2CH 32:31 Shin Yihuda biittan hanida malaalsiya oosotaba oychanaw Babiloonepe kiitetida asati Hizqiyaasako yida wode Goday iya paacanawunne iya wozanan de7iyaba eranaw iya yeddi bessis.
2CH 32:32 Hizqiyaasi oothida harabaynne iya keehatethay Amoxe Na7aa, nabiya Isayaasa qoncetha maxaafaninne Yihudanne Isra7eele kawota taarike maxaafan xaafetis.
2CH 32:33 Hizqiyaasi hayqidi, ba mayzatan gahetin qommo baggara de7iya Dawita kochata duufon iya moogidosona. I hayqin, Yihuda asaynne Yerusalaame asay iya bonchidosona. Iya bessan iya na7ay Minaasey kawotis.
2CH 33:1 Minaasey kawotiya wode iyaw laythi tammanne nam7a; I Yerusalaamen ishatammanne ichashu laythi kawotis.
2CH 33:2 Goday Isra7eele asaa sinthafe gooddidi kessida asaa, ixetida ogiya kaallidi Godaa sinthan iitabaa oothis.
2CH 33:3 Minaasey ba aaway Hizqiyaasi laallida, dhoqa goyinno bessata zaaridi keexis. Ba7aale yarsho bessatanne Asheera geetetiya eeqa misileta medhis; salo xoolintota goyinnis; entaw gufannis.
2CH 33:4 Goday, “Ta sunthay merinaw Yerusalaamen daana” yaagidi wothida Xoossa keethan Minaasey hara xoossatas yarsho bessi giigisis.
2CH 33:5 Xoossaa keethan de7iya nam7u dabaabatan salo xoolintoti goyinnetiya yarsho bessi giigisis.
2CH 33:6 Hinooma Zangaaran ba adde nayta taman xuuggidi yarshis. I bitanne murunno oothis; marothis; moytillenne tuna ayyaana zore oychis. Godaa sinthan daro iitabaa oothidi Xoossaa yiloyis.
2CH 33:7 Ba oothida eeqa misiliya efidi Xoossa keethan essis. He Xoossa keethay, Xoossay Dawitasinne iya na7aa Solomones, “Isra7eele zare ubbaa giddofe taani doorida Xoossa keethaninne Yerusalaamen ta suntha merinaw xeegisana.
2CH 33:8 Muse baggara ta Isra7eele asaa kiitida kiita, higgiyanne woga ubbaa enti naagiko, taani enta mayzatas immida biittafe enta shoddike” yaagis.
2CH 33:9 Shin Minaasey Yihuda asaanne Yerusalaame asaa balethidi, Goday Isra7eele asaa sinthafe dhaysida hara kawotethatape aadhiya iitaa oothana mela oothis.
2CH 33:10 Goday Minaasesinne iya asaas odis; shin enti iya si7onna ixidosona.
2CH 33:11 Hessa gisho, Goday Asoore olanchota enta bolla denthis. Enti Minaase sidhen dafo aathidi oykidosona; naase birata santhalaatan qachidi, Babiloone efidosona.
2CH 33:12 Minaasey un7etida wode Godaa ba Xoossaa maado woossis; ba aawata Xoossaa sinthan banatetha daro kawushis.
2CH 33:13 Xoossay Minaase woosa si7is; Yerusalaame simmidi zaaridi kawotana mela oothis. Goday tuma Xoossi gideysa Minaasey hessan eris.
2CH 33:14 Hessafe guye, Minaasey Giyoone Pultuwa matan de7iya bessaafe doomidi Ofeela deriyara kanthidi Molo Penge gakanaw kare baggara hara dirsa gimbe gimbis. He gimbey Dawita Katamaape doloha baggara de7iya zangaaran de7ees. Yihuda katamata ubban toora moconata wothis.
2CH 33:15 Allaga xoossatanne eeqa misileta Xoossa keethaafe diggis; Xoossa keethay de7iya zuma bollanne Yerusalaamen de7iya yarsho bessata laallidi he katamaape kare kessidi yeggis.
2CH 33:16 Minaasey Godaa yarsho bessi oorathidi issifetetha yarshonne galata yarsho yan yarshis. Yihuda asay Godaa Isra7eele Xoossaa goyinnana mela kiittis.
2CH 33:17 Asay dhoqa goyinno bessatan yarsho yarsheysa aggonna ixikoka, enti yarshey Godaa banta Xoossaa xalaalasa.
2CH 33:18 Minaase oothida harabay, ba Xoossaa woossida woosaynne Godaa Isra7eele Xoossaa sunthan nabeti iyaw odida qaalay Isra7eele kawota taarike maxaafan xaafetis.
2CH 33:19 Heko, Minaase woosaynne Xoossay iyaw zaarida zaaroy, I oothida nagaraynne Minaasey bana kawushanaape sinthe oothida dhoqa goyinno bessatabay, Asheeri eeqa misiletabaynne eeqataba ubbay nabeta taarike maxaafan xaafetis.
2CH 33:20 Minaasey hayqidi ba mayzata gakis; iya kawo gadhon moogidosona. Iya bessan iya na7ay Amoxey kawotis.
2CH 33:21 Amoxey kawotiya wode iyaw laythi laatamanne nam7a; I Yerusalaamen nam7u laythi kawotis.
2CH 33:22 Iya aaway Minaasey oothidaysada ika Godaa sinthan iitabaa oothis. Iya aaway Minaasey goyinnida eeqata goyinnis; entaw yarshis.
2CH 33:23 Shin iya aaway Minaasey banatetha kawushidaysada I banatetha Godaa sinthan kawushibeenna; Amoxey guji guji nagara oothis.
2CH 33:24 Amoxe shuumati iya bolla maqetidi, kawo gadhon iya wodhidosona.
2CH 33:25 Yihuda asay kawa Amoxe bolla maqetida ubbaa wodhidi, Amoxe bessan iya na7aa Iyosyaasa kawothidosona.
2CH 34:1 Iyosyaasi kawotiya wode iyaw laythi hospuna; I Yerusalaamen hastamanne issi laythi kawotis.
2CH 34:2 Iyosyaasi Godaa sinthan suureba oothis; ushachi haddirsi goonna ba mayza Dawita ogen hemetis.
2CH 34:3 I kawotida hospuntho laythan buroo yooga de7ishe ba mayza Dawita Xoossaa koyis. I kawotida tammanne nam7antho laythan Yihudaninne Yerusalaamen de7iya dhoqa goyinno bessata, Asheera eeqa misileta, massidi giigisida eeqatanne seerisidi oothida misileta dhaysis.
2CH 34:4 Iya kiitan, Ba7aale yarsho bessata laallidosona; entafe bollara de7iya ixaane cuyisiya miisheta tinchidosona. Asheera eeqa misileta, massidi giigisida eeqatanne seerisidi oothida misileta gaaccidi dhiille kessidosona; he dhiilliya enta goyinniya asata duufon laallidosona.
2CH 34:5 Iyosyaasi enta kahineta meqethaa he yarsho bessata bolla xuuggis; yaatidi, Yihudanne Yerusalaame geeshshis.
2CH 34:6 Minaase, Efreemanne Simoona biittafe bidi Niftaaleme biitta gakanaw de7iya katamatanne laaletida bessata ubbaa hessada oothidi geeshshis.
2CH 34:7 Iyosyaasi yarsho bessata laallis; Asheera eeqa misiletanne hara eeqa misileta tincherethis; Isra7eelen de7iya ixaane cuyisiya bessata qanxerethis. Hessafe guye, Iyosyaasi Yerusalaame simmis.
2CH 34:8 Iyosyaasi kawotida tammanne hospuntho laythan biittanne Xoossa keethaa geeshidaape guye, Xoossa keethaa oorathana mela Axala na7aa Safaana, Yerusalaame katamaa haariya Ma7iseyanne Iyo7akaaza na7aa waanna xaafiya Iyo7akina kiittis.
2CH 34:9 Enti kahine halaqaa Kalqiyaasako bidosona. Penge naagiya Leeweti Minaasepe, Efreemape, attida Isra7eele asaa ubbaafe Yihudape, Biniyaamepenne Yerusalaamen de7iya asaape kase shiishidi Xoossa keethi ehida miishiya Kalqes immidosona.
2CH 34:10 Enti Xoossa keethaa oorathiya halaqatas immin enti Xoossa keethaa oorathanaadanne zaaridi keexana mela oosanchotas immidosona.
2CH 34:11 Yihuda kawoti laallida Xoossa keethaa loythanaw mithinne masetida shuchu shammana mela anaaxetasinne gimbeysatas miishe immidosona.
2CH 34:12 Asay ammanetidi oosuwa polidosona. Enta bolla shuumetida oyddu Leeweti, Maraara yaraape Yahaatanne Abdiyu, Qahaata yaraape Masulaamanne Zakariyasa. Yetha miishe ka7i eriya Leeweti ubbay,
2CH 34:13 wolqa ooso oothiya asata bollanne dumma dumma ooso ootheyisata bolla shuumetidosona. Qassi hara Leeweti xaafe, halaqanne penge naageysata gididosona.
2CH 34:14 Enti Xoossa keethaa yida miishiya kessiya wode kahiney Kalqey Goday Muse baggara immida higge maxaafaa demmis.
2CH 34:15 Kalqey waanna xaafiya Saafanako, “Taani Xoossa keethafe higge maxaafaa demmas” yaagis. He maxaafaa Saafanas immis.
2CH 34:16 Safaani maxaafaa kawako efidi, “Ne shuumati ne kiitaa ubbaa oothidosona.
2CH 34:17 Xoossa keethan de7iya miishiya ekidi, oosuwa kaalliya halaqatasinne oothiya asaas immidosona” yaagis.
2CH 34:18 Waanna xaafey Safaani kawako, “Kahiney Kalqey taw maxaafaa immis” yaagidi maxaafaa kawa sinthan nabbabis.
2CH 34:19 Kawoy higge qaala si7ida wode azzanidi ba ma7uwa pheedhis.
2CH 34:20 Kawoy, Kalqe, Safaana na7aa Akqaama, Mikiyaasa na7aa Abdoona, waanna xaafiya Saafananne kawo shuuma Asaya haysada yaagidi kiittis;
2CH 34:21 “Bidi ta gishonne Isra7eeleninne Yihudan attida asata gisho ha bentida maxaafan xaafetidaba Godaa oychite. Ha maxaafan xaafetida ubbaa oothanaw nu mayzati Godaa qaala naagiboonna gisho Goday nu bolla ba hanquwa gussis” yaagis.
2CH 34:22 Kalqeynne kawoy kiitida asati Xoossa keethan ma7o naagiya Hasira na7a, Tiquwa na7a, Selema macho gidida Hulda geetetiya nabeko bidi iyo oychidosona. Iya Yerusalaamen nam7antho kataman de7awusu.
2CH 34:23 Hulda entako, “Goday Isra7eele Xoossay, ‘Hintena taako kiitida uraas haysada yaagidi odite’ yaagasu.
2CH 34:24 Goday haysada yaagees; ‘Yihuda kawa sinthan nabbabetida maxaafan xaafetida iita baadetha ubbaa ha bessan de7iya asaa bolla ehana hanayis.
2CH 34:25 Enti tana aggidi hara xoossatas ixaane cuyisidosona; enti banta kushen oothidaban tana hanqethidosona. Hessa gisho, ta hanqoy ha bessan tigetana; teqetenna.’
2CH 34:26 Godaa oychanaw hintena kiitida Yihuda kawako, ‘Goday Isra7eele Xoossay neeni si7ida qaalaba haysada yaagees;
2CH 34:27 Ha bessaaninne ha bessan de7iya asaa bolla Xoossay odetidaba neeni si7ida wode ne wozanay boshetin, ta sinthan nenatethaa kawushida gishonne ne ma7uwa peedhada ta sinthan yeekida gisho taani ne woosa si7as.
2CH 34:28 Heko, ta nena ne mayzata gathana; ne saro moogetana. Ta ha bessaaninne ha bessan de7iya asaa bolla ehana iitabaa ne ayfey be7enna’ yaagite” yaagasu. Enti bidi ha qaala kawas odidosona.
2CH 34:29 Hessafe guye, kawoy Iyosyaasi Yihuda cimatanne Yerusalaame cimata ubbaa shiishis.
2CH 34:30 Kawoy Xoossa keethi keyis; Yihuda asay, Yerusalaame asay, kahinetinne Leeweti, guuthafe gita gakanaw ubbay iyara issife keyidosona. Xoossa keethan bentida caaqo maxaafa qaala ubbaa kawoy entaw nabbabis.
2CH 34:31 Kawoy ba bessan eqidi, Godaa ogen hemetanawunne iya higgiya, iya wogaanne iya kiitaa ba kumetha wozanaaninne ba kumetha shempuwan naaganaw, qassi ha maxaafan xaafetida caaquwa oothanaw Godaa sinthan caaqis.
2CH 34:32 Yerusalaameninne Biniyaamen de7iya asa ubbay eqidi caaqana mela oothis; Yerusalaamen de7iya asay Xoossaa, banta mayzata Xoossaa caaqoy geysada oothidosona.
2CH 34:33 Iyosyaasi Isra7eele zawan de7iya ixetidaba ubbaa diggis. Isra7eelen de7iya ubbay Godaa, banta Xoossaa goyinnana mela oothis. Iyosyaasi de7ida laytha ubban enti Godaa, banta mayzata Xoossaa kaalo aggibokona.
2CH 35:1 Iyosyaasi Yerusalaamen Godaa Paasika Ba7aale bonchis. Koyro ageenan tammanne oyddantho gallas Paasika dorsaa shukidosona.
2CH 35:2 Iyosyaasi kahineta ooson shuumidi, enta Xoossa keetha ooson minthethis.
2CH 35:3 Bantana Godaas dummayida, Isra7eele ubbaa tamaarsiya Leeweta haysada yaagis; “Geeshsha Taabotiya Dawita na7ay, Isra7eele kawoy Solomoney keexida Xoossa keethan wothite. Hizape guye Taabotiya hinte hashen tookanaw koshshenna. Ha77i Godaas, hinte Xoossaasinne, iya asaa Isra7eeles oothite.
2CH 35:4 Isra7eele kawoy Dawitinne iya na7ay Solomoney xaafidaysada hinte cugan cuganinne hinte soo asan asan hintena giigisite.
2CH 35:5 Leeweti hinte dabbota, Isra7eele kochata maaddanaw hinte yaran yaran Xoossa keethan eqite.
2CH 35:6 Goday Muse baggara odida qaala Isra7eele asay, hinte dabboti naagana mela gigisite; hinteka hintenatethaa geeshshite Paasika dorsaa shukite” yaagis.
2CH 35:7 Iyosyaasi he bessan de7iya asaas, Paasika yarsho gidana mela 30,000 dorsenne deeshe immis; qassi 3,000 kormata immis. He ubbaa kawoy ba shaluwape immis.
2CH 35:8 Kawo shuumati banta shenen asaas, kahinetasinne Leewetas yarsho mehe immidosona. Xoossa keetha halaqati Kalqey, Zakariyasinne Yi7eeli Paasika yarshos gidiya nam7u mukulunne usupun xeetu marazeta, heedzu xeetu kormata immidosona.
2CH 35:9 Leeweta halaqati Konaaneynne iya ishati, Shamayeynne Natina7eeli, qassi Hashabi, Yi7eelinne Yozabaati Paasika yarshos haniya ichashu mukulu marazetanne koleta, ichashu xeetu kormata immidosona.
2CH 35:10 Paasika Baaliyas ubbabay giigis; kawa kiitan, kahineti banta bessan bessan, Leeweti banta cugan cugan eqidosona.
2CH 35:11 Paasika dorsati shuketidosona; Leeweti galbaa qaaridosona; kahineti suuthaa yarsho bessa bolla dharcoosona.
2CH 35:12 Muse maxaafan xaafetidaysada asay Godaas yarshana mela xuussa yarshos giigida dorsata ashuwa Leeweti banta soo asan asan shaaketidi uttida Isra7eele yaratas immidosona; kormataka hessada oothidosona.
2CH 35:13 Leeweti wogay kiitteysada shuketida Paasika dorsaa ashuwa taman caacidosona; geeshsha yarshota xaaron, otoninne disten doysidi, Isra7eele asa ubbaas eeson shaakidi shaakidi immidosona.
2CH 35:14 Hessafe guye, Leeweti bantawunne Aarona koche gidida kahinetas Paasika yarsho giigisidosona. Hessa enti oothiday, kahineti xuussa yarshonne modhuwa yarshishe qamma gakanaw oothiya gishosa.
2CH 35:15 Dawiti, Asaafi, Hemaaninne kawa nabey Editaami kase kiittidaysada Asaafa yarati, mazmure yexeysati banta bessan de7oosona. Penge naageysati banta bessan de7oosona. Enta dabboti, Leeweti entaw giigisida gisho enti banta oosuwa aggibokona.
2CH 35:16 Godaas oothiya ooso ubbay, Paasika Ba7aale bonchoynne xuussa yarshoy, kawoy Iyosyaasi kiittidaysada hanidi he gallas giigis.
2CH 35:17 Yan shiiqida Isra7eele asay he gallas Paasika Baaliya bonchidosona; enti Uytha Ba7aale laapun gallas bonchidosona.
2CH 35:18 Nabiya Sameela wodiyape doomin, hessa mela Paasika Ba7aaley Isra7eelen bonchetibeenna. Iyosyaasi, kahineti, Leeweti, Yihuda asay, Isra7eele asaynne Yerusalaame asay bonchidaysada Paasika Ba7aale kase Isra7eele kawotape bonchida issoyka baawa.
2CH 35:19 Paasika Ba7aaley Iyosyaasi kawotida tammanne hospuntho laythan bonchetis.
2CH 35:20 Iyosyaasi Xoossa keethaa giigisidaape guye Gibxe kawoy Naakoy Efraxiisa shaafa matan de7iya Karkamishan oletanaw bis. Iyosyaasi iya teqanaw keyis.
2CH 35:21 Shin Naakoy Iyosyaasako ase kiittidi, “Yihuda kawaw, tananne nena kachiyabay aybee? Taani yiday ta morketa olanaasafe attishin, nena olanaasa gidenna. Ta morketa taani eeson olanaada Xoossay tana kiittis. Xoossay nena dhaysonaada taara de7iya Xoossara eqeteysa agga” yaagis.
2CH 35:22 Gidoshin, Iyosyaasi Goday Nako baggara odidaysa si7onnanne guye simmonna ixis. Ba kawo ma7uwa laammidi Magido denban oletanaw bis.
2CH 35:23 Dongen dukeysati kawa Iyosyaasa caddin, kawoy ba aylletako, “Taani iita cadetida gisho tana olaa giddofe kessite” yaagis.
2CH 35:24 Iyosyaasa para gaariyape wodhisidi, iya para gaariyan wothidi, iya Yerusalaame ehidosona. I yan hayqidi ba mayzata duufon moogetis. Yihuda asaynne Yerusalaame asa ubbay iyaw yeekidosona.
2CH 35:25 Nabey Ermiyaasi Iyosyaasas zelelsi kessidi xaafis. Zeleelidi yeekiya maccasaynne adde ubbay hachi gakanaw Iyosyaasas qopoosona. He zelelsay Isra7eele Yeeho zelelsa maxaafan xaafetis.
2CH 35:26 Iyosyaasi oothida harabay, Godaa higgen maxaafan xaafetidaysa mela I oothida lo77o oosoynne
2CH 35:27 koyrope wursethi gakanaw I oothida ubbay, Heko, Isra7eele kawotanne Yihuda kawota taarike maxaafan xaafetis.
2CH 36:1 He biitta asay Iyosyaasa na7aa Iyo7akaaza dooridi iya aawa bessan Yerusalaamen kawothidosona.
2CH 36:2 Iyo7akaazi kawotiya wode iyaw laythi laatamanne heedza; I Yerusalaamen heedzu ageena kawotis.
2CH 36:3 Gibxe kawoy Iyo7akaaza kawotethaafe wothis; heedzu mukulunne oyddu xeetu kilo giraame biranne hastamanne oyddu kilo giraame worqa Yihuda asay giirana mela oothis.
2CH 36:4 Gibxe kawoy, Naakoy, Iyo7akaaza ishaa Eliyaqeeme Yihuda bollanne Yerusalaame bolla kawothidi iya sunthaa Iyo7aqeema yaagidi laammis. Yaatidi Iyo7aqeema ishaa Iyo7akaaza Gibxe efis.
2CH 36:5 Iyo7aqeemi kawotiya wode iyaw laythi laatamanne ichasha; I Yerusalaamen tammanne issi laythi kawotis. Ba Godaa Xoossaa sinthan iitabaa oothis.
2CH 36:6 Babiloone kawoy Nabukadanaxoori iya olidi, Babiloone efanaw naase birata santhalaatan qachis.
2CH 36:7 Qassi Nabukadanaxoori Xoossa keetha miishiya ekidi Babiloone efidi, ba kawo gadhon wothis.
2CH 36:8 Iyo7aqeemi oothida harabay, oothida tunabaynne oothida iitaba ubbay, Heko, Isra7eele kawotanne Yihuda kawota taarike maxaafan xaafetis. I hayqin, iya bessan iya na7ay Yo7akini kawotis.
2CH 36:9 Yo7akini kawotiya wode iyaw laythi hospuna; I Yerusalaamen heedzu ageenanne tammu gallas kawotis. I Godaa sinthan iitabaa oothis.
2CH 36:10 Laytha laamen, kawoy Nabukadanaxoori ase kiittidi, Yo7akinanne Xoossa keethan de7iya al7o miisheta iyara issife Babiloone ehis. Yaatidi iya aawa ishaa Sedeqiyaasa Yihudanne Yerusalaame bolla kawothis.
2CH 36:11 Sedeqiyaasi kawotiya wode iyaw laythi laatamanne issino; I Yerusalaamen tammanne issi laythi kawotis.
2CH 36:12 Ba Godaa Xoossaa sinthan iitabaa oothis; qassi Godaa qaala odiya nabiya Ermiyaasa sinthan bana kawushibeenna.
2CH 36:13 Sedeqiyaasi, ammanetana mela bana Xoossa sunthan caaqisida Nabukadanaxoora bolla makallis. Godaa, Isra7eele Xoossaako simmonna ixis; ba wozana Xoossa bolla minthis.
2CH 36:14 Qassi, Yihuda asaynne enta kaalethiya kahineti, ammanetona ixidosona. Enti hara kawotethati oothiya ixetida oosota kaallidi, Goday Yerusalaamen geeshshida Xoossa keethaa tunisidosona.
2CH 36:15 Goday, enta mayzata Xoossay ba asaasinne ba keethas qadhetiya gisho, ba nabeta entaw zaari zaari kiittis.
2CH 36:16 Shin Godaa hanqoy enta bolla wodhana gakanawunne enti kessi ekiyaso dhayana gakanaw Xoossaa kiitanchota qelqisidosona; iya qaala kadhidosona; nabeta bolla miicidosona.
2CH 36:17 Hessa gisho, Goday Kaldaaweta kawa enta bolla denthin, I enta yalaga addeta Xoossa keethan mashshan wodhis. I yalaga addetas woyko geela7otas woyko cimatas woyko ceegatas qadhetonna wursis. Xoossay enta ubbaa Nabukadanaxoora kushen aathidi immis.
2CH 36:18 Babiloone kawoy Xoossa keethan de7iya miisheta ubbaa, gitaanne guuthaa, Xoossa keethan de7iya buqura, kawo buquranne iya moorinnata buqura ubbaa ekidi Babiloone efis.
2CH 36:19 Enti Xoossa keethaa taman xuuggidi, Yerusalaame gimbe dirsaa laallidosona. Kawo gadhuwa taman xuuggidi, yan de7iya al7o miishe ubbaa dhaysidosona.
2CH 36:20 Mashshafe attidaysata kawoy di77idi Babiloone efis. Farse kawotethay dendana gakanaw enti iyawunne iya naytas aylle gididosona.
2CH 36:21 Goday nabiya Ermiyaasa baggara odida qaalay poletis. Wursethan biittay laapun tammu laythi asi bayna bessi gididi shempis. Biittay Sambaata shempo demmis.
2CH 36:22 Farse kawoy Qiroosi kawotida koyro laythan nabiya Ermiyaasa baggara Goday odidaysa polis. Farse kawoy Qiroosi ba kawotethan ubban haysada yaagidi awaajana melanne xaafidi wothana mela Goday iya ayyaana denthethis.
2CH 36:23 Farse kawoy Qiroosi, “Goday, salo Xoossay ha sa7aa kawotethata ubbaa taw immis. Qassi Yihudan de7iya Yerusalaamen ta iyaw Xoossa keethi keexana mela tana shuumis. Xoossa asi gidida oonika yaa boo. Goday iya Xoossay iyara gido” yaagis.
EZR 1:1 Farse kawoy Qiroosi kawotida koyro laythan, nabiya Ermiyaasa baggara Goday odidaba polis. Farse kawoy Qiroosi ba kawotethaa giddon haysada yaagidi awaajana melanne he awaajuwa xaafidi wothana mela Goday iya wozana denthethis.
EZR 1:2 Farse kawoy Qiroosi haysada yaagees; “Goday, salo Xoossay ha sa7aa kawotethata ubbaa taw immis. Qassi Yihudan de7iya Yerusalaamen iyaw keethe keexana mela tana shuumis.
EZR 1:3 Xoossa asi gidida oonika yaa boo; iya Xoossay iyara gido! Hinte Yihudan de7iya Yerusalaame bidi, yan Yerusalaamen Godaa, Isra7eele Xoossaa keethaa zaaridi keexo.
EZR 1:4 Dumma dumma biittan de7iya asa ubbay Ayhudetape attidaysati bira, worqa, dumma dumma miishetanne mehe immidi maaddo; qassi Yerusalaamen de7iya Xoossaa keethaa banta dosan immiya imota bolla gujidi immo” yaagees.
EZR 1:5 Hessafe guye, Yihudanne Biniyaame koche halaqati, kahinetinne Leeweti, qassi Xoossay enta wozanaa denthethida ubbay Yerusalaamen Godaa Xoossaa keethaa keexanaw baanaw dendidosona.
EZR 1:6 Qassi enta shooron de7eysatika banta dosan immidaba bolla gujidi, birapenne worqafe oosetida miisheta, hara dumma dumma miishetanne mehe immidi, enta maaddidosona.
EZR 1:7 Hessa bolla kawoy Qiroosi Nabukadanaxoori Yerusalaamepe efidi ba eeqa keethan wothida Godaa keethaa miisheta immis.
EZR 1:8 Farse kawoy Qiroosi miisheta wothiya keetha halaqaa Mitirdaaxu taybisidi, Yihuda haariya Sesabisaara kushen wothis.
EZR 1:9 Simmida miisheta tayboy haysa; hastamu worqa shaate, mukulu bira shaate, laatamanne uddufun pil7o,
EZR 1:10 hastamu worqaa kere, oyddu xeetanne tammu bira kere mukulu hara dumma dumma miishe.
EZR 1:11 Worqa miishetanne bira miisheta tayboy kumethi ichashu mukulunne oyddu xeeta; Seesabisari Babiloonepe Yerusalaame simmiya wode di7ope simmida asaara ekidi yis.
EZR 2:1 Babiloone kawoy Nabukadanaxoori di77idi, ba biitta efida asaape guye, Yerusalaamenne Yihuda banta katamaa katamaa simmida asay haysafe kaallidi xaafetidaysata.
EZR 2:2 Enta halaqati Zarubaabela, Iyyasu, Nahime, Saraya, Ra7ila, Mardikiyoosa, Bilisaana, Masefaara, Baguwaya, Rehuumanne Ba7ana. Di7ope simmida asaa tayboy haysa.
EZR 2:3 Faroosa yaray 2,172;
EZR 2:4 Safaaxa yaray 372;
EZR 2:5 Era yaray 775;
EZR 2:6 Iyyasunne Yo7aaba koche gidida Fahat-Moo7abe yaray 2,812;
EZR 2:7 Elama yaray 1,254;
EZR 2:8 Zata yaray 945;
EZR 2:9 Zakaya yaray 760;
EZR 2:10 Baana yaray 642;
EZR 2:11 Bebaya yaray 623;
EZR 2:12 Azgada yaray 1,222;
EZR 2:13 Adonqaama yaray 666;
EZR 2:14 Beguwaya yaray 2,056;
EZR 2:15 Adina yaray 454;
EZR 2:16 Hizqiyaasa koche gidida Axeera yaray 98;
EZR 2:17 Basaya yaray 323;
EZR 2:18 Yoora yaray 112;
EZR 2:19 Hasuma yaray 223;
EZR 2:20 Gibara yaray 95;
EZR 2:21 Beeteleme asay 123;
EZR 2:22 Naxoofa asay 56;
EZR 2:23 Anatoota asay 128;
EZR 2:24 Azmoota asay 42;
EZR 2:25 Qiriyat-Yi7aarima, Kafiranne Bi7eroota asay 743;
EZR 2:26 Ramanne Gib7a asay 621;
EZR 2:27 Mikmaasa asay 122;
EZR 2:28 Beetelenne Gaye asay 223;
EZR 2:29 Nabo asay 52;
EZR 2:30 Magibisa asay 156;
EZR 2:31 Nam7antho Elama asay 1,254;
EZR 2:32 Karima asay 320;
EZR 2:33 Looda, Hadidanne Ono asay 725;
EZR 2:34 Iyaarko asay 345;
EZR 2:35 Sana7a asay 3,630;
EZR 2:36 Di7ope simmida kahineta soo asaa tayboy haysa. Iyyasu koche gidida Yadaya yaray 973;
EZR 2:37 Imera yaray 1,052;
EZR 2:38 Paskora yaray 1,247;
EZR 2:39 Karima yaray 1,017.
EZR 2:40 Di7ope simmida Leeweta tayboy haysa; Hodawa koche gidida Iyyasunne Qadimeela yaray 74;
EZR 2:41 Asaafa koche gidida zammaareti 128;
EZR 2:42 Xoossa keetha penge naagiya Salooma, Axeera, Xalmoona, Aquba, Haxixanne Sobaya yaray 139.
EZR 2:43 Haysati di7ope simmidi, Xoossa keethan oothiya asaa yarata; Xiha yara, Hasufa yara, Xaba7oota yara,
EZR 2:44 Keraasa yara, Siha yara, Fadoona yara,
EZR 2:45 Libana yara, Agaba yara, Aquba yara,
EZR 2:46 Agaba yara, Samila yara, Hanana yara,
EZR 2:47 Gadalla yara, Gahaara yara, Raya yara,
EZR 2:48 Ra7asoona yara, Naqooda yara, Gasaama yara,
EZR 2:49 Oza yara, Faseeha yara, Besaya yara,
EZR 2:50 Asina yara, Me7unima yara, Nifuseesima yara,
EZR 2:51 Baqibuuqa yara, Haqufa yara, Harhura yara,
EZR 2:52 Basiluuta yara, Mahida yara, Harsa yara,
EZR 2:53 Barqoosa yara, Sisaara yara, Teema yara,
EZR 2:54 Nasiya yaranne Haxifa yara.
EZR 2:55 Haysati di7ope simmida Solomone oosanchota yarata; Soxaya yara, Sofeereta yara, Faruuda yara,
EZR 2:56 Ya7ila yara, Darqoona yara, Gadalla yara,
EZR 2:57 Safaaxa yara, Haxeela yara, Fakiraata yara, Haxaboyma yaranne Ama yara.
EZR 2:58 Di7ope simmidi, Xoossa keethan oothiya asa yaratinne Solomone aylleta yarata tayboy 392.
EZR 2:59 Haysafe kaalleysati qassi Talmela, Telaresa, Karuba, Adaananne Imera katamatape Yerusalaame simmidosona. Shin enti woyko enta aawati Isra7eele sheeshi gideysa erisanaw enti danda7ibookona.
EZR 2:60 Dalaya, Xoobbiyanne Naqooda yarati 652.
EZR 2:61 Kahinetape Abaya yaray, Aqoosa yaraynne Barzile yaray simmidosona. Barziley ha sunthan xeegetanaw danda7iday Galada biitta asi gidida Barzile na7iw macho ekida gishosa.
EZR 2:62 Haysati banta yeleta xaphuwa eranaw yeleta maxaafan koydosona, shin demmibookona. Hessa gisho, enti tuna geetetidi kahinetethan oothonna mela digetidosona.
EZR 2:63 Uriimeninne Tumiimen shaakidi pirdiya kahiney dendana gakanaw, enti geeshsha kathaafe maanaw danda7onaysa Ayhudeta ayseysi entaw odis.
EZR 2:64 Di7ope Yihuda simmida asaa tayboy kumethi 42,360.
EZR 2:65 Hessika 7,337 addenne macca aylleta gujunna de7ishina. Enta giddon 200 addenne macca zammaareti de7oosona.
EZR 2:66 Di7ope simmida asaa parati 736; baquloti 245;
EZR 2:67 gimaleti 435; hareti 6,720.
EZR 2:68 Enti Yerusalaamen de7iya Xoossa keetha gakida wode issi issi soo asaa halaqati Xoossa keethay kase ba bessan keexetana mela banta dosan imota immidosona.
EZR 2:69 Issoy issoy baw danda7ida mela Xoossa keetha oosuwas imota immis; imotay 500 kilo giraame worqa, 2,800 kilo giraame biranne 100 kahineta ma7o immidosona.
EZR 2:70 Hessafe guye, kahineti, Leewetinne guutha asay Yerusalaamen uttidosona; zammaareti, Xoossa keetha penge naageysatinne Xoossa keethan oothiya oosanchoti Yerusalaame yuushon de7iya katamatan uttidosona; attida asa ubbay banta katamatan katamatan uttidosona.
EZR 3:1 Laapuntha ageenan Isra7eele asay banta de7iya katamatape issi asi gididi Yerusalaame shiiqidosona.
EZR 3:2 Iyosadeqa na7aa Iyyasunne iyara oothiya kahineti, Salatiyaala na7aa Zarubaabelinne iya dabboti Xoossaa asi gidida Muse higgiyan xaafetidaysada xuussa yarsho yarshanaw, Isra7eele Xoossaas yarsho bessi giigisidosona.
EZR 3:3 He biittan de7iya asaa ixuwape dendoysan yayyikoka, yarsho bessi kase bessan keexidi, xuu yarsho Godaas ubba wode wontanne omarsi shiishidosona.
EZR 3:4 Kase xaafetidaysada Shaqara Ba7aale bonchidosona; xuussa yarsho issi issi gallas koshsheysada pacisonna yarshidosona.
EZR 3:5 Qassi ubba wode shiiqiya xuussa yarsho, ageena xeero yarshonne Godaa geeshsha ba7aaletan yarshiya yarsho ubbaa yarshidosona. Hesaa bollaka asay ba dosan Godaas immida imota ubbaa yarshidosona.
EZR 3:6 Xoossa keetha baasoy buroo doometonaba gidikoka Laapuntha ageenan koyro gallas enti Godaas xuussa yarsho shiisho doomidosona.
EZR 3:7 Hessafe guye, shuchu masseysatasinne anaaxetas miishe immidi ooso oykidosona. Farse kawoy Qiroosi entaw kiitida gisho, Libaanoosape ziga abba pinthidi, Yoophe ehanaw Sidoonanne Xiroosa asaas kathi, ushshinne zayte immidosona.
EZR 3:8 Enti Yerusalaame simmida nam7antho laythan nam7antho ageenan, Salatiyaala na7ay Zarubaabeli, Iyosadeqa na7aa Iyyasuynne enta dabboti, kahineti, Leewetinne di7ope simmida asa ubbay Xoossa keetha kase bessan keexo doomidosona. Qassi Xoossa keetha oosuwa aawatethan xeellana mela laatamu laythi gididaysatanne laatamu laythafe aadhida Leeweta shuumidosona.
EZR 3:9 Leewe koche gidida Iyyasu, iya naytanne iya dabboti, Hodawa soo asi gidida Qadimi7eelinne iya nayti issife gididi, Xoossa oosuwa oosisana mela aawatethi ekidosona; Enhadada koche gidida Leeweti enta maaddidosona.
EZR 3:10 Anaaxeti Xoossa keethaa baasuwa yegethi oykiya wode, kahineti banta ma7o ma7idi moyze oykidi, Asaafa koche gidida, Leeweti daala oykidi, Isra7eele kawa Dawita wogaa mela Godaa galatanaw eqidosona.
EZR 3:11 Enti Godaa galatishenne issoy issuwa kaali kaali mazmuren sabbishe, haysada yaagidi zammaridosona. “Goday keeha; Isra7eeles de7iya iya siiqoy merinaasa” yaagidosona. Xoossa keetha baasoy yegetiya gisho, asa ubbay banta qaala dhoqu oothidi ililishe Godaa galatidosona.
EZR 3:12 Shin kase Xoossaa keetha be7ida cima kahinetape, Leewetapenne kochata halaqatape daroti ha77i Xoossa keetha keexanaw yegetida baasuwa be7ida wode banta qaala dhoqu oothidi yeekidosona; harati qassi ufaytishe bonchidosona.
EZR 3:13 Oonika Ufaysa ililisaanne yeeho waasuwa shaakanaw danda7ibeenna; asay waassiya waasoy wolqaama gidiya gisho waasoy haahon si7etees.
EZR 4:1 Yihudasinne Biniyaames morke gidida asay, di7ope simmidaysati Godaas, Isra7eele Xoossas keethe keexeysa si7idosona.
EZR 4:2 Zarubaabelakonne Isra7eele yara halaqatako yidi, “Asoore kawoy Asiradooni nuna ha bessaa ehida gallasape doomidi, nuka hinte Xoossa goyinnoos, iyaw yarshoos. Hessa gisho, nuka hintera keexana” yaagidosona.
EZR 4:3 Shin Zarubaabeli, Iyyasuynne Isra7eele yara halaqati, “Nu Xoossaa keetha keexanaw nuusinne hintew gishoy baawa. Shin Farse kawoy Qiroosi kiittidaysada Godaa, Isra7eele Xoossa keetha nuuni nu xalaala keexana” yaagidosona.
EZR 4:4 Hessafe guye, he biittan de7iya asay, Yihuda asay Xoossa keetha keexonna mela ufaysi qanxisanawunne yashisanaw dendidosona.
EZR 4:5 Farse kawa Qiroosa laythafe bidi Daariyosa kawotetha gakanaw enti Yihuda asaa zoreta laallana mela ase shammidosona.
EZR 4:6 Arxekisisi kawotida wode Yihudanne Yerusalaame asaa mootanaw payle dooyidosona.
EZR 4:7 Arxekisisa kawotetha laythan, Bishilaami, Mitridaati, Xabeelinne enta bagga gididi, Farse kawa Arxekisisas dabdaabe xaafidosona; he dabdaabey Aramike pidaleninne doonan xaafetis.
EZR 4:8 Biitta aysiya Rehuuminne xaafey Simsayi Yerusalaameba haysada yaagidi, kawa Arxekisisas dabdaabe xaafidosona;
EZR 4:9 “Ha dabdaabey biitta aysiya Rehuumape, xaafiya Simsayape, Beteraplesape, Farsepe, Arkafe, Babiloonepe Suusapenne Elama biittan de7iya daynnatapenne biitta ayseysafe,
EZR 4:10 qassi gitanne bonchetida kawa Asnafaari di77idi Samaareninne Efraxiisa Shaafape hefinthan wothida asa ubbaafe xaafetis” yaagidosona.
EZR 4:11 Enta dabdaabey haysada yaagees; “Kawa Arxekisisas, Efraxiisa Shaafape hefinthan de7iya ne moorinatape yedetida dabdaabe.
EZR 4:12 “Kawaw, ne matape nuuko yida Ayhudeti Yerusalaame yidi, ha makallanne iita katamiw zaaridi keexo bolla de7eysa era. I gimbe dirsa oorathosona; I baasuwa yeggoosona; I xaphuwa minthoosona.
EZR 4:13 Hessa bolla qassi, ha katamiya keexetikonne I dirsa gimbey ooraxiko enti giiranne qaraxa qanxonnaysa era; kawo keethi geliya miishey guuxanaysa akeeka.
EZR 4:14 Nuuni kawoy shuumin ootheyisata gidiya gishonne kawoy kawuyishin be7anaw koyonna gisho haysa ne erana mela gidi odoos.
EZR 4:15 Hessa gisho, kase ne aawata taarike maxaafay koyetidi xeeleto; he xaafetidabape ha katamiya makallanne kawotasinne biittatas meto medhashe de7idaysa eranaw danda7aasa; hessa gaason iya laaletasu.
EZR 4:16 Ha katamiya keexetiyanne I dirsa gimbey ooraxiyaba gidiko, Efraxiisa Shaafape hefinthan de7iya biittay ne kushepe keydaysa era” yaagidosona.
EZR 4:17 Kawoy haysada giya zaaro entaw yeddis; “Biitta aysiya Rehuuma, xaafiya Simsaya, Samaareninne Efraxiisa Shaafape hefinthan de7iya entara issifida asaa saro gayis.
EZR 4:18 Hinte taw yeddida dabdaabey birshetidi nabbabetin si7as.
EZR 4:19 Ta kiitan, kase taarikey koyetidi xeeletiya wode, ha katamiya benipeka kawotas makallanne meto medhashe de7iya biitta gideysi eretis.
EZR 4:20 Yerusalaamen wolqaama kawoti kawotidosona; Efraxiisa Shaafape hefinthan de7iya Biittafeka he kawoti giiranne qaraxa ekidosona.
EZR 4:21 Hessa gisho, taani entaw ha kiita immana gakanaw, ha asati he katamiw keexeysa essana mela odite.
EZR 4:22 Hinte ha oda qelli goonna mela naagetite; kawotas meto darsanaw koshshenna” yaagidi kiittis.
EZR 4:23 Kawa Arxekisisa dabdaabey Rehuumas, xaafiya Simsayasinne entara de7iya ubbaas nabbabetida wode Yerusalaamen de7iya Ayhudetako ellesi bidi, enti keexeysa wolqan essidosona.
EZR 4:24 He wodepe doomidi Yerusalaamen de7iya Xoossaa keetha oosoy Daariyosi kawotida nam7antho laythi gakanaw eqis.
EZR 5:1 He wode nam7u nabeti Haggeynne Zakaryaasi Yihudaninne Yerusalaamen de7iya Ayhude asaas Isra7eele Xoossa sunthan tinbite odidosona.
EZR 5:2 Salatiyaala na7ay Zarubaabelinne Iyosadeqa na7ay Iyyasuy dendidi, Yerusalaamen de7iya Godaa keethaa zaaridi keexanaw doomidosona. Xoossaa nabetika enta maaddishe entara de7idosona.
EZR 5:3 He wode Efraxiisa Shaafape hefinthan de7iya biitta aysiya Tantani, Satarbuzaninne entara de7eysati Yerusalaame yidi, “Ha keetha hinte keexana mala hintew maata immiday oonee?” yaagidi oychidosona.
EZR 5:4 Qassi, “Ha keetha keexiya asata sunthay oonee?” yaagidi oychidosona.
EZR 5:5 Shin Xoossa ayfey Yihuda cimata bolla de7iya gisho, ha oday Daariyosako gakin, dabdaabey yaana gakanaw enta oonika ooso digibenna.
EZR 5:6 Efraxiisa Shaafape hefintha biitta aysiya Tantanaya, Satarbuzaninne entara oothiya kawa Daariyosas xaafida dabdaabey haysa.
EZR 5:7 Enti iyaw yeddida dabdaabey haysada yaagidi nabbabetees. Kawa Daariyosa, saroy new gido.
EZR 5:8 Nuuni Yihuda biittan de7iya gita Xoossaa keetha bidi be7idaysa kawoy ero. He Xoossa keethay gita shuchan keexetis; gimbe tuussati keyidosona; oosoyka gita akeekaninne eeson oosetishe de7ees.
EZR 5:9 “Nuuni, Ha keetha keexana mala hintew maata immiday oonee?” yaagidi cimata oychida.
EZR 5:10 Qassi entana kaalethiya asata sunthay ooneko xaafidi nena erisanaw enta oychida.
EZR 5:11 Enti haysada yaagidi zaaridosona: “Nuuni salonne sa7a Xoossaa aylleta; nuuni daro laythafe kase gita Isra7eele kawoy keexidi polida keetha zaaridi keexoos.
EZR 5:12 Nu aawati salo Xoossaa hanqethida gisho, I enta Babiloone kawa Nabukadanaxoora kushen aathidi immis. I ha keethaa laallis; asaa di77idi Babiloone biitta efis.”
EZR 5:13 “Shin Babiloone kawoy Qiroosi ba kawotida koyro laythan, Xoossaa keethaa zaari keexana mela awaajo kessis.
EZR 5:14 Nabukadanaxoori Yerusalaamen de7iya Xoossa keethaafe eki efidi, Babiloone biittan de7iya ba kawo gadhon wothida worqanne bira miishetaka Qiroosi zaaridi yeddis. He miisheti kawoy Qiroosi Yihuda biitta aysana mela doorida Sesabisaara kushen imetis.
EZR 5:15 Kawoy, ‘Ha miisheta eka efada Yerusalaamen de7iya Xoossa keethan wotha; Xoossa keethayka kase de7iya bessan keexeto’ yaagin,
EZR 5:16 Sesabisaari yidi, ‘Xoossa keethaa keexiya bessan Yerusalaamen baasis. I ha77i gakanaw wuribeenna; he wodepe doomidi, keexetishe de7ees’ ” yaagidosona.
EZR 5:17 “Hiza ha oday kawa ufaysiyaba gidiko, ane kawoy Qiroosi ha Xoossa keethaa Yerusalaamen keexana mela, tumaka awaajuwa kessidaako eranaw kase aadhida Babiloone kawota taarike mazgabey koyetidi xeeleto. Hessafe guye, kawoy ha oda waatanaw qopidaako nuna eriso” yaagidi xaafidosona.
EZR 6:1 Hessa gisho, kawoy Daariyosa kiitan, Babiloone de7iya miishe wothiya keethan de7iya taarike mazgabeta koydosona.
EZR 6:2 Meedona awurajan Ahimata kataman issi xaatha maxaafi bentis; he maxaafan xaafetidabay haysada yaagees:
EZR 6:3 “Kawoy Qiroosi ba kawotida koyro laythan, Yerusalaamen de7iya Xoossaa keethaa gisho, haysada giya awaajo kessis. Xoossaa keethay yarsho shiishiya bessi gididi zaari keexeto; iya baasoyka yegeto. He keetha adussatethay usupun tammu wadha, dalgatethay usupun tammu wadha gido.
EZR 6:4 Heedzu toho gita shuchan yuushsho, issi toho mitha tuussati yuuyo. Hessas koshshiya miishe ubbay kawo shalo minjiya keethaafe imeto.
EZR 6:5 Nabukadanaxoori Yerusalaamen de7iya Xoossa keethaafe ekidi, Babiloone ehida Xoossa keetha worqanne bira miisheti banta bessaa guye Yerusalaame simmidi; Xoossaa keethan de7o” yaagis.
EZR 6:6 Hessafe guye, Daariyosi xaafida dabdaabey haysada yaagees. “Hinteno Efraxiisa Shaafape hefintha biitta aysiya Tatanaya, Satarbozinyanne entara ootheysato, ha Xoossa keethako shiiqopite.
EZR 6:7 Ha Xoossaa keetha oosuwas dhube gidopite. Ayhudeta halaqatinne Ayhude cimati Xoossa keetha kase bessan zaaridi keexo.”
EZR 6:8 Hessa bolla qassi, “Ha Ayhude cimati Xoossa keetha keexiya wode, enti oothiya oosoy eqonna mela entaw koshshiya miishe ubbaa Efraxiisa Shaafape hefintha biittafe shiishida kawa giira miishiyape entaw immana mela taani kiittas.
EZR 6:9 Yerusalaamen de7iya kahineti salo Xoossas xuussa yarsho yarshanaw koshshiya wofaano gidin, maraze gidin woyko dorsa urge gidin entaw immite. Qassi aybaka pacisonna enti koyiya giste, maxine, woynenne zayte entaw gallas gallas immite.
EZR 6:10 Hessa hinte immey enti salo Xoossaa ufaysiya yarsho yarshanaasanne kawuwasinne iya naytas woossanaasa.
EZR 6:11 Ha awaajuwa laammiya oonika de7iko, iya keethaa tuussaa shoddidi, he tuussaa bolla iya kaqo; iya keethayka pito yeggiya besse gido.
EZR 6:12 Ha kiita laammanaw woyko Yerusalaamen de7iya Xoossaa keethaa laallanaw kushe denthiya ay kawoy woyko asi gidin, ba sunthay xeegetana mela Yerusalaame doorida Xoossay iya dhayso. Taani Daariyosi haysa kiittas. Ha ubbay minotethan poleto” yaagis.
EZR 6:13 Hessafe guye, Efraxiisa Shaafape hefintha biitta aysiya Tatanaya, Satarbuzaninne entara oothiya ubbay kawoy Daariyosi kiittidaysada minotethan oothidi polidosona.
EZR 6:14 Ayhude cimati banta oosuwa aggonna oothidosona; qassi nabey Haggeynne Ido na7ay Zakaryaasi odida qaalan minetidosona. Isra7eele Xoossay kiittidaysada Farse kawoti Qiroosi, Daariyosinne Arxekisisi awaajidaysada Xoossa keetha keexidi wursidosona.
EZR 6:15 Daariyosi kawotida usupuntho laythan Adaare geetetiya ageenan heedzantho gallasan, Xoossaa keetha oosoy poletis.
EZR 6:16 Isra7eele asay, kahineti, Leewetinne di7ope simmida asa ubbay Xoossa keethaa anjisiya ba7aale ufaysan bonchidosona.
EZR 6:17 He ba7aaley bonchetiya wode enti issi xeetu korma, nam7u xeetu maraze, oyddu xeetu dorsa urgeta yarshidosona. Qassi nagara yarshos tammanne nam7u Isra7eele kochata taybon tammanne nam7u kole yarshidosona.
EZR 6:18 Muse Maxaafan xaafetidaysada, Yerusalaamen de7iya Xoossaa keethan oothana mela kahinetinne Leeweti enta maarada maarada wothidosona.
EZR 6:19 Di7ope simmida asay koyro ageenan tammanne oyddantho gallas Paasika Ba7aale bonchidosona.
EZR 6:20 Kahinetinne Leeweti bantana geeshshidosona; enti ubbay wogada geeydosona. Leeweti di7ope simmida ubbaas, kahinetasinne bantaw Paasika dorse shukidosona.
EZR 6:21 Di7ope simmida Isra7eele asaynne Ayhude gidonna asay oothiya tunatethaafe bantana shaakidi, Godaako, Isra7eele Xoossaako simmida asa ubbay Paasika midosona.
EZR 6:22 Goday Asoore kawa qofa laammidi Isra7eele Godaa, Xoossa keethaa keexidi polana mela maaddida gisho, enti laapun gallas Uytha Ba7aale ufaysan bonchidosona.
EZR 7:1 Daro wodepe guye, Farse kawua Arxekisisi kawotida wode Izira geetetiya issi asi de7is. Iziri Saraya na7a; Azaara na7a; Kalqe na7a;
EZR 7:2 Saluma na7a; Saadoqa na7a; Akxuuba na7a;
EZR 7:3 Amaare na7a; Azaara na7a; Marayoota na7a;
EZR 7:4 Zaraha na7a; Oza na7a; Buqa na7a;
EZR 7:5 Abisu na7a; Finihaasa na7a; Finihaasi Alaazara na7a; kahine halaqa Aarona na7a.
EZR 7:6 Haysi Iziri Babiloonepe bis. Goday, Isra7eele Xoossay immida Muse higgiya eriya asi. Godaa, Xoossaa kushey iya bolla de7iya gisho, I oychidaba ubbaa kawoy iyaw immis.
EZR 7:7 Kawoy Arxekisisi kawotida laapuntha laythan Isra7eele asaape guuthatara, kahineti, Leeweti, zammaareti, penge naageysatinne Xoossaa keetha oosanchoti Izirara issife Yerusalaame bidosona.
EZR 7:8 Kawoy kawotida laapuntha laythan ichashantho ageenan Iziri Yerusalaame gakis.
EZR 7:9 Xoossaa lo77o kushey iya bolla de7iya gisho koyro ageenan koyro gallassi Babiloonepe keyidi, ichashantho ageenan koyro gallas Yerusalaame gakis.
EZR 7:10 Iziri Godaa higgiya xanna7on, ooso bolla peeshoninne Isra7eele asaa iya wogaanne iya higgiya tamaarsanaw ba wozanaa giigisis.
EZR 7:11 Goday Isra7eeles immida higgiyanne wogga, loythi eriya kahinenne xaafe gidida Iziras kawoy Arxekisisi xaafida dabdaabey haysa.
EZR 7:12 “Kawota Kawa Arxekisisape, kahinenne salo Xoossa higge loythi eriya Iziras, saroy new gido!
EZR 7:13 “Ta kawotetha giddon de7iya Isra7eele asaape oonika, kahine woyko Leewe gidin, Yerusalaame baanaw koyiya asay neera baana mela taani kiittas.
EZR 7:14 Taaninne taara zorettiya laapun asati issife gididi, ne kushen de7iya Xoossaa higgiyada, bada Yihudaninne Yerusalaamen de7iya hanotethay ay meleko oychana mela nena kiittoos.
EZR 7:15 Yerusalaamen de7iya Isra7eele Xoossaas, taaninne taara zorettiya asati nu dosan immida worqanne bira imota ekada ba.
EZR 7:16 Hessa bolla qassi neeni Babiloone biitta kumethaafe demmida biraanne worqaa ubbaa, qassi Isra7eele asaynne kahineti Yerusalaamen de7iya banta Xoossaa keethas dosan immida imota ekada ba.
EZR 7:17 Ha miishiyan kormata, marazeta, dorsa urgetanne, katha yarshosinne ushsha yarshos koshshiyaba shammada, Yerusalaamen de7iya hinte Xoossaa keethan yarsho bessan yarsha.
EZR 7:18 “Hessafe palahida biraanne worqaa neeninne neera de7iya Ayhude gidida ne ishati hinte Xoossa shenen, hinte oothanaw koiyaba oothite.
EZR 7:19 Qassi nuuni hinte Xoossa keethaas, immida miisheta ubbaa Yerusalaame Xoossaa sinthan shiisha.
EZR 7:20 Hessafe harabay Xoossaa keethas koshshiyabay aybika de7iko, kawo miishe minjiya keethaafe ekanaw danda7aasa.
EZR 7:21 “Taani kawoy Arxekisisi Efraxiisa Shaafape hefinthan biittan de7iya miishe keethan aawatethay de7iya ubbatas ha kiita immas. Kahinenne Salo Xoossaa higgiya loythi eriya Iziri hintena oychiyabay ayba gidikoka iyaw immite.
EZR 7:22 Heedzu mukulunne oyddu xeetu kilo giraame bira, issi xeetu kuntaale giste, nam7u mukulu litiro woyne ushshi, nam7u mukulu litiro shamaho zaytenne koshshiya mela maxine iyaw immite.
EZR 7:23 Kawa bollanne kawa nayta kawotetha bolla hanqoy yoonna mela salo Xoossay ba keethas koyiyaba ubba immite.
EZR 7:24 Kahinetape, Leewetape, zammaaretape penge naageysatape, Xoossa keetha oosanchotapenne Xoossaa keetha giddon dumma dumma ooso oothiya asaape hinte giiranne qaraxa ekanaw hintew maati baawa.
EZR 7:25 “La Izira, neeni, new Xoossay immida cincatethan Efraxiisa Shaafape hefintha biittan de7iya ne Xoossaa higgiya eriya asaa bolla pirdana mela daynnatanne ayseysata shuuma. Higgiya eronna asi de7iko neeni enta tamaarsa.
EZR 7:26 Ne Xoossaa higgiyanne kawa higgiya kiitetonna oonika de7iko, I qadhey bayna hayqo woyko gadepe goodeto woyko iya shaloy bonqeto woyko qashon seereto” yaagis.
EZR 7:27 Yerusalaamen de7iya Xoossa keethaa haysada bonchetana mela kawa wozanan ha qofaa wothida Godaa, nu aawata Xoossaa galati gako!
EZR 7:28 Kawa, kawuwara zoreteysatanne iyara oothiya wolqaama halaqata sinthan ba teema taw immida Xoossaas galati gido! Godaa, ta Xoossaa kushey taara de7iya gisho, Isra7eele halaqatape eretidaysata doorada Yerusalaame eka baana mela I taw minotethi gidis.
EZR 8:1 Kawoy Arxekisisi kawotida wode taara issife Babiloone biittafe simmida soo asaa halaqati haysata;
EZR 8:2 Finihaasa yarape Gersoona, Itamaara yarape Daanela, Dawita yarape Sakana na7aa Haxusa,
EZR 8:3 Paroosa yarape Zakaryaasanne enta yeleta maaran xaafetida hara issi xeetanne ishatamu addeta.
EZR 8:4 Pahati-Moo7abe yarape Zaraha na7aa Eliho7enayanne iyara de7iya nam7u xeetu addeta.
EZR 8:5 Zata yarape Yahazi7eela na7a Sakananne iyara de7iya heedzu xeetu addeta.
EZR 8:6 Adina yarape Yoonataana na7aa Ebeedanne ishatamu addeta.
EZR 8:7 Elama yarape Gotola na7a Yishayanne iyara de7iya laapun tammu addeta.
EZR 8:8 Safaaxa yarape Mika7eela na7a Zibaadanne iyara de7iya hospun tammu addeta.
EZR 8:9 Iyo7aaba yarape Yi7eela na7a Abdiyunne iyara de7iya nam7u xeetanne tammanne hospun addeta.
EZR 8:10 Baana yarape Yosifiya na7a Salomitanne iyara de7iya issi xeetanne usupun tammu addeta.
EZR 8:11 Bebaya yaraape Bebaya na7aa Zakariyasanne iyara de7iya laatamanne hospun addeta,
EZR 8:12 Azgada yarape Haqaxaana na7a Yohaananne iyara de7iya issi xeetanne tammu addeta.
EZR 8:13 Adonqaama yarape wursethan simmidaysati, Elfalaxa, Yi7u7eela, Shamayanne entara de7iya usupun tammu addeta.
EZR 8:14 Bigiwaya yarape Utaya, Zakuranne entara issife hara laapun tammu addeta.
EZR 8:15 Taani Ahawako goggiya shaafa matan enta shiishas. Nuuni he bessan dunkaanidi, heedzu gallas takida. Taani he bessan de7iya asaanne kahineta taybiya wode Leewe yarape issi asika demmabike.
EZR 8:16 Hessa gisho, Alaazara, Ar7eela, Shamaya, Elnaatana, Yariba, Elnaatana, Naatana, Zakaryaasanne Masulaama geeteteysatanne cinca asi gidida Yoyaaribanne Elnaatana xeegas.
EZR 8:17 Enta Kasfiya geetetiya bessan Leewetas halaqanne Xoossa keetha oosancho gidida Adosinne iya dabotas odanaba akeekisada nu Xoossa keethan oothiya ase ehana mela kiittas.
EZR 8:18 Nu Xoossa lo77o kushey nu bolla de7iya gisho, Isra7eele na7a Leewe yara Mahila yaranne daro cinca asi gidida Sarebaya geetetiya addiya tammanne hospun iya naytanne iya ishata, nuus yeddidosona.
EZR 8:19 Hessadaka, Hashaba, Maraara yara gidida Yashaya, iya naytanne laatamu gidiya iya ishatara yeddidosona.
EZR 8:20 Hessa bolla kase aawati Leeweta maaddana mela Dawitanne iyara oothiya halaqati shuumida Xoossa keetha oosanchotape nam7u xeetanne laatamu asata yeddidosona. Hessati ubbay banta sunthan xaafetidosona.
EZR 8:21 Nu Xoossaa sinthan nu huuphiya kawushidi, ogey nuus, nu naytasinne nu shalo ubbaas saro gidana mela woossana mela yan Ahawa Shaafa matan xooma awaajas.
EZR 8:22 Kase nuuni kawas, “Nu Xoossaa lo77o kushey iya koyeyisata bolla de7ees; shin iya wolqaama hanqoy iya aggeyisata bolla de7ees” yaagidi odida gisho, nuuni biya ogiyan de7iya morketape nuna naagana mela wotaadarenne parata immanaada kawa oychanaw yeellatas.
EZR 8:23 Hessa gisho, nuuni xoomidi, Xoossa woossida; ika nu woosa si7is.
EZR 8:24 Kahine halaqatape Sarebaya, Hasabayanne hara enta dabbo gidida tammu asata dooras.
EZR 8:25 Kawoy, iyara zoreteysati, iya shuumatinne Isra7eele ubbay nu Xoossaa keethas immida bira, worqanne, hara miisheta ubbaa likada enta kushen wothas.
EZR 8:26 Taani entaw immidabay haysa; laatamanne nam7u mukulu kilo giraame bira, heedzu mukulunne oyddu xeetu kilo giraame birape oosetida miisheta, heedzu mukulunne oyddu xeetu kilo giraame worqa,
EZR 8:27 hospun kilo giraamenne oyddu xeetu giraame worqafe oosetida laatamu saanetanne worqada al7onne muruuto gidida naase biratape oosetida nam7u saaneta.
EZR 8:28 Hessafe guye, taani entako haysada yaagas; “Hintenne ha miisheti Godaas dummatideta; ha biraynne worqay, asay ba dosan Godaas, hinte aawata Xoossaas immida imota.
EZR 8:29 Yerusalaamen de7iya Xoossa keethan miishe minjiya keethaa gakidi, kahine halaqata sinthan, Leeweta sinthaninne Isra7eele yarata halaqata sinthan immana gakanaw, ha miisheta loythidi naagite” yaagas.
EZR 8:30 Hessa gisho, kahinetinne Leeweti Yerusalaamen de7iya Xoossa keethi efanaw bira, worqanne hara miisheta ubbaa mizaanen likidi aawatethan ekidosona.
EZR 8:31 Koyro ageenan tammanne nam7antho gallasan Yerusalaame baanaw Ahawa Shaafa matape dendida. Nu bolla de7iya nu Xoossaa lo77o kushey nu biya ogen de7iya morketapenne pangatape nuna ashshis.
EZR 8:32 Nuuni Yerusalaame gakidi, yan heedzu gallas shempida.
EZR 8:33 Oyddantho gallas bira, worqanne hara miisheta ubbaa likidi, Uraya na7aa kahiniya Maremootas immida. Finihaasa na7aa Alaazari, Leewe gidida Iyyasu na7aa Yozabaatinne Biniya na7a No7aadi iyara issife de7oosona.
EZR 8:34 Ubbabay he wode taybeti liketidi xaafetis.
EZR 8:35 Hessafe guye, di7ope simmida asay, Isra7eele Xoossaas, tammanne nam7u korma, uddufun tammanne usupun marazenne laapun tammanne laapun dorsa urgeta xuussa yarsho oothidi, qassi tammanne nam7u kole nagara yarsho oothidi Godaas yarshidosona. Hessi ubbay xuussa yarsho gididi Godaas shiiqis.
EZR 8:36 Kawoy kiitida kiittaka kawuwape garsara biitta ayseysatasinne Efraxiisa Shaafape hefintha biitta ayseysatas immidosona; enti Isra7eele asaanne Xoossa keethaa oosuwa maaddidosona.
EZR 9:1 Ha ubbay hanidaape guye, deriya kaaletheysati taako yidi, haysada yaagidosona; “Isra7eele asay, hari attoshin, kahineti, Leeweti, banta heeran de7iya, Kanaaneta, Hiteta, Parzeta, Yaabuseta, Amooneta, Moo7abeta, Gibxetanne Amooreta tunaape bantana shaakibookona.
EZR 9:2 Bantawunne banta naytas Ayhude gidonna macca naytape macho ekidosona; hessa gaason geeshsha zeretha Ayhude gidonna asaara walakidosona. Ha balan koyro gididay kaaletheysatanne halaqata” yaagidosona.
EZR 9:3 Taani ha oda si7ida wode ta ma7uwanne ta qamisiya daakas; ta huuphiyanne ta buuchaa sikas; daro dagammada utta aggas.
EZR 9:4 Di7ope simmida asay oothida nagaraa gisho, Isra7eele Xoossay odida qaalas yayyida asa ubbay taani de7iya bessaa taako shiiqidosona. Omarsa yarsho yarshiya wode gakanaw dagammada uttida bessaafe dendabike.
EZR 9:5 Shin omarsa yarshoy shiiqiya wode, ta ma7oynne ta qamisey daaketidi de7ishin, taani azzanada uttida bessaafe dendas. Gulbatada Godaako, ta Xoossaako, ta kushiya denthada, haysada yaagada woossas.
EZR 9:6 “Abeeti ta Xoossaw, nu nagaray dooretidi nu huuphiyape aadhida gishonne nu naaqoy salo gakida gisho taani ta som7uwa neeko denthanaw yayyaysinne yeellatayis.
EZR 9:7 Nuuni nu mayzata wodepe doomin, hachi gakanaw, nena daro naaqida. Nu nagaraa gaason nuuni, nu kawotinne nu kahineti ha77iysada allaga kawota kushen kundida; mashshas, do7os, bonqeesinne yeellas aadhidi imetida.
EZR 9:8 “Shin ha77i Goday nu Xoossay nuupe guutha asi ashshanawunne ba keethan nuus besse immanaw koyidi guutha wodes marotethi immis. Hessa gisho Xoossay nu ayfiya dooyis; nu aylletethan de7ishin guutha wodes shempo immis.
EZR 9:9 Nuuni aylle gidikoka, nu Xoossay nuna aylletethan aggibeenna; nu de7uwa oorathis. Nu Xoossaa keethaa keexana mela, laaletidaysa oorathana melanne Yihudaninne Yerusalaamen saro daana mela Farse kawota sinthan nuus teemo immis.
EZR 9:10 “Shin nu Xoossaw, ha77i yaatin, nuuni woyganee? Heko ha77ika ne kiita toochida.
EZR 9:11 Nu toochiday ne aylle gidida nabeta baggara ‘Hinte laattanaw geliya biittay, in de7iya asan tunidaaro; ha gaxape hini gaxaa gakanaw enta iita oosuwaninne tunatethan kumasu.
EZR 9:12 Hessa gisho, hinte mino gidana mela, he biitta ayfiya maana melanne merinaw hinte naytas laatisana mela, hinte macca nayta enta adde naytas immofite; enta macca nayta hinte adde naytas ekofite. Enti sarotethaninne duretethan daana mela amottofite’ yaagadasa.
EZR 9:13 “Nu bolla gakida iitaba ubbay nu iita oosuwanne nu gita nagara gaasona. Gidoshin, neeni nu Xoossay nu nagara darotethaa mela nuna pirdabaaka; shin nuupe guuthata ashshadasa.
EZR 9:14 Nuuni haysa mela tunabaa oothiya asaara ekoninne gelon walaketidi, waanidi ne kiita ixas gaanee? Ha attida guutha kochay dhayana gakanaw ne hanqoy nu bolla dareneyee?
EZR 9:15 Abeeti Godaw, Isra7eele Xoossaw, neeni xillo; nuuni ha77i gakanaw attidi de7on de7oos. Nu nagaraa gaason nuupe issoyka ne sinthan eqanaw danda7ey baawa; attidaysati hachi haysan ne sinthan de7oos” yaagas.
EZR 10:1 Iziri Xoossa keetha sinthan kundidi yeekishe woossiya wodenne nagaraa paaxiya wode macci, addeynne na7i de7iya Isra7eele asay iyako shiiqidi, yibbata yeeho iyara yeekidosona.
EZR 10:2 Elama yara gidida Yi7eela na7ay Sakan haysada yaagis; “Nuuni nu yuushon de7iya allaga maccasata ekidi, nu Xoossaas ammanetiboko. Gidoshin, ha77ika Isra7eeles ufaysi de7ees.
EZR 10:3 Ta godaw, neeninne nu Xoossa kiita naageysati zoridaysada nuuni ha maccasaanne entafe yeletida nayta ubbaa yeddanaw qaala geloos. Hessi ubbay Godaa higgey geysada poleto.
EZR 10:4 Izira ha oosoy ne kushen de7ees, denda; nuuni nena maaddana; minna!” yaagis.
EZR 10:5 Iziri dendi eqidi, kahineta, Leewetanne Isra7eele asaa ubbaa ha geetetidaysata oothana mela caaqisis; entika caaqidosona.
EZR 10:6 Iziri Xoossa keetha sinthafe dendidi, Eliyaseeba na7ay Yohaani de7iya kifile gelis. Yan di7ope simmida asay nagaras yeekishe aqida gisho, he bessan kathi mibeenna; haatheka uybeenna.
EZR 10:7 Di7ope simmida asay Yerusalaame shiiqana mela, Yihudaninne Yerusalaamen awaajidosona.
EZR 10:8 Ha heedzu gallasata giddon he bessan shiiqonna oonika de7iko, iyaw de7iyabay ubbay eketana melanne ika di7ope simmida asa shiiquwape kurettana mela halaqatinne cimati oda kuuyidosona.
EZR 10:9 He geetetida heedzu gallasata giddon, uddufuntho ageenan laatamantho gallasan Yihudanne Biniyaame asa ubbay Yerusalaame shiiqidosona. Ha deexo odaanne wolqaama ira gaason, kokorishe, Xoossaa keetha sinthan de7iya dabaaban uttidosona.
EZR 10:10 Kahine Iziri dendiidi haysada yaagis; “Hinte ammanetonna ixideta; allaga maccasata macho ekidi, Isra7eele naaquwa bolla naaqo gujideta.
EZR 10:11 Hinte nagara Godaas, hinte aawata Xoossas paaxite; iya ufaysiyaba oothite. He biittan de7iya Ayhude gidonna asaapenne hinte ekida Ayhude gidonna hinte machetape shaaketite” yaagis.
EZR 10:12 Shiiqida asay banta qaala dhoqu oothidi, haysada yaagidosona. “Ne giyaba ubba nuuni oothana!
EZR 10:13 Shin haysan shiiqida asay daro; hessa bolla wolqaama iri bukees. Nuuni irape attiya bessi haysan baawa. Ha nagaran qohida asay daro gidida gisho, issi gallasan woyko nam7u gallasan ha oda polanaw danda7oko.
EZR 10:14 Ha shiiqida asaa sunthan nu halaqati Yerusalaamen gam7idi, koshshiyaba ootho. Hessa gaason dendada Xoossaa wolqaama hanqoy nuupe simmana gakanaw, nu katamatan de7iya Ayhude gidonna maccasata ekida ubbay keerida qamman katamata cimatinne daynnatara issife Yerusalaame yo.
EZR 10:15 Asaheela na7ay Yoonataaninne Tequwa na7ay Yahizi enta qofaa phalqidosona; Masulaaminne Leewe gidida Sabati entana maaddidosona” yaagidosona.
EZR 10:16 Di7ope simmida asay gidaysada oothidosona. Kahiney Iziri ubba kochatape halaqata dooridi, ubbaa enta sunthan sunthan xaafis. Tammantho ageenan koyro gallasan halaqati oda pilgidi be7o doomidosona.
EZR 10:17 Koyro ageenan koyro gallasay gakanaw, Ayhude gidonna maccasata ekida asata ubbaa pilgidi wursidosona.
EZR 10:18 Kahine kochata giddofe allaga maccasata ekidaysati haysata; Iyosadeqa na7a Iyyasu kochatapenne iya ishata giddofe Ma7iseya, Alaazara, Yaribanne Godoliya.
EZR 10:19 Enti banta macheta yeddanaw qaala gelidosona; banta nagara gisho, wudiyape issi issi maraze naaqo yarsho oothidi yarshidosona.
EZR 10:20 Imera yarape Allaga macheta ekidaysati Hanaananne Zabada.
EZR 10:21 Harima yarape Ma7iseya, Eeliyaasa, Shamaya, Yi7eelanne Ooziya.
EZR 10:22 Paskora yarape Eliyo7anaya, Ma7iseya, Isma7eela, Natina7eela, Yozabaatanne Elsi.
EZR 10:23 Leewetape, Yozabaata, Same7a, Qalixa geetetiya Qelaya, Fataya, Yihudanne Alaazara.
EZR 10:24 Zammaaretape, Eliyaseeba. Penge naageysatape, Saluma, Xelemanne Ure.
EZR 10:25 Isra7eeletape, Faroosa yarape Ramiya, Yizaya, Malkiya, Mayamina, Alaazara, Malkiyanne Banaya.
EZR 10:26 Elama yarape Mataana, Zakaryaasa, Yi7eela, Abda, Yiremootanne Ela.
EZR 10:27 Zata yarape Eliyo7ana, Eliyaseeba, Mataana, Yiremoota, Zabadanne Aziiza.
EZR 10:28 Babaya yarape Yohaana, Hanaana, Zabayanne Atilaya.
EZR 10:29 Baana yarape Masulaama, Maluka, Adaya, Yasuuba, Shaalanne Yiremoota.
EZR 10:30 Pahati-Moo7aba yarape Adina, Kalala, Banaya, Ma7iseya, Mataana, Basili7eela, Binuyanne Minaase.
EZR 10:31 Karima yarape Alaazara, Yisheya, Malkiya, Shamaya, Simoona,
EZR 10:32 Biniyaame, Malukanne Samaraya.
EZR 10:33 Hasuma yarape Mataana, Mataata, Zabada, Elfalaxa, Yeremaya, Minaasenne Same7a.
EZR 10:34 Baana yarape Madaya, Amraama, Ula,
EZR 10:35 Banaya, Bedaya, Kalqe,
EZR 10:36 Waaniya, Maremoota, Eliyaseeba,
EZR 10:37 Mataana Matinayanne Ya7isa.
EZR 10:38 Binuya yarape Sama7a,
EZR 10:39 Selema, Naatana, Adaya,
EZR 10:40 Makinadabaya, Sasaya, Saraya,
EZR 10:41 Azari7eela, Selema, Samara,
EZR 10:42 Saluma, Amaarenne Yoosefa.
EZR 10:43 Nabo yarape Yi7eela, Matita, Zabada, Zabina, Yadaya, Iyyu7eelanne Banaya.
EZR 10:44 Ha ubbay Ayhude gidonna macheta ekidaysata; issoti issoti na7aka yelidosona.
NEH 1:1 Hakaliya na7aa Nahime qaalay haysa. Arxekisisi Farse biittan kawotin laatamantho laythan, Kisile geetetiya ageenan, taani Nahimey waanna katama gidiya Suusan de7ayis.
NEH 1:2 Ta ishatape issoy, Hanaani, hara asatara issife Yihudape taako yin, taani Yerusalaamebanne Babiloone di7etonna attida Ayhudetaba enta oychas.
NEH 1:3 Enti zaaridi, “Babiloone di7etonna attida asaynne di7etidi simmida Ayhudeti gita metoninne kawushan de7oosona. Yerusalaame gimbe dirsay laaletis qassi gimbiya pengeti taman xuugetidosona” yaagidosona.
NEH 1:4 Ta haysa ubbaa si7ida wode uttada yeekas. Daro gallas azzanoninne xooman salo Xoossaa haysada yaagada woossas.
NEH 1:5 “Abeeti Godaw, salo Xoossaw, gitaw, bonchetidayso, nena doseysatasinne ne kiita naageysatas ne merina siiqo caaquwa naagasa.
NEH 1:6 Taani ne aylley, ne aylle gidida Isra7eele asaa gisho qammanne gallas woossiya woosa si7anaw ne haythay hayzo; ne ayfey tana xeello. Nu Isra7eele asay oothida nagaraa ubbaa new paaxayis; tuma taaninne ta mayzati nena naaqida.
NEH 1:7 Nuuni ne bolla daro iita nagara oothida; neeni ne aylliya Muse baggara nuus immida kiitaa, wogaanne higgiya naagibooko.
NEH 1:8 Ne aylliya Muses ne odida qaala hayyana qopa; neeni, ‘Hinte taw ammanetona ixiko, taani hintena Ayhude gidonna biittatan laallana.
NEH 1:9 Shin hinte taako simmidi, ta kiita naagiko, hinte hari attoshin sa7aa gaxaa gakanaw laaletikoka, ta sunthay xeegetana mela doorida bessaa zaarada ehana’ gidaysa qopa.
NEH 1:10 “Neeni ne gita wolqaaninne ne mino qesiyan woza ekida ne aylletanne ne asata.
NEH 1:11 Abeeti Godaw, taani ne aylley woossiya woosaanne nena bonchanaw dosiya, ne aylleta woosa ne haythay si7o. Ta ne aylley hachi oothanaw koyidabay taw ushacanaada, kawa sinthan taw saba imma” yaagas. Taani he wode kawas woyne ushsha tigiya asi.
NEH 2:1 Arxekisisi kawotida laatamantho laythan, Nisaane geetetiya ageenan, issi gallas kawa sinthan woyne ushsha shiishas. He gallasepe attishin, kase kawa sinthan azzana erike.
NEH 2:2 Hessa gisho, kawoy, “Nena sakiyabay baawa, shin haysa mela ayis azzanadii? Hessi ne wozanay issiban azzanidaysa bessees” yaagis. Yaagin, taani daro yayyada, kawako,
NEH 2:3 “Kawoy merinaw kawoto! Ta mayzati moogetida katamay laaletidi dhayin, qassi he katamaa dirsa pengeti taman xuugetin ayis azzanikina?” yaagas.
NEH 2:4 Kawoy zaaridi, “Yaatin, ha77i ta new ay oothana mela koyay?” yaagis. Taani salo Xoossaa woossa simmada,
NEH 2:5 kawako, “Kawaw, ta ne sinthan saba demmidaba gidikonne ta oyshay ufaysiyabaa gidiko, Yihuda biitta, ta mayzati moogetida katamaa bada zaara keexana mela tana yeddarki” yaagas.
NEH 2:6 He wode kawiya, Kawa Arxekisisa matan uttida de7ishin, kawoy zaaridi, “Ne ogey ay mela wode ekanee? Ne awude simmanee?” yaagidi tana oychis. Taani ta simmana wodiya iyaw odin, kawoy ufaytidi tana yeddis.
NEH 2:7 Qassi, “Kawa, nena ufaysiyabaa gidiko, ta Yihuda gakanaw he biittara kanthada aadhana mela Efraxiisa shaafape wuloha baggara de7iya biitta haareysatas dabdaabey xaafeto” yaagada kawa woossas.
NEH 2:8 Hessadaka, “Xoossa keetha pengiya giigisanaw, katamaa gimbe dirsaa diranawunne ta daana keethaa keexanaw taw mithi immana mela kawo wora naagiya Asaafas dabdaabey xaafeto” yaagada oychas. Xoossaa lo77o kushey taara de7iya gisho kawoy taani oychidaba ubba immis.
NEH 2:9 Kawoy taara guutha toora moconatanne para toggeyisata yeddis. Taani entara issife Efraxiisa shaafape wuloha bagga biitta gakada kawoy yeddida dabdaabiya he biitta haareysatas immas.
NEH 2:10 Shin Horoona katama asi gidida Sanbalaaxinne Amoone biitta halaqa gidida Xoobbey, “Isra7eele asaas lo77oba oothiya asi yis” geetetidaysa si7ida wode daro yilotidosona.
NEH 2:11 Taani Yerusalaame gakada heedzu gallas yan gam7as.
NEH 2:12 Yerusalaames taani oothana mela Xoossay ta wozanan wothida qofaa oodeska odabike. Hessafe guye, taara de7iya asaape guuthata ekada qamma dendada bas. He wode taani toggida mehiyape hara toga mehey nuus baawa.
NEH 2:13 Taani bilahe dendada Zangaara Pengiyara kanthada, Dawe Pulto geetetiya bessaara aadhada, Pito Penge geetetiya bessaa gakanaw bas. Yaara aadhashe laaletida Yerusalaame gimbiyanne taman xuugetida gimbe pengeta be7as.
NEH 2:14 Hessafe simmada Pulto Pengiyakonne kawa teqe haathay de7iya bessaa bas. Gidoshin, ta toggida mehey aadhiya oge demmabike.
NEH 2:15 Hessa gisho, qamma Qediroona Zangaara giddora aadhada gimbiya be7as. Wursethan, guye simmada Zangaara Pengiyara katamaa gelas.
NEH 2:16 Yan de7iya halaqatape oonika taani awu bidaako, woyko ay oothidaako eribeenna. Ayis giiko, taani Ayhudetas, kahinetas, bonchetida asatas, halaqatasinne oosuwa oothanaw de7iya asaape oodeska ta qofaa odabike.
NEH 2:17 Hessefe guye, entako, “Nuuni ay mela meton de7iyako be7eeta; Yerusalaame katamay laaletis; gimbe pengeti taman xuugetidosona. Ha yiite, Yerusalaame gimbiya zaaridi gimboos; nuna gakida yeella ane diggoos” yaagas.
NEH 2:18 Qassi Xoossaa lo77o kushey taara de7eysanne kawoy taw odidaba ubbaa entaw odas. Enti zaaridi, “Ane dendoos; zaaridi gimboos” yaagidi banta kushiya lo77o oosos minthidosona.
NEH 2:19 Shin Horoona katamaa asi gidida Sanbalaaxi, Amoone biitta asi gidida Xoobeynne Araba biitta asi gidida Geesamey hessa si7ida wode, nu bolla qelqisidi miicidosona. “Haysi hinte oothiyabay ayibee? Woyko kawa bolla makallanaw koyeetii?” yaagidi oychidosona.
NEH 2:20 Taani zaarada, “Salo Xoossay nuna polisana; nuuni iya aylleti dendidi oothana. Shin Yerusalaamen hintew gishoy woyko hintena gathiyabay woyko hintena qofisiyabay baawa” yaagas.
NEH 3:1 Kahine halaqay Eliyaseebinne hara kahineti Dorsa Pengiya zaari gimbidi Xoossas dummayidosona; sanqa aathidosona. Enti Xeeta geetetiya gimbe shakuwafe bidi Hanaani7eela geetetiya gimbe shakuwa gakanaw gimbidi Xoossas dummayidosona.
NEH 3:2 Enta lanqen de7iya bessaa Iyaarko asay gimbin, kaallidi de7eysa Imira na7ay Zakuri gimbis.
NEH 3:3 Hasinaa7a nayti Molo Pengiya gimbidosona. Enti gobane essidi, sanqa aathidosona; sanqa gordiya kasuwanne kasuwa gelsiya sagaayuwa giigisidosona.
NEH 3:4 Enta kaallidi de7iya bessaa Haqooxa na7a gidida Uraya na7ay Maremooti gimbis. Iyape kaallidi de7iya bessaa Masezabeela na7a Baraka na7ay Masulaami gimbis. Iyape kaallidi de7iya bessaa Ba7ana na7ay Saadoqi gimbis.
NEH 3:5 Iya matan de7iya bessaa Taqoha katamaa asati gimbidosona. Shin he katamaa halaqati bantaw imetida oosuwa oothonna ixidosona.
NEH 3:6 Paseha na7ay Yodaaheynne Baasodiya na7ay Masulaami Gal7a Pengiya gimbidosona. Enti gobane essidi, sanqa aathidosona; sanqa gordiya kasuwanne kasuwa gelsiya sagaayuwa giigisidosona.
NEH 3:7 Enta lanqen de7iya bessaa Gaba7oona katamaa asi gidida Malaaxinne Meronoota katamaa asi gidida Yadooni gimbidosona. Gaba7oonanne Mixipha katamaa asay entara issife gididi, Efraxiisa shaafape wuloha bagga biitta haareysi de7iya keethaa gakanaw de7iya bessaa gimbidosona.
NEH 3:8 Worqa sheeshiya Harihaya na7ay Uzi7eeli enta matan de7iya bessaa gimbis. Qassi iya matan de7iya bessaa shitto oothiya Hanaani gimbis. Enti nam7ay issife Yerusalaame Dalga Gimbiya geetetiya bessaa gakanaw de7iya bessaa gimbidosona.
NEH 3:9 Enta matan de7iya bessaa Huura na7ay, Yerusalaame woradaas baggaa haariya Rafayi gimbis.
NEH 3:10 Haruma na7ay Yadayi ba keethaafe sintha baggara de7iya bessaa gimbis. Iya matan de7iya bessaa Asebaana na7ay Hatushi gimbis.
NEH 3:11 Harima na7ay Malkeynne Pahati-Moo7aba na7ay Hashubi iya matan de7iya bessaanne Itoone Shako gimbiya gimbidosona.
NEH 3:12 Enta matan de7iya bessaa Haloheesa na7ay, Yerusalaame woradaas nam7antho baggaa haariya Saluminne iya macca nayti gimbidosona.
NEH 3:13 Hanuninne Zanoha kataman de7iya asay issife Zangaara Pengiya gimbidosona. Enti gobane essidi, sanqa aathidosona; sanqa gordiya mithaanne mithaa gelsiya sagaayuwa giigisidosona. Pito Pengiya gakanaw issi mukulu wadha adussa gimbiya gujidi gimbidosona.
NEH 3:14 Rakaaba na7ay, Beet-Hakareema woradaa haariya Malkey Pito Pengiya gimbis. Enti gobane essidi, sanqa aathidosona; sanqa gordiya kasuwanne kasuwa gelsiya sagaayuwa giigisidosona.
NEH 3:15 Kolihaaza na7ay, Mixipha woradaa haariya Salumi Pulto Pengiya zaaridi gimbis. I pengiyas kama giigisidi sanqa aathis; sanqa gordiya kasuwanne kasuwa gelsiya sagaayuwa giigisis. Qassi, Selaha teqe haathay de7iya baggara kawa atakilte bessaafe doomidi, Dawita Katamaape dugethe wodhisiya dethaa gakanaw de7iya gimbiya gimbis.
NEH 3:16 Beet-Xura woradaas baggaa haariya Azibuuqe na7ay Nahimey gimbis. I Dawita duufuwape sintha baggara de7iya bessaa gakanaw, asi oothida teqe haathay de7iya bessaa gakanaw, olanchota keethaa gakanaw de7iya bessaa gimbis.
NEH 3:17 Haysafe kaalleysa Baana na7aa Rehuuma aawatetha garsan de7iya Leeweti gimbidosona. Enta matan de7iya bessaa Qi7aala woradaas baggaa haariya Hashabi ba woradaa sunthan gimbis.
NEH 3:18 Iyape kaallidi Henadaada na7ay, Qi7aala woradaas nam7antho bagga haariya Bawi gimbidosona.
NEH 3:19 Enta matan de7iya bessaa Iyyasu na7ay, Mixipha woradaa haariya Ezeri gimbis. I ola miishe wothiya keethaafe sintha baggara gimbiya maazaniya gakanaw de7iya bessa gimbis.
NEH 3:20 Iyape kaalleysa Zabaya na7ay Baaroki, gimbiya maazaniyape bidi, kahine halaqaa Eliyaseeba keethaa pengiya gakanaw de7iya bessaa gimbis.
NEH 3:21 Iyape kaalleysa Haqooxa na7aa gidida Uraya na7ay Maremooti Eliyaseeba keetha pengiyafe doomidi, wursethi gakanaw de7iya bessaa gimbis.
NEH 3:22 Iyape kaallidi de7eysa heeran de7iya kahineti gimbidosona.
NEH 3:23 Entafe kaallidi Biniyaameynne Hashubi banta keethaa sinthan de7iya bessaa gimbidosona. Entafe kaallidi Ananiya na7a gidida Ma7iseya na7ay Azaari ba keethaa sinthan de7iya bessaa gimbis.
NEH 3:24 Iyape kaallidi Azaara keethaafe bidi, gimbiya maazaniya gakanaw de7iya bessaa Henadaada na7ay Benuyi gimbis.
NEH 3:25 Uzaya na7ay Palali gimbiya maazaniyape doomidi, I naageysata dabaaba matan de7iya qommo bagga kawo gadho naago gimbiya gakanaw de7iya bessaa gimbis. Iyape kaallidi de7eysa Paanose na7ay Padaynne
NEH 3:26 Ofeela deriya bolla de7iya Xoossa keethaa aylleti gimbidosona. Enti Haatha Pengiya matan doloha baggan de7iya bessaanne naago gimbiya gakanaw de7iya bessaa gimbidosona.
NEH 3:27 Entafe kaallidi Taqoha katamaa asay gimbiya sinthan de7iya bessaafe bidi, Ofeela matan de7iya gimbiya gakanaw de7iya bessaa gimbidosona.
NEH 3:28 Para Pengiyafe qommo baggan, banta keethaa sinthan de7iya bessaa kahineti gimbidosona.
NEH 3:29 Entafe kaallidi Imera na7ay Saadoqi ba keethaa sinthan de7iya bessaa gimbis. Iyape kaallidi Doloha Pengiya naagiya Sakana na7ay Shamayey gimbis.
NEH 3:30 Iyape kaallidi Salama na7ay Hananinne Zalafa usupuntho na7a gidida Hanunra gimbidosona. Entafe kaallidi Baraka na7ay Masulaami ba kifiliyape sinthan de7iya bessaa gimbis.
NEH 3:31 Iyape kaallidi Xomooso Pengiya sinthan de7iya Xoossa keetha oosanchotanne zal7anchota keethaa gakanaw de7iya bessaa worqa sheeshiya Malkey gimbis. Qassi I gimbe maazaniyas bolla baggara de7iya bessaaka gimbis.
NEH 3:32 Maazaniyas qommo bagga kifiliyapenne Dorsa Pengiyafe giddon de7iya bessaa worqa sheesheysatinne zal7anchoti gimbidosona.
NEH 4:1 Nuuni dirsa gimbe oosuwa doomidaysa Sanbalaaxi si7ida wode yilo eexidi nuna leqis.
NEH 4:2 Ba laggetanne Samaare olanchota sinthan, “Ha pathonna Ayhudeti ay oothanaw qopoona? Dirsa gimbiya zaari gimbanaw koyoonayee? Yarsho yarshanaw koyoonayee? Enti issi gallasan oosuwa oothidi wursana daanii? Enti gimbees haniya shuchata xuugetidi dooretidaysa giddofe kessanaw danda7oona?” yaagis.
NEH 4:3 Iya matan eqida Amoone biitta asi gidida Xoobbey, “Enti waanida gimbe gimbanaw danda7oona? Enti gimbiya bolla workani keyako laaletana” yaagidi leqis.
NEH 4:4 Taani haysada yaagada woossas; “Nu Xoossaw, enti nuna waati leqisiyako, haysa be7a! Enti nuna cayiya cashshay entaw gido. Banta aquwa bonqetidi allaga biittan di7etida asi gido.
NEH 4:5 Enti gimbeyisata cashshan kawushida gisho, enta naaqoy geemmofo; enta nagaraa ne sinthafe quchofa” yaagas.
NEH 4:6 Nuuni gimbiya oosuwa qanxonna oothida. Asay oosuwa minni oothida gisho gimbiya oosoy ellesidi bagga gakis.
NEH 4:7 Sanbalaaxi, Xoobbey, Arabe asay, Amoone asaynne Ashdooda asay Yerusalaame gimbe oosoy lo77o oosetishe de7eysanne dooya bessati gordetidaysa si7ida wode daro yilotidosona.
NEH 4:8 Hessa gisho enti issife Yerusalaame yidi nuna olanawunne meto medhanaw maqetidosona.
NEH 4:9 Shin nuuni nu Xoossaa woossida; enta teqanaw qammanne gallas naageysata wothida.
NEH 4:10 He wode Yihuda asay, “Toohoy nuna daabursis; buroo dendanaw koshshiya dooretida daro shuchi de7ees; yaaniya gisho, nuuni gimbiya gimbanaw danda7oko” yaagidosona.
NEH 4:11 Nu morketi, “Enti nu oothiyaba eranaapenne be7anaape sinthe nu enta giddo gelidi enta wodhana; enta oosuwaka essana” yaagidosona.
NEH 4:12 Nu morketa heeran de7iya Ayhudeti tamma simmidi nu morketi nuna ubba baggara olanaw giigetoysa nuus odidosona.
NEH 4:13 Hessa gisho, nu asaape mashshe, tooranne donge oykida asaa enta soo asan asan giigisada oosoy wuriboona heeran gimbiyas guyera garsa baggan naagana mela oothas.
NEH 4:14 Asay daggamidaysa taani be7ida wode denda eqada, asaako, enta kaaletheysatakonne halaqatako, “Nu morketa yayyofite! Gitaanne yashshiya Xoossaa qopite. Hinte ishatas, hinte adde naytasinne macca naytas, hinte machetasinne hinte keethaas oletite” yaagas.
NEH 4:15 Nu morketi nuna qohanaw maqetidaysa nuuni eridaysa enti si7idosona. Qassi Xoossay enta maquwa hada kessidaysa akeekidosona. Hessafe guye, nu ubbay simmidi, gimbe oosuwa doomida.
NEH 4:16 He wodepe doomidi ta asaape baggay oosuwa oothiya wode, baggay xurure ma7idi, toora, gondallenne donge oykidi naagana mela oothas. Qassi halaqati Yihuda asa ubbaafe guyera eqidi minthethoosona;
NEH 4:17 gimbiya gimbeysatinne koshshiyaba tookeysati issi kushen ola miishe oykidi, issi kushen ooso oothosona.
NEH 4:18 Gimbiya oothiya issoy issoy mashshe ba xeessan dancidi de7ees. Moyze punneysi ubba wode taape shaaketidi erenna.
NEH 4:19 Kaaletheysatako, halaqatakonne asa ubbaako, “Gimbiya oosoy gitanne dalga gidiya gisho nuuni issoy issuwafe haakidi de7oos.
NEH 4:20 Hessa gisho, hinte moyze puno si7iya wode he bessaa taako haa shiiqite. Nu Xoossay nu gisho oletana” yaagas.
NEH 4:21 Hessa gisho, wonta gontey zo7o wadhiya wodepe doomidi omarsi xoolintoy keyana gakanaw baggay oothiya wode baggay toora oykidi naagees.
NEH 4:22 He wode taani asaako, “Qamma nuna naaganawunne gallas oosuwa oothanaw hinte ubbay hintena maaddeysatara Yerusalaamen aqite” yaagas.
NEH 4:23 Tana gidin, ta ishata gidin, ta asaa gidin, woyko tana naageysata gidin, nu ubbay nu ma7uwa kessonna aqoos; nu ola miishey nuupe shaaketenna.
NEH 5:1 Issi wode addetinne enta macheti banta koche gidida Ayhudeta bolla waassidosona.
NEH 5:2 Entafe issoti issoti, “Nuus, daro adde naytinne macca nayti de7iya gisho nu shempuwa ashshanaw nuus kathi koshshees” yaagidosona.
NEH 5:3 Harati qassi, “Nuna gakida iita koshaape dendoysan kathi demmana gidi, nu goshsha gadiya, nu woyne gadiyanne nu keethaa oythida” yaagidosona.
NEH 5:4 Qassi attidaysati, “Kawo giira giiranaw miishe dhayidi nu goshsha gadiyanne nu woyne bessaa oythidi miishe tal7ida.
NEH 5:5 Ayhude kochatara nuuni issi ashonne issi suuthi; nu nayti enta nayta mela. Shin nuuni nu yelida nayta aylletethas aathidi immanaw un7etida; nu macca naytape issoti issoti aylletethas bayzetidosona. Nu goshshanne nu woyne gadiya nuupe eketida gisho nu wolqa dhayida” yaagidosona.
NEH 5:6 Taani enta waasuwanne oysha si7ida wode daro yilotas.
NEH 5:7 Ta wozanan oothanaba qopidaape guye, kaaletheysatanne halaqata xeegada, “Hinte, hinte ishatas yelora tal7ishe un7etheeta” yaagada enta kaccas. He metuwaba entara odetanaw deriya shiishada,
NEH 5:8 “Ayhude gidonaysatas bayzetida Ayhude koche gidida nu ishata wozanaw nuus danda7etidaba ubbaa oothida. Shin hinte isha gidida Ayhudeti banta koche gidida hintew, bantana bayzana mela ootheeta; nu enta zaari wozanaw koshshees” yaagas. Kaaletheysati zaaranaba dhayidi si77i gidoosona.
NEH 5:9 Taani kaallada, “Hinte oothiyabay woga gidenna; Ayhude gidonna nu morketi nuna qelqisonna mela hinte nu Xoossaas yayyanawunne suureba oothanaw bessennee?
NEH 5:10 Taani, ta ishatinne ta oosanchoti asaas miishenne kathi tal7ida; gidoshin, entafe yelo ekeysi atto.
NEH 5:11 Enta goshsha, woynenne shamaho zayte gadiyanne keethaa ubbaa entaw zaarite. Qassi miishepe, kathafe, woynepenne zaytepe hinte entafe ekida xeetape issi kushe yelo ekidaysa elle zaarite” yaagas.
NEH 5:12 Enti zaaridi, “Nuuni ekidaba ubbaa entaw guye zaarana; enti nuupe tal7idaysa zaaro gidi achoko; ne nuna kiitidaysada oothana” yaagidosona. Taani kahineta taako xeegada kaaletheysati banta gida qaala polana mela caaqisanaada oothas.
NEH 5:13 Taani ta ma7uwa qaarada qoqofashe, “Hintefe oonika ba gida qaala polonna ixiko, Xoossay iya, iya keethaafenne iya aquwape haysada qoqofidi mela kushe asho” yaagas. Shiiqida asa ubbay issi qaalan, “Amin7i” yaagidi Godaa galatidosona. Asa ubbay caaqidaysada oothidosona.
NEH 5:14 Arxekisisi kawotida laatamantho laythafe doomidi hastamanne nam7antho laythi gakanaw taani Yihuda biitta haaras. He tammanne nam7u laytha giddon tana gidin woyko ta ishati shuumas bessiya katha damooze ekibooko.
NEH 5:15 Shin taape kase shuumetidaysati asaas deexo tooho gididi, gallas gallas kathasinne woyne ushshas oytamu bira qanxisidosona. Hari attoshin shuumata aylleti asaa bolla godaa gididi un7ethidi gam7idosona. Shin taani Xoossas yayyida gisho, hessada oothabike.
NEH 5:16 Taw de7iya wolqa ubbaa Yerusalaame gimbe oosuwas immas; ta oosanchotika taara issife he oosuwa bolla gam7idosona; nu aybi biittaka shammibooko.
NEH 5:17 Nu heeran de7iya kawotethatape yida asay attishin, gallas gallas taara miya Ayhudetinne kaaletheysati xeetanne ishatama.
NEH 5:18 Gallas gallas issi boori, usupun modho dorsatanne daro kuttota shukidi asaas shiishosona; qassi tammu gallasape issi toho daro baatha woyne ushsha aggoosona. Shin asaa bolla de7iya deexo toohuwa ta eriya gisho biitta shuumas bessiya katha damooze oychabike.
NEH 5:19 Ta Xoossaw, ta ha asaas oothida keehatetha ubbaa qopada taw keeha.
NEH 6:1 Sanbalaaxi, Xoobbey, Arabe biitta asi gidida Geesameynne hanko nu morketi nuuni gimbiya oothidi polidaysanne dooya bessi baynaysa si7idosona. Gidoshin, ta gimbe pengetas sanqa aathabike.
NEH 6:2 Sanbalaaxinne Geesamey, “Ono Demban de7iya gutatape issuwan yada nuura gaheta” yaagidi kiita yeddidosona. Hessi enti tana qohanaw maqida maqo.
NEH 6:3 Taani entaw, “Taw gita oosoy de7iya gisho hessa aggada hinte gida bessaa baanaw danda7ike. Taani yaa bin, oosoy ayis dhubetii?” yaagada zaaras.
NEH 6:4 He kiitaa zaari zaari oyddu toho kiittidosona; shin taani issi qommo zaaro entaw immas.
NEH 6:5 Ichashantho Sanbalaaxi ba aylletape issuwa dooya de7iya dabdaabe oythidi taako kiittis. Dabdaabey haysada yaagidi xaafetis;
NEH 6:6 “Neeninne ne koche gidida Ayhudeti makallanaw qopidaysanne hessa gaason gimbiya gimbeysa shooro biittan de7iya asa ubbay odeteysa Geesamey taw odis. Qassi neeni nena kawo kessanaw koyeysanne
NEH 6:7 neeni Yihuda kawo gideysa Yerusalaamen awaajana mela nabe wothidaysa taw odis. Ha woriya kawoy si7anaysi attenna. Hessa gisho, taara gahetada zorettanaw haaya” yaagees.
NEH 6:8 Taani, “Ha neeni giya oda ubbay tuma gidonnabaanne ne neepe medhidaba” yaagada zaaras.
NEH 6:9 Nu oothiya oosoy poletonna mela, “Enta kushey argaacana; oosoyka poletonna eqi attana” yaagidi nuna yashisanaw qopidosona. Shin taani, “Xoossaw, ha77i ta kushiya minthetha” yaagada woossas.
NEH 6:10 Taani issi gallas soope keyonna mela gordi wothida Mahexabeela na7aa na7aa Dalaya na7aa Shamayako bas. I taako, “Qamma yidi enti nena wodhanaw danda7iya gisho neera taara Xoossa keethi gelidi, pengiya gordidi qosetana” yaagis.
NEH 6:11 Shin taani, “Ta mela asi yayyidi qosetii? Woyko tana daaniya asi ba shempuwa ashshanaw Xoossa keethi gelii? Ta hessa hanike” yaagas.
NEH 6:12 Ta qopa be7iya wode Shamayey Xoossay kiitida nabe gidonashin Xoobeynne Sanbalaaxi iya miishen shammidi yeddin ta bolla wordo tinbite odeysa akeekas.
NEH 6:13 I miishen shametida gaasoy tana yashisanaasa; ta hessa oothada nagaran gelana melanne tana borisiyabaa demmidi tana kawushanaassa.
NEH 6:14 Taani, “Ta Xoossaw, Xoobeynne Sanbalaaxi oothidaba ubbaa be7a. No7aado geetetiya macca nabiyanne hara wordo nabeti tana yashisanaw oothidaba ubba be7a” yaagada woossas.
NEH 6:15 Gimbe oosoy doometin ishatammanne nam7u gallasape guye Eluule geetetiya ageenan laatamanne ichashantho gallasan oosoy poletis.
NEH 6:16 Nu yuushuwan de7iya kawotethatan de7iya nu morketi hessa si7ida wode yayyidosonanne yeellatidosona. Ayis giiko, oosoy nu Xoossaa maaden poletidaysa akeekidosona.
NEH 6:17 He wode Yihuda shuumati Xoobbiyas dabdaabe xaafishe gam7idosona; ika entaw zaarishe gam7is.
NEH 6:18 Era na7ay Sakani, Xoobbiya bollo gidiya gishonne iya na7ay Yohaanani Baraka na7aa Masulaama na7iw ekida gisho, Ayhudetape daroti iyara caaqidi de7oosona.
NEH 6:19 He asati Xoobbey oothida lo77oba ubbaa ta sinthan nashidi haasayoosona; taani giyaba iyaw odoosona. Hessa gisho, Xoobbey ubba wode tana yashisanaw dabdaabe xaafo aggibeenna.
NEH 7:1 Gimbiya oosoy wurin, sanqayka gelis; pengiya naageysati, zammaretinne Leeweti banta oosuwa oykidosona.
NEH 7:2 Taani Yerusalaame katamaa aysiya maata ta ishaa Hananesinne miixa naageysata halaqaa Anaanas immas. Hanaani haratape aadhida tumanchonne Xoosse yayiya asi.
NEH 7:3 Taani entako, “Wonta away keyidi ho77ana gakanaw Yerusalaame gimbe pengeta dooyopite. Qassi omarsi naageysati banta oosuwa ongidi baanape sinthe pengeta minthi gordanaada oothite. Hessadaka, Yerusalaamen de7iya asaape dooridi baggati banta ooso bessan, harati qassi banta keethaa heeran naagana mela oothite” yaagas.
NEH 7:4 He wode Yerusalaame katamay daro dalganne gita; shin iya giddon de7iya asaa tayboy daro guutha; qassi daro keethati buroo keexetibeenna.
NEH 7:5 Hessafe guye, asa kaaletheyisata, halaqatanne asa ubbaa shiishada enta soo asan asan mazgabana mela Xoossay tana qofisis. Di7etethaafe sinthe simmida asaa enta soo asan asan xaafetida maxaafaka demmas; he maxaafan xaafetiday haysa.
NEH 7:6 Babiloone kawoy Nabukadanaxoori di7idi, ba biitta efida asape guye banta katamaa Yerusalaamenne Yihudan de7iya banta katamata simmida asay haysafe kaallidi de7eyisata.
NEH 7:7 Enta halaqati Zarubaabela, Iyyasu, Nahime, Azaara, Rama, Nahamane, Mardikiyoosa, Bilshana, Mispereta, Bigiwaya, Nahumanne Baana. Di7ope simmida Isra7eele asaa tayboy haysa;
NEH 7:8 Paroosa yarati 2,172;
NEH 7:9 Safaaxa yarati 372;
NEH 7:10 Era yarati 652;
NEH 7:11 Iyyasunne Iyo7aaba koche gidida Pahati-Moo7aba yarati 2,818;
NEH 7:12 Elama yarati 1,254;
NEH 7:13 Zaatu yarati 845;
NEH 7:14 Zakaya yarati 760;
NEH 7:15 Binuya yarati 648;
NEH 7:16 Bebaya yarati 628;
NEH 7:17 Azgada yarati 2,322;
NEH 7:18 Adonqaama yarati 667;
NEH 7:19 Bigiwaya yarati 2,067
NEH 7:20 Adina yarati 655;
NEH 7:21 Hizqiyaasa yara gidida Axeera yarati 98;
NEH 7:22 Hashuma yarati 328;
NEH 7:23 Besaya yarati 324;
NEH 7:24 Harifa yarati 112;
NEH 7:25 Gaba7oona yarati 95;
NEH 7:26 Beetelemeninne Naxoofan de7iya asay 188;
NEH 7:27 Anatoota katamaa asay 128;
NEH 7:28 Beet-Azmootan de7iya asay 42;
NEH 7:29 Qiriyat-Ariman, Kafiraninne Ba7erootan de7iya asay 743;
NEH 7:30 Ramanne Gib7an de7iya asay 621;
NEH 7:31 Mikmaasan de7iya asay 122;
NEH 7:32 Beeteleninne Gayen de7iya asay 123;
NEH 7:33 Nam7antho Nabon de7iya asay 52;
NEH 7:34 Nam7antho Elama yarati 1,254;
NEH 7:35 Hariman de7iya asay 320;
NEH 7:36 Iyaarkon de7iya asay 345;
NEH 7:37 Loodan, Hadidaninne Onon de7iya asay 721;
NEH 7:38 Sana7an de7iya asay 3,930.
NEH 7:39 Haysafe kaallidi de7eysati di7etethaafe simmida kahineta. Iyyasu yara gidida Yadaya yarati 973;
NEH 7:40 Imera yarati 1,052;
NEH 7:41 Paskora yarati 1,247;
NEH 7:42 Harima yarati 1,017.
NEH 7:43 Haysafe kaallidi de7eysati di7etethaafe simmida Leeweta; Hodawa yara gidiya Iyyasunne Qadimi7eela yarati 74;
NEH 7:44 Asaafa yara gidida zammaareti 148;
NEH 7:45 Pengiya naagiya Saluma, Axeera, Talmoona, Aquba, Hatitanne Shobaya yarati 138.
NEH 7:46 Haysafe kaallidi de7eysati Xoossa keethan oothiya oosanchota yarata; Xiha yarata, Hasufa yarata, Xaba7oota yarata,
NEH 7:47 Keroosa yarata, Sii7a yarata, Padoona yarata,
NEH 7:48 Libana yarata, Hagaba yarata, Samala yarata,
NEH 7:49 Hanana yarata, Gidela yarata, Gahaara yarata,
NEH 7:50 Raya yarata, Raxina yarata, Naqooda yarata,
NEH 7:51 Gazama yarata, Oza yarata, Paasa yarata,
NEH 7:52 Besaya yarata, Ma7unima yarata, Nafusesima yarata,
NEH 7:53 Baqibuuqa yarata, Haqufa yarata, Harhura yarata,
NEH 7:54 Baasilota yarata, Mahida yarata, Harsha yarata,
NEH 7:55 Barqoosa yarata, Sisaara yarata, Teema yarata,
NEH 7:56 Nasiya yaratanne Haxifa yarata.
NEH 7:57 Haysafe kaallidi de7eysati Solomone aylleta yarata; Soxaya yarata, Sofeereta yarata, Parida yarata,
NEH 7:58 Ya7ila yarata, Darqoona yarata, Gidela yarata,
NEH 7:59 Safaaxa yarata, Haxila yarata, Pokereet-Haxabayma yaratanne Amoone yarata.
NEH 7:60 Di7etethaafe simmida Xoossa keethan ootheysatinne solomone aylleta tayboy 392.
NEH 7:61 Talmela, Telharsha, Karuba, Adaananne Imera katamatape Yerusalaame simmidosona. Shin enti woyko enta aawati Isra7eele sheeshi gideysa erisanaw danda7ibookona.
NEH 7:62 Enti Dalaya, Xoobbiyanne Naqooda yarata; enta tayboy 642.
NEH 7:63 Kahinetape Hobaya yarati, Haqooxa yaratinne Barzile yarati Yerusalaame simmidosona. Barzile geysi Galada biitta asi gidida Barzile na7iw ekidi, ba bolluwa sunthaa ekis.
NEH 7:64 Enti banta yeletaa susa eranaw yeleta maxaafan koydosona, shin demmibookona. Hessa gisho, enti tunada taybetidi kahinetethan oothonna mela digetidosona.
NEH 7:65 Uriimeninne Tumiimen shaakidi pirdiya kahiney dendana gakanaw enti geeshsha kathaafe maanaw danda7onnaysa Yihuda haareysi entaw odis.
NEH 7:66 Di7etethaafe Yihuda biitta simmida 7,337 addenne macca aylleta gujonna de7ishin, kumetha asaa tayboy 42,360. Qassi entara 245 addenne macca zammaareti simmidosona.
NEH 7:68 Parata tayboy 736; baqulota tayboy 245;
NEH 7:69 gimaleta tayboy 435; hareta tayboy 6,720.
NEH 7:70 Yarata halaqatape guuthati oosuwas imota immidosona. Biittaa haareysi 8 kilo giraame worqa, 50 distenne 530 kahine ma7ota immis.
NEH 7:71 Yarata halaqati 168 kilo giraame worqanne 1,250 kilo giraame bira immidosona.
NEH 7:72 Attida asay 168 kilo giraame worqa, 140 kilo giraame biranne 67 kahine ma7ota immidosona.
NEH 7:73 Hessafe guye kahineti, Leeweti, naageysati, zammaareti, asaape issoti issoti, Xoossa keetha oosanchotinne hara Isra7eele asay banta kataman kataman uttidosona.
NEH 8:1 Laapuntho ageenay geliya wode Isra7eele asay banta kataman kataman uttidosona. He ageenan enti ubbay issife Haatha Penge sinthan de7iya dabaaban shiiqidosona. Enti Goday Muse baggara Isra7eele asaas immida Higge Maxaafa ehana mela xaafiya Izira oychidosona.
NEH 8:2 Yaatin, kahiney Iziri, laapuntho ageenan koyro gallasan, addey, maccinne akeekanaw danda7iya asi ubbay shiiqida bessaa Higge Maxaafa ehis.
NEH 8:3 Haatha Penge sinthan de7iya dabaaban eqidi, addes, maccasinne akeekanaw danda7iya ase ubbaas Higge Maxaafa wontafe gallas gakanaw nabbabis. Asayka hayzidi si7idosona.
NEH 8:4 Xaafey Iziri, nabbabanaw mithafe oosetida dhoqa bessan keyidi eqis. Iyape ushacha baggara Matita, Shamaya, Anaya, Uraya, Kalqenne Ma7iseya geetetiya asati eqidosona. Haddirsa baggara Padaya, Misa7eela, Malkiya, Hasuma, Hashibada, Zakariyasanne Masulaama geetetiya asati eqidosona.
NEH 8:5 Iziri asa ubbaafe dhoqiya bessan eqiya wode ubbay iya loythidi xeellishin, enta sinthan Higge Maxaafa dooyis. I dooyiya wode enti ubbay uttida bessaafe dendi eqidosona.
NEH 8:6 Iziri Godaa, gita Xoossaa galatis. Asa ubbay banta kushiya denthidi, “Amin7i! Amin7i!” yaagidosona. Enta som7oy sa7a bochana gakanaw gufannidi Godaa goyinnidosona.
NEH 8:7 Enti banta eqida bessan de7ishin, Leeweti, Iyyasuy, Baani, Saraba, Yamina, Aquba, Sabata, Hoda, Maseya, Qalixa, Azaara, Yozabaata, Hananinne Palahi higgiya asay akeekanaada birshethaa qoncisidosona.
NEH 8:8 Enti Xoossaa Higge Maxaafa nabbabidosona; qassi nabbabeteysi woygiyako asay erana mela birshethaa qoncisidosona.
NEH 8:9 Asay higge qaala si7ida wode yeekida gisho, biitta haariya Nahimey, kahinenne xaafe gidida Izirinne asaas maxaafa birshiya Leeweti, “Ha gallasay Godaas, hinte Xoossaas geeshsha gallas gidiya gisho, yeekofite woyko afuxofite” yaagidosona.
NEH 8:10 Nahimey, “Bidi dooretida kathaa miite; mal7iya ushshi uyite; qassi aykoy baynaysatas hinteysafe shaakidi immite. Hachi gallasay nu Godaas geeshsha gallas. Godaa ufaysay hintew wolqa gidiya gisho azzanopite” yaagis.
NEH 8:11 Leeweti, “Hachi gallasay geeshsha gallas gidiya gisho, azzanopite; si77i giite” yaagidi asa si77i oothidosona.
NEH 8:12 Nabbebetida qaala birshethay entaw gelida gisho, asay ufaysan maanaw, uyanawnne aykoy baynaysatas shaakidi immanaw soo bidosona.
NEH 8:13 He ageena nam7antho gallasan kochata halaqati, kahinetine Leeweti higge qaala entaw birshana mela Izirako yidosona.
NEH 8:14 Enti tamaariya wode laapuntha ageenan Shaqara Ba7aale bonchiya wode Isra7eele asay shaqara garsan uttidi bonchana mela Xoossay Muse baggara kiitidaysa demmidosona.
NEH 8:15 Shaqara Ba7aale bonchanaw katamataninne Yerusalaamen haysada yaagidi awaajidosona; “Shaqara shaqaranaw dere bolla keyidi zayte shamaho, wora shamaho, barseneete mitha, zamba haythinne mitha ubbaafe higgen xaafetidaysada tashe ehite” yaagidosona.
NEH 8:16 Hessa gisho, asay bidi mitha tashe ehidi banta pooqe keetha bolla de7iya denban, banta zabban, Xoossa keetha dabaaban, Haatha Pengiya dabaabaninne Efreema Pengiya dabaaban shaqara shaqaridosona.
NEH 8:17 Di7etethafe simmida asa ubbay shaqara shaqaridi iya garsan uttidosona. Nawe na7aa Iyyasu wodepe haa simmin enti haysa mela ba7aale bonchi erokona. Hessa gisho, enti ubbay daro ufaytidosona.
NEH 8:18 Ba7aaley doometidi wurana gakanaw gallas gallas Iziri Xoossaa Higge Maxaafape asaas nabbabees. Baaliya laapun gallas bonchidaape guye hospuntho gallasan higgey kiiteysada geeshsha duulatta oothidosona.
NEH 9:1 He ageenan laatamanne oyddantho gallasan Isra7eele asay issife shiiqidi, kayo ma7o ma7idi, banta huuphen baana qolidi xoomidosona.
NEH 9:2 Bantana allaga dere asaape shaakidosona. Hessefe guye dendi eqidi entinne enta aawati oothida nagaraa ubbaa paaxidosona.
NEH 9:3 Enti yan eqidi de7ishin heedzu saate kumethi Godaa enta Xoossaa Higge Maxaafay entaw nabbabetis. Qassi hara heedzu saate banta nagaraa paaxishe Godaa banta Xoossaa goyinnidosona.
NEH 9:4 Leeweti, Iyyasuy, Baani, Qadimi7eeli, Sabana, Buni, Saraba, Bananinne, Kenaani madirake bolla keyidi banta qaala dhoqu oothidi Godaa, banta Xoossaa woossidosona.
NEH 9:5 Leeweti, Iyyasuy, Qadimi7eeli, Baani, Asabaani, Sarabi Hodi, Sabaninne Patahi, “Dendi eqidi, merinaape merinaa gakanaw de7iya Godaa hinte Xoossa galatite!” “Iya boncho sunthaa anjite; galatapenne anjofe aadhiya iya sunthaa sabbite.”
NEH 9:6 Xoossaw, ne xalaali Godaa! Neeni salotanne dhoqa salotan de7iya medhetethata, sa7aanne iya bolla de7iya medhetethata, abbatanne enta giddon de7iya medhetethata ubbaa medhadasa. Ubbaas de7o immadasa; salo medhetethati new goyinnoosona.
NEH 9:7 Godaw, neeni Xoosse! Neeni Kaldaaweta biitta Uurepe Abrame doorada kessadasa. Iya sunthaa laammada Abrahaame gada sunthadasa.
NEH 9:8 I new ammanthiya asi gideysa be7ada, Kanaaneta, Hiteta, Amooreta, Parzeta, Yaabusetanne Gergeseta biitta iya kochaas laata biitta oothada immanaw iyaw caaqadasa. Neeni xillo gidiya gisho ne gida qaala poladasa.
NEH 9:9 Neeni nu mayzata Gibxe biittan gakida un7aa be7adasa; qassi Zo7o Abbaa matan de7ishe enti waassida waasuwa si7adasa.
NEH 9:10 Gibxe kawoy, iya shuumatinne he biitta asa ubbay Isra7eele asaa bolla otortida gisho enta bolla mallatanne malaalsiyabata oothadasa. Hessa oothada hachi gakanaw ne sunthay bonchon xeegetanaada oothadasa.
NEH 9:11 Abbaa shaakada ne asaa mela biittara pinthadasa. Shin shuchi ciimmo haathan holin, miteteysada enta goodiya morketa abban mitisada dhaysadasa.
NEH 9:12 Isra7eele asaa gallas shaara tuussan, qamma tama tuussan enta ogiya poo7isada kaalethadasa.
NEH 9:13 Neeni salope wodhada ne asaa Siina zuma bolla odisadasa. Suure pirdaanne tuma gidida higgiya, lo77o wogaanne kiita entaw immadasa.
NEH 9:14 Geeshsha ne Sambaata enti bonchana mela enta tamaarsadasa. Ne aylliya Muse baggara entaw kiita, wogaanne higge immadasa.
NEH 9:15 Enti koshatida wode salope kathi immadasa; qassi enti saamotida wode zaallafe haathe pultisadasa. Neeni entaw immana gada caaqida biitta enti gelidi laattana mela kiittadasa.
NEH 9:16 Shin nu mayzati otortidosona; si7onna ixidi new kiitetibookona.
NEH 9:17 Kiitetonna ixidosona; neeni entaw oothida malaalsiyaba ubbaa hassaybookona. Enti si7onna asi gididosona; banta geellatethan aylletethas Gibxe biitta guye kaalethana mela halaqa bantaw dooridosona. Gidoshin, neeni atto giya Xoossi, keehanne maariya Xoossi; siiqon kumidaysanne hanqos ellesonna Xoossi gidiya gisho enta aggabaaka.
NEH 9:18 Enti mara malan eeqa medhidi, “Hintena Gibxe biittafe kessida hinte xoossay haysa” yaagidi nena gita cashshe cayidosona.
NEH 9:19 Ne daro maarotethan neeni enta mela biittan aggabaaka. Enti biya ogiya poo7isana mela gallas shaara tuussan, qamma tama tuussan enta kaalethadasa.
NEH 9:20 Enta tamaarsana mela ne lo77o Ayyaana entaw immadasa. Maanaw manna, uyanaw haathe entaw immadasa.
NEH 9:21 Oytamu laythi kumethi mela biittan hemetiya wode entaw koshshiyabaape issibaaka pacisabaaka. Enta ma7oy wuribeenna; enta tohoy kixibeenna.
NEH 9:22 Ne enta kawotethatanne dereta hari attoshin haahon de7iya biittata xoonidi oykana mela oothadasa. Kawoy Sihooney haariya Haseboona biittanne kawoy Oogey haariya Baasane biitta entana laatisadasa.
NEH 9:23 Enta kochaa taybuwa salo xoolintoda darsadasa. Enta mayzatas immana gada caaqida biitta enta laatisadasa.
NEH 9:24 Enta nayti Kanaane biitta laattidosona. He biittan de7iya Kanaane asaa enta sinthan neeni kawushadasa. Enti Kanaane asaa bolla, enta kawota bollanne biittan de7iya asaa bolla dosidaba oothana mela enta kushen aatha immadasa.
NEH 9:25 Enti yuushoy gimbetida katamatanne aradda biitta xoonidi ekidosona. Lo77oba ubbay kumida keethata, booketida haatha ollata, woyne bessata, shamahonne hara ayfe ayfiya daro mithata laattidosona. Iyape midi kallidi ordidosona; ne gita keehatethan ufaytidosona.
NEH 9:26 Gidoshin, enti kiitetonna ixidi, ne bolla makallidosona; ne higgiya bolla zoko zaaridosona. Neeko simmanaada entaw minthidi odida ne nabeta wodhidosona. Daro iita cashshi nena cayidosona.
NEH 9:27 Hessa gisho, enta un7ethiya morketa kushen aatha immin, morketi enta un7ethida wode neeko waassidosona. Enta waasuwa salon gidada si7adasa; ne maarotethaa daruwan enta, enta morketa kushepe ashshiya asata kiittadasa.
NEH 9:28 Shin enti shempo demmi simmidi zaaridi ne sinthan nagara oothidosona. Ne zaarada enta morketa kushen aathada immin, enta morketi enta haaridosona. Shin ha77ika enti neeko waassin, enta waasuwa salon gidada si7adasa. Ne maarotethan enta zaara zaaradaka ashsha ekadasa.
NEH 9:29 Ne higgiyako enti simmana mela entaw minthada odadasa, shin enti otortidosona; new kiitetonna ixidosona. Asi kiitetidi de7o demmiya ne higgiya menthidosona. New zoko zaaridi si7onna ixidosona; kiitetonna ixidosona.
NEH 9:30 Gidikoka ne enta daro laythi danda7adasa; ne Ayyaanan nabeta baggara entaw odadasa, shin enti si7ibookona. Hessa gisho, shooro kawotethati enta haarana mela aatha immadasa.
NEH 9:31 Shin neeni keehanne maariya Xoossi gidiya gisho, ne gita maarotethan enta aggabaaka; burxora dhaysabaka.
NEH 9:32 Hiza nu Xoossaw, gitaw, wolqaamanne yayetida Xoossaw, ne merinaa siiqo caaquwa naageyso, beni Asoore kawotethaafe hachi gakanaw nu bolla, nu kawota bolla, nu halaqata bolla, nu kahineta bolla, nu nabeta bolla, nu mayzata bollanne ne asa ubbaa bolla gakida metoy ne sinthan laafaba daanopo.
NEH 9:33 Nuna gakidaba ubban neeni xillo. Nuuni nena naaqikoka ne ammanetetha aggabaaka.
NEH 9:34 Nu kawoti, nu halaqati, nu kahinetinne nu mayzati ne higgiya naagibookona. Qassi ne entaw immida kiitaanne naagisuwa si7ibookona.
NEH 9:35 Ne enta kawotethan entaw gita anjuwa immadasa; dalganne aradda biitta entaw immadasa. Shin enti nena goyinnibookona; banta iita oosuwape simmibokona.
NEH 9:36 “Hiza, hachi nuuni aylle gideysa be7a. Nu mayzati he biitte ayfiyanne iya immiya anjuwa ubbaa maana mela ne immida biittan nu hachi aylle gidida.
NEH 9:37 Nu nagaraa gisho, ne nu bolla denthida kawoti biittay immiya ayfiya ubbaa go77etoosona. Nu bollanne nu mehiya bolla banta koydaba oothosona; nuuni gita meto giddon de7oos” yaagidosona.
NEH 9:38 Hanidaba ubbaa gisho, nuuni haasayidi, he haasaya xaafidi qoncisanaw qofa qachida. Xaafetida xuufiya bolla nu halaqati, nu Leewetinne nu kahineti banta maatame wothidosona.
NEH 10:1 Maatame wothida asaa sunthay, biitta aysiya Nahimey, Hakaliya na7ay, Kahinetape, Sedeqiyaasa,
NEH 10:2 Saraya, Azaara, Ermiyaasa,
NEH 10:3 Paskora, Amaare, Malka,
NEH 10:4 Haxusa, Sabana, Maluka,
NEH 10:5 Harima, Maremoota, Obaada,
NEH 10:6 Daanela, Ginetoona, Baaroka,
NEH 10:7 Masulaama, Abiya, Miyamina,
NEH 10:8 Ma7aaza, Belgayanne Shamaya.
NEH 10:9 Leewetape, Aznaata na7aa Iyyasu, Henadaada kochi gidida Binuya, Qadimi7eelanne
NEH 10:10 entara oothiya Sabana, Hodiya, Qalixa, Palaya, Hanaana,
NEH 10:11 Mika, Rahooba, Hasabaya,
NEH 10:12 Zakura, Saraba, Sabana,
NEH 10:13 Hodiya, Bananne Banina.
NEH 10:14 Halaqatape, Paroosa, Pahati-Moo7aba, Elama, Zata, Baana,
NEH 10:15 Buna, Azgada, Bebaya,
NEH 10:16 Adoona, Bigiwaya, Adina,
NEH 10:17 Axeera, Hizqiyaasa, Azuura,
NEH 10:18 Hodiya, Hasuma, Besaya,
NEH 10:19 Harifa, Anatoota, Nebaya,
NEH 10:20 Magiphaasa, Masulaama, Ezira,
NEH 10:21 Masezabeela, Saadoqa, Yadu7a,
NEH 10:22 Palaxa, Hanana, Anaya,
NEH 10:23 Hose, Hanaana, Hasuba,
NEH 10:24 Haloheesa, Piliha, Sobeqa,
NEH 10:25 Rehuuma, Hasabina, Maseya,
NEH 10:26 Akiya, Hanana, Anaana,
NEH 10:27 Maluka, Harimanne Ba7ana.
NEH 10:28 Attida asay, kahineti, Leeweti, pengiya naageysati, zammaareti, Xoossa keetha oosanchoti, Xoossa higgiyas kiitetanaw bantana Ayhude gidonna deretape shaakida ubbay, enta macheti, akeekanaw danda7iya enta adde naytinne macca nayti,
NEH 10:29 bantana kaaletheysatara issife caaqidosona. Enti Xoossa aylliya Muse baggara Xoossay immida nu Godaa, Xoossaa kiitta, higgiyanne wogaa naaganaw qangethaninne caaqon qaala gelidosona.
NEH 10:30 Enti haysada yaagidi caaqidosona; “Nu macca nayta Ayhude gidonna adde naytas immoko; enta macca nayta nu adde naytas macho oothidi ekooko.
NEH 10:31 “Ayhude gidonna asati kathi gidin woyko haraba Sambaata gallas woyko hara ba7aale gallas bayzanaw ehiko entafe shammoko. Laapuntha laythi gakiya wode wode nu biitta goyoko; nuuni tal7ida acuwa achoko.
NEH 10:32 “Xoossa keetha oosuwas oyddu giraame bira laythan laythan qanxonna immana.
NEH 10:33 Hessika, Godaa sinthan wothiya uythaas, gallas gallas yarshetiya katha yarshuwas, xuussa yarshuwas, Sambaata gallasan, ageena xeeron, laythan de7iya hara ba7aaletan, geeshsha yarshotas, Isra7eele asa nagaraa atotethas yarshetiya yarshuwasinne nu Xoossa keetha oosuwas koshshiya ubbaa kunthanaasa.
NEH 10:34 “Nu, kahineti, Leewetinne hara asa ubbay, laythan laythan oosetiya gallasan, higgiyan xaafetidaysada Godaa, nu Xoossaa yarsho bessan eexiya mithaa issi issi kochay awude ehanaw bessiyako eranaw saama yeggida.
NEH 10:35 “Katha nu shiishiya wodenne dumma dumma mitha ayfiya nu maxiya wode bayraa Xoossa keethi ehana.
NEH 10:36 “Higgiyan xaafetidaysada nuuni koyro yeletiya nu adde nayta, qassi nu miizati, nu dorsatinne nu deeshati yeliya koyro marata Xoossa keethan oothiya kahinetako ehidi Xoossas dummayana.
NEH 10:37 “Nuuni nu biittan kaxida kathaafe koyruwa, nu mitha ubbaa ayfiya, woyniyanne zaytiya imota oothidi, Xoossa keethan oothiya kahinetako ehana. Leeweti nu de7iya katamata goshshan ayfiyabape asraata ekiya gisho, nu biittay ayfiyabape asraata ehana.
NEH 10:38 Leeweti asraata shiishiya wode, Aarona yara gidida kahineti entara issife gidanaw bessees. Leeweti asraata shiishidaape guye, asraatape asraata kessidi nu Xoossa keethi ehidi, miishe wothiya kifiliyan wotho.
NEH 10:39 Isra7eele asaynne Leeweti kathaa, woyniyanne shamaho zayte imota geeshsha miisheti uttiya bessaanne kahineti, pengiya naageysatinne zammaareti shempiya kifiliya eho. “Nuuni Xoossa keethaa ubbaka aggoko” yaagidi caaqidosona.
NEH 11:1 Asaa kaaletheysati Yerusalaamen de7idosona. Hanko asay tammaafe issoy geeshsha kataman Yerusalaamen de7ana mela saama yeggidi dooridosona. Shin hara uddufun kushe asay banta kataman kataman de7idosona.
NEH 11:2 Ba shenen Yerusalaamen de7anaw dosida asa ubbaa asay anjidosona.
NEH 11:3 Hara katamatan de7iya Isra7eele asay, kahineti, Leeweti, Xoossa keetha oosanchoti, Solomone aylleta sheeshati ubbay banta kataman kataman de7iya gadiya oykidi de7idosona. Haysafe kaallidi xaafetidaysati, Yerusalaamen de7anaw yida biitta shuumata;
NEH 11:4 Yihuda kochaafe yida asay Paaresa yara gidida Atayanne Seela yara gidida Ma7iseya. Atayi Ooziyana na7a; Ooziyani Zakaryaasa na7a; Zakaryaasi Amaare na7a; Amaarey Safaaxa na7a; Safaaxi Malal7eela na7a.
NEH 11:5 Ma7iseyi Baaroka na7a; Baaroki Kolihooza na7a; Kolihoozi Ooza na7a; Oozi Adaya na7a; Adayi Yoyaariba na7a; Yoyaaribi Zakaryaasa na7a. Haysati Seela kochata.
NEH 11:6 Paaresa yarape wolqaama gidida 468 asati Yerusalaamen de7idosona.
NEH 11:7 Biniyaame kochaafe yida asay Saala, Gabayanne Salaya. Saalu Masulaama na7a; Masulaami Yo7eeda na7a; Yo7eedi Padaya na7a; Padayey Qolaya na7a; Qolayi Ma7iseya na7a; Ma7iseyi Iti7eela na7a; Iti7eeli Yeshaya na7a. Biniyaame zariyape 928 asay Yerusalaamen de7idosona.
NEH 11:9 Zikira na7ay Iyyu7eeli enta halaqa; qassi Hasanu7a na7ay Yihudi kataman nam7antho halaqa.
NEH 11:10 Kahinetape yida asay Yoyaariba na7aa Yadaya, Yakina na7aa;
NEH 11:11 Saraya; Sarayi Kilqiya na7a; Kilqey Masulaama na7a; Masulaami Saadoqa na7a; Saadoqi Marayoota na7a; Marayooti Xoossa keetha halaqa gidida Ahixuuba na7a.
NEH 11:12 Entara issife Xoossa keethan oothiya oosanchoti kumethi 822. Adayi Yirohaama na7a; Yirohaami Palala na7a, Palali Amoxe na7a; Amoxey Zakaryaasa na7a; Zakaryaasi Paskora na7a; Paskora Malkiya na7a.
NEH 11:13 Adayara issife de7iya asaynne enta soo asaa halaqati kumethi 242. Amasasayi Azari7eela na7a; Azari7eeli Ahizaya na7a; Ahizayi Mashilmoota na7a; Mashilmooti Imera na7a.
NEH 11:14 Amasayara issife de7iya olanchoti kumthi 128. Hagidolima na7ay Zabdi7eeli kahineta ayseysa.
NEH 11:15 Leewetape yida asay Shamaya; Shamayey Hashuba na7a; Hashubi Aziriqaama na7a; Aziriqaami Hasabaya na7a; Hashabey Buna na7a.
NEH 11:16 Leeweti Sabatinne Yozabaata Xoossa keethafe karera oosetiya oosuwas halaqa.
NEH 11:17 Mataani Mika na7a; Miki Zabida na7a; Zabidi galata woosa kaalethiya Asaafa na7a; Asaafi iya nam7antho halaqa gidida Baqibuuqa na7a; Baqibuuqi Samusa na7a; Samusi Galaala na7a; Galaali Yedutuuna na7a.
NEH 11:18 Leewetape 284 asay geeshsha kataman Yerusalaamen de7idosona.
NEH 11:19 Pengiya naageysatape, Aquba, Talmoonanne entara issife oothiya oosanchota tayboy 172.
NEH 11:20 Attida kahineti, Leewetinne Isra7eele asa ubbay banta laata biittan Yihuda katamatan de7idosona.
NEH 11:21 Shin Xoossa keetha oosanchoti Yerusalaame kataman de7iya Ofeela deriya bolla de7idosona. Sihanne Gishipa geetetiya nam7u asati enta halaqata.
NEH 11:22 Yerusalaamen de7iya Leeweta halaqay Oza. Ozi Baana na7a; Baani Hasabaya na7a; Hashabey Mataana na7a; Mataani Mika na7a. Ozi Xoossa keetha zammaareta halaqa gidida Asaafa na7a.
NEH 11:23 Zammaareti gallas gallas yexana mazmuriya kawoy enta kiittees.
NEH 11:24 Yihuda na7aa Zaraha yaraape yeletida Masezabeela na7aa Pataha Isra7eele asaas doona gididi, kawa matan de7ees.
NEH 11:25 Yihuda asaape guuthati goshsha gadetaninne gutatan, Qiriyaat-Arbaninne iya gutatan, Diboonaninne iya gutatan, Yaqabxi7eelaninne iya gutatan de7idosona.
NEH 11:26 Qassi Iyyasun, Molaadan, Beet-Phalexan,
NEH 11:27 Haxar-Shu7aalaninne iya gutatan, Barsaabeninne iya gutatan,
NEH 11:28 Xiqilaagan, Makonaaninne enta gutatan,
NEH 11:29 Enirmoonan, Xor7aninne Yarmutan,
NEH 11:30 Zanohan, Adulaamaninne enta gutatan, Laakisoninne iya heeran de7iya goshsha gadiyan, Azeeqaninne iya gutatan de7idosona. Hessada hanidi Yihuda asay Barsaabepe bidi Hinooma Zangaara gakanaw de7iya bessan de7idosona.
NEH 11:31 Biniyaame kochati Gib7an, Mikmaasan, Ayan, Beeteleninne enta gutatan,
NEH 11:32 Anatootan, Nooban, Ananiyan,
NEH 11:33 Haxooran, Raman, Gitaman,
NEH 11:34 Hadidan, Xabo7iman, Nabalaaxan
NEH 11:35 Loodan, Ononinne Kushe Hiillata Zangaara geetetiya bessan de7idosona.
NEH 11:36 Yihudan de7ida Leewetape baggati Biniyaame asaara daanada oosetidosona.
NEH 12:1 Salatiyaala na7aa Zarubaabelaranne kahine halaqaa Iyyasura di7ope simmida kahinetinne Leeweti haysata: Saraya, Ermiyaasa, Izira,
NEH 12:2 Amaare, Maluka, Haxusa,
NEH 12:3 Sakana, Rehuuma, Maremoota,
NEH 12:4 Ida, Ginetoona, Abiya,
NEH 12:5 Miyamina, Ma7ada, Belga,
NEH 12:6 Shama7a, Yoyaariba, Yadaya,
NEH 12:7 Saala, Amoka, Hilqiyaanne Yadaya. Haysati Iyyasu laythan kahinetasinne yaratas halaqa gididaysata.
NEH 12:8 Entara issife simmida Leeweti Iyyasu, Binuya, Qadimi7eela, Saraba, Yihudanne galata mazmure zamareyisata halaqa gidida Mataana.
NEH 12:9 Entara issife zamariya Baqbuqeynne Unoy entafe sinthara haa simmi eqidi yexoosona.
NEH 12:10 Iyyasuy Yoyaaqima yelis; Yoyaaqimi Eliyaseeba yelis; Eliyaseebi Yoyada yelis;
NEH 12:11 Yoyadi Yoonataana yelis; Yoonataani Yadu7a yelis.
NEH 12:12 Yoyaaqimi kahine halaqa gididi de7iya laythi, haysafe kaallidi xaafetidaysati kahineta yarata halaqata. Saraya yaraa halaqay Maraya. Ermiyaasa yaraa halaqay Hananiya.
NEH 12:13 Izira yaraa halaqay Masulaama. Amaare yara halaqay Yehohanana.
NEH 12:14 Maluka yaraa halaqay Yoonataana. Sabana yaraa halaqay Yoosefa.
NEH 12:15 Harima yaraa halaqay Adina. Marayoota yaraa halaqay Hilqaya.
NEH 12:16 Ido yaraa halaqay Zakaryaasa. Ginetoona yaraa halaqay Masulaama.
NEH 12:17 Abiya yaraa halaqay Zikira. Miniyaminanne Ma7ada yaraa halaqay Pilxaya.
NEH 12:18 Bilga yaraa halaqay Samu7a. Shamaya yaraa halaqay Yoonataana.
NEH 12:19 Yoyaariba yaraa halaqay Matanaya. Yadaya yaraa halaqay Oza.
NEH 12:20 Salaya yaraa halaqay Qalaya. Amoka yaraa halaqay Ebeera.
NEH 12:21 Kelqe yaraa halaqay Hasabaya. Yadaya yaraa halaqay Natina7eela.
NEH 12:22 Leeweta halaqati Eliyaseebi, Yoyada, Yohaaninne Yadu7i kahine halaqa gidida dumma dumma laythan enti xaafetidosona. He mazgabey giigiday Farse biitta kawa Daariyosa laythana.
NEH 12:23 Gidoshin, Leeweta yarata halaqati mazgaben xaafetiday Eliyaseeba na7aa na7a gidida Yohaani hayqana gakanaw de7iya wode xalaalana.
NEH 12:24 Leeweta halaqati Hasabaya, Sarabanne Qadimi7eela na7aa Iyyasu. Enti Xoossa asi gidida kawoy Dawiti kiittidaysada, nam7an shaaketi eqidi, taran taran Xoossaa bonchoosonanne galata mazmure yexoosona.
NEH 12:25 Xoossa keetha gimbe dirsaa pengiya matan keexetida dumma dumma miishe wothiya keethaa naageysati Mataana, Baqbuuqa, Abdiyu, Masulaama, Xalmoonanne Aquba.
NEH 12:26 Haysati Yoxedeqa na7aa na7aa gidada Iyyasu na7aa Yoyaaqimey, biitta aysiya Nahimeynne kahinenne xaafe gidida Iziri de7ida laythan oothidosona.
NEH 12:27 Yerusalaame gimbe dirsay gimbetidi wurida ba7aale bonchiya wode Leeweti banta de7iya bessaafe koyetidi, daalan, diithan, maasinqon, galata mazmure yexishe ufaysan ba7aale bonchanaw Yerusalaame yidosona.
NEH 12:28 Ha baaliya bonchanaw zammaareti Yerusalaame heeran de7iya Naxoofata gutatape,
NEH 12:29 Beet-Gelgalape, Gib7apenne Azmaawetape shiiqidosona. Enti Yerusalaame heeran bantaw gutata keexidosona.
NEH 12:30 Kahinetinne Leeweti bantana wogada geeshidaape guye asaa, pengetanne gimbe dirsaa geeshshidosona.
NEH 12:31 Taani Yihuda halaqata gimbe dirsaa bolla kessas. Nam7u gita mazmure koyreta galata mazmure yexana mela oothas. Issi koyrey gimbiya huuphesoora ushachi simmidi, Pito Penge bagga bis.
NEH 12:32 Hoshayanne Yihuda halaqatape baggati entana kaallidosona.
NEH 12:33 Entara de7iya harati Azaara, Izira, Masulaama,
NEH 12:34 Yihuda, Biniyaame, Shama7iya, Ermiyaasinne
NEH 12:35 moyze punniya guutha kahineti kaallidosona. Entana kaallidi yiday Zakaryaasa; Zakaryaasi Yoonataana na7a; Yoonataani Shama7a na7a; Shama7i Mataana na7a; Mataani Mikaya na7a; Mikayey Zakura na7a; Zakuri Asaafa na7a.
NEH 12:36 Zakaryaasa yara gidida Shama7ey, Azari7eeli, Milaala, Gilaalay, Ma7ayey, Natina7eeli, Yihudinne Hanaani Xoossa asi gidida Dawiti zammariya wode go7etiya mazmure miishiya ubbaa ekidi, Zakaryaasa kaallidosona. Enta kaalethey xaafiya Izira.
NEH 12:37 Pulto Pengiya gakidaape guye Dawita Katamaako simmidi, gimbiya bolla keyidi, Dawita keethaafe pude baggara aadhidi, doloha baggara de7iya Haatha Pengiyako bidosona.
NEH 12:38 Nam7antho koyrey gimbiya huuphiya oykidi haddirsi simmidi bis. Taani asaape baggara gidada entafe guyera kaallas. Itoone Adussa Gimbiya aadhidi, Dalga Gimbiya bessaa gakida.
NEH 12:39 Yaape simmidi, Efreema Pengiya, Yeshaana Pengiya, Molo Pengiya, Hanaani7eela Adussa Gimbiyanne Xeetata Adussa Gimbiya gakanaw bida. Wursethan Dorsa Pengiya matara aadhidi Naageyisata Pengiya gakidi eqida.
NEH 12:40 Galata mazmure yexiya nam7u koyreti Xoossa keethan banta besse besse oykidosona. Qassi taka taara de7iya halaqatara yaa gakas.
NEH 12:41 Hessadaka, kahineti Eliyaqeemi, Ma7iseyi, Miniyamini, Mikayey, Eliyo7ani, Zakaryaasinne Hanaani banta moyziya oykidi,
NEH 12:42 Ma7iseyi, Shamayey, Alaazari, Uzi, Yehohanani, Malkiyey, Elaaminne Exeri banta bessaa bessaa oykidosona. Yizira enta kaalethin banta qaala dhoqu oothidi mazmure yexidosona.
NEH 12:43 He gallas daro yarsho yarshidosona. Xoossay entaw gita ufaysi immida gisho daro ufaytidosona. Maccasay nayti ubbay ufaytidosona. Yerusalaamen asay ufaytiya ufaysa kooshinchay haahon si7etees.
NEH 12:44 He gallas asay immiya imotata, asraatanne laythan kaxiya katha ayfiyape koyruwa shiishidi wothiya keetha naagiya halaqata dooridosona. Ha dooretida asati dumma dumma katamatan de7iya goshshatape higgey kiitteysada kahinetasinne Leewetas bessiya kathaa shiishosona. Ayis giiko, Yihuda asay kahinetinne Leeweti oothiya oosuwan daro ufaytidosona.
NEH 12:45 Enti Xoossay kiitidaysa oothidosona; geeshsho wogaa polidosona. Enta xalaala gidonashin zammaretinne naageysati Dawitinne iya na7aa Solomoney kiitida oosuwa polidosona.
NEH 12:46 Beni Dawita wodenne Asaafa wode zammaretinne Xoossas shiiqiya galata mazmureta kaalethiya halaqati de7oosona.
NEH 12:47 Zarubaabela laythaninne Nahime laythan Isra7eele asa ubbay zammaretasinne naageysatas bessiya kathaa gallas gallas immoosona. Leewetaska bessiya kathaa immoosona. Leeweti qassi Aarona yara gidida kahinetas bessiya kathaa immoosona.
NEH 13:1 He gallas asa ubbay si7ishin, Muse Maxaafay nabbabetis; he wode enti, “Moo7abe asaynne Amoone asay Xoossaa asaara merinaw gahetanaw bessenna” giya bessaa maxaafan demmidosona.
NEH 13:2 Ayis giiko, Isra7eele asay Gibxefe keyidi, Kanaane biya wode Moo7abenne Amoone biitta asay entaw kathinne haathe immidi mokanaysa aggidi, Isra7eele asaa baaddana mela Balaamas miishe immidi shammidosona. Gidoshin, nu Xoossay baadetha anjon laammis.
NEH 13:3 He higgiya Isra7eele asay si7ida wode allaga asaa banta giddofe shaakidosona.
NEH 13:4 Hessafe kase Xoossa keetha miisheta wothiya keethaas halaqa gidida kahiney, Eliyaseebi Xoobara dabbotethi medhis.
NEH 13:5 Hessafe gaason Eliyaseebi, katha imotata, ixaane, Xoossa keetha geeshsha miisheta, kathaa woyniyanne zaytiya, Leewetas, zammaretasinne naageysatas immiya asraatanne kahinetas immiya kathaa wothiya wogga kifiliyan Xoobbey daana mela immis.
NEH 13:6 Ha ubbay haniya wode ta Yerusalaamen de7ike. Arxekisisey Babiloone biittan kawotida hastamanne nam7antho laythan taani simmada Babiloone biitta kawako bas. Gidoshin, guutha wodepe guye kawa oychada,
NEH 13:7 Yerusalaame simmada yas. Xoossa keetha zabban Eliyaseebi Xoobbiyas daana kifile giigisidi wothida iitabaa si7as.
NEH 13:8 Daro yilotada, Xoobbiya soo miishe ubbaa kifiliyape kessada kare holas.
NEH 13:9 Kifilya wogaada geeshshana mela kiittas. Xoossa keetha miisheta, kathaa, imotatanne ixaaniya zaarada keethaa gelsas.
NEH 13:10 Qassi asay Leewetas bessiya kathaa immiboona gisho Leewetinne zammaareti banta Xoossa keetha oosuwa aggidi goshshas guye bidaysa be7as.
NEH 13:11 Hessa gisho, taani halaqatako, “Xoossa keetha oosuwa ayis yeggi aggidetii?” yaagada hanqetas. Hessafe guye, Leeweta xeegada ubbaa enta oosuwan oosuwan zaaras.
NEH 13:12 Yaatin Yihuda asay kathaafe, woyniyape, zaytiyape immiya asraata wothiya keethaa zaaridi eho doomis.
NEH 13:13 Taani kahiniya Salama, xaafiya Saadoqanne Leewiya Padaya miishe wothiya keethaas halaqa oothada shuumas. Qassi Mataana na7aa na7aa Zakura na7ay Hanaani enta maaddeysa. Haysati ubbay koshshiyaba ubbaa banta ishatas shaaki shaaki imon ammanetidaysata gididosona.
NEH 13:14 “Ta Xoossaw tana qopa; qassi ne keetha oosoy giigana mela taani oothida lo77o oosuwa dogopa” yaagas.
NEH 13:15 He wode taani Yihudan de7iya asay Sambaata gallas woyne gum7ishin be7as; harati kathi, woyne ushsha, woyne ayfiya, balase ayfiyanne harabata banta haren caanidi, Sambaata gallas Yerusalaame ehishin be7as. Hessa gisho, enti Sambaata gallasa zal7onaada taani entaw minthada odas.
NEH 13:16 Hessa bolla qassi Yerusalaamen de7iya Xiroosa asay molonne hara issi issi zal7e miisheta ehidi Sambaata gallas Yihuda asaasinne Yerusalaamen bayzoosona.
NEH 13:17 Taani Yihuda halaqata, “Haysa mela iita ooso oothidi Sambaata ayis tuniseetii?
NEH 13:18 Xoossay nu bollanne nu katamaa bolla haysa mela meto ehiday, kase hinte aawati hessa mela iitabaa oothida gisho gidennee? Ha77i hinte Sambaata tunisidi, Isra7eele asaa bolla hara hanqo ehanaw haneeta” yaagada hanqetas.
NEH 13:19 Hessafe guye, Sambaati gelanaape sinthe Yerusalaame gimbiya pengeti gordetanaadanne Sambaati aadhonashin dooyetonna mela kiittas. Qassi Sambaata gallasan ayba toohoyka gelonnaada naagana mela ta oosanchotape issota issota gimbe pengiya bolla essas.
NEH 13:20 Hessa gisho, dumma dumma zal7e miisheta ehiya zal7anchoti issi toho woyko nam7u toho Yerusalaame gimbiyafe kare baggara aqidosona.
NEH 13:21 Shin taani entako, “Gimbiyafe karera waananaw aqeetii? Hinte nam7antho haysada oothiko taani wolqan hintena teqana” yaagada hanqetas. He gallasape simmin nam7antho Sambaata gallas yibookona.
NEH 13:22 Taani Leeweti banta huuphiya geeshshana mela, pengeta naagana melanne Sambaata gallasaa geeshshi oothana mela kiittas. “Ta Xoossaw, ha ubbaa gisho tana qopa; ne merinaa siiquwa gisho taw qadheta” yaagada woossas.
NEH 13:23 He wode taani Yihuda adde asape issoti issoti Ashdooda, Amoonenne Moo7abe biittafe macho ekidaysa be7as.
NEH 13:24 Enta naytape baggay Ashdooda biitta woyko hara biitta doona haasayoosona; banta biitta, Yihuda doona odetanaw danda7okona.
NEH 13:25 Taani entara ooyetas; enta baaddas; entafe issota issota dechada, enta huuphiya binaana shoddas. Hessa xalaala gidonashin, enti banta macca nayta enta adde naytas immonnaada, enta macca nayta bantawunne banta adde naytas ekonnaada Xoossaa sunthan caaqisas.
NEH 13:26 Qassi entako, “Kawoy Solomoney nagara oothiday allaga biitta maccasata ekoysana gidennee? Solomone mela kawoy hara biitta kawota giddon baawa; Xoossay iya dosida gisho, Isra7eele asa ubbaa bolla kawoyis. Shin, hara attoshin iyaka allaga biitta maccasati haysa mela nagara oosisidosona.
NEH 13:27 Yaatin, nuka hintena si7idi, allaga maccasa ekidi hessa mela iitabaa oothidi Xoossaa naaqaneyee?” yaagas.
NEH 13:28 Kahine halaqaa Eliyaseeba naytape issoy Yoyada. Shin iya naytape issoy Beet-Horona katama asi gidida Sanbalaaxa na7iw macho ekis. Yaatin, taani Yoyada Yerusalaame katamaape gooddas.
NEH 13:29 “Ta Xoossaw, haysati kahinetetha wogaanne kahinetaranne Leewetara caaqida caaquwa waati tunisidaako be7a” yaagada woossas.
NEH 13:30 Enta allaga biitta tunatethaafe geeshidaape guye kahinetasinne Leewetas enta oosuwa oosuwa immas.
NEH 13:31 Yarshos eethiya mithay woden woden yaana melanne asay baw ayfidabape koyro ayfiya imota oothidi ehana mela wogaa wothas. “Ta Xoossaw, ne keehatethan tana qopa” yaagada woossas.
EST 1:1 Kawoy Arxekisisi Hinde biittafe Tophe biitta gakanaw de7iya, xeetanne laatamanne laapun biitta aysiya wode hanidaba.
EST 1:2 Kawoy ba araatan uttidi aysiya waanna katamay Suusa geetetees.
EST 1:3 I kawotida heedzantho laythan, baape garsara daynnatasinne biitta ayseysatas gita gibira giigisis. He gibira bessan Meedonanne Farse toora moconati, biitta haareysatinne ayseysati bentidosona.
EST 1:4 Kawoy issi xeetanne hospun tammu gallas kumethi ba kawotethaa duretethaanne ba yashshiya bonchuwa ubbaa enta bessis.
EST 1:5 He gallasatape guye, kawoy qassi hara laapun gallas gam7iya gibira, Suusa kataman, durepe manqo gakanaw de7iya asa ubbaas giigisis. He gibiray kawo gadhoy de7iya atakilte bessan giigis.
EST 1:6 He bessan de7iya dabaabay, liinope oosetida boothinne kaalose geshetan alleeqis. Gesheti ocha teera daaniya al7o liino kiren aathin, ibnebarade geetetiya shuchafe oosetida tuuqiya bolla de7iya bira migiddotan kaqetidi uttidosona. Qassi worqafenne birape oosetida arsati, dumma dumma mali de7iya al7o shuchatape oosetida baasuwan maaran yegetidosona.
EST 1:7 Issoy issuwafe dumma gidida worqa burcukon woyne ushshi asa ubbaas imetis. Kawoy daro keeha gidida gisho, woyne ushshas zawi baawa.
EST 1:8 Issi issi asi ba koyida mela uyees; hessa kawoy koyrottidi ba aylletas odis.
EST 1:9 He wode Kawiya Asxiina maccasa ubbaas gibira kawo gadhon giigisasu.
EST 1:10 Gibiray doometida laapuntha gallas, kawoy Arxekisisi woyne ushsha alidi ufaytida wode, ba aylleta Mehumana, Bizita, Harboona, Bigita, Abagita, Zataranne Karkasa geetetiya laapun shuufata xeegidi,
EST 1:11 “Kawiw Asxiino kawotetha kallacha wothidi haa ekidi yiite” yaagidi kiittis. Iya daro mala lo77o gidiya gisho, halaqatinne asa ubbay iyo be7ana mela kawoy koyis.
EST 1:12 Shin kawa kiitaa iw odin, kawiya Asxiina kawa sinthe yoonna ixasu. Hessi kawa daro hanqethis.
EST 1:13 He biitta higgiyanne de7o wogaa eriya asaa zore oyshoy kawa matan meezetidaba gidiya gisho, wodiyaba shaakidi eriya cinca asatara odetis.
EST 1:14 Kawoy gita maati de7iya laapun Farsenne Meedona shuumata, Arqesiyoosa, Shetara, Adimata, Tarshesha, Mareesa, Marsananne Memukaana xeegisis.
EST 1:15 Kawoy enta, “Taani, kawoy Arxekisisi, ta shuufata kiittin, Kawiya Asxiina ta kiitaa polonna ixasu. Hessa gisho, higgey odiya maaran iyo waatanaw bessii?” yaagidi oychis.
EST 1:16 Entafe issoy, Memukaani kawa sinthaninne halaqata sinthan haysada yaagis; “Kawiya Asxiina kawa xalaala gidonashin, iya halaqata ubbaanne iya kawotetha giddon de7iya asa ubbaa naaqasu.
EST 1:17 Ha kawotetha giddon de7iya maccasi ubbay kawiya Asxiina oothidaysa si7idi, banta azinata kadho doomana. Enti, ‘Kawoy Arxekisisi baako yaana mela xeegisin, kawiya Asxiina ixabekeyee?’ yaagana.
EST 1:18 Hessa xalaala gidonashin, Farsenne Meedona halaqata maccasay hessa si7ida wode, hachi awi wullana gakanaw banta azinata hessada gidi kadhana. Hessa gaason macheta giddoninne azinata giddon ooshshi keyana.
EST 1:19 Hessa gisho, kawaw, neeni dosiko, kawiya Asxiina nam7antho ne sinthe aadhona mela teqiya awaajo kessa. He awaajoy nam7antho laametonna mela Farsenne Meedona higgiya giddon xaafeto. Hessafe guye, kawotetha bonchuwa iipe ekada hara lo77o maccasas imma.
EST 1:20 Ha neeni aathida awaajoy ha gita kawotetha ubban odetiya wode issi issi maccasi dure gidin manqo gidin, shaakonna ba azinaa bonchana” yaagis.
EST 1:21 Kawoynne iya halaqati ha zoriyan ufaytidosona. Hessa gisho, Memukaani gidaysada kawoy oothis.
EST 1:22 I ba kawotethaa giddon de7iya dumma dumma biittatas enta pidaleninne enta doonan xaafidi, dabdaabe yeddis. He awaajoy, issi issi azini ba keethaa keethaa aysiya halaqa gideysa odees.
EST 2:1 Hessafe guye, kawa Arxekisisa hanqoy dochin, kawiya Asxiina oothidabaanne I bolla keyida awaajuwaba qopis.
EST 2:2 He wode kawa matan haggaaziya na7atethata addeti haysada yaagidosona; “Mala lo77o geela7ota koyidi, kawas ehana mela,
EST 2:3 ne kawotethaa giddon de7iya biitta ubban halaqata shuuma. Enti mala lo77o geela7o dooridi, Suusa katamaa ehidi, maccasas giigida keethan wotho. Yan he maccasa keethaas kaapo gidida kawo shuufa Hegaya kushen enti de7ishin, enta malaa loythiyaba ubbay entaw imeto.
EST 2:4 Hessafe guye, ubbaafe aadhada kawa ufaysiya geela7iya Asxiini bessan kawo macho gido” yaagidosona. Ha zorey kawa ufaysida gisho, kawoy hessada oothis.
EST 2:5 Yan Suusa kataman issi Mardikiyoosa geetetiya Ayhude asi de7ees. I Ya7ira na7a; Ya7iri Same7a na7a; Same7i Biniyaame koche gidida Qiisa na7a.
EST 2:6 Babiloone kawoy Nabukadanaxoori Yihuda kawa Yo7akinanne hara Ayhude asaa olan di77idi efida wode Mardikiyoosi entara bis.
EST 2:7 I ba aawa ishaa na7iw, Ibraawetho doonan Hadaso geetetiya Astiro baara wothidi dichees. Astira medhoninne geesan daro mala lo77o. I aawaynne aayiya hayqidaape guye, Mardikiyoosi iyo efidi, ba na7a oothidi dichis.
EST 2:8 Kawoy kessida awaajuwanne kiitaa maaran, Suusa katama yida dooretida daro geela7otape issinniya Astiro. Iya yada, maccasas giigida keetha kaapo gidida Heega aawatetha garsan de7asu.
EST 2:9 Heegi Astiro be7ida wode in daro ufaytis; iyo dumma xeellis. Ellesidi maanaw dumma kathinne bolla tiyetiyaba iw immis. Qassi iyo matan haggaazana mela kawo gadhope dooretida laapun na7atethi, maccasata giigida keethan, kifile ubbaafe aadhidi lo77iya kifilen iyonne entana wothis.
EST 2:10 Mardikiyoosi iw koyrottidi odidaysada, Astira Ayhude asi gideysa oodeska odabuuku.
EST 2:11 Qassi Mardikiyoosi Astira waana de7iyakonne iw haniyaba be7anaw, maccasa keetha sinthara gallas gallas gedenne haa hemetees.
EST 2:12 Geela7oti kawako gelanaape koyrottidi, issi laythi kumethi banta malaa loythishe gam7oosona. Hessika, koyro usupun ageena karbe zayten gorpetishe gam7idi, nam7antho usupun ageena qassi, lo77o sawiya shitton gorpetoosona.
EST 2:13 Hessafe guye, issi geela7iya kawako geliya wodey gakiya wode, ba koyida ma7uwa ma7a lo77ada, maccasa keethafe keyada, kawoy de7iya bessa gelawusu.
EST 2:14 Qamma gelada, kawuwara aqidaape guye, wonta guura keyiko, maccasati de7iya hara keethi iyo efoosona. He keethaas kaapo gidida kawo shuufay Shashagaazi iyo naagees. Kawoy dosidi I sunthaa xeegidi, “Ebelto ehite” goonna ixiko, iya nam7antho kawako gelanaw danda7uku.
EST 2:15 Hessi hanishin, kawako geliya tari Astiro gakis. Astira Mardikiyoosa aawa ishaa Abikaala na7iw; Mardikiyoosi ba na7a oothidi dichidaaro. Iya maccasas giigida keethaas kaapo gidida kawo shuufa Hegayi zoridaysada ma7o ma7asu. Iyo be7ida ubbay I malaa nashshis.
EST 2:16 Arxekisisi kawotida laapuntha laythan, Tebeeta geetetiya tammantho ageenan Astira kawoy de7iya bessaa gelasu.
EST 2:17 Iya Gelida wode, kawoy hara maccasa ubbaafe aathidi, iyo dosis; qassi hara geela7ota ubbaafe in ufaytis. Hessa gisho, kawotetha kallachaa I huuphen wothidi, iyo Asxiini bessan kawo macho oothis.
EST 2:18 Hessafe guye, kawoy Astiri bonchuwas gita gibira giigisidi, halaqatanne biitta ayseysata xeegis. Qassi ba kawotethaa giddon ufaysa ba7aaley bonchetana mela awaajis. Biitta ubbaas issi laytha giira maaris. Imotaka ba keehatetha mela huuphen huuphen immis.
EST 2:19 Geela7oti nam7antho shiiqidi de7ishin, Mardikiyoosi kawa dabaaban uttiya asape issuwa gidis.
EST 2:20 Mardikiyoosi, “Neeni Ayhude gideysa oodeska odopa” gida gisho, Astira ha77i gakanaw oodeska odabuuku. Kase na7atethan kiiteteysada, ha77ika iyaw kiitetawusu.
EST 2:21 Mardikiyoosi kawo keethan oothishe de7iya wode, kawoy de7iya kifileta geliya pengiya naagiya kawo shuufatape nam7ati, Gabatinne Taari kawa Arxekisisa ixidi, wodhanaw maqetidosona.
EST 2:22 Enta maquwa Mardikiyoosi si7idi, kawe Astiris odin, iyaka Mardikiyoosa sunthan kawas odasu.
EST 2:23 Kawoy hanidaba pilgidi xeelliya wode, oday tuma gididi bentin, he nam7u asata kaqidi wodhis. Ha hanotay kawa Arxekisisa Taarike xaafiya maxaafan xaafetis.
EST 3:1 Hessafe guye, kawoy Arxekisisi Haama geetetiya baara ootheysa shuumatetha dhoqisidi, ba halaqata halaqa oothidi shuumis. Haama aaway Hamadaati Agaaga koche.
EST 3:2 Kawoy kiittidi wothida gisho, kawo gadho pengen oothiya halaqati ubbay Haami aadhiya wode gulbatidi iya bonchoosona. Gidoshin, Mardikiyoosi Haamas gulbatonanne iya bonchona ixis.
EST 3:3 He wode kawo gadho pengen oothiya halaqati Mardikiyoosa, “Ayis kawa kiitaa polonna ixay?” yaagidi,
EST 3:4 gallas gallas iyaw odoosona. Shin I enti odeysa si7anaw koybeenna. Ubba qassi, “Taani Ayhude asi gidiya gisho, Haama gulbatanawunne iya bonchanaw danda7ike” yaagis. Hessafe guye, “Mardikiyoosi odiya gaasuwa si7idi, Haami waanandeesha!” yaagidi iyaw odidosona.
EST 3:5 Mardikiyoosi baw gulbatonaysanne bana bonchonaysa Haami erida wode hanqo eexis.
EST 3:6 Hessa bolla qassi, Mardikiyoosi Ayhude asi gideysa eridi, iya xalaala wodhoy laafaba gidi qopida gisho, Arxekisisa kawotethan de7iya Ayhude kocha ubbaa dhaysanaw qopis.
EST 3:7 Arxekisisi kawotida tammanne nam7antho laythan, Nisaane geetetiya koyro ageenan, Ayhudeta wodhiya ageenanne gallasa eranaw, Purima geetetiya saamaa iya sinthan yeggana mela Haami kiittis. He saamay wodhida maaran, Adaare geetetiya tammanne nam7antho ageenan, tammanne heedzantho gallas Ayhudeti wuriya gallas gideysi qashetis.
EST 3:8 Hessafe guye, Haami kawa Arxekisisako haysada yaagis; “Ne kawotethaa giddon ubba bessan laaletidi de7iya issi kochay de7ees. Enta de7o maaray hara asaysafe dumma; hessa xalaala gidonashin, enti kawo higgiyas haaretokona. Hessa gisho, neeni enta de7o gada si77i giiko, hessi lo77o gidenna.
EST 3:9 Hessa gisho kawaw, ha qofay nena ufaysiko, ha asata wodhidi dhaysana mela awaajo kessa. Hessa ne oothiko, taani heedzu xeetanne oytamu mukulu kilo giraame bira kawo buqura minjiya keetha gelsanaada, ne kawotethaa ayseysatas immana” yaagis.
EST 3:10 Kawoy ba maata erisanaw awaajuwa bolla wothiya migiddo maatame ba biradhiyafe kessidi, Ayhudeta morke gidida, Agaaga kochaas, Hamadaata na7aa Haamas immis.
EST 3:11 Kawoy Haama, “Neeni immana gida biray ne matan de7o; shin ha asata bolla ne dosidaba ootha” yaagis.
EST 3:12 Hessa gisho, koyro ageenan, tammanne heedzantho gallasan, Haami kawa xaafeta ubbaa xeegidi, he awaajoy biitta ubban de7iya asaas dumma dumma doonaninne dumma dumma pidalen xaafetidi, kawope garsara biitta haareysatas, awuraja haareysatasinne dere halaqata ubbaas kiitetanaada kiittis. Awaajoy kawa Arxekisisa sunthan xaafetidi, migiddo maatamey iya bolla wosetin,
EST 3:13 kiitetidaysati iya kawotethaa ubbaa gathanaada kiitetidosona. He awaajoy, “Adaare geetetiya tammanne nam7antho ageenan tammanne heedzantho gallasan, Ayhude ubbaa, yalaga, cima, macca, addiyanne, nayta ashshona issi gallas wursidi wodhidi; enta shaluwaka bonqite” yaagees.
EST 3:14 Hessa gisho, he qashetida gallasay gakiya wode asi ubbay giigetanaada, he awaajoy biitta ubbaa kiitetisinne asa ubbaas awaajetis.
EST 3:15 Kawoy kiitidaysati biitta ubbaa kiitaa gathidosona. Qassi Suusa katamanka odetis. Yaatin, Suusa katamaa asa ubbay daggamis. Shin kawuwaranne Haamara issife uttidi, woyne ushsha uyoosona.
EST 4:1 Mardikiyoosi ha hanidaba ubbaa si7ida wode, azzanidi ba ma7uwa peedhidi, kayo ma7o ma7idi, ba huuphen bido qolis. Ba qaala dhoqu oothidi, yibbata yeeho yeekishe, katamaa giddon yuuyis.
EST 4:2 Kayo ma7o ma7idi kawo keethi gelanaw oonika danda7onna gisho, I kawo keethi geliya pengiya gakanaw bis.
EST 4:3 Kawa awaajoy si7etida biitta ubban Ayhudeta giddon gita kayoy, xoomi, yeehoynne zelelsi doometis. Entafe daroti qassi kayo ma7o ma7idi, kayotanaw bido bolla uttidosona.
EST 4:4 Astiri dangirixetinne iyo naagiya shuufati yidi, Mardikiyoosaba iw odida wode iya daro azzanasu. Mardikiyoosi kayo ma7uwa qaaridi, hara ma7o ma7ana mela iyaw ma7o yeddasu; shin I ekonna ixis.
EST 4:5 Hessafe guye Astira, kawoy iw kiitetana mela wothida Hataka geetetiya shuufa xeegada, Mardikiyoosa metoy aybeko qassi I ayis kayotiyako erana mela iyako kiittasu.
EST 4:6 Hataki kawo keethi geliya pengiya matan katamaa dabaaban de7iya Mardikiyoosako bis.
EST 4:7 Mardikiyoosi, ba bolla gakidaba ubbaa qoncisidi, iyaw odis. Qassi Ayhudeta kumethi wursanaw Haami kawo buqura minjiya keethaas immanaw qopida miishiya likiyara ubbaa ashshona geeshshidi odis.
EST 4:8 Hessa xalaala gidonashin, Ayhudeta wursanaw Suusa kataman keyida awaajoy xaafetida worqatiya Astiris immana melanne haniyaba ubbaa iw odana mela odis. Qassi Astira kawako gelada, ba asay wuronnaada gaannatana mela Hatakas odis.
EST 4:9 Hataki yidi, Mardikiyoosi gidaba ubbaa Astiris odis.
EST 4:10 Astira, Hataka zaarada, Mardikiyoosako haysada yaagada kiittasu.
EST 4:11 “Macca gidin, adde gidin, oonika xeegetonna de7ishe, kawuwara gahetanaw kawo gadhos giddo dabaaba geliko, hayqo. Shin I xeegetonna kawako geliya wode kawoy ba worqa xam7aa xeeraa iyako zaaridi bessiko, he uraa xalaali paxa attees. Ha higgiya kawa zoreysatape bidi, coo asaa gakanaw de7iya asi ubbay erees. Shin taani hastamu gallas gidoosape kawako gelanaw xeegeta erike” yaagasu.
EST 4:12 Mardikiyoosi Astira kiitida kiitaa si7idaape guye,
EST 4:13 haysada yaagidi iiko kiittis; “Taani kawo gadhon de7iya gisho, hara Ayhudetape attishin, tana bochiyabay baawa gada qopofa!
EST 4:14 Neeni haysa mela woden si77i giiko, Ayhudetas maadoy harasoope yaana. Enti tuma attana; shin neeninne ne aawa keethaa asay hayqana. Neeni kawo macho gidada yiday haysa mela wodeseko ooni erii?” yaagis.
EST 4:15 Astira Mardikiyoosako haysada yaagada zaarada kiittasu;
EST 4:16 “Bada Suusa kataman de7iya Ayhudeta ubbaa shiisha; xoomidi taw woossite. Heedzu gallasinne heedzu qammi wurana gakanaw, kathi moopite; haathe uyopite. Taani tana haggaaziya maccatara hessada xoomana. Hessafe guye, higgiyan digetidaba gidikoka, kawoy de7iya bessaa taani gelana. Taani hayqikoka hayqana” yaagasu.
EST 4:17 Mardikiyoosi bidi, Astira iya kiittidaysada ubbaa oothis.
EST 5:1 Xoomay doometin heedzantho gallas Astira kawotetha ma7o ma7ada, kawo gadhon giddo dabaaba gelada eqasu. Kawoy kawo keethi geliya pengiyan de7iya ba araatan uttis.
EST 5:2 Astira gelada, giddo dabaaban eqidaaro kawoy be7idi in ufaytida gisho, ba worqa xam7aa iiko miccis. Iya shiiqada xam7aa xeeraa bochasu.
EST 5:3 Kawoy iiko, “Kawe Astire, neeni taako ayis yadii? Qassi neeni tana oychiyabay aybee? Hari attoshin ta kawotethaafe baggaa gidikoka, ta new immana” yaagis.
EST 5:4 Astira zaarada, “Kawaw, nena ufaysiyabaa gidiko, taani new giigisida gibira maanaw neera Haamara nam7ay hachi omarsi yaako dosayis” yaagasu.
EST 5:5 Hessafe guye kawoy, “Nuuni Astira giigisida gibiras baanaw Haama ellesidi ehite” yaagis. Hessa gisho nam7ay he bessaa bidosona.
EST 5:6 Enti issife woyne ushsha uyishin, kawoy nam7antho Astiro, “Neeni tana woossiyabay aybee? Taani new immana. Qassi neeni tana oychiyabay aybee? Hari attoshin ta kawotethaafe baggaa gidikoka, ta ne oysha polana” yaagis.
EST 5:7 Astira zaarada ta oycheynne ta woossey haysa;
EST 5:8 “Kawaw, neeni tanan ufaytiyaba gidiko, qassi taani woossiyaba immanawunne ta oysha polanaw neeni dosiyaba gidiko, wonto ta giigisiya hara gibiras neera Haamara yaana mela oychayis. Taani ay koyaako he wode new qoncisana” yaagasu.
EST 5:9 Haami gibira bessaafe keyidi biya wode, daro ufaytida gisho, ba wozanan ufaysi noocu gishe bis. Shin I kawo keethi geliya pengiya matara aadhidi biya wode yan uttida Mardikiyoosa be7is. Iyaw dendiboonaysanne yayyidi kokoriboonaysa be7idi Haami yilo eexis.
EST 5:10 Gidoshin, ba yiluwa danda7idi bidi ba soo gakis. Hessafe guye, ba laggetanne ba machiw Zosaara xeegisidi,
EST 5:11 Haami ba duretetha likiya, ba adde nayta taybuwa, kawoy bana bonchida bonchuwanne hara halaqatapenne kawo moorinatape aadhiya shuumatethi immidi, waatidi iya bonchidaako nashetis.
EST 5:12 Gujidika Haami, “Hari attoshin kawiya Astiraka ba giigisida gibiras kawuwara baana mela taape attishin, hara oonaka xeegabuuku. Qassi wontoka kawuwara baana mela tana xeegasu.
EST 5:13 Shin Ayhude gidida Mardikiyoosi kawo keethi geliya pengen uttidaysa be7iya wode ha ubbayka tana ufaysenna” yaagis.
EST 5:14 He wode iya machiya Zosaaranne iya laggeti ubbay haysada yaagidosona; “Neeni ishatamu wadha mithi esisada wonto guura Mardikiyoosi kaqetana mela kawa oycha. Hessafe guye, ufaytashe gibira maanaw ba” yaagidosona. Haama ha qofay ufaysida gisho, enti gidaysada kaqa mithi giigisis.
EST 6:1 He wode qamma kawa dhiskoy ekonna ixis. Hessa gisho, kawoy kawo taarike xaafiya maxaafaa ehidi, kase hanida taariketa iyaw nabbabana mela kiittis.
EST 6:2 Nabbabetida taariketape issoy Mardikiyoosi oothidaba. Hessika, kawoy de7iya kifiliya naagiya, Gabatanne Taara geetetiya nam7u shuufati kawa wodhanaw maqida maquwa Mardikiyoosi qoncisis.
EST 6:3 Kawoy, “Yaatin, I hessa oothida gisho iyaw imetida shuumatethay woyko woytoy aybee?” yaagis. Kawa aylleti zaaridi, “Iyaw aykoy oosetibeenna” yaagidosona.
EST 6:4 Kawoy zaaridi, “Kare dabaaban de7ey oonee?” yaagis. He wode ba giigisida mithan Mardikiyoosa kaqanaw, kawa oychanaw, Haami kare dabaaba gelishe de7ees.
EST 6:5 Kawa aylleti, “Haami kare dabaaban eqis” yaagidosona. Kawoy zaaridi, “Haa gela giite” yaagis.
EST 6:6 Haami gelidaape guye kawoy, “Kawoy bonchanaw dosiya asas ay oothanaw koshshii?” yaagidi oychis. Haami, “Kawoy taape haraa oona bonchanaw dosii?” yaagidi ba wozanan qopis.
EST 6:7 Hessa gisho, Haami kawas yaagidi zaaris; “Kawoy bonchanaw dosiya asaas,
EST 6:8 kawoy ba kawotetha ma7uwa ehiso; ba toggiya para huuphen guche wotho.
EST 6:9 Hessafe guye, kawoy ba moorinatape issi daro bonchetidaysa xeegisidi, kawotetha ma7o iya mayzanaadanne kawa para bolla iya utisidi, katamaa dabaaba kessanaada kiitto. Yaatiko he daro bonchetida moorinnay iya sinthan hemetishe, ‘Kawoy bonchanaw dosiya uraas haysada oothees’ yaagidi awaajo” yaagis.
EST 6:10 Kawoy zaaridi, Haama haysada yaagidi kiittis; “Hiza ellesa dendada kawotetha ma7uwanne ta para ekada, ne gidaysada Ayhude gidida Mardikiyoosas ootha. I kawo keethi geliya pengen de7ees. Ne gidaysafe issibaaka ashshofa” yaagis.
EST 6:11 Hessa gisho, Haami Mardikiyoosa kawotetha ma7o mayzidi, kawa para bolla utisis. Qassi katamaa dabaaban iyape sinthara hemetishe, “Kawoy bonchanaw dosiya uraas haysada oothees” yaagidi awaajis.
EST 6:12 Hessafe guye, Mardikiyoosi kawo keethi penge guye simmidi bis. Shin Haami daro azzanida gisho, guuluntidi, ellesishe ba soo bis.
EST 6:13 Bana gakidaba ubbaa ba mache Zosaarisinne ba laggetas odis. Enti iyako, “Iya sinthan neeni kawuyanaw doomida ha addey, Mardikiyoosi, Ayhude asi gidiko, ne iyara eqetada, iya xoonanaw danda7aka; tuma I nena dhaysana” yaagidosona.
EST 6:14 Enti buroo hessa odetishin, kawa shuufati gakidi, Haama Astira giigisida gibiras ellesidi efidosona.
EST 7:1 Kawoynne Haami Astiri gibira maanaw bidosona.
EST 7:2 He nam7antho gallas gibiras bidi, enti woyne ushsha uyishin, kawoy, “Kawe Astire, neeni woossiyabay aybee? Taani new immana. Neeni tana oychiyabay aybee? Hari attoshin ta kawotethaafe baggaa gidikoka, taani ne oysha polana” yaagidi oychis.
EST 7:3 Kawiya Astira zaarada, “Kawaw, neeni tanan ufaytidaba gidiko, qassi ta oyshaaka polanaw dosiyaba gidiko, ta woosaynne ta oyshay tanne ta asay hayqonna attana melasa.
EST 7:4 Tanne ta asay issoyka attonna ubbay hayqos bayzetida. Nuuni bayzetiday macca ayllenne adde aylle gididi de7anaasa gidiyako, taani si77i gaana. Hessa mela metoy kawa waaysanaw bessiyaba gidenna” yaagasu.
EST 7:5 Kawoy Arxekisisi zaaridi, “Hessa oothanaw xaltaamiday oonee? I he addey awun de7ii?” yaagidi kawiw Astiro oychis.
EST 7:6 Astira, “Nu morkey, nuna dhaysanaw koyey, ha iita addiya Haama” yaagasu. He wode Haami kawa sinthaninne kawe sinthan daro dagammis.
EST 7:7 Kawoy daro hanqetidi, ba uttida bessaafe dendi, kawo gadho atakilte bessaa bis. Shin Haami kawoy iya bolla iitabaa ehanaw qopidaysa erida gisho, Astira iya hayqope ashshana mela woossanaw guye attis.
EST 7:8 Kawoy atakilte bessaafe simmidi geliya wode, Haami kawiiw Astiro maarota woossanaw, iya uttida arsa bolla gufannidaysa be7is. Kawoy yilo eexidi, ba qaala dhoqu oothidi, “La ha addey haysan kawo keethan, ta sinthan, kawiw kawushanaw koyiyee?” yaagis. Kawoy buroo hessa haasayishin, kawo shuufati yidi, Haama som7uwa goozidosona.
EST 7:9 Entafe issoy, Harboona geetetiya shuufay, “Kawaw, Haami nena hayqope ashshida Mardikiyoosa kaqanaw essida ishatamu wadha mithi iya son de7ees” yaagis. Kawoy zaaridi, “Haama efidi, he mithan kaqite” yaagidi kiittis.
EST 7:10 Hessa gisho, Mardikiyoosa kaqana gidi giigisida mithan Haami kaqetis. Hessafe guye, kawa hanqoy dochis.
EST 8:1 Ayhudeta morkey Haami kaqetida gallas kawoy Arxekisisi Haama shaluwa ubbaa kawe Astiris immis. Qassi Mardikiyoosi iw mata dabbo gideysa Astira kawas odasu. Hessa gisho, he wodepe doomidi, Mardikiyoosi kawako gelanaw danda7is.
EST 8:2 Kawoy Haamape guye ekida ba migiddo maatamiya kessidi, Mardikiyoosas immis. Astira Mardikiyoosa Haama shaluwa bolla aawayada shuumasu.
EST 8:3 Hessafe guye, Astira yeekashe, kawa toho bolla kundada, Agaaga koche gidida Haami Ayhudeta bolla tukida iita maqoy ooson pee7onna mela kawa woossasu.
EST 8:4 Yaatin, kawoy ba worqa xam7aa iw miccin, iya denda eqada,
EST 8:5 “Kawaw, neeni tanan ufaytidaba gidiko, qassi ta oyshaaka polanaw neeni dosidaba gidiko, ne kawotethaa giddon de7iya Ayhude ubbaa kumethi wodhana mela, Agaaga koche gidida Hamadaata na7ay Haami kessida awaajuwa shaariya hara awaajo kessanaada woossayis.
EST 8:6 Ha ubba dhayoy ta asaa bollanne ta dabbota bolla gakiya wode taani si77i gada waanna xeello?” yaagasu.
EST 8:7 Hessafe guye, kawoy Arxekisisi, kawiw Astironne Ayhude gidida Mardikiyoosa haysada yaagis; “Haami Ayhudeta wodhanaw awaajo kessida gisho, taani mithan iya kaqisidaysanne iya shaluwa ubbaa kawe Astiris immidaysa hinte ereeta.
EST 8:8 Gidoshin, kawo gadho maatame wothin, kawa sunthan keyida awaajoy laametanaw danda7enna. Hessa gisho, hinte hinte baggara Ayhudeta maaddanaw koydaba xaafite. Hessa ta sunthan xaafidi, kawo maatamiya iya bolla wothite” yaagis.
EST 8:9 Nisaane geetetiya heedzantho ageenan, laatamanne heedzantho gallasan, Mardikiyoosi kawa xaafeta ubbaa xeegidi, Hindefe bidi Tophe gakanaw de7iya xeetanne laatamanne laapun biittatan kawope garsara haareysatas, awuraja ayseysatasinne biitta halaqatas yeddiya awaajo xaafisis. Awaajoy dumma dumma doonaninne dumma dumma pidalen xaafetis; qassi Ayhudetaska enta doonaninne enta pidalen xaafetis.
EST 8:10 Mardikiyoosi he awaajuwa ubbaa kawa Arxekisisa sunthan xaafisidi, kawo maatame wothidi, kawo gaaxatan dhiiketida, eesotiya parata toggiya asata bolla biitta ubbaa yeddis.
EST 8:11 Kawoy kessida awaajoy, katamatan de7iya Ayhudeti issife shiiqanawunne banta bolla yaaba oletidi zaaranaw danda7ana mela maata immees. Qassi ola miishiya oykidi, ay biittafeka, enta olanaw yeyisata, enta naytaranne enta machetara ubbaa issuwaka ashshona wodhanawunne enta shaluwa bonqidi ekanaw maata immees.
EST 8:12 Ayhudeti kawa Arxekisisa kawotethan hessa oothanaw qachida gallasay, Adaare geetetiya tammanne nam7antho ageenan, tammanne heedzantho gallasaana.
EST 8:13 Kawa awaajuwa biittata ubban de7iya asay eranaada, higge gididi awaajetis. Hessika Ayhudeti banta morketa bolla halo keyanaw bantana giigisanaw danda7isees.
EST 8:14 Kiiteteysati kawo keetha parata toggidi, kawa kiitaa gathanaw ellesidi bidosona. Qassi Suusa kataman ha awaajoy asa ubbaas odetis.
EST 8:15 Mardikiyoosi kaalosenne bootha kawotetha ma7o ma7idi, ocha teera daaniyanne liinope oosetida kaaba bollara ma7is; qassi gita worqa kallachaa wothidi, kawa sinthafe keyis. Suusa katamay ililisaninne ufaysan noocu gis.
EST 8:16 Hessi Ayhudetas gita ufaysi, ililsinne boncho wode gidis.
EST 8:17 Hessa gisho, kawa awaajoy nabbabetida biittaninne katamaa ubban de7iya Ayhudeti gita ba7aale kessidi, ufaytishenne gibira mishe pee7idosona. Hessa gaason Ayhudetas yayyidi, yan de7iya hara zare asaape daroti Ayhude gididosona.
EST 9:1 Adaare geetetiya tammanne nam7antho ageenan tammanne heedzantho gallasay gakis. He gallas, kawoy koyro kessida awaajuwa maaran morketi Ayhudeta xoonana gida qopida gallasaa. Shin oday shireti wodhin, Ayhudeti banta morketa xoonidosona.
EST 9:2 Kawa Arxekisisa kawotethan de7iya Ayhudeti ubbay bantana qohanaw koyiya ubbaa dhaysanaw banta kataman kataman issife shiiqidosona. Hara zare gidida asay entaw yayyida gisho, entara ay asika eqetanaw danda7ibeenna.
EST 9:3 Enti Mardikiyoosas yayyida gisho, kawope garsara biitta haareysati, awuraja ayseysatinne biitta halaqati ubbay Ayhudeta maaddidosona.
EST 9:4 Mardikiyoosi kawo gadhon gita maati imetidanne wolqan guji guji biya asi gideysi he kawotethan de7iya biitta ubban eretis.
EST 9:5 He gallas Ayhudeti banta morketa ubbaa mashshan goyridi wursidosona; bantana ixiya ubbaa bolla koydaba oothidosona.
EST 9:6 Waanna katama gidida Suusa xalaalan ichashu xeetu asaa wodhidosona.
EST 9:7 Enti Parshandata, Dalfoona, Aspata,
EST 9:8 Porata, Adala, Ardata,
EST 9:9 Parmashita, Arsaya, Ardayanne Wayzata wodhidosona.
EST 9:10 Enti Ayhudeta morke gidida Haama nayta. Shin enti enta shaluwa bonqibookona.
EST 9:11 Ayhudeti Suusa kataman wodhida asaa tayboy aapuneko he gallas kawas odetis.
EST 9:12 Yaatin, kawoy kawiw Astiro, “Ayhudeti waanna katama gidida Suusa xalaalan ichashu xeetu asaanne tammu Haama nayta wodhidosona. Hessi hessa gidiko, kawa biittatan enti wodhiday aapuna gidandesha! Qassi ha77i neeni woossiyabay aybee? Taani new immana. Neeni tana oychiyabay harabay aybee? Taani new polana” yaagis.
EST 9:13 Astira zaarada, “Kawa ha qofay ufaysiko, Suusa kataman de7iya Ayhudeti hachi oothidaysada wontoka ootho. Qassi tammu Haama nayta ahaa mitha bolla kaqanaada kiitta” yaagasu.
EST 9:14 Kawoy hessa oothana mela kiittis. Awaajoy Suusa kataman nam7antho awaajetin, tammu Haama nayta ahay kocaa bolla kaqetis.
EST 9:15 Adaare geetetiya ageenan tammanne oyddantho gallasan, Suusa kataman de7iya Ayhudeti issife shiiqidi, hara heedzu xeetu asaa wodhidosona; shin ha77ika enta shaluwa bonqibookona.
EST 9:16 He wode Suusa katamaape gaxara de7iya kawa biittatan de7iya Ayhudeti issife shiiqidi, banta morketa ubbaa olidosona. Enti laapun tammanne ichashu mukulu asaa wodhidaape guye banta morketape shempidosona. Shin enta shaluwa bonqibookona.
EST 9:17 Haysi ubbay haniday Adaare geetetiya ageenan tammanne heedzantho gallasaana. Tammanne oyddantho gallasan enti shempidosona; gibira mishe, uyishenne ufaytishe pee7iya gallas oothidosona.
EST 9:18 Shin Suusa kataman de7iya Ayhudeti tammanne heedzanthonne tammanne oyddantho gallasan wodhishe pee7idi, tammanne ichashantho gallasan shempidosona. Enti he gallasaa mishe, uyishenne ufaytishe pee7iya gallas oothidosona.
EST 9:19 Hessa gisho, guutha katamatan de7iya Ayhudeti hachi gakanaw Adaare geetetiya ageenan tammanne oyddantho gallasaa ba7aale gallas oothidi bonchoosona. He gallasan moosonanne uyoosona; qassi issoy issuwas imota immoosona.
EST 9:20 Mardikiyoosi ha hanida taarike ubbaa xaafidi, kawa Arxekisisa biitta ubban, haahoninne matan de7iya Ayhude ubbaas yeddis.
EST 9:21 He dabdaabiyan Mardikiyoosi Adaare ageenan tammanne oyddanthonne tammanne ichashantho gallasata, Ayhudeti laythan laythan ba7aale gallas oothidi bonchana mela entaw odis.
EST 9:22 He gallasati Ayhudeti banta morketape shempo demmida gallasata. Qassi he ageenay enta azzanoynne yeehoy ufaysaninne gibira muussan laametida ageena. Hessa gisho, enti muussaninne ushshan ufaytishe, issoy issuwasinne manqotas katha imota immishe bonchana mela entaw odis.
EST 9:23 Ayhudeti Mardikiyoosi immida kiitaa ekidi, enti bonchanaw doomida baaliya, laythan laythan aggonna bonchanaw ma7idosona.
EST 9:24 Agaaga kochay, Hamadaata na7ay Haami, Ayhudeta ubbaa morkey, enta dhaysanaw kase maqetidi enta wodhiya ageenanne gallasa eranaw Purima geetetiya saama yegisis.
EST 9:25 Shin Astira kawako gelidaape guye, Haami Ayhudeta bolla maqida iita maqoy ubbay guye simmidi, iya bolla poletanaada kawoy xuufen kiittis. Yaatin, Haaminne iya tammu nayti ahay mithan kaqetis
EST 9:26 Hessa gisho, ha nam7u gallasati Purima Ba7aale geetetoosona. Ha dabdaabiyan entaw xaafetidaba ubbaa gaason, enti banta ayfen be7idaba gaasoninne enta bolla gakidaba gaason
EST 9:27 Ayhudeti bantaw, banta kochatasinne Ayhude gidanaw koyiya ubbaas, ha baaliya woga oothidi bonchidosona. Hessika laythan laythan aggonna ha nam7u gallasata bonchana melasa.
EST 9:28 He gallasati yeleta ubban, katamata ubban, Ayhudeta keetha ubbaninne biitta ubban bonchetana mela qashetis. Hessika, Ayhudeti awude gidikoka, ha Purima gallasata bonchanawunne he gallasatan hanidabay enta kochan dogetonna mela qopanaw bessees.
EST 9:29 Hessafe guye, Abikaala na7iya, kawiya Astiranne Ayhude addey Mardikiyoosi, Purima Baaliyaba kase xaafida dabdaabiya minthanaw haysa nam7antho dabdaabiya kumetha maatan xaafidosona.
EST 9:30 He dabdaabeti Arxekisisa kawotethan, xeetanne laatamanne laapun biittan de7iya Ayhudeta ubbaas saroynne wopatethi gido giya sarotara xaafetidi kiitetidosona.
EST 9:31 Qassi enti kase xoomanawunne kayotanaw wogaa kessidaysada, ha77i enta gidin, sinthafe yaana enta kochata gidin, ha Purima gallasata laythan laythan woga oothidi bonchana mela he dabdaabeti qoncisosona. Hessi Ayhude addey Mardikiyoosinne kawiya Astira issife zoretidi kessida kiita.
EST 9:32 Kawe Astiri kiitay Purima Ba7aale wogaa minthis; ika maxaafan xaafetis.
EST 10:1 Kawoy Arxekisisi ba kawotethan gaxape gaxa gakanaw de7iya asa ubbay giira qanxana mela wolqan kiittis.
EST 10:2 I oothida gitanne malaalsiya oosoti ubbay, Mardikiyoosaka dhoqu oothidi waati bonchidaako qoncisiya taarikey Meedonanne Farse kawotetha taarike maxaafan xaafetis.
EST 10:3 Maatan gidiko, Mardikiyoosi kawa Arxekisisape nam7antho. I Ayhudetanka daro bonchetidanne dosetida asi. I ba ase gidida Ayhudeti, sarotethaninne hirgi bayna daana mela daro daaburida asi.
JOB 1:1 Uxe biittan Iyyoba geetetiya issi asi de7ees; I borey bayna asi, suure asi, Xoosse yayyiyanne iitabaape haakida asi.
JOB 1:2 Iyaw laapun adde naytinne heedzu macca nayti de7oosona.
JOB 1:3 Iyaw laapun mukulu dorsati, heedzu mukulu gimaleti, ichashu xeetu waatha boorati, ichashu xeetu macca haretinne daro aylleti de7oosona. Doloha bagga biittan de7iya asa ubbaafe I aadhida dure asi.
JOB 1:4 Iya adde nayti banta son son gibira giigisidi, banta heedzu micheta xeegidi issife moosonanne uyoosona.
JOB 1:5 Gibira gallasati poletiya wode Iyyobi ba nayta xeegisidi, “Ooni eri ta nayti banta wozanan Xoosse baaddidi nagara oothonna aggokona” gidi wonta guura dendidi, entana geeshshanaw ba nayta issuwa issuwa sunthaa xeegidi xuussa yarsho yarshees. Iyyobi hessa ubba wode oothees.
JOB 1:6 Issi gallas kiitanchoti Godaa sinthan bentanaw yidosona; Xalaheyka qassi entara yis.
JOB 1:7 Goday Xalahiyako, “Neeni awupe yadii?” yaagis. Xalahey, “Taani sa7a ubban yaanne haanne yuuyashe gam7as” yaagidi zaaris.
JOB 1:8 Goday Xalahiyako, “Yaatin, neeni ta aylliya Iyyoba loytha be7adii? Sa7a bolla iya mela borey bayna asi, suure asi, Xoosse yayyiyanne iitabaape haakida asi baawa” yaagis.
JOB 1:9 Xalahey zaaridi, “Tuma Iyyobi Xoossas coo yayyii?
JOB 1:10 Iyanne iya soo asaa, iyaw de7iyaba ubbaa neeni dirada naagabikii? I oothiya ooso ubbaa neeni anjida gisho iya mehe wudey biitta ubbaa bolla daris.
JOB 1:11 Shin neeni ne kushiya yeddada, iyaw de7iya aquwa ubbaa shociyako, tuma I nena som7on baaddana” yaagis.
JOB 1:12 Goday Xalahiyako, “Ero lo77o, iyaw de7iyaba ubbay ne kushena, shin iya bochofa” yaagis. Hessafe guye, Xalahey Godaa sinthafe keyidi bis.
JOB 1:13 Issi gallas Iyyoba adde naytinne macca nayti banta bayra ishaa son moosonanne woyne ushshi uyoosona.
JOB 1:14 Issi kiitetida asi Iyyobako yidi, “Nuuni boorata waaxidi goyishin, haretika nu matan mishin,
JOB 1:15 Saaba biitta asati akeekona yidi ola kessidi, ubbaa bonqidi ekidosona; qassi aylletaka mashshan wodhidosona. Yaatin, taani ta xalaala attada ha hanidaba new odanaw yas” yaagis.
JOB 1:16 I buroo odishin hara asi yidi, “Salope tami wodhidi dorsatanne heemmeyisata mis. Yaatin, taani ta xalaala attada ha hanidaba new odanaw yas” yaagis.
JOB 1:17 I buroo odishin hara asi yidi, “Kaldaaweti heedzu cugan shaaketidi yidi, nuna olidi gimaleta ubbaa eki bidosona; aylletaka mashshan wodhidosona. Yaatin, taani ta xalaala attada ha hanidaba new odanaw yas” yaagis.
JOB 1:18 I buroo odishin, hara asi yidi, “Ne adde naytinne macca nayti banta bayra ishaa son misheenne woyne ushshi uyishee de7ishin,
JOB 1:19 wolqaama gotey akeekona mela biittafe dendidi, keethaa shocin, keethay enta bolla kundidi nayta wodhis. Yaatin, taani ta xalaala attada ha hanidaba new odanaw yas” yaagis.
JOB 1:20 Hessafe guye, Iyyobi dendidi, kayos ba ma7uwa pheedhis; ba huuphiya buluusis; biittan gufannidi goyinnishe,
JOB 1:21 “Taani ta aaye ulope kallo yeletas; hayqasheka taani kallo baana; Goday immis; Goday zaaridi ekis; Godaa sunthay galatetto” yaagis.
JOB 1:22 Ha ubbanka Iyyobi nagaraa oothibeenna; Xoossaa bolla iitaba odetibeenna.
JOB 2:1 Hara gallas kiitanchoti Godaa sinthan bentanaw yidosona; Xalaheyka qassi entara issife iya sinthan bentanaw yis.
JOB 2:2 Goday Xalahiyako, “Neeni awupe yadii?” yaagis. Xalahey Godaako, “Taani sa7a ubban yaanne haanne yuuyashe gam7as” yaagis.
JOB 2:3 Goday Xalahiyako, “Neeni ta aylliya Iyyoba loythada be7adii? Sa7a bolla iya mela borey bayna asi, suure asi, Xoosse yayyiyanne iitabaape haakida asi baawa. Gaasoy bayna taani iya dhaysana mela ne tana denthethinka ha77i gakanaw I ba suuretethan minnidi eqis” yaagis.
JOB 2:4 Xalahey zaaridi, “Ne shempoy atto” asi geysada asi ba shempuwa gisho baw de7iyaba ubbaa immees.
JOB 2:5 Shin, “Neeni ne kushiya yeddada iya asatethaa bochiyako, I nena tuma som7on baaddana” yaagis.
JOB 2:6 Goday Xalahiyako, “Ero lo77o, iya wodhopafe attishin, iya bolla ne koydaba oothanaw danda7aasa” yaagis.
JOB 2:7 Hessafe guye, Xalahey Godaa sinthafe keyidi, Iyyoba tohope huuphe gakanaw iita madunthan kaa7etana mela oothis.
JOB 2:8 Iyyobi bido bolla uttidi kon7an bana goodis.
JOB 2:9 Iya machiya, “Ha77i gakanawuka neeni ne suuretetha mintha oykadii? Xoossaa baaddada hayqaaga” yaagasu.
JOB 2:10 Iyyobi zaaridi, “Neeni eeya maccasada waanada odetay? Nuuni Xoossaafe lo77oba eki gam7idi, iitabay gakiya wode ekokoyee?” yaagis. Ha waaye ubban Iyyobi Xoossa bolla iitabaa odetibeenna.
JOB 2:11 Heedzu Iyyoba laggeti, Temaana biittafe Elfaazi, Shuuha biittafe Beldadoosinne Na7ima biitta asi gidida Soofari Iyyoba bolla gakida metuwa si7ida wode iyaw qadhetanawunne minthethanaw issife iyako yidosona.
JOB 2:12 Enti iya haahon eqidi xeelliya wode I Iyyoba gideysa eribookona. Guyepe iya gideysa erida wode banta qaala dhoqu oothidi yeekidosona; banta ma7uwa peedhidi, banta huuphen baana qolidosona.
JOB 2:13 Enti iyara laapun gallasinne laapun qamma biittan uttidosona. Enti iya waayey keehi daro gideysa be7ida gisho oonika iya odisibeenna.
JOB 3:1 Hessafe guye, Iyyobi ba doona dooyidi, ba yeletida gallasaa haysada yaagidi baaddis.
JOB 3:3 “Taani qanthatida qammaynne yeletida gallasay baadetidaba gido!
JOB 3:4 He gallasay dhuman laameto! Salo Xoossay he gallasaa qopofo; iya bolla poo7oyka poo7opo.
JOB 3:5 Sakana dhuminne caagani iya goozo; iya shaarii kammo; iya poo7uwa dhumi qoso.
JOB 3:6 He gallasaa qamma sakana dhumi oyko. Laytha giddon de7iya gallasatan taybetofo; ageenata taybonka gelopo.
JOB 3:7 He qammay mayno; ufaysa ililsi iyan si7etofo.
JOB 3:8 Leewataane denthanaw danda7eysatinne gallasata baaddeysati he gallasaa baaddo.
JOB 3:9 He qamman bakali poo7opo; poo7o naagidi demmofo; wonta xalqey iyaw dolopo.
JOB 3:10 He gallasay taani ta aaye ulon qanthatonna melanne ha waayiya be7onna mela ashshiboona gisho baadetidaysa gido.
JOB 3:11 “Taani ta aaye ulon haatha gidida gidarkina! Ta aaye ulope yeleta wodhida mela hayqida gidarkina!
JOB 3:12 Ta aayiya tana ayis ba ki7on ekadesha? Ba dhanthaaka tana ayis dhanthadesha?
JOB 3:13 He wode taani hayqidaba gidiyako, ha77i taani shempada dhiskana shin!
JOB 3:14 Ha77i laaletida bessata bantaw keexida, ha sa7aa kawotaranne zoreysatara,
JOB 3:15 enta keethan worqaynne biray kumida halaqatara issife duufon zin7anashin!
JOB 3:16 Woyko bosha gididi yeletida na7ada, gallasa poo7o be7iboona yooga na7ada biitta giddon ayis qosetabikina?
JOB 3:17 Duufon iitati banta iita ooso aggoosona; yan daaburanchoti shempoosona.
JOB 3:18 He bessan qasho asati shempidi ufaytoosona; enta un7etheyisata waasuwa yan si7okona.
JOB 3:19 Gitinne guuthi yan de7ees; aylletika aylletethafe yan la77a keyoosona.
JOB 3:20 “Meton de7eysatas, shempoy cametidaysatas, poo7oy ayis imetidee?
JOB 3:21 Hayqo amotidi demmonaysatas, qottidi wothida shalope aathidi koyeysatas, de7oy ayis imetidee?
JOB 3:22 Duufo gakiya wode ufayteysatas, de7oy ayis imetidee?
JOB 3:23 Ogey dhayida uraas, Xoossay iya yuushuwa dirida uraas, poo7oy ayis imetidee?
JOB 3:24 Ooley taw kathi gidis; ta waasoy goggiya haathi gidis.
JOB 3:25 Taani yayyidabay ta bolla gakis; taani dagammidabay taw hanis.
JOB 3:26 Taw metope attishin, saroy, wopinne shempoy baawa” yaagis.
JOB 4:1 Temaanape yida Elfaazi zaaridi,
JOB 4:2 “Issi asi xaltaamidi neera odetiko neeni lancanee? Shin haasayonna agganay oonee?
JOB 4:3 Heko, neeni darota tamaarsadasa; argaacida kusheta minthethadasa.
JOB 4:4 Ne qaalay dhubetidaysata koolidi essis; daaburida gulbatata minthis.
JOB 4:5 Shin ha77i metoy nena gakin ufaysi qanxadasa; un7i nena teqin dagammadasa.
JOB 4:6 Ne Xoossaas yayyeysi nena ammanthidi wothibeennee? Ne suure hemethay new ufaysi gidibeennee?
JOB 4:7 “Ane qopa; geeshsha asi gididi dhayday oonee? Suure asi gididi shodetidi dhayday oonee?
JOB 4:8 Ta be7idaysada, iitatethi goyidi meto zereysati, iya zaaridi buucana.
JOB 4:9 Enti Xoossaafe keya shempon punetidi dhayana; iya hanquwa lacuwan meetetana.
JOB 4:10 Iitati gudiya gaammo mela xaaggoosona; shin enta achay meqeretis.
JOB 4:11 Shankatidi miyaba dhayida gaammoy hayqeysada, enta naytika laaleteysada iitata nayti laaletana.
JOB 4:12 “Issi gallas issi xuuray taako yis; he xuura kalkashan ta si7as.
JOB 4:13 Wolqaama dhiskoy ase oykida wode un7ethiya qamma amuho giddon,
JOB 4:14 yashshinne kokorsi tana oykis; ta meqethati kokoridosona.
JOB 4:15 Carkoy ta som7uwa baqidi aadhis; ta dagammin ta asatethaa ikisey eqis.
JOB 4:16 I ta sinthan eqis; shin I aybeko shaakada erabike. Hessafe guye, si77i gida bessafe haysada giya girsaa si7as.
JOB 4:17 ‘Hayqiya asi Xoossaa sinthan xillo gidanaw danda7ii? Woyko asi bana medhidaysa sinthan geeshshi gidanaw danda7ii?
JOB 4:18 Xoossay ba aylletan ammanetonaba gidiko, ba kiitanchotanka bala demmiyaba gidiko,
JOB 4:19 Yaatin, urqa keethan de7eysati, enta de7uwa baasoy biitta gididaysati, guxunepe eeson hayqeysati waananee?
JOB 4:20 Wonta bentidi omarsi hayqoosona; oonika hassayonna merinaw dhayoosona.
JOB 4:21 Dhishey shodetida dunkaane mela cincatethi bayna hayqoosona.’ ”
JOB 5:1 “Iyyoba, new koyana asi de7iko ane xeega! Kiitanchotape oodeko ne xeellanee?”
JOB 5:2 Eeya uraa lancey wodhees; akeeki bayna uraa qanaatey dhaysees.
JOB 5:3 Eeya uray minnidi de7ishin be7as; shin qoponna iya keethay baadetis.
JOB 5:4 Iya nayti saroy bayna daana; pirda dabaaban entaw eqiya asi bayna gisho enti qohetana.
JOB 5:5 I shiishida kathaa koshatida asay maana; hari attoshin aguntha giddon dolidaysaka aggokona. Saamotidaysati iya shaluwa ekanaw amottoosona.
JOB 5:6 Metoy sa7ape keyenna; waayey biittafe dolenna.
JOB 5:7 Tami pinxidi wodheysada, asi metos yeletis.
JOB 5:8 “Ta nena gidiyako ta Xoossako shiiqana; ta mootuwaka iya sinthan wothana.
JOB 5:9 I taybetonna malaatata, pilgetonna wolqaamabata oothees.
JOB 5:10 Ira biittan bukisees; goshsha gadiyas haathe yeddees.
JOB 5:11 Kawushata dhoqu dhoqu oothees; kayoteyisata minthethidi ufaysees.
JOB 5:12 Enta qofay poletonna mela, genanchota halchuwa hada oothees.
JOB 5:13 Cincata enta gene oosuwan oykees; genanchota maquwa aathidi yeggees.
JOB 5:14 Gallasay entaw dhuma gidana; seeta gallas dhuman hemetiya asada tattafana.
JOB 5:15 Manqota enta morketa mashshafe ashshees; enta wolqaamata kushiyape wothi ekees.
JOB 5:16 Hessa gisho, manqotas ufaysi de7ees; geellatethi si77i oothees.”
JOB 5:17 “Xoossay seeriya asi anjetidaysa; hessa gisho, Ubbaa Danda7iya Xoossaa seera kadhopa.
JOB 5:18 I menthees, shin zaaridi koolees; I madunxisees, shin iya kushey dhallees.
JOB 5:19 Usupun qommo qohotape I nena ashshana; laapunthoy nena bochenna.
JOB 5:20 Kosha laythi hayqope, ola wode mashshafe nena ashshees.
JOB 5:21 I nena iita inxarsafe naagana; boshi gakiya wode yayyaka.
JOB 5:22 Bosha bollanne kosha bolla ne miicana; bazzo do7atas yayyaka.
JOB 5:23 Ne goshsha biittan shuchi deenna; bazzo do7atara ne saron daana.
JOB 5:24 Ne dunkaaney saro gideysa ne erana; ne daraa ne xomoosiya wode aybika pacenna.
JOB 5:25 Ne yeletay daranaysanne ne kochay maata mela gidanaysa ne erana.
JOB 5:26 Kathi wode naagidi caketeysada, neeni cimatethi kaallada duufo baana.
JOB 5:27 “Iyyoba, nuuni hessa ubbaa pilgidi xeellida. Hessi tuma gidiya gisho akeekada eka” yaagis.
JOB 6:1 Hessafe guye Iyyobi zaaridi,
JOB 6:2 Ta waayeynne ta azzanoy ubbay mizaanen liketidi be7etiyako,
JOB 6:3 Abba gaxan de7iya shafiyape aadhidi deexana; Hessa gisho, ta qaalay nena malaalsenashin.
JOB 6:4 Ubbaa Danda7iya Xoossaa dongeti tana caddidosona; ta asatethay enta yiishsha uyees; Xoossaa daganthoy ta bolla salpis.
JOB 6:5 Harey woyko boori maati de7ishin waassiyee?
JOB 6:6 Mal7onna kathi maxiney gelonna meetetiyee? Woyko phuuphulle haathi mal7iyee?
JOB 6:7 Hessa mela kathi tana suukeyenna; hessa mela kathi ta miiko tana sakees.
JOB 6:8 Ta woosa Xoossi si7iyako aybee? Ta amuwaka taw kunthiyako aybee?
JOB 6:9 Xoossaa shene gidin I tana mentherethiyako, I ba kushiya yeddidi tana dhaysiyako,
JOB 6:10 Ta Geeshsha Xoossaa qaala kaddaboonna gisho, waayey darikoka ufaysan ta gupana.
JOB 6:11 Ta paxa daanaw taw ayba wolqi de7ii? Taw ayba ufaysi de7ishin danda7iyana?
JOB 6:12 Ta wolqay shucha meleyee? Woyko ta ashoy naase birata meleyee?
JOB 6:13 Taani tana maaddanaw ayba wolqi taw de7ii? maado demmanaw xeelliya bessika baawa.
JOB 6:14 Meton de7iya asi Ubbaa Danda7iya Xoossas yayyeysa aggikoka, iya laggeti iyaw keehatethi bessanaw koshshees.
JOB 6:15 Shin ta ishati hinte iri bukonna wode meliya shaafa mela tana cimmeeta.
JOB 6:16 Balgo ageenan ha shaafay shachan kumees.
JOB 6:17 Shin boney gakiya wode shachay til7ees; shaafayka melees.
JOB 6:18 Caana mehe laaggishe biya zal7anchoti, haathe koyanaw banta ogiyape gaxa keyidi, mela biittan toylatishe dhayoosona.
JOB 6:19 Teema biitta zal7anchoti haathe koyoosona; Saaba biitta oge asati ufaysi qanxokona.
JOB 6:20 Enti ammanetidi koyidi dhayida gisho yilotidosona, he bessaa gakidi yeellatidosona.
JOB 6:21 Hinteka taw he shaafata mela gidideta; tana gakida metuwa be7idi yayyideta.
JOB 6:22 Hanoshin ta hintena, “Taw issiba immite” woyko, “Hinte shaluwara tana wozite” gadinaa?
JOB 6:23 “Tana ta morketa kushepe ashshite” woyko, “Qadhey bayna asaa kushepe tana wozite” gadinaa?
JOB 6:24 “Ta si77i gaana; hinte tana tamaarsite; ta ay balidaako ane tana bessite.
JOB 6:25 Tuma odi cammikoka eketees! shin hinte oday aybiska maaddenna.
JOB 6:26 Hinte ta haasaya carko mela hada ootheeta; Yaatin, ufaysi qanxidaysas taw ay zaaro immanaw koyeetii?
JOB 6:27 Aawi bayna na7a bolla saama yeggeeta; hinte laggiya bayzanaw washiseeta.
JOB 6:28 Ane shama ayfen tana xeellite; ta hinte sinthan wordotiyana?
JOB 6:29 Hayyana, ane zaarethidi qopite; taani xillo ta bolla coo pirdofite.
JOB 6:30 Ta inxarsan wordoy de7ii? Ta doonay wordonne tumaa shaakanaw danda7ennee?”
JOB 7:1 Asa de7oy sa7a bolla wolqaama baaxe gidenneyee? Iya laythay une oothiya asa de7o mela gidenneyee?
JOB 7:2 Wulliya awa amotiya gaacha mela, woyko ba damooziya ekanaw naagiya oosanchoda,
JOB 7:3 hessada taw mela ageenati meto qammati imetidosona.
JOB 7:4 Taani zin7iya wode awude barkandinasha gayis; Shin qammay taw aduqees; sa7i wontana gakanaw hiixan shireta shireta wodhayis.
JOB 7:5 Ta asatethay guxuntis; ta madunthay giishshi goggees.
JOB 7:6 Ta laythay dorze mooqepe aadhidi ellesees; ufaysi baynashin ta laythay wurees.
JOB 7:7 Abeeti Xoossaw, ta laythay issi shempo mela gideysa qopa! Ta ayfey zaaridi keehaba be7enna.
JOB 7:8 Ha77i be7ey zaaridi be7enna; tana koyana shin zaari demmenna.
JOB 7:9 Shaari laaletidi dhayeysada, duufo wodhiya asi simmidi keyenna.
JOB 7:10 Ba soo simmidi yeenna; iya eriya asayka dogees.
JOB 7:11 “Hessa gisho, ta si77i giike; ta ayyaana un7etetha odana; ta shempuwa cametethaa gisho zuuzumana.
JOB 7:12 Hessa mela neeni tana ayis naagay? Ta new abba woyko abban de7iya iita do7a gadiyee?
JOB 7:13 ‘Ta hiixay tana minthethana; ta arsay tana zuuzunthafe shempisana!’ gada qopas;
JOB 7:14 Shin neeni tana amuhon yashisaasa; qoncethan tana daganthaasa.
JOB 7:15 Taani ha waayey kumida asatethaa tookada daanape, suletada hayqiyako dosayis.
JOB 7:16 Taani ta de7uwa shaatettas; daanaw koyke; ta laythay issi shempo mela gidiya gisho tana aggarki.
JOB 7:17 Ne iya gitayada xeellanaw asi aybee? Ne iyaw qopanaw asi aybee?
JOB 7:18 Wonta wonta ne iya xomoosasa; woden woden ne iya paacasa.
JOB 7:19 Ne ta bolla ayfe wotheysa aggikii? Cuchu mittiya wode taw immikii?
JOB 7:20 Abeeti ase kaalleyso, ta nagaraa oothin nena ay qohidee? Ne ayis tana cadda oykay? New ta tooho gidadinaayee?
JOB 7:21 Ta naaquwa ayis aggikii? Ta nagara ayis atto giikii? Ta duufo geliya wodey gakis; ne tana koyana, shin hizape demmaka” yaagis.
JOB 8:1 Shuha biittafe yida Beldadoosi zaaridi,
JOB 8:2 “Neeni hessa awude gakanaw odetay? Ne doonape keya qaalay wolqaama gote mela.
JOB 8:3 Ubbaa Danda7iya Xoossay xillo pirdennee?
JOB 8:4 Ne nayti Xoossaa bolla nagaraa oothida gisho, I enta enta nagaraa gisho seeris.
JOB 8:5 Shin neeni Xoossaako simmiko, Ubbaa Danda7iya Xoossaa woossiko,
JOB 8:6 neeni geeshshinne suure gidiko, I ne gisho dendidi nena maaddana; I kase ne de7uwa zaaridi woytana.
JOB 8:7 Ne doomethay guutha daanikoka, ne wursethay daro aadhidi darana.
JOB 8:8 Kase yeletaa ane oycha; nu mayzati ay tamaaridaako pilgada demma.
JOB 8:9 Nuuni zine nayta aybaka eroko; nu ha sa7an de7iya laythay kuya mela.
JOB 8:10 Enti nena tamaarseynne new odey, banta wozanan wothidabaape gidenneyee?
JOB 8:11 Carey bayna bessan palki dolanaw danda7ii? haathi bayna bessan mayrey cil7anaw danda7ii?
JOB 8:12 Buroo diccidi qanxetonna de7ishe, cil7o maatapeka eeson melees.
JOB 8:13 Xoossaa dogiya asaa ubbaa wursethay hessa mela; Xoosse eronna asaa ufaysay dhayana.
JOB 8:14 I ammanetiyabay meqiyaba; I ceeqetiyabayka shango haada mela.
JOB 8:15 I ba shango haada bolla zempana, shin eqenna; I iya oykana, shin duuxi wodhana.
JOB 8:16 I awa wode haathe uyidi cil7iya atakilte mela; ba xaphuwa biitta ubban yeddida mitha mela.
JOB 8:17 Ba xaphuwa keelan yeddees; gita shucha bolla ba xaphuwa xaaxees.
JOB 8:18 Shin I ba bessaafe shodetiko, he bessay, ‘Ta nena be7abike’ yaagana.
JOB 8:19 Iita asata ufaysay hessa mela; harati yidi enta bessaa oykana.
JOB 8:20 “Xoossay borey bayna asaa yeggi aggenna; iita ootheyisata maaddenna.
JOB 8:21 I zaaridi nena miichananne ililsana.
JOB 8:22 Nena ixeysati yeella ma7ana; iitata keethay dhayana” yaagis.
JOB 9:1 Iyyobi zaaridi,
JOB 9:2 “Ee, hinte geysi tuma gideysa ta erayis; shin asi Xoossa sinthan waanidi xillo gidanaw danda7ii?
JOB 9:3 Iyara ooni palamanaw danda7ii? I oychiya mukulu oyshatape issuwaka zaaranaw danda7enna.
JOB 9:4 Xoossay cincanne wolqaama; iyara eqetanaw danda7ey oonika baawa.
JOB 9:5 Qoponna de7ishin dereta enta bessaafe diggees; ba hanquwan aathidi yeggees.
JOB 9:6 I biitta iya bessaafe qaathees; biitta tuuqetaka yiggees.
JOB 9:7 Away keyonna mela oothees; xoolintoti poo7onna mela diggees.
JOB 9:8 I barka salota miccis; abba hobbiya bolla hemetees.
JOB 9:9 Xoossay Biire, Ooriyoona, Pilaadisa geetetiya xoolintotanne, dugeha baggara de7iya xoolinto koceeta medhis.
JOB 9:10 I asi pilgid eranaw danda7onna gitabata, taybetonna malaalsiyabata oothees.
JOB 9:11 I ta matara aadhiya wode ta be7anaw danda7ike; I taako shiiqiya wode eranaw danda7ike.
JOB 9:12 I bonqiko digganaw danda7ey oonee? ‘Waatay?’ yaagidi iya oychanay oonee?
JOB 9:13 Xoossay ba hanquwa teqenna; Ra7aaba geetetiya do7a maaddeysati iya tohuwa garsan kundoosona.
JOB 9:14 Yaatin, iya oysha zaaranaw, iyara mootetanaw taani oonee?
JOB 9:15 Taani xillo gidikoka, pirdiya Xoossay tana maaranaada woossanaape attishin, taani iyaw zaaro immike.
JOB 9:16 Ta iya xeegin, I taw koyaakoka, tana si7ees gada ammanike.
JOB 9:17 Tana goten mentherethees; gaasoy bayna ta madunthaa darsees.
JOB 9:18 Tana shempo diggees; ta de7uwa camethees.
JOB 9:19 Wolqaba gidiko, I wolqaama. Xillo pirdaba gidiko, iya pirda keethi shiishanay oonee?
JOB 9:20 Taani tana xillo giikoka ta doonay tana bala kessees; tanan borey baawa ta giikoka ta inxarsay tana geella kessees.
JOB 9:21 Taani borey bayna asi gidikoka tabaa qopike; taani ta de7uwa kadhayis.
JOB 9:22 Xoossay borey baynaysanne iita issife dhaysees; ta dummatethi baawa gey hessa gishosa.
JOB 9:23 Gadoy gelidi asaa qoponna wodhiya wode, I xillo asaa waayan miicees.
JOB 9:24 Ha sa7ay iita asaa kushen wodhiya wode, I pirdeyisata ayfiya goozees. Hessa ubbaa oothey iya gidonna ixiko, hari oonee?
JOB 9:25 Ta de7o laythati woxiya uraape aadhidi ellesoosona; enti lo77oba be7onna piradhidi dhayoosona.
JOB 9:26 Ta de7o laythay palka wogoloda woxees; arganthi miyaba oykanaw salope duge paalleysada paallees.
JOB 9:27 ‘Ta zuuzuntha dogana; som7o tukeysa aggada poo7isana giyako,’
JOB 9:28 Neeni tana geeshshi goonnaysa taani eriya gisho, tana gakana waaye ubbaa taani yayyayis.
JOB 9:29 Yaatin, taani bala gideysi attonna ixiko, coo mela ayis daaburayna?
JOB 9:30 Taani ta asatethaa hari attoshin saamunan meecetiyakoka, ta kushiya dummabaara meecetiyakoka,
JOB 9:31 ta ma7oyka tana shaatettana gakanaw, neeni tana urqa ollan holana.
JOB 9:32 Ta iyaw zaaro immanaw Xoossay ta mela ase gidenna; gidiyako nu nam7ay daynna sinthan eqana.
JOB 9:33 Shin nu nam7aa bolla ba kushe wothidi, nuna sigethiya asi nu giddon de7eerenne!
JOB 9:34 Iya teemoy tana daganthonna mela, issi asi Xoossaa xam7aa taape digereneshin!
JOB 9:35 Yaaniko, taani iyaw yayyonna odetana; shin ha77i taani danda7ike.
JOB 10:1 Tana duussi shaattis! Hessa gisho, ta zuuzumanaape attishin, si77i giike; ta shempuwa seela kessana.
JOB 10:2 Taani Xoossaako haysada gaana; ta bala taw odape attishin, ta bolla pirdofa.
JOB 10:3 Neeni iitata qofaa ufaysan ekashe, tana un7ethanaw bessii? ne kushen medhida uraa kadheysi wogee?
JOB 10:4 Ne ayfey asa ayfe meleyee? neeni asi xeelleysada xeellayee?
JOB 10:5 Ne de7o laythay asa de7o laytha meleyee?
JOB 10:6 Yaatin, ta bala ayis koyay? Ta nagaraa ayis kaallay?
JOB 10:7 Taani bala gidonaysanne ne kushepe tana oonika ashshanaw danda7onnaysa ne eraasa.
JOB 10:8 Tana ne kushey giigisidi medhis; shin ha77i he kushey simmidi tana menthees.
JOB 10:9 Neeni tana biittafe medhidaysa hassaya Yaatin, ha77i tana zaarada baana oothanaw koyay?
JOB 10:10 Tana maathada ta aaye ulon tigidaynne meqa maathada Irkisiday nena gidikii?
JOB 10:11 Neeni tana ashonne goga mayzadasa; shayaninne meqethan waaxadasa.
JOB 10:12 Neeni taw de7onne merinaa siiqo immadasa; ne naagoy tana paxa wothis.
JOB 10:13 Shin neeni he wodepe doomada ne wozanan tana qohanaw qopada de7eysa ta erayis.
JOB 10:14 Ta naaquwa ne be7aasa; ta nagara oothiko seeronna aadhaka.
JOB 10:15 Taani balikoka tana ayye! Ta xillo gidikoka ceeqetanaw danda7ike. Ne tana yeella mayzadasa; waayen wothadasa.
JOB 10:16 Ta otoriko tana gaammoda shankatada oykaasa; tana qohanaw ne malaalsiya wolqaa zaara zaara bessaasa.
JOB 10:17 Neeni ta bolla ooratha markata ehaasa; ne hanquwa ta bolla darsaasa; tana olanaw ooratha olanchota giigisaasa.
JOB 10:18 Yaatin, tana ta aaye ulope ayis kessadii? Oonika tana be7onna hayqidaako taw lo77oshin!
JOB 10:19 Taani medhetonna attidaako, woyko ta aaye ulope keyashe duufo gelidaako lo77oshin!
JOB 10:20 Ta guutha de7o laythay wurees gidenneyee? Ha guutha laythan ufaytana mela tana aggarki!
JOB 10:21 Ta simmonna bessaa boonna de7ishin, leelida dhuma biitta gakonna de7ishin,
JOB 10:22 iya poo7oy dhuma gidida bessaanne hayqoy kawotida bessaa, maari bayna bessaanne leelida dhuma biitta boonna de7ishin, tana aggarki!”
JOB 11:1 Na7ima biittafe yida Soofari zaaridi,
JOB 11:2 “Ha hada haasaya ubbaas zaaro immiya asi baawee? Woyko hessa odida uray tuma gidanaw danda7ii?
JOB 11:3 Ne hada oday ase si77i oothiya daanii? Ne qelqisiya wode nena seeriya asi baawee?
JOB 11:4 Neeni, ‘Ta timirtey tuma; taani Xoossaa sinthan geeshshi’ ” gaasa.
JOB 11:5 Xoossay new odiyako, ba doona dooyidi odetiyako aybe!
JOB 11:6 Cincatethas daro ogey de7iya gisho, Xoossay new cincatetha xuura qoncisiyako aybe! He wode ne seeretida seeray, besseysafe guutha gideysa eranashin.
JOB 11:7 “Ciimmo gidida Xoossaa xuuraa eranaw danda7ay? Woyko Ubbaa Danda7iya Xoossaba pilgada gakanaw danda7ay?
JOB 11:8 Enti salotape dhoqa; ne ay oothanaw danda7ay? Enti Si7oolepeka aadhida ciimmo; ne eranaw danda7aka.
JOB 11:9 Xoossaa cincatethay biittafe dalgees; abbafeka aadhidi ciimmotees.
JOB 11:10 I yidi nena qasho keethan yeggiyako, pirda keethi shiishiko, iya digganay oonee?
JOB 11:11 Xoossay pathonna asaa erees; iitabaa be7iya wode si77i gidi aggenna.
JOB 11:12 Eeya asi cinca gideysafe, wora harey ase gididi yeletanaysi mata.
JOB 11:13 Neeni ne wozanaa suure oothiko, ne kushiya iyako micciko,
JOB 11:14 nagaraa ne kushepe haassiko, ne keethan iitabay doonna mela oothiko,
JOB 11:15 He wode neeni dhoqu gada yeelli bayna ubbaba be7an; yashshi bayna minnada eqana.
JOB 11:16 Neeni ne metuwa ubbaa dogana; goggidi aadhida di7oda zaara hassayaka.
JOB 11:17 Ne de7oy seeta gallasa awape aadhidi poo7ana; ne de7uwa dhumay wonta xalqeda poo7ana.
JOB 11:18 New ufaysi de7iya gisho neeni hirgonna daana; Xoossay nena naagiya gisho wopu gada daana.
JOB 11:19 Neeni yashshi bayna dhiskana; daro asay nenan nashetanaw koyana.
JOB 11:20 Shin iitati meto be7ishe akeekokona; iyape baqatidi attanaw danda7okona; Enta ufaysay hayqo” yaagis.
JOB 12:1 Iyyobi haysada yaagidi zaaris.
JOB 12:2 Ee, hinte tumaka ase; cincatethi hintera hayqana!
JOB 12:3 Shin taka hinteda akeeki de7iya asi; taani hintefe guuxike; Ha hinte odetidaba eronnay oonee?
JOB 12:4 Taani Xoossaa woossin I tana si7ida asi gidikoka, ha77i ta laggetas miichas attas; taani xillonne borey bayna asi gidikoka qelqisethas attas.
JOB 12:5 Metootidi be7iboona asi hara asa meton miicees; hinte kundanaw gandigariya asi sugeeta.
JOB 12:6 Bonqeyisata keethay saro de7ees; Xoossaa yiloyeysati hirgi bayna de7oosona; banta wolqaa bantaw xoosse oothosona.
JOB 12:7 Ane meheta oycha; enti nena tamaarsana; Woyko salo kafota oycha; enti new odana.
JOB 12:8 Woyko sa7a medhetethatas oda; enti nena tamaarsana; abba molotika new odana.
JOB 12:9 Godaa kushey hessa oothidaysa eronnay oonee?
JOB 12:10 De7oy de7iya medhetethi ubbaynne asa shempoy iya kushena.
JOB 12:11 Inxarsi kathi shaakidi ereysada, haythi oda shaakidi erenneyee?
JOB 12:12 Cincatethi dondzida asaa matan deneyee? daro laythi de7ida asaa matan akeeki benteneyee?
JOB 12:13 Cincatethinne wolqi Xoossasa; zoreynne akeeki iya matan bentees.
JOB 12:14 Xoossay laallidaba zaari keexanay oonee? I qachida uraa birshanay oonee?
JOB 12:15 Xoossay ira teqiko biittay melees; ira bukisiko di7oy biitta dhaysees.
JOB 12:16 Minotethinne xoonoy Xoossasa; cimeteysinne cimmeysi nam7ayka iyape garsan de7ees.
JOB 12:17 Zoreysatape cincatethaa qaari ekees; halaqataka eeya kessees.
JOB 12:18 I kawota araatape wothidi aylle kessees.
JOB 12:19 Kahinetape bonchuwa qaari ekees; adussa wode xapho yeddida wolqaamata shiri yeggees.
JOB 12:20 Ammanetida zoreyisata si77i oothees; cimatapeka akeeka yegisees.
JOB 12:21 Bonchetidaysata kawushshees; minota danco bilisees.
JOB 12:22 Dhuman de7iya xuura qonce kessees; leelida dhumaa poo7o kessees.
JOB 12:23 Xoossay kawotethata gitayees; zaaridi dhaysees; Kawotethata dalgisees; zaaridi laallees.
JOB 12:24 Alamiya kawota akeeka diggees; ogey bayna mela biittan toylatana mela oothees.
JOB 12:25 Poo7oy bayna dhuman tattafoosona; mathotida asada gandigaroosona.
JOB 13:1 Ha ubbaa ta ayfey be7is; ta haythay si7idi akeekis.
JOB 13:2 Hinte ereysa taka erayis; taani hintefe guuxike.
JOB 13:3 Shin taani Ubbaa Danda7iya Xoossara odetanaw koyayis; taani ta metuwaba iyara mootetanaw amottayis.
JOB 13:4 Shin hinte wordon kammeyisata; hinte ubbayka pathonna aakimeta.
JOB 13:5 Hinte si77i gidaba gidiyako, cinca gidi bentanashin!
JOB 13:6 Ha77i ta mootuwa si7ite; ta doonape keya palama hayzite.
JOB 13:7 Hinte Xoossaa gisho wordo odeteetii? Iya gisho gidi cimon odeteetii?
JOB 13:8 Hinte iya maaddiyabay de7ii? Woyko iyaw xabaqa eqidi mootetetii?
JOB 13:9 I hintena pilgi xeelliyako hintefe lo77oba demmanee? Hinte ase cimmeysada iya cimmanaw danda7eetii?
JOB 13:10 Hinte geeman asa som7o be7idi maaddiko, I tuma hintena seerana.
JOB 13:11 Iya bonchoy hintena daganthennee? Iya teemay hintena yashshennee?
JOB 13:12 Hinte odida leemisoy bidintha mela pathonnaba; hinte mootoy biittafe medhetida gondalle mela.
JOB 13:13 Ane si77i giite; ta odetana; hizape hanidabay hano.
JOB 13:14 Taani tanatethaa ayis meton yeggiyana? Ta de7uwa ayis ta kushen oykiyana?
JOB 13:15 Xoossay tana wodhikoka taani iya danda7an naagana; taani ta metuwa iya sinthe shiishana.
JOB 13:16 Nagarancho asi iya sinthe shiiqanaw danda7onna gisho; ooni eri ta xaalatethay atotethas gaaso gidanaw danda7ees.
JOB 13:17 Ta haasaya akeekidi si7ite; ta oday hinte haythan gelo.
JOB 13:18 Ha77i taani ta metuwa eka shiiqas; I taw pirdanaysa erayis.
JOB 13:19 Tana mootana asi de7ii? De7iko taani si77i gada hayqana.
JOB 13:20 Xoossaw ne taw ha nam7ubata ootha; yaatiko ta ne sinthafe geemmike.
JOB 13:21 Ne seera kushiya taape dentha; tana dagantheysa agga.
JOB 13:22 Hessafe guye, tana xeega; ta koyana; Woyko ta odana, ne taw zaara.
JOB 13:23 Ta balaynne nagaray aapunee? Ane ta naaquwanne ta nagaraa tana bessa.
JOB 13:24 Neeni ayis ne som7uwa taape genthay? ne morkeda ayis tana taybay?
JOB 13:25 Carkoy efiya kaliya ayis un7ethay? melida punuwa ayis yedethay?
JOB 13:26 Neeni ta bolla xaafida mootoy camo; ta na7atetha balaka aggabaaka.
JOB 13:27 Neeni ta tohuwa duxadasa; ta tanguwa ubbaa wochaasa; ta tohoy yedhiyasuwa kaallasa.
JOB 13:28 Hessa gisho, taani wooqida mithada; bili mida afilada wurayis.
JOB 14:1 “Maccasape yeletida asas laythi qanthi; ika qassi meton kumis.
JOB 14:2 Ciishshada bentidi ellesidi qoqofetees; kuyada gam7onna eeson aadhees.
JOB 14:3 Yaatin, neeni hessa mela asi kaallayee? pirdas ne sinthe shiishayee?
JOB 14:4 Tunabaape geeshshaba kessanaw danda7ey oonee? Oonika baawa.
JOB 14:5 Asi daana laythas zawi de7ees; I daana ageena neeni tayba wothadasa; neeni wothida zawape aadhey oonika baawa.
JOB 14:6 Une oothiya asi ba oosuwa polidi shempeysada, I shempana mela ne ayfiya iyape denthada iya aggaaga.
JOB 14:7 Qanxetida mithas ufaysi de7ees; zaaridi aacees; ooratha tashe kessidi diccees.
JOB 14:8 Mithaa xaphoy biitta garsan cimikoka, durumay biittan wooqikoka,
JOB 14:9 haathe demmidi aacees; ooratha dolada tashe kessees.
JOB 14:10 Shin asi hayqees; hessi iyaw wursethi; iya shempoy keyape guye I awun de7ii?
JOB 14:11 Abbaa haathi meleysada, shaafa haathi wureysada,
JOB 14:12 hessada asika hayqees; simmidi dendenna; saloti aadhana gakanaw asi baarkenna; ba dhiskuwafeka dendenna.
JOB 14:13 Neeni tana duufon genthidaako aybe! Ne hanqoy aadhana gakanaw qottidaako aybe! Ne taw qamida he gallas tana hassaydaako aybe!
JOB 14:14 Asi hayqiko simmidi de7on daanee? Ta shempiya wodey yaana gakanaw, ha meto wode ubbaa danda7an naagana.
JOB 14:15 He wode ne tana xeegana taka koyana; ne medhida tana be7anaw laamotiya wodey yaana.
JOB 14:16 He wode neeni tuma ta tanguwa wochana; shin ta nagaraa kaallaka.
JOB 14:17 Ta balay ogoron yiicetana; ta nagaraa neeni kammana.
JOB 14:18 Zumi woddeysada, zaalli dhoqalleteysada,
JOB 14:19 haathi shucha xapho bookeysada, di7oy biitta meeccidi efeysada, neeni asa ufaysi dhaysaasa.
JOB 14:20 Neeni iya merinaw xoonasa; I simmenna; iya malaa laammada ne sinthafe diggaasa.
JOB 14:21 Iya nayti bonchetiko I erenna; enti kawuyiko I be7enna.
JOB 14:22 Shin iya asatethaa seelay iya xalaalas si7etees; I ba xalaalas yeekees” yaagis.
JOB 15:1 Temaana biittafe yida Elfaazi haysada yaagis;
JOB 15:2 “Cinca asi carkoda oyketonnaba odeetii? Woyko doloha bagga carkuwan ba uluwa coo kunthii?
JOB 15:3 Pathonna qaalan zuuzumii? Woyko gatey bayna odan mootetii?
JOB 15:4 Neeni Xoossas yayyeysa aggadasa; harati Xoossaa goyinnona mela dhubbadasa.
JOB 15:5 Ne iitatethay ne odan eretees; shin ne cinca oday nena genthees.
JOB 15:6 Ne doonay ne bolla pirdees tana gidike; ne inxarsay ne bolla markatees.
JOB 15:7 “Asape koyro yeletiday nenee? Neeni dereti medhetanaape kase yeletadii?
JOB 15:8 Neeni Xoossaa xuura duulatan de7ay? asa cincatethi ne xalaalas de7iyee?
JOB 15:9 Nuuni eronnabay neeni eriyabay aybee? Nuus geemmidi new qoncida ayba cincatethi de7ii?
JOB 15:10 Ne aawape bayratiya asati, cimidi puulumida asati nuura de7oosona.
JOB 15:11 “Xoossay new immida minthethoy gidenneyee? nuuni kahaamatethaba odida qaalay guutheyee?
JOB 15:12 Ne wozanay nena ayis wora efii? Ne ayfey ayis dereeqidi xeellii?
JOB 15:13 Yaatada neeni Xoossaa bolla hanqetadasa; iita qaala ne doonape kessadasa.
JOB 15:14 Asi Xoossa sinthan geeshshi gidanaw danda7ii? Woyko maccafe yeletida asi xillo gidanaw danda7ii?
JOB 15:15 Xoossay ba kiitanchotan ammanetena; hari attoshin saloti iya sinthan geeshshi gidokona.
JOB 15:16 Iitanne tuna gidida asi, nagara haathada uyaa asi waanidi ammanetanee?
JOB 15:17 “Ane si7a, qoncisada ta new odana, taani be7idaba ubbaa new odana.
JOB 15:18 Cincati banta aawatape ekidaysa, ta new genthonna odana.
JOB 15:19 Biittay enta xalaalas imetis; hara biitta asi entara walaketibeenna.
JOB 15:20 Ase un7ethishe de7iya iita asi, ba de7o laytha ubban waayetishe de7ees.
JOB 15:21 Daganthiyabay iya haythan si7etees; I saro de7ayis gishin dhayseysati iya bolla keyana.
JOB 15:22 Dhumape kessi ekoy iyaw hanenna; iya qaaday mashshan dhayo.
JOB 15:23 Iya ahay anko quma gidana; baw dhuma gallas matatidaysa I erees.
JOB 15:24 Metoynne un7i iya bolla yaana; olanaw keyida kawo mela iya bolla goobana.
JOB 15:25 Hessika I ba kushiya Xoossaa bolla denthida gishosa; Ubbaa Danda7iya Xoossaa bolla xaalida gishosa.
JOB 15:26 I eqetanaw minonne dalga gondalle oykis; otoron Xoossaako hordofees.
JOB 15:27 “Iya kilahoy muumida gisho, iya xeessay kumida gisho,
JOB 15:28 I laaletida katamatan, kaysa keethaninne, kundanaw gakida keethan de7ees.
JOB 15:29 I ba duretethan daro gam7enna; iya zaway aakenna.
JOB 15:30 Dhumape kessi ekenaw danda7enna; tashiya tami labida mithadanne carkoy ciishsha qoqofida mithada gidana.
JOB 15:31 Pathonnaban ammanetidi bana cimmofo; iyape aykoka demmonna attana.
JOB 15:32 Wodey gakonna iya ubbay melidi tasheyka aaconna mitha mela gidana.
JOB 15:33 I teeronna qawu7e de7ishe qoqofetiya woyne mela; ciishshan de7ishe qoqofetiya shamaho mela.
JOB 15:34 Xoossas yayyonna asaa kochay dhayana; wodhaafen keexetida keethay taman meetetana.
JOB 15:35 Enti iitatethi qanthatidi meto yeloosona; enta uluwan geney kumis” yaagis.
JOB 16:1 Iyyobi haysada yaagidi zaaris;
JOB 16:2 “Taani hessa mela haasaya daro si7as; hinte minthethoy tana salethis.
JOB 16:3 Go77i bayna hinte odaas wursethi baawee? taara hintena hessada palanthiya gaasoy aybee?
JOB 16:4 Hinte ta bessan, taani hinte bessan gididaba gidiyako, taani ta huuphiya qaathashe, ha77i hinte giyaba ubbaa hinte bolla loythada gaanashin!
JOB 16:5 Ta zoriyan ta hintena minthethanashin! Ta doonape keyiya oday hintena minthethanashin!
JOB 16:6 “Shin ta haasaykoka ta sahoy decenna; ta si77i gada danda7ikoka taape kichenna.
JOB 16:7 Abeeti Xoossaw, ne tana ta asatethafe kessadasa; ta keethaa asa ubbaa dhaysadasa.
JOB 16:8 Shuuqida ta gogay taw marka gidis; ta gilqatethay tana nagarancho kessis.
JOB 16:9 Xoossay hanqetidi ta asatethaa qanxerethis; tana ixidi ba acha ta bolla garcis; ta morkey ba ayfiya ta bolla kessis.
JOB 16:10 Asay ta yuushon shiiqidi tana qelqisidosona; tana leqidi baqidosona.
JOB 16:11 Xoossay tana nagarachotas aathidi immis; iitata kushen tana yeggis.
JOB 16:12 Taani kase saro de7as; shin Xoossay tana tincherethis; ta mirgaciya oykidi tana mentherethis; cache loohisiya malla oothis.
JOB 16:13 Iya tooranchoti banta dongen tana teqidosona; qadhey bayna ta kilahuwa muxerethidosona; ta ciyaa sa7an gussidosona.
JOB 16:14 I tana zaari zaari madunxisis; olanchoda toollidi caddis.
JOB 16:15 Taani kayo ma7o ma7as; ta wolqay wurin baanan uttas.
JOB 16:16 Yeehon ta som7oy gabbis; ta ayfey zo77is.
JOB 16:17 Shin he ubban ta balidabay baawa; ta geeshsha wozanan woossayis.
JOB 16:18 Biittaw, tana gakida qohuwa kammofa; ta waasoy shempiya soo demmofo.
JOB 16:19 Heko ta markay salona; ta xabaqay bollana.
JOB 16:20 Ta laggeti tana kadhidi xeelloosona; ta ayfey Xoossa sinthan afuthi tigees.
JOB 16:21 Ase asara sigethiya asi de7eysada, tana Xoossara sigethiya asi de7idaba gidernishin.
JOB 16:22 Ta laythay wurana hanees; guutha wodepe guye ta simmonna soo baana.
JOB 17:1 Ta shempoy keyees; ta laythay qaammis; taw duufoy giigis.
JOB 17:2 Ta bolla qelqiseysati ta yuushuwan de7oosona; enti tana yiloyida mela aysidosona.
JOB 17:3 Abeeti Xoossaw, neepe hari tana maaddey bayna gisho, ne taw waase gida.
JOB 17:4 Enti akeekona mela enta qofaa gordadasa; Hessa gisho, ne entaw xoono immofa.
JOB 17:5 Miishe demmana gidi, ba laggeta aathidi immiya uraa nayta ayfey qooqana.
JOB 17:6 Xoossay tana asas miichas aggis; asi cuttishe aadhiya asi gidas.
JOB 17:7 Ta daro kayotida gisho ta ayfey eeyis; ta asatethay laafidi eesho gidis.
JOB 17:8 Keeha asati tana be7idi dagammidosona; suureti Xoossaa ammanonayisata bolla yilotidosona.
JOB 17:9 Gidoshin xilloti banta ogiyape deshokona; suureti wolqa guji guji boosona.
JOB 17:10 Shin zaaridi ubbay taako haa yiite! ta hinte giddofe issi cinca asi demmike.
JOB 17:11 Ta de7o laythay wuris; ta halchoy hada gidis; ta wozanaa amoy coo attis.
JOB 17:12 Ta laggeti qamma gallas goosona; dhuma be7ishe ‘Poo7ana hanees’ yaagosona.
JOB 17:13 Ta ufaysan naagiya keethay duufo; ta hiixa dhuman hiixayis.
JOB 17:14 Duufoko, ‘Ne ta aawa’ yaagana; guxuneko, ‘Ne ta aayo woyko ta micho’ yaagana.
JOB 17:15 Yaatin, taw ay ufaysi de7ii? taw ufaysi gidiyaba ooni demmanay?
JOB 17:16 Ta ufaysay taara duufo bandee? Nu issife biittan duge gelanee?” yaagis.
JOB 18:1 Hessafe guye, Shuuha biittafe yida Beldadoosi zaaridi,
JOB 18:2 “Iyyoba, ne odaas wursethi baawee? Ane akeeka; nu odiyaba si7a.
JOB 18:3 Ne nuna ayis miizi oothay? Ayis nuna tulle kessay?
JOB 18:4 Ne hanqetada nena qohaasa; Ne hanquwan biittay kallo attanee? Woyko zaallay ba bessaafe qaaxennee?
JOB 18:5 Nagaranchota xompey to7ana; iya tama lacoy dhayana.
JOB 18:6 Enta keethan de7iya xompey dhayana; enta poo7oyka dhumana.
JOB 18:7 I tangiya tangoy qaammees; iya iita qofay iya zaaridi mees.
JOB 18:8 Iya hemethay iya xihen gelsees; iya tohoti gitetana.
JOB 18:9 Xihey iya ginde oykana; diizi iya qaaxo diggana.
JOB 18:10 Yurde wodoroy sa7an iyaw geemmi uttees; I hemetiya ogiyan gitey de7ees.
JOB 18:11 Dagami iya teqidi oykees; iya guyera kaallidi iya yedethees.
JOB 18:12 Iya wolqaa koshi wursis; dhayoy iya miyen naagees.
JOB 18:13 Hargey iya laafethees; hayqoy iya mokidi ekees.
JOB 18:14 Hirgi bayna de7iya ba keethaafe goodetees; enti iya hayqo geetetiya kawako efoosona.
JOB 18:15 Iya keethay taman oyketana; I de7iyasuwan diinney laaletana.
JOB 18:16 Garsara xaphoy melana; bollara haythi qoqofetana.
JOB 18:17 Iya qopiya asi biittafe dhayana; iya sunthay sa7an hassayetonna attana.
JOB 18:18 I poo7ope dhuman goodettana; alamiyape dhayana.
JOB 18:19 Iyaw na7i woyko kochi dhayana; I de7ida bessan issi asi paxa attenna.
JOB 18:20 Wuloha bagga asay, iya gakida metuwan dagammidosona; doloha bagga asay yashshan kokoridosona.
JOB 18:21 Iita asaa wursethay awudeka hessa mela; Xoossaa eronna asaa qaaday hessa mela” yaagis.
JOB 19:1 Iyyobi zaaridi haysada yaagis;
JOB 19:2 Hinte tana awude gakanaw madunxiseetii? Awude gakanaw hinte qaalan tana caddetii?
JOB 19:3 Hinte tana tammu toho cayideta; tana kawushishe yeellateketa.
JOB 19:4 Tuma ta balidaba gidiko, ta balay tana oychana.
JOB 19:5 Hinte hintena dhoqu dhoqu oothidi, ta kawusha tana mootanaw go7etiko,
JOB 19:6 ha metuwa ta bolla ehiday Xoosse gideysanne ba gitiyan tana gelsiday iya gideysa erite.
JOB 19:7 Ta qohetas gada waassin, tana alley baawa; ta qaala dhoqu oothada waassinka tana si7ey baawa.
JOB 19:8 Ta kanthada boonnada Xoossay ta ogiya diris; ta hemetiya ogiya dhuman gordis.
JOB 19:9 Ta bonchuwa taape qaaris; ta kallachaa ta huuphepe ekis.
JOB 19:10 I tana mentherethi yeggis; ta ufaysa xaphora shodetida mitha mela oothis.
JOB 19:11 Iya hanqoy ta bolla eexi keyis; I tana morkeda taybees.
JOB 19:12 Tana olanaw ba tooranchota kiittees; enti tana olanaw miixa keexidi, ta dunkaaniya yuushuwan uttidosona.
JOB 19:13 Xoossay ta ishata taape haassis; tana ereysati taw allaga gididosona.
JOB 19:14 Ta dabboti taape haakidosona; ta laggeti tana dogidosona.
JOB 19:15 Ta son moketiya imathati tana dogidosona; ta macca aylleti tana oge asada xeellidosona.
JOB 19:16 Ta aylliya ta xeegin taw koyenna; ta woossin taw ero geenna.
JOB 19:17 Ta machiya ta doona peenuwa shaatetasu; ta ishati tana uufidosona.
JOB 19:18 Hari attoshin guutha nayti tana kadhoosona; tana be7idi leqoosona.
JOB 19:19 Ta mata laggeti ubbay tana uufosoona; ta doseysati taw zoko zaaridosona.
JOB 19:20 Ta meqethay ta gogaara oyketis; taani hayqa kichada attas.
JOB 19:21 Ta laggeto, Xoossaa kushey tana dechida gisho, taw qadheterketi.
JOB 19:22 Xoossay tana yedetheysada, hinte tana ayis yedetheetii? ha77i gakanaw hinte tana waaysidaysi gidennee?
JOB 19:23 “Ha77i gakanaw ta odetida qaalay mazgabetidaako, maxaafan xaafetidaako ta dosayis shin.
JOB 19:24 Merinaw daana mela maarisaninne irsaasen zaalla bolla woocetidi xaafetida gideerenne!
JOB 19:25 Tana Wozidaysi de7on de7eysanne wursethan biitta bolla I eqanaysa ta erayis.
JOB 19:26 Ta gogay meetetidi wurikoka, taani ta ashuwape shaaketada Xoossaa be7anaysa erayis.
JOB 19:27 Hara asi gidonna taani ta huuphen, ta ayfen iya be7ana; ta wozanay he qamma laamotees.
JOB 19:28 “Ha metuwas gaasoy iya, nu iya waati yedethino gidi hinte qopiya gidiko,
JOB 19:29 Mashshas yayyite! Xoossa hanqoy mashshara yaana; pirdi de7eysa erite” yaagis.
JOB 20:1 Na7ima biitta asi gidida Soofari haysada yaagidi zaaris;
JOB 20:2 “Ne oday tana lancisida gisho, ta ellesada ne odaas zaaro immana.
JOB 20:3 Ne oday ta bonchuwa qaariya gisho, ta akeekay new zaaro immana mela tana denthethees.
JOB 20:4 Asi biitta bolla de7ida wodepe doomidi, benipe hanidaba eraasa.
JOB 20:5 Iita asa ceeqoy qantha wodesa; Xoossaa eronna asaa ufaysay guutha wodesa.
JOB 20:6 Iita asa otoroy salo gakanaw dhoqu giikoka, iya huuphey shaara gakidi bochikoka,
JOB 20:7 I baana mela pitetidi dhayana; Iya kase eriya asay ‘I awun de7ii?’ yaagana.
JOB 20:8 Elmoda paallidi dhayana; simmidi bentenna; qamma amuhoda coo dhayana.
JOB 20:9 Iya kase be7ida ayfeti zaaridi iya be7okona; I ba de7iya bessaafe tim7i gidi dhayana.
JOB 20:10 Aaway bonqi ekida miishe, iya nayti banta kushen guye zaarana.
JOB 20:11 Iya meqethaa kumida na7atetha wolqay iyara issife biittan zin7ana.
JOB 20:12 “Iitatethi iya doonan mal7iko, I ba inxarsaafe garsan qosiko,
JOB 20:13 wuronnaada ba doonan oykidi, wothi aggiko,
JOB 20:14 iya uluwan camo gidana; wodhiya shoosha marze gidana.
JOB 20:15 Iita asi mitida shaluwa zaari cuttana; iya uluwan de7iya ubbaa Xoossay cooshshana.
JOB 20:16 Iita asi miyabay iyaw marze gididi, iya wodhana.
JOB 20:17 Eessinne maathi haathada goggishin, I be7onna attana.
JOB 20:18 Ba daabura ayfiya moonna haras immana; zal7idi wodhisida wodhiyan ufaytenna.
JOB 20:19 Hessi haniday I manqota un7ethida gishonne hara asi keexida keethaa bonqida gishosa.
JOB 20:20 “Iya iita amoy shempo diggis; shiishida shaloy iya ashshanaw danda7enna.
JOB 20:21 Iya shaloy wuriya gisho, iya duretethay gam7enna.
JOB 20:22 Iyaw aqoy kumidi de7ishin, metoy akeekona iya bolla gaki wodhana.
JOB 20:23 Iya uloy kaalliya wode, Xoossay wolqaama hanquwa iya bolla gussana.
JOB 20:24 Birata mashshafe I baqatana; shin naase birata dongey iya caddana.
JOB 20:25 He dongey iya zokora kanthi keyana; phooliya xeeray iya tiriya kanthi aadhana; dagami iya wozanaa waabaqisana.
JOB 20:26 I shiishida aqoy sakana dhuman dhayana; asi oythiboonna tami iya maana; iya keethan attida shalo ubbaa xuuggana.
JOB 20:27 Saloti iya nagaraa qoncisana; sa7ika iyaw morke gidana.
JOB 20:28 Xoossaa hanqo gallasan, iya keethaanne iyaw de7iyaba di7oy efana.
JOB 20:29 Xoossay geellatas wothida qaaday, iita asaas giigisida gatey haysa” yaagis.
JOB 21:1 Yaatin Iyyobi haysada yaagidi zaaris;
JOB 21:2 Ane ta oda akeekidi si7ite; hessi hinte tana minthethida mela gido.
JOB 21:3 Taani issi toho odetana mela taw wode immite; taani haasaya simmiko tana qelqisite.
JOB 21:4 Taani mootetey asara gidenna. Yaatin, danda7ay wuriko hessi malaalsiyee?
JOB 21:5 Ane tana xeellidi malaaletite; hinte kushiya hinte doona bolla wothite.
JOB 21:6 Ta hessa qopiya wode tana daganthees; ta asatethay kokorees.
JOB 21:7 Iita asati ayis paxa de7oona? Enta laythay ayis aduqii? Enta wolqay ayis dari dari bidee?
JOB 21:8 Enta naytinne nayta nayti, diccishininne injen de7ishin enti ayis be7oona?
JOB 21:9 Enta soy hirgi bayna saro de7ees; Xoossaa xam7ay enta gakenna.
JOB 21:10 Enta miizati biraysi ekidi koxokona; yelishe awucayokona.
JOB 21:11 Banta nayta dorsaa wudeda kessoosona; enta nayti duroosona.
JOB 21:12 Karaabo baqishe diithi diixishe, suusul7e punnishe ufaysan yexoosona.
JOB 21:13 Enti banta de7o laytha injen de7idi, duufo sarora boosona.
JOB 21:14 Gidoshin, enti Xoossaako “Nuupe haaka! Nuuni ne ogiya eranaw koyoko” yaagosona.
JOB 21:15 “Nu iya goyinnanaw Ubbaa Danda7iya Xoossay oonee? Nu iya woossidi ay go7etanee?” yaagosona.
JOB 21:16 Enti duretetha banta minotethan demmida goosona; shin taani enta qofaa ekike.
JOB 21:17 “Hanoshin, iita asaa xompey to7ii? Entana boshi gaki erii? Xoossay ba hanquwan enta seeri erii?
JOB 21:18 Carkoy enta kaleda efida wodey, Gotey enta baanada denthida wodey de7ii?
JOB 21:19 Hinte, ‘Xoossi aawata bala gisho enta nayta seerees’ yaageeta. Ane Xoossay nagaranchota enta huuphen seero; yaatiko enti banta naaquwa erana.
JOB 21:20 Nagaranchoti banta seera bantaw eko; Ubbaa Danda7iya Xoossaa hanqoy enta bolla wodho.
JOB 21:21 Asi hayqidaape guye, ba naytabaa ay erii?
JOB 21:22 “Dhoqa bessan de7eyisata pirdiya Xoossaa, eratethi tamaarsanaw danda7iya asi de7ii?
JOB 21:23 Issi issi asi kumetha wolqaynne saroy de7ishin, inje duussu de7ishe hayqoosona.
JOB 21:24 Enta asatethay orde shin, enta meqethaa kolizey shica de7ishin hayqoosona.
JOB 21:25 Shin harati lo77oba be7onna, meton un7etidi kayotida mela hayqoosona.
JOB 21:26 Nam7ayka hayqidi biittan moogetosona; enti guxuntoosona.
JOB 21:27 “Hinte tana qohanaw qopidi, hinte wozanan qopida qofaa ta loythada erayis.
JOB 21:28 Hinte, ‘He gita uraa keethay awunee? Iita oothiya uray de7iya soy awunee?’ yaageeta.
JOB 21:29 Oge asata oychibeeketii? Enta markatethaa ammanibeketii?
JOB 21:30 Enti, ‘Iita asay dhayo gallas qohetokona; Xoossaa hanqoy qonciya gallas enti attana’ yaagosona.
JOB 21:31 Iita asi iya iitatethaa gisho kaccanay oonee? Iya oosuwa gisho iya seeranay oonee?
JOB 21:32 I hayqin, iya aha duufo efoosona; iya duufoy bonchon naagetees.
JOB 21:33 Zangaara biittay iyaw injetees; daro asay iya sinthan boosona; tayboy bayna asay iya kaalloosona.
JOB 21:34 Yaatin, hinte tana pathonna qaalan waati minthethanee? Hinte ta oyshaas zaariya zaaro ubbay wordo” yaagis.
JOB 22:1 Hessafe guye, Temaana biittafe yida Elfaazi haysada yaagidi zaaris;
JOB 22:2 “Asi Xoosse go77anaw danda7ii? Hari attoshin cinca gidikoka, bana go77anaape attishin, Xoosse go77enna.
JOB 22:3 Neeni xillo gidiko hessi Ubbaa Danda7iya Xoossaa ufaysiyee? Ne ogey borey baynaba gidiko hessan I ay wodhe demmii?
JOB 22:4 “I nena seereynne pirdey, Neeni iyaw yayya gishoyee?
JOB 22:5 Ne iitatethay daro gidenneyee? Ne nagaraas zawi baawa gidennee?
JOB 22:6 Gaasoy bayna ne ishata waase xeegisadasa; asaa ma7uwa qaara ekada enta kallo yeddadasa.
JOB 22:7 Saamotidaysata haathe ushshabaaka; koshatidaysata kathi muzabaaka.
JOB 22:8 Neeni wolqaama, durenne bonchetida asi gidada de7ashe,
JOB 22:9 Am7eta mela kushe yeddadasa; yi7otas wolqa dhaysadasa.
JOB 22:10 Ne yuushoy gitetiday, akeekona yashshi nena kokorsey hessasa.
JOB 22:11 Ne be7onna mela dhumiday, qassi kixa haathan ne muuketiday hessasa.
JOB 22:12 “Xoossay dhoqa saluwan uttidi, dhoqan de7iya xoolintota duge xeellees.
JOB 22:13 Shin neeni, ‘Xoossi ay erii? Sakana dhumaa giddora kanthidi, pirdanaw danda7ii?
JOB 22:14 Salo gufantho bolla I simeretiya wode, I be7onna mela siketida shaaray iya goozees’ yaagasa.
JOB 22:15 Nagaranchoti hemetida beni ogiyara baanaw qofaa qachadii?
JOB 22:16 Entaw wodey gakonna de7ishin hayqidosona; enta de7o baasoy di7on meecetidi dhayis.
JOB 22:17 Enti Xoossaako, ‘Nuupe haaka! Ubbaa Danda7iya Xoossay nuus ay oothanaw danda7ii?’ yaagidosona.
JOB 22:18 Gidikoka, enta keetha lo77oban kunthiday Xoossaa; Hessa gisho, iita asaa qofaa ta ekike.
JOB 22:19 “Iita asati seeretiya wode, xilloti ufaytoosona; suure asati haysada yaagidi, enta bolla qelqisoosona.
JOB 22:20 ‘Nu morketi dhayidosona; enta duretethay tamas attis’ yaagosona.
JOB 22:21 “Iyyoba, ha77ika Xoossara giiga; iyara saro de7a; yaatiko neeni anjetana.
JOB 22:22 Iya timirtiya si7a; iya qaala ne wozanan wotha.
JOB 22:23 Neeni Ubbaa Danda7iya Xoossaako simmiko; new sa7i simmana; iita ooso ubbaa ne soope digga;
JOB 22:24 Ne worqaa sa7an hola; ne Ofira worqaa shaafan yegga.
JOB 22:25 Yaatiko Ubbaa Danda7iya Xoossay, new worqanne dooretida bira gidana.
JOB 22:26 He wode ne Ubbaa Danda7iya Xoossan ufaytana; yeellatonna Xoossako pude xeellana.
JOB 22:27 Neeni iya woossana, I nena si7ana; ne qangetha iyaw gathana.
JOB 22:28 Ne qopidabay poletana; ne hemetiya ogey poo7o gidana.
JOB 22:29 Xoossay otoreyisata kawushshees; shin ashketa ashshees.
JOB 22:30 Ne kushey geeshshi gidiko, bala asay ne gaason maarota ekananne attana” yaagis.
JOB 23:1 Iyyobi haysada yaagidi zaaris;
JOB 23:2 Hachika ta cametada zuuzumayis; ta ooley mino gidikoka iya kushey ta bolla deexeysa aggibeenna.
JOB 23:3 Iya demmana bessaa ta erida gidarkina; I de7iya bessaa ta gakarkina!
JOB 23:4 Taani ta metuwa iya sinthan wothanashin! Ta doona mooton kunthanashin!
JOB 23:5 I taw zaaranay aybeko eranashin, I ay giyako be7anashin!
JOB 23:6 I ba gita wolqan taara eqetanesha? Akay, I tana si7ana.
JOB 23:7 Yan suure asi iyara mootetanaw danda7ees; ta daynnay tana merinaw shatinthana.
JOB 23:8 Shin taani doloha biiko I yan deenna; taani wuloha biiko iya yan demmike.
JOB 23:9 I pudehan oothiya wode taani iya be7ike; dugeha bagga simmiya wode taani iya demmike.
JOB 23:10 Shin I ta tanguwa ubbaa erees; I tana paaciya wode taani worqada geeyada keyana.
JOB 23:11 Ta tohoy iya tanguwa kaallidi bees; iya ogiyape haddirsi ushachi simmabike.
JOB 23:12 Iya doonape keyiya kiitaape taani shaaketabike; iya qaala ta wozanan wothas.
JOB 23:13 Xoossay laametenna; Iyara eqetanay baawa, I koydaba oothees.
JOB 23:14 I ta bolla qopidaysa polis; hessa mela hara daro halchoti iyaw de7oosona.
JOB 23:15 Hessa gisho, iya sinthan eqanaw daro yashshees; hessa ubbaa qopiya wode kokorayis.
JOB 23:16 Xoossay ta wozanay doccana mela oothis; Ubbaa danda7iya Xoossay tana daganthis.
JOB 23:17 Sakana dhumay ta som7uwa goozikoka, tana he dhumay haasaya diggibeenna.
JOB 24:1 Ubbaa Danda7iya Xoossay pirda wode ayis qanxennee? Iya ereysati he wodiya ayis coo naagonna?
JOB 24:2 Iita asati zawan de7iya shuchaa denthoosona; kaysi ehida dorsata yan heemmoosona.
JOB 24:3 Yi7o nayta hareta bonqoosona; am7e booraa acos oykidi ekoosona.
JOB 24:4 Manqota shaatetidi ogepe gooddosona; banta sinthafe qosetana mela oothosona.
JOB 24:5 Bazzon de7iya wora hare mela, manqoti banta naytas miyaba koyishe daaburoosona.
JOB 24:6 Enti hara asa gaden kathi cakoosona; iita asaa woyne gaden budhe maxoosona.
JOB 24:7 Enti qamma kallo aqoosona; meegos bolla yeggiyabay entaw baawa.
JOB 24:8 Zuma bolla bukiya iran enti suuruxoosona; geliya bessi dhayidi shucha hom7on aqoosona.
JOB 24:9 Aawi bayna na7a aaye ki7ope dafi ekoosona; manquwa na7a acos oykoosona.
JOB 24:10 Manqoti ma7o dhayidi kallo hemetoosona; enti bantaw koshatishe hara asa mirqe tookosona.
JOB 24:11 Enti bantaw saamotishe, zayte kessanaw hara asa gaden shamaho ayfe maxoosona; woyne ushsha gum7anaw woyne ayfe qoroosona.
JOB 24:12 Kataman kataman hayqana haniya asay oolosona; deshetidi madunxida asay maado koyidi waassoosona; shin Xoossay enta metuwa xeellenna.
JOB 24:13 Poo7o ixiya asati, iya ogiya eronna asatinne; iyan eqona asati de7oosona.
JOB 24:14 Sa7i qammiya wode shempo wodheysi dendidi, manqotanne metootanchota wodhees; qammi qassi kaysos boosona.
JOB 24:15 Laymatiya asi sa7i lem7anaysa naagees; oonika be7onna mela ba som7uwa kammees.
JOB 24:16 Kaysoti qamma keethe bookidi kaysotanaw geloosona; shin gallas qosetidi pee7osona.
JOB 24:17 Daganthiya dhumara enti dabbotiya gisho, sakana dhumay entaw seeta gallasa mela.
JOB 24:18 “Shin iita asati haatha goponto mela; enta laata biittay baadetidaysa; oonika enta woyne gade beenna.
JOB 24:19 Shachi maayin, haathi melidi dhayeysada, nagaranchoti hayqidi biittafe dhayoosona.
JOB 24:20 Yelida aayeti enta dogana; Guxuney enta ashuwa maana; iita asay hassayetokona; mithada meqana.
JOB 24:21 Enti na7i bayna mayntha maccasa naaqidosona; am7eta qadhetonna ixidosona.
JOB 24:22 Xoossay ba wolqan minota dhaysis; entaw sa7i injetida daanikoka, kundonna attokona.
JOB 24:23 Xoossay enti saro daanada oothikoka, enta ogiya wochees.
JOB 24:24 Iita asati guutha wodes dhoqu dhoqu goosona; shin ellesidi sharaafada shullidi dhayoosona; kathada caketoosona.
JOB 24:25 Hessi hanenna gidi kaddiya asi de7ii? taani odida qaala wordo gaana asi de7ii?” yaagis.
JOB 25:1 Hessafe guye, Shuuha biittafe yida Beldadoosi haysada yaagidi zaaris;
JOB 25:2 “Xoossay haareysanne yashsheysa; I dhoqa saluwa sarotethan haarees.
JOB 25:3 Iya olanchota taybanaw danda7iya asi de7ii? Xoossa poo7oy gakonna bessi de7ii?
JOB 25:4 Yaatin, asi Xoossaa sinthan xillo gidanaw danda7ii? Maccasape yeletida asi geeshshi gidanaw danda7ii?
JOB 25:5 Xoossaa sinthan ageenika kumetha poo7o gidenna; iya sinthan xoolintotika geeshshi gidokona.
JOB 25:6 Yaatin, Xoossaa sinthan wooqanne guxune gidida asi ay mela laafee?” yaagis.
JOB 26:1 Iyyobi haysada yaagidi zaaris;
JOB 26:2 “Neeni wolqi baynaysa ayba maaddadii? Daaburanchuwa waata ashshadii?
JOB 26:3 Cincatethi pacidaysas ay zore immadii? Ay mela eratethi qoncisadii?
JOB 26:4 Neeni ha qaala odetana mela nena maaddiday oonee? Ne odan mela nena denthethiday oodde ayyaanee?” yaagis.
JOB 26:5 Beldadoosi zaaridi, “Hayqida asaa ayyaanati, garsan haatha giddon de7eysati kokoroosona.
JOB 26:6 Xoossa sinthan Si7ooley qonce; aybika iya genthanaw danda7enna.
JOB 26:7 Xoossay pudeha salota coo miccis; sa7aa kaqoy bayna bessan kaqis.
JOB 26:8 I shaaratan haathe kunthees; haatha deexuwan shaarati daaketokona.
JOB 26:9 I ba shaara miccidi, kumtha ageena kammees.
JOB 26:10 Poo7o dhumape shaakanaw, abba gaxan Xoossay zawa wothis.
JOB 26:11 I hanqetiya wode, salo tuuqeti dagaman kokoroosona.
JOB 26:12 Ba wolqan abba si77i oothees; ba cincatethan Ra7aaba geetetiya do7aa dhaysees.
JOB 26:13 I ba shempuwan salota geeshshees; iya kushey xongetiya shooshaa caddees.
JOB 26:14 Haysati Xoossay oothiya oosotape guuthata; nu iya kalkashaa xalaala si7oos; iya wolqaa deshuwa akeekanaw danda7ey oonee?” yaagis.
JOB 27:1 Iyyobi kaallidi haysada yaagis;
JOB 27:2 “Suure pirdaa tana diggidi, ta de7uwa camo oothida, Ubbaa Danda7iya Xoossan taani caaqayis.
JOB 27:3 Ta shempoy de7ishin, ta siidhey shempishin
JOB 27:4 ta doonay wordo odetenna; ta inxarsay cimo odetenna.
JOB 27:5 Hinte oday like gada ta ekike; hayqana gakanaw ta tana suure geysa aggike.
JOB 27:6 Ta xillotethaa mintha oykanaape attishin, aggike; ta de7ida laytha ubban ta kahay tana mootenna.
JOB 27:7 “Ta morketi nagaranchoda, taara eqeteysati bala gido.
JOB 27:8 Xoossay enta shempuwa entafe ekiya wode, enta laytha qaamisiya wode, iitatas de7iya ufaysay aybee?
JOB 27:9 Enta bolla metoy gakiya wode, Xoossay enta waasuwa si7ii?
JOB 27:10 Ubbaa Danda7iya Xoossan enti ufaytanee? Enti ubba wode Xoossaa xeeganee?
JOB 27:11 “Taani hintena Xoossaa wolqaaba tamaarsana; Ubbaa Danda7iya Xoossaa qofaa ta hintefe qottike.
JOB 27:12 Hinte ubbay hessa be7ideta; yaatin, haysa mela coo haasaya ayis odeteetii?
JOB 27:13 Xoossay iita asatas giigisida qaaday, Ubbaa Danda7iya Xoossaafe ekiya woytoy haysa.
JOB 27:14 Enta nayti ay darikoka olan wurana; enta kochay miyaba dhayidi koshatana.
JOB 27:15 Hessafe attidaysati gadon wurana; enta am7eti entaw yeekokona.
JOB 27:16 Iita asati bira biittada shiishikoka, ma7o urqada shiishidi doorikoka,
JOB 27:17 enta bira xillo asati shaaki ekana; enta ma7uwa geeshshati ma7ana.
JOB 27:18 Enti keexiya keethati shango haada melanne gaabba mela laaletana.
JOB 27:19 Iita asati dure gididi hiixan zin7oosona; shin enti dhiskofe barkiya wode aykoyka baawa.
JOB 27:20 Dagami di7o haathada qoponna enta bolla yaana; qamma gotey enta denthidi efana.
JOB 27:21 Doloha carkoy enti de7iyasuwape pitidi efana.
JOB 27:22 Enti kessi ekanaw baqatishin, qadhey bayna enta bolla wodhana.
JOB 27:23 Ba kushiya baqidi enta bolla qelqisana ba suyqethan enta sugi yeddana.
JOB 28:1 “Bira bookidi kessiya bessinne worqaa seerisiya bessi de7ees.
JOB 28:2 Birati biittafe keyees; naase birati shuchu seerisin keyees.
JOB 28:3 Asay xompe ekidi dhumaa poo7isees; biitta gaathi gakanaw gelees; sakana dhuman he shuchaa koyees.
JOB 28:4 Asay de7iya bessaafe haakidi, asa tohoy yedhi eronna soo gakidi, yan gita olla bookees. Wodoron yaanne haanne kuullotishe, asaape koxetidi de7ees.
JOB 28:5 Kathi biittafe mokees; shin iya giddoy taman seeridi, shireti shireti wodhees.
JOB 28:6 He zaallafe sanpare geetetiya al7o shuchay keyees; iya biittafe worqay bentees.
JOB 28:7 He shuchaa bookiya bessa xiloy erenna; phircoyka be7ibeenna.
JOB 28:8 Iita do7ati he bessaa yedhi erokona; gaammoy yaara aadhibeenna.
JOB 28:9 Asi mino zaalla mentherethees; deriya bookidi xaphuwape aathidi yeggees.
JOB 28:10 Zaalla lukidi kanthiya oge kessees; he al7o shuchaa demmees.
JOB 28:11 Haathi he bessaara goggonna mela zeeres; geemmidabata poo7o kessees.
JOB 28:12 “Shin cincatethi awupe bentanaw danda7ii? Akeeki de7iya awee?
JOB 28:13 Asi iya gatiya erenna; I de7on de7iya medhetethati de7iya biittan bentenna.
JOB 28:14 Abbaa ciimmoy, ‘Cincatethi ta giddon baawa’ yaagees.
JOB 28:15 Cincatethi worqan shametenna woyko biran bentenna.
JOB 28:16 Cincatethi Ofira worqan, margidenne sanpare geetetiya al7o shuchan shametenna.
JOB 28:17 Worqinne mastootey iyara liketenna; worqafe oosetida al7o miishen laametenna.
JOB 28:18 Cincatetha gatey zaagolepe, almaazepenne al7o shucha ubbaafe aadhees.
JOB 28:19 Toophaze geetetiya Tophe inqoy iyara liketenna; walahi bayna worqan I shametenna.
JOB 28:20 “Yaatin, cincatethi awupe yii? Akeeki awupe bentii?
JOB 28:21 De7on de7iya medhetetha ubbaafe geemmidi de7ees; salo kafoti iya demmokona.
JOB 28:22 Gadoynne hayqoy, ‘Nuuni cincatethaba haythan si7ida’ yaagosona.
JOB 28:23 “Cincatethako efiya ogiyanne I de7iya bessaa erey Xoossaa xalaala.
JOB 28:24 Xoossay sa7aa gaxa ubbaa xeellees; salope garsan de7iyaba ubbaa be7ees.
JOB 28:25 Xoossay carkos wolqaa immida wode, haatha makida wode,
JOB 28:26 iri bukana woga immida wode, dadas oge wothida wode,
JOB 28:27 Xoossay cincatetha be7is; be7idi bonchis; paacidi essis.
JOB 28:28 He wode Xoossay asako, ‘Cincatethi Xoossas yayyeysa; akeeki iitaape haakeysa’ yaagees” yaagis.
JOB 29:1 Iyyobi kaallidi haysada yaagis;
JOB 29:2 Ha77i ta de7iya duussay, Xoossay beni tana naagida wodiyatho gideerenne!
JOB 29:3 He wode iya xompey ta bolla poo7ees; iya poo7uwan dhumaa kanthada bayis.
JOB 29:4 He wodey Xoossay ta keethaa anjin, taani ta na7atetha wolqara de7ida wode.
JOB 29:5 He wode Ubbaa Danda7iya Xoossay taape shaaketibeenna; ta nayti ta yuushon de7oosona.
JOB 29:6 He wode taani ta kushiya maathan meeccayis; shucha biittan toketida shamahoy, shaafa haathada goggiya zayte immees.
JOB 29:7 Taani katamaa pirda keethaa bida wode, shangotara issife uttayis.
JOB 29:8 He wode na7atethati tana be7idi oge yeddoosona; cimati tana bonchanaw dendi eqidosona.
JOB 29:9 Halaqati oda aggaagidosona; banta kushiya banta doona bolla wothidosona.
JOB 29:10 He kataman de7iya gita asati si77i gidoosona; enta inxarsay enta kottonuwa baqidi oykis.
JOB 29:11 Tabaa si7ida ubbay nashshees; tana be7ida ubbay bonchees.
JOB 29:12 Hessi haniday, taani manqota waasuwa si7ada ashshida gishonne, yi7o nayta maaddida gishosa.
JOB 29:13 Hayqana haniya asati tana anjidosona; am7eti ta maaduwan ufaytidosona.
JOB 29:14 Xillotethaa ma7oda ma7as; suure pirdaa afilada ma7as; barneexada wothas.
JOB 29:15 Taani qooqetas ayfe, wobbetas toho gidas.
JOB 29:16 Manqotas aawa gidas; oge asas xabaqa gidas.
JOB 29:17 Taani iitata gacuwa menthas; enti bonqidaysa enta doonape yegisas.
JOB 29:18 Taani ta wozanan, “Ta laythay shafeda darin, ta son bonchon hayqana” gada qopas.
JOB 29:19 Taani xaphuwa haathan yeddida, tashiya bolla aki kumida mitha melashin!
JOB 29:20 Ta bonchetida mela de7as; ta wolqay ubba wode oorathishin!
JOB 29:21 Ta haasaya wode si77i gidi si7ees; ta zoriya ufaysan ekoosona.
JOB 29:22 Ta entana alliya gisho, ta oda simmin taape guyera odiya asi baawa.
JOB 29:23 Goshshanchoy ira naageysada, enti ta haasaya si7anaw hakankidi naagoosona.
JOB 29:24 Enti hirgan de7ishin ta som7uwa pashkisayis; ta miichay enta minthethees.
JOB 29:25 Taani enti daana ogiya doorada entaw halaqa gidas. Ba olanchota giddon de7iya kawoda ta enta giddon de7as; enti azzaniya wode minthethas.
JOB 30:1 Shin ha77i taape na7attiya asati tana qelqisoosona. Enti ta dorsa wudiya heemmiya kanatara pee7onna mela taani diggida aawata nayta.
JOB 30:2 Enta aawati wolqi ixidaysatanne gilqata gidiya gisho tana aykoka maaddibokona.
JOB 30:3 Metoynne koshi un7ethin, biitta bazzo bidi xapho coommosona.
JOB 30:4 Cumadhenne bonco maxidosona; mal7onna sankara xapho midosona.
JOB 30:5 Asi waassishe kayso gooddeysada, entana asaa giddofe gooddidosona.
JOB 30:6 Enti zangaaran, gongoloninne zaalla qophon de7idosona.
JOB 30:7 Enti woran do7ada waassishe yuuyidosona; aguntha giddon shiiqidi issife de7idosona.
JOB 30:8 Enti biittafe goodetidosona; sunthi bayna eeyata gididi de7idosona.
JOB 30:9 Ha77i enta nayti tana yethan caddoosona; taani enta giddon hayses attas.
JOB 30:10 Enti tana shaatetidi taape haakoosona; yeellatonna ta som7on cuttoosona.
JOB 30:11 Xoossay ta wolqaa laafethidi tana kawushida gisho, enti tana qohanaw yeda para gididosona.
JOB 30:12 Seeri bayna diccida nayti ta bolla dendidosona; ta tohuwas xihe wothidosona; enti tana dhaysanaw teqidosona.
JOB 30:13 Enti ta ogiya gordidi tana dhaysanaw koyoosona; enti hessa oothonna mela teqiya oonika baawa.
JOB 30:14 Olanchoti katama dirsaa menthidi geleysada, enti ta bolla yidosona.
JOB 30:15 Taani gita dagama dagammas; ta bonchoy carkoy efiyada bis; ta saro duussay shaarada dhayis.
JOB 30:16 Ta shempiya daro un7etasu; metoy tana cuucummidi oykis.
JOB 30:17 Qamma qamma sahoy ta meqetha coommees; seelay taw shempo immenna.
JOB 30:18 Xoossay ba gita wolqan ta ma7uwa shiishidi oykis; qoodhe oykiya ma7oda tana cuullis.
JOB 30:19 Xoossay tana urqan holis; taani baananne bidinthe gidas.
JOB 30:20 Abeeti Xoossaw, taani neeko waassayis; shin neeni tana allabaka. Eqada nena woossas; shin neeni ta woosa si7abaka.
JOB 30:21 Neeni taw wozana mino gidadasa; ne gita wolqan tana yedethaasa.
JOB 30:22 Neeni tana carkora denthada gooddadasa; goten tana harqadasa.
JOB 30:23 Asa ubbaas wursethi gidida, hayqos ne tana aatha immanaysa erayis.
JOB 30:24 Meqida asi, “Tana maaddarki” gidi waassin, iyaw qadhetonna asi de7ii?
JOB 30:25 waayen de7eysatas ta yeekabikina? manqotas ta qadhetabikina?
JOB 30:26 Lo77oba demmana gada amotas shin iitabay gakis; Taw sa7i keehana gada naagas shin gallasi taw dhumis.
JOB 30:27 Ta wozanay hirga aggibeenna; taani wopa demmabike; un7a qammi ta bolla gakis.
JOB 30:28 Ta asatethay awa suulon gidonashin azzanon kareexis; taani deriya shiiquwan eqada maade koyayis.
JOB 30:29 Taani worakanatas isha, diidinthas lagge gidas.
JOB 30:30 Ta gogay kareexidi poqeti poqeti wodhees; ta asatethay mishan xuugetees.
JOB 30:31 Ta ufaysi qoncisiya diithinne suusul7ey, ha77i ta zelelsas gidis.
JOB 31:1 “Geela7o xeellada amottonna mela, taani ta ayfiyara caaqetas.
JOB 31:2 Bollan de7iya Xoossaa matape asas imetida qaaday aybee? Salon de7iya Ubbaa Danda7iya Xoossay asas immiya gishoy aybee?
JOB 31:3 Iitata bolla boshi, bala ootheyisata bolla gadoy gakanaysi eretidaba gidenneyee?
JOB 31:4 Xoossay ta ogiya ubbaa be7eneyee? ta tanguwa ubbaa taybeneyee?
JOB 31:5 “Taani wordon de7idaba gidiko, ase cimmidaba gidiko,
JOB 31:6 Xoossay tana like mizaanen mazzano; yaatidi ta xillo gideysa be7o.
JOB 31:7 Ta hemethay ogepe keydaba gidiko, ta wozanay ta ayfey xeellidaba amotidaba gidiko, ta kushey nagaran tunidaba gidiko,
JOB 31:8 ta dolay shodetidi dhayo; ta zeridaysa hari mo.
JOB 31:9 “Ta wozanay hara maccas amotidaba gidiko, woyko taani ta shooruwa machiw geeddidaba gidiko,
JOB 31:10 ta machiya hara asas gaacco; iira hara addey aqo.
JOB 31:11 Hessi yeellayiya nagaras koshshiya gita pirda.
JOB 31:12 Ha nagaray tamada xuuggiyaba gidiya gisho, ta aquwa ubbaa dhaysanashin.
JOB 31:13 “Ta adde woyko ta macca aylleti abeeti gin, entaw pirdonna ixidaba gidiko,
JOB 31:14 Xoossa sinthan ta pirdas shiiqiya wode waananee? I tana oychiya wode taani woyga zaaranee?
JOB 31:15 Tana medhida Xoossay enta I medhibeneyee? Nuna ubbaa nu aaye ulon medhiday issi iya gidenneyee?
JOB 31:16 “Taani manqoti woossidaba diggidaba gidiko, woyko am7eta minthethonna aggidaba gidiko,
JOB 31:17 yi7o nayti mela aqiya wode be7ashe, taani tarka midaba gidiko,
JOB 31:18 Taani enta ta na7atethafe doomada enta aawada dichas; ta yeletoosope doomada am7eta maaddas.
JOB 31:19 Ma7oy dhayin meegoy wodhiya uraa, woyko kallo de7iya metootanchuwa be7ada,
JOB 31:20 ta dorsata ikisepe oosetida ma7o mayzin, tana anjona biday de7iko,
JOB 31:21 Taani mooton enta shatimmanaysa erada, yi7o nayta naaqidaba gidiko,
JOB 31:22 ta qesey kuriyape me77o; ta kushey hashiyape kareti wodho.
JOB 31:23 Xoossaa hanquwa yayyida gisho hessa oothanaw danda7ike.
JOB 31:24 “Taani worqan ammanetidaba gidiko, woyko walahi bayna worqaa ‘Ta ceeqoy nena’ gidaba gidiko,
JOB 31:25 Ta duretetha darotethan, ta kushey demmida wodhen ufaytidaba gidiko,
JOB 31:26 Awa phoolethi be7ada, woyko ageena lo77otethi xeellada,
JOB 31:27 ta wozanay geeman enta nashshibeenna, woyko ta enta yeerada goyinnabike.
JOB 31:28 Hessi pirda ehiya nagara gidiya gisho Xoossaa kaddas guussu.
JOB 31:29 “Ta morketa kundethan ufaytabike; enta gakida metuwan hashshu gabike.
JOB 31:30 ‘Ta morkey dhayo’ yaaga baaddada, nagara oothabike.
JOB 31:31 Ta soo asay, ‘Iya son kathi midi kallonnay oonee?’ yaagidi markatoosona.
JOB 31:32 Ta soy ubba wode dooya gidiya gisho, oge asi karen aqi erenna.
JOB 31:33 Harati ootheysada, ta nagaraa ta wozanan genthabike.
JOB 31:34 Asa pokos yayyada, enta boriyas dagammada, soo gelada qosetida wodey deenna.
JOB 31:35 “Tana si7iya asi de7eerenneshin, Ta oday tuma gideysa paramayis; Ubbaa Danda7iya Xoossay taw zaaro immo Ta morkey ba mootuwa xaafidi shiishin ta be7arkinashin.
JOB 31:36 Be7iyako woytoda qoodhen aathada ma7anashin, Kallachada ta huuphen wothanashin!
JOB 31:37 Taani maati de7iya asada xoossaako shiiqada, ta oothidaba ubbaa iyaw qoncisanashin!
JOB 31:38 “Ta goshsha biittay ta bolla waassidaba gidiko, daasatika afuthan laakidaba gidiko,
JOB 31:39 he biittan kaxidaba miishe qanxonna ekidaba gidiko, woyko he biitta ootheyisata koshan wodhidaba gidiko,
JOB 31:40 taw he biittan giste gisho agunthi, banga gisho sharaafi dolo” yaagis. Iyyoba oday hessan poletis.
JOB 32:1 Iyyobi, “Taani xillo asi” gida gisho, ha heedzu asati iyaw zaaro imo aggaagidosona.
JOB 32:2 Iyyobi Xoossaafe aathidi bana xillo oothida gisho, Rama yarape gidida Buza biittafe yida Barkela na7ay Elihuy Iyyoba bolla hanqetis.
JOB 32:3 Enti iya coo bala gidi pirdidi, iyaw bessiya zaaro immanaw danda7iboona gisho Elihuy ha heedzu laggeta bollaka hanqetis.
JOB 32:4 Elihuy entafe kaalotiya gisho enti ubbay haasaya wursana gakanaw naagis.
JOB 32:5 Ha heedzu asati Iyyobas bessiya zaaro immanaw danda7iboonaysa be7idi I daro yilotis.
JOB 32:6 Buza biittafe yida Barkela na7ay Elihuy haysada yaagidi haasaya doomis. “Taani hintefe na7atayis; hinte taape bayrateta; Hessa gisho, taani ta qofaa hintew odanaw yayyas.
JOB 32:7 Taani, ‘Cimati odeto; banta daro laythan demmida cincatethaa tamaarsonna’ ” gada qopas.
JOB 32:8 Shin asa giddon aqidi cincatethi immey, Ubbaa Danda7iya Xoossaa Ayyaana.
JOB 32:9 Ase cinca oothey cimatethi gidenna, woyko asas akeeka immey laytha darotethi gidenna.
JOB 32:10 Hessa gisho, si7ite; taka ta qofaa hintew odana.
JOB 32:11 Hinte haasaya wode, taani si77i gada hayzas; hinte odana qaala koyishin naagas.
JOB 32:12 Hinte geysa ubbaa wursada si7as; shin hintefe oonika Iyyoba bala gidi ammanthibena; hintefe oonika iya palamas bessiya zaaro immibeenna.
JOB 32:13 Iyyoba odaas kalsiya zaaro immanaw danda7ey, Xoossefe attishin, ase gidonna gisho, hinte, “Nuus cincatethi de7ees” goopite.
JOB 32:14 Iyyobi palamiday taara gidonashin hintera; taani hinte odada iyaw zaaro immike.
JOB 32:15 Enti dagammidi, gaanaba dhayida gisho, zaaro immanaw danda7ibookona.
JOB 32:16 Yaatin enti odetiyaba dhayidi si77i gidi eqiko, taani naaganaw koshshii?
JOB 32:17 Gidenna, taani odiyabay de7ees; taka ta qofaa qoncisana.
JOB 32:18 Ta odanabay daroy de7iya gisho, ta giddon de7iya ayyaanay tana oda gidi sugees.
JOB 32:19 Ta gaathay goozetida manaaceda, woyko mal7anto woyne ushshi kumida ogoroda dhuuqana hanees.
JOB 32:20 Ta odada kessanaw bessees; ta doona dooyada zaaro immanaw koshshees.
JOB 32:21 Ha odan taani oonaka maaddike, woyko oonaka coo sabbike.
JOB 32:22 Ase coo sabbiyabay taw eretenna; ta hessa oothiyako tana medhidaysi pirdanashin.
JOB 33:1 Iyyoba, ha77i ta odaa si7a; ta giyaba ubbaa hayza.
JOB 33:2 Taani ta doona dooyas; ta qaalati ta inxarsaa xeeran de7oosona.
JOB 33:3 Ta qaalati ta wozana suuretetha qoncisosona; ta ereysa ta inxarsay tumatethan odees.
JOB 33:4 Tana medhiday Xoossaa Ayyaana; Ubbaa Danda7iya Xoossaa shempoy taw de7o immis.
JOB 33:5 Ne danda7iko taw zaaro imma; nena giigisada taara palama.
JOB 33:6 Taani Xoossaa sinthan ne mela; taanika urqafe medhetas.
JOB 33:7 Neeni taw yayiya gaasoy baawa; taani nena naaqike.
JOB 33:8 “Ne haasaya ubbaa taani si7ashe gam7as; ne doonape keyida qaalata hayzas.
JOB 33:9 Taani geeshshinne borey bayna asi; taani xillonne nagara oothaboonna asi.
JOB 33:10 Shin Xoossay tana seeranaw gaaso koyees; I tana ba morkeda taybees.
JOB 33:11 Ta tohuwa duxis; ta tango ubbaa I wochees” yaagadasa.
JOB 33:12 “Iyyoba, ne oday like gidenna; ta new odayis, Xoossay asape aadhees.
JOB 33:13 ‘Xoossay asa odaas zaaro immenna’ gada, ayis iyara palamay?
JOB 33:14 Asi akeekennafe attishin, Xoossay dumma dumma ogera odees.
JOB 33:15 Asi qamma hiixan zin7idi, dhisko eeyidi de7iya wode, Xoossi amuhoninne qoncethan odees.
JOB 33:16 He wode asay si7anaada haythe dooyees; ba seeran enta daganthees.
JOB 33:17 Yaatidi asi nagara oothonna mela teqees; otoro asape diggees.
JOB 33:18 Xoossi ase dhayope ashshees; hayqopeka naagees.
JOB 33:19 Asi hargetidi hiixan de7ishin, iya meqethaa garsan qanxonna saho yeddidi seerees.
JOB 33:20 Hessada hanidi hargida uray kathi ixees; daro mal7o kathi iya shaatees.
JOB 33:21 Iya ashoy gilqidi wurees; iya asatethay melin meqethi taybetees.
JOB 33:22 Iya shempoy duufoko, iya de7oy hayqo kiitanchotako matees.
JOB 33:23 “Asas suure ogiya bessiya mukulun taybetiya kiitanchotape issoy iya maaddanaw danda7ees.
JOB 33:24 Iyaw qadhetidi, ‘I duufo gelonna mela iya ashsha; taani iya woziyaba demmas; iya aggaaga’ yaagidi hayqos odees.
JOB 33:25 Hessa gisho, iya asatethay na7a asatethi gidana; iya yalagatetha wolqay iyaw simmana.
JOB 33:26 He wode I Xoossaa woossana; Xoossay iya woosa si7ana; Xoossay iyaw iya xillotethaa zaariya gisho, I ufaysan Xoossaa goyinnana.
JOB 33:27 He wode asa sinthan I haysada yaagidi yexana; ‘Taani nagaraa oothas; suureba geellayas; shin Xoossay ta hanuwa taw qanxibeenna.
JOB 33:28 Ta duufon gelonna mela tana ashshis; ha77i paxa de7ada poo77o be7ayis’ yaagana.
JOB 33:29 “Heko, Xoossi asas hessa ubbaa zaari zaari oothees.
JOB 33:30 I de7o poo7o be7ana mela, iya shempuwa duufope ashshees.
JOB 33:31 “Iyyoba, taani odeysa hayzada si7a; ane ne si77i ga; taani odetana.
JOB 33:32 Ne odanaw koyaabay de7iko oda; taani ne xillo gideysa be7anaw koyayis.
JOB 33:33 Atto giiko si77i gada, ta haasaya si7a; ta nena cincatethi tamaarsana” yaagis.
JOB 34:1 Qassika Elihuy haysada yaagis;
JOB 34:2 “Hinteno, cincato ta haasaya si7ite; hinteno, eranchoto tana hayzite.
JOB 34:3 Inxarsi mal7o kathi shaaki ereysada, haythi oda shaakidi erees.
JOB 34:4 Ane nuuni suureba shaakidi, lo77oba tamaaridi eroos.
JOB 34:5 “Iyyobi, ‘Taani xillo; shin Xoossi tana suure pirdaa diggis.
JOB 34:6 Taani tuma shin wordancho gidas; tanan bali baawa shin, paxonna madunthi madunxisis’ yaagis.
JOB 34:7 Iyyobada Xoossa bolla, qelqisiya asi de7ii?
JOB 34:8 I iita ootheysatara laggetees; nagaranchotara hemetees.
JOB 34:9 I, ‘Asi Xoosse ufaysana gidi oothiyabay aykoka maaddenna’ yaagees.
JOB 34:10 “Hessa gisho, hinteno, akeekancho asato si7ite, iita oosoy Xoossaafe, Ubbaa Danda7iya Xoossaafe bala oosoy haako.
JOB 34:11 Xoossay asas iya oosuwada immees; iya ogiyada iyaw qanxees.
JOB 34:12 Xoossay tuma iita oothenna; Ubbaa Danda7iya Xoossay suure pirdaa geellayenna.
JOB 34:13 Sa7a bolla iyaw maata immiday oonee? biitta ubbaa bolla iya shuumiday oonee?
JOB 34:14 Xoossay ba Ayyaananne ba de7o shempuwa zaaridi baako ekiyako,
JOB 34:15 asho ma7ida ubbay issife dhayana; asi biitta simmanashin.
JOB 34:16 “New akeeki de7iko haysa si7a; ta haasaya hayza.
JOB 34:17 Suure pirdaa ixey haaranaw danda7ii? Neeni xillonne wolqaama Xoossaa pirday?
JOB 34:18 Xoossay kawotako, ‘Hinte pathonayisata’; qassi biitta haareysatako, ‘Hinte iita’ yaagees.
JOB 34:19 Enti ubbay iya kushe oosota gidiya gisho, Halaqata som7o xeellidi maaddenna; dureta manqotape aathidi xeellenna.
JOB 34:20 Enti gidi bilahe akeekona hayqana; ubbay kokorishe dhayana; wolqaamati asa kushey bochonna kichana.
JOB 34:21 “Xoossay asa hemethaa xeellees; iya tango ubbaa wochees.
JOB 34:22 Iita ootheyisata, genthanaw danda7iya sakana dhumi baawa.
JOB 34:23 Asay iya sinthe pirdas shiiqana mela, Xoossay qaxaro immenna.
JOB 34:24 Oyshi bayna wolqaamata mentherethees; enta bessan harata shuumees.
JOB 34:25 I enta oosuwa eriya gisho, enta issi qamman maatape wothidi dhaysees.
JOB 34:26 Enta iitatethaa gisho, nagaranchota asa sinthan seerees.
JOB 34:27 Hessa I oothey, enti iya kaallonna ixida gishonne iya kiitaa aggida gishosa.
JOB 34:28 Enti manqota un7ethidi Xoossako waassana mela oothidosona; Xoossay manqota waasuwa si7is.
JOB 34:29 Xoossay si77i giiko iya oone mootanay? I ba som7uwa qosiko iya be7anay oonee? I asaapenne kawotethaafe bolla.
JOB 34:30 Hessi haniday geellay deriya haaronna melanne enta sinthan xihe wothonna melasa.
JOB 34:31 “Asi Xoossako yaagiyako Lo77o; kase ta nagara oothidaba gidiko zaarada oothike.
JOB 34:32 Ta be7onnaysa tana tamaarsa; nagara oothidaba gidiko zaarada oothike.
JOB 34:33 Yaatin neeni paaxike gashe, ne doseysa mela Xoossay new woytaneyee? Hiza qofa qachanay nenape attishin, tana gidike; hessa gisho, ne ereysa taw oda.
JOB 34:34 Akeeka asay haysada yaagosona; cincati yaagosona;
JOB 34:35 ‘Iyyobi eri bayna odetees; Iya odan ayfey baawa.’
JOB 34:36 Iyyobi iita asada zaaro immida gisho, wursethi gakanaw paacetida gideerenne!
JOB 34:37 I ba nagaraa bolla geellatethi gujis; nu sinthan Xoossaa bolla qelqisis; Xoossa bolla daro odetis” yaagis.
JOB 35:1 Elihuy qassi haysada yaagis;
JOB 35:2 “Iyyoba, neeni, ‘Taani Xoossaa sinthan xillo’ geysi likee?
JOB 35:3 ‘Taani nagaraa oothonna aggada ay go7etiyana? ay wodhe demmanee?’ yaagada ne Xoossaa oychanaw danda7aasa.
JOB 35:4 Taani newunne ne laggetas zaaro immana.
JOB 35:5 Dhoqu gada salota xeella; neepe bollara de7iya shaara akeekada be7a.
JOB 35:6 Ne nagara oothiko Xoossaa aybin qohanee? Ne balay dariko hessi iyaw ay oothii?
JOB 35:7 Ne xillo gidiko iyaw ay immanee? Woyko ne kushepe I ay ekanee?
JOB 35:8 Ne nagaraa oothiko ne mela ase qohaasa; qassi xillikoka ase go77aasa.
JOB 35:9 “Un77i dariya wode asay waassees; wolqaamata kushepe kessi ekiya asi koyidi wobbatoosona.
JOB 35:10 Shin oonika, ‘Qamma mazmure immiya, tana medhida Xoossay awun de7ii?
JOB 35:11 Do7atape aathidi tamaarseysi, kafotape aathidi cinca ootheysi awun de7i’ yaagenna.
JOB 35:12 Enti waassoosona; shin Xoossay enta otoruwa gaason, entaw zaaro immenna.
JOB 35:13 Coo waasuwa Xoossi tuma si7enna; Ubbaa Danda7iya Xoossay hessa hayzenna.
JOB 35:14 Neeni ta Xoossaa be7anaw danda7ike yaagikoka, ne mootoy iya sinthan de7iya gisho, ne iya danda7an naaganaw bessees.
JOB 35:15 Xoossay ase pirdonnabaanne nagara aggidi aadhana gada qopay?
JOB 35:16 Hessa gisho, neeni ne doona coo dooyasa; eri bayna haasaya darsaasa” yaagis.
JOB 36:1 Elihuy gujidi haysada yaagis;
JOB 36:2 “Xoossaa doona gidada ta new odiyabay de7iya gisho, guuthu danda7ada si7a.
JOB 36:3 Taani ta eraa haaho soope ehana; tana Medhidaysi xillo gideysa qoncisana.
JOB 36:4 Taani wordo haasayike; kumetha eri de7iya asi neera de7eysa ammana.
JOB 36:5 “Xoossay tuma wolqaama; shin I oonaka kadhenna. I ba akeekan mino.
JOB 36:6 I iitati de7on daana mela oothenna; shin un7etidaysatas suure pirdees.
JOB 36:7 Xoossay ba ayfiya xillota bollafe denthenna; enta kawotara utisidi, merinaw dhoqu dhoqu oothees.
JOB 36:8 Shin asay santhalaatan qashetiko, woyko meto wodoron oyketiko,
JOB 36:9 I enta oosuwanne otoron oothida nagaraa enta bolla qoncisees.
JOB 36:10 Seera si7anaada enta haytha dooyees; nagarape simmana mela enta kiittees.
JOB 36:11 Enti si7idi iyaw kiitetiko, banta laytha saroninne ufaysan wursana.
JOB 36:12 Shin enti si7onna ixiko mashshan wurana; enti era dhayida gisho hayqana.
JOB 36:13 “Xoossaa ammanonna asati banta wozanan yilotida mela de7oosona; I enta pirdiya wode maade koyidi woossokona.
JOB 36:14 Enti oothiya tuna oosuwan dhayana; banta na7atethan hayqana.
JOB 36:15 Shin waayeteyisata enta waayiyape ashshees; enta metuwa baggara entaw odees.
JOB 36:16 “Xoossay nena meto wodorope, un7i bayna dalga bessi, dooretida kathi kumida gaytaako kessana.
JOB 36:17 Shin ha77i iitata bolla gakiya pirday ne bolla gakin; xillo pirdan oyketadasa.
JOB 36:18 Oonika nena duretethi bessidi cimmonna mela, wodhaafe daroy balethonna mela naageta.
JOB 36:19 Ne duretethay woyko ne dafetethay nena metope ashshanee?
JOB 36:20 Asay banta bessaafe dhayiya qammay, yaana mela amottofa.
JOB 36:21 Ha meto ubbay nena gakiday hessa gaasona; hessa gisho, iita oothonna mela naageta.
JOB 36:22 “Xoossay ba wolqan dhoqu dhoqu gis; iya mela astamaarey oonee?
JOB 36:23 Xoossaa, ‘Haysa ootha’ gidi kiittey, woyko, ‘Neeni iita ooso oothadasa’ yaaganaw danda7ey oonee?
JOB 36:24 Asay mazmuren sabbida iya oosuwa, neka mazmuren sabba.
JOB 36:25 Asa koche ubbay Xoossaa oosuwa be7is; asay haahon eqidi xeellidosona.
JOB 36:26 Xoossay gita! Iya gitatetha nu akeekanaw danda7oko; iya laytha darotethaas zawi baawa.
JOB 36:27 “Xoossay haathe abbafe pude salo efees; duge zaaridi ira oothidi bukisees.
JOB 36:28 He iray shaarape keyidi, asa bolla bukana mela oothees.
JOB 36:29 Xoossi shaara waatidi micciyako, Xoossay de7iya saluwan waanidi guummiyako, oonika erenna.
JOB 36:30 I ba yuushon wol7antha poo7uwa laallees; abba ciimmuwa waatidi kammiyako be7a.
JOB 36:31 Yaatidi Xoossay deriya aysees; kathaa darsidi immees.
JOB 36:32 I wol7anthi ba kushen oykees; ba mallida bessaa caddana mela kiittees.
JOB 36:33 Dadi dhuuqidi uushoy yaanaysa bessees; meheyka uushoy yaanaysa erees.
JOB 37:1 “Iya uushuwan ta wozanay dirgees; ba bessan qaaxees.
JOB 37:2 Iya doonape keyiya qaala si7ite; dadada guummiya iya girsaa hayzite.
JOB 37:3 I salo garsan ba wol7antha laallees; biitta gaxape gaxa gakanaw kiittees.
JOB 37:4 Hessafe guye, iya guunthay si7etees; ba yashshiya girsaa sissees. Iya girsay si7etiya wode, ba wol7antha teqenna.
JOB 37:5 Xoossaa malaalsiya ogen ba guuntha sissees; nuuni akeekanaw danda7onna gitaba I oothees.
JOB 37:6 I shachako, ‘Sa7an wodha’ yaagees; wolqaama iraako, ‘Buka’ yaagidi kiittees.
JOB 37:7 I medhida asa ubbay iya oosuwa erana mela, asay banta oosuwa aggana mela oothees.
JOB 37:8 He wode do7ati banta bessaa geloosona; banta gongoluwan qosetoosona.
JOB 37:9 Wolqaama gotey dugehape dendees; irxa carkoy pudehape yees.
JOB 37:10 Xoossaa de7o shempoy shachi medhees; dalga haathata shuchada minthees.
JOB 37:11 Shaari haathe tookana mela oothees; ba wol7antha shaara giddon laallees.
JOB 37:12 Shaarati iya kiitan biitta gaxaa yuuyosona; I kiittiya kiita ubbaa poloosona.
JOB 37:13 Xoossay ira bukisey biitta irxisanaasa, woyko asaa seeranaasa, woyko ba siiquwa bessanaasa.
JOB 37:14 “Iyyoba, hessa si7a; Xoossay oothiya malaalsiya oosuwa taki gada akeeka.
JOB 37:15 Xoossay shaarata waatidi kiittiyako, ba wol7antha waatidi wol7amisiyako eray?
JOB 37:16 Shaarati salon waanidi uttiyako, eran polo gidida Xoossay oothiya malaalsiya oosuwa neeni eray?
JOB 37:17 Dugeha carkoy carkidi biitta mishisiya wode, neeni wolqaama bazzo seelan til7ana.
JOB 37:18 Xoossay saluwa til7ida mastooteda micciya wode, neeni iya maaddanaw danda7ay?
JOB 37:19 Nuuni era paca gidiya gisho, Xoossas woygidi odetaneko ne nuna tamaarsa.
JOB 37:20 Xoossara odetana gada taani oychanaw koshshii? tana dhaysana mela ta ayis iya denthethanee?
JOB 37:21 Carkoy salope shaara geeshshiya wode, salon phooliya awa oonika be7anaw danda7enna.
JOB 37:22 Pudeha baggara worqaa daaniya poo7oy bentees; Xoossay yashshiya teeman qoncees.
JOB 37:23 Ubbaa Danda7iya Xoossaako shiiqanaw danda7oko; iya wolqay gita. I ba tuma pirdaaninne ba gita xillotethan ase qohenna.
JOB 37:24 Hessa gisho, asay iyaw yayyees; bantana cinca geyisata I kadhees” yaagis.
JOB 38:1 Hessafe guye, Goday gote giddon gididi Iyyobas haysada yaagidi zaaris.
JOB 38:2 Eri bayna odan ta zoriya dhumisey I hessi oonee?
JOB 38:3 Ane addeda danceta; ta nena oychana, taw zaara.
JOB 38:4 Taani alamiya medhiya wode neeni awun de7ay? Ane ne akeekiyako taw oda.
JOB 38:5 Ne eriko, ha sa7aa dalgatethaas zawa wothiday oonee? Wadha wodoruwa sa7a bolla yeggiday oonee?
JOB 38:6 Ha sa7aa tuussata kundonna mela minthidi oykiday aybee? Ha sa7aa baasuwas koyro shuchaa wothiday oonee?
JOB 38:7 Wonta bakalati issife yexiya wode, kiitanchoti ubbay ufaysan ilili giya wode ne eray?
JOB 38:8 Abba haathi biittafe dhuuqidi keyiya wode, iya pengeta gordiday oonee?
JOB 38:9 Abbaa shaara mayzas; sakana dhuman gooziday tana.
JOB 38:10 Abbay kanthonna mela zawa medhiday, iyaw pengenne teqe wothiday tana.
JOB 38:11 “Haysa gakanaw ya; shin haysafe aadhofa; ne wolqaama hobbey hessan eqo” yaagiday tana.
JOB 38:12 Iyyoba, ne yeletoosope wonti wontana mela kiita eray, away dolana bessaa malla eray?
JOB 38:13 Wonta poo7oy biitta ubban poo7ana mela, iita asata qosetida bessaafe qonce kessana mela, neeni wonta kiitta eray?
JOB 38:14 Wonta poo7oy zumatanne zangaarata, dakoydi wothida ma7oy eqidi benteysada bessees; oto bolla wothida maatameda qoncees.
JOB 38:15 Iitata poo7oy eketana; enta makalla qesey meqana.
JOB 38:16 Ciimmo abba giddo gelada pultuwa be7adii? Woyko iya baasuwa gakada iya olla simeretadii?
JOB 38:17 New hayqo pengeti bentidona? Woyko sakana dhumaa pengeta be7adii?
JOB 38:18 Sa7ay ay mela giteeko ne eray? Hessa ubbaa ne eriya gidiko taw oda.
JOB 38:19 Poo7oko efiya ogey awunee? dhumi awun de7iyako eray?
JOB 38:20 Poo7onne dhuma enta bessaa bessaa efanaw danda7ay? Enti de7iya bessaa efiya ogiya eray?
JOB 38:21 Neeni sa7i medhetiya wode yeletida gishonne daro laythi de7ida gisho hessa eronna aggaka!
JOB 38:22 Shachi minjetiya keethaa geladii? woyko shachi dooretida bessaa be7adii?
JOB 38:23 Taani enta meto wodes, ola wodesinne toora gallasas minja wothas.
JOB 38:24 Wol7anthi keya bessaa efiya ogey awun de7ii? Woyko doloha carkoy awupe keyidi carkii?
JOB 38:25 Iri wodhiya bessaa giigisiday, dadas oge kessiday oonee?
JOB 38:26 Asi doonna mela biittan ira bukisey oonee?
JOB 38:27 Melida mela biittay iran laakidi, purco maatay dolana mela oothiday oonee?
JOB 38:28 Iras aawi de7ii? Woyko aka yeliday oonee?
JOB 38:29 Shachas aayiya de7ay?
JOB 38:30 Haathay shuchada minthees; abba baasoy shachada uuketees.
JOB 38:31 Pilaadisa geetetiya xoolintota issife gathada qachanaw danda7ay? Ooriyoona geetetiya xoolintoti qashetida wodoruwa billanaw danda7ay?
JOB 38:32 Cugan cugan de7iya xoolintota enta woden woden kessanaw danda7ay? Biire geetetiya xoolintota enta naytara kaalethanaw danda7ay?
JOB 38:33 Saloti ay higgen aqiyako ne eray? He higgey sa7aa haarana mela oothanaw danda7ay?
JOB 38:34 Di7oy nena muukana mela ira bukisanaw, ne qaala dhoqu oothada shaarata sissanaw danda7ay?
JOB 38:35 Wol7anthi kiittanaw danda7ay? Enti neeko yidi, “Heko, ay oothino?” goonna?
JOB 38:36 Wozanas cincatethi, kahas akeeka immiday oonee?
JOB 38:37 Ba cincatethan shaarata taybanaw danda7ey oonee? Baana munuqidi, urqa kessidi minthanaw, salo otota gedi oothidi haathe tiganaw danda7ey oonee?
JOB 38:39 Shankatada macca gaammos miyaba eha eray? koshatida gaammo marata muza eray?
JOB 38:40 Enti gongolon qoseti naagoosona; bazzon zin7idi pee7osona.
JOB 38:41 Quuroti koshatidi daaburiya wode, enta nayti miyaba demmanaw taako waassiya wode, entaw miyaba immey oonee?
JOB 39:1 “Woshi7ey awude yeliyako neeni eray? Baachoti bannakidi banta marata yeliya wode be7adii?
JOB 39:2 Enti ay mela ageena gam7iyako, awude yeliyako ne eray?
JOB 39:3 Enti gulbati eqetidi, banta marata yeley awudeko eray?
JOB 39:4 Enta marati bazzon diccidi minnoosona; banta aayeta aggidi boosona; nam7antho guye simmokona.
JOB 39:5 “Wora hareti yeda daanada oothiday oonee? Qashope enta birshidi yeddiday oonee?
JOB 39:6 Entaw bazzuwa de7iya bessi oothada immas; maxine biittan enti daanada oothas.
JOB 39:7 Katama waasuwape haakidi de7oosona; laaggeysta qodethi si7okona.
JOB 39:8 Enti dereta bolla bantana heemmoosona; yan miya purco maata qoroosona.
JOB 39:9 “Menthi new oothanaw ero gandee? Woyko ne zadalon qamma aqandee?
JOB 39:10 Goyana mela ne iya waaxanee? Woyko waaxada goyanaw danda7ay?
JOB 39:11 Neeni iya wolqaa minotethan ammanetanee? deexo ooso I oothana mela iyaw yegga agganee?
JOB 39:12 Neeni kathaa shaalen qolana mela, woyko wudumman shiishana mela iya ammanay?
JOB 39:13 “Yanchoy ba qefiya ellesada qaathawusu; shin haatha kafoda piradhanaw danda7uku.
JOB 39:14 Yanchoy ba phuuphulliya biittan phuuphulawusu; shafen ho7ana mela aggaagawusu.
JOB 39:15 ‘Tohoy menthana, bazzo do7ati yedhana’ gada qopuku.
JOB 39:16 Nayti babaa gidonnaada oothada entaw daro iitawusu. I daabura ubbay mela atteysi iw aykoka daanenna.
JOB 39:17 Hessada oothada iyo cincatethi diggidaynne akeeka dhaysiday tana.
JOB 39:18 Shin dendada iya woxiya wode, baara gaadetiya para bollanne paraawa bolla miiccawusu.
JOB 39:19 “Iyyoba, paratas wolqaa immiday, woyko parata morgen cimba mayziday nenee?
JOB 39:20 Parati booleda gupanaadanne garmamidi daganthanaada oothiday nenee?
JOB 39:21 Parati banta wolqan ammanetidi dhiskoosona; oletanaw ola demba gaallaboosona.
JOB 39:22 Yashshi erokona; enta aybika daganthenna; enta bolla mashsha shoddikoka guye simmokona.
JOB 39:23 Enta toggiya olanchoti oykida ola miisheti, phoolishe issoy issuwara gahetidi giiroosona.
JOB 39:24 Shin parati biitta kaashishenne yashisishe gaallaboosona; Moyze girsi si7iya wode si77i gidi eqanaw danda7okona.
JOB 39:25 Moyzey punetiya wode ufaysan garmamoosona; ola peeno haahon ekoosona; toora mocona kiitaanne olanchota ceequwa si7oosona.
JOB 39:26 “Xiloy ba qefiya dugeha bagga miccidi, paallanaw danda7ey ne cincatethanee?
JOB 39:27 Arganthi pude keyidi, ba keethaa dhoqa dereta bolla keexey ne kiitanee?
JOB 39:28 Arganthi aafo doonan ba keethaa keexidi de7ees; zaalla qophoti iyaw qol7a gididosona.
JOB 39:29 Yan uttidi baw miyaba wochees; iya ayfey haahon geeshshidi demmees.
JOB 39:30 Argantha nayti suuthi uyoosona; gawuxi de7iya bessan shiiqoosona” yaagis.
JOB 40:1 Goday Iyyobako zaaridi yaagis;
JOB 40:2 “Iyyoba, asi Ubbaa Danda7iya Godaara mootetidi, lathanaw danda7ii? Ane Xoossara mootetiya uray iyaw zaaro” yaagis.
JOB 40:3 Hessafe guye, Iyyobi zaaridi, haysada yaagis;
JOB 40:4 “Godaw, taani pathonna laafa asi; ta doona bolla kushe wothada si77i gaanape attishin, new ay zaaro immanaw danda7iyana?
JOB 40:5 Taani issi toho odas; shin taw zaariyabay baawa; nam7antho odas haraa gujike” yaagis.
JOB 40:6 Hessafe guye, Goday gote giddon giddon gididi Iyyobako haysada yaagis.
JOB 40:7 Addeda ne xeessaa dancada dendada, ta oyshaas zaaro imma.
JOB 40:8 Ne tana bala asi kessana hanayee? New xillo gidanaw tana wordancho kessayee?
JOB 40:9 Xoossa wolqaa mela wolqi new de7ii? Xoossay guummeysada ne guummanaw danda7ay?
JOB 40:10 Hessa gidiko, ne bonchuwanne gitatetha ma7a; ne wolqaanne teemuwa gixa.
JOB 40:11 Ne hanquwa gussa; ane otoranchota xeellada kawusha.
JOB 40:12 Ane loytha xeellada otortiya ubbaa yeellaya; iitata ubbaa enti de7iya bessaafe dhaysa.
JOB 40:13 Enta ubbaa biittan mooga; duufon yeggada enta bolla gorda.
JOB 40:14 He wode ne wolqay nena ashshanaw danda7eysa ta markatana.
JOB 40:15 Taani nena medhidaada medhida Bihemoota geetetiya do7a be7a; I boorada maata mees.
JOB 40:16 Iya xeessan de7iya wolqaynne iya uluwa kammida shayaa minotethay daro.
JOB 40:17 Iya goynay zigada bollan qaaxees; iya gedaa xaphoti minon dooqetidosona.
JOB 40:18 Iya meqethay naase birata mela; iya geday birata kure mela.
JOB 40:19 Xoossay medhida medheta ubbaa garsan I aadhees; taape attishin, hari iya xoonanaw danda7ey baawa.
JOB 40:20 Do7i gupiya derey, iyaw miyaba dolisees.
JOB 40:21 Mitha kuya garsan zin7ees; caren maqa giddon qosetees.
JOB 40:22 Mithati banta kuyan iya genthoosona; shaafa gaxan dicciya mithati iya kammoosona.
JOB 40:23 Shaafay kixidi goggey wode dagammenna; Yordaanose shaafay qoodhe gakanaw kumikoka I hirgenna.
JOB 40:24 Iya ayfiya toysidi, iya oykanaw danda7iya asi de7ii? Iya siidhiya lukidi oykanaw danda7ey oonee?
JOB 41:1 “Neeni Leewataane geetetiya abba do7aa manxaqon oykanaw, woyko iya inxarsaa wodoron ancafanaw danda7ay?
JOB 41:2 Iya siidhiya lukada dafo aathanaw danda7ay? Woyko iya gacuwa wospen lukanaw danda7ay?
JOB 41:3 I nena, ‘Hayyana tana aggarki’ yaagidi woossii? Woyko new mal7o qaala odii?
JOB 41:4 Ne iya merinaw aylle oothada haarana mela, I new ero gidi caaqanee?
JOB 41:5 Asi kafo loohiseysada ne iya loohisanaw danda7ay? Woyko iya qachada ne macca naytara kaa7ana mela oothanee?
JOB 41:6 Molo zal7anchoti iya gatiya bolla palamona? Woyko iya qanxerethidi bayzoona?
JOB 41:7 Neeni iya galbaa tooran, woyko iya huuphiya mashshan caddanaw danda7ay?
JOB 41:8 Ane iya ne kushen bocha; ne iyara butetida butiya dogaka; nam7antho iyara butetanaw qopaka.
JOB 41:9 He do7aa oykanaw paacey mela waaye; hari attoshin iya be7ida ubbay yashshan kokorees.
JOB 41:10 I zin7ida bessaafe iya denthanaw oonika xaalenna; yaatin, ta sinthan eqanaw danda7ey oonee?
JOB 41:11 Taani iyaw zaarana mela koyro taw tal7iday oonee? Salope garsan de7iyaba ubbay tabaa.
JOB 41:12 “Taani Leewataane tohotaba, iya gita wolqaabanne lo77iya iya asatethaba qoncisonna aggike.
JOB 41:13 Iya galbaa qaaranaw danda7ey oonee? Iya gacuwa pooqidi bixaala barsanay oonee?
JOB 41:14 Yashshiya achay de7iya iya gacuwa pooqanaw danda7ey oonee?
JOB 41:15 Iya zoko galbay issoy issuwa bolla dooretidi; shuchada minnida gondalle daanees.
JOB 41:16 Enti issoy issuwas daro matatida gisho, enta giddora hari attoshin carkoy kanthanaw danda7enna.
JOB 41:17 Issoy issuwara gahetidi de7iya gisho, enta aybika shaakenna.
JOB 41:18 I hadhishiya wode poo7oy pol7u gees; iya ayfeti wonta xalqeda caddees.
JOB 41:19 Iya doonape tama lacoy keyees; pinxiya tami bentees.
JOB 41:20 Iya siidhiyape cuyay, tama bolla de7iya otope keya pento mela.
JOB 41:21 Iya siidhera keya shempoy kenchikelo bonqisees; tama lacoy iya doonape keyees.
JOB 41:22 Iya morgiyan wolqay de7iya gisho, I daro yashshees.
JOB 41:23 Iya ashoy issife oyketidi de7iya gisho, iya asatethay biratada minnees.
JOB 41:24 Iya wozanay shuchada mino; gaacha woxa mela mino.
JOB 41:25 I dendiya wode minoti yayyoosona; dagammidi baqatoosona.
JOB 41:26 Iya gakiya mashshay aykoka oothenna; toori woyko dongey woyko mashshi iya qohenna.
JOB 41:27 I birata xinqa maatada, naase birata wooqida mithada mentherethees.
JOB 41:28 Dongey iya betisenna; yambarsha shuchi iyaw suulla mela.
JOB 41:29 Gumba xam7i iyaw xinqo mela; toora xongiya wode qelqisidi miicees.
JOB 41:30 Iya uluwa bolla de7iya galbay meqida kun7a mela qara; urqara I biya wode marasha mela biitta phalqees.
JOB 41:31 Abbaa pentida haatha mela tumbul tumbul oothees; xaaron pentiya zayte mela shiri shiri yeggees.
JOB 41:32 Iya biya ogey poo7ees; abba haatha goponto laammees.
JOB 41:33 I yashshi eronna gisho, biitta bolla iya mela medhetethi hari baawa.
JOB 41:34 I daro gita medhetethata ubbaa kadhees; do7a ubbaas I kawo” yaagis.
JOB 42:1 Hessafe guye, Iyyobi Godaako haysada yaagidi zaaris;
JOB 42:2 “Ne ubbaba oothanaw danda7eysanne ne qofaa teqanaw danda7ey baynaysa taani eras.
JOB 42:3 Ne, ‘Eri bayna ta zoriya qosey oonee?’ yaagada tana oychadasa; tuma taani taw geliboonnaba, ta eraape bolla gidida malaalsiyaba odetas.
JOB 42:4 “Neeni taako, ‘Taani odiya wode hayza; taani oychiya wode zaara’ yaagadasa.
JOB 42:5 Taani kase nebaa haythan si7as; shin ha77i ta nena ayfen be7as.
JOB 42:6 Hessa gisho, ta odan yellatada, bido bollanne baana bolla uttada paaxayis” yaagis.
JOB 42:7 Goday hessa Iyyobas odidaape guye, Temaanape yida Elfaazako haysada yaagis. “Ta aylliya Iyyobada hinte tabaa like odetiboonna gisho, ne bollanne ne nam7u laggeta bolla ta hanqoy eexis.
JOB 42:8 Hessa gisho, ha77i laapun kormatanne laapun marazeta ekidi ta aylliya Iyyobako bidi, xuussa yarsho hinte balas yarshite. Ta aylliya Iyyobi hintew woossana; taani iya woosa si7ada hinte hanuwa mela hintena seerike. Hinte ta aylliya Iyyobada tabaa like odibeketa” yaagis.
JOB 42:9 Hessafe guye, Temaanape yida Elfaazi, Shuuhape yida Beldadoosinne Na7imape yida Soofari bidi, Goday enta kiittidaysada oothidosona. Goday Iyyoba woosa s7is.
JOB 42:10 Iyyobi ba laggetas woossidaape guye, Goday iya zaaridi dureyis; iyaw kaseysa gisho nam7u kushe immis.
JOB 42:11 Hessafe guye, iya ishati, iya michetinne kase iya ereysati ubbay iyako yidi, iya son iyara gibira midosona. Iyaw azzanidosona; Goday iya bolla ehida meto ubban iya minthethidosona; qassi iyaw biranne worqa sagaayo immidosona.
JOB 42:12 Goday Iyyoba wursetha laytha koyro laythaafe aathidi anjis. Iyyobas tammanne oyddu mukulu dorsati, usupun mukulu gimaleti, issi mukulu waaxa booratinne issi mukulu macca hareti de7oosona.
JOB 42:13 Qassi iyaw laapun adde naytinne heedzu macca nayti yeletidosona.
JOB 42:14 Bayra macca na7iw Yimimo, nam7anthiw Qaxi7o, heedzanthiw Qerenhafuko yaagidi sunthis.
JOB 42:15 Iyyoba macca naytada mala lo77o macca na7i awu biittan bentibeenna. Enta aawa entaw enta ishatara laata biitta immis.
JOB 42:16 Hessafe simmin, Iyyobi xeetanne oytamu laythi de7is. Ba naytanne ba nayta nayta oyddantho yeletethaa gakanaw be7is.
JOB 42:17 Iyyobi daro wode de7idi, lo77o cima cimidi hayqis.
PSA 1:1 Iitata zoriyan boonnay, nagaranchota ogen eqonnay, qelqiseyisata shiiqon uttonnay, I anjetidaysa.
PSA 1:2 Shin I Godaa higgiyan ufaytees; iya higgiya gallasinne qamma qopees.
PSA 1:3 I goggiya haatha xaphon toketidi, woden woden ayfe immiya, iya haythay qolettonna mitha mela. I oothiya ubbay iyaw poletees.
PSA 1:4 Shin iitati hessa mela gidokona; carkoy pitidi efiya suulla mela.
PSA 1:5 Iitati xillo pirda bessan eqokona; nagaranchoti xillota duulatan bentokona.
PSA 1:6 Goday xillota ogiya erees; shin iitata ogey dhayana.
PSA 2:1 Kawotethati ayis dendoona? asay ayis coo maqetoona?
PSA 2:2 Kawoti Godaa bollanne I tiyidaysa bolla dendidosona; deriya haareysati enta bolla shiiqidosona.
PSA 2:3 “Enta santhalaata duuthoos; enta qasho wodoruwa holoos” yaagidosona.
PSA 2:4 Salon uttidaysi enta bolla miicees; Goday enta qelqisees.
PSA 2:5 I ba hanquwan enta daganthees; ba yiluwan enta yashisees.
PSA 2:6 “Ta geeshsha zuma Xiyoone bolla ta kawa kawothas” yaagees goday.
PSA 2:7 Taani Godaa higgiya awaajana; Goday tana, “Neeni ta na7aa; taani hachi new aawa gidas.
PSA 2:8 Ne tana oycha; ta new kawotethata immana; sa7a ubbay nebaa gidana.
PSA 2:9 Neeni birata xam7an enta menthana; meqa miisheda enta tincherethana” yaagis.
PSA 2:10 Hiza, kawoto eeyopite; ha sa7aa haareysato akeekite.
PSA 2:11 Godaa yashshan goyinnite; kokoridi kiitetite.
PSA 2:12 Goday hanqetin ogen hinte dhayonnaada iya tumatethan goyinnite. Iya hanqoy eeson eexi keyana; iyan qosetidi attida ubbay anjetidaysata.
PSA 3:1 Dawiti ba na7a Abeseloomepe baqatida wode xaafida mazmure Abeeti Godaw, ta morketi ay mela daridona! Ta bolla dendeysati aapune!
PSA 3:2 Daroti, “Xoossay iya ashshena” yaagidi, tabaa haasayoosona. Salah
PSA 3:3 Shin abeeti Godaw, ne taw gondalle; ta bonchoynne tana dhoqu oothey nena.
PSA 3:4 Ta qaala dhoqu oothada Godaako waassayis. I ba geeshsha zumaape taw zaarees. Salah
PSA 3:5 Goday tana naagiya gisho, ta zin7asinne dhiskas hirgi bayna barkas.
PSA 3:6 Ubba bessara ta bolla dendida, daro mukulu asaas yayyike.
PSA 3:7 Abeeti Godaw, denda! Abeeti ta Xoossaw tana ashsha! Ta morketa gacuwa shoca; iitata acha mentha.
PSA 3:8 Xoonoy Godaasa; Godaw, neeni ne asaa anja. Salah
PSA 4:1 Zammaareta Halaqaas Xaafetida Dawita Mazmure Diithan yexetiya mazmure Abeeti tana xillisiya Xoossaw, taani nena xeegiya wode taw koya. Taani un7etida wode ne tana la77a kessadasa; taw qadheta; ta woosa si7a.
PSA 4:2 Hinteno asaw, hinte awude gakanaw ta bonchuwa kawushsheetii? Awude gakanaw pathonnaba doseetii? Awude gakanaw wordo kaalleetii? Salah
PSA 4:3 Goday ammanetiya asata baw dummayidi wothidaysa erite; taani Godaa xeegiya wode I tana si7ees.
PSA 4:4 Hanqetite, shin nagara oothopite; hinte zin7iya wode hinte wozanaa qorite; si77i giite. Salah
PSA 4:5 Godaas like yarsho yarshite; iyan ammanetite.
PSA 4:6 “Nuna lo77oba bessanay oonee?” yaagidi daroti oychoosona; Abeeti Godaw, ne nuna keeha ayfen xeella.
PSA 4:7 Daro gistefenne woyne ushshafe ne ta wozanan wothida gita ufaysay aadhees.
PSA 4:8 Abeeti Godaw, ne xalaali tana saro wothiya gisho, taani zin7ada wopu gada dhiskayis.
PSA 5:1 Zammaareta Halaqaas Xaafetida Dawita Mazmure Suusul7en yexetiya mazmure. Abeeti Godaw, ta qaala si7a; ta ooliya qopa.
PSA 5:2 Ta kawaw, ta Xoossaw ta waasuwa si7a; ta maade koyada woossiya woosaa hayza.
PSA 5:3 Abeeti Godaw, wonta wonta ta qaala si7aasa. Wonta wonta ta woosa ne sinthe shiishayis; ta ne zaaruwa naagayis.
PSA 5:4 Neeni iitatethan ufaytonna Xoosse; iitabay neera deenna.
PSA 5:5 Otoranchoti ne sinthan eqokona; iitabaa oothiya ubbaa ne ixaasa.
PSA 5:6 Wordo odeteyisata ne dhaysaasa; Goday suuthu gusseysatanne cimmeyisata ixees.
PSA 5:7 Shin ta ne gita maarotethan ne keethaa gelana; ne geeshsha bessaako simmada nena bonchon goyinnana.
PSA 5:8 Abeeti Godaw, ta morketa gisho gada, tana ne xillotethan kaaletha; ne ogiya ta sinthan suurisa.
PSA 5:9 Enta mettershan tumi baawa; enta wozanan dhaysoy kumis. Enta doonay dooyetida duufo mela; enti banta inxarsan cimmoosona.
PSA 5:10 Enti ne bolla makallida gisho, abeeti Xoossaw, enta pirda; Enta tobbay enta ekidi boo; enta daro nagaraa gisho enta yedetha.
PSA 5:11 Shin neeko baqatidi attida ubbay ufayto; enti merinaw ufaysan yexo. Ne sunthaa dosiya ubbay nenan ufaytana mela; neeni enta merinaw naaga.
PSA 5:12 Abeeti Godaw, neeni xillota anjaasa; gondallen ashsheysada ne keehatethan iya ashsha.
PSA 6:1 Zammaareta Halaqaas Xaafetida Dawita Mazmure Hospun shayan yexetiya mazmure Abeeti Godaw, ne yiluwan tana seeropa; ne sheniyan tana hanqofa.
PSA 6:2 Abeeti Godaw, taani daaburancho gidida gisho tana maara; abeeti Godaw, ta wozanay argaacida gisho tana mintha.
PSA 6:3 Ta shempiya daro un7etasu; tana maaddanaw awude gakanaw gam7ay?
PSA 6:4 Abeeti Godaw, neeni simmada tana ashsha; ne keehatetha daruwan tana kessa eka.
PSA 6:5 Hayqida asaa giddofe nena hassayey baawa; duufon gididi nena galatey oonee?
PSA 6:6 Taani oolen daaburas; qamma kumethi yeekashe ta hiixa irxisas; ta arsa afuthan wooqisas.
PSA 6:7 Ta morketa gaason ta ayfey mulcatis; taani afuxida gisho demmonna ixis.
PSA 6:8 Goday ta yeehuwa si7ida gisho, hinteno, iita ootheysato taape haakite.
PSA 6:9 Goday ta waasuwa si7is; ta woosa ekis.
PSA 6:10 Ta morketi ubbay yeellatidosona; dagammidosona; qoponna guye simmidi kawuyidosona.
PSA 7:1 Biniyaame kocha Kuuzaba Dawiti Godaas yexida mazmure. Abeeti Godaw ta Xoossaw, ta nenan qosetayis; tana yedethiya ubbaafe tana ashsha.
PSA 7:2 Neeni tana ashshonaba gidiyako, enti tana gaammoda zaazana; ashshiya asi bayna mentherethanashin.
PSA 7:3 Abeeti Godaw ta Xoossaw, ta haysa melaba oothidaba gidiko, taani ase naaqidaba gidiko,
PSA 7:4 ta laggetas lo77o gisho iitaa zaaridaba gidiko, gaasoy bayna ta morkiya bonqidaba gidiko,
PSA 7:5 ta morkey tana yedethidi oyko; tana sa7an yeggidi yedho; tana baanan gondorsidi kawusho. Salah
PSA 7:6 Abeeti Godaw, ne hanquwan dendada, eexiya ta morketa hanquwa bolla eqa; ta Xoossaw, ta gisho barka; neeni xillo pirda koyaasa.
PSA 7:7 Asay ne yuushon shiiqo; neeni entafe bollara haara.
PSA 7:8 Goday kawotethata bolla pirdees; abeeti Godaw, ta xillotethaadanne ta suuretethaada pirda.
PSA 7:9 Qofanne wozanaa shaakada eriya xillo Xoossaw, iitata geella hanota neeni teqa; shin xilluwa saron naaga.
PSA 7:10 Wozana suureta ashshiya, Xoossay taw gondalle.
PSA 7:11 Xoossay xillo pirdeysa; I ubba wode iitata bolla hanqetiya Xoossaa.
PSA 7:12 Iitati banta iitatethaafe simmonna ixiko, Xoossay ba mashsha leefes; ba dongiya giigisees.
PSA 7:13 I ba wodhiya ola miisheta giigisees; laxiya ba donge toora pitees.
PSA 7:14 Iitati qoho qanthatidi, gene wodexidi, wordo yeloosona.
PSA 7:15 Hara asas olla bookida asi ba bookida ollan baw kundees.
PSA 7:16 Iya geney iya huuphen simmees. Iya geellatethay iya mees.
PSA 7:17 Iya xillotethaa gisho taani Godaa sabbana; Ubbaafe Dhoqa Godaa sunthaas taani galata mazmure yexana.
PSA 8:1 Zammaareta Halaqaas Xaafetida Dawita Mazmure Suusul7en yexetiya mazmure. Abeeti Godaw nu Xoossaw, ne sunthay biitta ubban waanidi bonchetide! Neeni ne bonchuwa salope bollara dhoqu dhoqu oothadasa.
PSA 8:2 Neeni ne morketa gisho ne morkiyanne nena mandeysa si77i oothanaw, guutha nayta doonan dhammiya nayta doonan galata kunthadasa.
PSA 8:3 Neeni ne biradhen medhida ne salota, iya bessan bessan neeni wothida ageenanne xoolintota taani be7iya wode,
PSA 8:4 neeni asaba qopanaw asi aybee? Woyko neeni iya xomoosanaw I aybee?
PSA 8:5 Iya ne neepe guuthara guuthadasa; bonchonne gitatetha kallacha iya huuphen wothadasa.
PSA 8:6 Ne medhida medhetetha ubbaa, haarana mela ne iya shuumadasa; ubbaa iya tohuwape garsara wothadasa.
PSA 8:7 Dorsatanne meheta, wora do7ata ubbaa,
PSA 8:8 salo kafota, abba molotanne haatha garsan qaaxiya ubbaa iyaw haarisadasa.
PSA 8:9 Abeeti Godaw nu Xoossaw, ne sunthay biitta ubban waanidi bonchetide!
PSA 9:1 Zammaareta Halaqaas Xaafetida Dawita Mazmure “Na7a hayqon” geetetiya cuudhethan yexetiya mazmure. Abeeti Godaw, ta nena ta kumetha wozanaape galatana; neeni oothida malaalsiya ooso ubbaa odana.
PSA 9:2 Taani nenan ufaytana hashshu gaana. Ubbaafe Dhoqa Xoossaw, taani ne sunthaas galata mazmure yexana.
PSA 9:3 Ta morketi guye simmiya wode, ne sinthafe dhubetidi dhayana.
PSA 9:4 Ne araatan uttada taw xillo pirdaasa; ta mootuwa ne xillotethan oykadasa.
PSA 9:5 Neeni kawotethata seeradasa; iitata dhaysadasa. Neeni enta sunthaa merinaw quchadasa.
PSA 9:6 Morketi merinaw dhayidosona; enta katamata kumethi laalladasa; enti kumethi dogetidosona.
PSA 9:7 Shin Goday merinaw kawotidi de7ees; I ba araata pirdas giigisis.
PSA 9:8 Ha sa7aa xillotethan pirdana; dereta suuretethan aysana.
PSA 9:9 Goday un7etidaysatas attiya bessi; meto wode gelidi attiya qota.
PSA 9:10 Nena ereysati nenan ammanetosona; Godaw, nena koyeyisata yegga aggaka.
PSA 9:11 Xiyoonen kawotida Godaa galatite; I oothida oosuwa asa ubbaas odite.
PSA 9:12 Halo keyiya Xoossay gukida xillo suuthaa dogenna; boretidaysata waasuwa qelli geenna.
PSA 9:13 Abeeti Godaw, taw qadheta; ta morketi ta bolla ehiya metuwa be7a; hayqope tana ashsha.
PSA 9:14 Xiyoone asaa giddon taani eqada, ne galataa odana; ne atotethan ufaytana.
PSA 9:15 Kawotethati banta bookida ollan bantaw kundidosona; enti wothida xihey enta tohuwa oykis.
PSA 9:16 Goday ba xillo pirdan eretis; iita asay banta iita oosuwan oyketidosona. Salah
PSA 9:17 Iitati duufo baana; Xoossaa dogiya kawotethati ubbay entada hanana.
PSA 9:18 Manqoy ubba wode dogetidi attenna; metootanchuwa ufaysay merinaw dhayenna.
PSA 9:19 Abeeti Godaw denda; asi xoonopo! Kawotethati ne sinthan pirdeto.
PSA 9:20 Abeeti Godaw enta neeni yashisa; kawotethati ase gideysa ero. Salaha.
PSA 10:1 Dawita Mazmure Abeeti Godaw, ayis haakada eqay? Meto wode ayis neeni geemmay?
PSA 10:2 Ba otoruwan iita asi manquwa yedethees; enti banta maquwan bantaw oyketidosona.
PSA 10:3 Iita asi ba iita amuwan ceeqetees; ba uuziyan Godaa cayeesinne kadhees.
PSA 10:4 Iitati banta otoruwan Xoossaa koyokona; banta qofan Xoossas besse immokona.
PSA 10:5 Iyaw ubba wode injetees; ne higgey iyaw gelenna; ba morketa I qelqisees.
PSA 10:6 Ba wozanan, “Tana aybika qaathenna tana metoy gakenna” yaagidi qopees.
PSA 10:7 Iya doonan baadethi, wordoynne mandethi kumis. Geneynne iitatethi iyan inxarsan de7ees.
PSA 10:8 Gutatan zugidi uttees; suure asata wodhanaw qosetidi naagees; wolqi bayna daaburanchota wochees.
PSA 10:9 Ba qosetida bessan geemmidi, manquwa oykanaw gaammoda zugees; iya oykidi ba xihiyan goochidi efees.
PSA 10:10 Wolqi bayna manquwa shocidi yeggees; iya tohuwa garsan I kundees.
PSA 10:11 I ba wozanan, “Xoossay dogis. Ba som7uwa genthidi be7enna” yaagees.
PSA 10:12 Abeeti Godaw, denda! Xoossaw, ne wolqaama kushiya dentha; manqota dogopa.
PSA 10:13 Iita asati Xoosse ayis kadhoona? Banta wozanan, “Xoossay nuna seerenna” ayis yaagona?
PSA 10:14 Shin Xoossaw, ne metuwanne un7aa be7aasa; neeni maaddanaw giiga uttadasa. Neeni yi7otas maade, qohetiday ne maaddana mela bana new aathidi immees.
PSA 10:15 Gene asata wolqaa mentha; iita asata seera; zaaridi enta giddon iitatethi bentofo.
PSA 10:16 Goday merinaw kawotidi de7ees; hara kawotethati iya biittafe dhayana.
PSA 10:17 Abeeti Godaw, neeni ashketa amuwa kunthaasa; enta minthetha; enta woosa si7a.
PSA 10:18 Yi7otanne un7etidaysata qohonna mela, sa7an de7iya oonika enta yashisonna mela, neeni entaw pirda.
PSA 11:1 Zammaareta Halaqaas Xaafetida Dawita Mazmure. Goday taani qosetada attiya bessi; yaatin ayis “Kafoda zumako baqata” yaagetii?
PSA 11:2 Nagaranchoti xillota dhuman caddanaw, banta dongiya waaxidi uttidosona.
PSA 11:3 Baasoy woddida wode, xillo asi ay oothanaw danda7ii?
PSA 11:4 Goday ba geeshsha bessan de7ees; salon ba araatan uttidi asaa xeellees; Godaa ayfey asaa pilgees; wochees.
PSA 11:5 Goday xilluwanne worduwa pilgees; iitatethi doseyisata ixees.
PSA 11:6 Goday iitata bolla eexiya tama bonqonne diinne bukisana; dhaysiya goten enta seerana.
PSA 11:7 Goday xillo gidida gisho, xillotethi dosees; suure asati iya som7uwa be7ana.
PSA 12:1 Zammaareta Halaqaas Xaafetida Dawita Mazmure. Xoossa asi biittafe wurida gisho, asa giddon ammanetethi bayna gisho, Godaw nuna maaddarkii?
PSA 12:2 Ubbay wordo haasayoosona; issoy issuwa cimmiya inxarsan nam7u wozanan odetoosona.
PSA 12:3 Abeeti Godaw, cimmiya doona gorda; otoron ceeqetiya inxarsaa teqa.
PSA 12:4 Enti, “Nu inxarsan nu xoonana; nu doonay nuusa; nuus godi oonee?” yaagosona.
PSA 12:5 “Manqota un7aa gishonne, metootanchota ooliya gisho, ha77i taani dendana; enti amotiya sarotethaa entaw immana” yaagees Goday.
PSA 12:6 Godaa qaalay geeshshi; taman laapun toho seerida birada geeshshi.
PSA 12:7 Abeeti Godaw neeni enta naaga; haysa mela asape merinaw enta ashsha.
PSA 12:8 Iiti asaa giddon bonchetiya wode, geella asati ceeqetishe simeretoosona.
PSA 13:1 Zammaareta Halaqaas Xaafetida Dawita Mazmure. Abeeti Godaw awude gakanaw tana dogay? Awude gakanaw neeni taape geemmay?
PSA 13:2 Ta shempiya awude gakanaw un7etanee? Ta wozanay azzanon awude gakanaw daanee? Ta morkey ta bolla awude gakanaw goobanee?
PSA 13:3 Godaw ta Xoossaw, ha77i tana xeellada taw zaara. Ta ayfiya poo7isada, tana hayqope ashsha.
PSA 13:4 Ta morketi, “Nuuni iya xoonida”, yaagidi ceeqetonnaada teqa; ta kundethan enti ufaytonnaada digga.
PSA 13:5 Shin taani ne maarotethan ammanetayis; neeni tana ashshiya gisho ufaytayis.
PSA 13:6 Ne taw keehida gisho, Godaw, ta new yexana.
PSA 14:1 Zammaareta Halaqaas Xaafetida Dawita Mazmure. Eeyati banta wozanan, “Xoossi baawa” yaagosona; enta de7oy iitis. Enti ixetidaba oothosona; lo77oba oothiya asi baawa.
PSA 14:2 Akeekeynne Xoosse koyey de7iyako be7anaw, Goday salope duge ase xeellees.
PSA 14:3 Shin ubbay zoko zaaridosona; ubbay go77onnaba gididosona. Lo77oba oothiya oonika baawa; hari attoshin issi asika baawa.
PSA 14:4 Asi kathi meysada, enti ta asaa bonqidi moosona; ha iita asati aybaka erokona; enti Xoossaa woossokona.
PSA 14:5 Shin Xoossay xillo asaara de7iya gisho, iita asati yashshan kokoroosona.
PSA 14:6 Hinte manqota qofaa laalleeta; shin Goday manqoti qosetidi attiya besse.
PSA 14:7 Isra7eeles atotethi Xiyoonepe yeerenne! Goday enta duussa zaariya wode, Yayqooba kochay ufaytana; Isra7eele asay hashshu gaana.
PSA 15:1 Dawita Mazmure. Abeeti Godaw, ne dunkaaniyan gam7anay oonee? Ne geeshsha zuma bolla daanay oonee?
PSA 15:2 Suure de7o de7ey, xillobaa oothey, ba wozanaape tuma odetey,
PSA 15:3 hara asa sunthi iissonnay, ba laggiya bolla iitabaa oothonnay, ba laagiya zigironnay,
PSA 15:4 iita asata kadhey, Godaa yayiya asata bonchey, qohetidika ba caaquwa poley,
PSA 15:5 ba miishiya yelon tal7onnay, xillo asi qohanaw wodhaafe ekonnay, haysata oothiya uray merinaw qaaxenna.
PSA 16:1 Dawita Woosa. Abeeti Xoossaw, ta neeko baqatiya gisho tana naaga.
PSA 16:2 Taani Xoossaa, “Neeni ta Godaa; neepe attishin, hari lo77obay taw baawa” yaagas.
PSA 16:3 Sa7an de7iya geeshshati ay mela bonchetidonaa! Ta entara issife ufaytayis.
PSA 16:4 Hara xoossata kaalleysati banta bolla meto darsoosona. Shin taani hara xoossatas suuthi yarshike; taani enta sunthaa xeegike.
PSA 16:5 Ta Godaw ta laatay nena; taw koshshiya ubbaa taw immaasa; ta de7uwa saamay nena.
PSA 16:6 Tana gakida saamay ay mela lo77o! Ee ta laatay tuma lo77o!
PSA 16:7 Tana zorida Godaa galatayis; qamma ta wozanay tana tamaarsees.
PSA 16:8 Taani ubba wode Godaa ta sinthan be7ayis; I ta ushachan de7iya gisho dagammike.
PSA 16:9 Hessa gisho, ta wozanay ufaytees; ta inxarsay galatees; ta asatethay hirgi bayna de7ees.
PSA 16:10 Ta shempiw si7oolen aggaka; ne Geeshshaa wooqana mela oothaka.
PSA 16:11 Tana de7o ogiya bessaasa; ne sinthan kumetha ufaysi de7ees; ne ushachan merinaa injey de7ees.
PSA 17:1 Dawita Woosa. Abeeti Godaw, ta xillo maggannuwa si7a; taani neeko waassiya waasuwa hayza. Cimon gidonashin tuman, woossiya woosa zaara.
PSA 17:2 Ne xillo pirday taw qonco; ne ayfey tumaa xeello.
PSA 17:3 Neeni qamma tana xomoosadasa; ta wozanaa paacadasa. Shin paacadaka ta bolla aykoka demmabaaka; ta inxarsayka baletibeenna.
PSA 17:4 Taani hara asatada iitabaa haasayike; taani ne qaala naagiya gisho, gene ogiya kaallabike.
PSA 17:5 Ta tohoy dhubetonna mela, ta tangoy ne ogiyape gaxa keybeenna.
PSA 17:6 Abeeti Xoossaw ta woosa ne si7iya gisho, taani nena woossayis. Ne haythaa taako zaarada, ta qaala si7a.
PSA 17:7 Banta morketape baqateyisata, ne ushacha kushen qottada ashsheyso, ne keehatetha malaalsiya ogen bessa.
PSA 17:8 Ne ayfe na77e mela tana naaga; ne qefiya garsan tana qosa.
PSA 17:9 Tana un7ethiya iitatape; teqidi oykida morketape ashsha.
PSA 17:10 Entaw qadhey baawa; otoron haasayoosona.
PSA 17:11 Tana gooddidi oykidosona; teqidosona; tana biittan holidi yegganaw xeelloosona.
PSA 17:12 Enti miyaba koyiya gaammo mela; qosetidi naagiya wodala gaammo mela.
PSA 17:13 Godaw, denda; ta morketara eqetada enta sa7an yegga; ne mashshan iitata kushepe tana ashsha.
PSA 17:14 Godaw, haysa mela asape tana qosa; enta qaaday sa7aba gidida asape ne kushen tana ashsha. Ne minjida seeran enta kalsa; he seeray enta naytas gididi, enta nayta naytas palaho.
PSA 17:15 Shin taani xillotethan ne som7uwa be7ana; ta barkiya wode ne malaa be7ada ufaytana.
PSA 18:1 Zammaareta Halaqaas Xaafetida Dawita Mazmure Goday iya morketapenne Saa7ola kushepe ashshida wode Dawiti Godaas yexida mazmure. Abeeti Godaw, ta wolqaw, taani nena dosayis.
PSA 18:2 Goday ta zaalla; ta miixa; tana ashsheysa; ta Xoossay ta iyako baqatiya ta zaalla. I taw gondalle; tana ashshiya wolqa; taani qosetada attiya besse.
PSA 18:3 Galata bessiya Godaa ta xeegayis; ta morketape taani attana.
PSA 18:4 Hayqo wodoroy tana cuullis; dhayo di7oy tana daganthis.
PSA 18:5 Duufo wodoroy ta bolla xaaxetis; hayqo xihey tana oykis.
PSA 18:6 Ta un7an Godaa xeegas; tana maaddana mela ta Xoossaako waassas. Ba keethan gididi ta girsaa si7is; ta waasoy iya haythan wodhis.
PSA 18:7 Xoossay hanqetida gisho, biittay qaaxis; dereta xaphoy kokoris.
PSA 18:8 Iya siidhiyape hanqo cuyay keyis; iya doonape miya tama lacoy keyis; I xuuggiya bonqo cuttis.
PSA 18:9 Saluwa phalqidi wodhis; iya tohuwape garsan dhuma shaari de7ees.
PSA 18:10 Kiruubeta bolla uttidi paallis; carko qefen pude dendis.
PSA 18:11 Bana dhuman kammis; iya dunkaaney iran kumida shaara.
PSA 18:12 Iya sinthan de7iya gita poo7uwape shachinne tama lacoy keyidi dhuma shaara kanthidi bis.
PSA 18:13 Goday dadada salope guummis; Ubbaafe Dhoqa Xoossay ba girsaa sissis; wol7anthaninne tama lacon qoncis.
PSA 18:14 Ba dongiya dukidi ba morketa laallis; wol7antha poo7o kiittidi enta yedethis.
PSA 18:15 Abeeti Godaw, neeni seerida wode, shenetada peenuqida wode, Abbay zin7ida biittay bentis; sa7a baasoy qoncis.
PSA 18:16 Goday bollafe kushiya yeddidi tana oykis; ciimmo haathaafe tana dafidi kessis.
PSA 18:17 Ta bolla daro wolqaamida ta morketapenne tana ixeysatape ashshis.
PSA 18:18 Ta metootida wode enti ta bolla dendidosona; shin Goday tana katisis.
PSA 18:19 I tana dalga bessi kessis; tanan ufaytida gisho tana ashshis.
PSA 18:20 Ta xillotethaada Goday taw qanxis; ta kushe geeshshatethaada I taw zaaris.
PSA 18:21 Taani Godaa ogiya kaallas; ta Xoossaa aggada kare keyabike.
PSA 18:22 Taani iya higgiya ubbaa naagas; iya kiitaa polo aggabike.
PSA 18:23 Taani iya sinthan suure de7as; tana nagarape naagas.
PSA 18:24 Goday ta xillotethaadanne ta kushe geeshshatethaada taw zaaris.
PSA 18:25 Ammaneteysatas ne ammanetaasa; suuretas ne suure.
PSA 18:26 Geeshshatas ne geeshshi; shin geellatas ne geella.
PSA 18:27 Ashketa ashshaasa; shin otoranchota kawushaasa.
PSA 18:28 Abeeti Godaw, ne taw xompaasa; ta Xoossay ta dhumaa poo7isaasa.
PSA 18:29 Ne maaduwan ta morke toora bolla dendayis; ta Xoossan miixaa xeerara gupada aadhayis.
PSA 18:30 Xoossaa ogey polo; Godaa qaalay geeshshi; iyako baqatiya ubbaas I gondalle.
PSA 18:31 Godaape attishin, hara xoossi oonee? nu Xoossaafe attishin, hara zaalli oonee?
PSA 18:32 Taw wolqa immeynne ta ogiya saro oothey Xoossaa.
PSA 18:33 I ta tohuwa gen7e tohoda minthees; dhoqa bessan hirgi bayna essees.
PSA 18:34 Ta kushiya ola tamaarsees; naase birata dongiya dukana mela ta qessiya minthees.
PSA 18:35 Tana ashshiya ne gondalliya taw immadasa; ne ushacha kushey tana zempisees; ne lo77o oykethay tana gitayees.
PSA 18:36 Ta hemetiya bessaa dalgisadasa; ta tohuwa harchuchi ekibeenna.
PSA 18:37 Ta morketa yedethada oykas; enta dhaysona guye simmike.
PSA 18:38 Enti zaari dendonnaada shocas; enti ta tohuwa garsan kundidosona.
PSA 18:39 Olas tana dancisadasa; taara gaaddeteyisata taw gulbatisadasa.
PSA 18:40 Ta morketa ta sinthafe guye zaaradasa; tana ixeyisata dhaysas.
PSA 18:41 Maade koyidi waassidosona, shin oonika enta ashshibeenna. Godaa enti xeegidosona, shin I entaw koybeenna.
PSA 18:42 Carkoy pitidi efiya baanada enta liiqisas; oge urqada enta yedhas.
PSA 18:43 Gene asape tana ashshadasa; tana kawotethata bolla shuumadasa; ta eronna asay taw haaretidosona.
PSA 18:44 Enti tabaa si7idi taw kiitetoosona; allaga derey ta sinthan ziggees.
PSA 18:45 Enti kaha dhayidosona; banta miixape kokorishe yoosona.
PSA 18:46 Goday de7ees! Xoossay, ta zaallay galatetto! Tana ashshiya Xoossay dhoqu dhoqu go!
PSA 18:47 I taw halo kessiya Xoossaa; kawotethata ta garsan haariseysa.
PSA 18:48 Ta morketape tana ashsheysa; tana ixeyisata bolla dhoqu dhoqu oothaasa; iitatape tana ashshaasa.
PSA 18:49 Hessa gisho, Godaw kawotethata giddon taani nena galatana; ne sunthaa sabbana.
PSA 18:50 I ba kawas xoono immees; ba tiyidaysas, Dawitasinne iya kochaas, ba keehatetha bessees.
PSA 19:1 Zammaareta Halaqaas Xaafetida Dawita Mazmure. Saloti Xoossaa bonchuwa haasayoosona; salo gufanthoy iya kushe oosuwa awaajees.
PSA 19:2 Issi gallasi hara gallassas hessa odees; issi qammi hara qammas eratethi qoncisees.
PSA 19:3 Odi woyko qaali baawa; enta girsay si7etenna.
PSA 19:4 Gidoshin enta oday sa7a ubban laaletis; enta qaalay biitta gaxaa gakis. Awi de7iya bessi Xoossay salon giigisis.
PSA 19:5 Ba soope keyiya mishirada, gaadde woxanaw ufaytidi giigida asada, away wonta wonta keyees.
PSA 19:6 Issi bagga salo gaxape keyidi, hara bagga salo gaxa gakanaw bees; iya suulape geemmiyabay baawa.
PSA 19:7 Godaa higgey suure; shempo zaarees. Godaa kiitay ammanetidaysa; akeeki pacidaysata cinca oothees.
PSA 19:8 Godaa wogay like; wozana ufaysees. Godaa kiitay geeshshi; ayfe poo7isees.
PSA 19:9 Godaas yashshi geeshshi; merinaw eqidi de7ees. Godaa pirday kumethi tumanne xillo.
PSA 19:10 Worqafe aadhidi koyetees; walahi bayna worqafe aadhidi lo77o. Eessafe aadhidi lo77o ililo eessafe aadhidi mal7o.
PSA 19:11 Ne aylley naagetana mela zorees; ne higgiya naagoy daro go77ees.
PSA 19:12 Ba qohuwa demmey oonee? Abeeti Godaw, geemmida nagarape tana geeshsha.
PSA 19:13 Tana ne aylliya, erishe oothiya nagarape naaga. Nagari tana haaronna mela maadda; he wode taani suure gidana, gita balape geeyana.
PSA 19:14 Abeeti Godaw, ta zaallaw, tana wozeyso; ta doonape keyiya qaalaynne ta wozanaa qofay nena ufaysiyabaa gido.
PSA 20:1 Zammaareta Halaqaas Xaafetida Dawita Mazmure. Meto wode Goday nena si7o; Yayqooba Xoossaa sunthay nena naago.
PSA 20:2 Ba keethaafe new maado kiitto; Xiyoonepe nena katiso.
PSA 20:3 I ne yarsho ubbaa hassayo; ne xuussa yarshuwan ufayto. Salaha
PSA 20:4 Ne wozanaa amuwa new immo; ne qofaa ubbaa polo.
PSA 20:5 Ne xoonuwan nuna ufayso; nu Xoossa sunthan nu bandira dhoqu oothana; ne woosa ubbaa Goday new zaaro.
PSA 20:6 Goday ba doorida kawas, xoono immidaysa taani buroo erayis. I ba geeshsha saluwan si7ana; ba ushacha kushen gita xoono iyaw immana.
PSA 20:7 Issoti issoti banta ola para gaariyan, harati banta paran ceeqetoosona; shin nuuni Godaa nu Xoossaa wolqan ceeqetoos.
PSA 20:8 Enti dhubetidi kundana; shin nuuni dendidi minni eqana.
PSA 20:9 Abeeti Godaw, kawas xoono imma; nuuni nena xeegiya wode si7a.
PSA 21:1 Zammaareta Halaqaas Xaafetida Dawita Mazmure. Godaw, kawoy ne wolqan ufaytees; ne immida xoonuwan hashshu gees.
PSA 21:2 Iya Wozanaa amuwa iyaw immadasa; iya mettersha woosa iya diggabaaka. Salaha
PSA 21:3 Lo77o anjora iya mokaasa; walahi bayna worqa kallacha iya huuphen wothaasa.
PSA 21:4 I nena de7o oychis; daro laythinne adussa de7o immadasa.
PSA 21:5 Neeni iyaw xoono immida gisho, iya bonchoy daris; gitatethinne teema iyaw immadasa.
PSA 21:6 Merinaa anjuwa iyaw immadasa; ne bentuwan iya ufaysaasa.
PSA 21:7 Kawoy Godan ammanetees; Ubbaafe dhoqa Xoossaa maarotay, iyara de7iya gisho I dagammenna.
PSA 21:8 Ne kushey ne morketa, ne ushacha kushey nena ixeyisata demmana.
PSA 21:9 Ne qonciya wode cooce tamada enta xuuggana; Goday ba hanqo suulon enta mittana; iya tamay enta maana.
PSA 21:10 Neeni enta nayta biittafe, enta kochaa asaa giddofe dhaysana.
PSA 21:11 Ne morketi ne bolla tobboosona; iitabaa maqetoosona, shin polokona.
PSA 21:12 Neeni enta ne dongiyan dukana; enta guye zaarada gooddana.
PSA 21:13 Godaw, ne minotethan dhoqu dhoqu ga; ne wolqaa gisho galata mazmure yexoos.
PSA 22:1 Zammaareta Halaqaas Xaafetida Dawita Mazmure “Guura gen7e” geetetiya diitha cuudhethan yexetida mazmure Ta Xoossaw, ta Xoossaw, tana ayis aggadii? Tana maadda gada ta nena woossiya wode, ayis taape haakay?
PSA 22:2 Ta Xoossaw, gallas kumethi ta neeko waassas; shin ne tana allaka. Qamma ubban neeko waassayis, shin wopatethi demmike.
PSA 22:3 Gidoshin neeni geeshshi; Isra7eele galatay ne araata yuushon de7ees.
PSA 22:4 Nu aawati nenan ammanetidosona; nenan ammanetin, ne enta ashshadasa.
PSA 22:5 Neeko waassidi attidosona; nenan ammanetidi yeellatibookona.
PSA 22:6 Shin ta ase gidike; guxune; ta asan kadhetidaysanne boretidaysa.
PSA 22:7 Tana be7iya ubbay qelqisoosona; banta huuphiya qaathishe dereeqosona.
PSA 22:8 “I Godan ammanetis; ane iya asho; Goday iya dosiko, ane iya asho” yaagosona.
PSA 22:9 Gidoshin taani ta aaye ulope suure yeletanaada oothiday nena. Ta aaye dhantha dhammiya wodeka tana naagiday nena.
PSA 22:10 Ta yeletoosope doomada nenan diccas; ta aaye ulope doomin ne ta Xoossaa.
PSA 22:11 Metoy taako matiya gishonne tana maaddiya asi bayna gisho, ha77i neeni taape haakofa.
PSA 22:12 Daro morketi qayciya boorada tana teqidosona; qayciya Baasane kormatada tana oykidosona.
PSA 22:13 Mentherethidi gudiya gaammoda banta doona ta bolla dooyosona.
PSA 22:14 Taani haathada goggas; ta meqethay ba kesuwape keyis; ta wozanay oysada ta gaathan til7is.
PSA 22:15 Ta qoodhey kun7ada melis; ta inxarsay kottonuwara oyketis; ne tana hayqida asada baanan yeggadasa.
PSA 22:16 Kanati tana teqidosona; iita asati ta yuushuwa oykidosona; ta kushetanne ta tohota caddoosona.
PSA 22:17 Ta meqethati taybetoosona; ta morketi tana dereeqosona.
PSA 22:18 Ta ma7uwa shaakidi ekoosona; ta adussa ma7uwa bolla saama yeggoosona.
PSA 22:19 Ta Godaw, ne ta matay taape haakofa; Ta wolqaw, tana maaddanaw ellesada haaya.
PSA 22:20 Tana mashshafe kessa eka; ta al7o de7uwa kanatape ashsha.
PSA 22:21 Gaammota doonape tana ashsha; qayciya bazzo boorata kacepe tana naaga.
PSA 22:22 Taani ne sunthaa ta ishatas odana; enta shiiquwan nena galatana.
PSA 22:23 Hinteno, Godaa yayyesato, iya galatite; hinteno, Yayqooba zareto, iya bonchite. Hinteno, Isra7eele kochato, yashshan iya dhoqu dhoqu oothite.
PSA 22:24 I un7etidaysa kadhenna; enta qohuwa be7ishe qelli geenna. Ba som7uwa entafe genthenna; enti iyako waassiya wode, entaw zoko zaaribeenna.
PSA 22:25 Ta ne lo77o oosuwa gisho gita shiiqon galatana; ta qangetha new yayiya asaa sinthan gathana.
PSA 22:26 Manqoti midi kallana; Godaa koyeysati iya galatana; enti merinaw ufaysan daana.
PSA 22:27 Sa7a gaxa gakanaw de7iya asa ubbay, akeekan Godaako simmana; asa zare ubbay iya goyinnana.
PSA 22:28 Maati ubbay Godaasa; I kawotethata haarees.
PSA 22:29 Sa7an de7iya dure ubbay iya goyinnana; bantanan hayqope ashshanaw danda7onaysatinne biitta simmiya ubbay iyaw gulbatana.
PSA 22:30 Yaana yeletay iyaw kiitetana; sintha yeletas Godaaba odana.
PSA 22:31 Buroo yeletiboona asaska, iya geeshshatetha odana.
PSA 23:1 Dawita Mazmure Goday ta henthanchuwa; taw aybika pacenna.
PSA 23:2 Tana aaca qooron shempisees; wopu gida haathaako laaggees.
PSA 23:3 Ta de7uwa ooraxisees; ba sunthaa gisho gidi, tana xillotetha ogiya kaalethees.
PSA 23:4 Ne ta Goday taara de7iya gisho, ta sakana dhumaa giddora biikoka, iitaba yayyike. ne xam7aynne ne guufey tana minthethoosona.
PSA 23:5 Ta morketa sinthan taw gibira giigisaasa; tana mokashe, ta huuphen zayte tiyaasa; ta wancay kumidi goggana gakanaw kunthaasa.
PSA 23:6 Ne keehatethaynne ne maarotethay ta de7o laytha ubban tana kaallana; taani Godaa keethan merinaw daana.
PSA 24:1 Dawita Mazmure Sa7aynne sa7an de7iya ubbay Godaaba; alameynne iyan de7iya asa ubbay iyassa.
PSA 24:2 I sa7aa gita abba bolla hiixis; ciimmo haatha bolla minthidi essis.
PSA 24:3 Godaa zuma bolla keyanaw danda7ey oonee? Iya geeshsha bessan eqanay oonee?
PSA 24:4 Iya kusheynne iya wozanay geeshshi gididaysa; eeqa goyinnonnaysa, wordo caaqonnaysa.
PSA 24:5 I Godaape anjo ekana; ashshiya Xoossaafe xillo pirdaa demmana.
PSA 24:6 Xoossaako xeelliya asinne Yayqooba Xoossaa som7uwa koyiya asi hessa mela ase. Salaha
PSA 24:7 Boncho kawoy gelana mela, hinteno pengeto dooyetite; beni pengeti iya ufaysan mokite.
PSA 24:8 He boncho kawoy oonee? Minonne wolqaama gidida Godaa; olan wolqaama gidida Godaa.
PSA 24:9 Boncho kawoy gelana mela, hinteno pengeto dooyetite; beni pengeti iya ufaysan mokite.
PSA 24:10 Ha boncho kawoy oonee? Ha boncho kawoy salo medhetethata Godaa! Salaha.
PSA 25:1 Dawita Mazmure Abeeti Godaw, shempofe ta nena woossayis.
PSA 25:2 Abeeti ta Xoossaw, ta nenan ammanetayis; tana yeellayopa; ta morketas tana aathada immofa.
PSA 25:3 Nenan ufaysi ootheysati yeellatokona; shin gaasoy bayna geneysati yeellatana.
PSA 25:4 Abeeti Godaw, tana ne ogiya bessa; ne geedo tana kaaletha.
PSA 25:5 Tana ashshiya Xoossay nena gidiya gisho, ne tumatethaa tana kaalethanne tamaarsa; gallas kumetha ta nenan ufaysi oothayis.
PSA 25:6 Abeeti Godaw, benipe de7iya ne qadhiyanne ne keehatetha hassaya.
PSA 25:7 Ta na7atetha nagaraanne iitaba hassayopa; abeeti Godaw, ne keehatethaanne lo77otetha hassaya.
PSA 25:8 Goday keehanne suure gidiya gisho; nagaranchota ba ogiya tamaarsees.
PSA 25:9 Ashketa suuretethan kaalethees; entana ba ogiya tamaarsees.
PSA 25:10 Godaa caaquwanne iya kiitaa naageysatas iya oge ubbay tumanne keeha.
PSA 25:11 Abeeti Godaw, ta nagaray daro; gidoshin ne sunthaa gisho taw atto ga.
PSA 25:12 Godaa yayiya asi oonee? I kaallanaw bessiya ogiya Goday iya tamaarsana.
PSA 25:13 I ubba wode duretethan daana; iya nayti biitta laattana.
PSA 25:14 Goday yayyeysatas ba xuuraa genthenna; I entaw ba caaquwa erisees.
PSA 25:15 Goday ta tohuwa xihepe naagiya gisho, ta ayfey maado ekanaw ubba wode iyako xeellees.
PSA 25:16 Godaw, taani bizzanne metootida asi gidiya gisho, taako simma; ne maarotethaa tana bessa.
PSA 25:17 Taw hirgi daris; ta metuwape tana ne ashsha.
PSA 25:18 Ta metuwanne ta waayiya be7a; ta nagara ubbaa atto ga.
PSA 25:19 Ta morketi ay mela daridaako be7a; enti tana ay mela ixiyako xeella.
PSA 25:20 Ne tana naaga; ne tana ashsha; ta neeko baqatiya gisho tana yeellayopa.
PSA 25:21 Ta nenan ufaysi oothida gisho, suuretethinne tumatethi tana naago.
PSA 25:22 Abeeti Xoossaw, Isra7eele asaa enta meto ubbaafe ne woza.
PSA 26:1 Dawita Mazmure Abeeti Godaw, ta suuretethan hemetida gishonne sidhey bayna nenan ammanetida gisho, taw pirda.
PSA 26:2 Abeeti Godaw, tana paaca; tana pilgada be7a; ta wozanaa xomoosa.
PSA 26:3 Ne siiqoy ta sinthan de7iya gisho, ta ubba wode ne tuma ogiyan hemetayis.
PSA 26:4 Cimmiya asaara ta uttike; cubbota maabaran gelike.
PSA 26:5 Iitata duulata ta ixayis; makallachotara issife uttike.
PSA 26:6 Abeeti Godaw, ta xillotethaa bessanaw ta kushiya meeccayis; ne yarsho bessa yuuyayis.
PSA 26:7 Galata mazmure yexashe ne malaalsiya ooso ubba odana.
PSA 26:8 Abeeti Godaw, ne keethaanne, ne bonchoy aqiya bessaa ta dosayis.
PSA 26:9 Tana nagaranchotara issife pittofa; asa suuthu gusseysatara ta shempuwa dhaysofa.
PSA 26:10 Enta kushen iita halchoy de7ees; enta ushacha kushen wodhaafey kumis.
PSA 26:11 Shin ta suuretethan hemetana; tana woza; taw qadheta.
PSA 26:12 Ta tohoy demba bessan eqis; gita shiiquwan Godaa galatana.
PSA 27:1 Dawita Mazmure Goday taw poo7onne tana ashsheysa; yaatin, ta oona yayiyanee? Goday, ta de7oy naagetiya miixaa; yaatin, ta ayis dagammanee?
PSA 27:2 Iita asati, tana ixeysatinne ta morketi tana wodhanaw hordofiya wode, bantaw dhubetidi kundana.
PSA 27:3 Morke toori tana teqiko ta wozanay yayyenna. Oli ta bolla dendiyakoka, taani Godan ammanetayis.
PSA 27:4 Ta Godaa issiba oychas; hessika, ta de7o laytha ubban Godaa keethan de7anaasa; Godaa lo77otetha be7anaasanne iya keethan iya koyanaasa.
PSA 27:5 Meto gallas tana ba de7iya bessan genthana; ba dunkaaniyan tana qosana; tana dhoqa zaalla bolla essana.
PSA 27:6 He wode taani tana teqida ta morketape aadhada, dhoqu dhoqu gaana. Taani iya dunkaaniyan ufaytashe yarsho yarshana; Godaa mazmuren galatana.
PSA 27:7 Abeeti Godaw, ta nena xeegiya wode ne taw koya; taw qadheta; tana si7a.
PSA 27:8 Neeni, “Ta som7uwa koyite” gadasa, ta wozanay Abeeti Godaw, “Ta ne som7uwa koyana” yaagis.
PSA 27:9 Ne som7uwa taape genthofa; tana maaddeyso; ne shenetada tana ne aylliya guye zaaropa. Abeeti tana ashshiya Xoossaw, tana yeggofa; aggofa.
PSA 27:10 Ta aawaynne ta aayiya tana aggikoka Goday tana shiishidi ekana.
PSA 27:11 Abeeti Godaw, tana ne ogiya tamaarsa; ta morketa gisho tana suure oge kaaletha.
PSA 27:12 Tana mandiya wordo markati ta bolla wolqan dendida gisho, tana ta morketa amuwas aathada immofa.
PSA 27:13 Taani de7on de7ashe, Godaa keehatetha be7anaysa ammanayis.
PSA 27:14 Godan ufaysi ootha; minna, yayyofa; Godan ufaysi ootha.
PSA 28:1 Dawita Mazmure Abeeti Godaw, ta zaallaw, ta nena xeegayis; ne taw si77i goopa. Ne si77i giiko, ta duufo gelida asi gidayis.
PSA 28:2 Maade koyada ta waassiya wode; ubbaafe geeshsha dunkaaniyako, ta kushiya micciya wode ta woosa si7a.
PSA 28:3 Iita oothiya iita asatara tana gathada oykofa; enti banta wozanan gene qopishe, banta doonan sarotethi haasayoosona.
PSA 28:4 Enta oosuwada enta seera; enta iitatethaada entaw qanxa. Enta kushe oosuwada enta pirda; entaw bessiya iitaa entaw zaara.
PSA 28:5 Enti Godaa oosuwanne iya kushe medhuwas, besse immonna gisho Goday enta laallana; zaaridi enta keexenna.
PSA 28:6 Ta woosa si7ida gisho Goday galatetto.
PSA 28:7 Goday taw wolqanne gondalle; ta wozanay iyan ammanetees; ta iyan maadetas. Ta wozanay iyan ufaytees; ta iya mazmuren sabbana.
PSA 28:8 Goday ba asaas wolqa; ba dooridi kawa ashshiya miixa.
PSA 28:9 Godaw, ne asaa ashsha; nebaa gididaysata anja. Enta heemmey nena gida; enta merinaw tooka.
PSA 29:1 Dawita Mazmure Hinteno salo medhetethato, bonchoynne wolqay Godaasa giite.
PSA 29:2 Godaa boncho sunthaa galatite; iya geeshshatetha teema gisho Godaa goyinnite.
PSA 29:3 Godaa guunthay haathata bolla si7etees; boncho Xoossay dadada dechees; Goday gita haathata bolla guummees.
PSA 29:4 Godaa kooshinchay wolqaama; Godaa girsay teemara de7ees.
PSA 29:5 Godaa girsay zigaa menthees; Libaanosen de7iya zigaa menthees.
PSA 29:6 Libaanose dereta galo marada buraaqisees; Siriyoona deriya menthada gufisees.
PSA 29:7 Godaa girsay wol7amees.
PSA 29:8 Godaa girsay mela biittaa qaathees; Goday Qaadesa mela biittaa kokorsees.
PSA 29:9 Godaa girsay wolaa qaathees; mitha haythaa qoqofees. Iya keethan de7iya ubbay, “Bonchoy Godaas gido” yaagees.
PSA 29:10 Goday di7o haatha bolla ba araata wothidi uttis; Goday ba araatan uttidi merinaw kawotis.
PSA 29:11 Goday ba asaas wolqa immees. Goday ba asaa sarotethan anjees.
PSA 30:1 Keethe Anjisos Dawiti Yexida Mazmure. Abeeti Godaw, ne tana ollafe kessida gishonne ta morketi ufaytonna mela oothida gisho, ta nena dhoqu dhoqu oothana.
PSA 30:2 Abeeti Godaw, ta Xoossaw tana maaddana mela, ta nena xeegin ne tana pathadasa.
PSA 30:3 Abeeti Godaw, duufo gelonnaada tana naagadasa; ollan wodhonnaada tana paxa ashshadasa.
PSA 30:4 Hinteno Xoossaa asaw, Godaas yexite; iya geeshsha sunthaa sabbite.
PSA 30:5 Iya hanqoy guutha wodesa, shin iya keehatethay de7o laytha ubbaasa. Qamma yeekishe aqiko, wonta zawi bayna ufaysi gidees.
PSA 30:6 Ta naagetada de7eysa erida wode “Hiza ta qaaxike” yaagas.
PSA 30:7 Abeeti Godaw, ne taw keehida wode, zumada tana minthada essadasa. Shin ne som7uwa hara soo zaarida wode, ta dagammas.
PSA 30:8 Abeeti Godaw, ta nena xeegas; nena maarota woossas;
PSA 30:9 “Ta duufo geliko nena ay go77ii? Biitta giddo gelida asi waatidi nena galatanaw danda7ii? Ne ammanetetha waatidi markatanee?
PSA 30:10 Abeeti Godaw, ne tana si7a; taw qadheta. Abeeti Godaw, ne taw maado gida” yaagas.
PSA 30:11 Ta yeehuwa yethan laammadasa; kayo ma7uwa taape qaarada, tana ufaysi mayzadasa.
PSA 30:12 Hessa gisho, ta nena sabbana; si77i giike. Abeeti Godaw, ta Xoossaw, ta nena merinaw galatana.
PSA 31:1 Zammaareta Halaqaas Xaafetida Dawita Mazmure. Abeeti Godaw, ta neeko baqatayis; awudeka tana yeellayopa; ne xillotethan tana ashsha.
PSA 31:2 Ne haythaa taako zaara; ellesada tana ashsha. Neeni, taw geemmiya zaalla; tana ashshiya mino miixa gida.
PSA 31:3 Ee, ne taw zaallanne miixa; ne sunthaa gisho tana kaaletha; ogiya bessa.
PSA 31:4 Ne taw geemmiya besse gidiya gisho, enti qotidi wothida xihepe tana naaga.
PSA 31:5 Abeeti Godaw, tuma Xoossaw, ta shempuwa ne kushen wothayis; ne tana woza.
PSA 31:6 Pathonna eeqata goyinneyisata ta ixayis; gidoshin taani Godan ammanetayis.
PSA 31:7 Ta metuwanne ta un7a ne be7ida gisho taani merinaw ne siiquwan ufaytana.
PSA 31:8 Ne tana morke kushen aathada immabaaka; ta tohota dalga bessan essadasa.
PSA 31:9 Abeeti Godaw, taani meton gelida gisho taw qadheta; Ta daro azzanida gisho ta ayfey mulcatis; ta ashoynne ta shempoy daaburis.
PSA 31:10 Ta de7oy azzanon, ta laythay oolen wuris; waaye darotethan ta wolqay wuris; ta meqethati argaacidosona.
PSA 31:11 Ta morketa ubbaas qidhes attas; ta shoorotas yeella gidas. Ta laggetas daganthiyaba gidas; tana be7eysati taape haakidosona.
PSA 31:12 Ta hayqida asada dogetas; meqa miisheda wora yegetas.
PSA 31:13 Taani darota kalkashaa si7as; ubba bessara dagami de7ees. Enti ta bolla tobboosona; tana wodhanaw maqetoosona.
PSA 31:14 Shin Godaw, ta nenan ammanetana; neeni ta Xoossaa.
PSA 31:15 Ta de7o laythay ne kushiyana; tana yedethiya ta morketa kushepe tana ashsha.
PSA 31:16 Ne aylliya bolla ne som7uwa poo7isa; ne maarotethan tana ashsha.
PSA 31:17 Abeeti Godaw, ta nena xeegiya gisho, tana yeellayopa. Shin iitati yeellato; duufon gelidi si77i go.
PSA 31:18 Otoroninne boren xillota bolla minnidi haasaya gisho, enta wordo inxarsaa si77i ootha.
PSA 31:19 Nena yayyeysatas ne minjida, neeko baqateysatas ne giigisida, keehatethay ay mela daro!
PSA 31:20 Neeni enta ne sinthan, geema bessan gentha wothadasa; asaa iita maquwafe ashshaasa; iita inxarsafe ne dunkaaniyan qosadasa.
PSA 31:21 Morkey teqida katamaa giddon, malaalsiya ba maarotethaa tana bessida, Goday galatetto.
PSA 31:22 Ta dagammada, “Ne sinthafe haakas” gas; shin ta maado koyada neeko waassida wode, ta waasuwa ne si7adasa.
PSA 31:23 Hinteno, Xoossa asaw, Godaa dosite; Goday ammaneteyisata naagees; shin otoranchotas enta gatiya qanxees.
PSA 31:24 Hinteno, Godan ufaysi ootheysato, minnite; gencite.
PSA 32:1 Dawita Timirte Akeekan xaafetida ginxo Iya nagaray atto geetetidaynne iya nagaray kametida uray anjetidaysa.
PSA 32:2 Goday iya iitatethaa taybonna asi, iya qofan cimoy bayna asi anjetidaysa.
PSA 32:3 Taani ta nagaraa paaxonna aggada, kumetha gallas oolidaysi, ta asatethaa daabursis.
PSA 32:4 Gallasinne qamma ne kushey tana deexis; haathi dhayin bone awan melidibada, ta wolqay wuris. Salaha
PSA 32:5 Taani ta nagaraa new paaxas; ta naaquwa neepe genthabike. “Ta nagaraa Godaas paaxana” yaagas; tana deexida nagaraa atto gadasa. Salaha
PSA 32:6 Hessa gisho, xillo asi oonika, ne bentiya wode nena woosso; iita di7oy yaa wode he uraa gakenna.
PSA 32:7 Ne taw qosetiya bessi; ne tana metope naagasa. Atotetha yethi yexiya asaa ta yuushuwan wothadasa. Salaha
PSA 32:8 Xoossay, “Ta nena tamaarsana; ne baana ogiya bessaana; ta nena zorananne naagana” yaagees.
PSA 32:9 Bixaalaninne puulon oyketonna; kiitetonna wozani bayna baquloda woyko parada hanopite.
PSA 32:10 Iitatas waayey darana; shin Godan ammaneteyisata siiqoy kammana.
PSA 32:11 Hinteno, xilloto, Godan ufaytitenne hashshu giite; hinteno, wozana suureto, ililite.
PSA 33:1 Hinteno, xilloto Godaas ufaysan ililite; suure asati iya galatanaw bessees.
PSA 33:2 Maasinqon Godaa galatite; tammu shayan waaxetida diithan yexite.
PSA 33:3 Ooratha yethi iyaw yexite; diithi loythidi diixishe ililite.
PSA 33:4 Godaa qaalay tuma; iya ooso ubbay ammaneteysa.
PSA 33:5 Goday xillotethinne tuma pirda dosees; iya maarotay sa7aa kumis.
PSA 33:6 Godaa qaalan saloti medhetidosona; iya doonape keyiya shempuwan salon de7iya medhetethati yeletidosona.
PSA 33:7 Abba haatha issi bessan eelisis; ciimmo haatha minja keethan wothis.
PSA 33:8 Sa7a ubbay Godaa yayyo; asa ubbay Godaa boncho.
PSA 33:9 Iya odan ubbay hanis; I kiittin minnidi eqis.
PSA 33:10 Goday kawotethata halchuwa hada oothees; enta qofaa laallees.
PSA 33:11 Godaa halchoy merinaw eqidi de7ees; iya wozanaa qofay yeletetha ubbaasa.
PSA 33:12 Xoossay entaw Godaa gidida kawotethay, I babaa oothidi doorida asay anjetidaysata.
PSA 33:13 Goday salon uttidi xeellees; asa koche ubbaa be7ees.
PSA 33:14 Goday ba araatan uttidi, sa7an de7iya ubbaa be7ees.
PSA 33:15 Enta wozanaa medhiday iya; enti oothiyaba ubbaa I erees.
PSA 33:16 Kawoy ba wotaadare darotethan attenna; olanchoy ba wolqaa minotethan kessi ekenna.
PSA 33:17 Paran xoonana gidi naagoy hada; I ba minotethan ashshanaw danda7enna.
PSA 33:18 Godaa ayfeti iyaw yayyanne iya maarotan ufaysi oothiya asaa be7oosona.
PSA 33:19 Hessika enta hayqope ashshanaasanne kosha wode enta naaganaassa.
PSA 33:20 Nuuni Godaa ufaysan naagoos; nuna maaddeynne nu gondalley iya.
PSA 33:21 Iya geeshsha sunthan nuuni ammanetiya gisho, nu wozanay iyan ufaytees.
PSA 33:22 Godaw, nuuni nenan ufaysi oothidaysada, ne maarotay nu bolla gido.
PSA 34:1 Dawiti gooshshu daanidi shiiqida gisho, Abimeleke sinthafe goodetidi keyda wode yexida mazmure. Taani ubba wode Godaa galatana; iya galatay ta doonape pacenna.
PSA 34:2 Taani Godan ceeqetayis; aadati hessa si7idi ufayto.
PSA 34:3 Taara Godaa bonchite; iya sunthaa issife dhoqu dhoqu oothoos.
PSA 34:4 Taani Godaa koyin, I taw zaaris; ta yayyiyaba ubbaafe tana ashshis.
PSA 34:5 Iyako xeelliya ubbay poo7osona; enta som7oy yeellatenna.
PSA 34:6 Ha manqoy waassis; Goday iya waasuwa si7is; iya meto ubbaafe iya ashshis.
PSA 34:7 Godaa kiitanchoy iyaw yayyeyisata naagees; enta yuushon gididi enta ashshees.
PSA 34:8 Goday keeha gideysa laacidi be7ite; iyako baqatiya asi anjetidaysa.
PSA 34:9 Hinteno, geeshsha asaw, Godaas yayyite; iyaw yayyeysatas aykoyka pacenna.
PSA 34:10 Gaammoti miyaba dhayidi koshatoosona; shin Godaa koyeysatas lo77obay pacenna.
PSA 34:11 Nayto, haa yiite; si7ite; ta hintena Godaa yashshi tamaarsana.
PSA 34:12 Lo77o de7o daanawunne keehaba be7anaw adussa laythi daanaw, amottey oonee?
PSA 34:13 Ne inxarsay iitabaa odetonaada, ne doonay cimmonnaada teqa.
PSA 34:14 Iitape haaka; lo77oba ootha; sarotethi koya; kaalla.
PSA 34:15 Godaa ayfey xillota xeellees; iya haythay enta waasuwa si7ees.
PSA 34:16 Enta qofisiyaba biittafe dhaysanaw, Goday iita ootheyisata ba hanqo ayfen xeellees.
PSA 34:17 Xilloti waassoosona; Goday enta waasuwa si7ees; I enta meto ubbaafe ashshees.
PSA 34:18 Wozani meqidaysatas Goday matana; I ufaysi qanxidaysata ashshees.
PSA 34:19 Xillo asas metoy daro; shin Goday iya he ubbaafe ashshees.
PSA 34:20 Goday iya meqethata naagiya gisho, entafe issoyka meqenna.
PSA 34:21 Iitata enta iitatethay wodhana; xillota ixeysati pirdetana.
PSA 34:22 Goday ba aylleta wozees; iyako baqatiya oonika pirdetenna.
PSA 35:1 Dawita Mazmure Godaw, taara baaxeteysatar ne baaxeta; tana oleyisata ne ola.
PSA 35:2 Gondallenne toora oykada, tana maaddanaw denda.
PSA 35:3 Tana gooddeyisata bolla ne tooranne mashsha dentha; taako “Ta nena ashsheysa” yaaga.
PSA 35:4 Ta shempuwa wodhanaw koyeysati, yeellato; kawuyo. Ta bolla iitabaa maqeteysati, kawuyidi guye simmo.
PSA 35:5 Godaa kiitanchoy enta yedethiya wode, enti carkon laaletiya suullada hano.
PSA 35:6 Godaa kiitanchoy enta gooddiya wode, enta ogey dhumanne hallithi gido.
PSA 35:7 Gaasoy bayna tana oykanaw xihe wothoosona; tana kundisanaw olla bookosona.
PSA 35:8 Eronna de7ishin enta bolla dhayoy yo; enti wothida xihey enta oyko; enti bookida ollan kundidi dhayo.
PSA 35:9 He wode taani Godan ufaytana; I ashshida gisho hashshu gaana.
PSA 35:10 Ta kumetha asatethay nena, “Godaw, ne meli oonee? Manquwa wolqaamaa kushiyape kessa ekaasa; metootanchuwanne un7etidaysa, bonqeyisata kushepe ashshaasa” yaagana.
PSA 35:11 Wordo markateysati ta bolla dendoosona; ta eronnaban tana mootosona.
PSA 35:12 Ta lo77o oothida gisho iita zaaridosona; tana bizza oothidosona.
PSA 35:13 Shin enti hargida wode taani kayo ma7o ma7as; ta asatethaa xooman daabursas; ta woosay zaaro demmonna attis.
PSA 35:14 Tana kawushada dabbos woyko ishas yeekeysada yeekas. Issi asi ba aayes kayoteysada ta huuphiya oykada yeekas.
PSA 35:15 Shin taani dhubetida wode ufaytidi shiiqidosona; gaasoy bayna tana wadhidi, aggonna ixidosona.
PSA 35:16 Iita asati ootheysada enti tana qelqisidosona; yilotidi banta acha garcidosona.
PSA 35:17 Godaw, neeni awude gakanaw, si77i gada xeellay? Enta iita oosuwape tana ashsha; ta al7o shempuwa ha gaammotape wosisa eka.
PSA 35:18 He wode gita shiiqon ta nena galatana; daro asay de7iya bessan nena bonchana.
PSA 35:19 Gaasoy bayna tana morkeysati ufaytofo; tana coo ixeysati ta bolla qam7otopo.
PSA 35:20 Enti saroba haasayokona; si77i gidi de7iya asaa bolla oda xaaxosona.
PSA 35:21 Enti banta doona ta bolla dooyidi, “Haysa be7a, ne oothidaysa nuuni nu ayfen be7ida” yaagosona.
PSA 35:22 Godaw, neeni hessa be7adasa; si77i goopa. Godaw, taape haakofa.
PSA 35:23 Ta Xoossaw, ta Godaw ta gisho, denda; barka; ta doona gidada mooteta.
PSA 35:24 Ta Godaw, ta Xoossaw, xillotethan taw pirda; ta morketa ufaysofa.
PSA 35:25 Enti banta wozanan, “Hashshu, nu amoy poletis; nuuni iya mittida” gaana mela oothofa.
PSA 35:26 Ta waayan ufayteysati, yeellato, kawuyo; ta bolla ceeqeteysati yeellanne kawushe ma7o.
PSA 35:27 Ta xoonuwa doseysati ufayto; ililo; hashshu yaago. “Ubba wode ba aylliya sarotethan, ufaytiya Goday dhoqu dhoqu go” yaago.
PSA 35:28 Ta inxarsay ne xillotethaanne ne galataa, gallasa kumethan odees.
PSA 36:1 Godaa aylley, Dawiti zammaareta halaqaas xaafida mazmure. Iita asi ba wozanan iitabaa qopees; I ba wozanan Xoossas yayyenna.
PSA 36:2 I bana daro nashshiya gisho; ba nagaraa be7anaw woyko ixanaw danda7enna.
PSA 36:3 Iya doonan geneynne wordoy kumis; Cincatethinne lo77oba ooso aggis.
PSA 36:4 Ba hiixan zin7idi gene qopees; bana lo77o gidonna ogen kaalethees; iitabaa ixenna.
PSA 36:5 Godaw, ne siiqoy salota gakees; ne tumatethay shaarape aadhees.
PSA 36:6 Ne xillotethay dhoqa deretape aadhees; ne pirday abba ciimmuwafe ziqa; Godaw, neeni asenne do7a naagasa.
PSA 36:7 Xoossaw, ne siiqoy ay mela al7o! Asay ne qefiya garsan qosetidi attees.
PSA 36:8 Enti ne gibiraape midi kalloosona; ne keehatetha shaafape uyidi aloosona.
PSA 36:9 De7o pultoy neepe keyees; ne poo7uwan nuuni poo7o be7oos.
PSA 36:10 Nena ereysatas ne siiqoy, wozana suuretas ne xillotethay qanxetenna.
PSA 36:11 Otoranchota tohoy tana yedhofo; nagaranchota kushey tana yedethofo.
PSA 36:12 Iita asata kundethaa be7ite; enti kundidosona; dendanaw danda7okona.
PSA 37:1 Dawita Mazmure Iitaa ootheyisata gaason yilotopa; nagara ootheyisata qanaatopa.
PSA 37:2 Enti maatada eeson melana; boncoda shullidi qoqofetana.
PSA 37:3 Godan ammaneta; lo77oba ootha; biitta bolla utta; palahin de7a.
PSA 37:4 Godan ufayta; I ne wozanaa amuwa immana.
PSA 37:5 Ne ogiya hadara Godaas imma; iyan ammaneta; I new oothana.
PSA 37:6 I ne xillotethaa wonta xalqeda, ne pirdaa seeta gallasa awada poo7isana.
PSA 37:7 Godaa sinthan si77i gada de7a; danda7an naaga; Iita asata halchoy poletin be7ada yilotopa.
PSA 37:8 Hanqo agga; yilo teqa; hessi meton yeggees.
PSA 37:9 Iita ootheysati dhoqolletidi dhayana; shin Godan ufaysi wotheysati biitta laattana.
PSA 37:10 Iita ootheysati guutha wodepe guye de7okona; ne enta koyada demmaka.
PSA 37:11 Shin aadati biitta laattana; sarotethan ufaytidi daana.
PSA 37:12 Iita asi lo77o asi dhaysanaw maqetees; ba acha enta bolla garcees.
PSA 37:13 Shin Goday iitata bolla miicees; entaw dhayo gallasi yeysa erees.
PSA 37:14 Iita asati manqotanne metootanchota wodhanaw, suure hemeteyisata shukanaw, banta mashsha shoddoosona; banta dongiya waaxoosona.
PSA 37:15 Shin enta mashshay enta wozanan gelana; enta dongey meqana.
PSA 37:16 Xillo asas de7iya guuthabay, iita asas de7iya darobaape lo77o.
PSA 37:17 Ayis giiko, iitata wolqay meqana; shin Goday xillota zempisees.
PSA 37:18 Suure asata ogiya Goday erees; enta laatay merinaw entaba gidana.
PSA 37:19 Iita wode suure asati yeellatokona; kosha wode enti kallidi maana.
PSA 37:20 Shin iita asati hayqana; Godaa morketi ciishshada qoqofetana; cuyada ayfepe geemmana.
PSA 37:21 Iita asi tal7idi zaarenna; shin xillo asi keehatethan immees.
PSA 37:22 Godan anjetidaysati biitta laattana; shin I baaddidaysati dhayana.
PSA 37:23 Asa ogey Godaa ufaysiko, Goday iya tanguwa kaalethees; minthees.
PSA 37:24 I dhubetikoka kundenna; Goday iya kushiya oykidi katisees.
PSA 37:25 Taani paamas; ha77i cimas; shin xillo asi yegetin, iya nayti kathi woossishin be7abike.
PSA 37:26 I ubba wode keehatethan immees; coo tal7ees; iya nayti haratas anjo gidana.
PSA 37:27 Iitape haaka; lo77o ootha; ne adussa laythi daana.
PSA 37:28 Goday xillo pirda dosees; ammaneteyisata I yeggenna. Enti merinaw naagetoosona; shin iitata kochay dhayana.
PSA 37:29 Xilloti biitta laattana; yan merinaw daana.
PSA 37:30 Xillo asa doonape cincatethi keyees; iya inxarsay xillo odetees.
PSA 37:31 Xoossa higgey iya wozanan de7ees; iya tohoy dhubetenna.
PSA 37:32 Iita asi xillo asi geeddees; iya wodhanaw koyees.
PSA 37:33 Shin Goday iya kushen aathidi immenna; pirdetanaw eqiya wode iya bolla pirdisenna.
PSA 37:34 Godan ufaysi ootha, iya kiitaa naaga; nena biitta laatisidi gitayana; iita asati dhayishin ne be7ana.
PSA 37:35 Nagaranchoy Libaanose zigada, diccidi dhoqu dhoqu gin ta be7as.
PSA 37:36 Shin ta simmada yan demmabike; koyinka bentibeenna.
PSA 37:37 Borey bayna asi be7a; suure asi akeeka; saro asas wursethay lo77o gidana.
PSA 37:38 Shin nagaranchoti dhayana; enta wursethay dhoommana.
PSA 37:39 Xillota atotethay Godaape yees; I meto wode enti naagetidi attiya besse.
PSA 37:40 Goday xillota maaddees; ashshees; enti iyako baqatida gisho, I enta iitatape ashshees; naagees.
PSA 38:1 Dawiti xaafida qofiso mazmure. Abeeti Godaw, ne sheniyan tana seeropa; ne yiluwan tana hanqofa.
PSA 38:2 Ne donge tooray tana caddis; ne kushey tana deexis.
PSA 38:3 Ne hanqida gisho ta asatethay qohetis; ta nagaraa gaason ta meqethay liiqis.
PSA 38:4 Ta balay tana muukis; dendonna gita toohoda tana deexees.
PSA 38:5 Ta eeyatethan oothida nagara gisho, ta madunthay xinqis.
PSA 38:6 Ta sa7a xeellas; hokas; gallas kumethi azzanashe pee7as.
PSA 38:7 Ta ashoy xuuggees; ta asatethay paxa gidenna.
PSA 38:8 Ta daaburas; liiqas; ta wozanay dirgiya gisho oolas.
PSA 38:9 Abeeti Godaw, ta wozanaa amo ubbaa eraasa; ta ooley neepe geemmibeenna.
PSA 38:10 Ta wozanay dirgees; ta wolqay hitti gis; ta ayfiya poo7oy dhayis.
PSA 38:11 Ta madunthaa gaason ta shoorotinne ta laggeti haakidi eqidosona; ta dabboti taape haakidosona.
PSA 38:12 Tana wodhanaw koyeysati banta xihiya taw yeggoosona. Tana qohanaw koyeysati, “Nu nena demmana” yaagidi, mandoosona; gallas kumethi ta bolla tobboosona.
PSA 38:13 Ta tulle asa mela si7ike; muume asa mela doona pogike.
PSA 38:14 Tuma haythi si7onna asi, inxarsi odidi zaaronna asi gidas.
PSA 38:15 Godaw, ta nena ufaysan naagayis; ta Godaw, Xoossaw ne taw zaaro imma.
PSA 38:16 Taani, “Ta tohoy dhubetin, enti hashshu gaanadanne ta bolla ceeqetanaada oothofa” yaagas.
PSA 38:17 Ta kundana hanayis, ta sakoy tana aggonna ixis.
PSA 38:18 Ta nagara paaxayis; ta naaquwa gaason azzanayis.
PSA 38:19 Ta morketi gitane wolqaama; tana coo ixeysati daro.
PSA 38:20 Taani lo77oba oothin iita zaareysati, ta lo77oba kaalliya gisho taara eqetoosona.
PSA 38:21 Godaw, tana yeggofa; ta Xoossaw, taape haakofa.
PSA 38:22 Tana ashshiya ta Godaw, tana maaddanaw ellesa.
PSA 39:1 Dawiti zammaareta halaqa, Edotaames xaafida mazmure. Taani, “Ta inxarsan nagara oothonna mela, ta ogiya naagana. Iita asati ta de7iya wode, ta doona barana” yaagas.
PSA 39:2 Shin doona muumeda si77i gas; hari attoshin lo77oba odeteysa aggas; shin ta waayey haa daris.
PSA 39:3 Ta wozanay ta gaathan teellis; ta qofay tamada eexis; yaatin ta inxarsan haasaya doomas.
PSA 39:4 Godaw, ta de7uwa wursethaanne ta daanaw attida gallasaa tana bessa; ta de7oy ay mela qantheko tana erisa.
PSA 39:5 Neeni ta laytha takadhada wothadasa; Ta laythay ne sinthan baynaba mela; tuma asi ubbay issi shempo mela. Salaha
PSA 39:6 Tuma asi aadhiya eesho mela; I coo daaburees; shalo shiishees; shin ooni go7etaneko erenna.
PSA 39:7 Godaw, ha77i ta naagey oonee? Taani nenan ufaysi oothayis.
PSA 39:8 Ta bala ubbaafe tana ashsha; eeyatan tana tooshisopa.
PSA 39:9 Hessa ubbaa oothiday nena gidiya gisho taani muumas; doonaka pogabike.
PSA 39:10 Ne xam7a ta bollafe dentha; mino ne kushiya gaason ta daaburas.
PSA 39:11 Ase iya nagaraa gisho seerasa; iya al7o de7uwa bilada wursaasa; tuma asi ubbay issi shempo mela. Salaha
PSA 39:12 Godaw, ta woosa si7a; tana maaddanaw ta waasuwa hayza. Ta afuthaa be7ada si77i goopa; taani ta aawatada bete asinne imathe gidada neera de7ayis.
PSA 39:13 Ta shaaketanapenne baanape sinthe taani ufaytana mela tana agga.
PSA 40:1 Zamaareta halaqaas Dawiti xaafida mazmure. Taani Godaa danda7an naagas; I taako simmidi ta waasuwa si7is.
PSA 40:2 Dhayo ollafe, silimo urqafe tana kessis; ta tohuwa zaalla bolla essis; ta hemethaa minthis.
PSA 40:3 Ta doonan ooratha yethi wothis; hessika nu Xoossay galatetto yaageysa; daroti be7idi yayyana; Godan ammanetana.
PSA 40:4 Godan ammanetiya, otoranchota xeellonnay, wordotara hemetonnay, anjetida asi.
PSA 40:5 Godaw, ta Xoossaw, neeni daro malaalsiyaba oothadasa; neera liketey oonika baawa! Neeni nuus qopida lo77o qofaa, oonika taybanaw danda7onna; Hessi taani odin wuriyaba gidenna.
PSA 40:6 Neeni yarshonne imo koyabaaka; shin nena si7ana mela ta haythaa dooyadasa; xuussa yarshonne nagara yarsho koyabaaka.
PSA 40:7 Hessa gisho taani, “Xaatha maxaafan tabay xaafetidaysada taani yas.
PSA 40:8 Ta Xoossaw, taani ne sheniya oothanaw dosayis; ne higgey ta wozanan de7ees” yaagas.
PSA 40:9 Gita shiiqon, ne xillotetha odana; Godaw neeni ereysada, taani markateysa aggike.
PSA 40:10 Ta ne xillotethaa ta wozanan qosabike; ne ammanetethanne ne ashuwa odas. Ne siiquwanne ne tumatethaa, gita shiiquwan genthabike.
PSA 40:11 Godaw, ne maarotethaa taape haassofa; ne siiqoynne ne tumatethay, tana ubba wode naago.
PSA 40:12 Tayboy bayna iitabay tana teqis; ta balay tana goozis; ta xeellanaw danda7ike Ta nagaray ta huuphe binaanape daris; ta wozanay ta giddon til7is.
PSA 40:13 Godaw, tana ashshanaw ero ga; ta Godaw, tana maaddanaw ellesa.
PSA 40:14 Tana wodhanaw koyeysati yeellato, kawuyo; Ta qohetetha amotteysati kawuyidi guye simmo.
PSA 40:15 Taako, “Iyaw hashshu, hashshu” geysati xoonetidi yeellato.
PSA 40:16 Shin nena koyiya ubbay, nenan ufayto; hashshu go. Ne atotetha dosiya ubbay, “Goday gita” yaago.
PSA 40:17 Taani manqonne metootancho; shin Goday tabaa qopo! Tana maaddey ashshey nena; ta Xoossaw, gam7ofa.
PSA 41:1 Zammaareta Halaqaas Xaafetida Dawita Mazmure. Manquwas qopiya asi anjetidaysa; meto gallas Goday iya ashshees.
PSA 41:2 Goday iya naagees, de7on wothees; biitta bolla Goday iya anjees; Goday iya, iya morketa amuwas aathidi immenna.
PSA 41:3 I saketidi hiithan de7ishin Goday maaddees; hargiyafe iya pathees.
PSA 41:4 Taani, “Godaw, ta nena naaqida gisho, tana maara; ta hargiyafe tana patha” yaagas.
PSA 41:5 Ta morketi iitabaa ta bolla haasayidi, “I awude hayqandee? iya sunthay awude dogetandee?” yaagosona.
PSA 41:6 Tana be7anaw yaa oonika wordo odees; ba wozanan tana zigiriyabaa shiishees; kare keyidi ta sunthaa iissees.
PSA 41:7 Tana ixiya ubbay issife tana zigiroosona; iitabay iya gakees gidi qopoosona.
PSA 41:8 “Iya iita hargey oykis; I hiza hiixape dendenna” yaagosona.
PSA 41:9 Hari attoshin ta ammanetiya laggey, taara midaysi taw zoko zaaris.
PSA 41:10 Shin Godaw tana maara; ta entaw kushe zaarana mela, harge hiixape tana dentha.
PSA 41:11 Ta morkey tana xoononna gisho, ne tanan ufaytanaysa ta erayis.
PSA 41:12 Ne tana ta suuretetha gisho katisaasa; ne sinthan tana merinaw wothaasa.
PSA 41:13 Goday, Isra7eele Xoossay, merinaape merinaa gakanaw galatetto.
PSA 42:1 Qore Nayta Timirte Akeekan xaafida mazmure Gaari pulto haathi laamoteysada, Xoossaw, ta shempiya nena laamotawusu.
PSA 42:2 “Ta shempiya Xoossaa, de7o Xoossaa be7anaw saamotawusu; awude gakada iya som7uwa be7o” yaagawusu.
PSA 42:3 Asay, “Ne Xoossay awun de7ii?” giya wode, gallasinne qammi taw afuthi kathi gidis.
PSA 42:4 Taani enta ba7aale bonchanaw shiiqida, daro asaa kaalethada, galata yethaninne ililisan xoossa keethi beysa qopiya wode, ta wozanay azzanon meqees.
PSA 42:5 Ta shempe, ayis azzanay? ayis un7etay? Ne Xoossan ufaysi wotha; tana ashshiya, ta Xoossaa taani buroo galatana.
PSA 42:6 Ta wozanay azzanis; hessa gisho taani Yordaanose biittan, Armoona dhoqan, Mizaare zuman, eqada nena qopana.
PSA 42:7 Ne soossuwa guunthan ciimmoy ciimmuwa xeegees; ne beetaynne ne zuley ta bollara aadhis.
PSA 42:8 Goday ba siiquwa gallas taw kiittees; qamma galata yethay taara de7ees; ta de7o Xoossaa woossana.
PSA 42:9 Xoossaa, ta zaallako, “Tana ayis dogadii? Ta morketi tana un7ethin, yeekashe ayis hemeto” yaagana.
PSA 42:10 Ta morketi, “Ne Xoossay awun de7ii?” yaagidi cayiya wode ta meqethay meqees.
PSA 42:11 Ta shempe ayis azzanay? ayis un7etay? Xoossan ufaysi wotha; tana ashshiya, ta Xoossaa ta buroo galatana.
PSA 43:1 Xoossaw taw pirda; nena eronna deretara ta gisho mooteta; Cimmiya iita asatape tana ashsha.
PSA 43:2 Xoossaw, neeni, taani qosetada attiya miixa; ne tana ayis aggadii? Ta morkey tana un7ethin, ayis yeekashe boo?
PSA 43:3 Ne poo7uwanne ne tumaa taw kiitta; enti tana kaalethidi ne geeshsha deriya, ne de7iya bessaa tana gatho.
PSA 43:4 He wode taani Xoossaa yarsho bessaako; tana ufaysiya Xoossaako baana. Xoossaw ta Godaw, taani diithan nena sabbana.
PSA 43:5 Ta shempe ayis azzanay? ayis un7etay? Xoossan ufaysi wotha; tana ashshiya, ta Xoossaa ta buroo galatana.
PSA 44:1 Qore Nayti Zammare Halaqaas Xaafida Mazmure Akeekan xaafida ginxo Xoossaw, beni wode ne oothidaba nu si7ida; nu aawata wode ne oothidaba nuus odidosona.
PSA 44:2 Kawotethata ne kushen goodda kessadasa; nu aawata enta biittan tokadasa. Hara kawotethata seeradasa; shin nu aawata aakisadasa.
PSA 44:3 Enti banta mashshan olidi he biitta laatibookona; enti banta minotethan xoonibookona. Shin neeni enta dosida gisho, enta ne ushacha kushey, ne qeseynne ne som7uwa poo77oy xoonisis.
PSA 44:4 Yayqooba kochaas xoono kiittiya, ta kawoynne ta Xoossay nena.
PSA 44:5 Nenan gididi nu morketa xoonana; ne sunthan nuna ixeyisata yedhana.
PSA 44:6 Taani ta tooran ammanetike; ta mashshay tana ashshena.
PSA 44:7 Shin ne nuna nu morketape ashshaasa; nuna ixeyisata neeni kawushaasa.
PSA 44:8 Nuuni ubba wode Xoossan ceeqetana; ne sunthaa merinaw galatana. Salaha.
PSA 44:9 Shin ha77i nuna aggadasa; kawushadasa; nu olanchotara issife olas keyaka.
PSA 44:10 Nu morketa sinthafe nuna baqatisadasa; nu ixeysati nuna bonqidosona.
PSA 44:11 Nuna dorsada shuhas aatha immadasa; kawotethata giddon nuna laalladasa.
PSA 44:12 Neeni ne asaa laafa gaten bayzadasa; ay wodheka demmabaaka.
PSA 44:13 Nu shooroti nuna boranaada oothadasa; nu heeran de7eysati nuna qilqisanaadanne nu bolla miicanaada oothadasa.
PSA 44:14 Nuna kawotethata giddon hayses aggadasa; enti banta huuphiya nu bolla qaathana mela oothadasa.
PSA 44:15 Gallas kumethi taani tooshetas; ta som7uwa yeelli kammis.
PSA 44:16 Hessi haniday tana cayeysatanne boreyisata gaasoninne, ta morketanne tana mandeyisata gaasona.
PSA 44:17 Nuuni nena dogonna de7ishin, ne caaquwa menthonna de7ishin, ha ubbay nuna gakis.
PSA 44:18 Nu wozanay nena aggibeenna; nu tohoy ne ogiyape kare keybeenna.
PSA 44:19 Shin neeni nuna mentherethada do7a ollan yeggadasa; sakana dhuman kammadasa.
PSA 44:20 Nu, Xoossaa sunthaa dogidaba gidiyako, hara xoossatako nu kushiya miccidaba gidiyako,
PSA 44:21 Wozana xuuraa Xoossay eriya gisho, I haysa xeellidi demmennee?
PSA 44:22 Gidoshin, ne gisho ubba gallas hayqoos; shukanaw efiya dorsada taybetida.
PSA 44:23 Godaw, denda, Ayis dhiskay? Denda, merinaw nuna aggofa.
PSA 44:24 Ne som7uwa nuupe ayis genthay? Nu qohuwanne nu un7aa ayis dogay?
PSA 44:25 Nuuni baanan yegetida; nu asatethay biittara oyketis.
PSA 44:26 Godaw, denda, nuna maadda; ne siiquwa gisho gada nuna woza.
PSA 45:1 Qore Nayti “Ciishshe” Geetetiya cuudhethan Zammaareta Halaqaas Xaafida Mazmure Akeekan xaafida siiqo mazmure. Taani ta yethaa kawas sissana; ta wozanay lo77o qofa pultees; ta inxarsay lo77o xaafiya asa bi7ire mela.
PSA 45:2 Asa ubbaafe neeni mala lo7o; ne mettershay aadho keehatetha qaalan kumis; Xoossay nena merinaw anjis.
PSA 45:3 Wolqaama kawaw, ne mashshaa danca; bonchonne teema ma7a.
PSA 45:4 Ne tumatethaa, ne aadatethanne ne xillotetha gisho, ne teema ma7ada xoonanaw denda; ne ushacha kushey malaalsiyaba besso.
PSA 45:5 Ne toorati qara; enti kawa morketa wozanaa caddo; kawotethati ne tohuwa garsan kundo.
PSA 45:6 Xoossaw, ne araatay merinaw de7ees; ne kawotethaa xam7ay xillotetha xam7aa.
PSA 45:7 Neeni xillotethi dosada geellatethi ixaasa; Hessa gisho, Xoossay, ne Xoossay, ne laggetape aathidi, nena ufaysa zayten tiyis.
PSA 45:8 Godare uuthan, karbeninne burguden walaketida shitton, ne ma7oy puuketis. Dangarsa zaalen alleeqetida, ne kawo gadhon diixetiya diithay nena ufaysees.
PSA 45:9 Kawo keethan de7iya maccasata giddon; kawota macca nayti de7oosona. Kawiya Ofira worqan alleeqetada, neepe ushacha baggan eqasu.
PSA 45:10 Ta naatte, si7a; wozanan wotha; ne haytha haa zaara; ne deriyanne ne aawa keethaa doga.
PSA 45:11 Kawoy ne malan ufaytis; ne godaa gidiya gisho iya boncha.
PSA 45:12 Xiroosa asay new woyto ekidi yaana; dureti nena aaddashana.
PSA 45:13 Kawa na7iya, kawo keethan waanna lo77ay! I yaagano ma7oy worqan alleeqetis.
PSA 45:14 Ba alleeqo ma7uwa ma7ada, kawako moyzetasu. I geela7o laggeti iyo kaallidi, iya sinthe ekidi yidosona.
PSA 45:15 Enti ufaytishe yidi, kawo gadho geloosona.
PSA 45:16 Kawaw, ne aawata bessaa ne nayti laattana; biitta ubban ne enta shuumana.
PSA 45:17 Ta ne sunthaa yeleta ubban, hassayetanaada oothana. Hessa gisho, asay merinaw nena galatana.
PSA 46:1 Qore Nayti Zammaareta Halaqaas Xaafida Mazmure “Geela7o nayta yethi” geetetiya cuudhethan yexetida mazmure. Xoossay nu qosetidi attiya, bessenne nu wolqaa. Nuna metoy gakiya wode, I nuna maaddanaw ubba wode nu matan de7ees.
PSA 46:2 Hessa gisho, biittay qaaxiyakoka, dereti abban kundiyakoka, nuuni yayyoko.
PSA 46:3 Abbay guummidi gopontikoka, iya wolqaama zuliyan dereti kokoriyakoka, nuuni dagammoko. Salaha.
PSA 46:4 Ubbaafe Dhoqa Xoossay de7iya, Xoossaa katamaa, geeshsha bessaa, ufaysiya issi shaafi de7ees.
PSA 46:5 Xoossay iya giddon de7iya gisho, he katamay qaaxenna; wonta guura Xoossay iya maaddana.
PSA 46:6 Derey dagammis; kawotethati qaaxoosona; Xoossay ba qaala sissis; biittay til7is.
PSA 46:7 Ubbaafe wolqaama Goday nuura de7ees; Yayqooba Xoossay nu qosetidi attiya besse. Salaha
PSA 46:8 Haa yiite; Godaa oosuwa xeellite; biitta waatidi dhaysidaako be7ite.
PSA 46:9 I biitta bolla de7iya olaa ubbaa teqees; dongenne toora menthees; gondalliya taman xuuggees.
PSA 46:10 Wopu giite; taani Xoosse gideysa erite; taani kawotethata giddon dhoqu dhoqu gaana; biitta bollaka dhoqu dhoqu gaana.
PSA 46:11 Ubbaafe Wolqaama Goday nuura de7ees; Yayqooba Xoossay nu qosetidi attiya besse. Salaha.
PSA 47:1 Qore Nayta Mazmure Dere ubbay hinte kushiya baqite; qaala dhoqu oothidi Xoossaa galatite.
PSA 47:2 Ubbaafe dhoqa Goday waani yashshii? biitta ubban I gita kawo.
PSA 47:3 Dereta nuupe garsara, kawotethata nu tohuwape garsan haarisees.
PSA 47:4 I nuus laata biitta dooris; I dosiya Yayqoobi he biittan ceeqetees. Salaha.
PSA 47:5 Xoossay ufaysaninne ililsan pude dendis, Goday moyze punon ba araatan keyis.
PSA 47:6 Xoossaas zammarit; ee, iyaw zammarit; iyaw kawas zammarit; ee, iyaw zammarit.
PSA 47:7 Xoossay biitta ubbaa kawo gidiya gisho, galatan sabbite.
PSA 47:8 Xoossay ba geeshsha araatan uttis, Xoossay kawotethata haarees.
PSA 47:9 Kawotethata halaqati, Abrahaame Xoossaa asaara shiiqoosona. Biittan de7iya wolqaama ubbay Xoossaba gidiya gisho I ubbaafe dhoqu dhoqu gis.
PSA 48:1 Qore Nayta Mazmure Goday gita; nu Xoossaa kataman iya geeshsha zumaa bolla gita galati iyaw bessees.
PSA 48:2 Biitta ubbaa ufaysi gidida, pudeha baggara de7iya Xiyoone derey, dhoqanne lo77o; I gita kawa katama.
PSA 48:3 Xoossay he gimbiya giddona; ika iyaw geshe gideysa erisis.
PSA 48:4 Kawoti banta tooranchotara shiiqidosona; Xiyoone olanaw yidosona.
PSA 48:5 Iya be7idi dagammidosona; guye simmidi baqatidosona.
PSA 48:6 Enti yan de7ishe yashshan kokoridosona; iqethi oykida maccasada inxaxidosona.
PSA 48:7 Doloha bagga wolqaama carkon meqiya Tarsesa markabeta mela gididosona.
PSA 48:8 Nu si7idaysada, Ubbaafe Wolqaama Godaa kataman, nu Xoossaa kataman I oothidaba be7ida; Xoossay he katamaa merinaw minthidi naagees. Salaha
PSA 48:9 Abeeti Xoossaw, ne keethan merinaa ne siiquwa qopoos.
PSA 48:10 Abeeti Xoossaw, ne sunthada ne galatay sa7aa gaxaa gakis; ne ushacha kushey xillotethan kumidaysa.
PSA 48:11 Ne pirdaa gaason Xiyoone asay ufayto; Yihuda kumethay ufaysan ililo.
PSA 48:12 Xiyoone yuushuwan hemetite; I dirsa yuuyite; I shakota taybite.
PSA 48:13 Yaa yeletas odana mela iya gimbiya akeekite; miixata wochite.
PSA 48:14 Hinte, “Merinaw Xoossay nu Xoossaa; I nuna hayqana gakanaw kaalethana” yaagidi odite.
PSA 49:1 Qore Nayti Zammaareta Halaqaas Xaafida Mazmure. Asa ubbay haysa si7ite; biitta bolla de7eysato, ubbay haysa hayzite.
PSA 49:2 Dhoqay ziqay, durey manqoy si7ite.
PSA 49:3 Ta wozanaa qofay akeeka immees; ta doonay cincatetha qaala odetees.
PSA 49:4 Ta haythaa leemisoko zaarana; diithi diixashe, ta qan7ishiya birshana.
PSA 49:5 Meto gallasay yaa wodenne cimmiya morketi; tana teqiya wode ta ayis babbayna?
PSA 49:6 Banta shaluwan ammaneteysatanne banta duretethan ceeqetiya ta morketa ayis babbayna?
PSA 49:7 Ay asika bana wozanaw, woyko ba shempuwa gatiya Xoossas qanxanaw danda7enna.
PSA 49:8 Asa shempo gatey daro al7o; Ay gate qanxinka gidenna.
PSA 49:9 I hayqonnaadanne duufo gelonnaada, woyko I hayqonnaada oothanaw gakenna.
PSA 49:10 Eeyatinne pathonna asati hayqeysada, cincati banta shaluwa haratas yeggidi beysa asa ubbay be7ees.
PSA 49:11 Enti banta biitta bantaba giikoka, duufoy merinaw entaw keethe gidana.
PSA 49:12 Asi ay gitatikoka ba gitatethaara kanthenna; I do7ada hayqees.
PSA 49:13 Bantarka banta huuphen ammaneteyisata qaadaynne enti gidaba tuma giya eeyata wursethay haysa. Salaha
PSA 49:14 Shukas giigetida dorsatada, hayqoy enta duufo kaalethees. Suureti enta duufuwa bollara hemetana; enta asatethay duufon wooqana; keethafe keyidi haakidi si7oolen attana.
PSA 49:15 Shin Xoossay ta shempuwa wozana; I tana hayqo wolqafe ashshana. Salaha
PSA 49:16 Asi duretiya wodenne iya bonchoy dariya wode yayyofa.
PSA 49:17 I hayqiya wode aykoka ekidi beenna; iya shaloy iyara issife duufo gelenna.
PSA 49:18 Asi paxa de7iya wode taw kumis giiko, ubbabay iyaw injetida gisho galatetikoka,
PSA 49:19 simmidi poo7o be7onna, ba mayzatan gahetees.
PSA 49:20 Eratethi bayna duretida asi do7ada coo dhayana.
PSA 50:1 Asaafa Mazmure Wolqaama Goday, Xoossay odees; dolohape wuloha gakanaw biitta ubbaa xeegees.
PSA 50:2 Medhon polo yegelsi gidida Xiyoonepe Xoossay poo7ees.
PSA 50:3 Nu Xoossay yaana; si77i geenna; eexiya tamay iya sinthana; wolqaama gotey iya yuushuwana.
PSA 50:4 Xoossay ba asaa pirdiya wode, salotanne sa7aa xeegees.
PSA 50:5 “Yarshon taara caaqida, ta geeshshata taako shiishite” yaagis.
PSA 50:6 Xoossay pirdiya gisho, saloti iya xillotethaa awaajosona. Salaha
PSA 50:7 “Ta asaw, si7ite; ta hintew odayis; Isra7eele asaw, ta ne bolla markatana; taani Xoossay, ne Xoossaa.
PSA 50:8 Ne yarshuwa gishonne ne xuussa yarshuwa gisho, nena borike.
PSA 50:9 Ne daraape kormata, ne girbiyafe kole ekanaw koyke.
PSA 50:10 Woran de7iya do7ati ubbay tabaa; mukulu zumaa bolla de7iya mehetika taassa.
PSA 50:11 Taani dhoqa deriyan de7iya kafota ubbaa erayis; denban de7iya medhetethati tayisata.
PSA 50:12 Tana koshaykoka nena oychike; sa7inne sa7an kumidaba ubbay tabaa.
PSA 50:13 Taani kormata ashuwa maynayee? woyko deeshata suuthaa uyanayee?
PSA 50:14 Xoossas galata yarsho imma; Ubbaafe dhoqa Xoossaas ne qangetha gatha.
PSA 50:15 Meto gallas tana xeega; ta nena ashshana; neka tana bonchana” yaagees.
PSA 50:16 Shin Xoossay iita asaa haysada yaagees; “Ta higgiya ne nabbabanaw new ay maati de7ii? Woyko ta caaquwa ne doonan qoncisanaw new ay maati de7ii?
PSA 50:17 Neeni ta timirtiya ixadasa; ta qaala guye yeggadasa.
PSA 50:18 Kaysuwa be7ida wode neeni iyara dabbotadasa; laymateyisata maabaran geladasa.
PSA 50:19 Ne doona iitabaa odetanaw billa yeddadasa; Ne inxarsay wordo haasaya meezetis.
PSA 50:20 Uttada ne ishaa zigiradasa; ne aaye na7aa bolla iitaba odetadasa.
PSA 50:21 Ne haysa ubbaa oothiya wode, taani si77i gida gisho tana ne mela gada qopadasa. Shin ha77i ta nena hanqana; ne nagaraa ne sinthan taybana.
PSA 50:22 Hinteno, Xoossaa dogeysato, haysa akeekite; hessi hanonna ixiko ta hintena mentherethana; he wode hintena ashshanay baawa.
PSA 50:23 Taw galata yarshey tana bonchees; ba ogiya suurisida asas taani Xoossaa atotetha bessaana” yaagees.
PSA 51:1 Dawiti zammaareta halaqaas xaafida mazmure Dawiti Barsaabera laymatida wode nabiya Naatani iyaw odi simmin Dawiti yexida mazmure. Abeeti Xoossaw, ne merinaa siiquwada tana maara; ne qadheta daruwa mela ta nagaraa qucha.
PSA 51:2 Ta iitatethaafe tana meecca; ta nagaraape tana geeshsha.
PSA 51:3 Taani ta qohuwa erayis; ta nagaray ubba wode ta sinthana.
PSA 51:4 Taani nena, ne xalaala qohas; ne sinthan iitabaa oothas. Hessa gisho, ne hanquwan ne like; ne pirdanka ne xillo.
PSA 51:5 Heko ta yeletiya wode nagarancho; ta aaye ulon buroo attiya, wodepe doomada taani nagarancho.
PSA 51:6 Neeni asa wozanape tumatethi koyaasa; ta gaatha asatethaa cincatethi tamaarsa.
PSA 51:7 Hisoophe boncon tana wurxa; ta geeyana; tana meecca; ta shachafe aadhada booxana.
PSA 51:8 Ne tana ufaysinne lo77oba sissa; ne mentherethida ta meqethaa zaarada ufaysa.
PSA 51:9 Ne som7uwa ta nagaraape hara soo zaara; ta bala ubbaa qucha.
PSA 51:10 Abeeti Xoossaw, geeshsha wozana tanan medha; qaaxonna ayyaana ta giddon ooratha.
PSA 51:11 Tana ne sinthafe yeggofa; ne Geeshsha Ayyaana taape ekofa.
PSA 51:12 Ne atotetha ufaysaa taw zaara; ta new kiitetana mela tana zempisa.
PSA 51:13 Ta he wode higge mentheyisata ne ogiya tamaarsana; nagaranchotika neeko simmana.
PSA 51:14 Abeeti Xoossaw, tana ashshiya Xoossaw, suuthu gussiya nagarape tana ashsha; he wode ta inxarsay ne xillotetha yexana.
PSA 51:15 Abeeti Godaw, ta doona dooya; ta inxarsay ne galataa awaajana.
PSA 51:16 Ne yarshon ufaytiyako, ta new yarshanashin, ne xuussa yarshon ufaytaka.
PSA 51:17 Xoossaa yarshoy aada ayyaana; Xoossaw, ne meqidanne kawuyida wozanaa kadhaka.
PSA 51:18 Abeeti Xoossaw, dosan Xiyoones keeha; Yerusalaame gimbeta gimba.
PSA 51:19 He wode ne xillotetha yarshoninne xuussa yarshon ufaytana. pollo shiqiaya mehe yarshon ne ufaytana; kormati ne yarsho bessan yarishetana.
PSA 52:1 Dawiti Zammaareta Halaqaas Akeekan xaafida Ginxo Edoome biitta asi gidida Doyqi Saa7olako bidi, “Dawiti Abimeleke soo bis” yaagidi odi simmin, Dawiti xaafida mazmure. Neno, wolqaama uraw, iitatethan ayis otortay? neno Xoossan kadhetidayso ubba wode ayis ceeqetay?
PSA 52:2 Neno, wordo odeteyso, ne harata dhaysanaw maqetaasa; ne inxarsay qara maqla mela.
PSA 52:3 Ne lo77o aggada iita dosaasa; tuma aggada wordo odetaasa. Salaha
PSA 52:4 Neno, wordanchuwaw, ne bosha qaala ubbaa dosaasa.
PSA 52:5 Xoossay nena merinaw menthana; Xoossay nena mentherethananne ne keethaafe dafidi kessana; nena de7on de7eyisata giddofe shoddidi yeggana. Salaha
PSA 52:6 Xilloti hessa be7idi yayyana; enti haysada yaagidi, ne bolla miicana;
PSA 52:7 “Xoossaa baw geshe oothiboonna, ba duretethan ammanetida, iita ooson minnida, addiya haysa be7ite” yaagana.
PSA 52:8 Shin taani Xoossaa keethan aaciya shamaho mela; iya siiquwan taani merinaw ammanetayis.
PSA 52:9 Ne oothida gisho merinaw ta nena galatana; neeni lo77o gidiya gisho ne sunthan ufaysi oothana; geeshshata sinthan ta nena sabbana.
PSA 53:1 Dawiti Zammaareta Halaqaas Xaafida Timirte Akeekan xaafetida ginxo Eeyati banta wozanan, “Xoossi baawa” yaagosona; enta de7oy iitis; enti tunabaa oothosona; lo77oba oothiya asi issoyka baawa.
PSA 53:2 Xoossaa koyiya cinca asi de7iyako be7anaw, Goday salope asaa xeellees.
PSA 53:3 Enti ubbay Xoossaafe haakidosona; ubbay issife tunidosona. Lo77o oothiya asi deenna; hari attoshin issi asika baawa.
PSA 53:4 Asi kathi meysada ta asaa meysati, ha iita oothiya asati erokona? enti Xoossaa xeegokona?
PSA 53:5 Enti dagammi eronna dagama dagammana; Xoossay ba asaa morketa meqethaa laallana; Xoossay enta kadhida gisho enti yeellatana.
PSA 53:6 Isra7eele atotethay Xiyoonepe yeerenne! Xoossay ba asaa di7uwa zaariya wode, Yayqooba zareti ufayto; Isra7eele asay ufaysan hashshu go.
PSA 54:1 Dawiti Zammaareta Halaqaas Diithan Yexida Akeeka Ginxo Ziifa asati Saa7olako bidi, “Dawiti nu biittan qosetis” yaagidi odin, Dawiti xaafida mazmure Abeeti Xoossaw, ne sunthan tana ashsha; ne wolqan taw pirda.
PSA 54:2 Abeeti Xoossaw, ta woosa si7a; ta doona qaala hayza.
PSA 54:3 Allaga asati ta bolla dendidosona; daganthiya asati tana wodhanaw koyoosona; enti Xoossaa qopokona. Salaha
PSA 54:4 Xoossay taw maade; Goday taw zempo.
PSA 54:5 Abeeti Xoossaw, ta morketa iitatethaa enta bolla zaara; ne tumatethaa gisho enta dhaysa.
PSA 54:6 Abeeti Godaw, taani ta dosan new yarshana; ne keeha gidiya gisho ne sunthaa galatana.
PSA 54:7 Ne tana, ta meto ubbaafe ashshadasa; ta morketa xoonetethaa ta ayfen be7as.
PSA 55:1 Dawiti Zammaareta Halaqaas Diithan Yexida Akeeka Mazmure. Abeeti Xoossaw, ta woosa si7a; ta magannuwa qelli goopa.
PSA 55:2 Tana si7a; ta woosaas zaaro imma; ta qofay tana waaysin, ta un7etas.
PSA 55:3 Ta morketa girsa si7ada dagammas; iitata mandiya gaason kokoras. Enti ta bolla meto ehoosona; yilon dendidi tana morkoosona.
PSA 55:4 Ta wozanay dirgees; hayqo hirgay tana wodhees.
PSA 55:5 Tana yashshinne kokorsi oykis; iita dagami ta bolla wodhis.
PSA 55:6 Holleda taw qefey de7iyako, paallada shempoy de7iya bessi gakanashin.
PSA 55:7 Taani haakada baanashin; bazzon aqanashin. Salaha
PSA 55:8 Taani gotepenne carkofe baqatada, ta qosetiya bessi demmanashin.
PSA 55:9 Abeeti Godaw, katamaa giddon ooshshinne gene be7ida gisho iitata odaa laalla.
PSA 55:10 Iitati gallasinne qamma katamaa gimbe dirsaa yuuyosona; waayeynne metoy katamaa giddon de7ees.
PSA 55:11 Dhayoy iya giddon de7ees; naaqoynne cimoy iya dabaabape shaaketenna.
PSA 55:12 Tana cayey ta morkiya gidenna; iya gidiyako ta danda7anashin. Ta bolla ceeqetey tana ixeysa gidenna; iya gidiyako ta iyape qosetanashin.
PSA 55:13 Shin hessa oothey nena, ta laggiya; ta dabbuwanne ta siiquwa.
PSA 55:14 Nu issoy issuwara ulo oda odetida; Xoossa keethan dabaaban asaara issife simeretida.
PSA 55:15 Enta wozanan iitatethi de7iya gisho, ta morketi qoponna hayqo; enti paxa de7ishe duufo gelo.
PSA 55:16 Shin taani Xoossaa xeegana; Goday tana ashshana.
PSA 55:17 Wonta, gallasinne omarsi waassana; ta metuwa iyaw odana; I tana si7ana.
PSA 55:18 Daroti tana morkikoka, I tana toorape ashshees.
PSA 55:19 Benipe ba araatan uttida Xoossay, banta ogiya laammonna gishonne iyaw yayyonna gisho tana si7idi enta kawushana. Salaha
PSA 55:20 Ta laggey ba dabbota qohis; entara caaqida caaquwa menthis.
PSA 55:21 Iya doonay oysape liiqo; shin ba wozanan ola denthees. Iya inxarsay zaytepe aadhida shugo; shin qanxanaw giigida qara mashsha mela.
PSA 55:22 Ne toohuwa Xoossa bolla yegga; I nena katisana. Xoossay xilloti, dagammana mela oothenna.
PSA 55:23 Shin Abeeti Xoossaw, iita asata wolqaama ollan holana. Suuthu gusseysatinne cimmeysati, banta laythaafe baggaaka de7okona; shin taani nenan ammanetana.
PSA 56:1 Filisxeeme Asay Geete Kataman Dawita Oykida Wode Dawiti Zammaareta Halaqaas Xaafida Woosa. “Haaho bessan wola bolla uttida hollees” geetetiya diitha cuudhethan yexetida woosa. Abeeti Xoossaw, asay tana un7ethiya gishonne ubba wode ta morketi tana yedethiya gisho taw qadheta.
PSA 56:2 Ta morketi kumetha gallas tana yedhoosona; otoron tana oliya asay daro.
PSA 56:3 Tana yashshiya wode ta nenan ammanetayis.
PSA 56:4 Taani Xoossan ammanetayis; yayyike; iya qaala galatiya Xoossan ammanetayis; asi tana ay oothanee?
PSA 56:5 Kumetha gallasan ta morketi bala koyoosona; tana qohanaw ubba wode tobboosona.
PSA 56:6 Enti ta bolla maqetoosona; tana qohanaw geeddosona. Ta tango ubba kaalloosona; tana wodhanaw koyoosona.
PSA 56:7 Enti ay ogeraka kessi ekana mela oothofa; ne hanquwan he kawotethata kawusha.
PSA 56:8 Ta waayiya tayba; ne ta afuthaa makadasa; enti ne mazgabiyan de7okona?
PSA 56:9 Ta nena xeegiya wode, ta morketi guye simmana; Xoossay ta bagga gideysa ta hessan erayis.
PSA 56:10 Ta iya qaala galatiya Xoossan, ta iya qaala galatiya Godan,
PSA 56:11 ta he Xoossan ammanetayis; yayyike. asi tana ay oothannee?
PSA 56:12 Abeeti Xoossaw ta new qangidabay de7ees; hessa galataa yarsho oothada ta new immana.
PSA 56:13 De7on de7eyisata bolla poo7iya poo7uwan Xoossaa sinthan simeretana mela, ta shempuwa hayqope, ta tohuwa dhubepe ashshadasa.
PSA 57:1 Dawiti Saa7olape baqatidi Gongolon Qosetida Wode Zammaareta Halaqaas Xaafida Woosa “Dhaysofa” geetetiya diitha cuudhethan yexetida woosa. Tana maara; abeeti Xoossaw, tana maara; ta neeko baqatayis. Dhayoy aadhana gakanaw, ne qefiya garsan qosetayis.
PSA 57:2 Taani Ubbaafe dhoqa Xoossako, ba qofaatho oothiya Xoossako waassayis.
PSA 57:3 Xoossay salope maado kiittidi tana ashshana; tana yedheyisata kawushana; Xoossay ba siiquwanne ba ammanetetha taw kiittana. Salaha
PSA 57:4 Taani ta morketape giddon, ase miya gaammotape giddon de7ayis. Enta achay tooranne donge toora mela; enta inxarsay qara mashsha mela.
PSA 57:5 Abeeti Xoossaw, ne salope aadhada dhoqu dhoqu ga; ne bonchoy sa7a ubbaa kammo.
PSA 57:6 Enti ta tohuwas xihe wothidosona; taani un7etada hokas. Enti ta ogiyan olla bookidosona; shin he ollan bantaw kundidosona. Salaha
PSA 57:7 Ta wozanay mino; abeeti Xoossaw, ta wozanay mino; taani nena mazmuren sabbana.
PSA 57:8 Ta shempe, barka; diithinne maasinqoy dendite; taani guura barkana.
PSA 57:9 Abeeti Godaw, ta nena asaa giddon galatana; kawotethata giddon nena sabbana.
PSA 57:10 Ne siiqoy salotape dhoqa; ne ammanetethay shaarape bolla.
PSA 57:11 Abeeti Xoossaw, ne salope aadhada dhoqu dhoqu ga; ne bonchoy sa7a ubbaa kammo.
PSA 58:1 Dawiti Zammaareta Halaqaas Xaafida Woosa “Dhaysofa” geetetiya diitha cuudhethan yexetida woosa. Deriya haareysato, tuma hinte like odeteetii? Asa ubbaas xillo pirdeetii?
PSA 58:2 Gidenna, hinte wozanan iitabaa halcheeta; hinte kushey biitta bolla geellaba oothees.
PSA 58:3 Iita asi aaye ulope doomidi halees; yeletida gallasape doomidi, baleesinne wordo odetees.
PSA 58:4 Enti shooshada yiishshara de7oosona; enti tulle gopeda si7okona.
PSA 58:5 Biteysi ay cinca gidikoka, Gopey iya xeessi si7enna.
PSA 58:6 Abeeti Xoossaw, gaammo achi daaniya enta achaa mentha; Godaw enta sakiliya dhuka.
PSA 58:7 Enti gukida haathi gido; banta dongiya dukiya wode, donge toora ayfey dhayo.
PSA 58:8 Enti maaydi dhayiya dhaadhe saassoda hano; aaye ulope hayqidi wodhiya, awa poo7o be7onna boshada hano.
PSA 58:9 Enti agunthi gididi daayanape kase, enti buroo puuto gididi de7ishin, enta ba hanquwan dhaysana.
PSA 58:10 Nagaranchota bolla halo keyiya wode xilloti ufaytana; iitata suuthan banta tohuwa meecetana.
PSA 58:11 He wode asay, “Tuma xillotas woytoy de7ees; sa7a bolla pirdiya Xoossi de7ees” yaagana.
PSA 59:1 Dawita wodhanaw iya keetha naagana mela Saa7oli ase kiittin, Dawiti zammaareta halaqaas xaafida woosa “Dhaysofa” geetetiya diitha cuudhethan yexetida woosa. Abeeti ta Xoossaw, ta morketape tana ashsha; ta bolla dendeysatape tana naaga.
PSA 59:2 Iita ootheysatape tana ashsha; suuthu gussiya asatape tana ashsha.
PSA 59:3 Abeeti Godaw, enti tana wodhanaw zugidi naageysa be7a. Abeeti Godaw, ta naaquwa gisho woyko ta nagaraa gisho gidonashin coo ta bolla tobboosona.
PSA 59:4 Ta ay balaka oothonna tana qohanaw giigidosona; hessa be7a; tana maaddanaw denda.
PSA 59:5 Abeeti Ubbaafe Wolqaama Xoossaw, Godaw, Isra7eele Xoossaw, kawotethata ubbaa pirdanaw barka; iita ootheyisata maaropa. Salaha
PSA 59:6 Enti katamaa giddon yuuyishe pee7idi, kanatho laawishe simmoosona.
PSA 59:7 Enta doonape keyeysa be7a; enta inxarsay mashsha mela; asi entana si7eysa qopokona.
PSA 59:8 Shin abeeti Godaw, ne enta bolla miicaasa; kawotethata ubbaa leqisaasa.
PSA 59:9 Xoossaw, ne ta miixaa gidiya gisho, ta ne wolqan ammanetayis.
PSA 59:10 Ta Xoossay ba siiquwan taako yaana; ta Xoossay ta morketa xoonetethaa tana bessaana.
PSA 59:11 Ta asati dogonna mela ne enta wodhopa. Abeeti Godaw, nu gondalliyaw, ne wolqan enta laallanne kawusha.
PSA 59:12 Enta doonape keyiya nagaraa gisho enta inxarsaafe pultiya qaala gisho, banta otoruwan oyketo; enta baadethanne worduwa gisho,
PSA 59:13 ne hanquwan enta dhaysa; enta kumethi digga. Hessan Xoossay Yayqooba zeretha haareysanne sa7aa gaxaa gakanaw haareysi eretana. Salaha
PSA 59:14 Enti katamaa giddon yuuyishe pee7idi, kanatho laawishe simmoosona.
PSA 59:15 Enti miyaba demmanaw toylatoosona; kallona attida laawiya kana gidoosona.
PSA 59:16 Shin taani ne wolqaa sabbana; wonta ne siiquwa yexana. Neeni taw ta waayiya gallas, ta baqata attiya bessenne miixa.
PSA 59:17 Abeeti taw wolqa gidida Xoossaw, ta nena sabbana. Ta qosetada attiya bessaynne siiquwa tana bessiya Xoossay nena.
PSA 60:1 Masephexoomeninne Soobalan de7ida Araame asaara oletida wodenne Iyo7aabi guye simmidi Maxine zangaaran tammanne nam7u mukulu Edoome asaa wodhida wode Dawiti zammaareta halaqaas xaafida woosa “Ciishsha cuudhethe” geetetiya markatetha woosa. Abeeti Xoossaw, ne nuna aggadasa; nuna mentherthadasa. Ne nuna hanqetadasa; shin ha77i nuna zaara; mintha essa.
PSA 60:2 Ne biitta qaathadasanne za7isadasa; biittay kokoriya gisho, ne iya za7uwa kuntha.
PSA 60:3 Neeni ne asaa meto bessadasa; nuna gandigarsiya woyne ushshadasa.
PSA 60:4 New yayyeysati banta morke dongefe attana mela malla immadasa. Salaha
PSA 60:5 Ne siiqeysati attana mela, ne ushacha kushen nuna ashsha; nuna alla.
PSA 60:6 Xoossay ba geeshsha bessan haysada yaagis; “Taani xoonada Seekema biitta shaakana; Sukota zangaara wadhana.
PSA 60:7 Galadi tabaa; Minaaseyka taassa; Efreemey ta huuphe ashshiya birata qoobe; Yihudi ta kawota xam7aa.
PSA 60:8 Moo7abey ta meecetiya kere; Edoomey tabaa gideysa erisanaw, ta caammaa iya bolla wothayis; taani Filisxeeme xoonada gereerayis” yaagis.
PSA 60:9 Gimbetida katamaako tana oone efanay? Edoome gakanaw tana oone kaalethanay?
PSA 60:10 Abeeti Xoossaw, nuna aggiday nena gidikii? Abeeti Xoossaw neeni nu olanchotara olas keyaka.
PSA 60:11 Asa maadoy pathonna gisho, morketara oletanaw ne nuna maadda.
PSA 60:12 Xoossaa wolqan nu morketa xoonana; I nu morketa yedhana.
PSA 61:1 Dawita Mazmure. Abeeti Xoossaw, ne ta woosa si7a; ta woosa hayza.
PSA 61:2 Taani biitta gaxan de7ishin, ta wozanay ufaysi qanxida wode, ta nena xeegayis. Taape dhoqa zaallako, tana kaaletha.
PSA 61:3 Ne taw qotanne ta morketape naagetiya mino miixa.
PSA 61:4 Taani ne dunkaaniyan merinaw darkinaashin! Taani ne qefiya hapha garsan saro attarkinaashin! Salaha
PSA 61:5 Abeeti Xoossaw, ne ta qangetha si7adasa; ne suntha yayyeysatara issife taw laata immadasa.
PSA 61:6 Kawa laytha adussa; I yeletethaafe yeletethaa gakanaw de7o.
PSA 61:7 I Xoossaa sinthan merinaw kawoto; ne siiquwaninne ne tuman iya naaga.
PSA 61:8 Hessa gisho ta qangetha gallas gallas gathana; ne sunthaa ubba wode sabbana.
PSA 62:1 Dawiti Zammaareta Halaqa Edotaames Xaafida Mazmure. Xoossaa xalaalan ta shempo demmas; ta atotethay iyape yees.
PSA 62:2 Iya xalaali ta zaallanne ta atotetha; I ta qosetiya attiya bessi gidiya gisho dagammike.
PSA 62:3 Woddana haniya godaanne qaaxiya dirsi daaniya uraa wodhanaw, hinte awude gakanaw dendetii?
PSA 62:4 Enti iya boncho bessaafe denthanaw koyoosona; enti wordon ufaytoosona. Banta doonan anjoosona; shin banta wozanan baaddoosona. Salaha
PSA 62:5 Ta shempete! Xoossaa xalaala si77i gada naaga; ta ufaysay iyape yees.
PSA 62:6 Iya xalaali ta zaallanne ta atotetha; taani qosetiya bessi gidiya gisho dagammike.
PSA 62:7 Ta atotethaynne ta bonchoy Xoossana; I ta mino zaallanne ta miixaa.
PSA 62:8 Asaw, ubba wode Xoossan ammanetite; I hintew geshe gidiya gisho, hinte qofaa iyaw odite. Salaha
PSA 62:9 Asi, issi toho shempiya carko mela; gooba asi ubbay maaddonna hada. Mizaanen wothin enti carko mela; enti issi toho shempiya carkofe kawuyoosona.
PSA 62:10 Bonqen ammanetofite; kaysoti shiishidi duretethan otortofite. Hinte duretethay darikoka, hinte wozana iya bolla wothofite.
PSA 62:11 Xoossay issi toho odis; taani nam7u oda si7as; wolqi xoossasa.
PSA 62:12 Merinaa siiqoy Xoossaba; Abeeti Godaw, ne asa ubbaas iya oosuwada oosuwada immana.
PSA 63:1 Yihuda Mela Biittan De7iya Wode Dawita Mazmure. Abeeti Xoossaw, ne ta Xoossaa; ta wozanay nena laamotees; ta ashoyka nena amottees. Haathi dhayidi phalqetida biittada, ta asatethay nena saamotees.
PSA 63:2 Ta nena geeshsha bessan xeellas; ne wolqaanne ne bonchuwa taani be7as.
PSA 63:3 Ne siiqoy de7ope lo77iya gisho, ta inxarsay nena bonchana.
PSA 63:4 Ta de7o laythan nena galatana; ne sunthan ta kushiya pude miccana.
PSA 63:5 Asi lo77o kathi midi kalleysada ta nenan kallana. Taani ta inxarsan ufaysa yethan nena galatana.
PSA 63:6 Taani ta hiixan nena hassayayis; qamma kumethan nebaa qopayis;
PSA 63:7 Ne tana maaddiya gisho, Ta ne qefiya kuyan uttada ufaysan yexana.
PSA 63:8 Ta shempiya neera oyketasu; ne ushacha kushey tana oykidi naagees.
PSA 63:9 Shin tana wodhanaw koyeysati, biitta garsan moogetana.
PSA 63:10 Enti mashshas aadhidi imetana; enti suudhumes kaho gidana.
PSA 63:11 Shin kawoy Xoossan ufaytana. Xoossaa sunthan caaqiya ubbay iya galatana; shin wordanchota doonay gordetana.
PSA 64:1 Zammaareta Halaqaas yexetida Dawita Mazmure. Abeeti Xoossaw, ta un7a woosa si7a; ta morketa mandethafe; tana ashsha.
PSA 64:2 Nagaranchota maqofenne iitata duulataape tana gentha.
PSA 64:3 Enti banta inxarsaa mashsha mela leefidosona; iita qaalata donge toorada mallidi yeddoosona.
PSA 64:4 Enti qosetidi xillo asi banta dongiyan qohoosona; akeeki bayna dukoosona; yayyokona.
PSA 64:5 Enti banta iita maquwas issoy issuwa minthethoosona. Banta xihiya wothana bessa koyoosona; enti, “Nuna ooni be7anee?” yaagosona.
PSA 64:6 Enti iitabaa maqetishe, “Nuuni lo77o maqo maqetida” yaagosona; Hessi asa wozana qofi ciimmo gideysa bessees.
PSA 64:7 Shin Xoossay enta ba dongiyan dukana; enti akeekona madunxana.
PSA 64:8 Enta maquwa I enta bolla zaarana; enta be7iya ubbay huuphe qaathana.
PSA 64:9 He wode asa ubbay Xoossas yayyana; iya oosuwa odananne zaari zaari qopana.
PSA 64:10 Xilloti Godan ufayto; iyako baqatidi atto; wozana suureti ubbay iya galato.
PSA 65:1 Zammaareta Halaqaas Yexetida Dawita Mazmure. Abeeti Xoossaw, Xiyoonen new galati bessees; nuuni nu qangetha new gathana.
PSA 65:2 Neeni woosa si7iya gisho, asa ubbay neeko yoosona.
PSA 65:3 Nu nagaray nuna muukida wode, ne nuus atotethi immadasa.
PSA 65:4 Ne dooridaysatinne ne dabaaban daana mela neeko shiishida asi anjetidaysa. Nuuni ne son, ne geeshsha dunkaaniyan de7iya lo77oban kalloos.
PSA 65:5 Abeeti nu atotethaw, malaalsiya ne xillo oosuwan nuus zaara. Sa7aa gaxape gaxaa gakanaw, haahon de7iya ubbaas ne ufaysi.
PSA 65:6 Neeni ne wolqan dereta minthadasa; ne wolqaa dancadasa.
PSA 65:7 Neeni abba girsaanne beeta guntha si77i oothaasa; yarkiya asaa waasuwa irxisaasa.
PSA 65:8 Ne oothida malaata gisho, sa7aa gaxaa gakanaw de7iya asa ubbay new yayyana; dolohape wuloha gakanaw de7iya asa ubbaa ufaysadasa.
PSA 65:9 Ne ira immada biitta naagasa; daro dureyasa; asaas kathay dolana mela Xoossa shaafay haathan kumidaysa; hessada oothada ne giigisadasa.
PSA 65:10 Goshshas haathe immaasa; biitta shugisada ollaa kunthaasa. Ne iran zaarada irxisaasa; kathay dolana diccana mela anjaasa.
PSA 65:11 Laytha kalo laythi oothaasa; ne aadhiya bessa ubbay kumidi palahana.
PSA 65:12 Hentha bessata maatan kunthaasa; zumata ufaysi mayzaasa.
PSA 65:13 Ne hentha bessata dorsata kunthaasa; zangaara biittan kathi kunthaasa; enti ufaysan ililishe yexoosona.
PSA 66:1 Zammaareta Halaqaas Yexetiya Saba Mazmure. Biitta ubbay hinte qaala dhoqu oothidi, ufaysan Xoossaa galatite.
PSA 66:2 Xoossaa sunthaas bonchon yexite; boncho galataa iyaw immite.
PSA 66:3 Xoossaas haysada yaagite; “Ne oosoti waanidi malaalsii? Ne wolqay darida gisho, ne morketi yashshan ne sinthan kokoroosona.
PSA 66:4 Biitta ubbay nena goyinnees; nena sabbees; ne sunthaas galatan yexoosona” yaagite. Salaha
PSA 66:5 Haayite; Xoossay oothidaba be7ite; asaa giddon malaalsiya ooso oothis.
PSA 66:6 I abba haatha shaakidi, kase nu aawati Yordaanose shaafa banta tohon yedhidi mela biittara pinnidosona. Hessan I oothidaban nuuni ufaytida.
PSA 66:7 I ba wolqan merinaw haarees. Kawotethata ba ayfen xeellees; hessa gisho, makalleysati iya bolla dendofo. Salaha
PSA 66:8 Asaw, nu Xoossaa galatite; hinte iya galatiya galatay si7etto.
PSA 66:9 I nuna paxa wothis; nu kundonna mela naagis.
PSA 66:10 Abeeti Xoossaw ne nuna paacadasa; biri taman paacetidi geeyeysada ne nuna geeshshadasa.
PSA 66:11 Ne nuna xihen gelsadasa; nu zokon deexo toho wothadasa.
PSA 66:12 Morketi nu huuphera toggidi aadhanada oothadasa; Nu haatha giddoranne tama giddora aadhida; shin ha77i nuna inje bessi ehadasa.
PSA 66:13 Ta xuussa yarsho ekada ne keethaa gelana, ta qangetha gathana.
PSA 66:14 Ta metootida wode ta doonay gida qaala, ta inxarsaafe keyida qangetha gathana.
PSA 66:15 Ta new modhuwa, xuussa yarsho oothada shiishana. Marazeta sawo tonku giya yarsho oothada shiishana; Kormanne koleta new yarshana. Salaha
PSA 66:16 Hinteno, Xoossas yayyeysato, ubbay haa yidi, si7ite; Xoossay taw oothidaba ta hintew odana.
PSA 66:17 Ta qaala dhoqu oothada woossas; ta inxarsan iya galatas.
PSA 66:18 Taani wozani erishin nagara genthidaba gidiyako, Goday tana si7enna.
PSA 66:19 Shin Xoossay tuma tana si7is; ta oysha zaaris.
PSA 66:20 Xoossay ta woosa ixiboonna gisho, ba merinaa siiquwa tana diggiboonna gisho galatetto.
PSA 67:1 Zammaareta Halaqaas Diithan Yexetida Saba Mazmure. Xoossay nuus qadheto; nuna anjo; iya som7oy nu bolla poo7o. Salaha
PSA 67:2 Ne ogey biitta bolla, ne atotetha wolqay, kawotethata ubban ereto.
PSA 67:3 Abeeti Xoossaw, asay nena galato; asa ubbay nena galato.
PSA 67:4 Kawotethay malaaletidi ufaysan yexo; ayis giiko, neeni asaas xillotethan pirdaasa; sa7an de7iya kawotethata kaalethaasa. Salaha
PSA 67:5 Abeeti Xoossaw, asay nena galato; kawotethati ubbay nena galato.
PSA 67:6 Biittay kathi immana; Xoossay, nu Xoossay nuna anjis.
PSA 67:7 Xoossay nuna anjida gisho, biitta gaxaa gakanaw de7iya asay iya yayyo.
PSA 68:1 Zammaareta Halaqaas Yexetida Dawita Mazmure. Xoossay dendo; iya morketi laaleto; Iya ixeysati iya sinthafe baqato.
PSA 68:2 Cuyay carkora dendidi dhaysiya mela, muqaadi taman til7eysada, iitati Xoossaa sinthafe dhayo.
PSA 68:3 Shin xilloti hashshu go; Xoossaa sinthan ufayto; ufaysan ililo.
PSA 68:4 Xoossaas yexite; iya sunthaa sabbite; shaaran beysas oge kessite; iya sunthay Godaa; iya sinthan ufaytite.
PSA 68:5 Xoossay ba de7iya geeshsha bessan, yi7otas aawa; am7etas daynna.
PSA 68:6 Xoossay bizzatas soo asi immees; qasho keethan de7eyisata birshidi, duretethan wothees; shin makallanchoti qaaqa biittan de7oosona.
PSA 68:7 Abeeti Xoossaw, neeni ne asaa kaalethida wode, ne entara mela biitta kanthida wode, Salaha
PSA 68:8 Siina Xoossaa yuussaninne, Isra7eele Xoossaa qoncethan biittay qaaxis; saloy ira immis.
PSA 68:9 Abeeti Xoossaw neeni ira darsada bukisadasa; laddida biitta zaarada oorathaasa.
PSA 68:10 Ne asay yan duussu oykis; abeeti Xoossaw, ne keehatethan manqotas koshshiyaba giigisada immadasa.
PSA 68:11 Goday kiittis; daro Maccasati he kiitaa markatidosona.
PSA 68:12 Kawotinne enta olanchoti baqatidi guye simmidosona; son attida maccasati di7o shaaketidosona.
PSA 68:13 Phooliya worqa qefera de7iya, birape medhetida holle misile di77idi demmiya wode hinte dorsa kelen ayis zin7ideti?
PSA 68:14 Ubbaa danda7iya Xoossay kawota laallida wode, Xalmoona zumaa bolla shacha bukisis.
PSA 68:15 Baasane zumaw, daro xeeri de7iya Baasane zumaw,
PSA 68:16 Daro xeerati de7iya zumato, Xoossay doorida zumaa hinte ayis qanaatidi xeelleetii? Goday iyan merinaw daana.
PSA 68:17 Xoossaa ola para gaareti tammu mukulu toho tammu mukulan taybetees; Goday Siina zumaape ba geeshsha bessaa yis.
PSA 68:18 Di7etida darota ekidi, dhoqa keyis; asaape, hari attoshin makallanchotape imo ekis; Goday Xoossay yan daana.
PSA 68:19 Gallas gallas nu toohuwa tookiya Goday galatetto; Xoossay nuna ashsheysa. Salaha
PSA 68:20 Nu Xoossay nuna ashshiya Xoossaa gidennee? Hayqope ashshiya Xoossay iya.
PSA 68:21 Xoossay tuma ba morketa huuphiya tinchana; nagara ogen hemetiya asa, binaanan kametida enta liiphiya menthana.
PSA 68:22 “Taani hinte morketa Baasanepe zaarada ehana; ta enta ciimmo abbafe kessada guye ehana.
PSA 68:23 Hessika, ne morketa suutha ne tohoy yedhana melanne ne kanatika morke suuthaafe banta gishuwa laaccana melasa” yaagees Goday.
PSA 68:24 Abeeti Xoossaw, ne salpey, ta Xoossay ta kawoy salpey, Xoossa keethi geliya wode ubbaas bentees.
PSA 68:25 Yexeysati sinthana; diixeysati guyena; qassi karaabo baqiya geela7oti giddona.
PSA 68:26 Hinte “Xoossa gita shiiqon galatite; hinteno, Isra7eele asaw, Godaa galatite” yaagosona.
PSA 68:27 He salpiyan ubbaafe kaalo gidida Biniyaame kochay koyro taybetoosona. Kaallidi Yihuda halaqati banta cugan de7oosona; wursethan Zabloona halaqatinne Niftaaleme halaqati taybetoosona.
PSA 68:28 Abeeti Xoossaw, ne wolqaa qoncisa; kase ne nuus oothidaysada, ne minotetha bessa.
PSA 68:29 Hessa gisho, Yerusalaamen de7iya ne keetha kawoti yidi, new imota immana.
PSA 68:30 Do7ada maqa giddon de7iya Gibxe asata neeni seera; boorunne mara wude daaniya kawotethata ne hanqeta. Enti gulbatidi, banta bira new immana gakanaw, neeni enta seera; oletanaw yeemotiya asata laalla.
PSA 68:31 Kiitetida halaqati Gibxefe yaana; Tophey ba kushiya Xoossako miccana.
PSA 68:32 Hinteno, sa7aa kawotethato, Xoossas yexite. Salaha
PSA 68:33 Benipe de7iya salotape bollara beyisas; ba wolqaama girsan ba guntha sisseysas yexite.
PSA 68:34 Xoossaa wolqaaba awaajite; iya gitatethay Isra7eele bollana; iya wolqayka salona.
PSA 68:35 Xoossay ba geeshsha asaa bolla malaalsees; Isra7eele Xoossay ba asas minotethinne wolqa immees. Xoossay galatetto.
PSA 69:1 Dawita Mazmure Haathi taw qoodhe gakida gisho, abeeti Xoossaw, tana ashsha.
PSA 69:2 Eqiya bessi bayna ciimmon mitettas; ciimmo haatha giddo gelas; haatha zuley ta bollara aadhis.
PSA 69:3 Maado demmanaw waassashe daaburas; ta kottonoy melis. Ta Xoossaa xeellishin, ta ayfey teljumis.
PSA 69:4 Tana coo ixeysati ta huuphe binaanape daro; Wordon tana morkeysatinne dhaysanaw koyeysati daro; ta kaysotonnaba zaara gidoosona.
PSA 69:5 Abeeti Xoossaw, ta eeyatetha ne eraasa; ta balay neepe geemmibeenna.
PSA 69:6 Abeeti Ubbaafe Wolqaama Godaw, nena ufaysan naageysati ta gaason yeellatopo. Abeeti Isra7eele Xoossaw, nena minthidi koyeysati ta gaason kawuyofo.
PSA 69:7 Ta ne gisho cashshe danda7as; ta som7oy yeella ma7iday ne gishosa.
PSA 69:8 Taani ta ishatas imathe, ta aaye naytas allaga gidas.
PSA 69:9 Taani ne keethas mishetiya mishay tana tamada xuuggees; nena cayiya cashshay ta bolla wodhis.
PSA 69:10 Taani xooman tana kawushida wode, tana cayidosona.
PSA 69:11 Taani kayo ma7o ma7ida wode, entaw kaassas attas.
PSA 69:12 Katama pengen utteysatas zigrisas attas; mathoteysati tabaa yethi kessidosona.
PSA 69:13 Shin Godaw, ta nena woossayis; abeeti Xoossaw, ne dosiya wode, ne merinaa siiquwan, ne atotethan taw zaaro imma.
PSA 69:14 Silimon mitettonnaada tana ashsha; ta morketape tana ashsha, ciimmo haathan mitetethafe tana ashsha.
PSA 69:15 Di7o haathay tana muukofo; ciimmo haathay tana mittofo; ziqa ollay ba doona ta bolla gordofo.
PSA 69:16 Abeeti Godaw, ne merina siiquwa lo77otethan, taw zaaro imma; ne gita maarotan taako simma.
PSA 69:17 Ne aylliyafe ne som7uwa genthofa; taani un7an de7iya gisho taw elle zaaro imma.
PSA 69:18 Taako shiiqa; tana woza; ta morketape tana la77a kessa.
PSA 69:19 Ta cashshaa, yeellaanne kawushatethaa ne eraasa; ta morketa ubbaa ne be7aasa.
PSA 69:20 Cashshay tana hargancho oothis; taw qadhetiya asi koyas. Shin issi asika demmabike; tana minthethiya asi xeellas; shin bentibeenna.
PSA 69:21 Ta kathan ciiye walakidosona; ta saamuwas caala ushshi immidosona.
PSA 69:22 Enta gaytay entaw xihe gido; enta yarshoy entaw xihe gido.
PSA 69:23 Xeellonnaada enta ayfey goozeto; enta zokoy kuuno.
PSA 69:24 Ne hanquwa enta bolla tiga; suulliya ne sheney enta yedetho.
PSA 69:25 Enta kambey kaysi gido; enta dunkaaniyan de7iya asi dhayo.
PSA 69:26 Ne seeridaysata enti yedethidosona; ne madunxisidaysata enti yeessosona.
PSA 69:27 Enti nagaraa bolla nagara gujana mela aggaaga; ne maarotethaafe enta aybika gakofo.
PSA 69:28 Enti de7o maxaafape qusheto; xillo asaara mazgabetofo.
PSA 69:29 Ta waayeninne un7an de7ayis; abeeti Xoossaw, tana ashshada, saro bessan wotha.
PSA 69:30 Taani Xoossaa sunthaa mazmuren galatana; galata imon iya gitayana.
PSA 69:31 Hessi boora yarshofe, woyko kacaama korma yarshofe, aadhidi, Godaa ufaysees.
PSA 69:32 Naaqetidaysati hessa be7ana; ufaytana; hinteno, Xoossaa koyeysato, hinte wozanay minetto.
PSA 69:33 Goday manqota si7ees; qasho keethan de7iya ba asaa kadhenna.
PSA 69:34 Saloy, sa7inne abbay, iya giddon de7iya woxi qaaxiya ubbay Godaa galato.
PSA 69:35 Xoossay Xiyoone ashshana; Yihuda katamaa zaaridi keexana; asay yan daananne biittayka entaba gidana.
PSA 69:36 Iya aylleta nayti he biitta laattana; iya sunthaa doseysati yan daana.
PSA 70:1 Dawita Qofiso Mazmure Abeeti Xoossaw tana ashshanaw haa simma; abeeti Godaw, tana maaddanaw ellesa.
PSA 70:2 Tana wodhanaw koyeysati, yeellatonanne haniyaba dhayo. Ta qohetetha amotteysati, kawuyidi guye simmo.
PSA 70:3 Taako iyaw “hashshu! hashshu!” gidaysati xoonetida gisho yeellato.
PSA 70:4 Nena koyiya ubbay nenan ufaytonne malaaleto. Qassi ne atotetha dosiya ubbay, “Xoossay gitato” yaago.
PSA 70:5 Taani manqonne metootancho; abeeti Xoossaw, ellesada taako haaya. Ta maadeynne tana ashshey nena gidiya gisho; abeeti Godaw, gam7ofa.
PSA 71:1 Godaw, taani neeko baqatada attiya gisho, awudeka tana yeellayopa.
PSA 71:2 Ne xillotethan tana naaga; ne haytha taako zaara; tana ashsha.
PSA 71:3 Neeni ta ubba wode geemmada attiya zaalla taani geemmada attana mela mino miixaa gida; ee, neeni ta zaallanne ta miixa.
PSA 71:4 Ta Xoossaw, iitata kushepenne, qadhey bayna asatape tana ashsha.
PSA 71:5 Abeeti Godaw, ta na7atethafe doomada, neeni ta ufaysaanne ta ammanetetha.
PSA 71:6 Ta yeletida wodepe doomada nenan zempas; ta aaye ulope tana kessiday nena; taani ubba wode nena galatana.
PSA 71:7 Neeni ta qosetada attiya bessi gidida gisho, ta de7oy daro asaas leemiso gidis.
PSA 71:8 Gallasa ubban ta doonay ne galataninne ne bonchuwan kumis.
PSA 71:9 Taani cimida wode tana yeggofa; ta wolqay ixida wode tana aggofa.
PSA 71:10 Ta morketi ta bolla tobboosona; Tana wodhanaw koyeysati ta bolla maqetoosona.
PSA 71:11 Enti, “Xoossay iya aggis; yedethidi oykoos; iya ashshanay oonika baawa” yaagosona.
PSA 71:12 Xoossaw, taape haakofa ta Xoossaw, tana maaddanaw ellesa.
PSA 71:13 Tana mooteysati yeellatidi dhayo; Tana qohanaw koyeysati, yeellanne kawushe ma7o.
PSA 71:14 Shin taani ubba wode ufaysan nena naagana; zaara zaaradaka nena galatana.
PSA 71:15 Ne oothidaba ta taybanaw xoonetikoka, ta doonay gallas ubban ne xillotethaanne ne atotethaaba odana.
PSA 71:16 Taani Ubbaa Haariya Godaa wolqan yada; ne xalaala xillo gideysa awaajana.
PSA 71:17 Xoossaw, neeni ta na7atethafe doomada tana tamaarsadasa; ha77ika ne malaalsiya oosuwa ta odana.
PSA 71:18 Xoossaw ne wolqaanne ne minotethan yaa yeleta ubbaas odana gakanaw, taani cimada puulumikoka tana aggofa.
PSA 71:19 Xoossaw, ne xillotethay salo gakis; gitaba oothida Xoossi, ne meli oonee?
PSA 71:20 Neeni ta bolla daro meto ehadasa; gidoshin ta de7uwa zaarada ooraxisadasa; neeni tana biitta garsafe kessadasa.
PSA 71:21 Neeni ta bonchuwa darsadasa; tana zaarada minthethadasa.
PSA 71:22 Ta Xoossaw, ne tumatethaa gisho, ta nena diithan galatana. Abeeti Isra7eele geeshshaw, ta nena maasinqon sabbana.
PSA 71:23 Ta mettershay ufaysan dhoqu oothidi yexees; neeni tana ashshida gisho taani nena sabbana.
PSA 71:24 Tana qohanaw koyeysati yeellatida gishonne kawuyida gisho ta inxarsay ne xillo maaduwaba gallas ubban odana.
PSA 72:1 Solomone Mazmure Xoossaw, ne suure pirdaa kawas, nu xillotethaa kawa na7aas imma.
PSA 72:2 I ne asaas xillotethan pirdana; qohetidaysatas suuren daynnatana.
PSA 72:3 Dereti duretethi, zumati xillotetha ayfe ne asaas ayfo.
PSA 72:4 Kawoy qohetidaysata gisho mooteto; manqota ashsho; un7etheyisata mentho.
PSA 72:5 Xoossaw, I awadanne ageenada de7o; yeletethaafe yeletethaa gakanaw de7o.
PSA 72:6 Kawoy goshshan bukiya ira melanne biitta kalsiya puuse ira mela gido.
PSA 72:7 Iya laytha ubban xillo asati daayo; ageeni dhayana gakanaw sarotethi daro.
PSA 72:8 Abbaafe abba gakanaw, Efraxiisa shaafape sa7aa gaxa gakanaw I haaro.
PSA 72:9 Bazzon de7iya asati iya goyinno; iya morketi baana laaco.
PSA 72:10 Tarsesanne yuushoy abban teqetida biittata, kawoti iyaw giira giiro; Arabenne Tophe kawoti iyaw imota eho.
PSA 72:11 Kawoti ubbay iyaw gulbato; kawotethati ubbay iyaw kiiteto.
PSA 72:12 Iyako waassiya manqota, qohetidaysatanne maadoy baynayisata I ashshana.
PSA 72:13 Manqotasinne daaburanchotas I qadhetees; manqota shempuwa hayqope ashshees.
PSA 72:14 Enta suuthay iya sinthan al7o gidiya gisho, I, enta qohopenne iitape wozana.
PSA 72:15 Kawoy daro laythi gam7o; Arabe biitta worqay iyaw yo. Asay iya gisho ubba wode woosso; gallas ubban I anjeto.
PSA 72:16 Biittan kathi palaho; dereti kathan kametto. Libaanose deriya bolla kathi ayfiyada ayfo; denbi maatan kumiyada asay katamaa kumo.
PSA 72:17 Kawa sunthay merinaw de7o; awada ubba wode xeegetishe gam7o. Asa ubbay iya baggara anjetana; kawotethati iya “anjetidaysa” yaagana.
PSA 72:18 Malaalisiyaba barka oothiya Goday, Xoossay Isra7eele Xoossay galatetto.
PSA 72:19 Iya boncho sunthay merinaw galatetto; iya bonchoy sa7a ubbaa kumo.
PSA 72:20 Isseye na7aa Dawita woosay haysan poletis.
PSA 73:1 Asaafa Mazmure Tuma Xoossay Isra7eeles lo77o; wozana geeshshatas I keeha.
PSA 73:2 Shin ta tohoy dhubetanaw guuthu attis; ta tangoy hallixanaw matis.
PSA 73:3 Hessi haniday iita asatinne otoranchoti, duretishin taani be7ada qanaatida gishosa.
PSA 73:4 Enta waayey gakonna gisho, enta asatethay payyanne mino.
PSA 73:5 Enti hara asada waayetokona; hara asada meton shocetokona.
PSA 73:6 Hessa gisho, otoroy entaw qoodhe alleeqo mela; buqethi afilada ma7idosona.
PSA 73:7 Enta wozanay iitabaa pultees; enta qofay iita halchon kumis.
PSA 73:8 Enti qelqisoosona; iitabaa haasayoosona; banta otoruwan harata un7ethoosona.
PSA 73:9 Banta doona Xoossaa bolla dooyosona; banta inxarsaa asa bolla adussosona.
PSA 73:10 Hari attoshin, Xoossaa asay entako simmana; enti odiyaba eeson ammanana.
PSA 73:11 Enti, “Xoossi ayko erii? Ubbaafe Dhoqa Xoossaas eratethi de7ii?” yaagosona.
PSA 73:12 Hiza iitati haysa mela; ubba wode injetin de7oosona; enti guji guji duretoosona.
PSA 73:13 Hiza taani ta wozanaa geeshshatethan naagiday, xillotethi bessanaw ta kushiya meecetiday mela.
PSA 73:14 Gallasa kumethi taani meton shocetas; wonta wonta seeretas.
PSA 73:15 Taani iita asatada odetidaako, ne asaas ammanetona attanashin.
PSA 73:16 Taani ha ubbaa eranaw qopiya wode, taw deexo gidis.
PSA 73:17 Hessika taani Xoossa keethaa gelana gakanawunne iita asata wursetha qaada akeekana gakanaasa.
PSA 73:18 Tuma neeni enta hallixiya bessan utisadasa; enti kundidi dhayana mela oothaasa.
PSA 73:19 Enti ellesidi dhayidosona; dagaman issoy attonna wuridosona.
PSA 73:20 Amuhoy barkiya wode baleteysada, abeeti Godaw, neeni dendiya wode, enti dogetana.
PSA 73:21 Taani yilotida wodenne ta wozanan cametida wode,
PSA 73:22 akeekona eeya asi gidas; ne sinthan mehe gidas.
PSA 73:23 Shin taani ubba wode neera de7ayis; ta ushacha kushiya neeni oykadasa.
PSA 73:24 Ne zoriyan tana kaalethaasa; wursethan tana bonchon ekaasa.
PSA 73:25 Taw salon neepe attishin, hari ooni de7ii? Taani neepe attishin, sa7an haraa amotike.
PSA 73:26 Ta wolqaynne ta wozanay daaburanaw danda7ees; shin Xoossay ta wozanaa minotethaanne merinaw tana gakida saamaa.
PSA 73:27 Neepe haakeysati dhayana; nena kaddeyisata ubbaa ne wursana.
PSA 73:28 Shin taw Xoossaako shiiqoy lo77o; iya ooso ubbaa taani odana mela, Ubbaa Haariya Godaa qosetidi attiya besse oothas.
PSA 74:1 Asaafa Timirte Akeekan xaafida ginxo. Xoossaw neeni nuna ayis merinaw aggadii? Ne qooruwan de7iya ne dorsata bolla ne hanqoy ayis eexidee?
PSA 74:2 Neeni beni doorida asaa, new buzo oothada wozida kochata hassaya; neeni de7ida Xiyoone zuma qopa.
PSA 74:3 Laaletida ne keethaa yada xeella; morketi yan de7iyaba ubbaa dhaysidosona.
PSA 74:4 Ne morketi ne keethan, “Nu xoonida” yaagidi gereeridosona. Xoono malaata gidida banta bandira essidosona.
PSA 74:5 Enti mithi qanxanaw wora giddon eqidi, banta kalta denthida asata daanosona.
PSA 74:6 Enti kushe hiillan alleeqida oosota ubbaa, banta kaltaaninne naariqan mentherethidosona.
PSA 74:7 Ne keetha taman xuuggidi dhaysidosona; ne sunthay xeegetiya bessaa tunisidosona.
PSA 74:8 Banta wozanan, “Nu kumethi dhaysana” yaagidosona; biittan de7iya asi Xoosse goyinniya bessata taman xuuggidosona.
PSA 74:9 He wode malaati nuus imetenna; nabeyka deenna. Hessi awude gakanaw gam7aneko, eriya asi nu giddon baawa.
PSA 74:10 Xoossaw, ne morketi awude gakanaw, ne bolla qelqisanee? Enti ne sunthaa merinaw cayanee?
PSA 74:11 Ne ushacha kushiya ayis shiisha ekay? Ne ushacha kushiya ne afilaa giddofe kessada enta dhaysa.
PSA 74:12 Gidoshin, abeeti Xoossaw, neeni benipe ta kawa; ne daro wode ashshadasa.
PSA 74:13 Ne gita wolqan abba shaakadasa; iya giddon de7iya do7aa huupheta doncadasa.
PSA 74:14 Leewataane geetetiya dawiya huupheta doncada, iya ashuwa bazzon de7iya medhetethatas kathi oothada immiday nena.
PSA 74:15 Neeni pultota dooya yeddadasa; ubba wode goggiya shaafata melisadasa.
PSA 74:16 Gallasay nebaa; qammayka nebaa; awanne ageena enta bessan wothiday nena.
PSA 74:17 Biittas zawa wothiday, balgonne bone medhiday nena.
PSA 74:18 Abeeti Godaw, ne morketi nena waati qelqisidaako, eeya asati ne sunthaa waati cayidaako hassaya.
PSA 74:19 Ne holliya shempuwa do7aas aathada immofa; metootanchota merinaw dogopa.
PSA 74:20 Nu biittan de7iya dhuma bessi ubbay makallanchotan kumida gisho, ne nuus caaqida caaquwa qopa.
PSA 74:21 Qohetidaysata yeellayopa; manqotinne metootanchoti ne sunthaa galato.
PSA 74:22 Abeeti Xoossaw, denda; mooteta; gallas kumethi eeyati nena qelqiseysa hassaya.
PSA 74:23 Ne morketi ne bolla waassiya waasuwanne nena ixeysati ceeqetiya ceequwa akeeka.
PSA 75:1 Asaafi zammaareta Halaqaas, “Dhaysofa” Geetetiya Diitha Cuudhethan Yexida Mazmure. Abeeti Xoossaw, new galata immoos; ne sunthay mata gidiya gisho nena galatoos; asay ne malaalsiya oosuwa odoosona.
PSA 75:2 Xoossay haysada yaagees; “Taani pirda immiya wode dooras; suure pirdey tana.
PSA 75:3 Biittaynne iyan de7iya ubbay qaaxikoka, iya tuussaa mintha essey tana. Salaha
PSA 75:4 Taani otoranchota, ‘Otortofite’; iitata, ‘Hinte kaciya bessofite.’
PSA 75:5 ‘Hinte kaciya salo denthofite; qoodhe qaathidi haasayopite’ ” yaagana.
PSA 75:6 Bonchoy dolohape woyko wulohape woyko mela biittafe yeenna.
PSA 75:7 Shin suure pirdey Xoossaa; I issuwa bolla pirdees; hankuwa shatinthees.
PSA 75:8 Xoossaa kushen issi wanci de7ees; he wancay Xoossaa hanqo woyne ushshan kumidi uttis. I he ushshafe tigin, sa7an de7iya iita asati hessa uyana; enti orcuwa ashshona xiiphidi uyana.
PSA 75:9 Shin taani Yayqooba Xoossaaba odana; iya merinaw sabbana.
PSA 75:10 I, iita asata kaciya menthana; shin xillota kacey dhoqu dhoqu gaana.
PSA 76:1 Asaafi Zammaareta Halaqaas Diithan Yexida Mazmure. Xoossay Yihudan eretis; iya sunthay Isra7eelen gita.
PSA 76:2 Iya dunkaaney Saalemana; I de7iya bessay Xiyoonena.
PSA 76:3 Yan xongetiya morke dongiya, gondalle, mashshenne ola miisheta mentherethis. Salaha
PSA 76:4 Abeeti Xoossaw, ne bonchoy ay mela gite! Neeni ne morketa xoonada zumaape simmiya wode, ne teemay ay mela yashshi!
PSA 76:5 Gooba tooranchoti bonqetidosona; enti wolqaama dhisko dhiskidosona; entafe issoyka ba kushiya denthibeenna.
PSA 76:6 Abeeti Yayqooba Xoossaw, ne seerida wode, para asatinne parati kundidi attidosona.
PSA 76:7 Shin abeeti Xoossaw, neeni yashshaasa; ne hanqoy suulliya wode, ne sinthan oone eqanay?
PSA 76:8 Neeni pirdaa salope sissida wode, biittay dagaman si77i gis.
PSA 76:9 Neeni biittan qohetida asaa ashshanawunne entaw pirdanaw dendiya wode hessi hannis. Salaha
PSA 76:10 Ne ase hanqikoka new boncho gidees; Olape attida asati ne ba7aale bonchana.
PSA 76:11 Godaas hinte Xoossaas qangethi gathite; hinteno iya matan de7iya kawotethato, yashshiya iyaw imota ehite.
PSA 76:12 I halaqata ayyaana kawushshees; wolqaama kawotaka daganthees.
PSA 77:1 Asaafi Zammaareta Halaqa Edotaames Xaafida Mazmure. Taani Xoossaa maggannayis; tana si7a gada iyako waassayis.
PSA 77:2 Ta metuwa gallasan Godaa koyas; qamma kumethi shempoy bayna ta kushiya miccas; gidoshin, ta shempiya minnanaw danda7abuku.
PSA 77:3 Taani Xoossaba qopiya wode oolayis; taani wotha denthida wode ta shempoy daaburees. Salaha
PSA 77:4 Qamma kumethi tana dhisko diggada aysadasa; ta un7etida gisho odetanaw danda7abike.
PSA 77:5 Taani aadhida gallasata qopas; kase laythata hassayas.
PSA 77:6 Taani qamma gita qofan aqas; ta wozanan wotha denthashe, haysada yaagada tana oychas;
PSA 77:7 “Xoossay nuna merinaw aggideyee? hizape guye I nuus keeheneyee?
PSA 77:8 Iya siiqoy attideyee? I odida qaala merinaw poleneyee?
PSA 77:9 Xoossay ba maarota dogideyee? Ba qadhiya hanqon laammideyee?” yaagada oychas. Salaha
PSA 77:10 Ubbaafe Dhoqa Xoossaw, tana un7ethiday, ne ushacha kushiyan nuna maado aggidaysa.
PSA 77:11 Godaa oosota taani qopana; I beni oothida malaalsiya oosota hassayana.
PSA 77:12 Ne oosota taani zaara zaarada qopana; ne wolqaama oosota taani wotha denthana.
PSA 77:13 Abeeti Xoossaw, ne ogey geeshshi; ne mela gita Xoossi oonee?
PSA 77:14 Neeni malaalsiyaba oothiya Xoossaa; asaa giddon ne wolqaa qoncisaasa.
PSA 77:15 Ne asaa, Yayqoobanne Yoosefa kochaa ne qesiyan wozadasa. Salaha
PSA 77:16 Abeeti Xoossaw, haathati nena be7idi yayyidosona; abba ciimmotika kokoridosona.
PSA 77:17 Shaarati haathe duge tigidosona; daday salon guummis; ne wol7anthay yan han wol7amis.
PSA 77:18 Ne dadaa guunthay uushuwa giddon guummis; ne wol7anthay sa7aa poo7isis; biittay qaaxis; kokoris.
PSA 77:19 Neeni abba giddora hemetaasa; ciimmo abba giddora kanthaasa; shin ne tohoy yedhida bessay bentenna.
PSA 77:20 Muse kushennine Aarona kushen ne asaa dorsa wudeda kaalethadasa.
PSA 78:1 Asaafi Akeekan Xaafida Ginxo Ta asaw, ta timirtiya si7ite; ta doonape keyiya qaala hayzidi si7ite.
PSA 78:2 Taani ta doona leemison dooyana; benipe geemmida xuura qoncisana.
PSA 78:3 Nuuni si7idaysanne eridaysa, nu aawati nuus odidaysata odana.
PSA 78:4 Hessata nuuni enta naytape qosoko; Godaas bessiya galataa, iya wolqaanne malaalsiya iya oosuwa, yaana yeletas odana.
PSA 78:5 I Yayqooba zerethaas kiitaa, Isra7eele asaas higgiya immis. Kase nu aawati banta nayta he higgiya tamaarsana mela kiittis.
PSA 78:6 Kaalliya yeletay hessa erana mela, enta naytika banta naytas buroo yeletana naytas erisanaasa.
PSA 78:7 He wode enti Xoossan ammanetena; I oothidaba balokona; iya kiitaa naagana.
PSA 78:8 Enti kase banta aawatada wozana muume yeleta, geellanne ammanetona yeleta, Xoossan minnidi eqenna yeleta gidokona.
PSA 78:9 Efreema asay donge dancikoka, ola gallas guye simmidosona.
PSA 78:10 Enti Xoossaa caaquwa naagibookona; iya higgiyan hemetonna ixidosona.
PSA 78:11 Enti I oothida oosuwanne I bessida malaata dogidosona.
PSA 78:12 I enta aawata sinthan Gibxe biittan, Xo7aane Denban malaata oothis.
PSA 78:13 Abbaa shaakidi giddora enta pinthis; haatha shaakidi yan han godada essis.
PSA 78:14 I enta gallas shaaran, qamma tama poo7on kaalethis.
PSA 78:15 I mela biittan zaalla phalqidi, abbada daro haathi enta ushshis.
PSA 78:16 Zaallafe haathe pultisidi, shaafa haathada gogisis.
PSA 78:17 Shin enti iya bolla nagara gujidi oothidosona; Ubbaafe Dhoqa Xoossaa bolla mela biittan makallidosona.
PSA 78:18 Banta amotida kathaa oychidi, Xoossaa erishe paacidosona.
PSA 78:19 Enti Xoossaa bolla haysada yaagidi haasayidosona; “Mela biittan Xoossay nuus kathi giigisanaw danda7ii?
PSA 78:20 Zaalla shocin pultoy keyidi shaafa haathi goggis; shin I nuus kathi immanaw danda7ii? Woyko ba asaas asho immanaw danda7ii?” yaagidosona.
PSA 78:21 Goday hessa si7ida wode daro hanqetis; Yayqooba kochata bolla tami eexis; Isra7eele bolla iya hanqoy daris.
PSA 78:22 Hessika enti Xoossan ammanibookona; woyko iya ashuwan ammanetibokona.
PSA 78:23 Gidoshin, dhoqa saluwa kiittis; salo pengiya dooyis.
PSA 78:24 Enta muzanaw manna bukisis; salo kathaa entaw immis.
PSA 78:25 Kiitanchota kathi asay mis; Xoossay entaw miyaba darsidi immis.
PSA 78:26 Doloha carkoy carkana mela oothis; ba wolqan dugeha carkuwa denthis.
PSA 78:27 I asaas asho biitta kessis; paalliya kafota abba gaxa shafeda bukisis.
PSA 78:28 Enti de7iya bessan, dunkaaniya yuushon wodhisis.
PSA 78:29 Enti amotidaysa entaw immis; midi banta ganjiya gathidosona.
PSA 78:30 Shin enti banta amuwa aathona de7ishin, ashoy enta doonan buroo de7ishin,
PSA 78:31 Xoossaa hanqoy enta bolla wodhis; enta giddofe wolqaama asata wodhis; Isra7eelepe na7atethata dhukis.
PSA 78:32 He ubbay haninka nagara ooso aggibokona; daro malaata oothinka ammanibookona.
PSA 78:33 Hessa gisho, I enta gallasata hada oothis; enta laythata dagaman ongis.
PSA 78:34 Xoossay entafe baggaa wodhiya wode iya koydosona, banta nagaraa paaxidi iyako simmidosona.
PSA 78:35 Xoossay enta zaalla gideysa, Ubbaafe Dhoqa Xoossay enta wozeysa, gideysa hassayidosona.
PSA 78:36 Shin enti banta inxarsan wordotidosona; banta doonan cimmidosona.
PSA 78:37 Enta wozanay Xoossan minnidi eqenna; iya caaquwas ammanetokona.
PSA 78:38 Shin I enta maaris enta nagaraa atto gis; enta dhaysibeenna. Daro wode ba hanquwa teqis; ba gaduwa kumethi enta bolla yeddibeenna.
PSA 78:39 Enti hayqiya asho gideysanne keyidi simmonna shempo gideysa akeekis.
PSA 78:40 Enti mela biittan iya bolla aapun toho makallidona! Mela biittan iya aapun toho lancisidonaa!
PSA 78:41 Enti zaari zaaridi Xoossaa paacidosona; Isra7eele Geeshshaa yiloyidosona.
PSA 78:42 Entana morketa kushepe ashshida gallasaa, un7ethiya asaape wozida wolqaa dogidosona.
PSA 78:43 I Gibxen oothida malaata, Xo7aane Denban oothida malaalsiya oosuwa hassaybookona.
PSA 78:44 Enta shaafa haathata suuthu laammis; hessa gisho, Gibxe asay shaafatape uyanaw danda7ibookona.
PSA 78:45 Enta waaysiya udunxetanne enta biitta dhaysiya shodheta kiittis.
PSA 78:46 Dolida kathaa duggos, enti daaburida ayfiya booles immis.
PSA 78:47 Enta woyniya shachan, enta balasiya carkon dhaysis.
PSA 78:48 Enta meheta shachan wodhis; enta dorsata dadan wursis.
PSA 78:49 Dhaysiya kiitancho cugara, ba suulliya hanquwa, yiluwa, ixuwanne gaduwa enta bolla yeddis.
PSA 78:50 Ba hanquwas oge giigisis; enta dhayos aathidi immis; enta hayqope ashshibeenna.
PSA 78:51 Gibxe bayra nayta ubbaa shocis; Kaama dunkaanen koyro nayta wodhis;
PSA 78:52 Shin ba asaa dorsada kessis; wudeda mela biittan heemmis.
PSA 78:53 I enta saro kaalethida gisho babibookona; shin enta morketa abbay mittis.
PSA 78:54 I enta ba geeshsha biitta, ba ushacha kushen xoonidi oykida zuma bolla ehis.
PSA 78:55 I enta sinthafe kawotethata gooddis; enta biitta Isra7eele kochatas laata oothidi shaakis; ba asaas enta keethaa immis.
PSA 78:56 Gidoshin, Ubbaafe Dhoqa Xoossaa bolla makallidosona; iya paacidosona; iya higgiya kiitetibookona.
PSA 78:57 Enti banta aawatada geellatanne minnidi eqonna asi gididosona; wobe toorada wora wodhidosona.
PSA 78:58 Dhoqa goyinno bessatan iya yiloyidosona; banta eeqatara iya qanaatisidosona.
PSA 78:59 Xoossay hessa si7ida wode shenetis; Isra7eele ubbaa kadhis.
PSA 78:60 Seelon I de7iya ba bessaa, asaa giddon I de7iya ba dunkaaniya aggis.
PSA 78:61 Xoossa wolqaasinne bonchuwas malaata gidida Taabotiya morketa kushen aathidi immis.
PSA 78:62 I ba asaa bolla shenetis; enta mashshas aathidi immis.
PSA 78:63 Na7atethati ubbay taman meetetidosona; geela7oti azina gelonna attidosona.
PSA 78:64 Enta kahineti mashshan wuridosona; enta macheti yeekonna mela digetidosona.
PSA 78:65 Goday dhiskofe barkiya asada dendis; woyne ushsha mathoy aadhida asada hanis.
PSA 78:66 I ba morketa guye zaaridi shocis; enta merinaw yeellayis.
PSA 78:67 Yoosefa dunkaaniya kadhis; Efreema kochaa dooribeenna.
PSA 78:68 Shin Yihuda kochaanne I dosiya Xiyoone deriya dooris.
PSA 78:69 Ba keethaa saloda dhoqu oothidi keexis; sa7ada merinaw essis.
PSA 78:70 Ba aylliya Dawita dooridi, dorse heemmiya bessaafe ekis.
PSA 78:71 Dorse heemmiya bessafe denthidi, ba asaa Yayqooba, ba laata Isra7eele henthanaw ehis.
PSA 78:72 Dawiti enta suure wozanan heemmis; ba cincatethan kaalethis.
PSA 79:1 Asaafa Mazmure Xoossaw, ayhude gidonna asay, ne biitta bolla dendidosona; Ne geeshsha keethaa tunisidosona; Yerusalaame laallidosona.
PSA 79:2 Ne aylleta aha salo kafotas, ne geeshshata ashuwa sa7a do7atas immidosona.
PSA 79:3 Enta suuthaa Yerusalaame yuushon haathada gussidosona; enta aha moogiya asi dhayis.
PSA 79:4 Nu shoorotas nuuni miichas, nu heeran de7iya asaas qelqisethas attida.
PSA 79:5 Godaw, hessi awude gakanaw hananee? Neeni nu bolla merinaw hanqetadii? Ne hanqoy tamada eexishe daaneyee?
PSA 79:6 Nena eronna dereta bolla, ne sunthaa xeegonna kawotethata bolla ne hanquwa zaara.
PSA 79:7 Hessika enti Yayqooba mida gishonne enti de7iya bessaa dhaysida gishosa.
PSA 79:8 Nuuni daro metootida gisho, nu mayzata iitatethaa nu bolla taybopa; eeson ne maarota nuus kiitta.
PSA 79:9 Abeeti nuna ashshiya Xoossaw, ne boncho sunthaa gisho nuna maadda. Ne suntha gisho nuna ashsha; nu nagaraa atto ga.
PSA 79:10 Dereti, “Enta Xoossay awun de7ii?” ayis gaanee? Ne aylleta suuthaa enti gussida gisho; neeni halo keyeysa nu xeellishin, enta giddon qoncisa.
PSA 79:11 Qasho asaa ooley ne sinthe gako; hayqo pirdetidaysata ne wolqaa gitatethan ashsha.
PSA 79:12 Godaw, nu shooroti nena toochida gisho, laapun kushe halo keyada enta ki7on idintha.
PSA 79:13 He wode nuuni ne asay, ne dorsati, merinaw nena galatana. Yeletethaafe yeletethaa gakanaw, ne peeshsha odana.
PSA 80:1 Asaafi Zammaareta Halaqaas Xaafida Mazmure “Ciishsha cuudhethi” geetetiya markatetha mazmure Yoosefa dorsa wudeda kaaletheyso, Isra7eele henthanchuwaw nuna si7a. Kiruubeta bolla de7iya araatan uttidayso, ne poo7uwan qonca.
PSA 80:2 Efreema, Biniyaamenne Minaase sinthan benta; ne wolqaa qaathada nuna ashshanaw haaya.
PSA 80:3 Xoossaw nuna zaara; nu attanaada ne som7uwa nuus poo7isa.
PSA 80:4 Ubbaafe Wolqaama Godaw Xoossaw, ne asaa woosa bolla awude gakanaw shenetay?
PSA 80:5 Neeni enta yeeho kathada muzadasa; afuthu haathada ushshadasa.
PSA 80:6 Nu shooroti nu biitta ekanaw banta giddon oyaana mela oothadasa; nu morketi nu bolla miicidosona.
PSA 80:7 Ubbaafe Wolqaama Xoossaw nuna zaara; nu attanaada ne som7uwa nuus poo7isa.
PSA 80:8 Gibxefe woyne ehadasa; kawotethata yedethada, enta biittan iya tokadasa.
PSA 80:9 Neeni biitta qeexadasa; I xapho yeddidi, daayidi biitta gakis.
PSA 80:10 Dereti iya kuyan, Libaanose zigati iya tashiyan kametidosona.
PSA 80:11 Ba tasheta Medetiraane Abbaa gakanaw, ba xeerata Efraxiisa shaafa gakanaw yeddis.
PSA 80:12 Yaatin, ogera aadhiya ubbay iya ayfiya duuthanaada, iya yuushon de7iya gimbiya ayis laalladii?
PSA 80:13 Bazzo gudunthoy iya bolla gupis; wora do7ati iya midosona.
PSA 80:14 Ubbaafe Wolqaama Xoossaw nuuko simma; salora duge xeellada; ha woyniya naaga.
PSA 80:15 I ne ushacha kushey tokida xapho; neeni new dichida puute.
PSA 80:16 Ne morketi ne woyniya qanxidosona; taman xuuggidosona; enta ne hanquwan dhaysa.
PSA 80:17 Ne kushey ne ushachan de7iya asaa, neeni new dichida asaa naago.
PSA 80:18 Hiza nuuni guye simmoko; Nuna paxa wotha; ne sunthaa galatana.
PSA 80:19 Ubbaafe Wolqaama Godaw Xoossaw, nuna zaara; nu attanaada ne som7uwa nuus poo7isa.
PSA 81:1 Zammaareta halaqaas xaafetida Suusul7en yexetiya Asaafa Mazmure Nuus wolqa gidida Xoossaas ufaysan yexite; Yayqooba Xoossaas ililite.
PSA 81:2 Yethi doomite; karaabo baqite; diithaninne maasinqon yexite.
PSA 81:3 Ageeni xeeriya wode, qassi dhuma uttiya wode, ba7aale gallasan moyze punnite.
PSA 81:4 Hessi Isra7eele biittan higge; Yayqooba Xoossay immida woga.
PSA 81:5 I Gibxe biitta shocida wode, Yoosefa kochaas ha wogaa awaajis. Eronna doonan haysada yaagishin si7as;
PSA 81:6 “Hinte hashiya toohope, hinte kushiya keeshepe shempisas.
PSA 81:7 Hinte metuwan tana xeegideta; ta hintena ashshas; taani dechiya shaara giddofe hintena allas; Mariba pultuwa matan ta hintena paacas.” Salaha
PSA 81:8 “Ta asaw, ta hintena seereysa si7ite; Isra7eele asaw hinte tana si7iko aybee?
PSA 81:9 Hinte giddon allaga xoossi de7opo; hara xoosse goyinnofite.
PSA 81:10 Gibxe biittafe hintena kessida, taani Godaa hinte Xoossaa; Ne doona loythada hakanka; taani iyan kunthana.
PSA 81:11 “Shin ta asay tana si7ibookona; Isra7eeley taw kiitetibeenna.
PSA 81:12 Hessa gisho, enti banta qofaa kaallana mela, simmonna enta wozanaas aathada immas.
PSA 81:13 Ta asay tana si7idaako aybe; Isra7eeley ta ogiya kaallidaako aybi de7i;
PSA 81:14 Taani enta morketa eeson xoonanashin; enta ixeyisata bolla ta kushiya denthanashin.
PSA 81:15 Godaa ixeysati iya sinthan hokana; enta seeray merinaw gidana.
PSA 81:16 Taani hintena lo77o giste muzana; zaallafe keyiya eessan hintena kalsana.”
PSA 82:1 Asaafa Mazmure Xoossay salo shiiquwa giddon, xoossati shiiqida bessan haysada yaagidi pirdees.
PSA 82:2 “Hinte awude gakanaw wobbe pirdanee? awude gakanaw iitata bagga gidanee?” Salaha
PSA 82:3 Metootanchotasinne aawi baynaysatas mootetite; manqotanne qohetida asaa maata naagisite.
PSA 82:4 Daaburanchotanne metootanchota ashshite; iitata kushepe enta yegisite.
PSA 82:5 Hintew eratethinne akeeki baawa; enti dhuman simeretoosona; biitta baasoti qaaxidosona.
PSA 82:6 Taani, “Hinte xoossata; ubbay Ubbaafe Dhoqa Xoossaa nayta.
PSA 82:7 Gidoshin hinte asi hayqeysada hayqana; hara halaqati kundeysada kundana” yaagas.
PSA 82:8 Xoossaw, denda; biitta bolla pirda; kawotethati ubbay nebaa.
PSA 83:1 Asaafa Mazmure Abeeti Xoossaw, si77i goopa; Xoossaw sirphi goopa; muumopa.
PSA 83:2 Ne morketi ne bolla dendeysa, nena ixeysati ne bolla makalleysa be7a.
PSA 83:3 Enti ne asaa bolla geeman duulatoosona; neeni dosiya asaa bolla maqetoosona.
PSA 83:4 “Haayite, enta kawotethaa dhaysoos; Isra7eele geetetiya sunthay merinaw hassayetonna mela oothoos” yaagosona.
PSA 83:5 Enti issi wozanan gididi maqetoosona; ne bolla dendanaw caaqidosona.
PSA 83:6 Enti, Edoomenne Isma7eela asaa, Moo7abenne Aggaari kochata;
PSA 83:7 Gebaalanne Amoone asaa, Amaaleqa, Filisxeemenne Xiroosa asaa.
PSA 83:8 Asooreti entara gahetidosona; Asooreti Looxe asaas wolqaama maado gididosona. Salaha
PSA 83:9 Neeni, Midiyaame, Sisaaranne Yabina bolla Qisoona shaafan oothidaysada enta bolla ootha.
PSA 83:10 Enti Endooran dhayidosona; enta ahay denban wooqidi attis.
PSA 83:11 Enta halaqata Oreebanne Zebada ootha; enta haareyisata Zabheelanne Silmanada dhaysa.
PSA 83:12 Enti, “Nuuni Xoossaa asaa laata nuus buzo oothana” yaagidosona.
PSA 83:13 Ta Xoossaw, enta baanada laalla; carkoy efiya suullada ootha.
PSA 83:14 Tami wora meysada, tama lacoy deriya xuuggeysada,
PSA 83:15 ne uushuwan enta yedetha; ne gotiyan enta dagantha.
PSA 83:16 Godaw, asay ne sunthaa koyana mela, enta som7uwa yeella mayza.
PSA 83:17 Enti merinaw yeellato; hirgo; kawuyidi dhayo.
PSA 83:18 Ne sunthay Godaa gidida ne xalaali, Ubbaafe Dhoqa Xoossay, sa7a ubbaa haareysa enti ero.
PSA 84:1 Zammaareta halaqaas Qore nayti xaafida Suusul7en yexetiya mazmure Ubbaafe Wolqaama Godaw, ne de7iya bessay waani lo77i!
PSA 84:2 Taani Godaa keetha dabaaba laamotayis; ta kumetha asatethay de7o Xoossaas ufaysan yexees.
PSA 84:3 Ubbaafe Wolqaama Godaw, ta kawaw, ta Xoossaw, ne yarsho bessa matan buube kafoy baw de7iya bessi demmasu; holleyka ba nayta wothiya keethe keexasu.
PSA 84:4 Ne keethan de7eysatinne merinaw nena sabbeysati anjetidaysata. Salaha
PSA 84:5 Nena banta minotethi ootheysati, banta wozanaa Xiyoone ogiya bolla, wotheysati anjetidaysata.
PSA 84:6 Enti yeeho zangaarara aadhiya wode, he bessay pultoy keyiya bessi gidis; torche iray bukidi ollaa kunthees.
PSA 84:7 Enti wolqa bolla wolqa guji guji baana; issoy issoy Xoossa sinthan Xiyoonen bentana.
PSA 84:8 Ubbaafe Wolqaama Godaw Xoossaw, ta woosa neeni si7a; Yayqooba Xoossaw hayza. Salaha
PSA 84:9 Xoossaw, nu gondalliya be7a; ne doorida kawa keeha ayfen xeella.
PSA 84:10 Taani hara bessan mukulu gallas daanape, ne dabaaban issi gallas de7eysi taw lo77o. Iitata dunkaaniyan daanape, Xoossa keetha penge naagoy taw lo77o.
PSA 84:11 Godaa Xoossay nuus gondallenne poo7o; nuus bonchonne keehatethi immees; suuretethan hemeteyisata lo77oba diggenna.
PSA 84:12 Ubbaafe Wolqaama Godaw, nenan ammaneteysati anjetidaysata.
PSA 85:1 Zammaareta halaqaas xaafetida Qore nayta mazmure Godaw, neeni ne biittas keehadasa; Yayqooba kochaa di7ope guye zaaradasa.
PSA 85:2 Ne asaa naaquwa atto gadasa; enta nagaraa ubbaa kammadasa. Salaha
PSA 85:3 Ne yiluwa aggadasa; suulliya ne hanquwafe simmadasa.
PSA 85:4 Abeeti nuna ashshiya Xoossaw, nuna guye zaara; nu bolla lancidaysa agga.
PSA 85:5 Neeni nu bolla merinaw shenetayee? Ne hanquwafe simmikiyee?
PSA 85:6 Nuuni nenan ufaytana mela, nuna zaarada oorathikiyee?
PSA 85:7 Abeeti Godaw, ne merina siiquwa nuna bessa; nuna ashsha.
PSA 85:8 Godaa Xoossay odiyaba taani si7ana; enti banta eeya ogiyako simmonna ixiko, I ba geeshsha deriyas sarotethi odees.
PSA 85:9 Iya bonchoy nu biittan daana mela, Xoossaa yayyeyisata ashshanaw I matan de7ees.
PSA 85:10 Siiqoynne tumatethi gahetidosona; Xillotethinne sarotethi idimetidosona.
PSA 85:11 Tumatethi sa7aape pude keyees; xillotethi salope duge xeellees.
PSA 85:12 Xoossay lo77oba nuus immana; nu biittay daro kathi ayfana.
PSA 85:13 Xillotethi Godaa sinthan hemetana; iya ogiya giigisana.
PSA 86:1 Dawita Woosa Godaw, taani manqonne metootancho gidiya gisho, ta woosa si7ada tana alla.
PSA 86:2 Ta new dummatida asi gidiya gisho, tana de7on wotha; nenan ammanetiya tana, ne aylliya ashsha; neeni ta Xoossa.
PSA 86:3 Godaw, gallas kumethi ta neeko waassiya gisho, taw qadheta.
PSA 86:4 Godaw, ta shempoy neeko waassiya gisho, tana, ne aylliya ufaysa.
PSA 86:5 Godaw, neeni keehanne atto geysa; nena xeegiya ubbaas ne siiqoy daro.
PSA 86:6 Abeeti Godaw, ta woosa si7a; ta waasuwa hayza.
PSA 86:7 Ne ta woosaas zaaro immiya gisho, ta metuwa gallasan ta neeko waassana.
PSA 86:8 Godaw, xoossata giddon ne meli baawa; ne oosuwara giney baawa.
PSA 86:9 Godaw, neeni medhida kawotethati yidi, ne sinthan gulbatana; ne sunthaa bonchana.
PSA 86:10 Neeni gita; ne malaalsiya ooso oothiya gisho Xoossi ne xalaala.
PSA 86:11 Godaw, ta ne tuman hemetana mela, tana ne ogiya tamaarsa. Taani ne sunthaas yayyana mela, taw issi wozanaa imma.
PSA 86:12 Godaw ta Xoossaw, taani nena ta kumetha wozanan galatana; ne sunthaa merinaw bonchana.
PSA 86:13 Ne siiqoy taw daro; tana duufope ashshadasa.
PSA 86:14 Xoossaw, otoranchoti ta bolla dendidosona; iita asata cugay tana wodhanaw koyees; enti nena wuda gookona.
PSA 86:15 Shin abeeti Godaw, neeni qadhetiyanne maariya Xoosse. Neeni hanqetanaw gam7aasa; siiqoynne ammanetethi daridaysa.
PSA 86:16 Taako simmada taw qadheta; ne aylliyas wolqa imma; ne gadhinde na7aa tana ashsha.
PSA 86:17 Godaw, ne keehatetha malaata tana bessa; ne tana maaddeysanne minthetheysa be7iya wode, ta morketi yeellatana.
PSA 87:1 Qore Nayta Mazmure Godaa katamay, geeshsha deriya bolla keexetis.
PSA 87:2 Goday Xiyoone pengeta, Yayqoobi de7iya hara bessatape aathidi dosees.
PSA 87:3 Neno Xoossaa katamaw, ne gisho malaalsiyabata haysada yaagidi odis. Salaha
PSA 87:4 “Tana eriya kawotethata giddofe, taani Raabanne Babiloone mazgabana. Filisxeemey, Xiroosinne Tophey, yan yeletidosona.”
PSA 87:5 Xoossay Xiyoones, “Ya derey ha derey Xiyoonen yeletis; Ubbaafe Dhoqa Xoossay iyo minthana” yaagees.
PSA 87:6 Goday asaa mazgaben xaafiya wode, “Haysi Xiyoonen yeletis” yaagana. Salaha
PSA 87:7 Enti yexishenne durishe, “Nu anjo ubbay Xiyoonepe pultees” yaagana.
PSA 88:1 Zammaareta Halaqaas Xaafetida Qore Nayta Mazmure Akeekan xaafida ginxo; aaretho mazmure Izra7eela addiya Emaana mazmure Godaw, tana ashshiya Xoossaw, taani gallas neeko waassayis; qamma ne sinthan yeekayis.
PSA 88:2 Ta woosay ne sinthe gako; ne haythay ta waasuwa si7o.
PSA 88:3 Ta shempoy meto kallida gisho, ta de7oy duufoko matis.
PSA 88:4 Duufo geliya asaara taybetas; wolqi bayna asi gidas.
PSA 88:5 Taani ahata giddon yegetida asa mela; hayqidi duufon zin7ida asa mela. Hizape neeni hassayonna asinne neepe duuxida asa mela gidas.
PSA 88:6 Neeni tana ciimmon, dhuma ollan yeggadasa.
PSA 88:7 Ne hanqoy tana deexees; ne hanquwa beetay tana muukis. Salaha
PSA 88:8 Neeni ta dabbota taape haassadasa; enti tana shaatettana mela oothadasa. Tana teqidosona; kessa ekanaw danda7ike.
PSA 88:9 Godaw, azzanon ta ayfey teljumis; Ubba gallas taani neeko waassayis; ta kushiya neeko miccas.
PSA 88:10 Hayqidaysatas ne malaalsiyaba oothayee? Enti dendidi nena galatonayee? Salaha
PSA 88:11 Merinaa ne siiqoy duufon, ne ammanetethay dhayo bessan odetiyee?
PSA 88:12 Ne malaalsiya oosoy dhuman, ne xillotethay dogetida biittan eretiyee?
PSA 88:13 Godaw, ta neeko waassayis; wonta wonta ta woosay ne sinthe gakees.
PSA 88:14 Godaw, ne tana ayis ixay? Ne som7uwa taape ayis genthay?
PSA 88:15 Na7atethafe doomada taani un7etas; hayqos matas; ne tana daganthin ufaysi qanxas.
PSA 88:16 Ne suulliya hanqoy ta bolla uushis; ne daganthoy tana dhaysis.
PSA 88:17 Enti gallas kumethi di7oda tana teqidosona; issife shiiqidi tana oykidosona.
PSA 88:18 Ta laggetanne taw mata asata taape haassadasa; taw dabboy dhuma xalaala.
PSA 89:1 Izra7eela Addiya Etaana Mazmure Akeekan xaafida ginxo Godaw, ne siiquwaba taani merinaw yexana; ne ammanetetha yeleta ubbaas awaajana.
PSA 89:2 Ne siiqoy merinaw eqidaysanne tumatethaa neeni salon minthada essidaysa odana.
PSA 89:3 Neeni, “Ta dooridaysara qaala gelas; Ta aylliya Dawitas haysada yaagada caaqas;
PSA 89:4 ‘Taani ne kochaa merinaw kawothana; ne araata yeleta ubban minthana’ ” yaagadasa. Salaha
PSA 89:5 Godaw, saloti ne malaalsiya oosuwa awaajo; geeshshata shiiqoy ne ammanetetha odo.
PSA 89:6 Salon Godaara liketanaw danda7ey oonee? Salo medhetethata giddon Godaa meli oonee?
PSA 89:7 Geeshshata shiiquwan Xoossay yashisees; iya yuushuwan de7iya ubbaafe aadhidi daganthees.
PSA 89:8 Ubbaafe Wolqaama Godaw Xoossaw, ne mela wolqaami oonee? Godaw, neeni ubbaban ammanetaasa.
PSA 89:9 Neeni guummiya abba wolqaa kiittasa; dendiya zuliya si77i oothaasa.
PSA 89:10 Ra7aaba geetetiya do7a mentherethadasa; ne morketa ne wolqaama qesiyan laalladasa.
PSA 89:11 Saloynne sa7i nebaa; alamiyanne iyan de7iya ubbaa medhiday nena.
PSA 89:12 Pudehanne dugeha ne medhadasa; Taaborenne Armoona zumati, ufaysan ne sunthaa sabboosona.
PSA 89:13 New wolqaama qesey de7ees; ne kushey mino; ne ushacha kushey dhoqu gis.
PSA 89:14 Xillotethinne suure pirdi ne araatas baaso; siiqoynne tumatethi ne sinthan boosona.
PSA 89:15 Godaw, ufaysan ilileysatnne ne som7uwa poo7uwan hemeteysati anjetidaysata.
PSA 89:16 Ne sunthan gallas kumethi ufaytoosona; enti ne xillotethaa dhoqu dhoqu oothosona.
PSA 89:17 Enti ceeqetiya wolqay nena; ne teeman nu kacey dhoqu dhoqu gis.
PSA 89:18 Nu gondalley nu Godaa kushena; nu kawoyka Isra7eele geeshshaa kushena.
PSA 89:19 Beni neeni, ne ammanetida asaas qoncethan haysada yaagadasa. “Taani issi olanchuwa maaddas; asaa giddofe dooretidaysa dhoqu dhoqu oothas.
PSA 89:20 Ta aylliya Dawita demmas; ta geeshsha zaytiya tiyada iya kawothas.
PSA 89:21 Ta kushe iyara daana; ta qesey iya minthana.
PSA 89:22 Iya ay morkeyka giirisenna; ay iita asika iya haarenna.
PSA 89:23 Iya morketa ta iya sinthan tincherethana; iya ixeyisata shoca yeggana.
PSA 89:24 Ta tumatethaynne ta siiqoy iyara gidana; ta sunthan iya kacey dhoqu dhoqu gaana.
PSA 89:25 Taani iya kawotethaa Medetiraane Abbaa, iya zawa shaafata gakanaw aassana.
PSA 89:26 I tana, ‘Neeni ta aawa, ta Xoossaa; tana ashshiya zaalla’ yaagidi xeegana.
PSA 89:27 Taani iya bayra na7a oothana; sa7an de7iya kawota ubbaafe iya gitayana.
PSA 89:28 Taani ta siiquwa merinaw iyaw naagana; taani iyara caaqida caaquwa minthana.
PSA 89:29 Taani iya kochaa merinaw minthada essana; iya araata saloda gam7isana.”
PSA 89:30 “Shin iya kochati ta higgiya aggiko, enti ta wogaada hemetonna ixiko,
PSA 89:31 ta awaajuwa shaariko, ta kiita naagonna ixiko,
PSA 89:32 taani enta nagaraa gisho xam7an, enta iitatethaa gisho lisson seerana.
PSA 89:33 Shin taani ta siiquwa iyape ekike; taani iyaw merinaw ammanetana.
PSA 89:34 Taani entara caaqida caaquwa menthike; ta doonape keyida qaala laammike.
PSA 89:35 Taani issi toho ta geeshshatethan caaqida gisho, Dawitas wordotike.
PSA 89:36 Iya kochay merinaw daana; iya araatay ta sinthan awada gam7ana.
PSA 89:37 Salon ammanetiya marka gidida ageenada, iya kawotethay merinaw minnidi daana” yaagadasa. Salaha
PSA 89:38 Shin ha77i ne tiyida kawa bolla hanqetadasa; iya ixadasa; aggadasa.
PSA 89:39 Ne aylliyara caaqida caaquwa menthadasa; iya kallachaa baanan holada tunisadasa.
PSA 89:40 Iya katamaa gimbe dirsa laalladasa; iya miixaa dhaysadasa.
PSA 89:41 Ogera aadhiya ubbay iya bonqidosona; I ba shoorotas miichas attis.
PSA 89:42 Iya morketas xoono immadasa, enta ubbaa ufaysadasa.
PSA 89:43 Iya mashshaa xeeraa qalam7adasa; iya olan maaddabaaka.
PSA 89:44 Iya kawota xam7aa iya kushepe ekadasa; iya araata biittan holadasa.
PSA 89:45 Iya yalagatetha wodiya qaamisadasa; iya yeella mayzadasa. Salaha
PSA 89:46 Godaw, neeni awude gakanaw gam7ay? Neeni merinaw geemmanee? Ne hanqoy tamada awude gakanaw eexanee?
PSA 89:47 Ta laythay ay mela qantheko qopa; asa ubbaa coo mela medhadi!
PSA 89:48 Hayqope attanaw danda7iya asi de7ii? Duufo gelonna daanaw danda7ey oonee? Salaha
PSA 89:49 Godaw, neeni ne tumatethan Dawitas caaqida, ne siiqoy awun de7ii?
PSA 89:50 Godaw, ne aylley ay mela boretidaako be7a; asa ubbaa boriya waata danda7idaako hassaya.
PSA 89:51 Godaw, ne morketi qelqisidaysa, ne tiyida kawa tangon tangon boreysa be7a.
PSA 89:52 Goday merinaw galatetto!
PSA 90:1 Xoossa asi gidida Muse woosa Godaw, neeni yeletape yeletaa gakanaw, nuuni de7iya bessi gidadasa.
PSA 90:2 Dereti medhetanaape kase, sa7i oosetanaape kase, merinaape merinaa gakanaw ne Xoosse.
PSA 90:3 Neeni, “Asa nayto, guye biittako simmite” yaagada, enta medhetida biittako guye zaarasa.
PSA 90:4 Mukulu laythi zine aadhida gallasa mela; woyko issi qamma giddon issi saate mela.
PSA 90:5 Neeni asaa qoponna di7oda efaasa; enti amuho mela; wonta wonta doliya maata mela.
PSA 90:6 Maati wonta diccidi ciyees; omarsiya wode shullidi melees.
PSA 90:7 Nuuni ne yiluwan wurida; ne hanquwa suulon dagammida.
PSA 90:8 Nu iita oosuwa ne sinthan wothadasa; nu geemmida nagaraa ne som7uwa poo7uwan wothadasa.
PSA 90:9 Nu gallasa ubbay ne hanquwan aadhis; nu laytha oolen wursoos.
PSA 90:10 Nu de7o laythay laapun tamma; woyko dariko hospun tamma. Hessika metoynne waayey kumidaysa; nu laythay eeson wurees; nuka eeson aadhoos.
PSA 90:11 Ne hanquwa wolqaa erey oonee? ne hanquwa suuloy wolqaama.
PSA 90:12 Nu laytha maara ogen nu go7etana mela, nuna cincatethi tamaarsa.
PSA 90:13 Godaw, ne hanqoy awude gakanaasee? hayyana ne aylletas qadheta.
PSA 90:14 Nu laytha ubban nu ufaytanaadanne yexanaada, wonta wonta ne siiquwa nuna kalsa.
PSA 90:15 Ne nuna metoothida gallasata keena, nuuni un7etida laythata keena nuna ufaysa.
PSA 90:16 Nuus ne aylletas ne oosoy qonco; ne bonchoy enta naytas bento.
PSA 90:17 Godaa nu Xoossaa keehatethay nu bolla gido; nu kushe ooso ubba nuus ayfisa; Ee, nu kushe ooso ubbaa ayfisa.
PSA 91:1 Ubbaafe Dhoqa Xoossan naagetidi de7ey, Ubbaafe Wolqaama Xoossaa kuyan aqees.
PSA 91:2 I Godaa, “Neeni taw miixanne qosetta attiya bessi, neeni tana ammanthiya ta Xoossaa” yaagana.
PSA 91:3 I nena shankanchota xihepe, wodhidi ongiya gadope ashshana.
PSA 91:4 I ba baalletan nena kammana; iya qefiya garsan neeni qosetada attana; iya ammanetethay new gondallenne kate.
PSA 91:5 Neeni qamma daganthiyabas, woyko gallas xongetiya tooras yayyaka.
PSA 91:6 Neeni dhuman oykiya harge, woyko gallasa seetan ongiya gado hirgaka.
PSA 91:7 Mukulay ne miyen, tammu mukulay ne ushachan kundana; shin nena aybika bochenna.
PSA 91:8 Iitati seeretishin, neeni ne ayfe xalaalan be7ana.
PSA 91:9 Neeni Godaa new qosetada attiya bessi oothida gishonne, Ubbaafe Dhoqa Xoossaa ne de7iya bessi oothida gisho,
PSA 91:10 iitabay nena bochenna; gadoy ne keethaako shiiqenna.
PSA 91:11 Ne oge ubban nena naagana mela, Xoossay ba kiitanchota kiittana.
PSA 91:12 Ne tohoy shuchan dhubetonna mela, kiitanchoti banta kushen nena denthana.
PSA 91:13 Neeni gaammonne shoosha bolla hemetana; wodala gaammonne iita shooshaa yedhana.
PSA 91:14 Xoossay, “I tana siiqida gisho taani iya ashshana; ta sunthaa eriya gisho taani iya naagana.
PSA 91:15 I tana xeegiya wode taani iyaw koyana; meto wode taani iyara gidana; taani iya ashshananne bonchana.
PSA 91:16 Taani iya laytha adussana; ta atotetha iya bessaana” yaagees.
PSA 92:1 Sambaata gallasa mazmure Godaa galatoy lo77o; Ubbaafe Dhoqa Xoossaw, ne suntha saboy lo77o.
PSA 92:2 Wonta wonta ne siiquwa odoy, qamma ne ammanetetha awaajoy lo77o.
PSA 92:3 Tammu shayan waaxetida diithan maasinqo kaa7ishe nena galatoy lo77o.
PSA 92:4 Taani ne oosuwan ufaytida gisho, ne kushe oosuwa gisho nena galatayis.
PSA 92:5 Godaw, ne oosoy ay mela gite! Ne qofay ay mela ciimmo!
PSA 92:6 Eeya asi eranaw danda7enna; wozani bayna asi akeekanaw danda7enna.
PSA 92:7 Iitati maatada diccikoka, iita ootheysati daaykoka, enti merinaw dhayana.
PSA 92:8 Shin abeeti Godaw, neeni merinaw ubbaafe dhoqa.
PSA 92:9 Abeeti Godaw, tuma ne morketi dhayana; iita oothiya ubbay piski gaana.
PSA 92:10 Ta kaciya mentha kaceda dhoqu oothadasa; lo77o zayte ta huuphen tiyadasa.
PSA 92:11 Ta morketi xoonetishin ta ayfen be7as; tana un7etheysati waassishin ta haythan si7as.
PSA 92:12 Xilloti zambada diccana; Libaanose zigada daayana.
PSA 92:13 Enti Godaa keethan toketida mitha mela; enti nu Xoossaa dabaaban daana.
PSA 92:14 Enti ceeggidika ayfana; enti irxanne cil7o gididi daana.
PSA 92:15 Enti, “Goday suure; I ta zaalla; iyan iitatethi baawa” yaagana.
PSA 93:1 Goday kawotis! Xoossay boncho ma7is; wolqa dancis; sa7i minnidi eqis; qaaxenna.
PSA 93:2 Ne araatay benipe eqidi de7ees; neeni merinaw de7aasa.
PSA 93:3 Godaw, shaafay guummis; haathay ba guuntha dhoqu oothis haatha zuliya girsay si7etis.
PSA 93:4 Salon de7iya Goday, daro haatha guunthaafe, abba zuliyape aadhidi wolqaama.
PSA 93:5 Abeeti Godaw, ne higgey ammanetidaysa; ne keethay merinaw geeshshatethan alleeqana.
PSA 94:1 Godaw, neeni halo keyiya Xoossi; kushe zaariya Xoossaw, ne bonchuwa bessa.
PSA 94:2 Abeeti sa7aa pirdiya Xoossaw denda; otoranchotas bessiya seera imma.
PSA 94:3 Godaw, awude gakanaw gam7ay? Iitati awude gakanaw ufaytanee?
PSA 94:4 Iita ootheysati otoro qaala haasayoosona; enti coo ceeqetoosona.
PSA 94:5 Godaw, enti ne asaa liiqisoosona; enti ne laata naaqoosona.
PSA 94:6 Am7etanne betanchota wodhoosona; aawi bayna nayta muucosona.
PSA 94:7 Enti, “Goday nuna be7enna; Yayqooba Xoossay akeekenna” yaagosona.
PSA 94:8 Hinteno, asaa giddofe eeyato, akeekite! hinteno, eeyato hinte cinca gidanay awudee?
PSA 94:9 Haythe oothida Xoossay si7ennee? Ayfe medhida Goday be7ennee?
PSA 94:10 Kawotethata seeriya Xoossay seerennee? Ase eratethi tamaarsiya i, erennee?
PSA 94:11 Goday asa qofi pathonnabaanne hada gideysa erees.
PSA 94:12 Abeeti Godaw, neeni seeriya asinne ne higgiya tamaarsiya asi anjetidaysa.
PSA 94:13 Iitati kundiya ollay booketana gakanaw, meto gallas neeni iya shempisaasa.
PSA 94:14 Xoossay ba asaa yeggenna; I ba laata aggenna.
PSA 94:15 Pirdi simmidi xillotetha bolla eqana; wozanaa suureti ubbay xillo pirdaa kaallana.
PSA 94:16 Makallanchota bolla ta gisho dendey oonee? Iita ootheysatara ta gisho eqetey oonee?
PSA 94:17 Goday tana maaddonnaako, taani eeson duufo gelada attanashin.
PSA 94:18 Taani, “Ta tohoy hallixis” gida wode, ne siiqoy tana katisis.
PSA 94:19 Ta wozanan un7etethi kumida wode, neeni tana wopu oothada ufaysaasa.
PSA 94:20 Higge shaariya geella daynnatara geella asara neeni hashetay?
PSA 94:21 Xillota wodhanaw enti tobboosona; suureta bolla hayqo pirdoosona.
PSA 94:22 Gidoshin Goday ta miixaa; ta Xoossay taani qosetada attiya zaalla.
PSA 94:23 Enta iitatethaa gisho I enta seerana; enta nagaraa gisho I enta dhaysana; Goday nu Xoossay enta dhaysana.
PSA 95:1 Haayite; ane Godaa sabboos; nuna ashshiya zaallas ufaysan ililoos.
PSA 95:2 Iya sinthe galatara shiiqoos. Galata mazmure ufaysan yexoos.
PSA 95:3 Goday wolqaama Xoosse; xoossata ubbaa bolla gita kawo.
PSA 95:4 Biitta ciimmoti iya qaaqan de7oosona; deriya xeerati iyabaa.
PSA 95:5 I medhida gisho abbay iyabaa; mela biittaa iya kushey oothis.
PSA 95:6 Haayite; ane gufannidi iya goyinnoos; nuna medhida Godaa sinthan gulbatoos.
PSA 95:7 I nu Xoossaa; nuuni iya qooron de7iya dereta; nuuni I heemmiya iya dorsata. Goday geysa hachi hinte si7iko,
PSA 95:8 Kase hinte mayzati Mariban hanidaysada, he gallas Maasan banta wozanaa minthidaysada, hinte, hinte wozanaa minthofite.
PSA 95:9 Enti ta malaalsiya oosuwa be7idika, tana paacidosona; taara eqetidosona.
PSA 95:10 Taani he yeletaa bolla oytamu laythi shaatettas; “Enti ubba wode banta wozanan baliya asata; enti ta ogiya erokona” yaagas.
PSA 95:11 Hessa gisho, “Enti ta shempo bessaa gelokona” yaagada ta hanquwan caaqas.
PSA 96:1 Godaas ooratha mazmure yexite; sa7an de7iya asa ubbay Godaas yexite.
PSA 96:2 Godaas yexite; iya suntha sabbite; Iya ashuwa gallas gallas odite.
PSA 96:3 Kawotethata giddon iya bonchuwa, asa ubbaa giddon iya malaalsiya oosuwa awaajite.
PSA 96:4 Goday gita gidiya gisho iyaw gita galatii bessees; xoossata ubbaafe aadhidi yayetanaw bessees.
PSA 96:5 Hara kawotethata xoossati ubbay eeqata; shin Goday salota medhida Xoossaa.
PSA 96:6 Bonchoynne sabi iya yuushon de7ees; minotethinne puulatethi iya keethan de7ees.
PSA 96:7 Biittan de7iya asa zare ubbay Godaaba odite; bonchoynne wolqi Godaaba giite.
PSA 96:8 Iya sunthaas bessiya bonchuwa Godaas ehite; Yarsho ekidi iya dabaaba gelite.
PSA 96:9 Iya geeshshatetha teemuwan Godaa goyinnite; biittan de7iya asaw ubbay iya sinthan kokorite.
PSA 96:10 Kawotethata giddon, “Goday kawotis! Sa7ay minnidi eqis; qaaxenna; I asaa bolla suure pirdana” yaagite.
PSA 96:11 Saloti ufayto; sa7ika hashshu go; abbaynne iya giddon de7iya ubbay guummo.
PSA 96:12 Goshshaynne iyan de7iya ubbay ufayto! Woran de7iya mitha ubbay ufaysan yexo.
PSA 96:13 Goday yaa gisho iya sinthan yexo; I sa7a bolla pirdanaw yees. I ha sa7aa bolla xillotethan, asaa bolla tumatethan pirdana.
PSA 97:1 Goday kawotida gisho sa7an de7iya asay ufayto; yuushoy abban teqetida biittati ufayto.
PSA 97:2 Shaarinne sakana dhumi iya yuushuwan de7ees; Xillotethinne tumatethi iya araata baaso.
PSA 97:3 Tami iya sinthara bees; iya yuushuwan de7iya morketa xuuggees.
PSA 97:4 Iya wol7anthay bitta ubbaa poo7isees; biittay hessa be7idi kokorees.
PSA 97:5 Dereti Godaa sinthan, sa7aa ubbaa Godaa sinthan muqaadada til7idosona.
PSA 97:6 Saloti iya xillotethaa awaajosona; asa ubbay iya bonchuwa be7oosona.
PSA 97:7 Eeqata goyinneysatinne entan ceeqeteysati ubbay yeellato; eeqati ubbay Godaas gulbato.
PSA 97:8 Abeeti Godaw, Xiyooney ne xillo pirdaa si7idi ufaytees; Yihuda macca naytika hashshu goosona.
PSA 97:9 Abeeti Godaw, neeni sa7a ubba bolla dhoqa; xoossata ubbaafe neeni dhoqu gadasa.
PSA 97:10 Godaa doseysato, iitaa ixite; iyan ammaneteyisata shempuwa I naagees; iitata kushepe enta ashshees.
PSA 97:11 Xillota bolla poo7oy poo7ees; wozana suuretas ufaysi de7ees.
PSA 97:12 Hinteno xilloto, Godan ufaytite; iya geeshsha sunthaa galatite.
PSA 98:1 Mazmure Goday malaalsiyaba oothida gisho, iyaw ooratha mazmure yexite. Iya ushacha kushey, iya geeshsha qesey iyaw xoono immis.
PSA 98:2 Goday ba xoonuwa erisis; ba xillotethaa kawotethatas qoncisis.
PSA 98:3 I Isra7eele asaa siiqeysanne entaw ammaneteysa hassayis. Sa7aa gaxaa gakanaw de7iya asa ubbay nu Xoossaa atotetha be7idosona.
PSA 98:4 Sa7a bolla de7iya asaw, Godaas ufaysan yexite; ufaysan ililishe sabbite.
PSA 98:5 Godaas diithi diixite; diithaninne mazmuren Godaa sabbite.
PSA 98:6 Suusul7enne moyze punnishe, ufaysan Godaa nu kawa sinthan yexite.
PSA 98:7 Abbaynne abba giddon kumida ubbay guummo; Sa7aynne sa7aa bolla de7iya ubbay yexo.
PSA 98:8 Shaafati banta kushiya baqo; zumati issife Godaa sinthan ufaysan yexo.
PSA 98:9 Goday sa7aa bolla pirdanaw yees; I ha sa7aa bolla xillotethan asaa bolla suuretethan pirdana.
PSA 99:1 Goday kawotida gisho kawotethati kokoro; araata bolla Kiruubeta giddon uttida gisho; biittay qaaxo.
PSA 99:2 Goday Xiyoonen gita; kawotethaa ubbaafe I dhoqu dhoqu gis.
PSA 99:3 Yashshiya iya gita sunthaa ubbay galato; I geeshshi.
PSA 99:4 Neeni, wolqaama kawoy suure pirda dosaasa. Neeni Yayqooba suuretethan minthadasa. Xillotethi essadasa.
PSA 99:5 Godaa, nu Xoossaa dhoqu dhoqu oothite; iya tohoy yedhiya bessan iya goyinnite; I geeshshi.
PSA 99:6 Museynne Aaroni iya kahineta giddofe koyrota; Sameeli iya woossidaysatape issuwa. Enti Godaako waassidosona; I enta si7is.
PSA 99:7 I shaara tuussaa giddora entaw haasayis; I immida higgiyanne wogaa naagidosona.
PSA 99:8 Abeeti Godaw, nu Xoossaw, ne enta woosa si7adasa. Ne entana maaradasa; gidoshin, enta nagara gisho enta seeradasa.
PSA 99:9 Goday nu Xoossay, geeshshi gidiya gisho, iya dhoqu dhoqu oothite; iya geeshsha zumaa bolla iya goyinnite.
PSA 100:1 Galata Mazmure Biittan de7iya asa ubbay, Godaas ufaysan ililite.
PSA 100:2 Godaas ufaysan haggaazite; ufaysa yethara iya sinthe shiiqite.
PSA 100:3 Goday Xoosse gideysa erite; nuna medhiday iya; nu iyabaa; nuuni iya asenne iya qooron heemetiya dorsata.
PSA 100:4 Iya pengiya galatara gelite, iya dabaaba sabara biite; iya galatitenne iya sunthaa anjite.
PSA 100:5 Goday keeha; iya siiqoy merinaasa; iya ammanetethay yeletape yeletaa gakanaasa.
PSA 101:1 Dawita Mazmure Ta ne siiquwabaanne ne xillo pirdaba yexana; Godaw, ta nena mazmuren galatana.
PSA 101:2 Taani suure ogiyan daana; neeni taako awude yaanee? Taani ta keethan suuretethan hemetana.
PSA 101:3 Taani ta ayfey iitabaa xeellenna; Xoossafe haakida asaa oosuwa ixayis; enti taara gahetokona.
PSA 101:4 Wozanaa geellatethi taape haako; iitatethaas besse immike.
PSA 101:5 Geeman ba laggiya zigiriya uraa si77i oothana; otortiyanne ceeqetiya asi taani danda7ike.
PSA 101:6 Enti taara daana mela, biitta bolla de7iya ammanetiya asata Taani keeha ayfen xeellayis; suuretethan hemetiya asi taw kiitetees.
PSA 101:7 Cimmiya asi ta keethan deenna; wordo haasaya asi ta sinthan eqenna.
PSA 101:8 Biittan de7iya iita asaa, taani gallas gallas si77i oothana. Iitaa ootheyisata ubbaa taani Godaa katamaape shoddana.
PSA 102:1 Un7etida wode Xoossa sinthan woossida asa woosa Godaw, ta woosa si7a; ta waasoy neeko gako.
PSA 102:2 Ta waayiya gallas ne som7uwa taape genthofa; ne haytha taako zaara; taani neeko waassiya wode, tana eeson alla.
PSA 102:3 Ta laythay cuyada dhayees; ta meqethay tamada eexees.
PSA 102:4 Ta wozanay buucidi yeggida maatada melis; kathika taw meetetenna.
PSA 102:5 Taani ta qaala dhoqu oothada oolida gisho; ta gogay meqethaara oyketis.
PSA 102:6 Taani woran de7iya solo mela, kaysa keethan de7iya gutto mela.
PSA 102:7 Taani zin7in dhiskoy yeenna; taani keetha huuphen barka uttida kafo gidas.
PSA 102:8 Ta morketi gallas kumethi tana cayoosona; tana qelqiseysati ta sunthan baaddoosona.
PSA 102:9 Bidoy taw kathi gidis; ta afuthay ta ushshara Walaketis.
PSA 102:10 Hessi haniday ne hanqoynne ne yiloy, tana denthadi wora holida gishosa.
PSA 102:11 Ta laythay omarsa kuya mela ellesidi aadhees; taani maatada shullayis.
PSA 102:12 Shin Godaw, neeni ne araatan merinaw uttadasa; ne sunthay yeletaape yeletaa gakanaw hassayetana.
PSA 102:13 Neeni iyo maariya wodey gakida gisho; dendada Xiyoones qadheta; neeni doorida wodey gakis.
PSA 102:14 I shuchati ne oosanchotas al7o; I biittayka enta qadhethees.
PSA 102:15 Kawotethati Godaa sunthaas yayyana; sa7aa kawoti iya bonchuwas dagammana.
PSA 102:16 Goday Xiyoone zaaridi keexana; ba gitatetha bessana.
PSA 102:17 I manqota woosa si7ana; enta oysha kadhenna.
PSA 102:18 Buroo yeletana asay Godaa galatana mela, haysi yaa yeletas xaafeto.
PSA 102:19 Goday dhoqan de7iya ba geeshsha bessaafe xeellis; salon gididi sa7aa xomoosees.
PSA 102:20 Hessika qashetida asaa waasuwa si7anawunne hayqo pirdetida asaa birshanaasa.
PSA 102:21 Hessa gisho, Godaa sunthay Xiyoonen odetana; iya galatay Yerusalaamen awaajettana.
PSA 102:22 Dereynne kawotethay shiiqidi, Godaas he wode goyinnana.
PSA 102:23 Taani na7atethan de7ishin, ta wolqaa ixisis; ta laytha qaamisis.
PSA 102:24 Taani, “Ta Xoossaw, ta laytha giddo zawan tana dhukofa” yaagayis. Godaw, neeni yeletape yeletaa gakanaw de7aasa.
PSA 102:25 Neeni beni sa7aa medhadasa; saloyka ne kushe ooso.
PSA 102:26 Haysati ubbay dhayana; shin neeni daana; enti ubbay afilada wurana. Neeni enta curqa afilada laammana; entika aadhana.
PSA 102:27 Shin neeni nena; ne laythay wurenna.
PSA 102:28 Ne aylleta nayta neeni saro wothaasa; enta kochay ne sinthan minnidi daana.
PSA 103:1 Dawita Mazmure Ta shempe Godaa galata! Ta kumetha asatethaw, iya geeshsha suntha galata.
PSA 103:2 Ta shempe Godaa galata! I new oothida keehatetha ubbaa dogopa.
PSA 103:3 I ne nagaraa ubbaa atto gees; ne harge ubbaafe nena pathees.
PSA 103:4 I nena hayqope ashshees; siiqoninne maarotan nena anjees.
PSA 103:5 Ne yalagatethay arganthada ooraxana mela, ne de7uwa lo77oban kalsees.
PSA 103:6 Goday qohetidaysatas xillotethaninne suuren pirdees.
PSA 103:7 I ba ogiya Muse, ba oosuwa Isra7eele asaa erisis.
PSA 103:8 Goday qadheteysanne maareysa; hanqetanaw eesotenna; iya siiqoy daro.
PSA 103:9 I ubba wode seerenna; merinaw hanqetenna.
PSA 103:10 I nuus nu nagaraada oothenna; nu iitatethaa mela zaarenna.
PSA 103:11 Saloy sa7ape dhoqeysada, Godaa yayyeysatas iya siiqoy gita.
PSA 103:12 Dolohape wulohi haakeysada, Goday nu nagara nuupe haassees.
PSA 103:13 Aawi ba naytas qadheteysada, Goday baw yayyeysatas qadhetees.
PSA 103:14 Nuuni aybipe medhetidaako I erees; nuuni biitta gideysa I akeekes.
PSA 103:15 Asi baw maata mela; I bazzo ciishshada ciyees.
PSA 103:16 Carkoy iya bolla carkiya wode dhayees; I dolida bessay zaaridi eretenna.
PSA 103:17 Shin Godaas yayyeysatas iya siiqoy merinaape merinaa gakanaasa; iya xillotethay na7a na7a gakanaasa.
PSA 103:18 Hessi haney iya caaquwa naageysatanne iya kiitaa polanaw minneysatasa.
PSA 103:19 Goday salotan ba araata essis; iya kawotethay ubbaa haarees.
PSA 103:20 Hinteno, iya kiitanchato, iya kiita naagiya wolqaamato, I odiyaba si7eysato, Godaa galatite!
PSA 103:21 Hinteno salon de7iya minoto, iya sheniya poleysato, Godaa galatite!
PSA 103:22 Hinteno, I haariya bessa ubban, de7iya medhetethato, Godaa galatite! Ta shempe Godaa galata!
PSA 104:1 Ta shempe, Godaa galata; abeeti Godaw, ta Xoossaw ne gita; neeni bonchonne teema ma7adasa.
PSA 104:2 Poo7o afilada guuluntadasa; neeni saluwa dunkaaneda toladasa.
PSA 104:3 Ne keethaa salo bolla keexaasa; shaara para gaare kessaasa; carko qefe bolla uttada baasa.
PSA 104:4 Carkoy new kiitancho, tama laco new oosancho oothaasa.
PSA 104:5 Ne, sa7aa iya baasuwa bolla essadasa; hessa gisho, merinaw qaaxenna.
PSA 104:6 Ciimmo abbay afilada biitta kammis; haathay gita dereta kammis.
PSA 104:7 Ne hanqetin haathati baqatidosona; ne deshuwa si7ida wode qosetidosona.
PSA 104:8 Enti dereta bollanne zangaarata giddo, ne entaw giigisida bessaa goggidosona.
PSA 104:9 Haathati simmidi biitta kammonnaada, enti aadhanaw danda7onna zawa wothadasa.
PSA 104:10 Neeni, pultoti zangaaran gogganaada oothadasa; shaafa haathati dereta giddora goggoosona.
PSA 104:11 Bazzo do7ati ubbay iyape uyoosona; bazzo hareti iyape saamo aloosona.
PSA 104:12 Salo kafoti he haatha matan banta keethaa keexidi, tashiya giddon yexoosona.
PSA 104:13 Ne gita dereta bolla salope ira buksaasa; iya kushe ooso ayfen biittiya kallasu.
PSA 104:14 Neeni mehes maata, asas kathi dolisaasa; hessan asay biitta oothidi, kathi shiishees.
PSA 104:15 Asa wozana ufaysiya woyne, som7o cil7isiya zaytenne wolqa immiya kathi dolisaasa.
PSA 104:16 Godaa mithati, I tokida Libaanose zigati, daro ira demmoosona.
PSA 104:17 Kafoti banta keetha yan keexoosona; xiloti xiidda bolla keexidi de7oosona.
PSA 104:18 Dhoqa dereta bolla gaarati de7oosona; gupalleti shucha qophon qosetoosona.
PSA 104:19 Wode taybuwa erisana mela, ne ageena medhadasa; away ba wulliya wodiya erees.
PSA 104:20 Neeni dhumaa medhadasa; qamma oothadasa; he dhuman wora do7i ubbay keyees.
PSA 104:21 Wodala gaammoti shankatishe gudoosona; enti bantaw miyaba Xoossafe koyoosona.
PSA 104:22 Awi doliya wode guye simmoosona; banta bessaa gelidi zin7oosona.
PSA 104:23 He wode asi ba oosos keyees; sa7i qammana gakanaw oothees.
PSA 104:24 Abeeti Godaw, ne oosoy ay mela daro; ne cincatethan ne enta ubbaa medhadasa; sa7i ne medhidaban kumis.
PSA 104:25 Heko, Abbay gitanne dalga; tayboy bayna qaaxiya medhetethan, gitatanne guutha medhetethan kumidi de7ees.
PSA 104:26 Iya bolla markabeti boosona; ne medhida Leewataane geetetiya dawey iyan kaa7ees.
PSA 104:27 Ne entaw koshshiya wodiyan miyaba immana mela, enti ubbay nena xeelloosona.
PSA 104:28 Ne entaw immin enti maxoosona; neeni ne kushiya miccin, enti lo77oba kalloosona.
PSA 104:29 Neeni ne som7uwa genthiya wode dagammoosona; neeni shempuwa ekiya wode hayqidi, banta biitta simmoosona.
PSA 104:30 Shin neeni ne shempuwa immiya wode, enti medhetoosona; biitta ooraxisaasa.
PSA 104:31 Godaa bonchoy merinaw de7o; Goday ba oosuwan ufayto.
PSA 104:32 I biitta xeelliya wode biittay qaaxees; I dereta bochiya wode dereti cuyoosona.
PSA 104:33 Ta de7o laytha ubban Godaas yexana; ta paxa de7iya wode ubban ta Xoossaa zammarana.
PSA 104:34 Taani Godan ufaytiya gisho, ta qofay iya ufayso.
PSA 104:35 Nagaranchoti biittafe dhayo; iita ootheysati de7opo. Ta shempe, Godaa galata; Goday galatetto.
PSA 105:1 Godaa galatite; iya suntha xeegite; I oothidaba kawotethatas odite.
PSA 105:2 Iya sabbite; galata mazmure yexite; malaalsiya iya ooso ubbaa odite.
PSA 105:3 Iya geeshsha sunthan ceeqite; Godaa koyeyisata wozanay ufayto.
PSA 105:4 Godaanne iya wolqan ammanetite; ubba wode iya koyite.
PSA 105:5 Hinteno, iya aylliya Abrahaame zareto, dooretida Yayqooba nayto, I oothida malaalsiyabata, iya malaatanne suure pirdaa hassayite.
PSA 105:7 I Godaa, nu Xoossaa; iya pirday biitta ubbaa bollana.
PSA 105:8 I ba caaquwa merinaw, ba gelida qaala mukulu yeleta gakanaw naagees.
PSA 105:9 I Abrahaamera caaqida ufaysa qaala, Yisaaqas gelida ufaysa qaala,
PSA 105:10 Yayqoobas woga, Isra7eeles merinaa caaquwa oothidi minthis.
PSA 105:11 I, “Kanaane biitta new immana; I ne kochaa gakida laata gidana” yaagis.
PSA 105:12 Xoossa asati taybon guuthanne Kanaane biittan bete asi gididi de7iya wode,
PSA 105:13 Issi deriyape hara deriya, issi kawotethaafe hara kawotethi yuuyidosona.
PSA 105:14 Xoossay oonika enta un7ethana mela oothibeenna; enta gisho kawota seeris.
PSA 105:15 “Ta tiyidaysata bochofite; ta nabeta qohopite” yaagis.
PSA 105:16 Goday biittan kosha yeddidi, enta kathaa ubbaa dhaysis.
PSA 105:17 Shin I ba asaa ashshanaw, issi addiya Gibxe kiittis; he uray aylle gididi bayzetida Yoosefa.
PSA 105:18 Iya tohoti biratan duxetidosona; I santhalaatan qashetis.
PSA 105:19 I kase odidaysi tumattana gakanaw, Godaa qaalay iya paacis.
PSA 105:20 Hessafe guye Gibxe kawoy ase yeddidi, iya qasho keethafe kessis.
PSA 105:21 Iya ba keethaa bolla godaa oothis; baw de7iya ubbaa bolla shuumis.
PSA 105:22 Ba moorinnata zorana mela, ba cimata cincatethi tamaarsana mela shuumis.
PSA 105:23 Isra7eeley Gibxe bis; Yayqoobi Kaama biittan uttis.
PSA 105:24 Goday ba asaa darsis; enta morketape aathidi enta minthis.
PSA 105:25 Ba asaa ixana mela Gibxe asaa wozanaa laammis; ba aylleta cimmana mela oothis.
PSA 105:26 Ba aylliya Musenne ba doorida Aarona entako kiittis.
PSA 105:27 Enti Gibxe asaa sinthan malaata, Kaama biittan malaalsiyaba oothidosona.
PSA 105:28 Goday dhumaa kiittidi, biitta dhumisis; shin Gibxe asay iya kiita polibookona.
PSA 105:29 Enta haatha suuthi laammidi, molota wodhis.
PSA 105:30 Enta biitta ubbaa, kawo gadhoka shodhe kunthis.
PSA 105:31 I kiittin, udunxenne biinne enta biitta ubbaa bolla biinney wodhis.
PSA 105:32 Ira gisho enta biitta bolla shachi, dadanne wol7anthi bukisis.
PSA 105:33 I enta woyniyanne balasiya shocis; enta biittan de7iya mithaa mentherethis.
PSA 105:34 I kiittin, booleynne tayboy bayna duggoy keyis.
PSA 105:35 Enta biittan dolida katha ubbaa mis; gaden de7iya cil7oba ubbaa dhaysis.
PSA 105:36 Goday Gibxe asaa bayra nayta ubbaa wodhis; koyro yeletida ubbaa dhaysis.
PSA 105:37 Hessafe guye, Isra7eele asaa worqanne bira alleeqora kessis; enta kochaa giddofe guye attiday oonika baawa.
PSA 105:38 Gibxe asay entaw yayyida gisho, enta kessan ufaytidosona.
PSA 105:39 Goday enta kammanaw shaara miccis; qamma entaw poo7isanaw tama giigisis.
PSA 105:40 Enti miyaba oychida wode, kuraacho daaniya kafota entaw yeddis; enta salo kathi kalsis.
PSA 105:41 I shuchaa phalqin, haathi pultis; mela biittan shaafada goggis.
PSA 105:42 I ba aylliya Abrahaames, gelida geeshsha qaala hassayis.
PSA 105:43 I ba asaa ufaysan, ba dooridaysata ililsan kessis.
PSA 105:44 I entaw allaga kawotethata biitta immis; Harati daaburida goshsha laattidosona.
PSA 105:45 I hessa oothiday enti iya wogaa iya higgiya naagananne oothana melasa. Goday galatetto!
PSA 106:1 Godaa galatite! I keeha gidiya gishonne iya siiqoy merinaasa gidiya gisho, Godaa galatite.
PSA 106:2 Goday oothida wolqaama ooso odanaw, woyko iya galataa ubbaa qoncisanaw danda7ey oonee?
PSA 106:3 Pirdaa naageysatinne ubba toho xillobaa ootheysati anjetidaasaata.
PSA 106:4 Abeeti Godaw, neeni ne asaas keehiya wode tana qopa; enta neeni ashshiya wode tana alla.
PSA 106:5 Hessika ne doorida asaa dichaa ta be7ana mela, ne asaa ufaysan taani ufaytana melanne ne asaara issife taani galatana melasa.
PSA 106:6 Nuuni nu aawatada nagara oothida; nu balida; iitabaa oothida.
PSA 106:7 Nu aawati Gibxen de7iya wode, malaalsiya ne oosuwa qopibookona. Ne siiquwa darotethaa enti hassaybookona; Zo7o abba matan iya bolla makallidosona.
PSA 106:8 Gidoshin, I ba sunthaa gisho, ba gita wolqaa erisanaw enta ashshis.
PSA 106:9 I Zo7o abba kiittin, abbay melis; mela biittara kanthidi aadhiyada, ciimmo giddora enta kaalethidi pinthis.
PSA 106:10 I enta ixeyisata kushepe ashshis; morketa kushepe enta wozis.
PSA 106:11 Enta morketa haathay mittis; entafe issoyka attibeenna.
PSA 106:12 He wode enti iya ufaysa qaala ammanidosona; iya mazmuren sabboosona.
PSA 106:13 Gidoshin, enti I oothidaba dogidosona; I zoriya ogiya naagidi baanaw dosibookona.
PSA 106:14 Mela biittan de7ishe daro amotidosona; mela biittan Xoossaa paacidosona.
PSA 106:15 Enti woossidaysa I immis; shin iita harge enta giddo kiittis.
PSA 106:16 Mela biittan dunkaanen de7ishe Musenne Godaas dummatida Aarona qanaatidosona.
PSA 106:17 Biittay dooyetidi Daatane mittis; Abeero iya keetha asaara moogis.
PSA 106:18 Enta maabara giddon tami eexis; lacoy he iita asata xuuggis.
PSA 106:19 Koreeba zuman worqafe mara misile medhidosona; he misiliya goyinnidosona.
PSA 106:20 Enti, banta boncho Xoossa maata miya mehe misilen laammidosona.
PSA 106:21 Enti Gibxen gita ooso oothidanne entana ashshida Xoossaa dogidosona.
PSA 106:22 Kaama biittan oosetida malaalsiyabanne Zo7o Abban hanida malaata oothidaasaa.
PSA 106:23 Hessa gisho, Xoossay enta dhaysana gis; shin dhaysonna mela iya hanqo zaaranaw, Xoossay doorida Musey giddon eqis.
PSA 106:24 Hessafe guye, enti iya qaala ammanonna gisho, he lo77o biitta kadhidosona.
PSA 106:25 Enti banta dunkaaniya giddon zuuzumidosona Godaa qaalas kiitetibookona.
PSA 106:26 Hessa gisho, I enta bazzon yegganaw, ba kushiya denthidi caaqis.
PSA 106:27 Enta kochaa kawotethata giddon, yegganawunne biitta bolla laallanaw caaqis.
PSA 106:28 Hessafe guye, enti Bi7eel-Fagoora eeqa goyinneysatara issife gahetidosona; shempoy bayna eeqatas yarshetida yarshuwa midosona.
PSA 106:29 Banta oosuwan Godaa hanqethidosona; hessa gaason enta giddon iita hargey wodhis.
PSA 106:30 Shin Pinihaasi dendidi, enta nagaraa pirdin, iita hargey enta bollafe kichis.
PSA 106:31 Hessika, iyaw, yeletethaafe yeletethaa gakanaw merinaw xillotetha gididi taybetis.
PSA 106:32 Mariba pultuwa matan Godaa hanqethidosona; enta gaason Muse bolla metoy gakis.
PSA 106:33 Enti iya yiloyidosona; Muse doonape bessonna qaalay keyis.
PSA 106:34 Goday dhaysite gin, enti Kanaane asata dhaysibookona.
PSA 106:35 He palabaape, enti he asatara walaketidosona; enta de7o woga kaallidosona.
PSA 106:36 Xoossa asati enta eeqa goyinnidosona; hessi entaw xihe gidis.
PSA 106:37 Enti banta addenne macca nayta tuna ayyaanatas yarshidosona.
PSA 106:38 Enti xillo suuthu Kanaane eeqatas yarshidi, banta addenne macca nayta suutha gussidosona; he suuthan biittay tunis.
PSA 106:39 Hessada enti banta ooson tunidosona; banta hanotan banta layma kessidosona.
PSA 106:40 Hessa gisho, Godaa hanqoy iya asaa bolla eexis; I ba laata shaatetis.
PSA 106:41 I enta allaga kushen aathidi immis; enta morketi enta haaridosona.
PSA 106:42 Enta morketi enta un7ethidosona banta shenen enta aysidosona.
PSA 106:43 I enta daro wode ashshis; shin enti banta makalla aggonna ixidosona; banta nagaraa gaason dhayidosona.
PSA 106:44 Gidoshin, I enta waasuwa si7is; enta waayiya qopis.
PSA 106:45 I enta gisho, ba ufaysa qaala hassayis; ba siiquwa daruwan enta maaris.
PSA 106:46 Enta di77ida ubbay, entaw qadhetana mela oothis.
PSA 106:47 Nuuni ne geeshsha sunthaa galatana mela Abeeti Godaw, nu Xoossaw, nuna ashsha. Ne bonchuwan nu ceeqetana mela, kawotethata giddofe nuna shiisha.
PSA 106:48 Isra7eele Goday, Xoossay, merinaape merinaa gakanaw galatetto! Asa ubbay, “Amin7i” yaago. Godaa galatite!
PSA 107:1 I keeha gidiya gishonne iya siiqoy merinaasa gidiya gisho; Godaa galatite
PSA 107:2 Goday ashshidaysati, morke kushepe kessi ekidaysati haysada yaagidi odeto.
PSA 107:3 Enti Dolohapenne wulohape, pudehapenne dugehape biitta ubbaafe shiiqidaysata.
PSA 107:4 Entafe issoti issoti mela biittan yuuyidosona. Banta de7iya katamaa biya ogiya demmanaw danda7ibookona.
PSA 107:5 Enti koshatidosona; saamotidosona; enti un7etidosona.
PSA 107:6 Enti metootida wode, Godaako waassidosona; I enta waayiyape enta ashshis.
PSA 107:7 Enti daana katama gakanaw, enta suure ogen kaalethis.
PSA 107:8 Merina iya siiquwa gishonne I entaw oothida malaalsiya oosuwa gisho enti Godaa galato.
PSA 107:9 I saamotidaysata alisees; koshatidaysata lo77oba kalsees.
PSA 107:10 Issoti issoti sakana dhuman uttidosona; birata santhalaatan waayidosona.
PSA 107:11 Hessi haniday enti Ubbaafe Dhoqa Xoossaa, kiita bolla makallida gishonne iya zoriya kadhida gishosa.
PSA 107:12 I enta waaye ooson daaburisis; enta maaddiya asi dhayin kundidosona;
PSA 107:13 Enti metootida wode, Godaako waassidosona; I enta waayiyape enta ashshis.
PSA 107:14 I enta sakana dhumape kessis; enti qashetida santhalaata duuthis.
PSA 107:15 Iya siiquwa gishonne I entaw oothida malaalsiya oosuwa gisho enti Godaa galato.
PSA 107:16 I naase birata pengeta menthis; birata kasota qanxis.
PSA 107:17 Issoti issoti eeya gididosona; banta oothida nagara gaason banta iitatetha gaason metootidosona.
PSA 107:18 Enti kathi ixida gisho hayqos gakidosona.
PSA 107:19 Enti metootida wode, Godaako waassidosona; I enta waayiyape enta ashshis.
PSA 107:20 I ba qaala kiittidi enta pathis; duufope enta ashshis.
PSA 107:21 Iya siiquwa gishonne I entaw oothida malaalsiya oosuwa gisho enti Godaa galato.
PSA 107:22 Enti iyaw galata yarsho shiisho; ufaysa yethan iya oosuwa odo.
PSA 107:23 Issoti issoti markaben abba bollara bidosona; abba bolla banta oosuwa oothidosona.
PSA 107:24 Enti Godaa oosuwa be7idosona; ciimmo abban oothida malaalsiyaba xeellidosona.
PSA 107:25 I kiitida wode gotey dendis; abba zuley qaaxis.
PSA 107:26 Enti pude dendidosona; duge ciimmon wodhidosona; iita metoy gakin enta wozanay til7is.
PSA 107:27 Enti mathotida asada dhubetidi gandigaridosona; enta eray maayis.
PSA 107:28 Enti metootida wode, Godaako waassidosona; I enta waayiyape enta ashshis.
PSA 107:29 I gotiya si77i oothis; abba beeta sirphi oothis.
PSA 107:30 Si77i gida gisho ufaytidosona; enti koyida katamaa Goday gathis.
PSA 107:31 Iya siiquwa gishonne I entaw oothida malaalsiya oosuwa gisho enti Godaa galato.
PSA 107:32 Deriya shiiquwan iya gitatetha awaajo; cimata duulatan iya galato.
PSA 107:33 Goday shaafata melisis; pultoti goggonnaada teqis.
PSA 107:34 He bessan de7iya asaa iitatethaa gisho, aradda biitta quu7e kessis.
PSA 107:35 I mela biittan haathe eelisis; mela biittan pultoy dhuuqanaada oothis.
PSA 107:36 Koshatida asaa he bessan wothis; bantaw daana katamaa yan keexidosona.
PSA 107:37 Enti banta goshshan zeridosona; woyne tokidosona; daro muruuto shiishidosona.
PSA 107:38 I enta anjin enti daridosona; enta mehiya taybuwa guuthibeenna.
PSA 107:39 Enti xoonetiya wodenne un7etiya wode, metoninne azzanon kawuyiya wode,
PSA 107:40 Goday enta halaqata kawushis; mela biittan toylatana mela oothis.
PSA 107:41 Shin manqota metope kessis; enta soo asaa dorsa wudeda darsis.
PSA 107:42 Suure asay hessa be7idi ufaytoosona; shin iita asay yeellatidi si77i goosona.
PSA 107:43 Cincati haysa ubbaa akeeko; Godaa siiquwa qopo.
PSA 108:1 Dawita Mazmure Ta wozanay minnidi de7ees; abeeti Xoossaw, ta wozanay minnidi de7ees. Ta new yexana; nena sabbana.
PSA 108:2 Ta shempe, barka; diithinne maasinqoy denda; Ta wonta guura dendana.
PSA 108:3 Abeeti Godaw, ta nena asaa giddon galatana; kawotethaa giddon nena sabbana.
PSA 108:4 Ne merinaa siiqoy salope dhoqa; ne ammanetethay shaarape dhoqa.
PSA 108:5 Abeeti Xoossaw, salope bollara ne dhoqu dhoqu ga; ne bonchoy sa7a ubbaa bolla gido.
PSA 108:6 Ne doseysati attana mela, ne ushacha kushen nuna ashsha; neeni ta woosa si7a.
PSA 108:7 Xoossay ba geeshsha bessan haysada yaagis; “Ta xoonada Seekema shaakana; Sukota zangaara gishana.
PSA 108:8 Galadinne Minaasey tabaa; Efreemi ta huuphen wothiya uke; Yihudi ta kawota xam7aa.
PSA 108:9 Moo7abey ta meecetiya gabate; Edoomey tabaa gideysa erisanaw ta caammaa iya bolla wothana. Filisxeeme xoonada gereerana” yaagis.
PSA 108:10 Godaw, gimbetida katamaako, tana efanay oonee? Edoome gakanaw tana kaalethanay oonee?
PSA 108:11 Abeeti Xoossaw, nuna aggiday nena gidikii? Abeeti Xoossaw, ne nu tooranchotara olas keyaka.
PSA 108:12 Asa maadoy pathenna gisho, morkiya olanaw ne nuna maadda.
PSA 108:13 Xoossaa wolqan nu morketa xoonana; nu morketa kawushanay iya.
PSA 109:1 Dawita Mazmure Abeeti ta nena galatiya Xoossaw, ne taw si77i goopa.
PSA 109:2 Iita asatinne wordanchoti, banta doona ta bolla dooyidosona; banta wordo inxarsan ta bolla haasayoosona.
PSA 109:3 Ixon ta yuushuwa teqidosona; gaasoy bayna tana olidosona.
PSA 109:4 Ta enta dosaysinne entaw woossayis; gidoshin, enti tana mootosona.
PSA 109:5 Ta lo77o oothin, taw iita zaarosona; ta enta dosin, enti tana ixoosona.
PSA 109:6 Ta morkiya bolla iita daynna shuuma; mootanchoy iya ushachan eqo.
PSA 109:7 Iya pilgiya wode I bala gididi bento; iya woosay iyaw gome gido.
PSA 109:8 Iya laythay qaammo; iya shuumatetha hari eko.
PSA 109:9 Iya nayti yi7o gido; iya machiya am7o gido.
PSA 109:10 Iya nayti woosancho gididi toylato; banta de7iya humpa keethaafe goodeto.
PSA 109:11 Iya shalo ubbaa acoy oyko; I daaburidi kessidaba ubba allagi bonqo.
PSA 109:12 Oonika iyaw keehopo; iya naytas qadhetiya asi bentofo.
PSA 109:13 Iya nayti ubbay hayqidi wuro; kaalliya yeletethan iya sunthay dogeto.
PSA 109:14 Iya aawata nagaray Godaa sinthan qofeto; iya aaye nagaray qushetofo.
PSA 109:15 Goday enta nagara ubba wode qopo; enti sa7a bolla hassayetofo.
PSA 109:16 I keeha oothanaw polo qopibeenna; manqota, metootanchota, qohetidaysata gooddidi wodhis.
PSA 109:17 I baaddanaw dosida gisho, I baadetidaysa gido. I anjanaw dosonna gisho, iya anjoy iyape haakis.
PSA 109:18 Baadethi iya afilada ma7is; iya baadethi haathada iya bolla laakisis; zayteda iya meqethaa giddo gelo.
PSA 109:19 Afilada iya kammo; dancoda ubba wode iya xeessan de7o.
PSA 109:20 Ha tana mooteysanne ta bolla iita odeteyisata Goday hessada oothidi seero.
PSA 109:21 Shin abeeti Ubbaa Haariya Godaw, ne suntha gisho tana maadda. Ne merinaa siiquwanne ne keehatetha gisho tana ashsha.
PSA 109:22 Taani manqonne metootancho asi; ta wozanay madunxis.
PSA 109:23 Ta omarsa kuyada dhayana hanayis; ta booleda qoqofetas.
PSA 109:24 Xooman ta gulbatay daaburis; ta asatethay laafin meqethi attis.
PSA 109:25 Tana mooteysatas qelqisethas attas; tana be7idi, banta huuphiya qaathosona.
PSA 109:26 Abeeti Godaw ta Xoossaw, tana maadda; merinaa ne siiquwada tana ashsha.
PSA 109:27 Ne kushey haysa oothidaysanne, ne haysa oothidaysa ta morketi ero.
PSA 109:28 Enti tana baaddoosona, shin ne tana anjana; tana gooddeysati yeellato; shin ne tana ufaysa.
PSA 109:29 Tana mooteysati yeella ma7o; banta kawushaa afilada ma7o.
PSA 109:30 Taani ta inxarsan Godaa galatana; deriya shiiquwan iya sabbana.
PSA 109:31 I manqota gisho mootetees; hayqos pirdetidaysata ashshees.
PSA 110:1 Dawita mazmure Goday ta godaa, “Ta ne morketa ne tohoy yedhiya bessi oothana gakanaw, haysan taape ushacha baggan utta” yaagis.
PSA 110:2 Godaw ne minotetha xam7a Xiyoonepe yedda; “Ne morketa haara” yaagana.
PSA 110:3 Ne haariya gallas ne derey dosidi new haaretana; ne geeshsha ma7uwa ma7ada, wonta xalqeda ne kumetha wolqan phoolana.
PSA 110:4 Goday, “Malkexaadeqi kahine gididaysada, ne merinaw kahine gidana” yaagidi caaqis; iya caaqoy laametenna.
PSA 110:5 Goday ne ushachan de7ees; ba hanquwa gallas kawota tincherethana.
PSA 110:6 I kawotethata bolla pirdana; ola denbata aha xalaala oothana; biitta ubban de7iya kawota dhaysana.
PSA 110:7 Kawoy oge lanqen de7iya pultuwafe uyidi, I ba huuphiya dhoqu oothana.
PSA 111:1 Godaa galatite; Suureta shiiqon ta kumetha wozanan Godaa galatana.
PSA 111:2 Godaa oosoti ay mela gite! Entan ufaytiya ubbay enta qopees.
PSA 111:3 Iya oosoti bonchoninne teeman kumis; iya xillotethay merinaw de7ees.
PSA 111:4 Iya malaalsiya oosoy hassayetishe daanada oothis; I keehanne qadhetiya Godaa.
PSA 111:5 Baw yayyeysatas kathi immees; ba caaqo qaala merinaw baletenna.
PSA 111:6 Allagata biitta ba asaas aathidi immidi, ba gita wolqaa ba asaa bessis.
PSA 111:7 Iya kushe oosoti tumanne suure; iya woga ubbay ammanetidaysa.
PSA 111:8 Enti merinaw eqidi de7oosona; tumatethaninne suuretethan imetidosona.
PSA 111:9 I ba asaa wozis; caaqo entara merinaw essis; iya sunthay geeshshinne yashsheysa.
PSA 111:10 Cincatethas koyroy Godaas yashshi; iya wogaa naageysatas lo77o akeeki de7ees. Goday merinaw galatetto!
PSA 112:1 Godaa galatite; Godaas yayeysinne iya kiita naageysi anjetidaysa.
PSA 112:2 Iya nayti biittan wolqaama gidana; suure asaa yeletay anjetana.
PSA 112:3 Shaloynne duretethi iya keethan de7ees; iya xillotethay merinaw daana.
PSA 112:4 Keeha, xillonne qadhetiya asas, dhuma giddon poo7oy poo7ees.
PSA 112:5 Keehatethan coo tal7iya uraas, ba oosuwa suuretethan oothiya uraas keehabay yaana.
PSA 112:6 Xillo asi awudeka kundenna; I merinaw hassayetana.
PSA 112:7 Iya wozanay hirgonna gishonne I Godan ammanetiya gisho, iitabaa si7ikoka I dagammenna;
PSA 112:8 Iya wozanay mino gidiya gisho yayyenna; wursethan iya morketi xoonetin be7ana.
PSA 112:9 I manquwas darsidi immees; iya xillotethay merinaw de7ees; iya kacey bonchon dhoqu dhoqu gaana.
PSA 112:10 Iita asi hessa be7idi yilotees; mettershe saxishe coo dhayees; iita asa amoy coo attana.
PSA 113:1 Godaa galatite; hinteno, Godaa aylleto, Godaa sunthaa galatite.
PSA 113:2 Godaa sunthay, hachife merinaa gakanaw galatetto.
PSA 113:3 Away doliyasuwape wulliyasuwa gakanaw, Godaa sunthay galatetto.
PSA 113:4 Goday kawotetha ubbaa haarees; iya bonchoy saluwape dhoqa.
PSA 113:5 Godaa nu Xoossaa meli oonee? I bolla dhoqan ba araatan uttis.
PSA 113:6 I salotanne sa7aa be7anaw duge hokees.
PSA 113:7 I manquwa baanape dhoqu oothees; metootanchuwa bidope denthees.
PSA 113:8 Moorinnatara lagge oothees; halaqatara dhoqa bessan utisees.
PSA 113:9 Mayntha maccasiw nayta aayo oothidi, ufaysidi I keethan iyo bonchisees. Godaa galatite!
PSA 114:1 Isra7eele asay Gibxe biittafe keyida wode, Yayqooba sheeshay allaga qaalan, haasaya asaa aggidi bida wode,
PSA 114:2 Yihuda asay Godaas geeshsha asi gidis; Isra7eele asay iyaw haaretis.
PSA 114:3 Abbay hessa be7idi baqatis; Yordaanose shaafay guye simmis.
PSA 114:4 Dereti deeshada gupidosona; zumati dorsa marada dozgidosona.
PSA 114:5 Abbaw, ne ayis baqatadii? Yordaanose, ne ayis guye simmadii?
PSA 114:6 Dereto, deeshada ayis gupidetii? zumato, dorsada ayis dozgidetii?
PSA 114:7 Neno biittaw, Godaa sinthan, Yayqooba Xoossaa sinthan kokora.
PSA 114:8 I zaalla eele haathi kessees; mino zaalla haatha pulto oothees.
PSA 115:1 Abeeti Godaw, nu gisho gidonashin, ne siiquwanne ne ammanetetha gisho, ne sunthaa boncha.
PSA 115:2 Ayis kawotethati, “Enta Xoossay awunee?” yaaganee?
PSA 115:3 Nu Xoossay salon de7ees; ba dosidaba ubbaa oothees.
PSA 115:4 Shin enta eeqati ase kushen oosetidosona; enti birapenne worqafe medhetidosona.
PSA 115:5 Entaw dooni de7ees, shin haasayokona; ayfey de7ees, shin xeellokona.
PSA 115:6 Entaw haythi de7ees, shin si7okona; siidhey de7ees, shin singokona.
PSA 115:7 Entaw kushey de7ees, shin bochi erokona; tohoy de7ees, shin hemetokona; enta siixinathara kooshinchi keyenna.
PSA 115:8 Enta medheysatinne enta ammaneteysati enta mela gido.
PSA 115:9 Isra7eele asaw, Godan ammanetite; hintena maaddeynne hinte gondalley iya.
PSA 115:10 Aarona keetha asaw, Godan ammanetite; hintena maaddeynne hinte gondalley iya.
PSA 115:11 Godaas yayyeysato, Godan ammanetite; hintena maaddeynne hinte gondalley iya.
PSA 115:12 Goday nuna qopees; I nuna anjana; I Isra7eele asaa anjana; I Aarona keetha asaa anjana.
PSA 115:13 Godaas yayyeyisata, guuthaa gita anjana.
PSA 115:14 Goday hintena darso; hintenanne hinte nayta anjo.
PSA 115:15 Saluwanne sa7aa medhida Goday hintena anjo.
PSA 115:16 Saloy Xoossaba; shin sa7a asas immis.
PSA 115:17 Hayqidaysati Godaa galatokonna; duufon zin7idaysati iya sabbokona.
PSA 115:18 Shin nuuni, de7on de7eysati, hachife merinaa gakanaw, Godaa galatoos. Godaa galatite.
PSA 116:1 Goday ta waasuwanne ta woosa si7ida gisho, taani iya dosayis.
PSA 116:2 I ba haytha taako zaarida gisho, ta de7o laytha ubban iya xeegana.
PSA 116:3 Hayqoy xiheda tana teqis; duufo hirgay tana oykis; un7inne metoy tana qachis.
PSA 116:4 He wode, “Abeeti Godaw, tana ashsha” yaagada Godaa suntha xeegas.
PSA 116:5 Goday keehanne xillo; nu Xoossay qadhetees.
PSA 116:6 Goday ashketa naagees; ta metootida wode tana ashshis.
PSA 116:7 Goday new keeha gidiya gisho, hiza ta shempe, wopu ga.
PSA 116:8 Goday ta shempuwa hayqope, ta ayfiya afuthafe, ta tohuwa dhubepe ashshis.
PSA 116:9 Taani de7on de7eyisata giddon, Godaa sinthan hemetayis.
PSA 116:10 Taani, “Daro waayetas” gida wode, ta ammanuwa aggabike.
PSA 116:11 Taw sa7i haddirida wode, “Asi ubbay wordancho” yaagas.
PSA 116:12 I taw keehida keehatetha gisho Godaas ay qanxanaw danda7iyana?
PSA 116:13 Goday tana ashshida gisho galatana, xuu7a woyne ushsha yarsho oothada shiishana.
PSA 116:14 Iya asaa ubbaa sinthan ta qangetha Godaas gathana.
PSA 116:15 Geeshshata hayqoy Godaa sinthan, daro al7o.
PSA 116:16 Abeeti Godaw, taani ne aylle; taani ne aylle, ne gadhinde na7aa; tana qashope ne birshadasa.
PSA 116:17 Godaw, ta galata yarsho new yarshana; ne sunthaa xeegana.
PSA 116:18 Asa ubbaa sinthan ta qangetha Godaas gathana.
PSA 116:19 Yerusalaamen de7iya Xoossa keethaa dabaaban, ta qangetha gathana. Godaa galatite.
PSA 117:1 Kawotethati ubbay Godaa galatite; asa ubbay iya sabbite.
PSA 117:2 Iya siiqoy nuus mino; iya ammanetethay merinaasa. Godaa galatite.
PSA 118:1 Goday keeha gidiya gisho galatite; iya siiqoy merinaasa.
PSA 118:2 Isra7eele asay, “Iya siiqoy merinaasa” yaago.
PSA 118:3 Aarona keetha asay, “Iya siiqoy merinaasa” yaago.
PSA 118:4 Godaas yayiya ubbay, “Iya siiqoy merinaasa” yaago.
PSA 118:5 Ta un7etida wode Godaako waassas; I ta waasuwa si7idi tana la77a kessis.
PSA 118:6 Goday taara de7iya gisho ta yayyike; asi tana ay oothanee?
PSA 118:7 Goday tana maaddanaw taara de7ees; ta morketa xoonetethaa ta be7ana.
PSA 118:8 Asan ammanetanape Godan geemmidi atteysi lo77o.
PSA 118:9 Gita asan ammanetanape Godan geemmidi atteysi lo77o.
PSA 118:10 Kawotethati ubbay tana teqidi oykidosona; shin Godaa sunthan ta enta xoonas.
PSA 118:11 Enti ta yuushuwa teqidosona; shin Godaa sunthan ta enta xoonas.
PSA 118:12 Enti ta yuushuwa mathada teqidosona; Shin buurey taman eexeysada eexidi dhayidosona; Godaa sunthan ta enta dhaysas.
PSA 118:13 Taani sugetada kundanaw gakas; shin Goday tana maaddis.
PSA 118:14 Goday ta minotethaanne yethaa; I tana ashsheysa gidis.
PSA 118:15 Xillota dunkaaniyan ola xoonidi, simmiya asaa ufaysas giyaba si7ite; Godaa ushacha kushey gitaba oothis.
PSA 118:16 Godaa ushacha kushey xoono immis; Godaa ushacha kushey gitaba oothis.
PSA 118:17 Taani hayqike; de7on daana; Goday oothidaba awaajana.
PSA 118:18 Goday tana iita seera seeris; shin hayqos aathidi immibeenna.
PSA 118:19 Taani gido gelada Godaa galatana mela, xillotetha pengeta taw dooyite.
PSA 118:20 Haysi Godaa penge; xilloti iyara geloosona.
PSA 118:21 Godaw, ne tana si7ida gishonne taw xoono immida gisho ta nena galatayis.
PSA 118:22 Gimbeysati kadhidi yeggida shuchay, godaa xaphuwa minthiya shuchu gidis.
PSA 118:23 Haysi Godaa ooso; nu ayfiyas malaalsiyaba.
PSA 118:24 Haysi gallasay Goday oothida gallas; ane nuuni iyan ufaytoosinne ililoos.
PSA 118:25 Godaw, ha77i nuna ashsha; Godaw, ha77i nuus injeya.
PSA 118:26 Godaa sunthan yaa asi anjetidaysa gido; nuuni Xoossa keethaafe hintena anjoos.
PSA 118:27 Goday Xoossaa; I nu bolla poo7isis; yarsho bessan de7iya kaciyako keyite; irxa tashe oykidi ba7aale bonchite.
PSA 118:28 Neeni ta Xoossaa; ta nena galatana; neeni ta Xoossaa; ta nena sabbana.
PSA 118:29 Goday keeha gidiya gisho iya galatite; iya siiqoy merinaasa.
PSA 119:1 Banta ogiyan borey baynaysatinne Godaa wogaada hemeteysati anjetidaysata.
PSA 119:2 Iya kiitaa naageysatinne banta kumetha wozanan iya koyeysati anjetidaysata.
PSA 119:3 Enti bala oothidi erokona; Godaa ogiyan hemetoosona.
PSA 119:4 Ne kiita ammanetidi naagana mela, neeni nuna kiittadasa.
PSA 119:5 Ne wogaa naagada ta ogey minnana mela koyayis.
PSA 119:6 Ne kiita ubbaa akeekada, ta polo yeellatike.
PSA 119:7 Ne xillo pirdaa ta tamaarida wode, ta nena suure wozanan galatana.
PSA 119:8 Ta ne higgiya naagana; tana polo yeggofa.
PSA 119:9 Yalagay ba ogiya waatidi, geeshshatethan naaganaw danda7ii? Ne qaala kiitetiko danda7ees.
PSA 119:10 Ta kumetha wozanan nena koyas; ne kiitaape kare keyonnaada tana naaga.
PSA 119:11 Taani ne bolla nagara oothonna mela ne qaala ta wozanan qosas.
PSA 119:12 Abeeti Godaw, ne galateta; ne awaajuwa tana tamaarsa.
PSA 119:13 Ne doonape keyiya pirda ubbaa taani ta inxarsan odana.
PSA 119:14 Duretethan ufayteysafe aathada, ta ne higgiyan ufaytayis.
PSA 119:15 Ne wogata zaara zaarada qopayis ne ogiya loythada akeekayis.
PSA 119:16 Taani ne higgiyan ufaytayis; ne qaala dogike.
PSA 119:17 Taani de7on daana melanne ne qaala kiitetana mela taw ne aylliyas lo77oba ootha.
PSA 119:18 Ne higgiyan de7iya malaalsiya tumatethaa ta be7ana mela ta ayfiya dooya.
PSA 119:19 Taani ha sa7an imathe; ne kiita taape genthofa.
PSA 119:20 Ta shempiya ubba wode ne pirdaa laamotashe hayqasu.
PSA 119:21 Otoreyisata, baadetidaysatanne, ne kiitaape kare keyeyisata ne seerasa.
PSA 119:22 Taani neeni odidaysa oothida gisho, enta cashshaanne boriya ta bollafe digga.
PSA 119:23 Hari attoshin halaqati shiiqidi, ta bolla maqetikoka, taani, ne oosanchoy, ne awaajuwa zaara zaarada qopana.
PSA 119:24 Ne markatethay tana ufaysees; I tana zorees.
PSA 119:25 Taani hayqana hanayis; ne gida qaalada tana ashsha.
PSA 119:26 Taani ta ogiyaba new odin, ne tana si7adasa; hiza ne awaajuwa tana tamaarsa.
PSA 119:27 Ne wogaa tana akeekisa; malaalsiya oosuwa taani zaara zaarada qopana.
PSA 119:28 Azzanoy darida gisho ta shempoy daaburis; neeni gida qaalada tana minthetha.
PSA 119:29 Wordo oge taape haassa; ne keehatethan ne higgiya tana tamaarsa.
PSA 119:30 Taani tuma oge dooras; ne pirdaa hayzas.
PSA 119:31 Abeeti Godaw, ta ne higgiya minthada oykas; hiza tana yeellayopa!
PSA 119:32 Ta wozanaa la77a kessida gisho, taani ne higgiya ogiyan woxayis.
PSA 119:33 Abeeti Godaw, ne awaajuwa birshethaa tana tamaarsa; taani wursethi gakanaw iya naagana.
PSA 119:34 Taani ne higgiya naagana malanne ta kumetha wozanaape iyaw kittaatan mela, ne taw akeeka imma.
PSA 119:35 Taani iyan ufaytiya gisho, ne kiita ogiyan tana kaaletha;
PSA 119:36 Ta wozanaa amuwako gidonashin, ne higgiyako tana zaara.
PSA 119:37 Pathonnaba xeellonna mela, ta ayfeta teqa; ne ogiyan ta de7uwa ooraxisa.
PSA 119:38 New yayyana mela, ne gelida qaala, taw ne aylliyas, pola.
PSA 119:39 Tana yashshiya cashsha taape digga; ne pirday ay mela lo77o!
PSA 119:40 Taani ne wogaa naaganaw amottayis; neeni xillo gidiya gisho, ta de7uwa ooraxisa.
PSA 119:41 Abeeti Godaw, ne siiquwa tana bessa; neeni gelida qaalada tana ashsha.
PSA 119:42 Taani ne qaalan ammanetiya gisho, tana cayeyisata zaaranaw danda7ayis.
PSA 119:43 Taani ne pirda ufaysi oothida gisho, ta inxarsaafe tumatethaa qaala dhaysofa.
PSA 119:44 Taani merii merinaw ne higgiya kiitetana.
PSA 119:45 Taani ne woga poliya gisho, aahon hemetana.
PSA 119:46 Taani kawota sinthan eqada, neeni gidaba odashe yeellatike.
PSA 119:47 Taani ne kiitata dosayis, entan ufaytayis.
PSA 119:48 Taani dosiya ne kiita bonchayis; ne awaajuwa zaara zaarada qopana.
PSA 119:49 Neeni taw, ne aylliyas, immida qaala qopa; ne qaalan taani ufaysi oothayis.
PSA 119:50 Ne qaalay tana de7on wothees; I meto wode tana minthethees.
PSA 119:51 Otoranchoti tana likefe aathidi cayoosona; shin taani ne higgiyafe sher7i giike.
PSA 119:52 Abeeti Godaw, benipe de7iya ne pirda taani hassayayis; hessan taani minettayis.
PSA 119:53 Iitati ne higgiya kiitetonaysa be7in, tana yiloy wodhis.
PSA 119:54 Taani de7iya allaga biittan ne awaajoy taw yethi gidis.
PSA 119:55 Abeeti Godaw, taani qamma ne suntha qopayis; ne higgiya naagayis.
PSA 119:56 Ta Ne woga naagana; I taw ooso gidis.
PSA 119:57 Abeeti Godaw, ta saamay nena; ta ne higgiya naaganaw qanxas.
PSA 119:58 Ta kumetha wozanan nena woossayis; ne gelida qaalada taw qadheta.
PSA 119:59 Taani ta ogiya akeeka xeellada, ne higgiya kaallanaw simmas.
PSA 119:60 Taani ne kiita naaganaw, eesotanaape attishin, gam7ike.
PSA 119:61 Iitati taw xihe yeggikoka, taani ne higgiya dogike.
PSA 119:62 Ne xillo pirda gisho, nena galatanaw, taani gidi bilahe dendayis.
PSA 119:63 Taani new yayyeyisata ubbaasinne ne wogaa naageysata dabbo.
PSA 119:64 Abeeti Godaw, sa7i ne siiquwan kumis; ne awaajuwa tana tamaarsa.
PSA 119:65 Abeeti Godaw, ne gelida qaalada taw ne aylliyas keehaba oothadasa.
PSA 119:66 Taani ne kiitatan ammanetiya gisho, lo77o pirdanne eratethi tana tamaarsa.
PSA 119:67 Taani seeretanaape kase kare hemetas; shin ha77i ne qaalas kiitetayis.
PSA 119:68 Neeni keeha; neeni keehaba oothaasa; ne awaajuwa tana tamaarsa.
PSA 119:69 Otoranchoti ta sunthaa wordon iissoosona; shin ta ne wogaa ta kumetha wozanan naagana.
PSA 119:70 Enta wozanay kumthi doccis; shin taani ne higgiyan ufaytayis.
PSA 119:71 Ne higgiya tamaarana mela ne tana seeridaysi taw lo77o gidis.
PSA 119:72 Daro worqafenne birape, ne doonape keyiya higgey taw aadhees.
PSA 119:73 Tana ne kushey medhis; ne kushey giigisis; ne kiita tamaarana mela taw akeeka imma.
PSA 119:74 Taani ne qaalan ufaysi oothida gisho, nena boncheysati tana be7idi ufayto.
PSA 119:75 Abeeti Godaw, ne pirday xillo gideysa eras; ne tana seeriday ammanetethan gideysa ta akeekas.
PSA 119:76 Taw ne aylliyas gida qaalada, ne siiqoy tana minthetho.
PSA 119:77 Ne higgey tana ufaysiya gisho, taani de7on daana mela taw qadheta.
PSA 119:78 Otoranchoti tana wordon mootiya gisho yeellato; taani ne wogaa zaara zaarada qopayis.
PSA 119:79 New yayyeysatinne ne markatethaa ereysati taako yo.
PSA 119:80 Ta yeellatonna mela, ta wozanay ne higgiyan borey baynaysa gido.
PSA 119:81 Neeni tana ashshana mela, taani naagashe daaburas; taani ne qaalan ufaysi oothayis.
PSA 119:82 Neeni gida qaalay poletin be7anaw naagishin ta ayfey teljumis. “Ne tana awude minthethane” yaagas.
PSA 119:83 Cuyan kaqetida ogoroda gundas; gidoshin ne awaajuwa balabiike.
PSA 119:84 Taani ne aylley awude gakanaw naago? Tana yedetheyisata ne awude pirdanee?
PSA 119:85 Ne higgiya naagonna otoranchoti tana oykanaw olla bookosona.
PSA 119:86 Ne kiita ubbay ammantheyisata; gaasoy bayna asay tana yedethiya gisho tana maadda.
PSA 119:87 Enti tana wodhi diggidi aggidosona; shin ta ne wogaa aggabike.
PSA 119:88 Ne siiquwan ta de7uwa naaga; ta ne kiitaa naagana.
PSA 119:89 Abeeti Godaw, ne qaalay merinaasa; I salon minnidi de7ees.
PSA 119:90 Yeletape yeletaa gakanaw ne ammanetaasa; ne ha sa7aa minthada essadasa; ika minnidi de7ees.
PSA 119:91 Ubbay ne aylle gidiya gisho, hachi gakanaw ubbay ne kiittada minnidi de7ees;
PSA 119:92 Ne higgey tana ufaysonnaba gidiyako, ta waayan ta dhayanashin.
PSA 119:93 Taani ne wogaa kumethi dogike; neeni iyan tana de7on wothadasa.
PSA 119:94 Taani nebaa gidiya gisho tana ashsha; taani ne wogaa naaganaw koyayis.
PSA 119:95 Iitati tana dhaysanaw zugidi naagoosona; shin taani neena qopayis.
PSA 119:96 Polo geetetidaba ubbaas zawi de7eysa ta be7as; shin polo gidida higgiyas zawi baawa.
PSA 119:97 Taani ne higgiya waanada dosiyana! kumetha gallas taani iya qopayis.
PSA 119:98 Ne kiitay ubba wode taara de7iya gisho, ta morketape aathidi tana akeeka kessoosona.
PSA 119:99 Taani nee higgiya qopiya gisho, ta astamaaretape aadhida cincatethi taw de7ees.
PSA 119:100 Taani ne wogaa kiitetiya gisho, cimatape aathada akeekayis.
PSA 119:101 Taani ne qaala kiitetanaw koyiya gisho, ta tohuwa iita oge ubbaafe naagas.
PSA 119:102 Neeni tana tamaarsida gisho, ta ne higgiyafe gaxa keyike.
PSA 119:103 Ne qaalay waanidi mal7i! ililo eessafe aadhidi mal7ees.
PSA 119:104 Ne wogaape akeeka demmas; hessa gisho, geella oge ubbaa ixas.
PSA 119:105 Ne qaalay ta tohuwas xompe, ta ogiyas poo7o.
PSA 119:106 Ne xillo pirdada daanaw, ta caaqida caaquwa minthana.
PSA 119:107 Abeeti Godaw, ta waayey daro; ne ufaysa qaalada tana de7on wotha.
PSA 119:108 Abeeti Godaw, ta galataa yarshuwa eka; tana ne pirdaa tamaarsa.
PSA 119:109 Ta shempoy ubba wode meton de7ees; shin taani ne higgiya dogike.
PSA 119:110 Iitati taw gite yeggidosona; shin taani ne wogaape kare keyabike.
PSA 119:111 Ne higgey taw merinaa shalo; I ta wozanaas ufaysi immees.
PSA 119:112 Ta hayqana gakanaw ne awaajuwada oothanaw qofa qachas.
PSA 119:113 Taani nam7u qofi de7iya asaa ixayis; shin ne higgiya dosayis.
PSA 119:114 Ne taw gondallenne qosetada attiya besse taani ne qaalan ufaysi oothayis.
PSA 119:115 Taani ta Xoossaa kiita naagana mela, hinteno, iita oothiya ubbay taape haakite.
PSA 119:116 Taani de7on daana mela ne ufaysa qaalada tana minthetha; ta ufaysaa dhumisopa.
PSA 119:117 Ta saro daana mela tana zempisa; ta ubba wode ne awaajuwa si7ana.
PSA 119:118 Ne awaajuwafe haakeyisata ne koyaka; enta cimoy hada.
PSA 119:119 Iitata ubbaa ne pitoda taybaasa; hessa gisho, taani ne kiitaa dosayis.
PSA 119:120 Ta asatethay yashshan new kokorees; ta ne higgiya daro yayyayis.
PSA 119:121 Ta suurenne xillo oothas; tana ta morketas aathada immofa.
PSA 119:122 Tana ne aylliya maaddanaw caaqa; tana otoranchoti un7ethana mela oothofa.
PSA 119:123 Ne tana ashshana gada ta xeellishin, ne xillo qaala ta naagishin, ta ayfey teljumis.
PSA 119:124 Taw ne aylliyas, ne siiquwada ootha; ne higgiya tana tamaarsa.
PSA 119:125 Tana ne aylliya ne siiquwa bessa; ne wogaa erana mela taw akeeka imma.
PSA 119:126 Abeeti Godaw, asay ne higgiya menthida gisho, ne pirdana wodey ha77i gakis.
PSA 119:127 Taani ne kiita worqafe aathada dosay; ee, walahi bayna worqafe aathada dosayis.
PSA 119:128 Hessa gisho, ta ne wogata ubbaa kaallayis; geella oge ubbaa ixas.
PSA 119:129 Ne woga ubbay malaalsiyaba; hessa gisho, ta iya kiitetayis.
PSA 119:130 Ne qaala birshethay poo7o immees; cincatethi pacidaysatas akeeka immees.
PSA 119:131 Taani ne kiitaa saamotada, ta doona dooyas.
PSA 119:132 Haa taako simma; nena doseysatas ne ootheysada taw qadheta.
PSA 119:133 Ne ufaysa qaalada ta hemethaa suurisa; nagari tana haarana mela oothofa.
PSA 119:134 Ta ne wogaa kiitetana mela tana un7etheyisata kushepe woza.
PSA 119:135 Ne aylliya ta bolla ne som7uwa poo7isa; ne higgiya tamaarsa.
PSA 119:136 Asay ne higgiya menthida gisho, ta afuthay haathada goggees.
PSA 119:137 Abeeti Godaw, ne xillo; ne pirday suure.
PSA 119:138 Ne higgey xillo; ay wodeka ammanetees.
PSA 119:139 Ta morketi ne qaala toochida gisho, ta mishay tamada eexidi keyis.
PSA 119:140 Ne ufaysa qaalay daro ammanetees; ta ne aylley daro dosayis.
PSA 119:141 Taani pathonnanne kadhetida asi; gidoshin ta ne wogaa dogike.
PSA 119:142 Ne xillotethay merinaw de7ees; ne higgey tuma.
PSA 119:143 Metoynne un7i tana gakis; shin ne kiitati tana ufaysoosona.
PSA 119:144 Ne wogay merinaw xillo; ta de7on daana mela taw akeeka imma.
PSA 119:145 Abeeti Godaw, ta kumetha wozanaape neeko waassas; tana alla; Ta ne awaajuwa naagana.
PSA 119:146 Ta neeko waassas; tana ashsha; ta ne higgiya naagana.
PSA 119:147 Xalqey caaronna wonta dendada, tana maadda gada neeko waassayis; ne gelida qaalan ufaysi wothayis.
PSA 119:148 Ne qaalaba zaara zaara qopanaw, qamma utta aqayis.
PSA 119:149 Abeeti Godaw, ne siiquwa gisho, tana si7a; ne xillo pirdada tana de7on wotha.
PSA 119:150 Tana yedethiya iitati tako matoosona; shin enti ne higgiyafe haakoosona.
PSA 119:151 Shin abeeti Godaw, ne taw matan de7aasa; ne kiita ubbay tuma.
PSA 119:152 Taani benipe doomada, ne higgiya tamaaras; ne iya merinaw minthada essadasa.
PSA 119:153 Ta ne higgiya dogonna gisho, ta metuwa be7ada tana ashsha;
PSA 119:154 Ta gisho mootetada tana woza; ne ufaysa qaalada tana de7on wotha.
PSA 119:155 Ne higgiya enti ekonna gisho, iitati atotethi demmokona.
PSA 119:156 Abeeti Godaw, ne qadhey daro; ne xillo pirdada tana de7on wotha.
PSA 119:157 Tana ixeysatinne yedetheysati daro; shin ta ne higgiyafe gaxa keyike.
PSA 119:158 Enti ne kiita naagonna gisho, ta nena kaddeyisata be7ada shaatettas.
PSA 119:159 Abeeti Godaw, ta ne wogaa doseysa be7a; ne siiquwada tana de7on wotha.
PSA 119:160 Ne qaalay tuma; ne xillo pirday merinaw de7ees.
PSA 119:161 Halaqati tana coo yedethoosona; shin ta wozanay ne qaala yayyees.
PSA 119:162 Darobaa di77ida asi ufayteysada, ne ufaysa qaalan ta ufaytayis.
PSA 119:163 Taani wordo ixayis; shaatettayis; shin ne higgiya dosayis.
PSA 119:164 Ne xillo pirdaa gisho, ta nena gallas laapun toho galatayis.
PSA 119:165 Ne higgiya doseysatas polo sarotethi de7ees; enta aybika dhubethanaw danda7enna.
PSA 119:166 Abeeti Godaw, ta ne atotetha ufaysan naagayis; ne kiita kaallayis.
PSA 119:167 Taani ne higgiya naagayis; ta kumetha wozanaape dosayis.
PSA 119:168 Ta oge ubbaa ne be7iya gisho, taani ne higgiyanne ne wogaa naagana;
PSA 119:169 Abeeti Godaw, ta waasoy ne sinthe gako; ne ufaysa qaalada taw akeeka imma.
PSA 119:170 Ta woosay ne sinthe gako; ne ufaysa qaalada tana ashsha.
PSA 119:171 Neeni ne awaajuwa tana tamaarsiya gisho, ta doonape galati pultana.
PSA 119:172 Ne kiita ubbay xillo gidiya gisho, ta inxarsay ne qaalaba yexana.
PSA 119:173 Taani ne wogaa doorida gisho, ne kushey tana maaddanaw giigidaysa gido.
PSA 119:174 Abeeti Godaw, ne ashshana mela ta laamotayis; ne higgey tana ufaysees.
PSA 119:175 Taani nena galatana mela, tana de7on wotha; ne pirday tana maaddo.
PSA 119:176 Taani dhayida dorsada toylatas; tana ne aylliya koya; ta ne kiita dogike.
PSA 120:1 Pudethe keyishe yexiya mazmure Meto wode taani Godaa xeegin I taw koyis.
PSA 120:2 Godaw, wordo doonapenne cimmiya inxarsafe tana ashsha.
PSA 120:3 Hinteno, wordanchoto, Goday hintena waatiko lo77o? I hintena waatidi seeriko lo77o?
PSA 120:4 I hintena leefetida ola tooran caddana; xiifa bonqon hintena xuuggana.
PSA 120:5 Ta Mosahan de7iya gishonne Qedaare dunkaanen uttida gisho tana ayye!
PSA 120:6 Sarotethi ixiya asaara taani daro wode de7as.
PSA 120:7 Taani saro asi; shin ta sarotethaba haasaya wode, enti olaba haasayoosona.
PSA 121:1 Pudethe keyishe yexiya mazmure Taw maadoy awupe yaane gada, taani deretako xeellas.
PSA 121:2 Taw maadoy salonne sa7aa medhida Godaape yees.
PSA 121:3 I ne tohuwa harchisenna; nena naageysi dhiskenna.
PSA 121:4 Isra7eele naageysi zin7enanne dhiskenna.
PSA 121:5 Goday nena naageysa; ne ushachan gididi, new kuya gidana.
PSA 121:6 Gallas awi nena meenna; qamma ageeni nena qohenna.
PSA 121:7 Goday qohiyaba ubbaafe nena naagana; I nena saro wothana.
PSA 121:8 Goday ne kessaane ne geluwa, hachife merinaw naagana.
PSA 122:1 Dawiti pude keyishe yexiya mazmure Enti tana, “Ane Xoossa keethi boos” yaagin, tana ufaysis.
PSA 122:2 Yerusalaame, nuuni ne pengetara gelidi eqida.
PSA 122:3 Yerusalaamey danthetada minna keexetida lo77o katama.
PSA 122:4 Godaa kiitaa maaran Isra7eele zareti, Godaa galatanaw he katamaa yoosona.
PSA 122:5 Dawita kochaafe kawotida ubbay, banta asaas pirdanaw yan uttoosona.
PSA 122:6 Yerusalaame sarotethaas haysada yaagidi woossite; “Nena dosiya ubbay anjeto.
PSA 122:7 Ne gimbeta giddon saroy gido; ne kawo keethan wopatethi de7o” yaagite.
PSA 122:8 Ta ishatanne ta dabbota gisho, “Ne giddon saroy de7o” yaagana.
PSA 122:9 Godaa nu Xoossaa keethaa gisho, new lo77oba amottayis.
PSA 123:1 Pudethe keyishe yexiya mazmure Salon, ne araata bolla uttidayso, taani pude neeko xeellayis.
PSA 123:2 Adde aylley ba godaa kushe xeelleysada, macca aylliya ba godate kushe be7eysada, neeni nuna maarana gakanaw, nu ayfey Godaako, nu Xoossaako xeellees.
PSA 123:3 Nuus kadhey darida gisho, nuna maara; abeeti Godaw, nuna maara.
PSA 123:4 Nuuni otoranchota cashshaanne saaphota kadhiya kallida.
PSA 124:1 Dawiti pude keyishe zammariya mazmure Goday nuura gidonaako, nu waananee? Isra7eeley haysada yaagidi zaaro;
PSA 124:2 “Goday nuura gidonnaako, nu bolla asay dendida wode,
PSA 124:3 enta hanqoy nu bolla suullin, nuna paxa mittanashin.
PSA 124:4 Di7oy nuna efanashin; shaafa haathay nuna mittanashin.
PSA 124:5 Kixa haathay nuna maanashin” yaago.
PSA 124:6 Nuna nu morketa achas aathidi immiboona Goday galatetto.
PSA 124:7 Kafoy shanka gitepe kessi ekeysada, nuuni kessi ekida; xihey meqis, nuuni kessi ekida.
PSA 124:8 Salonne sa7aa medhida, Godaa sunthan nuus maadoy yees.
PSA 125:1 Pudethe keyishe yexiya mazmure. Godan ammaneteysati qaaxanaw danda7onna, merinaw de7iya Xiyoone zuma mela.
PSA 125:2 Dereti Yerusalaame yuushon de7eysada, hachife merinaa gakanaw, Goday ba asaa yuushon de7ees.
PSA 125:3 Xilloti banta kushiya iitabas denthonna mela iitata ayso xam7ay xillota biittan gam7enna.
PSA 125:4 Abeeti Godaw, keeha asatasinne wozana suure asatas lo77oba ootha.
PSA 125:5 Shin neeni iita asata seeriya wode, ne ogiya aggida asaaka seera. Isra7eeles saroy gido.
PSA 126:1 Pudethe keyishe yexiya mazmure Goday di7ope zaaridi nuna Xiyoone ehida wode nuus amuho daanis.
PSA 126:2 Nu doonay miichan, nu inxarsay ufaysa yethan kumis. He wode kawotethati banta giddon, “Goday entaw gitaba oothis” yaagidosona.
PSA 126:3 Tuma Goday nuus gitaba oothis; nuka daro ufaytida.
PSA 126:4 Godaw, Negebe mela biittan ira bukisada, shaafa zaarada kuntheysada, nu duussa ooratha.
PSA 126:5 Yeekishe zeridaysati, ufaysan yexishe cakana.
PSA 126:6 Zerethi tookidi yeekishe bidaysati, ufaysa yethe yexishe, mirqe tookidi simmana.
PSA 127:1 Solomoney pude keyishe yexiya mazmure Goday keethe keexona ixiko, keexeysati coo daaburoosona. Goday katamaa naagonna ixiko, naageysati coo daaburoosona.
PSA 127:2 Duussas koshshiyaba demmanaw, wonta guura dendoy, omarsi daro qamisidi geloy hada. Goday ba doseysatas shempo immees.
PSA 127:3 Nayti Godaa imota; yeloti tuma woyto.
PSA 127:4 Issi asi na7atethan yelida adde nayti, olancho kushen de7iya toora mela.
PSA 127:5 Iya korojoti ha yiishshatan kumida asi anjetidaysa; I ba morketara katama pengen, mootetiya wode shatimmenna.
PSA 128:1 Pudethe keyishe yexiya mazmure Godaas yayyeysatinne iya ogiyan hemeteysati ubbay anjetidaysata.
PSA 128:2 Neeni ne daabura ayfe maana; ufaytananne duretana.
PSA 128:3 Ne machiya ne son ayfe duurkukida woyne mela gidana. Ne nayti ne gayta yuushon shamaho aaca mela gidana.
PSA 128:4 Godaas yayiya asi tuma hessada anjetana.
PSA 128:5 Goday nena Xiyoonepe anjo! Neeni de7ida laytha ubban Yerusalaame lo77otetha nena besso!
PSA 128:6 Ne nayta nayta be7a! Isra7eeles saroy gido!
PSA 129:1 Pudethe keyishe yexiya mazmure Isra7eeley haysada yaago; “Ta na7atethafe doomidi, ta morketi tana un7ethidosona.
PSA 129:2 Ee, enti ta na7atethafe doomidi, tana un7ethidosona; shin enti tana xoonibookona.
PSA 129:3 Ta zokuwa xurqafen shocidi, goshsha gade daanisidosona.”
PSA 129:4 Shin Goday xillo gidiya gisho iitata wodoruwa duuserethi yeggis.
PSA 129:5 Xiyoone ixiya ubbay yeellatidi guye simmo.
PSA 129:6 Keetha huuphen dolida, dicconna melida maata mela gido.
PSA 129:7 He maata buucanaw kushen dankey woyko mirqanaw oykey baawa.
PSA 129:8 Ogera aadheysati, “Goday wolqa immo” gin, cakeysati “Godi anjo” giyabay deenna.
PSA 130:1 Pudethe keyishe yexiya mazmure Godaw, taani meto ciimmon de7ashe, neeko waassayis.
PSA 130:2 Godaw, ta waasuwa si7a; ta woosa ne haythay hayzo.
PSA 130:3 Xoossaw, nu nagaraa ne xaafa oykidaako, Godaw, ooni pirdafe attanaw danda7ii?
PSA 130:4 Shin nuuni new yayyana mela, nu nagaraa atto yaagasa.
PSA 130:5 Taani Godaa laamotan naagayis; ta shempiya laamotan naagawusu; taani iya qaalan ufaysi wothayis.
PSA 130:6 Sa7i awude wontane gidi, naagiya wotaadarepe aathada, taani Godaa laamotan naagayis.
PSA 130:7 Iya siiqoy merinaasa gidiya gishonne iyan kumetha atotethi de7iya gisho Isra7eele, Godan ufaysi ootha;
PSA 130:8 Goday Isra7eele, iya nagaraa ubbaafe ashshana.
PSA 131:1 Pudethe keyishe Dawiti yexiya mazmure Godaw, ta wozanay otortenna; ta ayfeyka otoron xeellenna. Ta qofan gitatana gada koyabike; gahetonnaba ekana gada zaaturabike.
PSA 131:2 Dhanthi duuxida na7i ba aaye ki7on si77i geysada ta si77i gas. Wayetho agida na7ada, ta shempoy ta gaathan wopu gis.
PSA 131:3 Isra7eele, hachife merinaa gakanaw Godan ufaysi ootha.
PSA 132:1 Pudethe keyishe yexiya mazmure Godaw, Dawitanne I danda7ida metuwa ubbaa qopa.
PSA 132:2 Godaas I caaqidaysa, wolqaama gidida Yayqooba Xoossaas, I odidaysa hassaya.
PSA 132:3 Godaas besse giigisana gakanaw, Wolqaama gidida Yayqooba Xoossaas, keethe keexana gakanaw, ta soo gelike; ta hiixan zin7ike. Ta ayfey qilim7enna, woyko tana dhiskoy ekenna.
PSA 132:6 Nuuni Taabotiyabaa Efraatan si7ida; Yi7aarime biittan iya demmida.
PSA 132:7 “Ane I de7iya bessaa boos; iya tohoy yedhiya bessan iya goyinnoos.”
PSA 132:8 Godaw, denda! Ne minotethaa malla gidida ne Taabotiyara ne keethaa gela.
PSA 132:9 Ne kahineti xillotethi ma7o; ne asay ufaysan yexo.
PSA 132:10 Ne aylliya Dawita gisho, neeni tiyida kawa aggofa.
PSA 132:11 Goday Dawitas laametonna caaqo haysada yaagidi caaqis; “Ne gulbatape keyida, ne naytape issuwa ne araatan utisana.
PSA 132:12 Ne nayti ta caaquwanne ta tamaarsiya timirtiya naagiko, enta nayti ne araatan merinaw uttana” yaagis.
PSA 132:13 Goday Xiyoone dooris; baw de7iya bessi oothanaw amotidi, haysada yaagis;
PSA 132:14 “Haysi ta merinaw de7iya besse; taani amotida gisho haysan daana.
PSA 132:15 Taani daro kathi immada Xiyoone anjana; iyan de7iya manqotaka kathi kalsana.
PSA 132:16 Iyan de7iya kahineta atotethi mayzana; iyan de7iya xilloti ufaysan yexana.
PSA 132:17 He bessan Dawita zeriyape kawo kessana; taani tiyida kawa kawotethan gam7isana.
PSA 132:18 Taani iya morketa yeella mayzana; shin iya huuphen de7iya kallachay phoolana” yaagas.
PSA 133:1 Dawiti pudethe keyishe yexiya mazmure Ishati issifethan de7eysi, waani lo77i waani ufaysi!
PSA 133:2 Hessi huuphen tigin, buuchaara goggiya, Aarona buuchaara goggidi iya hashiya gakiya al7o zayte mela.
PSA 133:3 Hessi Armoona zumaape Xiyoone Dereta gakanaw wodhiya aka mela. Goday yan anjuwanne, de7uwa merinaw immis.
PSA 134:1 Pudethe keyishe yexiya mazmure Hinteno, Godaa aylleto, Godaa keethan qamma ootheysato, ubbay yidi Godaa galatite.
PSA 134:2 Xoossa keethan hinte kushiya miccidi, Godaa galatite.
PSA 134:3 Saluwanne sa7aa medhida Goday hintena Xiyoonepe anjo.
PSA 135:1 Godaa galatite! Hinteno, Godaa aylleto, Godaa sunthaa galatite!
PSA 135:2 Hinteno, Godaa keethan, nu Xoossa keethaa dabaaban eqeysato, Godaa galatite!
PSA 135:3 I keeha gidiya gisho Godaa galatite! I lo77o gidiya gisho iya sunthaa sabbite!
PSA 135:4 Goday Yayqooba babaa, Isra7eele baw buzo oothidi dooris.
PSA 135:5 Goday gita gideysanne nu Goday, xoossata ubbaafe aadheysa taani erayis.
PSA 135:6 Salon sa7an, abbaninne iya giddon Goday ba dosidaba ubbaa oothees.
PSA 135:7 Shaara sa7aa gaxape denthees; wol7anthi irara kiittees; carko ba minja keethaafe kessees.
PSA 135:8 Gibxe biittan asape mehe gakanaw, bayra yeletida ubbaa wodhis.
PSA 135:9 Neno Gibxe, Paaronanne iya aylleta ubbaa seeranaw malaatatanne malaalsiyabata kiittis.
PSA 135:10 I daro kawotethata dhaysis; wolqaama kawota wodhis.
PSA 135:11 Amoore kawa Sihoona Baasane kawa Oogenne Kanaane kawota ubbaa wodhis.
PSA 135:12 Enta biitta ba asaa, Isra7eele laatisis.
PSA 135:13 Godaw, ne sunthay merinaw daana; yeletaape yeleta gakanaw ne hassayetana.
PSA 135:14 Goday ba asaas pirdana; I ba aylletas qadhetana.
PSA 135:15 Kawotethata eeqati asa kushe oosota; birapenne worqafe medhetidaysata.
PSA 135:16 Entaw dooni de7ees, shin haasayokona; ayfey de7ees, shin xeellokona.
PSA 135:17 Haythi de7ees, shin si7okona; enta siidhen shempoy baawa.
PSA 135:18 Enta medhidaysatinne entan ammaneteysati ubbay entada hano.
PSA 135:19 Isra7eele asaw Godaa galatite; Aarona soo asaw Godaa galatite.
PSA 135:20 Leewe soo asaw Godaa galatite; Godaa yayyeysato ubbay Godaa galatite.
PSA 135:21 Yerusalaamen de7iya Goday Xiyoonen galatetto! Godaa galatite!
PSA 136:1 Godaa galatite!
PSA 136:2 Xoossata Xoossaa galatite!
PSA 136:3 Godata Godaa galatite!
PSA 136:4 Iya xalaali gita malaalsiyaba oothees;
PSA 136:5 Ba cincatethan salota medhis;
PSA 136:6 Haatha bolla biitta miccis;
PSA 136:7 Gita poo7ota medhis; iya siiqoy merinaasa.
PSA 136:8 Awi gallas haarana mela oothis;
PSA 136:9 Ageeninne xoolintoti qamma haarana mela oothis;
PSA 136:10 Gibxe biittan bayrata wodhis;
PSA 136:11 Isra7eele asaa Gibxefe kaalethidi kessis;
PSA 136:12 Ba mino kushiyan, ba wolqaama qesiyan haysa oothis;
PSA 136:13 Zo7o Abbaa shaakis;
PSA 136:14 Isra7eele asaa he abba giddora pinthis;
PSA 136:15 Gibxe kawanne iya olanchota Zo7o Abban muukisis;
PSA 136:16 I ba asaa mela biittara kaalethis;
PSA 136:17 Gita kawota shocis;
PSA 136:18 Wolqaama kawota wodhis;
PSA 136:19 Amoore kawa Sihoona wodhis;
PSA 136:20 Baasane kawa Ooge wodhis;
PSA 136:21 Enta biitta ba asaa laatisis;
PSA 136:22 Ba aylliya Isra7eele laatisis;
PSA 136:23 Nu kawuyida wode nuna qopis;
PSA 136:24 Nuna nu morketape ashshis;
PSA 136:25 Medhetetha ubbaas kathi immees;
PSA 136:26 Salo Xoossaa galatite!
PSA 137:1 Babiloone shaafata matan uttidi, Xiyoone qopida wode yeekida.
PSA 137:2 He bessan nuuni nu diithaa haatha gaxan dicciya, mithata bolla kaqida.
PSA 137:3 Nuna di77ida asati nuuni yexidi, enta ufaysana mela “Xiyoone yethatape issuwa ane nuus yexite” yaagidosona.
PSA 137:4 Godaa yethaa nuuni allaga biittan waati yexanee?
PSA 137:5 Yerusalaame taani nena dogiko, ta ushacha kushey tana balo.
PSA 137:6 Taani nena hassayonna aggiko, ta gita ufaysi gidida Yerusalaame dosonna ixiko, ta inxarsay kottonuwara oyketo.
PSA 137:7 Godaw, Yerusalaame di7etiya gallas Edoome asay oothidaysa hassaya; Enti, “Laallite! Laallite! Hirki xaphuwa gakanaw laallite!” yaagidaysa dogopa.
PSA 137:8 Babiloone, neeni dhayana! Neeni nu bolla oothida iita oosuwas halo kesseysi anjetidaysa.
PSA 137:9 Ne guutha nayta oykidi, zaalla bolla shoceysi anjetidaysa.
PSA 138:1 Dawita Mazmure Godaw, ta kumetha wozanan nena galatana; xoossata sinthan nena sabbana.
PSA 138:2 Ne geeshsha keethaako simmada nena goyinnana; ne siiquwa gishonne ne tumatethaa gisho galatana. Ne sunthaa gishonne ne qaala dhoqatethaa gisho galatana.
PSA 138:3 Taani xeegida wode ne taw koyadasa; ne minotethan tana minthadasa.
PSA 138:4 Godaw, ne doonape keyiya qaala si7iya wode, sa7an de7iya kawoti ubbay nena galato.
PSA 138:5 Godaa bonchoy gita gidiya gisho, enti Godaa ogiyaba yexo.
PSA 138:6 Goday bolla dhoqan de7ikoka, manqota keeha ayfen xeellees; shin otoranchota haahon erees.
PSA 138:7 Taani meto giddora hemetikoka, neeni tana naagasa. Ta morketa hanquwa bolla ne kushiya miccaasa; ne ushacha kushiyan tana ashshaasa.
PSA 138:8 Goday taw gelida qaala polana; Godaw, ne siiqoy merinaasa; Ne kushe oosuwa yegga aggofa.
PSA 139:1 Dawita Mazmure Godaw, neeni tana pilgada eradasa.
PSA 139:2 Neeni ta utethaanne ta equwa eraasa; ta qofa ubbaa haahon akeekasa.
PSA 139:3 Taani biya bessaanne shempiya bessaa xomoosasa; ta ogeta ubbaa eraasa.
PSA 139:4 Godaw, taani ta inxarsan issi qaala odetanaape sinthe, ta qofa ubbaa eraasa.
PSA 139:5 Neeni ta yuushuwan de7aasa; ne kushiya ta bolla wothaasa.
PSA 139:6 Ne eratethay tana daro malaalsees; ta akeekape dhoqa.
PSA 139:7 Ta ne Ayyaanape aw baqatanee? ne sinthafe aw baanee?
PSA 139:8 Pude salo keyiko ne yan de7aasa! Duge Si7oole wodhikoka ne yan de7aasa.
PSA 139:9 Doloha bagga paallada biiko, woyko wuloha baggan haakada de7iko,
PSA 139:10 yan ne kushey tana kaalethees; ne ushacha kushey tana zempisees.
PSA 139:11 “Dhumaw tana gentha; gallasaw qamma laameta” yaagiyakoka,
PSA 139:12 sakana dhumi new dhumenna; qammi gallasada poo7ees; new dhumi poo7o mela.
PSA 139:13 Neeni ta giddo asatethaa medhadasa; ta aaye ulon tana neeni tiladasa.
PSA 139:14 Neeni tana malaalsiyabanne yegelsi oothada medhida gisho, taani nena galatayis. Ne oosoti malaalsees! taani hessa loythada erayis.
PSA 139:15 Taani geema bessan medhetiya wode, ta meqethay neepe geemmibeenna. Ta asatethay ta aaye ulon ciimmo giddon hiillan alleeqetidi oosetiya wode,
PSA 139:16 ne ayfeti giigonna ta asatethaa be7idosona. Buroo issoyka doometonna de7ishin, ne taw buzoyida gallasa ubbay ne mazgaben xaafetidosona.
PSA 139:17 Xoossaw, ne taw qopiya qofay waanida boncho! Enta tayboy waanidi daride!
PSA 139:18 Taani enta taybiyako shafepe daro; taani barkiya wode ha77ika neera de7as.
PSA 139:19 Xoossaw, neeni iitata wodhiyako aybe! Suuthu gussiya asati taape haako!
PSA 139:20 Enti ne bolla iitabaa haasayoosona; ne morketi ne suntha iissoosona.
PSA 139:21 Godaw, nena ixeyisata ta ixikina? Ne bolla dendeyisata ta shaatetikina?
PSA 139:22 Taani enta kumethi ixayis; enta taani ta morkeda taybayis.
PSA 139:23 Xoossaw, tana pilgada ta wozanaa era; tana un7ethida ta qofaa be7a.
PSA 139:24 Tanan iitabay de7iko xeella; merina ogiyan tana kaaletha.
PSA 140:1 Dawita Mazmure Godaw, iitatape tana ashsha; makallanchotape tana naaga.
PSA 140:2 Enti iita oothanaw maqetoosona; gallas gallas ola denthoosona.
PSA 140:3 Banta inxarsaa shoosha inxarsada qarayoosona; enta doonan wodhiya marzey de7ees. Salaha
PSA 140:4 Godaw, iitata kushepe tana ashsha; ta tohuwa qaxanaw qopiya makallanchotape tana naaga.
PSA 140:5 Otorancho asati taw xihe wothoosona; gite hiixoosona; tana oykanaw gite yeggoosona. Salaha
PSA 140:6 Godaa, “Neeni ta Xoossaa” gaana; Godaw, ta woosa si7a.
PSA 140:7 Ubbaa Haariya Godaw, tana ashshiya minuwaw, ola gallas taw gondalle gidadasa.
PSA 140:8 Godaw, iitatas enta amuwa immofa; enti otortonna mela enta maquwa polisopa. Salaha
PSA 140:9 Ta morketan tana xoonisopa; enta doonape keyiya iitay enta bolla simmo.
PSA 140:10 Enta bolla xuuggiya tama bonqoy qoletto; enti tama ollan yegeto; keyanaw danda7onna olla holeto.
PSA 140:11 Yooyamati biitta bolla de7opo; buqeyisata iitabay yedethidi oyko.
PSA 140:12 Goday manqotas pirdeysanne metootanchotas mooteteysa erayis.
PSA 140:13 Xilloti tuma ne sunthaa galatana; suure asati ne sinthan daana.
PSA 141:1 Dawita Mazmure Godaw, taani nena xeegayis; tana maaddanaw ellesa; Ta neeko waassiya wode tana si7a!
PSA 141:2 Ta woosay ixaaneda ne sinthe shiiqo; ta kushe micethay omarsa yarsho mela gido.
PSA 141:3 Godaw, ta doona naagiya asi wotha; ta mettersha pengiya naaga.
PSA 141:4 Iita oothiya asatara iita oothonna mela, ta wozanaa iitako zaaropa; enta gibira tana muzopa.
PSA 141:5 Xillo asi tana seero, hessi taw keehatethi, I tana hanqeto, hessi ta huuphen zayte tiyo mela. Ta wozanay hessa ixenna; Ta woosay ubba wode enta iita oosuwa bollana.
PSA 141:6 Enta daynnati aafo holetiya wode, ta qaalay tuma gideysa enti erana.
PSA 141:7 Enti, “Asi biitta goyeysadanne phasha laalleysada, nu meqethay duufo doonan laaletana” yaagosona.
PSA 141:8 Ubbaa Haariya Godaw, ta ayfey nena xeellees. Taani neeko baqatayis; tana hayqos aathada immofa.
PSA 141:9 Enti taw yeggida gitiyapenne iitaa ootheyisata xihiyape tana naaga.
PSA 141:10 Taani saro aadhin, iitati banta wothida gitiyan oyketo.
PSA 142:1 Dawiti gongolon de7iya wode xaafida timirte Ta qaala dhoqu oothada Godaako waassayis; maarota demmanaw iya woossayis.
PSA 142:2 Ta oysha ubbaa iya bessayis; ta metuwa ubbaa iyaw odayis.
PSA 142:3 Taani heettida wode ne ta ogiya eraasa; ta ogiyan gite yeggidi wothidosona.
PSA 142:4 Taani ta yuushuwa xeelliya wode, tana maaddey issoyka baawa. Taani qosetada attiya bessi baawa; tana naagiya oonika baawa.
PSA 142:5 Godaw, taani neeko waassayis; taani, “Ne taw baqatada attiya bessi; de7on de7eyisata biittan ta saamay nena” yaagas.
PSA 142:6 Taani daro metootiya gisho, ta waasuwa si7a. Tana yedetheysati wolqaamida gisho, tana entafe ashsha.
PSA 142:7 Ta ne sunthaa galatana mela, tana qashope birsha. Neeni taw keeha gidiya gisho, xilloti ta yuushon shiiqana.
PSA 143:1 Dawita Mazmure Godaw, ta woosa si7a; maarota demmanaw ta waasseysa hayza. Neeni xillotethaninne ne ammanetethan taw zaaro imma.
PSA 143:2 Ne sinthan xillo asi bayna gisho tana ne aylliya pirdas shiishopa.
PSA 143:3 Tana ta morkey yedethidi, tincherethidi sa7an yeggis. Beni hayqida asada tana dhuman wothis.
PSA 143:4 Hessa gisho taani heettas; ta wozanayka til7is.
PSA 143:5 Taani beni wodeta hassayayis; ne oothida ooso ubbaa qopayis; ne kushe ooso ubbaa akeekayis.
PSA 143:6 Taani ta kushiya neeko miccas; mela biitti haathe koyeysada, ta shempoy nena saamotees. Salaha
PSA 143:7 Godaw, ta wozanay heettida gisho taw zaaro immanaw ellesa. Taani duufon geliya asada hanonna mela ne som7uwa taape genthofa.
PSA 143:8 Taani nenan ammanetiya gisho, wonta wonta ne siiquwaba tana bessa. Taani ta shempuwafe nena woossiya gisho, ta baana ogiya tana bessa.
PSA 143:9 Godaw, taani new maggannida gisho, ta morketape tana ashsha.
PSA 143:10 Neeni ta Xoossaa gidiya gisho, ta ne sheniya oothana mela tana tamaarsa; ne lo77o ayyaanay suure ogiyan tana kaaletho.
PSA 143:11 Godaw, ne sunthaa gisho tana ashsha; ne xillotethan tana metope kessa.
PSA 143:12 Ne siiquwan ta morketa wodha; ta ne aylle gidiya gisho tana un7etheyisata ubbaa dhaysa.
PSA 144:1 Dawita Mazmure Goday, ta zaallay, galatetto! Ta kushiya ola tamaarsees; ta biradheta tooras giigisees.
PSA 144:2 I ta siiqo Xoossaanne ta qosetta attiya besse; ta miixanne tana ashsheysa. Ta gondallenne taani baqatada attiya besse; I kawotethati taw haaretana mela oothis.
PSA 144:3 Godaw, neeni iyaw qopanaw asi aybee? Ne wozanan iyaw besse immanaw asa na7i aybee?
PSA 144:4 Asi issi toho carkiya carko mela; iya gallasati aadhiya kuya mela.
PSA 144:5 Godaw, saluwa phalqada duge wodha! dereta bocha; enti cuyo!
PSA 144:6 Wol7anthi yeddada ne morketa laalla; ne dongiya yiishshan dukada enta yedetha.
PSA 144:7 Bollara ne kushiya yeddada, tana wolqaama haathaafe goochada kessa; allaga asata kushepe tana wosisa.
PSA 144:8 Enti tuma haasayidi erokona; banta ushacha kushiya denthidi wordon caaqoosona.
PSA 144:9 Xoossaw taani new ooratha mazmure yexana; tammu shayan waaxetida diithan yexana.
PSA 144:10 Kawotas xoono immaasa; ne aylliya Dawita ashshaasa.
PSA 144:11 Tana iita mashshafe ashsha; allaga asata kushepe tana wosisa. Enta doonay wordon, enta ushacha kushey cimon kumis.
PSA 144:12 Nu adde nayti banta na7atethan, lo77o dicciya mitha mela gido. Nu macca nayti kawo gadho alleeqisanaw, oosetida tuuqe mela gido.
PSA 144:13 Nu shaaleti dumma dumma katha qommon kumo; heemetiya bessan de7iya nu dorsati mukulaninne tammu mukulan yelo.
PSA 144:14 Nu miizati birayso; awucayona yeletidi daro; nu ogetan waasoy si7etofo.
PSA 144:15 Ha anjoti gakiya asati tuma anjetidaysata; Xoossay entaw Godaa gidida asati anjetidaysata.
PSA 145:1 Dawita Galata Mazmure Ta Xoossaw, ta kawaw, ta nena gitayana; ne sunthaa merinaw galatana.
PSA 145:2 Taani nena ubba gallas sabbana; ne sunthaa merinaw galatana.
PSA 145:3 Goday gita; aadho galati iyaw bessees; iya gitatethay asa qofape aadhees.
PSA 145:4 Issi yeletay hara yeletas ne oosuwa odana; ne malaalsiya oosota awaajana.
PSA 145:5 Enti ne bonchuwa, ne teemaanne ne gitatetha odana. Taani ne malaalsiya oosuwa zaara zaarada qopana.
PSA 145:6 Malaalisiya gita ne oosuwaba odana; taani ne gitatetha awaajana.
PSA 145:7 Enti ne keehatetha darotethaa odana; ne xillotethabaa ufaysan yexana.
PSA 145:8 Goday keehanne qadheteysa; hanqetanaw ellesenna; siiqon kumidaysa.
PSA 145:9 Goday ubbaas keeha; I ba medhetetha ubbaas qadhetees.
PSA 145:10 Godaw, medhetetha ubbay nena galatana; ne asa ubbay nena sabbana.
PSA 145:11 Enti ne kawotethaa bonchuwaba odana; ne wolqaaba odana.
PSA 145:12 Hessan enti ne wolqaama oosuwabaanne ne kawotethaa boncho teemaba erisana.
PSA 145:13 Ne kawotethay merina kawotethi; ne maatay yeleta ubbaa haarees. Goday ba gida qaala ubban ammanetees; ba ooso ubban keeha.
PSA 145:14 Goday kundanaw gedgadeyisata katisees; kundidaysata denthees.
PSA 145:15 Ubbaa ayfey nena xeellees; entaw koshshiya woden kathi immaasa.
PSA 145:16 Neeni ne kushiya miccada, medhetetha ubbaa amo alaasa.
PSA 145:17 Xoossay ba oge ubban xillo; ba ooso ubban keeha.
PSA 145:18 Goday bana xeegiya ubbaas, tuman bana xeegiya ubbaas matan de7ees.
PSA 145:19 I baw yayyeyisata amuwa kunthees; enta waasuwa si7idi ashshees.
PSA 145:20 Goday bana doseyisata ubbaa naagees; shin iitata ubbaa dhaysana.
PSA 145:21 Taani ta doonan Godaa galatana; Medhetetha ubbay iya geeshsha sunthaa merinaw galato!
PSA 146:1 Godaa galatite! Ta shempe Godaa galata!
PSA 146:2 Ta de7o laytha ubban Godaa galatana; ta de7ida wode ubban ta Xoossaa sabbana.
PSA 146:3 Halaqatan ammanetofite; ashshanaw danda7onna asa na7an ceeqetofite.
PSA 146:4 Enta shempoy keyiya wode biittako simmoosona; enta halchoy ubbay he gallas aadhees.
PSA 146:5 Yayqooba Xoossay maaddiya asinne Godaa, ba Xoossan ufaysi oothiya asi anjetidaysa.
PSA 146:6 Goday salonne sa7aa, abbanne iya giddon de7iya ubbaa medhis; Xoossay merinaw ammanetees.
PSA 146:7 Goday un7etidaysatas pirdees; koshatidaysatas kathi immees; Goday qashetidaysata birshees;
PSA 146:8 Goday qooqeta xeelisees. Goday kundidaysata denthees; Goday xillota dosees.
PSA 146:9 Goday bete asata naagees; Am7etanne yi7o nayta maaddees; shin iitata ogiya dhaysees.
PSA 146:10 Goday merinaw kawotana; Xiyoone, ne Xoossay, yeletethafe yeletethi gakanaw kawotana. Godaa galatite!
PSA 147:1 Godaa galatite! Nu Xoossaa saboy lo77o; iya saboy ufaysiyabaanne bessiyaba.
PSA 147:2 Goday Yerusalaame oorathana; Isra7eelepe di7etidaysata shiishana.
PSA 147:3 Wozani meqidaysata koolees; enta madunthaa pathees.
PSA 147:4 I xoolintota taybuwa erees; enta ubbaa enta sunthan sunthan xeegees.
PSA 147:5 Nu Goday gita; I wolqaama; iya akeekas zawi baawa.
PSA 147:6 Goday aadata zempisees; shin iitata sa7an yeggees.
PSA 147:7 Godaas galata yethi yexite; nu Xoossaas diithan yexite.
PSA 147:8 I saluwa shaara mayzees; biittas ira immees; zumata bolla maata dolisees.
PSA 147:9 Mehetas kathi, Koshatidi waassiya quuro naytas miyaba immees.
PSA 147:10 I parata wolqaninne tooranchota minotethan ufaytenna.
PSA 147:11 Shin Goday baw yayyeysataninne iya maarotan ammaneteysatan ufaytees.
PSA 147:12 Yerusalaame, Godaa galata! Xiyoone, ne Xoossaa galata!
PSA 147:13 I ne pengiya kobeta minthana; ne giddon de7iya ne asaa anjana.
PSA 147:14 I ne zawa sarotethan naagana; nena lo77o gisten kalsana.
PSA 147:15 I ba kiitaa biittas yeddees; iya qaalay eeson gakees.
PSA 147:16 I shachi bullukoda miccees; caagana bidoda laallees.
PSA 147:17 I shacha shuchada holees; iya meeguwan oonika eqanaw danda7enna.
PSA 147:18 I ba qaala kiittidi shacha maaysees. I carkuwa kiittin haathi goggees.
PSA 147:19 I ba qaala Yayqoobas, ba higgiyanne wogaa Isra7eeles awaajees.
PSA 147:20 I hara kawotethatas hessa oothibeenna; enti iya higgiya erokona. Godaa galatite!
PSA 148:1 Godaa galatite! Salope Godaa galatite; bolla dhoqan iya galatite.
PSA 148:2 Iya kiitanchoti ubbay iya galatite; Salon de7iya iya olanchoti ubbay iya galatite.
PSA 148:3 Away, ageenay iya galatite; poo7iya xoolintoti ubbay iya galatite.
PSA 148:4 Dhoqa saloti iya galatite; Salope bollara de7iya haathati iya galatite.
PSA 148:5 Enti ubbay Godaa sunthaa galato; I kiittin enti medhetidosona.
PSA 148:6 I enta merinaw enta bessan bessan wothis; shaaretonna higge entaw immis.
PSA 148:7 Sa7ape Godaa galatite! abban de7iya gita medhetethato; abba ciimmoto ubbay iya galatite.
PSA 148:8 Wol7anthaw, shachaw, shaaraw, caaganaw, iya kiita poliya carkuwaw, ubbay iya galatite.
PSA 148:9 Dereto, zumato, meetetiya ayfe ayfiya mithato, zigato, ubbay iya galatite.
PSA 148:10 Meheto, do7ato, sa7ara gooshetiya medhetethato, paalliya kafoto ubbay iya galatite.
PSA 148:11 Kawoto, kawotethato, halaqato, deriya haareysato, ubbay iya galatite.
PSA 148:12 Panthato, geela7oto, cimato, nayto, ubbay iya galatite.
PSA 148:13 Iya sunthay ubbaafe dhoqa gidiya gishonne iya bonchoy salotapenne sa7ape dhoqa gidiya gisho, enti ubbay Godaa sunthaa galato.
PSA 148:14 Iyaw mata gidida Isra7eele, I dhoqu dhoqu oothis; iya galatana mela enta minthethis. Godaa galatite!
PSA 149:1 Godaa galatite! Godaas ooratha yethi yexite! xillota shiiquwan iya sabbite!
PSA 149:2 Isra7eeley bantana medhidaysan ufayto; Xiyooney banta kawan hashshu go.
PSA 149:3 Durishe, karaabo baqishe, diithi diixishe iya sunthaa sabbo.
PSA 149:4 Goday ba asan ufaytees; aadatas xoono immidi enta bonchees.
PSA 149:5 Ne asay banta xoonuwan ufayto; qamma kumethi ufaysan yexo.
PSA 149:6 Enta doonan Xoossaa galatay, enta kushiyan nam7u bagga qara mashshi de7o.
PSA 149:7 Hessan enti kawotethata bolla halo keyana; asaa seerana.
PSA 149:8 Enta kawota santhalaatan, enta moorinnata biratan qachana.
PSA 149:9 Enta bolla xaafetida pirdaa polana; Hessi Xoossaa asata ubbaas xoono. Godaa galatite!
PSA 150:1 Godaa galatite! Iya geeshsha keethan Xoossaa galatite; dhoqa salon iya galatite.
PSA 150:2 Iya wolqaama oosota gisho iya galatite; ubbaafe aadhiya iya gitatethaas iya galatite.
PSA 150:3 Moyze punnishe iya galatite; diithaninne maasinqon iya galatite.
PSA 150:4 Karaabo baqishenne durishe iya galatite; diithi diixishe, suusul7e punnishe iya galatite.
PSA 150:5 Daala qaathishe iya galatite; wolqaama daala girsan iya galatite.
PSA 150:6 Shempora de7iya ubbay Godaa galatite! Goday galatetto!
PRO 1:1 Haysati Isra7eele kawa Dawita na7aa Solomone leemisota.
PRO 1:2 Leemisoti asay cincatethi, seeranne era haasaya akeekanaw maaddoosona.
PRO 1:3 Enti cincatethi, xillotethi, suure pirdinne suure wozani daana mela tamaarsoosona.
PRO 1:4 Eeyatas akeeka immees; na7atethatas eratethinne kahaamatethi immees.
PRO 1:5 Cincati ha leemisota si7idi, era gujoosona; akeekanchoti lo77o zore ekoosona.
PRO 1:6 Hessan leemisotanne enta birshethaa, cincatetha odaanne enta qan7isheta akeekanaw danda7etees.
PRO 1:7 Godaas yashshi cincatethas doomethi; shin eeyati cincatethinne seera kadhoosona.
PRO 1:8 Ta na7aw, ne aawa zoriya si7a; ne aaye timirtiya kadhopa.
PRO 1:9 Hessi ne huuphiyas boncho kallacha; ne qoodhiyas gozda gidana.
PRO 1:10 Ta na7aw, nena nagaranchoti cimmiko ero goopa.
PRO 1:11 Enti, “Nuura yedha; ase wodhanaw hokidi naagoos; xillota wodhanaw qosetoos.
PRO 1:12 Si7ooley mitteysada nuka enta paxa mittoos; nu enta ollan yegetiya asada oothana.
PRO 1:13 Nuuni al7o miishe ubbaa demmana; nu keethaa bonqe miishen kunthana.
PRO 1:14 Nuura laggeta; nu demmidaba issife shaaketana” yaagana.
PRO 1:15 Ta na7aw, entara hemetofa; enta ogiyara baanaw ne tohuwa denthofa.
PRO 1:16 Enti iitabaa oothanaw woxoosona; asa suuthi gussanaw yaa haa goosona.
PRO 1:17 Kafoy xeellishin, iya oykanaw gite yegethi maaddenna.
PRO 1:18 Shin enti banta suuthi gussanaw hokosona; banta shempuwa wodhanaw qosetoosona.
PRO 1:19 Genen go77a demmiya asa wursethi hessa mela; enti shiishida shaloy enta shempuwa ekees.
PRO 1:20 Cincatethi daggala bolla eqada xeegawusu; dabaaban ba qaala dhoqu oothada sissawusu.
PRO 1:21 Cincatethi asi shiiqiya bessan eqada xeegawusu; katamaa geliya pengen eqada haysada yaagawusu.
PRO 1:22 “Hinteno, akeeki pacidaysato, hinte awude gakanaw eeya gididi daanee? Qelqiseysato, awude gakanaw ufaytanee? Eeyato, awude gakanaw eratethi ixanee?
PRO 1:23 Ta seera hinte si7idaba gidiyako, taani ta eraa hinte bolla gussana; ta qaalaka hintena tamaarsana.
PRO 1:24 Shin ta xeegida wode hinte koyonna ixida gisho; taani kushe miccin oonika akeekibona gisho;
PRO 1:25 Ta zoriya hinte kadhida gisho; ta seeraka ekiboonna gisho;
PRO 1:26 Hintena metoy gakiya wode ta miicana; hinte dagaman kokoriya wode ta qelqisana.
PRO 1:27 Gadoy uushoda hinte bolla yaa wode, metoy goteda hinte bolla eqiya wode, un7inne waayey hinte bolla gakiya wode, taani hintena qelqisana.
PRO 1:28 “He wode enti tana xeegana; shin ta koyke; enti tana minthidi koyana; shin demmokona.
PRO 1:29 Enti eratethi ixida gisho; Godaa yashshi dooriboonna gisho,
PRO 1:30 Ta zoriya ekiboonna gisho; ta seera kadhida gisho;
PRO 1:31 Enti banta oosuwa ayfiya maana; banta qofaa ayfiya kallana.
PRO 1:32 Akeeki pacidaysata cincatethafe haakeysi wodhees; eeyata qelli guussi dhaysees.
PRO 1:33 Shin ta odiyaba si7iya ubbay saro daana; meto hirgafeka shempana.”
PRO 2:1 Ta na7aw, ta timirtiya ne ekiko; ta kiitaa ne wozanan wothiko;
PRO 2:2 ne haythaa cincatethako zaariko; ne wozanaa akeekako zaariko;
PRO 2:3 Eratethi xeegiko; akeeka dhoqu oothada xeegiko;
PRO 2:4 Bira woyko geemmida miishe koyeysada, neeni eratethi koyko,
PRO 2:5 He wode neeni Godaas yashshi guussi aybeko erana; Xoossaa loythada erana.
PRO 2:6 Goday cincatethi immees; iyape eratethinne akeeki bentees.
PRO 2:7 I suuretas maaddiya zore minjees; borey baynaysatas gondalle gidees.
PRO 2:8 Suure pirda ogiya naagees; iyaw ammaneteyisata ogiya minthees.
PRO 2:9 He wode neeni xillotethi, suure pirdaa, suure ogenne lo77o oosoy aybeko akeekana.
PRO 2:10 Cincatethi ne wozana giddo gelana; eratethi new ufaysi gidana.
PRO 2:11 Shaakidi eroy nena naagana; akeeki nena kammana.
PRO 2:12 Cincatethi nena iita asata ogiyape naagana; geella odape nena ashshana.
PRO 2:13 Enti nagara dhuman daanaw, xillotetha ogiya aggidosona.
PRO 2:14 Iita ooson ufaytoosona; geellatethan hashshu goosona.
PRO 2:15 Enta oosoy mirqethi; enta de7oy geella.
PRO 2:16 Cincatethi layma maccasape, qaalan cimmiya laggethofe nena ashshana.
PRO 2:17 Iya ba na7atetha azina aggaagasu; Xoossa sinthan caaqida caaquwa dogasu.
PRO 2:18 I soo ogey hayqoko gathees; iiko buussi moytilletako gathees.
PRO 2:19 Iiko biya oonika guye simmenna; de7o oge demmenna.
PRO 2:20 Hessa aggada, lo77o asata leemisuwa kaalla; xillo asata hemethaa naaga.
PRO 2:21 Suure asatinne borey baynaysati, biittan adussa laythi daana.
PRO 2:22 Shin iitati biittafe shodetana; ammanetonaysati dhayana.
PRO 3:1 Ta na7aw, ta timirtiya dogopa; ta kiitaa ne wozanan wotha.
PRO 3:2 Enti ne laytha adussana; injenne sarotethi new gujana.
PRO 3:3 Siiqoynne tumatethi neepe haakofo; enta ne qoodhen qacha; ne wozanan xaafa.
PRO 3:4 Hessa oothiko ne Xoossanne asa sinthan sabetananne nashetana.
PRO 3:5 Ne kumetha wozanan Godaa ammaneta; ne akeekan zempofa.
PRO 3:6 Ne ooso ubban iya sinthaya; I nena suure oge kaalethana.
PRO 3:7 Nena ne huuphen cinca oothofa; Godaa yayya; iitape haaka.
PRO 3:8 Hessi ne asatethaas payyatethi ehana; ne meqethaaka xaalisana.
PRO 3:9 Ne shaluwan Godaa boncha; koyro ayfida kathaafe bayraa immada iya boncha.
PRO 3:10 Hessa ne oothiko, ne shaaliyan kathi kumana; ne daalloy woyne ushshan kumidi palahana.
PRO 3:11 Ta na7aw, Godaa seera kadhopa; I nena seeriya wode lancofa.
PRO 3:12 Aaway ba dosiya na7a seereysada, Goday ba dosiya uraa seerees.
PRO 3:13 Cincatethi demmeynne, akeeka baw miishe oothiya uray anjetidaysa.
PRO 3:14 Cincatethi birape aadhidi go77ees; worqafe aadhidi maaddees.
PRO 3:15 Cincatethi worqafe aadhidi al7o; ne demmanaw amotiya ubbay cincatethara ginenna.
PRO 3:16 Cincatethi ushacha kushen adussa laythi, haddirsa kushen duretethinne boncho oykasu.
PRO 3:17 I ogeti ufaysiya ogeta; I horogay saro horoga.
PRO 3:18 Iya bana oykeysatas de7o mithi; iyo minthidi oykiya ubbay anjetidaysata.
PRO 3:19 Goday ba cincatethan sa7aa medhis; ba akeekan salota minthis.
PRO 3:20 Iya eratethan shaafati goggoosona; shaaratape iri bukees.
PRO 3:21 Ta na7aw, suure pirdanne shaakidi ero minthada oyka enti neepe shaaketofo.
PRO 3:22 Enti new de7o gidana; injenne ufaysi immana.
PRO 3:23 He wode ne hirgi bayna hemetana; ne tohoy dhubetenna.
PRO 3:24 Neeni zin7iya wode yayyaka; qamma kumethi mal7o dhisko dhiskana.
PRO 3:25 Akeekona gakiya gados yayyaka; iitati dhayiya dhayuwan dagammaka.
PRO 3:26 Goday new zempo gidana; ne tohoy xihen oyketonnaada I naagana.
PRO 3:27 New wolqi de7ishin, metootida uraas lo77oba ooso aggofa.
PRO 3:28 Ha77i maaddanaw danda7ashe ne shooruwa, “Simmada ya; ta new wonto immana” yaagopa.
PRO 3:29 Nena ammanetidi, ne matan de7iya, ne shooruwa bolla gene oothofa.
PRO 3:30 Nena qohonna de7ishin, ase coo mootopa.
PRO 3:31 Gene oothiya asata qanaatopa; enta iita oosuwa kaallofa.
PRO 3:32 Goday iita oothiya asata ixees; shin suureta dosees.
PRO 3:33 Goday iita oothiya asaa keethaa baaddees; shin suureba oothiya asaa keethaa anjees.
PRO 3:34 Otoron qelqiseyisata Goday qelqisees; shin bantana kawusheyisata sabbees.
PRO 3:35 Cincati boncho demmana; shin eeyati kawuyana.
PRO 4:1 Ta nayto, hinte aawa zoriya si7ite; loythi si7ite; hinte akeeka demmana.
PRO 4:2 Ta hintew lo77o timirte immiya gisho, ta timirtiya kadhopite.
PRO 4:3 Taka ta aawas na7a; ta aayes iya dosiya issi na7a.
PRO 4:4 Ta aaway tana haysada yaagidi tamaarsis; “Ta oday new gelo; ta kiita naaga; neeni hessa oothiko de7on daana.
PRO 4:5 Cincatethinne akeeka demmanaw minna; ta new odiyaba dogopa; iyape kare keyopa.
PRO 4:6 Cincatethas zoko zaaropa; iya nena ashshana; iyo dosa; iya nena naagana.
PRO 4:7 Cincatethi aadhiya gisho iyo demma; new de7iyaba wursidi ekikoka akeeka demma.
PRO 4:8 Ne iyo boncha; iya nena dhoqu dhoqu oothana; ne iyo oykiko, iya nena bonchana.
PRO 4:9 Iya ne huuphiyas saba gidana; boncho kallacha immana” yaagis.
PRO 4:10 Ta na7aw, si7a; ta odeysa eka; ne laythay aduqana.
PRO 4:11 Taani nena cincatetha oge kaalethana; suure horoga bessaana.
PRO 4:12 Ne hemetiya wode dhubiyabay deenna; woxiyakoka dhubetaka.
PRO 4:13 Ta timirtiya loytha naaga; yeddofa; timirtey new de7o immiya gisho loytha naaga.
PRO 4:14 Nagaranchota ogiyara boopa; iita asata ogiyan hemetofa.
PRO 4:15 Iyape haaka; iyan hemetofa; guye simma; ne ogiyan ba.
PRO 4:16 Enti iitaba oothonna de7ishin dhiskoy ekenna; enti ase dhubbonna de7ishin dhiskoy efenna.
PRO 4:17 Enti nagara kathada moosona; geellatethi ushshada uyoosona.
PRO 4:18 Xillota ogey seeta gallas gakanaw, guji guji poo7iya wonta xalqe mela.
PRO 4:19 Shin geellata ogey sakana dhuma mela; enti aybin dhubetiyakoka erokona.
PRO 4:20 Ta na7aw, ta odeysa si7a; ne haythaa taako zaara.
PRO 4:21 Ne ayfiya sinthafe haassofa; ne wozanan naaga.
PRO 4:22 Enta demmiya ubbaas enti de7o; enti asatethas payyatethi immoosona.
PRO 4:23 De7oy iyape pultiya gisho, ubbaafe aathada ne wozanaa minthada naaga.
PRO 4:24 Ne doonape iita haasaya digga; wordo haasaya ne matape haassa.
PRO 4:25 Sitti gada sinthe xeella; ne ayfey ne sinthan de7iyaba tishshi oothidi xeello.
PRO 4:26 Ne tohuwa ogiya giigisa; suure oge xalaalan hemeta.
PRO 4:27 Suure ogepe ushachi haddirsi goopa; ne tohoy iita oge boonnada naaga.
PRO 5:1 Ta na7aw, ta cincatetha hayza si7a; ne haythaa ta timirtiyako zaara.
PRO 5:2 Hessi nena wozanaama oothana; ne oday ne eratethaa qoncisana.
PRO 5:3 Layma maccasa inxarsafe ililo eessi xokees; I oday oysape aadhidi looxikees.
PRO 5:4 Shin wursethan iya godare uthada cammawusu; nam7u baggara qanxiya mashshada qara.
PRO 5:5 I tohoy hayqoko bees; I tangoy duufo gathees.
PRO 5:6 Iya de7o oge qopuku; I ogey geella; shin geella gideysa iya eruku.
PRO 5:7 Ta na7aw, tana si7a; ta odeysafe keyopa.
PRO 5:8 Layma maccasa heera boopite; I keetha pengiyako shiiqopite.
PRO 5:9 Hessi hanonna ixiko hinte bonchuwa harati ekana; na7atethan wozana mino asa kushen hinte hayqana.
PRO 5:10 Hinte aquwa allagati ekana; hinte daaburadi shiishidabay hara asas gidana.
PRO 5:11 Wursethan hinte ashoynne hinte asatethay wurin hinte yeekana.
PRO 5:12 Hinte yaagana; “Ta ayis timirte ixadina? Ta wozanay seera ayis kadhidee?
PRO 5:13 Taani ta astamaareta si7abike; tana zoreyisata zoriya ekabike.
PRO 5:14 Hesaa gisho, ta asay shiiqida shiiquwan, kawuyanaw matas” yaagana.
PRO 5:15 Neeni ne pultuwafe haathe uya; ne mache xalaala siiqa.
PRO 5:16 Ne pultuwa dabaaban, ne olla haatha denban ayis gussay?
PRO 5:17 Enta new buzo ootha; hara allaga uraara koxofa.
PRO 5:18 Ne pultoy new anjeto; ne na7atetha machera ufayta.
PRO 5:19 Lo77iya gaaredaninne ufaysiya gen7eda I dhanthay ubba wode nena alo; ubba wode I siiqoy nena di77o.
PRO 5:20 Ta na7aw, layma maccasan ayis di7etay? Hara asa macho ayis qoommay?
PRO 5:21 Asi oothiyaba ubbaa Goday be7ees; I hemetiya horoga ubbaa xeellees.
PRO 5:22 Nagaranchuwa I oothida nagaray oykees; Iya nagaraa gitey iya qachees.
PRO 5:23 I ba eeyatethan dhayis; bana naagiboonna gisho hayqis.
PRO 6:1 Ta na7aw, miishe tal7ida ne shooruwas waase gelidaba gidiko, hara asas kushe baqada caaqidaba gidiko,
PRO 6:2 ne caaqida ne caaquwan xihen gelidaba gidiko, ne doonape keyida qaalan oyketidaba gidiko,
PRO 6:3 hiza ne shooruwa kushen geladasa. Hessa gisho, ta na7aw, iyape keyanaw koyko, ne shooruwa soo bada waasetetha ne bollafe wothana mela aaddashada iya woossa.
PRO 6:4 Hessa oothonna de7ashe zin7ofa; dhiskoyka nena ekofo.
PRO 6:5 Shankafe gen7ey kessi ekiyada, gitepe kafoy attiyada nena ashsha.
PRO 6:6 Neno azallaw, zimadoko ba; iyape cincatethi tamaara.
PRO 6:7 Zimaddota kiittey baawa, halaqi woyko enta haarey baawa.
PRO 6:8 Shin bantaw maanaba bone minjoosona; kathi cakiya wode bantaw koshshiya kathaa shiishosona.
PRO 6:9 Neno azallaw, ne awude gakanaw dhiskay? Ne dhiskofe awude barkanee?
PRO 6:10 Neeni “guuthu zin7ana; guuthu dhiskana; kushe shiisha ekada guuthu shempana” yaagasa.
PRO 6:11 He wode manqotethi pangada, paci ola miishe oykida asada ne bolla yaana.
PRO 6:12 Laafanne iita asi yuuyidi oda mirqees;
PRO 6:13 I ba ayfen qam7otees; ba tohon bessees; ba biradhen mallees.
PRO 6:14 Iya ulon geellatethi de7ees; iitabaa qopees; ubba wode ooshshu medhees.
PRO 6:15 Hessa gisho dhayoy akeekona iya bolla yaana; I hassayonna meqana; zaaridi paxenna.
PRO 6:16 Goday ixiya usupun qommoti de7oosona; I shaatetiya qommoti laapuna;
PRO 6:17 kadhidi xeelliya ayfe, wordotiya inxarsi, xillo asata wodhiya kushe,
PRO 6:18 iitaba maqiya wozanaa, iitabaako woxanaw eesotiya toho,
PRO 6:19 Wordo bolla wordo gujiya wordo marka, ishata giddon ooshshi medhiya asi.
PRO 6:20 Ta na7aw, ne aawa kiita pola; ne aaye timirtiya aggofa.
PRO 6:21 Enta ubba wode ne wozanan oyka; ne qoodhiyan qacha.
PRO 6:22 Ne hemetiya wode enti nena kaalethana; ne zin7iya wode, enti nena naagana; ne barkiya wode enti nena zorana.
PRO 6:23 Godaa kiitay xompe; iya timirtey poo7o; iya seeray de7oko efiya oge.
PRO 6:24 Ha timirteti iita maccafenne hara cimmiya maccasa inxarsafe nena naagana.
PRO 6:25 I mala lo77otethay nena qadhethofo; I qam7otoy nena di77ofo.
PRO 6:26 Issi addey guutha miishen layma maccas demmanaw danda7ees; shin hara asa macho laggethoy shempo ekees.
PRO 6:27 Tama idimmin iya ma7oy meetetonna attey de7ii?
PRO 6:28 Tama bonqo yedhin, iya tohoy xuugetonna attey de7ii?
PRO 6:29 Asa macho laggethiya uray hessa mela; iyo bochiya ubbay seerettonna attenna.
PRO 6:30 Kaysoy koshatidi maanaw kaysiko, asi iya borenna.
PRO 6:31 Shin I oyketiyabaa gidiko, laapun kushe qanxana; ba son de7iya miishe ubbaa immana.
PRO 6:32 Shin maccasara laymatiya asi wozani bayna asi; he uray ba shempuwa dhaysees.
PRO 6:33 Deshethinne kawushi iya qaada; yeelli iyape qushetenna.
PRO 6:34 Qanaatey azinas yilo denthethees; halo kessiya wode iw qadhetenna.
PRO 6:35 I ay acaka ekenna; ay mela imotika iya hanquwa doshisenna.
PRO 7:1 Ta na7aw, ta qaala naaga; ta kiitaa ne wozanan wotha.
PRO 7:2 De7on daanaw ta kiita ootha; ta timirtiya ne ayfe na77eda naaga.
PRO 7:3 Ne kushen enta qacha; ne wozanan enta xaafa.
PRO 7:4 Cincatethi ne michida, akeeka ne mata dabboda xeella.
PRO 7:5 Enti nena layma maccasapenne ba qaalan cimmiya hara maccasape naagana.
PRO 7:6 Issi gallas ta maskootera kare xeellas.
PRO 7:7 Eratethi pacida na7atethata be7as; enta giddofe issoy daro eeya.
PRO 7:8 He na7atethay ogera bishe, issi layma maccase keethaa matara aadhees; I soo efiya ogiya simmidi I sooko bis.
PRO 7:9 He wode sa7i laadees.
PRO 7:10 Maccasiya iya demmasu; iya layma gideysa I ma7oy erisees; iya asa cimmanaw halchada keyasu.
PRO 7:11 Iya xaltaamanne yeelli bayna maccas; son wopu gada uttuku.
PRO 7:12 Iya issi toho ogen, issi toho giyan, issi toho dabaaban eqada naagawusu.
PRO 7:13 Iya he na7atetha qoommada yeerasu; iya tishshi oothada xeellashe haysada yaagasu;
PRO 7:14 “Taani ta yarshuwa yarshada, ta qangetha hachi gathas.
PRO 7:15 Yaatada nena mokanaw keyas; nena daro koyas; hiza nena demmas.
PRO 7:16 Taani Gibxefe yida, alleeqetida afila hiixas.
PRO 7:17 Taani ta hiixa, karbefe, almunepenne qarafape, oosetida shittuwa puukas.
PRO 7:18 Haaya; wontana gakanaw siiqo aloos; qoometidi ufaytoos.
PRO 7:19 Ta azinay son deenna; haaho biitta bis.
PRO 7:20 Miishe karxiita kunthidi bida gisho, ageena kumonna soo simmenna” yaagasu.
PRO 7:21 Ba mal7o odan iya balethasu; ba liiqo inxarsan iya cimmasu.
PRO 7:22 Boori shukettanaw beysada, gaari eesotidi xihen geleysada, I iyo kaallidi bis.
PRO 7:23 Toori iya wozanaa caddidaada hanis; gite giddo gelida kafo daanis; hessi ubbay iya shempuwa dhaysanaw haneysa eribeenna.
PRO 7:24 Hiza ta na7aw, tana si7a; ta doonape keyiya qaala hayza.
PRO 7:25 Ne wozanay maccasa geedo boopo; I ogiyan gelada dhayopa.
PRO 7:26 Iya cadda yeggidaysati daro; iya wodhidaysati guutha gidokona.
PRO 7:27 I soy duufoko efiya oge; hayqoko kaalethiya horoga.
PRO 8:1 Cincatethi xeegawusu; si7ite; akeeki ba qaala dhoqu oothida sissawusu.
PRO 8:2 Oge doonan de7iya zumata bollanne daggala ogiyan iya eqawusu.
PRO 8:3 Dirsa penge matan, katamaa geliya pengen eqada, ba qaala dhoqu oothada haysada yaagawusu.
PRO 8:4 Asaw, ta hintena xeegayis; asa koche ubbaa xeegayis.
PRO 8:5 Hinteno eratethi baynaysato eratethi tamaarite; hinteno eeyato, akeeka demmite.
PRO 8:6 Taani lo77oba odiya gisho si7ite; taani doonape suurebay keyees.
PRO 8:7 Taani tuma odetayis; wordoy ta matan ixetidaba.
PRO 8:8 Ta oday tuma; geella woyko mirqethi gidenna.
PRO 8:9 Akeeki de7iya uraas ta oday like; eri de7iya uraas ta oday qonce.
PRO 8:10 Birape aathidi ta zoriya doorite; geeshsha worqafe aathidi eratethi doorite.
PRO 8:11 Cincatethi zo7o al7o shuchafe aadhees; ne amotiya ubbay iira liketenna.
PRO 8:12 Taw, cincatethas akeeki de7ees; eratethinne shaakidi eroy tabaa.
PRO 8:13 Godaas yashshi iitatethi ixo; taani otoronne ceeqetethi ixayis; iita ogenne wordo oda dosike.
PRO 8:14 Zoreynne lo77o eray tabaa; akeekinne wolqi taw de7ees.
PRO 8:15 Kawoti ta baggara kawotoosona; haareysati suure higge ta baggara kessoosona.
PRO 8:16 Halaqati ta maaddin deriya haaroosona; biitta aysiya gita asata ta maaddayis.
PRO 8:17 Tana doseyisata ta dosayis; tana minthidi koyeysati demmana.
PRO 8:18 Duretethinne bonchoy taara de7oosona; wuronna shaloynne injey ta matana.
PRO 8:19 Hinte taape demmiya go77ay, geeshsha worqafenne birape aadhees.
PRO 8:20 Ta xillotetha ogen hemetayis; suure pirda ogiyara kanthayis.
PRO 8:21 Tana doseysatas ta shalo immana; enta keethaa duretethan kunthana.
PRO 8:22 “Goday tana ubbaafe koyro medhis; benipeka iya oosuwas doomethay tana.
PRO 8:23 Alamey medhetanaape kase taani shuumetas.
PRO 8:24 Abbay bayna wode, pultoti dhuuqonna de7ishin ta yeletas.
PRO 8:25 Deretinne zumati medhetanaape sinthe ta yeletas.
PRO 8:26 Goday sa7aanne sa7an de7iya ubbaa medhanaape sinthe woyko koyro kophe biittay oosetanaape sinthe ta yeletas.
PRO 8:27 Goday salota miccida wode, abbatape bollara salo gufantho giigisida wode, taani yan de7ayis.
PRO 8:28 Goday shaarata bollara wothida wode, abba pultota dhuusida wode,
PRO 8:29 abba haathati imetida zawape pinnidi, bolla aadhonada, I enta kiitida wode sa7aa baasuwa minthida wode, taani yan de7ayis.
PRO 8:30 He wode ta iya matan waanna oosancho; ubba wode ta iya ufaysayis; tawuka iya sinthan ufaytayis.
PRO 8:31 I medhida alamiyan ufaytayis; asa naytika tana ufaysoosona.
PRO 8:32 “Hiza ta nayto, si7ite; ta odeysada ootheysati anjetidaysata.
PRO 8:33 Ta timirtiya si7ite; cinca gidite; si7idaba dogopite.
PRO 8:34 Taani odidaba si7iya uray, gallas gallas ta pengiyan bentiya uray, ta pengiyan naagiya uray anjetidaysa.
PRO 8:35 Tana demmiday de7o demmees; Godaape saba ekees.
PRO 8:36 Shin tana demmonna uray bana qohees; tana ixiya ubbay hayqo dosees.”
PRO 9:1 Cincatethi ba keethaa keexasu; laapun tuussata ba keethaas essasu.
PRO 9:2 Iya ba giigisiya gibiras modho mehe shukasu; woyne aggasu; gayta asaa sinthe aathasu.
PRO 9:3 Asaa xeeganaw ba aylleta kiittasu; oosanchoti katamaa dhoqa bessan eqidi,
PRO 9:4 Hinteno, eri pacidaysato haa gelite! Eeyatako haysada yaagasu.
PRO 9:5 “Haa yiite; ta kathaa miite; ta aggida woyniya uyite.
PRO 9:6 Hinte eeyatethi aggidi de7on de7ite; akeekidi hemetite” yaagasu.
PRO 9:7 Qelqisiya uraa seeriya asi cashshe ekees; iita uraa zoriya asi baw qohetees.
PRO 9:8 Qelqisiya uraa zoropa; I nena ixana; cinca uraa zora; I nena dosana.
PRO 9:9 Cincatethi uraa tamaarsa; I cinca gidana; Xillo uraa tamaarsa; I era gujana.
PRO 9:10 Godaas yashshi cincatethas doomethi, Geeshsha Godaa eroy akeeka.
PRO 9:11 Ta gaason ne laythay darana; ne de7o laythay aduqana.
PRO 9:12 Ne cinca gidiko, go7etey nena; Ne qelqisiya asi gidiko nena qohaasa.
PRO 9:13 Eeyo maccasi waaso darawusu; iw yeelli baawa; iya aykoka eruku.
PRO 9:14 Iya ba karen woyko katamaa dhoqa bessan uttawusu.
PRO 9:15 Banta ogiya biya asaa xeegada,
PRO 9:16 “Hinteno, eri pacidaysato taako haa yiite” yaagasu. Eri baynaysatako,
PRO 9:17 “Kaysidi uyaa haathi mal7ees; geeman miya kathi lo77ees” yaagasu.
PRO 9:18 Shin hayqida asay yan de7eysa, I imathatika duufon de7eysa I erenna.
PRO 10:1 Haysati Solomone leemisota. Cinca na7i ba aawa ufaysees; shin eeya na7i ba aayiw azzanthees.
PRO 10:2 Nagaran demmida miishey go77enna; shin xillotethi hayqope ashshees.
PRO 10:3 Goday xillota koshaysenna; shin nagaranchota amuwa polisenna.
PRO 10:4 Azallatethi manqisees; shin minnidi oosoy dureyees.
PRO 10:5 Cinca asi ba kathaa bone shiishees; shin kathi cakiya wode dhiskiya asi kawuyees.
PRO 10:6 Xillo asi anjetees; shin nagarancho asi ba makallatethaa doonan genthees.
PRO 10:7 Xilluwa sunthay anjon xeegetishe de7ees; shin nagaranchota sunthay elle dogetees.
PRO 10:8 Cinca asi kiittidaba oothees; shin eeya asi dhayoko bees.
PRO 10:9 Suure asi saro de7ees; shin geella asi ba gomen oyketees.
PRO 10:10 Gene ayfen qam7otiya asi meto ehees; shin yayyonna seeriya asi sarotethi medhees.
PRO 10:11 Xillo asa odi de7o pulto; shin nagarancho asa odi makalla genthees.
PRO 10:12 Ixoy palama denthethees; shin siiqoy bala ubbaa kammees.
PRO 10:13 Wozanaama asi cincatethan odees; shin eeya asa zokoy xam7as attees.
PRO 10:14 Cincati eratethi dagayoosona; shin eeyata doonay dhayo dafees.
PRO 10:15 Dure asa miishey diretida katamada naagees; shin manqotethi manqota dhaysees.
PRO 10:16 Xillo asa oosoy iya de7o; shin iita asa wursethay dhayo.
PRO 10:17 Seerin simmiya asi de7o ogen hemetees; shin seerin ixiya asi balees.
PRO 10:18 Ixo kammiya asi wordancho; zigirsi laaliya asi eeya.
PRO 10:19 Daro haasaya giddon nagari dhayenna; shin ba doona shiishiya asi cinca.
PRO 10:20 Xillo asa inxarsi geeshsha bira mela; shin iita asa wozani iitaban kumis.
PRO 10:21 Xillo asa odi daro asaa go77ees; shin eeyati banta paca wozanan hayqoosona.
PRO 10:22 Godaa anjoy dure kessees; he duretetha bolla meto gujenna.
PRO 10:23 Eeya uraas iitabaa oosoy kaassa mela; shin wozanaama asi cincatethan ufaytees.
PRO 10:24 Iita asi hirgidabay iya bolla gakana; shin xilloy amotidabay imetana.
PRO 10:25 Gotey aadhiya wode nagaranchoy bentenna; shin xilloti merinaw minnidi daana.
PRO 10:26 Caalabay ache, cuyi ayfe qoheysada, azalla asi kiittidaysa yiloyees.
PRO 10:27 Godaas yashshi laythi adussees; shin nagaranchota laythay qaammees.
PRO 10:28 Xillo asi ufaysi yaana gidi naagees; shin nagaranchota ufaysay dhayana.
PRO 10:29 Godaa ogey xillotas baqatidi attiya besse; shin iita oothiya asaas dhayo.
PRO 10:30 Xilloti ubba wode qaaxokona; shin iitati biitta bolla dookona.
PRO 10:31 Xillo asi cincatethan odees; shin geellaba odetiya inxarsi qanxetana
PRO 10:32 Xillo asa inxarsi bessiya haasaya erees; shin iita asaa oday wobbe.
PRO 11:1 Goday wordo mizaane ixees; shin like mizaanen ufaytees.
PRO 11:2 Otoroy yaa wode kawushatethi yees; shin ashketethan cincatethi yees.
PRO 11:3 Xillota enta suuretethay kaalethees; shin iita asata enta geellatethay dhaysis.
PRO 11:4 Hanqo gallas duretethi go77enna; shin xillotethi hayqope ashshees.
PRO 11:5 Borey bayna uraa ogiya xillotethay suurisees; shin iita uray ba iitatethan kundees.
PRO 11:6 Suureta enta xillotethay ashshees; shin ammanetonayisata enta amoy xihe gididi oykana.
PRO 11:7 Iita asi hayqiya wode, I naagiya ufaysay iyara issife hayqees; I ba wolqan ceeqetiyabay ubbayka dhayees.
PRO 11:8 Xilloy metope attees; iya gisho iitaa bolla metoy yees.
PRO 11:9 Xoossaa kaddida asi ba doonan asa dhaysis; shin xilloti eran kessi ekoosona.
PRO 11:10 Xilloti bonchetiya wode, katamay ufaytees; qassi iitati hayqiya wode, hashshu gees.
PRO 11:11 Xillota anjuwa gaason katamay diccees; shin iita uraa odi katamaa dhaysis.
PRO 11:12 Ba shooruwa kadhiya uraas wozani baawa; shin akeekancho uray si77i gees.
PRO 11:13 Zigiriya asi xuuraa laallees; shin ammanetiya asi xuuraa genthees.
PRO 11:14 Kaalethiyabay dhayiko, kawotethay kundees; shin daro zoreysati de7iko, saroy de7ees.
PRO 11:15 Erenna uraas waase gidiya asi tumape metootana; hessafe waase gidonna ixeysi lo77o.
PRO 11:16 Ulo keeha maccasi bonchetawusu; shin iita asi duretetha xalaala duretees.
PRO 11:17 Keeha asi baw lo77oba oothees; shin wozana mino asi bana qohees.
PRO 11:18 Iita asi demmiya miishey cimo; shin xillotethaa zeriya uray tuma woyto cakana.
PRO 11:19 Xillotethan minnidi de7iya uray paxa de7ana; shin iitatethaa kaalliya uray hayqana.
PRO 11:20 Goday iita qofay de7iya asata ixees; shin suure hemeteysatan ufaytees.
PRO 11:21 Iita asi seerettonna attenna; shin xillota kochay attana.
PRO 11:22 Qofi bayna mala lo77o macca puulatethay guduntho sidhen aathida worqaa mela.
PRO 11:23 Xillota amuwas poloy lo77o xalaala; shin iitata amuwas poloy hanqo xalaala.
PRO 11:24 Issi issi asati banta miishe asas coo keehosona; shin enta aqoy haa darees. Hara asati qassi banta miishas pala uuzettoosona; shin enta aqoy yaa pacees.
PRO 11:25 Keeha asi duretana; harata maaddiya asi maadetana.
PRO 11:26 Kathi al77in bayzanaw minjiya uraa asay baaddees. Shin ba kathaa asay koyiya wode bayziya uraa anjees.
PRO 11:27 Lo77oba minthidi koyiya uray ufaysaa demmees; shin iitabaa koyiya uraa iitabay demmees.
PRO 11:28 Ba duretetha ammanetiya asi kundana; shin xilloti balgo mithada.
PRO 11:29 Ba soo asaa bolla buqethi denthiya uray go7etiyabay aybika baawa. Eeyatika cincatas aylle gidana.
PRO 11:30 Xillo asi de7o ayfe ayfiya mitha mela; shempo ashsheysati cincata.
PRO 11:31 Xilloti sa7an banta ooso gate ekiyaba gidiko, iitatinne nagaranchati banta oosuwas ekana gatey waanidi darandeesha!
PRO 12:1 Seera dosiya uray eratethi dosees; shin seera ixiya uray eeya.
PRO 12:2 Lo77o asi Godaape saba demmees; shin Goday genanchota pirdees.
PRO 12:3 Asi iitatethan minnidi eqenna; shin xillota xaphoy qaaxenna.
PRO 12:4 Wozanaama machiya ba azinaas kallacha mela; shin ba azina kawushiya machiya meqethi miya ajaaje mela.
PRO 12:5 Xilluwa qofay suure; shin iitata zorey cimo.
PRO 12:6 Iitata zoretay asa qohanaasa; shin xillota zoretay enta ashshanaasa.
PRO 12:7 Iita asati kundana; entaw zerethika attenna; shin xillota kochay minnidi de7ana.
PRO 12:8 Asi ba cincatetha mela galatetees; shin geella qofay de7iya asi kadhetees.
PRO 12:9 Dure asi daanidi, meton de7iya asaape coo asa daanidi, oothiiddi ba de7o sugiya asi keeha.
PRO 12:10 Xillo asi ba mehes qadhetees, shin wozana mino asas qadhey baawa.
PRO 12:11 Ba biitta minthi oothiya uray kathi kallees; shin pathonnaba yedethiya uray akeeki pacidaysa.
PRO 12:12 Iitati nagarancho asata di77anaw amottoosona; shin xillota xaphoy daayidi de7ana.
PRO 12:13 Iita asa iya doonape keyida odi xihe gididi oykees; shin xilloy metope kessi ekees.
PRO 12:14 Asi ba doonape keyiya qaalan lo77oba kallees; ba oothida ooso gatiya ekees.
PRO 12:15 Eeya asi biya buussay aw iya huuphen like daanees; shin cinca asi zore si7ees.
PRO 12:16 Eeya uraa hanqoy ellesidi eretees; shin cinca asi cashshe wuda geenna.
PRO 12:17 Tumaa haasayiya asi suureba odees; shin wordo markay wordo odees.
PRO 12:18 Akeekona odetiya odi mashshada caddees; shin cinca inxarsay pathees.
PRO 12:19 Wordo odi guutha wodesa; shin tuma odi merinaw de7ana.
PRO 12:20 Iita qopiya asaa wozanan cimoy de7ees; shin saroba zoreteyisata wozanan ufaysay kumees.
PRO 12:21 Xillota metoy gakenna; shin iitatas metoy darana.
PRO 12:22 Goday wordanchota ixees; shin tumancho asatan I ufaytees.
PRO 12:23 Cinca asi ba eraa qottees; shin eeyati banta eeyatetha odoosona.
PRO 12:24 Minnidi oothiya uray dere haarees; shin azalla asi haaretees.
PRO 12:25 Un7an kumida wozani azzano ehees; shin keeha odi iya ufaysees.
PRO 12:26 Xillo asi ba shooruwa zoridi, suure oge kaalethees; shin iitati oge tumaape haassees.
PRO 12:27 Azalla asi shankatidi ehida asho kathenna; shin minnidi oothiya uray ba miishiyas mishetees.
PRO 12:28 Xillotethaa ogen de7oy de7ees; he ogen hayqoy baawa.
PRO 13:1 Erancho na7ay ba aawa seera si7ees; shin qelqiseysi seera ekenna.
PRO 13:2 Asi ba doonape keyiya qaalan lo77oba ekees; shin ammanetonaysati makallaba amottoosona.
PRO 13:3 Ba doona naagiya uray ba shempuwa naagees; shin eeson haasaya uray bana dhaysees.
PRO 13:4 Azallay amottees; amotikonne aybaka demmenna; shin minnidi ootheysati kallana.
PRO 13:5 Xillo asati wordo oda ixoosona. Shin iita asata odi yeellayeesinne kawushshees.
PRO 13:6 Suure de7uwa de7iya uraa iya xillotethay naagees; shin nagarancho iya nagaray ongees.
PRO 13:7 Bana dure daanisiya asi de7ees; shin iyaw aybinne baawa; qassi bana manqo daanisiya asi de7ees; shin iyaw daro aqoy de7ees.
PRO 13:8 Asi ba miishen ba shempo wozanaw danda7ees; shin manquwa yashisiyabay baawa.
PRO 13:9 Xillota poo7oy phoolees; shin iitata xompey to7ana.
PRO 13:10 Otoroy ooshshi yelees; shin zore ekeysati cincata.
PRO 13:11 Daaburi bayna demmida miishey eeson dhayees; shin minni oothidi demmida aqoy, dari daridi bees.
PRO 13:12 Koyiyabay poletonna gam7eysi azzanthees; shin amotidabay poleteysi ufaysees.
PRO 13:13 Zore kadhiya uray meton gelees; shin kiita bonchiya uray saro de7ana.
PRO 13:14 Cincatethi immiya timirtey de7o pulto; higgey ase hayqo xihepe kessi ekanaw maaddees.
PRO 13:15 Akeeki de7iya uray bonchetees; shin ammanetona ixoy qohos gathees.
PRO 13:16 Cinca asi ubbay eran oothees; shin eeyi ba eeyatetha qoncisees.
PRO 13:17 Iita asati kiitetidi, meton geloosona; shin ammanthiya asati kiitetidi, sarotethi ehoosona.
PRO 13:18 Seera ixiya asi manqeesinne yeellatees; shin seera ekiya uray bonchetees.
PRO 13:19 Amotidabay poleteysi daro ufaysees; shin iitati iitabaape haakanaw koyokona.
PRO 13:20 Cinca asara hemetiya asi cinca gidees; shin eeya asara hemetiya asi meton gelees.
PRO 13:21 Nagaranchota iita qaaday kaallees; shin duretethi xillota woyto.
PRO 13:22 Lo77o asi ba nayta nayta laatisees; shin nagaranchuwa aqoy xilluwas dagayetees.
PRO 13:23 Manquwa goshshay daro kathi ayfenaw danda7ees; shin suure pirda pacan dhayees.
PRO 13:24 Pircon seeranaw dosonna asi ba na7aa ixees; shin ba na7aa siiqiya uray minnidi seerees.
PRO 13:25 Xilloy, uloy kallana gakanaw mees; shin nagaranchoy ubba wode koshatana.
PRO 14:1 Cinca maccasi ba keethaa keexawusu; shin eeya maccasiya ba keethaa ba kushen laallawusu.
PRO 14:2 Suure hemetiya asi Godaa yayyees; shin ba oge geellayiya asi Godaa kadhees.
PRO 14:3 Eeya odi iya zokuwas xam7a ehees; shin cincata inxarsay enta naagees.
PRO 14:4 Boori bayna ixiko shaaley kaysi gidees; shin goshsha boori de7iko, ne shaaley kathan kumees.
PRO 14:5 Ammanetiya marki ubba wode tuma odees; shin wordo marki wordo xalaala odetees.
PRO 14:6 Qelqisiya asi cincatethi koyees, shin demmenna; akeeki de7iya asi eratethi demoy waaysenna.
PRO 14:7 Eeya asape haaka; neeni iya odape eratethi demmaka.
PRO 14:8 Cinca asi cinca gidiya ba oothiyaba erees; shin eeya asa eeyatethay iya balethees.
PRO 14:9 Eeyati nagara oothishe, qiirotanaysa aggidi qelqisoosona; shin suureti banta nagaray atto geetetanaw koyoosona.
PRO 14:10 Issi issi wozani ba azzanuwa erees; iya ufaysa oonika iyara koxenna.
PRO 14:11 Iitata keethay laaletana; shin suureta keethay minnidi daana.
PRO 14:12 Asas like daaniya ogey de7ees; shin iya wursethay hayqoko gathees.
PRO 14:13 Miicha wodeka wozanan azzanoy de7ees; ufaysa wursethay azzano gidanaw danda7ees.
PRO 14:14 Iita asi ba iita oosuwa gate ekana; lo77o asika ba lo77o oosuwa gate ekana.
PRO 14:15 Eeya asi ubbaba ammanees; shin cinca asi akeekidi tangees.
PRO 14:16 Cinca asi Godaa yayyees; iitape haakees; shin eeya asi eesotesinne iitape naagetenna.
PRO 14:17 Elle hanqetiya asi eeya ooso oothees; shin cinca asi danda7ancho.
PRO 14:18 Akeeki bayna asi ba eeyatetha gatiya ekoosona; shin cinca asi eratethi kallachada goxoosona.
PRO 14:19 Iitati lo77ota sinthan gulbatana; nagaranchati xillota pengen hokana.
PRO 14:20 Manqoy ba shooruwan ixetees; shin duretas daro laggeti de7oosona.
PRO 14:21 Ba shooruwa kadhiya asi nagara oothees; shin manquwa maaddiya asi anjetidaysa.
PRO 14:22 Iitabaa maqeteysati baloosona gidokona? shin lo77oba oothanaw halcheysati ammanetethinne siiqo demmoosona.
PRO 14:23 Minnidi oothiya ooso ubban wodhey de7ees; shin coo odi manqotethi ehees.
PRO 14:24 Cincatas enta duretethay entaw kallacha; shin eeyati guji guji eeyoosona.
PRO 14:25 Tuma marki shempo ashshees; shin wordo marki balethees.
PRO 14:26 Godaa yayiya asas mino miixay de7ees; iya naytas baqatidi attiya bessi de7ees.
PRO 14:27 Godaa yashshi de7o pulto; hayqo xihepe ase ashshees.
PRO 14:28 Kawo gitatethi I haariya asaa darotethaana; shin haaretiya asi dhayiko ika pathenna.
PRO 14:29 Danda7ancho asas gita akeeki de7ees; shin elle hanqetiya asi ba eeyatetha qoncisees.
PRO 14:30 Saro wozani asatethas payyatethi immees; shin qanaatey asatethas ajaaje harge mela.
PRO 14:31 Manqota naaqiya asi enta medhidaysa cayees; shin metootanchotas keehiya asi Xoossaa bonchees.
PRO 14:32 Iitati banta iita ooson kundana; shin xillotas hayqope attiya miixi de7ees.
PRO 14:33 Akeekancho asa wozanan cincatethi kumis; shin eeyati cincatethi aybeko erokona.
PRO 14:34 Xillotethi issi kawotetha dhoqu dhoqu oothees; shin nagari ay asika kawushshees.
PRO 14:35 Erancho aylletanan kawoy ufaytees; shin yeellaya aylley kawa hanqethees.
PRO 15:1 Liiqo inxarsi hanqo zarbisees; shin dom7ethiya qaali hanqo denthethees.
PRO 15:2 Cincata inxarsay era puulayees; shin eeyata doonay eeyatethi pultisees.
PRO 15:3 Godaa ayfeti ubba bessi xeelloosona; iitatanne lo77ota shaakidi be7oosona.
PRO 15:4 Lo77o odi de7o mitha mela; shin geella odi ayyaana menthees.
PRO 15:5 Eeyi ba aawa seera kadhees; shin ba aawa seera ekiya asi cinca.
PRO 15:6 Xillo uraa keethan daro miishey de7ees; shin iitata soo geliya miishey meto ehees.
PRO 15:7 Cincata doonay era zerees; shin eeyata wozanay hessa mela gidenna.
PRO 15:8 Goday iitata yarshuwa ixees; shin suureta woosan I ufaytees.
PRO 15:9 Goday iita asata ogiya ixees; shin xillotethi kaalleyisata I dosees.
PRO 15:10 Like ogiya aggida asi pirdi naagees; seera ixiya asi hayqees.
PRO 15:11 Duufoynne dhayoy Godaa sinthan qonce; yaatin, asa wozana qofay waani iyape geemmanee?
PRO 15:12 Qelqisiya asi seera dosenna; cincatape zore oychenna.
PRO 15:13 Wozani ufaytin, som7oy poo7ees; shin wozani azzaniko, ayyaani meqees.
PRO 15:14 Akeeka wozani de7iya asi eratethi koyees; shin eeyati banta eeyatethan ufaytoosona.
PRO 15:15 Manqota de7oy ubba wode baaxe; shin ufaytiya asi ubba wode alees.
PRO 15:16 Ooshshara de7iya gita aqope Godaa yashshara de7iya guuthabay keeha.
PRO 15:17 Ooshshi de7iya bessan modho asho maanape siiqoy de7iya bessan santhi keeha.
PRO 15:18 Hanqoy ooshshi kessees; shin danda7i ooshshi irxisees.
PRO 15:19 Azalla asa ogey agunthan diretis; shin suure asa ogey giiga.
PRO 15:20 Cinca na7i ba aawa ufaysees; shin eeya na7i ba aayiw kadhees.
PRO 15:21 Wozani bayna asi ba eeyatethan ufaytees; shin wozanaama asi bessiya ba oothees.
PRO 15:22 Zorey dhayiko, qopidabay haddirees; daro zorey de7iya bessan qopidabay poletees.
PRO 15:23 Oyshas bessiya zaaro imoy he uraa ufaysees; ba woden odetiya odi ay mela ufaysi!
PRO 15:24 Garsan de7iya si7oolepe attana mela de7o ogey akeeka uraa pude kaalethees.
PRO 15:25 Goday otoranchota keetha laallana; shin am7e zawa naagees.
PRO 15:26 Goday iitata qofaa ixees; shin geeshsha qaalan I ufaytees.
PRO 15:27 Wordon wodhe demmanaw aaliya asi ba soo asaa bolla meto ehees; shin wodhaafe ixiya asi de7on daana.
PRO 15:28 Xillo asi odetanape sinthatidi qopees; shin iitata inxarsaape iitabay pultees.
PRO 15:29 Goday iitatape haakees; shin xillota woosa si7ees.
PRO 15:30 Som7oy pashkin wozani ufaytees; mishiraachoy meqethi minthees.
PRO 15:31 De7o immiya zore si7iya asi cincatethara issife daana.
PRO 15:32 Seera ixiya asi bana qohees; shin seera ekiya asi akeeka demmees.
PRO 15:33 Godaas yashshi cincatethi tamaarsees; ashketethi bonchofe sinthatees.
PRO 16:1 Asi ba wozanan halchees; shin like zaaroy Godaape bentees.
PRO 16:2 Asi oothiya ooso ubbay iyaw like daanees; shin Goday dendo qofaa be7ees.
PRO 16:3 Ne ooso ubbaa Godaas hadara imma; neeni qopidabay poletana.
PRO 16:4 Goday ubbabay qopidaysatho bana mela oothees; hanikoka, makallanchota wursethay dhayo.
PRO 16:5 Goday otoranchota ixees; enti seerettonna attokona.
PRO 16:6 Siiqoninne ammanetethan nagari atto geetetees; Godaas yayyidi asi iitabaape attees.
PRO 16:7 Asa hemethi Godaa ufaysiyabaa gidiko, I ba morketara saro daanada oothees.
PRO 16:8 Xillotethan bentiya guuthabay, wordon demmiya daro wodhepe lo77o.
PRO 16:9 Asi wozanan ba oothanaba halchees; shin halchoy Godaa maaden poletees.
PRO 16:10 Kawoy Xoossaafe ekida maatan pirdees; iya inxarsay suure pirdees.
PRO 16:11 Gina mizaanetinne maka miisheti Godaaba; bayziyaba ubban geney doonna mela Goday koyees.
PRO 16:12 Kawoti iita ooso ixoosona; enta araatay xillotethan eqees.
PRO 16:13 Kawoti xillo inxarsan ufaytoosona; tumaa haasaya uraa dosoosona.
PRO 16:14 Kawa hanqoy hayqo kiitancho mela; shin cinca asi hanquwa irxisees.
PRO 16:15 Kawa som7oy poo7iko de7oy de7ees; Iya lo77otethay ira ehiya shaara mela.
PRO 16:16 Cincatethi demoy worqa demope aadhees; akeeka demoy bira demope lo77o.
PRO 16:17 Suureta ogey iitape haako; ba hemethaa naagiya uray ba shempuwa naagees.
PRO 16:18 Otoroy dhayo kaalethees; ceeqetethi kundethi ehees.
PRO 16:19 Otoranchotara di7o shaaketanaape, ashke gididi manqidi de7eysi lo77o.
PRO 16:20 Zore si7iya uraas I oothiyaba ubbay injetana; Godan ammanetiya uray anjetana.
PRO 16:21 Ba qofan cinca gidida asi akeekancho geetetees; lo77o qaali eratethi gujees.
PRO 16:22 Cinca asas eratethi de7o pulto mela; shin eeyata seeroy coo wode wursees.
PRO 16:23 Cinca asi odetanaape sinthe qopees; iya mettershay eratethi gujees.
PRO 16:24 Lo77o qaali eessa ililoda mal7ees; shempos mal7o; meqethas paxo gidees.
PRO 16:25 Asas suure daaniya ogey de7ees; shin wursethan hayqoko gathees.
PRO 16:26 Asi minnidi oothana mela oothey katha amo; koshi minnidi oothana mela denthethees.
PRO 16:27 Kawusha asi iitabaa halchees; iya oday tamada xuuggees.
PRO 16:28 Wobe asi ooshshi denthethees; zigirsi ammanetiya laggeta shaakees.
PRO 16:29 Gene asi ba shooruwa cimmees; lo77o gidonna oge kaalethees.
PRO 16:30 Ba ayfen qam7otiya asi geellaba qopees; ba mettersha saxidi mandiya asi iitabaa oothees.
PRO 16:31 Puulumida huuphey boncho kallacha; hessika bentey xillo de7o de7ina.
PRO 16:32 Wolqaama asi gidanaape danda7a asi gidoy lo77o, daro katamata olidi oykanaape bana haaroy aadhees.
PRO 16:33 Asi saama yeggees; shin wursetha zaaroy Godaape bentees.
PRO 17:1 Ooshshi de7iya bessan de7iya gita gibiraape saroynne wopi de7iya bessan uytha poqoy lo77o.
PRO 17:2 Cinca aylley pathonna ba godaa na7aa haarees; iya ishatara issife laata shaaketees.
PRO 17:3 Worqinne biri taman paaceteysada; Goday asa wozana paacees.
PRO 17:4 Iita asi iita haasaya si7ees; wordanchoy wordo haasaya hayzees.
PRO 17:5 Manqota bolla qelqisiya asi enta medhida Xoossaa cayees; hara asi gakiya meton ufaytiya asi seerettonna attenna.
PRO 17:6 Na7a na7i cima asas kallacha; aawati banta naytas boncho.
PRO 17:7 Lo77o odi eeya asas giigenna; hessadaka wordo odi ayseysas giigenna.
PRO 17:8 Wodhaafe immeysas wodhaafey bita mela; I biya bessa ubbay iyaw injetees.
PRO 17:9 Qoho genthiya uray siiqo koyees; shin oda zaaridi zaaridi woociya uray, ammanetiya laggeta shaakees.
PRO 17:10 Eeyay xeetu toho lisson shocin ereysafe; akeeki de7iya asas coo hanqoy era immees.
PRO 17:11 Iita asi ubba wode geella; qadhey bayna asi iya bolla kiitetana.
PRO 17:12 Eeyara iya eeyatethan gahetanaape marati eketida maahera gahetethi lo77o.
PRO 17:13 Lo77o oothidaysas iita kushe zaariya uraa soope iitabay kichenna.
PRO 17:14 Ooshshi doomishe haatha dhawa mentheysa mela; hessa gisho ooshshi doomanaape koyrottada palama agga.
PRO 17:15 Nagaranchuwa xillisoynne xilluwa bolla pirdoy, nam7ayka Goday ixiya ooso.
PRO 17:16 Cincatethi demmanaw amoy bayna de7ishin, eeya kushen de7iya miishey ay iya maaddii?
PRO 17:17 Laggey ubba wodeka lagge; ishi meto wode maaddanaw yeletees.
PRO 17:18 Akeeki bayna asi eronna uraa acuwa qanxanaw waase gidees.
PRO 17:19 Ooshshu dosiya asi nagara dosees; ubba wode ceeqetiya asi ba bolla dhayo xeegees.
PRO 17:20 Wobe qofi de7iya asi lo77oba demmenna; ba inxarsan cimmiya asi meton gelees.
PRO 17:21 Eeyaa na7a yelida aawi azzanees; eeya na7a aawas ufaysi deenna.
PRO 17:22 Ufaytiya wozani asas lo77o dhale; shin meqida wozani asas wolqa dhaysees.
PRO 17:23 Iita asi pirda geellayanaw geeman wodhaafe ekees.
PRO 17:24 Akeeka asi cincatethi ba sinthafe haassenna; shin eeya asa ayfey sa7a gaxa yuuyees.
PRO 17:25 Eaya na7i ba aawa azzanthees; ba aayiwuka camisees.
PRO 17:26 Xillo asi seeroy bessenna; suure asi shocoy lo77o gidenna.
PRO 17:27 Guutha qaala haasaya asi erancho; wopa ayyaani de7iya asi akeekancho.
PRO 17:28 Eeya asi si77i giiko cinca daanees; ba doona dooyonna ixiko erancho daanees.
PRO 18:1 Shaahetethi koyiya asi ba amuwa kaallees; suure qofa ubbaa ixees.
PRO 18:2 Eeya asi ba qofaa xalaala qoncisanaw dosees; hara asape era ekanaw dosenna.
PRO 18:3 Iitatethi yaa wode kadhey yees; kawushatethi yaa wode yeelli yees.
PRO 18:4 Asa doonape keya odi, ciimmo haatha mela; cincatethi goggiya pulto mela.
PRO 18:5 Naaqida uraa maaddidi, xilluwa pirdaa geellayeysi lo77o gidenna.
PRO 18:6 Eeya asa odi ooshshu denthethees; iya doonay wadho xeegees.
PRO 18:7 Eeya asa odi bana qohees; iya oday xihe gididi iya oykees.
PRO 18:8 Zigirsi mal7o katha mela; ufaysishe duge ganje gakees.
PRO 18:9 Azalla asi dhaysiya asape aybaka dummatenna.
PRO 18:10 Godaa sunthay mino gimbe mela; xillo asi yaa woxidi saro attees.
PRO 18:11 Dure asata duretethay gimbetida katama mela; enta qofan enta duretethay mino dirsada enta naagiyaba daanees.
PRO 18:12 Otoroy kundethafe sinthatees; ashketethi boncho ehees.
PRO 18:13 Si7onna de7ishe zaaro imoy, he uraas eeyatethinne yeella.
PRO 18:14 Daana gidi qopiko, iya ayyaanay harge danda7isees; shin ufaysi qanxiko iya maaddey baawa.
PRO 18:15 Akeeka asi eratethi koyees; cinca asa haythi cincatethi si7ees.
PRO 18:16 Imoti immeysas oge dooyees; gita asatara erisees.
PRO 18:17 Daynna sinthan koyro shiiqidi mootiya uray, iya morkey yin, iya oychana gakanaw, ubba wode bana xillo gidi qopees.
PRO 18:18 Saama yegethi palama teqees; nam7u palamiya asata shaakees.
PRO 18:19 Qohetida ishay gimbetida katamape aadhidi minnees; iya palamay birata gorde mela.
PRO 18:20 Asi ba doona odan ba ulo kunthees; ba inxarsaa ayfen kallees.
PRO 18:21 Hayqoynne de7oy inxarsana; neeni ne inxarsaa ayfiya maana.
PRO 18:22 Macho demmiday lo77oba demmis; i, Godaape teema demmees.
PRO 18:23 Manqo asi aaddashidi odetees; shin dure asi otoron zaarees.
PRO 18:24 Daro laggey de7iya asi ba bolla meto ehees; shin ishape aadhidi matatiya laggey de7ees.
PRO 19:1 Ba doonan wordotiya eeya asape ba de7uwan borey bayna manqoy lo77o.
PRO 19:2 Eri bayna dafetethi lo77o gidenna; eeso daroy oge balethees.
PRO 19:3 Asi ba eeyatethan ba de7uwa iissees; yaatidi Godaa bolla yilotees.
PRO 19:4 Duretethi daro lagge shiishees; shin manqotethi de7iya laggeta duuthees.
PRO 19:5 Wordo marki seerettonna attenna; wordo odetey kessi ekenna.
PRO 19:6 Daro asay shuuma som7o koyoosona; imota immiya asara asi ubbay dabbotees.
PRO 19:7 Manqo asi hari attoshin iya ishati ixoosona; iya laggeti iyape haakoosona; I enta aaddashinka enti iya koyokona.
PRO 19:8 Cincatethi demmiya asi ba shempuwa dosees; eratethi minthidi oykiya uraas injetees.
PRO 19:9 Wordo marki seerettonna attenna; wordo odetey dhayana.
PRO 19:10 Eeya asas inje de7oy bessenna; aylley halaqata haaroy daro iita.
PRO 19:11 Cincatethi ase danda7a tamaarsees; qoho kadhidi aadhethi bonchisees.
PRO 19:12 Kawa hanqoy gaammo gudetha mela; shin iya nashshoy maata aacisiya aka mela.
PRO 19:13 Eeya na7i ba aawa dhaysees; doonama macha xokiya keetha mela.
PRO 19:14 Asi keethenne shalo aawupe laattees; shin akeeka macho Goday immees.
PRO 19:15 Azallatethi dhisko ehees; ooso oothonna asi koshatees.
PRO 19:16 Kiita naagiya asi ba shempuwa naagees; shin qelli giya asi hayqees.
PRO 19:17 Manqos keehiya asi Godaas tal7ees; Goday he lo77o oosuwa gisho woytees.
PRO 19:18 Simo ufaysi de7ishin ne nayta seera; seeronna ixiko, ne enta dhaysaasa.
PRO 19:19 Elle shenetiya asi ba gatiya ekanaw bessees; neeni iya issi toho ashshiyaba gidiko, hara wodeka ne iya hessada ashshanaysi attenna.
PRO 19:20 Zore si7a; tamaaranaw koya; neeni wursethi gakanaw cinca gidana.
PRO 19:21 Asi darobaa halchees; shin Goday gidabay poletees.
PRO 19:22 Asape koyetey ammanetethi; wordo gidanaape manqo gideysi lo77o.
PRO 19:23 Godaas yashshi de7oko kaalethees; iya yayiya asi kallidi de7ees; iiti iya bochenna.
PRO 19:24 Issi issi asi daro azalla; hari attoshin woxen tushkida uythaa pude baaranaw waayetees.
PRO 19:25 Neeni qelqisiya asi shociko, akeeki pacidaysi cincatethi tamaarana; akeeka asi ne hanqetiko, I eratethi demmana.
PRO 19:26 Ba aawa bonqiya na7ay, ba aayiw yedethiya na7ay, yeellanne kawushatethi ehiya na7a.
PRO 19:27 Ta na7aw, ne zore si7onna ixiko, era ogiyape haakaasa.
PRO 19:28 Wordo marki suure pirda bolla qelqisees; iita asa dooni iitatethi mittees.
PRO 19:29 Qelqisiya asas pirda eeyatas wadho koshshees.
PRO 20:1 Mathoya ushshi eeyanne ooshancho oothees; ushshan baletiya asi cinca gidanaw danda7enna.
PRO 20:2 Kawo hanqoy gaammo gudetha mela; iya yiloyiya asi ba shempuwa bolla pirdees.
PRO 20:3 Palamape haakeysi boncho; shin eeya asi ooyetanaw ellesees.
PRO 20:4 Azalla goshshanchoy wode naagidi goyenna; kathi cakiya wode I woossanaw koyees; shin aybaka demmenna.
PRO 20:5 Asa wozana halchoy ciimmo haatha mela; shin wozanaama asi duuqidi kessees.
PRO 20:6 Daro asati banta lo77otetha odoosona; shin tuma ammanetiya asi demmanay oonee?
PRO 20:7 Xillo asi borey bayna de7o de7ees; iya kaalliya iya nayti anjetidaysata.
PRO 20:8 Kawoy pirdanaw ba araatan uttiya wode, iita ubbaa ba ayfen harqidi kessees.
PRO 20:9 “Ta wozanay geeshshi; tanan nagari baawa” gaanaw danda7iya asi daanesha?
PRO 20:10 Goday wordo mizaanenne gina gidonna maka miishen go7eteyisata ixees.
PRO 20:11 Na7i geeshshinne suure gideysi I oothiya ooson eretees.
PRO 20:12 Si7iya haythinne xeelliya ayfe, Goday medhis.
PRO 20:13 Dhiskon ne wode wursiko ne manqana; minnada oothiko ne kathi kallana.
PRO 20:14 Shammiya asi, “Qohees! Qohees!” yaagees; shin bidaape guye, “Gelan shammas” yaagidi ceeqetees.
PRO 20:15 Worqey kumis; al7o shuchika bentees; shin eri kumida inxarsi ubbaafe aadhida alleeqo.
PRO 20:16 Eronna asas waase geliya uraa ma7uwa qaari ekite; imatha asas waase geliya uraa ma7o oykite.
PRO 20:17 Wordon demmida kathi mal7ees; shin aqidi pee7ishe doonan aceda hanees.
PRO 20:18 Zore ekada ne qofaa qacha; zore ekonna de7ashe ola boopa.
PRO 20:19 Zigiriya asi xuura genthenna; hessa gisho, coo haasaya asape haaka.
PRO 20:20 Ba aawa woyko ba aayiw baaddiya asa, de7o xompey sakana dhuman to7ana.
PRO 20:21 Koyrora eeson shiiqida shaloy wursethan anjetenna.
PRO 20:22 Nena qohida uraa qohada zaarana goopa; Godan ammaneta; I nena ashshana.
PRO 20:23 Goday nam7u qommo mizaane ixees; wordo mizaaney iya ufaysenna.
PRO 20:24 Asay baana ogiya Goday kaalethees; yaatin, asi ba de7on baana ogiya waatidi akeekanaw danda7ii?
PRO 20:25 Eeson, “Haysa taani Xoossas immas” guussinne guyepe qiirotethi asas xihe.
PRO 20:26 Cinca kawoy geellata shaakidi erees; I enta qadhetonna seerees.
PRO 20:27 Asa ayyaani Godaas xompe; iya gaatha asatethaa ubbaa pilgidi xeellees.
PRO 20:28 Siiqoynne ammanetethi kawa naagoosona; iya araatay tuma pirdan minnees.
PRO 20:29 Yalagata bonchoy enta wolqaa; cimata bonchoy enta puulunthaa.
PRO 20:30 Mino seeri iitatethi shoddees; wadhoy iita wozana laammees.
PRO 21:1 Kawo wozani Godaa kushena; iya wozanaa dhawa haathada ba koyida soo zaarees.
PRO 21:2 Asi oothiyaba ubbay iyaw like daanees; shin Goday iya wozanaa qofaa paacees.
PRO 21:3 Yarsho yarshanaape aathidi, xillonne suure ootheysa Goday dosees.
PRO 21:4 Iitati otoroninne ceeqetethan eretoosona; hessi qassi nagara.
PRO 21:5 Mino oothiya asa halchoy dureyees; shin eesotiya ubbay manqees.
PRO 21:6 Wordon dagayida shaloy pentoda dhayees; hessa koyeysati hayqo koyoosona.
PRO 21:7 Iitati suureba oothanaw koyonna gisho, enta geella oosoy enta ekidi bees.
PRO 21:8 Nagaranchoti geella ogen hemetoosona; shin geeshshati suureba oothosona.
PRO 21:9 Doonatiya machira issi keethan daanape kare darmachan duussi lo77o.
PRO 21:10 Iitati iitaba oothanaw amottoosona; banta shoorotas qadhetokona.
PRO 21:11 Qelqisiya asi seeretiya wode wozani bayna uray cincatethi tamaarees; wozanaama uray era demmees.
PRO 21:12 Xillo Xoossay iitata son oosetiyaba ubbaa be7ees; enta shiri yeggidi dhaysees.
PRO 21:13 Manqota waasuwa si7anaape gidi, ba haythaa tucciya uray, ika waassana; I waassin alliya asi dhayana.
PRO 21:14 Geeman immiya imoy hanqo doshisees; qosan immida wodhaafey hanqo irxisees.
PRO 21:15 Suure pirdi pirdetiya wode, xilloti ufaytoosona; shin iita ootheyisata daganthees.
PRO 21:16 Akeeka ogiya haakiya uraa hayqoy naagees.
PRO 21:17 Injetin daana giya uray manqees; woynenne zayte dosiya uray duretenna.
PRO 21:18 Xoossa asata ashshanaw iita asati seeretosona; ammanetona asati suure asata gisho seeretosona.
PRO 21:19 Doonatiyanne yilotiya machira daanape bazzon de7oy lo77o.
PRO 21:20 Wozanaama uraa son mal7o quminne oysi minjettees; shin eeya asi de7iyaba ubbaa midigees.
PRO 21:21 Xillotethinne siiqo koyiya uraa laythay aduqees; he uray xillotethinne boncho demmees.
PRO 21:22 Wozanaama asi wolqaama olanchota katamaa olidi oykees; enti ammanetiya mino miixaa laallees.
PRO 21:23 Ba doonanne ba inxarsaa naagiya asi bana metope naagees.
PRO 21:24 Otoreynne ceeqetey qelqisiya asi; I otorancho gidida gisho asas qopenna.
PRO 21:25 Oothanaw koyonna gisho azalla amoy wodhees.
PRO 21:26 Azalla asi ubba wode darobaa demmanaw amottees; shin xilloy baw ashshona immees.
PRO 21:27 Goday iitata yarshuwa ixees; enti iyaw iita qofan shiishiya yarshuwa aathidi ixees.
PRO 21:28 Wordo marki dhayana; shin tuma marki eqidi daana.
PRO 21:29 Iita asi bessona xaala xaalees; shin suure asi yuushshi qopees.
PRO 21:30 Asi ba cincatethan, akeekaninne zoren Godaara eqetanaw danda7enna.
PRO 21:31 Olas para kooranaw danda7etees; shin xoonoy Godaaba.
PRO 22:1 Lo77o sunthi daro duretethafe aadhees; bonchoy birapenne worqafe aadhees.
PRO 22:2 Durenne manqo Goday medhis; hessan enti nam7ay issino.
PRO 22:3 Cinca asi iita be7idi qosetidi attees; shin akeeki bayna asi meton gelidi qohetees.
PRO 22:4 Ashketethinne Godaa yashshi, duretethi, bonchonne de7o immees.
PRO 22:5 Iitata ogen agunthinne xihey de7ees; shin bana naagiya asi entafe haakees.
PRO 22:6 Na7i waanidi daanaw bessiyako tamaarsa; I cimiya wodeka iyape haakenna.
PRO 22:7 Durey manquwa haarees; tal7e ekiday tal7e immidaysas aylle gidees.
PRO 22:8 Nagara zeriya uray waaye cakees; iya hanqo xam7ay meqana.
PRO 22:9 Ba kathaa manqotas shaakiya gisho keeha asi anjetana.
PRO 22:10 Qelqisiya asi diggiko, palami, ooshshinne cashshi attana.
PRO 22:11 Wozani geeshshi gidida asinne lo77o oda dosiya asi kawora dabbotees.
PRO 22:12 Godaa ayfey eratethi naagees; shin wordanchota qaala shiri yeggees.
PRO 22:13 Azalla asi, “Karen gaammoy de7ees; tana ogen maana” yaagees.
PRO 22:14 Layma maccasa dooni wolqaama olla mela; Goday hanqetidaysati iyan kundoosona.
PRO 22:15 Eeyatethi na7a wozanan de7ees; shin pircoy iyape haassees.
PRO 22:16 Shalo shiishanaw manquwa naaqeynne dure asas imota immiya nam7ay manqana.
PRO 22:17 Ne haytha zaarada cincata qaala si7a; ne wozanaa ta timirtiyako zaara.
PRO 22:18 Enta ne wozanan wothikonne ne doonan enta haasayiko, ne ufaytana.
PRO 22:19 Ne ammanoy Godan gidana mela, taani nena hachi tamaarsayis.
PRO 22:20 Taani new zorenne eratethi kumida hastamu leemisota xaafas.
PRO 22:21 Nena kiittidaysas like zaaro zaarana mela, taani nena tumatethi tamaarsas.
PRO 22:22 Manqotas aybika bayna gisho, enta bonqofa; pirdan enta maata dhaysofa.
PRO 22:23 Goday enta gisho mootetana; enta bonqidaysata I bonqana.
PRO 22:24 Yilotiya uraara laggetopa; elle shenetiya uraara hemetofa.
PRO 22:25 Neeni iya yiluwara meezetiko, guyepe agganaw danda7aka.
PRO 22:26 Asa aco ta qanxana gada waase gidopa.
PRO 22:27 Ne qanxiyaba dhayiko, ne zin7iya hiixay attonna, new de7iyaba ubbay eketana.
PRO 22:28 Ne mayzati tokida beni zawa shoddofa.
PRO 22:29 Ba oosuwan loohida asi be7adii? I coo asatas gidonashin kawotas oothees.
PRO 23:1 Halaqara kathi maanaw uttiya wode, neera de7eysa akeeka.
PRO 23:2 Neeni daro yaramba asi gidiko naageta.
PRO 23:3 I nena paacanaw danda7iya gisho, mal7o kathas yaaretopa.
PRO 23:4 Duretana gada daaburopa; ne qofaa haaranaw cinca gida.
PRO 23:5 Hessa mela duretethi ne xeellishin dhayana; qefe kessidi arganthada salo paallana.
PRO 23:6 Uuze asa kathi moopa; iya mal7o kathay nena amoyopo.
PRO 23:7 Qoodhepe qommon “Ma; uya” gees; shin iya wozanay neera gidenna.
PRO 23:8 Ne mida guutha kathaaka cooyana; ne galatay mela gidana.
PRO 23:9 Ne cincatetha haasaya kadhiya gisho, eeya asas paxaba haasayopa.
PRO 23:10 Beni zawa shoddofa; yi7o nayta zawa sugopa.
PRO 23:11 Enta ashshiya Goday mino gidiya gisho; i, enta gisho neera mootetana.
PRO 23:12 Ne wozanaa zore qaalako, ne haytha timirteko zaara.
PRO 23:13 Na7a seeronna aggofa; ne iya pircon shociko I hayqenna.
PRO 23:14 Ne iya pircon shociko, iya shempuwa hayqope ashshaasa.
PRO 23:15 Ta na7aw, ne wozanay cinca gidiko, ta wozanay ufaytana.
PRO 23:16 Ne inxarsay suureba haasaya wode, ta gaatha asatethay ufaytees.
PRO 23:17 Nagaranchota qanaatopa; shin ubba wode Godaa yayya.
PRO 23:18 Yaatiko new sintha de7oy suurana; ne ufaysay dhayenna.
PRO 23:19 Ta na7aw, si7a; cinca gida; ne wozanaa suure ogiyan naaga.
PRO 23:20 Daro woyne ushshu uyeysataranne asho maanaw yaareteysatara hemetofa.
PRO 23:21 Mathoteysatinne yarambati manqana; dhisko daroy curqa mayzees.
PRO 23:22 Nena yelida ne aaway odiyaba si7a; ne aayiya cimida wode kadhopa.
PRO 23:23 Tumaa, cinca, seeranne akeeka shammafe attishin, bayzopa.
PRO 23:24 Xillo na7a aawi daro ufaytees; wozanaama na7a yelida asi iyan ceeqetees.
PRO 23:25 Ne aawaynne ne aayiya nenan ufayto; nena yelidaara hashshu go.
PRO 23:26 Ta na7aw, ne wozanaa taw imma; ne ayfeti ta ogiya kallo.
PRO 23:27 Layma maccasi ciimmo haatha mela; laggetho maccasi xuntha olla mela.
PRO 23:28 Iya paannoda zugada naagawusu; ammanetona addeta darsawusu.
PRO 23:29 Waasoy oossee? Azzanoy oossee? Ooshshi oossee? Zuuzunthi oossee? Gaasoy bayna madunxethi oossee? Ayfe zo7oy oossee?
PRO 23:30 Woyne ushshu uyishe wode ongeysatasa gidennee? Walahetida woyne ushsha ganxidi be7eysatasa gidennee?
PRO 23:31 Woyne ushshi zo7ida wode, iya malay birille giddon phooliya wode, uyin mal7ishe geliya wode iya xeellofa.
PRO 23:32 Wursethan shooshada I dukees; iita shooshada ba marziya puukees.
PRO 23:33 Ne ayfey be7i eronnabaa be7ana; ne wozanay suure qopanaw danda7enna.
PRO 23:34 Neeni abba giddon zin7ida, markabiya tuussa bolla katida ase daanasa.
PRO 23:35 Neeni, “Enti tana dechidosona; shin ta qohetabike. Enti tana wadhidosona; shin taw eretibeenna. Hara ushshu uyanaw taani awude dendanee?” yaagana.
PRO 24:1 Ta na7aw, iita asata qanaatopa; entara laggetanaw amottofa.
PRO 24:2 Enti ubba wode iitabaa maqetoosona; banta inxarsan gene haasayoosona.
PRO 24:3 Keethi cincatethan keexetees; akeekan minnees.
PRO 24:4 Eri de7iko, qol7i al7obaaninne lo77oban kumees.
PRO 24:5 Cinca asi wolqaama asape aadhees; era asi mino asape lo77o.
PRO 24:6 Olas keyanaape koyro halchanaw koshshees; daro zore zoriya asatan xoonoy bentees.
PRO 24:7 Eeya asi cincatethi akeekanaw danda7enna; shiiqo bessan I odiyabay aybika baawa.
PRO 24:8 Iita oothanaw qopiya asi gene asi geetetees.
PRO 24:9 Eeya asa qofi nagara; qelqisiya asi ixetees.
PRO 24:10 Meto wode ne dol7iko, ne wolqay guutha.
PRO 24:11 Pirdi bayna hayqos beyisata ashsha; shukettanaw biya wode si77i gada xeellofa.
PRO 24:12 Ne, “Ta hessa erike” giiko, wozana eriya i, be7ennee? Ne de7uwa naageysi erennee? Asa ubbaas iya oosuwada oosuwada zaarennee?
PRO 24:13 Ta na7aw, eessi lo77o gidiya gisho, eessi ma; ililo eessi mal7ees.
PRO 24:14 Cincatethika hessada ne shempuwas mal7o gideysa era. Neeni iya demmiyaba gidiko, sinthara yaana keehay nebaa; ne ufaysay dhayenna.
PRO 24:15 Xillo asa keethi bonqanaw naagopa; iya aquwa dhaysanaw dendofa.
PRO 24:16 Xillo asi laapun toho kundikoka dendees; shin iitati gadon dhayana.
PRO 24:17 Ne morkey kundiya wode ufaytofa; I dhubetiya wode hashshu goopa.
PRO 24:18 Goday hessa be7idi ufaytenna; iya hanqetonna aggaagana.
PRO 24:19 Iita ootheyisata gaason hirgofa; enta mela gidarkina gada qopofa.
PRO 24:20 Iita asas sinthara yaana keehi baawa; iitata xompey to7ana.
PRO 24:21 Ta na7aw, Godaanne kawa yayya; enta bolla makalleysatara hemetofa.
PRO 24:22 Hessa mela asata qoponna metoy gakees; kawuwapenne Godaape yaana meto oone erey?
PRO 24:23 Cincati gujidi haysada yaagidosona; Som7o be7idi pirdoy lo77o gidenna.
PRO 24:24 Qohidaysa lo77o oothadasa giya daynna, asi baaddana; kawotethati iya ixana.
PRO 24:25 Qohidaysa ne bala giya daynnati lo77oba ekana daro anjo demmana.
PRO 24:26 Tuma zaaro zaariya asi, tuma lagge mela.
PRO 24:27 Kasetada ne gadiya goya; kathi zera; hessafe guye, ne keethaa keexa.
PRO 24:28 Ne shooruwa bolla gaasoy bayna markatofa; ne doonan cimmofa.
PRO 24:29 “I taw oothidaysada ta iyaw oothana; ta iyaw kushe zaarana” yaagopa.
PRO 24:30 Taani booza asa goshshara aadhas; azalla addiya woyne gadera kanthas.
PRO 24:31 Agunthinne sharaafi goozi wothis; yuushon de7iya dirsayka laaletis.
PRO 24:32 Taani iya be7ida wode qopas; iyape timirte ekas.
PRO 24:33 Neeni guuthu liipha; guuthu dhiska; ne kushiya shiishada guuthu shempa.
PRO 24:34 Shin manqotethi paannoda yaana; duussa waayey ola miishe oykida asada puttu gaana.
PRO 25:1 Haysati Yihuda kawa Hizqiyaasa asati duuqidi xaafida Solomone leemisota.
PRO 25:2 Xuura genthoy Xoossas boncho; xuura pilgidi kesoy kawotas boncho.
PRO 25:3 Saloy dhoqu gidaysadanne sa7i ziqa gididaysada kawota qofaa asi eranaw danda7enna.
PRO 25:4 Birape qita digga; hessafe guye, hiillanchoy loythana.
PRO 25:5 Kawo sinthafe iita asata digga; iya araatay xillotethan minnidi eqana.
PRO 25:6 Kawo sinthan eqiya wode ceeqetofa; gita asata giddon new besse koyopa.
PRO 25:7 Neepe gitatiya asas besse immanaw halaqay nena denthin, kawuyeysafe, I nena, “Ha dhoqa bessan utta” geysi lo77o.
PRO 25:8 Ne ayfen be7idaba markatanaw daynna sinthe baanaw ellesopa. Ne markata simmin hara asi ne markatethay bala gideysa qoncisiko, ne yeellatana.
PRO 25:9 Ne giddoninne ne shooruwa giddon palami medhetiko, iyara odetada ne palama wursa; hara asa xuura qoncisopa.
PRO 25:10 Hessi hanonna ixiko ne odeysa si7ida asi nena kawushana; ne sunthay zaaridi simmonnaada iitana.
PRO 25:11 Bessiya wode odetida like qaali, bira miishe bolla tigetida worqa alleeqo mela.
PRO 25:12 Era asi zoriya zore si7iya haythas, hessi worqafe woyko geeshsha worqafe oosetida alleeqo mela.
PRO 25:13 Katha cakiya wode irxa haathi uyin aleysada, ammanthiya kiitanchoy bana kiittoysa ufaysees.
PRO 25:14 Immonnaba immana gidi ceeqetiya asi iri bayna shaaranne carko mela.
PRO 25:15 Danda7a asi halaqa odidi mayzees; liiqo qaali meqethi kanthi gelees.
PRO 25:16 Eessi demmiko kallana gakanaw ma; shin darsiko nena cooshshana.
PRO 25:17 Nena uufishe ixonnaada, ne shooruwa soo ubba wode boopa.
PRO 25:18 Ba shooruwa bolla wordon markatiya asi, xam7i, mashshinne toori qoheysada qohees.
PRO 25:19 Meto wode ammanetona asan zempoy, qaaxiya achan coommiyanne silida tohon hemeteysa mela.
PRO 25:20 Azzanida asas yethi yexiya asi, meego wode ma7o qaariyanne maduntha bolla caalaba tigiya asa mela.
PRO 25:21 Ne morkey koshatiko muza; saamotiko ushsha.
PRO 25:22 Ne hessa oothiko iya huuphen tama bonqo kaashidi qoleysa mela; Goday nena woytana.
PRO 25:23 Doloha bagga carkoy ira eheysada, zigirsi hanqo ehees.
PRO 25:24 Doonatiya machira issi keethan daanape kare barandan duussi lo77o.
PRO 25:25 Daaburida asi irxa haathi uyidi aleysada, haaho biittafe yaa lo77o odi ufaysees.
PRO 25:26 Iita asa sinthan gulbatiya xillo asi, buullotida pultonne iitida olla haatha mela.
PRO 25:27 Daro eessi muussi lo77o gidenna; hessadaka, ba boncho koshshi bonchisenna.
PRO 25:28 Bana haaronna asi dirsi laaletida katama mela.
PRO 26:1 Bone shachi, kathi cakiya wode iri koshshonaysada, eeyas boncho koshshenna.
PRO 26:2 Kafoti yaanne haanne piradhishe ase qohonnaysada, gaasoy bayna baaddiya baadethi ase gakenna.
PRO 26:3 Paras lisso, hares bixaala koshsheysada eeya zokos xam7a koshshees.
PRO 26:4 Eeya asas iya eeyatethaada zaaropa; zaariko ne iya mela gidana.
PRO 26:5 Eeya asas iya eeyatetha qoncisada zaara; hessi hanonna ixiko I bana cinca gidi qopana.
PRO 26:6 Eeya asa bolla kiita yedoy, ba toho qanxi yeggeysa mela woyko wodhiyaba uyeysa mela.
PRO 26:7 Eeya asa leemisoy, silida toho mela maaddenna.
PRO 26:8 Eeya asas boncho imoy, shuchu yambarshan qachi wothidi yambaranaw paaciya asa mela.
PRO 26:9 Eeya asa leemisoy mathotida asi ba kushe caddida agunthu kessanaw baaxeteysa mela.
PRO 26:10 Eeya asa woyko ba oge biya asi une oosisanaw qaxariya asi ba toora shaaran xongiya asa mela.
PRO 26:11 Kani ba cooshshako guye simmidi laaceysada, eeya asi ba eeyatetha zaari zaari qoncisees.
PRO 26:12 Bana cinca oothidi xeelliya asape eeya asas lo77o qaadi de7ees.
PRO 26:13 “Azalla asi ogen gaammoy de7ees; yashshiya gaammoy ogen yuuyees” yaagees.
PRO 26:14 Sanqi maxaafe bolla yaanne haanne qaaxeysada, azalla asi ba hiixan yaanne haanne shiretees.
PRO 26:15 Issi issi azalla asi hari attoshin, woxen tushidi baaranaw waayetees.
PRO 26:16 Azalla asi markara odiya laapun cincatape bana aadhida cinca gidi qopees.
PRO 26:17 Bana gathiyabay baynaban palamiya asi ogera biya kana haythi oykiya asa mela.
PRO 26:18 Ba shooruwa, “Taani kaasse gayis” yaagidi cimmiya asi, gooyidi bonqo tama holiya, woyko wodhiya donge toora dukiya asa mela.
PRO 26:20 Mithi wuriko tami to7ees; zigirsi dhayiko ooshshi attees.
PRO 26:21 Xiifi bonqo darseysadanne mithi tama darseysada palama darsiya asi ooshshu darsees.
PRO 26:22 Zigirsa qaali mal7o katha mela ufaysishe duge ganje bees.
PRO 26:23 Wozanan iitabay de7ishin, ba inxarsan cimo qaala haasaya asi biran lanxetida urqa miishe mela.
PRO 26:24 Gene asi ba wozanan de7iya iitatethaa ba inxarsan genthees.
PRO 26:25 Iya wozanan laapun tunati kumida gisho, I lo77o qaala haasaykoka iya ammanopa.
PRO 26:26 Ba morketetha I genthikoka, I oothiya iitay dabaaban qoncana.
PRO 26:27 Haratas olla bookiya asi he ollan baw kundana; harata bolla shuchu gondorsiya asa bolla he shuchay simmidi gondoretana.
PRO 26:28 Wordotiya inxarsi ba qohida asata ixees; cimo odi kundethi kaalethees.
PRO 27:1 Wontoy ehanaba ne eronna gisho wontoban ceeqetofa.
PRO 27:2 Hara asi nena galatope attishin neeni nena galatopa; asi ne gisho markatofe attishin, neeni ne keehatethabaa odopa.
PRO 27:3 Shuchi gita tooho; shafey deexo; shin eeya asi medhiya ooshshi nam7aafeka deexees.
PRO 27:4 Hanqos qadhey baawa; yiloy dhaysiya di7o mela; shin qanaatey ubbaafe iita.
PRO 27:5 Geemmida siiqope baliya wode qoncen hanqetethi lo77o.
PRO 27:6 Morkey nena tammu toho yeeranaape siiqoy nena madunxiseysi lo77o.
PRO 27:7 Kallida asi ililo eessi shaattees; shin koshatida uraa cammiyabay mal7ees.
PRO 27:8 Ba soo aggidi yuuyiya asi, ba keethaa aggada paalliya kafo mela.
PRO 27:9 Shittoynne sawiya ixaaney ase ufayseysada siiqo lagge zorey hessada ufaysees.
PRO 27:10 Ne laggetanne ne aawa laggeta aggofa; ne metootida wode ne ishaa soo boopa; haahon de7iya ishape matan de7iya shooroy lo77o.
PRO 27:11 Ta na7aw, cinca gida; tana ufaysa; tana kadhiya asaas ta zaaro immana.
PRO 27:12 Cinca asi metoy yaa wode be7idi qosetees; shin akeeki bayna asi bidi meton gelees; yaatidi guyepe qiirotees.
PRO 27:13 Eronna asas waase geliya uraa ma7uwa qaari ekite; imatha asas waase gelida uraa ma7uwa oykite.
PRO 27:14 Wonta guura ba qaala dhoqu oothidi, ba shooruwa sarotey iya baaddiya asa mela.
PRO 27:15 Doonatiya machanne aathiya keethi issino.
PRO 27:16 Carko teqanaw, zayte kuucidi oykanaw danda7etonaysada, iyo si77i oothanaw danda7etenna.
PRO 27:17 Birati birata posheysada, asi issoy issuwafe tamaarees.
PRO 27:18 Balase mithi loythidi naagiya asi iya ayfe maana; ba halaqaa kaaboya oosanchoy bonchetana.
PRO 27:19 Haathi mastooteda som7o besseysada, asa wozani iya oonatetha bessees.
PRO 27:20 Hayqoynne Duufoy kalli eronnaysada, asa ayfey kallidi erenna.
PRO 27:21 Birinne worqey taman paacetidi geeyeysada, asi ba ekiya galatan paacetees.
PRO 27:22 Kathi udulan caddeysada, eeya asi udulan caddiyakoka iyape eeyatethay kichenna.
PRO 27:23 Ne dorsata hanota loythada era; ne wudiyaka akeekada heemma.
PRO 27:24 Ayis giiko, duretethi merinaw deenna; kallachika yeletethafe yeletethaas aadhenna.
PRO 27:25 Mela maatay buucetin, aaca maati keya wode, deriya bolla de7iya maatay shiiqidaape guye,
PRO 27:26 dorsata ikisepe ne new ma7o kessana; deeshata bayzada gade shammana.
PRO 27:27 Attida deeshata maathay new, ne soo asaasinne ne macca aylletas kathi gidana.
PRO 28:1 Iitati oonika yedethonna baqatoosona; shin xilloti gaammo mela yayyonna de7oosona.
PRO 28:2 Issi kawotethay makalliko, haareysati daroosona; shin kaaletheysi cincanne akeekancho gidiko, sarotethinne wopi de7ees.
PRO 28:3 Manqota un7ethiya kawoy kathi dhaysiya wolqaama ira mela.
PRO 28:4 Higge bonchona asi iita asaa sabbees; shin higge bonchiya asi iita asaa ixees.
PRO 28:5 Iita asatas suure pirdi gelenna; shin Godaa goyinniya asi ubbaa akeekes.
PRO 28:6 Dure gididi cimmiya asi gidanaape, suure asi gididi manqo gideysi lo77o.
PRO 28:7 Higge naagiya na7ay akeeka na7a; shin pathonna asara hemetey ba aawa yeellayees.
PRO 28:8 Mishe yelon tal7eynne ase bonqidi duretiya asi he aquwa manqotas keehiya asas shiishees.
PRO 28:9 Higge si7anaape gidi ba haytha tucciya, uraa woosay Godaa sinthan ixetidaba.
PRO 28:10 Suureta iita ogen kaalethiya uray ba bookida ollan kundana; shin geeshshati lo77oba laattana.
PRO 28:11 Dure asi bana cinca gidi qopees; shin akeeki de7iya manqoy iya paacees.
PRO 28:12 Xilloti xooniya wode asa ubbay ufaytees; shin iitati maata oykiya wode asay qosetees.
PRO 28:13 Ba nagaraa genthiya asi aacenna; shin paaxeynne nagara aggey maarota ekana.
PRO 28:14 Godaa ubba wode yayiya asi anjetidaysa; shin ba wozana minthiya asi meton gelana.
PRO 28:15 Manqo asaa haariya iita halaqay, gudiya gaammonne koshatida babantha mela.
PRO 28:16 Akeeki bayna kawoy ba deriya qohees; shin ase qohonna halaqi daro laythi haarana.
PRO 28:17 Ase wodhiya asi hayqana gakanaw baqatishe de7ees; iya oonika maaddenna.
PRO 28:18 Borey bayna hemetiya asi qohetenna; shin geella asi akeekona kundana.
PRO 28:19 Minnidi oothiya asi kathi kallees; shin pathonna amo kaalliya asi manqotethi laattana.
PRO 28:20 Ammanetiya uray daro anjetana; shin duretanaw woxiya asi meto be7ana.
PRO 28:21 Som7o be7idi pirdoy lo77o gidenna; shin asi baso uytha gisho gidi qohees.
PRO 28:22 Yaare asi duretanaw baqetees; manqotethi akeekona oykanaysa erenna.
PRO 28:23 Ase coo sabbiya asape hanqetiya asi guyepe galatetees.
PRO 28:24 Ba aawanne ba aayiw kaysotidi, “Nagara oothabike” giya asinne demmidaba dhaysiya asi issino.
PRO 28:25 Uuze asi ooshshi denthees; shin Godan ammanetiya asi kallees.
PRO 28:26 Banan ammanetiya asi eeya; shin cincatethan hemetiya asi saro de7ees.
PRO 28:27 Manqos immiya asi metootenna; shin enta be7anaape gidi qilim7ey baadetana.
PRO 28:28 Iita asati shuumetiya wode asay qosetees; shin enti dhayiya wode xilloti daroosona.
PRO 29:1 Daro wode seeretidi simmonna asi hassayonna meqana; he uraas paxoy baawa.
PRO 29:2 Xillo asati shuumetiya wode asay ufaytees; shin iitati biitta haariya wode asay un7etees.
PRO 29:3 Cincatethi dosiya asi ba aawa ufaysees; shin layma maccasa heeran yuuyiya asi ba miishiya wursees.
PRO 29:4 Tuma pirdan kawoy ba kawotethaa wopu oothees; shin wodhaafe ekiya kawoy ba kawotethaa dhaysees.
PRO 29:5 Ba shooruwa cimon sabbiya asi, ba tohos xihe yeggees.
PRO 29:6 Iita asi ba nagaran oyketees; shin xillo asi ufaytees; yexees.
PRO 29:7 Xillo asi manqotas suure pirdees; shin iita asati hessa erokona.
PRO 29:8 Cayiya asati kataman ooshshu denthoosona; shin cinca asati hanqo irxisoosona.
PRO 29:9 Cinca asi eeya asa pirda keethi efiko, eeyay hanqetees; qidhees; iyaw saroy baawa.
PRO 29:10 Suuthu gussanaw saamotiya asati suure asi ixoosona; xillo asaa wodhanaw koyoosona.
PRO 29:11 Eeya asi ba hanquwa yeddi bessees; shin cinca asi bana haarees.
PRO 29:12 Shuumay wordo oda si7iyaba gidiko, iya moorinnati ubbay iita gidoosona.
PRO 29:13 Manqoynne ase naaqiya asi issiba koxoosona; enta nam7aas ayfe immiday Godaa.
PRO 29:14 Kawoy manqotas suure pirdiko, I ba araatan gam7ana.
PRO 29:15 Pircon seeri naytas cincatethi immees; shin yedan diccida na7i ba aayiw kawushshees.
PRO 29:16 Iita asati dariya wode nagari darees; shin xilloti enta kundethaa be7ana.
PRO 29:17 Ne na7aa seera; I new saro immana; I nena ufaysana.
PRO 29:18 Qoncethi bayna ixiko derey yeda gidees; shin higge naagiya asi anjetidaysa.
PRO 29:19 Aylley coo oda xalaalan seeretenna; iyaw geliyakoka I kiitetenna.
PRO 29:20 Eeson haasaya asi be7a eray? Iyape eeya asas ufaysi de7ees.
PRO 29:21 Ne aylliya na7a yeda dichiko, iya wursethay azzano gidana.
PRO 29:22 Hanqetiya asi ooshshu denthethees; elle yilotiya asi daro nagara oothees.
PRO 29:23 Otoroy ase kawushshees; shin ashke ayyaani de7iya asi bonchetees.
PRO 29:24 Kaysora laggetiya asi bana ixiya asi; I dabaaban tuma odiko seeretees; I tumaa odonna ixiko Godan baadetana.
PRO 29:25 Asas yashshi he uraas xihe gidees; shin Godan ammanetiya asi saro de7ees.
PRO 29:26 Daroti maati de7iya asape made koyoosona; shin suure pirdi Godaape bentees.
PRO 29:27 Xilloti nagaranchota shaatettoosona; iitati suure asaa ixoosona.
PRO 30:1 Yaaqe na7aa Agura leemisoti haysafe kaallidi xaafetidaysata. Aguri Iti7eelasinne Ukaalas haysa haasayis.
PRO 30:2 Taani asa ubbaafe aadhida eeya; asas de7iya akeeki taw deenna.
PRO 30:3 Taani cincatethi tamaarabike; Geeshsha Xoossabaaka erike.
PRO 30:4 Salo pude keyidi duge wodhiday oonee? Carko ba kushen oykiday, haathe ba afilan yiiciday, sa7aa gaxaa minthidi essiday oonee? Iya sunthay oonee? Iya na7aa sunthay oonee? Iya eriya gidiko ane taw oda?
PRO 30:5 Xoossa qaalan borey baawa; ubbay tuma iyan ammanetiya ubbaas I gondalle.
PRO 30:6 Iya qaala bolla aybaka gujofa; gujiko I nena seerana; ne wordancho gideysa I qoncisana.
PRO 30:7 Godaw, ta nena nam7ubba oychayis; ta hayqana gakanaw enta tana diggofa.
PRO 30:8 Ta ase cimmonna melanne wordo haasayonna mela tana naaga; taw koshshiya kathi immafe attishin, tana dure woyko manqo oothofa.
PRO 30:9 Dure gidada, “Goday oonee?” gada nena kaddana; manqo gidada, kaysada ta Xoossaa sunthaa cayisana.
PRO 30:10 Nena baaddonna melanne iya baadethay new gome gidonna mela, aylliya iya godaara zigropa.
PRO 30:11 Ba aawa baaddiyanne ba aayiw anjona yeletethi de7ees.
PRO 30:12 Daro tuna gidi uttidi bantana geeshshi oothiya asati de7oosona.
PRO 30:13 Otoron kumida asatinne ase kadhidi xeelliya asati de7oosona.
PRO 30:14 Enta achay mashshe gidin, enta gaccoy toora gidin, manqotanne metootanchota naaqidi, entaba bonqiya asati de7oosona.
PRO 30:15 Ullathas nam7u macca nayti de7oosona; enti, “Hamma! Hamma!” yaagidi waassoosona. Kallidi eronna heedzubati de7oosona; oyddanthoy qassi “Gidana” gidi erenna.
PRO 30:16 Hessati, duufo, maynnida maccas, haathe kallidi eronna mela biittanne, “Gidana!” gidi eronna tama.
PRO 30:17 Ba aawa leqiya na7aa ayfiya, ba aayiya cimin kadhiya na7aa ayfiya, zangaaran de7iya quuroti woocana; iya ashuwa ankoti maana.
PRO 30:18 Tana heedzubati malaalsoosona; oyddanthoy ubba taw gelenna.
PRO 30:19 Hessati, salora paalliya arganthi, zaalla bollara kolxiya shooshi abba bollara biya markabenne geela7ora shiiqo oyketida adde.
PRO 30:20 Layma maccasi haniya hanoyka hessa mela; Iya masu; shin ba doona quchada, “Taani aykoka balabiike” yaagawusu.
PRO 30:21 Heedzuban biitti qaaxees; oyddanthuwa ubba tookanaw danda7etenna.
PRO 30:22 Hessatika, aylley kawotida wode, eeya asi kathi kallida wode,
PRO 30:23 asi ixida maccasi azina gelida wodenne macca aylliya ba godatiw laattida wode medhetiya hanota.
PRO 30:24 Sa7a bolla oyddu guutha medhetethati de7oosona; shin enti aadhida cinca.
PRO 30:25 Hessatika, Cuncalley wolqi bayna medhetethi; shin bantaw miyaba bone shiishidi, minjoosona.
PRO 30:26 Gupaleti wolqi baynayisata; shin banta keetha zaalla qophon keexoosona.
PRO 30:27 Booletas kawoy baawa; shin enti ubbay maaran zattoosona.
PRO 30:28 Zareti kushen oyketoosona; shin kawo gadhon de7oosona.
PRO 30:29 Banta maata bessishe hemetiya heedzu medhetethati de7oosona; oyddanthoy lo77o hemethi hemetees.
PRO 30:30 Hessika, do7a ubbaafe minonne yashshi eronna gaammo.
PRO 30:31 Macca kuttota giddon hemetiya adde kutto, wude kaalethiya deesha kole; ba olanchota giddon qoncen eqiya kawa.
PRO 30:32 Neeni eeyada otortidaba gidikoka, iita oothanaw halchidaba gidiko, ane taki gada qopa.
PRO 30:33 Maathi bukey oysu kesseysada, siidhe dichin suuthi yeysada, hanqo denthethoy ooshshu ehees.
PRO 31:1 Haysafe kaallidi xaafetida leemisoy, kawa Limu7eela aayiya kawa Limu7eela tamaarsidaysa.
PRO 31:2 Ta na7aw, ta ulope wodhidayso, taani qangetada yelidayso,
PRO 31:3 maccasan ne wolqaa wursofa; kawota dhaysiya maccasatan ne minotethaa dhaysofa.
PRO 31:4 “Limu7eela, woyne ushshi kawotas bessenna; mathoyiya ushshi shuumatas bessenna.
PRO 31:5 Enti uyaa wode higge baloosona; naaqetida asaa maata qelli goosona.
PRO 31:6 Mathoyaa ushshu hayqana haniya uraasinne sa7i iitida uraas immite.
PRO 31:7 Enti banta manqotethaanne banta waayiya doganaw uyo.
PRO 31:8 Banta gisho odetanaw danda7onna asaa gisho ne odeeta; maaddiya asi baynayisata gisho ne eqa.
PRO 31:9 Enta miyen eqada entaw suure pirda; manqotanne metootanchota maata naaga” yaagada tamaarsasu.
PRO 31:10 “Wozanaama macho ooni demmanaw danda7ii? I gatey zo7o al7o shuchafe aadhees.
PRO 31:11 I azinay iyo ammanetees; iyaw koshshiyabaape aybika pacenna.
PRO 31:12 Iya ba de7o laytha ubban, iyaw lo77obaape attishin, iitaba oothuku.
PRO 31:13 Suufenne liino koyada, ufaytashe ba kushen oothawusu.
PRO 31:14 Iya zal7anchota markabe mela; ba kathaa haaho biittafe shiishawusu.
PRO 31:15 Iya ba soo asaas kathi giigisanawunne ba macca aylletas ooso immanaw, sa7i wontonna de7ishin dendawusu.
PRO 31:16 Lo77o gade koyada shammawusu; ba kushen oothada demmida miishen woyne tokawusu.
PRO 31:17 Iya ba xeessa minthada dancawusu; ba qesiya oosos minthawusu.
PRO 31:18 Iya wodhe demmanaw minnada zal7awusu; iya oothashe qamisiya gisho I xompey to7enna.
PRO 31:19 Iya ba hindziritiya oykawusu; ba biradhen loythada suqawusu.
PRO 31:20 Iya manqotasinne metootanchotas immawusu.
PRO 31:21 I soo asa ubbay ho77iya ma7o ma7iya gisho, shachi bukikoka iya hirguku.
PRO 31:22 Alga bolla hiixiya ma7o sikawusu; liinope oosetida ocha teera daaniya ma7o ma7awusu.
PRO 31:23 Biitta cimati shiiqiya dubbushan I azinay bonchetida asi.
PRO 31:24 Liinope ma7onne danco oothada, zal7anchotas bayzawusu.
PRO 31:25 Iya minonne boncho asi; yaana laytha ubban ufaytada de7awusu.
PRO 31:26 Cincatethan ba doona dooyawusu; ammanthiya zorey I inxarsan de7ees.
PRO 31:27 Iya ba soo asaa de7uwa injeyanaw ubba wode oothawusu; azallatethi I bolla bentidi erenna.
PRO 31:28 I nayti dendidi, iyo nashshoosona; I azinay iyo yaagidi galatees;
PRO 31:29 Lo77oba oothiya daro maccasati de7oosona; shin ne enta ubbaafe aadhasa” yaagees.
PRO 31:30 Mali cimmees; yegelssatethi dhayana. Shin Godaa yayiya maccasiya, iya anjetidaaro.
PRO 31:31 Iya oothidaba ubbaas iyo woytite; I ooso ubbay dabaaban iyo galatiso.
ECC 1:1 Haysi, Dawita na7aa, Yerusalaamen kawotida cinca uraa qaala.
ECC 1:2 He cincay, “Ubbabay hada; ubbabay hadape hada; ubbabay kumethi hada” yaagis.
ECC 1:3 Ba de7iya bessan ubban, asi daaburidi oothiyaba ubban iyaw wodhey aybee?
ECC 1:4 Issi yeletethi aadhiya wode, hara yeletethi bessaa oykees. Shin ha biittay merinawuka laametonna de7ees.
ECC 1:5 Awi dolees wullees; nam7antho dolanaw yaa doliya bessaa ellesees.
ECC 1:6 Carkoy issi toho duge issi toho pude carkees; qassi yuuyi yuuyi aadhidi, simeretidi yees.
ECC 1:7 Goggiya haathi ubbay abban gelees; shin abbay kumi erenna. He haathay simmidi gogganaw, guye ba pultiya bessaa bees.
ECC 1:8 Ubbabay salethiyaba; I ay mela salethiyako odi wursanaw danda7etenna. Ayfey xeellidi kalli erenna; haythi si7idi, taw gidis geenna.
ECC 1:9 Kase hanidabay wontoka simmidi I hanana; qassi ha77i hanishe de7eysi kase hanidaba. Hessa gisho, salo gufanthon oorathabay aybika baawa.
ECC 1:10 Oonika, “Heko, haysi oorathaba” giiko, hessi oorathi gidenna; hessi nuuni yeletanaape kase hanidaba.
ECC 1:11 Kase aadhida wodetan hanidabata zaaridi hassayabay baawa; guyepe hananabata entafe guye oonika hassayenna.
ECC 1:12 Taani cincay, Yerusalaamen Isra7eeles kawo gidada de7as.
ECC 1:13 Taani sa7an de7iyaba ubbaa shaakada eranawunne cincatethan pilgada xeellanaw qofa qachas. Yaatada asa ubbaas Xoossay immida de7oy daro daabursiyabaanne ufaysonnaba gideysa akeekas.
ECC 1:14 Salope garsan hanidaba ubbaa taani be7as; shin ubbayka hada; carko oykanaw yedetheysa mela.
ECC 1:15 Geelli suuranaw danda7enna; baynaba taybanaw danda7etenna.
ECC 1:16 Taani ta wozanan haysada yaagada qopas; “Taape kase Yerusalaame haarida ubbatape taani gitanne cinca gidas. Cincatethinne era guussi I aybeko paacada eras” yaagas.
ECC 1:17 Taani cincatethafe, gooshshatethafenne eeyatethafe giddon de7iya dummatethi aybeko eranaw daro daaburas. Shin wursethan hessika carko oykanaw yedetheysa mela hada gideysa eras.
ECC 1:18 Cincatethi dariya wode azzanthiyabay darees; eri dariya wode qassi metoy darees.
ECC 2:1 Taani taako, “Haaya, ta nena ufaysi aybeko erisanaw lo7oba bessaana” yaagas; shin hessika hada.
ECC 2:2 Miichi eeyatethi gideysa, qassi miikoynne ufaysi aykoka go77onnaysa akeekas.
ECC 2:3 Ha7ika ta wozanay cincatethan tana kaalethishin, tana woyne ushshan ufaysanaw, eeyaka gidanaw paacas. Asi ba qantha woden salope garsan de7iyaba bolla ay oothiko go77aneko eranaw koyas.
ECC 2:4 Issi gitaba oothas; ta daana keethata keexas; woyne tokas.
ECC 2:5 Dumma dumma atakiltiyanne ayfe ayfiya mithata tokas; asi shempiya bessaa giigisas. He bessan dumma dumma ayfe ayfiya mithata tokas.
ECC 2:6 He mithata ushshanaw, haathe dagaaya bessi zeerada giigisas.
ECC 2:7 Addenne macca aylleta shammas; qassi ta son yeletida hara aylletika taw de7oosona. Taape kase Yerusalaamen de7ida asaape aadhiya mehe, deeshenne dorse haaras.
ECC 2:8 Ta haariya dumma dumma biittatapenne kawotape bonchetida buqura ehisada, daro worqanne bira taw dagayaas. Qassi, tana sabbidi yexiya addenne macca shiishas; hessa bolla, asas ufaysi immiya daro maccasata shiishas.
ECC 2:9 Taani kase Yerusalaamen de7ida oodefeka aadhada gita asi gidas. Ta cincatethayka taara wursethi gakanaw de7is.
ECC 2:10 Ta ayfey xeellidabaanne ta wozanay amotidaba ubbaa demmas; ta asatethay koyiya ufaysi ubbaa diggabike. Taani oothida ooso ubban ufaytas; ta daabura wodhey hessa.
ECC 2:11 Gidoshin, hessa ubbaa ootha simmada taani akeekiya wode, daro taani iyaw daaburida ubbay hada gideysa be7as. Salope garsan go77iyabay aykoy baawa; ubbay carko oykanaw yedethiya mela.
ECC 2:12 Hessafe guye, taani cincatethi, eeyatethinne gooshshatethi ayibeko paacada eranaw qofaa doomas. Awude gidinka kawoy oothanaw danda7ey iyape kase kawotida kawoy oothidaysafe harabay aybi de7ii?
ECC 2:13 Poo7oy dhumape, cincatethi eeyatethafe lo77o gideysa taani be7as.
ECC 2:14 Cinca asa ayfeti iya huuphiya giddon de7oosona; shin eeyati dhuman hemetoosona. Gidoshin, enta nam7aa wursethay issino gideysa akeekas.
ECC 2:15 Taani taako, “Eeya gakeya qaaday tanaka gakees; yaatin, taani cinca gideysi tana ay maaddii?” yaagada qopas. Qassi taani ta wozanan, “Haysika hada” yaagas.
ECC 2:16 Eeya gidin cinca, hayqope guye, iya hassayey baawa; sinthafe yaa laythan nuuni ubbay dogetidi attana. Eeyay hayqeysada, cincayka hayqees.
ECC 2:17 Metope attishin, go77iyabay bayna gisho, ha de7oy tana shaattis. Hessika hada; carko oykanaw yedethiya mela.
ECC 2:18 Salope garsan taani daro daaburada demmida ta shaluwa ubbaa taape guyera yaa uraas aggada biya gisho, taani daaburida ubbay tana shaattis.
ECC 2:19 Taape guyera yaa addey cinceko eeyeko ooni erii? Shin I oona gidinka, taani daro daaburidabaanne ta cincatethan demmidaba ubbaa baw ekidi, godaa gidana; hessika hada.
ECC 2:20 Hessa gisho, salope garsan ta daaburidaba bolla ta wozanay ufaysi qanxis.
ECC 2:21 Asi ba de7ida laythan baw de7ida cincatethan, eraninne hiillan daaburidi demmidaba ubbaa aykoka daaburonaysas yeggidi bees. Hessika hadanne gita qoho.
ECC 2:22 Yaatin, salope garsan asi daro daaburidi oothidaba ubbaafe ay go77a demmii?
ECC 2:23 I ba de7o laythan daaburiya daaburi ubbay azzanopenne muudethafe attishin, hari aybika iyaw gujenna; hari attoshin qammaka iya huuphey qofape shempenna; he ubbayka hada.
ECC 2:24 Hiza asas go77a gidiyabay aybe giiko, asi midi uyidi ba daaburan ufaytanaysa. He ufaysay qassi Xoossaa kushiyape imetidaba gideysa taani akeekas.
ECC 2:25 Iya shene gidonna, min uyin asas ufaysi awun de7ii?
ECC 2:26 Xoossaa ufaysiya uraas Xoossay cincatethi, eratethinne ufaysi immees; nagaranchuwas I daaburidi shiishana mela, daabura immees. Shin I shiishidaysa Xoossay ekidi, baw yayiya haras immees. Hessa gisho, ha ubbay hadanne carko oykanaw yedetho mela.
ECC 3:1 Ubbabaas wodey de7ees; salope garsan oosetiyaba ubbaas wodeynne qammi de7ees.
ECC 3:2 Yeletanaw wodey de7ees; hayqanaw wodey de7ees. Tokanaw wodey de7ees; Shoddanaw wodey de7ees.
ECC 3:3 Wodhanaw wodey de7ees; pathanaw wodey de7ees. Laallanaw wodey de7ees; keexanaw wodey de7ees.
ECC 3:4 Yeekanaw wodey de7ees; miiccanaw wodey de7ees. Kayotanaw wodey de7ees; yexanaw wodey de7ees.
ECC 3:5 Shuchu laallanaw wodey de7ees; shuchu shiishanaw wodey de7ees. Qoometanaw wodey de7ees; duuxanaw wodey de7ees.
ECC 3:6 Koyanaw wodey de7ees; koshshi agganaw wodey de7ees. Shiishi oykanaw wodey de7ees; laallanaw wodey de7ees.
ECC 3:7 Peedhanaw wodey de7ees; sikanaw wodey de7ees. Si77i gaanaw wodey de7ees; odetanaw wodey de7ees.
ECC 3:8 Dosanaw wodey de7ees; ixanaw wodey de7ees. Olas wodey de7ees; saro daanaw wodey de7ees.
ECC 3:9 Yaatin, oosanchoy ba daaburida daaburaape ay wodhe demmii?
ECC 3:10 Taani qassi, asa na7i daaburidi oothana mela, Xoossay immida toohoy daro deexo gideysa be7as.
ECC 3:11 Xoossay ubbaba iya wodiyan wodiyan loythidi oothis. Xoossay asa wozanan merinatethi wothis; gidikoka, Xoossay oothidaba ubbaa koyrope wursethi gakanaw, asi kumethi eranaw danda7enna.
ECC 3:12 Asi ba de7ida laythan lo77iyaba ootheysafenne, ufayteysafe aadhiyabay aybika baynaysa taani akeekas.
ECC 3:13 Qassi, asas oothi daaburidi demmiya daaburas gatey, midinne uyidi ufayteysi Xoossaafe iyaw imetida imota.
ECC 3:14 Xoossay oothidaba ubbay merinaw de7eysa taani eras; I oothidaba bolla gujanaw woyko iyape denthanaw oodesika danda7etenna. Xoossi hessa oothey, asi iya yayyidi bonchana melasa.
ECC 3:15 Ha77i hanishe de7iyabay woyko sinthafe hananaw de7iyaba ubbay kase hanidaba; Xoossay kase hanidabay zaari hananaada koyees.
ECC 3:16 Qassi taani, salope garsan xillo pirda bessan iitatethi, xillotetha bessan geney de7eysa be7as.
ECC 3:17 Ta wozanan, “Xoossay xilluwanne worduwa nam7aaka pirdas shiishana; Xoossay hanidaba ubbaasinne ooso ubbaas wode qanxi wothis” yaagada qopas.
ECC 3:18 Taani taako, “Asi do7ape duumatonaysa enti akeekana mela Xoossay enta paacees” yaagas.
ECC 3:19 Ase gidin, do7a gidin, enta qaaday issino; issoy hayqeysada, hankoyka hayqees. Nam7ay issi carko shempoosona; hessa gisho, asi do7ape dummatenna; hessika hada.
ECC 3:20 Enti nam7ay issi bessi boosona; nam7ay biittafe medhetida gisho, biitta simmoosona.
ECC 3:21 Yaatin, asa shempoy salo pude keyeysanne do7a shempoy biitta duge wodheysa shaakidi erey oonee?
ECC 3:22 Asi ba oothida ooson ufayteysafe lo77iya harabay iyaw baynaysa be7as. Iyaw de7iya lo77o qaaday hessa xalaala. Asi hayqi simmin iyape guye haniyaba bessanaw, iya guye ehanaw danda7ey oonee?
ECC 4:1 Taani zaarada, salope garsan ay mela naaqoy de7iyako be7as. Naaqeteysati minthetho dhayidi yeekosona. Naaqeyisata kushen maati de7iya gisho naaqeteyisata maaddey baawa.
ECC 4:2 Taani, “Ha77i paxa de7eysatape kase hayqidaysati lo77o” yaagas.
ECC 4:3 Gidoshin, ha nam7atape aadhidi yeletiboonaysatanne salope garsan oosetiya naaquwa be7onayisata qaaday lo77o.
ECC 4:4 Asa daaburinne amotidaba demoy, asas ba laggiya bolla de7iya qanaatepe pulteysa be7as. Hessika hada; carko oykanaw kaalo mela.
ECC 4:5 Ba kushe idimmidi uttiya azallay koshan hayqees.
ECC 4:6 Daaburaninne carko kaalon demmiya dakobaape wopan demmiya issi kushey lo77o.
ECC 4:7 Salope garsan hada gididaba haraba be7as.
ECC 4:8 Hessika na7i woyko ishi bayna issi bizza addey de7ees. Shin iya daaburas zawi baawa; baw de7iyaban alenna. I bana, “Ta haysa ooddes daaburayna? Taani tana ayis ufaysi diggadina?” yaagidi oychis. Hessika qassi hadanne meto de7o.
ECC 4:9 Banta oosuwan lo77o ayfe demmiya gisho issino gideysafe nam7a gideysi lo77o.
ECC 4:10 Nam7aafe issoy kundiko issoy denthees; shin barka de7iya uray kundiko iya denthey bayna gisho iya ayye!
ECC 4:11 Nam7ay issife zin7iko ho77ees; shin barka zin7iya uraa waanidi ho77anaw danda7ii?
ECC 4:12 Issi asi barka teqanaw danda7onna metuwa nam7u asati teqanaw danda7oosona. Heedzu ayfen dooqetida wodoroy elle duuxenna.
ECC 4:13 Zore ekonna eeyanne ceega kawuwape manqonne cinca gidida na7atetha kawoy lo77o.
ECC 4:14 He na7atethay qasho keethafe keyidi woyko manqotethafe dendidi kawo gidanaw danda7ees.
ECC 4:15 Salope garsan de7iyanne simeretiya asa ubbay kawa laattiya na7atetha kaalleysa be7as.
ECC 4:16 Issi kawoy haariya asaa tayboy daro gidanaw danda7ees. Shin kaalliya yeletethay iya kawotethan ufaytibeenna. Hessika hada; carko oykanaw kaalo mela.
ECC 5:1 Xoossa keethi geliya wode akeekada tanga. Enti banta iita oosuwa eronna gisho, si7anaw shiiqoy eeyata yarshuwafe aadhees.
ECC 5:2 Odetanaw eesotopa; Xoossa sinthan odetanaw ne wozanan dirgofa. Xoossay salona, neeni sa7ana; hessa gisho, ne qaalay guutha gido.
ECC 5:3 Qofi dariya wode amuhoy darees; oda daroy eeyatethi qoncisees.
ECC 5:4 Xoossas gepidaba polanaw gam7ofa; eeyatan Xoossay ufaytenna. Hessa gisho, neeni gepidaba ubbaa pola.
ECC 5:5 Issiba gepidi polonna agganaape koyro geponna agoy lo77o.
ECC 5:6 Nagaran nena gelsonna mela ne inxarsa yeda oothofa. Xoossa keethan ootheysako, “Koyro haysa taani akeekona gepas” goopa. Hessi Xoossa daro hanqethiya gisho, ne kushe ooso ubbaa I ba hanquwan dhaysanaw danda7ees.
ECC 5:7 Daro amuhoynne daro odi hada. Hessa gisho, Xoossaa yayya.
ECC 5:8 Issi biittan manqoti naaqetishin, pirdi geellatishin neeni be7iko malaaletofa. Issi issi halaqaas iyape bollara shuumetidi iya xeelliya hara halaqi de7ees. Qassi entafe bollara shuumetidi enta xeelliya hara halaqati de7oosona.
ECC 5:9 Biittafe bentiya wodhey ubbaasa; hari attoshin, kawoyka goshshafe go7etees.
ECC 5:10 Bira dosiya uraas biri gidi erenna; duretethi siiqiya uray miishe kalli erenna; he ubbay hada.
ECC 5:11 Duretethi dariya wode miya asi darees. Ba shaluwa coo ayfen xeellidi, “Taani dure” gaanape haraba ay maaddii?
ECC 5:12 Ooso oothiya asi guuthu min daro min, saro dhisko dhiskees; shin durey ba duretethaas ubba wode un7etiya gisho dhisko dhayidi de7ees.
ECC 5:13 Salope garsan daro azzanthiyaba haraba taani be7as. Hessika iita wode bana asho gidi minjida shalo,
ECC 5:14 woyko issi iitabay gakin dhayida duretethi. I na7a yelidaba gidikoka na7aa laatisiyaba dhayidi mela attees.
ECC 5:15 Asi ubbay kallo yeletidaysada mela kushe simmidi baana. Ay mela I daaburidi oothikoka ekidi biyabay baawa.
ECC 5:16 Asi kallo yeletidi kallo guye simmeysi daro azzanthiya iitabaa. Iya daabura ubbay carko oykiyabada hada gidiko iya ay maaddii?
ECC 5:17 I ba laytha ubbaa dhuma de7on, azzanon, yeellan, hargeninne yilon wursees.
ECC 5:18 Hiza, taani akeekida issi lo77obay, salope garsan Xoossi asas immida qantha laythan, asi ba daaburaape midi uyidi ufayteysi lo77onne bessiyaba; iya qaaday hessa.
ECC 5:19 Xoossi asas duretethinne shalo immey, ba daabura gatiya demmidi, midi uyidi ufaytana melasa; hessika Xoossaafe iyaw imetida imota.
ECC 5:20 Xoossi iya wozanan ubba wode ufaysi kunthiya gisho I ba de7o laythaba daro qopenna.
ECC 6:1 Salope garsan asa bolla gakiya daro iitabaa taani be7as.
ECC 6:2 Xoossi asas shalo, duretethinne boncho immees; iyaw koshshiyabaape issibaaka pacisenna. Shin iyaw imetida shaluwaninne duretethan ufaytana mela kumetha maata immenna. Hessa xalaala gidonashin I daaburidi demmidaban hari ufaytana mela oothees; hessika hadanne azzanthiya iitabaa.
ECC 6:3 Issi asi xeetu na7a yelidi, adussa laythi de7idi cimanaw danda7ees. Shin I baw imetidaban ufaytonnanne wursethan bonchon moogetonna attiko iyape boshi lo77o gayis.
ECC 6:4 He boshay coo yeletidi oonika hassayonna dhumaa biya gisho iya sunthay dhuman kametidi attees.
ECC 6:5 I, awa poo7o be7onna woyko aybibaaka eronna attikoka he uraape aadhidi iyaw shempoy de7ees.
ECC 6:6 Hessa gisho, ufaysi bayna nam7u mukulu laythi de7iya asape he bosha qaaday lo77o. Wursethan nam7ay issi bessi boosona.
ECC 6:7 Asi daaburidi oothiya ubbay baw miyaba demmanaasa; shin iya amoy ali erenna.
ECC 6:8 Yaatin, cinca asi eeya asape aybin dummatii? Manqoy daro cincidi, harata sinthan waanidi daaneko eroy iya ay maaddii?
ECC 6:9 Amon xuugetanaape ayfen be7oy lo77o; hessika carko oykanaw kaalo mela hada.
ECC 6:10 Haniyaba ubbay koyrottidi eretidi de7ees. Issi issi asi waananaw de7iyako adussa wodepe kase eretidi uttis. Ay asika baape minneysara baaxetanaw danda7enna.
ECC 6:11 Odi dariya wode hadabay darees; yaatin hessi ase ay maaddii?
ECC 6:12 Hada gididi kuyada coo aadhiya ba guutha laytha asi waatidi aathanaw koshshiyako erey oonee? Asi hayqidi aggin salope garsan hananaw de7iyaba asas odanaw danda7ey oonee?
ECC 7:1 Al77o shittofe lo77o sunthi aadhees; yeletiya gallasape hayqo gallas lo77o.
ECC 7:2 Asa ubbaa wursethay hayqo gidida gisho, gibira keethi beysafe yeeho keethi beysi lo77o; de7on de7iya asi hessa ba wozanan wothanaw koshshees.
ECC 7:3 Azzanoy som7o kareethikoka, wozana poo7isiya gisho miichafe azzanoy lo77o.
ECC 7:4 Cinca asa wozani yeeho son de7ees; shin eeya asa wozani ufaysa son de7ees.
ECC 7:5 Eeyata yethi si7anaape cincata seera sissi lo77o.
ECC 7:6 Eeya asa miichi agunthan tama yeddin dhuuqeysa mela; hessika hada.
ECC 7:7 Gene oosoy cinca asi eeya kessees; wodhaafe ekoy wozana iissees.
ECC 7:8 Doomethafe wursethi lo77o; otorope danda7i lo77o.
ECC 7:9 Eeyata hanqoy enta ki7on de7iya gisho, neeni ne shempuwan hanqos ellesopa.
ECC 7:10 “Ha77i wodiyape kase wodey ayis lo77o gididee?” gada oychofa; hessa mela oyshoy cinca asi oychiya oysho gidenna.
ECC 7:11 Ha sa7an de7iya asi ubbay cinca gidanaw koshshees; cincatethi demoy laatape lo77o.
ECC 7:12 Miishey ase iitape kammidi ashsheysada cincatethika ashshees. Shin cincatethi miishepe aadhey asa de7o naaganaw danda7iya gishosa.
ECC 7:13 Ane Xoossi oothidaba akeeka! Xoossi geellayidaba ooni suurisanaw danda7ii?
ECC 7:14 Sa7i giigida wode ufayta; metoy gakiya wode akeeka. Ufaysi gidin meto gidin Xoossi yeddiya woden yees. Shin awusi koyrottidi yaaneko neeni eraka.
ECC 7:15 Ha hada gidida ta laythan darobaa be7as. Hessika, geellay ba geellatethan adussa laythi de7iya wode xilloy qantha laythan hayqees.
ECC 7:16 Hessa gisho, neeni elle dhayonnaada daro xillo woyko daro cinca gidopa.
ECC 7:17 Neeni wodey gakonna hayqonnaada aadhida iita gidopa; aadhada eeya gidopa.
ECC 7:18 Ha ubban Xoosse yayya; asi meto ubbaa xoonon keyanaw danda7iya gisho neeni daro iita woyko daro xillo gidonashin giddo asi gida.
ECC 7:19 Cincatethi cincaas immiya wolqay issi katama haariya tammu asata wolqafe aadhees.
ECC 7:20 Xillobaa xalaala oothidi nagara oothonna de7iya asi ha sa7aa bolla baawa.
ECC 7:21 Asi haasaya qaala ubbaa si7ada polana goopa; neeni ubbaa si7ana giiko ne aylley nena baaddishin si7ana.
ECC 7:22 Qassi neeni ne huuphen harata baaddiyaba ne wozanay erees.
ECC 7:23 Hessa ubbaa taani cincatethan pilgada be7as. Yaatada, “Taani cinca gidana” yaagas. Shin taani gidaysada hanibeenna.
ECC 7:24 Cincatethi ubba wode haahon de7iyabaanne ciimmoba; yaatin, iya koyidi demmanaw danda7ey oonee?
ECC 7:25 Taani pilgada xeellanaw cincatethinne oda ubbaa wursethaa eranaw qopas. Nagari eeyatethi, eeyatethi gooshshatethi gideysa eranaw gakas.
ECC 7:26 Taani hayqope aadhidi cammiya haraba demmas. Hessika, I wozanay gite, I kushey santhalaata gididi xiheda oykiya issi maccas be7as. Xoosse yayiya asi iipe kessi ekana; shin nagaranchuwa iya ba xihiyan xaaxada oykana.
ECC 7:27 Astamaarey haysada yaagis; “Taani pilgada demmidabay haysa.
ECC 7:28 Hessika, taani hachi gakanaw koyada demmaboonnaba. Mukulu adde asa giddofe bonchoy bessiya issi adde xalaala demmas; shin macca asaa giddofe issinnoka demmanaw danda7abike.
ECC 7:29 Taani pilgada demmida harabay, Xoossi ase suure qofara medhis; shin asi daro gene oge koyidi bis” yaagis.
ECC 8:1 Cinca asi daaney oonee? Ubbabaas birshethaa erey oonee? Cincatethi pashkisidi, dhumida som7uwa poo7isees.
ECC 8:2 Kawos kiiteta; kase neeni kiitetana gada Xoossa sinthan caaqadasa.
ECC 8:3 Kawa sinthafe ellesada keyopa; kawoy ba koydaba oothanaw danda7iya gisho iita ooso oothanaw dendofa.
ECC 8:4 Ubbabaa oothanaw kawas maati de7iya gisho, “Ayis haysa oothadii?” yaagidi iya oychanaw danda7ey oonee?
ECC 8:5 Iya kiitaa poliya asi qohetenna; cinca asi like wodiyanne oothiya ogiya erees.
ECC 8:6 Ase deexo metoy gakikoka ubbabaas wodeynne ogey de7ees.
ECC 8:7 Sinthafe hananaba eriya asi baawa; “Haysi hanana” gidi odanaw danda7ey oonee?
ECC 8:8 Shempoy shaaketidi biya gallas oykidi teqanaw danda7iya asi baawa; woyko hayqoy ba gallasan yoonnaada digganaw danda7iya asi baawa. Ola wode oonika oletike gaanaw danda7onnaysada iitatethi iita oothiya uraa yeddenna.
ECC 8:9 Salope garsan haniyaba ubbaa taani akeekada qopiya wode asi baw de7iya maata hara asi qohanaw go7eteysa be7as.
ECC 8:10 Iita asati bonchon moogetishin be7as. Enti iitatetha oothida katamaa asay shiiqidi enta sabbishin si7as; hessi ubbay hada.
ECC 8:11 Asi qopidi iitabaa oothiya gaasoy, iitabaa oothida asata ellesidi seerey bayna gishosa.
ECC 8:12 Nagaranchoy xeetu toho iitabaa oothishin iya barey aduqikoka, Xoosse yayyeysatasinne boncheysatas sa7i lo77anaysa ta erayis.
ECC 8:13 Iitati Xoosse yayyonna gisho sarotethi entaw baawa; enti Xoosse yayyonna gisho enta barey kuyada qaammana.
ECC 8:14 Ha sa7an oosetiya hara hadabay de7ees. Hessika, geeshsha asati, nagaranchoti ekanaw bessiya seera ekiya wode nagaranchoti geeshshati ekanaw bessiya lo77oba ekeysa; hessi ubbay hada.
ECC 8:15 Asi miyabaape, uyabaapenne bana ufaysiyabape aadhidi lo77obay salope garsan hari bayna gisho, asi ba de7on ufaytiko lo77o gas. Xoossi iyaw immida laythan I daaburidi demmidaban ufaytanaw danda7ees.
ECC 8:16 Taani cincatethi aybeko eranawunne asi ha sa7a bolla daaburiya daabura akeekanaw halchas; wursethan asi dhisko dhayidi oothiya oosoy de7eysa be7as.
ECC 8:17 Taani Xoossi oothidaba ubbaa be7as. Salope garsan oosetida ooso asi pilgidi eranaw danda7onnaysa eras. Asi ay mela daaburidi pilgi xeellikoka, iya birshethaa eranaw danda7enna. Qassi cinca asi haysa erayis gaanaw danda7enna.
ECC 9:1 Ha ubbaa ta wozanan qopidaape guye cincatinne xilloti, enta oosoti Xoossa kushen de7oosona gada kuuyas. Shin siiqo gidin woyko ixo aybi iya naagiyako oonika erenna.
ECC 9:2 Dummatethi bayna ubbaa gakiya qaaday issino; xillo gidin geella, lo77o gidin iita, tuna gidin tuna gidonna ixin, yarsho yarsheysa gidin yarshonaysa ubbaa qaaday issino. Lo77o asas nagaranchuwafe lo77iya qaadi baawa; caaqo yayyeysi yayyonnaysafe dummatenna.
ECC 9:3 Asa ubbaa qaaday issino gideysi, ha sa7an de7iya hara iitatethaa mela daro iita. Asi de7on de7ida laytha ubban iya wozanay iitatethaninne gooshshatethan kumidi de7ees; wursethan hayqidi aggees.
ECC 9:4 Hayqida gaammofe paxa de7iya kani lo77o; de7on de7eysatara de7iya uraas ufaysi de7ees.
ECC 9:5 De7on de7iya asati issi toho hayqanaw de7eysa eroosona; shin hayqidaysati issibaaka erokona. Enti dogetidaysata gidiya gisho aykoka maaddokona.
ECC 9:6 Enta siiqoy, ixoynne qanaate ubbay entara issife dhayees. Hizape guye salope garsan haniyaba ubban merinaw entaw qaadi baawa.
ECC 9:7 Ba, ne kathaa ufaysan ma; ne woyne ushsha ne wozanay ufaytin uya. Xoossay hessa new kasepe giigisidi wothis.
ECC 9:8 Ubba wode ne ma7oy boothi gido; ne huuphen zayte tiya.
ECC 9:9 Salope garsan Xoossay new immida ha hada de7uwan, hada gidida ne qammatan ne siiqiya ne machera ufaytada de7a. Neeni salope garsan daaburada oothidaba ubbaafe nena gakiya saamay hessa.
ECC 9:10 Ne kushey oothanaw demmidaba ubbaa ne kumetha wolqan ootha; neeni baana duufuwan oosoy woyko halchoy woyko eri woyko cincatethi baawa.
ECC 9:11 Taani salope garsan haraba be7as. Hessika, eeson woxeysati ubba wode xoonokona; mino olanchoti ubba wode olan kanthokona; cincati ubba wode kathi demmokona; hiillanchoti ubba wode duretokona; tamaarida asati ubba wode sabetokona. Shin ubbaa qaadinne wodey gathidaysada hanees.
ECC 9:12 Gidoshin he wodey awude yaaneko eranaw danda7iya asi baawa. Kafoy xihen geleysada woyko moloy giten oyketeysada asi ubbay qoponna gakiya iita woden oyketees.
ECC 9:13 Salope garsan taani be7idaba harabay de7ees. Hessika cincatethi gita leemiso gideysa.
ECC 9:14 Guutha asi de7iya issi guutha katamiya de7awusu. He katamiw issi wolqaama kawoy olanaw dendis; iyo teqidi oykis.
ECC 9:15 He katamen manqo gidida issi cinca addey de7ees; I ba cincatethan he katamiw ashshis. Shin he manqo addiya zaaridi hassayday baawa.
ECC 9:16 Taani, “Cincatethi wolqaafe aadhees” yaagas. Gidoshin, cinca gidikoka manqo asi kadhetees; I odiyaba si7ey baawa.
ECC 9:17 Hessi hanikoka, deriya haareysi eeyata shiiqon waassiya waasuwa si7anaape loddara odetiya cinca asa qaala si7eysi lo77o.
ECC 9:18 Cincatethi ola miishepe aadhees; shin issi nagaranchoy daro lo77oba dhaysees.
ECC 10:1 Hayqida udunxeti sawiya shittuwa xinqisoosona; hessadaka, guutha eeyatethi cincatethinne gita bonchuwa iissees.
ECC 10:2 Cinca asa wozanay iya ushachi kaalethees; shin eeya asa wozani haddirsi kaalethees.
ECC 10:3 Eeya asi oge hemetiya wode iyaw akeeki baawa; I eeya gideysa asi ubbay erees.
ECC 10:4 Ne halaqay ne bolla hanqetiko ne bessaa yeddofa; si77i gidi danda7oy gita nagaraa atto giisees.
ECC 10:5 Salope garsan taani be7ida hara iitabay de7ees. Hessika deriya haareysati oothiya naaquwa.
ECC 10:6 Eeyati daro dhoqa shuumatetha oykidi de7iya wode dureti ziqa bessan uttidosona.
ECC 10:7 Taani aylleti haareysatada para toggidi bishin qassi haareysati aylletada tohon hemetishin be7as.
ECC 10:8 Olla bookiya asi he ollan kundees; gimbe dirsi laaliya uraa shooshi dukees.
ECC 10:9 Shuchu denthiya asi he shuchan, mithi qeriya asi he mithan deshetees.
ECC 10:10 Dun7ida kalta leefonna qeriko daro wolqaa wursees; shin cincatethan oothiya oosuwas ayfey de7ees.
ECC 10:11 Shooshi duki aggin shooshu doqiya dhale wotheysi he uraa aykoka maaddenna.
ECC 10:12 Cinca asa odi iyaw boncho imisees; shin eeyay ba doonape keyida qaalan baw meton gelees.
ECC 10:13 Eeyay ba haasaya eeya qaalan doomidi, iitatethaninne gooshshatethan polees.
ECC 10:14 Eeya asi darobaa odetees. Gidoshin, sinthafe hananaw de7iyaba oonika erenna. Asi hayqi aggin, haniyaba iyaw odanaw danda7ey baawa.
ECC 10:15 Eeya asi ba ooson daaburees; I ba soo biya ogiya erenna.
ECC 10:16 Na7a gidida kawoynne wonta guura gibira miya halaqati de7iya biitte nena ayye!
ECC 10:17 Bonchetida kawoynne mathotanaw gidonashin wolqanne minotethi demmanaw maaran miyanne uyaa halaqati de7iya biittiya anjetidaaro.
ECC 10:18 Addey azalla gidiko iya kaaray woddees; iya kushey oothonnaba gidiko, iya keethay xokees.
ECC 10:19 Kathi muussaninne woyne ushshan ufaysi bentees; shin miishey ubbaba shammees.
ECC 10:20 Si7iya asi baawa gada ne wozanan kawo cayopa; woyko ne zin7iya kifiliyan dure uraa baaddofa. Ne gidaysa salo kafoy bidi entaw odanaw danda7ees.
ECC 11:1 Ne kathaa haatha bolla yegga; daro gallasape guye neeni zaarada demmana.
ECC 11:2 New de7iya shaluwa laapun woyko hospun bessan shaakada wotha. Sinthafe ha sa7aa bolla ay iitabay yaaneko neeni eraka.
ECC 11:3 Shaari ira tookiko biitta bolla iri bukees. Mithi pude kundin duge kundin ba kundida bessan de7ees.
ECC 11:4 Carko naagiya oonika kathi zerenna; shaari dendana gakanaw naagiya oonika ba kathaa cakenna.
ECC 11:5 Carkoy biya ogiyanne na7i ba aaye ulon waanidi medhetiyako ne eronnaysada ubbaba medhida Xoossay ba oosuwa waati oothiyako eranaw danda7aka.
ECC 11:6 Guura gidin omarsi ne zerethi zereysa aggofa; wontaysi woyko omarsaysi lo77aneko neeni eraka.
ECC 11:7 Poo7oy ufaysiyabaa; awa ayfe be7oy lo77oba.
ECC 11:8 Asi adussa laythi ha sa7an de7iko he laythan ufayto. Shin ha alamiyabay hada gideysanne yaana dhuma wodey merinaw daanaysa qopo.
ECC 11:9 Neno na7atethaw, na7atethi daro lo77oba gidiya gisho ne na7atetha laythan ufayta; ne wozanayka ufayto. Ne ayfey be7idabaanne ne wozanay amotidaba ubbaa pola. Shin he neeni oothidaba ubbaa gisho nena Xoossay pirdanaw de7eysa dogopa.
ECC 11:10 Na7atethinne goobatethi hada gidiya gisho ne wozanaape azzano, ne asatethafe iitatethi digga.
ECC 12:1 Ne na7atetha laythan nena medhidaysa qopa. Un77a gallasati yoonna de7ishin, “Haysi tana ufaysenna” geetetiya wodeti gakonna de7ishin,
ECC 12:2 awinne poo7oy, ageeninne xoolintoti dhumonna de7ishin, iri bukidi aadhin, shaari simmonna de7ishin, nena medhidaysa qopa.
ECC 12:3 He wodey keethe naageysati kokoriya wode, mino asi kuuniya wode, gaacceysati taybon guuxida gisho gaache aggiya wodenne maskootera xeelleysati daaburiya wode gidana.
ECC 12:4 He wodey, wogga ogiyako simmida pengeti gordetiya wode, gaacciya woxa girsay ziqi giya wode, kafo waasoy ase dhiskofe barkisiya wode, macca nayta yetha girsay lepiya wode gidana.
ECC 12:5 He wodey, dere keyanaw xoonetiya wode, dalga ogetara hemetanaw yashshiya wode, lawuze mithi ciiyiya wode, booley qaaxanaw xoonetiya wode, amoyabay aggiya wode gidana. He wodey, asi ba merinaa keethaa biya wode, yeekeysati dalga ogiyara yeekishe yuuyiya wode gidana.
ECC 12:6 Bira santhalaatay duuxonna de7ishin, worqa kerey meqonna de7ishin, haatha otoy pultuwa matan meqonna de7ishin, haathe ollafe goochi kessiya wodoroy duuxonna de7ishin,
ECC 12:7 biittay biittako simmonna de7ishin, shempoy bana immida Xoossaako simmonna de7ishin, nena medhidaysa qopa.
ECC 12:8 Astamaarey, “Hada! Hada! Ubbabay hada” yaagis.
ECC 12:9 Astamaarey cinca xalaala gidonashin eraka gidiya gisho deriya tamaarsis. I daro leemisota pilgidi issuwa issuwa iya maaran maaran dummayidi wothis.
ECC 12:10 Astamaarey like gidida qaala demmanaw koyis; hessa gisho, I xaafidabay suurenne tuma.
ECC 12:11 Cincata qaalay henthanchoy wude laagiya xeera oco xam7a mela. Issife shiiqida leemisoti gathi oythiya mismaare mela.
ECC 12:12 Ta na7aw, ha ubbaafe bollara neeni naagetanaw koshshiyabay de7ees. Maxaafa xaafidi wursanaw danda7etenna. Qassi darobaa pilgidi aggonna ixoy asatethi daabursees.
ECC 12:13 Heko ubbabay odetis; ubbabaas kuushshay haysa; Xoosse yayiya; iya kiitaa naaga; hessi asas waanna ooso.
ECC 12:14 Xoossay ooso ubbaa qassi geemmida ubbaa lo77o gidin iitaa pirdanaw de7ees.
SOL 1:1 Mazmure ubbaafe aadhiya Solomone mazmurey haysa.
SOL 1:2 Ne siiqoy woynepe aadhidi ufaysiya gisho tana zaara zaara yeera.
SOL 1:3 Ne tiyetiya shittoy waanidi sawii! Ne sunthay goggiya shitto mela; Geela7oti nena siiqey hessasa.
SOL 1:4 Tana neera ekada ba; ane issife woxoos! Kawaw, tana ne quruxuwan gelsa. Nenan nu ufaytoos; ne siiquwa woyne ushshafe aathidi nashshoos. Maccasi ubbay nena siiqeysa bessa.
SOL 1:5 Hinteno, Yerusalaame maccasato si7ite; taani kareethi gidikoka mala lo77o. Ta kareethatethay Qedaare dunkaane mela; shin ta malay Solomone magarajota mela.
SOL 1:6 Ta malaa kareethiday awa; taani kareethi gidida gisho tana boropite. Ta ishati, ta aaye nayti taara ooyetidi, tana woyne gade naagisidosona; hessa gisho ta woyniya naagabike.
SOL 1:7 Ta siiquwaw, ane taw oda; ne dorsaa wudiya awun heemmay? Seeta gallas enta awun shempisay? Nena demmanaw ne laggeta wudiya kaallada, ayis guuluntada biya maccas gido?
SOL 1:8 Maccasa ubbaafe lo77iyare, Bessaa eronna ixiko dorsata geedo kaalla. Ne deesha marata henthanchota dunkaaniya matan heemma.
SOL 1:9 Ta siiqe! Gibxe kawo para gaareta goochiya, parata giddon de7iya magaayeda lo77aasa.
SOL 1:10 Ne haythan de7iya alleequwara shiiqidi, ne shakalay waanidi lo77i! Ne qoodhey al7o shuchan alleeqetis.
SOL 1:11 Nuuni new biran cadetida, worqa alleequwa oosisana.
SOL 1:12 Kawoy gayta bolla uttidashin, ta shittuwa sawoy keethan tonku gis.
SOL 1:13 Ta siiqoy ta dhanthata giddon de7iya, xuntetida sawiya karbe daanees.
SOL 1:14 Ta siiqoy, Engaada woyne gaden, dolida heena ciishsha mela.
SOL 1:15 Ta siiqe, neeni waana lo77ay! Neeni waana lo77ay! Ne ayfeti holle ayfeda lo77oosona.
SOL 1:16 Ta siiquwaw, neeni waanna lo77ay! Ayba ufaysay; nu arsay cil7o maata mela ufaysees.
SOL 1:17 Nu keethaa tuussay ziga; nu kaaray xiiddan oyketis.
SOL 2:1 Taani Saaronan doliya ciishshanne zangaaran doliya suufe ciishsha mela.
SOL 2:2 Ta siiqiya maccasa giddon be7iya wode, aguntha giddon bentiya suufe ciishsha mela.
SOL 2:3 Ta siiqoy hara panthata giddon xeelliya wode woran de7iya apile mithaa mela. Tana daro ufaysin, iya kuyaa giddon uttas; iya ayfey min tana mal7ees.
SOL 2:4 I tana gibira miya keethi gelsis; ba siiquwa bandirada ta bolla dhoqu dhoqu oothis.
SOL 2:5 Taani iya siiquwan oyketada hargida gisho, zabibe ayfe muzidi tana gashtisite; apile muzidi ta wolqaa minthite.
SOL 2:6 Ba haddirsa kushiya tana borkotisis; ba ushacha kushiyan tana qoommis.
SOL 2:7 Hinteno, Yerusalaame yalaga maccasaw, siiqoy baw dosidi dendana gakanaw, iya hinte barkethonna mela, ta hintena gen7eninne wora woshi7en ammatayis.
SOL 2:8 Ta siiquwa girsay deriya bollara gupishenne, zumaa bollara xongetishe yeysi si7etees.
SOL 2:9 Ta siiqoy woshi7e woyko gen7e mari daanees; Heko, nu keethaa matan eqis; maskootera soo xeellees; magarajuwa giddora xeellees.
SOL 2:10 Ta siiqoy, haysada yaagees; “Ta siiqe, denda! Ta yegelsse, haaya, issife ane boos.
SOL 2:11 Heko, balgoy aadhis; irayka eqis.
SOL 2:12 Biittan ciishshi ciiyis; yethi yexiya ageenay gakis; holle yethi nu biittan si7etis.
SOL 2:13 Balase mithay ayfe doomis; woyney ciiyis; ciishsha sawoy biittan tonku gees. Ta siiqe, denda; ta yegelsse, haaya; ane issife boos.”
SOL 2:14 Aafo doonan zaalla qophon, qosetida holle daaniyare; ane issi toho tana ne som7uwa bessa; ne girsa sissa. Ne qaalay tana mal7ees; ne som7oy daro lo77ees.
SOL 2:15 Nu woyney ciiyis; nu woyne gadiya iissiya workanata, he guutha butaleta xihen oykite.
SOL 2:16 Ta siiqoy tabaa; taanika iyabaa; ciishshata giddon I ba wudiya heemmees.
SOL 2:17 Sa7i geeyana gakanaw, kuyay dhayana gakanaw, ta siiquwaw, gen7eda woyko woshi7e marada, aafotiya deriyara woxashe haa simma.
SOL 3:1 Qamma kumethi hiixan zin7ada, ta siiquwa demmanaw amottas; minthada koyas; shin demmabike.
SOL 3:2 Katamaa giddon de7iya dalganne xuntha ogeta ubban yuuyas. Ta siiquwa demmanaw koyas; minthada koyas; shin demmanaw danda7abike.
SOL 3:3 Katamaa yuuyidi naageysati tana demmidosona; taani, “Ta siiquwa be7idetii?” yaagada oychas.
SOL 3:4 Enta aggada aadhida mela ta siiquwa demmas; I taape kessi ekonnaada minthada oykas. Ta aaye soo efas; ta yeletida kifiliya gelsas.
SOL 3:5 Hinteno Yerusalaame macca nayto, siiqoy baw dosidi dendana gakanaw, iya hinte barkisonna mela taani hintena gen7eninne woshi7en ammatayis.
SOL 3:6 Zal7ancho ixaanedanne karbeda sawiyara, cuya tuussu daaniyara, hanna mela biittafe yaara iya oonee?
SOL 3:7 Heko, Solomone para gaariya yawusu; he para gaariw Isra7eelepe dooretida, usupun tammu wolqaama tooranchoti ajabidosona.
SOL 3:8 Enti ubbay mashsha oythan meezetidosona; olanka paacetidosona. Qamma gakiya metuwa teqanaw, enti mashshe dancidi giigidosona.
SOL 3:9 Kawa Solomoney para gaare giddon, baw uttiya araata giigisis; iya araatay Libaanosepe yida mithan oosetis.
SOL 3:10 Araata tuussay biran lanxetis; zempoy worqan alleeqetis. Oydey ocha teera daaniya qacinan kametis; gaathay Yerusalaame geela7ota siiqon alleeqetis.
SOL 3:11 Hinteno, Xiyoone geela7oto, kawa Solomone be7anaw haayite. I daro ufaytida iya yaaganuwa gallas iya aayiya iya huuphen wothida kallacha wothis.
SOL 4:1 Ta siiqe, neeni waana lo77ay! Neeni waanida yegelsse! Ne ayfeti guulunthaa giddora be7iya wode, holleda lo77oosona. Ne binaanay Galada zumaape wodhiya deesha wude daanees.
SOL 4:2 Ne achay meedetidi haathan meecetida, ubbay mente yeliya, enta giddon awucayey bayna dorsa wude mela.
SOL 4:3 Ne mettershay zo7o qacina daanees; ne haasaya wode daro ufaysoosona. Ne nam7u shakalay guulunthaa giddora xeelliya wode, nam7a kessidi phalqida oromaane daanosona.
SOL 4:4 Ne qoodhey loythi oothida, iya bolla olanchota gondalley de7iya, mukulu mino olanchota gondalley kaqetida, Dawita adussa gimbiya daanees.
SOL 4:5 Ne nam7u dhanthati mente yeletida, lo77o ciishshata giddon miya woshi7e marata daanosona.
SOL 4:6 Sa7i geeyanaape sinthe, dhumay kichanaape sinthe, karbe deriyanne ixaane zuma bada shempana.
SOL 4:7 Ta siiqe, ne asatethay kumethi lo77o; nenan boretiyabay baawa.
SOL 4:8 Ta mushurate, Libaanosepe haaya; Gaammoy pee7iya, maahey aqiya, Amaana zumaape, Sanira liiphepe Armoona huuphiyape wodha.
SOL 4:9 Ta siiqe, micho gidida ta mushurate; ne ayfiya xeeloynne ne qoodhiya alleeqoy, ta wozanaa ufaysan gooshshis.
SOL 4:10 Ta siiqo micho gidida ta mushurate! Ne siiqoy tana waani ufaysi! Ne siiqoy woyne ushshafe aadhidi ufaysees; ne shittoy ubbaafe aadhidi sawees.
SOL 4:11 Ta mushurate, ne mettershafe ililo eessi xokees; Ne doonape eessinne maathi pultees; ne ma7oy Libaanose shittoda sawees.
SOL 4:12 Ta siiqo micho gidida ta mushurate, ne yuushoy diretidi naagetiya atakilte bessa mela; ne haratas gordetida, taw dooyetida pulto mela.
SOL 4:13 Neeni atakilte giddon, oromaaney, dooretida atakilte ayfeti, nardoose geetetiya ayfeti de7iya bessa mela.
SOL 4:14 Nardoosey, laadey, sawiya maati, qarafin, ixaanada sawiyabati de7oosona. Karbey, godare uutha ciishshinne dumma dumma qimame atakilteti doloosona.
SOL 4:15 Neeni atakilte bessa ushshiya pulto mela; de7o haathi bentiya olla mela; Libaanose zumaape goggiya shaafa mela.
SOL 4:16 Pudeha bagga carkuwaw, denda! dugeha bagga carkuwaw, haaya! Ta atakiltiya bolla carka! iya sawoy tonku go. Ta siiqoy ba atakiltiya giddo yo; daro mal7iya ayfeta mo.
SOL 5:1 Ta miche, ta mushurate, taani ta atakiltiya giddo gelas. Ta karbiyanne ta shitto ciishsha qoras; taani eessa uythi mas; ta woyniyanne ta maatha uyas. Iya laggeto, miite uyite; siiqo alana gakanaw uyite.
SOL 5:2 Taani dhiskas; shin ta wozanay barkis; ta siiqoy haysada yaagidi pengiya qonkishin si7as. “Ta miche, ta siiqe, ta yegelsse; borey bayna ta holle, taw pengiya dooya. Ta huuphey akan laakis; ta binaanay qamma puusen irxis.”
SOL 5:3 Ta ma7uwa qaaras, zaarada ma7oyee? Ta tohuwa meecetas, zaarada qitayoyee?
SOL 5:4 Ta siiqoy ibitha xoo7era ba kushiya soo yeddis; ta wozanay iya gisho seellees.
SOL 5:5 Ta siiquwas dooyanaw dendas; pengiya dooyanaw kobiya oykiya wode, ta kushiyape karbey, ta biradhiyafe shittoy xokees.
SOL 5:6 Ta siiquwas kariya dooyas, shin I deenna; iya qaala si7anaw daro amottas. Minthada koyas, shin iya demmabike; xeegas, shin taw koybeenna.
SOL 5:7 Katamaa naageysati tana demmidi, wadhidosona; madunxisidosona. Katamaa dirsaa naageysati, ta laxana qaari ekidosona.
SOL 5:8 Hinteno, Yerusalaame geela7oto, ta siiquwa demmiko, taani iya siiquwan hargidaysa, hadara iyaw odite.
SOL 5:9 Neno, maccasa ubbaafe lo77iyara, ne laggey haratape waanidi dummatii? Neeni nuna hadara gey, I haratape aybin dummatii?
SOL 5:10 Ta siiqoy mala lo77onne ayanta; tammu mukulu addeta giddon iya meli baawa.
SOL 5:11 Iya huuphey al7o worqa daanees; iya binaanay lo77onne quuro mela kareethi.
SOL 5:12 Iya ayfey shaafa matan eqida, maathan meecetida holleta daanees.
SOL 5:13 Iya shakalay sawiya qimamey toketida madabeda lo77ees; iya mettershay karbe shittoy xokiya wora ciishshada lo77ees.
SOL 5:14 Iya qesey al7o shuchan alleeqetida worqa xam7ada lo77ees; iya asatethay sanpare al7o shuchan alleeqetida dangarsa zaale mela.
SOL 5:15 Iya tohoti worqa baason eqida salo shucha tuussi daanosona; iya malay zigan alleeqetida Libaanose zuma mela.
SOL 5:16 Iya doonay eessada mal7ees; iya kumetha asatethay lo77ees. Hinteno Yerusalaame geela7oto, ta siiqoynne ta laggey haysa daannes.
SOL 6:1 Maccasa ubbaafe lo77iyare, ne laggey awu bidee? Nu neera koyana mela I bida gina nuus oda.
SOL 6:2 Ta siiqoy dorsa wude heemmanaw, lo77o ciishsha shiishanaw, shitto maatay de7iya atakiltiya giddo bis.
SOL 6:3 Taani ta siiquwaba; ta siiqoy tabaa; I ciishsha giddon wude heemmees.
SOL 6:4 Ta siiqe, ne Tirsa katameeda lo77aasa; Yerusalaameda daro lo77aasa. Bandira oykidi salpiya, olanchoda yashshaasa.
SOL 6:5 Enti tana un7ethida gisho, hayyana ne ayfiya taape dentha. Ne binaanay Galada zumaape wodhiya, deesha wude daanees.
SOL 6:6 Ne achay meecetidi keyiya, ubbay mente yeliya, enta giddon awucayey bayna dorsa wude mela.
SOL 6:7 Ne nam7u shakalay guulunthaa giddora xeelliya wode, nam7u kessidi phalqida oromaane daanosona.
SOL 6:8 Usupun tammu macca kawoti, hospun tammu laggethoti, tayboy bayna geela7oti de7oosona.
SOL 6:9 Shin borey bayna ta holliya taw dumma; iya ba aayes issinno. Iyo yelida aayiya ubbaafe aathada iyo dosawusu; Geela7oti iyo be7idi, “Hanna anjetidaaro” yaagosona; macca kawotinne laggethoti iyo sabboosona.
SOL 6:10 Hanna wonta xalqeda doliyara, ageenada poo7iyara, xalqeda caddiyara, bandira oykidi salpe keyida, olanchoda yashshiyara hanna oonee?
SOL 6:11 Taani zangaaran toketida mithata be7anaw, woyney aacidako oromaaney ayfidaako xeellanaw, duge ocholone gade wodhas.
SOL 6:12 Ta qoponna de7ishin ta amoy tana efidi, kawa asaa para gaareta giddon tana utisis.
SOL 6:13 Neno Sulaamape yidaare, haaya; haa simma; Nu nena loythidi xeellana mela haa simma. Daro asaa sinthan yexiya asada, tana ayis xeelleetii?
SOL 7:1 Kawo na7ada lo77iyare, Laxana caamma aathida ne tohoti waani lo77i! Ne sheechey hiillanchoy qoxidi, alleeqisida al7o shuchu daanees.
SOL 7:2 Ne gul7ay woyney kumida birille daanees; ne xeessa yuushoy ciishshan qashetida giste mirqe daanees.
SOL 7:3 Ne dhanthati mente yeletida, gen7e mari daanosona.
SOL 7:4 Ne qoodhey dangarsa zaalen alleeqetida adussa shako mela. Ne ayfey gita Haseboona katama pengiya matan, de7iya zeero haatha daanees. Ne siidhey Damasqoko zaaridi gimbida, Libaanose gimbiya daanees.
SOL 7:5 Ne huuphey Qarmeloosa zuma daanees; ne binaanay qacina xaathi daanees; ne huuphiya dathay kawa ufaysees.
SOL 7:6 Ta siiqe, ne waanna lo77ay! Ne waanida yegelsse! Ne siiqoy tana waani ufaysi!
SOL 7:7 Ne geesay zamba daanees; ne dhanthay zamba mor77e daanees.
SOL 7:8 Taani, “Zamba bolla keyana; iya ayfiya maxana” yaagas. Ne dhanthay woyne mor7e mela; ne siidhiyara keya peenoy apileda sawees.
SOL 7:9 Ne doonape keyiya peenoy lo77o woyne mela. Hiza lo77iya woyne ushshay, ne siiqe mettershafenne achafe giddora, lepi gidi goggo.
SOL 7:10 Taani ta siiquwaba; ika tana amottees.
SOL 7:11 Ta siiquwaw, haaya; katamaape keyidi gaxare boos; nam7ay qamma yan aathana.
SOL 7:12 Wonta guura woyne atakiltiya giddo boos; woyney ciiyidaako, ayfe aathidako, oromaaney ayfidaako ane be7oos. Taani ta siiquwa nena yan bessaana.
SOL 7:13 Inkoye ayfe sawoynne dumma dumma ufaysiya atakilte ayfey nu karen kumis. Ta siiquwaw! Ha ayfetape teeridaysanne oorathi maxidaysa new wothas.
SOL 8:1 Ne taw ta aaye dhanthi dhammida ta isha gididaako aybe! Ta nena ogen demmada yeeridaako, tana oonika borennashin.
SOL 8:2 Taani nena kaalethada, tana tamaarsida ta aaye soo gelsarkinashin. Mal7iya Oromaane gum7ethaanne lo77iya woyne ushsha ta nena yan ushsharkina.
SOL 8:3 Tana ne haddirsa kushey borkotisees, ne ushacha kushey tana qoommes.
SOL 8:4 Hinteno, Yerusalaame geela7oto, ta siiqoy ba wode dendana gakanaw, koyrottidi hinte iya denthonaada hadara gayis.
SOL 8:5 Ba siiquwa hashen zempada, mela biittafe yaara hanna oonee? Beni ne aayiya nena iqetada yelida, apile mithaa garsan ne zin7idashin, nena ta barkisas.
SOL 8:6 Merina siiquwan tana ne wozanan attama; ne qesiyan maatameda ta xalaala oyka. Siiqoy hayqo mela mino; qanaatey si7oole mela iita; iya lacoy Xoossaa tama laco mela.
SOL 8:7 Daro haathi siiqo tama toysanaw danda7enna; di7oyka meeccidi efanaw danda7enna. Asi siiqo shammanaw baw de7iya ubbaa immikoka, siiqoy miishen shametonna gisho, asi iya kadhees.
SOL 8:8 Dhanthi tiran uttiboona micha nuus de7awusu; azini iyo oychiko, nu iw ay oothanee?
SOL 8:9 Iya gimbe dirsi gidiyako, nuuni I bolla adussa bira gimbe gimbana; iya dirsa penge gidiyako ziga ibithe medhana.
SOL 8:10 Taani dirsa gimbe; ta dhanthay gimbe bolla de7iya shako mela; taani ta siiquwara de7iya wode I tanan ufaytees.
SOL 8:11 Solomones Ba7aal-Hamoonan woyne gadey de7ees; he woyne gadiya une ootheysatas immis. Kera ekidaysati ayfiya gisho, issoy issoy mukulu bira iyaw ehoosona.
SOL 8:12 Shin taw ta buzo woyne gadey de7ees; Solomone, neeni mukulu bira eka; une ekidi ootheysati nam7u xeetu bira eko.
SOL 8:13 Neno, atakiltiya giddon de7iya ta siiqe, ne laggeti ne qaala si7anaw koyoosona; ne qaala tanaka sissa.
SOL 8:14 Ta siiquwaw, taako elle ya! shitto maatay doliya dereta bollara, gupiya gen7e woyko woshi7e marada hana.
ISA 1:1 Ooziyani, Iyo7atami, Akaazinne Hizqiyaasi Yihudan kaalli kaallidi kawotida wode Amoxe na7ay Isayaasi Yihudabaanne Yerusalaameba be7ida qoncethay haysa.
ISA 1:2 Saloto si7ite; sa7aw hayza si7a; Goday haysada yaagees; “Ta nayta yelada dichas; shin enti taw makallidosona.
ISA 1:3 Boori ba godaa erees; hareyka bana haaridaysa zadaluwa erees. Shin Isra7eeley erenna; ta asay akeekenna.
ISA 1:4 Hinteno, nagarancho kawotethato, bala ooson deexidaysato, iitaa oothiya yeletethato, tuna oosos imetida nayto, Godaa aggidaysato, hintena ayye! Isra7eele Geeshshaa kadhideta; iyaw zoko zaarideta.
ISA 1:5 Makalla bolla makalla ayis gujeetii? Ayis zaari zaari shoceteetii? Hinte huuphey hargetis; hinte wozanay daaburis.
ISA 1:6 Huuphe binaanape toho xugunthi gakanaw payyatethi baawa; madunthi, kixinne dhuusi ma7is. Enti giiybookona, woyko meecetidi qashetibookona woyko zayten tiyetidi looxikbookona.
ISA 1:7 “Hinte biittay oxis; hinte katamati taman xuugetidosona. Hinte be7ishin hinte goshsha allagati ekana; imatha asati hinte biitta quu7e kessana.
ISA 1:8 Yerusalaamey woyne gaden de7iya shaqarada, leehe giddon de7iya gaabbadanne morken teqetida katamada hanada attana.
ISA 1:9 Ubbaafe Wolqaama Goday nuus guutha koche ashshonaako nuuni Soodomenne Gamoora katamaada hananashin” yaagis.
ISA 1:10 Hinteno, Soodome halaqato, Godaa qaala si7ite! Hinteno, Gamoora asaw, nu Xoossa higgiya si7ite!
ISA 1:11 “Hinte yarsho daroy taw ay oothii? Hanno gakanaw hinte taw shiishida urge dorsaanne modho mehe xuussa yarshoy taw gidana. Taani kormata, dorsa urgetanne deeshata suuthan ufaytike.
ISA 1:12 Hinte ta sinthan bentanaw yaa wode ta keethaa dabaaba hinte yedhana mela oone oychiday?
ISA 1:13 Hada yarshuwa eheysa aggite! Hinte cuyisiya ixaaney tana shaattees. Ageena xeeron hinte bonchiya gallasa, Sambaatanne iitatethan hinte shiiqiya shiiquwa taani ixayis.
ISA 1:14 Ageena xeeron hinte bonchiya gallasaanne hinte ba7aale gallasata taani ixas; enti taw tooho gididosona; taani enta tookanaw danda7ike.
ISA 1:15 Hinte kushe miccidi tana woossiya wode taani ta ayfiya hintefe genthana. Hinte kushey suuthan kumida gisho hinte darsi woossikoka taani si7ike.
ISA 1:16 Meecetite; hintena geeshshite; hinte iita oosuwa ta sinthafe diggite; gene hanuwa aggite.
ISA 1:17 Lo77oba ooso tamaarite; xillo pirdaa koyite. Un7etidaysata ashshite; yi7otas eqite; am7etas mootetite” yaagees Goday.
ISA 1:18 “Haayite; ane woli ammanthoos. Hinte nagaray baara biittada zo7ikoka, shachada booxana; suuthada zo7ikoka puutoda booxana.
ISA 1:19 Hinte ero gidi taw kiitetiko biitta anjuwa maana.
ISA 1:20 Shin hinte ixas gidi makalliko, mashshan meetetana” yaagees Goday ba doonan.
ISA 1:21 Ammanetida katamiya waanada layma gidadee? Kase suuretethinne xillotethi I giddon kumis, shin ha77i shempo wodheysati I giddon de7ees.
ISA 1:22 Ne biray baltis; ne mal7o woyney haathan yeletis.
ISA 1:23 Hinte halaqati makallanchotanne kayso lagge gididosona; enti ubbay wodhaafe doseysatanne kushe xeelleyisata. Yi7otas suure pirdokona; am7eta waasuwa si7okona.
ISA 1:24 Hessa gisho, Goday, Ubbaafe Wolqaama Xoossay, Isra7eele Wolqaamay, haysada yaagees; “Ha77i taani ta morketa bolla ta hanquwa gussana; taara eqeteyisata halo keyana.
ISA 1:25 Taani ta kushiya ne bolla zaarana; ne baltetha geeshshana; ne tunatetha ubbaa neepe diggana.
ISA 1:26 Taani beniysada ne halaqata, koyroysada ne zoranchota denthana. Hessafe guye, neeni ammanetida biitta; xillotetha Katama geetetana” yaagees.
ISA 1:27 Xiyooney suure pirdan, banta nagara paaxeysatika xillotethan wozetana.
ISA 1:28 Shin makallanchotinne nagaranchoti issife meqana; Godaa aggeysati dhayana.
ISA 1:29 Hinte ufaytida yarsho wolan yeellatana; hinte doorida kooran kawuyana.
ISA 1:30 Hinte haythi qoqofetidi wurida woladanne haathi dhayida atakilte bessada gidana.
ISA 1:31 Bana mino gey buuxa gidana; iya oosoyka pol7u gidi to7iya tama gidana; enti issife xuugetana; he tama toysana asi baawa.
ISA 2:1 Amoxe na7ay Isayaasi Yihudabaanne Yerusalaameba be7idaysi haysa.
ISA 2:2 Wursetha gallasatan Godaa keethay keexetida zumay, zumata ubbaafe dhoqu gidi bentana; zuma ubbaafe bollara dhoqu gaana. Kawotethati ubbay iyako baana.
ISA 2:3 Higgey Xiyoonepe, Godaa qaalay Yerusalaamepe keyiya gisho, daro asay yidi, “Ane haayite! Godaa zumako, Yayqooba Xoossa keethaako keyoos. Nuuni iya ogiyan baana mela I nuna ba ogiya tamaarsana” yaagana.
ISA 2:4 I kawotethata giddon pirdana; daro asata palama shaakana. Enti banta mashshaa marasha, banta toora baaca kessana. Kawotethati kawotethata bolla mashsha denthokona; hizape enti ola timirte tamaarokona.
ISA 2:5 Hinteno, Yayqooba kochato, haayite! Ane Godaa poo7uwan hemetoos.
ISA 2:6 Godaw, ne asaa, Yayqooba kochata aggadasa. Enti doloha bagga asaa Bitaaninne Filisxeeme asaa murunnuwan kumidosona; allaga asaara issifidosona.
ISA 2:7 Enta biittan birinne worqey kumis; enta miishiyas zawi baawa. Enta biittan pari kumis; enta para gaariyas zawi baawa.
ISA 2:8 Enta biittan eeqi kumidosona; enti banta kushe oosuwa goyinnoosona.
ISA 2:9 Hessa gisho, asa ubbay tooshettananne kawuyana. Enta nagaraa atto goopa.
ISA 2:10 Godaa daganthuwafenne yashshiya bonchuwafe attanaw zaallako biite; biitta giddon qosetite!
ISA 2:11 Otoranchoti kawuyana; ceeqeteysati guuxana; he gallas Godaa xalaali dhoqu dhoqu gaana.
ISA 2:12 Ubbaafe Wolqaama Goday, issi gallas otoranchota, ceeqeteysatanne bantana dhoqu dhoqu ootheyisata kawushana.
ISA 2:13 Adussa Libaanose zigatanne Baasane wola ubbaa dhaysana;
ISA 2:14 Dhoqa deretanne zumata dembayana.
ISA 2:15 Katamaa naagiya adussa shakotanne mino dirsa gimbeta ziqi oothana.
ISA 2:16 Goday gitanne lo77o markabeta haathan mitisana.
ISA 2:17 Asa otoroy ziqi gaana; iya ceeqetethay dhayana. He gallas Godaa xalaali dhoqu dhoqu gaana.
ISA 2:18 Eeqa ubbay polo dhayana.
ISA 2:19 Goday biitta qaathanaw dendiya wode iya daganthuwafenne iya yashshiya bonchuwafe attanaw asay shucha gongoloninne biitta ollan qosetana.
ISA 2:20 He gallasay asay goyinnanaw medhida banta bira misiletanne banta worqa misileta girotasinne shirshiqotas yeggana.
ISA 2:21 Goday biitta qaathanaw dendiya wode iya daganthuwafenne iya yashshiya bonchuwafe attanaw enti gongolo giddonne shucha za7o giddo baqatana.
ISA 2:22 Hiza shempoy siidhen de7iya, ha hayqiya asan ammanetofite. Asi ay maaddii?
ISA 3:1 Heko, Goday, Ubbaafe Wolqaama Xoossay, minjanne maado ubbaa, katha minjanne haatha minja ubbaa Yerusalaamepenne Yihudape diggana.
ISA 3:2 Minotanne olanchota, daynnanne nabiya, biteysanne cima,
ISA 3:3 toora moconanne deriya ayseysa, zoreysa, hiillanchuwanne qara marota ubbaa diggana.
ISA 3:4 Taani yooga nayta enta halaqa oothana; guutha nayti enta haarana.
ISA 3:5 Asay asa bolla, shooroy shooruwa bolla dendidi, issoy issuwa sugana. Na7atethay cima bolla, kadhetidaysi bonchetidaysa bolla dendana.
ISA 3:6 Issi asi ba aawa keethan de7iya ba ishatape issuwa oykidi, “New ma7oy de7ees; neeni nuus halaqa gida; ha laaletida bessaa aawatethan eka” yaagana.
ISA 3:7 He gallas, I ba qaala dhoqu oothidi, “Taani maaddike; ta son kathi woyko ma7oy baawa; hinte bolla tana shuumopite” yaagana.
ISA 3:8 Yerusalaamey gandigarasu; Yihudi kundanaw matasu; enti banta odaaninne banta oosuwan Godaa bolla dendidi, iya bonchuwa toochidosona.
ISA 3:9 Enta som7oy enta bolla markatees; enti banta nagaraa Soodome asaa mela awaajosona; banta nagaraa qottokona. Enti banta bolla dhayo ehida gisho enta ayye!
ISA 3:10 Enti banta oosuwa ayfiya maana gisho, xillotas lo77o gidana gada oda.
ISA 3:11 Enti banta kushe oosuwa gatiya ekana gishonne dhayoy enta bolla yida gisho iitata ayye!
ISA 3:12 Na7atethati ta asaa un7ethoosona; maccasati enta haaroosona. Ta asaw, hintena kaaletheysati balethoosona; hinte biya ogiyape kare kessoosona.
ISA 3:13 Goday ba araatan uttis; asaa bolla pirdanaw giigetis.
ISA 3:14 Goday deriya cimatanne kaaletheyisata pirdanaw shiishidi, “Ta woyne gadiya dhaysiday hintena; manqotape bonqidaysi hinte son de7ees.
ISA 3:15 Hinte ta asaa ayis tincherethetii? Manqota som7uwa ayis kareethetii?” yaagees Ubbaafe Wolqaama Goday.
ISA 3:16 Goday, “Xiyoone maccasati otortidosona; banta qoodhiya adussidi, banta ayfiyan qam7otoosona; banta hemethaa laammidi, banta toho albuwa giirsishe hemetoosona.
ISA 3:17 Hessa gisho, Goday Xiyoone maccasa huuphiya dhuusan kunthana; Goday enta huuphiya bo77ayana” yaagees.
ISA 3:18 He gallas Goday Xiyoone maccasa alleeqota, hessika, toho albuwa, shaashiya, qoodhe worqaa,
ISA 3:19 haytha worqa, kushe ambaare, som7o kama,
ISA 3:20 huuphe kama, qese santhalaata, dancuwa, shittuwa, gozdda,
ISA 3:21 siidhe worqa, biradhe migiduwa,
ISA 3:22 koyse ma7uwa, adussa ma7uwa, kaaba, borsa,
ISA 3:23 mastootiya, liinuwa, huuphe alleeqota, sharbiya ubbaa entafe ekana.
ISA 3:24 Shitto gisho xinqo, danco gisho wodoro, goofare gisho bo77a, koyse ma7o gisho kayo ma7o, lo77otetha gisho beeta gidana.
ISA 3:25 Ne asati mashshan, ne olanchoti olan hayqana.
ISA 3:26 Xiyoone pengeti yeekananne zeleelana; kayotada sa7an uttida maccasada hanana.
ISA 4:1 He gallas laapun maccasati issi adde oykidi, “Nuuni nu kathi maana; nu ma7o ma7ana. Ne sunthan xeegetana mela oothada nu kawusha nuupe diggarkii?” yaagidi woossana.
ISA 4:2 He wode Godaa tashey, lo77ananne bonchetana; attida Isra7eele asaas biitta kathay ceeqonne boncho gidana.
ISA 4:3 Xiyoonen attidaysati, Yerusalaamen dhayope kessi ekidaysatinne de7os xaafetidaysati geeshshata geetetana.
ISA 4:4 Goday Xiyoone maccasa qita meeccana; ba pirdaaninne ba ayyaana taman suutha guso Yerusalaamepe diggana.
ISA 4:5 Goday Xiyoone zumaa bollanne yan shiiqiya ubbaa bolla gallas shaara cuyanne qamma tama laco medhana; iya boncho ubbaa bolla kama gidana.
ISA 4:6 I, gallasa mishape ashshiya kuyanne uushopenne irape qosetiya besse gidana.
ISA 5:1 Ta dosiya addiya woyne gadiyaba, siiqo yethi yexana. Taani dosiya addiyas, aradda zuma bolla iyaw woyne gadey de7ees.
ISA 5:2 Biitta bookidi, shuchaa qori kessidi, lo77o woyne tokis. Naago shako iya giddon shakis; woyniya gum7iya bessaa giigisis. Hessafe guye, lo77o ayfe ayfana gidi naagis; shin caala ayfe ayfis.
ISA 5:3 “Hinteno, Yerusalaamen de7eysato, hinteno Yihuda asaw, taapenne ta woyne gadiya giddon de7iya odaa ane pirdite.
ISA 5:4 Taani ta woyne gadiyas oothidaysafe haraa ay oothanabay attidee? Lo77o ayfe ayfana gada naagas, shin ayis caala ayfe ayfidee?
ISA 5:5 Ha77i taani ta woyne gadiya bolla oothanaba hintew odana. Taani iya dirsaa diggana; woyney dhayanaada oothana. Taani gimbiya laallana; woyne gadey yedhetana.
ISA 5:6 Taani he gadiya quu7e oothana; woyney xintetenna, harmetenna. He bessan kinchoteynne agunthi dolana; Iri iya bolla bukonna mela taani shaara kiittana” yaagis.
ISA 5:7 Ubbaafe Wolqaama Godaa woyne gadey Isra7eele asaa. I, ufaytiya atakilte bessay Yihuda asaa. Enta suure pirdoosona gidi naagis; shin suuthi gussidosona. Xillotethi oothosona gidi naagis; shin un7a waasoy darana mela oothidosona.
ISA 5:8 Bessi dhayin, hinte xalaala biitta bolla daana gakanaw, keethe keetha bolla, gade gade bolla, gujeysato hintena ayye!
ISA 5:9 Ubbaafe Wolqaama Goday haysada gidi caaqishin ta si7as. “He gita keethati kaysatana; he lo77o keethatan daanaw asi dhayana.
ISA 5:10 Tammu waaxan tokida woyniyape, issi oto gum7etha woyne xalaala ekana. Hospun tammu kilo giraame zerida gadepe, tammanne hospun kilo giraame xalaala ekana” yaagis.
ISA 5:11 Mathoya ushsha koyanaw wonta guura dendeysatanne woyne ushshay xuuggana gakanaw, yan qamisiya asaa ayye!
ISA 5:12 Enta imatuwan maasinqoy, diithi, karaaboy, suusul7eynne woyne ushshi de7ees. Shin enti Godaa oosuwa be7ibookona; iya kushe oosuwa akeekokona.
ISA 5:13 Hiza ta asay akeeka dhayida gisho, di7etana; ayseysati koshan hayqana; asay saamon xuugetana.
ISA 5:14 Duufoy ba gompaa dalgisis; ba doona zawi bayna dooyis. Yerusalaamen de7iya gita asaa, daro asaa, wocameysatanne ufayteyisata mittana.
ISA 5:15 Asi tooshetana; asa koche ubbay kawuyana; otortiya ubbay guuxana.
ISA 5:16 Shin Ubbaafe Wolqaama Goday, ba suure pirdan dhoqu dhoqu gaana; Xoossaa geeshshatethay iya xillotethan qoncana.
ISA 5:17 He wode dorsati he bessan heemetana; dorsa urgeti laaletida keetha bessatan maana.
ISA 5:18 Cimo wodoron nagara, gaare wodoron iitatethi goocheyisata ayye!
ISA 5:19 “Ane Xoossay elleso! Nuuni be7ana mela ba oosuwa eesoyo! Nuuni erana mela Isra7eele Geeshshay qopida qofaa polo” yaageyisata ayye!
ISA 5:20 Iitaa lo77o, lo77uwa iita; dhumaa poo7o, poo7uwa dhuma; camuwa mal7o, mal7uwa camo geyisata ayye!
ISA 5:21 Bantana cincanne qara geyisata ayye!
ISA 5:22 Woyne ushshan eretida asaanne mathoyiya ushshu walakanaw wozani mino gidida asaa ayye!
ISA 5:23 Qohida uraa xillisanaw wodhaafe ekidi, xillo asaa suure pirdaa geellayeyisata ayye!
ISA 5:24 Enti Ubbaafe Wolqaama Godaa higgiya ixida gishonne Isra7eele Geeshshaa qaala kadhida gisho tama lacoy kale oykeysadanne buurey taman meetetidi dhayeysada enta xaphoy wooqana. Enta ciishshay baanada laaletidi dhayana.
ISA 5:25 Hessa gisho, Godaa hanqoy iya asaa bolla eexis; iya kushey dendidi, enta dhaysis. Dereti qaaxidosona; hayqida asaa ahay oge bolla buureda hanis. He ubbanka iya hanqoy simmibeenna; iya kushey ha77ika dendida bessan de7ees.
ISA 5:26 Goday haaho son de7iya kawotethatas malla dhoqan essis; sa7aa gaxan de7iya asaa suyqidi xeegis; enti dirgishe puttu goosona.
ISA 5:27 Enta giddon daabureynne dhubetey baawa; entafe issoyka dhiskenna woyko zin7enna. Xeessan dancida saqey birshetena; enta caamma wodoroy duuxenna.
ISA 5:28 Enta tooray qara; enta dongeyka waaxetidi de7ees. Enta parata tohoy qara shucha mela; enta para gaareta gertoy gote mela.
ISA 5:29 Enti gaammo mela guummoosona; wodala gaammo mela gudoosona. Enti sarbuqishe miyaba oykidi, tooki ekidi boosona; entafe wothidi ekey oonika baawa.
ISA 5:30 He wode enti gita abba guunthada Isra7eele bolla guummana. Issi asi he biitta xeelliya wode dhuminne waayey be7ana; poo7oy shaaran mitettana.
ISA 6:1 Kawoy Ooziyani hayqida laythi Goday dhoqa araataninne boncho bessan uttidaysa be7as; iya ma7oy Xoossa keethaa kumis.
ISA 6:2 Surafeela geetetiya kiitanchoti iyape bollara de7oosona; issi issi kiitanchuwas usupun qefeti de7oosona; nam7u qefetan ba som7uwa kammees; nam7u qefetan ba tohuwa kammees; nam7u qefetan piradhees.
ISA 6:3 Enti issoy issuwako, “Geeshshay, geeshshay, geeshshay, Ubbaafe Wolqaama Godaa! Sa7a ubbay iya bonchuwan kumis” yaagosona.
ISA 6:4 Enta girsa waasuwa gaason Xoossa keethaa baasoy qaaxis; Xoossa keethay cuyan kumis.
ISA 6:5 Yaatin, “Taani mettershay tunida asaa giddon de7ayis; ta mettershayka tuna. Taani Kawa, Ubbaafe Wolqaama Godaa ta ayfen be7ida gisho, tana ayye! Ta dhayas!” yaagas.
ISA 6:6 He kiitanchotape issoy yarsho bessaafe bonqo tama qaphera ekidi piradhishe taako yis.
ISA 6:7 Bonqo taman ta mettersha bochidi, “Heko; ha bonqo tamay ne mettershay bochida gisho ne naaqoy neepe kichis; ne nagaray atto geetetis” yaagis.
ISA 6:8 Hessafe guye Goday, “Oona kiitto? Nuus oone baanay?” yaagishin si7as. Taani, “Heko, tana kiitta, taani baana” yaagas.
ISA 6:9 Goday taako, “Bada ha asaa, ‘Hinte sissi si7eeta, shin akeekeketa; hinte xeelleta, shin demmeketa’ ” yaagada oda.
ISA 6:10 Kaallidika, “Ha asaa wozanaa muumisa; enta haythaa tullisa; enta ayfiya gooza. Hessi hanonna ixiko, enti banta ayfiyan be7idi, banta haythan si7idi, banta wozanan akeekidi, taako simmana; zaaridi paxana” yaagis.
ISA 6:11 Taani, “Abeeti Godaw, hessi hananay awude gakanaasee?” yaagas. I zaaridi, “Katamati laaletana gakanaw, keethati kaysa gidana gakanaw, biittay polo dogetana gakanaw;
ISA 6:12 asaa haaho bessi yeddana gakanawunne biittay asi bayna mela biitta gidana gakanaasa.
ISA 6:13 Tammu asaape issi asi biitta bolla attiko, ika dhayana. Qanxin attida wolanne caca duruma mela gidana; he durumay geeshsha koche gidana” yaagis.
ISA 7:1 Ooziyana na7ay Iyo7atama na7ay Akaazi, Yihudan kawotida wode Araame kawoy Razininne Isra7eele kawoy Ramala na7ay Faaquhey Yerusalaame olanaw yidosona; shin xoonanaw danda7ibookona.
ISA 7:2 Araame biittay Efreema biittara issife olas caaqidaysa Yihuda kawoy si7ida wode, woran de7iya mithaa carkoy qaatheysada, Akaaza wozanaynne asaa wozanay dagaman qaaxis.
ISA 7:3 Goday Isayaasako, “Neeranne ne na7aa Sheer-Yasuubara Akaazara gahetanaw biite; hinte iya ma7o meecciya goshshaako efiya ogiya matan qommo baggan de7iya haatha olaa wursethan hinte iya demmana.
ISA 7:4 Iyaw haysada yaagada oda; ‘Naageta; wopu ga; yayyofa. Ha nam7u kawoti tamape attidi cuyaa duruma mela gidiya gisho, Araame kawa Razinanne Ramala na7aa hanquwas yayyofa; ne wozanay dagammofo.’
ISA 7:5 Araame biittay, Efreema asaaranne Ramala na7aara ne bolla iitabaa maqetidosona.”
ISA 7:6 Enti “Ane Yihuda olidi oykoos; iya mentherethidi nu giddon shaaki ekidi, Xabeela na7aa kawothana yaagosona” yaaga.
ISA 7:7 Gidoshin, Ubbaa Haariya Goday, “Ha enta maqoy minnenna; enta zoretay poletenna.
ISA 7:8 Damasqoy Araame huuphe; kawoy Razini Damasqo huuphe. Usupun tammanne ichashu laytha giddon Efreemi laaletidi kawotethi gidonna attana.
ISA 7:9 Efreema huuphey Samaariya; Ramala na7ay, Faaquhey Samaariya huuphe. Hinte, hinte ammanuwan minnonna ixiko, eqanaw danda7eketa” yaagees.
ISA 7:10 Qassika Goday Akaazako,
ISA 7:11 “Bolla saluwape woyko garsa sa7aape Goday, ne Xoossay new issi malla immana mela oycha” yaagis.
ISA 7:12 Shin Akaazi, “Oychike; oychada Godaa paacike” yaagis.
ISA 7:13 Yaatin, Isayaasi, “Hinteno, Dawita soo asaw, si7ite! Hinte asa danda7a paaceysi ay guuxin, qassi ta Xoossa danda7a paacetii?
ISA 7:14 Hessa gisho, Goday ba huuphen hintew malla immana; geela7iya qanthatada adde na7a yelana; iya sunthaaka Amanu7eela gada xeegana.
ISA 7:15 I, iitaa ixonne lo77o dooro eriya wode meqa maathinne oysi maana.
ISA 7:16 Shin na7ay iita ixonne lo77uwa dooro eranaape sinthe, neeni yayiya nam7u kawota biittati baysatana.
ISA 7:17 Efreemi Yihudape shaaketoosape doomin haniboonna meto wode Goday ne bolla, ne asaa bollanne ne aawa soo asaa bolla ehana; I ehanayka Asoore kawa” yaagis.
ISA 7:18 He gallas Goday, haaho shaafa gaxan de7iya Gibxe udunxetanne Asoore mathata suyqidi xeegana.
ISA 7:19 Yaatin, enti ubbay yidi, mela biitta zangaaran, shucha gongolon, agunthi de7iya buureninne haatha ollatan uttana.
ISA 7:20 He gallas Goday Efraxiisa shaafa hefintha baggafe garxida shiggiriyan, Asoore kawan, hinte huuphiya buluusana; hinte ikisiyanne hinte buuchaa meedana.
ISA 7:21 He gallas issi asas issi miizinne nam7u deesha xalaali attana.
ISA 7:22 Gidoshin, enta maathay daro gidiya gisho I meqa maathi ustana; he biittan attida asa ubbay meqa maathinne eessi maana.
ISA 7:23 He gallas issi mukulu biran washetiya mukulu woyne tohoti de7iya bessa ubban kinchoteynne agunthi dolana.
ISA 7:24 Biitta ubban kinchoteynne agunthi kumida gisho, asay yaa biya wode donge oykidi baana.
ISA 7:25 Kase konten oothida zumatan ha77i kinchoteynne agunthi kumida gisho yayyidi, issi asika yaa beenna. Shin meheynne dorsi heemetiya bessi gidana.
ISA 8:1 Goday taako, “Gita saleeda ekada, ‘Di7anaw ellesa! Bonqanaw dirga!’ yaagada nabbabetiya pidalen xaafa.
ISA 8:2 Kahiniya Urayanne Baraka na7aa Zakariyasa ammanetiya marka oothada taani xeegana” yaagis.
ISA 8:3 Hessafe guye, taani nabe gidida ta machera aqas; iya qanthatada adde na7a yelasu. Goday taako, “Iya suntha, ‘Mahaar-Shalal-Hash-Baaz’ yaagada xeega.
ISA 8:4 Na7ay, ‘Abbo, immo’ gidi xeessi eranaape sinthe Asoore kawoy, Damasqo duretethaanne Samaariya shaluwa ekidi baana” yaagis.
ISA 8:5 Qassika Goday taako haysada yaagis.
ISA 8:6 “Ha asay loddara goggiya Salihoome haatha ixidi, Razinanne Ramala na7aa ufaytidi ekidosona.
ISA 8:7 Hessa gisho, Goday minonne daro gidida Efraxiisa haatha, Asoore kawa, iya olanchotara ehana hanees. I haathi kixidi kumeysada gaxaa ubbaa ma7idi goggana.
ISA 8:8 Di77ishe Yihuda gelana; kixay qoodhe gakanaw kumidi yaara kanthana.” Abeeti Amanu7eela, iya qefiya micethay ne biitta ubbaa ma7is.
ISA 8:9 Hinteno kawotethato, issife olas shiiqite, shin hinte dhayana. Haaho biittan de7iya asato, si7ite; olas giigite; shin hinte liiqana! Ee, olas giigite; hinte wurana.
ISA 8:10 Xoossay nuura de7iya gisho, olas maqetite, shin hinte maqoy kanthenna; halchite, shin hinte halchoy halana.
ISA 8:11 “Goday ba mino kushiya ta bolla wothidi, ta ha asaa ogiyan boonna mela taw minthidi odis.
ISA 8:12 Ha asaa maqo ubbaa maqo goopite; enti yayyiyaba Yayyofite; dagammopite.
ISA 8:13 Hinte geeshshi gaanaw bessey Ubbaafe Wolqaama Godaa; iyaw yayyanawunne dagammanaw bessees.
ISA 8:14 I, geeshsha bessi gidana; shin Yihudasinne Isra7eeles I, dhube shuchinne kundisiya zaalla gidana. Yerusalaamen de7iya asaas I gitenne xihe gidana.
ISA 8:15 Entafe daroti dhubetana; kundidi me77ana; xihen oyketidi di7etana” yaagis.
ISA 8:16 Ta odeysa naaga; ta tamaareta giddon higgiya attama.
ISA 8:17 Taani ba som7uwa Yayqooba zerethafe genthiya Godaa naagana; iyan ammanetana.
ISA 8:18 Tananne taw Goday immida nayta be7ite. Nuuni Xiyoone deriyan de7iya Ubbaafe Wolqaama Godaape Isra7eele asaas mallanne malaata.
ISA 8:19 “Suyqishenne kalkashishe odiya marotanne moytilleta oychite” yaagidi hintena zoriya asay de7oosona. De7on de7eysatas hayqidaysata oycheysafe asay banta Xoossaa oychanaw bessennee?
ISA 8:20 Higgiyanne Godaa marka si7ite! He asati ha qaalada haasayonna ixiko entaw sa7i wontenna.
ISA 8:21 Asay waayetishenne koshatishe biitta bolla toylatana. Enti koshatida wode yilotidi, pude salo xeellidi banta kawanne banta Xoossaa baaddana.
ISA 8:22 Sa7aa duge xeelliya wode waaye, dhumanne yashshiya caagana be7ana; enti sakana dhuman holetana.
ISA 9:1 Gidoshin, waayetidaysatas hizape guye dhumenna. Beni wode Goday Zabloona biittanne Niftaaleme biitta kawushis. Shin sinthafe Medetiraane Abbaa ogiyan de7iya biittanne Yordaanose shaafape hefinthan de7iya Ayhude gidonna asay de7iya Galila biitta I bonchana.
ISA 9:2 Dhuman hemetiya asay wolqaama poo7o be7is; qassi hayqo dhuman de7eysatas poo7oy poo7is.
ISA 9:3 Neeni kawotethaa darsadasa; enta ufaysaa gujadasa. Asi kathi shiishiya wode ufayteysada woyko di7uwa shaakidi ekiya wode ufayteysada ne sinthan ufaytana.
ISA 9:4 Neeni Midiyaame biitta xoonidaysada enta deexo qambara, enta gannas giigida xam7anne enta un7etheyisata gumba menthadasa.
ISA 9:5 Olanchota caammaynne suuthan munuqetida ma7o ubbay taman xuugetana; tamas oysetho gidana.
ISA 9:6 Nuus na7i yeletis! Adde na7i nuus imetis! Kawotetha maati iya hashiyan gidana; iya sunthay, “Malaalisiya Zorancho, Wolqaama Xoossa, Merinaa Aawa, Sarotethaa Halaqaa” geetetana.
ISA 9:7 Iya kawotethaa dalgatethaasinne iya sarotethaas zawi baawa. Hachife doomidi, merinaa gakanaw suure pirdaaninne xillotethan minthanawunne essanaw Dawita araataninne iya kawotethan I kawotana. Ubbaafe Wolqaama Godaa qanaatey haysa oothana.
ISA 9:8 Goday Yayqooba zeretha bolla pirda qaala kiittin, Isra7eele kawotethaa bolla wodhis.
ISA 9:9 Efreema asayinne Samaare katamaa asay haysa oothiday Godaa gideysa erishe, otoroninne ceeqon,
ISA 9:10 “Xuubepe keexetida keethati laaletidosona; shin nu zaaridi masetida shuchan keexana; boobba mithati qanxetidosona; shin nu enta bessan zigata laammana” yaagidosona.
ISA 9:11 Shin, Xoossay Rasoona morketa minthana; enta bolla ehana; entara eqetiya morketa enta bolla denthethis.
ISA 9:12 Dolohape Araameta, wulohape Filisxeemeta denthin, enti banta doona dooyidi, Isra7eele mittidosona. He ubban Godaa hanqoy simmibeenna; iya kushey dendida bessan de7ees.
ISA 9:13 Gidoshin, asay bantana shocidaysako simmibokona; Ubbaafe Wolqaama Godaa koybookona.
ISA 9:14 Hessa gisho, issi gallas Goday Isra7eelepe huuphenne goynaa, zamba daashshanne maqa qanxana.
ISA 9:15 Cimatinne bonchetidaysati huuphe; wordo tamaarsiya nabeti goyna.
ISA 9:16 Ha asaa kaaletheysati balethoosona; enta kaalleysatika baloosona.
ISA 9:17 Hessa gisho, Goday enta na7atethatan ufaytenna; yi7o naytasinne am7etas qadhetenna. Asi ubbay iitanne Xoosse eronnaysa gidana; ubbay ba doonan iitabaa odetees. He ubban Godaa hanqoy simmibeenna; iya kushey dendida bessan de7ees.
ISA 9:18 Tami kinchotenne agunthi meysada iitatethi xuuggees; siketida wori xuugetin, cuyay tuussada keyeysada keyees.
ISA 9:19 Ubbaafe Wolqaama Godaa hanquwan biittay xuugetana; asika tama oysethiyaba gidana; oonika ba ishaa ashshanaw qopenna.
ISA 9:20 Enti ushacha baggara bonqana, shin koshatana; enti haddirsa baggara maana, shin kallokona; enti banta yelida nayta maana.
ISA 9:21 Minaasey Efreema, Efreemika Minaase maana; enti issife gididi Yihuda biitta morkana. He ubban Godaa hanqoy simmibeenna; iya kushey dendida bessan de7ees.
ISA 10:1 Iita higgenne un7ethiya awaajo kesseyisata ayye!
ISA 10:2 Hessan enti manqota, am7etanne yi7ota pirdaa geellayosona; am7etanne yi7ota aquwa bonqoosona.
ISA 10:3 I, haaho biittafe yaa metuwan seeriya wode hinte waananee? Maado demmanaw oodeko baqatanee? Hinte shaluwa awun qottanee?
ISA 10:4 Hinte di7etida asaara gooshetana; hayqida asaa giddon zin7ana. He ubban Godaa hanqoy simmibeenna; iya kushey dendida bessan de7ees.
ISA 10:5 Goday haysada yaagees; “Ta yiluwas pirconne ta hanquwas xam7a gidida Asoore biitta ayye!
ISA 10:6 Enta shaluwa di77anaadanne bonqanaada; oge urqada enta yedhanaada Xoosse eronna kawotethaa bolla taani Asoore kiittana; tana hanqethida asaa bolla iya yeddana.
ISA 10:7 Shin Asoore kawoy haysa halchibeenna; iya wozanay haysa qopibeenna. I qopiday daro kawotethata dhaysanaasa.
ISA 10:8 Hessa gisho, I yaagidi ceeqetees; ‘Ta toora moconati ubbay kawota gidokonaayee?’
ISA 10:9 Kalinoy Karkamisha katamaa mela gidenneyee? Hamaati Arfada katamaa mela gidenneyee? Samaarey Damasqo katamaa mela gidenneyee?
ISA 10:10 Yerusalaameninne Samaaren de7iya eeqatape dariya eeqata goyinniya kawotethata seeranaw taani ta kushiya yeddas.
ISA 10:11 Taani Samaare katamaa bollanne iya eeqa misileta bolla oothidaysada Yerusalaame katamaa bollanne iya eeqa misileta bolla oothikinaayee?” yaagis.
ISA 10:12 Goday Xiyoone deriya bollanne Yerusalaame bolla ba oosuwa ubbaa polidaape guye, Asoore kawa iya otoruwasinne ceequwas iya seerana.
ISA 10:13 Asoore kawoy haysada yaagees: “Ta kushe minotethan, ta cincatethaaninne ta akeekan haysa oothas. Taani kawotethata giddon de7iya zawata shoddas; enta shaluwa bonqas; ta wolqan kawotethata araatape wodhisas.
ISA 10:14 Asi kafo keethan kushe yeddeysada taani kawotethaa shaluwan ta kushiya yeddas. Qassi dogetida phuuphuleta shiisheysada taani biitta ubbaa shiishas. Ba qefiya qaathiday woyko doona phuqiday woyko waassiday issoyka baawa” yaagis.
ISA 10:15 Kalti baara qanxiya addiya bolla dendanaw danda7ii? Woyko magaazey banan go7etiya addiya bolla otoranaw danda7ii? Kushey denthonna xam7i bana baw denthii? Guufey oykiya asi bayna baw hemetii?
ISA 10:16 Hessa gisho, Goday, Ubbaafe Wolqaama Xoossay, iya mino olanchota bolla gilqisiya harge yeddana. Iya bonchuwa laxo tami maana.
ISA 10:17 Isra7eele Poo7oy tama gidana; enta Geeshshay laco gidana. Iya agunthanne iya kinchotiya issi gallas xuuggananne maana.
ISA 10:18 Hargey ase gilqiseysada Goday ba wora mitha bonchuwanne ba aradda biitta bonchuwa dhaysana.
ISA 10:19 Woran attiya mithay daro guuthi gidiya gisho, hari attoshin guutha na7ika taybidi wursana.
ISA 10:20 He wode Isra7eelepenne Yihudape attida guuthati bantana shocidaysan gidonashin, tuma Godan, Isra7eele Geeshshan zempana.
ISA 10:21 Attida Yihuda asay Wolqaama Xoossaako simmana.
ISA 10:22 Neno Isra7eele, neeni abba gaxan de7iya shafiya mela darikoka, attida guuthata xalaali simmana. Xillotethi kumida dhayoy iya asaas awaajetis.
ISA 10:23 Ee, Goday, Ubbaafe Wolqaama Xoossay sa7a ubbaa bolla ehanaw qopida dhayuwa ehana.
ISA 10:24 Hessa gisho, Goday, Ubbaafe Wolqaama Xoossay haysada yaagees: “Xiyoonen de7iya ta asaw, Gibxeti oothidaysada Asooreti hintena xam7an shociya wodenne banta gumba hinte bolla denthiya wode yayyofite.
ISA 10:25 Guutha wodepe guye, taani hinte bolla hanqetidaysa aggana; hessafe guye, ta hanqoy enta dhaysanaw dendana” yaagees.
ISA 10:26 Ubbaafe Wolqaama Goday Oreeba shuchaa matan Midiyaameta shocidaysada enta lisson shocana. I Gibxen oothidaysada ba xam7a abba bolla denthana.
ISA 10:27 He gallas, iya toohoy hinte hashiyape wodhana; iya qambaray hinte morgefe kichana. Hinte ordida gisho qambaray meqana.
ISA 10:28 Morkiya wotaadarati Gaye katamaa gelidosona; Migroonara kanthidosona; banta ola miishiya Mikmaasa wothidosona.
ISA 10:29 Enti ogiyara kanthi aadhidi, Geeban aqidosona. Raman de7iya asay kokoridosona; Gib7an, kawa Saa7ola kataman de7iya asay baqatidosona.
ISA 10:30 Galima asaw, waaso goochite! Laysha asaw, si7ite! Anatoota asaw, oysha zaarite!
ISA 10:31 Madimana asay baqatidosona; Gebima asay banta shempuwas qosetidosona.
ISA 10:32 Morkiya wotaadarati hachi Nooban de7oosona; enti Xiyoone zuma bolla eqidi, banta kushiya qaathidi, Yerusalaame katamaa babisoosona.
ISA 10:33 Heko, Goday, Ubbaafe Wolqaama Xoossay, tasheta gita wolqan shaqana; aduqida mithati qanxetana; dhoqa gidaysati kawuyana.
ISA 10:34 Goday siketida wora kallotana gakanaw qanxana; Libaanosey Wolqaamaa sinthan kundana.
ISA 11:1 Isseye durumay aacana; iya xaphuwape ayfiya tashey keyana.
ISA 11:2 Godaa Ayyaanay iya bolla shempana; cincatethaanne akeeka Ayyaanay, zoriyanne wolqaa Ayyaanay, eratethaanne Godaas yayiya Ayyaanay, iya bolla shempana.
ISA 11:3 Godaas yayyidi ufaytees; ba ayfey be7idaban coo pirdenna; woyko ba haythay si7idaban coo kuuyenna.
ISA 11:4 Shin I, manqotas xillotethan pirdana; sa7an de7iya metootanchotas suuretethan kuuyana. I ba inxarsaa xam7an sa7aa shocana; ba doona shempuwan iitata wodhana.
ISA 11:5 Xillotethi iya xeessa danco gidana; ammanetethi iya miyaas saqe gidana.
ISA 11:6 Suudhumey dorsa marara issife daana; maahey deesha marara issife zin7ana. Mari gaammo butalera issife hemetana; guutha na7i enta heemmana.
ISA 11:7 Miizinne babanthi issife heemetana; enta marati issife zin7ana; gaammoy boorada kale maana.
ISA 11:8 Dhammiya na7i shoosha ollan kaa7ana; dhanthi duuxida na7i wodhiya shoosha ollan ba kushiya yeddana.
ISA 11:9 Ta geeshsha zumaa bolla oonika qohetenna woyko dhayenna. Abbi haathan kumeysada sa7i Godaa eron kumana.
ISA 11:10 He wode Isseye xaphoy asaas malla gidana; kawotetha ubbay iya koyana; I de7iya bessay bonchetana.
ISA 11:11 He gallas Goday attida ba asaa, Asoorepe, Gibxefe, Phatroosape, Tophefe, Elaamape, Sana7oorepe, Hamaatapenne yuushoy abban teqetida biittafe nam7antho ehanaw ba kushiya zaaridi yeddana.
ISA 11:12 I kawotethatas malla dhoqu oothidi denthana; Isra7eelepe laaletidaysata issife gathana; Yihudape sa7aa oyddu baggan zeretidaysata shiishana.
ISA 11:13 Hessafe guye, Efreema qanaatey iyape kichana; Yihuda morketethay iyape qanxetana. Efreemi Yihuda qanaatenna; Yihudi Efreema morkenna.
ISA 11:14 Enti wuloha baggan de7iya Filisxeeme biitta bolla gupi wodhana; enti doloha baggan de7iya asaa bonqana. Enti Edoome bollanne Moo7abe bolla banta kushiya wothana; Amooneti entaw haaretana.
ISA 11:15 Goday Gibxe matan de7iya Zo7o Abbaa melisana; ba melsiya carkuwara ba kushiya Efraxiisa shaafa bolla qaathana. Yaatidi asay mela bessaara pinnana mela laapun guutha shaafa kessidi shaakana.
ISA 11:16 Isra7eele asay Gibxe biittafe keyiya wode ogey keydaysada, attida iya asay, Asoore biittafe simmiya ogey keyana.
ISA 12:1 He wode hinte haysada yaagidi yexana. “Godaw, neeni ta bolla hanqetadasa; shin ha77i ne hanquwafe simmadasa. Tana minthethadasa; hessa gisho, taani nena galatayis.
ISA 12:2 Xoossay ta atotetha; taani iyan ammanetayis, yayike. Goday Xoossay, ta wolqaanne yethaa; I ta atotetha” yaagana.
ISA 12:3 Atotetha pultuwafe hinte haathe ufaysan duuqana.
ISA 12:4 He gallas hinte yaagidi yexana: “Godaa galatite! Iya sunthaa xeegite. Iya oosota kawotethata ubbaas odite; I gita gideysa awaajite.
ISA 12:5 Goday gita ooso oothida gisho, iyaw yexite; haysi sa7a ubban ereto.
ISA 12:6 Isra7eele Geeshshay hinte giddon gita gidiya gisho, Xiyoone asaw, ililite, ufaysan yexite!” yaagana.
ISA 13:1 Amoxe na7ay, Isayaasi Goday Babilooneba qoncisin be7idaysi haysa.
ISA 13:2 Aykoy bayna deriya bolla malla essidi, hinte qaala dhoqu oothidi waassite; enti halaqata pengiyara gelana mela wuttite.
ISA 13:3 Taani hanqetidaysata seerana mela ta geeshshata kiittas; ta xoonoy ufaysiya ta wolqaamata xeegas.
ISA 13:4 Daro asay wocameysada deriya huuphiyan de7iya wocamaa si7ite! Qassi kawotethati issife shiiqidi palamiya palama si7ite! Ubbaafe Wolqaama Goday olanchota olas giigisis.
ISA 13:5 Godaynne iya hanqo ola miishey biitta ubbaa dhaysanaw haaho biittafe, salo gaxape yoosona.
ISA 13:6 Godaa gallasay matida gisho yeekite! He gallasay Ubbaafe Wolqaama Xoossaa matape dhaysanaw yaana.
ISA 13:7 Hessa gisho, yashshan enta kushey doccana; asa ubbaa wozanay til7ana.
ISA 13:8 Enti dagammana; iqethinne un7etethi enta oykana. Yelo keyida maccasada enti inxaxana. Enti dagammidi issoy issuwa xeellana; enta som7oy bido gidis.
ISA 13:9 Heko biitta baysa kessanawunne iyan de7iya nagaranchota dhaysanaw yiloninne suullida hanqon Godaa gallasay yaana.
ISA 13:10 Salo xoolintotinne xoolinto koceti banta poo7uwa diggana; doliya away dhumana; ageenayka ba poo7uwa immenna.
ISA 13:11 Goday, “Taani ha sa7aa iya iitatethaa gisho, iitataka enta nagara gisho seerana. Taani otoranchota otoruwa shaarana; iitata ceequwa kawushana.
ISA 13:12 Attidaysati walahi bayna worqafe al7o gidana; asa na7i Ofira worqafe aadhidi boncho gidana.
ISA 13:13 Hessa gisho, Ubbaafe Wolqaama Godaa hanquwan, iya hanquwa suulaa gallas, taani salota kokorsana; sa7aaka iya bessaafe qaathana” yaagees.
ISA 13:14 Shankafe baqatiya gaarada woyko heemmiya asi bayna dorsa wudeda asi ubbay ba asaako simmana; ubbay ba biitta baqatana.
ISA 13:15 Bentida oonika cadetana; oyketida oonika mashshan hayqana.
ISA 13:16 Enta guutha nayti enta sinthan busetana; enta keethay bonqetana; enta macheta hara asi iissana.
ISA 13:17 Bira koyonnanne worqan ufaytonna Meedona asaa taani enta bolla denthana.
ISA 13:18 Enta dongey na7atethata wodhana; yooga naytaka maarokona; enta ayfey naytas qadhetenna.
ISA 13:19 Kawotethatas boncho, ba asaas alleeqo gidida Babiloone biitta, Goday Sodoomedanne Gamoorada shiri yeggana.
ISA 13:20 He biittan asi uttenna; woyko yeletaape yeletaa gakanaw yan asi deenna. Arabe asay yan banta dunkaaniya tolokona; dorse heemmeysatika yan banta wudiya heemmokona.
ISA 13:21 Shin bazzo do7ati yan aqana; workanati enta keethaa kumana; guttoti yan daana; yanchoti yan keexana; bazzo deeshati yan gupana.
ISA 13:22 Enta keethatan godarey waassana; enta kawo gadhon workanati boccana. Iya wodey matis; iya gallasayka gam7enna.
ISA 14:1 Goday Yayqoobas qadhetana; Isra7eele zaaridi doorana; enta, enta buzo biittan wothana. Betanchoti entara issifana, Yayqooba soo asaara oyketana.
ISA 14:2 Kawotethati enta, enta biitta ehana. Isra7eele asay entana maccanne adde aylle oothidi Godaa biittan haarana. Enti bantana di7idaysata di7ana; bantana haaridaysata haarana.
ISA 14:3 Goday hintena, hinte un7aafe, metuwapenne hinte haaretida iita aylletethaafe shempisiya wode,
ISA 14:4 hinte Babiloone kawa bolla haysada yaagidi qelqisana. Un7etheysi waanidi aggidee? Iya hanquwa suulay waanidi attidee?
ISA 14:5 Goday kawotethata xam7aanne haareyisata gumba menthis.
ISA 14:6 Enti asaa zawi bayna hanquwan shocidosona; bantana xoonidaysata qanxonna un7ethishe de7idosona.
ISA 14:7 Shin biitta ubbay shempidi de7is; ufaysan yexis.
ISA 14:8 Hari attoshin, Libaanose zigatinne xiiddati kawa kundethan ufaytidi, “Neeni kawuyada kundidaape guye, nuna qanxanaw yey baawa” yaagosona.
ISA 14:9 Neeni yaa wode, Si7ooley nena mokanaw giigis; I kase biitta kaalethida asaa moytilleta, nena sarothana mela denthethees; qassi kase kawo gidida ubbaa enta araatape denthidi essees.
ISA 14:10 Enti ubbay haysada yaagana. “Heko neka nuuda wolqa dhayadasa; nu mela gidadasa.”
ISA 14:11 Kase diithi diixin sabetiya ne bonchoy ha77i Si7oole gelis. Ollathi neeni zin7iya hiixa; guxuney neeni ma7iya afila gidana yaagana.
ISA 14:12 Neno wonta na7aw, guura bakalaw, salope waana kundadii? Neno kawotethata kawushidayso waana qanxetada sa7an wodhadii?
ISA 14:13 Neeni ne wozanan, “Taani salo keyana; ta kawotethaa araata Xoossaa xoolintotape bollara wothana; taani pudeha bagga gaxan shiiqo deriya huuphen uttana.
ISA 14:14 Taani shaarati de7iya dhoqa bessaafe bolla aadhana; taani, tana Ubbaafe Dhoqa Xoossaa daanisana” yaagadasa.
ISA 14:15 Shin neeni Si7oolen, hirki ciimmo ollan duge yegetadasa.
ISA 14:16 Nena be7idaysati, “Biitta qaathidaysi, kawotethata kokorsidaysi,
ISA 14:17 sa7aa biitta bazzo kessidaysi, sa7an de7iya katamata shiri yeggidaysi, ba qasho asata yeddonna ixidaysi haysee?” yaagidi tishshi oothidi xeellana.
ISA 14:18 Kawotethata kawoti ubbay ba duufon duufon bonchon zin7ana.
ISA 14:19 Shin neeni ixetida tasheda ne duufuwape gaxa holettadasa. Ne ahay mashshan hayqida ahaninne ollan de7iya shuchatako duge wodhidaysata ahan kametis. Neeni tohon yedhetida aha mela gidadasa.
ISA 14:20 Neeni ne biitta dhaysida gishonne ne asaa wodhida gisho entara moogetaka. Iitaa sunthay kochay merinaw xeegetofo.
ISA 14:21 Enti dendidi biitta laattonna; sa7a ubbaa katama xalaala oothonna mela enta aawata nagaraa gisho, iya nayta wodhanaw giigisite.
ISA 14:22 Taani “Enta bolla dendana; enta sunthaa, enta kochaanne enta yeletaa Babiloonepe dhaysana.
ISA 14:23 Taani Babiloone quxarey de7iya bessinne haathi eelliya bessi oothana; taani gado piton iya pittana” yaagees Ubbaafe Wolqaama Goday.
ISA 14:24 Ubbaafe Wolqaama Goday haysada yaagidi caaqis: “Taani halchidaysada hanana; taani qopidaysada poletana.
ISA 14:25 Taani Asoore asaa ta biittan mentherethana; ta deriya bolla iya yedhana. Iya qambaray enta bollafe, iya toohoy enta hashiyape kichana” yaagis.
ISA 14:26 Sa7a ubbaas qofetida qofay haysa; kawotethata ubbaa bolla micetida kusheyka haysa.
ISA 14:27 Ubbaafe Wolqaama Goday haysa qopida gisho iya digganaw danda7ey oonee? Iya kushey micetis; hessa guye zaaranaw danda7ey oonee?
ISA 14:28 Kawoy Akaazi hayqida laythi odetida qaalay haysa:
ISA 14:29 Hinteno Filisxeeme asaw, hintena shocida xam7ay me77ida gisho ufaytofite. He shoosha kochaafe hasoy keyana; iya kochay qassi xongetiya shooshi gidana.
ISA 14:30 Manqofe manqoti ta qooruwan heemetana; metootanchoti wopu gidi zin7ana. Shin taani ne kochaa koshan wursana; neepe attida guuthata wodhana.
ISA 14:31 Neno pengiyaw, yeeka! Neno katamaw, waassa! Hinteno Filisxeeme asaw, hinte ubbay hirgan til7ite! Pudeha baggafe cuyi keyidi yees; he cugaape duuxidi guye attey baawa.
ISA 14:32 He kawotethay kiitida asatas woygidi zaaranee? Goday Xiyoone keexin, qohetida asay I giddon qosetidi attiya bessi demmis.
ISA 15:1 Moo7abe biittaba Goday odida qaalay haysa: Moo7aben de7iya Era katamaynne Qiira katamay issi qamma laaletidi dhayidosona.
ISA 15:2 Diboonan de7iya asay banta eeqa keethan yeekanaw dhoqa bessi keyidosona. Moo7abe asay Nebosinne Medebaas yeekees. Huuphe ubbay buluusetis; buuchi ubbay meedetis.
ISA 15:3 Oge bolla kayo ma7o ma7oosona; pooqe bollanne dabaaba ubban yeekoosonanne afuthi dharcoosona.
ISA 15:4 Haseboona asaynne Elaala asay waassoosona; enta waasoy Yahaaxa gakanaw si7etees. Hessa gisho, olas dancida Moo7abe wotaadareti banta qaala dhoqu oothidi waassidosona; enta shempoy kokoris.
ISA 15:5 Taani Moo7abes wozanape yeekas; iyan de7iya asay Zo7aarenne Egilaat-Shelisha katamaa baqatis. Enti Luhita ogiyan yeekishe boosona; baggati qassi Horonayma biya ogiyan, banta dhayuwa gisho waaso goochidosona.
ISA 15:6 Namirima haathati melidosona; maatay miccis; aacay shullis; cil7obay aybika baawa.
ISA 15:7 Hessa gisho, enti banta shiishida shaluwanne minja tooki ekidi, Ahaya mithay de7iya zangaarape hefinthi efoosona.
ISA 15:8 Moo7abe heera ubbay waaso xalaala gidis; enta waasoy Eglaamanne Bi7eer-Elime gakanaw si7etees.
ISA 15:9 Dimoona haathati suuthi gididosona; shin, ha77ika taani Dimoona katamaa bolla kaseysafe aadhiya meto ehana. Moo7abepe kessi ekidi baqateyisata bollanne he biittan attidaysata bolla gaammo yeddada wursana.
ISA 16:1 Moo7abe asaw, bazzo biya ogiyan de7iya Seelape urge dorsata imota oothidi, Yerusalaamen de7iya biitta haareysas yeddite.
ISA 16:2 Moo7abe maccasay banta keethafe goodetida kafotada Arnoona shaafa pinniya bessan laaletana.
ISA 16:3 Moo7abe asay Yihuda asaako, “Nuna zorite; nuna nu morketape ashshite; seeta gallasan mitha kuyada hinte kuyaa nu bolla kuyayte. Goodeteyisata qosite; qosetidaysata aathidi immopite.
ISA 16:4 Moo7abepe goodeteysati hinte giddon de7o; enta dhaysanaw koyeysatape qosetidi attiya besse gidite. Enta un7etheysati wuridosona; enta dhayoy attis; otoranchoti biittafe dhayidosona.
ISA 16:5 Hessafe guye, siiqon issi kawotetha araatay eqana; he araatan, Dawita kochaafe issi ammanetiya kawoy uttana. I suuretetha koyana; xillotethaa oothanaw ellesana” yaagana.
ISA 16:6 Yihuda asay, “Moo7abe asay ay mela otoriyako nu enta otoruwa si7ida; enta ceequwanne enta cashshaa si7ida; shin enta otoroy hada” yaagana.
ISA 16:7 Hessa gisho, Moo7abey baw yeeko; asi ubbayka Moo7abes yeeko. Qir-Hereesan hinte de7iya wode mida lo77o kathaa hassayishe yeekite.
ISA 16:8 Haseboona goshshaynne Sebama woyne gadey dhayis. Kawotethata halaqati yedherethida tasheti mela biitta kanthidi Ya7izeera gakidosona; enta aacay daayidi, abba pinnis.
ISA 16:9 Taani Ya7izeera katamaas yeekidaysada Sebama katamaa woynetas yeekayis. Haseboona katamaasine El7aala katamaas, taani ta afuthaa gussayis. Hinte mithaa ayfiyanne hinte bootida kathaa bolla oli dendis.
ISA 16:10 Goshsha gadiyape ufaysinne hashshu guussi eketis. Woyne gadiyan mazmurey yexetenna. Ufaysan woyne gum7iya bessan gum7iya asi baawa; taani gum7eyisata ililsaa dhaysas.
ISA 16:11 Hessa gisho, ta wozanay Moo7abes, ta garsa asatethayka Qir-Hereesas yeekees.
ISA 16:12 Moo7abey ba zumaa bolla keykoka, bana coo daabursees; I woossanaw ba eeqa keethi gelikoka bana aykoka maaddenna.
ISA 16:13 Goday kasetidi Moo7abeba odida qaalay haysa.
ISA 16:14 Shin ha77i Goday, “Une oosancho wodey guutha gideysa mela Moo7abe bonchoynne iya darotethay heedzu laytha giddon wurana. Iyan attiya asay pathonaysatanne wolqi baynayisata gidana” yaagees.
ISA 17:1 Damasqoba Goday haysada yaagees: “Heko, hizape guye Damasqoy katama gidonnoshin, laaletha doore gidana.
ISA 17:2 Aroora katamati asi bayna baysa biitta gidana; yan mehey heemetana; enta yashshiyabay deenna.
ISA 17:3 Efreemape Miixati, Damasqofe kawotethay dhayana; Soorepe attida guuthati Isra7eele asaa bonchuwa mela gidana” yaagees Ubbaafe Wolqaama Goday.
ISA 17:4 “He wode Isra7eele bonchoy qaaretana; iya ordetethay gilqana.
ISA 17:5 Isra7eeley, kathi caki ekidi keyida goshsha gade mela gidana; woyko kathi caki simmin kallotida Raafayme zangaara mela gidana.
ISA 17:6 Shamaho qoqofi simmin, xeeran nam7u woyko heedzu ayfeti atteysada woyko issi yangiya bolla oyddu woyko ichashu ayfeti atteysada Isra7eelepe guuthati attana” yaagees Goday Isra7eele Xoossay.
ISA 17:7 He gallas asay bantana medhidaysako, banta ayfiyaka Isra7eele Geeshshaako zaarana.
ISA 17:8 Enti banta kushen giigisida yarsho bessaako xeellokona; Asheera eeqa misiliyas gidin, ixaane cuyisanaw enti banta kushen medhida yarsho bessa bonchokona.
ISA 17:9 He wode Isra7eele asaa gaason Hiwenne Amoore katamati laaletidaysada enta mino katamati laaletana; baysa gidana.
ISA 17:10 Hinte hintena ashshiya Xoossaa dogideta; hinte qoseti attiya zaalla qopibeketa. Hessa gisho, neeni lo77o mithaanne kare biittafe yida lo77o atakiltiya tokikoka,
ISA 17:11 he gallas enti diccidi gakana mela oothikoka, qassi neeni zerida wontethe enti ciiyakoka neeni ayfe demmaka. Iya bessan paxonna hargenne meto cakana.
ISA 17:12 Heko, abba beetada guummiya daro asaa, qassi wolqaama haathada waassiya kawotethata ayye!
ISA 17:13 Kawotethati daro haathada guummoosona; shin Goday enta seerana. Enti zumaa huuphen de7iya buure carkoy dentheysadanne gotey baana dentheysada enta denthidi haaho bessi laallana.
ISA 17:14 Sa7i qammiya wode enti dagammana; sa7i wontanaape sinthe enti dhayana. Nuna wolqan ekeysatanne bonqeyisata qaaday haysa.
ISA 18:1 Tophe shaafatape hefinthan giiriya qefeti de7iya biitta ayye!
ISA 18:2 He biittay, kiitetiya asata mayre wogolon wothidi Nayle Shaafa bollara kiittees. Hinteno, eeson kiiteteysato, adusenne liiqo asaako, mataninne haahon yashshiya asaako, wolqaamanne xooniya kawotethaako, shaafan enta zaway shaaketida biittako biite.
ISA 18:3 Hinteno, sa7an de7iya ubbato, hinteno, biittan de7eysato, zumaa bolla malli eqiya wode hinte be7ana; moyzey punetiya wode hinte si7ana.
ISA 18:4 Goday taako, “Seeta gallas si77i gidi poo7iya awada, qassi kathi cakiya ageenan, hombiya qamman bentiya aka mela taani si77i gada, ta de7iya bessaafe duge xeellana” yaagis.
ISA 18:5 Kathaa cakiya wodiyape kase, ciishshay qoletidi simmin, woyne teeriya wode oco baacan xeera qanxeysada I he biitta asaa dhaysana.
ISA 18:6 Enti ubbay deriya huuphiyan de7iya, miyaba wochiya kafotasinne do7atas attana. Kafoti balgon, do7ati bonen enta midi shaacana.
ISA 18:7 He wode adussenne liiqo asaape, mataninne haahon yashshiya asaape, wolqaamanne xooniya kawotethaafe, zaway shaafan shaaketida biittafe, Ubbaafe Wolqaama Godaas imoti Xiyoone Zumaa, iya sunthay de7iya bessaa yaana.
ISA 19:1 Gibxe bolla Goday haysada yaagidi odis: “Heko, Goday eesotiya shaara toggidi, Gibxe yees. Gibxe eeqati iya sinthan kokorana; Gibxe asaa wozanay yashshan til7ana.
ISA 19:2 Gibxe asaa issuwa issuwa bolla denthana. Ishay ishaa bolla, shooroy shooruwa bolla, katamay katamaa bolla, kawotethay kawotethaa bolla dendana.
ISA 19:3 Gibxe asay eesho dhayana; taani enta halchuwa hada oothana. Enti banta eeqata, moytillera odeteyisata, bitanchotanne marota zore oychana.
ISA 19:4 Taani wozana mino gidida Gibxe kawa kushen aathada immana; I enta haarana” yaagees Ubbaafe Wolqaama Goday.
ISA 19:5 Nayle Shaafa guuxi guuxi baana; haathayka melana.
ISA 19:6 Dhaway xinqana; Gibxe haathati guuxananne melana; mayreynne maqay shullana;
ISA 19:7 Nayle Shaafa gaxan de7iya cil7obay melana; iya heeran zeretida katha ubbay melananne dhayana.
ISA 19:8 Molo oykeysati kayotana; Nayle shaafan gitenne molo manxaqo yeggiya ubbay yeekananne doccana.
ISA 19:9 Paadetida talbafe liino ma7o ootheysati, bootha ma7o daddiya dorzeti ufaysi qanxana.
ISA 19:10 Piiqeysatinne une oothiya ubbay kayotana.
ISA 19:11 Xo7aane haareysati eeya; Gibxe kawa zoriya cincati pathonna zore zoroosona. Yaatin, hinte Gibxe kawako, “Nuuni cincata nayta; nuuni beni kawota nayta” gaanaw waanidi danda7eetii?
ISA 19:12 Yaatin, ne cinca asati ha77i awun de7oona? Ubbaafe Wolqaama Goday Gibxe bolla oothanaw halchidaba ane enti new odonne nena erisonna.
ISA 19:13 Xo7aane haareysati eeyidosona; Mempisa haareysati cimetidosona. Gibxe zoriya gita asati iya balethidosona.
ISA 19:14 Goday enta giddon eeyisiya ayyaana yeddis; enti mathotida asi ba cooshshan gondoreteysada Gibxey ba ooso ubban gondoretana mela oothidosona.
ISA 19:15 Zamboy woyko boozi, zamba tashey woyko mayrey Gibxen oothanabay aybika baawa.
ISA 19:16 He gallas Gibxe asay maccasa mela gidana. Enti Ubbaafe Wolqaama Goday enta bolla qaathiya iya kushiya be7idi yashshan kokorana.
ISA 19:17 Yihudi Gibxe yashisana; Ubbaafe Wolqaama Goday enta bolla oothanaw qopida qofaa gisho Yihudaba si7iya ubbay yayyana.
ISA 19:18 He gallas Gibxe biittan de7iya ichashu katamati Kanaane qaalan odeteysatanne Ubbaafe Wolqaama Godaas ammanetanaw caaqeyisata gidana. He katamatape issoy, “Awa Katama” geetetidi xeegetana.
ISA 19:19 He wode Gibxe biittas gidduwan, Godaas yarsho bessay giigana; qassi Gibxe biitta zawan Godaas tuussi eqana.
ISA 19:20 Hessi Ubbaafe Wolqaama Godaas Gibxe biittan mallanne marka gidana. Enti bantana un7etheyisata gisho Godaako waassiya wode entaw ashsheysa kiittidi enta ashshana.
ISA 19:21 He wode Goday Gibxe biittan eretidaysa gidana; Gibxe asay he gallas Godaa erana. Yarshonne katha yarsho eki yidi iya goyinnana. Enti Godaas qangananne banta qangetha gathana.
ISA 19:22 Goday Gibxe biitta shocana; iyo zaaridi pathana. Enti Godaako simmana; I enta woosa si7idi pathana.
ISA 19:23 He gallas Gibxefe Asoore gakanaw dalga ogey keyana; Asoore asay Gibxe, Gibxe asay Asoore simeretana; Gibxe asay Asoore asaara issife goyinnana.
ISA 19:24 He gallas Isra7eeley Gibxeranne Asoorera heedzantho biitta gididi, sa7aas anjo gidana.
ISA 19:25 Ubbaafe Wolqaama Goday enta haysada yaagidi anjana: “Ta ase gidida Gibxey anjeto; ta kushe ooso gidida Assory anjeto; ta laata gidida Isra7eeley anjeto” yaagana.
ISA 20:1 Asoore kawoy Sargooni kiitida toora moconati yidi, Filisxeeme katamaa gidida Ashdooda olidi oykida laythi,
ISA 20:2 Goday Amoxe na7aa Isayaasa haysada yaagis: “Ne kayo ma7uwa qaara; ne tohuwape caamma kessa” yaagis. Isayaasi Goday gidaysada oothidi kallonne mela tohon hemetis.
ISA 20:3 Yaatin Goday haysada yaagis: “Ta aylley Isayaasi Gibxenne Tophe bolla gakana metuwas malla gidana mela heedzu laythi kallonne mela tohon hemetis.
ISA 20:4 Hessa gisho, Asoore kawoy, Gibxetas yeella gidana mela Gibxefenne Tophefe di7etida na7atethatanne cimata kallonne mela toho laaggidi efana.
ISA 20:5 Tophen ammaneteysatinne Gibxen ceeqeteysati yayyana; yeellatana.
ISA 20:6 He gallas Abbaa gaxan de7iya asay haysada yaagana: ‘Nuna Asoore kawuwape ashshana gidi ufaysi oothidi entako baqatida asaa bolla haysi gakiko, yaatin, nuuni waanidi kessi ekanee?’ yaagana” yaagis.
ISA 21:1 Abbaa matan de7iya bazzuwas odetida qaala. Nagebe gotey mentherethishe yeysada olanchoy bazzofe, dhayo biittafe yees.
ISA 21:2 Taani issi yashshiya qoncethi be7as; aathid immeysi aathidi immees; di77eysi di77ees. Elama keya! Meedona katamaa oyka! Babilooney gathida waayiya taani diggana.
ISA 21:3 Hessa gisho ta asatethay saketis; maccasi eqeteysada taani un7etas. Taani si7iyabay tana kokorsis; taani be7iyabay tana daganthis.
ISA 21:4 Tana biicoyees; yashshan kokoras; taani ufaysi wothida omarsay un7an laametis.
ISA 21:5 Gibira giigisidosona; uttiya soo giigisidosona; maanawunne uyanaw uttidosona. Hinteno halaqato, dendite! Hinte gondalliya quchite!
ISA 21:6 Goday taako haysada yaagis: “Bada haniyaba wochidi new odiya asi wotha.
ISA 21:7 Parati gaare goochiya wode, harenne gimale toggeyisata be7iya wode, loythidi xeello; akeekidi be7o” yaagis.
ISA 21:8 Wocheysi, “Godaw, gallasinne qamma paci bayna ta shakuwa bolla uttada naagayis.
ISA 21:9 Heko, nam7a nam7a gididi para gaare toggida asati yoosona” yaagis. I qassika, “Babilooney kundis; iya xoossata misileti sa7an kundidi gaacetidosona” yaagidi waassis.
ISA 21:10 Hinteno, wudumman gaacetida ta asaw, Ubbaafe Wolqaama Godaape, Isra7eele Xoossaafe si7idaba taani hintew odayis.
ISA 21:11 Edoomeba Goday haysada yaagis: “Issi asi Sayrepe tana xeegidi, naageyso, sa7i wontanaw ay mali attidee? Naageyso, sa7i geeyanaw ay mali attidee?” yaagees.
ISA 21:12 Naageysi zaaridi, “Sa7i wontana hanees; shin zaari qammana. Hinte oychanaw koyko oychite; simmi yidi oychite” yaagis.
ISA 21:13 Arabe ba Goday haysada yaagees: “Hinteno Daadana zal7anchoto, hinte, hinte caana gimaletara Arabe mela biittan aqana.
ISA 21:14 Hinteno, Teeman biittan de7iya asaw, saamotidaysatas haathe ehite; koshatidaysatas kathi immite.
ISA 21:15 Enti mashshafe, shohope shodetida mashshafe, dafetida dongefenne mino olape baqatoosona” yaagees.
ISA 21:16 Goday taako haysada yaagis: “Une oosancho wodey wureysada, issi laytha giddon Qedaare boncho ubbay wurana.
ISA 21:17 Qedaaren de7iya dongen dukiya wolqaama olanchotape guuthati attana; Goday Isra7eele Xoossay hessa odis” yaagis.
ISA 22:1 “Qoncetha Zangaara” geetetiya bessaba Goday odida qaala. Hintena ubbaa aybi un7ethin pooqe keetha bolla keydetii?
ISA 22:2 Neno waasoy, dirgoyinne wocami kumida katamaw, ne giddon hayqida asati mashshan woyko olan hayqibookona.
ISA 22:3 Hinte halaqati ubbay issife baqatidosona; enti dongey bayna coo di7etidosona. Enti haakidi baqatikoka betida ubbay oyketidosona.
ISA 22:4 Hessa gisho, “Tana aggaagite; ta asaas misha yeeho afuxada yeekana; ta asaa dhayuwas tana minthethopite” yaagas.
ISA 22:5 Goday, Ubbaafe Wolqaama Xoossay Qoncetha Zangaaran dagama, yedhetethinne un7a gallas oothis; qassi gimbeti woddiya gallasinne deretako maaddees waassiya gallas oothis.
ISA 22:6 Elaami ba para gaaretaranne para asatara ba dongiya oykidi yis; Qiira wotaadareti banta gondalleta giigisidosona.
ISA 22:7 Hinte lo77o zangaarati para gaaretan kumidosona; para asati Yerusalaame pengiya sinthan eqidosona.
ISA 22:8 I Yihuda miixata qaaris. He gallas Wora Keethan de7iya kawa olaa miisheta be7ideta.
ISA 22:9 Dawita Katama giddon laaletha dooriya be7ideta; garsa baggan de7iya ollan haathe kunthideta.
ISA 22:10 Yerusalaamen de7iya keethata taybideta; dirsaa zaaridi gimbanaw keethata laallideta.
ISA 22:11 Kase gal7a zeeruwan de7iya haatha zaaridi, nam7u gimbetape gidduwan olla giigisideta. Shin hinte hessa medhida Xoossaa akeekibeketa; woyko daro wodepe sinthe hessa halchidaysa hassaybeketa.
ISA 22:12 He gallas Goday, Ubbaafe Wolqaama Xoossay, hintena yeehosinne zelelsas, huuphe buluusanawunne kayo ma7o ma7anaw xeegis.
ISA 22:13 Shin hinte hessa aggidi ufaytetanne yexeeta; boorunne dorse shukeeta; ashuwa meeta; woyne uyeeta. Nuuni “Wonto hayqanaw de7iya gisho, hachi maananne uyana” yaageeta.
ISA 22:14 Ubbaafe Wolqaama Goday haysa taw qoncisis; “Hinte hayqana gakanaw ha nagaray hintew atto geetetenna. Taani Goday, Ubbaafe Wolqaama Xoossay haysa odayis” yaagis.
ISA 22:15 Goday, Ubbaafe Wolqaama Xoossay, “Bada kawo gadhon shuumetida Saminasako haysada yaaga;
ISA 22:16 Neeni haysan ay oothay? Neeni haysan, zaalla woocada duufo giigisana mela, dhoqa bessan new duufo bookana melanne zaalla woocada new shempo bessi oothana mela oona oychadii?
ISA 22:17 Neno mino addiyaw, nena Goday minthidi oykana; cuucummidi wora holana.
ISA 22:18 Kooseda nena yuushshidi dalga biittan holana. Neno ne godaa keethaas yeella gidida addiyaw neeni yan hayqana; ne boncho para gaareti yan attana.
ISA 22:19 Taani nena ne oosuwape kessana; ne shuumatethaafe shaarana.
ISA 22:20 He gallas taani Kalqe na7aa, ta aylliya Eliyaqeeme xeegana.
ISA 22:21 Taani ne ma7uwa iya mayzana; ne dancuwa iya dancisana; ne shuumatetha iyaw immana. I, Yerusalaameninne Yihudan de7iya asaas aawa gidana.
ISA 22:22 Taani Dawita keethaa qulpiya iyaw immana; I dooyin oonika gordenna; I gordin oonika dooyenna.
ISA 22:23 Taani iya ammanthiya bessan dhisheda tolana; I ba aawa keethas boncho araata gidana.
ISA 22:24 Qandafe oto gakanaw de7iya soo miisheta, kocan kaqeysada, iya aawa keethaa bonchuwa, naytanne, nayta nayta ubbaa iya bolla kaqana” yaagis.
ISA 22:25 Ubbaafe Wolqaama Goday haysada yaagees: “He gallas ammanthiya bessan dhishida toley kichana; qanxettananne kundana. Iya bolla kaqetida tooho ubbay duuxidi wodhana” yaagees. Goday haysa odis.
ISA 23:1 Xiroosa katamaas odetida Godaa qaalay haysa. Xiroosa kataman keethi woyko shempiya soy bayna gisho hinteno Tarsesa markabiya laaggeysato yeekite! Qophiroosa biittafe ha worey hinteko yis.
ISA 23:2 Hinteno, abba matan de7iya asaw, hinteno abba bollara hemetiya duretida, Sidoona zal7anchoto, si77i giite!
ISA 23:3 Hintew yaa kathay, Nayle shaafape caketida Shihoora biitta kathi; hinte kawotethatas zal7e bessi.
ISA 23:4 Neno Sidoona katamaw, abba matan de7iya miixaw, abbay, “Taani iqetabike; yelabike; addenne macca na7a dichabike” yaagidi odida gisho yeellata.
ISA 23:5 He worey Gibxe biitta gakiya wode enti Xiroosaba si7idi dagammana.
ISA 23:6 Hinteno abba matan de7iya asaw, zeleelishe Tarsesa pinnite.
ISA 23:7 Beni wode keexetida katamay, iya tohoy iya haaho biitta efidaynne hinte iyan ufaytiya Xiroosa katamay haysee?
ISA 23:8 Kallacha wosisiya katamaa, iya zal7anchoti halaqata gididanne iya giddon bayzeysatinne laammeysati bonchetidaysata gidida Xiroosa katamaa bolla haysa halchiday oonee?
ISA 23:9 Otoranchota boncho ubbaa guuthanawunne biitta bolla bonchetida ubbaa kawushanaw Ubbaafe Wolqaama Goday haysa halchis.
ISA 23:10 Hinteno, Tarsesa asaw, hintena teqiyabay bayna gisho, Nayle shaafada biitta bolla kumidi goggite.
ISA 23:11 Goday abba bolla ba kushiya miccis; iya kawotethaa qaathis. Kanaane miixa laallana mela Goday kiittis.
ISA 23:12 Gujidika, “Hinteno, un7etida Sidoona asaw, hinte ufaysan yexiya wodey wuris. Dendidi Qophiroosa pinnite; yanka hinte saro demmeketa” yaagis.
ISA 23:13 Babiloone biitta be7ite; he biittay ha77i pathonnaba gidis. Asoore asay he biittan do7i aqanaada oothis. Enti yan de7iya wogga keethata laallidi bantaw miixa gimbidosona; biitta baysa oothidosona.
ISA 23:14 Hinteno, Tarsesa markabeto, hinte miixay laaletida gisho, zeleelite.
ISA 23:15 Xiroosa katamay issi kawos de7o laythi gidiya laapun tammu laythi dogetidi daana wodey yaana. Laapun tammu laythi wuriya wode layma maccasas yexetiya yetha mela Xiroosa katamaas yexetana.
ISA 23:16 Enti, “Neno dogetida layma katamaw, ne diitha ekada katamaara yuuya. Nena asay hassayana mela mal7o qaalan daro yethi yexa” yaagana.
ISA 23:17 Laapun tammu laythay poletiya wode, Goday Xiroosa xomoosana. Shin hessafe guye, I beni ba laymatetha oosuwako simmana; sa7an de7iya kawotethata ubbaara laymatana.
ISA 23:18 Gidoshin, iya zal7iya wodheynne iya damoozey Godaas dummatidaysa gidana; iya zal7iya wodheynne kathinne lo77o ma7o shammanaw, Godaas oothiya asaas imetanaape attishin, miishe keethan woyko minja keethan uttenna.
ISA 24:1 Heko, Goday biitta laallananne baysa kessana; I, biitta dhaysidi iyan de7iya asaa laallana.
ISA 24:2 Asi ubbay issino gidana; kahiney asaara issino gidana; aylley godaara issino gidana; gadhindiya godatera issino gidana; shammeysi bayzeysara issino gidana; tal7e immeysi tal7e ekeysara issino gidana; aco acheysi aco ciggeysara issino gidana.
ISA 24:3 Biitta ubbay bonqetidi baysa gidana; Goday ha qaala odis.
ISA 24:4 Biittay melana, iya aacay shullana; alamey argaacana, daaburana; biittan de7iya wolqaama asay daaburana.
ISA 24:5 Biittay banan de7iya asaa gaason tunis. Enti higgiyas kiitetibookona; wogaa naagibookona; merinaa caaquwa menthidosona.
ISA 24:6 Hessa gisho, baadethay biitta mees; asay banta nagaraa gaason pirdetanaw bessees. Sa7an de7iya asay xuugetidosona; guutha asi attis.
ISA 24:7 Woyney xaphora melis, mal7anto woyney wuris; kase ufaytiya ubbay azzanis.
ISA 24:8 Karaabo baqoy attis; yetha waasoy si77i gis; ufaysiya diitha dursay eqis.
ISA 24:9 Hizape yexishe woyne ushsha uyokona; ushshayka entaw camo gidana.
ISA 24:10 Laaletida katamay baysa gidana; oonika gelonnaada keetha ubbay gordetis.
ISA 24:11 Woyne ushshi dhayida gisho asay dabaaban waassees; ufaysi azzanon laametis; ufaysiyabay sa7ape dhayis.
ISA 24:12 Katamay laaletis; katamaa pengeti meqeretidosona.
ISA 24:13 Shamaho teera qoqofeysada, woyne maxi simmin, poshiley atteysada, biitta bolla de7iya kawotethata bolla hessada hanana.
ISA 24:14 Enti banta qaala dhoqu oothidi, ufaysan yexoosona; wuloha baggara de7iya ubbay Godaa gitatetha odana.
ISA 24:15 Hessa gisho, doloha baggara de7eysati, Godaas boncho immana; yuushoy abban teqetida biittati Godaas, Isra7eele Xoossaas boncho immana.
ISA 24:16 Nuuni, “Xilluwas bonchoy gido” giya mazmure biitta gaxape si7ida. Shin, “Taani gilqas! Taani laafas! Tana ayye! Aathi immeysi aathidi immees; kaddeysati gujidi aathidi immoosona” yaagas.
ISA 24:17 Hinteno, sa7an de7iya asaw, dagami aafoynne xihey hintena naagees.
ISA 24:18 Daganthiya girsaafe baqateysi ollan kundana; ollafe keyeysa xihey oykana; salo maskooteti dooyetidosona; biitta baasoti qaaxidosona.
ISA 24:19 Biitti za77is; biitti shaaketis; biitti qaaxis.
ISA 24:20 Biitti matho asada gandigarees; carkoy sugiya gaabbada yuuyees. Geellata balay daro deexida gisho zaari dendonna mela kundisis.
ISA 24:21 He gallas Goday salo wolqata salon, sa7aa kawota sa7an pirdana.
ISA 24:22 Ollan de7iya qasho asada enta issife shiishana; qasho keethan enti gordetidi uttana. Daro gallasape guye enti seeretana.
ISA 24:23 Ubbaafe Wolqaama Goday Xiyoone zumaaninne Yerusalaamen kawotana; Yerusalaame cimata sinthan ba bonchuwa qoncisana. He wode ageenay dhumana, away yeellatana.
ISA 25:1 Abeeti Godaw, neeni ta Xoossaa. Taani nena dhoqu dhoqu oothana; ne sunthaa galatana. Neeni ne polo ammanetethan benipe qofetidi de7iya malaalsiya oosota oothadasa.
ISA 25:2 Neeni katamaa laaletha doore oothadasa; mino gimbe dirsay de7iya katamaa laalladasa. Allagata kawo keethay zaaridi katama gidonna mela oothadasa; zaaridi polo keexetenna.
ISA 25:3 Hessa gisho, mino asati nena bonchana; wozana mino kawotethata katamati new yayyana.
ISA 25:4 Neeni manqoy baqatidi attiya bessi, metootanchoy qosetiya bessi, uushope attiya geshenne awa seelape attiya kuya gidadasa. Wozana mino asaa hanqoy gimbera dom7ethiya uusho melanne
ISA 25:5 mela biittan honge mela. Shaara kuyay awa seela irxisiya mela neeni allagata yethaa si77i oothadasa; yaatin wozana mino asaa waasoy si77i gis.
ISA 25:6 Ubbaafe Wolqaama Goday asa ubbaas ha zumaa bolla gita gibira giigisana. He gibira bolla modho ashuwa, lo77o kathinne caalida woyne ushsha giigisis.
ISA 25:7 I ha zumaa bolla asa ubbaa kammida magarajuwanne kawotetha ubbaa bolla micetida kamaa dhaysana.
ISA 25:8 I merinaw hayqo mittana; Ubbaa Haariya Goday ayfe ubbaafe afuthaa quchana; ba asaa kawusha biitta ubbaafe diggana. Goday haysa odis.
ISA 25:9 He gallas enti, “Tuma haysi nu Xoossaa; nuuni iyan ammanetida gisho I nuna ashshis. Nu Goday haysa; nuuni iyan ammanetida; ane iya atotethan ufaytoos; hashshu goos” yaagana.
ISA 25:10 Godaa kushey ashshanaw ha zumaa bolla shempana. Shin utulli urqara ollan yedheteysada Moo7abey yedhetana.
ISA 25:11 Haathe wadheysi ba kushiya yeddeysada enti banta kushiya yeddana. Shin Goday iya gene kushe oosuwan cimetonna, iya otoruwa kawushana.
ISA 25:12 Enti dhoqisidi gimbida mino dirsa gimbiya I wodisananne kawushana; I duge sa7an, ubba hirki baanan holana.
ISA 26:1 He gallas Yihuda biittan ha mazmurey yexetana. Nuus mino katami de7ees; Xoossay atotetha iya yuushuwan gimbenne miixa oothis.
ISA 26:2 Ba ammanuwa naagiya xillo derey, gelana mela kareta dooyite.
ISA 26:3 I nenan ammanetida gisho, ba wozanaa nenan wothida uraa, neeni polo sarotethan naagasa.
ISA 26:4 Goday merinaa zaalla gidiya gisho, Godan merinaw ammaneta.
ISA 26:5 Dhoqan de7eyisata ziqi oothis; dhoqu gida katamaa kawushis. Iya sa7an duge yeggis; biitta baanan holis.
ISA 26:6 Manqoti iya yedhana un7etidaysati iya bollara hemetana.
ISA 26:7 Xillota ogey suure; Abeeti Xilluwaw, neeni xillota ogiya giigisaasa.
ISA 26:8 Abeeti Godaw, nuuni ne higgiya naaganaw amottoos; ne sunthaa bonchoynne ne teemay nu wozanaa amo.
ISA 26:9 Qamma taani nena laamotas; wonta ta ayyaanay nena minthidi koyees. Ne biitta pirdanaw yaa wode, sa7an de7iya asay xillotethi tamaarees.
ISA 26:10 Iita asas keehatethi oosetikoka, I xillotethi tamaarenna. Suure biittan iitabaa oothees; Godaa gitatetha erenna.
ISA 26:11 Abeeti Godaw, ne kushey dhoqu gis; shin enti be7okona. Ne asaas neeni mishetiya misha be7idi yeellato. Neeni ne morketas giigisida tamay enta midi dhayso.
ISA 26:12 Abeeti Godaw, nuus sarotethi immadasa; nu ooso ubbaa ne oothadasa.
ISA 26:13 Abeeti Godaw, nu Xoossaw, hara godati nuna haaridosona; shin nuuni ne sunthaa xalaala bonchoos.
ISA 26:14 Enti hayqidosona; simmidi de7on dookona. Ne seerin dhayida gisho, zaaridi dendokona. Enta qofisuwa ubbaa quchada dhaysadasa.
ISA 26:15 Abeeti Godaw, neeni kawotethaa darsadasa; kawotethaa darsada neeni bonchetadasa; biitta zawa ubbaa dalgisadasa.
ISA 26:16 Abeeti Godaw, meto wode enti nena koydosona. Ne enta seerida wode nena kalkashidi woossidosona.
ISA 26:17 Abeeti Godaw, qanthatida maccasi, yelo wodey gakin un7etada waasseysada, nuuni ne sinthan hessada hanida.
ISA 26:18 Nuuni qanthatida; iqetida; shin carko yelida. Nuuni sa7aas atotethi ehibooko; biittan de7iya asaa yelibooko.
ISA 26:19 Hayqida ne asay paxana; enta ahay dendana. Hinteno, biitta garsan de7eysato, dendidi ufaysa mazmure yexite. Hinte akay wonta aka mela; biittiya hayqidaysata zaarada immana.
ISA 26:20 Ta asaw, bidi hinte soo gelidi, kariya hinte bolla gordite. Godaa hanqoy aadhana gakanaw, guutha wodes hintena qosite.
ISA 26:21 Biitta bolla de7iya asaa, enta nagaraa gisho seeranaw, Goday ba de7iya bessaafe keyidi yees. Biittiya ba bolla gukida suuthaa qoncisana; hayqidaysata zaarada genthuku.
ISA 27:1 He gallas Goday ba mino, gitanne wolqaama mashshan Leewataane geetetiya xongetiyanne xaaxetiya shoosha seerana; abban de7iya do7aaka wodhana.
ISA 27:2 He gallas haysada geetetana: “Lo77o woyne gadiyas yexite;
ISA 27:3 Taani, Goday iya naagayis; taani qanxonna haathe ushshayis; oonika iya qohonnaada qamma gallas naagayis.
ISA 27:4 Taani hanqetike; taara oletanaw agunthinne gom7orey ane dendo! Taani enta bolla keyada enta xuugga wursanashin.
ISA 27:5 Woyko qosetidi attanaw taako yo; taara sigeto; ee, taara sigeto” yaagetana.
ISA 27:6 Yaana wodiyan Yayqoobi xapho yeddana; Isra7eeley aacananne ciiyana; iya ayfey biitta ubbaa kumana.
ISA 27:7 Enta shocidaysata shocidaysada Goday Isra7eele asaa shocideyee? Woyko enta wodhidaysata wodhidaysada enti hayqidonaayee?
ISA 27:8 Goday ba asaa di7etana mela oothidi seeris; wolqaama doloha bagga gotiyan enta gooddidi kessis.
ISA 27:9 Yayqooba naaqoy atto geetetanaynne iya nagaray polo qushetanay, yarsho shucha ubbaa I mentherethidi booqinte shuchada oothiya wodenne Asheera eeqa misiliya woyko ixaane cuyisiya bessaa laaliya wode.
ISA 27:10 Diretida katamay baysatis; kase asi de7iya bessay ha77i bazzo mela dogetidi attis. Mehey heemetiya bessi gidida gisho, maatanne mitha haythaa midi marati yan allatoosona.
ISA 27:11 Mitha tasheti meliya wode meqeretoosona; maccasay mixidi eethanaw efoosona. Ha asay akeeki bayna asi gidiya gisho, enta medhidaysi entaw qadhetenna; enta maarenna.
ISA 27:12 He gallas Efraxiisa shaafape Gibxe shaafa gakanaw Goday kathaa qoxana. Hinte, Isra7eele asay issoy issoy shiiqana.
ISA 27:13 He gallas gita moyzey punetana; Asoore biittan dhaydaysatinne Gibxe biitta di7etidaysati yidi, Yerusalaamen geeshsha zumaa bolla Godaa goyinnana.
ISA 28:1 Efreeman mathoteysatas qofiso kallacha gididaysa, aradda zangaara huuphiyan uttidaysa, iya bonchuwas alleeqo gidida shullida ciishshanne mathoyiya ushshay entaw nashetethas gidida katamaa ayye!
ISA 28:2 Heko, Godaas wolqaamanne mino gidida issoy de7ees. Goday iya shacha uushoda, dhaysiya gotedanne kixida wolqaama haathada mino kushiyan duge sa7an holana.
ISA 28:3 He mathotiya Efreema asaa otoruwa kallachay tohon yedhethana.
ISA 28:4 Aradda zangaara huuphen de7iya shullida ciishshay, iya boncho alleeqoy wodey gakanaape sinthe teerida balase ayfe mela gidana. Issi asi he balasiya be7iya wode ba kushen oykida mela mi aggees.
ISA 28:5 He gallas Ubbaafe Wolqaama Goday attida ba asaas boncho kallachanne alleeqo gidana.
ISA 28:6 I daynnatas suure pirdiya ayyaana, katamaa pengiyafe ola zaareysatas wolqa gidana.
ISA 28:7 Enti woyne ushshan biicotoosona; mathoyiya ushshan gandigaroosona. Kahineynne nabey mathoyiya ushshan biicotees; enti woyne ushshan yarkoosona; mathoyiya ushshan gandigaroosona. Qoncethi be7ishe baletoosona; pirdishe dhubetoosona.
ISA 28:8 Enti miya gayta ubbay cooshsha xalaala gidiya gisho, iitiboonna bessi baawa.
ISA 28:9 Enti haysada gaana: “I eratethaa oona tamaarsanee? Kiita ooddes qoncisanee? Buroo maathi paahetiya woyko dhanthi duuxida naytaseyee?
ISA 28:10 I, kiitta bolla kiitta, kiitta bolla kiitta; woga bolla woga, woga bolla woga; yan guutha han guutha” yaagana.
ISA 28:11 Shin Goday allaga qaalaninne imatha doonan ha asaas odana.
ISA 28:12 I entako, “Haysi shempo bessi; daaburidaysa shempisite. Haysi shempi ekiya bessi” yaagis. Shin enti si7onna ixidosona.
ISA 28:13 Hessa gisho, enti bidi kundana mela, me77ana melanne xihen oyketidi baana mela Godaa qaalay entaw kiita bolla kiita, kiita bolla kiita; woga bolla woga, woga bolla woga; yan guutha han guutha gidana.
ISA 28:14 Hinteno, Yerusalaamen de7iya asaa haariya qelqiseysato Godaa qaala si7ite.
ISA 28:15 Hinte, “Nuuni hayqora caaqida; Si7oolera giigida; nuuni wordo nuus qota oothida gishonne malte kate oothida gisho, gadoy nuna bochonna aadhana” yaagidi ceeqeteta.
ISA 28:16 Hessa gisho, Ubbaa Haariya Goday, “Heko, taani al7onne dooretida baaso shuchaa Xiyoonen wothas; iyan ammaniya oonika yeellatenna.”
ISA 28:17 Taani suure pirdaa wadha wodoro, xillotethaa tumbe oothana. Hinte, “Nuus qota gida wordo shachay shocana; hinte nuus kate gida bessaa di7oy dhaysana” yaagees.
ISA 28:18 Hinte hayqora caaqida caaqoy laaletana; Si7oolera giigida giigoy minnenna. Gadoy yaa wode hinte iyan shocetana.
ISA 28:19 He gadoy yaa wode hintena ekidi baana; wonta wonta, qamminne gallas yaara aadhana; he aadhiya wode ubban hintena aggenna. Ha kiita akeekoy hintew dagama xalaala immana.
ISA 28:20 Hinte qosetiya bessi hintew baawa; hinte zin7iya arsay hintew gidenna; hinte ma7iya afilay hintena gakenna.
ISA 28:21 Paraziima zuma bolla Goday oothidaysada ba oosuwa, ba imatha oosuwa, hessika ba ooratha oosuwa oothanaw dendana. Gaba7oona zangaaran oothidaysada hanqana.
ISA 28:22 Goday, Ubbaafe Wolqaama Xoossay, biitta ubbaa bolla dhayo ehanaw awaajidaysa ta si7ida gisho hinte qashoy minnonna mela qelqiseysa aggite.
ISA 28:23 Hinte haytha haa yeggidi, ta odeysa si7ite; ta odaa akeekite.
ISA 28:24 Kathi zeranaw goyiya goshshanchoy ubba wode goyishe de7iyee? Qassi ubba wode gaggahiya wodhishenne liiqisishe de7ii?
ISA 28:25 Gadiya liiqisidi, kareetha sawanne okashe, banganne giste, banga iya do7uwan, iya bessan bessan zerees gidennee?
ISA 28:26 Ha hiilla iya Xoossay iya erisesinne tamaarsees.
ISA 28:27 Kareetha sawonne okashe shocu wodhan qoxenna; shin guutha xam7an shocetees.
ISA 28:28 Katha ayfey buketeesipe attishin, liiqenna; qassi kathaa bukiya para gaareti iya bollara laagetikoka kathay gaacetenna.
ISA 28:29 Ha cincatethaa ubbay ba zoriyaninne ba cincatethan malaalsiya Ubbaafe Wolqaama Godaape yees.
ISA 29:1 Dawiti de7ida Ar7eela katamaw nena ayye! Laytha bolla laythi guja; ne ba7aaleta zaara zaara boncha.
ISA 29:2 Taani Ar7eela katamaa buroo un7ethana; I zeleelidi yeekana. He katamay suuthi kammida yarsho bessa mela gidana.
ISA 29:3 Taani ne yuushuwa teqana; adussa gimbiyan nena dirana; ne bolla ola shako essana.
ISA 29:4 Neeni gelida ollan gidada odetana; garsa baanape ne girsay yaana. Ne girsay moytille girsada biitta giddofe keyana; baana giddofe ne kalkashana.
ISA 29:5 Shin ne morketi baana mela daro; wozana mino asata tayboy carkoy efiya puno mela.
ISA 29:6 Qoponna de7ishin, Ubbaafe Wolqaama Goday dadan, biitta qaaxon, gita girsan, goten, carkoninne tama lacon hintena wochana.
ISA 29:7 Ar7eela katamaa oliya daro kawotetha ubbay, he katamaanne iya miixa oliya ubbay, iya un7ethiya ubbay dhisko amuhodanne elmoda hanana.
ISA 29:8 Koshatida asi amuhon kathi midi, barkiya wode iya koshay aggonaysada woyko saamotida asi amuhon uyidi, barkiya wode saamuwa alonaysada, Xiyoone deriya oliya kawotethati ubbay hessada hanana.
ISA 29:9 Malaaletite; dagammite; qilim7ite; qooqite. Mathotite, shin woyne ushshan gidopo. Gandigarite, shin mathoyiya ushshan gidopo.
ISA 29:10 Goday dhisko ayyaana hinte bolla gussis. Nabeto, hinte ayfey goozetis; qoncethi be7eysato, hinte huuphey kametis.
ISA 29:11 Ha ubba qoncethay new attametida maxaafa mela gidis. Issi asi, “He7e, haysa nabbaba” yaagidi, issi nabbabo eriya asas immiya wode, I, “Maxaafay attametida gisho, ta nabbabanaw danda7ike” yaagana.
ISA 29:12 Maxaafa nabbabi eronna asako, “He7e, haysa nabbaba” yaagidi immiya wode, I, “Taani nabbaba erike” yaagana.
ISA 29:13 Goday yaagees: “Ha asay tana banta doonan bonchees; shin enta wozanay taape haahon de7ees. Enti asi medhida wogaa tamaarsishe tana coo goyinnoosona.
ISA 29:14 Hessa gisho, taani ha asaa bolla zaara zaara malaalsiyaba oothana. Cincata cincatethaa eeya kessana; eranchota eraa dogisana” yaagis.
ISA 29:15 Banta halchuwa Godaape qosanaw ciimmoyeyisata, banta oosuwa dhuman oothishe, “Nuna ooni be7ii? Nuna ooni erii?” yaageyisata ayye!
ISA 29:16 Hinte ubbaba shiri yeggeeta. Oto medheysi urqa mela gidi qopeeta! Medhetidaysi medhidaysa, “I tana medhibeenna” giyyee? Otoy bana medhidaysa, “I aykoka erenna” gaanaw danda7ii?
ISA 29:17 Libaanose woray aradda gade gidanaw; qassi aradda gadey wora gidanaw guutha wodey attis gidennee?
ISA 29:18 He gallas tulleti maxaafaa qaala si7ana; dhuman de7iya qooqeta ayfey xeellana.
ISA 29:19 Ashketi Godan ufaytana; manqoti Isra7eele Geeshshan hashshu gaana.
ISA 29:20 Ulo iitati wurana; qelqiseysati tim7i gaana; iitabaa oothanaw wochiya ubbay dhayana.
ISA 29:21 Ase odan bala ootheysati, mootetidaysa pirda keethan xihen yeggeysatinne wordo markatethan xillo asa pirdaa geellayeysati dhayana.
ISA 29:22 Hessa gisho, Abrahaame wozida Goday Yayqooba kochaako haysada yaagees: “Yayqooba kochay hizape guye yeellatenna; iya som7oy yeellatidi sa7a xeellenna.
ISA 29:23 Shin enti ta kushe ooso gidida banta nayta banta giddon be7iya wode ta sunthaa geeshshana; enti Yayqooba Geeshshaa, geeshshatetha naagana; Isra7eele Xoossaa yashshatethan bonchana.
ISA 29:24 Ayyaanan baleysati akeeka demmana; zuuzumeysati timirte ekana” yaagees.
ISA 30:1 Goday, “Geella nayta ayye! Taani halchaboona oothosona; ta Ayyaanan gidonashin banta shenen caaqidi nagara bolla nagara gujeyisata ayye!
ISA 30:2 Tana zore oychonna Gibxe wodhoosona. Paarona miixa bantaw teqe, Gibxe bantaw shempiya kuya oothosona.
ISA 30:3 Shin Paarona miixay hintew yeella, Gibxe kuyay hintew kawushatethi gidana.
ISA 30:4 Enta halaqati Xaanesan de7ikoka, enti kiittidaysati Haneesa katamaa gakikoka,
ISA 30:5 yeellafe attishin, hara maaddeynne go77i bayna gisho iyan ammanetiya ubbay kawuyananne yeellatan” yaagees.
ISA 30:6 Negeban de7iya do7ataba Goday odiday haysa: kiitetidaysati metoynne un7i de7iya biittara, adde gaammoynne macca gaammoy worara, iitanne xongetiya shooshati de7iya bazzuwara kanthidi baana. Haretanne gimaleta zokon banta duretetha caanidi enta aykoka maaddonna biitta baana.
ISA 30:7 Gibxey aykoka maaddenna; hessa gisho, taani iya, “Pathonna Ra7aaba” yaagada xeegana.
ISA 30:8 Ha77i bada sinthara yaana wodiyas merinaa malla gidana mela enta sinthan shuchaa woocada xaafa; mazgabenka xaafa.
ISA 30:9 Enti geellanne wordancho nayta; enti Goday odiyaba si7anaw koyonna nayta.
ISA 30:10 Enti qoncethi be7eyisata, “Qoncethi be7opite” yaagosona. Nabeta, “Ufaysiyabaanne cimmiyaba oditepe attishin, suureba odopite.
ISA 30:11 Ogiyape kichite; horogape haakite; Isra7eele Geeshshara nuna som7on gathofite” yaagosona.
ISA 30:12 Hessa gisho, Isra7eele Geeshshay haysada yaagees: “Hinte ha qaala ixidi, geneninne cimon ammanetida gisho,
ISA 30:13 ha nagaray hintew za77idi woddiya, akeekona ellesidi kundiya adussa gimbe mela gidana.
ISA 30:14 Iya meqoy urqafe medhida oto mela dipi gidi meqana. He mequwa giddofe tama kaashiya woyko haathe duuqiya kun7i bentenna” yaagees.
ISA 30:15 Isra7eele Geeshshay, Ubbaa Haariya Goday, haysada yaagees. “Simoninne shempon hinte attana; si77i guussaninne ammanetethan hintew wolqa gidana; shin hinte ixideta.
ISA 30:16 Hinte, ‘Akay, nuuni para bolla uttidi baqatana’ yaagideta; hessa gisho, hinte baqatana. Qassi hinte, ‘Eesotiya para toggidi baana’ ” yaagideta; shin hintena yedetheysati hintefe aadho eesotana.
ISA 30:17 Issi tooranchuwa be7idi hintefe mukulu asay baqatana; ichashu tooranchoti hintena ubbaa yedethana. Zumaa huuphen eqida bandira mithada woyko zuma bolla de7iya mallada hinte hanana gakanaw hintena yedethena.
ISA 30:18 Shin Goday hintew keehanaw naagees; Goday xillo pirdiya Xoossi gidiya gisho hintew qadhetanaw dendana. Iya ammanetidi naagiya ubbay anjetidaysata.
ISA 30:19 Hinteno, Yerusalaamen de7iya Xiyoone asaw, hizape guye yeekeketa. Xoossay qadhen kumida Xoossi gidiya gisho, hinte maade koyidi iyako waassiya wode hintew zaaro immana.
ISA 30:20 Goday hintew meto kathinne un7a haathi immikoka, hinte astamaarey hizape bana qosenna. Shin hinte ayfey hinte astamaariya be7ana.
ISA 30:21 Hinte ushachi woyko haddirsi simmiya wode, guyera hintena, “Ogey haysa; iyara biite” giya qaala hinte si7ana.
ISA 30:22 Biraninne worqan alleeqetida eeqa misileta hinte tunisana. Tuna curqada hinte enta, “Nuupe haakite” yaagidi wora holana.
ISA 30:23 He wode I, hinte biittan zerida kathaas ira bukisana; biittafe doliya kathay daronne muruuta gidana. He gallas hinte mehey dalga denban heemetana.
ISA 30:24 Goshsha booratinne hareti gillan punetida geeshsha harquwa maana.
ISA 30:25 Asi wuriya wode miixati laaletiya gallas deretanne zumata bollafe pulto haathi goggana.
ISA 30:26 He gallas ageena poo7oy awa poo7oda hanana; awa poo7oy kaseysafe laapun kushe darana; laapun gallas poo7uwa mela gidana. He ubbay hananay Goday meqida ba asaa kooliya wodenne I dechin madunxida asaa pathiya wode.
ISA 30:27 Heko, Godaa sunthay suulliya hanquwara, dhumida cuyaa shaarara haaho bessaafe yaana. Iya doonan hanqoy kumis; iya inxarsan miya tami de7ees.
ISA 30:28 Iya peenoy, qoodhe gakanaw kixidi, ubbaba pittidi efiya haatha kixa mela. I, kawotethata dhayo zarzaren harqana; asaa gapata bixaalidi oge balethana.
ISA 30:29 Geeshsha ba7aaley bonchetiya gallas yexeysada, hinte yexana. Godaa zumako, Isra7eele Zaallako biya wode suusul7e punnishe yexiya asay ufayteysada hinte ufaytana.
ISA 30:30 Goday ba yashshiya qaala sissana; ba suulliya hanquwan, tama lacuwan, gotiyan, uushuwaninne shachan ba qesiya qoncisana.
ISA 30:31 Goday ba girsan Asoore daganthana; iya xam7ay enta shocana.
ISA 30:32 Goday enta ba seeriya xam7an enta shociya wode iya asay karaaboranne diithara yexana. Ba qesiya denthidi enta shocana.
ISA 30:33 Benipe doomidi Asoore kawoy xuussa Toofeta geetetiya bessi giigis. He bessay ollanne dalga; qassi daro mithi dooretidi de7iya bessi. Godaa peenoy diinne shaafada goggidi, he tama eethana.
ISA 31:1 Maado demmanaw Gibxe wodheysatanne paran ammaneteyisata ayye! Para gaareta darotethaaninne para asata minotethan ammaneteyisata ayye! Enti Isra7eele Geeshshaa xeellokona woyko Godaape maado koyokona.
ISA 31:2 Shin Goday cinca gidiya gisho gado yeddana; I odidaysa aggenna. Iita asaa bollanne iitabaa oothiya asaa maaddeyisata bolla dendana.
ISA 31:3 Gibxeti asepe attishin, xoosse gidokona; enta paratika ashope attishin, ayyaana gidokona. Goday hanqon ba qesiya denthiya wode maaddeysi dhubetana; maadeteysi kundana; enti ubbay issife dhayana.
ISA 31:4 Goday taako haysada yaagis: “Gaammoy woyko wodala gaammoy mehe oykidi daariya wode henthanchoti xeegetidi shiiqikoka, I enta waasuwas dagammenna; enta qaalas yayyenna. Hessadaka, Ubbaafe Wolqaama Goday Xiyoone zumanne iya zumata olanaw wodhana.
ISA 31:5 Kafoy aaleysada Ubbaafe Wolqaama Goday Yerusalaame gechana, ashshana, naagana; iya bollara aalidi heemmana.
ISA 31:6 “Hinteno Isra7eele asaw, hinte makallidi ixida, iyako simmite.
ISA 31:7 He gallas nagari kumida hinte kushiyan birapenne worqafe oothida eeqata wora holana.
ISA 31:8 Asoorey asaba gidonna mashshan kundana; asaba gidonna mashshi enta maana. Enti mashsha sinthafe baqatana; enta na7atethati wolqan asas oothana.
ISA 31:9 Dagama gaason enta mino miixay laaletana; enta toora moconati dagammidi yeggi dhayana” yaagees, iya tamay Xiyoonen, iya coocey Yerusalaamen de7iya Goday.
ISA 32:1 Heko, kawoy xillotethan kawotana; haareysati suuretethan haarana.
ISA 32:2 Issi issi asi ba huuphen carkofe geemmiya bessi, gotepe qosetidi attiya bessi gidana. Mela biittan goggiya haatha melanne saamo biittan gita zaalla kuya mela gidana.
ISA 32:3 Xeelliya asata ayfey qilim7enna; si7iya asata haythay hayzidi si7ana.
ISA 32:4 Eesotiya asaa wozanay erananne akeekana. Dedotiya asaa inxarsay biletana; geeshshidi odetana.
ISA 32:5 Hizape guye eeyi asi erancho geetetenna; iita asi bonchetenna.
ISA 32:6 Eeyay eeyatethi odetees; iya wozanay nagara qopees. Godaa bolla minoba odetees; iya bolla iitabaa maqetees: koshatidaysas kathi immenna; saamotidaysa haathe diggees.
ISA 32:7 Gene asa qofay iita; manqoti suureba odetikoka enta dhaysanaw wordon iita qofa qopees.
ISA 32:8 Lo77o asi lo77oba halchees; he lo77o halchuwan minnidi de7ees.
ISA 32:9 Hinteno qofi bayna de7iya maccasaw, dendite; ta odeysa si7ite; hinteno ammanetidi de7iya macca nayto, ta hintew odeysa si7ite.
ISA 32:10 Laythi kumonna hinte ammanetidi de7eysati kokorana; woyne iya wodiyan maxeketa; tokidabaape ayfe shiisheketa.
ISA 32:11 Hinteno injetin de7iya maccasaw kokorite. Hinteno ammanetidi de7iya macca nayto yayyite. Hinte ma7uwa qaaridi kayo ma7o hinte xeessan dancite.
ISA 32:12 Lo77o gaden ayfiya woyney dhayida gisho, azzanidi hinte tiraa qoxite.
ISA 32:13 Agunthinne kinchotey ta asaa gadiyan dolis. Asay ufaytidi de7ida keethatasinne katamaas yeekite.
ISA 32:14 Kawo keethaynne daro asay de7iya katamay baysatana; miixatinne gimbe shakoti merinaw laaletana; wora hareti ufaytiya bessinne dorsa wudey heemetiya bessi gidana.
ISA 32:15 Hessi hananay, Ayyaanay nu bolla gukana gakanaw, mela biittay araddana gakanawunne aradda biittay wora gidana gakanaasa.
ISA 32:16 Hessafe guye, mela biittan suure pirdi, aradda biittan xillotethi daana.
ISA 32:17 Xillotethi sarotethi ehana, wopatethinne ammanetethi merinaw biitta kumana.
ISA 32:18 Ta asay saroy kumida keethan, ammanthiya bessaaninne wopu gida son shempidi daana.
ISA 32:19 Shachi bukidi wora dhaysiyakoka, qassi katamay kumthi laaletiyakoka,
ISA 32:20 shaafata gaxan hinte kathaa zeridi, hinte mehiyasinne hinte haretas hentha bessi demmeysati hinte anjetana.
ISA 33:1 Nena dhaysona de7ishin haraa dhayseyso, nena aathidi immonna de7ishin haraa aatha immeyso, nena ayye! Ne dhayso aggida wode nena dhaysana; ne aatha imo aggida wode nena aathidi immana.
ISA 33:2 Abeeti Godaw, nuna maara; nuuni nena ufaysan naagoos; wonta wonta nuus wolqa gida; meto wode nuna ashsha.
ISA 33:3 Ne girsaa deshuwan derey baqatees; neeni nuna maaddanaw dendiya wode kawotethati laaletoosona.
ISA 33:4 Gondoy shiiqeysada hinte di7oy shiiqana; booley dirgeysada asay iya bolla dirgana.
ISA 33:5 Goday bolla de7iya gisho, dhoqu dhoqu gis; Xiyoone suure pirdaaninne xillotethan kunthana.
ISA 33:6 I hinte wodiyas ammanthiya baaso gidana; hintew atotethi, cincatethinne eratethi gidana; Godaas yashshi ha ubba shaluwas qulpe gidana.
ISA 33:7 Heko, goobati oge bolla waassoosona; sigethanaw kiitetidaysati cametidi yeekosona.
ISA 33:8 Wogga ogeti kaysatidosona; ogiyara kanthiya asi baawa. Caaqoy laaletis; katamati kadhetidosona; boncho asati boretidosona.
ISA 33:9 Biittay azzanis; daaburis; Libaanosey yeellatidi melis; Saarona zangaaray mela biitta gidis. Baasane deriyaninne Qarmeloosa deriyan de7iya mitha haythay qoqofetis.
ISA 33:10 Goday haysada yaagees: “Ha77i taani dendana; ha77i taani bonchetana; ha77i taani dhoqu dhoqu gaana.
ISA 33:11 Hinte utulla qanthatidi puno yelideta; hinte shempoy hintena tamada maana.
ISA 33:12 Asay booqinte shuchada taman xuugetana; qassi agunthada taman eexana.
ISA 33:13 Hinteno, haahon de7eysato, ta oothidaysa si7ite; matan de7eysato ta wolqaa akeekite” yaagees.
ISA 33:14 Xiyoonen de7iya nagaranchoti dagammidosona; Xoossaa eronnaysati kokoridosona. Enti, “Nu giddofe miya tamaranne merinaw eexiya lacuwara daanaw danda7ey oonee?”
ISA 33:15 Xillotethan hemetey, suure odetey, bessonna ogera bentiya go77a ixey, ba kushiya wodhaafe ekonna mela diggey, shempo wodhoba si7onna mela ba haythaa tuccey, iitabaa xeellonna mela ba ayfiya kammey,
ISA 33:16 he uray dhoqa bessan daana. I, qosetidi attiya bessay mino zaalla gidana; iya kathay iyaw imetana; I, uyaa haathay pacenna.
ISA 33:17 Hinte ayfey kawa, iya yegelssara be7ana; haahon de7iya biitta demmana.
ISA 33:18 Hinte, “Halaqay awun de7ii? Giira ekeysi awun de7ii? Gimbe shakota halaqay awun de7ii?” yaagidi hinte wozanan beni yashshiya wodiya qopana.
ISA 33:19 Wozana mino asaa, hintew gelonna doonan odetiya asaanne inxarsay dedotiya asaa hizape guye hinte be7eketa.
ISA 33:20 Nuuni nu ba7aale bonchiya Xiyoone katamaa be7ite! Wopu gidi de7iya, iya dhishey shodetonna, iya wodoroy duuxonnanne iya dhishey qaaxonna dunkaane mela hanida Yerusalaame katamaa hinte, hinte ayfen be7ana.
ISA 33:21 He bessan Goday nuus wolqaa gidana. He bessay dalga safanne goggiya haatha mela gidana. Wogoloy iya bollara baanaw danda7enna; gita markabeti yaara kanthanaw danda7okona.
ISA 33:22 Goday nuus pirdeysa; Goday nuus higge immeysa; Goday nu kawa; I nuna ashshana.
ISA 33:23 Ne qasho wodoroy dol7ana; markabiya tuussay shuggana; iya sharayka toletibeenna. He wode daro di7o shaaketana; hari attoshin wobbetika di7o ekana.
ISA 33:24 Xiyoonen de7iya oonika “Tana sakees” yaagenna; yan de7iya asaa nagaray atto geetetana.
ISA 34:1 Hinteno, kawotethato, shiiqidi si7ite! Hinteno, asaw akeekite! Biittaynne biittan de7iyaba ubbay, sa7inne sa7ape keyaaba ubbay si7o.
ISA 34:2 Goday kawotethata ubbaa bolla hanqetis; enta tooranchota ubbaa bolla yilotis. I, enta ubbaa dhaysana; enta shukeysatas aathidi immana.
ISA 34:3 Enta ahay holetidi, attidi xinqana; dereti enta suuthan kametana.
ISA 34:4 Salo xoolintoti ubbay seerana; saloti saleenada xaaxetana. Woyne haythinne balase ayfey qoqofeteysada xoolintoti ubbay qoqofetana.
ISA 34:5 Ta mashshay salotan alana gakanaw uyis; Heko Edoome bolla, taani dhaysida asaa bolla pirdanaw wodhana.
ISA 34:6 Godaa mashshay suuthan muuketis. Yarshos shuketiya dorsatanne deeshata suuthan mashshi muuketeysadanne enta kilaho modhuwan kameteysada Godaa mashshay suuthan muuketis; modhuwan kametis. Goday Baasora kataman yarsho, Edoome biittan gita shuka giigisis.
ISA 34:7 Menthati, wofaanotinne boorati entara kundana. Enta gadey suutha xalaala gidana; enta biittay modhon munuqetana.
ISA 34:8 Goday halo keyana gallasinne Xiyoone olida morketa bolla kushe zaariya laythi giigisis.
ISA 34:9 Edoome shaafati melidi made gidis; iya baanay diinne laametana; iya biittay eexiya made gidana.
ISA 34:10 Qammanne gallas tamay to77enna; iya cuyay merinaw cuyana. Edoome biittay yeletethaafe yeletethaa gakanaw baysa gidana; oonika merinaw yaara kanthenna.
ISA 34:11 Shin xiloynne quxarey iya laattana; guttoynne quuroy yan daana. Xoossay Edoome bolla laaletha wadha wodoronne baysatetha tumbe yeddana.
ISA 34:12 He biitta aysiya kawoy deenna; halaqati yaape kichana.
ISA 34:13 Kawo keethata agunthi, miixata ohi ma7ana; workanati allatiya bessinne yanchoti de7iya soo gidana.
ISA 34:14 Bazzo do7ati godaretara gahetana; tuna ayyaanati issoy issuwara xeegetana; qamma qoolleti wodhidi yan daana.
ISA 34:15 Guttoti yan keethe keexidi, phuuphullidi qoxana. Banta nayta banta qefeta garsan haphana; phircoti banta laggetara yan shiiqana.
ISA 34:16 Godaa maxaafan koyidi nabbabite. Godaa doonay odida gishonne iya ayyaanay shiishida gisho, haysatape issoyka pacenna; qassi issoyka ba laggey bayna deenna.
ISA 34:17 I, entaw saama kessis; iya kushey biitta entaw wodoron shaakis; enti iya merinaw laattana; yeletethaafe yeletethaa gakanaw enti yan daana.
ISA 35:1 Baysa biittaynne mela biittay ufaytana; aykoy bayna mela biittay ufaytananne ciiyana.
ISA 35:2 Mela biittay ciishshe ma7ana; ufaysa mazmure yexana. Libaanose bonchuwa ma7ana; Qarmeloosanne Saarona gitatethay imetana; enti Godaa bonchuwanne nu Xoossaa gitatetha be7ana.
ISA 35:3 Daaburida kushetanne argaacida gulbatata minthite.
ISA 35:4 Yashsha wozani de7eysatako, “Minnite! Yayyofite! Heko, hinte Xoossay halo keyanawunne ba xoossatethan kushe zaaranaw yidi hintena ashshana” yaagite.
ISA 35:5 He wode, qooqeta ayfey dooyetana; tulleta haythay si7ana.
ISA 35:6 Wobbeti gen7eda gupana; dedoti ufaysan yexana; mela biittan haathi goggana; mela bessan pultoy dhuuqana.
ISA 35:7 Xuuggiya shafey eele haathi gidana; mela biittay haathe pultana; workanati allatiya bessan maatinne mayreynne maqi dolana.
ISA 35:8 Yaara wogga ogey keyana; ika “Geeshshatetha Oge” geetetana. Tunati he ogiyara bookona; eeyati yan simeretokona; shin geeshshatas gidana.
ISA 35:9 Gaammoy woyko yashshiya do7ati yaara kanthokona; yan bentokona; shin wozetidaysata xalaali hemetana.
ISA 35:10 Goday wozidaysati simmana; yexish, Xiyoone gelana; merinaa ufaysay enta huuphiyan uttana. Enti ufaytananne hashshu gaana; azzanoynne ooley entafe haakana.
ISA 36:1 Hizqiyaasi kawotida tammanne oyddantho laythan, Asoore kawoy Sanakreemi yuushoy gimbetida Yihuda katamata olidi oykis.
ISA 36:2 Hessafe guye, Asoore kawoy Laakiso katamaape issi toora mocona daro olanchotara kawa Hizqiyaasako Yerusalaame yeddis. I, bidi Ma7o Meecciya gadiyako efiya ogiyape qommo baggara de7iya eelida haathay goggiya dhawa matan eqis.
ISA 36:3 Kawo gadho aysiya Alqa na7ay Eliyaqeemi, xaafey Sheebinne, taarike xaafey, Asaafa na7ay, Yo7aasi iyako kare keyidosona.
ISA 36:4 Asoore toora moconay entako, “Hizqiyaasas haysada yaagidi odite: ‘Wolqaama Asoore kawoy, neeko haysada’ yaagees: neeni haysa mela minnanaw aybin ammanetadii?
ISA 36:5 Neeni coo qaalan, olaa oletanaw taw cincatethinne wolqi de7ees yaagasa. Shin neeni oonan ammanetada ta bolla haysada makallay?
ISA 36:6 Neeni ‘Gibxe kawoy tana maaddana’ gada qopidaba gidiko meqida mayre xam7a guufetiya asa mela. Xam7ay meqin pincoy kushiya caddesinne madunxisees. Gibxe kawoy banan ammanetiya asa ubbaas hessa mela.
ISA 36:7 Shin neeni, ‘Nuuni Godan, nu Xoossan, ammanetoos’ yaagiko, Hizqiyaasi Yihudanne Yerusalaame asaa, ‘Hinte Yerusalaamen de7iya yarsho bessan goyinnanaw koshshees’ gidi, Xoossaa goyinniya dhoqa bessatanne yarsho bessata diggiday iya gidennee?
ISA 36:8 “Ane ha77i haaya! Ta godaa Asoore kawuwara geedareta. Togganaw danda7iya asi ne demmiko, nam7u mukulu parata ta new immana.
ISA 36:9 Neeni, ‘Gibxeti para asatanne para gaareta taw yeddana’ gada ammaniko, ta godaa toora moconatape issi laafaka zaaranaw danda7aka.
ISA 36:10 Hessa bollaka, taani ha biitta dhaysanaw tuma Godaa sheney bayna keyadina? Goday ba huuphen tana ‘Bada ha biitta olada dhaysa’ yaagidi kiittis” yaagis.
ISA 36:11 Hessafe guye Eliyaqeemi, Sheebinne Yo7aasi Asoore halaqaako, “Nuuni eriya Aramike doonara nuus ne aylletas odape attishin, gimbe dirsa bolla de7iya asay si7ana mela Ibraawetho doonan odopa” yaagidosona.
ISA 36:12 Shin halaqay zaaridi, “Ha kiitaa taani hintewunne hinte godaa xalaalas odana mela tana ta goday kiittibeenna. Hintera issife banta shi7a maanawunne banta sheesha uyanaw de7iya, ha gimbe dirsaa bolla de7iya asa ubbaas odana mela kiittis” yaagis.
ISA 36:13 Asoore halaqay dendi eqidi, ba qaala dhoqu oothidi, Ibraawetho doonan haysada yaagis: “Wolqaama gidida Asoore kawoy giyaba si7ite!
ISA 36:14 Kawoy hinteko haysada yaagees; ‘Hizqiyaasi hintena cimmofo’ I hintena ta kushepe ashshanaw danda7enna.
ISA 36:15 Hizqiyaasi hintena, ‘Tuma Goday nuna ashshana; ha katamayka Asoore kawa kushen gelenna’ yaagidi, hinte Godan ammanetana mela oothofo.
ISA 36:16 “Hinte Hizqiyaasi odiyaba si7opite. Asoore kawoy hintena, ‘Taara sigetite; haa taako yiite. Hessa hinte oothiko, hinte ubbay hinte woynepenne hinte balasepe maana; hinte bookida ollaafeka haathe uyana.
ISA 36:17 Taani yada, hintena hinte biitta daaniya biitta ekada efana. He biittay kathinne woyney kumida biitta’ ” yaagis.
ISA 36:18 “Hizqiyaasi, ‘Goday hintena ashshana’ yaagidi cimmonnaada naagetite. Hara kawotethata xoossatape ba biitta Asoore kawa kushepe ashshida xoossi de7iyee?
ISA 36:19 Hamaata xoossatinne Arfada xoossati awun de7oona? Safarwayma xoossati awu bidonaa? Enti Samaariya ta kushepe wothi ekidona?
ISA 36:20 Ha biittata xoossatape ba biitta ta kushepe ashshidi ekiday de7ii? Yaatin hinte, ‘Goday Yerusalaame ta kushepe ashshana’ yaagidi qopeetii?” yaagis.
ISA 36:21 Shin kawoy entako, “Iyaw ay zaaroka immopite” yaagidi zorida gisho, asay issi qaalaka iyaw zaaronna si77i gidoosona.
ISA 36:22 Hessafe guye kawo gadho aysiya Kalqe na7ay Eliyaqeemi, xaafey Sheebinne taarike xaafey Asaafa na7ay Yo7aasi banta ma7uwa peedhidosona. Hizqiyaasako bidi Asoore halaqay gidaba ubbaa iyaw odidosona.
ISA 37:1 Kawoy Hizqiyaasi hessa si7ida wode ba ma7uwa peedhidi, kayo ma7o ma7idi, Godaa keethi gelis.
ISA 37:2 Kawo gadho aysiya Eliyaqeemi, xaafey Sheebinne kaalethiya kahineti kayo ma7o ma7idi, Amoxe na7aa nabiya Isayaasako baana mela kiittis.
ISA 37:3 Enti Isayaasako bidi, Hizqiyaasi haysada yaagees: “Ha gallasay meto gallas, seera gallasinne yeella gallas. Hessika na7i yeletanaw wodey gakin, bannakada yelanaw wolqi dhayida maccasa mela gidida.
ISA 37:4 De7o Xoossaa cayanaada iya goday, Asoore kawoy, kiitida halaqaa qaala Goday ne Xoossay si7onna aggenna. Qassi Goday ne Xoossay he qaala gaason iya seeronna aggenna. Hessa gisho, asaa giddofe attanaysatas woossa” yaagidosona.
ISA 37:5 Kawoy Hizqiyaasi kiittidaysa Isayaasi si7ida wode,
ISA 37:6 entako, “Hinte godaas haysada yaagidi odite: Goday, ‘Asoore kawa aylleti tana cayishin, neeni si7ida cashsha qaalas yayyofa.
ISA 37:7 Heko, I oda si7idi, ba biitta simmana mela, taani iya giddon issi ayyaana yeddana. Yaatada I ba biitta bidi yan mashshan hayqanaada oothana’ yaagees” yaagidi kiittis.
ISA 37:8 Asoore kawoy Laakiso katamaape dendidi bidaysa Asoore halaqay si7idi, guye simmidi kawoy Libina kataman oleteysa demmis.
ISA 37:9 Kawoy Sanakreemi, “Tophe kawoy Tirihaaqi nena olanaw yis” giya odaa si7idi, Hizqiyaasas haysada yaagidi kiittis.
ISA 37:10 “Yihuda kawa Hizqiyaasa, neeni ammanetiya Xoossay, ‘Yerusalaame Asoore kawa kushen yeggenna’ yaagidi cimmofo.
ISA 37:11 Asoore kawoti biittata ubbaa waati dhaysidaako neeni si7adasa. Yaatin, neeni attanee?
ISA 37:12 Beni ta mayzati dhaysida Gozaana, Kaaranenne Rafeesa biitta xoossatinne Talasaaran de7iya Edene biitta xoossati he biittata dhayope ashshidonaa?
ISA 37:13 Hamaata kawoy, Arfada kawoy, Safarwayma kawoy, Heena kawoynne Iwa kawoy awun de7oona?” yaagidi kiittis.
ISA 37:14 Hizqiyaasi dabdaabiya kiitetida asaape ekidi nabbabis. Dabdaabiya Godaa keethi efidi Godaa sinthan miccis.
ISA 37:15 Godaa haysada yaagidi woossis:
ISA 37:16 “Abeeti Ubbaafe Wolqaama Godaw, kiruubetape gidduwan uttida Isra7eele Xoossaw, sa7a kawotethata ubbaa bolla ne xalaali Xoosse. Saluwanne sa7aa neeni medhadasa.
ISA 37:17 Abeeti Godaw, ne haytha yeggada haa si7a. Abeeti Godaw, ne ayfiya dooyada haa xeella. Nena, de7o Xoossaa, Sanakreemi cayida cashshaa si7a.
ISA 37:18 “Abeeti Godaw, Asoore kawoti kawotethatanne enta biitta dhaysidaysi ee tuma.
ISA 37:19 Enta xoossata taman xuuggidi dhaysidosona; Enta xoossati kaseka asa kushey massidi kessida mithinne shuchi gidiya gisho, xoossata gidokona.
ISA 37:20 Hiza abeeti Godaw, nu Xoossaw, ne xalaali Godaa gideysa sa7aa kawotethati ubbay erana mela neeni nuna iya kushepe ashsha” yaagidi woossis.
ISA 37:21 Hessafe guye, Amoxe na7ay Isayaasi Hizqiyaasas haysada yaagidi kiittis: Goday, Isra7eele Xoossay haysada yaagees: “Neeni Asoore kawa Sanakreema gaason tana woossida woosa taani si7as” yaagees.
ISA 37:22 “Goday Sanakreema haysada yaagis. Xiyoone geela7iya nena kadhasu; leqasu; Yerusalaame na7iya ba huuphiya qaathada nena borasu.
ISA 37:23 Neeni cayidaynne toochiday oonee? Ne oodde bolla ne qaala dhoqu oothada odetadii? Ne otoron oona dhoqu gada xeelladii? Hessa ne oothiday Isra7eele Geeshshaa bollana gidennee?
ISA 37:24 Neeni kiitida asaa baggara Godaa cayadasa. Haysada yaagadasa: ‘Ta daro para gaaretara dhoqa zumaa huuphiya, Libaanose zuma xeera keyas. Ubbaafe adussa zigatanne ubbaafe lo77o xiiddata qanxas. Dhoqa bessan de7iya xittida wora gakas.
ISA 37:25 Taani allaga biittatan haatha olla bookada haathe iyape uyas. Gibxe biittan goggiya haatha ubbaa taani ta tohuwan yedhada melisas’ ” yaagadasa.
ISA 37:26 “Daro wodepe sinthe neeni gimbetida katamata laallada, shucha keela kessana mela, ta qofaa qacha wothidaysa ne erabikii? Taani ha77i oothiya oosota beni halcha wothas.
ISA 37:27 Hessa gisho, enta asaas wolqay ixin, enti kawuyidosonanne yeellatidosona. Enti maata melanne yooga ciishsha mela. Enti keethaa huuphen doliya maata melanne leegey kundisiya katha mela hanidosona.
ISA 37:28 “Shin neeni uttiya, keyiya, geliya bessaanne ta bolla ne hanqetida hanquwa erayis.
ISA 37:29 Ne ta bolla hanqetida gishonne, ne otoruwa taani si7ida gisho, taani ne siidhiyan dafo aathana; ne doonan bixaala barsana. Yaatada neeni yida ogiyara nena guye zaarana.”
ISA 37:30 Isayaasi kawa Hizqiyaasako haysada yaagis. “Hessi poletanaysas mallay haysa; ha laythinne wonto laythi hinte aasebo kaxida kathi maana. Shin heedzantho laythan hinte, hinte huuphen zeritenne cakite; woyne tokitenne iya ayfiya miite.
ISA 37:31 Yihuda asaape attidaysati xapho yeddana; ayfe ayfana.
ISA 37:32 Attida guuthati Yerusalaamepenne Xiyoone deriyape yaana. Ubbaafe Wolqaama Godaa qanaatey hessa oothana.
ISA 37:33 “Hessa gisho, Asoore kawuwaba Goday haysada yaagees. Asoore kawoy ha katamaa gelenna; woyko haysan ba dongiya dukenna; woyko ba gondalliya oykidi, ha katamaa sinthe aadhenna; woyko katamaa yuushuwa teqenna.
ISA 37:34 Asoore kawoy ba yida ogiyara guye simmana; ha katamaa gelenna.” Taani Goday haysa odayis.
ISA 37:35 “Taani ta bonchuwa gishonne ta aylliya Dawita gisho, ha katamaa ashshana” yaagis.
ISA 37:36 He qamma Godaa kiitanchoy keyidi, Asoore asay dunkaanida guta bidi, 185,000 addeta wodhis. Wontetha gallas asay dendidi ahi aha bolla dooretidaysa be7idosona.
ISA 37:37 Hessa gisho, Asoore kawoy Sanakreema dendidi, guye simmi bidi Nanawe kataman uttis.
ISA 37:38 Issi gallas Sanakreema ba xoossaa Nisirooka keethan goyinnishin, iya nayti Adramelekinne Sarxari mashshan iya wodhidi Araraate biitta baqatidosona. Iya na7ay Asiradooni iya bessan kawotis.
ISA 38:1 He wode kawoy Hizqiyaasi hargidi, hayqanaw matis. Amoxe na7ay nabey Isayaasi iyako bidi, Goday, “Ne hayqana haniya gisho ne keetha giigisa” yaagis.
ISA 38:2 Hizqiyaasi godaako simmi zin7idi, Godaa woossis.
ISA 38:3 “Abeeti Godaw, taani ne sinthan tumatethaninne kumetha wozanan hemetidaysanne nena ufaysiyabaa oothidaysa hassaya” yaagidi cametidi yeekis.
ISA 38:4 Hessafe guye, Godaa qaalay Isayaasako,
ISA 38:5 Bada Hizqiyaasako, Goday ne mayza Dawita Xoossay, “Taani ne woosa si7as; ne afuthaa be7as. Ne laytha bolla taani tammanne ichashu laytha gujana.
ISA 38:6 Nenanne ha katamaa Asoore kawa kushepe ashshana; taani ha katamaas oletana” yaaga.
ISA 38:7 “Goday ba gida qaala polanaw immida mallay haysa yaagis:
ISA 38:8 Akaazi keyanaw giigisida dethan de7iya kuyay tammu tango guye simmidi baana mela taani oothana” yaagis. Kuyay tammu tango guye simmidi bis.
ISA 38:9 Yihuda kawoy Hizqiyaasi hargiyafe paxidi xaafida mazmurey haysa:
ISA 38:10 Taani, “Ta de7o laythay bagga gakonna de7ishin, hayqo pengera gelana haniyana? Attida laytha bonqetana haniyana?” yaagas.
ISA 38:11 “Taani de7on de7eyisata biittan Godaa be7ike; ha sa7an ase be7ike; ha alamiyan de7eysatara zaarada de7ike.
ISA 38:12 Dorse heemmeyisata dunkaaniyada, ta de7oy shodetis. Dorzey afila wandaraashen xaaxeysada, ta de7oy xaaxetis. Dorzey afila duuthiyada, ta de7uwa duuthis. Wontafe omarsi gakanaw tana dhaysaasa” yaagas.
ISA 38:13 “Qamma kumetha danda7an naagas; gaammoda ta meqetha ubbaa menthadasa; wontafe omarsi gakanaw tana dhaysadasa.
ISA 38:14 Taani kaarodanne cilashoda waassas; holleda zuuzumas. Ta ayfey salo xeellishe daaburis; Godaw, taani un7etas; neeni tana ha un7aafe kessa” yaagas.
ISA 38:15 Haysa ubbaa oothiday Godaa; taani ay gaanaw danda7iyana? Ta shempoy un7etida gisho, ta laytha ubbaa ashketethan daana.
ISA 38:16 Godaw, haysa mela seeran asay de7on de7ees. Ha77i ta payyatetha zaarada, tana de7on wotha!
ISA 38:17 Ta un7etethay taw lo77o gidis; neeni ta shempuwa dhayo ollafe ashshadasa; ta nagara ubbaa neeni guye yeggadasa.
ISA 38:18 Duufoy nena galatenna; hayqoy nena sabbenna. Ollan wodhidaysati, ne ammanetetha ufaysi oothokona.
ISA 38:19 Taani hachi nena galateysada, de7on de7eysati nena galatoosona. Ne ammanetetha aawati banta naytas odoosona.
ISA 38:20 Goday tana ashshana; hessa gisho, nuuni nu de7o laytha ubban, Godaa keethan diithan yexana.
ISA 38:21 Isayaasi kase, “Balase daaxidi, iya kixa bolla wothite; I paxana” yaagis.
ISA 38:22 Hizqiyaasi kase, “Taani paxada Godaa keethi baanaysas mallay aybe” yaagidi Isayaasa oychis.
ISA 39:1 He wode, Baldaana na7ay, Babiloone kawoy Mardook-Baldaani, Hizqiyaasi hargidi paxidaysa si7ida gisho, dabdaabenne imota Hizqiyaasas yeddis.
ISA 39:2 Hizqiyaasi kiitetidi yida asata mokis. Ba shaluwa minjiya keethan de7iya bira, worqaa, sawuwa, lo77o zayte, ba ola miishetanne ba shaluwa minjiya keethan de7iyaba ubbaa enta bessis. Ba son woyko ba gadhuwan de7iyaba ubbaafe Hizqiyaasi enta bessonna aggidabay baawa.
ISA 39:3 Nabey Isayaasi kawa Hizqiyaasako bidi, “Ha asati woygidona? Awupe yidona?” yaagidi oychis. Hizqiyaasi, “Enti taako, haaho biitta Babiloonepe yidosona” yaagis.
ISA 39:4 Isayaasi zaaridi, “Enti ne son ay ay be7idonaa?” yaagidi oychis. Hizqiyaasi, “Enti ta gadhon de7iya ubbaba be7idosona; ta shaluwa minja keethan de7iyabaape taani enta bessonnabay baawa” yaagis.
ISA 39:5 Yaatin, Isayaasi Hizqiyaasako, “Ubbaafe Wolqaama Goday giyaba si7a.
ISA 39:6 ‘Neeni, kawo gadhon de7iyaba ubbaynne ne mayzati hachi gakanaw shiishidaba ubbay kumthi di7etidi, Babiloone biitta baana wodey yaana; aybika attenna.
ISA 39:7 Qassi neepe yeletida ne ashonne ne suuthu gidida ne kochati di7etidi baana; Babiloonen kawo gadhon shuufa gididi oothana’ yaagees” yaagis.
ISA 39:8 Hizqiyaasi zaaridi, “Neeni odida Godaa qaalay lo77o. Shin ta laythan saronne wopa gido” yaagidi qopis.
ISA 40:1 Hinte Xoossay haysada yaagees: “Ta deriya minthethite! Minthethite!
ISA 40:2 I aylletethan de7ida wodey poletis; iya nagaray atto geetetis; ba nagaraa gisho, Goday iya dako seeridaysa, Yerusalaames liiqo qaalan odite; awaajite” yaagees.
ISA 40:3 Haysada giya girsay si7etees; “Mela biittan Godaa ogiya giigisite; nu Xoossaas Araba mela biittan horoga sitti oothite.
ISA 40:4 Zangaara ubbay dhoqu gaana; dereynne zumay ziqi gaana; iita ogetinne gela kessati dembatana.
ISA 40:5 He wode Godaa bonchoy qoncana; asho ma7ida ubbay hessa issife be7ana. Godaa doonay haysa odis” yaagees.
ISA 40:6 Issi girsi, “Waassa” yaagishin si7as; taani, “Woygada waasso?” yaagas. “Asi ubbay maata mela; iya boncho ubbay ciishsha mela.
ISA 40:7 Godaa iya bolla shempiya wode, maatay melees; ciishshay qoqofetees; asi tuma maata mela.
ISA 40:8 Maati melees; ciishshi qoqofetees; shin nu Xoossaa qaalay merinaw eqidi de7ees” yaagada waassa.
ISA 40:9 Neno Xiyoones lo77oba odeyso; zuma bolla keya. Neno Yerusalaames lo77oba odeteyso; ne qaala dhoqu oothada waassa. Yayyofa; dhoqu ootha; Yihuda katamatas, “Hinte Xoossay haysish” yaaga.
ISA 40:10 Heko, Ubbaa Haariya Goday wolqara yees; iya qesey iyaw haarana. Iya woytoy iyara de7ees; ciggiya gatey iya sinthana.
ISA 40:11 I ba wudiya henthanchoda heemmana; Ba dorsa marata ba qesiyan shiishana; enta ba ki7on idimmana; dhantheyisata loddara kaalethana.
ISA 40:12 Haathata ba kushe qaaqan, salota takadhon likiday, biitta baana daachon makiday, deretanne zumata mizaanen likiday oonee?
ISA 40:13 Godaa Ayyaana eriday, iya zoridi tamaarsiday oonee?
ISA 40:14 Iyaw qoncisana mela oona zore oychidee? Suure pirdaa iya tamaarsiday oonee? Iya cincatethi tamaarsiday, iya akeeka bessiday oonee?
ISA 40:15 Heko, kawotethati xuggan de7iya issi xoko mela; enti mizaane bolla de7iya baana mela; I yuushoy abban teqetida biittata baanada likes.
ISA 40:16 Libaanose mithay yarsho bessan eexanaw gidenna; iyan de7iya do7ati xuussa yarshos gidokona.
ISA 40:17 Kawotethati ubbay iya sinthan baynaba mela; enti iya sinthan ubba aykoka gidokona; baynabapeka laafa.
ISA 40:18 Yaatin, Xoossaa hinte oodera ginayetii? Ayba misilera gathidi xeelletii?
ISA 40:19 Kushe hiillanchoy eeqa misile giigisees; worqa sheesheysi worqan lanxees; bira sheesheysi iya bolla bira santhalaata medhees.
ISA 40:20 Miishey bayna manqoy, yarshos xoodhonna mithi doorees. Misiley qaaxonna mela essanaw kushe hiillancho koyees.
ISA 40:21 Eribeeketii? Woyko si7ibeeketii? Haysi hintew koyrope odetibeennee? Woyko sa7i medhetoosape haysa hinte akeekibeketii?
ISA 40:22 I biitta gertuwafe bolla baggan ba araatan uttees; biittan de7iya asati xaqo mela. Salota gesheda miccees; dunkaaneda de7iya bessi oothidi tolees.
ISA 40:23 I, halaqata baynabaada oothees; ha alamiya haareyisata hada kessees.
ISA 40:24 Enti toketidi buroo gam7onnashin, zeretidi buroo xapho yeddonnashin, Goday enta bolla carko yeddis; enti melin gotey enta punoda efis.
ISA 40:25 Yaatin, tana oodera likeyetii? Tana oodera ginayetii? yaagees geeshshay.
ISA 40:26 Hinte ayfiya dhoqu oothidi salo xeellite; ha xoolintota medhiday oonee? I enta olanchoda kaalethees; enta taybuwa erees. I enta ubbaa enta sunthan sunthan xeegees; iya wolqa gitatethaafenne minotethafe dendoysan, entafe issoyka dhayenna.
ISA 40:27 Neno Yayqoobaa, neno Isra7eele, Ta ogey Godaape geemmis; ta pirday Xoossaafe qosetis; yaagada ayis odetay?
ISA 40:28 Erabikii? Si7abikii? Goday merina Xoossa; biitta ubbaa medhiday iya. I daaburenna; woyko argaacena; oonika iya qofaa eranaw danda7ena.
ISA 40:29 I daaburidaysatas wolqa immees; minotethi baynaysas minotethi gujees.
ISA 40:30 Hari attoshin yalaga nayti daaburoosona; argaacosona; na7atethati daaburidi kundoosona.
ISA 40:31 Shin Godaa ammanetidi naageysati, banta wolqaa oorathana. Enti arganthada qefen paallana; woxana, shin daaburokona; hemetana, shin argaacokona.
ISA 41:1 Hinteno, yuushoy abban teqetida biittato, si77i gidi, taani odeysa si7ite! Derey banta wolqaa ooratho; enti haa shiiqidi, odeto; ane nuuni pirdetanaw issife shiiqoos.
ISA 41:2 “Doloha baggafe issuwa denthidi biya bessa ubban xoono immey oonee? I kawotethata iya kushen aathidi immees; kawota iyaw haarisis. I enta ba mashshan bido kessees; ba dongiyan enta puno oothees.
ISA 41:3 I enta yedethishe, iya tohoy kase yedhiboona ogiyara saro kanthees.
ISA 41:4 Haysa oothidaynne poliday yeletethaaka koyrope xeegiday oonee? Taani Goday, koyruwara de7ayis wursetharaka de7ey tana” yaagees.
ISA 41:5 Yuushoy abban teqetida biittati, hessa be7idi yayyidosona; sa7aa gaxan de7eysati kokoridosona. Enti issife shiiqidi taako yidosona.
ISA 41:6 Issoy issuwa maaddees; ba ishaa, “Minna” yaagees.
ISA 41:7 Kushe hiillanchoy worqa sheesheysa minthethees; naariqan qoxidi lee7iseysi baachan birata seeriseysa, “Minna” gees. I birata dhantheysa, “Lo77o oothaasa” yaagees; eeqay qaaxonna mela mismaaren dhishees.
ISA 41:8 “Shin neno Isra7eele, ta aylliyaw, ta doorida Yayqoobaa, ta laggiya Abrahaame kochaw,
ISA 41:9 taani nena biitta gaxape ehas; haahosoope xeegada, ‘Neeni ta aylle’ taani nena dooras; taani nena yeggike.
ISA 41:10 Yayyofa, taani neera de7ayis; dagammofa, taani ne Xoossaa. Taani nena minthana; nena maaddana; taani nena xooniya ta ushacha kushiyan katisana.
ISA 41:11 Ne bolla hanqetiya ubbay yeellatidi kawuyana; neera eqeteysati baynaba gidana.
ISA 41:12 Ne morketa neeni koyana; shin enta demmaka; nena oleysati baynaba gidana.
ISA 41:13 Taani Goday, ne Xoossay, ne ushacha kushiya oykana; yayyofa, taani nena maaddana.
ISA 41:14 Neno guxuniyaw, Yayqooba, hinteno Isra7eele asaw, yayyofite; taani hintena maaddana; hintena woziya Isra7eele Geeshshay tana.
ISA 41:15 Heko, taani nena oorathi, qaranne achara de7iya, kathi qoxiya miishe oothas. Neeni dereta qoxada liiqisana; zumataka puno oothana.
ISA 41:16 Neeni enta punnana; carkoy enta efana; shin neeni Godan ufaytana; Isra7eele Geeshshan bonchetana.”
ISA 41:17 “Manqotinne metootanchoti haathe koyana, shin demmokona; enta qoodhey saamon melana. Gidoshin, taani Goday enta si7ana; taani, Isra7eele Xoossay, enta aggike.
ISA 41:18 Taani mela zumata bolla shaafa, zangaaratan pulto dhuusana. Bazzuwa haathi eelliya bessi, mela biitta pultoy keyaso oothana.
ISA 41:19 Taani mela biittan, ziga, soqala mithi, barseneete mithaanne shamaho dolisana. Mela biitta xiiddi, maaroynne caci kumida biitta oothana.
ISA 41:20 Isra7eele Geeshshay hessa medhidaysanne Godaa kushey hessa oothidaysa asay be7ana, erana, qopananne akeekana mela taani hessa oothas.”
ISA 41:21 “Ane hinte mootuwa shiishite” yaagees Goday; “Ane hinte marka haa ehite” yaagees Yayqooba kawoy.
ISA 41:22 Ane enti banta eeqata haa eho, aybi hananeeko enta eeqati nuus odo. Nuuni akeekana melanne enta wursethaa erana mela kase hanidabay aybeko nuus odo; woyko sinthafe hananaba nuus qonciso.
ISA 41:23 Hinte xoossata gideysa nuuni erana mela sinthafe yaanaw de7iyaba nuus odite. Nuuni dagammana melanne yayyana mela, lo77o gidin iita gidin ane issiba oothite.
ISA 41:24 Shin hinte baynaba mela; hinte oosoyka hada; hintena dooriya asayka ixetidaysata.
ISA 41:25 Taani pudeha baggafe issuwa denthin, I yees. Ta sunthaa xeegiya issoy dolohape yaana; oto medheysi urqa yedheysada, I kaaletheyisata yedhana.
ISA 41:26 Nuuni erana melanne I like gaana mela kasetidi nuus haysa odiday oonee? Hintefe oonika kasetidi haysa qoncisiday, woyko awaajiday woyko ba qaala sissiday baawa.
ISA 41:27 Taani haysa kasetada Xiyoones odas; taani Yerusalaames mishiraacho odeysa immas.
ISA 41:28 Shin taani xeelliya wode issoyka baawa; taani zore oychiya wode enta eeqata giddofe zaaro immiya issoyka baawa.
ISA 41:29 Heko, enti ubbay hada; enta oosoyka pathenna; sheeshidi medhida enta misiletika carko.
ISA 42:1 “Taani katisada oykida ta aylley, ta iyan ufayteysi, taani dooridaysi haysa. Taani ta Ayyaana iya bolla wothas; I kawotethatas suure pirda ehana.
ISA 42:2 I waassenna; ba qaala dhoqu oothenna ba qaala ogen sissenna.
ISA 42:3 Dincetida mayriya I menthenna; lii7i lii7idi eexiya muqaada I toysenna; ammanetethan I suure pirda ehana.
ISA 42:4 I biittan suure pirda essenna gakanaw argaacena woyko guye geenna. Yuushoy abban teqetida biittan de7iya asay iya higgiya si7anaw naagees.
ISA 42:5 Salota medhidaynne enta micciday, sa7aanne sa7a bolla de7iyaba medhiday, sa7an de7iya asaas shempo immiday, iyan hemetiya ubbaas de7o immiday, Godaa Xoossay haysada yaagees.
ISA 42:6 Taani Goday nena xillotethan xeegas; ne kushiya oykada nena naagana. Taani nena asaas caaqo oothana; kawotethatas poo7o oothada immana.
ISA 42:7 Neeni qooqe ayfeta dooyana; dhuma ollan, qasho keethan de7eyisata kessana.
ISA 42:8 Taani Godaa; hessi ta sunthaa; ta bonchuwa taani haras immike; ta galataa eeqatas immike.
ISA 42:9 Heko taani kase odidaba ubbay poletidosona; ha77i taani oorathaba awaajayis; enti hananaape sinthe taani hintew odayis” yaagees.
ISA 42:10 Godaas ooratha mazmure yexite; biitta gaxape gaxaa gakanaw iya galata yexite. Abba giddora beysatinne iyan de7eysati, yuushoy abban teqetida biittatinne iyan de7iya ubbay yexo.
ISA 42:11 Mela biittan de7iya katamati, Qedaare asay de7iya gutati banta qaala dhoqu oothonna. Sela7a kataman de7eysati ufaysan yexo; deriya huuphen banta ililsaa sisso.
ISA 42:12 Enti boncho Godaas immo; iya galata yuushoy abban teqetida biittatan odo.
ISA 42:13 Goday mino asada keyana; ba qaala dhoqu oothidi ola awaajana. Ba qaala dhoqu oothidi gereerana; ba morketa xoonana.
ISA 42:14 Daro wode si77i gada gam7as; si77i gada danda7as. Shin ha77i iqethi oykida maccasada ta waassana; tooka shempananne peenuqana.
ISA 42:15 Deretanne zumata laallana; enta bolla dolidaba ubbaa melisana. Shaafata yuushoy abban teqetida biitta kessana; eele haathata melisana.
ISA 42:16 Taani qooqeta enti eronna ogiyara kaalethana; enti eronna horogara efana. Enta sinthan dhumaa poo7o kessana; enta sinthan de7iya ogiya baasana. Ha ubbaa taani entaw oothana; taani enta oothonna aggike.
ISA 42:17 “Shin eeqa misiletan ammaneteysati, misileta, ‘Hinte nu xoossata’ yaageysati, yeellan guye simmana.
ISA 42:18 Hinte tulleti, si7ite; hinte qooqeti, xeellite, loythidi be7ite.
ISA 42:19 Ta aylliyafe hari qooqey oonee? Ta kiittidaysafe hari tulley oonee? Bana Godaas aathidi immida uraape Godaa aylliyafe hari qooqey oonee?
ISA 42:20 Darobaa be7adasa, shin akeekaka; ne haythay dooya, shin si7aka” yaagees.
ISA 42:21 Goday ba xillotetha gisho, ba higgiya gitayanawunne bonchanaw dosis.
ISA 42:22 Shin ha asay bonqetis; de7iyaba eketis. Olla giddon xihen oyketis, qasho keethan enta bolla gordetis. Enti bonqetidosona, shin enta ashshey baawa; di7etidosona, shin oonika “Enta guye zaara” giya asi baawa.
ISA 42:23 Hinte giddofe haysa si7ey oonee? sinthafe yaana wodiyaba qopey oonee?
ISA 42:24 Yayqooba di7etethas, Isra7eele bonqees aathidi immiday oonee? Nagara oothidi nu qohida, iya ogiya kaallanawunne, iya higgiya kiitetanaw nuuni ixida Godaa gidenneyee?
ISA 42:25 Hessa gisho, I enta bolla ba eexiya hanquwa gussis; enta yuushuwa tama lacon teqis, shin enti eribookona; I enta xuuggis, shin enti akeekibokona.
ISA 43:1 Shin neno Yayqoobaa nena medhiday, neno Isra7eele, nena giigisiday, Goday haysada yaagees: “Taani nena wozida gisho yayyofa; taani nena ne sunthan xeegas; neeni tabaa.
ISA 43:2 Neeni haatha giddora pinniya wode taani neera gidana. Neeni shaafata giddora pinniya wode enti nena mittokona. Neeni tama giddora aadhiya wode xuugetaka; lacoyka nena meenna.
ISA 43:3 Taani nena Ashshiysa, Isra7eele Geeshshaa, Godaa ne Xoossaa. Gibxe new wozo oothada, Tophenne Saaba new laame oothada immana.
ISA 43:4 Neeni ta sinthan al7onne boncho gidiya gisho, taani nena dosiya gisho, asaa ne gisho, kawotethata ne shempuwa gisho laame oothada immana.
ISA 43:5 Taani neera de7iya gisho yayyofa; taani ne nayta dolohape nena wulohape shiishana.
ISA 43:6 Taani pudeha baggaa, ‘Enta zaarada eha!’ dugeha baggaa, ‘Enta teqofa’ yaagana. Ta adde nayta haahosoope, ta macca nayta sa7aa gaxape ehana.
ISA 43:7 Enti ta sunthan xeegetidaysata, taani ta bonchuwas medhidaysata, taani giigisidaysatanne oothidaysata hammite.”
ISA 43:8 Ayfey de7ishin qooqida asata, haythi de7ishin tullida asata kessa.
ISA 43:9 Kawotethati ubbay issife shiiqo; asay duulata utto. Enta eeqata giddofe haysa odanaw, kase aadhidabata nuus qoncisanaw danda7ey oonee? Hara asay si7idi, “Haysi tuma” gaana mela, enti like gideysa bessanaw banta markata eho.
ISA 43:10 Goday haysada yaagees: “Hinte ta markata; hinte tana erana melanne ammanana mela taani Xoosse gideysa akeekana mela taani doorida ta aylleti hintena. Taape kase hara xoossi medhetibeenna; taape guye hara xoossi deenna.
ISA 43:11 Taani Godaa; taape attishin, hari ashshey baawa.
ISA 43:12 Ta kasetada odas, ta oothanaba awaajas, ta ashshas. Hinte giddon de7iya allaga xoossatape hessa oothiday baawa. Taani Xoosse gideysas hinte taw markata.
ISA 43:13 Merinaape merinaw taani Xoosse; ta kushepe oonika ashshena; ta oothidaba laammanaw danda7ey baawa” yaagees Goday.
ISA 43:14 Goday, hintena Woziya, Isra7eele Geeshshay, haysada yaagees: “Hinte gisho, taani Babiloone bolla olanchota kiittana. Babilooneta ubbaa enti ceeqetiya markabetara betana mela oothana.
ISA 43:15 Taani Godaa, hinte Geeshshaa, Isra7eele medhida hinte Kawa” yaagees.
ISA 43:16 Abba giddon oge, wolqaama haathata giddora horoga kessida Goday haysada yaagees.
ISA 43:17 Para gaaretanne parata, olanchotanne mino asata abban ehidi, enti dendonna mela yeggiday, enta muqaada tamada toysida.
ISA 43:18 Goday haysada yaagees: “Kasebata haasayopite; benibata qopofite.
ISA 43:19 Heko, ha77i taani oorathaba oothayis; ika ha77i dolana. Hessi hintew bentennee? Taani mela biittan oge, mela biittan shaafata kessana.
ISA 43:20 Taani doorida, ta asaas mela biittan haathe, mela biittan haatha shaafata immas. Wora do7ati, workanatinne yanchoti tana bonchana.
ISA 43:21 Taani taw medhida dere gidiya gisho, ta galataa awaajana mala ta haysa oothas.
ISA 43:22 Shin neno Yayqoobaa, neeni ta sunthaa xeegabaka; neno Isra7eele, neeni tana saletadasa.
ISA 43:23 Neeni taw xuussa yarshos dorse ehabaaka; hara yarshonka tana bonchabaaka. Taani nena katha yarsho eha gada waaysabike; ixaane taw cuyiso gada daabursabike.
ISA 43:24 Neeni taw sawiya ixaane shammabaaka; ne modho yarshon tana ufaysabaka. Shin neeni ne nagaran tana waaysadasa; ne naaquwan tana daabursadasa.
ISA 43:25 “Ta gisho gada ne nagaraa quchey tana; ne nagaraa zaarada qopike.
ISA 43:26 Ane tana hassayisa; neeni xillo gideysa erisanaw issife shiiqidi mootetoos.
ISA 43:27 Ne koyro aaway nagara oothis; ne astamaareti tana qohidosona.
ISA 43:28 Hessa gisho, taani ta keetha halaqata kawushas; Yayqooba gados, Isra7eele cashshas aathada immas.”
ISA 44:1 Shin ta aylliya Yayqooba, ta doorida Isra7eele, ha77ika si7a.
ISA 44:2 Nena medhida, ne aaye ulon nena giigisida Goday haysada yaagees. Ta aylliya Yayqooba, taani doorida Yishuruuna, yayyofa.
ISA 44:3 Taani saamotida biittan haatha gussana; mela biitta bolla shaafa gogisana. Ta Ayyaana ne nayta bolla, ta anjuwa ne kochaa bolla gussana.
ISA 44:4 Enti haatha doonan dolida maatada, shaafa lanqen de7iya mithada aacana.
ISA 44:5 Issoy bana, taani Godaaba yaagana; hankoy bana Yayqooba sunthan xeegana; haray ba kushiya bolla, “Taani Godaaba” yaagidi caddana; I Isra7eele iya sunthan xeegetana.
ISA 44:6 Goday, Isra7eele Kawoynne iya Woziday, Ubbaafe Wolqaama Goday haysada yaagees: “Koyroy tana; wursethay tana; taape hara Xoossi baawa.
ISA 44:7 Ta meli oonee? De7iko ane awaajo; ane ta sinthan eqidi odo. Benipe doomidi, hanidaba odo; sinthafe hananaba qonciso.
ISA 44:8 Yayyofite; dagammopite; taani haysa benipe doomada odabikina? Kasetada erisabikina? Hessas hinte taw marka. Taape attishin, hara Xoossi de7ii? Hara Zaalli baawa; oonika baynaysa ta erayis” yaagees.
ISA 44:9 Eeqa misileta medhiya ubbay hada; iyan ufaytiyabati enta go7okona. Enta markati qooqeta entaw eri baawa; enti yeellatana.
ISA 44:10 Bana go77onna eeqa Xoossa oothidi giigisiday oonee?
ISA 44:11 Eeqa medhey asepe attishin, hara gidenna; inne iya laggeti yeellatana; ubbati issife shiiqidi eqo, yayyo, yeellato.
ISA 44:12 Birata qoxeysi eeqa oothanaw ba birata taman seerisidi mala immanaw ba mino kushiyan naariqan qoxees. Hessa giigisishe koshatees; iya wolqay wurees; saamotesinne labbanees.
ISA 44:13 Anaaxey wodoron likidi irsaasen iya bolla malla wothees; liiqisiya miishen liiqisees. Lo77o asa malan medhidi ba eeqa keethan wothees.
ISA 44:14 I hessa oothanaw ziga qanxees; wola woyko xiidda wora giddofe dooridi diccana mela oothees. Woyko ziga tokidi iran diccana mela naagees.
ISA 44:15 Iyape baggaa eethanaw go7etees; iyape baggaa ekidi, eethidi kayees; baggaa eethidi kathi kathees. Attidaysa ekidi xoosse oothidi iyaw goyinnees; eeqa medhidi iya sinthan gufannees.
ISA 44:16 Iyape baggaa eethidi kathi kathees; baggan asho caacidi kallidi mees. Qassi tama kayishe, “Eroshsho, tama goopa; waani ho77i” yaagees.
ISA 44:17 Qassi attida mithaa massidi, goyinniya xoossa misile kessees. He misiliya sinthan gufannidi, iyaw goyinnees; “Neeni taw xoosse gidiya gisho, tana ashsha” yaagidi woossees.
ISA 44:18 Enti aykoka erokona; aykoka akeekokona; enti be7onna mela enta ayfey goozetis; akeekona mela enta wozanay gordetis.
ISA 44:19 Eeqa oothiya asaa giddofe ba wozanan, “Iyape baggaa taman eethas; iya bonquwan kathi kathas; iyan asho caacada mas. Iyape attidaysa ixetida eeqa oothada medho? attida cugetha mithas gufannada goyinno?” yaagidi qopiya woyko akeekiya asi baawa.
ISA 44:20 I bido mees; iya cimetida wozanay iya hara soo kaalethis. I ba shempuwa ashshanaw danda7enna; “Haysi ta ushacha kushen de7ey wordo gidenna” gaanaw danda7enna.
ISA 44:21 Goday haysada yaagees: “Yayqoobaa, haysa akeeka; Isra7eele, neeni ta aylle gidiya gisho haysa hassaya. Taani nena medhas; neeni ta aylle; neno Isra7eele, taani nena dogike.
ISA 44:22 Taani ne nagaraa pittada diggas, ne naaquwa caaganada quchas. Taani nena wozida gisho, taako simma” yaagees.
ISA 44:23 “Hinteno saloto, Goday haysa oothida gisho, ufaysan yexite; neno biittaw, ilila. Hinteno dereto, worawnne iya giddon de7iya mitha ubbay mazmure yexite. Goday Yayqooba wozis; Isra7eele giddon bonchetis.
ISA 44:24 Ne aaye ulon nena medhidaysi, nena wozidaysi Goday haysada yaagees: Ubbabaa Medhiday, salota tarka micciday; sa7aaka tarka hiixiday, taani Godaa.
ISA 44:25 Taani wordo nabeta tinbitiya hada oothas; marota kaayowa eeyatethi kessas. Taani cincata cincatethaa shira yeggas; enta eraa eeya oothas.
ISA 44:26 Taani ta aylleta qaala minthana; ta nabeta tinbitiya polana. Taani Yerusalaame katamaa, ‘Neeni asay de7iya bessi gidana’ yaagas; Yihuda katamata, ‘Hinte simmidi keexetana; hinte gimbey ooraxana’ yaagas.
ISA 44:27 Taani goggiya haathata melisana gisho ciimmo haatha, ‘Ne mela’ yaagana.
ISA 44:28 Qiroosako, ‘Neeni ta asaa heemmeysa; neeni ta halchuwa poleysa’ yaagana. I, Yerusalaame katamaa, ‘Neeni simmada keexetana’; xoossa keethaa, ‘Ne baasoy yegetana’ ” yaagana.
ISA 45:1 Goday tiyidaysas, kawota danco bilisaana mela, deriya iyaw haarisana mela, pengeti iya sinthan dooyetana mela iya ushacha kushiya oykida Qiroosa Goday haysada yaagees:
ISA 45:2 Taani ne sinthara baana; dereta dembayana; naase birata sanqata menthana; birata kobeta qanxana.
ISA 45:3 Nena ne sunthan xeegey tana Godaa, Isra7eele Xoossaa gideysa neeni erana mela taani new dhuman de7iya shaluwa, geeman qosetida duretetha immana.
ISA 45:4 Ta aylliya Yayqooba gisho, taani doorida Isra7eele gisho, taani nena ne sunthan xeegas. Neeni tana eronna ixikoka, taani nena boncho sunthan xeegas.
ISA 45:5 Taani Godaa; taape hara xoosse baawa; neeni tana eronna ixikoka taani new wolqa immana.
ISA 45:6 Hessika awi doliyasope wulliyaso gakanaw taape hari baynaysa asay erana melasa; taani Godaa; taape hara xoossi baawa.
ISA 45:7 Taani poo7onne dhuma medhas; Sarotethinne dhayo ehayis; ha ubba taani Goday oothayis.
ISA 45:8 Hinteno saloto, bollafe xillotethi tigite; shaarati bukiso. Biittay dooyeto, atotethi xillotethay issife dolo; taani Goday haysa medhas.
ISA 45:9 Bana Medhidaysara palamiya uraa ayye! I sa7an meqidi wodhida otope issuwa mela. Otoy bana medheysako, Neeni, “Ay oothay?” “New kushey baawa” yaagiyee?
ISA 45:10 Ba aawa, “Tana ayis yeladii?” giya, ba aayiw, “Tana haysada ayis bannakadii?” giya uraa ayye!
ISA 45:11 Goday, Isra7eele Geeshshay, iya Medhidaysi haysada yaagees: “Sinthafe hananaba, hinte tana ta naytabaa oychanaw, ta kushe oosotaba tana kiittanaw bessetii?
ISA 45:12 Taani sa7aa oothas; aseka iya bolla medhas. Salota taani ta kushen miccas; enta bolla xoolintota ubbaa wothas.
ISA 45:13 Taani Qiroosa xillotethan denthas; iya ogiya ubbaa suure oothana. Miishe qanxonna woyko woyto immonna I ta katamaa keexana; ta asaa di7ope zaarana” yaagees ubbaafe Wolqaama Goday.
ISA 45:14 “Goday haysada yaagees: Gibxe duretethaynne Tophe zal7ey, geesay adussa gidida Saaba asati neeko yidi, nebaa gidana; enti santhalaatan qashetidi, nena kaallana. Enti new goyinnishe, ‘Xoossi neera de7ees; iyape attishin, hara xoossi baawa’ ” yaagana.
ISA 45:15 “Isra7eele Ashshiya Godaa Xoossaw, tuma neeni nena genthiya Xoosse.
ISA 45:16 Eeqa medheysati ubbay yeellatananne kawuyana; enti issife yeella ma7ana.
ISA 45:17 Shin Goday Isra7eele merinaa atotethan ashshana; hinte merinaw yeellateketa kawuyeketa.
ISA 45:18 Salota medhida Goday, biitta giigisidi oothiday, asi daana melape attishin, biitta coo medhiboonna Xoossay haysada yaagees: taani Godaa; taape hari baawa.
ISA 45:19 Taani geeman, woyko dhuma biittan uttada odabike. Yayqooba zerethaako, ‘Tana coo bessan koyite’ gabike; taani Goday tumaa haasayis; like gididaba qoncisayis.
ISA 45:20 Hinteno kawotethata giddofe attidaysato, issife haa mata shiiqite. Mithafe oosetida eeqa misiliya tooki yuuyeysatas, ashshanaw danda7onna xoossata woosseysatas eri baawa.
ISA 45:21 Ane palamit; hinte mootuwas gaaso shiishite; issife zoretite. Daro wodepe kase haysa odiday oonee? Benipe haysa awaajiday oonee? Tana Godaa gidikinaayee? Taape attishin, hara Xoossi baawa. Taape attishin, hari xilloynne ashshiya Xoossi baawa.
ISA 45:22 Hinteno biitta gaxape gaxa gakanaw de7eysato, taako simmidi attite; taape attishin, hara Xoossi baawa.
ISA 45:23 Taani tanan caaqas; guye simmonna qaali ta doonape xillotethan keyis. Gulbati ubbay taw gulbatana; inxarsi ubbay tanan caaqana.
ISA 45:24 Enti tabaa haasayishe, ‘Xillotethinne minotethi Godaa xalaalan de7ees’ yaagana. Iya ixiya ubbay iyako yidi yeellatana.
ISA 45:25 Shin Isra7eele zeretha ubbay, Godan, xoononne boncho demmana.
ISA 46:1 Beella geetetiya Babiloone eeqay hokis; Nebo geetetiya eeqay gufannis. Enta misileti caana mehe bolla caanetidosona; daaburida mehetas deexo tooho gididosona.
ISA 46:2 Deexuwape dendidaysan caana meheti, caanara issife kundidosona. Eeqati bantana ashshanaw danda7onna gisho bantaw di7etidi bidosona.
ISA 46:3 Hinteno, Isra7eelepe attidaysato, Yayqooba kochato, hinte qanthatida wodepe doomada naagiday, hinte yeletida wodepe doomada tookiday, taani odeysa si7ite.
ISA 46:4 Hinte cimana gakanaw, puulumana gakanaw taani tana; ta hintena maaddana. Taani hintena medhas; ta hintena naagana; ta hintena tookananne ashshana.
ISA 46:5 Tana oodera gaaddeyeetii? woyko oodera likiseetii? Enti woli daanees gaanaw tana oodera ginayetii?
ISA 46:6 Asay worqanne bira banta qarxiitape qolidi, xoosse oothidi medhana mela worqa sheesheysas immoosona. I oothidi simmin enti eeqa sinthan gufannidi goyinnoosona.
ISA 46:7 Enti iya denthidi, banta hashiyan tookidi, iya bessan iya wothin, I he bessan eqi aggees. Ba de7iya bessaafe qaaxenna; asi iyako waassiko iyaw zaaro immenna; iya metuwape iya ashshena.
ISA 46:8 Hinteno nagaranchoto, haysa hassayite; qopite; hinte wozanan wothite.
ISA 46:9 Beni wode hanidabata hassayite; taape attishin, hara Xoossi baawa; taani Xoosse; ta meli oonika baawa.
ISA 46:10 Ta qofay minnana; taani ta halchuwa ubbaa polana. Wursethan hananaba doomethan, sinthafe hananaba koyrottada erisayis.
ISA 46:11 Doloha baggafe bonqiya kafo, haaho biittafe ta qofaa poliya asi xeegana. Taani qopidaba polana; taani halchidaba oothana.
ISA 46:12 Hinteno wozani muumidaysato, xillotethafe haakidaysato tana si7ite.
ISA 46:13 Taani ta xillotethaa matayana; ika haahona gidenna. Ta atotethay gam7enna; ta atotetha Xiyoones, ta bonchuwa Isra7eeles immana” yaagees.
ISA 47:1 “Babiloone geela7ee, duge wodhada baana bolla utta. Babiloone naatte, ne araata aggada sa7an utta. Hizape guye neeni saaphotiyaronne baalotiyaro geetetaka.
ISA 47:2 Woxa teqada kathi gaacca; ne guulunthaa qaara; ne adussa ma7uwa kessa; ne wodiriya qaarada shaafa pinna.
ISA 47:3 Ne kalloy qaaretana; ne pokoy bentana. Taani halo keyana; oodeska qadhetike” yaagees Goday.
ISA 47:4 Nuna Woziya Isra7eele Geeshshaa sunthay Ubbaafe Wolqaama Godaa.
ISA 47:5 “Babiloone naatte, bada dhuman si77i gada utta; Hizape guye neeni kawotethata kawiw geetetaka.
ISA 47:6 Taani ta asaa hanqetas; ta laata tunisas; taani enta ne kushen aathada immas. Neeni entaw qadhetabaaka; cimidaysata bolla ne deexo qambara wothadasa.
ISA 47:7 Neeni, ‘Taani merinaw kawo gidana’ yaagadasa; shin ne oothida oosuwanne iya wursethay waananeko qopabaaka.
ISA 47:8 “Neno wopu gada uttidaarenne naagetada de7idaare si7a. Ne wozanan, ‘Taape attishin, hari baawa; taani am7o gidike; woyko yelada na7i bayna asi gidike’ yaagadasa.
ISA 47:9 Ha nam7ubati qoponna issi gallas ne bolla yaana. Ne bitay ay darikoka, ne murunnoy ay wolqaamikoka neeni ne naytape mela atteysinne am7etethay attenna.
ISA 47:10 “Neeni ne iitatethan ammanetada, ‘Oonika tana be7enna’ yaagadasa. Ne eratethaynne cincatethay nena balethin, neeni ne wozanan, ‘Taape attishin, hari baawa’ yaagadasa.
ISA 47:11 Shin neeni waatada ne bitan haassaneeko eronna iitay ne bolla yaana. Neeni gate qanxanaw danda7onna dhayoy ne bolla wodhana; qassi neeni aykoka qoponna gadoy ne bolla yaana.
ISA 47:12 “Ane neeni ne na7atethafe doomada oothashe de7ida ne bitaanne ne murunnuwa ha77ika ootha. Ooni eri ne qopidaysa mela hananeeko woyko neeni iyara daganthaneeko.
ISA 47:13 Neeni ekida zorey ubbay daabursafe attishin, nena aykoka maaddibeenna. Salo xoolinto taybeysatinne iya xeellidi ageenan ageenan hananaba odeysati ane nena asho.
ISA 47:14 Enti buure mela; tami enta maana. Enti tama lacuwape bantana ashshanaw danda7okona. Asi kayaa bonqoy woyko asi iya sinthan uttidi ho77iya tama gidenna.
ISA 47:15 Neeni entara daaburidaysati, na7atethafe doomidi neera zal7idaysati new hessa mela. Enti issoy issoy ba balan balan oyketana; nena ashshiya oonika baawa.”
ISA 48:1 “Hinteno, Yayqooba soo asaw, Isra7eele sunthan xeegetidaysato, Yihuda kochaafe yidaysato, haysa si7ite. Hinte Godaa sunthan caaqeta; Isra7eele Xoossaa xeegeta; shin tumatethaninne xillotethan gidenna.
ISA 48:2 Hinte, ‘Nuuni geeshsha kataman de7oos; Isra7eele Xoossan zempoos; iya sunthay Ubbaafe Wolqaama Godaa’ ” yaagidi ceeqeteta.
ISA 48:3 Taani sinthafe hananabata daro wodepe kase odas. ta doonape enti keyin, enti eeson poletana mela oothas.
ISA 48:4 Neeni odin si7onnaysa, ne morgey birata mela gideysa ne som7oy naase biratada leeqamonaysa taani erayis.
ISA 48:5 Hessa gisho, neeni, “Haysa ta eeqay oothis; ta masetida misileti, ta sheeshada oothida misileti oothidosona” goonnaada, Taani hessa new benipe doomada odas. Enti hananaape sinthe taani enta new erisas.
ISA 48:6 “Ta kase odidaysa ne si7adasa; I poletidaysa be7adasa, yaatin iya tumatethaa ekikii? Hizape ne eronna oorathabata ta new odana.
ISA 48:7 Enti beni medhetidaba gidonashin ha77i medhetidosona. Neeni, ‘Taani enta erayis’ goonnaada haysafe kase neeni entaba si7abaka.
ISA 48:8 Neeni si7abaka; erabaaka; ne haythay benipeka dooyetibeenna. Neeni ay cimmiya aseeko taani erayis; neeni yeletoosape geella geetetada xeegeteysa erayis.
ISA 48:9 Ta sunthaa gisho, taani ta hanquwa zaarana; ta bonchuwa gisho nena dhaysona mela ta hanquwa teqana.
ISA 48:10 Taani nena paacas; birada gidonashin taani nena meto taman paacas.
ISA 48:11 Taani ta gisho, haysa oothana; ta sunthay tooshetana mela koyke; taani ta bonchuwa haras immike.”
ISA 48:12 “Neno Yayqooba, taani xeegida Isra7eele, taani odiyaba si7a; taani iya; koyroyka tana; wursethayka tana.
ISA 48:13 Ta kushey biitta baasuwa medhis; ta ushacha kushey salota miccis. Taani enta xeegiya wode enti issife eqoosona.
ISA 48:14 “Hinte ubbay issife shiiqidi si7ite; eeqatape haysi hananaysa sinthatidi odiday oonee? Goday dooridaysi iya qofaa Babiloone bolla polana; iya qeseyka Babiloone biitta bolla gidana.
ISA 48:15 Taani, ta huuphen iyaw odas; iya xeegas; ta iya ehana; I oothiyaba ubbay iyaw poletana.
ISA 48:16 “Taako haa shiiqidi haysa si7ite; “Taani koyrope doomada geeman odabike; hessi hanida wodepe doomada taani yan de7ayis” yaagees. Ha77ika Ubbaa Haariya Godaynne iya Ayyaanay tana kiittidosona.
ISA 48:17 Nena woziya Goday, Isra7eele Geeshshay haysada yaagees: “Nena maaddiyaba tamaarsey ne baanaw bessiya ogiya ne kaalethey, tana ne Godaa, ne Xoossaa.
ISA 48:18 Neeni ta kiitaa si7idaba gidiyako, ne sarotethay shaafa haathada gogganashin; ne xillotethay abba beetada hananashin.
ISA 48:19 Ne kochay abba shafeda, ne nayti taybetonna baana mela daranashin; enta sunthay ta sinthafe dhayenna; kichennashin” yaagees.
ISA 48:20 Babiloone biittafe keyite; Babiloonepe baqatite! Qaala dhoqu oothidi, ufaysan haysada yaagidi waassite. Sa7aa gaxape gaxa gakanaw haysa kiittite; “Goday ba aylliya Yayqooba wozis” yaagidi odite.
ISA 48:21 I enta mela biittara kaalethida wode saamotibookona. Zaallafe haathi entaw pultis; I zaalla phalqin haathi dhuuqis.
ISA 48:22 “Iitatas saroy baawa” yaagees Goday.
ISA 49:1 Hinteno, yuushoy abban teqetida biittato, taani odeysa si7ite. Hinteno, haahoson de7iya kawotethato akeekite; taani yeletanaape kase Goday tana xeegis; ta aaye ulon de7ishin, ta suntha sunthis.
ISA 49:2 Ta inxarsaa qara mashshi oothis; ba kushiya kuyan tana genthis. I tana poshetida donge yiishshi oothidi ba shoohuwan tana qottis.
ISA 49:3 I taako, “Isra7eele, neeni ta aylle; taani ta bonchuwa nenan qoncisana” yaagis.
ISA 49:4 Shin taani, “Taani coo daaburas; ta wolqaa go77i baynabaninne hadaban wursas. Gidoshin, ta pirday Godaa matana; ta gatey ta Xoossaa matana” yaagas.
ISA 49:5 Taani Godaa ayfe sinthan bonchetida gisho, ta Xoossay taw wolqa gidida gisho, Yayqooba iyako zaaranaw Isra7eele iyako shiishanaw, taani iya aylle gidana mela tana ta aaye ulon doorida
ISA 49:6 Goday taako haysada yaagees; Neeni Yayqooba kochaa denthanaw Isra7eelepe attida guuthata zaarada ehanaw neeni taw aylle gideysi daro guuthaba. Hessafe aathada, ta atotethay biitta gaxa gakana mela taani nena kawotethatas poo7o oothana.
ISA 49:7 Kadhetidaysasinne ixetidaysas qassi kawotethata haariya aylliyas, Isra7eele woziya Goday, Isra7eele Geeshshay haysada yaagees; Ammanthiya Godaa gisho, nena doorida Isra7eele Geeshsha gisho kawoti be7idi dendi eqana; deriya haareysati be7idi goyinnana.
ISA 49:8 Goday yaagees; “Taani doorida woden ne oysha zaarana; atotetha gallas taani nena maadana. Taani nena naagana; neeni biitta zaarada essana mela; asi doonna biitta neeni laatisana mela taani nena asaas caaqo oothada immas.
ISA 49:9 Di7etidaysata, ‘Keyite!’ dhuma qashon de7eyisata, ‘Birshetite!’ gaana mela taani nena oothana. Enti oge matan heemetana; mela dere bolla heemetiya bessi demmana.
ISA 49:10 Enti koshatokona woyko saamotokona; enta mela biitta mishay xuuggenna; away enta meenna. Entaw qadheteysi enta kaalethana; pulto haathaako enta laaggana.
ISA 49:11 Taani ta dereta ubbaa oge kessana; ta wogga ogeta dhoqu oothana.
ISA 49:12 Heko, ta asay haahosoope yaana: pudeha baggaafenne wuloha baggafe, qassi Aswaana biittafe yaana” yaagees.
ISA 49:13 Hinteno saloto, ufaysan yexite; neno biittaw ufayta. Hinteno dereto, ililite! Goday ba asa minthethis; ba metootetida ba asaas qadhetis.
ISA 49:14 Shin Xiyooney, “Goday tana aggis; Xoossay tana dogis” yaagasu.
ISA 49:15 Aayiya ba dhanthiya na7aa doganaw danda7ay? Ba ulope keyida na7as qadhetekee? Iya dogikoka, taani nena dogike!
ISA 49:16 Heko, taani nena ta kushe qaaqan xaafa wothas; ne dirsa gimbeti ubba wode ta sinthan de7oosona.
ISA 49:17 Nena zaaridi keexeysati ellesidi yaana; nena laallidaysati neepe haakana.
ISA 49:18 Ane dhoqu gada ne yuushuwa xeella; ne nayti ubbay issife shiiqidi neeko yaana. Taani Goday, tanan caaqas: neeni enta ubbaa alleeqoda ma7ana; gelanaw haniya maccasi alleeqeteysada neeni entan alleeqetana.
ISA 49:19 Neeni laaletada baysa gidikoka, ne biittay dhaykoka, ha77i nenan de7iya asaas daro xuummana; nena laallidaysati neepe haakana.
ISA 49:20 Neeni kayotiya laythan new yeletida nayti ne haythan, “Haysi bessay nuus daro xuunthu gidiya gisho, nu daana dalga bessi imma” yaagana.
ISA 49:21 Neeni ne wozanan, “Ha nayta ubbaa taw oone yeliday? Taani yelada dhonthu gidas; taani di7etas, ixetas. Yaatin, haysata oone dichiday? Taani tarka attas; yaatin ha nayti ubbay awupe yidona? yaagana.”
ISA 49:22 Ubbaa Haariya Goday haysada yaagees: “Heko, taani kawotethata mallata bessaana; asaas ta bandira essana. Enti ne adde nayta idimmidi, ne macca nayta banta hashiyan tookidi ehana.
ISA 49:23 Kawoti nena dichiya aawata gidana; enta macca kawoti nena dhanthiya aayo gidana. Enti gufannidi new goyinnana; ne toho baana laaccana. Taani Godaa gideysa neeni hessan erana; tanan ammanetidi naageysati yeellatokona” yaagees.
ISA 49:24 Olanchuwafe di7o yegisanaw, wozan iita asa kushepe di7etida asi kessi ekanaw danda7etiyee?
ISA 49:25 Shin Goday yaagees: Olancho kushepe di7etida asi kessi ekanaw, wozana mino asape di7o yegisanaw danda7etees. Neera oleteysatara taani oletana; ne naytaka ashshana.
ISA 49:26 Nena un7etheysati banta ashuwa maana mela oothana; woyne uyidi mathoteysada enti banta suuthaa uyidi mathotana. He wode asa ubbay taani Godaa, nena Ashshiya, Woziyanne Yayqooba Wolqaamaa gideysa erana.
ISA 50:1 Goday yaagees; “Taani hinte aayiw yeddida pirima worqatey awun de7ii? taani ooddes hintena taani bayzadina? Heko, hinte nagaraa gisho hinte bayzetideta; hinte naaquwa gisho hinte aayiya yedetasu.
ISA 50:2 Taani yida wode, haysan asi ayis dhayidee? Taani xeegida wode, ‘Yee!’ gaanaw ayis asi dhayidee? Taani hintena wozanaw ta kushey qantheyee? hintena ashshanaw taw wolqi baaweyee? Taani abba seerada melisayis; shaafata mela biitta oothayis. Haathi dhayin entan de7iya moloti wooqosona; saamoy wodhin hayqoosona.
ISA 50:3 Taani salota dhuma mayzayis; enta kamay kayo ma7o daanees” yaagis.
ISA 50:4 Daaburidaysa taani qaalan minthetho erana mela, Ubbaa Haariya Goday taw tamaarida inxarsi immis. I tana wonta wonta barkisidi, taani tamaareda si7anaada ta haythaa dooyees.
ISA 50:5 Ubbaa Haariya Goday ta haythaa dooyis; taani geella gidabike; guye simmabike.
ISA 50:6 Taani ta zokuwa shoceysatas, ta buuchaa shoddeysatas ta gacuwa aathada immas. Ta bolla cutteysatapenne tana kawusheysatape ta som7uwa genthabike.
ISA 50:7 Ubbaa Haariya Goday tana maaddiya gisho, taani yeellatike. Taani ta som7uwa salo shuchu oothas; taani yeellatonnaysa erayis.
ISA 50:8 Taw pirdeysi matan de7ees; yaatin, tana mootey oonee? Ane taara mootetanaw eqo!
ISA 50:9 Ubbaa Haariya Goday tana maaddees; yaatin, ta bolla pirdey oonee? Enti ubbay ma7oda cimana; enta bili maana.
ISA 50:10 Hinte giddofe Godaa yayyey, iya aylliya qaalas kiitetey oonee? Dhuman hemeteynne poo7oy baynay I oonee? He uray Godaa sunthan ammaneto; ba Xoossan zempo.
ISA 50:11 Hinteno tama eethiya ubbato, laco xompe hintew shiisheysato, hinte eethida tama poo7uwan hemetite. Laco xompiyan simeretite; Hinte ta kushepe ekanaw de7ey haysa; hinte wolqaama meto seelan zin7ana.
ISA 51:1 Hinteno xillotethi kaalleysato, hinteno Godaa koyeysato si7ite. Hinte phalqetidi eketida shuchaa hinte booketidi keyida ollaa xeellite.
ISA 51:2 Hinte aawa Abrahaamenne hintena yelida Saaro xeellite. I barka de7ishin, taani iya xeegada anjasinne taybon darsas.
ISA 51:3 “Goday Xiyoonenne laaletida bessan de7iya asa ubbaa minthethana. I mela biitta Edene, kalotida biitta Godaa atakilte gadeda oothana. Yan ufaysinne hashshu guussi daana; galatinne mazmurey si7etana.
ISA 51:4 “Ta asaw; ta odiyaba si7ite; ta deriyaw, hinte haythaa taako zaarite. Higgey taape keyees; ta suure pirday kawotethatas poo7o gidana.
ISA 51:5 Ta xillotethay ellesidi shiiqana; ta atotethay matis; ta qesey kawotethatas suure pirdaa ehana. Yuushoy abban teqetida biittati ubbay tanan ammanetidi naagana; taani enta ta wolqan ashshanaysa ufaysan naagana.
ISA 51:6 Pude dhoqu gidi salota xeellite; duge sa7aaka xeellite. Saloti cuyada laaletidi dhayana; sa7i afilada wurana; iyan de7iya asa ubbay udunxeda hayqana. Shin ta atotethay merinaw daana; ta xillotethay wurenna.
ISA 51:7 “Hinteno xillotethaa ereysato, ta higgey hinte wozanan de7eysato, si7ite. Asaa bore yayyofite; enta cashshas dagammopite.
ISA 51:8 Bili ma7o, dorsa ikise guxuney meysada, enti meetetana. Shin ta xillotethay merinaw daana; ta atotethay yeletetha ubbaas gidana” yaagees.
ISA 51:9 Abeeti Godaw, denda! Denda! Godaa qesiyaw, wolqaa ma7a. Beni wodetaninne yeletethan hanidaysada denda; Ra7aaba geetetiya dawiya qanxerethidaynne caddiday nena gidikiyee?
ISA 51:10 Abbaanne gita ciimmo haatha melisiday nena gidikiyee? Ne wozidaysati pinnana mela ciimmo abba oge oothiday nena gidikiyee?
ISA 51:11 Goday wozidaysati yexishe simmidi Xiyoone yaana; merinaa ufaysay kallacha mela enta bolla uttana. Enti ufaysinne hashshu giyaba demmana; azzanoynne yeehoy entafe haakana.
ISA 51:12 Goday, “Taani, hintena minthethey tana; yaatin, hayqiya asenne maatada shulliya asa na7a yayyanaw hinte oonee?
ISA 51:13 Salota miccidanne sa7a baasuwa essida Godaa, hintena medhida Xoossaa dogideta. Enti hintena dhaysanaw un7ethiya asaa hanquwa gaason ubba gallas yashshan de7eeta. Shin hintena un7etheyisata hanqoy awun de7ii?
ISA 51:14 Di7etidaysati eeson birshetana; qashetida ollan hayqokona; koshatokona.”
ISA 51:15 “Taani Godaa, ne Xoossaa; guummana mela abba qaathey tana; ta sunthay Ubbaafe Wolqaama Godaa.
ISA 51:16 Ta qaala ne doonan wothiday, ta kushe kuyan nena genthiday, salota micciday, sa7aa baasuwa essiday, Xiyooneko, ‘Neeni ta ase’ ” yaagiday tana.
ISA 51:17 Neno, Godaa kushepe gandigarsiya hanqo xuu7aa ashshona uyida Yerusalaame, barka! Denda! Denda.
ISA 51:18 Iya yelida naytape iyo kaalethiya issoyka baawa; iya dichida naytape I kushiya oykidi efida issoyka baawa.
ISA 51:19 Ha nam7ubati ne qaada gididosona; hessati laaletethinne dhayo; koshinne mashshi ne bolla yaana; yaatin, nena ooni minthethanee?
ISA 51:20 Ne nayti giten gelida gen7eda oge gaxan kundidi labbanidosona. Enti Godaa hanquwaninne ne Xoossaa seeran kumidosona.
ISA 51:21 Hessa gisho, woyne ushshan gidonashin meton mathotidaysato, hinte haysa si7ite.
ISA 51:22 “Ba asaas mootetiya ne Goday, ne Xoossay yaagees; Heko, nena gandigarisiya, ta hanqo xuu7aa taani ne kushepe ekas; neeni zaarada he mathoyiya ushsha uyaka.
ISA 51:23 Taani hessa nena un7ethiya asaa kushen wothana; Enti neeko, ‘Nuuni ne bollara hemetidi aadhana mela zaqulla’ ” yaagidosona. Neeni enti aadhana gakanaw ne zokuwa entaw biittadanne ogeda oothadasa.
ISA 52:1 Neno Xiyoone, barka; barka, minotethi afilada ma7a. Neno geeshsha katame, Yerusalaame, ne boncho ma7uwa ma7a. Hizape guye qaxaretonaynne tuni ne giddo gelenna.
ISA 52:2 Neno, di7etida Yerusalaame, ne baana qoqofa; dendada ne araata bolla utta. Neno Xiyoone asaw, ne qoodhen qashetida santhalaata birsha.
ISA 52:3 Ubbaa Haariya Goday haysada yaagees: “Hinte kase gatey bayna bayzetideta; ha77i qassi miishe immonna coo wozetana.
ISA 52:4 Goday haysada yaagees: Ta asay koyro bete asi gididi Gibxe bis; guyepe Asooreti ta asaa coo un7ethidosona.
ISA 52:5 Xoossay haysada yaagidi odees: Ta asay gatey bayna coo di7etidi bin, taw haysan aybe de7ey? Enta haareysati toochoosona; ta sunthay ubba wode cayetees.
ISA 52:6 Hessa gisho, ta asay ta sunthaa erana; he gallas haysa odey tana gideysa enti erana; ee, I tana” yaagees Ubbaa Haariya Goday.
ISA 52:7 Lo77o mishiraacho ehiya, sarotethaa awaajiya, atotethi odiya, Xiyooneko, “Ne Xoossay kawotis” yaagishe deriya bollara yaa tohoti waani lo77oona.
ISA 52:8 Ne katamaa naageysati banta qaala dhoqu oothidi, ufaysan issife yexoosona. Goday Xiyoone simmiya wode enti banta ayfen be7ana.
ISA 52:9 Hinteno Yerusalaamen laaletida bessato, issife ufaysan yexite; Goday ba asaa minthethis; Yerusalaame wozis.
ISA 52:10 Goday ba geeshsha qesiya kawotethata ubbaa sinthan qoncisis. Biitta gaxaa gakanaw de7iya asa ubbay nu Xoossaa atotetha be7ana.
ISA 52:11 Hinteno Godaa miishiya tookeysato, shaaketite, shaaketite, yaape keyite. Tunabaa bochofite; iya giddofe keyite; hintena geeshshite.
ISA 52:12 Shin hinte keyishe eeson keyeketa; woyko goodetidi beeketa. Goday hintefe sinthe aadhidi kaalethana; Isra7eele Xoossay guyera gididi hintena naagana.
ISA 52:13 “Heko, ta aylley akeekan oothana; I bonchetidi, dhoqu dhoqu gaana; daro gitatana.
ISA 52:14 Iya som7oy asa ubbaafe, iya medhoy asa naytape aadhidi qohetis; iya be7idi daro asay dagammidosona.
ISA 52:15 Shin ha77i daro kawotethati ubbay iyaban malaaletana; iya gaason, daro kawoti banta doona oykana. Enti bantaw odetiboonnaba be7ana; si7iboonaba akeekana” yaagees.
ISA 53:1 Nuuni odidaba ooni ammanidee? Godaa qesey ooddes qoncidee?
ISA 53:2 I iya sinthan mela biittan aacida duruma mela; xapho yeddida dola mela diccis. Nuuni iya loythi xeellonna mela mali woyko teemi baawa. Nuuni iyako shiiqonna mela cuchu mal7o gidenna.
ISA 53:3 I asan kadhetis, ixetis; I metopenne azzanope shaaketi eronna asi gidis. Asi iya be7anaape gidi ba som7uwa wora zaariya asada kadhetis; nuuni iya bonchibooko.
ISA 53:4 I tuma nu waayiya baw ekis; qassi nu daabura tookis. Shin nuuni, I Xoossan deshetidi kundidadanne madunxidaada qopida.
ISA 53:5 Shin I nu nagaraa gisho, cadetidi madunxis; nu qohuwa gisho shocetidi liiqis. Iya seeran nuuni saro demmida; iya madunthan nuuni paxida.
ISA 53:6 Nuuni ubbay oge balida dorsada wora bida; nu ubbay nu ogiya ogiya bida. Shin Goday nu ubbaa naaquwa iya bolla wothis.
ISA 53:7 I un7etis; qohetis; shin ba doona dooybeenna. Shukanaw efiya urge dorsada laagetis; ba ikisiya meediya uraa sinthan si77i giya dorsa mela aykoka pogibeenna.
ISA 53:8 Enti iya un7ethoninne geella pirdan efidosona; I ta asaa nagaraa gisho shocetidi, de7on de7eyisata biittafe kichidaysa iya kochaafe ooni akeekidee?
ISA 53:9 Iya doonan bali bayna, I, iitaba oothonna, ba hayquwan iita asatara taybetis; iya duufoy dure asatara gidis.
ISA 53:10 Shin iya qohetethaynne iya un7etethay Godaa shene gidis. I bana nagara yarsho oothiya wode ba kochaa be7ana. Iya laythay aduqana; Godaa sheney iya kushen poletana.
ISA 53:11 Ba shempuwa waayiyape guye, I de7o poo7o be7ana; ufaytana. Ta xillo aylley ba eratethan darota xillisana; enta qohuwaka tookana.
ISA 53:12 Hessa gisho, taani iya gishuwa gita asata giddon immana; minotara I di7uwa shaaketana. I ba shempuwa hayqos aathidi immidi, iitatara paydetis. I daro asaa nagaraa tookis; geellatas gaannatis.
ISA 54:1 Naate, yelonna maynthe, yexa! Naate, iqeta eronnaare, ufaysan ilila! Azinara de7iya maccase naytape barka de7iya maccase nayti darana.
ISA 54:2 Ne dunkaaniya bessaa dalgisa; dunkaaniya gesheta piddi oothada micca; xuumisopa; wodoruwa adussa; dhishiya mintha.
ISA 54:3 Neeni ushachinne haddirsi dalgana; ne kochati kawotethata laattana; baysatida enta katamatan keexidi daana.
ISA 54:4 “Yayyofa; neeni yeellataka; dagammofa; neeni kawuyaka. Ne yalagatetha yeella neeni dogana; ne am7etetha boriya hizape guye hassayaka.
ISA 54:5 Ne azinay nena Medhidaysa; iya sunthay Ubbaafe Wolqaama Godaa. Isra7eele Geeshshay nena Wozidaysa; I biitta ubbaa Xoossaa geetetana.
ISA 54:6 Azini aggin, dogetada azzaniya maccasada, yalagatethan azina soope keyida, maccasada neeni hanada de7ishin, taani Goday nena zaarada xeegas.
ISA 54:7 “Guutha wode taani nena aggas, shin gita qadhen taani nena zaarada ehana.
ISA 54:8 Suulliya hanqon taani ta som7uwa neepe guutha wodes genthas. Shin merinaa maarotethan taani new qadhetana” yaagees nena woziya Goday.
ISA 54:9 “Haysi taw Nohe wodiya mela; he wode taani dhayo haathan zaarada sa7aa dhaysike gada caaqidaysada, zaarada ne bolla hanqetonna melanne seeronna mela taani caaqas.
ISA 54:10 Dereti qaxanaw, zumati banta bessaafe kichanaw danda7oosona; shin ta merinaa siiqoy neepe shaaketenna; ta sarotetha caaqoy neepe kichenna” yaagees new qadhetiya Goday.
ISA 54:11 “Neno, metootida katame, gotey yaanne haanne shocidaare, minthethiyabay dhayidare, Heko, taani nena boncho shuchan alleeqisada keexana; ne baasuwa sanpare shuchan hiixana.
ISA 54:12 Ne shucha gimbiya qustiya zo7o inqo shuchan, ne pengiya phooliya al7o shuchan, ne dirsa boncho shuchan gimbana.
ISA 54:13 Ne nayti ubbay Godaape tamaarana; ne nayta sarotethay darana.
ISA 54:14 Neeni xillotethan minnada eqana; geneynne un7ethoy neepe haakana. Nena yashisiyaba deenna; dagami neeko shiiqenna.
ISA 54:15 Nena olanaw dendey de7iko, hessi taape gidenna; nena qohanaw koyey de7iko, I kundana.
ISA 54:16 “Heko, huben tama hubidi, ba qopida ola miishiya qoxiya uraa taani medhas; dhaysana mela dhayseysa medhiday tana.
ISA 54:17 Nena qohanaw oosetida ay miisheyka ne bolla oothenna; nena mootiya inxarsa ubbaas ne zaaro immana. Godaa aylleta laatay haysa; taape enti ekiya xillo haysa” yaagees Goday.
ISA 55:1 Hinteno, saamotidaysato, ubbay taako haa yiite; miishey baynaysato, haa yiite. Shammidi miite; haa yidi, miishe qanxonna coo woyne ushshinne maathi shammite.
ISA 55:2 Kathi gidonnabaas hinte miishiya ayis kesseetii? Kalsonnaban hinte wolqaa ayis wurseetii? Ane tana si7ite, taani odeysa hayzite; lo77o kathaa miite; lo77o kathan hinte asatethaa ufaysite.
ISA 55:3 “Hinte haytha taako zaaridi tana si7ite; de7on daanaw ta odeysa si7ite; taani Dawitas gelida ufaysa qaalan hintena anjana.
ISA 55:4 Heko, taani iya kawotethatas marka, kaaletheysanne halaqa oothas.
ISA 55:5 Goday, ne Xoossay, Isra7eele Geeshshay nena bonchida gisho, neeni eronna kawotethata xeegana; nena eronna kawotethati ellesidi neeko yaana.”
ISA 55:6 “Goday bentiya wode iya koyite; matan de7iya wode iya xeegite.
ISA 55:7 Iita asi ba ogiyape simmo; nagaranchoy ba qofaa aggo. Godaako simmo, ika iya maarana; I nu Xoossaako simmo, iyaw atto gaana.
ISA 55:8 Ta qofay hinte qofaa mela, ta ogey hinte ogiya mela gidenna” yaagees Goday.
ISA 55:9 Saloti sa7aape dhoqeysada, ta ogey hinte ogiyape, ta qofay hinte qofaape dhoqees.
ISA 55:10 Irinne shachi salope wodhidi, biitta laakisidi, kathi dolana melanne ayfana mela ootheysada, zereysas zerethi, meysas kathi immonna guye salo simmenna.
ISA 55:11 Ta doonape keyiya qaalay hessa mala; I taani halchidaysa polonnanne ta kiittidaysa oothonna taako coo simmenna.
ISA 55:12 “Hinte ufaysan keyana; saron moyzetana; deretinne zumati hinte sinthan ufaytidi yexana; bazzo mithati ubbay banta kushiya baqana.
ISA 55:13 Aguntha gisho xiidda, gom7ore gisho xaythi dolana. Hessi Godaa qofisiyabaanne merinaw dhayonna malla gidana” yaagees Goday.
ISA 56:1 “Suure pirdaa naagite; xillo oothite; ta atotethay ellesidi yaana; ta xillotethay matan qoncana.
ISA 56:2 Haysa oothiya uray, Sambaata tunisonna bonchiya uraynne ba kushey iitabaa oothonna mela teqiya uray anjetidaysa” yaagees Goday.
ISA 56:3 Godaako shiiqida bete asi, “Goday tana ba asaape shaakana” goopo; shuufay, “Taani melida mithi” goopo.
ISA 56:4 “Ta Sambaata bonchiya, tana ufaysiyaba dooreynne ta caaquwa minthidi naagiya shuufatas,
ISA 56:5 entaw taani ta keethaninne ta dirsa gimbiya giddon enti hassayetiyaba immana. Enti macca na7anne adde na7a yelidi, demmiya bonchuwafe aadhiya sunthi taani entaw immana; taani merinaw dhayonna sunthi entaw immana.
ISA 56:6 Godaa haggaazanaw, Godaa dosanawunne iya aylle gidanaw bantana iyako shiishiya, sambaata tunisonna bonchiyanne ta caaqo qaala minthidi naagiya bete asata,
ISA 56:7 taani ta geeshsha zumaa bolla ehada ta woosa keethan enta ufaysana. Enti ta yarsho bessan shiishiya xuussa yarshoynne hara yarshoy eketana; ta keethay asa ubbay Xoossaa woossiya keethi geetetana” yaagees.
ISA 56:8 “Shiqidaysata bolla gujada harataka taani shiishana” yaagees Isra7eelepe laaletidaysata shiishiya, Ubbaa Haariya Goday.
ISA 56:9 Hinteno bazzo do7ato, hinteno wora do7ato, ubbay haa yidi miite.
ISA 56:10 Isra7eele asaa naageysati qooqe; entaw eri baawa; enti ubbay boccanaw danda7onna butale kanata; enti zin7idi elmotoosona; dhisko dosoosona.
ISA 56:11 Enti midi kallonna yaramba kana mela; enti akeeki pacida henthancho. Enti ubbay banta oge bidosona; ubbay banta go77a xalaala koyoosona.
ISA 56:12 Enti, “Haa yiite; woyne ushsha ane uyoos; mathoyiya ushsha ane ganoos! Wontoy hachi mela gidana; hachifeka aadhidi lo77ana” yaagosona.
ISA 57:1 Xillo asi hayqees; shin hessa qopey baawa. Bantana Xoossas immida asay biittafe eketoosona, shin xillo asi iiti yaanape sinthatidi, eketeysa oonika akeekenna.
ISA 57:2 I, bidi sarotethi de7iya bessi gelees; suuretethan hemeteysati hayqidi, shempo demmoosona.
ISA 57:3 “Hinteno, maro nayto, hinteno laammiyanne laymatiya zareto, haa yiite.
ISA 57:4 Hinte oona qelqiseetii? Hinte oona boreetiii? Hinte inxarsaa oodde bolla kesseetii? Hinte geellatanne wordancho nayta gideketii?
ISA 57:5 Hinte wolaa garsaninne daashsha mitha garsan amon xuugeteeta. Hinte nayta zangaaraninne zaalla qophon shukidi yarsheeta.
ISA 57:6 Zangaaran de7iya liiqo shuchati hinte xoossata; Hinte entaw ushsha yarsho tigideta. Kathaa yarshoka immideta yaatin, taani haysan hanqetikina?
ISA 57:7 Zumaa huuphen hiixa yeggideta; yan yarshanaw keydeta.
ISA 57:8 Hinte pengiyafenne gobanetape soo baggara eeqa misileta essideta. Tana aggidi hinte arsa dalgisidi, yaa keydeta; entara caaqideta; yaatidi enta arsa dosideta; enta kalluwa be7ideta.
ISA 57:9 Zaytenne shitto ekidi Moloka geetetiya eeqako bideta; hinte kiitanchota haaho soo kiittideta; hari attoshin si7oole gakanaw wodhideta.
ISA 57:10 Hinte hara xoossata koyishe daaburideta; shin, ‘Ufaysi baawa’ gibeeketa. Hinte wolqay haa ooraxis; hessa gisho, labbanidi kundibeeketa.
ISA 57:11 “Hinte oona yayyidi, taw wordotidetii? Hinte tana qopibeketa; hinte wozanan qopibeketa. Hinte taw yayyonna ixiday taani daro wode si77i gida gisho gidennee?
ISA 57:12 Taani hinte xillotethaanne hinte oosota awaajana; shin hintena aykoka go77okona.
ISA 57:13 Hinte maado demmanaw waassiya wode hinte shiishida eeqati hintena ashshena! Enta ubbaa carkoy efana; issi toho carkiya carkoy enta punnidi dhaysana. Shin tana baw baqatidi attiya besse oothiya uray biitta laattana; ta geeshsha zumaa ekana” yaagees.
ISA 57:14 “Baasite, baasite! Oge giigisite; ta asaa ogiyape dhubiyaba ubbaa diggite” yaagees Goday.
ISA 57:15 Merinaw de7eysi, gitay, dhoqa bessan de7eysi, iya sunthay Geeshsha geeteteysi, yaagees: “Kawuyida asaa ayyaana denthethanaw, meqida wozani de7eyisata koolanaw, kawuyidanne meqida ayyaani de7eysara daana.
ISA 57:16 Ta medhida asa ayyaanaynne shempoy, ta sinthan docconna mela taani merinaw mootike; ubba wode hanqetike.
ISA 57:17 Enta nagaraa gaason taani enta hanqetada seeras; ta som7uwa entafe genthas; shin enti ha77ika banta wozanaa qofan bidosona.
ISA 57:18 Taani enta ogiya be7as; shin taani enta pathana, kaalethana; iyawunne iya gisho yeekeyisata minthethana.
ISA 57:19 Isra7eele biittan yeekeyisata, mettershan galata kunthana. Haahoninne matan de7eysatas, saroy giddo; taani enta pathana” yaagees Goday.
ISA 57:20 Shin iitati urqanne silimo kessiya, wopu gaanaw danda7onna abba beeta mela.
ISA 57:21 “Iitatas saroy baawa” yaagees ta Xoossay.
ISA 58:1 Goday haysada yaagees: “Ne qaala dhoqu oothada waassa; guye goopa; ne qaala moyzeda dhoqu ootha. Ta asaas enta geellatetha, Yayqooba keethaas enta nagaraa oda.
ISA 58:2 Shin enti tana gallas gallas koyoosona; ta ogiya kaallanaw dosiya daanosona. Xillo oothidanne Xoossaa kiitaa aggiboonna asada enti tana suure pirda oychoosona; taako Xoossaako shiiqanaw dosiya daanosona.
ISA 58:3 Enti Godaako, ‘Nuuni xoomos, shin neeni ayis nuna xeellikii? Nuuni nunatethaa kawushida, shin neeni ayis eronnaada hanadi’ yaagosona. Goday zaaridi, ‘Heko, hinte xoomiya wode hintena ufaysiyabaa ootheeta; hinte oosanchota un7etheeta.’
ISA 58:4 Hinte ooshshaninne palaman xoomeeta; qadhey bayna iita deshethi dechanaw xoomeeta. Hessa mela xoomiya hinte woosay bolla saluwan si7etonna mela oothees.
ISA 58:5 Taani doorida xoomay haysa mela xoomee? Issi asi banatetha kawushey haysa mela gallasa xalaalanee? Taani koyiya xoomay asi ba huuphiya kaxida gasheda hoksana melanne bido tiyetidi kayo ma7o ma7idi utetheyee? Hinte hessa xooma gidi xeegetiyee? He xooma gallasay Godaa sinthan eketiyee?
ISA 58:6 “Taani dooriya xoomay haysa; suure pirda dhayo santhalaata billana melanne qambara menthidi un7etidaysata la77a kessana mela gidenneyee?
ISA 58:7 Taani dooriya xoomay koshatidaysa muzana mela, keethi bayna manqota soo ekana mela, kallotidaysa be7ada mayzana melanne maado koyiya hinte dabbuwafe hintena genthonna melasa gidennee?
ISA 58:8 Yaatiko, hinte poo7oy wonta xalqeda poo7ana; hinte paxotethay eeson yaana. Hinte xillotethay hintefe sinthara baana; Godaa bonchoy hintefe guyera gididi, hintena naagana.
ISA 58:9 He wode hinte xeegana; Goday hintew koyana. Hinte maado koyidi waassana; I, ‘Heko, taani haysan de7ayis!’ yaagana. “Hinte giddofe un7ethiya qambara diggiko, biradhen malleysanne iitaba odeteysa aggiko,
ISA 58:10 Koshatidaysa muziko, metootidaysata koshshiyaban maaddiko, he wode hinte poo7oy dhuman poo7ana; hinte qammay seeta gallas gidana.
ISA 58:11 Goday hintena ubba wode kaalethana; hintena mela biittan koshshiyaban kalsana; hinte xaphuwa xaalisana. Hinte haathe uyaa gannate melanne meli eronna haatha pulto mela gidana.
ISA 58:12 Ne asay beni laaletida bessata zaaridi keexana; daro wodepe kase baasetida baasota keexidi dhoqu oothana. Hinte ‘Laaletida gimbeta gimbeysatanne asay de7iya bessaanne wogga ogey de7iya katamata esseyisata geetetana.’
ISA 58:13 “Sambaata gallasaa boncho aggonna ixiko, ta geeshsha gallas hinte go77a yedetheysa aggiko, Sambaata ufaysinne bonchetida, Godaa gallasaa boncho gada xeegiko, hinte hinte ogiya boonna aggidi he gallasaa bonchiko, hintena ufaysiyabaa oothonnanne hadaba odetonna aggiko,
ISA 58:14 he wode hinte Godan ufaytana; taani hintena daro bonchetidaysata oothana; hinte aawa Yayqooba laata hinte maana mela oothana. Taani Goday haysa odas” yaagees.
ISA 59:1 Heko, Godaa kushey hintena ashshanaw qaammibeenna; iya haythay si7anaw tullibeenna.
ISA 59:2 Shin hinte nagaray hintefenne hinte Xoossaafe giddon shaahetethi medhis. I si7onna mela hinte nagaray iya som7uwa hintefe genthis.
ISA 59:3 Hinte kushey suuthan, hinte biradhey naaqon tunis; hinte doonay wordo odetees; hinte inxarsay iitaba zuuzumees.
ISA 59:4 Xillotethan mootey baawa; suuretethan pirdeyka baawa. Enti coo palaman ceeqetoosona; wordo odetoosona; cimo qanthatidi iitatethi yeloosona.
ISA 59:5 Enti shoosha phuuphulle haphoosona; shango haada daddoosona. He phuuphulleta miya asi hayqees; phuuphulliyafe issoy meqiko, iyape shooshi keyees.
ISA 59:6 Enti daddida shango haaday ma7os hanenna; iyara banta asatethaa kammanaw danda7okona. Enta oosoy iita; geella oosoy enta kushen kumis.
ISA 59:7 Enta tohoti iitabaa oothanaw woxoosona; xillo suuthi gussanaw eesotoosona. Enta qofay iita; enti bida bessa ubban qohoynne boshi de7ees.
ISA 59:8 Enti sarotetha oge erokona; enta ogiyan suure pirdi baawa. Enti banta ogiya geellayidosona; he ogiyara hemetiya oonika saro demmenna.
ISA 59:9 Hessa gisho, suure pirdi nuupe haakis; xillotethi nuuko shiiqenna. Nuuni poo7o koyoos, shin dhuma gidis; wagagga poo7o koyoos, shin sakana dhuman hemetoos.
ISA 59:10 Nuuni qooqeda dirsaa gimbiya bolla tattafoos; seeta gallas, sa7i lem7in hemetiyada dhubetoos; wolqara de7iya asaa giddon nuuni hayqida asa mela gidida.
ISA 59:11 Nuuni ubbay babanthada waassos; holleda kayotidi oolos. Nuuni suure pirda koyida, shin demmibooko; atotethi koyida, shin I nuupe haakis.
ISA 59:12 Nu balay ne sinthan daris; nu nagaray nu bolla markatees. Nu naaqoy nuura de7ees; nu qohuwa nu eroos.
ISA 59:13 Nuuni makallidi, Godaa kadhida; nu Xoossaa aggidi guye simmida. Geellatethinne gene odetida; nuuni wordo qanthatidi wordo yelida.
ISA 59:14 Suure pirdi guye sugetis; xillotethi nuupe haakis. Tumatethi dabaaban dhubetees; ammanetethi gelanaw besse dhayis.
ISA 59:15 Tumatethi awunka bentenna; iitatethafe haakiya asi qohos aadhidi imetees; Goday suure pirdi baynaysa be7idi azzanis.
ISA 59:16 Un7eteyisata maaddiya asinne entaw gaannatiya asi baynaysa Goday be7idi malaaletis. Hessa gisho, iya qesey iyaw atotethi ehis; iya xillotethay iya katisidi oykis.
ISA 59:17 I, xillotethi tiran wothiya ola miisheda ma7is; ba huuphiyan atotetha barneexa wothis; halo kessi ma7oda, hanqo afilada ma7is.
ISA 59:18 I entaw enta oosuwada oosuwada zaarana; hanquwa ba morketas, seera baara eqeteysatas ciggana; yuushoy abban teqetida biittatas enta oosuwada immana.
ISA 59:19 Godaa peenoy wolqaama goteda di77ishe yaana gisho, wuloha baggan de7eysati Godaa sunthaas yayyana; doloha baggan de7eysati iya bonchana.
ISA 59:20 “Xiyoonesinne Yayqooba zeretha giddon banta nagarape simmeyisata Wozeysi yaana.
ISA 59:21 Taw entara de7iya caaqoy haysa: hinte bolla de7iya ta Ayyaanaynne taani hinte doonan wothida ta qaalay, hachife doomidi, merinaa gakanaw, hinte doonape, hinte nayta doonapenne hinte nayta nayta doonape shaaketenna” yaagees Goday.
ISA 60:1 Ne poo7oy yida gisho, dendada poo7isa; Godaa bonchoy ne bolla poo7ana.
ISA 60:2 Heko, dhumi sa7aa, sakana dhumi asaa kammana; shin Goday ne bolla dendana; iya bonchoy ne bolla poo7ana.
ISA 60:3 Kawotethati ne poo7uwako, kawotika ne wonta xolqethaako yaana.
ISA 60:4 Dhoqu gada ne yuushuwa xeella; ubbay issife neeko yaana. Ne adde nayti haahope yaana; ne macca nayti ba7etidi neeko yaana.
ISA 60:5 He wode neeni be7ada ufaytana; ne wozanay ufaysan noocu gaana. Abbaa bolla de7iya shaloy neeko yaana; kawotethata duretethay nebaa gidana.
ISA 60:6 Midiyaamepenne Efa biittafe yida, gimale wudey ne biitta kammana. Worqanne ixaane eheysati Godaa galataa awaajishe Saabape yaana.
ISA 60:7 Qedaarenne Nebayoota dorsa wude ubbay, ta yarsho bessa neeko yaana; taani ta boncho keethaa bonchana.
ISA 60:8 “Haysati shaarada woyko holleda banta keethako paalleysati oonee?
ISA 60:9 Tuma yuushoy abban teqetida biittati, tanan ufaysi wothana; Isra7eele geeshshay, Goday hinte Xoossay, hintena bonchida gisho, Tarsesa markabeti sinthati keyidi, ne nayta haaho biittafe enta biraranne worqara Xoossaa bonchuwas ehana.
ISA 60:10 “Allaga biittati ne dirsaa gimbana; enta kawoti new oothana. Nena taani ta hanquwan kase shocas, shin ha77i ta qadhiyan nena maaras.
ISA 60:11 Ne pengeti ubba wode dooya daana; kawotethata duretethaynne enta kawoti di7etidi neeko yaana mela gallasinne qamma gordetokona.
ISA 60:12 New oothonna asi woyko kawotethi ubbay dhayana.
ISA 60:13 Ta keethaa bessaa loythana mela Libaanose boncho gidida zigay, xiiddaynne xaythay neeko yaana; taani ta tohuwa wothiya bessaa bonchana.
ISA 60:14 Nena un7ethida asaa nayti yidi new hokana; nena kadhida ubbay ne sinthan goyinnana. Enti nena, ‘Godaa Katame, Xiyoone, Isra7eele, Geeshsha Katame’ yaagidi xeegana.
ISA 60:15 “Haysafe kase oonika ne giddora kanthonna mela yegetadasanne ixetadasa. Shin ha77i taani nena merinaw gita oothana; yeletethaa ubbay nenan ufaytana.
ISA 60:16 Neeni kawotethata maatha uyana; kawota dhantha dhammana. Goday, nena Ashsheysa, wozeysanne Yayqooba wolqaama gideysa neeni erana.
ISA 60:17 Naase birata gisho worqa, birata gisho bira, mitha gisho naase birata, shucha gisho birata taani new ehana. Taani, sarotethi nena ayseysa, xillotethi new halaqa oothana.
ISA 60:18 Geellatethi ne biittan, dhayoy woyko boshi ne zawan si7etenna. Neeni ne dirsa gimbiya, ‘Atotethaa’, ne pengiya, ‘Galata’ yaagada xeegana.
ISA 60:19 Gallas awa poo7o, qamma ageena poo7o new koshshenna; Goday new merinaa poo7o, ne Xoossay new boncho gidana.
ISA 60:20 Awi nam7antho wullenna; ne ageenay poo7o aggenna. Goday new merinaa poo7o gidana; neeni yeekida gallasati new gidana.
ISA 60:21 Ne asa ubbay xillo gidana; enti biitta merinaw laattana. Enti taani ta bonchuwa qoncisanaw tokida puutota; ta kushe oosota.
ISA 60:22 Hinte giddon issi keethan de7iya guutha asata darsana; ubbaafe guuthaa gita kawotethi oothana. Taani Godaa; wodey gakiya wode, taani hessa eeson polana” yaagees.
ISA 61:1 Ubbaa Haariya Godaa Ayyaanay ta bolla de7ees; manqotas lo77oba odana mela Goday tana tiyis. Wozani meqidaysata koolana mela, di7etidaysata la77a kessana melanne qashetidaysata billana mela Goday tana kiittis.
ISA 61:2 Dosetida Godaa laytha odana mela, nu Xoossay halo keyana gallasaa awaajana mela, azzaneyisata ubbaa minthethana mela tana kiittis.
ISA 61:3 Xiyoonen kayoteysatas, bido gisho kallacha, yeeho gisho ufaysa zayte, azzano gisho galata ma7o immana mela tana kiittis. Enti Goday ba bonchuwas tokida xillo mitha geetetidi xeegetana.
ISA 61:4 Enti beni laaletida bessata zaaridi keexana; beni kundida bessata zaaridi essana. Enti daro yeletethaafe kase laaletidi onida katamata zaaridi keexana.
ISA 61:5 Allaga asati hinte dorsa wudiya heemmana; imathati hinte gadiya goyana enti hinte woyne gadiya naagana.
ISA 61:6 Asay hintena, “Godaa kahinetanne nu Xoossaa oosanchota” yaagidi xeegana. Hinte kawotethata duretetha maana; enta shaluwan hinte nashetana.
ISA 61:7 Ta asay banta yeella gisho nam7u kushe ekana; banta kawusha gisho laatan ufaytana. Hessa gisho, hinte enta biittan dako laattana; hinte ufaysay merinaa ufaysi gidana.
ISA 61:8 “Taani, Goday suure pirda dosayis; bonqenne iita ooso ixayis. Taani tuma enta oosuwa gatiya qanxana; Taani entara merinaw caaqana.
ISA 61:9 Enta kochati kawotethata giddon, enta nayti dereta giddon eretana; enta be7ida ubbay taani, Goday, enta anjida asi gideysa erana.”
ISA 61:10 Taani Godan daro ufaytayis; ta shempiya ta Xoossan hashshu gawusu. Ekeysi ba huuphen kallacha wotheysada, geliyara bana alleeqiseysada, I tana atotetha ma7o mayzis; xillotethi afila bollara gujis.
ISA 61:11 Biittafe mithi maati doleysada, gadey tokidaba dicheysada, Ubbaa Haariya Goday xillotethinne galata kawotetha ubbaa sinthan purcisana.
ISA 62:1 Xiyoone gisho, taani si77i giike; Yerusalaame xillotethay poo7oda, I atotethay wonta xalqeda keyana gakanaw taani si77i giike.
ISA 62:2 Kawotethati ne xillotethaa, kawoti ubbay ne bonchuwa be7ana. Goday sunthiya ooratha sunthan neeni xeegetana.
ISA 62:3 Neeni Godaa kushen lo77ida kawotetha kallacha gidana.
ISA 62:4 Neeni, “Dogetidaaro” geetetaka; ne biittiya, “Dhonthu” geetetuku. Shin neeni, “Ta ufaysay in de7iyaro”, ne biittiya, “Azina gelidaaro” geetetana. Goday nenan ufaytana; ne biittiyaka azini de7iyaro gidana.
ISA 62:5 Panthi geela7o ekeysada, ne nayti nena machana. Ekeysi geliyarin ufayteysada, ne Xoossay nenan ufaytana.
ISA 62:6 Neno Yerusalaame, ne dirsa gimbiya bolla wocheyisata taani wothas; enti gallasinne qamma si77i gookona.
ISA 62:7 Hinteno, Godaa qofiseysato, I, Yerusalaame keexana gakanawunne biitta ubban nashetida katama oothana gakanaw hinteka shempopite; iyaka shempisopite.
ISA 62:8 Goday ba ushacha kushiyaninne ba wolqaama qesiyan haysada yaagidi caaqis: “Taani nam7antho hinte katha hinte morketi maana mela oothike. Hinte daaburida hinte woyne ushsha allagati uyokona.
ISA 62:9 Shin banta kathaa cakidaysati midi Godaa galatana; woyne maxeysati ta keethaa dabaaban uyana.
ISA 62:10 Aadhite! Pengera keyidi biite! Asaas oge giigisite! Wogga oge kessite. Shuchaa diggite; kawotethati ogiya demmana mela malla essite.
ISA 62:11 Goday sa7a gaxas haysada yaagidi awaajis: ‘Xiyoone asaas haysada yaagite; heko, hintena Ashsheysi gakis! Iya gatey iyara de7ees; I immiya woytoy iya sinthan de7ees’ yaagite.
ISA 62:12 Hinte, ‘Goday Wozida Geeshsha asata’ geetetidi xeegetana. Yerusalaamey, ‘Koyetiyaronne Yegeta Attaboona Katamiw’ ” geetetana.
ISA 63:1 Edoome biittan, Baasora katamaape zo7o ma7o ma7idi yey haysi oonee? Boncho ma7o ma7idi ba wolqaa minotethan sinthe hordofey oonee? “Xillo odeteynne ashshiya wolqi de7ey tana” yaagees Goday.
ISA 63:2 Woyne gum7iyason woyne yedhiya asa ma7oda ne ma7oy ayis zo77idee?
ISA 63:3 “Taani woyne gum7iyason woyniya tarka yedhas; kawotethatape issi asika taara baawa. Taani enta ta hanquwan yedhas; ta yiluwan enta dirxerethas. Enta suuthay ta ma7uwa bolla dharcetin, ta ma7o ubbay iitis.
ISA 63:4 Taani ta asaa woziya gallasaynne enta morketa halo keyiya laythay gakis.
ISA 63:5 Taani be7as, shin tana maaddiya issi asika demmabike; maaddey dhayida gisho, taani malaaletas. Hessa gisho, ta qesey taw atotethi ehis; ta hanqoy tana maaddis.
ISA 63:6 Taani ta hanquwan kawotethata yedhas; ta yiluwan enta dirxerethas; enta suuthaa biittan gussas” yaagees Goday.
ISA 63:7 Goday nuus oothida ooso ubbaa, Goday ba maarotethaaninne ba qadhiyan Isra7eele asaas oothida lo77o ooso ubbaanne iya sunthay galatetana mela bessida keehatetha ubbaa taani odana.
ISA 63:8 I, “Enti tuma ta asenne ta na7a gidiya gisho, taw wordotokona” yaagis. Hessa gisho, I enta ashsheysa gidis.
ISA 63:9 Enta waaye ubbaa I waayetis; iya Sinthaa Kiitanchoy enta ashshis. I enta ba siiquwaninne ba maarotan wozis; kase aadhida wodeta ubban I enta tookis.
ISA 63:10 Shin enti makallidosona; iya Geeshsha Ayyaana azzanthidosona. Hessa gisho, I simmidi, entaw morke gidis; enta olis.
ISA 63:11 Hessafe guye asay benibaanne ba aylliya Muse wode oothidaba qopidi, haysada yaagidosona: “Ba wudiya henthanchotara issife abba giddora kanthisida Xoossay awun de7ii? He wode ba Geeshsha Ayyaana enta giddon, wothida Xoossay ha77i awun de7ii?
ISA 63:12 Baw merinaa sunthu gidana mela enta sinthan haatha shaakidi, ba boncho wolqaama qesey Muses ushacha kushe gidana mela kiittidaysi awun de7ii?
ISA 63:13 Biitta bollara pari biyada enti dhubetonna ciimmo haatha giddora pinthidaysi awun de7ii?” yaagidosona.
ISA 63:14 Zangaara wodhiya meheda, Godaa Ayyaanay entaw shempo immis. Ne sunthay bonchetana mela hessada oothada ne asaa kaalethadasa.
ISA 63:15 Abeeti Godaw, salora duge xeella; neeni de7iya geeshshinne boncho gidida araatape be7a. Ne qinaateynne ne wolqay anee? Ne maarotaynne ne qadhey nuupe haakis.
ISA 63:16 Abrahaamey nuna eronna ixikoka, Yayqoobi nuna akeekona ixikoka, abeeti Godaw, neeni nu aawa; benipe doomidi, ne sunthay nuna wozeysa.
ISA 63:17 Abeeti Godaw, nuuni ne ogiyape dhayanaadanne new yayyonnaada nu wozanaa ayis muumisadii? Godaw, ne aylleta gisho, ne laata gidida kochata gisho, nuuko simma.
ISA 63:18 Ne geeshsha asay ne keetha guutha wodes laattidosona; shin ha77i nu morketi iya yedhidosona.
ISA 63:19 Nuuni benipe nebaa; shin enta neeni haarabaaka; ne sunthanka enti xeegetibookona.
ISA 64:1 Abeeti Godaw, salota daakada duge wodha; dereti ne sinthan kokoro.
ISA 64:2 Tami eexidi haathe pentiseysada duge wodhada, ne suntha ne morketa erisa; kawotethataka ne sinthan kokorsa.
ISA 64:3 Kase nuuni naagiboonna malaatata neeni oothida wode wodhadasa; dereti ne sinthan kokoridosona.
ISA 64:4 Benipe doomidi, nena ammanetidi, naageysatas malaatata oothiday neepe attishin, hara Xoossi asa haythi si7ibeenna; asa ayfey be7ibeenna.
ISA 64:5 Ufaytidi xillotethi ootheysatanne ne ogiya qopeyisata neeni maaddadasa. Shin nuuni nagara ooso aggonna ixida wode neeni hanqetadasa; nuuni waanidi attanee?
ISA 64:6 Nuuni ubbay tuna asi gidida; nu xillotetha ooso ubbay tuna curqa mela. Nu ubbay boncoda qoletida; nu nagaray nuna carkoda pitidi efis.
ISA 64:7 Neeni ne sinthaa nuupe genthadasa; nu nagaray nuna dhaysana mela aggadasa. Ne sunthaa xeegey deenna; nena minthidi oykanaw koyey baawa.
ISA 64:8 Gidoshin, abeeti Godaw, neeni nu aawa; nuuni urqa; ne urqa medhadasa; nuuni ubbay ne kushen medhetida.
ISA 64:9 Abeeti Godaw, daro hanqetofa; nu nagaraa merinaw qopofa. Nuuni ubbay ne ase gidiya gisho, nuna be7a.
ISA 64:10 Ne geeshsha katamati mela biitta gididosona; Xiyoone katamay mela biitta, Yerusalaamey baysa gidis.
ISA 64:11 Nu aawati iyan nena galatida geeshshinne lo77o gidida nu xoossa keethay taman xuugetis; nu lo77o bessa ubbay laaletis.
ISA 64:12 Abeeti Godaw, neeni haysa ubbaa be7ashe si77i gaanee? ha ubbay hanin, nuuko simmikii? Neeni si77i gada zawi bayna seeranee?
ISA 65:1 “Tana oychiboonaysatas qoncas; tana koyboonaysatas bentas. Ta sunthaa xeegiboonna kawotethas, ‘Yee! Yee!’ yaagada koyas.
ISA 65:2 Banta qofaa kaallidi, lo77o gidonna ogiyan hemetiya geella asaas gallas kumethi ta kushiya miccas.
ISA 65:3 Ha asay, ta sinthan atakilte gaden yarshishenne xuube yarsho bessan ixaane cuyisishe tana ubba wode hanqethoosona.
ISA 65:4 Enti duufon utteyisata, geema bessan aqeyisata, guduntho asho meyisata; enta xaaruwan, tuna asho cambi de7eyisata.
ISA 65:5 “Enti, ‘New yan de7a; taani neepe geeshshi gidiya gisho taako shiiqopa!’ yaagosona. Hessa mela asati siidhe tucciya cuyaa mela; gallas kumethi eexiya tama mela.
ISA 65:6 “Heko, ta sinthan xaafeti uttis; taani entaw zaarana si77i giike; enta seeranaw dendas.
ISA 65:7 Taani enta nagaraanne enta aawata nagaraa acuwa issife entaw qanxana. Enti deriya bolla ixaane cuyisidosona; zumata bolla tana cayidosona. Enti kase oothida oosuwa acuwa taani entaw qanxana” yaagees Goday.
ISA 65:8 Goday yaagees: “Iita woyne susa giddon lo77o woyne ayfey de7eysada, asay, ‘Iya giddon lo77o woyne ayfey de7iya gisho ubbaa wora holopite’ geysa mela, Taani ta aylleta haysada oothana; taani enta ubbaa dhaysike.
ISA 65:9 Taani Yayqoobape koche, Yihudape ta deriya laatteyisata kessana; ta dooridaysati iya laattana; ta aylleti yan daana.
ISA 65:10 Tana minthidi koyiya ta asaas, Saaroni dorsa wudey heemetiya bessi gidana; Akoora zangaaray miiza wudey allatiya bessi gidana.
ISA 65:11 “Shin hinteno, Godaa aggidi, ta geeshsha zumaa dogidaysato, ‘Qaada’ geetetiya eeqas gibira giigiseysato, hinte wursethaa eranaw ‘Saama’ geetetiya eeqas walaha woyne ushsha wancan kuntheysato,
ISA 65:12 Taani hinte wursethaa mashshas aathada immana; hinte ubbay goyretanaw hokana. Taani hintena xeegin koybeketa; odisin si7ibeeketa. Hinte ta sinthan iitabaa oothideta; taani dosonnaba doorideta.”
ISA 65:13 Ubbaa Haariya Goday yaagees: “Ta aylleti maana, shin hinte koshatana; ta aylleti uyana, shin hinte saamotana; ta aylleti ufaytana, shin hinte yeellatana.
ISA 65:14 Ta aylleti wozanape ufaytidi yexana, shin hinte wozanape kayotana; hinte ayyaanay meqida gisho, hinte zeleelidi yeekana.
ISA 65:15 Hinte, hinte sunthaa ta dooretida deriyas qangethi oothidi immana. Ubbaa Haariya Goday hintena wodhana; shin I ba aylleta dumma sunthan xeegana.
ISA 65:16 Kase metoti dogetida gishonne ta ayfiya sinthafe geemmida gisho he biittan anjo koyiya ubbay tuma Xoossaa sunthan woossana. He biittan caaqo caaqiya ubbay tuma Xoossaa sunthan caaqana.
ISA 65:17 “Heko, taani ooratha salotanne ooratha sa7a medhana; kaseba ubbay hassayetenna; qofetenna.
ISA 65:18 Shin taani medhiyaban merinaw ufaytitenne hashshu giite. Taani Yerusalaame ufaysasinne I asaaka galatan kumidaysata oothada medhana.
ISA 65:19 Taani Yerusalaamen ufaytana; ta asan hashshu gaana. Hizape guye yeehoynne un7a waasoy yan si7etenna.
ISA 65:20 “Yerusalaamen hizape guye, guutha wode de7idi hayqiya na7i, ba laytha wursonna hayqiya cima asi deenna. Xeetu laythara hayqiya uray, na7atethan hayqis geetetana; xeetu laythi gathonna hayqey, baadetida asada taybetana.
ISA 65:21 He wode asay keethe keexidi daana; woyne tokidi iya ayfiya maana.
ISA 65:22 Enti keexin hari deenna; enti tokin hari meenna. Ta asaa laythay mitha laythada aduqana; taani dooridaysati adussa wode banta kushe oosuwan ufaytana.
ISA 65:23 Enti coo daaburokona qaadi bayna na7a yelokona. Enti banta naytara Godan anjetida kochata gidana.
ISA 65:24 Enti tana xeeganaape sinthe, taani entaw koyana; enti buroo haasayonna de7ishin taani enta si7ana.
ISA 65:25 Suudhumeynne dorsa urgey issife heemetana; gaammoy boorada kale maana; baani shooshas kathi gidana. He wode ta geeshsha zumaa bolla enti qohetokonanne dhayokona” yaagees Godaa Xoossay.
ISA 66:1 Goday yaagees; Saloy ta araata, sa7i ta tohoy yedhiya besse. Yaatin hinte taw keexiya keethay, ay mela keethee? Ta shempana bessay awusee?
ISA 66:2 Haysa ubbaa ta kushey oothis; entika hanidosona. Shin taani bana ziqi oothiya uraa, ba ayyaanan meqida uraanne ta qaalan kokoriya ura xeellana.
ISA 66:3 Korma yarshey ase wodhiya asa mela; urge dorsi yarshey kana yarshiya asa mela; katha yarsho yarshey, guduntho suuthi yarshiya asa mela; qofiso ixaane cuyisey eeqa goyinniya asa mela. Asa ubbay baw injetiya oge dooridosona; enta shempoy enta tunatethan ufaytees.
ISA 66:4 Hessa gisho, taani enta metos aatha immana; enti yayyidaba enta bolla ehana. Taani xeegida wode oonika koybeenna; taani odiya wode oonika si7ibeenna. Enti ta sinthan iitabaa oothidosona; tana ufaysonnaba dooridosona.
ISA 66:5 Hinteno, Godaa qaalas kokoreysato iya qaala si7ite: “Hintena ixiya hinte ishati, ta sunthaa gisho, hintena kureysati, ‘Hinte ufaytin nuuni be7ana mela ane Goday boncheto’ ” yaagidosona; shin enti yeellatana.
ISA 66:6 Katamaape yaa waasuwa si7ite; xoossa keethafe keyiya girsaa si7ite. He girsay ba morketas enta oosuwada kushe zaariya Godaa girsaa.
ISA 66:7 “Iqetonna na7a yeliya maccas de7ii? Bannakonna adde na7a yeliya maccas de7ii?
ISA 66:8 Haysa melaba oone si7iday? Hessa melaba oone be7iday? Issi derey issi gallas yeletanaw danda7iyee? issi kawotethi qiphi zaaron medhetiyee? Xiyooney buroo iqethi oykonna, ellesada ba nayta yelasu.
ISA 66:9 Yelana wode gathiya taani enti yelanaada oothikinaayee? Yelanaada oothiya taani yeliya ulo gordaynaayee? Haysa giday tana, Godaa, ne Xoossaa.
ISA 66:10 Hinteno Yerusalaamo dosiya ubbaw, iira ufaytite; I gisho ufaysan noocu giite. Hinteno iw yeekiya ubbaw, iira ufaytite.
ISA 66:11 Hinte, iya minthethiya dhantha dhammidi kallana; I daro bonchuwafe loythi uyidi, ufaytana.”
ISA 66:12 Goday yaagees; “Taani iw sarotethaa shaafada darsana; iw kawotethata duretetha kixa shaafada ehana. Hinte hessa dhammana; I hashiyan tooketana; I ki7on uttidi baalotana.
ISA 66:13 Aayiya ba na7a minthetheysada taani hintena minthethenna; hinte Yerusalaamen minettana.
ISA 66:14 Hessa hinte be7iya wode hinte wozanay ufaytana; hinte meqethay maata mela aacana. Godaa kushey iya aylleta bolla de7eysin iya hanqoy iya morketa bolla de7eysi eretana.
ISA 66:15 Heko, Goday tamara yaana; iya para gaareti gote mela. Ba sheniya hanqon; ba seeraka tama lacon qoncisees.
ISA 66:16 Goday asho ma7ida ubbaa tamaninne mashshan pirdana; daroti Godaa mashshan hayqana.
ISA 66:17 “Banta eeqa goyinnanaw atakilte gade baanaw, bantana dummayeysatinne geeshsheysati; guduntho, ecerenne hara tunabata meyisata giddofe issuwa kaallidi beysati ubbay dhayana.
ISA 66:18 “Taani enta oosuwanne enta qofaa eriya gisho, kawotethatanne dumma dumma doonan odeteyisata, issife shiishana; enti shiiqidi, ta bonchuwa be7ana.
ISA 66:19 Taani enta giddon malaata oothana; entafe attidaysata giddofe ta gitatetha si7iboonanne ta bonchuwa be7iboona kawotethatako, Tarsesako, Liibeko, Liideko, Tubaalako, Yawaanakonne yuushoy abban teqetidi haaho biittatako kiittana; enti ta bonchuwa kawotethata giddon awaajana.
ISA 66:20 Isra7eele asay katha yarshuwa geeshsha miishen wothidi xoossa keethi eheysada, enti hinte ishata ubbaa kawotethata giddofe, paratan, para gaaretan, gimaletan, baqulotaninne caane gaaretan utisidi, Godaas imo oothidi ta geeshsha zumaa bolla Yerusalaame ehana.
ISA 66:21 Entafe issota issota kahinenne Leewe oothana” yaagees Goday.
ISA 66:22 “Taani medhida ooratha salotinne ooratha sa7i ta sinthan minnidi de7eysada, hinte kochaynne hinte sunthay minnidi daana.
ISA 66:23 Ageena xeerope bidi ageena xeero gakanaw, Sambaatape bidi Sambaata gakanaw asa ubbay ta sinthan goyinnanaw yaana.
ISA 66:24 Enti keyidi bishe, ta bolla makallida asaa aha be7ana. Enta miya guxuney hayqenna; enta xuuggiya tamay to7enna; enti asa ubbaas shaatiyaba gidana” yaagees Goday.
JER 1:1 Biniyaame biittan, Anatoota kataman de7iya kahinetape issuwa gidida Kalqe na7aa Ermiyaasa qaalay haysa.
JER 1:2 Amoone na7ay, Yihuda kawoy Iyosyaasi kawotida tammanne heedzantho laythan Godaa qaalay Ermiyaasako yis.
JER 1:3 Iyosyaasa na7ay, Yihuda kawoy Iyo7aqeemi kawotida laythatan Godaa qaalay Ermiyaasako yis. Qassi Iyosyaasa na7ay, Sedeqiyaasi kawotin, tammanne issi laythi gakanawunne, ichashantho ageenan Yerusalaame asay di7etidi bida wodiya gakanaw Godaa qaalay iyako yis.
JER 1:4 Godaa qaalay taako haysada yaagishe yis:
JER 1:5 “Neeni ne aaye ulon medhetanaape sinthe ta nena erayis. Ne yeletanaape sinthe ta nena dummayada wothas; kawotethatas nena nabe oothada shuumas” yaagis.
JER 1:6 Taani, “Ubbaa Haariya Godaw, taani na7a gidiya gisho waatada odetaneko erike” yaagas.
JER 1:7 Shin Goday, “ ‘Taani na7a goopa’; taani nena kiittiya bessaa bada ta kiita ubbaa asaas oda.
JER 1:8 Taani nena ashshanaw neera de7iya gisho entaw yayyofa. Haysa odey Godaa” yaagis.
JER 1:9 Goday ba kushiya yeddidi, ta doona bochidi, “Heko; taani ta qaala ne doonan wothas.
JER 1:10 Shoddanawunne laallanaw, dhaysanawunne shira yegganaw, keexanawunne tokanaw, asaa bollanne kawotethata bolla ta nena hachi shuumas” yaagis.
JER 1:11 Godaa qaalay taako, “Ermiyaasa, neeni ay be7ay?” yaagis. Taani zaarada, “Lawuze mitha xam7a be7ayis” yaagas.
JER 1:12 Goday, “Neeni like be7adasa. Taka ta qaala polanaw haysada be7ayis” yaagis.
JER 1:13 Zaaridi Goday, “Haraa ay be7ay” yaagis. Taani zaarada, “Issi pentiya xaaroy pudeha baggafe issi bagga gedi gidi uttidaysa be7ayis” yaagas.
JER 1:14 Goday, “Pudeha baggafe dhayoy podhidi, biittan de7iya asa ubbaa bolla gukana.
JER 1:15 Taani pudeha bagga kawotethatan de7iya asa ubbaa xeegana hanayis. Enta kawoti yidi, Yerusalaame geliya pengetan, dirsa yuushuwaninne Yihuda katamata ubban banta araata wothana.
JER 1:16 Yihuda asay tana aggidi, iita oothida gisho, hara xoossatas ixaane cuyisida gishonne banta kushen oothida xoossata goyinnida gisho ta pirdaa enta bolla ehas.
JER 1:17 “Shin neeni giigeta! Dendada taani nena kiittiyaba ubbaa entaw oda. Entaw yayyofa; ne entaw yayyiko, ta nena enta sinthan gujada yashisana.
JER 1:18 Hachi ta nena ha biitta bolla, Yihuda kawota bolla, halaqata bolla, kahineta bollanne ha asaa bolla gimbetida katamada, birata tuussadanne naase biratan dirida dirsada oothada minthas.
JER 1:19 Enti neera oletana; shin ta ashshanaw neera de7iya gisho nena xoonokona. Haysa odey Godaa” yaagis.
JER 2:1 Godaa qaalay taako haysada yaagishe yis:
JER 2:2 “Bada Yerusalaame asa haythan haysada yaagada awaaja. Ne na7atethan taw ay mela ammanetidako, ne buroo meddan de7iya wode tana ay mela siiqidaako, ta akeekayis. Neeni mela biittan zerethi zereti eronna biittan tana kaalladasa.
JER 2:3 He wode Isra7eeley Godaas geeshshi; iyaw bayra katha mela. Iyape mida ubbay bala gidoosona; enta bolla dhayoy yis. Hessa odey Godaa” yaagees.
JER 2:4 Hinteno, Yayqooba nayto, Isra7eele zare, ubbay Godaa qaala si7ite!
JER 2:5 Goday yaagees; kase hinte aawati taape ay bala demmidi taape haakidi bidonaa? Enti pathonna eeqata goyinnidi pathonnaba gididosona.
JER 2:6 Enti, “Nuna Gibxefe kessida, mela biittan kaalethida, aaforanne mela biittara aathida, koshinne sakana dhumi de7iya biittara pinthida, oonika aadhonanne de7onna bessara kaalethida Goday awun de7ii?” yaagidi oychibookona.
JER 2:7 Hinte he biitta ayfiyape lo77uwa maana mela ta hintena aradda biitta ehas. Shin hinte yidi, ta biitta tunisideta; ta laata iisideta.
JER 2:8 Kahineti, “Goday awunee?” yaagidi oychibookona. Ta higgey enta kushen de7iya asati tana eribookona. Deriya ayseysati ta bolla makallidosona. Nabeti Ba7aale eeqa sunthan tinbite odidi pathonna eeqata goyinnidosona.
JER 2:9 “Hessa gisho, ta hintera buroo mootetana; hinte nayta naytara mootetana.
JER 2:10 Ane wuloha bagga bidi, yuushoy abban teqetida biitta Qophiroosa xeellite; doloha bagga bidi Qedaare biitta ase kiittidi xomoosite. Haysa melabay haysafe kase hanidaako be7ite.
JER 2:11 Enti tuma xoossata gidonna ixikoka ba xoossata laammida derey oonee? Shin ta asay entaw boncho gidida tana pathonna eeqatara laammis.”
JER 2:12 “Saloto, haysan malaaletite; dagammidi kokorite” yaagees Goday
JER 2:13 Ta asay nam7u nagara oothidosona; hessika, de7o pulto gidida tana aggis. Haathe oykanaw danda7onna, xoo7e ollata bantaw bookidosona.
JER 2:14 “Isra7eeley shametida aylleyee? woyko son yeletida aylleyee? Yaatin, morketi ayis do7oda shankatoona?
JER 2:15 Iya morketi gaammoda iya bolla gudoosona. Enti banta qaala dhoqu oothidi daarosona. Enti iya biitta kaysi kessidosona; iya katamati laaletidi asi bayna soo gididosona.
JER 2:16 Hesaa bollaka Mempisanne Xafinaasa asati iya huuphiya meedidosona.
JER 2:17 Neno Isra7eele, oge ubban nena kaalethiya, Godaa ne Xoossaa aggada haysa ne bolla ehiday nena gidikii?
JER 2:18 Nayle shaafape haathe uyanaw Gibxe buussi nena ay maaddanee? Efraxiisa shaafape haathe uyanaw Asoore buussi nena ay maaddanee?
JER 2:19 Hiza ne iitatethay nena seerana; ne tana kaddidaysi ne bolla pirdana. Ne tana Godaa ne Xoossaa aggidaysi ay mela iitanne camo gidiyako akeeka be7a. Ne taw yayiya yashshay baawa” yaagees Goday, Ubbaafe Wolqaama Xoossay.
JER 2:20 “Ta ne qambara daro wodepe kase menthas; ne qashuwa duuthas. Neeni, ‘Ta nena goyinnike’ yaagadasa. Dere bollanne daashsha mitha garsan laymatanaw zin7adasa.
JER 2:21 Ta nena dooretida zerethafe ekada, lo77o woyne gaden tokas. Yaatin, waanada, guye simmada, woran dolida, iita woyne gidadii?” yaagees Goday.
JER 2:22 “Ne sangeenora meecetiyakoka, saamunan gorpetiyakoka ne qitay ta sinthana.
JER 2:23 Neeni waanada, ‘Ta tunabike; Ba7aale eeqa goyinnabike’ gay? Neeni zangaaran hanidaba xeella; ne oothidaba akeeka. Neeni yaanne haanne woxiya ziita keyida gimale mela.
JER 2:24 Neeni bazzo meezetida, ziita wode carko singethiya hare mela. I amoy dendin, ooni iyo teqanaw danda7ii? Iya baw koyada gakiya gisho ay adde hareyka iyo demmanaw daaburenna.
JER 2:25 Neno, Isra7eele, ne caammay wurana gakanaw ne kottonoy melana gakanaw hara xoossata geedo woxofa. Shin neeni, ‘Atto, hessi tana maaddenna. Taani imatha xoossata dosas; taani enta goyinnana’ yaagadasa.
JER 2:26 “Kaysoy oyketida wode yeellateysada Isra7eele asay yeellatidosona; enti, enta kawoti, enta halaqati, enta kahinetine enta nabeti ubbay yeellatana.
JER 2:27 Enti mithaako, ‘Ne ta aawa’ yaagosona; shuchaa, ‘Tana ne yeladasa yaagosona. Enti banta som7uwa aggidi, banta zokuwa zaaridosona. Shin enti meto wode nuna ashsha!’ yaagosona.
JER 2:28 Shin hinte, hintew medhida xoossati awun de7oona? Hinte meton geliya wode hintena ashshanaw danda7iko dendidi hintena asho. Hinteno, Yihuda asaw, hinte xoossati hinte katamata mela daro” yaagees Goday.
JER 2:29 “Hinte taara ayis mootetetii? Hinte ubbay taw makallideta.
JER 2:30 Ta hintena coo seeras; hinte hinte oosuwape simmiyaba gideketa. Koshatida gaammoda hinte mashshay hinte nabeta mis” yaagees Goday.
JER 2:31 Hinteno, ha wodiya yeletaw, Godaa qaala si7ite. Ta Isra7eeletas bazzo woyko sakana dhuman de7iya biitta gidadinaayee? Yaatin, ayis ta asay, “Nuuni nu sheneda baana; neeko simmoko” yaagidona?
JER 2:32 Geela7iya ba alleequwa, mushuriya ba ma7uwa dogay? Shin ta asay tana tayboy bayna gallas dogidosona.
JER 2:33 Neeni ne laggethota geedo wothaa waanada meezetadii? Daro iita maccasati ne ogiya tamaarosona.
JER 2:34 Menthidi gelishin oykida asaa suuthan gidonashin xillo manqota suuthan ne ma7oy iitis. Neeni hessa ubbaa oothadaka,
JER 2:35 Neeni, “ ‘Taani xillo; tuma Goday ta bolla hanqetenna; taani nagara oothabike’ giya gisho ta ne bolla pirdana.
JER 2:36 Neeni ne ogiya laammashe ayis woxay? Nena Asoorey yeellaydaysada Gibxey yeellayana.
JER 2:37 Goday ne ammaneteyisata kawushida gishonne ne entafe maade demmonna gisho ne huuphiya oykada yaape keyana” yaagees Goday.
JER 3:1 “Issi asi ba machiw yeddin, iya bada hara azina geliko, he addey iyo zaarii? Zaariko he biittay tuna gidennee? Shin ne laymatanaw koyada daro laggethotara de7adasa; ha77i neeni taako simmanee? yaagees Goday
JER 3:2 Dhoqu gada aykoy bayna dereta xeella. Laymatanaw ne zin7aboona bessi de7ii? Arabe asi mela biittan utteysada, neeni laggethota naagada oge doonan uttadasa. Ne laymatethaninne ne iitatethan biitta tunisadasa.
JER 3:3 Hessa gisho, torche iray teqetis; sila irayka bukonna ixis. Hessi haninka, new laymatetha medhoy de7ees; ne yeellatonna ixadasa.
JER 3:4 Ha77i neeni, ‘Ta aawaw, ta na7atetha laggiyaw ne tana siiqasa.
JER 3:5 Ne ubba wode yilotay? Ne hanqoy merinaw aggennee?’ yaagasa. Shin ne oothanaw danda7iya iita ubbaa oothaasa” yaagees Goday.
JER 3:6 Kawa Iyosyaasa wode Goday taako haysada yaagis: “Ammanoy bayna Isra7eeley oothidaba ne be7adii? Iya dere bollanne daashsha mitha ubbaa garsi bada yan laymatasu.
JER 3:7 Iya haysa ubbaa oothinka taako simmande gada qopas, shin simmabuuku. I michiya, ammanetona Yihudika hessa be7asu.
JER 3:8 Ammanoy bayna Isra7eele daro wode laymatida gisho pirima immada iyo yeddas. Hessi haninka Isra7eele michiya, ammanetona Yihudi, yayyonnaysa ta be7as; iyaka keyada laymatasu.
JER 3:9 Laymatethay iw laafaba gidiya gisho, mitharanne shuchara laymatada biitta tunisasu.
JER 3:10 He ubban I michiya, ammanetona Yihudi simmidaba daanawusupe attishin, kumetha wozanape taako simmabuuku” yaagees Goday.
JER 3:11 “Ammanetona Yihudape ammanoy bayna Isra7eeley xillo.
JER 3:12 Bada pudeha baggan de7iya asaas haysada yaagada awaaja: ‘Ammanoy bayna Isra7eele, simma! Taani maaroti kumida Godaa gidiya gisho nena iita ayfen xeellike. Merinaw hanqetike’.
JER 3:13 Gidoshin, ‘Taani Godaa, ta Xoossaa bolla makallas. Allaga xoossatara daashsha mitha garsan laymatas. Ne qaala kiitetabike’ gada ne qohuwa ammana” yaagees Goday.
JER 3:14 “Hinteno, ammanetona asaw, ta hintew azina gidiya gisho simmite. Taani issi katamape issinno, issi yarape nam7a doora ekada Xiyoone ehana.
JER 3:15 Ta wozanaada hintena heemmiya henthanchota hintew immana. Enti hintena eratethaninne akeekan heemmana” yaagees Goday.
JER 3:16 “He gallasatan hinte he biittan dariya wode asay, ‘Godaa caaqo Taabotiya’ gidi odetokona. I entaw qofetenna; hassayetenna; baynaysi entaw eretenna; harika oosetenna.
JER 3:17 He wode enti Yerusalaame, ‘Godaa Araata’ gidi xeegana. Kawotetha ubbaafe asay Godaa sunthaa bonchanaw Yerusalaame shiiqana. Hessafe guye, enti banta wozanaa iitatethaa kaallokona.
JER 3:18 He wode Yihuda asaynne Isra7eele asay gahetidi pudeha bagga biittafe ta hinte aawata laatisida biitta issife yaana” yaagees Goday.
JER 3:19 “Ta hintena na7atho ekada, biitta ubbaafe lo77iyanne aradda biitta hintew immanaw koyas. ‘Ta aawaw’ gidi xeegananne tana kaallana gada qopas.
JER 3:20 Shin Isra7eele asaw, hinte ba azinaas ammanetona machida taw ammanetibeketa” yaagees Goday.
JER 3:21 Enti banta ogiya geellayida gishonne banta Xoossaa aggida gisho manqo zumatape Isra7eele asaa waasoynne yeehoy si7etees.
JER 3:22 “Hinteno, ammanoy bayna asaw, taako simmite. Hinte ammanetana mela ta hintena pathana” yaagees Goday. Hinte, “Neeni, nu Godaa Xoossaa gidiya gisho neeko simmana.
JER 3:23 Dereta bollanne zumata bolla eeqa goyinnoy tuma cimo. Tuma Isra7eele atotethay Godaa, nu Xoossaa.
JER 3:24 Nu na7atethafe doomin, nu aawati daaburidi demmida, enta dorsaanne mehiya, enta maccanne adde nayta yeellayiya eeqati midi dhaysidosona.
JER 3:25 Na7atethafe hachi gakanaw, nunne nu aawati Godaa nu Xoossaa bolla nagara oothida. Godaa nu Xoossaa qaala kiitetibooko. Hessa gisho, nuuni yeellan gufannanaw qassi kawushatethi afilada nuna kammo” yaagosona.
JER 4:1 Goday yaagees, “Isra7eele asaw, simmiko, taako simmite. Hinte tana shaatiya hinte eeqata ta sinthafe diggiko, ta ogiyape kare keyonna ixiko,
JER 4:2 tuman, suuretethaninne xillotethan, ‘De7o Xoossay eriya mela’ gidi caaqiko, he wode kawotethati iyan anjetananne iyan ceeqana.”
JER 4:3 Goday Yihudanne Yerusalaame asaako haysada yaagees: “Hinte othe biitta goyite; aguntha bolla zeropite.
JER 4:4 Hinteno, Yihudanne Yerusalaame asaw, hinte Xoossaas qaxaretite; hinte wozanaa shoohuwa diggite. Hessi hanonna ixiko hinte iitatethaa gisho, ta hanqoy tamada eexana; iya oonika toysanaw danda7enna” yaagees Goday.
JER 4:5 Yihudan awaajite; Yerusalaamen moyze punnite! Hinte qaala dhoqu oothidi haysada gidi waassite! Issife shiiqidi gimbetida katamatako yedhite.
JER 4:6 Asay Xiyoone baana mela mallite! Hinte shempuwa ashshanaw gam7onna baqatite! Gam7ofite! Ta pudeha baggafe gadonne dhayo biitta bolla ehana hanayis.
JER 4:7 Gaammoy worape keyeysada kawotethata dhayseysi ba bessaafe dendidi hinte biitta dhaysanaw yis. Hinte katamati laaletidi baysa gidana.
JER 4:8 Hessa gisho, kayo ma7o ma7idi, “Woo! Woo!” gidi zeleelitenne yeekite. Godaa suulliya hanqoy nu bollafe kichibeenna.
JER 4:9 “He wode kawanne halaqata wozanay til7ana; kahineti dagammana; nabeti hirgana” yaagees Goday.
JER 4:10 Taani, “Ubbaa Haariya Godaw, mashshi enta qoodhen wodhiya wode ‘Hintew sa7i saro gidana’ yaagada ha asaanne Yerusalaame ayis cimmay” yaagas.
JER 4:11 He wode ha asaasinne Yerusalaames haysada yaagidi odetana: “Mela biittan de7iya aykoy bayna dhoqa deretape michiya carkoy ta asaa bolla carkana; hessi kathi geeshshanaasa gidenna.
JER 4:12 Ta kiitan wolqaama carkoy carkana; ta enta pirdana” gees.
JER 4:13 Heko, morkey shaarada keyees. Iya para gaareti gote mela; iya parati arganthafe aadhidi eesotoosona. Nuna ayye! Nu dhayida!
JER 4:14 “Neno Yerusalaame, attana mela ne wozanaa meeccada iitatethaafe geeya. Iita qofay ne wozanan awude gakanaw gam7anee?
JER 4:15 Daane katamaapenne Efreema zumaape yidaysati iitabaa awaajosona.
JER 4:16 Yihuda katamata bolla ola awaajiya olanchoti haaho biittafe yuussaa bolla de7oosona gidi kawotethatas odite; Yerusalaameska awaajite.
JER 4:17 I ta bolla makallida gisho, gaden de7iya kathaa naageysada olanchoti Yihuda yuushuwa teqana” yaagees Goday.
JER 4:18 Yihuda asaw, hinte hanoynne hinte oosoy haysa ubbaa hinte bolla ehis. Haysi hintew seera. I ay mela cammi! Hinte wozanaa ay mela caddi!
JER 4:19 Tana ayye! Ta haysa waata danda7ane! Ayye ta wozanaa! Ta wozanay kokorees; ta si77i gaanaw danda7ike. Taani moyze punonne ola girsi si7ida gisho si77i gaanaw danda7ike.
JER 4:20 Dhayoy dhayo bolla yees; biittay kumethi dhayis. Ta dunkaaney kundis; ta shaqarayka laaletis.
JER 4:21 Taani awude gakanaw ola malla be7anee? Awude gakanaw moyze puno si7anee?
JER 4:22 “Ta asay eeya; enti tana erokona. Enti qofi bayna nayta mela; entaw akeeki baawa. Enti iitabaa oothanaw cinca; shin lo77oba oothidi erokona” yaagees Goday.
JER 4:23 “Taani sa7aa be7iya wode, sa7i aykoyka bayna baysa gididaysa be7as. Qassi salota xeelliya wode, poo7oy baynaysa xeellas.
JER 4:24 Ta dereta xeelliya wode enti qaaxoosona; taani zumata be7iya wode yaa haa woxoosona.
JER 4:25 Ta xeelliya wode asi baawa; salo kafoti ubbay paallidi baqatidosona.
JER 4:26 Ta xeelliya wode aradda biittay qaa7e gididaysa be7as. Godaa sinthaninne iya suulliya hanquwa sinthan he biitta katamati laaletidosona.
JER 4:27 “Biittay dhayana; shin ta iya kumethi dhaysike.
JER 4:28 Sa7ay yeekana; saloy dhumana. Taani odas; marsike. Taani qofa qachas; aggike” yaagees Goday.
JER 4:29 Para asatanne donge asata waasuwan, asay katama ubbaafe baqatana. Baggati woxidi wora gelana, baggati zaalla bolla keyana. Katama ubbay baysi gidin de7iya asi dhayana.
JER 4:30 Neno, dhayos attidaare ne waanay? Ne zo7o ma7uwa ayis ma7adii? Worqa alleeqo ayis wothadii? Ne ayfiya siphintha ayis tiyay? Neeni coo nena loythaasa; ne laggethoti nena kadhidosona; enti nena wodhanaw koyoosona.
JER 4:31 Taani iqethi oykida maccasi waassiya waasuwa mela si7as. I waasoy koyro na7a yeliya maccasa waaso mela. He waasoy, Yerusalaamey shempo dhayada, ba kushiya miccada, “Tana ayye! Ta dhayas! Tana wodhanaw hanoosona!” yaagada waassiya waasuwa.
JER 5:1 “Ane Yerusalaame ogiya bolla keyite; pudenne duge hemetite; iya yuushuwa xeellitenne akeekite; iya gutaranka koyite. Xillo pirdiyanne tuma koya issi asi hinte demmiko, ta Yerusalaame maarana.
JER 5:2 Enti, ‘De7o Goday eriya mela’ gidi caaqikoka, wordo caaqoosona” yaagees Goday.
JER 5:3 Abeeti Godaw, ne ayfeti tumaa xeellokonaayee? Ne enta shocadasa shin enta sakibeenna. Ne enta mentherethadasa shin enti simmonna ixidosona. Enti banta som7uwa zaallafe aathidi minthidi banta nagaraape simmonna ixidosona.
JER 5:4 Hessafe guye, taani, “Haysati Godaa ogiyanne banta Xoossaa higgiya eronna gisho, manqonne eeya” yaagada qopas.
JER 5:5 Hiza, ta gita asatako bada entaw odana. Godaa ogiyanne banta Xoossaa higgiya eroosona. Shin enti ubbay iya qambara menthidosona; iya qashuwaka duuthidosona.
JER 5:6 Enta makallaynne enta kundethay daro gidiya gisho, gaammoy worape keyidi, enta wodhana. Suudhumey bazzofe keyidi, enta maana. Maahey enta katamata hokidi naagana. He katamatape keyiya ubbay puuzetana.
JER 5:7 “Taani hinte nagaraa ayis atto go? Hinte nayti tana aggidi, wordo xoossatan caaqidosona. Taani enta muzada kalsas, shin enti laymatidosona; enta keethan aqidosona.
JER 5:8 Enti dhiiketida korma parada, hara asa macho laggethanaw singethoosona.
JER 5:9 Tuma ta ha oosota gisho, enta seeranaw bessikina? Haysa mela kawotethaa bolla ta haluwa keyikina?” yaagees Goday.
JER 5:10 “I woyne gadiya giddo gelidi iissite, shin kumethi dhaysofite. Enti Godaaba gidonna gisho I tasheta karidi yeggite.
JER 5:11 Isra7eele asaynne Yihuda asay kumethi kaddidosona” yaagees Goday.
JER 5:12 Enti haysada gidi Godaa bolla wordo odetidosona: “I aykoka oothenna; qohiyabay aybika nu bolla yeenna. Morke mashshay woyko koshi nuna polo demmenna.
JER 5:13 Nabeti carko mela; entan Xoossaa qaalay baawa. Hessa gisho, enti giyaba ubbay enta gako” yaagosona.
JER 5:14 Hessa gisho, Isra7eele asaako, “Enti ha qaala odida gisho taani ta qaala ne doonan tama oothana; ha asay mithi gidana; tamayka enta maana” yaagees Goday, Ubbaafe Wolqaama Xoossay.
JER 5:15 Goday Isra7eele asaako, “Hinteno, Isra7eele asaw, ta hinte bolla haaho biittafe issi kawotethi ehana. Enta qaala hinte eronna, enta oday hintew gelonna wolqaamanne beni kawotethi.
JER 5:16 Enta donge pal7e shoohoy dooya duufo mela; enta olanchoti wolqaama.
JER 5:17 Enti hinte kathaanne hinte goshsha ayfiya maana; hinte adde naytanne macca nayta wodhana; hinte dorsaanne mehiya bonqana; hinte woyniyanne balase mithaa dhaysana. Hinte ammanetiya, gimbetida katamata banta mashshan olidi dhaysana” yaagees.
JER 5:18 “Gidoshin, he gallasatan gidikoka, taani ta asaa kumethi dhaysike” yaagees Goday
JER 5:19 Asay nena, “ ‘Goday nu Xoossay nu bolla haysa ubbaa ayis oothidee?’ gidi oychiko, ne entako, ‘Hinte tana aggidi, hinte biittan imatha xoossata goyinnidaysada, hinteka asa biittan haratas haggaazana’ yaaga” yaagis.
JER 5:20 “Haysa Yayqooba asaas oda; Yihuda biittan awaaja.
JER 5:21 Hinteno, ayfey de7ishin be7onaysato, haythi de7ishin si7onnaysato, eeyanne akeekona asaw haysa si7ite!
JER 5:22 Hinte taw yayyanaw bessennee? Hinte ta sinthan kokoranaw koshshennee? yaagees Goday. Abbay aadhidi boonna mela shafe iyaw zawa oothiday tana? Zuley sugikoka iyape aadhanaw danda7enna; hobbey dendikoka kanthidi aadhenna.
JER 5:23 Shin ha asaas muumenne makalla wozani de7ees. Enti hara soo simmidi wora bidosona.
JER 5:24 Enti banta wozanan, ‘Nuus sila iranne torche ira woden woden immiya, kathaa shiishiya wode nuus immiya Godaa ane yayyoos’ yaagibookona.
JER 5:25 Hinte balay hessa teqis; hinte nagaray hintena lo77obaape ashshis” yaagees.
JER 5:26 “Ta asaa giddon iita asati de7oosona. Kafo oykanaw naagiya asada hokidi naagoosona. Enti gite yeggidi asaa oykoosona.
JER 5:27 Kafo keethan kafoy kumidaada, enta keethay cimon kumis; enti wolqaamanne dure.
JER 5:28 Enti ordenne modho gididosona; enta iita oosuwas zawi baawa. Enti yi7o nayta gisho mootetokona; manqotas suure pirdibookona.
JER 5:29 Yaatin, taani hessa gisho enta seeranaw bessennee? Haysa mela kawotetha bolla ta haluwa keyanaw bessennee?” yaagees Goday.
JER 5:30 “Daro iitabaynne daganthiyabay biitta bolla hanis.
JER 5:31 Nabeti wordo odoosona; kahineti enta zoriyan aysoosona. Ta asayka hessa melaba dosees. Shin wursethan hinte waananee?” yaagees Goday.
JER 6:1 Hinteno, Biniyaame asaw, hinte shempuwa ashshanaw baqatite! Yerusalaamepe keyite! Taquhe kataman moyze punnite! Beet-Hakareeman malla bessite! Pudeha baggafe iitabaynne gita dhayoy yaana hanees.
JER 6:2 Taani lo77iyanne ufaysiya Xiyoone katamata dhaysana.
JER 6:3 Henthanchoti banta wudiya ekidi yaa yaana. Iya yuushuwan banta dunkaaniya tokana; issoy issoy ba wudiya heemmana.
JER 6:4 “Yerusalaame olanaw giigetite! Dendite! Iya seeta gallas oloos. Shin ayye! Sa7i qammees; omarsa kuyay aduqi aduqi bees.
JER 6:5 Hessa gisho, dendite! qamma olidi iya miixaa laalloos” yaagidi maqetoosona.
JER 6:6 Ubbaafe Wolqaama Goday haysada yaagees: “Mithata qanxite. Yerusalaame gimbiya miyen biitta doorite. He kataman naaqoy kumida gisho I seeretanaw bessees.
JER 6:7 Haatha olli haathe pulteysada ika ba iitatetha pultees. Makallinne dhayoy iya giddon si7etees; iya hargeynne madunthay ta sinthana.
JER 6:8 Neno Yerusalaame, ta seera eka. Akay, giiko, ta neepe shaaketananne ne biitta asi bayna baysa kessana” yaagees.
JER 6:9 “Woyne poshiliyada, Isra7eele asaa giddofe attidaysata loythidi poshilite. Woyne qoriya asada, hinte kushiya daashshata giddo zaaridi yeddite” yaagees Ubbaafe Wolqaama Goday.
JER 6:10 “Ta ooddes odo? Oona seero? Ooni si7anee? Enti si7onna mela enta haythay tullis. Godaa qaalay entaw miichas attis; enti iyan ufaytokona.
JER 6:11 Godaa hanqoy tanan kumis. Ta ha sheniya teqanaw danda7ike. Oge bolla de7iya yooga nayta bollanne shiiqida na7atethata bolla ta hanquwa tiga. Machiya, azinaynne cimida asa ubbay attokona.
JER 6:12 Taani he biittan de7eyisata bolla ta kushiya yeddiya wode enta keethay, enta goshshaynne enta macheti ubbay haratas imetana” yaagees.
JER 6:13 “Guuthafe gita gakanaw ubbay bana go77iyabaa koyees. Nabetinne kahineti ubbay cimmoosona.
JER 6:14 Ta asaa maduntha pathonnaba oothidi guutha dhale wothoosona. Saroy baynashin, ‘Saro; saro!’ yaagosona.
JER 6:15 Enti ha shaatiya oosuwa oothidi yeellatidona? Akay, enti kumethi yeellatibookona; enti yeelli aybeko erokona. Hessa gisho, entika kundidaysata giddon kundana. Taani enta seeriya wode enta kawushana” yaagees Goday.
JER 6:16 Goday haysada yaagees: “Ogiyan eqidi xeellite; beni ogey de7iya bessaa oychite. Lo77o ogey awun de7iyako oychidi iyan hemetite; hinte shempo demmana. Shin hinte, nuuni he ogiyan hemetoko!” yaagideta.
JER 6:17 Taani naageysata hinte bolla shuumada, “Moyze girsaa si7ite” yaagas. Shin hinte, “Nu si7oko” yaagideta.
JER 6:18 “Hessa gisho, kawotethato, si7ite! Taani ta asaa bolla oothanaba akeekite.
JER 6:19 Sa7an de7iya asaw, haysa si7ite! Enti ta qaala si7onna ixida gishonne ta higgiya kadhida gisho ta enta bolla dhayo ehana.
JER 6:20 Saaba biittafe ixaani woyko haaho biittafe yida sawoynne qimamey taw aysee? Hinte xuussa yarshoyka eketenna. Hinte yarshoy tana ufaysenna” yaagees.
JER 6:21 Hessa gisho, Goday, “Taani ha asaa sinthan dhube wothana; aawatinne nayti entan dhubetana; shoorotinne laggeti dhayana” yaagees.
JER 6:22 Goday, “Pudeha bagga biittafe olanchoti yoosona; issi gita kawotethay sa7aa gaxape dendis.
JER 6:23 Enti dongenne toora dancidosona; enti qadhey bayna wozana minotanne maarotethi eronnayisata. Enti paran gaallabiya wode abbada guummoosona. Hinteno, Xiyoone katama asaw, enti hintena olanaw salpidosona” yaagees.
JER 6:24 Nuuni he odaa si7in, nu kushey argaacis; maccasi iqethi oykeysada nuna metoynne un7i oykis.
JER 6:25 Morkey mashsha oykida gishonne yan han dagami de7iya gisho soope keyopite; oge bollaka bentofite.
JER 6:26 Dhayseysi qoponna nu bolla yaana gisho, kayo ma7o ma7idi, bido bolla gondoretidi, asi ba issi na7as yeekiya mela ta asaas yeekite.
JER 6:27 Goday Ermiyaasako, “Neeni enta ogiya xomoosana melanne paacana mela birata paaciya asada ta nena oothas.
JER 6:28 Enti ubbay zigiranaw yuuyosona; odin si7onna makallanchota. Enti naase biratadanne biratada mino; enti ubbay nagara oothosona.
JER 6:29 Birata bolla de7iya shi7a xuuggidi geeshshanaw gilpey punnees. Shin geeshshanaw waayida waayey coo gidis; ta asaa giddon de7iya iitati kichibookona.
JER 6:30 Goday enta yeggidi aggida gisho, enti yegetida bira geetetana” yaagees.
JER 7:1 Godaape Ermiyaasako yida qaalay haysa:
JER 7:2 “Xoossa keetha pengiyan eqada, haysada yaagada awaaja. Hinteno, Godaa goyinnanaw ha pengetara geliya Yihuda asaw, ubbay Godaa qaala si7ite!
JER 7:3 Ubbaafe Wolqaama Goday, Isra7eele Xoossay haysada yaagees: hinte ogiyanne hinte oosuwa laammite; ta hintena ha bessan wothana.
JER 7:4 ‘Haysi Xoossa keethi! Haysi Xoossa keethi! Haysi Xoossa keethi’ yaagidi cimo qaalan ammanetofite.
JER 7:5 Hinte, hinte ogiyanne oosuwa tuma laammiko, issoy issuwas xillo pirdiko,
JER 7:6 bete asaa, yi7o naytanne am7eta naaqonna aggiko, ha bessan xillo asa suuthu gussonna aggikonne, hinte qohetonaada hara xoossata goyinnona aggiko,
JER 7:7 ta hinte mayzatas merinaw immida biittan hintena wothana.
JER 7:8 Shin hinte maaddonna cimo qaalan ammaneteta” yaagees.
JER 7:9 “Hinte kaysoteeta, wodheeta, laymateta, wordo caaqidi markateeta, Ba7aale eeqas yarsho yarsheeta, haysafe kase hinte eronna hara xoossata goyinneta.
JER 7:10 Yaatidi, ta sunthan xeegetida Xoossa keethaa yidi, ta sinthan eqidi, ‘Nuuni saro’ yaageeta. Shin ha shaatiya oosuwa ubbaa ootheeta.
JER 7:11 Ta sunthan xeegetida ha Xoossa keethay hintew pangati qosetiya gongolo gidetiyee? Hinte oothiyaba ubbaa taani ta ayfen be7as” yaagees.
JER 7:12 “Taani ta sunthay de7iya bessi oothada koyro doorida, Seelo biite. Ta asaa Isra7eele iitatethaa gisho, taani he bessaa waatidaako be7ite.
JER 7:13 Hinte ha ubbaa oothiya wode ta hintew zaara zaara odas; shin si7onna ixideta. Ta hintena xeegas; shin taw koybeketa.
JER 7:14 Hessa gisho, ta Seelo bolla oothidaysada haysan hinte ammanetiya, ta sunthan xeegetida ha Xoossa keethaa bolla, hintewunne hinte mayzatas immida ha bessaa bolla hessada oothana.
JER 7:15 Hinte dabbota, Efreema kochaa ta diggidaysada ta sinthafe hintenaka diggana” yaagees.
JER 7:16 “Ermiyaasa, ta si7onna gisho, ha asaas woossofa; enta gisho tana oychofa woyko waassofa; entaw gaannatopa.
JER 7:17 Enti Yihuda katamataninne Yerusalaame ogetan oothiyabay aybeko be7ikiyee?
JER 7:18 Nayti mithi mixoosona; aawati tama eethoosona; maccasati, ‘Salo Kawiw’ geetetiya eeqees uythi uukanaw dhiille munuqoosona. Enti tana yiloyanaw ushsha yarsho hara xoossatas gussoosona.
JER 7:19 Enti haysa oothey tuma tana qohanaaseyee? Haysan qohetidi yeellatanay enta gidokonaayee?” yaagees Goday.
JER 7:20 Hessa gisho, Ubbaa Haariya Goday haysada yaagees: “Ta hanqoy ha bessaa bolla, asaa bollanne mehiya bolla, gaden de7iya mithaa bollanne biittan de7iya kathaa bolla gukana; I eexana, to7anaw danda7enna.”
JER 7:21 Ubbaafe Wolqaama Goday, Isra7eele Xoossay haysada yaagees: “Hinte xuussa yarshuwa hara yarshota bolla gujidi, ashuwa hintew miite.
JER 7:22 Ta hinte mayzata Gibxe biittafe kessiya wode, xuussa yarshobanne hara yarshotaba odabike woyko kiittabike.
JER 7:23 Shin ta entako, taw kiitetite; ta hinte Xoossaa gidana; hinteka ta ase gidana. Hintew injetana mela ta hintena kiittiya oge ubban hemetite.
JER 7:24 Shin enti tana si7onna woyko taw besse immonna ixidosona. Enti banta iita wozanaa qofaa kaallidi bidosona; sinthe baanaysa aggidi guye bidosona.
JER 7:25 Hinte mayzati Gibxefe keyida wodepe doomidi hachi gakanaw ta aylleta, nabeta wonta wonta hintew kiittas.
JER 7:26 Shin hinte tana si7onna woyko taw besse immonna ixideta. Hinte morgiya minthideta; hinte aawatape aadhidi iitabaa oothideta.
JER 7:27 “Ha ubbaa ne entaw oda; shin enti ne giyaba si7okona. Ne enta xeegana; shin enti koyokona.
JER 7:28 Hessa gisho, Ermiyaasa, ne entako haysada yaaga: ha kawotethay ba Godaa Xoossaa kiitetonna woyko iya zoriya si7onna kawotethi. Tumi dhayis; tumi enta inxarsan deenna.
JER 7:29 Hinte huuphiya meedidi wora holite. Goday bana yiloyida yeleta ixida gishonne yeggidi aggida gisho aybika bayna dhoqa zumaa bolla keyidi zeleelite” yaagis.
JER 7:30 “Yihuda asay ta sinthan iitabaa oothidosona. Enti ta sunthan xeegetida Xoossa keethaa tunisanaw taani ixiya eeqata ehidi iya giddon wothidosona.
JER 7:31 Enti banta adde naytanne macca nayta taman xuuggidi yarshanaw, Hinooma Zangaaran Toofeta geetetiya yarsho bessa gimbidosona. Shin hessi ta enta kiittaboonabanne ta qofan baynaba.
JER 7:32 Hessa gisho, he bessay Hinooma Zangaara woyko Toofeta geetetidi xeegeteysi attidi, Shuka Zangaara yaagetidi xeegetana wodey yaana. Moogiya bessi bayna gisho, Toofeti enti banta aha moogiya bessi gidana.
JER 7:33 He wode he asaa ahay salo kafotasinne sa7a do7atas kathi gidana; enta gooddana asika baawa.
JER 7:34 Taani yethi, ufaysinne yaagano girsi Yihuda katamataninne Yerusalaame ogetan si7etonnaada oothana; biittay baysa gidana” yaagees Goday.
JER 8:1 “He wode Yihuda kawota meqethay, halaqata meqethay, kahineta meqethay, nabeta meqethaynne Yerusalaamen de7iya asaa meqetha ubbay duufope maxetidi keyana.
JER 8:2 Enti siiqida, kiitetida, kaallida, zore oychidanne goyinnida awa, ageenanne salo xoolintota ubbaa sinthan micetana. Enta meqethay shiiqenna woyko moogetenna; shin biitta bolla pito mela yegetana.
JER 8:3 Ta laallida bessatan de7iya, ha iita kawotethaafe attida asa ubbay de7ope hayqo amotana” yaagees Ubbaafe Wolqaama Goday.
JER 8:4 Goday haysada yaagees gada oda: “Issi asi kundiko, simmidi dendeneyee? Woyko issi asi oge baletiko guye simmenneyee?
JER 8:5 Yaatin, ha asay ayis guye simmidee? Yerusalaamey ayis ubba wode oge baleetii? Enti cimo baqidi oykidosona; simmonna ixidosona.
JER 8:6 Ta minthada hayzas; shin enti tuma haasayokona. ‘Ta ay oothadina?’ gidi ba iita nagaraa paaxey issoyka baawa. Ubbay olas gaallabiya parada baw baw woxees.
JER 8:7 Hari attoshin, haatha kafoti banta wodiya eroosona; holleti, kaarotinne masqala kafoti banta simmiya wodiya naagoosona; shin ta asay Godaa woga erokona.
JER 8:8 “Yaatin waanidi, ‘Godaa higgey nuura de7iya gisho nu cinca’ gaanaw danda7eetii? Wordancho xaafeti ta higgiya wordo kessidaysa be7eketii?
JER 8:9 Cincati yeellatana; enti kawuyananne oyketana. Enti Godaa qaala ixin, entaw ay cincatethi de7ii?
JER 8:10 Hessa gisho, ta enta macheta haratas, enta goshsha allaga asas immana. Guuthafe gita gakanaw bessonna go77as yiiqetoosona. Nabetinne kahineti ubbay asaa cimmoosona.
JER 8:11 Enti ta asaa madunthaa laafa gidi, guutha dhale wothoosona. Saroy baynashin ‘Saro, saro!’ yaagosona.
JER 8:12 Ha shaatiya oosuwa oothishe, enti yeellatidona? Akay, enti aykoka yeellatibookona. Enti yeelli aybeko erokona. Hessa gisho, enti kundidaysata giddon kundana; enti seeretiya wode kawuyana.
JER 8:13 Enta goshsha ayfiya ta entafe ekana. Enta woyne ayfey dhayana; balase mithaa ayfey bentenna. Iya boncoy shullana; ta entaw immidaba entafe ekana” yaagees Goday.
JER 8:14 Asay zaaridi haysada yaagosona: “Nu si77i gidi ayis uttanee? Ane shiiqite; gimbetida katamata gelidi yan hayqana. Goday nu Xoossay nuna hayqos aathidi immis. Nu iya bolla nagara oothida gisho, nu wodhiya haathi uyana mela oothis.
JER 8:15 Sarotethi ufaysan naagida; shin lo77obay yibeena. Nu paxo amotida; shin dagama gidis.
JER 8:16 Morke para garmamoy Daane kataman si7etees; enta korma parata caagethan biitti qaaxees. Enti biittanne biittan de7iyaba ubbaa, katamaanne kataman de7iya ase ubbaa midi dhaysanaw yidosona.
JER 8:17 Taani shooshata hinte giddo yeddana. Biti teqanaw danda7onna haso shooshata hinte giddo yeddana; enti hintena dukana” yaagees Goday.
JER 8:18 Ta azzanuwas minthethoy baawa; ta wozanay til7is.
JER 8:19 Ta asay haaho biittan waassiya waasuwa si7ite. Enti, “Goday Xiyoonen baawee? Ha Xiyoone Kawoy zaaridi yan deennee?” yaagidi waassoosona. Goday enta Kawoy, “Enti banta medhida misiletan, banta pathonna allaga eeqatan tana ayis yiloyidona?” yaagis.
JER 8:20 Asay zaaridi, “Heko caka wodey aadhis; boney wuris; nuuni attibooko” yaagidi waassoosona.
JER 8:21 Ta asay madunxida gisho, ta wozanayka madunxis. Ta kayotas; yashshi tana oykis.
JER 8:22 Galadan tiyetiya dhaley baawee? Yan aakimey deennee? Yaatin, ta asaa meqoy ayis paxennee?
JER 9:1 Hayqida ta asaas qammanne gallas yeekana mela ta huuphey haatha olla, ta ayfey pulto haathi gideerenne.
JER 9:2 Enti ubbay makallanne laymatiya asi gidiya gisho, taani ta asaape shaaketada baana mela, oge asi aqiya bessi, taw mela biittan de7ereneshin.
JER 9:3 “Enti banta inxarsan wordo odetanaw ubba wode giigidi de7oosona. Enta biittan tuma gidonashin wordoy kawotis. Enti issi nagarape hara nagaran pinnidosona; tana erokona” yaagees Goday.
JER 9:4 “Ishi cimmeysa, shooroy zigireysa gidiya gisho shooruwape naageto; ishay ishaa ammanetofo.
JER 9:5 Shooroy shooruwa cimmees; tuma odetey deenna. Wordo odetana mela banta inxarsaa tamaarsidosona; nagara oosona bantana daabursidosona.
JER 9:6 Ne cimo giddon de7aasa; enti banta cimuwan tana eronna ixidosona” yaagees Goday.
JER 9:7 “Hessa gisho, ta enta biratada seerisana; enta paacana. Ta asaa gisho, ta haraba ay oothanaw danda7iyana?
JER 9:8 Enta inxarsay wodhiya donge toora mela; enti cimon haasayoosona. Banta doonan issoy issuwara saro qaala haasayoosona; shin banta wozanan xihe wothoosona.
JER 9:9 Yaatin, ta ha hanotaas enta seeranaw bessennee? Taani haysa mela kawotethaa bolla halo keyanaw bessennee?” yaagees Ubbaafe Wolqaama Goday.
JER 9:10 Taani dhoqa deretas yeekana; enta gisho waassana; bazzon de7iya hentha gadetas zeleelana. Enti dhayidosona; yaara issi asika aadhenna. Mehe waasoy si7etenna; salo kafotinne do7ati baqatidosona.
JER 9:11 “Yerusalaame katamaa laaletida keelanne workanati gupiya bessi oothana. Yihuda katamata oonika doonna baysa kessana” yaagees Goday.
JER 9:12 Haysa akeekanaw danda7iya cinca asi oonee? Hara asas odana mela Goday ooddes qoncisidee? Issi asika iya giddora aadhona mela biittay iitidi bazzoda oniday aybisee?
JER 9:13 “Haysi haniday, entaw ta immida higgiya enti aggida gishosa. Enti taw kiitetonanne ha higgiya kaallonna ixida gishosa.
JER 9:14 Hessa aggidi, enti banta wozanaa muumetetha kaallidosona; enta aawati tamaarsida Ba7aale geetetiya eeqa goyinnidosona” yaagees Goday.
JER 9:15 Hessa gisho, Ubbaafe Wolqaama Goday, Isra7eele Xoossay haysada yaagees: “Taani ha asaa cammiya kathi muzana; wodhiya haathi ushshana.
JER 9:16 Enti woyko enta aawati eronna kawotethata giddon ta enta laallana. Enta dhaysana gakanaw mashshan yedethana” yaagees.
JER 9:17 Ubbaafe Wolqaama Goday haysada yaagees: “Ane qopite. Yeeho yeekiya maccasata xeegite; zelelsi eriya asata ehite.
JER 9:18 Enti ellesidi yidi, nu ayfey afuthu holthu oothana gakanawunne nu ayfiya ciroy haathe pultana gakanaw zelelsi kesso.
JER 9:19 Xiyoonen zelelsa girsi si7etees; ‘Nu dhayida! Nu kawuyida! Nu keethay laaletida gisho, nu biitta aggidi baanaw koshshees’ ” yaagosona.
JER 9:20 Hinteno, maccasato, Godaa qaala si7ite! Hinte haythay iya doonape keyiya qaala hayzo. Hinte macca nayta zelelsi tamaarsite; issoy issuwa yeeho tamaarso.
JER 9:21 Hayqoy yooga nayta ogen, na7atethata dabaaban qeexishe yidi, nu maskooteta gakis; nu miixaa gelis.
JER 9:22 “Asa ahi buureda denban yegetana; cakeysati cakidi guye yeggida katha mela enta oonika shiishenna” yaagees Goday.
JER 9:23 “Cinci ba cincatethan ceeqofo; wolqaami ba wolqan ceeqofo; durey ba duretethan ceeqofo.
JER 9:24 Shin ceeqiya oonika tana eroninne akeekon ceeqo. Maarotethi, suure pirdanne xillotethi sa7a bolla oothiya Godaa, tana eridi ceeqo; hessi tana ufaysees” yaagees Goday.
JER 9:25 “Banta asho xalaala qaxaretida asaa ta seerana wodey yaana.
JER 9:26 Hessatika Gibxe, Yihuda, Edoome, Amoonenne Moo7abe asaanne banta huuphiya yuushuwa meedidi, mela biittan de7iya asa ubbaa. Ha kawotethati ubbay tuma qaxaretibookona; Isra7eele asa ubbayka banta wozanan qaxaretibookona” yaagees Goday.
JER 10:1 Hinteno, Isra7eele asaw, Goday odiya qaala si7ite!
JER 10:2 Goday haysada yaagees: “Hara kawotethata ogiya tamaaropite. Enti salo bolla malaata be7idi dagammikoka, hinte dagammopite.
JER 10:3 Enta wogay hada; enti worape mithi qanxoosona; masseysi kaltan massees.
JER 10:4 Enti biraninne worqan alleeqisosona; qaaxonnaada misimaaren dhishidi oythoosona.
JER 10:5 Enta eeqati leehe giddon kafo daganthanaw essiya malla mela. Enti odetokona; enti hemetanaw danda7onna gisho asay enta tookosona. Entas kumthi yayyofite. Enti qohanawuka maaddanawuka danda7onna gisho entaw yayyofite” yaagees Goday.
JER 10:6 Abeeti Godaw, ne mali oonika baawa. Neeni gita; ne sunthayka gitanne wolqaama.
JER 10:7 Abeeti kawotethata Kawaw, nena bonchonay oonee? Cinca asaa giddoninne enta kawotethaa giddon ne meli bayna gisho new boncho bessees.
JER 10:8 Enti eeyanne eri dhayidaysata; enti mithafe massida, pathonna eeqatape ay tamaarona?
JER 10:9 He eeqati Tarsesa biraninne Afeeza worqan alleeqetidosona. Enti ubbay kushe hiillanchotan oosetida woynenne kaalose daaniya ma7uwan kametidosona.
JER 10:10 Shin Goday tuma Xoossaa; I de7o Xoossaanne merinaa kawa. Iya hanquwan biittay qaaxees; kawotethati iya yiluwa danda7okona.
JER 10:11 “Haysati salonne sa7a medhiboonna xoossati sa7apenne salope dhayana” yaagada neeni entaw oda.
JER 10:12 Ba wolqan sa7aa medhiday, ba cincatethan sa7aa essiday, ba akeekan salota micciday, Xoossaa.
JER 10:13 I, ba kooshincha sissiya wode, salon de7iya haathati guummoosona. I shaara sa7a gaxape pude denthees; wol7anthi irara yeddees; carkuwa ba minja keethaafe kessees.
JER 10:14 Asi ubbay era dhayidi eeyis; worqaa sheeshiya ubbay ba eeqan yeellatis. Enti medhida eeqati wordo; entaw shempoy baawa.
JER 10:15 Enti pathonnabaanne hada; enti seeretiya wode dhayana.
JER 10:16 Shin I ubbaa medhida gisho, Yayqooba Saama gidida Xoossay hessa mela gidenna; Isra7eeley, I baw doorida kawotethi; iya sunthay Ubbaafe Wolqaama Godaa.
JER 10:17 Hinteno, morkey teqidaysato, biittafe keyanaw hintew de7iyaba shiishite.
JER 10:18 “Taani, ha wodiyan, ha biittan de7iya asaa kessada yambarana. Enta qohoy eretana gakanaw enta bolla iitabaa ehana” yaagees Goday.
JER 10:19 Ta madunxas! Ta madunthay paxenna. Shin taani, “Haysi ta harge; ta danda7anaw bessees” yaagas.
JER 10:20 Ta dunkaaney laaletis; iya wodoro ubbay duuxeretis. Ta nayti ubbay taape shaaketidi bidosona; enti baawa. Ta dunkaaniya zaaridi tokanaw woyko ta magarajuwa kaqanaw issi asika attibeenna.
JER 10:21 Henthanchoti eeyidosona; enti Godaa oychibookona. Hessa gisho, entaw injetonna ixis; enta wude ubbay laaletis.
JER 10:22 Ooratha odi yis; si7ite. Pudeha baggan de7iya kawotethan gita dirgoy medhetis. Iya olanchoti yidi, Yihuda katamata baysanne workanati gupiya bessi kessana.
JER 10:23 Abeeti Godaw, asa de7oy iyaw buzo gidonaysanne ba ogiya suurisanaw iya shene gidonnaysa ta erayis.
JER 10:24 Abeeti Godaw, tana seera; shin likera gido. Ta dhayonna mela ne hanquwan ta bolla yoopa.
JER 10:25 Ne sheniya, nena eronna kawotethata bollanne ne sunthaa xeegonna asaa bolla gussa. Enti Yayqooba asaa midosona; enta mittidosona; enta biitta dhaysidosona.
JER 11:1 Godaape Ermiyaasako yida qaalay haysa:
JER 11:2 “Ha caaqo qaala si7ada Yihuda asaasinne Yerusalaame kataman de7iya asaas oda.
JER 11:3 Goday Isra7eele Xoossay haysada yaagees gada oda. ‘Ha caaquwa naagonna asi oonika baadetidaysa gido’.
JER 11:4 Taani kase hinte aawata Gibxe biittafe, birata seerisiya coociyape kessiya wode, ‘Taw kiitetite; ta hintena kiittiyaba ubbaa oothite. Hinte ta ase gidana; taka hinte Xoosse gidana’ yaagada odas.
JER 11:5 Hessadaka, maathinne eessi goggiya biitta kase hinte aawatas immanaw, taani caaqida caaquwa polana.” Taani, “Ero, Godaw, amin77i” yaagas.
JER 11:6 Goday taako, “Ha qaalata ubbaa Yihuda katamataninne Yerusalaame ogetan haysada yaagada awaaja: ‘Ha caaqo qaala si7ite; iya kaallite.
JER 11:7 Kase hinte aawata ta Gibxe biittafe kessida wodiyape hachi gakanaw, zaara zaarada, “Taw kiitetite” gada seeras.
JER 11:8 Shin enti ta qaala si7ibookona woyko taw kiitetibookona. Enti banta iita wozanaa kaallidosona. Ta caaqo qaala enti naagana mela kiittas; shin enti ixidosona. Hessa gisho, he caaquwa baadetha ubbaa enta bolla ehas’ ” yaagis.
JER 11:9 Zaaridika Goday taako haysada yaagis: “Yihuda asaynne Yerusalaamen de7iya asay ta bolla maqetidosona.
JER 11:10 Enti kase ta qaala si7onna ixida banta mayzata nagarako guye simmidosona. Enti hara xoossata goyinnidosona; entaw oothidosona. Isra7eele asaynne Yihuda asay ta kase enta mayzatara caaqida caaquwa menthidosona.
JER 11:11 Hessa gisho, ‘Enti baqatidi attanaw danda7onna metuwa enta bolla ehana. Enti taako waassinka ta enta si7ike.
JER 11:12 He wode Yihuda asaynne Yerusalaame asay, ixaane cuyisiya banta xoossatako waassana. Shin meto wode he xoossati enta maaddokona.
JER 11:13 Hinteno, Yihuda asaw, hinte xoossati hinte katamata mela daro. Qassi Ba7aale geetetiya yeellaya xoossaas ixaane cuyisanaw hinte giigisiya yarsho bessati Yerusalaame ogeta mela daro’ yaagees Goday.
JER 11:14 “Ermiyaasa, ha asaas tana aykoka woossofa; enta gisho gaannatopa woyko oychofa. Enti banta metuwa gallas tana xeegiya wode ta enta si7ike.
JER 11:15 “Daro asaara ba iita maquwa maqetashe, ta dosiya ta asay, ta keethan bentanaw bessii? Hinte hinte iita oosuwa oothishin, yarshetida mehiya ashoy hintena seerape ashshanee? Hessa gidiyako hinte ufaytanashin” yaagis.
JER 11:16 Goday nena, dicciya, lo77o ayfe ayfiya shamaho yaagidi sunthis. Shin, I he shamahuwa wolqaama dada guunthan, taman xuuggana; iya tasheyka meqana.
JER 11:17 Taani, hintena tokida Ubbaafe Wolqaama Goday, hinte bolla iitabaa ehanaw awaajas. Isra7eele asaynne Yihuda asay Ba7aales ixaane cuyisidi tana yiloyidosona.
JER 11:18 Goday enta maquwa taw qoncisida gisho ta eras. He wode enti oothiya iita oosuwa tana bessis.
JER 11:19 Taani shukas giigida dorsada hanas. Enti, “Ane mithaanne iya ayfiya dhaysoos. Iya sunthay hassayetonna mela iya paxa de7eyisata giddofe shoddidi diggoos” yaagidi maqetidaysa ta erabike.
JER 11:20 Shin abeeti Ubbaafe Wolqaama Godaw, xillo pirdeyso, asa wozananne qofaa shaakada ereyso, ne enta bolla ne haluwa keyada tana bessa. Taani ta qohuwa nena bessaas.
JER 11:21 Hessa gisho, “Godaa sunthan tinbite odopa ixiko, ne nu kushen hayqanna” yaagidi, nena wodhanaw koyiya Anatoota asaaba Goday haysada yaagees.
JER 11:22 Ubbaafe Wolqaama Goday haysada yaagees: “Ta enta seerana; enta panthati mashshan hayqana; enta macca naytinne adde nayti koshan hayqana;
JER 11:23 entafe issoynne attenna. Ayis giiko, taani seeriya laythi Anatoota asa bolla iitaba ehana” yaagees.
JER 12:1 Abeeti Godaw, ta neera mootetiya wode ubbanka ne xillo. Gidoshin, ne xillo pirdaba neera odetanaw koyayis. Iita asati oothiyabay entaw ayis injetii? Gene asati ayis duretidi de7oona?
JER 12:2 Neeni enta tokadasa; enti xapho yeddidosona; diccidi ayfe ayfidosona. Enti nena doonape yeggokona; shin enta wozanaape ne haahon de7aasa.
JER 12:3 Shin abeeti Godaw, ne tana eraasa; tana be7aasa; ta nebaa ay qopiyako paacasa. Shuka dorsada, he iita asata goochada kessa; shuka gallasas enta dummayada wotha.
JER 12:4 Biittay ira dhayidi qohetannay, denban de7iya maatay melanay awude gakanaasee? Asaa iitatethaa gaason, do7inne kafoy wuris. Asay qassi, “Goday nu oothiyaba demmenna” yaagosona.
JER 12:5 Goday Ermiyaasako, “Neeni tohon woxiya asatara gaaddetada daaburiko, parara waanada gaaddetanee? Ne saro biittan dhubetiko, Yordaanose wora giddora waanada hemetanee?
JER 12:6 Ne ishati, hinte soo asati nena aathidi immidosona; ne bolla dendidosona. Hessa gisho, lo77oba odikoka enta ammanopa.
JER 12:7 “Ta Isra7eele aggas; ta dooretida kawotetha yeggas; ta siiqiya asaa iya morketa kushen aathada immas.
JER 12:8 Ta doorida asay taw woran de7iya gaammo mela gidis. I ta bolla gudis; hessa gisho, ta iya ixas.
JER 12:9 Ta doorida asay ubba baggara phircoy teqida kafo mela gididosona. Bidi do7ata ubbaa shiishidi iya maana mela ehite.
JER 12:10 “Daro allaga kawoti ta woyne gadiya iissidosona; ta gadiya yedhidosona; ta lo77o goshsha baysa kessidosona.
JER 12:11 He biittay iitidi oxis; ta sinthan melanne baysa gidis. Qadhetey bayna gisho biittay kumethi iitis.
JER 12:12 Mela biittan de7iya aykoka bayna dere kanthidi, bonqeysati yidosona. Godaa mashshay biitta ha gaxape ya gaxaa gakanaw mis. Hessa gisho, oonika saro attanaw danda7enna.
JER 12:13 Enti giste zeridi, agunthu cakidosona; enti daro daaburidosona; shin aykoka demmibookona. Godaa wolqaama sheniya gaason enta kathay dhayis” yaagis.
JER 12:14 “Taani ta asaa, Isra7eeles, immida biitta oykida, iita shooro kawotethata enta biittafe shoddana. Qassi Yihuda asaa enta giddofe kessana.
JER 12:15 Shin enta biittafe shoddidaape guye, zaarada entaw qadhetana. Enta issuwa enta laata biittanne enta kawotethaa zaarada ehana.
JER 12:16 Kase ta asaa Ba7aale sunthan caaqana mela tamaarsidaysada enti ta asaa ogiya tamaarikonne ta sunthan caaqiko enti ta asaa giddon minnidi daana.
JER 12:17 Shin kiitetonna ixida kawotethata taani polo shoddada dhaysana” yaagees Goday.
JER 13:1 Goday taako, “Bada liino qacinape dadetida danco shammada, ne xeessan danca; shin haathan boshisopa” yaagis.
JER 13:2 Hessa gisho, taani Goday kiittidaysada dancuwa shammada ta xeessan dancas.
JER 13:3 Goday nam7antho taako haysada yaagis:
JER 13:4 “Ne shammada dancida dancuwa ekada, Efraxiisa shaafa bada shucha qophon qosa” yaagis.
JER 13:5 Goday taw odidaysada efada, Efraxiisa shaafa lanqen qosas.
JER 13:6 Daro gallasape guye Goday, “Efraxiisa shaafa bada, ta nena, ‘Yan qosa’ gida dancuwa eka” yaagis.
JER 13:7 Taani Efraxiisa shaafa bada, dancuwa moogida bessaafe ekas. Shin he dancoy iitidi aykoka maaddonnaba gidis.
JER 13:8 Hessafe guye, Godaa qaalay taako,
JER 13:9 “Taani Yihuda ceeqetethaanne Yerusalaame otoruwa haysada oothada dhaysana.
JER 13:10 Ta qaala si7onna ixidi, banta wozanaa muumisidi, hara xoossata goyinnanawunne entaw oothanaw biya ha iita asati, ha dancuwada maaddonnaba gidana.
JER 13:11 Dancoy asa xeessi baqidi oykeysada Yihudinne Isra7eeley taara oyketidi, ta sunthaas galatanne boncho gidana melanne ta ase gidana mela oothas; shin enti si7onna ixidosona” yaagees Goday.
JER 13:12 Goday taako, “Goday Isra7eele Xoossay, haysada yaagees gada oda yaagis: ‘Issi issi xuggay woyne ushshan kumana’ yaaga. Enti neeko, ‘Nuuni issi issi xuggay woynen kumanaysa erokoyee?’ yaagiko,
JER 13:13 ne entako, ‘Taani ha biittan de7iya asa ubbaa, hari attoshin, Dawita araatan uttiya kawota, kahineta, nabetanne Yerusalaamen de7iya asa ubbaa, enti mathotana gakanaw woyne ushshan kunthana.
JER 13:14 Taani enta, issuwa issuwara, aawa na7aara dom7ethana. Ta enta dhaysana; ta entaw keehike, qadhetike; enta maarike’ ” yaagees Goday.
JER 13:15 Haysa odey Godaa gidiya gisho hinte otoruwa aggidi si7ite; akeekite.
JER 13:16 I dhuma ehanaape sinthe, hinte tohoy dhumiya deriyan dhubetanaape sinthe, Godaa hinte Xoossaa bonchite. Hinte, “Poo7oy yaana” gidi naageta; shin I sakana dhuman laammana.
JER 13:17 Shin hinte si7onna ixiko, hinte otoruwa gisho ta geeman yeekayis. Godaa wudey di7etidi bida gisho, ta yeekayis; ta ayfey afuthu gussees.
JER 13:18 Goday taako, “Kawuwasinne kawa aayes, haysada yaagada oda: Hinte boncho kallachay hinte huuphiyape kundida gisho, hinte kawotetha araatape duge wodhite.
JER 13:19 Negebe biittan de7iya katamati ubbay gordetidosona. Enta dooyanaw issi asika yan baawa. Yihuda asay kumethi di7etidi bidosona” yaagis.
JER 13:20 Goday, “Ane dhoqu gada, pudeha baggafe yeyisata xeella. New imetida wudey, ne ceeqetida dorsati awun de7oona?
JER 13:21 Neeni, new lagge gidana mela koydaysati nena xoonidi haariya wode woygay? Yelos keyida maccasada iqethi nena oykennee?
JER 13:22 Yerusalaame, neeni ne wozanan, ‘Ha ubbay tana ayis gakidee?’ giiko, ne ma7oy qaaretidaynne ne bonqetiday ne nagaray darida gishosa.
JER 13:23 Tophey ba malaa woyko maahey ba gazzatethaa laammanaw danda7ii? Hessadaka, iita ooson meezetida hinte, lo77o ooso oothanaw danda7eketa” yaagis.
JER 13:24 “Ta hintena bazzo carkoy efiya suullada laallana.
JER 13:25 Hinte tana dogida gishonne wordo xoossatan ammanetida gisho hinte saamaynne ta hintew immiya gishoy haysa.
JER 13:26 Hinte kalloy bentana mela ta hinte ma7uwa qaara yeggana.
JER 13:27 Ne borso oosuwa, korma parada ziitas caageysa, yeelli bayna laymatethi, zuma bollanne denban ne oothiya ixetida oosuwa ta be7as. Yerusalaame, nena ayye! Ne awude gakanaw geeyonna daanee?” yaagees Goday.
JER 14:1 Koshaba Goday Ermiyaasas odida qaalay haysa:
JER 14:2 “Yihuda biittay kayotees; iya katamati labbanidosona. Yan de7iya asati biittan uttidi yeekosona; Yerusalaamepe gita waasoy si7etis.
JER 14:3 Dure asati haathe tikanaw banta aylleta kiittoosona. Enti haatha ollaako boosona; shin haathe demmokona; banta otuwa mela tooki ekidi simmoosona. Haniyaba dhayidi yeellatishe, banta huuphiya guuluntoosona.
JER 14:4 Iri bukonna gisho biittay melidi za77is. Goshshanchoti yeellatidi, banta huuphiya guuluntidosona.
JER 14:5 Maati bayna gisho woshi7ey ba yelida galo mariw denban yeggada bawusu.
JER 14:6 Bazzo hareti aybika bayna dhoqa zumata bolla eqidi, workanada lafettoosona. Entaw miyabay dhayin, enta ayfey xeellanaw daaburis” yaagis.
JER 14:7 Asay haysada yaagidi woossis: “Abeeti Godaw, nu nagaray nu bolla markatikoka, ne sunthaa gisho, nuus issiba ootha. Nu nena aggidi daro wode guye simmida; ne bolla nagara oothida.
JER 14:8 Abeeti Isra7eele ufaysaw, meto wode ashsheyso, ne imathada, issi qamma aqanaw gelida oge asada ayis hanay?
JER 14:9 Ne dagammida asada, ashshanaw danda7onna asada ayis hanay? Abeeti Godaw, ne nu giddon de7aasa! Nuuni ne sunthan xeegetida; nuna aggofa!” yaagis.
JER 14:10 Ha asataba Goday haysada yaagees: “Enti toylatethi daro dosoosona; banta tohuwa teqokona. Hessa gisho, Goday entan ufaytenna. I enta iita oosuwa hassayidi, enta nagaraa gisho enta seerana” yaagees.
JER 14:11 Hessafe guye, Goday taako, “Ha asaa sarotethaas woossofa.
JER 14:12 Enti xoomikoka, ta enta waasuwa si7ike. Xuussa yarshonne katha yarshuwa enti yarshikoka, ta ekike. Taani enta olan, koshaninne gadon dhaysana” yaagis.
JER 14:13 Taani zaarada, “Abeeti Ubbaa Haariya Godaw, nabeti ‘Hinte ola be7eketa woyko koshi gakenna. Goday ha biittan polo sarotethi immana’ yaagosona” yaagas.
JER 14:14 Goday zaaridi, “Nabeti ta sunthan wordo odoosona; ta enta kiittabike woyko entaw odabike. Enti hintew odey wordo qoncethi, pathonna kaayonne bantaw medhi kessida wordo haasayoosona.
JER 14:15 Hessa gisho, Godaa sunthan odiya nabeta ta kiittabike. Shin enti, ‘Oli woyko koshi ha biitta bochenna’ yaagosona. He nabeti bantaw olaninne koshan dhayana!
JER 14:16 Qassi tinbitey odetida asay koshanne ola gaason hayqana; enta ahay Yerusalaame ogiya bolla holetana. Enta woyko enta macheta, enta adde naytanne woyko enta macca nayta moogiya asi dhayana. Entaw bessiya waayiya enta bolla tigana” yaagis.
JER 14:17 Ta azzanuwaba ta asaas odana mela Goday tana kiittis. “Ta asay deshetidi, daro madunxida gisho, ta ayfey qammanne gallas qanxonna afuxana.
JER 14:18 Ta demba keyiko, mashshan hayqidaysata be7ayis. Katamaa geliko, koshan qohetidaysata be7ayis. Nabetinne kahineti banta oosuwa oothosona; shin ay oothiyako erokona” yaagas.
JER 14:19 Abeeti Godaw, ne Yihuda aggadii? Xiyoone asaa ixadii? Nu paxonnaada oothada ayis dechadii? Nu “Saro gidana” gidi naagida; shin aybika lo77obay bentibeenna. Nu “Paxana wodey yaana” gidi naagida; shin dagama xalaali gakis.
JER 14:20 Abeeti Godaw, nu iitatethaa erida; nu aawata balaa akeekida; nuuni nagara oothida.
JER 14:21 Ne sunthaa gisho gada nuna kadhopa; ne boncho araata kawushofa. Ne nuura caaqida caaquwa hassaya; ne caaquwa menthofa.
JER 14:22 Kawotethata eeqatape issoy ira bukisanaw danda7ii? Saloy ba shenen puusanaw danda7ii? Danda7enna! Abeeti Godaw, nu Xoossaw, hessa danda7ey nena! Haysa ubbaa oothey nena gidiya gisho nenan ufaysi oothoos.
JER 15:1 Hessafe guye, Goday taako haysada yaagis: “Hari attoshin Museynne Sameeli ta sinthan eqidi woossiyakoka ta wozanay ha asaako simmenna. Enta ta sinthafe digga; enti boo.
JER 15:2 Enti nena, ‘Nu awu baanee?’ gidi oychiko, Goday haysada yaagees gada entaw oda: ‘Hayqos pirdetidaysati hayqos; mashshas pirdetidaysati mashshas; koshas pirdetidaysati koshas; di7etanaw pirdetidaysati di7etanaw boo’ yaagis.
JER 15:3 “Taani oyddu qommo gadota enta bolla ehana yaagees Goday. Hessika, enta wodhanaw mashsha, enta aha goochanaw kanata, enta asho midi dhaysanaw salo kafotanne sa7a do7ata ehana.
JER 15:4 Hizqiyaasa na7ay, Yihuda kawoy Minaasey Yerusalaamen oothida iita oosuwa gisho, ta enta sa7aa kawotetha ubbaas dagama oothana.
JER 15:5 “Yerusalaame asaw, hintew oone qadhetanay? Hintew azzananay oonee? Hinte waanidetii? gidi hintena oychanay oonee?” yaagees Goday.
JER 15:6 “Hinte tana aggideta; hinte guye simmideta. Hessa gisho, taani hinte bolla ta kushiya denthada hintena dhaysas; hizape ta hintew qadhetike.
JER 15:7 Enti banta iita ogiyape simmonna ixida gisho enta katamata pengiyan pithe ekada harqas. Ta enta nayta wodha wursas; ta asaa dhaysas.
JER 15:8 Enta am7eta tayboy abba gaxan de7iya shafiyape daris. Taani seeta gallas na7atethata aayeta bolla dhayo ehana. Qoponna de7ishin, enta bolla dagamanne kokorsi ehana.
JER 15:9 Laapun nayti hayqida aayiya shempanaw xoonetada daaburasu. Iwu gallasi qammis; iya kawuyasunne yeellatasu. Paxa attidaysata enta morketa sinthan mashshan wursana” yaagees Goday.
JER 15:10 Ta aaye, tana ayis yeladii? Tana ayye! Ta biitta ubban de7iya asaara kacciyanne baaxetiya asi gidas. Ta oodeska tal7abike; oodefeka tal7ada ekabike; shin asa ubbay tana baaddees.
JER 15:11 Goday taako, “Tuma ta nena lo77o oosos ashshada ekana. Tuma ne morketi metuwa wodenne waaye wode nena woossana mela oothana.
JER 15:12 Asi birata, pudeha baggafe yaa birata woyko naase birata menthanaw danda7ii?
JER 15:13 Biitta ubban hinte oothida nagaraa gisho, hinte shaluwanne duretetha hinte morketas aathada immana.
JER 15:14 Hintena eronna biittan hinte morketi hintena aylle oothana. Ta hanqoy miya tama gididi merinaw eexana” yaagis.
JER 15:15 Abeeti Godaw, ne eraasa. Tana hassaya; tana maadda; tana yedetheyisata bolla ta haluwa keya. Ne danda7an tana wora yeggofa. Ta ne gisho cayeteysa qopa.
JER 15:16 Abeeti Godaw, Ubbaafe Wolqaama Xoossaw, ta ne sunthan xeegetida gisho, ne qaalay taako yin mas. Ma simmin tana pashkisis; ta wozanaa ufaysis.
JER 15:17 Qelqiseyisata cugan uttabike; entara ufaytabike. Neeni ne kushiya ta bolla wothida gishonne ta bolla yilotida gisho ta tarka dumma uttas.
JER 15:18 Ta hargey paxonnay, ta madunthay melonnay aybisee? Ne taw eqiya shaafada, meliya pultoda hanayee?
JER 15:19 Hessa gisho, Goday haysada yaagees: “Ne taako simmiko, ta zaarada nena ekana; ne taw oothana. Hada oda aggada, boncho qaala xalaala odetiko, ne ta doona gidana. Enti neeko simmana; shin ne entako simmaka.
JER 15:20 Ta nena ha asaas naase biratan gimbetida gimbe oothana. Enti neera oletana; shin nena xoonokona; ta nena ashshana.
JER 15:21 Iitata kushepe ta nena ashshana; qadhey bayna wozana mino asaape ta nena wozana” yaagees Goday.
JER 16:1 Godaa qaalay, haysada yaagishe taako yis:
JER 16:2 “Neeni macho ekofa; macca na7anne adde na7a ha bessan yelopa.
JER 16:3 Ha bessan yeletiya macca naytabaanne adde naytabaa, enta yeliya aayetanne aawataba Goday haysada yaagees.
JER 16:4 Enti iita hargen hayqana; entaw yeekiya woyko enta moogiya asi bentenna. Enta ahay biitta bolla pito mela yegetana; enti mashshaninne koshan wurana; enta ashoy salo kafotasinne sa7a do7atas kathi gidana” yaagis.
JER 16:5 “Yeeho keethi gelopa; yeekanaw woyko qadhetanaw boopa. Taani ha asaa bollafe ta sarotethaa, ta siiquwanne ta maarotethaa diggas.
JER 16:6 Gitinne guuthi ha biittan hayqana; enti moogetokona. Oonika entaw yeekenna; oonika bana gaarenna woyko huuphe meedetidi kayotenna.
JER 16:7 Yeekiya asaas shochu efidi, entara issife midi uyidi, kayuwa balethiya asi issoyka deenna. Hari attoshin, aayiya woyko aawi hayqida asaaka minthethiya asi baawa.”
JER 16:8 “Entara maanawunne uyanaw gibiri de7iya keethi gelopa.
JER 16:9 Ubbaafe Wolqaama Goday, Isra7eele Xoossay haysada yaagees: ‘Taani ufaysinne ililsi, yaagano yethi ha bessaafe diggana. Hessa asay banta laythaninne banta ayfiyan be7ana.’ ”
JER 16:10 “Ne ha qaala ubbaa asaas odiya wode, enti, ‘Goday ayis haysa mela iitabaa nu bolla awaajidee? Nu ay balido? Godaa, nu Xoossaa bolla nu ay nagara oothido?’ ” yaagana.
JER 16:11 He wode ne entako; “Hinte aawati tana aggida gishosa, enti hara xoossata kaallida gishosa, entaw oothidanne goyinnida gishosa, tana aggidi ta higgiya naagonna ixida gishosa.
JER 16:12 Hinte, hinte aawatape aadhidi iita oothida gishosa. Hinte issoy issoy ero goonna hinte iita wozanaa kaallideta; taw kiitetonna ixideta.
JER 16:13 Hessa gisho, ta hintena ha biittafe denthada, hinte woyko hinte aawati eronna biitta holana. Yan hinte hara xoossata gallasinne qamma haggaazana; taani hintew qadhetike” yaagees Goday.
JER 16:14 Asay, “Isra7eele asaa Gibxe biittafe kessida Goday eriya mela” yaagidi caaqonna wodey yaana.
JER 16:15 Hessa aggidi, “ ‘Isra7eele asaa pudeha bagga biittafenne enta laallida biitta ubbaafe zaaridi ehida Goday eriya mela’ yaagidi caaqana. Taani enta kase enta aawatas immida biitta zaarada ehana” yaagees Goday.
JER 16:16 “Ta molo oykiya daro asaa kiittana; enti enta oykana. Hessafe guye, daro shankatiya asaa kiittana; derepe, zumapenne shucha qophope enta shankatidi kessana.
JER 16:17 Ta ayfey enta ogiya bolla de7ees; enti taape qosetibookona; enta nagaray ta sinthafe geemmibeenna.
JER 16:18 Ta enta iitatethaanne enta nagaraa gisho entaw nam7u kushe zaarana. Enti aha daaniya banta ixetida eeqatan ta biitta tunisidosona; shaatiya banta misiletan ta laata kunthidosona” yaagees Goday.
JER 16:19 Abeeti Godaw, ta wolqaw, ta miixaw, meto gallas ta baqatada attiya bessaw, kawotethati sa7aa gaxape neeko yidi, “Nu aawati pathonnanne maaddonna wordo xoossata xalaala laattidosona.
JER 16:20 Asay bantaw xoossata medhanaw danda7oona? Ee, enti medhiyakoka tuma xoossata gidokona!” yaagana.
JER 16:21 “Hessa gisho, ta enta tamaarsana; ta wolqaanne ta gitatetha enta erisana. He wode enti ta sunthay Godaa gideysa erana” yaagees Goday.
JER 17:1 “Yihuda nagaray birata biiren xaafetis; enta wozanaa bollanne yarsho bessan de7iya kaciya bolla almaaze geetetiya shucha xeeran xaafetis.
JER 17:2 Enta nayti irxa mitha garsan, zumata bollanne dereta bolla giigisida yarsho bessan Asheera geetetiya xoossees essida misiliya goyinnoosona.
JER 17:3 Hinte biitta bolla oothida nagaraa acuwa qanxisanaw hinte shaluwanne hinte miishiya hinte morketas immana.
JER 17:4 Hinte merinaw eexiya ta sheniya denthethida gisho, hintena laatisida biittafe shoddana; hinte eronna biittan hinte morketas aylle oothana” yaagees Goday.
JER 17:5 Goday haysada yaagees: “Asan ammanetey, asho ma7ida asan ceeqeteynne ba wozanaa Xoossafe haassey baadetidaysa gido.
JER 17:6 Hessa mela asi bazzon de7iya tushe mela; lo77obay yaa wode I be7enna. I bazzon, mela bessan, asi doonna maxine biittan daana.
JER 17:7 “Godan ammanetiya asi, iya ceeqoy Godaa gidida asi anjetidaysa.
JER 17:8 I haatha matan toketidi, ba xaphuwa goggiya haathan yeddida mitha mela. I awa suulas yayyenna. He mithaa haythay cil7oshin de7ees. Iri bukonna laythan hirgenna; ubba wode ayfe aggenna.
JER 17:9 “Asa wozani ubbaafe aadhidi cimmeesinne iita; iya gaatha qofaa ooni eranaw danda7ii?
JER 17:10 Taani Goday, asa ubbaas iya ogiyadanne iya oosuwada immanaw, asa wozanaa pilgayis; iya kahaa paacayis” yaagees Goday.
JER 17:11 Bessonna ogen shalo shiishiya asi babaa gidonna phuuphulle qoxiya kuraacho mela. Ba laytha bagga zawan aggidi baana; wursethan iya eeyatethay qoncana.
JER 17:12 Nu Xoossa keethay koyrope doomidi, boncho kawotetha araatada dhoqa deriya bolla de7ees.
JER 17:13 Abeeti Godaw, Isra7eele ufaysaw, nena aggida ubbay yeellatana. De7o pulto haatha, nena Godaa enti aggida gisho baanan xaafetida sunthada dhayana.
JER 17:14 Abeeti Godaw, ne ta galataa gidiya gisho, tana patha; ta paxana; tana ashsha; ta attana.
JER 17:15 Asay taako, “ ‘Goday taw odis’ yaagada ne odida qaalay awun de7ii? I ayis poletennee?” yaagosona.
JER 17:16 Taani henthancho gidada nena haggaazo aggabike; enti metootana gallasaa ta amottabike. Ta doonape keyida qaala ne eraasa.
JER 17:17 Tana daganthofa; meto gallas taani baqatada attiya bessay nena.
JER 17:18 Tana yedetheysati yeellato; shin tana yeellayopa. Enta dagantha; shin tana daganthofa. Enta bolla meto eha; enta nam7u kushe seera.
JER 17:19 Goday taako, “Koyro bada Yihuda kawoti katamaa geliyanne keyiya, asay geliya pengiyaninne hara Yerusalaame pengeta ubban eqa.
JER 17:20 Asaako haysada yaaga: ‘Hinteno Yihuda kawoto, hinteno Yihuda asaw, hinteno Yerusalaame asaw, ha pengetara geliya asaw, ubbay Godaa qaala si7ite.
JER 17:21 Sambaata gallas tooho tookidi Yerusalaame pengiyara gelonna mela naagetite.
JER 17:22 Sambaata gallas hinte keethaafe tooho tookidi kessofite, woyko aybi oosoka oothopite. Kase hinte aawata ta kiittidaysada Sambaata gallas bonchite.
JER 17:23 Gidoshin, enti si7ibookona; banta haythaa taako zaaribookona. Enti tana si7onnanne taape tamaaronna ixidosona.
JER 17:24 Shin hinte taw kiitetiko, Sambaata gallasan tooho tookidi, ha katamaa pengetara gelonna aggiko, Sambaata gallas aykoka oothonna dummayidi bonchiko,
JER 17:25 Dawita araatan uttiya kawoti banta moorinnatara paratanne para gaareta toggidi, ha pengetara gelana. Enti Yihuda asaaranne Yerusalaame kataman de7iya asaara gelana; ha katamay merinaw asi de7iya katama gidana.
JER 17:26 Asay xuussa yarsho, hara yarsho, katha yarsho, ixaanenne galata yarsho ekidi, Yihuda katamatape, Yerusalaame yuushuwan de7iya gutatape, Biniyaame biittafe, gadhape, derey dariya biittafenne, Negebape Godaa Xoossa keethaa yaana.
JER 17:27 Shin hinte Sambaata gallasa dummayidi bonchona aggidi, Sambaata gallasan tooho tookidi, Yerusalaame pengetara gelidi, ta higgiya menthiko, ta he pengetan tama oythana. Yerusalaame kawo keethata maana; he tamay to7enna’ ” yaagees Goday.
JER 18:1 Godaape Ermiyaasako yida qaalay haysa:
JER 18:2 “Dendada urqa medhiya addiya soo ba. Yan ta nena ta qaala sissana” yaagis.
JER 18:3 Taani duge urqa medhiya addiya soo bada, I ba gertuwa bolla urqa medhishin be7as.
JER 18:4 I medhishin, he miishey iya kushen iitis. I he urqa zaaridi munuqidi, bana lo77iya hara miishe kessidi medhis.
JER 18:5 He wode Godaa qaalay, haysada yaagishe taako yis:
JER 18:6 “Isra7eele asaw, urqa medhiya addey ootheysada ta hintena oothanaw danda7ikina? Isra7eele asaw, urqay bana medheysa kushen de7eysada, hinteka ta kushen de7eeta.
JER 18:7 Issi kawotethi woyko issi derey shodetana mela, laaletana melanne dhayana mela ta odida wode,
JER 18:8 he kawotethay ba iitatethaafe simmiko, ta enta bolla ehana gida iitabaa ehonna aggaagana.
JER 18:9 Qassi hara wode issi deriya woyko kawotethaa, ‘Ta hintena keexananne tokana’ gada odida wode,
JER 18:10 he kawotethay ta odeysa si7onna ixidi, ta sinthan iitabaa oothiko, ta oothana gida lo77oba oothonna aggaagana.
JER 18:11 “Hessa gisho, Yihuda asaasinne Yerusalaamen de7iya asaas haysada yaaga. Taani hintew dhayo giigisaysinne iitabaa halchayis. Hinte ubbay hinte iita ogiyape simmite; hinte ogiyanne hinte oosuwa laammite.
JER 18:12 Shin enti, ‘Haysi aykoka maaddenna! Nuuni nu qofaada hanana; nu issoy issoy nu iita wozanaa kaallana’ yaagana” yaagis.
JER 18:13 Hessa gisho, “Goday, ‘Haysa melaba si7i ereetii?’ yaagidi kawotethata oychite. Geela7o gidida Isra7eeley daro shaatiyaba oothasu.
JER 18:14 Libaanose zuma bolla de7iya shachay, zaalla bollafe dhayidi erii? He zumaape goggiya irxa haathi meli erii?
JER 18:15 Shin ta asay tana dogidosona; pathonna xoossatas ixaane cuyisidosona. Banta ogiyape, banta beni ogiyape, gaxa keyidi dhubetidosona.
JER 18:16 Enti banta biitta baysanne kadhetidaba kessidosona. Yaara aadhiya oonika malaaletidi ba huuphiya qaathees.
JER 18:17 Baani doloha bagga carkuwan laaleteysa mela, taani ta asaa morketa sinthan laallana. Enta metuwa gallas ta entaw zoko zaaranaape attishin, ta som7uwa enta bessike” yaagees Goday.
JER 18:18 Asay, “Kahineta matan higgey, cincata matan zorey, nabeta matan qaali dhayonna gisho ane Ermiyaasa bolla maqetoos. Nu inxarsan oykoos; I odiya qaala si7onna ixana” yaagidosona.
JER 18:19 Abeeti Godaw, tana si7a; ta morketi ta bolla giyaba hayza.
JER 18:20 Lo77o oothida asas zaaroy iiteyee? Shin enti taw olla bookosona. Ne hanqoy entafe simmana mela ta enta gisho gaannateysa be7a.
JER 18:21 Hessa gisho, enta nayta koshas aathada imma; enta mashshas aathada imma. Enta macheti na7i baynaysatanne am7o gido. Enta addeti wodhiya hargen gahetonna; enta na7atethati olan wuro.
JER 18:22 Enti tana oykanaw olla bookida gishonne ta tohuwas xihe wothida gisho, qoponna bonqeyisata enta bolla yedda; enta keethan waasoy keyo.
JER 18:23 Shin abeeti Godaw, enti tana wodhanaw maqeteysa ne eraasa. Ne enta iitatethaa atto goopa woyko enta nagaraa ne sinthafe quchofa. Enti ne sinthan xoonetidi kundo; ne shenetiya wode enta haysada ootha.
JER 19:1 Goday taako, “Bada oto medheysafe xugga shamma. Neera guutha biitta cimatanne guutha kahine cimata ekada,
JER 19:2 Kun7a Me7o Pengiya matara aadhada, Hinooma Zangaara ba; yan ta new odiya qaala awaaja.
JER 19:3 ‘Hinteno, Yihuda kawoto, hinteno Yerusalaame katama asaw, Godaa qaala si7ite!’ Ubbaafe Wolqaama Goday, Isra7eele Xoossay haysada yaagees: ‘Si7iya ubbaa haythas iitiya palaba ha biitta bolla ta ehana.’
JER 19:4 Ha asay tana aggidi, enti woyko enta aawati woyko Yihuda kawoti eronna hara xoossatas ixaane cuyisidi ha bessaa tunisidosona. Enti xillo asaa suuthaa ha bessan gussidosona.
JER 19:5 Ta enta kiittonaba woyko entaw odonnaba woyko ta qoponnaba oothidosona; banta adde nayta nagaras taman xuussa yarsho oothidi yarshanaw, dhoqa goyinno bessata gimbidosona.
JER 19:6 Hessa gisho, ha bessay Toofeta woyko Hinooma Zangaara geeteteysi attidi, Shuha Zangaara yaagetidi xeegetana gallasay yaana.
JER 19:7 Yihudanne Yerusalaame asaa halchuwa ta ha bessan laallana. Enti banta morketa mashshaninne bantana wodhanaw koyiya asaa kushen hayqanaada oothana. Enta aha salo kafotasinne sa7a do7atas kathi oothada immana.
JER 19:8 Taani ha katamaa baysanne miichas kessana. Yaara aadhiya ubbay iya dhayuwan malaaletidi, ‘Poora’ yaagana.
JER 19:9 Enti banta macca naytanne adde nayta ashuwa maanada oothana. Enta wodhanaw koyiya morketi enta teqidi waaysiya wode un7etidi enti issoy issuwa ashuwa maana” yaagis.
JER 19:10 “Hessafe guye, neera bida asaa sinthan xuggaa mentha.
JER 19:11 Entako haysada yaaga: xuggay meqidaysadanne zaaridi koolanaw danda7etonnaysada ta ha kawotethaanne ha katamaa mentherethana. Asi aha moogiya bessi bayna gisho Toofetan moogetana.
JER 19:12 Ha bessaaninne iyan de7iya asaa bolla haysa oothana. Ha katamaa Toofetada oothana.
JER 19:13 Yerusalaame asaa keethatinne Yihuda kawota keethati, keethaa bolla dembayidi oothida bessan salo xoolintotas ixaane cuyisidanne hara xoossatas ushsha yarsho gussida keethati ubbay Toofetada tuna gidana” yaagees Ubbaafe Wolqaama Goday.
JER 19:14 “Hessafe guye, Ermiyaasi Goday tinbite odana mela kiitida Toofetape simmidi, Xoossa keetha giddon de7iya dabaaban eqidi asa ubbaako haysada yaagis:
JER 19:15 Enti morgiya gabbisidi, ta odiyaba si7onna ixida gisho ha katamaa bollanne iya heeran de7iya gutata bolla ehana gida iitabaa ubbaa ehana hanayis” yaagees Ubbaafe Wolqaama Goday.
JER 20:1 He wode Godaa keethaanne halaqa gidiya, Imera na7aa kahiniya Phaskori Ermiyaasi tinbite odishin si7is.
JER 20:2 Phaskori nabiya Ermiyaasa deshisidi, Qommo Biniyaame Pengiyan Xoossa keethaa geliya pengen gonge luhon qashisis.
JER 20:3 Wontetha gallas Phaskori Ermiyaasa qashope birshin, Ermiyaasi iyaw haysada yaagis: “Hachife doomin, Goday ne sunthaa Phaskori yaagenna; I ne sunthaa ‘Yan Han Dagama’ yaagana.
JER 20:4 Goday haysada yaagees: ‘Taani nena, newunne ne laggeta ubbaas dagama oothana. Enti neeni xeellishin, banta morketa mashshan wurana. Taani Yihuda asa ubbaa Babiloone kawa kushen aathada immana. I enta di7idi, Babiloone efidi, yan mashshan wodhana.
JER 20:5 Hessadaka, ha katama shaluwanne duretetha ubbaa, oyki yedhidaba ubbaa, haaridaba ubbaanne Yihuda kawota miishiya ubbaa taani enta morketas aathada immana; enti enta bonqidi Babiloone efana.
JER 20:6 Qassi neeni Phaskori, ne son de7iya asa ubbay di7etidi, Babiloone baana. Neeni wordo tinbite odida ne laggeta ubbaaraka yan hayqananne yan moogetana’ yaagees” yaagis.
JER 20:7 Abeeti Godaw, neeni tana cimmadasa; taanika cimetas. Neeni taape minnada, tana xoonadasa. Gallasa kumetha taani asa miichas attas; ubbay tana qelqisis.
JER 20:8 Taani haasaya wode ubban, “Makallabaynne dhayoy gakis” gada waassayis. Godaa qaalay taw gallas gallas borenne qelqisethi ehis.
JER 20:9 Taani, “Taani GODAABA denthada odike” woyko, “Iya sunthan nam7antho odike” giiko, Godaa qaalay ta meqethaa giddon qum7etidi, eexiya tama mela gididi, ta wozanan michees. Taani giddon oykada ashshona gada daaburas; shin teqanaw danda7abike.
JER 20:10 Taani daro kalkasha si7as; “Yan han dagami de7ees! Ane iya mootite! Nuunika iya mootoos” yaagosona. Taw mata laggeti ubbay ta kundethaa naagidi, “Ooni eri, nuuni iya oykana melanne nu haluwa keyana mela, I cimmanaw danda7ees” yaagosona.
JER 20:11 Shin Goday yashisiya toora qaradan taara de7ees. Hessa gisho, tana yedetheysati dhubetana; enti tana xoonokona. Entaw giigonna gisho, enti gita yeella yeellatana. Enta kawushay kumthi dogetenna.
JER 20:12 Abeeti Ubbaafe Wolqaama Godaw, xillota paaceyso, wozananne kaha be7eyso, neeni ta morketa bolla ne haluwa keyada tana bessa. Ayis giiko, taani ta mootuwa new aathas.
JER 20:13 Godaas yexite! Godaa galatite! ayis giiko, I manqota iitata kushepe ashshees.
JER 20:14 Taani yeletida gallasay baadetidaysa gido! Ta aayiya tana yelida gallasay anjetofo!
JER 20:15 Ta aawas, “New mishiraacho; new adde na7i yeletis!” yaagi odidi, daro ufaysida urayka baadetidaba gido!
JER 20:16 He addey Goday qadhetonna aathidi yeggidi dhaysida katamatada hano. He addey wonta waasuwa, gallas seetan, “Olay gakis!” giya odaa si7o.
JER 20:17 Ayis giiko, ta aayiya taw duufo gidana melanne I uloyka tana merinaw oyki uttana mela, tana ulon wodhibeenna.
JER 20:18 Taani metonne azzano be7anawunne laytha ubbaa yeellatashe wursanaw, ayis ta aaye ulope keyadina?
JER 21:1 Kawoy Sedeqiyaasi Malkiya na7aa Phaskoranne Ma7iseya na7aa kahiniya Sofoniyaasa kiitida wode, Godaa qaalay Ermiyaasako haysada yaagidi yis:
JER 21:2 Enti, “Babiloone kawoy Nabukadanaxoori ba olanchotara ha katamaa teqida gisho nuus Godaa oycha. Ooni eri, Goday beniysada malaalsiya oosuwa nu gisho oothidi, iya guye zaaronna aggenna” yaagidosona.
JER 21:3 Ermiyaasi entaw zaaridi, “Bidi Sedeqiyaasako yaagite:
JER 21:4 ‘Neeni Babiloone kawuwaranne gimbiyafe karera ne katama teqida iya olanchotara oletiyanne ne kushen de7iya ola miishiya ta ne bolla zaarana; enta ubbaa ha katamaa giddo gelsana.
JER 21:5 Taani, ta huuphen seeras micetida kushen, wolqaama qesiyan, yilon, hanqoninne wolqaama gadon nena olana.
JER 21:6 Ta ha kataman de7iya asaanne mehiya shocana; enti iita gadon wurana.
JER 21:7 Hessafe guye, Yihuda kawa Sedeqiyaasa, iya moorinnata, gadope, mashshafenne koshape attida, ha katama asa ubbaa, Babiloone kawa Nabukadanaxoorasinne enta wodhanaw koyiya morketas aathada immana. I enta qara mashshan goyrana. I entaw qadhetenna; saletidi aggenna; maarenna’ ” yaagees Goday Isra7eele Xoossay.
JER 21:8 Goday Ermiyaasako, “Gujada asaako haysada yaaga: ta hinte sinthan de7o ogiyanne hayqo ogiya wothas.
JER 21:9 Ha kataman gam7iya oonika mashshan woyko koshan woyko gadon hayqana. Shin katamaape keyidi katamaa teqidi oykida Babiloonetas ba kushiya immiya oonika paxa attana; he uray ba shempuwa ashshana.
JER 21:10 Taani ha katamaa bolla lo77oba gidonashin iitabaa oothanaw dendas. Ta iya Babiloone kawas aathada immana; I ha katamaa taman xuuggana” yaagees Goday.
JER 21:11 Yihuda kawa keetha asaas haysada yaaga: Godaa qaala si7ite!
JER 21:12 Hinteno, Dawita kochato, Goday hinteko haysada yaagees; “Wonta wonta suure pirdite; bonqetidaysata un7ethiya asaa kushepe ashshite. Hessa hinte oothonna ixiko, hinte iita oosuwa gaason ta hanqoy tamada eexana; oonika iya toysenna” yaagees Goday.
JER 21:13 Neno, Yerusalaame, denban de7iya zaallada, zangaarape dhoqu gada bentaasa; shin ta nena olana. Neeni, “Oonika ta bolla xaalenna woyko ta de7iya bessaa gelenna” yaagasa.
JER 21:14 Shin, “Taani Goday nena ne oosuwada seerana. Taani ne kawo keethan tama oythana; ne yuushuwan de7iya ubbaa midi dhaysana” yaagees Goday.
JER 22:1 Goday haysada yaagees; “Duge Yihuda kawa gadho bada, yan ha qaala oda.
JER 22:2 ‘Neno Yihuda kawaw, Dawita araatan uttidayso, neeni, ne moorinnatinne ha pengiyara geliya ne asay Godaa qaala si7ite!
JER 22:3 Suure pirdaa pirdite; xillo oothite. Bonqetidaysa un7ethiya asaa kushepe ashshite. Bete asaas, yi7otasinne am7etas gene oothopite woyko sugopite. Xillo asa suuthu ha bessan gussofite.
JER 22:4 Ha kiitata hinte naagiko, Dawita araatan uttiya kawoti paranne para gaare toggidi, banta moorinnataranne banta asaara ha kawo gadho pengiyara gelana.
JER 22:5 Shin hinte kiitetonna ixiko, ha kawo gadhoy baysa gidana yaagada ta Goday ta huuphen caaqas’ ” yaagees Goday.
JER 22:6 Goday Yihuda kawo gadhuwaba haysada yaagees: “Neeni taw Galada biittanne Libaanose zuma mela gidikoka, ta nena mela biittanne asi doonna katama oothana.
JER 22:7 Taani nena laaliya asaa ola miishe oythada kiittana; enti ne ziga tuuqeta qanxerethidi, taman yeggana.
JER 22:8 “Dumma dumma kawotethatape asay he katamaa matara aadhishe, ‘Goday ayis ha gita katamaa haysada oothidee?’ yaagidi issoy issuwa oychana.
JER 22:9 Enti zaaridi, ‘Godaa banta Xoossara caaqida caaquwa menthidi, hara xoossata goyinnida gishonne oothida gishosa’ ” yaagana.
JER 22:10 Hayqida kawa Iyosiyasas yeekofite woyko kayotofite. Hessa aggidi, di7etidi bida Saalomasseeletidi yeekite. I guye simmenna; ba yeletida biitta zaaridi be7enna.
JER 22:11 Ba aawa bessan Yihudan kawotidi de7ishe, ha bessaafe bida Iyosiyaasa na7a Saloomaba Goday haysada yaagees. “I guye simmenna.
JER 22:12 I di7etidi bida biittan hayqana; simmidi ha biitta be7enna” yaagees Goday.
JER 22:13 Ba keetha genen keexeysa, geella ogen pooqe bolla pooqe gujeysa, ba asaas aykoka immonnanne gate qanxonna oosiseysa ayye!
JER 22:14 He uray, “Taani taw gita pooqey de7iya dalga keethi keexana” yaagdi, ba keethas dalga maskooteta kessidi, ziga mithan alleeqisidi, zo7o qalame tiyees.
JER 22:15 Ne daro zigan keexidaysi nena lo77o kawo kessees gada qopay? Ne aawa Iyosyaasas miyabaynne uyaabay dhayidee? I suure pirda pirdis; xillo oothis. Hessa gisho, iyaw ubbabay injetis.
JER 22:16 I manqotasinne metootanchotas suure pirdiya gisho, ubbabay iyaw injetis. Godaa erees guussay haysa.
JER 22:17 Shin ne ayfeynne ne wozanay shempiday, cimon go77a demo, xillo suuthi guso, genenne un7etho bollana.
JER 22:18 Hessa gisho, Goday Iyosyaasa na7aa, Yihuda kawa Iyo7aqeemaba haysada yaagees: “I hayqiya wode enti iyaw, ‘Woo! Ta ishaw, woo! Ta ishaw’ yaagidi yeekokona. Qassi, ‘Woo! Ta godaw, woo! Ta kawaw’ yaagidi zeleelokona.
JER 22:19 Iya moogoyka hare moogo mela gidana. Iya ahay gooshetidi, Yerusalaame pengetape ya baggan yegetana” yaagees Goday.
JER 22:20 Goday Yerusalaameba haysada yaagees: “Olas neera zupeteysati ubbay xoonetida gisho, pude Libaanose bada, yan waassa. Baasane biittan waaso suulisa; Abariima zuman waassa.
JER 22:21 Ne saro de7iya wode ta new odas; shin ne tana si7onna ixadasa. Ne na7atethafe doomin ne hanoy haysa; ne taw kiitetonna ixadasa.
JER 22:22 Ne henthanchota ubbaa carkoy efana; olas neera zupeteysati di7etidi baana. He wode ne iitatetha ubbaa gisho yeellatananne kawuyana.
JER 22:23 Hinteno, Libaanose zigan keexetida keethan de7eysato, iqethi oykida maccasada un7i hinte bolla puttu giiko hinte waananee?” yaagees.
JER 22:24 Goday haysada yaagees: “Ta de7oy ero! Neeni Iyo7aqeema na7ay, Yihuda kawoy Yo7akini, ta ushacha kushen de7iya ta attamiya migiddo gidiyakoka ta nena kessa yeggana.
JER 22:25 Nena wodhanaw koyeysatas, ne yayiya Babiloone kawa Nabukadanaxoorasinne iya olanchotas ta nena aathada immana.
JER 22:26 Ta nenanne ne aayiw hinte yeletonna hara biitta holana; hinte nam7ayka yan hayqana.
JER 22:27 Hinte simmanaw laamotiya biitta polo simmeketa” yaagees.
JER 22:28 Ha addey Yo7akini, kadhetidanne meqida xuggee? I, oonika koyonna miishee? Inne iya nayti ayis goodetidi, eronna biittan yegetidi attidonaa?
JER 22:29 Biitte, biitte, biitte, Godaa qaala si7a!
JER 22:30 “Iya kochaafe issuwasika injetonna gishonne Dawita araatan uttiya woyko Yihudan kawotiya asi issoyka bayna gisho, ha addiya, na7i bayna asi, ba laytha ubban de7oy injetonna asi” gada xaafa yaagees Goday.
JER 23:1 “Ta hentha bessan de7iya dorsata dhaysiyanne laaliya henthanchota ayye!” yaagees Goday.
JER 23:2 Goday, Isra7eele Xoossay, ba asaa heemmiya henthanchota haysada yaagees: “Hinte ta dorsata laallida gisho, gooddida gisho, naagiboonna gishonne hinte oothida hinte iita oosuwa gisho ta hintena seerana.
JER 23:3 Ta wudiyape attidaysata ta kase laallida biitta ubbaafe ta huuphen shiishana. Enta guye enta hentha bessaa zaarana; enti yan yeletidi darana.
JER 23:4 Enta loythidi heemmiya henthanchota entaw shuumana. Enti zaaridi yayyokona; dagammokona; entafe issoyka dhayenna” yaagees Goday.
JER 23:5 “Dawita kochaafe xillo aaca denthana wodey yaana. I kawotethaa cincatethan aysana; biitta bolla suurenne xillo oothana.
JER 23:6 Iya kawotetha wodiyan Yihudi attana; Isra7eeley saro daana. Iya sunthay, ‘Xoossay nu Xillotethaa’ geetetana” yaagees Goday.
JER 23:7 Hessa gisho, “Asay, ‘Isra7eela asaa Gibxe biittafe kessida Goday eriya mela’ yaagidi caaqanaysa aggidi,
JER 23:8 ‘Isra7eela kochaa pudeha bagga biittafenne enta laallida biitta ubbaafe ehida Goday eriya mela’ yaagidi caaqana wodey yaana. Hessafe guye, enti banta buzo biittan daana” yaagees Goday.
JER 23:9 Nabetaba ta qopiya wode ta wozanay daaburees; ta meqethati kokoroosona. Godaa gishonne iya geeshsha qaala gisho woyney xoonin mathotida asi gidas.
JER 23:10 Biittay laymatethan kumis. Qangetha gisho, biittay yeekees; bazzo hentha bessati melidosona. Nabeti iita ogen hemetoosona; banta maata like gidonna ogen go7etoosona.
JER 23:11 “Nabetinne kahineti tunidosona; hari attoshin ta keethan enti oothiya iitaa ta be7as” yaagees Goday.
JER 23:12 “Hessa gisho, enta ogey hallixana; enti dhuman yegetana, dhubetidi kundana. Enti seeretiya wode enta bolla gado ehana” yaagees Goday.
JER 23:13 “Samaare nabeta giddon iitabaa be7as. Enti Ba7aale sunthan tinbite odoosona; ta asaa Isra7eele balethoosona.
JER 23:14 Qassi Yerusalaame nabeta giddonka haythas deexiyaba be7as. Enti laymatoosona; wordotidi de7oosona. Oonika ba iita oosuwape simmonna mela enti iitaa ootheyisata minthethoosona. Enti ubbay taw Soodoma mela; Yerusalaame asay Gamoora mela” yaagees Goday.
JER 23:15 Hessa gisho, Ubbaafe Wolqaama Goday nabetaba haysada yaagees: “Yerusalaame nabeta doonape tunabay keyidi, biitta ubban laaletida gisho, ta enta cammiya kathi muzana; enta wodhiya haathi ushshana” yaagees.
JER 23:16 “Nabeti odiyaba si7opite; enti hanonna ufaysan kunthoosona. Goday odonnashin enti bantafe medhi kessidi qoncethi odoosona.
JER 23:17 Tana kadheysatako, ‘Hinte saro daana’ yaagosona; qassi banta wozana iitatethaa kaalleysatako, ‘Hintena iitabay gakenna’ yaagosona” yaagees Ubbaafe Wolqaama Goday.
JER 23:18 “Shin be7anaw woyko iya qaala si7anaw Goday zoriya bessan entafe oone eqiday? Iya qaala si7iday oonee?
JER 23:19 Godaa gotey hanqon dendana; wolqaama hobbey iitata huuphiya shocana.
JER 23:20 Ba wozanaa qofaa polonna de7ishe, Godaa hanqoy simmenna. Wursetha wodiyan haysa hinte akeekana.
JER 23:21 Ta ha nabeta kiittabike; shin enti banta kiita ekidi woxoosona. Ta entaw odabike; shin enti tinbite odoosona.
JER 23:22 Enti ta zoriya bessan eqidabaa gidiyako, ta qaala, ta asaas odanashin. Enti iita ogiyapenne enta iita oosuwape zaaranashin” yaagees Goday.
JER 23:23 “Ta mata xalaala Xoossee? Haaho Xoossi gidikina?
JER 23:24 Ta be7onnaada, asi geema bessan bana qosanaw danda7ii? Saloninne sa7an kumiday tana gidikina?” yaagees Goday.
JER 23:25 “Ta sunthan wordo tinbite odeysati giyaba si7as. Enti, ‘Ta amuho be7as; ta amuho be7as’ yaagosona.
JER 23:26 Ha nabeti bantaw medhidi kessidi odiya wordo tinbitey enta wozanan awude gakanaw gam7anee?
JER 23:27 Enta aawati Ba7aale eeqa goyinnidi ta sunthaa dogidaysada, enti issoy issuwas odiya amuhuwan, ta asay ta sunthaa dogana mela oothanaw qopoosona.
JER 23:28 Amuho amuhiya nabey ba amuhuwa odo; shin ta qaala si7iya nabey ta qaala ammanetidi odo. Dalinne gistey awun gahetii?
JER 23:29 Ta qaalay tama mela gidennee? Zaalla mentherethiya naariqa mela gidennee?” yaagees Goday.
JER 23:30 “Hessa gisho, ta qaala issoy issuwafe kaysotidi taape ekida daanisidi tinbite odiya nabeta ta ixayis.
JER 23:31 Hessadaka, banta wozanaa qofaa odishe, ‘Goday yaagees’ giya nabetaka taani ixayis.
JER 23:32 Wordo amuhishe tinbite odiya nabeta bolla ta dendana. Enti banta amuhuwan katidi tinbite odiya nabeta taani ixayis. Ta enta kiittonnashin woyko shuumonnashin wordo tinbite odoosona; ta asaa balethoosona. Enti ha asaa aykoka maaddokona” yaagees Goday.
JER 23:33 “Goday taako, ‘Ha asay woyko nabey woyko kahiney, Godaa kiitay aybee?’ gidi oychiko, ne entako, ‘Goday, ta hintena holana’ yaagees” gada oda.
JER 23:34 “Nabey woyko kahiney woyko asay, ‘Haysi Godaa kiita’ yaagidi odiko, ta he addiyanne iya soo asaa seerana.
JER 23:35 Hessa aggidi issoy issoy, ‘Goday woygidee? woyko Goday ay odidee?’ yaagidi ba laggetanne ba dabbota oychanaw bessees.
JER 23:36 Hizape oonika, ‘Godaa kiita’ yaagidi zaaridi odetanaw bessenna. Hessa gisho, iya doonape keyiya qaalay iyaw kiita gidiya gisho, de7o Xoossaa, Ubbaafe Wolqaama Godaa, nu Xoossaa qaala hinte mirqeeta.
JER 23:37 Neeni nabetako, ‘Goday hintena woygidee?’ woyko ‘Ay odidee?’ yaagada oychanaw bessees.
JER 23:38 Shin hinte, ‘Haysi Godaa kiita’ giiko, Goday haysada yaagees: taani hintena, ‘Haysi Godaa kiita goopite’ yaaginka hinte, ‘Haysi Godaa kiita’ gideta.
JER 23:39 Hessa gisho, ta hintena dogana; hintenanne hinte aawatas immida katamaa kumethi ta sinthafe diggana.
JER 23:40 Ta hinte bolla merinaa kawushanne dogetonna yeella ehana” yaagees Goday.
JER 24:1 Kawoy Nabukadanaxoori, Iyo7aqeema na7aa, Yihuda kawa Ikoniyaana, Yihuda halaqatara, kushe hiillataranne birata qoxeysatara Yerusalaamepe Babiloone di77idi efidaape guye, Goday tana qoncethi bessis. Goday tana, Xoossa keethas sintha baggara balasey de7iya nam7u keesheta bessis.
JER 24:2 Issi keeshiyan koyro teerida daaniya lo77o balasey de7ees; hanko keeshiyan qassi maanaw giigonna iita balasey de7ees.
JER 24:3 Goday taako, “Ermiyaasa, ne be7ey aybee?” yaagidi oychis. Taani, “Balase be7ayis; lo77o teeray daro lo77o; iita teeray qassi maanaw giigonna daro iita” yaagas.
JER 24:4 Hessafe guye, Godaa qaalay taako yis:
JER 24:5 Goday Isra7eele Xoossay haysada yaagees: “Yihuda biittafe di7on Babiloone biitta yeddida asata, ha lo77o balase teerada lo77o gaana.
JER 24:6 Taani lo77o ayfen enta xeellana; qassi enta zaarada ha biitta ehana. Ta enta keexanape attishin, laallike; enta tokanape attishin, shoddike.
JER 24:7 Taani Godaa gididaysa enti erana mela entaw wozana immana. Enti banta kumetha wozanape taako simmanaw de7iya gisho, enti ta ase gidana; ta enta Xoosse gidana” yaagees.
JER 24:8 Gidoshin, “Yihuda kawa Sedeqiyaasa, iya moorinnata, ha biittan gidin Yerusalaamen attida asaanne Gibxe biittan de7eyisata maanaw giigonna daro iita balase teerada iita gaana.
JER 24:9 Taani enta gooddada yeddiya biitta ubban, ha sa7a kawotethati enta be7idi dagammana. Taani enta ixetidaysata, cayetidaysata, boretidaysata, leemiseteyisata, qelqiseteyisata, baadetidaysata oothana.
JER 24:10 Ta entawunne enta mayzatas immida biittafe enti polo dhayana gakanaw mashsha, koshanne bosha enta bolla yeddana” yaagees Goday.
JER 25:1 Iyosyaasa na7ay, Yihuda kawoy Iyo7aqeemi kawotida oyddantho laythan, Babiloone kawoy Nabukadanaxoori kawotida koyro laythan, Yihuda asaabay Ermiyaasako yida qaalay haysa.
JER 25:2 Nabey Ermiyaasi Yihuda ubbaasinne Yerusalaamen de7iya ubbaas haysada yaagis:
JER 25:3 Amoxe na7ay, Yihuda kawoy, Iyosyaasi kawotida tammanne heedzantho laythafe doomidi, hachi gakanaw, laatamanne heedzu laythi Godaa qaalay taako yis. Ta hintew zaara zaara odas; shin hinte si7onna ixideta.
JER 25:4 Goday ba aylleta, nabeta ubbaa zaari zaari hinteko kiittis; shin hinte si7onna ixideta.
JER 25:5 Enti, “Hinte ubbay hinte iita ogiyapenne hinte iita oosuwape simmite. Goday hintewunne hinte mayzatas merinaw immida biittan hinte daana.
JER 25:6 Hara xoossata goyinnanawunne entaw oothanaw kaallopite. Qassi hinte, hinte kushen oothida eeqatan Godaa hanquwa denthethofite. Hessi haniko Goday hintena qohenna” yaagidosona.
JER 25:7 “Hinte ta odidaysa si7onna ixidi, hinte kushey oothidaban tana yiloyideta. Hinte, hintena qohiyaba oothideta” yaagees Goday.
JER 25:8 “Hessa gisho, Ubbaafe Wolqaama Goday haysada yaagees: hinte ta qaalas kiitetonna ixida gisho,
JER 25:9 pudeha bagga asa ubbaanne ta aylliya Babiloone kawa Nabukadanaxoora xeegana. Enta ha biitta bolla, ha biittan de7iya asa bollanne heeran de7iya kawotethata ubbaa bolla ehana. Ta ha biitta kumethi dhaysana; qassi be7ida ubbay shaatiyabanne qelqisiyaba oothana” yaagees Goday.
JER 25:10 Enta giddofe ililsinne ufaysa qaala, yaagano girsi, woxa girsinne xompe poo7o dhaysana.
JER 25:11 Ha biittay kumethi laaletidanne baysa biitta gidana; kawotethati Babiloone kawas laapun tammu laythi haaretana.
JER 25:12 “Laapun tammu laythay poletidaape guye, taani Babiloone kawanne iya asaa enta nagara gisho seerana; enta biitta merinaw baysa oothana.
JER 25:13 Ta ha biitta bolla odida ubbaa, Ermiyaasi kawotethata ubba bolla odida tinbitiyanne ha maxaafan xaafetida ubbaa ha biitta bolla ehana.
JER 25:14 Daro kawotethatinne gita kawoti Babiloone asaa haarana. Ta entaw, enta hanuwadanne enta kushe oosuwada zaarana” yaagees Goday.
JER 25:15 “Ta hanquwan kumida woyne wanca ta kushepe eka. Efada ta nena kiittiya kawotethata ubbaa ushsha.
JER 25:16 Enti uyidi, taani enta giddo yeddiya mashshaa gaason gandigarananne gooyana” yaagees Goday Isra7eele Xoossay.
JER 25:17 Taani Godaa kushepe wanca ekada, I tana kiitida kawotethata ubbaa ushshas.
JER 25:18 Hachi hanidaysada enta ubbaa dhayonne dagama, cashshenne baadethi oothana mela Yerusalaamenne Yihuda katamata, iya kawotanne iya moorinnata ubbaa ushshas.
JER 25:19 Gibxe kawa, iya aylleta, iya moorinnata, iya biitta asa ubbaanne
JER 25:20 yan de7iya allaga asa ubbaa ushshas. Oxa kawota ubbaa ushshas. Filisxeemen de7iya Asqaloona, Gaaza, Eqroonanne Ashdoodape attida kawota ubbaa ushshas.
JER 25:21 Edoome, Moo7abenne Amoone ushshas.
JER 25:22 Xiroosa kawota ubbaa, Sidoona kawota ubbaanne Medetiraane Abbaafe hefinthan, haahon de7iya kawota ushshas.
JER 25:23 Dedaana, Temaana, Buzanne banta huuphiya gaxa meediya asa ubbaa ushshas.
JER 25:24 Arabe kawota ubbaanne mela biittan de7iya walaka asaa kawota ubbaa ushshas.
JER 25:25 Zimira, Elaamanne Meedona kawota ubbaa ushshas.
JER 25:26 Pudeha biitta kawota ubbaa, haahoninne matan de7iya kawota ubbaa kaallada kaallada sa7aa bolla de7iya kawotethata ubbaa ushshas. Entafe guye Babiloone kawoy uyana.
JER 25:27 Goday taako, “Hessa gisho, ‘Ubbaafe Wolqaama Goday, Isra7eele Xoossay hinteko haysada yaagees’ yaaga. ‘Uyitenne mathotite; cooyitenne kundite. Taani hinte giddo yeddiya mashshaa gaason zaaridi dendofite’ yaagis.
JER 25:28 Shin enti ne kushepe wanca ekonnanne uyonna ixiko, entako haysada yaaga. ‘Ubbaafe Wolqaama Goday hinteko haysada yaagees: hinte uyanaw bessees.
JER 25:29 Ta sunthan xeegetida katamaa bolla iitabaa oothanaw doomayis. Yaatin hinte seerettona attanaw danda7eetii? Ta sa7an de7iya ubbaa bolla mashsha xeegida gisho hinte seerettonna atteketa’ ” yaagees Ubbaafe Wolqaama Goday.
JER 25:30 “Hessa gisho, Ermiyaasa, ha qaala ubbay enta bolla poletanaysa entaw oda. Goday dhoqan guummana; Goday ba geeshsha bessaafe ba guntha sissana. I ba biitta bolla xaaggana; woyne gum7eysati waasseysada sa7an de7iya ubbaa bolla waassana.
JER 25:31 Godaas kawotethatara mootoy de7iya gisho iya waasoy sa7a gaxaa gakidi si7etees. Goday asa ubbaara pirdetana; I iitata mashshas aathidi immana” yaagees Goday.
JER 25:32 “Iitabay kawotethaafe kawotethaa laaletis; sa7aa gaxape gotey dendis” yaagees Ubbaafe Wolqaama Goday.
JER 25:33 He wode Goday wodhidaysata ahay, biitta bolla ha gaxape ya gaxa gakanaw laaletana. Entaw yeeketenna, enta ahay shiiqenna woyko moogetenna; enti biittan pito mela gidana.
JER 25:34 Hinteno, henthanchoto, yeekitenne waassite. Hinteno, wudiya kaaletheysato, bidon gondoretite. Hinte shuketiya wodey gakis; hinte kundananne lo77o urqa miishada meqeretana.
JER 25:35 Henthanchoti baqatidi attiya bessi baawa; wudiya kaaletheysati kessi ekiya bessi baawa.
JER 25:36 Goday enta hentha gadiya dhaysiya gisho, henthanchoti waassiya waasuwanne wudiya kaaletheysati yeekiya yeehuwa si7ite.
JER 25:37 Godaa suulliya sheniya gaason saro biittay baysatana.
JER 25:38 Gaammoy ba de7iya worape keyeysada Goday ba de7iya bessaafe keyana. Enta biittay un7etheyisata mashshaninne Godaa suulliya hanquwan baysa gidana.
JER 26:1 Iyosyaasa na7ay Yihuda kawoy Iyo7aqeemi kawotida wode Godaa qaalay yis.
JER 26:2 Goday, “Xoossa keetha dabaaban eqa. Xoossa keethan goyinnanaw Yihuda katamatape yaa ubbaas, ta nena kiitida qaalape issuwaka ashshona oda.
JER 26:3 Enti si7idi, banta iita ogiyape simmaneko ooni eri. Hessa gidiko, taani enta iitatetha gisho dhaysanaw qopidaysa aggaagana.”
JER 26:4 Entako haysada yaaga: “Hinte tana si7onna ixikonne ta hintew immida higgiya kiitetonna ixiko,
JER 26:5 hinte si7onna ixikoka ta zaara zaarada hinteko kiitida, ta aylleta nabeta qaala si7onnan ixiko,
JER 26:6 ta ha xoossa keethaa Seeloda oothana. Ha katamaa sa7an de7iya kawotethata ubbaas baadethi oothana” yaagis.
JER 26:7 Ermiyaasi Xoossa keethan ha qaala odishin, kahineti, nabetinne asa ubbay si7idosona.
JER 26:8 Ermiyaasi, Goday, oda gidi immida kiita odidi ongida wode kahineti, nabetinne asa ubbay iya oykidi, “Ne hayqanaw bessaasa” yaagidosona.
JER 26:9 Neeni, “ ‘Ha xoossa keethay Seeloda hanana; qassi ha katamay dhayana; baysa gidana’ yaagada, Godaa sunthan ayis tinbite odadii?” yaagidi, Xoossa keethan shiiqida asa ubbay Ermiyaasa teqidosona.
JER 26:10 Yihuda halaqati hessa si7ida wode, kawo gadhope keyidi, Xoossa keethi yidosona. Xoossa keethan Ooratha Penge geetetiya pengiyan uttidosona.
JER 26:11 Kahinetinne nabeti halaqatakonne asa ubbaako haysada yaagidosona: “Hinte, hinte haythan si7idaysada, ha addey ha katamaa bolla tinbite odida gisho, I hayqanaw bessees!” yaagidosona.
JER 26:12 Ermiyaasi halaqatakonne asa ubbaako haysada yaagis: “Ha hinte si7ida qaala ubbay ha xoossa keethaa bollanne ha katamaa bolla hanana gada ta odana mela Goday tana kiittis.
JER 26:13 Hiza hinte ogiyanne hinte oosuwa laammite; Godaa hinte Xoossaa qaalas kiitetite. Hessa hinte oothiko, Goday hinte bolla ehana gida iitabaa aggaagana.
JER 26:14 Tana gidiko, ta hinte kushen de7ayis. Hintew lo77onne suure daanidaba ta bolla oothite.
JER 26:15 Taani ha qaala ubbaa hintew odana mela Goday tuma tana kiitida gisho, hinte tana wodhiko, hinte hinte bolla, ha katama bollanne iyan de7iya asaa bolla xillo suutha aco ehanaysa erite” yaagis.
JER 26:16 Halaqatinne asa ubbay, kahinetinne nabeti, “I, Godaa, nu Xoossaa sunthan nuus odida gisho, ha addey hayqanaw bessenna” yaagidosona.
JER 26:17 Biitta cimatape issoti issoti dendi eqidi, shiiqida asaako haysada yaagidosona:
JER 26:18 “Hizqiyaasi Yihudan kawotida laythan Mooreseeta addey Mikiyaasi kase Yihuda asaas haysada yaagidi, tinbite odis: ‘Xiyooney shooqada goyetana. Yerusalaame katamay laaletidi, laaletha doore gidana. Xoossa keethay keexetida derey wora gidana’ yaagees Ubbaafe Wolqaama Goday” yaagis.
JER 26:19 Yaatin, “Yihuda kawoy Hizqiyaasinne Yihuda asa ubbay iya wodhidona? Akay, Hizqiyaasi Godaas yayyidi, Godaa maarotethi oychibeennee? Godaay enta bolla ehana gida iitabaa aggibeenee? Shin nuuni nu bolla iitabaa ehana hanoos” yaagidosona.
JER 26:20 Qiriyat-Yi7aarima geetetiya bessan, Shamaya na7aa, Ooriyoona geetetiya issi addey de7ees. Ika Ermiyaasi odidaysada, ha katamaa bollanne ha biitta bolla Godaa sunthan kase tinbite odis.
JER 26:21 Kawoy Iyo7aqeemi, iya olanchoti, iya moorinnati, Ooriyooni odidaysa si7ida wode kawoy iya wodhanaw koyis. Ooriyooni hessa si7ida wode yayyidi, Gibxe baqatis.
JER 26:22 Gidoshin, kawoy Iyo7aqeemi Akboora na7aa Elnaatananne hara asata Gibxe kiittis.
JER 26:23 Enti Ooriyoona Gibxefe kessidi, kawa Iyo7aqeemeko efin, iya mashshan wodhisidi derey moogetiya duufon moogidosona.
JER 26:24 Shin Safaana na7ay, Akqaami Ermiyaasa maaddida gisho asay iya wodhanaw aathidi immibookona.
JER 27:1 Iyosyaasa na7ay Sedeqiyaasi, Yihudan kawoto doomida wode ha qaalay Godaape Ermiyaasako yis.
JER 27:2 “Dafo gonne wodorora de7iya qambara medhada ne gannan wotha.
JER 27:3 Yihuda kawa Sedeqiyaasako Yerusalaame kiitetida asaa baggara, Edoome, Moo7abe, Amoone, Xiroosanne Sidoona kiitta.
JER 27:4 Enti banta godatas odana mela enta kiitta. Ubbaafe Wolqaama Goday, Isra7eele Xoossay haysada yaagees:
JER 27:5 ‘Ta gita wolqaaninne ta micetida kushen sa7aa, sa7an de7iya asaa, mehenne do7ata medhas; taani iya, ta koyiya oodeska immayis.
JER 27:6 Ha77i ta biitta ubbaa ta aylliyas, Babiloone kawa Nabukadanaxooras immas. Qassi ta bazzo do7atika iyaw haaretana mela oothas.
JER 27:7 Iya biittay haratas haaretiya wodey gakanaw kawotethati ubbay iyaw, iya na7aasinne iya na7aa na7aas haaretana. Hessafe guye, daro kawotethatinne gita kawoti iya haarana.’
JER 27:8 “Shin ay biitti woyko ay kawotethi Babiloone kawa Nabukadanaxooras kiitetonna ixikonne iya qambaran gelonna ixiko, he kawotethay iya kushen dhayana gakanaw mashshan, koshaninne boshan seerana.
JER 27:9 Hessa gisho, ‘Babiloone kawas haareteketa’ giya hinte nabeta, hintew kaayeyisata, hinte amuho billeyisata, hinte marotanne moytille xeegeyisata si7opite.
JER 27:10 Enti hintew wordo odoosona; hintena hinte biittafe shoddana; hintena gooddada kessana; hinteka dhayana.
JER 27:11 Shin ay kawotethika Babiloone kawa qambaran gelidi, iyaw haaretiko, ta he kawotethaa iya biittan ashshana; enti he biitta goyana; yan daana” yaagees Goday.
JER 27:12 Taani, Yihuda kawa Sedeqiyaasaska ha qaala odas; “Babiloone kawa qambaran gelada iyawunne iya asaas haaretiko, ne de7on daana.
JER 27:13 Goday Babiloone kawas haaretonna ixiya kawotethas odidaysada mashshan, koshaninne boshan nenne ne asay ayis hayqeetii?
JER 27:14 Enti odey wordo gidiya gisho, ‘Hinte Babiloone kawas haareteketa’ yaagidi odiya nabeta si7opite.
JER 27:15 Ta enta kiittabike; shin enti ta sunthan wordo tinbite odoosona. Hessa gisho, ta hintena gooddada kessana; hintenne hinte nabeti dhayana” yaagees Goday.
JER 27:16 Hessafe guye, ta kahinetasinne asa ubbaas haysada yaagada odas: “Xoossa keetha miishey Babiloonepe matara simmidi yaana” yaagidi wordo odiya nabeta si7opite.
JER 27:17 Enti giyaba si7onna aggidi, Babiloone kawas haaretite; hinte de7on daana. Ha katamay ayis laaletida bessi gidanee?
JER 27:18 Enti tuma nabe gidikonne Godaa qaalay entan de7iko, Xoossa keethan, Yihuda kawo gadhoninne Yerusalaamen attida miishey Babiloone boonnada Ubbaafe Wolqaama Godaa Xoossaa woosso.
JER 27:19 “Ubbaafe Wolqaama Goday, xoossa keetha karen eqida nam7u naase birata tuussatabaa, gita keretabaa, caana gaaretabaanne hara miishetaba haysada yaagees:
JER 27:20 Babiloone kawoy Nabukadanaxoori Iyo7aqeema na7aa, Yihuda kawa Ikoniyaananne Yihudaninne Yerusalaamen de7iya gita asa ubbaa di77idi efida wode,
JER 27:21 Ubbaafe Wolqaama Goday, Isra7eele Xoossay, Xoossa keethan, Yihuda kawo gadhoninne Yerusalaamen attida miishetaba haysada yaagees;
JER 27:22 Enti Babiloone biitta gaazetana; ta enta gisho yaana wodey gakanaw, enti yan daana. He wode ta enta guye zaarada enta bessan wothana” yaagees Goday.
JER 28:1 He laythi, Yihuda kawoy Sedeqiyaasi kawoto doomida oyddantho laythan, ichashantho ageenan Gaba7oona addey, Azuura na7ay nabey Hanaani, Xoossa keethan kahinetanne asa ubbaa sinthan taako haysada yaagis:
JER 28:2 “Ubbaafe Wolqaama Goday, Isra7eele Xoossay, ‘Babiloone kawa qambara menthana.
JER 28:3 Babiloone kawoy, Nabukadanaxoori, Babiloone efida Xoossa keethaa miishe ubbaa ta nam7u laytha giddon zaarada ha bessaa ehana.
JER 28:4 Iyo7aqeema na7aa, Yihuda kawa Yo7akina, Yihudape di7etidi Babiloone bida asa ubbaa zaarada ha bessaa ehana. Taani Babiloone kawa qambara menthana’ ” yaagees Goday.
JER 28:5 Xoossa keethaa giddon eqida kahinetanne asa ubbaa sinthan nabey Ermiyaasi, nabiya Hananako haysada yaagis.
JER 28:6 “Amin7i! Goday ne gidaysada ootho. Xoossa keetha miishetanne di7etidi bida asa ubbaa Babiloonepe zaaridi, ne odiya qaala Goday polo!
JER 28:7 Gidoshin, ta newunne ne asaas odeysa si7a.
JER 28:8 Neepenne taape kase de7ida nabeti, olaba, dhayobanne gadoba gita kawotethata bolla tinbite odidosona.
JER 28:9 Shin, Saroba odiya nabey, tuma Xoossi kiitida nabe gideysi eretey, I odiya tinbitey poletiya wodena” yaagis.
JER 28:10 Hessafe guye, nabey Hanaani, nabiya Ermiyaasa gannaafe qambara ekidi menthis.
JER 28:11 Hanaani asa ubbaa sinthan, “Taani nam7u laytha giddon Babiloone kawa Nabukadanaxoora qambara kawotethata ubbaa gannaafe denthada haysada menthana” yaagees Goday. Hessafe guye, Ermiyaasi dendidi, ba ogiya bis.
JER 28:12 Nabey Hanaani, nabiya Ermiyaasa gannaafe menthida guutha wodepe guye, Godaa qaalay nabiya Ermiyaasako haysada yaagishe yis.
JER 28:13 Bada Hanaanas oda; “Neeni mitha qambara menthadasa; shin neeni iya gisho birata qambara medhana.
JER 28:14 Babiloone kawa Nabukadanaxooras haaretana mela taani ha kawotethata ubbaa gannan birata qambara wothana; entika iyaw haaretana. Taani hari attoshin, bazzo do7atika iyaw haaretana mela oothana” yaagees Ubbaafe Wolqaama Goday, Isra7eele Xoossay.
JER 28:15 Hessafe guye, nabey Ermiyaasi, nabiya Hananako haysada yaagis: “Hananiya, si7a! Goday nena kiittibeenna; shin neeni ha asay wordoban ammanetana mela oothadasa.
JER 28:16 Hessa gisho, Goday, ‘Ta nena sa7a bollafe diggana. Neeni ha asay ta bolla makallana mela oothida gisho ne ha laythi hayqana’ ” yaagis.
JER 28:17 He laythi laapuntha ageenan nabey Hanaani hayqis.
JER 29:1 Nabiya Ermiyaasi di7etida asaa giddon de7iya attida cimatas, kahinetas, nabetasinne Nabukadanaxoori Yerusalaamepe di77idi, Babiloone efida ubbaas Yerusalaamepe yeddida dabdaabey haysafe kaallidi xaafetidaysa.
JER 29:2 Haysi haniday, kawoy Ikoniyaani, iya aayiya kawiya, iya moorinnati, Yihudanne Yerusalaame halaqati, kushe hiillanchotinne birata qoxeysati Yerusalaamepe di7etidi bidi simmina.
JER 29:3 Ermiyaasi Yihuda kawoy Sedeqiyaasi Babiloone kawa Nabukadanaxoorako kiitetida Safaana na7aa El7aasanne Kalqqe na7aa Gamaara bolla he dabdaabiya yeddis. Dabdaabey haysada yaagees:
JER 29:4 “Ubbaafe Wolqaama Goday, Isra7eele Xoossay, Yerusalaamepe Babiloone di7etida asa ubbaas haysada yaagees:
JER 29:5 Keethe keexidi yan de7ite. Kathi zeridi ayfiya miite.
JER 29:6 Macho ekidi macca na7anne adde na7a yelite. Hinte adde naytas macho oychidi immite; hinte macca nayta azinas immite. Enti macca adde yelo; yan taybon darite; guuxofite.
JER 29:7 Hinte di7etidi bida katamaas saroy daana mela koyite. He katamaas Godaa woossite. Iyaw saroy de7iko, hintewuka saroy daana.
JER 29:8 Hinte giddon de7iya hinte nabetinne maroti odiyaban cimetofite; enti amuhiya amuhuwa si7opite.
JER 29:9 Enti ta sunthan wordo tinbite odoosona; ta enta kiittabike” yaagees Ubbaafe Wolqaama Goday, Isra7eele Xoossay.
JER 29:10 “Hinte Babiloonen gam7iya laapun tammu laythay poletiya wode ta hinte gisho yada, hintena, hinte biitta zaarada ehana gada gelida qaala polana.
JER 29:11 Taani hintew qopiya qofaa erayis. He qofay, wursethay lo77onne ufaysi de7iya, hintena go77iya qofape attishin, qohiya qofa gidenna.
JER 29:12 Hessafe guye, hinte tana xeegana; taako yaananne tana woossana; taka hintena si7ana.
JER 29:13 Hinte tana koyana; hinte tana hinte kumetha wozanan koyida wode demmana.
JER 29:14 Ta hintew bentana; ta hintena di7etethaafe zaarana. Taani hintena laallida kawotethatapenne dumma dumma bessaafe shiishana. Ta hintena di7on denthida hinte biitta guye zaarada ehana” yaagees Goday.
JER 29:15 Hinte, “Goday nabe nuus Babiloonen denthis” yaagideta.
JER 29:16 Gidoshin, Dawita araatan uttiya kawabanne hinte mela di7etidi boonna attida asaabanne hinte dabbotabaa Goday haysada yaagees.
JER 29:17 “Ta enta bolla mashshe, koshanne gado yeddana. Ta entana meetetanaw danda7etonna iitida balase mitha ayfeda oothana.
JER 29:18 Taani enta mashshan, koshaninne gadon yedethada, enta sa7an de7iya kawotetha ubbaas dagama oothana. Qassi ta enta kessada yeddida biitta ubban baadethas, dagamas, boresinne cashshas oothana.
JER 29:19 Ta aylleta nabeta baggara zaarada zaarada kiitida ta qaala enti si7onna ixidosona. Hinte di7etidi bidaysatika si7onna ixideta.
JER 29:20 Hinteno, Yerusalaamepe Babiloone di7etidi bida asaw, hinte ubbay Godaa qaala si7ite” yaagees Ubbaafe Wolqaama Goday.
JER 29:21 Ta sunthan wordo tinbite odiya, Qolaya na7aa Akaababanne Maseya na7aa Sedeqiyasaba Ubbaafe Wolqaama Goday, Isra7eele Xoossay haysada yaagees. “Ta enta Babiloone kawa Nabukadanaxooras aathada immana. Hinte xeellishin, I enta wodhana.
JER 29:22 Hessafe guye, Yihudape di7etidi, Babiloone bida asay issi asi baaddanaw koyiko, ‘Babiloone kawoy taman xuuggida Sedeqiyasadanne Akaabada Goday nena ootho’ yaagana.
JER 29:23 Enti Isra7eelen iita nagara oothidosona. Enti banta shoorota machetara laymatidosona; ta enta kiittonna wordo tinbite ta sunthan odidosona. Hessa erey tana; hessas taani marka” yaagees Goday.
JER 29:24 Nahelame addiya Shamayas haysada yaagada oda:
JER 29:25 “Ubbaafe Wolqaama Goday, Isra7eele Xoossay haysada yaagees: ‘Neeni ne sunthan Yerusalaamen de7iya asaas, Ma7iseya na7aa kahiniya Sofoniyasasinne hara kahinetas dabdaabe yeddadasa.’ Ne Sofoniyasas haysada yaagadasa:
JER 29:26 ‘Xoossa keethan halaqa gidana mela Goday nena Yoodahe bessan kahine oothidi shuumis. Bana nabe gidi tinbite odiya gooya oonaka iya tohuwa duthan, iya qoodhiya santhalaatan neeni qachanaw bessees.
JER 29:27 Yaatin bana nabe giya Anatoota addiya Ermiyaasa ayis hessada oothabikii?
JER 29:28 Ermiyaasi, di7etetha laythay daro gidiya gisho Babiloonen keethe keexidi de7ite; kathi zeridi ayfiya miite’ ” yaagidi nuna kiittis.
JER 29:29 Kahiney Sofoniyaasi nabiya Ermiyaasas dabdaabiya nabbabis.
JER 29:30 Godaa qaalay Ermiyaasako haysada yaagidi yis;
JER 29:31 “Ha kiitaa di7on de7iya asa ubbaas kiitta; Nahelama addiya Samayeba Goday haysada yaagees; Taani kiittonna Shamayey wordo tinbite odidi hinte wordon ammantana mela oothis.
JER 29:32 Ta Nahelama addiya Shamayanne iya soo asaa seerana. I ta bolla makallaba odida gisho ha asaa giddon iyaw issi asika de7on attenna. Taani ta asaas oothana keehatetha I be7enna” yaagees Goday.
JER 30:1 Godaape Ermiyaasako yida qaalay haysa.
JER 30:2 “Ermiyaasa, ta new odida qaala ubbaa xaatha maxaafan xaafa.
JER 30:3 Taani ta asaa Isra7eelenne Yihuda di7ope guye zaariya wodey matatis. Enta mayzatas immida biitta enta zaarana; enti iya laattana” yaagees Goday Isra7eele Xoossay.
JER 30:4 Goday Isra7eelebanne Yihudaba odida qaalay haysa.
JER 30:5 “Ta yashshanne dagama waaso si7as; dagama waasope attishin, saro waaso gidenna.
JER 30:6 Ane oychite; be7ite; addey na7a yelanaw danda7ii? Yaatin, adde ubbay iqethi oykida maccasada, ba kushen ba uluwa oykidashin ta be7eysi aybee? Asa ubbaa som7oy ayis kareexidee?
JER 30:7 He gallasay ay mela un7ethiya gallasee? Hessa mela gallas baawa. He gallasay Yayqooba zerethaas un7a wode gidana. Gidoshin enti he ubbaafe attana” yaagees Goday.
JER 30:8 Ubbaafe Wolqaama Goday haysada yaagees: “He gallasan ta enta gannaafe qambara menthana; enti qashetida santhalaata duuthana. Hessafe guye, allaga biitta asay enta aylleyena.
JER 30:9 Shin enti Godaas, banta Xoossaas, oothana; ta entaw denthiya kawa Dawitas haaretana.
JER 30:10 “Hessa gisho, ta aylleto, Yayqooba kochato, yayyofite. Hinteno, Isra7eeleto, dagammopite. Hinte haaho bessan de7ishin, ta hintena ashshana; hinte kochata enti di7etida biittafe zaarana. Yayqooba zareti simmidi, saro daana; enta oonika yashisenna.
JER 30:11 Ta hintena ashshanaw hintera de7ayis. Hintena laallida kawotethata ubbaa dhaysana; shin hintena dhaysike. Ta hintena xillo pirdan seerana; shin seeronna hintena coo yeddike” yaagees Goday.
JER 30:12 “Hinte meqoy kooletenna; hinte madunthay paxenna.
JER 30:13 Hintew mootetey baawa; hinte madunthaas dhaley deenna; hintew paxoy baawa.
JER 30:14 Hinte doseysati hintena dogidosona; enti hintebaa wuda gookona. Hinte balaynne hinte nagaray daro gidiya gisho, ta hintena morkeda shocas; qadhey bayna seeras.
JER 30:15 Paxoy bentonna hinte hargiyasinne hinte madunthaas ayis waassetii? Hinte balaynne hinte nagaray darida gisho ta haysa hinte bolla oothas.
JER 30:16 “Shin hintena gaashidi mida ubbay meetetana; hinte morketi ubbay di7etana. Hintena bonqidaysati bonqetana; hintebaa ekidaysati eketana.
JER 30:17 Enti, ‘Oonika koyonnanne boretida Xiyoone’ gidoosona; shin ta hintew keehana; hinte madunthaa pathana” yaagees Goday.
JER 30:18 “Yayqooba kochata di7etida bessaafe guye zaarada, keexana; enti de7iya bessaasika qadhetana. Yerusalaame katamay kase ba laaletida bessan, kawo gadhoy kase ba bessan simmidi keexetana.
JER 30:19 Yan de7iya asa ubbay galata mazmurenne ufaysa yethi yexana. Ta enta taybuwa darisanape attishin, guuxenna. Taani enta bonchetida dere oothana; enti kawuyokona.
JER 30:20 Enta nayti beni duussaada daana; enta maabaray ta sinthan minnidi daana. Enta un7ethiya ubbaa ta seerana.
JER 30:21 Enta kaalethanay enta giddofe keyana; enta haaranay enta giddofe dendana. Taani iya taw mata ehana; I taako shiiqana. Taani iya shiishonna de7ishin, minnidi taako shiiqanaw danda7ey oonee?” yaagees Goday.
JER 30:22 Hessa gisho, hinte ta ase gidana; taka hinte Xoosse gidana.
JER 30:23 Heko, Godaa hanqoy goteda dendees; shireti shireti wodhishe iitata huuphen wodhana.
JER 30:24 Goday ba wozanaa qofaa wursidi polana gakanaw eexiya iya hanqoy guye simmenna. Hessa sinthafe yaana wodetan hinte akeekana.
JER 31:1 “He wode taani Isra7eele zeretha ubbaas Xoosse gidana; entika ta ase gidana” yaagees Goday.
JER 31:2 “Mashshafe attida asay mela biittan ta sinthan saba demmana. Taani Isra7eele asaas shempo immanaw yaana.
JER 31:3 Taani entaw haaho bessafe qoncas; taani hintena merina siiquwan dosas; ta qadhiyan hintena taako shiishas.
JER 31:4 Geela7o Isra7eele, ta hintena zaarada keexana; hinteka keexetana. Neeni karaabuwa zaara oykada, ufayteysatara neeni yexananne durana.
JER 31:5 Samaare zumaa bolla woyne tokana; tokidaysati iya ayfiyan ufaytana.
JER 31:6 Efreema gezze biittan naageysati, ‘Haa yiite; Godaako, nu Xoossaako, pude Xiyoone boos’ yaagidi xeegiya wodey yaana” yaagees Goday.
JER 31:7 “Yayqooba asaas ufaysan yexite; kawotethata ubbaafe aadhiya Isra7eeles ililite. ‘Isra7eele asaape attidaysata ashsha’ yaagidi galata mazmure yexite.
JER 31:8 Taani enta pudeha bagga biittafe ehana; sa7aa gaxape ta enta shiishana. Qooqeti, wobbeti, wodetha maccasatinne iqethi oykida maccasati entara issife yaana; daro asay banta biitta simmana.
JER 31:9 Ta enta zaarada ehiya wode enti ufaysafe dendoysan yeekishenne woossishe yaana. Taani enta shaafa lanqiyara, enti dhubetonna giigida ogiyara kaalethana. Taani Isra7eeles aawa; Efreemi taw bayra na7a.
JER 31:10 “Hinteno, kawotethato, Godaa qaala si7idi, haaho bessan, yuushoy abban teqetida biittatan, ‘Isra7eele laallidaysi I enta shiishana; henthanchoy ba wudiya heemmeysada I enta heemmana’ yaagidi awaajite.
JER 31:11 Goday Yayqooba kochata wozana; I enta, entafe minneyisata kushepe ashshis.
JER 31:12 Enti yidi Xiyoone zuma bolla ufaysan yexana; enti, Goday immiya keehatethan, kathan, woynen, zayten, dorsaninne mehen ufaytana. Enti haathe loythidi ushshida atakilte bessa mela gidana; enti zaaridi azzanokona.
JER 31:13 He wode geela7oti ufaysan durana; panthatinne cimati ufaytana. Ta enta yeehuwa ufaysan laammana; ta enta minthethana; enta azzanuwa gisho enta ufaysana.
JER 31:14 Taani kahinetas daro kathi immana; ta asay ta keehatetha kaallana” yaagees Goday.
JER 31:15 “Yeehoynne zelelsi Rama kataman si7etis; Raheela ba naytas yeekasu; enti bayna gisho yeeho minthetho ixasu” yaagees Goday.
JER 31:16 “Yeehuwa aggidi, hinte afuthaa quchite. Hinte oothida oosuwas woyto hinte ekana; morke biittafe hinte nayti simmana.
JER 31:17 Hinte nayti banta biitta simmanaw de7iya gisho, hintew ufaysi de7ees” yaagees Goday.
JER 31:18 “Efreema kochata zuuzuntha ta si7as. Enti, ‘Neeni nuna wadhetiboonna wofaanoda wadhadasa; nuka keedida. Neeni Godaa, nu Xoossaa gidiya gisho nuna zaara; nuuni neeko simmana.
JER 31:19 Nu kase neepe haakidi bida; shin ha77i nu nagara paaxida. Ne nuna seerin, yeellatidi nu tiraa baqida. Nuuni nu na7atetha laytha nagaraa gisho, kawuyidanne yeellatida’ yaagidosona.
JER 31:20 “Efreemi taw tuma al7onne ta dosiya na7a gidennee? Taani iya sunthaa denthiya wode ubban iya hassayayis. Hessa gisho, ta wozanay iya laamotees; ta iyaw daro qadhetayis” yaagees Goday.
JER 31:21 “Hinte ogiyan malaata wothite; malaata mithi essite; hinte bida ogiya akeekite. Geela7o Isra7eele, simma; ne katamata gela.
JER 31:22 Hinteno, ammanoy bayna Isra7eeleto, awude gakanaw toylatetii? Goday sa7a bolla oorathaba oothana; hessika maccasi adde yuushon eqana” yaagees Goday.
JER 31:23 Ubbaafe Wolqaama Goday, Isra7eele Xoossay, haysada yaagees: “Taani Isra7eele asaa di7etethaafe zaarada ehiya wode Yihuda biittaninne iya katamatan enti, ‘Neno xillotethi aqiya bessaw, geeshsha deriyaw, Goday nena anjo’ yaagidi zaaridi odetana.
JER 31:24 Yihudaninne Yihudan de7iya katamatan asay daana; goshshanchotinne henthanchoti banta wudiyara yan daana.
JER 31:25 Taani daaburanchota gashtisana; qassi koshatidi gilqidaysata kalsana” yaagees Goday.
JER 31:26 He wode barkada ta yuushuwa xeellas; ta dhiskoy taw mal7o dhisko gidis.
JER 31:27 “Taani Isra7eeleninne Yihudan asenne mehe kunthiya wodey yaana.
JER 31:28 Enta shoddanaw, laallanaw, shira yegganaw, dhaysanawunne gado ehanaw dendidaysada enta zaarada gimbanawunne tokanaw dendana” yaagees Goday.
JER 31:29 “He wode asay, ‘Aawati qaw7e woyne ayfe min, nayta achay doccis’ yaagidi haasaya leemisoy attana.
JER 31:30 Shin issoy issoy ba nagaran hayqana; qaw7e woyne ayfe miya oodeska iya achay doccana” yaagees Goday.
JER 31:31 “Taani Isra7eeleranne Yihudara ooratha caaqo caaqana wodey yaana.
JER 31:32 He caaqoy ta enta Gibxefe kessanaw enta kushiya oykida wode enta mayzatara caaqida caaquwa mela gidenna. Ta entaw azina mela gida uttinka enti ta caaquwa menthidosona” yaagees Goday.
JER 31:33 “Shin taani he wodiyape guye Isra7eelera caaqana caaqoy haysa: taani ta higgiya enta guuggiyan wothana; enta wozanan xaafana. Taani enta Xoosse gidana; entika ta ase gidana.
JER 31:34 Hizape guye, asi ba laggiya woyko ba ishaa, ‘Godaa era’ yaagidi tamaarsenna. Guuthafe gita gakanaw ubbay tana erana. Taani enta naaquwa atto gaana; enta nagaraa zaarada qopike” yaagees Goday.
JER 31:35 Gallas poo7ana mela awa wothiday, qamma poo7ana mela ageenanne xoolinto kiittiday, abba qaathidi, beetay guummanaada oothey, iya sunthay Ubbaafe Wolqaama Godaa geeteteysi haysada yaagees.
JER 31:36 “Ha eqidi de7iya medhetetha higgey ta sinthafe shaaretiko, he wode Isra7eele kochay ta dere gideysi merinaw attana” yaagees Goday.
JER 31:37 “Bolla salota wadhanaw woyko garsa sa7aa baasoy eretanaw danda7iko, he wode ta Isra7eele zeretha ubbaa, enti oothida nagaraa gisho ta sinthafe diggana” yaagees Goday.
JER 31:38 “Hanaani7eela shako Gimbiyafe doomidi, Maazane Pengiya gakanaw Yerusalaame katamay ta katama gididi, keexetiya wodey yaana.
JER 31:39 He katamaa zaway wuloha baggafe bidi Gaareba zumanne Go7a yuushuwa gakanaw dalgana.
JER 31:40 Aha moogiyanne bido yeggiya zangaaraynne Qediroona Zangaarape qommora doloha baggara bidi, Para Penge maazaniya gakanaw de7iya biitta ubbay Godaas dummatidi, geeshshi gidana. Hizape guye, katamay merinaw shodetenna; laaletenna” yaagees Goday.
JER 32:1 Yihuda kawoy Sedeqiyaasi kawotida tammantho laythan, Babiloone kawoy Nabukadanaxoori kawotida tammanne hospuntho laythan Godaape ha qaalay Ermiyaasako yis.
JER 32:2 He wode Babiloone kawa olanchoti Yerusalaame teqidosona; nabey Ermiyaasi Yihuda kawo gadhon de7iya, naageysata dabaaban iya bolla gordetin de7ees.
JER 32:3 Yihuda kawoy Sedeqiyaasi iya haysada yaagidi qachidi wothis: “Ne ayis haysada yaagada tinbite oday? ‘Goday ha katamaa Babiloone kawa kushen aathidi immana; I iya oykana’ yaagada ayis oday.
JER 32:4 Yihuda kawoy Sedeqiyaasi Babiloone aadhidi imetana; I Babiloone kawa kushen gelana. Iya sinthan eqidi, iyara odetana; I ba ayfen iya be7ana.
JER 32:5 Nabukadanaxoori Sedeqiyaasa Babiloone efana; ta iyabaa be7ana gakanaw I yan daana. Neeni Babiloonetara oletanaw qopiko, hessi new hanenna” yaagees Goday.
JER 32:6 Ermiyaasi, “Godaa qaalay he wode taako haysada yaagidi yis” yaagis.
JER 32:7 “Ne aawa isha Saluma na7ay, Hanami7eeli neeko yidi, ‘Wozanaw maati de7iya mata dabboy nena gidiya gisho Anatoota kataman de7iya ta gadiya shamma’ yaagana.
JER 32:8 Goday gidaysada, ta aawa ishaa na7ay Hanami7eeli taako naageysata dabaaba yidi, ‘Wozanaw maati de7iya mata dabboy nena gidiya gisho, Biniyaame biittan Anatootan de7iya ta gadiya shamma’ yaagin, taani hessa odiday Godaa gideysa eras.
JER 32:9 “Anatoota kataman de7iya gadiya ta aawa ishaa na7aa Hanami7eelape shammas. Iya gatiya mizaanen likin, tammanne laapun bira santime gidis.
JER 32:10 Shama pirimaa markati de7iya bessan paramas; gordas; maatame iya bolla wothas; miishiya mizaanen likada iyaw immas.
JER 32:11 Hessafe guye, taani zal7iya hanota qoncisiya ashshagetidi attametida shama pirimaanne attametiboona shama pirimaa ekas.
JER 32:12 Ta aawa ishaa na7ay Hanami7eeli, shama pirimaa paramida markatinne naageysata dabaaban uttida Ayhudeti ubbay be7ishin, he shama pirimaa Mahiseya na7aa, Neera na7aa Baarokas immas.
JER 32:13 Enta sinthan ta Baaroka haysada yaagada kiittas:
JER 32:14 ‘Ubbaafe Wolqaama Goday, Isra7eele Xoossay, haysada yaagees: Daro wode gam7ana mela ha ashshagetidi attametida pirimaanne attametiboona pirimaa efada oton wotha.’
JER 32:15 Ubbaafe Wolqaama Goday, Isra7eele Xoossay, haysada yaagees: ha biittan asay zaaridi keethe, gadenne woyne tokiya bessi shammana” yaagees Goday.
JER 32:16 Taani Neera na7aa Baarokas shama pirimaa warqatiya immidaape guye, haysada yaagada woossas.
JER 32:17 “Abeeti Ubbaa Haariya Godaw, ne salotanne sa7aa ne gita wolqaaninne ne micetida kushen medhadasa. New danda7etonnabay baawa.
JER 32:18 Neeni ne siiquwa mukulu asaas bessaasa; shin aawata nagaraa enta nayta bolla zaarasa. Abeeti gitanne wolqaama Xoossaw, ne sunthay Ubbaafe Wolqaama Godaa geetetees.
JER 32:19 Ne halchoy gita; ne oothiya oosoy wolqaama. Asa oge ubbaa ne be7aasa; asa ubbaas iya ogiyadanne iya oosuwada zaarasa.
JER 32:20 “Ne Gibxen malaatanne mallata oothadasa; hachi gakanaw ha mallata Isra7eele asaa giddoninne hara kawotethata ubbaa giddon ooso aggabaaka. Hessafe dendoysan ne sunthay ubba bessan eretis.
JER 32:21 Neeni ne asaa Isra7eele Gibxefe malaataninne mallatan, ne mino qesiyan, ne micetida kushiyaninne gita dagaman kessadasa.
JER 32:22 Enta mayzatas ne immanaw caaqida biitta, maathinne eessi goggiya biitta entaw immadasa.
JER 32:23 Enti he biitta gelidi laattidosona. Shin enti new kiitetibookona; ne higgiya naagibookona; enti oothana mela ne kiitida ubbaa oothibookona. Hessa gisho, ne enta bolla ha gaduwa ubbaa ehadasa.
JER 32:24 “Babiloone asay katamaa oykanaw gimbiya yuushuwan biitta dooridi teqidosona. Olape, koshapenne boshape dendoysan katamay enta oliya Babiloone kushen aadhidi imetis. Ne ha77i be7eysada ne gidaba ubbay poletis.
JER 32:25 Abeeti Ubbaa Haariya Godaw, katamay Babiloone asaas imetanaw haniya wodeka ne tana, ‘Marka xeegada, miishen gadiya shamma’ gadasa” yaagada woossas.
JER 32:26 Hessafe guye, Godaa qaalay Ermiyaasako haysada yaagidi yis:
JER 32:27 “Taani Godaa, asa ubbaa Xoossaa. Taw danda7etonnabay de7ii?” yaagis.
JER 32:28 Taani ha katamaa Babiloone asaasinne Babiloone kawa Nabukadanaxooras aathada immana; enti iya oykana.
JER 32:29 Ha katama teqida Babiloone asay yidi, katamaa taman xuuggana; pooqiya bolla Ba7aale eeqas ixaane cuyisishenne hara xoossatas ushsha yarsho gussishe tana hanqethida asay de7iya keethatika xuugetana.
JER 32:30 “Isra7eeleynne Yihudi banta na7atethafe doomidi, ta sinthan iitabaape attishin, lo77oba, oothibookona; enti banta kushen oothida oosuwan tana hanqethidosona.
JER 32:31 Ha katamay keexetida wodepe hachi gakanaw, ha katamaa asay tana daro hanqethida gisho ha katamaa ta sinthafe dhaysana.
JER 32:32 Isra7eeleynne Yihudi, enta kawotinne halaqati, enta kahinetine nabeti oothida iita ooso ubban tana yiloyidosona.
JER 32:33 Enti banta som7uwa gidonashin, banta zokuwa taw zaaridosona. Ta enta zaara zaarada tamaarsinka, enti si7ibookona woyko seera ekibookona.
JER 32:34 Enti ixetida banta eeqata ta sunthay xeegetida keethan essidi tunisidosona.
JER 32:35 Enti banta adde naytanne macca nayta Moloka eeqas yarshanaw Hinooma Zangaaran Ba7aale eeqas yarsho dhoqa bessata giigisidosona. Enti hessa oothana mela ta kiittabike; Yihuda asay nagara oothana mela hessa enti oothana gada ta naagabike” yaagis.
JER 32:36 “Neeni, ‘Ha katamay olan, koshaninne boshan Babiloone kawa kushen aadhidi imetana’ yaagida ha katamaaba Goday Isra7eele Xoossay haysada yaagees.
JER 32:37 Ta suulliya hanquwaninne gita sheniyan enta laallida biitta ubbaafe shiishada ha bessaa zaara ehada, enti sarotethan daana mela oothana.
JER 32:38 Enti ta ase gidana; ta enta Xoosse gidana.
JER 32:39 Enti taw merinaw yayyana mela, ta entaw issi wozananne issi oge immana; hessi entawunne entafe guye enta naytas lo77o gidana.
JER 32:40 Taani entara merinaw caaqana; he caaquwan ta entaw lo77oba ooso aggike. Enti tana aggidi guye simmonna mela enti taw yayyana mela oothana.
JER 32:41 Ta entaw lo77oba ootheysi tana ufaysees; ta kumetha wozanapenne ta kumetha shempuwafe tuma ha biittan enta tokana” yaagees Goday.
JER 32:42 “Ta ha asaa bolla iita bosha ubbaa ehidaysada ta entaw immana gida lo77oba ubbaa immana.
JER 32:43 Hinte, ‘Ha biittay asaynne mehey bayna baysa biitta gidana; I Babiloonetas imetis’ yaagida biittan asay zaaridi gade shammana.
JER 32:44 Ta enta zaarada ehiya gisho, asay gade shammana; marka sinthan zal7iya hanota qoncisiya pirima paramidi, maatame wothana. Haysi ubbay Biniyaame biittan, Yerusalaame yuushuwan de7iya heeratan, Yihuda katamatan, derey dariya katamatan, gadha katamataninne Negebe mela biittan de7iya katamata ubban hanana” yaagees Goday.
JER 33:1 Ermiyaasi buroo naageysata dabaaban qashetidi de7ishin, Godaa qaalay zaaridi iyako yis.
JER 33:2 Sa7aa medhida Goday, giigisidi iya bessan wothida Goday, iya sunthay Godaa geeteteysi haysada yaagees:
JER 33:3 “Tana xeega; ta new koyana; ne eronna gitabaanne wolqaamaba ta new qoncisana.”
JER 33:4 Goday, Isra7eele Xoossay, Babiloone olaa, biitta doorethaanne, di7etetha teqana mela dirsa gimbiya minthanaw laallida ha katama keethatabaanne Yihuda kawota gadhotaba haysada yaagees.
JER 33:5 Enta iitatetha gaason, ta ha katamaa bollafe ta som7uwa denthida gisho, hintera oletanaw taani ta hanquwan shocana asaa ahan ha bessan kunthanaw Babilooneti gelana.
JER 33:6 Gidoshin, “ta ha katamaanne iyan de7iya asaa zaarada pathana; enta payyatetha zaarana; saronne wopa duussu entaw immana.
JER 33:7 Taani Yihuda asaanne Isra7eele asaa di7ope zaarana; enti kase de7idaysada oothada enta gimbana.
JER 33:8 Enti tana oothida nagara ubbaafe ta enta geeshshana; enti naaquwanne enta makalla ubbaa atto gaana.
JER 33:9 Yerusalaame katamay taw ufaysi, bonchonne galata sa7an de7iya kawotethata ubbaa sinthan ehana. Taani Yerusalaame asaas oothiya lo77obaanne katamaas ehiya duretethaanne sarotethaa si7idi, kawotethati ubbay yashshan kokorana” yaagees Goday.
JER 33:10 “Hinte, ‘Asinne mehey bayna baysa’ gida ha bessan, asinne mehey bayna Yihuda katamataninne Yerusalaame ogetan ufaysinne ililsa girsi si7etana.
JER 33:11 Yethinne Yaagano girsi, ufaysa girsi, hessadaka, xoossa keethi galata yarsho ehidi, “I keeha gidiya gisho, iya maarotethay merinaasa gidiya gisho, Ubbaafe Wolqaama Godaa galatite. yaagidi yexishe xoossa keethi galata yarsho ekidi yaa asaa girsay si7etana. Taan enta di7ope zaarana; enti kase de7idaysada oothada wothana” yaagees Goday.
JER 33:12 “Ha asaynne mehey bayna baysa biittaninne iyan de7iya katamatan henthanchoti banta dorsa wudiya heemmiya gadey daana.
JER 33:13 Gezze katamatan, gadha katamatan, Negebe mela biittan de7iya katamatan, Biniyaame biittan, Yerusalaame yuushuwan de7iya bessataninne Yihuda katamatan henthanchoti banta dorsata zaaridi taybana” yaagees Ubbaafe Wolqaama Goday.
JER 33:14 “Taani Isra7eele asaasinne Yihuda asaas gelida qaala poliya wodey yaana.
JER 33:15 He wode taani Dawita kochaafe issi xillo Aaca denthana; I suure pirda pirdana; xillo oothana.
JER 33:16 He wode Yihuda asay attana; Yerusalaame asay wopu gidi de7ana. Ha katamay, ‘Goday nu Xillotethaa’ geetetidi xeegetana.
JER 33:17 Dawita kochaafe Isra7eele araatan uttiya asi dhayenna.
JER 33:18 Hessadaka, xuussa yarsho, katha yarshonne hara yarsho yarshanaw Leewe kochaafe kahine gidiya asi merinaw ta sinthafe dhayenna” yaagees Goday.
JER 33:19 “Godaa qaalay Ermiyaasako haysada yaagidi yis.
JER 33:20 Gallasasinne qammas ta wothida wogaa menthidi, gallasinne qammi banta wodiyan simeretonna mela oothidi ta caaquwa laammanaw hinte danda7iko,
JER 33:21 iya kochaafe araatan uttiya asi dhayonnaada, ta aylliya Dawitara caaqida caaquwa laammana; taw oothiya, Leewe koche gidida kahinetara caaqida caaquwa laammana.
JER 33:22 Taani ta aylliya Dawita kochaanne ta sinthan oothiya Leewe kocha taybanaw danda7etonna salo xoolintotadanne makanaw danda7etonna abba shafiyada darsana” yaagees Goday.
JER 33:23 Godaa qaalay qassika Ermiyaasako haysada yaagidi yis.
JER 33:24 “Ha asay, ‘Goday ba doorida nam7u kawotethata, Isra7eelenne Yihuda aggaagis’ yaagidi odeteysa ne akeekabikii? Enti ta asaa kadhidi, bana danda7ida kawotethi gidokona gidi qopoosona.
JER 33:25 Taani gallasaranne qammara caaqida caaquwanne salonne sa7a higgiya minthaboonnaba gidiko,
JER 33:26 Yayqooba zerethaanne ta aylliya Dawita kochaa aggaagana. Iya naytape Abrahaame, Yisaaqanne Yayqooba kochata bolla kawothanaw Dawita kochaa doorike. Taani ta asaa maarana; enta shaluwa zaarana” yaagees Goday.
JER 34:1 Babiloone kawoy Nabukadanaxoori, iya olanchoti ubbaynne I haariya kawotethatan de7iya asa ubbay, Yerusalaamenne Yerusalaame yuushuwan de7iya katamata ubbaa oliya wode, ha qaalay Godaape Ermiyaasako yis:
JER 34:2 Goday Isra7eele Xoossay haysada yaagis; “Bada Yihuda kawa Sedeqiyaasako haysada yaaga: ‘Taani ha katamaa Babiloone kawa kushen aathada immana; I katamaa taman xuuggana.
JER 34:3 Neeni iya kushepe kessa ekaka; neeni oyketana; iyaw aadhada imetana. Neeni ne ayfen Babiloone kawa be7ana; ika neera odetana. Neeni Babiloone biitta baana’ yaagees Goday.
JER 34:4 “Gidoshin, Yihuda kawaw Sedeqiyaasa, Goday giyaba si7a. Neeni olan hayqaka.
JER 34:5 Ne saro hayqana. Neepe kase de7ida kawota bonchuwas, ne mayzatas ixaane cuyisidaysada, asay ne bonchuwas ixaane cuyisana. Woo! nu kawaw, yaagidi new yeekana. Taani Goday haysa odayis” yaagees.
JER 34:6 Hessafe guye, nabey Ermiyaasi ha tinbitiya Yihuda kawa Sedeqiyaasas Yerusalaamen odis.
JER 34:7 He wode Babiloone olanchoti Yerusalaame katamaanne Yihudan attida Laakisonne Azeeqa katamata olidosona. Yihudan attida gimbetida katamati enta xalaala.
JER 34:8 Kawoy Sedeqiyaasi aylleta la77a kessiya awaajuwa awaajanaw Yerusalaamen de7iya asa ubbaara caaqidaape guye, Godaa qaalay Ermiyaasako haysada yaagidi yis:
JER 34:9 He awaajoy, issi issi Ibraawe asi addenne macca aylle aylletethafe la77a kesso. Oonika Ayhude asi gidida ba ishaa aylle oothofo.
JER 34:10 Hessa gisho, asaynne halaqati ubbay caaqida caaquwan banta addenne macca aylleta aylletethafe la77a kessanawunne zaaridi aylletethan haaronna agganaw giigidi enta aylletethafe la77a kessidosona.
JER 34:11 Shin enti banta qofaa laammidi, aylletethafe la77a kessida banta addenne macca aylleta zaaridi haaridosona.
JER 34:12 Hessafe guye, Godaa qaalay Ermiyaasako yaagis.
JER 34:13 Goday, Isra7eele Xoossay haysada yaagees: “Taani hinte mayzata Gibxefe, aylletetha biittafe kessida wode entara haysada yaagada caaqas.
JER 34:14 He caaquwa maaran, ‘Ibraawe aylley de7iya ase ubbay, aylleta usupun laythi oosisidi, laapuntha laythan aylletethafe kessidi yeddite’ yaagada kiittas. Shin hinte mayzati ta odiyaba si7onna ixidosona; taw kiitetibookona.
JER 34:15 Hinteka mata wodepe kase hinte nagaraape simmidi, aylleta la77a kessanaw awaajideta; ta sinthan suureba oothideta. Qassi hessa oothanaw ta sinthan, ta sunthay xeegetiya ta keethan caaqideta.
JER 34:16 Shin hinte, hinte qofaa laammidi, ta sunthaa tunisideta. Enti koyida bessaa baana mela la77a kessida addenne macca aylleta zaaridi haarideta.”
JER 34:17 Hessa gisho, Goday, “Hinte taw kiitetonna ixidi, hinte ishaa woyko hinte shooruwa aylletethafe la77a kessiya awaajuwa awaajibeketa. Hinte bolla oli, boshinne koshi keyana mela ta awaajayis. Ta hintena sa7a bolla de7iya kawotethatas dagama oothana.
JER 34:18 Ta caaquwa menthida asaa, ta sinthan caaquwa naagonna ixida asaa, shukidi, nam7u bessan shaakidi, iya giddora aadhida maraa mela ta enta oothana.
JER 34:19 He asay Yihuda halaqata, Yerusalaame halaqata, biitta ayseysata, kahinetanne nam7u bessan shaakida maraa ashuwa giddora aadhida asa ubbaa.
JER 34:20 Ta enta, enta morketa kusheninne enta wodhanaw koyiya asa kushen aathada immana; enta ahay salo kafotasinne sa7a do7atas kathi gidana.
JER 34:21 “Taani Yihuda kawa Sedeqiyaasanne iya halaqata, enta morketa kushen, enta wodhanaw koyeyisata kusheninne hintena oleysa aggida Babiloone olanchota kushen aathada immana.
JER 34:22 Taani Babiloone olanchota kiittin; enti ha katama simmana. Enti ha katamaa olana, di7ananne taman xuuggana. Yihudan de7iya katamata asi doonna baysa bessi oothana” yaagees Goday.
JER 35:1 Iyosyaasa na7aa Yihuda kawa Iyo7aqeema laythan, Godaa qaalay Ermiyaasako haysada yaagidi yis.
JER 35:2 “Rakaaba yara gidida asaako bada, entara odetada, Xoossa keetha kifiletape issuwa giddo gelsada woyne ushsha entaw imma” yaagis.
JER 35:3 Taani bada, Kabasa na7aa na7aa, Ermiyaasa na7aa Ya7izaana, iya ishatanne iya adde nayta ubbaa, Rakaaba yaraa ubbaa ekada,
JER 35:4 xoossa keethi ehas. Enta, Yigidaala na7aa, Xoossa asi gidida Hanaana nayta kifile gelsas. He kifiley, pengiya naagiya Saluma na7aa Ma7iseya kifiliyape bolla baggara, halaqata kifiliya matan de7ees.
JER 35:5 Hessafe guye, taani Rakaaba yarata sinthan woyne ushshay kumida xuggatanne xuu7ata wothada, “Woyne ushsha uyite” yaagas.
JER 35:6 Shin enti zaaridi, “Nu woyne ushshu uyoko; nu mayzay Rakaaba na7ay Yoonadaabi nuuko, ‘Hintenne hinte nayti woyne ushshu merinaw uyopite.
JER 35:7 Keethe keexofite; goshshe goyopite; woyne tokofite. Dunkaane giddon de7ite; hinte adussa laythi ha biittan daana’ yaagis.
JER 35:8 Nu mayzay Rakaaba na7ay Yoonadaabi nuna kiitida ubbaa kiitetida. Nuuni woyko nu macheti woyko nu adde nayti woyko nu macca nayti nu de7o laytha ubban woyne ushshu uyibooko.
JER 35:9 Duussa keethi keexibooko; woyne gade woyko goshshi nuus baawa.
JER 35:10 Nu dunkaanen de7ida; nu mayzay Yoonadaabi kiitida ubbaa kiitetida.
JER 35:11 Shin Babiloone kawoy Nabukadanaxoori nu biitta bolla dendida wode, ‘Babiloonenne Soore olanchotape attanaw, Yerusalaame boos’ yaagida. Ha77i nu Yerusalaamen de7ey hessasa” yaagidosona.
JER 35:12 Hessafe guye, Goday Ermiyaasako yaagis.
JER 35:13 Ubbaafe Wolqaama Goday, Isra7eele Xoossay haysada yaagees. “Yihuda asaakonne Yerusalaame asaako bada haysada yaaga; ‘Ta qaala naaganaw haysafe tamaareketi.’
JER 35:14 Rakaaba na7ay Yoonadaabi ba adde nayta woyne ushshu uyonnaada kiittida kiitaa naagidosona. Enti banta mayza kiitaa naagidi hachi gakanaw woyne ushshu uyokona. Taani hintew ubba wode odayis; shin hinte tana si7ibeeketa.
JER 35:15 Taani zaarada zaarada nabeta, ta aylleta hinteko yeddas; enti, ‘Hinte ubbay hinte iita ogiyape simmite; hinte oosuwa loythite; hara xoossata goyinnofite; entaw oothopite. He wode, ta hintewunne hinte mayzatas immida biittan hinte daana’ yaagidosona. Shin hinte tana si7anaw hinte haythaa taako zaaribeeketa.
JER 35:16 Rakaaba na7aa Yoonadaabe kochati enta mayzay enta kiitida kiita oothidosona; shin ha asay taw kiitetibeenna yaaga” yaagees Goday.
JER 35:17 “Hessa gisho, Goday, Ubbaafe Wolqaama Goday, Isra7eele Xoossay haysada yaagees. ‘Si7ite, ta Yihuda asaa bollanne Yerusalaamen de7eyisata bolla ehana gida iitabaa ehana. Ta entaw odin, si7onna ixidosona; ta enta xeegin koyonna ixidosona’ ” yaagees.
JER 35:18 Hessafe guye, Ermiyaasi Rakaaba yaratako, “Ubbaafe Wolqaama Goday, Isra7eele Xoossay hintena haysada yaagees: ‘Hinte, hinte mayza Yoonadaabas kiitetida gisho, iya wogaa kaallida gishonne I kiitida ubbaa oothida gisho,
JER 35:19 Rakaaba na7ay Yoonadaabi, taw oothiya adde asi awudeka dhayenna’ ” yaagees.
JER 36:1 Iyosyaasa na7ay Yihuda kawoy Iyo7aqeemi kawotida oyddantho laythan, Goday Ermiyaasako haysada yaagis:
JER 36:2 “Issi xaatha maxaafaa ekada, Iyosyaasa wode taani new odo doomida koyro gallasape doomada, hachi gakanaw Isra7eele bolla, Yihuda bollanne hara kawotethata bolla taani odida qaala ubbaa xaafa.
JER 36:3 Ta Yihuda asaa bolla ehana gada halchida bosha ubbaa si7idi, ooni eri, enti banta iita oosuwape simmana; ta enta naaquwanne enta nagaraa atto gaana” yaagis.
JER 36:4 Hessa gisho, Ermiyaasi Neera na7aa Baaroka xeegidi, Goday iyaw odidaba ubbaa Baarokas odin, I xaatha maxaafan xaafis.
JER 36:5 Hessafe guye, Ermiyaasi Baarokako, “Taani qasho keethan de7iya gisho, xoossa keethi gelanaw danda7ike.
JER 36:6 Hessa gisho, ne xooma gallas xoossa keethi bada, ta odin, ne xaatha maxaafan xaafida Godaa qaala entaw nabbaba; banta katamatape yida Yihuda asa ubbaas nabbaba.
JER 36:7 Ha asaa bolla Goday awaajida hanqoy gita gidiya gisho, ooni eri, enti banta iita oosuwape simmidi, Godaa woossana” yaagis.
JER 36:8 Neera na7ay Baaroki nabey Ermiyaasi kiittidaysada xoossa keethan Godaa qaala ubbaa nabbabis.
JER 36:9 Iyosyaasa na7ay Yihuda kawoy Iyo7aqeemi kawotida ichashantho laythan, uddufuntho ageenan, Yerusalaamen de7iya asaasinne Yihuda katamatape yida asa ubbay Godaa sinthan xoomana mela awaajidosona.
JER 36:10 Baaroki Xoossa keethan, qommo bagga dabaaban, Ooratha Penge geetetiya bessan, xaafiya Safaana na7aa, Gamaara kifiliyan eqidi, Ermiyaasa qaalay xaafetida xaatha maxaafa asa ubbaas nabbabis.
JER 36:11 Safaana na7aa na7ay, Gamaara na7ay Mikayi maxaafape Godaa qaala Baaroki nabbabishin si7ida wode,
JER 36:12 kawo gadhon xaafey uttiya kifiliya bis. I biya wode, xaafey Elishami, Shamaya na7ay Dali, Akboora na7ay Elnaatani, Safaana na7ay Gamaara, Hananiya na7ay Xidiqenne hara halaqati yan uttidosona.
JER 36:13 Baaroki asas maxaafape nabbabishin si7ida qaala ubbaa Mikayi entako odis.
JER 36:14 Halaqati Naatana na7aa Yihuda Baarokako kiittidi, “Asaas neeni nabbabida maxaafaa ekada haa ya” yaagidosona. (Naatani Salama na7a; Salami Kuusa na7a.) Baaroki maxaafaa ekidi, entako yis.
JER 36:15 Entika iya, “Ane uttada, nuus maxaafaa nabbaba” yaagidosona. Yaagin Baaroki maxaafaa nabbabis.
JER 36:16 I nabbabida qaala ubbaa si7idi yayyidosona, issoy issuwa xeellidi, Baaroka, “Ha qaala ubbaa nuuni kawas odanaw koshshees” yaagidosona.
JER 36:17 Qassika zaaridi, “Neeni ha qaala ubbaa waatada xaafidaako nuus oda. Haysa new Ermiyaasi odin xaafadii?” yaagidosona.
JER 36:18 Baaroki, “Ee, ha qaala ubbaa Ermiyaasi ba doonape taw odis; taani qalamen ha xaatha maxaafan xaafas” yaagis.
JER 36:19 Enti Baaroka, “Neeninne Ermiyaasi bidi qosetite; hinte de7iya bessaa oonika eropo” yaagidosona.
JER 36:20 Halaqati maxaafa xaafiya Elishama kifilen wothidaape guye, kawoy de7iya dabaaba bidi, hanidaba ubbaa kawas odidosona.
JER 36:21 He maxaafaa ehana mela, kawoy Yihuda kiittis; xaatha maxaafaa Elishama kifilepe ehidi, kawasinne iya yuushuwan eqida halaqatas nabbabis.
JER 36:22 Uddufuntho ageenan sa7i balgo gidiya gisho, kawoy balguwa aathiya keethan uttis. He wode kawa sinthan de7iya coociyan Tami eexees.
JER 36:23 Yihudi heedzu woyko oyddu bessata nabbabidaape guye, kawoy he bessata xaatha maxaafape mashshan qanxi qanxidi, taman yeggis; hessada oothidi, maxaafa kumethi xuuggis.
JER 36:24 Ha qaala si7idi kawoynne iyara oothiya moorinnati ubbay ayinne babibookona; woyko kayotidi, banta ma7uwa peedhibokonna.
JER 36:25 Hari attoshin Elnaatani, Dalaynne Gamaari kawoy he maxaafaa xuuggonna mela woossinka, enta woosa si7onna ixis.
JER 36:26 Kawa na7a Yirahima7eela, Aziri7eela na7aa Sarayanne Abdi7eela na7aa Selema, xaafiya Baarokanne nabiya Ermiyaasa oykana mela kawoy kiittis. Shin Goday enta qottis.
JER 36:27 Ermiyaasi odin, Baaroki xaafida maxaafaa kawoy xuuggidi simmin, Godaa qaalay Ermiyaasako haysada yaagishe yis:
JER 36:28 “Hara xaatha maxaafaa ekada, Yihuda kawoy Iyo7aqeemi xuuggida xaatha maxaafan de7iya qaala ubbaa zaarada xaafa.
JER 36:29 Qassi Yihuda kawa Iyo7aqeema haysada yaaga: Goday haysada yaagees; Neeni, ‘Babiloone kawoy yidi, ha biitta dhaysana; qassi yan de7iya asaanne mehiya wursana’ gada ayis xaafadii?” yaagada maxaafaa xuuggadasa.
JER 36:30 “Hessa gisho, Goday Yihuda kawa Iyo7aqeema haysada yaagees: Dawita araatan uttiya kochay new kumthi deenna. Ne ahay coo holetidi, gallasi awa suulos, qamma meegon shocetana.
JER 36:31 Hinte nagaraa gisho nena, ne kochaanne neera oothiya moorinnata ubbaa seerana. Enti taani odidaba si7onna ixida gisho, ta gida iitaba ubbay hinte bolla, Yihudaninne Yerusalaamen de7iya asa ubba bolla ehana” yaagees.
JER 36:32 Hessafe guye, Ermiyaasi hara xaatha maxaafaa ekidi, Neera na7aa xaafiya Baarokas immis. Baaroki Yihuda kawoy Iyo7aqeemi taman xuuggida xaatha maxaafaa qaala ubbaa Ermiyaasi iyaw doonan odin xaafis. Qassi Ermiyaasi hessa daaniya hara qaalaka gujin, ubbaka Baaroki xaafis.
JER 37:1 Babiloone kawoy Nabukadanaxoori Iyo7aqeema na7aa Ikoniyaana bessan Iyosyaasa na7aa Sedeqiyaasa Yihuda biittan kawothis.
JER 37:2 Sedeqiyaasi, iyara oothiya halaqatinne biittan de7iya asa ubbay, Goday nabiya Ermiyaasa baggara odida qaalas kiitetibookonna.
JER 37:3 Shin kawoy Sedeqiyaasi Selema na7aa Yokaalanne Ma7iseya na7aa kahiniya Sofoniyaasa, “Hayyana, nu gisho Godaa nu Xoossaa woossa” yaagidi Ermiyaasako kiittis.
JER 37:4 He wode Ermiyaasi qasho keethi geliboonna gisho, asaa giddon simeretees.
JER 37:5 Gibxe kawa olanchoti, Gibxefe keydaysa Yerusalaame teqida Babiloone olanchoti si7ida wode Yerusalaame yeddidi keyidosona.
JER 37:6 Hessafe guye, Godaa qaalay nabiya Ermiyaasako yis.
JER 37:7 “Goday Isra7eele Xoossay haysada yaagees: tana oychana mela hintena taako kiitida Yihuda kawas haysada yaagite; ‘Hintena maaddanaw yida Gibxe kawa olanchoti banta biitta simmidi baana.
JER 37:8 Qassi Babiloone olanchoti simmidi yaana; ha katamaa olidi oykana; taman iya xuuggana’ yaagite.
JER 37:9 “Babiloone olanchoti simmidi yuussay attonna gisho ‘Babiloone olanchoti yookona’ gidi hintena hintew cimmofite.
JER 37:10 Hinte Babiloone olanchota kumethi xooniyakoka, madunxidi, dunkaanen zin7idaysati dendidi, ha katamaa taman xuuggana” yaagees Goday.
JER 37:11 Gibxe kawa olanchoti matida gisho, Babiloone olanchoti Yerusalaame aggidi banta de7iya bessaa guye simmidosona.
JER 37:12 He wode Ermiyaasi ba gisho biitta ekanaw Biniyaame biitta baanaw Yerusalaamepe dendis.
JER 37:13 Gidoshin, I bidi, Biniyaame Penge gakiya wode pengiya naageysatape issoy, Hananiya na7ay, Saleema na7a Yeera, “Ne nuna kaddada Babiloone baasa gidikii?” yaagidi oykis.
JER 37:14 Ermiyaasi zaaridi, “Ne geysa mela ta Babiloone biya asi gidike” yaagis. Shin Yeerey I geysa si7onna ixidi Ermiyaasa oykidi halaqatako efis.
JER 37:15 Halaqati daro hanqetidi, Ermiyaasa wadhi, enti qasho keethi oothida, xaafiya Yoonataana keethan iya qachidosona.
JER 37:16 Ermiyaasi yan biitta garsan de7iya kifiliyan daro wode gam7is.
JER 37:17 Hessafe guye, kawoy Sedeqiyaasi ase kiittidi, Ermiyaasa ba kawo gadho xeegisidi, dumma qosan iya, “Goday new odidabay de7ii?” yaagidi oychis. Ermiyaasi zaaridi, “Ee de7ees; neeni Babiloone kawa kushen aadhada imetana” yaagis
JER 37:18 Qassika Ermiyaasi kawa Sedeqiyaasa haysada yaagidi oychis: “Tana hinte qasho keethan yegganaw ta ne bolla, new oothiya halaqata bolla woyko ha asaa bolla ay bala oothadina?
JER 37:19 Yaatin, ‘Babiloone kawoy yidi hintenanne hinte biitta olenna’ yaagidi new tinbite odida ne nabeti ha77i awun de7oona?
JER 37:20 Ta godaw, kawaw, si7a; ta oychiya issiba ne polana mela nena woossayis. Ta he bessan hayqonna mela iya keethay qasho keethi gidida xaafiya Yoonataana soo tana guye zaaropa” yaagis.
JER 37:21 Kawoy Sedeqiyaasi naageysata dabaaban Ermiyaasa daana mela kiittis. Yan I de7ishin katamape daabboy dhayana gakanaw gallas gallas issi issi daabbo uukiya bessaafe ehidi iyaw immoosona. Hessa gisho, Ermiyaasa kawa zaban gam7is.
JER 38:1 Mataana na7ay Safaaxi, Phaskora na7ay Godoliya, Selema na7ay Yokaalinne Malkaya na7ay Phaskori Ermiyaasi asa ubbaas odida qaala si7idosona.
JER 38:2 Ermiyaasi, “Ha kataman attiya oonika olan, koshaninne boshan hayqana. Shin Babiloonetas ba kushe immiya oonika hayqenna; attana; de7on daana.
JER 38:3 Yerusalaame katamay Babiloone kawa olanchota kushen aadhidi imetana; entika iya polo di77ana” yaagees Goday.
JER 38:4 Hessafe guye, halaqati kawako bidi, “Ha addey hayqanaw koshshees; haysa mela oda odidi, ha kataman de7iya olanchotinne asa ubbay shuggana mela oothis. I ase qohiyaba amotteesipe attishin, saroba amottenna” yaagidosona.
JER 38:5 Kawoy Sedeqiyaasi zaaridi, “Hinte iya bolla oothana gidaba ta hintena digganaw danda7ike” yaagis.
JER 38:6 Enti Ermiyaasa kawo gadho dabaaban de7iya, kawa na7aa Malkaya haatha ollan, wodoron duge yeggidosona. He wode he ollan silimope attishin, haathi baawa; Ermiyaasi he silimuwa giddo gelis.
JER 38:7 Shin Tophe ase gidida, kawo morinay, Abemeleke geetetiya addey Ermiyaasi ollan yegetidaysa si7is. He wode kawoy Biniyaame Penge pirda oyden uttis.
JER 38:8 Ebed-Meleki kawako bidi, haysada yaagis;
JER 38:9 “Ta godaw kawaw, ha asati gita iitabaa oothidosona; enti nabiya Ermiyaasa haatha ollan yeggidosona. Qassi kataman qumi bayna gisho I yan koshan hayqana” yaagis.
JER 38:10 Kawoy zaaridi, Tophe addey Ebed-Melekako, “Hastamu asi neera eka bada, Ermiyaasi hayqonna de7ishin haatha ollafe kessite” yaagis.
JER 38:11 Ebed-Meleki ase ekidi, bidi kawo gadhon shalo minjiya keethaafe garsa baggara de7iya kifiliya gelidi, gal7a ma7onne curqa ekis. He curqa wodoruwa xeeran qachidi, Ermiyaasas duge olla giddo yeddis.
JER 38:12 Tophe addey Ebed-Meleki Ermiyaasa xeegidi, “Ha curqa ma7uwa wodoruwape garsara ne shophiyan wotha” yaagis. Ermiyaasi I gidaysada oothis.
JER 38:13 Enti wodoruwara goochidi, Ermiyaasa ollaafe kessidi, naageysata keethi gelsidi gordidosona.
JER 38:14 Hessafe guye, kawoy Sedeqiyaasi Ermiyaasa kiittidi ehisidi, xoossa keethi geliya heedzantho pengiya matan, “Ta nena issiba oychana; ne taape qosopa” yaagis.
JER 38:15 Ermiyaasi zaaridi, “Ta odiko, ne tana wodhikii? Ta zorin ne si7aka” yaagis.
JER 38:16 Kawoy Sedeqiyaasi, “De7o Xoossay eriya mela, ta nena wodhike; nena wodhanaw koyeysatas aathada immike” yaagidi qosan Ermiyaasas caaqis.
JER 38:17 Ermiyaasi zaaridi, “Goday, Ubbaafe Wolqaama Xoossay, Isra7eele Xoossay haysada yaagees: ‘Babiloone kawa halaqatas ne kushe immiko, ne paxa attana; ha katamay taman xuugetenna; nenne ne keetha asay de7on daana.
JER 38:18 Shin ne entaw kushe immonna ixiko, ha katamay Babiloonetas aadhidi imetana; enti iya xuuggana; ne entafe kessa ekaka’ ” yaagis.
JER 38:19 Kawoy Sedeqiyaasi, “Ta yayyey ha biitta kaddidi, Babiloone bida Ayhudetasa. Babilooneti tana enta kushen aathidi immin, Ayhudeti tana kaa7ana” yaagidi zaaris.
JER 38:20 Ermiyaasi, “Aykoy baawa! Enti nena entaw aathidi immokona. Ta odiya Godaa qaalas hayyana kiiteta. Hessi new lo77o gidana; ne paxa attana.
JER 38:21 Shin ne kushe immonna ixiko, Goday tana bessida qoncethi de7ees.
JER 38:22 Hessika, Yihuda kawo gadhon attida maccasati ubbay di7etidi, Babiloone halaqatako baana. Enti neeko, ‘Ne mata laggeti nena balethidosona; enti nena xoonidosona. Shin ha77i ne tohoy silimo giddo gelin, he laggeti nena yeggidi bidosona’ yaagana.
JER 38:23 Ne machetinne ne nayti ubbay Babiloone di7etidi baana. Ne enta kushepe kessa ekaka. Babiloone kawoy nena oykana. Ha katamay taman xuugetana” yaagis.
JER 38:24 Sedeqiyaasi zaaridi, “Haysa ne taw odidaysa asas odonna ixiko ne hayqaka.
JER 38:25 Halaqati ta neera odetidaysa si7idi, ‘Neera kawara ay odetidaako nuus oda. Ne nuus qottonna ixiko, nu nena wodhoko’ yaagidi oychana.
JER 38:26 Neeni, ‘Ta yan hayqonna mela tana zaarada qasho keethi gidida Yoonataana soo yeddonna mela kawa woossas’ ” gada zara yaaga.
JER 38:27 Hessafe guye, halaqati ubbay Ermiyaasako yidi, he oysha oychidosona. Kawoy iya kiittidaysada entaw odis; Ermiyaasara kawara haasayishin si7ida asi bayna gisho enti si77i gidoosona.
JER 38:28 Yerusalaamey oyketana wodey gakanaw, Ermiyaasi naageysata dabaaban gordetidi gam7is.
JER 39:1 Sedeqiyaasi Yihudan kawotida uddufuntho laythan, tammantha ageenan, Babiloone kawoy Nabukadanaxoorinne iya olanchoti ubbay yidi, Yerusalaame teqidosona.
JER 39:2 Sedeqiyaasi kawotida tammanne issintho laythan, oyddantho ageenan, uddufuntho gallasan Babiloone olanchoti katama gimbiya menthidosona.
JER 39:3 He wode Babiloone kawa halaqati, Ergaal-Sarasira, Samgaar-Nabo, Sarsakimanne Ergaal-Sarasira geeteteysati hara daro halaqatara issife yidi Giddo Penge geetetiya bessan uttidosona.
JER 39:4 Yihuda kawoy Sedeqiyaasinne iya olanchoti ubbay Babiloone olanchota be7ida wode baqatidosona. Qamma katamaape keyidi, kawa atakilte bessaa efiya ogiyara, nam7u dirsa gimbeta issife gathiya pengiyara keyidi Yordaanose Zangaarako simmidi bidosona.
JER 39:5 Gidoshin, Babiloone olanchoti enta yedethidi, Iyaarko demba gathishe, Sedeqiyaasa oykidosona. Hamaata biittan, Irbila kataman de7iya kawa Nabukadanaxoorako efidosona. Kawoy Nabukadanaxoori yan Sedeqiyaasa bolla pirdis.
JER 39:6 Babiloone kawoy, Sedeqiyaasa ade nayta iya sinthan, Irbila kataman wodhis; qassi Yihuda halaqata ubbaa wodhis.
JER 39:7 Sedeqiyaasa ayfeta wooci kessidi, iya Babiloone biitta efanaw santhalaatan qachis.
JER 39:8 Babiloone olanchoti kawo gadhonne asay de7iya keetha ubbaa taman xuuggidosona; Yerusalaame gimbiyaka laallidosona.
JER 39:9 Kawa naageysata halaqay Nabuzardaani kataman attida asaanne kaddidi iyako yida asa ubbaa di77idi Babiloone biitta efis.
JER 39:10 Kawa naageysata halaqay Nabuzardaani aykoka bayna guutha manqota Yihudan aggidi, entaw woyne gadenne goshsha gade immis.
JER 39:11 Nabukadanaxoori, kawa naageysata halaqaa Nabuzardaana haysada yaagidi kiittis:
JER 39:12 “Bada Ermiyaasa koya demmada, iyaw koshshiyaba ubbaa ootha; iya bolla hara iitabaa aykoka oothofa” yaagis.
JER 39:13 Hessa gisho, Nabuzardaani, Nabushazbaana, Ergaal-Sarasiranne Babiloone kawa halaqata ubbaa kiittidi,
JER 39:14 Ermiyaasa qashetidi de7iya, naageysata dabaabape kessidosona. Ba soo efidi wothana mela Safaana na7aa, Akqaama na7aa Godoliyas hadara immidosona. Hessa gaason, Ermiyaasi ba biitta asaara issife de7is.
JER 39:15 Ermiyaasi naageysata dabaaban qashetidi de7ishin, Godaa qaalay iyako haysada yaagidi yis.
JER 39:16 “Bada, Tophe addiya Ebemelekako haysada yaaga: ‘Ubbaafe Wolqaama Goday, Isra7eele Xoossay, haysada yaagees: hizape guye ta odidaysada ha katamaa bolla lo77oba gidonashin, dhayo ehana. Hessi ubbay haniya wode ne ha kataman uttada, ne ayfen be7ana.
JER 39:17 Gidoshin, he gallas ta nena ashshana; ne yayiya, ne morketa kushen aathada immike.
JER 39:18 Ta nena polo ashshana; ne olan hayqaka; ne tanan ammanetida gisho, hayqope attana’ ” yaagees Goday.
JER 40:1 Kawa naageysata halaqay Nabuzardaani Ermiyaasa Raman birshidi simmin, Godaa qaalay Ermiyaasako yis. Nabuzardaani Yerusalaamepenne Yihudape di77idi, Babiloone efanaw qachida asaa giddon Ermiyaasi santhalaatan qashetidi de7ees.
JER 40:2 Kawa naageysata halaqay Ermiyaasa dumma kessidi, haysada yaagis: “Goday ne Xoossay, dhayo ha biitta bolla ehanaysa odis.
JER 40:3 I ehana gidaysada ha77i oothis; Godaa bolla hinte nagara oothida gishonne iyaw kiitetonna ixida gisho haysi ubbay hanis.
JER 40:4 Heko, ha77i ta ne kushen de7iya santhalaata birshada nena yeddas. Taara Babiloone baana giiko yedha; ta new koshshiyaba ubbaa kunthana. Babiloone baanaw koyonna ixiko attanaw danda7aasa. Biitta ubbay ne sinthan de7ees; nena lo77ida bessi awuka ba” yaagis.
JER 40:5 Ermiyaasi iya matape boonna de7ishin, Nabuzardaani gujidi yaagis; “Safaana na7aa, Akqaama na7aa Godoliyako ba. Babiloone kawoy Nabukadanaxoori iya Yihuda katamata haariya asi oothidi shuumis. Hessa gisho, iyara issife yan asaara de7a; woyko nena lo77ida bessi awuka ba” yaagis. Kawa naageysata halaqay iyaw shinqenne hara imota immidi yeddis.
JER 40:6 Ermiyaasi Mixiphan de7iya Akqaama na7aa Godoliyako bis. I yan attida asaara issife de7is.
JER 40:7 Yihuda toora moconatapene olanchotape guuthati Babiloone kawas kushe immibookona. Enti Babiloone kawoy, Akqaama na7a Godoliya biitta haareysa oothidi shuumidaysanne Babiloone di7etidi boonna Yihudan attida manqotas halaqa oothidaysa si7idosona.
JER 40:8 Naatana na7ay Isma7eeli, Qareya nayti Yohaaninne Yoonataani, Tanhumeta na7ay Sarayi, Naxoofa addiya Yoofa naytinne Ma7ika addiya na7ay Yazaani banta olanchota ubbaara Godoliyako Mixipha yidosona.
JER 40:9 Safaana na7ay, Akqaama na7ay Godoliya entaw haysada yaagidi caaqis: “Babiloonetas kushe immanaw yayyofite; he biittan de7ite. Babiloone kawas haaretite; ubbabay hintew inje gidana.
JER 40:10 Ta Mixiphan uttada, Babiloone biittafe hintera gahetanaw yaa ubbaara hinte doona gidada odetana. Shin hinte de7iya bessan woyne, shamaho zaytenne hara katha ayfe ubbaa shiishidi dagayite” yaagis.
JER 40:11 Moo7aben, Amoonen, Edoomeninne hara biittatan de7iya Ayhude ubbay Babiloone kawoy, guutha Yihuda asati Yihudan attana mela oothidaysanne Safaana na7a Akqaama na7a Godoliya enta bolla shuumidaysa si7idosona.
JER 40:12 Enti laaletidi de7iya banta biittafe Yihuda simmidi, Godoliya de7iya bessaa Mixipha yidosona. Yan enti daro woynenne hara katha ayfe shiishidi dagaayidosona.
JER 40:13 Hessafe guye, Qaraya na7ay Yohaaninne kushe immiboona toora moconati ubbay Godoliyako Mixipha yidi,
JER 40:14 “Amoone kawoy Ba7alisi nena wodhana mela Naatana na7aa Isma7eela yeddidaysa eray?” yaagidosona. Shin Akqaama na7ay Godoliya enti odaa ammanonna ixis.
JER 40:15 Qaraya na7ay Yohaani Mixiphan de7iya Godoliyako yidi, “Oonika eronna de7ishin bada, Nataniyaa na7aa Isma7eela ta wodhana. I nena wodhiko, ne matan shiiqida Ayhude ubbay laaletana; qassi Yihudan attida asa ubbay wurana” yaagis.
JER 40:16 Shin Akqaama na7ay Godoliya zaaridi, “Isma7eelaba ne odiya ubbay wordo gidiya gisho hessa melaba oothofa” yaagis.
JER 41:1 Laapuntha ageenan kawo koche gididi, kawa moorinnatape issoy, Elsama na7ay, Naatana na7ay Isma7eeli tammu asaara issife Akqaama na7aa Godoliyara gahetanaw Mixipha bis. Ubbay uttidi kathi mishin,
JER 41:2 Naatana na7ay Isma7eelinne iyara de7iya tammu asati banta mashshaa mashshaa kessidi, Babiloone kawoy Yihuda bolla shuumida Akqaama na7aa Godoliya wodhidosona.
JER 41:3 Isma7eeli qassi Mixiphan Godoliyara de7iya Ayhudetanne Babiloone olanchota ubbaa wodhis.
JER 41:4 Godoliya hayqida wontetha gallas, oonika iya hayquwa eronna de7ishin,
JER 41:5 Seekemape, Seelopenne Samaarepe hospun tammu asati azzanidi, banta buuchaa meedidi, banta ma7uwa daakidi, banta som7uwa gaarishe yidosona. Enti Xoossa keethaas immiya kathinne ixaane ehidosona.
JER 41:6 Isma7eeli yeekishe Mixiphafe keyidi, entara gahetanaw bis. Enta gahetida wode, “Akqaama na7aa Godoliyako haa yidi iya be7ite” yaagis.
JER 41:7 Enti katamaa gelida wode Isma7eelinne iyara de7iya asati enta wodhidi haatha ollan yeggidosona.
JER 41:8 Shin he hospun tammu asatape tammati Isma7eela haysada yaagidi woossidosona: “Nuna wodhopa! Nu goshshan nu qosida daro gistey, bangi, shamaho zayteynne eessi de7ees” yaagidosona. I enta wodhonna yeddi aggis.
JER 41:9 Isma7eeli asaa wodhidi yeggida ollay, Isra7eele olanaw Ba7oosi yida wode kawoy Asi bookisida gita gimbetida haatha olla. Nataniyaa na7ay Isma7eeli he ollaa ahan kunthis.
JER 41:10 Isma7eeli kawa macca naytanne Mixiphan attida asa ubbaa di77is. Hessati kawa naageysata halaqay Nabuzardaani Akqaama na7aa Godoliya aawatetha garsan Mixiphan wothidaysata. I enta di77idi, baara ekidi, Amoone biitta baanaw dendis.
JER 41:11 Qaraya na7ay Yohaaninne iyara de7iya toora moconati Isma7eeli oothida iitaba ubbaa si7idosona.
JER 41:12 Banta asaa ekidi, iyara oletanaw bidosona; Isma7eela Gaba7oonan de7iya gita eele haatha matan oykidosona.
JER 41:13 Isma7eeli di77idi efiya asa ubbay Qaraya na7aa Yohaanananne iyara de7iya toora moconata be7ida wode daro ufaytidosona.
JER 41:14 He di7etidaysati ubbay guye simmidi, Qaraya na7aa Yohaananan gahetidosona.
JER 41:15 Shin Isma7eelinne hara hospun asati Yohaananape kessi ekidi, Amoone biitta baqatidosona.
JER 41:16 Isma7eeli Akqaama na7aa Godoliya wodhidi, Mixiphafe di77idi ehida olanchoti, maccasati, naytinne shuufati ubbay Qaraya na7aa Yohaanaranne hara toora moconatara dendidi bidosona.
JER 41:17 Enti yaape dendidi, Gibxe baanaw, Beeteleme matan de7iya Gerot-Kamahama geetetiya bessan shempidosona.
JER 41:18 Enti Gibxe biday Babiloone kawoy shuumida Akqaama na7aa Godoliya Isma7eeli wodhida gisho, Babiloonetas yayyidi, Babiloonepe baqatidi, Gibxe baanaw dendidosona.
JER 42:1 Tora moconati ubbay, Qaraya na7ay Yohaani, Hoshaya na7ay azariyaas asa ubbay, guuthafe gita gakanaw,
JER 42:2 nabiya Ermiyaasako yidi, “Nu nena oychiyaba nuus ootharki. Attida nu gisho Godaa ne Xoossaa woossarki. Nu kase daro; shin ha77i ne be7eysada guutha asa xalaali attida.
JER 42:3 Nu biya ogiyanne nu oothanaba I nuna bessaana mela Godaa ne Xoossaa nu gisho woossa” yaagidosona.
JER 42:4 Nabey Ermiyaasi zaaridi, “Lo77o; hinte oyshaada, Godaa hinte Xoossaa ta woossana; hintefe aykoka qosonna I odiyaba ubbaa hintew odana” yaagis.
JER 42:5 Enti zaaridi, Ermiyaasako, “Goday ne Xoossay ne baggara nuna kiittiyaba ubbaa nu polonna ixiko, Goday ba huuphen nu bolla tumanne ammanetida marka gido.
JER 42:6 Nu dosiyaba gidin, ixiyaba gidin, nu nena iyako kiittiya Goday, nu Xoossay kiittiyaba nu oothana. Nu iyaw kiitetiko, nuus ubbabay inje gidana” yaagidosona.
JER 42:7 Tammu gallasape guye, Godaa qaalay Ermiyaasako yis.
JER 42:8 Qaraya na7aa Yohaana, iyara de7iya toora moconatanne asa ubbaa, guuthafe gita gakanaw xeegidi,
JER 42:9 Hinte woosa ta iyako shiishana mela hinte tana kiitida Goday Isra7eele Xoossay haysada yaagees.
JER 42:10 “ ‘Ta kase hinte bolla ehida iitabay tana azzanthida gisho, hinte ha biittan uttiko, ta hintena keexanape attishin, laallike; tokanape attishin, shoddike.
JER 42:11 Hinte ha77i yayiya Babiloone kawas aykoka yayyofite. Hintena iya kushepe ashshanaw ta hintera de7iya gisho yayyofite.
JER 42:12 Ta hintew qadhetana; yaatada I hintew qadhetidi, hintena hinte biitta zaarana mela oothana’ yaagees Goday.
JER 42:13 “Gidoshin, hinte Godaas, hinte Xoossaas kiitetonna ixidi, ha biittan uttoko giiko,
JER 42:14 qassi hinte, ‘Ola worenne olas punniya moyze si7onnanne koshi bayna Gibxe bidi, yan daana’ giiko,
JER 42:15 hinteno, Yihudan attida asaw, Goday giyaba si7ite. Ubbaafe Wolqaama Goday, Isra7eele Xoossay haysada yaagees: ‘Hinte Gibxe bidi, yan daanaw qofa qachiko,
JER 42:16 hinte yayyida olay Gibxen hintena oykana; hinte hirgida koshay hintena kaallidi baana; hinte yan Gibxen hayqana.
JER 42:17 Gibxe bidi daanaw qofa qachida asa ubbay olan woyko koshan woyko boshan hayqana. Ta enta bolla ehiya iitaape issoyka kessi ekenna woyko attenna’ yaagees.
JER 42:18 “Ubbaafe Wolqaama Goday, Isra7eele Xoossay, ‘Yerusalaamen de7eyisata bolla ta hanqoynne ta yiloy gukidaysada, hinte Gibxe geliya wode hinte bolla ta hanqoy hessada gukana. Hinte dagamas, cashshas, baadethasinne miicha attana; ha bessaa zaaridi be7eketa’ yaagees.
JER 42:19 “Yihudan attidaysato, Goday hinteko, ‘Gibxe boopite!’ yaagis. Ta hachi hinteko, ‘Naagetite’ geysa si7ite.
JER 42:20 Hinte taako, ‘Nu gisho Godaa nu Xoossaa woossa; I new odiyaba ubbaa nuus oda; nu oothana’ yaagidi, tana Godaako, hinte Xoossaako, kiittideta; hessan gita bala balideta.
JER 42:21 Ta I gidaba ubbaa hachi hintew odas. Shin Goday hinte Xoossay ta baggara hintew kiitida qaalas kiitetonna ixideta.
JER 42:22 Hiza, haysa si7ite; hinte bidi daanaw koyiya biittan hinte olan, koshaninne boshan hayqidi wurana” yaagis.
JER 43:1 Goday enta Xoossay kiitida qaala ubbaa Ermiyaasi entaw odidi wursidaape guye,
JER 43:2 Hoshaya na7ay Azaariyasi, Qaraya na7ay Yohaaninne otorancho asa ubbay Ermiyaasako, “Ne wordo odaasa! Goday nu Xoossay nu Gibxe bidi uttonna mela digganaw nena nuuko kiittibeenna.
JER 43:3 Shin Babiloone asay nuna wodhanaada woyko di77idi banta biitta efanaada ne nuna enta kushen aathada immana mela nena nu bolla denthiday Neera na7aa Baaroka” yaagidosona.
JER 43:4 Qaraya na7ay Yohaani, toora moconati ubbaynne asa ubbay Yihuda biittan daana mela Goday enta kiitida kiitta polonna ixidosona.
JER 43:5 Qaraya na7ay Yohaaninne toora moconati ubbay banta laaletida kawotethata ubbaafe Yihudan daanaw simmida Yihuda asa bantara ekidi Gibxe bidosona.
JER 43:6 Kawa naageysata halaqay Nabuzardaani Safaana na7aa, Akqaama na7aa Godoliyara daana mela ashshida addeta, maccasa, naytanne kawa macca nayta ubbaa efidosona. Qassi nabiya Ermiyaasanne Neera na7aa Baaroka efidosona.
JER 43:7 Enti Godaa kiitaa ixidi, Gibxe biitta gelidi, Xafinaasa katamaa gakanaw bidosona.
JER 43:8 Xafinaasan Godaa qaalay Ermiyaasako haysada yaagidi yis.
JER 43:9 “Gita shuchata ekada, Yihuda asay be7ishin, Xafinaasan de7iya Gibxe kawa gadho geliya bessan sintha baggara de7iya baasuwan mooga.
JER 43:10 Entako, ‘Ubbaafe Wolqaama Goday, Isra7eele Xoossay haysada yaagees; ta kiittada, ta aylliya Babiloone kawa Nabukadanaxoora ehisana. Ha moogetida shuchata bolla iya kawotethaa araata wothana. I ba kawotetha dunkaaniya iya bolla essana.
JER 43:11 I yidi Gibxe biitta olana. Hayqos besseysati hayqana; di7etanaw besseysati di7etana; mashshan hayqanaw besseysati mashshan hayqana.
JER 43:12 Gibxen de7iya eeqa xoossata keethaa tama oythana; eeqata xuuggana woyko di77ana. Henthanchoy ba itiya ma7eysada, Gibxe biitta ma7ana. Yaatidi, yaape saro baana.
JER 43:13 I, Gibxe biittan Heliyoota kataman de7iya hawultiya mentherethana; Gibxe xoossata keethaa taman xuuggana’ ” yaagis.
JER 44:1 Gibxen Migdoola, Xafinaasa, Mempisanne Phatiroosa biittan de7iya Ayhudetas Godaa qaalay Ermiyaasako haysada yaagidi yis.
JER 44:2 “Ubbaafe Wolqaama Goday, Isra7eele Xoossay, Yerusalaame bollanne Yihuda katamaa ubbaa bolla ta ehida dhayo ubbaa hinte, hinte ayfen be7ideta. Enti hachi gakanaw laaletidi attidosona; oonika yan deenna.
JER 44:3 Hessi haniday, enti iita ooso oothidi, tana hanqethida gishosa. Enti woyko hinte woyko hinte mayzati eronna hara xoossatas ixaane cuyisidi entaw goyinnidosona.
JER 44:4 ‘Ta ixiya haysa mela iitabaa oothopite’ yaagidi odana mela zaara zaara ta aylleta, nabeta kiittas.
JER 44:5 Gidoshin, enti si7onna woyko akeekona ixidosona. Hara xoossatas ixaane cuyisiya iita oosuwa aggonna ixidosona.
JER 44:6 Hessa gaason ta suulliya hanqoynne yiloy Yihuda katamata bollanne Yerusalaame ogetan eexis. Enti hachi hinte be7eysada laaletidosona; baysa gididosona.
JER 44:7 “Ha77ika Goday, Ubbaafe Wolqaama Xoossay, Isra7eele Xoossay, haysada yaagees; hinte kochay attonna mela, maccasa, addeta, naytanne yooga nayta Yihuda biittafe dhaysanaada iitabaa hinte, hinte bolla ayis oothetii?
JER 44:8 Hinte daanaw yida Gibxe biittan hara xoossatas ixaane cuyisidi tana ayis hanqethetii? Sa7an de7iya kawotethata ubbaa giddon baadethasinne bores attidi, hintena dhaysanaw ayis koyeetii?
JER 44:9 Kase hinte aawati, Yihuda kawotinne enta macheti, hintenne hinte macheti Yihuda katamataninne Yerusalaame ogetan oothida iita ubbaa dogidetiyee?
JER 44:10 Hinte hachi gakanaw hintenatethaa kawushibeketa; tana bonchibeeketa. Ta hintewunne hinte mayzatas immida higgiyanne woga kaallibeketa.
JER 44:11 “Hessa gisho, Ubbaafe Wolqaama Goday, Isra7eele Xoossay, haysada yaagees; ta hintena, Yihuda zertheta ubbaa dhaysanaw qofa qachas.
JER 44:12 Yihudan attida asaa giddofe, Gibxe bidi, yan daanaw qofa qachidaysata ta dhaysana. Enti ubbay Gibxen wurana; olaninne koshan hayqana. Gitape guuthu gakanaw de7iya ubbay olaninne koshan dhayana. Enti dagamas, cashshas, baadethasinne miichas attana.
JER 44:13 Ta Yerusalaame, olan, koshaninne boshan seeridaysada Gibxe biittan de7eyisata seerana.
JER 44:14 Attida Yihuda asaape Gibxe bidi de7eysati Gibxeta kushiyape polo kessi ekokona. Enti simmidi daana gidi amotiya Yihuda biitta ay asika simmenna. Guutha asape attishin, oonika simmidi yeenna” yaagis.
JER 44:15 Enta macheti hara xoossatas ixaane cuyisethi eriya addey ubbay, yan de7iya maccasa ubbaynne gita maabara gididi, Gibxeninne Phatiroosan de7iya asa ubbay Ermiyaasako haysada yaagidosona.
JER 44:16 “Neeni Godaa sunthan nuus odiyaba ubbaa nu si7oko.
JER 44:17 Nu oothana gidi qopidaba ubbaa oothana. Nuuni, nu mayzati, nu kawotinne nu halaqati Yihuda katamataninne Yerusalaame ogetan kase oothidaysada Salo Kawiw geetetiyaris nu xoossees ixaane cuyisana; ushsha yarshuwa iw gussana. Nu kase hessa oothiya wode, nuus daro kathi de7ees; he wode nuus sa7i keeha; nuna aybika metibeenna.
JER 44:18 Shin Salo Kawees ixaane cuyiseysanne ushsha yarsho gusseysa aggidaape guye, nuus ubbabay pacis; nu olaninne koshan wurida” yaagidosona.
JER 44:19 Maccasati gujidi, “Nu Salo Kawees malan uythu uukiya wode, ixaane cuyisiya wodenne ushsha yarsho iw gussiya wode nu azinati eronna de7ishin, nu oothidabay aybika baawa” yaagidosona.
JER 44:20 Haysada yaagidi zaarida asa ubbaas, maccasasinne addetas, Ermiyaasi haysada yaagis;
JER 44:21 “Hintenne hinte mayzati, hinte kawotinne hinte halaqati, biittan de7iya asa ubbay, Yihuda katamataninne Yerusalaame ogetan ixaane cuyisidaysa Goday erenna woyko dogis gidi qopeetii?
JER 44:22 Hinte oothiya iitanne shaatiya oosuwa Goday si77i gaanaw danda7iboona gisho, hinte biitta hachi hinte be7eysada laaletida, baysanne baadetida biitta oothis.
JER 44:23 Ha dhayo ubbay hintena gakiday, hinte hara xoossatas ixaane cuyisida gishosa, Godaa bolla nagara oothida gishosa, Godaa qaala si7onna ixida gishosanne iya higgiya, iya wogaanne awaajuwas kiitetonna ixida gishosa” yaagis.
JER 44:24 Hessafe guye, Ermiyaasi asa ubbaasinne maccasas haysada yaagis; “Hinteno, Yihudape yidi, Gibxe biittan de7iya asaw, Goday giyaba si7ite.
JER 44:25 Ubbaafe Wolqaama Goday, Isra7eele Xoossay, haysada yaagees; hintenne hinte macheti, ‘Nuuni Salo Kawees ixaane cuyisana; ushsha yarshuwa iw gussana’ gidi caaqida caaquwa polidi, ooson bessideta. Hiza, guye goopite; hinte caaquwa polite.
JER 44:26 “Gidoshin, hinteno, Gibxe biittan de7iya Yihuda asaw, Goday giyaba si7ite! Goday haysada yaagees; ‘Hizape guye Gibxe biittan de7iya Yihuda asaape issoyka ta sunthan, “Ubbaa Haariya Goday ero” ’ gidi caaqonna mela ta gita sunthan caaqas.
JER 44:27 Ta enta bolla lo77oba gidonashin, iitabaa ehanaw minnayis. Gibxen de7iya Yihuda asay wurana gakanaw olaninne koshan hayqana.
JER 44:28 Olape attida guutha asati Gibxefe Yihuda simmana. He wode Gibxen de7iya Yihuda asay, ta qaalapenne enta qaalape awusi tumeeko erana.
JER 44:29 Ta hintena ha bessan seeriya wode, ‘Ta hinte bolla iitabaa ehana’ gidaysi tuma gideysas ta hintew malaata immana.
JER 44:30 Ta Yihuda kawa Sedeqiyaasa iyaw morke gididi, iya wodhanaw koyiya Babiloone kawa Nabukadanaxooras aathada immidaysada Gibxe kawa Hofira iya wodhanaw koyiya iya morketas aathada immana” yaagees Goday.
JER 45:1 Iyosyaasa na7ay Iyo7aqeemi Yihudan kawotida oyddantho laythan, Neera na7ay Baaroki ha qaalata Ermiyaasi odin, si7idi, maxaafan xaafis. He wode Ermiyaasi iyaw odida qaalay haysa:
JER 45:2 “Baaroka, Goday, Isra7eele Xoossay neeko haysada yaagees:
JER 45:3 Neeni, ‘Goday ta sakuwa bolla azzano gujida gisho tanooshsho! Taani un7an daaburada shempo dhayas’ ” yaagadasa.
JER 45:4 Baaroka, Goday neeko haysada yaagees: “Ta keexidaysa ta laallana; ta tokidaysa ta shoddana. Ta haysa biitta ubban oothana.
JER 45:5 Yaatin, ne new gitaba koyayee? Hessa koyopa. Asa ubbaa bolla ta dhayo ehana. Shin ne bida bessa ubban ta ne shempuwa ashshana” yaagees Goday.
JER 46:1 Kawotethatabaa Goday Ermiyaasas odida qaalay haysa.
JER 46:2 Iyo7aasa na7ay Iyo7aqeemi Yihudan kawotida oyddantho laythan, Efraxiisa shaafa matan, Karkamisha geetetiya bessan, Babiloone kawoy Nabukadanaxoori xoonida Gibxe kawa Nako olanchotabaa Goday haysada yaagees.
JER 46:3 Hinte tooranne gondalle giigisite; olas keyite.
JER 46:4 Hinte parata bixaalidi toggite; hinte huuphiyan birata barneexa wothite. Hinte bessaa bessaa oykite; hinte toora leefite; hinte ola ma7uwa ma7ite.
JER 46:5 “Shin haysi ta be7ey aybee? enti yayyidi guye simmidosona. Wolqaamati xoonetidosona; guye xeellonna baqatidosona; Enta yuusho ubban dagami de7ees” yaagees Goday.
JER 46:6 Eesoteysi kessi ekenna; minoyka attanaw danda7enna. Pudeha baggan Efraxiisa shaafa matan, ubbay dhubetidi kundidosona.
JER 46:7 Haysi Nayle shaafa kixada dendey, di7o haathada goggey oonee?
JER 46:8 Gibxey Nayle shaafada dendees; di7o haathada gupees. Gibxey, “Taani kixada, biittan eellana; katamatanne iyan de7iya asa ubbaa dhaysana” yaagees.
JER 46:9 Parato, gupidi keyite; para gaareto woxite. Gondalle oykida Tophenne Puuxa asaw, dongen dukiya Luuda asaw, mino olanchoto, dendidi oletite.
JER 46:10 He gallasay Godaa Ubbaafe Wolqaama Godaa gallas, Goday ba morketa bolla halo keyiya gallas. Iya mashshay kallana gakanaw enta maana; alana gakanaw enta suuthaa uyana. Goday, Ubbaafe Wolqaama Xoossay, pudeha baggan Efraxiisa shaafa matan, enta yarsho oothidi ekana.
JER 46:11 Geela7ee, Gibxe macca naatte, Galada biitta bada tiyetiya dhale eha. Gidoshin, ne coo dhale darsaasape attishin, new paxoy baawa.
JER 46:12 Kawotethati ne yeella si7idosona; ne yeehoy biitta ubbaa kumana. Ne olanchoti issoy issuwan dhubetidi, ubbay issife kundidosona.
JER 46:13 Babiloone kawoy Nabukadanaxoori Gibxe olanaw yaanaysa, Goday nabiya Ermiyaasas odida qaalay haysa:
JER 46:14 Haysa Gibxen oda; Migdoolan, Mempisaninne Xafinaasan awaaja. Hinte bessan bessan eqite; giigetite; hinte yuushuwan de7iya ubbaa mashshi maana.
JER 46:15 Hinte mino olanchoti ayis kundidee? Goday enta sugida gisho gidennee?
JER 46:16 Olanchoti dhubetidi kundidosona; issoy issuwa, “Dendidi yedhite; morke mashshafe attanaw, nu asaako, nu biitta simmoos” yaagosona.
JER 46:17 Enti yan Gibxe kawako, “Ba qaada go7etonna coo wursiya odancho” gidi sunthana.
JER 46:18 “Ubbaafe Wolqaama Godaa” geetetiya kawoy haysada yaagees: “Taani, ta shempuwan caaqayis; dereta giddon Taabore Derey, abba matan de7iya Qarmeloosa Derey, aduqeysada aduqiya morkey hinte bolla yaana.
JER 46:19 Hinteno, Gibxen de7eysato, di7etidi baanaw giigite. Mempisa katamay laaletidi, oonika de7onna mela biitta gidana.
JER 46:20 Gibxey lo77o ussa mela; shin pudeha bagga biittafe yaa boxiyan iya saxetana.
JER 46:21 Miishey cigetin oothiya olanchoti modhida wofaano mela. Enta dhayo gallasay matida gisho, enti seeretiya wodey gakida gisho, enti issife guye simmidi baqatidosona; enti banta bessan eqibookona.
JER 46:22 Morkey wolqan sugidi yaa wode, Gibxe asay baqatiya shooshada kolxana. Morketi mithi qanxiya asada, kalta ekidi iya bolla yaana.
JER 46:23 Asay sixida wora qeexidi dhayseysada, Gibxe asaa qanxidi wursana Morketa tayboy boolepe daro; enta taybanaw danda7etenna.
JER 46:24 Gibxe macca na7iya kawuyana; pudeha bagga asaas aadhada imetana.”
JER 46:25 Ubbaafe Wolqaama Goday, Isra7eele Xoossay haysada yaagees. “Taani Tebisa xoossa Amoone, kawa paarona, Gibxe biittanne Gibxe xoossata, Gibxe kawotanne kawa paarona bolla zempiya ubbaa seerana.
JER 46:26 Enta shempuwa koyiya Babiloone kawa Nabukadanaxoora kusheninne iya olanchota kushen aathada immana. Hessafe guye, Gibxe biittay kaseysada asi de7iya biitta gidana” yaagees Goday.
JER 46:27 “Ta aylliyaw, Yayqooba yayyofa; Isra7eele, dagammofa. Nena haaho bessafe, ne kochay di7etidi bida biittafe ashshana. Yayqoobi simmidi, saron wopu gidi daana; enta yashisiyabay deenna.
JER 46:28 Ta aylliyaw, Yayqooba, ta neera de7iya gisho, yayyofa. Ta nena laallida kawotethata ubbaa dhaysana; shin nena dhaysike. Ta nena xillo pirdan seerana; shin seeri bayna nena coo aggike” yaagees Goday.
JER 47:1 Gibxe kawoy Gaaza olidi oykanaape kase, Filisxeemeba Godaape nabiya Ermiyaasako yida qaalay haysa:
JER 47:2 Goday haysada yaagees; “Heko, pudeha baggafe haathi dhuuqana; di7oy gelida kixa haathada goggana. Biittanne biittan de7iyaba ubbaa, katamatanne enta giddon de7iya asa ubbaa muukana. Asay waassana; biittan de7iya ubbay yeekana.
JER 47:3 Parata girsaa, para gaareta kooshincha, gaareta gondorsa girsaa si7ana. Aawata kushey argaacida gisho, banta nayta maaddanaw guye simmokona.
JER 47:4 Filisxeeme asa dhaysanaw, Xiroosanne Sidoona maaddanaw attiya asaa dhaysanaw wodey gakis. Goday Filisxeemepe attidaysata, Haathan teqetida de7iya Kaftoorape yida kochata dhaysana.
JER 47:5 Gaazi kayotada ba huuphiya meedasu; Asqalooni ba kushiya doonna bolla wothasu. Hinteno, abba gaxan attidaysato, awude gakanaw hinte asatethaa gaaretii?
JER 47:6 Hinte, ‘Godaa mashshaw, neeni si77i goonna ixey awudesee? Ne bessaa simmada gela; si77i gada utta’ yaageeta.
JER 47:7 Shin Goday iya kiittin, I waanidi si77i gaanee? Asqaloonanne abba gaxan de7iya biitta olana mela kiittas” yaagis.
JER 48:1 Moo7abe Ubbaafe Wolqaama Goday, Isra7eele Xoossay haysada yaagees; “I dhayana gisho, Nabo katamaa ayye! Qiratayma katamay yeellatananne; oyketana; enta miixay kawuyana; meqeretana.
JER 48:2 Hizape Moo7abe ceeqoy dhayana; Haseboona katamaa asay Moo7abe bolla, ‘Haayite, ha biitta dhaysana’ yaagidi iitabaa maqetis. Neno, Madmaana katame, mashshi nena yedethana gisho si77i ga.
JER 48:3 Horonayma asay, ‘Dhayoynne kundethi, gakis’ gidi waassiya waasuwa si7ite!
JER 48:4 Moo7abey meqeretana; iya nayti yeekiya yeehuwa si7ite!
JER 48:5 Enti yeekishe, Luhita pude keyana; Horonaymape duge wodhishe, dhayo waasuwa si7ana.
JER 48:6 Issoy issoy, ‘Baqatite; hinte shempiw ashshite; mela biittan de7iya Aro7eerada dummatite, hinte shempuwa ashshite’ yaagana.
JER 48:7 Neeni ne wolqaaninne ne duretethan ceeqetida gisho, neka di7etana. Kamooshika ba kahinetaranne halaqatara, di7etidi baana.
JER 48:8 Goday odidaysada, katama ubbaa dhayseysi yaana. Issi katamika attenna; zangaaraynne demba ubbay dhayana.
JER 48:9 Moo7abey paallidi attana mela qefe immite. I katamay dhayana laattiya asika demmenna.
JER 48:10 Godaa oosuwa qeli gidi oothiya uray baadetidaysa gido. Suuthu gussonna mela ba mashsha teqiya uray baadetidaysa gido!
JER 48:11 “Moo7abey yalagatethafe doomidi, injen de7ida asa mela; I hara biitta di7etibeenna. Moo7abey otope oton tigetonanne qaaxonna, mal7oy laametonnanne sawoy aggonna, uttidi de7ida woyne ushsha mela.
JER 48:12 Taani otuwa gupanthesata kiittiya wodey yaana. Enti iya gussana; otuwape xiizo dhaysana; otuwa mentherethana.
JER 48:13 Isra7eele asay ba ammanetida, Beetelen de7iya eeqan kawuyidaysada Moo7abey ba xoossaa Kamooshan kawuyana.
JER 48:14 “Hinte, ‘Nu wolqaama asinne mino olancho’ gidi ayis ceeqetetii?
JER 48:15 Heko, Moo7abeynne yan de7iya katamati dhayidosona. Iya yalaga adde nayti shukettanaw duge bidosona” yaagees, kawoy, Ubbaafe Wolqaama Goday.
JER 48:16 Moo7abe dhayoy matatis; iya laaletetha wodey ellesidi gakis.
JER 48:17 Iya yuushuwan de7iya asay, iya gitatetha eriya ubbay, “Mino gidida kawotethaa xam7ay waanidi meqidee?” Bonchetida xam7ay waanidi tinchetidee? yaagidi zeleelite.
JER 48:18 “Hinteno, Diboona kataman de7eysato, hinte boncho bessafe wodhidi, mela biittan uttite. Moo7abe dhayseysi hinte bolla yaana; hinte miixa ubbaa laallana.
JER 48:19 Aro7eera kataman de7eysato, oge doonan eqidi xeellite; kessi ekidi baqatiya addetanne maccasa, ‘Aybe keyday?’ yaagidi oychite.
JER 48:20 Enti, ‘Moo7abey kundida gisho kawuyis; iyaw yeekitenne zeleelite. Moo7abe dhaydaysa gisho Arnoona shaafa matan awaajite’ ” yaagidi zaarana.
JER 48:21 “Gezzen de7iya Holona, Yaasa, Mefaata,
JER 48:22 Diboona, Nabo, Beet-Dibilatayma,
JER 48:23 Qiratayma, Beet-Gamula, Beet-Ma7oona,
JER 48:24 Qiriyootanne, Baasora katamata bollanne mataninne haahon de7iya Moo7abe katamata bolla pirdi yis.
JER 48:25 Moo7abe kacey qanxetis; iya qesey meqis.”
JER 48:26 Godaa bolla otortida gisho, Moo7abe ushshidi mathoyite. Ba cooshshaa bolla gondoreto; asa ubbay iya bolla qelqiso.
JER 48:27 Kase ne Isra7eele bolla qelqisabikii? Iyabaa haasaya wode kadhada huuphe qaathiday Isra7eeley kaysotara oyketida gishoyee?
JER 48:28 Hinteno, Moo7aben de7eysato, katamape keydi, shucha hom7on de7ite. Aafo doonan baw keethe keexiya holle mela gidite.
JER 48:29 Moo7abey daro otortis; Moo7abey ay mela ba ganna gabbisidaako, ceeqetiyako, otortiyako, ay mela bana dhoqu oothiyako, ta si7as.
JER 48:30 Ta enta ceequwa erayis; shin aykoka maaddenna; enta otoroy aykoka oothenna.
JER 48:31 Hessa gisho, ta Moo7abes waassas; Qir-Hereesa asaas kayotada yeekayis.
JER 48:32 Hinteno, Sebama asaw, Ya7izeera asaas yeekeysafe aathada hintew yeekayis. Hinte tashey daayidi, Maxine Abbaa pinnidi, Ya7izeera gakida woyne mela; shin hinte woyne ayfiyanne wurcuwa bonqeysati yidi dhaysidosona.
JER 48:33 Ufaysinne Lo77obay ayfiya Moo7abe biittafe eketis. Woyne gum7iya bessaafe woyney goggonnaada teqas. Oonika ililishe woyne gum7enna. Si7etiya girsi de7ikoka ufaysa girsi gidenna.
JER 48:34 Enti Haseboonaninne Eliyaalan waassiya waasoy Yahaaxa gakanaw si7etees. Zo7aarape bidi Horonaymanne Eglaat-Shalisha gakanaw si7etees. Hari attoshin, Nimirima haathay melis.
JER 48:35 Taani Moo7abepe dhoqa bessatan goyinnesatanne banta xoossatas ixaane cuyiseyisata dhaysana.
JER 48:36 “Enti kase demmida duretethay ha77i dhayida gisho, ta wozanay Moo7abesinne Qir-Hereesa asaas susul7eda yeekas.
JER 48:37 Enti banta huuphiyanne banta buuchaa meedidosona; banta kushiya qanxidi madunxisidosona; banta xeessan kayo ma7o dancidosona.
JER 48:38 Taani Moo7abe oonika koyonna otoda menthida gisho, Moo7abeta keethaa bollaninne dabaaban yeehope attishin, harabay baawa” yaagees Goday.
JER 48:39 Moo7abey aybi meqo meqide! Iya asay aybi waaso waassi! Moo7abe waani yeellatidi, ba zokuwa zaaridee? Hessa gisho, Moo7abey ba yuushuwan de7iya ubbaas miichasinne dagamas attis.
JER 48:40 Arganthi ba qefiya miccidi yeysada morkey Moo7abe bolla yaana.
JER 48:41 Iya katamati oyketana; iya miixati eketana. He gallas Moo7abe mino olanchota wozanay iqethi oykida maccasa wozana mela un7etana.
JER 48:42 Moo7abe ta bolla makallida gisho dhayana; hizape guye kawotethi gididi deenna.
JER 48:43 Moo7abe asaw, yashshi, olinne xihey hintena naagees.
JER 48:44 Daganthiyabaape baqatiya oonika ollan kundana; ollafe keyiya oonika xihen oyketana. Taani Moo7abe seeriya wode hessa oothana.
JER 48:45 “Baqatidi bidaysati wolqa dhayidi, Haseboona katama kuyan eqidosona. Haseboona katamaape Tami, kawoy Sihooney de7ida keethaafe lacoy keyidi, Moo7abe biittanne yan de7iya makallancho asaa mis.
JER 48:46 Moo7abe asaw, hintena ayye! Kamoosha geetetiya eeqa xoossaa goyinneysati dhayidosona; enta adde naytinne macca nayti di7etidi bidosona.
JER 48:47 Gidoshin, wursethan taani Moo7abe zaarada oorathana” yaagees Goday. Moo7abe bolla odetida pirday haysan wuris.
JER 49:1 Amoonebaa Goday haysada yaagees; “Isra7eeles adde na7i baawee? Iya laattey baawee? Yaatin, Moloka geetetiya eeqa xoossaa goyinniya asati Gaade biitta ayis oykidona? Enta kataman ayis uttidona?
JER 49:2 Amoone biittan Raaba katamaa bolla ola waasoy si7etana mela ta oothana wodey yaana. He katamay laaletidi baysa gidana. Iya yuushuwan de7iya gutati taman xuugetana. Isra7eeley bana ba biittafe gooddidaysata gooddana” yaagees Goday.
JER 49:3 “Haseboona asaw, Gaye katamay laaletida gisho zeleelite. Raaba asaw, yeekite; kayo ma7o ma7idi kayotite; katamaa gimbiya giddon woxeretite. Hinte xoossay Moloki ba kahinetaranne ba halaqatara di7etis.
JER 49:4 Ammanoy bayna asaw, ‘Nuna olanay oonee?’ yaagidi hinte duretethaaninne hinte aradda zangaaratan ayis ceeqetetii?
JER 49:5 Ta ne yuushuwan de7eysati nena daganthana mela oothana” yaagees Goday, Ubbaafe Wolqaama Xoossay. Hinte ubbay keyidi baqatana gisho baqatidi bidaysata shiishiya asi dhayana.
JER 49:6 “Gidoshin, wursethan ta Amoone asaa zaarada oorathana” yaagees Goday.
JER 49:7 Edoomeba Ubbaafe Wolqaama Goday haysada yaagees; “Temaana asaas de7iya cincatethay aw bidee? Zoreysatape zorey dhayidee? Enta cincatethay entafe eketidee?
JER 49:8 Taani Eesawe kochaa seeriya wode iya bolla dhayo ehana gisho, Dadaanen de7eysato, baqatidi aafon qosetite.
JER 49:9 Woyne maxeysati poshile ashshokona? Kaysoti qamma geliko, bantaw koyaba xalaala ekokona?
JER 49:10 Shin ta Eesawa kochaa qaarada kallo ashshana; enti qosetanaw danda7onna mela, enti qosetiya bessa qaarada qonce bessi oothana. Eesawe sheeshay, iya dabbotinne iya shooroti ubbay dhayana; entafe issoyka attenna.
JER 49:11 Hinte giddon de7iya yi7o nayta aggaagite; enta ta dichana. Hinte am7etika tanan ammaneto” yaagees.
JER 49:12 Goday haysada yaagees; “Hiza seera ekanaw bessonna asas seeretethi attonnaba gidiko, hinte waanidi seerettonna attanee? Tuma hinteka seera xuu7ape uyeetape attishin, coo atteketa.
JER 49:13 Baasora katamay baysa gididi attana; iya be7ida asa ubbaas dagamas, qelqisethasinne baadethas attana. Iya yuushuwan de7iya guta ubbay merinaw laaletidi attana. Haysa taani ta sunthan caaqayis” yaagees Goday.
JER 49:14 Taani Godaape yida issi kiita si7as. Kawotethata giddo kiitetidaysi, “Edoome teqanaw shiiqite; iyara oletanaw dendite” yaagis.
JER 49:15 “Hiza, ta nena kawotethata giddon guuthana; asaa giddon kadhetida asi oothana.
JER 49:16 Shucha qophoninne dere bolla de7eyso, ne daganthoynne ne otoroy nena cimmis. Ne keethaa arganthada dhoqan keexikoka, ta nena yaape duge wodhisana” yaagees Goday.
JER 49:17 “Edoomey ase daganthiya biitta gidana. Yaara aadhiya asa ubbay iya dhayuwa be7idi, dagammana; malaaletana.
JER 49:18 Soodomeynne Gamoori banta yuushuwan de7iya katamatara dhayiya wode hanidaysada oonika yan deenna; asi yan uttenna” yaagees Goday.
JER 49:19 “Yordaanose shaafa lanqen de7iya woraape dorsati heemetiya lo77o qooroy de7iya bessaa, qoponna keyiya gaammoda, ta Edoome asata qoponna enta biittafe yedethana. Ta doorida asi iya bolla shuumana. Ta meli oonee? Ta oothana gidaba teqanaw danda7ey oonee? Taara eqetanaw danda7iya henthanchoy oonee?
JER 49:20 “Ta Edoome bollanne Temaana katamaa bolla oothanaw halchidabanne qopidaba si7ite. Enta nayta wolqan goochidi efana; hessa gaason enta soo asay dagammana.
JER 49:21 Edoome kundethaa girsay biitta qaathana; Edoometa waasoy Zo7o Abbaa gakanaw si7etana.
JER 49:22 Arganthi ba qefiya miccidi duge paallidi yeysada, morkey Baasora bolla yaana. He wode Edoome olanchoti iqethi oykida maccasada hirgana” yaagees.
JER 49:23 Damasqoba Goday haysada yaagees; “Iita oda si7ida gisho, Hamaatanne Arfada katamatan de7iya asay yeellatis; yayyis. Zuley shocida abbada enta wozanay shempo demmanaw danda7ibeenna.
JER 49:24 Damasqoy daaburis; enti dagaman kokoridi baqatidosona; maccas iqethi oykeysada metoynne un7i enta oykis.
JER 49:25 Ufaysi kumida eretida katamay waanidi baysa gididee?
JER 49:26 He wode he kataman de7iya yalaga addeti katamaa giddo ogetan hayqana; olanchoti ubbay wurana.
JER 49:27 Taani Damasqo katama dirsa gimbiyan tama yeddana; he tamay Wolde-Adara miixa maana” yaagees Ubbaafe Wolqaama Goday.
JER 49:28 Babiloone kawoy Nabukadanaxoori olidi xoonida Qedaarenne Haxoora kawotethatabaa Goday haysada yaagees; “Dendidi, Qedaare asaa olite; doloha baggara de7iya asaa wursite.
JER 49:29 Enta dunkaanetanne enta wudeta ekite. Enta gesheta, enta shaluwanne enta gimaleta ekite. Yaatidi entaw, ‘Hinte yuushuwan dagami de7ees’ yaagidi odite.
JER 49:30 Haxooran de7eysato, Babiloone kawoy Nabukadanaxoori hinte bolla iitabaa oothanaw maqetidi uttida gisho, baqatite; aafon qosetite” yaagees Goday.
JER 49:31 “Dendada; hirgi bayna saro de7iya kawotethata ola. Enta katama gimbiyas ibithi woyko kobey baawa; enti bantarka de7oosona.
JER 49:32 “Enta gimaleti bonqetana; enta wudey di7etana. Banta huuphiya gaxaa meedeyisata carkon laallana; ta ubba bessara enta bolla dhayo ehana.
JER 49:33 Haxoori merinaw workanati de7iya mela biitta gidana. Oonika yan deenna; asi yan uttenna” yaagees Goday.
JER 49:34 Yihuda kawoy Sedeqiyaasi koyro kawotida wode, Elaamaba Godaape Ermiyaasako yida qaalay haysa;
JER 49:35 Ubbaafe Wolqaama Goday haysada yaagees; “Elaamas wolqa gidida donge dukiya asata ta wodhana.
JER 49:36 Ubba bessara ta Elama bolla carko ehana; enta he carkuwan laallana. Hessa gisho, Elama asay laaletidi gakonna biitti deenna.
JER 49:37 Enta morketa sinthaninne enta wodhanaw koyeyisata sinthan ta Elama daganthana. Ta gita hanquwan enta bolla dhayo ehana. Ta enta dhaysana gakanaw mashshan yedethana.
JER 49:38 Taani Elama kawanne enta halaqata dhaysada ta araata yan wothana.
JER 49:39 Gidoshin, wursetha wode taani Elama zaarada oorathana” yaagees Goday.
JER 50:1 Babiloonenne Babiloone asaaba nabiya Ermiyaasa baggara Goday odida qaalay haysa:
JER 50:2 “Kawotethata giddon oditenne awaajite. Bandira dhoqu oothi oykidi, aykoka qosonna, haysada yaagidi odite. ‘Babilooney kundis! Beella geetetiya eeqay yeellatis; Marduka geetetiya eeqay kawuyis. Iya misileti yeellatidosona; iya eeqati kawuyidosona.
JER 50:3 Pudeha baggafe issi kawotethi yidi, Babiloone biitta dhaysana. Asaynne mehey baqatana; oonika yan deenna’ ” yaagis.
JER 50:4 “He wodenne he gallas Isra7eeleynne Yihudi issife yeekishe yidi Godaa banta Xoossaa koyana.
JER 50:5 Enti Xiyoone efiya ogiya oychana; banta som7uwa yaa zaarana. Enti, polo dogetonna merina caaquwan Godaara” oyketana.
JER 50:6 “Ta asay dhayida dorsa mela; enta henthanchoti enta balethidi, zuma bolla guye yeddidosona. Issi zumaape hara zumaa bolla toylatidi banta girbiya dogidosona.
JER 50:7 Demmida ubbay enta shankatis. Enta morketi, ‘Nu aykoka balibooko; ha metoy enta gakiday, enti Godaa, banta shempo bessaa, banta mayzata ufaysa bolla nagara oothida gishosa.’
JER 50:8 “Isra7eele asaw, Babiloonepe baqatite; Babiloone biittafe keyite; wude kaalethiya kole deesha mela gidite.
JER 50:9 Taani pudeha baggafe gita kawotethata cugaa denthada, Babiloone bolla ehana hanayis. Enti iya olidi oykana; enta dongey dukidi, balonna olancho mela.
JER 50:10 Babilooney bonqetana; iya bonqiya ubbay kallana” yaagees Goday.
JER 50:11 Babiloone asaw, ta asaa bonqeysato, hinte ufaytidi hashshu gideta. Qooron kallida ussada peenuqideta; korma parada caagideta.
JER 50:12 Shin ha77i hinte gita katamay yeellatananne kawuyana. Kawotethata giddon Babilooney ubbaafe laafa gidana; haathi bayna mela biitta gidana.
JER 50:13 Godaa hanquwa gaason, Babilooney dhayana; laaletana. Iya matara aadhiya ubbay iya bolla gakida bosha be7idi, dagammananne malaaletana.
JER 50:14 “Donge dukeysato, Babiloone olanaw iya yuushuwan salpite; I Godaa bolla nagara oothida gisho hinte dongiyan iya dukite.
JER 50:15 Ubba baggara Babiloone bolla ola waaso waassite; Babilooney kushe immis; iya gimbeti kundidosona; iya gimbe dirsay laaletis. Goday iya bolla halo keyishe de7iya gisho, hinte iya bolla halo keyite. I harata bolla oothidaba hinteka iya bolla oothite.
JER 50:16 Zerethi zereysanne caka wode baacara keyeysa Babiloonepe dhaysite. Dhayseysata mashshaa yayyida gisho, he biittan de7iya asa ubbay ba yaraako yaraako simmidi ba biitta biitta baqatana.
JER 50:17 “Isra7eeley gaammoy yedethidi laallida dorsaa mela. Koyro Asoore kawoy iya ashuwa mis; wursethan Babiloone kawoy Nabukadanaxoori iya meqethaa dhoggis.”
JER 50:18 Hessa gisho, Ubbaafe Wolqaama Goday, Isra7eele Xoossay, “Asoore kawa ta seeridaysada Babiloone kawanne iya biitta seerana.
JER 50:19 Shin Isra7eele, iya hentha bessaa zaarana; Qarmeloosanne Baasane Deretan I heemetana. I Efreemanne Galada gezze biittan kallidi maana.
JER 50:20 He wode, hayqope ta ashshida Isra7eele asaa nagaraa ta atto gana gisho, asay Isra7eelen nagara koyana, shin demmokona. Yihudan nagara koyana, shin bentenna” yaagees Goday.
JER 50:21 “Miraatayma biittaninne Piqodan de7iya asaa bolla dendidi enta olite; wodhite; enta polo dhaysite. Ta hintena kiittiya ubbaa oothite” yaagees Goday.
JER 50:22 Biitta bolla ola waasoy si7etees; gita dhayoy gakis.
JER 50:23 Biitta ubbaa liiqisiya naariqay waanidi meqide! Waanidi liiqide! Kawotethata ubbaa giddon Babilooney waanidi daganthiyaba gidide!
JER 50:24 Neno, Babiloone, ta nena oykanaw xihe wothas; neeni eronnashin gelada oyketadasa. Neeni Godaara eqetida gisho oyketadasa.
JER 50:25 Taani ta ola miishiya wothiya keethaa dooyada, ta yiluwan ola miishiya yaape kessas. Hessa oothiday, Goday, Ubbaafe Wolqaama Goday Babiloone biittan oothiya oosoy de7iya gishosa.
JER 50:26 Yaara haara iya bolla dendite; kathay de7iya iya shaaliya dooyite; di7uwa kathada doorite; Aybibaaka ashshona wursidi dhaysite.
JER 50:27 Booru shukeysada enta olanchota wodhite. Babiloone asay seeretiya wodey gakida gisho enta ayye!
JER 50:28 “Di7etida asay Babiloonepe kessi ekidi, Yerusalaame baqatana. Babiloone asay Xoossa keethaa bolla oothidabaas Goday, enta Xoossay halo keyanaysa enti Xiyoonen odana.
JER 50:29 Babiloone olanaw donge dukiya ubbaa xeegite; issoyka kessi ekonnaada iya yuushuwa teqo. Godaa bolla, Isra7eele Geeshsha bolla, I otortida gisho, iya oosuwada iyaw zaarite. I harata bolla oothidaysada iya bolla oothite.
JER 50:30 Hessa gisho, iya yalaga addeti katamaa giddo ogiyan hayqana; he gallas iya olanchoti ubbay dhayana” yaagees Goday.
JER 50:31 Goday, Ubbaafe Wolqaama Goday, “Neeni seeretiya wodey gakida gisho, neno, otoranchuwaw, ta ne bolla dendas.
JER 50:32 Otoranchoy dhubetidi kundana; iya denthiya asi deenna. Ta iya katamata taman oythana; he tamay yuushuwan de7iya ubba dhaysana” yaagees.
JER 50:33 Ubbaafe Wolqaama Goday haysada yaagees: “Isra7eele asaynne Yihuda asay un7etidosona. Enta di77idi efidaysati enta minthidi oykidosona; enta yeddenaw koybookona.
JER 50:34 Shin enta Wozeysi mino; iya sunthay Ubbaafe Wolqaama Godaa. I, enta biittas shempo immanaw enta gisho mootetees. Shin Babiloone biittan de7eyisata bolla dagama yeddana.
JER 50:35 Babilooney, Babiloonen de7eysati, iya halaqatinne iya cincati mashshan hayqana” yaagees Goday.
JER 50:36 “Iya eeya wordo nabeti mashshan hayqonna. Dagammiya iya wolqaama olanchoti mashshan hayqana.
JER 50:37 Iya parata bolla, iya para gaareta bollanne maccasa mela gidida iya allaga olanchota bolla mashshi yo. Iya shaluwa minjiya keethaa bolla mashshi yo; iya buqura ubbay bonqetana.
JER 50:38 Babiloonen eeqi kumida gishonne dagamman kokoriya eeqati de7iya gisho; iya haathay melo; iya bolla koshi yo.
JER 50:39 “Hessa gisho, Babilooney bazzo do7atinne workanati de7iya bessi gidana; qassi yanchoti yan daana. Yan merinaw asi deenna; yeletaape yeleta gakanaw asi de7iya bessi gidenna.
JER 50:40 Xoossay beni Soodomenne Gamoora enta yuushuwan de7iya katamatara dhaysidaysada Babiloonen oonika deenna; asi yan uttenna” yaagees Goday.
JER 50:41 “Heko, asay pudeha baggafe yaana; mino kawotethatinne daro kawoti sa7aa gaxape yaanaw dendidosona.
JER 50:42 Enti banta dongiyanne toora oykidosona; enti wozana minonne yeddi maaronna asi. Enti banta para toggidi biya wode, beetay shociya abba guunthada hanees. Neno, Babiloone, enti ubbay olas giigida asi gididi ne bolla salpidosona.
JER 50:43 “Babiloone kawoy hessa si7iya wode iya kushey daaburidi silis; iqethi oykida maccasada un7etis.
JER 50:44 “Yordaanose shaafa lanqen de7iya woraape, lo77o qooroy de7iya bessafe qoponna keyiya gaammoda, ta yada, Babiloone asaa enta biittafe yedethana. Hessafe guye, ta doorida asi iya bolla shuumana; yaatin ta meli oonee? Ta oothana gidaba teqanay oonee? Ay henthanchoy taara eqetanaw danda7ii?
JER 50:45 Hessa gisho, Goday Babiloone bollanne Babiloone biitta bolla halchidabanne qopidaba si7ite. Enta nayta wolqan goochidi efana; hessa gaason enta soo asa ubbay dagammana.
JER 50:46 Babiloone kundethaa girsay biitta qaathana; Babiloone waasoy kawotethata ubban si7etana” yaagees.
JER 51:1 Babiloone asaanne Babiloone biitta dhaysiya carko kiittana.
JER 51:2 Taani Babiloone bolla carkoda punniya allagata kiittana. Iya dhayuwa gallas enti ubba bessara iya un7ethana.
JER 51:3 Iya olanchoti dongiya dukana gakanaw woyko banta ola miishiya dancana gakanaw naagopite. Iya yalaga addetas mishetopite; iya olanchota polo dhaysite.
JER 51:4 Enti Babiloone biittan shuketana; I dabaaban cadetidi kundana.
JER 51:5 Enti biitta nagaran kunthikoka, Xoossay, Ubbaafe Wolqaama Goday, Isra7eele Geeshshay, Isra7eelenne Yihuda am7ida yeggidi aggibeenna.
JER 51:6 Babiloonepe baqatite; issoy issoy ba shempuwa ashsho. I oothida nagaraa gaason hinte wuropite. Ha wodey taani Goday halo keyiya wode.
JER 51:7 Babilooney sa7an de7iya asa ubbay uyidi mathotiya, woyne ushshi tigetiya, ta kushen de7iya worqa wanca mela. Kawotethati ubbay he woyne ushsha uyidi gooyidosona.
JER 51:8 Babilooney qoponna kundidi meqis. Hessa gisho, iyaw yeekite; I paxaneko ooni eri iya madunthaas dhale immite.
JER 51:9 Babiloonen de7iya allaga asay, “Nu Babiloone pathanaw koyida; shin paxanaw danda7ibeenna. Iya pirday haakidi salo gakida gishonne shaara gakanaw dhoqu gida gisho iya aggidi nu biitta simmoos” yaagidosona.
JER 51:10 Isra7eele asay, “Goday nuus pirdida gisho, Xiyoone bidi, Goday nu Xoossay oothidaba odana” yaagana.
JER 51:11 “Goday Babiloone dhaysanaw qofa qachida gisho, Meedona kawota denthis. I ba keethaa gisho halo keyanaw qopis. Meedona halaqati, ‘Donge toora leefite; gondalle oykite.
JER 51:12 Babiloone bolla ola bandira denthite; minthidi naagite. Wocheyisata enta bessan bessan wothite; zugidi caddiya olanchota giigisite’ ” yaagidosona. Goday Babiloone asa bolla qopidabaanne ba gida ba oothana.
JER 51:13 Babiloone, neeni daro shaafatinne duretethi kumida biitta, shin ne wursethay gakis; neeni bessonna ogen shiishiya go77ay attis.
JER 51:14 Ubbaafe Wolqaama Goday, “Booley biitta kumeysada taani asaa ne biittan kunthana; enti nena xoonida ufaysan banta qaala dhoqu oothidi ne bolla gayrana” yaagidi ba sunthan caaqis.
JER 51:15 Goday ba wolqan sa7aa medhis; ba cincatethan biitta baasis; salota ba akeekan miccis.
JER 51:16 I kiittiya wode, salon de7iya haathati guummoosona. Shaarata sa7aa gaxape ehees; iri bukiya wode wol7anthi wol7amees; ba minja bessaafe carkuwa kessees.
JER 51:17 Asi ubbay eeyanne akeeki baynaysa; enta misileti wordonne shempoy baynayisata gidiya gisho, worqaa sheeshidi eeqa medheysati yeellatidosona.
JER 51:18 He misileti pathonaysatanne kedhetidaysata; enta bolla Xoossay pirdiya wode enti dhayana.
JER 51:19 Shin Yayqooba Xoossay enta mela gidenna; ubbaba medhiday iya. I baw doorida kochay Isra7eele asaa; iya sunthay Ubbaafe Wolqaama Godaa.
JER 51:20 “Babiloone, ne ta naariqanne ta ola miishe; Nena go7etada taani biittata mentherethas; kawotethata dhaysas.
JER 51:21 Nena go7etada paratanne para toggeyisata; para gaaretanne enta laaggeyisata mentherethas.
JER 51:22 Nena go7etada maccanne adde, cimanne nayta panthinne geela7o mentherethas.
JER 51:23 Henthanchuwanne iya wudiya, goyeysanne iya waatha boorata, deriya haareysatanne halaqata nena go7etada mentherethas” yaagees Goday.
JER 51:24 “Babilooneynne Babiloone asay Xiyoone bolla oothida iita oosuwa gisho hinte xeellishin ta halo keyana” yaagees Goday.
JER 51:25 “Neno, Babiloone, ne biitta dhaysiya zuma mela; shin ta Goday nena ixas. Taani ta kushiya yeddada, nena zumaa bollafe duge gondorsana; neeni xuugetida zuma gidada attana.
JER 51:26 Neepe baason yeggiya woyko gimbees eketiya shuchi deenna; ne merinaw baysa gidana” yaagees Goday.
JER 51:27 “Babiloone bolla ola bandira denthite; asa giddon moyze punnite. Iya olanaw asaa ubbaa giigisite; Araraate, Minanne Askanaaza kawotethata xeegite. Ola halaqata shuumite; boole mela daro parata ehite.
JER 51:28 Babiloone olanaw kawotethata ubbaa giigisite; Meedona kawota, enta halaqata, deriya haareysatanne enti haariya biitta asa ubbaa denthite.
JER 51:29 “Babilooney oonika doonna baysa oothanaw Goday halchida halchuwa poliya gisho, biitta ubbay kokoresinne porqatees.
JER 51:30 Babiloone olanchoti ola aggidi, banta miixan uttidosona. Enta wolqay laafin, maccasa mela gididosona. Enta keethati xuugetidosona; katama pengiya kobe mithati meqidosona.
JER 51:31 Ha gaxape hini gaxa gakanaw, katamay morken oyketidaysa Babiloone kawas odanaw, woxeysi woxeysa kaallidi, kiitetidaysi kiitetidaysa kaallidi boosona.
JER 51:32 Shaafara pinniya bessati oyketidaysa, haatha gaxan de7iya woray xuugetidaysanne olanchoti dagammidaysa enti kawas odanaw woxoosona” yaagees Goday.
JER 51:33 “Babiloone biittay kathi bukiya wudumma gidana; guutha wodepe guye I caketiya wodey yaana” yaagees Ubbaafe Wolqaama Goday, Isra7eele Xoossay.
JER 51:34 Babiloone kawoy Nabukadanaxoori nuna wursidi mis; nu katamaa kaysa oto kessis. Dawey mitteysada iya mittis; mal7oba midi kuntheysada I nu shaluwan ba ganjiya kunthis; attidaysa mucidi cuttis.
JER 51:35 Xiyooney, “Babilooney nu bolla oothida iitaba ubbay iya bolla simmo” yaagosona. Yerusalaamey, “Nu suuthaa acoy Babiloone asa oyko” yaagosona.
JER 51:36 Hessa gisho, Goday Yerusalaame asaa haysada yaagees: “Ta ne gisho mootetana; ne haluwa ta keyana. Taani Babiloone haathaanne pultota melisana.
JER 51:37 Babilooney laaletha doorenne workanati gupiya bessi gidana. Iya be7iya ubbay dagammananne qelqisana; yan issi asika deenna.
JER 51:38 Babiloone asa ubbay gaammoda gudoosona; gaammo marada daarosona.
JER 51:39 Enta asatethay ho77iya wode, ta entaw ushsha gibira giigisana. Enti mathotana gakanaw ta enta ushshana; enti zaaridi dendonna mela merinaw dhiskana” yaagees Goday.
JER 51:40 Shukanaw efiya urgeda, marazedanne koleda taani enta shuka bessi efana.
JER 51:41 “Asa ubbay sabbiya Babilooney waanidi oyketide! Babilooney kawotethata giddon waanidi daganthiyaba gidide!
JER 51:42 Babiloone morketi abba beetay dendeysada dendidi kataman eellidosona.
JER 51:43 Iya katamati laaletidi, daganthiyaba gididosona; haathi bayna mela biitta daanidosona; asi doonna bessinne oonika kanthidi aadhona bessi gididosona.
JER 51:44 Beella geetetiya Babiloone eeqa ta seerana; I mittidaba iya uluwape kessana. Hizape guye, kawotethati iyako goggeysa aggana; Babiloone gimbey kundana.
JER 51:45 “Ta asaw, iya giddofe keyite! Hinte, Godaa hanqo suuluwape hintena ashshite!
JER 51:46 Biittan odetiya odaa si7iya wode ufaysi qanxofitenne yayyofite. Laythan laythan odi kaallidi kaallidi yaana. He wode kawoy kawa bolla dendiya makalla odi biittan si7etana.”
JER 51:47 “Hessa gisho, taani Babiloone eeqa misileta seeriya gallasi yaana. Biitta ubbay yeellatana; hayqidaysati ubbay katamaa giddon kundana.
JER 51:48 Pudeha baggafe yaana dhayseysata kushen Babilooney geliya wode saloninne sa7an de7iya ubbabay ililana.
JER 51:49 Babilooney, Isra7eele asaanne sa7an de7iya asa ubbaa wodhidaysada Babiloone asay hayqanaw koshshees.
JER 51:50 Ta asaw, olape kessi ekidaysato, biite; haysan eqofite. Hinte de7iya haaho biittan tana Godaa hassayite; Yerusalaame qopite.”
JER 51:51 Hinte, “Nuuni cayetida gisho kawuyida; allagati Xoossa keethan de7iya geeshsha bessata gelida gisho, nu yeella ma7ida” yaagideta.
JER 51:52 Shin “Taani Goday Babiloone eeqata seeriya wodey yaana. Madunxidaysati biitta ubban oolana.
JER 51:53 Babilooney salo pude keyidi, yan miixa medhanaw danda7iyakoka, yaa gakanaw keyidi, iya yan dhaysiya asi taani kiittana” yaagees Goday.
JER 51:54 “Babiloonen waasoy, Babiloone biittan gita dhayo girsi si7etana.
JER 51:55 Goday Babiloone dhaysana; iya wolqaama girsa si77i oothana. Abba beetada guummiya morketi olishe ceeqetana.
JER 51:56 Dhayseysati Babiloone bolla yaana; iya olanchoti oyketana; enta dongey meqana. Taani Goday halo keyiya Xoosse gidiya gisho, enta oosuwada entaw zaarana.
JER 51:57 Iya halaqata, iya cinca asata, iya deriya haareyisata, iya toora moconatanne iya olanchota mathoyana. Enti zaaridi dendonna mela merinaw dhiskana” Taani kawoy, Ubbaafe Wolqaama Godaa geeteteysi haysa odayis.
JER 51:58 “Gita Babiloone gimbey kundana; iya adussa pengeti taman xuugetana. Asay oothidaba ubbay hada; kawotethati daaburiyabay tamasa” yaagees Ubbaafe Wolqaama Goday.
JER 51:59 Maseya na7aa, Neera na7ay Sarayi kawa Sedeqiyaasa shuuma. Sedeqiyaasi Yihudan kawotida oyddantho laythan, Sarayi iyara Babiloone biya wode Ermiyaasi Saraya bolla kiita yeddis.
JER 51:60 Babiloone bolla gakanaw de7iya iitaba ubbaanne Babiloone xeelliya haraba ubbaa Ermiyaasi maxaafan xaafis.
JER 51:61 Sarayako, “Neeni Babiloone gakida wode ne qaala dhoqu oothada asaas ha maxaafa nabbaba.
JER 51:62 Qassi haysada yaagada woossa: ‘Abeeti Godaw, neeni ha bessaa dhaysana; ha bessan shempora de7iya medhetethi, asinne mehey deenna; ha bessay merinaw mela biitta gidana’ yaaga.
JER 51:63 Ha maxaafa nabbaba wursidaape guye, maxaafa shuchara gatha qachada, Efraxiisa shaafan hola.
JER 51:64 Taani Goday iya bolla ehiya dhayuwa gaason, Babilooney zaaridi dendonna mela haysada muuketana” yaaga. Ermiyaasi odida qaalay haysan wuris.
JER 52:1 Sedeqiyaasi kawotiya wode, iyaw laythi laatamanne issino; I Yerusalaamen tammanne issi laythi kawotis. Iya aaye sunthay Amxaalo; iya Libina kataman de7iya Ermiyaasa na7a.
JER 52:2 Iyo7aqeemi oothidaysada Sedeqiyaasi Godaa sinthan iitabaa oothis.
JER 52:3 Goday Yerusalaame bollanne Yihuda bolla hanqetida gisho enta ba sinthafe diggis. Sedeqiyaasi Babiloone kawa bolla makallis.
JER 52:4 Sedeqiyaasi kawotida uddufuntho laythan, tammantho ageenan, tammantho gallasan Babiloone kawoy Nabukadanaxoori ba olanchota ubbaa ekidi, Yerusalaame teqis. Enti iya yuushuwan biitta dooridosona.
JER 52:5 Sedeqiyaasi kawotida tammanne issintho laythi gakanaw, Yerusalaamey teqetidi gam7is.
JER 52:6 He laythi oyddantho ageenan, uddufuntho gallasan, koshi suullin, asay miyaba dhayis.
JER 52:7 Katama gimbey issi baggara meqis. Babiloone asay katamaa yuushuwa naagikoka, Yihuda kawa olanchoti ubbay qamma kawo atakilte bessaa efiya ogiya oykidi, nam7u dirsaa gimbeta issife gathiya pengiyara keyidi baqatidosona. Enti Yordaanose zangaarako simmidi bidosona.
JER 52:8 Shin Babiloone olanchoti kawa Sedeqiyaasa yedethidi, Iyaarko demba gathishe oykidosona. Iya olanchoti ubbay iya kaddidi laaletidosona.
JER 52:9 Hessafe guye, iya Hamaata biittan, Irbila kataman de7iya Babiloone kawako efidosona. Yan Nabukadanaxoori Sedeqiyaasa bolla pirdis.
JER 52:10 Sedeqiyaasa adde nayta Sedeqiyaasi xeellishin, Babiloone kawoy wodhis. Yihuda halaqata ubbaa yan Irbila kataman wodhidosona.
JER 52:11 Sedeqiyaasa ayfeta woocidi, santhalaatan qachidi, Babiloone efidosona. I hayqana gakanaw, yan qasho keethan iya wothidosona.
JER 52:12 Nabukadanaxoori Babiloonen kawotida tammanne uddufuntho laythan, ichashantho ageenan, tammantho gallasan, kawa moorinnay, kawa naageysata halaqay Nabuzardaani Yerusalaame gelis.
JER 52:13 Xoossa keethaa, kawo gadhonne Yerusalaamen de7iya keethata ubbaa taman xuuggis; qassi gita keethata ubbaa xuuggis.
JER 52:14 Babiloone olanchoti ubbay kawa naageysata halaqaa kiitan, Yerusalaame katamaa yuushuwan de7iya dirsa gimbiya ubbaa laallidosona.
JER 52:15 Nabuzardaani guutha manqota, kataman attida asata, kaddidi Babiloone olanchotan gelida asatanne kushe hiillanchota di77idi Babiloone efis.
JER 52:16 Shin Nabuzardaani manqotape guutha asaa woyne tokanaadanne gade goyanaada Yihudan aggis.
JER 52:17 Babilooneti Xoossa keetha karen eqida naase birata tuuqeta, caana gaaretanne gita kereta mentherethidi, naase birata ubbaa Babiloone efidosona.
JER 52:18 Kereta, akaafata, xompe shaluwa xeera pittiyabata, xaarota, ixaane saanetanne yarsho wode go7etiya naase birata miisheta ubbaa efidosona.
JER 52:19 Kawa naageysata halaqay Nabuzardaani worqafenne birape oosetida disteta, tama ekiya miisheta, xaarota, laafa kereta, xompe wothiya kocata, ixaane saanetanne ushsha yarshos go7etiya otota efis.
JER 52:20 Kawoy Solomoney Xoossa keethan oosetiyabas medhida nam7u tuussati, gita kereta, tammanne nam7u kormata misiletinne caana gaareti medhetida naase biratati mizaanen likanaw danda7etenna.
JER 52:21 Nam7u tuussati issi mela gididi, issoy issoy tammanne hospun wadha adusse. Enta ubbay tammanne nam7u wadha. Entaw giddoy kaysi gididi, biratay oyddu biradhe keena orde.
JER 52:22 Nam7u tuussata huuphiyan naasepe oosetida gumboti de7oosona. Issi gumbuwa geesay ichashu wadha gididi, yuushoy gite misileninne oromaane misilen alleeqetidi uttis. Nam7antho gumboyka iya mela.
JER 52:23 Gumbotas miyen miyen de7iya oromaaneta misileti uddufun tammanne usupuna; yuushuwan de7iya gite misiletape bolla baggara de7iya oromaane misileti issi xeeta.
JER 52:24 Kawa naageysata halaqay Nabuzardaani kahine halaqaa Saraya, iya kaalliya kahiniya Sofoniyaasanne penge naagiya heedzu asata oykis.
JER 52:25 Kataman de7iya asaape toora mocona, kawa zoreysatape laapun asata efis. Toora mocona, xaafiya, asaa olanchota dooriya halaqanne hara usupun tammu asata efis.
JER 52:26 Nabuzardaani enta ubbaa ekidi, Babiloone kawako, Irbila katamaa efis.
JER 52:27 Hamaata biittan, Irbila kataman, Babiloone kawoy enta ubbaa wodhisis. Hessada hanidi, Yihuda asay banta biittafe di7etidi bidosona.
JER 52:28 Nabukadanaxoori kawotida laapuntho laythan, heedzu mukulunne laatamanne heedzu asay Yihudape di7etis.
JER 52:29 Tammanne hospuntho laythan hospun xeetanne hastamanne nam7u asay Yerusalaamepe di7etis.
JER 52:30 Nabukadanaxoori kawotida laatamanne heedzantho laythan kawa naageysata halaqay Nabuzardaani laapun xeetanne oytamanne ichashu asaa di77is. Di7etida asa tayboy oyddu mukulunne usupun xeeta.
JER 52:31 Yo7akini di7etida hastamanne laapuntha laythan, tammanne nam7antho ageenan, laatamanne ichashantho gallasan, Yoor-Marodaaki kawotida laythi Yihuda kawa Yo7akina bonchidi, qashope birshis.
JER 52:32 Yoor-Marodaaki Yo7akinara mal7o qaala odetidi, Babiloonen di7on de7iya hara kawota ubbaafe aathidi iya bonchis.
JER 52:33 Hessa gisho, Yo7akini qasho keethan ma7iya ma7uwa laammidi, ba de7o laytha ubban kawo gaytape mishe de7is.
JER 52:34 Yo7akini hayqana gakanaw, gallas gallas iyaw koshshiyaba ubbaa Babiloone kawoy immis.
LAM 1:1 Kase asi kumida katamiya ha77i waanada asi bayna bessi gidadee? Kase kawotethata giddon gita gididaara ha77i waanada am7o gidadee? Katamata giddon kawo gididaara ha77i waanada aylle gidadee?
LAM 1:2 Qamma yibbata yeeho yeekashe aqawusu; afuthi I ayfe karera duge wodhees. Kase iyo doseysatape ha77i iyo minthethiya issoyka baawa. I laggeti iyo aathidi immidosona; iw morke gididosona.
LAM 1:3 Yihudi naaqetada; aylletada di7etasu; ha77i kawotethata giddon de7awusu; shin shempo bessi demmabuku. Iya metootada de7ishin, yedetheysati iyo demmidosona.
LAM 1:4 Laytha ba7aale bonchanaw yaa asi bayna gisho, Xiyoone ogeti yeekosona. I dirsa pengeti baysatidosona; I kahineti oolosona. Yan de7iya geela7o nayti un7etidosona; iyaka un7etada yeekawusu.
LAM 1:5 I morketi iw godaa gididosona; entaw injetin de7idosona. I, nagaraa gaason Goday iyo un7ethis; I nayti morketan di7etidi bidosona.
LAM 1:6 Xiyooni bonchoy iipe qaaretis; I, halaqatika miya bessi dhayida gaarada hanidosona; Enti wolqa dhayidi bantana yedetheyisata sinthafe baqatidosona.
LAM 1:7 Yerusalaamey ba metuwanne ba un7a gallasan, beni ba boncho shaluwa hassayawusu. I, asay morketa kushen aadhidi imetida wode, iyo maaddiya issoyka bentibeenna. I morketi iyo xeellidi, I dhayuwan miicidosona.
LAM 1:8 Yerusalaamey gita nagara oothida gisho tunasu; iyo bonchida ubbay I kalluwa be7ida gisho kadhees; iya oolashe guye simmasu.
LAM 1:9 Tunatethi I afilaa bolla bentis; sinthafe ba bolla yaanaba qopabuuku. I kundethay daganthiyaba gidis; iyo minthethiya oonika baawa. Iya, “Abeeti Godaw, ta un7etetha be7a! ta morketi tana xoonidosona” yaagasu.
LAM 1:10 Morketi I boncho shaluwa bonqidosona; kase ne maabara giddo gelonna mela, neeni diggida asati, I keethaa gelishin be7asu.
LAM 1:11 I asati koshatidi kathi demmanaw oolosona; enti de7on daanaw banta shaluwa kathan laammoosona. Yerusalaamey haysada yaagasu; Abeeti Godaw, tana xeella; ta kawushatethaa be7a!
LAM 1:12 Hinteno, haysara aadheysato, haysi hintew aykoka daanennee? Ane be7ite; akeekite; ba eexiya hanqo gallasan, Xoossay ta bolla ehida metuwa mela metoy de7ii?
LAM 1:13 Bollafe tama duge yeddis; he tamay ta meqethaa giddo gelis. Ta tohoy xihen oyketis; tana guye zaaris; tana gallas ubbaa labbanthidi yeggi aggis.
LAM 1:14 Ta oothida nagara ubbaa shiishi qachidi, qambarada ta gannan wothis; yaatidi ta wolqaa wursis. Ta eqetanaw danda7onna asaas, tana aathidi immis.
LAM 1:15 Goday ta giddon de7iya wolqaama olanchota ubbaa diggis. Ta yalagata dhaysanaw wode qachis; woyne yedheysada, Goday Yihuda geela7ota yedhis.
LAM 1:16 Taani yeekashe ta afuthaa gussey hessasa; tana minthetheynne katisiya oonika baawa; morkey goobin, ta nayti un7etidosona.
LAM 1:17 Xiyooney ba kushiya miccasu; shin iyo minthethiya oonika baawa. I yuushuwan de7eysati iyo morkanaada Goday oothis. Yerusalaamey enta giddon tuna gidasu.
LAM 1:18 Iya haysada yaagasu; “Goday xillo; iya kiitetonna ixiday tana. Hinteno, asato ubbay si7ite; ta metuwaka be7ite; ta panthatinne ta geela7oti di7etidosona.
LAM 1:19 Ta laggeta xeegas; shin enti tana cimmidosona; kahinetinne cimati banta shempuwa ashshanaw, kathi koyishe katama giddon hayqidosona.
LAM 1:20 Abeeti Godaw, ta waayiya be7a! ta garsay dagammis. Taani daro makallida gisho, ta wozanay meqis; karen mashshi wursees; son hayqoy de7ees.
LAM 1:21 Asay ta zelelsa si7idosona; shin tana minthethiya issi asika baawa. Ta morketi ta metuwa si7idosona; ne ta bolla oothidaban ufaytidosona. Enti taada hanana mela, enta bolla ne awaajida gallasaa eha!
LAM 1:22 Enta iitatetha ubbay ne sinthe gako; ta nagaraa gisho tana seeridaysada entaka seera; ta zelelsay daris; ta wozanayka meqis.”
LAM 2:1 Goday ba hanqo shaarape garsan, Xiyoone na7iw, waatidi wothide! Isra7eele bonchuwa salope sa7a holis; ba hanquwa gallas, iya tohoy yedhiya bessaa qopibeenna.
LAM 2:2 Goday Yihudan keethata ubbaa qadhetonna dhaysis; ba hanquwan Yihuda biitta miixaa ubbaa laallis; he kawotethaanne halaqata sa7an duge yeggidi kawushis.
LAM 2:3 Ba wolqaama hanquwan Isra7eele wolqaa mentherethis; morkey iya olanaw yaa wode Goday ba ushacha kushiya enta bollafe diggis. Ba yuushuwan de7iyaba ubbaa miya tamada, Yayqooba bolla tama lacoy eexis.
LAM 2:4 Morkeda I ba dongiya enta bolla dafis; un7ethiya iya ushacha kushey giigis. Ayfees lo77iya asa ubbaa wodhis; Xiyoone bolla ba sheniya tamada qolis.
LAM 2:5 Goday morkeda hanidi, Isra7eele dhaysis; kawo gadhotanne miixa ubbaa laallis yihuda asaas yeehonne kayo gujis.
LAM 2:6 Ba keetha atakilte gaden de7iya shaqarada shoddidi holis; laytha ba7aaletinne Sambaatati dogetanaada oothis; ba gita hanquwan kawanne kahiniya kawushis.
LAM 2:7 Goday ba yarsho bessa kadhis; ba keethaa aggaagis; kawo gadhota gimbiya morketa kushen yeggis. Laytha ba7aale bonchiya gallasa wocamada, morketi Xoossa keethan wocamidosona.
LAM 2:8 Goday Xiyooni na7e dirsa gimbiya, laallanaw qachis; I bolla wadha wodoro yeggis. Iyo dhaysona de7ishe ba kushiya zaarenna; gimbeynne miixay issife kundanaada oothis.
LAM 2:9 Yerusalaame penge sanqati biittan moogetidosona; enta gorde mithata mentherethidi dhaysis. Kawoynne moorinnati di7etidi kawotethata giddo bidosona; higge tamaarsey baawa; nabetika hizape guye qoncethi be7okona.
LAM 2:10 Xiyoone cimati si77i gidi biittan uttidosona; banta huuphen baana qolidi kayo ma7o ma7idosona; Yerusalaame geela7oti sa7an duge hokidosona.
LAM 2:11 Ta asay dhayida gisho, guutha nayti katamaa ogiya bolla daaburidi kundida gisho, ta ayfey afuthan tulcatis; ta wozanay azzanon dagammis.
LAM 2:12 Enti banta aayetako, “Kathi imma! haathe imma” yaagidi waassoosona; katamaa ogiyan madunxidi labbaniya asada, enti daaburin enta shempoy enta aayeta ki7on keyees.
LAM 2:13 Yerusalaame naatte, taani nebaa ay gaanee? ne qohuwa ta aybira ginayo? Dosetida Xiyoone geela7e, ta nena waatada minthetho? Ne madunthay abba mela ciimmo; nena ooni pathanaw danda7ii?
LAM 2:14 Ne nabeti wordonne pathonna qoncethi be7idosona; ne di7etonna mela ne nagaraa qoncisidi odibookona; enti balethiya wordo qoncethi new be7idosona.
LAM 2:15 Ne matara aadhiya ubbay ba kushiya baqees; “Biittan ubbaafe aadhada lo77iya katamiya hanno? Biitta ubbaas ufaysi geetetida katamiya hanno?” yaagidi nena qelqisishe banta huuphiya qaathidosona.
LAM 2:16 Ne morketi ubbay banta doona ne bolla dooyidosona; ne bolla qelqisidosona. Banta achaa qarcishe haysada yaagosona; nu enta dhaysida, nu amotiday hessa wursethan be7ida.
LAM 2:17 Goday ba qopidaba oothis; kase odida ba qaala polis. Yerusalaames qadhetonna iyo laallis I morketi ufaytana mela, morketa wolqaa minthis.
LAM 2:18 Xiyoone, ne dirsa gimbey Godaako waasso! ne afuthay qammanne gallas shaafada goggo! Newuka shempofa; ne ayfiyas shempo immofa!
LAM 2:19 Qamma dendada waassa; Godaa sinthan ne wozanaa haathada gussa. Koshatidi oge doonan kundida ne nayta shempuwas ne kushiya iyako pude denthada woossa!
LAM 2:20 Abeeti Godaw, be7a! kase haysada neeni oodde bolla oothadii? Aayeti banta ki7on ko77isidi dichida banta nayta mo gay? kahinetinne nabeti Xoossa keethan hayqo gay?
LAM 2:21 Ciminne na7atethi oge bolla kundidosona; geela7otinne panthati mashshan wuridosona. Neeni ne hanquwa gallas enta wodhadasa; entaw qadhetonna enta buthadasa.
LAM 2:22 Gibira gallas ase xeegeysada, daganthiya ta morketa ubba bessafe xeegadasa. Godaa hanqo gallasan oonika kessi ekibeenna woyko attibeenna. Taani ta ki7on ko77isada dichida nayta ubbaa morkey wodhidi dhaysis.
LAM 3:1 Godaa shene xam7an meto be7ida asi tana.
LAM 3:2 Tana ba sinthafe kessidi, poo7oy bayna dhuman wothis.
LAM 3:3 Gallas kumethi tana shocanaw zaari zaari ba kushiya denthis.
LAM 3:4 I, ta galbaanne ta ashuwa cimisis; ta meqethaa menthis.
LAM 3:5 I, ta yuushuwa metoninne daaburan diris.
LAM 3:6 Beni hayqida asada tana dhuman wothis.
LAM 3:7 Ta kessa ekonna mela, ta yuushuwa diris; deexo duthan tana duxis.
LAM 3:8 Taani maade koyada iya xeegin, iyako waassin, tana si7onna ixis.
LAM 3:9 Ta ogiya wolqaama shuchan gordis; ta ogiya geellayis.
LAM 3:10 I, taw zugidi naagiya babantha mela, qosetidi naagiya gaammo mela gidis.
LAM 3:11 I, tana ta ogiyape kessidi duuserethis; tana asi bayna bessan yeggi aggis.
LAM 3:12 Ba dongiya dafidi, tana dukanaw mallis.
LAM 3:13 Ba dongiya dafidi, ta wozana ayfen caddis.
LAM 3:14 Taani asa ubbaas miichas attas; gallas kumethi bore yethas gidas.
LAM 3:15 I, tana meton camisis; camo godare uuthi tana ushshidi kalsis.
LAM 3:16 I, ta achaa acen menthis; tana baanan yedhis.
LAM 3:17 Saroy taape haakis; taani inje duussu dogas.
LAM 3:18 Hessa gisho, “Ta wolqay taape eketis; taani Godan wothida ufaysa ubbay dhayis” yaagas.
LAM 3:19 Ta metuwanne ta un7aa hassayin de7oy tana cammis.
LAM 3:20 Ta hessa kumethi dogike; ta shempoy azzanees.
LAM 3:21 Gidoshin, ta issiba ta wozanan qopiya wode ta ufaysan kumayis.
LAM 3:22 Hessika, nuuni dhayboonay Godaa siiquwape dendoysana; iya qadhey wuri erenna.
LAM 3:23 Enti wonta wonta oorathi; ne daro ammanthasa.
LAM 3:24 Goday ta saama; hessa gisho, ta iyan ufaysi wothana.
LAM 3:25 Iyan banta ufaysa wotheysatasinne iya koyeysatas Goday lo77o.
LAM 3:26 Asi si77i gidi Godaa atotethan naagiko lo77o.
LAM 3:27 As ba na7atethan meto danda7a tamaariko lo77o.
LAM 3:28 Goday meto ehiya wode si77i gidi utto.
LAM 3:29 Iyaw sinthafe ufaysi daanaw danda7iya gisho bana ziqi ootho.
LAM 3:30 I ba shakala baqeysas immo; cashshe kallo.
LAM 3:31 Goday ase merinaw yeggenna.
LAM 3:32 I asa bolla meto ehikoka, ba merina siiquwa darotethan zaaridi qadhetees.
LAM 3:33 I asa bolla meto woyko un7a ehidi ufaytenna.
LAM 3:34 Bittan de7iya qasho asa banta tohuwpe garsan yedhiya wode,
LAM 3:35 Ubbaafe Wolqaama Xoossaa sinthan asa maati yedhetiya wode,
LAM 3:36 Xillo pirdi dhayiya wode Goday hessa ubbaa be7eneyee?
LAM 3:37 Goday kiittonashin odidi polisanaw danda7ey oonee?
LAM 3:38 Iitaba gidin lo77oba odi poley Ubbaafe Dhoqa Xoossa gidenneyee?
LAM 3:39 Yaatin, asi de7on de7ishe ba nagaraa gisho seeretiya wode ayis zuuzumii?
LAM 3:40 Ane nu ogiya paacoos; Godaako simmoos.
LAM 3:41 Nu wozanaa nu kushiyara salon de7iya Xoossaako denthidi haysada yaagos:
LAM 3:42 Nu nena naaqida; new makallida; neka nuus atto gabaaka.
LAM 3:43 Ne hanquwan kametada nuna yedethada; ne nuus qadhetonna nuna wodhadasa.
LAM 3:44 Nu woosay neeko gakonnaada, nenatethaa shaaran kammadasa.
LAM 3:45 Asaa giddon nuna pitonne buure oothadasa.
LAM 3:46 Nu morketi ubbay nu bolla banta doona dooyidosona.
LAM 3:47 Nu dagamaninne giten gelida; metoninne un7an laaletida.
LAM 3:48 Ta asaa gakida waayiya gaason ta ayfepe afuthu shaafada goggees.
LAM 3:49 Ta ayfey aggonna afuxees.
LAM 3:50 Goday salope duge be7ana gakanaw hessi hanees.
LAM 3:51 Ta kataman de7iya maccasata bolla gakidaba ta ayfey be7ida wode ta wozanay azzanis.
LAM 3:52 Coo tana morkeysati kafo shankatiyada tana shankatidosona.
LAM 3:53 Ta paxa de7ishin tana ollan yeggidi, ollaa doona shuchan gordidosona.
LAM 3:54 Haathi kumidi ta huuphera goggiya wode ta dhayas gada qopas.
LAM 3:55 Abeeti Godaw, ta ciimmo ollan de7ashe ne sunthaa xeegas.
LAM 3:56 Ta waasuwa si7anaada ta nena woossiya wode tana si7adasa.
LAM 3:57 Taani nena xeegida wode taako shiiqada, “Babofa” yaagadasa.
LAM 3:58 Abeeti Godaw ne ta mootuwa mootetada tana wozadasa.
LAM 3:59 Abeeti Godaw, ne ta un7aa be7adasa; hessa gisho, ne taw pirda.
LAM 3:60 Enti halo keyanaw ta bolla maqetiya maquwa ubbaa be7adasa.
LAM 3:61 Abeeti Godaw, enti tana cayiya cashshaanne ta bolla maqetiya maquwa ubbaa si7adasa.
LAM 3:62 Ta morketi gallas kumethi ta bolla zuuzumeysanne kalkasheysa si7adasa.
LAM 3:63 Enti uttishenne eqishe tana boridi yexoosona.
LAM 3:64 Abeeti Godaw, enti oothida oosuwas bessiya zaaruwa entaw qanxa!
LAM 3:65 Enta wozanaa eysa; ne baadethay enta gako.
LAM 3:66 Abeeti Godaw, ne enta ne hanquwan yedetha; salope garsan enta dhaysa.
LAM 4:1 Worqey phooleysa waanidi aggidee? geeshsha worqay waanidi dammidee? Xoossa keethay gimbetida shuchay oge doonan laaletis.
LAM 4:2 Kase al7o worqa mela bonchetida Xiyoone nayti ha77i biittafe medhetida oto gididosona.
LAM 4:3 Hari attoshin worakani ba mari dhanthawusu; shin ta asay bazzon de7iya yanchoda, ba naytas iita gidis.
LAM 4:4 Saamo gaason yooga nayta inxarsay kottonora oyketis; nayti kathi woossosona; shin entaw immiya oonika baawa.
LAM 4:5 Kase mal7o katha xalaala meysati ha77i oge doonan koshan wuridosona. Kase liino ma7idi diccidaysati ha77i bido bolla zin7idosona.
LAM 4:6 Ta asaa nagaray, oodde kusheyka iyo bochonna, qoponna shiretidi wodhida Soodome asa nagarape daro.
LAM 4:7 Yihuda halaqati shachafe aadhida geeshshi, maathafe aadhida boothu. Enta asatethay zo7o inqofe aadhida aarise; enta medhoy sanpare al7o shucha mela.
LAM 4:8 Shin ha77i enta som7oy shaalape aadhidi kareexis; asasi ogen enta be7idi erenna; enta gogay meqethaara oyketidi mithada melis.
LAM 4:9 Miyaba dhayidi, koshan hayqidaysatape olan hayqidaysati lo77o.
LAM 4:10 Ta asaa bolla yida dhayuwa gaason, qadhetiya aayeti banta nayta doysidi midosona.
LAM 4:11 Godaa hanqo xuu7ay kumis; I ba suulliya sheniya tigis. Yerusalaame baasuwa tama oythis.
LAM 4:12 Ha sa7a kawotape woyko kawotethatan de7iya asaape oonika morkey Yerusalaame pengiyara gelana gidi ammanibena.
LAM 4:13 Shin haysi haniday iya nabetinne nagarasinne iya kahineti oothida naaquwasa, xillota suuthaa iya giddon gussida gishosa.
LAM 4:14 Enti qooqe asada, oge tattafoosona; enti suuthan tunida gisho enta ma7uwa oonika bochanaw koyenna.
LAM 4:15 Hessa gisho, asay, “Kichite! hinte tuna gidiya gisho, nuna bochofite!” yaagidi enta bolla waassidosona. Enti baqatidi toylatiya wode, kawotethatan de7iya asay, “Hinte nuura haysan daanaw danda7eketa” yaagidosona.
LAM 4:16 Goday enta laallis; I entaba zaaridi qopenna; enta kahineti bonchetokona; enta cimati nashetookona.
LAM 4:17 Nu ayfey maado demmanaw xeellishe coo daaburis; nuna ashshanaw danda7onna kawotethatape maado naagida.
LAM 4:18 Asay nu gedaa kaalliya gisho, nu katama ogera hemetanaw danda7ibooko. Nu wursethay matis; nu laythay wuris; nuus dhayo wodeyka gakis.
LAM 4:19 Nuna yedetheysati piradhiya arganthafe aadhidi eesotoosona; enti nuna dere huuphera yedethidosona; bazzon hokidi nuna naagidosona.
LAM 4:20 Goday tiyida kawoy, nu de7uwas shempoy, enta xihiyan oyketis. Nu iya kuya garsan uttidi, kawotethata giddon daana gidi qopida.
LAM 4:21 Hinteno, Uxa biittan de7iya Edoome asaw, ufaytite; hashshu giite. Shin xuu7ay hinte bolla yaana; hinte mathotidi kallo attana.
LAM 4:22 Hinteno, Xiyoone asaw, hinte seeray gidana; I hizape hintena di7o biittan wothenna. Shin Edoome asaw, hinte seeretana; hinte nagarayka qoncana.
LAM 5:1 Abeeti Godaw, nuna gakidaba ubbaa qopa; nu kawushatethaa be7a!
LAM 5:2 Nu laatay allagatas, nu keethayka imatha asaas imetis.
LAM 5:3 Nuuni aawi hayqida na7a gidida; nu aayetika am7o gididosona.
LAM 5:4 Nuuni ushsha haatha shammidi ekoos; eethiya mithas gate qanxoos.
LAM 5:5 Nuna yedetheysati nu gindiya garsana; nu daaburida shin shempanaw danda7ibooko.
LAM 5:6 Nuuni kathi kallana gidi, Gibxetasinne Asooretas kushe immida.
LAM 5:7 Nagara oothiday nu mayzata, shin enti ha77i dookona; enti ekanaw bessiya seera ekiday nuna.
LAM 5:8 Nuna aylleti haaroosona; enta kushepe nuna ashshiya oonika baawa.
LAM 5:9 Mashshan wodheysati bazzon de7iya gisho, nu shempuwa bayzidi kathi demmida.
LAM 5:10 Iita kosha gaason, nu gogay tama cooceda michees.
LAM 5:11 Maccasata Xiyoonen geela7ota Yihuda katamatan wolqan oykidi tunisidosona.
LAM 5:12 Halaqata efidi kaqidosona; cimati bonchetibookona.
LAM 5:13 Yalaga addeti woxan gaaccidosona; adde nayti deexo mithi tookidi gandigaridosona.
LAM 5:14 Cimati katama pengen pirdanaw utteysa aggidosona; yalaga addeti nayti yethi dogidosona.
LAM 5:15 Nu wozanaape ufaysi kichis; nu dursay yeehon laametis.
LAM 5:16 Nu huuphiyape kallachay kundis; nu nagara oothida gisho nuna ayye!
LAM 5:17 Hessa gisho, nu wozanay daaburis; nu ayfey teljumis.
LAM 5:18 Xiyoone Derey baysa gidida gisho, workanati yan gupoosona.
LAM 5:19 Abeeti Godaw, ne merinaw haarasa; ne araatay yeletaape yeletaa gakanaasa.
LAM 5:20 Neeni nuna ayis ubba wode dogay? haysa mela adussa wode nuna ayis aggay?
LAM 5:21 Abeeti Godaw, nuna neeko zaara; nu simmana; nu wodiya beniysatho zaarada ooratha.
LAM 5:22 Neeni nuna polo aggadiyee? Ne hanquwas zawi baaweyee?
EZE 1:1 Hastamantho laythan, oyddantho ageenan, ichashantho gallas, taani Koboora shaafan di7etida asaa giddon de7ishin saloti dooyetin, Xoossaa qoncethi be7as.
EZE 1:2 Kawoy Yo7akini di7etida ichashantho laythan, he ageenan ichashantho gallasan,
EZE 1:3 Kaldaaweta biittan Koboora shaafa matan de7iya taako, Buza na7aa, kahiniya Hizqeelako, Godaa qaalay yis; Godaa wolqay tana haaris.
EZE 1:4 Ta xeelliya wode gotey pudeha baggafe yishin be7as; wolqaama shaara giddofe wol7anthi bentees; iya yuushuwan de7iya saloy poo7is. Tama giddo baggay phooliya naase birata daanees.
EZE 1:5 Iya giddon oyddu de7on de7iya medhetethati de7oosona. Enta malay asa mala daanees.
EZE 1:6 Enta issuwas issuwas oyddu oyddu som7oynne oyddu oyddu qefey de7ees.
EZE 1:7 Enta geday sitti gis; enta tohoy mehe qincafile mela; he tohoti quchidi geeshshida naase biratada phoolees.
EZE 1:8 Enta qefiyape garsara oyddu baggara asa kushe daaniya kushey de7ees. He oyddu medhetethatas som7oynne qefey de7ees.
EZE 1:9 Enta qefey issoy issuwa bochees; enti ubbay yaa haa simmonna sitti gidi sinthe boosona.
EZE 1:10 Enta issuwas issuwas sintha baggara asa som7oy de7ees; ushacha baggara gaammo som7oy de7ees; haddirsa baggara boora som7oy de7ees; guye baggara argantha som7oy de7ees.
EZE 1:11 Enta qefey dhoqu gidi micetidi uttis; enta issuwa issuwa nam7u qefey nam7u baggara hanko medhetethata qefey bochees; nam7u qefey enta asatethaa kammees.
EZE 1:12 Enti ubbay sitti gidi sinthe boosona; yaa haa simmonna, Xoossa Ayyaanay biya soo awuka boosona.
EZE 1:13 Ha de7on de7iya medhetethata giddon issi eexiya tama bonqo daaneysi de7ees. He tamay sinthenne guye qaaxiya, eexiya xompe daanees; he tamay phoolees; iya giddofe wol7anthi keyees.
EZE 1:14 Ha de7on de7iya medhetethati wol7anthada sinthenne guye eeson simeretoosona.
EZE 1:15 Heko, ha oyddu medhetethata ta be7iya wode, enta miyen, sa7an de7iya gertota be7as; issi issi medhetetha miyen issi issi gertoy de7ees.
EZE 1:16 Ha gertoti al7o shuchada phoolosona; enti oydday medhoninne malan issoy issuwa daanosona. Issi gertoy hanko gertuwa giddora kanthidi aadhidaba daanees.
EZE 1:17 Enti biya wode oyddu baggafe awu simmidi baaneko yaa haa simmonna boosona.
EZE 1:18 Gitanne yashshiya oyddu gertoti de7oosona; he gertotas gaxi de7ees; he gaxaa yuushoy ayfen kumidi uttis.
EZE 1:19 Ha medhetethati biya wode, enta miyen de7iya gertoti genderetoosona. He medhetethati biittafe pude dendiya wode gertotika dendoosona.
EZE 1:20 Ayyaanay biya awuka enti dendidi boosona. Hessi haney, de7o Ayyaanay gertota giddon de7iya gishosa.
EZE 1:21 De7o Ayyaanay gertota giddon de7iya gisho, medhetethati biya wode gertoti boosona; medhetethati eqiya wode gertoti eqoosona; medhetethati biittafe pude dendiya wode gertoti entara dendoosona.
EZE 1:22 De7on de7iya medhetethata huuphe soope bolla baggara mastooteda phoolidi ayfe caddiya salo gufantho daaniyabay micetidi de7ees.
EZE 1:23 He salo gufanthuwafe garsa baggara enta qefey sitti gidi, issoy issuwako micetidi uttis. Enta ubbaas banta asatethaa kammiya nam7u nam7u qefey de7ees.
EZE 1:24 Medhetethati paalliya wode enta qefiya girsay haatha kixa guunthada, Ubbaa Danda7iya Xoossa qaaladanne daro olanchota kooshinchada haneysa si7as. Enti paalo aggiya wode banta qefiya shiishidi ekoosona.
EZE 1:25 Enti banta qefiya shiishi ekidi, he bessan eqidashin, enta huuphe soope bolla baggara de7iya salo gufanthuwafe bolla dhoqafe girsi si7etis.
EZE 1:26 Salo gufanthuwafe bolla baggara sanpare geetetiya al7o shuchafe medhetida araata daaneysi de7ees; araata daaneysa bolla ase daaneysi uttis.
EZE 1:27 Taani iya be7iya wode iyaw xeesse daaneysafe bolla baggay taman de7iya naase biratada phoolees. Iyape garsa baggay tama daanees; iya yuushon phooliya poo7oy de7ees.
EZE 1:28 Iya yuushuwan de7iya phooliya poo7oy ira wode shaaran eqiya zuulla daanees. Haysi Godaa boncho qoncethaa daanees. Taani hessa be7ida wode biittan duge gufannada issi qaala girsi si7as.
EZE 2:1 I taako, “Asa na7aw, denda eqa. Ta neera odetanaw koyayis” yaagis.
EZE 2:2 I taara odetiya wode Xoossa Ayyaani ta giddo gelidi, tana ta tohuwan essis; I taw odeysa si7as.
EZE 2:3 “Asa na7aw, ta nena Isra7eele asaako, ta bolla makallida deriyako kiittayis. Entinne enta mayzati hachi gakanaw ta bolla makallida mela de7oosona.
EZE 2:4 Enti wozana muumenne yeelli baynayisata gidiya gisho, ta nena entako kiittayis. Taani, Ubbaa Haariya Goday haysada yaagayis.
EZE 2:5 Ha makallancho asay si7in, si7onna ixin, nabey enta giddon de7eysa enti erana.
EZE 2:6 Asa na7aw, entawunne enta qaalas yayyofa! Kinchoteynne xunduqey ne yuushon de7ikoka, qassi korneta giddon ne uttikoka yayyofa. Enti makallancho koche gidiya gisho entaw woyko enta qaalas yayyofa.
EZE 2:7 Enti makallancho koche gidiya gisho enti si7in, si7onna ixin ta qaala entaw oda.
EZE 2:8 Shin, asa na7aw, ta new odeysa si7a. Ha makallancho asaada neka makallancho gidopa; ne doona dooyada ta new immeysa ma” yaagis.
EZE 2:9 Ta xeelliya wode, Heko, taako micetida kushe be7as; he kushiyan xaatha maxaafi de7ees.
EZE 2:10 I ta sinthan he xaatha maxaafa billis; he maxaafas nam7u baggara yeehoy, azzanoynne zelelsi huuphe qofa gididi xaafetis.
EZE 3:1 Xoossay, “Asa na7aw, ne sinthan de7eysa ma; ha xaatha maxaafa ma; bada, Isra7eele asaas oda” yaagis.
EZE 3:2 Hessa gisho, taani ta doona dooyin, I tana xaaxa maxaafa barsis.
EZE 3:3 I taako, “Asa na7aw, ha ta nena barsiya xaatha maxaafa ma; iyara ne uluwa kuntha” yaagis. Ta miya wode ta doonan eessada mal7is.
EZE 3:4 Xoossay taako, “Asa na7aw, dendada, Isra7eele asaako ba; ta qaala entaw oda.
EZE 3:5 Neeni kiitetiday, enta doonay eretonnanne qaalay gelonna asaako gidenna; shin neeni Isra7eele asaako kiitetadasa.
EZE 3:6 Taani nena enta qaalay gelonna, enta doonay eretonnanne akeekanaw metiya daro deriyako ta nena kiittabike. Ta nena entako kiittidaba gidiyako, enti ne odiyaba si7anashin.
EZE 3:7 Isra7eele asay ta odiyaba si7anaw koyonna gisho, ne odeysa si7okona. Isra7eele asay wozana muumenne yeelli baynayisata gidiya gisho ne odiyaba si7okona.
EZE 3:8 Shin taani nena entada wozana muumenne yeelli baynaysa oothana.
EZE 3:9 Taani nena yashshi baynanne zaallafe aadhida mino oothana. Enti makallancho gidikoka, entaw yayyofa; entaw dagammofa” yaagis.
EZE 3:10 Gujidi Xoossay, “Asa na7aw, ta new odiya qaala ubbaa minthada si7a; akeeka.
EZE 3:11 Di7on de7iya ne asaako bada entaw oda. Enti si7in, si7onna ixin, taani Ubbaa Haariya Goday odeysa entaw oda” yaagis.
EZE 3:12 Hessafe guye, Ayyaanay tana pude denthis; Godaa bonchoy ba bessaafe pude dendiya wode taape guyera wolqaama guunthu si7as.
EZE 3:13 Hessika, de7on de7iya medhetethata qefey issoy issuwara boshetiya girsaynne enta miyen de7iya gertota girsaara gahetidi, wolqaama guuntha girsi si7as.
EZE 3:14 Ayyaanay tana pude denthis; tana ekidi hara bessi efis; Godaa gita wolqay tana haaris; ta ayyaanan cametashenne yilotashe bas.
EZE 3:15 Koboora shaafa matan, Tel-Abiban de7iya di7etida asaako gakas. Taani dagammada yan entara laapun gallas gam7as.
EZE 3:16 Laapuntho gallas wursethan Godaa qaalay taako haysada yaagishe yis:
EZE 3:17 “Asa na7aw, ta nena Isra7eele asaa naagiya asi oothas. Ta doonape keyiya qaala si7idi, naagana mela entaw oda.
EZE 3:18 Taani nagaranchuwa, ‘Tuma neeni hayqana’ giya wode, ne bada iyaw odonna ixiko, I ba iita ogiyape simmana melanne iya shempoy attana mela ne iya naagisonna ixiko, I ba nagaran hayqana; shin iya suutha gisho ta nena oychana.
EZE 3:19 Neeni nagaranchuwas odin, I ba nagarapenne ba iita ogiyape simmonna ixiko, I ba nagaran hayqana; shin neeni ne huuphiya ashshana.
EZE 3:20 “Xillo asi ba xillotethaafe guye simmidi, iita oothiya wode ta iya sinthan dhube wothin, I hayqana. I simmana mela ne iyaw odonna gisho I ba nagaran hayqana. I kase oothida xillo oosoy zaaridi qofetenna; shin taani iya suuthaa gisho nena oykana.
EZE 3:21 Shin xillo asi nagaraa oothonna mela ne iyaw odin, I ne kiita si7idi, nagara oothonna aggiko, tuma I de7on daana; neeni nena ashshana” yaagis.
EZE 3:22 He bessan Godaa wolqay tana haaris; I taako, “Dendada zangaara ba; yan ta new odana” yaagis.
EZE 3:23 Ta dendada, zangaara bas. He bessan kase Koboora shaafa matan ta be7idaysada, yan Godaa bonchuwa be7as; taani sa7an som7ora gufannas.
EZE 3:24 Shin Ayyaanay ta giddo gelidi, tana ta tohaan essis. Goday taako, “Ne soo bada, ne bolla pengiya gordada utta.
EZE 3:25 Asa na7aw, ne wodoron qashetana; asako keyanaw danda7aka.
EZE 3:26 Ha makallancho asaas ne odonna melanne enta bolla hanqetonna mela ta ne doona muumisana.
EZE 3:27 Shin ta new odiya wodenne ne doona dooyiya wode neeni, ‘Ubbaa Haariya Goday, enti makallancho gidiya gisho, si7iya oonika si7o; si7onna ixiya oonika si7opo’ yaagada” odana.
EZE 4:1 “Neno asa na7aw, biittafe medhida xuube ekada, ne sinthan wotha; yaatada Yerusalaame katamaa misile iya bolla medha.
EZE 4:2 Katamaa yuushuwa dira; iya biitta doora; miixa keetha; olanchoti uttiya bessi giigisa; gimbiya laaliya duruma iya yuushon giigisa.
EZE 4:3 Birata bashe ekada, ne giddoninne katamaa giddon dirsi oothada essa. Ne som7uwa iyako zaarada dereeqa; katamaa yuushuwa teqa; iya teqeyka nena; hessika Isra7eele asaas malla gidana.
EZE 4:4 “Isra7eele asaa seeretethas malla gidana mela neeni ne haddirsa miyen zin7a. Neeni ne haddirsa miyen zin7iya gallasata taybuwan Isra7eele asay waanidi seeretanaw de7iyako bessaana.
EZE 4:5 Isra7eele asay waanidi seeretanaw de7iyako bessanaw neeni zin7ana mela heedzu xeetanne uddufun tammu gallas new immas; issi gallasi issi laythara gina gidana.
EZE 4:6 “Neeni he gallasata polidaape guye, zaarada, Yihuda asay waanidi seeretanaw de7iyako bessanaw ne ushacha miyen zin7ana mela oytamu gallas new immas. Issi gallasi issi laythara gina gidana.
EZE 4:7 Ne som7uwa teqetida Yerusalaameko zaarada, ne kushiya denthada mandashe, Yerusalaame bolla tinbite oda.
EZE 4:8 He teqethay wurana gakanaw issi miyepe hara miye shiretonna mela ta nena wodoron qachana.
EZE 4:9 “Neeni gistenne banga, qom7olonne misire, maldonne murqa ekada, kathi wothiya miishen qolada, neeni zin7iya heedzu xeetanne uddufun tammu gallas iyape kathada maana.
EZE 4:10 Gallas gallas ne miya katha mazanna; ika nam7u xeetanne hastamu giraame gido; hessa iya woden woden ma.
EZE 4:11 Gallas gallas ne uyaa haathayka likera gido; ika nam7u kubbaya gido; hessa iya woden woden uya.
EZE 4:12 Wora sheesha kem7ele eethada, asay xeellishin, he walakida kathaa banga uythada uukada ma.
EZE 4:13 Hessi Isra7eele asay ta enta laaliya kawotethata giddon de7ishe, tunida kathi maanaw de7eysas malla” yaagis.
EZE 4:14 Taani, “Hay7i! Ubbaa Haariya Godaw, hessi hanenna; taani tunada erike. Ta na7atethafe doomada hachi gakanaw, bawuta woyko do7i wodhidaba ma erike; tunida ashoy ta doonako shiiqi erenna” yaagas.
EZE 4:15 I zaaridi, “Lo77o, yaatiko, wora sheesha kem7elen uukeysa aggada, osha kem7elen ne uythaa uuka” yaagis.
EZE 4:16 I gujidi, “Neno, asa na7aw, akeeka! Yerusalaame katamaa kathi gelonna mela taani teqana hanayis. Asay kathi hirgishe makidi maana; haathe yayyishe likidi uyana.
EZE 4:17 Hiza, entaw de7iya kathaynne haathay wurana; enti dagaman issoy issuwa xeellana; banta nagaraa gaason seeretidi gilqana.
EZE 5:1 “Neno, asa na7aw, oco mashshi ekada, maqlara meediyada ne huuphiyanne ne buuchaa meeda. He huuphiya mizaanen mazzana; ne binaana heedzu bessan shaaka.
EZE 5:2 Neeni teqiya gallasay wuriya wode, ne shaakida binaanape sikuwa ne giigisida katama misiliyas gidduwan wothada taman xuugga. Nam7antho sikuwa he katamaa yuushuwa ubban mashshan qanxeretha. Heedzantho sikuwa carko bolla laalla; ta enta mashshan yedethana.
EZE 5:3 Iyape guutha binaana ekada, ne ma7uwa macaran qacha.
EZE 5:4 Qassi iyape guuthara ekada, taman yeggada xuugga. Yan doomida tamay Isra7eele asa ubbaa gakana” yaagis.
EZE 5:5 Ubbaa Haariya Goday, “Kawotethata ubbaa iya yuushon essada, iya giddon wothida, Yerusalaame katamaa haysa be7a.
EZE 5:6 Shin I ba iita oosuwan ba yuushuwan de7iya biittatapenne kawotethatape aadhidi ta higgiyanne ta wogaa bolla makallis. Tuma I ta higgiya menthis; ta wogaa kaallibeenna” yaagees.
EZE 5:7 Hessa gisho, Ubbaa Haariya Goday, “Ne yuushuwan de7iya kawotethatape aadhada meto medhadasa; ta higgiya menthadasa; ta wogaa naagonna ixadasa. Hari attoshin, ne yuushuwan de7iya kawotethata wogaadaka de7ibeeketa” yaagees.
EZE 5:8 Hessa gaason, Ubbaa Haariya Goday, “Neno, Yerusalaame, taani ne bolla dendana; hara kawotethati ubbay be7ishin, ne bolla taani pirdaa ehana.
EZE 5:9 Ixetida eeqa goyinno ubbaa ne oothida gisho, haysafe kase oothaboonna, sinthafeka yoonna pirdaa ta ne bolla ehana.
EZE 5:10 Hessa gaason, ne giddon aawati banta nayta maana; nayti banta aawata maana. Ta hintena pirdana; attidaysata carko bolla laallana.
EZE 5:11 Hessa gisho, Ubbaa Haariya Goday, taani ta de7uwan caaqayis. Hinte eeqataninne ixetida oosotan ta keetha tunisida gisho, ta hintena biittafe pittada dhaysana. Ta hintew qadhetike; hintena maarike.
EZE 5:12 Ne giddon de7iya asaape issi sikoy katamaa giddon boshaninne koshan hayqana; nam7antho sikoy mashshan wurana; heedzantho sikuwa carko bolla laallada, enta mashshan yedethana” yaagees.
EZE 5:13 “Ta yiloy enta bolla poletana; ta wolqaama hanqoy irxana. Taani ta hanquwa enta bolla wursiya wode taani qanaaten odidaysa enti erana.
EZE 5:14 “Ne yuushuwan de7iya kawotethata giddoninne hinte matara aadhiya ubbaa sinthan ta hintena baysa oothana; hintena miichas aggana.
EZE 5:15 Ta hintena ta hanquwan, ta yiluwaninne, qadhey bayna seeran pirdiya wode hinte yuushuwan de7iya kawotethata sinthan qelqisethas, cashshas, hintena be7ida asi naagetiyabaanne dagammiyaba oothana.
EZE 5:16 Dukiya donge toorada, ta hintena wodhiyanne dhaysiya kosha hinte bolla yeddana. Taani zaara zaara kosha hinte bolla ehana; kathi Yerusalaame gelonna mela teqana.
EZE 5:17 Taani koshanne do7a hinte bolla yeddana; enti hinte nayta dhaysana; boshanne shempo wodho hinte bolla ehana” yaagees Goday.
EZE 6:1 Godaa qaalay taako haysada yaagishe yis.
EZE 6:2 “Neno, asa na7aw, Isra7eele zumata dereeqa xeellashe, enta bolla tinbite oda.
EZE 6:3 Hinteno, Isra7eele dereto, Ubbaa Haariya Godaa qaala si7ite. Ubbaa Haariya Goday Isra7eele zumatako, zoozetako, zangaaratakonne kakatako haysada yaagees: ‘Asay eeqa goyinniya bessata taani dhaysanaw mashsha yeddana.
EZE 6:4 Hinte yarsho xarpheezati laaletana; hinte ixaane cuyisiya miisheti meqana; hayqida hinte asay hinte eeqata sinthan yegetana.
EZE 6:5 Taani Isra7eele asaa aha enta eeqata sinthan zin7isana; hinte meqethata hinte yarsho xarpheezata yuushon laallana.
EZE 6:6 Hinte de7iya bessa ubbaan, hinte katamatinne hinte goyinno bessati laaletana. Hessadaka, hinte yarsho bessay tunananne laaletana; hinte eeqati meqana; hinte ixaane cuyisiya miisheti meqana; hinte oothidaba ubbay pitetidi dhayana.
EZE 6:7 Hayqida asay hinte giddon kundana. Taani Godaa gideysa hinte hessan erana.
EZE 6:8 Taani hinte giddon mashshafe attida guuthata paxa ashshana; hinte biittataninne kawotethata giddon laaletana.
EZE 6:9 Mashshafe attida enti, di7etidi bida kawotethata giddon de7ishe tana hassayana. Enti banta layma wozananinne amotiya ayfiyan eeqa goyinnanaw simmidi ta wozanaa menthidaysa enti akeekana. Enti banta iita oosuwaninne ixetida eeqa goyinno gaason bantana shaatettana.
EZE 6:10 Taani Godaa gideysa enti erana. Taani enta bolla iitabaa ehana giday coo babiso gidonnaysa enti akeekana’ ” yaagees.
EZE 6:11 Ubbaa Haariya Goday taako haysada yaagees: “Isra7eele asaay ixetida eeqa goyinnida gisho, ne hanquwa biradhen mallada bessa; ne yiluwa biitta qakada qoncisa. Entana ayye! Enti olan, koshaninne gadon wurana.
EZE 6:12 Haahon de7ey gadon dhayana; matan de7ey olan hayqana; paxa attiday, koshan wurana. Hessada oothada, ta hanquwa enta bolla polana.
EZE 6:13 Enta ahay enta eeqata giddo ubban, enta yarsho bessa yuusho ubban, zumata bolla ubban, dere bolla ubban, cil7o mitha garsa ubban, daashsha mitha garsa ubban, banta eeqatas sawiya yarsho yarshida bessa ubban kundida wode taani Godaa gideysa erana.
EZE 6:14 Taani ta kushiya yeddada, enti de7iya biitta ubbaa, dugeha mela biittafe bidi pudehan de7iya Deblaata gakanaw baysa oothana. Taani Godaa gideysa enti hessan erana” yaagees.
EZE 7:1 Godaa qaalay taako haysada yaagishe yis.
EZE 7:2 “Neno asa na7aw, Ubbaa Haariya Goday Isra7eele biittako haysada yaagees: ‘Wursethi matis; ubba baggara ha biitta bolla wursethi yis.
EZE 7:3 Ha77i, wursethi hinte bolla gakis; taani ta hanquwa hinte bolla yeddana. Taani hinte oosuwada, hinte bolla pirdana; hinte ixetida eeqa goyinnida gisho hintena seerana.
EZE 7:4 Taani hintew qadhetike; hintena maarike. Hinte iita oosuwada hinte bolla pirdana; hinte giddon de7iya ixetida eeqa goyinnota qoncisana. Taani Godaa gideysa hinte hessan erana’ ” yaagees.
EZE 7:5 Ubbaa Haariya Goday, “Heko, gadoy gakis; gadoy gado bolla yees.
EZE 7:6 Wursethi gakis; wursethi matis; I hinte bolla dendis; Heko, gakis.
EZE 7:7 Biitta bolla de7eysato, hinte pirday gakis; wodey matis; gallasay matatis. Hessi dagama gallasipe attishin, zumata bolla ufaysan ililiya gallas gidenna.
EZE 7:8 Ha77i mata wode taani ta hanquwa hinte bolla gussana; ta yiluwa hinte bolla wursana. Taani hinte oosuwa gisho hinte bolla pirdana; ixetida eeqa goyinnida gisho hintena seerana.
EZE 7:9 Ta hintew qadhetike; hintena maarike. Hinte iita oosuwada hinte bolla pirdana; hinte giddon de7iya ixetida eeqa goyinnota qoncisana. He wode hintena seerey tana Godaa gideysa hinte erana.
EZE 7:10 “Heko, gallasay! He gallasay gakis! Hinte dhayoy matis! Hinte iitatethay gambuxis; hinte otoroy ciiyis.
EZE 7:11 Geellatetha gaason iita oosoy daris. Entafe issoyka attenna; enta shaluwape woyko enta asaape woyko enta bonchuwafe attanabay baawa.
EZE 7:12 Wodey gakis; gallasay matis; ta hanqoy asa ubbaa bolla gidiya gisho shammeysi ufaytofo; bayzeysi azzanopo.
EZE 7:13 Nam7ay de7on de7iya wode ubban, bayzidaysi ba bayzidaba ekanaw guye simmenna. Isra7eele asa ubba bolla odetida ha qoncethay poletonna attenna. Enta nagaraa gaason entafe issoyka ba shempuwa ashshena.
EZE 7:14 Ta hanqoy asa ubbaa bolla qoncanaw de7iya gisho enti olas moyze punnidi giigetokona; oonika olas keyenna.
EZE 7:15 “Karen oli de7ees; son boshinne koshi de7ees. Katamaape karen de7ey olan hayqana; katamaa giddon de7ey boshaninne koshaninne wurana.
EZE 7:16 Kessi ekidi attidaysati, zangaarape yashshan dere bolla piradhidi keyida holleda, banta nagaraa gisho dere bolla zeleelana.
EZE 7:17 Kushe ubbay doccana; ubbay yashshan kokoridi sheeshi yeggana.
EZE 7:18 Enti kayo ma7o ma7ana; yashshan kokorana. Enta ubbaa som7oy yeella ma7ana; enta ubbaa huuphey meedettana.
EZE 7:19 Enti banta bira ogen holana; enta worqay tunaba gidana. Godaa wolqaama hanqo gallas enta biraynne enta worqay enta ashshanaw danda7enna. Entaw dhube gididi, nagaran gelsida, biraynne worqay ulo kumidi, enta koshape ashshena.
EZE 7:20 “Enti banta al7o alleeqota otortidi, ixetida eeqanne yeellayiya misile medhanaw go7etidosona. Hessa gisho, taani he al7o alleeqota entaw tunabaa kessas.
EZE 7:21 Taani enta alleequwa allaga biitta asaas di7o, biittan de7iya iita asaas bonqe aathada immana; enti iya tunisana.
EZE 7:22 He wode taani ta som7uwa hara soo zaarana; ta boncho keetha pangati gelidi tunisana.
EZE 7:23 “Suure pirda dhayon biittay suuthan kumida gishonne katamay geella ooson kumida gisho santhalaata giigisa.
EZE 7:24 Taani iita kawotethata ehada enta keethata bonqana mela oothana. Wolqaamata otoruwa dhaysana; enta geeshsha goyinno bessati tunana.
EZE 7:25 Enti dagammiya wode saro koyana; shin demmokona.
EZE 7:26 Issi gadoy hara gado kaalethana; issi worey hara wore kaallidi yaana. Enti nabetape qoncethi koyana; Kahinetas tamaarsiyabay dhayana; cimatas zoriyabay dhayana.
EZE 7:27 Kawoy yeekana; halaqay ufaysi qanxana; asay yashshan kokorana. Taani entaw enta oosuwada oothana; enti harata bolla pirdidaysada ta enta bolla pirdana. Taani Godaa gideysa enti hessan erana” yaagees.
EZE 8:1 Nuuni di7etida usupuntho laythan, usupuntho ageenan, ichashantho gallasan, taani ta son uttidashin, Yihuda cimatika ta sinthan uttidashin, Ubbaa Haariya Godaa wolqay tana haaris.
EZE 8:2 Heko, taani dhoqu gada xeelliya wode ase daaneysa be7as. Iyaw xeesse daaneysafe garsa baggay tama laco daanees; bolla baggay phooliya naase birata daanees.
EZE 8:3 I kushe daaniyaba taako yeddidi, ta binaana oykis. Ayyaanay tana sa7apenne salope giddo pude denthidi, Xoossaa qoncethan tana Yerusalaame efis. Yan qommo baggara Xoossaa keetha giddo dabaaba geliya pengiyara gelsidi, Godaa qanaatiya denthethiya eeqay eqida bessaa bessis.
EZE 8:4 Heko, kase taani zangaaran be7idaysada, Isra7eele Xoossaa bonchuwa yan be7as.
EZE 8:5 Goday taako, “Neno asa na7aw, pudeha bagga xeella” yaagis. Taani xeelliya wode qanaate denthethiya eeqay, dirsa pengiya sinthan de7iya yarsho bessa matan de7eysa be7as.
EZE 8:6 I taako, “Neno, asa na7aw, enti oothiyaba be7ay? Tana ta geeshsha keethafe haassanaw, Isra7eele asay oothiya ixetida eeqa goyinnuwa be7ay? Haysafe aadhiya ixetida eeqa goyinno neeni buroo be7ana” yaagis.
EZE 8:7 I tana Xoossaa keetha dabaaba penge ehin, taani xeelliya wode, Heko, godaa bolla xoo7e be7as.
EZE 8:8 I taako, “Neno, asa na7aw, godaa booka” yaagin, ta bookiya wode issi penge yan be7as.
EZE 8:9 I taako, “Gelada enti yan oothiya iita oosuwanne ixetida eeqa be7a” yaagis.
EZE 8:10 Ta giddo gelada xeelliya wode, Heko, sa7ara gooshetiya dumma dumma medhetethata misiley, tuna do7ata misileynne Isra7eele asaa eeqata ubbaa misiley godaa bolla yuuyi aadhidi medheti uttidaysa be7as.
EZE 8:11 Entafe sintha baggara Isra7eele asaape laapun tammu cimati eqidosona; Safaana na7aa Ya7izaani enta giddon eqis. Ubbay ixaane cuyisiyaba banta kushen oykidosona; ixaaniya cuyay tuqu gees.
EZE 8:12 Goday taako, “Neno, asa na7aw, Isra7eele asaa cimati ubbay dhuman banta eeqa misiliya keethan oothiyaba be7ay? Enti, Goday nuna be7enna; Goday ha biitta aggis” yaagosona.
EZE 8:13 I taako, “Haysafe aadhiya ixetida eeqa goyinno neeni buroo be7ana” yaagis.
EZE 8:14 Hessafe guye, pudeha baggan de7iya Xoossa keethaa pengiyako efin, Heko, maccasay yan uttidi, Tamuuza geetetiya banta xoossas yeekishin be7as.
EZE 8:15 I taako, “Neno asa na7aw, haysa be7ay? Haysafe aadhiya ixetida eeqa goyinno neeni buroo be7ana” yaagis.
EZE 8:16 Hessafe guye, I tana Xoossaa keetha giddo dabaaba efis; yan Xoossaa keetha pengiya matan, barandaafenne yarsho bessaafe giddon, laatamanne ichashu gidiya asata be7as. Enti banta zokuwa Xoossa keethaako, banta som7uwa dolohako zaaridi, dolohara keyiya awa goyinnoosona.
EZE 8:17 Goday taako, “Neno asa na7aw, haysa be7adii? Yihuda asay ha ixetida eqa goyinnoy haysan ootheysi entaw laafaba gididee? Enti biitta geella ooson kunthidi, zaari zaaridi tana hanqethanaw bessii? Enti bantaw danda7etida mela tana iissidi cayoosona.
EZE 8:18 Hesaa gisho, ta entara hanqon gahetana; ta entaw qadhetike; entafe issuwaka ashshike. Enti banta qaala dhoqa oothidi waassinka, ta enta si7ike” yaagis.
EZE 9:1 Hessafe guye, “Katamaa seeranaw dooretida asati, ola miishe banta kushen oykidi haa yoosona” yaagidi waassishin taani si7as.
EZE 9:2 Heko, wodhiya ola miishe banta kushen oykida usupun asati, Pudeha baggan de7iya qommo pengiyafe yidosona. Entara issife liinope oosetida ma7o ma7idi, ba miyen xaafiyabaa korojon oykida issi asi de7ees. Enti giddo gelidi, naase biratape oosetida yarsho bessa matan eqidosona.
EZE 9:3 Isra7eele Xoossaa bonchoy ba de7iya kiruubetape dendidi, Xoossaa keetha penge bis. Goday liino ma7idi, ba miyen xaafiyabaa korojon oykida addiya xeegidi,
EZE 9:4 “Yerusalaame katamaa giddo kanthada bashe, yan oosetiya ixetida eeqa goyinnuwa gisho azzanishenne oolishe de7iya asaa som7on malla wotha” yaagis.
EZE 9:5 Ta si7ishin, Xoossay haratako haysada yaagis: “Iya geedo kaallidi, katamaa giddo kanthidi wodhite. Issuwaka maaropite; oodeska qadhetofite.
EZE 9:6 Cimata, panthata, geela7ota, maccasatanne nayta ubbaa shukite; shin som7on malli de7iya ase oonaka bochofite. Ta keethan wodho doomite” yaagis. Enti Xoossaa keetha sinthan eqida cimatan wodho doomidosona.
EZE 9:7 Xoossay, “Bidi Xoossaa keetha tunisite; dabaabata ahan kunthite” yaagis. Enti keyidi, katamaa giddo ubban wodho doomidosona.
EZE 9:8 Enti wodhishin, taani tarka attada, ta som7uwara biittan gufannada, ta qaala dhoqu oothada, “Abeeti Ubbaa Haariya Godaw, neeni Yerusalaame bolla gussiya ne hanquwan Isra7eelepe attidaysata kumethi dhaysanee?” yaagas.
EZE 9:9 I zaaridi, “Isra7eelenne Yihuda asaa nagaray daro; biitta ubbay suuthan kumis. Katama ubban suure pirdi baawa. Asay, ‘Goday ha biitta aggis; Goday be7enna’ yaagosona.
EZE 9:10 Hessa gisho, ta entaw qadhetike; entana maarike. Taani enta ogiya mela entaw zaarana” yaagis.
EZE 9:11 Hessafe guye, liino ma7idi, ba miyen xaafiyabaa korojon oykida addey, guye simmidi, “Ne tana kiittidaysada oothas” yaagis.
EZE 10:1 Taani Kiruubeta huuphepe bolla baggara de7iya salo gufantho daaneysa be7as. Kirubeela bolla sanpare al7o shuchafe oosetida araata be7as.
EZE 10:2 Goday liino ma7ida addiyako, “Kirubeelape garsa baggara gertota giddora kanthada ba. Xiifa bonqo ne kushen kopheta ekada, katamaa bolla laalla” yaagis. Ta xeellishin tama ekanaw gelis.
EZE 10:3 Addey soo geliya wode Kirubeeti Xoossa keethafe garsa baggara eqidosona; giddo dabaaban shaari kumis.
EZE 10:4 Godaa bonchoy Kirubeela bollafe dendidi, Xoossa keetha penge bis. Shaari keethaa kumis; dabaabay Godaa boncho phoolethan kumis.
EZE 10:5 Kirubeela qefiya girsay Ubbaa Haariya Godaa girsada kare dabaaban si7etees.
EZE 10:6 Goday liino ma7ida addiya, “Kirubeela garsa baggan de7iya gertota giddofe tama eka” yaagidi kiittin, I gelidi issi gertuwa matan eqis.
EZE 10:7 Kirubeelape issoy banta giddon de7iya taman ba kushiya yeddidi, iyape guuthara ekidi, liino ma7ida addiya kushen wothin, I ekidi keyis.
EZE 10:8 Kirubeela qefiyape garsa baggara asa kushe daaniyabay de7ees.
EZE 10:9 Ta xeelliya wode Kirubeela matan oyddu gertoy de7ees. Issi issi Kiruubiya matan issi issi gertoy de7eysa be7as; he gertoy al7o shuchada phoolees.
EZE 10:10 Enti oydday issoy issuwa daanosona; issi issi gertoy hara gerto giddora kanthi aadhidi medhetida daanees.
EZE 10:11 Kirubeeti biya wode oyddu bagga yaa haa simmonna boosona; issi gertoti bida ginde hanko gertoy yaa haa simmonna sitti gidi boosona.
EZE 10:12 Enta kumetha bolla, hessika enta zokuwan, enta kushiyan, enta qefiyaninne enta oyddu gertotan xeelliya ayfey kumis.
EZE 10:13 Ta si7ishin, gertoti yuuyiya gertota geetetidi xeegetidosona.
EZE 10:14 Issi issi Kiruubiyas oyddu som7oy de7ees. Koyro som7oy kiruube som7o, nam7anthoy asa som7o, heedzanthoy gaammo som7o; oyddanthoy argantha som7o.
EZE 10:15 Kiruubeti pude dendidosona. Enti taani Koboora shaafa matan be7ida de7on de7iya medhetathata.
EZE 10:16 Kiruubeti biya wode, enta miyen de7iya gertoti boosona; Kiruubeti biittafe pude dendanaw banta qefiya micciya wode gertoti enta miyepe shaaketokona.
EZE 10:17 De7on de7iya medhetethata ayyaanay gertota giddon de7iya gisho, enti eqiya wode gertoti eqoosona; enti biittafe pude dendiya wode enti dendoosona.
EZE 10:18 Hessafe guye, Godaa bonchoy Xoossa keetha pengefe dendidi, Kiruubetape bolla baggan eqis.
EZE 10:19 Ta xeellishin, Kiruubeti banta qefiya miccidi, kirikirotara issife biittafe pude dendidosona. Enti Xoossaa keethafe doloha bagga pengiya matan eqidosona. Isra7eele Xoossaa bonchoy entafe bolla baggara de7ees.
EZE 10:20 Enti Koboora shaafan Isra7eele Xoossaafe garsa baggara be7ida de7on de7iya medhetathata. Enti kiruubeta gideysa ta eras.
EZE 10:21 Enta ubbaas oyddu som7otinne, oyddu qefeti de7oosona; enta qefetape garsa baggara asa kushe daaniyabay de7ees.
EZE 10:22 Enta som7oti Koboora shaafa matan ta be7ida som7ota daanosona. Enti ubbay sitti gidi sinthe boosona.
EZE 11:1 Xoossa Ayyaanay tana denthidi, Xoossa keethas doloha bagga pengiyako efis. Pengiya matan laatamanne ichashu addeti de7oosona; enta giddon asaa kaalethiya Azuura na7aa Ya7izaana Banaya na7aa Palaxa be7as.
EZE 11:2 Goday taako, “Neno asa na7aw, ha asay katamaa bolla iita qofa qopoosona; iita zore zoretoosona.
EZE 11:3 Enti, ‘Nuuni keethe zaaridi keexana wodey matatis. Ha katamay asho xaaro; nuuni qassi asho’ yaagosona.
EZE 11:4 Hessa gisho, tinbite oda; asa na7aw, enta bolla tinbite oda” yaagis.
EZE 11:5 Godaa Ayyaanay ta bolla wodhidi, taako haysada yaagis: “Isra7eele asaw, hinte hessada geeta; shin ta hinte ay qopiyako erayis.
EZE 11:6 Ha kataman hinte daro asaa wodhidi, oge ubban aha kunthideta” yaagees.
EZE 11:7 Hessa gisho, Ubbaa Haariya Goday haysada yaagees; “Hinte wodhidi yeggida ahay asho; ha katamay asho xaaro; shin ta hintena ha katamaape yedethada kessana.
EZE 11:8 Hinte olas yayyideta; shin ta hinte yayyida olaa hinte bolla ehana.
EZE 11:9 Ta hintena ha katamaape kessada, allagatas aathada immana; ta hintena hinte zawan pirdana.
EZE 11:10 Hinte olan wurana; ta hintena hinte biittan pirdana. He wode hinte ta Godaa gideysa erana.
EZE 11:11 Ha katamay hintew asho xaaro gidenna; hinteka iya giddon asho gideketa. Ta hinte bolla Isra7eele zawan pirdana.
EZE 11:12 Hinte ta higgiyanne ta wogaa shaaridi hinte yuushuwan de7iya kawotethata wogaa mela de7ida gisho hinte bolla pirdey Godaa gideysa hinte erana” yaagees Ubbaa Haariya Goday.
EZE 11:13 Ta tinbite odiya wode Banaya na7aa Palaxi hayqin, taani gufannada, ta qaala dhoqu oothada, “Abeeti Ubbaa Haariya Godaw, Isra7eelepe attidaysata kumethi wursana hanayee?” yaagada waassas.
EZE 11:14 Godaa qaalay taako haysada yaagidi yis;
EZE 11:15 “Neno asa na7aw, Yerusalaamen de7iya Isra7eele asay nebaanne di7on de7iya ne dabbotabaa, ‘Enti Godaape haakidosona; ha biittay nuus laata gididi imetis’ ” yaagidi haasayoosona.
EZE 11:16 Ubbaa Haariya Goday haysada yaagees: “Ta enta haahon de7iya kawotethata giddo yeddikoka, biitta ubban laallikoka, enti bida biittatan guutha wodes entara gidana” yaagees.
EZE 11:17 Hessa gisho, Ubbaa Haariya Goday haysada yaagees: “Ta hintena kawotethatapenne hinte laaletida biittatape shiishana; Isra7eele biitta zaarada hintew immana.
EZE 11:18 Enti guye simmidi yaa wode tuna misiletanne eeqata biittafe dhaysana.
EZE 11:19 Taani entaw issi wozana immana; ooratha ayyaana enta giddon wothana. Entafe shucha wozanaa diggada, asho wozana entaw immana.
EZE 11:20 He wode enti ta higgiya kaallana; ta kiita naagana. Enti ta ase gidana; taani enta Xoossaa gidana.
EZE 11:21 Gidoshin, ixetida misiliyanne tuna eeqa goyinnanaw doseyisata taani enta oosuwada oothana” yaagees Ubbaa Haariya Goday.
EZE 11:22 He wode Kiruubeti banta qefiya miccidosona; enta miyen gertoti de7oosona. Isra7eele Xoossaa bonchoy entafe bollara de7ees.
EZE 11:23 Godaa bonchoy katamaa giddofe dendidi, doloha baggan de7iya zumaa bolla eqis.
EZE 11:24 Xoossaa Ayyaanay taw immida qoncethan Ayyaanay tana biittafe denthidi, Kaldaaweta biittan de7iya di7etidaysatako efis. Hessafe guye, qoncethay taape shaaketis.
EZE 11:25 Goday tana bessidaba ubbaa di7on de7eysatas odas.
EZE 12:1 Godaa qaalay taako haysada yaagidi yis;
EZE 12:2 “Neno asa na7aw, neeni geella asaa giddon de7aasa. Enti geella asi gidiya gisho entaw ayfey de7ees, shin demmokona; haythi de7ees, shin si7okona.
EZE 12:3 Hessa gisho, asa na7aw, di7on biya asada, neeni efanaw danda7iyaba ubba shiisha qachada, gallas enti be7ishin keyada, ne de7iya bessaafe hara bessi ba. Ooni eri enti geella asi gidikoka akeekana.
EZE 12:4 Gallas enti xeellishin, di7o biya asada, ne qachidaba kare kessa; omarsi enti xeellishin, di7etidi biya asada keya.
EZE 12:5 Enti xeellishin, ne keethaa godaa lukada xoo7iyara keya.
EZE 12:6 Ne kessida miishiya enti xeellishin, ne hashen tookada, lem7ishin dendada ba. Ne awu biyako be7onna mela ne som7uwa kamma. Ne haniyabay Isra7eele asaas malla gidana” yaagis.
EZE 12:7 Taani I tana kiittidaysada oothas. Di7etidi biya asada, gallas ta qachidaba kare kessas. Omarsi ta keetha godaa ta kushen lukada keyas; ta kessida miishiya enti xeellishin, ta hashen tookada, lem7ishin bas.
EZE 12:8 Wonta guura Godaa qaalay taako haysada yaagidi yis.
EZE 12:9 “Neno asa na7aw, geella Isra7eele asay, ‘Ne oothiyabay aybee?’ gidi nena oychibookona?
EZE 12:10 Entaw Ubbaa Haariya Goday haysada yaagees gada oda. ‘Ha tinbitey Yerusalaamen de7iya halaqabaanne Isra7eele asaaba odees.’
EZE 12:11 Ne haniyabay entaw malla gideysa oda; enti di7etidi hara biitta baana.
EZE 12:12 Enta giddon de7iya halaqay godaa lukidi ba miishiya ba hashen tookidi, lem7ishin baana; biitta be7onna mela ba som7uwa kammana.
EZE 12:13 Ta gite iya sinthan yeggada oykana. Taani iya Kaldaaweta biitta Babiloone katamaa ehana; shin I he katamaa be7onna hayqana.
EZE 12:14 Iya yuushon de7iya iya maaddeysatanne iya olanchota ubbaa ta ubba bessi piski oothana; ta enta mashshan yedethana.
EZE 12:15 “Enta ta hara biittatanne kawotethata giddo laaliya wode ta Godaa gideysa enti he wode erana.
EZE 12:16 Enti biiya kawotethata giddon banta tuna ooso paaxana mela entafe guuthata olape, koshapenne hargepe attidi akekanada oothana. Ta Godaa gideysa enti he wode erana” yaagis.
EZE 12:17 Godaa qaalay taako haysada yaagidi yis;
EZE 12:18 “Neno asa na7aw, ne kathaa dagaman ma; ne haathaa yashshan kokorashe uya.
EZE 12:19 Biittan de7iya asaako haysada yaaga. Ubbaa Haariya Goday Isra7eele biittan de7iya Yerusalaame asaaba haysada yaagees: ‘Biittan de7iya asa ubbay gene oothiya gisho enta biittay kallo attana, enti banta uythaa hirgan maana; banta haatha dagaman uyana.
EZE 12:20 Ha77i asi kumida katamati dhayana; biittay baysa gidana. Taani Godaa gideysa enti he wode erana’ ” yaagees.
EZE 12:21 Godaa qaalay taako haysada yaagidi yis;
EZE 12:22 “Neno asa na7aw, hinte Isra7eele biittan, wode aduqis qoncethi ubbay hada gidis aadhis yaagidi leemisey I aybee?
EZE 12:23 Ubbaa Haariya Goday haysada yaagees; ‘Taani ha leemisoy nam7antho odetonna mela oothana; enti zaaridi, Isra7eele biittan leemisokona’ yaagees. ‘Gallasay matatis; qoncethi ubbay poletana hanees’ yaaga.
EZE 12:24 Hizape guye Isra7eele asaa giddon wordo qoncethinne murunno deenna.
EZE 12:25 Ta Goday odanaw koydaba odana; hessika gam7onna poletana. Hinteno, geellato, ta odiyaba ubbaa hinte laythan polana” yaagees Ubbaa Haariya Goday.
EZE 12:26 Qassika Godaa qaalay taako haysada yaagidi yis.
EZE 12:27 “Neno asa na7aw, Isra7eele asay, ‘I be7ida qoncethaynne I odiya tinbitey daro laythafe guye hananaba’ yaagidi odoosona.
EZE 12:28 Hessa gisho, Ubbaa Haariya Goday haysada yaagees: ‘Ta odiya qaalay poletanaape attishin, issoyka gam7enna’ ” yaagees Ubbaa Haariya Goday.
EZE 13:1 Godaa qaalay haysada yaagishe taako yis.
EZE 13:2 “Neno asa na7aw, Isra7eelen tinbite odiya nabeta bolla ne tinbite oda. Bantaw medhi kessidi tinbite odeyisata haysada yaaga; Godaa qaala si7ite.
EZE 13:3 Ubbaa Haariya Goday haysada yaagees: ‘Aybaka be7onna banta qofan dendidi tinbite odiya eeya nabeta ayye!’
EZE 13:4 Isra7eele asaw, hinte nabeti laaletida kataman de7iya workanata mela.
EZE 13:5 Godaa gallasan olan minnidi eqana mela Isra7eele asaa dirsa gimbiya minthidi essibeeketa; pude laaletida bessaa keybeketa.
EZE 13:6 Enta qoncethaynne enta bitay wordo. Enti Goday kiittonnashin, Goday haysada yaagees yaagosona. Enti odeysa Goday polana gidi naagoosona.
EZE 13:7 Taani odonnashin, Goday haysada yaagees yaagidi odiyanne wordo qoncethi be7eysatanne muranchota gideketii?” yaagees.
EZE 13:8 Hessa gisho, Ubbaa Haariya Goday haysada yaagees; “Hinte be7ida qoncethanne hinte odida tinbitey wordo gidiya gisho ta hintew morke gidana.
EZE 13:9 Wordo qoncethi be7iyanne muranchiya nabeta bolla taani ta kushiya denthana. Enti ta asaa zoretan gelokona; Isra7eele asaa mazgaben xaafetokona; enti Isra7eele biitta gelokona. He wode ta Ubbaa Haariya Godaa gideysa hinte erana.
EZE 13:10 “Saroy baynashin sa7i saro yaagidi ta asaa balethoosona. Asay shuchu keelidi doorin, enti booqinte tiyoosona.
EZE 13:11 Ha booqinte tiyeysatas; ha hinte tiyida gimbey kundana; wolqaama iri bukana. Taani gita shachi yeggana; wolqaama gotey dendana.
EZE 13:12 He gimbey kundiya wode asay hinte tiyida nooray anee? yaagidi oychonna aggane” yaagees.
EZE 13:13 Ubbaa Haariya Goday haysada yaagees: “Taani gimbiya laallanaw; ta hanquwan wolqaama gote yeddana; ta yiluwan gita shacha kiittana, ta sheniyan wolqaama ira bukisana.
EZE 13:14 Hinte booqinte tiyida gimbiya ta mentherethana; baasoy bentana gakanaw laallana. I kundiya wode hinte iya giddon hayqana; he wode taani Godaa gideysa hinte erana.
EZE 13:15 Ta hanqoy gimbiya bollanne gimbiya booqinte tiyida asata bolla wodhana. Ta hinteko, ‘Gimbey baawa; gimbiya booqinte tiyidaysatika dookona.
EZE 13:16 Isra7eelen de7iya nabeti, Yerusalaameba tinbite odeysati, saroy baynashin saro qoncethi be7eysati dookona’ ” yaagees Ubbaa Haariya Goday.
EZE 13:17 “Neno asa na7aw, banta qofan dendidi, tinbite odiya maccasa dereeqa xeellada enta bolla tinbite oda.
EZE 13:18 Ubbaa Haariya Goday haysada yaagees: ‘Hara asa bolla wolqi daanada, enta hashiya bolla murunnoba sikiyanne asas ubbaas biitta qace giigisiya maccasa ayye! Hinte ta asaa xihen oykidi hinte shempuwa ashshanee?
EZE 13:19 Issi kophe banga woyko issi baso uythi demmanaw, yeellayaba oothidi, ta asaa sinthan tana kawushsheeta. Hinte hayqanaw bessonnayisata wodhidi daanaw bessonnayisata ashsheeta. Yaatidi ta asaa wordo odeeta; entika hinte worduwa si7oosona’ ” yaagees.
EZE 13:20 Hessa gisho, Ubbaa Haariya Goday haysada yaagees: “Hintew hara asaa bolla wolqi daana mela hinte kushen qachida murunnuwa qacciya ta dafa ekana. Ta iya hinte kushiyape duutha holana; xihepe kessi ekiya kafoda ta enta hinte xihiyape kessa ekana.
EZE 13:21 Taani hinte shaashiya qaara ekada, ta asaa merinaw hinte kushepe ashshana. Taani Godaa hinte he wode erana.
EZE 13:22 Taani azzanthaboonna xillo asaa wozanaa hinte wordon azzanthideta; nagaranchoti banta iita oosuwape simmidi, banta shempuwa ashshona mela enta minthideta.
EZE 13:23 Hizape hinte wordo qoncethi be7eketa; murunneketa. Taani ta asaa hinte kushepe kessa ekana. Taani Godaa gideysa hinte he wode erana” yaagees.
EZE 14:1 Isra7eele cimatape issoti issoti taako yidi, ta sinthan uttidosona.
EZE 14:2 Godaa qaalay haysada yaagishe taako yis.
EZE 14:3 “Asa na7aw, ha asati banta wozanan eeqa essidosona; enta nagaray entaw dhube shuchi gidis. Yaatin, enti tana oychana mela oothoyee?”
EZE 14:4 Ne entaw Ubbaa Haariya Goday haysada yaagees gada oda; “Isra7eele asaape oonika eeqa ba wozanan wothidi, iya nagaray iyaw dhube shuchu gidin, nabe oychanaw biiko, taani ta huuphen iya eeqata darotethaada iyaw zaarana.
EZE 14:5 He eeqati Isra7eele asaa taape haassidosona; shin ha77i ta entaw immiya zaaruwan enta wozanaa taako zaarana” yaagees.
EZE 14:6 “Hessa gisho, Isra7eele asaas haysada yaagada oda. Ubbaa Haariya Goday haysada yaagees; nagara paaxite; hinte eeqa aggite; hinte tuna ooso ubbaafe simmite.
EZE 14:7 “Isra7eele asaa gidin woyko Isra7eele biittan de7iya allaga biitta asaa gidin, taape haakidi, ba wozanan eeqa wothidi, iya nagaray iyaw dhube shuchu gidin, tana zore oychanaw nabeko biiko, taani Goday ta huuphen iyaw zaaro immana.
EZE 14:8 Taani he uraa morkana; ta iya asa malasinne miichas ashshana; taani iya ta asaa giddofe dhaysana; ta Godaa gideysa hinte he wode erana.
EZE 14:9 Issi nabey cimetidi tinbite odiko, he nabey odana mela cimmiday tana Godaa. Taani iya bolla ta kushiya wothada, ta asaa giddofe iya dhaysana.
EZE 14:10 Enti banta nagara seera tookana; nabeynne nabiya oycheysi issi gina seeretana.
EZE 14:11 Hizape guye Isra7eele asay oge baletidi taape haakenna; banta nagaran bantana tunisokona. Enti ta ase gidana; taanika enta Xoossaa gidana” yaagees Ubbaa Haariya Goday.
EZE 14:12 Godaa qaalay haysada yaagishe taako yis:
EZE 14:13 “Asa na7aw, issi biitta asay nagara oothidi, taw ammanetona ixiko, taani ta kushiya denthada, enta kathaa dhaysada, kosha ehana; asaanne mehiya wodhana.
EZE 14:14 Hari attoshin ha heedzu asati Nohey, Daanelinne Iyyobi he biittan de7iyakoka, enti banta xillotethan banta shempuwa xalaala ashshana” yaagees Ubbaa Haariya Goday.
EZE 14:15 “Taani enta biitta bolla wora do7ata yeddada, he biittay asi baynanne oonika kanthonna mela he biitta baysa oothana.
EZE 14:16 Taani Ubbaa Haariya Goday ta de7uwan caaqas. Hari attoshin, ha heedzu asati he biittan de7iyakoka, enti banta nayta ashshanaw danda7okona. Enti bantaw attana; shin biittay baysa gidana” yaagees Ubbaa Haariya Goday.
EZE 14:17 “Taani he biitta bolla toora yeddada, yan de7iya asaanne mehiya wodhiko,
EZE 14:18 taani Ubbaa Haariya Goday ta de7uwan caaqas. Ha heedzu asati he biittan de7iyakoka, banta nayta ashshanaw danda7okona. Enti bantaw attana” yaagees Goday.
EZE 14:19 “Taani he biitta bolla iita harge yeddada, ta hanquwan suuthi gukana mela oothiko, yan de7iya asaanne mehiya wodhiko,
EZE 14:20 taani Ubbaa Haariya Goday ta de7uwan caaqas. Hari attoshin, Nohey, Daanelinne Iyyobi he biittan de7iyakoka, enti banta xillotethan banta shempuwa ashshanaape attishin, banta nayta ashshokona” yaagees Ubbaa Haariya Goday.
EZE 14:21 Ubbaa Haariya Goday haysada yaagees; “Taani asaanne mehiya wodhanaw Yerusalaame bolla oyddu iita pirdata: toora, kosha, wora do7atanne harge yeddana.
EZE 14:22 Gidoshin, attidi keyida guutha asati; macca naytinne adde nayti yaape keyana. Enti hinteko yaa wode enta hanotaanne enta oosuwa hinte be7idi, ta Yerusalaame bolla ehida gadoy like gideysa akeekana.
EZE 14:23 Hinte enta hanotaanne enta oosuwa be7idi, ta enta bolla coo pirdonnaysa erana” yaagees Ubbaa Haariya Goday.
EZE 15:1 Godaa qaalay haysada yaagishe taako yis.
EZE 15:2 “Asa na7aw, woyney woran de7iya hara mithafe aybin aadhii?
EZE 15:3 Go77i de7iya ba oothanaw qanxetidi eriyee? Aykoba kaqiya kocaa iyape kessanaw danda7eetii?
EZE 15:4 Iya tama oysethanaw taman yeggin, xeeraynne dulley taman meetetin attida dunchay ay maaddanee?
EZE 15:5 Xuugetonna de7ishe, ayko maaddonnaysi tami min miccidi ay maaddanee?”
EZE 15:6 Hessa gisho, Ubbaa Haariya Goday haysada yaagees: “Taani woran de7iya mithaa giddofe woyne mithaa tamas aathada immidaysada Yerusalaamen de7iya asaa hessada oothana.
EZE 15:7 Taani ta som7uwa enta bolla zaarana; enti issi tamape keykoka, hara tami enta maana. Taani ta som7uwa enta bolla zaariya wode taani Godaa gideysa hinte erana.
EZE 15:8 Enti tanan ammanetona aggida gisho ta enta biitta baysa kessana” yaagees Ubbaa Haariya Goday.
EZE 16:1 Godaa qaalay haysada yaagishe taako yis.
EZE 16:2 “Asa na7aw, Yerusalaame iya tuna oosota erisa.
EZE 16:3 Ubbaa Haariya Goday Yerusalaameko haysada yaagees. Ne mayzanne ne sheeshay Kanaane biittana; ne aaway Amoore; ne aayiya Hite asi.
EZE 16:4 Ne yellatiya gallas ne gul7ay qanxetibnna; woyko nena geeshshanaw haathan meecetabaaka; woyko maxinen gorpetada curqan xaaxetabaaka.
EZE 16:5 Ha geetetidaysatape hari attoshin issuwa oothanaw new mishetiday baawa. Ne yeletida gallas boretida gisho wora yegetadasape attishin, new oonika qadhetibeenna.
EZE 16:6 “Ta yaara aadhiya wode neeni ne suuthan iitada zohetishin be7ada, neeni ne suuthan zin7ida de7ishin, ‘De7on de7a’ yaagas.
EZE 16:7 Ta nena aradda biittan de7iya kathada dichas. Neeni dicca aduqada, gamma gakadasa. Ne dhanthay uttis; ne huuphey diccis; shin ne kallo de7aasa.
EZE 16:8 “Zaarada ta yaara aadhashe nena xeelliya wode, neeni gelos gakada, kallo borsetiya ase gidadasa. Ta afila maccara ne bolla yeggada, ne kalluwa kammas; ta neera caaqada nena taw buzo oothas” yaagees Ubbaa Haariya Goday.
EZE 16:9 “Suuthan iitida ne asatethaa haathan meecca geeshshada, zayten tiyas.
EZE 16:10 Taani nena alleeqo ma7o mayzas; lo77o galbafe oosetida caamma aasisas; liino shaashe nena qacisas; al7o kuta qulintisas.
EZE 16:11 Nena alleequwan alleeqisas; ne kushen sagaayo aathas; ne qoodhiya worqan mayzas.
EZE 16:12 Ne sidhene, ne haythan worqa, ne huuphen lo77o kallacha wothas.
EZE 16:13 Ne worqaninne biran alleeqetadasa; ne ma7o ubbay al7o liino, al7o kutanne alleeqo qamise. Ne miya kathay lo77o dhiille, eessinne zayte. Neeni daro puulatada, kawo gidanaw gakadasa.
EZE 16:14 Ta new immida bonchuwa gaason, ne daro puulatida gisho kawotethata ubban eretadasa” yaagees Ubbaa Haariya Goday.
EZE 16:15 “Shin neeni ne puulan ammanetada, haratan eretida gisho ogera aadhiya ubbaas nena aatha immadasa.
EZE 16:16 Ne ma7uwape baggaa ekada, ne goyinno bessata alleeqisadasa; yan laymatadasa. Hessa melabay haysafe kase hanibeenna; sinthafeka hananaw bessenna.
EZE 16:17 Ta new immida worqafenne birape oosetida lo77o alleeqo, adde misileta oothada entara laymatadasa.
EZE 16:18 Ta immida alleeqo ma7uwa he misileta mayzadasa; ta zaytiyanne ta ixaaniya entaw shiishadasa.
EZE 16:19 Ta new immida lo77o dhiilliya, zaytiyanne eessa enta sinthan sawo tonku giya yarsho oothada shiishadasa” yaagees Ubbaa Haariya Goday.
EZE 16:20 Ne laymatethay guuxibeenashin, ne taw yelida adde naytanne macca nayta efada, eeqatas yarshadasa.
EZE 16:21 Ne ta nayta shukada, eeqatas taman yarshadasa.
EZE 16:22 Ne tunatethaaninne ne laymatethan ubban de7ashe, kase ne yalagatetha laytha, kallo suuthan muuketada zohetiya wodiya dogadasa.
EZE 16:23 Ubbaa Haariya Goday, “Ayye! Nena ayye!” yaagees. Ha iitatetha ubbaa bolla gujada,
EZE 16:24 dabaaba ubban dhoqa eeqa goyinniya bessata new giigisadasa.
EZE 16:25 Oge doonan laymatiya bessata keexada, ne puula tunisadasa; ogera aadhiya ubbaas ne asatethaa aatha immada, laymatethi darsadasa.
EZE 16:26 Neeni amon kumida, ne shooro gidida Gibxetara laymatadasa; ne laymatethan tana yiloyadasa.
EZE 16:27 Hessa gisho, taani ta kushiya ne bolla denthas; nena gakiya ne anjuwa guuthas. Taani nena ne poko hanotan yeellatiya, nena morkiya Filisxeemetas aathada immas.
EZE 16:28 Ne alonna asi gidiya gisho, Asoore asaara laymatadasa. He ubban taw gidana gabaaka.
EZE 16:29 Zal7en aqiya Kaldaawetara laymatadasa, shin hessi taw gidana gabaaka.
EZE 16:30 Ubbaa Haariya Goday, “Neeni yeelli bayna layma maccasada haniyara, ne aybi laafa ase!
EZE 16:31 Neeni oge doonan laymatiya bessata new keexiya wodenne dabaaba ubban eeqas goyinniya bessata giigisadasa. Gidoshin, hara layma maccasati ekiya miishe ekabaaka.
EZE 16:32 Neeni ba azinay de7ishin, allaga addetara laymatiya maccasa mela.
EZE 16:33 Layma maccasas miishey qanxetees, shin neeni ne laggethotas imota immaasa; enti ubba bessafe neeko yaana mela entaw miishe immaasa.
EZE 16:34 Neeni laymatiya hara maccasatape dumma; neera laymatanaw nena kaalliya oonika baawa. Neeni gede imota immasape attishin, haa ekaka; neeni haratape dumma” yaagees.
EZE 16:35 Neno, layma yerusalaame Godaa qaala si7a.
EZE 16:36 Ubbaa Haariya Goday haysada yaagees; “Neeni ne laymatetha amuwan ne laggethotas ne asatethaa qaarida gisho, ne eeqata ubba gishonne ne nayta suuthaa ne entaw gussida gisho,
EZE 16:37 ne entan ufaytida ne laggethota ubbaa, ne doseysatanne ne ixeyisata ta new morke oothada shiishana. Taani enta dumma dumma bessafe ne yuushuwan shiishada, enta sinthan nena qaarana; enti ne kalluwa be7ana.
EZE 16:38 Taani layma maccasata bollanne suuthu gussiya maccasata bolla pirdeysada ne bolla pirdana; ta hanquwaninne ta qaanatiyan ne bolla hayqo ehana.
EZE 16:39 Ta nena ne laggethotas aathada immana; enti ne laymatiya bessatanne eeqa goyinno bessata laallana. Enti ne ma7uwa qaaridi, ne lo77o alleequwa ekidi, nena xire kallo ashshana.
EZE 16:40 Nena shuchan caddidi, mashshan qanxerethidi wodhiya asaa ne bolla enti denthethana.
EZE 16:41 Enti ne keethaa xuuggidi, daro maccasa sinthan ne bolla pirdana. Ta ne laymatetha agisana; ne laggethotas gede miishe qanxaka.
EZE 16:42 Hessan ne bolla de7iya ta yiloy irxana; ta qanaatiya neepe haassana; hizape si77i gaana; zaarada hanqetike.
EZE 16:43 Neeni ne na7atetha laytha dogada, ha iita ooso ubban tana hanqethadasa. Hessa gisho, ne oothidaba ubbaa ta ne bolla zaarana. Ne tuna ooso ubbaa bolla laymatethi ayis gujadiii?” yaagees Ubbaa Haariya Goday.
EZE 16:44 “Yerusalaame, asay nena, ‘Na7iya aaye mala’ gidi leemisana.
EZE 16:45 Tuma neeni ba azinaanne ba nayta shaatetiya ne aaye mela; banta azinatanne banta nayta shaatetiya ne micheta mela; ne aayiya Hite asi; ne aaway Amoore asi.
EZE 16:46 Ne bayra michiya, ba gutaraa neepe pudeha baggan de7iya Samaarenne I macca nayta; ne kaalo michiya ba gutaraa neepe dugeha baggan de7iya Soodomenne I macca nayta.
EZE 16:47 Ne enta ogiya kaallada enta tuna oosota polo xalaala gidonashin, guutha woden entafe aadhada iita oothadasa.
EZE 16:48 “Taani Ubbaa Haariya Goday ta de7uwan caaqas. Neeninne ne gutan de7eysati oothidaysada ne michiya Soodomenne I macca nayti oothibookona.
EZE 16:49 Ne michiya Soodome oothida nagaray haysa: iyanne I macca nayti otorancho, enti kallidaysatanne inje duussu de7ikoka enti metootanchotanne manqota maaddibokona.
EZE 16:50 Enti otorancho gididi, ta sinthan tuna ooso oothidosona. Hessa gisho, hinte be7idaysata ta enta dhaysas.
EZE 16:51 “Samaarey ne oothida nagaras baggaaka oothabuuku; ne iipe aadhada shaatiya tuna oothadasa. Ne oothida tuna oosota ubbaa gaason ne micheti xillo azzanana mela oothadasa.
EZE 16:52 Neeni ne micheta suure asi kessida gisho yeella ma7a. Ne nagaray entaysafe aadhidi iitin, enti neepe xillo daanidosona. Hessa gisho, kawuyada yeella ma7a.
EZE 16:53 “Gidoshin, Soodomenne I macca nayta, Samaarenne I macca nayta taani enta shaluwa zaariya wode ne shaluwaka zaarana.
EZE 16:54 Neban neeni daro yeellatana; ne kawushatethay daro gidiya gisho ne micheti hessan minettana.
EZE 16:55 Ne micheti, Soodome ba gutataranne Samaariya ba macca naytara banta kase duusako simmana; neka ne macca naytara kase ne duussako simmana.
EZE 16:56 Ne otortiya wode ne miche Soodomi bolla qelqisabikii?
EZE 16:57 Hessi haniday ne nagaray qoncanaape kase gidennee? Ha77i neeni ne yuushuwan de7iya Edoomes michetisnne I shoorotas, Filisxeemesinne I miche naytas; hessadaka nena ixiya ubbaas bores attadasa.
EZE 16:58 Ne laymatetha gishonne ne tuna oosota gisho ne seeretana” yaagees Goday.
EZE 16:59 Ubbaa Haariya Goday haysada yaagees; “Neeni ufaysa qaala menthada, caaquwa laallida gisho ne oothida oosuwada ta new oothana.
EZE 16:60 Gidoshin, ta ne na7atetha wodiyan neera caaqida caaqo qaala hassayana; merinaw neera caaqana.
EZE 16:61 Ne bayranne ne kaalo micheta ta neeko ehiya wode neeni ne hemethaa hassayada yeellatana. Shin hessi ta neera caaqida caaquwa mela gidonna ixikoka, ta enta new na7a oothada immana.
EZE 16:62 Taani ta caaquwa neera oorathana; he wode ta Godaa gideysa ne erana.
EZE 16:63 Ne oothida nagaraa ubbaa taani atto giya wode ne oothidaba hassayada, yeellas ne doona oykana” yaagees Ubbaa Haariya Goday.
EZE 17:1 Godaa qaalay haysada yaagidi taako yis:
EZE 17:2 “Asa na7aw, Isra7eele asaas qan7ishin oda; leemison qoncisa.
EZE 17:3 Ubbaa Haariya Goday haysada yaagees gada oda. ‘Gita qefeynne dumma dumma mallara de7iya baalleti de7iya issi arganthi de7ees. He arganthay Libaanose yidi ziga xeeran oykis.
EZE 17:4 He zigaa xeera menthi ekidi, zal7ey dariya biitta efidi zal7anchota kataman tokis.
EZE 17:5 I Isra7eele biittafe aaca efidi, aradda biittan, haatha matan tokis.
EZE 17:6 Aacay daro aduqonna de7ishe daayidi arganthaako simmidi diccis; shin iya xaphoy biitta giddo gelis. He woyney daro tashenne haythe kessis.
EZE 17:7 Hessadaka, gita qefeynne daro baalleti de7iya hara arganthi de7ees. Haathe demmanaw he woyney ba toketida bessafe he arganthay de7iya bessaako ba xaphuwanne ba tashiya yeddis.
EZE 17:8 Shin, he woyney tashe kessana mela, ayfe ayfana melanne lo77o woyne gidana mela aradda biittan, daro haathi de7iya bessan toketis’ ” yaagees.
EZE 17:9 Ubbaa Haariya Goday haysada yaagees gada oda. “He woyney diccanee? Koyro iya tokida arganthay iya shoddenee? Iya ayfeta qoqofidi, iya irxa haythata melisennee? Iya he bessaafe xaphora shoddanaw gita wolqaa woyko daro asi koshshenna.
EZE 17:10 Iya shoddidi, hara bessan tokiyako I diccanee? Doloha bagga carkoy shocin ba toketida bessan melennee?”
EZE 17:11 Godaa qaalay haysada yaagishe taako yis:
EZE 17:12 “He leemisuwa birshethay aybeko ane ha geella asata oycha. Hessi aybe giiko, Babiloone kawoy Yerusalaame yidi, enta kawaanne enta halaqata di77idi, Babiloone efis.
EZE 17:13 Kawa soo asaape issuwa ekidi, baara caaqisidi, asaa giddofe eretidaysata di77idi efis.
EZE 17:14 Hessa oothiday enta kawotethay wolqa dhayidi, zaaridi dendonnaada banta caaquwa xalaala naagidi daana melasa.
EZE 17:15 Shin Yihuda kawoy makallidi, paratanne daro olanchota yeddana mela Gibxe kiittis. Yaatin hessi hanandee? Hessa oothida I kessi ekandee? I caaquwa menthidi seerettonna attandee?”
EZE 17:16 “Taani Ubbaa Haariya Goday ta de7uwan caaqas. Bana kawothida kawa caaquwa menthida gishonne caaquwa kadhida gisho, he kawa biittan, Babiloonen I hayqana.
EZE 17:17 Babiloone olanchoti daro asaa wodhanaw gimbiya yuushon biitta dooridi dirsi giigisiya wode, Gibxe kawoy ba olanchotaranne ba daro asaara yidi aykoka maaddenna.
EZE 17:18 I caaqo kadhidi menthida gishonne ba kushiya immidi, ba gida ba ubba polonna aggida gisho kessi ekanaw danda7enna.”
EZE 17:19 “Taani Ubbaa Haariya Goday ta de7uwan caaqas. I caaquwa kadhidi ta caaquwa menthida gisho ta sunthan caaqidas ta iya bolla zaarada ehana.
EZE 17:20 Taani ta gitiya iya bolla miccin, I ta xihiyan oyketana. I taw ammanetona ixida gisho ta iya Babiloone efada, yan iya bolla pirdana.
EZE 17:21 Dooretida iya olanchoti mashshan hayqana; attidaysati dumma dumma bessara laaletana.” Hessa odey tana, Godaa gideysa hinte erana.
EZE 17:22 Ubbaa Haariya Goday haysada yaagees; “Taani ta huuphen adussa ziga xeera qanxa ekada, dhoqanne adussa zumaa huuphen tokana.
EZE 17:23 Taani iya Isra7eele zumaa huuphen tokana; yan daayana; ayfe ayfananne lo77o ziga gidana. Kafo koche ubbay iyan keexana; enti iya tashiya kuyan shempana.
EZE 17:24 Adussa mithaa ziqi ootheynne qantha mithaa dhoqu oothey, qassi cil7o mithaa meliseynne mela mithaa aacisey tana Godaa gideysa biittan de7iya mitha ubbay erana. Taani Goday haysa odas; ta odidaysa ta oothana” yaagees.
EZE 18:1 Godaa qaalay haysada yaagishe taako yis.
EZE 18:2 “Isra7eele biittaba asay, ‘Aawati qawu7e woyne min, nayta achay hayqis’ yaagidi odiya leemisoy aybee?
EZE 18:3 Taani Ubbaa Haariya Goday ta de7uwan caaqas. Hizape guye hinte Isra7eele biittan ha leemisuwa leemiseketa.
EZE 18:4 Asa ubbaa shempoy tabaa; aawa shempoynne na7aa shempoy tabaa. Nagara oothiya shempoy i, baw hayqana.
EZE 18:5 “Issi asi xillo gidiko, tuma pirdanne suureba oothiko,
EZE 18:6 I deriya bolla de7iya eeqa goyinniya bessan meenna; Isra7eele asaa eeqa goyinnenna; ba shooruwa machiw tunisenna; kushe metora de7iya maccara aqena;
EZE 18:7 Oonaka un7ethenna; acos oykidaba guye zaarees, bonqenna; koshatida asi muzees; kallotida asi mayzees;
EZE 18:8 ba miishiya yelora tal7ena; ba kushiya iitabaape naagees; ase sigethishe xillo pirdees.
EZE 18:9 Ta higgiya naagees; ta wogaa ammanetethan polees; he uray xillo asi gidiya gisho I de7on daana” yaagees Ubbaa Haariya Goday.
EZE 18:10 Gidoshin, he uraas shempo wodhiya woyko kallidi de7eysatape issuwa oothiya iita na7i de7iko,
EZE 18:11 iya aaway haysatape issuwaka oothonna aggin, iya na7ay dere bolla eeqa goyinno bessatan miiko, asa macho tunisiko,
EZE 18:12 metootanchotanne manqota un7ethiko, bonqiko, acos oykidaba zaaronna ixiko, eeqa goyinniko, tunabaa oothiko,
EZE 18:13 ba miishiya yelora tal7idi wodhe ekiko, hessa mela asi de7on de7anee? I de7on deenna! I hessa mela tunabaa oothida gisho tuma hayqana; iya gomey iya oykana.
EZE 18:14 “Ha iita uraas na7i de7iko he na7ay ba aaway oothiya ha nagara ubbaa be7ishe, hessa melaba oothonna ixiko,
EZE 18:15 I dere bolla de7iya eeqa goyinno bessatan moonna ixiko, Isra7eele asaa eeqa goyinnona ixiko, ba laggiya machiw tunisonna ixiko,
EZE 18:16 oonaka un7ethonna ixiki, acos oykidaba guye zaariko, bonqona ixiko, koshatidaysa muziko, kallotidaysa mayziko,
EZE 18:17 Iita oosope ba kushiya teqiko wodhe ekanaw yelora tal7onna ixiko, ta higgiya naagiko, ta wogaa kaalliko, yaatiko, he na7ay de7on daanape attishin, ba aawa nagaraa gaason hayqenna.
EZE 18:18 Shin iya aaway asa maata sugida gisho, ba ishata bonqida gishonne ba asaa giddon iitaa oothida gisho ba nagaraa gaason hayqana.
EZE 18:19 “Shin hinte, ‘Na7ay ba aawa nagara gaason ayis seeretennee?’ ” yaageeta. Na7ay tuma pirdanne suure oothidi, ta higgiya minthidi naagiko, tuma de7on daana.
EZE 18:20 Nagara oothiya uray baw hayqana. Na7ay aawa nagaraa gaason seeretenna; hessadaka, aaway na7aa nagaraa gaason seeretenna. Xillo asi ba xillotethaa gatiya ekana; iita asi ba iitatethan seeretana.
EZE 18:21 Shin iita asi ba nagara ubbaafe simmidi, ta kiita naagiko tuma pirdaanne suure oothiko, I tuma de7on daanape attishin, hayqenna.
EZE 18:22 I oothida nagaraape issoyka qofetenna; ba oothida xillo oosuwa gaason I de7on daana.
EZE 18:23 Taani Ubbaa Haariya Goday, iita asi ba iita ogiyape simmidi, de7on de7eysan ufaytaysipe attishin, iya hayquwan ufaytike.
EZE 18:24 Shin xillo asi ba xillotethaa aggidi, iita asi oothiya tuna oosota ubba oothiko, I de7on daanee? Hanenna, I oothida xillo oosuwape issoyka qofetenna; I ammanetona ixida gishonne I oothida nagaraa gisho I hayqana.
EZE 18:25 Gidoshin, “Hinte, ‘Godaa ogey suure gidenna’ geeta. Isra7eele asaw, si7ite; suure gidonnay ta ogiyayee? Hinte ogiya gidennee?
EZE 18:26 Xillo asi ba xillotethaa aggidi, iita oothiya wode ba nagaran hayqees; ba oothida qohuwa gaason de7on de7ena.
EZE 18:27 Shin iita asi ba iitatethaa aggidi, tuma pirdanne suure oothiya wode ba shempuwa ashshana.
EZE 18:28 I ba oothida nagaraa qopidi guye simmida gisho, I tuma de7on daanape attishin, hayqenna.
EZE 18:29 Shin Isra7eele asay, ‘Godaa ogey suure gidenna’ yaagidosona. Isra7eele asaw, suure gidonnay ta ogiya? Hinte ogiya gidennee?
EZE 18:30 “Hinteno, Isra7eele asaw, ta hintena hinte oosuwatho oosuwatho pirdana. Ubbaa Haariya Goday haysada yaagees; nagari hintew dhayos gaaso gidonna mela paaxite; hinte bala ubbaafe simmite.
EZE 18:31 Hinte iita oosuwa ubba wora yeggidi, ooratha wozananne ooratha ayyaana ekite. Hinteno, Isra7eele asaw, ayis hayqeetii?
EZE 18:32 Taani issi asa hayqonka ufaytike. Hessa gisho, hinte nagaraa paaxidi, de7on de7ite” yaagees Ubbaa Haariya Goday.
EZE 19:1 Goday Hizqeelako, Isra7eele halaqatas haysada yaagada zeleela:
EZE 19:2 “Hinte aayiya gaammota giddon waanida gaammo! Yalaga gaammota giddon zin7ada, ba marata dichasu.
EZE 19:3 Iya ba maratape issuwa dichin, I wodala gaammo gidis; shanka tamaaris; ase muussu doomis.
EZE 19:4 Kawotethati ubbay iyabaa si7idosona; enti bookida ollan gelidi oyketis; siidhen wodoro aathidi Gibxe biitta efidosona.
EZE 19:5 Iya aayiya naagidaysi hanonna ixin, I ufaysay dhaydaysa be7ida wode, ba maratape issuwa dichada, wodala gaammo kessasu.
EZE 19:6 I wodala gaammo gididi, hara gaammota simeretis; I shanka tamaaris; ase muussu oykis.
EZE 19:7 I enta miixaa mentherethis; katamata dhaysis; I gudiya wode biittan de7iya asa ubbay dagammees.
EZE 19:8 Iya yuushuwan de7iya kawotethati ubbay iya oykanaw xihe wothidosona; banta gitiya miccidosona; enta ollan I oyketis;
EZE 19:9 Enti iya sidhen wodoro aathidi hoothen yeggidi, Babiloone kawako efidosona. I gudeysi zaaridi Isra7eelen si7etonna mela enti iya qasho keethan yeggidosona.
EZE 19:10 Ne aayiya haatha doonan toketida woyne mela; daro haathi de7iya gisho woyney daashshaninne ayfen kumidi de7ees.
EZE 19:11 Iya tasheti mino gidiya gisho kawota xam7a gididosona. Woyney woran de7iya mithatape aadhidi diccis; ba tashiya darotethaaninne adussatethan ubbaafe bollara bentis.
EZE 19:12 Shin he woyney hanqon shodetidi sa7an yegetis; doloha carkoy iya ayfiya melisis; iya mino tashey melin tami mis.
EZE 19:13 Ha77i I haathi bayna mela biittan toketis.
EZE 19:14 Tami iya ubbaafe keyidi, iya ayfiyanne tashiya mis. Kawota xam7a gidana mino tashey, iya bolla bentibeenna. Haysi yeeho zelelsi; haysa zelelsi kessiya wode go7etanaw bessees” yaagis.
EZE 20:1 Nu di7etida laapuntho laythan, ichashantho ageenan, tammantho gallasan, Isra7eele cimatape guuthati Godaa sheniya oychanaw yidi, ta sinthan uttidosona.
EZE 20:2 He wode Godaa qaalay haysada yaagishe taako yis;
EZE 20:3 “Asa na7aw, Ubbaa Haariya Goday, Isra7eele cimatako Goday haysada yaagees yaaga: ‘Hinte ta sheniya oychanaw yidetii? Taani Ubbaa Haariya Goday ta de7uwan caaqas: hinte tana oychana mela ta koyke.’
EZE 20:4 “Asa na7a ne enta bolla pirdanee? Tuma enta bolla pirdanee? Hessa gidiko, enta mayzata tuna oosuwa enta erisa.
EZE 20:5 Ubbaa Haariya Goday haysada yaagees gada entaw oda. ‘Taani Isra7eele doorida wode ta kushiya denthada Yayqooba zerethas caaqas. Taani tanatethaa Gibxe biittan entaw qoncisas. Ta kushiya denthada, taani Godaa, hinte Xoossa.
EZE 20:6 Ta hintena Gibxefe kessada, hintew doorida biitta, maathinne eessi goggiya biitta, hara biitta ubbaafe aadhida lo77o biitta ehana’ gada caaqas.
EZE 20:7 Ta entako, ‘Hinte issoy issoy dosiya tuna eeqata diggite; Gibxe eeqatan hintena tunisopite. Taani Godaa hinte Xoossaa’ ” yaagas.
EZE 20:8 Gidoshin, enti taw makallidi, ta odiyaba si7onna ixidosona. Enti banta amotida tuna eeqata diggibookona; Gibxe eeqata goyinno aggibokona. Hessa gisho, enti Gibxen de7ishin, ta hanquwa enta bolla gussanaw qopas. Ta sheniya wursanaw qofa qachas.
EZE 20:9 Shin enti de7iya kawotethata giddoninne Isra7eele asaa Gibxefe kessanaw caaqiya wode ta tanatethaa erisida asaa sinthan ta sunthay tunonna mela oothas.
EZE 20:10 Hessa gisho, ta enta Gibxefe kessada mela biitta ehas.
EZE 20:11 Kiitetiya ubbaas de7o immiya ta higgiya entaw immas; ta wogaa enta tamaarsas.
EZE 20:12 Enta geeshshey tana Godaa gideysa enti erana mela, ta Sambaata taapenne entafe giddon malla oothada immas.
EZE 20:13 Shin Isra7eele asay mela biittan ta bolla makallidosona. Kiitetyida ubbaas de7o immiya ta higgiya menthidosona; ta wogaa kaallibookona; ta Sambaata tunisidosona. Taani mela biittan ta hanquwa enta bolla gussada enta dhaysanaw qopas.
EZE 20:14 Shin ta enta Gibxefe kessiya wode be7ida kawotethata sinthan ta sunthay tunonna mela enta dhaysabike.
EZE 20:15 Enti mela biittan de7ishin, entaw immida, hara biitta ubbaafe lo77o gidida maathinne eessi goggiya biitta, enta gelsike gada caaqas.
EZE 20:16 Hessi haniday enti eeqa goyinnidi, ta higgiya menthida gisho, ta wogaa kaalliboonna gishonne ta Sambaata tunisida gishosa.
EZE 20:17 Gidoshin, ta entaw qadhetida gisho, mela biittan enta wursa dhaysabike.
EZE 20:18 Enti mela biitta de7ishin, enta naytako haysada yaagas; “Hinte aawata wogaa kaallopite; enta higgiya naagopite; woyko enta eeqatan tunopite.
EZE 20:19 Taani Godaa hinte Xoossaa. Ta wogaas kiitetite; ta higgiya naagite.
EZE 20:20 Ta hintera caaqida caaquwas malla gidana melanne taani Godaa hinte Xoossaa gideysa hinte erana mela Sambaata dummayite” yaagas.
EZE 20:21 “Shin enta nayti ta bolla makallidosona; kiitetiya ubbaas de7o immiya ta wogaa menthidosona; ta higgiya naagibookona; ta Sambaata tunisidosona. Yaatin, mela biittan ta hanquwa enta bolla gussada ta yiloy wurana gakanaw entana dhaysanaw qopas.
EZE 20:22 Shin taani enta Gibxefe kessiya wode be7ida kawotethata sinthan ta sunthay tunonna mela enta dhaysabike.
EZE 20:23 Enta hara kawotethata giddonne dumma dumma biitta laallanaw mela biittan ta kushiya denthada caaqas.
EZE 20:24 Enti ta wogas kiitetonna ixidosona; ta higgiya menthidosona; ta Sambaata tunisidosona; banta aawata eeqa amotidosona.
EZE 20:25 Yaatin, entaw lo77o gidonna wogatanne de7o immonna higgeta immas.
EZE 20:26 Enti banta yarshuwan tunanaada, banta bayra nayta yarshanaada, ta enta yedda bessaas. Ta hessa oothiday enta daganthanaasanne taani Godaa gideysa enti erana melasa” yaagis.
EZE 20:27 “Hessa gisho, asa na7aw, Isra7eele asaas, Ubbaa Haariya Goday haysada yaagees gada oda: hessa oothidi hinte aawati ammanetona ixidi tana cayidosona.
EZE 20:28 Ta entaw immana gada ta kushiya dentha caaqida biitta enta ehida wode, enti dereta ubbanne irxa mitha ubba be7idosona. Yan banta yarshuwa yarshidosona. Banta, ixaaniyaninne ushsha yarshuwan tana yiloyidosona.
EZE 20:29 Taani, ‘Haysi hinte biya dhoqa bessay aybee?’ yaagada oychas. Hachi gakanaw he bessay ‘Bama’ geetetees iya birshethay ‘Dhoqa Goyinno Bessata’ geetetidi xeegetees” yaagees.
EZE 20:30 “Hessa gisho, Isra7eele asaas, Ubbaa Haariya Goday haysada yaagees yaagada oda: ‘Hinte mayzati oothida nagara oothidi, ayis hintena tuniseetii? Enta tuna eeqa goyinnanaw amotidi ayis kaalleetii?’
EZE 20:31 Hachika hinte yarshuwa yarshiya wode hinte nayta taman yarshidi, eeqa ubban hintena tuniseeta. Hinteno, Isra7eele asaw, taani hintenan oysheto? Taani Ubbaa Haariya Goday ta de7uwan caaqas: ta hintenan oyshetike.
EZE 20:32 Hinte, ‘Nuuni mithinne shuchu goyinniya hara kawotethata melanne biittan de7iya hara asaa mela gidana yaagidi qopeeta. Shin hinte qofay polo hanenna.’ ”
EZE 20:33 Ubbaa Haariya Goday haysada yaagees: “Ta mino qesiyan, ta micetida kushiyaninne ta hanquwan hinte bolla kawotana.
EZE 20:34 Kawotethata giddofe ta hintena kessana; hinte laaletida biitta ubbaafe ta mino qesiyan, ta micetida kushiyaninne ta hanquwan hintena shiishana.
EZE 20:35 Ta hintena ‘kawotethata mela biitta’ giya mela biitta ehada, hintena ta sinthan essada, hinte bolla pirdana.
EZE 20:36 Gibxe mela biittan hinte mayzata bolla pirdidaysada, hinte bolla pirdana.
EZE 20:37 Taani hintena ta kawotetha xam7a garsan haarana; hinte ta caaquwa naagana mela oothana.
EZE 20:38 Makallanchotanne nagaranchota ta hinte giddofe diggana; ha77i enti de7iya biittafe ta enta kessana. Shin enti Isra7eele biitta gelonna mela teqana; he wode taani Godaa gideysa hinte erana” yaagees Ubbaa Haariya Goday.
EZE 20:39 Isra7eele asaw, hinteko Ubbaa Haariya Goday haysada yaagees: “Ha77i ta odeysa hinte si7onna ixiko, ubbay bidi hinte eeqa goyinnite. Shin hizape guye, hinte imotaninne hinte eeqatan ta geeshsha sunthaa tunisopite.
EZE 20:40 Ta geeshsha zumaa bolla, dhoqa Isra7eele zumaa bolla hinte Isra7eele asay tana, Ubbaa Haariya Godaa goyinnana. Taani hintena ekana; hinte yarshuwa, hinte doorida imuwanne hinte geeshsha imuwa ta hintefe koyana.
EZE 20:41 Hinte laaletida kawotethata giddofe taani hintena ehiya wodenne hara biittatape ta hintena shiishiya wode sawo tonku geetetiya yarshoda ta hintena ekana. Kawotethati xeellishin, hinte giddon ta geeshshatetha qoncisana.
EZE 20:42 Kase hinte mayzatas immana gada ta kushiya denthada caaqida Isra7eele biitta hintena zaarada ehida wode taani Godaa gideysa hinte erana.
EZE 20:43 Hinte iita hanotaanne hinte tuna oosuwa hinte he bessan hassayana; hinte oothida iita ooso ubbaa hinte shaatettana.
EZE 20:44 Hinteno, Isra7eele asaw, hinte iita hanota melanne hinte tuna oosuwa mela gidonashin, ta sunthaa gisho ta oothiya wode taani Godaa gideysa hinte erana” yaagees Ubbaa Haariya Goday.
EZE 20:45 Godaa qaalay haysada yaagishe taako yis.
EZE 20:46 “Asa na7aw, dugeha bagga simmada xeella; dugeha baggaas oda; dugeha wora bolla tinbite oda.
EZE 20:47 Dugeha woraas, Ubbaa Haariya Goday odiyaba si7a yaagada oda. ‘Ta ne giddon tama yeddana; he tamay cil7o mithaanne mela mithaa ubbaa maana. He eexiya tamay to7enna; dugehape bidi, pudeha bagga gakanaw de7iya asa som7o ubbaa he lacoy labana.
EZE 20:48 He tama oythiday tana Godaa gideysa asa ubbay be7ana. He tamay to7enna’ ” yaagees.
EZE 20:49 Taani zaarada, “Ubbaa Haariya Godaw, hessa oda gada tana kiittofa. Enti, ‘I ubba wode leemison odees gidennee?’ yaagosona” yaagas.
EZE 21:1 Godaa qaalay haysada yaagishe taako yis.
EZE 21:2 “Asa na7aw, ne som7uwa Yerusalaameko zaarada, asay goyinniya bessata bollanne Isra7eele biitta bolla tinbite oda.
EZE 21:3 Haysada yaaga: ‘Taani new morke. Taani ta mashsha shoohuwape shoddada, ne gidope xillo asaanne iita asa ubbaa wursana.
EZE 21:4 Xilluwanne nagaranchuwa ubba dhaysanaw dugehape pudeha gakanaw de7iya asa ubba bolla ta mashsha shoddana.
EZE 21:5 Taani Goday, ta mashsha shoohuwape shoddidaysanne guye zaaronnaysa asa ubbay erana’ ” yaagees.
EZE 21:6 “Hessa gisho, asa na7aw, asa ubbay xeellishin, ne wozanay meqin, cametada olla.
EZE 21:7 ‘Ayis oolay?’ yaagidi enti nena oychiko, ‘Sinthara yaa iita woriya gisho ollayis’ yaaga. He woriyan, ‘Wozani ubbay yashshan seerana; kushe ubbay argaacana; goobatethi ubbay eketana; gulbati ubbay kokorana. He wodey gakis; tuma poletana’ ” yaagees Ubbaa Haariya Goday.
EZE 21:8 Godaa qaalay haysada yaagishe taako yis:
EZE 21:9 “Asa na7aw, tinbite oda; taani Goday odiyaba asaas oda; mashsha; leefetidanne qushetida mashsha.
EZE 21:10 “Gora7anaw leefetis; wol7antha mela phoolanaw qushetis. Ta asay imetida seera ixida gisho, hizape guye, oonika ufaytenna.
EZE 21:11 Go7etanaw mashshay qushetis; leefetidinne qushetidi, Gora7eysas imetanaasa.
EZE 21:12 Asa na7aw, yeekanne zeleela; ha mashshay giigetiday ta asaa bollanne Isra7eele halaqata bollana. Halaqati ta asaara issife mashshan hayqana; Hessa gisho, azzanada ne tiraa qoxa.
EZE 21:13 Taani ta asaa paacana; enti nagara paaxonna ixiko, ha metoy ubbay enta bolla yaana; Ubbaa Haariya Goday haysa odis.
EZE 21:14 “Ha77ika asa na7aw, tinbite oda; ne kushiya baqa. He wode mashshi nam7u toho heedzu toho zaaridi shocana; hessika daganthiya, yuushuwa ubban wodhiyanne shukiya mashshi.
EZE 21:15 Hessi enta wozanay til7anaadanne entafe daroti dhubetanaada oothana. Hintena ayye! Hinte pengen mashshi wol7antha mela wol7amees; shukanaw shoohope shodetis.
EZE 21:16 Neno, qara mashshaw, ushachinne haddirsi simmida ne simmida bagga ubbaa butha.
EZE 21:17 Hiza Taani ta kushiya baqana; ta hanqoy dochana” yaagees Goday.
EZE 21:18 Godaa qaalay haysada yaagishe taako yis.
EZE 21:19 “Asa na7aw, Babiloone kawa mashshay yaa nam7u ogetan malla wotha. Nam7u ogeti issi biittafe dendoosona; ogey katamako simmiya ogen mallata tuussu essa.
EZE 21:20 Issi ogiyan de7iya malla Raaba geetetiya Amoone katamaa biya ogiya mallees; hankoy ogey gimbetida Yihudan de7iya Yerusalaame katamaa biya ogiya mallees.
EZE 21:21 Babiloone kawoy ogeti gahetiya daggalan, malla tuussata matan eqees. I awu ogiyara baaneko eranaw, donge tooran saama yeggana; ba eeqata zore oychana; maraaciya be7ana.
EZE 21:22 Gimbiya pengiya laaliya duruma ehana mela, wodho kiita aathana mela, ceeqetana mela, dirsa pengiya laaliya duruma katama pengen essana mela, biitta doorana melanne miixa giigisana mela Yerusalaame saami iyaw ushacha kushen keyis.
EZE 21:23 Yerusalaame asay Babiloone kawuwara caaqida gisho, hessi banta bolla gakana gidi qopibookona. Shin Babiloone kawoy enta di77iya wode enti banta nagaraa hassayana.
EZE 21:24 Hessa gisho, Ubbaa Haariya Goday haysada yaagees; hinte nagaray qoncis; hinte bala gideysa asa ubbay erees; hinte oosoy hinte nagarancho gideysa bessees. Hessa gisho, hinte iita oosoy hassayetana; hinte, hinte morketas aadhidi imetana.
EZE 21:25 “Neno, iitanne tuna gidida Isra7eele halaqaw, ne pirdaa gallasay gakis.
EZE 21:26 Ubbaa Haariya Goday haysada yaagees: ne huuphiyape kallachaa dentha; ne huuphe xaatha qaara. Hizape guye kaseysada hananabay baawa; ziqay dhoqu gaana; dhoqay ziqi gaane.
EZE 21:27 Gado! Gado! Taani ha katamaa dhaysana. Pirdanaw maati de7eysi yaana gakanaw ha katamay zaaridi keexetenna. I yaa wode ta iyaw aathada immana” yaagees.
EZE 21:28 Asa na7aw, haysada yaagada tinbite oda. Isra7eele cayiya Amooneta Ubbaa Haariya Goday haysada yaagees gada oda. “Dhaysiya mashshi shoohope shodetis; wodhanaw wol7amees; wursanaw qushetees.
EZE 21:29 Hinte be7iya qoncethay wordo; hinte odiya tinbitey wordo. Hinte iitanne tuna asi; hinte pirda gallasay gakis hinte qoodhen mashshi wodhana hanees.
EZE 21:30 Mashshaa shoohuwan zaarite; hinte medhetida bessan, hinte yeletida biittan ta hinte bolla pirdana.
EZE 21:31 Taani ta hanquwa hinte bolla gussana; ta hanqo tamay hinte bolla eexana; dhayso meezetida, wozana mino asaas aathada immana.
EZE 21:32 Hinte taman dhayana; hinte suuthay hinte biittan gukana; hinte zaaridi hassayeteketa. Taani Goday haysa odas” yaagis.
EZE 22:1 Godaa qaalay haysada yaagishe taako yis.
EZE 22:2 “Asa na7aw, shempo wodheysati kumida katamaa bolla pirdanaw giigadiii? Yaatiko, I oothida tuna ooso ubbaa iyaw oda.
EZE 22:3 Ubbaa Haariya Goday haysada yaagees gada oda: ne daro asaa wodhida gishonne eeqa goyinnon nena tunisida gisho ne dhayo wodey gakis.
EZE 22:4 Ne gussida suuthan bala gidadasa; ne oothida eeqan tunadasa. Ne pirdaa gallasay matatis; ne dhayo wodey gakis. Hessa gisho, ta nena kawotethatas miichasinne hara biittatas qelqisees aggana.
EZE 22:5 Neno, ne sunthay iitida dagami kumida katamaw, mataninne haahon de7eysati nena qelqisana.
EZE 22:6 “Ne giddon de7iya Isra7eele halaqati ubbay suuthu gussanaw banta wolqaa ay mela go7etiyako be7a.
EZE 22:7 Ne giddon de7eysati banta aawanne banta aayiw bonchokona. Enti bete asaa cimmoosona; am7etanne aawu aayiya bayna nayta naaqoosona.
EZE 22:8 Enti ta geeshsha miisheta kadhoosona; ta Sambaata tunisoosona.
EZE 22:9 Ne giddon issoti issoti harata wodhisanaw wordon odoosona; harati eeqas yashetidaba moosona; harati laymatoosona.
EZE 22:10 Ne giddon issoti issoti ba aawa machera tunoosona; harati kushe metoy de7iya maccasara wolqan tunisoosona.
EZE 22:11 Ne giddon issoti issoti ba shooruwa machera tunoosona; aaway ba na7a machera tunees; ba aawa na7iw, ba michiw wolqan iissidi yeellayees.
EZE 22:12 Ne giddon issoti issoti miishe ekidi, shempo wodhoosona; harati banta miishiya banta yara gidida Isra7eeletas yelora tal7oosona; enta bonqidi bantaw duretoosona; tana kumethi dogidosona” yaagees Ubbaa Haariya Goday.
EZE 22:13 “Asay bessonna miishe ekiya gishonne shempo wodhiya gisho, taani ta kushiya hinte bolla denthana.
EZE 22:14 Ta nena seeriya wode ne goobatethay neera daanee? Woyko ne kushey mino gidanee? Taani Goday haysa odas; ta odidaysada oothana.
EZE 22:15 Ta nena kawotethata giddoninne biittata giddon laallana; ne tunatethaa neepe diggana.
EZE 22:16 Hara kawotethata sinthan ne kawuyana; taani Godaa gideysa ne erana” yaagis.
EZE 22:17 Goday taako haysada yaagis:
EZE 22:18 “Asa na7aw, Isra7eele asay aykoka pathokona; enti ubbay bira sheeshiya wode naase biratape, qorqorope, biratapenne irsaasepe keya sha7a mela.
EZE 22:19 Hessa gisho, Ubbaa Haariya Goday haysada yaagees; ‘Hinte ubbay atala mela gidida gisho ta hintena ubbaa Yerusalaame shiishana.
EZE 22:20 Bira, naase birata, birata, irsaasenne qorqoro taman hubidi sheesheysada ta hintena shiishada ta hanquwana til7isana.
EZE 22:21 Ta hintena Yerusalaame shiishada, ta hanqo tama hinte bolla eethada hintena yan til7isana.
EZE 22:22 Biri coocen shee7eysada hinte Yerusalaamen til7ana. He wode taani Goday ta hanquwa hinte bolla gussidaysa hinte erana’ ” yaagees.
EZE 22:23 Zaaridi Godaa qaalay haysada yaagishe taako yis.
EZE 22:24 “Asa na7aw, enta biittay tunida gisho, ta hanquwan iri bukonna mela diggada enta seera domidasa Isra7eele asaas oda.
EZE 22:25 Ne giddon enta halaqati wodhidaba gudishe mentherethiya gaammo mela; enti wodhoosona; miishe gidin, hara buqura gidin, ubbaa bantaw ekoosona; daro maccasata am7o oothidosona.
EZE 22:26 Kahineti ta higgiya menthidosona; ta geeshshabata bonchibookona. Geeshshinne geeshshi gidonna ba shaakokona; tunanne tunaa gidonna ba shaakidi tamaarsokona; ta Sambaata yeggi aggideta. Hessa gaason ta Isra7eele asaa giddon bonchetabike.
EZE 22:27 Halaqati banta wodhidaba duuserethiya suudhume mela; enti bantaw bessona duretethi demmanaw shempo wodhoosona.
EZE 22:28 Nabeti godaa booqinte tiyiya asada, wordo qoncethi be7idi, wordo tinbite odidi enta nagaraa genthoosona. Goday odonna de7ishin, ‘Ubbaa Haariya Goday haysada yaagees’ yaagosona.
EZE 22:29 Biittan de7iya asay bonqoosona; manqotanne metootanchota un7ethoosona; enti suure pirdaa diggidi bete asaa geellayosona.
EZE 22:30 “Taani biitta dhaysona mela dirsa gimbiya keexey, laaletida dirsa gimbiya baggara ta sinthan eqidi naagiya issi asi koyas; shin oonaka demmabike.
EZE 22:31 Hessa gisho, ta hanquwa enta bolla gussana; taani ta yiluwan enta dhaysana; enti oosuwa enta bolla zaarana” yaagees Ubbaa Haariya Goday.
EZE 23:1 Godaa qaalay haysada yaagishe taako yis:
EZE 23:2 “Asa na7aw, issi aayepe yeletida nam7u micheti de7oosona.
EZE 23:3 Enti Gibxen de7ishe, banta na7atethafe doomidi, layma gididosona. He biittan de7iya addeti enta dhanthan kaa7idosona; enta geela7otethay eketis.
EZE 23:4 Entafe bayre sunthay Ohoolo; kaalo miche sunthay Ohooliba. Enta nam7a taani machin, taw addenne macca na7a yelidosona. Ohoola Samaare; Ohooliba qassi Yerusalaame.”
EZE 23:5 “Ohoola taw macho gidada de7ashe laymatasu; iya ba olancho gidida Asoore laggethota kaallada bawusu.
EZE 23:6 Enti kaalose daaniya ma7o ma7ida olanchota, biitta haareysatanne toora moconata; enti ubbay na7atethinne mala lo77o gidida para toggiya asata.
EZE 23:7 Iya bana layma oothada, ubbaafe lo77iya Asoore addetas bana aathada immasu. I laymatethay iya Asoore eeqata goyinnada tunana mela oothis.
EZE 23:8 Iya Gibxen doomida laymatetha ha77ika aggabuku; I na7atethafe doomidi, addeti I dhanthaa kaa7osonanne iira laymatoosona.”
EZE 23:9 “Hessa gisho, iya minthada siiqiya Asoore laggethotas taani iyo aathada immas.
EZE 23:10 Enti iyo qaaridi kalloydosona; I addenne macca nayta di7idi oykidosona; iyo mashshan wodhidosona. Iyo gakida pirda gaason, maccasa giddon qelqisethas attasu.”
EZE 23:11 “I michiya Ohooliba hessa be7asu; iya ba amuwaninne ba laymatethan ba michefe aadhada tuna gidasu.
EZE 23:12 Iyaka Asoore haareysati, toora moconata, lo77o ma7o ma7ida olanchotanne para toggiya asata, na7atethinne mala lo77o asata minthada siiqasu.
EZE 23:13 Iyaka bana tunisidaysa be7as; enti nam7ay issi ogen boosona.”
EZE 23:14 “Iya ba laymatetha yaa darsasu; iya godaa bolla woocetidi oosetidi zo7o qalamen tiyetada Kaldaaweta adde misile be7asu.
EZE 23:15 Enti banta xeessan zinnaare dancidosona; banta huuphiyan lo77o carqe xaaxidosona. Enti ubbay Kaldaawe biittafe yida Kaldaaweta halaqata daanosona.
EZE 23:16 Iya enta misileta be7ida wode daro siiqada, enta xeeganaw Kaldaaweta biitta ase kiittasu.
EZE 23:17 Babilooneti iiko yidi, iira laymatidi iyo tunisidosona. Enti iyo daro tunisidaape guye, iya enta shaatetasu.
EZE 23:18 Iya ba laymatetha qoncen oothida wodenne ba kalluwa qaara bessida wode, taani I michiw aggidaysada iyoka shaatettada aggas.
EZE 23:19 Shin iya Gibxen layma gidada de7iya, ba yalagatetha wodiya hassayada, ba laymatetha kaseysafe yaa darsasu.
EZE 23:20 Enta atunthay hareysa mela, enta kochay paraysa mela gidida ba laggethota kaallada basu.
EZE 23:21 Neno, Ohoolibe, ne yalagatetha wodiyan Gibxe addeti ne dhanthan kaa7ishin, ne geela7otetha ekishin, neeni polida laymatetha zaarada ha77i oothanaw amottaasa.”
EZE 23:22 Hessa gisho, Ohoolibe, Ubbaa Haariya Goday haysada yaagees: “Taani ne laggethota, ne shaatetta aggidaysata ne bolla denthana; ta enta ne bolla ubba bessara ehana.
EZE 23:23 Babiloonetanne Kaldaaweta ubbaa, Faaquda, Sohaane Qo7aana, Asooreta ubbaa, na7atethinne mala lo77o asata, biitta haareyisata, toora moconata, olanchota, halaqatanne para toggiya asata ne bolla ehana.
EZE 23:24 Enti ola para gaaretara, caana gaaretaranne daro olanchotara pudeha baggafe hinte bolla yaana. Enti wogga gondallenne guutha gondalle oykidi, birata barneexa wothidi, ne yuushuwan salpana. Taani nena entaw aathada immana; enti nena banta wogaa mela pirdana.
EZE 23:25 Taani ta hanquwa ne bolla yeddana; enti neera hanqo suulan gahetana. Enti ne siidhiyanne ne haythaa qanxana; attidaysati mashshan wurana. Enti ne adde naytanne ne macca nayta oykana; attidaysata taman xuuggana.
EZE 23:26 Enti ne ma7o ubbaa neepe qaaridi ekana; ne alleeqo ubbaa neepe kessidi ekana.
EZE 23:27 Hessada oothada, ne Gibxefe ehida laymatetha amuwa neepe diggana. Neeni nam7antho Gibxeta eeqa misileta dhoqu gada xeellonnaada woyko enta hassayonnaada oothana.”
EZE 23:28 Ubbaa Haariya Goday haysada yaagees: “Taani nena ne ixeyisata, ne shaatettada aggidaysatas aathada immana.
EZE 23:29 Enti nena ixana; ne daaburada demmidaba ubba bonqidi, nena xire kallo ashshana. Ne laymatetha amoy qoncanaada oothana. Ne laymatetha amoy,
EZE 23:30 hessa ne bolla ehis. Neeni kawotethatara laymatadasa; enta eeqatara nena tunisadasa.
EZE 23:31 Ne michiya bida ogiya neka badasa. Hessa gisho, nena I xuu7aa ushshana.”
EZE 23:32 Ubbaa Haariya Goday haysada yaagees: “Neeni ne miche xuu7ape uyana; he xuu7ay gitanne ciimmo. I tigin, daro ekiya gisho, asi ubbay ne bolla miicananne nena qidhana.
EZE 23:33 Neeni mathota gandigarananne azzanana. Hessi ne miche Samaare xuu7ay new dagamanne dhayo ehana.
EZE 23:34 Ne iya xiizothada uyana; xuu7a menthana; kun7an ne dhantha gaarana.” Taani Ubbaa Haariya Goday haysa odayis.
EZE 23:35 Ubbaa Haariya Goday haysada yaagees: “Neeni tana dogida gisho, taw zoko zaarida gishonne ne laymatetha amuwas gate ekana.”
EZE 23:36 Goday taako haysada yaagis: “Asa na7aw, Ohooli bollanne Ohoolibi bolla pirdanaw giigetadii? Enti oothida tuna oosuwa entaw oda.
EZE 23:37 Enti nam7ay laymatidosona; shempo wodhidosona. Enti banta eeqa goyinnidosona. Hari attoshin, enti taw yelida banta adde nayta banta eeqatas kathi oothidi yarshidosona.
EZE 23:38 Hessafe aathidi hara iitabaa ta bolla oothidosona; enti ta keethaa tunisidosona; he wode ta Sambaataka shaaridosona.
EZE 23:39 Enti banta nayta eeqatas yarshida gallas, enti ta keetha gelidi tunisidosona; enti ta keethan oothiday haysa.”
EZE 23:40 Enti haaho bessafe addeti yaana mela ase kiittin, enti yidosona. Hinte nam7u micheti hinte bolla meecetideta; hinte ayfiya tiyetideta; alleeqo aathideta.
EZE 23:41 Lo77o arjeeta bolla uttideta; xarpheeza bolla ta ixaaniyanne ta shamaho zaytiya wothideta.
EZE 23:42 Ufaytiya asaa koysethi hinte matan si7etees. Mathotida asay mela biitta yidosona. Hinte kushen sagaayo wothidosona; lo77o kallachata hinte huuphen goxidosona.
EZE 23:43 Taani ta wozanan, “Ha addeti asatethay laymatethan gilqida maccaseera laymatoosona” yaagas.
EZE 23:44 Addey maccasara laymateysada, haysati entara laymatidosona. Enti laymatanaw amotiya Ohooliranne Ohoolibira laymatidosona.
EZE 23:45 Enti layma gidiya gishonne shempo wodhiya gisho, xillo asati laymatiyanne shempo wodhiya enta bolla pirdana.
EZE 23:46 Ubbaa Haariya Goday haysada yaagees: “Daro asa denthethada enta bolla eha. Enta daganthiyanne enta bonqiya asatas aatha imma.
EZE 23:47 Ha daganthiya asati yidi, enta shuchan caddo; mashshan butho; enta addenne macca nayta wodho; enta keethaa taman xuuggo.
EZE 23:48 Maccas ubbay naagetana mela taani biitta ubbaafe laymatethi dhaysana.
EZE 23:49 Hinte nam7u micheti hinte laymatetha gishonne eeqata hinte goyinnida nagaraa gisho hintena pirdana. Taani Ubbaa Haariya Godaa gideysa hinte he wode erana” yaagees.
EZE 24:1 Nuuni di7etida uddufuntho laythan, tammantho ageenan, tammantho gallas, Godaa qaalay haysada yaagishe taako yis.
EZE 24:2 “Asa na7aw, hachi gallas mazgaben xaafa. Babiloone kawoy Yerusalaame teqiday hachi.
EZE 24:3 Ha makallancho asaas Ubba Haariya Goday haysada yaagees gada ha leemisuwa oda. Madabe diste tama bolla wothada haathe iyan tiga.
EZE 24:4 Gedaanne angaasuwa, lo77o asho ubbaa muxada, iyan yegga; lo77o meqethaa qanxerethada iyan kuntha.
EZE 24:5 Hessas ne ekana dorsay wudiyape dooretidaysa gido. Distiya garsan mithi wothada ashuwanne meqetha kaxana gakanaw doysa.”
EZE 24:6 Ubbaa Haariya Goday haysada yaagees: “Suuthu gussiya katamaa ayye! Iya shi7idi geeyonna ixida naase birata diste mela gidasu. I giddon de7iya muxetida ashuwa saama yeggonna kushen gahetidaysa kessa kessa eka.
EZE 24:7 He katamay wodhida asaa suuthay hanno gakanaw in de7ees. Suuthi gussashe, aybika kammonna danda7onna zaalla bolla gussasupe attishin, baanan kammana biitta bolla gussabuuku.
EZE 24:8 Halo keyanaw, ta hanquwa denthethanaada, kamettonna mela iya gussida suuthaa taani zaalla bolla wothas.”
EZE 24:9 Hessa gisho, Ubbaa Haariya Goday haysada yaagees: “Suuthu gussiya katamaa ayye! Taani mithi gujada wothana.
EZE 24:10 Daro mithi wotha; tama eetha. Ashuwa loythada doysa; cambaa mal7etha; meqetha xuugga.
EZE 24:11 Kaysa Madabe diste tama bolla wotha. Iya bolla de7iya buuqay seeridi kichana gakanawunne iya bolla de7iya shi7ay xuugetidi dhayana gakanaw suullidi michana mela tama bolla wotha.
EZE 24:12 He daaburay ubbay coo mela gidis; iya bolla de7iya daro shi7ay hari attoshin, taman kichibeenna.
EZE 24:13 Yerusalaame, nene tuniday ne iita oosuwana. Ta hanqoy ne bolla wurana gakanaw hizape neeni geeyaka. Ne tunatethafe nena geeshshanaw koyas shin, ne geeyanaw koyabaaka.
EZE 24:14 Taani Goday haysa odas; hessi hanana. Taani guye simmike; new qadhetike; ta qofaa laammike. Ne ogiyadanne ne oosuwada taani nena pirdana. Taani Ubbaa Haariya Goday haysa odayis” yaagis.
EZE 24:15 Qassika Godaa qaalay haysada yaagishe taako yis.
EZE 24:16 “Asa na7aw, ne siiqiyanne ne ayfe sinthan lo77iya ne machiw akeekona wodhana. Hessan kayotofa, yeekofanne afuxofa.
EZE 24:17 Oola, shin ne ooliya asi si7opo; hayqidaaris kayotofa. Neeni ne huuphen qace xaaxa; ne tohuwan caamma aatha. Ne doona kammofa; shochi moopa.”
EZE 24:18 Wonta taani asaas odas; omarsi ta machiya hayqasu. Wontetha gallas Goday tana kiittidaysada oothas.
EZE 24:19 Asay taako, “Ha neeni oothiyabas birshethay aybeko nuus ayis odikii?” yaagis.
EZE 24:20 Godaa qaalay haysada yaagishe taako yis yaagada entaw odas.
EZE 24:21 Ubbaa Haariya Goday Isra7eele asaa haysada yaagees; “Hinte ceeqetiya, hinte ayfe amuwanne hinte shempoy amotiya ta keethaa taani tunisana hanayis. Hinte guye ashshida hinte adde naytinne hinte macca nayti mashshan wurana.
EZE 24:22 He wode ta oothidaysada hinte oothana. Hinte doona kammeketa; shochu meeketa.
EZE 24:23 Hinte huuphiya xaaxite; hinte tohuwan caamma aathite. Kayoteketa woyko yeekeketa. Shin hinte hinte nagaraa gaason gilqananne issoy issuwara oolana.
EZE 24:24 He wode Hizqeeli hintew malaata gidana; I oothidaysada, hinte oothana. Hessi haniya wode, taani Ubbaa Haariya Godaa gideysa hinte erana.
EZE 24:25 “Asa na7aw, taani enta ufaysaanne bonchuwa, enta ayfen lo77iyabaanne enta wozanay amotiyaba mino bessa, qassi enta adde naytanne enta macca nayta entafe ekana.
EZE 24:26 He gallas new wore odanaw issi asi kessi ekidi yaana.
EZE 24:27 He gallas ne doonay dooyetana; ne iyara odetana; zaarada muume gidaka. Hessada hanada, ne asaas malaata gidana. Taani Godaa gideysa enti he wode erana” yaagis.
EZE 25:1 Godaa qaalay haysada yaagishe taako yis.
EZE 25:2 “Asa na7aw, ne som7uwa Amooneko zaarada, enta bolla tinbite oda.
EZE 25:3 Ubbaa Haariya Goday odiya qaala si7ite. Hinte ta keetha tunisiya wode, Isra7eele biittay baysa attiya wodenne Yihuda asay di7etiya wode hashshu gideta.
EZE 25:4 Taani hintena doloha bagga biitta asaas laata oothada immana. Enti hinte giddon kambe keexidi daana. Hinte mithaa ayfiya enti maana; hinte maatha enti uyana.
EZE 25:5 Taani Raaba katamaa gimaleti heemetiya bessi kessana; Amooneta biitta dorsaa wudey pee7iya bessi oothana. Taani Godaa gideysa hinte he wode erana.
EZE 25:6 Ubbaa Haariya Goday haysada yaagees: ‘Hinte Isra7eele dhayuwan kushe baqida gisho, gupida gishonne ufaytidi qelqisida gisho,
EZE 25:7 taani hinte bolla ta kushiya denthas. Hintena kawotethatas di7o oothada immana. Ta hintena asaape shoddana; kawotethata giddofe dhaysana. Taani Godaa gideysa hinte he woden erana’ ” yaagees.
EZE 25:8 Ubbaa Haariya Goday haysada yaagees: “Moo7abeynne Sayre, ‘Yihudi hara kawotethata ubba mela’ yaagida gisho,
EZE 25:9 taani Moo7abe biitta teqana; iya zawa naagiya, eretida Beet-Yashimoota, Ba7aal-Ma7oonanne Qiratayma katamata dhaysana.
EZE 25:10 Hizape guye Amooneta gujada, enti kawotethata giddon hassayetonna mela enta doloha bagga biittafe yida asaas aathada immana.
EZE 25:11 Taani Moo7abe pirdana; taani Godaa gideysa enti he wode erana” yaagees.
EZE 25:12 Ubbaa Haariya Goday haysada yaagees; “Edoomey Yihuda bolla halo keyida gishonne qohida gisho,
EZE 25:13 taani kushiya Edoome bolla denthana. Yan de7iya asaanne mehiya kumethi dhaysada baysa kessana. Temaanape bidi, Dedaana katamaa gakanaw enti mashshan wurana.
EZE 25:14 Taani Isra7eele baggara Edoome bolla halo keyana. Isra7eeleti enta bolla ta yiluwa mela oothana. Taani halo keydaysa Edoomey erana” yaagees Ubbaa Haariya Goday.
EZE 25:15 Ubbaa Haariya Goday haysada yaagees: “Filisxeemeti banta wozanaa iitatethan halo keyida gishonne aqida morken Yihuda kadhidi dhaysanaw koyida gisho,
EZE 25:16 taani ta kushiya Filisxeemeta bolla denthana. Taani Keltaaweta qanxana; abba doonan attidaysata ubbaa dhaysana.
EZE 25:17 Ta enta bolla gita halo keyana; ta hanquwan enta seerana. Taani enta bolla halo keyiya wode, taani Godaa gideysa enti he wode erana” yaagees.
EZE 26:1 Nuuni di7etida tammanne issantho laythan, ageena koyro gallasan, Godaa qaalay haysada yaagishe taako yis.
EZE 26:2 “Asa na7aw, Xiroosa asay ufaytishe, ‘Hashshu! Yerusalaamey kundis; iya pengey waggi gidi dooyetis. I laaletidi dooyetida gisho hizape guye nu duretana’ yaagosona.
EZE 26:3 Hessa gisho, Ubbaa Haariya Goday haysada yaagees; ‘Neno, Xiroosa, taani new morke. Abba zuley dendeysada taani daro kawotethata ne bolla ehana.
EZE 26:4 Enti ne dirsa gimbiya laallana; ne gimbe shakota menthana. Ta nena biitta ubbaa quchidi efin, kallo de7iya zaalla oothana.
EZE 26:5 Neeni abba giddon asay banta molo gitiya melisanaw micciya bessi gidana. Hara kawotethati Xiroosa bonqana.
EZE 26:6 Waanna biittan de7iya gutata mashshan wursana. Taani Godaa gideysa enti he wode erana’ yaagees Ubbaa Haariya Goday.
EZE 26:7 “Ubbaa Haariya Goday haysada yaagees: ‘Xiroosa bolla ola denthana mela kawota kawo gidida Babiloone kawa Nabukadanaxoora, paratara, para gaaretaranne daro olanchotara pudeha baggafe ehana.
EZE 26:8 Enti waanna biittan de7iya gutata mashshan wursana. Enti nena teqidi, ne dirsa gimbiya gathidi, biitta doorana; banta gondalliya ne bolla denthana.
EZE 26:9 Dirsa gimbeta dom7idi laaliya miishen ne dirsa gimbiya mentherethana; banta ola miishen ne adussa gimbeta laallana.
EZE 26:10 Iya parati daro gidiya gisho, enti denthiya baanay nena kammana. Paratinne parata gaareti laaletida katamaa dirsa pengiyara geliya wode enti sissiya garmamoy ne dirsa gimbiya qaathana.
EZE 26:11 Enta parati ogeta ubbaa yedhana. Ne asaa mashshan wursana; ne wolqaama tuussati sa7an kundana.
EZE 26:12 Ne shaloy di7etana; ne zal7iya miisheti bonqetana. Ne dirsa gimbetanne ne lo77o keethata ubbaa dhaysana; ne shuchata, ne sanqaanne laaletida ubbaa efidi abban yeggana.
EZE 26:13 Ne mal7o yetha ta teqana; ne diitha girsay zaari si7etenna.
EZE 26:14 Ta nena kallo de7iya zaalla oothana; neeni asay banta molo gitiya micciya bessi gidana. Taani Goday haysa odida gisho, neeni zaarada keexetaka’ ” yaagees Ubbaa Haariya Goday.
EZE 26:15 “Ubbaa Haariya Goday Xiroosa katamaako haysada yaagees: ‘Ne morketi ne bolla dendiya wode yuushoy abban teqetida biittan de7iya asay, ne goyretiya wode waassiya waasuwa si7idi, yashshan kokorana.
EZE 26:16 Abbaa doonan de7iya haareysati banta araatape wodhana. Banta boncho ma7uwanne alleeqetidi oosetida ma7uwa qaaridi yashshan kokorishe biittan uttana. Ne bolla gakida metuwa qopidi, enti daro dagammana; enti ubba wode kokorishe daana.’
EZE 26:17 Enti new haysada yaagidi zelelsi kessana: “Abbaa doonan de7iya yashshiya katamata; wolqaama asay de7iya katame, neeni waana laaletadii? Neeninne ne giddon de7ida asay abba doonan de7iya asa ubbaa yashisadasashin.
EZE 26:18 Neeni kundiya gallas yuushoy abban teqetida biittati kokoridosona. Haathan teqetida biittati ne dhayuwan dagammidosona” yaagis.
EZE 26:19 Ubbaa Haariya Goday haysada yaagees: “Ha77i oonika doonna katamatada ta nena baysa kessana. Taani abba haatha ne bolla ehin, daro haathay nena kammana.
EZE 26:20 Neeni si7oole gelada beni hayqida asaara walaketana mela oothana. Neeni biittafe garsan, beni moogetidi, merinaw laaletidi attidaysatara daana mela oothana. Neeni zaarada asi de7iya katama gidaka; de7on de7eyisata biittan zaarada besse demmaka.
EZE 26:21 Taani ne wursethaa daganthiya wursethi oothana; new hessi wursethi gidana. Asi nena koyana; shin neeni zaarada bentaka” yaagees Ubbaa Haariya Goday.
EZE 27:1 Godaa qaalay haysada yaagishe taako yis.
EZE 27:2 “Asa na7aw, Xiroosas zelelsi kessa.
EZE 27:3 Yuushoy abban teqetida biittan de7iyanne abba gaxan de7iya daro asaara zal7iya, katamaas, Ubbaa Haariya Goday haysada yaagees. “ ‘Neno Xiroosa, taani puulanne borey bayna mala lo77o’ ” yaagadasa.
EZE 27:4 Ne zaway abba gul7aana; nena keexeysati loythidi oothidi keexidosona.
EZE 27:5 Ne sanqa Sanira xiiddan oothidosona; ne markabiya tuussaa Libaanose zigan giigisidosona.
EZE 27:6 Haathaa pidhiya mithati Baasane wolaape oosetidosona. Ne markabiya hiixay Qophiroosa xiiddan, iya yuushoy dangarsa zaalen alleeqetis.
EZE 27:7 Ne sharay bandirada haahon bentana mela, Gibxeta liinope alleeqetidi oosetis. Ne kamaa geshey Qophiroosape yida, kaalose ocha teera daaniya ma7ope oosetidaysata.
EZE 27:8 Ne markabiya kolxiseysati Sidoonanne Arwada katamatape yidaysata; ne markabiya laaggeysati loohida ne asata.
EZE 27:9 Markabiya giigiseysati Gebaalape yida eranchotanne kaalethiya hiillanchota; abban biya markabe ubban de7iya oosanchoti wodha keya gidi ne giddon zal7oosona.
EZE 27:10 “Farsefe, Liidepenne Liibepe yida olanchoti, ne olanchota maaddidi oletidosona. Banta gondalliyanne banta ola barneexa ne giddon kaqidosona; enti nena bonchida asata.
EZE 27:11 Arwadanne Heleka olanchoti, ne dirsa gimbiya naagoosona. Gammada asay ne adussa gimbi shako bolla naagoosona; banta gondalliya ne gimbiya bolla kaqidosona; ne puulatana mela oothiday entana.
EZE 27:12 Ne daro duretetha gaason Tarsesi neera zal7is; I bira, birata, qorqoronne irsaase neera laammidi zal7oosona.
EZE 27:13 Yawaani, Tubaalinne Mosahi neera zal7idosona; aylletanne naase birata immidi, ne miishiyara laammidosona.
EZE 27:14 Beet-Torgaama asay toga parata, ola paratanne baqulota immidi, ne miishiyara laammis.
EZE 27:15 Didaana asay neera zal7idosona; yuushoy abban teqetida biittatan de7iya asay dangarsa zaalenne zophe mithi new ehoosona.
EZE 27:16 “Ne daro duretetha gaason, Soore asati neera zal7idosona; enti ciliilo al7o shuchi, zo7o al7o shuchi, yeleello alleeqo, ocha teera daaniya ma7uwa, al7o liinonne alleeqetida ma7o ehidi ne miishiyara laammidosona.
EZE 27:17 Yihudanne Isra7eele asay neera zal7idosona; enti Minite gade giste, maldo, eessi, zaytenne dhalliya balsaame zayte ne miishiyara laammidosona.
EZE 27:18 Ne daro duretethinne shalloy de7iya gisho, Damasqoy, Kelboona, woyniyanne zahaara dorsa ikise immidi ne miishiyara laammidosona.
EZE 27:19 Uzaalen de7iya Daanenne Yawaana asay ne dumma dumma miisheta shammidosona. Enti ne miishiyara laammanaw alleeqetida biratanne dumma dumma sawo ehidosona.
EZE 27:20 “Didaana asay koora gilaase ehidi zal7idosona.
EZE 27:21 Arabetinne Qedaare halaqati ubbay ne zal7e miishiyas dorsa urgeta, marazetanne deeshata ehidosona.
EZE 27:22 Saabanne Rama zal7anchoti al7o shuchu, worqanne dooretida sawota immidi, ne miishiyara laammidosona.
EZE 27:23 Kaarane, Kane, Edene, sabba Asoorenne Kelmaada katamati ubbay neera zal7idosona.
EZE 27:24 Enti lo77o ma7ota, kaalose daaniya ma7uwa, alleeqetida ma7uwa, gazza sigaajata, loythi dooqida sibaagotanne wodorota immidi, ne giyan zal7oosona.
EZE 27:25 “Tarsesa markabeti ne miisheta caanidosona. Neeni darobay caanetin, abba bolla biya markabe mela gidadasa.
EZE 27:26 Ne markabiya laaggeysati nena ekidi, abba giddo gina efidosona; shin doloha carkoy nena abba giddon mentherethis.
EZE 27:27 Neeni meqeretida wode ne duretethaynne ne zal7e miishe ubbay, ne markabiya laaggeysati, ne markabiya giigiseysati, ne zal7anchotinne ne giddon de7iya olanchoti ubbay abba giddon muuketidosona.
EZE 27:28 Enta waasoy abba gaxaa de7iya biitta daganthis.
EZE 27:29 “Markabiya bolla uttidi haatha pidheysati ubbay markabetape keyidi, abba gaxan eqidosona.
EZE 27:30 Enti ubbay banta huuphen baana qolidi, bidon gondoretishe, ne dhayuwa gisho iita yeeho yeekidosona.
EZE 27:31 New kayotidi, banta huuphiya meedidi, kayo ma7o ma7idosona; enti daro azzanidi new yeekidosona.
EZE 27:32 Enti haysada yaagidi new zeleelidosona: “Ha77i abba giddon si77i gida, Xiroosa meli oonee?”
EZE 27:33 “Ne zal7e miishey abba pinnidi yaa wode, daro asaa kalsadasa; ne shaluwan biittan de7iya kawoti duretidosona.
EZE 27:34 Shin ha77i ciimmo abban meqeretadasa; ne zal7e miisheynne new oothiya asa ubbay, neera abba giddon muuketidi dhayidosona.
EZE 27:35 Yuushoy abban teqetida biittan de7iya asa ubbay ne bolla gakidaba be7idi dagammidosona. Enta kawoti daro yayyidosona; enta som7oy yashshan shullis.
EZE 27:36 Ne wursethay daganthiyaba gidis; neeni zaarada daaka. Hessa gisho, biitta ubban de7iya zal7anchoti, shinchalle gidoosona” yaagis.
EZE 28:1 Godaa qaalay haysada yaagishe taako yis.
EZE 28:2 “Asa na7aw, Ubbaa Haariya Goday haysada yaagees gadas Xiroosa halaqa oda: ‘Ne wozanay otortida gisho, taani xoosse; taani abba giddon, xoossata araatan uttas’ yaagadasa. Neeni, ‘Taani xoossada, cinca gidas gada qopikoka ne asepe attishin, xoosse gidaka.
EZE 28:3 Ne Daanelape aadhada cincay? Ay xuurika neepe geemmennee?
EZE 28:4 Tuma ne cincatethaaninne ne akeekan dure gidadasa; ne buqura minja keethan biranne worqaa shiishadasa.
EZE 28:5 Ne zal7iya eran daro wodhe demmadasa; ne duretetha gaason ne wozanay otortis’ ” yaagees.
EZE 28:6 Hessa gisho, Ubbaa Haariya Goday haysada yaagees: “Taani xoossada cinca gada qopiya gisho,
EZE 28:7 ta ne bolla qadhey bayna wozana mino morketa ehana; enti neeni cincatethaninne eratethan shiishida shalo ubbaa mashshan dhaysana; enti ne bonchuwa tunisana.
EZE 28:8 Enti nena si7oole yeddana, neka ciimmo abban hayqana.
EZE 28:9 Enti nena wodhanaw yaa wode neeni, ‘Taani xoossa’ gaanee? Nena wodhiya asaa kushen ne kundiya wode ne asepe attishin, xoosse gidaka.
EZE 28:10 Neeni allagata kushen ammanonna asi hayqiya hayqo hayqana” yaagees Ubbaa Haariya Goday.
EZE 28:11 Qassi Godaa qaalay haysada yaagishe taako yis.
EZE 28:12 “Asa na7aw, Ubbaa Haariya Goday haysada yaagees gada Xiroosa kawas zeleela: ‘Neeni kase cincatethan kumadasa; neeni asi leemisidi odiya puulanne cinca gidadasa.
EZE 28:13 Neeni Edenen, Xoossa gannatiyan kase de7adasa; sardiyoone, toophaze, almaaze, birille, margide, yasphide, sanparenne baluure geetetiya al7o shuchan alleeqetada, lo77o worqa alleeqo kase ma7adasa; ne medhetida gallas he ubbay new giigis.
EZE 28:14 Nena naagiya kiruube oothada shuumas; nena tiyas. Ta geeshsha zumaa bolla ne de7adasa; tamada phooliya al7o shuchata giddon simeretadasa.
EZE 28:15 Ne medhetida gallasaape doomada, iitabay ne bolla bentana gakanaw borey bayna de7adasa.
EZE 28:16 Ne daro zal7en mathotida gisho buqethan kumada, nagara oothadasa. Hessa gisho, ta geeshsha zumaape nena wolqan kessas. Nena naagiya kiruubey, he tamada phooliya al7o shuchata giddofe yedethis.
EZE 28:17 Neeni mala lo77o gidiya gisho daro otortadasa; ne boncho koyada cincatetha kawushadasa. Hessa gisho, ta nena sa7an yeggas; hara kawoti nena be7idi bayana mela oothas.
EZE 28:18 Ne nagaraninne ne balethiya zal7iyan, ne goyinno bessata tunisadasa. Hessa gisho, tami ne giddofe keyanaada oothas; ika nena mis. Ubbay xeellishin, ta nena xuuggada sa7aa bolla bido kessas.
EZE 28:19 Nena kase eriya kawotethati ubbay dagammidosona. Ne wursethay yashshiyabaa gidis; neeni zaarada bentaka’ ” yaagis.
EZE 28:20 Godaa qaalay haysada yaagishe taako yis.
EZE 28:21 “Asa na7aw, ne som7uwa Sidoonako zaarada iya bolla tinbite oda.
EZE 28:22 Neno, Sidoona, ta new morke gidana. Taani ne bolla oothiyaban ta bonchoy qoncana. Ne giddon de7eysati pirdan taani ta geeshshatetha bessiya wode, taani Godaa gideysa enti ubbay erana.
EZE 28:23 Ta ne bolla iita harge yeddana; oge ubban suuthi gukanaada oothana. Ubba baggara yaa olaa gaason ne asay mashshan hayqana. Taani Godaa gideysa enti he wode erana.
EZE 28:24 Hizape guye Isra7eele yuushon de7iya, iya kadhidi xeelliya, biitta ubban aguntha melanne kinchote mela qohiya oonika deenna. Taani Ubbaa Haariya Godaa gideysa enti he wode erana” yaagees Ubbaa Haariya Goday.
EZE 28:25 “Isra7eele asaa laaletida biitta ubbaafe shiishada ehiya wodenne kawotethata ubbaa sinthan taani ta geeshshatetha bessiya wode, taani ta aylliya Yayqoobas immida banta biittan enti daana.
EZE 28:26 Yan enti saronne naagetidi daana; keethe keexana; woyne tokana. Enta kadhidi xeelliya enta shoorota ubbaa taani pirdiya wode Isra7eele asay saro daana. Taani Godaa enta Xoossaa gideysa enti he wode erana” yaagees Ubbaa Haariya Goday.
EZE 29:1 Nuuni di7etida tammantho laythan, tammantho ageenan, tammanne nam7antho gallas, Godaa qaalay haysada yaagishe taako yis.
EZE 29:2 “Asa na7aw, ne som7uwa Gibxe kawako zaarada, iya bollanne Gibxe biitta ubbaa bolla tinbite oda.
EZE 29:3 Ubbaa Haariya Goday haysada yaagees gada oda. ‘Neno, Nayle shaafa giddon zin7ida, gitanne yashshiya do7a daaneyso. Nayle shaafay tabaa; iya medhiday tana’ giya Gibxe kawaw, ta new morke gidana.
EZE 29:4 Ta ne siidhen dafo aathana; ne shaafan de7iya molota qefey ne galbara oyketana mela oothana; moloti ne gogaara oyketidi uttidashin, ta nena haathaafe goochada gaxa kessana.
EZE 29:5 Ta nenanne ne shaafan de7iya molota ubbaa mela biitta holana; ne ahay denban yegetidi attana; ne aha shiishidi moogiya asi dhayana. Ta nena salo kafotasinne sa7aa do7atas kathi oothana.
EZE 29:6 Gibxen de7iya asa ubbay taani Godaa gideysa he wode erana. “Neeni Isra7eele asaas maqa xam7a gidadasa;
EZE 29:7 Enti nena oykida wode meqada enta shophen caddadasa; enti nenan zempida wode meqada enta zokuwa duuthadasa.
EZE 29:8 Hessa gisho, taani Ubbaa Haariya Goday, ne bolla mashshe dentheyisata ehana; enti ne asaanne ne mehiya ubbaa wursana.
EZE 29:9 Gibxe laaletidi baysa biitta gidana. Taani Godaa gideysa enti he wode erana. Neeni, ‘Nayle shaafay tabaa; iya medhiday tana’ yaagida gisho,
EZE 29:10 taani ne bollanne ne shaafa bolla dendas. Pudeha baggara Migdoolape doomada, dugeha baggara Aswaana gakanaw, yaara kanthidi Tophe zawa gakanaw Gibxe ubbaa asi bayna baysa besse kessana.
EZE 29:11 Ase gidin mehe gidin yaara kanthenna; oytamu laythi wurana gakanaw, aybika yan deenna.
EZE 29:12 Taani Gibxe biitta ubbaafe aadhida baysa biitta oothana; iya katamati oytamu laythi wurana gakanaw, hara laaletida katama ubbaafe aadhidi laaletida katama gidana. Gibxe asaa taani kawotethata giddoninne hara asaa giddon laallana” yaagees.
EZE 29:13 Ubbaa Haariya Goday haysada yaagees: “Oytamu laythafe guye, taani Gibxey laaletida kawotethata giddofe shiishana.
EZE 29:14 Taani nena zaarada gashtisana enta yeletida dugeha Gibxen de7iya Phatroosa biitta zaarana; yan enti laafa kawotethi gididi daana.
EZE 29:15 Gibxey hara kawotethata ubbaafe laafa kawotethi gidana. Zaaridi hara kawotethata bolla bana dhoqu dhoqu oothenna; I hara kawotethi haaronnaada taani iya guuthana.
EZE 29:16 Isra7eeley zaaridi maado demmanaw Gibxen ammanetena; Gibxen ammanetida ammanetethay ay mela qohoko Isra7eeley akeekana. Taani Ubbaa Haariya Godaa gideysa enti he wode erana” yaagees.
EZE 29:17 Nuuni di7etida laatamanne laapuntho laythan, koyro ageenan, koyro gallasan, Godaa qaalay haysada yaagishe taako yis.
EZE 29:18 “Asa na7aw, Babiloone kawoy Nabukadanaxoori Xiroosa bolla olaa denthanaw giigis. Enta huuphey qolettana gakanawunne enta hashey shooletana gakanaw olanchoti deexo tooho tookana mela oothidosona. Gidoshin, kawoynne olanchoti ha daabura ubban Xiroosape demmidabay baawa.
EZE 29:19 ‘Taani Gibxe biitta Babiloone kawa Nabukadanaxooras aathada immana; ika ba olanchotas damooze gidana mela di7oninne bonqen oykidaba ubbaa ekidi baana.
EZE 29:20 Inne iya olanchoti taw oothida gisho, taani iyaw Gibxe biitta enta daaburas damooze oothada immana’ ” yaagees Ubba Haariya Goday.
EZE 29:21 “He gallas taani Isra7eele deriya minthana. Hizqeela, neka asaas odana mela ta nena minthana. Taani Godaa gideysa enti he wode erana” yaagis.
EZE 30:1 Qassika Godaa qaalay haysada yaagishe taako yis:
EZE 30:2 “Asa na7aw, Ubbaa Haariya Goday haysada yaagees gada tinbite oda. “ ‘He gallasaa ayye! Yaagada zeleela.’
EZE 30:3 He gallasay matis! Godaa gallasay gakis! He gallasay shaari kammida gallas kawotethata ubbaas meto gallas gidana.
EZE 30:4 Gibxe bolla oli yaana; Tophe bolla un7i yaana. Daroti Gibxe biittan hayqana; iya duretethay bonqetana; iya baasoy shodetana.
EZE 30:5 He olay Tophe, Liide, Liibe, Arabenne caaqo dere ubbay Gibxera issife mashshan wursana” yaagees.
EZE 30:6 Gibxe maaddeysati kundana; iya otoruwa wolqay wurana. Migdoolape bidi Aswaana gakanaw, enti mashshan hayqana. Taani Ubbaa Haariya Goday hessa odayis.
EZE 30:7 Gibxey biitta ubbaafe aadhida baysa biitta gidana; iya katamati hara laaletida katama ubbaafe aadhidi laaletidi attana.
EZE 30:8 Taani Gibxe taman oythiya wodenne iya maaddeysati ubbay hayqidi wuriya wode, taani Godaa gideysa enti erana.
EZE 30:9 “He wode taani saro de7iya Tophe asaa daganthanaw asata markaben kiittana. Gibxey pirdetiya gallas Tophe asaa bolla waayey yaana. He gallasay gakis” yaagees.
EZE 30:10 Ubbaa Haariya Goday haysada yaagees: “Babiloone kawa Nabukadanaxoora kushen taani Gibxe duretetha dhaysana.
EZE 30:11 Kawotethata ubbaafe aadhidi, wozana mino olanchota kaalethidi yidi, biitta dhaysana; enti Gibxe asaa bolla mashshe shoddidi, biittan aha kunthana.
EZE 30:12 Nayle shaafa taani melisana; taani Gibxe iita asata kushen aathada immana; he biittanne yan de7iyaba ubbaa allagatan dhaysana. Taani Goday haysa odas” yaagees.
EZE 30:13 Ubbaa Haariya Goday haysada yaagees: “Mempisa kataman de7iya eeqatanne misileta ubbaa ta dhaysana; Gibxe biittan zaaridi halaqay deenna; biitta ubbaa taani yashisana.
EZE 30:14 Taani Phatroosa geetetiya dugeha bagga Gibxe baysa kessana; pudeha baggara de7iya Xo7aane kataman tama yeddana; Tebisa katama pirdana.
EZE 30:15 Gibxe miixa gidida Pelusiyaman ta hanquwa gussana; Tebisa asa ubbaa wursana.
EZE 30:16 Taani Gibxen tama oythana; Pelusiyami daro waayetana; Tebisa dirsa gimbey laaletana; Mempisa katamaa duuxonna metoy gakana.
EZE 30:17 Onaninne Bubastu kataman de7iya na7atethati ubbay mashshan wurana; maccasay di7etidi baana.
EZE 30:18 Gibxe wolqaa ta mentherethiya wode Xafinaasan gallasi qammana; I otoruwa wolqay wurana; Gibxe shaari kammana; he katama yuushon de7iya gutati ubbaa di7etidi baana.
EZE 30:19 Taani Gibxe hessada oothada pirdana. Taani Godaa gideysa enti he wode erana” yaagees.
EZE 30:20 Nuuni di7etida tammanne issintho laythan, koyro ageenan, laapuntha gallasan, Godaa qaalay haysada yaagishe taako yis.
EZE 30:21 “Asa na7aw, ta Gibxe kawa qesiya menthas; iya woyshaninne curqan xaaxidi, koolidi pathiya hiilli baawa; hizape guye I minotethi demmidi mashshe oykanaw danda7enna.
EZE 30:22 Hessa gisho, Ubbaa Haariya Goday haysada yaagees. Taani Gibxe kawas morke gidana. Kase iyaw meqida qesiyanne lo77o de7iya qesiya nam7aaka ta menthana; iya mashshay iya kushepe sa7an wodhanaada oothana.
EZE 30:23 Taani Gibxeta kawotethata giddoninne hara biittatan laallana.
EZE 30:24 Taani Babiloone kawa nam7u qesiya minthada, ta mashsha iya oythana. Shin Gibxe kawa qesiya menthana; ba morkiya sinthan I hayqana haniya asada oolana.
EZE 30:25 Taani Gibxe kawa qesiya daabursada, Babiloone kawa qesiya minthana. Taani Babiloone kawa ta mashsha oythiya wodenne I Gibxe bolla denthiya wode Gibxeti taani Godaa gideysa erana.
EZE 30:26 Gibxeta taani kawotethata giddoninne biitta ubban laallana. Taani Godaa gideysa enti he wode erana” yaagees.
EZE 31:1 Nuuni di7etida tammanne issintho laythan, heedzantho ageenan, koyro gallasan, Godaa qaalay haysada yaagishe taako yis.
EZE 31:2 “Asa na7aw, Gibxe kawasinne asa ubbaas haysada yaagada oda: ‘Ne gitatetha ta oodera gaaddeyo?’ ”
EZE 31:3 Ne lo77o daashsha kuyay de7iya Libaanose ziga mela; I diccis; iya xeeray shaara gakis.
EZE 31:4 Yan iya dichiya haathi de7ees; pulto ciimmoti iya dichidosona. Shaafati goggidi iya yuushuwa irxisidosona; pultoti mithay doliya bessa ubbaa ushshoosona.
EZE 31:5 He mithay woran de7iya mitha ubbaafe aduqis; iya daashshay daris; tashey aduqis; haathi darida gisho ordis.
EZE 31:6 Salo kafoti iya daashshan banta keethaa keexidosona; bazzo do7ati iya kuya garsan na7a yelidosona; gita kawotethati ubbay iya kuyan shempoosona.
EZE 31:7 Ba xaphuwa ciimmo haathan duge yeddida gisho he mithay ba daashsha tashiyara waanidi lo77i!
EZE 31:8 Hari attoshin Xoossa gannatiyan he zigaara giniya zigi baawa; iya mela daashshi de7iya xiiddika baawa. Hessa mela ocha mithi, Xoossa gannatiyan hessa mela lo77o mithi baawa.
EZE 31:9 Taani iya daro daashshan puulayas; Edene geetetiya Xoossa gannatiyan de7iya mithati ubbay iya qanaatoosona.
EZE 31:10 Hessa gisho, Ubbaa Haariya Goday haysada yaagees: “He mithay aduqidi diccida gisho, iya xeeray shaara gakida gishonne I ba geesan otortida gisho,
EZE 31:11 ta iya yegga aggas; wolqaama, allaga kawas aathada immas. He kawoy iya iitatethaa mela iya bolla oothana.
EZE 31:12 Wozana mino allagati he mitha qanxidi yeggana; qanxida tasheti deretan, ollataninne zangaaratan yegetidi attana. Iya kuyan shempiya kawotethati ubbay he bessaa aggidi baana.
EZE 31:13 Salo kafoti yidi kundida mithaa bolla uttana; bazzo do7ati iya tasheta yedhana.
EZE 31:14 Haatha matan dicciya mithata giddon iya mela aduqidi, xeeray shaara gakiya mithi deenna. Hayqiya asa bolla gakiya hayqo pirday he mithaa bolla gakana; I duufon de7eysatara gidana” yaagees.
EZE 31:15 Ubbaa Haariya Goday haysada yaagees: “He mithay duufo geliya gallas ciimmo pulto haathati iyaw kayotana mela oothana. He pulto haathay goggonna mela oothana; Libaanosey iya gisho azzanana mela oothana; wora mitha ubbay shullana.
EZE 31:16 Ta he mithaa duufon holiya wode, iya kundethaa girsan kawotetha ubbay qaaxana. Kundidi duufon gelida Edene mithatinne haathe uyidi ordida lo77o Libaanose mithati ubbay iya kundethan mintena.
EZE 31:17 Kawotethata giddon iyara issifidaysatinne iya kuyan de7iya ubbay kase mashshan hayqidaysatara gahetanaw iyara issife duufo gelana.
EZE 31:18 Edene gannatiyan de7iya mithata giddon hessa mela gitinne lo77oy baawa. Shin ha77i Edene mithatada ika hayqidi duufon gelees; yan I mashshan hayqida ammanonaysatara gahetana. “He mithay Gibxe kawaanne iya asaa leemiso” yaagees Ubbaa Haariya Goday.
EZE 32:1 Nuuni di7etida tammanne nam7antho laythan, tammanne nam7antho ageenan, koyro gallasan, Godaa qaalay haysada yaagishe taako yis.
EZE 32:2 “Asa na7aw, Gibxe kawas haysada yaagada zeleela. Neeni kawotethatas giddon nena gaammo mela kessadasa; shin ne abba giddon de7iya yeeruntha mela. Ne haathaafe keyadasa; ne tohuwan yedhada, haatha buulloyadasa.
EZE 32:3 Daro asay shiiqiya wode taani ta gitiyan nena oykana; asay nena goochidi, haathaafe gaxa kessana.
EZE 32:4 Taani nena biittan hola aggana; sa7a bolla miccana; salo kafota ne bolla utisana; bazzo do7ata ne ashuwa kalsana.
EZE 32:5 Ta ne ashuwa dereta bolla laallana; zangaarata ne ahan kunthana.
EZE 32:6 Shaafata kumidi dereta kammana, gakanaw, ne suuthay gukana mela oothana.
EZE 32:7 Ta nena dhaysiya wode saloy goozetana; xoolintoti dhumana; away shaaran kametana; ageenay ba poo7uwa diggana.
EZE 32:8 Neepe bollara de7iya salo poo7ota ubbaa dhaysada, biitta dhumisana” yaagees Ubbaa Haariya Goday.
EZE 32:9 Ne bolla gakida dhayuwa ne eronna kawotethata sissiya wode daro asa wozanay un7ethana.
EZE 32:10 Daro kawotethati nena be7idi dagammana. Taani ta mashsha enta sinthan shoddada seesiya wode, kawotethati yashshan kokorana; ne kundiya wode enti ubbay banta shempuwas yayyana.
EZE 32:11 Ubbaa Haariya Goday Gibxe kawako haysada yaagees: “Babiloone kawa mashshay ne bolla yaana.
EZE 32:12 Hara kawotethatape aadhida, wozana mino olanchoti banta mashshan daro asaa wursanaada taani oothana. Enti Gibxe otoruwa dhaysana; daro asay wurana.
EZE 32:13 Daro haatha matan de7iya mehe ubbaa ta dhaysana; hizape guye, haatha buulloya asi woyko mehey deenna.
EZE 32:14 He wode taani ne haathata xillisana; ne shaafata wopu oothada gogisana. Taani Ubbaa Haariya Goday haysa odayis.
EZE 32:15 Taani Gibxe baysa kessiya wode iyan de7iya ubbaa quchada dhaysiya wodenne iyan de7iya asa ubbaa shociya wode taani Godaa gideysa enti erana.
EZE 32:16 Ha ubbay entaw zeleeletiya zelelsi gidana. Kawotethata maccasati Gibxesinne iya daro asaas zeleelana” yaagees Ubbaa Haariya Goday.
EZE 32:17 Nuuni di7etida tammanne nam7antho laythan, he ageenan, tammanne ichashantho gallasan, Godaa qaalay haysada yaagishe taako yis:
EZE 32:18 “Asa na7aw, daro gidida Gibxe olanchota gisho yeeka. Iyonne, wolqaama kawotethata macca nayta hayqidi duufo geleysatara issife duge duufo moyza.
EZE 32:19 Entako, ‘Hinteno Gibxeto, hinte haratape aadhidi mala lo77o? Hinte duufo gelana; yan hinte Godaa qaxaretonaysatara issife moogetana.’
EZE 32:20 Gibxe biittas mashshi shodetidi uttida gisho, enti mashshan hayqidaysata giddon kundana; Gibxey ba daro asaara duge gooshetana.
EZE 32:21 Duufon de7iya wolqaamaa halaqati Gibxebaanne Gibxera issifidaysataba haasayishe, ‘Enti duge yidosona; Godaa qaxaretonayisata mashshan hayqidaysatara enti zin7idosona’ yaagosona.
EZE 32:22 “Asoorey duufon de7ees. Olan hayqida Asoore olanchota duufoti iya yuushuwa teqidi uttidosona.
EZE 32:23 Enta duufoti ollas wursetha gaxan de7oosona. Iya olanchoti duufuwa yuushon keeletidosona; kase de7on de7iya asa heeran buqethi denthiya asay shuketidosona; mashshan wuridosona.
EZE 32:24 “Elaami duufon de7ees; iya olanchoti ubbay shuketidosona mashshan kundidosona. De7on de7iya asa matan buqethi denthidasati ubbay qaxaretona biitta garsi aadhidosona duufo gelidi zin7idosona.
EZE 32:25 Hayqidaysata giddon Elaamas bessi giigidi uttis. Elama olanchota duufoti iya yuushuwan de7oosona; enti ubbay mashshan hayqidosona. Enti ubbay qaxaretiboonaysatanne mashshan hayqidaysata Enti de7on de7eyisata giddon buqethi denthida gisho duufo geelidaystara issife zin7idosona.
EZE 32:26 “Mosahinne Tobaali banta olanchotara duufon de7oosona; enti kase kawotethata ubbaa yashshan kokorsidaysata gidikoka, enti ubbay mashshan hayqidosona. Enti ubbay qaxaretonayisata. Enti de7on de7eyisata giddon buqethi denthida gisho mashshan hayqidosona.
EZE 32:27 Enti beni gooba olanchoti banta ola miishiya dancidi banta gondalliya tiran wothidi banta mashsha borkotidi mogeteysada bonchon mogetibookona. Ha olanchota de7on de7iya asa giddon buqethi denthida gisho enta nagaray enta meqetha bolla de7ees.
EZE 32:28 “Hinte Gibxe asati xoonetananne mashshan hayqida, ammanonna asatara issife zin7ana.
EZE 32:29 “Edoomey ba kawotaranne ba halaqatara issife duufon de7ees; enti kase mino olanchota; shin ha77i olan hayqida, ammanonna asatara ollan gelidosona.
EZE 32:30 “Pudeha bagga halaqatinne Sidoona asay duufon de7oosona. Enti kase banta wolqan asaa yashisidosona; shin ha77i enti banta yeellara yaa gelidosona. Mashshan hayqida qaxaretiboonna asaara issife duufo geloosona.
EZE 32:31 “Gibxe kawoynne iya olanchoti, mashshan hayqida olanchota yan be7idi minettana” yaagees Ubbaa Haariya Goday.
EZE 32:32 “Ta haysafe kase kawotethati Gibxe kawas yayyana mela oothidaba gidikoka, inne iya olanchoti Godaa ammanonna, mashshan hayqida asatara issife zin7ana” yaagees Ubbaa Haariya Goday.
EZE 33:1 Godaa qaalay haysada yaagishe taako yis.
EZE 33:2 “Asa na7aw, ne biitta asaas haysada yaagada oda: ‘Ta issi biitta bolla olaa ehiya wode he biitta asay banta bolla yaaba wochiya asi dooro banta giddofe dooro.
EZE 33:3 He wochiya uray morkey yishin be7idi, asay naagetana mela moyze punniko,
EZE 33:4 Oonika moyze punuwa si7idi, naagetonna ixin, oli yidi iya wodhiko, suuthaa acoy iya oyko.
EZE 33:5 I moyze punuwa si7idi, naagetonna ixida gisho iya suuthaa acoy iya bollana. I si7idi naagetidaba gidiyako hayqope attanashin.
EZE 33:6 Shin wocheysi morkey yeysa be7ishe, moyze punnidi asaa erisonna aggiko, olay yidi, he asaape issi asi wodhiko, he uray ba nagaran hayqees; shin taani iya suuthaa wocheysa kushepe ekana’ ” yaaga.
EZE 33:7 “Asa na7aw, ta nena Isra7eele asaas wochiya asi oothas; ta new odeysa si7ada asaa akeekisa.
EZE 33:8 Taani issi iita asi, ‘Neeni tuma hayqana’ giya wode, I ba nagaraape simmana mela ne iyaw odonna ixiko, he uray ba nagaran hayqees; shin taani iya suuthaa gisho nena achana.
EZE 33:9 Shin nagaranchoy ba nagaraape simmana mela ne odin, I ixiko, I ba nagaran hayqees; shin ne ne shempuwa ashshaasa.”
EZE 33:10 “Asa na7aw, Isra7eele asaas haysada yaagada oda: ‘Hinte, nu nagaray nu qohoy nu bolla de7ees; hessa gaason nu gilqida. Yaatin, nu waanidi paxa daanaw danda7oona?’ ” yaageeta.
EZE 33:11 Taani Ubbaa Haariya Goday ta de7uwan caaqayis: “Nagaranchoy ba nagaraa aggidi, de7on daana mela koyaysipe attishin, nagaranchuwa hayquwan ufaytike. Hinteno, Isra7eele asaw, simmite; hinte iita oosuwa aggite! Ayis hayqanaw koyeetii?” yaagis.
EZE 33:12 Asa na7aw, ne biitta asaas oda. “Xillo asi nagara oothiko, iya kase xillotethay iya ashshena; qassi nagaranchoy ba nagaraape simmiko, kase nagaraa gisho I pirdetenna. Xillo asi nagara oothiko, kase xillotethaa gisho de7on daanaw danda7enna.
EZE 33:13 Taani xillo asako, ‘Neeni tuma de7on daana’ yaagida wode, I ba xillotethan ammanetidi nagara oothiko, ba oothida nagaran I hayqanaape attishin, kase xillotethay iyaw qofetenna.
EZE 33:14 Qassi taani nagarancho asako, ‘Neeni tuma hayqana’ yaagida wode I ba nagaraape simmidi, tumanne suure ooso oothiko,
EZE 33:15 miishe tal7anaw oykidaba zaariko, kaysotidaba guye immiko, nagara ooso aggidi, de7o immiya higgiya naagiko, I tuma de7on daanape attishin, hayqenna.
EZE 33:16 I kase oothida nagaray issoy qofetenna; ha77i tumanne suure ooso oothida gisho, I tuma de7on daana.
EZE 33:17 “Gidoshin, ne biitta asay, ‘Godaa ogey like gidenna’ yaagosona; shin like gidonnay enta ogiya.
EZE 33:18 Xillo asi ba xillotethaa aggidi, nagara oothiko, I ba nagaran hayqana.
EZE 33:19 Qassi nagarancho asi ba nagaraape simmidi, tumanne suure ooso oothiko, he oosuwan I de7on daana.
EZE 33:20 Shin hinte, ‘Godaa oge like gidenna’ yaageeta. Isra7eele asaw, ta hinte issuwa issuwa bolla hinte oosuwada pirdana” yaagis.
EZE 33:21 Nuuni di7etida tammanne nam7antho laythan, tammantho ageenan, ichashantho gallasan, Yerusalaamepe kessi ekidi yida issi asi katamay kundidaysa taw odis.
EZE 33:22 He uray yaanape issi gallasi sinthe, omarsa wode Godaa kushey ta bolla de7ees; ta doonay dooyetis; wontetha gallas he uray taako gakiya wode taani oda doomas.
EZE 33:23 Godaa qaalay haysada yaagishe taako yis.
EZE 33:24 “Asa na7aw, Isra7eele biittan laaletida katamatan de7iya asay haysada yaagosona: ‘Abrahaamey barka de7iya issi asi; I ha biitta laattis; shin nuuni daro; biittay tuma nuus laata gididi imetis’ ” yaagosona.
EZE 33:25 Hessa gisho, Ubbaa Haariya Goday haysada yaagees gada entaw oda. “Hinte ha77ika suuthara de7iya asho meeta; eeqa goyinneta; shempo wodheeta. Haysa ubbaa oothishe hinte tuma biitta laattanee?
EZE 33:26 Hinte hinte mashshan ammaneteta; tuna ooso ootheeta; hinte ubbay hinte shooruwa macheta tuniseeta. Haysa ubbaa oothishe hinte tuma biitta laattanee?” yaagees.
EZE 33:27 Ubbaa Haariya Goday ba de7uwan caaqidi haysada yaagees: “Laaletida katamatan de7iya asay mashshan hayqana; katamaape gaxan de7iya asaa taani bazzo do7aas kathi oothana; dere bollanne gongolo giddon de7iya asay iita hargen hayqana.
EZE 33:28 Ta he biitta kallonne baysi kessana; enti otortiya wolqay wurana; Isra7eele dereti ay asika yaara kanthonna baysi gidana.
EZE 33:29 Enti oothida tunaa gaason taani biitta kallonne baysi kessiya wode, taani Godaa gideysa enti erana” yaagees.
EZE 33:30 “Asa na7aw, asay katamaa dirsa mataninne banta keethata pengen eqidi, issoy issuwara haysada yaagidi, nebaa odetees. ‘Haayite; Godaa matape yida qaalay woygiyako ane si7oos’ yaagosona.
EZE 33:31 Enti kase asay yeysada neeko yoosona; ta asada ne sinthan uttoosona; ne odeysa si7oosona; shin oothokona. Enti siiqoba haasayoosona; shin enta wozanay go77a xalaala yaaretees.
EZE 33:32 Ne entaw issi siiqo mazmure lo77o girsan yexiyanne diithi loythidi diixiya asa mela. Enti ne odeysa si7oosona; shin oothokona.
EZE 33:33 Shin ne odeysi tuma poletana; poletiya wode, nabey enta giddon de7eysa enti erana” yaagis.
EZE 34:1 Godaa qaalay haysada yaagidi taako yis.
EZE 34:2 “Asa na7aw, Isra7eele henthanchota bolla haysada yaagada tinbite oda: hinteno, hintena heemmiya Isra7eele henthanchoto, hintena ayye! Hinte dorsata heemmanaw bessennee?
EZE 34:3 Enta maatha uyeeta; enta ikisiyape dadetida suufiya ma77eeta; entafe modhuwa shukidi meeta; shin dorsata suure heemmeketa.
EZE 34:4 Daaburidaysata gashtisibeketa; hargidaysata pathibeeketa; meqidaysata koolibeeketa; betidaysata zaaribeeketa; dhaydaysata koybeketa. Hessa aggidi enta wolqan un7ethidi haarideta.
EZE 34:5 Dorsati ubbay heemmiya asi dhayin laaletidosona; bazzo do7atas kathi gididosona.
EZE 34:6 Ta dorsati laaletidosona; enti zumata bollanne dereta bolla toylatidosona. Biitta gaxa gakanaw laaletidosona; shin enta xomoosey woyko koyey baawa” yaagees Ubbaa Haariya Goday.
EZE 34:7 Hessa gisho, hinteno, henthanchoto, Godaa qaala si7ite.
EZE 34:8 “Taani ta de7uwan caaqayis: Ta dorsata heemmiya asi dhayin, ta dorsati oyketidi, bazzo do7atas kathi gididosona. Ta henthanchoti ta dorsata koyiboona gishonne enti ta dorsata heemmonna aggidi, bantana heemmida gisho,
EZE 34:9 hinteno, henthanchoto, Godaa qaala si7ite.
EZE 34:10 Ta hintew, henthanchohotas morke gidana; ta dorsata taani hintefe ekana; ta hintena nam7antho entaw henthancho oothike. Hizape guye hinte hintena heemmishe de7eketa. Ta dorsata ta hintefe ekana; hizape enti hintew kathi gidokona” yaagees Ubbaa Haariya Goday.
EZE 34:11 “Taani ta huuphen ta dorsata xomoosananne koyana.
EZE 34:12 Henthanchoy ba dorsatape dhayin koyeysada, taani ta dorsata koyana; shaarinne dhumi goozida gallas enti dhayida bessaafe ta enta shiishana.
EZE 34:13 Taani kawotethata giddofenne hara biitta ubbaafe shiishanada, entana, enta biitta ehana. Isra7eele deretan, pultotaninne asay de7iya bessatan enta heemmana.
EZE 34:14 Taani enta lo77o qooron heemmana; Isra7eele zumati enti heemetiya besse gidana. Enti lo77o qooroy de7iya Isra7eele zumata bolla hemetananne allatana.
EZE 34:15 Taani ta huuphen ta dorsata heemmananne shempisana.
EZE 34:16 Taani dhayidaysa koyana; betidaysa zaarana; meqidaysa koolana; hargidaysa pathana. Shin taani suure pirdiya henthancho gidiya gisho genen modhidaysanne minnidaysa dhaysana” yaagees Ubbaa Haariya Goday.
EZE 34:17 Hinteno, ta dorsato, “Hintena ubbaa ta pirdana; keeha iitaape, dorsaa deeshape ta shaakana.
EZE 34:18 Hinte lo77o qooron heemmeteysi gidonna ixin, attida maata tohon yedheetii? Qassi hinte xillo haathi uyeysi gidonna ixin, attida haatha tohon buulloyetii?
EZE 34:19 Ta dorsati hinte tohon yedhida maata maanawunne hinte tohon buulloyida haatha uyanaw bessii?” yaagees Ubbaa Haariya Goday.
EZE 34:20 Hessa gisho, Ubbaa Haariya Goday entako haysada yaagees: “Modho mehiya giddoninne gilqa mehiya giddon ta ta huuphen pirdana.
EZE 34:21 Daaburanchota, hinte, hinte miyanne hinte hashiyan sugiya gishonne gaxa kessana gakanaw hinte enta hinte kaciyan qayciya gisho,
EZE 34:22 taani ta dorsata ashshana. Hizape guye oonika enta oykenna; ta keeha dorsata giddoninne iita dorsata giddon ta pirdana.
EZE 34:23 Ta enta bolla issi henthanchuwa, ta aylliya Dawita shuumana; I enta heemmananne entaw henthancho gidana.
EZE 34:24 Hizape guye ta Goday enta Xoossaa gidana; ta aylley Dawiti enta giddon halaqa gidana” yaagees Goday.
EZE 34:25 “Ta entara sarotetha caaqo caaqana; iita do7ata taani biittafe diggana; ta dorsati bazzon saro daana; wora garsan hirgi bayna allatana.
EZE 34:26 Ta entanne ta zuma yuushon de7iya bessata anjana. Entaw koshshiya ira woden woden immana; he iray entaw anjo gidana.
EZE 34:27 Gaden de7iya mithati ayfana; biittay kathi dolisana; ubbay banta biittan saro daana. Ta enta qambara menthada, enta aylle oothidi haaridaysata kushepe kessiya wode taani Godaa gideysa enti erana.
EZE 34:28 Hara kawotethati enta bonqokona; biittan de7iya do7ati enta mookonna; aykoyka daganthonna enti saro daana.
EZE 34:29 Ta entaw aradda biitta immana; enti zaaridi koshan wurokona; woyko hara kawotethatas cashshas attokona.
EZE 34:30 He wode enti taani Goday, enta Xoossay entara de7eysanne Isra7eele asay ta ase gideysa enti erana.
EZE 34:31 Hinteno, Isra7eele asaw, hinte ta wude; ta qooron miya ta wudiya; hinte ta ase, taani hinte Xoossaa” yaagees Ubbaa Haariya Goday.
EZE 35:1 Godaa qaalay haysada yaagishe taako yis.
EZE 35:2 “Asa na7aw, Sayre zumako ne som7uwa zaarada tinbite oda:
EZE 35:3 ‘Neno, Sayre zumaw, ta new morke gidana; taani ta kushiya ne bolla denthada, nena kallonne baysa kessana.
EZE 35:4 Taani ne katamata laallana; ne baysa gidana. Taani Godaa gideysa ne he wode erana’ ” yaagees Ubbaa Haariya Goday.
EZE 35:5 New Isra7eelera wuronna morketethi de7iya gisho, enta un7aa wodenne enta wursetha pirdaa wode, enta ne mashshas aathada immadasa.
EZE 35:6 Ta Ubbaa Haariya Goday ta de7uwan caaqayis: taani nena hayqon pirdana; ne hayqope kessa ekanaw danda7aka. Ne ase wodho ixonna gisho ase wodhey nena kallana.
EZE 35:7 Taani Sayre zumaa kallonne baysa kessana; yaara oonika aadhona mela oothana.
EZE 35:8 Taani ne dereta ubbaa ahan kunthana; dereti, shaafatinne zangaarati mashshan hayqidaysata ahan kametana.
EZE 35:9 Ta nena merinaw baysa oothana; ne katamati kallo attana; Taani Godaa gideysa hinte he wode erana.
EZE 35:10 “Taani Goday Isra7eeleninne Yihudan de7ishin hinte, ‘Ha nam7u kawotethatanne ha nam7u biittata nu oykana; enti nubaa gidana gida gisho,
EZE 35:11 Hinte enta morkidi, enta bolla yilotida gishonne qanaatida gisho ta hintew seerana. Ta hintena pirdiya wode taani tana gideysa hintena erisana.’
EZE 35:12 Hinte, ‘Isra7eele dereti baysa attidosona; nuuni midi dhaysana mela nuus imetidosona’ gidi, cayida cashsha ubbaa taani Goday si7idaysa hinte he wode erana.
EZE 35:13 Ne ta bolla otoron odetida odaanne zawi bayna haasayida haasaya taani si7as.
EZE 35:14 Biitta ubbay ufaytiya wode taani hintena baysa kessana.
EZE 35:15 Isra7eele laata biittay baysa gidida wode hinte ufaytida gisho, Sayre zumaw Edoome biitta ubbaa taani baysa oothana. Taani Godaa gideysa hinte he wode erana” yaagees Ubbaa Haariya Goday.
EZE 36:1 “Asa na7aw, Isra7eele zumata haysada yaagada tinbite oda: ‘Hinteno, Isra7eele zumato, Godaa qaala si7ite.’
EZE 36:2 Hinte morketi, ‘Hashshu! Beni dhoqa dereti ubbay nu laata gididosona’ yaagidosona.
EZE 36:3 Hessa gisho, Ubbaa Haariya Goday haysada yaagees gada tinbite oda. Enti hintena ubba bessara mentherethidi baysa oothida gishonne hinte hara kawotethatan haaretana mela oothida gisho hintena cashshasinne miichas aggis.
EZE 36:4 Godaa qaala si7ite! Ubbaa Haariya Goday deretako, zumatako, zangaaratako, ollatako, yuushuwan de7iya hara kawotethan bonqetida, qelqisetidanne baysa attida katamatako haysada yaagees.
EZE 36:5 Taani, ta eexiya qaanatiyan hara kawotethata bollanne Edoome ubba bolla tuma odas. Enti ufaytishenne kadhishe ta biitta bantaw ekidosona; hentha gadeta laattidosona.
EZE 36:6 Hessa gisho, Isra7eele biitta bolla tinbite oda. Kawotethata cashshaa gisho, ta qanaaten eexada deretas, zumatas, zangaaratsinne ollatas odeysa oda.
EZE 36:7 Hinte yuushuwan de7iya kawotethati ubbay kawuyanaysa taani Ubbaa Haariya Goday hintew ta kushiya denthada caaqada odayis.
EZE 36:8 “Shin, Isra7eele dereta bolla de7iya mithati ta asaa Isra7eeles zaaridi aacana; ayfe ayfana; enti eeson banta biitta simmana.
EZE 36:9 Ta hintera de7ayis; ta hinteko simmana; hinte biittay goyetananne zeretana.
EZE 36:10 Ta Isra7eele asaa taybuwa ha biittan darsana; asay katamatan daana; laaletida bessati zaaridi gimbetana.
EZE 36:11 Taani asaanne mehiya hintew darsana; enti yeletananne darana. Beni hinte de7idaysada daana; kaseysafe aathada ta hintena dureyana. He wode hinte, taani Godaa gideysa erana.
EZE 36:12 Taani ta asaa Isra7eele, ha biittan zaaridi daana mela oothana. Zaaridi he biittay hinte nayta dhaysena; biittay hinte laata biitta gidana” yaagees.
EZE 36:13 Ubbaa Haariya Goday haysada yaagees asay hintena, “Biittay ase miya biitta” kawotethiuwka, “Na7i bayna asi oothasu” yaageysi tuma.
EZE 36:14 Hizape guye, biittay, “Ase miya biitta” giduku; qassi kawotethati, “Na7i bayna asi gidokona” yaagees Ubbaa Haariya Goday.
EZE 36:15 “Hizape guye, kawotethata cashshaa ta hintena sissike; hizape guye yeellateketa; he biittay hintew dhube giduku” yaagees Ubbaa Haariya Goday.
EZE 36:16 Zaaridi, Godaa qaalay haysada yaagishe taako yis.
EZE 36:17 “Asa na7aw, Isra7eele asay banta biittan de7iya wode, banta hanotaaninne banta oosuwan biitta tunisidosona; enta hanoy ta sinthan maccasa kushe meto mela.
EZE 36:18 Enti biittan suuthu gussida gishonne banta eeqan biitta tunisida gisho ta hanquwa enta bolla gussas.
EZE 36:19 Taani enta kawotethata giddon laallas; biitta ubban zeras. Taani enta hanotaanne enta oosuwa mela pirdas.
EZE 36:20 Enti bida besse ubban asay enta, ‘Haysati Godaa asata; enti iya biittafe keydaysata’ ” yaagidi ta geeshsha sunthaa tunisana mela oothidosona.
EZE 36:21 Shin Isra7eele asay bida kawotethata ubban tunisida ta geeshsha sunthay tana qofisees.
EZE 36:22 “Hessa gisho, taani Ubbaa Haariya Goday, Isra7eele asaas giyaba oda. ‘Hinteno, Isra7eele asaw, ta hessa oothey, hinte bida kawotethata giddon tunisida ta geeshsha sunthaa gishope attishin, hinte gisho gidenna.
EZE 36:23 Hinte tunisida, kawotethata giddon tunida ta gita sunthaa geeshshatetha ta bessaana. Enti xeellishin, hinte baggara ta geeshshatetha bessiya wode, taani Godaa gideysa enti erana’ ” yaagees Ubbaa Haariya Goday.
EZE 36:24 “Taani hintena kawotethata giddofe kessana; biitta ubbaafe shiishada hinte biitta zaarada ehana.
EZE 36:25 Ta hinte bolla xillo haathi dharcana; hinteka geeyana. Hintena hinte tunatethi ubbaafenne eeqa goyinno ubbaafe geeshshana.
EZE 36:26 Ta hintew ooratha wozanaa immana; ooratha ayyaana hinte giddon wothana; shucha wozanaa hintefe kessada, asho wozanaa hintew immana.
EZE 36:27 Ta Ayyaana hinte giddon wothana; ta wogaanne ta higgiya naagana mela oothana.
EZE 36:28 Ta hinte mayzatas immida biittan hinte daana; hinte ta ase gidana; taka hinte Xoossaa gidana.
EZE 36:29 Hinte tuna ubbaafe ta hintena ashshana; kathay hintew darana mela oothana; zaarada hinte bolla kosha ehike.
EZE 36:30 Koshaa gaason hinte kawotethata giddon kawuyonna mela hinte mitha ayfiyanne hinte goshsha kathan kunthana.
EZE 36:31 He wode hinte, hinte iita hanotaanne iita ogiya hassayana. Hinte nagaraanne hinte tuna oosuwa gisho, hinte hintena shaatettana.
EZE 36:32 Ta hessa ubbaa oothey hinte gisho gidonnaysa erite. Hinteno, Isra7eele asaw, hinte hanotan yeellatitenne kawuyite” yaagees Ubbaa Haariya Goday.
EZE 36:33 Ubbaa Haariya Goday haysada yaagees: “Ta hintena, hinte nagaraa ubbaafe geeshshiya wode, hinte katamatan zaaridi daana mela oothana; laaletidaysati zaaridi gimbetana.
EZE 36:34 Iya matara aadhiya asaa sinthan baysa gididi de7iya biittay goshsha biitta gidana.
EZE 36:35 Asay, ‘Haysi kase baysa gidida biittay ha77i waanidi Edene Gannate gididee? Kase laaletida, asi doonnanne baysa katamati ha77i waanidi yuushoy gimbetidanne asi de7iya katamata gididona?’ yaagana.
EZE 36:36 He wode hinte yuushuwan de7iya attida kawotethati, taani laaletida katamata zaarada keexidaysanne baysa biittay zaaridi kathi dolana mela oothiday tana Godaa gideysa enti erana. Taani Goday hessa odas; ta odidaysa ta oothana” yaagees.
EZE 36:37 Ubbaa Haariya Goday haysada yaagees; “Isra7eele asay issi toho tana maado oychana mela oothana; enta taybuwa wudeda darsana.
EZE 36:38 Ba7aale gallas yarshos yida wude mehen Yerusalaamey kumeysada, laaletida katamatan ase kunthana. He wode enti taani Godaa gideysa erana” yaagis.
EZE 37:1 Godaa kushey ta bolla de7ees; iya Ayyaanay tana meqethi kumida zangaaran wothis.
EZE 37:2 I tana enta giddon yaanne haanne yuushshis; ta hinchi gidi melida daro meqethata zangaara giddon be7as.
EZE 37:3 I, “Asa na7aw, ha meqethati zaaridi, shempora daanaw danda7oona?” yaagis. Taani, “Ubbaa Haariya Godaw, haysa ne eraasa” yaagas.
EZE 37:4 I taako, “Ha meqethatas haysada yaagada tinbite oda; hinteno, melida meqethato, Godaa qaala si7ite.
EZE 37:5 Ubbaa Haariya Goday ha meqethatako haysada yaagees: ‘Taani shempo hinte giddo gelsana; zaaridi hinte de7on daana.
EZE 37:6 Ta hinte bolla shaya wothana; hintena asho mayzana; hintena gogan kammana. Hinte de7on daana mela ta hinte giddo shempo gelsana. He wode hinte taani Godaa gideysa erana’ ” yaagees.
EZE 37:7 I tana kiittidaysada tinbite odas; ta tinbite odo doomiya wode girsi si7etis; meqethati shiiqidi, ba bessan bessan oyketidosona.
EZE 37:8 Ta xeelliya wode, enta bolla shayi de7ees; ashoy enta bolla bentis; galba ma7idosona; shin shempoy enta giddon deenna.
EZE 37:9 I taako, “Asa na7aw, carkuwas tinbite oda; neno, carkuwaw, oyddu baggafe haa ya; enti de7on daana mela ha hayqidaysata bolla shempo punna” yaagis.
EZE 37:10 I tana kiittidaysada tinbite odas; shempoy enta giddo gelis; de7o demmidosona; enti daro olancho gididi banta tohon eqidosona.
EZE 37:11 I taako, “Asa na7aw, ha meqethati Isra7eele asaa leemiso; Isra7eele asay, ‘Nu meqethati melidosona; nu ufaysay dhayis; nubay kumethi halis’ yaagosona.
EZE 37:12 Hessa gisho, entaw haysada yaagada tinbite oda; ‘Hinteno, ta asaw, taani hinte duufuwa dooyana; hintena yaape kessana; ta hintena zaarada, Isra7eele biitta ehana.
EZE 37:13 Ta asaw, ta hinte duufuwa dooyiya wodenne hintena kessiya wode, ta Godaa gideysa hinte erana.
EZE 37:14 Taani ta Ayyaana hinte giddon wothana; hinte de7on daana. Taani hintena, hinte biittan wothana. He wode taani Goday odidaysanne oothidaysa hinte erana’ ” yaagees Ubbaa Haariya Goday.
EZE 37:15 Zaaridi Godaa qaalay haysada yaagishe taako yis:
EZE 37:16 “Asa na7aw, issi mitha xam7a ekada, iya bolla, ‘Haysi Yihudasinne iyara de7iya Isra7eele asaasa’ yaagada xaafa. Qassi hara xam7a ekada, iya bolla, ‘Haysi Efreema; Yoosefanne iyara de7iya Isra7eele asaasa’ yaagada xaafa.
EZE 37:17 Hessafe guye, enti ne kushen issi xam7a gidana mela nam7a issife gathada oyka.
EZE 37:18 Ne biitta asay neeko, ‘Haysi ne ootheysi aybee? Nuus birshethaa oda’ yaagidi oychiko,
EZE 37:19 Ubbaa Haariya Goday haysada yaagees gada oda: taani Efreema kushen de7iya Yoosefa xam7anne iyara de7iya Isra7eele kochata ekanaw hanayis; enta nam7aa issi xam7a oothanaw, Yihuda xam7ara gathana. Enti nam7ay ta kushen isso gidana” yaagees Ubbaa Haariya Goday yaagada oda.
EZE 37:20 “He ne enta bolla xaafida nam7u xam7ata enta sinthan oykada,
EZE 37:21 Ubbaa Haariya Goday haysada yaagees gada oda. Taani Isra7eele asaa enti laaletida kawotethata giddofe kessana; ta enta shiishada, enta biitta zaarada ehana.
EZE 37:22 Isra7eele dereta bollanne enta biittan ta enta issi kawotethi oothana; enta ubbaa bolla issi kawo kawothana. Qassi enti zaaridi nam7u biitta gidokona; nam7u kawotethi gididi shaaketokona.
EZE 37:23 Hizape guye, enti banta eeqatan, banta ixetidabataninne banta nagara ubban bantana tunisokona. Taani enta kundida bessaafe denthada nagara ubbaafe geeshshana. Enti ta ase gidana; taka entaw Xoosse gidana.
EZE 37:24 “Ta aylley Dawiti enta kawo gidana; entaw ubbaas issi henthancho xalaali daana. Enti ta higgiya kaallana; ta wogaa minthidi naagana.
EZE 37:25 Taani ta aylliya Yayqoobas immidanne enta mayzati de7ida biittan enti daana. He biittan enti, enta naytinne enta nayta nayti merinaw daana; ta aylley Dawiti enta bolla merinaw kawo gidana.
EZE 37:26 Ta entara sarotetha caaqo caaqana; he caaqoy merinaa caaqo gidana. Taani enta minthada essana; enta taybuwa darsana; ta keethaa merinaw enta giddon wothana.
EZE 37:27 Taani yan entara daana; entaw Xoosse gidana; enti ta ase gidana.
EZE 37:28 Xoossa keethay enta giddon merinaw de7iya wode, Isra7eele geeshshey tani, Godaa gideysa kawotethati erana” yaagis.
EZE 38:1 Godaa qaalay haysada yaagishe taako yis.
EZE 38:2 “Asa na7aw, Maagoge biittan de7iya Mosahanne Tobeela asaa bolla waanna halaqa gidida Googe bolla tinbite oda.
EZE 38:3 Ubbaa Haariya Goday haysada yaagees gada oda. Mosahanne Tobeela waanna halaqa gidida Googe ta ne bolla dendas.
EZE 38:4 Ta nena guye zaarana; ne sidhen dafo aathada, ne olanchotara, ne paratara, ola miishe ma7ida ne para asatara, banta mashsha leefida, gitanne guutha gondalle oykida asaara nena goochada kessana.
EZE 38:5 Farsefe, Tophefenne Liibepe yida asay gondalle oykidi, huuphen birata barneexa wothidi, entara gidana.
EZE 38:6 Gomerinne iya olanchoti ubbay, pudeha baggan de7iya Beet-Torgaaminne iya olanchoti neera gidana.
EZE 38:7 “Nenne neeko shiiqida asa ubbay dendite; hintena giigisite; ne entaw halaqa gida.
EZE 38:8 Daro wodepe guye, ne olas koyettana; sinthafe yaana laythatan daro wode baysa gididi de7ida biitta, olape shempida biittanne, iyan de7iya asay daro kawotethatape Isra7eele dereta shiiqida biitta olanaw ne dendana. Enti daro kawotethatape shiiqidaysatanne ubbay ha77i saro de7eyisata.
EZE 38:9 Neeni, ne olanchotinne neera de7iya daro kawotethati goteda dendana; hinte shaarada biitta kammana” yaagees.
EZE 38:10 Ubbaa Haariya Goday haysada yaagees: “He wode qofi ne wozana giddo yin, ne iitabaa halchana.
EZE 38:11 Neeni, ‘Taani diretiboonna gutata olana; wopu gidi, hirgi bayna de7iya asata, dirsi, pengey woyko gordey bayna katamata ta olana.
EZE 38:12 Taani enta di77ananne bonqana; kase baysa gidida biitta yidi uttida, kawotethata giddofe shiiqida, mehenne miishe haarida, biittas gul7an uttida asaa bolla ta kushiya denthana’ yaagana.
EZE 38:13 Saaba asaynne Didaana asay Tarsesa zal7anchotinne na7atethi olanchoti ubbay, ‘Ne bonqanaw yadii? Ne olanchota di7o toossanaw, biranne worqa gaazisanaw, mehenne miishe ekanawunne di7uwa bonqanaw daro asi shiishadii?’ ” yaagana.
EZE 38:14 Hessa gisho, asa na7aw, Googe bolla haysada yaagada tinbite oda. Ubbaa Haariya Goday haysada yaagees: “He wode, ta asay Isra7eele hirgi bayna de7iya wode, neeni akeekikii?
EZE 38:15 Neeni de7iya pudeha bagga biittafe yaana. Nenne neera de7iya daro kawotethati para toggidi, mino olancho gididi, yaana.
EZE 38:16 Biitta kammiya shaarada, ne ta asaa Isra7eele bolla yaana. Googe sinthafe yaana wodiyan ta nena ta biitta bolla denthana. Hessa ta oothey kawotethati tana erana melanne taani ne baggara oothiyabay ta geeshshatetha enta sinthan bessaana melasa” yaagees.
EZE 38:17 Ubbaa Haariya Goday haysada yaagees: “Taani ta aylle gidida Isra7eele nabeta baggara, kase wode zaara zaarada Isra7eelen tinbite odas.
EZE 38:18 Ubbaa Haariya Goday haysada yaagees: ‘Googey Isra7eele bolla dendiya wode ta hanqoy suullana.
EZE 38:19 He wode Isra7eele biittan wolqaama biitta qaaxoy hanana; taani ta sheniyaninne ta eexiya hanquwan awaajas.
EZE 38:20 Abbaa moloy, salo kafoy, deren de7iya meheynne do7ay, sa7a bolla woxi qaaxiya medhetethi ubbaynne sa7an de7iya asa ubbay ta sinthan kokorana. Dereti kundana; aafoti woddana; dirsa gimbe ubbay laaletana.
EZE 38:21 Ta zumatan ubban Googe bolla mashshi dendana mela oothana; olanchoti banta mashsha banta bolla zaaridi, issoy issuwa wodhana. Taani Ubbaa Haariya Goday haysa odas.
EZE 38:22 Taani hargeninne hayqon iya seerana; wolqaama ira, shachi, xuuggiya diinne iya bolla, iya olanchota bollanne iyara de7iya kawotethata bolla bukisana.
EZE 38:23 Hessada oothada, taani ta gitatethaanne ta geeshshatetha bessaana. Daro kawotethata taani tanatethaa erisana. Taani Godaa gideysa enti he wode erana’ ” yaagis.
EZE 39:1 Ubbaa Haariya Goday haysada yaagees: “Asa na7aw, Googe bolla haysada yaagada tinbite oda. Mosahanne Tobeela asaas waanna halaqa gidida Googe, ta new morke.
EZE 39:2 Ta nena guye zaarana; haaho gidida pudeha bagga biittafe goocha kessada, Isra7eele dereta bolla nena ehana.
EZE 39:3 Taani ne haddirsa kushiyape dongeta baqa yeggana, ne ushacha kushiyape donge toorata yegisana.
EZE 39:4 Neeni, ne olanchotinne neera de7iya kawotethati ubbay Isra7eele deriya bolla kundidi attana. Taani hinte ashuwa kafotasinne bazzo do7atas kathi oothada immana.
EZE 39:5 Taani Ubbaa Haariya Goday hessa odida gisho, hinte ubbay denban kundidi attana.
EZE 39:6 Maagoge biittaninne yuushoy abban teqetida biittatan, hirgi bayna uttida asaa bolla taani eexiya tama yeddana. Taani Godaa gideysa enti he wode erana.
EZE 39:7 Ta geeshsha sunthay ta asaa Isra7eele giddon eretanaada oothana. Hizape guye ta geeshsha sunthay cayetena. Kawotethati taani Godaa, Isra7eele Geeshshaa gideysa erana” yaagis.
EZE 39:8 Ubbaa Haariya Goday haysada yaagees: “He gallasay yaana; attenna” yaagada ta odida gallasay haysa.
EZE 39:9 “He wode Isra7eele katamatan de7iya asay keyidi, ola miisheta ubbaa taman eethana; hessika guuthanne gita gondalleta, dongeta, donge toora, tooratanne xam7ata ubba xuuggana. Laapun laythi kumethi enti eeso mithi oothidi go7etana.
EZE 39:10 Enti mithi mixanaw woyko worape mithi qanxanaw koshshenna. Enti shiishida ola miisheta eeso mithi oothidi go7etana. Bantana bonqidaysata zaaridi bonqana; entaba ekidaysatape enti zaaridi ekana” yaagees Ubbaa Haariya Goday.
EZE 39:11 He gallas Googe moogetiya bessi taani iyaw Isra7eele biittan immana. He bessay abbaafe doloha baggara de7iya Ooge asata Zangaara geetetiya zangaara giddon gidana. Googeynne iya olanchoti ubbay yan moogetiya gisho, enta duufoy yaara hemetiya asaas oge gordana. He bessay, “Googe Olanchota zangaara” geetetidi xeegetana.
EZE 39:12 “Isra7eele asay biitta geeshshanaw, laapun ageena kumethi aha moogishe gam7ana.
EZE 39:13 He biittan de7iya asa ubbay aha moogon maadetana; hessan, taani ta bonchuwa qoncisiya wode entaw boncho gidana” yaagees Ubbaa haariya Goday.
EZE 39:14 Laapun ageenape guye attida ahi de7iko, moogana mela asi dooretana; he asay biittay geeyana gakanaw ubba wode biitta ubban yuuyidi attida aha demmidi moogosona.
EZE 39:15 Enti biittan yuuyishin, asa meqethi bentiko, he meqetha matan malla wothidi aadhana. Moogeysati yidi, Googe Olanchota zangaaran moogana.
EZE 39:16 He katama sunthay Hamoona geetetana. Enti biitta zaaridi geeshshana. Iya heeran, “Olanchota Katamaa” geetetidi xeegetiya katami daana.
EZE 39:17 Ubbaa Haariya Goday haysada yaagees: “Asa na7aw, kafo kochenne sa7a do7atas haysada yaagada xeega. Ta hintew Isra7eele dereta bolla giigisida gita yarsho ba7aalen asho maanawunne suuthu uyanaw ubba bessafe shiiqidi haayite.
EZE 39:18 Hinte mino asata ashuwa maana; biitta halaqata suuthaa uyana. Enti hintew Baasane modho urge dorsada, marazeda, koledanne boora mela gidana.
EZE 39:19 Taani hintew giigisida yarsho ba7aalen hinte kallana gakanaw, modho maana; mathotana gakanaw, suuthu uyana.
EZE 39:20 Ta hintew giigisiya gibiraape parata, para asata, mino toora asatanne hara olanchota ubba ashuwa hinte kallana gakanaw maana” yaagees Ubbaa Haariya Goday.
EZE 39:21 “Taani kawotethata giddon ta bonchuwa qoncisana. Kawotethati ubbay ta enta pirdida pirdanne ta enta bolla denthida ta kushiya be7ana.
EZE 39:22 He wodiyape doomidi, Isra7eele asay taani Godaa, enta Xoossaa gideysa erana.
EZE 39:23 Isra7eele asay di7etidi biday banta nagara gaason, gideysa hara kawotethati erana. Enti taw ammanetona ixida gisho, taani ta som7uwa entafe denthada, enta morketas enta aathada immin, enti ubbay olan hayqidosona.
EZE 39:24 Enta tunatethaanne enta iitatetha mela entaw bessiya seera seeras; ta som7uwa entafe genthas” yaagis.
EZE 39:25 Ubbaa Haariya Goday haysada yaagees. “Ha77i taani Yayqooba kochata di7ope zaarada gashtisana; Isra7eele asaa ubbaas qadhetana. Ta geeshsha sunthas mishetada cayetonna mela oothana.
EZE 39:26 Enta yashshiyabay bayna, banta biittan saro duussu doomiya wode kase banta yeellanne taw ammanetona ixidaysa dogana.
EZE 39:27 Taani enta kawotethata ubbaa giddofe zaarada ehana; morketa biittafe enta shiishana. Hessada oothada, taani geeshshi gideysa enta baggara kawotethata ubbaa bessaana.
EZE 39:28 Enti di7etidi baana mela oothiday tana gidiya gishonne enta shiishada, enta biitta zaarida gisho, taani Godaa enta Xoossaa gideysa enti erana. Taani entafe issuwaka kawotethata giddon aggike.
EZE 39:29 Taani ta Ayyaana Isra7eele asaa bolla gussana; zaarada ta som7uwa entafe genthike” yaagees Ubbaa Haariya Goday.
EZE 40:1 Nuuni di7etida laatamanne ichashantho laythan, Yerusalaamey xoonetida tammanne oyddantho laythan, koyro ageenan, tammantho gallasan Godaa kushey ta bolla de7ees. I tana denthidi Yerusalaame efis.
EZE 40:2 Xoossay tana qoncethan Isra7eele biitta efidi, issi zuma bolla essis. He zumaape dugeha baggara daro keethi keexetida katama daaniyaba be7as.
EZE 40:3 I tana yaa efin taani naase biratada phooliya issi addiya be7as. He uray liinope oosetida wodoronne wadha xam7a oykidi, dirsa pengiya matan eqis.
EZE 40:4 I taako, “Asa na7aw, ta nena ha bessaa ehiday ta nena bessiyaba ubbaa ne mintha akeekana melasa. Hessa gisho, ne ayfiyan xeella; ne haythan si7a; ne wozanan wotha. Ne be7iyaba ubbaa Isra7eele asaas oda” yaagis.
EZE 40:5 Taani Xoossa keetha yuuyi aadhida dirsa gimbiya be7as. He addiya kushen usupun wadha adusse gidida xam7i de7ees. Issi adussa wadhay issi wadho bolla oyddu biradheta guja gidees. Dirsa gimbiya likiya wode dalgatethay issi wadhanne takadho; gompaynne adussatethay usupun wadha.
EZE 40:6 Hessafe guye, doloha baggara de7iya dirsa pengiyako bis. Dethaa keyidi, geliya pengiya wadhiya wode usupun wadha gidis.
EZE 40:7 Yaara aadhiya wode ushacharanne haddirsara penge naageysati eqiya heedzu heedzu kifileti de7oosona. Issi issi kifiley usupun wadha adussenne usupun wadha dalga. Enta giddon de7iya godati ichashu wadha orde. Pengiya naageysata kifiletape ya baggara, Xoossa keethako simmida usupun wadha barandi de7ees.
EZE 40:8 He uray geliya bessaa barandaa wadhin, hospun wadha gidis.
EZE 40:9 Xoossa keethaako simmida pengey wursethan de7ees. He barandaa tuuqeta ordetethay nam7u wadha.
EZE 40:10 Doloha bagga pengiyan ushachaninne haddirsa baggan issi gina gidida heedzu naago keethi de7ees.
EZE 40:11 He uray dirsa pengiya wadhiya wode dalgatethay tammu wadha, adussatethay tammanne heedzu wadha.
EZE 40:12 Issi issi penge naageysata kifiliya sinthan adussatethay issi wadha, dalgatethay issi wadha gidida godi de7ees; naageysata kifileti nam7u baggara usupun usupun wadha.
EZE 40:13 Hafinthan de7iya naageysata kifileti guye baggafe hefinthan de7iya naageysata kifileta guye bagga gakanaw de7iya bessay laatamanne ichashu wadha gidis.
EZE 40:14 He uray dabaaba sinthan de7iya wursetha kifiliya wadhin, laatamu wadha gidis.
EZE 40:15 Pengiya geliya bessaafe bidi, wursethan de7iya iya barandaa gakanaw de7iya pengiya adussatethay ishatamu wadha.
EZE 40:16 Kifileta ubbaas kare bagga simmida guutha maskooteti de7oosona; kifiletape giddon de7iya godatas maskooteti de7oosona. Yaanne haanne shaakiya godata bolla zamba misiley de7ees.
EZE 40:17 He uray tana kare dabaabako efis. Yan taani dabaaba yuushon de7iya shuchi hiixetida baasuwanne he baasuwa keexetida hastamu kifileta be7as.
EZE 40:18 Shuchay hiixetida baasoy dabaaba yuusho ubbaa gakis; kare dabaabay giddo dabaabape ziqees.
EZE 40:19 Giddo dabaaba gathiya, dhoqan oosetida, dirsa pengey de7ees. He uray nam7u pengetape giddon de7iya bessaa wadhin, gompay wuloha bagga xeetu wadha doloha baggay xeetu wadha gidis.
EZE 40:20 He uray tana qommo bagga efidi, kare bagga dabaaba sinthan de7iya dirsa pengiya wadhis.
EZE 40:21 Wulohape ushachaninne haddirsa baggara de7iya heedzu naageysata kifileti, entafe giddon de7iya godatinne iya baranday koyro doloha pengiya baggan wadhin issi gina gididosona. Dirsa penge adussatethay ichashu wadha; dalgatethay laatamanne ichashu wadha.
EZE 40:22 Baranday, maskootetinne zamba misiley kase doloha pengiya baggan be7idaysada issi gina. Yaa gathiya laapun dethati de7oosona. Baranday dabaaba sintha baggara de7ees.
EZE 40:23 Doloha baggan, qommo bagga giddo dabaabas hara pengey de7ees. He uray ha nam7u dirsa pengetape giddon de7iya bessaa wadhin, xeetu wadha gidis.
EZE 40:24 He uray tana garsa bagga dirsa pengiyako kaalethin, yan hara dirsa penge be7as. I tuuqetanne gido kifileta wadhiya wode haratara gina gidis.
EZE 40:25 He dirsa pengiya matan de7iya kifileta ubbaas maskooteti de7oosona. Dirsaa pengiya adussatethay ishatamu wadha; dalgatethay laatamanne ichashu wadha.
EZE 40:26 Yaa gathiya laapun dethati de7oosona. Baranday dabaaba sinthan de7ees. Pengiya bolla ya baggaranne ha baggara zamba misiley de7ees.
EZE 40:27 Giddo dabaabas hara pengey de7ees. He uray ha nam7u dirsa pengetape giddon de7iya bessaa wadhin, xeetu wadha gidis.
EZE 40:28 He uray tana garsa dirsa pengiya baggara giddo dabaabako efis. I dirsa pengiya wadhin, hara pengetara gina gidis.
EZE 40:29 Naageyisata kifileti, godatinne barandati ubbay hara dirsa pengetara issi gina. He dirsa pengiya yuushon de7iya kifileta ubbaas maskooteti de7oosona. Ha pengiya adussatethay ishatamu wadha; gompay laatamanne ichashu wadha.
EZE 40:30 He dirsa pengey yuushuwan barandati de7oosona; enta adussatethay laatamanne ichashu wadha; gompay ichashu wadha.
EZE 40:31 He barandati kare bagga dabaaba sinthan de7oosona. Pengiya bolla ya baggaranne ha baggara zamba misiley de7ees. Yaa gathiya hospun dethati de7oosona.
EZE 40:32 He uray tana doloha bagga dirsa pengiyara giddo dabaabako efis. I he dirsa pengiya wadhin, hara pengetara gina gidis.
EZE 40:33 Naageyisata kifileti, godatinne baranday hanko dirsa pengetara issi gina. He dirsa pengiya yuushon de7iya kifileta ubbaas maskooteti de7oosona. He pengiya adussatethay ishatamu wadha; gompay laatamanne ichashu wadha.
EZE 40:34 Baranday kare bagga dabaaba sinthan de7ees. Pengiya bolla ya baggaranne ha baggara zamba misiley de7ees. Yaa gathiya hospun dethati de7oosona.
EZE 40:35 He uray tana pudeha bagga dirsa pengiyako efis. I he dirsa pengiya wadhin, hanko pengetara issi gina gidis.
EZE 40:36 Naageyisata kifileti, godatinne baranday hanko dirsa pengetara issi gina. He dirsa pengiya yuushon maskooteti de7oosona. He pengiya adussatethay ishatamu wadha; gompay laatamanne ichashu wadha.
EZE 40:37 Baranday kare bagga dabaaba sinthan de7ees. Pengiya bolla ya baggaranne ha baggara zamba misiley de7ees. Yaa gathiya hospun dethati de7oosona.
EZE 40:38 Kare dabaaba qommo baggara, giddo dirsa pengiya barandaara oyketidi, hara kifiley de7ees. Xuussa yarsho ehiya mehe ashoy meecetey he kifiliyana.
EZE 40:39 He barandan ha baggara nam7u xarpheezati, ya baggara nam7u xarpheezati de7oosona; xuussa yarshos, nagara yarshosinne naaqo yarshos mehe ubbay shuketiya he xarpheezata bollana.
EZE 40:40 Barandaafe kare baggara qommo dirsa pengiya matan nam7u xarpheezati ha baggara, nam7u xarpheezati ya baggara de7oosona.
EZE 40:41 Hessa gisho, yarshos shiiqida mehey shuketiya hospun xarpheezati de7oosona; entafe oyddati barandan de7oosona; oyddati kare dabaaban de7oosona.
EZE 40:42 Xuussa yarsho wothanaw giigisida, shuchafe masetidi oosetida oyddu xarpheezati de7oosona. Entaw adusatethay issi wadhanne takadho; dalgatethay issi wadhanne takadho geesay issi wadhanne takadho. Xuussa yarshonne hara yarsho ubbaa shukiya miisheti he xarpheezata bolla uttoosona.
EZE 40:43 Oyddu biradhe aduqiya kaqota godaa bolla yuuyi aadhidi dhishetidi uttidosona. Yarshos shiishiya asho ubbay he xarpheezata bolla uttees.
EZE 40:44 He uray tana giddo dabaaba gelsis. Yan pengeti giddo dabaabako dooyetiya nam7u kifileti de7oosona. Entafe issi kifiley qommo dirsa pengiya matara garsa bagga simmis; nam7anthoy garsa dirsa pengiya matara qommo bagga simmis.
EZE 40:45 He uray, “Dugeha bagga simmida kifiley Xoossa keethan oothiya kahinetaba.
EZE 40:46 Qommo bagga simmida kifiley yarsho bessan oothiya kahinetaba. Kahineti ubbay Saadoqa yaraape yeletida Leeweta; Godaa sinthan eqidi oothanaw besseysati haysata xalaala” yaagis.
EZE 40:47 He uray dabaaba wadhin, adusatethay xeetu wadha, dalgatethay xeetu wadha gidis. Dabaaban Xoossa keethafe sintha baggara issi yarsho bessi de7ees.
EZE 40:48 I tana Xoossa keetha barandaako efis. Barandaa geliya bessan eqida gobaneta13 wadhin, adussatethay ichashu wadha; dalgatethay tammanne oyddu wadha. Haddirsaranne ushachara de7iya godata ordetethay heedzu wadha gidis.
EZE 40:49 Barandaa adussatethay laatamu wadha; gompay tammu wadha. Yaa gathiya tammu dethati de7oosona. Geliya bessan ushacharanne haddirsara eqida nam7u tuuqeti de7oosona.
EZE 41:1 Hessafe guye, he uray tana Xoossaa keethan de7iya Geeshsha Bessaa gelsis. He Geeshsha Bessaa giddora aathiya ogiya likin usupun wadha gidis.
EZE 41:2 Gompay tammu wadha gidis. Haddirsaranne ushachara de7iya godata gompay ichashu wadha. I Geeshsha Bessaa wadhin adussatethay oytamu wadha, gompay laatamu wadha gidis.
EZE 41:3 Hessafe guye, qol7a gelis. Qol7a geliya ogiya wadhin, nam7u wadha gidis; gompay usupun wadha gidis; haddirsaranne ushachara de7iya godata gompay laapun wadha gidis.
EZE 41:4 I qol7a wadhin, adussatethay laatamu wadha, dalgatethay laatamu wadha gidis. Hessafe guye, “Haysi Ubbaafe Geeshsha Bessaa” yaagis.
EZE 41:5 He uray Xoossaa keethaa godaa wadhin, ordetethay usupun wadha gidis. He godaara oyketidi, Xoossaa keetha gido bagga yuushuwan keexetida oyddu oyddu wadha dalgiya daro kifileti de7oosona.
EZE 41:6 He kifileti issoy issuwa bolla keexetida heedzu pooqe gidin, issi issi pooqiya bolla hastamu kifileti de7oosona. Gimbiya yuushon de7iya kifileta tookiya tuuqeti de7oosona. Shin he tuuqeti gimbiya giddo kumethi gelibookona.
EZE 41:7 Xoossa keethaa yuushon de7iya kifileta dalgatethay pooqey gujiya wode gujees. Xoossa keethaa yuushon de7iya keethaa oosoy garsafe pude dalgishe biya gisho keethay pude guzhetida wode ubban kifileta dalgatethay gujishe bees. Giddo pooqiyara kanthidi, qommo wursetha pooqiya gakanaw efiya dethati de7oosona.
EZE 41:8 Xoossa keethaa yuushon dhoqu gida baasoy de7eysa be7as. Iya yuushuwan de7iya kifileti he baasuwa bolla keexetidosona; he baasoy giddo dabaabape usupun wadha dhoqees.
EZE 41:9 He kifileta kare bagga godaa ordetethay ichashu wadha. Kaysa bessay Xoossa keethaafenne,
EZE 41:10 kahineta kifiliyape giddon de7ees; iya ordetethay laatamu wadha.
EZE 41:11 Kaysa bessaafe ushachaninne haddirsa baggan de7iya kifileta gelsiya pengeti de7oosona. He pengeti issoy qommo baggara, issoy qassi garsa baggara de7ees. Kaysa bessaa yuushuwa gasethiya baasuwa dalgatethay ichashu wadha.
EZE 41:12 Xoossa keethafe wuloha baggara de7iya kaysa bessaafe sintha baggara issi keethi de7ees. He keethaa adussatethay uddufun tammu wadha; gompay laapun tammu wadha. He keethaa godaa ordetethay ichashu wadha.
EZE 41:13 He uray Xoossa keetha kare baggaa wadhin, adusatethay xeetu wadha. Xoossa keethaafe guye baggara de7iya kaysa bessaa kanthidi wuloha bagga keethaa gakanaw de7iya bessaa wadhin xeetu wadha gidis.
EZE 41:14 Doloha baggara de7iya Xoossaa keetha gompay nam7u kaysa bessata gujidi wadhin xeetu wadha gidis.
EZE 41:15 Nam7u baggara de7iya aadhiya bessata gujidi, wuloha baggara de7iya keetha adussatethaa wadhin, xeetu wadha gidis. Xoossaa keetha Geeshsha Bessay, iya qol7aynne iya baranday
EZE 41:16 wuygepe bidi, maskooteta gakanaw de7iya bessay mithan licetidi uttis; maskootetika mithan licetidi uttidosona.
EZE 41:17 Xoossa keetha soo bagga kifileta goday, pengetape bolla aadhana gakanaw alleeqetidi uttis.
EZE 41:18 Kifileta yuushon, zamba mithaninne kiruubeta misiley alleeqetis. He zamba mitha misileti alleeqetiday nam7u kiruubetape giddona. Kiruubetas nam7u nam7u som7oy de7ees.
EZE 41:19 Issi baggara asa som7o daaniya som7oy zamba misiliya xeellees; hanko baggara gaammo som7o daaniya som7oy zamba misiliya xeellees.
EZE 41:20 Geeshsha bessi wuygepe bidi, pengetape bolla baggan de7iya bessaa gakanaw, godaa yuusho ubbay hessada alleeqetis.
EZE 41:21 Xoossa keetha penge xangeti ubbay oyddu maazaney de7iya ubbay issi like. Ubbaafe Geeshsha Bessaa geliya bessaa sinthan
EZE 41:22 mithafe oosetida yarsho bessi daaniya bessi bentees. Ika oyddu maazaney gididi, dalgatethaynne adussatethay issi gina; issoy issoy nam7u wadha; adussatethay heedzu wadha. Maazaneta tuussati, baasotinne miye baggan de7iya sanqati ubbay mithafe oosetidosona. He uray taako, “Haysi Godaa sinthan de7iya xarpheeza” yaagis.
EZE 41:23 Geeshsha Bessaa gelsiya issi pengey de7ees; Ubbaafe Geeshsha Bessaa gelsiya issi pengey de7ees.
EZE 41:24 Issi issi pengiyas giddon daakotidi dooyetiya nam7u sanqati de7oosona.
EZE 41:25 Godata bolla medhetidaysada Geeshsha Bessaa pengeta sanqata bolla kiruubetanne zambata misiley medhetidi uttis. Gaathi geliya kifiliya sinthan, kare baggara mithafe oosetida kami de7ees.
EZE 41:26 He kifiliya geliya godata miyen maskooteti de7oosona. Godati zamba misilen alleeqetidosona. He kifiliya geliya ushachaninne haddirsan de7iya kifileta dethaa baggara kammiya kaari de7ees.
EZE 42:1 Hessafe guye, he uray tana pudeha bagga pengiyara kare dabaabako kaalethidi Xoossa keethaa giddo dabaaba gimbiyara oyketida keethaako tana ehis.
EZE 42:2 He keethaa wulay pudeha bagga simmis. Ha keethay xeetu wadha adussenne ishatamu wadha dalga.
EZE 42:3 Gido dabaabape laatamu wadha haakidi, qassi sintha baggara kare dabaaban de7iya hiixetida shuchafe sintha baggara woliko simmida heedzu dethi de7iya pooqey de7ees.
EZE 42:4 He kifileta pengeti pude xeelloosona. Entafe sintha baggara tammu wadha dalganne xeetu wadha adusse gidida giddora aathiya ogey de7ees.
EZE 42:5 He keethas bolla heedzantho pooqey nam7antho pooqiyape xuummees; nam7anthoy koyruwape xuummees. Hessi haniday enti issoy issuwafe guye shiiqidi gimbetida gishosa.
EZE 42:6 He pooqiyas bolla bagga kifileti gido kifiletapenne garsa bagga kifiletape xuummiya gisho, kare dabaaban de7iya hara keethatada entaw tuussi baawa.
EZE 42:7 He kifiletape sintha baggara ishatamu wadha aduqiya kare dabaaba baggara de7iya issi gimbey de7ees.
EZE 42:8 Kare dabaaba baggara de7iya kifileta adussatethay ishatamu wadha gidishin, Xoossa keethaa sinthan de7iya kifileta adussatethay xeetu wadha.
EZE 42:9 Kare dabaabape gathi geliya wode doloha baggara garsa kifileta geliya pengey de7ees.
EZE 42:10 Dugeha baggara kare dabaaba kaallidi Xoossa keethaa dabaabara oyketidi keexetida kare dabaabako simmida kifiley de7ees.
EZE 42:11 He keethaa kifileta sinthan ogey de7ees. He keethay qommo baggan de7iya keethara issi gina; adussatethay, dalgatethay, kifiletinne pengeti ubbay issi gina.
EZE 42:12 Dirsa gimbey wuriya doloha bagga gaxa doomidi gimbiyas dugeha baggara de7iya kifileta geliya pengey de7ees.
EZE 42:13 He uray taako, “Xoossa keethaa dabaaba sinthan, pudeha bagganinne dugeha baggan de7iya kifileti kahinetassa. He kifileta giddon Godaa sinthan oothiya kahineti ubbaafe geeshsha kathaa maana. He kifileti geeshshi gidiya gisho, ubbaafe geeshsha imota, hessika katha yarsho, nagara yarshonne naaqo yarsho enti yan wothana.
EZE 42:14 Kahineti issi toho Ubbaafe Geeshsha Bessaa gelidaape guye, Xoossaas oothiya wode ma77iya ma7oti geeshshi gidiya gisho, banta ooso ma7uwa laammonnashin kare dabaaba keyanaw danda7okona. Enti asaako kare keyishe kase ma7iya hara ma7ota ma7idi keyanaw koshshees” yaagis.
EZE 42:15 He uray Xoossaa keetha gaatha baggaa wadhidi wursidaape guye doloha bagga dirsa pengiyara tana kare kessidi, Xoossa keethaa kare baggaa yuushuwa ubba wadhis.
EZE 42:16 Wadha xam7a ekidi, doloha baggaa wadhin, ichashu xeetu wadha gidis.
EZE 42:17 Pudeha baggaa he xam7an wadhin, ichashu xeetu wadha gidis.
EZE 42:18 Dugeha baggaa wadhin, ichashu xeetu wadha gidis.
EZE 42:19 Wuloha baggaa wadhin, ichashu xeetu wadha gidis.
EZE 42:20 Hessada oothidi, I oyddu baggaa ubbaa wadhis. Iya yuushuwan ichashu xeetu wadha aduqiya, qassi ichashu xeetu wadha dalgiya dirsa gimbey de7ees. He gimbey geeshsha bessanne coo bessaa shaakanaasa.
EZE 43:1 He uray tana doloha bagga pengiyako ehis.
EZE 43:2 Taani Isra7eele Xoossaa bonchoy doloha baggafe yeysa be7as. Iya yuussaa girsay kixa haatha guntha mela; biittay iya bonchuwan poo7is.
EZE 43:3 Ta be7ida qoncethay kase Goday Yerusalaame katamaa dhaysanaw yida wode be7ida qoncethaa daanees. Koboora shaafa matan taani be7ida qoncethaa daanees. He wode ta som7uwa sa7a gathada gufannas.
EZE 43:4 Godaa bonchoy doloha pengiyara Xoossaa keethaa giddo gelis.
EZE 43:5 He wode Godaa Ayyaanay tana denthidi, giddo dabaaba gelsin, Heko, Godaa bonchoy Xoossa keethaa kumis.
EZE 43:6 Yan he uray ta matan eqidashin, Xoossa keetha giddofe Goday taw odishin si7as.
EZE 43:7 I taako, “Asa na7aw, haysi ta araatay uttiyanne ta tohoy yedhiya besse. Ta Isra7eele asaa giddon merinaw daana. Hizape guye Isra7eele asaa gidin, enta kawota gidin, eeqa goyinnidi woyko banta kawota hawulte goyinnishe ta geeshsha sunthaa tunisokona.
EZE 43:8 Issi godaa xalaali tananne enta shaakin, banta pengiya ta pengiya matan, banta penge zizgiya ta penge mithaa matan essidosona. Banta ixetida oosuwan ta geeshsha suntha tunisidosona. Hessa gisho, taani ta hanquwan enta dhaysas.
EZE 43:9 Hiza eeqa goyinno aggo; banta kawota hawulte ta matape diggo. Yaatiko, ta enta giddon merinaw daana.”
EZE 43:10 Zaaridi Goday taako, “Asa na7aw, ta nena bessida Xoossa keethaa oosuwa Isra7eele asaas oda; enti banta oothida nagaran yeellatana mela iya medhuwaba entaw oda.
EZE 43:11 Enti banta oothidaban yeellatiyaba gidiko, Xoossaa keethaa mallaa, I keexetida hanota, keyiya dethata, geliya pengetanne iya kumetha misiliya entaw qoncisa. Hessadaka, iya wogaa, iya higgiya ubbaa enta erisa. He keetha hanota kaallana mela iya higgiyanne woga naagana mela enti xeellishin xaafa.
EZE 43:12 Xoossa keetha higgey haysa, zumaa huuphen, Xoossa keethaa yuushuwan de7iya bessa ubbay Ubbaafe Geeshshi gidana.”
EZE 43:13 Yarsho bessay kase Xoossa keethaa wadhidaysada, issi wadhanne oyddu biradhe gujidi wadhetis. Yarsho bessaa baasuwa yuushon issi wadha ziqanne issi wadha dalgiya olli de7ees; he ollay kare baggara issi takadho dhoqees; hessi yarsho bessa dhoqatethaa.
EZE 43:14 Baasuwape bidi, koyro dethaa gakanaw dhoqatethay nam7u wadha; gompay issi wadha. Guutha dethaafe bidi gita dethaa gakanaw dhoqatethay oyddu wadha; qassi gompay issi wadha.
EZE 43:15 Yarshoy xuussa coocey de7iya wursetha dethay oyddu wadha dhoqa. I oyddu maazane gididi, oyddu maazaniya bolla issi issi kacey de7ees;
EZE 43:16 Tamay eexiya coocey oyddu maazane gididi, adussatethaynne dalgatethay tammanne nam7u wadha.
EZE 43:17 Nam7antho dethay hessa mela oyddu maazane gididi, adussatethaynne dalgatethay tammanne oyddu wadha. He dethaa kare bagga gaxay issi takadho dhoqees; yuushon issi wadha olli de7ees. Yarsho bessaa pude efiya dethati doloha baggan de7oosona.
EZE 43:18 Ubbaa Haariya Goday taako, “Asa na7aw, xuussa yarsho yarshanawunne suuthu wurxanaw, yarsho bessa gimbidi wursiya gallas oosetana wogay haysa.
EZE 43:19 Ta sinthan eqidi oothiya Saadoqa yaraape yeletida Leewe koche gidida kahinetas nagara yarsho oothada issi wofaano imma” yaagees Ubbaa Haariya Goday.
EZE 43:20 Neeni he suuthaafe ekada, oyddu kaceta, nam7antho dethaa oyddu maazanetanne he dethaa gaxaa tiya. Hessada oothada, yarsho bessa geeshsha.
EZE 43:21 Nagara yarshos imetida kormaa ekada, Xoossaa keethaas teqetida geeshsha bessaafe kare baggara iyaw giigida bessan xuugga.
EZE 43:22 Wontetha gallas borey bayna issi kole ekada, nagara yarsho oothada yarsha. Kase korma suuthan geeshshidaysada he koliya suuthan yarsho bessa geeshsha.
EZE 43:23 Geeshsha simmada borey bayna issi wofaanonne issi maraze ekada,
EZE 43:24 nam7aaka Godaa sinthe shiisha. Kahineti enta bolla maxine laallidi, Godaas xuussa yarsho oothidi yarsho.
EZE 43:25 “Laapun gallas kumethi, issi issi gallas, issi kole, issi wofaanonne issi maraze nagara yarsho oothada yarsha.
EZE 43:26 Kahineti laapun gallas kumethi yarsho bessa geeshshidi Godaas dummayo.
EZE 43:27 Ha gallasati wuriya wode, hospuntho gallasaape doomidi, kahineti xuussa yarshonne issifetetha yarsho shiisho. He wode ta hintenan ufaytana” yaagees Ubbaa Haariya Goday.
EZE 44:1 Hessafe guye, he uray tana guye zaaridi, Xoossa keethas doloha baggara de7iya kare bagga dirsa pengiyako ehiya wode dirsa pengey gordetidi uttis.
EZE 44:2 Goday taako, “Ha pengey gordan daanape attishin, nam7antho dooyetenna. Goday Isra7eele Xoossay yaara gelida gisho oonika yaara gelenna. Hessa gisho, he pengey gordan daana.
EZE 44:3 Gidoshin, Isra7eele halaqay, Godaa sinthan uythi maanaw yan uttanaw danda7ees. Pengiya barandaara I gelanawunne keyanaw danda7ees” yaagis.
EZE 44:4 He uray tana pudeha pengiyako efiya ogiyara efidi, Xoossa keethas sintha bagga gathis. Yan gidada ta be7iya wode, Heko, Godaa bonchoy Xoossa keethaa kumidi uttidaysa be7ada som7ora sa7an gufannas.
EZE 44:5 Goday taako, “Asa na7aw, Xoossa keetha wogatanne iya higgeta ubbaa ne be7eysanne si7eysa loythada naaga. Xoossa keethaa gelanawunne keyanaw bessiya asatinne bessonna asati oonanteko loythada akeeka.
EZE 44:6 Makallancho Isra7eele asaas, Ubbaa Haariya Goday haysada yaagees gada oda. ‘Hinteno, Isra7eele asaw, hinte oothiya tuna oosota aggite.
EZE 44:7 Hinte taw ta kathaa, modhuwanne suuthu yarsho oothidi shiishiya wode wozanaynne ashoy qaxaretiboona allaga asata Xoossa keethi gelsidi ta keethaa tunisideta; ta caaquwa menthideta.
EZE 44:8 Ta geeshsha miisheta bolla aawatona ixidi, ta keethan allagata aawaydeta’ ” yaagees.
EZE 44:9 Hessa gisho, Ubbaa Haariya Goday haysada yaagees: “Isra7eele asaa giddon de7iya allaga asi, ba wozananinne ba ashuwa qaxaretiboona, oonika ta keetha gelopo.”
EZE 44:10 “Tana aggidi, Isra7eele asaara eeqa goyinnida Leeweta ta seerana.
EZE 44:11 Enti ta keethan oosancho gido; ta keetha dirsa pengeta naago; Xoossa keethaa oosuwaka ootho. Enti xuussa yarshonne asay ehiya hara yarsho shuko; qassi asaas oothanaw asaako shiiqo.
EZE 44:12 Shin enti kase Isra7eele asaa eeqa goyinnisida gishonne asaa nagarako kaalethida gisho, enti banta nagaraa seera ekana mela ta kushe denthada caaqas” yaagees Ubbaa Haariya Goday.
EZE 44:13 Enti kahine gididi oothanaw taako shiiqopo; woyko taw dummatida geeshshabakonne Ubbaafe Geeshsha Bessaako shiiqopo. Enti banta oothida tuna oosuwa gisho, oyshetana.
EZE 44:14 Hessa gisho enti Xoossa keethan aawatanadanne iya giddon oothanaw de7iya ooso ubbaa oothana mela ta enta shuumana.
EZE 44:15 “Shin Isra7eele asay tana aggidi, ta sinthafe haakida wode Xoossa keethaa wogaa ammanetidi polida, Leewe koche gidida kahineti, Saadoqa yarati, taw oothanaw taako shiiqo. Modhdhuwanne suuthaa shiishidi enti ta sinthan ootho” yaagees Ubbaa Haariya Goday.
EZE 44:16 Xoossa keethaa enti gelo; taw oothanaw ta yarsho bessa enti shiiqo; aawatetha enti oyko.
EZE 44:17 Enti Xoossa keethaas giddo dabaaba geliya wode, liinope dadetida ma7o ma7o; giddo dabaaba pengen woyko Xoossaa keetha giddon oothiya wode suufe ma7o ma77ofa.
EZE 44:18 Enti banta huuphen liino goxidi; banta xeessan liino qantha sure danco; cawaya ma7o ma7ofo.
EZE 44:19 Asay de7iya kare dabaaba enti keyanaape sinthe Xoossa keethan oothishe ma7ida ma7uwa qaaridi, geeshsha kifiletan wotho. Hessika, asay enta geeshsha ma7uwa bochidi qohetonna melasa.
EZE 44:20 “Kahineti banta huuphiya meedetofo woyko adussidi dichofo; banta huuphiya maaran qanxeto.
EZE 44:21 Ay kahineti giddo dabaaba geliya wode woyne ushshi uyopo.
EZE 44:22 Enti azini hayqida, woyko sayo maccas ekofo. Isra7eele asaape geela7o eko; woyko azinay kahine gididi de7ishe hayqida maccas eko.
EZE 44:23 “Kahineti Godaas dummatidabaanne dummatonnaba giddon de7iya dummatethaa ta asaa tamaarso; geeshshinne tuna giddon de7iya dummatethaa enta besso.
EZE 44:24 Ay mootoy dendikoka, kahineti higgey odeysada pirdo. Ta higgeynne ta wogay geysada ta ba7aaleta boncho; ta Sambaata dummayidi boncho.
EZE 44:25 “Kahiney hayqida ahako shiiqidi, bana tunisopo. Gidoshin, hayqiday aawa woyko aayo woyko iya adde na7a woyko macca na7a woyko isha woyko azina gelaboonna micho gidiko bana tuniso.
EZE 44:26 Tunidaape guye, laapun gallas gam7o; hessafe guye, I geeshshi gidana.
EZE 44:27 Geeshsha bessan haggaazanaw giddo dabaaba geliya wode ba nagaraa gisho yarsho shiisho” yaagees Ubbaa Haariya Goday.
EZE 44:28 Kahinetas laati baawa; ta entaw laata. Isra7eele biittan entaw ay laataka immopite; enta laatay tana.
EZE 44:29 Enti katha yarsho, nagara yarshonne naaqo yarsho mo. Isra7eele biittan Godaas dummayidaba ubbay entassa.
EZE 44:30 Koyro gakiya dumma dumma kathaa xeera ayfeynne hinte Godaas immiya imota ubbay kahinetassa. Hinte keethay anjetana mela hinte dhiilliyafe koyro kushiya entaw immite.
EZE 44:31 Kahineti bawuta woyko do7i wodhida kafo asho woyko mehe asho moopo.
EZE 45:1 “Biittaa laattanaw hinte saaman shaakiya wode he biittafe issi saamaa Godaas dummayite. Hessika tammanne nam7u kilo mitirenne bagga aduqiyanne tammu kilo mitire dalgiya besse gido. He bessay ubbay geeshsha besse gido.
EZE 45:2 He bessaafe oyddu maazane de7iya adussatethaynne dalgatethay issi gina gidiya ichashu xeetu wadha, bessi Xoossa keethaas teqeto; iya yuushon ishatamu wadha gidida kaysa bessi de7o.
EZE 45:3 He Godaas dummayida bessaafe adusatethay tammanne nam7u kilo mitirenne bagga, gompay ichashu kilo mitire gidida besse wadhada shaaka. He bessay Ubbaafe geeshsha bessay de7iya Xoossa Keethas, gididi de7o.
EZE 45:4 Hessi Xoossa keetha giddon Godaas haggaazanaw, iyako shiiqiya kahinetas dummatida geeshsha bessi gido. Hessi kahineta keethaynne Xoossa keethay keexetiya besse gido.
EZE 45:5 Qassi attida tammanne nam7u kilo mitire bagga aduqiyanne ichashu kilo mitire bagga dalgiya bessay Xoossaa keethan oothiya Leewetas laata gido; enti bantaw duussa katamata yan keexo.
EZE 45:6 “Godaas dummayida bessaa matan tammanne nam7u kilo mitirenne bagga aduqiyanne nam7u kilo mitirenne bagga dalgiya bessay katamaa keexanaw de7o; he bessay Isra7eele asa ubbaas gido.
EZE 45:7 Isra7eele halaqaas imetida gishoy nam7u baggara Godaas dummayida bessaaninne katamaa bessan zawatees. I wuloha baggara Medetiraane Abbaa gakees; doloha baggara Isra7eele biitta zawa gakees. Iya adussatethay Isra7eele kochaafe issuwa gishuwada wuloha bagga zawape bidi, doloha bagga zawa gakees.
EZE 45:8 He gishoy Isra7eele halaqaas laata gade gido. Hizape guye ta halaqati ta asaa un7ethofo; enti Isra7eele asa ubbay ba kochan kochan biitta ekanaada oothonna” yaagees.
EZE 45:9 Ubbaa Haariya Goday haysada yaagees; “Hinteno, Isra7eele halaqato, hintew ha77i gidana! Buqethinne asaa un7etho aggite; suure pirdite; xillotethi oothite. Ta asaa enta laata biittafe shoddidi gooddeysa aggite. Haysa odey tana Ubbaa Haariya Godaa.
EZE 45:10 Hintew issuwas issuwas like mizaaneynne maka miishey de7o.
EZE 45:11 Maka miishe ubbaas giddo gidiya gomare geetetiya maka miishe gido. Melaba makiya ifa geetetiya miisheynne gukiyaba makiya baate geetetiya miishey issi like gido. Hessa guussay, issi gomerey tammu ifaranne tammu baatera issi gina gidees.
EZE 45:12 Guuthaba makiya wode hinte maka miishey saqile gido. Laatamu geeri issi saqile gido; usupun tammu saqiley issi minaane gido.
EZE 45:13 “Hinte imuwa immishe haysada immite. Hinte shiishiya gistefe usupun tammaafe issi kushe, bangafe usupun tammaafe issi kushe gido.
EZE 45:14 Shamaho zaytiyape xeetape issi kushe immite. Hessa makiya wode ne makiya miishey baate gido. Tammu baatey issi gomare woyko issi Qoore gidees.
EZE 45:15 Isra7eele asay heemmiya nam7u xeetu mehepe de7iya issi wudiyape issi issi mehe immite. Hessi asaa nagara atotethas yarshetiya, katha yarshora, xuussa yarshoranne issifetetha yarshora shiiqana” yaagees Ubbaa Haariya Goday.
EZE 45:16 Biittan de7iya asa ubbay hessa ubbaa Isra7eele halaqaas immo.
EZE 45:17 Halaqay oothiya oosoy, Isra7eele asay bonchiya ba7aaletan, ageena xeeron Sambaatata gallasan, xuussa yarsho, katha yarshonne ushsha yarsho shiisho. Isra7eele asaa nagara atotethas nagara yarsho, katha yarsho, xuussa yarshonne issifetetha yarsho koshshiyaba immo.
EZE 45:18 Ubbaa Haariya Goday haysada yaagees: “Koyro ageenan, koyro gallasan borey bayna issi wofaano Xoossa keethaa geeshshanaw shiisha.
EZE 45:19 Kahiney nagaraa yarsho suuthaafe ekidi, Xoossaa keetha penge xangeta, yarsho bessa yuushon de7iya dethan de7iya oyddu maazanetanne giddo dabaaba efiya dirsa penge xangeta tiyo.
EZE 45:20 Oonika qoponna woyko eronna oothida nagara atotethas, he ageenan laapuntho gallas hessada ootha. Yaatada Xoossa keetha geeshsha.
EZE 45:21 “Koyro ageenan, tammanne oyddantho gallas Paasika Ba7aale bonchite; laapun gallas gakanaw, irshoy bayna uythi miite.
EZE 45:22 Koyro gallas halaqay ba gishonne ba asaa gisho nagara yarsho oothidi issi kormaa shiisho.
EZE 45:23 He ba7aaley bonchetiya laapun gallasatan gallas gallas borey bayna laapun kormatanne laapun maraze dorsi xuussa yarsho oothidi, Godaas shiisho. Hessara gathidi nagara yarshos gallas gallas issi deesha kole shiisho.
EZE 45:24 Issi issi kormanne maraze yarshiya wode, katha yarshos tammane laapun kilo giraame gistenne heedzu litiro zayte shiisho.
EZE 45:25 “Laapuntho ageenan, tammanne ichashantho gallasan doomiya laapun gallasa ba7aale wode nagara yarsho, xuussa yarsho, katha yarshonne zayte kaseysafe dummayonna halaqay shiisho” yaagees.
EZE 46:1 Ubbaa Haariya Goday haysada yaagees: “Giddo dabaaba gelsiya doloha bagga dirsa pengey usupun ooso gallasatan gordetidi gam7o; shin Sambaata gallasinne ageena xeero gallasan dooyeto.
EZE 46:2 Isra7eele halaqay dirsa pengiya baggara kare dabaabape gaathi gelidi, dirsa pengiya matan eqo. Kahineti I immida xuussa yarshonne issifetetha yarsho shiisho. I yan dirsa pengiya matan goyinnidi simmidi kare keyo. Shin dirsa pengey omarsi gakanaw gordetenna.
EZE 46:3 He biitta asay Sambaataninne ageena xeero wode he gido dabaaba pengiya sinthan Godaa goyinno.
EZE 46:4 Halaqay Sambaata gallas Godaas xuussa yarsho oothidi, borey bayna usupun urge dorsatanne issi maraze dorsi shiisho.
EZE 46:5 Issi dorsa urgiyara tammane laapun kilo giraame katha yarsho immo. Urge dorsatar shiiqiya katha yarshoy halaqay baw shiishanaw koyeysa mela gido. Qassi issi issi tammane laapun kilo giraame kathara heedzu heedzu litiro zaytey immo.
EZE 46:6 Ageena xeero gallas borey bayna issi wofaano, usupun urge dorsatanne issi maraze shiisho.
EZE 46:7 Issi issi wofaanonne urge dorsi yarshiya wode katha yarshos issi issi tammanne laapun kilo giraame gistenne heedzu heedzu litiro zayte shiisho. Urge dorsatara shiiqiya katha yarshoy halaqay baw shiishanaw koydaysa mela gido.
EZE 46:8 Halaqay gelishe, dirsa penge barandaara aadhidi gelo; keyisheka yaara keyo.
EZE 46:9 “Asay ba7aale gallas Godaa goyinnanaw yaa wode goyinnanaw pudeha pengiyara gelidaysati garsa pengiyara keyo; dugeha pengera gelidaysati pudeha pengera keyo. Oonika ba sinthan de7iya pengiyara sitti gidi keyope attishin, ba gelida pengiyara keyopo.
EZE 46:10 Enti geliya wode, halaqay entara gelo; enti keyiya wode entara keyo.
EZE 46:11 “Ufaysa gallasataninne laytha ba7aaletan issi issi kormaranne issi issi maraziyara shiiqiya katha yarshoy issi issi tammane laapun kilo giraame gistera heedzu heedzu litiro zaytera gido. Qassi urge dorsaara shiiqiya yarshoy halaqay baw shiishanaw koydaysa mela gido.
EZE 46:12 Halaqay ba dosan immiya yarsho, hessika xuussa yarsho woyko issifetetha yarsho Godaas ehiya wode, doloha bagga dirsa pengey iyaw dooyeto. Ba xuussa yarshuwa woyko issifetetha yarshuwa Sambaata gallas I shiisheysada shiisho. I keyidi bin, dirsa pengey gordeto.
EZE 46:13 “Halaqay gallas gallas borey bayna issi laythi gidida issi dorse xuussa yarsho oothidi, Godaas shiisho; I hessa wonta guura pacey bayna ootho.
EZE 46:14 Hessadaka nam7u kilo giraame dhiilley issi litiro zaytera munuqetidi, wonta guura katha yarsho gididi shiiqo. Hessi hinte Godaas gallas gallas shiishiya yarsho wogaa.
EZE 46:15 Haysi urge dorsay, kathinne zaytey paci bayna wonta wonta xuussa yarsho gididi shiiqanaw bessees” yaagees.
EZE 46:16 Ubbaa Haariya Goday haysada yaagees: “Halaqay ba gadiyape shaakidi, ba adde naytape issuwas immiko, hessi he na7aasinne iya naytas laata gidees.
EZE 46:17 Shin halaqay ba gadiyape shaakidi, ba aylletape issuwas immiko, Ishatamantho Laytha ba7aaley gakanaw, he gadey iyabaa gidees. Hessafe guye, halaqaas simmo; hessi halaqaasa gidiya gisho, merinaw iyawunne iya naytas laata gidees.
EZE 46:18 Halaqay ase naaqidi, asaa laata gadiya wolqan ekofo. Ta asay ba laata gadiyape shodetonna mela I ba adde naytas ba gadiyape immo” yaagees.
EZE 46:19 Hessafe guye, he uray tana qommo baggan de7iya kahineta kifileta geliya pengiyako ehis. Hessati giddo dabaaba gathiya garsa bagga dirsa pengiya matan de7eyisata. Kifiletape wuloha baggara taani issi bessi be7as.
EZE 46:20 I taako, “Ha bessay kahineti nagara yarshonne naaqo yarsho ashuwa doysiya bessinne katha yarsho uukiya bessi. He bessan go7etiya gaasoy asaa qohoy gakonna mela geeshsha yarshuwafe kare dabaaba keyenna” yaagis.
EZE 46:21 Hessafe guye, he uray tana kare bagga dabaaba efidi, dabaaba oyddu maazaneta yuushshidi bessis. Issi issi maazaniyan guutha dabaabi de7ees.
EZE 46:22 Oyddu maazanetan de7iya dabaabati issi gina; enti oytamu wadha adusse; hastamu wadha orde.
EZE 46:23 He oyddu dabaabata yuushon shucha gimbey de7ees; gimbiya garsan tama eethiya bessi de7ees.
EZE 46:24 He uray taako, “Haysi ubbay Xoossaa keethan ootheysati asay ehiya yarshuwa doysiya bessata” yaagis.
EZE 47:1 He uray zaaridi, tana Xoossa keetha geliya pengiyako efis. Xoossa keetha geliya pengiyafe garsara haathi pultidi, Xoossa keethaafe doloha bagga goggees. Xoossa keethas garsa baggara duge goggidi, yarsho bessaafe garsa baggara kanthees.
EZE 47:2 I tana qommo pengiya baggara kessidi, doloha pengiyako yuushshis. He pengiyafe garsa baggara haathi goggees.
EZE 47:3 He uray wadha wodoro ba kushen oykidi, doloha bagga bidi, goggiya haatha kaallidi, issi mukulu wadhis. Tana haatha giddora kaalethis; haathay taw shuqule gakis.
EZE 47:4 Zaaridi issi mukulu wadhidi, haatha giddora tana kaalethis. Haathay taw gulbata gakis. Qassi issi mukulu wadhidi, tana haatha giddora kaalethis. He wode haathay taw xeesse gakis.
EZE 47:5 I qassi issi mukulu wadhis. Shin he haathay daro ciimmo gidiya gisho, ta pinnanaw danda7abike; I asi wadhonna pinnanaw danda7onna shaafa gidis.
EZE 47:6 He uray taako, “Asa na7aw, haysa akeekada be7a?” yaagis. Hessafe guye, I tana shaafa gaxa guye zaaris.
EZE 47:7 Ta yaa gakiya wode shaafa gaxan ha baggaranne ya baggara daro mithi de7eysa be7as.
EZE 47:8 I taako, “Ha haathay doloha bagga goggidi, Arabe zangaaranne Maxine Abban gelees. Haathay Maxine Abbaa geliya wode Maxine Abbay ooraxidi xillo haathi gidees.
EZE 47:9 Shaafay goggidi biya bessan dumma dumma medhetethati de7oosona. He shaafay yaara goggiya gishonne he haatha oorathidi xillisiya gisho daro moloti yan de7oosona. Hessa gisho haathay goggiya bessan de7iya medhetethati ubbay de7on daana.
EZE 47:10 Molo oykiya asati abba gaxan eqana; Engaadape bidi En Eglayma gakanaw de7iya bessay molo oykanaw gite yeggiya besse gidana. Medetiraane Abban de7iya molotada, yan daro dumma dumma moloti daana.
EZE 47:11 Shin abba gaxan de7iya eelleynne cafa haathay maxine gididi attanaape attishin, ooraxidi xillenna.
EZE 47:12 He shaafa doonan ha baggaranne ya baggara meetetiya ayfe immiya, dumma dumma qommo mithati de7oosona. Enta haythay qoqofetenna; ayfe aggokona. Xoossa keethaafe keyiya haathay entako goggiya gisho, enti ageenan ageenan ooratha ayfe ayfana. Enti ayfiya ayfey kathi gidana; enta haythay dhale gidana” yaagees.
EZE 47:13 Ubbaa Haariya Goday haysada yaagees: “Tammanne nam7u Isra7eele zerethaas laata biitta oothada, ne shaakana zaway haysa. Yoosefa kochaas nam7u saami imeto.
EZE 47:14 Taani kase hinte mayzata ha biitta laatisanaw caaqas; ha77i hinte ubbay shaakidi laattite.
EZE 47:15 “Pudeha bagga biitta zaway haysa: Medetiraane Abbaafe dendidi, Hetloonanne Hamaata kanthidi, Xedaada gakees.
EZE 47:16 Damasqofenne Hamaatape giddon de7iya Berootanne Sibrayma katamata kanthidi, Hawurana zawan de7iya Tikoona katamaa gakees.
EZE 47:17 Isra7eele biitta pudeha bagga zaway Hamaata biitta pudeha baggan aggidi, Medetiraane Abbaafe doloha bagga bidi, Damasqo zawan de7iya Haxar-Enaana katamaa gakees.
EZE 47:18 “Doloha bagga zaway Haxar-Enaanape dendidi, Damasqofenne Hawuranape gidduwara kanthees. Isra7eelepenne Galadape giddon de7iya Yordaanose shaafan zawatidi Maxine Abbaa kanthidi Tamaare katamaa gakees.
EZE 47:19 “Dugeha bagga zaway Tamaarape dendidi, Mariba Qaadesan de7iya haatha gakees. Yaape Gibxe shaafape bidi Medetiraane Abbaa gakees. Hessi dugeha zawa.
EZE 47:20 “Wuloha bagga zaway Medetiraane Abbaa gididi, pudeha baggara Hamaata sinthara kanthidi wuloha bagga gakees.
EZE 47:21 “Ha biitta Isra7eele zareti shaakidi ekite.
EZE 47:22 Hintenne hinte giddon na7a yelidi de7iya bete asaas laata biitta oothidi shaakite. Enta hinte, hinte biittan yeletida Isra7eele asada xeellite. Enti Isra7eele kochatara taybetidi biitta saaman shaaketidi eko.
EZE 47:23 Bete asi Isra7eelen kochaara awunka de7iko, he I de7iya kochaa giddon iyaw laata biitta immite” yaagees Ubbaa Haariya Goday.
EZE 48:1 “Biittaa shaakanaw mazgabetida kochata sunthay haysa: Pudeha baggara issi saami Daane kochaas imeto. Hessika Hetloonape Hamaata efiya ogiya kaallidi, yaape Damasqo biittan de7iya Haxar-Enaana katamaa gakees. Hessi dolohape bidi wuloha gakanaw de7iya bessaas pudeha bagga zawa gidana.
EZE 48:2 Daane zawara oyketidi, dolohape wuloha gakanaw de7iya issi saamay Aseera kochaas imeto.
EZE 48:3 Aseera zawara oyketidi, dolohape wuloha gakanaw de7iya issi saamay Niftaaleme kochaas imeto.
EZE 48:4 Niftaaleme zawara oyketidi, dolohape wuloha gakanaw de7iya issi saamay Minaase kochaas imeto.
EZE 48:5 Minaase zawara oyketidi, dolohape wuloha gakanaw de7iya issi saamay Efreema kochaas imeto.
EZE 48:6 Efreema zawara oyketidi, dolohape wuloha gakanaw de7iya issi saamay Robeela kochaas imeto.
EZE 48:7 Robeela zawara oyketidi, dolohape wuloha gakanaw de7iya issi saamay Yihuda kochaas imeto.
EZE 48:8 “Yihuda zawara oyketidi, dolohape wuloha gakanaw de7iya issi saama dummaya wotha. Iya gompay tammanne nam7u kilo mitirenne bagga gido. Dolohape wuloha gakanaw de7iya adussatethay issi kochaa shaakin gakiya saamara gina. Iyaw giddo ginan Xoossa keetha de7ees.
EZE 48:9 “He bessaafe neeni Godaas dummayada wothiya bessay tammanne nam7u kilo mitirenne bagga adussenne tammu kilo mitire dalga gido.
EZE 48:10 He bessaafe baggay kahinetas dummatida besse gido; I pudeha baggara tammanne nam7u kilo mitirenne bagga adusse; wuloha baggaranne doloha baggara ichashu kilo mitire dalga gido. Xoossa keethay iyaw giddo ginan de7ees.
EZE 48:11 Ha dummatida bessay Isra7eele asay ta ogiyape kare kare keyida wode entara kare keyida Leewetada giddona, ammanetidi taw oothishe gam7ida, geeshsha kahinetas, Saadoqa yaratas imeto.
EZE 48:12 Hessi Godaas dummatida biittafe entaw dumma gisho; I Ubbaafe geeshsha Bessi. Enta zaway Leewetas saaman imeto.
EZE 48:13 “Kahineta zawara oyketidi, Leewetas adussatethay tammanne nam7u kilo mitire bagga, dalgatethay ichashu kilo mitire gidida issi saami imeto.
EZE 48:14 Enti he biittafe bayzanaw woyko laammanaw koshshenna. He biittay lo77o biitta gidiya gisho, hara asa kushen gelanaw bessenna; Godaas I geeshsha besse.
EZE 48:15 “Attida nam7u kilo mitirenne bagga dalganne tammanne nam7u kilo mitirenne bagga adussa bessay katamaa asa ubbay keethaasinne mehe heemmiya besse gido; katamay he biitta giddo ginan de7o.
EZE 48:16 He katamay oyddu maazanera de7ees. Pudeha baggay oyddu mukulunne ichashu xeetu wadha; dugeha baggay oyddu mukulunne ichashu xeetu wadha; doloha baggay oyddu mukulunne ichashu xeetu wadha; wuloha baggay oyddu mukulunne ichashu xeetu wadha.
EZE 48:17 Katamaas hentha gadey de7o; he gadey pudeha baggara, dugeha baggara, doloha baggaranne wuloha baggara nam7u xeetanne ishatamu wadha dalga gido.
EZE 48:18 Xoossa keethay keexetidi simmin, geeshsha bessan attida bessay doloha baggara adussatethay ichashu kilo mitire; wuloha baggara adussatethay ichashu kilo mitire gido. Attida biittay he kataman de7iya asaas goshsha biitta gidana.
EZE 48:19 He kataman de7iya Isra7eele zare gidida oonika he biitta goyanaw danda7ees.
EZE 48:20 Hinte dummaya bessaa oyddu maazaney tammanne nam7u kilo mitirenne bagga aduqo. He bessay katamay keexetida bessaanne geeshsha bessaa gujees.
EZE 48:21 “Geeshsha bessaafenne katamaa bessaafe attida biittay halaqaa gisho gido. Hessika tammanne nam7u kilo mitirenne bagga gidida geeshsha bessaafe bidi doloha bagga zawa gakees. Wuloha baggan de7iya tammanne nam7u kilo mitire gidida katamaa biittay wuloha baggaa zawa gakees. Hessada hanidi geeshsha bessaynne Xoossay keethay giddon gidana.
EZE 48:22 Hessa gisho, Leeweta biittaynne katamaa biittay halaqaas imetida biittafe giddon gidana. He halaqaa biittay pudeha baggara Yihuda laatan, garsa baggara Biniyaame laatan zawatees.
EZE 48:23 “Attida kochatas biittay haysada hanidi shaaketis. Dolohape wuloha gakanaw de7iya issi saamay Biniyaame kochaas imeto.
EZE 48:24 Biniyaame zawara oyketidi, dolohape wuloha gakanaw de7iya issi saamay Simoona kochaas imeto.
EZE 48:25 Simoona zawara oyketidi, dolohape wuloha gakanaw de7iya issi saamay Yisakoora kochaas imeto.
EZE 48:26 Yisakoora zawara oyketidi, dolohape wuloha gakanaw de7iya issi saamay Zabloona kochaas imeto.
EZE 48:27 Zabloona zawara oyketidi, dolohape wuloha gakanaw de7iya issi saamay Gaade kochaas imeto.
EZE 48:28 Gaade dugeha zaway Tamaara katamaape dendidi, Mariba Qaadesan de7iya pultouwa gakidi, Gibxe shaafa kaallidi, Medetiraane Abbaa gakees.
EZE 48:29 “Hinte Isra7eele asaas shaakana biittay haysa; hessi enta gishuwa” yaagidi Ubbaa Haariya Goday odis.
EZE 48:30 Katamaape keyiya pengeti haysata. Pudeha baggara de7iya oyddu mukulunne ichashu xeetu aduqiya pengiyafe doomidi,
EZE 48:31 katamaa pengeti Isra7eele kochata sunthan xeegetana. Pudeha baggara de7iya heedzu pengeti Robeela penge, Yihuda pengenne Leewe penge gidana.
EZE 48:32 Doloha baggara oyddu mukulunne ichashu xeetu wadha aduqiya heedzu pengeti, Yoosefa penge, Biniyaame pengenne Daane penge gidana.
EZE 48:33 Dugeha baggara oyddu mukulunne ichashu xeetu aduqiya heedzu pengeti, Simoona penge, Yisakoora pengenne Zabloona penge gidana.
EZE 48:34 Wuloha baggara oyddu mukulunne ichashu xeetu wadha aduqiya heedzu pengeti, Gaade penge, Aseera pengenne Niftaaleme penge gidana.
EZE 48:35 “Katamaa yuushoy kumethi wadhin, tammanne hospun mukulu wadha gidana. He wodepe doomidi he katamay, ‘Goday Yan De7ees’ geetetidi xeegetana” yaagees.
DAN 1:1 Yihuda kawoy Iyo7aqeemi kawotida heedzantho laythan Babiloone Kawoy Nabukadanaxoori Yerusalaame katama bolla dendi katamaa teqis.
DAN 1:2 Goday Yihuda kawa Iyo7akemenne Xoossa keethan de7iya miishetape baggaa, iya kushen aathidi immis. I he miisheta Sana7oora biittan de7iya ba eeqa xoossata keethi efidi, miishe minjiya keethan wothis.
DAN 1:3 Kawoy, Asfanaaza geetetiya ba oosanchota halaqaa haysada yaagidi kiittis: “Isra7eele asaa giddofe kawo koche gididaysatanne gita asata koche gididaysata doora.
DAN 1:4 Dooretana na7atethati, borey baynayisata, mala lo77ota, timirte ellesidi ekanaw danda7eyisata, akeekanchota, eratethi kumidaysatanne kawo gadhon oothanaw danda7eyisata gidanaw bessees. Enta Babiloone doonanne xaafo tamaarsa” yaagis.
DAN 1:5 Enti maana kathaanne uyana woyne ushsha kawa kathaafenne ushshafe gallas gallas immana mela kawoy kiittis. Heedzu laythi loohidaape guye kawa sinthe shiiqidi ooso doomana mela qofa kuuyis.
DAN 1:6 Dooretidaysata giddofe Yihuda koche gidida Daanela, Anaana, Misa7eelanne Azaara geeteteysati de7oosona.
DAN 1:7 Kawa oosanchota halaqay enta suntha laammidi, Daanela Bilxasoora, Anaana Sidiraaqa, Misa7eela Misaaqa, Azaara Abdanaago gidi sunthis.
DAN 1:8 Daaneli kawa kathaa midinne woyne ushsha uyidi, bana tunisonna mela ba wozanan qofa qachidi, he qofaa ekanaada, kawa oosanchota halaqaa woossis.
DAN 1:9 Xoossay, oosanchota halaqaa sinthan Daanelas sabanne qadhe immis.
DAN 1:10 Gidoshin, oosanchota halaqay Daanelako, “Hintew ha kathaanne ushsha kiitida ta godaa, kawa yayyayis. Hinte lagge gidida na7atethata som7uwafe hinte som7oy gilqidi bentiko, hinte gaason kawoy tana wodhana” yaagis.
DAN 1:11 Oosanchota halaqay shuumin Daanela, Anaana, Misa7eelanne Azaara naagiya addiyako, Daaneli haysada yaagis:
DAN 1:12 “Maanaw nuus atakilte, uyanaw haatha xalaala immada, nuna ne aylleta tammu gallas paaca.
DAN 1:13 Yaatada, nu som7uwanne kawo kathaa miya na7atethata som7uwa xeellada, nuna ne aylleta new bentidaysada ootha” yaagis.
DAN 1:14 I, hessa ekidi tammu gallas enta paacis.
DAN 1:15 Tammu gallasape guye, kawa kathaa mida na7atethata ubbaafe enta som7oy ciiyin, modhidi bentidosona.
DAN 1:16 I, entaw giigida kathaanne woyne ushsha diggidi atakilte immis.
DAN 1:17 Ha oyddu na7atethatas Xoossay eranne ubba qommo xuufenne timirte ekiya akeeka immis. Daaneli qoncethinne amuho birshethi erees.
DAN 1:18 Kawoy, na7atethati baako gelanaada kiitida wodey gakin, oosanchota halaqay enta Nabukadanaxoora sinthe ehis.
DAN 1:19 Kawoy, enta odisiya wode Daanela, Anaana, Misa7eelanne Azaara mela asi enta giddon bentibeenna. Yaatin, enti kawas oothanaw gelidosona.
DAN 1:20 Kawoy enta oychida ay cincatethaanne akeeka oyshan, iya kawotethan de7iya marotapenne bitanchotape enti tammu kushe aadhidi bentidosona.
DAN 1:21 Daaneli, kawoy Qiroosi kawotida koyro laytha gakanaw gam7is.
DAN 2:1 Nabukadanaxoori kawotida nam7antho laythan amuho amuhis. He amuhoy iya daganthin, dhiskoy iya ekonna ixis.
DAN 2:2 Hessa gisho, I amuhida amuhuwa iyaw odana mela maroti, bitanchoti, murunneysatinne xoolinto taybeysati yaana mela kawoy kiittis. Enti yidi iya sinthan eqidosona.
DAN 2:3 Kawoy entako, “Tana daganthiya amuho amuhas; he amuhoy aybeko eranaw koyayis” yaagis.
DAN 2:4 Xoolinto taybeysati Soore doonan, “Kawaw, merinaw kawota! Ne amuhuwa nuus ne aylletas oda; nu new iya birshethaa odana” yaagidosona.
DAN 2:5 Kawoy entako, “Hinte ha amuhuwanne iya birshethaa tana erisonna ixiko, ta hintena qanxana; hinte keethay buure yeggiya bessi gidanaysa ta hintew minthada odayis.
DAN 2:6 Shin hinte amuhuwanne iya birshethaa taw odiko, imota, woytonne daro boncho taape demmana. Hessa gisho, ane amuhuwanne iya birshethaa tana erisite” yaagis.
DAN 2:7 Enti zaaridi, “Kawoy amuhuwa nuus ba aylletas odo; nu iya birshethaa erisana” yaagidosona.
DAN 2:8 Kawoy zaaridi, “Ta mino qofa hinte eriya gisho wode adussanaw hinte koyeysa ta erayis.
DAN 2:9 Hinte amuhuwa taw odonna ixiko, issi pirdi hintena naagees. Hanotay laametana gidi hinte ufaysi oothiya gisho taw wordonne gene qaala odanaw maqetideta. Hessa gisho, amuhuwa taw odite. Yaatiko, hinte iya birshethaa erisanaw danda7eysa ta erana” yaagis.
DAN 2:10 Xoolinto taybeysati zaaridi, “Kawoy oychiya oysha zaaranaw danda7iya issi asika biittan baawa. Ay gitanne wolqaama kawoy marota, bitanchotanne xoolinto taybeyisata hessa melaba oychidi erenna.
DAN 2:11 Kawoy oychida oyshoy deexo; asa giddon doonna xoossatape attishin, hessa kawas qoncisanaw danda7ey baawa” yaagidosona.
DAN 2:12 Kawoy daro yilotidi, Babiloonen de7iya cincata ubbaa wodhanaada kiittis.
DAN 2:13 Cincata wodhanaw awaajoy keyis; Daanelanne iya laggeta wodhanaw asi kiitetis.
DAN 2:14 Kawa naageysata halaqay Ariyooki, Babiloonen de7iya cincata wodhanaw keyiya wode Daaneli iya cincatethaninne hiillan odisis.
DAN 2:15 I kawa naageysata halaqaa Ariyooka, “Kawoy haysa mela iita awaajo ayis kessidee?” gidi oychis. Ariyooki hanota Daanelas odis.
DAN 2:16 Daaneli kawako gelidi, amuhuwa birshethaa erisanaw baw wodey imetana mela woossis.
DAN 2:17 Hessafe guye Daaneli ba soo simmidi, ba heedzu laggetas, Anaaniyas, Misa7eelasinne Azaariyasi hanota odis.
DAN 2:18 Enti Babiloonen de7iya hanko cincatara issife hayqonnaada, salo Xoossay maarota oothidi, ha xuura entaw qoncisanaada woossana mela entaw odis.
DAN 2:19 He qamma xuuray Daanelas qoncis. Daaneli salo Xoossaa haysada yaagidi galatis;
DAN 2:20 “Cincatethinne wolqi Xoossasa gidiya gisho, iya sunthay merinaape merinaa gakanaw galatetto.
DAN 2:21 I wodetanne ageenata laammees; kawota araatan utisees; araatape diggees. Cincatas cincatethi immees; akeekanchotas era immees.
DAN 2:22 I xuuraanne geemmidaba qoncisees; I dhuman de7iyaba erees; poo7oy iyara de7ees.
DAN 2:23 Ta mayzata Xoossaw, ta nena galatayis; sabbayis. Ne taw cincatethinne wolqa immadasa; nuuni nena oychidaba tana erisadasa; kawa amuhuwa nuna erisadasa” yaagis.
DAN 2:24 Hessafe guye, Daaneli Babiloonen de7iya cincata wodhisanaw kawuwape kiita ekida, Ariyookako bidi, “Cincata wodhopa; tana kawako gelsa; taani iya amuhuwa birshethaa iya erisana” yaagis.
DAN 2:25 Ariyooki ellesidi Daanela kawako gelsidi, kawako, “Yihudape di7etidi yida asaape kawa amuhuwa birshethaa erisanaw danda7iya ase demmas” yaagis.
DAN 2:26 Kawoy Bilxasoora geetetiya Daanela, “Ta amuhida amuhuwanne iya birshethaa tana erisanaw danda7ay?” gidi oychis.
DAN 2:27 Daaneli haysada yaagidi zaaris: “Kawaw, ne oychida xuuraa qoncisanaw danda7iya cinca asi, maroy, bitanchoynne, murunniya asi baawa.
DAN 2:28 Shin xuura qoncisiya issi Xoossi salon de7ees. Wursetha wodetan hananaba I, nena bessis. Ne arsan zin7ada, ne be7ida amuhoynne qoncethay haysa.
DAN 2:29 “Kawaw, ne arsan zin7ada, sinthafe yaanaba qopadasa. He wode xuura qoncisiya Xoossay sinthafe hananaba nena bessis.
DAN 2:30 Ha xuuray taw qonciday, ta hara asape cinca gidida gisho gidenna. Shin neeni kawoy, amuhuwa birshethaa eranaadanne ne huuphen simeretiya qofa akeekana melasa.
DAN 2:31 “Kawaw, ne daro gita, phooliyanne xeellanaw yashshiya misiley ne sinthan eqidaysa be7adasa.
DAN 2:32 He misiliya huuphey, walahi bayna worqafe, iya tiraynne kusheti birape, uloynne wodireti naase biratape,
DAN 2:33 suyley biratapenne toho yacha baggay biratape baggay biittafe medhetis.
DAN 2:34 Neeni misiliya xeelliya wode, issi shuchi asa kushey bochonna dhoqolletidi, biratapenne biittafe medhetida misiliya toho yacha bolla wodhidi gaaccis.
DAN 2:35 He wode birati, urqi, naase biratay, birinne worqey ubbay gaacetidi, bonen wudumman de7iya suulaa mela gidin, aykoyka attonnashin carkoy pitidi efis. Shin misiliya bolla wodhida shuchay zuma gididi sa7aa kumis.
DAN 2:36 “Amuhoy haysa; ha77i birshethaa nuuni new odana.
DAN 2:37 Kawaw, neeni kawota kawo. Salo Xoossay new kawotethinne wolqa, minotethinne boncho immis.
DAN 2:38 Neeni biitta ubbaa haaranaada oothis; ase, do7anne salo kafo ne kushen wothis. Hessa gisho, worqa huuphey nena.
DAN 2:39 “Neepe guye, minotethan nena gakonna hara kawotethi dendana. Kaallidi, biitta ubbaa haariya, naase birata gidiya, heedzantho kawotethi dendana.
DAN 2:40 Wursethan ubbaa gaaccidi liiqisiya biratada minnida oyddantho kawotethi dendana. Birati ubbaa gaaccidi liiqiseysada I, baape kase dendida kawotethata gaaccidi liiqisana.
DAN 2:41 “Tohotinne toho biradheti baggay biratape, baggay biittafe medhetidaysa ne be7idaysada, he kawotethay shaaketida kawotethi gidana. Birati biittara walaketin, neeni be7idaysada baggay biratada mino gidana.
DAN 2:42 Toho biradheti baggay birata, baggay biitta gididaysada, ha kawotethaas baggay mino, baggay shugo gidana.
DAN 2:43 Birati biittara walaketin neeni be7idaysada he nam7u bagga asay geloninne ekon walaketana. Shin birati biittara walaketanaw danda7onaysada enti issino gididi gam7anaw danda7okona.
DAN 2:44 “He kawota laythan, salo Xoossay kundonna, hara asas aadhidi imetonna kawotethaa essana. He eqida kawotethay, he kawotethata ubbaa gaaccidi dhaysana; shin I merinaw eqidi daana.
DAN 2:45 Asa kushey bochonna zumaape dhoqolletidi, wodhidi, biratape, naase biratape, biittafe, birapenne biittafe medhetida misiliya gaaccida shuchaa birshethay he kawotethaa. “Gita Xoossay sinthafe hananaba kawa bessis. Amuhoy tuma; birshethayka ammanetidaysa” yaagidi zaaris.
DAN 2:46 Hessafe guye, kawoy Nabukadanaxoori Daanela bonchidi, gufannis; asay iya sinthan yarsho yarshana melanne ixaane cuyisana mela kiittis.
DAN 2:47 Kawoy Daanela, “Tuma ne Xoossay xoossata Xoosse, kawota Godanne xuura qoncisiya Xoosse. Neeni ha xuuraa qoncisanaw danda7iday hessa gishosa” yaagis.
DAN 2:48 Hessafe guye, kawoy Daanela aathidi bonchis; daronne al7o imotata iyaw immis. Babiloone biitta haariya ase oothis; Babiloonen de7iya cincata ubbaa bolla halaqa oothidi shuumis.
DAN 2:49 Daaneli oyshan, kawoy Sidiraaqa, Misaaqanne Abdanaago Babiloone biitta ayseysata oothidi shuumis; shin Daaneli kawo keethan gam7is.
DAN 3:1 Kawoy Nabukadanaxoori adussatethay usupun tammu wadha, gompay usupun wadha gidiya misile worqafe medhidi, Babiloone biittan Duura Demban essis.
DAN 3:2 He misiliya anjisanaw yaana mela, kawo moorinnata, shuumata, biitta ayseysata, kawa zoreyisata, miishe keethan ootheyisata, pirda daynnata, higge eranchotanne awuraja shuumata xeegis.
DAN 3:3 He wode kawo moorinnati, shuumati, biitta ayseysati, kawa zoreysati, miishe keethan ootheysati, pirda daynnati, higge eranchotinne awuraja shuumati shiiqidi, kawoy Nabukadanaxoori essida misiliya sinthan eqidosona.
DAN 3:4 He wode awaajiya addey ba qaala dhoqu oothidi, haysada yaagis: “Hinteno, asaw, kawotethato, dumma dumma doona odeteysato,
DAN 3:5 ubbay moyze, suusul7e, maasinqo, diithi, zayenne hara yetha miishe girsi si7iya wode, kawoy Nabukadanaxoori essida worqa misiliyas gufannidi goyinnite.
DAN 3:6 Misiliya sinthan gufannidi goyinnona oonika, he saatiyan eexiya itoone taman holetana” yaagis.
DAN 3:7 Hessa gisho, asay, kawotethatinne dumma dumma doona odetiya ubbay moyze, suusul7e, maasinqo, diithi, zayenne hara yetha miishe girsi si7ida wode biittan gufannidi, kawoy Nabukadanaxoori essida worqa misiliyas goyinnidosona.
DAN 3:8 He wode Babiloone asatape issoti issoti Ayhudeta mootidosona.
DAN 3:9 Enti kawa Nabukadanaxoorako haysada yaagidosona; “Kawaw, merinaw kawota.
DAN 3:10 Kawaw, ne moyze, suusul7e, maasinqo, diithi, zayenne hara yetha miishe girsi si7iya oonika gufannidi, worqa misiliyas goyinnana mela,
DAN 3:11 biittan gufannidi goyinnona asi de7iko, itoone taman holetana mela awaajo kessadasa.
DAN 3:12 Shin kawaw, neeni Babiloone biittan shuumida Ayhudeti, Sidiraaqi, Misaaqinne Abdanaagoy ne kiita ixidosona. Ne xoossatas oothokona; qassi ne essida worqa misiliyaka goyinnokona” yaagidosona.
DAN 3:13 Nabukadanaxoori hessa si7ida wode, yilo eexidi, Sidiraaqa, Misaaqanne Abdanaago ehana mela kiittis; enta kawa sinthe ehidosona.
DAN 3:14 Nabukadanaxoori enta haysada yaagis: “Sidiraaqa, Misaaqa, Abdanaago, hinte ta xoossatas oothiboonaysinne ta essida worqa misiliya goyinniboonaysi tumee?
DAN 3:15 Ha77i moyze, suusul7e, maasinqo, diithi, zayenne hara yetha miishe girsi si7iya wode ta essida misiliyas gufannidi goyinniko lo77o. Shin hinte goyinnona ixiko, ellesidi eexiya itoone taman holetana. Ay xoossika hintena ta kushepe ashshena” yaagis.
DAN 3:16 Sidiraaqi, Misaaqinne Abdanaagoy zaaridi, “Kawaw, Nabukadanaxoora, haysas nu new zaaro immanaw bessenna.
DAN 3:17 Kawaw, nu eexiya itoone taman holetiyakoka, nu iyaw oothiya Xoossay tamape nuna ashshanaw danda7ees. Qassi kawaw, I nuna ne kushepe ashshana.
DAN 3:18 Shin kawaw, I nuna ashshona ixikoka, nuuni ne xoossatas oothonaysanne ne essida worqa misiliya goyinnanaysa era” yaagidosona.
DAN 3:19 He wode Nabukadanaxoori Sidiraaqa, Misaaqanne Abdanaago bolla yilo eexin, iya som7oy laametis. Tamay kase eexeysafe laapun kushe aadhidi eexana mela kiittis.
DAN 3:20 Sidiraaqa, Misaaqanne Abdanaago qachidi, eexiya itoone taman holana mela, ba olanchota giddofe mino asata kiittis.
DAN 3:21 Enti banta afilara, suriyara, huuphe xaatharanne hara ma7o ubbaara de7ishin, eexiya itoone taman holidosona.
DAN 3:22 Kawa kiitay daro eeso gidida gishonne itoone tamay kasepe aadhidi eexiya gisho, Sidiraaqa, Misaaqanne, Abdanaago taman holida, mino asata tama lacoy wodhis.
DAN 3:23 Ha heedzu qashetida asati, Sidiraaqi, Misaaqinne Abdanaagoy, eexiya itoone taman wodhidosona.
DAN 3:24 Hessafe guye, kawoy Nabukadanaxoori malaaletidi, eeson dendi eqidi, “Nu qachidi eexiya itoone taman yeggida asati heedza gidokonaayee?” yaagidi bana zoreyisata oychis. Enti, “Kawaw, ee, tuma heedza” yaagidi zaaridosona.
DAN 3:25 Kawoy zaaridi, “Qashope birshetidi, tama giddon yaanne haanne hemetiya, tamay aykoka bochonna oyddu asata be7ayis; oyddanthoy xoossata na7a daanees” yaagis.
DAN 3:26 Nabukadanaxoori eexiya itoone tama mata shiiqidi, ba qaala dhoqu oothidi, “Ubbaafe Dhoqa Xoossaa oosanchoto, Sidiraaqa, Misaaqa, Abdanaago, keyidi haa yiite!” yaagidi xeegis. Sidiraaqi, Misaaqinne Abdanaagoy tama giddofe keyidosona.
DAN 3:27 Kawuwape garsara biitta ayseysati, moorinnati, shuumatinne kawa zoreysati entako shiiqidosona. Tamay enta asatethaa bochiboonaysa, enta huuphe binaanape issoyka xuugetiboonnaysa, enta ma7oyka meetetiboonaysanne tama peenoy enta bolla baynaysa be7idosona.
DAN 3:28 Hessafe guye, Nabukadanaxoori haysada yaagis: “Sidiraaqa, Misaaqanne Abdanaago Xoossay galatetto. I, ba kiitanchuwa kiittidi, banan ammanetida, ba aylleta ashshis. Enti kawa kiita ixidi, banta Xoossaafe attishin, hara xoosse goyinnanaape hayqanaw dosidosona.
DAN 3:29 Hesaa gisho, hara ay xoossika haysada oothidi ase ashshona gisho, Sidiraaqa, Misaaqanne Abdanaago Xoossaa toochidi odetiya ay asika, woyko ay kawotethika, woyko dumma dumma doonan odetiya ay kochayka qanxetana mela enta keethayka laaletidi, pito doore gidana mela taani kiittas” yaagis.
DAN 3:30 Kawoy Sidiraaqa, Misaaqanne Abdanaago Babiloone biittan dhoqu dhoqu oothidi shuumis.
DAN 4:1 Kawoy Nabukadanaxoori, Asaas, kawotethatas, dumma dumma doonan odetiya kochatas haysada yaagidi dabdaabe xaafis: Saroy hintew gido,
DAN 4:2 Ubbaafe Dhoqa Xoossay taw oothida, malaalsibaanne oorathaba ta hintew odanaw koyayis.
DAN 4:3 Iya malaatay ayba gite! I oothiya oorathabay ayba mino! Iya kawotethay merina kawotethi; I yeletaape yeletaa gakanaw haarees.
DAN 4:4 Taani, Nabukadanaxoori ta keethan injetin, ta kawo gadhon miikotin de7ayis.
DAN 4:5 Issi gallas taani yashshiya amuho be7as. Taani ta arsan zin7ada, be7ida amuhoynne qoncethay tana daganthis.
DAN 4:6 Hessa gisho, amuhuwa birshethaa tana erisana mela Babiloonen de7iya cincata ubbaa taako ehana mela kiittas.
DAN 4:7 He wode maroti, muranchoti, xoolinto taybeysatinne bitanchoti taako yin, ta amuhuwa entaw odas; shin enti birshethaa tana erisanaw danda7ibookona.
DAN 4:8 Wursethan ta xoossaa sunthan Bilxasoora geetetidi xeegetiya, geeshsha xoossata ayyaani iyan de7iya, Daaneli taako gelin, iyaw ta amuhuwa odas.
DAN 4:9 Cincata halaqa gidida Bilxasoora, geeshsha xoossata ayyaani nenan de7eysanne ayba xuurika neepe geemmonaysa taani erayis. Taani be7ida amuhoy haysa; ane taw iya birshetha oda.
DAN 4:10 Taani ta arsan zin7ada, biittas gidi zawan issi gita mithi eqidaysa qoncethan be7as.
DAN 4:11 He mithay diccidi gitatisinne minnis. Iya xeeray salo gakees; sa7aa gaxape gaxa gakanaw bentees.
DAN 4:12 He mithaa haythay xeellanaw lo77ees; iya ayfeyka daro; iya bolla ubbaas meetetiyabay de7ees. Sa7a do7ati iya kuyan shempoosona; salo kafoti iya tashiya bolla keexidi de7oosona. De7ora de7iya ubbay iyape mees.
DAN 4:13 “Taani ta arsan zin7ada, geeshsha kiitanchoy salope wodhishin qoncethan be7as.
DAN 4:14 Ika ba qaala dhoqu oothidi, haysada yaagis: ‘Ha mithaa qanxite; iya tashiya karite; iya haytha duuthite; iya ayfiya laallite. Iya garsan de7iya do7atinne iya tashiyan uttiya kafoti ubbay baqato.
DAN 4:15 Shin durumaanne iya xaphuwa birataninne naase birata santhalaatan qachidi, biittan, maata giddon aggaagite. Salo akan laako; bazzon maata giddon do7ara de7o.
DAN 4:16 Iya kahay asape do7aysan laameto; hessada hanidi laapun laythi de7o.
DAN 4:17 Ubbaafe Dhoqa Xoossay asa nayta kawotetha ubbaa haareysa, kawotethi koyiya asas immeysanne hari attoshin boretidaysa shuumeysa de7on de7iya asi ubbay erana mela, hessa kiitanchoti awaajidosona; geeshshati pirdaa ehidosona’ ” yaagis.
DAN 4:18 “Taani, Kawoy Nabukadanaxoori be7ida amuhoy haysa: Ha77i, Bilxasoora, taw iya birshethaa oda. Ta kawotethan de7iya cincatape issoyka tana birshetha erisanaw danda7ibeenna. Shin geeshsha xoossata ayyaani nenan de7iya gisho, neeni danda7aasa” yaagas.
DAN 4:19 He wode Bilxasoora geetetiya Daaneli dagammidi, haniyaba dhayis. I dagammida gisho guutha wode si77i gidi gam7is. Yaatin, kawoy, “Bilxasoora, ha amuhoynne iya birshethay nena daganthofo” yaagis. Bilxasoori zaaridi, “Ta godaw, ha amuhoy nena ixeysatas, iya birshethay ne morketas gido.
DAN 4:20 Ne amuhon be7ida mithay, diccidi minniday, daayidi salo gakiday, sa7a gaxape gaxa gakanaw bentiday,
DAN 4:21 haythay xeellanaw lo77ey, ayfey dariday, iya bolla ubbaas miyabay de7ey, do7ati iya kuyan shempidaynne salo kafoti iya tashiyan keexidi de7ey,
DAN 4:22 kawaw, he mithay nena. Neeni gitatadasa; minnadasa; ne gitatethay diccidi, salo gakis; ne maatay sa7aa gaxape gaxa gakis.”
DAN 4:23 “Kawaw, geeshsha kiitanchoy salope wodhidi, ‘Ha mithaa qanxidi dhaysite; shin iya durumaanne iya xaphuwa birataninne naase birata santhalaatan qachidi, biittan, maata giddon aggaagite. I salo akan laako; laapun laythi gakanaw woran do7ada de7o’ ” giya wode be7adasa.
DAN 4:24 “Kawaw, birshethay haysa: haysi Ubbaafe Dhoqa Xoossay ta godaa, kawa bolla polanaw kiitida pirda.
DAN 4:25 Neeni asa giddofe goodetada do7atara issife daana. Neeni boorada maata maananne salo akan laakana. Qassi Ubbaafe Dhoqa Xoossay, asa nayta kawotetha ubbaa haareysanne kawotethi ba koyida asas immeysa ne erana gakanaw, laapun laythi ne bollara aadhana.
DAN 4:26 Durumay xaphora biittan attanaada kiitetidaysi, salo Xoossay biitta ubbaa haareysa neeni eriya wode, ne kawotethay new simmanaysa bessees.
DAN 4:27 Kawaw, ta zoriya eka. Nagara ooso aggada suureba ootha; un7etidaysata naaqo aggada entaw qadheta. Ooni eri neeni saro daana wodey aduqonna aggenna” yaagis.
DAN 4:28 Ha ubbay kawa Nabukadanaxoora bolla gakis.
DAN 4:29 Tammanne nam7u ageenape guye, kawoy Babiloonen de7iya kawo gadho bolla de7iya bessan simeretees.
DAN 4:30 Kawoy, “Taani, ta gita wolqan, ta gita bonchuwas kawoy daana mela ta keexida wolqaama Babiloone katamay haysa gidennee?” yaagis.
DAN 4:31 I, ba odaa wursonna de7ishin, salope haysada giya qaali yidi, “Kawa Nabukadanaxoora, ne bolla pirdetida pirday haysa: ne kawotethay neepe eketis.
DAN 4:32 Neeni asa giddofe goodetada, bazzo do7atara daana; ne boorada maata maana. Ubbaafe Dhoqa Xoossay asa nayta kawotetha ubbaa haareysanne I ba koyaida asas kawotethi immeysa neeni erana gakanaw laapun laythi ne bollara aadhana” yaagis.
DAN 4:33 Nabukadanaxoora bolla geetetidabay ellesidi poletis. Asa giddofe goodetidi, boorada maata mis. Iya asatethay salo akan laakis. Iya binaanay anko baalleda, iya xugunthayka kafo xugunthada diccis.
DAN 4:34 “He laapun laythay wuridaape guye, taani Nabukadanaxoori dhoqu gada salo xeellas. Ta kahay simmin, Ubbaafe Dhoqa Xoossaa galatas; merina Xoossaa bonchas; sabbas. “I merinaape merinaw haarees; iya kawotethay yeletethaafe yeletetha gakanaasa.
DAN 4:35 Sa7an de7iya asa ubbay iya sinthan laafaba. Salo medhetethata bollanne sa7an asaa bolla I dosidaba oothees. Iya kushiya teqanaw danda7ey baawa, iya, ‘Ay oothay?’ yaagidi oychey deenna.
DAN 4:36 Ta kahay simmin, ta kawotethaa bonchoynne ta teemay taw simmis. Kase tana zoreysatinne ta moorinnati tana koydosona. Taani ta araatan minnas; taw kaseysafe aadhiya gitatethi guzhetis.
DAN 4:37 Hiza, taani Nabukadanaxoori salo kawa galatayis; iya dhoqu dhoqu oothayis; iya bonchayis. I oothiyaba ubbay like; iya oge ubbay suure; I otoron hemeteyisata kawushanaw danda7ees” yaagis.
DAN 5:1 Issi gallas kawoy Bilxasoori mukulu gidiya ba shuumatas gibira giigisidi, entara issife woyne ushsha uyis.
DAN 5:2 Bilxasoori woyne ushsha uyidi mathotida wode, iya aaway Nabukadanaxoori Yerusalaamen de7iya Xoossa keethafe ehida worqafenne birape oosetida ushsha miisheta ehana mela kiittis. I hessa oothiday I, iya shuumati, iya machetinne iya laggethoti ushsha he miishetan uyanaw koyida gishosa.
DAN 5:3 Enti Yerusalaamen de7iya Xoossa keethafe ehida worqafe oosetida ushsha miisheta kawas ehidosona. Yaatin kawoy, iya shuumati, iya machetinne iya laggethoti he miishetan tigetida woyne ushsha uyidosona.
DAN 5:4 Enti he woyne ushsha uyishe, worqafe birape, naase biratape, biratape, mithafenne shuchafe oosetida xoossata galatidosona.
DAN 5:5 He wode qoponna de7ishin, asa kushe biradheti keyidi, xompe wothiya kocaa sinthan, meeshetida kawo gadho godaa bolla xaafidosona. He kushey xaafiya wode kawoy be7is.
DAN 5:6 He wode iya som7oy laametidi, bido gidis; yashshan iya gaadey kokoris; iya gulbatay ixis.
DAN 5:7 Kawoy ba qaala dhoqu oothidi, muranchota, marotanne xoolinto paydeyisata ehana mela kiittis. I, Babiloone cincatako haysada yaagis: “Ha xuufiya nabbabidi, iya birshethaa taw odiya oonika, ocha teera daaniya ma7uwa ma7ana; iya qoodhen worqa aathana; I, ta kawotetha haariya heedzantho asi gidana” yaagis.
DAN 5:8 Babiloone cincati ubbay iya sinthe yidosna; shin entafe oonika he xuufiya nabbabanaw woyko iya birshethaa odanaw danda7ibeenna.
DAN 5:9 Kawoy Bilxasoori kaseysafe aadhidi dagammin, iya som7oy kaseysafe aadhidi bido gidis. Iya shuumati haniyaba dhayidosona.
DAN 5:10 Iya aayiya, kawanne iya shuumata palama si7ada, enti gibira miya keethaa gelada, haysada yaagasu: “Kawaw, merinaw kawota! Ha qofan daro dagammofa; ne som7oy laametofo.
DAN 5:11 Geeshsha xoossata ayyaani iya bolla de7iya, issi asi ne kawotethaa giddon de7ees. Iyaw eratethi, akeekinne cincatethi de7ees. Kase ne aaway, kawoy Nabukadanaxoori iya, marota, muranchota, bitanchotanne xoolinto paydeyisata halaqa oothidi shuumis.
DAN 5:12 I, lo77o ayyaani, erinne akeeki de7iya ase. I amuho birshanaw, qan7ishe odanawunne xuura qoncisanaw danda7ees. Kawoy Bilxasoora gidi sunthida Daanela xeega. I new xuufiya birshethaa odana” yaagasu.
DAN 5:13 He wode Daanela kawako ehin, kawoy iyako haysada yaagis: “Daaneli nenee? Ta aaway, kawoy Yihudape di77idi ehidaysatape issoy nenee?
DAN 5:14 Xoossata ayyaani nenan de7eysa, eri, akeekinne cincatethi new de7eysa ta si7as.
DAN 5:15 Ha xuufiya nabbabanawunne iya birshethaa taw odanaw muranchotinne cincati yidosona; shin enti taw birshethaa odanaw danda7ibookona.
DAN 5:16 Neeni birshethaa odanawunne deexo oysha ubbaa zaaranaw danda7eysa ta si7as. Hiza ne ha xuufiya nabbabanawunne iya birshethaa taw odanaw danda7iko, ocha teera daaniya ma7uwa mayzana; ne qoodhen worqa aathana; neeni, kawotetha haariya heedzantho ase gidana.”
DAN 5:17 Daaneli kawas zaaridi, “Ne imoy new gido; ne woytuwa hara asas imma. Gidoshin, taani xuufiya kawas nabbabana; birshethaaka odana.”
DAN 5:18 “Kawaw, Ubbaafe Dhoqa Xoossay ne aawa Nabukadanaxooras kawotethi, gitatethi, bonchonne teema immis.
DAN 5:19 Iya gitatetha gaason derey, kawotethatinne dumma dumma doonan odetiya kochati iyaw yashshan kokoridosona. I wodhanaw koyeysa wodhees; ashshanaw koyeysa ashshees; shuumanaw koyeysa shuumees; kawushanaw koyeysa kawushshees.
DAN 5:20 Shin I otortida wodenne iya wozanay muumida wode, ba araatape wodhis; iya bonchoyka qaaretis.
DAN 5:21 Asa giddofe goodetis; iya kahay laametin do7a gidis. Boorada maata mishe demba haretara issife de7is. Iya asatethay salo akan laakis. Hessi haniday, Ubbaafe Dhoqa Xoossay asa nayta kawotetha ubbaa haareysanne ba koydaysas immeysa I erana melasa.
DAN 5:22 “Shin Bilxasoora, neeni iya na7ay, ha ubbaa erashe ne nenatethaa kawushabaaka.
DAN 5:23 Qassi salo Godaa bolla otortada, nenatethaa dhoqu dhoqu oothadasa. Iya keethaafe bonqetidi yida worqa miishetan neeni, ne shuumati, ne machetinne ne laggethoti, woyne ushsha uyideta. Qassi xeellanaw, si7anawunne eranaw danda7onna birape, worqafe, naase biratape, biratape, mithafenne shuchafe oosetida xoossata galatideta. Ne de7uwanne ne ogiya ba kushen oykida Xoossaa bonchabaaka.
DAN 5:24 Hessa gisho, kushe biradheti iyape kiitetin, ha xuufey xaafetis.
DAN 5:25 “Xuufey, ‘MAANE, MAANE, TEQEL, PAARES’ yaagees.
DAN 5:26 “Aramike doonan iya birshethay haysa. MAANE: (taybetis) ‘Xoossay ne kawota laytha taybidi wuranaada oothis’ guussu.
DAN 5:27 TEQEL: (mazzanetis) ‘Mizaanen mazzanetada, kawuyada bentadasa’ guussu.
DAN 5:28 PAARES: (shaaketis) ‘Ne kawotethay shaaketidi Meedonasinne Farses imetis’ ” guussu.
DAN 5:29 He wode, Bilxasoora kiitan, ocha teera daaniya ma7uwa Daanela mayzidosona; iya qoodhen worqa aathidosona; qassi kawotetha haariya heedzantho asi gidana mela awaajidosona.
DAN 5:30 He wode qamma morketi gelidi, Babiloone kawa Bilxasoora wodhidosona.
DAN 5:31 Iya kawotethaa, laythi usupun tammanne nam7a gidida Meedona addey Daariyosi ekis.
DAN 6:1 Kawoy Daariyosi ba kawotetha ubbaa giddon baape garsara biitta haariya xeetanne laatamu asata shuumanaw qopis.
DAN 6:2 Kawas aybika paconna mela shuumata aawatethan xeellana mela heedzu asata halaqa oothidi dooris; dooretidaysatape issoy Daanela.
DAN 6:3 Daaneli ooso oothanaw baw de7iya dumma eran hara halaqatapenne shuumatape aadhidi bentis. Hessa gisho, kawoy iya ba kumetha kawotethaa bolla shuumanaw qopis.
DAN 6:4 Biitta shuumatinne halaqati Daanela mootanaw, I aysiya aysuwa bolla bala demmanaw koydosona. Shin I, bana naagiyanne ammanetida asi gidiya gisho, iya mootanaw iya bolla ay balaka demmibookona.
DAN 6:5 Wursethan enti, “Iya Xoossaa higgiya baggara gidonna ixiko, hara baggara Daanela mootiyaba demmoko” yaagidosona.
DAN 6:6 Hessafe guye, biitta shuumatinne halaqati issife kawako bidi, haysada yaagidosona: “Kawaw Daariyosa, merinaw kawota!
DAN 6:7 Nuuni ne kawotetha ooso oothiya halaqati, shuumati, ayseysati, zoreysatinne biitta haareysati ubbay zoretida issi zorey de7ees. Hessika hastamu gallas gakanaw, ay asika kawa woossanaape attishin, hara ay asi woyko ay xoosse woossonnaada, neeni awaajo kessana melasa. He awaajuwa ekonnay gaammo ollan yegetana mela neeni kiitta.
DAN 6:8 Hiza kawaw, ha awaajoy shaaretonna Meedonanne Farse higgeda minonne laametonnaysa gidana mela parama” yaagidosona.
DAN 6:9 Hessa gisho, kawoy Daariyosi awaajuwa xaafidi paramis.
DAN 6:10 Daaneli awaajoy parametidi keydaysa erida wode ba soo bis; pooqe bolla de7iya kifiliya gelis. He kifiliya maskootey Yerusalaame bagga simmidi dooyetidi de7ishin, kase woosseysada gulbatidi, ba Xoossaa galatishe, issi gallasan heedzu toho woossees.
DAN 6:11 He asati issife bidi, Daaneli ba Xoossaa woossishininne ba Godaa maado oychishin demmidosona.
DAN 6:12 Enti kawako bidi, “Kawaw, hastamu gallasata giddon ne attishin, hara ay ase woyko ay xoosse woossiya oonika gaammo ollan yegetana mela awaajo kessabikii?” yaagidosona. Kawoy zaaridi, “Ee awaajay keyis; shaaretonna Meedonanne Farse higgeda minnidaysa” yaagis.
DAN 6:13 Enti, “Kawaw, Heko Yihudape di7etidi, yida asaape issoy, Daaneli, new gidin ne paramada kessida ne awaajuwaka kiitetenna. I ha77i gakanaw gallasan heedzu toho ba Xoossaa woossees” yaagidosona.
DAN 6:14 Kawoy hessa si7ida wode daro azzanis; Daanela ashshanaw qopidi, awi wullana gakanaw iya ashshana oge ubbaa koyis.
DAN 6:15 He wode asati issife kawako bidi, “Kawaw, Meedonanne Farse higgiyada, kawoy awaajida awaajoy woyko kiitay laametonnaysa era” yaagidosona.
DAN 6:16 Kawa kiitan, Daanela ehidi, gaammo ollan yeggidosona. Kawoy Daanelako, “Ne ubba wode goyinniya Xoossay nena asho” yaagis.
DAN 6:17 Enti shuchu ehidi, olla doona gordidosona. Oonika Daanela bolla oosetidabay laametonna mela, kawoy ba maatamenne ba moorinnata maatame shuchaa bolla wothis.
DAN 6:18 Kawoy ba gadho simmidi, kathi moonnanne ufaysiyaba baako shiishonna, dhisko dhayidi aqis.
DAN 6:19 Kawoy wonta guura dendidi, ellesidi gaammo ollaako bis.
DAN 6:20 I azzanishe yaa gakidi, “De7o Xoossaa aylliyaw, Daanela, neeni ubba wode goyinniya ne Xoossay, nena gaammotape ashshanaw danda7idee?” yaagidi xeegis.
DAN 6:21 Daaneli zaaridi, “Kawaw, merinaw kawota!
DAN 6:22 Ta Xoossay ba kiitanchuwa kiittidi, gaammota doona gordis; enti tana bochibookona. Taani iya sinthan xillo; qassi kawaw, ne sinthanka bala oothabike” yaagis.
DAN 6:23 Kawoy daro ufaytidi, Daanela ollaafe kessana mela kiittis. Daaneli ollaafe keyis; I ba Xoossan ammanetida gisho, iya asatethaa bolla qohoy bentibeenna.
DAN 6:24 Kawoy Daanela mootida asata ehana mela kiittis. Enti oyketidi, banta machetaranne banta naytara yidi, ubbay gaammo ollan yegetidosona. Enti ollaa wursetha gakonna de7ishin, gaammoti gupi ekidi, enta meqethaa mentherethi aggidosona.
DAN 6:25 Kawoy Daariyosi asaas, kawotethatasinne dumma dumma doonan odetiya kochatas haysada yaagidi xaafis: “Saroy hintew gido!
DAN 6:26 “Ta kawotethan de7iya asa ubbay Daanela Xoossaa yayyana melanne kokorana mela taani awaajo kessas. “I merinaw de7iya de7o Xoossaa; iya kawotethay polo dhayenna; iya kawotethaas zawi baawa.
DAN 6:27 I, ashshees; metope kessidi ekees; Saloninne sa7an mallatanne malaatata oothees; I, Daanela gaammota doonape ashshis” yaagis.
DAN 6:28 Daaneli Daariyosa kawotetha wodenne Farse kawa Qiroosa kawotetha wode ubban injetin de7is.
DAN 7:1 Babiloone kawoy Bilxasoori kawotida koyro laythan, Daaneli ba arsan zin7idi, amuhonne qoncethi be7is. Ba amuhuwan be7ida ayfe qofata xaafis.
DAN 7:2 Daaneli haysada yaagis: “Salope yida oyddu carkoti gita abba buqishin ta qamma qoncethan be7as.
DAN 7:3 Issoy issuwafe dumma gidida oyddu gita do7ati abbafe keyidosona.
DAN 7:4 “Koyro do7ay gaammo daanees; iyaw argantha qefey de7ees. Ta be7ishin, iya qefey shodetin, sa7ape dendidi, asada nam7u tohon eqanaada oosetis; iyaw asa wozani imetis.
DAN 7:5 “Nam7antho do7ay issi bagga dhoqu gidi eqida Babanthi geetetiya do7a daanees. He do7ay heedzu gaylle meqethi ba doonan baaridi, ba achan saxidi oykis. Ika, ‘Denda; kallana gakanaw asho ma’ geetetis.
DAN 7:6 “Hessafe kaallada, maahe daaniya hara do7a be7as. Iya zokon kafo qefe daaniya oyddu qefeti de7oosona. Iyaw oyddu huupheti de7oosona; iyaw haaro maati imetis.
DAN 7:7 “Hessafe guye, qamma qoncethan yashshiya, daganthiyanne daro mino gidida oyddantho do7a be7as. Iyaw gita birata achi de7ees. I banan gahetiya ubbaa entan mentherethidi mees; attidaysata ba tohuwan yedherethees. Kase ta be7ida do7ata ubbaafe I dummatees; iyaw tammu kacey de7ees.
DAN 7:8 Taani he kacetaba qopishin, enta giddofe hara issi guutha kacey keyishin be7as. He kacey hanko kacetape heedzata dhoqollidi holis. He qaciyas asa ayfe daaniya ayfeynne otoron odetiya inxarsi de7ees.
DAN 7:9 “Taani hessa be7ishin, araatati utethas giigidosona. Merinaw De7eysi ba araatan uttis; iya ma7oy shachada, iya huuphe binaanay muqaadada boothu. Iya araataynne araata gertoy tamada locees.
DAN 7:10 Iya araata giddofe tama shaafi pultidi, keyees. Mukulu toho mukulan taybeteysati iyaw oothosona; tammu mukulu toho tammu mukulan taybeteysati iya sinthan eqoosona. Pirdi doometis; maxaafati dooyetidosona.
DAN 7:11 “Kacey odetiya otoro qaala taani si7ida gisho, iya cadda xeellas. Taani be7ishin do7ay hayqidi, eexiya taman yeggetidi, dhayis.
DAN 7:12 Hanko heedzu do7ata maatay eketis; shin enti guutha wode de7on daana mela entaw imetis.
DAN 7:13 “Taani, qamma qoncethan, asa na7a daaneysi salope shaarara yishin be7as. Merinaw de7eysako shiiqin, iya sinthe aathidosona.
DAN 7:14 Iyaw maati, bonchoynne kawotethi imetis; derey, kawotethatinne dumma dumma doonan odetiya ubbay haaretidosona. Iya maatay merinaw shaaretonna maata; iya kawotethaas zawi baawa.
DAN 7:15 “Taani, Daaneli, ta be7idaban dagammas; qoncethay tana hirgisis.
DAN 7:16 Taani yan eqidaysatape issuwako shiiqada, ha ubbaas tuma birshethay aybeko oychas. I taw iya birshetha ubbaa haysada yaagidi odis:
DAN 7:17 ‘Ha oyddu gita do7ati sa7an sinthafe dendana oyddu kawotethata.
DAN 7:18 Shin Ubbaafe Dhoqa Xoossaa geeshshati iya kawotetha ekidi, merinaw bantaba oothana; merinaw kawotethaa enti laattana’ yaagis.
DAN 7:19 “Hessafe guye, taani hara do7ata ubbaafe dumma gidida yashshiya oyddantho do7aas de7iya tuma birshethaa eranaw koyas. He do7aas birata achinne naase birata xugunthi de7ees; I banan gahetiya ubbaa mentherethidi mees; attidaysa ba tohuwan yedherethees.
DAN 7:20 He do7aa huuphen de7iya tammu kacetabaanne guyepe keyidi, entafe heedzata dhoqollidi yeggida guutha kaciyaba eranaw koyas. He guutha qaciyas ayfeynne otoro qaala odetiya inxarsi de7ees. He kacey hankotape aadhidi yashshees.
DAN 7:21 Taani be7iya wode he kacey geeshshatara oletidi, enta xoonis.
DAN 7:22 Hessi haniday, Merinaw De7eysi yaana gakanawunne Ubbaafe Dhoqa Xoossaa geeshshatas pirdana gakanaasa; enti kawotethaa laattiya wodey gakis.
DAN 7:23 “I birshethaa taw haysada yaagidi odis; ‘Oyddantho do7ay ha sa7an sinthafe dendana oyddantho kawotethaa. He kawotethay hara kawotetha ubbaafe dumma; I, biitta ubbaa maana, yedhananne mentherethana.
DAN 7:24 Tammu kaceti ha kawotethaafe dendana tammu kawota. Hessafe guye, kase tammu kawotape dumma gidida hara kawoy dendana. I, entafe heedzu kawota xoonidi haarana.
DAN 7:25 I, Ubbaafe Dhoqa Xoossaa bolla otoron odetana; Ubbaafe Dhoqa Xoossaa geeshshata un7ethana. Qassi wodetanne higgiya laammanaw amottana. Wodey, wodetinne wode baggay gakanaw, geeshshati iya maatape garsan haaretana.
DAN 7:26 Shin pirdi doometana; iya maatay kumethi eketana; I merinaw dhayana.
DAN 7:27 Salope garsan de7iya kawotethata maatay, wolqaynne gitatethay, Ubbaafe Dhoqa Xoossaa geeshshatas imetana. Iya kawotethay merinaw daana; biitta haareysati iyaw kiitetana; iya goyinnana’ ” yaagis.
DAN 7:28 Ta qoncethabay haysan wuris. Taani, Daaneli, ta qofan daro dagammas; ta som7oy bido gidis. Shin ubbaba taani ta wozanan wothas.
DAN 8:1 Bilxasoori kawotida heedzantho laythan, taani, Daaneli, kase be7ida qoncethaafe hara qoncethi be7as.
DAN 8:2 He qoncethan, Elama biittan, Suusa kataman, Ubaala shaafa matan eqada tana demmas.
DAN 8:3 He shaafa matan nam7u adussa kaceti de7iya dorsi eqis. Nam7u kacetape issoy guyepe dolis; shin koyro dolidaysafe adusse.
DAN 8:4 He dorsay ba kaciyan qaycanaw, wuloha, pudehanne dugeha bagga koolishin be7as. Iyara eqetanawunne iya wolqaafe kessi ekanaw ay meheyka danda7ibeenna. I, ba koydaba oothees; yaatidi gita gidis.
DAN 8:5 Taani ha qoncethabaa qopishin, issi deeshi wuloha baggafe keyidi, biitta kanthidi, tohoy sa7a yedhonna yis. Iya nam7u ayfetape giddon issi gita kacey de7ees.
DAN 8:6 I, daro yilora, shaafa matan taani be7ida nam7u kacera de7iya dorsaako yis.
DAN 8:7 I, daro yilotidi, ta be7ishin, dorsaa kaceti nam7ay meqana gakanaw, iita dom7e dom7is. Dorsay iyara eqetanaw wolqi dhayis; deeshay iya sa7an yeggidi yedhidi eqis. Deesha wolqaafe he dorsa ashshiyabay baawa.
DAN 8:8 He deeshay daro wolqaamis; shin iya wolqay darishe bin, iya gita kacey meqis. Iya bessan oyddu gita kaceti biitta oyddu baggaa simmidi diccidosona.
DAN 8:9 Ha oyddu kacetape issuwa bolla hara guutha kacey dolidi, dugeha, dolohanne Isra7eele biittako simmidi wolqara diccis.
DAN 8:10 I, bidi salon de7iya olanchota gakanaw diccidi, salo xoolintotape guuthata sa7an yeggidi enta yedhis.
DAN 8:11 Salo tora mocona gidida Xoossara bana likisana gakanaw dhoqu dhoqu gis. Iyaw gallas gallas yarshetiya yarshuwa diggis; iya keethaaka tunisis.
DAN 8:12 Nagara gaason olanchotinne gallas gallas yarshetiya yarshoy he kaciyas imetis. Tumi sa7an holetis; he kacey oothiyaba ubbay iyaw injetis.
DAN 8:13 Hessafe guye, issi geeshsha kiitanchoy, hara geeshsha kiitanchuwara odetishin taani si7as. Issoy issuwa, “Gallas gallas yarshetiya yarshuwaba, dhayo ehiya makallatethaba, salo olanchotinne xoossa keethay yedhetishe daanaba odiya, qoncethay awude poletanee?” yaagidi oychis.
DAN 8:14 I zaaridi, “Nam7u mukulunne heedzu xeetu wontanne omarsi gakanaw gam7ana; hessafe guye, xoossa keethay geeyana” yaagidi odishin si7as.
DAN 8:15 Taani, Daaneli, ha qoncethaa be7ashenne iya birshetha eranaw qopashe de7ishin, issi ase daaniyabay ta sinthan eqidaysa be7as.
DAN 8:16 Ubaala shaafape, “Gabreela, ha addiyas ha qoncethaa birshetha oda” giya girsi si7as.
DAN 8:17 I, yidi ta matan eqida wode, taani dagammada, sa7an kundas. I taako, “Asa na7aw, ha qoncethay wursetha wodiyaba odeysa akeeka” yaagis.
DAN 8:18 I taara odetiya wode, taani sa7an ta som7uwara gufannada, tana bala aggas. I tana sa7aape denthidi, ta tohuwan essis.
DAN 8:19 I taako, “Ha qoncethay wursetha wodiyaba bessiya gisho, Godaa hanqo gallasan hananaw de7iyaba ta new odana.
DAN 8:20 Neeni be7ida nam7u kacera de7iya dorsay, Meedonanne Farse kawota leemiso.
DAN 8:21 Deeshay Girike kawa leemiso; iya nam7u ayfiyape giddon de7iya gita kacey Girike kawa.
DAN 8:22 Kace meqin iya bessan dolida oyddu kaceti iya kawotethaafe shaaketidi keyana oyddu kawotethata leemiso. Shin enta wolqay koyro kawa wolqaa gakenna.
DAN 8:23 “Enta kawotethaa wursethan, enta nagaray zawa gakiya wode, iitanne cimmiya kawoy dendana.
DAN 8:24 I daro mino gidana; shin ba wolqan gidenna. I daganthiya dhayo dhaysana; I oothiyaba ubbay iyaw injetana. I mino asatanne geeshsha asata dhaysana.
DAN 8:25 I cimmiya gisho iyaw injetana; I bana ubbaafe dhoqu dhoqu oothana. Enti sa7i saro gidi de7ishin, entafe darota wodhana. I halaqata Halaqaara eqetana, shin I, asi bochona baw dhayana.
DAN 8:26 “New odetida nam7u mukulunne heedzu xeetu wontanne omarsa qoncethay tuma. Shin ha qoncethay daro wodepe guye poletanaw de7iya gisho, maatame iya bolla wothada gordada naaga” yaagis.
DAN 8:27 Taani Daaneli, daro daaburida gisho, saketada daro gallas zin7as. Hessafe guye, dendada, kawa oosos bas. Ha qoncethan taani daro dagammas; akeekanaw danda7abike.
DAN 9:1 Meedona asi gidida Arxekisisa na7ay, Daariyosi Babiloonen kawotis.
DAN 9:2 I kawotida koyro laythan, taani Daaneli, Geeshsha Maxaafata nabbabashe, nabey Ermiyaasi odidaysada, Yerusalaamey laapun tammu laythi laaletidi gam7anaw de7eysa akeekas.
DAN 9:3 Hessa gisho, kayo ma7o ma7ada, bido ta huuphen qolada, xoomashenne woossashe ta Godaa Xoossaako ta som7uwa zaaras.
DAN 9:4 Ta nagara paaxashe, Godaa, ta Xoossaa haysada yaagada woossas. “Abeeti Godaw, wolqaamanne yashshiya Xoossaw, nena doseysatasinne new kiiteteysatas ne merinaa siiquwanne caaquwa naageyso,
DAN 9:5 nu nagara oothida balida. Nu iitabaa hanida; makallida; ne kiitapenne ne higgiyafe kare keyida.
DAN 9:6 Nu kawotas, nu halaqatas, nu aawatasinne biittan de7iya asa ubbaas ne sunthan tinbite odida ne nabeta si7onna ixida.
DAN 9:7 “Abeeti Godaw, ne xillo; shin nuuni hachi yeella ma7ida. Yihudaninne Yerusalaamen de7iya asa ubbay new ammanetona ixin, ne haaho biittaninne mata biittan laallida Isra7eele asa ubbay yeellatida.
DAN 9:8 Abeeti Godaw, nuuni, nu kawoti, nu halaqatinne nu aawati nena naaqida gisho yeella ma7ida.
DAN 9:9 Shin nu iya bolla makallikoka, Goday nu Xoossay maariyanne atto giya Xoossi.
DAN 9:10 Nuuni nu Godaa, nu Xoossaa, kiitetibooko; qassi ba nabeta baggara immida iya higgiya naagibooko.
DAN 9:11 Isra7eele asa ubbay ne higgiya menthidi, kare keyidosona; new kiitetibookona. “Nu ne bolla nagara oothida gisho, Xoossa aylliya Muse Higge Maxaafan xaafetida baadethaynne pirday nu bolla gakis.
DAN 9:12 Qassi nu bollanne nuna kaaletheyisata bolla gita meto ehanaw ne odida qaala nu bolla poladasa. Yerusalaame bolla gakida metuwa meli salope garsan hara biitta bolla gakibeenna.
DAN 9:13 Muse Higgiyan xaafetidaysada, ha dhayo ubbay nu bolla gakis. Nuuni nu nagaraape simmibooko; ne tumaa si7ibooko; nena, Godaa, nu Xoossaa maarota oychibooko.
DAN 9:14 Goday ha dhayuwa nu bolla ehanaw guye gibeenna. Goday, nu Xoossay ba oothiyaba ubban xillo, shin nu iyaw kiitetonna ixida.
DAN 9:15 “Abeeti Godaw, nu Xoossaw, kase ne asaa, ne mino kushiyan Gibxefe kessada, hachi gakanaw ne sunthaa xeegisadasa; nuuni nagara oothida; balida.
DAN 9:16 Abeeti Godaw, neeni kase ne xillo ooso ubbaa oothidaysada, ha77i ne hanquwanne ne gaduwa ne katamaape, Yerusalaamepe, ne geeshsha zumaape dentha. Nuuni oothida nagaraynne nu aawati oothida balay Yerusalaamenne ne asaa nu yuushuwan de7iya ubbaa sinthan kawushis.
DAN 9:17 “Hiza nu Xoossaw, taani ne aylley woossiya woosaanne magannuwa si7a. Godaw, ne sunthaa gisho gada, ha laaletida ne keethaa, ne keeha ayfiyan xeella.
DAN 9:18 Abeeti ta Xoossaw, ne haythaa nuuko zaara; ne ayfiya dooyada, ne sunthay xeegetida katamaa dhayuwa be7a. Nuuni, nena woossey, nu xillotethaa gisho gidonashin, ne gita maarotethaa gishosa.
DAN 9:19 Abeeti Godaw, si7a! Abeeti Godaw, atto gada! Abeeti Godaw, ne oosuwa qoncisa! Ne katamaynne ne asay ne sunthan xeegetida gisho, abeeti ta Xoossaw, ne sunthaa gisho gam7ofa.”
DAN 9:20 Taani woossashe, ta nagaraanne ta asaa Isra7eele nagaraa paaxashenne ta Xoossaa geeshsha zumabaa, Yerusalaameba Godaa, ta Xoossaas odashe gam7as.
DAN 9:21 Taani woosa bolla de7ishin, kase qoncethan ta be7ida Gabreeley, taako eeson piradhishe, omarsa yarsho yarshiya wode puttu gis.
DAN 9:22 I haysada yaagidi, taw odis: “Daanela, ta new eranne akeeka immanaw ha77i yas.
DAN 9:23 Neeni buroo woosa doomida wode ne woosa zaaroy imetis; ta hessa new odanaw yas. Xoossay nena daro dosees. Hessa gisho, ta odeysa qopa; qoncethaa akeeka.
DAN 9:24 “Xoossay ne asaasinne ne geeshsha katamaas qachida wodey, laapun toho laapun tammu laythi. He wode naaqoy wurana; nagara oosoy attana; qohoy atto geetetana; merinaa xillotethi kawotana; qoncethinne tinbitey poletana Ubbaafe Geeshsha bessay tiyettana.
DAN 9:25 “Haysa era; akeeka. Yerusalaame oorathanawunne keexanaw kiiti keyida gallasaape bidi tiyetida Halaqay yaana gakanaw, laapun toho laapunanne usupun tammanne nam7u toho laapun laythi aadhana. He wode Yerusalaame katamay ooraxana; ogetinne yuusho gimbeti oosetana; shin gimbetiya wodey, meto wode gidana.
DAN 9:26 Usupun tammanne nam7u toho laapun laythafe guye Tiyetidaysi hayqana; iyaw aykoyka attibeenna. Yaana halaqa olanchoti katamaanne Xoossaa keetha laallana. He katamaa wursethay di7oda akeekona yaana. He wodepe bidi wursethi gakanaw olinne dhayoy awaajetis.
DAN 9:27 Laapun laytha giddon, he halaqay asaara mino caaqo caaqetana. He laapun laythata bagga zawan yarshonne imota diggana. Awaajetida pirday, iya bolla tigetana gakanaw, I dhayo ehiya tunatethaa xoossa keethan essana” yaagis.
DAN 10:1 Farse kawoy Qiroosi kawotida heedzantho laythan, Bilxasoora geetetiya Daaneli hara qoncethi be7is. He qoncethay tuma; qoncidabay wolqaama olaba. He qoncethaa erana mela akeeki iyaw imetis.
DAN 10:2 He wode taani, Daaneli, heedzu saaminta yeekas.
DAN 10:3 Heedzu saamintay wurana gakanaw kathi mabike; ashoy woyko woyne ushshi ta doonako shiiqibenna; ta huuphiya tiyettabike
DAN 10:4 Koyro ageenan laatamanne oyddantho gallasan, gita Xegroosa shaafa matan eqas.
DAN 10:5 Taani xeelliya wode liino ma7o ma7ida issi addiya be7as. I ba xeessan Afeeza worqafe oosetida danco dancis.
DAN 10:6 Iya asatethay phooliya al7o shuchu daanees; iya som7oy wol7antha mela wol7amees; iya ayfey tama laco daanees; iya kusheynne iya tohoy qushetida naase biratada poo7ees; iya qaalay daro asa girsada kooshimmees.
DAN 10:7 Ha qoncetha taani, Daaneli tarka be7as. Taara de7iya asay be7ibookona; enti daro dagammida gisho baqatidi qosetidosona.
DAN 10:8 Taani ha gita qoncethaa be7ashe, tarka attas. Taw wolqi ixin daaburas; ta som7oy bullatis.
DAN 10:9 Taani iya kooshincha si7ida wode sa7an ta som7uwara gufannada, tana bala aggas.
DAN 10:10 Hessafe guye, issi kushey tana bochis; taani kokorashin, ta kushiyaninne ta gulbatan tana denthidi essis.
DAN 10:11 I taako, “Daro dosetida Daanela, taani new odiya qaala loythada akeeka; denda eqa. Taani kiitetada neeko yas” yaagis. I taako haysada gin, taani kokorashe denda eqas.
DAN 10:12 Qassika, “Daanela, yayyofa! Neeni akeeka demmanaw qopada, ne Xoossaa sinthan nenatethaa kawushida koyro gallasape doomidi, ne woosay si7etis; ta new zaaro ekada yas.
DAN 10:13 Shin Farse kawotethaa halaqa gidida ayyaanay laatamanne issi gallas tana teqis. Taani, tarka Farse kawotethaa halaqaara yan attida gisho, kiitanchota halaqatape issoy, Mika7eeli, tana maaddanaw yis.
DAN 10:14 Ha qoncethay sinthafe hananaba bessiya gisho, taani neeko yiday, wursetha gallasan ne asaa bolla hananaw de7iyaba new qoncisanaasa” yaagis.
DAN 10:15 I hessa taw odiya wode, taani sa7an gufannada, gaanaba dhayas.
DAN 10:16 Hessafe guye, ase daaniya issoy ta mettersha bochis; ta doonay dooyetin, odetethi doomas. Ta sinthan eqidaysako, “Ta godaw, ha qoncethay tana daro daganthida gisho daro daaburas.
DAN 10:17 Taani ne aylley, neera, ta godaara waanada odetanaw danda7ayna? Ta wolqay wuris; shempanawuka taw ixetis” yaagas.
DAN 10:18 He ase daaniya issoy nam7antho tana bochidi, taw wolqa immis.
DAN 10:19 I taako, “Daro dosetida addiyaw yayyofa! Saroy new gido. Minna; xaala” yaagis. I hessa gidi tana minthin, taani minnada, “Ta Godaw, neeni tana minthida gisho taw oda” yaagas.
DAN 10:20 I zaaridi, “Taani neeko ayis yidaako ne eray? Ha77i ta simmada Farse halaqa gidida ayyaanara oletanaw baana; taani biiko Girike halaqa gidida ayyaanay yaana.
DAN 10:21 Shin Tuma Maxaafan xaafetidaba taani new odana. Taani entara oletiya wode, hinte halaqaa Mika7eelape attishin, tana maaddiya hari baawa.”
DAN 11:1 “Meedona asi gidida Daariyosi, kawotida koyro laythan, taani iya maaddanawnne minthethanaw iya miyen eqas.”
DAN 11:2 “Hiza ta new tuma odayis. Hara heedzu kawoti Farse biittan kawotana; entafe guye kawotiya oyddantho kawoy, hankotape aadhida dure gidana. I ba duretetha gaason wolqa demmiya wode, asa ubbay Girike kawotethaara oletana mela denthethana.
DAN 11:3 “Hessafe guye, wolqan haariya mino kawoy dendidi, ba koydaba ubbaa oothana.
DAN 11:4 I wolqan minnida wode iya kawotethay laaletidi, oyddu bessan shaaketana. Iya kochati iya kawotethaa laattokona; kawotethay I kase ayseysada wolqaama gidenna; iya kawotethay iyape eketidi, haratas imetana.
DAN 11:5 “Dugeha biitta kawoy mino gidana; shin iya shuumatape issoy iyape daro minnidi, he gita kawotethaa haarana.
DAN 11:6 Guutha laythafe guye, dugeha biitta kawoynne pudeha biitta kawoy banta giddon dabbotetha caaqo caaqetana. Dugeha biitta kawa na7iya pudeha biitta kawa gelana; shin I wolqay minnenna; qassi ika iya wolqayka daro wode gam7enna. He wode, iira issife, iyo maaddeysati, I na7aynne I azinay, ubbay aadhidi imetana.
DAN 11:7 “Guutha wudepe guye, I dabbotape issoy dugeha biittan kawotana. Pudeha biitta kawa bolla dendana; iya miixaa menthi gelidi iya xoonana.
DAN 11:8 Qassi enta xoossata, misiletanne birapenne worqafe oosetida miisheta ekidi, Gibxe efana. Guutha wodes pudeha biitta kawa olanaw dendenna.
DAN 11:9 Pudeha biitta kawoy dugeha biitta kawa bolla dendana; shin ba yida ogiyara guye simmana.
DAN 11:10 “Pudeha biitta kawa adde nayti olas giigidi, daro olanchota shiishana. Entara gahetiyaba ubbaa meeccidi efiya wolqaama di7oda kanthidi aadhana; zaari olidi dugeha kawa miixaa gakanaw baana.
DAN 11:11 He wode dugeha biitta kawoy daro hanqetidi, pudeha biitta kawa olanaw dendana. Pudeha biitta kawoy shiishida daro olanchotara oletidi, enta xoonana.
DAN 11:12 Daro olanchota di77idaape guye, otoron punetana. Daro mukulu asaa wodhana; shin iya xoonoy iyara gam7enna.
DAN 11:13 “Pudeha biitta kawoy kaseysafe aadhiya hara olanchota giigisana. Guutha laythi gam7idaape guye, kumetha ola miishe oykida, olanchota ekidi olas keyana.
DAN 11:14 He wode daro asay dugeha biitta kawa bolla dendana. Qoncethay poletana mela ne asaape issi issi makallanchoti dendana, shin enti xoonokona.
DAN 11:15 Pudeha biitta kawoy dugeha biitta yidi, yuushoy gimbetida issi katama olidi oykana. Dugeha biitta kawa olanchoti wolqa dhayana; hari attoshin, entafe mino olanchotika entara eqetanaw danda7okona.
DAN 11:16 Iyara eqetanaw danda7ey bayna gisho pudeha biitta kawoy ba koydaba ubbaa oothana. I dooretida biittan minni eqidi, iya dhaysiya wolqa demmana.
DAN 11:17 I ba kawotethan de7iya wolqa ubbaa ekidi yaanaw halchana; dugeha biitta kawuwara dabbotetha caaqo medhana. He kawotethaa dhaysanaw halchidi, ba na7iw iyaw immana, shin iya halchoy poletenna.
DAN 11:18 Ba som7uwa yuushoy abban teqetida biittatako zaaridi, entafe darota olidi baw ekana. Shin issi toora moconay iya xoonidi iya otoruwa giishshana; iya otoro odaa iya bolla zaarana.
DAN 11:19 Pudeha biitta kawoy ba biitta, ba miixako simmana. Shin I dhubetidi kundana; iya nam7antho oonika be7enna.
DAN 11:20 “Iya bessan kawotiya hara kawoy ba kawotetha bonchuwa naaganaw giira giirsiya ase kawotethaa giddo kiittana. Gidoshin, guutha wodepe guye, qoncen woyko olan gidonashin, I coo hayqidi dhayana.
DAN 11:21 “Iya bessan issi kadhetida asi dendana; shin enti iyaw kawotetha boncho immokona. Asay sa7i saro gidi uttidashin, cimmidi kawotethaa oykana.
DAN 11:22 Daro olanchoti iya sinthafe pitetidi dhayana; caaqo halaqayka hayqana.
DAN 11:23 Iyara caaquwa caaqi simmidi, ba oothiyaba cimon oothana; guutha asata xalaalara I minnana.
DAN 11:24 Asay sa7i saro gidi uttidashin, he biittan I, daro dure gidida issi baggaa oykana. Kase iya aaway woyko iya mayzay oothiboonnaba oothana; I di77idi shiishida duretethaanne aquwa bana kaalleysatas gishana. I miixata laallanaw halchana; shin hessi hananay guutha wodesa.
DAN 11:25 Ba wolqaa minthidi, daro olanchotara dugeha biitta kawa bolla dendana. Dugeha biitta kawoy daronne wolqaama olanchotara olas dendidi, iyara oletana. Shin iya bolla enti maqida maquwa gaason, I entara eqetanaw danda7enna.
DAN 11:26 Kawuwara issi gaytan meysati iya dhaysana; iya olanchoti pitetana; daroti olan hayqana.
DAN 11:27 Ha nam7u kawoti banta wozanan iita qofa oykidi, issife issi gayta bolla uttana; issoy issuwa cimmanaw wordo odetana. Shin qametida wodey buroo gakiboonna gisho enti oothana gidi qopiyabay entaw injetenna.
DAN 11:28 Pudeha biitta kawoy daro duretethara ba biitta simmana. Shin I ba wozanan geeshsha caaquwa ixana. Geeshsha caaquwa qohanaw iya bolla issiba oothidi, ba biitta simmana.
DAN 11:29 “Qametida wodey gakin, I zaaridi dugeha biitta bolla dendana, shin iyaw kaseysada injetenna.
DAN 11:30 Kiximape yaa olaa markabeti iya daganthana. Guye simmidi, geeshsha caaquwa bolla hanqetana. Qassi yaape simmidi, geeshsha caaquwa aggidaysatara dabbotana.
DAN 11:31 “Iya olanchoti Xoossa keethaanne iya yuushuwa tunisana; gallas gallas yarshetiya yarshuwa diggana. Yaatidi, dhayo tunatetha yan essana.
DAN 11:32 I caaqo qaala mentheyisata, cimo qaalan ba bagga zaarana; shin banta Xoossaa eriya asay minnananne iyara eqetana.
DAN 11:33 “Asaa giddon de7iya cincati daro asaa tamaarsana. Shin guutha woden he asati mashshan hayqana, taman xuugetana, di7etana woyko bonqetana.
DAN 11:34 He metuwa giddon de7ishe, enti guutha maado demmana; daro asay enta bagga daanidi, entako simmana; shin tuma wozanape gidenna.
DAN 11:35 Cincatape issoti issoti dhubetana. Qametida wodey buroo gakiboonna gisho, enti hessada hanidi, wursetha wodey gakanaw, paacetidi keyana, geeyananne borey baynayisata gidana.”
DAN 11:36 “Kawoy bana lo77idaba oothana; bana xoossata ubbaafe dhoqu oothidi gitayana; xoossata Xoossaa bolla kase si7etidi eronna iita qaala odetana. Hananaw de7iyabay hananaw bessiya gisho, Xoossa hanqoy poletana gakanaw I oothiyaba ubbay iyaw injetana.
DAN 11:37 I, ba mayzata xoossata woyko maccasay dosiya xoossata kadhana. I bana ubbaafe aathidi dhoqu oothiya gisho, hara xoossata ekenna.
DAN 11:38 I enta boncho aggidi miixata xoossaa bonchana; iya mayzati eronna xoosse, worqa, bira, al7o shuchinne lo77o imota immidi bonchana.
DAN 11:39 Imatha xoossan maadetidi, I mino miixata bolla dendana. Qassi iya maata eriya asaa daro bonchana. I enta, asaa bolla shuumana; biitta woyto oothidi entaw shaaki shaaki immana.
DAN 11:40 “Wursetha wodey gakin, dugeha biitta kawoy dendidi, pudeha biitta kawa olana. Shin pudeha biitta kawoy para gaareta, para asatanne daro markabeta ekidi, iya bolla goteda yaana. Daro biitta oykidi, di7oda meecidi efana.
DAN 11:41 I geeshsha biitta bolla dendana; daro biittati iya kushen kundana. Shin Edoomey, Moo7abeynne Amoonepe dariya baggay iya kushepe attana.
DAN 11:42 I daro biittata bolla dendiya wode, Gibxeyka iyape kessi ekenna.
DAN 11:43 Gibxe worqaa, biraanne duretetha ubbaa, ba kushen aathana. Liibenne Tophe asay iyaw haaretana.
DAN 11:44 Shin doloha baggaafenne pudeha baggafe yaa oday, iya daganthana. Hanqo eexi keyidi, darota wodhananne dhaysana.
DAN 11:45 I ba kawota dunkaaniya abbaafenne lo77o geeshsha zumaape giddon tokana. Shin I, wursethan baw dhayana; iya maaddiya oonika bentenna.”
DAN 12:1 “He wode ne asaa naagiya gita halaqay, Mika7eeli dendana. Kawotethi medhetida wodiyape doomidi, hani eronna meto wodey yaana. Gidoshin, enta sunthay Xoossa Maxaafan xaafetida ne asa ubbay he wode attana.
DAN 12:2 Hayqida asaape daroti dendana. Entafe baggati merina de7os, baggati qassi yeellasinne merinaa kawushas dendana.
DAN 12:3 Cincati salo poo7oda qassi darota xillotetha oge kaaletheysati merinaw xoolintoda poo7ana.
DAN 12:4 Shin neno Daanela, ne wursetha wodey gakanaw, ha maxaafa gordada, maatame wotha. Daroti eratethi demmanaw yaanne haanne woxeretana” yaagis.
DAN 12:5 Taani, Daaneli, nam7u asata, issoy shaafape hafintha, issoy shaafape hefinthan eqidaysata be7as.
DAN 12:6 Entafe issoy liino ma7idi, shaafape bolla baggara eqida kiitanchuwa, “Ha malaatati poletanaw ay mela wode gam7anee?” yaagidi oychis.
DAN 12:7 Liino ma7idi, shaafape qommo baggara eqida kiitanchoy, ba ushacha kushiyanne ba haddirsa kushiya salo denthidi, merinaw de7eysa sunthan haysada yaagidi caaqis: “Haysi, wodey, wodetinne wode baggay gakanaw gam7ana; geeshsha asata wolqay wuriya wode ha ubbay poletana” yaagis.
DAN 12:8 Ha ubba taani si7as, shin taw gelibeenna. Yaatin, taani, “Ta Godaw, ha ubbaas wursethay ay gidandee?” gada oychas.
DAN 12:9 I zaaridi, “Daanela, ha qaalay wursetha wodey gakanaw gordetidanne attametida gisho neeni ba;
DAN 12:10 Daroti paacetidi keyana, geeyananne borey baynayisata gidana; shin iitati, iitabaa oothana. Iitatape issi asika akeekenna; shin cincati akeekana.
DAN 12:11 “Gallas gallas yarshetiya yarshoy digetidaapenne dhayo tunatethay he bessan eqidaape simmin, 1,290 gallas.
DAN 12:12 Gencidi 1,335 gallas gakanaw naagiya asi anjetidaysa.
DAN 12:13 “Neeni wursethi gakanaw ba. Ne shempana; wursethan nena gakiya laata ekanaw dendana” yaagis.
HOS 1:1 Ooziyani, Iyo7atami, Akaazinne Hizqiyaasi kaalli kaalli Yihudan kawotida wode qassi Yo7aasa na7ay Iyorbaami Isra7eelen kawotida wode Bi7eera na7aa Hoseko yida Godaa qaalay haysa.
HOS 1:2 Goday koyro Hose baggara odida wode “Ta asay taape haakidi iita laymatethi oothida gisho, neeni bada, layma maccas ekada layma nayta iipe yela” yaagis.
HOS 1:3 Hessa gisho, Hosey bidi, Dibilayma na7iw Gomero ekin, iya qanthatada adde na7a yelasu.
HOS 1:4 Yaatin, Goday Hoseko ne na7a suntha, “Izra7eele” (laallana woyko zerana) yaagada suntha. Ayis giiko, Izra7eelen gukida suuthaa gisho taani Iyyu kochaa qantha woden pirdana; Isra7eele kawotethaaka dhaysana.
HOS 1:5 He gallas taani Izra7eela zangaaran Isra7eele olanchota mentherethana.
HOS 1:6 Gomera nam7antho qanthatada, macca na7a yelasu. Yaatin, Goday Hoseko, “I suntha Loruhaama (Maarotethi demmonaaro) yaagada suntha. Ayis giiko, hizape guye taani Isra7eele asas qadhetike; entaw atto giike.
HOS 1:7 Shin taani Yihuda asaas qadhetana; taani enta dongen woyko mashshan woyko olan woyko paratan woyko para asatan gidonashin, taani Goday, enta Xoossay, ta wolqan enta ashshana” yaagis.
HOS 1:8 Gomera Loruhaamo dhanthi duuthidaape guye qanthatada hara adde na7a yelasu.
HOS 1:9 Yaatin, Goday Hoseko, “Iya sunthaa Lo7aama (Ta ase gidenna) yaagada suntha. Ayis giiko, hinte ta ase gideketa; taka hinte Xoosse gidike.
HOS 1:10 “Gidoshin, Isra7eele asay makanawunne taybanaw danda7etonna abba shafiya mela gidana. Enti, ‘Hinte ta ase gideketa’ geetetidi xeegetida bessan hinte ‘De7o Xoossaa nayta’ geetetana.
HOS 1:11 Yihuda asaynne Isra7eele asay issife shiiqidi bantaw issi halaqa dooridi di7etida biittafe simmananne injetidi daana. He gallasay Izra7eeles gita gallas gidana.
HOS 2:1 “Hinte ishata, ‘Ta ase’ qassi hinte micheta, ‘Maarotethi demmidaysata’ yaagidi xeegite.
HOS 2:2 “Hinte aayiw hanqetite; iyo kaccite. Ayis giiko, iya ta macho giduku; taka I azina gidike. Iya ba som7uwafe laymatetha mallaa diggo; laymatetha oosuwa ba dhanthata giddofe diggo.
HOS 2:3 Hessi hanonna ixiko iya yeletida gallasaada, taani iyo xire kallo ashshana. Qassi iyo melida mela biitta oothana; taani iyo saamon wodhana.
HOS 2:4 Enti laymepe yeletida nayta gidida gisho, taani I naytas qadhetike.
HOS 2:5 Enta aayiya laymatasu; kawushabaa hanada enta qanthatasu. Iya, ‘Taani ta kathaanne ta haatha, ta suufiyanne ta liinuwa, ta zaytiyanne ta ushsha taw immiya ta laggethota kaallada baana’ yaagasu.
HOS 2:6 Hessa gisho, taani I ogiya agunthan gordana; iya ba ogiya demmonna mela taani I yuushuwa gimben dirana.
HOS 2:7 Iya ba laggethota geedo woxana, shin gakuku; enta koyana, shin demmuku. Hessafe guye, ‘Ha77i duussaafe taw beniysi lo77o gidiya gisho, simmada ta koyro azinaako baana’ yaagana.
HOS 2:8 Kathaa, woyne ushshaanne zaytiya iw immidaynne enti Ba7aale eeqas yarshiya biraanne worqaa iw darsiday tana gideysa iya eronna ixasu.
HOS 2:9 Hessa gisho, kaxiya wode ta kathaa, teeriya wode ta woyniya iipe zaarada ekana. Iya ba kalluwa kammiya suufiyanne liinuwa iipe qaara ekana.
HOS 2:10 I laggethota sinthan taani I kalluwa qaarana; ta kushiyape iyo oonika ashshena.
HOS 2:11 Taani I ufaysa ba7aaleta ubbaa, ageena xeero gallasata, I Sambaata gallasata, laythan laythan bonchetiya ba7aaleta ashshana.
HOS 2:12 Iya, ‘Ta laggethoti taw immida ciga’ giya woyniyanne balase mithaa ta dhaysana; taani he bessa wora oothana; bazzo do7ati iya maana.
HOS 2:13 Iya tana dogada ba laggethota kaallada, sagaayotaninne alleeqotan alleeqetada, Ba7aale eeqas ixaane cuyisida gallasata gisho taani iyo seerana; yaagees Goday.
HOS 2:14 “Hessa gisho, taani iyo cimmada mela biitta ehada, iw siiqo qaalan odana.
HOS 2:15 Yan taani I woyne gade iw zaarada immana; Akoora zangaara (meto zangaara) iw ufaysa penge oothana. Gibxe biittafe keyida wodiyada ba geela7otetha laythan de7iya hanotan ufaysan yexana” yaagees.
HOS 2:16 He gallas iya tana, “Ta azinaw” yaagada xeegana; kaseysada, “Ta godaw” yaagada xeeguku.
HOS 2:17 Ayis giiko, taani I doonape “Ba7aale” eeqata sunthaa diggana; hizape guye taani iyo “Ba7aale” suntha xeegisike.
HOS 2:18 He wode taani ta asaa gisho sa7aa do7atara, salo kafotaranne biittara gooshetiya medhetethatara caaqana. Taani biittafe donge, mashshenne ola dhaysana. Enti biitta bolla saro daana.
HOS 2:19 Taani nena merinaw taw macho oothana; xillotethan, suure pirdan, merinaa siiquwaninne maarotethan taw giigisana.
HOS 2:20 Taani ammanetada nena taw giigisana; neka Godaa erana.
HOS 2:21 “He wode taani zaaro immana; taani salotas zaaro immana, saloti sa7aas zaaro immana.
HOS 2:22 Sa7ay kathaas, woyne ushshasinne zaytiyas zaaro immana; enti Izra7eeles (Xoossay tokana) zaaro immana.
HOS 2:23 Taani iyo ta gisho gada biitta bolla tokana; Kase taani, ‘Maarike’ gidaysata maarana; ‘Ta ase gideketa’; gidaysata, ‘Ta ase’ gaana. Entika tana, ‘Neeni nu Xoossaa’ yaagana” yaagees Goday.
HOS 3:1 Goday tana, “Isra7eele asay hara xoossatako simmidi, zabibe uythaa yarshanaw koykoka, Goday enta doseysada iyo dosa. Iya hara laggethiyabanne laymatiyaba gidikoka neeni iyo dosa” yaagis.
HOS 3:2 Yaagin, taani iyo tammanne ichashu bira santimeninne xeetanne ishatamu kilo giraame bangan shammas.
HOS 3:3 Taani iyo, “Neeni laymatonnanne hara addera doonna taara daro wode daanaw koshshees. Taanika neera daana” yaagas.
HOS 3:4 Isra7eele asay kawoy woyko halaqi bayna, yarshoy woyko eeqa tuussi bayna, efuude ma7oy woyko eeqa misiley bayna daro wode daana.
HOS 3:5 Hessafe guye, Isra7eele asay Godaa banta Xoossaakonne banta kawa Dawitako simmana. Wursetha wodiyan enti kokorishe, Godaakonne iya anjuwako yaana.
HOS 4:1 Ha biittan de7iya asa ubbaa, Goday mootiyabay de7iya gisho, Isra7eele asato, Godaa qaala si7ite. Hessika, biitta bolla ammanetethi, siiqoynne Xoossaa eroy baawa.
HOS 4:2 Ha biitta bolla de7ey baadethi, wordo, shempo wodho, kaysotonne layma xalaala. Enti woga ubbaa menthosona; suuthu gussoosona.
HOS 4:3 Hessa gaason biitta ubbay yeekana; biittan de7iya ubbay daaburana. Sa7a do7ati, salo kafotinne abba moloti hayqana.
HOS 4:4 Hinteno, kahineto, taani hintena mootiyabay de7iya gisho, oonika hara asara palametofo; woyko hara asi mootopo.
HOS 4:5 Hinte gallasinne qamma dhubeteeta; nabetika hintera dhubetoosona. Hessa gisho, taani hinte aayiw dhaysana.
HOS 4:6 Ta asaas eratethi bayna gisho dhayidosona. Hinte eratethi ixida gisho, taka hinte taw kahine gidonna mela ixas. Hinte Xoossaa higgiya dogida gisho, taka hinte nayta dogana.
HOS 4:7 Kahineta tayboy dari dari biya wode tana guji guji naaqidosona; taani enta bonchuwa qaarada yeellayana.
HOS 4:8 Ta asaa nagaray entaw kathi gidida gisho enti ta asay balaba oothana mela koyoosona.
HOS 4:9 Kahineti deriyape dummatibokona. Taani enta hanota gisho, enta seerana; enta oosuwada entaw zaarana.
HOS 4:10 Enti Godaa aggida gisho maana, shin kallokona; laymatana, shin na7a yelokona.
HOS 4:11 Laymatethi, gam7ida woyne ushshinne mal7anto woyne ushshi ta asaa wozanaa dhaysis.
HOS 4:12 Enti mithafe oosetida eeqa misile zore oychoosona; enta xam7ay enta oysha zaarees. Laymatetha ayyaanay enta balethis; enti banta Xoossaafe haakidi laymatidosona.
HOS 4:13 Dereta huuphen yarsho yarshoosona; lo77o kuyay de7iya wolaa garsan, xiidda garsan ixaane cuyisoosona. Hessa gisho, hinte macca nayti laymatoosona; hinte nayta macheti laammoosona.
HOS 4:14 Hinte macca nayti laymatiya wodenne hinte nayta macheti laammiya wode taani seerike. Ayis giiko, addeti banta huuphen laymateysatara laggetoosona; entara yarshoosona. Hessa gisho, akeeki bayna derey dhayana.
HOS 4:15 “Isra7eele asato, hinte laymatikoka, Yihuda asay hinteysada bala gidopo. Galgala boopite; Beet-Aweena (Iitatetha keethi) keyopite; ‘De7o Xoossay eriya mela’ gidi caaqofite.
HOS 4:16 Isra7eele asay geella ussada geellatis. Yaatin, Goday entana dalga denban dorsa marada waatidi heemmanee?
HOS 4:17 Efreemi eeqatara gahetis; enta aggaagite.
HOS 4:18 Enti daro woyne ushsha uyi simmidi, laymatethi aggokona; enta halaqatika yeellayaba daro dosoosona.
HOS 4:19 Enta carkoy efana; banta eeqas yarshida yarshota gaason enti yeellatana.”
HOS 5:1 “Hinteno kahineto, haysa si7ite! Hinteno Isra7eele asato, akeekite! Kawo keetha asato, loythi si7ite! Ha pirday hinte bolla pirdetis. Hinte Mixiphas xihe gidideta; Taabore zuma bolla miccetida giteda gidideta.
HOS 5:2 Geellati wodho aggibokona; hessa gisho, ta enta ubbaa seerana.
HOS 5:3 Taani Efreema erayis; Isra7eeley taape geemmibeenna. Efreema, neeni ha77i layma gidadasa; Isra7eeley tunis.”
HOS 5:4 “Isra7eele asay banta Xoossaako simmonna mela enta iita oosoy enta teqis. Laymatetha ayyaani enta wozanan de7iya gisho enti Godaa erokona.
HOS 5:5 Isra7eele asaa otoroy enta bolla markatees. Isra7eele asaynne Efreema asay banta nagara gaason dhubetoosona; Yihuda asayka entara dhubetees.
HOS 5:6 Enti Godaas yarshanaw banta dorsa wudiyanne mehe wudiya laagi ekidi iya koyanaw baana; shin I entafe shaaketida gisho iya demmokona.
HOS 5:7 Enti laymatethan nayta yelida gisho Godaas ammanetibokona. Hessa gisho, issi ageenan entinne enta biittay dhayana.
HOS 5:8 Gib7a kataman moyze, Rama kataman zaye punnite. Biniyaame asaw, ‘Guye simmidi be7ite’ yaagidi Beet-Aweenan waassite.
HOS 5:9 Seeretiya wode Efreemi baysa gidana. Isra7eele kochaa giddon tuma hananaba taani awaajana.
HOS 5:10 “Goday, ‘Yihuda halaqati zawa sugiya asa mela gididosona; taani ta hanquwa enta bolla di7o haathada gussana.
HOS 5:11 Efreema asay eridi eeqa goyinnida gisho, suure pirdan un7etidosona; tinchetidosona.
HOS 5:12 Hessa gisho, taani Efreema asaas bile, Yihuda asaas xoodha gidana.
HOS 5:13 “ ‘Efreemi ba hargiya, Yihudi ba madunthaa be7ida wode Efreemi Asoore biitta bis; he gita kawa maado oychis. Shin I enta hargiya dhallanaw woyko enta madunthaa pathanaw danda7ibeenna.
HOS 5:14 Hessa gisho, taani Efreemas gaammoda hanana; Yihudas wodala gaammoda hanana. Taani enta mentherethada eka baana; oonika enta ta kushepe ashshena.
HOS 5:15 Enti banta bala akeekana gakanawunne tana koyana gakanaw taani guye ta bessaa simmana. Enti banta waayan tana minthidi koyana’ ” yaagees.
HOS 6:1 Isra7eele asay, “Haayite! Ane Godaako simmoos. I nuna mentherethis, shin I nuna koolana; I nuna madunxisis, shin I nu madunthaa qachana.
HOS 6:2 Nam7u gallasape guye I nuna pathana; heedzantho gallasan nu iya sinthan daana mela nuna denthana.
HOS 6:3 Ane Godaa eroos; iya eranaw minthidi kaalloos. Xalqey doleysada I qoncana; torche iri yeysada I nuuko yaana” yaagidosona.
HOS 6:4 Goday, “Ta hintena Efreema asaa waato? Ta hintena Yihuda asaa waato? Hinte siiqoy wonta xaasa mela; ellesidi dhayiya aka mela.
HOS 6:5 Hessa gisho, taani nabeta baggara hintena qanxerethas; ta doonape keyida qaalan hintena wodhas. Ta pirday hinte bolla poo7oda wagaggi gaana.
HOS 6:6 Ta yarsho gidonashin maarota koyayis; xuussa yarsho gidonashin Xoossaa ero koyayis.
HOS 6:7 “Shin enti Addaameda, caaqo menthidosona; yan taw ammanetona ixidosona.
HOS 6:8 Galada katamay suuthi gukiya iita ooso oothiya asay kumida katama.
HOS 6:9 Pangati ase wodhanaw qosetidi naageysada kahineta cugay hessada naagoosona. Seekema katamaa efiya ogiyan naagidi ase wodhoosona; enti yeellaya worandzo ooso oothosona.
HOS 6:10 Taani Isra7eele asaa giddon daganthiyaba be7as. Efreema giddon laymatethi de7ees; Isra7eeley tunis.
HOS 6:11 “Yihuda, taani ta asaa di7uwa zaariya wode new qassi caka wode giigisas.
HOS 7:1 “Taani Isra7eele pathanaw koyiya wode Efreema nagaraynne Samaare asaa iita oosoy qoncis. Enti ubba wode cimmoosona; kaysoti menthidi geloosona; pangati keyidi bonqoosona.
HOS 7:2 Shin taani enta iita ooso ubbaa ereysa akeekokona. Enta iita oosoy enta naaqi oykis; he iita oosoy ubba wode ta sinthan de7ees.
HOS 7:3 “Enti kawa banta iitatethan, halaqata banta worduwan ufaysoosona.
HOS 7:4 Enti ubbay laammoosona; munuqay dendana gakanaw daabbo uukeysi tama shiisho koshshonaysada enti teellida cooce mela.
HOS 7:5 Banta kawa boncho ba7aale gallasan halaqati woyne ushshan mathotidosona. Ika qelqiseysatas ba kushiya immis.
HOS 7:6 Enta wozanay tama cooce mela; enti shiiqidi iitabaa maqetidosona. Enta hanqoy qamma kumetha cuuyishe aqees; sa7i wontiya wode tama lacoda eexees.
HOS 7:7 Enti ubbay teellida cooce mela banta halaqata moosona. Enta kawoti ubbay kundidosona; entafe oonika tana xeegey baawa.
HOS 7:8 “Efreema asay hara kawotetha asaara walaketis; Efreema asay shiretiboonna uytha mela gidis.
HOS 7:9 Allagati iya wolqaa midosona, shin I hessa eribeenna; iya huuphey puulumis, shin I hessa akeekibena.
HOS 7:10 Isra7eele asaa otoroy enta bolla markatees. Hessi ubbay haninka enti Godaako, banta Xoossaako, simmibokona woyko iya koybookona.
HOS 7:11 “Efreema asay holleda eeyanne coo cimeteyisata. Enti maado demmanaw issi toho Gibxe; issi toho Asoore simmoosona.
HOS 7:12 Enti biya wode taani enta bolla gite yeggana; taani enta kafo oykiyada oykana. Enta iita oosuwa gisho taani enta seerana.
HOS 7:13 “Enta ayye! Enti taape haakidosona. Entaw dhayo gido! Enti ta bolla makallidosona. Taani enta wozanaw koyas, shin enti ta bolla wordo haasayoosona.
HOS 7:14 Banta hiixan zin7idi zeleelosona, shin banta wozanaape woossokona. Kathasinne woyne ushshas banta asatethaa gaarosona, shin enti taape haakidosona.
HOS 7:15 “Enta loohisidaynne minthiday tana, shin taw iitabaa maqetoosona.
HOS 7:16 Enti hadabaako simmidosona. Enti ammanthona donge gididosona. Enta halaqati iitaba odetida gisho mashshan wurana; hessika entaw Gibxen miichas gidana.
HOS 8:1 “Moyze punna! Enti ta caaquwanne ta higgiya menthida gisho, Godaa asaa bolla morkey ankoda aales.
HOS 8:2 Isra7eele asay, ‘Abeeti nu Xoossaw, nuuni nena eroos’ yaagidi taako waassoosona.
HOS 8:3 Shin Isra7eele asay lo77oba ixida gisho, morkey enta yedethana.
HOS 8:4 Enti tana oychonna bantaw kawota kawothidosona; ta eronna de7ishin bantaw halaqata dooridosona. Dhayanaw machidi eeqa misileta banta birapenne worqafe medhidosona.
HOS 8:5 Samaare asaw, hinte mari daanisidi medhida eeqa ta ixas; ta hanqoy hinte bolla eexis. Enti tunida mela awude gakanaw daanee?
HOS 8:6 Ha mara eeqa misiley kushe hiillan medhetisipe attishin, I xoosse gidenna. Samaare eeqa misiley meqeretana.
HOS 8:7 “Enti carko zeridi gote buucosona. Eqon de7iya enta kathaas ayfey bentenna; dhiilleyka baawa; ayfey de7ikoka allagati maana.
HOS 8:8 Isra7eele asay ha77i allaga asaa giddon mitetidosona; enti pathonna asi gididosona.
HOS 8:9 Enti baddo harey barka toylateysa mela toylatishe Asoore bidosona. Efreema asay banta miishiyan laggetho shammidosona.
HOS 8:10 Bantana maaddana mela miishen shammikoka ta enta shiishana. Kare biitta kawotinne halaqati entana un7ethin enti coo dhayana.
HOS 8:11 “Efreema asay nagara yarsho yarshiya daro bessata keexis, shin he yarsho bessati nagara oothiya bessi gididosona.
HOS 8:12 Taani entaw ta higgiyan darobaa xaafas, shin enti he higgiya allagabada xeellidosona.
HOS 8:13 Enti yarshanaw dosoosona; yarsho ashuwa moosona, shin Goday enta yarshuwa ekibeenna. I ha77i enta nagara hassayana; enta nagaraa gisho enta seerana; enti Gibxe biitta simmana.
HOS 8:14 Isra7eele asay bana Medhidaysa dogidi, kawo gadhota keexis. Yihuda asay gimbetida daro katamata keexis. Shin taani he katamatan tama yeddin, enta miixa maana” yaagees.
HOS 9:1 Isra7eele asato, ufaytofite! Hara kawotada poocu goopite! Hinte hinte Xoossaafe haakidi laymatideta; kathaa geeshshiya wudumman laymatethas immiya gatiya dosideta.
HOS 9:2 Hessa gisho, hinte wudummaafe kathi, gum7iya bessaafe woyne ushsha demmeketa; woyney hintew ayfena.
HOS 9:3 Enti Godaa biittan gam7okona. Efreemi Gibxe biitta simmana; Asoore biittan tuna kathi maana.
HOS 9:4 Enti Godaas woyne ushsha yarsho gussokona; enta yarshoy iya ufaysenna. He yarshoy entaw shocha mela gidana; hessa miya ubbay tunana. He kathay enta koshaa xalaala zaaranaasafe attishin, Godaara de7iya issifetethaas maaddenna.
HOS 9:5 Godaa hinte bonchana mela I hintew immida ba7aale gallasatan hinte ay oothanee?
HOS 9:6 Enti dhayope kessi ekikoka Gibxey enta shiishana; Mempisa katamay enta moogana. Enti shiishida bira miishe ubbaa sharaafi mittana; enti de7iya bessan buloy dolana.
HOS 9:7 Seera gallasi yis; pirda wodey gakis. Isra7eele asay hessa ero! Hinte nagaraa gishonne morketetha gisho nabey eeya mela Xoossa asi geetetidaysi gooshsha mela taybetis.
HOS 9:8 Nabey Xoossara gididi, Efreema naagees; shin iya ogiyan xihey yegetis; xoossa keethan iya morketethi naagees.
HOS 9:9 Gib7a kataman hanidaysada enti tunidosona. Xoossay enta naaquwa hassayana; nagaraa gisho enta seerana.
HOS 9:10 Goday, “Taani mela biittan woyne ayfe demmidaysada Isra7eele asaa demmas. Taani balase mithan koyro ayfe be7idaysada hinte aawata be7as. Shin enti Bi7eel-Fagoora geetetiya bessaa yidi, yeellayiya eeqas bantana dummayidosona; enti he dosida eeqada tunidosona.
HOS 9:11 Efreema bonchoy kafoda paalli dhayana; hizape guye yeloy baawa; qanthatoy baawa; atethi baawa.
HOS 9:12 Enti na7a yelidi dichiyaba gidikoka ta enta wodha wursana. Taani entafe haakida wode entana ayye!
HOS 9:13 Efreemi lo77o bessan toketida zamba mitha mela hanin be7as, shin ba nayta shukas aatha immis” yaagis.
HOS 9:14 Abeeti Godaw, entaw imma! Ne entaw ay immanee? Ne entaw boshetiya ulonne melida dhanthi imma.
HOS 9:15 Goday, “Enta iitatetha gisho taani Galgalan ixo doomas. Enta nagaraa gisho taani enta ta keethaafe gooddana; hizape guye ta enta dosike; enta halaqati ubbay geellata.
HOS 9:16 Efreemi deshetin, iya xaphoy melis; ayfeyka baawa. Enti na7a yelikoka taani enti dosiya nayta wodhana” yaagis.
HOS 9:17 Enti iyaw kiitetonna ixida gisho ta Xoossay enta pixiri holana; enti kawotethata giddon toylatishe daana.
HOS 10:1 Isra7eele asay daro ayfe ayfiya daayida woyne mela; enta ayfey darida mela eeqa yarsho bessata darsi keexidosona. Enta biittay duretida keena goyinniya eeqa tuussata alleeqisidi medhidosona.
HOS 10:2 Enta wozanay caaketis; ha77i enti banta nagaraa tookana. Goday enta yarsho bessata laallana; enta eeqa tuussata dhaysana.
HOS 10:3 He wode asay, “Nuuni Godaas yayyiboonna gisho, nuus kawoy baawa. Shin kawoy de7iyakoka nuus ay oothanee?” yaagana.
HOS 10:4 Enti hanonna ufaysa qaala geloosona; wordon caaqoosona; Hessa gisho, wodhiya harmey gaden doleysada enta bolla pirdi dolana.
HOS 10:5 Samaare kataman de7iya asay Beet-Aweenan de7iya mara misiliyas yashshan kokoroosona. Iya bonchoy iyape qaaretida gisho iyaw yeekana; he eeqa misiliya kahineti waassana.
HOS 10:6 He eeqa misiley Asoore tooketidi, bidi, gita kawas imota gididi imetana. Efreemi yeellatana; Isra7eeley eeqa misiliya gisho kawuyana.
HOS 10:7 Samaare kawoy haatha goponto gididi dhayana.
HOS 10:8 Isra7eele asay Aweena kataman eeqas goyinnishe, nagara oothiya dhoqa bessati laaletana. Enta yarsho bessan agunthinne gom7orey dolana. He wode enti deretako, “Nuna qosite!” zumatako, “Nuna genthite” yaagana.
HOS 10:9 Goday, “Isra7eele asaw, Gib7an hinte nagara ooso doomida wodiyape, hachi gakanaw nagara ooso aggibeketa. Hessa gisho, iita ootheyisata Gib7an oli wursibeenee?
HOS 10:10 Taani dosida wode he geellata seerana. Enti oothida daro nagaraa gisho taani enta seeriya wode kawotethati enta bolla dendana.
HOS 10:11 Efreemi kathi yedhanaw dosiya wadhi kessida wofaano mela. Shin taani iya lo77iya morgiyan qambara wothada waaxana. Yihuda asay worxafana; Yayqooba asay shirechana.
HOS 10:12 Goday yidi xillotethi hinte bolla bukisana gakanaw iya koyite. Hinte xillotethi zeriyaba gidiko merina siiqo cakana. Hessa gisho, othe biitta worxafite.
HOS 10:13 Shin hinte, hinte ogiyaninne hinte daro olanchotan ammanetida gisho, iitatethi zeridi nagaraa cakideta; hinte worduwa ayfiya mideta.
HOS 10:14 Hinte bolla wolqaama oli dendana; beni Kawoy Salmani Beet-Arbela katamaa olidi laallidaysadanne aayetanne nayta dhaysidaysada qassi hinte miixata dhaysana.
HOS 10:15 Beetele kataman de7eysato, hinte nagaray daro gidiya gisho hessa melabay hintena gakana. He gallas sa7i wontiya wode Isra7eele kawoy hayqana.
HOS 11:1 “Isra7eeley na7a de7iya wode iya dosiday tana; ta na7aa Gibxefe xeegas.
HOS 11:2 Taani enta darsada xeegin, enti taape daro haakidi bidosona. Ba7aale eeqatas yarsho yarshidosona; eeqa misiletas ixaane cuyisidosona.
HOS 11:3 Efreema asaa kushiya oykada hemethi tamaarsiday tana, shin enta pathiday tana gideysa erokona.
HOS 11:4 Taani enta qadheninne siiqo wodoron goochas; enta morgefe qambara denthada hokada enta muzas.
HOS 11:5 Enti taako simmonna ixidi Gibxe biitta simmana; Asoore biitta kawoy enta bolla kawotana.
HOS 11:6 Enta kataman mashshi dendana; enta katamata pengeta mentherethana; enta zoretay laaletana.
HOS 11:7 Ta asay taape haakanaw koyis. Enti Xoossaako waassikoka, I entana bonchenna.
HOS 11:8 Efreemi, taani nena waatada aggo? Isra7eele, taani nena waatada aatha immo? Taani nena waatada Adaama katamaada ootho? Taani nena waatada Xaboyma katamaada ootho? Taani nena daro dosiya gisho ta wozanay hessa ero geenna.
HOS 11:9 Taani hinte giddon de7iya Geeshsha Xoossaafe attishin, ase gidike. Hessa gisho, taani ta suulliya hanquwa hinte bolla ehike; nam7antho Efreema dhaysike; ta hanquwara hinteko yiike.
HOS 11:10 Enti Godaa kaallana; ika gaammoda gudana. I gudiya wode iya nayti wuloha baggafe kokorishe yaana.
HOS 11:11 Gibxefe kafoda, Asoorepe holleda paallishe yaana. Taani enta, enta keethan keethan wothana. Taani Goday hessa odas” yaagis.
HOS 11:12 Efreema asay wordon, Isra7eele asay cimon tana teqidosona. Yihuda asay ammanthiya Geeshsha Xoossaa bolla xaltaamis.
HOS 12:1 Efreema asay wontafe omarsi gakanaw doloha carko oykees woyko yedethees. Enti wordonne geellatethi darsoosona; Asoore biittara caaqidosona; shamaho zayte Gibxe biitta yeddoosona.
HOS 12:2 Godaas Yihuda asaara mootoy de7ees; I Yayqooba nayta enta ogiyada seerana; enta oosuwada entaw zaarana.
HOS 12:3 Yayqoobi ba aaye ulon de7ishe ba ishaa gindiya oykis. Dicci gakidi Xoossara butetis;
HOS 12:4 kiitanchora baaxetidi xoonis. Bana keeha ayfen xeellana mela ba ishaa yeekidi woossis. Yayqoobi Xoossaa Beetelen demmin Xoossay yan iyara haasayis.
HOS 12:5 I Godaa, Ubbaafe Wolqaama Xoossaa. Iya eretida sunthay Godaa geetetees.
HOS 12:6 Hessa gisho, hinte Xoossaako simmite; siiqonne suure pirdaa minthi oykite; hinte Xoossay oothana gakanaw naagite.
HOS 12:7 Zal7anchoy wordo mizaanen zal7ees; I asaa cimmanaw dosees.
HOS 12:8 Efreemi, “Taani daro dure; taani taw aqo demmas. Ta aqo ubban tanan enti bala woyko nagara demmokona.
HOS 12:9 Shin taani hintena Gibxe biittafe kessada ehida Godaa, hinte Xoossaa; Shaqara Ba7aale gallas hinte dunkaanen de7idaysada ta hintena zaara dunkaanen wothana.
HOS 12:10 Taani nabetas odas; daro qoncethi entaw immas; enta baggara daro leemisota odas” yaagis.
HOS 12:11 Galadi iita nagarancho; Galada asati pathonayisata. Enti Galgalan kormata yarshana. Enta yarsho bessay goshshan de7iya keela shuchada laaletana.
HOS 12:12 Yayqoobi Soore biitta baqatis; Isra7eeley macho ekanaw une oothis. Koyta immanaw yan dorse heemmis.
HOS 12:13 Goday Isra7eele asaa nabeta baggara Gibxe biittafe kessidi he nabeta baggara enta naagis.
HOS 12:14 Shin Efreemi Godaa daro hanqethis; I suuthi gussida gisho iya Goday achana; iya cashshaa iyaw zaarana.
HOS 13:1 Efreemi odetida wode si7ida ubbay yashshan kokoris; Isra7eele biittan enti bonchetida asi. Shin Ba7aale eeqa goyinnidosona; he nagara gaason hayqidosona.
HOS 13:2 Ha77ika nagara bolla nagara oothosona; banta bira sheeshidi bantaw eeqa medhidosona; hiillan oosetida misileta giigisidosona; ubbayka kushe hiillan medhetidosona. Asay entaba odishe, “Yarshiya asay mara eeqa misileta yeerite” yaagosona.
HOS 13:3 Hessa gisho, enti wonta shaara mela woyko wonta xaasa mela woyko carkoy wudummafe denthidi efiya puno mela woyko maskootera keya cuyaa mela gidana.
HOS 13:4 Goday “Taani hintena Gibxe biittafe kessada ehida Godaa, hinte Xoossaa. Hinte taape attishin, hara xoossi ereketa; ashshey taape hari baawa.
HOS 13:5 Bazzon, mela biittan taani hintena naagas.
HOS 13:6 Taani hintena muzin, midi kallidi otortideta; hessafe guye, tana dogideta.
HOS 13:7 Hessa gisho, taani hinte bolla gaammo gidana; maahe mela oge doonan zugana.
HOS 13:8 Mari eketida maahe mela taani hintera gahetada ta hintena puuzana. Taani hintena gaammoda mentherethana; bazzo do7ada hintena pooshshana.
HOS 13:9 “Isra7eele asato, hinte ta bolla, hintena maaddeysa bolla dendida gisho ta hintena dhaysana.
HOS 13:10 Hinte tana, ‘Nuus kawonne halaqa imma’ yaagidi oychideta. Hintena ashshiya hinte kawoy anee? Katamatan de7iya hinte halaqati awun de7oona?
HOS 13:11 Taani ta hanquwan hintew kawo immas; ta yiluwan iya denthas.
HOS 13:12 Efreema balaynne nagaray xaafetidi uttis.
HOS 13:13 Iqethi oykida maccasi un7eteysa mela un7i iya bolla yaana. Shin I eri bayna na7a; yeletiya wodey gakin, ba aaye ulope wodhonna ixiya na7a mela.
HOS 13:14 Taani enta duufope ashshana; hayqo wolqaafe wozana. Hayqo, ne gadoy awunee? Si7oole, ne dhaysoy awunee? Taani ta asaas qadhetike.
HOS 13:15 Efreemi ba ishata giddon minnikoka, Goday yeddida doloha bagga carkoy bazzofe carkishe yaana; iya pultoy eqana; iya haathay melana. I minjida al7o miishe ubbay bonqetana.
HOS 13:16 Samaare asay banta Xoossaa bolla geellatida gisho, seera ekanaw bessees. Enti mashshan busetana; enta nayti tinchetana; enta qanthatida maccasata uloy daaketana” yaagees.
HOS 14:1 Isra7eele asaw, hinte nagaraa gaason dhubetidi kundida gisho ha77i Godaa, hinte Xoossaako simmite.
HOS 14:2 Godaako simmidi, haysada yaagidi woossite; “Nu nagara ubbaafe nuna maara; nuuni nu mettersha ayfe gidida galataa new shiishana mela ne nuna ne keehatethan shiisha eka.
HOS 14:3 Asoorey nuna ashshena; nu ola paratanka ammanetoko. Nuuni nu kushen medhida eeqa misileta ubbaa, ‘Nu xoossata’ gooko. Aaway baynaysatas qadhetey nena” yaagite.
HOS 14:4 Goday, “Ta hanqoy entafe simmida gisho, taani enta makalla hanuwape enta pathada, enta wozanape siiqana.
HOS 14:5 Taani Isra7eele asaas aka gidana; enti ciishshada ciyidi, Libaanose zigaa mela xapho yeddana.
HOS 14:6 Enta dolay cil7ana; enti shamahoda lo77ana. Enta sawoy Libaanose zigada tonku gaana.
HOS 14:7 Asay simmidi ta kuya garsan shempana; enti dolada cil7ana; enti woyneda ciiyana; Libaanose woyne ushshada eretiyaba gidana.
HOS 14:8 Efreema asaw, hizape guye eeqa misilera taw ay gahetethi de7ii? Hinte woosa si7eynne hintena naagey tana. Taani cil7o zigaa mela; hinte ayfe ayfana mela oothey tana” yaagees.
HOS 14:9 Cincatethi de7iya oonika haysa akeeko; wozani de7iya oonika hessa ero. Godaa ogey suure; xilloti he ogiyara hemetoosona; shin nagaranchoti iyan dhubetoosona.
JOE 1:1 Batu7eela na7aa Iyyu7eelako Goday kiitida qaalay haysa.
JOE 1:2 Hinteno cimato, haysa si7ite! Yihuda biittan de7iya asa ubbay si7ite! Haysa melabay hinte wode woyko hinte aawata wode hani erii?
JOE 1:3 Haysa hinte naytas odite; hinte nayti banta naytas odo; enta nayti kaalliya yeletas odo.
JOE 1:4 Gondofe attida kathaa booley mis; boolepe attida kathaa guddoy mis; guddofe attida kathaa xaqoy mis.
JOE 1:5 Mal7iya woyney hintefe attida gisho, hinteno, mathoteysato barkite yeekite! Hinteno, woyne uyiya ubbati zeleelite!
JOE 1:6 Tayboy bayna booley ta biitta oykis; Enta achay gaammo acha mela; enta gacoy macca gaammo gaco mela.
JOE 1:7 Enti ta woyniya dhaysidosona; ta balasiya mitha dhoggidosona. Enti poqidi mida gisho, woyniyanne balasiya tasheti puxu gis.
JOE 1:8 Geela7iya, ba giigida azinay hayqin, kayo ma7o ma7ada yeekeysada hinteka yeekite!
JOE 1:9 Katha yarshoynne ushsha yarshoy Godaa keethan dhayida gisho, Godaa keethan oothiya kahineti yeekosona.
JOE 1:10 Goshshay mela attis; biittay yeekees; kathay dhayis; woyneynne zaytey melis.
JOE 1:11 Gaden de7iya gisteynne bangi dhayida gisho, hinteno goshshanchoto, kayotite; hinteno woyne tokeysato, zeleelite!
JOE 1:12 Woyney melis; balasey shullis; oromaaney, temirey, apiley, gaden de7iya hara mithi ubbay melis; hessa gisho, asape ufaysi haakis.
JOE 1:13 Hinteno kahineto, kayo ma7o ma7idi yeekite; hinteno yarsho bessa sinthan ootheysato, zeleelite. Hinteno ta Xoossaa sinthan ootheysato, xoossa keethi gelidi, kayo ma7o ma7idi aqite. Katha yarshoynne ushsha yarshoy, Xoossa keethan yarshiyabay baawa.
JOE 1:14 Xooma awaajite; geeshsha shiiqo xeegite. Cimatanne biittan de7iya asa ubbaa Godaa hinte Xoossaa keethan shiishite; yan Godaako waassite.
JOE 1:15 Godaa gallasay matis; he gallasaa ayye! He gallasay Ubbaa Danda7iya Xoossaa hanqo gallas gididi yees.
JOE 1:16 Nu sinthafe kathi, nu Xoossaa keethaafe, ufaysinne ililsi dhayis gidennee?
JOE 1:17 Zeretida zerethay biitta giddon buuqis; kathay dhayida gisho eley kallotis; shaaley laaletis.
JOE 1:18 Heemmiya bessi bayna gisho, mehey waassees. Hari attoshin dorsa wudeyka maata dhayidi un7etees.
JOE 1:19 Abeeti Godaw, bazzuwa tami mida gisho, xaragi denban de7iya maata xuuggida gisho, wora mithaa tama lacoy dhaysida gisho, taani neeko waassayis.
JOE 1:20 Goggiya haathi melida gisho, tami bazzon de7iya maata midigida gisho, bazzo do7atika neeko waassoosona.
JOE 2:1 Xiyoonen moyze punnite; ta geeshsha zumaa bolla waassite. Biittan de7iya asi ubbay kokoro; Godaa gallasay yees; karen de7ees.
JOE 2:2 He gallasay dhumanne caagana gallas; shaaranne sakana dhuma gallas! Zumaa bolla xalqey caareysada daronne wolqaama booley biitta ma7ana. Hessa melabay kase hanibeenna, sinthafeka hessa melabay hanenna.
JOE 2:3 Entafe sinthara miya tami bees; entafe guyera lacoy xuuggees. Enta sinthay Gannate mela; shin enta guyey booddila bazzo mela; entafe aybika kessi ekenna.
JOE 2:4 Enta medhoy para medho mela; enti ola parada adarsoosona.
JOE 2:5 Pari goochiya gaareda giiroosona; deriya huuphera gupoosona. Buuriya miya tama lacoda xuuggoosona; ola baanaw keyida wolqaama olancho daanosona.
JOE 2:6 Enta sinthan asi kokorees; yashshan asa som7oy kareexees.
JOE 2:7 Enti olanchoda woxoosona; toora asada dirsaa bollara gupoosona. Enti ubbay maaran boosona; banta salpiyafe gaxa keyokona.
JOE 2:8 Issoy issuwara sugetokona; ubbay qinxi gidi sinthe boosona. Enti bantara eqeteyisata menthidi boosona; enta teqiyabay baawa.
JOE 2:9 Enti katamaa oykoosona; dirsa gimbiya bollara woxoosona. Enti keetha bolla keyoosona; kaysoda maskootera geloosona.
JOE 2:10 Enta sinthan biitti qaaxees; saloti kokoroosona. Awinne ageeni dhumees; xoolintoti banta poo7uwa diggoosona.
JOE 2:11 Goday ba olanchota sinthan guummees; iyaw kiitetiya olanchoti taybope bolla. Godaa gallasay gitanne daro yashshees; He gallasa danda7anay oonee?
JOE 2:12 “Ha7ika xooman, yeehoninne azzanon hinte polo wozanaape taako simmite.”
JOE 2:13 Hinte wozanaape attishin, hinte ma7uwa peedhopite. Godaa, hinte Xoossaako, simmite; I, qadheynne maaroti kumidaysa; I, hanqanaw ellesonaysanne siiqoy daridaysa; I, hintena seeranaw ellesenna.
JOE 2:14 Goday hinte Xoossay, ba hanquwafe simmidi, hintena anjaneko ooni erii? He wode Godaas hinte Xoossaas, katha yarshonne ushsha yarsho yarshana.
JOE 2:15 Xiyoonen moyze punnite; xooma awaajite; geeshsha shiiquwa shiiqite!
JOE 2:16 Asaa shiishidi, hinte shiiquwa geeshshite; cimata issife shiishite; guutha naytanne dhammeyisata ashshofite. Meddan de7eysati banta quruxuwape keyo.
JOE 2:17 Godaas oothiya kahineti Xoossaa keethaa barandaafenne yarsho bessaafe giddon eqidi yeeko. Enti haysada yaagidi woosso; “Abeeti Godaw, ne asaas qadheta; kawotethati, ‘Enta Xoossay awunee? yaagana mela oothada, ne asaa boresinne miichas yeggofa’ ” yaago.
JOE 2:18 Goday ba biittas de7iya mishan ba asaas qadhetis.
JOE 2:19 Goday zaaridi ba asa haysada yaagana; “Heko, taani hintew kathaa, woyniyanne zaytiya, kalsana gakanaw yeddana; hizape guye kawotethata giddon hintena bores aggike.”
JOE 2:20 “Pudeha baggara yida booliya, taani yedethada hintefe haassana. Baysanne mela biitta enta gooddana; sintha baggara de7eyisata Maxine Abba, guye baggara de7eyisata Medetiraane Abbaa, yedethana. Yan enti hayqidi xinqana. tuma Goday wolqaamaba hintew oothis” yaagana.
JOE 2:21 Biittaw, hiza yayyofa; Goday gitaba oothida gisho, ufaytanne hashshu ga!
JOE 2:22 Hinteno sa7aa meheto, yayyofite; bazzon de7iya maatay aacis. Mithay ayfis; balaseynne woyne ayfey burkukis.
JOE 2:23 Hinteno Xiyoone asato, ufaytite; Godan hinte Xoossan, hashshu giite! I, balgo ira hintew darsidi immis; kaseysada silanne torche ira gidisidi immis.
JOE 2:24 Kathaa bukiya wudumman kathi kumana; woyniyanne zaytiya gum7iya ollay kumidi palahana.
JOE 2:25 Kase taani hinte giddo yeddida, wolqaama gondoy, booley, guddotinne xaqoti midaysa, ta hintew zaarana.
JOE 2:26 Hinte min kalsidi palahiya kathi daana; malaalsiyaba hintew oothida Godaa; hinte Xoossa sunthu galatana; ta asay zaaridi yeellatenna.
JOE 2:27 He wode taani Isra7eele giddon de7eysa, taani Goday hinte Xoossaa gideysanne taape hara xoossi baynaysa hinte erana; ta asay zaaridi yeellatenna.
JOE 2:28 Hizape guye haysada hanana; taani asa ubbaa bolla ta Ayyaana gussana. Hinte adde naytinne macca nayti tinbite odana; hinte cimati amuho amuhana; hinte na7atethati qoncethi be7ana.
JOE 2:29 He gallasatan ta adde aylleta bollanne ta macca aylleta bolla ta Ayyaana gussana.
JOE 2:30 Taani saloninne sa7an malaalsiyaba oothana, tamanne salo dendiya cuyaa bessaana.
JOE 2:31 Gitanne yashshiya Godaa gallasay yaanape kase, awi dhumana; ageeni suuthu daanana.
JOE 2:32 He wode haysada hanana; Godaa sunthaa xeegiya ubbay attana. Goday gidaysada Xiyoone zumaaninne Yerusalaamen attidaysati daana.
JOE 3:1 “He gallasaninne he wodiyan taani Yihudanne Yerusalaame asaa di7etethaafe zaarada anjana.
JOE 3:2 Taani kawotethatan de7iya asaa shiishada, Yoosafexa zangaara wodhisana. Ta asaa Isra7eele bolla enti oothida iita oosuwa gisho, taani enta yan pirdana. Enti kawotethata giddon ta asaa laallidosona; ta biitta bantaw shaaki ekidosona.
JOE 3:3 Ta asaa bolla saama yeggidosona; laymatiya maccas demmanaw, adde nayta immidosona; woyne ushshas macca nayta bayzidosona.
JOE 3:4 “Hinteno, Xiroosa, Sidoonanne Filisxeeme biitta asato, hinte ta bolla ay oothanaw qopidetii? Ta bolla halo keyanaw koyeetii? Hinte hessa koyiko, taani ellesada hinte oosuwa hinte bolla zaarana.
JOE 3:5 Ta bira, ta worqanne ta al7o miishiya ubbaa ekidi hinte eeqa keethaa gelsideta.
JOE 3:6 Yihudanne Yerusalaame asaa enta biittafe haassi efidi, Girike asaas bayzideta.
JOE 3:7 Heko, hinte bayzida bessaafe taani ha77i enta kessada hinte oothidaba ubbaa hinte huuphen zaarana.
JOE 3:8 Taani hinte adde naytanne hinte macca nayta Yihuda asaas aatha immana. Enti haaho biittan de7iya Saaba asaas enta bayzana. Taani Goday haysa odas.
JOE 3:9 “Haysada yaagidi kawotethata giddon awaajite; Olas giigite; mino asata denthethite, olanchoti shiiqidi olas keyo.
JOE 3:10 Hinte marasha mashshe, hinte baaca toora oothidi qoxite! Daaburanchoy, ‘Taani mino!’ yaago.
JOE 3:11 Hinteno, yuushuwan de7iya kawotethato, elle keyite; haa shiiqite” yaagite. Abeeti Godaw, ne olanchota duge yedda!
JOE 3:12 “Kawotethati dendidi, Yoosafexa zangaara yo; Isra7eele yuushuwan de7iya kawotethata, ubbaa bolla pirdanaw taani yan uttana.
JOE 3:13 Enta iitatethay daro; caka wodey gakida kathada enta cakite. Woyne ayfey ollan kumin yedheysada, enta yedhite.
JOE 3:14 Pirda zangaaran Goday pirdiya gallasay gakis; hessa gisho, taybon daro asay he zangaaran shiiqis.
JOE 3:15 He gallas awinne ageeni dhumana; xoolintoti banta poo7uwa diggana.
JOE 3:16 Goday Xiyoonen gididi dechana; Yerusalaamen ba qaala sissana; saloynne sa7i kokorana. Shin Goday ba asaas, Isra7eeles baqatidi attiya bessi gidana.”
JOE 3:17 “He wode hinte, taani ta geeshsha zumaa bolla, Xiyoonen de7iya Godaa hinte Xoossaa gideysa erana. Yerusalaame katamay geeshshi gidana; allagati zaaridi Yerusalaame olokona.
JOE 3:18 He gallas dereti mal7anto woyne ushshan xokana; zumati maathi goggana. Yihuda biittan de7iya shaafa ubban haathi pultana. Godaa keethan pultoy dhuuqana; Seexima zangaara ushshana.
JOE 3:19 “Gibxey baysa gidana; Edoomey booddila bazzo gidana. Enti Yihuda asaa bolla iitabaa oothidosona; xillo asaa suuthaa gussidosona.
JOE 3:20 Shin Yihudinne Yerusalaamey merinaw, yeleta ubbaas de7iya bessi gidana.
JOE 3:21 Taani halo keyonna aggida enta suuthaa haluwa buroo keyana” yaagees Goday.
AMO 1:1 Ooziyani Yihuda biittan, Iyo7aasa na7ay Iyorbaami Isra7eele biittan kawotida laythan Taqoha biittan mehe heemmeysatape issoy, Amoxey, biitti qaaxanaape nam7u laythafe sinthe Isra7eeleba odida tinbitey haysa:
AMO 1:2 I, “Goday Xiyoone zuma bolla gudees; Yerusalaame kataman dechees. Mehe heemmiya bessati meloosona; Qarmeloosa zuma bolla de7iya irxay shullees” yaagis.
AMO 1:3 Goday, “Damasqo asay zaari zaari oothida nagaraa gisho, taani enta seeronna aggike. Enti Galada biitta asaa birata achi de7iya gaaren gondorsidi yedhidosona.
AMO 1:4 Hessa gisho, taani kawa Haza7eela keethan tama yeddana; he tamay kawa Ben-Hadaada miixata maana.
AMO 1:5 Taani Damasqo katamaa pengiya menthana; Aweena zangaaran de7iya asaa yedethananne kawota xam7aa oykidaysata Beet-Edenape dhaysana; Soore asay de7etidi, Qiira baana” yaagees.
AMO 1:6 Goday, “Gaaza katamaa asay zaari zaari oothida nagaraa gisho, ta enta seeronna aggike. Enti biittan de7iya asa ubbaa di77idi, Edoome biitta asas bayzidosona.
AMO 1:7 Hessa gisho, taani Gaaza katamaa dirsan tama yeddana; he tamay katamaa miixata maana.
AMO 1:8 Ashdoodan de7iya asaa taani yedethananne kawota xam7aa oykidaysata Asqaloonape dhaysana. Eqroona kataman de7iya asaa seerana; Filisxeeme asaape attidaysati hayqana. Taani Ubbaa Haariya Goday hessa odayis” yaagees.
AMO 1:9 Goday, “Xiroosa katamaa asay zaari zaari oothida nagaraa gisho, taani enta seeronna aggike. Enti caaqida ishatetha caaquwa menthidi, de7etida asa ubbaa Edoome asaas bayzidosona.
AMO 1:10 Hessa gisho, taani Xiroosa katamaa dirsan tama yeddana; he tamay katamaa miixata maana” yaagees.
AMO 1:11 Goday, “Edoome asay zaari zaari oothida nagaraa gisho, taani enta seeronna aggike. Enti banta ishaa Isra7eele mashshan yedethidosona; enti entaw qadhetibookona; enta yiloy merinaw irxenna.
AMO 1:12 Hessa gisho, taani Temaana katamaa bolla tama yeddin, he tamay Boosora katamaa miixata maana” yaagees.
AMO 1:13 Goday, “Amoone asay zaari zaari oothida nagaraa gisho, taani enta seeronna aggike. Enti banta zawa aassanaw Galada biittan de7iya qanthatida maccasata uluwa daakidosona.
AMO 1:14 Hessa gisho, taani Raaba katamaa dirsan tama yeddana; he tamay katamaa miixata maana. Hessafe guye, olaa gallas waasoy darana; olanchoti goteda wolqaamana.
AMO 1:15 Enta kawoynne iyara oothiya halaqati ubbay de7etidi baana” yaagees.
AMO 2:1 Goday, “Moo7abe asay zaari zaari oothida nagaraa gisho, taani enta seeronna aggike. Enti Edoome kawa meqethay bido gidana gakanaw xuuggidosona.
AMO 2:2 Hessa gisho, taani Moo7abe biittan tama yeddana; he tamay Qiriyoota katamaa miixata maana. Olanchota waasuwan, moyze punuwaninne ola girsan Moo7abe asay wurana.
AMO 2:3 Taani Moo7abe haareysanne iya moorinnata ubbaa dhaysana” yaagees.
AMO 2:4 Goday, “Yihuda asay zaari zaari oothida nagaraa gisho, taani enta seeronna aggike. Enti Godaa higgiya ixidosona; iya kiitaa naagibookona. Enta aawati kaallida wordo xoossati entana balethidosona.
AMO 2:5 Hessa gisho, taani Yihuda bolla tama yeddana; he tamay Yerusalaame miixata maana” yaagees.
AMO 2:6 Goday, “Isra7eele asay zaari zaari oothida nagaraa gisho, taani enta seeronna aggike. Enti xilluwa miishes, manquwa caammas bayzoosona.
AMO 2:7 Manqota biitta baanan yeggidi, enta huuphiya yedhoosona; un7etidaysata pirda diggoosona. Aawaranne na7aara issi maccasi laggethidi ta geeshsha sunthaa tunisoosona.
AMO 2:8 Enti asape acos oykida ma7uwa yarshiya bessatan ubbaa matan hiixidi, zin7oosona; qassi asape acos ekida woyne ushsha banta xoossata keethan uyoosona.
AMO 2:9 “Gidoshin, hinte gisho gada zigada aduqida, wolada minnida Amoore asata hinte sinthafe dhaysiday tana. Taani entaw bolla ayfiya, garsa xaphuwa ubbaa dhaysas.
AMO 2:10 Taani hintena Gibxe biittafe kessada, bazzon oytamu laythi kaalethas; Amooreta biitta hintew laata oothada immas.
AMO 2:11 Hinte adde nayta giddofe nabeta, hinte na7atethata giddofe Naaziraweta denthas. Isra7eele asaw, hessi tuma gidennee? Taani Goday hessa odas.
AMO 2:12 Shin hinte Naaziraweta caaqo menthisidi, woyne ushsha ushshideta; nabeta tinbite odonna mela diggideta.
AMO 2:13 “Hessa gisho, kathi darsidi caanida gaarey me77eysada taani hintena menthana.
AMO 2:14 Gooba woxeysi kessi ekenna; minuwas wolqi ixana; olanchoy ba shempuwa ashshena.
AMO 2:15 Dongen dukeysi eqanaw danda7enna; gooba woxiya olanchoy kessi ekenna; paraaway ba shempuwa ashshena.
AMO 2:16 He gallas hari attoshin olanchota giddon daro xaala geeteteysati xire kallo baqatana” yaagees Goday.
AMO 3:1 Gibxe biittafe hintena kessida, Isra7eele asaw, Goday hintew odeysa si7ite.
AMO 3:2 Goday, “Sa7an de7iya asa ubbaafe taani hinte xalaala dooras. Hessa gisho, hinte oothida nagara ubbaas taani hintena seerana” yaagees.
AMO 3:3 Nam7u asati wolla baana gidi qofa qachonna de7ishe issife hemetoona?
AMO 3:4 Gaammoy wodhathe demmonna woran coo gudiyee? Woyko wodala gaammoy ayko yedethidi oykonna uti dendidi sarbuqiyee?
AMO 3:5 Kafoy xihey bayna coo denban oyketiyee? Woyko xihey aykoy bochonna coo piriyee?
AMO 3:6 Katama giddon ola moyzey punetiya wode asay yashshan kokoreneyee? Woyko Goday kiittonna de7ishin dhayoy issi katama bolla yiiyee?
AMO 3:7 Tuma Ubbaa Haariya Goday ba xuuraa nabetas, ba oosanchotas kasetidi qoncisonna de7ishe aykoka oothenna.
AMO 3:8 Gaammoy gudin yayyonnay oonee? Ubbaa Haariya Goday odin, tinbite odonnay oonee?
AMO 3:9 Ashdoodaninne Gibxen de7iya miixa ubbaas haysada yaagidi awaajite: “Samaariya dereta bolla shiiqidi, yan de7iya iitatethaanne sugethaa be7ite” yaagite.
AMO 3:10 “Ha asay lo77oba oothi erokona; iitatethaninne bonqidi ehida miishen banta keethaa kunthoosona” yaagees Goday.
AMO 3:11 Hessa gisho, “Morkey hinte biitta teqana; hinte baasuwa laallana; hinte keethaa bonqana” yaagees Ubbaa Haariya Goday.
AMO 3:12 “Henthanchoy gaammo doonape nam7u shuqule woyko duuxa haythi yegisi ekeysada, Samaare biittan inje duussu de7iya Isra7eele asaape guuthati attana” yaagees Goday.
AMO 3:13 “Haysa si7idi Yayqooba kochata bolla haysada yaagidi markatite.
AMO 3:14 Taani Isra7eele asaa enta nagaraa gisho seeriya wode, Beetele kataman de7iya yarsho bessata laallana; yarsho bessan de7iya kaceti me77idi, sa7an wodhana.
AMO 3:15 Enti balgonne bone de7iya keethata ubbaa taani dhaysana. Enti dangarsa zaalen alleeqisidi, keexida keethaa laallana; qassi gita gita keethati ubbay dhayana” yaagees Goday, Ubbaafe Wolqaama Xoossay.
AMO 4:1 Hinteno, Baasane miizatada modhida Samaare maccasato, haysa si7ite! Hinte manqota un7etheeta; metootanchota waayetheta. Hinte azinatako, “Nuus ushshi immite” yaageeta.
AMO 4:2 Ubbaa Haariya Goday haysada yaagidi, ba geeshshatethan caaqis, “Hinte manxaqon oyketidi gooshetana gallasinne hintefe attida guuthati manxaqon oyketidi biya moloda hanana gallas yaana.
AMO 4:3 Hinte ubbay dirsa xoo7era gooshetidi, keyidi, Armoone holetana” yaagis.
AMO 4:4 “Hinteno, Isra7eele asaw, Beetele bidi nagara oothite; Galgala bidi nagara gujidi oothite. Wonta wonta hinte yarshuwa yarshite; heedzantho gallas gallas hinte asraata ehite.
AMO 4:5 Hinte oothanaw dosey hessa gidiya gisho, Irsho yeggidi uukida oytha xuuggidi, galata yarshuwa yarshite. Hinte hinte dosan immiya imuwa gisho, otortidi awaajite” yaagees Ubbaa Haariya Goday.
AMO 4:6 “Hinte katama ubban taani kosha yeddada, hari attoshin hinte achan gathiyaba dhaysas; shin hinte hessan taako simmibeketa.
AMO 4:7 Kathi cakiya wodey gakanaw buroo heedzu ageeni de7ishin, taani hintew ira teqas. Taani issi kataman ira bukisada hara kataman bukonnaada diggas; issi goshshan bukis; hara goshshay qassi ira dhayidi melis.
AMO 4:8 Hessa gisho, nam7u woyko heedzu katama asay haathe uyanaw issi katama bidosona; shin alibookona. Hessanka hinte taako simmibeketa” yaagees Goday.
AMO 4:9 “Taani hinte kathaa bolla harge yeddas; hinte atakiltiya, hinte woyniya hinte balasiyanne hinte shamaho ubbaa booley mis; shin hinte hessanka taako simmibeketa” yaagees Goday.
AMO 4:10 “Taani Gibxe asaa bolla gado yeddidaysada, hinte bolla gado yeddas. Hinte pantha nayta mashshan wodhas; hinte parati di77etana mela oothas. Hinte mootha aha xinqon ullas; shin hinte hessanka taako simmibeketa” yaagees Goday.
AMO 4:11 “Soodomenne Gamoora katamata dhaysidaysada hintefe darota dhaysas; hinte tamape attida duncha mela; shin hessanka hinte taako simmibeketa” yaagees Goday.
AMO 4:12 Hessa gisho, “Isra7eele asaw, taani hintena haysada oothada seerana. Taani hintena haysada oothada seerana haniya gisho, Isra7eele asaw, hinte Xoossara gahetanaw giigite” yaagees Goday.
AMO 4:13 Dereta giigisiday, carko medhiday, ba wozana qofaa asas qoncisey, gallasa poo7uwa dhuman laammey, biitta dhoqa bessata bolla hemetey, iya sunthay Godaa, Ubbaafe Wolqaama Xoossaa.
AMO 5:1 Isra7eele asaw, taani hintew zeleeliya zelelsa si7ite!
AMO 5:2 “Geela7iya, Isra7eeley kundasu; zaarada denduku. Iya sa7an yegetasu; iyo denthiya oonika baawa” yaagas.
AMO 5:3 “Isra7eele katamaape mukulu olanchota olas yeddiko, xeetu olanchota xalaali attana; katamaape xeetu olanchota olas yeddiko, tammu olanchota xalaali attana” yaagees Ubbaa Haariya Goday.
AMO 5:4 “Tana koyite; hinte de7on daana.
AMO 5:5 Shin Galgali di7etana; Beeteley dhayana gisho, Beetele koyopite; Galgala gelopite. Barsaabe pinnofite” yaagees Goday.
AMO 5:6 Godaa koyite; hinte de7on daana. Hessa ixiko, I Yoosefa kochaa tamada xuuggana; Beetelen de7iya asaa tami maana. He tama toysana asi baawa.
AMO 5:7 Hinteno, suure pirdaa mirqeysato, xillotethi sa7an yeggeysato, si7ite.
AMO 5:8 Piliyadisa geetetiya laapun xoolintota oothiday, Ooriyoona geetetiya xoolinto kocata medhiday, dhumaa poo7on, gallasa qamman laammey, abban de7iya haathata salo pude xeegidi, sa7a micetha bolla duge tigey, iya sunthay Godaa.
AMO 5:9 I miixata laallanaw wolqaamata bolla gado ehees.
AMO 5:10 Hintena pirdaa dabaaban seereysa ixeeta; tuma odeysa kadheeta.
AMO 5:11 Hinte manqota yedhidi, enta kathaa bonqeeta. Yaatidi shucha keethata gimbideta; shin hinte iyan de7eketa. Lo77o woyne tokideta; shin hinte he woyne ushsha uyeketa.
AMO 5:12 Hinte naaqoy ay mela daroko, hinte nagaray ay mela giteeko taani erayis. Hinte xillota naaqeta; wodhaafe ekeeta; qassi dabaaban manqota pirdaa naaqeta.
AMO 5:13 Hessa gisho, wodey iita gidiya gisho, hessa mela woden cinca asi si77i gees.
AMO 5:14 Lo77o dosite; iita ixite; hinte de7on daana. Hessa oothiko, hinte geysada, Goday, Ubbaafe Wolqaama Xoossay hintera gidana.
AMO 5:15 Iitabaa ixite; lo77oba dosite. Pirdaa bessan suure pirda pirdite. Ooni eri Goday, Ubbaafe Wolqaama Xoossay Yoosefa kochaafe attida guuthatas qadhetonna aggenna.
AMO 5:16 Hessa gisho, Goday, Ubbaafe Wolqaama Xoossay, “Dabaaba ubban waasoy si7etana; oge ubban zelelsi darana. Goshshanchoti yeeho, zeleelidi yeekiya asay zelelsas xeegetana.
AMO 5:17 Taani hintena seeranaw hinte giddora aadhiya gisho, woyne gade ubban yeehoy daana” yaagees.
AMO 5:18 Hinteno, Godaa gallasay yaana mela amotteysato, hintena ayye! Godaa gallasaa ayis amotteetii? He gallasay poo7o gidonashin dhuma gidana.
AMO 5:19 He gallasay asi gaammofe baqatidi attiya wode maahey gakeysa mela qassi ba soo gelidi, ba kushiya godaa bolla zempisiya wode shooshi dukiya asa mela gidana.
AMO 5:20 Godaa gallasay dhuma gidanaape attishin, poo7o gidenna; he gallasay sakana dhuma gidanaape attishin, poo7oy bayna gallas gidana.
AMO 5:21 “Taani hinte bonchiya ba7aaleta ixaysinne shaatettayis; hinte geeshsha shiiqoti tana ufaysokona.
AMO 5:22 Hinte taw xuussa yarshonne katha yarsho shiishiya wode taani ekike. Qassi hinte taw issifetetha yarshos ehiya dooretida modho meheta be7ike.
AMO 5:23 Hinte mazmure cancetha ta matape haassite; hinte diixiya diithaa si7ike.
AMO 5:24 Shin suure pirdi pulto haathada, xillotethi melonna shaafa haathada goggo.
AMO 5:25 “Hinteno, Isra7eele asaw, taani hintena mela biittan oytamu laythi kaalethiya wode, taw yarsho shiishidetii? Woyko imota immidetii?
AMO 5:26 He wode hinte, hinte kushen medhida, ‘Kawa Sakuta’ geetetiya eeqanne ‘Kewaana’ geetetiya xoolinto eeqa xoossata tookideta.
AMO 5:27 Hessa gisho, taani hintena di7isada Damasqo katamaape aathada haaho bessi yeddana” yaagees iya sunthay, Ubbaafe Wolqaama Xoossaa geetetiya Goday.
AMO 6:1 Hinteno, asay maado oychiya bonchetida Isra7eele halaqato, hinteno, Xiyoonen injen de7eysato, Samaare kataman hirgi bayna uttidaysato, hintena ayye!
AMO 6:2 Ane Kaline katamaa bidi be7ite. Yaape gita Hamaata katamaanne Filisxeeme katamaa Geete wodhite. Enti hinte nam7u kawotethatape aadhona? Enta biittay hinte biittafe dalgii?
AMO 6:3 Hinte, “Iita gallas elle yeenna” gidi, iita ooso ootheysato,
AMO 6:4 zaalepe oosetida arsan zin7eysato, injen uttidaysato, dorsa wudiyape anqaratanne miiza wodiyape gatarmenthuwa meysato,
AMO 6:5 Dawitada yetha miishe hintew giigisidi, dumma dumma yethi yexeysato,
AMO 6:6 woyney ushsha kerera ganeysato, al7o shitton tiyeteysato, Yoosefa kochata dhayuwan azzanonaysato, hintena ayye!
AMO 6:7 Hessa gisho, koyro di7etanay hintena; he wode hinte inje duussay attana.
AMO 6:8 Goday, Ubbaafe Wolqaama Xoossay haysada yaagidi, banan caaqis: “Taani Yayqooba otoruwa ixas; enta miixaaka shaatettas; taani katamaanne kataman de7iya ubbaa enta morketas aathada immana” yaagees.
AMO 6:9 Issi keethan tammu asi attiko, entika hayqana.
AMO 6:10 Hayqidaysata dabbotape issoy aha mooganaw soope kessi efishe, he keethan qosetida uraako, “Neera attida hara asi de7ii?” yaagidi oychana. I zaaridi, “Baawa” yaagana. Oycheysi zaaridi, “Hayza, hayza! Godaa sunthaa nuuni xeeganaw koshshenna” yaagana.
AMO 6:11 Godaa kiitan, gita keethati laaletana; laafa keethati meqeretana.
AMO 6:12 Parati zaalla bolla gaallabanaw danda7oona? Woyko goshshanchoy boori waaxidi, abba goyanaw danda7ii? Shin hinte suure pirdaa ciiye, xillotethaa camo oothideta.
AMO 6:13 Hinte Lodobaara katama xoonida gisho ufayteta; hinte, “Nuuni Qarnayma katamaa nu minotethan oykida” gidi ceeqeteta.
AMO 6:14 “Hinteno, Isra7eele asaw, taani hinte bolla hara kawotethi denthana; enti hintena Hamaata Pinuwape doomidi, Araba zangaara gakanaw un7ethana” yaagees Goday, Ubbaafe Wolqaama Xoossay.
AMO 7:1 Ubbaa Haariya Goday tana qoncethi bessis. He qoncethan taani kawa gakiya kathay caketidaape guye, nam7antho caarida dolaa bolla Xoossay boole wude medhishin be7as.
AMO 7:2 Enti irxaba ubbaa midi wursida wode taani, “Abeeti, Ubbaa Haariya Godaw, hayyana ne deriya maararki! Yayqooba zareti waanidi attanaw danda7oona? Enti ubba guutha!” yaagas.
AMO 7:3 Hessa gisho, Goday entaw qadhetidi, “Ha neeni be7idabay poletenna” yaagis.
AMO 7:4 Ubbaa Haariya Goday tana hara qoncethi bessis. Ubbaa Haariya Goday ba asaa pirdanaw tama xeegis; he tamay gita ciimmo abba mi diggidi, biitta maanaw doomis.
AMO 7:5 Taani, “Abeeti, Ubbaa Haariya Godaw, hayyana ha tama toysarki! Yayqooba zareti waanidi attanaw danda7oona? Enti ubba guutha!” yaagas.
AMO 7:6 Hessa gisho, Goday qadhetidi, “Haysi poletenna” yaagees Ubbaa Haariya Goday.
AMO 7:7 Qassi Xoossay tana hara qoncethi bessis. Taani he qoncethan be7iya wode, Goday tumbe oykidi, tumben liketidi gimbetida gimbiya matan eqis.
AMO 7:8 Goday taako, “Amoxe, neeni ay xeellay?” yaagidi oychis. Taani, “Tumbe xeellayis” yaagas. Goday taako, “Heko, taani ta ase gidida Isra7eele giddon tumbe yeggayis; taani enta seeronna aggike.
AMO 7:9 Yisaaqa kochati goyinniya dhoqa bessati laaletana; Isra7eele geeshsha bessati dhayana; Iyorbaama kawotethaa bolla taani mashshara dendana” yaagis.
AMO 7:10 Beetele kataman kahine gididi de7iya Amasiyaasi Isra7eele kawa Iyorbaamako haysada yaagidi kiittis: “Amoxey Isra7eele asaa giddon de7ishe, ne bolla maqetees; I ba odan biitta dhaysees.
AMO 7:11 I, ‘Iyorbaami mashshan hayqana; Isra7eele asay banta biittafe di7etidi baana’ yaagees” yaagis.
AMO 7:12 Amasiyaasi Amoxeko, “Neno tinbite odeyso, ba; Yihuda biitta bada, yan oothada aqa; yan tinbite oda.
AMO 7:13 Shin Beeteley kawoy goyinniya bessinne kawotetha keethi gidiya gisho, nam7antho ha bessan tinbite odopa” yaagis.
AMO 7:14 Amoxey zaaridi, “Taani mehiya heemmiyanne boobba ayfe maxiya asepe attishin, nabe woyko nabe na7a gidike.
AMO 7:15 Shin Goday tana dorsa wude heemmiya bessaafe ekidi, ‘Bada ta asaa Isra7eeles tinbite oda’ yaagis.
AMO 7:16 Ha77i hiza Goday giyaba si7a! Neeni, ‘Isra7eele bolla tinbite odopa; Yisaaqa kochata sabbakopa’ yaagadasa.
AMO 7:17 Hessa gisho, Goday, ‘Ne machiya katama giddon layma gidana; ne adde naytinne ne macca nayti mashshan hayqana. Ne biittay wodoron shaaketana; qassi neeni ne huuphen allaga biittan hayqana. Sidhey bayna Isra7eele asay banta biittafe di7etidi baana’ yaagees” yaagis.
AMO 8:1 Ubbaa Haariya Goday tana hara qoncethi bessis; hessika, teera ayfey kumida daacho bessis.
AMO 8:2 I taako, “Amoxe, neeni ay be7ay?” yaagidi oychis. Taani, “Teera ayfey kumida daacho be7ayis” yaagas. Goday taako, “Ta asaa Isra7eele wursethay gakis; hizape guye taani enta seeronna aggike” yaagis.
AMO 8:3 Ubbaa Haariya Goday, “He gallas kawo keethan yexiya yethay yeehon laametana; asa ahi dumma dumma bessan wodhana; yeehoy waasoy bayna si77i gidi yegetana” yaagees.
AMO 8:4 Hinteno, metootanchota un7etheysato, biittan de7iya manqota dhaysanaw koyeysato, haysa si7ite!
AMO 8:5 Hinte, “Nuuni kathaa bayzanaw ageena xeero ba7aaley awude aadhane! Qassi nuuni nu zal7iya doomanaw Sambaati awude aadhane! Nuuni kathaa guuthaban makidi, daro miishen bayzana. Qassi wordo mizaanen asaa cimmana.
AMO 8:6 Manquwa biran, metootanchuwa waatha caamman shammana; qassi harqo giste muruuto giste gaten bayzana” yaageeta.
AMO 8:7 Yayqoobi iya sunthan ceeqetiya Goday, Xoossay, haysada yaagidi ba huuphen caaqis: “Taani enti oothida iita ooso ubbaa dogike.
AMO 8:8 Hessa gaason biittay yarkees; asa ubbay yeekees. Nayle shaafay kixidi keyeysadanne wodheysada biitta ubbay qaaxananne simmi wodhana” yaagis.
AMO 8:9 Ubbaa Haariya Goday, “He gallas taani awa seeta gallas wulisana; gallasaa qamisana.
AMO 8:10 Taani hinte ufaysa baaliya azzanon, hinte yethaa yeehon laammana. Mexi issi na7i hayqin yeekiya asada, hinte hinte huuphiya meedetidi kayo ma7o ma7anada, hintena oothana. He gallasaa wursethay daro camo gidana” yaagees.
AMO 8:11 Ubbaa Haariya Goday, “Heko, taani biitta ubbaa bolla kosha yeddiya wodey yaana. He koshay kathi woyko haatha kosha gidonashin, si7anaw Godaa qaala dhayo kosha gidana.
AMO 8:12 Asay dolohape wuloha gakanaw, pudehape dugeha gakanaw woxeretana. Enti Godaa qaala koyanaw yaanne haanne woxana, shin demmokona.
AMO 8:13 He gallas yegelssa geela7otinne wolqaama panthati saamon piqi gaana.
AMO 8:14 Samaare eeqatara caaqidaysati, ‘Daana xoossay ero!’ yaageysati, ‘Barsaabe xoossay ero’ yaageysati kundana. Enti zaari dendokona” yaagees.
AMO 9:1 Taani Goday yarsho bessa matan eqidashin be7as. I taako, “Baasoy qaaxana gakanaw xoossa keetha gumbuwa shocada asa ubbaa huuphen mentheretha. Hessafe attida asaa taani mashshan wodhana. Baqatiya asi kessi ekenna; kessi ekida asika paxa attenna.
AMO 9:2 Enti biitta bookidi, Si7oolen wodhikoka, taani entana yaape kessana. Saluwa keykoka, taani enta yaape wodhisana.
AMO 9:3 Enti Qarmeloosa zuma huuphen qosetikoka, taani enta koyada yaape kessana. Abba ciimmon gelidi, ta sinthafe geemmikoka, taani dawe kiittin, I enta dukana.
AMO 9:4 Enti banta morketan di7etidi, biikoka, yan enti mashshan hayqanaada kiittana; taani enta iita ayfen xeellana; enta lo77o ayfen xeellike” yaagis.
AMO 9:5 Goday, Ubbaafe Wolqaama Xoossay, sa7aa bochin sa7i til7ees; qassi sa7an de7iya ubbay yeekees. Nayle shaafay kixidi keyeysadanne wodheysada biitta ubbay qaaxananne simmi wodhana.
AMO 9:6 Ba keethaa salon keexiday, iya baasuwa sa7an essiday, abba haatha xeegidi, biitta bolla duge bukisey; iya sunthay Godaa.
AMO 9:7 Goday, “Isra7eele asaw, hinte taw Tophe asaa mela gideketiyee? Taani hintena Gibxe biittafe kessidaysada, Filisxeeme asaa Kaftoorape, qassi Soore asaa Qiirape kessabikina?” yaagees.
AMO 9:8 Goday, “Heko, Ubbaa Haariya Godaa ayfey nagarancho kawotethaa bolla de7ees. Taani iya biitta bollafe dhaysana; shin taani Yayqooba kochaa ubbaa dhaysike.
AMO 9:9 Taani kathi zarzaren harqeteysada Isra7eele asay kawotethata ubbaa giddon laaletana mela kiittana. Shin enta giddon ammanetidaysatape issoyka sa7an wodhidi dhayenna.
AMO 9:10 ‘Nuna ayba iitika gakenna woyko demmenna’ giya ta asaa giddon de7iya nagaranchoti ubbay mashshan wurana” yaagees.
AMO 9:11 “He gallas taani kundida Dawita kawotethaa denthana. Dirsa gimbeta zaara essana; laaletida bessata oorathana; taani iya kaseysada oothada keexana.
AMO 9:12 Hessika Edoomepe attidaysatanne ta sunthan xeegetida kawotethata ubbaa laattana” yaagees hessa oothiya Goday.
AMO 9:13 “Kathi cakeysati caki wursonna de7ishin, goyeysati gakiya wodey, woyne gum7eysati gum7idi wursonna de7ishin, woyne tokeysati gakiya wodey yaana. He wode dereti mal7o woyne ushshi pultana; zumati woyne ushshan mitettana.
AMO 9:14 Di77etidi bida ta asaa Isra7eele zaarana; enti laaletida katamata zaari keexidi daana. Woyne tokidi iyape woyne ushsha uyana; atakilte tokidi enta ayfiya maana.
AMO 9:15 Taani ta asaa, Isra7eele enta biittan tokana; enti taani entaw immida biittafe zaaridi shodetokona” yaagees hessa oothiya Goday.
OBA 1:1 Abdiyuy be7ida qoncethaa. Godaa Xoossay Edoomeba haysada yaagees: Edoomeba Goday, ba kiittiya addiya bolla kawotethatas kiittidaysa nuuni si7ida; “Dendite! Edoome olanaw boos” yaagis.
OBA 1:2 “Heko, ta nena kawotethata giddon laafa kessana; neeni daro kadhetidaysa gidana.
OBA 1:3 Neno, zaalla qopho giddon de7eyso, ne keethaa dhoqa dereta bolla keexidayso, ne wozanan, ‘Tana haysafe sa7an wodhisanay oonee?’ yaageyso, nena ne wozanaa otoroy cimmis.
OBA 1:4 Ne arganthada pude haakada piradhikoka, ne keethaa xoolintota giddon keexikoka, ta nena yaape duge wodhisana” yaagees Xoossay.
OBA 1:5 “Kaysoy woyko banqiya asi qamma yiiko, bantaw gideysa mela xalaala kaysotokonayee? Woyne maxeysati maxishe, poshile ashshokonaayee? Shin ne morketi nena polo dhaysana.
OBA 1:6 Abeeti Eesawey waanidi bonqetandee? Qosan de7iya iya shaloy waanidi eketandee?
OBA 1:7 Neera caaqidaysati ubbay nena ne biittafe gooddana; qassi ne ammanetida laggeti cimmidi nena xoonana. Ne kathaa midaysati ne ogen gite yeggana, shin neeni hessa akeekaka” yaagees.
OBA 1:8 “He gallas taani Edoomepe cincatanne Eesawe zumaape akeeka dhaysana.
OBA 1:9 Hinteno, Temaana asato, hinte olanchoti dagammana; Eesawe zuma bolla de7iya asa ubbay goyretana” yaagees Goday.
OBA 1:10 Ne ishaa Yayqooba bolla ne oothida iitabaa gisho, ne yeella ma77ana; ne merinaw dhayana.
OBA 1:11 Imathatinne allagati iya shaluwa bonqiya gallas neeni gaxa keyada eqa xeelladasa. Qassi iya pengera gelidi, Yerusalaame katamaa bolla saama yeggiya wode neeni entafe issuwa mela gidadasa.
OBA 1:12 Neeni ne ishay metootiya gallas iya metuwan ufaytanaw bessennashin; Yihuda asaa bolla waayey gakiya gallas hashshu gaanaw bessennashin. Enta un7a gallasan otoron odetanaw bessennashin!
OBA 1:13 Neeni enta metuwa gallas ta asay de7iya katamaa gelanaw, enta waayan neeni ufaytanawunne enta metuwa gallas enta shaluwa bonqanaw bessennashin!
OBA 1:14 Baqateyisata wodhanaw neeni daggala ogen naaganawunne attidaysata enta un7aa gallas morketas aathada immanaw bessennashin!
OBA 1:15 Godaa pirda gallasay kawotethata ubbaa bolla matis. Neno Edoome, neeni harata bolla oothidabay ne bolla oosetana; ne oosoy ne bolla simmana.
OBA 1:16 Ta geeshsha zumaa bolla ne uyidaysa mela kawotetha ubbay qanxonna uyana; gujidika uyana; enti kase hani eronnabaa hanana.
OBA 1:17 “Shin Xiyoone zuman kessi ekidaysati daana; Xiyooney geeshshi gidana; Yayqooba kochay banta biitta zaari laattana.
OBA 1:18 Yayqooba kochay tama gidana; Yoosefa kochay laco gidana; Eesawe kochay buure gidana. Tami buure meysada, Yayqooba zerethaynne Yoosefa kochay Eesawe kochaa midi polo dhaysana” yaagees Goday.
OBA 1:19 Negebe mela biittan de7iya asay Eesawe zuma laattana; gadha biittan de7iya asay Filisxeeme biitta, Efreema biittanne Samaare biitta laattana. Qassi Biniyaame kochay Galada biitta laattana.
OBA 1:20 Di7etethafe simmida Isra7eele asay, Kanaanepe bidi Sirafta gakanaw de7iya biitta laattana. Yerusalaamepe de7etidi, Safarada geetetiya bessan de7iya asati Negebe katamata laattana.
OBA 1:21 Ashsheysati Eesawe asaa haaranaw Xiyoone zuma bolla keyana; kawotethay Godaaba gidana.
JON 1:1 Godaa qaalay Amaate na7aa, Yoonasas haysada yaagidi qoncis.
JON 1:2 “He katama asa iitatethay ta sinthe gakida gisho, dendada hini wolqaama katama Nanawe bada sabbaka” yaagis.
JON 1:3 Shin Yoonasi Godaa sinthafe betidi Tarsesa biitta baanaw keyis. I, Yoophe katama wodhidi Tarsesa biya markabe demmis. Godaa sinthafe betanaw koyidi Tarsesa baanaw koshshiya miishe ciggidi markabiyan gelis.
JON 1:4 Shin Goday abba bolla wolqaama carkuwa denthis. Abban wolqaama hobbey wolqaamida gisho markabiya meqanaw gakasu.
JON 1:5 Yaatin markabiya oosanchoti yayyidosona. Issoy issoy ba xoossaako ba xoossaako waassis. Qassi markabey kawuyana mela giddon de7iya caana denthidi abban yeggidosona. Shin Yoonasi markabiyas giddo gelidi wolqaama dhisko dhiskis.
JON 1:6 Markabiya laaggeysi iyako shiiqidi, “Haysa mela saaten waana dhiskay? Denda ne xoossa woossa! Ooni eri I nuus qadhetidi nuna ashshanekonne” yaagis.
JON 1:7 Markabiya oosanchoti issoy issuwako, “Haa yiite, ha iitabay nuna oodde gaason gakidaako eranaw saama yeggana” yaagidosona. Saama yeggin, saamay Yoonasa bolla wodhis.
JON 1:8 Enti Yoonasako, “Ha iitabay oodde gaason nu bolla gakidaako ane nuus oda. Ne oosoy aybee? Awupe yadii? Ne biittay awee? Neeni oodde baggee?” yaagidi oychidosona.
JON 1:9 Yoonasi zaaridi, “Taani Ibraawe asi; abbanne biitta medhida Godaa, salo Xoossa goyinniya asi” yaagis.
JON 1:10 I entaw koyrottidi odidaysada I Godaa sinthafe beteysa eridosona. Hessa gisho, enti yayyidi, “La ayba palaba oothadi” yaagidosona.
JON 1:11 Abbaa hobbey kaseysafe haa darida gisho asati Yoonasa, “Nuus abbay si77i gaana mela nena nuuni waatino?” yaagidi oychidosona.
JON 1:12 Ika, “Ha wolqaama hobbey hinte bolla dendiday ta gaason gideysa taani erayis. Hessa gisho, tana ekidi abban yeggite. Yaatiko abbay hintew si77i gaana” yaagis.
JON 1:13 Shin markabiya oosanchoti markabiya gaxa kessanaw gita pidhidosona. Shin abba hobbey haa darida gisho gaxa kessanaw danda7ibookona.
JON 1:14 Hessa gisho, enti Godaako, “Abeeti Godaw, haa ura shempuwa gisho, neeni nuna dhaysonadanne ha geeshsha suutha acuwa neeni nuupe achonada nuuni nena minthidi woossoos” yaagidi Godaa woossidosona.
JON 1:15 Hessafe guye, Yoonasa denthidi, abban yeggidosona. Abbaa hobbayka si77i gis.
JON 1:16 Yaatin asati Godaas daro yayyidi yarsho yarshidosona; iyaw qangidosona.
JON 1:17 Yoonasa mittana mela issi gita molo Goday giigisis. Yoonasi he moluwa ulon heedzu gallasinne heedzu qamma gam7is.
JON 2:1 Yoonasi moluwa ulon de7ishe, ba Godaa Xoossaa haysada yaagidi woossis.
JON 2:2 “Taani ta waayan de7ashe nena xeegas; neka taw si7adasa. Taani Si7oole ciimmuwa giddon de7ashe, maado koyada neeko waassas Neka ta waasuwa si7adasa.
JON 2:3 Neeni tana abba ciimmuwan duge yeggadasa. Haathi ta yuushuwa teqis; wolqaama zuley ta bollara aadhis.
JON 2:4 ‘Taani ne sinthafe wora holetas, Shin ne Geeshsha Keetha zaarada be7ana’ gada qopas.
JON 2:5 Haathi taw qoodhe gakis, Abbaa ciimmoy tana mittis. Abban de7iya maatay ta huuphen xaaxetis.
JON 2:6 Taani haatha garsan de7iya dereta baasuwa gakada mitettas, biitta wulay merinaw ta bolla gordetis, Shin ta Godaw Xoossaw, neeni ta shempiw iita ollafe kessadasa.
JON 2:7 Ta shempiya doccida wode, Godaw ta nena qopas; ta woosay neeko ne Geeshsha keethaa gakis.
JON 2:8 Hada gidida eeqa xoossata bolla zempeysati, new de7iya banta ammanetetha aggoosona.
JON 2:9 Shin taani galata mazmure new yarshana. Ta qangidabaaka new gathana. Ayis giiko, atotethay Xoossafe” yaagis.
JON 2:10 Hessafe guye, Goday moluwa kiittis. Moloy Yoonasa mela biitta bolla cooyis.
JON 3:1 Godaa qaalay nam7antho Yoonasako haysada yaagidi yis.
JON 3:2 “Dendada gita katamaa Nanawe ba; ta new odiya qaala entaw awaaja” yaagis.
JON 3:3 Yoonasi Godaas kiitetidi Nanawe bis. Nanawey daro gita katama. Ha gaxape hini gaxa gakanaw heedzu qamma hemethees.
JON 3:4 Yoonasi katama gelidi issi gallasa oge hemetidi, “Nanawey oytamu gallasape guye dhayana” yaagidi awaajis.
JON 3:5 Nanawe asay Xoossaa ammanidosona. Xooma awaajidosona; guuthafe gita gakanaw asi ubbay kayo ma7o ma7idosona.
JON 3:6 Nanawe kawoy he oda si7ida wode ba kawotetha araatape wodhidi, kawotetha ma7uwa qaaridi kayo ma7o ma7idi bido bolla uttis.
JON 3:7 Nanawe deriyas haysada yaagidi awaajisis: “kawapenne iya moorinatape keyida kiittada hachife doomidi hinteranne hinte mehetara, aybibaaka moonna mela uyonna mela.
JON 3:8 Asinne mehe ubbay kayo ma7o ma77o. Issi issi asi minthidi Xoossaako waasso. Ba iita ogiyape simmo, ba iita oosuwaka aggo.
JON 3:9 Xoossay nuus qadhetidi, nuuni dhayona mela ba wolqaama hanquwafe simmaneko ooni eri!” yaagis.
JON 3:10 Enti banta iita ogiyape simmidaysa Xoossay be7ida wode entaw qadhetidi enta bolla ehana gida iitaba aggaagis.
JON 4:1 Shin hessi Yoonasa daro ufaysibeenna. Hessa gisho, I yilotis.
JON 4:2 Godaako, “Abeeti Godaw taani koyro ta biittan de7ashe gidaysi haysa gidennee? Taani ne sinthafe betada Tarsesa baanaw ellesiday haysasa. Neeni qadheynne maaroti kumida Xoossi gideysa, hanqos ellesonaysanne wuronna siiqon kumidaysa, qassi ehana gida iitabaka qadhetada aggiya Xoossi gideysa taani kaseka erayis.
JON 4:3 Ha7i Abeeti Godaw, hayyana tana wodha; de7ope taw hayqoy lo77o” yaagidi woossis.
JON 4:4 Goday iyako, “Neeni haysatho shenetanaw bessii?” yaagis.
JON 4:5 Hessafe guye, Yoonasi katamaape gaxa keyidi doloha baggan uttis. Hessan baw shaqara shaqaridi I kuyan uttidi katama bolla gakanaw de7iyaba ba7anaw naagees.
JON 4:6 Awa suulape Yoonasa ashshana mela Goday issi gose dolisis. He gose haythay Yoonasa huuphe bolla baggara kuya gidana mela oothis. Yoonasi he gose gaason daro ufaytis.
JON 4:7 Shin wontetha gallas wonta guura Xoossay guxune giigisis. He guxuniya gosey melana gakanaw masu.
JON 4:8 Away keyiya wode Xoossay doloha baggafe misha carko yeddis. Yoonasi labbanana gakanaw away Yoonasa huuphiya xuuggis. Yaatin I, “De7ope taw hayqoy lo77o” yaagidi hayqos woossis.
JON 4:9 Xoossay Yoonasako, “Neeni ha gose gisho yilotanaw bessii?” yaagis. Yoonasi, “Ee bessees; ubbaraka hayqana gakanaw yilotanaw taw bessees” yaagis.
JON 4:10 Yaatin Xoossay Yoonasako, “Zine dolada hachi melida gosees, ne daaburonaaris, ne dichonaris haysa mela qadhetadasa.
JON 4:11 Shin ushachinne haddirsi shaakidi eronna xeetanne laatamu mukulu asinne daro mehey de7iya ha gita katamaa Nanawes taani qadhetanaw bessennee?” yaagis.
MIC 1:1 Iyo7atami Akaazinne Hizqiyaasi kaalli kaallidi Yihudan kawotida wode Mooreseeta katama asi gidida Mikiyaasako yida Godaa qaalay haysa: I Samaarebanne Yerusalaameba qoncethi be7is.
MIC 1:2 Hinte, asa ubbay si7ite; sa7inne iya de7iya ubbay haysa hayzidi si7ite. Ubbaa Haariya Goday, ba geeshsha keethaafe hinte bolla markatees.
MIC 1:3 Heko, Goday ba de7iya bessaafe yees; biitta dhoqa bessata bolla hemetees.
MIC 1:4 Muqaadi taman til77eysada, haathi derepe duge goggeysada, dereti iya tohuwape garsan til7ana; zangaarati phalqetana.
MIC 1:5 Hessi ubbay haniday Yayqooba qohuwa gishonne Isra7eele nagaraa gishosa. Yayqoobi baletana mela gaaso gididay oonee? Enta katamaa Samaare gidenneyee? Yihuda asay eeqa goyinnana mela gaaso gididay oonee? Yerusalaame gidenneyee?
MIC 1:6 Hessa gisho, Goday, “Taani Samaare, denban keeletida shuchinne woyney tokiya bessa mela oothana. Taani iya shuchaa zangaaran holana; iya baasuwa kalloyana.
MIC 1:7 Iya eeqa misileti ubbay tinchetana; iya eeqa keethan oothiya laymatas imetida gatey ubbay xuugetana; taani iya eeqata ubbaa dhaysana. He gate ubbay layman demmidaba gidiya gisho, ika simmidi, hara laymas imetana” yaagees.
MIC 1:8 Hessa gisho, taani yeekananne waassana; xire kallonne mela tohon hemetana. Workanada waassana; qassi yanchoda yii gaana.
MIC 1:9 Samaare madunthay paxanaw danda7enna. He waayey Yihuda biitta gakis; ta asay de7iya Yerusalaame katamaa pengiyako gakis.
MIC 1:10 Gaate kataman de7iya nu morketas hessa odopite; enta sinthan yeekofite. Beet-Ofiira kataman baanan gondoretidi yeekite.
MIC 1:11 Hinteno, Shafira kataman de7eysato, kallo yeellatishe, di7etidi biite. Xanaana kataman de7eysati yaape keyanaw xaalokona. Beet-Exela katamay yeehoy de7iya bessi gidiya gisho, I hintew attiya bessi gidanaw danda7enna.
MIC 1:12 Metoy Godaape Yerusalaame penge gakanaw yida gisho, Marootan de7iya asay, “Lo77obay yandeesha!” gidi naagishe daaburis.
MIC 1:13 Xiyoone asaa nagaray koyro hinte bolla bentida gishonne Yerusalaame asaa nagaray hintenan bentida gisho, hinteno, Laakiso kataman de7eysato, gaare parata koorite.
MIC 1:14 Hessa gisho, hinteno Yihuda asato, hinte bidi, Moreseet-Gaate katama asas imota immana. Akziiba katama asay Isra7eele kawota cimmana.
MIC 1:15 Hinteno, Maaresha kataman de7eysato, Goday hintena olidi oykiya olanchota hinte bolla ehana; bonchetida Isra7eele halaqati Adulaama gongoluwan qosetana.
MIC 1:16 Hinteno, Yihuda asato, hinte dosiya nayti hintefe di7etidi baanaw de7iya gisho, hinte huuphiya meedetite; hinte huuphiya qoorase huupheda borooqo oothite.
MIC 2:1 Iitabaa halcheyisata, qassi banta hiixan de7ishe, gene waati oothaneko qopeyisata ayye! Wolqay enta kushen de7iya gisho, sa7i wontiya wode banta qofaa poloosona.
MIC 2:2 Enti goshsha gade koyiko, wolqan ekoosona; keethe koyiko wolqan oykoosona. Asa maata yedhidi, iya laata coo bonqoosona.
MIC 2:3 Hessa gisho, “Heko, taani hinte bolla iitabaa ehanaw qopas; hinte kessi ekanaw danda7eketa. I iita wode gidiya gisho, hinte otoron simeretanaw danda7eketa.
MIC 2:4 “He wode enti hinte bolla leemison qelqisana; qassi haysada yaagidi zeleelishe hintena oda caddana. ‘Nuuni ubbay tuma dhayida; Goday nu biitta ekidi, nuna di77idaysatas shaakidi immis’ ” yaagees Goday.
MIC 2:5 Hessa gisho, gadey saaman shaaketiya wode Godaa asaa giddon ne saama kessiya asi dhayana.
MIC 2:6 Asay taako, “Nu bolla tinbite odopa; hinte bolla haysa melabay gakana gada nu bolla tinbite odopa. Hessa mela kawushabay nuna gakena” yaagosona.
MIC 2:7 Taani entako, “Yayqooba kochato, Godaa danda7ay wurdeyee? I hessa malaba oothiyee? Suure ogen beysatas ta qaalay lo77oba oothennee? yaagidi hinte oychanaw bessii? yaagas.
MIC 2:8 Shin mata wodepe doomidi, ta asay ta bolla morkeda dendis. Hirgi bayna hinte giddora aadhiya saro asaa olape qaaretidi simmiya asada oothideta.
MIC 2:9 Ta asaa giddon de7iya maccasata enta lo77o keethafe laaggidi kesseeta; ta anjuwa enta naytape merinaw ekideta.
MIC 2:10 Ha bessay tunatethaa gaason iitida gisho, dendidi biite. Haysi hintew shempo bessi gidenna.
MIC 2:11 Issi cimmiya wordanchoy yidi, ‘Hinte sinthafe woyne ushshaninne mathoyiya ushshan ufaytana’ yaagidi wordo tinbite odiko, I hintew nabe gidana.
MIC 2:12 “Yayqooba kochato, taani hintena ubbaa shiishana; taani Isra7eele asaape attidaysata tuma issife shiishana. Dorsi girben shiiqeysadanne wudey hentha bessan shiiqeysada, taani enta issife shiishana. He bessay daro asan kumana.
MIC 2:13 Entaw oge dooyidi kaaletheysi entafe sinthatidi keyana; entika pengiya menthidi, keyana. Goday, enta kawoy ba huuphen entaw enta sinthe aadhidi enta kaalethana” yaagees.
MIC 3:1 Taani, “Yayqooba kochata halaqatonne Isra7eele asaa kaaletheysato, si7ite! Hinte suure pirdaa eranaw besseneyee?
MIC 3:2 Hinte lo77o ixidi, iita doseeta. Ta asaa galbaa qaareta; enta ashuwa enta meqethafe shaaketa.
MIC 3:3 Hinte ta asaa ashuwa meeta; enta galbaa qaaridi; enta meqethaa qanxeretheta; asho disten yegganaw muxeysada enta ashuwa muxeretheta.
MIC 3:4 Enti iita ooso oothida gisho, he wode enti Godaako waassana, shin I entaw zaarenna; I ba som7uwa he wode entafe qottana” yaagas.
MIC 3:5 Goday wordo nabetako, “Hinte miyaba immiya wode, ‘New sa7i saro’ yaageeta; shin hintena muzonna ixiko iya bolla ola awaajeta.
MIC 3:6 Hessa gisho, hintew gallas qamma gidana; qoncethi be7eketa. Sa7i hintew dhumana; zaaridi murunneketa; nabetas awii wullana; gallasi dhumana.
MIC 3:7 Qoncethi be7eysati yeellatana; murunneysati kawuyana. Godaa matape entaw zaaroy bayna gisho, enti yeellatidi, ubbay banta doona oykana” yaagees.
MIC 3:8 Shin taani Yayqooba zerethaas enta nagara, Isra7eele asaas enta nagaraa odana mela wolqan, Godaa Ayyaanan, suure pirdaaninne minotethan kumas.
MIC 3:9 Hinte suure pirdaa ixeysatinne lo77oba geellayiya Yayqooba kochata halaqatinne Isra7eele asaa kaaletheysati haysa si7ite.
MIC 3:10 Hinte Xiyoone katamaa suuthi gussidi keexeta; Yerusalaame katamaa geellatethan gimbeta.
MIC 3:11 Iya halaqati wodhaafen pirdoosona; kahineti miishen tamaarsoosona; nabeti miishey bayna murunnokona. Shin he ubbaa oothidi, “Goday nu giddon de7iya gisho, nu bolla iitabay yeenna” yaagidi iya ammanetosona.
MIC 3:12 Hessa gisho, hinte gaason Xiyoone katamay gadeda goyetana; Yerusalaame katamay laaletha doore gidana. Xoossa keethay keexetida derey wora gidana.
MIC 4:1 Wursetha gallasan Godaa xoossa keethay keexetida zumay, zumata ubbaafe dhoqu gidi bentana. Dere ubbaafe dhoqu dhoqu gaana. Kawotethati ubbay iyako woddana.
MIC 4:2 Higgey Xiyoonepe, Godaa qaalay Yerusalaamepe keyiya gisho, daro kawotethati yidi, “Ane Haayite; Godaa zumako, Yayqooba Xoossaa keethaako keyoos. Nu iya sheniya oothana mela I nuna ba ogiya tamaarsana” yaagana.
MIC 4:3 I daro asata giddon pirdana; haahon de7iya mino kawotethata palama diggana. Enti banta mashshaa marasha, banta toora baaca kessanaw qoxana. Kawotethay kawotethaa bolla ola denthenna; hizape guye, enti ola timirte tamaarokona.
MIC 4:4 Shin asi ubbay ba woyne kuyaninne balase kuya garsan wopu gidi uttana; hirgisiyabay aybika baawa. Ubbaafe Wolqaama Goday hessa odis.
MIC 4:5 Asa ubbay ba xoossaa xoossaa goyinnana. Shin nuuni Godaa, nu Xoossaa sunthan merinaw hemetana.
MIC 4:6 Goday, “He gallas taani wobbetanne taani waayees aatha immin, di7etidi haaho bessi bidaysata shiishana.
MIC 4:7 Wobbeti attidi daana mela oothana; di7etidi haaho bessi bidaysata mino kawotethi kessana. He wodepe doomada merinaw taani Goday, Xiyoone deriyan enta bolla kawotana” yaagees.
MIC 4:8 Neno, Godaa asaa wochiya Yerusalaame dhoqa gimbiyaw, kase ne haariya maataynne Yerusalaame kawotethaa zaway ubbay new simmana.
MIC 4:9 Ha77i neeni ne qaala dhoqu oothada waasseynne iqethi oykida maccasada un7etey aybisee? New kawoy bayna gishoyee? Woyko nena zoriya dhayida gishosee?
MIC 4:10 Xiyoone asaw, iqethi oykida maccasada oolishe zooketite. Hinte katamaape keyidi qaa7en daana; yaape Babiloone baana. Gidoshin, yan hinte attana; Goday hintena hinte morketa kushepe wozana.
MIC 4:11 Shin ha77i daro kawotethati ne bolla shiiqidi, “Yerusalaamey tuno; nu ayfey Xiyoone be7o” yaagosona.
MIC 4:12 Shin enti Godaa qofaa erokona; iya halchuwa akeekibokona. Kathi yedhetanaw wudumman shiiqeysada, Goday enta seeranaw shiishis.
MIC 4:13 Goday, “Yerusalaame asaw, dendidi, hinte morketa yedhite. Taani hintew birata kace immana; taani hintew naase birata toho immana. Hinte daro kawotethata tincherethana; enti genen shiishida ubbaa hinte Godaas dummayana; enta shaluwa hinte sa7a ubbaa Godaas immana” yaagees.
MIC 5:1 Hinteno, Yerusalaame asaw, hinte olanchota shiishite! Nu morketi nuna teqidosona; enti Isra7eele kaaletheysa gacuwa xam7an shocana hanoosona.
MIC 5:2 Goday, “Efraatan de7iya Beeteleme katamaw, neeni Yihuda katamata giddon guutha; shin iyaw dendoy benipe doomidi, merinaw gididaysi, Isra7eele haaranaysi taw neepe keyana” yaagees.
MIC 5:3 Hessa gisho, iqethi oykida maccasiya na7aa yelana gakanaw, Goday Isra7eele morketas aathidi immana. Hessafe guye, di7etidi de7iya iya ishati simmidi, banta asaara walaketana.
MIC 5:4 I Godaa minotethan yidi, Godaa ba Xoossaa suntha wolqan ba asaa heemmana. I sa7aa gaxa gakanaw gita gidiya gisho, enti sarotethan daana.
MIC 5:5 I entaw sarotethi gidana. Asoore biitta asati nu biitta oykiya wodenne nu miixata yedhidi geliya wode nuuni laapun naageysatanne hospun kaaletheyisata enta bolla denthana.
MIC 5:6 Enti Namiruudey de7iya Asoore biitta olan xoonidi haarana. Asoore biitta asati nu biitta olidi oykiya wodenne nu zawa yedhiya wode I nuna enta kushepe ashshana.
MIC 5:7 Attida Yayqooba zareti daro deriya giddon Goday kiitida xaasa melanne maata bolla wodhiya aka mela gidana. Enti ammanetidi naagey Godaape attishin, ase gidenna.
MIC 5:8 Attida Yayqooba zareti kawotethata giddoninne daro asaa giddon, bazzon do7ata giddon gaammo melanne dorsa wude giddon gupi wodhiya wodala gaammo mela gidana. I yaara aadhiya wode yedherethesinne mentherethees; oonika ashshanaw danda7enna.
MIC 5:9 Hinte kushey hintera eqeteyisata bolla dendana; hinte morketi ubbay dhayana.
MIC 5:10 Goday, “He gallas taani hinte parata hinte giddofe dhaysana; hinte para gaareta mentherethana.
MIC 5:11 Taani hinte biittan de7iya katamata dhaysana; hinte miixa ubbaa laallana.
MIC 5:12 Hinte marota taani dhaysana; hizape guye murunneysati hinte giddon dookona.
MIC 5:13 Taani hinte eeqa misiletanne hinte goyinnanaw essida shuchata hinte giddofe dhaysana; hizape guye hinte hinte kushen medhidaba goyinneketa.
MIC 5:14 Taani Asheera eeqa xoossata hinte giddofe shoddana; hinte katamata dhaysana.
MIC 5:15 Taw kiitetiboonna kawotethata bolla yiloninne hanqon halo keyana” yaagees.
MIC 6:1 Goday Isra7eele asaas odeysa si7ite. Abeeti Godaw, dendada dhoqa dereta sinthan pirdeta; neeni odiyaba zumati si7o.
MIC 6:2 Hinte dereti, hinte mino sa7aa baasoti, Goday mootiya mootuwa si7ite. Goday ba asaara mootetees; Isra7eele asaara palamees.
MIC 6:3 Goday, “Ta asaw, taani hintena ay qohadinaa? Taani hintew waanada tooho gidadina? Ane taw odite!
MIC 6:4 Taani hintena Gibxe biittafe kessas; ta hintena aylletetha biittafe wozas. Hintena kaalethana mela Muse, Aaronanne Mayraamo hintew immas.
MIC 6:5 Ta asaw, Moo7abe kawa Balaaqi new qopidabaanne Bi7oora na7ay Balaami iyaw woygidi zaaridaako akeekite. Neeni Seeximape Galgala biya wode, ogen hanidaba ane qopite. Hessa hinte qopiko taani Goday hintena ashshanaw oothidaba ubbaa hinte akeekana” yaagees.
MIC 6:6 Godaa, dhoqa bessan de7iya Xoossaa sinthan goyinnanaw yashe taani ay ekada shiiqo? Iyaw xuussa yarsho gidana mela issi laytha wofaano ekada yo?
MIC 6:7 Goday mukulu dorsa marazetan woyko tammu mukulu shaafan de7iya haatha mela shamaho zayten ufaytandee? Ta naaquwa gisho, ta bayra na7aa, ta shempuwa nagaraa gisho ta yeluwa immo?
MIC 6:8 Asa na7o, Goday new lo77oba odi wothis. Goday neepe koyey aybee? Neeni suure pirdana mela, maarota dosana melanne ashketethan ne Xoossara daana mela gidennee?
MIC 6:9 Goday, “Yerusalaame katamaa xeegidi, ‘Iya sunthaas yashetethi cincatethi’ Seera xam7anne iya giigisiday ooneko akeekite.
MIC 6:10 Nagaranchoy genen ba son shiishida shaluwanne ixetida wordo maka miisheta taani doganeyee?
MIC 6:11 Yaatin, taani wordo mizaanen wordo maka miisheta waatada atto go?
MIC 6:12 He katamaa dureti geellatethan kumidaysata. Iyan de7iya asa ubbay wordancho; enta inxarsay iita.
MIC 6:13 Hessa gisho, taani hinte nagaraa gisho hintena dhaysanaw dendas.
MIC 6:14 Hinte maana, shin kalleketa; koshi hintefe duuxenna. Hinte buuridi shiishana, shin hintew aadenna; hinte dagayaba taani mashshan dhaysana.
MIC 6:15 Hinte kathi zerana, shin cakeketa; shamaho teera gum7ana, shin go7eteketa; woyne teera gum7ana, shin iya uyeketa.
MIC 6:16 Hinte kawa Omira wogaa, iya na7aa kawa Akaaba soo iita oosuwanne enta zoriya kaallida gisho, taani hintena dhaysana; hintena asi ubbay boronna mela oothana. Asay hintena cayiya cashshaa hinte tookana” yaagees.
MIC 7:1 Tana ayye! Taani teera ayfey maxetidi wurin, woyniyapenne balase mithafe ba amotidaysa demmanaw danda7iboona koshatida uraa mela gidas.
MIC 7:2 Xoossa asi biittan baawa; asa garsan suure asi dhayis. Asi ubbay asa suuthi gussanaw hokidi naagees; ubbay ba ishaa giten oykanaw kaallees.
MIC 7:3 Enta nam7u kusheti iitaba oothanaw loohidosona. Halaqinne daynni wodhaafe oychoosona; wolqara de7iya asati banta koydaba wolqan polisoosona. Enti ubbay issife pirdaa mirqidi dhaysoosona.
MIC 7:4 Enta garsan keeha geeteteysi aguntha mela; suure geeteteysi kinchote mela. Goday nabeta baggara odidaysada I ba asaa seerana gallasay gakis; enti yarkana wodey ha77i matis.
MIC 7:5 Ne shooruwa ammanopa; ne laggiyan ammanetofa. Neera de7iya ne machefe ne doona naaga.
MIC 7:6 He wode na7ay ba aawa kadhees; na7iya ba aaye bolla, na7aa machiya ba azinaa aaye bolla morketethan dendana. Asas iya soo asay morke gidana.
MIC 7:7 Shin taani ufaysan Godaa xeellana; tana ashshiya Xoossaa naagana; ta Xoossay tana si7ana.
MIC 7:8 Ta morkiyaw, ta metuwan ufaytofa; taani kundikoka dendana; ta dhuman uttikoka Goday taw poo7ana.
MIC 7:9 Taani Godaa naaqas; I taw mootetidi, tabaa pirdana gakanaw, taani iya hanquwa danda7ana. I tana poo7on kessana; taani iya xillo pirdaa be7ana.
MIC 7:10 He wode ta morkey hessa be7ana; taako, “Goday ne Xoossay awun de7ii?” yaagidi qelqisiday yeella ma77ana. I ogen de7iya urqada yedhetin, taani ta ayfen be7ana.
MIC 7:11 Hinteno, Isra7eele asaw, hinte katamaa gimbe dirsati diretiya gallasay yaana; he gallas hinte zaway aakana.
MIC 7:12 He gallas hinte asay hinteko simmana. Enti Asoorepe, Gibxefe, Efraxiisa shaafa heeran de7iya biittatape, haaho bessan de7iya abba gaxapenne dhoqa zumatape hinteko simmana.
MIC 7:13 Shin biittay iya bolla de7iya asaa iitatetha gaason asi bayna baysa gidana.
MIC 7:14 Neeni bazzon barka de7iya, ne laata deriya ne aradda biittan ne asaa heemma. Enti kase wodiyada Baasaneninne Galadan heemetana mela ootha.
MIC 7:15 Goday, “Hinte Gibxepe keyida wodiyada taani hintena malaalsiyaba bessaana” yaagees.
MIC 7:16 Enta wolqay gita gidikoka, kawotethati ubbay hessa be7idi yeellatana. Enti yeellatidi, banta doona oykana; enta haythay tullana.
MIC 7:17 Enti shooshadanne sa7ara gooshetiya medhetethatada biitta laaccana. Enti banta miixape kokorishe keyidi gita dagaman Godaako, nu Xoossaako, simmana; enti Godaa yayyidi daana.
MIC 7:18 Nagara ubbaa atto yaagey, attida ba asaa naaquwa taybonnay ne mela Xoossi oonee? Maarotethi nena ufaysiya gisho ne hanquwan merinaw gam7a eraka.
MIC 7:19 Neeni zaarada ne asaas qadhetasa; nu naaquwa ne tohuwan yedhasa; nu nagara abba ciimmon holaasa.
MIC 7:20 Neeni beni nu mayzatas caaqida caaquwada Abrahaamenne Yayqooba zare gidida ne asaas ne ammanetethanne ne merina siiquwa bessaana.
NAH 1:1 Elqosha kataman de7iya Nahoomi Nanaweba odida qaalaynne be7ida qoncethay haysa.
NAH 1:2 Goday qanaateysanne halo keyiya Xoossi; Goday halo keyeysanne hanqon kumidaysa. Goday baara eqeteyisata halo keyees; ba morketa seeranaw giigeti uttis.
NAH 1:3 Goday hanqetanaw ellesenna; iya wolqay gita; I qohidaysa seeronna aggenna. Godaas gotiyanne hobbiya giddora ogey de7ees; shaaray iya tohoy yedhin dendiya baana.
NAH 1:4 I abbanne shaafa hanqidi melisees; Baasanenne Qarmeloosi shulloosona. Libaanose ciishshay qoqofetees.
NAH 1:5 Iya sinthan dereti qaaxoosona; zumati til7oosona. I qonciya wode biitti qaaxana; sa7an de7iya ubbay kokorana.
NAH 1:6 Iya hanquwa sinthan eqanay oonee? Iya hanquwa suulaa danda7anay oonee? Iya hanquwa tamada bukiya wode zaallati za77idi phalqetoosona.
NAH 1:7 Goday lo77o; meto gallas qosetidi attiya besse; I banan ammaneteyisata erees.
NAH 1:8 Shin I ba morketa di7on muukidi dhaysana; baara eqeteyisata dhuman gelsana.
NAH 1:9 Hinte Godaa bolla maqetey aybisee? I hintena kumthi dhaysana; metoy zaari dendenna.
NAH 1:10 Hinte mathotidi gandigareysati, wolira oyketida agunthinne buurey taman xuugetiya mela hinte taman xuugetidi dhayana.
NAH 1:11 Nanawe, Godaa bolla iitabaa maqeteynne iita zore zorey ne giddofe keyis.
NAH 1:12 Goday, “Nanaweti minonne daro gidikoka, shodetidi dhayana. Taani kase Yihuda asaa un7ethas, shin hizape guye un7ethike.
NAH 1:13 Taani ha77i Asooreta qambara hinte gannaafe menthana; hinte qashetida santhalaata duuserethana” yaagees.
NAH 1:14 Nanawe, Goday ne bolla pirdida pirday haysa: “Hizape guye ne sunthaa xeegisiya koche new deenna. Ne xoossata keethan de7iya misiletanne eeqata taani dhaysana. Neeni pathonnaba gidiya gisho, taani ne duufuwa bookana” yaagees.
NAH 1:15 Heko, lo77o wore odishenne sarotethaa awaajishe kiitetidi yeysa tohoy deriya bollara gakis. Yihuda asaw, hinte morketi kumthi dhaydosona; enti zaaridi hinte biitta olidi oykokona. Hessa gisho, hinte ba7aaleta bonchite; hinte qangetha gathite.
NAH 2:1 Neno, Nanawe, mentheretheysi keyis! Hessa gisho, ne miixa naaga; ne ogiya wocha; ne dancuwa mintha; nena giigisa.
NAH 2:2 Bonqeysati bonqidi, enta woyniya dhaysikoka, Goday Isra7eele bonchuwa zaaridaysada Yayqooba bonchuwa zaarana.
NAH 2:3 Olanchoti zo7o gondalle oykidosona; zo7o ma7o ma77idosona. Enti olas giigiya wode para gaareti qin7aarosona; enti banta toora luuxoosona.
NAH 2:4 Para gaareti ogiyan adarsoosona; enti yaanne haanne hemetishe katamaa ogiyan yuuyosona. Qassi enti lacoy loccu giya xompe daanosona; wol7anthada ellesoosona.
NAH 2:5 Nanawey ba halaqata xeegidi shiishana, shin enti yishe oge bolla dhubetana. Enti katamaa gimbe dirsaako ellesana, morketa qohuwape enta naagiya gondalley giigis.
NAH 2:6 Shaafa baggara de7iya katamaa dirsaa pengeti dooyetidosona; kawo gadhoy dagammis.
NAH 2:7 Kawiya di7etada basu; I macca aylleti azzanidi holleda guugumana; banta tiraa baqishe yeekana.
NAH 2:8 Teqetida haathi dooyi bessin goggeysada Nanawe asay katamaape baqatana. Asi enta ba qaala dhoqu oothidi, “Eqite! Eqite!” yaagidi xeegana, shin oonika guye xeellenna.
NAH 2:9 He katamaa shaluwasinne, iyan minjetida boncho miishiyas tayboy baawa. Hessa gisho, he biraanne worqaa bonqite!
NAH 2:10 Nanawey baysa gidis; kasatidi, bazo gidis! Asaa wozanay yashshan til7is; gaadey kokoris; xeessay xaaxetis; som7oy bullatis!
NAH 2:11 Gaammoti aqiya bessay, wodala gaammoti de7iya bessay, addeynne macca gaammoti banta maratara yashshi bayna gupiya bessi daaniya Nanawe katamay ha77i awun de7ii?
NAH 2:12 Gaammoy ba maratas gidiyaba oykis; baara de7iya macca gaammes mentherethidi immis. Ba gongoluwa wodhethan, ba ollaa ashon kunthis.
NAH 2:13 Ubbaafe Wolqaama Goday, “Heko, taani ne bolla dendas! Taani ne para gaareta taman xuuggana; ne wodala gaammota mashshi maana. Neeni haratape ekidaba taani neepe wosisana; ne kiitanchota qaalay hizape si7etenna” yaagees.
NAH 3:1 Daro asa suuthi gussida Nanawe katamaa ayye! Wordoy kumis; bonqi ekida shaluwas tayboy baawa.
NAH 3:2 Nanawe katamen lisso girsay, gerto gondorsay, parata adarsoynne para gaareta gufay si7etees.
NAH 3:3 Para asati piirixoosona; mashshay locees; tooray phoolees. Daro asi hayqis! Ahi aha bolla dooretis; hayqidabaas tayboy baawa! Yaara kanthidi biya asi ahan dhubetees.
NAH 3:4 Hessi ubbay haniday maari bayna Nanawe laymatetha gaasuwana. I daro murunno oothasu; kawotethata ba laymatethan, asaa ba murunnuwan aylleyasu.
NAH 3:5 Ubbaafe Wolqaama Goday, “Heko, taani ne bolla dendas! Taani ne ma7uwa neepe qaarana; ne kalluwa asaa, ne pokuwa kawotethata bessaana.
NAH 3:6 Taani nena pito yeggiya bessi kessana; nena kadhana; asi ubbay nena miiccanaada oothana.
NAH 3:7 Nena be7iya ubbay neepe haakidi, ‘Heko, Nanawe katamay baysatis; iyaw azzananay oonee? Iya minthethiya asi awupe bentandesha?’ yaagana” yaagees.
NAH 3:8 Neno, Nanawe, neeni Gibxen de7iya Tebiso katamape aadhay? Iya Nayle shaafa matan de7awusu; haathi I yuushuwa teqis; shaafay iw miixa gidis; qassi haathayka iw dirsi.
NAH 3:9 Topheynne Gibxey iw zawi bayna wolqa; Puuxinne Liibey iyo maaddeyisata.
NAH 3:10 Gidoshin, iya di7etasu; I guutha nayti deshetidi, oge gaxa ubban kundidosona. I bonchetida asata bolla saami yegetis; I gita asati ubbay santhalaatan qashetidosona.
NAH 3:11 Neno, Nanawe, neeni mathotidi gandigariya asada hanana. Ne morketa sinthafe baqatada attiya bessi koyana.
NAH 3:12 Ne miixati ubbay koyro teerida ayfey de7iya balase mithaa mela. Balase mithaa qaathiya wode teeray meysa doonan wodhees.
NAH 3:13 Heko, ne olanchoti ubbay maccasa mela. Ne zawa pengeti ne morketas dalgidi dooyetidosona; kobe mithaa tami mis.
NAH 3:14 Ne morketi ne yuushuwa un7ethiya wode uyana haatha ha77i tika. Ne miixa mintha; urqa yedhada xuube medha; oto giigisa.
NAH 3:15 Nena yan tami maana; booley kathi meysada nena mashshi maana. Neeni booleda dara gondoda yeleta.
NAH 3:16 Neeni ne zal7anchota salo xoolintotape aathada darsadasa. Shin enti booleda ubbaa mi diggidi paallidi dhayana.
NAH 3:17 Ne toora moconatinne ne moorinnati meego wode dirsa bolla uttida boole mela. Enti awi keyiya wode paallidi dhayoosona; enti de7iya bessaa erey baawa.
NAH 3:18 Neno Asoore kawaw, ne halaqati dhiskidosona; ne bonchetida asati kundidosona. Ne asay dereta bolla laaletis; enta shiishiya asika baawa.
NAH 3:19 Neeni zawi bayna iitatethaafe kessi ekida asi bayna gisho, ne me7oy kooletenna; ne madunthay paxenna. Nebaa si7ida ubbay ne bolla kushe baqana.
HAB 1:1 Nabiya Inbaqoomes Goday qoncisida qaalay haysa.
HAB 1:2 Inbaqoomey, “Abeeti Godaw, tana maaddana mela taani nena xeegiya wode awude gakanaw si7onna ixay? Taani un7etada neeko waassiya wode awude gakanaw ashshona ixay?
HAB 1:3 Neeni ha iitatetha ubbaa tana ayis bessay? Neeni bala be7ashe ayis si77i gay? Dhayoynne geellatethi ta sinthana; palaminne ooshshi biitta ubban daris.
HAB 1:4 Hessa gisho, higgey dol7is; suure pirdi kanthenna. Nagaranchoti xillo asata teqidi oykida gisho, pirdi geellatis” yaagis.
HAB 1:5 Goday zaaridi, “Hinte yuushuwan de7iya kawotethata xeellidi malaaletite. Hintew asi odin hinte ammanonna oosuwa taani hinte wodiyan oothana.
HAB 1:6 Taani qadhey baynaysatanne dirgiya Babiloone asaa denthana. Enti bantaba gidonna biitta olidi oykanaw biitta ubban yuuyosona.
HAB 1:7 Enti yashisoosonanne daganthoosona; bantana bonchisiya higge kessoosona.
HAB 1:8 Enta parati maahepe aadhidi ellesoosona; koshatida omarsa suudhumepe aadhidi wozana mino. Enta para asati haahope yoosona; enti arganthi issiba oykanaw wodhiyada paalloosona.
HAB 1:9 Enta olanchoti ubbay iita ooso oothanaw bazzo carkoda carkishe yoosona. Asa di77idi shafeda shiishosona.
HAB 1:10 Enti kawota bolla qelqisoosona; haareyisata enti toochoosona. Enti shucha dirsan diretida katamata ubbaa bolla miicoosona. He dirsata di77anaw enta yuushuwan biitta shiishosona.
HAB 1:11 Hessafe guye, enti ubbaa carko mela pitidi efana. He geellatas enta wolqay enta xoossaa” yaagis.
HAB 1:12 Abeeti Godaw, ta Xoossaw, ta Geeshshaw, neeni merinaa Xoossaa gidikii? Neeni nu Zaalla gidiya gisho nuuni hayqoko. Abeeti Godaw, Babiloone asay nuna pirdana mela enta denthada wolqaa entaw immadasa.
HAB 1:13 Ne ayfeti daro geeshshi gidiya gisho, iitabaa xeellanaw dosokona; neeni iitabay oosetiya wode be7ashe si77i gaaka. Yaatin, ha iitata ayis si77i gada xeellay? Nagaranchoti bantafe aadhidi xilliya asata mittiya wode ayis si77i gay?
HAB 1:14 Neeni ase abba molodanne kaalethey bayna ulora gooshetiya medhetethata medhadasa.
HAB 1:15 Babiloone asay asa ubbaa qaphen qoridi kessana; enta banta gitiyan oykana; enta banta daachuwan buuridi shiishana; hessa oothidi enti ufaytananne hashshu gaana.
HAB 1:16 Hessa gisho, enti banta gitiyaas yarshana; banta daachuwas ixaane cuyisana. Enti shalo demmeynne injetin de7ey he gitetana.
HAB 1:17 Yaatin, enti banta gitiya qadhey bayna yeggishenne mishi kawotethata dhaysishe waanidi daanee?
HAB 2:1 Taani wochiya gimbiya bolla eqada naagana. He bessan eqada Goday taw odiyabaanne ta mootuwas immiya zaaruwa si7anaw naagashshana.
HAB 2:2 Goday zaaridi, “Woxiya addey nabbabana mela loche shucha bolla taani new qoncisiya qaala ordisada xaafa.
HAB 2:3 Qoncethay ba wodiya naagees; qoncethay poletiya wodey elle gakana; wordo gidenna. Gam7ikoka naaga; I tuma hanana; gam7enna.”
HAB 2:4 Heko, iya wozanay otortis; iya qofay suure gidenna; shin xilloy ba ammanuwan de7on daana.
HAB 2:5 Duretethi ase cimmees; ceeqetiya uraas shempoy baawa. I duufoda yaramba gidiya gishonne hayqoda kalli eronna gisho, kawotethata ubbaa baw shiishees; asa ubbaa baw di77ees.
HAB 2:6 Di7etida asay simmidi enta borishenne qelqisishe haysada yaagana: “Babaa gidonna miishe shiishidi dooreysanne bonqidi duretidaysata ayye! Haysi haysada hanidi, awude gakanaw daanee?” yaagana.
HAB 2:7 Neeni entafe bonqida asati ne akeekona ne bolla dendidi nena kokorsana. Hessafe guye, enti ne shaluwa ubbaa bonqana.
HAB 2:8 Neeni daro asa shaluwa bonqida gisho, entafe attidaysati ne shaluwa bonqana. Ne daro asa suuthaa gussadasa; sa7aa bolla, katamata bollanne yan de7iya asaa ubbaa bolla iita ooso oothadasa.
HAB 2:9 Metoy nena gakenna mela ne keethaa dhoqa bessan keexanaw geellatethan miishe shiishidayso nena ayye!
HAB 2:10 Daro asaa genada dhaysida gisho, ne soo asaa kawushadasa; neeni ne bolla dhayo ehadasa.
HAB 2:11 Hari attoshin ne keetha gimbe shuchay ne bolla waassana; keethaa tuuqeti waasuwa kooshummana.
HAB 2:12 Katamaa iitatethan baasidi asa suuthan keexeysato hintena ayye!
HAB 2:13 Asay oothiyaba ubbay tama kaho gidana mela, kawotethati daaburida ubbay hada gidana mela oothiday Ubbaafe Wolqaama Godaa gidennee?
HAB 2:14 Abbi haathan kumeysada sa7i Godaa bonchuwa eratethan kumana.
HAB 2:15 “Ba shooroy kallotin be7ana gidi, mathoyiya ushshi ushshiya uraa ayye!
HAB 2:16 Neeni boncho aggada kawushe ma77ana. Ha77i mathoy ne tara; ne uyada kallota. Godaa ushacha kushiyan de7iya xuu7ay new imetana; ne bonchoy yeellan laametana.
HAB 2:17 Ne Libaanose dhaysidaysada neka dhayana. Ne do7ata wursadasa, ha77i enti nena yashisana. Ne daro asaa suuthaa gussadasa; sa7a bolla, katamata bollanne iyan de7iya asa bolla iita ooso oothadasa.
HAB 2:18 “I baw eeqi ay maaddii? Iya asa kushen giigis gidennee? Wordofe attishin, iyan harabay bentenna. Yaatin, iya medhida uray ha aykoka odetonna eeqan ammaneteysi iya ay maaddanee?
HAB 2:19 Mithafe giigidaysa ‘Barka’ geyso, qassi shempoy bayna shuchaa ‘Denda’ geyso nena ayye! I wona new ay qoncisanaw danda7ii? Heko, worqaninne biran meeshetis; iyaw shempoy baawa.
HAB 2:20 “Shin Goday ba geeshsha keethaana. Hessa gisho, sa7an de7iya asa ubbay iya sinthan si77i go” yaagis.
HAB 3:1 Mazmuren shiqida nabiya Inbaqoome woosay haysa:
HAB 3:2 Abeeti Godaw, neeni kase oothidaba taani si7ada yayyas. Godaw, nu wodiyanka he oosota zaarada ootha; enti nu wodiyanka ereto. Ne hanqetiya wode ne maarota qopa.
HAB 3:3 Xoossay Temaana biittafe yees; Geeshshay Paarana deriyape wodhees. Iya bonchoy saluwa kammis; iya galatay sa7aa kumis.
HAB 3:4 Iya poo7oy phooliya awa mela; iya wolqay qosetidi uttida iya kushiyape xolqiya poo7oy keyees.
HAB 3:5 Gadoy iya sinthan bees; tama lacoy iya tohuwape keyees.
HAB 3:6 I eqin biittay qaaxis; I xeellin kawotethati kokoridosona. Merinaa dereti woddidosona; I enta bolla hemetiya benipe de7iya zumati laaletidosona.
HAB 3:7 Taani Tophe asaa dunkaaney metootishin be7as; Midiyaame biitta asay kokorishin be7as.
HAB 3:8 Abeeti Godaw, neeni ayis hanqetadii? Shaafati nena hanqethidona? Woyko ne hanqoy abba bollee? Akay, neeni ne paratanne ne para gaareta toggiday ne asaas xoono immanaasa gidennee?
HAB 3:9 Neeni ne dongiya waaxadasa; dukanaw giigisadasa; biitta phalqada haathe kessadasa. Salaha
HAB 3:10 Dereti nena be7idi yashshan kokoridosona; kixa haathay aadhis. Ciimmo haathati waassidosona; banta zuliya dhoqu dhoqu oothosona.
HAB 3:11 Ne dongiya dukan, ne toora phoolethan, awinne ageeni banta de7iya bessan eqidosona.
HAB 3:12 Neeni hanquwan biitta ubba yuuyadasa; kawotethata ne hanquwan yedhadasa.
HAB 3:13 Ne asaanne ne tiyidaysa ashshanaw keyadasa; iitata halaqaa shocadasa; iya ma7uwa qaarada kallo ashshadasa. Salaha
HAB 3:14 Nuna laallanaw goteda yida nu morkiya, metootanchota mittanaw geeman qosetidaysa, iya tooran iya caddadasa.
HAB 3:15 Neeni ne paratara abba bolla hemetadasa; daro haatha yedhadasa.
HAB 3:16 Taani hessa ubbaa si7in ta wozanay dagammis; ta mettershay kokoris. Ta meqethay dagammis; ta tohoy gundis. Nu morketa Goday seerana gakanaw, taani metuwa gallasaa danda7an naagana.
HAB 3:17 Balase mithay ayfonna ixikoka, woyniya bolla ayfey bentonna ixikoka, shamahoy ayfonna ixikoka, goshshan kathi kaxikoka, girben dorsi dhaykoka, zadalon mehey dhaykoka,
HAB 3:18 taani Godan ufaytana; tana ashshiya Xoossan ufaysan kumana.
HAB 3:19 Ta wolqay Ubbaa Haariya Godaa; I ta tohuwa gaara tohoda minthees; I tana dhoqa bessan hemethees.
ZEP 1:1 Amoone na7ay Iyosyaasi Yihudan kawotida wode Sofoniyaasako yida Godaa qaalay haysa. Sofoniyaasi Kuusha na7aa; Kuushi Gadalla na7a; Gadalli Amaare na7a; Amaarey Hizqiyaasa na7aa.
ZEP 1:2 “Taani biitta bolla de7iyaba ubbaa dhaysana.
ZEP 1:3 Asenne mehee, salo kafotanne abba molota dhaysana. Iita asata shira yeggana; asa zare biitta bollafe dhaysana” yaagees Goday.
ZEP 1:4 “Yihudaninne Yerusalaamen de7iya ubbaa seeranaw ta kushiya denthana. Ba7aale eeqa goyinneysatanne iya haggaaziya kahineta he bessaafe dhaysana.
ZEP 1:5 Keetha bolla keyidi awas, ageenasinne xoolintotas goyinneyisata taani dhaysana. Godaa goyinnishenne iya sunthan caaqishe Moloka geetetiya eeqa sunthan caaqeyisata taani dhaysana.
ZEP 1:6 Tana kaalo aggidi guye simmidaysata, tana koyboonaysatanne tana oychiboonayisata taani dhaysana” yaagees Goday.
ZEP 1:7 Godaa gallasay matida gisho, Ubbaa Haariya Godaa sinthan si77i giite! Goday yarshuwa giigisis; qassi ba xeegida imathata geeshshis.
ZEP 1:8 “Godaa yarshuwa gallas halaqata, kawa naytanne allaga biitta ma7o ma77ida ubbaa taani seerana.
ZEP 1:9 He gallas allaga biitta asatada, eeqa goyinneysatanne banta godaa keethaa geellatethaninne cimon kuntheyisata taani seerana” yaagees Goday.
ZEP 1:10 “He gallas Molo Pengiya baggara waasoy, katamaas nam7antho shaahuwan yeehonne zumata bolla gita dom7e girsi si7etana.
ZEP 1:11 Hinteno, katamaas garsa baggan de7eysato, yeekite. Yan zal7iya ubbay dhayidosona; bira oykidaysati hayqi wuridosona.
ZEP 1:12 He gallas taani xompe oythada Yerusalaame gidduwa koyana. Hirgi bayna wodhi uttidi banta wozanan, ‘Goday lo77oka iitaka’ geyisata taani seerana.
ZEP 1:13 Enta shaloy bonqetana; enta keethay laaletana. Enti keethe keexana, shin he keethan dookona; woyne tokana, shin he woyniya uyokona” yaagees Goday.
ZEP 1:14 “Godaa gita gallasay matis; ellesidi gakis. Godaa gallasay camo gallas; He gallas mino olanchotika waaso goochana.
ZEP 1:15 He gallasay hanqo gallas, he gallasay metonne un7a gallas, dhayonne laaletetha gallas, dhumanne caagana gallas, shaaranne sakana dhuma gallas gidana.
ZEP 1:16 He gallasay diretida katamata bolla, adussa gimbeta bolla ola moyzey punetana; giigeta giya waasoy si7etana.
ZEP 1:17 Enti tana qohida gisho, qooqeda tattafana gakanaw, enta bolla meto ehana. Enta suuthay di7oda goggana; enta ahay pitoda yegetana.
ZEP 1:18 Godaa hanqo gallas enta biraynne enta worqay enta ashshena. I sa7an de7iya ubbaa qoponna dhaysana; biitta ubbay iya hanquwa taman meetetana” yaagees Goday.
ZEP 2:1 Hinteno, yeelli bayna asaw, ane issife shiiqite!
ZEP 2:2 Carkoy punnidi efiya baanada hanonna de7ishin, yashshiya Godaa hanqoy hinte bolla wodhonna de7ishin, Godaa hanqo suulaa gallasay hinte bolla yoonna de7ishin Godaako simmite.
ZEP 2:3 Hinteno, biittan de7iya ashketo, iya kiita naagiya ubbato, Godaa koyte; xillotethaa koyte; ashketethi koyte. Ooni eri Godaa hanqo gallas hinte attonna aggeketa.
ZEP 2:4 Gaaza katamay ona gidana; Asqaloona katamay baysa gidana. Ashdooda katama asay seeta gallas goodettana; Eqroona katamay shodetana.
ZEP 2:5 Hinteno, abba gaxan de7iya Keltaaweto, hintena ayye! Neno, Filisxeemeti de7iya Kanaane biittaw, Godaa pirday ne bolla yees. Taani nena dhaysana; issi asika attenna.
ZEP 2:6 Abbaa gaxan de7iya hinte biittay mehe heemetiya bessi, henthanchoti de7iya bessinne mehe dara gidana.
ZEP 2:7 Yihuda asape attidaysati abba gaxan de7iya bessaa laattana; enti yan heemmana. Sa7ay qammiya wode enti Asqaloona kataman de7iya keethatan aqana. Goday enta Xoossay entaba qopana; I enta zaaridi naannisana.
ZEP 2:8 Ubbaafe Wolqaama Goday, Isra7eele Xoossay, “Taani Moo7abe tooshiyanne Amoone cashshaa si7as. Enti ta asaa waatidi toochidaakonne enta biitta ekanaw waatidi mandidaako ta erayis.
ZEP 2:9 Hessa gisho, ta de7o sunthan caaqayis; Moo7abey Sodoomeda hanana; Amooney Gamoorada hanana. Enti merinaw maxine ollanne agunthi ma77ida bazzo gidana. Ta asape attidaysati enta shaluwa bonqana; enta biitta laattana” yaagees.
ZEP 2:10 Enti Ubbaafe Wolqaama Godaa asaa toochida gishonne cayida gisho, enta bolla metoy gakana.
ZEP 2:11 Enta biittan de7iya xoossata I dhaysiya wode Goday entana yashisana. Sa7an de7iya kawotethatan de7iya asa ubbay ba de7iya bessan iya goyinnana.
ZEP 2:12 Hinteno, Tophe asaw, hinte ta mashshan hayqana.
ZEP 2:13 I ba kushiya pudeha bagga yeddidi Asoore biitta dhaysana. Qassi Nanawe katamaa mela bazzoda baysa bessi oothana.
ZEP 2:14 Mehe wudeynne biittan de7iya do7ati ubbay yan hemetana; guttoynne quxarey laaletida gimbiya giddon daana. Enta qaalay maskooteranne pengiyara si7etana; ziga tuuqeti kallotana.
ZEP 2:15 “Taape attishin, hari baawa” yaagidi otortidi de7ida katamay ha77i waanidi do7ati aqiya bessi gididee? Iya matara aadhiya ubbay banta kushiya baqishe, “Poora!” gaana.
ZEP 3:1 Makallanchuwas, tunidaysasinne ba deriya un7ethida Yerusalaame katamaa ayye!
ZEP 3:2 I oonaka kiitetenna; seerin simmenna; Godan ammanetena; ba Xoossaako shiiqenna.
ZEP 3:3 Iya halaqati gudiya gaammo mela; iya daynnati demmidaba wontos ashshona ubbaa midi ongiya omarsa suudhume mela.
ZEP 3:4 Iya nabeti otoranchonne genancho; iya kahineti geeshshaa tuniseyisata; enti Godaa higgiya mirqoosona.
ZEP 3:5 Shin iya giddon de7iya Goday xillo; I bala oothenna. Wonta wonta I xillo pirdees; gallas gallas hessa aggenna. Gidoshin, yan de7iya geellay yeella erenna.
ZEP 3:6 “Taani kawotethata dhaysas; enta gimbeta laallas. Enta katamata issi doonna baysa biitta oothas; enta ogeta asi kanthonna bazzo oothas.
ZEP 3:7 Taani haysa ubbaa oothada, ‘Ta asay tana bonchana; ta seera ekana; ta kiittidaba dogenna’ yaagas. Shin enti kasepe aadhidi iitidosona; banta oosuwan tunidosona” yaagees Goday.
ZEP 3:8 “Ane taani pirdiya gallasay gakanaw guuthu naagite. Taani deretanne kawotethata shiishanaw qofa qachas; ta hanquwa suulaa enta bolla gussana; biittay kumethi ta hanquwa taman xuugetana.
ZEP 3:9 “He wode asa ubbay geeshsha oda odetana mela oothana. Enti ubbay Godaa sunthaa xeegana; issife iyaw goyinnana.
ZEP 3:10 Laaletida asay, tana tuma goyinneysati, Tophe shaafatape hefinthan de7eysati taw imota ehana.
ZEP 3:11 Otoreysatanne ceeqeteyisata ta hinte giddofe dhaysiya gisho, he wode hinte ta bolla oothida oosuwa gaason yeellateketa. Hizape guye hinte ta geeshsha zumaa bolla otorteketa.
ZEP 3:12 Taani hinte giddofe bantana kawusheysatanne aadata ashshana; enti Godaa sunthan ammanetana.
ZEP 3:13 Isra7eele asaape attidaysati iitabaa oothokona; wordo odetokona; enta inxarsan cimoy bentenna. Hessa gisho, enti midi kallidi saron daana; enta yashisiyabay baawa” yaagees.
ZEP 3:14 Xiyoone na7e, mazmuriya yexa! Isra7eele asaw, ililite! Yerusalaame na7e, ne polo wozanaape ufayta; hashshu ga!
ZEP 3:15 Goday hinte bolla pirdida pirdaa aggis; hinte morketa diggis. Goday, Isra7eele kawoy hinte giddon de7ees; hizape guye hintena yashisiyabay baawa.
ZEP 3:16 He gallas enti Yerusalaame haysada yaagana: “Xiyoone, yayyofa! Ne kushey argaacopo.
ZEP 3:17 Goday, ne Xoossay ne giddon de7ees; I new xoono immiya olanchuwa. I nenan ufaytana; ba siiquwan nena oorathana. Asay ba7aale gallas mazmure yexeysada, I nenan ufayteysa mazmure yexidi bessaana” yaagana.
ZEP 3:18 Goday haysada yaagees: “Hizape guye ne bolla dhayoy gakonnaada oothana; ne yeella diggana.
ZEP 3:19 He wode taani nena un7ethidaysata ubbaa seerana; wobbeta ashshana; laaletidaysata shiishana. Enti yeellatida bessan zaarada bonchana; enta yeella bonchoninne saban laammana.
ZEP 3:20 He wode taani hintena shiishana; hintena issife zaarada shiishana. Taani hintena naannisiya wode, hinte ha sa7an de7iya asa ubbaa matan, bonchetidaysatanne eretidaysata gidana” yaagees Goday.
HAG 1:1 Kawoy Daariyosi kawotida nam7antho laythan, usupuntho ageenan koyro gallasan, Godaa qaalay nabiya Hagge baggara Yihuda biitta haariya Salatiyaala na7aa, Zarubaabelakonne kahine halaqa gidida Iyyosadeqa na7aa, Iyyasuko haysada yaagidi yis.
HAG 1:2 Ubbaafe Wolqaama Goday, “Ha asay Godaa keethaa zaaridi keexiya wodey buroo gakibeenna” yaagees.
HAG 1:3 Yaatin, Godaa qaalay nabiya Hagge baggara haysada yaagis:
HAG 1:4 “Ta asaw, ta keethay laaletidi uttin, hinte, hinte alleeqetida keethatan daanaw haysi hintew wodee?” yaagis.
HAG 1:5 Hessa gisho, Ubbaafe Wolqaama Goday, “Ane hinte hintena gakishe de7iyaba qopite.
HAG 1:6 Hinte daro zerideta, shin guuthu shiishideta. Meeta, shin kalleketa; uyeeta, shin aleketa. Ma77eeta, shin hintena ho77enna. Damooze ekeeta, shin peedhetha kiisen yeggiyada coo dhayees” yaagees.
HAG 1:7 Ubbaafe Wolqaama Goday, “Ane hinte hintena gakishe de7iyaba qopite.
HAG 1:8 Hiza deriya bolla keyidi, mithi qanxidi ehite; taani iyan ufaytana melanne bonchetana mela xoossa keethaa zaaridi keexite.
HAG 1:9 Hinte daro kathi shiishanaw qopideta, shin guutha gidis. Iya hinte soo gelsiya wode ta punnin dhayi aggis. Haysi aybis hanidee? Taani haysa oothiday hinte ubbay hinte keethaa keethaa keexishin, ta keethay laaletidi attida gishosa.
HAG 1:10 Hessa gisho, saloy ira diggis, sa7i kathi immonna ixis.
HAG 1:11 Taani biittanne zumaa bolla, kathaa bolla, woyniyanne zaytiya bolla, biitti dolisiyaba ubbaa bolla, asaanne mehiya bollanne hinte daabura ubbaa bolla koshaa xeegas” yaagees.
HAG 1:12 Haysafe guye, Salatiyaala na7ay Zarubaabeli, kahine halaqa gidida Iyyosadeqa na7ay, Iyyasuynne di7etethaafe simmida asa ubbay, Godaa banta Xoossaa qaalasinne Goday enta Xoossay kiitida nabiya Hagge qaalas, kiitetidosona; asay Godaa yayyidosona.
HAG 1:13 Yaatin, Goday kiitida Haggey asaako, “ ‘Taani hintera de7ayis’ yaagees” yaagidi Godaa kiitaa asaas odis.
HAG 1:14 Yaatin, Goday, Yihuda biitta haariya Salatiyaala na7aa, Zarubaabela, Kahine halaqa gidida Iyyosadeqa na7aa, Iyyasunne di7etethaafe simmida asa ubbaa denthethis. Enti Ubbaafe Wolqaama Godaa, banta Xoossaa keethaa keexo doomidosona.
HAG 1:15 Haysi haniday kawoy Daariyosi kawotida nam7antho laythan, usupuntho ageenan laatamanne oyddantho gallasaana.
HAG 2:1 Daariyosi kawotida nam7antho laythan, laapuntha ageenan laatamanne issintho gallasan, Godaa qaalay nabiya Hagge baggara haysada yaagis.
HAG 2:2 “Yihuda haariya, Salatiyaala na7aa, Zarubaabelas, kahine halaqa gidida Iyyosadeqa na7aa, Iyyasusinne di7etethaafe simmida asaas haysada yaagada oda:
HAG 2:3 Ha xoossa keetha kase bonchoy ay meleko be7ida asaape hinte giddon attida asi de7ii? Hachi hinte be7iya wode ay daanii? Hinte ayfiya sinthan baynaba daanennee?
HAG 2:4 Gidoshin, Zarubaabela, ha77i minna! Kahine halaqa gidida Iyyosadeqa na7aw, Iyyasu minna! Biittan de7iya asaw hinte minnidi oothite! Taani hintera de7ayis. Taani Ubbaafe Wolqaama Goday haysa odayis.
HAG 2:5 Hinte Gibxefe keyiya wode taani hintera gidana gada caaqidaysada ta Ayyaanay hintera de7iya gisho yayyofite!” yaagis.
HAG 2:6 Ubbaafe Wolqaama Goday, “Taani qantha woden issi toho gujada salotanne sa7aa, abbanne biitta qaathana.
HAG 2:7 Kawotethata ubbaa qaathada kawotethata ubban de7iya shaloy haa yaana mela oothana. Ha xoossa keetha bonchon kunthana.
HAG 2:8 Biray tabaa; worqay tabaa.
HAG 2:9 Koyro bonchuwafe ha nam7antho xoossa keetha bonchoy aadhana. Taani Ubbaafe Wolqaama Goday ha bessan sarotethi immana yaagada oda” yaagis.
HAG 2:10 Daariyosi kawotida nam7antho laythan, uddufuntho ageenan laatamanne oyddantho gallasan, Godaa qaalay nabiya Hagge baggara haysada yaagidi yis.
HAG 2:11 Ubbaafe Wolqaama Goday, “Higgey woygiyako eranaw kahineta oycha.
HAG 2:12 ‘Issi asi geeshsha ashuwa ba afilaa macaran qachidi eki bishin, he afilaa macaray, uytha woyko woxiya woyko woyniyanne zaytiya woyko hara ay qommo kathi bochiko, he boshetida kathay geeshshi gidanaw danda7ii?’ yaagada oycha” yaagis. Kahiney zaaridi, “Geeshshi gidanaw danda7enna” yaagis.
HAG 2:13 Haggey zaaridi, “Aha bochidi tunida issi asi haysatape issi qommo kathaa bochiko he kathay tuna gidanee?” yaagidi oychis. Kahiney, “Ee tunana” yaagidi zaaris.
HAG 2:14 Haggey zaaridi, “Ha asaynne ha kawotethay ta sinthan hessa mela. Enti oothiya oosoynne enti immiya imotay ubbay hessa mela tuna” yaagees Goday.
HAG 2:15 “Hachife doomidi, hinte bolla gakidaba akeekite! Godaa keethaa keexo doomanaape kase,
HAG 2:16 hinte nam7u kuntaale kathi ekana gidi, kathi wothida bessaa bideta, shin issi kuntaale xalaala demmideta. Issi xeetu litiro woyne ekanaw woyne gum7iya ollaa bideta, shin hinte oytamu litiro xalaala woyne demmideta.
HAG 2:17 Taani hinte kushe ooso ubbaa bolla melsiya carko, katha hargenne shachi yeddada dhaysas. Shin hinte ha ubban taako simmibeketa” yaagees Goday.
HAG 2:18 “Hachi gallasaape, ha uddufuntho ageenan laatamanne oyddantho gallasaape doomidi ane akeekite. Godaa keethaa baasoy baasetida gallasaape doomidi qopite.
HAG 2:19 Ha77i zerethas haniya kathi hinte shaalen dhayiko, woyney, balasey, oromaaneynne shamahoy hachi gakanaw ayfonna ixikoka, hachife doomada taani hintena anjana” yaagees Goday.
HAG 2:20 He ageenan laatamanne oyddantho gallasan Godaa qaalay nam7antho Haggeko haysada yaagis.
HAG 2:21 Yihuda haariya Zarubaabelas haysada yaagada oda: “Taani salotanne sa7aa qaathana.
HAG 2:22 Kawotethata araata shira yeggana; enta wolqaa dhaysana. Para gaareta enta laaggeysatara shira yeggana; enta parati wurana; para asati wolu wodhana.
HAG 2:23 ‘Ta aylliyaw, Salatiyaala na7a Zarubaabela, taani Ubbaafe Wolqaama Goday nena he gallas ekana. Taani nena ta migiddo maatame mela oothana. Taani nena dooras’ yaagees” yaagada oda.
ZEC 1:1 Daariyosi kawotida nam7antho laythan, hospuntho ageenan, Godaa qaalay Ido na7aa, Baraka na7aa, nabiya Zakariyasako yis.
ZEC 1:2 “Goday hinte mayzata bolla daro hanqetis.
ZEC 1:3 Shin ha77i asaas haysada yaagada oda: ‘Taako simmite; taani hinteko simmana’ yaagees Ubbaafe Wolqaama Goday.
ZEC 1:4 Kase nabeti, hinte aawatako, ‘Hinte iita ogiyapenne iita oosuwape simmite’ yaagidi odin, si7onna ixidi, banta iita ogiyapenne oosuwape simmonna ixida, hinte mayzatada hanopite” yaagees Ubbaafe Wolqaama Goday.
ZEC 1:5 Hinte mayzati ha77i awun de7oona? He nabeti merinaw paxa de7oona?
ZEC 1:6 Gidoshin, nabeta, ta aylleta baggara taani odida kiitatinne higgeti ubbay hinte mayzata bolla gakibeennee? Yaatin, enti banta nagara paaxidi, “Ubbaafe Wolqaama Goday nu ogiyadanne nu oosuwada nuus immana gidaysada ba oosuwa oothis” yaagidosona.
ZEC 1:7 Daariyosi kawotida nam7antho laythan, Shabaaxa geetetiya tammanne issintho ageenan, laatamanne oyddantho gallasan, Godaa qaalay Ido na7aa, Baraka na7aa, nabiya Zakariyasako yis.
ZEC 1:8 Taani qamma qoncethan, zo7o para toggida issi asi be7as. I zangaaran de7iya barseneete geetetiya mithata garsan eqis; iyape guye baggara zo7o, daamanne bootha parati de7oosona.
ZEC 1:9 Yaatin taani, “Ta godaw, haysati aybee?” yaagada oychas. Taara haasaya kiitanchoy, “Haysati aybeko taani nena bessaana” yaagis.
ZEC 1:10 Barseneete mitha garsan eqida uray, “Haysati sa7aa ubbaa yuuyidi wochana mela Goday kiittidaysata” yaagis.
ZEC 1:11 Enti barseneete mithaa garsan eqida Godaa kiitanchuwako, “Nuuni sa7a ubbaa yuuyidi wochida; sa7i wopu gidi saro de7ees” yaagidosona.
ZEC 1:12 Hessafe guye, Godaa kiitanchoy, “Abeeti Ubbaafe Wolqaama Godaw, neeni hanqetin ha77i laapun tammu laythi kumis; yaatin, neeni Yerusalaamenne Yihuda katamata maaronna awude gakanaw gam7anee?” yaagis.
ZEC 1:13 Goday taara haasaya kiitanchawas lo77onne minthethiya qaalan zaaro immis.
ZEC 1:14 Taara haasaya kiitanchoy taako, “Ha qaala awaaja! Ubbaafe Wolqaama Goday, ‘Taani Yerusalaamesinne Xiyoones daro mishetayis.
ZEC 1:15 Nuuni saro de7oos gidi qopiya hara kawotethata bolla taani daro hanqetas. Taani ta asaa bolla guuthara hanqetas, shin enti aathidi ta deriya qohidosona.’
ZEC 1:16 Hessa gisho, taani Yerusalaameko maarotan simmana; ta keethay zaaridi yan keexetana; Yerusalaame katama bolla wadha wodoro yeggana” yaagees Ubbaafe Wolqaama Goday.
ZEC 1:17 Gujada haysada yaagada awaaja: “Ta katamata duretethay kumidi palahana; taani Goday Xiyoone zaara minthethana; Yerusalaame zaara doorana” yaagees Ubbaafe Wolqaama Goday.
ZEC 1:18 Taani qoncethan oyddu kaceta be7as.
ZEC 1:19 Taara haasaya kiitanchuwa, “Haysati aybee?” yaagada oychas. I zaaridi, “Ha kaceti Yihuda, Isra7eelenne Yerusalaame laallida kawotethata” yaagis.
ZEC 1:20 Hessafe guye, Goday tana birata qoxiya oyddu hiillanchota bessis.
ZEC 1:21 Taani, “Haysati ay oothanaw yidona?” yaagada oychas. I zaaridi, “Haysati oonika zaari denthona mela Yihuda biitta laallida kaceta kawushanawunne dhaysanaw yidosona. Enti Yihuda biitta laallanaw banta kaciya denthida hara kawotethata kaciya shocidi sa7an yegganaw yidosona” yaagis.
ZEC 2:1 Hara qoncethan ba kushen wadha wodoro oykida issi asi be7as.
ZEC 2:2 Taani, “Neeni aw bay?” yaagada oychas. I zaaridi, “Taani Yerusalaame dalgatethaynne adussatethay ay meleko wadhanaw bayis” yaagis.
ZEC 2:3 Hessafe guye, taara haasaya kiitanchoy keyidi bis; iyara gahetanaw hara kiitanchoy yis.
ZEC 2:4 Yida kiitanchoy, “Woxa bada, na7atetha addiyako, ‘Yerusalaamen daro asinne daro mehey daana gisho, katamaa yuushon gimbe dirsi koshshenna.
ZEC 2:5 Taani iya yuushuwan tama dirsi gidana; taani iyaw boncho gidana’ yaagees Goday.
ZEC 2:6 “Taani hintena biitta oyddu baggaa laallida gisho, yaape keyite; elle keyite; pudeha bagga biittafe baqatite” yaagees Goday.
ZEC 2:7 “Neno, Xiyoone keya; Babiloone macca nayta giddon de7iyare, enta giddofe baqata” yaagees Goday.
ZEC 2:8 Ubbaafe Wolqaama Goday iya bonchuwa qoncisana mela, ba asaa bonqida kawotethatako tana kiittidi, “Hintena bochiya uray iya ayfiya buluwa bochees.
ZEC 2:9 Taani ta kushiya enta bolla denthana; enta aylleti enta zaaridi bonqana. He wode hinte Ubbaafe Wolqaama Goday tana kiittidaysa erana.”
ZEC 2:10 “Taani yada hinte giddon daana gisho, Xiyoone asaw, zamarite; ufaytite!” yaagees Goday.
ZEC 2:11 He wode daro kawotethati Godaara gahetidi iya ase gidana. I hinte giddon daana; Ubbaafe Wolqaama Goday tana hinteko kiittidaysa he wode hinte erana.
ZEC 2:12 Geeshsha biittan Yihuda, bana gakida gisho oothidi laattana; Yerusalaame zaaridi doorana.
ZEC 2:13 Goday ba de7iya geeshsha bessan dendida gisho, asho ma77ida ubbay iya sinthan si77i go!
ZEC 3:1 Hessafe guye, kahine halaqay Iyyasuy Godaa kiitanchuwa sinthan eqidaysanne xalahey Iyyasu mootanaw iyape ushacha baggara eqidaysa tana qoncethan bessis.
ZEC 3:2 Goday, “Xalahiyaw, Goday nena seero; Yerusalaame doorida Goday nena seero! Ha addey tamape attida duncha mela gidennee?” yaagis.
ZEC 3:3 Iyyasuy qitatida ma7o ma77idi kiitanchuwa sinthan eqis.
ZEC 3:4 Kiitanchoy ba sinthan eqidaysata, “Iya bollafe ha qita ma7uwa qaarite” yaagis. Qassi Iyyasuko, “Heko, taani ne nagara neepe diggas; boncho ma7uwa nena mayzana.”
ZEC 3:5 Taani, “Geeshsha xaatha qaciya iya huuphen xaaxite” yaagis. Enti kiittidaysada oothidosona; ma7o mayzidosona. Godaa kiitanchoy he wode iya miyen eqis.
ZEC 3:6 Hessafe guye, Godaa kiitanchoy Iyyasuko,
ZEC 3:7 Ubbaafe Wolqaama Goday haysada yaagees; “Neeni ta ogiyan hemetikonne ta kiita naagiko, neeni ta keethaa aysana; ta dabaaban aawatana. Qassi haysan eqidaysatara issife geliyanne keyiya maata new immana.
ZEC 3:8 Kahine halaqa Iyyasu, haysa si7a! Sinthara yaana lo77obaas malaata gididaysatinne neera ootheysati haysa si7o! Taani, ‘Tashe’ geetetiya ta aylliya ehana.
ZEC 3:9 Heko, taani Iyyasu sinthan shuchu wothana; he shucha bolla laapun ayfeti de7oosona. Taani he shuchaa woocada iya bolla xuufe xaafana; ha biitta nagara issi gallas diggana” yaagees Ubbaafe Wolqaama Goday.
ZEC 3:10 “He gallas hinte ubbay hinte woynenne hinte balase garsan uttidi hinte shooruwa xeegana” yaagees Ubbaafe Wolqaama Goday.
ZEC 4:1 Hessafe guye, taara haasaya kiitanchoy simmidi yidi, dhiskida asi barkiya mela tana barkisis.
ZEC 4:2 I taako, “Neeni ay be7ay?” yaagis. Taani zaarada, “Taani worqa xalaalape oosetida xompe wothiya kocaa be7ayis; iya xeeran zayte xaaroy de7ees. Qassi iya bolla laapun xompeti de7oosona; he laapun xompetas laapun laapun piiqeti de7oosona.
ZEC 4:3 He xompiya wothiya kocaa matan nam7u shamaho mithati de7oosona. Enti zayte xaaruwape ushacha baggaranne haddirsa baggara de7oosona” yaagas.
ZEC 4:4 Taara haasaya kiitanchuwa, “Ta godaw, haysi aybee?” yaagada oychas.
ZEC 4:5 Kiitanchoy zaaridi, “Haysati aybeko erikii?” yaagis. Taani zaarada, “Ta godaw, taani erike” yaagas.
ZEC 4:6 I taako, “Zarubaabelas Goday odida qaalay haysa; ‘Ta Ayyaananape attishin, wolqan woyko minotethan gidenna’ yaagees Ubbaafe Wolqaama Goday.
ZEC 4:7 Gita zumaw, neeni aybee? Neeni Zarubaabela sinthan lichi gida demba gidana. Zarubaabeli xoossa keethaa keexi polidi, wursetha shuchaa kessiya wode asay, ‘Hashshu! Hashshu poletis’ ” yaagana.
ZEC 4:8 Qassika Godaa qaalay taako haysada yaagidi yis.
ZEC 4:9 “Xoossaa keetha baasuwa Zarubaabela kusheti baasidosona; iya kusheti keexidi polana. Hessafe guye, Ubbaafe Wolqaama Goday tana hinteko kiittidaysa hinte erana.
ZEC 4:10 Ha guutha doomethaa kadhiya oonika guyepe ufaytana; enti Zarubaabela kushen tumbiya be7ana. Haysati laapun xompeti biitta ubbaa yuuyidi xeelliya Godaa ayfeta” yaagis.
ZEC 4:11 Taani kiitanchuwa zaarada, “Ha xompe wothiya kocaape ushacha baggaranne haddirsa baggara de7iya ha nam7u shamahoti aybee?” yaagada oychas.
ZEC 4:12 Gujadaka, “Zaytey entafe goggiya nam7u worqa piiqeta matan de7iya nam7u shamaho mitha tasheti aybee?” yaagada oychas.
ZEC 4:13 I zaaridi, “Haysati aybeko neeni erikii?” yaagis. Taani zaarada, “Ta godaw, taani erike” yaagas.
ZEC 4:14 I zaaridi, “Haysati sa7a ubbaa Godaas oothiya nam7u tiyetida asata” yaagis.
ZEC 5:1 Qassi taani dhoqu gada xeelliya wode bollara piradhiya issi xaatha maxaafa be7as.
ZEC 5:2 Kiitanchoy tana, “Neeni ay be7ay?” yaagidi oychis. Taani zaarada, “Taani bollara piradhiya issi xaatha maxaafa be7ayis; he maxaafa adussatethay laatamu wadha qassi gompay tammu wadha” yaagas.
ZEC 5:3 I taako, “Ha xaatha maxaafaa giddon biitta ubbaa bolla yaana baadethay xaafetis. He maxaafan issi baggara, ‘Kayso ubbay biittafe dhayana’; qassi hanko baggara, ‘Wordon caaqiya ubbay dhayana’ giya xuufey xaafetis.
ZEC 5:4 ‘Taani ha baadetha kiittana; he baadethay bidi, kaysuwa soonne ta sunthan wordo caaqeysa soo gelana. He keetha gelidi mithaanne shuchaa dhaysana’ ” yaages Ubbaafe Wolqaama Goday.
ZEC 5:5 Hessafe guye, taara haasaya kiitanchoy taako yidi, “Ane dhoqu gada, yaabay aybeko be7a” yaagis.
ZEC 5:6 Taani, “I aybee?” yaagada oychas. I zaaridi, “Haysi makiya daacho” yaagis. Qassi gujidi, “Haysi asay ha biitta ubban oothida naaquwa malaata” yaagis.
ZEC 5:7 Irsaase geetetiya biratape oosetida daachuwa kamaa denthiya wode issi maccasi daachuwan uttasu.
ZEC 5:8 Kiitanchoy, “Hanna iitatetha leemiso” yaagis. Iyo guye daachuwan yeggidi irsaase kamaa zaaridi kammis.
ZEC 5:9 Hessafe guye taani dhoqu gada xeelliya wode enta qefiyan carkoy de7iya, piradhiya nam7u maccasata be7as. Enta qefey gollo qefe mela mino; enti daachuwa sa7ape dinthidi ekidi piradhidosona.
ZEC 5:10 Taani kiitanchuwako, “Haysati daachuwa awu efoona?” yaagada oychas.
ZEC 5:11 I zaaridi, “Enti iyaw keethe keexanaw Sana7oora biitta efoosona. Keethay keexeti simmiko enti he daachuwa iyaw giigida bessan wothana” yaagis.
ZEC 6:1 Qassi taani dhoqu gada xeelliya wode oyddu para gaareti nam7u naase birata deretape giddora yeyisata be7as.
ZEC 6:2 Koyro gaariya zo7o parati goochosona; nam7antho gaariya kareetha parati goochosona.
ZEC 6:3 Heedzantho gaariya bootha parati goochosona; oyddantho gaariya wanco parati goochosona.
ZEC 6:4 Taani kiitanchuwako, “Ta godaw, haysati aybee?” yaagada oychas.
ZEC 6:5 Kiitanchoy zaaridi, “Haysati biitta ubbaa Godaa sinthan eqidi oothiya oyddu salo carkota.
ZEC 6:6 Kareetha parati goochiya gaarey pudeha bagga biitta bees; bootha parati goochiya gaarey wuloha bagga bees; wanco parati goochiya gaarey dugeha bagga bees” yaagis.
ZEC 6:7 He parati biitta wochanaw keyida wode gede haa pachiparoosona. Kiitanchoy entako, “Bidi biitta ubbaa yuuyidi wochite” yaagis. Enti bidi biitta ubbaa yuuyidi wochidosona.
ZEC 6:8 Hessafe guye, kiitanchoy ba qaala dhoqu oothidi, “Heko, pudeha bagga biitta bida parati ta Ayyaana he biittan shempisidosona” yaagis.
ZEC 6:9 Godaa qaalay taako haysada yaagishe yis:
ZEC 6:10 “Babiloone di7etethaafe simmida Heldayi, Xoobeynne Yadayi immiya biranne worqa imota ekada he gallas Sofoniyaasa na7aa Iyosyaasa soo ba.
ZEC 6:11 Entafe ekida birapenne worqafe kallacha medhada Iyosadeqa na7aa, kahine halaqaa Iyyasu huuphen wotha.
ZEC 6:12 Ubbaafe Wolqaama Goday haysada yaagees gada iyaw oda: heko, tashey ba bessan daaya gishonne I xoossa keetha keexiya gisho, iya sunthay ‘Tashe geetetida addey haysa.
ZEC 6:13 Godaa keetha keexanay iya; I kawotetha ma7uwa ma77idi, araatan uttidi haarana. Qassi iya araata matan issi kahiney eqana; enta nam7aa giddon issifetethi daana.’
ZEC 6:14 He kallachay Heldaya, Xoobbiya, Yadayanne Sofoniyaasa na7aa Iyosyaasa qofiso gididi, Godaa xoossa keethan daana” yaagis.
ZEC 6:15 He wode haaho bessan de7iya asati Godaa keetha keexidi maaddanaw yaana. Ubbaafe Wolqaama Goday tana hinteko kiittidaysa hinte hessan erana. Godaas, hinte Xoossaas hinte polo kiitetiko hessi hanana.
ZEC 7:1 Daariyosi kawotida oyddantho laythan, Kisiila geetetiya uddufuntho ageenan, oyddantho gallasan, Zakariyasako yida Godaa qaalay haysa.
ZEC 7:2 Beetele katamaa asay Sarezeera, Regem-Melekanne entara issife de7iya asata Godaa anjoy yaana mela woossanaw kiittidosona.
ZEC 7:3 Qassi Ubbaafe Wolqaama Godaa keethan oothiya kahinetanne nabeta, “Daro laythi oothishe gam7idaysada nuuni ha77ika ichashantho ageenan yeekanawunne xoomanaw bessii?” yaagidi oychana mela kiittidosona.
ZEC 7:4 Hessafe guye, Ubbaafe Wolqaama Godaa qaalay haysada yaagidi taako yis:
ZEC 7:5 “Biittan de7iya asa ubbaasinne kahinetas haysada yaagada oda: ‘Hinte ha aadhida laapun tammu laythan ichashantho ageenaninne laapuntha ageenan xoomidaynne yeekiday tana bonchanaasee?
ZEC 7:6 Hinte miya wodenne uyaa wode hintew meetanne uyeeta.
ZEC 7:7 Yerusalaame katamaynne iya yuushuwan de7iya katamatan de7iya asay shemponinne injen de7ida wodenne Negebaninne gadhan asay wopu gidi de7ida wode Goday ba nabeta baggara odida qaalay haysa gidennee?’ yaaga” yaagis.
ZEC 7:8 Godaa qaalay Zakariyasako haysada yaagidi yis:
ZEC 7:9 “Ubbaafe Wolqaama Goday kase immida kiitay, ‘Suure pirdaa pirdite; hinte issoy issuwas keehatethinne maarotethi oothite.
ZEC 7:10 Am7eta, yi7ota, bete asaanne manqota naaqofite. Qassi hintefe oonika ba ishaa bolla iitabaa oothanaw ba wozanan qopofo.’
ZEC 7:11 “Shin enti si7onna ixidosona; zoko zaaridi banta haythaa tuccidosona.
ZEC 7:12 Ubbaafe Wolqaama Goday ba Ayyaanan kase ba nabeta baggara kiitida higgiyanne qaala si7onna ixidi banta wozanaa zaallada minthidosona. Hessa gisho, Ubbaafe Wolqaama Godaa matape gita hanqoy enta bolla yis.
ZEC 7:13 Taani xeegiya wode enti si7onna ixidaysada enti xeegiya wode taani si7ike” yaagees Ubbaafe Wolqaama Goday.
ZEC 7:14 “Taani gote ehada enti eronna kawotethata giddon laallas. Biittay asi yaanne haanne simeretonna kaysa biitta gidis; ha lo77o biittay baysa gidis” yaagees Ubbaafe Wolqaama Goday.
ZEC 8:1 Ubbaafe Wolqaama Godaa qaalay qassika taako haysada yaagidi yis:
ZEC 8:2 Ubbaafe Wolqaama Goday, “Taani Xiyoones daro qadhetayis; I mishay tana xuuggees.
ZEC 8:3 Taani Xiyoone simmada Yerusalaamen daana. Qassi Yerusalaamey ammanthiya katama geetetada eretana. Ubbaafe Wolqaama Godaa zumay Geeshsha Zuma geetetidi xeegetana” yaagees.
ZEC 8:4 Ubbaafe Wolqaama Goday, “Cimidi guufera biya addeynne maccasay kaseysada Yerusalaame dabaaban uttana.
ZEC 8:5 Yerusalaame katamaa ogeti kaa7iya addenne macca naytan kumana” yaagees.
ZEC 8:6 “Attida asaas hessi malaalsiyaba gidikoka, tana hessi malaalsiyabayee? yaagees Ubbaafe Wolqaama Goday.
ZEC 8:7 Heko taani ta asaa dolohapenne wulohape shiishana.
ZEC 8:8 Enti Yerusalaamen daana mela oothana. Enti ta ase gidana; taani xillonne ammanthiya enta Xoossaa gidana” yaagees Ubbaafe Wolqaama Goday.
ZEC 8:9 Ubbaafe Wolqaama Goday haysada yaagees: “Hinteno, Ubbaafe Wolqaama Godaa keethaa baasoy yegetida gallasaape doomidi nabeti odida qaala si7idaysato, hinte kushiya minthite; oosuwa minnidi polite.
ZEC 8:10 He wodiyape kase asaas damoozey, mehiyas qanxetiya keri baawa. Taani asa ubbaa issuwa issuwa bolla morketethan denthida gisho, geleysasinne keyeysas saroy baawa.
ZEC 8:11 Shin ha77i taani ha attida asaa bolla kase oothidaysada oothike” yaagees Ubbaafe Wolqaama Goday.
ZEC 8:12 “Entii zerida ubbay dolana; woyney ba ayfiya immana; goshshay kathan kumana; saloti banta ira immana. Haysa ubba attida asaas laata oothada immana.
ZEC 8:13 Hinteno, Yihuda asaw, Isra7eele asaw, kawotethata giddon hinte baadetidaysata gidideta, shin ha77i taani hintena ashshana; hinte anjetidaysata gidana. Yayyofite! hinte kushiya minthite!” yaagees.
ZEC 8:14 “Hinte mayzati tana yiloyida wode enta qadhey bayna seeranaw qofa qachas.
ZEC 8:15 Ha77i taani Yerusalaamesinne Yihudas lo77oba oothanaw qofa qachas. Hiza yayyofite!
ZEC 8:16 Hinte oothanaw koshshiyabay haysa: issoy issuwara tumaa odetite; pirda dabaaban tumaanne saruwa ehiya pirda pirdite.
ZEC 8:17 Issoy issuwa qohanaw iitabaa hinte wozanan maqetofite; wordon caaqofite. Hayisata ubbaa taani ixayis” yaagees Ubbaafe Wolqaama Goday.
ZEC 8:18 Ubbaafe Wolqaama Godaa qaalay qassika taako haysada yaagidi yis:
ZEC 8:19 “Oyddantho, ichashantho, laapunthonne tammantho ageenan hinte xoomida xoomay Yihuda asaas ufaysinne inje wode gidana. Hessa gisho, hinte tumatethinne sarotethi dosite” yaagees.
ZEC 8:20 “Daro asaynne daro katamatan de7iya asay Yerusalaame yaana.
ZEC 8:21 Issi kataman de7iya asay hara kataman de7iya asaako bidi, ‘Godaa anjoy yaana mela woossanawunne Ubbaafe Wolqaama Godaa koyanaw ane boos; taanika bayis’ yaagana.
ZEC 8:22 Qassi daro asaynne wolqaama kawotethati Ubbaafe Wolqaama Godaa koyanawunne woossanaw Yerusalaame yaana.
ZEC 8:23 He gallasatan dumma dumma qaalan haasaya kawotethata ubbaafe tammu asati yidi, issi Ayhude addiya ma7uwa macaraa oykidi, ‘Xoossay hintera de7eysa nuuni si7ida gisho, nuuni hintera baana’ yaagana” yaagees Ubbaafe Wolqaama Goday.
ZEC 9:1 Asaa ayfeynne Isra7eele asa ubbaa ayfey Godaa xeelliya gisho, Sadraaka biittaynne Damasqo katamay dhayanaysa, Goday odida pirda qaalay haysa.
ZEC 9:2 Qassi ha pirday Hadraaka zawa gidida Hamaata katamaanne qara gidida Xiroosanne Sidoona katamata bolla ha pirday gakana.
ZEC 9:3 Xiroosa katamay baw mino miixa gimbis. Qassi biraanne worqaa biittada dooris.
ZEC 9:4 Shin I shiishidaba ubbaa Goday ekana; iya shaluwa abban holana; katamay taman meetetana.
ZEC 9:5 Asqaloona katamay hessa be7idi yayyana; Gaaza katamay un7etana; Eqroona katamay ufaysi dhayana. Gaaza kawoy dhayana; Asqaloona katamay kaysa gidana.
ZEC 9:6 Ashdooda kataman walaha asay daana. Goday haysada yaagees: “Filisxeemeta otoruwa taani wursana.
ZEC 9:7 Taani enta doonape suuthi, enta achaafe tunaba diggana. Entafe attidaysati nu Xoossaa asi gidana; qassi Yihuda yaraape issuwa gidana. Eqroona asay Yaabuse asaada ta ase gidana.
ZEC 9:8 Hessafe guye, olanchoti oykonnaada, taani ta keethaa naagana. Taani ta huuphen naagiya gisho, zaaridi oonika ta asaa un7ethenna” yaagees.
ZEC 9:9 Neno, Xiyoone katame, ufayta! Neno, Yerusalaame katame, ilila! Heko, xoonida ne xillo kawoy neeko yees. Ne kawoy ashke gididi, hare bolla, aadhidi hare mara bolla uttidi neeko yees.
ZEC 9:10 Taani para gaareta Isra7eelepe, ola parata Yerusalaamepe dhaysana; ola dongiya mentherethana. Ne kawoy kawotethatas saro awaajana; I abbas gaxape hini gaxa gakanaw Efraxiisa shaafape doomidi sa7aa gaxaa gakanaw haarana.
ZEC 9:11 Taani neera suutha caaquwa gisho, qashetida ne asata haathi bayna ollaafe kessana.
ZEC 9:12 Hinteno, sinthan ufaysi de7iya qasho asato, hinte miixaa simmite. Kaseysa gisho dako shalo hintew immanaysa hachi taani hintew awaajayis.
ZEC 9:13 Taani Yihuda dongeda, Isra7eele donge toorada go7etana. Xiyoone, taani ne nayta Girike nayta bolla denthana; nena wolqaama olanchuwa mashshaa mela oothana.
ZEC 9:14 He wode Goday enta bolla qoncana; iya donge tooray wol7antha wol7amana. Ubbaa Haariya Goday moyze punnana; dugeha bagga goteda dendana.
ZEC 9:15 Ubbaafe Wolqaama Goday enta gisho oletana. Enti banta morketa wursana; yambarshan oleyisata yedhana. Enti banta morketa suuthaa woyne ushsha uyana; suuthi keren kumiyada kumana; enti yarsho bessan gukiya suuthada gukana.
ZEC 9:16 He gallas henthanchoy ba dorsata ashsheysada Goday enta Xoossay enta ashshana. Kallacha bolla de7iya alleeqoda enti Godaa biittan phoolana.
ZEC 9:17 Enti waanidi lo77onne puulancho gidandesha! Na7atetha nayta kathay, geela7o nayta woyne ushshay aacisana.
ZEC 10:1 Balgoy gakiya wode Goday ira immana mela woossite. Goday ira tookida shaara kiittees; asaas ira immees; goshshan atakilte dolisis.
ZEC 10:2 Eeqati hadaba odoosona; maroti wordo qoncethi be7oosona; amuheysati wordo amuho odoosona; hada minthetho minthethoosona. Hessa gisho, asay dhayida dorsada toylatoosona; enta heemmiya asi bayna gisho, enti qohetidosona.
ZEC 10:3 Goday haysada yaagees: “Ta hanqoy henthanchota bolla eexi keyis; he kaaletheyisata taani seerana. Ubbaafe Wolqaama Goday ba wudiya Yihuda heemmees. I enta olas giigida wolqaama para mela oothana.
ZEC 10:4 Yihuda asaa giddofe quste shuchaa mela, dunkaane dhishe melanne ola toora mela hanida kaaletheysati keyana.
ZEC 10:5 Banta morketa ogiya urqada yedhiya mino olanchota mela gidana. Goday entara de7iya gisho, enti oletidi xoonana.
ZEC 10:6 “Taani Yihuda asaa minthethana; Yoosefa asaa ashshana. Taani entaw qadhetiya gisho, enta zaarada ehana. Enti taani kaseka enta yeggaboonna asa mela gidana. Taani Godaa enta Xoossaa gidiya gisho, enta woosa si7ana.
ZEC 10:7 Isra7eele asay mino olancho mela gidana; woyne uyida asada enta wozanay ufaytana. Enta nayti hessa be7idi, hashshu gaana; enta wozanay Godan ufaytana.
ZEC 10:8 “Taani ta asaa suyqada xeegana; enta issife shiishana. Taani enta wozana; enti kaseysada darana.
ZEC 10:9 Taani enta kawotethata giddon laallikoka enti banta de7iya haaho biittan gididi tana hassayana. Qassi entinne enta nayti de7on daananne banta biitta simmana.
ZEC 10:10 “Taani enta Gibxe biittafe zaarana; Asoore biittafe enta shiishana. Entaw uttiya bessi dhayana gakanaw taani enta Galada biittaninne Libaanose biittan kunthana.
ZEC 10:11 Enti meto abba giddora aadhiya wode taani Goday abba seerana. Ciimmo gidida Nayle shaafay melana. Asoore biitta otoroy kawuyana; Gibxe kawotetha xam7ay meqana.
ZEC 10:12 Taani, enta Goday enta minthana; enti iya sunthan hemetana. taani Goday haysa odayis” yaagees.
ZEC 11:1 Neno, Libaanose, tami ne zigata maana mela, ne pengeta dooya!
ZEC 11:2 Neno xiiddaw, zigay kundida gisho, boncho mithati dhayida gisho, yii gada yeeka! Hinteno Baasane wolato, he siketida woray man7etida gisho, yii gidi yeekite.
ZEC 11:3 Enta lo77o hentha bessay dhayida gisho, Henthanchota zelelsa si7ite; Yordaanose woray dhayida gisho, Gaammoti gudeysa si7ite.
ZEC 11:4 Goday ta Xoossay taako haysada yaagis: “Shukettanaw de7iya dorsa wudiya heemma.
ZEC 11:5 Enta shammeysati shukoosona; shin seerettokona. Bayzeysati, ‘Nuuni duretida; Goday galatetto’ yaagosona; hari attoshin, enta henthanchoti entaw qadhetokona” yaagis.
ZEC 11:6 Goday haysada yaagees: “Taani hizape guye ha biittan de7iya asaas qadhetike. Taani issi issi ase iya shooruwasinne iya kawas aathada immana. Enti biitta dhaysana; taani issi asika enta kushiyape ashshike” yaagees.
ZEC 11:7 Hessa gisho, taani shukettanaw de7iya dorsata, aathada qassi wudiya giddon un7etidaysata heemmeysa gidas. Yaatada dorsata heemmanaw nam7u xam7ata ekada, issuwa “Dosetidaysa” gada xeegas; nam7anthuwa “Issifetethi” gada xeegas.
ZEC 11:8 Taani issi ageenan heedzu henthanchota dhaysas. Enta hanotethay taw danda7etenna; entika tana ixidosona.
ZEC 11:9 Yaata simmada ta dorsatako, “Taani hintena nam7antho heemmike; hayqeysi hayqo; dhayeysi dhayo; attidaysati issoy issuwa mo” yaagas.
ZEC 11:10 Hessafe guye, taani “Dosetidaysa” geetetiya xam7a ekada menthas. Hessa ta oothiday kawotethatara gelida caaqoy duuxidaysa bessanaasa.
ZEC 11:11 He gallas caaqoy me77is; he wode dorse shammeysatinne bayzaysati tana be7idi, hessi Godaa qaala gideysa eridosona.
ZEC 11:12 Taani, “Hinte dosiko ta damooziya immite; ixas giiko aggaagite” yaagas. Yaatin enti taw hastamu bira santime immidosona.
ZEC 11:13 Goday taako, “Enti immida boncho miishiya efada xoossa keethan de7iya otuwan yegga” yaagis. Taani he miishiya efada xoossa keethan de7iya otuwan yeggas.
ZEC 11:14 Hessafe guye, taani Yihudasinne Isra7eeles giddon de7iya ishatethay dhayidaysa bessanaw “Issifetethi” geetetiya ta nam7antho xam7aa menthas.
ZEC 11:15 Qassika Goday tana, “Nam7antho bada pathonna henthanchota miishiya eka.
ZEC 11:16 Taani ha biittan issi henthancho denthana. I qohetida dorsata maaddenna; laaletida dorsata shiishenna; meqida dorsata koolenna; paxa de7eyisata heemmenna. Shin I hessa aggidi, modhota shukidi mees; enta koliziya dhoggees.
ZEC 11:17 Dorsa wudiya yeggi dhayida he pathonna henthanchota ayye! Iya qesiyanne iya ushacha ayfiya bolla mashshi wodho. Iya ushacha kushey silo; iya ushacha ayfey qooqo” yaagis.
ZEC 12:1 Salota micciday, sa7aa medhiday, asas de7o ayyaana immida Goday Isra7eeleba odida Godaa qaalay haysa:
ZEC 12:2 “Heko, taani Yerusalaame katamaa, iya yuushuwan de7iya asa ubbay uyin gandigarsiya woyne ushshi tigiya wanca oothana. Yerusalaamey oyketiya wode Yihuda katamati oyketana.
ZEC 12:3 He wode taani Yerusalaame katamaa asa ubbaas deexo shuchu oothana; iya denthiya ubbay baw deshetana. Sa7aa kawotethati ubbay iya olanaw issife shiiqana.
ZEC 12:4 He wode taani para ubbaa daganthana; para asata gooshshana.” Taani Goday haysa odayis. Yihuda asaa taani ta keeha ayfen xeellana; shin morketa parata ubbaa qooqisana.
ZEC 12:5 He wode Yihuda halaqati banta wozanan, “Yerusalaame asay Ubbaafe Wolqaama Godan, banta Xoossan, minotethaa demmidosona” yaagana.
ZEC 12:6 “He wode taani Yihuda kochata mitha dooriya giddon de7iya xiifanne mirqeeta giddon laxiya xompe oothana. Enti banta ushachan, banta haddirsaninne banta yuushuwan de7iya asa ubbaa maana; shin Yerusalaame katamay, asay saro de7iya bessi gidana.
ZEC 12:7 “Dawita kochata bonchoynne Yerusalaamen de7eyisata bonchoy Yihuda asaa bonchuwafe aadhona mela taani Goday kasetada Yihuda asaas xoono immana.
ZEC 12:8 He wode enta giddon daro laafa geetetiya asi Dawita mela mino gidana. Taani Goday Yerusalaamen de7eysatas gondalle gidana. Dawita kochati Xoossa mela, Godaa kiitancho mela gididi enta kaalethana.
ZEC 12:9 He wode taani Yerusalaame olanaw dendiya kawotethata ubbaa dhaysanaw dendana.
ZEC 12:10 “He wode taani Dawita kochata bollanne Yerusalaamen de7iya asaa bolla qadhenne woosa ayyaana gussana. Hessa gisho, enti banta caddidaysa be7iya wode asi ba issi na7as yeekeysada yeekana. Qassi ba bayra na7as kayoteysada kayotana.
ZEC 12:11 He wode Yerusalaamen yeeketiya yeehoy Magido denban Hadaad-Rimoonas yeeketida yeehuwa mela wolqaama gidana.
ZEC 12:12 Biittan de7iya issi issi kochay baw baw yeekana; Dawita kochati banta machetara, Naatana kochati banta machetara bantaw,
ZEC 12:13 Leewe kochati banta machetara bantaw, Same7a kochati banta machetara bantaw, yeekana.
ZEC 12:14 Attida kocha ubbay baw baw yeekana; enta macheti bantaw bantaw yeekana” yaagees.
ZEC 13:1 Ubbaafe Wolqaama Goday haysada yaagees: “He wode Dawita kochatanne Yerusalaamen de7eyisata nagarapenne tunatethafe geeshshiya pultoy dhuuqana.
ZEC 13:2 He wode taani enti nam7antho qofetonna mela eeqata sunthaa biittafe dhaysana. Qassi nabetanne tuna ayyaanata biittafe dhaysana. Taani Ubbaafe Wolqaama Goday haysa odayis.
ZEC 13:3 Qassi oonika, taani nabe giiko, iya aawanne aayiya iya, ‘Neeni Godaa sunthan wordo odiya gisho, hayqanaw bessees’ yaagana. I tinbite odiya wode iya aawaynne aayiya iya caddidi wodhana.
ZEC 13:4 He wode taani nabe giya oonika ba be7ida qoncethan yeellatana. Qassi ase cimmanaw ikisey de7iya ma7o ma77enna.
ZEC 13:5 Shin I, ‘Taani nabe gidike; na7atethafe doomada biitta oothiya asi’ yaagana.
ZEC 13:6 Issi asi, ‘Yaatin, ha ne bolla de7iya madunthay aybee?’ yaagidi oychiko, i, ‘Haysi taani ta laggeta son madunxidaysa’ yaagana” yaagees.
ZEC 13:7 “Mashshaw denda, taw mata gidida ta dorsata henthanchuwa bolla barka! Dorsati laaletana mela henthanchuwa wodha. Taani guutha dorsata bolla ta kushiya denthana” yaagees Ubbaafe Wolqaama Goday.
ZEC 13:8 “Biitta ubban de7iya heedzu kushe asaape nam7u kushey shocetidi hayqin, issi kushe xalaali attana. Taani Goday haysa odayis.
ZEC 13:9 Ha attida siko asaa taani taman yeggana; biri taman geeyada enta geeshshana; worqey paacetiyada paacana. Hessafe guye, enti ta sunthan woossana; taani enta si7ana. Taani enta, ‘Ta ase’ gaana; enti, Goday, ‘Nu Xoosse’ yaagana” yaagees.
ZEC 14:1 Heko, Godaa pirda gallasay yees; he wode hinte xeellishin, hintefe bonqidaba hinte sinthan shaaketana.
ZEC 14:2 Kawotethata ubbaa Goday Yerusalaame bolla olas shiishana. Katamay oyketana; keethay bonqetana; macca asaa wolqan iissana. Katamaa asaape baggay di7etidi baana; shin attida asay katamaape keyenna.
ZEC 14:3 Hessafe guye, Goday keyidi, kase ola gallas oleteysada kawotethata olana.
ZEC 14:4 He gallas iya tohoti Yerusalaamepe doloha baggara de7iya Shamaho zuma bolla eqana. Shamaho Derey dolohape wuloha gakanaw nam7u keyidi phalqetin, daro gita zangaaray medhetana. Zumaape baggay pudeha bagga, qassi baggay dugeha bagga sher7i gaana.
ZEC 14:5 He zangaaray bidi Axeela gakana; hinte he zangaarara baqati aadhidi attana. Beni Yihuda kawa Ooziyaane laythi biittay qaaxin, hinte mayzati baqatidi attidaysada hinte baqatana. Hessafe guye, Goday ta Xoossay ba geeshshata ubbaara issife yaana.
ZEC 14:6 He wode meegoy, shachinne dhumi deenna.
ZEC 14:7 He wode qamminne gallasi baawa, Goday xalaali eriya dumma gallas gidana; he gallas qammay poo7o gidana.
ZEC 14:8 He wode de7o haathay Yerusalaamepe goggana; iyape baggay Maxine Abban gelana; qassi baggay Medetiraane Abban gelana. He haathay balgonne bone goggishe daana.
ZEC 14:9 Goday biitta ubbaa bolla kawotana; he wode issi Godaa xalaali daana; iya sunthaa xalaala xeegana.
ZEC 14:10 Gib7ape doomidi Yerusalaame dugeha baggara aadhidi Irmoona katamaa gakanaw de7iya biitta ubbay dembatana. Shin Yerusalaamey Biniyaame Pengiyafe bidi, beni pengiya ginara Zooze Pengiya gakanaw, qassi Hanan7eela Adussa Gimbiyafe bidi, kawo woyne gum7iya bessaa gakanaw ba bessan dhoqu gidi daana.
ZEC 14:11 Yerusalaamey asi de7iya bessi gidana; hizape guye dhayenna; iyan de7iya asay hirgi bayna saro daana.
ZEC 14:12 Goday Yerusalaame olanaw dendida asa ubbaa bolla gado ehana. Enti eqon de7ishin, enta ashoy wooqana; enta ayfey ba ollan, enta inxarsay ba kottonuwan wooqana.
ZEC 14:13 He wode Goday enta wolqaama dagama daganthana. Asa ubbay issoy issuwa kushiya oykidi oletana.
ZEC 14:14 Yihuda asay Yerusalaame bagga gididi oletana. Yuushuwan de7iya kawotethata, tayboy bayna shaluwa, worqaa, biraanne ma7uwa di77idi shiishana.
ZEC 14:15 Ha gaduwa daaniya gadoy parata bolla, baqulota bolla, gimaleta bolla, hareta bollanne morketi dunkaanida bessan de7iya mehe ubbaa bolla yaana.
ZEC 14:16 Hessafe guye, Yerusalaame olida kawotethatape attida ubbay Kawa, Ubbaafe Wolqaama Godaa goyinnanawunne Shaqara Ba7aale bonchanaw laythan laythan Yerusalaame baana.
ZEC 14:17 Sa7an de7iya asaape oonika Kawa, Ubbaafe Wolqaama Godaa goyinnanaw Yerusalaame boonna ixiko, entaw iri bukenna.
ZEC 14:18 Gibxe asay bidi goyinnona ixiko, Shaqara Ba7aale bonchanaw boonna ixida asaa bolla gakida gadoy enta bolla yaana.
ZEC 14:19 Shaqara Ba7aale bonchanaw boonna ixida Gibxeynne hara kawotethati ubbay seeretana seeray haysa.
ZEC 14:20 He wode parata qoodhen de7iya shaashshotiya bolla, “Godaas Geeyidaysa” geetetiya malla xuufey xaafetana. Xoossa keethan de7iya kathiya otoy yarsho bessa matan de7iya saaniya mela geeshshi gidana.
ZEC 14:21 Yerusalaameninne Yihudan de7iya oto ubbay Ubbaafe Wolqaama Godaas geeshshi gidana. Yarsho yarshiya asa ubbay he otota ekidi, yarsho ashuwa entan kathana. He wode Ubbaafe Wolqaama Godaa keethan ay zal7anchoy deenna.
MAL 1:1 Goday Milkiyaasa baggara Isra7eele asaas odida tinbite qaalay haysa.
MAL 1:2 Goday ba asaako, “Ta hintena dosas” yaagees. Shin hinte, “Ne nuna aybin dosadii?” yaageeta. Goday zaaridi, “Eesawey Yayqooba isha gidenneyee? Shin taani Yayqooba dosas;
MAL 1:3 Eesawe ixas. Taani derey dariya Eesawe biitta baysa oothas; iya laata workanati gupiya mela biitta oothas” yaagees.
MAL 1:4 Eesawe koche gidida Edoome asay, “Nu katamati laaletikoka, nu enta zaaridi keexana” yaagikoka, Ubbaafe Wolqaama Goday, “Enti zaaridi keexana, shin taani laallana. Asay enta, ‘Ha biittay iita biitta; ha asayka Goday merinaw hanqetida ase’ yaagana” yaagees.
MAL 1:5 Hessa hinte, hinte ayfen be7idi, “Heko, Goday Isra7eele biittafe karenka wolqaama” yaagana.
MAL 1:6 Ubbaafe Wolqaama Goday haysada yaagees: “Hinteno, ta sunthaa kawushiya kahineto, na7i ba aawa, aylley ba godaa bonchees. Yaatin, taani hintew aawa gidiko, hinte tana bonchiya bonchoy awunee? Taani hintew godaa gidiko, hinte taw yayiya yashay awunee? Hinte ta sunthaa kawushshideta. Hinte zaaridi, ‘Nuuni ne sunthaa waatidi kawushshido?’ yaageeta.
MAL 1:7 “Hinte ta yarsho bessan tuna kathi wotheta. Qassi, ‘Nuuni nena waatidi tunisido?’ yaageeta. Hinte, ‘Godaa yarsho bessay kadhetidaba’ yaagidi tana tunisideta.
MAL 1:8 Hinte qooqe mehe yarshiya wode hessi qoho gidenneyee? Hinte hargancho woyko wobe mehe yarshiya wode hessi qoho gidenneyee? Hinte hessa mela mehe hinte halaqaas immiyako, I hessa ekanabaanne iyan ufaytanaaba hintew daanii? yaagees Ubbaafe Wolqaama Goday.
MAL 1:9 “Ha77i Xoossay hintew qadhetana mela iya woossite. Wona hinte hessa mela imota iyaw immin, I hintena maaddanee?” yaagees Ubbaafe Wolqaama Goday.
MAL 1:10 “Hinte ta yarsho bessan hada tama eethonna mela xoossa keetha pengiya gordiya issi asi bentida gidereneshin! Ta hintenan ufaytike; hinte immiya imotaka ekike” yaagees Ubbaafe Wolqaama Goday.
MAL 1:11 “Awi doliyasope wulliyaso gakanaw ta sunthay kawotethata giddon wolqaama. Ubba bessan ta sunthaas ixaane cuyisananne geeshsha yarsho yarshana; ta sunthay kawotethata giddon wolqaama” yaagees Ubbaafe Wolqaama Goday.
MAL 1:12 “Shin hinte, ‘Godaa yarsho bessay tuna; iyan yarshetiya kathika kadhetidaba’ yaagidi iya kawushshideta.
MAL 1:13 Qassi hinte, ‘Haysi coo daabursi’ yaagidi, qidhidi cuttideta. “Hinte bonqidi ehidaba woyko wobe woyko hargancho mehe yarsheeta; yaatin, taani hessa hinte kushepe ekanaw bessii?
MAL 1:14 Taani gita kawo; ta sunthayka kawotethata giddon bonchetidaysa gidiya gisho, Xoossas immana gidi doorida marazey iya mehiya giddon de7ishin, iya aggidi, boretida maraze yarsho shiishiya asinne cimmiya asi baadetidaba gido” yaagees Goday.
MAL 2:1 “Ha77ika kahineto, ha kiitay imetiday hintesa.
MAL 2:2 Hinte si7onna ixiko; ta sunthaa bonchanaw hinte wozanan ta qaala wothonna ixiko, ta hinte bolla baadethi yeddana; hinte anjuwa taani baadethan laammana. Hinte hinte wozana tana bonchanaw giigisiboonna gisho, ta hintena baaddas” yaagees Ubbaafe Wolqaama Goday.
MAL 2:3 “Taani hinte kochaa seerana; hinte yarsho mehe osha hinte som7on laallana; hinteka iyara issife holetana.
MAL 2:4 He wode ta Leewera caaqida caaqoy, minnidi daana mela ha kiita kiitiday tana gideysa hinte erana” yaagees Ubbaafe Wolqaama Goday.
MAL 2:5 “Ta iyara caaqida caaqoy de7onne sarotetha caaqo; I taw yayyana mela de7onne sarotetha iyaw immas; ika taw yayyis, ta sunthaa bonchida mela de7is.
MAL 2:6 Tuma timirtey iya doonan de7is; iya inxarsanka wordoy bentibeenna. I taara sarotethaninne suuretethan hemetis; qassi darota nagarape zaaris.
MAL 2:7 Kahiney, Ubbaafe Wolqaama Goday kiitidaysa gidiya gisho, iya mettershay eratethi naaganaw koshshees; asay eratethi iya doonape tamaaranaw bessees” yaagees Ubbaafe Wolqaama Goday.
MAL 2:8 “Shin hinte ta ogiyape gaxa keydeta; hinte timirtiyan darota dhubideta; taani Leewera caaqida caaquwa menthideta.
MAL 2:9 Hessa gisho, hinte ta ogiyan boonna ixidi, hinte timirtiyan asaa giddon shaahetethi medhiya gisho, ta hintena asa ubbaa sinthan kadhetanaadanne kawuyanaada oothas” yaagees Ubbaafe Wolqaama Goday.
MAL 2:10 Nu ubbaas issi aawi de7ees gidennee? Nuna issi Xoossay medhibeneyee? Yaatin, nu issoy issuwas ammanetona ixidi, nu mayzata caaquwa ayis menthanee?
MAL 2:11 Yihudi cimmis; Isra7eeleninne Yerusalaamen tunabay oosetis; Yihudi allaga xoossa macca nayta ekidi, Goday dosiya xoossa keetha tunisis.
MAL 2:12 Hessa tamaarseynne kaalliya oonika, Ubbaafe Wolqaama Godaas yarsho ehiyakoka, Goday iya Yayqooba dunkaaniyape dhayso.
MAL 2:13 Qassi hinte oothiya harabay aybe giiko, Goday hinte yarshuwako xeellonna gisho woyko ufaysan ekonna gisho yarsho bessa afuthan, yeehoninne azzanon kuntheeta.
MAL 2:14 Hinte, “I nu yarshuwa ayis ekennee?” yaagidi oycheeta. Hessi haniday, hinte, hinte na7atetha machera caaqida caaquwa menthida gishonne cimmida gishosa; iya ne miyenne ne caaqo macho gidiya gisho Goday marka.
MAL 2:15 Goday hintewunne hinte machetas issi asatethinne issi ayyaani daana mela oothibeennee? Hessa ayis oothidee? Xoossa yayiya koche daana mela koyda gishosa. Hessa gisho, hinte ayyaana naagite; hinte na7atetha macheta cimmofite.
MAL 2:16 “Taani Goday, Isra7eele Xoossay, azini ba machiw yeddanaysa ixayis; ba ma7uwa iita ooson kammiya oonaka ta ixayis. Hessa gisho, hinte ayyaana naagite; hinte na7atetha macheta cimmofite” yaagees Ubbaafe Wolqaama Goday.
MAL 2:17 Hinte, hinte odan Godaa salethideta. Hinte zaaridi, “Nuuni iya waatidi salethido?” yaageeta. Hinte iya salethiday, “Iita oothiya ubbay Godaa sinthan lo77o; ika entan ufaytees” yaagusaana; woyko, “Xillo pirdiya Xoossay awun de7ii?” yaagusaana.
MAL 3:1 “Heko, ta sinthan oge giigisana mela ta kiitanchuwa kasetada kiittana. Hinte koya Goday qoponna de7ishin ba keetha yaana. Hinte ufaysan naagiya, caaqo kiitanchoy yaana” yaagees Ubbaafe Wolqaama Goday.
MAL 3:2 Shin I bira seerisidi geeshshiya tama melanne ma7uwa meeciya saamuna mela gidiya gisho, I yaa gallasan danda7i eqanay oonee? Qassi I qonciya wode iya sinthan eqanaw danda7ey oonee?
MAL 3:3 I bira sheeshiyanne geeshshiya asada uttana. I Leewe kochata biradanne worqada geeshshana. He wode enti Godaas xillotethan yarsho yarshana.
MAL 3:4 He wode Yihudanne Yerusalaame yarshoy beni wodetanne aadhida laythada Godaa ufaysiyaba gidana.
MAL 3:5 “Hessafe guye, pirdas taani hinteko yada, bitanchota, laammeyisata, wordon caaqeyisata, oosanchota damooze diggeyisata, am7etanne yi7ota un7etheyisata, betanchotas pirda diggeysatanne taw yayyonnayisata bolla eeson markatana” yaagees Ubbaafe Wolqaama Goday.
MAL 3:6 “Taani Goday laametike; hessa gisho, hinteno Yayqooba kochato, hinte dhaybeketa.
MAL 3:7 Hinte mayzata wodepe doomidi, ta wogape kare keydeta; iya naagibeketa. Ha77i taako simmite; taanika hinteko simmana” yaagees Ubbaafe Wolqaama Goday. Shin hinte, “Nuuni ay ogen simmino?” yaagidi oycheeta.
MAL 3:8 “Asi Xoosse kaysotii? Shin hinte tana kaysotideta.” Qassika hinte, “Nuuni nena waatidi kaysotido? yaageeta. “Hinte asraataninne imotan tana kaysideta.
MAL 3:9 Isra7eele asa ubbay tana kaysotida gisho, hinte baadetidaysata.
MAL 3:10 Ta keethan kathi daana mela asraata ubba shaalen yeggite. Yaatidi, taani salo maskootiya dooyada anjo hintew palahisada immonna ixiko hessan tana paacite” yaagees Ubbaafe Wolqaama Goday.
MAL 3:11 “Kathi moonna mela taani hinte gisho, gonduwa seerana; gaden de7iya woyne ayfeyka qoqofetenna.
MAL 3:12 Hinte biittay daanaw injetiya biitta gidiya gisho, kawotethati ubbay hintena anjetidaysata yaagana” yaagees Ubbaafe Wolqaama Goday.
MAL 3:13 Goday haysada yaagees: “Hinte ta bolla mino qaala odetideta. Yaatidi qassi, ‘Nuuni ne bolla woygidi mino qaala odetido?’ yaagidi oycheeta.
MAL 3:14 “Hinte, ‘Xoossas ootheysi hada; iya kiita naagidi, Ubbaafe Wolqaama Godaa sinthan azzaniya asada simeretethi nuna ay maaddidee?
MAL 3:15 Ha77ika nuuni otoreyisata anjetidaysata goos; iita ootheysati duretoosona; hari attoshin enti Xoossaa paacisheka kessi ekoosona’ yaageeta” yaagees Xoossay.
MAL 3:16 He wode Godaas yayyeysati issoy issuwara odetidosona; Godayka hayzidi si7is. Godaas yayyeysatinne iya sunthaa boncheysati dogetonna mela enta hassaysiya maxaafay iya sinthan xaafetis.
MAL 3:17 “Enti tabaa gidana; taani oothiya gallas enti taw buzo miishe gidana; aawi baw oothiya ba na7a maareysada taani enta maarana.
MAL 3:18 He wode hinte simmidi xilluwanne nagaranchuwa giddon, Xoossas kiiteteysanne kiitetonaysa giddon de7iya dummatethaa be7ana” yaagees Ubbaafe Wolqaama Goday.
MAL 4:1 “Heko, cooce tamada eexiya gallasi yaana; otoranchotinne iita ootheysati ubbay buure mela gidana. He yaa gallasay enta xuuggana; entaw xaphonne xeera ashshena” yaagees Ubbaafe Wolqaama Goday.
MAL 4:2 Shin “Hintew, ta sunthaas yayyeysatas, xillotetha awi ba qefe garsan paxotethi ekidi keyana. Hinte qashope yedetida ko77o galoda gupana.
MAL 4:3 Taani oothiya gallas, nagaranchoti hinte tohope garsan bidinthe gidana; hinte enta yedhana” yaagees Ubbaafe Wolqaama Goday.
MAL 4:4 “Isra7eele asay kiitetana mela taani Koreeba zumaa bolla ta aylliya Muse baggara immida higgiyanne kiita akeekite.
MAL 4:5 “Heko, gitanne yashshiya Godaa gallasay yaanape kasetada, taani hintew nabiya Eeliyaasa kiittana.
MAL 4:6 Taani yada biitta baadethan dhaysonna mela aawata wozana naytako, nayta wozana aawatako zaarana” yaagees.
MAT 1:1 Haysafe kaallidi xaafetidaysi Dawita na7a Abrahaame na7a gidida Yesuus Kiristoosa yeletethaa.
MAT 1:2 Abrahaamey Yisaaqa yelis; Yisaaqi Yayqooba yelis; Yayqoobi Yihudanne iya ishata yelis;
MAT 1:3 Yihudi Timaaripe Faaresanne Zaara yelis; Faaresi Asroome yelis; Asroomey Raame yelis;
MAT 1:4 Raamey Amnadaabe yelis; Amnadaabey Na7asoona yelis; Na7asooni Salmoona yelis;
MAT 1:5 Salmoona Raabipe Boo7eza yelis; Boo7ezi Uruutipe Iyobeeda yelis; Iyobeedi Isseye yelis;
MAT 1:6 Isseyey kawa Dawita yelis; Dawiti koyro Ooriyo machefe Solomone yelis;
MAT 1:7 Solomoney Orobi7aama yelis; Orobi7aamey Abiya yelis; Abiyi Asaafa yelis;
MAT 1:8 Asaafi Iyosaafexa yelis; Iyosaafexi Iyoraama yelis; Iyoraami Ooziyana yelis;
MAT 1:9 Ooziyani Iyo7ataame yelis; Iyo7atami Akaaza yelis; Akaazi Hizqiyaasa yelis;
MAT 1:10 Hizqiyaasi Minaase yelis; Minaasey Amoone yelis; Amooni Iyosiyaasa yelis;
MAT 1:11 Isra7eele asay di7etidi Babiloone biitta bida wode Iyosiyaasi Ikoniyaananne iya ishata yelis.
MAT 1:12 Babiloone biitta Isra7eele asay di7etidi bidaape guye Ikoniyaani Salatiyaala yelis. Salatiyaali Zarubaabela yelis;
MAT 1:13 Zarubaabeli Abdiyu yelis; Abdiyuy Eliyaqeeme yelis; Eliyaqeemi Azaara yelis;
MAT 1:14 Azaari Saadoqa yelis; Saadoqi Akime yelis; Akimey Elyuuda yelis;
MAT 1:15 Elyuudi Alaazara yelis; Alaazari Maatane yelis; Maataney Yayqooba yelis;
MAT 1:16 Yayqoobi Yoosefa yelis; Yoosefi Kiristoosa geetetiya Yesuusa yelida Mayraami azina.
MAT 1:17 Hiza, yeletethay Abrahaamepe Dawita gakanaw tammanne oydda. Dawitape bidi Babiloone di7uwa gakanaw tammanne oydda. Babiloone di7uwape bidi Kiristoosa gakanaw tammanne oyddu yeletethi gidees.
MAT 1:18 Yesuus Kiristoosa yeletethaa taarikey haysafe kaalleysa. Iya aayiya Mayraama Yoosefas oysheta de7ashe Yoosefara gahetonna Geeshsha Ayyaanape qanthatasu.
MAT 1:19 Yoosefi Xillo asi gidida gisho iyo asan kessanaw koybeenna. Yaaniya gisho qosan iyo agganaw qopis.
MAT 1:20 I he qofan de7ishin Xoossaa kiitanchoy amuhon qoncidi, “Dawita na7aw, Yoosefa, Mayraama qanthatiday Geeshsha Ayyaanape gidiya gisho iyo ekanaw yayyofa” yaagis.
MAT 1:21 Iya adde na7a yelana, I ba deriya enta nagaraape ashshiya gisho iya sunthaa ne Yesuusa gada xeegana.
MAT 1:22 Goday nabiya Isayaasa doonan,
MAT 1:23 “Heko geela7iya qanthatana; adde na7a yelana; iya sunthay Amanu7eela” geetetana goysi poletana mela ha ubbay hanis. Amanu7eela geysas birshethay “Xoossay nuura de7ees” guussu.
MAT 1:24 Yoosefi dhiskofe barkidi Godaa kiitanchoy kiittidaysa mela Mayraamo ba soo efis.
MAT 1:25 Shin ba bayra na7a yelana gakanaw iyo bochibeenna; yeletida na7aka Yesuusa gidi xeegis.
MAT 2:1 Kawa Herodiisa woden Yesuusi Yihuda biittan Beeteleme kataman yeletidaape guye xoolinto taybiya asati dolohape Yerusalaame yidi,
MAT 2:2 “Yeletida Ayhude kawoy awun de7ii? Nuuni doloha baggara keyida iya xoolintuwa be7idi iyaw goyinnanaw yida” yaagidi oychidosona.
MAT 2:3 Kawoy Herodiisi hessa si7ida wode dagammis. Yerusalaamen de7iya asa ubbayka dagammidosona.
MAT 2:4 Herodiisi kahine halaqatanne higge astamaareta baako xeegidi, “Kiristoosi awun yeletandesha?” yaagidi enta oychis.
MAT 2:5 Entika, “Yihuda Beetelemena; nabey,
MAT 2:6 “ ‘Yihudan de7iya Beeteleme, Yihudan de7iya gooba katamatape, neeni aybinka guuxaka. Ta deriya Isra7eele aysanaysi, neepe keyana’ gidi xaafis” yaagidosona.
MAT 2:7 Hessafe guye, Herodiisi dolohape yida asata geeman xeegidi, xoolintuwa enti be7ida wodiya entafe geeshshidi eris.
MAT 2:8 I entana Beeteleme yeddishe, “Bidi yeletida na7aa minthidi koyite; iya hinte demmida wode taka bada iyaw goyinnana mela simmidi yishe taw odite” yaagis.
MAT 2:9 Entika kawoy Herodiisi gidaysa si7idi bidosona. Enti doloha baggara be7ida xoolintoy entana kaalethishe na7ay de7iyasuwa gakanaw efis.
MAT 2:10 Enti he xoolintuwa be7ida wode gita ufaysi ufaytidosona.
MAT 2:11 Soo gelidi na7aa ba aaye Mayraamira de7eysa be7idosona. Iyaw gulbatidi goyinnidosona. Banta saaxiniya dooyidi worqa, ixaanenne karbe iyaw immidosona.
MAT 2:12 Enti Herodiisako guye simmonna mela Xoossay amuhon entaw odin, hara ogera banta biitta simmidosona.
MAT 2:13 Doloha baggafe yida asati bidaape guye, Godaa kiitanchoy Yoosefas amuhon qoncidi, “Herodiisi na7aa wodhanaw koyiya gisho denda; ellesada na7aanne na7aa aayiw ekada Gibxe biitta ba. Ne simmana wodiya ta new odana gakanaw yan gam7a” yaagis.
MAT 2:14 Hessa gisho, Yoosefi he qamman dendidi, na7aanne na7aa aayiw ekidi Gibxe bis.
MAT 2:15 Nabiya doonan Xoossay, “Taani, ta na7aa, Gibxe biittafe xeegas” geetetida qaalay poletana mela Herodiisi hayqana gakanaw I yan de7is.
MAT 2:16 Hessafe guye, doloha baggafe yida asati iya cimmidaysa erida wode daro yilotis. I kase entafe si7idaysada Beetelemeninne he heeran de7iya nam7u laythi kumidaysatanne nam7u laythafe garsan de7iya adde nayta ubbaa ba wotaadareta yeddidi wodhisis.
MAT 2:17 Nabiya Ermiyaasa doonan, “Yeehoynne zelelsi, Rama kataman si7etis. Raheela ba naytas yeekawusu; enti hayqida gisho minettanaw danda7abuku” gidi odidaysi poletis.
MAT 2:19 Herodiisi hayqidaape guye Gibxen Godaa kiitanchoy Yoosefas amuhon qoncidi,
MAT 2:20 “Na7aa wodhanaw koyiya asati hayqida gisho, dendada na7aanne na7aa aayiw ekada Isra7eele biitta simma” yaagis.
MAT 2:21 Yoosefi dendidi na7aanne na7aa aayiw ekidi Isra7eele biitta simmis.
MAT 2:22 Shin Arkeliyoosi Yihudan ba aawa Herodiisa bessan kawotidaysa si7ida wode yaa baanaw yayyis. Xoossay amuhon iyaw qoncisin Galila biitta bis.
MAT 2:23 Nabeta doonan, “Naazirete asi geetetana” gidi odetidaysi poletana mela Naazirete katamaa bidi yan de7is.
MAT 3:1 He wode Xammaqiya Yohaanisi, “Xoossaa kawotethay matatida gisho hinte nagaraape simmite” yaagidi sabbakishe Yihuda mela biitta bis.
MAT 3:3 Nabiya Isayaasi Yohaanisaba odidaysa mela, “Mela biittan, issoy ba qaala dhoqu oothidi, ‘Godaa ogiya giigisite. Iya horoga piddi oothite’ gis” yaagetiday iyassa yaagis.
MAT 3:4 Yohaanisi gimale ikisepe oosetida afila ma77ees. Ba xeessan dafo dancees. I miya kathayka boolenne degera eessi.
MAT 3:5 Asay he wode Yerusalaame katamaape, Yihuda biitta ubbaafenne Yordaanose Shaafa heerape iyako yoosona.
MAT 3:6 Banta nagaraa paaxidi Yordaanose Shaafan Yohaanisa kushen xammaqetosona.
MAT 3:7 Yohaanisi, daro Farsaawetinne Saduqaaweti xammaqetanaw baako yeyisata be7idi, entako, “Ha iita shooshato, yaana Xoossaa hanquwafe baqatana mela hintena oone zoriday?
MAT 3:8 Hiza, hinte, hinte nagaraape simmidaysa erisiyaba oothite.
MAT 3:9 Hinte, hinte wozanan, ‘Abrahaamey, nu aaway de7ees’ gidi qopofite. Loythi si7ite! Xoossay ha shuchatape Abrahaames na7a kessanaw danda7ees.
MAT 3:10 Beexey mitha xaphon giigidi uttis; lo77o ayfe ayfonna mitha ubbay qanxetidi taman yegetana.
MAT 3:11 “Hinte, hinte nagaraape simmidaysa erisanaw taani hintena haathan xammaqayis. Shin taape guyera yeysi hintena Geeshsha Ayyaananinne taman xammaqana. I taape daro wolqaamees; taani hari attoshin iya caammaa tookanawuka bessike.
MAT 3:12 Kathaa geeshshiya pithey iya kushen de7ees. Kathaa loythi geeshshees; gistiya ba shaaliyan qolana, shin punuwa to7onna taman xuuggana” yaagis.
MAT 3:13 He wode Yesuusi Yohaanisa kushen xammaqetanaw Galilape Yordaanose Shaafa bis.
MAT 3:14 Shin Yohaanisi iya digganaw koyidi, “Taani nenan xammaqetanaw koshshishin neeni taako yay?” yaagis.
MAT 3:15 Shin Yesuusi zaaridi, “Xoossay nuupe koyaba ubbaa nu polanaw bessiya gisho, ha77i taw ero ga” yaagis. Yohaanisi iyaw ero gidi ekis.
MAT 3:16 Yesuusi xammaqetida mela haathaafe keyis. Iiraka saloy dooyetin Xoossaa Ayyaanay holleda yishin qassi ba bolla wol7amidi wodhishin be7is.
MAT 3:17 He wode, “Ta dosiya, iyan tana ufaysiya ta na7ay haysa” giya qaalay salope yis.
MAT 4:1 Hessafe guye, Xalahey Yesuusa paacana mela Geeshsha Ayyaanay Yesuusa mela biitta efis.
MAT 4:2 Oytamu qammanne oytamu gallas xoomidaape guye koshatis.
MAT 4:3 Xalahey Yesuusako yidi “Neeni Xoossaa na7a gidiko, ane ha shuchati uythi gidana mela kiitta” yaagis.
MAT 4:4 Yesuusi zaaridi, “ ‘Asi Xoossaa doonape keyiya qaala ubban de7eesipe attishin, uytha xalaalan deenna’ geetetidi Xoossaa qaalan xaafetis” yaagis.
MAT 4:5 Kaallidika, Xalahey Yesuusa geeshsha katamaa efidi, Xoossaa keetha huuphiya kessidi,
MAT 4:6 “Neeni Xoossa na7a gidiko, ane duge sa7an kunda. “ ‘Ne tohoy shuchan dhubetonna mela, banta kushiyan nena denthana mela, Xoossay ba kiitanchota ne gisho kiittana’ geetetidi Xoossaa qaalan xaafetis” yaagis.
MAT 4:7 Yesuusi iyako, “Qassika, ‘Xoossaa qaalan ne Godaa, ne Xoossaa paacofa’ yaagetidi xaafetis” gidi zaaris.
MAT 4:8 Wursethan Xalahey Yesuusa issi wolqaama zuma huuphe kessidi alamiya kawotethata enta bonchuwara issife bessidi,
MAT 4:9 “Ne taw kundada goyinniko ta new ha ubbaa immana” yaagis.
MAT 4:10 Yesuusi zaaridi, “Ha Xalahiyaw, taape haaka! ‘Ne Godaa, ne Xoossaa goyinna, iya xalaala haggaaza’ geetetidi Xoossaa qaalan xaafetis” yaagis.
MAT 4:11 Hessafe guye, Xalahey aggidi bis; kiitanchoti yidi iya haggaazidosona.
MAT 4:12 Yesuusi, Yohaanisi qashetoysa si7ida wode Galila biitta bis.
MAT 4:13 Naazirete katamaa aggidi Zabloonaninne Niftaaleme heeran, abba matan de7iya Qifirnahooma katamaa bidi yan de7is.
MAT 4:14 Hessi haniday nabiya Isayaasa doonan,
MAT 4:15 “Zabloona biittan, Niftaaleme biittan, Yordaanose Shaafape hefinthan, abba ogiya gaxan de7iya, Ayhude gidonna derey de7iya Galilan,
MAT 4:16 dhuman de7iya derey, wolqaama poo7o be7is. Hayqo kuya biittan, de7eysatas poo7oy keyis” yaagidi odetida qaalay poletana melasa.
MAT 4:17 He wodepe doomidi Yesuusi, “Xoossaa kawotethay matatida gisho hinte nagaraape simmite” yaagidi qaala sabbakees.
MAT 4:18 Yesuusi Galila Abbaa matara aadhishe nam7u ishata, Phexroosa geetetiya Simoonanne iya ishaa Indiriyasa be7is. Enti molo oykeyisata gidida gisho banta gitiya abban yeggoosona.
MAT 4:19 Yesuusi entana, “Haa yiite; tana kaallite; taani hintena ase oythi tamaarsana” yaagis.
MAT 4:20 Entika, ellesidi banta gitiya yeggi aggidi Yesuusa kaallidosona.
MAT 4:21 Yesuusi yaape buroo gede sinthe aadhishe hara nam7u ishata, Zabdiyoosa nayta, Yayqoobanne Yohaanisa be7is. Banta aawa Zabdiyoosara issife wogoluwa giddon banta gitiya giigiseyisata xeegis.
MAT 4:22 Entika, ellesidi banta wogoluwanne banta aawa aggidi Yesuusa kaallidosona.
MAT 4:23 Yesuusi ayhude woosa keethatan tamaarsishe, salo kawotethaa Wongela odishenne dumma dumma hargiyafe asaa pathishe Galila biitta ubban yuuyis.
MAT 4:24 Hessafe dendoysan iya sunthay Soore biitta ubban keyis. Dumma dumma hargen oyketidaysatanne waayeteyisata, tuna ayyaanan oyketidaysata, shoci yeggiya hargen oyketidaysatanne, gundata iyako ehidosona; ika entana pathis.
MAT 4:25 Asay Galilape, Tammu Katamatape, Yerusalaamepe, Yihudapenne Yordaanose Shaafa hefinthan de7iya biittafe yida daro asay iya kaallidosona.
MAT 5:1 Daro derey shiiqidaysa Yesuusi be7ida wode zumaa bolla keyidi uttis. Iya tamaareti iyako shiiqin,
MAT 5:2 haysada yaagidi tamaarsis:
MAT 5:3 “Banta ayyaanan manqoti anjetidaysata, salo kawotethay entassa.
MAT 5:4 Yeekeysati anjetidaysata, enti minthetho demmana.
MAT 5:5 Banta wozanan ashketi anjetidaysata, enti sa7aa laattana.
MAT 5:6 Xillobaa oothanaw koshateysatinne saamoteysati anjetidaysata, enti kallana.
MAT 5:7 Maareysati anjetidaysata, enti maarotethi demmana.
MAT 5:8 Wozana geeshshati anjetidaysata, enti Xoossaa be7ana.
MAT 5:9 Sigetheysati anjetidaysata, enti Xoossaa nayta geetetidi xeegetana.
MAT 5:10 Xillobaa oothiya gisho gidi, goodeteysati anjetidaysata, salo kawotethay entassa.
MAT 5:11 “Asay hintena ta gisho gidi cayiya wode, gooddiya wodenne hinte bolla iitabaa ubbaa wordon odisiya wode hinte anjetidaysata.
MAT 5:12 Hinte woytoy salon gita gidiya gisho ufaytite, hashshu giite. Hintefe kase de7iya nabeta hessada goodidosona.
MAT 5:13 “Hinte biittas maxine; maxiney ba maxinetetha aggiko, ba mal7otetha waati zaari demmanee? Kare holin asan yedhetanaape attishin, aybiska maaddenna.
MAT 5:14 “Hinte biittas poo7o; zuma bolla de7iya katamiya qosetanaw danda7uku.
MAT 5:15 Xompe oythidi son de7iya asa ubbaas poo7ana mela dhoqa son wotheesipe attishin, daallo giddon wothey baawa.
MAT 5:16 Hessa mela asay hinte lo77o oosuwa be7idi, salon de7iya hinte aawa bonchana mela hinte poo7oy asa sinthan poo7o.
MAT 5:17 “Taani Muse higgiyanne nabeta qaala shaaranaw yida hintew daanopo. Taani, enti odidaysi tuma gideysa qoncisanaw yasipe attishin, shaaranaw yabiike.
MAT 5:18 Ta hintew tuma odayis; saloynne sa7i aadhana gakanaw higge ubbay poletanaape attishin, higgiyafe issi qaalay woyko pidaley aadhenna.
MAT 5:19 Hessa gisho, ha kiitatape guuxiya issi kiitaa menthiya oonika qassi harata hessatho oothana mela tamaarsey oonika salo kawotethan ubbaafe guutha gidana. Shin ha kiitaa poleysinne harataka polana mela tamaarsey salo kawotethan gita gidana.
MAT 5:20 Ta hintew odayis; hinte xillotethay Farsaaweta xillotethaafenne higge astamaareta xillotethafe aadhona ixiko, salo kawotethaa geleketa.
MAT 5:21 “Hinte mayzatas, ‘Wodhopite; shempo wodhida oonika pirdetana’ geetetoysa si7ideta.
MAT 5:22 Shin ta hintew odayis; ba isha bolla hanqetiya ubbay pirdetana. Ba ishaa cayiya oonika daynna sinthe pirdas shiiqana. Ba ishaako, ‘Eeyay’ giya oonika qassi gaanname taman pirdetana.
MAT 5:23 “Hessa gisho, neeni ne yarshuwa yarshiya wode, ne isha qohidabay new akeeketiko,
MAT 5:24 ne yarshuwa he bessan aggada ba; koyrota bada ne ishaara giiga; yaata simmada, ne yarshuwa Xoossaas yarsha.
MAT 5:25 “Nena mooteysara pirda keethi bashe oge bolla iyara giiga. Hessi atto giiko I nena daynna sinthe efana. Daynnay nena qacheysas aathidi immana; I nena woynen yeggana.
MAT 5:26 Ta tuma odayis; ne bolla pirdetida acuwa issi santimey attonna cigga ongana gakanaw qasho keethafe keyaka.
MAT 5:27 “Haysafe kase, ‘Laymatopite’ geetetoysa si7ideta.
MAT 5:28 Shin ta hintew odayis, maccas xeellidi, amotida ubbay ba wozanan iira laymatees.
MAT 5:29 Ne ushacha ayfey new nagaras gaaso gidiko, kessa hola. Ne asatethay kumethi gaanname taman wodhanaape ne asatethafe issoy dhayiko new lo77o.
MAT 5:30 Ne ushacha kushey new nagaras gaaso gidiko, iya qanxa hola. Ne asatethay kumethi gaanname taman wodhanaape ne asatethafe issoy dhayiko, new lo77o.
MAT 5:31 “ ‘Ba machees anjo worqate immo’ geetetis.
MAT 5:32 Shin ta hintew odayis; ba machiya laymatonna de7ishin billiya oonika iya laymatana mela oothees. Hessadaka, anjetida maccasiw ekiya ubbay laymatees.
MAT 5:33 “Hinte mayzatako, ‘Wordon caaqofite; hinte Xoossaa sinthan caaqidaysa polite’ geetetidaysa si7ideta.
MAT 5:34 Shin ta hintew odayis; ubbaraka caaqofite. Xoossay uttiya araata gidiya gisho, salon caaqofite.
MAT 5:35 Iya tohoy yedhiya soo gidiya gisho, sa7anka caaqofite. Gita kawa katama gidiya gisho, Yerusalaamenka caaqofite.
MAT 5:36 Hinte binaanape issuwaka boothi woyko kareethi oothanaw danda7onna gisho, hinte, hinte huuphenka caaqofite.
MAT 5:37 Hessa gisho, hinte qaalay, ‘Ee’ woyko ‘Akay’ gido. Hessafe kare keyey Xalahepe yees.
MAT 5:38 “ ‘Ayfe gisho ayfe; acha gisho ache’ geetetidaysa si7ideta.
MAT 5:39 Shin ta hintew odayis; hinte bolla iitabaa oothiya uraara eqetofite. Oonika ne ushacha shakala baqiko ne haddirsa shakala bessa.
MAT 5:40 Issi asi ne shamziya ekanaw nena mootiko, ne kootiya gujada imma.
MAT 5:41 Issi asi nena wolqan babaa toossidi issi saate oge baara baana mela nena un7ethiko, iyara nam7u saate oge ba.
MAT 5:42 Woossiya oodeska imma; neepe tal7anaw koyiya oonaka diggofa.
MAT 5:43 “ ‘Nena doseysa dosa; nena ixeysa ixa’ geetetoysa si7ideta.
MAT 5:44 Shin ta hintew odayis; hinte morketa dosite; hintena qoheysatas woossite.
MAT 5:45 Hessatho hinte oothiko, salon de7iya hinte aawas hinte nayta gidana. I iitatasinne lo77otas awa kessees; xillotasinne nagaranchotas ba ira bukisees.
MAT 5:46 Hintena dosiya asaa xalaala hinte dosiko, hintew ay woytoy de7ii? Hari attoshin, qaraxa qanxiseysatika hessa oothosona.
MAT 5:47 Hinte, hinte ishata xalaala sarothiko, haratape ay hara aadhiyaba oothidetii? Hari attoshin, Xoossaa ammanonna asayka hessa oothosona.
MAT 5:48 Hiza, salon de7iya hinte aaway polo gidoysada hinteka polo gidite.”
MAT 6:1 “Asi be7o gidi hinte lo77o oosuwa asa sinthan oothonnaada naagetite. Hessatho hanonna ixiko salon de7iya hinte Aawape woyto demmeketa.
MAT 6:2 “Hinte manqotas immiya wode asa sinthan bonchetanaw gidi cubboti ogiya doonaninne ayhude woosa keethatan ootheysada asi be7o gidi oothopite. Ta hintew tuma odayis; enti banta kumetha woytuwa ekidosona.
MAT 6:3 Shin hinte manqotas immiya wode hinte ushacha kushey ootheysa hinte haddirsa kushey eropo;
MAT 6:4 hinte imoy geeman gido. Geeman ootheysa be7iya hinte aaway hintew woytuwa qoncen immana.
MAT 6:5 “Woosa woossishe cubbotatho hanopite. Enti, bantana asi be7o gidi ayhude woosa keethaninne ogiya doonan eqidi woosseysa dosoosona. Ta hintew tuma odayis; enti banta kumetha woytuwa ekidosona.
MAT 6:6 Shin neeni woossiya wode, ne soo gela, wulaa gordada geeman de7iya ne Aawa woossa; geeman oosetidaysa be7iya ne aaway new woytuwa immana.
MAT 6:7 Hinte woossiya wode ammanonna asatho coo qaala darsidi woossofite. Enti adussi woossin Xoossay si7ees gidi qopoosona.
MAT 6:8 Hessa gisho, entaysada hanopite. Ayis giiko, hinte aaway hintew ay koshshiyako hinte woossanaape sinthatidi erees.
MAT 6:9 “Hiza, hinte yaagidi woossite: “ ‘Salon de7iya nu aawaw, ne geeshsha sunthay anjeto.
MAT 6:10 Ne kawotethay yo, ne sheney salon hanidaysada sa7anka hano.
MAT 6:11 Gallasa kathaa hachi hachi nuus imma.
MAT 6:12 Nuuni nuna qohidaysata, atto geysada, nuuska nu qohuwa atto ga.
MAT 6:13 Nuna iitape ashshafe attishin, paacen gelsofa. [Kawotethay, wolqaynne bonchoy merinaw neesa; Amin7i.’]
MAT 6:14 “Hinte hintena qohidaysata atto giiko, salon de7iya hinte Aaway hinte qohuwaka atto gaana.
MAT 6:15 Shin hinte hara asa nagara atto goonna ixiko hinte Aaway hinte nagara atto geenna.
MAT 6:16 “Hinte xoomiya wode cubbotatho kayotofite. Ayis giiko, enti xoomeysa asi erana mela banta som7uwa qitayoosona. Ta tuma odayis; enti banta woytuwa ekidosona.
MAT 6:17 “Shin neeni xoomiya wode ne som7uwa meecca, ne huuphiya tiyetta.
MAT 6:18 Hessada ne oothiko ne xoomiya xoomay asape geemmidaysa, shin geeman de7iya ne Aaway eriya xooma gidana. Geeman oosetidaysa be7iya ne Aaway new woytuwa immana.
MAT 6:19 “Bili miya bessan, birati shi7iyason, kaysoy bookidi ekiyason, ha sa7an, hintew shalo shiishopite.
MAT 6:20 Shin bili moonnason, birati shi7onnason, kaysoy bookidi ekonnason salon hintew shalo shiishite.
MAT 6:21 Ne shaloy de7iyasuwan ne wozanay de7ana.
MAT 6:22 “Ayfey asatethas xompe. Hessa gisho, ne ayfey paxa gidiko ne kumetha asatethay poo7o gidees.
MAT 6:23 Ne ayfey hargancho gidiko ne kumetha asatethay dhuma gidees. Hiza, nenan de7iya poo7oy dhuma gidiko, dhumay ay mela aadhidi dhumandeesha!
MAT 6:24 “Issi asi nam7u godaas haaretanaw danda7enna. Issuwa dosiko hankuwa ixees; woyko issuwa bonchiko hankuwa kadhees. Xoossasinne miishes haaretanaw danda7eketa.
MAT 6:25 “Hiza, si7ite! Hinte de7on daanaw, ‘Ay maanee? Ay uyanee? Ay ma7anee?’ gidi un7etofite; de7oy kathafe woyko asatethi ma7ope aadhenee?
MAT 6:26 Salo kafota xeellite; enti zerokona, buucokona, shaalen yeggokona, shin hinte salo aaway enta muzees. Hinte entafe daro aadheketii?
MAT 6:27 Hinte giddofe daro un7etidi ba laytha bolla issi gallas gujanaw danda7ey de7ii?
MAT 6:28 “Qassi hinte ma7iyabaas ayis un7etetii? Ane ciishshata be7ite, ooson daaburokona woyko suqokona.
MAT 6:29 Si7ite! Hari attoshin, kawa Solomoney ba boncho ubban ha ciishshatape issuwa melaka ma7ibeenna.
MAT 6:30 Hinteno, ammanoy pacidaysato, Xoossay hachi bentidi wonto taman wodhanaw de7iya maata yaatidi mayziyaba gidiko, hintena entafe aathidi waati mayzennee?
MAT 6:31 Hessa gisho, ‘Ay maanee? Ay uyanee? Ay ma7anee?’ gidi un7etofite.
MAT 6:32 He ubbaa Xoossaa ammanonna asay darsidi demmanaw un7etoosona. Hinte salo aaway he ubbay hintew koshsheysa erees.
MAT 6:33 Shin ubbaafe sinthe Xoossaa kawotethaanne iya xillotethaa koyite; he ubbay hintew guji imetana.
MAT 6:34 Hessa gisho, wontos qopishe un7etofite. Wontoysi wontos aqo; issi issi gallasay baw gidiya metora de7ees.
MAT 7:1 “Hinte bolla pirdetonna mela harata bolla pirdofite.
MAT 7:2 Ayis giiko, harata bolla hinte pirdeysada hinte bolla pirdetana; hinte haratas makidaban hintew zaari maketana.
MAT 7:3 Ne ayfen de7iya tuussu daaneysa be7onna ne ishaa ayfen de7iya buuriya ayis be7ay?
MAT 7:4 Ne ayfen tuussi de7ishin ne ishaa ayfen de7iya buuriya kesso gaanaw waana danda7ay?
MAT 7:5 Neno cubbuwaw, koyrottada ne ayfen de7iya tuussi daaneysa kessa. Iyape guye, ne ishaa ayfen de7iya buuriya kessanaw ne geeshsha xeellana.
MAT 7:6 “Guye simmidi hintena saxona mela geeshshaba kanatas yeggofite. Banta tohuwan yedhidi iissonna mela hinte al7o inquwa gudunthota sinthan yeggofite.
MAT 7:7 “Woossite hintew imetana, koyite hinte demmana, kare yidi xeegite hintew dooyetana.
MAT 7:8 Woossiya oodeska imetana, koyiya oodeska bentana, kare yidi xeegiya oodeska dooyetenna.
MAT 7:9 “Hinte giddofe ba na7i uythi woossiko shuchi immey oonee?
MAT 7:10 Woyko molo woossiko shooshi immey de7ii?
MAT 7:11 Yaatin hinte iita gidishe hinte naytas lo77oba imo eriko, hinte salo aaway bana woosseysatas lo77oba waati darsidi immenee?
MAT 7:12 Harati hintew oothana mela hinte koyaba ubbaa hinteka haratas oothite. Ayis giiko, Muse higgeynne nabeti tamaarsey haysa.
MAT 7:13 “Xuuntha wulara gelite; ayis giiko, dhayos efiya ogey wogga, wulayka dalga. Iyara geliya asayka daro.
MAT 7:14 Shin de7uwako efiya ogeynne wulay xuunthu; yaa geliya asayka guutha.
MAT 7:15 “Bolla baggara dorse daanidi banta gaathan suudhume gididi hinte giddo geliya wordancho nabetape naagetite.
MAT 7:16 Hinte enta, enta ayfiyape erana; agunthafe woyney, kinchotepe laadey maxetenna.
MAT 7:17 Hessa mela lo77o mithi ubbay lo77o ayfe ayfees; iita mithi iita ayfe ayfees.
MAT 7:18 Lo77o mithi iita ayfe ayfena, qassi iita mithi lo77o ayfe ayfanaw danda7enna.
MAT 7:19 Lo77o ayfe ayfonna mithi ubbay qanxetidi taman xuugetana.
MAT 7:20 Hessa gisho, hinte enta, enta ayfiyan erana.
MAT 7:21 “Salon de7iya ta aawa sheniya oothiya uray salo kawotethi gelanaape attishin, coo tana ‘Godaw, Godaw’ giya ubbay salo kawotethi gelenna.
MAT 7:22 Pirda gallas daroti, ‘Godaw, Godaw, ne sunthan tinbite odibooko? Ne sunthan tuna ayyaanata kessibooko? Ne sunthan malaatata oothibooko?’ yaagana.
MAT 7:23 He wode taani, ‘Ta hintena ubbaraka erike, hinte iita ootheysati taape haakite’ yaagana.
MAT 7:24 “Hiza, ha ta qaala si7idi oothiya oonika ba keethaa shucha bolla keexida wozanaama asa mela.
MAT 7:25 Iray bukis, di7oy di77is, carkoyka carkidi he keethaa sugis. Shin keethay shucha baaso bolla keexetida gisho kundibeenna.
MAT 7:26 Ha ta qaala si7idi oothonna oonika ba keethaa shafe bolla keexida eeya uraa mela.
MAT 7:27 Iray bukidi, di7oy di77idi, carkoyka carkidi, he keethaa sugin, he keethay kundis; iya kundethayka wolqaama” yaagis.
MAT 7:28 Yesuusi ba oda ongida wode iya timirtey higge astamaareta mela gidonashin, maatara gidiya gisho asay iya timirtiyan malaaletidosona.
MAT 8:1 Yesuusi zumaape wodhiya wode daro asay iya kaallidosona.
MAT 8:2 Heko issi baro harganchoy iyako shiiqidi, iya sinthan gulbatidi, “Godaw, ne shene gidiko tana geeshshada pathanaw danda7aasa” yaagis.
MAT 8:3 Yesuusi ba kushiya yeddidi iya bochidi, “Ee, ta shene, paxa” yaagis. Uray iiraka geeyi aggis.
MAT 8:4 Yesuusi iyako, “Ne paxuwa oodeska odopa. Shin bada ne geeyada paxoysa kahine bessa. Ne paxuwas marka gidana mela bada Musey kiitida yarshuwa yarsha” yaagis.
MAT 8:5 Yesuusi Qifirnahooma katama gakida wode, issi mato halaqay iyako shiiqidi,
MAT 8:6 “Godaw, ta aylley asatethay gundin daro hargetidi, son zin7idi de7ees” yaagidi woossis.
MAT 8:7 Yesuusi zaaridi, “Taani bada iya pathana” yaagis.
MAT 8:8 Shin mato halaqay zaaridi, “Godaw, ne ta soo gelanaw bessiya asi gidike, shin ne han uttada qaala xalaala oda, ta aylley paxana.
MAT 8:9 Ayis giiko, taape bollara tana kiittiya asati de7oosona, qassi taape garsara taw kiiteteysati de7oosona. Entafe issuwa, ‘Ba’ giyade bees; hankuwa qassi ‘Haaya!’ giyade yees. Ta aylliya, ‘Haysa ootha’ giyade oothees” yaagis.
MAT 8:10 Yesuusi hessa si7ida wode malaaletidi, bana kaalliya asaako, “Ta hintew tuma odayis; taani haysa mela ammano Isra7eele asanka be7abike.
MAT 8:11 Ta hintew odayis; daroti dolohapenne wulohape yidi, salo kawotethan Abrahaamera, Yisaaqaranne Yayqoobara issife imato bolla uttana.
MAT 8:12 Shin salo kawotethaa laattanaw bessishin attidaysati kare dhuman holetana. Yan entaw yeehonne acha garcethi gidana” yaagis.
MAT 8:13 Yesuusi mato halaqaako, “Ne soo ba, ne ammanuwatho new hano” yaagis. Iya aylley iiraka paxi aggis.
MAT 8:14 Yesuusi Phexroosa soo geliya wode, Phexroosa mache aayiya qoxo misha hargen saketada zin7idaaro be7is.
MAT 8:15 Yesuusi I kushiya bochida wode qoxoynne mishay aggaagis. Paxa dendada iya mokasu.
MAT 8:16 He wode omarsi tuna ayyaanan oyketida daro asata, asay Yesuusako ehidosona. Ika tuna ayyaanata ba qaalan kessis, harganchota ubbaa pathis.
MAT 8:17 Hessanka nabiya Isayaasi, “I nu hargiya baw ekis, nu daabura tookis” gida qaalay poletis.
MAT 8:18 Yesuusi daro asay iya yuushuwan eqidaysa be7idi, abbaafe hefinthi pinnana mela ba tamaareta kiittis.
MAT 8:19 Higge astamaaretape issoy, “Astamaariyaw, ne biya bessa ubbaa ta kaallana” yaagis.
MAT 8:20 Yesuusi iyako “Workanatas olli de7ees, salo kafotas keethi de7ees. Shin Asa Na7aas ba huuphiya shempisiya bessi baawa” yaagis.
MAT 8:21 Yesuusa kaalliya asatape issoy, “Godaw, taani sinthata bada ta aawa moogada yaana” yaagis.
MAT 8:22 Shin Yesuusi, “Hayqidaysati banta hayqota moogo; neeni tana kaalla” yaagis.
MAT 8:23 Yesuusi baanaw wogoluwan gelida wode, iya tamaaretika iyara baanaw gelidosona.
MAT 8:24 Enti qoponna de7ishin, wolqaama hobbey haatha bolla dendin wogoloy mitettanaw gakis. Shin Yesuusi dhiskis.
MAT 8:25 Iya tamaareti iyako shiiqidi iya barkethidi, “Godaw, nu dhayos nuna ashsharki” yaagidosona.
MAT 8:26 Yesuusi entako, “Hinteno, ammanoy pacidaysato, ayis yayyetii?” yaagis. Dendidi, hobbiyanne gotiya essis. Ellesidi ubbabay si77i gis.
MAT 8:27 Iya tamaareti malaaletidi, “Haysi, hari attoshin, hobbeynne gotey kiiteteysi waanida asee?” yaagidosona.
MAT 8:28 Yesuusi abbaafe hefinthan de7iya Gergesoone biitta gakida wode tuna ayyaanay oykida nam7u asati duufope keyidi iyara gahetidosona. Enti daro iitanne yashshiya asata gidiya gisho asi he bessaara aadhanaw danda7enna.
MAT 8:29 Entika, “Xoossaa Na7aw, nunanne nena aybe gathey? Wodey gakonna de7ishin nuna pirdanaw yadii?” gidi waassidosona.
MAT 8:30 Entafe daro haakonna guduntho wudey hemetees.
MAT 8:31 Tuna ayyaanati Yesuusa, “Ne nuna kessanaba gidiko, hini guduntho wudiya giddo yeddarki” yaagidi woossidosona.
MAT 8:32 Yesuusi, “Biite” yaagis. Tuna ayyaanati asatape keyidi gudunthotan gelidosona. Gudunthoti ubbay aafo doonara dirgidi bidi abban mitetidi hayqidosona.
MAT 8:33 Guduntho wudiya heemmeysati baqatidi katama bidi, hanidabaanne tuna ayyaanay oykida asata bolla oosetidaba ubbaa odidosona.
MAT 8:34 Yaatin, kataman de7iya asa ubbay Yesuusa be7anaw keyidosona. Enti Yesuusa be7ida wode banta biittafe keyidi baana mela woossidosona.
MAT 9:1 Hessafe guye, Yesuusi wogoluwan gelidi, abba pinnidi ba katamaa bis.
MAT 9:2 Hanida guutha asati issi gunda ura algara tookidi Yesuusako ehidosona. Yesuusi enta ammanuwa be7idi, gunda uraa, “Ta na7aw, yayyofa; ne nagaray atto geetetis” yaagis.
MAT 9:3 He saatiyan, Ayhude higge astamaaretape issoti issoti, “Haysi Xoossaa cashshe gidenne” yaagidi banta wozanan qopidosona.
MAT 9:4 Yesuusi enta qofaa eridi, “Iitabaa hinte wozanan ayis qopeetii?
MAT 9:5 Hanoshin, ‘Ne nagaray atto geetetis’ geysafenne ‘Denda eqada ba’ geysafe awusi kawuyii?
MAT 9:6 Shin sa7a bolla nagara atto gaanaw Asa Na7aas maati de7eysa ta hintena erisana” yaagidi, gunda addiyako, “Denda eqa, ne algaa tookada, ne soo ba” yaagis.
MAT 9:7 Gunda uray dendidi ba soo bis.
MAT 9:8 Derey hessa be7idi malaaletidosona. Hessa mela maata asas immida Xoossaa galatidosona.
MAT 9:9 Yesuusi yaape dendidi bishe Maatosa geysa qaraxa qanxisiya bessan uttidashin be7idi, “Tana kaalla” yaagis. Ika dendidi kaallis.
MAT 9:10 Yesuusi Maatosa son gayta bolla uttidashin, qaraxa qanxisiya daro asatinne nagaranchoti yidi iyaranne iya tamaaretara issife maanaw uttidosona.
MAT 9:11 Issi issi Farsaaweti hessa be7idi, Yesuusa tamaareta, “Hinte astamaarey qaraxa qanxiseysataranne nagaranchotara ayis mii?” yaagidosona.
MAT 9:12 Yesuusi hessa si7idi, “Dhale koshshey harganchotasafe attishin, paxatasa gidenna.
MAT 9:13 Shin hinte bidi, ‘Taani hinte yarshuwa gidonashin hinte harata maarana mela koyayis’ geetetidi xaafetidaysi ay guusseko erite. Ayis giiko, taani nagaranchota xeeganaw yasipe attishin, xillota xeeganaw yabiike” yaagis.
MAT 9:14 He wode Yohaanisa tamaareti Yesuusako shiiqidi, “Nunne Farsaaweti xoomos, shin ne tamaareti ayis xoomokonaa?” yaagidi oychidosona.
MAT 9:15 Yesuusi zaaridi entako, “Machiw ekeysi entara de7ishin xeegetidi yida asay kayotanaw danda7onna? Mushuray enta matape eketana wodey yaana, enti he wode xoomana.
MAT 9:16 “Ooratha ma7ope peedhidi gal7a ma7o bolla sikey oonika baawa. Hessatho oothiko oorathay gal7a peedhees. Peedhethayka guji dalgees.
MAT 9:17 Ooratha woyne gal7a ogoron qoliya oonika baawa. Hessatho oothiko ooratha woyney gal7a ogoruwa dhusees woyneyka gukees; ogoroyka nam7antho maaddonnaba gidees. Shin ooratha woyney ooratha ogoron qoletanaw bessees. Hessatho oosetiko nam7ayka iitonna naagetoosona” yaagis.
MAT 9:18 Yesuusi hessa odo bolla de7ishin, Ayhude halaqatape issoy iyako yidi, iya sinthan gulbatidi, “Ta na7iya ha77i hayqasu, shin iya paxana mela neeni yada ne kushiya I bolla wotharki” gidi woossis.
MAT 9:19 Yesuusi dendidi iyara bis; iya tamaaretika kaallidosona.
MAT 9:20 I bishin tammanne nam7u laythi kumethi suuthi goggidi waaysiya issi maccasiya guyera shiiqada Yesuusa afilaa macaraa bochasu.
MAT 9:21 Iya ba wozanan, “Ta iya afilaa macaraa xalaala bochiyako paxana” yaagada qopasu.
MAT 9:22 Yesuusi guye simmi iyo xeellidi, “Ta naatte, yayyofa! Nena ne ammanoy pathis” yaagis. Maccasiya ellesada paxa aggasu.
MAT 9:23 Yesuusi Ayhude halaqaa soo gakiya wode zaye punneysatanne yeekeyisata be7idi,
MAT 9:24 “Ane kichite; guutha na7iya dhiskasupe attishin, hayqabuuku” yaagis. Shin asay iya bolla miicidosona.
MAT 9:25 Asaa kare kessidaape guye soo gelidi, na7e kushiya oykis, na7iya denda eqasu.
MAT 9:26 He worey he biitta ubbaa gakis.
MAT 9:27 Yesuusi yaape dendidi gede sinthe biya wode nam7u qooqeti banta qaala dhoqu oothidi, “Dawita na7aw, nuna maararki” yaagishe iya kaallidosona.
MAT 9:28 Yesuusi soo gelida wode qooqeti iya kaallidi yidosona. Yesuusi entako, “Taani hessa oothanaw danda7eysa hinte ammanetii?” yaagis. Entika, “Ee, Godaw” yaagidi zaaridosona.
MAT 9:29 Hessafe guye, Yesuusi enta ayfiya bochidi entako, “Hintew, hinte ammanuwatho hano” yaagis.
MAT 9:30 Enta ayfeyka dooyetis. Yesuusi entako, “Haysa oodeska odopite” yaagidi minthi odis.
MAT 9:31 Shin asati bidi Yesuusaba he biitta ubban odidosona.
MAT 9:32 Enti yaape keyiya wode asay tuna ayyaanay oykidi muumisida issi asi Yesuusako ehidosona.
MAT 9:33 Tuna ayyaanay keydaape guye muume uray odetis. Dereyka malaaletidi, “Haysa mela oorathabay Isra7eele biittan hanibeenna” yaagidosona.
MAT 9:34 Shin Farsaaweti, “Tuna ayyaanata halaqan tuna ayyaanata kessees” yaagidosona.
MAT 9:35 Yesuusi ayhude woosa keethatan tamaarsishe, salo kawotethaa Wongela sabbakishe, asaa harge ubbaafe pathishe katamataninne guta ubban yuuyis.
MAT 9:36 Daro derey, heemmiya asi bayna dorsada entana be7iya asi dhayin un7etidi de7eyisata be7idi entaw qadhetis.
MAT 9:37 Ba tamaaretako, “Shiiqana kathay daro, shin kathaa shiishiya asay guutha.
MAT 9:38 Hessa gisho, Goday kathaa shiishiya oosanchota yeddana mela woossite” yaagis.
MAT 10:1 Yesuusi tammanne nam7u tamaareta baako xeegidi, tuna ayyaanata kessana melanne harge ubbaa pathana mela entaw maata immis.
MAT 10:2 Yesuusi kiitida tammanne nam7u hawaareta sunthay: koyroy Phexroosa geetetiya Simoonanne iya ishaa Indiriyasa, Zabdiyoosa na7aa Yayqoobanne iya ishaa Yohaanisa,
MAT 10:3 Filphoosanne Bartelemoosa, Toomasanne qaraxa qanxisiya Maatosa, Ilfiyoosa na7aa Yayqooba, Taadiyosa,
MAT 10:4 ba biittas mishetiya Simoonanne Yesuusa aathidi immida Asqoroota Yihuda.
MAT 10:5 He tammanne nam7ata Yesuusi kiittidi yeddishe, “Ayhude gidonna deriyako boopite, qassi Samaareta katamaka gelopite.
MAT 10:6 Shin Isra7eele keethaafe gidida hini dhayida dorsatako biite.
MAT 10:7 Yaa bidi, ‘Salo kawotethay matatis’ gidi odite.
MAT 10:8 Harganchota pathite, hayqidaysata hayqope denthite, baro harganchota geeshshi pathite, tuna ayyaanata kessite. Hinte coo ekidaysa coo immite.
MAT 10:9 Hinte kiisen worqa, woyko bira santime oykofite.
MAT 10:10 Hinte ogiyas karxiito, nam7u afila, woyko caamma woyko xam7a oykofite; oosanchuwas gallasa kathi koshshees.
MAT 10:11 “Hinte issi katamaa woyko gutaa geliya wode hintena mokidi ekanaw ufaytiya uraa koyidi iya son shempite; hinte baana gakanaw yan gam7ite.
MAT 10:12 Qassi oodde sooka gelishe sarothite.
MAT 10:13 He keethay hintena mokiko hinte sarothida saroy entana gako, shin enti mokonna ixiko hinte sarothida saroy hintew guye simmo.
MAT 10:14 Oonika hintena mokonnanne hinte odiyaba si7onna ixiko he keethaafe woyko he katamaape keyishe hinte tohuwan de7iya baana pitidi keyite.
MAT 10:15 Ta hintew tuma odayis; Xoossaa pirda gallasan he katamaape Soodomesinne Gamoora katamatas pirday kawuyana.
MAT 10:16 “Ta hintena dorsatada suudhumeta giddo yeddana. Hessa gisho, shooshada cincata, holleda aadata gidite.
MAT 10:17 Asay hintena pirda daynnatas aathidi immana, qassi ayhude woosa keethan hintena garaafana. Hessa gisho, entafe naagetite.
MAT 10:18 Ta gisho gidi hintena deriya haareyisata sinthenne kawota sinthe efana. Enta sinthaninne Ayhude gidonna deriya sinthan eqidi hinte tabaa markatana.
MAT 10:19 Shin hintena pirdas aathidi immiya wode, woygidi zaarino gidi un7etofite; he saatiyan hinte gaanaba Xoossay hintew immana.
MAT 10:20 Ayis giiko, hintenan odetey hinte Aawa Geeshsha Ayyaanape attishin, hintena gideketa.
MAT 10:21 “Ishay ba isha, aaway ba na7a, hayqos aathidi immana, nayti bantana yelidaysata bolla dendidi enta wodhisana.
MAT 10:22 Ta gisho gidi asa ubbay hintena ixana, shin wursethi gakanaw minniday attana.
MAT 10:23 Issi heerape hintena enti gooddiko hara katama baqatite. Taani hintew tuma odayis; Asa Na7ay yaana gakanaw, hinte Isra7eele katama ubbaa kantheketa.
MAT 10:24 “Tamaarey ba astamaariyape, aylley ba godaape aadhenna.
MAT 10:25 Tamaarey ba astamaariya, aylley ba godaa daaniko iyaw gidana. Keetha goda Bi7eel-Zebuula giiko iya soo asaa waatidi iissidi xeegenee?
MAT 10:26 “Hiza, asas yayyofite. Kametidabay qonconna, qosetidabay geeshshi keyonna attenna.
MAT 10:27 Taani hintew dhuman odiyaba hinte poo7on odite; ta hintew haythan kalkashidaba dabaaban awaajite.
MAT 10:28 Ashope attishin, shempo wodhanaw danda7onaysatas yayyofite. Shin shempuwanne ashuwa gaannamen dhaysanaw danda7iya Xoossaas yayyite.
MAT 10:29 Nam7u buubeti issi santimen bayzetokonayee? Hanope attishin, entafe issinnaka hinte Xoossay goonna de7ishin sa7an wodhuku.
MAT 10:30 Hari attoshin, hinte huuphe binaanayka paydetidi de7ees.
MAT 10:31 Hiza, daro buubetape hinte aadhiya gisho yayyofite.
MAT 10:32 “Asa sinthan taw markatiya ubbaas taanika salon de7iya ta aawa sinthan markatana.
MAT 10:33 Shin asa sinthan tana kaddeysa taanika salon de7iya ta aawa sinthan kaddana.
MAT 10:34 “Taani sa7an saro ehanaw yida hintew daanopo. Taani toorape attishin, sarotethi ehanaw yabiike.
MAT 10:35 Taani yiday, “ ‘Na7aa aawape macca na7iw aayepe na7aa machiw azina aayepe shaakanaasa.
MAT 10:36 Asas morketi iya soo asata gidana.’
MAT 10:37 “Taape aathidi ba aawa woyko ba aayiw dosey, tabaa gidanaw bessenna. Ba adde na7a woyko ba macca na7iw taape aathidi dosey, tabaa gidanaw bessenna.
MAT 10:38 Ba masqaliya tookidi tana kaallonna oonika tabaa gidanaw bessenna.
MAT 10:39 Ba shempuwa ashshanaw koyey dhaysana, shin ba shempuwa ta gisho aathidi immey ashshana.
MAT 10:40 “Hintena mokey tana mokees, tana mokey qassi tana kiittidaysa mokees.
MAT 10:41 Nabiya nabe sunthan mokey, nabiyatho woytetana; qassi xilluwa xillo sunthan mokey, xilluwatho woytetana.
MAT 10:42 Ta hintew tuma odayis; ha ta tamaaretape guuxiya issuwas tana kaalliya gisho hari attoshin guutha irxa haathi immiko iya woytoy dhayenna” yaagis.
MAT 11:1 Yesuusi tammanne nam7u tamaareta kiitidaape guye yaape dendidi tamaarsanawunne sabbakanaw Galila katamata bis.
MAT 11:2 Yohaanisi qasho keethan de7ishe Kiristoosi oothiyabata si7idi, ba tamaaretape iyako kiittidi,
MAT 11:3 “Yaana geetetiday neneyee? Woyko nuuni haraa naagino?” yaagidi oychis.
MAT 11:4 Yesuusi entako zaaridi, “Bidi hinte si7iyabaanne hinte be7iyaba Yohaanisas odite.
MAT 11:5 Qooqeti xeelloosona, wobbeti hemetoosona, baro harganchoti paxoosona, tulleti si7oosona, hayqidaysati hayqope dendoosona; manqotas Wongelay sabbaketees.
MAT 11:6 Tanan dhubetonay anjetidaysa” yaagis.
MAT 11:7 Yohaanisa tamaareti guye simmidi bin, Yesuusi deriyas Yohaanisaba odishe, “Ha mela biitta ay be7anaw keydetii? Carkoy qaathiya mayre be7anaw yidetiyee?
MAT 11:8 Yaatin, ay be7anaw keydetii? Koyse ma7o ma7ida ase be7anaseyee? Koyse ma7o ma7ida asati kawo gadhon de7oosona.
MAT 11:9 Yaatin, ay be7anaw keydetii? Nabe be7anaseyee? Heko, hinte nabepe aadheysa be7eeta.
MAT 11:10 “Ne ogiya ne sinthan giigisiya ta kiitanchuwa neepe sinthe kiittana” geetetidi xaafetiday iyassa.
MAT 11:11 Ta hintew tuma odayis; maccasape yeletidaysata giddofe Yohaanisape aadhey oonika baawa; salo kawotethan ubbaafe guuxey I, iyape aadhana.
MAT 11:12 Xammaqiya Yohaanisa wodiyape doomidi hachi gakanaw salo kawotethay daro naaqetees, minnida asati wolqan yaa gelana.
MAT 11:13 Nabeti ubbaynne Muse higgey Yohaanisa wode gakanaw salo kawotethaaba tinbite odidosona.
MAT 11:14 Hiza, hinte enta kiitaa ammanana gidiko, yaana geetetida Eeliyaasi, I Yohaanisa.
MAT 11:15 Hiza, si7iya haythi de7ey si7o.
MAT 11:16 “Hiza, ha wodiya yeletethaa aybira daaniso? Giya giddon uttidi woli xeegidi,
MAT 11:17 “ ‘Nu hintew suusul77e punnin; hinte yexeketa. Nu sabbidi zeleelin; hinte yeekeketa’ giya nayta daanosona.
MAT 11:18 Xammaqiya Yohaanisi moonnanne uyonna yin, ‘Tuna ayyaani de7ees’ yaagideta.
MAT 11:19 Asa Na7ay mishenne uyishe yin, ‘Yarambanne ushshancho, qaraxa qanxiseysatanne nagaranchota dabbo’ yaagideta. Hiza, cincatethaa tumatethay iya oosuwan qoncees” yaagis.
MAT 11:20 Hessafe guye, Yesuusi daro malaatata oothida katamatan de7iya asati banta nagaraape simmidi maarotan gelonna ixida gisho entana,
MAT 11:21 “Korazine katamaw nena ayye! Beetesayda katamaw nena ayye! Ayis giiko, hinte giddon oosetida malaatati Xiroosaninne Sidoonan oosetida gidiyako, enti beni bido tiyetidi, kayo ma7o ma7idi banta nagarape simmi aggana.
MAT 11:22 Shin ta hintew odayis; pirda gallas hintefe aathidi Xiroosasinne Sidoonas pirday kawuyana.
MAT 11:23 Qassi, Qifirnahooma, neeni pude salo keyanaw koyay? Hanenna! Neeni Si7oolen yegetana. Ayis giiko, ne giddon oosetida malaatati Soodomen oosetidaba gidiyako, Soodomey hachi gakanaw de7anashin.
MAT 11:24 Shin ta new odayis; pirda gallas neepe aathidi Soodomes pirday kawuyana” yaagidi hanqetis.
MAT 11:25 He wode Yesuusi, “Aawaw, saluwanne sa7aa Godaw, neeni haysa eranchotapenne cincatape genthada naytas qoncisida gisho, nena galatayis.
MAT 11:26 Ee, ta Aawaw, haysi ne lo77o sheniyada hanis.
MAT 11:27 “Ubbay taw ta Aawape imetis. Aawape hari Na7a erey baawa, Na7aapenne I entaw qoncisanaw koyeysatape hari Aawa eranaw danda7ey baawa.
MAT 11:28 “Hinteno, daaburanchoto, toohoy deexida ubbay taako haa yiite; taani hintena shempisana.
MAT 11:29 Taani ta wozanan ashkenne aada gidiya gisho, ta qambaran gelite, taape tamaarite; hinte, hinte shempuwas shempo demmana.
MAT 11:30 Ta qambaray liiqo, qassi ta toohoyka kawushe” yaagis.
MAT 12:1 Hessafe guye, Sambaata gallas, Yesuusi gade giddora aadhees. Yesuusa tamaareti koshatida gisho tiya banga shirikidi moosona.
MAT 12:2 Shin Farsaaweti hessa be7idi Yesuusako, “Heko, ne tamaareti Sambaata gallas oothanaw bessonnaba oothosona” yaagidosona.
MAT 12:3 Yesuusi zaaridi, “Dawiti koshatida wode iyara de7eysatara ay oothidaako nabbabibeketii?
MAT 12:4 Dawiti Xoossaa keethi gelidi kahineta xalaalape attishin, inne iyara de7eysatas bessonna geeshsha daabbuwa mis.
MAT 12:5 Woyko kahineti Sambaata wogaa shaaridi xoossa keethan Sambaata gallas ooso oothiko entaw bala gidonnaysa Muse higgiyan nabbabibeketii?
MAT 12:6 Shin si7ite! Xoossa Keethaafe aadhey haysan de7ees.
MAT 12:7 ‘Taani hinte yarshuwa gidonashin harata maarana mela koyayis’ giya qaalay woy guuseko hinte eridaako, xillo asa bolla pirdeketa.
MAT 12:8 Asa Na7ay Sambaata Godaa” yaagis.
MAT 12:9 Yesuusi yaape bidi ayhude woosa keethi gelis.
MAT 12:10 Yan kushey gundida issi uray de7ees. Yesuusa mootanaw gaaso koyiya asati, “Sambaata gallas pathanaw bessi bessennee?” yaagidi oychidosona.
MAT 12:11 I entako, “Hinte giddofe issuwas dorsi Sambaata gallas aafon wulliko, goochidi kessonnay oonee?
MAT 12:12 Yaatin asi dorsaafe waanidi daro aadhenee? Hessa gisho, Sambaata gallas lo77oba oosoy bessees” yaagis.
MAT 12:13 Hessafe guye, Yesuusi addiyako, “Ne kushiya piddi ootha” yaagin, uray piddi oothis. Iya kushey paxidi hanko kushiyada hanis.
MAT 12:14 Shin Farsaaweti yaape kare keyidi, Yesuusa waati wodhaneko maqetidosona.
MAT 12:15 Yesuusi enta qofaa eridi he bessaa aggidi hara soo bis. Daro asay iya kaallidi bidosona, harganchota ubbaa pathis.
MAT 12:16 Yesuusi, “Tabaa hara oodeska odopite” yaagidi minthi odis.
MAT 12:17 Hessika nabiya Isayaasi,
MAT 12:18 “Heko ta doorida aylley, ta doseysi, tana ufayseysi, taani ta ayyaana, iya bolla shempisana; I, Ayhude gidonna deriyas suure pirdaba awaajana.
MAT 12:19 I palamenna woyko kaccenna; ba qaalaka denban coo sissenna.
MAT 12:20 Suure pirdan xoono demmana gakanaw, dincetida mayre menthenna, cuyiyaa muqaada toysenna.
MAT 12:21 Ayhude gidonna derey ubbay iyan ufaysi wothana” yaagidi xaafidaysi poletana melasa.
MAT 12:22 Hessafe guye, tuna ayyaanan oyketida qooqenne muume ase de7eysa iyako ehidosona. Yesuusi ura pathin, uray xeellis; odetis.
MAT 12:23 Asa ubbay malaaletidi, “Haysi Dawita Na7aa gidandesha?” yaagidosona.
MAT 12:24 Shin Farsaaweti hessa si7idi, “Ha uray tuna ayyaanata kessey tuna ayyaanata halaqa Bi7eel-Zebuula wolqaana” yaagidosona.
MAT 12:25 Yesuusi enta qofaa eridi, “Woli giddon shaaketiya kawotetha ubbay kundana; qassi woli giddon shaaketiya katamay woyko keethay minnidi eqenna.
MAT 12:26 Xalahey Xalahe kessiyaba gidiko ba giddon shaaketis guussu. Hessatho haniyaba gidiko iya kawotethay waanidi minnidi eqanaw danda7ii?
MAT 12:27 Taani tuna ayyaana kessey Bi7eel-Zebuula wolqan gidiko hintena kaalliya asati oodde wolqan kessannee? Hessa gisho, hintena kaalliya asati hintena pirdana.
MAT 12:28 Shin taani tuna ayyaanata kessey Xoossaa Ayyaanan gidiko, Xoossaa kawotethay hinteko yis.
MAT 12:29 “Woyko issi asi wolqaama asa soo gelidi iya shaluwa bonqanaw koyko koyrottidi he uraa qachonna ixiko waatidi danda7ii? Yaatiko iya shaluwa bonqanaw danda7ees.
MAT 12:30 “Taara gidonnay oonika taara eqetees; qassi taara issife shiishonna ubbay laallees.
MAT 12:31 Hessa gisho, si7ite; asay oothiya ay nagarinne cashsha qaali ubbay atto geetetana, shin Geeshsha Ayyaana cayiya oodeska iya nagaray atto geetetenna.
MAT 12:32 Oonika Asa Na7a bolla iitabaa odetiko iyaw atto geetetana, shin Geeshsha Ayyaana bolla iitabaa odetiya oodeska ha sa7an gidin yaana alamiyan iya nagaray atto geetetenna.
MAT 12:33 “Lo77o mithay lo77o ayfe ayfees; qassi iita mithay iita ayfees. Hiza, mithay eretey ba ayfiyana.
MAT 12:34 Hinteno, shoosha nayto, hinte iita gidishe waanidi lo77oba odetanaw danda7eetii? Asi ba wozanan kumidabaape doonan odetees.
MAT 12:35 Lo77o asi ba wozanan wothida lo77obaape, lo77oba kessees; iita asi ba wozanan wothida iitabaape, iitabaa kessees.
MAT 12:36 Shin si7ite, asay odetiya coo oda ubbaas pirda gallas zaaro immana.
MAT 12:37 Ayis giiko, ne odetiya ne qaalan xillana; ne odetiya ne qaalay ne bolla pirdana” yaagis.
MAT 12:38 Hessafe guye, issi issi Farsaawetinne higge astamaareti Yesuusako, “Astamaariyaw, neeni malaata oothada nuna bessa” yaagidosona.
MAT 12:39 Shin Yesuusi zaaridi, “Ammanetonanne iita yeletethay malaata koyees. Shin nabiya Yoonasa malaatape hara malaati iyaw imetenna.
MAT 12:40 Yoonasi gita molo ulon heedzu gallasinne heedzu qamma gam7idaysa mela Asa Na7ay heedzu gallasinne heedzu qamma biitta garsan gam7ana.
MAT 12:41 Nanawe asay pirda gallas dendidi ha yeletethaa bolla pirdana; ayis giiko, enti Yoonasi sabbakin, si7idi banta nagaraape simmidosona. Heko, Yoonasape aadheysi haysan de7ees.
MAT 12:42 Pirda gallas dugeha kawiya dendada ha yeletethaa bolla pirdana; ayis giiko, iya Solomone cincatethaa si7anaw biitta gaxape yasu. Heko, Solomonepe aadhey haysan de7ees.
MAT 12:43 “Tuna ayyaanay asape keydaape guye baw shempiya bessi koyidi haathi bayna mela bessan daaburees, shin ba koyiya shempuwa demmenna.
MAT 12:44 Yaanin, ‘Ta agga keyida keetha simmada baana’ yaagees. I simmiya wode keethay kaysi gideysanne pitetidi giigidi uttidaysa demmees.
MAT 12:45 Hiza, simmi bidi, baape iitiya hara laapun iita ayyaanata ekidi yees; entika uraa giddo gelidi de7oosona. He uraas kaseysafe guyeysi daro iitees. Ha iita yeletethaa bolla hessa mela hanana” yaagis.
MAT 12:46 Yesuusi deriyas oda bolla de7ishin iya aayanne iya ishati iya odisanaw koyidi karen eqidosona.
MAT 12:47 Issi asi iyako, “Ne aayanne ne ishati nena odisanaw koyidi karen eqidosona” yaagis.
MAT 12:48 Yesuusi zaaridi, “Ta aayiya oonee? Ta ishatika oonantee?” yaagis.
MAT 12:49 Ba kushiyara tamaareta mallishe, “Be7ite, ta aayanne ta ishati haysata.
MAT 12:50 Salon de7iya ta Aawa sheniya oothiya ubbay ta isha, ta michonne ta aayo” yaagis.
MAT 13:1 He gallas Yesuusi soope keyidi abba gaxan uttis.
MAT 13:2 Daro derey iya yuushuwan shiiqin asaa abba gaxan aggaagidi wogolon gelidi uttis.
MAT 13:3 Asaas darobaa leemison yaagidi odis: “Issi goshshanchoy zerethi zeranaw keyis.
MAT 13:4 I zeriya wode issi issi zerethati oge gaxan wodhidosona; entaka kafoti yidi maxi midosona.
MAT 13:5 Issi issi zerethati garsan shaalloy de7iya biitta bolla wodhidosona. Daro biitti bayna gisho ellesidi dolis.
MAT 13:6 Shin away keyin shullis; xaphoy bayna gisho melis.
MAT 13:7 Issi issi zerethay aguntha giddon wodhis; agunthay diccidi he dolaa cuullis.
MAT 13:8 Harati qassi aradda biitta bolla wodhis; dolidi ayfe ayfis. Issoy xeeta, issoy usupun tamma, issoy qassi hastama ayfis.
MAT 13:9 Si7iya haythi de7iya uray si7o” yaagis.
MAT 13:10 Yesuusa tamaareti iyako shiiqidi, “Ayis neeni deriyas leemison oday?” yaagidi oychidosona.
MAT 13:11 I zaaridi, “Hintew salo kawotethaa xuuraa eray imetis, shin entaw imetibeenna.
MAT 13:12 De7iya ubbaas guzhetana, iyaw darana, shin baynaysafe hari attoshin iyaw de7iyaraka eketana.
MAT 13:13 Hessa gisho, taani enti, xeellishe demmonna mela, si7ishe si7onna mela woyko akeekona mela entaw leemison odayis.
MAT 13:14 “Isayaasi ba maxaafan odidaysi enta bolla poletis. I odishe, “ ‘Hinte sissi si7eeta, shin akeekeketa; hinte xeelleta, shin be7eketa.
MAT 13:15 Ayis giiko, ha asaa wozanay zel7umis; banta haythaa erishe tullisidosona, banta ayfiya goozidosona. Hessi bayneko enti banta ayfiyan be7idi, banta haythan si7idi, banta wozanan akeekidi, taako simmana, taka enta pathanashin’ yaagis.
MAT 13:16 “Shin hinte ayfeti be7iya gishonne hinte haythati si7iya gisho hinte anjetidaysata.
MAT 13:17 Ta hintew tuma odayis; daro nabetinne xilloti hinte be7eysa be7anawunne hinte si7eysa si7anaw amotidosona, shin entaw hanibeenna.
MAT 13:18 “Hiza, ha zerethi zeriya uraa leemisuwa si7ite.
MAT 13:19 Oge gaxan wodhida zerethi leemisoy haysa: salo kawotethaa qaala si7idi akeekona uraa wozanape Xalahey yidi iya wozanan de7iya zeretha maxi diggees.
MAT 13:20 Shaalloy garsan de7iya biitta bolla zeretidaysi qaala si7idi ellesidi ufaysan ekeyisata.
MAT 13:21 Shin xapho yeddanaw danda7onna gisho daro gam7okona. Qaala gaason metoy woyko goodetethi yaa wode ellesi dhubetoosona.
MAT 13:22 Aguntha gaathan zeretidaysi qaala si7is, shin ha alamiya duussaa Hirgaynne duretetha qofay qaala cuulliya gisho ayfe ayfonna attees.
MAT 13:23 Shin aradda biittan zeretida zerethay akeekan qaala si7iya uraa. I ayfe ayfees; issoy xeeta, issoy usupun tamma issoy qassi hastama ayfees” yaagis.
MAT 13:24 Yesuusi entaw hara leemiso odis, “Xoossaa kawotethay ba goshshan lo77o zerethi zerida uraa daanees.
MAT 13:25 Shin asi ubbay dhiskin iya morkey yidi gistiya giddon leeshsho zeridi bis.
MAT 13:26 Gistey diccidi ayfiya wode leeshshoy iya giddon bentis.
MAT 13:27 “Gadiya godaa aylleti godaako bidi, ‘Godaw, ne goshshan ne lo77o zerethi zerabikisho? Yaatin, leeshshoy awupe yidee?’ yaagidosona.
MAT 13:28 “I entako, ‘Hessa morkey oothis’ yaagis. “Aylleti godaako, ‘Nu bidi leeshuwa shoddana mela koyay?’ yaagidosona.
MAT 13:29 “Shin I, ‘Atto bochofite; hinte leeshuwa shoddayis gishin gistey shodetana.
MAT 13:30 Bochofite; caka wodey gakanaw issife dicco. He wode cakiya asata leeshuwa sinthatidi maxidi taman xuugganaw mirqen mirqen qachite. Shin gistiya shiishidi ta shaaliyan qolite’ yaagana” yaagis.
MAT 13:31 Qassi hara leemiso yaagidi odis; “Salo kawotethay issi asi ba goshshan bakida guutha mithee ayfe daanees.
MAT 13:32 He mithee ayfey hara mitha ayfetape guutha, shin iya dolaa diccida hara mithata ubbaafe aadhada gitatawusu. I tashiyan kafoti keexidi uttana gakanaw wolqaama mithi gidawusu” yaagis.
MAT 13:33 Kaallidika, Yesuusi hara leemiso odis; “Salo kawotethay issi maccasi heedzu gabate dhiille eka munuqada, munuqay dendana mela iyan gujida irsho daanees” yaagis.
MAT 13:34 Yesuusi deriyas he leemisuwa ubbaa odis. Leemisoy bayna issibaaka odibeenna.
MAT 13:35 Nabey ba maxaafan, “Taani ta doona, leemison dooyana; saloynne sa7i medhetoosape, geemmidaysa odayis” yaagidi odidaysi hessan poletis.
MAT 13:36 Yesuusi deriya moyzidi soo gelis. Iya tamaareti iyako shiiqidi, “Goshshan de7iya leeshuwa birshethaa nuus oda” yaagidosona.
MAT 13:37 I zaaridi, “Lo77o zerethi zeriday Asa Na7a.
MAT 13:38 Goshshay ha alamiya. Lo77o zerethay salo kawotethaa nayta. Leeshshoy Xalahe nayta.
MAT 13:39 Leeshuwa zeriday morkiya Xalahe. Caka wodey, wode wursethi; cakeysati kiitanchota.
MAT 13:40 “Leeshshoy maxetidi taman xuugeteysa mela wodiya wursethan hessada hanana.
MAT 13:41 Asa Na7ay ba kiitanchota kiittana. Enti nagaras gaaso gideysatanne iita oothiya ubbaa maxidi iya kawotethaafe kessana.
MAT 13:42 Maxi shiishidi yeehoynne acha garcethi de7iya to7onna taman yeggana.
MAT 13:43 He wode xilloti banta Aawa kawotethan awada poo7ana. Si7iya haythi de7ey si7o!
MAT 13:44 “Xoossaa kawotethay goshshan moogetida miishe daanees. Issi asi he miishiya demmidi zaari moogis. Daro ufaytidi bidi baw de7iyaba ubbaa bayzidi he goshsha gadiya shammis.
MAT 13:45 “Hessadaka, qassi salo kawotethay inqu geetetiya al7o shuchata koyiya zal7ancho daanees.
MAT 13:46 Daro al7o inquwa demmidi bidi baw de7iyaba ubbaa bayzidi iya shammis.
MAT 13:47 “Qassi Xoossaa kawotethay abban yegetida dumma dumma qommo molo oykiya gitiya daanees.
MAT 13:48 Molo oykiya asati moloy gitiyan kumin abbaafe gaxa kessidosona. Yan uttidi lo77uwa qori qori daachon yeggidosona, shin iita molota wora holidosona.
MAT 13:49 Wodiya wursethan hessatho hanana. Kiitanchoti yidi nagaranchota xillotape shaakidi,
MAT 13:50 yeehoynne acha garcethi de7iya to7onna taman yeggana.
MAT 13:51 “Ha ubbay hintew gelidee?” yaagidi enta oychis. Enti zaaridi, “Ee” yaagidosona.
MAT 13:52 Yesuusi, “Hiza, salo kawotethaa eraa ekidi higgiya tamaarsiya ubbay, ba minjida shaluwape oorathaanne gal7a kessiya ase daanees” yaagis.
MAT 13:53 Yesuusi ha leemisuwa odi wursidaape guye yaape dendidi bis.
MAT 13:54 Ba yeletida biitta bidi ayhude woosa keethan deriya tamaarsis. Enti malaaletidi, “Ha uray ha cincatethaanne ha malaatata oothiya wolqaa awupe ekidee?
MAT 13:55 Haysi anaaxiya na7aa gidenneyee? Iya aaye sunthay Mayraamo gidennee? Iya ishati Yayqooba, Yoosefa, Simoonanne Yihuda gidokonaayee?
MAT 13:56 Iya micheti nuura de7oosona gidokona? Yaatin, ha uray ha ubbaa awupe ekidee?” yaagidosona.
MAT 13:57 Hessa gisho, I giyaba ekonna ixidosona. Shin Yesuusi, “Nabey ba yeletida biittaninne ba soo asaa matan bonchetenna” yaagis.
MAT 13:58 Enti ammanonna ixida gisho daro malaatata he bessan oothibeenna.
MAT 14:1 He wode Galila aysiya Herodiisi Yesuusaba si7is.
MAT 14:2 Ba aylletako, “Haysi Xammaqiya Yohaanisa; I hayqope dendis. Yaanida gisho, ha ubbaa malaatata I oothees” yaagis.
MAT 14:3 I hessa giday Herodiisi ba ishaa Filphoosa mache Herodiyadi gaason Yohaanisa qasho keethi gelsida gishosa.
MAT 14:4 Yohaanisi Herodiisa, “Ne iyo ekanaw woga gidenna” yaagis.
MAT 14:5 Herodiisi Yohaanisa wodhanaw koyis, shin derey Yohaanisa nabe oothidi be7iya gisho yashetis.
MAT 14:6 Herodiisi ba yeletida gallasa bonchiya wode, Herodiyada na7iya asaa sinthan yethan durada iya ufaysasu.
MAT 14:7 Yaatin, I, “Iya koyaba ubbaa immana gidi” caaqis.
MAT 14:8 Na7iya ba aaye zoriya si7ada Herodiisako, “Xammaqiya Yohaanisa huuphiya keren wothada taw imma” yaagasu.
MAT 14:9 Iya yaagin kawoy qiirotis, shin ba caaquwa gishonne baara de7iya imathata gisho gidi I oyshay poletana mela kiittis.
MAT 14:10 Kawoy ase kiittidi Yohaanisi qasho keethan de7ishin iya qoodhiya gora7isis.
MAT 14:11 Huuphiya keren wothi ehidi na7ees immidosona; na7iyaka ekada ba aayes efasu.
MAT 14:12 Yohaanisa tamaareti yidi iya aha efidi moogidosona. Iyape guye hanidaba ubbaa bidi Yesuusas odidosona.
MAT 14:13 Yesuusi hanidaba si7ida wode wogolon gelidi he bessaafe issi geemmiya soo barka bis. Asay hessa si7idi katamatape dendidi tohon iya kaallidosona.
MAT 14:14 Yesuusi wogoluwape wodhidi daro asaa be7idi entaw qadhetis. Enta giddon de7iya harganchota pathis.
MAT 14:15 Sa7ay omarsishe biya wode Yesuusa tamaareti iyako shiiqidi, “Ha bessay asi bayna bessi, sa7ika qammis. Yaaniya gisho, heeran de7iya gutata bidi bantaw shammidi maana mela deriya yedda” yaagidosona.
MAT 14:16 Shin Yesuusi entako, “Derey moonna baanaw koshshenna; enti maanaba hinte immite” yaagis.
MAT 14:17 Enti zaaridi, “Nuus haysan ichashu uythaafenne nam7u molope hari baawa” yaagidosona.
MAT 14:18 Ika, “Ane enta haa ehite” yaagis.
MAT 14:19 Kaallidika, derey maatan uttana mela odis. Ichashu uythaanne nam7u molota ekidi, salo xeellidi galati simmidi, uythaa menthidi ba tamaaretas immis; enti qassi deriyas immidosona.
MAT 14:20 Ubbay midi kallidosona. Yesuusa tamaareti mishin attidaysa tammanne nam7u gayta denthidosona.
MAT 14:21 Kathaa mida asay maccasaynne nayti attishin, ichashu mukulu gidees.
MAT 14:22 Yesuusi ba tamaareti wogolon gelidi baape sinthatidi abbaafe he pinthi pinnana mela kiittidi baw deriya moyzanaw guye attis.
MAT 14:23 Deriya moyzi simmidi barka woossanaw issi zuma bolla keyis. Sa7ay qamminka I barka yan gam7is.
MAT 14:24 He wode wogoloy abba bolla bishin sintha baggara carkoy dendin hobbey wogoluwa un7ethis.
MAT 14:25 Wontimaatha bolla Yesuusi abba bolla hemetishe ba tamaaretako yis.
MAT 14:26 Iya tamaareti, I abba bolla hemetishe bantako yeysa be7idi yayyidosona. Entika, “Haysi moytille” gidi yayyidi waassidosona.
MAT 14:27 Shin Yesuusi ellessidi, “Aykoy baawa! Yayyofite! Tanabay” yaagis.
MAT 14:28 Phexroosi iyako, “Godaw, nena gidiko, taani haatha bollara hemetada neeko baana mela tana kiitta” yaagis.
MAT 14:29 Yesuusi Phexroosako, “Haaya” yaagis. Phexroosi wogoluwape wodhidi haatha bollara hemetishe Yesuusako buussu oykis.
MAT 14:30 Shin wolqaama carkuwa be7idi yayyis. Haathan mitetethi oykida wode, “Godaw! tana ashsharki!” yaagidi waassis.
MAT 14:31 Yesuusi ellesidi ba kushiya yeddi iya oykidi, “Neno, ammanoy pacidayso ayis sidhay” yaagis.
MAT 14:32 Yesuusaranne Phexroosara wogoluwan gelida wode carkoy si77i gis.
MAT 14:33 Wogoluwa giddon de7iya iya tamaareti, “Neeni tumaka Xoossa Na7a” gidi goyinnidosona.
MAT 14:34 Enti abba pinnidi Gensareexe biitta gakidosona.
MAT 14:35 He biittan de7iya asay Yesuusa erida wode banta heeran de7iya guta ubba kiita yeddidosona. Asay harganchota ubbaa iyako ehidosona.
MAT 14:36 Harganchoti iya afila macaraa xalaala bochana mela woossidosona. Bochida ubbayka paxidosona.
MAT 15:1 Hessafe guye, issi issi Farsaawetinne higge astamaareti Yerusalaamepe Yesuusako yidi,
MAT 15:2 “Ne tamaareti ayis nu aawata wogaa menthona? Enti kathi maanape sinthe banta kushiya meecetokona” yaagidi oychidosona.
MAT 15:3 Yesuusi zaaridi, “Hinte, hinte wogaa gisho, Xoossaa kiitaa poleysa ayis ixeetii?
MAT 15:4 Ayis giiko, Xoossay, ‘Ne aawanne ne aayiw boncha. I ba aawa woyko ba aayiw cayeysi hayqo gibeennee?’ yaagis.
MAT 15:5 Shin hinte, issi asi ba aawa woyko ba aayiw maaddanabay de7ishin, ‘Haysa ta Xoossas yarshas giiko,
MAT 15:6 ba aawa woyko ba aayiw bonchanaw bessenna’ yaageeta. Yaatidi hinte, hinte wogaa polanaw Xoossaa qaala mentheta.
MAT 15:7 Hinteno, cubboto, Isayaasi hintebaa like odis,
MAT 15:8 “ ‘Ha asay tana banta doonan bonchees, shin enta wozanay taape haahon de7ees.
MAT 15:9 Asay tana coo goyinnoosona; enti asi medhida kiitaa Xoossaa higge daanisidi tamaarsoosona’ gis” yaagis.
MAT 15:10 Yesuusi daro asaa baako xeegidi, “Si7ite! Akeekite!
MAT 15:11 Ase tunisiyabay doonara geliyaba gidonashin doonape keyaaba” yaagis.
MAT 15:12 Hessafe guye, Yesuusa tamaareti iyako yidi, “Farsaaweti neeni gidaysa si7idi dhubetidaysa akeekay?” yaagidosona.
MAT 15:13 Shin Yesuusi zaaridi, “Salon de7iya ta aaway tokiboonna mithi ubbay shodetana.
MAT 15:14 Entaba Hirgofite; enti qooqe kaalethiya qooqeta. Qooqey qooqe kaalethiko, nam7ayka ollan kundana” yaagis.
MAT 15:15 Phexroosi zaaridi, “Ha leemisuwa birshethaa nuus odarkii” yaagis.
MAT 15:16 Yesuusi entako, “Hintewuka ha77i gakanaw gelibeennee?
MAT 15:17 Doonara geliyaba ubbay ulo gelidi kare keyeysa ereketii?
MAT 15:18 Shin doonara keyaabay wozanape keyees. Ase tunisiyabati hessata.
MAT 15:19 Entika:- asa wozana giddofe keyiya iita qofa, wodho, laymatethi, iita ooso, kayso, wordo markatethi, cashshe.
MAT 15:20 Hessa daaniyabati ase tuniseesipe attishin, meecetonna kushera meysi tunisenna” yaagis.
MAT 15:21 Hessafe guye, Yesuusi yaape keyidi Xiroosanne Sidoona katamati de7iya biitta bis.
MAT 15:22 Issi Kanaane biitta maccas Yesuusako yada, ba qaala dhoqu oothada, “Godaw, Dawita na7aw, taw qadhetarki; ta na7iw tuna ayyaanay oykidi iita waaysees” yaagasu.
MAT 15:23 Shin Yesuusi issi qaalaka zaaronna si77i gis. Yesuusa tamaareti iyako yidi, “Ha maccasiya nu geedo kaalla kaallada, woossawusu. Hessa gisho, neeni iyo moyzarki” yaagidi woossidosona.
MAT 15:24 Yesuusi zaaridi, “Taani wudepe dhayida dorsada Isra7eele keethaafe dhayida asata xalaalas kiitetas” yaagis.
MAT 15:25 Shin iya, iya sinthan kundada, “Godaw, tana maaddarkii?” yaagasu.
MAT 15:26 I zaaridi, “Nayta kathi ekidi kanatas yeggeysi lo77o gidenna” yaagis.
MAT 15:27 Maccasiyaka, “Godaw, hessi tuma, shin hari attoshin kanati banta godati mishin, gaytape wodhiya tiifiya moosona” yaagasu.
MAT 15:28 Yesuusi zaaridi, “Ha maccasete, ne ammanoy gita; ne koydaysada new hano” yaagis. I na7iya iiraka paxa aggasu.
MAT 15:29 Yesuusi yaape dendidi Galila Abbaa mati bis. Issi zuma bolla keyidi, yan uttis.
MAT 15:30 Daro asay bantara, wobbeta, qooqeta, kuunata, doona muumetanne, hara daro harganchota ekidi, iyako ehidi iya sinthan wothidosona. Yesuusi entana pathis.
MAT 15:31 Hessa gisho, muumeti odetishin, kuunati piddi gishin, wobbeti hemetishin, qooqeti xeellishin asay be7idi malaaletidi, Isra7eele Xoossaa galatidosona.
MAT 15:32 Yesuusi ba tamaareta baako xeegidi, “Ha daro asay taara heedzu gallas gam7ida gishonne entaw ha77i miyabay bayna gisho taani entaw qadhetayis. Enti ogen daaburidi kundonna mela ayko muzonna enta mela yeddanaw koyke” yaagis.
MAT 15:33 Iya tamaareti zaaridi, “Nuuni ha bazzuwan haysa keena asaas gidiya kathi awupe demmanee?” yaagidosona.
MAT 15:34 Yesuusi entako, “Hintew aapun uythi de7ii?” yaagidi oychis. Enti zaaridi, “Laapun uythinne laafa molotape guuthi de7ees” yaagidosona.
MAT 15:35 Yesuusi deriya sa7an uttite yaagidi kiittis.
MAT 15:36 Hessafe guye, he laapun uythaanne moluwa ekidi Xoossaa galatis. Menthidi ba tamaaretas immis. Iya tamaareti daro asaas gishidosona.
MAT 15:37 Asa ubbay midi kallidosona. Iya tamaareti, mishin attida tiifiya laapun gita gayta kumethi denthidosona.
MAT 15:38 Mida asay maccasinne na7a paydonna adde xalaali oyddu mukulu.
MAT 15:39 Yesuusi deriya yeddidaape guye wogoluwan gelidi Magedoona biitta bis.
MAT 16:1 Farsaawetinne Saduqaaweti Yesuusako yidosona. Iya paacanaw koyidi, bantana salope malaata besso gidi oychidosona.
MAT 16:2 Shin I entako, “Sa7i omarsiya wode, ‘Saloy zo77ida gisho wonto booqallana’ yaageeta.
MAT 16:3 Wontiya wode, ‘Saloy zo77idi shaaratida gisho iri bukana’ yaageeta. Yaatin hinte salo mallaa be7idi ereeta, shin wodiya malla eranaw danda7ibeeketa.
MAT 16:4 Iitanne ammanonna yeletethay malaata koyees. Shin iyaw Yoonasa malaatape hara malaati imetenna” yaagis. Hessafe guye, entana yan aggidi hara soo bis.
MAT 16:5 Enti abbaafe hefinthi pinnida wode daabbo ekidi yaanaysa dogidosona.
MAT 16:6 Yesuusi entako, “Farsaawetapenne Saduqaaweta irshuwafe naagetite” yaagis.
MAT 16:7 Entika banta garsan, “I hessa giday nu daabbo ekidi yoonna gishosa gidana” yaagidosona.
MAT 16:8 Yesuus enta qofaa eridi, “Hinteno, ammanoy pacidaysato! Daabbo ekonna yida gisho woli giddon ayis odeteetii?
MAT 16:9 Ha77ika hinte akeeketii? Ichashu mukulu asaas ichashu uythaa gishidaysanne enti midi kallin hinte aapun gayta kumethi denthidaako dogidetii?
MAT 16:10 Hessadaka, laapun uythaa oyddu mukulu asaas gishidaysanne enti midi kallin, hinte aapun gita gayta kumethi denthidaako akeekeketii?
MAT 16:11 Hiza, taani Farsaawetanne Saduqaaweta irshuwafe naagetite gada odeysi daabboba gidonnaysa akeekeketii?” yaagis.
MAT 16:12 Yaatin, iya tamaareti Yesuusi odey munuqa denthanaw yegetiya irshoba gidonashin Farsaawetanne Saduqaaweta timirtiyafe naagetanaysa gideysa akeekidosona.
MAT 16:13 Yesuusi Qisaare Filphoosa biitta gakida wode ba tamaaretako, “Asay, Asa Na7aa oona goonna?” yaagidi oychis.
MAT 16:14 Entika, “Issoti issoti Xammaqiya Yohaanisa, harati Eeliyaasa qassi hankoti Ermiyaasa woyko nabetape issuwa goosona” yaagidosona.
MAT 16:15 Yesuusi zaaridi, “Yaatin, hinte tana oona geetii?” gidi enta oychis.
MAT 16:16 Simoona Phexroosi zaaridi, “Neeni Kiristoosa, de7o Xoossaa na7a” yaagis.
MAT 16:17 Yesuusi Phexroosako, “Yoona na7aa Simoona, neeni anjetidaysa! Haysa new qoncisiday saluwan de7iya ta aawape attishin, ase gidenna.
MAT 16:18 Ta new odayis Phexroosa, neeni zaalla! Taani ha zaalla bolla ta woosa keethaa keexana. Hayqo wolqatika iyo xoonokona.
MAT 16:19 Salo kawotethaa qulpeta ta new immana. Sa7an neeni diggiyabay ubbay salon Xoossaa matan digetidaba gidana. Sa7an neeni hano giyabay ubbay salon Xoossaa matan hanidaba gidana” yaagis.
MAT 16:20 Hessafe guye, I, Kiristoosa gideysa oodeska odonna mela ba tamaareta minthidi kiittis.
MAT 16:21 He wodiyape doomidi Yesuusi ba tamaaretas, “Taani Yerusalaame baanaw bessees. Yan deriya cimatan, kahine halaqatanne higge astamaareta kushen waaye ekanaw bessees. Enti tana wodhana, shin taani heedzantho gallas hayqope dendana” yaagidi qoncisis.
MAT 16:22 Phexroosi Yesuusa gaxa kessidi, “Godaw, hessi hanenna! Hessa melabay nena ubbaraka gakofo!” yaagidi hanqetis.
MAT 16:23 Yesuusi Phexroosako guye simmidi, “Ha Xalahiyaw, taape haaka! Neeni asa qofa qopaasape attishin, Xoossaa qofa qoponna gisho taw dhube gidaasa” yaagis.
MAT 16:24 Hessafe guye, Yesuusi ba tamaaretako, “Oonika tana kaallanaw koyaba gidiko bana kaddo, ba masqaliya tookidi tana kaallo.
MAT 16:25 Ba de7uwa ashshanaw koyiya ubbay dhaysees. Shin ba de7uwa ta gisho gidi aathidi immeysi ashshees.
MAT 16:26 Asi alame kumethi baw oothidi, gidoshin ba shempuwa dhaysiko iya ay maaddii? Woyko asi ba shempuwa laame ay immanaw danda7ii?
MAT 16:27 Asa na7ay ba aawa bonchuwan ba kiitanchotara yaana. He wode issi issi uraas iya oosuwada immana.
MAT 16:28 Ta tuma odayis; haysan eqida asatape Asa Na7ay kawo gididi simmeysa be7ana gakanaw hayqonnaysati haysan de7oosona” yaagis.
MAT 17:1 Usupun gallasape guye Yesuusi, Phexroosa, Yayqoobanne iya ishaa Yohaanisa baara ekidi bantarka gidanaw zuma bolla keyis.
MAT 17:2 Yan enta sinthan Yesuusa malay kumethi laametis; iya som7oyka awada xolqis. Iya ma7oyka daro booxis.
MAT 17:3 Heko, Museynne Eeliyaasi iyara odetishin be7idosona.
MAT 17:4 Phexroosi Yesuusako, “Nuuni haysa hashshu yida. Ne koyko issino new, issino Muses, issino Eeliyaasas haysan heedzu shaqara shaqarana” yaagis.
MAT 17:5 Phexroosi hessa buroo odishin bootha shaaray entana kammis. Shaara giddora, “Tana ufaysiya, ta dosiya na7ay haysa, iya si7ite!” giya qaalay yis.
MAT 17:6 Yesuusa tamaareti hessa si7ida wode dagammidi banta som7uwara sa7an kundidosona.
MAT 17:7 Shin Yesuusi entako shiiqidi enta bochidi, “Dendite, yayyofite!” yaagis.
MAT 17:8 Enti dhoqu gidi be7iya wode Yesuusape hara oonaka be7ibookona.
MAT 17:9 Enti zumaa bollafe wodhishin Yesuusi entako, “Asa Na7ay hayqope dendana gakanaw ha hinte be7idaba oodeska odopite” gidi kiittis.
MAT 17:10 Yesuusa tamaareti, “Yaatin, higge astamaareti Eeliyaasi Kiristoosape kasetidi yaana giday aybisee?” yaagidi oychidosona.
MAT 17:11 Yesuusi zaaridi, “Ee! Eeliyaasi kaseti yidi ubbaba giigisana.
MAT 17:12 Shin ta hintew tuma odayis; Eeliyaasi kasetidi yis. Entika iya bolla koydaba oothidosonape attishin, iya shaaki eribookona. Hessada Asa Na7ay enta kushen waayetana” yaagis.
MAT 17:13 He wode Yesuusi giday Xammaqiya Yohaanisaba gideysa akeekidosona.
MAT 17:14 Enti deriyape asaako simmiya wode issi asi Yesuusa sinthan gulbatidi,
MAT 17:15 “Godaw, hayyana ta na7aas qadhetarki; iya shocidi yeggiya hargey daro un7ethidi tamaninne haathan yeggees.
MAT 17:16 Ne tamaaretako ehas, shin enti pathanaw danda7ibookona” yaagis.
MAT 17:17 Yesuusi zaaridi, “Hinteno, ammanonna geella yeletethaw awude gakanaw ta hintera daanee? Awude gakanaw ta hintena danda7anee? Ane na7aa haa eki yiite” yaagis.
MAT 17:18 Yesuusi tuna ayyaana hanqin, tuna ayyaanay na7aape keyis; he saatenka na7ay paxis.
MAT 17:19 Hessafe guye, Yesuusa tamaareti bantarka iyako shiiqidi, “Nuuni tuna ayyaana kessanaw danda7iboonay aybisee?” yaagidi oychidosona.
MAT 17:20 I entako, “Hintew ammanoy laafida gishosa. Ta hintew tuma odayis; gaashe ayfe mela ammanoy hintew de7iko ‘Ha zumaa haysafe dendada gede aadha’ giiko hintew kiitetana. Hintew danda7etonabay deenna.
MAT 17:21 [Shin hessa melay woosapenne xoomape attishin, haran keyenna”] yaagis.
MAT 17:22 Yesuusa tamaareti Galilan shiiqidi de7ishin Yesuusi entako, “Asa Na7i asa kushen aadhidi imetana.
MAT 17:23 Enti iya wodhana, shin I heedzantho gallas hayqope dendana” yaagis. Iya tamaaretika daro qiirotidosona.
MAT 17:24 Yesuusaranne iya tamaaretara Qifirnahooma katama gakida wode Xoossa Keetha giira qanxiseysati Phexroosako yidi, “Hinte astamaarey Xoossa Keetha giira giirii?” yaagidi oychidosona.
MAT 17:25 Phexroosi zaaridi, “Giirees” yaagis. Phexroosi soo geliya wode Yesuusi kasetidi, “Phexroosa, new ay daanii? Ha sa7aa kawotethati qaraxanne giira oope ekona? Gade asapeye woyko asa gade asapee?” yaagidi oychis.
MAT 17:26 Phexroosi “Asa gade asape” gidi zaaris. Yesuusi zaaridi, “Gade asay giira giirokona guussu.
MAT 17:27 Shin enti dhubetonna mela abba bada molo oykanaw manxaqo yegga. Koyro ne oykiya moluwa doona dooyada giiras gidiya miishe ne gishonne ta gisho efada giira” yaagis.
MAT 18:1 He wode Yesuusa tamaareti yidi, “Salo kawotethan ubbaafe aadhey oonee?” yaagidi oychidosona.
MAT 18:2 Yesuusi issi guutha na7a xeegidi enta giddon essidi haysada yaagis.
MAT 18:3 “Taani hintew tuma odayis; hinte laametonnanne guutha naytada hanonna ixiko salo kawotethaa ubbaraka gelanaw danda7eketa.
MAT 18:4 Hiza, ha guutha na7ada bana kawushiya oonika salo kawotethan ubbaafe aadheysa gidana.
MAT 18:5 Haysa mela na7a ta sunthan mokiya oonika tana mokees.
MAT 18:6 “Shin tanan ammaniya ha guuthatape issuwa nagara oothana mela dhube gidiya oonika gita gaacha woxa ba qoodhen qachidi ciimmo abban mitetiko iyaw lo77o.
MAT 18:7 Alamen asay nagara oothana mela oothiyabati de7iya gisho alamiya ayye! Hessa melabati yoonna attenna, shin dhubey iya gaason yaa uraa ayye!
MAT 18:8 “Ne kushey woyko ne tohoy nena balethiko neepe qanxa yegga. Neeni nam7u kushera woyko nam7u tohora merinaa taman yegetanaape kushe woyko toho duuxa gidada merinaa de7o demmeysi new lo77o.
MAT 18:9 Qassi ne ayfey nena balethiko iyo wooca kessada wora hola. Neeni nam7u ayfera gaanname taman yegeteysafe issi ayfera merinaa de7uwa geleysi new lo77o.
MAT 18:10 “Ta hintew odayis; salon de7iya enta naagiya kiitanchoti ubba wode salon de7iya ta Aawa sinthan de7iya gisho, hinte ha guuthatape issuwaka kadhonna mela naagetite.
MAT 18:11 Asa Na7ay dhaydaysata ashshanaw yis” yaagis.
MAT 18:12 Qassi Yesuusi, “Hintew ay daanii? Issi uraas xeetu dorsati de7eysatape issoy dhayiko uddufun tammanne uddufunata deriya bolla yeggi aggidi he dhayidaysa koyanaw beennee?
MAT 18:13 Ta tuma odayis; I demmida wode uddufun tammanne uddufunatape aathidi dhayidi bentida issi dorsa gisho ufaytees.
MAT 18:14 Hessadaka, salon de7iya hinte aaway ha guuthatape issoy dhayana mela koyenna.
MAT 18:15 “Ne ishay nena qohiko nerka iyako bada iya qohuwa iyaw oda. I nena si7iko iya new isha ootha.
MAT 18:16 Shin I nena si7onna ixiko, nam7u woyko heedzu asa markan mootoy lasetiya gisho, issi woyko nam7u asi ekada iyako ba.
MAT 18:17 I entana si7onna ixiko, woosa keethas oda. Woosa keethi giyaba si7onna ixiko ammanonna asada woyko qaraxa qanxisiya asada iya payda.
MAT 18:18 “Ta hintew tuma odayis; sa7an hinte diggiyabati ubbay salon Xoossaa matan digetidaba gidana. Sa7an hinte hano giyabati ubbay salon Xoossa matan hanidaba gidana.
MAT 18:19 “Qassika ta hintew odayis; sa7an hintefe nam7ay banta woossiyabas issi wozanan gididi Xoossaa woossiyaba gidiko salon de7iya ta Aaway hintew oothana.
MAT 18:20 Tana kaalleysatape nam7a woyko heedza gididi shiiqiya bessan taani enta giddon bentana” yaagis.
MAT 18:21 He wode Phexroosi Yesuusako yidi, “Godaw, ta ishay tana qohiko aapun toho taani atto gaanaw bessii? Laapun toho gakanaaseyee?” gidi oychis.
MAT 18:22 Yesuusi zaaridi, “Gidenna, laapun tammu toho laapunape attishin, laapun toho gidenna.
MAT 18:23 “Hessa gisho, Xoossaa kawotethay ba oosanchotara ba miishey pacidaakonne palahidaako be7anaw qopida kawa daanees.
MAT 18:24 He kawoy miishey pacidaakonne palahidaako be7iya wode daro gindiginda acoy de7iya issi uraa iyako ehidosona.
MAT 18:25 Shin he aylley acuwa qanxanaw xoonetin iyara, iya machera, iya naytinne iyaw de7iyabay ubbay bayzetidi acoy cigetana mela iya goday kiittis.
MAT 18:26 Yaatin aylley ba godaa tohuwa bolla gulbatidi, ‘Ta godaw, hayyana guutha wode takarki, ta acuwa ubbaa ta ciggana’ yaagidi woossis.
MAT 18:27 Kawoy iyaw qadhetidi, yeddi aggis; iya acuwa maaris.
MAT 18:28 “Shin he aylley keyi bidi ba lagge oosanchotape issoy baape daro guutha miishe tal7idaysa, ‘Ne bolla de7iya ta miishiya taw cigga’ gidi qoodhe oykis.
MAT 18:29 “He iya lagee aylley iya sinthan gulbatidi, ‘Hayyana guutha wode takarki taani ta acuwa ubbaa ciggana’ yaagidi woossis.
MAT 18:30 “Shin ixidi eki efidi ba laggey acuwa qanxana gakanaw qasho keethi gelsis.
MAT 18:31 Hessa gisho, hara lagge oosanchoti hessa be7ida wode daro yilotidi, bidi banta godaas I oothidaba ubbaa odidosona.
MAT 18:32 “Yaatin kawoy he aylliya xeegisidi, ‘Ha iita aylliyaw, neeni tana woossida gisho, ta ne acuwa ubbaa new maaras.
MAT 18:33 Yaatin, taani ne acuwa maaridaysada neeni ne lagge aylliya acuwa maaranaw new bessennee?’ yaagis.
MAT 18:34 Hessa gisho, kawoy daro yilotidi, I ba acuwa ubbaa ciggana gakanaw paxa kaa7etana mela qasho keethan yeggis.
MAT 18:35 “Hessadaka, hinte issoy issoy hinte ishaa wozanape maaronna ixiko salon de7iya ta Aaway hintena hessada oothana” yaagis.
MAT 19:1 Yesuusi hessa odi ongidaape guye, Galilape dendidi Yordaanose Shaafape hefinthan de7iya Yihuda biitta bis.
MAT 19:2 Daro asay iya kaallidi bin enta giddofe harganchota pathis.
MAT 19:3 Farsaaweti iya paacanaw koyidi iyako yidi, “Issi asi ay gaasonka ba machiw yeddanaw bessii?” yaagidi oychidosona.
MAT 19:4 Yesuusi zaaridi, “Xoossay koyro addenne maccas oothi medhidaysa hinte nabbabibeketii?
MAT 19:5 ‘Hessa gisho, Issi asi ba aawanne ba aayiw aggidi ba machera issino gidees, nam7ayka issi asho gidoosona.’
MAT 19:6 Hessa gisho, enti issi asi gidoosonape attishin, nam7u asi gidokona. Hiza, Xoossi qachidaysa asi shaakofo” yaagis.
MAT 19:7 Farsaaweti, “Yaatin, Musey issi asi anjo worqate immidi yeddana mela ayis kiittidee?” yaagidi oychidosona.
MAT 19:8 Yesuusi zaaridi, “Hinte, hinte macheta yeddana mela Musey hintena kiittiday, hinte wozanaa minotethaa gishope attishin, koyrope hessa mela gidenna.
MAT 19:9 Ta hintew odayis; ba machiya laymatonna de7ishin yeddidi hara ekiya oonika laammees” yaagis.
MAT 19:10 Iya tamaareti iyako, “Azinabaynne machibay hessa mela gidiko eko geloy attiko lo77o” yaagidosona.
MAT 19:11 Yesuusi zaaridi, “Hessa mela timirtey Xoossay danda7a immidaysatasafe attishin, asa ubbaasa gidenna.
MAT 19:12 Hiza, yeletishe shuufa gididi yeletidaysati de7oosona, qassi asi qaaratidaysati de7oosona, qassi salo kawotethaa gisho gidi bantana shuufaydaysati de7oosona. Hessa gisho, haysa ekanaw danda7iya oonika eko” yaagis.
MAT 19:13 Yesuusi ba kushiya guutha nayta bolla wothidi entaw woossana mela issi issi asay nayta iyako ehidosona. Shin iya tamaareti asaa hanqetidosona.
MAT 19:14 Shin Yesuusi, “Xoossaa kawotethay haysata melasa gidiya gisho, guutha nayti taako yeysa diggofite; yo giite” yaagis.
MAT 19:15 Ba kushiya enta bolla wothidaape guye he bessaafe aggidi bis.
MAT 19:16 Issi gallas issi uray Yesuusako yidi, “Astamaariyaw, taani merinaa de7o demmanaw ay lo77oba ootho?” yaagis.
MAT 19:17 Yesuusi iyako, “Lo77oba ne tana ayis oychay? Issi Xoossaafe attishin, hari lo77oy baawa. Shin neeni merinaa de7uwa ekanaw koyko kiitata naaga” yaagis.
MAT 19:18 Uray zaaridi, “Awusa kiitata” yaagidi oychis. Yesuusi zaaridi, “Wodhopa, laymatopa, kaysotopa, wordo markatofa,
MAT 19:19 ne aawanne ne aayiw boncha, ne shooruwa ne huupheda dosa” yaagis.
MAT 19:20 He na7atethay, “Taani haysata ubbaa na7atethafe doomada naagas. Yaatin, hari taw paciyabay aybee?” yaagidi oychis.
MAT 19:21 Yesuusi zaaridi, “Neeni polo gidanaw koyko bada new de7iyaba bayzada manqotas imma; neeni salon duretana. Yaata simma yada tana kaalla” yaagis.
MAT 19:22 Shin he na7atetha uray daro dure gidiya gisho, hessa si7ida wode azzanishe aggidi bis.
MAT 19:23 Hessafe guye, Yesuusi ba tamaareta, “Taani hintew tuma odayis; durey salo kawotethi gelanaysi daro meto.
MAT 19:24 Dure asi Xoossaa kawotethaa gelanaysafe gimaley narpe luhora aadheysi kawuyees” yaagis.
MAT 19:25 Yesuusa tamaareti hessa si7idi malaaletidi, “Yaatin, ooni attanaw danda7ii?” yaagidi oychidosona.
MAT 19:26 Yesuusi enta caddi xeellidi, “Haysi asas danda7etenna, shin Xoossas ubbay danda7etees” yaagis.
MAT 19:27 Phexroosi zaaridi, “Nuuni ubbaba aggidi nena kaallida. Yaatin, nuuni ay demmanee?” yaagis.
MAT 19:28 Yesuusi entako haysada yaagis: “Taani hintew tuma odayis; Asa Na7ay yaana alamiyan ba boncho araatan uttiya wode hinte tammanne nam7ati, tana kaallidaysati, tammanne nam7u araatan uttidi tammanne nam7u Isra7eele zerethata bolla pirdana.
MAT 19:29 Ta sunthaa gisho keethe woyko ishata woyko micheta woyko aawa woyko aayiw woyko nayta woyko gadee aggiday oonika xeetu kushe ekana. Qassi merinaa de7uwaka ekana.
MAT 19:30 Shin daroti ha77i dethan sinthe gididaysati guye gidana, qassi guye gididaysati sinthe gidana” yaagis.
MAT 20:1 “Xoossaa kawotethay ba woyne gaden une oothiya asi oosisanaw wonta guura keyida ura daanees.
MAT 20:2 I he une oothiya asa hachi hachi issi dinaare qanxanaw entara giigidi, enta ba woyne gadiya giddo yeddis.
MAT 20:3 “Qassi wontafe heedzu saate gidishin keyidi ooso dhayidi giya bolla eqida hara asata demmis.
MAT 20:4 I entako, ‘Hinteka ta woyne gadee giddo bidi oothite, taani hintew bessiya gatiya qanxana’ yaagis.
MAT 20:5 Entika bidosona. Qassika I usupun saateninne uddufun saaten keyidi hessada oothis.
MAT 20:6 Tammanne issi saate gidishin I keyiya wode harati yan eqidaysata demmidi, ‘Hinte ooso oothonna gallas kumethi haysan ayis eqidi pee7idetii?’ yaagis.
MAT 20:7 “Enti zaaridi, ‘Nuna une oosisiya asi dhayida gishosa’ yaagidosona. “Ika, ‘Hinteka ta woyne gadiya giddo bidi oothite’ yaagis.
MAT 20:8 “Sa7i omarsin, woyne gadiya goday oosanchota halaqaako, ‘Oosanchota xeegada wursethan ooso gelidaysatape doomada koyro gelidaysata gakanaw enta gatiya qanxa’ yaagis.
MAT 20:9 Tammanne issi saaten ooso oykidaysati yidi, huuphen huuphen issi issi dinaare ekidosona.
MAT 20:10 Koyro ooso oykidaysati yidi, bantaw daro imetana gidi qopidosona. Shin entika huuphen huuphen issi issi dinaare ekidosona.
MAT 20:11 Banta miishiya eki simmidi godaa bolla zuuzumidosona.
MAT 20:12 ‘Haysati guyepe yidi issi saate xalaala oothidosona. Shin gallas kumethi awa suulan daaburidi pee7ida nuura enti waanidi issino gidoona’ yaagidosona.
MAT 20:13 “Woyniya goday oosanchotape issuwako, ‘Ta ishaw, taani nena qohabike; ne taara giigiday issi dinaaresa gidennee?
MAT 20:14 Ne miishiya ekada ne soo ba. Ta omarsi yidaysaska neysa mela immanaw koyayis.
MAT 20:15 Taani ta miishiyan koydaba oothanaw taw maati baawee? Woyko taani keeha gidida gisho neeni qanaatay?’ yaagis.
MAT 20:16 “Hessada ha77i dethan guye gididaysati sinthatana, sinthatidaysati qassi guyetana” yaagis.
MAT 20:17 Yesuusi Yerusalaame bishe, tammanne nam7u tamaareta dumma gaxa kessidi entako yaagis:
MAT 20:18 “Heko, nuuni ha77i Yerusalaame buussaa bolla de7oos. Yan Asa Na7ay kahine halaqatasinne higge astamaaretas aadhidi imetana. Enti iya bolla hayqo pirda pirdana.
MAT 20:19 Iya Ayhude gidonna deriyas aathidi immana. Enti iya kawushana, garaafana, yaatidi iya masqaliya bolla kaqana. Shin I heedzantho gallas hayqope dendana” yaagis.
MAT 20:20 He wode Zabdiyoosa machiya ba nam7u adde naytara Yesuusako yada, iya sinthan gulbatada issiba iya woossasu.
MAT 20:21 Yesuusi iiko, “Ne ay koyay?” yaagis. Iya zaarada, “Ne kawotethan ha ta nam7u nayti issoy ne ushachan issoy ne haddirsan utto garki!” yaagasu.
MAT 20:22 Shin Yesuusi naytako zaaridi, “Hinte ay woossiyako ereketa; taani uyanaw de7iya waaye xuu7aa uyanaw danda7eetii?” yaagis. Entika, “Ee danda7oos” yaagidosona.
MAT 20:23 Yesuusi, “Tumaka taani uyanaw de7iya xuu7ape hinte uyana. Shin ta ushachaninne haddirsan uttanayisata doorey tana gidike. He bessay imetey, ta aaway immanaw giigisida asatasa” yaagis.
MAT 20:24 Attida tammu iya tamaareti hessa si7ida wode nam7u ishata bolla hanqetidosona.
MAT 20:25 Shin Yesuusi enta ubbaa xeegidi haysada yaagis. “Ayhude gidonna asaa haareysati banta asaa bolla godateysanne enta kaaletheysati wolqan haareysa hinte ereeta.
MAT 20:26 Shin hinte giddon hessada gidopo. Hintefe gitatanaw koyiya oonika hintew aylle gido.
MAT 20:27 Hinte giddon ubbaafe bolla gidanaw koyiya oonika hintew aylle gidanaw bessees.
MAT 20:28 Hessadaka, Asa Na7ay ase haggaazanawunne daro asaa wozanaw ba shempuwa immanaw yisipe attishin, asan haggaazetanaw yibeenna” yaagis.
MAT 20:29 Hessafe guye, Yesuusi ba tamaaretara Iyaarkofe keyidi bishin, daro asay entana kaallidosona.
MAT 20:30 Oge gaxan uttida nam7u qooqeti Yesuusi yaara aadheysa si7idi, “Godaw, Dawita Na7aw, nuus qadhetarki” yaagidi waassidosona.
MAT 20:31 Daro asay entana, “Hayzite” yaagidi kaccidosona. Shin enti, “Godaw, Dawita na7aw, nuus qadhetarki” gidi guji waassidosona.
MAT 20:32 Yesuusi eqidi, enta xeegidi, “Ta hintew ay oothana mela koyeetii?” yaagidi oychis.
MAT 20:33 Entika, “Godaw, nu ayfey xeellana mela koyoos” yaagidosona.
MAT 20:34 Yesuusi entaw qadhetidi, enta ayfiya bochis. Ellesidi enta ayfey xeellis; enti iya kaallidi bidosona.
MAT 21:1 Yesuusaranne iya tamaaretara Yerusalaame matidi, Shamaho zuma bolla de7iya Beetefaage geetetiya gutaa gakishe, Yesuusi ba tamaaretape nam7ata baape sinthe yaagidi kiittis:
MAT 21:2 “Hintefe sinthan de7iya guta biite. Yan issi harey qashon de7iyaro I maarara hinte demmana. Enta billidi haa eki yiite.
MAT 21:3 Oonika hintena oychiko, ‘Goday entana koyees’ yaagite. I entana iiraka yeddi aggana” yaagis.
MAT 21:4 Hessika nabey,
MAT 21:5 “Xiyoone katamaas, ‘Heko, ne kawoy ashke gididi, hare bollanne hare mara bolla uttidi, neeko yees’ yaagite” yaagidi xaafidaysi poletana mela hessi hanis.
MAT 21:6 Iya tamaareti bidi Yesuusi enta kiitidaysada oothidosona.
MAT 21:7 Hariiwunne hare maraa ehidi bollara ma7ida banta ma7uwa enta zokon yeggidosona. Yesuusi ma7ota bolla uttis.
MAT 21:8 Daro asay banta ma7uwa ogiyan hiixidosona. Harati bonco tashidi oge bolla yeggidosona.
MAT 21:9 Yesuusape sinthara hemeteysatinne iyape guyera kaalliya daro asay, “Hosaana! Dawita na7ay galatetto! Godaa sunthan yeysi anjetidaysa! Bonchoy Ubbaafe Dhoqa Saluwan Xoossaas gido!” yaagidi waassidosona.
MAT 21:10 Yesuusi Yerusalaame katamaa gelida wode he kataman de7iya asa ubbay, “Haysi oonee?” yaagidi yarkidosona.
MAT 21:11 Asay, “Haysi Galilan de7iya Naazirete katamaape yida nabiya Yesuusa” yaagidosona.
MAT 21:12 Yesuusi Xoossa Keethi gelidi, yan bayzeysatanne shammeyisata ubbaa kare goodis. Miishe laammeyisata xarpheezatanne holleta bayziya oydeta shiri yeggis.
MAT 21:13 Ika entako, “Xoossaa qaalan, ‘Ta keethay Xoossaa woossiya keethi geetetana’ geetetidi xaafetis. Shin hinte pangati qosetiya gongolo oothideta” yaagis.
MAT 21:14 Yesuusi xoossa keethan de7ishin qooqetinne gundati iyako yin enta pathis.
MAT 21:15 Shin kahine halaqatinne higge astamaareti Yesuusi oothida malaalsiyabata be7idaysasinne guutha nayti xoossa keethan, “Dawita na7ay, galatetto” yaagidi waasseysa si7idi hanqetidosona.
MAT 21:16 Enti Yesuusako, “Haysati geysa ne si7ay?” yaagidosona. Yesuusi, “Ee si7ayis, Xoossaa qaalan, ‘Guutha nayta doonaninne dhammiya nayta doonan galata wothadasa’ geetetidi xaafetidaysa hinte nabbabibeketii?” yaagis.
MAT 21:17 Entana yan aggidi Bitaane katamaa bidi aqis.
MAT 21:18 Yesuusi wonta guura katama simmidi yishe koshatis.
MAT 21:19 Oge gaxan issi balase mithi be7idi iiko bis. Shin haythafe attishin, hara aykoka demmibeenna. Hessa gisho, iyo, “Hizape nam7antho ayfe ayfopa!” yaagis. He balase mithiya ellesada mela aggasu.
MAT 21:20 Iya tamaareti hessa be7idi, “Ha balasiya waanada ellesa meladee?” yaagidi malaaletidosona.
MAT 21:21 Yesuusi zaaridi, “Taani hintew tuma odayis; hintew ammanoy de7iko, qassi hinte sidhonna ixiko balase bolla taani oothidaysa mela xalaala ootheketa, shin ‘Ha zumaa shodetada abban wodha’ yaagiko hanana.
MAT 21:22 Ammanidi hinte woossiyaba aybiba gidikoka hinte ekana” yaagis.
MAT 21:23 Yesuusi Xoossa Keetha gelidi tamaarsishin, kahine halaqatinne Ayhude cimati iyako yidi, “Neeni haysa oothana mela new ay maati de7ii? New ha maata immiday oonee?” yaagidi oychidosona.
MAT 21:24 Yesuusi entako, “Taanika hintena issiba oychayis; hinte taw hessa zaariko, taani ay maatan oothiyako hintew odana.
MAT 21:25 Yohaanisi xammaqana mela maatay awupe imetidee? Xoossafeye asapee?” yaagis. Enti banta giddon zoretidi, “Nuuni, ‘Xoossafe’ giiko, I nuna, ‘Yaatin ayis ammanibeketii?’ yaagana.
MAT 21:26 Nuuni, ‘Asape’ giiko, asa ubbay Yohaanisa nabe oothi xeelliya gisho, asaa yayyoos” yaagidosona.
MAT 21:27 Hessa gisho, “Nuuni eroko” yaagidi zaaridosona. Ika, “Hiza, taanika haysa ay maatan oothiyako hintew odike” yaagis.
MAT 21:28 “Yesuusi kaallidika haysada yaagis: nam7u adde nayti de7iya issi uray de7ees. He uray bayra na7aako bidi, ‘Ta na7aw, hachi woyne giddo bada ootha’ yaagis.
MAT 21:29 Na7ay zaaridi, ‘Atto biike’ yaagis. Shin guyepe ba wozanan qopi ekidi oothanaw bis.
MAT 21:30 Aaway ba kaalo na7aako bidi, ba bayra na7aako gidaysada kiittis. Ika, ‘Ero, ta aawaw’ yaagis. Shin bibeenna.
MAT 21:31 Ha nam7u naytape ba aawas kiitetidaysi awusee?” yaagis. Entika, “Bayra” yaagidosona. Yesuusi entako, “Ta hintew tuma odayis; qaraxa qanxiseysatinne laymateysati hintefe sinthatidi Xoossaa kawotethaa gelana.
MAT 21:32 Xammaqiya Yohaanisi suure ogiya tamaarsishe yin I geysa ammanibeketa. Shin qaraxa qanxiseysatinne laymateysati ammanidosona. Hinte hari attoshin, enta be7idika hinte nagaraape simmidi ammanibeketa” yaagis.
MAT 21:33 Qassika Yesuusi haysada yaagis; “Hara leemiso si7ite, woyne tokida issi uray de7ees. He woyniya yuushuwa diris. Woyne gum7iya olla bookis. Woyniya naaganaw shako shaakis. Hessafe guye, gadiya kothe immidi hara biitta bis.
MAT 21:34 Woyne ayfiya maxiya wodey gakin bana gakiya baggaa ekidi yaana mela ba aylleta entako yeddis.
MAT 21:35 Kothe aawati iya aylleta oykidi issuwa wadhidosona, hankuwa wodhidosona qassi attidaysa shuchan caddidosona.
MAT 21:36 Woyne atakiltiya goday kaseysatape dariya hara aylleta kiittis. Kothe aawati enta bollaka hankoyisata bolla oothidaysada oothidosona.
MAT 21:37 Wursethan I, ‘Ta na7aa enti bonchana!’ yaagidi ba na7aa entako kiittis.
MAT 21:38 “Shin kothe aawati na7aa be7idi banta giddon ‘Gadiya laattanaysi haysa, iya wodhidi gadiya nuuni laattoos!’ yaagidosona.
MAT 21:39 Na7a oykidi woyne gadiya giddofe gaxa kessidi wodhidosona.
MAT 21:40 “Hiza, woyne gadiya goday yaa wode he kothe aawata waatanee?” yaagidi oychis.
MAT 21:41 Enti zaaridi, “I he iita asata iita wodho wodhidi, woyney ayfiya wode iya gakiya baggaa woden woden immiya hara kothe aawatas immana” yaagidosona.
MAT 21:42 Yesuusi zaaridi entako, Xoossaa qaalan, “ ‘Gimbeysati boridi ixida shuchay, godaa xaphuwa minthiya, ubbaafe aadhiya shuchaa gidis. Haysi Goday oothidaba; nu ayfiyas malaalsiyaba’ geetetidi xaafetidaysa nabbabibeketii?
MAT 21:43 “Hessa gisho, taani hintew odayis; Xoossaa kawotethay hintefe eketidi lo77o ayfe ayfiya asatas imetana.
MAT 21:44 [Ha shucha bolla kundiya oonika meqeretana. Qassi ha shuchay iya bolla wodhiya urayka gaacetana”] yaagis.
MAT 21:45 Kahine halaqatinne Farsaaweti Yesuusi odida leemisuwan bantana odidaysa eridosona.
MAT 21:46 Enti Yesuusa oykanaw koydosona, shin asay Yesuusa nabe oothidi xeelliya gisho, asaas yayyidosona.
MAT 22:1 Yesuusi asaas zaaridi haysada yaagidi leemiso odis.
MAT 22:2 “Xoossaa kawotethay ba na7aas yaagano giigisida kawa daanees.
MAT 22:3 He kawoy yaagano yaana mela odi wothida asata xeeganaw ba aylleta kiittis. Shin asati yaanaw koybookona.
MAT 22:4 Qassi hara aylleta xeegidi, xeegetida asatako bidi, ‘Taani ta sangatanne modhida gatarmenthota shukas; ubbabay giigis. Ta yaaganuwa haa yiite yaagite’ yaagidi kiittis.
MAT 22:5 Shin xeegetidaysati xeessaa ixidi, banta oosos oosos bidosona. Issoy ba goshshas, hankoy ba zal7iyas bis.
MAT 22:6 Harati qassi kawa aylleta oykidi, kawushi wadhidi wodhidosona.
MAT 22:7 “Kawoy daro yilotidi, ba wotaadareta yeddidi shempo wodhidaysata wodhisis, enta katamaka xuuggis.
MAT 22:8 Hessafe guye, ba aylletako, ‘Yaaganoy giigis, shin xeegetidaysati yaaganuwas bessiya asi gidokona.
MAT 22:9 Hessa gisho, wogga ogeta bidi, demmida asi ubbaa yaaganuwa yaana mela xeegite’ yaagis.
MAT 22:10 Aylleti ogiya bolla bidi banta demmida asi ubbaa lo77otanne iitata ehidi yaagano shaqara gelsidi kunthidosona.
MAT 22:11 “Shin kawoy kathaa maanaw uttida asaa be7anaw gelida wode yaagano ma7o ma7iboona issi asi demmis.
MAT 22:12 Iyako, ‘La, ne yaagano ma7o ma7onna waanada haysa geladii?’ yaagis. Shin uray si77i gis.
MAT 22:13 “Kawoy ba aylletako, ‘Ha uraa kushiyanne tohuwa qachidi, kare dhumaa kessi yeggite. Yan iyaw yeehonne acha garcethi gidana’ yaagis.
MAT 22:14 “Hessadaka, Xoossaa kawotethaas xeegetidaysati daro shin dooretidaysati guutha” yaagis.
MAT 22:15 Hessafe guye, Farsaaweti bidi, Yesuusa waati odan oykaneeko zoretidosona.
MAT 22:16 Banta tamaaretanne Herodiisa baggatape issota issota kiittidosona. Entika, “Astamaariyaw, ne tuma odeysa nu eroos. Neeni asape ase shaakaka, asa woygandes gada aykoka oothaka, Xoossa oge tumatethan tamaarsaasa.
MAT 22:17 Ane nuus oda, nuuni Roome Kawas giira giiranaw bessi bessennee?” yaagidosona.
MAT 22:18 Shin Yesuusi enta iita qofaa eridi, “Ha cubboto, tana ayis paacetii?
MAT 22:19 Giira giiriya miishiya tana bessite” yaagis. Entika iyaw santime ehidosona.
MAT 22:20 I, “Ha sunthaynne misiley oodebayee?” yaagis.
MAT 22:21 Enti, “Roome Kawoysa” yaagidosona. Yaatin Yesuusi entako, “Hiza, Kawas besseysa kawas, Xoossas besseysa Xoossas immite” yaagis.
MAT 22:22 Enti hessa si7ida wode malaaletidi iya matape aggidi bidosona.
MAT 22:23 He gallas hayqope dendoy baawa giya Saduqaaweti Yesuusako yidi, yaagidi iya oychidosona.
MAT 22:24 “Astamaariyaw, ‘Musey, issi asi na7a yelonna hayqiko, he hayqidaysa ishay iya machiw ekidi, ba ishaas na7a yelo’ yaagidi kiittis.
MAT 22:25 Nu eriya laapun ishati de7oosona. Bayray macho ekidi na7a yelonna hayqis. Iya machiw iya kaalo ishay ekis.
MAT 22:26 Hessadaka, he maccasiw ekida nam7anthoyka, heedzanthoyka, bidi laapunati wurana gakanaw ubbay hayqidosona.
MAT 22:27 Ubbaafe guye he maccasiya hayqasu.
MAT 22:28 Yaatin, laapunati ubbay iyo ekida gisho, hayqope dendiya gallas, he maccasiya laapunatape awusas macho gidanee?” yaagidosona.
MAT 22:29 Yesuusi zaaridi, “Hinte Xoossaa qaalay tamaarsiyaba woyko iya wolqaa eronna gisho baleeta.
MAT 22:30 Asay hayqope dendiya wode salon de7iya kiitanchota mela gidanaape attishin, ekokona gelokona.
MAT 22:31 Qassi hayqida asati hayqope dendanaba Xoossay hintew odidaysa nabbabibeketii?
MAT 22:32 Xoossay, ‘Taani Abrahaame Xoossaa, Yisaaqa Xoossaa, Yayqooba Xoossaa’ yaagis. Hessa gisho, Xoossay paxa de7eyisata Xoossaafe attishin, hayqidaysata Xoossaa gidenna” yaagis.
MAT 22:33 Daro asay hessa si7idi, iya timirtiyan malaaletidosona.
MAT 22:34 Yesuusi Saduqaawetas gaanaba dhaysidaysa Farsaaweti si7ida wode issife shiiqidosona.
MAT 22:35 Enta giddofe issi higge astamaarey Yesuusa paace oysho oychis.
MAT 22:36 “Astamaariyaw, higge ubbaafe aadheysi awusee?” yaagidi oychis.
MAT 22:37 Yesuusi zaaridi, “ ‘Ne Godaa, ne Xoossaa, ne kumetha wozanape, ne kumetha shempuwafe, ne kumetha qofaape dosa.
MAT 22:38 Ubbaafe aadheysinne bayra kiitay haysa.
MAT 22:39 Nam7antho ubbaafe aadhiya kiitay, ase ubbaa ne huuphiya ne doseysada dosa’ yaageysa.
MAT 22:40 Muse higgeynne nabeta timirtey ubbay ha kiitata bolla katoosona” yaagis.
MAT 22:41 Farsaaweti issi bolla shiiqidi de7ishin, Yesuusi entana,
MAT 22:42 “Kiristoosaba hinte woygetii? I oodde na7ee?” yaagidi oychis. Enti, “I Kawa Dawita na7a” yaagidi zaaridosona.
MAT 22:43 Yesuusi entako, “Yaatin, Dawiti Geeshsha Ayyaanan gididi waatidi Kiristoosa, ‘Godaa’ gidi xeegii? Dawiti gishe,
MAT 22:44 “ ‘Godaa Xoossay, ta Godaako, ne morketa ne tohoy yedhiyaso oothana gakanaw, haysan taape ushacha baggan utta’ gis.
MAT 22:45 Hiza, Dawiti Kiristoosa Godaa gidi xeegiko, waanidi Kiristoosi Dawita na7a gidii?” yaagis.
MAT 22:46 Yesuusas issi qaala zaaranaw danda7ida asi oonika baawa. Qassi he gallasape doomidi hara oysha oychanaw oonika danda7ibeenna.
MAT 23:1 Hessafe guye, Yesuusi shiiqida asaasinne ba tamaaretas haysada yaagis.
MAT 23:2 “Higge astamaaretinne Farsaaweti Muse higgiya billanaw maatara de7oosona.
MAT 23:3 Hessa gisho, enti hintena kiittiya ubbaa oothitenne naagite. Shin enti ootheysada oothopite. Ayis giiko, enti odeysada oothokona.
MAT 23:4 Enti tookanaw danda7etonna tooho qachidi asaa toossosona. Shin bantaw hari attoshin, he toohuwa asay tookiya wode biradhe xeeran bochanaw koyokona.
MAT 23:5 “Shin enti banta ooso ubbaa asi be7onna mela oothosona. Banta som7oninne qesen qachiya maxaafaa xiqisey de7iya kitaafe dalgisoosona, banta ma7uwa macaraa adussosona.
MAT 23:6 Moketiya bessan boncho bessinne ayhude woosa keethatan daro lo77iya oyde dosoosona.
MAT 23:7 Asay giyan entana bonchon sarothanaysanne ‘Astamaariyaw’ gidi xeeganaysa koyoosona.
MAT 23:8 “Shin hinte astamaarey issuwa xalaala gidida gishonne hinte ubbay ishata gidida gisho, ‘Astamaariyaw’ geetetidi xeegetofite.
MAT 23:9 Hintew salon issi aawa xalaali de7iya gisho, ha sa7an oonaka ‘Aawaw’ gidi xeegopite.
MAT 23:10 Hintew issi Goday Kiristoosa xalaali de7iya gisho ‘Godaw’ geetetidi xeegetofite.
MAT 23:11 Hinte giddon bayratey hinte aylle gido.
MAT 23:12 Bana gitaya oonika kawuyana; bana kawushiya oonika gitatana.
MAT 23:13 “Hinteno, cubboto, higge astamaaretonne Farsaaweto, asa sinthan salo kawotethaa gordeysato hintena ayye! Hinte, hinte huuphen geleketa qassi harataka gelseketa.
MAT 23:14 “[Hinteno cubboto, higge astamaaretonne, Farsaaweto, am7eta keetha hinte bonqishe, asi be7o gidi woosa adusseta. Hessa gisho, hintena ayye! Ubbaafe aadhiya pirday hintena naagees.]
MAT 23:15 “Hinteno, cubboto, higge astamaaretonne Farsaaweto, hinte issi uraa ammanthanaw abbaranne sa7ara yuuyeta. Shin hinte iya ammanthida wode he uraa hintefe aathidi Gaannames giigetidaysa oothiya gisho, hintena ayye!
MAT 23:16 “Oonika xoossa keethan caaqiko aykoyka baawa. Shin Xoossaa Keethan de7iya worqan caaqiko, he caaqoy iya gomana giya qooqeto, hintew qooqidi harata kaaletheysato, hintena ayye!
MAT 23:17 Hinteno, eeyato, qooqeto, worqay aadhiyee? Worqiya Xoossas dummaya xoossa keethay aadhii?
MAT 23:18 Qassi ‘Oonika yarsho bessan caaqiko, aykoyka baawa. Shin oonika iya bolla de7iya yarshuwan caaqiko, he caaqoy iya gomana’ yaagidi tamaarseeta.
MAT 23:19 Hinteno, qooqeto, yarshoy aadhiyee? Yarshuwa Xoossas dummaya bessay aadhii?
MAT 23:20 Hessa gisho, yarsho bessan caaqiya uray, he yarsho bessaaninne iya bolla de7iya ubbaban caaqees.
MAT 23:21 Xoossa keethan caaqiya uray, he xoossa keethaninne iyan de7iya Xoossan caaqees.
MAT 23:22 Salon caaqiya uray Xoossaa araataninne he araata bolla uttiya Xoossan caaqees.
MAT 23:23 “Hinteno, cubboto, higge astamaaretonne Farsaaweto, hintena ayye! Hinte kareetha sawope, naatiropenne okashepe asraata kesseeta. Shin higgen de7iya aadhidi koshsheyisata aggideta. Hessika, suure pirda, qadhetethinne ubbaban ammanetethi. Harataka aggonashin haysata hinte oothanaw bessees.
MAT 23:24 Hintew qooqidi hara asi kaaletheysato, hinte ushshafe udunxe kessidi gimale miteeta.
MAT 23:25 “Hinteno, cubboto, higge astamaaretonne Farsaaweto, hintena ayye! Hinte shaatiyasinne keriyas bolla baggaa geeshsheeta. Shin entaw garsan bonqeynne uuzetethi kumi uttis.
MAT 23:26 Neno qooqe Farsaawiyaw, shaatiyasinne keriyas garsa kasetada geeshsha. Hessafe guye, bolla baggayka geeshshi gidana.
MAT 23:27 “Hinteno, cubboto, higge astamaaretonne Farsaaweto, hintena ayye! Kare baggara qalame tiyetidi lo77idi, giddon meqethinne wooqidabay kumida duufota daaneta.
MAT 23:28 Hessadaka, bolla baggara asas lo77o daaneta. Shin hinte garsan cubbotethinne iitatethi kumis.
MAT 23:29 “Hinteno, cubboto, higge astamaaretonne Farsaaweto, hintena ayye! Hinte nabetas duufo keexeta, qassi xillota duufuwaka loytheeta.
MAT 23:30 Qassi hinte, ‘Nuuni beni nu aawata wode de7idaba gidiyako, entara issife nabeta suuthaa gussokoshin’ yaageeta.
MAT 23:31 Hessa gisho, hinte nabeta wodhida asaa nayta gideysa hinte hinte huuphen markateeta.
MAT 23:32 Hiza, hinte aawati doomidaysa hinte polite.
MAT 23:33 “Ha shooshato, shoosha nayto, hinte Gaanname pirdaafe waanidi attanee?
MAT 23:34 Hessa gisho, heko, taani nabeta, cinca asatanne astamaareta hinteko kiittana. Entafe issota issota hinte wodhananne masqala bolla kaqana. Baggata ayhude woosa keethatan lisson garaafananne katamaape katama gooddana.
MAT 23:35 Hessa gisho, xilluwa Aabela wodhida wodepe doomidi, Xoossa Keethasinne yarsho bessaafe giddon hinte wodhida Baraka na7a Zakaryaasa wode gakanaw hayqida xillo asa ubba gisho, hinte seeretana.
MAT 23:36 Taani hintew tuma odayis; hintenne hinte aawati oothida nagaraas ha pirda ubbay ha yeletethaa bolla gakana.
MAT 23:37 “Yerusalaame, Yerusalaame, nabeta wodhiyare! Xoossay neeko kiittidaysata shuchan caddiyare! Kuttoy ba nayta ba qefen hapheysada taani ne asaa ta qesiyan gechanaw aapun toho koyadina! Shin tana diggadasa.
MAT 23:38 Hiza, heko, hinte keethay kaysi gidana.
MAT 23:39 Taani hintew odayis; ‘Godaa sunthan yeysi anjetidaysa’ hinte gaana gakanaw nam7antho tana be7eketa” yaagis.
MAT 24:1 Yesuusi Xoossa Keethafe keyidi bishin, iya tamaareti iyako yidi, malaaletidi Xoossa Keetha gimbiya bessidosona.
MAT 24:2 Yesuusi entako zaaridi, “Ee! Haysa ubbaa be7eetii? Taani hintew tumaa odayis; shuchi shucha bolla gimbetida mela laaletonna attenna” yaagis.
MAT 24:3 Yesuusi Shamaho zuma bolla uttidashin, iya tamaareti bantarka iyako yidi, “Hessi awude hananeeko nuus oda. Qassi ne yuussasinne wodiya wursethaas malaatay aybee?” yaagidi oychidosona.
MAT 24:4 Yesuusi zaaridi, “Hintena oonika balethonna mela naagetite!
MAT 24:5 Ayis giiko, daro asati ta sunthan, ‘Taani Kiristoosa, Xoossay asaa ashshanaw kiittidaysa’ yaagishe yidi daro asaa balethana.
MAT 24:6 Matan de7iya ola girsaa, haahon de7iya ola wore si7anaw de7eeta. Hessa melabay hananaw bessiya gisho Hirgofite. Shin wursethay buroona.
MAT 24:7 Derey deriyara, issi kawotethay hara kawotethaara oletana. Koshaynne biitta qaaxoy ubba bessan hanana.
MAT 24:8 Hessi ubbay yelo iqethas zooke mela.
MAT 24:9 “He wode asay hintena waayees aathidi immana, qachananne wodhana. Ta sunthaa gisho asa ubbay hintena ixana.
MAT 24:10 He wode daroti ammano aggana. Banta giddon issoy issuwa aathidi immana, issoy issuwa ixana.
MAT 24:11 Qassi daro wordo nabeti dendidi darota balethana.
MAT 24:12 Geellatethi dariya gisho, daro asaa siiqoy irxana.
MAT 24:13 Shin wursethi gakanaw genciya uray attana.
MAT 24:14 Asa ubbaas marka gidana mela Xoossaa kawotethaa Wongelay biitta ubban odetana. Hessafe guye, wursethay yaana.
MAT 24:15 “Hessa gisho, nabiya Daaneli odida dhayo tunatethay geeshsha bessan eqidaysa hinte be7ana. (Akeekiso: Hessi woy guusseko nabbabeysi akeeko!)
MAT 24:16 He wode Yihuda biittan de7eysati deriyako baqato.
MAT 24:17 Keetha huuphen de7iya uray ba son de7iyaba ekanaw soo gelonna baqato.
MAT 24:18 Gaden de7eysi ba ma7uwa ekanaw guye simmofo.
MAT 24:19 He wode qantha maccasatasinne dhanthiya maccasatas daro un7a gidana.
MAT 24:20 Balgon woyko Sambaatan hinte baqatoy gidonna mela Xoossaa woossite.
MAT 24:21 Ayis giiko, sa7i medhetoosape hachi gakanaw hanonnabay, qassi sinthafeka ubbaraka hanonna waayey he wode hanana.
MAT 24:22 Xoossay he gallasata taybuwa guuthonnaako ase gidida oonika attenna. Shin I ba doorida asata gisho, he gallasata taybuwa guuthana.
MAT 24:23 “He wode oonika hintena, ‘Heko, Kiristoosi haysan’ woyko ‘Hinin de7ees’ yaagiko ammanopite.
MAT 24:24 Ayis giiko, wordo Kiristoosatinne wordo nabeti dendana. Entaw danda7etiko, hari attoshin Xoossay dooridaysataka balethanaw gita malaatatanne malaalsiyabata oothana.
MAT 24:25 Akeekite, taani hintew haysa kasetada odas.
MAT 24:26 “Hessa gisho, asay hinteko, ‘Heko, Kiristoosi bazzon de7ees’ giiko, yaa boopite. Woyko hinteko, ‘Heko, qol7an de7ees’ giiko, entaba ammanopite.
MAT 24:27 Ayis giiko, wol7anthi salon wol7amidi, dolohape wuloha gakanaw benteysada, Asa Na7aa yuussay hessada hanana.
MAT 24:28 “Bawuti de7iyason ankoti shiiqana.
MAT 24:29 “He wode he waaye gallasatape guye, ellesidi away dhumana, ageenay ba poo7uwa diggana. Xoolintoti salope wodhana, qassi salon de7iya wolqati buqettana.
MAT 24:30 He wode Asa Na7aa yuussaa mallay saluwa bolla bentana. Sa7an de7iya asi ubbay yeekana. Qassi Asa Na7ay, wolqaranne gita bonchuwara saluwa shaara giddora yishin enti be7ana.
MAT 24:31 I ba kiitanchota gita moyze punora kiittana. Enti sa7aa oyddu baggaa bidi, ha gaxape ya gaxa gakanaw de7iya iyaw dooretidaysata shiishana.
MAT 24:32 “Balase mithafe tamaarite. Iya aacada hayxiya wode torchey matatidaysa hinte ereeta.
MAT 24:33 Hessadaka, hinte ha ubbaba be7iya wode Yesuusi matidi pengen de7eysa erite.
MAT 24:34 Taani hintew tuma odayis; ha ubbabay poletana gakanaw, ha yeletethay aadhenna.
MAT 24:35 Saloynne sa7i aadhana, shin ta qaalay ubbaka aadhenna.
MAT 24:36 “He gallasaanne he saatiya salon de7iya ta aawape attishin, hari salo kiitanchota gidin woyko Na7aa gidin oonika erenna.
MAT 24:37 Asa Na7aa yuussay, Nohe wode hanidaysa mela gidana.
MAT 24:38 He wode dhayo haathay yaanape sinthe Nohey markabiyan gelida gallasa gakanaw, asay mishenne uyishe, ekishenne gelishe gam7is.
MAT 24:39 Dhayo haathay yidi, enta ubbaa dhaysana gakanaw akeekibokona. Asa Na7aa yuussayka hessada hanana.
MAT 24:40 “He wode nam7u asati gaden oothana. Entafe issoy eketana, hankoy attana.
MAT 24:41 Nam7u maccasati issife gaaccana. Entafe issiniya eketana hankiya attana.
MAT 24:42 “Hiza, hinte Goday ay gallas yaaneko hinte eronna gisho, minnidi naagite.
MAT 24:43 Shin kaysoy qammafe ay saaten yaaneko goday eriyako, ba keethay booketonna mela barkidi naaganashin.
MAT 24:44 Hessadaka, Asa Na7ay hinte qoponna saaten yaana gisho, hinteka giigidi de7ite.
MAT 24:45 “Yaatin, ba soo asaas kathaa koshshiya wodiyan immana mela iya goday doorida ammantheysinne wozanaama aylley oonee?
MAT 24:46 I ba goday kiittidaysa oothishin iya goday yidi demmiya aylley anjetidaysa.
MAT 24:47 Taani hintew tuma odayis; goday he aylliya babaa ubbaa bolla shuumana.
MAT 24:48 Shin he aylley iita gidiko, ‘Ta goday gam7idi yaana’ yaagidi ba wozanan qopidi,
MAT 24:49 ba lagge oosanchota wadho doomiko, mathoteysatara miikonne uyiko,
MAT 24:50 he aylliya goday I qoponna gallasinne I eronna saaten,
MAT 24:51 yidi iya qanxerethana. Iya qaada cubbotara oothana. He bessan iyaw yeehonne ache garcethi gidana.
MAT 25:1 “He wode salo kawotethay banta xompe oykidi, macho ehanaw bida addiya mokanaw keyida tammu geela7ota daanees.
MAT 25:2 Entafe ichashati eeya, qassi ichashati cinca.
MAT 25:3 Eeyati xompe oykidosona, shin guzha zayte oykibookona.
MAT 25:4 Shin cincati banta xompenne hara guzha zayte oykidosona.
MAT 25:5 Machiw ekeysi gam7in, he geela7oti bantana dhiskoy oykin dhiskidosona.
MAT 25:6 “Giddi bilahe gidiya wode, ‘Heko, machiw eheysi gakis, iya mokanaw keyite’ giya gita caboy si7etis.
MAT 25:7 “He wode he geela7oti ubbay barkidi, banta xompiya giigisidosona.
MAT 25:8 Eeyati cincatako, ‘Nu xompey to7ana haniya gisho, hinte zaytiyape nuus immerketi’ yaagidosona.
MAT 25:9 “Shin cincati zaaridi, ‘Akay, nuusinne hintew gidiya zaytey baawa. Hessa gisho, bidi hintew shammidi ekite’ yaagidosona.
MAT 25:10 Eeya geela7oti zayte shammanaw bin, machiw ekeysi puttu gis. Giigeti uttida ichashu geela7oti iyara issife yaagano keethi gelidosona; kareyka gordeti aggis.
MAT 25:11 “Guyepe hanko geela7oti yidi, ‘Godaw, godaw, nuus dooyarki’ yaagidosona.
MAT 25:12 “Shin I zaaridi, ‘Taani hintew tuma odayis; ta hintena erike!’
MAT 25:13 “Hiza, Asa Na7ay yaana gallasaa woyko saatiya hinte eronna gisho barkidi naagite.
MAT 25:14 “Xoossaa kawotethay ba oosanchota xeegidi baw de7iyaba entaw sheedhidi oge baanaw keyida uraa daanees.
MAT 25:15 Entaw huuphen huuphen enta wolqaa mela issuwas ichashu karxiite bira, issuwas nam7u karxiite bira qassi issuwas issi karxiite bira immidi ba ogiya bis.
MAT 25:16 Ichashu karxiite bira ekida aylley ellesi bidi zal7idi, hara ichashu karxiite bira wodhisis.
MAT 25:17 Hessadaka, qassi nam7u karxiite bira ekida aylley hara nam7u karxiite bira wodhisis.
MAT 25:18 Shin issi karxiite bira ekidaysi bidi, olla bookidi, ba godaa miishiya moogis.
MAT 25:19 “Daro wodepe guye he aylleta goday yidi, ba miishiya entara salla7is.
MAT 25:20 Ichashu karxiite bira ekida aylley yidi, hara ichashu karxiite bira ehidi, ‘Ta godaw, neeni taw ichashu karxiite bira immadasa. Shin taani hara ichashu karxiite bira wodhisas’ yaagis.
MAT 25:21 Iya goday, ‘Zamboy! Neeni lo77onne ammanthiya aylle; neeni guuthaban ammanetadasa. Taani nena darobaa bolla shuumana; haa gelada ne godaara ufayta’ yaagis.
MAT 25:22 “Qassi nam7u karxiite bira ekidaysi yidi, ‘Ta godaw, neeni taw nam7u karxiite bira immadasa. Shin taani hara nam7u karxiite bira wodhisas’ yaagis.
MAT 25:23 Iya goday, ‘Zamboy! Neeni lo77onne ammanthiya aylle; neeni guuthaban ammanetadasa. Taani nena darobaa bolla shuumana; haa gelada ne godaara ufayta’ yaagis.
MAT 25:24 “Qassi issi karxiite bira ekidaysi yidi, ‘Ta godaw, neeni zeronna bessafe cakiyanne dharcona bessafe maxiya iita asi gideysa taani erayis.
MAT 25:25 Hessa gisho, yayyada ne bira biittan moogas. Ne miishey haysish’ yaagis.
MAT 25:26 “Iya goday zaaridi, ‘Ha iita azalla aylliyaw, taani zeronna bessafe cakeysanne dharcona bessafe maxiya asi gideysa eradasa.
MAT 25:27 Yaatin, neeni ta miishiya banken wothidaba gidiyako, taani simmiya wode ta miishiya wodhera ekanaysa diggadasa.
MAT 25:28 Hessa gisho, miishiya iyape ekidi, tammu karxiite biri de7eysas immite.
MAT 25:29 Ayis giiko, de7iya ubbaas guzhetananne darana. Shin baynaysafe hari attoshin, he iyaw de7iya guuthiyaka eketana.
MAT 25:30 Ha maaddonna aylliya kare dhumaa kessi yeggite. Yan iyaw yeehonne ache garcethi gidana’ yaagis.
MAT 25:31 “Asa Na7ay, kiitancho ubbatara, ba bonchuwara yaa wode I ba boncho kawotetha araata bolla uttana.
MAT 25:32 Biittan de7iya asi ubbay iya sinthe shiiqana. Henthanchoy dorsata deeshatape shaakeysada I he asaa nam7an shaakana.
MAT 25:33 Qassi dorsata ushacha baggara deeshata haddirsa baggara essana.
MAT 25:34 “Hessafe guye, kawoy ushacha baggara de7eysatako haysada yaagana: ‘Ta Aaway anjidaysato, ha yidi sa7i medhetiya wodepe doomidi hintew giigida kawotetha laattite.
MAT 25:35 Ayis giiko, taani koshatin muzideta, saamotin ushshideta, eretonna imatha asi gidada bin mokideta,
MAT 25:36 kallotin mayzideta, hargetin hargisideta, qashetin tana oychideta’ yaagana.
MAT 25:37 “Hessafe guye, xilloti zaaridi, ‘Godaw, neeni koshatin awude be7idi muzido? Woyko neeni saamotin awude be7idi ushshido?
MAT 25:38 Neeni imathe gidada yin awude be7idi mokido? Woyko neeni kallotin awude mayzido?
MAT 25:39 Neeni hargin woyko qashetin neeko bidi nena awude oychido?’ yaagana.
MAT 25:40 Kawoy zaaridi, ‘Taani hintew tuma odayis; hinte tana kaalliya ha ubbaafe guuxeysas oothidaysa taw oothideta’ yaagana.
MAT 25:41 “He wode haddirsa baggara de7eysatako, ‘Ha baadetidaysato, ta matape haakite. Xalahesinne iya kiitanchotas giigida merinaa taman biite.
MAT 25:42 Ayis giiko, koshatin tana muzibeeketa; saamotin ushshibeeketa.
MAT 25:43 Taani imathe gidada bin tana mokibeketa, kallotin mayzibeeketa, hargininne qashetin tana oychibeeketa’ yaagana.
MAT 25:44 “He wode enti, ‘Godaw, neeni koshatin woyko saamotin woyko imathe gidada bin woyko kallotin woyko hargin woyko qashetin be7idi nena awude maaddonna ixido?’ yaagidi zaarana.
MAT 25:45 “He wode kawoy zaaridi entako, ‘Taani hintew tuma odayis; hinte tana kaalliya ha ubbaafe guuxeysa maaddonna ixidaysi, tana maaddonna ixidaysa’ yaagana.
MAT 25:46 Hessa gisho, he asati merinaa pirdas qassi xilloti merinaa de7uwas baana” yaagis.
MAT 26:1 Yesuusi ha timirtiya ubbaa wursida wode ba tamaaretako,
MAT 26:2 “Nam7u gallasape guye, Paasika Ba7aale bonchiya gallas gideysa ereeta. He gallas Asa Na7i masqale bolla kaqetanaw asa kushen aadhidi imetana” yaagis.
MAT 26:3 He wode kahine halaqatinne cimati, Qayyaafa geetetiya kahine halaqaa keethan shiiqidi,
MAT 26:4 asi eronna Yesuusa oykidi, wodhanaw maqetidosona.
MAT 26:5 Shin enti, “Asay ooshshi kessonna mela gidi, Paasika bonchiya gallas hessa oothoko” yaagidosona.
MAT 26:6 Yesuusi Bitaane kataman baro hargida Simoona son de7ees.
MAT 26:7 Yesuusi imatuwa bolla de7ishin issi maccasiya albasxiroosa philqaaxe kumetha daro al7o shitto eka yada Yesuusa huuphen tigasu.
MAT 26:8 Shin Yesuusa tamaareti hessa be7idi hanqetidi, “Ha shittoy coo iitey aybisee?
MAT 26:9 Ha shittoy al7o gaten bayzetidi, miishey manqotas imetanaw danda7etees” yaagidosona.
MAT 26:10 Yesuusi enti geysa eridi, entako, “Ha maccasiw ayis waaysetii? Iya taw lo77oba oothasu.
MAT 26:11 Manqoti ubba wode hintera daana. Shin taani hintera ubba wode de7ike.
MAT 26:12 Iya ha shittuwa ta bolla tigidaysi tana mooganaw giigisanaasa.
MAT 26:13 Taani hintew tuma odayis; biitta ubban ha Wongelay sabbaketiya bessan awunka, asay iyo hassayana mela iya oothidaysi odetana” yaagis.
MAT 26:14 He wode tammanne nam7u Yesuusa tamaaretape issoy, Asqoroota Yihuda geeteteysi kahine halaqatako,
MAT 26:15 bidi, “Taani hintew Yesuusa aatha immiko, hinte taw ay immanee?” yaagidi enta oychis. Enti zoretidi hastamu bira santime immidosona.
MAT 26:16 Hessafe guye, Yihudi Yesuusa aathidi immanaw injetiya wode wochees.
MAT 26:17 Uytha Ba7aale bonchiya koyro gallas, Yesuusa tamaareti iyako yidi, “Paasika bonchiya gallas neeni maana kathi nuuni awun giigisino?” yaagidosona.
MAT 26:18 Yesuusi entako, “Kataman de7iya addiyako bidi, ‘Astamaarey, taw wodey gakida gisho, ta tamaaretara Paasika bonchiya gallasa ne son aathana yaagees’ yaagite” yaagis.
MAT 26:19 Iya tamaareti Yesuusi bantana kiitidaysada oothidi, Paasika Ba7aale gallas maana kathaa giigisidosona.
MAT 26:20 Sa7ay omarsiya wode, Yesuusi tammanne nam7u hawaaretara kathi maanaw uttis.
MAT 26:21 Enti mishin, Yesuusi entako, “Taani hintew tuma odayis; hintefe issi uray tana aathidi immana” yaagis.
MAT 26:22 Enti daro dagammidi, issoy issoy, “Godaw, tuma taneshsha?” gidi iya oychidosona.
MAT 26:23 Yesuusi zaaridi, “Ba kushiya taara issife shaatiyan yeddeysi I tana aathidi immana.
MAT 26:24 Asa Na7ay, Xoossaa qaalan iyaw xaafetidaysada hayqana. Shin Asa Na7aa aathidi immiya uraa ayye! He uray yeletonna attidaako iyaw lo77oshin” yaagis.
MAT 26:25 Iya aathidi immanaw de7iya Yihudi zaaridi, “Astamaariyaw, neeni gey taneyee?” yaagis. Yesuusi zaaridi, “Neeni ne huuphen gadasa” yaagis.
MAT 26:26 Enti mishin, Yesuusi uythaa ekidi Xoossaa galatis. He uythaa menthidi ba tamaaretas immidi, “He7ite, miite, haysi ta ashuwa” yaagis.
MAT 26:27 Xuu7aa ekidi, Xoossaa galatis. Entaw immidi, “Ubbay haysafe uyite.
MAT 26:28 Haysi daro asa nagara atotethas mela gukiya ta suuthaa. Ha suuthay Xoossay hintera geliya caaquwa mintheysa.
MAT 26:29 Shin taani hintew odayis; taani ta Aawa kawotethan ooratha woyne ushsha hintera uyana gallasa gakanaw nam7antho ha woyne ushsha uyike” yaagis.
MAT 26:30 Galata mazmure yexidaape guye, Shamaho zuma bidosona.
MAT 26:31 He wode Yesuusi entako, “ ‘Xoossay henthanchuwa shocana dorsatika laaletana’ geetetidi Xoossa qaalan xaafetidaysa mela hachi qamma hinte ubbay tana aggidi baqatana.
MAT 26:32 Shin taani hayqope dendidaape guye hintefe sinthatada Galila baana” yaagis.
MAT 26:33 Phexroosi zaaridi, “Enti ubbay nena aggidi baqatikoka, taani nena aggike” yaagis.
MAT 26:34 Yesuusi Phexroosako, “Taani new tuma odayis; hachi qamma kuttoy waassanaape sinthe neeni tana heedzu toho kaddana” yaagis.
MAT 26:35 Phexroosi zaaridi, “Taani neera issife hayqope attishin, nena ubbaka kaddike” yaagis. Hanko iya tamaareti ubbayka hessada gidoosona.
MAT 26:36 Yaatidi, Yesuusi ba tamaaretara Geetasemaane geetetiya bessaa bidi, entako, “Taani hini bada Xoossaa woossashana, hinte haysan uttite” yaagis.
MAT 26:37 Phexroosanne Zabdiyoosa nayta nam7ata baara eki bidi daro azzanonne un7etethi doomis.
MAT 26:38 Qassika entako, “Taani hayqos gathiya un7a un7etas. Haysan taara gam7itenne minnidi naagite” yaagis.
MAT 26:39 Guuthi sinthe bidi biittan gufannidi, “Ta Aawaw, danda7etiyaba gidiko ha waaye xuu7aa taape digga. Shin ne sheney hanope attishin, ta sheney hanopo” yaagidi Xoossaa woossis.
MAT 26:40 Yesuusi ba tamaaretako simmi yidi enti dhiskidashin demmis. Phexroosako, “Hinte issi saatekoka dhiskonna taara minnanaw danda7ibeeketii?
MAT 26:41 Paacen hinte gelonna mela barkidi naagitenne Xoossaa woossite. Hintew lo77o amoy de7ees, shin hinte daaburancho asi” yaagis.
MAT 26:42 Yesuusi qassi nam7antho bidi, “Ta Aawaw, taani ha waaye xuu7ape uyonna de7ishe aadhanaw danda7etonnaba gidiko ne sheney hano” yaagidi Xoossaa woossis.
MAT 26:43 Qassika simmi yaa wode iya tamaareta ayfiya dhiskoy goozin, zin7idashin demmis.
MAT 26:44 Qassika enta aggidi, bidi kase qaala zaari heedzantho woossis.
MAT 26:45 Hessafe guye, ba tamaaretako yidi, “Ha77i gakanaw dhisketinne shempetii? Heko, Asa Na7i, nagaranchota kushen aadhidi imetiya saatey gakis.
MAT 26:46 Dendidi yedhite, tana aathidi immeysi haysish gakis” yaagis.
MAT 26:47 Yesuusi buroo hessa haasayishin, tammanne nam7u tamaaretape issoy, Yihudi gaki wodhis. Kahine halaqatinne deriya cimati kiitida daro asati mashshenne xam7a oykidi iyara issife yidosona.
MAT 26:48 Yesuusa aathidi immiya Yihudi he daro asaako, “Taani yeereysi hinte koyeysi iya, iya oykite” yaagidi malla immi wothis.
MAT 26:49 Iiraka Yesuusako shiiqidi, “Astamaariyaw, saro de7ay” yaagidi iya yeeris.
MAT 26:50 Yesuusi iyako, “Ta laggiyaw, neeni oothanaba ootha agga” yaagis. Hessafe guye, shiiqidi, Yesuusa oykidosona.
MAT 26:51 Yesuusara de7eysatape issoy ba mashsha shoddidi kahine halaqaa aylliya shocidi, iya haythaa qanxidi yeggis.
MAT 26:52 Shin Yesuusi, “Ne mashsha guye shoohuwan zaara. Ayis giiko, mashsha shoddiya ubbay mashshan hayqana.
MAT 26:53 Ta, ta Aawa woossiyako daro mukulun taybetiya kiitanchota yeddanaw danda7onnaba new daanii?
MAT 26:54 Yaatin, Xoossaa qaalan hessada hananaw bessees geetetidaysi waanidi poletanee?” yaagis.
MAT 26:55 He saatiyan, Yesuusi he shiiqida daro asaako, “Tana panga oothidi oykanaw mashshanne xam7a oykidi yidetii? Taani xoossa keethan gallas gallas tamaarsashe hintera de7iya wode tana oykibeeketa.
MAT 26:56 Shin haysi ubbay hanidaysi nabeti Xoossaa qaalan xaafidaysi poletana melasa” yaagis. He wode iya tamaareti ubbay iya aggidi baqatidosona.
MAT 26:57 Yesuusa oykidaysati kahine halaqaa Qayyaafako iya efidosona. Yan higge astamaaretinne biitta cimati shiiqidi de7oosona.
MAT 26:58 Shin Phexroosi kahine halaqaa zabbaa gakanaw haahon iya kaallis. Iya wursethay shaaketana gakanaw zabbaa gelidi naageysatara uttis.
MAT 26:59 Kahine halaqatinne shiiqida asa ubbay Yesuusa wodhanaw iya bolla wordo marka koydosona.
MAT 26:60 Daroti yidi iya bolla wordo marka markatidosona, shin aykoka demmibookona. Guyepe nam7u asati yidi,
MAT 26:61 “Ha uray, ‘Taani Xoossa Keetha laallada heedzu gallasan zaara keexanaw danda7ayis’ yaagis” yaagidosona.
MAT 26:62 Kahineta halaqay dendi eqidi Yesuusako, “Haysati nena mootiya mootuwas neeni zaariyabay baawee?” yaagis.
MAT 26:63 Shin Yesuusi si77i gis. Qassika kahine halaqay, “Taani nena de7o Xoossaa sunthan oykayis; neeni Xoossaa Na7aa Kiristoosa gidiko nuus oda” yaagis.
MAT 26:64 Yesuusi zaaridi, “Neeni ne huuphenka gadasa. Shin taani hintew odayis; hizape guye, Asa Na7ay wolqaama Xoossaa ushacha baggan uttidashin, qassi salo shaarara yishin hinte be7ana” yaagis.
MAT 26:65 He wode kahine halaqay daro yilotidi ba ma7uwa peedhidi, “Haysa be7ite Xoossaa cayis! Nuna hara marka ay koshshii? I ha77i cayidaysa hinte si7ideta.
MAT 26:66 Hinte qofay aybee?” yaagis. Entika, “Iyaw hayqo bessees” yaagidi zaaridosona.
MAT 26:67 Yaatin, enti iya som7on cuttidi dechidosona. Harati iya baqidi,
MAT 26:68 “Kiristoosa! Nena dechiday oonee? Ane nuus oda” yaagidosona.
MAT 26:69 Phexroosi zabban uttidashin, issi aylliya iyako yada, “Neenika Galila Yesuusara issife de7aasa” yaagasu.
MAT 26:70 Shin I enta ubbaa sinthan he aylleko, “Neeni giyabay aybeko taani erike” yaagidi kaddis.
MAT 26:71 Qassi bidi dirsaa pengeko gakishin hara aylliya iya be7ada, yan de7iya asaako, “Ha uray Naazirete Yesuusara de7ees” yaagasu.
MAT 26:72 Phexroosi nam7antho caaqidi, “Taani he uraa erike!” yaagis.
MAT 26:73 Guuthu gam7ishin, yan eqida asati Phexroosako yidi, “Neka tuma entara issife de7aasa; neeni ne odan eretasa” yaagidosona.
MAT 26:74 Hessafe guye, Phexroosi, “Taani he uraa erike!” yaagidi, bana baadethinne caaqo doomis. He wode iiraka kuttoy waassi aggis.
MAT 26:75 Yesuusi iyako, “Neeni kuttoy waassanaape sinthe tana heedzu toho kaddana” gidaysa Phexroosi akeekidi, kare keyidi iita yeeho yeekis.
MAT 27:1 Wonta guura kahine halaqatinne biitta cimati ubbay Yesuusa wodhisanaw maqetidosona.
MAT 27:2 Enti Yesuusa qachi efidi deriya haariya Philaxoosas aathidi immidosona.
MAT 27:3 He wode Yesuusa oythida Yihudi, Philaxoosi Yesuusa bolla pirdidaysa be7idi, qiirotidi, he hastamu bira santime kahine halaqatasinne deriya cimatas guye zaaris.
MAT 27:4 “Taani xillo asi hayqos aatha immada nagara oothas” yaagis. Shin enti, “Hessi nu meto gidenna ne meto” yaagidosona.
MAT 27:5 Yihudi miishiya Xoossa Keethan yeggi aggidi enta matape bidi, suletidi hayqis.
MAT 27:6 Kahine halaqati miishiya ekidi, “Ha miishey suutha miishe gidiya gisho, nuuni Xoossa Keethaa miishiyara gatheysi woga gidenna” yaagidosona.
MAT 27:7 Hessafe guye, issife zoretidi, bete asi mooganaw mana biitta shammidosona.
MAT 27:8 Hessa gisho, he gadey hachi gakanaw suutha biitta geetetidi xeegetees.
MAT 27:9 Nabiya Ermiyaasi, “Isra7eele asay iyaw qanxanaw gammatida hastamu bira santime ekidosona.
MAT 27:10 Goday tana kiitidaysada mana biitta shammanaw immidosona” gidaysi he wode poletis.
MAT 27:11 Yesuusi deriya haariya Philaxoosa sinthe shiiqin, Philaxoosi iyako, “Neeni Ayhude kawo?” yaagidi oychis. Yesuusi zaaridi, “Ne gadasa” yaagis.
MAT 27:12 Kahine halaqatinne biitta cimati iya mootiya wode entaw aybi zaaroka immibeenna.
MAT 27:13 He wode Philaxoosi Yesuusako, “Haysati nena mootiya mootuwa ubbaa si7ikii?” yaagis.
MAT 27:14 Yesuusi hari attoshin, issi qaalaka zaaronna ixin, deriya haareysi daro malaaletis.
MAT 27:15 Deriya haareysi laythan laythan Paasika Ba7aale bonchiya gallasan, asay koyiya issi asi qashope birshiya wogi de7ees.
MAT 27:16 He wode issi Barbaana Yesuusa geetetiya daro eretida iita asi qasho keethan de7ees.
MAT 27:17 Hessa gisho, daro asay shiiqidi de7ishin Philaxoosi, “Taani hintew Barbaana billoye woyko Yesuusa geetetiya Kiristoosa billo?” yaagidi asaa oychis.
MAT 27:18 I hessa giday enti qanaatidi Yesuusa oythidaysa eriya gishosa.
MAT 27:19 Philaxoosi pirda keethan uttidashin, iya machiya, “Taani hachi qamma amuhon iyabaa daro waayetashe aqida gisho, he xillo uraa bolla aybibaaka oothofa” yaagada kiittasu.
MAT 27:20 He wode kahine halaqati, “Barbaani bileto, Yesuusi hayqo” gidi Philaxoosa woossana mela asaa cimmidosona.
MAT 27:21 Philaxoosi zaaridi, “Taani enta nam7aafe hintew oona billana mela koyeetii?” yaagidi oychis. Enti, “Barbaana billana mela koyoos” yaagidosona.
MAT 27:22 Philaxoosi, “Yaatin, Yesuusa geetetiya Kiristoosa waato?” yaagidi enta oychis. Ubbay zaaridi, “Masqaliya bolla iya kaqa” yaagidosona.
MAT 27:23 Philaxoosi asaako, “Ayis? I ay iitabaa oothidee?” yaagidi oychis. Shin asay kaseysafe aathidi, “Masqaliya bolla iya kaqa” gidi waassidosona.
MAT 27:24 Ooshshi denthethofe hara aybibaaka oothanaw danda7etonaysa Philaxoosi be7idi, haathe ekidi, “Ha uraa hayquwan taani de7ike. Hessa oothey hintena” yaagidi asaa sinthan ba kushiya meecetis.
MAT 27:25 Asa ubbay zaaridi, “Iya suuthaa gomey nunanne nu nayta gako” yaagidosona.
MAT 27:26 Yaatin, Philaxoosi Barbaana entaw billidi, Yesuusa lisson garaafidi, masqaliya bolla kaqetidi hayqana mela entaw aathidi immis.
MAT 27:27 Hessafe guye, Philaxoosa wotaadareti Yesuusa deriya haareysa soo eki efin, wotaadareti ubbay iya yuushuwan eqidosona.
MAT 27:28 Iya afilaa qaari ekidi zo7o afila mayzidosona.
MAT 27:29 Qassi aguntha kallacha giigisidi, iya huuphen wothidosona. Iya ushacha kushiyan mayre xam7a oythidi, iya sinthan gulbatidi, “Ayhude kawaw, mukulu laythi kawota!” yaagidi, iya bolla qelqisidosona.
MAT 27:30 Iya bolla cuttidosona. He mayre xam7aa ekidi, iya huuphen shocidosona.
MAT 27:31 Enti iya bolla qelqisidaape guye, zo7o afilaa iyape qaari ekidi, iya afilaa iya mayzidosona. Masqaliya bolla iya kaqanaw eki efidosona.
MAT 27:32 Enti kare keyidi, issi Simoona geetetiya Qereena biitta asi demmidi, Yesuusa masqaliya wolqan toossidosona.
MAT 27:33 Golgota geetetiya bessi gakidosona. “Golgota” guussay “Guugge bessi” guussu.
MAT 27:34 Hessan enti ciiye walaketida woyne ushsha uyo gidi iyaw immidosona. Shin I hessa ganxi ekidi, uyonna ixis.
MAT 27:35 Enti masqaliya bolla iya kaqidaysafe guye, iya afilaa shaakidi, saama yeggidi ekidosona.
MAT 27:36 Hessafe guye, yan uttidi iya naagidosona.
MAT 27:37 Qassi, “Haysi Ayhude Kawa Yesuusa” giya mooto xuufiya iya huuphe son wothidosona.
MAT 27:38 Yesuusara he wode nam7u pangata issuwa iyape ushacha baggan, hankuwa iyape haddirsa baggara, masqaliya bolla kaqidosona.
MAT 27:39 Ogiyara aadhiya asay Yesuusa boridi, iya bolla cuttishe,
MAT 27:40 “Xoossa Keethaa laallada heedzu gallasa giddon keexeyso, nena ashsha. Neeni Xoossaa Na7a gidiko, ane masqaliya bollafe wodha” yaagidosona.
MAT 27:41 Hessadaka, kahine halaqati, higge astamaaretinne biitta cimati issife Yesuusa bolla qelqisidosona. Haysada yaagidosona:
MAT 27:42 “Harata ashshis, shin bana ashshanaw danda7ibeenna. I Isra7eele kawo gidiko, ane masqaliya bollafe ha77i wodho, nuka iya ammanana.
MAT 27:43 Xoossan I ammanetees, Xoossay iya ashshanaw koyko ane ashsho. Ayis giiko, I bana, ‘Taani Xoossaa Na7a’ gees” yaagidosona.
MAT 27:44 Qassi hari attoshin, iyara masqaliya bolla kaqetida pangatika hessada gidi iya bolla qelqisidosona.
MAT 27:45 Usupun saatepe bidi, uddufun saate gakanaw biitta ubbay dhumis.
MAT 27:46 Uddufun saate gidiya wode Yesuusi, “Elohe, Elohe, lama sabaqtanii?” gidi gita waaso waassis. “Elohe, Elohe, lama sabaqtanii?” geysa birshethay “Ta Xoossaw, ta Xoossaw, tana ayis aggadii?” guussu.
MAT 27:47 Hessan eqida asaape issoti issoti hessa si7idi, “Ha uray Eeliyaasa xeegees” yaagidosona.
MAT 27:48 Iira entafe issoy woxi bidi, isponje ekidi, caala woyne ushsha kunthis. Hessa mayre xam7a xeeran wothidi ushshanaw iya doonako shiishis.
MAT 27:49 Shin hankoti, “Naaga, Eeliyaasi iya ashshanaw yaaneko ane be7oos” yaagidosona.
MAT 27:50 Yesuusi nam7antho gita waaso waassidi, hayqi aggis.
MAT 27:51 He saaten xoossa keethan kaqetida magaraajoy qommofe duge gakanaw nam7u keyidi, peedheti wodhis. Biittay qaaxis, zaallayka phalqetis.
MAT 27:52 Duufoti dooyetin Xoossaa asatape daroti hayqope dendidosona.
MAT 27:53 Enti duufope keyidi, Yesuusi hayqope dendidaape guye, geeshsha katamaa bidosona; yan enti daro asaas bentidosona.
MAT 27:54 Mato halaqaynne iyara Yesuusa naagiya wotaadareti biittay qaaxidaysanne hessan hanidaba be7ida wode daro yayyidi “Tuma haysi Xoossaa Na7aa” yaagidosona.
MAT 27:55 Hessan daro maccasati, Galilape doomidi Yesuusa haggaazishe kaallidaysati haahon eqidi xeelloosona.
MAT 27:56 Enta giddon Magdela Mayraama, Yayqoobanne Yoosefa aayiya Mayraamanne Zabdiyoosa machiya de7oosona.
MAT 27:57 Sa7ay omarsiya wode Yoosefa geetetiya issi dure aday, Armaate katamape yis. I ba huuphenka Yesuusa kaalliya asi.
MAT 27:58 Yoosefi Philaxoosako bidi, Yesuusa aha ekanaw woossis. Philaxoosi ahay Yoosefas imetana mela kiittis.
MAT 27:59 Yesuusa aha ekidi, geeshsha moogo afilan xaaxis.
MAT 27:60 Baw moogetanaw shuchafe woocida ooratha gongolon iya aha wothis. Qassi he gongoluwa doonan gita shuchaa gondorsi wothidi, aggidi bis.
MAT 27:61 Magdela Mayraamanne hanko Mayraama he gongoluwako simmidi uttidosona.
MAT 27:62 Wontethe Sambaata gallas, kahine halaqatinne Farsaaweti Philaxoosako yidi, haysada yaagidosona:
MAT 27:63 “Godaw, ha wordanchoy paxa de7ishe, ‘Taani heedzu gallasape guye, hayqope dendana’ yaagidaysi nuus hassayetis.
MAT 27:64 Hessa gisho, I moogetida gongoluwa heedzu gallas gakanaw, minthi naagana mela kiittarki. Hessi hanonna ixiko, iya tamaareti bidi iya aha kaysi dhaysidi, ‘Hayqope dendis’ yaagidi asaas odiko nam7antho balesoy koyroysafe ubba haa iitana” yaagidosona.
MAT 27:65 Philaxoosi entako, “Hintew naageysati de7oosona; bidi hintew danda7etida mela naagisite” yaagis.
MAT 27:66 Hessa gisho, enti bidi duufoy boshetonna mela shuchaa bolla maatame wothidi wotaadaretan naagisidosona.
MAT 28:1 Sambaati aadhin, wogga wode wonta guura, Magdela Mayraamanne hanko Mayraama Yesuusi moogetida gongoluwa be7anaw bidosona.
MAT 28:2 Qoponna wolqaama biitta qaaxoy hanis. Godaa kiitanchoy salope wodhidi duufuwa doonan de7iya shuchaa gondorsidi iya bolla uttis.
MAT 28:3 Iya malay wol7anthi daanees. Iya ma7oyka shachada boothi.
MAT 28:4 Naageysati kiitanchuwa be7idi, yashshan kokoridi, hayqida asada hanidosona.
MAT 28:5 Kiitanchoy maccasatako, “Hinte masqaliya bolla kaqetida Yesuusa koyeysa taani eriya gisho, yayyofite.
MAT 28:6 I kase odidaysa mela hayqope dendis; haysan deenna. Haa yidi iya zin7isida bessaa be7ite.
MAT 28:7 Hinte ha77i ellesi bidi, iya tamaaretas, ‘Yesuusi hayqope dendis. Qassi I hintefe sinthatidi Galila baana; hinte iya yan be7ana’ yaagidi odite. Taani hintew haysa odanaw yas” yaagis.
MAT 28:8 Enti yayyishenne daro ufaytishe, duufuwa matape ellessidi bidi, iya tamaaretas odanaw woxidosona.
MAT 28:9 Qoponna Yesuusi entara gahetidi entako, “Saroy hintew gido” yaagis. Enti iyako shiiqidi, iya tohuwa oykidi iyaw goyinnidosona.
MAT 28:10 He wode Yesuusi entako, “Yayyofite; bidi ta tamaareti Galila baana mela entaw odite. Enti yan tana be7ana” yaagis.
MAT 28:11 He maccasati bishin, duufuwa naagiya wotaadaretape baggati katamaa bidi, hanidaba ubbaa kahine halaqatas odidosona.
MAT 28:12 Kahine halaqatinne cimati shiiqidi zoretidi, wotaadaretas daro miishe immidi,
MAT 28:13 “ ‘Nuuni dhiskidashin iya tamaareti qamma yidi, iya aha kaysidosona’ yaagite.
MAT 28:14 Ha odaa deriya haareysi si7iko, hessi hinte bala gidonnaysa nuuni iya odi ammanthana. Hintena aybika Hirgisopo” yaagidosona.
MAT 28:15 Wotaaddareti miishiya ekidi, kiitetidaysada oothidosona. Ha oday Ayhude matan hachi gakanaw odetishe de7ees.
MAT 28:16 Tammanne issi iya tamaareti Yesuusi bantana biite gida Galila Zumaa bolla Keyidosona.
MAT 28:17 Yan enti iya be7ida wode iyaw goyinnidosona, shin entafe issoti issoti sidhidosona.
MAT 28:18 Yesuusi entako shiiqidi, “Saloninne sa7an maati ubbay taw imetis.
MAT 28:19 Hiza, hinte ubba bessi bidi, Aawa, Na7aa, Geeshsha Ayyaana sunthan ase ubbaa xammaqidi tana kaalleyisata oothite.
MAT 28:20 Taani hintena kiittidaba ubbaa enti naagana mela enta tamaarsite. Taani wodiya wursethaa gakanaw ubba wode hintera de7ayis” yaagis.
MAR 1:1 Haysi Xoossa Na7a Yesuus Kiristoosa wongelaa doomethi.
MAR 1:2 Nabiya Isayaasi xaafida maxaafan Xoossay, “Heko, taani ta kiitanchuwa taani neepe sinthe yeddana. I ne ogiya giigisana.
MAR 1:3 Issoy mela biittan ba qaala dhoqu oothidi, ‘Godaa ogiya giigisite; I hemetana horoga iyaw suurisite gis’ ” yaagees.
MAR 1:4 Xammaqiya Yohaanisi asaa xammaqishe, “Hinte nagaraape simmidi xammaqetite; Xoossay hinte nagaraa atto gaana” yaagidi qaala odishe mela biittafe yis.
MAR 1:5 Yihuda biittan de7iya asa ubbaynne Yerusalaame katamaa asa ubbay Yohaanisako yoosona. Banta nagara paaxin, Yohaanisi enta Yordaanose Shaafan xammaqees.
MAR 1:6 Yohaanisi gimale ikisepe dadetida afila ma77ees. Ba xeessan dafo dancees; qassi boolenne degera eessi mees.
MAR 1:7 Yohaanisi qaala odishe, “Taape guyera daro minneysi yees. Hari attoshin, taani iya caammaa wodoruwa hokada billanaw bessike.
MAR 1:8 Taani hintena haathan xammaqayis, shin I hintena Geeshsha Ayyaanan xammaqana” yaagis.
MAR 1:9 Yesuusi he wode Galila biittan de7iya Naazirete katamaape yin, Yohaanisi Yordaanose Shaafan iya xammaqis.
MAR 1:10 Yesuusi haathaafe keyiya wode saloy dooyetin, Geeshsha Ayyaanay ba bolla holleda wodhishin be7is.
MAR 1:11 Qassi salope, “Taani dosiya ta na7ay nena; ta nenan ufaytayis” giya qaalay yis.
MAR 1:12 Iira Geeshsha Ayyaanay Yesuusa mela biitta efis.
MAR 1:13 Yesuusi mela biittan Xalahen paacetishe oytamu gallas gam7is. Do7atara de7is, shin kiitanchoti yidi iya maaddidosona.
MAR 1:14 Yohaanisi qashetidaape guye, Yesuusi Xoossaa kawotethaa Wongela odishe Galila biitta bis.
MAR 1:15 Yan, “Wodey gakis; Xoossaa kawotethay matatis. Hinte nagaraape simmidi, Wongelan ammanite” yaagis.
MAR 1:16 Yesuusi Galila Abbaa matara aadhishe, molo oykiya, Simoonanne iya ishaa Indiriyasa, banta gitiya abban yeggeyisata be7is.
MAR 1:17 Entako, “Tana kaallite; taani hintena ase oythu tamaarsana” yaagis.
MAR 1:18 Enti ellesidi banta gitiya yeggi aggidi Yesuusa kaallidosona.
MAR 1:19 Yesuusi guuthi sinthe bidi, nam7u ishata Zabdiyoosa nayta, Yayqoobanne Yohaanisa wogoluwa giddon banta gitiya giigiseyisata be7is.
MAR 1:20 I enta be7ida mela xeegis. Enti banta aawa Zabdiyoosa, iya oosanchotara wogoluwa giddon yeggi aggidi Yesuusa kaallidi bidosona.
MAR 1:21 Enti Qifirnahooma katamaa gelidosona. Sambaati gelida mela Yesuusi ellesidi ayhude woosa keethi gelidi tamaarso oykis.
MAR 1:22 Maatara de7iya asada tamaarsesipe attishin, higge astamaaretatho tamaarsonna gisho, asay iya timirtiyan malaaletidosona.
MAR 1:23 He wode tuna ayyaanay oykida issi uray ayhude woosa keethi gelidi ba qaala dhoqu oothidi,
MAR 1:24 “Naazirete Yesuusa, neeni nuupe ay koyay? Nuna dhaysanaw yadii? Neeni ooneko ta erayis; neeni Xoossaa Geeshshaa gidikii?” yaagis.
MAR 1:25 Yesuusi he tuna ayyaana, “Hayza, ha addiyafe keya” gidi kiittis.
MAR 1:26 Tuna ayyaanay uraa daferethidi, waassidi iyape keyis.
MAR 1:27 Asa ubbay malaaletidi, “Haysi aybee? Ha uray ba maatan hari attoshin tuna ayyaanataka kiittees. Enti iyaw kiitetoosona; haysi aybi ooratha timirtee?” gidi, banta giddon issoy issuwa oychidosona.
MAR 1:28 Yesuusa sunthay ellesidi Galila biittan de7iya heera ubban keyis.
MAR 1:29 Yesuusi ayhude woosa keethafe keyidi, Yayqoobaranne Yohaanisara Simoona soonne Indiriyasa soo bis.
MAR 1:30 Simoona mache aayiya qoxo misha hargada zin7idaaro Yesuusi yaa gakiya wode iyaw odidosona.
MAR 1:31 I iiko shiiqidi, I kushiya oykidi, iyo denthidi essis. Qoxoynne mishay aggin iya enta mokasu.
MAR 1:32 Hargida asa ubbaanne tuna ayyaanati oykida asa ubbaa omarsi away wullidaape guye, iyako ehidosona.
MAR 1:33 Kataman de7iya asa ubbay he keetha kare shiiqidosona.
MAR 1:34 Yesuusi dumma dumma hargen oyketida daro asaa pathidi, daro tuna ayyaanata kessis. I ooneko tuna ayyaanati erida gisho, enta odisonna diggis.
MAR 1:35 Yesuusi wonta guura dendidi, asi bayna bessi bidi, yan Xoossaa woossis.
MAR 1:36 Simooninne iyara de7eysati iya koyishe bidosona.
MAR 1:37 Enti iya demmidi, “Asa ubbay nena koyees” yaagidosona.
MAR 1:38 Yesuusi qassi enta, “He heeran de7iya hara katamata yedhite. Taani yiday Wongela odanaw gidiya gisho yanka qaala odanaw bessees” yaagis.
MAR 1:39 Ayhude woosa keethatan qaala odishenne tuna ayyaanata kessishe, Galila biitta ubban yuuyis.
MAR 1:40 Baroy oykida issi uray Yesuusako yidi, iya sinthan gulbatidi, “Neeni koyko tana geeshshanaw danda7aasa” yaagidi woossis.
MAR 1:41 Yesuusi iyaw qadhetidi, ba kushiya yeddidi iya bochidi, “Taani koyayis, geeyiya” yaagis.
MAR 1:42 Ellesidi baroy uraa yeddin uray paxis.
MAR 1:43 Yesuusi uraa minthi naagisidi kessi yeddis.
MAR 1:44 Yesuusi iya, “Nena era, haysa oodeska odopa. Shin bada ne asatethaa kahine bessa. Neeni ha77i geeshshi gididaysa asaa erisanaw, Musey kiitida yarshuwa yarsha” yaagis.
MAR 1:45 Shin uray bidi, guta ubban asa ubbaas odis. Hessa gisho, Yesuusi qonce keyidi, katama gelanaw danda7ibeenna. Shin asi bayna bessan gaxan de7is; qassi asay ubba bessafe iyako yoosona.
MAR 2:1 Guutha gallasape guye, Yesuusi Qifirnahooma simmidi, son de7ees giya oday si7etis.
MAR 2:2 Asaa keethay ekonna ixin, hari attoshin kareyka xuummana gakanaw daro asay shiiqin, Yesuusi qaala tamaarsis.
MAR 2:3 Oyddu asati issi gunda uraa tookidi iyako ehidosona.
MAR 2:4 Asay darida gisho, uraa Yesuusako shiishanaw entaw danda7etonna ixin, Yesuusi de7iya ginara keetha qaaridi, kaara qawuxidi uraa I zin7ida algara duge yeddidi Yesuusa sinthan wodhisidosona.
MAR 2:5 Yesuusi enta ammanuwa be7idi, he gunda uraa, “Ta na7aw, ne nagaray atto geetetis” yaagis.
MAR 2:6 Higge astamaaretape he bessan uttida issoti issoti banta wozanan,
MAR 2:7 “La ha uray haysa mela iitabaa Xoossaa bolla ayis odeetii? Xoossaa xalaalape attishin, hari ooni nagara atto gaanaw danda7ii?” gidi qopidosona.
MAR 2:8 Enti banta wozanan hessada qopidaysa Yesuusi ellesidi ba ayyaanan eridi, entako, “Hinte hinte wozanan ayis hessada qopeetii?
MAR 2:9 Gunda uraa, ‘Ne nagaray atto geetetis’ geysi mateyee? Woyko, ‘Denda eqada ne algaa tookada ba’ geysi matee?
MAR 2:10 Shin taw, Asa Na7aas, sa7a bolla nagara atto gaanaw maati de7eysa hinte erana mela” gidi he gunda uraako,
MAR 2:11 “Nena gayis, denda eqada ne algaa tookada ne soo ba” yaagis.
MAR 2:12 Uray ellesi dendi eqidi, ba algaa tookidi asa ubbay be7ishin bis. Asa ubbay malaaletidi, “Nuuni haysa mela malaalsiyaba be7i eroko” yaagidi Xoossaa galatidosona.
MAR 2:13 Yesuusi qassi Galila Abbaa doona simmi bidi, baako yida asa ubbaa tamaarsis.
MAR 2:14 Yaara aadhishe, Ilfiyoosa na7aa Leewe geeteteysi qaraxa qanxisiya bessan uttidaysa be7idi, “Tana kaalla” yaagis. Leewey dendi eqidi iya kaallis.
MAR 2:15 Yesuusi kathi maanaw Leewe son uttis. Iya kaalliya asay daro gidiya gisho, qaraxa qanxisiya daro asaynne nagaranchoti iyaranne iya tamaaretara issife uttidosona.
MAR 2:16 Higge astamaare gidida issi issi Farsaaweti Yesuusi nagaranchotaranne qaraxa qanxiseysatara kathi mishin be7idi, “I ayis nagaranchotaranne qaraxa qanxiseysatara kathi mii?” yaagidi, iya tamaareta oychidosona.
MAR 2:17 Yesuusi enti geysa si7idi, “Harganchotape attishin, paxatas aakime koshshenna. Taani nagaranchota xeeganaw yasipe attishin, xillota xeeganaw yabiike” yaagidi entaw zaaris.
MAR 2:18 Xammaqiya Yohaanisa tamaaretinne Farsaaweti xoomosona. Issi issi asati Yesuusako yidi, “Yohaanisa tamaaretinne Farsaaweta tamaareti xoomosona, shin ne tamaareti ayis xoomokonaa?” yaagidosona.
MAR 2:19 Yesuusi entako, “Yaaganuwa yida asati machiw ekeysi entara de7ishin, xoomanaw danda7onna? Machiw ekeysi entara de7ishin, xoomanaw danda7okona.
MAR 2:20 Shin machiw ekeysi enta matape eketana wodey yaana, enti he wode xoomana.
MAR 2:21 “Gal7a ma7o bolla ooratha carqe wothidi sikiya asi baawa. Wothidi sikiko, oorathay ceega ma7uwa daakees; daakethayka kaseysafe darees.
MAR 2:22 Qassi mal7anto woyne ceega ogoron qoliya asi baawa. Shin qoliko, he woyney ogoruwa daakees, bawuka gukees, ogoroyka iitees. Shin mal7anto woyney ooratha ogoron qoletees” yaagis.
MAR 2:23 Yesuusi issi Sambaata gallas banga gade giddora aadhishin, iya tamaareti iyara bishe banga tiya shirkidi moosona.
MAR 2:24 Farsaaweti Yesuusako, “Heko, ne tamaareti Sambaata gallas woga gidonnaba ayis oothonna?” yaagidosona.
MAR 2:25 Yesuusi entako, “Dawiti koshatidi, miyaba koyida wode, baara de7eysatara oothidaysa nabbabibeketii?
MAR 2:26 Abyataari kahine halaqa gididi de7iya wode Dawiti Xoossa keethi gelidi, kahineta xalaali maanape attishin, oonika maanaw woga gidonnaysa Godaa sinthan wothida daabbuwa mis, baara de7eystaska immis” yaagis.
MAR 2:27 Qassika Yesuusi entako, “Sambaati asa na7a go77as medhetisipe attishin, asi Sambaatas medhetibeenna.
MAR 2:28 Hessa gisho, Asa Na7ay, hari attoshin Sambaataska Godaa” yaagis.
MAR 3:1 Yesuusi ayhude woosa keethi simmi gelis. Yan kushey gundida issi uray de7ees.
MAR 3:2 Issi issi asay Yesuusa mootanaw koyidi, kushey gundida uraa Sambaata gallas I pathikonne aggiko be7anaw koyidi minthidi naagoosona.
MAR 3:3 Yesuusi kushey gundida uraa, “Denda eqada haa sinthe ya” yaagis.
MAR 3:4 Hessafe guye, asaako, “Sambaata gallas lo77oba ootheysi wogeye iitabaa ootheysi wogee? Asa shempo ashoye woyko wodho?” yaagidi oychis. Shin asay si77i gis.
MAR 3:5 Yesuusi hanqetidi, enta yuushshi aathi xeellidi, enti odin si7onnayisata gidiya gisho, enta bolla daro azzanis. He addiyako, “Ne kushiya piddi ootha” yaagis. Uray piddi oothin iya kushey paxis.
MAR 3:6 Ellesidi Farsaaweti ayhude woosa keethafe kare keyidi, Yesuusa waati wodhaneko maqetanaw Herodiisa baggatara issi soo shiiqidosona.
MAR 3:7 Yesuusi ba tamaaretara Galila Abbaako bis. Galilapenne Yihudape yida daro asay iya kaallidosona.
MAR 3:8 Qassika Yerusalaamepe, Edomiyaasape, Yordaanose Shaafa pinthafe, Xiroosa katamaapenne Sidoona katamaape Yesuusi oothidaba si7idi, daro asay iyako yidosona.
MAR 3:9 Asaa darotethaafe dendoysan iya un7ethonna mela iya tamaareti wogolo iyaw giigisana mela kiittis.
MAR 3:10 Daro asaa I pathida gisho, hargiya asa ubbay iya bochanaw sugetoosona.
MAR 3:11 Tuna ayyaanay oykida asati iya be7ida wode iya sinthan kundidi, banta qaala dhoqu oothidi, “Neeni Xoossaa Na7aa gidikii?” yaagosona.
MAR 3:12 He tuna ayyaanati iya oonatetha oodeska qoncisonna mela entaw minthidi odis.
MAR 3:13 Yesuusi deriya bolla keyidi, ba koyida asata baako xeegis; entika iyako bidosona.
MAR 3:14 Enti baara daana melanne qaala tamaarsana mela tammanne nam7ata dooridi, enta, “Hawaareta” gidi sunthis.
MAR 3:15 Tuna ayyaanataka kessana mela entaw maata immis.
MAR 3:16 I doorida tammanne nam7ati haysata: Phexroosa yaagidi sunthida Simoona,
MAR 3:17 Bo7anerges (Dada Nayta) yaagidi sunthidaysata, Zabdiyoosa nayta Yayqoobanne Yayqooba ishaa Yohaanisa,
MAR 3:18 Indiriyasa, Filphoosa, Bartelemoosa, Maatosa, Toomasa, Ilfiyoosa na7a Yayqooba, Taadiyosa, ba biittas mishetiya Simoonanne,
MAR 3:19 Yesuusa aathidi immida Asqoroota Yihuda.
MAR 3:20 Hessafe guye, Yesuusi soo bis. Qassi daro asay shiiqin, inne iya tamaareti hari attoshin kathi maanawuka danda7ibookona.
MAR 3:21 Asay iya, “Gooyees” giya gisho, iya dabboti hessa si7idi iya ekanaw bidosona.
MAR 3:22 Higge astamaaretape issoti issoti Yerusalaamepe yidi, “Iya bolla Bi7eel-Zebuuli de7ees”, I, “Xalahey wolqan tuna ayyaanata kessees” yaagidi odetidosona.
MAR 3:23 Yesuusi asaa baako xeegidi leemiso odis. “Xalahey Xalahe waati kessanaw danda7ii?
MAR 3:24 Issi kawotethay ba giddon shaaketiko he kawotethay eqanaw danda7enna.
MAR 3:25 Hessadaka, issi keetha asay banta giddon shaaketiko dhayanape attishin, daanaw danda7okona.
MAR 3:26 Hiza, Xalahey baara kacetidi shaaketiko dhayope attishin, daanaw danda7enna.
MAR 3:27 “Shin koyrottidi wolqaama uraa qachonna de7ishe iya keetha gelidi, iya miishiya bonqanaw danda7iya asi baawa. Qachi simmidi iya keetha bonqanaw danda7ees.
MAR 3:28 “Taani hintew tuma odayis; Xoossay asa naytas nagara ubbaanne enti cayiya cashshe ubbaa atto gaana.
MAR 3:29 Shin Geeshsha Ayyaana bolla iitabaa odetiya oodeska merinaa nagara gidanaape attishin, Xoossay ubbaraka iya maarenna” yaagis.
MAR 3:30 Yesuusi hessa giday, issi issi asati, “Iya bolla tuna ayyaanay de7ees” yaagida gishosa.
MAR 3:31 Iya aayanne iya ishati yidi karen eqidi, iyako ase kiittidi iya xeegidosona.
MAR 3:32 Iya matan uttida daro asati, “Heko, ne aayeranne ne ishatara karen eqidi nena koyoosona” yaagidosona.
MAR 3:33 Yesuusi zaaridi, “Ta aayiya oonee? Qassi ta ishati oonantee?” yaagis.
MAR 3:34 Ba matan uttida asa yuushshi aathi xeellidi, “Heko, ta aayanne ta ishati haysata.
MAR 3:35 Xoossay sheniya oothiya ubbay ta isha, ta michonne ta aayo” yaagis.
MAR 4:1 Yesuusi zaaridi Galila Abbaa matan tamaarsees. Daro asay iya matan yuushuwan shiiqin, abban de7iya wogoluwa giddo gelidi uttis, asa ubbay Abbaa matan de7ees.
MAR 4:2 I enta darobaa leemison tamaarsis. Tamaarsishe haysada yaagis:
MAR 4:3 “Si7ite! Issi uray zerethi zeranaw keyis.
MAR 4:4 I zerishin, issi issi zerethay oge gaxan wodhis; kafoti yidi midosona.
MAR 4:5 Issi issi zerethay garsan shaalloy de7iya biitta bolla wodhis. Daro biitti bayna gisho, he zerethay ellesidi dolis.
MAR 4:6 Shin awi keyida wode shullis. Loythidi xapho yeddiboonna gisho, ellesi melis.
MAR 4:7 Issi issi zerethay aguntha giddon wodhis. Dolidaysa agunthay diccidi cuullida gisho ayfe ayfonna attis.
MAR 4:8 Issi issi zerethay aradda biittan wodhidi dolis. Diccidi issoy hastama, issoy usupun tamma issoy xeeta ayfis” yaagis.
MAR 4:9 “Si7iya haythi de7iya oonika si7o” yaagis.
MAR 4:10 Yesuusi odidaysa si7ida issi issi asatinne tammanne nam7u tamaareti Yesuusi barka de7ishin, iyako shiiqidi he leemisuwa birshethaa oychidosona.
MAR 4:11 Yesuusi entako haysada yaagis: “Hintew Xoossaa kawotethaa xuuraa eroy imetis. Shin haratas kawotethaafe karen de7eysatas ubbabay leemison odetees.
MAR 4:12 Gaasoyka, “ ‘Enti xeelloosona, shin demmokona. Si7oosona, shin akeekokona. Enti demmiyakonne akeekiyako, Xoossaako simmana ika enta maaranashin’ ” yaagis.
MAR 4:13 Yesuusi entako, “Ha leemisoy hintew gelennee? Yaatin, leemiso ubbaa hinte waati akeekanee?
MAR 4:14 Zereysi Xoossaa qaala zerees.
MAR 4:15 Qaalay zeretiya wode oge gaxan wodhidaysati qaala si7idaysata. Shin Xalahey ellesidi, yidi enta wozanan zeretida qaala maxi diggees.
MAR 4:16 Hessadaka, garsan shaalloy de7iya biittan zeretidaysi qaala si7idi, ellesidi ufaysan ekeysa.
MAR 4:17 Shin iyaw mino xaphoy bayna gisho ha77issafe attishin, gam7okona. Guutha wodepe guye qaala gaason waayey woyko goodi gakiya wode ellesidi dhubetoosona.
MAR 4:18 Aguntha giddon zeretidaysi qaala si7eyisata.
MAR 4:19 Shin ha sa7a de7uwas hirgoy, duretetha dosoynne haraba amotteysi iya wozanan gelidi qaala cuulliya gisho ayfe ayfonna attis.
MAR 4:20 Shin aradda biittan zeretidaysati qaala si7idi ekeyisata. Enti issoy hastama, issoy usupun tamma issoy xeeta ayfis” yaagis.
MAR 4:21 Yesuusi gujidi, “Xompe ekidi, daachofe woyko algafe garsan wothiya asi de7ii? Dhoqa bessan wothenneyee?
MAR 4:22 Hiza, qosetidabay ubbay qonce keyana; geemmidabay ubbay eretonna attenna.
MAR 4:23 Si7iya haythi de7iya oonika si7o” yaagis.
MAR 4:24 Qassi entako, “Hinte si7iyaba akeekidi si7ite! Xoossaa qaala hinte si7eysa mela I hintew akeeka immana. Ubbaka hintew darsidi immana.
MAR 4:25 Issibay de7iya uraas guji imetana, baynaysafe hari attoshin, iyaw de7iya he guuthiyaka eketana” yaagis.
MAR 4:26 Yesuusi zaaridi, “Xoossaa kawotethay ba gaden zerethi zeriya asa mela.
MAR 4:27 He uray qamma dhiskees; wonta dendees. I ba huuphen waaniyako eronna de7ishin he zerethay doleesinne diccees.
MAR 4:28 Biittay kathi barka immees. Koyro dolidi diccees, kaallidi ayfanaw gambuxees, wursethan kumetha ayfe ayfees.
MAR 4:29 Shin kathay gakiya wode uray ellesidi baacara geli aggees” yaagis.
MAR 4:30 Yesuusi, “Nuuni Xoossaa kawotethaa ay daanees gaanee? Woyko aybira leemisanee?
MAR 4:31 Xoossaa kawotethay ayfe guutha mithi daanees. He mithaa ayfiya zeriya wode sa7an de7iya mitha ayfe ubbaafe guuxees.
MAR 4:32 Zerin dolidi atakilte ubbaafe gitatees; daro daashshi daayees. Kafoti iya tashiya bolla keexidi uttana gakanaw daayees” yaagis.
MAR 4:33 Yesuusi haysa mela daro leemison asay akeekanaw danda7eysa mela qaala odis.
MAR 4:34 Asaas leemisoy bayna odenna. Shin Yesuusi ba tamaareta xalaalara de7iya wode, entaw ubbaba birshidi odis.
MAR 4:35 He gallas sa7i omarsin, Yesuusi ba tamaaretako, “Abbaafe hefinthi pinnoos” yaagis.
MAR 4:36 Iya tamaareti daro asa yeggi aggidi, Yesuusi kase geli uttida wogoluwan gelidi Yesuusa bantara efidosona. Hara wogolotika yan de7oosona.
MAR 4:37 Wolqaama gotey dendidi, hobbey wogoluwa shocin, kumana gakanaw wogoluwa giddo haathi gelis.
MAR 4:38 He wode Yesuusi wogoluwan guye baggara borkotidi dhiskis. Iya tamaareti iya denthidi, “Astamaariyaw, nuuni dhayiya wode ne si77i gada xeellay?” yaagidosona.
MAR 4:39 Yaatin, I barkidi gotiya, “Si7i ga” gidi, abbaaka, “Wopu ga” gis. Goteyka si77i gin ubbabay wopu gis.
MAR 4:40 Yesuusi ba tamaaretako, “Ayis haysada babetii? Hintew ammanoy waanidi dhayidee?” yaagis.
MAR 4:41 Enti daro babidi banta giddon, “Haysi hari attoshin, goteynne abbay kiiteteysi oonee?” yaagidosona.
MAR 5:1 Yesuusinne iya tamaareti abba pinnidi, Gergesoone biitta gakidosona.
MAR 5:2 Yesuusi wogoluwape wodhiya wode tuna ayyaanay oykida issi uray duufope keyidi iyara gahetis.
MAR 5:3 He uray aqi pee7idi de7ey duufona. Iya oonika santhalaatan qachanaw danda7enna.
MAR 5:4 I daro toho duthaninne santhalaatan qashetidi de7ees. Shin santhalaata duuserethees, dutha mentherethees. Iya teqanaw danda7iya oonika baawa.
MAR 5:5 I qammanne gallas he duufuwaninne dere bolla waassees, ba asatethaa shuchan gaarees.
MAR 5:6 Yesuusa haahon be7ida wode woxi bidi iya sinthan gulbatis.
MAR 5:7 He uray ba qaala dhoqu oothidi, “Ubbaafe Bolla Xoossaa Na7aw Yesuusa, nenanne tana aybe gathey? Tana dhaysona mela taani nena Xoossaa sunthan woossayis” yaagis.
MAR 5:8 I hessa giday Yesuusi iya, “La ha tuna ayyaanaw, ha addiyafe keya” yaagida gishosa.
MAR 5:9 Yesuusi iyako, “Ne sunthay oonee?” yaagidi oychis. I, “Nuuni daro gidiya gisho, ta sunthay Leegiyona” yaagis.
MAR 5:10 Tuna ayyaanati bantana he biittafe kessi yeddonna mela Yesuusa minthidi woossidosona.
MAR 5:11 He deriya bolla daro guduntho wudey hemetees.
MAR 5:12 Tuna ayyaanati Yesuusako, “Nuna hini guduntho wudiyako yeddarki, entan bidi geloos” yaagidi woossidosona.
MAR 5:13 Yesuusi entako, “Biite” yaagis. Yaatin tuna ayyaanati addiyafe keyidi gudunthotan gelidosona. Nam7u mukulu gidiya guduntho wudey aafo doonara dirgidi bidi abban gelidi mitetidosona.
MAR 5:14 Guduntho wudiya heemmeysati baqati bidi hanidaba katamaninne gaxariyan odidosona. Yaatin asay hanidaba be7anaw keyidosona.
MAR 5:15 Asay Yesuusako yaa wode tuna ayyaanan oyketida uraa be7idosona. I ba wozanaako simmidi, ma7o ma7idi, yan uttidaysa be7ida wode ubbay yayyidosona.
MAR 5:16 Hessa be7ida asati tuna ayyaanati oykida uraa bollanne gudunthota bolla hanidaba ubbaa asaas odidosona.
MAR 5:17 Hessa gisho, asay banta biittafe Yesuusi baana mela woossidosona.
MAR 5:18 Yesuusi wogoluwan geliya wode kase tuna ayyaanay oykidi yeddida uray, Yesuusa kaallanaw iya woossis.
MAR 5:19 Shin Yesuusi ixidi iyako, “Ne soo simmada, Goday new ay mela gitaba oothidaakonne new ay mela keehidaako ne soo asaas oda” yaagis.
MAR 5:20 Uray bidi Tammu Katamaa geetetiya bessan yuuyidi, Yesuusi baw ay mela gitaba oothidaako odis. I odidaysa si7ida asa ubbay malaaletidosona.
MAR 5:21 Yesuusi simmidi, wogoluwan gelidi, abba pinnidaape guye daro asay abba gaxan iya yuushuwan shiiqidosona.
MAR 5:22 Iyaroosa geetetiya ayhude woosa keetha halaqatape issoy, Yesuusa be7ida wode iyako yidi iya tohuwa bolla
MAR 5:23 kundidi, “Ta na7iya hargada hayqana hanawusu. Iya paxada de7ana mela yada ne kushiya I bolla wotharki” yaagidi Yesuusa minthidi woossis.
MAR 5:24 Yesuusi Iyaroosara bis. I bishin daro asay iya kaallidi un7ethidosona.
MAR 5:25 Tammanne nam7u laythi Ipe suuthi dhohiya issi maccasiya de7awusu.
MAR 5:26 Daro aakimeti iyo aakimidosona, shin iya paxa kaa7etasu. Iya ba miishiya ubbaa wursinka iw haa iitisipe attishin, aykoka maaddibeenna.
MAR 5:27 He maccasiya Yesuusaba si7ada, asaa kanthada Yesuusa guyera yada iya ma7uwa bochasu.
MAR 5:28 Iya, “Taani hari attoshin iya ma7uwa bochiyako paxana” gada qopasu.
MAR 5:29 Iipe goggiya suuthay iiraka eqi aggis. Iya ba waayiyape paxidaysa ba asatethan erasu.
MAR 5:30 Yesuusi baape wolqi keydaysa ba huuphen eridi, ellesidi daro asa giddon guye simmidi, “Ta ma7uwa bochiday oonee?” yaagis.
MAR 5:31 Iya tamaareti, “Asay nena sugeysa be7ashe, ‘Woygada tana oone bochiday yaagay?’ ” yaagidosona.
MAR 5:32 Yesuusi hessa ooni oothidaako be7anaw yuushshi aathi xeellis.
MAR 5:33 Shin maccasiya baw hanidaba erada, yashshan kokorashe yada Yesuusa sinthan gufannasu; qassi hanidaba ubbaa tumaa iyaw odasu.
MAR 5:34 Yaanin, Yesuusi iiko, “Ta naatte, nena ne ammanoy pathis, saron ba, ne waayapeka paxa” yaagis.
MAR 5:35 Yesuusi buroo hessa odishin, ayhude woosa keetha halaqaa soope kiitetida asati yidi, “Ne na7iya hayqasu, astamaariya ayis daabursay?” yaagidosona.
MAR 5:36 Shin Yesuusi enti geysa si7idi, ayhude woosa keetha halaqaako, “Ammano xalaala ammanape attishin, babofa” yaagis.
MAR 5:37 Yesuusi Phexroosape, Yayqoobapenne Yayqooba ishaa Yohaanisape hari oonika bana kaallonna mela diggis.
MAR 5:38 Enti ayhude woosa keetha halaqaa soo gakiya wode Yesuusi asay kaha dhayidi yeekeysanne zeleeleysa be7is.
MAR 5:39 Gelidi asaako, “Ayis kaha dhayidi yeeketii? Na7iya dhiskasupe attishin, hayqabuuku” yaagis.
MAR 5:40 Asay iya bolla miicis. Shin asa ubbaa kare kessidi, na7e aawa, aayiwunne heedzu tamaareta baara ekidi na7iya de7iyasuwa gelis.
MAR 5:41 Yesuusi na7e kushiya oykidi, “Xaalita, quumi” (Guutha naatte, nena gayis denda) yaagis.
MAR 5:42 Na7iya ellesa denda eqada hemetasu. Iya tammanne nam7u laytha na7a. Hessan asay daro malaaletidosona.
MAR 5:43 Yesuusi hessa enti oodeska odonna mela enta minthi kiittis. Enti iw miyaba immana mela odis.
MAR 6:1 Yesuusi yaape keyidi, ba tamaareta kaalethidi, ba katama Naazirete bis.
MAR 6:2 Sambaata gallas ayhude woosa keethan tamaarso oykis. I tamaarseysa si7ida daro asay malaaletidi, “Haysi ha ubbaa awupe demmidee? Ha cincatethaa I awupe ekidee? Ha malaatata oothiya maata I awupe demmidee?
MAR 6:3 Haysi anaaxiya gidennee? Mayraami na7a, Yayqooba, Yoosa, Yihudanne Simoona ishaa gidenneyee? Iya micheti nuura haysan de7okonayee?” yaagidi, I giyaba ekonna ixidosona.
MAR 6:4 Yesuusi he asaako, “Nabey ba biittan, ba dabbotaninne ba soo asan bonchetenafe attishin, harata matan bonchetees” yaagis.
MAR 6:5 I he bessan ba kushiya guutha asaa bolla wothidi pathidaysafe attishin, hara malaatata oothanaw danda7ibeenna.
MAR 6:6 Asay ammanibona gisho daro malaaletis. Hessafe guye, Yesuusi he heeran de7iya gutatan asaa tamaarsees.
MAR 6:7 Yesuusi tammanne nam7u tamaareta baako xeegidi, nam7aa nam7aa gathidi kiittis. Entaw tuna ayyaanata kessiya wolqaa immis.
MAR 6:8 Enta, “Oge xam7afe attishin, kathi, karxiita, hinte kiisen miishe aybibaaka oykofite.
MAR 6:9 Hinte tohuwan caamma aathite, shin nam7u afila oykofite” yaagis.
MAR 6:10 Qassika, “Hintena asi mokida soo awunka gidin he bessaa yeddidi baana gakanaw he keethan gam7ite.
MAR 6:11 Hintena asi mokonasuwa woyko hinte odiyaba si7onnasuwa awun gidikoka, he biittan de7iya asaas marka gidana mela he bessaafe keyishe, hinte tohuwape baana pitite” yaagis.
MAR 6:12 Tammanne nam7u tamaareti bidi, asay banta nagaraape simmanaada qaala odidosona.
MAR 6:13 Enti asape daro tuna Ayyaanata kessidosona. Daro harganchota zayte tiyidi pathidosona.
MAR 6:14 Yesuusa sunthay ubba bessan keyida gisho, Kawoy Herodiisi iyabaa si7is. Issi issi asay, “Xammaqiya Yohaanisi hayqope dendis, hessa gisho ha malaatata oothey iya” yaagidosona.
MAR 6:15 Baggati, “Haysi Eeliyaasa gidennee?” yaagidosona. Harati qassi, “Haysi beni wode nabetape issuwa gidonna aggenna” yaagidosona.
MAR 6:16 Shin Herodiisi hessa si7ida wode, “Haysi taani qoodhiya qanxisida Xammaqiya Yohaanisa gidennee? I hayqope dendis” yaagis.
MAR 6:17 Herodiisi ba ishaa Filphoosa machiw Herodiyada ekida gisho I gaason Yohaanisa oythidi qashisis.
MAR 6:18 Yohaanisi Herodiisa, “Neeni ne ishaa machiw ekanaw bessenna” yaagis.
MAR 6:19 Herodiyada Yohaanisa ba ulon morkada iya wodhisanaw koyasu, shin danda7abuku.
MAR 6:20 Yohaanisi xillonne geeshsha asi gididaysa Herodiisi erida gisho, iyaw babidi loythi naagisees. Herodiisi Yohaanisi giyaba si7anaw dosikoka I giyaba si7iya wode daro dagammees.
MAR 6:21 Herodiisi ba yeletida gallasa bonchanaw deriya haareysatas, shaalaqatasinne Galilan de7iya gita asaas imato giigisis. Hessi Herodiyadas inje gallas gidis.
MAR 6:22 Herodiyada na7iya imathay moketiya bessaa gela durada, Herodiisanne iya imathata ufaysasu. Kawoy na7iw, “Ne koyaba ayba gidikoka tana oycha, taani new immana” yaagis.
MAR 6:23 Qassi iw caaqidi, “Neeni oychiyaba ayba gidikoka, taani new immana. Hari attoshin, ta kawotethaa baggaa gidikoka taani new immana” yaagis.
MAR 6:24 Na7iya kare keyada ba aayeko, “Ay imma go?” gada oychasu. I aayiya, “Xammaqiya Yohaanisa huuphiya imma ga” yaagasu.
MAR 6:25 Na7iya ellesada kawako bada, “Xammaqiya Yohaanisa huuphiya saanen wothada ha77i taw immana mela koyayis” yaagasu.
MAR 6:26 Yaanin, kawoy daro qiirotis, shin ba imathata gisho iw caaqida ba caaquwa menthanaw koybeenna.
MAR 6:27 Hessa gisho, ellesidi naageysa Yohaanisa huuphiya ehana mela kiittis. Naageysi qasho keethi bidi Yohaanisa qoodhiya qanxis.
MAR 6:28 He qanxetida huuphiya saanen wothi ehidi na7ees immis. Na7iya qassi ba aayes immasu.
MAR 6:29 Yohaanisa tamaareti hessa si7ida wode bidi iya aha eki efidi moogidosona.
MAR 6:30 Tammanne nam7u hawaareti simmi yidi enti oothidabaanne tamaarsidaba ubbaa Yesuusas odidosona.
MAR 6:31 Entako yaa asaynne biya asay darida gisho, Yesuusaranne iya tamaaretara, hari attoshin kathi maanawuka enta gathonna ixis. Yaanin, Yesuusi entako, “Nurka guuthi shempi ekanaw asi bayna bessi yedhite” yaagis.
MAR 6:32 Hessa gisho, enti bantarka wogolon gelidi asi bayna bessi bidosona.
MAR 6:33 Enti bishin daro asay enta be7idi eridosona. Yaatin, katama ubbaafe asay tohora woxi bidi enti biya bessaa entafe sinthe gakidosona.
MAR 6:34 Yesuusi wogoluwape wodhidi daro asa be7is. Asay heemmiya asi bayna dorsa mela gididaysa be7idi entaw qadhetidi enta darobaa tamaarsis.
MAR 6:35 Sa7ay omarsiya wode Yesuusa tamaareti iyako yidi, “Haysi bessay asi bayna bessi; ha77i sa7ika qammis.
MAR 6:36 Asay gutatanne katamata bidi bantaw miyaba shammana mela asa yedda” yaagidosona.
MAR 6:37 Shin Yesuusi zaaridi entako, “Asaas miyaba hinte immite” yaagis. Enti, “Nuuni bidi nam7u xeetu dinaaren uythu shammidi asaa muzana mela koyay?” yaagidi oychidosona.
MAR 6:38 Yesuusi entako, “Hintew aapun uythi de7ii? Ane bidi be7ite” yaagis. Enti be7idi, “Ichashu uythunne nam7u molo” yaagidosona.
MAR 6:39 Yesuusi ba tamaareta asa ubbaa cugan cugan shaakidi maatan utisana mela kiittis.
MAR 6:40 Asay xeetu cuganinne ishatamu cugan shaaketi shaaketi uttidosona.
MAR 6:41 Yesuusi ichashu uythaanne nam7u molota ekidi, pude salo xeellidi Xoossaa galatis. Uythaa menthidi asaas gishana mela ba tamaaretas immis. Qassi nam7u molota enta ubbaas shaakis.
MAR 6:42 Asa ubbay midi kallidosona.
MAR 6:43 Attida uytha tiifiyanne molota tiifiya, iya tamaareti tammanne nam7u gayta kumethi denthidosona.
MAR 6:44 Uythaa mida adde asaa tayboy ichashu mukulu.
MAR 6:45 Ellesidi Yesuusi ba tamaareti wogoluwan gelidi, abbaafe hefinthan de7iya Beetesayda baape sinthatidi baana mela kiittis. Shin baw asaa moyzanaw guye attis.
MAR 6:46 Asaa moyzidaape guye, Xoossaa woossanaw zuma bolla keyis.
MAR 6:47 Sa7ay qammiya wode wogoloy abba giddon de7ees, shin Yesuusi abbaafe gaxan barka de7ees.
MAR 6:48 Carkoy iya tamaaretako carkiya gisho, abba pidhoy waayseysa Yesuusi be7is. Wontimaathe sa7i geeyana haniya wode I abba bolla hemetishe entako yidi, enta yeggidi aadhanaw koyis.
MAR 6:49 Shin I abba bolla hemetishin, enti be7idi, entaw moytille daanin waassidosona.
MAR 6:50 Enti ubbay iya be7idi, yashshan kokoridosona. Shin Yesuusi ellesidi entako, “Tana, aykoy baawa; yayyofite” yaagis.
MAR 6:51 Yesuusi wogoluwan gelidi entara issife uttin carkoy wopu gis. Enti daro malaaletidosona.
MAR 6:52 Enta wozanay zel7umida gisho, enti uythabaa akeekibokona.
MAR 6:53 Enti abba pinnidi, Gensareexe biitta gakidi, wogoluwa gaxa shiishidi qachidosona.
MAR 6:54 Enti wogoluwape wodhiya wode asay ellesidi Yesuusa eridosona.
MAR 6:55 Enti heeran de7iya biitta ubban woxeretidi harganchota halan tookidi, “Yesuusi de7ees” gin si7ida bessaa ehidosona.
MAR 6:56 Asay I bida soo ubban, gaxariyan gidin, kataman, de7iya harganchota dabaaba efoosona. Harganchoti iya afilaa macaraa gidikoka bochana mela asay iya woossidosona. Bochida ubbay paxis.
MAR 7:1 Yerusalaamepe yida guutha Farsaawetinne higge astamaareti Yesuusa matan shiiqidosona.
MAR 7:2 Yesuusa tamaaretape issoti issoti geeyonna kushiyan, hessika kushe meecetonna kathi meyisata be7idosona.
MAR 7:3 Farsaawetinne Ayhude asa ubbay banta aawata wogaatho banta kushiya meecetonna mookonna.
MAR 7:4 Hessadaka, enti giyape shametidaba meecconna de7ishe mokonna. Qassi enti banta aawatape ekida hara daro wogi de7ees: hessika sineta, kereta, birata miishetanne arsa meecciya wogaa naageysa.
MAR 7:5 Farsaawetinne higge astamaareti Yesuusa, “Ne tamaareti ayis aawata wogaa menthidi banta kushiya meecetonna kathi moonna?” yaagidi oychidosona.
MAR 7:6 Yesuusi entako, “Isayaasi hintena cubbota, “ ‘Haysi asay tana ba inxarsa xalaalan bonchees, shin enta wozanay taape haahon de7ees.
MAR 7:7 Asi medhida wogaa Xoossaa higge daanisidi tamaarsiya gisho, enti taw mela goyinnoosona’ ” gidi xaafidaysi tuma.
MAR 7:8 “Hinte Xoossaa kiitaa aggidi asa wogaa minthidi naageta” yaagis.
MAR 7:9 Qassika Yesuusi, “Hinte hinte wogaa naagidi Xoossaa kiitaa yeggi agganaw lo77o oge demmideta.
MAR 7:10 Musey, ‘Ne aawanne ne aayiw boncha’, qassi ‘Ba aawanne ba aayiw cayeysi hayqanaw bessees’ yaagis.
MAR 7:11 Shin issi asi ba aawa woyko ba aayiw maaddanaysa aggidi, ‘Haysi taani Xoossas immida yarsho’ giiko,
MAR 7:12 I ba aawa woyko ba aayiw maaddonna mela ootheeta.
MAR 7:13 Hessadaka, hinte harata tamaarsida hinte wogan Xoossaa qaala kadhideta. Hessa mela hara darobaa ootheeta” yaagis.
MAR 7:14 Yesuusi daro asaa qassika baako xeegidi, “Ubbay taani odeysa si7itenne akeekite.
MAR 7:15 Asa wozanape keyaabay ase tuniseesipe attishin, karepe asa ulo gelidi ase tunisiyabay aybika baawa.
MAR 7:16 Si7iya haythi de7iya oonika si7o” yaagis.
MAR 7:17 Yesuusi daro asaa yeggi aggidi soo gelin iya tamaareti he leemisuwaba iya oychidosona.
MAR 7:18 I entako, “Hintewuka qassi gelibeennee? Karepe asan geliyabay aybika ase tunisanaw danda7onnaysa akeeketii?
MAR 7:19 Ayis giiko, kathi asa ulo giddo gelidi kanthidi aadhesipe attishin, asa wozana giddo gelenna” yaagis. Hessan Yesuusi kathi ubbay geeshshi gideysa erisis.
MAR 7:20 Kaallidika, Yesuusi, “Asa tunisiyabay asa wozana giddofe keyaaba.
MAR 7:21 Asa wozana giddofe keyaabay iita qofa, laymatethi, kayso, ase wodho, laame,
MAR 7:22 iita amo, iitatethi, gene, qayxe, cimo, qanaate, cashshe, otoronne boozatethi.
MAR 7:23 Ha iitabay ubbayka asa wozana giddofe keyidi ase tunisees” yaagis.
MAR 7:24 Yesuusi yaape keyidi, Xiroosa katama matan de7iya biitta bis. I issi keethi gelidi yan de7eysa oonika erana mela koybeenna. Shin qosetidi gam7anaw danda7ibeenna.
MAR 7:25 Shin I guutha na7iw tuna ayyaanay oykida issi maccasiya Yesuusaba si7ada ellesa iyako yada iya tohuwa bolla kundasu.
MAR 7:26 Iya Ayhude maccasi giduku; iya yeletiday Sirofinqe biittana. Iya, ba na7epe tuna ayyaana kessana mela Yesuusa woossasu.
MAR 7:27 Shin Yesuusi zaaridi, “Nayti koyrottidi kathaa kallo; nayta kathaa ekidi kanatas yeggeysi lo77o gidenna” yaagis.
MAR 7:28 Maccasiya zaarada, “Ta Godaw hessi tuma, shin gayta matan de7iya kanati naytape wodhiya tiifiya moosona” yaagasu.
MAR 7:29 Yesuusi qassi iiko, “Ha ne qaala gisho, ne soo ba; tuna ayyaanay ne na7epe keyis” yaagis.
MAR 7:30 Maccasiya ba soo biya wode tuna ayyaanay iipe keyin hiixan zin7idaaro demmasu.
MAR 7:31 Yesuusi Xiroosa katamaape keyidi, Sidoonaranne Tammu Katamata geetetiya biittara kanthidi Galila Abbaako bis.
MAR 7:32 Asay tullenne waayidi odetiya asi Yesuusako ehidi, ba kushiya iya bolla wothana mela iya woossidosona.
MAR 7:33 Yesuusi barka he uraa daro asape gaxa kessidi, ba biradhiya iya haythan yeddis. Qassi cuchu cuttidi iya inxarsaa bochis.
MAR 7:34 Salo pude xeellidi, tooki shempidi, “Eftah” gis. Birshethayka “Dooyeta” guussu.
MAR 7:35 Uraa haythay ellesidi dooyetis, qashetida inxarsayka birshetis, uray geeshshidi odetis.
MAR 7:36 Yesuusi asaako, “Haysa oodeska odopite” yaagis. Shin I daro minthidi odopite gin, asay odaa yaa darsis.
MAR 7:37 Hessa si7ida asa ubbay daro malaaletidi, “Ubbabaa I loythi oothees. Hari attoshin, tulliya sissees, muumiya odisees” yaagidosona.
MAR 8:1 Guutha wodepe guye, daro asay Yesuusako shiiqidosona. Asaas miyabay dhayin Yesuusi ba tamaareta baako xeegidi,
MAR 8:2 “Ha asay taara heedzu gallas gakanaw gam7idi, aykoka miyaba demmiboonna gisho, tana asay qadhethees.
MAR 8:3 Taani asaa koshara soo yeddiko asay bishe ogen daaburidi kundana, bagga asay haahosoope yidosona” yaagis.
MAR 8:4 Yesuusa tamaareti zaaridi, “Ha mela biittan ha asa ubbaa muzanaw gidiya kathi demmanaw danda7ey oonee?” yaagidosona.
MAR 8:5 Yesuusi entako, “Hintew aapun uythi de7ii?” yaagidi oychis. Enti zaaridi, “Laapun uythi de7ees” yaagidosona.
MAR 8:6 Yesuusi asay sa7an uttana mela kiittis. Yaatidi, laapun uythaa ekidi Xoossaa galati simmidi he uythaa menthidi, asaas gishana mela ba tamaaretas immis. Iya tamaareti asaas gishidosona.
MAR 8:7 Entaw qassi guutha laafa moloti de7oosona. Yesuusi he molota gisho Xoossaa galatidi, asaas gishana mela ba tamaareta kiittis.
MAR 8:8 Asa ubbay midi kallidosona. Iya tamaareti attida tiifiya laapun gayta kumethi denthidosona.
MAR 8:9 Kathaa mida asaa tayboy oyddu mukulu gidana. Hessafe guye, Yesuusi asa yeddis.
MAR 8:10 I qassi ba tamaaretara ellesi wogolon gelidi Dalmanuuta biitta bis.
MAR 8:11 Farsaaweti yidi Yesuusa paacanaw koyidi, salope bantana malaata bessaana mela Yesuusara palama oykidosona.
MAR 8:12 Yesuusi tooki shempidi, “Ha wodiya asay ayis malaata koyii? Taani hintew tuma odayis; ha wodiya asaas ay malaatika imetenna” yaagis.
MAR 8:13 I enta yan yeggi aggidi zaari wogolon gelidi abbaafe hefinthi pinnis.
MAR 8:14 Iya tamaareti kathi efanaysa dogidosona; entaw wogoluwa giddon issi uythaafe hari baawa.
MAR 8:15 Yesuusi entako, “Hintena erite. Farsaaweta irshuwafenne Herodiisa irshuwafe naagetite” yaagidi kiittis.
MAR 8:16 Enti banta giddon, “I haysa gey nuus uythi bayna gishosa” yaagidosona.
MAR 8:17 Yesuusi enti geysa eridi entako, “Hintew uythi bayna gisho ayis odeteetii? Ha77ika ereketii? Woyko akeekeketii? Hinte wozanay doccidee?
MAR 8:18 Hintew ayfey de7ishin be7eketii? Haythi de7ishin si7eketii? Hinte akeeketii?
MAR 8:19 Taani ichashu uythaa ichashu mukulu asaas bathida wode aapun gayta kumethi tiife denthidetii?” yaagis. Entika, “Tammanne nam7u gayta kumethi” yaagidosona.
MAR 8:20 “Hessadaka, taani laapun uythaa oyddu mukulu asaas bathida wode aapun gayta kumetha tiife denthidetii?” yaagis. Enti, “Laapun gayta kumethi denthida” yaagidosona.
MAR 8:21 Yaatin, “Ha77ika akeekibeketii?” yaagis.
MAR 8:22 Enti Beetesayda katamaa bidosona. Guutha asati qooqe uraa Yesuusako ehidi he uraa bochana mela iya woossidosona.
MAR 8:23 Yesuusi qooqe uraa kushiya oykidi katamaape gaxa kessis. Iya ayfiyan cuttidi ba kushiya iya bolla wothidi, “New aykoy bentii?” yaagidi oychis.
MAR 8:24 Uray dhoqu gidi xeellidi, “Taw asay bentees, shin asay hemetishe mithi daanees” yaagis.
MAR 8:25 Hessafe guye, Yesuusi zaaridi, uraa ayfiyan ba kushiya wothis. Uray loythi xeellis, iya ayfey paxis, ubbaba geeshshidi be7is.
MAR 8:26 Yesuusi addiyako, “Ne soo ba, shin gutaa gelopa” yaagidi kiittis.
MAR 8:27 Yesuusi ba tamaaretara Qisaare Filphoosa matan de7iya gutaa bis. Enti bishin oge bolla Yesuusi, “Tana asay oona goonna?” yaagidi ba tamaareta oychis.
MAR 8:28 Iya tamaareti, “Issi issi asay nena, ‘Xammaqiya Yohaanisa’ goosona; harati, ‘Eeliyaasa goosona’ qassi harati, ‘Nabetape issuwa’ goosona” yaagidosona.
MAR 8:29 Yesuusi entako, “Yaatin hinte tana oona geetii?” yaagidi oychis. Phexroosi, “Neeni Kiristoosa” yaagidi zaaris.
MAR 8:30 Yesuusi, “Tabaa oodeska odopite” yaagidi enta kiittis.
MAR 8:31 Yesuusi ba tamaaretako, “Asa Na7ay, daro meto ekanaw bessees; cimati, kahine halaqatinne higge astamaareti iya ixanaw bessees. Enti iya wodhanawunne I, heedzu gallasape guye, hayqope dendanaw bessees” yaagidi enta tamaarsis.
MAR 8:32 I hessa entaw geeshshidi odis. Phexroosi iya issi bagga zaaridi hanqetis.
MAR 8:33 Shin Yesuusi guye simmidi, ba tamaareta xeellidi, Phexroosa hanqetidi, “Ha Xalahey, taape haaka. Neeni asi dosiyaba qopaasape attishin, Xoossay dosiyaba qopaka” yaagis.
MAR 8:34 Qassika Yesuusi daro asaanne ba tamaareta baako xeegidi, “Tana kaallanaw koyiya oonika bana kaddo; ba masqaliya tookidi tana kaalo.
MAR 8:35 Ba shempuwa ashshanaw koyiya uray dhaysana. Shin ta gishonne Wongela gisho ba shempuwa dhaysiya uray ashshana.
MAR 8:36 Issi asi sa7an de7iya ubbaba baw shiishidi, ba shempuwa dhaysiko iya ay maaddanee?
MAR 8:37 Issi asi ba shempuwa wozanaw ay immanaw danda7ii?
MAR 8:38 Xoossaa ammanonna ha iita yeletethan, issi asi tananinne ta qaalan yeellatiko, Asa Na7ay, qassi ba Aawa bonchon geeshsha kiitanchotara yaa wode iyan yeellatana” yaagis.
MAR 9:1 Yesuusi entako, “Taani hintew tuma odayis; Xoossaa kawotethay wolqara yeysa be7onna hayqonna issi issi asati haysan de7oosona” yaagis.
MAR 9:2 Yesuusi usupun gallasape guye, baara Phexroosa, Yayqoobanne Yohaanisa ekidi, enta xalaala gita zuma bolla kessidi enta sinthan laametis.
MAR 9:3 Iya ma7oyka phoolis; sa7an ma7o meecciya oonika geeshshanaw danda7onnaysa mela daro booxis.
MAR 9:4 He heedzu tamaareti, Eeliyaasinne Musey Yesuusara odetishin be7idosona.
MAR 9:5 Phexroosi Yesuusa, “Astamaariyaw, nuuni haysan de7eysi nuus lo77o; nu heedzu shaqarata issuwa new, issuwa Muses, qassi issuwa Eeliyaasas shaqarana” yaagis.
MAR 9:6 Iyaranne hankotara daro yayyida gisho Phexroosi ay giyakoka eribeenna.
MAR 9:7 Hessafe guye, shaaray yidi enta kammin shaarape, “Haysi ta dosiya, ta Na7aa, I geysa si7ite” giya qaalay yis.
MAR 9:8 Ellesidi enti yuushshi aathidi xeelliya wode, Yesuusape attishin, haraa oonaka banta matan be7ibookona.
MAR 9:9 Enti zumaa bollafe wodhishin, Yesuusi entako, “Asa Na7ay, hayqope dendana gakanaw, hinte be7idaba oodeska odopite” yaagidi kiittis.
MAR 9:10 I kiittidaysa enti, “Ero” gidi, “Ha hayqope dendo guussay woyguuse” gidi, banta giddon odetidosona.
MAR 9:11 Enti zaaridi, “Higge astamaareti, ‘Eeliyaasi koyrottidi yaanaw bessees’ ayis goonna?” yaagidi oychidosona.
MAR 9:12 Yesuusi zaaridi “Eeliyaasi koyrottidi yidi, ubbaba giigisees; yaatin, Geeshsha Maxaafan, ‘Asa Na7i daro waayetana; ixetana’ yaagidi aybis xaafetidee?
MAR 9:13 Shin taani hintew odayis; Eeliyaasi yis; qassi iyabay Geeshsha Maxaafan xaafetidaysada, asay iya bolla banta koydaba oothidosona” yaagis.
MAR 9:14 Yesuusi, Phexroosi, Yayqoobinne Yohaanisi hanko iya tamaaretako simmidi yaa wode, daro asay enta yuushuwan eqidaysatanne higge astamaare gidida guutha asati entara palameysa be7idosona.
MAR 9:15 He daro asay Yesuusa be7ida wode malaaletidi, ellesidi iyako woxi yidi, iya sarothidosona.
MAR 9:16 Yesuusi ba tamaaretako, “Entara ay palameetii?” yaagidi oychis.
MAR 9:17 He daro asa giddofe issi uray zaaridi, “Astamaariyaw, ta na7aa bolla odetethi diggiya tuna ayyaanay de7iya gisho, iya neeko ekada yas.
MAR 9:18 Ha tuna ayyaanay iya oykiya wode ubban, iya shoci yeggees; iya doonara gopontoy yees; qassi ache garcisees; asatethayka minnees. Iyape ha tuna ayyaana kessana mela, ne tamaaretas odas, shin kessanaw danda7ibookona” yaagis.
MAR 9:19 Yesuusi zaaridi entako, “Ammanonna ha wodiya asaw! Taani hintera awude gakanaw daanee? Qassi hintena awude gakanaw danda7anee? Na7aa taako haa eki yiite” yaagis.
MAR 9:20 Enti na7aa iyako ehidosona; he tuna ayyaanay Yesuusa be7ida mela na7aa kokorsis; na7ay sa7an kundidi, doonara gopontoy toofu gishin gondoretis.
MAR 9:21 Yesuusi he na7aa aawako, “Haysi ne na7aa oykoosape ay mela wode gidanee?” yaagidi oychis. Na7aa aaway, “I guuthan de7ishin oykis.
MAR 9:22 Iya wodhanaw daro wode tamaninne haathan yeggees, shin ne danda7iko, nuus qadhetarki, nuna maaddarki” yaagis.
MAR 9:23 Yesuusi iya, “ ‘Neeni danda7iko gay?’ Ammaniya oodeska ubbabay danda7etees” yaagis.
MAR 9:24 Ellesidi na7aa aaway ba qaala dhoqu oothidi, “Taani ammanayis, shin guja ammananada tana maaddarki” yaagis.
MAR 9:25 Yesuusi asay dari dari beysa be7idi, tuna ayyaana, “Ha tullenne muume ayyaanaw, ha na7aape keya gada nena ta kiittayis; qassi nam7antho iyan gelopa” yaagis.
MAR 9:26 He tuna ayyaanay waassidi, na7aa daro kokorsidi, iyape keyis. Na7ay hayqida daanin, daro asay, “Na7ay hayqis” yaagidosona.
MAR 9:27 Shin Yesuusi na7aa kushiya oykidi denthin, na7ay dendi eqis.
MAR 9:28 Yesuusi soo gelidaysafe guye, iya tamaareti, “Nuuni he tuna ayyaana kessanaw ayis danda7ibooko?” yaagidi Yesuusa dumma oychidosona.
MAR 9:29 Yesuusi zaaridi, “Hessa melay woosapenne xoomape attishin, haraban keyanaw danda7enna” yaagis.
MAR 9:30 Enti he bessaafe dendidi, Galilara aadhidi bidosona; Yesuusi ba de7iyasuwa oonika erana mela koybeenna.
MAR 9:31 I ba tamaaretako, “Asa Na7aa, asi asas aathidi immananne wodhana; I heedzu gallasape guye, hayqope dendana” yaagidi tamaarsees.
MAR 9:32 Shin entaw I geysi gelibeenna; qassi iya oychanawuka yayyidosona.
MAR 9:33 Enti Qifirnahooma katamaa bidi soo gelidaysafe guye, Yesuusi entako, “Ogen ay odeteetii?” yaagidi oychis.
MAR 9:34 Shin enti, “Nu giddon ubbaafe aadhanay oonee?” yaagidi palamida gisho, si77i gidoosona.
MAR 9:35 Yesuusi uttidi, tammanne nam7u tamaareta xeegidi, “Oonika sinthe aadhanaw koyko, ubbaafe guye aadhidi, ubbaas aylle gidanaw bessees” yaagis.
MAR 9:36 Issi guutha na7aa ekidi, enta giddon essis; he guutha na7aa idimmidi entako,
MAR 9:37 “Haysa mela guutha naytape issuwa ta sunthan mokiya oonika tana mokees; qassi tana mokiya oonika tana kiittidaysaka mokeesipe attishin, ta xalaala mokenna” yaagis.
MAR 9:38 Yohaanisi, “Astamaariyaw, issi asi ne sunthan tuna Ayyaanata kessishin nuuni be7idi, nu bagga gidonna gisho, iya diggida” yaagis.
MAR 9:39 Shin Yesuusi, “Oonika ta sunthan Xoossay oothiya malaatata oothidi, ellesidi ta bolla iitabaa odetanaw danda7ey bayna gisho diggofite.
MAR 9:40 Nubaa ixonna uray nu bagga.
MAR 9:41 Taani hintew tuma odayis; hinte tabaa gidiya gisho, oonika hintew ta sunthan halo haathi uyanaw immikoka, ba woytuwa ekana.
MAR 9:42 “Tana ammaniya ha guuthatape issuwa balethiya oonika, gaacha wogga woxa ba qoodhen qachidi, abban wulliyako iyaw lo77o.
MAR 9:43 Ne kushey nena balethiko, qanxa hola. Neeni nam7u kushera to7onna gaanname taman yegeteysafe, duuxa kushera de7uwa geloy new lo77o.
MAR 9:45 Ne tohoy nena balethiko, qanxa hola. Neeni nam7u tohuwara gaanname taman yegeteysafe, wobbe gidada de7uwa geleysi new lo77o.
MAR 9:47 Ne ayfey nena balethiko, wooca kessa hola. Neeni nam7u ayfiyara gaanname taman yegeteysafe, issi ayfiyara Xoossaa kawotethaa geleysi new lo77o.
MAR 9:48 Yan enta miya guxuney hayqenna, tamayka to7enna.
MAR 9:49 “Yarshoy maxinen geeyeysa mela asi ubbay taman harqetana.
MAR 9:50 Maxiney lo77o, shin I mal7onna ixiko, zaaridi waati mal7ethanee? Hintenan maxiney de7o. Yaanidi, issoy issuwara sarotethan de7ite” yaagis.
MAR 10:1 Yesuusi hessafe dendidi, Yihuda biitta bidi Yordaanose Shaafa pinnis. Daro asay zaaridi iyako shiiqin, kaseysadaka he asaa tamaarsis.
MAR 10:2 Issi issi Farsaaweti paacanaw koyidi Yesuusa, “Issi asi ba machiw yeddana mela Muse higgey kiittii?” yaagidi iya oychidosona.
MAR 10:3 I zaaridi, “Musey hintena woygidi kiittidee?” yaagis.
MAR 10:4 Enti, “Musey, ‘Issi asi ba machees anjo worqate immidi yeddo’ gis” yaagidosona.
MAR 10:5 Yesuusi zaaridi, enta “Hinte odin si7onnayisata gidiya gisho, Musey ha kiitaa hintew xaafis.
MAR 10:6 Shin Xoossay koyro medhiya wode, addenne macca oothidi, enta medhis.
MAR 10:7 Hessa gisho, issi asi ba aawanne ba aayiw aggidi, ba machera issife de7ees.
MAR 10:8 Enti nam7ay issi ase gidoosona; hizape, enti issi ase gidoosonape attishin, nam7u asi gidokona.
MAR 10:9 Hessa gisho, Xoossay issife qachidaysa asi shaakofo” yaagis.
MAR 10:10 Enti soo simmida wode, iya tamaareti ha odabaa Yesuusa nam7antho oychidosona.
MAR 10:11 Yesuusi entako, “Ba machiw yeddidi hara ekiya oonika laymatees.
MAR 10:12 Qassi maccasiyaka ba azinaape keyada hara azina geliko laymatawusu” yaagis.
MAR 10:13 Yesuusi guutha nayta bolla ba kushiya wothana mela, issi issi asay nayta iyako ehoosona, shin iya tamaareti he asa hanqetidosona.
MAR 10:14 Yesuusi hessa be7idi, ba tamaareta hanqetidi; entako, “Guutha nayti taako yeysa diggofite; Xoossaa kawotethay haysata melasa.
MAR 10:15 Taani hintew tuma odayis; Xoossaa kawotethaa guutha na7ada ekonna uray oonika he kawotethaa ubbaraka gelenna” yaagis.
MAR 10:16 Guutha nayta idimmidi, ba kushiya enta issuwa issuwa bolla wothidi anjis.
MAR 10:17 Yesuusi baanaw keyda wode, issi uray woxi yidi, iya sinthan gulbatidi, “Keeha astamaariyaw, taani merinaa de7o laattanaw ay ootho?” yaagidi oychis.
MAR 10:18 Yesuusi, “Ayis tana keehaw gada xeegay? Xoossaa xalaalape attishin, hari keehi oonika baawa.
MAR 10:19 Xoossaa kiitaa, wodhopa; laymatopa; kaysotopa; wordo markatofa; inxarsan cimmofa; ne aawanne ne aayiw boncha yaageysa eraasa” yaagis.
MAR 10:20 Uray, “Astamaariyaw, taani hessa ubbaa na7atethafe doomada ha77i gakanaw naagayis” yaagis.
MAR 10:21 Yesuusi uraa tishshi oothi xeellidi dosis; “New issibay pacees; bada new de7iyaba ubbaa bayzada, he miishiya manqotas imma; neeni salon dure gidana. Yaata simmada tana kaalla” yaagis.
MAR 10:22 Shin uray hessa si7idi, I daro dure gidiya gisho, ba som7uwa kareethis, ufaytonna aggidi bis.
MAR 10:23 Yesuusi ba tamaareta yuushshi aathi xeellidi, “Dure asi Xoossaa kawotethaa gelanaysi waanidi metandeesha!” yaagis.
MAR 10:24 Iya tamaareti iya timirtiya si7idi malaaletidosona. Shin Yesuusi qassika entako, “Nayto, Xoossaa kawotethaa gelanaysi waanidi metandeesha!
MAR 10:25 Dure asi Xoossaa kawotethaa gelanaysafe, gimaley narpe luhora aadheysi kawuyees” yaagis.
MAR 10:26 Iya tamaareti malaaletidi, “Yaatin, ooni attanee?” yaagidi, issoy issuwa oychidosona.
MAR 10:27 Yesuusi enta tishshi oothi xeellidi, “Haysi Xoossas danda7etesipe attishin, asas danda7etenna; Xoossas ubbabay danda7etees” yaagis.
MAR 10:28 Phexroosi Yesuusako, “Heko; nuuni nubaa ubbaa aggidi, nena kaallida” yaagis.
MAR 10:29 Yesuusi “Taani hintew tuma odayis; ta gishonne wongela gisho, keethe woyko ishata woyko micheta woyko aawa woyko aayo woyko machiw woyko nayta woyko gade aggida oonika,
MAR 10:30 ha77i ha wodiyan xeetu kushe keetha, ishata, micheta, aayeta, nayta, gadiya, goodetethara issife ekana. Sinthafe yaana wodiyanka merinaa de7uwa ekana.
MAR 10:31 Shin daroti ha77i dethan sinthe gididaysati guye gidana, qassi daroti ha77i guye gididaysati sinthe gidana” yaagis.
MAR 10:32 Yesuusaranne iya tamaaretara Yerusalaame bishin, Yesuusi ba tamaareta sinthan hemetees. Enti malaaletidosona. Iya kaalleysatika yayyidosona. Nam7antho, tammanne nam7u tamaareta gaxa kessidi, bana gakanaba dumma entaw haysada yaagidi odis.
MAR 10:33 “Heko, nuuni Yerusalaame ha77i keyoos. Yan Asa Na7ay, kahine halaqatasinne higge astamaaretas aadhidi imetana. Enti iya bolla hayqo pirdaa pirdana; qassi Ayhude gidonna deriyas iya aathidi immana.
MAR 10:34 Ayhude gidonna derey iya toochana, iya bolla cuttana, lisson garaafananne wodhana. I heedzu gallasape guye, hayqope dendana” yaagis.
MAR 10:35 Zabdiyoosa nayti Yayqoobinne Yohaanisi Yesuusako yidi, “Astamaariyaw, nuuni nena woossiyaba ubbaa nuus oothana mela koyoos” yaagidosona.
MAR 10:36 Yesuusi entako, “Taani hintew ay ootho?” yaagis.
MAR 10:37 Enti, “Neeni ne boncho kawotethan uttiya wode, nuupe issuwa ushacha baggara qassi issuwa haddirsa baggara utisarki” yaagidosona.
MAR 10:38 Shin Yesuusi entako, “Hinte ay woossiyako ereketa, ta uyanaw de7iya xuu7aa uyanaw danda7eetii? Qassi taani xammaqetanaw de7iya xinqatiya xammaqetanaw danda7eetii?” yaagis.
MAR 10:39 Enti zaaridi, “Ee danda7oos” yaagidosona. Yesuusi qassi, “Tumaka ta uyanaw de7iya xuu7aa hinte uyana, taani xammaqetanaw de7iya xinqatiya hinte xammaqetana.
MAR 10:40 Shin taape ushacha baggaranne haddirsa baggara uttanayisata dooranaw taw maati baawa, shin he bessay Xoossay immanaw giigisidi wothidaysatasa” yaagis.
MAR 10:41 Hanko tammu tamaareti hessa si7ida wode, Yayqoobanne Yohaanisa bolla hanqetidosona.
MAR 10:42 Yesuusi enta ubbaa baako xeegidi, “Ayhude gidonna asaa halaqati deriya haareyisata geetetidi xeegeteysanne haareysatas deriya bolla maati de7eysa hinte ereeta.
MAR 10:43 Shin hinte giddon hessa mela gidenna; hinte giddon gitatanaw koyey oonika hintew aylle gidanaw bessees.
MAR 10:44 Qassi hinte giddon ubbaafe bolla gidanaw koyey oonika hinte ubbaas aylle gidanaw bessees.
MAR 10:45 Hari attoshin, Asa Na7ayka, asaas oothanawunne darota wozanaw ba shempuwa aathidi immanaw ysipe attishin, asi iyaw oothana mela yibeenna” yaagis.
MAR 10:46 Enti Iyaarko katama bidosona. Yesuusi ba tamaaretaranne daro asaara Iyaarkofe keyishin, Ximoosa na7ay, qooqey, Barximoosa geeteteysi, oge gaxan woossishe uttis.
MAR 10:47 Barximoosi, yaara aadhey Naazirete Yesuusa gididaysa si7ida wode, ba qaala dhoqu oothidi, “Dawita na7aa Yesuusa, tana maararki!” yaagis.
MAR 10:48 Daro asay iya, “Hayza!” gidi hanqetidosona. Shin, I ba qaala kaseysafe daro dhoqu oothidi, “Dawita na7aw, tana maararki!” yaagis.
MAR 10:49 Yesuusi eqidi, “Iya haa xeegite” yaagis. Enti qooqiyako, “Aykoy baawa, denda eqa, nena xeegees” yaagidosona.
MAR 10:50 Qooqey ba ma7uwa holi yeggidi, gupi dendi eqidi, Yesuusako bis.
MAR 10:51 Yesuusi, “Taani new ay oothana mela koyay?” yaagis. Qooqey, “Astamaariyaw, ta xeellanaw koyayis” yaagis.
MAR 10:52 Yesuusi, “Ba, ne ammanoy nena pathis” yaagis. Iiraka iya ayfey xeellin, Yesuusa kaallis.
MAR 11:1 Enti Yerusalaame matishe, Shamaho zuma matan de7iya Beetefaagenne Bitaane katamata gakidosona. Yesuusi ba tamaaretape nam7ata sinthe kiittidi,
MAR 11:2 “Hintefe sinthan de7iya gutaa biite; yaa gelida mela oonika toggiboonna qashon de7iya hare mari hinte demmana, iya billidi, haa eki yiite.
MAR 11:3 Oonika hintena, ‘Haysa ayis oothetii?’ yaagidi oychiko, ‘Goday iya koyees, ellesidi haa yeddana’ yaagite” yaagis.
MAR 11:4 Enti bidi, hare mari kare bolla oge matan qashetidi de7eysa demmidi billidosona.
MAR 11:5 He bessan eqida issi issi asati entako, “Hare maraa waatanaw billeetii?” yaagidi oychidosona.
MAR 11:6 Iya tamaareti Yesuusi bantana kiittidaysa odin, asati yeddi aggidosona.
MAR 11:7 Enti hare maraa Yesuusako ehidi, banta ma7uwa iya zokon hiixin Yesuusi he hare maraa toggis.
MAR 11:8 Daro asay banta ma7uwa ogiyan hiixidosona; qassi harati mitha tashe tashidi, ogen hiixidosona.
MAR 11:9 Yesuusape sinthara hemetiya asaynne iya kaalliya asay banta qaala dhoqu oothidi, “Hosaana! Xoossay galatetto! Godaa sunthan yeysi anjetidaysa.
MAR 11:10 Godaa sunthan yaa nu aawa Dawita kawotethay anjetidaysa. Ubbaafe Bolla Salon de7iya Xoossay galatetto” yaagidosona.
MAR 11:11 Yesuusi Yerusalaame bidi, Xoossaa Keetha gelis. Qassi ubbaba yuuyi xeellidaape guye, sa7i qammiya gisho, tammanne nam7u tamaaretara Bitaane katama bis.
MAR 11:12 Wontetha gallas enti Bitaanepe keyidi bishin, Yesuusi koshatis.
MAR 11:13 Haahon issi balase mithiw haytha xalaala ma7a uttidaaro be7idi, I bolla ayfey bentiko gidi, be7anaw iiko bis, shin iiko I biya wode, haytha xalaalape attishin, issi ayfeka demmibeenna; ayis giiko, balasey ayfiya wodey gakibeenna.
MAR 11:14 Yesuusi he balasiw, “Hiza, asi neepe merinaw ayfe moopo” yaagis. Iya tamaareti I geysa si7idosona.
MAR 11:15 Enti Yerusalaame bidosona; Yesuusi Xoossa Keethi gelidi, yan bayzeysatanne shammeyisata kare goodo oykis; qassi miishe laammeyisata xarpheezanne holle bayzeyisata oydiya shiri yeggidi,
MAR 11:16 asi aybibaaka tookidi, xoossa keetha giddora aadhona mela diggis.
MAR 11:17 Yesuusi asaa haysada yaagidi tamaarsis: “Geeshsha Maxaafan, ‘Ta keethay asi ubbay Xoossaa woossiya keethi gidana’ geetetidi xaafetis. Shin hinte iya pangati qosetiya gongolo oothideta” yaagis.
MAR 11:18 Kahine halaqatinne higge astamaareti hessa si7idi, iya wodhanaw oge koydosona. Shin daro asay iya timirtiyan malaaletiya gisho, iyaw babidosona.
MAR 11:19 Sa7ay omarsiya wode Yesuusinne iya tamaareti katamaape gaxa keyidosona.
MAR 11:20 Enti wontetha gallas he ogiyara aadhishe, he balasiya xaphora melidaaro be7idosona.
MAR 11:21 Phexroosi akeekidi, “Astamaariyaw, Heko, neeni baaddida balasiya melasu” yaagis.
MAR 11:22 Yesuusi zaaridi, “Xoossaa ammanite.
MAR 11:23 Taani hintew tuma odayis; oonika ba wozanan sidhonna gidabay hananaysa ammanidi, ha zumaa, ‘Dendada abban kunda’ yaagiko iyaw hanana.
MAR 11:24 Hessa gisho, taani hintew odayis; Xoossaa hinte woossiyabanne oychiyaba ayba gidikoka ekidaada ammanite, hinte ekana.
MAR 11:25 Xoossaa woossanaw hinte eqiya wode, salon de7iya hinte Aaway hinte nagara atto gaana mela, oonika hintena naaqidabay de7iko, iyaw atto giite.
MAR 11:26 Shin asa nagara hinte atto goonna ixiko, salon de7iya hinte Aawayka hinte nagaraa hintew atto geenna” yaagis.
MAR 11:27 Enti zaaridi Yerusalaame bidosona. Yesuusi xoossa keethan hemetishin, kahine halaqati, higge astamaaretinne cimati iyako yidi,
MAR 11:28 “Neeni haysa oothanaw new ay maati de7ii? Woyko new ha maata immiday oonee?” yaagidosona.
MAR 11:29 Yesuusi zaaridi, “Ta hintena issiba oychana, taw odite. Ta qassi haysa ay maatan oothiyako, hintew odana.
MAR 11:30 Yohaanisa xinqatey Xoossafeye woyko asapee? Taw odite” yaagis.
MAR 11:31 Enti banta giddon palama doomidi, “Nuuni, ‘Xoossafe’ giiko, I nuuko, ‘Yaatin, Yohaanisi odidaysa ayis ammanibeketii?’ yaagana.
MAR 11:32 ‘Asape giiko’ asa ubbay Yohaanisi nabe gideysa eroosona.” Hessa gisho, asaas yayidosona.
MAR 11:33 Hessa gisho, enti Yesuusako, “Nuuni eroko” yaagidi zaaridosona. Yesuusi, “Taanika haysa ay maatan oothiyako, hintew odike” yaagis.
MAR 12:1 Yesuusi entaw leemison yaagidi odis: “Issi uray woyne tokidi, iya yuushon dirsi diris. Qassi he woyne gum7iya olla bookis. Iya naaganaw adussa shako shakis. Hessafe guye, kothe oothiya asas immidi, hara biitta bis.
MAR 12:2 Woyne ayfiya maxiya wodey gakin, bana gakiya gishuwa ehana mela, issi ba aylliya kothe aawatako yeddis.
MAR 12:3 Kothe aawati iya aylliya oykidi wadhidi, mela kushe yeddidosona.
MAR 12:4 Nam7antho hara aylle entako kiittin, enti he aylliya huuphiya qoo7idi kawushidi yeddidosona.
MAR 12:5 Woyne atakiltiya goday qassika hara aylle kiittis. He aylliya wodhidosona, qassi hara darota hessada oothidosona, issota issota wadhidi, harata wodhidosona.
MAR 12:6 “Woyne atakiltiya godaas kiittanaw ubbaafe wursethan I daro dosiya ba na7aa xalaali attis. I, ‘Enti ta na7aa bonchona aggokona’ gidi, ba na7aa entako kiittis.
MAR 12:7 “Shin kothe aawati banta giddon, ‘Laattanaysi haysa; yedhite iya wodhoos; iya laatay nubaa gidana!’ yaagidosona.
MAR 12:8 Na7aa oykidi wodhidi, iya aha woyne gadiya giddofe gaxa kessidi yeggidosona.
MAR 12:9 “Hiza, woyne gadiya goday waatanee? Yidi he kothe aawata wodhi ongidi, woyniya kothe oothiya hara asas immana.
MAR 12:10 “ ‘Gimbeysati boridi ixida shuchay godaa xaphuwa minthiya, ubbaafe aadhiya shuchu gidis. Haysi Goday oothidaba; qassi nu ayfiyaska malaalsiyaba’ yaageysa Geeshsha Maxaafape nabbabibeketii?” yaagis.
MAR 12:12 Kahine halaqati, higge astamaaretinne cimati Yesuusi he leemisuwa banta bolla leemisidaysa erida gisho, iya oykanaw koydosona, shin asaas yayyidi, aggidi bidosona.
MAR 12:13 Qassi iya odaape bala demmidi, iya oykana mela, Farsaawetapenne Herodiisa baggatape guutha asata iyako kiittidosona.
MAR 12:14 Enti iyako yidi, “Astamaariyaw, neeni tuma odeteysanne asape ase shaakonnaysa nuuni eroos. Neeni ase dummayaka; qassi Xoossaa ogiya tumatethan tamaarsaasa. Nuuni Roome biitta Kawa Qeesares giira giireysi wogeye woga gidennee? Giira giirane agganee?” yaagidosona.
MAR 12:15 Shin Yesuusi enta cubbotethaa eridi, “Tana ayis paacetii? Ane issi santime tana bessite” yaagis.
MAR 12:16 Enti iyaw ehidosona, “Ha misileynne sunthay oodebayee?” yaagidi enta oychis. Enti, “Roome Kawa Qeesareysa” yaagidosona.
MAR 12:17 Yesuusi zaaridi, “Yaatiko, Qeesareba Qeesares, Xoossaba Xoossaas immite” yaagin enti iyabaa malaaletidosona.
MAR 12:18 Hayqida asi dendenna giya Saduqaawetape issi issi asati Yesuusako yidi, haysada yaagidi, iya oychidosona.
MAR 12:19 “Astamaariyaw, Musey nuus higgiya xaafishe, ‘Macho ekida asi na7a yelonna hayqiko, he hayqidaysa ishay iya machiw ekidi, ba ishaas na7a yelanaw bessees’ yaagis.
MAR 12:20 Beni wode laapun ishati de7eysatape bayray macho ekidi, na7a yelonna hayqis.
MAR 12:21 Nam7anthoy iyo ekis, ika na7a yelonna hayqis. Heedzanthoyka hessada hanis.
MAR 12:22 Laapunatika hessatho iyo ekidi, na7a yelonna hayqidosona. Ubbaafe guye, qassi he maccasiya hayqasu.
MAR 12:23 Yaatin, laapunati iyo ekida gisho hayqida asay hayqope dendiya gallas, iya entafe awusas macho gidanee?” yaagidosona.
MAR 12:24 Yesuusi zaaridi, “Hinte baletey, Geeshsha Maxaafata woyko Xoossaa wolqaa eronna gishosa!
MAR 12:25 Hayqida asay hayqope dendiya gallas, salon de7iya kiitanchota mela gidanaape attishin, ekokona; gelekona.
MAR 12:26 Shin hayqidaysata denduwaba gidiko, Muse maxaafan xaafetida xuugetiya tushiyaba odiya bessan, Xoossay Museko, ‘Taani, Abrahaame Xoossa, Yisaaqa Xoossa, Yayqooba Xoossa’ gidaysa nabbabibeketii?
MAR 12:27 Hessa gisho, I, paxa de7eyisata Xoossaafe attishin, hayqidaysata Xoosse gidenna. Hinte daro balideta” yaagis.
MAR 12:28 Higge astamaaretape issoy enti palameysa shiiqidi si7is. Qassi Yesuusi entaw loythi zaaridaysa si7idi, “Kiita ubbaafe aadhiya kiitay awusee?” yaagidi Yesuusa oychis.
MAR 12:29 Yesuusi zaaridi, iya haysada yaagis: “Kiita ubbaafe aadhiya kiitaa si7ite; ‘Isra7eele asaw, Goday nu Xoossay issi Godaa.
MAR 12:30 Ne Godaa ne Xoossaa ne kumetha wozanape, ne kumetha shempuwafe, ne kumetha qofaape, ne kumetha wolqaafe dosa’ yaagees.
MAR 12:31 Qassi kiita ubbaafe aadhiya nam7antho kiitay haysa; ‘Ase ubbaa ne huuphiyada dosa’ yaageysa; haysatape aadhiya hara kiiti baawa” yaagis.
MAR 12:32 Higge astamaarey Yesuusako, “Astamaariyaw, tuma gadasa; neeni ‘Xoossay issi Xoossaa xalaala. Iyape attishin, hari baawa’ gidaysi tuma.
MAR 12:33 Xoossaa kumetha wozanape, kumetha qofaapenne kumetha wolqaafe doseysinne qassi ase ubbaa ba huuphiyada doseysi, xuussa yarshofenne hara yarsho ubbaafe aadhees” yaagis.
MAR 12:34 Yesuusi higge astamaariya zaaroy aadhida erancho asa zaaro gididaysa be7idi, “Neeni Xoossaa kawotethaafe haakabaaka” yaagis; hessafe guye, Yesuusa haraba oychanaw oonika minnibeenna.
MAR 12:35 Yesuusi xoossa keethan tamaarsishe, haysada yaagis: “Higge astamaareti Kiristoosa woygidi Dawita na7a goonna?
MAR 12:36 Dawiti Geeshsha Ayyaanan kumidi, “ ‘Goday, ta Godaa, “Taani ne morketa ne tohoy yedhiyaso oothana gakanaw, haysan taape ushacha baggara utta” gis’ yaagis.
MAR 12:37 Dawiti ba huuphen Kiristoosa, ‘Godaa’ gidi xeegiko, yaatin, Kiristoosi waanidi, Dawita na7a gidi?” yaagis. Daro asay Yesuusi geysa ufaysan si7idosona.
MAR 12:38 Yesuusi tamaarsishe, haysada yaagis: “Higge astamaaretape naagetite; enti adussa ma7o ma7idi yuuyeysanne giyanka asay enta bonchidi sarotheysa dosoosona.
MAR 12:39 Enti ayhude woosa keethatan daro lo77iya oydiya dosoosona; qassi asi bantana mokiya bessan boncho bessi dosoosona.
MAR 12:40 Enti am7eta keethaa bonqidi, bantaw lo77o daananaw woosa adussosona; enti ubbaafe aadhiya pirdaa ekana” yaagis.
MAR 12:41 Yesuusi xoossa keethan muxaata yeggiya saaxiniya matan uttidi, asay ba miishiya he saaxiniyan yeggeysa be7is; daro dure asay daro miishiya he saaxiniyan yeggoosona.
MAR 12:42 Issi manqo am7iya yada, nam7u bakanna he saaxiniyan yeggasu.
MAR 12:43 Yesuusi ba tamaareta xeegidi, “Taani hintew tuma odayis; muxaata saaxiniyan yeggida asa ubbaafe ha manqo am7iya darsada yeggasu.
MAR 12:44 Ayis giiko, harati ubbay bantaw palahida miishiyape yeggidosona. Shin iya ba pacaape, baw de7iya aquwa kumethi immasu” yaagis.
MAR 13:1 Yesuusi Xoossa Keethafe keyishin, iya tamaaretape issoy, “Astamaariyaw, ha lo77o shuchaanne ha lo77o shucha keethaa be7ay!” yaagis.
MAR 13:2 Yesuusi zaaridi, “Ha gita shucha keethaa be7ay? Ha keethay shuchi shucha bolla gimbetida mela laaletonna attenna; issi shuchika attonna ubbay laaletana” yaagis.
MAR 13:3 Yesuusi Xoossa keethafe hini baggara Shamaho zuma bolla uttidashin, Phexroosi, Yayqoobi, Yohaanisinne Indiriyasi bantarka iyako yidi,
MAR 13:4 “Haysi awude hananeeko nuus oda; ha ubbay poletana wodiya erisiya malaatay aybee?” yaagidi oychidosona.
MAR 13:5 Yesuusi qassi entako haysada yaagidi odis. “Hintena oonika balethonna mela naagetite.
MAR 13:6 Daro asati ta sunthan, ‘Taani Kiristoosa’ yaagidi tamaarsishe yidi, daro asaa balethana.
MAR 13:7 Matan de7iya olaanne haahon de7iya ola wore hinte si7iya wode hirgofite. Hessa melabay hananaw bessees, shin wursethay buroona.
MAR 13:8 Issi biitta asay hara biitta asaara oletana; qassi issi kawotethay hara kawotethatara oletana; biitta qaaxoy ubba bessan hanana; koshay daana, shin hessi ubbay yelo iqethas zooke mela.
MAR 13:9 “Shin hinte, hinte huuphen naagetite. Ayis giiko, asi hintena oykidi, pirda keethas aathidi immana; qassi ayhude woosa keethatanka hintena lisson garaafana; deriya haareyisata sinthaninne kawota sinthan ta gisho hinte markatanaw eqana.
MAR 13:10 Wursethay gakanaape sinthe wongelay koyro dere ubbaas odetanaw bessees.
MAR 13:11 Enti hintena pirda keethi ehiya wodenne aathidi immiya wode, woygidi odaneko koyro hirgofite; he saatiyan Xoossay hintew immiyaba odite. Hintenan Geeshsha Ayyaanay odeteesipe attishin, hintena gideketa.
MAR 13:12 “Ishay ba ishaa, aaway ba na7aa wodhisana. Nayti bantana yelidaysata bolla dendidi, enta wodhisana.
MAR 13:13 Asa ubbay hintena ta suntha gisho ixana, shin wursethi gakanaw minniday attana.
MAR 13:14 “Shin dhayo tunatethay eqanaw bessonna bessan eqidashin hinte be7ana.” (Akeekiso: Hessi woy guusseko nabbabeysi akeeko!) “Yihuda biittan he wode de7eysati deriyako baqato.
MAR 13:15 Keetha huuphen de7iya urayka issiba ekanaw duge wodhidi, ba soo gelopo.
MAR 13:16 Gaden de7eysi ba ma7uwa ekanaw guye simmofo.
MAR 13:17 He wode qanthatida maccasatasinne dhanthiya maccasatas daro un7a gidana.
MAR 13:18 Shin haysi ubbay haniya wodey balgo gidonna mela, Xoossaa woossite.
MAR 13:19 Ayis giiko, Xoossay alamiya medhida wodiyape doomidi, ha77i gakanaw haniboonna metoynne sinthafeka hanonna metoy asa bolla he wode hanana.
MAR 13:20 Goday he gallasata taybuwa guuthonnaako, ase gidida oonika attenna. Shin I ba doorida asa gisho, he gallasata taybuwa guuthees.
MAR 13:21 “He wode oonika hintena, ‘Heko, Kiristoosi haysan de7ees woyko Kiristoosi hinin de7ees’ yaagiko, hessa ammanopite.
MAR 13:22 Wordancho Kiristoosatinne wordo nabeti dendidi bantaw danda7etiko, hari attoshin Xoossay dooridaysataka balethanaw malaatatanne malaalsiyabata bessaana.
MAR 13:23 Shin hinte naagetite; taani hintew ubbaba kasetada odas.
MAR 13:24 “Shin he wode he waayiyape guye, away dhumana; ageenay poo7uwa aggana.
MAR 13:25 Xoolintoti salope kundana; qassi salon de7iya wolqatika qaaxana.
MAR 13:26 He wode Asa Na7ay, gita wolqaranne bonchuwara shaara giddora yishin enti be7ana.
MAR 13:27 He wode I kiitanchota sa7a oyddu bagga kiittana; sa7a gaxape salo gaxa gakanaw, Xoossay doorida asaa shiishana.
MAR 13:28 “Leemisuwa balase mithafe akeekite; balasiya aaciya wodenne I haythay cil7iya wode, torchey matatidaysa hinte ereeta.
MAR 13:29 Hessadaka, hinte he ubbabay haneysa be7iya wode, I matidi penge gakidaysa erite.
MAR 13:30 Taani hintew tuma odayis; ha ubbabay hanana gakanaw haysan de7iya asa ubbay hayqenna.
MAR 13:31 Saloynne sa7i aadhana, shin ta qaalay aadhenna.
MAR 13:32 “Shin he gallasaanne he saatiya Aawa xalaalape attishin, hari attoshin salon de7iya kiitanchota gidin woyko Na7aa gidin oonika erey baawa.
MAR 13:33 He wodey awude gidaneeko, hinte eronna gisho, naagetitenne minnite.
MAR 13:34 Ta yuussay, ba keetha aggidi, oge biya asa mela. Uray ba aylletas huuphen huuphen ooso immidi enta ba oosuwa bolla aawa oothis; qassi naageysi minthidi naagana mela kiittis.
MAR 13:35 “Hessa gisho, minnite. Ayis giiko, goday omarsi gidin woyko giddi bilahe gidin woyko kutto waaso gidin woyko wonti maathe gidin awude yaaneko, hinte ereketa.
MAR 13:36 Hinte akeekona I yidi hinte dhiskidi de7ishin demmonna mela minnite.
MAR 13:37 Taani hintew odeysa asa ubbaas odayis; minnite” yaagis.
MAR 14:1 Paasika Ba7aale bonchiya gallasinne Uytha Ba7aale bonchiya gallasi gakanaw nam7u gallasi attis. Kahine halaqatinne higge astamaareti asi eronna Yesuusa oykidi wodhiya oge koyoosona.
MAR 14:2 “Asay ooshshi kessonna mela Paasika bonchiya gallasan hessa oothoko” yaagidosona.
MAR 14:3 Yesuusi Bitaane kataman baro hargancho gidida Simoona son gibira bolla uttidashin, issi maccasiya albasxiroosa shuchafe oosetida philqaaxe kumetha nardoose geetetiya daro al7o shitto ekada yasu. He philqaaxe menthada shittuwa Yesuusa huuphen tigasu.
MAR 14:4 He bessan de7iya asape issoy issoy hanqetidi, “Ha shittoy mela coo iitey aybisee?
MAR 14:5 Ha shittuwa heedzu xeetu dinaaren bayzidi, miishiya manqotas immanaw danda7etees” yaagidi banta giddon odetidosona. Yaatidi, he maccasiw daro boridosona.
MAR 14:6 Shin Yesuusi “Ha maccasiw aykoka goopite; iyo ayis waaysetii? Iya taw lo77oba oothasu.
MAR 14:7 Manqoti ubba wode hintera de7oosona. Hinte koyida wode awudeka hinte enta maaddanaw danda7eeta, shin taani ubba wode hintera de7ike.
MAR 14:8 Iya ba danda7idaysa oothasu; qassi tana moogoos giigisanaw kasetada shitto tiyasu.
MAR 14:9 Taani hintew tuma odayis; sa7a ubban wongela odiya bessa awunka, asay iyo akeekana mela ha iya oothidaysi odetana” yaagis.
MAR 14:10 Tammanne nam7u tamaaretape issoy Asqoroota Yihuda geeteteysi Yesuusa kahine halaqatas aathidi immanaw entako bis.
MAR 14:11 Enti hessa si7ida wode ufaytidi, “Nuuni new miishe immana” yaagidosona; Yihudi Yesuusa aathidi immanaw inje wode koyees.
MAR 14:12 Uytha miya gallas bonchiya koyro gallas, Paasika katha maanaw maraze shukiya wode, Yesuusa tamaareti iyako, “Paasika bonchiya gallas neeni maana katha nuuni aw bidi giigisino?” gidi oychidosona.
MAR 14:13 Yesuusi ba tamaaretape nam7ata haysada yaagidi kiittis: “Katamaa biite; hinte bishin, otora haathe tookida issi uray hintera gahetana; iya kaallite.
MAR 14:14 I bidi geliya keetha godaa, ‘Astamaarey neeko, “Taani ta tamaaretara Paasika maanaw imatha kifiley awunee?” yaagees’ yaagite.
MAR 14:15 Goday hintena pooqiya bolla de7iya giigidi uttida dalga kifile bessaana; hessan giigisite” yaagis.
MAR 14:16 He nam7u tamaareti keyidi, katama bidosona; Yesuusi entaw odidaysada demmidi, Paasika kathi giigisidosona.
MAR 14:17 Sa7ay omarsiya wode Yesuusi tammanne nam7u tamaaretara yaa bis.
MAR 14:18 Enti uttidi kathi mishin, Yesuusi entako, “Taani hintew tuma odayis; hintefe issoy taara meysi, tana aathidi immana” yaagis.
MAR 14:19 Iya tamaareti dagammidi, banta huuphen huuphen, “Tuma taneshsha?” yaagidi iya oychidosona.
MAR 14:20 Yesuusi zaaridi, “He uray, hinte tammanne nam7atape issuwa; I taara issife tushanaw ba uytha shaaten yeddeysa.
MAR 14:21 Asa Na7ay, Geeshsha Maxaafay hayqana gidaysada hayqana, shin Asa Na7a, aathidi immiya ura ayye! He uray yeletonna attidaako iyaw lo77oshin” yaagis.
MAR 14:22 Enti mishin, Yesuusi uythaa ekidi, Xoossaa galatis; he uytha menthidi, ba tamaaretas immishe, “He7ite, haysi ta ashuwa” yaagis.
MAR 14:23 Xuu7a ekidi, Xoossaa galatidi, entaw immin ubbayka he xuu7ape uyidosona.
MAR 14:24 Yesuusi, “Haysi ooratha caaquwan daro asaa gisho gukiya ta suutha.
MAR 14:25 Taani hintew tuma odayis; taani Xoossaa kawotethan ooratha woyne uyana gallasi gakanaw zaarada ha woyniyape uyike” yaagis.
MAR 14:26 Mazmure yexidaape guye, Shamaho zuma bolla bidosona.
MAR 14:27 Yesuusi entako, “Hinte ubbay tana yeggi aggidi baqatana; Geeshsha Maxaafay, “ ‘Xoossay wude aawa shocana, dorsati ubbay laaletana’ yaagees.
MAR 14:28 Shin taani hayqope dendidaape guye, hintefe sinthatada Galila baana” yaagis.
MAR 14:29 Phexroosi zaaridi, “Enti ubbay nena yeggi aggidi baqatikoka, ta nena aggike” yaagis.
MAR 14:30 Yesuusi Phexroosako, “Taani new tuma odayis; hachi qamma kuttoy nam7u toho waassanaape sinthe neeni tana heedzu toho kaddana” yaagis.
MAR 14:31 Shin Phexroosi kaseysafe minthidi, “Taani hari attoshin, neera issife hayqiyakoka, nena kaddike” yaagis. Qassi harati ubbatika hessada gidoosona.
MAR 14:32 Geetasemaane geetetiya bessaa bidosona; Yesuusi ba tamaaretako, “Taani Xoossaa woossada simmana gakanaw hinte haysan uttishite” yaagis.
MAR 14:33 Yesuusi Phexroosa, Yayqoobanne Yohaanisa baara ekidi bis; daro waayetisinne un7etis.
MAR 14:34 Qassi entako, “Taani hayqana gakanaw azzanas, haysan gam7ishite; dhiskofite” yaagis.
MAR 14:35 Guuthi sinthe shiiqidi, sa7an gufannidi, danda7etiyaba gidiko, he waayiya saatey baape aadhana mela, Xoossa woossis.
MAR 14:36 Qassi, “Abba, ta Aawaw, ubbabay new danda7etees, ha waaye xuu7aa taape digga. Shin ne sheney hanope attishin, ta sheney hanopo” yaagis.
MAR 14:37 Yesuusi ba tamaaretako simmi yidi, enti dhiskidashin demmidi, Phexroosako, “Simoona, dhiskadii? Neeni issi saateka barkada naaganaw danda7abikii?
MAR 14:38 Paacen hinte gelonna mela barkidi naagitenne Xoossaa woossite. Hintew lo77o amoy de7ees, shin hinte daaburancho asi” yaagis.
MAR 14:39 Qassika bidi kaseysada Xoossa woossis.
MAR 14:40 Ba tamaaretako guye simmidi yaa wode, dhiskidashin demmis. Enta ayfiya dhiskoy goozi wothida gisho, iyako ay odetiyakoka erokona.
MAR 14:41 Heedzantho entako yidi, “Ha77i gakanawuka dhisketinne shempetii? Hiza, gidana; saatey gakis; be7ite! Asa Na7ay, nagarancho asaas aadhidi imetana wodey gakis.
MAR 14:42 Dendidi yedhite; be7ite, tana aathidi immanaysi gakis” yaagis.
MAR 14:43 Yesuusi hessa buroo odishin, tammanne nam7u iya tamaaretape issoy, Yihudi, ellesidi gaki wodhis. Qassi kahine halaqati, higge astamaaretinne cimati kiittin, mashshanne xam7a oykida daro asay iyara issife yidosona.
MAR 14:44 Yesuusa aathidi immanaysi he daro asaas, “Taani yeeriya uray iya; iya oykidi, loythi naagidi efite” yaagidi malla odi wothis.
MAR 14:45 Yihudi gaki wodhida mela Yesuusako shiiqidi, “Astamaariyaw” yaagidi Yesuusa yeeri ekis.
MAR 14:46 He daro asay Yesuusa oykidosona.
MAR 14:47 Shin matan eqidaysatape issoy ba mashsha shoddidi kahine halaqaa aylliya shocidi, iya haytha qanxidi holis.
MAR 14:48 Yesuusi zaaridi, he shiiqida daro asaako, “Tana panga kessidi, panga oykeysada oykanaw mashshenne xam7a oykidi yidetii?
MAR 14:49 Taani xoossa keethan tamaarsashe, gallas gallas hintera de7iya wode tana oykibeeketa, shin Geeshsha Maxaafay gidaysi poletanaw bessees” yaagis.
MAR 14:50 Iya tamaareti ubbay iya yeggi aggidi baqatidosona.
MAR 14:51 Laxana xalaala ma7ida issi na7atetha uray Yesuusa kaalleysa asay oykis.
MAR 14:52 Shin he uray laxana yeggi aggidi, xire kallo baqatis.
MAR 14:53 Asay Yesuusa kahine halaqaa soo efidosona. Yan kahine halaqati, cimatinne higge astamaareti shiiqidi de7oosona.
MAR 14:54 Phexroosi kahine halaqaa zabbaa gakanaw haahon iya kaalli bidi yan naageysatara uttidi tama kayees.
MAR 14:55 Kahine halaqatinne shiiqida asa ubbay Yesuusa wodhanaw iya bolla marka koydosona, shin aykoka demmibookona.
MAR 14:56 Daro asati iya bolla wordo markatidosona, shin enta markatethay issino gidibeenna.
MAR 14:57 Issi issi asati dendi eqidi Yesuusa bolla, “I, ‘Taani asi keexida ha Xoossa Keetha laallada, asa kushen keexetiboonna hara Xoossa Keetha heedzu gallasa giddon keexana’ gishin nuuni si7ida” yaagidi wordo markatidosona.
MAR 14:59 Gidoshin, enta markatethay hessanka issino gidibeenna.
MAR 14:60 Kahine halaqay asa ubba sinthan dendi eqidi, “Haysati nena mootiya mootuwas ne zaariyabay baawee?” yaagidi Yesuusa oychis.
MAR 14:61 Shin Yesuusi si77i gis; aykoka zaaribeenna. Kahine halaqay, “Anjetida Xoossaa Na7ay, Kiristoosi neneyee?” yaagidi zaari oychis.
MAR 14:62 Yesuusi zaaridi, “Ee tana, hinte Asa Na7ay, wolqaama Xoossaafe ushacha baggara uttidashin qassi saluwa shaarara yishin be7ana” yaagis.
MAR 14:63 Kahine halaqay ba ma7uwa peedhidi, “Nuna hara marka ay koshshii?
MAR 14:64 Hinte iya cashsha si7ideta; hinte qofay aybee?” yaagis. Enti ubbay, “I hayqanaw bessees” yaagidi iya bolla pirdidosona.
MAR 14:65 Entafe issoti issoti iya bolla cutethi oykidosona. Iya ayfiya goozidi baqishe, “Nena dechiday oonee? Ane nuus oda!” yaagidosona. Naageysati iya eki efidi garaafidosona.
MAR 14:66 Phexroosi kahine halaqaa zabban garsa baggara de7ishin, kahine halaqa gadhindotape issiniya ya yasu.
MAR 14:67 Phexroosi tama kayeysa demmada, tishshi ootha xeellada, “Neka Naazirete Yesuusara de7aasa” yaagasu.
MAR 14:68 Shin Phexroosi, “Ne geysi aybeko ta erike, taw akeeketena” yaagidi kaddis. Yaagi simmidi, zago keyiya wode iiraka kuttoy waassis.
MAR 14:69 He gadhindiya Phexroosa be7ada, iya matan eqida asatako, “Ha urayka entara de7ees” gada zaara odasu.
MAR 14:70 Shin Phexroosi qassika kaddis. Guuthu gam7ishin, matan eqida asati nam7antho Phexroosako, “Neeni Galila biitta asi gidiya gisho tuma entara de7aasa” yaagidosona.
MAR 14:71 Shin Phexroosi, “Taani hinte giya uraa erike!” yaagidi bana baadethinne caaqo oykis.
MAR 14:72 Ellesidi kuttoy nam7antho waassi aggis. Phexroosi, Yesuusi iyako, “Neeni kuttoy nam7u toho waassanaape sinthe heedzu toho tana kaddana” gidaysa akeekidi daro yeekis.
MAR 15:1 Wonta guura ellesidi kahine halaqati, cimati, higge astamaaretinne Ayhude shangoti ubbay shiiqidi maqetidosona. Enti Yesuusa qachi efidi Philaxoosas aathidi immidosona.
MAR 15:2 Philaxoosi iyako, “Neeni Ayhude kawo?” yaagidi oychis. Yesuusi zaaridi, “Ne gadasa” yaagis.
MAR 15:3 Kahine halaqati Yesuusa daroban mootidosona.
MAR 15:4 Shin Philaxoosi zaaridi Yesuusako, “New zaariyabay baawee? Enti ne bolla ay mela mootuwa ehiyako be7ikii?” yaagis.
MAR 15:5 Shin Yesuusi haraba zaaronna ixin, Philaxoosi malaaletis.
MAR 15:6 Philaxoosas Paasika Ba7aale bonchiya gallasan asay koya issi asi qashope billiya meezey de7ees.
MAR 15:7 He wode issi Barbaana geetetiya uray ooshshu kessidi shempo wodhida asaara issife qasho keethan de7ees.
MAR 15:8 Shiiqida daro asay Philaxoosi kaseysada oothana mela iya oychidosona.
MAR 15:9 Philaxoosi asa zaaridi, “Taani hintew Ayhudeta kawa billanaysa koyeetii?” yaagidi oychis.
MAR 15:10 Hessa I giday, kahine halaqati Yesuusa qanaatidi aathidi immidaysa eriya gishosa.
MAR 15:11 Shin kahine halaqati Yesuusa gisho Barbaana billanaada, he shiiqida asay Philaxoosa woossana mela asaa maqidosona.
MAR 15:12 Philaxoosi zaaridi, “Yaatin, ha hinte Ayhude kawo geysa waato?” yaagis.
MAR 15:13 Asay Philaxoosa bolla waassidi, “Masqale bolla iya kaqa” yaagidosona.
MAR 15:14 Philaxoosi, “Ayis? I ay iitaba oothidee?” yaagis. Shin asay kaseysafe guji waassidi, “Masqale bolla iya kaqa” yaagidosona.
MAR 15:15 Philaxoosi asaa ufaysanaw koyidi, Barbaana billis. Yaatidi, lisson Yesuusa garaafisidi, masqaliya bolla kaqana mela entaw aathidi immis.
MAR 15:16 Hessafe guye, wotaadareti Yesuusa deriya haareysa ooso keethi efidi, hara wotaadareta ubbaa issife xeegidosona.
MAR 15:17 Qassi zo7o afila iya mayzidosona; aguntha kallacha giigisidi, iya huuphen wothidosona.
MAR 15:18 Hessafe guye, iyako, “Ayhudeta kawaw merinaw kawota” yaagidi, iyaw ziggidosona.
MAR 15:19 Iya huuphiya xam7an shocidosona; qassi iya bolla cuttidosona; gulbatidi iyaw goyinnidosona.
MAR 15:20 Iya toochidaape guye zo7o afila iyape qaari ekidi, iya afila iya mayzidi masqale bolla iya kaqanaw efidosona.
MAR 15:21 Enti bishe, Iskindirenne Rufoosa aawa, Simoona geetetiya Qereena biitta asi, gaxarepe katama yeysara gahetidi, Yesuusa masqaliya wolqan toossidosona.
MAR 15:22 Yaatidi Golgota geetetiya bessaa Yesuusa efidosona. “Golgota” guussay “Huuphe guugge” guussu.
MAR 15:23 Sakoy si7etonna mela karbera walaketida woyne uyo gidi iyaw immidosona; shin I uyonna ixis.
MAR 15:24 Enti masqale bolla iya kaqidosona. Oona aybi gakaneeko gidi iya afila shaakidi saama yeggidosona.
MAR 15:25 Enti masqale bolla iya kaqiya wode wontafe heedzu saate.
MAR 15:26 Enti, “Ayhude kawa” yaagidi iya mootiya xuufe xaafidi wothidosona.
MAR 15:27 Yesuusara nam7u pangata issuwa iyape ushacha baggara hankuwa iyape haddirsa baggara masqale bolla kaqidosona.
MAR 15:28 Geeshsha Maxaafay, “Iitabaa oothida asatara I paydetis” geetetidaysi poletis.
MAR 15:29 Ogera aadhiya asay Yesuusa kadhidi, banta huuphiya qaathidi cayidosona. “Heko! Xoossa Keetha laallada heedzu gallasa giddon keexana geyso,
MAR 15:30 ane masqaliya bollafe wodha; ne huuphiya ashsha” yaagidosona.
MAR 15:31 Hessadaka, kahine halaqati higge asatamaaretara issife Yesuusa toochidi, “Harata ashshis, shin bana ashshanaw danda7enna;
MAR 15:32 nuuni be7idi ammanana mela Kiristoosi, Isra7eele Kawoy, ane masqale bollafe ha77i wodho” yaagidosona. Qassi hari attoshin, iyara masqale bolla kaqetidaysatika iya toochidosona.
MAR 15:33 Usupun saatepe doomidi, uddufun saate gakanaw biitta ubbay dhumis.
MAR 15:34 Uddufun saaten Yesuusi, “Elohe, Elohe, lama sabaqtanii?” yaagidi waassis. Hessa guussay, “Ta Xoossaw, ta Xoossaw, tana ayis aggadii?” guussu.
MAR 15:35 Hessan eqida asape issoy issoy hessa si7idi, “Heko, Eeliyaasa xeegees” yaagis.
MAR 15:36 He asape issoy woxidi, isponjen caala woyne kunthis; hessa xam7a xeeran wothidi, “Naagite; Eeliyaasi masqale bollafe iya wodhisanaw yaaneko ane be7oos” yaagidi, Yesuusa doonako ushshanaw shiishis.
MAR 15:37 Hessafe guye, Yesuusi waassis; hayqis.
MAR 15:38 Xoossa keethan kaqetida magaraajoy qommofe duge gakanaw, nam7u keyidi daaketi wodhis.
MAR 15:39 Masqaliyape sintha baggara yan eqida issi mato halaqay, Yesuusi waanidi hayqidaako be7ida wode, “Ha uray tuma Xoossa Na7a” yaagis.
MAR 15:40 Hessa haahon eqidi be7iya guutha maccasati de7oosona. Enta giddon Magdela Mayraama, kaaluwa Yayqoobanne Yoosa aayiya Mayraamanne Salooma de7oosona.
MAR 15:41 He maccasati Yesuusi Galilan de7iya wode iya kaallidaysatanne iya mokidaysata qassi Yesuusara issife Yerusalaame bida hara daro maccasati yan de7oosona.
MAR 15:42 Sa7i omarsida wode, shiiqida asan bonchetida Ayhude shangotape issoy, Yoosefa geetetiya uray, Xoossa kawotethay yaanaysa naagishe de7eysi, Armaate katama asi de7eysi yis. Wontethe Sambaatas giigetiya gallas gidida gisho, Yoosefi minnidi Philaxoosako bidi, Yesuusa aha ekanaw woossis.
MAR 15:44 Philaxoosi, Yesuusi hayqidaysa si7ida wode malaaletis; mato halaqa xeegidi, “I hayqidi gam7idee?” yaagidi oychis.
MAR 15:45 Philaxoosi, Yesuusi hayqidaysa mato halaqaape si7idi, iya aha Yoosefas immis.
MAR 15:46 Yoosefi moogo afila shammis; Yesuusa aha masqaliyape wothidi, afilan xaaxidi, shuchafe woocetida duufon iya aha moogis. Qassi he duufuwa doonan gita shuchu gondorsidi wothis.
MAR 15:47 Magdela Mayraamanne Yoosa aayiya Mayraama Yesuusa aha enti awun moogidako be7oosona.
MAR 16:1 Sambaati aadhidaape guye, Magdela Mayraama, Yayqooba aayiya Mayraamanne Salooma bidi, Yesuusa aha tiyanaw shitto shammidosona.
MAR 16:2 Wogga wode wonta daro guura xalqey caarishin, duufo bidosona.
MAR 16:3 Enti banta giddon issoy issuwara, “Duufuwa doonape nuus shuchaa oonee gondorsidi digganay?” yaagidi odetidosona.
MAR 16:4 Enti xeelliya wode he daro gita shuchay gondoretidi kichidaysa be7idosona.
MAR 16:5 Yesuusi moogetida duufuwa giddo geliya wode issi pantha addey bootha ma7o ma7idi, ushacha baggara uttidaysa be7idi dagammidosona.
MAR 16:6 Shin I entako, “Dagammofite; masqaliya bolla kaqetida, Naazirete Yesuusa hinte koyeysa taani erayis. I haysan deenna, hayqope dendis. Enti iya moogida bessa haysa be7ite.
MAR 16:7 Ha77i bidi Yesuusa tamaaretasinne Phexroosas, ‘Yesuusi hintefe sinthatidi Galila bees. I, hintew odidaysada hinte iya yan be7ana’ yaagidi odite” yaagis.
MAR 16:8 Maccasati yashshan kokorishe duufope keyidi baqatidosona. Qassi enti yayyida gisho, hessa oodeska aykoka odibookona.
MAR 16:9 Yesuusi hayqope dendidaape guye, wogga gallas wonta, laapun tuna ayyaanata kessida Magdela Mayraamis koyrottidi bentis.
MAR 16:10 Iya bada kase iyara de7eysatas, enti azzanishenne yeekishe de7ishin odasu.
MAR 16:11 Shin Yesuusi paxa de7eysanne iw bentidaysa enti si7ida wode iya geysa ammanibookona.
MAR 16:12 Hessafe guye, entafe nam7ati katamaape keyidi bishin, oge bolla Yesuusi kasepe dummatidi entaw bentis.
MAR 16:13 Enti guye simmidi, haratas odidosona, shin haratika enta odaa tuma gibookona.
MAR 16:14 Guyepe tammanne issi iya tamaareti kathi mishin, Yesuusi entaw bentis. Entaw ammanoy bayna gishonne hayqope I dendidaysa be7ida asay odin, enti ammanonna ixida gisho I enta boris.
MAR 16:15 I entako, “Biitta ubbaa bidi asa ubbaas wongela odite.
MAR 16:16 Ammaneynne xammaqetey attana, shin ammanonay pirdetana.
MAR 16:17 Ammaneysatas ha malaatati imetana. Enti ta sunthan tuna ayyaanata kessana, ooratha doonan odetana.
MAR 16:18 Enti shooshu oykikoka woyko wodhiyaba uyikoka enta qohenna. Qassi enti banta kushiya harganchota bolla wothidi enta pathana” yaagis.
MAR 16:19 Goday Yesuusi tamaaretara odetidaape guye, pude salo keyis; Xoossafe ushacha baggara uttis.
MAR 16:20 Iya tamaareti bida bessa ubban qaala odidosona. Godayka entara issife oothees. Enti odiya qaalay tuma gididaysa Xoossay entaw immiya malaatatan erisis.
LUK 1:1 Boncho Tewofloosa, nu giddon poletidabas daroti, bantaw danda7etida mela xaafidosona.
LUK 1:2 He taarikiya enti xaafiday koyrope doomidi ayfe markatinne qaala haggaazeysati nuus odidaysa.
LUK 1:3 Taka ta baggara koyrope akeeka xeellidaape guye, he taarikiya hanota maarayada new xaafoy lo77o gididi bentis.
LUK 1:4 Hessika, ne tamaaridabay tuma gideysa erisanaasa.
LUK 1:5 Yihuda kawa Herodiisa wode Abiya yaraape gidida Zakaryaasa geetetiya Ayhude kahiney de7ees. Iya machiyaka Aarona sheeshape. I sunthayka Elsabeexo.
LUK 1:6 Nam7ayka Godaa wogaanne kiita ubbaa naagidi borey bayna Xoossaa sinthan xillotethan de7idosona.
LUK 1:7 Hanope attishin, Elsabeexa maynthi gidida gisho entaw na7i baawa; nam7ayka qassi cimidosona.
LUK 1:8 Issi gallas Zakaryaasi ba gishuwa maaran Xoossaa sinthan kahinetethan haggaazees.
LUK 1:9 Kahinetetha wogan Xoossa Keethi gelidi ixaane cuyisanaw iya saami gakis.
LUK 1:10 Ixaaney cuyaa wode asay karen woossees.
LUK 1:11 Godaa kiitanchoy yarsho yarshiya bessaafe ushacha baggara eqidi bentis.
LUK 1:12 Zakaryaasi iya be7ida wode dagammidi daro yayyis.
LUK 1:13 Shin kiitanchoy iyako, “Zakaryaasa yayyofa; ne woosay si7etis. Ne machiya Elsabeexa adde na7a yelana, iya Yohaanisa gada ne sunthana.
LUK 1:14 I new injenne ufaysi gidana; daroti iya yeletethan ufaytana.
LUK 1:15 Godaa sinthan I gita gidana; woyne ushshi gidin hara mathoyiya ushsha uyenna. Ba aaye ulon de7ishe Geeshsha Ayyaanan kumana.
LUK 1:16 Isra7eele asatape darota banta Godaa, Xoossaako zaarana.
LUK 1:17 Aawata wozana naytako zaarana, kiitetonayisata xillota cincatethaako zaarana mela, Godaas bessiya dere giigisanaw Eeliyaasa ayyaananinne wolqan Godaa sinthan baana” yaagis.
LUK 1:18 Zakaryaasi kiitanchuwako, “Ta hessa aybin eranee? Taaranne ta machera cimida” yaagis.
LUK 1:19 Kiitanchoy zaaridi, “Taani Xoossaa sinthan eqiya Gabreele. Ha mishiraachuwa new odanaw Xoossaafe kiitetas.
LUK 1:20 Heko, wodiya naagidi poletiya ta qaala ne ammanonna ixida gisho, haysi poletana gakanaw neeni muume gidana, odetanawuka danda7aka” yaagis.
LUK 1:21 He wode Zakaryaasi Xoossa Keethi gelidi gam7ida gisho, aybi hanide gidi asay karen naagishe gam7is.
LUK 1:22 I kare keyidi entana odisanaw danda7ibeenna. Malli besope attishin, odetanaw danda7onaysa be7ida wode qoncethi be7idaysa eridosona.
LUK 1:23 Zakaryaasi ba haggaazuwa polidi soo simmis.
LUK 1:24 Hessafe guye, iya machiya Elsabeexa qanthatasu. Ichashu ageena kumethi bana genthada gam7asu.
LUK 1:25 Iya, “Goday ba maarotan ta boriya asaa giddofe digganaw be7idi ha wodiyan haysa oothis” yaagasu.
LUK 1:26 Elsabeexa qanthatin usupuntho ageenan, Xoossay kiitanchuwa Gabreele Galila biittan de7iya Naazirete katamaa kiittis.
LUK 1:27 Kawa Dawita sheeshape gidida Yoosefa geetetiya uraas oyshetida geela7eeko kiittis. He geela7iya Mayraamo geetetawusu.
LUK 1:28 Kiitanchoy iiko bidi, “Daro dosetidaare, saroy new gido, Xoossay neera de7ees; neeni anjetidaaro” yaagis.
LUK 1:29 Mayraama iya odan daro dagammada, “Haysi aybi sarotho” gada heetasu.
LUK 1:30 Kiitanchoy zaaridi, “Mayraame, babofa; neeni Xoossa sinthan saba demmadasa.
LUK 1:31 Heko neeni qanthatana adde na7a yelana, iya sunthaa Yesuusa gada sunthana.
LUK 1:32 I gita gidana, Ubbaafe Bolla Xoossaa na7aa geetetidi xeegetana. Godaa Xoossay iya aawa Dawita araata iyaw immana.
LUK 1:33 I Yayqooba sheesha bolla merinaw kawotana; iya kawotethaas zawi baawa” yaagis.
LUK 1:34 Mayraama kiitanchuwako, “Hessi waanidi hananee? Ta adde erike” yaagasu.
LUK 1:35 Kiitanchoy zaaridi, “Geeshsha Ayyaanay ne bolla wodhana, Ubbaafe Bolla Xoossaa wolqay ne bolla kuyatana. Hessa gisho, yeletiya geeshsha na7ay Xoossaa Na7aa geetetana.
LUK 1:36 Heko, ne dabiya Elsabeexa ba cimatetha laythan adde na7a qanthatasu. Iya maynthi geetetidaaro, shin ha77i usupuntho ageena oykasu.
LUK 1:37 Xoossaa xooniyabay baawa” yaagis.
LUK 1:38 Mayraama, “Heko, taani Godaa aylliw, ne qaalada taw hano” yaagasu. Hessafe guye, kiitanchoy iipe shaaketis.
LUK 1:39 Mayraama he saamintan dendada Yihuda biittan de7iya issi derey dariya katama basu.
LUK 1:40 Zakaryaasa soo gelada Elsabeexo sarothasu.
LUK 1:41 Elsabeexa Mayraami sarothuwa si7ida wode I uluwan de7iya na7ay ufaysan gupis. Elsabeexa Geeshsha Ayyaanan kumada,
LUK 1:42 ba qaala dhoqu oothada, “Neeni maccasa giddofe anjetidaaro, ne qanthatida na7ayka anjetidaysa.
LUK 1:43 Hanoshin, ta Godaa aaye, neeni taako yaana mela taani oonee?
LUK 1:44 Heko ne sarothuwa ta si7ida wode ta uluwan de7iya na7ay ufaysan gupis.
LUK 1:45 Goday polana gidi immida qaala ammanidara, iya anjetidaaro” yaagasu.
LUK 1:46 Mayraama haysada yaagasu: “Ta shempiya Godaa bonchawusu,
LUK 1:47 ta Ayyaanay dhaliya Xoossan ufaytees.
LUK 1:48 I ba aylle kawushatethaa be7is. Hachife doomidi yeletethi ubbay tana anjetidaaro gaana.
LUK 1:49 Ayis giiko, wolqaama gidida I, taw gitaba oothis. Iya sunthay Geeshshaa.
LUK 1:50 Iya boncheyisata bolla, iya maarotethay merinaape merinaa gakanaasa.
LUK 1:51 Ba qesiyan minoba oothis, banta wozanan otorteyisata laallis.
LUK 1:52 Wolqaama kawota araatape kawushis; bantana kawushidaysata kaaboyis.
LUK 1:53 Koshatidaysata lo77oban kalsis, shin dureta mela kushe yeddis.
LUK 1:54 Ba maarota qopidi, Ba aylliya Isra7eele maaddis.
LUK 1:55 Hessika nu aawatas odida qaala, Abrahaamesinne iya sheeshas gidaysa merinaw polanaasa” yaagasu.
LUK 1:56 Mayraama Elsabeexi matan heedzu ageena mela gam7ada ba soo simmasu.
LUK 1:57 Elsabeexis yelo qammay gakin adde na7a yelasu.
LUK 1:58 I shoorotinne I dabboti Goday gita maarota oothidaysa si7idi, iira issife ufaytidosona.
LUK 1:59 Hospuntha gallasan yooga na7aa qaxaranaw yidosona. Iya aawa sunthan Zakaryaasa gidi sunthanaw koydosona.
LUK 1:60 Shin aayiya, “Akay, Yohaanisa geetetanaw bessees” yaagasu.
LUK 1:61 Entika, “Ne dabbotape ha sunthan xeegetiday oonika baawa” yaagidosona.
LUK 1:62 Iya aaway oona gidi sunthaneko eranaw koyidi iya malla oychidosona.
LUK 1:63 I xaafiyabaa oychi ekidi, “Iya sunthay Yohaanisa” gidi xaafis. Ubbay I xaafidaysa be7idi malaaletidosona.
LUK 1:64 Iira Zakaryaasa inxarsay biletis, Xoossaa galatishe odetethi oykis.
LUK 1:65 Shooroti ubbay yashshan kumidosona. Ha hanidabay derey dariya Yihuda biittan odetis.
LUK 1:66 Hessa si7ida ubbay, “Ha na7ay ay hanandesha” gidi banta giddon odetidosona. Godaa kushey iyara de7ees.
LUK 1:67 Yohaanisa aaway Zakaryaasi Geeshsha Ayyaanan kumidi haysada yaagidi tinbite odis.
LUK 1:68 “Isra7eele Goday galatetto, yidi ba asaa wozis.
LUK 1:69 Ba aylliya Dawita keethan atotetha kaciya denthis.
LUK 1:70 Hessika beni wode geeshsha nabeta doonan odetidaysa mela,
LUK 1:71 Iya ashoy nu morketapenne nuura eqetiya ubbaa kushiyape.
LUK 1:72 Hessa I oothiday nu aawatas ba maarota bessanaasinne, ba geeshsha caaquwa naaganaassa.
LUK 1:73 Nu aawa Abrahaames caaqida caaquwa qopanaasinne
LUK 1:74 nu morketa kushepe kessidi yashshi bayna iya haggaazana melasa.
LUK 1:75 Nu laytha ubban geeshshatethaninne xillotethan ba sinthan nuna essanaasa.
LUK 1:76 Qassi la na7aw, neeni Ubbaafe Bolla Xoossaa nabe geetetana. Godaa ogiya loythanaw ne iya sinthan baana.
LUK 1:77 Enta nagaray qushetin, enti atotethi demmanaysa ne Godaa deriyas odana.
LUK 1:78 Nu Xoossaa lo77o maarotethaafe dendoysan wonta xalqey nuus saluwape keyis.
LUK 1:79 Hessika dhumaninne, hayqo kuya garsan de7eysatas poo7isanaasa, nu tohuwaka saro ogiyako zaaranaasa” yaagis.
LUK 1:80 Na7ay diccis, Ayyaanan minnis, Isra7eele asaas qoncana gakanaw mela biittan de7is.
LUK 2:1 He wode Roome biittan de7iya asa ubbay taybetana melanne sunthay xaafetana mela kawoy Awugisxoosi kiittis.
LUK 2:2 Hessika Qerenoosi Soore biitta aysiya wode oosetida koyro taybuwa.
LUK 2:3 Hessa gisho, issi issi asi ba sunthaa xaafetanaw ba yeletida biitta bis.
LUK 2:4 Yoosefika Dawita keethaafenne yaraape gidida gisho, Galila Naazirete katamaape dendidi Dawita katama gidida Yihuda Beeteleme bis.
LUK 2:5 Bishe, yelanaw wodey wurida I oychi wothida, Mayraamira wolla xaafetanaw bis.
LUK 2:6 Enti yan de7ishin iw yelo wodey gakis.
LUK 2:7 Ba bayra na7aa yelasu. Curqara xaaxada imathi aqiya keethan bessi dhayida gisho daran mehe muziya gongen zin7isasu.
LUK 2:8 He gadiyan qamma dorsa wudiya naagishe karen aqiya henthanchoti de7oosona.
LUK 2:9 Godaa kiitanchoy hassayonna yidi enta matan eqis. Godaa bonchoy enta yuushuwan poo7is; entika wolqaama yashshi yayyidosona.
LUK 2:10 Shin kiitanchoy, “Yayyofite! Heko, asaa ubbaas gidiya gita ufaysaa mishiraachuwa ekada yas.
LUK 2:11 Hessika, Dawita kataman ashsheysi hintew hachi yeletis. I Godaa Kiristoosa.
LUK 2:12 Zoqale na7i curqara xaaxetidi gongen zin7idaysa hinte demmana; hessika hintew malla gido” yaagis.
LUK 2:13 Qoponna daro salo kiitanchoti kiitanchuwara issife qoncidi,
LUK 2:14 “Bonchoy Xoossaas dhoqa saluwan, saroy biitta bolla Xoossay dosiya asaas gido” yaagidi galatidosona.
LUK 2:15 Kiitanchoti entafe shaaketidi saluwa keydaape guye henthanchoti, “Ane Goday nuus qoncisidabaanne hanidaba be7anaw Beeteleme boos” yaagidosona.
LUK 2:16 Entika ellesidi bidosona. Mayraamo, Yoosefanne zoqale na7aa gongen zin7idaysa be7idosona.
LUK 2:17 Be7i simmidi na7aba entaw odetoysa, qoncisidi he bessan de7iya asaas markatidosona.
LUK 2:18 Hessa si7ida ubbay henthanchoti odidaysan malaaletidosona.
LUK 2:19 Mayraama hanidaba ubbaa ba wozanan qopashe de7asu.
LUK 2:20 Henthanchoti entaw odetidaysada hanin be7idosona. Hessa gisho, banta si7idabaasinne be7idaba ubbaas Xoossaa bonchishenne galatishe simmidosona.
LUK 2:21 Hospuntha qamman, qaxaro wodey gakin, I qanthatanaape sinthe kiitanchoy wothida sunthan Yesuusa geetetis.
LUK 2:22 Muse woga mela enta geeshshatetha wodey poletidaape guye Yoosefaranne Mayraamira yooga na7aa banta Godaas immanaw Yerusalaame bidosona.
LUK 2:23 Hessika, Godaa wogan, “Adde gidida bayra na7i ubbay Godaas dummatidaysa gido” geetetidi xaafetidaysa polanaasa.
LUK 2:24 Qassi Godaa wogan, nam7u kuraacho woyko holle yarshanaw efidosona.
LUK 2:25 He wode geeshshinne ammanora mino gidida Simoona geetetiya asi Yerusalaamen de7ees. I Isra7eeleta atotetha naagishe de7ees. Geeshsha Ayyaanayka iya bolla de7ees.
LUK 2:26 Qassi Kiristoosa be7onna hayqonnaysa Geeshsha Ayyaanay iyaw qoncisin eridi de7ees.
LUK 2:27 I he gallas Ayyaanay kaalethin Xoossa Keethi bis. Na7aa aayeranne aawara wogaa polanaw yooga na7aa Yesuusa ekidi gelida wode,
LUK 2:28 Simooni moki ekidi na7aa idimmidi,
LUK 2:29 “Godaw ne taw gelida qaala mela, ha77i ne aylliya saron moyza.
LUK 2:30 Ta ayfey asaa ubbaa sinthan ne giigisida,
LUK 2:31 ne ashuwa be7is.
LUK 2:32 Hessika kawotethata ubbaas, Xoossaa ogiya qoncisiya poo7o, ne asaa Isra7eeleska boncho” yaagidi Xoossaa galatis.
LUK 2:33 Yoosefaranne Mayraamira iyaw odetidaban malaaletidosona.
LUK 2:34 Simooni enta anjis. Aaye Mayraamiko, “Heko daro asaa wozanaa qofay qoncana mela, Isra7eelen de7iya darotas enta kundethaasinne denduwas Xoossan dooretis.
LUK 2:35 Qassi eqeteysatas malla gidana. Ne shempuwaraka qassi mashshi aadhana” yaagis.
LUK 2:36 Qassi Aseera yaraape gidida Faanu7ela na7iya Haanna geetetiya nabey de7awusu. Iya daro cimasu; iya ba koyro azinaara laapun laythi de7asu.
LUK 2:37 I azinay hayqin hospun tammanne oyddu laythi gidana gakanaw qammanne gallas pacey bayna woosaninne xooman xoossa keethan haggaazasu.
LUK 2:38 Iya he saatiyan bada Xoossaa galatasu; Yerusalaame wozetetha naagiya ubbaas yooga na7aba markatasu.
LUK 2:39 Yoosefaranne Mayraamira Godaa higgiyan kiitetida woga ubbaa polidaape guye Galila biittan de7iya banta katama Naazirete simmidosona.
LUK 2:40 Na7ay diccishenne minnishe bis. Cincatethan kumis; Xoossaa aadho keehatethay iya bolla de7ees.
LUK 2:41 Yoosefaranne Mayraamira Paasika Ba7aale bonchanaw laythan laythan Yerusalaame boosona.
LUK 2:42 Yesuusas tammanne nam7u laythi gidiya wode kase meezetidaysada ba7aale bonchanaw bidosona.
LUK 2:43 Baaliya bonchidaape guye soo simmiya wode na7ay Yesuusi Yerusalaamen attis. Shin Yoosefaranne Mayraamira I Yerusalaamen attoysa eribookona.
LUK 2:44 I soo simmiya asaara wolla de7iya daanin enti issi gallasa oge bidosona. I baynaysa eridaape guye banta dabbotanne laggeta matan koydosona.
LUK 2:45 I yan dhayin koyishe guye Yerusalaame gakanaw bidosona.
LUK 2:46 Heedzu gallasape guye xoossa keethan astamaareta giddon uttidi entaba si7ishenne enta oychishe de7ishin demmidosona.
LUK 2:47 Iya si7iya ubbay iya akeekaninne zaaruwan malaaletidosona.
LUK 2:48 Soo asay iya demmida wode malaaletidosona. Iya aayaka, “Ta na7aw, ayis nuna haysada oothadii? Ne aawaranne taara nena koyishe un7etida” yaagasu.
LUK 2:49 Yesuusi entako, “Tana ayis koyeetii? Ta, ta aawa keethan daanaw besseysa ereketi” yaagis.
LUK 2:50 Shin I entako gidaba enti akeekibokona.
LUK 2:51 Hessafe guye, entara issife Naazirete katama bis. Entaw kiitetishe de7is. Iya aayiya he ubbaa ba wozanan wothada naagasu.
LUK 2:52 Yesuusi, cincatethan, geesaninne teeman Xoossaa sinthaninne asa sinthan diccis.
LUK 3:1 Kawoy Xibaryoosi Roome biittan kawotin, tammanne ichashantho laythan, Phenxe Philaxoosi Yihuda haariya wode, Herodiisi Galila haariya wode, iya ishaa Filphoosi Ixuuriyasanne Xirakondoosa haariya wode, Lisaniyoosi Ablaanisa haariya wode,
LUK 3:2 Haannaranne Qayyaafara kahine halaqa gidi de7ishin, Xoossaa qaalay Zakaryaasa na7aa Yohaanisako mela biitta yis.
LUK 3:3 Yohaanisi, “Hinte nagaraape simmitenne xammaqetite. Xoossay hinte nagaraa atto gaana” yaagidi tamaarsishe Yordaanose Shaafa heeran de7iya biitta ubbaa bis.
LUK 3:4 Hessika nabey Isayaasi ba maxaafan, “Mela biittan ba qaala dhoqu oothidi, waassiya uraa qaalay, ‘Godaa ogiya giigisite, horogaaka piddi oothite.
LUK 3:5 Aafo ubbay kumana, zumaynne derey ziqi gaana. Wobbe ogey luulana, giigonna horogay qinxi gaana.
LUK 3:6 Asho ma7ida ubbay, Xoossaa ashuwa be7ana’ ” gidi xaafidaysada hanis.
LUK 3:7 Yohaanisi, ba kushen xammaqetanaw yida asaako, “Hinteno, shoosha nayto yaanaw de7iya hanquwafe attana mela hintena zoriday oonee?
LUK 3:8 Hiza, hinte simuwa qoncisiya lo77o ooso oothite, hinte wozanan, ‘Nuus, nu aaway Abrahaamey de7ees gidi ceeqetofite.’ Haa si7ite, ha shuchatape Xoossay Abrahaames na7a kessanaw danda7ees.
LUK 3:9 Heko, beexey mithaa xaphon de7ees. Hiza, lo77o ayfe ayfonna mitha ubbay qanxetidi taman yegetana” yaagis.
LUK 3:10 Asay, “Yaatin nuuni ay oothinoo?” yaagidi oychidosona.
LUK 3:11 Yohaanisi zaaridi, “Nam7u afili de7iya asi baynaysas immo. Kathi de7eysi baynaysas immo” yaagis.
LUK 3:12 Qaraxa qanxiseysati xammaqetanaw yidi, “Astamaariyaw, nuuni ay oothinoo?” yaagidosona.
LUK 3:13 I zaaridi, “Hinte qanxisanaw kiitetoysafe aathidi ekofite” yaagis.
LUK 3:14 Qassi wotaadareti yidi, “Nuuni ay oothinoo” yaagidi oychidosona. Yohaanisi, “Oodebaaka wolqan dafidi ekofite, oonaka wordon mootopite, hinte damoozey hintew gido; ufaytidi de7ite” yaagis.
LUK 3:15 Asay Kiristoosa naagishe de7iya gisho, Yohaanisa, “I Kiristoosa gidandesha?” gidi qopidosona.
LUK 3:16 Yohaanisi ubbaas zaaridi, “Taani hintena haathan xammaqayis, shin taape aadhidi wolqaameysi yaana. Taani iya caammaa wodoruwa billanaw bessonna asi. I hintena Geeshsha Ayyaananinne taman xammaqana.
LUK 3:17 Wudumman de7iya kathaa polo geeshshanaw pithey iya kushen de7ees. Geeshsha kathaa ba shaaliyan qolana; kaliya dhayonna taman xuuggana” yaagis.
LUK 3:18 Qassi Yohaanisi asaa daro zore zoridi Wongela odis.
LUK 3:19 Shin Yohaanisi Herodiisi ba ishaa machiw, Herodiyada, ekida gishonne haraa iita oosota gisho hanqeetida wode,
LUK 3:20 Herodiisi kaseysa bolla haraba ubbaa gujidi Yohaanisa woyne gelsis.
LUK 3:21 Yohaanisi qashetanaape sinthe asaa ubbaa xammaqidi simmin, qasi Yesuusika xammaqetis. I woossishin saloy dooyetis.
LUK 3:22 Geeshsha Ayyaanay holleda bentishe iya bolla uttis. Salope “Taani dosiya na7ay nena; ne tana ufaysaasa” giya qaalay yis.
LUK 3:23 Yesuusi tamaarso oykiya wode iyaw hastamu laythi gidishin, asay iya Yoosefa na7a gidi qopis. Yoosefi Eele na7a,
LUK 3:24 Eeley Mata na7a, Mati Leewe na7a, Leewey Malka na7a, Malki Yoona na7a, Yooni Yoosefa na7a,
LUK 3:25 Yoosefi Mataata na7a, Mataati Amoxe na7a, Amoxey Nahoome na7a, Nahoomey Asiliime na7a, Asiliimey Naage na7a,
LUK 3:26 Naagey Ma7aate na7a, Ma7aatey Mataata na7a, Mataati Samaye na7a,
LUK 3:27 Samayey Yihuda na7a, Yihudi Yonaana na7a, Yoonaney Rase na7a, Rasey Zarubaabela na7a, Zarubaabeli Salatiyaala na7a, Salatiyaali Neera na7a,
LUK 3:28 Neeri Malka na7a, Malki Hade na7a, Hadi Qoosama na7a, Qoosami Elmodaana na7a, Elmodaani Era na7a,
LUK 3:29 Eri Yoose7a na7a, Yoose7i Alaazara na7a, Alaazari Yoraame na7a, Yoraamey Mata na7a, Mata Leewe na7a,
LUK 3:30 Leewey Simoona na7a, Simooni Yihuda na7a, Yihudi Yoosefa na7a, Yoosefi Yonaana na7a, Yoonaney Eliyaqeeme na7a,
LUK 3:31 Eliyaqeemi Maliya na7a, Maliyi Maynaane na7a, Maynaaney Mata na7a, Mati Naatana na7a, Naatani Dawita na7a,
LUK 3:32 Dawiti Isseye na7a, Isseyey Iyobeeda na7a, Iyobeedi Boo7eza na7a, Boo7ezi Salmoona na7a, Salmoona Na7asoona na7a,
LUK 3:33 Na7asooni Amnadaabe na7a, Amnadaabey Raame na7a, Raamey Arne na7a, Arney Asroome na7a,
LUK 3:34 Asroomey Faaresa na7a, Faaresi Yihuda na7a, Yihudi Yayqooba na7a, Yayqoobi Yisaaqa na7a, Yisaaqi Abrahaame na7a, Abrahaamey Taara na7a,
LUK 3:35 Taari Nakoora na7a, Naakorey Saruga na7a, Sarugi Rehu na7a, Rehuy Faleqa na7a, Faleqi Ebeera na7a, Ebeeroy Seela na7a,
LUK 3:36 Seeli Qaynama na7a, Qaynami Arfakisaade na7a, Arfakisaadi Seema na7a, Seemi Nohe na7a, Nohey Laameha na7a,
LUK 3:37 Laamehi Matusaala na7a, Matusaali Heenoke na7a, Heenokey Yaareda na7a, Yaaredi Malal7eela na7a, Malal7eeli Qaynana na7a,
LUK 3:38 Qaynani Henoosa na7a, Henoosi Seeta na7a, Seeti Addaame na7a, Addaamey Xoossaa na7a.
LUK 4:1 Yesuusi Geeshsha Ayyaanan kumidi Yordaanose Shaafape simmida mela Ayyaanay iya mela biitta efis.
LUK 4:2 Yan oytamu gallasinne qamma xalahen paacetis. He gallasatan aykoka moonna gam7ida gisho wursethan koshatis.
LUK 4:3 Xalahey iyako, “Neeni Xoossaa na7a gidiko ane haysi shuchay uythu gido gada kiitta” yaagis.
LUK 4:4 Yesuusi zaaridi, “Asi uytha xalaalan deenna geetetidi xaafetis” yaagis.
LUK 4:5 Hessafe guye, Xalahey Yesuusa adussa dere bolla kessidi ha alamiya kawotethata ayfe qiphi zaaranaw bessis.
LUK 4:6 Xalahey, “Ha ubbaas maataynne bonchoy taw imetis. Taani dosida oodeska immiya gisho new immana.
LUK 4:7 Hessa gisho, neeni taw goyinniko ubbay new gidana” yaagis.
LUK 4:8 Yesuusi zaaridi, “Ne Godaa, ne Xoossaa, iya xalaala goyinna geetetidi xaafetis” yaagis.
LUK 4:9 Wursethan Xalahey Yesuusa Yerusalaame efidi Xoossa Keethas huuphiya bolla essidi, “Neeni Xoossaa na7a gidiko ane duge sa7an nena yegga.
LUK 4:10 Ayis giiko, “ ‘Nena naagiya Kiitanchota Xoossay ne gisho kiittana.
LUK 4:11 Enti ne tohoy shuchan dhubetonna mela, banta kushiyan dhoqu oothidi nena denthana’ geetetidi xaafetis” yaagis.
LUK 4:12 Yesuusi zaaridi, “Ne Godaa Xoossaa paacofa geetetidi xaafetis” yaagis.
LUK 4:13 Xalahey Yesuusa paaciya wursidaape guye hara inje wode demmana gakanaw iyape shaaketis.
LUK 4:14 Yesuusi Ayyaana wolqan kumidi Galila simmis. Iya sunthay heeran de7iya biitta ubban keyis.
LUK 4:15 I ayhude woosa keethi gelidi tamaarsis; asa ubbay iya galatidosona.
LUK 4:16 Yaape I diccida katamaa Naazirete yis. Kase meezetidaysada Sambaata gallas ayhude woosa keethi gelis. Nabbabanawuka dendi eqis.
LUK 4:17 Nabiya Isayaasa maxaafay iyaw imetin, dooyidi, haysada yaagidi xaafetidaysa demmis:
LUK 4:18 “Godaa Ayyaanay ta bolla de7ees, manqotas Wongela odana mela Xoossay tana dooris. Qashetidaysatas biletethi, qooqidaysata xeelisanaasinne un7etidaysata birshana mela,
LUK 4:19 Xoossay keehanaw qopida laytha odana mela tana kiittis” yaagis.
LUK 4:20 Hessafe guye, maxaafaa xaaxidi haggaazeysas immidi tamaarsanaw uttis. Ayhude woosa keethan de7iya asati ubbay caddi xeelloosona.
LUK 4:21 I, “Haysi hinte haythan hinte si7iya ha maxaafaa qaalay hachi poletis” yaagis.
LUK 4:22 Ubbay iyabaa darsidi odetoosona. Qassi iya doonape keyiya aadho keehatethan kumida qaalan malaaletishe, “Haysi Yoosefa na7aa gidenneyee?” yaagidosona.
LUK 4:23 I, “ ‘Neno dhale aawaw nena ashsha, Qifirnahooman ne oothidaba nu si7oysa qassi haysan ne kataman ootha’ giya leemisuwan hinte tana gaanaysas sidhey baawa” yaagis.
LUK 4:24 Qassi, “Tuma odayis; nabey ba yeletida biittan bonchetenna.
LUK 4:25 “Ta hintew tuma odayis; saloy heedzu laythinne bagga gordetin mino koshi biitta ubban de7iya Eeliyaasa wode daro am7eti Isra7eelen de7oosona.
LUK 4:26 Eeliyaasi entafe issinnekoka kiitetibeenna. Shin Saraptan de7iya am7eeko kiitetis.
LUK 4:27 Nabiya Elsa wode Isra7eelen daro baro harganchoti de7oosona. Shin Soore uraa Ni7imaanepe attishin, oonika paxibeenna” yaagis.
LUK 4:28 Ayhude woosa keethan de7iya asa ubbay hessa si7ida wode daro yilotidosona.
LUK 4:29 Banta uttida bessaafe dendidi dere bolla keexetida katamaape gaxa kessidi sugi yeddanaw aafo doona efidosona.
LUK 4:30 Shin I enta giddora kanthidi aadhis.
LUK 4:31 Yaape Galila biittan de7iya Qifirnahooma katamaa bis. Yan Sambaata gallas asaa tamaarsis.
LUK 4:32 I tamaarsey maatara gidiya gisho ubbay iya timirtiyan malaaletidosona.
LUK 4:33 Ayhude woosa keethan tuna ayyaanay oykida uray de7ees.
LUK 4:34 I, “Naazirete Yesuusa nuna ayis waaysay nuupe haaka; neeni yiday nuna dhaysanaseyee? Neeni ooneko taani erayis. Neeni Xoossaafe yida Geeshsha” yaagidi waassis.
LUK 4:35 Yesuusi tuna ayyaanako, “Si7i gada ha uraape keya” yaagidi hanqis. Tuna ayyaanay uraa asaa ubbaa sinthan holi yeggidi aykoka qohonna yeddidi keyis.
LUK 4:36 Asa ubbay malaaletidosona. Woliko, “Hanos, haysi aybi timirtee? Tuna ayyaanata maataninne wolqan kiittees; entika keyoosona” yaagidosona.
LUK 4:37 Iya sunthay heera ubban keyis.
LUK 4:38 Hessafe guye, Yesuusi ayhude woosa keethafe keyidi Simoona soo gelis. Simoona mache aayiya mino qoxo misha hargen saketasu. Iyo pathana mela Yesuusa woossidosona.
LUK 4:39 I hiixako shiiqi hokidi I hargiya hanqis. Mishay aggin ellesa dendada enta mokasu.
LUK 4:40 Away wullana hanishin dumma dumma hargiyan oyketida asaa iyako ehidosona. I issuwa issuwa bolla ba kushiya wothidi pathis.
LUK 4:41 Tuna ayyaanati qassi, “Neeni, Xoossaa na7aa” gidi waassishe daro asaape keyidosona. Shin I entana hanqis. I Kiristoosa gideysa enti eriya gisho, issibaaka odetonna mela diggis.
LUK 4:42 Buroo wontiya wode Yesuusi issi geema bessi bis. Asay koyishe I de7iya bessaa yidosona. Entafe I shaaketidi boonna mela digganaw koydosona.
LUK 4:43 Shin I, “Taani hara katamata bada Xoossaa kawotethaa Wongela markatanaw bessees. Ta kiitetiday hessasa” yaagis.
LUK 4:44 Yihuda biittan de7iya ayhude woosa keethan sabbakis.
LUK 5:1 Issi gallas Yesuusi Gensareexe Abbaa matan eqidashin daro asay iya yuushuwa un7ethidi, I tamaarsiya Xoossaa qaala si7oosona.
LUK 5:2 Yan haatha gaxan de7iya nam7u wogolota be7is. Molo oykiya asati wogolotape wodhidi banta gitiya meeccosona.
LUK 5:3 He wogolotape Simoonaysan gelidi biittafe guuthi giddo shiishana mela oychis. Yaatidi, he wogoluwa bolla uttidi asaa tamaarsis.
LUK 5:4 Ba timirtiya ongidaape guye Simoonako, “Gede ciimmuwako shiishada moluwa oykanaw hinte gitiya yeggite” yaagis.
LUK 5:5 Simooni zaaridi, “Astamaariyaw, qamma kumethi daaburishe aqidi aykoka oykibooko, shin ne giiko gitiya yeggana” yaagis.
LUK 5:6 Enti gitiya yeggida wode gitey daaketana gakanaw daro molo oykidosona.
LUK 5:7 Hara wogolon de7iya banta laggeti yidi, bantana maaddana mela wuttidi xeegidosona. Enti yidi nam7u wogoloti, haathan mitettana gakanaw molon kunthidosona.
LUK 5:8 Simoon Phexroosi hessa be7ida wode, Yesuusa sinthan kundidi, “Godaw, taani nagarancho asi gidiya gisho, taape shaaketa” yaagis.
LUK 5:9 I hessa giday, inne iyara de7eysati oykida moluwa darotethan malaaletida gishosa.
LUK 5:10 Qassi Simoona lagge gidida Zabdiyoosa nayti Yayqoobaranne Yohaanisara malaaletidosona. Yesuusi Simoonako, “Babofa! Hizape neeni ase oykiya asi gidana” yaagis.
LUK 5:11 Enti wogolota gaxa shiishidaape guye ubbaa aggidi Yesuusa kaallidosona.
LUK 5:12 Yesuusi katamatape issuwan de7ishin issi baro hargen oyketida asi he kataman de7ees. He uray Yesuusa be7idi iya sinthan gufannidi, “Godaw, ne shene gidiko tana geeshshanaw danda7aasa” gidi woossis.
LUK 5:13 Yesuusi ba kushiya yeddi bochidi, “Ee, ta shene; geeyiya” yaagis. Iira baro hargey uraape kichis.
LUK 5:14 Yesuusi, “Haysa oodeska odopa, shin bada nenatethaa Ayhude kahine bessa. Ne geeyidaysas marka gidana mela Musey kiitida yarsho yarsha” gidi kiittis.
LUK 5:15 Gidoshin, iya sunthay kasepe aadhidi eretishe bis. Daro asay I odiyaba si7anawunne banta hargiyafe paxanaw yoosona.
LUK 5:16 Shin Yesuusi daro wode geema bessi bidi woossees.
LUK 5:17 Issi gallas Yesuusi tamaarsishin Galilapenne Yihuda heera ubbaafe qassi Yerusalaamepe yida Farsaawetinne higge astamaareti yan uttidosona. Asaa pathiya Godaa wolqayka iyara de7ees.
LUK 5:18 He wode asay issi gunda asi halara tookidi ehidosona. Soo gelsidi iya sinthan wothanaw qopidosona.
LUK 5:19 Shin asaa darotethaafe dendoysan soo gelsanaw xoonetidi keethaa bolla keyidi, kaara qawuxidi, harganchuwa halara asaa shaakidi Yesuusa sinthan yeggidosona.
LUK 5:20 Yesuusi enta ammanuwa be7idi, “La addiyaw, ne nagaray atto geetetis” yaagis.
LUK 5:21 Higge astamaaretinne Farsaaweti, “Haysi Xoossaa bolla yaagidi odetey oonee? Issi Xoossafe attishin, hari nagara atto gaanaw danda7ey oonee?” yaagidi qopidosona.
LUK 5:22 Yesuusi enta qofaa erida gisho entako, “Hinte wozanan hessatho ayis qopeetii?
LUK 5:23 ‘Ne nagaray qushetis geysafenne dendada ba geysafe awusi kawuyii?’
LUK 5:24 Shin ta hessa giday Asa Na7i sa7a bolla nagara ato gaanaw maati de7eysa hinte erana melasa.” Hessafe kaallidi, gunda uraako, “Denda; ne algaa tookada ne soo ba” yaagis.
LUK 5:25 I ellesi dendidi enta sinthan eqis; I tooketidi yida algaa tookidi Xoossaa galatishe ba soo bis.
LUK 5:26 He wode ubbayka malaaletidosona. Xoossaa galatishe, “Hachi gita malaata be7ida” yaagidi yashetidosona.
LUK 5:27 Hessafe guye, Yesuusi yaape keyidi bis. Leewe geetetiya issi qaraxa qanxiseysi qaraxa qanxisiya bessan uttidaysa be7idi, “Tana kaalla” yaagis.
LUK 5:28 I ubbaba aggidi, dendidi iya kaallis.
LUK 5:29 He Leewey ba son gita gibira giigisis. Daro qaraxa qanxiseysatinne hara asati katha bolla uttidosona.
LUK 5:30 Farsaawetinne higge astamaareti, “Qaraxa qanxeysataranne nagaranchotara ayis meetinne uyeetii?” yaagidi Yesuusa tamaareta bolla zuuzumidosona.
LUK 5:31 Yesuusi entako, “Harganchotasafe attishin, paxatas aakime koshshenna.
LUK 5:32 Taani nagaranchota maarotako zaaranaasafe attishin, geeshshata xeeganaw yabiike” yaagidi zaaris.
LUK 5:33 Enti Yesuusako, “Yohaanisa tamaareti daro wode xoomosona, woossosona; qassi Farsaaweta tamaaretika hessatho oothosona. Shin neysati ubba wode moosonanne uyoosona” yaagidosona.
LUK 5:34 Yesuusi entako, “Machiw ekeysi entara de7ishin xeegetida asay xoomana mela oothanaw danda7eetii?
LUK 5:35 Shin mushuray entafe shaaketana gallasay yaana, he wode enti xoomana.”
LUK 5:36 Qassi yaagidi leemiso odis; “Ooratha ma7ope peedhidi gal7a ma7o bolla sikey oonika baawa. Hessatho oothiko ooratha ma7uwa peedhees, oorathay gal7aas giigenna.
LUK 5:37 Mal7anto woyne gal7a ogoron qoliya oonika baawa. Hessa oothiko, ooratha woyney gal7a ogoruwa dhusees; woyney gukees ogoroyka maaddonnaba gidees.
LUK 5:38 Hessa gisho, ooratha woyney ooratha ogoron qolettanaw bessees.
LUK 5:39 Hiza, caalay lo77o giya gisho, caala woyne uyi simmidi mal7anto koyey oonika baawa” yaagis.
LUK 6:1 Issi Sambaata gallas Yesuusi giste gade giddora aadhees. Yesuusa tamaareti tiya banga duuthidi banta kushen shirkidi moosona.
LUK 6:2 Shin Farsaaweta giddofe issoti issoti, “Sambaata gallas oothanaw bessonnaba ayis oothetii?” yaagidosona.
LUK 6:3 Yesuusi entako zaaridi, “Dawiti koshatida wode baara de7eysatara issife oothoysa nabbabibeketii?
LUK 6:4 Xoossa Keethi gelidi Ayhude kahineta xalaalas bessiya daabbuwa mis; baara de7eysataska immis” yaagis.
LUK 6:5 Qassi Yesuusi, “Asa Na7ay Sambaata Godaa” yaagis.
LUK 6:6 Hara Sambaata gallas Yesuusi ayhude woosa keethi gelidi tamaarsees. He bessan ushacha kushey silida issi asi de7ees.
LUK 6:7 Higge astamaaretinne Farsaaweti iya mootanaw gaaso koyidi Sambaata gallas pathiko be7ana gidi naagoosona.
LUK 6:8 Shin Yesuusi enta qofaa eridi kushey silida uraako, “Dendada asaa giddon eqa” yaagis. Urayka dendi eqis.
LUK 6:9 Yesuusi, “Ane ta hintena issiba oychayis; Sambaata gallas oothanaw bessey lo77obayeye iitabayee? Shempo ashoye woyko dhayso?” yaagis.
LUK 6:10 Qassi Yesuusi iya yuushuwan de7iya asaa yuushshi xeellidi uraako, “Ne kushiya piddi ootha” yaagis. Urayka I gidaysada oothin kushey paxis.
LUK 6:11 Shin higge astamaaretinne Farsaaweti daro yilotidosona. Yesuusa bolla ay oothino gidi banta giddon maqetidosona.
LUK 6:12 He wode gallasatape issuwan Yesuusi woossanaw zuma bolla keyis. Qamma kumethi woossishe aqis.
LUK 6:13 Wontethe ba tamaareta xeegidi enta giddofe tammanne nam7ata dooridi, entana, “Hawaareta” gidi sunthis.
LUK 6:14 Entika, Phexroosa gidi sunthida Simoona, iya ishaa Indiriyasa, Yayqooba, Yohaanisa, Filphoosa, Bartelemoosa,
LUK 6:15 Maatosa, Toomasa, Ilfiyoosa na7aa Yayqooba, ba biittas mishetiya Simoona,
LUK 6:16 Yayqooba na7aa Yihudanne Yesuusa aathidi immida Asqoroota Yihuda.
LUK 6:17 Yesuusi entara issife zumaape wodhidi demba bessan eqis. Iya tamaaretape daroti he bessan de7oosona. Yihuda biitta ubbaafe Yerusalaamepe, Xiroosapenne Sidoona abba gaxape yida daro asay de7ees.
LUK 6:18 Enti yiday, I tamaarsiyaba si7anawunne banta hargiyafe paxanaasa. Tuna ayyaanan waayetiya asatika paxidosona.
LUK 6:19 Wolqi iyape keyidi asa ubbaa pathiya gisho asay iya bochanaw koyoosona.
LUK 6:20 Ba tamaareta xeellidi haysada yaagis: “Hinteno, manqoto, hinte anjetidaysata; Xoossaa kawotethay hintesa.
LUK 6:21 Hinte ha77i koshateysati anjetidaysata, hinte kallana. Hinte ha77i yeekeysati anjetidaysata hinte miicana.
LUK 6:22 Asay hintena Asa Na7aa gisho, ixiya wode, hintena hiliya wode, hintena enti toochiya wodenne, iita sunthu enti hintew immiya wode hinte anjetidaysata.
LUK 6:23 “Heko, hinte woytoy salon gita gidiya gisho he wode ufaysan gupite. Ayis giiko, beni enta aawati nabeta bolla hessada oothidosona.”
LUK 6:24 “Shin dureto hintena ayye! hinte ha77i lo77o duussaa ekideta.
LUK 6:25 Ha77i kallidaysato hintena ayye! hinte koshatana. Ha77i miiceysato hintenosho hinte kayotananne yeekana.
LUK 6:26 Asi ubbay hinte lo77otetha xalaala odiya wode hintena ayye! Enta aawati beni wordancho nabeta bolla hessada oothidosona.
LUK 6:27 “Shin tana si7iya hintew ta odayis; hinte morketa dosite; hintena ixeysatas lo77oba oothite.
LUK 6:28 Hintena baaddeyisata anjite, hintena naaqeysatas woossite.
LUK 6:29 Issi bagga shakala baqeysas hanko bagga bessa. Ne laxana ekana geysas ne shamziya gujada imma.
LUK 6:30 Nena woossiya ubbaas imma; neepe ekida oonaka zaaro gada oychofa.
LUK 6:31 Asay hintew oothana mela hinte koyaba ubbaa hinteka asaas oothite.
LUK 6:32 “Hinte, hintena dosiya asata xalaala dosiko, ay galati hintew de7ii? Hari attoshin, nagaranchotika bantana doseyisata dosoosona.
LUK 6:33 Hintew lo77oba ootheyisata xalaalas lo77oba oothiko hintew ay galati de7ii? Nagaranchotika hessada oothosona.
LUK 6:34 Tal7e zaarana asa xalaalas hinte tal7iko ay dumma galatetetii? Nagaranchotika guye zaarana asi be7idi tal7oosona.”
LUK 6:35 “Shin hinte morketa dosite; entaw lo77oba oothite. Guye ekanaw qoponna tal7ite. Hessan hinte ekana woytoy gita gidana. Hinte Ubbaafe Bolla Xoossaa nayta gidana. I bana galatonaysatasinne iitatas keeha.
LUK 6:36 Hinte aaway keeha gidoysada hinteka keeha gidite.
LUK 6:37 “Asa bolla pirdofite; hinte bolla pirdetenna. Hinte boretonna mela oonaka boropite. Atto giite; Xoossay hintew atto gaana.
LUK 6:38 Immite; hintew imetana. Hinte makidaban hintew zaari maketana, ubbaraka lo77o makiyaban baqidi, suuddi kunthidi, laaletana gakanaw hintew maketi imetana” yaagis.
LUK 6:39 Qassika Yesuusi yaagidi entaw leemiso odis; “Qooqey qooqe kaalethanaw danda7ii? Kaalethiko nam7ayka woli ekidi aafon wullokonayee?
LUK 6:40 Tamaarey astamaarepe aadhenna. Shin loythi tamaarida uray ba astamaariyatho hanees.
LUK 6:41 “Ne ishaa ayfen de7iya buuriya ayis be7ay? Ne ayfen de7iya tuussu daaneysa ayis be7ikii?
LUK 6:42 Ne ayfen de7iya tuussu daaneysa be7onna ne ishaako, ‘Ta ishaw, ne ayfen de7iya buuriya kesso’ gaanaw waana danda7ey? Neno cubbuwaw, koyrottada ne ayfen de7iya tuussu daaneysa kessa. Hessafe guye, ne isha ayfen de7iya buuriya kessanaw geeshshada xeellana.
LUK 6:43 “Lo77o mithi iita ayfe ayfena; hessadaka iita mithi lo77o ayfe ayfena.
LUK 6:44 Ayfe ayfiya mithi ubbay ba ayfen eretees. Agunthafe balase ayfey maxetenna qassi laadepe woyne ayfey maxetenna.
LUK 6:45 Lo77o asi ba wozanan kumida lo77obaape lo77oba kessees. Iita asi ba wozanan kumida iitabaape iitabaa kessees. Asi ba wozanan kumidi palahidabaape ba doonan odetees.
LUK 6:46 “Ta geysa ootheketa, shin yaatin ayis tana, ‘Godaw, Godaw, geetii?’
LUK 6:47 Taako yeynne ta qaala si7idi poliya ubbay oona daaniyako ta hintena bessaana.
LUK 6:48 I keethe keexanaw ziqi oothi, olla bookidi, garsan de7iya zaalla bolla keethe essida cinca ura daanees. Di7oy di77idi he keetha sugis, shin minthidi keexida gisho, qaaxanaw danda7ibeenna.
LUK 6:49 Shin ta qaala si7idi oothonay ba keetha shafe bolla keexida ura daanees. Di7oy di77idi he keethaa sugida wode ellesidi kundis. He keethay wolqaama kundethi kundis” yaagis.
LUK 7:1 Yesuusi hessa ubbaa asaa sinthan tamaarsidi ongidaape guye, Qifirnahooma katamaa bis.
LUK 7:2 He bessan issi mato halaqay de7ees. I daro dosiya aylley hargetidi hayqos gakis.
LUK 7:3 I Yesuusaba si7ida wode ba aylliya pathana mela iya woosso gidi issi issi Ayhude cimata Yesuusako kiittis.
LUK 7:4 Kiitetidaysati, Yesuusako bidi, “Ne iyaw haysa oothanaw bessees.
LUK 7:5 Ayis giiko, ha uray nu asaa dosees, ayhude woosa keethaaka keexis” gidi minthi woossidosona
LUK 7:6 Yesuusika entara bis. Mato halaqaa sooko matiya wode ba laggeta iyako kiittidi, “Godaw, ta kaarape garsan ne gelanaw ta bessonna gisho, daaburopa.
LUK 7:7 Taka tana ne sinthe shiiqanaw bessiya asi gada qopike. Shin ne issi qaala oda; ta aylley paxana.
LUK 7:8 Taw taape bollara halaqay de7ees, taape garsan ta kiittiya wotaadareti de7oosona. Issuwa, ‘Ba’ giiko bees, hankuwa, ‘Haaya’ giiko yees. Ta aylliyako, ‘Hanno ootha’ giiko oothees” yaagis.
LUK 7:9 Yesuusi hessa si7ida wode malaaletis. Guye simmidi baara yaa asaako, “Taani hintew tuma odayis; hari attoshin Isra7eelenka haysa mela gita ammano demmabike” yaagis.
LUK 7:10 Kiitetida asati soo simmiya wode aylley paxin demmidosona.
LUK 7:11 Guutha wodepe guye Yesuusi Nayne katamaa bis. Iya tamaaretaranne hara daro asati iyara bidosona.
LUK 7:12 I katamaa gelana haniya wode aha tookida daro asati katamaape keyoosona. Hayqida na7ay ba aayes issuwa, iyaka am7o gidada de7awusu. Katama asaape daroti iira de7oosona.
LUK 7:13 Goday iyo be7ida wode qadhetidi, “Yeekofa” yaagis.
LUK 7:14 Shiiqidi hala bochin tookida asati eqidosona. Yesuusi, “La, yalagaw denda” yaagis.
LUK 7:15 Hayqidaysi dendi uttidi oda oykis. Yesuusi na7aa ekidi aayes immis.
LUK 7:16 Asa ubbay yashetidi, “Gita nabey nu giddon dendis; Xoossay ba asaa be7is” yaagidi Xoossaa galatidosona.
LUK 7:17 Iya sunthay Yihudaninne he heeran de7iya biitta ubban si7etis.
LUK 7:18 Xammaqiya Yohaanisa tamaareti hessa ubbaa Yohaanisas odidosona. I enta giddofe nam7ata xeegidi,
LUK 7:19 “Yaana geetetiday neneyee? Woyko haraa naagino?” yaagidi oychite gidi Godaako kiittis.
LUK 7:20 Asati “Yesuusako bidi, Xammaqiya Yohaanisi, ‘Yaana geetetiday neneyee? Woyko haraa naagino?’ giite gidi nuna neeko kiittis” yaagidosona.
LUK 7:21 He saatenka Yesuusi daro asaa hargiyafe pathis. Tuna ayyaanata kessis, qooqida ayfiyaka xeelisis.
LUK 7:22 Yohaanisa matape kiitetidi yidaysatako, “Bidi hinte be7idaysanne si7idaysa Yohaanisas odite. Ayfe qooqeti xeelloosona, gundati birshetidi hemetoosona, baro harganchoti geeyosona, tulleti si7oosona, hayqidaysati hayqope dendoosona, manqotas Wongelay sabbaketees.
LUK 7:23 Tanan dhubetonna oonika anjetidaysa.”
LUK 7:24 Yohaanisi kiittidaysati bidaape guye Yesuusi asaas Yohaanisaba yaagidi odis: “Hinte ay be7anaw mela biitta keydetii? Carkoy qaathiya maata be7anaseyee?
LUK 7:25 Yaatin, ay be7anaw keydetii? Koyse ma7o ma7ida asaa be7anaseyee? Koyse ma7o ma7idaysatinne sa7i injetida asay kawo gadhon de7oosona.
LUK 7:26 Yaatin, ay be7anaw keydetii? Nabiya be7anaseyee? Ee, ta yaagayis: hinte be7anaw keyday nabepe aadheysa.
LUK 7:27 “ ‘Ne ogiya ne sinthan giigisiya ta kiitanchuwa neepe sinthe ta kiittana’ geetetidi xaafetiday iyassa.
LUK 7:28 Ta hintew odayis; maccasape yeletidaysata giddofe Yohaanisape aadhey baawa. Xoossaa kawotethan ubbaafe guuxeysi, I ubbaafe gita gidana” yaagis.
LUK 7:29 Hari attoshin, Yesuusa qaala si7ida qaraxa qanxiseysati ubbay Yohaanisa kushen xammaqetidi Xoossay xillo gideysa qoncisidosona.
LUK 7:30 Shin Farsaawetinne higge astamaareti Yohaanisa kushen xammaqetonna ixidi Xoossaa zoriya leqsidosona.
LUK 7:31 Yesuusi kaallidi haysada yaagis: “Hiza, ha wodiya yeletethaa aybira daaniso? Entika oona daanonna?
LUK 7:32 Giya giddon uttidi woli xeegidi, ‘Nu hintew suusul7e punnin, hinte yexeketa. Nu sabbidi zeleelin, hinte yeekeketa’ giya nayta daanosona.
LUK 7:33 Xammaqiya Yohaanisi moonnanne uyonna yin, ‘Iita ayyaanara de7ees gideta.’
LUK 7:34 Asa Na7ay mishenne uyishe yin, ‘Yarambanne ushshancho, qaraxa qanxiseysatanne nagaranchota dabbo’ gideta.
LUK 7:35 Hiza, cincatethaa tumatethay iya nayta ubbaa matan eretis” yaagis.
LUK 7:36 Issi Farsaawey Yesuusa kathi muzanaw ba soo xeegis. I Farisaawiya soo bidi gayta bolla uttis.
LUK 7:37 He kataman issi nagarancho maccasi, Yesuusi Farisaawiya son gibira bolla de7eysa si7ida wode daro al7o philqaaxe shitto ekada yasu.
LUK 7:38 Yesuusape guye baggara, iya tohuwa matan eqada yeekashe iya tohuwa ba afuthaara laakothawusu. Ba binaanara iya tohuwa quchashenne yeerashe shitto tiyasu.
LUK 7:39 Gibira giigisida Farsaawey hessa be7ida wode ba wozanan, “Haysi nabe gidiyako ha maccasiya, iya bochiyara ooneko qassi iya nagarancho gideysaka I eranashin” yaagis.
LUK 7:40 Yesuusi, “Simoona, ta new odiyabay de7ees” yaagis. I, “Astamaariyaw, taw oda” yaagis.
LUK 7:41 Yesuusi iyako, “Nam7u asati issi uraape miishe tal7idosona. Issoy ichashu xeetu bira hankoy qassi ishatamu bira tal7idosona.
LUK 7:42 Nam7ayka tal7iya cigganaw xoonetin, nam7ataska tal7iya maaris. Hiza, ha nam7atape he uraa daro dosanay new oona daani” yaagis.
LUK 7:43 Simooni, “Daro acoy maaretida uray daro dosana daanees” yaagis. Yesuusi, “Ne tuma pirdadasa” yaagis.
LUK 7:44 Hessafe guye, Yesuusi maccaseeko simmi xeellidi, Simoonako, “Hanno maccasiw be7ay? Taani ne soo gelin hari attishin, ne taw toho haathe immabaaka, shin iya ta tohuwa ba afuthan laakothada ba binaanan quchasu.
LUK 7:45 Neeni tana yeera ekabaaka, shin iya ta ne soo gelosape doomada ta tohuwa yeero aggabuku.
LUK 7:46 Neeni ta huuphiyan zayte tiyabaka, shin iya ta tohuwa shitto tiyawusu.
LUK 7:47 Iya tana daro dosida gisho, I daro nagaray atto geetetis. Guutha nagari atto geetetida uray guuthara dosees.”
LUK 7:48 Yesuusi maccaseeko, “Ne nagaray atto geetetis” yaagis.
LUK 7:49 Iyara issife gaytan uttidi miya imathati, “Nagara atto yaagey, I haysi oonee?” yaagidi banta wozanan qopidosona.
LUK 7:50 Yesuusi maccaseeko, “Ne ammanoy nena ashshis; saro ba” yaagis.
LUK 8:1 Hessafe guye, Yesuusi Xoossaa kawotethaa Wongela sabbakishe katamaaranne gutaara aadhis. He wode tammanne nam7u hawaareti iyara de7oosona.
LUK 8:2 Qassi tuna ayyaanapenne dumma dumma hargiyafe paxida issi issi maccasati iyara de7oosona. Entika, laapun tuna ayyaanati keyida Magdela Mayraamo,
LUK 8:3 Herodiisa shuuma Kuuza machiw Yohaana, Soosinaranne qassi hara daroti entana miishen maaddeysati de7oosona.
LUK 8:4 Daro asay dumma dumma katamaape iyako shiiqin leemison entaw odis.
LUK 8:5 “Issi goshshanchoy zerethi zeranaw keyis. I zerishin issi issi zerethay oge gaxan wodhidi yedhetis, salo kafoti maxidosona.
LUK 8:6 Harati shaalloy garsan de7iya biitta bolla wodhidosona. Buroo dolida mela biittan laahoy bayna gisho miccidosona.
LUK 8:7 Hara zerethay qassi aguntha giddon wodhis. Agunthaara wolla diccida gisho agunthay cuullidi bessan ashshis.
LUK 8:8 Harati lo77o biitta bolla wodhidosona. Dolida wode xeetu kushe ayfidosona.” Hessa odi ongidi, ba qaala dhoqu oothidi, “Si7iya haythi de7iya ubbay si7o” yaagis.
LUK 8:9 Iya tamaareti, “Ha leemisuwa birshethay aybee?” yaagidi oychidosona
LUK 8:10 I, “Xoossaa kawotethaa xuuraa erana mela hintew imetis. Shin harati be7ishe demmonna mela, si7ishe akeekona mela leemison odayis.
LUK 8:11 “Hiza, ha leemisuwa birshethay haysa: koche yaagetiday Xoossaa qaala.
LUK 8:12 Oge gaxan wodhida zerethay qaala si7eyisata. Gidoshin, enti ammanidi attonna mela Xalahey qaala enta wozanaape maxi diggees.
LUK 8:13 Shaalloy garsan de7iya biitta bolla wodhida zerethay qaala si7idi ufaysan ekeyisata. Enti ha77is ammanoosonape attishin, xaphoy bayna gisho paacey gakiya wode ellesidi kaddoosona.
LUK 8:14 Aguntha giddon zeretida zerethay qaala si7eyisata. Entika alamiya qofan, duretethaninne sa7a duussaa miikotethan cuuletidi besseysada ayfibookona.
LUK 8:15 Lo77o biittan wodhida zerethay lo77o wozanan qaala si7idi naageysatanne danda7an minnidi ayfe ayfeyisata.
LUK 8:16 “Xompe oythidi, daacho kammey woyko arsafe garsan wothey deenna. Geliya asi be7ana mela dhoqa bessan wothees.
LUK 8:17 “Hessa gisho, qonce keyonna qosetidi attiyabay, eretonna geemmidi attiyabay deenna.
LUK 8:18 “Hiza, hinte qaala waati si7iyako akeekite. De7iya ubbaas guzhetidi imetana, baynaysas hari attoshin iyaw de7iya guuthiyaka iyape eketana” yaagis.
LUK 8:19 Yesuusa aayeranne ishatara iyako yidosona. Shin asaa darotethaafe dendoysan iya demmanaw danda7ibookona.
LUK 8:20 Issi asi Yesuusako, “Ne aayeranne ne ishatara nena koyidi karen naagoosona” yaagis.
LUK 8:21 Yesuusi zaaridi, “Xoossa qaala si7idi ooson peesheysati ubbay, taw aayonne taw isha” yaagis.
LUK 8:22 Issi gallas Yesuusaranne iya tamaaretara issife wogolon gelidi, “Abbaa pinnoos” yaagis. Entika baanaw dendidosona.
LUK 8:23 Abbaa bollara enti pinnanaw bishin Yesuusi dhiskis. Qoponna mino carkoy abba bolla dendis. Haathi wogoluwan gelin wogoloy mitetethi oykiya wode ubbay babidosona.
LUK 8:24 Iya tamaareti iyako shiiqidi, “Godaw! Godaw! nu dhayos” yaagidi Yesuusa denthidosona. Yesuusi dendidi carkuwanne gotiya hanqis. Ellesidi carkoynne gotey wopu gis; sarotethi simmis.
LUK 8:25 Yesuusi ba tamaaretako, “Hinte ammanoy awunee?” yaagis. Entika, yayyishenne malaaletishe issoy issuwako, “Carkoynne haathay kiiteteysi, I haysi oonee” yaagidosona.
LUK 8:26 Abba pinnidi Galila baggara de7iya Gergesoone biitta gakidosona.
LUK 8:27 Yesuusi wogolope keyidi sa7an wodhishin tuna ayyaanan oyketida uray katamaape keydi iyara gahetis. Daro laythi ma7o ma7onna kallo duufon de7eesipe attishin, soo gelenna.
LUK 8:28 Yesuusa be7ida wode iya sinthan gufannidi, ba qaala dhoqu oothidi, “Ubbaafe Bolla Xoossaa na7aw Yesuusa neera taw aybi issifetethi de7ii? Hayyana tana ha77i un7ethofarki” yaagis.
LUK 8:29 Hessa I giday, tuna ayyaanay uraape keyana mela Yesuusi hanqida gishosa. Daro wode tuna ayyaanay iya haarida gisho santhalaataninne toho qachiya biratan qashetidi naagetees. Shin qashuwa duuthidi tuna ayyaanan laagetidi mela biitta gelis.
LUK 8:30 Yesuusi, “Ne sunthay oone” yaagidi oychis. I, daro tuna ayyaanati iya oykida gisho bana, “Leegiyona” gis.
LUK 8:31 Tuna ayyaanati bantana Si7oole kiittonna mela woossidosona.
LUK 8:32 He bessan zooze bolla miya guduntho wudey hemetees. Hini gudunthotan gelino gidi woossidosona, ika “Gelite” gis.
LUK 8:33 Tuna ayyaanati uraape keyidi gudunthotan gelidosona. Wudey deriyape duge gurguxidi abban gelis.
LUK 8:34 Henthanchoti hanidaysa be7ida wode woxi bidi, katamaninne guta ubban odidosona.
LUK 8:35 Asay hanidaba be7anaw keyidi Yesuusako yidosona. Tuna ayyaanay keyida uray ma7o ma7idi, iya wozanay simmin, Yesuusa toho matan uttidaysa demmidi yayyidosona.
LUK 8:36 Iya be7ida asay tuna ayyaanan oyketida uray waanidi paxidaako odidosona.
LUK 8:37 Gergesoone yuushon de7iya asay gita yashshi yayidi, Yesuusi banta matape baana mela woossidosona. I wogoluwan gelidi guye simmis.
LUK 8:38 Tuna ayyaanay keyida uray Yesuusara daanaw woossis.
LUK 8:39 Shin Yesuusi iyako, “Ne soo simma, Xoossay ay mela gitaba new oothidaako oda” yaagidi moyzis. Urayka Yesuusi ay mela gitaba iyaw oothidaako katama ubban markatishe bis.
LUK 8:40 Asay naagidi gam7ida gisho Yesuusi simmiya wode moki ekidosona.
LUK 8:41 Ayhude woosa keetha halaqa gidida Iyaroosa geetetiya uray ba soo yaana mela Yesuusa tohuwa bolla wodhidi woossis.
LUK 8:42 Iyaw tammanne nam7u laythi gidida macca na7i saketada hayqos gakada de7awusu. Yesuusi biya wode asay iya un7ethees.
LUK 8:43 Tammanne nam7u laythi suuthi goggishe gam7ida maccasi de7awusu. Iya baw de7iya miishiya aakimetas immada ongasu. Shin paxanaw danda7abuku.
LUK 8:44 Iya Yesuusas guye baggara shiiqada, iya afilaa macaraa bochasu, iiraka goggiya suuthay eqi aggis.
LUK 8:45 Yesuusi, “Tana bochiday oonee?” yaagis. Ubbay, “Nu bochibooko” yaagin, Phexroosi, “Astamaariyaw, daro asay kaallishininne un7ethishin be7ashe waanada, ‘Tana bochiday oonee?’ gay” yaagis.
LUK 8:46 Shin Yesuusi, “Issi asi tana bochis; ayis giiko, wolqi taape keyoysi taw eretis” yaagis.
LUK 8:47 Maccasiya, ibay qoncidaysa erida wode kokorashe yada Yesuusa tohuwa bolla kundasu. Ayis bochidaakonne waanada ellesada paxidaako asaa ubbaa sinthan markatasu.
LUK 8:48 I, “Ta naate, ne ammanoy nena pathis; saro ba” yaagis.
LUK 8:49 Yesuusi oda ongonna de7ishin, ayhude woosa keetha halaqaa, Iyaroosa soope issi asi yidi, “Iyaroosa, ne na7iya hayqasu; astamaariya mela daabursofa” yaagis.
LUK 8:50 Shin Yesuusi hessa si7idi Iyaroosako, “Babofa! Ammana, ne na7iya paxana” yaagis.
LUK 8:51 Yesuusi Iyaroosa soo gakida wode Phexroosape, Yohaanisape, Yayqoobape, na7e aawapenne aayepe attishin, hari gelana mela koybeenna.
LUK 8:52 He bessan de7iya asa ubbay na7ees mishetidi yeekishin, Yesuusi, “Yeekofite Na7iya dhiskasupe attishin, hayqabuuku” yaagis.
LUK 8:53 Asay na7iya hayqidaysa eriya gisho, iya oda leqidi miicidosona.
LUK 8:54 Shin Yesuusi na7e kushiya oykidi, “Naatte denda” yaagis.
LUK 8:55 Na7ees shempoy simmin denda eqasu. Yesuusi entako, “Iwu miyaba immite” yaagis.
LUK 8:56 Na7ee aawaranne aayera malaaletidosona. Shin Yesuusi haysa, “Oodeska odopite” yaagis.
LUK 9:1 Yesuusi tammanne nam7u hawaareta baako xeegidi, tuna ayyaanata kessana melanne harge ubbaa pathana mela wolqanne maata immis.
LUK 9:2 Xoossaa kawotethaaba markatanaadanne harganchota pathanaada kiittis.
LUK 9:3 I entako, “Xam7a gidin ogoro gidin kathi gidin miishe gidin laammidi ma7iya afila gidin oges gidi aykoka oykofite.
LUK 9:4 He katamaape hinte keyana gakanaw imathatethan hinte gelida keethan gam7ite.
LUK 9:5 Oonika hintena mokonna ixiko he katamaape keyishe entaw marka gidana mela hinte tohuwan de7iya baana pitidi keyite.”
LUK 9:6 Entika kiitetidaysada keyidi wongela odishenne dumma dumma gutatan harganchota pathishe aadhidosona.
LUK 9:7 Galila biitta haariya Herodiisi Yesuusi oothidaba ubbaa si7ida wode dagammis. Ayis giiko, issi issi asati Yohaanisi hayqope dendonna aggenna yaagosona.
LUK 9:8 Baggati, “Eeliyaasi qoncis” goosona; harati qassi, “Beni nabetape issoy hayqope dendis” yaagidi odetoosona.
LUK 9:9 Shin Herodiisi, “Taani Yohaanisa qoodhiya qanxisada wodhas. Yaatin, haysatho yaagetidi iyabaa odetey, I oonee?” yaagidi ba ayfen be7anaw koyees.
LUK 9:10 Tammanne nam7u hawaareti guye simmi yidi, enti oothidaba ubbaa Yesuusas odidosona. I entana ekidi Beetesayda katamaape gaxa efis.
LUK 9:11 Shin daro asay Yesuusa gideysa eridi iya kaallidosona. I enta moki ekidi Xoossaa kawotethaaba tamaarsis; paxanaw koyeysataka pathis.
LUK 9:12 Sa7i omarsiya wode tammanne nam7u hawaareti iyako shiiqidi, “Nu de7ey mela biitta gidiya gisho asay dumma dumma gutatanne katamata bidi, kathinne aqiya bessi koyana mela asaa moyza” yaagidosona.
LUK 9:13 Shin I, “Entaw miyaba hinte immite” yaagis. Enti, “Nuus de7ey ichashu uythinne nam7u molo gidiya gisho, ha asaas gidiya kathi nuuni bidi shammonna ixiko gidenna” yaagidosona.
LUK 9:14 He bessan ichashu mukulu gidiya addeti de7oosona. Yesuusi ba tamaaretako, “Ishataman ishataman shaaki shaaki asaa utisite” yaagis.
LUK 9:15 Iya tamaareti, I kiitidaysada asaa utisidosona.
LUK 9:16 I ichashu uythaanne nam7u molota ekidi, salo xeellidi, Xoossaa galatidi, menthidi asaa ubbaa gathana mela ba tamaaretas immis.
LUK 9:17 Ubbay midi kallidosona. Entafe attida tiifey tammanne nam7u gayta kumethi gidis.
LUK 9:18 Yesuusi ba xalaala woossishin, iya tamaareti iyako yidosona. I, “Asay tana oona goonna?” gidi oychis.
LUK 9:19 Enti zaaridi “Issoti issoti, ‘Xammaqiya Yohaanisa, baggati Eeliyaasa, harati qassi, beni nabetape issoy hayqope dendis’ yaagosona” yaagidosona.
LUK 9:20 I zaaridi, “Yaatin hinte tana oona geetii?” yaagis. Phexroosi, “Neeni Xoossaafe kiitetida Kiristoosa” yaagidi zaaris.
LUK 9:21 Yesuusi haysa oodeska odopite gidi minthidi odis.
LUK 9:22 Qassika Yesuusi, “Asa Na7i daro metuwa ekana. Biitta cimata, kahine halaqatanne higge astamaareta kushen aadhidi imetana. Enti iya wodhana, shin I heedzantho gallas hayqope dendana” yaagis.
LUK 9:23 Yesuusi asaa ubbaako, “Tana kaallanaw koyey oonika de7iko bana kaddo, ba masqaliya gallas gallas tookidi tana kaallo.
LUK 9:24 Ba shempiw ashshanaw koya ubbay iyo dhaysees, ba shempiw ta gisho gidi dhaysiya oonika iyo ashshees.
LUK 9:25 Asi alame ubbaa haaridi, gidoshin, ba shempiw dhaysiyaba woyko qohiyaba gidiko iya ay maaddii?
LUK 9:26 Oonika tananinne ta qaalan yeellatiko, Asa Na7i ba bonchuwara hessadaka aawa bonchuwaranne Geeshsha kiitanchota bonchuwara yaa wode iyan yeellatana.
LUK 9:27 Ta hintew tuma odayis; haysan eqidaysata giddofe Xoossaa kawotethaa be7onnashin hayqonna asati de7oosona” yaagis.
LUK 9:28 Yesuusi he oda odin, hospun gallasape guye, Phexroosa, Yayqoobanne Yohaanisa baara ekidi woossanaw zuma bolla keyis.
LUK 9:29 I woosa bolla de7ishin iya ayfe karey laametis; afilayka booxidi, awa mela phoolis.
LUK 9:30 Nam7u asati, entika Museranne Eeliyaasara bonchon qoncidi,
LUK 9:31 Yerusalaamen poletanaw de7iyaba, hessika, I ha alamiyape shaaketanaba iyara odetoosona.
LUK 9:32 Phexroosanne iyara de7eyisata dhiskoy efin, enti dhiskofe barkiya wode iya bonchuwanne iyara eqida nam7u asata be7idosona.
LUK 9:33 Asati Yesuusape shaaketidi baana hanishin, Phexroosi Yesuusako, “Godaw, nu haysan gidiko nuus ay mela lo77o! Issino new, issino Muses, issino Eeliyaasas oothidi, heedzu shaqara shaqaroos” yaagis. Shin I ay gidaako erenna.
LUK 9:34 I yaagidi odetishin shaaray yidi entana kammis. Enti he shaara giddo gelishe babidosona.
LUK 9:35 Shaara giddofe, “Ta doorida na7ay haysa iya si7ite” giya qaali si7etis.
LUK 9:36 Qaali si7etidaape guye, Yesuusi barka de7ishe bentis. He wode enti be7idaba oodeska odonna, banta wozanan oykidi si77i gidoosona.
LUK 9:37 Wontethe enti zuma bollafe wodhiya wode daro asay yidi iyara gahetidosona.
LUK 9:38 He wode asaa giddofe issi asi, “Astamaariyaw, ta issi na7aa yada be7arki.
LUK 9:39 Tuna ayyaanay qoponna oykidi waasisees; goponto yegisidi qakerethees, asatethaa qohidi un7ethidi yeddees.
LUK 9:40 Ne tamaareti kessana mela woossas, shin enti danda7ibookona” yaagidi woossis.
LUK 9:41 Yesuusi, “Ammanoy bayna geella yeletato, awude gakanaw ta hintera daane, hintena danda7anee? Ne na7aa bada haa ekaya” yaagis.
LUK 9:42 Na7aa ekidi yaa wode tuna ayyaanay sa7an holi yeggidi kokorsis. Shin Yesuusi tuna ayyaana hanqidi na7aape kessis. Na7aaka na7aa aawas immis.
LUK 9:43 Asa ubbay Xoossaa gita wolqan malaaletidosona. Enti I oothidaban malaaletishin, Yesuusi ba tamaaretako,
LUK 9:44 “Haysa ta hintew odeysa loythi si7ite; Asa Na7i morketa kushen aadhidi imetana” yaagis.
LUK 9:45 Shin I gidabay entafe geemmida gisho, akeekibokona. Hessa gisho, zaaridi oychanaw babidosona.
LUK 9:46 Yesuusa tamaareti, “Nu giddon gita gidanay oonee?” gidi palama oykidosona.
LUK 9:47 Yesuusi enta wozanaa qofaa eridi yooga na7aa ba matan essidi,
LUK 9:48 “Ha yooga na7aa ta sunthan mokiya oonika tana mokees, tana mokey tana kiittidaysa mokees, hinte ubbaafe guuxeysi, I gita gidana” yaagis.
LUK 9:49 Yohaanisi, “Godaw, issi asi ne sunthan tuna ayyaanata kessishin be7idi, I nuura gidonna gisho diggida” yaagis.
LUK 9:50 Yesuusi zaaridi, “Hintera eqetonnaysi, I hinte bagga. Hessa gisho, iya diggofite” yaagis.
LUK 9:51 Yesuusi salo biya wodey matatida gisho, Yerusalaame baanaw qanxidi dendis.
LUK 9:52 Samaare biittan de7iya issi gutaa bidi, ubbaba iyaw giigisana mela ase yaa kiittis.
LUK 9:53 Shin I bey Yerusalaame gidiya gisho, enti iya moki ekibookona.
LUK 9:54 Yesuusa tamaareti Yayqoobaranne Yohaanisara hessa be7idi, “Godaw, salope tami wodhidi enta mo gaana mela ne koyay” yaagidosona.
LUK 9:55 Shin Yesuusi guye simmi enta hanqetidi, “Hinte garsan aybi ayyaani de7iyako hinte ereketa. Asa Na7i ase ashshanaw yisipe attishin, dhaysanaasa gidenna” yaagis.
LUK 9:56 Yaape dendidi hara guta bidosona.
LUK 9:57 Enti ogera bishin, issi asi, “Ne biya soo ubba ta kaallana” yaagis.
LUK 9:58 Yesuusi zaaridi, “Workanatas olli, salo kafotas keethi de7ees, shin Asa Na7i ba huuphe shempisiya bessi baawa” yaagis.
LUK 9:59 Hankuwako, “Neeni tana kaalla” yaagis. Shin uray, “Godaw, koyrottada ta aawa moogada yaana” yaagis.
LUK 9:60 Shin Yesuusi, “Hayqidaysati hayqidaysata moogana mela entaw aggaaga; neeni bada Xoossaa kawotethaa sabbaka” yaagis.
LUK 9:61 Qassi hara asi, “Godaw, ta nena kaallana, shin koyrottada ta soo asa sarothada yaana” yaagis.
LUK 9:62 Yesuusi zaaridi, “Koxe oykidi guye xeelliya oonika Xoossa kawotethas bessenna” yaagis.
LUK 10:1 Hessafe guye, Goday hara laapun tammanne nam7u asata dooris. I baanaw qopida katamanne guta ubba sinthatidi baana mela nam7a nam7a oothidi kiittis.
LUK 10:2 Yesuusi entako, “Heko, shiiqana kathay daro shin oosanchoti guutha. Yaaniya gisho, katha goday oosanchota kiittana mela woossite.
LUK 10:3 Hiza, biite, taani hintena dorsatada suudhumeta giddo yeddana.
LUK 10:4 Hinte biya ogiyas aykoka oykofite, miishe gidin kathi gidin caamma oykofite. Oge bolla oonaka sarothofite.
LUK 10:5 Hinte geliya keethe ubbaa koyrottidi, ‘Saroy ha keethaas gido’ yaagite.
LUK 10:6 Saro dosiya asi he bessan de7iko, hinte saroy yan shempana; ixas giiko hinte saroy hintew simmana.
LUK 10:7 Oosanchos damooze bessiya gisho, hinte gelida keethan hintew shiishidaba ubbaa mishenne uyishe yan gam7ite. Issuwa soope issuwa soo yuuyopite.
LUK 10:8 Ay katamaka hinte geliya wode asay hintena mokidi, hintew shiishidaba ubbaa miite.
LUK 10:9 He kataman de7iya harganchota pathishe, ‘Xoossaa kawotethay hinteko matis’ yaagidi odite.
LUK 10:10 Shin issi katamaa geliya wode asay hintena mokonna ixiko dabaaba keyidi haysada giite:
LUK 10:11 ‘Nu tohuwa bolla de7iya hinte katamaa baana pittoos, shin Xoossaa kawotethi hinteko matatidaysa erite.’
LUK 10:12 Pirda gallasan, ha katamaape Soodome katamaas pirdi kawushe gidanaysa ta hintew odayis” yaagis.
LUK 10:13 Kaallidika, Yesuusi, “Neno Korazine, neno Beetesayda, ayye! Hintenan oosetida malaatati Xiroosaninne Sidoonan oosetidaako yan de7iya asay kayo ma7o ma7idi, bidintha bolla uttidi, beni maarotan geli agganashin.
LUK 10:14 Hessa gisho, hintefe aathidi Xiroosasinne Sidoonas Xoossa pirdi kawuyana.
LUK 10:15 Neka Qifirnahooma, salo gakanaw nena dhoqu oothanaw koyay? Ne duge Si7oole holetana” yaagis.
LUK 10:16 Qassika Yesuusi ba tamaaretako, “Hintena si7ey tana si7ees, hintena ekonnay tana ekenna, tana ekonnay tana kiittidaysa ekenna” yaagis.
LUK 10:17 Laapun tammanne nam7u tamaareti kiitetida bessaafe daro ufaytishe simmidosona. Yesuusako shiiqidi, “Godaw, ne sunthan tuna ayyaanatika nuus kiitetidosona” yaagidosona.
LUK 10:18 Yesuusi entako, “Xalahey salope wol7anthada wodhishin ta be7as.
LUK 10:19 Heko, shooshinne korne yedhana melanne morkiya wolqa zaarana mela maata hintew immas. Hintena qohanabay aykoyka deenna.
LUK 10:20 Gidoshin, hinte sunthay salo mazgaben xaafetida gisho, ufaytitepe attishin, tuna ayyaanati kiitetida gisho ufaytofite” yaagis.
LUK 10:21 He wode, Yesuusi Geeshsha Ayyaanan ufaytidi, “Saluwa sa7aa Godaw, haysa cincatapenne eranchotape genthada yalagatas qoncisida gisho galateta. Ee, ta aawaw, hessa ne oothanaw lo77o shene gidis.
LUK 10:22 “Ubbabay ta aawape taw imetis. Na7ay ooneko aawape attishin, hari woyko na7ay qoncisanaw koyeysafe hari oonika aawa erey baawa” yaagis.
LUK 10:23 Kaallidika, Yesuusi ba tamaaretas dumma, “Hinte be7eysa be7eysati anjetidaysata.
LUK 10:24 Tuma daro nabetinne kawoti hinte be7eysanne si7eysa be7anawunne si7anaw amotidosona, shin be7ibookona, si7ibookona” yaagis.
LUK 10:25 Heko, issi gallas Muse woga eriya issi uray dendidi Yesuusa yaagidi paace oysho oychis. “Astamaariyaw, merina de7o laattanaw taani ay ootho?” yaagis.
LUK 10:26 Yesuusi, “Muse maxaafan xaafetidaysi woygii? Ne waata nabbabay?” yaagis.
LUK 10:27 Addey zaaridi, “ ‘Ne Godaa ne Xoossaa, ne kumetha wozanape, ne kumetha shempofe, ne kumetha wolqaafenne ne kumetha qofaape dosa. Qassi ne shooruwa ne huupheda dosa’ yaagees” yaagis.
LUK 10:28 Yesuusi iyako, “Neeni like zaaradasa, neka hessada ootha. Neeni merinaw de7on daana” yaagis.
LUK 10:29 Shin uray bana xillo oothanaw koyidi, “I ta shooroy oonee?” yaagis.
LUK 10:30 Iya oyshaas Yesuusi yaagidi zaaro immis; “Issi ase de7eysi Yerusalaame katamape duge Iyaarko katama bishin, oge bolla pangati keyidi shocidosona. Iya ma7uwa qaari ekidi hayqopenne paxape giddon yeggidi bidosona.
LUK 10:31 Guyepe, Ayhude kahine issoy he ogiyara ba buussu bishe uraa be7idi deshshi gidi aadhis.
LUK 10:32 Qassi issi Leewe de7eysi he bessaa gakishe uraa be7idi, hara soora aadhidi bis.
LUK 10:33 Shin, issi Samaare biitta ase de7eysi he ogiyara yishe uraa be7idi iyaw qadhetis
LUK 10:34 Iyako shiiqidi, iya maduntha bolla zaytenne woyne tigidi qachis. Ba hariya bolla utisidi imathi aqiya keethe efis. He bessan iyaw koshshiyaba ubbaa oothis.
LUK 10:35 Wontethe nam7u dinaare kessidi imatha keetha aawas immidi, ‘Hayyana ha uraa loytha xeella. Taani new immidaysafe bollara ne kessiyaba ubbaa ta new ciggana’ yaagis.
LUK 10:36 “Hiza, ha heedzu asatape pangati shocida uraas shoorotey new oona daanii?”
LUK 10:37 Uray zaaridi, “Iyaw qadhetidaysaka” yaagis. Yesuusi, “Neka bada hessada ootha” yaagis.
LUK 10:38 Yesuusi ba tamaaretara oge bishe issi guta gakis. Yan Marta geetetiya issi maccasiya, iya ba son mokasu.
LUK 10:39 Iwuka Mayraamo geetetiya michiya de7awusu, Mayraama qaala si7ashe Godaa tohuwa matan uttasu.
LUK 10:40 Shin Marta daro ooson un7etada Yesuusako shiiqada, “Godaw, ta michiya oosuwa ta xalaalas yeggada utta aggin ta daaburiya wode neeni be7ashe si77i gay? Iya tana maaddana mela odikii” yaagasu.
LUK 10:41 Shin Goday zaaridi, “Marta, Marta, neeni daroban un7etasaanne metootasa.
LUK 10:42 Gidoshin, koyetey issiba xalaala. Mayraama lo77oba doorasu, hessika iipe eketenna” yaagis.
LUK 11:1 Issi gallas Yesuusi issi bessan woossees. Woosaa wursida wode iya tamaaretape issoy, “Godaw, Yohaanisi ba tamaareta woosa tamaarsida mela neka nuna woosa tamaarsa” yaagis.
LUK 11:2 Yesuusi, “Haysada yaagidi woossite: “ ‘Salon de7iya nu aawaw ne geeshsha sunthay anjeto; ne kawotethay yo.
LUK 11:3 Nu gallasa kathaa hachi hachi nuus imma.
LUK 11:4 Nuna qoheyisata nuuni atto geysada, nu nagara atto ga; paacen nuna gelsofa’ yaagite” yaagis.
LUK 11:5 Kaallidika, Yesuusi ba tamaaretako yaagis: “Leemisos hintefe issuwas laggey de7ees. I giddi bilahe ba laggiya soo bidi, ‘Ta laggiyaw, miyabay de7iko taw immarki.
LUK 11:6 Taw lagge gidida issi asi ogepe yin, iyaw aathiyaba dhayas’ yaagiko,
LUK 11:7 “Iya laggey keetha giddon gididi, ‘Hayyana tana waaysopa, pengey gordetis. Ta naytika taara arsa bolla zin7idosona. Yaaniya gisho, dendada ne koyaba immanaw danda7ike’ yaagiyee?
LUK 11:8 Ta hintew odayis; laggetetha gisho dendidi immanaw koyonna ixikoka woosan salethida gisho, dendidi koshshiyaba ubba immees.
LUK 11:9 “Hessa gisho, taani hintew odayis; woossite hintew imetana; koyite hinte demmana; kare yidi xeegite hintew dooyetana.
LUK 11:10 Gaasoyka, woossiya ubbay ekees; koyey demmees; kare yidi xeegeysas dooyetees.
LUK 11:11 “Hinteno, aawato hinte giddofe na7i uythi woossin, shuchu immey oonee? Molo woossin shooshi immey oonee?
LUK 11:12 Woyko phuuphulle woossiko korne immii?
LUK 11:13 Hinte iitata gidishe hinte naytas lo77oba immo eriko, salon de7iya hinte aaway woosseysatas Geeshsha Ayyaana waatidi aathidi immennee?” yaagis.
LUK 11:14 Issi gallas Yesuusi, doona muumisida tuna ayyaana issi uraape kessis. Tuna ayyaanay keyida mela muume uray odetis. Asayka malaaletis.
LUK 11:15 Shin issoti issoti, “Tuna ayyaana halaqa, Bi7eel-Zebuula wolqan tuna ayyaanata kessees” yaagidosona.
LUK 11:16 Harati qassi paacees salope malla bessaana mela koydosona.
LUK 11:17 Shin Yesuusi enta qofaa eridi entako, “Woli giddon shaaketiya kawotethi ubbay dhayees; woli giddon shaaketiya keethi kundees.
LUK 11:18 Xalahey woli giddon shaaketiko iya kawotethay waanidi minnidi eqanee? Hinte tana, ‘I tuna ayyaanata Bi7eel-Zebuula wolqan kessees’ yaageeta.
LUK 11:19 Hiza, taani tuna ayyaana Bi7eel-Zebuula wolqan kessiyaba gidiko hinte nayti oodde wolqan kessonaasha? Hessa gisho, enti hinte bolla pirdeyisata gidana.
LUK 11:20 Shin taani tuna ayyaanata Xoossa biradhen kessiyaba gidiko, hiza, Xoossaa kawotethay hinteko matidaysa erite.
LUK 11:21 “Mino asi tooranne gondalle oykidi, ba keetha naagiyaba gidiko, iya shaloy boshetenna.
LUK 11:22 Hanoshin, iyape aadhidi mino gidida asi yidi, iya qohidi xooniko, ammanetida tooranne gondalle wosisi ekidi, iya shaluwa bonqidi haras shaakees.
LUK 11:23 “Taara gidonaysi tana ixees; taara shiishonnaysi laallees.
LUK 11:24 “Tuna ayyaanay asape keyda wode shempiya bessi koydi haathi bayna soora yuuyees. Shempiya bessi dhayda wode, ‘Ta keydasuwa simmana’ yaagees.
LUK 11:25 I simmiya wode keethay pitetidi lo77idi de7ishin demmis.
LUK 11:26 Hessafe guye, bidi iyape aadhidi iitida hara laapun tuna ayyaanata ekidi yees. Iyan gelidi duussu oykees. He uraas koyroysafe aadhidi guyeysi iita gidees” yaagis.
LUK 11:27 Yesuusi hessa oda bolla de7ishin, issi maccasi asaa gaathafe dendada, ba qaala dhoqu oothada, “Nena tookida uloynne neeni dhammida dhanthati anjetidosona” yaagasu.
LUK 11:28 Shin I, “Anjetidaysati Xoossaa qaala si7idi kiiteteyisata” yaagis.
LUK 11:29 Daro asay shiiqida wode Yesuusi, “Ha yeletethay iita yeletethi; ooratha malla koyees. Shin Yoonasa malaatape attishin, hari entaw imetenna.
LUK 11:30 Yoonasi Nanawe asaas malla gidida mela Asa Na7ika ha yeletethaas malla gidana.
LUK 11:31 Dugeha kawiya pirda gallas ha yeletethaara dendada pirdana. Gaasoyka, iya Solomone cincatethaa si7anaw biitta gaxape dendada yasu. Heko Solomonepe aadhey haysan de7ees
LUK 11:32 Nanawe asati pirda gallas ha yeletethaara dendidi enta bolla pirdana. Gaasoyka, Yoonasa sibkatiyan maarota gelidosona. Heko, Yoonasape aadhey haysan de7ees” yaagis.
LUK 11:33 “Xompe oythidi qosa bessan woyko oto giddon wothiya asi deenna. Asi poo7uwa be7ana mela dhoqa bessan wothees.
LUK 11:34 Ne asatethaas poo7oy ne ayfiya. Ne ayfey lo77o gidiko, ne kumetha asatethay poo7ees. Nena ayfey sakiko ne asatethay ubbay dhumees.
LUK 11:35 Hessa gisho, ne garsan de7iya poo7oy dhumonna mela naageta.
LUK 11:36 Hiza, ne kumetha asatethay poo7o gidiko, ne asatethanka hari dhuma bessi dhayiko, ne asatethaa kumethay wolile poo7o mela gidees” yaagis.
LUK 11:37 Yesuusi ba oda ongida mela issi Farsaawey baara kathi maana mela xeegis. Yesuusi, iyara issife gelidi gibira bolla uttis.
LUK 11:38 Farsaawey Yesuusi kathi maanape sinthe kushe meecconaysa be7idi malaaletis.
LUK 11:39 Goday iyako, “Hinte Farsaaweti quulesinne shaates bolla bagga meeceta. Shin hinte gaathay uuzetethaninne iitatethan kumis.
LUK 11:40 Hinteno, eeyato, kare bagga medhiday, gaatha bagga medhiday iya gidennee?
LUK 11:41 Shin quuliyaninne shaatiyan de7eysa manqotas immite. He wode hintew ubbabay geeshshi gidana.
LUK 11:42 “Farsaaweto hintena ayye! Sawope, xalootepenne hessa melabaape asraata kesseeta. Shin xillotethinne Xoosse dosoy hintenan baawa. Harata aggonna haysataka oothanaw bessees, shin aggideta.
LUK 11:43 “Farsaaweto hintena ayye! Ayhude woosa keethan boncho oyde, giya giddon boncho sarotho doseeta.
LUK 11:44 “Mali dhayin, asay eronna bollara biya duufo daaneysato hintena ayye!” yaagis.
LUK 11:45 Higge astamaarey zaaridi, “Astamaariyaw, ne hessa gashe nuna cayaasa” yaagis.
LUK 11:46 Yesuusi, “Hinteno, higge astamaareto, hintenaka ayye! Asay tookanaw danda7onna deexo tooho toosseta, shin hinte hinte huuphes hari attoshin biradhe xeeranka bocheketa.
LUK 11:47 “Hinte aawati wodhida nabeta duufuwa hinte giigisiya gisho, hintena ayye!
LUK 11:48 Hiza, hinte aawata oosuwa minthanaw enti wodhida nabeta duufuwa hinte loythiya gisho, enta iita oosuwas hinte marka.
LUK 11:49 Hessa gisho, Xoossay ba cincatethan, ‘Nabetanne hawaareta ta hintew kiittana, shin hinte baggata wodhana; harata gooddana’ yaagis.
LUK 11:50 Ha yeletethay alamey medhetoosape hanno gakanaw gukida nabeta ubbaa suuthas oyshetana.
LUK 11:51 Aabelape doomidi yarsho bessaasinne xoossa keethafe gidduwan gukida Zakaryaasa suutha gisho ha yeletethay oyshetana.
LUK 11:52 “Higge astamaareto, hintena ayye! Eratetha qulpiya hinte kushen oykideta, shin hintew geleketa harataka gelseketa” yaagis.
LUK 11:53 Yesuusi yaape baanaw keyiya wode, higge astamaaretinne Farsaaweti iyara eqetidi oyshon waaysosona.
LUK 11:54 Iya doonape keyiya qaalan iya oykanaw koydi hessa oothidosona.
LUK 12:1 He wode daro mukulun taybetiya asay woli bolla yedhetana gakanaw asi asa bolla shiiqidi de7ishin, Yesuusi ba tamaaretako, “Farsaaweta irshofe naagetite. Hessika enta cubbotethaa.
LUK 12:2 Qonconna qosetidi, eretonna geemmidi attiyabay aykoyka baawa.
LUK 12:3 Hiza, hinte dhuman odetidabay ubbay poo7on si7etana, qol7a gaathan kalkashidabay dabaaban odetana.
LUK 12:4 “Ta baggato, ta odeysa si7ite; ashuwa wodhoosonape attishin, haraa aykoka oothanaw danda7onaysatas babofite.
LUK 12:5 Hanoshin, hinte babanaw besseysa ta hintew qoncisana. Hessika wodhidaape guye Gaannamen yegganaw wolqay de7eysas iyaw babite. Ee, tuma odayis; iyaw babite.
LUK 12:6 Ichashu buubeti issi santimes bayzetokonayee? Hanoshin, entafe issinnaka Xoossaa sinthan dogetuku.
LUK 12:7 Hari attoshin, hinte huuphe binaanayka paydetidi de7ees. Hiza, babofite; daro buubetape hinte aadheta.
LUK 12:8 “Ta odeysa si7ite; asa sinthan taw markatiya ubbaas Asa Na7i Xoossa kiitanchota sinthan markatana.
LUK 12:9 Asa sinthan tana kaddeysas Xoossa kiitanchota sinthan ta iya kaddana.
LUK 12:10 Asa Na7a bolla kadhe qaala haasaya ubbay maarota demmana, shin Geeshsha Ayyaana bolla kadhe qaala odeteysi maaretenna.
LUK 12:11 “Asi hintena oykidi ayhude woosa keethan, daynnata sinthaninne kawota sinthan gooshechiya wode ay odanekonne woygi zaaraneko hirgofite.
LUK 12:12 He wode hinte odanaba Geeshsha Ayyaani hintena tamaarsana” yaagis.
LUK 12:13 Asaa giddofe issi asi Yesuusako yidi, “Ta ishay taw nu aawa laatape shaakana mela iyaw oda” yaagis.
LUK 12:14 Yesuusi zaaridi, “La addiyaw, hinte bolla tana daynnanne laata shaakiya cima oothiday oonee?” yaagis.
LUK 12:15 Gujidika, Yesuusi, “Asa de7oy shalo darotethan gidonna gisho yaare aggidi minthidi hintena naagite” yaagis.
LUK 12:16 Kaallidika leemison, “Gadey daro kathi immiya issi dure uray de7ees.
LUK 12:17 He uray, ‘Ta katha taani shiishanaw bessi guuxida gisho ay ootho?’ yaagidi ba wozanan qopis.
LUK 12:18 Hizape yaatana; kase de7iya shaaleta laallada haraa dalga shaaleta keexana. Kathinne taw de7iyaba ubbaa iyan yeggana.
LUK 12:19 Ba shempeko, ‘Ta shempete, daro laythas new gidiya shalo shiishas. Hiza, shempada ma, uya, ufayta’ yaagana.
LUK 12:20 “Shin Xoossay, ‘La, eeya uraw, hachi qamma ne shempiya neepe eketawusu. Hiza, ne shiishidabay ooddes gidanee?’ yaagis.
LUK 12:21 “Hessa gisho, baw duretethi sa7an shiishiya asas, Xoossaa matan dure gidonna asaas wursethay ha ura mela” yaagis.
LUK 12:22 Hessafe guye, Yesuusi ba tamaaretako, “Hiza, ta odiyaba si7ite, hinte shempuwas ay miino? Hinte asatethaas ay ma7ino? yaagidi un7etofite.
LUK 12:23 Shempoy kathafe, asatethi afilape aadhees.
LUK 12:24 Kafota be7ite zerokona, kiishokona, eleynne shaaley entaw baawa. Shin Xoossay entana muzees. Hinte kafotape daro aadheta.
LUK 12:25 Hanoshin, hintefe un7etidi ba laytha bolla issi qamma gujanaw danda7ey oonee?
LUK 12:26 Hiza, ha guuthaba oothanaw danda7onna hinte, harabas ayis un7etetii?
LUK 12:27 Ane ciishshati waanidi dicciyako be7ite. Waayokonanne suqokona. Hari attoshin, Solomoney ba de7iya boncho ubban entafe issuwa melaka ma7ibeenna.
LUK 12:28 Hinteno, ammanoy pacidaysato, hiza, Xoossay hachi bentidi wonto taman yegetana ciishshata haysada mayziko, hintena waati aathidi mayzennee?
LUK 12:29 Hessa gisho, ay mino woyko ay uyino gidi un7etofite.
LUK 12:30 He ubbaas Xoossaa ammanonna asati un7etoosona. Shin hinte aaway Xoossay hessi ubbay hintew koshsheysa erees.
LUK 12:31 Ubbaafe aathidi Xoossa kawotetha koyite; hessi ubbay hintew guji imetana.
LUK 12:32 “Hinteno, guutha dereto, yayyofite; hinte aawa Xoossay kawotetha hintew immanaw ufaytees.
LUK 12:33 Hintew de7iyaba bayzidi manqotas immite. Kaysoy ekonnason, bili moonnason, cimonna karxiitan, wuronna shalo salon shiishite.
LUK 12:34 Hinte wozanay hinte shaloy de7iya bessan gidana.
LUK 12:35 “Qanthan dancidi giigetite; hinte xompey poo7o.
LUK 12:36 Banta goday yaaganope simmana gakanaw barkidi naageysatada, goday yidi xeegiya wode ellesidi dooyanaw giigida asata daanite.
LUK 12:37 Banta goday simmiya wode dhiskonna de7ishe naageysati anjetidaysata. Tuma gayis; goday qanthan dancidi gayta yuushon utisidi mokees.
LUK 12:38 Goday laade gidin, giddi bilahe gidin, woyko wonti maathe gidin yidi, hessa mela dhiskona naagishin demmiya he aylleti anjetidaysata.
LUK 12:39 Shin haysa erite; kaysoy awude yaaneko keetha aaway eriyako keethay boketiya wode si77i gidi be7enna.
LUK 12:40 Hinteka giigidi naagite; Asa Na7i hinte qoponna wode yaana” yaagis.
LUK 12:41 Phexroosika, “Godaw ha leemisuwa nu xalaalas odaye woyko asa ubbaasee?” yaagis.
LUK 12:42 Goday zaaridi, “Hiza, kathaa muzanaw bessiya wodiyan immana mela goday ba aylleta bolla shuumida ammantheysinne wozanaama halaqay oonee?
LUK 12:43 Goday simmiya wode hessa mela oothishe bentiya aylley, I anjetidaysa
LUK 12:44 Ta hintew tuma odayis; ba godaas de7iya shalo ubbaa bolla I, shuumetana.
LUK 12:45 Shin he aylley, ‘Ta goday elle yeenna’ yaagidi ba wozanan qopidi, macca aylletanne adde aylleta wadhiko, qassi baw koyda mela mishenne uyishe mathotiko,
LUK 12:46 he aylliya goday, I qoponna gallasaninne hirgonna wode yaana. Yidi iya qanxerethidi, iya qaada ammanonna asaara oothana.
LUK 12:47 “Godaa sheniyada giigonnaysinne iya goday ay dosiyako erishe oothonna aylley daro garaafetana.
LUK 12:48 Shin ba godaa sheniya eronna attidi garaafetanaw besseysa oothiday guuthara garaafetana. Gaasoyka daro imetidaysafe daro koyetees, daro hadara ekidaysafeka daro immana gidi naagetees.
LUK 12:49 “Taani yiday biitta bolla tama oythanaasa. Ha77i tamay oykiyako tana waanidi ufaysandesha!
LUK 12:50 Hanoshin, ta ha77i xammaqetey xinqatey de7ees. I poletana gakanaw ta daro un7etayis.
LUK 12:51 Sa7a bolla sarotethi ehanaw yida hintew daanii? Gidenna, ta yiday shaakanaasa.
LUK 12:52 Ha77ife doomidi woli giddon shaaketida ichashu keethaa asati issife de7oosona. Nam7ati heedzata bolla, heedzatika nam7ata bolla, dendidi shaaketoosona.
LUK 12:53 Aaway na7aa bolla, na7ayka aawa bolla, aayiya na7e bolla, na7iya aaye bolla, azinaa aayiya na7a mache bolla, na7a machiya azina aaye bolla, dendidi shaaketana.”
LUK 12:54 Qassika asaako, “Wuloha baggara saloy shaaratiya wode be7idi, ellesidi, ‘Iri yaana’ yaageeta, hessadaka hanees.
LUK 12:55 Dugeha carkoy carkiya wode ‘Sa7i awana’ yaageeta, hessadaka hanees” yaagis.
LUK 12:56 Hinteno, cubboto, Salobanne sa7aba shaakidi ereetashin ha wodiya shaakidi eroy hintena waanidi xoonidee?
LUK 12:57 “Yaatin, hinte huuphes ayis tuma pirdeketii?
LUK 12:58 Ne morkiyara wolla daynna sinthan eqanaw bashe oge bolla giiganaw koya. Ne giigonna ixiko gooshechidi daynna sinthe nena efana. Daynnay nena qachiya asas aathidi immana. I nena woynen yeggana.
LUK 12:59 Si7ite, issi bakani attonna cigga ongana gakanaw ne yaape keyonnaysa era” yaagis.
LUK 13:1 He wode Yesuusako asay yidi Philaxoosi wodhidi enta suuthara enta yarshuwa walakida Galila asaaba odida asati he bessan de7oosona.
LUK 13:2 I haysada yaagidi zaaris; “Yaatin he Galila asati he iita hayqo hayqida gisho, Galilan de7iya asa ubbaafe aadhida nagarancho daanonna?
LUK 13:3 Gidenna! Gidoshin, hinteka maarotan simmonna ixiko, ubbay hessada dhayana.
LUK 13:4 Woyko qassi Salihoome geetetiya bessan gimbey woddidi wodhida tammanne hospun asay Yerusalaamen de7iya asa ubbaafe aadhida nagarancho daanonna?
LUK 13:5 Gidenna! Shin hinteka maarotan simmonna ixiko ubbay hessada dhayana.”
LUK 13:6 Qassika Yesuusi haysada gidi leemiso odis: “Issi uraas woyne gaden toketida balase mithi de7awusu. I iipe ayfe demmanaw koydi aykoka demmibeenna.
LUK 13:7 Woyne gadiya goday woyne oosanchuwako, ‘Ayfe demmanaw koyada heedzu laythi simeretada aykoka demmabike. Hessa gisho, qanxa digga; ayis biitta melisay?’ yaagis.
LUK 13:8 “Shin oosanchoy, ‘Godaw, I yuushuwa oothada osha yeggana gakanaw ha laythas aggarki.
LUK 13:9 Ha laythi ayfiko lo77o, ixiko qanxa agga’ ” yaagidi zaaris.
LUK 13:10 Yesuusi Sambaata gallas ayhude woosa keethan tamaarsees.
LUK 13:11 He bessan tammanne hospun laythi tuna ayyaani zoko kuunisida issi maccasiya de7awusu. Iya kuunape dendoysan suure eqanaw danda7uku.
LUK 13:12 Yesuusi iyo be7ida wode xeegidi, “Ha maccasete, ne hargiyafe paxadasa” yaagis.
LUK 13:13 Ba kushiya I bolla wothin, iya ellesada, suurada eqasu. Xoosse galatasu.
LUK 13:14 Shin ayhude woosa keetha halaqay yilotidi asaako, “Ooso oothiya usupun gallasati de7oosona. Hessa gisho, he gallasatan yidi paxitepe attishin, Sambaata gallas gidenna” yaagis.
LUK 13:15 Goday, “Cubboto, hinte giddofe boori woyko hare Sambaata gallas zadalope billidi haathe ushshanaw efonnay oonee?
LUK 13:16 Yaatin, ha maccasiya Abrahaame na7a gidashe xalahen qashetada tammanne hospun laythi kumethi de7idaaris Sambaata gallas birshetethi koshshennee?” yaagidi oychis.
LUK 13:17 I hessa odida wode eqeteysati ubbay yeellatidosona. Shin asa ubbay I oothida malaalsiya ooso ubban ufaytidosona.
LUK 13:18 Hessafe guye, Yesuusi haysada yaagis, “Xoossa kawotethi ay daanii? Iya aybira daaniso?
LUK 13:19 Xoossa kawotethi issi asi ba goshshan tokida wola ayfe mela. I diccidi mithi gidis. Salo kafoti iya tashiya bolla shempidosona.”
LUK 13:20 Qassi, “Xoossaa kawotetha aybira daaniso?
LUK 13:21 Issi maccasiya daro dhiillera walakada munuqida guutha irsho daanees” yaagis.
LUK 13:22 Hessafe guye, Yesuusi Yerusalaame bishe I kanthiya ogiyan de7iya katamataninne gutatan tamaarsishe aadhis.
LUK 13:23 Issi asi Yesuusako, “Godaw, attanay guutha asa xalaalee?” yaagidi oychis. Yesuusi entako,
LUK 13:24 “Si7ite, xuuntha wulara gelanaw baaxetite. Daroti gelanaw koyoosona shin entaw hanenna.
LUK 13:25 Keetha aaway dendidi wulaa gordidaape guye, ‘Nuus dooyarki’ yaagishe karen eqidi xeessi oyketa. Shin I, ‘Hinte oonekonne awupe yidaako ta erike’ gidi zaarana.
LUK 13:26 He wode hinte, ‘Neera wolla mida, uyida, nu dabaabanka tamaarsadasa’ yaagana.
LUK 13:27 “I zaaridi, ‘Hinte oonekonne awupe yidaako erike. Hinteno, geellato taape haakite’ yaagana.
LUK 13:28 Abrahaame, Yisaaqa, Yayqoobanne nabeta ubbaa Xoossa kawotethan be7ana, shin hinte karen wodhidi attiya wode hintew yeehonne ache garcethi gidana.
LUK 13:29 Asay dolohape, wulohape, pudehapenne dugehape yidi Xoossaa kawotethan gibira bolla uttana.
LUK 13:30 Hessa gisho, ha77i dethan guye gididaysatape sinthe gidanaysati, sinthe gididaysatape guye gidanaysati de7oosona” yaagis.
LUK 13:31 He wode Farsaawetape issoti issoti yidi, “Herodiisi nena wodhanaw koyiya gisho ha bessaafe dendada ba” gidoosona.
LUK 13:32 I zaaridi, “Bidi, he workanaas, ‘Heko, hachinne wonto tuna ayyaanata kessana, harganchota pathana, heedzantho gallasan kuushsha bolla gakana’ yaagis giite.
LUK 13:33 Hanope attishin, nabey Yerusalaamepe karen hayqanaw bessenna. Hessa gisho, hachi, wontonne wonti pee7in he bessa baanaw dendas.
LUK 13:34 “Yerusalaame, Yerusalaame, nabeta wodhiyare, neeko kiitetidaysata shuchan caddiyare, kuttoy ba nayta ba qefiyape garsan shiishiyada ne nayta ta qesiyape garsan aapun toho shiishanaw koyadina, shin hinte ixas gideta.
LUK 13:35 Ta hintew odayis; hinte keethay kaysatana. Godaa sunthan yeysi anjetidaysa hinte gaana gakanaw tana demmeketa” yaagis.
LUK 14:1 Issi Sambaata gallas Yesuusi issi Farsaaweta halaqa soo kathi maanaw geliya wode asay caddi xeelloosona.
LUK 14:2 He bessan shawuhe hargen waayetiya issi asi iyaw sintha baggara zin7is.
LUK 14:3 Yesuusi Farsaawetanne higge astamaareta, “Sambaata gallas hargancho pasoy wogeye woga gidennee?” yaagidi oychis.
LUK 14:4 Enti si77i gidoosona. Yesuusi hargetiya uraa bochi pathidi moyzis.
LUK 14:5 “Qassika hintefe issuwas na7i woyko boori Sambaata gallas aafon wulliko, ellesidi kessonnay oonee?” yaagidi oychis.
LUK 14:6 Enti issibaaka zaaranaw danda7ibookona.
LUK 14:7 Yesuusi imatuwas xeegetidaysati boncho bessi doorishin be7idi, ha leemisuwa odis:
LUK 14:8 “Issi asi nena yaagano xeegiko boncho bessan uttofa. Neepe aadhidi bonchetiya asi xeegetanaw danda7ees.
LUK 14:9 Hintena nam7ataka xeegidaysi yidi, ‘Ne bessa ha imathas yedda’ giya wode neeni yeellatashe ziqa bessi wodhaasa.
LUK 14:10 Gidoshin, ne xeegetida wode koyrottada ziqa bessi be7ada utta. Xeegoysi yidi, ‘Ta laggiyaw, ha boncho bessan utta’ yaagana. He wode neera issife xeegetida asa ubbaa sinthan ne bonchetana.
LUK 14:11 Bana dhoqu dhoqu oothiya ubbay kawuyana; bana ziqi ziqi oothiya ubbay dhoqu dhoqu gaana.”
LUK 14:12 Qassi Yesuusi iya mokida keetha aawako, “Quma woyko kaho imato xeegiya wode, neeni kushe zaaro xeegonna mela ne laggeta woyko ne ishata woyko ne dabbota woyko ne dure shoorota imato xeegopa.
LUK 14:13 Gidoshin, ne imato giigisida wode manqota, wobbeta, gundatanne qooqeta xeega; neeni anjetana.
LUK 14:14 Haysati kushe zaaranaw danda7onna gisho kushe zaaroy geeshshata dendo gallasan new simmana” yaagis.
LUK 14:15 Yesuusara wolla imato bolla uttoyisata giddofe issoy, hessa si7idi, “Xoossa kawotethan imato bolla utteysi anjetidaysa” yaagis.
LUK 14:16 Yesuusi, “Issi asi gita imato giigisidi daro asata xeegis.
LUK 14:17 Imatoy moketiya saatey gakiya wode, xeegetida imathata, ‘Heko ubbabay giigis, haa yiite’ yaagidi xeeganaada ba aylliya kiittis.
LUK 14:18 “Shin ubbayka banta gaaso gaaso medhidosona. Issoy, ‘Ha77i buroo gade shammida gisho, bada be7anaw koshshees; hayyana tana aggarki yaaga’ yaagis.
LUK 14:19 Hankoy, ‘Ichashu waatha boori shammas; entana waaxa be7ana gisho hayyana tana lancofa’ yaagis.
LUK 14:20 Qassi haray, ‘Taani buroo meddan de7iya gisho, yaanaw danda7ike’ yaagis.
LUK 14:21 “Aylley simmi yidi he ubbaa ba godaas odis. He wode yaagano aaway hanqetidi aylliyako, ‘Ellesada kataman de7iya wogga ogetanne daggalata bada, manqota, wobbeta, qooqetanne gundata haa eha’ yaagis.
LUK 14:22 “Aylley, ‘Ta godaw, ne kiittidaysi ubbay poletis, shin ha77ika bessi de7ees’ yaagis.
LUK 14:23 “Goday aylliyako, ‘Horogata bollanne, gade giddo ogeta keya, ta keethay kumana gakanaw demmida ubba yaana mela ootha.
LUK 14:24 Ta hintew odayis; imato xeegetidaysatape oonika ta gibiraape moonnaysa erite’ gis” yaagis.
LUK 14:25 Daro asay iyara wolla bishin, Yesuusi entako guye simmidi,
LUK 14:26 “Taako yaa ubbay ba aawanne ba aayiw, ba machiwnne ba nayta, ba ishatanne ba micheta, hari attoshin ba de7uwa ixonnay ta tamaare gidanaw danda7enna.
LUK 14:27 Ba masqaliya tookidi tana kaallonnay ta tamaare gidanaw danda7enna.
LUK 14:28 “Hintefe issi asi shucha keethi keexanaw koyko, keetha keexidi onganaw ay mela miishe koshshiyako koyrottidi eranaw qopi be7onnay oonee?
LUK 14:29 Hessa gidonna ixiko, ha uray baaso shuchu hiixin qustethi xooniko,
LUK 14:30 be7iya ubbay, ‘Ha uray gimbethi oykin qustanaw iya xoonis’ yaagidi boroosona.
LUK 14:31 “Woyko issi kawoy hara kawora oletanaw dendishe laatamu mukulu olanchota eki yaa kawuwara tammu mukulu olanchotara eqetanaw danda7anaysanne danda7onaysa uttidi zorettonay oonee?
LUK 14:32 Eqetanaw danda7etonaba gidiko, he kawuwara haahon de7ishin giiganaw koyrottidi cima yeddidi oychees.
LUK 14:33 Hessadaka, hintefe oonika baw de7iyaba ubba aggonna ixiko, ta tamaare gidanaw danda7enna.
LUK 14:34 “Maxiney lo77o, shin maxiney ba mal7uwa aggiko, waanidi maxine geetetanaw danda7ii?
LUK 14:35 Biittatethasinne araddatethas maaddona gisho wora yegetees. Hiza, si7iya haythi de7iya asi si7o” yaagis.
LUK 15:1 Issi gallas qaraxa qanxeysatinne nagaranchoti Yesuusa timirtiya si7anaw iya yuushon shiiqidosona.
LUK 15:2 Shin Farsaawetinne higge astamaareti, “Haysi uray nagaranchota shiishidi ekees, entara issife mees” yaagidi zuuzumidosona.
LUK 15:3 Yesuusi ha leemisuwa entaw yaagidi odis:
LUK 15:4 “Hinte giddofe issuwas xeetu dorsati de7iyaba gidiko entafe issoy dhayiko uddufun tammanne uddufunata bazzon aggidi dhayoysa demmana gakanaw koyonnay oonee?
LUK 15:5 Demmida wode ufaytidi ba gannan tookidi,
LUK 15:6 ba soo simmees. Ba laggetanne shoorota xeegidi, ‘Dhayida ta dorsa demmas, taara issife ufaytite’ yaagees.
LUK 15:7 Hessadaka, maaroti koshshonna uddufun tammanne uddufun xillotape aathidi, maarotan geliya issi nagaranchuwa gaason salon gita ufaysi gidees.
LUK 15:8 “Woyko tammu biri de7iya issi maccasiya tammaafe iissiya dhayiko demmana gakanaw xompe oythada keetha pittada mintha koyonnay oonee?
LUK 15:9 Demmida wode ba laggetanne ba shoorota xeegada ‘Dhayida ta issi bira demmida gisho taara ufaytite’ yaagawusu.
LUK 15:10 Si7ite, hessa mela issi maarotethan geliya nagaranchuwan Xoossaa kiitanchota sinthan ufaysi gidees” yaagis.
LUK 15:11 Zaaridi Yesuusi, “Issi uraas nam7u nayti de7oosona.
LUK 15:12 Entafe kaalo na7ay ba aawako, ‘Ta aawaw, ne shaluwape ta gishuwa taw imma’ yaagis. Aaway ba shaluwa ba naytas shaakis.
LUK 15:13 Guutha gallasape guye, kaalo na7ay ba gishuwa ubbaa, qachi ekidi haaho biitta bis. Yan altacan shaluwa toochidi ongis.
LUK 15:14 I baw de7iyaba ubba wursidaape guye he biitta ubban mino koshi keyin metootis.
LUK 15:15 Hessa gisho, he biitta asaape issuwa soo gaata gelis. Uray iya guduntho heemmana mela ba moothu yeddis.
LUK 15:16 Gudunthoti miya harquwafe maanaw amottis, shin iyoka iyaw immiya asi bentibeenna.
LUK 15:17 I ba wozanaako simmidi, ‘Aapun ta aawa aylletas kathi wora wodhin ta haysan koshara hayqanaw gakadina?’
LUK 15:18 Dendada ta aawako bada, ‘Ta aawaw, salon Xoossa, sa7an nena qohas.
LUK 15:19 Hizape ne na7a geetetada xeegetanaw taw bessonna gisho, ne son de7iya aylletape issuwada tana payda’ yaagana” yaagis.
LUK 15:20 Hessa gisho, dendidi ba aawako bis. “Hanoshin, I buroo haahon de7ishin aaway qadhetidi, iyako woxi bidi, idimmidi yeeris.
LUK 15:21 Na7ayka, ‘Ta aawaw salon Xoossa, sa7an nena ta qohas. Hizape ne na7a geetetada xeegetanaw bessike’ yaagis.
LUK 15:22 “Iya aaway aylleta xeegidi, ‘Ellesidi ubbaafe lo77o gidida ma7o ehidi iya mayzite; iya biradhen sagaayo, iya tohon caamma aathite.
LUK 15:23 Modho gatarmentho ehidi shukite, moos, ufaytoos.
LUK 15:24 Ta na7ay haysi hayqis, shin ha77i paxis; dhayis, shin bentis’ yaagis. Hessafe guye, ufaysi doomidosona.
LUK 15:25 “He wode bayra na7ay goshsha gaden de7ees. Yaape yishe soo matishin yethinne gufa girsi si7is.
LUK 15:26 I, aylletape issuwa xeegidi haniyabay aybeko eranaw oychis.
LUK 15:27 Aylley, ‘Ne ishay saro yida gisho ne aaway modho gatarmentho iyaw shukis’ yaagis.
LUK 15:28 “Bayra ishay yilotidi soo gelanawuka koybeenna. Aaway kare keyidi soo gelana mela iya woossis.
LUK 15:29 Shin I ba aawako, ‘Heko, haysa mela laythi ta new aylletada ne kiitaape issuwaka pacisonna new kiitetin, taani ta laggetara ufaytana mela hari attoshin issi laaqa deeshe immabaaka.
LUK 15:30 Hanoshin, haysi ne na7ay ne shaluwa laymatara dhaysidi yin, modho gatarmentho shukadasa’ ” yaagis.
LUK 15:31 “Aawayka, ‘Ta na7aw, neeni ubba wode taara de7aasa, taba ubbay neesa.
LUK 15:32 Haysi ne ishay hayqis, shin paxis; dhayis, shin bentis. Hessa gisho, daro ufaytanaw bessees’ yaagana” yaagis.
LUK 16:1 Yesuusi ba tamaaretako, “Issi dure uraas iyape garsara issi shuumi de7ees. He shuumay ba godaa shaluwa toochees giya worey keetha aawa gakis.
LUK 16:2 Keetha aaway shuuma xeegisidi, ‘Taani woygiyaba si7adina? Hizape neeni ta keethas shuuma gidada oothanaw danda7onna gisho, ta shaluwa taw sheedha’ yaagis.
LUK 16:3 “He shuumay ba wozanan haysada yaagidi qopis: ‘Ta goday tana shuumatethaafe wothana hanees, goya aqanaw wolqi baawa, woossa maanaw yeellayees; yaatin ta waano?
LUK 16:4 Shuumatethaafe ta wodhiya wode asay tana mokana mela oothanaba ta erayis’ yaagis.
LUK 16:5 “Hessa gisho, iya godaa acoy de7iya asaa issuwa issuwa xeegi ehidi koyro uraako, ‘Ne bolla ta godaa acoy ay meli de7ii?’ yaagidi oychis.
LUK 16:6 “I, ‘Laatamu barmeele zayte acoy de7ees’ yaagis. “Shuumay, ‘Wule warqatiya he7e, ellesada, tammu barmeele zayte acoy de7ees gada xaafa’ yaagis.
LUK 16:7 “Hessafe kaallidi nam7anthuwako, ‘New aapuni de7ii?’ yaagis. “I, ‘Heedzu xeetanne laapun tammu kuntaale giste acoy de7ees’ yaagis. “Shuumay, ‘Ne wule warqatiya he7e, ellesada, 296 kuntaale yaagada xaafa’ yaagis.
LUK 16:8 Keetha aaway ammanetibona shuuma iya cincatethaas nashshis. Ha alamiya nayti ase oythan poo7o naytape aadhida wozanaamata.
LUK 16:9 “Hessa gisho, ta hintew odayis; ha alamiya miishey wuriya wode merinaa keethan moketana mela ha miishiyara hintew laggeta shammite.
LUK 16:10 Ubbaafe guuthaban ammanetiday daroban ammanetidaysa gidees. Qassi ubbaafe guuthaban ammanetonaysi daroban ammanetena.
LUK 16:11 Hiza, ha alame miishen hinte ammanetona ixiko, tuma miishe hintew ooni hadara immanee?
LUK 16:12 Hinte hara asa miishen ammanetona ixiko, hinte buzo miishe hintew ooni immanee?
LUK 16:13 “Issi aylley nam7u godatas haaretanaw danda7enna. Issuwa ixiko hankuwa dosees woyko issuwako shiiqiko hankuwa kadhees. Hessadaka, hinte Xoossasinne miishes haaretanaw danda7eketa.”
LUK 16:14 Miishe dosiya Farsaaweti hessa si7ida wode Yesuusa qelqisidosona.
LUK 16:15 I, “Hinte, hintena asa sinthan xilliseeta, shin Xoossay hinte wozana erees. Asa sinthan bonchetidaysi Xoossa sinthan boretidaysa.
LUK 16:16 “Muse higgeynne nabeta kiitay Yohaanisa gakanaw hintew odetishe gam7is. Hessafe guye, Xoossaa kawotethaa Wongelay sabbaketishe gam7is. Asi ubbay yaa gelanaw dafetees.
LUK 16:17 Gidoshin, higgiyafe issi laafa pidaley attanaape saloynne sa7i aadheysi kawuyees.
LUK 16:18 “Ba machiw yeddidi haraa ekiya ubbay laammees. Ba azinaape anjetidaaro ekeysika laammees” yaagis.
LUK 16:19 “Al7onne alleeqo afila ma7iya, sa7i injetin gallas gallas ufaysan de7iya issi dure asi de7ees.
LUK 16:20 Hari qassi asatethay kumethi madunxida issi Alaazara geetetiya manqoy he dure uraa karen yegetidi attidaysi de7ees.
LUK 16:21 Koshape dendoysan dure ura gaytape wodhiya tiifiya maanaw amotishe de7ees. Hari attoshin, kanati yidi iya maduntha laacosona.
LUK 16:22 “He manqoy hayqis; kiitanchoti iya Abrahaame ki7o efidosona. Qassi dure urayka hayqidi moogetis.
LUK 16:23 Si7oolen un7etidi de7ishe dhoqu gidi haahon Abrahaamenne iya ki7on de7iya Alaazara be7is.
LUK 16:24 I, ‘Aawaw Abrahaame, taw qadhetarki; ha tama lacon un7etada de7iya gisho Alaazari ba biradhiya haathan yeddidi ta inxarsa laakothana mela hayyana iya yeddarki’ yaagidi waassis.
LUK 16:25 “Shin Abrahaamey iyako, ‘Ta na7aw, ne sa7an de7iya wode lo77obata ekidaysa, qassi Alaazari iitabata ekidaysa akeeka. Shin ha77i I haysan ufaytees, qassi neeni waayetashe de7aasa’ yaagis.
LUK 16:26 Ha ubbaafe aadhidi, ‘Haape hinteko, hinipe haa nuuko aadhanaw koyeysati pinnonna mela nuusinne hintew giddon gita aafoy de7ees’ yaagis.
LUK 16:27 “Dure uray, ‘Aawaw, yaako Alaazara ta aawa soo kiittana mela ta nena woossayis.
LUK 16:28 Taw ichashu ishati de7idosona, entika ha waaye bessaa yoonna mela entaw bidi markato’ yaagis.
LUK 16:29 “Shin Abrahaamey, ‘Entaw Museranne nabetara de7oosona; enti odiyaba si7onna’ yaagis.
LUK 16:30 “Dure uray, ‘Aawaw Abrahaame, hessatho gidenna; issi asi hayqope dendidi biiko enti maarotan gelana’ yaagis.
LUK 16:31 “Abrahaamey, ‘Musenne nabeta si7onna ixiko, hari attoshin hayqope issi asi dendi odikoka ammanokona’ yaagis.”
LUK 17:1 Yesuusi ba tamaaretako, “Ase dhubethidi nagaran gelsiyabay yoonna aggenna. Gidoshin, nagaran gelana mela oothiya ura ayye!” yaagis.
LUK 17:2 He uray kaalotape issuwa balethanaape woxa ba qoodhen qachidi abban wulliko iyaw lo77o.
LUK 17:3 Hessa gisho naagetite. “Ne ishay nagara oothiko hanqeta; qiirotidi maarotethan simmiko, iyaw atto yaaga.
LUK 17:4 Issi gallasan laapun toho qohidi, laapun toho, ‘Taani ta nagaraa eras tana maara’ yaagidi neeko yiiko iyaw atto ga.”
LUK 17:5 Hawaareti Godaako, “Ammano nuus gujarki” yaagidosona.
LUK 17:6 Goday, “Gaashe ayfe mela ammanoy hintew de7iko ‘Haysa wolaa shodetada abba giddon toketa’ yaagiko hintew kiitetana” yaagis.
LUK 17:7 Gujidika Yesuusi, “Hinte giddofe issuwas goshshanchoy woyko dorse heemmiya aylley de7iko ooso gadepe woyko wudepe soo simmiya wode, ‘Elle haayada kathi maanaw utta’ yaagey de7ii?
LUK 17:8 Deenna, ‘Taw kaho giigisa; taani mada, uyada aggana gakanaw eqada muza. Hessafe guye, neeni qassi maasanne uyaasa’ yaageneyee?
LUK 17:9 Hiza, goday, aylley kiita polida gisho anjiyee?
LUK 17:10 Hessa gisho, hinteka kiitetoysa ubbaa polida wode, ‘Nu pathonna aylleta; oothanaw bessiya oosuwa polida’ yaagite” yaagis.
LUK 17:11 Yesuusi Yerusalaame bishe Samaarisinne Galilas giddora kanthidi aadhis.
LUK 17:12 Issi gutaa geliya wode baro hargen oyketida tammu asati iya demmidosona. Entika haahon eqidi,
LUK 17:13 “Godaa Yesuusa, nuus qadhetarki” yaagidi waassidosona.
LUK 17:14 I enta be7ida wode, “Bidi hintenatethaa Ayhude kahine bessite” yaagis. Enti ogiya bolla bishe paxidosona.
LUK 17:15 Entafe issoy ba paxuwa be7ida wode dhoqu gida qaalan Xoossa bonchishe Yesuusako simmis.
LUK 17:16 I, Samaare biitta asi, shin Yesuusa toho bolla gufannidi iya galatis.
LUK 17:17 Yesuusi, “Paxiday tammu asata gidokonaayee? Yaatin, uddufunati aw bidonaa?
LUK 17:18 Ha allaga uraape attishin, hari simmidi Xoossa galatey deenna guusseyee?” yaagidi oychis.
LUK 17:19 Uraako, “Ne ammanoy nena pathis; dendada ba” yaagis.
LUK 17:20 Farsaaweti, “Xoossa kawotethay awude yaanee?” gidi Yesuusa oychidosona. I, “Xoossaa kawotethay bentiya mallan yeenna.
LUK 17:21 Qassika iya, ‘Hannina woyko hinina yaaganaw danda7enna. Ayis giiko, Xoossa kawotethay hinte giddon de7ees’ ” yaagidi zaaris.
LUK 17:22 Yesuusi ba tamaaretako, “Asa Na7a gallasatape issuwa be7anaw hinte amotiya wodey yaana, shin hinte be7eketa.
LUK 17:23 Asay, ‘I yan de7ees’ woyko, ‘Haysan de7ees’ yaagana, shin entana kaallidi boopite.
LUK 17:24 Wol7anthi wol7amidi salo gaxape gaxa poo7isiya mela Asa Na7aa yuussaa gallasay hessada hanana.
LUK 17:25 Shin hessi hananaape sinthe Asa Na7ay daro waayanawunne ha yeletethan ixetanaw bessees.
LUK 17:26 Nohe wode hanidaysa mela Asa Na7a woden hessada hanana.
LUK 17:27 Nohey Markabiyan gelida qamma gakanaw asay mishenne uyishe, ekishenne gelishe de7ishin dhayo haathay yidi ubbaa dhaysis.
LUK 17:28 Looxe laythanka hessatho hanis. Asay mishenne uyishe, shammishenne bayzishe, tokishenne keexishe, gam7idosona.
LUK 17:29 Looxey Soodomepe keyida gallas diinne geetetiya xuuggiyabay salope bukidi ubbaa dhaysis.
LUK 17:30 Asa Na7ay qonciya wodeka hessada hanana.
LUK 17:31 “He gallasan karen de7iya oonika keetha giddon de7iyaba ekanaw soo gelopo. Hessadaka, gaden de7iya asi aykoska soo simmofo.
LUK 17:32 Looxe machiw akeekite;
LUK 17:33 ba shempiw ashshanaw koyiya asi oonika dhaysana; ba shempiw aathidi immiya oonika I ashshana.
LUK 17:34 Ta hintew odayis; he gallasan nam7u asati issi arsan zin7ana; issoy eketana, hankoy attana.
LUK 17:35 Nam7u maccasati wolla gaaccishin iissiya eketana, hankiya attana.
LUK 17:36 Nam7u asati wolla gaden goyeysatape issoy eketana, hankoy attana” yaagis.
LUK 17:37 Enti, “Godaw aw eketanee?” yaagidi oychidosona. I, “Bawuti de7iya bessan ankoti shiiqoosona” yaagis.
LUK 18:1 Yesuusi ba tamaareta azallonna ubba wode woossana mela tamaarsanaw koyidi yaagidi leemiso odis:
LUK 18:2 “Issi kataman Xoossas yashetonna, asas yeellatonna issi daynni de7ees
LUK 18:3 He kataman issi am7iya de7awusu. Iyaka, ‘Ta giddoninne ta morkiya giddon de7iya mootuwa pirda’ yaagada ubba wode he daynnaako simeretawusu.
LUK 18:4 Daynnay guutha wodes I odaa si7onna ixis, shin guyepe ba wozanan, ‘Taani Xoossas yayyonna, asas yeellatonna ixikoka,
LUK 18:5 ha am7iya tana waaysiya gisho iw pirdana; yaatonna ixiko ubba wode yada tana salethana’ ” yaagidi qopis.
LUK 18:6 Godayka, “Geella daynnay gidaysa si7ideta;
LUK 18:7 Xoossay qammanne gallas iyako waassiya ba dooridaysatas pirdeneyee? Entana maaddanaw gam7iyee?
LUK 18:8 Ta hintew odeysa si7ite, ellesidi pirdana. Gidoshin, Asa Na7i yaa wode sa7a bolla ammano demmandesha?” yaagis.
LUK 18:9 Qassi zaaridi, Yesuusi, bantana xillo asada oothidi ceeqeteysatasinne harata kadheysatas haysada yaagidi leemiso odis:
LUK 18:10 “Nam7u asati woossanaw Xoossa Keethi bidosona. Issoy Farsaawe hankoy qassi qaraxa qanxisiya asi.
LUK 18:11 Farsaawey eqidi baw woossishe, ‘Xoossaw taani harata mela bonqancho, geellanne laymatiya asi, aadhada qassi ha qaraxa qanxisiya uraa mela gidonna gisho nena galatayis.
LUK 18:12 Saamintafe nam7u toho xoomayis, ta demmiyaba ubbaafe asraata kessayis’ yaagis.
LUK 18:13 “Shin qaraxa qanxiseysi haahon eqidi hari attoshin salo dhoqu gidi xeellanawka yayyidi ba tiraa iccishe ‘Xoossaw, tana nagaranchuwa maararki’ gidi woossis.
LUK 18:14 Ta hintew odeysa si7ite; Farsaawiyape haysi qaraxa qanxiseysi Xoossaa sinthan xillo gididi ba soo simmis. Ayis giiko, bana dhoqu dhoqu oothiya asi kawuyana, bana kawushiya asi dhoqu dhoqu gaana” yaagis.
LUK 18:15 Yesuusi yooga nayta bolla ba kushiya wothidi anjana mela asay iyako ehoosona. Yesuusa tamaareti hessa be7idi “Ayis Yesuusako eheetii?” yaagidi kaccidosona.
LUK 18:16 Shin Yesuusi nayta baako xeegidi, “Yooga nayti taako yaanaysa diggofite; yo giite. Ayis giiko, Xoossa kawotethay entada hanidaysatasa.
LUK 18:17 Taani hintew tuma odayis; Xoossa kawotetha yooga naytatho ekonnay oonika yaa gelenna” yaagis.
LUK 18:18 Ayhude halaqatape issoy, “Keeha astamaariyaw, merina de7o demmanaw ay ootho?” yaagidi oychis.
LUK 18:19 Yesuusi iyako, “Ayis tana keehaw yaagada xeegay? Issi Xoossafe attishin, hari keehi baawa.
LUK 18:20 Laammofa, wodhopa, kaysotopa, wordo markatofa, ne aawanne ne aayiw boncha” giya kiita eray gidi oychis.
LUK 18:21 Urayka, “Hessata ubbaa taani na7atethafe doomada naagashe gam7as” yaagis.
LUK 18:22 Yesuusi hessa si7ida wode, “Hiza, new issibay pacees; new de7iyaba ubbaa bayzada manqotas imma; salon nena shaloy naagees. Yaata simmada, tana kaalla” yaagis.
LUK 18:23 Shin uray hessa si7ida wode iyaw daro shaloy de7iya gisho daro qiirotis.
LUK 18:24 Yesuusi uraa be7idi, “Dure asas Xoossa kawotethi geloy waanidi un7andesha?
LUK 18:25 Durey Xoossa kawotethi gelanaysafe gimaley narpe luhora kantheysi kawuyees” yaagis.
LUK 18:26 Hessa si7ida asay, “Hessa gidiko ooni attanee?” yaagidosona.
LUK 18:27 Yesuusi, “Asas danda7etonabay Xoossas danda7etees” yaagis.
LUK 18:28 Phexroosi, “Heko nuuni nubaa ubbaa aggidi nena kaallida” yaagis.
LUK 18:29 “Yesuusi tuma ta hintew odayis; Xoossaa kawotethaas gidi ba keethaa woyko ba machiw woyko ba ishata woyko ba aawanne ba aayiw woyko ba nayta aggiday;
LUK 18:30 ha wodiyan dako daro, yaana alamen merina de7o ekonnay oonika baawa” yaagis.
LUK 18:31 Yesuusi tammanne nam7ata baako xeegidi, “Ane Yerusalaame boos, nabeti Asa Na7aba xaafidaba ubbay yan poletana.
LUK 18:32 I Ayhude gidonna asaas aadhidi imetana. Enti iya toochana, cayananne iya bolla cuttana.
LUK 18:33 Iya garaafidaape guye, wodhana, shin heedzantho gallasan I hayqope dendana” yaagis.
LUK 18:34 Shin iya tamaareti he ubbaafe issibaaka akeekibokona. Iya xuuray entaw qosetida gisho I woygidaako eribookona.
LUK 18:35 Yesuusi Iyaarko matiya wode issi qooqe uray oge gaxan uttidi woossees.
LUK 18:36 Qooqe uray asay he bessaara aadhishin si7idi, “I aybee?” gidi oychis.
LUK 18:37 Enti, “Naazirete Yesuusi haysara aadhees” yaagidosona.
LUK 18:38 I, “Dawita na7aw, Yesuusa, tana maararki” yaagidi waassis.
LUK 18:39 Sinthe sinthe biya asati, “Si7i ga” gidi hanqetidosona. Shin I, “Dawita na7aw, tana maara” yaagidi darsidi waassis.
LUK 18:40 Yesuusi eqidi uraa baako ehana mela kiittis. Urayka, iyako shiiqin,
LUK 18:41 “Ta new ay oothana mela koyay?” yaagidi oychis. Qooqey, “Godaw ta xeellanaw koyayis” yaagis.
LUK 18:42 Yesuusi, “Xeella, ne ammanoy nena pathis” yaagis.
LUK 18:43 Uray ellesidi xeelli aggis. Xoossaa bonchishe Yesuusa kaallis. Asa ubbay hessa be7idi Xoosse galatidosona.
LUK 19:1 Yesuusi Iyaarko gelidi aadhees.
LUK 19:2 Yan Zakiyoosa geetetiya qaraxa qanxiseyisata halaqay de7ees. I daro dure.
LUK 19:3 I Yesuusi ooneko be7anaw koyis. I qanthi gidiya gisho asaa darotethaafe dendoysan Yesuusa be7anaw danda7ibeenna.
LUK 19:4 Yesuusa be7anaw koyidi I biya ogiyas sinthe woxi bidi issi boobba mitha bolla keyis.
LUK 19:5 Yesuusi he bessaa gakishe dhoqu gidi be7idi, “Zakiyoosa, hachi ta ne son pee7anaw bessiya gisho elle wodha” yaagis.
LUK 19:6 I ellesi wodhidi ufaysan Yesuusa mokis.
LUK 19:7 He bessan de7iya asaa ubbay hessa be7idi, “Nagaranchuwa soo gelidi moketaniw hanees” yaagidi zuuzumidosona.
LUK 19:8 Gidoshin, Zakiyoosi eqidi Godaako, “Godaw, Heko taw de7iya shalo ubbaafe baggaa manqotas immana. Asape aybaka wordon balethada ekidaba gidiko oyddu kushe zaarana” yaagis.
LUK 19:9 Yesuusi qassi, “Ha uray Abrahaame na7a gidida gisho hachi atotethay ha soo yis.
LUK 19:10 Asa Na7ay yiday dhayidaysa koyanaasanne ashshanaasa” yaagis.
LUK 19:11 Asay hessa si7iya wode, Yesuusi Yerusalaame matatida gishonne Xoossaa kawotethay ha77i matara qoncana daanida gisho entaw leemiso odis.
LUK 19:12 Hessa gisho, Yesuusi, “Issi gita asi de7eysi baw kawotethi ekidi yaanaw hara biitta bis.
LUK 19:13 Iyaw oothiya aylletape tammata xeegidi issuwas issuwas tammu minaane immidi ‘Ta simmada yaana gakanaw ha miishiyara zal7ite’ yaagis.
LUK 19:14 “He biitta asay iya ixiya gisho, ha uray nu bolla kawotana mela nu koyoko yaagidi ase iya guyera kiittidosona.
LUK 19:15 “Gidoshin, he uray kawo gididi ba biitta simmis. He tammu aylleti I immida miishiyan ay mela zal7idi wodhisidaako eranaw koyidi entana xeegisis.
LUK 19:16 “Koyroysi yidi, ‘Godaw, ne taw immida miishey haraa tamma wodhis’ yaagis.
LUK 19:17 “Iya Goday, ‘Neno ammanetida aylliyaw lo77o oothadasa. Neeni guuthaban ammanetida gisho new tammu katamata bolla maata immas’ yaagis.
LUK 19:18 “Nam7anthoy yidi, ‘Godaw, ne taw immida miishey haraa ichasha wodhis’ yaagis.
LUK 19:19 “Goday iyako, ‘Newuka qassi ichashu katamata bolla maata immas’ yaagis.
LUK 19:20 “Heko heedzanthoy yidi, ‘Godaw, ta curqan xaaxada naagida ne miishiya hannashu.
LUK 19:21 Ayis giiko, neeni nebaa gidonnaba ekeysanne ne zeronnaba cakiya iita asi gidiya gisho new yayyas’ yaagis.
LUK 19:22 “Iya goday zaaridi, ‘Neno iita aylliyaw ne doonatho ta nena pirdana. Ta wothonnaba ekeysanne zeronnaba cakiya asi gideysa ne eriko,
LUK 19:23 ta yada ta miishiya wodhera ekana mela zal7iya asaas ayis immabikii?’
LUK 19:24 “Iya goday he bessan eqidaysatako, ‘Iyara de7iya miishiya ekidi tamma wodhisidaysas immite’ yaagis.
LUK 19:25 “Enti, ‘Godaw, iyaw kaseka tammu minaaney de7ees’ yaagidosona.
LUK 19:26 “Goday, ta hintew odayis; ‘De7iya ubbaas hari guzhetana, shin baynaysafe haray atto iyaw de7iyaraka eketana.
LUK 19:27 Gidoshin, ta enta bolla kawotonna mela koydaysata he ta morketa ha ta sinthe ehidi gora7ite’ gis” yaagis.
LUK 19:28 Yesuusi hessa odidaape guye, entafe sinthe hemetidi Yerusalaame bis.
LUK 19:29 Shamaho zuma bolla de7iya Beetefaagenne Bitaane matida wode ba tamaaretape nam7ata kiittidi,
LUK 19:30 “Hinte sinthan de7iya gutaa biite, hinte yaa gakiya wode oonika toggonna qashetidi de7iya hare mari demmana. Iya billidi haa eki yiite.
LUK 19:31 Oonika, ‘Ayis billeetii?’ gidi oychiko, ‘Goday iya koyees’ yaagite” yaagis.
LUK 19:32 Kiitetidaysati bidi I gidaysada hanin be7idosona.
LUK 19:33 Enti hare maraa billishin godati be7idi, “Hare maraa ayis billeetii?” yaagidosona.
LUK 19:34 Enti zaaridi, “Goday iya koyees” yaagidosona.
LUK 19:35 Yaape hare maraa Yesuusako ehidosona. Banta ma7uwa hare maraa zokon yeggidi Yesuusa hare maraa bolla utisidosona.
LUK 19:36 Asayka I biya ogiya bolla banta ma7uwa hiixidosona.
LUK 19:37 Shamaho zuma dugethe wodhisiya ogiyako matiya wode, taybon keehi daro asay enti be7ida malaalsiyaban ufaytidi banta qaala dhoqu oothidi,
LUK 19:38 “Godaa sunthan yaa kawoy anjetidaysa saluwan saroy ubbaafe dhoqa saluwan bonchoy Xoossaas gido” yaagidi Xoossaa galatidosona.
LUK 19:39 Asaa giddofe issi issi Farsaaweti Yesuusako, “Astamaariyaw, ne tamaareta hayzite gada hanqeta” yaagidosona.
LUK 19:40 I entako, “Enti si77i giiko shuchati waassana” yaagis.
LUK 19:41 Yesuusi Yerusalaame matishe katamaa be7idi iyaw yeekis.
LUK 19:42 “New saro gidanaysa hachi ne eridaba gidiyakoshin, ha77i ne ayfiyape geemmis.
LUK 19:43 Ne morketi ne yuushuwa diridi dumma dumma ogiyara nena teqidi un7ethiya wodey yaana.
LUK 19:44 Nenanne ne dirsaa garsan de7iya ne nayta dhaysana. Issi issi shuchu denthidi laallana, ayis giiko Xoossay nena ashshanaw yaa wodiya erabaaka” yaagidi iw yeekis.
LUK 19:45 Hessafe guye, Yesuusi Xoossa Keethi gelidi zal7eyisata yaape goodis.
LUK 19:46 Qassi, “ ‘Ta keethay Xoossaa woossiya keethi gidana’ gidi xaafetis, shin hinte ta keethaa pangata gongolo oothideta” yaagis.
LUK 19:47 Gallas gallas xoossa keethan tamaarsees. Kahineta halaqati, higge astamaaretinne deriya cimati iya wodhanaw oge koyoosona.
LUK 19:48 Gidoshin, asa ubbay iya timirtiya banta wozana yeggidi si7iya gisho, entaw oothanabay dhayis.
LUK 20:1 Issi gallas Yesuusi xoossa keethan asaa tamaarsishininne Wongela markatishin, kahine halaqati, higge astamaaretinne deriya cimati issife iyako yidi,
LUK 20:2 “Neeni haysata aybi maatan oothiyako nuus oda. Ha maata new immiday oonee?” yaagidi oychidosona.
LUK 20:3 I entako, “Taka hintena issiba oychana, ane taw zaarite.
LUK 20:4 Xammaqiya Yohaanisa xinqatey Xoossafeye asapee?” yaagis.
LUK 20:5 Enti woli giddon yaagidi zoretidosona: “Xoossafe giiko yaatin, ayis ammanibeketii?” yaagana.
LUK 20:6 “Asape giiko, asa ubbay Yohaanisi nabe gideysa ammaniya gisho nuna shuchan caddana.”
LUK 20:7 Yaaniya gisho, “Awupeko nu eroko” yaagidi zaaridosona.
LUK 20:8 Yesuusi zaaridi, “Hiza, taka ay maatan haysata oothiyako hintew odike” yaagis.
LUK 20:9 Hessafe guye, Yesuusi yaagidi ha leemisuwa asaas odis: “Issi asi woyne tokis. Goshshanchotas kera immidi daro wode gam7idi yaanaw hara biitta bis.
LUK 20:10 Woyne ayfiya maxiya wodey gakin woyne ayfiyape iyaw yeddana mela goshshanchotako ba aylliya kiittis. Shin goshshanchoti he aylliya oykidi wadhidi mela kushe yeddidosona.
LUK 20:11 Kaallidika hara aylliya kiittis. Qassi goshshanchoti iya wadhidi, kawushidi mela kushe yeddidosona.
LUK 20:12 Ha77ika zaaridi heedzantho aylliya kiittis. Goshshanchoti iyaka madunxisidi woyne gadiya giddofe gaxa kessidi yeggidosona.
LUK 20:13 “Woyne gadiya goday, ‘Yaatin ta ay ootho? Ane qassi ta dosiya ta na7a yeddana; ooni eri enti iya bonchona aggokona’ yaagis.
LUK 20:14 “Shin goshshanchoti uraa na7a be7ida wode, ‘Haysi iya laattanaysa, haa yiite iya wodhana, yaatiko laatay nuus gidana’ yaagidi zoretidosona.
LUK 20:15 Woyne gadiya giddofe gaxa kessidi wodhidosona. Yaatin, woyne gadiya goday he asata waatanee?
LUK 20:16 Yidi he goshshanchota dhaysana, woyne gadiya hara asatas immana. Asay hessa si7ida wode ‘Shinchalle hessa melaba gathofo’ yaagidosona.
LUK 20:17 “Yesuusi enta caddi xeellidi, “ ‘Yaatin, gimbe keexiya asati borida shuchay, keethaas malanne minotethi immiya ubbaafe aadhiya shuchi gidis’ geetetidi xaafetidaysa birshethay aybee?
LUK 20:18 He shuchaa bolla kundiya ubbay qoxettana, shuchay iya bolla wodhiya ubbay liiqana” yaagis.
LUK 20:19 Higge astamaaretinne kahine halaqati ha leemisoy odetiday enta bolla gideysa eridi he wode iya oykanaw koydosona, shin asaas babidosona.
LUK 20:20 Hessa gisho, Yesuusa deriya haariya Roome kawa maatas aathidi immanaw koyidi iya doonape bala qaala naagoosona. Hessa polisanaw xillo daanidi cimmiya asata iyako kiittidosona.
LUK 20:21 Kiitetidi bida asati, “Astamaariyaw, neeni odeysinne tamaarseysi like gideysa, qassi Xoossaa ogiya tumatethan tamaarseysanne oonaka shaakonnaysa nu eroos.
LUK 20:22 Hanoshin, Roome kawas giira giiranaw bessi bessennee?” yaagidi iya oychidosona.
LUK 20:23 Shin I enta wozanaa iitatetha erida gisho,
LUK 20:24 “Ane tana issi santime bessite, Iya bolla de7iya misileynne sunthay oodebayee?” yaagis. Enti zaaridi, “Roome Kawa Qeesareysa” yaagidosona.
LUK 20:25 I zaaridi, “Yaatiko, Qeesareba Qeesares, Xoossaba Xoossaas immite” yaagis.
LUK 20:26 Hessa gisho, I zaarida zaaruwan asaa sinthan bala demmanaw danda7ibookona. Iya zaaruwan malaaletidi si77i gidoosona.
LUK 20:27 Hayqope dendoy baawa giya Saduqaawetape issoti issoti Yesuusako yidi,
LUK 20:28 “Astamaariyaw, issi asi macho ekidi na7a yelonna hayqiko, iya ishay he maccasiw ekidi nayta yelidi ba ishaas koche ashshana mela Musey xaafis.
LUK 20:29 Heko laapun ishati de7oosona. Koyroysi macho ekidi na7a yelonna hayqis.
LUK 20:30 Nam7anthoy iyo ekidi na7a yelonna hayqis.
LUK 20:31 Heedzanthoyka hessatho hanis. Laapunati ubbay hessada hanidi iyo ekidosona, shin na7a yelonna hayqidosona.
LUK 20:32 Wursethan maccasiya hayqasu.
LUK 20:33 Hiza, laapun addey iyo ekida gisho hayqope dendiya wode iya oodde macho gidanee?” yaagidi oychidosona.
LUK 20:34 Yesuusi zaaridi, “Asay ha wodiyan ekoosonanne geloosona.
LUK 20:35 Shin hayqope dendidi yaana alamiyan daanaw besseysati ekokonanne gelokona.
LUK 20:36 Enti kiitancho mela gidiya gisho sinthafe hayqokona. Hayqope dendida gisho enti Xoossaa nayta.
LUK 20:37 Musey Godaa, ‘Abrahaame Godaa, Yisaaqa Godaa, Yayqooba Godaa’ gidi tushiya giddon xuugetiya tama taarikiya xaafidaysan hayqida asay dendeysa bessees.
LUK 20:38 Ubbay iyaw de7on de7eyisata gidiya gisho I de7on de7eyisata Godaape attishin, hayqidaysata Godaa gidenna” yaagidi zaaris.
LUK 20:39 Higge astamaaretape issoti issoti, “Astamaariyaw, lo77oba odadasa” yaagidosona.
LUK 20:40 Hessafe guye, hara oysho oychanaw yayyidosona.
LUK 20:41 Iyape kaallidi Yesuusi entako, “Asay Kiristoosa waatidi Dawita na7a yaagona?
LUK 20:42 Ayis giiko, Dawiti ba huuphen ba maxaafan, “ ‘Xoossay ta Godaako “Ta ne morketa ne tohoy yedhiyaso oothana gakanaw taape ushacha baggan utta” gis’ yaagis.
LUK 20:44 “Hiza, Dawiti Kiristoosa, ‘Godaa gidi xeegishe iyaw na7a waanidi gidii?’ ” yaagis.
LUK 20:45 Derey ubbay si7ishin ba tamaaretako,
LUK 20:46 “Adussa ma7o ma7idi yuushshe doseysatape, giyan boncho sarotho, ayhude woosa keethan boncho oyde, moketiya sonka boncho bessi koyiya higge astamaaretape naagetite.
LUK 20:47 Enti am7eta keethaa kalloyoosona, xillo asi daanidi woosa adussosona. Hessati ubbaafe aadhiya iita pirda ekana” yaagis.
LUK 21:1 Dure asay xoossa keethan muxaata saaxiniyan yeggishin Yesuusi dhoqu gidi asaa be7is.
LUK 21:2 Qassi issi manqo am7iya nam7u sikina yeggishin be7idi,
LUK 21:3 “Ta hintew tuma odayis; ha manqo am7iya ubbaafe aathada immasu.
LUK 21:4 Ayis giiko, ha asa ubbay bantaw de7iyabaape immidosona, shin iya ba pacaape, baw de7iya aquwa ubbaa immasu” yaagis.
LUK 21:5 Yesuusa tamaaretape issoti issoti Xoossa Keethay daro lo77iya shuchaninne asay Xoossaas immida imotan lo77idaysa odetoosona.
LUK 21:6 Shin Yesuusi, “Ha hinte be7iyabay ubbay laaletonna, shuchi shucha bolla gimbetida mela attonna wodey yaana” yaagis.
LUK 21:7 Entika, “Astamaariyaw, ha ubbay hananay awudee? Qassi haysi hananaysas malaatay aybee?” yaagidi oychidosona.
LUK 21:8 Yesuusi yaagidi entaw zaaro immis: “Baletonna mela naagetite. Daroti, ‘Taani Kiristoosa, wodey matatis’ yaagishe ta sunthan yaana, shin hinte enta kaallopite.
LUK 21:9 Hinte olabaanne asaa geellatetha si7iya wode dagammofite. Hessi sinthatidi hananaysi attonnaba gidiya gisho wodiya wursethay ellesidi yeenna” yaagis.
LUK 21:10 Kaallidika, “Derey deriya bolla, kawotethay kawotethaa bolla dendana.
LUK 21:11 Gita biitta qaaxoy hanana, koshaynne gadoy dumma dumma bessan darana, yashshiyabaynne gita malaatati salope qoncana.
LUK 21:12 Shin ha ubbay hananaape sinthe ta sunthaa gisho gidi asay hintena gooddananne oykana. Ayhude woosa keethaninne qasho keethan hintena yeggana. Kawota sinthenne deriya haareyisata sinthe hintena efana.
LUK 21:13 Hessika tabaa hinte entaw markatanaw lo77o oge gidana.
LUK 21:14 Hessa gisho, hinte oyshetiya wode woygidi zaaro immane gidi hinte wozanan un7etonna mela akeekite.
LUK 21:15 Ayis giiko, hinte morketi hintera eqetanawunne palamanaw danda7onna doonanne cincatethi ta hintew immana.
LUK 21:16 Hari attoshin, hintena yelidaysati, hinte ishati, hinte dabbotinne laggeti hintena aathidi immana. Hinte giddofe issota issota wodhana.
LUK 21:17 Ta sunthaa gisho asa ubbaa sinthan hinte ixetidaysata gidana.
LUK 21:18 Shin hari attoshin, hinte binaanape issoyka dhayenna.
LUK 21:19 Polo danda7an hinte, hinte shempuwa ashshana.”
LUK 21:20 “Yerusalaame katamay wotaadaren diretidi uttidashin hinte be7iko iyaw dhayoy matatidaysa erite.
LUK 21:21 He wode Yihudan de7iya ubbay deriyako baqato, kataman de7eysati yaape keyo, gaxariyan de7eysati katama gelopo.
LUK 21:22 Ayis giiko, ha xaafetidabay poletana mela hessi Xoossay kushe zaariya wode.
LUK 21:23 Sa7a bolla gita metoy yaana, hessanka asaa bolla Xoossaa hanqoy yaana. Hessa gisho, qanthatidaysatanne dhantheyisata ayye!
LUK 21:24 Enti mashshan hayqana, asa ubbay allaga biitta di7etana. Ayhude gidonna asaa wodey poletana gakanaw Yerusalaamey entanan yedhetidaysa gidana.
LUK 21:25 “Awan, ageenaninne, xoolintota bolla malaatati hanidi bentana. Abbaafenne zuliya deshuwape dendoysan biittan de7iya asay un7etananne yarkana.
LUK 21:26 Saluwa wolqati buqettana gisho asay yashshaninne biitta bolla aybi hanandesha gidi naagon bantana baletana.
LUK 21:27 He wode Asa Na7ay wolqaninne gita bonchuwan shaarara yishin enti be7ana.
LUK 21:28 Hinte atotethay matatida gisho ha hanoti poletethi oykiya wode giigeti eqite, hinte huuphiya dhoqu oothidi xeellite” yaagis.
LUK 21:29 Kaallidika, haysada gidi leemiso odis; “Balase mithinne hara mithata ubbaa be7ite.
LUK 21:30 Enti aaciya wode torchey matatidaysa hinte ereeta.
LUK 21:31 Hessada ha hanoti poletishin hinte be7iko Xoossaa kawotethay matatidaysa erite.
LUK 21:32 “Ta hintew tuma odayis; ha ubbay poletana gakanaw ha yeletethay aadhenna.
LUK 21:33 Saloynne sa7i aadhana, shin ta qaalay aadhenna.
LUK 21:34 “Hiza, dhassi bayna de7on, ushsha daroninne duussabaas un7etethan hinte wozanay oyketonna melanne he qammay akeekona xiheda hinte bolla gakonna mela naagetite.
LUK 21:35 He qammay biitta kumethan de7iya ubbaa bolla gakana.
LUK 21:36 Hessa gisho, yaa iitaape attanawunne Asa Na7a sinthan eqanaw danda7ana mela ubba wode minnidi woossite” yaagis.
LUK 21:37 Gallas gallas Yesuusi xoossa keethan tamaarsishe, qamma qamma Shamaho zuma bolla keyidi aqees.
LUK 21:38 Asa ubbay iya si7anaw wonta guura iyako Xoossaa Keethi yoosona.
LUK 22:1 He wode “Paasika” giya Uytha Ba7aaley matis.
LUK 22:2 Kahine halaqatinne higge astamaareti ase yayiya gisho, waatidi Yesuusa banta giddofe dhaysaneko oge koyoosona.
LUK 22:3 Xalahey tammanne nam7atape issuwa gidida Asqoroota Yihuda geeteteysa gido gelis.
LUK 22:4 Yihudi kahine halaqatakonne Xoossa Keetha naageysata halaqatako bidi Yesuusa waati aathidi immaneko entara maqetis.
LUK 22:5 Entika hessan ufaytidi miishe immanaw iyara zoretidosona.
LUK 22:6 Ika zoretethan giigis. Aathi entaw immanaw asi bayna inje wode naagishe de7ees.
LUK 22:7 Hessafe guye, Paasika dorsay shuketiya Uytha Ba7aaley gakis.
LUK 22:8 Yesuusi, “Paasika kahuwa maana mela bidi nuus giigisite” yaagidi Phexroosanne Yohaanisa kiittis.
LUK 22:9 Enti, “Nu awun giigisana mela ne koyay” yaagidi oychidosona.
LUK 22:10 I entako, “Heko hinte katama gelishin haatha oto tookida addey hintera gahetana. I bidi geliya keethaa iya kaallidi gelite.
LUK 22:11 Astamaarey godaako, ‘Ta ta tamaaretara wolla Paasika kahuwa maanaw imatha keethi awunee? yaagis’ giite.
LUK 22:12 I pooqiya bolla hiixetidi giigidi de7iya dalga kifile hintena bessaana, yan giigisite” yaagis.
LUK 22:13 Enti bidi Yesuusi gidaysada hanin demmidosona. Paasika ba7aale kahuwa yan giigisidosona.
LUK 22:14 Saateyka gakida wode Yesuusi hawaaretara wolla kahuwa bolla uttis.
LUK 22:15 I entako, “Ta waaye ekanaape sinthe ha kahuwa hintera maanaw daro amottas.
LUK 22:16 Hiza, si7ite! Xoossaa kawotethan haysas birshethay poletana gakanaw ha kahuwa zaarada miike” yaagis.
LUK 22:17 Ushshaa ekidi galati simmidi, “He7ite haysa hinte giddon shaaketite.
LUK 22:18 Si7ite! Xoossaa kawotethay yaana gakanaw hachife doomada ha woyne ushshafe zaarada uyike” yaagis.
LUK 22:19 Uythaa ekidi, galati simmidi, “Haysi hintew imetiya ta ashuwa. Haysa oothishe tana qopite” yaagidi menthidi entaw immis.
LUK 22:20 Hessadaka, kahuwape guye, ushsha ekidi, “Ha ushshay hintew gukida ta suuthan gidiya ooratha caaquwa.
LUK 22:21 Gidoshin, tana aathidi immana uraa kushey taara issife gaytaana.
LUK 22:22 Asa Na7ay iyaw geetetoysa mela hayqanaw de7ees, shin iya aathidi immiya uraa ayye!” yaagis.
LUK 22:23 Enti banta giddon, “Haysa ooni oothanee” gidi woli oychidosona.
LUK 22:24 Qassi enta giddon gita gidanay oone giya palami medhetis.
LUK 22:25 Yesuusi entako, “Deriya kawoti banta asaa wolqan haaroosona; banta deriya bolla godateysataska bantana, ‘Lo77o ootheyisata’ yaagidi xeegosona.
LUK 22:26 Shin hinte giddon hessa mela gidopo. Hinte giddon bayratey kaaloda hano; kaaletheysi kaalleysada hano.
LUK 22:27 Hanoshin, mokeysafenne Moketeysafe awusi aadhii? Moketeysa gidenneyee? Shin taani hinte giddon mokeysa mela.
LUK 22:28 “Hinteka ta metuwan taape shaaketonna taara minnidi eqidaysata.
LUK 22:29 Hinte ta gaytape maana mela, uyana melanne araatata bolla uttidi tammanne nam7u Isra7eele sheeshata bolla pirdana mela ta aaway tana shuumidaysada taka hintena ta kawotethan shuumana” yaagis.
LUK 22:31 Kaallidika Yesuusi, “Simoona, Simoona, Xalahey hintena gisteda harqanaw woossis.
LUK 22:32 Shin taani ne ammanoy dhayonna mela new gaannatas. Neka simmida wode ne ishata mintha” yaagis.
LUK 22:33 Simooni, “Godaw, taani neera qashetanawunne hayqanaw giigetas” yaagis.
LUK 22:34 Yesuusi Phexroosako, “Ta new odayis; hachi kuttoy waassanaape sinthe ne tana heedzu toho kaddana” yaagis.
LUK 22:35 Kaallidika, Yesuusi entako, “Taani hintena korojoy, karxiitinne caammi baynna kiitida wode hintew pacidabay de7ii?” yaagidi oychis. Enti zaaridi, “Aykoyka pacibeenna” yaagidosona.
LUK 22:36 I entako, “Ha77i korojoynne karxiiti de7ey oyko; mashshi baynay ba afilaa bayzidi mashsha shammo.
LUK 22:37 Haa si7ite! ‘Geellatara taybetis’ geetetidi xaafetidaysi tanan poletanaw bessees. Ee, ta gisho xaafetidabay poleteysi tumatis” yaagis.
LUK 22:38 Iya tamaareti, “Godaw haysan nam7u mashshati de7oosona” yaagidosona. I, “Gidana” yaagis.
LUK 22:39 Yesuusi kase meezetidaysada dendidi Shamaho zuma bolla keyis. Iya tamaareti iya kaallidosona.
LUK 22:40 He bessaa gakida wode, “Paacen gelonna mela woossite” yaagis.
LUK 22:41 Entafe shuchi holin gakiya soo mela haakidi gulbatidi woossis.
LUK 22:42 “Ta aawaw, ne shene gidiko ha metuwa taape aatha. Shin ta shene gidopo ne sheney hano” yaagidi woossis.
LUK 22:43 Kiitanchoy salope qoncidi minthis.
LUK 22:44 Daro un7etidi minnidi woossees. Iya cawayka suuthi xokiyada sa7an xokees.
LUK 22:45 Yesuusi woosa wursidi ba tamaaretako yis. Enti, azzanope dendoysan daaburidi dhiskidashin demmidi,
LUK 22:46 “Ayis dhisketii? Paacen gelonna mela dendidi woossite” yaagis.
LUK 22:47 I buroo oda bolla de7ishin daro asati yidosona. Tammanne nam7atape issoy Yihuda geeteteysi entana kaalethees. I Yesuusa yeeranaw mati shiiqis.
LUK 22:48 Shin Yesuusi, “Yihuda, Asa Na7aa yeerada aatha immanee?” yaagis.
LUK 22:49 Yesuusa tamaareti he hanuwa be7idi, “Godaw mashshan shocino?” yaagidosona.
LUK 22:50 Enta giddofe issoy kahine halaqaa oosanchuwa shocidi ushacha haytha qanxidi yeggis.
LUK 22:51 Shin Yesuusi, “Agga! Diggofite” yaagis. Uraa haythaa bochidi pathis.
LUK 22:52 Hessafe guye, Yesuusi bana oykanaw yida kahine halaqatako, Xoossa Keetha naageysata shuumatakonne cimatako, “Paanno oykiya asada mashshenne xam7a oykidi yidetii?
LUK 22:53 Ubba gallas xoossa keethan ta hintera de7iya wode ta bolla kushe wothibeeketa. Shin haysi dhuma kawotethay haarida wodenne hinte wode” yaagis.
LUK 22:54 Hessafe guye, Yesuusa oykidi kahine halaqaa zabbaa efidosona. Phexroosi haahon Yesuusa kaallees.
LUK 22:55 Asati kahine halaqaa zabban tama eethidi wolla uttidashin Phexroosi entara issife uttis.
LUK 22:56 Issi gadhindiya Phexroosi tama matan uttidaysa cadda xeellada, “Ha uray iyara de7ees” yaagasu.
LUK 22:57 Shin Phexroosi, “Ha maccasete ta he uraa erike” yaagidi kaddis.
LUK 22:58 Guutha wodepe guye issi hara addey iya be7idi, “Neka entafe issuwa” yaagis. Shin Phexroosi, “Ha addiyaw tana gidike” yaagis.
LUK 22:59 Issi saate mela gam7idaape guye issi hara addey tillisidi, “Ha uray Galilape gidiya gisho sidhey bayna iyara de7ees” yaagis.
LUK 22:60 Shin Phexroosi, “Ha addiyaw, ne geysa ta erike” yaagis. I he oda ongonna de7ishin kuttoy waassis.
LUK 22:61 Goday guye simmidi Phexroosa xeellis. Phexroosi, “Hachi kuttoy waassanaape sinthe ne tana heedzu toho kaddana” yaagidi, Goday odida qaala akeekis.
LUK 22:62 Phexroosi kare keyidi daro kokoridi yeekis.
LUK 22:63 Yesuusa naagiya asati iya leqisonne deshethi oykidosona.
LUK 22:64 Iya ayfiya goozidi “Ane tinbite oda; nena dechiday oonee?” yaagidi oychoosona.
LUK 22:65 Hara daro cashshe cayidi kawushoosona.
LUK 22:66 Sa7i wontiya wode Ayhude biitta cimati, kahine halaqatinne higge astamaareti shiiqidi, Yesuusa banta sinthe shiishidosona.
LUK 22:67 Enti, “Neeni Kiristoosee? Ane nuus oda?” yaagidi oychidosona. Yesuusi, “Ta odiyako ammaneketa.
LUK 22:68 Ta oychiyako zaareketa.
LUK 22:69 Shin Asa Na7ay haysafe gede baggan wolqaama Xoossaa ushacha baggan uttana” yaagis.
LUK 22:70 He wode ubbay, “Yaatin, neeni Xoossaa na7ee?” yaagidosona. I, “Ta Xoossaa na7a gideysa hinte gideta” yaagis.
LUK 22:71 Enti, “Hiza, hara marka ay koshshii? I ba inxarsan odishin nu si7ida” yaagidosona.
LUK 23:1 He bessan shiiqida shangoti ubbay dendidi Yesuusa Philaxoosako efidosona.
LUK 23:2 “Ha uray nu asaa balethishin, kawas giira giironna mela diggishininne qassi, ‘Taani Kiristoosa hinte kawa’ yaagishin demmida” yaagidi mootidosona.
LUK 23:3 Philaxoosi Yesuusa, “Neeni Ayhudeta kawo?” yaagidi oychis. Yesuusi, “Ee, ne gidaysa mela” yaagis.
LUK 23:4 Philaxoosi kahine halaqatakonne asaako, “Ha uraa bolla taani issi balaka demmabike” yaagis.
LUK 23:5 Shin enti, “Ha uray Galilape doomidi haysa gakanaw Yihuda kumetha iitabas denthethees” yaagidi minthi odidosona.
LUK 23:6 Philaxoosi hessa si7ida wode Yesuusi Galila aseeko eranaw koyidi iya oychis.
LUK 23:7 Yesuusi Herodiisa biittafe yida asi gideysa Philaxoosi erida wode Herodiisi he wode Yerusalaamen de7iya gisho iyako yeddis.
LUK 23:8 Herodiisi Yesuusa be7anaw daro wodepe koyishe de7iya gisho, iya be7ida wode daro ufaytis. Ayis giiko, iyabaa si7ida gisho malaalsiyaba oothin be7anaw amotishe de7ees.
LUK 23:9 Herodiisi Yesuusa daro oyshota oychis, shin I aykoka zaaribeenna.
LUK 23:10 Kahineta halaqatinne higge astamaareti yan eqidi minthidi iya mootosona.
LUK 23:11 Herodiisaranne iya wotaadaretara Yesuusa kadhidosonanne leqsidosona. Boncho afila mayzidi Philaxoosako zaaridi yeddidosona.
LUK 23:12 Herodiisaranne Philaxoosara kase morkeshin he gallas wolla giigidosona.
LUK 23:13 Philaxoosi kahine halaqata, asaa haareysatanne asaa xeegidi,
LUK 23:14 “ ‘Ha uray asaa geellatethas denthethees’ gidi taako ehideta. Taka hinte sinthan pilgada hinte shiishida mootuwas aybi balaka demmabike.
LUK 23:15 Herodiisi, hessatho aybi balaka iya bolla demmiboonna gisho nuuko yeddis. Tumaka ha uray hayqos gathiya aybi balaka oothibeenna.
LUK 23:16 Hessa gisho, iya garaafada billa yeddana” yaagis.
LUK 23:17 Hessa I giday Paasika Ba7aale wode issi asi entaw billanaysi iyaw attonnaba gidiya gishosa.
LUK 23:18 Derey ubbay issi bolla, “Ha uraa gede digga, nuus Barbaana billa” yaagidi waassidosona.
LUK 23:19 Barbaani katamaa giddon asaa iitabas denthethidi ase wodhidi qashetida asi.
LUK 23:20 Philaxoosi Yesuusa billanaw koyidi asaas zaari odis.
LUK 23:21 Gidoshin, asay, “Kaqa! Kaqa!” yaagidi waassidosona.
LUK 23:22 Philaxoosi heedzantho, “Ha uray qohidabay aybee? Wodhos gathiya bala ta demmabike. Hessa gisho, garaafada yedda aggana” yaagis.
LUK 23:23 Enti banta qaala dhoqu oothidi, “Kaqetanaw bessees” gidi minthi waassidosona. Enta waasoyka xoonis.
LUK 23:24 Enta oysha gisho, gidi Philaxoosi iya bolla pirdis.
LUK 23:25 Ase iitabas denthethidaysanne ase wodhidi qashetidaysa billana mela woossida gisho he uraa entaw billis. Shin Yesuusa enti koydaba oothana mela entaw aathidi immis.
LUK 23:26 Yesuusa oykidi efishin Simoona geetetiya Qereena biitta addey gaxarepe yishin, demmidi masqaliya toossidi Yesuusa kaallidi baana mela un7ethidosona.
LUK 23:27 Daro asaynne banta tiraa iccishe yeekiya maccasati iya guyera kaalloosona.
LUK 23:28 Shin Yesuusi entako guye simmidi, “Hinteno, Yerusalaame maccasato, hinte huuphesinne hinte naytas yeekitepe attishin, taw yeekofite.
LUK 23:29 ‘Heko maynthati, yelonna ulotinne dhanthonna dhanthati anjetidosona’ hinte yaagana gallasay yaana.
LUK 23:30 He wode dereta, ‘Nu bolla kundite’, zumataka, ‘Nuna kammite’ yaagana.
LUK 23:31 Hiza, qaye mithaa hessatho oothiko mela mithaa waatandesha?” yaagis.
LUK 23:32 Iyara wodhanaw hara nam7u worandzota efidosona.
LUK 23:33 Qeraaniyo geetetiya bessaa gathidi kaqidosona. Worandzotape issuwa ushacha baggara hankuwa haddirsa baggara kaqidosona.
LUK 23:34 Yesuusi, “Ta aawaw, enti ay oothiyako eronna gisho, neeni entaw atto yaaga” yaagis. Enti iya afilaa bolla saama yeggidi shaaketidi ekidosona.
LUK 23:35 Asay eqidi xeelloosona, shin deriya haareysati, “Harata ashshis; Xoossay doorida Kiristoosi iya gidiko ane bana asho” yaagidi leqsidosona.
LUK 23:36 Wotaaddareti iyako shiiqidi, caala woyne ushsha immidosona.
LUK 23:37 Yaatidi, “Neeni Ayhudeta kawo gidiko ne huuphiya ashsha” yaagidi leqsidosona.
LUK 23:38 Iyaw huuphe baggara, “Haysi Ayhudeta kawo” giya xuufey de7ees.
LUK 23:39 Kaqetida worandzotape issoy cashshe sa7ara goochishe, “Ane neeni Kiristoosa gidiko, nenaka nunaka ashsha” yaagis.
LUK 23:40 Shin hanko worandzoy, “Neeni haysa mela pirdan de7ashe hari attoshin, Xoossas yayyikii?
LUK 23:41 Nuuni nu oothida nagaraa gisho bessiya pirda ekoos, shin ha uray issi iitabaa oothibeenna” yaagidi hanqetis.
LUK 23:42 Qassika, “Yesuusa, ne ne kawotethaara yaa wode tana qopa” yaagis.
LUK 23:43 Yesuusi, “Ta new tuma odayis; hachi neeni taara gannaten gidana” yaagis.
LUK 23:44 He gallas usupun saatepe bidi uddufun saate gakanaw away poo7uwa diggida gisho, biitta ubbaa bolla dhuma gidis. Xoossa Keetha geshey daaketidi nam7an shaaketis.
LUK 23:46 Yesuusi, qaala dhoqu oothidi, “Ta aawaw, ta ta shempiw ne kushen sheedhayis” yaagidi hayqis.
LUK 23:47 Mato halaqay, hanidaysa be7idi, “Haysi uray tumaka xillo” yaagidi Xoossaa galatis.
LUK 23:48 Ha haniyaba be7anaw he bessaa shiiqida asa ubbay hanidaba be7ida wode banta tiraa iccishe banta soo simmidosona.
LUK 23:49 Gidoshin, Yesuusa matan eriya asa ubbay, hessadaka Galilape kaallidi yida maccasati hessa be7ishe haahon eqidosona.
LUK 23:50 Ayhude shangotape issoy, Yoosefa geetetiya uray de7ees. I Armaate geetetiya Yihuda katamaape yis. I lo77onne Xillo asi gidiya gisho Xoossaa kawotethaa yuussaa naagees. Shangotape issuwa gidishe enta zoretethaaninne oosuwan deenna.
LUK 23:52 He uray Philaxoosako bidi, Yesuusa aha mooganaw taw imma gidi woossis.
LUK 23:53 Philaxoosi eka yaagin, Yesuusa aha wodhisidi afilara xaaxis. Zaallafe woocidi kessida hara asi moogetonna ooratha duufon wothis.
LUK 23:54 Sambaati gelana haniya gisho, he gallasay giigetetha qamma.
LUK 23:55 Galilape dendidi Yesuusa kaallidi yida maccasati Yoosefara bidi iya aha waati moogiyako duufuwa akeekidi be7idosona.
LUK 23:56 Yaape simmidi shittonne qibaate giigisidosona. Higgey kiitteysa mela Sambaata gallas shempi pee7idosona.
LUK 24:1 Saamintafe koyro gallas, wogga wode wonta daro guura, maccasati banta giigisida shittuwa ekidi duufuwa bidosona.
LUK 24:2 Enti yaa gakiya wode duufuwa doonan de7iya shuchay gonderetidi kichoysa demmidosona.
LUK 24:3 Enti duufuwa gaathi gelidosona, shin Godaa Yesuusa aha demmibookona.
LUK 24:4 Enti yan eqidi aybi hanide gidi qopishin akeekona daro phooliya afila ma7ida nam7u asati enta matan eqidosona.
LUK 24:5 Maccasati yashetidi banta huuphiya sa7an ziqi oothidi de7ishin, asati entako, “De7on de7eysa hayqota giddon ayis koyeetii?
LUK 24:6 I haysan deenna; hayqope dendis, ‘Asa Na7ay nagaranchota kushen aadhidi imetana; entika iya kaqana. I heedzantho qamman hayqope dendana’ yaagidi, I hintera Galilan de7ishe hintew odida qaala qopite” yaagis.
LUK 24:8 Maccasati he wode iya qaala qopidosona.
LUK 24:9 Maccasati duufuwape simmidi hanidaba ubbaa tammanne issotasinne haratasika odidosona.
LUK 24:10 Hessa hawaaretas odiday Magdela Mayraamo, Yohaana, Yayqooba aayiw Mayraamonne entara de7iya hara maccasata.
LUK 24:11 Shin entaw maccasati odidaysi elmo daanin ammanibookona.
LUK 24:12 Shin Phexroosi dendi woxidi duufo bis. He bessaa gakidi, hokidi gaathi xeelliya wode moogo afilaa xalaala be7is. Hanidaban malaaletishe ba soo simmis.
LUK 24:13 He gallas kaalliya tamaaretape nam7ati Yerusalaamepe tammanne issi kilo mitire haakiya Emahoose guta boosona.
LUK 24:14 Enti wolla hanidaba ubbaa odetoosona.
LUK 24:15 Enti he hanotaba qopishenne odetishe biya wode Yesuusi ba huuphen shiiqidi entara bees.
LUK 24:16 Hanoshin, enti iya eronna mela enta ayfey oyketis.
LUK 24:17 I, “Hinte wolla oge bolla de7ishe odeteysi aybee?” yaagis. Enti azzanidi si77i gidi eqidosona.
LUK 24:18 Entafe issoy Qeliyoophe geeteteysi, “Ha qammata giddon Yerusalaamen hanidaba eronnaysi, ne biittas imatheyee?” yaagis.
LUK 24:19 I zaaridi, “I hanidaysi aybee?” yaagidi oychis. Enti, “Xoossaa sinthaninne asa sinthan oosoninne odan mino nabe gidida Naazirete Yesuusaba.
LUK 24:20 Iya kahine halaqatinne haareysati hayqo pirdas aathi immidi, kaqidosona.
LUK 24:21 Nuuni Isra7eele asaa wozande gidi ufaytidi naagidashin haysi hanin hachi heedzantho qamma.
LUK 24:22 Qassi nu giddofe issi issi maccasati nuna malaalsidosona. Enti hachi wonta guura duufuwa bidosona.
LUK 24:23 Iya aha dhayida wode simmi yidi, ‘I paxa de7ees’ giya kiitanchoti qoncin be7ida yaagidi odidosona.
LUK 24:24 Nu giddofeka issoti issoti duufuwa bidi maccasati odidaysatho hanin be7idosona, shin iya be7ibookona” yaagis.
LUK 24:25 I entako, “Hinteno, akeekona asato, hinte wozanay nabeti odidaba ubbaa ammananaw gam7eysato,
LUK 24:26 Kiristoosi ha metuwa ekanawunne ba bonchuwan gelanaw bessennee?” yaagis.
LUK 24:27 Musepenne nabeta ubbaafe dendidi Geeshsha Maxaafan iyabay xaafetidaysa ubbaa entaw qoncisis.
LUK 24:28 Enti biya gutaako matatida wode Yesuusi aadhidi haaho soo biya daanin,
LUK 24:29 Enti, “Sa7ay qammida gisho nuura aqa” yaagidi minthidi woossidosona. Hessa gisho, entara aqanaw gelis.
LUK 24:30 Entara issife gayta bolla uttidi, uythaa denthidi, menthidi, anjidi entaw immis.
LUK 24:31 He wode enti erana mela enta ayfey dooyetis. Entika eridosona. Shin I entafe geemmis.
LUK 24:32 Enti, “Nu ogiya bolla de7ishin I nuus Geeshsha Maxaafaa birshishininne nuna odisishin, nu wozanay xuugetibeennee?” yaagidosona.
LUK 24:33 He wode dendidi guye Yerusalaame yidosona. Tammanne issotinne harati issi bolla shiiqidi de7ishin demmidosona.
LUK 24:34 Enti, “Goday tuma dendis; Simoonas qoncis” yaagidosona.
LUK 24:35 He nam7u tamaareti Emmahuuse ogiya bolla de7ishin hanidaysanne uythaa menthida wode waati iya eridaako entaw odidosona.
LUK 24:36 Nam7u tamaareti hessa oda bolla de7ishin, Yesuusi enta giddon eqidi, “Saroy hintew gido” yaagis.
LUK 24:37 Gidoshin, enti dagammidi, moytille be7ida daanin yayyidosona.
LUK 24:38 I entako, “Ayis babidetii? Ayis sidhey hinte wozanan gelidee?
LUK 24:39 Ta kushiyanne ta tohuwa be7ite; taani tana. Qassi oykidi be7ite; tanan hinte be7eysada, moytilles ashoynne meqethi baawa” yaagis.
LUK 24:40 Yaagidi, ba tohuwanne ba kushiya enta bessis.
LUK 24:41 Enti ufaysafe dendoysan ammanonna malaaletethan de7ishin, Yesuusi entako, “Haysan hintew miyabay de7ii?” yaagis.
LUK 24:42 Enti issi caacetida molo iyaw immidosona.
LUK 24:43 I ekidi enta sinthan mis.
LUK 24:44 I, “Ta hintera gam7ida wode ubban Muse maxaafatan, nabeta maxaafataninne Mazmure maxaafatan, ta gisho xaafetidabay ubbay poletanaw bessees yaagada ta hintew odida qaalay haysa” yaagis.
LUK 24:45 He wode Geeshsha Maxaafata akeekana mela enta wozanaa dooyis.
LUK 24:46 Hessadaka, “Kiristoosi waaye ekana, heedzantho qamman hayqope dendana yaagidi xaafetis.
LUK 24:47 Yerusalaamepe dendidi asaa ubbaas nagaraape maarotethaynne atotethay iya sunthan markatana.
LUK 24:48 Hinte hessas markata.
LUK 24:49 Heko, taka ta aaway immida ufaysaa hintew yeddana. Hinte salope wolqa ma7ana gakanaw Yerusalaame kataman gam7ite” yaagis.
LUK 24:50 Hessafe guye, Bitaane katamaa entana ekidi bis. Ba kushiya denthidi anjis.
LUK 24:51 Entana anjishe entafe shaaketidi pude salo eketis.
LUK 24:52 Enti ziggi goyinnidi daro ufaysan Yerusalaame simmidosona.
LUK 24:53 Xoossaa ubbaa wode galatishe xoossa keethan gam7idosona.
JOH 1:1 Qaalay koyro de7ees. Qaalayka Xoossara de7ees; he Qaalay Xoossaa.
JOH 1:2 Koyrope Qaalay Xoossara de7ees.
JOH 1:3 Xoossay ubbaba Qaala baggara medhis. Medhetidabaape issoyka iya baggara medhetonabay baawa.
JOH 1:4 Iyan de7oy de7ees; he de7oy asaas poo7o.
JOH 1:5 Poo7oy dhuman poo7ees; dhumay poo7uwa xoonibeenna.
JOH 1:6 Xoossay kiitida, issi Yohaanisa geetetiya asi de7ees.
JOH 1:7 Asa ubbay poo7uwan ammanana mela I poo7os marka gididi yis.
JOH 1:8 I poo7uwabaa markatanaw yisipe attishin, ba huuphen poo7o gidenna.
JOH 1:9 Asa ubbaas poo7isiya tuma poo7oy alamiya yees.
JOH 1:10 Qaalay alamen de7is. Xoossay Qaalan alamiya medhis, shin alamey iya eribeenna.
JOH 1:11 I ba asaako yis, shin iya asay iya ekibookona.
JOH 1:12 Shin I bana ekidaysatasinne iya sunthan ammanidaysatas Xoossaa nayta gidana mela maata immis.
JOH 1:13 Enti Xoossafe yeletidosonape attishin, asi yeletiya wogan woyko adde shenen woyko asa amon yeletibookona. Xoossay I enta aawa.
JOH 1:14 Qaalay ase gidis; aadho keehatethaanne tumaa kumidi nu giddon de7is. I aawas issi na7aa gididi ekida iya bonchuwa nuuni be7ida.
JOH 1:15 Yohaanisi iyabaa markatis. Ba qaala dhoqu oothidi, “Taani, ‘Taape guyera yeysi taape kase de7iya gisho taape aadhees’ gada markatidaysi haysa” yaagis.
JOH 1:16 Nuuni ubbay iya aadho keehatetha kumethaafe anjo bolla anjo ekida.
JOH 1:17 Xoossay higgiya Muse baggara immis, shin aadho keehatethaynne tumatethay Yesuus Kiristoosa baggara yis.
JOH 1:18 Xoossaa be7ida asi oonika baawa; ba Aawa matan de7iya issi Na7aa xalaali baw Xoosse gididaysi iya qoncisis.
JOH 1:19 Yerusalaamen de7iya Ayhude halaqati, kahinetanne Leeweta, “Neeni oonee?” gidi, Yohaanisa oychana mela iyako kiittin, Yohaanisi entaw markatida markatethay haysa.
JOH 1:20 Yohaanisi, “Taani Kiristoosa gidike” yaagidi, geeshshidi markatisipe attishin, kaddibeenna.
JOH 1:21 Enti, “Yaatin, neeni oonee? Neeni Eeliyaaseyee?” yaagidi oychidosona. Yohaanisi, “Akay, gidike” yaagis. Qassi enti, “Neeni yaana geetetida nabiyayee?” yaagidi oychidosona. Yohaanisi, “Akay” gidi zaaris.
JOH 1:22 Yaatin, “Neeni oonee? Nuuni nuna kiitidaysatas odana mela neeni nena oona gay?” yaagidosona.
JOH 1:23 Yohaanisi zaaridi, “Nabiya Isayaasi gidaysada, “ ‘Godaa ogiya suurisite!’ gidi mela biittan waassiya uraa qaalay tana” yaagis.
JOH 1:24 Qassi Farsaaweti kiitida asati
JOH 1:25 Yohaanisako, “Neeni Kiristoosa woyko Eeliyaasa woyko nabe gidonna ixiko, yaatin ayis xammaqay?” gidi oychidosona.
JOH 1:26 Yohaanisi zaaridi, “Taani haathan xammaqayis, shin hinte eronna asi hinte giddon eqis.
JOH 1:27 I taape guyera yees. Taani hari attoshin iya caammaa wodoruwa billanaw bessike” yaagis.
JOH 1:28 Hessi ubbay Yordaanose Shaafape hefinthan, Bitaane kataman, Yohaanisi xammaqiya bessan hanis.
JOH 1:29 Yohaanisi wontetha gallas Yesuusi baako yishin be7idi, “Alamiya nagaraa quchiya Xoossaa Dorsay haysa!
JOH 1:30 Taani, ‘Taape guyera issi asi yaana. I taape kase de7iya gisho taape aadhees’ gada odidaysi haysa.
JOH 1:31 I ooneko taani erike. Shin Isra7eele asaas iya qoncisanaw haathan xammaqashe yas” yaagis.
JOH 1:32 Yohaanisi haysada yaagidi markatis: “Geeshsha Ayyaanay salope holleda wodhishininne iyara de7ishin be7as.
JOH 1:33 Hessi hananaape kase taani iya erike. Shin haathan xammaqanaw tana kiitida Xoossay, ‘Geeshsha Ayyaanay wodhidi iyara de7ishin neeni be7anaysinne Geeshsha Ayyaanan xammaqanaysi iya’ yaagidi taw odis.
JOH 1:34 Taani hessi hanishin be7ada, I Xoossaa Na7aa gididaysa markatayis” yaagis.
JOH 1:35 Qassi wontetha gallas Yohaanisi ba tamaaretape nam7atara issife eqis.
JOH 1:36 Yesuusi aadhishin, Yohaanisi be7idi, “Xoossaa dorsay haysish!” yaagis.
JOH 1:37 Yohaanisa nam7u tamaareti Yohaanisi geysa si7idi Yesuusa kaallidosona.
JOH 1:38 Yesuusi bana kaalleyisata guye simmi be7idi, “Ay koyeetii?” yaagidi oychis. Enti zaaridi, “Astamaariyaw, neeni awun de7ay?” yaagidosona.
JOH 1:39 Yesuusi entako, “Haa yidi be7ite” yaagis. Enti bidi I de7iyasuwa be7idosona. He gallas sa7i tammu saate heera gidiya gisho iya matan pee7idosona.
JOH 1:40 Yohaanisi gidaysa si7idi, Yesuusa kaallida nam7u tamaaretape issoy, Simoon Phexroosa ishaa Indiriyasa.
JOH 1:41 Indiriyasi koyro ba ishaa Simoonara gahetidi, “Nuuni Kiristoosa demmida” yaagis.
JOH 1:42 Indiriyasi Simoona Yesuusako ehis. Yesuusi Simoona be7idi, “Neeni Yoona na7aa Simoona; ne sunthay Keefa gidi xeegetana” yaagis.
JOH 1:43 Wontetha gallas Yesuusi Galila biitta baanaw qofa qachis. I Filphoosara gahetidi, “Tana kaalla!” yaagis.
JOH 1:44 Filphoosi, Indiriyasinne Phexroosi de7ida Beetesayda katamaape yida ase.
JOH 1:45 Filphoosi Natina7eelara gahetidi, “Musey higge maxaafan, qassi nabetika iyabaa xaafida Yoosefa na7aa Naazirete Yesuusa nuuni demmida” yaagis.
JOH 1:46 Natina7eeli zaaridi, “Naazirete katamaape lo77obay keyanaw danda7ii?” yaagis. Filphoosi, “Yada be7a” yaagis.
JOH 1:47 Natina7eeli baako yeysa Yesuusi be7idi, “Geney bayna tuma Isra7eele asi haysa!” yaagis.
JOH 1:48 Natina7eeli Yesuusako, “Neeni tana awun eray?” yaagis. Yesuusi zaaridi, “Filphoosi nena xeeganaape sinthe, neeni balase mithaa garsan de7ishin taani nena be7as” yaagis.
JOH 1:49 Natina7eeli zaaridi, “Astamaariyaw, neeni Xoossaa Na7aa! Neeni Isra7eele kawo!” yaagis.
JOH 1:50 Yesuusi iyako, “Taani nena balase mithee garsan be7as gida gisho ammanay? Neeni haysafe aadhiyaba be7ana!” yaagis.
JOH 1:51 Qassi Yesuusi, “Taani hintew tuma odayis; saloy dooyetin, Xoossaa kiitanchoti Asa Na7aa bolla keyishininne wodhishin hinte be7ana” yaagis.
JOH 2:1 Heedzantho gallas Galila biittan Qaana kataman yaaganoy yaaganetis. Yesuusa aayiya he yaaganuwan de7awusu.
JOH 2:2 Yesuusika ba tamaaretara issife he yaaganuwa xeegetis.
JOH 2:3 Woyne ushshay wurin, Yesuusa aayiya Yesuusako, “Entaw woyne ushshay wuris” yaagasu.
JOH 2:4 Yesuusi zaaridi, “Ta aaye, ne haysan gelopa? Ta wodey buroo gakibeenna” yaagis.
JOH 2:5 Yesuusa aayiya oosanchotako, “I hintew odiyaba aybiba gidikoka oothite” yaagasu.
JOH 2:6 Ayhudeti banta geeshsho wogaas go7etiya usupun shucha baathati he bessan de7oosona. Issi issi baathay nam7u woyko heedzu xugga oykees.
JOH 2:7 Yesuusi oosanchotako, “Baathatan haathe kunthite” yaagis. Enti baathatas doona gakanaw haathe kunthidosona.
JOH 2:8 Yesuusi entako, “Ha77i duuqidi yaaganuwa aawatethan poliseysas immite” yaagis. Enti iyaw efidi immidosona.
JOH 2:9 Yaaganuwa aawatethan poliseysi woyne ushshi laametida haatha ganxi ekidi awupe yidaako eribeenna, shin haatha kunthida oosanchoti eroosona. Yaaganuwa aawatethan poliseysi machiw ekeysa xeegidi,
JOH 2:10 “Oonika lo77o woyne ushsha asaa koyrottidi ushshees. Yaatidi asay uyi kallidaape guye, qiraariya immees. Shin neeni lo77o woyne ushsha hanno gakanaw wotha aggadasa” yaagis.
JOH 2:11 Yesuusi ha koyro malaata Galila biittan Qaana kataman oothis; hessan ba gitatetha bessis. Iya tamaareti iya ammanidosona.
JOH 2:12 Hessafe guye, Yesuusi ba aayera, ba ishataranne ba tamaaretara issife Qifirnahooma katamaa bidi guutha gallas gam7is.
JOH 2:13 Ayhudeti bonchiya Paasika Ba7aale gallasay matatin Yesuusi Yerusalaame bis.
JOH 2:14 Bidi xoossa keethan boorata, miizata, dorsatanne holleta bayzeysatanne banta oydiyan uttidi miishe laammeyisata demmis.
JOH 2:15 I xurqafe dooqidi asaa ubbaa enta mehetara Xoossa Keethafe gooddidi kare kessis. Miishe laammeyisata xarpheezataka aathi yeggidi enta miishiya laallis.
JOH 2:16 Holle bayzeyisata, “Ha holleta haysafe kessite; ta Aawa keetha giya oothopite” yaagis.
JOH 2:17 Iya tamaareti Geeshsha Maxaafan, “Taani ne keethas mishetiya mishay tana tamada xuuggees” geetetidi xaafetidaysa akeekidosona.
JOH 2:18 Hessafe guye, Ayhudeti zaaridi, “Ne haysa oothanaw new maati de7eysas nuna ay malaata oothada bessanee?” yaagidosona.
JOH 2:19 Yesuusi, “Ha Xoossa Keetha laallite; taani heedzu gallasan zaarada keexana” yaagis.
JOH 2:20 Qassika Ayhudeti, “Ha Xoossa Keetha keexanaw oytamanne usupun laythi ekis, shin neeni heedzu gallasan keexanee?” yaagidosona.
JOH 2:21 Shin Yesuusi odiya Xoossa Keethay ba asatethaba.
JOH 2:22 Hessa gisho, Yesuusi hayqope dendidaape guye iya tamaareti I hessa gidaysa akeekidosona. Qassi enti Geeshsha maxaafan xaafetidaysanne Yesuusi odidaysa ammanidosona.
JOH 2:23 Yesuusi Paasika bonchiya bessan Yerusalaamen de7ishin, I oothida malaatata be7idi daro asay iya ammanidosona.
JOH 2:24 Shin Yesuusi asaa ubbaa eriya gisho enta ammanibena.
JOH 2:25 Asa wozanan de7iyaba I ba huuphen eriya gisho asaba oonika iyaw odana mela koshshibeenna.
JOH 3:1 Farsaaweta yaraape gidida, Ayhudeta halaqay, Niqodimoosa geetetiya issi addey de7ees.
JOH 3:2 Niqodimoosi qamma Yesuusako yidi, “Astamaariyaw, neeni Xoossay kiitida astamaare gideysa nuuni eroos. Ayis giiko, Xoossay iyara doonna ixiko ha neeni oothiya malaata oothanaw danda7iya asi baawa” yaagis.
JOH 3:3 Yesuusi zaaridi, “Taani new tuma odayis; oonika zaari yeletonna ixiko Xoossaa kawotethaa be7anaw danda7enna” yaagis.
JOH 3:4 Niqodimoosi, “Ceega asi waanidi zaari yeletanaw danda7ii? Ba aaye ulo simmi gelidi zaari yeletanaw danda7ii?” yaagis.
JOH 3:5 Yesuusi zaaridi, “Taani new tuma odayis; oonika haathafenne Geeshsha Ayyaanape yeletonna ixiko, Xoossaa kawotethaa gelanaw danda7enna.
JOH 3:6 Asho na7atethi aawupenne aayipe yees; Xoossaa na7atethi Geeshsha Ayyaanape imetees.
JOH 3:7 Taani, ‘Hinte zaari yeletanaw bessees’ gada hintew odida gisho neeni malaaletofa.
JOH 3:8 Carkoy ba koyida bessi carkees. Neeni iya kooshincha si7asape attishin, I awupe yaako woyko aw biyako eraka. Ayyaanape yeletida ubbay hessa mela” yaagis.
JOH 3:9 Yaatin Niqodimoosi, “Hessi waanidi hananaw danda7ii?” yaagidi oychis.
JOH 3:10 Yesuusi zaaridi, “Neeni Isra7eeleta astamaare gidashe haysa erikii?
JOH 3:11 Taani new tuma odayis; nu eriyaba odoosinne be7idaba markatoos, shin nu markatethaa hinte ekeketa.
JOH 3:12 Taani hintew sa7aba odin hinte ammanonnaba gidiko saloba odin waatidi ammananee?
JOH 3:13 Salope wodhida Asa Na7aape attishin, salo keyday oonika baawa; [salon de7iya Asa Na7ay tana”] yaagis.
JOH 3:14 Musey mela biittan Naase birata shooshi kaqidaysada tana ammanida ubbay merinaa de7uwa ekana mela Asa Na7ay dhoqu gaanaw bessees.
JOH 3:16 Xoossaa Na7aa ammaniya ubbay merinaa de7uwa laattanaape attishin, dhayonna mela Xoossay ha alamiya daro dosida gisho ba issi Na7aa immis.
JOH 3:17 Xoossay ba Na7aa ha alamiya kiittiday alamiya pirdanaw gidonashin alamiya iya baggara ashshanaasa.
JOH 3:18 Na7aa ammaniya oonika pirdetenna, shin Na7aa ammanonna oonika issi Xoossaa Na7aa ammanibona gisho ha77i pirdetis.
JOH 3:19 Pirdayka haysa: poo7oy alamiya yis, shin asaa oosoy iita gidiya gisho asay poo7uwape aathidi dhumaa dosees.
JOH 3:20 Iitabaa oothiya oonika poo7o ixees. Ayis giiko, ba oosoy qonconna mela poo7uwako yeenna.
JOH 3:21 Shin tuma oothiya oonika Xoossay kiitidaysada I oothidaysa poo7oy qoncisana mela poo7uwako yees.
JOH 3:22 Hessafe guye, Yesuusinne iya tamaareti Yihuda biitta bidosona. Yesuusi yan xammaqishe entara guutha wode uttis.
JOH 3:23 Qassi Yohaanisi Saleema matan de7iya Henoona giya bessan gidiya haathi de7iya gisho asaa yan xammaqees. Asayka yaa bidi xammaqetosona.
JOH 3:24 He wode Yohaanisi buroo qashetibeenna.
JOH 3:25 Hessafe guye, Yohaanisa tamaaretinne issi Ayhude addey geeshsho wogabaa palamidosona.
JOH 3:26 Enti Yohaanisako bidi, “Astamaariyaw, Yordaanose Shaafape hefinthan neera de7eysi, neeni iyabaa markatidaysi, Heko xammaqees. Asa ubbayka iyako boosona” yaagidosona.
JOH 3:27 Yohaanisi zaaridi, “Xoossay immonna asi aybibaaka ekanaw danda7enna.
JOH 3:28 ‘Taani Kiristoosa gidike, shin iyape sinthe kiitetas’ gidaysas taw hinte, hinte huuphen marka.
JOH 3:29 Gelos giigidaara ekenaw giigidaysasa. Ekeysa laggey iya matan eqidi I geysa si7iya wode daro ufaytees. Hessa gisho, haysi ta ufaysay poletis.
JOH 3:30 I gitatanaw taani guuxanaw bessees” yaagis.
JOH 3:31 Bollafe yeysi ubbaafe bolla. Sa7ape bentidaysi sa7aba. I sa7aba odees. Salope yeysi ubbaafe bolla.
JOH 3:32 I ba be7idabaanne si7idaba markatees, shin iya markatethaa ekey baawa.
JOH 3:33 Iya markatethaa ekiya oonika Xoossay tuma gideysa qoncisees.
JOH 3:34 Xoossay ba geeshsha Ayyaana iyaw kumethi immiya gisho Xoossay kiittidaysi Xoossaa qaala odees.
JOH 3:35 Aaway ba Na7aa dosidi ubbaba iya kushen wothis.
JOH 3:36 Na7aa ammaniya uraas merinaa de7oy de7ees. Shin Na7aa ammanonaysa bolla Xoossaa hanqoy de7eesipe attishin, I de7o demmenna.
JOH 4:1 Yesuusi Yohaanisape daro kaalliya asaa baako shiisheysanne xammaqeysa Farsaaweti si7idosona.
JOH 4:2 Gidikoka Yesuusa tamaareti xammaqidosonape attishin, Yesuusi oonaka xammaqibeenna.
JOH 4:3 Yesuusi asay iyabaa geysa si7ida wode Yihudape dendidi Galila bis.
JOH 4:4 I, Galila bishe Samaarera aadhanaysi attonnaba gidis.
JOH 4:5 Hessa gisho, Yayqoobi ba na7aa Yoosefas immida gadiya matan de7iya Sikaare geetetiya Samaare katamaa bis.
JOH 4:6 He bessan Yayqooba haatha ollay de7ees. Yesuusi hemethan daaburidi he haatha olla matan uttis. He wode sa7i usupun saate heera.
JOH 4:7 Issi Samaare katamaa maccas he ollaafe haathe tikanaw yasu. Yesuusi he maccaseeko, “Tana haathe ushsharki” yaagis.
JOH 4:8 He wode Yesuusa tamaareti kathi shammanaw katama bidosonashin.
JOH 4:9 He maccasiya zaarada, “Neeni Ayhude ase gidashe, Samaare maccas gidiya tana waanada haathe ushsha gay?” yaagasu. Hessa iya giday Ayhudeti Samaaretara gahetonna gishosa.
JOH 4:10 Yesuusi zaaridi, “Neeni Xoossa imotanne haathe tana ushsha geysi ooneko eridaba gidiyako iya ne woossana; ika new de7o immiya haathi immanashin” yaagis.
JOH 4:11 Maccasiya zaarada, “Godaw, new duuqiyabay baawa; ollayka ziqa. Yaatin, de7o immiya haathi ne awupe ekanee?
JOH 4:12 Nuus ha haatha olla immida nu aawa Yayqoobape neeni aadhay? I, iya naytinne iya mehey ha ollaafe uyidosona” yaagasu.
JOH 4:13 Yesuusi, “Ha haathaafe uyida oonika zaari saamotana.
JOH 4:14 Shin taani immana haatha uyaa oonika ubbaka saamotenna. Taani immiya haathay iya giddon merinaa de7o immiya goggiya pulto gidana” yaagis.
JOH 4:15 Maccasiya zaarada, “Godaw, taani saamotonna melanne haathe tikanaw ha bessaa yoonna mela taw he haatha imma” yaagasu.
JOH 4:16 Yesuusi iiko, “Bada ne azinaa xeegada ya” yaagis.
JOH 4:17 Maccasiya zaarada, “Taw azini baawa” yaagasu. Yesuusi iiko, “Taw azini baawa gashe balabaka.
JOH 4:18 New kase ichashu azinati de7oosona. Ha77i neera de7iya addey ne azina gidenna. Neeni ha77i tuma odadasa” yaagis.
JOH 4:19 Maccasiya zaarada, “Godaw, neeni nabe gideysa taani eras.
JOH 4:20 Nu aawati ha zumaa bolla Xoossaa goyinnidosona. Shin hinte Ayhudeti asi Xoossas goyinnanaw bessiya bessay Yerusalaamena geeta” yaagasu.
JOH 4:21 Yesuusi, “Ha maccasete tana ammana; ha zumaa bolla woyko Yerusalaamen Aawas hinte goyinnona wodey yaana.
JOH 4:22 Hinte Samaareti eronnaysa goyinneta. Shin nuuni atotethay Ayhudepe yaa gisho nu ereysa goyinnoos.
JOH 4:23 Shin Aawas tuman goyinneysati Ayyaananinne tumatethan goyinnana wodey matatis; ha77ika gakis. Hiza, Aaway koyey haysa mela ogiyan goyinneyisata.
JOH 4:24 Xoossay Ayyaana; iyaw goyinneysati Ayyaananinne tumatethan goyinnanaw bessees” yaagis.
JOH 4:25 Maccasiya zaarada, “Kiristoosi yaanaysa taani erayis. I yaa wode nuus ubbaba odana” yaagasu.
JOH 4:26 Yesuusi, “Ha neera odetey taani iya” yaagis.
JOH 4:27 Enti odetishin, Yesuusa tamaareti bida bessaafe simmidosona. Yesuusi maccasara odetishin enti be7idi daro malaaletidosona. Shin maccaseeko, “Ay koyay?” Woyko Yesuusako, “Iira ayis odetay?” giday oonika baawa.
JOH 4:28 Hessafe guye, maccasiya ba haatha otuwa aggada guye katamaa bada asaako,
JOH 4:29 “Taani oothidaba ubbaa taw odida addiya be7anaw yedhite. I Kiristoosa gidandesha?” yaagasu.
JOH 4:30 Asay katamaape keyidi Yesuusako bidosona.
JOH 4:31 Hessi hanishin, iya tamaareti Yesuusako, “Guuthaba marki” yaagidi woossidosona.
JOH 4:32 Shin I, “Taw hinte eronna kathi ta meysi de7ees” yaagis.
JOH 4:33 Hessa gisho, iya tamaareti banta giddon, “Iyaw miyaba asi ehonna aggenna” yaagidosona.
JOH 4:34 Yesuusi entako, “Ta kathay tana kiittidaysa sheniya oothanaysanne iya oosuwa polanaysa.
JOH 4:35 Hinte, ‘Oyddu ageenape guye kathay caketana’ geeketiyee? Shin taani hintew odayis; kathay kaxidi shiishoos gakidaysa loythi xeellite.
JOH 4:36 Zereysinne cakeysi issife ufaytana mela cakeysi damooziya ekees qassi kathaa merinaa de7os shiishees.
JOH 4:37 Hiza, ‘Issoy zerees; hankoy qassi cakees’ giya oday tuma.
JOH 4:38 Hinte daaburiboonaysa shiishana mela taani hintena kiittas. Harati oothi daaburidasuwan gelidi hinte enta daabura ayfiya ekideta” yaagis.
JOH 4:39 Maccasiya, “I, taani oothida ubbaba odis” gada markatida gisho he kataman de7iya Samaare asaape daroti Yesuusa ammanidosona.
JOH 4:40 Samaare asay Yesuusako yidi, banta matan gam7ana mela Yesuusa woossin I yan nam7u gallas uttis.
JOH 4:41 I odiya qaala gisho kaseysafe daro asay ammanidosona.
JOH 4:42 Qassi enti maccaseeko, “Ha77i nu ammaney nu huuphen I geysa si7ida gishosafe attishin, neeni markatida gishosa gidenna. Qassi I tuma ha alamiya ashsheysa gideysa nuuni erida” yaagidosona.
JOH 4:43 Nam7u gallasape guye, Yesuusi yaape keyidi Galila biitta bis.
JOH 4:44 Yesuusi ba huuphen, “Nabey ba biittan bonchetenna” yaagidi kasetidi odis.
JOH 4:45 Yesuusi Galila gakida wode Galila asay iya mokidosona. Ayis giiko, Paasika Ba7aale bonchiya gallas enti Yerusalaamen de7iya gisho I oothidaba ubbaa be7idosona.
JOH 4:46 Yesuusi haatha woyne ushshi laammida bessaa, Galilan de7iya Qaana katama bis. Qifirnahooman kawo keethan oothiya issi shuumas na7ay hargetis.
JOH 4:47 Yesuusi Yihudape Galila yidaysa he shuumay si7idi iyako yis. Hayqanaw matida ba na7aa bidi pathana mela Yesuusa woossis.
JOH 4:48 Yesuusi shuumako, “Xoossay oothiya malaatatanne oorathabata be7onna de7ishe hinte ubbaraka ammaneketa” yaagis.
JOH 4:49 Shuumay zaaridi, “Godaw, ta na7ay hayqonna de7ishin taara yedharki” yaagis.
JOH 4:50 Yesuusi, “Ne soo ba; ne na7ay paxana” yaagis. He shuumay Yesuusi gidaysa ammanidi ba soo bis.
JOH 4:51 I ba soo bishin iya aylleti iyako yishe iyara ogen gahetidi, “Ne na7ay paxis” gidoosona.
JOH 4:52 I ba aylleta ba na7aas ay saaten lo77idaako oychis. Enti zaaridi, “Zine laapun saaten mishay aggis” yaagidosona.
JOH 4:53 Na7aa aaway Yesuusi baako, “Ne na7ay paxana” giday he saatiyan gideysa akeekis. Hessa gisho, inne iya soo asa ubbay ammanidosona.
JOH 4:54 Hessi Yesuusi Yihudape Galila yidi oothida nam7antho malaata.
JOH 5:1 Hessafe guye, Yesuusi Ayhudeti bonchiya baaliya bonchanaw Yerusalaame bis.
JOH 5:2 Yerusalaamen Dorsa Pengiya matan Ibraawetho doonan Beetesayda giya teqetida haathi de7ees. He teqeti uttida haatha matan ichashu shempiya bessati de7oosona.
JOH 5:3 [Hessan haathay qaaxanaysa naagiya] daro harganchoti, qooqeti, wobbetinne gundati zin7idosona.
JOH 5:4 [Ayis giiko, issi issi toho Godaa kiitanchoy teqetida haathan wodhidi haatha qaathees. Haathay qaaxiya wode koyro gelida uray bana oykida ay hargefeka paxees.]
JOH 5:5 He bessan hastamanne hospun laythi hargetida issi addey de7ees.
JOH 5:6 Yesuusi yan zin7ida addiya be7idi, qassi daro wode hargetidaysa eridi addiyako, “Paxanaw koyay?” yaagis.
JOH 5:7 Harganchoy zaaridi, “Godaw, haathay qaaxiya wode tana haathan yeggiya asi baawa. Taani gelana haniya wode haray taape sinthatidi geli kichees” yaagis.
JOH 5:8 Yesuusi iyako, “Denda eqa; ne algaa tookada ba” yaagis.
JOH 5:9 Addey iiraka paxis; ba algaa tookidi bis. Hessi Sambaata gallasan hanis.
JOH 5:10 Hessa gisho, Ayhudeti paxida addiyako, “Hachi sa7i Sambaata; neeni ne algaa tookeysi woga gidenna” yaagidosona.
JOH 5:11 Shin addey, “Tana pathidaysi, ne algaa tookada ba gis” yaagidi zaaris.
JOH 5:12 Enti iyako, “Nena, ne algaa tookada ba giday I oonee?” yaagidi oychidosona.
JOH 5:13 Shin Yesuusi he bessan daro asaa giddora erisonna kanthidi bida gisho addey bana pathiday ooneko erenna.
JOH 5:14 Yesuusi guyepe he addiya xoossa keethan demmidi, “Heko, neeni paxadasa; haysafe iitabay nena gakonna mela zaarada nagara oothofa” yaagis.
JOH 5:15 Hessafe guye, addey bidi bana pathidaysi Yesuusa gididaysa Ayhudetas odis.
JOH 5:16 Yesuusi hessa Sambaata gallas oothida gisho, Ayhudeti Yesuusa goodda oykidosona.
JOH 5:17 Yesuusi zaaridi, “Ta Aaway ubba wode oothees; taka oothanaw bessees” yaagis.
JOH 5:18 Yesuusi Sambaata bonchona gisho xalaalas gidonashin Xoossay ba Aawa gidi bana Xoossara giigisida gisho, Ayhudeti iya wodhanaw kasepe minthidi koydosona.
JOH 5:19 Yesuusi zaaridi, “Taani hintew tuma odayis; Na7ay barka aykoka oothanaw danda7enna. I ba Aaway oothishin be7oysa xalaala oothees. Aaway ootheysa Na7ayka oothees.
JOH 5:20 Aaway ba Na7aa dosiya gisho I oothiya ooso ubbaa ba Na7aa bessees. Hinte malaaletana mela I haysafe aadhiya ooso ba Na7aa bessaana.
JOH 5:21 Aaway hayqidaysata hayqope denthidi entaw de7o immeysada Na7ayka ba koyeysatas de7o immees.
JOH 5:22 Aaway Na7aas pirda maata ubbaa immispe attishin, I oonaka pirdenna.
JOH 5:23 Asa ubbay Aawa boncheysada Na7aaka bonchana. Na7aa bonchona oonika Na7aa kiitida Aawaka bonchenna.
JOH 5:24 “Taani hintew tuma odayis; ta qaala si7eysasinne tana kiittidaysa ammaneysas merinaa de7oy de7ees. I hayqope de7on pinnida gisho pirdetenna.
JOH 5:25 Taani hintew tuma odayis; hayqida asay Xoossaa Na7aa qaala si7iya wodey yaana; hessika ha77i. He qaala si7ey de7on daana.
JOH 5:26 Aaway de7os pulto gididaysada Na7aaka de7os pulto oothis.
JOH 5:27 Na7ay Asa Na7a gidiya gisho Aaway Na7aas pirda maata immis.
JOH 5:28 “Duufon de7eysati iya qaala si7idi dendiya wodey yaana gisho haysan malaaletofite.
JOH 5:29 Lo77o oothidaysati de7on daanaw qassi iita oothidaysati pirda ekanaw duufope dendana.
JOH 5:30 “Taani ta maatan aybibaaka oothanaw danda7ike. Xoossay taw odidaysada pirdayis. Taani tana kiittidaysi koyaba oothaysipe attishin, ta koyaba oothonna gisho ta pirday tuma.
JOH 5:31 “Taani tabaa markatiko ta markatethay tuma gidenna.
JOH 5:32 Tabaa markatiya hari de7ees; I tabaa markateysi tuma gideysa taani erayis.
JOH 5:33 “Hinte Yohaanisako ase kiittin I tumaas markatis.
JOH 5:34 Taani hessa hintew odey, hinte attana mela gadape attishin, asa markatethi taw koshshin gidenna.
JOH 5:35 Yohaanisi muqaadada eexishe poo7is. Hinte guutha wode iya poo7uwan ufaytideta.
JOH 5:36 “Shin taw Yohaanisape aadhiya marki de7ees. Taani oothana mela ta Aaway taw immida oosoti tabaa markatoosona; Aaway tana kiittidaysa qoncisosona.
JOH 5:37 “Qassi tana kiitida Aawayka ba huuphen tabaa markatees. Hinte iya qaala ubbaraka si7ibeeketa woyko iya malaa be7ibeeketa.
JOH 5:38 I kiittidaysa hinte ammanonna gisho iya qaalay hinte wozanan baawa.
JOH 5:39 “Geeshsha Maxaafatape merinaa de7o demmanabaa hintew daanin enta pilgeeta; enti tabaa markatoosona.
JOH 5:40 Shin hinte de7o demmanaw taako yaanaw koyeketa.
JOH 5:41 “Asape taani boncho koyke.
JOH 5:42 Shin taani hinte wozanan Xoossaa siiqoy baynaysa erayis.
JOH 5:43 Taani ta Aawa maatan yas, shin tana mokibeketa. Haray ba maatan yaa wode iya mokeeta.
JOH 5:44 Hinte issoy issuwafe boncho koyeysati, issi Xoossaafe yaa galata ekanaw koyonnaysati, waanidi tana ammananaw danda7eetii?
JOH 5:45 “Taani ta Aawa sinthan hintena mootiyaba hintew daanopo. Hintena mootanay hinte ufaysan naagiya Muse.
JOH 5:46 Hinte Muse ammanidaba gidiyako I tabaa xaafida gisho tanaka ammananashin.
JOH 5:47 Shin hinte I xaafidaysa ammanonna ixiko ta qaala waatidi ammananee?” yaagis.
JOH 6:1 Hessafe guye, Yesuusi Xibradoosa geetetiya Galila Abbaafe hefinthi pinnis.
JOH 6:2 I harganchota pason oothida malaata be7ida gisho, daro asay iya kaallidosona.
JOH 6:3 Yesuusi zumaa bolla keyidi, yan ba tamaaretara issife uttis.
JOH 6:4 Ayhudeti bonchiya Paasika Ba7aale gallasay gakis.
JOH 6:5 Yesuusi daro asay baako yeysa be7idi Filphoosako, “Ha asaa ubbaa muzanaw gidiya kathi awupe shammanee?” yaagis.
JOH 6:6 I hessa Filphoosa paacanaw gisipe attishin, I ba huuphen ay oothaneko erees.
JOH 6:7 Filphoosi zaaridi Yesuusako, “Hari attoshin, Huuphen huuphen, issi issi barsi gathanaw, nam7u xeetu dinaaren uythu shamminka gidenna” yaagis.
JOH 6:8 Qassi Yesuusa tamaaretape issoy, Simoon Phexroosa ishay Indiriyasi,
JOH 6:9 “Ichashu banga uythinne nam7u molo oykida issi na7ay haysan de7ees, shin ha asa ubbaas hessi ay maaddanee?” yaagis.
JOH 6:10 Yesuusi ba tamaaretako, “Asaa utisite” yaagis. He bessan daro maati de7ees; asa ubbay uttis. Adde asaa tayboy ichashu mukulu gidana.
JOH 6:11 Yesuusi uythaa ekidi Xoossaa galati simmidi yan uttida asaas gishis. Moluwaka ekidi hessada oothidi immin, asay ba koydaysa mela mis.
JOH 6:12 Enti ubbay kallidaape guye, Yesuusi ba tamaaretako, “Issibayka iitonna mela attida tiifiya shiishite” yaagis.
JOH 6:13 Hessa gisho, enti ubbaa shiishidosona. Asay min attida banga uytha tiifiya shiishidi tammanne nam7u gayta kunthidosona.
JOH 6:14 Asay Yesuusi oothida malaatata be7ida wode, “Haysi tuma ha alamiya yaana geetetida nabiya” yaagidosona.
JOH 6:15 Yesuusi enti iya oykidi wolqan kawo oothanaw haneysa eridi, barka zumaa bolla zaaridi keyis.
JOH 6:16 Sa7ay omarsida wode Yesuusa tamaareti abbaako wodhidosona.
JOH 6:17 Sa7ay qammida gishonne Yesuusi buroo entako yiboona gisho iya tamaareti wogolon gelidi abba pinnidi Qifirnahooma baanaw dendidosona.
JOH 6:18 Wolqaama carkoy carkida gisho abbay qaaxees.
JOH 6:19 Ichashu woyko usupun kilo mitire gideysa mela enti abba pidhidi bidaape guye, Yesuusi abba bollara hemetishe yeysa be7idi yayyidosona.
JOH 6:20 Shin I, “Babofite, tana” yaagis.
JOH 6:21 Enti ufaytidi iya wogoluwan gelsidosona; iiraka wogoloy enti biya abba gaxa gakis.
JOH 6:22 Wontetha gallas abbaafe hefinthan attida daro asay issi wogolo xalaali de7eysa be7idosona. Yesuusi ba tamaaretara wogoluwan gelidi, entara boonnaysanne enti bantarka bidaysa akeekidosona.
JOH 6:23 Shin Xibradoosape hara wogoloti Yesuusi Xoossaa galatin, asay uythaa mida bessaa yidosona.
JOH 6:24 Asay Yesuusi woyko iya tamaareti yan baynaysa be7idi, Yesuusa koyanaw wogolotan gelidi Qifirnahooma bidosona.
JOH 6:25 Asay Yesuusa abbaafe hefinthan demmida wode, “Astamaariyaw, haa awude yadii?” yaagis.
JOH 6:26 Yesuusi zaaridi, “Taani hintew tuma odayis; hinte tana koyey uythi midi kallida gishosafe attishin, malaata be7ida gishosa gidenna.
JOH 6:27 Samiya kathas oothopite, shin merinaa de7o immiya kathas oothite. Xoossaa Aaway I oothana mela iyaw maata immida gisho he katha Asa Na7ay hintew immana” yaagis.
JOH 6:28 Yaatin enti, “Nuuni Xoossaa oosuwa oothanaw ay oothanee?” yaagidi Yesuusa oychidosona.
JOH 6:29 Yesuusi zaaridi, “Hinte oothana mela Xoossay koyiya oosoy haysa: I kiittidaysa ammanite” yaagis.
JOH 6:30 Enti zaaridi, “Nuuni be7idi, nena ammanana mela ay malaata ne bessanee? Ne ay oothanee?
JOH 6:31 Geeshsha Maxaafan, ‘Enti maana mela uythu salope immis’ geetetidi xaafetidaysada nu aawati mela biittan manna midosona” yaagidosona.
JOH 6:32 Yesuusi, “Taani hintew tuma odayis; hintew salope tuma uythaa immiday ta Aawape attishin, Muse gidenna.
JOH 6:33 Hiza, Xoossay immiya uythay salope wodhidaysi alamiyas de7o immeysa” yaagis.
JOH 6:34 Enti zaaridi, “Godaw, nuus he uythaa ubba wode imma” yaagidosona.
JOH 6:35 Yesuusi, “Taani de7o immiya uythaa; taako yaa oonika ubbaraka koshatenna. Qassi tana ammaniya uray ubbaraka saamotenna.
JOH 6:36 Shin taani hintew odas; hinte tana be7ideta, shin ammaneketa.
JOH 6:37 Ta Aaway taw immiya ubbay taako yaana; qassi taako yaa oonaka kare yeddike.
JOH 6:38 Taani ta koyaba oothanaw gidonashin tana kiittidaysi koyaba oothanaw salope yas.
JOH 6:39 Tana kiittidaysi koyey haysa: taani I taw immida ubbataka wursetha gallas hayqope denthana melape attishin, issuwaka dhaysana mela koyenna.
JOH 6:40 Hiza, ta Aaway koyey hessa: Na7aa be7idi ammaniya ubbay merinaa de7uwa ekana; taani he ubbaa wursetha gallas merinaa de7os hayqope denthana” yaagis.
JOH 6:41 Yesuusi, “Taani salope wodhida uythaa” gida gisho, Ayhudeti iya bolla zuuzumidosona.
JOH 6:42 Enti, “Haysi nuuni iya aawanne iya aayiw eriya Yoosefa Na7aa Yesuusa gidennee? Yaatin, I waanidi, ‘Taani salope wodhas’ gaanaw danda7ii?” yaagidosona.
JOH 6:43 Yesuusi zaaridi, “Issoy issuwara zuuzuntha aggite.
JOH 6:44 Tana kiitida ta Aaway taako ehiya asape attishin, taako yaanaw danda7iya oonika baawa. Taani wursetha gallas iya merinaa de7os hayqope denthana.
JOH 6:45 Nabeti, ‘Xoossay asa ubbaa tamaarsana’ yaagidi xaafidosona. Aawa si7eysinne iyape tamaariya oonika taako yees.
JOH 6:46 Xoossaa matape yidaysafe attishin, Aawa be7iday oonika baawa; iya xalaali Aawa be7is.
JOH 6:47 “Taani hintew tuma odayis; tana ammaniya oodeska merinaa de7oy de7ees.
JOH 6:48 Taani de7o immiya uythaa.
JOH 6:49 Hinte aawati mela biittan manna midosona, shin hayqidosona.
JOH 6:50 Salope yaa uythay haysa; he uythaa miya oonika hayqenna.
JOH 6:51 Salope yida de7o uythay tana. Oonika ha uythaa miiko merinaw daana. Qassi ha alamey de7on daana mela taani hintew immana uythay ta ashuwa” yaagis.
JOH 6:52 Ayhudeti, “Ha addey ba ashuwa nu maana mela nuus waatidi immanaw danda7ii?” yaagidi banta giddon palamidosona.
JOH 6:53 Hessa gisho, Yesuusi entako, “Taani hintew tuma odayis; Asa Na7aa ashuwa, hinte moonna ixiko, qassi iya suuthaa hinte uyonna ixiko, hintew de7oy baawa.
JOH 6:54 Ta ashuwa miya uraasinne ta suuthaa uyaa uraas merinaa de7oy de7ees. Taani wursetha gallas iya hayqope denthana.
JOH 6:55 Ta ashoy tuma kathi; ta suuthayka tuma ushshu.
JOH 6:56 Ta ashuwa miya uraynne ta suuthaa uyaa uray tanan de7ees; taka iyan de7ayis.
JOH 6:57 De7o Aaway tana kiittin, taani iya baggara de7on de7eysada, tana miya urayka ta gaason de7on daana.
JOH 6:58 Salope wodhida uythay haysa: hinte aawati midi hayqida manna mela gidenna; ha uythaa miya uray merinaw daana” yaagis.
JOH 6:59 Yesuusi Qifirnahooma kataman ayhude woosa keethan haysa tamaarsis.
JOH 6:60 Yesuusa tamaaretape dariya baggay hessa si7ida wode, “Haysi gelonna timirte; haysi ooddes gelii?” yaagidosona.
JOH 6:61 Yesuusi ba tamaareti hessas zuuzumidaysa eridi, “Haysi hintena dhubbii?
JOH 6:62 Yaatin, Asa Na7ay kase de7iyasuwa pude keyishin hinte be7idi woygandetii?
JOH 6:63 Geeshsha Ayyaanay de7o immees; asa wolqi aykoka maaddenna. Ta hintew odiya qaalay de7o immiya Geeshsha Ayyaanape yees.
JOH 6:64 Shin hinte giddon ammanonaysati de7oosona” yaagis. Ammanonaysati oonanteko Yesuusi koyrope doomidi erees. Qassi bana aathidi immanay ooneko erees.
JOH 6:65 Qassika Yesuusi, “Aaway ba goonna oonika taako yaanaw danda7enna gada taani odiday hessa gishosa” yaagis.
JOH 6:66 Hessa gaason, Yesuusa kaalleysatape daroti iya aggidi guye simmidosona; zaari iya kaallibookona.
JOH 6:67 Yesuusi ba tammanne nam7u tamaaretako, “Hinteka aggidi baanaw koyeetii?” yaagidi oychis.
JOH 6:68 Simoon Phexroosi zaaridi, “Godaw, nuuni oodeko baanee? New merinaa de7o immiya qaalay de7ees.
JOH 6:69 Neeni Xoossaa Geeshshaa gideysa nuuni ammanoosinne eroos” yaagis.
JOH 6:70 Yesuusi entako, “Taani hintena tammanne nam7ata doorabikina? Shin hintefe issoy Xalahe” yaagis.
JOH 6:71 Yesuusi hessa giday Simoona Na7aa Asqoroota Yihudasa. Yihudi Yesuusa aathidi immanaw de7iya tammanne nam7u tamaaretape issuwa.
JOH 7:1 Hessafe guye, Ayhudeti Yesuusa wodhanaw koyiya gisho I Yihuda aggidi Galilan simeretees.
JOH 7:2 Ayhudeti bonchiya Shaqara Ba7aaley bonchetanaw matis.
JOH 7:3 Hessa gisho, Yesuusa ishati, “Ne tamaareti neeni oothiya malaatata be7ana mela haysafe dendada Yihuda biitta ba.
JOH 7:4 Baw eretanaw koya asi oonika ba oosuwa genthenna. Neeni haysata oothada nebaa alamiya erisa” yaagidosona.
JOH 7:5 Iya ishati hessa giday iyan ammanibona gishosa.
JOH 7:6 Yesuusi entako, “Taw inje wodey gakibeenna, shin hintew ubba wodey injetees.
JOH 7:7 Alamey hintena ixanaw danda7enna, shin taani alamiya oosoy iita gideysa markatiya gisho tana ixees.
JOH 7:8 Hinte baaliya biite; ta wodey gakiboonna gisho taani baaliya biike” yaagis.
JOH 7:9 I hessa gidi Galilan attis.
JOH 7:10 Iya ishati ba7aale bonchanaw bidaape guye Yesuusi oonaka erisonna qosan he bessaa bis.
JOH 7:11 Ayhudeti ba7aale bonchiya bessan, “I awun de7ii?” yaagidi iya koydosona.
JOH 7:12 Asay kalkashidi iyabaa odetoosona. Baggay, “I lo77o asi” giya wode harati qassi, “Akay, I asaa balethees” yaagosona.
JOH 7:13 Shin Ayhude halaqatas yayyida gisho oonika iyabaa qoncen odetenna.
JOH 7:14 Baaliya bonchidi giddo gathiya wode Yesuusi Xoossa Keethi bidi tamaarso oykis.
JOH 7:15 Ayhudeti, “Ha addey timirte tamaaronna haysa ubbaa waati eridee?” yaagidi malaaletidosona.
JOH 7:16 Yesuusi zaaridi, “Ta tamaarsiya timirtey tana kiitida Xoossaa matape yaa timirtefe attishin, tabaa gidenna.
JOH 7:17 Xoossaa sheniya oothanaw koyiya oonika ha timirtey Xoossaa matape yaakonne woyko taani taape odiyako erana.
JOH 7:18 Babaa odiya oonika ba huuphe boncho koyees. Shin bana kiittidaysa bonchuwa koyiya oonika I tumancho; iyan wordoy baawa.
JOH 7:19 Musey hintew higgiya immis, shin hintefe oonika higgiya naagibeenna. Yaatin ayis tana wodhanaw koyeetii?” yaagis.
JOH 7:20 Asay zaaridi, “Nena Xalahey oykis; nena wodhanaw oonee koyey?” yaagidosona.
JOH 7:21 Yesuusi, “Taani issi malaata oothin hinte ubbay malaaletideta.
JOH 7:22 Hinte, hinte nayta qaxarana mela Musey kiittis. Shin qaxaro hinte mayzati doomidosonape attishin, Muse gidenna. Hessa gisho, hinte Sambaata gallas adde nayta qaxareeta.
JOH 7:23 Muse higgey kiitida gisho, hinte Sambaata gallas qaxariyabaa gidiko, taani issi asa kumetha asatethaa pathida gisho, taara ayis kacceetii?
JOH 7:24 Tuma pirda pirditepe attishin, asa som7o be7idi pirdofite” yaagis.
JOH 7:25 Yerusalaame asaape issoti issoti, “Enti wodhanaw koyiya uray haysa gidennee?
JOH 7:26 Heko, I qoncen odees; enti iya aykoka gookona. I Kiristoosa gideysa Ayhude halaqati tuma eridonaasha?
JOH 7:27 Kiristoosi yaa wode I awupe yaako oonika erenna, shin I awupe yidaako nu eroos” yaagidosona.
JOH 7:28 Yesuusi xoossa keethan tamaarsishe ba qaala dhoqu oothidi, “Tuma hinte taani oonekonne ta awupe yidaako ereetii? Taani ta maatan yabiike, shin tana kiittidaysi tumancho; hinte iya ereketa.
JOH 7:29 Shin taani I kiittin iya matape yida gisho iya erayis” yaagis.
JOH 7:30 Hessa gisho, enti iya oykanaw koydosona. Shin iya wodey buroo gakiboonna gisho oonika iya bolla kushe wothibeenna.
JOH 7:31 Shin daro asay Yesuusa ammanidi, “Kiristoosi yaa wode ha uray oothida malaatatape dariya malaata oothaneyee?” yaagidosona.
JOH 7:32 Farsaaweti daro asay Yesuusaba kalkasheysa si7idosona. Kahine halaqatinne Farsaaweti iya oythidi qashisanaw Xoossa Keethi naageysata kiittidosona.
JOH 7:33 Yesuusi, “Taani hintera guutha wode gam7ana; hessafe guye tana kiittidaysako baana.
JOH 7:34 Hinte tana koyana, shin demmeketa. Taani de7iyasuwa hinte yaanaw danda7eketa” yaagis.
JOH 7:35 Ayhudeti issoy issuwara, “Haysi nuuni demmonaso aw baana hanii? Girike kataman de7iya Ayhudetako bidi Giriketa tamaarsanaw haniyee?
JOH 7:36 ‘Hinte tana koyana, shin demmeketa’ qassi, ‘Taani de7iyasuwa hinte yaanaw danda7eketa’ guussay ay guussee?” yaagidosona.
JOH 7:37 Baaliya bonchiya gallasatape wolqaamanne wursetha gallasan Yesuusi dendidi, ba qaala dhoqu oothidi, “Saamotida oonika taako yidi uyo.
JOH 7:38 Tana ammaniya oonika Geeshsha Maxaafay gidaysada de7o immiya pulto haathay iyape goggana” yaagis.
JOH 7:39 I hessa giday iya ammanidaysati ekanaw de7iya Geeshsha Ayyaanaba. Yesuusi buroo bonchetiboona gisho, he wode Geeshsha Ayyaanay imetibeenna.
JOH 7:40 He asaape daroti I geysa si7idi, “Tuma haysi nabiya” yaagidosona.
JOH 7:41 Harati qassi, “Haysi Kiristoosa” yaagidosona. Shin harati qassi, “Kiristoosi Galilape waanidi keyii?
JOH 7:42 Geeshsha Maxaafay, ‘Kiristoosi Dawita sheeshape Dawiti de7ida Beeteleme katamaape yaana’ yaageneyee?” yaagidosona.
JOH 7:43 Hessa gisho, Yesuusa gaason asay banta giddon shaaketidosona.
JOH 7:44 He asaape issoti issoti iya oykanaw koydosona, shin oonika iya bolla kushe wothibeenna.
JOH 7:45 Xoossa Keetha naageysati kahine halaqatakonne Farsaawetako guye simmi yin enti, “Ayis iya ehibeketii?” yaagidi oychidosona.
JOH 7:46 Xoossa Keetha naageysati entako, “Ha addey odeteysatho oonika odetenna” yaagidi zaaridosona.
JOH 7:47 Farsaaweti zaaridi, “I hintenaka balethidee?
JOH 7:48 Ayhude halaqatape woyko Farsaawetepe iya ammanida asi de7ii?
JOH 7:49 Muse higgiya eronna ha asay baadetidaysata” yaagidosona.
JOH 7:50 Farsaawetape issoy qamma Yesuusako bida Niqodimoosi entako,
JOH 7:51 “Issi asi giyaba si7onna woyko I ay oothidaako eronna de7ishe koyrottidi iya bolla pirdeysi nu higgiyan de7ii?” yaagis.
JOH 7:52 Enti zaaridi, “Neenika qassi Galila biitta asee? Galila biittafe nabey keyonnaysa Geeshsha Maxaafape pilgada demma” yaagidosona.
JOH 7:53 Issoy issoy aggidi ba soo ba soo bis.
JOH 8:1 Shin Yesuusi Shamaho zuma bolla keyis.
JOH 8:2 Qassi wontetha gallas guura Xoossa Keethi simmis. Daro asay iyako yin uttidi enta tamaarsis.
JOH 8:3 Higge astamaaretinne Farsaaweti laymatishin oykida issi maccasiw iyako ehidosona. Enti asa ubbaa sinthan iyo essidi,
JOH 8:4 “Astamaariyaw, ha maccasiya laymatishin nu oykida.
JOH 8:5 Muse higgey hanni mela maccas shuchan cadeta hayqana mela kiittees. Yaatin, neeni woygay?” yaagidosona.
JOH 8:6 Enti hessa giday Yesuusa paacidi iya mootiyaba demmanaasa. Shin Yesuusi hokidi ba biradhen biitta bolla xaafis.
JOH 8:7 Enti iya zaari zaari oychidi aggonna ixin, pude dhoqu gidi, “Hinte giddon nagara oothiboonna asi koyrottidi iyo shuchan caddo” yaagis.
JOH 8:8 Qassika hokidi biitta bolla xaafis.
JOH 8:9 Enti hessa si7ida wode cimatape doomidi issoy issoy keyishe wuridosona. Yesuusa xalaali he bessan eqida maccaseera attis.
JOH 8:10 I pude dhoqu gidi maccaseeko, “Maccasete, asati aw bidonaa? Ne bolla pirdiday oonika baawee?” yaagis.
JOH 8:11 Maccasiya, “Godaw, oonika baawa” yaagasu. Yesuusi zaaridi, “Taanika ne bolla pirdike. Ba; zaarada nagara oothofa” yaagis.
JOH 8:12 Qassika Yesuusi asaako, “Taani alamiyas poo7o. Tana kaalliya oonika de7o immiya poo7uwa ekanaape attishin, dhuman simeretenna” yaagidi odis.
JOH 8:13 Farsaaweti, “Neeni nebaa markataasa, shin ne markatethay tuma gidenna” yaagidosona.
JOH 8:14 Yesuusi zaaridi, “Taani tabaa markatikoka ta markatethay tuma. Ayis giiko, taani awupe yidaako qassi aw biyako erayis, shin hinte ereketa.
JOH 8:15 Hinte asa qofan pirdeta; taani issi asa bollaka pirdike.
JOH 8:16 Taani pirdiyaba gidikoka ta pirday tuma. Ayis giiko, tana kiitida ta Aaway taara de7eesipe attishin, taani tarka de7ike.
JOH 8:17 Nam7u asa markatethi tuma gideysi hinte higgiyan xaafetis.
JOH 8:18 Taani tabaa ta huuphen markatayis; qassi tana kiitida ta Aawayka tabaa markatees” yaagis.
JOH 8:19 Enti, “Ne aaway awun de7ii?” yaagidi iya oychidosona. Yesuusi zaaridi, “Hinte tana woyko ta Aawa ereketa. Tana eridaba gidiyako, hinte ta Aawaka eranashin” yaagis.
JOH 8:20 Yesuusi xoossa keethan muxaata miishiya yeggiya saaxiney de7iya bessan hessa tamaarsis. Iya qammay buroo gakiboonna gisho oonika iya oykibeenna.
JOH 8:21 Qassika Yesuusi entako, “Taani baana; hinte tana koyana, shin hinte atotethi demmonna hinte nagaran hayqana. Taani biya bessaa hinte baanaw danda7eketa” yaagis.
JOH 8:22 Ayhude halaqati, “I, ‘Taani biya bessaa hinte baanaw danda7eketa’ yaagees. I bana barka wodhaneyee?” yaagidosona.
JOH 8:23 Yesuusi zaaridi, “Hinte garsafe; taani bollafe. Hinte ha alamiyape, taani ha alamiyape gidike.
JOH 8:24 Hinte atotethi demmonna hinte nagaran hayqana gada taani hintew odiday hessasa. ‘Taani Tana Gideysa’ hinte ammanonna ixiko hinte atotethi demmonna hinte nagaran hayqana” yaagis.
JOH 8:25 Enti, “Neeni oonee?” yaagidi oychidosona. Yesuusi zaaridi, “Taani, koyrope hintew odida tana.
JOH 8:26 Taani hintebaa odada pirdiyabay darobay de7ees. Shin tana kiittidaysi tumancho; qassi taani iyape si7idaysa xalaala alamiyas odayis” yaagis.
JOH 8:27 Yesuusi ba Aawaba odeysa enti akeekibokona.
JOH 8:28 Hessa gisho, Yesuusi entako, “Hinte Asa Na7aa pude dhoqu oothiya wode Taani Tana Gideysa hinte erana. Qassika taani ta maatan aykoka oothonaysanne ta Aaway tana tamaarsidaysa odeysa hinte erana.
JOH 8:29 Tana kiittidaysi taara de7ees. Taani ubba wode iya ufaysiyabaa oothiya gisho I tana ta xalaala aggibeenna” yaagis.
JOH 8:30 Yesuusi hessa odishin si7ida daro asay iya ammanidosona.
JOH 8:31 Yesuusi bana ammanida asatako, “Hinte ta timirtiyas kiitetiko tuma tana kaalleyisata.
JOH 8:32 Hinte tumaa erana; tumayka hintena aylletethafe kessana” yaagis.
JOH 8:33 Enti zaaridi, “Nuuni Abrahaame sheeshi; nuuni oodeska aylletibooko. Neeni woygada, ‘Hinte aylletethafe keyana’ gay?” yaagidosona.
JOH 8:34 Yesuusi zaaridi, “Taani hintew tuma odayis; nagara oothiya oonika nagara aylle.
JOH 8:35 Aylley merinaw soo asaara deenna, shin na7ay merinaw soo asaara de7ees.
JOH 8:36 Na7ay hintena aylletethafe kessiko hinte aylletethafe tuma keyana.
JOH 8:37 Hinte Abrahaame sheeshi gideysa taani erayis. Shin ta qaalay hinte wozanan bayna gisho, tana wodhanaw koyeeta.
JOH 8:38 Taani ta Aaway tana bessidaysa odayis, shin hinteka hinte aawape si7idaysa ootheeta” yaagis.
JOH 8:39 Enti zaaridi, “Nu aaway Abrahaame” yaagidosona. Yesuusi entako, “Hinte Abrahaame nayta gidiyako I oothidaysa oothana.
JOH 8:40 Shin Xoossafe si7ida tumaa odida tana hinte wodhanaw koyeeta. Abrahaamey hessada oothibeenna.
JOH 8:41 Hinte, hinte aaway oothidaysa ootheeta” yaagis. Enti zaaridi, “Nuuni tuma Xoossaa nayta; nuus issi Aaway Xoossaa xalaali de7ees” yaagidosona.
JOH 8:42 Yesuusi entako, “Xoossay tuma hinte aawa gidiyako hinte tana dosana; ayis giiko, taani Xoossaa matape yada haysan de7ayis. Tana I kiittisipe attishin, taani ta maatan yabiike.
JOH 8:43 Taani geysa hinte si7anaw koyonna gisho ta giyabay hintew gelenna.
JOH 8:44 Hinte, hinte aawa Xalahe nayta. Qassi hinte, hinte aaway amotiyaba oothanaw koyeeta. I koyrope doomidi shempo wodheysa. Tumi iyan bayna gisho I tumaa ixees. Wordoy iyaw medho gidida gishonne I wordo aawa gidiya gisho wordo odetishe baape odetees.
JOH 8:45 Taani tuma odayis, shin hinte tana ammaneketa.
JOH 8:46 Hintefe, ‘Neeni nagara oothishin ta be7as’ gaanaw danda7ey oonee? Taani tuma odetiyaba gidiko tana ayis ammaneketii?
JOH 8:47 Xoossaa asi Xoossay giyaba si7ees. Hinte Xoossaa asi gidonna gisho Xoossay giyaba si7eketa” yaagis.
JOH 8:48 Ayhudeti zaaridi, “ ‘Neeni Samaare asi; nenan tuna ayyaanay de7ees’ gishe like gidoko?” yaagidosona.
JOH 8:49 Yesuusi entako “Ta bolla tuna ayyaani baawa. Taani ta Aawa bonchayis, shin hinte tana kawusheta.
JOH 8:50 Taani ta huuphe boncho koyke; taani bonchetana mela koyeysinne taw pirdeysi de7ees.
JOH 8:51 Taani hintew tuma odayis; ta qaala naagiya oonika hayqenna” yaagis.
JOH 8:52 Ayhudeti zaaridi, “Ne bolla tuna ayyaanay de7eysa nuuni ha77i erida. Abrahaamey hayqis; nabetika hayqidosona. Shin neeni, ‘Ta qaala naagiya oonika hayqenna’ yaagasa.
JOH 8:53 Neeni hayqida nu aawa Abrahaamepe aadhayee? Nabetika qassi hayqidosona. Neeni nena oona gada qopay?” yaagidosona.
JOH 8:54 Yesuusi, “Taani tana bonchiko ta bonchoy hada. Hinte, ‘Nu Xoossaa’ giya ta Aaway I tana bonchees.
JOH 8:55 Hinte iya eronna ixiko taani iya erayis. Taani iya erike giiko hinte mela wordotayis. Shin taani iya erayis; qassi iya qaalaka naagayis.
JOH 8:56 Hinte aaway Abrahaamey ta yuussaa gallasa be7idi ufaytanaw amottis; be7idika ufaytis” yaagis.
JOH 8:57 Ayhudeti zaaridi, “Hari attoshin, new ishatamu laythi kumibeenashin waanada Abrahaame be7as gay?” yaagidosona.
JOH 8:58 Yesuusi entako, “Taani hintew tuma odayis; Abrahaamey yeletanaape kase, ‘Taani Tana’ ” yaagis.
JOH 8:59 Hessa gisho, enti Yesuusa caddanaw shuchi ekidosona. Shin Yesuusi entafe geemmidi Xoossa Keethafe keyidi bis.
JOH 9:1 Yesuusi bishe yeletoosape qooqe gididi de7iya issi addiya be7is.
JOH 9:2 Iya tamaareti, “Astamaariyaw, ha addey qooqe gididi yeletana mela nagara oothiday oonee? I oothideye woyko iya yelidaysati oothidona?” yaagidi oychidosona.
JOH 9:3 Yesuusi, “Xoossaa oosoy iya bolla qoncana melape attishin, I woyko iya yelidaysati nagara oothida gisho gidenna.
JOH 9:4 Sa7i gallas de7ishin tana kiittidaysa oosuwa nu oothanaw bessees. Oonika oothanaw danda7onna qammay yees.
JOH 9:5 Taani alamiyan de7ashe alamiyas poo7o” yaagis.
JOH 9:6 Yesuusi hessa gidi sa7an cuttis. Ba cuchan guutha biitta laakothidi he urqan qooqe addiya ayfiya tiyis.
JOH 9:7 Yaatidi, “Bada Salihoome (Salihoome guussay Kiitetidaysa guussu) geetetiya teqetida haathan ne ayfiya meeceta” yaagis. Hessa gisho, addey bidi ba ayfiya meecetidi xeellishe simmis.
JOH 9:8 Addiya shoorotinne addey kase woossishin be7ida asay, “Haysi uttidi woossiya addiya gidenneyee?” yaagidosona.
JOH 9:9 Issi issi asay, “Haysi iya” yaagidosona. Harati qassi, “Akay, haysi iya daaneesipe attishin, iya gidenna” yaagidosona. Shin addey, “Ee, tana” yaagis.
JOH 9:10 Enti iyako, “Yaatin ne ayfey waanidi xeellidee?” yaagidi oychidosona.
JOH 9:11 I zaaridi, “Yesuusa geetetiya addey guutha urqa laakothidi ta ayfiya tiyidi, ‘Salihoome bada ne ayfiya meeceta’ yaagin, taani bada meecetada xeella aggas” yaagis.
JOH 9:12 Enti iyako, “I awun de7ii?” yaagidi oychidosona. Addey, “Taani erike” yaagis.
JOH 9:13 Enti kase qooqe, shin ha77i xeellida addiya Farsaawetako efidosona.
JOH 9:14 Yesuusi urqa laakothidi addiya ayfiya pathida gallasay Sambaata gallas.
JOH 9:15 Hessa gisho, addey waanidi xeellidaako Farsaaweti iya zaari oychidosona. Addey entako, “I ta ayfiyan guutha urqa tiyis. Ta ayfiya meecetada ha77i xeellayis” yaagis.
JOH 9:16 Farsaawetepe issoti issoti, “Haysa oothida addey Sambaata higgiya naagonna gisho Xoossaa matape yibeenna” yaagidosona. Shin harati, “Nagarancho asi haysa mela malaata waati oothanaw danda7ii?” yaagidi banta giddon shaaketidosona.
JOH 9:17 Hessa gisho, Farsaaweti addiyako, “I ne ayfiya xeelisida gisho ne iyabaa woygay?” yaagidosona. Addey, “I nabe” yaagis.
JOH 9:18 Ayhude halaqati, iya aayiwunne aawa xeegidi oychana gakanaw, addey kase qooqe gididaysanne ha77i I xeelleysa ammanibookona.
JOH 9:19 Enti iya aayiwunne iya aawako, “Hinte ‘Qooqe gididi yeletis’ giya hinte na7ay haysee? Yaatin, ha77i waanidi xeellidee?” yaagidi oychidosona.
JOH 9:20 Iya yelidaysati, “Haysi nu na7aa gididaysanne qooqe gididi I yeletidaysa nu eroos.
JOH 9:21 Shin ha77i I waanidi xeellidaako qassi iya ayfiya ooni pathidaako nuuni eroko. Iya oychite. I bana erida asi gidiya gisho babaa odanaw danda7ees” yaagidosona.
JOH 9:22 Iya yelidaysati hessa giday Ayhudetas yayyida gishosa. Ayis giiko, Ayhudeti, Yesuusi I Kiristoosa yaagidi markatiya asi de7iko he uraa ayhude woosa keethafe hilanaw koyrottidi zore qachidosona.
JOH 9:23 Iya yelidaysati, “I bana erida asi; iya oychite” yaagiday hessasa.
JOH 9:24 Hessa gisho, qooqe gididi yeletida addiya enti zaari xeegidi, “Tumaa odanaw Xoossan caaqa; ha addey nagarancho gideysa nu eroos” yaagidosona.
JOH 9:25 Addey zaaridi, “I nagarancho gideysa, ta erike. Taani qooqe gideysanne ha77i xeelleysa he issiba erayis” yaagis.
JOH 9:26 Enti zaaridi, “I new ay oothidee? I ne ayfiya waati pathidee?” yaagidosona.
JOH 9:27 I entako, “Taani hintew odas, shin si7ibeeketa. Ayis zaari si7anaw koyeetii? Hinteka iya tamaare gidanaw koyeetiyee?” yaagis.
JOH 9:28 Enti iya cayidi, “Ne he uraa tamaare gida; nuuni Muse tamaare.
JOH 9:29 Xoossay Muses odidaysa nuuni eroos, shin hari attoshin ha uray I awupe yidaakoka nu eroko” yaagidosona.
JOH 9:30 Addey entako, “I awupe yidaako hinte eronnaysi malaalsiyaba, shin I ta ayfiya pathis.
JOH 9:31 Xoossaa boncheysanne I koyaba oothiya uraa Xoossay si7eesipe attishin, nagaranchota si7enna.
JOH 9:32 Saloy sa7i medhetoosape qooqe gididi yeletida asa ayfe pathiday oonika baawa.
JOH 9:33 Ha addey Xoossafe kiitetiboonaba gidiyako issibaaka oothanaw danda7enna” yaagis.
JOH 9:34 Enti zaaridi, “Neeni nagaran yeletada diccidaysi nuna tamaarsanaw koyay?” yaagidosona. Iya ayhude woosa keethafe hilidosona.
JOH 9:35 Yesuusi enti addiya kessidaysa si7ida wode iya demmidi, “Asa Na7aa ammanay?” yaagidi oychis.
JOH 9:36 Addey Yesuusako, “Godaw, taani iya ammanana mela I oonee? Taw odarkii?” yaagis.
JOH 9:37 Yesuusi addiyako, “Neeni iya be7adasa; ha neera odeteysi iya” yaagis.
JOH 9:38 Addey zaaridi, “Godaw, ammanayis” yaagidi Yesuusas goyinnis.
JOH 9:39 Yesuusi, “Qooqeti xeellana melanne xeelleysati qooqana mela taani pirdanaw ha alamiya yas” yaagis.
JOH 9:40 Iyara de7iya guutha Farsaaweti hessa si7idi, “Nu qooqeyee?” yaagidi oychidosona.
JOH 9:41 Yesuusi, “Hinte qooqe gidiyako hintew nagara gidenna. Shin ha77i hinte xeelloos giya gisho hinte, hinte nagaran de7eeta” yaagis.
JOH 10:1 Yesuusi, “Taani hintew tuma odayis; dorsa girbe giddo pengera gidonna harasoora geliya oonika kaysonne panga.
JOH 10:2 Shin pengera geleysi dorsata heemmeysa.
JOH 10:3 Pengiya naageysi iyaw pengiya dooyees; dorsatika iya qaala si7oosona. I ba dorsata enta sunthan sunthan xeegees; enta kaalethidi kare kessees.
JOH 10:4 I ba dorsata kare kessidaape guye enta sinthan hemetees. Enti iya qaala eriya gisho iya kaalloosona.
JOH 10:5 Hara uraa qaala enti eronna gisho iyape baqatoosonape attishin, iya geedo kaallokona” yaagis.
JOH 10:6 Yesuusi entaw ha leemisuwa odis, shin I ay gidaako enti akeekibokona.
JOH 10:7 Zaaridi Yesuusi entako, “Taani hintew tuma odayis; taani dorsatas penge.
JOH 10:8 Taape sinthe yida ubbay kaysonne panga, shin dorsati enta si7ibookona.
JOH 10:9 Pengey tana; ta baggara geliya oonika attana. I ta baggara gelananne keyana; lo77o heemetiya bessi demmana.
JOH 10:10 Kaysoy kaysotanaw, shukanawunne dhaysanaw yeesipe attishin, harabas yeenna. Taani entaw de7oy daana melanne kumidi palahana mela yas.
JOH 10:11 “Taani lo77o henthancho; lo77o henthanchoy ba dorsata gisho ba shempuwa aathidi immees.
JOH 10:12 Une heemmiya asi dorsata godanne henthancho gidonna gisho suudhumey yaa wode be7idi dorsata aggidi bees. Hessa gisho, suudhumey dorsata oykidi laallees.
JOH 10:13 Une heemmeysi miishes heemmiya gishonne dorsatabay iya qofisonna gisho dorsata aggidi baqatees.
JOH 10:14 “Taani lo77o henthancho. Ta Aaway tana ereysada taanika ta Aawa erayis. Hessadaka, taani ta dorsata erayis; ta dorsatika tana eroosona. Taani ta dorsata gisho ta shempuwa aatha immayis.
JOH 10:16 Ha wudiyan bayna hara dorsati taw de7oosona. Taani entaka ehanaw bessees. Enti ta qaala si7ana; enti issi wude gidana; henthanchoyka issuwa.
JOH 10:17 “Taani ta shempuwa aatha immada zaara ekiya gisho ta Aaway tana dosees.
JOH 10:18 Ta dosada ta shempuwa aatha immaysipe attishin, taape oonika ekenna. Taani ta shempuwa aatha immanawunne zaara ekanaw maati taw de7ees. Taani oothana mela ta Aaway tana kiittidaysi haysa” yaagis.
JOH 10:19 Hessa I gida gisho, Ayhudeta giddon qassika shaaketethi medhetis.
JOH 10:20 Entafe dariya baggay, “Iyan tuna ayyaanay de7ees! I gooyees! I giyaba ayis si7eetii?” yaagidosona.
JOH 10:21 Harati qassi, “Xalahey oykida asi haysada odetenna. Tuna ayyaani qooqe ayfe xeelisanaw danda7iyee?” yaagidosona.
JOH 10:22 Yerusalaamen Xoossa Keetha anjisida gallasata bonchiya ba7aaley gakis; he wode sa7i balgo.
JOH 10:23 Yesuusi xoossa keethan Solomone barandan simeretees.
JOH 10:24 Ayhudeti Yesuusa yuushon shiiqi eqidi, “Neeni nuna awude gakanaw sidhera wothanee? Neeni Kiristoosa gidiko ane nuus geeshshada oda” yaagidosona.
JOH 10:25 Yesuusi zaaridi entako, “Taani hintew odas; shin tana ammaneketa. Taani ta Aaway taw immida maatan oothiya oosoy tabaa markatees.
JOH 10:26 Shin taani hintew odidaysada hinte ta dorse gidonna gisho ammaneketa.
JOH 10:27 Ta dorsati ta qaala si7oosona. Taani enta erayis; entika tana kaalloosona.
JOH 10:28 Taani entaw merinaa de7uwa immayis; enti ubbaraka dhayokona. Oonika ta kushepe enta bonqi ekanaw danda7enna.
JOH 10:29 Enta taw immida ta Aaway ubbaafe aadhees Oonika ta Aawa kushepe enta bonqi ekanaw danda7enna.
JOH 10:30 Tanne ta Aaway issino” yaagis.
JOH 10:31 Ayhudeti Yesuusa caddanaw qassika shuchi denthidosona.
JOH 10:32 Yesuusi entako, “Taani oothana mela ta Aaway taw immida daro lo77o oosota hintena ootha bessaas. Hessatape awusa gisho tana shuchan caddanaw koyeetii?” yaagis.
JOH 10:33 Ayhudeti zaaridi, “Nuuni nena ne lo77o ooso gisho shuchan caddanaw koyoko. Shin neeni Xoossaa cayiya gishonne ase gidashe neeni, nena Xoosse giya gishosa” yaagidosona.
JOH 10:34 Yesuusi zaaridi, “Geeshsha Maxaafan Xoossay, ‘Hinte xoossata’ gidaysi xaafetibeennee?
JOH 10:35 Geeshsha Maxaafay merinaw laametenna. Xoossay ba qaala immida asata, ‘xoossata’ gidi xeegiko,
JOH 10:36 Aaway dooridi ha alamiya kiitida tana Xoossaa Na7a waatidi ‘Xoossaa cayaasa’ yaagetii?
JOH 10:37 Taani ta Aaway ootheysa oothonna ixiko tana ammanopite.
JOH 10:38 Shin taani oothiyaba gidiko hinte tana ammanonna ixikoka, ta Aaway tanan de7eysanne taka ta Aawan de7eysa hinte erana mela ta oosuwa ammanite” yaagis.
JOH 10:39 Qassika enti iya oykanaw koydosona, shin I entafe kessi ekis.
JOH 10:40 Yohaanisi kase xammaqiya bessaa, Yordaanose Shaafape hefinthi Yesuusi pinnidi yan de7is.
JOH 10:41 Daro asay Yesuusako yidi, “Yohaanisi malaata oothibeenna, shin I ha addiyaba odidabay ubbay tuma” yaagidosona.
JOH 10:42 Yan daro asay Yesuusa ammanidosona.
JOH 11:1 Bitaane gutan Alaazara geetetiya issi addey hargetis. Bitaaney Mayraamanne I michiya Marta de7iya guta.
JOH 11:2 He Mayraama Godaa tohuwa shitto tiyada ba binaanan iya tohuwa quchidaaro. Hargetiday I ishaa Alaazara.
JOH 11:3 Hessa gisho, micheti, “Godaw, ne doseysi hargetis” gidi Yesuusako kiittidosona.
JOH 11:4 Yesuusi hessa si7ida wode, “Ha hargey, Xoossaynne iya Na7ay bonchetana melape attishin, hayqos gathiya harge gidenna” yaagis.
JOH 11:5 Yesuusi Marta, I michiwunne Alaazara dosees.
JOH 11:6 Shin Alaazari hargidaysa Yesuusi si7idi ba de7iya bessan nam7u gallas gam7is.
JOH 11:7 Hessafe guye, Yesuusi ba tamaaretako, “Zaaridi Yihuda biitta boos” yaagis.
JOH 11:8 Iya tamaareti zaaridi, “Astamaariyaw, guutha wodepe kase Ayhudeti nena shuchan caddidi wodhanaw koydosona; ha77ika yaa baanee?” yaagidosona.
JOH 11:9 Yesuusi, “Issi gallasan tammanne nam7u saatey de7ees gidenneyee? Gallas hemetiya asi ha alamiya poo7uwa be7iya gisho dhubetenna.
JOH 11:10 Shin qamma hemetiya oonika poo7oy bayna gisho, dhubetees” yaagis.
JOH 11:11 Yesuusi hessa gidaape guye entako, “Nu dosiya Alaazari dhiskis, shin iya denthanaw taani baana” yaagis.
JOH 11:12 Iya tamaareti zaaridi, “Godaw, I dhiskidaba gidiko iyaw lo77ana” yaagidosona.
JOH 11:13 Yesuusi Alaazari hayqidaysa odis, shin entaw coo dhisko daanis.
JOH 11:14 Hessa gisho, Yesuusi geeshshidi entako, “Alaazari hayqis.
JOH 11:15 Hinte ammanana mela taani he bessan de7onaysas hinte gisho ufaytayis. Ane yedhite; iyako boos” yaagis.
JOH 11:16 Hessafe guye, Didimoosa geetetiya Toomasi ba lagge tamaaretako, “Astamaariyara hayqanaw nuka boos” yaagis.
JOH 11:17 Yesuusi gakiya wode Alaazari moogetin oyddu gallas gidis.
JOH 11:18 Bitaaney Yerusalaamepe heedzu kilo mitire mela haakees.
JOH 11:19 Daro Ayhudeti Martanne Mayraamo enta ishay hayqidaysas minthethanaw yidosona.
JOH 11:20 Marta Yesuusi yidaysa si7ada iya mokanaw keyasu, shin Mayraama son attasu.
JOH 11:21 Marta Yesuusako, “Godaw, neeni haysan de7idaba gidiyako ta ishay hayqennashin.
JOH 11:22 Shin ha77i gidikoka neeni woossiyaba Xoossay new immanaysa taani erayis” yaagasu.
JOH 11:23 Yesuusi, “Ne ishay hayqope dendana” yaagis.
JOH 11:24 Marta iyako, “Wursetha gallas I hayqope dendanaysa erayis” yaagasu.
JOH 11:25 Yesuusi iiko, “Taani dendonne de7o; tana ammaniya oonika hayqikoka de7on daana.
JOH 11:26 Qassi de7on de7eynne tana ammaniya oonika hayqenna. Hessa neeni ammanay?” yaagis.
JOH 11:27 Marta zaarada, “Godaw, ee taani ammanayis! Neeni Xoossaa Na7aa, alamiya yaanaw de7iya Kiristoosa gideysa taani ammanayis” yaagasu.
JOH 11:28 Marta hessa gidaape guye, bada ba michiw geeman xeegada, “Astamaarey yidi nena koyees” yaagasu.
JOH 11:29 Mayraama hessa si7ida wode ellesa denda eqada Yesuusako basu.
JOH 11:30 He saaten Yesuusi Martara gahetida bessan de7ees; buroo gutaa gakibeenna.
JOH 11:31 Mayraamo minthethishe iira son de7iya Ayhudeti, iya denda eqada ellesada kare keydaysa be7idi, duufo bada yeekanaw haniya daanin iyo kaallidi keyidosona.
JOH 11:32 Mayraama Yesuusi de7iyasuwa bada iya be7ida wode iya tohuwa bolla kundada, “Godaw, neeni haysan de7idaba gidiyako ta ishay hayqennashin” yaagasu.
JOH 11:33 Yesuusi Mayraamanne iira de7iya, Ayhudeti yeekeysa be7idi, ba wozanan daro seeletidi,
JOH 11:34 “Awun moogidetii?” yaagidi oychin, “Godaw, yada be7a” yaagidi zaaridosona.
JOH 11:35 Yesuusi afuxis.
JOH 11:36 Hessa gisho, Ayhudeti, “I Alaazara ay mela dosiyako be7ite” yaagidosona.
JOH 11:37 Shin entafe issoti issoti, “Haysi qooqiya xeelisidaysi ha addey hayqonna mela oothanaw danda7eneshin?” yaagidosona.
JOH 11:38 Qassika Yesuusi seeletidi, Alaazari moogetida duufuwa bis. He duufoy shuchan gordetida gongolo.
JOH 11:39 Yesuusi, “Shuchaa denthite” yaagidi kiittis. Marta, “Godaw, I hayqosaape oyddu gallas gidida gisho, ha77i xinqana” yaagasu.
JOH 11:40 Yesuusi Martako, “Ne ammaniyaba gidiko Xoossaa bonchuwa be7anaysa taani new odabikina?” yaagis.
JOH 11:41 Enti shucha denthin Yesuusi salo pude xeellidi, “Aawaw, tana ne si7ida gisho nena galatayis.
JOH 11:42 Ne ubba wode tana si7eysa taani erayis. Shin haysan eqida asay neeni tana kiittidaysa ammanana mela taani enta gisho haysa gayis” yaagis.
JOH 11:43 Yesuusi hessa gidaape guye, ba qaala dhoqu oothidi, “Alaazara, haa keya!” yaagis.
JOH 11:44 Hayqida addey ziidhetida mela kusheynne tohoy shalon qashetidi de7ishin iya ayfey karey goozetida mela duufuwape keyis. Yesuusi enta, “Birshite, bo giite!” yaagis.
JOH 11:45 Hessa gisho, Mayraamiko yida Ayhudetape daroti Yesuusi oothidaysa be7idi iya ammanidosona.
JOH 11:46 Shin entafe issoti issoti Farsaawetako bidi Yesuusi oothidaysa entaw odidosona.
JOH 11:47 Hessafe guye, kahine halaqatinne Farsaaweti shanguwa shiishidi, “Ha addey daro malaatata oothiya gisho nu ay oothinoo?
JOH 11:48 Nuuni iya si77i gidi aggiko asa ubbay iya ammanana. Qassi Roome biitta asati yidi nu xoossa keethaanne nu deriya dhaysana” yaagidosona.
JOH 11:49 Entafe issoy Qayyaafa geysi, he laythi kahine halaqa gididaysi, “Hinte aykoka ereketa!
JOH 11:50 Asa ubbay dhayeysafe asa ubbaa gisho issi asi hayqeysi lo77o gideysa ereketii?” yaagis.
JOH 11:51 I hessa baape gibeenna. Shin he laythi kahine halaqa gidiya gisho, Yesuusi Ayhude asaa gisho hayqanaw besseysa tinbite odis.
JOH 11:52 Qassi Yesuusi Ayhude asaa xalaalas gidonashin laaletidi de7iya Xoossaa asa ubbaa issife shiishanawunne issi asi oothanaw hayqana.
JOH 11:53 He gallasape doomidi enti iya wodhanaw maqetidosona.
JOH 11:54 Hessa gisho, Yesuusi Ayhudeta giddon qoncen simeretibeenna. Shin mela biitta matan de7iya Efreema gutaa bis. Ba tamaaretara he bessan gam7is.
JOH 11:55 Ayhudeti bonchiya Paasika gallasay matis. Qassi daro asay bantana geeshshanaw Paasika bonchiya gallasay gakanaape sinthe he biittafe Yerusalaame bidosona.
JOH 11:56 Enti xoossa keethan eqidi Yesuusa yuussaa naagiya gisho, “Ay qopeetii? Yesuusi baaliya bonchanaw yeennee?” yaagidi issoy issuwa oychidosona.
JOH 11:57 Kahine halaqatinne Farsaaweti Yesuusa oykanaw, I de7iyasuwa eriya oonika bantaw odana mela kiittidosona.
JOH 12:1 Paasika bonchiya gallasape usupun gallas sinthatidi, Yesuusi hayqope denthida Alaazari de7iya gutaa, Bitaane bis.
JOH 12:2 He bessan enti iyaw kaho giigisidosona. Alaazari Yesuusara issife gayta bolla uttidashin, Marti entana imatawusu.
JOH 12:3 Mayraama nardoose geetetiya daro al7o geeshsha shitto ehada Yesuusa tohuwa tiyasu. Ba binaanan iya tohuwa quchasu; keetha ubbay shitto sawon tonku gis.
JOH 12:4 Shin Yesuusa tamaaretape issoy, Yesuusa aathidi immanaysi, Asqoroota Yihuda,
JOH 12:5 “Ayis ha shittoy heedzu xeetu dinaaren bayzetidi, miishey manqotas imetennee?” yaagis.
JOH 12:6 I kayso gidida gisho hessa gisipe attishin, manqotas qadhetidi gibeenna. I miishe karxiita oykeysa gidiya gisho ubba wode iyape baw ekees.
JOH 12:7 Yesuusi, “Iya baw de7iyaba ta moogo gallasaas minjida gisho iyo aggaagite.
JOH 12:8 Manqoti ubba wode hintera daana, shin taani ubba wode hintera de7ike” yaagis.
JOH 12:9 He wode daro asay Yesuusi Bitaanen de7eysa si7idi yaa bidosona. Enti Yesuusa xalaala gidonashin, I hayqope denthida Alaazaraka be7anaw bidosona.
JOH 12:10 Hessa gisho, kahine halaqati Alaazaraka qassi wodhanaw maqetidosona.
JOH 12:11 Ayis giiko, Alaazara gaason daro Ayhudeti entana ixidi Yesuusa ammanoosona.
JOH 12:12 Wontetha gallas Paasika bonchiya bessaa yida daro asay Yesuusi Yerusalaame beysa si7idi,
JOH 12:13 Zamba haythi ekidi iya mokanaw keyidosona. Banta qaala dhoqu oothidi, “Hosaana! Xoossay galatetto! Godaa sunthan yeysi anjeto! Xoossay Isra7eele Kawa anjo!” yaagidosona.
JOH 12:14 Geeshsha Maxaafan, “Xiyoone katamaw, babofa! Heko, ne Kawoy hare mara bolla uttidi yees” geetetidayada Yesuusi hare mari demmidi iya toggis.
JOH 12:16 Yesuusa tamaareti hessa kase akeekibokona. Shin Yesuusi bonchetidaape guye enti hessa ubbaa akeekidosona. Hessi ubbay Geeshsha Maxaafay gidaysada hanis.
JOH 12:17 Yesuusi Alaazara duufope xeegidi, hayqope denthida wode iyara de7iya daro asay Yesuusaba markatidosona.
JOH 12:18 Daro asay iya mokanaw keyday, I he malaatata oothidaysa si7ida gishosa.
JOH 12:19 Hessa gisho, Farsaaweti issoy issuwako, “Nu aykoka oothanaw danda7onnaysa be7ite; dere ubbay iya kaallees” yaagidosona.
JOH 12:20 Paasika bonchiya gallas goyinnanaw Yerusalaame bidaysata giddon issi issi Girike asati de7oosona.
JOH 12:21 Enti Galila biittan Beetesayda katamaape yida Filphoosako bidi, “Godaw, nuuni Yesuusa be7anaw koyoos” yaagidi woossidosona.
JOH 12:22 Filphoosi bidi Indiriyasas odin nam7ay bidi, Yesuusas odidosona.
JOH 12:23 Yesuusi entako, “Asa Na7ay, bonchetiya wodey gakis.
JOH 12:24 Taani hintew tuma odayis; issi giste ayfey biittan wodhidi wooqonna ixiko barka attees. Shin he giste ayfey wooqiko daro ayfe ayfees.
JOH 12:25 Ba shempuwa dosiya oonika dhaysees; ba shempuwa ha alamiyan ixiya oonika merinaa de7os ashshees.
JOH 12:26 Taani de7iyasuwan taara daana mela taw oothanaw koyiya oonika tana kaallanaw bessees. Taw oothiya oonaka ta Aaway bonchana.
JOH 12:27 “Ha77i ta shempoy daro un7etis; yaatin woygo? ‘Ta Aawaw, tana ha saatepe ashsharki’ yaago? Akay, taani yiday waaye ekanaasa.
JOH 12:28 Ta Aawaw, ne sunthaa boncha” yaagis. He wode salope, “Taani ta sunthaa bonchas; zaaradaka bonchana” giya qaalay yis.
JOH 12:29 He bessan eqida daro asay he qaala si7idi, “Hessi dada” yaagidosona. Harati qassi, “Kiitanchoy iyaw odis” yaagidosona.
JOH 12:30 Yesuusi zaaridi entako, “Ha qaalay hinte gisho yisipe attishin, ta gisho gidenna.
JOH 12:31 Ha alamey pirdetiya wodey ha77i; ha alamiya haareysi ha77i kare holetana.
JOH 12:32 Qassi taani sa7ape dhoqu oosetida wode asa ubbaa taako ehana” yaagis.
JOH 12:33 I hessa giday ay mela hayqo hayqaneko entaw qoncisanaasa.
JOH 12:34 Daro asay zaaridi, “Nu higgey Kiristoosi merinaw de7eysa odees. Yaatin, neeni woygada, ‘Asa Na7ay dhoqu gaanaw bessees’ gay? ‘I, Asa Na7ay oonee?’ ” yaagidosona.
JOH 12:35 Yesuusi, “Poo7oy hintera guutha wode gam7ana. Hintew dhumonna mela poo7oy de7ishin, poo7uwan hemetite. Dhuman hemetiya asi aw biyako erenna.
JOH 12:36 Poo7o nayta gidana mela poo7oy de7ishin poo7uwa ammanite” yaagis. Yesuusi hessa odetidaape guye bidi entafe geemmis.
JOH 12:37 I hessa mela malaatata enta sinthan oothinka ammanibookona.
JOH 12:38 Nabiya Isayaasi, “Godaw, nu markatethaa ooni ammanidee? Goday ba wolqaa ooddes qoncisidee?” Gidaysi tuma gidana mela enti iya ammanibookona.
JOH 12:39 Qassika Isayaasi, “Enta ayfey xeellonna mela, enta wozanay akeekona mela, enti Xoossaako simmin, I enta pathonna mela, Xoossay enta ayfiya qooqisis. Enta wozanaa minthis” gida gisho enti ammananaw danda7ibookona.
JOH 12:41 Isayaasi hessa giday, Yesuusa bonchuwa be7ida gishonne iyabaa odida gishosa.
JOH 12:42 Gidikoka, Ayhudeta halaqatapeka daroti Yesuusa ammanidosona. Shin Farsaaweti bantana Ayhudeta Woosa Keethafe kessoosona gidi yayyida gisho ammanida gidi qoncen markatibookona.
JOH 12:43 Hessa enti oothiday, Xoossan eretanaysafe aathidi asan eretanaysa dosida gishosa.
JOH 12:44 Yesuusi ba qaala dhoqu oothidi, “Tana ammaniya oonika tana kiittidaysaka ammaneesipe attishin, ta xalaala ammanena.
JOH 12:45 Tana be7iya oonika tana kiittidaysaka be7ees.
JOH 12:46 Tana ammaniya ubbay dhuman doonna mela taani poo7o gidada alamiya yas.
JOH 12:47 Ta qaala si7idi kiitetonna oonaka taani pirdike. Ayis giiko, taani alamiya ashshanaw yasipe attishin, pirdanaw yabiike.
JOH 12:48 Tana ixeysanne ta qaala ekonna oonaka pirdeysi de7ees. Taani odida qaalay wursetha gallas he uraa pirdana.
JOH 12:49 Ayis giiko, taani hessa taape odike, shin tana kiitida ta Aaway taani gaanaysanne odanaysa kiittis.
JOH 12:50 Qassi iya kiitay merinaa de7o gideysa taani erayis. Hessa gisho, taani odeysi ta Aaway tana oda gidaysa” yaagis.
JOH 13:1 Paasika bonchiya gallasay gakanaape sinthatidi ha alamiya aggidi Aawako biya wodey gakidaysa Yesuusi eris. Ha alamiyan de7iya ba asaa ubba wode dosis; wursethi gakanawuka enta dosis.
JOH 13:2 Yesuusaranne iya tamaaretara issife kaho moosona. Hessafe kase Xalahey Simoona na7aa Asqoroota Yihudi Yesuusa aathidi immanaada iya wozanan iita qofa wothis.
JOH 13:3 Yesuusi Aaway ubbaba iya kushen wothidaysa, I Xoossaa matape yidaysanne simmidi iyako baanaysa eris.
JOH 13:4 Yesuusi gayta bollafe dendidi bolla bagga ma7uwa qaari wothidi, pooxa ekidi ba xeessan marxafis.
JOH 13:5 Hessafe guye, haathe meecha miishen tigidi, ba tamaareta tohuwa meeccis; qassi ba xeessan dancida pooxan quchis.
JOH 13:6 Yesuusi Simoona Phexroosako yaa wode Phexroosi, “Godaw, ne ta tohuwa meeccanee?” yaagis.
JOH 13:7 Yesuusi zaaridi iyako, “Taani ootheysa ne ha77i eraka, shin guyepe akeekana” yaagis.
JOH 13:8 Yaatin, Phexroosi, “Ne ta tohuwa ubbaraka meeccaka” yaagis. Yesuusi iyako, “Taani ne tohuwa meecconna ixiko newunne tawunne issifetethi baawa” yaagis.
JOH 13:9 Phexroosi Yesuusako, “Godaw, yaatiko, ta tohuwa xalaala gidonashin ta kushiyanne ta huuphiya meecca” yaagis.
JOH 13:10 Yesuusi zaaridi, “Bolla meecetida oonika tohope haraba meecetanaw koshshenna; iyaw ubbasoy geeshshi. Hinte geeshshi, shin ubbay geeshshi gideketa” yaagis.
JOH 13:11 Yesuusi bana aathidi immana uray ooneko eriya gisho, “Hinte ubbay geeshshi gideketa” yaagis.
JOH 13:12 Enta tohuwa meeccidaape guye, Yesuusi ba ma7uwa zaari ma7is. Simmi gayta bolla uttidi entako, “Taani hintew oothidaysa akeeketii?
JOH 13:13 Hinte tana astamaarenne Godaa geeta; taani hinte geysa gidiya gisho lo77o gideta.
JOH 13:14 Taani hintew Godanne astamaare gidashe hinte tohuwa meecciko hinteka issoy issuwas hessada oothanaw bessees.
JOH 13:15 Hiza, taani hintew oothidaysada hinteka oothana mela hintew leemiso gidas.
JOH 13:16 Taani hintew tuma odayis; aylley ba godaape, kiitetidaysi kiittidaysafe aadhenna.
JOH 13:17 Hinte hessa eridi oothiyaba gidiko anjetidaysata.
JOH 13:18 “Taani hintena ubbaa giike; taani dooridaysata erayis. Shin Geeshsha Maxaafan, ‘Ta barsidaysi ta kushiya saxis’ geetetidaysi tuma gidanaw bessees.
JOH 13:19 ‘Taani Tana Gideysa’ hinte ammanana mela hessi hananaape sinthatada hintew odayis.
JOH 13:20 Taani hintew tuma odayis; taani kiitida oonaka mokiya uray tana mokees. Tana mokiya oonika tana kiittidaysa mokees” yaagis.
JOH 13:21 Yesuusi hessa odidaape guye, ba wozanan daro un7etidi, “Taani hintew tuma odayis; tana hintefe issoy aathidi immana” gidi qoncisidi odis.
JOH 13:22 I oodeba odiyako iya tamaaretas eretonna ixin issoy issuwa xeellidosona.
JOH 13:23 Iya tamaaretape issoy, Yesuusi doseysi, Yesuusa matan uttis.
JOH 13:24 Hessa gisho, Simoon Phexroosi iya qam7otidi, “I oona giyako ane oycha” yaagis.
JOH 13:25 Hessa gisho, he tamaarey Yesuusako shiiqidi haythan, “Godaw, I oonee?” yaagis.
JOH 13:26 Yesuusi zaaridi, “Taani uythaa woxen tushada barseysa” yaagis. Qassi uythaa menthi ekidi, woxen tushidi, Simoona na7aa Asqoroota Yihuda barsis.
JOH 13:27 Yihudi uythaa baaridaape guye, Xalahey ellesidi Yihudan gelis. Yesuusi iyako, “Neeni oothanaw qopidaba ellesada ootha” yaagis.
JOH 13:28 Shin gayta bolla uttidaysatape oonika Yesuusi hessa ayis iyako gidaako eribeenna.
JOH 13:29 Yihudi miishe oykiya gisho, iya tamaaretape issoti issoti Yesuusi iya, “Paasika bonchiya gallasaas bantaw koshshiyaba shamma woyko manqotas muxaata imma gis” yaagidi qopidosona.
JOH 13:30 Yihudi uythaa baarida mela ellesidi kare keyis. He wode sa7i qamma.
JOH 13:31 Yihudi kare keydaape guye, Yesuusi, “Ha77i Asa Na7ay bonchetis; Xoossayka iya baggara bonchetis.
JOH 13:32 Xoossay iya baggara bonchetiko I ba huuphen Asa Na7aa bonchana; qassi I hessa ellesidi oothana.
JOH 13:33 Ta nayto, taani hintera daro wode gam7ike. Hinte tana koyana, shin taani Ayhudetas odidaysa mela, ‘Hinte taani biya bessaa baanaw danda7eketa.’
JOH 13:34 Taani hintew immiya ooratha kiitay haysa; issoy issuwa dosite. Taani hintena dosidaysada hinte issoy issuwa dosanaw bessees.
JOH 13:35 Hinte issoy issuwara dosetiko hinte ta tamaare gideysa asa ubbay erana” yaagis.
JOH 13:36 Simoon Phexroosi Yesuusako, “Godaw, neeni aw bay?” yaagis. Yesuusi zaaridi, “Taani biya bessaa neeni ha77i kaallanaw danda7aka, shin guyepe tana kaallana” yaagis.
JOH 13:37 Phexroosi, “Godaw, taani nena ha77i kaallanaw ayis danda7ikina? Taani ne gisho, hayqanawuka giiga uttas” yaagis.
JOH 13:38 Yesuusi zaaridi, “Ta gisho hayqanaw tuma giiga uttadii? Taani new tuma odayis; kuttoy waassanaape sinthe neeni tana heedzu toho kaddana” yaagis.
JOH 14:1 Yesuusi ba tamaaretako, “Hinte wozanay un7etofo, Xoossaa ammanite, tanaka ammanite.
JOH 14:2 Ta Aawa keethan daro bessi de7ees. Taani hintew besse giigisanaw bayis. Hessa gidonnaako taani hintew odikeshin.
JOH 14:3 Taani bada besse giigisidaape guye, taani de7iyasuwan hinte daana mela simma yada hintena taako efana.
JOH 14:4 Hinte taani biya bessaa efiya ogiya ereeta” yaagis.
JOH 14:5 Yaatin, Toomasi, “Godaw, neeni biya bessaa nuuni eroko; ogiya waatidi eranaw danda7anee?” yaagis.
JOH 14:6 Yesuusi zaaridi, “Ogey, tumaynne de7oy tana. Ta baggara gidonna ixiko oonika ta Aawako baanaw danda7enna.
JOH 14:7 Hinte tana eriyaba gidiyako, ta Aawaka erana. Shin hizape doomidi hinte iya ereetanne iya be7ideta” yaagis.
JOH 14:8 Filphoosi Yesuusako, “Godaw, Aawa nuna bessa; hessi nuus gidana” yaagis.
JOH 14:9 Yesuusi zaaridi, “Taani haysa mela wode hintera de7inka tana erikii? Tana be7ida uray Aawaka be7is. Yaatin, neeni woygada, ‘Aawa nuna bessa’ gay?
JOH 14:10 Taani Aawara issino gideysanne Aawayka taara issino gideysa neeni ammanikiyee? Taani hintew odiya qaala taani taape odike, shin tanan de7iya Aaway ba oosuwa oothees.
JOH 14:11 Taani Aawan de7eysanne Aawayka tanan de7eysa ammanite. Hessa ammanonna ixiko ta oothiyabatan tana ammanite.
JOH 14:12 “Taani hintew tuma odayis; tana ammaniya uray taani oothiya oosuwape aadhiya ooso oothana. Taani Aawako biya gisho tana ammaniya oonika haysafe aadhiya ooso oothana.
JOH 14:13 Aaway Na7aa baggara bonchetana mela ta sunthan hinte woossiya ubbaa ta hintew oothana.
JOH 14:14 Ta sunthan aybibaaka hinte oychiko ta hintew oothana.
JOH 14:15 “Hinte tana dosiko ta kiitaa naagana.
JOH 14:16 Taani Aawa woossana; hintera merinaw daana mela minthetheysa hintew immana.
JOH 14:17 He Ayyaanay Xoossaa tumaa qoncisees. Ha alamiya asay iya be7onna gishonne eronna gisho iya ekanaw danda7okona. Shin I hintera de7iya gishonne hinte giddon daana gisho hinte iya ereeta.
JOH 14:18 “Taani hintena aayiya aawu bayna na7ada hinte xalaala aggike; simmada hinteko yaana.
JOH 14:19 Guutha wodepe guye alamey tana zaari be7enna, shin hinte be7ana. Taani de7on de7iya gisho hinteka de7on de7ana.
JOH 14:20 Taani ta Aawan, hinte tanan, qassi taani hintenan de7eysa hinte he gallas erana.
JOH 14:21 “Ta kiitaa ekidi naagey tana dosees. Tana doseysa ta Aawayka dosees; taanika iya dosayis; taani iyaw qoncana” yaagis.
JOH 14:22 Asqoroota Yihuda gidonna Yihudi Yesuusako, “Godaw, neeni waatada alamiyas gidonashin nuus nena qoncisanee?” yaagis.
JOH 14:23 Yesuusi zaaridi, “Tana dosiya oonika ta qaalas kiitetana. Ta Aaway iya dosana. Qassi ta Aawaynne taani iyako yidi iyara daana.
JOH 14:24 Tana dosonna oonika ta qaalas kiitetenna. Hinte si7iya qaalay tana kiitida Aawabape attishin, tabaa gidenna.
JOH 14:25 “Taani hintera ha77i de7ashe hessa hintew odas.
JOH 14:26 Shin Aaway ta sunthan kiittana minthethiya Geeshsha Ayyaanay, hintena ubbaba tamaarsana. Taani hintew odida ubbaa I hintena hassayisana.
JOH 14:27 “Sarotethaa hintew immana. Taani ta sarotethaa hintew immana. Ta immiya sarotethay alamey immiya sarotethaa mela gidenna. Hessa gisho, un7etofite, yayyofite.
JOH 14:28 ‘Taani baana, shin simmada hinteko yaana’ gidaysa si7ideta. Hinte tana tuma dosiyaba gidiyako ta Aaway taape aadhiya gisho taani iyako beysan hinte ufaytana.
JOH 14:29 Hessi haniya wode hinte ammanana mela hessi hanonna de7ishin sinthatada taani hintew odas.
JOH 14:30 “Ha alamiya haareysi yaa gisho hizape guye hintera daro odetike. Tana I aykoka oothanaw danda7enna.
JOH 14:31 Shin taani Aawa doseysa alamey erana mela ta Aaway tana kiittidaysa ubbaa oothayis. Dendite; haysafe boos.
JOH 15:1 “Taani tuma woyne ubba. Goshshanchoy ta Aawa.
JOH 15:2 I, ta bolla de7iya ayfe ayfonna tashiya ubbaa karees. Ayfiya tashiya kasepe aadhidi ayfana mela he tashiya I giigisana.
JOH 15:3 Taani hintew odida qaala gisho hinte geeshshi.
JOH 15:4 Tanan de7ite; taanika hintenan de7ana. Woyne tashey ubbara doona ixiko he tashey barka ayfe ayfanaw danda7enna. Hessadaka, hinteka tanan de7onna ixiko ayfe ayfanaw danda7eketa.
JOH 15:5 “Taani woyne ubba; hinte tasheta. Tanan de7eysinne taani iyan de7eysi, I daro ayfe ayfana. Ta bayna hinte xalaala aykoka oothanaw danda7eketa.
JOH 15:6 Tanan doonna uray tashiyada karen yegitidi melana. Hessa mela tasheti shiiqidi taman yegetana, xuugetana.
JOH 15:7 Hinte tanan de7iko, ta qaalayka hintenan de7iko, hinte koyiyabay ayba gidikoka woossite; hinte ekana.
JOH 15:8 Hinte daro ayfe ayfiya ta tamaare gidiko, hessan ta Aaway bonchetana.
JOH 15:9 Aaway tana doseysada taanika hintena dosayis; ta siiquwan de7ite.
JOH 15:10 Taani ta Aawa kiitaa naagada iya siiquwan de7idaysada hinteka ta kiitaa naagiko ta siiquwan daana.
JOH 15:11 “Ta ufaysay hintenan gidana melanne hinte ufaysay polo gidana mela taani hintew hessa odas.
JOH 15:12 Ta kiitay haysa; taani hintena dosidaysada hinteka issoy issuwa dosite.
JOH 15:13 Ba shempuwa ba laggiyas aathidi immeysafe aadhiya gita siiqoy baawa.
JOH 15:14 Taani hintena kiittidaba ubbaa oothiko hinte dosetidaysata.
JOH 15:15 “Aylley ba goday oothiyaba eronna gisho taani hintena hizape guye aylleta giike. Shin ta Aawape si7ida ubbaa taani hintew odida gisho hintena dosetidaysata gas.
JOH 15:16 Taani hintena doorasipe attishin, hinte tana dooribeketa. Hinte bidi dhayonna ayfe ayfana mela taani hintena shuumas. Yaaniko, ta Aaway hinte ta sunthan woossidaba ubbaa immana.
JOH 15:17 Ta kiitay haysa: issoy issuwa dosite.
JOH 15:18 “Alamey hintena ixiko koyrottidi tana ixidaysa akeekite.
JOH 15:19 Hinte alamiyaba gidiyako alamey hintena dosana. Shin taani hintena alamepe doorida gishonne hinte alamiyaba gidonna gisho alamey hintena ixees.
JOH 15:20 ‘Aylley ba godaape aadhenna’ gada taani hintew odidaysa akeekite. Enti tana gooddidaba gidiko hintenaka gooddana. Enti ta qaala naagidaba gidiko hinte qaalaka naagana.
JOH 15:21 Shin enti tana kiittidaysa eronna gisho ha ubbaa ta gaason hinte bolla oothana.
JOH 15:22 Taani yada entaw odonnaba gidiyako nagara gidenna. Shin ha77i enti oothida nagaraas gaasoyabay baawa.
JOH 15:23 Tana ixeysi ta Aawaka ixees.
JOH 15:24 Oonika oothiboonna ooso ta enta giddon oothaboonnaba gidiyako entaw nagara gidonna attana. Shin ha77i enti taani oothida oosuwa be7idi tanaka ta Aawaka ixidosona.
JOH 15:25 Shin enta higgiyan, ‘Tana coo ixidosona’ geetetidi xaafetidaysi poletana mela hessi hanis.
JOH 15:26 “Aawape yaa tumaa qoncisiya Ayyaana ta hintew kiittana. I hintena minthethana, tabaa markatana.
JOH 15:27 Hinteka koyrope doomidi taara de7iya gisho tabaa markatana.
JOH 16:1 “Taani hessa hinte ammanoy dhayonna mela hintew odas.
JOH 16:2 Enti hintena ayhude woosa keethatape kessi yeddana. Hessadaka, hintena wodhiya oonika Xoossi koyaba oothiya daaniya wodey yaana.
JOH 16:3 Enti hessa hinte bolla oothey tana woyko Aawa eronna gishosa.
JOH 16:4 Shin enti hessa hinte bolla oothiya wodey gakiya wode taani hintew odidaysa hinte akeekana mela taani hintew haysa odas. “Sinthatada taani haysa hintew odonna gam7iday ta hintera de7iya gishosa.
JOH 16:5 Shin ha77i taani tana kiittidaysako bayis; hintefe oonika, ‘Awu bay?’ gidi tana oychey baawa.
JOH 16:6 Shin taani hessa odida gisho, hinte wozanan daro azzanoy de7ees.
JOH 16:7 Shin taani hintew tuma odayis; taani biiko hintew lo77o. Ayis giiko, taani boonna ixiko minthetheysi hinteko yeenna. Shin taani biiko iya hinteko yeddana.
JOH 16:8 Minthetheysi yidi, nagaraba, xillotethabaanne pirdaba ha alamiya asaa erisana.
JOH 16:9 Nagarabay, asay tana ammanonna gishosa.
JOH 16:10 Xillotethabay, taani Aawako biya gishonne hinte tana zaari be7onna gishosa.
JOH 16:11 Pirdabay, qassi alamiya haareysi pirdetida gishosa.
JOH 16:12 “Taani hintew odiyabay darobay de7ees, shin ha77i hintew gelenna.
JOH 16:13 Tuma Ayyaanay yaa wode hintena tumatethaa ubbaako kaalethana. I si7idaba odeesipe attishin, baape aybibaaka odenna. Qassi sinthafe yaanaba hintew I odana.
JOH 16:14 I taw de7eysafe ekidi hintew odiya gisho I tana bonchana.
JOH 16:15 Aawas de7iyaba ubbay tabaa; ‘Minthetheysi taw de7eysafe ekidi hintew odana’ taani giday hessasa.
JOH 16:16 “Guutha wodepe guye tana be7eketa; qassi guutha wodepe guye hinte tana be7ana” yaagis.
JOH 16:17 Iya tamaaretape issoti issoti banta giddon, “Guutha wodepe guye hinte tana be7eketa; qassi guutha wodepe guye hinte tana be7ana; qassika taani Aawako bayis guussay woy guussee?” yaagidosona.
JOH 16:18 “Guutha wodepe guye geysi woy guussee? I ay odetiyako nuus eretenna” yaagidosona.
JOH 16:19 Enti bana oychanaw koyeysa Yesuusi eridi, “Taani, ‘Guutha wodepe guye tana be7eketa; qassi guutha wodepe guye hinte tana be7ana’ gidaysas hinte issoy issuwa oycheetii?
JOH 16:20 Taani hintew tuma odayis; hinte yeekananne afuxana, shin ha alamey ufaytana. Ha77i hinte azzanana, shin hinte azzanoy ufaysan laametana.
JOH 16:21 Issi maccasiya na7a yelana haniya wode ba yelo wodey gakida gisho hirgawusu. Shin na7a yelidaape guye na7i ha alamiyan yeletida ufaysaa gisho ba un7aa dogawusu.
JOH 16:22 Hessadaka, hinteka hinte wozanan azzaneeta, shin taani hintena zaarada be7ana. Hinte wozanay daro ufaytana; he ufaysaa oonika hintefe ekenna.
JOH 16:23 “He gallas hinte tana aybibaaka woosseketa. Taani hintew tuma odayis; hinte ta sunthan woossiyaba ubbaa Aaway hintew immana.
JOH 16:24 Ha77i gakanaw ta sunthan aybibaaka woossibeketa. Hinte ufaysay polo gidana mela Xoossaa woossite; hinte ekana.
JOH 16:25 “Taani ha77i gakanaw hintew leemison odas, hizape taani leemison odonna wodey yaana. Shin Aawaba taani hintew qoncen odana.
JOH 16:26 He gallas hinte ta sunthan Aawa woossana; hinte gisho taani Aawa woossike.
JOH 16:27 Ayis giiko, Aaway ba huuphen hintena dosees. Hinte tana dosiya gishonne taani Aawa matape yidaysa ammanida gisho, I hintena dosees.
JOH 16:28 Taani Aawa matape ha alamiya yas; qassi alamiya aggada Aawako baana” yaagis.
JOH 16:29 Iya tamaareti zaaridi, “Heko, ha77i neeni qoncen odaasa; leemison aykoka odaka.
JOH 16:30 Neeni ubbaba ereysa nuuni ha77i eroos; qassi nena oonika oychana mela neeni koyaka. Hessi nuna neeni Xoossafe kiitetidaysa ammanthees” yaagidosona.
JOH 16:31 Yaatin, Yesuusi zaaridi entako, “Ha77i ammanetii?
JOH 16:32 Heko, hinte, hinte soo hinte soo laaletiya wodeynne ta xalaala yeggi aggidi baqatiya wodey yaana; ha77ika yikichis. Shin Aaway taara de7iya gisho taani ta xalaala gidike.
JOH 16:33 Hinte taara de7ishe saroy hintew daana mela taani hessa odas. Alamen de7ishe hinte waayetana. Shin minnite; taani alamiya xoonas” yaagis.
JOH 17:1 Yesuusi hessa odidaape guye pude salo xeellidi, haysada yaagis: “Aawaw, saatey gakis; ne Na7ay nena bonchana mela neeni ne Na7aa boncha.
JOH 17:2 Neeni iyaw immida ubbaas I merinaa de7uwa immana mela asa ubbaa bolla iyaw maata immadasa.
JOH 17:3 Merinaa de7oy, nena, issi tuma Xoossaanne ne kiitida Yesuus Kiristoosa ero.
JOH 17:4 Neeni ta oothana mela immida oosuwa polada nena sa7an bonchas.
JOH 17:5 Ha77ika, Aawaw, alamey medhetanaape sinthe ne matan taw de7iya bonchuwan tana boncha.
JOH 17:6 “Alamiya asaape neeni taw immidaysata nena erisas. Enti neyisata; neeni enta taw immadasa. Enti ne qaalaska kiitetidosona.
JOH 17:7 Neeni taw immida ubbabay neepe yidaysa enti ha77i eroosona.
JOH 17:8 Neeni taw immida qaala taani entaw immas; entika he qaala ekidosona. Taani ne matape yidaysi tuma gideysa eridi neeni tana kiittidaysaka ammanidosona.
JOH 17:9 “Taani entaw woossayis. Enti neyisata gidiya gisho neeni taw immida asaas woossaysipe attishin, alamiyas woossike.
JOH 17:10 Taw de7iya ubbabay nebaa; new de7iya ubbayka tabaa. Taani enta baggara bonchetas.
JOH 17:11 Taani hizape guye alamiyan de7ike; enti alamen de7oosona. Taani ha77i neeko bayis. Geeshsha Aawaw, ha neeni taw immidaysati neeranne taara issino gididaysada enti issino gidana mela enta ne taw immida ne sunthan naaga.
JOH 17:12 Taani entara sa7an de7ashe, ne taw immida ne sunthaa wolqan enta naagas. Geeshsha Maxaafay gidaysi poletana mela dhayoy bessiya uraape attishin, entafe hari oonika dhaybeenna.
JOH 17:13 “Ha77i taani neeko bayis. Ta ufaysay enta wozanan polo gidana mela haysa taani alamen de7ashe odayis.
JOH 17:14 Taani entaw ne qaala immas. Taani alamiyape gidonaysada, entika alamiyape gidonna gisho, alamey enta ixis.
JOH 17:15 Neeni Xalahepe enta naagana melape attishin, alamepe kessana mela woossike.
JOH 17:16 Taani alamepe gidonaysada entika alamepe gidokona.
JOH 17:17 Neeni ne tumatethan enta nebaa ootha; ne qaalayka tuma.
JOH 17:18 Neeni tana alamiya kiitidaysada taanika enta alamiya kiittas.
JOH 17:19 Qassi enti tuma nebaa gidana mela enta gisho taani ta huuphiya new immayis.
JOH 17:20 “Taani enta xalaalas gidonashin enti qaala odin, tana ammananaysataska woossayis.
JOH 17:21 Enti ubbay issino gidana mela taani woossayis. Aawaw, ne tanan de7eysada, qassi ta nenan de7eysada enti nunan daana mela woossayis. He wode neeni tana kiittidaysa alamey ammanana.
JOH 17:22 Neeninne taani issino gideysada, enti issino gidana mela, neeni tana bonchidaysada, taanika enta bonchas.
JOH 17:23 Taani entan, neeni tanan de7eysada enti polo issino gidana mela nena woossayis. Hessika, ne tana kiittidaysanne ne tana dosida dosuwan enta siiqidaysa alamey eran melasa.
JOH 17:24 “Aawaw, neeni taw immidaysati taani de7iyasuwan taara daana mela koyayis. Alamey medhetanaape sinthe neeni tana dosida gisho, taw immida ta bonchuwa enti be7ana.
JOH 17:25 “Geeshsha Aawaw, alamey nena erenna, shin taani erayis. Qassi neeni tana kiittidaysa haysati eroosona.
JOH 17:26 Neeni tana siiqida siiqoy entanan daana mela, qassi taani entanan gidana mela, taani ne sunthaa enta erisas; sinthaska erisana” yaagis.
JOH 18:1 Yesuusi woosa ongidaape guye, ba tamaaretara Qediroona zangaara pinnidi, he bessan de7iya atakiltiya giddo gelidosona.
JOH 18:2 Yesuusi ubba wode ba tamaaretara yan shiiqiya gisho Yesuusa aathidi immida Yihudi he bessaa erees.
JOH 18:3 Hessa gisho, Yihudi paanose, xompe, tooranne gondalle oykida daro wotaadareta, kahine halaqatinne Farsaaweti kiitida Xoossa Keetha naagiya wotaadareta kaalethi ekidi, he bessaa bis.
JOH 18:4 Yesuusi bana gakana haniyaba ubbaa eridi, gaxa keyidi, “Oona koyeetii?” yaagis.
JOH 18:5 Enti zaaridi, “Naazirete Yesuusa koyoos” yaagidosona. I zaaridi, “Taani Yesuusa” yaagis. Yesuusa aathidi immida Yihudi yan entara eqis.
JOH 18:6 I, “Taani Yesuusa” gida wode enti guye shiiqidi, sa7an kundidosona.
JOH 18:7 Yesuusi qassika, “Oona koyeetii?” yaagidi oychis. Enti, “Naazirete Yesuusa koyoos” yaagidosona.
JOH 18:8 I zaaridi, “Taani Yesuusa gideysa hintew odas. Hiza, hinte tana koyaba gidiko haysata yeddite” yaagis.
JOH 18:9 I hessa giday, “Aawaw, neeni taw immidaysatape hari attoshin issuwaka dhaysabike” gidaysi poletana melasa.
JOH 18:10 Simoon Phexroosas mashshay de7ees. I he mashsha shoddidi kahine halaqaa aylliyas ushacha haytha shocidi, qanxi yeggis. He aylliya sunthay Malkosa.
JOH 18:11 Yesuusi Phexroosako, “Ne mashsha shoohuwan zaara. Ta Aaway taw immida xuu7ape taani uyonnabaa new daanii?” yaagis.
JOH 18:12 Roome wotaadaretinne enta halaqay Xoossa Keetha naagiya wotaadaretara issife Yesuusa oykidi qachidosona.
JOH 18:13 Koyro Yesuusa Haannako efidosona. Haanni he laythi kahine halaqa gidiya Qayyaafa bollo.
JOH 18:14 Qayyaafi, “Asa ubbaa gisho, issi asi hayqiko lo77o” gidi kase Ayhudeta zoridaysa.
JOH 18:15 Simoon Phexroosinne hara issi tamaarey Yesuusa kaallidi bidosona. Kahine halaqay he hara tamaariya loythi erees. Hessa gisho, I Yesuusara kahine halaqaa zabbaa gelis.
JOH 18:16 Shin Phexroosi karera dirsaa pengen eqis. Kahine halaqay eriya hara tamaarey kare keyidi, pengiya naagiya na7ees odidi, Phexroosa gaathi gelsis.
JOH 18:17 Pengiya naagiya na7iya Phexroosako, “Neeni, he addiya tamaaretape issuwa gidikii?” yaagasu. Phexroosi zaaridi, “Akay, taani gidike” yaagis.
JOH 18:18 Sa7ay meegiya gisho, aylletinne naageysati xiifa tama eethidi, kayoosona. Phexroosika entara eqidi tama kayees.
JOH 18:19 Kahine halaqay Yesuusa, iya tamaaretabaanne iya timirtiyaba oychis.
JOH 18:20 Yesuusi zaaridi, “Taani asa ubbaas qoncen odas. Taani Ayhude ubbay shiiqiya ayhude woosa keethaninne xoossa keethan ubba wode tamaarsas. Geeman aykoka odabike.
JOH 18:21 Yaatin, neeni tana ayis oychay? Ta odishin si7ida asaa oycha. He asay taani odidaysa eroosona” yaagis.
JOH 18:22 Yesuusi hessa gida wode, he bessan eqida wotaadaretape issoy Yesuusa baqidi, “Kahine halaqaas haysada zaaray?” yaagis.
JOH 18:23 Yesuusi zaaridi, “Taani iitabaa odidaba gidiko haysan de7iya asa ubbaa sinthan oda. Shin taani tuma odidaba gidiko tana ayis baqay?” yaagis.
JOH 18:24 Hessa gisho, Haanni, Yesuusi qashetida mela kahine halaqaa Qayyaafako yeddis.
JOH 18:25 Phexroosi yan eqidi, tama kayishin, harati iyako, “Neeni ha addiya tamaaretape issuwa gidikii?” yaagis. Phexroosi zaaridi, “Akay, taani gidike” yaagidi kaddis.
JOH 18:26 Kahine halaqaa aylletape issoy, Phexroosi haythaa qanxida addiya dabboy, Phexroosako, “Taani nena iyara atakiltiya giddon be7abikina?” yaagidi oychis.
JOH 18:27 Phexroosi qassika kaddis; ellesidi kuttoy waassi aggis.
JOH 18:28 Wonta guura, enti Yesuusa Qayyaafa soope deriya haareysa ooso keethi eki efidosona. Ayhudeti Paasika Ba7aale kathaa maanaw bantana tunisonna mela deriya haareysa ooso keethaa gelibookona.
JOH 18:29 Hessa gisho, Philaxoosi entako kare keyidi, “Ha addiya ayis mootetii?” yaagis.
JOH 18:30 Enti, “I iita oothonnaba gidiyako nuuni iya neeko ehoko” yaagidosona.
JOH 18:31 Philaxoosi zaaridi, “Hinte iya eki efidi, hinte higgey geysada iya bolla pirdite” yaagis. Ayhudeti, “Oonaka wodhiya maati nuus baawa” yaagidosona;
JOH 18:32 Hessi haniday Yesuusi ay mela hayqo hayqaneko erisanaw odidaysi poletanaasa.
JOH 18:33 Philaxoosi ba ooso keetha zaari gelidi, Yesuusa xeegidi, “Neeni Ayhude kawo?” yaagidi oychis.
JOH 18:34 Yesuusi Philaxoosa, “Ha oysha neeni neepe oychaye woyko hara asi new tabaa odidee?” yaagis.
JOH 18:35 Philaxoosi zaaridi, “Ta Ayhude asee? Ne asaynne kahine halaqati nena taw aathidi immidosona. Ne ay oothadii?” yaagis.
JOH 18:36 Yesuusi, “Ta kawotethay ha alamiyana gidenna. I haysan gidiyako ta Ayhudeta halaqatas aadhada imetonna mela ta aylleti taw oletana. Shin ta kawotethay ha alamiyana gidenna” yaagis.
JOH 18:37 Hessa gisho, Philaxoosi Yesuusako, “Yaatin, neeni kawoyee?” yaagidi oychis. Yesuusi zaaridi, “Tuma ta kawo gideysa ne gadasa. Taani yeletidaynne ha alamiya yiday tumatethaas markatanaasa. Tumaa bagga gidida oonika taani geysa si7ees” yaagis.
JOH 18:38 Philaxoosi, “Tumi aybee?” yaagis. Philaxoosi hessa gidaape guye Ayhudetako kare keyidi, “Taani iyape ay iitaka demmabike.
JOH 18:39 Shin Paasika Ba7aale gallas, issi ase hintew qashope billiya meezey de7ees. Taani hintew Ayhudeta kawa billana mela koyeetii?” yaagis.
JOH 18:40 Enti zaaridi, banta qaala dhoqu oothidi, “Barbaana billafe attishin, iya gidenna” yaagidosona. Shin Barbaani panga.
JOH 19:1 Hessafe guye, Philaxoosi Yesuusa garaafisis.
JOH 19:2 Wotaaddareti aguntha kallacha medhidi iya huuphen wothidosona. Qassi zo7o ma7o iya mayzidosona.
JOH 19:3 Iyako shiiqidi, “Ayhude kawaw, merinaw kawota” yaagidi iya baqidosona.
JOH 19:4 Philaxoosi qassika kare keyidi, Ayhudetako, “Heko, taani iyape ay iitaka demmaboonnaysa hinte erana mela iya hinteko kare kessana” yaagis.
JOH 19:5 Hessafe guye, Yesuusi aguntha kallacha ba huuphen wothidi, zo7o ma7o ma7idi, kare keyis. Philaxoosi Ayhudetako, “Uraa haysa be7ite” yaagis.
JOH 19:6 Kahine halaqatinne Xoossa Keetha naageysati iya be7ida wode, banta qaala dhoqu oothidi, “Masqaliya bolla kaqa! Kaqa!” yaagidosona. Philaxoosi entako, “Hinte iya efidi, masqaliya bolla kaqite. Taani iyape ay iitaka demmabike” yaagis.
JOH 19:7 Ayhudeti zaaridi, “Nuus higgey de7ees. I bana Xoossaa na7a oothida gisho nu higgiyatho I hayqanaw bessees” yaagidosona.
JOH 19:8 Philaxoosi hessa si7ida wode kaseysafe daro yayyis.
JOH 19:9 Qassika Philaxoosi ba ooso keethi simmi gelidi Yesuusako, “Neeni awupe yadii?” yaagidi oychis. Shin Yesuusi iyaw aykoka zaaribeenna.
JOH 19:10 Hessa gisho, Philaxoosi, “Taw odikii? Nena billanaw woyko masqaliya bolla kaqanaw taw maati de7eysa erikii?” yaagis.
JOH 19:11 Yesuusi, “Xoossay new maata immiboonnaba gidiyako ta bolla maati new deennashin. Hessa gisho, tana new aathidi immidaysi aadhiya nagara oothis” yaagis.
JOH 19:12 Philaxoosi hessa si7ida wode Yesuusa billanaw oge koyis. Shin Ayhudeti banta qaala dhoqu oothidi, “Neeni iya billiyabaa gidiko Kawa Qeesare bagga gidaka. Bana kawo giya oonika Qeesare morke” yaagidosona.
JOH 19:13 Philaxoosi hessa si7idi Yesuusa kare kessis. Yaatidi, “Loche Shuchi” geetetiya bessan pirda oydiyan uttis. Ibraawetho doonan he bessay “Gabate” guussu.
JOH 19:14 He gallasay Paasika Ba7aale bonchanaw giigetetha gallas. Sa7ay usupun saate heera. Philaxoosi Ayhudetako, “Hinte kawa haysa be7ite” yaagis.
JOH 19:15 Ayhudeti banta qaala dhoqu oothidi, “Digga! Digga! Masqaliya bolla kaqa” yaagidosona. Philaxoosi zaaridi, “Hinte kawa taani masqaliya bolla kaqanaysa koyeetii?” yaagidi oychis. Kahine halaqati, “Qeesarepe hara kawoy nuus baawa” yaagidosona.
JOH 19:16 Hessafe guye, enti Yesuusa masqaliya bolla kaqana mela Philaxoosi entaw aathidi immis. Enti Yesuusa oykidi efidosona.
JOH 19:17 Yesuusi ba masqaliya tookidi, “Huuphe guugge” geetetiya bessaa bis. “Huuphe guugge” guussay Ibraawetho doonan “Golgota” guussu.
JOH 19:18 Enti he bessan masqaliya bolla Yesuusa kaqidosona. Qassi iyara hara nam7u asata, issuwa ya baggara hankuwa ha baggara masqaliya bolla kaqidosona.
JOH 19:19 Philaxoosi, “Ayhudeta Kawa, Naazirete Yesuusa” giya xuufe xaafidi masqaliya bolla wothis.
JOH 19:20 Yesuusi masqaliya bolla kaqetida bessay katamas matan de7iya gisho, daro Ayhudeti he xuufiya nabbabidosona. Xuufey xaafetiday Ibraawetho doonan, Laatine doonaninne Girike doonana.
JOH 19:21 Hessa gisho, kahine halaqati Philaxoosako, “ ‘Ha addey bana Ayhude kawo yaagis’ gada xaafape attishin, ‘Ayhude kawo’ gada xaafopa” yaagidosona.
JOH 19:22 Yaatin, Philaxoosi, “Ta xaafidaysa xaafas” yaagidi zaaris.
JOH 19:23 Wotaaddareti masqaliya bolla iya kaqidaape guye, iya ma7uwa ekidi, oyddu bessan shaakidi, isso isso ekidosona. Yeda ma7etiya iya adussa ma7uwa ekidosona.
JOH 19:24 Wotaaddareti, “Oona gakaneeko, saama yegganaape attishin, ma7uwa peedhoko” yaagidosona. Hessi haniday Geeshsha Maxaafan, “Ta ma7uwa shaaki ekidosona; ta adussa ma7uwa bollaka saama yeggidosona” geetetidaysi poletana melasa. Hessa gisho, wotaadareti hessa oothidosona.
JOH 19:25 Shin Yesuusa masqaliya matan iya aayiya, iya aaye michiya, Qeliyoophe machiya Mayraamanne Magdela Mayraama eqidosona.
JOH 19:26 Yesuusi ba aayiwunne I dosiya tamaarey yan eqidaysata be7idi, ba aayeko, “Ta aaye, ne na7aa haysa be7a” yaagis.
JOH 19:27 Hessafe guye, he tamaariyako, “Ne aayiw hanno be7a” yaagis. He tamaarey iyo he wodepe doomidi baara daana mela soo efis.
JOH 19:28 Hessafe guye, Yesuusi ubbay ha77i poletidaysa eridi, Geeshsha Maxaafan xaafetidaysi poletana mela “Tana saamees” yaagis.
JOH 19:29 He bessan issi xugga kumetha caala woyney de7ees. Enti isponje he woyniyan yeggidi, hisoophe mitha xeeran wothidi, Yesuusa doonako shiishidosona.
JOH 19:30 Yesuusi woyniya ganxi be7idi, “Poletis” yaagis. Hessafe guye, ba huuphiya ziqi oothidi ba shempuwa immis.
JOH 19:31 He gallasay giigetetha gallas gidiya gishonne wontetha gallasay boncho Sambaata gidiya gisho, asata ahay masqaliya bolla Sambaata gallas pee7onna mela enta tohuwa menthidi, masqaliyape wodhisana mela Ayhudeti Philaxoosa woossidosona.
JOH 19:32 Hessa gisho, wotaadareti bidi, Yesuusara kaqetida nam7u asata tohuwa menthidosona.
JOH 19:33 Shin Yesuusako yida wode I hayqidaysa be7idi, iya tohuwa menthibookona.
JOH 19:34 Shin wotaadaretape issoy iya miya tooran caddin iiraka suuthinne haathi goggis.
JOH 19:35 Hinte ammanana mela hessa be7idaysi markatis. Iya markatethayka tuma. Qassi I odeysi tuma gideysa erees.
JOH 19:36 Hessi haniday Geeshsha Maxaafay, “Iya meqethatape issoyka meqenna” gidaysi poletana melasa.
JOH 19:37 Qassika Geeshsha Maxaafay hara bessan, “Enti banta caddidaysa be7ana” yaagees.
JOH 19:38 Hessafe guye, Armaate katamape yida Yoosefi Yesuusa aha ekanaw Philaxoosa woossis. Yoosefi Ayhudetas yayyida gisho qosan Yesuusa kaalleysa. Philaxoosi, “Eka” yaagis. Hessa gisho, Yoosefi bidi Yesuusa aha ekis.
JOH 19:39 Qassi Niqodimoosi hessafe kase Yesuusako qamma yidaysi, karbenne godare uuthara walaketida hastamanne issi kilo giraame gidiya shitto ekidi Yoosefara yis.
JOH 19:40 He nam7u asati Yesuusa aha ekidi, Ayhudeti aha xaaxiya maaran, shittora, moogo afilan xaaxidosona.
JOH 19:41 Yesuusi masqaliya bolla kaqetida bessan daro atakiltey de7ees. He atakiltiya giddon shuchafe woocetidi oosetida buroo oonika moogetiboonna ooratha duufoy de7ees.
JOH 19:42 He gongoloy matan de7iya gishonne Ayhudeti Sambaatas giigetiya gallas gidiya gisho, Yesuusa aha yan moogidosona.
JOH 20:1 Wogga wode wonta buroo geeyonna de7ishin, Magdela Mayraama, Yesuusi moogetida duufuwa bada shuchay he duufuwa doonape dendidaysa be7asu.
JOH 20:2 Simoon Phexroosakonne Yesuusi dosiya hanko tamaariyako woxa bada, “Duufuwape Godaa efidosona; iya awun wothidaako nu eroko” yaagasu.
JOH 20:3 Hessa gisho, Phexroosinne hanko tamaarey keyidi duufuwa bidosona.
JOH 20:4 Nam7ayka issife woxidosona, shin hanko tamaarey Phexroosape aadhidi sinthatidi duufuwa gakis.
JOH 20:5 He tamaarey hokidi, moogo afilaa be7is, shin duufuwan wodhibeenna.
JOH 20:6 Simoon Phexroosi iya kaalli yidi, duufuwan wodhidi moogo afilay yan de7eysa be7is.
JOH 20:7 Qassi Yesuusa huuphen xaaxetida afilay xaaxetida mela dumma issi bessan de7eysa be7is. He afilay dumma de7eesipe attishin, moogo afilara issife deenna.
JOH 20:8 He wode, sinthatidi duufuwa gakida hanko tamaarey geli be7idi ammanis.
JOH 20:9 Yesuusi hayqope dendanaw besseysa odiya Geeshsha maxaafaa qaala enti buroo akeekibokona.
JOH 20:10 Hessafe guye, iya tamaareti banta soo simmi bidosona.
JOH 20:11 Shin Mayraama he duufuwa doonan eqada yeekashe hokada duufuwa giddo xeellasu.
JOH 20:12 Bootha ma7o ma7ida nam7u kiitanchoti Yesuusa ahay zin7ida bessan issoy huuphesoora hankoy tohosoora uttidashin be7asu.
JOH 20:13 Enti iiko, “Maccasete, ayis yeekay?” yaagidi oychidosona. Iya, “Enti ta Godaa efidosona; enti awun wothidaako taani erike” yaagasu.
JOH 20:14 Hessa gidaape guye, iya guye simma xeelliya wode, Yesuusi yan eqidaysa be7asu. Shin I Yesuusa gididaysa erabuku.
JOH 20:15 Yesuusi iiko, “Maccasete, ayis yeekay? Oona koyay?” yaagidi oychis. Mayraama atakilte oosanchuwa daanin, “Godaw, ne ekidaba gidiko, iya awun wothidaako taw odarkii. Taani iya ekana” yaagasu.
JOH 20:16 Yesuusi iiko, “Mayraame” yaagis. Iya iyako simmada, Ibraawetho doonan “Rebuuni” yaagasu. Hessas birshethay “Astamaariyaw” guussu.
JOH 20:17 Yesuusi iiko, “Taani buroo ta Aawako boonna gisho, tana oykofa. Shin ta ishatako bada, ‘Taani ta Aawakonne hinte Aawako, ta Xoossaakonne hinte Xoossaako, simmana gis’ gada entaw oda” yaagis.
JOH 20:18 Magdela Mayraama Godaa be7idaysanne iw hessa I odidaysa bada iya tamaaretas odasu.
JOH 20:19 Wogga wode omarsi, iya tamaareti Ayhudetas yayyidi kariya gordidi shiiqi uttidashin, Yesuusi yidi, enta giddon eqidi, “Saroy hintew gido” yaagis.
JOH 20:20 Hessa gidi simmidi ba kushiyanne ba miya enta bessis. Iya tamaareti Godaa be7ida wode daro ufaytidosona.
JOH 20:21 Yesuusi zaaridi entako, “Saroy hintew gido; ta Aaway tana kiitidaysada taanika hintena kiittayis” yaagis.
JOH 20:22 Hessa gidaape guye, enta bolla ufu gidi punnis. Qassi, “Geeshsha Ayyaana ekite.
JOH 20:23 Hinte atto gida asaa nagaray atto geetetana. Hinte atto goonnayisata nagaray atto geetetenna” yaagis.
JOH 20:24 Shin tammanne nam7u tamaaretape issoy, Didimoosa geetetiya Toomasi, Yesuusi yida wode entara deenna.
JOH 20:25 Hessa gisho, hanko iya tamaareti Toomasako, “Nuuni Godaa be7ida” yaagidosona. Shin Toomasi entako, “Misimaaren I cadetida iya kushiyan de7iya beeta be7onnanne he beeta ta biradhen bochonna, qassi ta kushiya iya miyen yedda be7onna ammanike” yaagis.
JOH 20:26 Saamintafe guye, Yesuusa tamaareti qassika son shiiqidi uttidosona; Toomasika entara de7ees. Karey gordetidi de7ishin Yesuusi yidi, enta giddon eqidi, “Saroy hintew gido” yaagis.
JOH 20:27 Hessafe guye, Yesuusi Toomasako, “Ta kushiya ne biradhen bochada be7a. Qassi ne kushiya ta miyiyan yedda be7a. Neeni sidhopa, ammana” yaagis.
JOH 20:28 Toomasi zaaridi, “Ta Godaw, ta Xoossaw” yaagis.
JOH 20:29 Yaatin Yesuusi, “Neeni tana be7ida gisho ammanadasa, shin tana be7onna ammanidaysati anjetidaysata” yaagis.
JOH 20:30 Yesuusi ha maxaafan xaafetiboonna hara daro malaatata ba tamaareta sinthan oothis.
JOH 20:31 Shin Yesuusi I Kiristoosa, Xoossaa Na7aa gideysa hinte ammanana melanne ammanidi iya sunthan de7o demmana mela haysi xaafetis.
JOH 21:1 Hessafe guye, Yesuusi Xibradoosa Abba matan ba tamaaretas zaari qoncis. I entaw haysafe kaallidi de7iya hanotan qoncis.
JOH 21:2 Simoon Phexroosi, Mente geetetiya Toomasi, Qaana Galilape yida Natina7eeli, Zabdiyoosa naytinne Yesuusa tamaaretape hara nam7ati issife de7oosona.
JOH 21:3 Simoon Phexroosi entako, “Taani molo oykanaw bayis” yaagis. Enti, “Nuka neera baana” yaagidi, wogoluwa giddo gelidosona. Shin enti he qamman aybi moloka oykibookona.
JOH 21:4 Wonta guura xalqey dolanaape sinthe, Yesuusi abba gaxan eqis, shin iya tamaareti Yesuusa gididaysa eribookona.
JOH 21:5 Yesuusi entako, “Ta laggeto, molo oykibeeketii?” yaagis. Enti zaaridi, “Aykoka oykibooko” yaagidosona.
JOH 21:6 I zaaridi, “Hinte gitiya wogoluwape ushacha baggara yeggite; guutha molo hinte oykana” yaagis. Hessa gisho, gitiya ushacha baggara yeggidosona. Moloy darida gisho goochi kessanaw xoonetidosona.
JOH 21:7 Yesuusi dosiya tamaarey Phexroosako, “Haysi Godaa!” yaagis. Simoon Phexroosi I Godaa gidaysa si7ida wode, kallo de7iya gisho, ba ma7uwa ma7idi abba giddo gupi gelis.
JOH 21:8 Shin wogoluwan attida hanko tamaareti moloy kumida gitiya goochidi, abbaafe gaxa keyidosona. Enti abbaafe nam7u xeetu wadha mela haakoosona.
JOH 21:9 Enti abbaafe gaxa keyida wode, xiifa bonqon moloy de7eysanne uythi be7idosona.
JOH 21:10 Yesuusi entako, “Ha77i hinte oykida moluwape guuthara hammite” yaagis.
JOH 21:11 Simoon Phexroosi wogoluwan gelidi, xeetanne ishatammanne heedzu wogga moloti kumida gitiya goochidi abbaafe gaxa kessis. Moloy hessa mela daro gidin gitey daaketibeenna.
JOH 21:12 Yesuusi entako, “Haa yidi miite” yaagis. I Godaa gideysa enti erida gisho, iya tamaaretape issoyka, “Neeni oonee?” gidi iya oychanaw minniday baawa.
JOH 21:13 Yesuusi yidi, uythaa ekidi entaw immis; moluwaka hessada immis.
JOH 21:14 Yesuusi hayqope dendidi ba tamaaretas qoncishin haysi heedzantho.
JOH 21:15 Enti midaape guye, Yesuusi Simoon Phexroosako, “Yoona na7aw Simoona, tana haysatape aathada dosay?” yaagis. Simoon Phexroosi, “Ee Godaw, taani nena doseysa ne eraasa” yaagis. Yesuusi iyako, “Ta dorsa marata heemma” yaagis.
JOH 21:16 Yesuusi qassika, “Yoona na7aw Simoona, tana dosay?” yaagis. Simoon Phexroosi, “Ee Godaw, taani nena doseysa ne eraasa” yaagis. Yesuusi, “Ta dorsata heemma” yaagis.
JOH 21:17 Yesuusi heedzantho, “Yoona na7aw Simoona, tana dosay?” yaagis. Yesuusi heedzantho Simoon Phexroosako, “Tana dosay?” yaagidi oychida gisho, Phexroosi azzanidi, “Godaw, neeni ubbaba eraasa; taani nena doseysa ne eraasa” yaagis. Yesuusi, “Ta dorsata heemma.
JOH 21:18 Taani new tuma odayis; neeni na7atethan de7iya wode, nerka dancetada, ne koyida soo baasa. Shin ne cimida wode ne kushiya micca bessaana. Hari dancisana; ne dosonna soo efana” yaagis.
JOH 21:19 Yesuusi hessa Phexroosi ay mela hayqo hayqidi, Xoossaa bonchisaneeko erisanaw gis. Hessa gidaape guye, Yesuusi Phexroosako, “Tana kaalla” yaagis.
JOH 21:20 Phexroosi guye simmidi, Yesuusi dosiya tamaarey baape guyera yeysa be7is. He tamaarey, kaho miya bessan Yesuusako shiiqidi, “Godaw, nena aathidi immanay oonee?” gidaysa.
JOH 21:21 Phexroosi he tamaariya be7idi, “Godaw, ha addey qassi waananee?” yaagidi Yesuusa oychis.
JOH 21:22 Yesuusi iyako, “Taani yaana gakanaw I daana mela taani koyko, hessi nena ay metidee? Neeni tana kaalla” yaagis.
JOH 21:23 Hessa gisho, he tamaarey hayqenna giya oday ishata ubbaa gakis. Shin Yesuusi, “Taani yaana gakanaw, I daana mela taani koyko nena ay metidee?” yaagisipe attishin, “Hayqenna” gibeenna.
JOH 21:24 Ha odabaa markatidaynne haysa xaafiday he tamaariya. Iya markatethay tuma gideysa nuuni eroos.
JOH 21:25 Yesuusi oothida hara darobay de7ees. Ta qopin, ubbabay huuphen huuphen xaafetidaako, xaafetiya maxaafatas kumetha alamey wothanaw gidanaba daanenna.
ACT 1:1 Tewofloosa, Yesuusi ba oosuwa oykida wodepe salo bida gallasaa gakanaw, oothidabaanne tamaarsidaba ubba taani ta koyro maxaafan xaafas. Salo baanape sinthe I ba doorida hawaareta, Geeshsha Ayyaanan kiittis.
ACT 1:3 I ba waayiyape guye, hayqope dendidaysa sidhey bayna qoncisidi entaw bana bessis. Oytamu gallas entaw qoncidi Xoossa kawotethaaba enta tamaarsis.
ACT 1:4 Issi wode entara issife de7ishe enta haysada yaagidi kiittis: “Ta hintew odida, ta Aaway immana gida ufaysa qaala naagitepe attishin, Yerusalaamepe keyopite.
ACT 1:5 Yohaanisi haathan xammaqis, shin guutha wodepe guye, Geeshsha Ayyaanan hinte xammaqetana” yaagis.
ACT 1:6 Hawaareti issife Yesuusara shiiqida bessan, “Godaw, Isra7eeletas ne kawotetha zaarana wodey haysee?” yaagidi oychidosona.
ACT 1:7 Yesuusi entako, “Ta Aaway ba maatan oothiya wodenne laythi hinte eranaw danda7eketa.
ACT 1:8 Shin Geeshsha Ayyaanay hinte bolla wodhiya wode, hinte wolqan kumana. Yaani simmidi, Yerusalaamen, Yihuda biitta ubban, Samaareninne sa7a gaxa gakanaw taw markata gidana” yaagis.
ACT 1:9 Hessa gidaape guye enti xeellishin, dhoqu dhoqu gidi, salo bin, iya enta ayfepe shaari genthis.
ACT 1:10 Yesuusi biya wode enti salo tishshi oothidi xeellishin, bootha ma7o ma7ida nam7u asati akeekona enta matan eqidi,
ACT 1:11 “Galila asato, salo xeellishe, hinte ayis eqidetii? Ha hinte be7ishin salo bida Yesuusi hessadaka simmidi yaana” yaagidosona.
ACT 1:12 Hessafe guye, hawaareti Shamaho zumaape Yerusalaame simmidosona. Shamaho zumay Yerusalaames matan de7ees.
ACT 1:13 Enti Yerusalaame gelidi, banta de7iya bessa, pooqiya bolla keyidosona. Entika: Phexroosa, Yohaanisa, Yayqooba, Indiriyasa, Filphoosa, Toomasa, Bartelemoosa, Maatosa, Ilfiyoosa na7a Yayqooba, ba biittas mishetiya Simoonanne Yayqooba na7a Yihuda.
ACT 1:14 Haysati ubbay maccasatara, Yesuusa aaye Mayraamiranne Yesuusa ishatara ubbay issi wozanan gididi minthidi woossosona.
ACT 1:15 He wode, Phexroosi xeetanne laatama gidiya ammaniya asay shiiqida bessan dendi eqidi, haysada yaagis:
ACT 1:16 “Asaw, Yesuusa oykidaysata kaalethida Yihudaba, Geeshsha Ayyaanay kase Dawita doonan odida Xoossa qaalay poletanaw bessees.
ACT 1:17 Yihudi nuura issife ha oosuwa oothanaw dooretida asi.”
ACT 1:18 Shin Yihudi ba iita oosuwan demmida miishen gade shammis. I sintha guthu kundin, iya uloy daaketis; iya maraace ubbay kare keyis.
ACT 1:19 Yihuda bolla hanidaba Yerusalaamen de7iya asa ubbay si7is. Hessa gisho, he gadiya banta qaalan Akeldaama (Suutha gade) gidi xeegidosona.
ACT 1:20 “Hessika mazmure maxaafan, “ ‘Iya keethay kallo atto; oonika iyan de7opo. Qassi iya shuumatetha hari eko’ geetetidi xaafetis.
ACT 1:21 “Hessa gisho, Godaa Yesuusi nu giddon simeretida wode ubban nuura de7eysatape,
ACT 1:22 qassi Xammaqiya Yohaanisa wodepe doomidi Godaa Yesuusi salo bida gallas gakanaw nuura de7eysatape issi asi iya denduwas nuura marka gidanaw bessees” yaagis.
ACT 1:23 Hessa gisho, asay dooruwas Yosxoosa woyko Barsabaasa geetetiya Yoosefanne Maatiyasa nam7a shiishidosona.
ACT 1:24 Hessafe guye, Xoossa woossishe, “Asa ubba wozana eriya Godaw, ha nam7atape ne oona dooridako nuna bessa.
ACT 1:25 Yihudi ba bessaa bidi, aggida oosuwanne hawaaretetha oosuwa ekana mela haysatape nuus qoncisa” yaagidosona.
ACT 1:26 Enta bolla saama yeggidosona. Saamay Maatiyasa bolla wodhin, Maatiyasi tammanne issi hawaareta bolla guzhetis.
ACT 2:1 Phenxeqosxe gallasay gakida wode ammaniya asa ubbay issife issi bessan shiiqidi de7oosona.
ACT 2:2 Qoponna wolqaama goteda guummiya guunthay akeekona salope yidi enti de7iya keetha kumis.
ACT 2:3 Qassi tama laco daaniya inxarsati entaw bentishe, shaaketi shaaketi enta ubbaa bolla wodhidosona.
ACT 2:4 Enti ubbay Geeshsha Ayyaanan kumidi dumma dumma doonan odetana mela Geeshsha Ayyaanay enta danda7isin haasaya doomidosona.
ACT 2:5 He wode biitta ubbaafe yida Xoossas babbiya Ayhudeti Yerusalaamen de7oosona.
ACT 2:6 He guuntha si7ida wode daro asay shiiqidosona. Ammaniya asay enta qaalan odetishin si7ida gisho,
ACT 2:7 malaaletidi, “Ha odetiya asa ubbay Galila ase gidokonaayee?
ACT 2:8 Yaatin, nuuni, nu yeletida biitta doonan enti odetishin waanidi si7anaw danda7ido?
ACT 2:9 Nuuni Pharxen, Meedonan, Elaaman, Masephexoomen de7eysati, Yihudan, Qaphadooqan, Phanxoosan, Iisen,
ACT 2:10 Pirgen, Phinfilen, Gibxen, Qaarena matan de7iya Liiben de7eyisata. Nuupe baggatika Roomepe yida asata.
ACT 2:11 Ayhudetinne Ayhudetetha ammano gelida asati, Qarxeesanne Arabe asati, Xoossay oothida gita oosuwa nu qaalan odetishin si7oos” yaagidosona.
ACT 2:12 Ubbay malaaletidi, gaanaba dhayidi, “La haysi ay guussee?” yaagidosona.
ACT 2:13 Shin harati, “Haysati woyne uyidi mathotidosona” yaagidi qelqisidosona.
ACT 2:14 Shin Phexroosi, tammanne issi hawaaretara dendi eqidi, ba qaala dhoqu oothidi, entaw haysada yaagidi odis: “Ayhudeto, Yerusalaamen de7iya ubbato, taani odeysa si7ite.
ACT 2:15 Wontafe heedzu saate gidiya gisho hinte qopeysada ha asati mathotibookona; hessi hintew ereto.
ACT 2:16 Shin haysi haniday nabey Iyyu7eeli odidaysi poletana melasa.
ACT 2:17 “ ‘Xoossay, wodiya wursethan haysada hanana yaagees: taani asa ubbaa bolla ta Ayyaana gussana. Hinte adde naytinne macca nayti, tinbite odana. Hinte yalagati qoncethi be7ana; hinte cimati amuho amuhana.
ACT 2:18 He gallasatan tana ammaniya adde aylleta bollanne macca aylleta bolla taani ta Ayyaana gussana; enti tinbite odana.
ACT 2:19 Qassi taani bolla salon oorathaba, garsa sa7anka malla bessaana. Suuthay, tamaynne wolqaama caaganay bentana.
ACT 2:20 Gitanne boncho gidida Godaa gallasay gakanaape sinthe awi dhumana; ageeni suuthi daanana.
ACT 2:21 He wode hessada hanana; Godaa sunthaa xeegiya oonika attana’ yaagis.
ACT 2:22 “Isra7eele asato, ha qaala si7ite. Naazirete Yesuusa oonatethay, Xoossay hinte giddon oothida wolqaama oosuwaninne malaatatan hintew qoncoysa hinte, hinte huuphen ereeta.
ACT 2:23 Xoossa kase eraninne iya shenen, Yesuusi hintew aadhidi imetis. Hinte, nagaranchoti iya masqale bolla kaqidi wodhana mela aathidi immideta.
ACT 2:24 Shin Xoossay hayqo wolqa diggidi iya denthis. Hessa gisho, hayqoy iya oykanaw danda7ibeenna.
ACT 2:25 Dawiti iyabaa odishe, “ ‘Taani yarkonna mela, Goday ta ushachan de7ees. Godaa ubba wode ta matan be7ayis.
ACT 2:26 Hessa gisho, ta wozanay ufaytis; ta inxarsan ufaysi kumis; hayqiya ta asatethay ufaysan daana.
ACT 2:27 Ayis giiko, ta shempuwa Si7oolen aggaka. Qassi ne Geeshsha Na7a aha wooqisaka.
ACT 2:28 Neeni tana de7o oge erisadasa. Neeni taara de7eysan ta ufaysay kumethi gidees’ yaagis.
ACT 2:29 “Asaw, nu aawa Dawitaba ta hintew geeshshada odana. Dawiti hayqidi moogetis; iya duufoy hachi gakanaw nu matan de7ees.
ACT 2:30 Dawiti nabe gidida gisho, Xoossay iya sheeshape issuwa iya kawotetha araata bolla utisanaw iyaw caaqida caaquwa erees.
ACT 2:31 Hessa gisho, Kiristoosa denduwa sinthe xeellidi, ‘Iya shempoy Si7oolen attibeenna; iya asatethayka wooqibeenna’ gidi odis.
ACT 2:32 “Xoossay, ha Yesuusa hayqope denthidaysas nuuni ubbay marka.
ACT 2:33 Hessa gisho, Xoossay baara haarana mela baape ushacha baggara iya dhoqu dhoqu oothidi, iyaw immana geetetida Geeshsha Ayyaana ekidi, haysa hinte ha77i be7eysanne si7eysa nu bolla gussis.
ACT 2:34 Gaasoyka, Dawiti ba huuphen salo bibeenna shin yaagis. “Goday, ta Godaa, ‘Taani ne morketa ne tohoy yedhiyaso oothana gakanaw haysan, taape ushacha baggara utta’ ” gis. yaagis.
ACT 2:36 “Hessa gisho, ha hinte masqale bolla kaqida Yesuusa, Xoossay Godanne Kiristoosa oothidaysa Isra7eele asa ubbay tuma ero” yaagis.
ACT 2:37 Asay Phexroosi gidaysa si7ida wode banta wozanan boshetidi Phexroosanne hanko hawaaretako, “Ishato, yaatin nuuni ay oothino?” yaagidosona.
ACT 2:38 Phexroosi entako, “Hinte nagaray atto geetetana mela nagaraape simmidi, hinte issoy issoy Yesuus Kiristoosa sunthan xammaqetite. Xoossay immiya Geeshsha Ayyaana hinte ekana.
ACT 2:39 Gaasoyka Xoossay immana gida ufaysa qaalay hintew, hinte naytasinne Goday nu Xoossay baako xeegiya haahon de7iya ubbaasa” yaagis.
ACT 2:40 Phexroosi entaw hara qaalaka guji markatidi, “Ha wodiya geella asaa bolla yaanaw de7iya pirdafe hinte huuphiya ashshite” yaagidi zoris.
ACT 2:41 Phexroosi odidaysa ekidaysati xammaqetidosona. He gallas heedzu mukulu gidiya asay ammanidosona.
ACT 2:42 Enti hawaareta timirtiyan, issifetethan, uytha muusaninne woosan minnoosona.
ACT 2:43 Hawaareta kushen daro oorathabaynne malaati oosetiya gisho asa ubbay yayidosona.
ACT 2:44 Ammanida ubbay issife de7oosona; bantaw de7iyaba ubbaa issife shaaketoosona.
ACT 2:45 Enti bantaw de7iyaba bayzidi miishiya issuwas issuwas koshshida mela shaakosona.
ACT 2:46 Ubba gallas issi wozanan gididi xoossa keethan shiiqoosona. Banta keethan issoy issuwa xeegidi ufaysaninne ashke wozanan kathi moosona.
ACT 2:47 Xoossa galatishe asa ubban sabetidosona. Goday atteyisata gallas gallas enta bolla gujees.
ACT 3:1 Issi gallas Phexroosinne Yohaanisi woossanaw uddufun saaten Xoossa Keethi bidosona.
ACT 3:2 Yeletoosope doomidi wobbe gidida issi addey Xoossa Keethi geliya asaape miishe woossana mela ubba gallas lo77o geetetiya Xoossa Keetha pengen ehidi wothoosona.
ACT 3:3 He wobbe addey Phexroosinne Yohaanisi Xoossa Keethi gelana hanishin be7idi enta miishe woossis.
ACT 3:4 Entika iya caddi xeellidi, “Nuuko haa xeella” yaagidosona.
ACT 3:5 Wobbe addey entafe ayko ekana daanin entako xeellis.
ACT 3:6 Shin Phexroosi iyako, “Taw miishey baawa, shin taw de7iyaba taani new immana. Naazirete Yesuus Kiristoosa sunthan dendada hemeta” yaagis.
ACT 3:7 Hessafe guye, wobbe addiyas ushacha kushiya oykidi denthis. Ellesidi iya tohoynne qincafiley minni aggis.
ACT 3:8 Addey gupidi dendi eqis. Gedenne haa hemethi doomis. Hemetishe, gupishenne Xoossa galatishe entara issife Xoossa Keethi gelis.
ACT 3:9 I hemetishininne Xoossa galatishin asa ubbay iya be7idosona.
ACT 3:10 Be7ida ubbay miishe woossanaw lo77o geetetiya xoossa keetha pengen uttidaysi, iya gididaysa eridosona; I hanidaba be7idi malaaletidosona.
ACT 3:11 Addey Phexroosapenne Yohaanisape duuxike gidi oykidi de7ishin, asa ubbay malaaletidi, Solomone barandaa geetetiya bessan issife entako woxidosona.
ACT 3:12 Phexroosi asaa be7ida wode asaako, “Isra7eele asaw, ayis haysan malaaletetii? Woyko ayis nuna caddi xeelletii? Nuuni nu wolqan woyko nu xillotethan ha addiya hemethidaba hintew daanii?
ACT 3:13 Abrahaame, Yisaaqa, Yayqooba Xoossay, nu aawata Xoossay, ba na7aa Yesuusa bonchis. Shin hinte hayqos aathidi immidaysa Philaxoosi billanaw koyinka hinte iya sinthan, ‘Nuuni iya eroko’ yaagideta.
ACT 3:14 Hinte geeshshanne xilluwa, ‘Nuuni iya eroko’ gidi, shempo wodhidaysa hintew billana mela Philaxoosa woossideta.
ACT 3:15 De7o immeysa hinte wodhideta, shin Xoossay hayqope iya denthis. Hessas nuuni marka.
ACT 3:16 Ha hinte be7eysinne eriya addey, paxidi minniday Yesuusa sunthan ammanidaysana. Ha hinte ubba sinthan iya haysada pathiday, I Yesuusa ammanida gishosa.
ACT 3:17 “Ha77ika ta ishato, hinteka hintena kaaletheysatada, eronna oothidaysa taani erayis.
ACT 3:18 Shin Xoossay beni nabeta ubba doonan, ‘Kiristoosi waaye ekanaw bessees’ yaagidaysi haysada poletana mela oothis.
ACT 3:19 Hiza, Xoossay hinte nagara atto gaana mela Godaako simmite.
ACT 3:20 Godaa matape minthetho wodey hintew yaana. Xoossay Kiristoosa gidana mela sinthatidi doorida Yesuusa hintew yeddana.
ACT 3:21 Xoossay ba geeshsha nabeta doonan beni odidaysa mela ubbabay ooraxiya wodey gakanaw Yesuusi salon gam7anaw bessees.
ACT 3:22 Musey, ‘Godaa Xoossay tana denthidaysa mela hinte giddofe hintew nabe denthana. Hinte I geysa ubbaa si7ite.
ACT 3:23 He nabey odeysa si7onna asi oonika asaa giddofe shaaketidi dhayo’ yaagis.
ACT 3:24 “Qassi Sameelape doomidi de7iya nabeti ubbay ha wodiyaba odidosona.
ACT 3:25 Hinte nabeta nayta; qassi Xoossay Abrahaames, ‘Sa7an de7iya asa ubbaa taani ne sheesha baggara anjana’ yaagidi nu aawatas gelida qaala laattiya nayta.
ACT 3:26 Xoossay hintena ubbaa hinte iita ogepe zaaridi anjana mela ba na7a denthidi hintew koyro yeddis” yaagis.
ACT 4:1 Phexroosinne Yohaanisi asaas odishin kahine halaqati, Xoossa Keethe naageysata halaqaynne Saduqaaweti entako yidosona.
ACT 4:2 Enti Yesuusi hayqope dendoysanne iya gaason hayqope dendoy de7eysa asaa tamaarsida gisho yilotidosona.
ACT 4:3 Hessa gisho, enta oykidi sa7i omarsida gisho wontana gakanaw qasho keethi gelsidosona.
ACT 4:4 Shin qaala si7idaysatape daroti ammanidosona. Ammanida adde asaa tayboy ichashu mukuluko bis.
ACT 4:5 Wontetha gallas deriya haareysati, cimatinne, higge astamaareti Yerusalaamen shiiqidosona.
ACT 4:6 He asa giddon kahine halaqay Haanni, Qayyaafi, Yohaanisi, Iskindireynne kahine halaqaa soo asati ubbay de7oosona.
ACT 4:7 Hawaareta banta sinthan essidi, “Aybi wolqan woyko oodde sunthan haysa hinte oothidetii?” yaagidi oychidosona.
ACT 4:8 He wode Phexroosi Geeshsha Ayyaanan kumidi, “Deriya haareysato, cimato,
ACT 4:9 hachi ha wobbe addiyas oosetida lo77o oosuwasinne I waanidi paxidaako hinte nuna oychiko,
ACT 4:10 masqaliya bolla hinte kaqin, Xoossay hayqope denthida Naazirete Yesuus Kiristoosa sunthan ha addey paxidi hinte sinthan eqidaysi hintewunne Isra7eele asa ubbaas ereto.
ACT 4:11 “ ‘Gimbeysati boridi ixida shuchay, godaa xaphuwa minthiya, ubbaafe aadhiya shuchu gidis. He shuchay Yesuusa.’
ACT 4:12 Hessa gisho, atotethi iya baggarape attishin, hara oodde baggaraka baawa. Nuuni iya sunthan attana mela asa ubbaas Xoossay salope garsan immida hara sunthi baawa” yaagis.
ACT 4:13 Shiiqida asay Phexroosinne Yohaanisi minnida minotetha be7ida wode enti tamaariboonna coo asi gididaysa akeekidi, malaaletidosona; enti Yesuusara de7eysa eridosona.
ACT 4:14 Qassi paxida addey Phexroosaranne Yohaanisara eqidaysa asay be7idi giyaba dhayidosona.
ACT 4:15 Shin Phexroosanne Yohaanisa kare keyana mela oothidi banta giddon,
ACT 4:16 “Ha asata nu ay oothino? Enta kushen oosetida gita malaatay Yerusalaamen de7iya ubbaas bentees. Nuuni hessa eroko gaanaw danda7oko.
ACT 4:17 Shin ha oday asaa giddon laaletonna mela hizape guye, ha asati Yesuusa sunthan oodeska odonna mela minthidi naagisana” yaagidi zoretidosona.
ACT 4:18 Enta xeegidi, Yesuusa sunthan hizape odonna mela woyko tamaarsonna mela kiittidosona.
ACT 4:19 Shin Phexroosinne Yohaanisi entako zaaridi, “Xoossas kiitetanaysafenne hintew kiitetanaysafe Xoossaa sinthan awusi lo77oko? Ane hinte pirdite.
ACT 4:20 Nuuni be7idabaanne si7idaba odonna agganaw danda7oko” yaagidosona.
ACT 4:21 Biitta cimatinne deriya haareysati kasepe minthi naagisidi enta yeddi aggidosona. Asay hanidabaas Xoossaa galatiya gisho enta seeranaw danda7ibookona.
ACT 4:22 He malaatan hargefe paxida addiyas laythi oytamape aadhis.
ACT 4:23 Phexroosinne Yohaanisi birshetidi banta dabbotako bidi, kahine halaqatinne cimati bantako gidaba ubbaa entaw odidosona.
ACT 4:24 Enti hessa si7ida wode issi wozanan gididi Xoossaa haysada yaagidi woossidosona: “Ubbaa Haariya Godaw, saluwa, sa7aa, abbanne enta giddon de7iya ubbaba medhidayso,
ACT 4:25 Neeni ne aylliya, nu aawa Dawita doonan Geeshsha Ayyaanan, “ ‘Derey ayis yilotidonaa? Asay ayis coo maqetidona?
ACT 4:26 Sa7aa kawotinne deriya haareysati issife Godaa bollanne Kiristoosa bolla dendidosona’ yaagadasa.
ACT 4:27 “Tumaka, Herodiisinne Phenxe Philaxoosi Ayhude gidonna asaaranne Isra7eele asaara ne doorida ne geeshsha Na7aa Yesuusa bolla dendanaw ha kataman shiiqidosona.
ACT 4:28 Qassi neeni ne wolqaaninne ne sheniyan oothana gada qopa uttidaba ubbaa polidosona.
ACT 4:29 Ha77ika Godaw, enta mandetha be7a; nuuni ne aylleti ne qaala kumetha wozanan odana mela nuna danda7isa.
ACT 4:30 Ne geeshsha na7aa Yesuusa sunthan harganchota pathanaw, oorathabaynne malaatati oosetana mela ne kushiya micca” gidi woossidosona.
ACT 4:31 Enti Xoossa woossidaape guye, he enti shiiqida bessay qaaxis. Enta ubban Geeshsha Ayyaani kumin Xoossaa qaala minotethan odidosona.
ACT 4:32 Ammaneysati ubbay qofaninne wozanan issino gididosona. Enti bantaw de7iyaba tabaa goonnashin issife shaaketoosona.
ACT 4:33 Hawaareti, Godaa Yesuusi hayqope dendidaysa gita wolqan markatoosona. Xoossay enta ubbaas aadho keehatetha darsidi immis.
ACT 4:34 Biitti woyko keethi de7eysati ubbay bayzi ekida miishiya ehiya gisho, ammaneyisata giddon metootanchoy issoyka baawa.
ACT 4:35 Miishe ehidi hawaaretas immoosona; he miishiya asaas koshshidaysada issuwas issuwas shaaki shaaki immees.
ACT 4:36 Qophiroosa geetetiya bessan yeletida Yoosefa geetetiya Leewe sheeshape gidida issoy de7ees. Iya sunthaa hawaareti Barnabaasa (Minthetho na7a) gidoosona.
ACT 4:37 Barnabaasi baw de7iya biitta bayzidi miishiya ehidi hawaaretas immis.
ACT 5:1 Issi Hananiya geetetiya addey ba mache Saphirira gade bayzis.
ACT 5:2 He bayzida miishiyape ba machiya erishin bagga ashshidi, attidaysa ehidi hawaaretas immis.
ACT 5:3 Shin Phexroosi Hananiyako, “Neeni Geeshsha Ayyaana cimmana melanne gadiya bayzida miishiyape shaakada ashshana mela Xalahey ne wozanan ayis gelidee?
ACT 5:4 Neeni bayzanaape kase gadey nebaa gidenneyee? Qassi neeni bayza simminka miishey nebaa gidenneyee? Yaatin, hessa melaba oothanaw ayis ne wozanan qopadii? Neeni Xoossa bolla wordotadasape attishin, asa bolla wordotabaaka” yaagis.
ACT 5:5 Hanaani he qaala si7ida mela kundidi hayqis; hessa si7ida ubbay daro yayyis.
ACT 5:6 Na7atetha asati soo gelidi iya aha xaaxidi efidi moogidosona.
ACT 5:7 Heedzu saatepe guye Hananiya machiya hessa eronna de7ashe Phexroosi de7iyasuwa gelasu.
ACT 5:8 Phexroosi iiko, “Hinte gadiya haysa mela miishes bayzidetii? Ane taw oda” yaagis. Iyaka, “Ee, haysa mela miishes bayzida” yaagasu.
ACT 5:9 Phexroosi maccasiw, “Neeranne ne azinara Godaa Ayyaana paacanaw ayis zoretidetii? Heko, ne azina moogida asati karen de7oosona; nenaka enti kare kessana” yaagis.
ACT 5:10 Maccasiya iiraka Phexroosa tohuwa matan kundada hayqa aggasu; na7atethati geliya wode hayqidaaro demmidi kare kessidi, I azina matan moogidosona.
ACT 5:11 Kumetha woosa keethaynne hessa si7ida hara asa ubbay daro yayyidosona.
ACT 5:12 Hawaareti daro malaatatanne oorathabata asaa giddon oothosona. Ammaniya ubbay Solomone barandan issife shiiqoosona.
ACT 5:13 Hara asape entara gahetanaw issi asika minnibeenna, shin asay enta bonchees.
ACT 5:14 Ammaniya addetanne maccasata tayboy kaseysafe darishe bis.
ACT 5:15 Hessa gisho, asay harganchota halaninne algan tookidi Phexroosi aadhiya wode iya kuyay entafe issota issota bolla shempana mela oge doonan kessidi wothoosona.
ACT 5:16 Qassi daro asay Yerusalaame matan de7iya katamatape harganchotanne tuna ayyaani waaysiya asata ekidi yoosona; ubbayka paxidosona.
ACT 5:17 Kahine halaqaynne iyara de7iya Saduqaaweti ubbay qanaaten kumidi hawaareta bolla dendidosona.
ACT 5:18 Hawaareta oykidi deriya qasho keethan yeggidosona.
ACT 5:19 Shin Godaa kiitanchoy qamma qasho keetha pengiya dooyidi hawaareta kare kessidi,
ACT 5:20 “Bidi, xoossa keethan eqidi ha ooratha de7o qaala asa ubbaas odite” yaagis.
ACT 5:21 Hawaareti hessa si7ida wode wonta guura Xoossa Keethi gelidi tamaarso doomidosona. Kahineta halaqaynne iyara de7eysati yidi, Isra7eele cimata ubbaa xeegi shiishidi hawaareta banta sinthe ehana mela wotaadareta qasho keethi kiittidosona.
ACT 5:22 Shin wotaadareti qasho keethi bidi hawaareta demmibookona. Guye simmi yidi deriyas,
ACT 5:23 “Nuuni biya wode qasho keetha pengey minthi gordetin, naageysati pengen eqidaysata demmida. Shin nuuni kariya dooyiya wode giddon hari attoshin issi asika baawa” yaagidosona.
ACT 5:24 Hessa gisho, Xoossa Keethaa wotaadareta kiitteysinne kahine halaqati hessa si7ida wode, “Hawaareta bolla aybi hanidee?” yaagidi hirgidosona.
ACT 5:25 He wode issi addey entako yidi, “Heko, qasho keethi hinte gelsida asati xoossa keethan eqidi asaa tamaarsoosona” yaagidi entaw odis.
ACT 5:26 Xoossa Keethaa wotaadareta kiitteysi ba wotaadaretara bidi hawaareta ehis. Shin enti bantana asay shuchan caddana gidi yayyida gisho enta aaddashidi ehidosona.
ACT 5:27 Enti hawaareta ehidi, shiiqida shanguwa sinthan essin kahine halaqay entako,
ACT 5:28 “Hintena nuuni he uraa sunthan tamaarsonna mela minthidi kiittibooko? Heko, hinte timirtiya Yerusalaame katamaa ubba gathideta. He uraa shempuwas nuna oythanaw qopeetii?” yaagidi oychis.
ACT 5:29 Phexroosaranne hanko hawaaretara entaw zaarishe, “Nuuni asas kiitetanaape Xoossas kiitetanaw bessees.
ACT 5:30 Masqaliya bolla hinte kaqidi wodhida Yesuusa, nu aawata Xoossay hayqope denthis.
ACT 5:31 Isra7eeleti nagaraape simmana melanne enta nagaray atto geetetana mela Xoossay Yesuusa haareysanne ashsheysa oothidi bonchon baape ushacha baggan utisis.
ACT 5:32 Hessas nuuni marka; qassi Xoossay bana ammaneysatas immida Geeshsha Ayyaanayka marka” yaagidosona.
ACT 5:33 Shiiqida asay hessa si7ida wode daro yilotidi, hawaareta wodhanaw qopidosona.
ACT 5:34 Shin asa ubban daro bonchetida Gamaaliyale geeteteysi, issi higge astamaareynne Farsaawey dendi eqidi hawaareta guutha wodes kare kessana mela kiittis.
ACT 5:35 Hessafe guye, shiiqida asaako, “Isra7eele asaw, ha asata bolla hinte oothanaw qopiyabaape naagetite.
ACT 5:36 Ayis giiko, haysafe kase Tewodaasi bana, ‘Taani gita’ gidi dendin, oyddu xeetu gidiya asati iyara issifidosona. Shin iya wodhin iya kaallida ubbay laaletin pathonna asi gididi attidosona.
ACT 5:37 Hessafe guye, asay taybetiya wode Galila Yihudi dendidi daro asa pangayidi kaalethis, shin iyaka wodhin iya kaallida asa ubbay laaletis.
ACT 5:38 Ha77ika ta hintew odayis; ha asatape shaaketite; enta bochofite. Ayis giiko, ha qofaanne ha oosuwa asi oothiyaba gidiko dhayana.
ACT 5:39 Shin ha qofaynne ha oosoy Xoossafe yidaba gidiko, hinte enta dhaysanaw danda7eketa. Hessada hanishe hinte Xoossara kaccetana” yaagidi odis. Hessa gisho, shiiqida asay Gamaaliyale zoriya ekidosona.
ACT 5:40 Hawaareta soo xeegidi lisson garaafisis. Hessafe guye, entako, “Yesuusa suntha nam7antho denthofite” gidi birshidi yeddidosona.
ACT 5:41 Yesuusa suntha gisho, enti kawuyanaysi bessiyaba gideysa erida gisho shanguwa sinthafe ufaytishe keyidosona.
ACT 5:42 Enti ubba gallas Xoossa keethaninne asaa son Yesuusi I Kiristoosa gideysa tamaarsonne sabbako aggibokona.
ACT 6:1 He wode kaalleyisata tayboy dari daridi bishin, Girike doona odetiya Ayhudeti Yihudan yeletidi de7iya Ayhudeta bolla zuuzumidosona. Ayis giiko, Girike doona odetiya Ayhudeti, “Gallas gallas imetiya kathan nu am7eti naaqetosona” yaagidosona.
ACT 6:2 Tammanne nam7u hawaareti woosa keetha asa ubbaa xeegidi, “Nuuni Xoossaa qaala odeysa aggidi kathi gishanaw bessenna.
ACT 6:3 Hiza, ishato, lo77o asata, Geeshsha Ayyaananinne cincatethan kumida laapun asata hinte giddofe doorite; nuuni enta ha oosuwas shuumana.
ACT 6:4 Shin nuuni, nu kumetha wodiya woosaninne qaala tamaarson peeshana” yaagidosona.
ACT 6:5 Hawaareti odida oday asa ubba ufaysis. Hessa gisho, ammanoynne Geeshsha Ayyaani kumida Isxifaanose, Filphoosa, Phirokoroosa, Niqaroona, Ximoona, Pharmenanne Ayhude ammano geli simmida Anxooke addiya Niqolawoosa dooridosona.
ACT 6:6 Enta hawaareta sinthan essin, hawaareti enta bolla kushe wothidi woossidosona.
ACT 6:7 Xoossaa qaalay dalgi dalgi bis. Yerusalaamen de7iya ammaneyisata tayboy dari daridi bis; daro kahinetika ammanidosona.
ACT 6:8 Isxifaanosey aadho keehatethaaninne wolqan kumidi asaa giddon oorathabatanne malaatata oothees.
ACT 6:9 Aylletethafe keyida ayhude woosa keetha asay Qereenapenne Iskindirepe Kilqefenne Iisepe yida issi issi asati dendidi Isxifaanosera palamidosona.
ACT 6:10 Shin Isxifaanosey Ayyaana wolqan odetiya cincatethaa enti eqetanaw danda7ibookona.
ACT 6:11 He wode enti, “Musenne Xoossaa I cayishin si7ida” giya wordo asata shammidosona.
ACT 6:12 Hessada oothidi biitta cimatanne higge astamaareta iya bolla denthidosona. Isxifaanose oykidi shanguwa sinthe efidosona.
ACT 6:13 Iya bolla paydida wordo markati, “Ha uray ha xoossa keethaanne Muse higgiya zaari zaari cayees.
ACT 6:14 I, ‘Haysi Naazirete Yesuusi, ha xoossa keetha laallana; qassi Musey nuus immida higgiya laammana’ yaagishin nuuni si7ida” yaagidosona.
ACT 6:15 Shango shiiqon uttida asa ubbay Isxifaanose loythidi xeelliya wode iya som7oy kiitancho som7o daanees.
ACT 7:1 Kahineta halaqay Isxifaanoseko, “Haysi tumee?” yaagidi oychis.
ACT 7:2 Isxifaanosey, “Ta ishato, ta aawato, si7ite! Nu aawa Abrahaamey Kaaranen daanaw baanape sinthe Masephexoomen de7ishin, boncho Xoossay iyaw qoncidi,
ACT 7:3 ‘Ne biittafenne ne dabotape shaaketada taani nena bessiya biitta ba’ yaagis.
ACT 7:4 He wode Abrahaamey Kaldaaweta biittafe keyidi Kaaranen daanaw bis. Iya aaway hayqidaape guye Xoossay iya ha biitta ha77i hinte de7iya bessaa ehis.
ACT 7:5 I ha biittafe hari attoshin tohoy yedhiya bessika Abrahaames immibeenna. Shin na7i iyaw bayna wode Xoossay ha biitta iyawunne iya sheeshas laata oothidi immanaysa qaala gelis.
ACT 7:6 Xoossay Abrahaameko, ‘Ne sheeshay hara biittan imathatethan daana; yan oyddu xeetu laythi enti aylletethan haaretana.
ACT 7:7 Shin taani ne sheesha haariya kawotethata pirdana. Hessafe guye, enti he biittafe keyidi haysan taw goyinnana’ yaagis.
ACT 7:8 Xoossay Abrahaame sheeshay qaxaretana mela iyara caaqin, Yisaaqi yeletida hospuntho gallasan qaxaris. Yisaaqi Yayqooba qaxaris; qassi Yayqoobi tammanne nam7u ba nayta, nu aawata mayzata qaxaris.
ACT 7:9 “Yayqooba nayti Yoosefa qanaatidi Gibxe biittan aylletethas bayzidosona, shin Xoossay iyara de7ees.
ACT 7:10 Iya, iya waaye ubbaafe kessis. Gibxe kawa sinthan sabanne cincatethi iyaw immis. Gibxe kawoy Yoosefas Gibxe biittanne ba gadhuwa ubbaa aysanaada aawatethi immis.
ACT 7:11 “Gibxe biittaninne Kanaane biittan ubban koshi gelidi daro asaa un7ethis. He wode nu mayzati kathi demmanaw danda7ibookona.
ACT 7:12 Yayqoobi Gibxe biittan kathi de7eysa si7idi nu aawata koyro yaa yeddis.
ACT 7:13 Nam7antho buussan Yoosefi ba ishatas banatetha erisis. Gibxe kawoyka Yoosefa soo asa eris.
ACT 7:14 Yoosefi ba aawa Yayqoobanne ba soo asa ubbaa, laapun tammanne ichashu asaa baako yaana mela kiittidi ehisis.
ACT 7:15 Yayqoobi Gibxe biitta wodhis; inne iya nayti yan hayqidosona.
ACT 7:16 Enta ahay he bessaafe Seekema biitta tooketidi bidi, yan Abrahaamey Hamoore naytape daro biran shammida duufon moogetis.
ACT 7:17 “Shin Xoossay Abrahaames immana gidaysa poliya wodey gakanaw matida wode Gibxe biittan de7iya nu asay dari dari bis.
ACT 7:18 Hessafe guye, Yoosefa eronna hara kawoy Gibxe biittan kawotis.
ACT 7:19 He kawoy nu kochaa genidi guutha nayti hayqana mela enta kare kessi yeggana mela nu aawata un7ethis.
ACT 7:20 “He wode Musey yeletis; I Xoossaa sinthan daro lo77o na7a. Ba aawa keethan heedzu ageena gakanaw diccis.
ACT 7:21 Musey wora holetida wode Gibxe kawa na7iya demma ekada ba na7a oothada iya dichasu.
ACT 7:22 Musey Gibxeta cincatetha ubbaa tamaaridi odaninne ooson mino asi gidis.
ACT 7:23 “Muses laythi oytama kumida wode ba ishata, Isra7eeleta be7anaw ba wozanan qopis.
ACT 7:24 Isra7eeletape issuwa Gibxe issoy qohishin be7idi he Isra7eele uraa maaddidi, he qohida Gibxe uraa wodhidi kushe zaaris.
ACT 7:25 Musey ba ishata ba baggara Xoossay ashshanaw haneysa enti akeekana gidi qopis, shin enti akeekibokona.
ACT 7:26 “Wontetha gallas nam7u Isra7eele asati issoy issuwara wadhetishin demmidi enta sigethanaw koyidi, ‘Asaw, hinte ishanta; ayis issoy issuwa qohetii?’ yaagis.
ACT 7:27 “Shin ba laggiya qoheysi Museko, ‘Nena nu bolla haareysanne daynna oothiday oonee?
ACT 7:28 Neeni zine Gibxe uraa wodhidaysada tanaka wodhanaw koyay?’ yaagidi Muse sugi yeddis.
ACT 7:29 Musey hessa si7ida wode Gibxefe betidi Midiyaame biittan bete asi gididi de7ishe nam7u adde nayta yelis.
ACT 7:30 “Godaa kiitanchoy oytamu laythafe guye, Siina zuma matan de7iya bazzo tushiya giddon eexiya tama laco giddon Muses bentis.
ACT 7:31 Musey ba be7idaysan malaaletidi, loythi be7anaw tushiya mati shiiqidi de7ishin, Godaa qaalay,
ACT 7:32 ‘Taani ne aawata, Abrahaame Xoossaa, Yisaaqa Xoossaa, Yayqooba Xoossaa’ yaagishe Museko yis. Musey yashshan kokoridi xeellanaw danda7ibeenna.
ACT 7:33 “Goday Museko, ‘Neeni eqida biittay geeshshi gidiya gisho ne tohuwan de7iya caammaa kessa.
ACT 7:34 Taani Gibxen de7iya ta asaa un7etetha be7as. Enta waasuwa si7ada enta ashshanaw wodhas. Ha77i haaya! Taani nena Gibxe kiittana’ yaagis.
ACT 7:35 “Isra7eeleti Muse, ‘Nena nu bolla haareysanne daynna oothiday oonee?’ yaagidi ixidaysa tushiya giddon iyaw bentida kiitanchuwa baggara haareysanne ashsheysa oothidi Xoossay kiittis.
ACT 7:36 He Musey Isra7eeleta Gibxefe kessidi malaalsiyabatanne oorathabata Gibxe biittaninne Zo7o Abban oothidi enta oytamu laythi mela biittan kaalethis.
ACT 7:37 “Isra7eele asaako, ‘Xoossay tana denthidaysada hinte sheesha giddofe ta mela nabe hintew denthana’ yaagiday he Muse.
ACT 7:38 Mela biittan shiiqida Isra7eele asaara de7idaysi, nu aawataranne Siina zuma bolla iyaw odida kiitanchuwara de7ida Musey iya. Yaatidi, Xoossaa de7o qaala nuus immanaw ekis.
ACT 7:39 “Shin nu mayzati Muses kiitetanaw dosibookona; iya ixidi guye Gibxe simmanaw amotidosona.
ACT 7:40 Qassi Aaronako, ‘Nuna kaalethiya xoossata nuus ootha. Ayis giiko, haysi nuna Gibxefe ehida Musey, waanidaako nuuni eroko’ yaagidosona.
ACT 7:41 He wode mari daanisidi eeqa oothidosona. He eeqas yarsho yarshidi banta kushen oothida oosuwan ufaytidosona.
ACT 7:42 Shin Xoossay entaw zoko zaaris. Enti saluwa xoolintotas goyinnana mela enta yeggi aggis. Nabeta maxaafan, “ ‘Isra7eele asato oytamu laythi kumethi mela biittan shukida mehiyanne yarshida yarshuwa taw yarshidetii?
ACT 7:43 Hinte, hintew goyinnanaw kessida eeqanne Moloka dunkaaniya Rafana geetetiya hinte xoossaa xoolinto misiliya tookideta. Taani hintena Babiloonepe hini bagga yeddana’ geetetidi xaafetis.
ACT 7:44 “Nu aawatas mela biittan marka dunkaaney de7ees. Iyaka Xoossay Muse kiittidaysadanne iya bessidaysada oothis.
ACT 7:45 Qassi nu aawati he dunkaaniya banta aawatape ekidi Xoossay kase goodida Ayhude gidonna asaa biitta oykida wode Iyyasura yaa ekidi gelidosona. He dunkaaney Dawita wode gakanawuka he bessan de7is.
ACT 7:46 Dawiti Xoossan sabetis. Qassi Yayqooba Goday de7ana keethaa keexanaw Xoossaa woossis.
ACT 7:47 Shin iyaw keethaa keexiday Solomone.
ACT 7:48 “Hanoshin, Ubbaafe Bolla Xoossay asi keexida keethan deenna. Nabey gidaysa mela,
ACT 7:49 “ ‘Saloy ta araata, sa7ika ta tohoy yedhiyaso. Yaatin, taw hinte ay mela keethi keexanee? Woyko taani shempiya bessi awunee?
ACT 7:50 Ha ubbaa ta kushen oothabikina?’ yaagees Goday.
ACT 7:51 “Hinte waanida si7onna asee? Hinte wozanay Xoossaa qaala ekanaw ayis ixidee? Hinte haythay ayis tullidee? Hinte, hinte aawatatho ubba wode Geeshsha Ayyaanara eqeteta.
ACT 7:52 Nabeta giddofe hinte aawati gooddonay oonee? Xoossaa Na7ay, Xilloy yaanaysa kasetidi odidaysata wodhidosona. Ha77i hinte iya aathi immidi wodhideta.
ACT 7:53 Hinte kiitanchuwa kushepe Xoossa higgiya ekideta, shin kiitetibeketa” yaagis.
ACT 7:54 Enti hessa si7ida wode banta wozanan Isxifaanose bolla daro yilotidi, banta mettersha saxidi mandidosona.
ACT 7:55 Shin Isxifaanosey Geeshsha Ayyaanan kumidi, salo pude xeellidi, Xoossaa bonchuwanne Yesuusa, Xoossa ushacha baggan eqidaysa be7is.
ACT 7:56 “Heko, taani saloy dooyetin, Asa Na7ay, Xoossaa ushacha baggan eqidaysa be7ayis” yaagis.
ACT 7:57 Qaala dhoqu oothidi waassishe, banta haytha oykidi issife iyako woxidosona
ACT 7:58 Iya katamaape gaxa kessidi, shuchan caddidosona. Markati banta ma7uwa issi Saa7ola geetetiya na7atetha matan wothidosona.
ACT 7:59 Isxifaanosey, “Ta Godaa Yesuusa, ta shempuwa eka” yaagidi xeegishin enti iya shuchan caddoosona.
ACT 7:60 Gulbatidi, ba qaala dhoqu oothidi, “Ta Godaw, ha nagaraa entaw atto ga” yaagis. Hessa yaagidi simmida mela hayqi aggis.
ACT 8:1 Saa7oli Isxifaanose hayquwan ufaytis. He gallas Yerusalaamen de7iya woosa keethan gita goodi dendis. Hawaareti attishin, ammaneysati ubbay Yihuda biittaninne Samaare biittan laaletidosona.
ACT 8:2 Issi issi Xoossa asati Isxifaanose moogidosona; qassi iyaw daro yeekidosona.
ACT 8:3 Shin Saa7oli woosa keetha dhaysanaw koyees. Soo soo yuuyi gelidi, ammaniya addetanne maccasata goochi goochi kessidi qasho keethi gelsees.
ACT 8:4 Laaletida ammaneysati bida bessa ubban qaala odidosona.
ACT 8:5 Filphoosi Samaare katama bidi Kiristoosaba asaas odis.
ACT 8:6 Daro asay Filphoosi odidaysa si7ida wodenne I oothiya malaatata be7ida wode iya akeekidi si7idosona.
ACT 8:7 Tuna ayyaanati waassidi daro asaape keyidosona; qassi daro gundatinne wobbeti biletidosona.
ACT 8:8 He kataman de7iya asay daro ufaytidosona.
ACT 8:9 Shin Simoona geetetiya issi uray he kataman de7ees. I, “Bana gita” gidi Samaare asaa marotethan malaalsishe gam7is.
ACT 8:10 Guuthafe gita gakanaw de7iya asa ubbay, “Gita Xoossa wolqay haysa” gidi iyabaa si7oosona.
ACT 8:11 Daro wodepe doomidi marotishe Samaare asa malaalsida gisho asay iyabaa si7oosona.
ACT 8:12 Shin Filphoosi Xoossaa kawotethabanne Yesuus Kiristoosa sunthaba addetasinne maccatas odin, enti iyabaa ammanidi xammaqetidosona.
ACT 8:13 Qassi Simoonika ba huuphen ammanidi xammaqetis. Filphoosara issife bida bessa ubban oosetiya gita malaatata be7idi malaaletis.
ACT 8:14 Yerusalaamen de7iya hawaareti Samaare asay Xoossaa qaala ekidaysa si7ida wode Phexroosanne Yohaanisa entako yeddidosona.
ACT 8:15 Phexroosinne Yohaanisi bidi, ammaneysati Geeshsha Ayyaana ekana mela entaw Xoossaa woossidosona.
ACT 8:16 Ayis giiko, Samaare asati Godaa Yesuusa sunthaa xalaalan xammaqetidosonape attishin, entafe issuwa bollaka Geeshsha Ayyaanay wodhibeenna.
ACT 8:17 He wode Phexroosinne Yohaanisi banta kushe enta bolla wothin, enti Geeshsha Ayyaana ekidosona.
ACT 8:18 Hawaareti banta kushe enta bolla wothin, entaw Geeshsha Ayyaanay imetidaysa Simooni be7ida wode Phexroosasinne Yohaanisas miishe ehidi,
ACT 8:19 “Taanika ta kushe wothiya ubbay Geeshsha Ayyaana ekana mela ha maata taw immerketi” yaagis.
ACT 8:20 Shin Phexroosi iyako, “Neeni Xoossaa imota miishen shammanaw qopida gisho ne miishey neera dhayo.
ACT 8:21 Ne wozanay Xoossaa sinthan suure gidonna gisho, new haysan gishoy woyko qaadi baawa.
ACT 8:22 Hiza, ha ne wozana iitatetha gisho nagarape simma. Ne wozanan de7iya iita qofa Xoossay atto gaana mela Xoossaa woossa.
ACT 8:23 Gaasoyka, neeni iita qanaateninne nagara qashon de7eysa taani be7ayis” yaagis.
ACT 8:24 Simooni zaaridi, “Hinte gidaysafe issoyka tana gakonna mela taw Xoossaa woossite” yaagis.
ACT 8:25 Phexroosinne Yohaanisi markatidaapenne Godaa qaala odidaape guye Yerusalaame simmidosona. Samaaren de7iya daro gutatan wongela odidosona.
ACT 8:26 Godaa kiitanchoy Filphoosako, “Dendada Yerusalaamepe Gaaza efiya mela biitta ogiyako ba. He ogey dugeha baggara de7ees” yaagis.
ACT 8:27 Filphoosi dendidi bis. Hindeke geetetiya Tophe kawees I miishe ubba naagiya Tophe asi de7ees. Ika goyinnanaw Yerusalaame bis.
ACT 8:28 Para gaaren uttidi, Yerusalaamepe ba biitta simmishe nabiya Isayaasa maxaafaa nabbabees.
ACT 8:29 Geeshsha Ayyaanay Filphoosako, “He gaariyako bada iya mati shiiqa” yaagis.
ACT 8:30 Yaatin Filphoosi woxi bidi gakiya wode moorinnay nabiya Isayaasa maxaafape nabbabishin si7idi, “Ne nabbabeysi new gelii?” yaagis.
ACT 8:31 Moorinnay, “Taw odi gelsiya asi bayna waanidi gelanee?” yaagis. Baara gaariyan keyidi uttana mela Filphoosa woossis.
ACT 8:32 Moorinnay nabbabiya maxaafa kifiley, “I dorsada shuketanaw laagetis; Dorsa mari ba ikisiya meedeyisata sinthan si77i geysada, ika ba doona dooyibeenna.
ACT 8:33 I kawuyis; iyaw xillo pirdi dhayis; iya de7oy ha sa7ape qanxetida gisho, iya sheeshaba oone odanay?” yaagees.
ACT 8:34 Moorinnay zaaridi Filphoosako, “Nabey oodeba odii? Babaa odiye woyko hara asaba odii? Taw odarkii” yaagis.
ACT 8:35 Filphoosi, Xoossa qaala he bessaafe doomidi, Yesuusaba odiya Wongela iyaw odis.
ACT 8:36 Enti bishe haathi de7iyaso gakidosona. Moorinnay, “Haathe haysa be7a; ta xammaqetonna mela aybe diggey?” yaagis.
ACT 8:37 Filphoosi iyako, “Neeni ne kumetha wozanaape ammaniko danda7aasa” yaagis. I zaaridi, “Yesuus Kiristoosi Xoossaa Na7aa gideysa taani ammanayis” yaagis.
ACT 8:38 Gaarey eqana mela moorinnay kiittin, nam7ay wodhidi haathan gelidosona; Filphoosi iya xammaqis.
ACT 8:39 Enti haathaafe gaxa keyida wode Godaa ayyaanay Filphoosa qoponna ekis. Nam7antho moorinnay Filphoosa be7ibeenna, shin ba ogiya ufaytishe bis.
ACT 8:40 Filphoosi Azaxoonan bana demmis. Qassi Qisaare yaana gakanaw katamatan yuuyidi wongela markatis.
ACT 9:1 He wode Saa7oli Godaa kaalleyisata wodhanaw mandidi kahine halaqaako bis.
ACT 9:2 Godaa ogiya kaalliya addenne macca demmiko, qachishe Yerusalaame ehanaw, Damasqon de7iya ayhude woosa keethatas dabdaabe baw xaafana mela woossis.
ACT 9:3 I bidi, Damasqo katama gakanaw matishin, qoponna salope wolqaama poo7oy iya yuushon poo7is.
ACT 9:4 I sa7an kundidashin, “Saa7ola, Saa7ola, ayis tana goodday?” giya qaala si7is.
ACT 9:5 Saa7oli, “Godaw, neeni oonee?” yaagidi oychis. “Taani, neeni gooddiya Yesuusa” yaagis.
ACT 9:6 Shin Saa7oli kokorishenne malaaletishe, “Godaw, taani ay oothana mela koyay?” yaagis. Goday iyako, “Dendada katamaa gela; neeni oothanaw bessiyabay yan new odetana” yaagis.
ACT 9:7 Saa7olara oge biya asati aykoka odetonna eqi attidosona. Qaala si7oosona, shin oonaka be7ibookona.
ACT 9:8 Saa7oli kundida bessaafe dendidi xeelliya wode iya ayfey demmonna ixis. Hessa gisho, enti iya kushiya oykidi kaalethidi Damasqo gelsidosona.
ACT 9:9 Heedzu gallas gakanaw I xeellanaw danda7ibeenna; aykoka mibeenna; uybeenna.
ACT 9:10 Damasqon issi Hananiya geetetiya Yesuusa tamaarey de7ees. Goday qoncethan, “Hananiya” yaagidi xeegis. Hanaani zaaridi, “Ta Godaw, haysan de7ayis” yaagis.
ACT 9:11 Goday iyako, “Dendada Suure geetetiya ogiya bada, Yihuda son Saa7ola geetetiya Tarsesape yida uraa koya; Saa7oli woossees.
ACT 9:12 Qassi Hananiya geetetiya addey gelidi, Saa7oli nam7antho xeellana mela ba kushiya iya bolla wothishin qoncethan be7is” yaagis.
ACT 9:13 Hanaani zaaridi, “Godaw, Yerusalaamen ne geeshsha asaa bolla he uray ay mela iitabaa oothidaako taani daro asaape si7as.
ACT 9:14 Qassi Damasqon ne sunthaa xeegeyisata ubba qachanaw, kahine halaqati iyaw maata immidosona” yaagis.
ACT 9:15 Shin Goday iyako, “Saa7oli Ayhude gidonna asaa sinthan, kawota sinthaninne Isra7eele asaa sinthan, ta sunthaa erisanawunne taw oothanaw dooretida miishe gidiya gisho neeni iyako ba.
ACT 9:16 Ayis giiko, ta sunthaa gisho, I ay mela waaye ekanaw bessiyako taani iya bessaana” yaagis.
ACT 9:17 Hanaani bidi, soo gelidi, ba kushiya Saa7ola bolla wothidi, “Ta ishaa Saa7ola, neeni yaa ogiyan new bentida Yesuusi, neeni xeellana melanne Geeshsha Ayyaanan kumana mela Goday tana kiittis” yaagis.
ACT 9:18 Ellesidi, Saa7ola ayfepe issi poqo melabay wodhin, Saa7oli nam7antho xeellis. Qassi dendidi xammaqetis.
ACT 9:19 Kathi midi xaalidi, Damasqon de7iya ammaneysatara guutha gallas gam7is.
ACT 9:20 Ellesidi Saa7oli, “Yesuusi Xoossaa Na7a” yaagidi Damasqon de7iya ayhude woosa keethatan qaala tamaarsis.
ACT 9:21 Hessa si7ida ubbay malaaletidi, “Haysi Yerusalaamen Yesuusa sunthaa xeegeyisata qacheysa gidenneyee? Qassi haa yiday enta qachidi, kahine halaqata sinthe efanaasa gidennee?” yaagidosona.
ACT 9:22 Shin Saa7oli qaala odon minni minnidi bis. Yesuusi, I Kiristoosa gideysa qoncisidi odida gisho Damasqon de7iya Ayhudeti iyaw zaariyaba dhaydosona.
ACT 9:23 Daro gallasape guye, Ayhudeti shiiqidi, Saa7ola wodhanaw zoretidosona.
ACT 9:24 Shin Ayhudeti bana wodhanaw qopidaysa Saa7oli si7is. Enti iya wodhanaw qammanne gallas katama pengen naagoosona.
ACT 9:25 Shin iya tamaareti iya qamma efidi, gimbe dirsa maskootera daachora wodhisidosona.
ACT 9:26 Saa7oli Yerusalaame gakida wode ammaneysatara gahetanaw koyis. Shin I Kiristoosa ammanidaysi entaw tuma daanonna ixin iyaw yayyidosona.
ACT 9:27 Shin Barnabaasi Saa7ola hawaaretako efis. Ogen Goday waanidi qoncidaakonne odisidaako, qassi Saa7oli Damasqon Yesuusa sunthan yayyonna waatidi qaala odidaako entaw geeshshidi odis.
ACT 9:28 Saa7oli Yerusalaamen yuuyidi Godaa sunthan yayyonna qaala odishe, hawaaretara issife de7is.
ACT 9:29 Qassi Saa7oli Girike doonan haasaya Ayhudetara odetishe palamees. Shin enti iya wodhanaw koydosona.
ACT 9:30 Ammaniya asati hessa si7idi, Saa7oli Qisaare efidi Tarsesa yeddidosona.
ACT 9:31 Yihudan, Galilaninne Samaare ubban de7iya woosa keethati sarotethan de7idosona. Qassi minnidosona; Godaas yayyishe Geeshsha Ayyaana minthethon dari daridi bidosona.
ACT 9:32 Phexroosi biitta ubba yuuyishe Liiden de7iya ammaniya asatako gakis.
ACT 9:33 Yan hospun laythi kumethi gundidi arsan zin7idi de7iya Eniya geetetiya addiya demmis.
ACT 9:34 Phexroosi, “Eniya, Yesuus Kiristoosi nena pathana; dendada ne hiixa dentha” yaagis. Ika ellesidi dendi eqis.
ACT 9:35 Liideninne Saaronan de7iya asa ubbay Eniya be7idi, Godaako simmidosona.
ACT 9:36 Yoophe kataman issi Xaabito geetetiya ammaniyara de7awusu. I sunthay Aramike doonan, “Xaabito”; Girike doonan, “Dorqa”; he nam7u suntha birshethay “gen7e” guussu. Iya ba de7ida wode ubban lo77oba oothashenne manqota maaddashe de7asu.
ACT 9:37 He wode iya hargada hayqin, asay I aha meeccidi, pooqe bolla kessidi zin7isidosona.
ACT 9:38 Liidey Yoophes mata. Ammaneysati Phexroosi Liiden de7eysa si7idi, “Hayyana nuuko ellesada ya” yaagidi nam7u asata iyako kiittidosona.
ACT 9:39 Hessa gisho, Phexroosi dendidi, entara bis. Yaa gakin, pooqe bolla de7iya kifile iya gelsidosona. Am7eti Phexroosa yuushon eqidi yeekishe Dorqa entara paxa de7ashe oothida qamisetanne afilata ubbaa Phexroosa bessidosona.
ACT 9:40 Phexroosi enta ubbaa kare kessidi, gulbatidi woossis. Qassi ahaako simmidi, “Xaabite, denda” yaagis. Xaabita ba ayfiya dooyada Phexroosa be7ada, denda uttasu.
ACT 9:41 Phexroosi iyo ba kushen maaddidi denthidi essis. Hessafe guye, ammaneysatanne am7eta xeegidi, dendidaro enta sinthe shiishis.
ACT 9:42 Ha oday, Yoophe katama ubbaa gakis; daro asay Godaa ammanidosona.
ACT 9:43 Phexroosi Yoophen Simoona geetetiya galba haasheysa son daro gallas gam7is.
ACT 10:1 Qisaaren, “Xaale ola asata” geetetiya olanchota giddon issi Qorneliyoosa geetetiya mato halaqay de7ees.
ACT 10:2 Qorneliyoosi ba soo asaara Xoossaa minthi ammaniya asinne Xoossaa goyinniya asi. Ayhude manqotaka daro maaddees, qassi Xoossaa ubba wode woossees.
ACT 10:3 Issi gallas uddufun saate heeran Xoossaa kiitanchoy iyako yidi, “Qorneliyoosa” gidi xeegishin I qoncethan geeshshidi be7is.
ACT 10:4 Qorneliyoosi dagammidi kiitanchuwa tishshi oothi xeellidi, “Godaw, I aybee?” yaagis. Kiitanchoy zaaridi, “Ne woosaynne manqota ne maaddeysi Xoossaa sinthan hassayetis.
ACT 10:5 Ha77i Yoophe ase kiittada, Phexroosa geetetiya Simoona ehisa.
ACT 10:6 Phexroosi abba doonan galba haashiya Simoona son imathatethi siiratis” yaagis.
ACT 10:7 Qorneliyoosi baw odida kiitanchoy bin, ba aylletape nam7atanne Xoossaa goyinniya ba mata wotaadaretape issuwa xeegidi,
ACT 10:8 entaw ubbaba odidi Yoophe kiittis.
ACT 10:9 Wontetha gallas enti bidi, Yoophe katama matishin usupun saate heeran Xoossaa woossanaw Phexroosi pooqe bolla keyis.
ACT 10:10 I koshatidi kathi maanaw koyis, shin kathi kaxishin I qoncethi be7is.
ACT 10:11 Saloy dooyetin, gita afila daaniyabay oyddu baggara oyketidi wodhishin I be7is.
ACT 10:12 Iyan oyddu tohora de7iya meheti, wora do7ati, ulora gooshetiya medhetethatinne salo kafoti ubbay de7ees.
ACT 10:13 He wode, “Phexroosaa, denda eqada shukada ma” giya qaalay iyako yis.
ACT 10:14 Shin Phexroosi, “Godaw, akay! Ta tunabaa ubbaraka ma erike” yaagis.
ACT 10:15 Qassi, “Xoossay geeshshidaysa neeni tuna goopa” giya qaalay nam7antho iyako yis.
ACT 10:16 Hessika, heedzu toho hanidaape guye he gita afila daaneysi ellesidi pude salo eketis.
ACT 10:17 Phexroosi ba be7ida qoncethaa birshethay, “Ay gidandesha?” gidi ba wozanan qopishin, Qorneliyoosi kiitida asati Simoona soo oychi demmidi karen eqidosona.
ACT 10:18 Banta qaala dhoqu oothidi, “Phexroosa geetetiya Simoona geetetiya imathay haysan de7ii?” yaagidi oychidosona.
ACT 10:19 Phexroosi qoncethan be7idaba qofa bolla de7ishin, Geeshsha Ayyaanay iyako, “Heko, heedzu asati nena koyoosona.
ACT 10:20 Dendada wodha, taani enta kiitida gisho sidhonna entara ba” yaagis.
ACT 10:21 Phexroosi asatako wodhidi, “Hinte koyey tana; ayis yidetii?” yaagis.
ACT 10:22 Enti zaaridi, “Nuna mato halaqay Qorneliyoosi kiittis. I xillo, Xoossaa goyinniya asinne Ayhude asa ubban daro bonchetida asi. Qorneliyoosi, nena ba soo ehisidi qaala neepe si7ana mela geeshsha kiitanchoy iyaw odis” yaagidosona.
ACT 10:23 Phexroosi asata soo gelsidi mokis. Wontetha gallas, dendidi entara bis. Yoophe kataman de7iya ammaneysatape issoti issoti iyara issife bidosona.
ACT 10:24 Wontetha gallas, Qisaare gakidosona. Qorneliyoosi ba dabbotanne ba mata laggeta issife xeegi shiishidi, Phexroosa naagees.
ACT 10:25 Phexroosi soo gelana hanishin, Qorneliyoosi iyara gahetidi iya sinthan kundidi iyaw goyinnanaw koyis.
ACT 10:26 Shin Phexroosi, “Denda, taka ta huuphen ne mela ase” yaagidi iya denthis.
ACT 10:27 Phexroosi Qorneliyoosara odetishe soo geliya wode daro asay shiiqidaysa demmis.
ACT 10:28 I asaako, “Ayhude asi hara derera issifanaw woyko gahetanaw woga gidonnaysa hinte ereeta. Shin taani oonaka tuna woyko geeshshi gidenna goonna mela Xoossay tana bessis.
ACT 10:29 Hessa gisho, hinte taako kiittin ixoy bayna yas. Ha77i tana ayis xeegisidaako taw odite” yaagis.
ACT 10:30 Qorneliyoosi, “Taani hachi oyddu gallasape kase hannoode uddufun saate woosa woossishin, phooliya ma7o ma7ida asi ta sinthan eqis.
ACT 10:31 I taako, ‘Qorneliyoosa, Xoossay ne woosa si7is, neeni manqota maaddidaysaka hassayis.
ACT 10:32 Hiza, ase Yoophe kiittada, Simoon Phexroosa geysa xeegisa. Simoon Phexroosi Simoona geetetiya galba haashiya uraa son abba doonan siiratis’ yaagis.
ACT 10:33 Hessa gisho, taani neeko ellesada kiittas; ne lo77o yadasa. Hiza, Xoossay nena Kiittidaba ubbaa si7anaw ha77i nuuni ubbay haysan Godaa sinthan de7oos” yaagis.
ACT 10:34 Kaallidika, Phexroosi, “Xoossay asa som7o be7idi ase asape shaakenna.
ACT 10:35 Shin ase ubbaa oona gidikoka baw yayyeysanne xillo ooso ootheysan Xoossay ufayteysa taani tuma akeekas.
ACT 10:36 Xoossay, ubbaa Godaa gidida Yesuus Kiristoosa baggara sarotethaa odishe ha Wongela Isra7eele asaas kiittidaysa hinte ereeta.
ACT 10:37 Yohaanisi xinqateba Galilan sabbakida wodiyape doomidi Yihuda biitta ubbaa gakanaw hanidaba hinte ereeta.
ACT 10:38 Xoossay Naazirete Yesuusas Geeshsha Ayyaananne wolqaa immis. Xoossay iyara de7iya gisho lo77oba I oothishe Xalahe kushen haaretida ubbaa pathishe yuuyis.
ACT 10:39 “Ayhude biittaninne Yerusalaamen I oothida ubbabaas nuuni markata. Enti masqaliya bolla kaqidi iya wodhidosona.
ACT 10:40 Shin Xoossay heedzantho gallasan hayqope iya denthidi asaas qoncana mela oothis.
ACT 10:41 He qoncethay Xoossay koyro doorida markatasafe attishin, asa ubbaasa gidenna. I hayqope dendidaape guye iyara midanne uyida.
ACT 10:42 Xoossay Wongela asaas nuuni odana melanne paxa de7eyisata bollanne hayqidaysata bolla pirdanaw shuumetiday Yesuusa gideysa markatana mela nuna kiittis.
ACT 10:43 Xoossay iya ammaniya ubbaa nagaray, iya sunthan atto geeteteysa nabeti markatoosona” yaagis.
ACT 10:44 Phexroosi buroo he oda ongonnashin qaala si7iya ubbaa bolla Geeshsha Ayyaanay wodhis.
ACT 10:45 Phexroosara Yoophefe yida ammaniya qaxaretida Ayhude ubbay, Ayhude gidonnaysati bolla Geeshsha Ayyaanay gukida gisho malaaletidosona.
ACT 10:46 Gaasoyka, enti dumma dumma doonan odetishininne Xoossa gitatetha sabbishin si7idosona. He wode Phexroosi zaaridi,
ACT 10:47 “Haysati qassi nu mela Geeshsha Ayyaana ekidaysati xammaqetonna mela haathe digganay oonee?” yaagis.
ACT 10:48 Enti Yesuus Kiristoosa sunthan xammaqetana mela enta kiittis. Hessafe guye, enti bantara guutha gallas uttana mela Phexroosa woossidosona.
ACT 11:1 Hawaaretinne Yihuda ubban de7iya ammaneysati, Ayhude gidonaysatika Xoossaa qaala ekidaysa si7idosona.
ACT 11:2 Phexroosi Yerusalaame bida wode qaxaretida ammaneysati,
ACT 11:3 iyako, “Neeni qaxaretiboonaysatako gelada entara kathi ayis maaddii?” yaagidosona.
ACT 11:4 Shin Phexroosi hanidaba koyrope doomidi maaran maaran odis:
ACT 11:5 “Taani Yoophe kataman Xoossaa woossashe qoncethi be7as. Gita afila daaniyabay oyddu baggara oyketidi salope wodhishe taako yis.
ACT 11:6 Taani tishshi ootha iya giddo xeelliya wode oyddu tohora de7iya meheta, wora do7ata, ulora gooshetiya medhetethatanne salo kafota be7as.
ACT 11:7 ‘Phexroosaa, denda, shukada ma’ giya qaala si7as.
ACT 11:8 “Shin taani, ‘Godaw, akay, tunabay woyko geeyonnabay ubbaka ta doonako shiiqi erenna’ yaagas.
ACT 11:9 “ ‘Xoossay geeshshidaysa neeni tuna goopa’ giya qaalay nam7antho salope yis.
ACT 11:10 “Hessi heedzu toho hanin, wursethan ubbabay salo pude eketis.
ACT 11:11 He saatenka heedzu asati Qisaarepe taako kiitetidi taani de7iya keetha gaki aggidosona.
ACT 11:12 Sidhonna entara bana mela Ayyaanay taw odis. Qassi ha usupun ishati Yoophefe taara Qisaare bidaysatara Qorneliyoosa soo gelida.
ACT 11:13 Kiitanchoy iya son eqidi, ‘Yoophe kiittada Phexroosa geetetiya Simoona xeegisa.
ACT 11:14 Nenanne ne soo asa ubbaa ashshiya qaala I new odana’ gidaysa Qorneliyoos nuus odis.
ACT 11:15 “Taani haasaya doomiya wode Geeshsha Ayyaanay koyro nu bolla wodhidaysada enta bollaka wodhi aggis.
ACT 11:16 He wode, ‘Yohaanisi haathan xammaqis, shin hinte Geeshsha Ayyaanan xammaqetana’ yaagida Godaa qaalay taw qofetis.
ACT 11:17 Xoossay nuus Godaa Yesuus Kiristoosa ammanidaysatas immida imota Ayhude gidonaysataska immiko, yaatin Xoossaa digganaw taani oonee?” yaagis.
ACT 11:18 Enti hessa si7ida wode banta palama aggidi, “Yaatin, Xoossay Ayhude gidonaysatika nagarape simmidi de7on daanada qaada immis” yaagidi Xoossaa galatidosona.
ACT 11:19 Isxifaanose hayqos gathida goodda gaason laaletida ammaneysati qaala Ayhudeta xalaalas odishe Sirofinqe, Qophiroosanne Anxooke gakanaw yuuyidosona.
ACT 11:20 Shin Qophiroosapenne Qereenape yida issi issi ammaniya asati Anxooke bidi, Godaa Yesuusa Wongela Girike asaaska odidosona.
ACT 11:21 Godaa wolqay entara de7ees; qassi daro asay ammanidi Godaako simmidosona.
ACT 11:22 He odaa Yerusalaamen de7iya woosa keethay si7ida gisho Barnabaasa Anxooke kiittis.
ACT 11:23 Barnabaasi Anxooke bida wode Xoossaa aadho keehatetha oosuwa be7idi ufaytis. Enti ubbay banta kumetha wozanan Godan minnidi daana mela enta zoris.
ACT 11:24 Barnabaasi Geeshsha Ayyaanaynne ammanoy kumida lo77o asi gidiya gisho daro asay Godaa ammanidosona.
ACT 11:25 Hessafe guye, Barnabaasi Saa7ola koyanaw Tarsesa bis.
ACT 11:26 Yan Saa7ola demmida wode Anxooke ekidi yis. Barnabaasinne Saa7oli woosa keetha asaara laythi kumethi uttidi daro asaa tamaarsidosona. Ammaneysati Anxooken “Kiristaane” geetetidi koyro xeegetidosona.
ACT 11:27 He wode issi issi nabeti Yerusalaamepe Anxooke wodhidosona.
ACT 11:28 Enta giddofe Agaboosa geysi dendidi biitta ubban gita koshi keyanaysa Ayyaana wolqan tinbite odis. Hessi haniday Roome Kawa Qalawudiyoosa wodena.
ACT 11:29 Ammaneysati huuphen huuphen banta wolqaa mela miishe kessidi Yihudan de7iya ammaneysatas maade yeddanaw qofa qachidosona.
ACT 11:30 Enti hessada oothidi, miishiya Barnabaasa bollanne Saa7ola bolla woosa keethaa cimatas yeddidosona.
ACT 12:1 He wode Kawoy Herodiisi woosa keetha asaape baggaa goodda doomis.
ACT 12:2 Yohaanisa ishaa Yayqooba mashshan wodhisis.
ACT 12:3 Hessi Ayhudeta ufaysidaysa be7idi, gujidi Phexroosaka oythis. Hessi haniday Paasika Ba7aale bonchiya gallasatana.
ACT 12:4 Phexroosa oykidi qachis. Paasika bonchiya gallasatape guye deriya sinthe aathanaw qopidi, oyddu oyddu wotaadareti iya naagana mela tammanne usupun wotaadaretas aathidi immis.
ACT 12:5 Hessa gisho, Phexroosi qasho keethan naagetees. Shin woosa keetha asay iyaw minthidi Xoossaa woossosona.
ACT 12:6 Herodiisi Phexroosa asaa sinthe shiishanaape kase qamma Phexroosi nam7u baggara nam7u wotaadaretara santhalaatan qashetidi enta giddon dhiskis. Naageysati qasho keethaa pengetan eqidi naagoosona.
ACT 12:7 Akeekona de7ishin Godaa kiitanchoy qoncis. Qasho keethan poo7oy poo7is. Kiitanchoy Phexroosa miya bochi barkisidi, “Elle denda” yaagis. Iiraka santhalaatay iya kushiyape wodhi aggis.
ACT 12:8 Kiitanchoy iyako, “Ne ma7uwa ma7a, ne caammaaka aatha” yaagis. Phexroosi hessada oothis; kiitanchoy, “Ne laxana ma7ada tana kaalla” yaagis.
ACT 12:9 Phexroosi qasho keethafe keyidi kiitanchuwa kaallis. Iyaw qoncethi be7iyaba daanisipe attishin, kiitanchoy oothiyabay tuma daanibeenna.
ACT 12:10 Kiitanchoynne Phexroosi koyruwanne nam7antho wotaadariya aadhidi katamaa efiya birata pengiyako gakidosona. Pengey entaw barka dooyeti aggis. Enti keyidi issi ogiyara bishin kiitanchoy akeekona Phexroosape shaaketi aggis.
ACT 12:11 Phexroosas wozani simmin, “Tana Goday ba kiitanchuwa kiittidi, Herodiisa kushepenne naagidi uttida Ayhude asa ubbaafe ashshidaysa ha77i tuma eras” yaagis.
ACT 12:12 I hessa akeekida wode daro asay issife shiiqidi Xoossaa woossiya bessaa, Marqoosa geetetiya Yohaanisa aaye Mayraami soo bis.
ACT 12:13 Yan karen eqidi xeegis. Issi Rooda geetetiya oosanchiya pengiya dooyanaw yasu.
ACT 12:14 Rooda Phexroosa qaala gididaysa erida wode ufaysan kumada kariya dooyenna guye woxa bada, “Phexroosi karen eqis” yaagada asaas odasu.
ACT 12:15 Asay iiko, “Neeni gooyay!” yaagidosona. Rooda Phexroosa gididaysa geeshshada odasu. Enti, “Hessi iya naagiya kiitanchuwa” yaagidosona.
ACT 12:16 Shin Phexroosi karen eqidi xeegidi aggonna ixin asay kariya dooyidi iya be7idi malaaletidosona.
ACT 12:17 Shin enti si77i gaana mela Phexroosi ba kushiyan mallidi Goday qasho keethafe iya waati kessidaako entaw qoncisi odidi, “Haysa Yayqoobasinne ammaniya asatas odite” gidi yaape keyidi haraso bis.
ACT 12:18 Sa7ay wontiya wode, “Phexroosi aw bide” gidi wotaadareti woli giddon daro kaccidosona.
ACT 12:19 Herodiisi Phexroosa koyisin, I dhayida wode naageysata qoridi, enta wodhana mela kiittis. Hessafe guye, Herodiisi Yihudape Qisaare wodhidi yan guutha wode uttis.
ACT 12:20 Herodiisi Xiroosa asa bollanne Sidoona asaa bolla daro hanqetis. Enta biittay kathi Herodiisa biittafe demmiya gisho enti issife gididi iya Moorinna Bilasxoosa bantaw cima oothidi giiganaw Herodiisako bidosona.
ACT 12:21 Herodiisi bareda gallasan ba kawotethaa afilaa ma7idi, araata bolla uttidi asaas odis.
ACT 12:22 Asay, “Hessi Xoossaa qaala, asa qaala gidenna” yaagidi waassidosona.
ACT 12:23 Herodiisi Xoossaa bonchiboona gisho iiraka Godaa kiitanchoy iya dechin guxunen meetetidi hayqis.
ACT 12:24 Shin Xoossaa qaalay diccishenne dalgishe bees.
ACT 12:25 Barnabaasinne Saa7oli banta oosuwa polidi Marqoosa geetetiya Yohaanisa bantara ekidi Yerusalaamepe simmidosona.
ACT 13:1 Anxooken de7iya woosa keethan nabetinne astamaareti de7oosona. Enti Barnabaasa, Kareethi geetetiya Simoona, Qereenape yida Lukiyoosa, Kawa Herodiisara diccida Minaahenne Saa7ola.
ACT 13:2 Enti Godaa goyinnishininne xoomishin Geeshsha Ayyaanay, “Taani xeegida oosuwas Barnabaasanne Saa7ola taw dummayite” yaagis.
ACT 13:3 Hessa gisho, enti xoomidaapenne woossidaape guye banta kushiya enta bolla wothidi yeddidosona.
ACT 13:4 Hessa gisho, Geeshsha Ayyaanay enta kiittis. Selewuqe bidosona; yaape markaben gelidi Qophiroosa haathan teqetida biitta bidosona.
ACT 13:5 Enti Silmana gakidi ayhude woosa keethatan Xoossaa qaala odidosona. Yohaanisi maaddishe entara de7ees.
ACT 13:6 Enti yuushoy abban teqetida biitta, Qophiroosa kanthidi Phaafu gakiya wode, issi wordancho nabiya, Bar-Yesuusa geetetiya Ayhude maruwa demmidosona.
ACT 13:7 He maroy deriya aysiya Sargiyoos Phawuloosa geetetiya akeekancho addiyara de7ees. Sargiyoos Phawuloosi Barnabaasanne Saa7ola baako xeegidi Xoossaa qaala si7anaw koyis.
ACT 13:8 Shin Girike doonan maruwa sunthay “Elmaasa” geetetees. I deriya haareysi ammanonna mela digganaw koyidi Barnabaasaranne Phawuloosara eqetis.
ACT 13:9 Shin Phawuloosa geetetiya Saa7oli Geeshsha Ayyaanan kumidi maruwa caddi xeellidi,
ACT 13:10 “La, Xalahe na7aw, iitatethi ubbay kumidayso, xillotetha ubbaas morkiyaw, suure Godaa ogiya mirqeysa aggikii?
ACT 13:11 Heko, ha77i Godaa kushey ne bolla de7ees. Neeni qooqe gidana; guutha wodes awa poo7o be7aka” yaagis. Iira caaganne dhumi iya ayfiya goozin, ba kushiya oykidi kaalethiya asi koyishe yuuyis.
ACT 13:12 Deriya ayseysi hessa be7ida wode Godaaba tamaarsiya timirtiyan malaaletidi ammanis.
ACT 13:13 Phawuloosinne iyara de7eysati Phaafupe dendidi, Phinfilen de7iya Pharge markabera bidosona. Yohaanisi entafe shaaketidi Yerusalaame simmis.
ACT 13:14 Shin enti Phargefe aadhidi Phisden de7iya Anxooke gakidosona. Sambaata gallas ayhude woosa keethi gelidi uttidosona.
ACT 13:15 Muse higgeynne nabeta maxaafay nabbabetidaape guye ayhude woosa keetha halaqati, “Nu ishato, asaa minthethiya qaali hintew de7iyako asaas oderketi” yaagidi entako kiittidosona.
ACT 13:16 Phawuloosi dendi eqidi ba kushe mallidi, “Isra7eele asatonne, Xoossaa goyinniya Ayhude gidonna asaw, si7ite.
ACT 13:17 Ha Isra7eele asaa Xoossay nu mayzata dooris. Gibxe biittan imathatethan enti de7ishin, enta darsidi ba gita wolqan Gibxe biittafe enta kessis.
ACT 13:18 Mela biittan oytamu laytha mela enta danda7is.
ACT 13:19 Kanaane biittan Ayhude gidonna laapun kawotethata diggidi enta biitta ba asaa laatisis.
ACT 13:20 “Hessafe guye, nabiya Sameela wode gakanaw oyddu xeetanne ishatamu laytha mela aysiya daynnata entaw immis.
ACT 13:21 Hessafe guye, enti bantaw kawo immana mela woossin, Xoossay Biniyaame sheeshape Qiisa na7aa, Saa7ola oytamu laythi kawotana mela entaw immis.
ACT 13:22 Xoossay Saa7ola shaaridaape guye enta bolla Dawita kawothis. Xoossay Dawitaba markatishe, ‘Taani koyiya ubbaa ta wozanaa mela oothiya Isseye na7aa Dawita demmas’ yaagis.
ACT 13:23 “Xoossay, ‘Taani Dawita sheeshape Isra7eele deriya ashsheysa ehana’ gidaysa mela Yesuusa ehis.
ACT 13:24 Yesuusi yaanape sinthe Isra7eele asa ubbay banta nagaraape simmidi xammaqetana mela Yohaanisi qaala odis.
ACT 13:25 Qassi Yohaanisi ba oosuwa wursana hanishe asaako, ‘Tana oona gidi qopeetii? Taani hinte naagiya Kiristoosa gidike, shin taani iya caammaa birshanaw taw bessonnaysi taape guyera yees’ yaagis.
ACT 13:26 “Ta Ishato, Abrahaame sheeshato, qassi haysan Ayhude gidonashin Xoossas yayyeysato, ha atotetha qaalay nuus kiitetis.
ACT 13:27 Ayis giiko, Yerusalaamen de7iya asaynne enta halaqati Yesuusa eribookona. Sambaata ubban nabbabetiya nabeta qaala akeekibona gisho iya bolla pirdidi nabeti odida qaala polidosona.
ACT 13:28 Yesuusa wodhisanaw issi gaasoyka entaw dhayin Philaxoosi iya wodhana mela woossidosona.
ACT 13:29 Enti Yesuusabay Geeshsha Maxaafan xaafetidaba ubba polida wode masqaliyape iya wodhisidi moogidosona.
ACT 13:30 Shin Xoossay hayqope Yesuusa denthis.
ACT 13:31 Hessafe guye, I baara Galilape Yerusalaame yidaysatas daro toho bentis. Enti ha77i iyabaa asaas markatoosona.
ACT 13:32 “Xoossay nu aawatas immana gida Wongela nuuni hintew odoos.
ACT 13:33 Dawiti ba Mazmure Maxaafan nam7antho shempuwan, “Neeni, ta Na7a, taani hachi nena yelas” geetetidi xaafetida Yesuusa, Xoossay hayqope denthidi nu mayzatas immana gidaysa nuus enta naytas polis.
ACT 13:34 I wooqonna mela Xoossay hayqope iya denthon erisanaw, “ ‘Taani Dawitas immana gida ammanetida geeshsha anjuwa hintew immana’ ” yaagidi odis.
ACT 13:35 Hessa gisho, Mazmure Maxaafan hara bessan, “ ‘Ne Geeshsha Na7aa aha wooqisaka’ yaagees.
ACT 13:36 “Dawiti ba wode Xoossaa qofaa polidaape guye hayqidi ba aawatara moogetidi wooqis.
ACT 13:37 Shin Xoossay hayqope denthidaysi wooqibeenna.
ACT 13:38 “Hessa gisho, ta ishato, nagara atotethay Yesuusa baggara kasetidi hintew odetidaysa erite. Muse higgey nagaraape xillisanaw danda7enna.
ACT 13:39 Shin Yesuusa ammaniya ubbay nagaraape xillees.
ACT 13:40 Hessa gisho, nabeti gidaysi hinte bolla gakonna mela naagetite.
ACT 13:41 “ ‘Xoossay gidaba leqiseysato! Be7ite! Malaaletite! Dhayite! oonika odin, hinte ammanonna oosuwa taani hinte wodiyan oothana’ ” yaagis.
ACT 13:42 Phawuloosinne Barnabaasi Ayhude Woosa keethafe keyishin, kaalliya Sambaatan hessa gujidi odana mela asay entana woossidosona.
ACT 13:43 Shiiqoy laaletidaape guye, daro Ayhudetinne Ayhudeta ammanuwan gelidi Xoossaa goyinniya daroti Phawuloosanne Barnabaasa kaallidosona. Ammanidaysati Xoossaa aadho keehatethan minnidi daana mela enta zoridosona.
ACT 13:44 Kaalliya Sambaatan kataman de7iya asaape daroti Xoossaa qaala si7anaw shiiqidosona.
ACT 13:45 Shin Ayhudeti daro asaa be7ida wode Phawuloosa qanaatidi iya haasaya ixidi iya cayidosona.
ACT 13:46 Phawuloosinne Barnabaasi yayyonna, “Xoossaa qaalay koyrottidi hintew odetanaw koshshees. Shin hinte qaala ixidi merinaa de7uwa ekanaw nuus bessenna gidi hinte, hinte huuphen pirdida gisho hiza nuuni Ayhude gidonaysatako simmoos.
ACT 13:47 Gaasoyka Goday, “ ‘Alame kumethay ne baggara attana mela, taani nena Ayhude gidonna deriyas poo7o oothas’ yaagidi nuna kiittis” yaagidosona.
ACT 13:48 Ayhude gidonnaysati hessa si7ida wode ufaytidi Xoossaa qaala bonchidosona. Qassi merinaa de7uwas dooretida ubbay ammanidosona.
ACT 13:49 Godaa qaalay he biitta ubbaa gakis.
ACT 13:50 Shin Ayhudeti, Ayhude gidonna Xoosse goyinniya dure maccasatanne kataman de7iya gita asata Phawuloosa bollanne Barnabaasa bolla denthethidosona. He asati enta goodda doomidi banta biittafe kessidosona.
ACT 13:51 Shin Phawuloosaranne Barnabaasara ixeysatas malla gidana mela banta tohuwape baana pitidi Iqoniyoone katama bidosona.
ACT 13:52 Qassi Anxooken de7iya ammaneysati Geeshsha Ayyaananinne ufaysan kumidosona.
ACT 14:1 Kaseysadaka, Phawuloosinne Barnabaasi Iqoniyoonen Ayhudeta woosa keethi gelidi daro Ayhudetinne Ayhude gidonnaysati ammanana gakanaw qaala odidosona.
ACT 14:2 Shin ammanibona Ayhudeti, Ayhude gidonnayisata wozanaa laammidi ishata bolla denthethidosona.
ACT 14:3 Hawaareti yan daro wodiya gam7idosona. Enti yayyonna Godaaba odidosona. Goday malaatatanne oorathaba enti oothana mela entaw maata immidi, I ba aadho keehatetha qaalay tuma gideysa qoncisis.
ACT 14:4 Shin he katama asay shaaketidi, baggay Ayhudetara baggay qassi Hawaaretara gidis.
ACT 14:5 Ayhude gidonaysatinne Ayhudeti banta halaqatara issife gididi hawaareta qohanawunne shuchan caddanaw koydosona.
ACT 14:6 Hawaareti hessa eridi, Lisxiranne Darbe geetetiya Liqa7oona katamatanne enta heeran de7iya biitta baqatidosona.
ACT 14:7 Yan Wongela odidosona.
ACT 14:8 Yeletoosape doomidi nam7u tohoy wobbin hemeti eronna issi addey Lisxiran de7ees.
ACT 14:9 He addey Phawuloosi odishin uttidi si7ees. Phawuloosi iya tishshi oothi xeelliya wode paxanaw iyaw ammanoy de7eysa be7idi,
ACT 14:10 ba qaala dhoqu oothidi, “Sitti gada ne tohuwan eqa” yaagis. Yaatin, gupi dendi eqidi hemethi doomis.
ACT 14:11 Phawuloosi oothidaysa asay be7idi banta qaala dhoqu oothidi Liqa7oona doonan, “Xoossati ase daanidi nuuko wodhidosona” yaagidosona.
ACT 14:12 Barnabaasa, “Diya” gidi, Phawuloosi odan waannatiya gisho, iya, “Hermena” gidi sunthidosona.
ACT 14:13 Katamaape gaxan de7iya eeqa Diya keethaa kahineynne asay kormatanne alleeqo ciishshata hawaaretas yarshanaw koyidi katamaa penge ehidosona.
ACT 14:14 Shin Barnabaasinne Phawuloosi hessa si7ida wode enti oothanaw qopidaysa ixidi, banta ma7uwa peedhidosona. Asaa giddo woxi gelidi,
ACT 14:15 banta qaala dhoqu oothidi, “Asaw, haysa ayis oothetii? Nuka hinte mela ase. Ha pathonabape salonne sa7a, abbanne enta giddon de7iya ubbaba medhida de7o Xoossaako hinte simmana mela hintew nuuni Wongela odoos.
ACT 14:16 I, beni asay banta oge baana mela yeddi aggis.
ACT 14:17 Shin ira saluwape bukisis, kathaaka wodiyan wodiyan immis, kathi immidi hintena daro ufaysis, yaatidi hintew lo77oba oothidi baw marka dhaysibeenna” yaagidosona.
ACT 14:18 Hawaareti hessa gidi, bantaw asay yarshonna mela waaydi diggidosona.
ACT 14:19 Anxookepenne Iqoniyoonepe yida Ayhudeti, asaa banta bagga zaaridi shuchan Phawuloosa caddidosona. I hayqidaba daanin katamaape gaxa goochi efidi yeggidosona.
ACT 14:20 Shin ammaneysati yidi, iya yuushon eqidashin I dendidi katamaa gelis. Wontetha gallas Barnabaasara issife Darbe bis.
ACT 14:21 Enti Darbe kataman Wongela odidi darota ammanthidaape guye Lisxira, Iqoniyoonenne Phisden de7iya Anxooke simmidosona.
ACT 14:22 Yan ammaneyisata minthethishenne enti ammanon minnidi de7ana mela zorishe, “Xoossaa kawotethaa gelanaw nuuni daro waaye ekanaw bessees” yaagidi tamaarsidosona.
ACT 14:23 Qassi woosa keethatas huuphen huuphen cimata dooridosona. Xoomidaapenne woossidaape guye enti ammanida Godaas enta hadara immidosona.
ACT 14:24 Phisde biitta kanthi aadhidi Phinfile bidosona.
ACT 14:25 Phergen qaala odidaape guye Axaale bidosona.
ACT 14:26 Banta oosuwa polidaape guye, Axaalep Xoossa aadho keehatethas enta hadara immida Anxooke markabera guye simmidosona.
ACT 14:27 Anxooke gakida wode woosa keethaa asaa shiishidi Xoossay entara oothida oosuwa ubbaanne Ayhude gidonna asay ammanana mela entaw waati penge dooyidaako odidosona.
ACT 14:28 Hessan ammaneysatara daro wode gam7idosona.
ACT 15:1 Issi issi asati Yihudape Anxooke bidi, “Muse wogaatho hinte qaxaretonna ixiko attanaw danda7eketa” gidi ammaneyisata tamaarso doomidosona.
ACT 15:2 Hessi Phawuloosanne Barnabaasa entara daro palamanadanne kaccanaada oothis. Hessa gisho, Anxooken de7iya issi issi asati Phawuloosaranne Barnabaasara Yerusalaame bidi Hawaaretaranne cimatara gahetidi he oda billanaw qofay qashetis.
ACT 15:3 Woosa keethay enta kiittin bidosona. Enti Sirofinqe Samaarera aadhishe Ayhude gidonnaysati Xoossako waanidi simmidaako odidosona. Hessi ammaneyisata ubbaa daro ufaysis.
ACT 15:4 Enti Yerusalaame gakida wode woosa keethay, Hawaaretinne cimati enta mokidosona. Xoossay bantara oothidaba ubba odidosona.
ACT 15:5 Shin Farsaaweta baggafe ammanida issi issi asati dendi eqidi, “Ayhude gidonashin ammanida asati qaxaretanawunne Muse higge naaganaw bessees” yaagidosona.
ACT 15:6 Hawaaretinne cimati hessa zorettanaw shiiqidosona.
ACT 15:7 Daro zoretidaape guye, Phexroosi dendi eqidi, “Ta ishato, Ayhude gidonnaysati Wongela qaala ta doonape si7idi ammanana mela kasetidi tana Xoossay hinte giddofe dooridaysa hinte ereeta.
ACT 15:8 Asa wozana eriya Xoossay Geeshsha Ayyaana nuus immidaysada entawuka immidi tumayis.
ACT 15:9 Ammanon enta wozana geeshshida gisho nu giddoninne enta giddon dummatethi wothibeenna.
ACT 15:10 Hessa gisho, nu aawatinne nuuni tookanaw danda7iboona qambara ammaneyisata morgen wothidi ha77i ayis hinte Xoossa paacetii?
ACT 15:11 Godaa Yesuus Kiristoosa aadho keehatethan enti attidaysada nuka attidaysa ammanoos” yaagis.
ACT 15:12 Asay si77i gidi, Barnabaasinne Phawuloosi Ayhude gidonna asaa giddon banta baggara Xoossay oothida malaatatanne oorathaba ubbaa odishin si7oosona.
ACT 15:13 Enti haasaya ongidaape guye Yayqoobi, “Ishato, ta geysa si7ite.
ACT 15:14 Xoossay Ayhude gidonnayisata giddofe ba ase dooranaw koyidi entana koyro waatidi qopidaako Simooni odis.
ACT 15:15 Nabeta qaalay haysara issino. Geeshsha Maxaafan,
ACT 15:16 “ ‘Haysafe guye, taani simmana, kundida Dawita kawotetha denthana. Laaletida keethaaka zaara essana.
ACT 15:17 Attida asa ubbay taako yaana, taani xeegida Ayhude gidonna asa ubbay tana koyana.
ACT 15:18 Benipe doomada hessi eretana mela oothida Xoossay, taani yaagayis’ yaagees.
ACT 15:19 “Hessa gisho, ta qofay Xoossako simmiya Ayhude gidonnayisata nuuni waaysonaako lo77o.
ACT 15:20 Shin enti eeqas yarshetidi tunidaba moonna mela, laymatonna mela, bawuta moonna melanne suuthi uyonna mela entaw nuuni dabdaabe xaafanaw koshshees.
ACT 15:21 Muse higgey benipe doomidi Sambaatan Sambaatan ayhude woosa keethatan nabbabetishe katama ubban sabbaketees” yaagis.
ACT 15:22 Hessafe guye, hawaaretinne cimati woosa keetha asa ubbaara issife banta giddofe guutha asata dooridi Phawuloosaranne Barnabaasara Anxooke yeddanaw qofa qachidosona. Enti daro bonchetida nam7u asata Barsabaasa geetetiya Yihudanne Sillaase dooridosona.
ACT 15:23 Haysada geetetidi xaafetida dabdaabe enta bolla yeddidosona: “Nuuni hawaaretinne cimati hinte ishati, Anxooken, Sooreninne Kilqen de7iya Ayhude gidonna ishatas nu sarothuwa kiittoos.
ACT 15:24 “Nuuni kiittonna asati nu giddofe bidi, ‘Hinte qaxaretanawunne higgiya naaganaw bessees’ gidi, hintena waaysidaysanne yiloydaysa si7ida.
ACT 15:25 Nuuni dosiya Barnabaasanne Phawuloosa dooretida asatara issife hinteko kiittanaw issi wozanan nu qofaa qachida.
ACT 15:26 Enti nu Godaa Yesuus Kiristoosa gisho banta de7uwa aathidi immidosona.
ACT 15:27 Hessa gisho, nuuni xaafidaysa enti banta doonan gujidi hintew odana mela Yihudanne Sillaase kiitida.
ACT 15:28 “Ha koshsheysatape attishin, hara tooho hintena toossonna mela nunne Geeshsha Ayyaanay oda qachida.
ACT 15:29 Eeqas yarshetidi tunidaba moopite, suuthu uyopite, bawuta moopite, laymatopite. Ha ubbaafe hinte huuphiya naagiko hinte lo77oba ootheeta. Hiza, saro de7ite” yaagidosona.
ACT 15:30 Hessa gisho, kiitetidaysati moyzetidi Anxooke bidi ammaniya asaa shiishidi, dabdaabe immidosona.
ACT 15:31 Enti he minthethiya dabdaabiya nabbabida wode ufaytidosona.
ACT 15:32 Qassi Yihudinne Sillaasey banta huuphen nabe gidiya gisho ammaneyisata loythi zoridi minthethidosona.
ACT 15:33 Enti Anxooken guutha gallas uttidaape guye ishati lo77ora moyzin bantana kiitidaysatako simmidosona.
ACT 15:34 [Shin Sillaasey yan attanaw koyis].
ACT 15:35 Qassi Phawuloosinne Barnabaasi hara daro asatara issife Godaa qaala tamaarsishenne wongelaa odishe Anxooken gam7idosona.
ACT 15:36 Guutha gallasape guye Phawuloosi Barnabaasako, “Nuuni Godaa qaala odida katama ubban ammaneysati waanidi de7iyako guye simmishe xomoosi be7oos” yaagis.
ACT 15:37 Barnabaasi Marqoosa geetetiya Yohaanisa bantara efanaw koyis.
ACT 15:38 Shin Phawuloosi Marqoosa bantara efanaw koybeenna. Gaasoyka, I Phinfilen shaaketidi entara oothanaw bibeenna.
ACT 15:39 Enta giddon iita ooshshi keyin issoy issuwafe shaaketidosona. Barnabaasi Marqoosa ekidi markabera Qophiroosa bis.
ACT 15:40 Shin Phawuloosi Sillaase dooris; ammaneysati Phawuloosa Xoossa aadho keehatethas hadara immidaape guye, I keyidi bis.
ACT 15:41 Yaatidi, woosa keethata minthethishe Sooreranne Kilqiyara aadhis.
ACT 16:1 Phawuloosi Darbenne Lisxira bis. Yan Ximotiyoosa geetetiya ammaniya asi de7ees. Iya aayiya ammaniya Ayhude maccasi, iya aaway Girike asi.
ACT 16:2 Lisxiraninne Iqoniyoonen de7iya ammaneysati Ximotiyoosaba loythidi markatidosona.
ACT 16:3 Phawuloosi Ximotiyoosa baara efanaw koydi, iya aaway Girike asi gididaysa he bessan de7iya Ayhude ubbay eriya gisho iya qaxaris.
ACT 16:4 Enti katamatara bishe Yerusalaamen de7iya hawaaretinne cimati wothida higgiya ammaneysati naagana mela entaw odishe aadhidosona.
ACT 16:5 Hessa gisho, woosa keethati ammanon minnishe, taybonka gallas gallas dari dari bidosona.
ACT 16:6 Iisen qaala odonna mela Geeshsha Ayyaanay enta diggida gisho, Pirgeranne Galatiya biittara aadhidosona.
ACT 16:7 Enti Miise zawa gakida wode Bitaane baanaw koydosona. Shin Yesuusa Ayyaanay enta diggis.
ACT 16:8 Hessa gisho, enti Miise matara aadhishe Xiro7aada wodhidosona.
ACT 16:9 Phawuloosi qamma qoncethan issi Maqedoone asi baako, “Maqedoone pinnada nuna maaddarki” yaagishe eqidi woossishin be7is.
ACT 16:10 Qoncethaa I be7idaape guye ellesidi nuuni Maqedoone baanaw koyda. Ayis giiko, wongela yan de7iya asaas odanaw Xoossay nuna xeegidaysa erida.
ACT 16:11 Xiro7aadape dendidi markaben gelidi Samotiraaqe bida, wontetha gallas Naaphule bida.
ACT 16:12 Yaape dendidi Maqedoone biittan de7iya Filphisiyuusa katama bida. Filphisiyuusi Roome asay de7iya katama. Nuuni he kataman guutha gallas uttida.
ACT 16:13 Sambaata gallas katamaape gaxan Shaafa doonan Ayhudeti Xoossaa woossiya bessi de7eysa eridi yaa bida. He bessan shiiqida maccasaas qaala odida.
ACT 16:14 Nuna si7iya asape issi Liidiya geetetiya Tiyatroona katamaape yida, Xoossaa ammanida zo7o afila zal7iya, maccasiya de7awusu. Phawuloosi odeysa iya si7ana mela Xoossay I wozanaa dooyis.
ACT 16:15 Liidiya ba soo asaara issife xammaqetidaape guye nuuko, “Hinte tana Godaa tuma ammanasu giiko ta soo yedhite” gada minthada woossasu.
ACT 16:16 Nuuni Xoossaa woossiya bessaa bishin iita ayyaanay I bolla de7idi marothiya issi geela7o gadhindoy nuura gahetasu. Iya kaayada daro miishe ba godatas ehawusu.
ACT 16:17 Phawuloosanne nuna kaallada, “Haysati Ubbaafe Bolla Xoossaa aylleta! Enti hinte attana oge odeyisata” gada waassasu.
ACT 16:18 Ubba gallas hessada gawusu. Shin Phawuloosi yilotidi guye simmidi, he ayyaana, “Yesuus Kiristoosa sunthan neeni iipe keya” gidi kiittis. Iiraka iita ayyaanay iipe keyi aggis.
ACT 16:19 Shin I godati bantaw miishe demmiya ogey dhayidaysa be7idi, Phawuloosanne Sillaase oykidi, dabaaba daynnata sinthe goochi efidosona.
ACT 16:20 Daynnata sinthe enta efidi, “Haysati Ayhude asi gidishe nu katamaa asaa daro waaysosona.
ACT 16:21 Nuuni Roome biitta asi gidishe ekanawunne oothanaw woga gidonnaba tamaarsoosona” yaagidosona.
ACT 16:22 Asay issi bagga gididi, Phawuloosa bollanne Sillaase bolla dendidosona. Daynnati enta ma7uwa qaaridi xam7an shocana mela kiittidosona.
ACT 16:23 Enta daro wadhidaape guye, qasho keethi gelsidosona. Qasho keethaa naageysika enta minthi naagana mela kiittidosona.
ACT 16:24 Qasho keethaa naageysi he kiita ekidi, Phawuloosanne Sillaase qasho keethas qol7a gelsis. Enta tohuwa duxis.
ACT 16:25 Shin giddi bilahe gidiya wode Phawuloosaranne Sillaasera woossishenne mazmure yexishe Xoossaa galatoosona. Qasho keethan de7iya hara asatika enti giyaba si7oosona.
ACT 16:26 Qoponna qasho keetha baasoy qaaxana gakanaw biitta qaaxoy hanis. He saatenka penge ubbay dooyetis; qashetida asa ubbaa santhalaatay birsheti wodhis.
ACT 16:27 Qasho keethaa naageysi dhiskofe barkida wode qasho keethaa penge ubbay dooyetidaysa be7idi qasho asay kessi eki bidaba daanin bana wodhanaw mashshe ekis.
ACT 16:28 Shin Phawuloosi qaala dhoqu oothidi “Nu ubbay haysan de7iya gisho neeni nena qohopa” yaagis.
ACT 16:29 Qasho keethaa naageysi xompe woossi ekidi ellesidi gaathi woxis. Kokorishe Phawuloosa sinthaninne Sillaase sinthan gufannis.
ACT 16:30 Enta kare kessidi, “Ta godato, taani attanaw ay oothanaw bessii?” yaagis.
ACT 16:31 Phawuloosaranne Sillaasera iyako, “Godaa Yesuus Kiristoosa ammana; neeranne ne soo asaara attana” yaagidosona.
ACT 16:32 Enti iyasinne iya son de7iya ubbaas Godaa qaala odidosona.
ACT 16:33 Qamma he saatenka qasho keetha naageysi enta efidi enta madunthaa meeccis. Ellesidi ba soo asa ubbaara xammaqetis.
ACT 16:34 Phawuloosanne Sillaase ba soo efidi entaw kathi aathis. I ba soo asa ubbaara Xoossa ammanida gisho ufaytis.
ACT 16:35 Sa7i wontin daynnati, “He asata billa” yaagidi wotaadareta halaqata iyako kiittidosona.
ACT 16:36 Qasho keetha naageysi, “Hinte biletana mela daynnati kiittidosona. Hiza, keyidi saro biite” yaagidi he kiita Phawuloosas odis.
ACT 16:37 Shin Phawuloosi, “Nuuni Roome asi gidishin enti nuna pirdi bayna asaa sinthan wadhidi, qasho keethan yeggidosona. Ha77i nuna geeman keyidi boo goonna? Hanenna, enti banta huuphen yidi nuna kesso” yaagis.
ACT 16:38 Wotaadare halaqati daynnatas hessa odin, Phawuloosaranne Sillaasera Roome biitta ase gididaysa si7ida wode yayyidosona.
ACT 16:39 Hessa gisho, daynnati yidi entako, “Nuuni hintena qohida” gidoosona. Qasho keethafe kare enta kessidi, katamape keydi baana mela woossidosona.
ACT 16:40 Phawuloosaranne Sillaasera qasho keethafe keyidi Liidiya soo bidosona. Yan ammaneysatara gaketidi enta minthethidi keydi bidosona.
ACT 17:1 Phawuloosaranne Sillaasera Amfipholisaranne Apholonara aadhidi Teselonqe bidosona. Yan ayhude woosa keethi de7ees.
ACT 17:2 Phawuloosi kaseysada yaa gelis. Hessan heedzu saaminta Xoossaa qaalape asaas odis.
ACT 17:3 Kiristoosi waaye ekanawunne hayqope dendanaw besseysa entaw qoncisidi odishe, “Yesuusi ha taani hintew odeysi Kiristoosa” yaagis.
ACT 17:4 Entafe issoti issoti oday tuma gideysa ma7idi Phawuloosaranne Sillaasera issifidosona. Hessadaka, Xoossaa goyinniya daro Girike asaynne daro bonchetida maccasatika entara issifidosona.
ACT 17:5 Shin Ayhudeti qanaatidi issi issi oosoy bayna iita asata ogepe shiishidosona. Kataman buqethi kessidosona; Phawuloosanne Sillaase asaas aathidi immanaw koydi Yaasona keethaa teqidosona.
ACT 17:6 Phawuloosinne Sillaasey entaw bentonna ixin, Yaasonanne issi issi ammaneyisata katamaa halaqatako goochi efidi, “Haysati biitta ubbaa buqeysati ha77i nuuko yidosona.
ACT 17:7 Yaasoni enta ba son wothis. Haysati, ‘Yesuusa geetetiya hara kawoy de7ees’ gidi Qeesare kiitaa menthosona” yaagidi dhoqu gida qaalan odidosona.
ACT 17:8 Shiiqida asaynne katama halaqati hessa si7idi hananaba dhaydosona.
ACT 17:9 Halaqati Yaasonanne harata waasera billidosona.
ACT 17:10 Ammaneysati Phawuloosanne Sillaase qammara Beeriya yeddidosona. Beeriya gakidi, ayhude woosa keethi gelidosona.
ACT 17:11 Beeriya asay Teselonqe asaape aadhida suureta. Enti qaala kumetha wozanape ekidosona; Phawuloosi gidaysi tuma gideysa shaaki eranaw gallas gallas Geeshsha Maxaafata pilgoosona.
ACT 17:12 Hessa gisho, entafe daroti, Giriketapeka bonchetida daro maccasatinne daro addeti ammanidosona.
ACT 17:13 Shin Teselonqen de7iya Ayhudeti Phawuloosi Xoossaa qaala Beeriyanka odidaysa si7ida wode Beeriya yidi asaa buqidosona.
ACT 17:14 Hessafe guye, ammaneysati ellesidi Phawuloosa abba mati yeddidosona. Shin Sillaaseynne Ximotiyoosi Beeriyan attidosona.
ACT 17:15 Phawuloosa moyzida asati Ateena gathidosona. He asati Sillaaseynne Ximotiyoosi bantaw danda7etida mela ellesidi baako yaana mela Phawuloosi kiitida kiita ekidi Beeriya simmidosona.
ACT 17:16 Phawuloosi Ateenan Sillaasenne Ximotiyoosa naagishe, kataman eeqi kumidaysa be7idi yilotis.
ACT 17:17 Hessa gisho, ayhude woosa keethan Ayhudetaranne Xoossa goyinniya Ayhude gidonna asaara qassi baara gahetiya asaara ubba gallas palamees.
ACT 17:18 Epiqoroosenne Istoyke geetetiya cugatape issi issi eranchoti Phawuloosara palamidosona. Entafe issoti issoti, “Ha yooyamay ay odanaw koyii?” yaagidosona. Harati Phawuloosi Yesuusabaanne hayqope I dendidaysa bantaw odida gisho, “Ooratha xoossataba odiya daanees” yaagidosona.
ACT 17:19 Phawuloosa oykidi Ariyospagoosa geetetiya shiiqo bessaa efidi, “Ha neeni tamaarsiya oorathabay aybeko nuna erisikii?
ACT 17:20 Ayis giiko, neeni nuus oorathaba odaasa; hiza hessi aybeko nuuni eranaw koyoos” yaagidosona.
ACT 17:21 Ateena asa ubbaynne yan de7iya imatha asay oorathaba odetonanne si7onna pee7okona.
ACT 17:22 Phawuloosi Ariyospagoosa sinthan eqidi, “Ateena asato, xoossatas ubbaban hinte daro yayyeysa taani be7ayis.
ACT 17:23 Taani hinte katamaara yuuyashe hinte goyinniya bessata be7iya wode, ‘Eretonna Xoossaas’ geetetidi xaafetida yarsho bessa demmas. Ha hinte eronnashin goyinneysa taani hintew odayis.
ACT 17:24 Sa7anne sa7an de7iya ubbaba medhida Xoossay, salonne sa7a Goday, asi keexida keethan deenna.
ACT 17:25 I de7o, shemponne ubbaba asa ubbaas immiya gisho paci de7iya asada asa maade koyenna.
ACT 17:26 Xoossay asa koche ubbaa issi addiyafe medhidi biitta ubban wothis. Yaatidi enti daana wodiyasinne bessaas zawa immis.
ACT 17:27 I hessa oothiday asi iya koyana melanne pilgidi demmana melasa. Hanikoka I nuupe geemmibeenna.
ACT 17:28 Hintefe issi issi yexeysati, ‘Nuuni iya nayta’ gidaysada, ‘Nuuni iyan paxa de7oos, qaaxoos.’
ACT 17:29 Hiza, nuuni Xoossaa nayta gidiya gisho, ‘Xoossay asa hiillatethaninne qofan worqafe woyko birape woyko shuchafe oosetidaba daanees’ yaagidi qopanaw bessenna.
ACT 17:30 Hessa gisho, Xoossay beni wode asay eronna oothidaysa aggidi aadhis. Shin ha77i ubba bessan de7iya asay nagarape simmana mela kiitees.
ACT 17:31 Ayis giiko, Xoossay ba doorida addiyan sa7an de7iya asa ubbaa bolla xillo pirda pirdanaw qamma giigisi wothis. Iya hayqope denthidi hessa asa ubbaas tumayis” yaagis.
ACT 17:32 Entafe issi issi asati hayqope dendoba Phawuloosape si7idi, iya bolla qelqisidosona. Shin harati, “Nuuni hessa neepe gujidi si7anaw koyoos” yaagidosona.
ACT 17:33 Hessa gisho, Phawuloosi enta giddofe keyis.
ACT 17:34 Shin issi issi addeti Phawuloosara gaketidi ammanidosona. Enta giddofe Ariyospagoosan shiiquwan de7iya Diyonasiyoosa geetetiya addey, Damarso geetetiya issi maccasiyanne harati de7oosona.
ACT 18:1 Hessafe guye, Phawuloosi Ateenape keyidi, Qorontoosa bis.
ACT 18:2 Yan Phanxoosan yeletida issi Ayhude addiya Aqila demmis. Ayhude asa ubbay Roomepe keyana mela kawoy Qalawudiyoosi kiitida gisho guutha wodepe kase I ba mache Phirisqillara Xaalepe yis. Phawuloosi entara gahetanaw bis.
ACT 18:3 Iya oosoy entaysada dunkaane siko gidiya gisho, entara uttidi issife oothis.
ACT 18:4 Phawuloosi Sambaata ubban Ayhudetanne Giriketa ammanthanaw ayhude woosa keethan palamees.
ACT 18:5 Sillaaseynne Ximotiyoosi Maqedoonepe yida wode Phawuloosi ba kumetha wodiya immidi Ayhudetas Yesuusi I, Kiristoosa gidi qaala odis.
ACT 18:6 Shin enti Phawuloosa ixidi iya cayin Phawuloosi ba ma7uwape baana qoqofishe, “Hinte gomey hintena oyko; taani hessan de7ike. Hizape guye, taani Ayhude gidonna asaako bayis” yaagis.
ACT 18:7 Yaape keyidi Xoossaa goyinniya Titos Yosxoosa geetetiya uraa soo bis. Yosxoosa keethay ayhude woosa keetha matan de7ees.
ACT 18:8 Ayhude woosa keetha halaqay Qarisphoosi ba soo asa ubbaara Godaa ammanis. Qorontoosa asatapeka daroti Xoossaa qaala si7ida wode ammanidi xammaqetidosona.
ACT 18:9 Goday issi qamma Phawuloosas qoncidi, “Yayyofa; oda, si77i goopa.
ACT 18:10 Taani neera de7ayis. Taw ha kataman daro asi de7iya gisho nena qohidi iitaban yeggana asi oonika baawa” yaagis.
ACT 18:11 Hessa gisho, Phawuloosi Xoossaa qaala asaa tamaarsishe issi laythinne usupun ageena entara uttis.
ACT 18:12 Gaaliyoosi Akaya biitta aysiya wode Ayhudeti issife Phawuloosa bolla dendidi pirda keethi iya efidi,
ACT 18:13 “Ha addey higgiya ixidi, asay Xoossaa goyinnana mela oothees” yaagidosona.
ACT 18:14 Phawuloosi odetana hanishin, Gaaliyoosi Ayhudetako, “Ayhudeto, hessi iita ooso woyko naaqo gidiyako taani hintebaa danda7ada si7anaw bessees.
ACT 18:15 Shin qaalas, sunthasinne hinte higgiyas hinte palamiyaba gidiko hinte, hintew billite; hessa taani pirdike” yaagis.
ACT 18:16 Yaatidi, enta pirda keethafe kare kessis.
ACT 18:17 Hessafe guye, Girike asa ubbay ayhude woosa keetha halaqaa Sosteneesa oykidi pirda keethaa sinthan wadhidosona. Shin Gaaliyoosi hessa paxaba gibeenna.
ACT 18:18 Phawuloosi daro gallas Qorontoosan uttidaape guye ammaniya asaa sarothidi, Phirisqilliranne Aqilara markaben Soore bis. Shin I baanape sinthe baw gasoy de7iya gisho Kinkire kataman ba huuphiya buluusetis.
ACT 18:19 Enti Efesoona gakida wode Phawuloosi Phirisqillonne Aqila yan aggis. Shin baw ayhude woosa keethi gelidi Ayhudetara odetis.
ACT 18:20 Enti bantara daro wode uttana mela Phawuloosa woossidosona shin I ixis.
ACT 18:21 Entafe shaaketishe, “Taani yaa baaliya Yerusalaamen bonchanaw bessees. Shin Xoossi giiko hinteko simma yaana” yaagidi Efesoonape markabiyan bis.
ACT 18:22 Qisaare gakida wode Yerusalaame bidi woosa keethaa asaa sarothidaape guye Anxooke bis.
ACT 18:23 Yan guutha wode gam7idaape guye ammaniya asata ubbaa minthethishe Galatiyaranne Pirgera aadhis.
ACT 18:24 Iskindiren yeletida issi Aphiloosa geetetiya Ayhude asi Efesoona bis. I oda eriya asinne Xoossaa qaala daro eriya asi.
ACT 18:25 Godaa ogiyaka tamaaris, ayyaanan xuugetidi Yesuusaba suure tamaarsees. Gidoshin, Yohaanisa xinqatiya xalaala erees.
ACT 18:26 I ayhude woosa keethan yayyonna tamaarsees. Phirisqillanne Aqili I odeysa si7ida wode bantara soo iya efidi Xoossaa ogiya kaseysafe geeshshidi iyaw odidosona.
ACT 18:27 Aphiloosi Akaya baanaw koyin Efesoonan de7iya ammaniya asay iya qofaa ekidi Akayan de7iya ammaneysati iya mokana mela entaw dabdaabiya xaafidosona. I yaa gakida wode Xoossaa aadho keehatetha baggara Yesuus Kiristoosa ammanidaysata daro maaddis.
ACT 18:28 Ayis giiko, Yesuusi, I, Kiristoosa gideysa Ayhudetas Xoossaa qaalape qoncisidi deriya sinthan minthi odidi enta lathis.
ACT 19:1 Aphiloosi Qorontoosan de7ishin, Phawuloosi qommo baggara aadhidi Efesoona bis. Yan issi issi ammaniya asata demmis.
ACT 19:2 Entako, “Hinte ammanida wode Geeshsha Ayyaana ekidetii?” yaagidi oychis. Enti, “Akay, ekibooko; hari attoshin, Geeshsha Ayyaani de7iyabaka si7ibooko” yaagidosona.
ACT 19:3 Phawuloosi entako, “Yaatin, aybin xammaqetidetii?” yaagis. Enti, “Nuuni Yohaanisa xinqaten xammaqetida” yaagidi zaaridosona.
ACT 19:4 Phawuloosi, “Yohaanisi baape guyera yaa Yesuus Kiristoosan asay ammanana mela asaas odishe, nagarape simo bessiya xinqaten xammaqis” yaagis.
ACT 19:5 Enti hessa si7ida wode Godaa Yesuus Kiristoosa tamaare gidanaw xammaqetidosona.
ACT 19:6 Phawuloosi ba kushiya enta bolla wothida wode Geeshsha Ayyaanay enta bolla wodhin, dumma dumma doonan odetidosona; qassi tinbite odidosona.
ACT 19:7 He bessan tammanne nam7a gidiya asati de7oosona.
ACT 19:8 Phawuloosi ayhude woosa keethi gelidi, Xoossa kawotethaaba yayyonna palamishenne loythi qoncisishe entara heedzu ageena gakanaw gam7is.
ACT 19:9 Shin entafe issoti issoti dhube gididi daro asaa sinthan Godaa ogiya cayidi ammanonna ixidosona. Phawuloosi ammaneyisata entafe shaaki ekidi Xiranoosa geetetiya timirte keethan ubba gallas enta tamaarsis.
ACT 19:10 Phawuloosi nam7u laythi gakanaw qaala odis. Hessa gisho, Iisen de7iya asa ubbay, Ayhudetinne Ayhude gidonnaysati Godaa qaala si7idosona.
ACT 19:11 Xoossay Phawuloosa kushen wolqaama malaatata oothis.
ACT 19:12 Hessa gisho, asay iya asatethaa bochida maarabe woyko ma7o harganchotas efoosona. Entika paxoosona; tuna ayyaanati entafe keyoosona.
ACT 19:13 Tuna ayyaanata kessishe yuuyiya Ayhudetape issoti issoti, “Phawuloosi sabbakiya Yesuusa sunthan keyite gidi hintena kiittoos” yaagidi, tuna ayyaanati oykida asaa bolla Godaa Yesuusa sunthaa xeegidosona.
ACT 19:14 Kahine halaqaa Asqewa geetetiya issi Ayhude addiyas hessa oothiya laapun nayti de7oosona.
ACT 19:15 Shin tuna ayyaanay entako, “Taani Yesuusaka Phawuloosaka erayis, shin hinte oonantee?” yaagis.
ACT 19:16 Tuna ayyaani oykida addey enta bolla gupi wodhidi, enta madunxisidi, he keethafe kallo baqatana gakanaw wolqaamis.
ACT 19:17 Efesoonan de7iya Ayhudetinne Ayhude gidonnaysati ubbay hessa si7idi daro yayyidosona. Godaa Yesuusa sunthay daro bonchetis.
ACT 19:18 Ammaneysatape daroti banta oothida iita oosuwa paaxishenne qoncen odishe yoosona.
ACT 19:19 Marotape daroti banta maxaafata shiishidi asa ubbaa sinthan xuuggidosona. He maxaafata gatiya tayboy ishatamu mukulu bira santime gidis.
ACT 19:20 Hessada hanidi Xoossa qaalay diccishenne dalgishe bis.
ACT 19:21 Hessi hanidaape guye Phawuloosi, “Taani Yerusalaame ba simmada Roome baanaw bessees” yaagidi Maqedooneranne Akayara aadhidi Yerusalaame baanaw qofa qachis.
ACT 19:22 Qassi bana maaddeysatape nam7ata Ximotiyoosanne Erasxoosa Maqedoone kiittidi, baw Iisen guutha wode gam7is.
ACT 19:23 He wode Godaa ogiya gisho Efesoonan wolqaama kachi keyis.
ACT 19:24 Issi bira oothiya Dimexiroosa geetetiya uray Arxemisi eeqa keetha misiliya birape oothidi daro wodhe demmees.
ACT 19:25 Hessa gisho, hessa mela ooso ootheyisata issife shiishidi, “Asaw, nu duretethay ha oosuwan gideysa hinte ereeta.
ACT 19:26 Haysi Phawuloosi, ‘Asa kushen oosetidaysati xoossata gidokona’ yaagidi, Efesoonaninne guutha biittatape attishin, kumetha Iise ubban de7iya daro asaa odi ammanthidaysanne balethidaysa hinte be7idetanne si7ideta.
ACT 19:27 Meto gididay, nu oosoy kadheteysa xalaala gidonashin, Iisenne biitta ubban de7iya asi goyinniya gita xoosse Arxemisi keethay bonchetonna atteysanne I gitatethay kundanaysa” yaagis.
ACT 19:28 Asay hessa si7ida wode shenen xuugetidi, “Efesoona Arxemisa gita” yaagidi waassidosona.
ACT 19:29 He waasoy katama ubbaa gakis. Phawuloosara hemetiya Maqedoone asata, Gaayoosanne Arxirokoosa oykidi goochishe kaassa bessaa woxidosona.
ACT 19:30 Phawuloosi asay shiiqida bessa gelanaw koyis, shin ammaneysati iya diggidosona.
ACT 19:31 Iise biitta halaqatape Phawuloosa lagge gidida issoti issoti Phawuloosako kiittidi, “Kaassa bessa qoncen keyada bentofa” gidi iya woossidosona.
ACT 19:32 Shiiqida asaas hananabay dhayis; dariya bagga asay hari attoshin ayis shiiqidako eronna gisho, issoy issibas waassiya wode hankoy harabas waassees.
ACT 19:33 Ayhudeti Iskindire geetetiya addiya aathidi bessin, issi issi asay I gaanaba odidi iya sinthe aathidosona. I asay si77i gaana mela ba kushen malli bessidi, asaas mootetanaw eqis.
ACT 19:34 Shin Iskindirey Ayhude asi gididaysa asay erida wode nam7u saate gidanaysa mela ubbay issi qaalan, “Efesoona Arxemisa gita” yaagidi waassidosona.
ACT 19:35 Wursethan, katamaa xaafey asaa si77i oothidi, “Efesoona asaw, Efesoona katamay gita Arxemisi eeqa keethinne salope wodhida I shucha misiliya naagey Efesoona asaa gideysa eronnay oonee?
ACT 19:36 Haysa kashi giya asi bayna gisho, hinte si77i gaanawunne dirgidi ayko oothonna agganaw bessees.
ACT 19:37 Hinte, ha asata eeqa keetha miishe kaysotonashin woyko nu xoossata cayiboonashin coo ha asata oykidi ehideta.
ACT 19:38 Hessa gisho, Dimexiroosinne iyara de7iya oosanchoti asaa mootanaw koyko, pirda keethay dooya de7ees; daynnatika de7oosona; enti mootanaw danda7oosona.
ACT 19:39 Shin hinte hara oda koyko, Shango shiiqon oday be7eto.
ACT 19:40 Hessa gidonna ixiko hachi hanidabaas Roome kawotethay nuna oychana. Ha buqethaas gaasoy bayna gisho, nuuni gaaso odanaw danda7oko”
ACT 19:41 yaagidi shiiquwa laallis.
ACT 20:1 Waasoy dochidaape guye, Phawuloosi ammaniya asata xeegisidi enta zoridaape guye, sarothidi Maqedoone baanaw keyis.
ACT 20:2 He biittara aadhishe qaala odishe asaa daro minthethidaape guye Girike biitta bis.
ACT 20:3 I yan heedzu ageena uttidi, markabera Soore baanaw qopidi de7ishin, Ayhudeti bana wodhanaw koyeysa eridi Maqedoonera guye simmanaw koyis.
ACT 20:4 Phawuloosa moyzidaysati Beeriyape Pharhusa na7aa Sophaxiroosa, Teselonqefe Arsxirokoosanne Sikonduusa, Darbefe Gaayoosa, Iisepe Tikiqoosa, Xirofmoosanne Ximotiyoosa.
ACT 20:5 Hessati sinthe bidi nuna Xiro7aadan naagoosona.
ACT 20:6 Nuuni Uytha Baaliya bonchidaape guye, Filphisiyuusape markabera dendidi, ichashantho gallasan enta Xiro7aadan gakidi yan laapun gallas gam7ida.
ACT 20:7 Saamintafe koyro gallasan nuuni uythaa menthanaw shiiqidi de7ishin, Phawuloosi wontethe baanaw qopida gisho, entaw qaala odishe giddi bilahe gakanaw odaa adussis.
ACT 20:8 Nuuni shiiqidi uttida pooqiyan daro poo7oy de7ees.
ACT 20:9 Ewuxikoosa geetetiya issi na7atethay maskoote bolla uttidi, baana dogidi dhiskis. Phawuloosi oda adussida wode Ewuxikoosi dhisko eeyidi heedzantho pooqiyape kundidi hayqidaysa asay denthis.
ACT 20:10 Shin Phawuloosi wodhidi, iya bolla gufannis. Iya idimmidi, “I hayqibeenna, hirgofite” yaagis.
ACT 20:11 Hessafe guye, pude pooqiya bolla keyidi uythaa menthidi mis. Sa7ay wontana gakanaw asaas odidaape guye dendidi bis.
ACT 20:12 He paxida na7atetha soo efidi daro ufaytidosona.
ACT 20:13 Shin Phawuloosi bana yaape mokana mela nuus odida gisho, kasetidi markabiyako bidi, Asoosa baanaw dendida. Ayis giiko, I tohon baanaw qopida gisho nuna hessatho kiittis.
ACT 20:14 I nuura Asoosan gahetin markabiyan iya ekidi Mixiline bida.
ACT 20:15 Wontetha gallas yaape dendidi markaben Kiyoosa sinthan de7iya bessaa gakida; qassi wontetha gallas Saamosa pinnidi kaalliya gallas Milixe gakida.
ACT 20:16 Phawuloosi Iisen daro gam7onna Efesoona matara aadhanaw qopis. Baw danda7etiko Phanxeqosxe Baaliya gallas Yerusalaame gakanaw eesotees.
ACT 20:17 Phawuloosi Milixepe Efesoona kiittidi woosa keethaa cimata xeegisis.
ACT 20:18 Woosa keetha cimati iyako yin, entako haysada yaagis: “Taani Iise gelida koyro gallasape doomida hintera de7ida wode ubban waana de7idaako hinte ereeta.
ACT 20:19 Ayhudeti duulatidi ta bolla meto gathikoka taani ashketethaninne daro afuthan Godaas oothas.
ACT 20:20 Dabaabanka hinte keethan keethan hintena tamaarsishe hintena maaddiyabape issibaaka pacisabike.
ACT 20:21 Taani Ayhudetasinne Ayhude gidonaysatas nagarape Xoossaako simmana melanne nu Godaa Yesuusa ammanana mela markatas.
ACT 20:22 “Yan tana aybi gakaneeko erike, shin ha77i taani Geeshsha Ayyaanas kiitetada Yerusalaame bayis.
ACT 20:23 Geeshsha Ayyaanay qashoynne waayey tana naageysa katama ubban taw markatis.
ACT 20:24 Shin ta wothaa polanawunne Godaa Yesuus Kiristoosape ekida oosuwa, Xoossaa aadho keehatetha Wongela markateysa polanaw ta shempiw pathonnabada taybas.
ACT 20:25 “Taani ha77ika Xoossaa kawotethaa markatashe hinte ubbaa giddon yuuyas. Hizape guye, hintefe oonika tana be7onnaysa erayis.
ACT 20:26 Hessa gisho, hintefe issi uray dhaykoka ta oyshetonnaysa hachi hintew geeshshada odayis.
ACT 20:27 Ayis giiko, Xoossay oothanaw qopidaba ubbaa hintew aybibaaka ashshona odas.
ACT 20:28 “Ba na7aa suuthan wozida Xoossaa woosa keethaa naagite. Geeshsha Ayyaanay hintena halaqaa oothidi doorida wudiyasinne hinte huuphiyas naagetite.
ACT 20:29 Taani bidaape guye, wudiyas qadhetonna wozana mino suudhumeti hinte giddo gelanaysa taani erayis.
ACT 20:30 Ammaneyisata banta geedo kaalethanaw wordo tamaarsiya asati hinte giddofe dendana.
ACT 20:31 Hessa gisho, taani heedzu laythi qammanne gallas afuthan hintena huuphen huuphen minthethidaysa qopishe naagetite.
ACT 20:32 “Ha77ika hintena minthanawunne geeshsha asaara laatisanaw danda7iya Xoossaasinne iya aadho keehatetha qaalas hintena hadara immayis.
ACT 20:33 “Taani oodde bira woyko worqa woyko afila amottabike.
ACT 20:34 Taani ta kushen oothada tananne taara de7eyisata koshshidaba maaddidaysa hinte, hinte huuphen ereeta.
ACT 20:35 Hinte haysada daaburidi oothishe daaburanchota maaddanaysanne Godaa Yesuusi, ‘Ekeysafe immeysi anjetidaysa’ gida qaala hinte qopanaw besseysa taani hintena ubbaban bessaas” yaagis.
ACT 20:36 Phawuloosi hessa odi ongidi enta ubbaara gulbatidi Xoossaa woossis.
ACT 20:37 Enti ubbayka Phawuloosa idimmidi yeekidi yeeridosona.
ACT 20:38 I Zaaridi, “Tana be7eketa” yaagida qaalay enta daro azzanthis. Enti markabiya gakanaw iya moyzidosona.
ACT 21:1 Nuuni Efesoona cimatape shaaketida mela Qoosa bida. Wontetha gallas Rooda gakidi yaape Phaxara bida.
ACT 21:2 Sirofinqe pinniya markabe demmidi iyan gelidi baanaw dendida.
ACT 21:3 Nuuni Qophiroosa be7anaw danda7iya soo yidi, Qophiroosa haddirsa bagga aggidi Soore bida. Markabey ba caana yan wothanaw koyida gisho Xiroosa bida.
ACT 21:4 Yan ammaniya asata demmidi entara laapun gallas uttida. Phawuloosi Yerusalaame boonna mela enti iyaw Ayyaanan odidosona.
ACT 21:5 Nuuni entara uttiya wodey wurin keyidi bida. Enti ubbay banta maccasataranne banta naytara issife katamaape kare kessidi nuna moyzidosona. Nuuni abba doonan gulbatidi Xoossaa woossida.
ACT 21:6 Hessafe guye, woli sarothidi nu markabiyan gelida; enti banta soo simmidosona.
ACT 21:7 Nuuni abba ogiya ongidi, Xiroosape Phaxelemaasa gakida. Yan ammaniya asata sarothidi, enta matan issi gallas pee7ida.
ACT 21:8 Wontetha gallas keyidi, Qisaare bida. Sabaakiya Filphoosa soo gakidi iya matan uttida. I Yerusalaamen kase dooretida laapunatape issuwa.
ACT 21:9 Filphoosas nabe gidida oyddu geela7o nayti de7oosona.
ACT 21:10 Nuuni undenna gallas yan uttidi de7ishin tinbite odiya issi Agaboosa geetetiya addey Yihudape Qisaare yis.
ACT 21:11 Nuuko yidi Phawuloosa saqiya ekidi ba kushiyanne ba tohuwa qachidi, “Geeshsha Ayyaanay ha saqiya godaa, Yerusalaamen Ayhudeti haysada qachidi, Ayhude gidonna asaas aathidi immana yaagees” yaagis.
ACT 21:12 Nuuni hessa si7ida wode nunne yan de7iya asati Phawuloosi Yerusalaame boonna mela woossida.
ACT 21:13 Shin Phawuloosi zaaridi, “Hinte haysada yeekishe ayis ta wozanaa shugiseetii? Taani, Godaa Yesuusa sunthaa gisho qashetetha xalaala gidonashin Yerusalaamen hayqanawuka giigetas” yaagis.
ACT 21:14 Nu zoriya I ekonna ixin, “Godaa sheney hano” yaagidi si77i gida.
ACT 21:15 Yan guutha wode gam7idaape guye giigetidi Yerusalaame baanaw keyida.
ACT 21:16 Qisaaren de7iya ammaniya asatape guuthati nuura bidosona. Enti nuuni shempana bessi Minaasona geetetiya Qophiroosa addiya soo efidosona. Minaasoni koyro ammanida asaape issuwa.
ACT 21:17 Nuuni Yerusalaame gakida wode ammaniya asati nuna ufaysan mokidosona.
ACT 21:18 Wontetha gallas Phawuloosinne nuuni Yayqoobara gahetanaw bida. Woosa keethaa cimati ubbatika yan de7oosona.
ACT 21:19 Phawuloosi enta sarothidaape guye Ayhude gidonna asaa giddon ba baggara Xoossay oothidaba ubbaa entaw odis.
ACT 21:20 Enti hessa si7ida wode Xoossaa galatidi Phawuloosako haysada yaagidosona: “Nu ishaw, Ayhudeta giddon aapun mukulati Xoossaa ammanidako ne be7aasa; enti ubbayka higgiya minthi naagoosona.
ACT 21:21 Neeni Ayhude gidonnayisata biittan de7iya Ayhude ubbay banta nayta qaxaronna mela, Ayhudeta wogaa kaallonna melanne Muse higgiya ixana mela neeni tamaarseysa Yerusalaamen de7iya Ayhudeti si7idosona.
ACT 21:22 Yaatin aybi lo77o? Neeni yidaysa daroti si7ana.
ACT 21:23 “Hessa gisho, nuuni new odeysa si7a; gasoy de7iya oyddu asati nu matan de7oosona.
ACT 21:24 Enta ekada entara geeya; qassi enti banta huuphiya meedettana mela entaw miishe imma. Enti kase nebaa si7idaysi tuma gidonaysanne neeni ne huuphenka higge naagiya asi gideysa ubbay erana.
ACT 21:25 “Shin ammanida Ayhude gidonna asata gidiko, enti eeqas yarshetidaba moonna mela, suuthu uyonna mela, bawuta moonna melanne laymatonna mela, nuuni oda qachidi, entaw dabdaabe xaafida” yaagidosona.
ACT 21:26 Hessafe guye, Phawuloosi wontetha gallas asata ekidi, entara geeyis. I banta geeyiya gallasay awude poletiyako erisanawunne banta yarshuwa awude yarshaneko erisanaw Xoossa Keethi gelis.
ACT 21:27 Laapun gallasay wurana hanishin, Iisepe yida Ayhudeti xoossa keethan Phawuloosa be7idi, asa ubbaa denthethidi Phawuloosa oykidosona.
ACT 21:28 “Isra7eele asaw, nuna maaddite; ha uray, nu deriya, nu higgiyanne ha Xoossa Keetha ixana mela asa ubbaa tamaarsees. Hessika gidonna ixin Ayhude gidonnayisata Xoossa Keethi gelsidi, ha geeshsha bessaa tunisis” yaagidi waassidosona.
ACT 21:29 Enti hessa giday kase Efesoona Xirofmoosa Phawuloosara kataman be7ida gisho ha77i Phawuloosi Xoossa keethi iya eki gelidaba entaw daanis.
ACT 21:30 Katama ubbay buqetis; asa ubbay shiiqidi Phawuloosa oykidi Xoossa Keethafe kare goochidosona. Xoossa Keethaa pengeti ellesidi gordetidosona.
ACT 21:31 Asay Phawuloosa wodhana hanishin, “Yerusalaame katamay kumethi buqetis” giya oday Roome shaalaqaako gakis.
ACT 21:32 Shaalaqay wotaadaretanne mato halaqata ekidi woxishe yis. Asay shaalaqaanne wotaadareta be7ida wode Phawuloosa wadheysa aggaagidosona.
ACT 21:33 He wode shaalaqay shiiqidi, Phawuloosa oykidi, nam7u santhalaatan qashetana mela kiittis. Yaatidi, I oonekonne ay oothidaako asaa oychis.
ACT 21:34 Asaape baggay issiba gidi waassiya wode, harati haraba gidi waassees. Waasoy darida gisho, shaalaqay tumaa shaakanaw danda7etonna ixin, wotaadareti Phawuloosa banta de7iyaso efana mela kiittis.
ACT 21:35 Phawuloosi yedhi keyiya dethaa gakiya wode asaa sugethaa gisho wotaadareti iya tookidosona.
ACT 21:36 Daro asay, “I hayqo!” yaagidi waassishe kaalloosona.
ACT 21:37 Wotaaddareti Phawuloosa banta de7iyasuwa gelsana hanishin, Phawuloosi shaalaqaako, “Taani new issiba odo?” yaagis. I Phawuloosako, “Neeni Girike doona eray?
ACT 21:38 Neeni haysafe sinthe buqethi medhidi shempo wodhida oyddu mukulu asata ekidi bazzo gelida Gibxe uraa gidikii?” yaagis.
ACT 21:39 Shin Phawuloosi, “Taani, Kilqiyan de7iya eretida Tersesee kataman yeletida Ayhude asi. Hayyana tana odisarkii?” yaagis.
ACT 21:40 Shaalaqay iyako, “Oda” yaagin Phawuloosi dethaa bolla eqidi, asay si77i gaana mela ba kushiyan mallis. Asay si77i gin Ibraawetho doonan haysada yaagis:
ACT 22:1 “Ta ishato, ta aawato, taani ha77i hintew immiya zaaruwa si7ite.”
ACT 22:2 Phawuloosi entaw Ibraawetho doonan odeysa si7idi kaseysafe aathidi si77i gidoosona. I kaallidi,
ACT 22:3 “Taani Kilqiyan de7iya Tersesee yeletada ha kataman diccas. Ta astamaareyka Gamaaliyale; taani nu aawata higgiya mintha tamaarida, hachi hinte ubbay haneysada Xoossas mishetiya Ayhude asi.
ACT 22:4 Taani ha ogiya kaalliya maccatanne addeta oykada qasho keethan yeggashenne enta wodhisana gakanaw waaye bessida asi.
ACT 22:5 Hessadaka, kahine halaqaynne Shango ubbay tabaa markatanaw danda7ees. Taani Damasqon de7iya enta ishatas entafe dabdaabiya ekada yan de7iya asati qashetidi seeretana mela Yerusalaame enta ehanaw yaa bas.
ACT 22:6 “Taani bada Damasqo matida wode seeta gallas qoponna salope gita poo7oy ta yuushuwan poo7is.
ACT 22:7 Taani sa7an kunda de7ishin, ‘Saa7ola, Saa7ola, tana ayis yedethay?’ giya qaala si7as.
ACT 22:8 Taani zaarada, ‘Godaw, neeni oonee?’ yaagas. I zaaridi, ‘Taani, neeni gooddiya Naazirete Yesuusa’ yaagis.
ACT 22:9 Taara de7eysati poo7uwa be7idosonape attishin, taw odeysa qaala akeekibokona.
ACT 22:10 “Taani, ‘Godaw, ta ay ootho?’ yaagas. “Goday taako, ‘Dendada Damasqo ba. Neeni oothana mela Xoossay oothanaw qopidaba ubbay yan new odetana’ yaagis.
ACT 22:11 He wolqaama poo7uwa gaason ta ayfey qooqin, taara de7iya asati ta kushiya oykidi, tana goochin Damasqo gakas.
ACT 22:12 “Damasqon de7iya Ayhude ubbay daro bonchiya issi Hananiya geetetiya addey, nu higgiya boncheysinne Xoossaa minthi woosseysi de7ees.
ACT 22:13 Hanaani taako yidi, ta matan eqidi, ‘Ta ishaw Saa7ola, xeella’ yaagis. Ellesada taani iya xeella aggas.
ACT 22:14 “I taako, ‘Nu aawata Xoossay neeni iya sheniya erana mela, iya xillo Na7aa be7ana melanne iya doonape qaala si7ana mela kasetidi nena dooris.
ACT 22:15 Neeni be7idabaanne si7idaba asa ubbaa sinthan iyaw markatana.
ACT 22:16 Ha77i ayis gam7ay? Dendada xammaqeta; iya sunthaa xeegada ne nagaraape meeceta’ yaagis.
ACT 22:17 “Taani guye Yerusalaame simmada xoossa keethan woossishin, taw qoncethi bentis.
ACT 22:18 Qoncethan Goday taako, ‘Ne taw markatiya markatethaa asay ekonna gisho ellesada Yerusalaamepe keya’ yaagishin taani be7as.
ACT 22:19 “Taani, ‘Godaw, ayhude woosa keetha ubban nena ammaneyisata oykada wadhidaysanne qasho keethan yeggidaysa enti eroosona.
ACT 22:20 Enti ne marka Isxifaanose wodhiya wode taani he odan issifas. Qassi enta matan eqada iya wodheyisata ma7uwa naagayis’ yaagis.
ACT 22:21 “Goday taako, ‘Taani nena Ayhude gidonna asaako haahoso kiittiya gisho dendada ba’ ” yaagis.
ACT 22:22 Phawuloosi he qaala odidi ongana gakanaw asay I geysa si7oosona. Hessafe guye, banta qaala dhoqu oothidi, “Haysa biittafe dhaysa! I daanaw bessenna” yaagidosona.
ACT 22:23 Enti wocamishin, banta ma7uwa bolla holishininne baana bolla laallishin;
ACT 22:24 Shaalaqay be7idi wotaadareti Phawuloosa banta de7iyasuwa efana mela kiittis. Qassi asay ayis hessada wocamidaako eranaw koyidi Phawuloosa lisson garaafidi pilgana mela enta kiittis.
ACT 22:25 Shin wotaadareti Phawuloosa dafon minthi qachidi garaafana haniya wode Phawuloosi ba matan eqida mato halaqaako, “Roome asi pirdi bayna garaafeysi hintew wogee?” yaagis.
ACT 22:26 Mato halaqay hessa si7ida wode shaalaqaako bidi, “Ha addey Roome asi. Neeni ay oothanaw qopay?” yaagidi oychis.
ACT 22:27 Shaalaqay Phawuloosako shiiqidi, “Neeni Roome asee? Ane taw oda” yaagis. Phawuloosi, “Ee” yaagis.
ACT 22:28 Shaalaqay zaaridi, “Taani ha gadetetha daro miishen shammas” yaagis. Shin Phawuloosi, “Ta ha gadetetha yeletethan demma ekas” yaagis.
ACT 22:29 Hessa gisho, Phawuloosa pilganaw qopidaysati iira iyape shaaketidosona. Shaalaqay Roome asi santhalaatan qachidaysa erida wode yayyis.
ACT 22:30 Wontetha gallas Shaalaqay, Ayhudeti Phawuloosa ayis mootidaako geeshshi eranaw koyis. Kahine halaqatinne shangoy ubbay shiiqana mela kiittis; qassi Phawuloosa qashope bilisidi enta sinthan essis.
ACT 23:1 Phawuloosi shiiquwa caddi xeellidi, “Ta ishato, taani hachi gakanaw Xoossaa sinthan ta de7o ubban lo77o wozanan de7as” yaagis.
ACT 23:2 Kahine halaqay Hanaani, Phawuloosa doonan baqana mela iya matan eqidaysata kiittis.
ACT 23:3 He wode Phawuloosi iyako, “La ha booqinte tiyida godaa daaneyso, Xoossay nena baqana. Neeni ta bolla higgiyatho pirdanaw uttada de7ashe higgey bayna tana baqana mela kiitay?” yaagis.
ACT 23:4 Phawuloosa matan eqidaysati iyako, “Ne Xoossaa kahine halaqaa cayay?” yaagidosona.
ACT 23:5 Phawuloosi, “Ta ishato, I kahine halaqa gididaysa taani erabike; ayis giiko Xoossaa qaalan, ‘Ne deriya ayseysa bolla iita qaala haasayopa’ geetetidi xaafetis” yaagis.
ACT 23:6 Shin Phawuloosi he bessan de7iya asaape baggati Saduqaaweta, baggati Farsaaweta gideysa be7idi, “Ta ishato, taani Farsaawenne Farsaawe na7a; ‘Hayqidaysati hayqope dendana’ gada taani ufaysan naagiya gisho enti ta bolla pirdoosona” yaagidi odis.
ACT 23:7 Phawuloosi hessa gida wode Farsaaweta giddoninne Saduqaaweta giddon ooshshi keyin shaaketidosona.
ACT 23:8 Ayis giiko, Saduqaaweti, “Hayqida asi dendenna; kiitanchoyka ayyaanika baawa” yaagosona. Shin Farsaaweti nam7ayka de7eysa ammanoosona.
ACT 23:9 Gita kachi keyis; Farsaaweta bagga gidida higge astamaareti dendi eqidi, “Ha uraa bolla aybi balaka demmibooko; iyaw ayyaani woyko kiitanchoy haasayonna aggenna” yaagidi palamidosona.
ACT 23:10 Ooshshay darin asay Phawuloosa shaqerethonna mela gidi, shaalaqay ba wotaadareti wodhidi enta giddofe iya ellesi kessidi banta de7iyasuwa efana mela kiittis.
ACT 23:11 He qamma Goday Phawuloosa matan eqidi, “Phawuloosa, neeni taw Yerusalaamen markatidaysada Roomenka markatanaw bessees; minna; aykoy baawa” yaagis.
ACT 23:12 Wontetha gallas Ayhudeti, “Phawuloosa wodhonna de7ishe mooko uyoko” gidi caaqidosona.
ACT 23:13 Phawuloosa bolla hessa maqetida asati oytamape daroosona.
ACT 23:14 Enti kahine halaqatakonne deriya cimatako bidi, “Nuuni Phawuloosa wodhonna de7ishe kathi giyaba mooko gidi caaqetida.
ACT 23:15 Hiza, hintenne shangoy iyabaa geeshshidi pilgiyabay de7iya daanisidi, Phawuloosa hinteko ehana mela shaalaqa oychite. Nuuni I ha shiiquwa gakanaape sinthe iya wodhanaw giigidi uttida” yaagidosona.
ACT 23:16 Shin Phawuloosa miche na7ay he maquwa si7ida wode, bidi wotaadareti de7iyasuwa gelidi, Phawuloosas odis.
ACT 23:17 Phawuloosi mato halaqatape issuwa xeegidi, “Ha na7ay shaalaqas odiyabay de7iya gisho iya shaalaqaako efa” yaagis.
ACT 23:18 Mato halaqay na7aa shaalaqaako efidi, “Qasho keethan de7iya Phawuloosi tana baako xeegidi, ha na7ay new odiyabay de7iya gisho, iya neeko ehana mela tana woossis” yaagis.
ACT 23:19 Shaalaqay na7aa kushiya oykidi, dumma kare kessidi, “Neeni taw odanabay aybee?” yaagidi oychis.
ACT 23:20 Na7ay shaalaqaako, “Ayhudeti Phawuloosaba kasepe minthi pilganaw koydaba daanisidi neeni wonto iya shiiquwa ehana mela nena woossanaw zoreta qachidosona.
ACT 23:21 Shin neeni enti giyaba si7opa. Ayis giiko, oytamape dariya asati Phawuloosa wodhonna de7ishe ‘Kathi mooko, haathe uyoko’ gidi caaqetidi, qosetidi iya naagoosona. Ha77i ne giyaba xalaala si7anaw naagoosona” yaagis.
ACT 23:22 Shaalaqay zaaridi, “Ha oda ne taw odidaysa hara oodeska odopa” yaagidi kiittidi na7aa guye yeddis.
ACT 23:23 Shaalaqay mato halaqatape nam7ata xeegidi, “Qammafe heedzu saaten Qisaare baanaw, nam7u xeetu wotaadareta, laapun tammu para asatanne nam7u xeetu tooranchota giigisite.
ACT 23:24 Deriya aysiya Filkisako Phawuloosa saro gathanaw toga mehe giigisite” yaagidi enta kiittis.
ACT 23:25 Shaalaqay Filkisas haysada giya dabdaabe xaafis:
ACT 23:26 “Qalawudiyoosa Lusiyoosape deriya aysiya boncho Filkisas, saroy new gido.
ACT 23:27 Ayhudeti ha uraa oykidi wodhana hanishin, I Roome biitta asi gidoysa erada wotaadaretara gakada iya ashshas.
ACT 23:28 Enti iya ayis mootiyako eranaw koyada enta shiiquwan iya shiishas.
ACT 23:29 Enti banta higgiyas iya mootidaysafe attishin, iya wodhisiyaba woyko qashisiyaba gidonnaysa ta demmas.
ACT 23:30 Enti ha uraa bolla maqetida zigirsay tana gakin, taani ellesada iya neeko yeddas. Iya mooteysati ne sinthan bidi mootana mela kiittas” yaagis.
ACT 23:31 Hessa gisho, wotaadareti kiitetidaysada Phawuloosa ekidi, qamma Antiphaxirisa gathidosona.
ACT 23:32 Wontetha gallas para asati iyara baana mela oothidi toho asati guye simmidosona.
ACT 23:33 Togay Qisaare gakidi dabdaabiya deriya ayseysas immidi, Phawuloosa iya sinthe aathidosona.
ACT 23:34 Deriya ayseysi dabdaabiya nabbabidaape guye, “Phawuloosa, ne aw awuraja asee?” gidi iya oychis. I Kilqiya asi gidoysa erida wode,
ACT 23:35 “Taani nebaa nena mooteysati yaa wode si7ana” yaagis. Wotaaddareti Phawuloosa Herodiisa gadhon naagana mela kiittis.
ACT 24:1 Ichashu gallasape guye kahine halaqay, Hanaani, cimataranne Xerxeluusa geetetiya issi xabaqaara Qisaare bis. Enti deriya ayseysa bolla Phawuloosa mootidosona.
ACT 24:2 Phawuloosi xeegetidi gelida wode, Xerxeluusi iya haysada yaagidi mootis: “Boncho Filkisa, nuuni ne baggara daro sarotethaa demmida, ne lo77o aysuwan nu biittay daro laametis.
ACT 24:3 Boncho Filkisa, nuuni awunka awude gidin daro galatan hessa ekoos.
ACT 24:4 Taani nena gam7isonashin neeni ne keehatethan nubaa qanthan si7ana mela nena woossayis.
ACT 24:5 Ha uray dhube gididi biitta ubban de7iya Ayhudeta giddon buqethi medhidi Naaziraweta bagga asaa kaaletheysa gidoysa erida.
ACT 24:6 Hari attoshin, Xoossa Keetha tunisana hanishin nuuni iya oykida; nu higgiyada iya bolla pirdanaw qopida.
ACT 24:7 Shin shaalaqa Lusiyoosi yidi, wolqan nu kushepe iya wothi ekis.
ACT 24:8 Iya mooteysati neeko yaana mela kiittis. Neeni ne huuphen ha uraa pilgada nuuni iya mootiya mootuwa ubbaa eranaw danda7aasa” yaagis.
ACT 24:9 Ayhudetika, “Ha oday tuma” gidi iya qofaa ma7idosona.
ACT 24:10 Deriya ayseysi Phawuloosa oda gidi mallis. Phawuloosi haysada gidi zaaris: “Neeni daro wodepe doomada, ha asaas pirdashe de7eysa erada ta odas ufaysan zaaro immayis.
ACT 24:11 Taani Yerusalaame goyinnanaw keyin tammanne nam7u gallasape aadhonaysa neeni ne huuphen eranaw danda7aasa.
ACT 24:12 Ayhudeti tana Xoossaa Keethan gidin ayhude woosa keethan gidin kataman gidin ooderaka palamishin woyko asa shiishada maqishin issi asika demmibeenna.
ACT 24:13 Ha77ika enti tana mootiyabas marka demmanaw danda7okona.
ACT 24:14 “Shin taani haysa issiba ammanayis; taani higgen de7iyabaanne nabeti xaafida ubbaba ammanada, nu aawata Xoossaa, enti wordo giya ogiyan goyinnayis.
ACT 24:15 Enti banta huuphen ammaneysa mela xillotinne nagaranchoti hayqope dendanaysa taka ammanayis.
ACT 24:16 Hessa gisho, taani Xoossaa sinthaninne asaa sinthan ubba wode lo77o kahi taw daana mela minnayis.
ACT 24:17 “Taani Yerusalaamepe keyoosape daro laythafe guye ta biitta manqotas maade immanawunne yarsho yarshanaw Yerusalaame bas.
ACT 24:18 Taani xoossa keethan hessa oothada geeshsha wogaa pola simmin tana demmidosona. He wode taara asi baawa, ooshshika keybeenna.
ACT 24:19 Shin Iisepe yida issi issi Ayhudeti hessan de7oosona; enti ta bolla oda koyko yidi tana ne bolla mootanaw danda7oosona.
ACT 24:20 Woyko taani shanguwa sinthe shiiqida wode oothida bali de7iko haysati ne sinthan de7eysati odonna.
ACT 24:21 Taani enta giddon eqada, ‘Hayqidaysati dendana gada waassada odida gisho hachi hinte sinthan ta bolla pirdoosona’ gas; hessafe haraba oothabike” yaagis.
ACT 24:22 Shin Filkisi Xoossaa ogiyaba geeshshi erida gisho, “Taani hinte oda shaalaqa Lusiyoosi yaa wode pirdana” yaagidi moyzis.
ACT 24:23 Filkisi qassi Phawuloosa qachonna naagana melanne iya dabbotape oonika iya oychanaw yishin diggonna mela mato halaqaa kiittis.
ACT 24:24 Guutha gallasape guye, Filkisi Ayhude bagga gidida ba mache Dirusillara yidi Phawuloosa kiiti ehisidi Yesuus Kiristoosan ammanoba iyape si7is.
ACT 24:25 Phawuloosi xillotethabaa, ba huuphe haarobaanne yaanaw de7iya pirdaba odishin, Filkisi yayyidi, “Neeni ha77is ba; taw injetida wode nena xeegisana” yaagis.
ACT 24:26 He wode Phawuloosape wodhaafe ekanaw qopidi, iya zaari zaari xeegisidi iyara odetees.
ACT 24:27 Nam7u laythafe guye, Filkisa bessaa Phorqiyoos Fisxoosi ekis. Filkisi Ayhudeta ufaysanaw koyidi Phawuloosa billonna aggaagis.
ACT 25:1 Fisxoosi kawotida heedzu gallasape guye Qisaarepe Yerusalaame bis.
ACT 25:2 Yan kahine halaqatinne Ayhudeta kaaletheysati Phawuloosa mootidosona.
ACT 25:3 Phawuloosa Yerusalaame ehishin ogen qosetidi iya wodhanaw entaw injetana mela bantana maaddo gidi Fisxoosa woossidosona.
ACT 25:4 Fisxoosi entako, “Phawuloosi, Qisaaren qasho keethan de7ees; taani ta huuphenka ellesada guye simmana hanayis.
ACT 25:5 I balidabay de7iko hinte giddon aawateysati taara Qisaare bidi iya mootona” yaagidi zaaris.
ACT 25:6 Fisxoosi enta matan hospun woyko tammu gallasa mela gam7idaape guye Qisaare bis. Wontetha gallas pirda oyden uttidi Phawuloosa ehana mela kiittis.
ACT 25:7 I yin Yerusalaamepe yida Ayhudeti iya yuushuwan eqidi enti lathanaw danda7onna daro deexo mooto iya bolla shiishidosona.
ACT 25:8 Phawuloosi zaaridi, “Taani Ayhude higgiya gidin Xoossa Keethaa woyko Roome Kawa Qeesare naaqabike” yaagis.
ACT 25:9 Shin Fisxoosi Ayhudeta ufaysanaw koyidi Phawuloosako, “Yerusalaame bada ha mootuwaba yan ta sinthan pirdetanaw koyay?” yaagidi oychis.
ACT 25:10 Shin Phawuloosi, “Taani pirdetanaw bessiya Qeesare pirda keethan eqa kichas. Neeni loytha ereysada taani Ayhudeta aybinka naaqabike.
ACT 25:11 Hiza, taani naaqidabay woyko hayqos gathiyaba oothidaba gidiko hayqope tana ashsha giike. Shin enti tana mootiya mootoy mela gididaape guye oonika tana entaw aathidi immanaw danda7enna. Qeesarey tabaa pirdo gada oychayis” yaagis.
ACT 25:12 He wode Fisxoosi ba zoranchotara zoretidi, “Neeni Qeesarey tabaa pirdo gada oychadasa; Qeesareko baasa” yaagidi zaaris.
ACT 25:13 Guutha gallasape guye Kawoy Agirphinne Barniqey Fisxoosa sarothanaw Qisaare bidosona.
ACT 25:14 Yan enti daro gallas gam7in, Fisxoosi Kawas Phawuloosaba haysada yaagidi odis; “Filkisi billonna aggidi bida issi addey haysan de7ees.
ACT 25:15 Taani Yerusalaame bida wode kahine halaqatinne Ayhude cimati iya bolla pirdana mela tana woossidi iyabaa taw odidosona.
ACT 25:16 Taani, ‘Mootetida uray bana mooteyisata sinthan eqidi ba mootidabaas zaaro immonnashin, oona gidikoka aadhidi imeteysi Roome higge gidenna’ yaagada entaw zaaras.
ACT 25:17 “Hessa gisho, enti haysan shiiqida wode taani gam7onna wontetha gallas pirda keethaa gelada Phawuloosa ehana mela kiittas.
ACT 25:18 Iya mooteysati iya matan eqidi, iitaban iya mootonna aggokona gada taani qopidaysa mela iya mootibookona.
ACT 25:19 Shin enti banta haymaanotebanne Phawuloosi, ‘Paxa de7ees’ giya issi hayqida Yesuusa geetetiya addiyaba iyara palamoosona.
ACT 25:20 Ha oday tana shaakanaw metida gisho, Phawuloosi Yerusalaame bidi, yan pirdetanaw koyaako gada iya oychas.
ACT 25:21 Shin Phawuloosi ba oda Qeesarey iyabaa be7ana gakanaw qasho keethan gam7anaw oychis. Taani iya Qeesareko yeddana gakanaw I qashetana mela kiittas” yaagis.
ACT 25:22 Hessa gisho, Agirphi Fisxoosako, “Taani ta huuphenka he uray giyaba si7anaw koyayis” yaagis. Fisxoosi iyako, “Neeni wonto I giyaba si7ana” yaagis.
ACT 25:23 Wontetha gallas Agirphinne Barniqey gita bonchon shaalaqataranne kataman de7iya gita asatara yidi pirda keethi gelidosona. Fisxoosi Phawuloosa xeegisidi ehis.
ACT 25:24 Fisxoosi, “Kawaw Agirpha, haysan nuura de7iya asaw, Ayhudeti Yerusalaamenka haysanka waassidi, ‘I hizape guye paxa daanaw bessenna’ yaagidi, tana woossida uraa haysa be7eeta.
ACT 25:25 Shin iya hayqos gathiyaba aybibaaka taani demmabike. I ba huuphen, ‘Qeesarey tabaa pirdo yaagada oychayis’ gida gisho, Qeesareko iya yeddanaw qofa qachas.
ACT 25:26 Taani iyabaa ta godaa Qeesares xaafanaw gidiya gaasoy aybika baawa. Hessa gisho, iyabaa hinte be7iko ta xaafiyabay bentaneko gada hinte sinthe ubbaraka Kawaw, Agirpha, ne sinthe iya ehas.
ACT 25:27 Ayis giiko, qashetida asi bolla daynnas aathiya wode I ayis mootetidaako qoncisonna aggeysi taw eeyatethi daanees” yaagis.
ACT 26:1 Agirphi Phawuloosako, “Neeni nebaa odanaw danda7aasa” yaagis. He wode Phawuloosi ba kushiya denthidi haysada yaagis:
ACT 26:2 “Kawaw, Agirpha, Ayhudeti tana mootidabaas zaaro immanaw hachi ne sinthan eqashe ta qaaday lo77o gada qopayis.
ACT 26:3 Neeni Ayhude woganne palama loythada eriya gisho tana saletonna si7ana mela nena woossayis.
ACT 26:4 “Taani na7atethafe doomada ta asaa giddoninne Yerusalaamen de7ida ta de7uwa Ayhude ubbay eroosona.
ACT 26:5 Taani koyrope doomada, nu haymaanote higgiya minthidi naagiya Farsaaweta yaraape gideysa enti markatanaw koyko eroosona.
ACT 26:6 Ha77ika taani Xoossay nu aawatas immana gida ufaysaa naagiya gisho mootetada haysan eqas.
ACT 26:7 Qassi tammanne nam7u nu aawata sheeshay Xoossaa qammanne gallas minthidi goyinnishe Xoossay immana gidaysa ekanaw ufaysan naagoosona. Kawaw Agirpha, Ayhudeti tana mootey taani ufaysan hessa naagiya gishosa.
ACT 26:8 Ayhudeto, Xoossay hayqidaysata dentheysa ayis ammaneketii?
ACT 26:9 “Kase taani ta huuphenka Naazirete Yesuusa sunthaa teqanaw danda7etidaba ubbaa oothanaw bessees gada qopas.
ACT 26:10 Taani Yerusalaamen oothiday haysa. Kahine halaqatape maata ekada Xoossaa asatape darota qashisas. Enta wodhiya wodeka enta hayquwa dosas.
ACT 26:11 Daro wode ayhude woosa keethaa ubban enti seeretana melanne Yesuusa cayidi kaddana mela un7ethas. Taani wogi bayna enta hanqetada hari attoshin, hara biitta katamata gakanaw enta gooddas.
ACT 26:12 “Taani ha odas kahine halaqatape maatanne kiitaa ekada Damasqo bayis.
ACT 26:13 Kawaw, taani seeta gallas ogen de7ishin awa poo7ope daro aadhiya poo7oy ta yuushuwaninne taara beyisata yuushuwan salope poo7is.
ACT 26:14 Nuuni ubbayka sa7an kundida wode Ibraawetho doonan, ‘Saa7ola, Saa7ola, tana ayis goodday? Neeni, nena caddiya birata xam7a qakiko nena qohaasa’ yaagidi taw odishin si7as.
ACT 26:15 “Taani, ‘Godaw, neeni oonee?’ yaagas. “Goday, ‘Taani, neeni gooddiya Yesuusa;
ACT 26:16 shin denda eqa. Hachi neeni tana be7idaysaninne sinthafe ta new bessanaysa haratas markatana mela ta oosancho oothada nena shuumanaw new bentas.
ACT 26:17 Isra7eele asatapenne taani nena entako kiittiya Ayhude gidonaysatape nena ashshana.
ACT 26:18 Neeni enta ayfiya dooyana, dhumape poo7oko, Xalahe kushepe Xoossako enta zaarana. Enti tanan ammanidi nagara atotetha ekana. Xoossay doorida asaa giddon banta laata demmana’ yaagis.
ACT 26:19 “Kawaw Agirpha, hessa gisho, taw salope bentida qoncethas kiitetanaysa ixabike.
ACT 26:20 Shin taani koyrottada Damasqon hessafe guye Yerusalaameninne Yihuda biitta ubban de7eysatinne Ayhude gidonnaysati banta nagaraape Xoossaako simmana melanne nagaraape simuwa bessiya ooso oothana mela qaala odas.
ACT 26:21 Hessa gisho, Ayhudeti tana xoossa keethan oykidi wodhanaw koydosona.
ACT 26:22 Hachi gakanaw Xoossaa maadey taape shaaketibeenna; yaaniya gisho, guuthaasinne gitaas markatashe haysan eqas. Nabetinne Musey hanana gidi odidaysafe haraa issibaaka taani odidabay baawa.
ACT 26:23 Hessika, ‘Kiristoosi waaye ekanaw bessees; qassi hayqope koyro dendidi Ayhudetasinne Ayhude gidonaysatas atotetha poo7o odanaw bessees’ gidaysa” yaagis.
ACT 26:24 Phawuloosi hessa yaagidi zaarishin, Fisxoosi ba qaala dhoqu oothidi, “Phawuloosa, ne gooyadasa; ne daro timirtey nena gooshshatethas gathis” yaagis.
ACT 26:25 Shin Phawuloosi, “Boncho Fisxoosa, taani tumabaanne bessiyaba odaysipe attishin, gooyabike.
ACT 26:26 Taani qoncen odiya odaa Kawoy erees. Ha oday geeman oosetiboonna gisho issoyka iyape geemmonaysa taani geeshshada erayis.
ACT 26:27 “Kawaw Agirpha, neeni nabeta ammanaasa gidikii? Neeni ammaneysa taani erayis” yaagis.
ACT 26:28 Kawoy Agirphi, Phawuloosako, “Ha guutha saaten tana kiristaane oothanaw koyay?” yaagis.
ACT 26:29 Phawuloosi, “Daro wode gidin guutha wode ne xalaala gidonashin hachi tana si7iya ubbay ha qashuwape attishin, ta mela gidana mela Xoossaa woossayis” yaagis.
ACT 26:30 Hessafe guye, Kawoy Fisxoosi, Barniqeynne entara uttida ubbayka dendidosona.
ACT 26:31 Yaape keyidi bishe issoy issuwara, “Ha uray hayqos woyko qashos gathiyaba aykoka oothibeenna” yaagidi odetidosona.
ACT 26:32 Agirphi Fisxoosako, “Ha uray ‘Qeesarey tabaa pirdo’ goonnako biletanaw danda7ees shin” yaagis.
ACT 27:1 Nuuni markaben Xaale baanaw qachida wode Awugisxoosa wotaadareta geeteteysatape issi Yuuliyoosa geetetiya mato halaqaas Phawuloosanne hara guutha qasho asata aathidi iyaw immidosona.
ACT 27:2 Iise gaxan de7iya biittata biya Adramixiyoone markaben gelidi dendida. Maqedoone asi gidida Teselonqe Arsxirokoosi nuura de7ees.
ACT 27:3 Wontetha gallas nuuni Sidoona gakishin, Yuuliyoosi Phawuloosas keehidi ba laggetako bidi koshshiyaban maaddana mela entako iya yeddis.
ACT 27:4 Yaape dendidi sinthara nu bolla carkiya gisho haathan teqetida biitta, Qophiroosan zempidi aadhida.
ACT 27:5 Kilqiyanne Phinfile matan de7iya abba pinnidi Liiqen de7iya Mura gakida.
ACT 27:6 Yan mato halaqay Xaale biya Iskindire markabe demmidi, iyan nuna gelsis.
ACT 27:7 Nuuni daro gallas loddara bidi, daro meton Qandoosa katama mati gakida. Yaara baanaw nuna carkoy diggin Salmonara aadhidi haathan teqetida biitta, Qarxeesan zempidi aadhida.
ACT 27:8 Daro meton gaxa gaxa oykidi Laasa katamaa matan de7iya abba doonan “Markabey Wopu Gidi Shempiya bessi” geetetiya bessa gakida.
ACT 27:9 Nuuni yan daro wode gam7idaape guye xoomi biletida gisho hizape markaben buussi metiya gisho Phawuloosi enta zoris.
ACT 27:10 “Asaw, nu buussan gita boshinne daro qohoy de7eysi taw bentees; qohoy caana bollanne markabiya bolla xalaala gidonashin nu de7uwa bollaka gakana” yaagis.
ACT 27:11 Shin mato halaqay Phawuloosi gidaysafe aathidi markabiya laaggeysinne markabiya goday geysan ammanis.
ACT 27:12 He abba doonan de7iya katamay balgo ageena aathanaw entaw injetonna gisho, dariya asati bantaw danda7etiko Finqe katamaa gakidi balgo ageena yan aathanaw zoretidosona. Finqey pudeha-wulohapenne dugeha-wulohape giddon abba doonan de7iya katama.
ACT 27:13 Kawusha dugeha carkoy loddara carkida wode banta qopidaysada hanidaba entaw daanin dendidi, markabey qaaxonna mela oykiya birata pude ekidi Qarxeesa matara aadhidosona.
ACT 27:14 Shin daro gam7onna “Awuraqis” geetetiya wolqaama gotey haathan teqetida biittafe duge enta bolla dendis.
ACT 27:15 He gotey markabiya sugidi efonna diggida gisho carkoy markabiya ba dosida soo efis.
ACT 27:16 Nuuni yuushoy abban teqetida biitta, Qeedan zempidi bishe daro metootetidi markabiya wogoluwa ashshanaw danda7ida.
ACT 27:17 Enti wogoluwa pude kessidaape guye wodoruwan markabiya bolla xaaxidi, minthi qachidosona. Surtisa geetetiya shafiyan bantana dom7ethana gidi hirgidi, markabiya sharaa wodhisidi markabiya coo yeddi aggidosona.
ACT 27:18 Gotey wolqaamishe bin wontetha gallas caanaape baggaa abban holo oykidosona.
ACT 27:19 Heedzantho gallas markabiya miishiya ekidi banta kushen holidosona.
ACT 27:20 Nuuni daro gallas awa ayfenne xoolinto be7onna gishonne wolqaama uushoy nu bolla uushida gisho sinthafe nuuni shempora attana gidi qopibooko.
ACT 27:21 He wode enti daro gallas kathi moonna gam7ida gisho Phawuloosi enta giddon dendi eqidi, “Asaw, hinte ta zoriya ekidi Qarxeesape dendonna aggidako ha metoynne qohoy nuna gakenna.
ACT 27:22 Shin taani hintena yayyofite gada zorayis; ayis giiko, ha markabey dhayanape attishin, hintefe issi asa shempoyka dhayenna.
ACT 27:23 Zine qamma ta iyabaa gididaysinne ta goyinniya Xoossay kiitida kiitanchoy ta matan eqidi,
ACT 27:24 ‘Phawuloosa, yayyofa; neeni Roome biitta Kawa Qeesare sinthan eqanaw bessees. Heko Xoossay ne gisho neera biya asa ubbaa shempuwa ashshis’ yaagis.
ACT 27:25 Hessa gisho, asaw, yayyofite. He kiitanchoy taw odidaysi hananaysa taani ammanayis.
ACT 27:26 Shin carkoy nuna efidi issi yuushoy abban teqetida biitta gaxan holana” yaagis.
ACT 27:27 Tammanne oyddantho qamman Adire Abban nuna carkoy gedenne haa sugishin, gidi bilahe gidiya wode markabiyan ootheysatas biittako matidaba daanis.
ACT 27:28 Enti ciimmotetha eranaw koyidi wodoro xeeran deexiyaba qachidi abban yeggin, abbay hospun tammu wadha gidis. Guuthi gam7idi, zaari yeggin usupun tammu wadha gidis.
ACT 27:29 Enti abba gaxan de7iya shuchan dom7etona mela yayyidi, markabey boonna mela oykiya oyddu biratata markabiyape guyera abban yeggidi, sa7i wontana mela Xoossaa woossosona.
ACT 27:30 Markabiyan ootheysati markabiyape baqatanaw koyidi, markabey boonna mela oykiya biratata markabiyape sintha baggara abban yeggiya daanin wogoluwa abban yeggidosona.
ACT 27:31 Phawuloosi mato halaqaakonne wotaadaretako, “Haysati markabiyan shempi uttonna ixiko hinte attanaw danda7eketa” yaagis.
ACT 27:32 Hessa gisho, wotaadareti wogoloy qashetida wodoruwa qanxidi yeddi aggidosona.
ACT 27:33 Sa7ay wontana hanishin ubbay kathi maana mela Phawuloosi asaako, “Hinte kathi moonna naagishe hachira tammanne oyddu gallas gam7ideta.
ACT 27:34 Hessa gisho, guutha kathi hinte maana mela taani hintena woossayis. Hinte gashtisana mela guutha kathi maanaw koshshees; hari attoshin hinte huuphe binaanape issoyka dhayenna” yaagis.
ACT 27:35 Phawuloosi hessa gidi uythi ekidi ubbaa sinthan Xoossaa galatis; uythaa menthidi muussu doomis.
ACT 27:36 Ubbay minetidi bantaw kathi ekidi midosona.
ACT 27:37 Nuuni markabiyan de7eysati nam7u xeetanne laapun tammanne usupuna.
ACT 27:38 Enti midi kallida wode caana gistiya abban yeggidi markabiya deexuwa kawushidosona.
ACT 27:39 Sa7ay wontida wode markabiya oosanchoti aw biitta gakidaako eronnashin, abba gaxan de7iya shafenne silimo be7idosona. Bantaw danda7etiko markabiya he shafiyako shiishanaw qopidosona.
ACT 27:40 Yaatidi, markabey boonna mela oykiya biratata birshidi abban yeggidosona. He wode laagiya mithaa qachiya wodoruwa birshidosona. Hessafe guye, carkoy markabiya sinthe sugana mela markabiya efiya sharaa sintha baggara dhoqu oothidi buussu doomidosona.
ACT 27:41 Shin markabey shafe dooren dom7etidi mitetis. Markabiyas sintha baggay xuggunidi shafiya caddi oykidi qaaxonna ixin, guye baggay zuliya sugethan meqeretethi oykis.
ACT 27:42 Wotaaddareti qasho asaape issoyka haatha wadhidi kessi ekonna mela enta wodhanaw zoretidosona.
ACT 27:43 Shin mato halaqay Phawuloosa ashshanaw koyidi wotaadareta zoreta ixis. Haathe wadho eriya ubbay markabiyape haathan gupi gupi wodhidi kasetidi gaxa keyana mela kiittis.
ACT 27:44 Attidaysati sanqa bollanne, markabiya me7uwa bolla keyana mela kiittis. Hessada hanidi ubbay gaxa sarora keyidosona.
ACT 28:1 Nuuni gaxa saro keyida wode gakida bessay yuushoy abban teqetida biitta, Malta gideysa erida.
ACT 28:2 Malta asay nuus daro keeha keehidosona. Iri bukiya gishonne meegiya gisho tama eethidi nuna ubbaa mokidosona.
ACT 28:3 Phawuloosi daro afira shiishidi taman wothishin, shooshi seela gisho keyidi iya kushiya bolla xaaxetidi iya dukis.
ACT 28:4 Malta asay shooshi Phawuloosa kushen xaaxetidaysa be7ida wode issoy issuwako, “Tuma ha uray shempo wodhida asi; hari attoshin abbaafe I attinka xoossa pirdafe attidi paxa daanaw danda7ibeenna” yaagidosona.
ACT 28:5 Shin Phawuloosi ba kushiyape shooshaa wuxarkidi, taman yeggis; iya aykoka qohibeenna.
ACT 28:6 Enti, “Iya asatethay kixees, woyko akeekona kundidi hayqees” gidi iya naagoosona. Shin daro wode naagidi iya asatethan aybika dummatidabay dhayin, “Hessi xoosse” yaagidi banta qofaa laammidosona.
ACT 28:7 He heeran yuushoy abban teqetida biitta halaqaa, Pupliyoosa geeteteysas gadey de7ees; heedzu gallas gakanaw I nuna siiqon mokis.
ACT 28:8 Pupliyoosa aaway qoxo, mishanne ulo uttison hargetidi zin7idi de7ees. Phawuloosi iya soo gelidi iyaw Xoossaa woossis; ba kushiya iya bolla wothidi pathis.
ACT 28:9 Hessafe guye, yuushoy abban teqetida biitta, Maltan de7iya hargiya hara asatika yidi paxidosona.
ACT 28:10 Enti nuna daro boncho bonchidosona; nuuni markaben baanaw dendida wode oges koshshiyaba nuus immidosona.
ACT 28:11 Heedzu ageenape guye, Maltan balgo aathidi Markaben gelidi Iskindire baanaw dendida. He markabiya bolla Diyosqoroosa geetetiya mente eeqata misiley de7ees.
ACT 28:12 Sirakuuse katamaa gelidi yan heedzu gallas uttida.
ACT 28:13 Yaape dendidi Regiyume katamaa gakida. Issi gallasape guye, dugeha bagga carkoy carkin, wontetha gallas Putiyoola katamaa gakida.
ACT 28:14 Yan nuuni issi issi ammaniya asata demmin, bantara saaminta gam7ana mela nuna woossidosona. Hessafe guye, Roome bida.
ACT 28:15 Roomen de7iya ammaniya asati nubaa si7idi, Afiyoosa Giyan, Heedzu Imatha Keethi gakanaw nuna mokanaw yidosona. Phawuloosi enta be7ida wode Xoossaa galatidi minetis.
ACT 28:16 Nuuni Roome gelida wode Phawuloosi bana naagiya wotaadariyara barka de7o geetetis.
ACT 28:17 Heedzu gallasape guye, Phawuloosi Ayhudeta halaqata baako xeegisis. Enti shiiqida wode entako, “Ta ishato, taani nu asaa woyko nu aawata wogaa bolla aybi qohoka oothabike, shin tana Yerusalaamen qachidi Roome asaas aathidi immidosona.
ACT 28:18 Enti ta mootuwa be7idi hayqos gathiyaba ta bolla aybibaaka demmiboonna gisho tana billanaw qopidosona.
ACT 28:19 Shin Ayhudeti hessa ixida wode, ‘Tabaa Qeesarey pirdo’ yaagasipe attishin, taani ta deriya mootiyabay de7in gidenna.
ACT 28:20 Taani hintena xeegisiday hintena be7anawunne hintew haysa odanaasa. Taani ha santhalaatan qashetiday Isra7eele asay naagiya ufaysaa gishosa” yaagis.
ACT 28:21 Ayhude halaqati Phawuloosako, “Nuus Yihudape nebaa xaafetida dabdaabey gakibeenna. Yaape yida asatape issoyka nebaa iita odiday baawa.
ACT 28:22 Shin ha ne kaalliya ammanuwa dumma dumma bessan asay ixeysa nuuni eriya gisho ne qofaa si7anaw koyoos” yaagidosona.
ACT 28:23 Enti banta yaana gallas Phawuloosas qaxaridi, he gallas daridi I de7iyasuwa yidosona. I wontafe omarsi gakanaw Xoossaa kawotethaaba entaw markatis. Qassi enti Yesuusaba ammanana mela Muse higgiyafenne nabeta maxaafape qoncisidi enta tamaarsis.
ACT 28:24 Issoti issoti Phawuloosi gidaysa ammanidosona, shin harati ammanibookona.
ACT 28:25 Enti banta giddon oda ma7onna ixida wode Phawuloosi issiba gidaape guye bidosona. I haysada yaagis: “Geeshsha Ayyaanay nu aawatas nabiya Isayaasa doonan odidaysi tuma.
ACT 28:26 “ ‘Neeni he asaako bada, hinte sissi si7eeta, shin hintew gelenna; hinte be7o be7eeta, shin demmeketa.
ACT 28:27 Ayis giiko, ha deriya wozanay muumis; enta haythay tullis; enta ayfeyka goozetis. Hessi bayneko, enti banta ayfiyan be7idi, banta haythan si7idi, banta wozanan akeekidi, taako simmanashin; taka enta pathanashin’ yaaga” yaagis.
ACT 28:28 “Hiza, haysi Xoossaa atotetha kiitay Ayhude gidonaysatas gideysa ereeta. Entika si7ana” yaagis.
ACT 28:29 Phawuloosi hessa gidaape guye, Ayhudeti banta giddon daro palamishe keyidi bidosona.
ACT 28:30 Phawuloosi kera keethan nam7u laythi kumethi de7is; yan de7ishe baako yaa ubbaa mokees.
ACT 28:31 Yashshi baynanne oonika diggonashin Xoossa kawotethaaba sabbakis; Godaa Yesuus Kiristoosaba qoncisidi tamaarsees.
ROM 1:1 Yesuus Kiristoosa aylle gidida, hawaare gidana mela xeegetidaysafenne Xoossaa Wongela sabbakana mela dooretida Phawuloosi kiitida kiitaa.
ROM 1:2 Xoossay daro wodepe sinthe ba nabeta baggara immana yaagida Xoossaa Wongelay Geeshsha Maxaafatan xaafetis.
ROM 1:3 He Wongelay ashon Dawita sheeshape yeletida, Xoossaa Na7aa, nu Godaa Yesuus Kiristoosaba.
ROM 1:4 Qassi I ba geeshsha Ayyaanan hayqope dendidi, Xoossaa Na7aa gideysa gita wolqan bessis.
ROM 1:5 Iya baggara Ayhude gidonna asa ubbay, ammanidi kiitetana mela Kiristoosa sunthaa gisho, Xoossay aadho keehatethinne hawaaretetha maata nuus immis.
ROM 1:6 Yesuus Kiristoosas gidana mela xeegetida asatape baggati hintena.
ROM 1:7 Roomen de7iya, Xoossay siiqeysatasinne iya geeshsha dere gidana mela dooridaysatas. Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
ROM 1:8 Ubbaafe koyrottada, hinte ammanoy biitta ubban si7etida gisho, Yesuus Kiristoosa baggara hinte gisho ta Xoossaa galatayis.
ROM 1:9 Taani iya Na7aa wongelaba kumetha wozanan odiya Xoossay, taani ta woosan ubba wode hintena qopeysas I marka.
ROM 1:10 Wursethan, Xoossaa shene gidiko, taani hinteko baanaw ogey taw injetana mela ubba wode woossayis.
ROM 1:11 Taani hintew Ayyaana imuwa shaakanawunne hintena be7anaw laamotayis.
ROM 1:12 Hessika, taani hinte ammanuwan, qassi hinte ta ammanuwan minettana melasa.
ROM 1:13 Ta ishato, taani Ayhude gidonna asaape ayfe demmidaysada, hintefeka ayfe demmanaw hinteko baanaw qopas, shin digetas.
ROM 1:14 Tamaarida asaasinne tamaariboonna asaas qassi cincatasinne eeyatas taw acoy de7ees.
ROM 1:15 Hessa gisho, Roomen de7iya hintewuka wongela odanaw amottayis.
ROM 1:16 Iya ammaniya ubbaa, koyrottidi Ayhudeta, kaallidi Ayhude gidonnayisata ashshanaw Wongelay Xoossaa wolqaa gidiya gisho, ta Wongelan yeellatike.
ROM 1:17 Xilloy ammanon de7on daana geetetidi Geeshsha Maxaafan xaafetis. Wongelan Xoossaa xillotethay qoncis; koyrope wursethi gakanaw, asay xilley ammanonna.
ROM 1:18 Tumay eretonna mela banta iita ooson kammiya asaa bollanne nagara ubbaa bolla, Xoossaa hanqoy salope wodhees.
ROM 1:19 Xoossay entaw qoncanaw bessiyaba qoncisida gisho, enti Xoossaba eroosona.
ROM 1:20 Alamey medhetoosape doomidi, asaas bentonna Xoossaa kandoy, hessika iya merinaa wolqaynne Xoossatethay iya medhetethan qoncidi de7iya gisho, asay banta iitatethaas gaasoyabay baawa.
ROM 1:21 Enti Xoossaa erishe, iya bonchibookonanne galatibookona. Enta qofay maaddonnaba gidis; enta akeekona wozanay dhumis.
ROM 1:22 Enti bantana cincata goosona, shin eeyata.
ROM 1:23 Enti hayqonna Xoossaa goyinnanaysa aggidi, hayqiya asa medhon, kafota medhon, do7ata medhoninne ulora gooshetiyabata daanisidi oothida misileta goyinnidosona.
ROM 1:24 Hessa gisho, enti issoy issuwara borsoba oothidi, banta asatethaa kawushana mela Xoossay enta wozanay amotiya tuna oosos enta yeggi aggis.
ROM 1:25 Hessi haniday enti Xoossaa tumaa wordon laammida gishonne medhida Xoossaa aggidi, medhetethi goyinnida gishosa. Xoossay merinaw galatetidaysa. Amin7i.
ROM 1:26 Hessa gisho, Xoossay entana enta borso amuwas yeggi aggis. Enta maccasay bantaw bessiya addera gahetethi aggidi, bessonnaba hanidi maccasi maccasara gahetidosona.
ROM 1:27 Hessadaka, addeti bantaw bessiya maccasara gahetethi aggidi, addey addera gahetidosona. Addeti issoy issuwara amon xuugetidi, borsoba oothidosona. Banta oothida nagaraas bessiya pirdaa ekidosona.
ROM 1:28 Enti Xoossaa erishe, hari attoshin iyabaa qopanaw koyonna ixida gisho, bessonnaba oothana mela Xoossay entana pathonna qofas aathidi immis.
ROM 1:29 Entan geellatethi, iitatethi, yiiqey, geney, qanaatey, shempo wodhoy, palami, cimoynne iita amoy kumis. Enti zigireyisata,
ROM 1:30 asa sunthi iisseyisata, Xoossaa ixeyisata, cayeyisata, otoreyisata, ceeqeteyisata, iitabaa oothanaw koyeysatanne banta aayesinne aawas kiitetonayisata,
ROM 1:31 akeekonayisata, caaqo mentheyisata, siiqoy baynayisata, qadhey baynayisata.
ROM 1:32 Hayisata mela ootheysatas hayqoy bessees giya Xoossaa higgiya erishe, haysata oothosona. Enti bantaw ooso xalaala gidonashin, oothiya harataka nashshoosona.
ROM 2:1 Hessa gisho, neno harata bolla pirdeyso, neeni gaasoyabay baawa. Neeni harata bolla pirdashe, he neeni pirdiya uraa mela oothiko, neeni, ne bolla pirdaasa.
ROM 2:2 Hessa mela ooso ootheyisata bolla Xoossay xillo pirdaa pirdeysa nu eroos.
ROM 2:3 Neno, hessa mela ooso ootheyisata bolla pirdeyso, enti ootheysa mela ootheyso, neeni Xoossaa pirdaafe attanaba daanii?
ROM 2:4 Woyko Xoossaa keehatetha, gencanne danda7a darotethaa kadhayee? Xoossay new keehiday nena nagaraape zaaranaw gideysa erikiyee?
ROM 2:5 Shin hintew shucha wozaninne si7onna haythi de7ees. Hessa gisho, Xoossaa hanqoynne xillo pirday qonciya gallas, ne bolla pirday darana mela oothaasa.
ROM 2:6 Xoossay issuwas issuwas iya oosuwa mela immana.
ROM 2:7 Lo77o ooson minnidi, galataa, bonchonne dhayonna de7uwa koyeysatas Xoossay merinaa de7uwa immana.
ROM 2:8 Shin bantana siiqeyisata, tumaa ixeysatanne iitabaa oothanaw koyeyisata bolla Xoossaa hanqoynne pirday yaana.
ROM 2:9 Iitabaa oothiya asa ubbaa, koyrottidi Ayhudeta, kaallidi Ayhude gidonna asaa metoynne waayey gakana.
ROM 2:10 Shin Xoossay lo77o ooso oothiya ubbaas, koyrottidi Ayhudetas, kaallidi Ayhude gidonaysatas galataa, bonchonne sarotethaa immana.
ROM 2:11 Xoossay som7o be7idi ase shaakenna.
ROM 2:12 Higgey bayna nagara oothida ubbay higgey bayna dhayana. Higgey de7ishin, nagara oothida ubbay higgen pirdetana.
ROM 2:13 Xoossaa sinthan xilleysati higge naageysatape attishin, higge sissa xalaala si7eyisata gidokona.
ROM 2:14 Higgey bayna Ayhude gidonna asay medhon higgey kiitteysa oothosona. Entaw xaafetida higgey bayna ixikoka enti banta wozanan higgiya eroosona.
ROM 2:15 Enta hanotay, higge kiitay enta wozanan xaafetidaysa bessees. Qassi enta kahay enta bolla markatees. Enta qofay issi issi toho entana bala gees; issi issi toho entana like gees.
ROM 2:16 Ta tamaarsida Wongela mela Xoossay Yesuus Kiristoosa baggara asa wozanan geemmida qofaa pirdiya wode hessi eretana.
ROM 2:17 Shin ne nena Ayhude gaasa; higgen zempaasa; Xoossan ceeqasa.
ROM 2:18 Ne oothana mela Xoossay koyiyabay aybeko eraasa. Higgiya tamaarida gisho, tuma gidiyaba dooranaw eraasa.
ROM 2:19 Neeni qooqeta kaaletheysa, qassi dhuman de7eysatas poo7o gideysa shaaka eraasa.
ROM 2:20 Neeni higgiyafe demmida eratethaninne tumatethan eeyata eriseysanne yoogata tamaarseysa gideysa eraasa.
ROM 2:21 Yaatin, ne harata tamaarseysi ne nena ayis tamaarsikii? Neeni, “Kaysotopa” gashe, neeni ne huuphen kaysotayee?
ROM 2:22 Neeni, “Laammofa” gashe, neeni ne huuphen laammayee? Neeni eeqa ixashe, eeqay de7iya keethaa bonqayee?
ROM 2:23 Neeni Xoossaa higgiyan ceeqetasa, shin higgiyas kiitetonna ixada Xoossaa yeellayay?
ROM 2:24 Geeshsha Maxaafan, “Hinte gaason Xoossaa sunthay Ayhude gidonna asatan cayetees” geetetidi xaafetis.
ROM 2:25 Ne higges kiitetiko, ne qaxaretethaas maadey de7ees, shin neeni higgiyas kiitetonna ixiko ne qaxaretethay qaxaretiboona mela gidees.
ROM 2:26 Ayhude gidonna asi qaxaretonna de7ishe, higgiyas kiitetiko, Xoossay iya qaxaretida mela taybennee?
ROM 2:27 Hinte, Ayhude asati, hintew xaafetida higgeynne qaxaroy de7ishin, hinte higges kiitetonna ixiko, Ayhude gidonna asay qaxaretonna ixikoka higges kiitetidi, hinte bolla pirdana.
ROM 2:28 Hiza, sunthan Ayhude gidida ubbay tuma Ayhude gidenna. Qassi kare asatethaa qaxaroy tuma qaxaro gidenna.
ROM 2:29 Shin tuma Ayhudetethi gaatha baggan Ayhude gideysa. Tuma qaxaretethi Xoossaa Ayyaanan oosetiya wozana qaxaretethafe attishin, xaafetida higgiyan oosetiya asatethaa qaxaro gidenna. He uray galataa Xoossafe ekeesipe attishin, asape gidenna.
ROM 3:1 Yaatin, Ayhude giddon ay dummatethi de7ii? Woyko qaxaretethan ay maadey de7ii?
ROM 3:2 Tumaka Ayhude gidoy daro ogera maaddees. Ubbaafe sinthe Xoossay ba qaala hadara Ayhudetas immis.
ROM 3:3 Yaatin, entafe issoti issoti qaala ammanonna ixiko, enta ixoy Xoossaa ammanetetha diggiyee?
ROM 3:4 Diggenna! Asa ubbay wordancho gidikoka Xoossay tuma gido. Geeshsha Maxaafan, “Ne qaalan ne xillaasa; nena mooteysa pirdan lathaasa” geetetidi xaafetis.
ROM 3:5 Yaatin, nu nagaray Xoossay xillo gideysa bessiyaba gidiko, nu woyganee? Xoossay nu nagaraa gisho, nu bolla pirdiko, like gidenneyee? Haysa taani asa qofatho gayis.
ROM 3:6 Hessi ubbaraka hanenna. Hessada haniko, Xoossay ha alamiya bolla waati pirdanee?
ROM 3:7 Shin ta wordotethay Xoossa tumaa qoncisidi, iya bonchuwa darsi bessiyaba gidiko, yaatin, ayis ta bolla nagaranchoda pirdeetii?
ROM 3:8 Issi issi asay, “Lo77oy yaana mela iita oothoos” yaagidi tamaarsiyada oothidi tana mootosona. Hessa mela asaa bolla yaa Xoossaa pirday like.
ROM 3:9 Yaatin, nuuni woyganee? Nu Ayhudeti, Ayhude gidonaysatape aadhonayee? Gidenna! Ayhude gidin, Ayhude gidonna ixin ubbay nagarancho gideysa taani kasetada hintew odas.
ROM 3:10 Geeshsha Maxaafan, “Xillo asi issoyka baawa.
ROM 3:11 Akeekiya asi baawa, Xoossaa koyiya oonika baawa.
ROM 3:12 Asa ubbay Xoossaas zoko zaaridosona; ubbay issife pathonnaba gididosona. Lo77o oothiya oonika baawa; issi asika baawa.
ROM 3:13 Enta doonape keyiya qaalay, dooyetida duufope keyiya xinqo mela; banta inxarsan cimmoosona. Enta doonape ase wodhiya, shoosha marzey keyees.
ROM 3:14 Enta doonan camo odaynne baadethi kumis.
ROM 3:15 Enti suuthi gussanaw ellesoosona.
ROM 3:16 Enta ogiyan dhayoynne qohoy de7ees.
ROM 3:17 Enti sarotetha ogiya erokona.
ROM 3:18 Banta de7uwan Xoossaas yayyokonna” geetetidi xaafetis.
ROM 3:19 Ase ubbaa doona oythanawunne kumetha alamiya Xoossaa pirdaafe garsan shiishanaw, higgey imetiday higgefe garsan aqeysatas gideysa nu eroos.
ROM 3:20 Hessa gisho, oonika higges kiitetidi Xoossaa sinthan xillanaw danda7enna. Higgey asi ubbay nagarancho gideysa bessees.
ROM 3:21 Shin ha77i Xoossay asi higgey baynashin xilliya oge qoncisis. He ogiya Muse higgeynne nabeti markatidosona.
ROM 3:22 Ha xillotethaa, Xoossay Yesuus Kiristoosa baggara asa ubbaas shaakoy bayna immees.
ROM 3:23 Asa ubbay nagara oothidosona; Xoossay entaw immida bonchuwafe haakidi attidosona.
ROM 3:24 Shin enti Xoossaa aadho keehatethan, woziya Kiristoos Yesuusa baggara coo xillidosona.
ROM 3:25 Xoossay Yesuus Kiristoosa yarsho oothidi immiday, iya ammaniya ubbay iya suuthan nagara atotethi demmana melasa. Xoossay hessa oothiday ba danda7an kase nagaraa taybonna aggidi, ba xillotethaa bessanaasa.
ROM 3:26 Ha77i wodiyan Yesuusa ammaniya ubbaa xillisidi, Xoossay ba huuphen xillo gideysa bessees.
ROM 3:27 Yaatin, nu ceeqetiyabay aybi de7ii? Aybika baawa. Nuuni ceeqetey higges kiitetiya gishoyee? Akay! Ammano gishosa.
ROM 3:28 Xoossay ase xillisey ammanonape attishin, higges kiitetethan gidonnaysa nu akeekos.
ROM 3:29 Woyko Xoossay Ayhudeta xalaala Xoosseyee? Ayhude gidonaysatas Xoosse gidenneyee? Tuma, Ayhude gidonaysataska I Xoosse.
ROM 3:30 Xoossay isso; Ayhudetanne Ayhude gidonnayisata ammanon xillisey iya.
ROM 3:31 Yaatin, nuuni higgiya ammano gisho shaaros guusseyee? Gidenna! Higgiya minthosipe attishin.
ROM 4:1 Yaatin, nu mayzay Abrahaamey ay demmidee?
ROM 4:2 Abrahaamey ooson xillidaba gidiyako, I ceeqetiyabay de7ees, gidoshin, Xoossaa sinthan ceeqetanaw danda7enna.
ROM 4:3 Geeshsha Maxaafay, “Abrahaamey Xoossaa ammanis; Xoossay hessa iyaw xillotethi oothidi ekis” yaagees.
ROM 4:4 Oothiya uray ekiya damoozey, iya ooso wolqaas cigetiya gatepe attishin, iyaw imota gidenna.
ROM 4:5 Shin ooso oothonna oonika nagaranchuwa xillisiya Xoossaa ammaniko, iya ammanoy iyaw xillotethi gididi taybetees.
ROM 4:6 Geeshsha Maxaafan Dawiti, oosoy bayna Xoossay xillisiya asati ay mela anjetidako haysada yaagidi qoncisees:
ROM 4:7 “Enta balay atto geetetidaysatinne enta nagaray kametidaysati anjetidaysata.
ROM 4:8 Goday iya nagaraa taybonna asi anjetidaysa” yaagees.
ROM 4:9 Yaatin, Dawiti odida anjoy qaxaretida asaa xalaalaseyee? Woyko qaxaretiboona asaasee? Nuuni, “Geeshsha Maxaafay, ‘Abrahaamey Xoossaa ammanis; Xoossay hessa iyaw xillotethi oothidi ekis’ yaagees” gida.
ROM 4:10 Yaatin, hessi awude hanidee? Abrahaamey qaxaretineyee? Woyko qaxaretona de7ishinee? Qaxaretanaape sinthe hanisipe attishin, guye gidenna.
ROM 4:11 Abrahaamey qaxaretanaape sinthe iya ammanoy iyaw xillotethi gididi taybetidaysa erisanaw, iya qaxaroy malaata gidis. Hessa gisho, Abrahaamey qaxaretonna ammaneysatasinne ammanon xilleyisata ubbaas aawa gidis.
ROM 4:12 I qaxaretidaysataska aawa. Abrahaamey entaw aawa gididay enti qaxaretida gisho, xalaalas gidonashin, I qaxaretanaape sinthe ammanida ammanuwa enti kaallida gishosa.
ROM 4:13 Abrahaamesinne iya sheeshas, “Alamiya ta hintew immana” yaagida ufaysay, Abrahaamey ammanon xillida gishosafe attishin, higge naagidi polida gisho gidenna.
ROM 4:14 Higges kiitetidaysati Xoossay immana gida ufaysa laateyisata gidiko, asaa ammanoy maaddenna; Xoossaa ufaysay hada gidis.
ROM 4:15 Higge menthoy Xoossaa hanqo ehees, shin higgey baynason higge menthoy baawa.
ROM 4:16 Hessa gisho, Xoossay immida ufaysay ammanon eketees. Ha ufaysay Abrahaame sheesha ubbaas Xoossaa aadho keehatetha baggara imetidaysa qoncisees. Hessika higge naageysata xalaalas gidonashin, Abrahaameda ammanida ubbaasa. Abrahaamey nu ubbaas aawa.
ROM 4:17 Geeshsha Maxaafan, “Ta nena daro kawotethatas aawa oothas” geetetidi Abrahaame gisho, xaafetis. Ha ufaysay Abrahaames imetiday hayqidaysatas de7o immeysinne oorathaba oothiya Xoossay iya gideysa I ammanida gishosa.
ROM 4:18 Xoossay Abrahaames daro koche immanaysa caaqis. Ufaysi oothanaw aykoka danda7etonna wode Abrahaamey Xoossan ammanida gishonne ufaysi oothida gisho, daro kawotethatas aawa gidis.
ROM 4:19 Abrahaames xeetu laythi kumana hanikoka, ba daaburida asatethanne Saara na7a yelanaw danda7onnaysa erishe ba ammanuwan daaburibeenna.
ROM 4:20 Gidoshin, I ba ammanuwan minnidi Xoossaas boncho immispe attishin, Xoossay immida ufaysaa ammanonna ixidi, sidhibeenna.
ROM 4:21 Abrahaamey, Xoossay caaqida caaquwa polanaysa ba kumetha wozanan ammanis.
ROM 4:22 Hessa gisho, Xoossay iya ammanuwa xillotethan taybis.
ROM 4:23 Shin, “Iyaw xillotethan taybis” giya qaalay Abrahaame xalaalas xaafetibeenna.
ROM 4:24 He qaalay nu Godaa Yesuusa hayqope denthida Xoossaa ammaniya nuuska nu ammanoy xillotethan taybetana mela xaafetis.
ROM 4:25 Xoossay iya nu nagara gisho, hayqos aathidi immis; I nuna xillisanaw hayqope dendis.
ROM 5:1 Hiza, nu ammanon xillida gisho, nu Godaa Yesuus Kiristoosa baggara Xoossara nuus sarotethi de7ees.
ROM 5:2 Nuuni iya baggara ha77i nu eqida aadho keehatetha giddo ammanon gelida. Hessa gisho, nu Xoossaa bonchuwa shaaketanaw de7iya ufaysan ceeqetoos.
ROM 5:3 Hessa xalaala gidonashin, metoy danda7a eheysa nu eriya gisho, nu metuwanka ceeqetoos.
ROM 5:4 Qassi danda7ay genca, gencay ufaysi immeysa nu eroos.
ROM 5:5 Nuus immida Geeshsha Ayyaana baggara Xoossay ba siiquwa nu wozanan gussida gisho he ufaysay nuna yeellayenna.
ROM 5:6 Nuuni buroo daaburanchota gididi de7ishin, Xoossaa wodey gakin, Kiristoosi nagaranchota gisho hayqis.
ROM 5:7 Xillo asa gisho hayqana asi demmanaysi daro meto, shin keeha asa gisho hayqana asi ooni eri bentonna aggenna.
ROM 5:8 Shin nuuni buroo nagarancho gididi de7ishin, Kiristoosi nu gisho hayqis. Hessi Xoossay nuna ay mela siiqiyako iya siiquwa bessees.
ROM 5:9 Hiza, nuuni Kiristoosa suuthan xillidaba gidiko, ubbaafe aathidi iya baggara Xoossaa hanquwafe attana.
ROM 5:10 Nuuni Xoossara kase morke, shin iya Na7aa hayquwan iyara sigetida. Hessafe aathidi, ha77i nuuni Xoossara sigetidaape guye, iya na7aa de7uwa gaason nuuni attana.
ROM 5:11 Hessa xalaala gidonashin, ha77i nuna Xoossara sigethida nu Godaa Yesuus Kiristoosa baggara nu Xoossan ceeqetoos.
ROM 5:12 Addaame baggara nagari ha alamiya gelis. He nagaraa baggara hayqoy yis. Asi ubbay nagara oothida gisho hayqoy asa zare ubbaa gakis.
ROM 5:13 Higgey imetanaape sinthe alamen nagari de7ees, shin higgey bayna wode nagari nagara gididi taybetenna.
ROM 5:14 Shin Addaamepe Muse gakanaw hayqoy asa ubbaa haaris. Hari attoshin, Addaameda higges kiitetonna ixidi, nagara oothiboonayisata bollaka hayqoy kawotis. Addaamey yaana Yesuusas leemiso.
ROM 5:15 Shin Xoossaa aadho keehatethay Addaame nagaraa mela gidenna. Issi asa nagara baggara daro asay hayqis. Shin Yesuus Kiristoosa baggara Xoossaa aadho keehatethay asa ubbaas daridi imetis.
ROM 5:16 Addaame nagaraa giddoninne Xoossaa imota giddon daro dummatethi de7ees. Issi asa nagara gaason Xoossay iya bolla pirdis. Shin asay daro nagara oothinka Xoossaa aadho keehatethay xillotethaa ehis.
ROM 5:17 Issi asa nagara gaason hayqoy asa ubbaa bolla kawotis. Shin Yesuus Kiristoosa baggara Xoossaa aadho keehatethaanne xillotetha imota ekiya ubbay, xoono de7on de7oosona.
ROM 5:18 Hiza, issi asi nagara oothida gaason asa ubbaa bolla pirdi yidaysada issi asi xillo oothida gaason, Xoossay ase ubbaa xillisidi entaw de7o immees.
ROM 5:19 Issi asi kiitetonna ixida gaason, daro asay nagarancho gididaysada issi asa kiitetethan daro asay xillana.
ROM 5:20 Asay nagara wolqaa erana mela higgey yis, shin nagara wolqay darida wode Xoossaa aadho keehatethay aadhidi daris.
ROM 5:21 Nagari hayqo wolqan kawotidaysa mela Xoossa aadho keehatethay xillotethaa wolqan kawotidi, nu Godaa Yesuus Kiristoosa baggara nuna merinaa de7uwako kaalethees.
ROM 6:1 Yaatin, nuuni woyganee? Xoossaa aadho keehatethay darana mela nagaran minnidi de7ino?
ROM 6:2 Akay, nuuni nagaras hayqidaba gidiko, yaatin, nuuni hizape waanidi nagaran daanee?
ROM 6:3 Nu ubbay Kiristoos Yesuusara issifanaw xammaqetida wode iya hayquwan iyara issifanaw xammaqetidaysa ereketiyee?
ROM 6:4 Nu xammaqetida wode Kiristoosara hayqidanne moogetida. Kiristoosi Xoossaa Aawa boncho wolqan hayqope dendidaysa mela nuka ooratha de7on daana.
ROM 6:5 Nu iya hayquwan iyara issino gidiko, hessadaka, iya denduwan iyara issino gidana.
ROM 6:6 Nu hizape nagaras aylle gidonna melanne nu nagarancho asatethaa wolqay dhayana mela nu cima asatethay Kiristoosara kaqetidaysa eroos.
ROM 6:7 Issi asi Kiristoosan hayqidaba gidiko, I nagara wolqafe la77a keyis.
ROM 6:8 Nuuni Kiristoosara hayqiko, iyara de7on daanaysa ammanoos.
ROM 6:9 Kiristoosi hayqope dendida gisho, zaari I hayqonaysanne hayqoy sinthafe iya haaronnaysa nu eroos.
ROM 6:10 I hayqida wode nagaras issitoho wursethi gakanaw hayqis, shin ha77i de7on Xoossaas de7ees.
ROM 6:11 Hessadaka, hinte nagaras hayqidi, Godaa Kiristoos Yesuusa baggara Xoossas de7on de7eysa qopite.
ROM 6:12 Hessa gisho, hinte, hinte asatethaa amuwas kiitetonna mela hayqiya hinte asatethaa nagari haaropo.
ROM 6:13 Qassi hinte asatethaa nagara oothanaw geellatetha miishe oothidi immofite. Shin hinte hayqope dendidi, de7on de7iya asada hinte asatethaa Xoossaas immite. Qassi hinte kumetha asatethaa xillo ooso oothanaw Xoossaas aathidi immite.
ROM 6:14 Hinte Xoossaa aadho keehatetha garsan de7eetape attishin, higgefe garsan de7onna gisho nagari hintena haaranaw bessenna.
ROM 6:15 Yaatin, nu woyganee? Higgefe garsan gidonashin, Xoossaa aadho keehatetha garsan de7iya gisho nagara oothaneyee? Akay!
ROM 6:16 Hinte issi asas kiitetanaw hintena aylle oothidi immiya wode he hinte kiiteteysas aylle gideysa ereeta. Hessadaka, hinte nagaras kiitetiko, hintew hayqo ehiya nagaraas aylle gideeta. Woyko hinte Xoossas kiitetiko xillotethi ehiya Xoossaas aylle gideeta.
ROM 6:17 Kase hinte nagaras aylle, shin ha77i hinte ekida tuma timirtiyas kumetha wozanape kiitetida gisho Xoossaas galati gido.
ROM 6:18 Hinte nagara aylletetha qashope biletidi xillotetha aylle gidideta.
ROM 6:19 Hinte hinte qofan daaburancho gidiya gisho, taani oodeska geliya ogen odayis. Kase hinte, hinte asatethaa tunanne iitabaa oothanaw aylle oothidi immidaysa mela ha77i hinte asatethaa geeshshi gidana mela xillotetha aylle oothidi immite.
ROM 6:20 Hinte nagaras aylletidi de7iya wode xillotethas haareteketa.
ROM 6:21 Hintena ha77i yeellayiya beni hinte iita oosuwape ay maade demmidetii? He oosota wursethay hayqo.
ROM 6:22 Shin hinte nagara aylletetha qashope biletidi, Xoossaas aylle gidideta. Hessi hintena geeshshi oothidi merinaa de7uwako kaalethees.
ROM 6:23 Nagara gatey hayqo. Shin Xoossay, nu Godaa Kiristoos Yesuusa baggara immiya imotay merinaa de7o.
ROM 7:1 Ta ishato, taani odey higge eriya asatasa. Higgey issi asi paxa de7iya wode ubban iya haarees.
ROM 7:2 Leemisos, azina gelida maccasiya I azinay paxa de7iya wode higgen iyara qashetasu. Shin I azinay hayqiko iyara iya caaqida caaqoy iyo haarenna.
ROM 7:3 Hessa gisho, iya ba azinay paxa de7ishin, hara adde geliko, iya laammidaaro geetetawusu. Shin I azinay hayqiko, caaqoy iyo haaronna gisho iya hara azina geliko, iya laammidaaro geetetuku.
ROM 7:4 Hessa gisho, ta ishato, hinte Kiristoosa asatethaa baggara higge wolqaas hayqidi, Xoossaas ayfe ayfanaw hayqope dendida Kiristoosas gidideta.
ROM 7:5 Nu asho amoy nuna haarin, nu de7iya wode higgey guji nagara oothana mela nuna denthethees. Nu asatethaa giddon iita amotethi de7iya gisho nuuni hayqo ayfe ayfana mela oothis.
ROM 7:6 Shin ha77i nuuni nuna qachida higgiyas hayqida gisho nuuni higge qashope biletida. Hessa gisho, Geeshsha Ayyaana ogen Xoossaas kiitetosipe attishin, xaafetida cima higgiyas kiitetoko.
ROM 7:7 Yaatin, nuuni woyganee? Higgey ba huuphen nagaree? Gidenna! Shin higgey nagari aybeko tana erisis. Higgey, “Amotofa” goonnako, amotethi aybeko taani erike.
ROM 7:8 Shin ta ubbaba amottana mela nagari higge baggara tanan oge demmis. Higgey bayneko nagari hayqidaysa.
ROM 7:9 Kase higgey bayna wode ta paxa, shin higgey imetida wode nagari paxin ta qassi hayqas.
ROM 7:10 Taani de7on daana mela Xoossay immida higgey taw hayqo ehis.
ROM 7:11 Nagari higge baggara tana cimmiya ogiya demmidi, wodhis.
ROM 7:12 Hessa gisho, higgey geeshshi; iyan xaafetida kiitayka geeshshi, xillonne lo77o.
ROM 7:13 Yaatin, lo77o gididabay ta bolla hayqo ehideyee? Gidenna! Shin nagari nagara gideysi qoncana mela lo77oban maaddetidi taw hayqo ehis. Hessa gisho, nagara nagaratethay higge baggara aadhidi eretis.
ROM 7:14 Nuuni higgey ayyaanaba gideysa eroos. Shin taani nagaras bayzetida asho asi.
ROM 7:15 Taani oothiyaba akeekike; taani dosiyaba oothanaysa aggada ta ixiyaba oothayis.
ROM 7:16 Taani ixiyaba oothiya gidiko, higgey lo77o gideysa ta ma7ayis.
ROM 7:17 Hessa gidiko, he oosuwa tanan de7iya nagaray oothaysipe attishin, ta oothike.
ROM 7:18 Tanan, hessika ta ashuwan lo77obay baynaysa erayis. Lo77oba oothiya amotethi tanan de7ees, shin lo77oba oothanaw danda7ike.
ROM 7:19 Taani ixiya iitabaa oothaysipe attishin, ta dosiya lo77oba oothike.
ROM 7:20 Taani ixiyaba oothiya gidiko, hessa tanan de7iya nagaray ootheesipe attishin, oothey tana gidike.
ROM 7:21 Hiza, ta lo77oba oothanaw dosishin, iitabaa oosoy woga gideysa demmas.
ROM 7:22 Taani ta wozanan Xoossaa higgiyan ufaytayis.
ROM 7:23 Shin ta asatethaa giddon de7iya ta qofaa higgiyara oletiya dumma higge be7ayis. He higgey ta asatethaa giddon oothiya nagara higgiyas tana aylle oothidi immis.
ROM 7:24 Taani waanida yibbata asee? Hayqos efiya ha asatethafe tana ashshanay oonee?
ROM 7:25 Nu Godaa Yesuus Kiristoosa baggara tana ashshiya Xoossaas galatay gido. Hiza, taani ta qofan Xoossaa higgiyas haaretayis; shin ta asatethan tana nagara oosisiya higgiyas haaretayis.
ROM 8:1 Hessa gisho, Kiristoos Yesuusan de7eysati ha77i pirdetokona.
ROM 8:2 Kiristoos Yesuusa baggara nuus de7o immiya Geeshsha Ayyaana higgey, tana nagaranne hayqo higge aylletethaafe kessis.
ROM 8:3 Nu nagara asatethaa gaason, higgey daaburancho gidiya gisho nuna ashshanaw danda7ibeenna. Xoossay ba na7aa nagarancho asa leemison nagaras yarsho gidana mela kiittidi hessa oothis. Yaatidi, Xoossay Kiristoosa ashuwa baggara nagara, nagarancho asa giddon pirdis.
ROM 8:4 Xoossay hessa oothiday, nu asho amoy koyeysada gidonashin, Geeshsha Ayyaanay koyeysada de7iya nu bolla higgiya xillo kiitay poletana melasa.
ROM 8:5 Banta asho amuwa kaallidi de7eysati bantana ufaysiyabaa qopoosona. Shin Geeshsha Ayyaana shenen de7eysati Geeshsha Ayyaana ufaysiyabaa qopoosona.
ROM 8:6 Nu qofay asho amos haaretiko hayqo ehees, shin ayyaana amos haaretiko de7onne sarotethi ehees.
ROM 8:7 Asho amos haaretiya asi Xoossaa higgiyas kiitetanaw koyonna gishonne kiitetanaw danda7onna gisho, Xoossara morke.
ROM 8:8 Banta asho amuwas haareteysati Xoossaa ufaysanaw danda7okona.
ROM 8:9 Shin Xoossaa Ayyaanay hintenan de7ikonne hintena haariko, hinte Ayyaana shenen de7eetape attishin, hinte asho amuwas haareteketa. Kiristoosa Ayyaanay bayna oonika Kiristoosaba gidenna.
ROM 8:10 Shin Kiristoosi hintenan de7iko, hinte asatethay nagara gaason hayqidaysa. Shin hinte ayyaanay xillotethaa gaason de7on de7ees.
ROM 8:11 Shin Yesuusa hayqope denthida Xoossaa Ayyaanay hintenan de7iko, Kiristoosa hayqope denthida Xoossay, hintenan de7iya ba Geeshsha Ayyaanan hayqiya hinte asatethaas de7o immana.
ROM 8:12 Hiza, ta ishato, nuuni nu asho amuwa kaallidi daanaw bessenna.
ROM 8:13 Hinte, hinte asho amuwas de7iko hayqana, shin Geeshsha Ayyaana wolqan nagara oosuwa wodhiko hinte de7on daana.
ROM 8:14 Xoossaa Ayyaanay kaalethiya ubbay Xoossaa nayta.
ROM 8:15 Nuuni, “Abbaa, ta Aawaw” yaagidi xeegiya, Xoossaa nayta oothiya Geeshsha Ayyaana ekidaape attishin, zaaridi yashshan daanaw aylle oothiya ayyaana ekibooko.
ROM 8:16 Xoossaa Ayyaanay nu ayyaanara gididi nuuni Xoossaa nayta gideysa markatees.
ROM 8:17 Nuuni iya nayta gidiko Xoossaa anjuwa laattana; Kiristoosara wolla he anjuwa laattana. Qassi nuuni Kiristoosara metuwa ekiko iyara wolla iya bonchuwan shaaketana.
ROM 8:18 Nuuni ha77i waayetiya waayiya, sinthafe nuus qoncana bonchuwara gathi be7iko, ginisanaw danda7etenna gada qopayis.
ROM 8:19 Medhetetha ubbay Xoossaa nayta qoncethaa daro laamotidi naagoosona.
ROM 8:20 Medhetetha ubbay hada gidis; hessika, medhetetha dooron gidonashin, ufaysan naagana mela oothida Xoossaa shenen hanis.
ROM 8:21 Medhetethay ba huuphen dhayo aylletethaafe wozetidi, Xoossaa naytara wolla boncho la77a shaaketana.
ROM 8:22 Medhetethay issife hanno gakanaw iqethi oykida maccasada ooleninne un7an de7eysa nu eroos.
ROM 8:23 Qassi hessa medhetetha xalaala gidonashin, Geeshsha Ayyaana bayra imotada ekida nuuni, nu huuphen nu asatethaas wozo gidida Xoossaa nayta gidana ufaysaa naagishe nu asatethan oolos.
ROM 8:24 Ha ufaysan nuuni attida. Shin nuuni ufaysi oothiyabay bentiya gidiko hessa ooni ufaysi oothii?
ROM 8:25 Shin nu be7onnaba demmana gidi ufaysan naagiko hessa danda7an naagoos.
ROM 8:26 Hessada Geeshsha Ayyaanay nu daaburan maaddees. Nuuni Xoossaa waati woossanaw bessiyako eroko, shin Geeshsha Ayyaanay ba huuphen, asi odanaw danda7etonna qaalan nuus gaannatees.
ROM 8:27 Qassi asa wozana eriya Xoossay Geeshsha Ayyaana qofay aybeko erees. Geeshsha Ayyaanay Xoossaa sheniyada geeshshatas gaannatees.
ROM 8:28 Xoossaa siiqeysatasinne iya sheniyada xeegetidaysatas Xoossay ubbaa lo77os ootheysa eroos.
ROM 8:29 Xoossay koyrottidi eridaysati ba Na7aa daanana melanne na7ayka ammaneyisata giddon bayra gidana mela enta dummayidi wothis.
ROM 8:30 Xoossay koyrottidi dummayidaysata xeegis; he xeegidaysata xillisis; he xillisidaysata qassi bonchis.
ROM 8:31 Yaatin, nu ha ubbaas woyganee? Xoossay nu bagga gidiko nuura oone eqetanay?
ROM 8:32 I hari attoshin, ba na7aas qadhetonnashin, nu gisho aathidi immis. Yaatin, ba na7aa nuus aathidi immidaysi waanidi ubbaba coo immennee?
ROM 8:33 Xoossay entana xillisida gisho I dooridaysata oone mootanay?
ROM 8:34 Yaatin, enta bolla pirdanaw danda7ey oonee? Oonika baawa. Hayqope dendidi Xoossaa ushachan uttida, Kiristoos Yesuusi, I nuus gaannatees.
ROM 8:35 Hiza, nuna Kiristoosa siiquwape shaakanay oonee? Waayeye woyko metoye woyko goodeye woyko kosheye woyko kallotetheye woyko yashsheye woyko oleyee?
ROM 8:36 Geeshsha Maxaafan, “Nuuni ne gisho kumetha gallas hayqoos; shukas efiya dorsada taybetida” geetetidi xaafetidaysa mela gidis.
ROM 8:37 Shin nuuni, nuna siiqida Kiristoosan ha ubbaa polo xoonos.
ROM 8:38 Hessa gisho, hayqo gidin de7o gidin kiitanchota gidin haareyisata gidin ha77i de7eysa gidin sinthafe yaanaysa gidin wolqaamata gidin,
ROM 8:39 salo wolqaa gidin sa7a wolqaa gidin ay medhetethi gidin nu Godaa, Kiristoos Yesuusan de7iya Xoossaa siiquwape nuna shaakanaw danda7onnaysa taani eras.
ROM 9:1 Taani Kiristoosan tuma odayis, wordotike. Geeshsha Ayyaanay kaalethiya ta kahay taani wordotonnaysa taw markatees.
ROM 9:2 Ta wozanan Isra7eeletas daro qadhetaysinne qamma gallas qopayis.
ROM 9:3 Taani, ta ishata gisho, Kiristoosape shaaketada Xoossaa baadethafe garsan de7idaako dosaysishin.
ROM 9:4 Enti Isra7eeleta, Xoossay enta ba nayta oothis, ba bonchuwa entaw qoncisis. Entara caaqis; higgiya entaw immis. Enti Xoossaa goyinnana tuma ogiya bessis; Xoossay ufaysa qaala entaw immis.
ROM 9:5 Enti yeletethan mayzata koche; qassi Kiristoosi ashon enta koche gididi yis. Ubbaafe bolla gidida Xoossay merinaw galatetto. Amin7i!
ROM 9:6 Gidoshin, Xoossay gelida qaalay poletonna attis guussu gidenna. Isra7eele asa ubbay Xoossaa asi gidokona.
ROM 9:7 Qassi Abrahaame zare ubbay Abrahaame nayta gidokona. Xoossay Abrahaames, “Ne kochay Yisaaqa baggara xeegetana” yaagis.
ROM 9:8 Hessa guussay ashon yeletida nayti ubbay Xoossaa nayta gidokona. Shin tuma Isra7eele nayti Xoossay Abrahaames gelida qaalada yeletida nayta.
ROM 9:9 Xoossay immana gidi gelida qaalay, “Taani wonto laythi hannoode yaana; Saaraka adde na7a yelana” yaageysa.
ROM 9:10 Hessa xalaala gidonashin, Irbiqinne Yisaaqi yelida mente adde naytabaa akeekite.
ROM 9:11 Enti yeletanaape woyko iita woyko lo77o oothanaape sinthe Xoossaa dooroy ooson gidonashin xeessan gideysa qoncisanaw,
ROM 9:12 “Bayray kaaluwas kiitetana” yaagidi Goday Irbiqas odis.
ROM 9:13 Hessika Geeshsha Maxaafan, “Yayqooba dosas, Eesawe ixas” geetetidi xaafetis.
ROM 9:14 Yaatin, nuuni woyganee? Xoossay ase asape shaakiyee? Gidenna.
ROM 9:15 Goday Museko, “Ta maaranaw koydaysata maarana; ta qadhetanaw koydaysatas qadhetana” yaagis.
ROM 9:16 Hiza, Xoossaa dooroy asa shenen woyko ooson gidonashin iya maarotethaana.
ROM 9:17 Geeshsha Maxaafan, Gibxe kawako, “Taani, ta wolqaa nenan bessanawunne ta sunthay alame ubban eretana mela hessas nena kawothas” geetetidi xaafetis.
ROM 9:18 Hiza, Xoossay maaranaw koyeysa maarees; wozanaa muumisanaw koyeysa wozanaa muumisees.
ROM 9:19 Hintefe issoy, “Yaatin, Xoossay ase iita ooso gisho ayis borii? Xoossaa sheniya ixas gaanay oonee?” yaagidi oychanaw danda7ees.
ROM 9:20 Shin ta ishaw, Xoossara palamanaw neeni oonee? Urqafe Medhetida miishey bana medhidaysa, “Tana haysada oothada ayis medhadii?” gidi oychanaw danda7ii?
ROM 9:21 Woyko urqa medheysi issi urqafe issuwa boncho miishe, hankuwa qassi tooshe miishe oothidi medhanaw maati baawee?
ROM 9:22 Xoossay ba hanquwa bessanawunne ba wolqaa erisanaw koyidi, pirdas giigida hanqo nayta daro gencan danda7idaako ne ay eray?
ROM 9:23 Hessa I oothiday koyrottidi bonchoos giigisida, ba doorida naytas ba bonchuwa qoncisanaasa.
ROM 9:24 Ayhude gidin, woyko Ayhude gidonna asa ubbay Xoossan dooretida.
ROM 9:25 Nabiya Hose maxaafan, “Ta ase gidonnayisata, ‘Ta ase’ gada xeegana. Ta siiqaboonna deriya, ‘Siiqetidaysata’ gada xeegana.
ROM 9:26 Enti, ‘Ta ase gideketa’ geetetidi xeegetida bessan, ‘De7o Xoossaa nayta’ geetetidi xeegetana” yaagees.
ROM 9:27 Nabiya Isayaasi Isra7eele asaaba, “Isra7eele asay abba gaxan de7iya shafeda darikoka, entafe guutha asa xalaali attana.
ROM 9:28 Goday alamiya ubbaa bolla ellesidi polo pirdaa pirdana.”
ROM 9:29 Qassika Isayaasi, “Ubbaafe Wolqaama Goday nuus guutha koche ashshonaba gidiyako, nuuni Soodomenne Gamoora katamaada dhayanashin” yaagidi koyrottidi odis.
ROM 9:30 Yaatin, nu woyganee? Xillotethaa koyiboona Ayhude gidonna asay ammanon xillotethi demmidosona.
ROM 9:31 Shin xillotethako gathiya higgey de7iya Isra7eele asay xillotethi demmibookona.
ROM 9:32 Ayis demmibookona? Enti xillotethaa ammanon gidonashin, ooson ekanaw koyida gishosa. Yaaniya gisho, enti, “Dhubiya shuchan” dhubetidosona.
ROM 9:33 Geeshsha Maxaafan, “Taani Xiyoonen dhubbi kundisiya shuchaa wothana. Iyan ammaniya oonika yeellatenna” geetetidi xaafetis.
ROM 10:1 Ta ishato, ta kumetha wozanan ta amotteynne Xoosse woossey Isra7eeley attana melasa.
ROM 10:2 Enti Xoossaas mishetoosonashin, tuma eratethan mishetonnaysa ta markatayis.
ROM 10:3 Enti Xoossaa xillotethaa ogiya eronna ixidi, banta huuphe xillotethaa kaallidosonape attishin, Xoossaa xillotethaa koybookona.
ROM 10:4 Asi ubbay ammanon xillana mela Kiristoosi higgiya polis.
ROM 10:5 Asi higge naagidi ekiya xillotethabaa Musey xaafishe, “Higge naagiya oonika he higgiya naagida mela de7ees” yaagis.
ROM 10:6 Shin ammanon ekiya xillotethabaa geetetiday haysa: “Ne wozanan, ‘Ooni salo keyanee?’ yaagopa; hessi Kiristoosa wodhisanaasa.
ROM 10:7 Woyko, ‘Duge sa7a garsi wodhanay oonee?’ goopa; hessi Kiristoosa duufope kessanaasa.
ROM 10:8 Shin yaagidi xaafetis: ‘Xoossaa qaalay ne matana; ne doonaninne ne wozanan de7ees’ Nuuni hintew odiya ammano qaalay haysa.
ROM 10:9 “Yesuusi Godaa” gada ne doonan markatikonne Xoossay iya hayqope denthidaysa ne wozanan ammaniko, ne attana.
ROM 10:10 Asi ba wozanan ammanidi xillees; ba doonan markatidi attees.
ROM 10:11 Geeshsha Maxaafay, “Iyan ammaniya oonika yeellatenna” yaagees.
ROM 10:12 Issi Xoossay ubbaa Godaa gidiya gisho, Ayhudeta giddoninne Ayhude gidonna asaa giddon dummatethi baawa. I bana xeegiya ubbaas daro keeha.
ROM 10:13 Geeshsha Maxaafay, “Godaa sunthaa xeegiya oonika attana” yaagees.
ROM 10:14 Yaatin, enti ammanonna de7ishe waanidi iya xeeganaw danda7onna? Enti iyabaa si7onna de7ishe waatidi iya ammananaw danda7onna? Qassi entaw qaala odiya asi bayna de7ishin, waanidi si7anaw danda7oona?
ROM 10:15 Kiitetida asi bayna de7ishin, qaalay waanidi odetanaw danda7ii? Geeshsha Maxaafan, “Ufaysa Wongela odiya asaa tohoti waanidi lo77oona!” yaagidi xaafetis.
ROM 10:16 Shin Isayaasi, “Godaw, nu markatethaa ooni ammanidee?” yaagidaysada, ubbay Wongela ammanibookona.
ROM 10:17 Hessa gisho, ammanoy sissafe yees; sissi Kiristoosa qaalape yees.
ROM 10:18 Gidoshin, Isra7eele asay qaala si7ibookona guusseyee? Akay, si7idosona. Geeshsha Maxaafan, “Enta qaalay biitta ubban si7etis, enta oday sa7aa gaxa gakis” yaagetis.
ROM 10:19 Shin Isra7eele asay eribookona guusseyee? Musey kase, “Taani hintena leqetida asan qiiroysana; qassi eeya asan hintena yiloyana” yaagis.
ROM 10:20 Qassi Isayaasi, “Tana koyiboona asaas bentas; tana oychiboona asaas qoncas” yaagidi yayyonna odis.
ROM 10:21 Shin Isayaasi Isra7eeletaba odishe, “Ubbaa gallas kiitetonna asaasinne tana ixiya asaas ta kushiya miccas” yaagees.
ROM 11:1 Ane ta oychayis: yaatin, Xoossay ba asaa aggideyee? Aggibeenna! Taani ta huuphen Isra7eele; Abrahaame sheeshi; Biniyaame koche.
ROM 11:2 Xoossay koyro doorida ba asata yeggenna. Geeshsha Maxaafan, Eeliyaasi Isra7eeleta Xoossaa sinthan waati mootidaako, hinte ereketii?
ROM 11:3 Eeliyaasi, “Godaw, enti ne nabeta wodhidosona, ne yarsho bessaaka laallidosona. Ta tarka attas; enti tanaka wodhanaw koyoosona” yaagis.
ROM 11:4 Xoossay iyaw woygidi zaaridee? “Ba7aale geetetiya eeqas goyinniboona laapun mukulu asaa taw ashshas” yaagis.
ROM 11:5 Hessadaka, ha wodiyan Xoossay ba aadho keehatethan doorida guutha Isra7eeleti de7oosona.
ROM 11:6 I enta dooriday ba aadho keehatethanaape attishin, enta ooson gidenna. Dooroy ooson gidiko, iya aadho keehatethay tuma aadho keehatethi gidenna.
ROM 11:7 Yaatin, waanidee? Isra7eeleti banta koyaba demmibookona, shin Xoossay doorida guuthati demmidosona. Attidaysati banta wozanaa muumisidosona.
ROM 11:8 Hessika, Geeshsha Maxaafan, “Enti banta ayfiyan be7onnaada banta haythan si7onnaada, hanno gakanaw entaw Xoossay azalla ayyaana immis” geetetidi xaafetidaysada hanis.
ROM 11:9 Qassi Dawiti, “Enti miya gaytay enta xiheda oyko; enta gufanthiya aafo gido; enta iitatethay enta bolla gako.
ROM 11:10 Enti xeellonnaada enta ayfey goozeto; ubba wode meton enti kuunidi de7o” yaagis.
ROM 11:11 Yaatin, Ayhudeti zaari dendonna mela kundidonayee? Gidenna! Enta kundethay Ayhude gidonna asay attana mela gaaso gidis. Hessika Ayhudeti enta bolla qanaatanaada oothis.
ROM 11:12 Ayhudeta nagaray alamiyas daro anjo ehis; qassi enta kundethay Ayhude gidonna asaas daro anjo gidis. Yaatin, dooretida Ayhudeti kumethi attiya wode anjoy ay mela darandeesha!
ROM 11:13 Taani, ha77i hintew Ayhude gidonna asaas odayis. Ayhude gidonna asaas hawaare gidada ootheysan taani daro ceeqetayis.
ROM 11:14 Ta hessa oothiday taw ashon koche gidida Isra7eeleta qiiroyada entafe guuthata ashshanaasa.
ROM 11:15 Xoossay enta yeggida wode, ha alamey Xoossara sigetis. Xoossay enta shiishi ekiya wode hayqida asi hayqope dendida mela gidees.
ROM 11:16 Koyro menthida baso uythay Xoossaas yarshetidi geeshshi gidiko, muume uythayka geeshshi. Mithas xaphoy geeshshi gidiko, tasheyka geeshshi.
ROM 11:17 Gaden tokida shamaho tashe gidida Ayhudeti karetin, hinte bazzon dolida shamaho tashe gidida Ayhude gidonnaysati enta bessan dhanthetidi enta anjuwanne duretetha shaaketideta.
ROM 11:18 Hiza, hinte tasheda karetidi wodhida Ayhudeta bolla otortofite. Hinte otortiyaba gidiko, xaphoy hintena tookesipe attishin, hinte xaphuwa tookonnaysa akeekite.
ROM 11:19 Neeni, “He tasheti karetiday, ta enta bessan dhanthetana melasa” gaanaw danda7aasa.
ROM 11:20 Hessi tuma. Enti ammanibona gisho karetidosona. Neeni ammanida gisho he bessan eqadasa. Neeni yayyanaw besseesipe attishin, otoranaw bessenna.
ROM 11:21 Xoossay medhon tashe gidida Ayhudetas qadhetonna ixiko hintewuka qadhetenna.
ROM 11:22 Hiza, Xoossay ay mela keehekonne ay mela yashshiyako be7a. I yashshey kiitetonayisata, qassi I keehey iya ammanidi minnidi eqidaysatasa. Minnidi eqonna ixiko hinteka karetana.
ROM 11:23 Ayhudeti ammaniko, kase enti de7iya bessaa simmana. Xoossay enta zaaridi, wothanaw danda7ees.
ROM 11:24 Hintena bazzon de7iya shamaho gidida Ayhude gidonnayisata qanxidi, gaden tooketida shamahuwa bolla hintena tokiko, medhon gade shamaho gidida Ayhudeta banta koyro bessan zaari tokanaw waanidi danda7etennee?
ROM 11:25 Ta ishato, hinte hintena erancho gidi ceeqetofite. Ta hintew odiya issi xuuri de7ees. Hessika Isra7eeletape baggay si7onna ixiday wursethi gakanaw gidonashin, attanaw de7iya Ayhude gidonna asay kumethi Xoossako yaana gakanaasa.
ROM 11:26 Hessadaka, Isra7eele asa ubbay attana. Geeshsha Maxaafan, “Nuna ashsheysi Xiyoonepe yaana; Yayqooba kochaafe iita ubbaa diggana.
ROM 11:27 Taani enta nagara atto giya wode entara caaqana caaqoy haysa” geetetidi xaafetis.
ROM 11:28 Ayhudeti Wongela ekonna ixidi, hinte gisho Xoossara morke gididosona. Gidoshin, ha77ika enti dooretidaysata, Xoossay enta aawata gisho enta dosees.
ROM 11:29 Xoossay ba imuwaninne ba xeessan qiirotenna.
ROM 11:30 Hinte Ayhude gidonnaysati kase Xoossaas kiitetibeketa. Shin ha77i Ayhudeti kiitetonna ixin, hinte Xoossaa maarotethaa ekideta.
ROM 11:31 Hessadaka, hinte ekida maarotethaa Ayhudeti ekana mela ha77i Xoossaas kiitetonna ixidosona.
ROM 11:32 Xoossay asa ubbaa ba maarotethaa bessanaw koyidi, asi ubbay kiitetonna ixana mela oothis.
ROM 11:33 Xoossaa duretetha, cincatethaanne eratethaa akeekidi odanay oonee? Iya pirday pilgetenna, iya ogey eretenna.
ROM 11:34 Geeshsha Maxaafan, “Godaa qofaa erey oonee? Iya zoranaw danda7ey oonee?
ROM 11:35 Xoossaas tal7eynne tal7iya zaaridi ekey oonee?” yaagees.
ROM 11:36 Ubbaa I medhis; ubbay iyan de7ees; ubbay iya bonchosa. Xoossaas merinaw bonchoy gido. Amin7i.
ROM 12:1 Hiza, ta ishato, hinte, hinte asatethaa Xoossaa ufaysiya, de7onne geeshsha yarsho oothidi, immana mela taani hintena Xoossaa maarotethan woossayis. Xoossaa hinte goyinnanaw bessiya tuma ogey hessa.
ROM 12:2 Lo77o, ufayseysanne polo gidida Xoossaa sheniya hinte shaaki eranaw hinte qofan laametitepe attishin, ha alamiya daanopite.
ROM 12:3 Xoossay hinte issuwas issuwas immida ammanuwa mela wozanaama asada qopite. Qopanaw besseysafe aathidi hintena dummayidi, otoron qopofite gada taw imetida aadho keehatethan hintew odayis.
ROM 12:4 Nu issi asatethaa giddon dumma dumma kifileti de7oosona; he dumma dumma kifiletas dumma dumma oosoy de7ees.
ROM 12:5 Hessada, nuuni daro asi gidikoka, Kiristoosan issi asatethi gidida. Nuuni issi asatethi gididi dumma dumma kifileti issoy issuwara oyketida.
ROM 12:6 Nuus imetida aadho keehatethan dumma dumma imotati de7oosona. Nu imoy tinbit odo gidiko, nuus de7iya ammanuwa mela odanaw bessees.
ROM 12:7 Nu imoy harata maade gidiko, he oosuwan minnanaw bessees; tamaarso gidiko, he tamaarsuwan minnanaw bessees.
ROM 12:8 Nu imoy harata minthetho gidiko, minnidi minthethanaw bessees. Nu imoy nuus de7iyabaape haratas imo gidiko, wozanape immanaw bessees. Nu imoy ayso gidiko, minnidi aysanaw bessees. Nu imoy haratas keeho gidiko, ufaysan keehanaw bessees.
ROM 12:9 Hinte siiqoy qoodhepe qommon gidanaw bessenna. Iitaba ixite; lo77oba minthidi oykite.
ROM 12:10 Issoy issuwara ishada siiqetite; issoy issuwa bonchite.
ROM 12:11 Azallofite; hinte ayyaanan minnidi, Godaas oothite.
ROM 12:12 Xoossay immida ufaysan ufaytite; metuwa danda7ite; ubba wode Xoossaa woossite.
ROM 12:13 Ammaniya geeshshata koshshiyaban maaddite; imathata mokite.
ROM 12:14 Hintena goodeyisata anjite; anjitepe attishin, baaddofite.
ROM 12:15 Ufayteysatara ufaytite; yeekeysatara yeekite.
ROM 12:16 Issoy issuwara issi qofan de7ite. Otoro qofaa aggidi, hintena kawushidi, kawusha ooso oothite. Hinte hintena cinca gidi qopofite.
ROM 12:17 Oonika hintew iitabaa oothiko, he uraas iita zaaropite. Asa ubbaa sinthan nashisiya lo77o ooso oothite.
ROM 12:18 Asa ubbaara saron daanaw hintew danda7etiya ubbaa oothite.
ROM 12:19 Ta ishato, hinte, hinte huuphen asas halo keyopite. Xoossay halo kessana mela iyaw aggaagite. Geeshsha Maxaafan, “Taani halo kessana; taani kushe zaarana” yaagees Goday, geetetidi xaafetis.
ROM 12:20 Shin Geeshsha Maxaafan, “Ne morkey koshatiko muza; I saamotiko ushsha. Neeni hessa oothiko iya huuphen yeella tama bonqo qolaasa” geetetidi xaafetis.
ROM 12:21 Iitaa lo77on xoonape attishin, iitan xoonetofa.
ROM 13:1 Xoossaa shene gidonashin maati imetonna gishonne ha77i de7iya shuumatika Xoossaa shenen shuumetida gisho asi ubbay deriya ayseysatas kiitetanaw bessees.
ROM 13:2 Hessa gisho, maatara de7eysatas kiitetonna ixiya oonika Xoossaa kiitaa ixees. Kiitetonna ixiya oonika ba bolla pirdaa ehees.
ROM 13:3 Ayseysati iita ootheysatape attishin, lo77o ootheyisata yashshokona. Ayseysatas yayyonna agganaw koyay? Yaako lo77o ootha; enti nena galatana.
ROM 13:4 Enti new lo77oba oothanaw shuumetida Xoossaa aylle. Shin neeni iitabaa oothiko, enti iitabaa oothidaysa seeriya gisho iyaw yayya. Enti iita ootheyisata seeridi, Xoossaa hanquwa qoncisiya Xoossaa aylle.
ROM 13:5 Hessa gisho, Xoossaa hanquwa xalaalas gidonashin, hinte kahay markatiya gisho deriya ayseysatas kiitetanaw bessees.
ROM 13:6 Hinte giira giireyka hessasa. Deriya ayseysati he oosuwa oothey, enti Xoossaa aylleta gidida gishosa.
ROM 13:7 Issuwas issuwas besseysa immite. Giira giiranaw besseysas giirite; qaraxa qanxanaw besseysas qaraxa qanxite; yayyanaw besseysas yayyite; bonchoy besseysa bonchite.
ROM 13:8 Issoy issuwara siiqetite. Siiqo acope attishin, hinte bolla hara acoy doopo. Ase siiqiya oonika higgey geysa polis.
ROM 13:9 “Laammofa; wodhopa; kaysotopa; amottofa” giya kiitaynne hara kiita ubbay, “Ase ne huupheda dosa” giya kiitan qashetis.
ROM 13:10 Ase siiqiya oonika iya bolla iitabaa oothenna. Hessa gisho, ase siiqeysi higge kiitaa polis.
ROM 13:11 Dhiskofe hinte barkiya wodey ha77i gideysa akeekidi hessa oothite. Nu attana wodey koyro nu ammanida wodiyape ha77i nuuko matis.
ROM 13:12 Dhuma wodey aadhanaw hanees; wontay matis. Hiza, nuuni dhuma ooso aggidi poo7o ola miishe oykoos.
ROM 13:13 Ane gallas poo7on de7iya asada maaran de7oos. Mathoninne laymatethara gahetiya dumma dumma tuna oosotan, palamaninne qanaaten gidopo.
ROM 13:14 Godaa Yesuus Kiristoosa kanduwa ma7ite; hinte nagarancho asatethay ba amuwa polana mela iyaw qopofite.
ROM 14:1 Ammanon daaburida oonaka shiishi ekitepe attishin, iya qofaa bolla pirdofite.
ROM 14:2 Leemisos, ammanon minnida issi asi ay kathika maanaw danda7ees. Shin ammanon daaburiya asi atakilte xalaala mees.
ROM 14:3 Ubbabaa miya asi moonna uraa kadhopo. Ubbabaa moonna asi miya uraa bolla pirdofo. Xoossay ubbaa miya uraa shiishi ekis.
ROM 14:4 Hara asa aylle bolla pirdey neeni oonee? I daaburin woyko minnin ba Godaasa. Goday iya essanaw danda7iya gisho I minnidi eqana.
ROM 14:5 Qassi “Issi gallasay hara gallasape aadhees” yaagidi qopiya asi de7ees. Haray qassi, “Gallasati ubbay issi mela” gidi qopees. Shin issoy issoy ba qofaa akeekidi qacho.
ROM 14:6 Issi gallasaa hara gallasatape aathidi bonchiya oonika Godaa bonchoos gidi oothees. Ubba kathi miya asi Godaa bonchoos gidi mees. I miya he kathaa gisho, Xoossaa galatees. Ubba kathi moonna asi Godaa bonchoos moonna aggees; qassi moonna agon Xoosse galatees.
ROM 14:7 Nuupe oonika baw deenna; qassi nu giddofe oonika baw hayqenna.
ROM 14:8 Nu de7on de7iko Godaas de7oos; qassi hayqikoka Godaas hayqoos. Hiza, nu de7on de7in woyko hayqin Godaasa.
ROM 14:9 Kiristoosi hayqidi hayqope dendiday, de7on de7eysatasinne hayqidaysatas Godaa gidanaasa.
ROM 14:10 Yaatin, neeni ne ishaa bolla ayis pirday? Woyko neeni ne ishaa ayis kadhay? Nuuni ubbay Xoossaa pirda araata sinthan eqana.
ROM 14:11 Geeshsha Maxaafan Goday, “Taani de7on de7ayis; asa ubbay ta sinthan gulbatana; taani Xoossaa gideysa markatana” yaagees.
ROM 14:12 Hiza, nu oothidabaas nu huuphen huuphen Xoossaa sinthan shiiqidi zaaro immana.
ROM 14:13 Hessa gisho, nuuni issoy issuwa bolla pirdeysa aggoos. Shin hinte ishaa dhubisidi woyko qaxidi nagaran gelsiyaba oothonnaada naagetite.
ROM 14:14 Godaa Yesuusa ammaniya asada, ba huuphen tuna gidida kathi baynaysa taani geeshshada erayis. Shin issi asi issiba tuna gidi qopiko hessi iyaw tuna gidees.
ROM 14:15 Ne miya katha gisho ne ishaa dhubiyaba gidiko, Kiristoosan de7iya ne ishaa siiqaka. Kiristoosi iya gisho hayqida uraa ne miya kathan iya ayyaana de7uwa dhaysofa.
ROM 14:16 Hiza, hintew de7iya la77atetha harati borana mela oothopite.
ROM 14:17 Xoossaa kawotethay Geeshsha Ayyaanay immiya xillotethi, sarotethinne tuma ufaysife attishin, muussabaanne ushshaba gidenna.
ROM 14:18 Hessada Kiristoosas oothiya asi Xoossaa ufaysees; asanka anjetees.
ROM 14:19 Hessa gisho, ane nuuni sarotethi bentiya ogiyanne issuwa issuwa ammanon minthiya ogiya koyoos.
ROM 14:20 Katha gisho gada Xoossaa oosuwa dhaysofa. Ubba kathi meetetees, shin hara asi nagaran dhubisiya kathi muussi iita.
ROM 14:21 Ne ishay dhubetonna mela asho moonna woyko ushshu uyonna woyko ne ishaa dhubiya haraba oothonna agoy lo77o.
ROM 14:22 Hiza, ha ne ammanuwa ne giddoninne ne Xoossaa giddon naaga. Like gidi qopidaba oothiya wode iya kahay mootonna uray anjetidaysa.
ROM 14:23 Shin sidhishe miya uraas iya muussay ammanon gidonna gisho pirdetees. Ammanoy bayna oosetida ooso ubbay nagara.
ROM 15:1 Nuuni ammanon minnidaysati daaburanchota toohuwa tookanaw bessees. Nuuni nuna ufaysanaw bessenna.
ROM 15:2 Nuuni nu ishaa ammanon minthanaw iya maaddanawunne ufaysanaw bessees.
ROM 15:3 Kiristoosi bana ufaysibeenna. Shin Geeshsha Maxaafan, “Asay nena cayida cashshay tana gakis” geetetidi xaafetidaysada hanis.
ROM 15:4 Geeshsha Maxaafay immiya gencaninne minthethuwan nu ufaysaa ekana mela Geeshsha Maxaafan xaafetida ubbay nuna tamaarsanaw xaafetis.
ROM 15:5 Gencanne minotethi immiya Goday hinte Kiristoos Yesuusa kaalliya wode issifetethi hintew immo.
ROM 15:6 Hessika, nu Godaa Yesuus Kiristoosa Aawa, Xoossaa, issi wozananinne issi qaalan hinte bonchana melasa.
ROM 15:7 Kiristoosi hintena ekidaysada Xoossaa bonchoos issoy issuwa ekite.
ROM 15:8 Xoossay beni aawatas immida ufaysay poletana melanne iya tumatethay eretana mela Kiristoosi Ayhudeta aylle gididi yidaysa ta hintew odayis.
ROM 15:9 Kiristoosi Ayhudeta aylle gidida hara gaasoy qassi Ayhude gidonna asati Xoossaa iya maarotethaa gisho galatana melasa. Geeshsha Maxaafan, “Ta nena Ayhude gidonna asaa giddon galatana; ne sunthaa sabbana” geetetidi xaafetidaysada hanis.
ROM 15:10 Qassi, “Ayhude gidonna asato, Xoossaa deriyara ufaytite” yaagetis.
ROM 15:11 Qassi zaaridi, “Ayhude gidonna asato, Godaa galatite; kawotetha ubbay iya sabbite” yaagetis.
ROM 15:12 Hessada Isayaasi, “Isseye kochaafe yeletiya issoy yaana; I kawotetha ubbaa haarana. Enti banta ufaysaa iya bolla wothana” yaagees.
ROM 15:13 Geeshsha Ayyaana wolqan hinte diccana mela ufaysi immiya Xoossay, hinte ammanuwa gaason hintew ufaysinne sarotethi kumethi immo.
ROM 15:14 Ta ishato, hintenan lo77otethinne eratethi kumidaysa qassi issoy issuwa zoranaw danda7eysa ta geeshshada erayis.
ROM 15:15 Taani hintena issi issiba guja akeekisanaw koyada yayyonna ha dabdaabiya hintew xaafas.
ROM 15:16 Taani Kiristoos Yesuusa aylle gidada, Ayhude gidonna asaas kahineda oothada, Wongela odana mela Xoossay taw aadho keehatetha immis. Ayhude gidonna asay Geeshsha Ayyaanan geeyidi, Xoossaa ufaysiya yarsho gidana mela Xoossay hessa oothis.
ROM 15:17 Taani Kiristoos Yesuusan gidada Xoossaas oothiya oosuwan ceeqetayis.
ROM 15:18 Ayhude gidonna asay Xoossaas kiitetanaada, Kiristoosi ta qaalanne ta oosuwa baggara oothida oosuwape attishin, hari ta ceeqetiyabay baawa.
ROM 15:19 Xoossay hessa malaataninne Geeshsha Ayyaana wolqan waati oothidaako ta hintew odana. Taani Yerusalaamepe doomada, Iliwarqoone gakanaw Kiristoosa Wongela sabbakas.
ROM 15:20 Taani hara asi baasida bessan keexanaw koyke. Kiristoosa sunthay xeegetiboona bessan Wongela odanaw amottayis.
ROM 15:21 Geeshsha Maxaafan, “Iyabay odetiboonna asati iya be7ana; iyabaa si7iboona asati akeekana” geetetidi xaafetis.
ROM 15:22 Hessa gaason, taani hinteko yaanaw danda7abike.
ROM 15:23 Shin taani ha77i ha heeran ta oosuwa ongida gishonne daro laythafe doomada hintena be7anaw laamotida gisho,
ROM 15:24 taani Ispeene bashe hintena be7anaw qopas. Qassi guutha wode hintera ufaytidaape guye, Ispeene biya wode hinte ta ogiyas tana maaddana mela koyayis.
ROM 15:25 Shin ha77i taani Xoossaa asata maaddanaw Yerusalaame bayis.
ROM 15:26 Maqedoonenne Akayan de7iya Xoossa asati, Yerusalaamen de7iya manqota miishen maaddanaw koyida gishosa.
ROM 15:27 Enti manqota maaddanaysi entaw attonnaba gidida gisho banta huuphen hessa oothanaw qofa qachidosona. Ayhudeti Ayhude gidonaysatara ayyaana anjuwa shaaketiko, enti qassi bantaw de7iyaban Ayhudeta maaddanaw bessees.
ROM 15:28 Hessa gisho, taani he shiiqida miishiya entaw immidaape guye, Ispeene bashe hinte matara aadhana.
ROM 15:29 Taani hinteko biya wode Kiristoosa anjuwan kumada baanaysa erayis.
ROM 15:30 Ta ishato, taw Xoossaa woossishe ta baaxiyan taara eqana mela Godaa Yesuus Kiristoosaninne Geeshsha Ayyaana siiquwan hintena woossayis.
ROM 15:31 Xoossay tana Yihudan de7iya ammanonna asatape ashshanaadanne Yerusalaamen ta oothana oosoy Xoossaa asata matan eketana mela taw woossite.
ROM 15:32 Qassi Xoossay giiko, taani hinteko bada ufaysan hintera shempana mela taw woossite.
ROM 15:33 Sarotethaa Xoossay hinte ubbaara gido. Amin7i.
ROM 16:1 Kinkire kataman de7iya woosa keethan oothiya nu michiya Feebena lo77o maccas gideysa hinte erana mela koyayis.
ROM 16:2 Hinte ammaniya asati Godaa sunthan mokanaw bessiya ammaniya asatape issuwada iyo mokite. Iya hintefe koyaba ubbaa iyo maaddite. Iya ba huuphen daro asaa maaddasu; qassi tana ta huuphenka daro maaddasu.
ROM 16:3 Kiristoos Yesuusa oosuwa taara issife oothiya Phirisqillanne Aqila saro giite.
ROM 16:4 Enti ta gisho banta shempuwa aathidi immidosona. Ta xalaala gidonashin, Ayhude gidonna asaa woosa keetha ubbay enta galatees.
ROM 16:5 Enta son shiiqiya ammaniya asaa saro giite. Iise biittan Kiristoosa koyro ammanida, ta dosiya Ephanexoosas ta sarothuwa odite.
ROM 16:6 Hinte gisho ooson daro daaburida Mayraamo saro giite.
ROM 16:7 Taara qasho keethan aathida ta Ayhude laggeta Andiraniqosanne Yuniyasa saro giite. Enti Yesuusa hawaareta giddon eretidaysata. Qassi enti Kiristoosa taape sinthe ammanidosona.
ROM 16:8 Godan ammaniya ta siiqo laggiya, Philiyaxoona saro giite.
ROM 16:9 Kiristoosa oosuwa nuura issife oothiya Urbaanosanne ta dosiya Istakuusa saro giite.
ROM 16:10 Kiristoosan ammanthiya aylliya Aphelisas ta sarothuwa odite. Arsxobuloosa soo asaas ta sarothuwa odite.
ROM 16:11 Ta Ayhude laggiya Herodiyoona saro giite. Narsisasinne iya soo asaape Kiristoosa ammanidaysata saro giite.
ROM 16:12 Godaa oosuwan daaburiya Tirufaynanne Tirufoosa saro giite. Qassi Godaas daro daaburada oothiya, ta dosiya Xarsido saro giite.
ROM 16:13 Godaa oosuwan daro eretida Rufoosasinne tana ba na7ada be7iya iya aayes ta sarothuwa odite.
ROM 16:14 Asqarixoonas, Afilesonphas, Hermeesas, Phaxrobaanas, Hermaasinne entara de7iya ammaniya ishata ubbaas ta sarothuwa odite.
ROM 16:15 Filologuusa, Yuula, Neera, iya michiw, Alinxoosanne entara de7iya ammaniya asa ubbaa saro giite.
ROM 16:16 Geeshsha yeeretethi yeeretishe, issoy issuwa sarothite. Kiristoosa woosa keetha ubbay hintena saro yaagosona.
ROM 16:17 Ta ishato, hinte tamaarida timirtiya ixidi, hinte giddon shaaketethinne meto medhiya asatape naagetite. Entafe haakite.
ROM 16:18 Hessa mela asati bantaw oothosonape attishin, nu Godaa Kiristoosas oothokona. Banta mal7iya doonaninne saphothiya qaalan ayko eronna asaa wozanaa balethoosona.
ROM 16:19 Wongelas hinte kiitetidaysa asa ubbay si7idaysi tana ufaysees. Shin hinte lo77oba erana melanne iitabaape haakana mela ta koyayis.
ROM 16:20 Sarotethaa Xoossay Xalahiya hinte tohuwape garsan gaaci yeggana. Nu Godaa Yesuus Kiristoosa aadho keehatethay hintera gido.
ROM 16:21 Taara oothiya Ximotiyoosi hintena saro yaagees. Hessadaka, ta dabboti Luqiyoosi, Yaasoninne Sosiphaxroosi hintena saro yaagosona.
ROM 16:22 Taani, ha dabdaabiya xaafida, Xarxiyoosi, hintena Godaa sunthan saro yaagayis.
ROM 16:23 Tana mokidaynne woosa keetha ubbay iya son shiiqiya Gaayoosi, hintena saro yaagees. Katamaa miishiya oykiya Erasxoosinne nu ishaa Qarxoosi hintena saro yaagosona.
ROM 16:24 [Nu Godaa Yesuus Kiristoosa aadho keehatethay hinte ubbaara gido. Amin7i.]
ROM 16:25 Galatay Xoossaas gido. Taani, Yesuus Kiristoosaba odiya Wongela qaalanne daro wodepe qosetidi gam7ida tumatethan, Xoossay hintena ammanon minthidi essanaw danda7ees.
ROM 16:26 Shin ha77i he tumay qoncis. Kawotetha ubbay ammanidi kiitetana mela merinaa Xoossaa kiitan nabeti he tumabaa xaafidosona.
ROM 16:27 Yesuus Kiristoosa baggara cincatethi iya xalaalas de7iya, issi Xoossaas merinaw bonchoy gido. Amin7i.
1CO 1:1 Xoossaa sheniyan Yesuus Kiristoosa hawaare gidanaw xeegetida Phawuloosinne, nu isha Sosteneesi,
1CO 1:2 Qorontoosan de7iya Xoossa woosa keethaas, Yesuus Kiristoosan geeydaysatasinne geeshshi gidana mela xeegetidaysatas; qassi entawunne nuus Godaa gidiya nu Godaa Yesuus Kiristoosa suntha ubba bessan xeegiya ubbaas.
1CO 1:3 Xoossay, nu Aawaynne Goday Yesuus Kiristoosi hintew aadho keehatethaanne sarotethaa immo.
1CO 1:4 Xoossay Kiristoos Yesuusa baggara hintew immida aadho keehatetha gisho, taani ubba wode Xoossaa galatayis.
1CO 1:5 Iyan odaninne eratetha ubban hinte duretideta.
1CO 1:6 Taani Kiristoosaba markatidaysi tuma gideysa hessi qoncisees.
1CO 1:7 Hessa gisho, hinte nu Godaa Yesuus Kiristoosa yuussaa naagishe de7ishin, ay ayyaana imoyka hintew pacenna.
1CO 1:8 Nu Godaa Yesuus Kiristoosi simmiya wode hinte boretonayisata gidana mela wursethi gakanaw I hintena minthana.
1CO 1:9 Ba Na7a, nu Godaa, Yesuus Kiristoosara issifetethi daana mela hintena xeegida Xoossay ammanetidaysa.
1CO 1:10 Ta ishato, hinte giddon shaaketethi doonna melanne hinte issi wozananinne issi qofan isso gididi daana mela, nu Godaa Yesuus Kiristoosa sunthan hintena woossayis.
1CO 1:11 Ta ishato, Qelo7e soo asay hinte giddon ooshshi de7eysa taw odidosona.
1CO 1:12 Ta hintew odeysi haysa: hintefe issoti issoti, “Taani Phawuloosasa; taani Aphiloosasa; taani Phexroosassa; taani Kiristoosassa” yaageeta.
1CO 1:13 Kiristoosi shaaketideyee? Hinte gisho, masqaliya bolla kaqetiday Phawulooseyee? Woyko hinte Phawuloosa sunthan xammaqetidetiyee?
1CO 1:14 Taani Qarisphoosinne Gaayoosi attishin, hintefe oonaka xammaqaboonna gisho, Xoosse galatayis.
1CO 1:15 Hessa gisho, oonika hintena ta sunthan xammaqetideta gaanaw danda7enna.
1CO 1:16 [Qassi Isxifaanose soo asaaka ta xammaqidaysa akeekayis, shin hara oona xammaqidaako hassayike.]
1CO 1:17 Kiristoosi tana kiittiday wongela odana melasafe attishin, xammaqana mela gidenna. Kiristoosi masqaley hada gidonna mela taani asa cincatetha qaalan odike.
1CO 1:18 Kiristoosa masqala qaalay dhayeysatas eeyatethi, shin nuus atteysatas Xoossa wolqa.
1CO 1:19 Geeshsha Maxaafan, “Taani cincata cincatethaa dhaysana; akeekanchota akeeka balethana” yaagees.
1CO 1:20 Yaatin, cinci awun de7ii? Higge astamaarey awunee? Woyko ha sa7a eranchoy awun de7ii? Xoossay ha sa7aa cincatetha eeyatethi oothibeennee?
1CO 1:21 Ha sa7aa asay banta cincatethan Xoossa eronna mela ba cincatethan diggidi, eeyatethan taybetiya, nuuni odiya qaalan ammaneyisata ashshanaw Xoossa shene gidis.
1CO 1:22 Ayhudeti malaata be7anaw koyoosona; qassi Giriketi cincatethi koyoosona.
1CO 1:23 Shin nuuni masqale bolla kaqetida Kiristoosa sabbakoos. Hessi Ayhudetas dhube; qassi Giriketas eeyatethi gidis.
1CO 1:24 Shin Xoossay xeegidaysatas, Ayhude gidin, Girike gidin Kiristoosi Xoossa wolqaanne iya cincatethaa.
1CO 1:25 Xoossa eeyatethi asa cincatethafe aadhees; qassi Xoossa daaburay asa minotethafe minnees.
1CO 1:26 Hiza, ta ishato, Xoossay hintena xeegiya wode hinte ay mela aseeko qopite. Asa qofan, hinte giddofe daroti cinca, wolqaamanne dhoqa koche gideketa.
1CO 1:27 Shin Xoossay cincata yeellayanaw alamen de7iya eeyata dooris; qassi minota yeellayanaw alamen de7iya daaburanchota dooris.
1CO 1:28 Ha alamiyan gita geetetidaba dhaysanaw, Xoossi, ha sa7aa kawushaba, kadhetidabanne pathonaba dooris.
1CO 1:29 Xoossa sinthan oonika ceeqetonna mela hessa oothis.
1CO 1:30 Shin, hintew Kiristoos Yesuusara issifetethi daana mela Xoossay hessa oothis. I, nuus Xoossafe cincatethi, xillotethi, geeshshatethinne atotethi gidis.
1CO 1:31 Hessa gisho, Geeshsha Maxaafan, “Ceeqetiya oonika Godan ceeqo” yaagees.
1CO 2:1 Ta ishato, taani koyro Xoossa qaala hintew odashe yida wode, doona bilatethaninne cincatethan yabiike.
1CO 2:2 Taani hintera de7iya wode masqaliya bolla kaqetida Yesuus Kiristoosape attishin, haraba eranaw koyke gada qofa qachas.
1CO 2:3 Ta hintera de7iya wode daaburan, yashshaninne daro kokorsan de7as.
1CO 2:4 Ta kiitaynne ta timirtey doona bilatethaninne cincatethan gidonashin, Geeshsha Ayyaana wolqa qoncisethaana.
1CO 2:5 Hessika, hinte ammanoy Xoossaa wolqaanape attishin, asa cincatethan zemponna melasa.
1CO 2:6 Ayyaana de7on diccidaysatas nuuni cincatetha qaalan odoos. Shin he cincatethay, ha sa7a cincatethi woyko dhayanaw de7iya ha sa7a haareyisata cincatethi gidenna.
1CO 2:7 Shin nuuni odiya cincetethay, daro wodepe sinthe Xoossay nu bonchuwas giigisidaysanne geemmidi de7iya xuura cincatethi.
1CO 2:8 Ha sa7aa haareysatape oonika ha cincatetha eribookona. Enti eridaba gidiyako, boncho Godaa masqaliya bolla kaqokona.
1CO 2:9 Shin Geeshsha Maxaafan, “Ayfey be7iboonaba, haythi si7iboonaba, wozani qopiboonnaba, Xoossay bana doseysatas giigisis” yaagees.
1CO 2:10 Xoossay ba xuura ba Ayyaana baggara nuus qoncisis. Geeshsha Ayyaanay hari attoshin, geemmida Xoossa xuura ubba pilgees.
1CO 2:11 Asan de7iya asa ayyaanape attishin, asaba oonika erenna. Hessadaka, Xoossaba, Xoossa Ayyaanape attishin, oonika erenna.
1CO 2:12 Xoossay nuus coo immidaba nu erana mela Xoossa Ayyaana ekidaape attishin, ha sa7a ayyaana ekibooko.
1CO 2:13 Nuuni ayyaanaba, ayyaana asatas asa cincatethan gidonashin, Xoossa Ayyaanay immiya cincatethan tamaarsoos.
1CO 2:14 Geeshsha Ayyaani bayna asi Xoossa Ayyaana imotata ekenna. Hessi iyaw eeyatethi; ubbay Geeshsha Ayyaanan pilgetiya gisho, I eranaw danda7enna.
1CO 2:15 Geeshsha Ayyaani de7iya asi ubbaba pilgees, shin iya oonika pilgenna.
1CO 2:16 Geeshsha Maxaafan, “Godaa wozana erey oonee? Iya zoranaw danda7ey oonee?” geetetidi xaafetidaysa mela. Shin nuus Kiristoosa wozani de7ees.
1CO 3:1 Ta ishato, hinte Kiristoosan buroo yooganne ammanonna asatho de7iya gisho, taani ayyaanaba hintew odanaw danda7abike.
1CO 3:2 Hinte mino kathi maanaw danda7iboona gisho, taani hintena maathi paahas; ha77ika danda7ibeeketa.
1CO 3:3 Ha77ika hinte ammanonna asada de7eeta. Hinte giddon de7iya qanaateynne ooshshi hinte ammanonna asada de7eysa erisennee? Hinte ammanonna asada haneeta.
1CO 3:4 Hintefe issoy, “Taani Phawuloosasa” haray qassi, “Taani Aphiloosasa” giiko, ammanonna asa mela gideketii?
1CO 3:5 Yaatin, Aphiloosi oonee? Phawuloosi oonee? Nuuni hintena ammanthida Xoossaa oosanchota. Xoossay issuwas issuwas immida imota mela oothiya oosanchota gidokonaayee?
1CO 3:6 Taani tokas; Aphiloosi haathe ushshis, shin dichey Xoosse.
1CO 3:7 Hessa gisho, dichiya Xoossafe attishin, tokeyka haathe ushsheyka aykoka gidenna.
1CO 3:8 Tokeynne haathe ushshey woli mela, shin issoy issoy ba oosuwa mela Xoossay immiya woytuwa ekana.
1CO 3:9 Nuuni issife Xoossas oothiya iya oosanchota gidiya gisho, hinte Xoossa shooqa; Xoossa keethi.
1CO 3:10 Xoossay taw immida aadho keehatetha mela hiillancho anaaxeda baaso yeggas. Hara asi iya bolla keexees. Shin iya bolla keexiya oonika waatidi keexiyako, baw naageto.
1CO 3:11 Issi toho yegetida baasope hara baaso yegganaw oonika danda7enna. He baasoyka Yesuus Kiristoosa.
1CO 3:12 Shin ha baasuwa bolla oonika worqan woyko biran gidin, al7o shuchan woyko mithan gidin, maatan woyko maqan keexiko,
1CO 3:13 issi issi asi he baasuwa bolla aybin keexidako pirda gallas taman paacetidi qoncana.
1CO 3:14 Oonika he baasuwa bolla keexida keethay taman xuugetonna attiko, ba woytuwa ekana.
1CO 3:15 Shin oodde oosoyka taman xuugetiko, he uraas woytoy baawa. Gidoshin, I ba huuphen tamape kessi ekida asada attana.
1CO 3:16 Hinte Xoossa keethi gideysanne Xoossa Ayyaani hintenan de7eysa ereketii?
1CO 3:17 Oonika Xoossaa keethi laalliko, Xoossi iya laallana. Xoossa keethi geeshshi; he keethayka hintena.
1CO 3:18 Oonika bana cimmofo. Ha sa7aa cincatethan bana cinca oothidi ekiya oonika Xoossaa sinthan cinca gidanaw eeya gido.
1CO 3:19 Ha sa7a cincatethay Xoossa sinthan eeyatethi. Geeshsha Maxaafan, “Xoossay cincata enta gene qofan oykees” yaagees.
1CO 3:20 Qassi, “Cincata qofay maaddonnaba gideysa Goday erees” yaagees.
1CO 3:21 Hessa gisho, ubbay hintebaa gidiya gisho, oonika asan ceeqetofo.
1CO 3:22 Phawuloosi, Aphiloosinne Phexroosi, ha alamey, de7oy, hayqoy, ha77i de7ey, sinthafe yaanaysi, ubbay hintesa.
1CO 3:23 Hinte Kiristoosassa; Kiristoosi Xoossasa.
1CO 4:1 Asay nuna Kiristoosa aylledanne Xoossa xuura qoncisanaw hadari imetida asada oothidi qopo.
1CO 4:2 Hadara ekida asati banta Godaas ammanetidaysata gidanaw bessees.
1CO 4:3 Shin hinte woyko hari tana pirdiko, taw aykoka gidenna. Hari attoshin, taka ta bolla pirdike.
1CO 4:4 Ta kahay geeshshi, shin hessi taani polo xillo gideysa bessenna. Ta bolla pirdanay Godaa xalaala.
1CO 4:5 Hessa gisho, wodey gakonna, Goday yoonna oodde bollaka pirdofite. I dhuman geemmidaba poo7on kessenna; asa wozanan qosetida qofa qoncisana. He wode, issoy issoy Xoossafe galataa ekana.
1CO 4:6 Ta ishato, hinte gisho, tananne Aphiloosa, hintew leemiso oothada odas. Hessa ta oothiday, “Xaafetidaysafe aadhofa” giya zoriya hinte nuupe tamaarana melasa. Hessa gisho, oonika issuwa sabidi hankuwa kadhanaw bessenna.
1CO 4:7 Ne haratape aybin aadhay? Neeni ekaboonabay aybi de7ii? Neeni ekidaba hara asape ekida gidiko, yaatin, ekiboonna asada ayis ceeqetay?
1CO 4:8 Ha77i hinte kallideta. Ha77i hinte duretideta. Nuuni bayna hinte xalaala kawotideta. Hinte tuma kawotidaba gidiyako, nuka hintera kawotanashin.
1CO 4:9 Taw, Xoossay nuna hawaareta, hayqos pirdetida asada, asa ubbaafe nuna guye aathida daanees. Nuuni ha alamiyas, kiitanchotasinne asaas kaassaba gidida.
1CO 4:10 Nuuni Kiristoosa gisho eeya gidida, shin hinte Kiristoosan cincata gidideta. Nuuni daaburancho, shin hinte mino gidideta. Hinte bonchetideta, shin nuuni tooshetida.
1CO 4:11 Ha77i gakanaw nu koshatoos, saamotoos, kallotoos, wadhetoos; daana soo dhaydi toylatoos.
1CO 4:12 Nuuni nu kushen oothidi aqoos. Nuna asi baaddiya wode anjoos; nuna goodiya wode danda7oos.
1CO 4:13 Nu bolla iitabaa odetiya wode lo77o qaala zaaros. Nu ha77i gakanaw ha alamiya pitonne wora yegetiya buure gidida.
1CO 4:14 Taani hessa xaafiday, ta dosiya naytada, hintena zoranaw xaafasipe attishin, yeellayanaw gidenna.
1CO 4:15 Kiristoosan hintena dichiya taybope bolla gidida kaaletheysati de7ikoka, hintew daro aawati dookona. Ta hintena Kiristoos Yesuusa wongelan yelas.
1CO 4:16 Hiza, hinte tana leemiso oothidi kaallana mela hintena woossayis.
1CO 4:17 Hessa gisho, ammanetida, ta dosiya, Godan ta na7a, Ximotiyoosa hinteko kiittayis. I dumma dumma bessan de7iya woosa keethan taani tamaarsida, Kiristoosa Yesuusan de7iya, ta ogiya hintena hassayisana.
1CO 4:18 Taani hinteko yoonnaba daanin, otortiya issi issi asati de7oosona.
1CO 4:19 Shin Goday giiko, mata wode taani hinteko baana. He wode otoranchota haasaya xalaala gidonashin, enta wolqaaka erana.
1CO 4:20 Xoossaa kawotethay oda gidonashin, wolqa.
1CO 4:21 Taani hinteko xam7ara booye woyko siiqoranne ashke ayyaanara boo? Awusa dooretii?
1CO 5:1 Hinte giddon laymatethi de7eysi zigiretees. Hessa mela laymatethi hari attoshin, ammanonna asayka oothokona. Hinte giddon ba aawa machera tunida asi de7ees.
1CO 5:2 Hinte hessan qiirotanawunne yeellatanaw bessenne, shin otortideta. Hessa mela borsoba oothida ura hinte giddofe kessanaw bessennee?
1CO 5:3 Taani ashon hintera doona ixikoka ayyaanan ta hintera de7ayis. Taani hintera de7iya asada hanada hessa mela oosuwa oothida ura bolla pirdas.
1CO 5:4 Nu Godaa Yesuus Kiristoosa sunthan hinte shiiqiya wode taani ayyaanan hintera daana. Hessan Godaa Yesuus Kiristoosa wolqay hintera gidana.
1CO 5:5 He ura nagara ashoy dhaydi, iya ayyaanay Godaa Yesuusa pirda gallasan attana mela I, Xalahes aadhidi imeto.
1CO 5:6 Hinte ceeqoy lo77o gidenna. Guutha irshoy munuqa ubba dentheysa ereketiyee?
1CO 5:7 Hinte ha77i irshoy bayna munuqa gidana mela, hintefe nagara irsho kessite. Nuus Paasika dorse gidida Kiristoosi yarshetis.
1CO 5:8 Hessi gisho, geneynne iitatethi de7iya irshora gidonashin, tumatethinne geeshshatethi de7iya uythara nu baaliya bonchoos.
1CO 5:9 Ta kase xaafida dabdaabiyan hinte laymatiya asara gahetonna mela hintew odas.
1CO 5:10 Hessa guussay ha alamiyan de7iya laymateysatara woyko uuzetara woyko kaysotara woyko eeqa goyinneysatara polo gahetofite guussu gidenna. Hessa gidiko, ha alamiyape hinte keyanaw bessees shin attis.
1CO 5:11 Shin ammanayis yaagishe laymateysatara woyko uuzetara woyko eeqa goyinneysatara woyko cayeysatara woyko mathoteysatara woyko kaysotara gahetofite gada hintew odayis. Hessa mela asara hari attoshin, kathika moopite.
1CO 5:12 Woosa keethafe karera de7eyisata bolla pirdanaw tana aybe gathey? Woosa keethan de7eyisata bolla hinte pirdeketiyee?
1CO 5:13 Shin karera de7eyisata bolla Xoossay pirdana. He iitaba oothiya ura hinte giddofe kessite.
1CO 6:1 Hinte giddofe issoy issuwara mootoy de7iko, hessa ammaniya asaa sinthan pirdetanaysa aggidi, ammanonna asa sinthan pirdetanaw waanidi bii?
1CO 6:2 Ammaniya asay alame bolla pirdanaysa hinte ereketii? Yaatin, hinte alame bolla pirdiyaba gidiko, haysa mela guuthaba pirdanaw waanidi danda7eketii?
1CO 6:3 Nuuni kiitanchota bolla pirdanaysa ereketii? Yaatin, ha sa7a duussaba bolla pirdanaysi hintena waanidi xoonii?
1CO 6:4 Yaatin, hessa mela metoy hinte giddon medhetiko, woosa keetha ayfen kadhetida asa sinthan pirdetanaw waatidi efeetii?
1CO 6:5 Taani hintena yeellayanaw hessa gayis. Hinte giddon kacetida ishata sigethanaw danda7iya akeeka asi baawee?
1CO 6:6 Yaatin, issi ammaniya ishay hanko ammaniya isha pirda keethan ammanonna asaa sinthan mootanaw bessii?
1CO 6:7 Hiza, hinte issoy issuwa mootiyaba gidiko hessi hinte kundethaa bessees. Hessafe hinte qohetiko keehennee? Hinte cimetiko lo77ennee?
1CO 6:8 Shin hinte woli giddon ammaneysati, issoy issuwa qohetanne cimmeeta.
1CO 6:9 Geellati Xoossa kawotethi laattonaysa hinte ereketii? Hintena cimmofite; laymateysati woyko eeqa goyinneysati woyko laammeysati woyko addera addera gaheteysati,
1CO 6:10 woyko kaysoti woyko uuzeti woyko mathoteysati woyko cayeysati woyko bonqeysati Xoossa kawotethi laattokona.
1CO 6:11 Hintefe issi issi asati kase hessa mela. Shin ha77i, hinte Godaa Yesuus Kiristoosa sunthaninne Xoossaa Ayyaanan meecetideta; geeydeta; xillideta.
1CO 6:12 Hinte, “Nu koydaba oothanaw danda7oos” yaageeta. Shin ubbay maaddenna. “Taani koydaba ubba oothanaw danda7ayis” yaageeta. Shin aybika tana haarenna.
1CO 6:13 Hinte, “Kathi ulosa; uloyka kathasa” yaageeta. Shin Xoossi uloka kathika dhaysanaysa ta hintew odayis. Nu asatethay Godasafe attishin, laymatethas gidenna. Godayka nu asatethasa.
1CO 6:14 Xoossay Godaa hayqope denthidaysada, nunaka hayqope ba wolqan denthana.
1CO 6:15 Hinte asatethay Kiristoosa asatethafe issi bagga gideysa ereketii? Yaatin, taani Kiristoosa asatethafe issi bagga efada laymatetha asatethi gidana mela ootho? Hanenna!
1CO 6:16 Laymatiya addey, I gahetiya maccaseera issi asatethi gideysa ereketii? Geeshsha Maxaafan, “Enti nam7ay issi asatethi gidana” geetetidi xaafetis.
1CO 6:17 Shin Godaara issifiya asi iyara ayyaanan issino gidees.
1CO 6:18 Laymatethafe haakite. Issi asi oothiya hara nagari iya asatethafe karera oosetees, shin laymatiya asi ba asatethaa bolla nagara oothees.
1CO 6:19 Hinte asatethay, Xoossay hintew immida hintenan de7iya Geeshsha Ayyaana keethi gideysa ereketii? Hinte hintebaa gideketa.
1CO 6:20 Xoossay hintena gaten shammis. Hessa gisho, hinte asatethan Xoosse bonchite.
1CO 7:1 Hinte taw xaafida dabdaabiyas zaaroy haysa. Issi asi maccas bochonna aggiko lo77o.
1CO 7:2 Shin laymatethafe attanaw issi issi addey macho eko; qassi issi issi maccasas azini de7o.
1CO 7:3 Azinay ba machees, qassi machiya ba azinaas bessiyaba kuntho.
1CO 7:4 Machees ba asatethaa bolla maati baawa, shin maati I azinasa. Hessadaka, azinas ba asatethaa bolla maati baawa, shin maati machesa.
1CO 7:5 Hinte woosan guutha wode gam7anaw zoretethan gidonna ixiko, issoy issuwa diggofite. Hessa gaason hintenatethaa haaranaw xoonetin, Xalahey hintena paaconna mela issife de7ite.
1CO 7:6 Shin taani hintena zoranaw haysa gaysipe attishin, kiita gidenna.
1CO 7:7 Asi ubbay taada macho ekonna de7iyako dosayis, shin Xoossi issuwas issuwas immida dumma imoti de7ees. Issuwas haysa mela hankuwas hessa mela imoti de7ees.
1CO 7:8 Macho ekiboonaysatasinne azina geliboonnaysatas qassi am7etas taani odey, taada de7ite gada zorayis.
1CO 7:9 Shin amon xuugeteysafe ekeysinne geleysi lo77o gidiya gisho, enti bantana haaranaw danda7onna ixiko, ekonne gelo.
1CO 7:10 Taani ekidaysatanne gelidaysata haysada gada zorayis; tana gidike Goday kiittees; machiya ba azinaape shaaketofo.
1CO 7:11 Shin shaaketiko hara azina gelonna barka de7o woyko ba azinara sigeto. Azini ba machiw billofo.
1CO 7:12 Shin haratas Godaa gidonashin, taani haysada gayis. Ammanonna macha de7iya ammaniya azini de7iko, iya machiya iyara issife daanaw koyko iyo billofo.
1CO 7:13 Qassi ammanonna azini de7iya ammaniya macha de7iko, I azinay iira issife daanaw koyko iyape biletofo.
1CO 7:14 Ammanonna azini ba ammaniya mache baggara xillees; qassi ammanonna machiya ba ammaniya azina baggara xillawusu. Hessi bayneko, hinte nayti tuna gidoosona, shin ha77i enti geeshshi.
1CO 7:15 Shin ammanonna azinay woyko machiya billanaw koyko billo. Ammaniya machiya woyko azinay hessa melaban qashetokona. Xoossi nuna sarotethan daana mela xeegis.
1CO 7:16 Neno, ammaniya machete, neeni ammanonna ne azina ashshaneko ay eray? Woyko ammaniya azinaw, neeni ammanonna ne machiw ashshaneko ay eray?
1CO 7:17 Issi issi asi Goday iyaw immida imotadanne Xoossay iya xeegidaysada de7o. Woosa keetha ubban taani tamaarsiya wogay haysa.
1CO 7:18 Oonika qaxaretidi xeegetidaba gidiko, qaxaretonada hanopo. Qaxaretonna xeegetida oonika de7iko, qaxaretanaw koyopo.
1CO 7:19 Xoossa kiitaa polanaw besseesipe attishin, qaxaretin qaxaretonna aggin aykoka maaddenna.
1CO 7:20 Issi issi asi Xoossay bana xeegiya wode de7eysada de7o.
1CO 7:21 Xoossay nena xeegiya wode neeni ayllee? Aykoy baawa hessas un7etofa. Shin neeni aylletethafe la77a keyanaw danda7iko la77a keya.
1CO 7:22 Aylle gididi de7ishe Godan xeegetida asi Godan aylletethafe la77a keyis. Hessadaka, aylle gidonna de7ishe, Godan xeegetida asi Kiristoosa aylle.
1CO 7:23 Xoossay hintena gaten shammida gisho asa aylle gidopite.
1CO 7:24 Ta ishato, hinte issoy issoy xeegetiya wode de7iya de7uwan Xoossara issife de7ite.
1CO 7:25 Geela7otaba Goday tana kiittidabay baawa. Shin Goday taw immida maarotetha mela taani hintena zorayis.
1CO 7:26 Hiza, ha77i metuwa gisho, ekonna woyko gelonna duussi taw lo77o daanees.
1CO 7:27 Ne macho ekidaba gidiko, shaaketanaw koyopa. Neeni macho ekaboonaba gidiko, ekanaw koyopa.
1CO 7:28 Shin ne macho ekiko nagari baawa. Hessada geela7iya azina geliko nagari baawa. Shin ekiya geliya asaas ha sa7an daro metoy de7iya gisho hinte hessafe attana mela taani koyayis.
1CO 7:29 Ta ishato, ta gey hessa; wodey wuris. Hizape guye macha de7ey macho ekonnaada de7o.
1CO 7:30 Yeekeysati yeekonaada, ufayteysati ufaytonnaada, shammeysati aykoyka baynaada bantana taybo.
1CO 7:31 Ha sa7aa shalon maadeteysati maadetiboonada hano. Ha alamiya malay aadhana.
1CO 7:32 Hinte hirgi bayna daana mela ta dosayis. Macho ekiboonaysi Godaa ufaysanaw koya gisho, Godaaba qopees.
1CO 7:33 Shin macho ekidaysi ba machiw ufaysanaw koya gisho, ha sa7aba qopees.
1CO 7:34 Iya qofay nam7an shaaketees. Azina gelaboonna geela7iya ba asatethaninne ba shempuwan geeyada Godaa ufaysanaw koya gisho, Godaaba qopawusu. Shin azina gelidaara ba azina ufaysanaw koya gisho, sa7aba qopawusu.
1CO 7:35 Taani hessa hintew odey, hinte maadetana melasafe attishin, hintena un7ethanaw gidenna. Shin hinte qofay shaaketonna maaran de7idi Godaa ufaysiyaba hinte oothana mela taani odayis.
1CO 7:36 Oonika ba oychida geela7es gelo wodey aadhis gidi iyo agganaw qopiko, hessi qassi iw lo77o gidonnaysi iyaw si7etiko, ba koydaysa ootho; enti eketo, geleto; hessan nagari baawa.
1CO 7:37 Shin issi asi un7ethiyabay dhayin, ba wozanan minnidi, bana haaridi, ba oychida geela7iw ekenaw agganaw koyko loythis.
1CO 7:38 Hessa gisho, geela7iw ekiya uray lo77o oothis; qassi ekonna uray daro lo77o oothis.
1CO 7:39 Machiya ba azinay paxa de7iya wode ubban iyara qashetasu. Shin I azinay hayqiko, ba dosida azina gelanaw danda7awusu. Gidoshin, iya geliya addey ammaniya asi gidanaw bessees.
1CO 7:40 Ta qofan gidiko, iya gelonna de7iko ufaysan daana. Qassi taw, ta bolla Xoossa Ayyaani de7iya daanees.
1CO 8:1 Eeqas yarshetiya kathaba gidiko nu ubbay eroos. Eratethi otorsees, shin siiqoy dichees.
1CO 8:2 Oonika bana erayis gidi qopiko, I buroo eranaw besseysa eribeenna.
1CO 8:3 Shin oonika Xoosse siiqiko, I Xoossa matan eretidaysa.
1CO 8:4 Hessa gisho, eeqas yarshetida kathi muussaba gidiko, ha alamiyan Godi issi Xoossafe attishin, hari bayna gisho, eeqi pathonnaba gideysa nuuni eroos.
1CO 8:5 Xoosse gidonashin, saloninne sa7an xoosse geetetidi xeegetiya daro xoossatinne godati de7ikoka,
1CO 8:6 ubbaba medhida, nu iyabaa gidida, issi Xoossi, Aawi, nuus de7ees. Ubbay iya baggara medhetida, nuka iya baggara de7o demmida issi Goday, Yesuus Kiristoosi nuus de7ees.
1CO 8:7 Shin ha erey ubba matan deenna. Issi issi asay eeqa goyinnora meezetida gisho, kathi miya wode eeqas yarshetidaba oothidi ekoosona. He wode enta kahay daabura gidiya gisho tunees.
1CO 8:8 Shin kathi nuna Xoossara daboyenna. Nu moonna aggidi aykoka qohetoko; qassi midi dumma go7etoko.
1CO 8:9 Shin hinte koydaba maanaw maati hintew de7ikoka hessi ammanon minnonna asata dhubonna mela naagetite.
1CO 8:10 Neeni nena erancho gada eeqas yarshetida kathi maanaw eeqa keethan uttidashin, ammanon minnonna asi nena be7iko, hessi eeqas yarshetida kathi I maana mela denthetheneyee?
1CO 8:11 Hiza, ne eratetha gaason Kiristoosi iya gisho hayqida, ammanon minnonna ne ishay dhayis.
1CO 8:12 Hessada oothidi, ammanon minnonna hinte ishata qohishenne enta kaha madunxisishe Kiristoosa qoheeta.
1CO 8:13 Hessa gisho, kathi ta isha dhubiyaba gidiko, I dhubetonna mela ubbaraka asho miike.
1CO 9:1 Taani yeda de7iya asi gidikina? Ta hawaare gidikina? Taani nu Godaa Yesuus Kiristoosa be7abikina? Hinte Godan ta daabura ayfe gideketii?
1CO 9:2 Hinte Godaaba gidiya gisho, ta haratas hawaare gidonna ixikoka, hintew hawaare gideysas hinte marka.
1CO 9:3 Tana hawaare gidenna geysatas taani immiya zaaroy haysa.
1CO 9:4 Nu hintefe maanawunne uyanaw tuma nuus maati baawee?
1CO 9:5 Hanko hawaaretada, Godaa ishatadanne Phexroosada, ammaniya nu macheta ekidi hemetanaw nuus maati baawee?
1CO 9:6 Woyko oothidi aqanaw bessey taaranne Barnabaasa xalaalee?
1CO 9:7 Ba miishen wotaadaretathi oothey oonee? Woyko woyne tokidi, iyape ayfe moonnay oonee? Woyko wude heemmishe, he wudiyape maathi uyonnay oonee?
1CO 9:8 Taani hessa asa qofatho gaynayee? Muse higgey hessa geeneyee?
1CO 9:9 Muse Higgiyan, “Wuduman kathi yedhiya boora doona qachofa” geetetidi xaafetis. Yaatin Xoossay hessa booras qopidi odidee?
1CO 9:10 Xoossay hessa giday nuus qopidi gidennee? Ee, nu gishosa. Biitta goyeysinne katha geeshsheysi bana gakeysa ekana gidi ufaysan oothanaw bessees geetetidi tuma nu gisho xaafetis.
1CO 9:11 Nuuni hinte giddon ayyaana zerethi zerida gidiko, ashos koshshiyaba nu hintefe ekiko, hessi gitabayee?
1CO 9:12 Harati hessa hintefe ekanaw entaw maati de7iko, nuus entafe aadhiya maati deennee? Shin nuuni Kiristoosa wongelas dhube gidonna mela, ubbaba gencosipe attishin, he maatan go7etibooko.
1CO 9:13 Xoossa keethan oothiya asati banta katha xoossa keethafe ekeysa ereketii? Qassi yarsho bessan oothiya asati yarshuwafe ekeysa ereketii?
1CO 9:14 Hessadaka, wongela markateysati duussas koshshiyaba wongelape ekana mela Goday kiittis.
1CO 9:15 Shin taani ha maata ubban aykoka go7etabike. Taani hessa xaafiday ta maata bonchisanaw koyada gidenna. Oonika ta ceequwa hada oothanaape hayqoy taw lo77o.
1CO 9:16 Taani wongela odey kiitetida gishosafe attishin, tana ceeqisiyaba gidenna. Wongela odonna ixiko, tana ayye!
1CO 9:17 Taani wongela dosada odiko, taw woytoy de7ees. Shin taani wongela dosonna odiyaba gidiko, hessa Xoossi taw hadara immis.
1CO 9:18 Yaatin, ta woytoy aybee? Taani wongela odiya wode ta maatan go7etonna, wongela gatey bayna odeysi taw woyto.
1CO 9:19 Taani oodeska aylle gidike, shin darota maaddanaw ubbaas aylle gidas.
1CO 9:20 Taani Ayhudeta maaddanaw entara enta gidas. Ta huuphen higgefe garsan de7ike, shin higgefe garsan de7eyisata maaddanaw higgefe garsan de7iya asi gidas.
1CO 9:21 Xoossa higgiyafe kare keyonna, Kiristoosa higgiyas kiitetashe, higgey baynayisata maaddanaw higgey bayna asada hanas.
1CO 9:22 Taani daaburanchota maaddanaw daaburancho gidas. Taani issota issota maaddanaw ubbaara ubbaba hanas.
1CO 9:23 Taani wongela anjuwa shaaketanaw, wongela gisho, ha ubbaa hanas.
1CO 9:24 Wothan gaaddetiya ubbay woxees, shin issuwa xalaali woyto ekeysa ereketii? Hessada hinteka woyto ekanaw woxite.
1CO 9:25 Gaaddetiya asa ubbay ubbaban bantana haarees. Enti hessa daaburey dhayiya woyto ekanaasa. Shin nuuni daaburey merina woyto ekanaasa.
1CO 9:26 Hessa gisho, taani qofi bayna asada woxike. Carko yimpiya asada coo kushe yeddike.
1CO 9:27 Shin taani haratas wongela odidaape guye, taani ta huuphen yegetida asi gidonna mela ta asatethaa wolqan haarada taw kiitetana mela oothayis.
1CO 10:1 Ta ishato, taani hinte haysa akeekana mela koyayis. Nu mayzati ubbay shaarape garsara hemetidosona; ubbay abba pinnidosona.
1CO 10:2 Enti Musera issifanaw shaaraninne abban xammaqetidosona.
1CO 10:3 Enti ubbay issi ayyaana kathi midosona.
1CO 10:4 Qassi ubbay issi ayyaana ushsha uyidosona. Enti bantana kaalliya ayyaana zaallafe pultida ushsha uyidosona; he zaallayka Kiristoosa.
1CO 10:5 Shin Xoossay entafe darotan ufaytiboonna gisho, enta ahay mela biittan wodhidi attis.
1CO 10:6 Enti iitaba amotidaysada, nuka iitaba amottonna mela he ubbay nuus leemiso gidis.
1CO 10:7 Geeshsha Maxaafan, “Asay maanawunne uyanaw uttidosona; qassi yexanaw dendidosona” geetetidaysada entafe issoti issoti eeqa goyinnidaysa mela hinte eeqa goyinnofite.
1CO 10:8 Entafe issoti issoti laymatidaysada nu laymatanaw bessenna. Hessa gaason entafe issi gallas laatamanne heedzu mukulay hayqis.
1CO 10:9 Entafe issoti issoti Godaa paacidi shooshan duketidi hayqidaysada nu Godaa paacanaw bessenna.
1CO 10:10 Entafe issoti issoti zuuzumidi hayqo ehiya kiitanchuwan dhayidaysada hinteka zuuzumofite.
1CO 10:11 Ha enta bolla gakida ubbay nu naagetana mela nuus leemiso gidis. Qassi wode wursethaa bolla de7iya nuus timirte gidana mela ha ubbay xaafetis.
1CO 10:12 Hessa gisho, ta eqas giya oonika kundonna mela bana naago.
1CO 10:13 Ase ubbaa gakiya paacepe attishin, dumma paacey hintena gakibeenna. Hinte wolqay danda7eysafe aadhiya paacen hinte paacetonna mela aathidi immonna Xoossay ammanetidaysa. Hintena paacey gakiya wode he paaciya I hintena danda7isana. Qassi he paaciyape hinte keyana ogiya I giigisana.
1CO 10:14 Hiza, ta al7o ishato, eeqa goyinnofe haakite.
1CO 10:15 Hinte wozanaama asi gidida gisho ta haysa odayis. Taani geysi tuma gideysa hinte hinte huuphen pirdite.
1CO 10:16 Nuuni Xoossaa galatidi shaaketiya anjo xuu7ay Kiristoosa suuthara issifetethi de7eysa gidenneyee? Qassi nuuni bathiya uythay Kiristoosa ashuwara issifetethi de7eysa gidenneyee?
1CO 10:17 Nuuni daro gidikoka uythay issino, nu he issi uytha shaaketiya gisho issi asatethi.
1CO 10:18 Ane Isra7eele asay oothidaysa akeekite. Yarshetida yarshuwa meysati yarsho bessaara issifetethi baaweyee?
1CO 10:19 Taani ay gaanaw koyada gayna? Eeqas yarshetida kathay woyko eeqay pathiyaba guusseyee?
1CO 10:20 Gidenna, enti yarshey Xoossas gidonashin, tuna ayyaanatasa. Hessa gisho, hintew tuna ayyaanatara issifetethi daana mela koyke.
1CO 10:21 Hinte Godaa xuu7ape uyishe, qassi tuna ayyaanata xuu7ape uyanaw danda7eketa. Godaa gaytape mishe qassi tuna ayyaanata gaytape maanaw danda7eketa.
1CO 10:22 Nuuni hessa oothidi Godaa yiloyno? Nuuni iyape aadhiya minoyee?
1CO 10:23 Hinte, “Ubbabaa oothonna mela diggiyabay baawa” geeta, shin ubbay maaddenna. Hinte, “Ubbabaa oothonna mela diggiyabay baawa” geeta, shin ubbay dichenna.
1CO 10:24 Issi issi asi, hara asi maaddiyaba qopanaw besseesipe attishin, bana maaddiyaba xalaala qopofo.
1CO 10:25 Hinte kaha sidhen gelsiya oysha denthonna giyan bayzetiya ashuwa coo miite.
1CO 10:26 Ayis giiko, sa7inne sa7an de7iya ubbay Godaaba.
1CO 10:27 Issi ammanonna asi hintena imatanaw koydi xeegiko baanaw koyko biite. Hinte kahan medhetiya oyshan sidhonna hinte sinthe aathiyaba ubba miite.
1CO 10:28 Shin issi asi, “Haysi eeqas yarshetidaba” giiko, he hintew odida addiya gishonne kaha gisho he katha moopite.
1CO 10:29 Taani, kaha gisho gey, he hintew odida ura kaha guussufe attishin, hinte kaha gidenna. Hara asa kaha gisho gada taani ta la77atetha bolla ayis pirdo?
1CO 10:30 Taani miya katha Xoossa galatada miiko balidada ayis boretiyana?
1CO 10:31 Hiza, hinte ay miiko ay uyiko, woyko ay oothikoka ubbaba Xoossa bonchoos oothite.
1CO 10:32 Ayhudeta gidin Giriketa gidin woyko Xoossa woosa keethi gidin oodeska dhube gidopite.
1CO 10:33 Taani ubba wode darota ashshanaw enti maadetiya oge koyaysipe attishin tana maaddiya oge koyke.
1CO 11:1 Taani Kiristoosa leemisuwa kaalleysada, hinteka tana kaallite.
1CO 11:2 Hinte ubbaban tana qopiya gishonne taani tamaarsida timirtiya minthidi naagida gisho taani hintena galatayis.
1CO 11:3 Shin Kiristoosi adde ubbaas huuphe, addey maccasas huuphe, qassi Xoossi Kiristoosas huuphe gideysa hinte erana mela koyayis.
1CO 11:4 Ba huuphiya guuluntidi Xoosse woossiya woyko tinbite odiya addey ubbay huuphe gidida Kiristoosa toochees.
1CO 11:5 Ba huuphiya qaconna Xoosse woossiya woyko tinbite odiya maccasiya huuphe gidida ba azina toochawusu. Ba huuphiya qaconna maccasiya ba huuphiya meedetida maccasa mela.
1CO 11:6 Maccasi ba huuphe kammonna ixiko, ba huuphiya qanxeto. Shin iw huuphe qanxoy woyko meedoy borso gidiko, ba huuphiya qaco.
1CO 11:7 Addey Xoossa leemisonne Xoossa boncho gidiya gisho, ba huuphiya kammanaw bessenna, shin maccasi addes boncho.
1CO 11:8 Maccasi addefe medhetasupe attishin, addey maccasape medhetibeenna.
1CO 11:9 Maccasi addes medhetisipe attishin, addey maccasas medhetibeenna.
1CO 11:10 Haysa gishonne kiitanchota gisho maccasi baw maati de7eysa bessiya malla ba huuphen qacanaw bessees.
1CO 11:11 Shin Godaa qofan maccasi addey bayna deenna; addeyka maccasi bayna deenna.
1CO 11:12 Maccasi addefe medhetidaysada addeyka maccasape yeletis. Shin ubbayka Xoossafe medhetis.
1CO 11:13 Ane hinte pirdite; maccasi ba huuphe kammonna Xoossa woossanaw bessii?
1CO 11:14 Addey ba huuphiya dichiko iyaw borso gideysa hari attoshin medhetethi hintena tamaarsennee?
1CO 11:15 Shin maccasi ba huuphe dichiko iw boncho gidennee? Maccasas huuphey imetiday iya bana kammana melasa.
1CO 11:16 Shin haysa bolla palamanaw koya asi de7iko, nuus gidin woyko Xoossa woosa keethatas gidin haysafe hara wogi baawa.
1CO 11:17 Hinte issife shiiqey go77as gidonashin qohos gidiya gisho, ha77i taani immiya kiitan hintena nashike.
1CO 11:18 Taani koyro si7iday, woosa keethan shiiqiya wode hinte giddon shaaketethi de7eysa. Ha ta si7idaysi tuma gideysa ammanayis.
1CO 11:19 Hinte giddofe tumi de7eysati oonanteko eretana mela hinte giddon shaahoy daanaysi attenna.
1CO 11:20 Hinte issife shiiqiya wode hinte shiiqey Godaa kahuwa maanasa gidenna.
1CO 11:21 Hinte kathi miya wode issoy issuwa naagonna baysa baysa miya gisho, issoy koshatees hankoy qassi mathotees.
1CO 11:22 Tuma hinte maanawunne uyanaw hintew keethi baawee? Woyko Xoossa woosa keethi kadheetii? Aykoy bayna manqota yeellayetii? Ta hintena woygo? Haysas ta hintena nashoyee? Nashshike.
1CO 11:23 Taani hintew immida timirtiya Godaape ekas. Goday Yesuusi aadhidi imetiya qamma uythu ekidi,
1CO 11:24 Xoossaa galatis. Uythaa bathidi “He7ite; miite. Haysi hintew imetiya ta ashuwa. Haysa mishe tana hassayite” yaagis.
1CO 11:25 Hessadaka, kahuwa midi simmin, xuu7aa ekidi, “Haysi xuu7ay ta suuthan eqiya ooratha caaquwa. Hinte iyape uyaa wode ubban tana hassayite” yaagis.
1CO 11:26 Hinte ha uytha miya wodenne ha xuu7a uyaa wode ubban Goday yaana gakanaw iya hayquwa odeeta.
1CO 11:27 Hessa gisho, bessonna ogen Godaa uytha miya woyko Godaa xuu7a uya oonika iya ashuwanne suutha toochida gisho ba nagaran oyshetees.
1CO 11:28 Shin asi bana paaco. Yaatidi uytha mo; xuu7ape uyo.
1CO 11:29 Godaa ashuwaba shaakidi eronna, uytha meynne xuu7ape uyey, ba bolla pirda meesinne uyees.
1CO 11:30 Hessa gisho, hinte giddofe daroti daaburidosona; hargidosona; qassi undenna asati hayqidosona.
1CO 11:31 Shin nuuni nuna paacidi be7idaba gidiyako, nu bolla pirdetanashin.
1CO 11:32 Alamey pirdetiya wode nuuni alamiyara pirdetonna mela ha77i Goday nuna seerees.
1CO 11:33 Hessa gisho, ta ishato, Godaa kahuwa ekanaw hinte shiiqiya wode issoy issuwa naagidi ekite.
1CO 11:34 Hinte shiiqoy pirdas gidonna mela koshatida oonika de7iko, ba son mo. Attidaba taani yaa bada hintew odana.
1CO 12:1 Ta ishato, Geeshsha Ayyaana imotataba hinte erana mela ta koyas.
1CO 12:2 Hinte Xoossaa ammanonna wode dooni bayna eeqatan gooshetidi, hinte eronna soo bidaysa ereeta.
1CO 12:3 Xoossaa Ayyaanay kaalethiya asi oonika, “Yesuusi baadeto” yaagenna. Qassi Geeshsha Ayyaanay kaalethonna de7ishin, oonika, “Yesuusi Godaa” gaanaw danda7onaysa hinte erana mela koyayis.
1CO 12:4 Dumma dumma Ayyaana imotati de7oosona, shin imotata immiya Ayyaanay issuwa.
1CO 12:5 Nu Godaas oothiya dumma dumma oosoti de7oosona, shin Goday issuwa.
1CO 12:6 Nu Godaas oothiya dumma dumma ogeti de7oosona, shin he ogetan oothiya asa ubban oothiya Xoossay issuwa.
1CO 12:7 Shin issuwas issuwas imetida imotatan harata maaddana mela Geeshsha Ayyaanay qoncees.
1CO 12:8 Geeshsha Ayyaanay issuwas cincatethi kumida qaala immees; qassi issuwas eratethi kumida qaala immees.
1CO 12:9 He Geeshsha Ayyaanay issuwas ammano, hankuwas qassi pathiya wolqaa immees.
1CO 12:10 Geeshsha Ayyaanay issuwas malaata oothiya wolqaa, issuwas tinbite odiya wolqaa immees. Issuwas ayyaanape ayyaana shaaki eriya wolqaa, issuwas dumma dumma doonan odiya wolqaa, qassi issuwas dumma dumma doonan odetidaysa birshiya wolqaa immees.
1CO 12:11 Shin ha ubbaa oothey he issi Geeshsha Ayyaana. I koyiya mela issi issi asaas dumma dumma imota immees.
1CO 12:12 Issi asatethan daro billiteti de7oosona, shin he dumma dumma billiteti issi asatethi gidoosona. Hessadaka, Kiristoosi dumma dumma billiteti de7iya asatethaa mela.
1CO 12:13 Nuuni Ayhude gidin Girike gidin aylle gidin womaanno gidin, ubbay issi asatethi gidanaw Geeshsha Ayyaanan xammaqetida. Qassi nu ubbay issi Geeshsha Ayyaana ekida.
1CO 12:14 Nu asatethan dumma dumma billiteti de7oosonape attishin, issi billite gidenna.
1CO 12:15 Tohoy, “Taani kushe gidonna gisho billite gidike” giiko, I hessa gida gisho billitetethay attiyee?
1CO 12:16 Haythi, “Taani ayfe gidonna gisho billite gidike” giiko, I hessa gida gisho asatethafe issi billite gideysi attiyee?
1CO 12:17 Asatetha ubbay ayfe xalaala gididaako, nu aybin si7anee? Qassi asatethi ubbay haytha xalaala gididaako nu aybin singanee?
1CO 12:18 Shin Xoossay ba koydaysada, asatethaa giddon dumma dumma billiteta wothis.
1CO 12:19 Ubbay issi billite gididaako asatethi waanidi daanee?
1CO 12:20 Shin billiteti daro gidikoka, asatethay issuwa.
1CO 12:21 Ayfey kusheko, “Ne taw koshshaka” gaanaw danda7enna. Woyko huuphey tohoko, “Ne taw koshshaka” gaanaw danda7enna.
1CO 12:22 Shin daabura daaniya asatethaa billiteti nuus aadhidi koshshosona.
1CO 12:23 Boncho koshshenna gidi nu qopiya nu billitetape baggata daro bonchoos. Qassi nu borsetiya nu asatethaa billiteta aathidi bonchidi naagoos.
1CO 12:24 Nu be7in borsonna asatethaa billitetas boncho koshshenna. Shin Xoossay nu asatethaa billiteta wolira gasethidi borsiya billitetas aadhiya boncho immis.
1CO 12:25 Asatetha billiteti issoy issuwara shaako medhonna wolis qopana mela oothidi medhis.
1CO 12:26 Asatetha billitetape issoy saketiko billiteti ubbay iyara saketoosona. Asatetha billitetape issoy bonchetiko billiteti ubbay iyara ufaytoosona.
1CO 12:27 Hinte ubbay Kiristoosa asatethi; qassi hinte issoy issoy iya billiteta.
1CO 12:28 Woosa keethan Xoossay, koyro hawaareta, nam7antho nabeta, heedzantho astamaareta, kaallidi malaata ootheyisata, patheyisata, harata maaddeyisata, woosa keetha ayseysatanne, dumma dumma doonan odeteyisata wothis.
1CO 12:29 Ubbay hawaaree? Ubbay nabee? Ubbay astamaaree? Ubbay malaata oothii?
1CO 12:30 Ubbay pathiyee? Ubbay dumma dumma doonan odeetii? Ubbay dumma dumma doonan odetoysa birshii?
1CO 12:31 Shin ubbaafe aadhiya imota minthidi koyite. Qassi ubbaafe aadhiya ogiya ta hintena bessaana.
1CO 13:1 Taani asa qaalanne kiitancho qaala odetanaw danda7ikoka, taw siiqoy dhayiko, coo giiriya daala mela.
1CO 13:2 Tinbite odiya imoti taw de7ikoka, xuura ubbaa erikoka, eratethi ubbay de7ikoka, qassi deriya denthidi haraso efiya ammanoy taw de7ikoka, siiqoy dhayiko, ta aykoka gidike.
1CO 13:3 Taw de7iyaba ubbaa manqotas immikoka, hari attoshin, tana tamas aatha immikoka, siiqoy dhayiko tana aykoka maaddenna.
1CO 13:4 Siiqoy danda7ancho. Siiqoy keeha. Siiqoy qanaatenna. Siiqoy ceeqetenna. Siiqoy otorenna.
1CO 13:5 Siiqoy bessonnaba oothenna. Siiqoy uuzetenna. Siiqoy yilotenna. Siiqoy ba qoho paydenna.
1CO 13:6 Siiqoy tuman ufaytesipe attishin, wordon ufaytenna.
1CO 13:7 Siiqoy ubbaa danda7ees; ubbaa ammanees; lo77obay hanana gidi, ufaysan naagees; ubbaa gencees.
1CO 13:8 Siiqoy wursethi gakanaw dhayenna. Shin tinbitey attana; dumma dumma doonan odeteysi attana; eratethika aadhana.
1CO 13:9 Nu eratethaafe guuthi eroos; tinbitepe baggaa odoos.
1CO 13:10 Shin polo gididaysi yaa wode polo gidonnaysi attana.
1CO 13:11 Taani na7a de7iya wode na7ada haasayis; na7ada qopayis; na7ada akeekayis. Ta kahaamida wode na7atetha hanuwa aggas.
1CO 13:12 Ha77i poo7oy bayna son mastooten be7eysada be7oos, shin he wode nu qoncen be7ana. Ha77i nu eratethaafe guutha eroos, shin he wode Xoossay nuna ereysada polo erana.
1CO 13:13 Hiza, ammanoy, ufaysinne siiqoy, ha heedzati eqidi daana. Shin haysatape aadhey siiqo.
1CO 14:1 Siiqo kaallite. Ayyaana imotata minthidi koyite; ubbaafe aathidi, tinbite imota minthidi koyite.
1CO 14:2 Dumma dumma doonan odetiya asi Xoossaas odeesipe attishin, asas odenna. Shin asas qonciboonna xuuraa Ayyaana wolqan odetiya gisho, oonika I odeteysa akeekenna.
1CO 14:3 Shin tinbite odeysati ase dichanaw, minthethanawunne minthanaw asas odees.
1CO 14:4 Dumma dumma doonan odiya asi bana dichees. Shin tinbite odiya asi woosa keethaa dichees.
1CO 14:5 Hinte ubbay dumma dumma doonan odetiyako ta dosayis, shin tinbite odanaysa aathada dosayis. Dumma dumma doonan odeteysa woosa keethi dichanaw birshiya asi dhayiko, dumma dumma doona odeteysafe tinbite odeysi aadhees.
1CO 14:6 Shin ta ishato, taani hinteko bada, qoncethan woyko eratethan woyko tinbite odon woyko timirten gidonashin, dumma dumma doonan odetiko hintena ay maaddanee?
1CO 14:7 Dumma dumma yetha miishetas issi qommo girsi de7iko, suusul7e girsinne diitha girsi waatidi shaaki eranee?
1CO 14:8 Qassi moyze punoy geeyidi eretonna ixiko olas giigetey oonee?
1CO 14:9 Hessadaka, dumma dumma doonan hinte odeteysi qonce gidonna ixiko hinte odeysa ooni eranee? Hessi carkos odiya mela.
1CO 14:10 Ha alamiyan daro doonati de7oosona; he ubbaas birshethi de7ees.
1CO 14:11 Shin issi asi odetiya doona taani eronna ixiko I taw imathe gidees; taka iyaw imathe gidayis.
1CO 14:12 Hessadaka, Geeshsha Ayyaana imota hinte ekanaw minthidi koyko, woosa keethi dichanaw ubbaafe aadhiya imota koyite.
1CO 14:13 Dumma dumma doonan odetiya asi ba odaa birshanaw birshetha imotay imetana mela Xoossaa woosso.
1CO 14:14 Taani dumma dumma doonan Xoossaa woossiko, ta ayyaanay woossees, shin ta wozanay aykoka go7etenna.
1CO 14:15 Yaatin, ta ay oothanaw koshshii? Taani ta ayyaanan woossayis; ta wozananka woossayis. Taani ta ayyaanan yexayis; ta wozananka yexayis.
1CO 14:16 Hessa gidonna ixiko neeni ne ayyaanan Xoossaa galatiya wode he bessan neeni geysa eronna asi ne galateysa woygidi, “Amin7i” gaanee?
1CO 14:17 Neeni Xoossaa galateysi lo77o, shin hara asi maaddenna.
1CO 14:18 Ta hinte ubbaafe aathada dumma dumma doonan odetiya gisho Xoossaa galatayis.
1CO 14:19 Shin taani woosa keethan harata tamaarsanaw dumma dumma doonan tammu mukulu qaala odetanaape ichashu qaala eretiya doonan odetanaw dosayis.
1CO 14:20 Ta ishato, hinte qofan naytada hanopite. Hinte iitabas naytada hanitepe attishin, hinte qofan kahaamata gidite.
1CO 14:21 Goday, Geeshsha Maxaafan, “Taani ha asaas, dumma dumma doonan odetiya asaaninne imatha inxarsan odetiya asan odana. Shin hessi haninika tana si7okona” yaagees.
1CO 14:22 Hiza, dumma dumma doonan haasayoy, ammanonna asaas malla gideesipe attishin, ammaniya asaasa gidenna. Tinbitey ammaniya asaas malla gideesipe attishin, ammanonna asaasa gidenna.
1CO 14:23 Woosa keethaa asay issife shiiqiya wode, ubbay dumma dumma doonan odetiko eronna woyko ammanonna asay hinte shiiquwa yidi, “Haysati gooyosona” gookonayee?
1CO 14:24 Shin eronna woyko ammanonna asay woosa keethi yaa wode asay tinbite odishin, si7iko ba nagaraa akeekana; qassi I si7ida qaalan pirdetana.
1CO 14:25 Enti iya wozanan geemmida qofaa qoncisana. Hessadaka, “Tuma Xoossay hinte giddon de7ees” yaagidi markatidi, gufannidi Xoossaas goyinnana.
1CO 14:26 Ta ishato, nu woygino? Hinte issife shiiqiya wode issuwas mazmurey de7ees; issuwas tamaarso imoti de7ees; issuwas qoncethi de7ees; issuwas dumma dumma doonan haasayoy de7ees; issuwas birshetha imoti de7ees. He ubbay woosa keethi dichiyaba gidanaw bessees.
1CO 14:27 Dumma dumma doonan odetiya asati de7iko, nam7a woyko dariko heedza gididi maaran maaran odetanaw bessees. Enti odeteysa hara asi birsho.
1CO 14:28 Shin birshiya asi dhayiko, dumma dumma doonan odeteysi woosa keethan si77i go. Bawunne ba Xoossaas odo.
1CO 14:29 Tinbite odeysati nam7a woyko heedza gididi odo. Qassi harati enti giyaba pirdona.
1CO 14:30 He shiiquwan de7iya hara asas issibay qonciko kase odeteysi si77i go.
1CO 14:31 Ubbay tamaarana melanne ubbay minnana mela maaran maaran tinbite odanaw danda7eeta.
1CO 14:32 Nabeta ayyaanay nabetas kiitetees.
1CO 14:33 Geeshshata woosa keetha ubbay meezetidaysada Xoossay sarotetha Xoossaafe attishin, buqethi medhiya Xoossi gidenna.
1CO 14:34 Maccasi woosa keethan si77i go. Muse higgey geysada enti haaretofe attishin, woosa keethan odanaw entaw maati baawa.
1CO 14:35 Maccasi woosa keethan haasayoy borso gidiya gisho issiba eranaw koyko son banta azinata oychonna.
1CO 14:36 Xoossaa qaala koyro hinte ehidetii? Woyko Xoossaa qaalay hinte xalaalako yidee?
1CO 14:37 Oonika bana nabe woyko bana Xoossaa asi gidi qopiko, taani hintew xaafeysi Godaa kiitta gideysa akeeko.
1CO 14:38 Shin oonika akeekona ixiko ika akeeketofo.
1CO 14:39 Hessa gisho, ta ishato, tinbite odanaw minthidi amotite; qassi dumma dumma doonan odeteysaka diggofite.
1CO 14:40 Shin ubbayka woganinne maaran gido.
1CO 15:1 Ta ishato, ta hintew markatida wongela hinte ekidaysanne hinte ammanoy iyan eqidaysa hinte akeekana mela taani koyayis.
1CO 15:2 Ta tamaarsida wongela minthidi oykiko hinte iyan attana. Hessi hanonna ixiko hinte ammanoy hada gidana.
1CO 15:3 Taani ekida ubbaafe aadhiya kiitaa kasetada hintew immas. Hessika, Geeshsha Maxaafay geysada, Kiristoosi nu nagaraa gisho hayqis.
1CO 15:4 Moogetis; Geeshsha Maxaafay geysada, heedzantho gallasan hayqope dendis.
1CO 15:5 Phexroosas qoncis. Hessafe guye, tammanne nam7u hawaaretas qoncis.
1CO 15:6 Hessafe guye, ichashu xeetape dariya asaas issitoho qoncis. Entafe dariya baggay ha77i gakanaw paxa de7oosona, shin guuthati hayqidosona.
1CO 15:7 Hessafe guye, Yayqoobas qoncis; guyepe ba hawaareta ubbaas qoncis.
1CO 15:8 Qassi wursethan awucaya mela gidida taw qoncis.
1CO 15:9 Taani Yesuusa hawaareta ubbaafe laafa. Taani Xoossaa woosa keethaa gooddida gisho Yesuusa hawaare geetetada xeegetanaw bessonnaysa.
1CO 15:10 Shin Xoossaa aadho keehatethan ta ha77i gididaysa gidas; I taw immida aadho keehatethay mela attibeenna. Taani hanko hawaaretape aathada daaburas. Shin taara de7iya Xoossaa aadho keehatethay oothisipe attishin, tana gidike.
1CO 15:11 Hiza, tana gidin enti, nu ubbay tamaarsey hessa; hinteka he kiitaa ammanideta.
1CO 15:12 Kiristoosi hayqope dendidaysa nu sabbakiya wode hintefe issoti issoti yaatin, woygidi, “Hayqope dendoy baawa” yaagona?
1CO 15:13 Hayqope dendoy baynaba gidiko Kiristoosi hayqope dendibeenna guussu.
1CO 15:14 Kiristoosi hayqope dendiboonaba gidiko nu timirtey qassi hinte ammanoyka hada.
1CO 15:15 Hayqope dendoy baynashin, nuuni Xoossay, “Kiristoosa hayqope denthis” yaagidi sabbakishe Xoossaa wordancho markata gidida guussu.
1CO 15:16 Hayqida asay hayqope dendiboonaba gidiko hiza, Kiristoosi hayqope dendibeenna.
1CO 15:17 Kiristoosi hayqope dendonaba gidiko, hinte ammanoy hada; qassi hinte ha77i gakanaw hinte nagaran de7eeta.
1CO 15:18 Hiza, Kiristoosa ammanidi hayqidaysatika dhayidosona guussu.
1CO 15:19 Nuuni ha alamiya de7uwa xalaalas Kiristoosan ufaysi oothidaba gidiko, ha sa7an de7iya asa ubbaafe nubay aadhida yibbata.
1CO 15:20 Shin Kiristoosi hayqidaysatas hayqope dendon bayra gididi tuma dendis.
1CO 15:21 Hayqoy issi asa baggara ha alamiya yidaysada hayqope dendoy issi asa baggara yis.
1CO 15:22 Addaame baggara asa ubbay hayqidaysada Kiristoosa baggara asa ubbay de7on daana.
1CO 15:23 Shin issoy issoy ba maaran maaran dendana. Kiristoosi ubbaafe kasetidi dendis; hessafe guye, Kiristoosaysati I yaa wode dendana.
1CO 15:24 Hessafe guye, Kiristoosi halaqatethi, maatanne wolqa ubbaa dhaysidi, kawotethaa Xoossa Aawas immiya wode wodiya wursethay yaana.
1CO 15:25 Xoossay iya morketa ubbaa iya tohuwape garsan wothana gakanaw Kiristoosi haaranaw bessees.
1CO 15:26 Wursethan I dhaysanaw de7iya morkey hayqo.
1CO 15:27 Geeshsha Maxaafan, “Xoossay ubbaba iya maatape garsan haarisis” geetetidi xaafetis. Shin ubbaa iya maatape garsan haarisis geysi, ubbaba iya maatape garsan haarisida Xoossaa gujenna.
1CO 15:28 Ubbabay Kiristoosa maatape garsan haaretidaape guye Kiristoosi qassi ba huuphen ubbaba baw haarisida Xoossaas haaretana. He wode Xoossay ba xalaala ubbaa haarana.
1CO 15:29 Hayqidaysati dendonaba gidiko enta gisho xammaqetiya asaas ayba wodhey de7ii? Hayqidaysati dendonaba gidiko yaatin, ayis, asay hayqidaysata gisho xammaqetoona?
1CO 15:30 Yaatin, nuuni ayis ubba wode nunatethaa metos aathidi immoona?
1CO 15:31 Ta ishato, ta gallas gallas hayqos aadhada imetayis. Hessika, Godaa Kiristoos Yesuusan de7iya de7uwa issifetethan hintenan ceeqiya gishosa.
1CO 15:32 Asa qofatho gidiko, taani Efesoonan do7ara butetidaysi tana ay maaddii? Hayqidaysati hayqope dendonaba gidiko, “Wonto nu hayqiya gisho hachi maana uyana” giya asaa mela gidoos.
1CO 15:33 Cimetofite! Iita laggetethi lo77o amale iissees.
1CO 15:34 Hinte akeekako simmite. Nagara oothopite. Hintefe issi issi asay Xoossaa erokona. Taani hintena yeellayanaw hessa gayis.
1CO 15:35 Issi asi, “Hayqida asay waanidi dendanee? Enti ay mela asatethara yaanee?” yaagonna aggenna.
1CO 15:36 Neno eeyaw, neeni biittan zeriya zerethay hayqonna dolenna.
1CO 15:37 Neeni zerey giste gidin woyko hara katha qommo ayfe xalaala zerasaape attishin, dolida dolaa gidenna.
1CO 15:38 Shin Xoossay zerethaas ba dosida mela medhetethi immees. Dumma dumma zerethaas dumma dumma asatethi immees.
1CO 15:39 Medhetetha ubbaa ashoy isso gidenna. Shin asa ashoy issuwa; mehe ashoy dumma; kafota ashoy dumma; qassi molo ashoy dumma.
1CO 15:40 Salo asatethi de7ees; qassi sa7a asatethi de7ees. Shin salo asatethaa bonchoy dumma; qassi sa7a asatethaa bonchoy dumma.
1CO 15:41 Awa bonchoy dumma; ageena bonchoy dumma; xoolintota bonchoy dumma; issi xoolintoy hanko xoolintuwafe bonchon dummatees.
1CO 15:42 Hayqidaysati hayqope dendiya wode hessada hanana. Hayqiya asatethay zeretees; hayqonna asatethi gididi dendees.
1CO 15:43 Tooshen zeretidi, bonchon dendana; daaburan zeretidi, wolqan dendana.
1CO 15:44 Medhetetha asatethay zeretidi, ayyaana asatethi gididi dendana. Medheta asatethi de7iko, ayyaana asatethi de7ees.
1CO 15:45 Hessadaka, Geeshsha Maxaafan, “Koyro addey, Addaamey, paxa de7iya ase gididi medhetis” yaagees. Shin wursetha Addaamey, Kiristoosi, de7o immiya ayyaana gidis.
1CO 15:46 Shin medheta asi koyro yin, guyepe ayyaana asi yisipe attishin, ayyaana asi koyro yibeenna.
1CO 15:47 Koyro Addaamey biittafe medhetida biitta asi; nam7antho Addaamey salope yida salo asi.
1CO 15:48 Biittafe medhetidaysati biittafe medhetidaysa daanosona. Saloysati salope yidaysa daanosona.
1CO 15:49 Nuuni biittafe medhetida addiya daaneysa mela salope yida addiya daanana.
1CO 15:50 Ta ishato, ta geysi hessa; ha77i nu ma7ida asatethay Xoossaa kawotethaa laattanaw danda7enna. Wooqiya asatethay wooqonna asatethaa laattenna.
1CO 15:51 Ta hintew issi xuura odana. Nu ubbay hayqoko, shin wursethan ubbay laametana.
1CO 15:52 Moyzey punetiya wode, ayfey qiphi xeellanaw hassayonna laametana. Hayqida asay wooqonna asi gididi dendana; nuka laametana.
1CO 15:53 Haysi wooqeysi wooqonnaysa, haysi hayqeysi hayqonnaysa ma7anaw bessees.
1CO 15:54 Haysi wooqeysi wooqonnaysa, qassi haysi hayqeysi hayqonnaysa ma7iya wode, Geeshsha Maxaafan, “Hayqoy xoonon mitetis” giya qaalay poletana.
1CO 15:55 Hessadaka, “Hayqo, ne xoonoy awun de7ii? Hayqo, ne qohiya wolqay awun de7ii?” gida qaalay poletana.
1CO 15:56 Hayqoy dukiya wolqay nagara; qassi nagara wolqay higge.
1CO 15:57 Shin nu Godaa Yesuus Kiristoosa baggara nuus xoono immiya Xoossaa galati gako.
1CO 15:58 Hessa gisho, ta siiqo ishato, qaaxonna minnidi eqite. Godaa oosuwan hinte daabureysi coo gidonnaysa eridi ubba wode Godaa oosuwa azallonna oothite.
1CO 16:1 Ammaniya asaas miishe shiishobaa Galatiya woosa keethatas taani kiittidaysada hinteka oothite.
1CO 16:2 Miishiya shiishoy ta hinteko biya wode gidonna mela issoy issoy saamintafe koyro gallas, wogga wode, wogga wode, ba demmeysafe kessidi ba son dagayo.
1CO 16:3 Taani yaa bida wode miishiya Yerusalaame gathana mela hinte dooriya asaas dabdaabe immada enta Yerusalaame kiittana.
1CO 16:4 Entara ta buussay koshshiyaba gidiko enti taara baanaw danda7oosona.
1CO 16:5 Taani Maqedoonera aadhanaw qopida gisho, yaa bada hinteko yaana.
1CO 16:6 Ta biya bessa aw gidikoka, ta buussan hinte tana maaddana mela hinte matan guutha wode gam7onna aggike. Balgo ageenata hinte matan aathona waaya aggana.
1CO 16:7 Taani ogera aadhashe hintena be7anaw koyke. Goday giiko, hinte matan guutha wode takanaw qopayis.
1CO 16:8 Shin taani Phanxeqosxe Ba7aaley gakanaw Efesoonan gam7ana.
1CO 16:9 Taw oosoy kumida dalga pengey dooyetis, shin daro eqetiya morketi de7oosona.
1CO 16:10 I ta mela Godaa ooso oothiya asi gidiya gisho, Ximotiyoosi hinteko biiko, hinte matan I hirgonna daana mela oothite.
1CO 16:11 Oonika iya kadhopo. I taako saro simmana mela iya maaddidi moyzite. Taani I hanko ammaneysatara simmanaysa naagayis.
1CO 16:12 Nu ishaa Aphiloosi hanko ammaneysatara hinteko baana mela ta iya mintha woossas. Ha77i hinteko baanaw koybeenna, shin iyaw injetiya wode hinteko baana.
1CO 16:13 Barkite; Ammanon eqite; xaalite; minnite.
1CO 16:14 Ooso ubbaa siiqon oothite.
1CO 16:15 Ta ishato, Isxifaanoseynne iya soo asay Akayan enti koyro ammanidaysata gideysanne ammaneyisata maaddanaw bantana aathidi immidaysa hinte ereeta.
1CO 16:16 Hinteka enta mela asaasinne, entara ooson daaburiya ubbaas kiitetana mela ta hintena woossayis.
1CO 16:17 Isxifaanosey, Ferdonaxisinne Akayqoosi taako yidaysi tana ufaysis. Hinte bayna bessan enti hintena gididi ta pacaa kunthidosona.
1CO 16:18 Enti hintena ufaysidaysada tanaka ufaysidosona. Hessa mela asata dogopite.
1CO 16:19 Iise woosa keetha asay hintena saro goosona. Aqilinne Phirisqilla banta son shiiqiya woosa keetha asaara issife hintena Godaa sunthan wozanape sarothoosona.
1CO 16:20 Ammaniya ishati ubbay hintena saro yaagosona. Geeshsha yeeretethi yeeretishe issoy issuwa sarothite.
1CO 16:21 Taani, Phawuloosi, ha sarothuwa ta kushen xaafas.
1CO 16:22 Godaa dosonna asi de7iko, baadetidaysa gido. Nu Godaw, haaya!
1CO 16:23 Godaa Yesuus Kiristoosa aadho keehatethay hintera gido.
1CO 16:24 Ta siiqoy Kiristoos Yesuusan de7iya hinte ubbaara gido. Amin7i.
2CO 1:1 Xoossa shenen Yesuus Kiristoosa hawaare gidida Phawuloosinne, nu ishaa Ximotiyoosi, Qorontoosan de7iya Xoossaa woosa keethaasinne Akaya biittan de7iya Xoossaa asa ubbaas xaafida kiitaa.
2CO 1:2 Xoossaa nu Aawapenne Godaa Yesuus Kiristoosape, aadho keehatethaynne sarotethay hintew gido.
2CO 1:3 Maarotetha Aawas, ubba wode nuna minthethiya Xoossaas, nu Godaa Yesuus Kiristoosa Aawas galati gido.
2CO 1:4 Xoossay nuus immida minthethuwan, meton de7eyisata nu minthethana mela Xoossay nuna nu meto ubban minthethees.
2CO 1:5 Nuuni Kiristoosa daro waayiya shaaketidaysada qassi nuuni iya daro minthethuwan minnana.
2CO 1:6 Nuuni waayetiko hessi hintena minthethanaasanne hintena ashshanaasa. Qassi nuuni minetiko nuuni gencida waayiya mela hinteka gencidi, Xoossay hintew immiya minthethuwan minnana.
2CO 1:7 Hinte nu ekida metuwa mela ekidi, nu minthethuwan shaaketanaysa nu eriya gisho nu ufaysay hintenan mino.
2CO 1:8 Nu ishato, Iise biittan nuna gakida metuwa hinte erana mela koyoos. He nuna gakida metoy nu wolqaafe darin, hayqonna attoko gidi ufaysi qanxidashin.
2CO 1:9 Nuuni nu bolla hayqo pirdi pirdetida mela qopida. Shin nuuni nu huuphen gidonashin, hayqidaysata denthiya Xoossan ammanetana mela hessi hanis.
2CO 1:10 Xoossay hessa mela iita hayqope nuna ashshis; ha77ika ashshana; sinthafeka I nuna ashshana gidi iyan ufaysi wothoos.
2CO 1:11 Woosan nuna maaddite. Daro woosa gaason Xoossaa maaduwa nu demmiya wode daro asay nu gisho Xoossaa galatoosona.
2CO 1:12 Nuuni nu geeshsha kahan ceeqetoos. Nuuni ha alamiyan de7ida de7uwan ubbaraka hintera nu de7ida de7uwan tumatethaninne suuretethan hintera de7ida. Hessika, ha alamiya cincatethan gidonashin, Xoossaa aadho keehatethaana.
2CO 1:13 Nu hintew xaafida dabdaabey hinte nabbabanawunne akeekanaw danda7iyabaape attishin, haraa gidenna. Hinte iya akeekanaw danda7eysa ta ammanayis.
2CO 1:14 Ha77i hinte nuna hanida keena ereeta, shin sinthafe kumethi eranaysa ta ammanetayis. Nu Godaa Yesuusi simmiya wode nuuni hintenan ceeqetidaysada hinteka nunan ceeqetana.
2CO 1:15 Hessa taani loytha erida gisho, hinte nam7antho go7etana mela kasetada hinteko baanaw qofa qachas.
2CO 1:16 Taani Maqedoone bashenne yaape simmashe hintena be7ana. Taani yaape Yihuda biya wode hinte tana ta ogiyan maaddana gada qopas.
2CO 1:17 Taani hessa gashe ay oothanaw bessiyako eronna asi daaniyana? Woyko taani ta qofaa qachiya wode asa qofada, issi toho “Ee” qassi issi toho “Akay” giya asa meleyee?
2CO 1:18 Shin Xoossay ammaneteysa gidiya gisho, nu hintew odiya qaalay “Ee” woyko “Akay” geysa gidenna.
2CO 1:19 Taani, Sillaaseynne Ximotiyoosi hintew markatida Xoossaa Na7ay, Yesuus Kiristoosi ubba wode “Eepe” attishin, “Ee” nne “Akay” gidenna.
2CO 1:20 Xoossay immana gida ubbay Kiristoosa baggara “Ee” gidees. Nuuni Kiristoosa baggara Xoossaa bonchoos, “Amin7i” gey hessa gishosa.
2CO 1:21 Nunne hinte Kiristoosan minnidi eqana mela oothidaynne ba oosuwas dooriday Xoossaa.
2CO 1:22 Nuuni iyabaa gideysa erisanaw ba maatamiya nu bolla wothis; qassi ba Geeshsha Ayyaana oythi oothidi nu wozanan wothis.
2CO 1:23 Taani Qorontoosa boonna aggiday hinte azzanonna attana melasa; hessi wordo gidiko Xoossay ta shempuwa taape eko.
2CO 1:24 Hinte, hinte ammanuwan minnidi de7iya gisho, nu hintena ufaysanaw hintera issife ootheysatape attishin, hintena wolqan ammantheyisata gidoko.
2CO 2:1 Taani nam7antho hinteko biike gada qofa qachiday hintena azzanthonna agganaasa.
2CO 2:2 Taani hintena azzanthikoka ta azzanthida hintefe hari tana ufaysanaw de7ey oonee?
2CO 2:3 Taani hintew he dabdaabiya xaafiday, ta hintena be7anaw biya wode tana ufaysanaw bessiya asan ta azzananaw koyonna gishosa. Ta ufaytiya wode hinte ubbayka ufaytanaysa ta ammanayis.
2CO 2:4 Taani daro waayeninne un7an qassi daro afuthan xaafiday, hintena azzanthanaasa gidonashin, taani hintena ubbaa ay mela dosiyako hintena erisana melasa.
2CO 2:5 Ase azzanthida oonika de7iko ta iya naaquwa darsanaw koyikefe attishin, tana gidonashin, hintefe darota azzanthis.
2CO 2:6 Hintefe dariya asay he uraa seerida seeray iyaw gidana.
2CO 2:7 Hessa gisho, he uray daro azzanidi, ufaysi qanxonna mela hinte iya maaranawunne minthethanaw bessees.
2CO 2:8 Hinte iya siiqeysa zaari iyaw qoncisana mela ta hintena woossayis.
2CO 2:9 Ta he dabdaabiya hintew xaafiday, hinte paacetidi, ubbaban taw kiiteteysa eranaw koyida gishosa.
2CO 2:10 Hinte maariya uraa taka maarana. Taani maaranabay aybi de7ikoka, Kiristoosa sinthan hinte gisho gada maaras.
2CO 2:11 Taani hessa oothiday Xalahiya cimo oosuwa nu eriya gisho, xalahen cimetonna attana melasa.
2CO 2:12 Taani Kiristoosa Wongela sabbakanaw Xiro7aada bida wode, Goday yan taw ooso oge giigisidi wothis.
2CO 2:13 Shin taani ta ishaa Tito yan demmaboonna gisho ta wozanay shempibeenna. Hessa gisho, yan de7iya asaa sarothada iya koyanaw Maqedoone bas.
2CO 2:14 Shin Kiristoosa baggara ubba wode nuna xoonon kaalethiyanne shitto mela sawiya Kiristoosaba nu eriya timirtiya ubba bessi gathana mela oothiya Xoossaa galati gako.
2CO 2:15 Nuuni attiya asaa giddoninne dhayiya asaa giddon Kiristoosa baggara Xoossas imetida sawiya shitto mela.
2CO 2:16 Dhaya asaas hayqoko efiya hayqo peeno; qassi attiya asaas de7oko efiya de7o sawo; yaatin, hessa mela oosos gidanay oonee?
2CO 2:17 Nuuni Xoossaa qaala wodhe demmanaw koyidi walakidi zal7iya daro asaa mela gidoko. Shin Xoossay kiitida suure asata mela Kiristoosan de7idi Xoossaa sinthan qaala odoos.
2CO 3:1 Nuuni zaaridi nuna sabbinoyee? Woyko hara asada, saba dabdaabiya hintew yeddanaw woyko hintefe ekanaw nuna koshshiyee?
2CO 3:2 Asi ubbay hintena erana melanne nabbabana mela hinte nu wozanan xaafetidi de7iya nu dabdaabe.
2CO 3:3 Hinte qalamen gidonashin, de7o Xoossaa Ayyaanan, shucha bolla gidonashin, asa wozanan xaafetidaysatanne nunan haggaazetida Kiristoosa dabdaabe gideysa bessideta.
2CO 3:4 Nu hessa giday, Kiristoosa baggara Xoossan ammanoy nuus de7iya gishosa.
2CO 3:5 Nu hessa oothanaw danda7iday Xoossaa wolqaanape attishin, nuuni nu wolqan aykoka oothanaw danda7oko.
2CO 3:6 Nu ooratha caaquwa oosanchota gidana mela Xoossay nuna danda7isis. He ooratha caaqoy Geeshsha Ayyaanan bentidaysafe attishin, xaafetida higgen gidenna. Higgey wodhees, shin Geeshsha Ayyaanay de7o immees.
2CO 3:7 Shucha bolla xaafetida higgey imetiya wode Xoossaa bonchoy qoncis. Muse som7uwan de7iya bonchoy dhayishe biyaba gidikoka, Isra7eele asay iya som7uwa tishshi oothidi xeellanaw danda7ibookona. Hiza, hayqo ehiya higgey hessa mela bonchon qonciko,
2CO 3:8 yaatin, Geeshsha Ayyaanan oosetiya oosuwa bonchoy waanidi aadhenee?
2CO 3:9 Asa bolla pirda ehiya higgey boncho gidiko yaatin, ase xillisiya ooratha ogey waanidi aadhidi bonchetennee?
2CO 3:10 Kase boncho gididaysa ha77i aadhiya bonchoy de7eysara gathi be7iya wode bonchoy baynaba gidis.
2CO 3:11 Guutha wodes qoncidi guyepe dhaydaysi haysada bonchetiko, merinaw de7eysi waanidi aadhidi bonchetennee?
2CO 3:12 Nuus haysa mela ufaysay de7iya gisho, yeellatonna odetoos.
2CO 3:13 Nuuni, Isra7eele asay dhayishe biya bonchuwa wursethaa be7onna mela ba som7uwa kammida Muse mela gidoko.
2CO 3:14 Shin enta wozanay doccis. Hachi gakanaw enti gal7a caaquwa nabbabiya wode enta wozanay he kaman kametidi de7ees. He kamay Kiristoosa xalaalan qaaretees.
2CO 3:15 Shin hachi gakanawuka enti Muse maxaafaa nabbabiya wode ubban he kamay enta wozanaa kammees.
2CO 3:16 Shin oonika Godaako simmiya wode awudeka he kamay qaaretees.
2CO 3:17 Goday Ayyaana; Godaa Ayyaanay de7iya bessan la77atethi de7ees.
2CO 3:18 Nuuni ubbay kametiboonna som7on Godaa bonchuwa be7ana. Nuuni Ayyaana gidida Godaa malaa daananaw bonchofe bonchon laametana.
2CO 4:1 Hiza, Xoossay ba maarotethan ha oosuwa nuus immida gisho, nuuni ufaysi qanxoko.
2CO 4:2 Nuuni yeellaya geema ooso ubbaa aggida; gene ooso oothoko; Xoossaa qaala wordora walakoko. Tumaa qoncen haasayishe, asa ubbaa kahay nuna ekana mela Xoossaa sinthan nuna shiishoos.
2CO 4:3 Nu odiya Wongelay geemmidaba gidikoka, geemmiday dhayo ogen de7iya asaasa.
2CO 4:4 Ha alamiya haariya xoossay ammanonna asaa wozanaa goozis. Enti Xoossaa mela gidida Kiristoosa boncho Wongela poo7uwa be7onna mela diggis.
2CO 4:5 Nuuni, Yesuus Kiristoosi Godaa gideysanne nu iya gisho hinte oosancho gideysa odoosipe attishin, nubaa odoko.
2CO 4:6 “Dhuman poo7oy poo7o” gida Xoossay, Kiristoosa som7uwan poo7iya Xoossaa bonchuwa eraa poo7uwa immanaw ba poo7uwa nu wozanan poo7isis.
2CO 4:7 Shin ubbaafe aadhiya wolqay nubaa gidonashin, Xoossaba gideysa bessanaw ha boncho shaloy meqa miishe gidida nu asatethan de7ees.
2CO 4:8 Nu ubba baggaraka waayetida, shin meqeretibooko. Nuus haddirsi gidis, shin ufaysi qanxibooko.
2CO 4:9 Nu, morketan goodetida, shin lagge dhaybooko. Nu morketan shocetidi kundida, shin dhaybooko.
2CO 4:10 Yesuusa de7oy nu asatethan qoncana mela iya hayquwa ubba wode nu asatethan tookidi yuuyoos.
2CO 4:11 Yesuusa de7oy hayqiya nu asatethan qoncana mela paxa de7iya nuuni iya gisho, ubba wode hayqos aadhidi imetoos.
2CO 4:12 Hiza, hayqoy nunan oothiya wode de7oy hintenan oothees.
2CO 4:13 Geeshsha Maxaafan, “Ta ammanas; hessa gisho odas” yaagetis. Hessa mela ammanoy nuus de7iya gisho haasayoos.
2CO 4:14 Godaa Yesuusa hayqope denthida Xoossay, nunaka Yesuusara hayqope denthanaysanne hintera issife ba sinthe shiishanaysa eroos.
2CO 4:15 Hessi ubbay haniday hinte gishosa. Xoossaa aadho keehatethay daro asaa gakiya wode asay Xoossaa bonchuwas daro galataa immana.
2CO 4:16 Hessa gisho, nuuni ufaysi qanxoko. Nu bentiya asatethay daaburishe biyaba gidikoka, nu ayyaana asatethay gallas gallas ooraxees.
2CO 4:17 Ha77is nuuni waayetiya ha kawusha waayey, ubbaafe keehi gitatiya merinaa bonchuwa nuus imisana.
2CO 4:18 Nuuni bentiyaba gidonashin, bentonnaba xeelloos. Bentiyabay ha77isa, shin bentonnabay merinaasa.
2CO 5:1 Ha77i nu de7iya dunkaane daaniya ha sa7a asatethay laaletikoka, asi keexiboonna, Xoossay keexida merinaa keethay nuus salon de7eysa eroos.
2CO 5:2 Salo asatethaa ma7anaw amotishe ha77i ha sa7an de7ishe oolos.
2CO 5:3 Nuuni hessa ma7iya wode kallotoko.
2CO 5:4 Dunkaane daaniya ha sa7a asatethan nu de7ishe deexetidi oolos. Hayqiya nu asatethay de7on laametana mela salo asatethaa ma7anaw koyoosipe attishin, ashuwape shaaketanaw koyidi gidenna.
2CO 5:5 Nuna haysas giigisiday Xoossaa. Qassi sinthafe yaanabas oythi oothidi ba Ayyaana nuus immis.
2CO 5:6 Hessa gisho, nuuni ha sa7a asatethan de7iya wode ubban Godaape haakidi de7eysa erikoka ubba wode ammanetidi de7oos.
2CO 5:7 Nuuni de7ey ammanonape attishin, be7iyaban gidenna.
2CO 5:8 Nu ha sa7a asatethafe shaaketidi, nu soo bidi Godaara issife daanaw amotiya gisho, ammanetidi de7oos.
2CO 5:9 Hessa gisho, nu ha asatethan de7in woyko ha asatethafe shaaketin, nu amoy iya ufaysanaysa.
2CO 5:10 Nuuni issoy issoy ha sa7an de7ishe lo77o gidin woyko iita gidin, oothida oosuwas bessiya pirdaa ekanaw Kiristoosa pirda araata sinthan shiiqana.
2CO 5:11 Hiza, Godaa yashshi ay guusseko nuuni eriya gisho, asay nu odeysa ekana mela zoroos. Xoossay, nuuni ooneko nuna erees; qassi hinteka hinte kahan nu ooneko ereeta yaagada qopayis.
2CO 5:12 Wozanan gidonashin, malan ceeqetiya asaa doona oythanaw hinte nunan ceeqetana mela hintew gaaso gidanaw koyoosipe attishin, nu nuna zaaridi nashshanaw koyoko.
2CO 5:13 Nu gooshshi gidiko Xoossa bonchosa; wozanaama gidiko hintesa.
2CO 5:14 Issoy ubbaas hayqidaysanne ubbay qassi iyara hayqidaysa nu eriya gisho, Kiristoosa siiqoy nuna haarees.
2CO 5:15 De7on de7eysati hizape guye bantaw gidonashin, entaw hayqidaysasinne hayqope dendidaysas daana mela Kiristoosi asa ubbaa gisho hayqis.
2CO 5:16 Hizape guye, nuuni oonaka asa qofan pirdoko. Haysafe kase nuuni Kiristoosaka asa qofan be7idaba gidikoka, hizape hessada be7oko.
2CO 5:17 Hessa gisho, oonika Kiristoosan de7iko ooratha medhetethi; gal7a medhetethay aadhis; ubbayka oorathi gidis.
2CO 5:18 Hessa ubbaa Xoossay oothis. I Kiristoosa baggara nuna baara sigethis. Qassi harata baara sigethana mela nuus sigetho ooso immis.
2CO 5:19 Xoossay Kiristoosa baggara asa ubbaa baara sigethees. Enta nagaraa taybibeenna; qassi asaa baara sigethiya qaala nuus immis.
2CO 5:20 Xoossay asaa nu baggara xeegiya gisho, nu Kiristoosan kiitetidi asaa Xoossara sigetite gidi Kiristoosa gisho, woossoos.
2CO 5:21 Nuuni Xoossaa xillotethaa Kiristoosa baggara ekana mela, nagara eronna Kiristoosa nu gisho, nagarancho asada oothis.
2CO 6:1 Nuuni Xoossara issife oothiya asi gideysada, hinte ekida aadho keehatetha hada oothonna mela nu hintena woossoos.
2CO 6:2 Xoossay, “Ta nena si7ana woden si7as; atotetha gallasan nena maaddas” yaagees. Heko, ta si7iya wodey ha77i; atotetha gallasay hachi.
2CO 6:3 Oonika nu oosuwa borana melanne nunan dhubetana mela koyoko.
2CO 6:4 Gidoshin, nu tuma Xoossaa oosanchota gideysa nu oothiya ubbaban bessida. Daro gencan, waayen, meton, un7an,
2CO 6:5 garaafetethan, qashon, ixon kumida wocaman, daaburan, dhisko dhayon, xooman,
2CO 6:6 geeshshatethan, eratethan, danda7an, keehatethan, Geeshsha Ayyaanan, tuma siiqon,
2CO 6:7 tumaa odaninne Xoossaa wolqan nuuni iya oosanchota gideysa bessida. Qassi xillotethay nuus tooranne gondalle.
2CO 6:8 Nuuni bonchetidanne tooshetida; cayetidanne galatetida. Tumaa haasayoos, shin asay nuna wordancho gidoosona.
2CO 6:9 Nu asan eretida asi, shin eretonna asa mela gidida. Hayqidosona yaagetida, shin paxa de7oos; shocetida, shin hayqibooko.
2CO 6:10 Nuuni azzanikoka ubba wode ufaytoos. Nu manqo daanos, shin daro asaa dureyoos. Qassi aykoyka bayna asi daanos, shin ubbay nubaa.
2CO 6:11 Qorontoosa asato, nu hintew qoncen odida; nu uluwa hintena bessida.
2CO 6:12 Hinte nuna hinte siiquwa bessonna diggidetape attishin, nuuni nu siiquwa hintena diggibooko.
2CO 6:13 Aawu ba naytas odeysada ta hintew odayis; nu hintena nu uluwa bessidaysada, hinteka hinte uluwa nuna bessite.
2CO 6:14 Ammanonna asaara bessonna ogen waaxettofite. Xillotethasinne nagaras aybi gahetethi de7ii? Poo7osinne dhumas aybi issifetethi de7ii?
2CO 6:15 Kiristoosanne Xalahe issife gathiyabay aybee? Qassi ammaneysinne ammanonaysi issife koxiyabay aybee?
2CO 6:16 Xoossaa Keethas eeqatara aybi issifetethi de7ii? Xoossay, “Taani enta giddon de7ana, enta giddon hemetana. Taani enta Xoossaa gidana; entika ta ase gidana” gidaysada, nuuni de7o Xoossaa keethi.
2CO 6:17 Hessadaka, Goday, “Enta giddofe shaaketidi keyite; tuna gididaba bochofite; ta hintena ekana.
2CO 6:18 Ta hintew aawa gidana; hinte taw adde naytanne macca nayta gidana; yaagees Ubbaafe Wolqaama Goday” yaagis.
2CO 7:1 Hiza, ta siiqoto, ha ufaysay nuus de7iya gisho, nu ashuwanne nu shempuwa tunisiyaba ubbaafe nuna geeshshos. Xoossas yayyidi nu geeshshatetha polo oothoos.
2CO 7:2 Hinte uluwa nuna bessite. Nuuni oonaka naaqibooko; oonaka qohibooko; oonaka cimmibooko.
2CO 7:3 Taani hessa hinte bolla pirdanaw giike. Haysafe kase ta hintew odidaysada, hinte nu wozanan de7eeta; nu paxa de7inka hayqinka hintefe shaaketoko.
2CO 7:4 Ta odiyaba hintefe qotike; ta hintenan ceeqetayis; nu waaye ubban minettayis; qassi gita ufaysi ufaytayis.
2CO 7:5 Nuuni Maqedoone bida wode, ubba baggara waayetidaape attishin shempibooko. Karera morketan, nu gaathan yashshan un7etida.
2CO 7:6 Shin azzanidaysata minthethiya Xoossay, Tito yuussan nuna minthethis.
2CO 7:7 Nuna minthethiday Tito yuussaa xalaala gidonashin, hinteka iya minthethidaysa. Hinte tana laamoteysa, taw azzaneysanne taw qopeysa ta si7ida wode tana daro ufaysis.
2CO 7:8 Ta dabdaabey hintena azzanthikoka ayis xaafadinasha gada qiirotike. Ta qiirotiday ta xaafida dabdaabey hintena guutha wodes azzanthida gishosa.
2CO 7:9 Ha77i taani ufaytiday, ta hintena azzanthida gisho gidonashin, hinte azzanoy hintena hinte nagarape zaarida gishosa. Xoossay ba sheniyada hintena azzanthisipe attishin nu hintena aybinka qohibooko.
2CO 7:10 Xoossay koya azzanoy, atotethako gathiya nagarape simo ehees; iyan qiiroyabay baawa. Shin ha sa7a azzanoy hayqo ehees.
2CO 7:11 Hinte azzanoy hintenan ayfisida ayfiya be7ite. He azzanoy hintena ay mela denthethidako, ay mela zaaro immanaada giigisidaako, he ura bolla ay mela hanqethidaako, ay mela taw yayyana mela oothidaako, ay mela amoydako, he ura seeranaw ay mela giigidaako be7ite. Ha ubbaban hinte geeshshi gideysa markaydeta.
2CO 7:12 Hessa gisho, taani ha dabdaabiya hintew xaafiday, naaqida ura woyko naaqetida ura gisho gidenna. Shin hinte nuus ay mela qopiyako Xoossa sinthan hinte, hintena be7ana mela xaafas.
2CO 7:13 Nuuni ufaytiday hessa gishosa. Nu ufaysaafe aadhidi nuna daro ufaysiday, hinte Tito ufaysidaysanne iya wozanaa shempisidaysa.
2CO 7:14 Taani hintena nashshada iyaw odin, hinte tana yeellaybeketa. Shin nuuni ubba wode hintew tuma odida; hessadaka nuuni Tito sinthan hintena nashidaysi tuma gidis.
2CO 7:15 Hinte iyaw yashshan kokoridi, iya mokidaysa qassi iyaw ay mela kiitetidaako, I qopiya wode hintew de7iya siiqoy minnishe bis.
2CO 7:16 Taani ubbaban hintenan ammanetiya gisho ufaytayis.
2CO 8:1 Nu ishato, Xoossay Maqedoonen de7iya woosa keethatas immida aadho keehatethaba hinte erana mela nu koyoos.
2CO 8:2 Enti gita meton paacetidosona, shin enta ufaysay wolqaama. Enta manqotethas zawi baawa, shin banta imuwan daro keehidosona.
2CO 8:3 Enti banta wolqaa melanne banta wolqafe aadheysa dosidi immidaysas ta marka.
2CO 8:4 Enti Xoossa ase maaddiya lo77o ooso nuura oothanaw koydi nuna daro woossidosona.
2CO 8:5 Enti nuuni qopidaysafe aathidi oothidosona. Xoossa sheniyada, koyrottidi bantana Godaas immidosona; kaallidi, bantana nuus aathidi immidosona.
2CO 8:6 Ha lo77o oosuwa doomida Titoy, gujidi oothanaadanne hintena maaddidi, he oosuwa polisanaada iya woossida.
2CO 8:7 Shin hinte ubbaban, ammanon, odan, eratethan, gita amon, nuna dosoninne ubbaban duretidaysada ha lo77o oosuwanka hinte keeha gidana mela nu koyoos.
2CO 8:8 Taani hessa kiittanaw giike. Shin harata gita amuwa hinte siiquwara gatha be7ada, hinte ay keena tumeeko eranaw gayis.
2CO 8:9 Hinte, nu Godaa Yesuus Kiristoosa aadho keehatetha ereeta. Kiristoosi dure gidi uttidi, hinte iya manqotethan duretanaada hinte gisho manqis.
2CO 8:10 Taani ha odan hintena maaddiya zore zoranaw koyayis. Hinte zillaythi immanaw xalaala gidonashin, hessa oothanaw amotisheka hinte koyro.
2CO 8:11 Hinte oothanaw doomida oosuwa ha77i polite. Hinte hintew de7eysa keena immiko, hessi hinte immanaw daro amotteysa qoncisees.
2CO 8:12 Issi asi immanaw amotiko, iya imoy Xoossa sinthan eketey, I baw de7idaysa keena imminape attishin, baynabape immanaw un7etin gidenna.
2CO 8:13 Taani hessa gey, hinte ubbay issi gina gidana melasafe attishin, harati waayiyape shempin, hinte waayetana melasa gidenna.
2CO 8:14 Wode enta palahay hinte pacaa kunthana mela, ha77i hinte palahay enta pacaa kuntho. Hessan hinte gina gidana.
2CO 8:15 Geeshsha Maxaafan, “Daro shiishidaysas palahibeenna; guutha shiishidaysas pacibeenna” geetetidi xaafetidaysa mela.
2CO 8:16 Nuuni hintew qopeysada Titoyka hintew qopana mela oothida Xoossay galatetto.
2CO 8:17 Titoy hinteko biday, nuuni iya denthethida gisho xalaala gidonashin, I ba shenen baanaw amotida gishosa.
2CO 8:18 Wongela markatethan woosa keetha ubban daro eretida isha, nuuni Titora issife kiittoos.
2CO 8:19 Hessa bolla nuuni ha keeha imota efiya wode nuura baana mela, ha lo77o oosuwan Godaa bonchanawunne harata maaddanaw de7iya amuwa bessanaw I woosa keethatan dooretis.
2CO 8:20 Ha imetida keeha imuwa, nuuni ooso bolla peeshshiya wode boretonna mela naagetoos.
2CO 8:21 Nuuni Godaa sinthan xalaala gidonashin, asa sinthanka lo77o gididaba oothoos.
2CO 8:22 Qassi daro wode paacen minnidi aadhida nu ishaa, entara hinteko kiitida. I hintenan daro ammanetiya gisho, ha77i hintena maaddanaw daro amottees.
2CO 8:23 Titoba eranaw koyko, hintena maaddanaw taara oothiya ta ooso lagge. Hanko ishataba gidiko woosa keethati kiittidaysata; qassi asay enta duussa be7idi Kiristoosa bonchoosona.
2CO 8:24 Hessa gisho, woosa keethati hinte siiquwanne nu hintena nashiya nashoy tuma gideysa qoncisanaw hinte siiquwa ha asata bessite.
2CO 9:1 Ammaniya asaas kessiya miishiyaba ta hintew xaafanaw koshshenna.
2CO 9:2 Hinte maaddanaw keehi amotteysa ta erayis. Hinte Akaya asay, zillaythafe doomidi maaddanaw giigetidaysa taani Maqedoone asaas doona kunthada odas. Hinte gita amoyka entafe darota denthethis.
2CO 9:3 Ha oosuwan hintenan nu ceeqetiya ceeqoy hada gidonna mela koyro hintebaa ta odidaysada hinte giigetidi naagana mela ha ishata hinteko kiittas.
2CO 9:4 Maqedoone asay taara bidi, hinte giigetonna de7ishin, demmiko, nu hintenan yeellatana; qassi hinte nuupe aadho yeellatana.
2CO 9:5 Hessa gisho, ha ishati taape sinthatidi hinteko bidi, hinte immana gida imuwa kasetidi giigisana mela ta entana kiittas. Taani gakiya wode he imoy giigidi uttees. He wode he keehatetha imoy wolqan gidonashin, dosan gideysa erisees.
2CO 9:6 Haysa akeekite; guuthu zeriday guuthu cakana; daro zeriday daro cakana.
2CO 9:7 Xoossay ufaysan immiya uraa dosiya gisho, wolqan woyko dosi bayna gidonashin, issi issi asi ba wozanan qopidaysada dosan immanaw bessees.
2CO 9:8 Ubba wode ubbaban koshshiyaba ubbaa demmidi lo77o ooso ubbaa oothanaw danda7ana mela Xoossay hintew ba anjuwa darsana.
2CO 9:9 Geeshsha Maxaafan, “I ba shaluwa manqotas laallis; iya xillotethay merinaw de7ana” yaagees.
2CO 9:10 Zereysas zerethi, maanaw kathi immiya Goday, hinte zeriya zerethi darsidi immana. Hinte xillotetha ayfiyaka darsana.
2CO 9:11 Daro asay hinte immiya imuwa nuupe ekidi, Xoossaa galatanaada, hinte ubba wode darsidi immeyisata gidana mela Xoossay hintena ubba baggara dureyana.
2CO 9:12 Ha hinte immiya imoy ammaniya asaa pacaa kuntho xalaala gidonashin, asay Xoossaa galatanaw gaaso gidees.
2CO 9:13 Ha hinte oosoy hinte ammanuwa erisidi Kiristoosa Wongela hinte ammanidinne iyaw kiitetidi hintew de7iyaba entaranne haratara shaaketida gisho ubbay Xoossaa bonchana.
2CO 9:14 Xoossay hintew immida aadho keehatetha gisho enti hintew Xoossaa woossishe hintena be7anaw laamotosona.
2CO 9:15 Zawi bayna Xoossaa imuwas Xoossay galatetto.
2CO 10:1 Taani hintera de7iya wode, “Shugo”, qassi hintefe haakiya wode “Nu bolla minnees” yaagetida, Phawuloosi, keehanne ashke gidida Kiristoosa sunthan hintena woossayis.
2CO 10:2 Taani hinteko biya wode nu asho qofara simeretiya asi oothidi qopiya asaa bolla mino qaalan odetanaw qofa qachas. Hinte bolla hessada odetana mela hinte tana oothonnaada hintena woossayis.
2CO 10:3 Nuuni ha sa7an de7ikoka ha sa7aa asada oletoko.
2CO 10:4 Nu ola miishey ha sa7aba gidenna. Shin miixa laallanaw wolqara de7iya Xoossa toora. Tumaara eqetiya palamanne,
2CO 10:5 Xoossa eratetha bolla otoron dendiya palamanne hada qofa ubba laalloos. Asa qofa ubbaa di77idi Kiristoosas kiitetana mela oothoos.
2CO 10:6 Hinte kiitetethay polo gidiya wode nuuni kiitetetha ixo ubbaa seeranaw giigetana.
2CO 10:7 Hinte ayfey be7ida mela pirdeta. Oonika bana Kiristoosaba gidi qopiyaba gidiko, nuka Kiristoosaba gideysa ero.
2CO 10:8 Goday taw immida maatan ceeqetikoka hessan yeellatike. He maatay taw imetiday hintena dichanaasafe attishin, qohanaasa gidenna.
2CO 10:9 Taani ta dabdaabiyan hintena yashisanaw koyada xaafidaba daanopo.
2CO 10:10 Issi issi asay, “Phawuloosa dabdaabey deexonne wolqaama, shin iya som7on be7iya wode I daaburancho; iya odayka pathenna” yaagosona.
2CO 10:11 He asati nu haahon de7ishe xaafiya dabdaabiyaninne matan hintera de7ishe oothiya oosuwa giddon dummatethi baynaysa akeeko.
2CO 10:12 Nuuni bantana nashshiya asatara nuna ginayanaw woyko gaaddeyanaw koyoko. Shin enti bantana bantara ginayidi woyko gaaddeyidi be7ishe eeya.
2CO 10:13 Shin nuuni Xoossay nuus immida dhassan ceeqetoosipe attishin, zawa pinnidi ceeqetoko; he zaway hintekoka gakees.
2CO 10:14 Nuuni besseysafe aathidi ceeqetoko, shin Kiristoosa Wongela hinteko gathidaysan ceeqetoos.
2CO 10:15 Nuuni Xoossay essida zawape pinnidi, harati oothida ooson ceeqetoko. Gidoshin, hinte ammanoy diccana mela Xoossay immida zawan hinte giddon nu oothiya oosoy dalgana gidi qopoos.
2CO 10:16 Nuuni hara asi ba zawan oothida ooson gelidi ceeqetoko, shin hintefe pinnidi haratas Wongela markatanaw danda7oos.
2CO 10:17 Shin, Geeshsha Maxaafan, “Ceeqiya ubbay Godaa lo77otethan ceeqo” yaagidi xaafetis.
2CO 10:18 Goday nashshiya uraape attishin, bana baw nashshiya uray nashetenna.
2CO 11:1 Ta guutha eeyatetha hinte ha77ika danda7ana gada qopayis; hayyana danda7ite.
2CO 11:2 Xoossay hintew qopidaysada, taka hintew qopayis. Taani hintena geeshsha geela7ida issi addiya, Kiristoosas immanaw oycha wothas.
2CO 11:3 Shin shooshay ba geniyan Hewaanno balethidaysada ooni eri hinte wozanay iitidi Kiristoosas de7iya hinte suuretethaanne geeshshatetha aggandeti gada hirgayis.
2CO 11:4 Issi asi yidi, nuuni hintew markatida Yesuusape hara Yesuusa hintew markatiko, woyko hinte ekida Ayyaanapenne Wongelape hara ayyaananne Wongela hintew odiko, si77i gidi ekeeta.
2CO 11:5 Shin taani Yesuusi kiitida “Gita hawaareta” geetetidi xeegeteysatape guuxayis gada qopike.
2CO 11:6 Taani oda eronna asi gidikoka, eratethi taw de7ees. Hessa ta hintew daro ogen qoncisas.
2CO 11:7 Taani miishe oychonna Xoossaa Wongela hintew coo odidaysinne hintena dhoqu oothada tana toochidaysi taw nagara gidii?
2CO 11:8 Taani hintew oothanaw hara woosa keethatape miishe bonqa ekas.
2CO 11:9 Ta hintera de7iya wode tana metinka hintefe issi asika waaysabike. Maqedoonepe yida ammaneysati tana koshshiyaba ubban maaddidosona. Hachi gakanaw ta hintew tooho gidabike sinthaska tooho gidike.
2CO 11:10 Kiristoosa tumatethay tanan de7ishin, ta ceequwa Akaya biittan tana oonika diggenna.
2CO 11:11 Ta haysa ayis gayna? Hintena dosonna gishoyee? Taani hintena doseysa Xoossay erees.
2CO 11:12 “Nuka hinte mela oothoos” yaagidi ceeqiya hanko hawaareta ceequwa gaasuwa dhaysanaw ha77i ta ootheysa sinthaska oothana.
2CO 11:13 Haysa mela asati Kiristoosa hawaare daananaw bantana laammiya wordancho hawaaretanne cimmiya oosanchota.
2CO 11:14 Hessi malaalsiyaba gidenna; ayis giiko, Xalahey poo7o kiitancho daananaw bana laammees.
2CO 11:15 Hessa gisho, Xalahe oosanchoti xillotethaa oosanchota daananaw bantana laammiko hessi gitaba gidenna. Enti wursethan banta oosuwada ekana.
2CO 11:16 Oonika tana eeya gidi qoponna mela zaaradaka odayis. Ta hintew eeya daanikoka ta guuthara ceeqetana mela tana eeya oothidi ekite.
2CO 11:17 Taani haysada ceeqetada odetey, Goday koyeysada gidonashin, eeyatethan odayis.
2CO 11:18 Daro asay ha sa7aban ceeqetiya gisho, taka ceeqetana.
2CO 11:19 Hinte wozanaama gidiya gisho, eeya asaba ufaysan danda7eeta.
2CO 11:20 Oonika hintena aylleyiko woyko hintena bonqiko woyko baw maadetanaw hinteko shiiqiko woyko hinte bolla otortiko woyko hintena baqiko hinte danda7eeta.
2CO 11:21 Nuuni hessa oothanaw daro daaburancho gideysa yeellatashe ta odayis. Shin oonika minnidi ceeqetiko, taka ceeqetanaw minnayis. Taani hessa eeya asada odetayis.
2CO 11:22 Enti Ibraawee? Taka Ibraawe. Enti Isra7eelee? Taka Isra7eele. Enti Abrahaame sheeshee? Taka Abrahaame sheeshi.
2CO 11:23 Enti Kiristoosa oosancho? Taani gooshsha asada odayis, entafe aadhiya Kiristoosa oosancho. Taani ooson daro daaburas; daro wode qashetas; garaafetas; daro wode hayqope attas.
2CO 11:24 Ayhudeti tana hastamanne uddufuna ichashu toho garaafidosona.
2CO 11:25 Heedzu toho xam7an shocetas; issi toho shuchan cadetas; markabey heedzu toho me77is; abba giddon issi qamma kumethi aqada pee7as.
2CO 11:26 Taani daro ogiya daaburan hemetas. Kixa haathafenne pangafe attas. Ayhudetinne Ayhude gidonna asay ta bolla meto gathidosona. Katamay, bazzoy, abbay, tana yashshis; ammaniya daaniya asati tana waaysidosona.
2CO 11:27 Taani ooson daaburasinne cawatas, daro toho dhisko dhayas, koshatas, saamotas, daro toho xoomas, meegetas, kallotas.
2CO 11:28 Haraba ubbaa taybonna ubba wode tana qofisey woosa keethatabaa.
2CO 11:29 Issi asi daaburiya wode iyara ta daaburabikina? Issi asi nagaran dhubetiya wode ta awude qiirotonna aggadina?
2CO 11:30 Ta ceeqetanaw koshshiyaba gidiko taani daaburancho gideysa erisiyaban ceeqetana.
2CO 11:31 Merinaw bonchetida Xoossay, nu Godaa Yesuus Kiristoosa Aaway, ta wordotonnaysa erees.
2CO 11:32 Damasqo kataman kawa Arisxoosape garsara haareysi tana oythanaw koyidi Damasqo katamaa pengiya naagisis.
2CO 11:33 Shin asay tana daachon yeggidi, katamaa dirsaa maskootiyara wodhisin taani iya kushiyape attas.
2CO 12:1 Ceeqetethas go77i baynaysa erayis. Shin ceeqetanaw koshshiko, Godaape ekida qoncethan ceeqana.
2CO 12:2 Tammanne oyddu laythafe kase, Kiristoosa ammaniya issi uray heedzantho saluwa bidaysa ta erayis. He uray ashon woyko ashope karera bidaako ta erike; Xoossay erees.
2CO 12:3 He uray heedzantho saluwa eketidaysa erayis. Shin I ashon woyko ashope karera eketidaako ta erike; Xoossay erees.
2CO 12:4 He uray gannate eketidi asi qoncisanawunne asi odanaw danda7onnaba si7is.
2CO 12:5 Taani he addiyaban ceeqetana, shin taani ta daaburaape attishin, tanan ceeqetiyabay baawa.
2CO 12:6 Taani tumaa odetiya gisho, ceeqetanaw koykoka eeya gidike. Shin asi ta ootheysa be7eysafenne si7eysafe aathidi qoponna mela gada ceeqetethi aggayis.
2CO 12:7 Taw qoncida gita qoncethan ta otortonna mela tana waaysanaw ta ashuwan caddiya Xalahiya kiitanchoy taw imetis.
2CO 12:8 Ha waaysiyaba taape diggana mela taani Godaa heedzu toho woossas.
2CO 12:9 Shin Goday, “Ta wolqay ne daaburan qonciya gisho ta aadho keehatethay new gidana” yaagis. Kiristoosa wolqay tanan qoncana mela ta daaburan ufaytashe ceeqetayis.
2CO 12:10 Taani Kiristoosa gisho, daaburiya wode cayetiya wode waayetiya wode goodetiya wode metootiya wode ta daaburan ufaytayis. Ayis giiko, ta daaburiya wode, he wode minnayis.
2CO 12:11 Taani eeya asada ceeqetas. Hessada ta ceeqetana mela oothiday hintena. Ta, ta huuphen eretonna asi gidikoka, “Gita hawaareta” geeteteysatape guuxike. Hessa taw markatanaw bessey hintenashin.
2CO 12:12 Ta hinte giddon de7ashe danda7an oothida malaatatinne mallati ta tuma hawaare gideysa bessoosona.
2CO 12:13 Ta hintew tooho gidonaysafe attishin, hara woosa keethatape hinte aybin guuxidetii? Hessi bala gidiko tana maarite.
2CO 12:14 Taani hinteko baanaw giigetishin haysi taw heedzantho. Ta hintenape attishin, hintew de7iyaba koyonna gisho hintena waaysanaw koyke. Yelidaysati banta naytas shalo minjoosonape attishin, nayti bantana yelidaysatas shalo minjokona.
2CO 12:15 Ta hinte gisho, taw de7iyabaanne tana aatha imminka tana ufaysees. Yaatin, taani hintena hessada keeha siiqiya wode hinte tana guuthara siiqetii?
2CO 12:16 Gidikoka, ta hintew tooho gidike; waaysabike; shin hintena cimoninne genen oykidaba hintew daanonna aggenna.
2CO 12:17 Hari attoshin, ta hinteko kiitida asatape hintena cimmida asi de7ii?
2CO 12:18 Titoy hinteko baana mela taani woossas; qassi ammaniya ishaaka iyara yeddas. Yaatin, Titoy hintena cimmidee? Nuuni nu oosuwa issi ayyaanan oothibooko? Qassi nu hanoyka issino gidennee?
2CO 12:19 Nu ubba wode hinte sinthan nuna xillisanaw mootetiyaba hintew daanii? Nu Kiristoosan de7idi Xoossaa sinthan ha77i gakanaw odoos. Nu siiqo ishato, nu ha ubbaa oothey hintena dichanaasa.
2CO 12:20 Ta hinteko biya wode ooni eri hinte ta koyeysada hanonna, qassi taka hinte koyeysada hanonna gahetonna aggoko gada yayyayis. Qassi ooni eri hinte giddon palami, qanaatey, hanqoy, yiiqey, zigirsi, asa sunthu iisoy, otoroynne kachi doonna aggenna gada yayyayis.
2CO 12:21 Taani nam7antho hinteko biya wode Xoossay hinte sinthan tana kawushana gada yayyayis. Kase nagara oothidi he banta oothida tunatethaafe, laymatethafenne yeellayiya oosuwape simmiboonna asata be7ada azzanonna aggike gada yayyayis.
2CO 13:1 Ta hinteko bishin haysi heedzantho. Ay mootoyka nam7u woyko heedzu markan minnees.
2CO 13:2 Taani nam7antho hintera gahetida wode hinte giddon kase nagara oothida uraanne harata ubbaa seeronna aggike gada oda wothas. Ha77i ta haakada de7ikoka simmada hinteko biya wode oodeska qadhetike.
2CO 13:3 Tanan de7idi odey Kiristoosa gideysa hinte eranaw koyeeta. I hintera haasaya wode wolqaamape attishin, hinte giddon daaburancho gidenna.
2CO 13:4 Kiristoosi masqale bolla daaburan kaqetis, shin Xoossa wolqan de7on de7ees. I daaburancho gididaysada, nuka daaburancho. Shin hintena haggaazanaw Xoossaa wolqan iyara de7on daana.
2CO 13:5 Ammanon minnidi de7iyako hintena hintew paacidi be7ite. Paacen hinte kundonna attiko, Kiristoosi hintenan de7eysa hinte ereeta. Shin Kiristoosi hintenan doonna ixiko hinte kundeeta.
2CO 13:6 Nuuni paacen kundonaysa hinte ereeta gada ammanayis.
2CO 13:7 Hinte iitabaa oothonna mela nuuni Xoossaa woossoos. Nuuni mino gideysa asay be7ana mela gidonashin, nuuni mino gidonna ixikoka, hinte lo77o oothana mela nuuni woossoos.
2CO 13:8 Nuuni tumaas oothoosipe attishin, tumaara eqetiyaba aybaka oothoko.
2CO 13:9 Nu daaburiya wode hinte qassi minniya wode nuna ufaysees. Hinte borey baynayisata gidana mela nu hintew Xoossaa woossoos.
2CO 13:10 Taani hintefe haakada de7ashe xaafiday hessa gishosa. Taani hinteko biya wode Goday taw immida maatan zempada hinte bolla godatanaw koyke. Goday taw maata immiday, hintena maaddanaasafe attishin, qohanaasa gidenna.
2CO 13:11 Wursethan ta ishato, saro de7ite. Borey bayna de7ite; ta zoriya si7ite. Issi wozanan gididi de7ite; sarotethan de7ite. Siiqonne saro immiya Xoossay hintera gido.
2CO 13:12 Geeshsha yeeretethi yeeretishe, issoy issuwa sarothite.
2CO 13:13 Xoossaa asa ubbay hintena saro saro yaagosona.
2CO 13:14 Godaa Yesuus Kiristoosa aadho keehatethay, Xoossaa siiqoy, Geeshsha Ayyaana issifetethay hinte ubbaara gido.
GAL 1:1 Asape woyko asa baggara gidonashin, Yesuus Kiristoosapenne iya hayqope denthida Xoossaa Aawape hawaare gidana mela kiitetida ta Phawuloosi,
GAL 1:2 taara de7iya ammaniya ishati ubbay, Galatiyan de7iya woosa keethatas kiitida kiitaa.
GAL 1:3 Xoossay nu Aawaynne nu Godaa Yesuus Kiristoosi hintew aadho keehatethaanne sarotethaa immo.
GAL 1:4 Ha iita wodiyape nuna ashshanaw, nu Xoossaa, nu Aawa shenen Kiristoosi nu nagara gisho bana aathidi immis.
GAL 1:5 Xoossaas Merinaape merinaa gakanaw bonchoy gido. Amin7i.
GAL 1:6 Kiristoosa aadho keehatethan hintena xeegida Xoossaa aggidi, hara Wongelako, hinte ellesidi, waanidi simmidaako tana malaalsees.
GAL 1:7 Hintena balethanawunne Kiristoosa wongela wobbisanaw koyiya guutha asati de7oosonape attishin, tuma Wongelay issino.
GAL 1:8 Shin nuna gidin woyko salo kiitancho gidin nuuni hintew koyro odida Wongelape dummatiya hara Wongela hintew odiyaba gidiko, I baadetidaba gido.
GAL 1:9 Haysafe sinthe nuuni gidaysada ha77ika zaarada gayis. Hinte ekida Wongelape dummatiya Wongela oonika hintew odiko he uray baadetidaba gido.
GAL 1:10 Yaatin, tana asi nashshana mela koyaanayee? Woyko Xoossi nashshana mela koyayna? Woyko ta ase ufaysanaw koyayna? Ta ase ufaysanaw koyaba gidiko, Kiristoosa aylle gidike.
GAL 1:11 Ta ishato, ta hintew odida Wongelay asape gidonnaysa hinte erana mela ta koyayis.
GAL 1:12 Taw ha Wongela Yesuusi Kiristoosi qoncisisipe attishin, asape ekabike woyko asi tana tamaarsibeenna.
GAL 1:13 Ta kase Ayhude ammanon de7iya wode waana de7idaako, hinte si7ideta. Ta woosa keethaa qadhey bayna gooddanawunne dhaysanaw baaxetas.
GAL 1:14 Ayhude ammano naagon, ta woden de7iya Ayhude ishatape aadhayis. Nu aawata wogaas aadhada mishetayis.
GAL 1:15 Shin ta buroo ta aaye ulon de7ishin Xoossay tana dooris; ba aadho keehatethan tana xeegis.
GAL 1:16 Ayhude gidonna asaas Wongela odana mela Xoossay ba Na7aa taw qoncisida wode ta ooderaka zorettabike.
GAL 1:17 Woyko taape sinthe hawaare gididaysatara gahetanaw Yerusalaame babike. Shin ta kasetada Arabe biitta bas; hessafe simmada Damasqo katamaa yas.
GAL 1:18 Heedzu laythafe guye, Phexroosara gahetanaw Yerusalaame bada iyara tammanne ichashu gallas uttas.
GAL 1:19 Shin Godaa ishaa Yayqoobape attishin, hanko hawaareta be7abike.
GAL 1:20 Ta hintew xaafiydaysi wordo gidonnaysa Xoossaa sinthan hintew qoncisayis.
GAL 1:21 Hessafe guye, taani Soore biittanne Kilqiya biitta bas.
GAL 1:22 Yihudan de7iya woosa keethaa asay tana be7idi eribookona.
GAL 1:23 Shin enti, “Kase nuna gooddiya uray, ha77i he I dhaysanaw koyiya ammanuwaba sabbakees” yaageysa si7idosona.
GAL 1:24 Si7ida ubbay ta gaason Xoossaa galatidosona.
GAL 2:1 Tammanne oyddu laythafe guye, Barnabaasara zaarada Yerusalaame bas. He wode Tito taara ekada bas.
GAL 2:2 Xoossay taw qoncisida qoncethan yaa bada Ayhude gidonna asaa giddon ta sabbakiya Wongela entaw qoncisas. Kase ta woxida wothaynne ha77ika ta woxiya wothay hada gidonna mela gada kaaletheyisata dumma shiishada entaw odas.
GAL 2:3 Hari attoshin, taara de7iya Titoy Girike asi gidikoka, qaxareto gidi un7ethibookona.
GAL 2:4 Gidoshin, ammaniya ishata daanidi nu giddo gelida issoti issoti I qaxaretana mela koydosona. He asati Kiristoos Yesuusan nuus de7iya la77atetha wochidi be7anaw geeman nu giddo gelidi zaaridi nuna aylle oothanaw koyoosona.
GAL 2:5 Shin tuma Wongelay hintenan minnidi daana mela nuuni hari attoshin, guutha wodeska entaw kushe immibooko.
GAL 2:6 Shin halaqa daaniya asata oonatethay taw aykoka gidenna. Xoossay asa som7o be7idi pirdenna. Ha asati ta markatiya Wongela bolla gujidabay baawa.
GAL 2:7 Shin Phexroosi, Ayhudetas Wongela odana mela Xoossay iyaw hadara immidaysada tawuka Ayhude gidonna asaas Wongela odiya hadara immidaysa enti guyepe be7idosona.
GAL 2:8 Hiza, Phexroosi Ayhudeta hawaare gidana mela oothida Xoossay, taka Ayhude gidonna asaas hawaare gidana mela oothis.
GAL 2:9 Qassi tuussu daanidi bentiya Yayqoobi, Phexroosinne Yohaanisi, taw imetida aadho keehatetha be7ida wode nuura issifidaysa qoncisanaw ta kushiyanne Barnabaasa kushiya oykidosona. Nuuni Ayhude gidonna asaako, qassi enti Ayhude asaako baanaw giigidosona.
GAL 2:10 Enti nuna minthidi hadara giday, nuuni manqotas qopanaysa. Kaseka ta hessa oothanaw amottayis.
GAL 2:11 Phexroosi Anxooke katamaa yida wode I balida gisho taani iya som7on “Neeni baladasa” gas.
GAL 2:12 Yayqoobi kiitida guutha asay yaanape sinthe I Ayhude gidonna asaara mees, shin enti yidaape guye, “Ayhude gidonna asaape ammanidaysati qaxaretanaw bessees” giya asaas yayyidi entafe shaaketis.
GAL 2:13 Qassi hanko ammanida Ayhudeti Phexroosa hanuwa kaallidosona. Hari attoshin, Barnabaasika iya qofan gooshetis.
GAL 2:14 Shin enti Wongela tumatethan suure hemetonnaysa be7ada, Phexroosa asa ubbaa sinthan, “Neeni Ayhude gidashe, Ayhude wogaatho gidonashin, Ayhude gidonna asada de7aasa; yaatin, waanada Ayhude gidonnayisata, ‘Ayhude wogan de7ite gada wolqatay?’ ” yaagas.
GAL 2:15 Nuuni yeletan Ayhude, shin nagarancho gidida Ayhude gidonna asaa mela gidoko.
GAL 2:16 Shin asi Yesuus Kiristoosa ammanidi xilleesipe attishin, higge naagidi xillonnaysa eroos. Oonika higge naagidi xillonna gisho, nuka higge naagidi gidonashin, Kiristoosan ammanidi xillana mela Kiristoosi Yesuusa ammanida.
GAL 2:17 Nu Ayhudetika Kiristoosa baggara xillanaw koshshees. Hessa gidiko nuka hara asada nagarancho gideysa be7oos. Yaatin, nu nagara oothana mela denthethey Kiristoosa guusseyee? Ubbaka gidenna!
GAL 2:18 Hiza, ta laallidaysa zaarada keexiyaba gidiko taani ta huuphen higge mentheysa gideysa qoncisayis.
GAL 2:19 Taani Xoossaas daana mela higge baggara higges hayqas.
GAL 2:20 Taani Kiristoosara masqaliya bolla kaqetas. Taani hizape taw de7ike, shin Kiristoosi tanan de7ees. Ta ha77i de7iya de7oy, tana dosidi ta gisho bana aathidi immida Xoossaa Na7aa ammanada de7ayis.
GAL 2:21 Taani Xoossaa aadho keehatetha hada oothike. Xillotethi asas higge baggara bentiyaba gidiyako, Kiristoosi coo hayqis guussu.
GAL 3:1 Hinteno, akeeki bayna Galatiya asato, hinte ayfiya sinthan Kiristoosi masqale bolla kaqetida misileda qoncidi bentees. Yaatin, tumaas hinte kiitetonna mela hintena bitiday oonee?
GAL 3:2 Ta issiba eranaw koyayis; hinte Geeshsha Ayyaana ekiday higge naagidiye woyko hinte si7ida Wongela ammanidi ekidetii?
GAL 3:3 Hinte hessa mela eeyee? Hinte Xoossaa Ayyaanan doomidi, ha77i wolqan polanaw koyeetii?
GAL 3:4 Hinte Wongela gaason daro waayetiday melee? He waaye ubbay coo gididee?
GAL 3:5 Xoossay hintew Geeshsha Ayyaana immeynne hinte giddon malaatata oothey, hinte higge naagida gishoye woyko Wongela si7idi ammanida gisho?
GAL 3:6 Ane Abrahaame be7ite, “I Xoossaa ammanis; Xoossay iyaw hessa xillotethi oothidi ekis” geetetidi xaafetis.
GAL 3:7 Hiza, ammaneysati Abrahaame nayta gideysa erite.
GAL 3:8 Xoossay Ayhude gidonna asaa ammanon xillisanaysa Geeshsha Maxaafay be7idi, “Kawotetha ubbay nenan anjetana” yaagidi, Wongela Abrahaames kasetidi odis.
GAL 3:9 Hessa gisho, ammaniya ubbay ammanida Abrahaamera issife anjetidosona.
GAL 3:10 Higge naagidi xillana giya oonika baadetidaysa. Ayis giiko, Geeshsha Maxaafan, “Higge maxaafan xaafetida ubbaa naagonna oonika baadetidaysa gido” geetetidi xaafetis.
GAL 3:11 “Xilloy ammanon daana” geetetidi xaafetida gisho, oonika Xoossaa sinthan higge naagidi xillonnaysi eretidaba.
GAL 3:12 Higgey ammanon zempenna. Shin, “Higgiya naagiya oonika higgiyan de7on daana” yaagees.
GAL 3:13 “Mitha bolla kaqetidi hayqiya oonika baadetidaysa” geetetidi xaafetida gisho, Kiristoosi nu gisho baadetidaysa gididi, nuna higge baadethafe wozis.
GAL 3:14 Xoossay Abrahaames immida anjoy, Yesuus Kiristoosa baggara Ayhude gidonna asaa gakana melanne Xoossay immana gida Geeshsha Ayyaana nuuni ammanon ekana mela hessa oothis.
GAL 3:15 Ta ishato, ta hintew asa de7on meeze gididi de7iyaba leemiso oothada odayis. Asi caaqida caaqoy minnidaape guye, oonika he caaquwa shaaranaw woyko iya bolla haraa gujanaw danda7enna.
GAL 3:16 Xoossay he keeke qaala Abrahaamesinne iya zerethaas immis. Geeshsha Maxaafay, daro asas odiyada, “Ne zerethatas” geenna. Shin issi asas odiyada, “Ne zerethaas” yaagees; ika Kiristoosa.
GAL 3:17 Taani gey haysa; oyddu xeetanne hastamu laythafe guye imetida higgey, koyro Xoossay minthida caaquwa shaaridi ufaysa qaala dhaysanaw danda7enna.
GAL 3:18 Xoossay immiya laatay higgen eketiyaba gidiyako Xoossay immida ufaysaa baggara gideysi attees. Shin Xoossay ba aadho keehatethan laata Abrahaames ufaysa qaala baggara immis.
GAL 3:19 Yaatin, higgey ayis imetidee? Higgey imetiday, Abrahaames ufaysa qaali imetida kochay yaana gakanaw iita oosoy aybeko erisanaasa. Higgey kiitanchota baggara imetidi, giddo gididi sigethiya issi asa baggara ooso bolla pee7is.
GAL 3:20 Giddo gididi sigethiya uray issi asa xalaalas gidenna, shin Xoossay issino.
GAL 3:21 Yaatin, higgey Xoossaa ufaysa qaalara eqetiyee? Akay, gidenna! Higgey imetiday asas de7o immanaw gidiyako, xillotethi higge baggara bentanashin.
GAL 3:22 Shin Yesuus Kiristoosa ammanin bentiya ufaysa qaalay ammaneysatas imetana mela kumetha alamey nagaras haaretidi de7eysa Geeshsha Maxaafay odees.
GAL 3:23 Shin ammanoy yaanape kase higgey nuna qachi wothis. He ammanoy qoncana gakanaw higgey nu bolla gordi wothis.
GAL 3:24 Hessa gisho, nuuni ammanon xillana mela Kiristoosi yaana gakanaw higgey na7a naagiya asa mela nuna naageysa gidis.
GAL 3:25 Shin ha77i ammanoy yida gisho, higgey hizape guye na7a naagiya asa mela nuna naageysi attis.
GAL 3:26 Hinte ubbay Yesuus Kiristoosa ammanidi Xoossaa nayta gidideta.
GAL 3:27 Kiristoosara issino gidanaw xammaqetida ubbay Kiristoosa ma7oda ma7ideta.
GAL 3:28 Hinte ubbay Kiristoosan issino gidiya gisho, Ayhude asaa giddoninne Girike asaa giddon, aylle giddoninne womaanno giddon, adde giddoninne maccasa giddon dummatethi baawa.
GAL 3:29 Hiza, hinte Kiristoosaba gidiko hinte Abrahaame zare. Xoossaa ufaysa qaalada hinte laatteyisata.
GAL 4:1 Ta geysi haysa. Laattey na7aa gidi de7ishe, shalo ubbay iyabaa gidikoka, I ayllefe aykoka dummatenna.
GAL 4:2 Shin iya aaway gida wodey gakanaw I hadara ekidaysata kusheninne naageysata kushen de7ees.
GAL 4:3 Hessadaka, nuuni na7atethan de7iya wode alamiya wogaas aylletidi de7ida.
GAL 4:4 Shin wodey gakida wode Xoossay higgefe garsan, maccasape yeletida ba na7aa kiittis.
GAL 4:5 I hessa oothiday, higges haaretidi de7eyisata wozanawunne nuna ba nayta oothanaasa.
GAL 4:6 Nu Xoossaa nayta gidiya gisho, “Abbaa, Aawaw” gidi xeegiya ba Na7aa Ayyaana nu wozanaa giddo kiittis.
GAL 4:7 Hessa gisho, hizape neeni Xoossaa na7ape attishin, aylle gidaka. Neeni iya na7a gidiko, Xoossaa laatteysa gidadasa.
GAL 4:8 Hinte kase Xoossaa eronna wode xoosse gidonaysatas aylle gididi haaretideta.
GAL 4:9 Shin ha77i hinte Xoossaa erideta; ubbaraka Xoossan eretideta. Yaatin pathonnanne go77onna alame wogatako guye waanidi simmetii? Wodhi eqidi, waanidi entaw aylle gidanaw koyeetii?
GAL 4:10 Dumma gidida gallasata, ageenata, wodetanne laythata hinte loythi boncheta.
GAL 4:11 Tana hintebay yashshees; ta hintew coo daaburadinasha?
GAL 4:12 Ta ishato, ta hinteda hanida gisho, hinteka taada hanite gada hintena woossayis. Hinte tana aybinka qohibeeketa.
GAL 4:13 Taani koyro hargetashe hintew Wongela odidaysa hinte ereeta.
GAL 4:14 Ta hargey hintew paace gidikoka, tana saletibeketa; ixibeketa. Shin tana Xoossaa kiitancho woyko Kiristoos Yesuusa mokeysada mokideta.
GAL 4:15 Yaatin, he hintew de7iya ufaysay ubbay aw bidee? Hintew danda7etidaako, hinte taw, hinte ayfiya kessidi immiyako ixonnaysa ta markatayis.
GAL 4:16 Yaatin, ta hintew tuma odida gisho hintew morke gidadinaayee?
GAL 4:17 He asati hintena bantako zaaranaw koyoosona, shin enta qofay lo77osa gidenna. Enta qofay hintena shaakanaasanne hinte entaw qopana mela oothanaasa.
GAL 4:18 Lo77oba oothanaw amotiko lo77o, shin hessi ta hintera de7iya wode xalaala gidonashin ubba wode gido.
GAL 4:19 Ta siiqo nayto, Kiristoosi hintenan misiletana gakanaw maccasi yelos iqeteysada ta hinte gisho iqetayis.
GAL 4:20 Hintebay taw haddin ta un7etas; ha77i hinte giddon ta bentada shenetada odiyako ay mela dosaynashin.
GAL 4:21 Muse higgen haaretidi daanaw koyeysato, ane taw odite; higgey ay giyako ereketii?
GAL 4:22 Geeshsha Maxaafay, “Abrahaames gadhindefenne godatefe yeletida nam7u nayti de7oosona” yaagees.
GAL 4:23 Gadhinde na7ay asi na7a yeliya maaran yeletis, shin godate na7ay Xoossaa ufaysa qaalan yeletis.
GAL 4:24 Ha maccasati nam7u caaqotas leemiso gididi eketoosona. Entafe issinniya, Siina zumaape yidaara, ba nayta aylletethas yelasu; iyaka Aggaaro.
GAL 4:25 Aggaara Arabe biittan de7iya Siina zuman leemisetada ha77i de7iya Yerusalaame daanawusu. Ayis giiko, iya ba naytara aylletethan de7awusu.
GAL 4:26 Shin salon de7iya Yerusalaamey aylletethan de7uku; iya nu ubbaas aayo.
GAL 4:27 Geeshsha Maxaafay, “Naatte, yelonna maynthete ufayta; naate iqeta eronnaare ilila. Azinara de7iya maccaseepe, azini bayna maccasees nayti daro” yaagees.
GAL 4:28 Ta ishato, hinte Yisaaqada Xoossaa ufaysa qaalan yeletida nayta.
GAL 4:29 Shin he wode asa maarada yeletidaysi, Ayyaana wolqan yeletidaysa goodis. Hachika hessa mela.
GAL 4:30 Shin Geeshsha Maxaafay woygii? “Gadhinde na7ay godate na7aara issife laattonna gisho, aylliw I na7aara wolla kessa yedda” yaagees.
GAL 4:31 Hessa gisho, ta ishato, nuuni godate naytape attishin, gadhinde nayta gidoko.
GAL 5:1 Nuuni la77atethan daana mela Kiristoosi nuna aylletethaafe kessis. Hiza, minnidi eqite; zaaridi aylletetha qambaran gelopite.
GAL 5:2 Ta, Phawuloosi, geysa si7ite. Hinte qaxaretanaw koyko, Kiristoosi hintena aykoka maaddenna.
GAL 5:3 Qaxaretiya oonika higgey kiittiya ubbaa polanaw besseysa gujada ta odayis.
GAL 5:4 Higge naagidi xillanaw koyeysato, Kiristoosape shaaketideta; Xoossaa aadho keehatethaafe kundideta.
GAL 5:5 Shin nuuni Xoossaa Ayyaana baggara ammanon xillanaw ufaysan naagoos.
GAL 5:6 Hiza, Kiristoos Yesuusan de7iko, siiqon qonciya ammanope attishin, qaxaretin, qaxaretonna aggin nuna aykoka maaddenna.
GAL 5:7 Kase hinte lo77o woxeeta, shin ha77i tumaas kiitetonna mela hintena diggiday oonee?
GAL 5:8 Haysa mela iita cimoy hintena xeegida Xoossaafe yibeenna.
GAL 5:9 Hessika, “Guutha irshoy munuqa ubbaa denthees” geetetidi xaafetidaysa mela.
GAL 5:10 Hintew hara qofi baynaysas ta Godan ammanetayis. Shin hintena buqiya oonika Xoossafe ba pirdaa ekana.
GAL 5:11 Ta ishato, ta ha77i gakanaw qaxararetethi sabbakiyaba gidiko, yaatin tana ayis gooddona? Hessi tuma gidiyako Kiristoosa masqaliyaba tamaarsoy asas dhube gidennashin.
GAL 5:12 Hintena buqeysati qaxaretetha xalaala gidonashin, bantana qaaratiyakoka ta dosayis.
GAL 5:13 Ta ishato, hinte la77a daanaw xeegetideta. Gidoshin, hinte la77atethay asho amo polanaw hintew gaaso gidopo; hessafe aathidi issoy issuwa siiqon maaddite.
GAL 5:14 Higge ubbay, “Ase needa dosa” giya issi qaalan qashetis.
GAL 5:15 Shin hinte issoy issuwara saxetiyabaanne meetetiyabaa gidiko, hinte woli wursonna mela naagetite.
GAL 5:16 Hiza, ta hintew odayis; Ayyaanan de7ite; hinte asho amuwa polopite.
GAL 5:17 Asho amoy Ayyaana amuwara morke; qassi Ayyaana amoyka asho amuwara morke. Enti issoy issuwara ixetiya gisho hinte dosiyaba oothanaw danda7eketa.
GAL 5:18 Shin Ayyaanay hintena kaalethiyaba gidiko higgey hintena haarenna.
GAL 5:19 Asho oosoti eretidaysata; entika, laymatethi, tunatethi, qayxe,
GAL 5:20 eeqa goyinno, bita, morketethi, kachi, qanaate, hanqo, bana doso, shaaketethi, iita tobbo
GAL 5:21 gene, matho, yethinne hessa hessa melata. Kase ta hintew odidaysada ha77ika ta hintew odayis. Haysa melabata ootheysati Xoossaa kawotethaa laattokona.
GAL 5:22 Shin Ayyaana ayfey, siiqo, ufaysi, sarotethi, danda7a, keehatethi, lo77otethi, ammano,
GAL 5:23 ashketethi, bana haaro. Haysa melabata ixiya higgey baawa.
GAL 5:24 Kiristoos Yesuusaba gididaysati banta ashuwa iya iita qofaranne iya amuwara issife masqaliya bolla kaqidosona.
GAL 5:25 Nu Ayyaanan de7iyaba gidiko, nuna Ayyaanay kaaletho.
GAL 5:26 Ane issoy issuwa yiloyishenne qanaatishe coo ceeqeteysa aggoos.
GAL 6:1 Ta ishato, issi asi nagaran kundiko, Ayyaanan de7iya hinte he uraa ashketethan suurisite. Shin neeni hessa melaban paacetonna mela nena naaga.
GAL 6:2 Issoy issuwa deexo toohuwa tookite. Yaatiko Kiristoosa higgiya poleeta.
GAL 6:3 Issi asi aykoyka baawashin, bana haratape lo77o gidi qopiko, I bana cimmees.
GAL 6:4 Shin issi issi asi ba oosuwa paaco. Hessafe guye, haratara bana gaaddeyeysa aggidi baw ceeqetiyaba demmees.
GAL 6:5 Issi issi asi ba toohuwa baw tookanaw bessees.
GAL 6:6 Xoossaa qaala tamaariya oonika lo77oba ubbaa ba astamaariyara shaaketees.
GAL 6:7 Hinte, hintena cimmofite. Asi ba zeridabaa zaaridi cakiya gisho Xoossaa bolla qelqisopite.
GAL 6:8 Ba asho amuwa kunthanaw zeriya oonika, ba asho amuwape hayqo buucana. Shin Ayyaana ufaysanaw zeriya oonika Ayyaanape merinaa de7o cakana.
GAL 6:9 Ane lo77o ooso oothanaw azalleysa aggoos. Nuuni azallonna ixiko wodey gakiya wode nu zeridaysa cakana.
GAL 6:10 Nu inje wode demmiko, asa ubbaas, aathidika ammaniya asaas lo77oba oothoos.
GAL 6:11 Taani ta kushen, ay mela gita pidalen hintew xaafidaako be7ite.
GAL 6:12 Asa sinthan lo77o gididi bentanaw koyiya asati hinte qaxaretana mela koyoosona. Shin hessa enti oothey, Kiristoosa masqaliya gisho entana goodi gakonna melasa.
GAL 6:13 Enti hinte qaxaretethan ceeqetanaw koyidi hintena qaxareto goosonape attishin, qaxaretidaysatika banta huuphen higgiya naagokona.
GAL 6:14 Shin alamey taw kaqetidaysafenne taanika alamiyas kaqetida, Godaa Yesuus Kiristoosa masqaliyape attishin, hara ceeqoy taape haako.
GAL 6:15 Hiza, qaxaretin qaxaretonna aggin aykoka maaddenna. Maaddey ooratha medhetethi gido.
GAL 6:16 Ha wogaa kaalliya ubbaasinne Xoossaa dere gidida Isra7eeles sarotethinne maarotethi gido.
GAL 6:17 Taani Yesuusas madunxida beeta ta asatethan tookida gisho, hizape tana oonika waaysopo.
GAL 6:18 Ta ishato, nu Godaa Yesuus Kiristoosa aadho keehatethay hintera gido. Amin7i.
EPH 1:1 Xoossaa shenen Kiristoos Yesuusa hawaare gidida Phawuloosape, Efesoonan de7iya geeshshatasinne Kiristoos Yesuusa ammaneysatas xaafetida kiitaa.
EPH 1:2 Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
EPH 1:3 Salon de7iya ayyaana anjo ubban Kiristoosa baggara nuna anjida, nu Godaa Yesuus Kiristoosa Aaway, Xoossay galatetto.
EPH 1:4 Nuuni iya sinthan geeshshatanne borey baynayisata gidana mela Xoossay alamey medhetanaape kase Kiristoosa baggara ba siiquwan nuna dooris.
EPH 1:5 Xoossay ba sheniyan ba dosidaysada Yesuus Kiristoosa baggara nuna ba nayta oothanaw kasetidi qopi wothis.
EPH 1:6 Xoossay ba siiqiya Na7aa baggara nuus coo immida aadho keehatethay bonchetana mela hessa oothis.
EPH 1:7 Xoossaa aadho keehatetha duretethaada Kiristoosa suuthan wozetidi nagara atotetha demmida.
EPH 1:8 Ba aadho keehatetha cincatethaninne eratethan kunthidi nuus immis.
EPH 1:9 Xoossay ba dosidaysada Kiristoosa baggara iya sheniya xuuraa nu erana mela oothis.
EPH 1:10 Wodey gakiya wode Xoossay polanaw qopida qofay, saloninne sa7an de7iya medhetetha ubbay Kiristoosape garsan gidana melasa.
EPH 1:11 Ubbabaa ba sheniyada oothiya Xoossay, kasetidi halchidaysa Kiristoosa baggara nuuni iyabaa gidana mela nuna dooris.
EPH 1:12 Hessa I oothiday, Kiristoosan ufaysi wothidi naagon koyro gidida nuuni Xoossaa bonchuwa galatan qoncisana melasa.
EPH 1:13 Hinteka hinte atotetha Wongela, hessika tuma qaala si7ida wode Kiristoosa ammanideta. Xoossay hintew immana gida Geeshsha Ayyaanan hinte attametideta.
EPH 1:14 Xoossaa bonchoy galatetana mela Xoossay ba asaa wozana gakanaw Geeshsha Ayyaana nuus oythu oothidi immis.
EPH 1:15 Hessa gisho, Godaa Yesuusa hinte ammaneysanne geeshshata ubbaa hinte siiqeysa ta si7ida wode
EPH 1:16 ta woosan hintena qopashe hinte gisho Xoossaa galateysa aggabike.
EPH 1:17 Godaa Yesuus Kiristoosa Xoossay, boncho Aaway, Xoossaa hinte aathidi eranaada cincatethaanne qoncetha ayyaana hintew immanaada taani Xoossaa woossayis.
EPH 1:18 Xoossay hintena xeegida ufaysaynne geeshshati laattiya boncho laatay ay mela daroko hinte erana mela Xoossay hinte wozana ayfiya dooyana mela taani Xoossaa woossayis.
EPH 1:19 Qassi iya ammaniya nunan oothiya iya wolqay ay mela aadhida giteeko hinte erana mela woossayis. He wolqay xoonetonanne daaburonna wolqaa. Ha nunan de7idi oothiya wolqaynne,
EPH 1:20 Kiristoosa hayqope denthidi, salon Xoossaafe ushacha baggara utisida gita wolqay issino.
EPH 1:21 Iya sunthay, ayseysatapenne maata aawatape, haareysatapenne godatape, bolla gididi ha alamiya xalaalan gidonashin, sinthafe yaana alamiyanka hara sunthata ubbaafe dhoqa.
EPH 1:22 Xoossay ubba Kiristoosa tohope garsan haarisis; qassi woosa keethan, ubbaban Godaa gidana mela iya shuumis.
EPH 1:23 Woosa keethi Kiristoosa kumethi oothiya iya asatethi. Medhetethay de7iya bessa ubban Kiristoosi ba huuphen ubbaba kuntheysa.
EPH 2:1 Haysafe kase hinte, hinte nagaraanne hinte qohuwa gaason hayqidaysata.
EPH 2:2 He wode hinte ha alamiya iita ogiya kaallideta. Carkuwa bolla de7iya ayyaana wolqata halaqaasinne ha77ika Xoossaas kiitetonna asaa haariya ayyaanas kiitetideta.
EPH 2:3 Nu ubbayka kase he asata giddon nu asho amuwanne nu wozanaa sheniya kaallidi de7ida. Nuka harata mela nu medhetethan Xoossaa hanquwa ekanaw de7eyisata.
EPH 2:4 Shin Xoossaa gita maarotethaafenne nuus de7iya gita siiquwape dendidaysan,
EPH 2:5 hari attoshin nuuni nu qohuwan hayqidi de7ishin Kiristoosa baggara nuus de7o immis. Hinteka attiday Xoossaa aadho keehatethaana.
EPH 2:6 Xoossay nuna Kiristoosara issife hayqope denthidi salon iyara issife wothis.
EPH 2:7 I hessa oothiday, Kiristoos Yesuusa baggara nuus qoncisida ba keehatethaanne zawi bayna ba aadho keehatetha duretetha yaana laythan nuna bessanaasa.
EPH 2:8 Hinte aadho keehatethan ammanon attideta. Hessika, Xoossaa imotape attishin, hinte ooson bentidaba gidenna.
EPH 2:9 Oonika ceeqetonna mela atotethay bentiday ooson gidenna.
EPH 2:10 Nuuni Xoossaa medhetethi; I nuus kasetidi giigisi wothida lo77o oosota oothana mela Kiristoos Yesuusa baggara oorathi medhetida.
EPH 2:11 Hessa gisho, hinteno yeletan Ayhude gidonaysato, Ayhudeti bantaw asa kushen qaxaretidi, hintena qassi qaxaretiboonayisata gidi xeegeysa akeekite.
EPH 2:12 He wode hinte Kiristoosape shaaketi de7idaysa, Isra7eele asaas allaga gididi de7idaysa, Xoossaa ufaysa qaalape haakidi de7idaysanne ha alamiyan ufaysinne Xoossi bayna de7idaysa akeekite.
EPH 2:13 Shin hinte kase haakidi de7idaysati, ha77i Kiristoos Yesuusan de7idi Kiristoosa suuthan mata shiiqideta.
EPH 2:14 Kiristoosi nu sarotethaa; I Ayhudenne Ayhude gidonna asaa timidi, nam7aa shaaki wothida morketetha godaa laallis.
EPH 2:15 I banan ha nam7u kochatape issi ooratha ase medhidi, higgiya iya kiitaranne wogatara issife ba asatethan dhaysidi sarotethi immis.
EPH 2:16 Kiristoosi masqaliya bolla hayqidi morketetha dhaysis; qassi nam7u kochata issi asatethi oothidi Xoossara sigethis.
EPH 2:17 Kiristoosi yidi, Xoossaafe haakidi de7iya hintew, qassi matidi de7iya entaw sarotetha Wongela odis.
EPH 2:18 Nu ubbay iya baggara issi Ayyaanan Aawa sinthe shiiqanaw danda7oos.
EPH 2:19 Hizape hinte allaga woyko imathe gideketa, shin hinte ha77i geeshshata biitta asinne Xoossaa soo asi.
EPH 2:20 Hinte hawaaretinne nabeti baasida baasuwa bolla keexetideta. Godaa xaphuwa minthiya shuchay Kiristoos Yesuusa.
EPH 2:21 Iyan keetha ubbay issife oyketidi Godan geeshsha Xoossa keethi gidanaw diccees.
EPH 2:22 Hinte qassi Xoossay ba Ayyaanan de7iya keethi gidanaw Kiristoosan issife keexeteta.
EPH 3:1 Hessa gisho, taani, Phawuloosi, Ayhude gidonna hinte gisho Kiristoos Yesuusan qasho asi gidas.
EPH 3:2 Ta hintena maaddana mela Xoossay ba aadho keehatethan taw immida ha oosuwaba hinte loythi si7ideta.
EPH 3:3 Ta hintew kase qanthan xaafidaysada Xoossay ba xuuraa qoncethan taw qoncisis.
EPH 3:4 Ta xaafidaysa hinte nabbabiya wode Kiristoosa xuuraa ta ay mela eridaako hinte akeekanaw danda7eeta.
EPH 3:5 Ha xuuray geeshsha hawaaretasinne nabetas ha77i Ayyaana baggara qoncidaysada beni wode asaas hessada qoncisibeenna.
EPH 3:6 Xuuray haysa: Ayhude gidonna asay Wongela baggara Isra7eeletara issife Xoossaa anjuwa laattoosona. Isra7eeletara issi keetha asi gidoosona; Kiristoos Yesuusa baggara Xoossaa ufaysa qaala ekoosona.
EPH 3:7 Xoossay ba oothiya wolqaa baggara taw immida aadho keehatethan ha Wongelas oosancho gidas.
EPH 3:8 Taani geeshshata ubbaafe laafa gidikoka Ayhude gidonna asaas zawi bayna Kiristoosa duretetha Wongela odana mela ha aadho keehatethay taw imetis.
EPH 3:9 Qassi kase wodiyan ubbaa medhida Xoossan qosetidi de7iya xuuras, Xoossaa qofay aybeko qoncisanaw aadho keehatethay taw imetis.
EPH 3:10 Xoossay hessa oothiday ha77i wodiyan woosa keetha baggara salon de7iya halaqatasinne haareysatas ba dumma dumma qoncethaa erisanaasa.
EPH 3:11 Xoossay ba merinaa qofaa nu Godaa Kiristoos Yesuusa baggara polanaw hessa oothis.
EPH 3:12 Nu ammanon yashshi bayna Xoossako shiiqana mela Kiristoosi nuus minotethinne la77atethi immis.
EPH 3:13 Taani hinte gisho waaye ekiya gisho, hinte ta waayan yeellatonnaada hintena woossayis; taani hinte bonchuwas waayetayis.
EPH 3:14 Taani aawa sinthan gulbatada woossey hessa gishosa.
EPH 3:15 Saloninne sa7an de7iya issi issi soo asay iyan sunthetees.
EPH 3:16 Xoossay ba boncho duretethaafe hinte garsa asatethaa minthiya wolqaa ba Ayyaana baggara immana mela hintew woossayis.
EPH 3:17 Qassi ammanon Kiristoosi hinte wozanan daana melanne hinte siiqon xapho yeddidi minnidi daana mela woossayis.
EPH 3:18 Hessadaka, Kiristoosa siiqoy ay mela dalgeko, adusseko, dhoqekonne ciimmoko geeshshata ubbaara, hinte akeekana wolqa demmana mela woossayis.
EPH 3:19 Eratethaafe aadhiya Kiristoosa siiquwa hinte erana mela qassi de7o immiya Xoossaa wolqan hinte kumana mela ta woossayis.
EPH 3:20 Hiza, nu giddon oothiya ba wolqaa baggara nuuni woosseysafe woyko qopeysafe aathidi oothanaw danda7iya Xoossaas,
EPH 3:21 woosa keethaninne Kiristoos Yesuusan wode ubban merinaape merinaa gakanaw bonchoy gido. Amin7i.
EPH 4:1 Hiza, Godaa gisho qashetida taani, hinte xeegetida xeessas bessiya de7o daana mela hintena woossayis.
EPH 4:2 Hinte ubba wode aadatanne hayo gidite; issoy issuwa danda7itenne siiqon de7ite.
EPH 4:3 Sarotethan qashetidi Ayyaanay immiya issifetetha naaganaw minnite.
EPH 4:4 Xoossay hintena xeegida wode issi ufaysas xeegidaysada issi asatethinne issi Ayyaani de7ees.
EPH 4:5 Issi Goday, issi ammanoynne issi xinqatey de7ees.
EPH 4:6 Ubbaafe bolla gidida, ubbaa baggara oothiyanne ubbaa giddon de7iya issi Xoossay, ubbaa Aaway de7ees.
EPH 4:7 Shin Kiristoosi immanaw koydaysada nu issoy issoy dumma dumma imota ekida.
EPH 4:8 Hessa gisho, Xoossaa qaalay, “I pude keyida wode di7etida darota baara ekidi bis; asaaska imota immis” yaagees.
EPH 4:9 Yaatin, “Pude keyis” guussay woy guussee? I koyro duge, sa7aa ziqa bessaa wodhis guussu gidonna ixiko ay guussee?
EPH 4:10 Ha duge wodhidaysi, ubba bessan bentanaw ubbaafe dhoqa saluwa keydaysi iya.
EPH 4:11 I issota issota hawaareta, issota issota nabeta, issota issota Wongela sabaaketa, issota issota woosa keethi heemmeyisata, issota issota astamaareta oothidi immis.
EPH 4:12 I hessa oothiday Kiristoosa asatethi gidida woosa keethi dichanawunne ammaniya asaa Xoossaa oosos giigisanaasa.
EPH 4:13 Hessadaka, nu ubbay Xoossaa Na7aa eridi ammanon bentiya issifetethaako gakidi, Kiristoosa ayyaana de7uwa kumethi gakidi diccana melasa.
EPH 4:14 Hizape guye, asaa gene cimon giigida balethiya wordo timirte carkoninne hobben gedenne haa kuullo kaa7iya nayta mela gidanaw bessenna.
EPH 4:15 Shin nuuni tumaa siiqon odishe, asatethaas huuphe gidiya Kiristoosara de7iya issifetetha guji guji dichoos.
EPH 4:16 Kumetha asatethay Kiristoosa bolla zempees qassi dumma dumma asatethaa billiteti issoy issuwara oyketidi uttis. Issi issi asatethaa kifiley ba oosuwa oothiya wode kumetha asatethay siiqon diccees.
EPH 4:17 Hessa gisho, taani haysa hintew Godaa sunthan odaysinne markatayis. Go77i bayna qofaa qopiya Ayhude gidonna asatada de7opite.
EPH 4:18 Enta qofay dhumis; banta wozanaa muumisidosona. Enti eratetha dhayoninne ixas gidi Xoossay immiya de7uwape haakidosona.
EPH 4:19 Enti yeella giyaba erokona; enti laymatethas bantana aathidi immidosona; qassi tunabaa ubbaa guye goonna oothosona.
EPH 4:20 Shin hinte Kiristoosa eriday hessa mela ogen gidenna.
EPH 4:21 Iyabaa tuma si7ideta. Qassi Yesuusan de7iya tumaa mela iyape tamaarideta.
EPH 4:22 Hinte kase de7ida de7o ogiya aggite. Qassi ba cimmiya amon dhayiya hinte ceega asatethaa diggite.
EPH 4:23 Hinte wozanaa qofan ooraxite.
EPH 4:24 Tuma xillotethaninne geeshshatethan Xoossaa leemison medhetida ooratha asatethaa ma7ite.
EPH 4:25 Hiza, wordo odetofite. Nuuni ubbay Kiristoosa asatethaa billiteta gidiya gisho asa ubbaara tuma odetite.
EPH 4:26 Hanqetite, shin hinte hanquwan nagara oothopite. Hinte hanqeti de7ishin awi wullofo.
EPH 4:27 Xalahes besse immofite.
EPH 4:28 Kaysotiya uray hizape guye kaysotopo. Shin manqota maaddiyabay iyaw daana mela ba kushen lo77oba ootho.
EPH 4:29 Hinte doonape iita qaali keyopo. Shin si7eyisata go77ana melanne harata minthethiya koshshiya lo77o qaali hinte doonape keyo.
EPH 4:30 Xoossay hintena woziya gallasas hintena attamidi wothida Xoossaa Ayyaana azzanthofite.
EPH 4:31 Cametethi, yilo, hanqo, waaso, cashshenne iita ubbaa hintefe haassite.
EPH 4:32 Aathidi issoy issuwas keehanne qadheteyisata gidite. Xoossay Kiristoosa baggara hintew atto gidaysada hinteka wolis atto giite.
EPH 5:1 Hiza, Xoossay dosiya naytada iya daanite.
EPH 5:2 Kiristoosi nuna dosidi bana nu gisho Xoossaas sawiya imonne yarsho oothidi immidaysada hinteka siiqon de7ite.
EPH 5:3 Shin laymatethi, tunatethinne uuzetethi ammaniya asaas bessonna gisho hinte giddon ubbaraka si7etofo.
EPH 5:4 Xoossaa galatitepe attishin, yeellayabaynne eeya odi woyko qidhey hintew bessonna gisho hinte giddon ubbaka de7opo.
EPH 5:5 Haysa erite; oonika laymatey woyko tunabaa oothey woyko uuzetey Kiristoosa kawotethaanne Xoossaa kawotethaa laattanaw danda7enna. Uuzetethi eeqa goyinno mela.
EPH 5:6 Hayisata gaason Xoossaa hanqoy kiitetonna asaa bolla yaana gisho oonika hintena pathonna odan cimmofo.
EPH 5:7 Hessa mela asaara issifetethi oothopite.
EPH 5:8 Kase hinte dhuman de7ideta, shin ha77i Godaa baggara poo7on de7eeta. Hiza, poo7o asada poo7on simeretite.
EPH 5:9 Poo7oy lo77otethi, xillotethinne tumatethi ayfees.
EPH 5:10 Godaa ufaysiyabaa oothanaw koyite.
EPH 5:11 Go77i bayna dhuma ooso qoncisitepe attishin, iyara issifopite.
EPH 5:12 Enti geeman oothiya oosuwa hari attoshin odanawuka yeellayees.
EPH 5:13 Shin ubbabay poo7on keyiya wode qoncen bentees.
EPH 5:14 Poo7oy ubbaba qoncen bessees. Hessa gisho, “Neno dhiskeyso barka; hayqope denda; Kiristoosi ne bolla poo7ana” yaagetis.
EPH 5:15 Hiza, hinte waanidi de7iyako akeeki be7ite. Cincata giditepe attishin, eeyata gidopite.
EPH 5:16 Laythay iita gidiya gisho injetiya wode ubbaa go7etite.
EPH 5:17 Hessa gisho, Godaa sheney aybeko akeekitepe attishin, eeyopite.
EPH 5:18 Geeshsha Ayyaanan gallas gallas kumitepe attishin, dhayoko hintena kaalethiya gisho woyne ushshan mathotofite.
EPH 5:19 Mazmuren, sabaninne ayyaana yethan, issoy issuwara odetite. Qassi hinte wozanan yexishenne sabbishe Godaa galatite.
EPH 5:20 Nu Godaa Yesuus Kiristoosa sunthan ubba wode Xoossaa Aawa ubbabaas galatite.
EPH 5:21 Kiristoosa bonchuwas gidi issoy issuwas haaretite.
EPH 5:22 Macheto, Godaas haareteysada hinte azinatas haaretite.
EPH 5:23 Kiristoosi woosa keethaas huuphe gideysada azinika ba machees huuphe. Qassi Kiristoos ba asatethi gidida woosa keethaa ashsheysa.
EPH 5:24 Shin woosa keethay Kiristoosas haareteysada macheti banta azinatas ubbaban haaretanaw bessees.
EPH 5:25 Azinatoo, Kiristoosi woosa keethaa dosidi bana iw immidaysada hinteka hinte macheta dosite.
EPH 5:26 I woosa keethaa ba qaala baggara haathan meeccidi geeshshis.
EPH 5:27 Kiristoosi woosa keethaa qiti woyko som7o tuussi woyko hessa melabay bayna I kumetha bonchuwara geeshshinne boretonaaro oothidi baako shiishanaw koyidi hessa oothis.
EPH 5:28 Hessadaka, azinati bantana doseysada banta macheta dosanaw bessees. Ba machiw doseysi bana dosees.
EPH 5:29 Bana ixiya asi oonika baawa, shin Kiristoosi woosa keethaas ootheysada ba asatethaa muzeesinne naagees.
EPH 5:30 Nuuni Kiristoosa asatethaa billiteta.
EPH 5:31 Xoossaa qaalay, “Hessa gisho, asi ba aawanne ba aayiw aggidi, ba machera issife daana; enti nam7ayka issi asho gidana” yaagees.
EPH 5:32 Haysi gita xuura, shin taani hessa Kiristoosabaanne woosa keethabaa leemiso oothada odayis.
EPH 5:33 Gidoshin, hinte issoy issoy hinte macheta hinte, hintena doseysada dosite. Issi issi macha ba azinaa bonchanaw bessees.
EPH 6:1 Nayto, hinte Godaaba gidiya gisho hintena yelidaysatas kiitetite. Hessi hintew bessiyaba.
EPH 6:2 “Ne aayiwunne ne aawa boncha.” Hessi ufaysa qaali de7iya koyro kiitaa.
EPH 6:3 “Ne hessa poliyaba gidiko ubbay new injetana; ne laythay sa7a bolla aduqana.”
EPH 6:4 Aawato, hinte nayta Godaa qaala tamaarsoninne enta kaaleson dichitepe attishin, entana caamisopite.
EPH 6:5 Aylleto, Kiristoosas kiiteteysada hinte sa7a godatas yashshan, bonchoninne suure wozanan kiitetite.
EPH 6:6 Enta sinthan saba demmanaw enti be7iya wode xalaala oothopite. Shin Kiristoosa aylletada Xoossaa sheniya wozanape polite.
EPH 6:7 Asas gidonashin, Godaas gidi hinte kumetha wozanaape oothite.
EPH 6:8 Aylle gidin woyko godaa gidin issoy issoy ba oothida lo77o oosuwas Godaape woyto ekanaysa ereeta.
EPH 6:9 Godato, asa som7o be7idi maaddonna Goday, saluwan de7eysa ereeta. Hessa gisho, hinte aylleta mandeysa aggidi enti hintew bonchon kiiteteysa mela hinte entaw lo77oba oothite.
EPH 6:10 Wursethan, Godaaninne iya gita wolqan minnite.
EPH 6:11 Xalahe cimuwa eqetanaw danda7ana mela Xoossay hintew immida ola miishiya ubbaa ma7ite.
EPH 6:12 Nu olay asara gidonashin, salon de7iya tuna ayyaana olanchotara, maata aawatara, haareysataranne ha dhuma alamiya wolqatara.
EPH 6:13 Hessa gisho, iita gallasaa teqanawunne ubbaa polidi, minnidi eqanaw hinte danda7ana mela Xoossaa ola miisheta ubbaa ma7ite.
EPH 6:14 Tumaa xeessan dancoda dancidi, xillotethaa xurureda tiran wothidi, sarotethaa Wongela hinte tohuwan caammada aathidi minnidi eqite.
EPH 6:16 He ubbaafe aathidi, Xalahey yeddiya laxiya tama donge ubbaa toysanaw danda7iya ammanuwa ubba wode gondalleda oykite.
EPH 6:17 Xoossaa atotetha birata barneexada hinte huuphen wothite; qassi Geeshsha Ayyaana mashsha ika, Xoossaa qaala oykite.
EPH 6:18 Woossa aggofite; haratasika gaannatite; ubba wode Ayyaanan woossite. Hessan, geeshshatas saletonna minnidi ubba wode woossite.
EPH 6:19 Taani Wongela xuuraa yashshi bayna qoncisada odana mela Xoossay taw qaala immana mela woossite.
EPH 6:20 Taani hessa oothanaw kiitetas ha77ika qashon de7ey he Wongela gishosa. Yaaniya gisho, taani yashshi bayna besseysada odana mela taw woossite.
EPH 6:21 Taani waana de7iyakonne ay oothiyako hinte erana mela nu siiqo ishay, Godaa oosuwan ammanetida oosanchoy, Tikiqoosi, tabaa ubbaa hintew odana.
EPH 6:22 Nuuni ubbay waanidi de7iyako hintew odana melanne hintena minthethana mela taani iya hinteko kiittas.
EPH 6:23 Xoossaa Aawape, Godaa Yesuus Kiristoosape sarotethaynne siiqoy ammanora issife ammaniya ubbaas gido.
EPH 6:24 Irxonna siiqon nu Godaa Yesuus Kiristoosa siiqiya ubbaara Xoossaa aadho keehatethay gido.
PHI 1:1 Kiristoos Yesuusara issifida gisho, Xoossaba gidida, Filphisiyuusa kataman de7iya woosa keethaa cimatasinne daaqoneta ubbaas. Yesuus Kiristoosa aylle gidida, Phawuloosapenne Ximotiyoosape kiitetida kiitaa.
PHI 1:2 Nu Aawa Xoossaafenne Godaa Yesuus Kiristoosape aadho keehatethaynne sarotethay hintew gido.
PHI 1:3 Taani hintena qopiya wode ubban, ta Xoossaa galatayis.
PHI 1:4 Taani hinte ubbaas Xoossaa woossiya wode ufaysan woossayis.
PHI 1:5 Hinte koyro gallasape ha77i gakanaw, Wongela markateysan taara issife gididi, tana maaddida gisho, Xoossaa galatayis.
PHI 1:6 Hinte giddon lo77o ooso doomida Xoossay, Kiristoos Yesuusi simmiya gallasay gakanaw, polanaysa erayis.
PHI 1:7 Hinte ubba wode ta wozanan de7eeta. Taani ubba wodeka hessada qopanaw bessees. Ha77i taani qashon de7ashenne qashetanaape sinthe Wongela naagoninne Wongela mintha eson Xoossay taw qaadida qaada hinteka taara shaaketideta.
PHI 1:8 Taani hintena ubbaa Kiristoos Yesuusa siiquwan ay mela laamotiyako Xoossay taw marka.
PHI 1:9 Hinte siiqoy tuma eratetharanne akeekara issife guji guji diccana mela Xoossaa woossayis.
PHI 1:10 Hessan hinte lo77oba shaakidi, dooreyisata, Kiristoosi simmiya gallasan geeshshatanne boretonayisata gidana.
PHI 1:11 Hinte de7oy Xoossaa bonchuwasinne galatas Yesuus Kiristoosa baggara bentiya xillotethaa ayfiyan kumidi ayfana.
PHI 1:12 Ta ishato, tana gakida ubbay Wongelay dalgana mela tuma maaddidaysa hinte erana mela koyayis.
PHI 1:13 Taani Kiristoosa gisho qashetidaysa, kawo gadho naageysatinne haysan de7iya harati ubbay eroosona.
PHI 1:14 Ta qashuwa gaason nu ishatape daroti Godan keehi ammanetidosona. Hessa gisho, Xoossaa qaala yashshi bayna kasepe minnidi odana mela minotethi demmidosona.
PHI 1:15 Gidoshin, issoti issoti qanaateninne palaman Kiristoosaba odoosona, shin harati suure wozanape odoosona.
PHI 1:16 Suure wozanape odeysati, Xoossay taw Wongela naagana mela hadara immidaysa eriya gisho, siiqon odoosona.
PHI 1:17 Shin tana qanaateysati ta qashuwa bolla hara meto ehanaba entaw daanin bantana dosidi Kiristoosaba odoosonape attishin, tuma wozanape odokona.
PHI 1:18 Hessi aykoka metenna. Tuma ogen gidin woyko wordo ogen gidin he ubban Kiristoosi sabbaketees. Tana hessi ufaysees. Qassi harabay tana ufaysiyabay,
PHI 1:19 taani hinte woosaninne Yesuus Kiristoosa Ayyaana maaduwan attanaysa eriya gisho tana ufaysees.
PHI 1:20 Ta gita amoynne ufaysan naagiya naagoy ta yeellatonna attanaysa. Shin ubba wode ootheysada, ha77ika taani paxa de7in woyko hayqin yayyonna ta kumetha asatethan Kiristoosi bonchetana gada minotethan odayis.
PHI 1:21 Ta de7ikoka Kiristoosa xalaalas de7ayis; qassi ta hayqikoka taw aadhida wodhe.
PHI 1:22 Shin ta paxa de7iko ayfey de7iya ooso oothana. Shin paxa de7eysafenne hayqope awusa dooraneko taw eretenna.
PHI 1:23 Taani ha nam7atape awusa dooraneko un7etas. Ha de7uwape shaaketada Kiristoosara issife daanaw amottayis; Kiristoosara issife de7eysi ubbaafe aadhida lo77o.
PHI 1:24 Shin taani hinte gisho paxa de7eysi hintew daro koshshiyaba.
PHI 1:25 Hessa taani geeshshada erayis; taani, hinte ammanon diccanaadanne ufaytanaada hintera paxa daana.
PHI 1:26 Hessa gisho, taani hinteko simmada yaa wode, Kiristoos Yesuusara hinte de7iya de7uwan tanan de7iya ceeqetethay hintew darana.
PHI 1:27 Ubbaafe aathidi, hinte Kiristoosa Wongelas boncho ehiya de7o de7ite. Ta hintena be7in woyko be7onna ixin, hinte issi qofan minni eqidi, harati Wongelan ammanana mela issi wozanan gididi issife baaxeteysa ta si7ana.
PHI 1:28 Hinte morketas yayyofite. Enti hintera eqetiyaba gidiko hessi hintew atotethas, entaw dhayos Xoossaafe gidida malla.
PHI 1:29 Kiristoosas oothiya qaaday hintew imetiday, hinte iya ammanana mela xalaala gidonashin hinte iya gisho meto ekana melasa.
PHI 1:30 Hessa gisho, hinte ta waayiya kase be7ideta; ha77ika ta waayeteysa si7eeta. Hinteka ta waayiya mela waayeteta.
PHI 2:1 Kiristoosan hinte de7iya de7oy hintena minthees; qassi iya siiqoyka hintena minthethees. Geeshsha Ayyaanara hintew issifetethi de7ees; hinte haratas keehetanne qadheteta.
PHI 2:2 Hiza, hinte issi qofan, siiqon, issi wozananinne ayyaanan issino gididi tana polo ufaysite.
PHI 2:3 Hintena doson woyko ceeqetiya hada amon issibaaka oothopite. Shin hinte issoy issuwafe gitatayis yaagidi qoponna hintena kawushite.
PHI 2:4 Hinte issoy issoy, hara asi maaddiyaba koyitepe attishin, hintena maaddiyaba xalaala koyopite.
PHI 2:5 Kiristoos Yesuusan de7iya qofay hintenan daanaw bessees.
PHI 2:6 Iyaw ubba wode Xoossa hanoti de7ees. Gidoshin, iya Xoossara issino oothiya hanota, wolqan ekanaw koybeenna.
PHI 2:7 Gidoshin, I baw de7iya bonchuwa ubbaa aggidi, aylle medheta ekis; ase daanidi qoncis.
PHI 2:8 I bana kawushis; hayqana gakanaw, hari attoshin masqaliya bolla hayqanaw kiitetis.
PHI 2:9 Hessa gisho, Xoossay iya daro dhoqu dhoqu oothis; qassi suntha ubbaafeka aadhiya dhoqa sunthaa immis.
PHI 2:10 Saloninne sa7an, sa7ape garsan de7iya ubbay, Yesuusa sunthaa bonchuwas gulbatana.
PHI 2:11 Asa ubbay banta inxarsan, Yesuus Kiristoosa Godaa yaagidi, Xoossaa Aawa bonchuwas markatana.
PHI 2:12 Ta ishato, taani hintera de7iya wode ubban hinte kiitetidaysada, ha77i taani hinte matape haakinka, kaseysafe aathidi, kiitetanaw bessees. Xoossaas yashshaninne kokorsan hinte atotetha polanaw oothite.
PHI 2:13 Xoossay, hinte iyaw ero gidi kiitetana mela ubba wode hinte giddon oothees.
PHI 2:14 Ay ooso oothisheka zuuzumonna woyko palamonna oothite.
PHI 2:15 Geellanne nagarancho asaa giddon boretonayisata, geeshshatanne pokoy bayna Xoossaa naytada gidite. Hinte enta giddon salo xoolintoda poo7ishe,
PHI 2:16 de7o immiya kiitaa entaw odite. He wode ta daabursaynne ta oosoy mela attiboona gisho, Kiristoosi yaa gallas ta hintenan ceeqetana.
PHI 2:17 Hinte Xoossaas immiya ammano imota bolla ta suuthay ushsha yarshoda gukikoka tana ufaysees. Hinteka taara ufaytana.
PHI 2:18 Hessada hinteka ufaytidi tanaka ufaysanaw bessees.
PHI 2:19 Taani hinte de7uwabaa si7ada ufaytanaw Ximotiyoosa hinteko ellesada yeddana mela Godaa Yesuusi tana maaddanaysa ammanetayis.
PHI 2:20 Hinte de7uwas wozanape qopiya iya mela asi hari oonika baawa.
PHI 2:21 Harati bantana go77iyabaa koyoosonape attishin, Yesuus Kiristoosi koyaba oothokona.
PHI 2:22 I taara issife gididi na7i ba aawas ootheysada Wongela ooso oothidaysanne ammanetiya asi gideysa hinte ereeta.
PHI 2:23 Hessa gisho, tabay haniyaba be7ada ellesada iya hinteko yeddana gada qopayis.
PHI 2:24 Taani, ta huuphen mata woden hinteko baanaysa Godan ammanetayis.
PHI 2:25 Hessadaka, taani, ta ishaa Ephafiraditusa, taara issife ta bagga gididi oothidaysa, oletidaysanne, tana maaddanaw hintew kiitetidaysa, hinteko kiittanaw qopas.
PHI 2:26 I hintena ubbaa be7anaw daro laamotees. Qassi I hargetidaysa hinte si7ida gisho, ba wozanan daro un7etis.
PHI 2:27 I tuma hargetidi, hayqi kichidi attis. Shin Xoossay iyaw qadhetis. Iya xalaalas gidonashin, azzanoy azzano bolla guzhetonnaada tawuka qadhetis.
PHI 2:28 Hiza, hinte iya zaari be7idi ufaytanaada tawuka ta wozanaa seelay irxanaada taani iya ellesada hinteko yeddanaw amottayis.
PHI 2:29 Godaas haggaaziya asada iya kumetha ufaysan mokite. Qassi iya mela asa ubbaa bonchite.
PHI 2:30 Hinte ta matan gididi oothanaw danda7onna maaddiya maaddidi Kiristoosa oosuwa gisho, ba shempuwas mishetonna ixidi hayqi kichidi attis.
PHI 3:1 Wursethan, ta ishato, hinte Godaaba gidiya gisho, ufaytite. Taani kase xaafidaysa zaarada xaafanaysi tana waaysenna, shin hintena balape naagana.
PHI 3:2 Iitabaa oothiya kanatape, qassi qaxaretanaw koshshees giya iita asatape naagetite.
PHI 3:3 Nuuni Xoossaa Geeshsha Ayyaanan goyinniya gishonne nu de7uwan Kiristoos Yesuusan ceeqetiya gisho, tuma qaxaro qaxaretidaysata. Nuuni kare asatethaa bolla oosetiyaban ceeqetoko.
PHI 3:4 Ta kare asatethan ceeqetanaw koshshiko ta daroban ceeqetanaw danda7ayis. Ay asika ba kare asatethan ceeqetiyabay baw de7ees gidi qopiko, taani iyape daro aadhada ceeqetiyabay de7ees.
PHI 3:5 Taani yeletida saamintara qaxaretas. Taani yeletan Isra7eele; taani Biniyaame koche; taani walaki bayna Ayhude ase. Ayhude higge naagon gidiko taani Farsaawe.
PHI 3:6 Ayhude ammanuwas mishetethan gidiko taani woosa keethaa yedethas. Issi asi higge naagidi xilliyaba gidiko, tanan borey bentibeenna.
PHI 3:7 Shin kase tana maaddees gada qopidaba ubbaa, Kiristoosa gisho gada maaddonnaba oothada taybas.
PHI 3:8 Hessa xalaala gidonashin, taani ta Godaa Kiristoos Yesuusa ereysi haraba ubbaafe daro aadhiya gisho, he ubbaa wodhey baynabaada taybas. Taani iya gisho ubbaba dhayas. Kiristoosa demmanaw ubbaba wora holetida buureda taybayis. Taani Yesuusara issino gidas.
PHI 3:9 Taani higges kiitetada demmiya ta huuphe xillotethi taw baawa. Kiristoosa ammanin bentiya xillotethay, Xoossaa matape yaa xillotethay ha77i taw de7ees.
PHI 3:10 Taani Kiristoosanne iya dendo wolqaa eranaw koyayis. Taani iya metuwa iyara shaaketanawunne iya hayquwan iya daananaw amottayis.
PHI 3:11 Hessadaka, hayqope dendada merinaw de7on daanaysa ufaysi oothayis.
PHI 3:12 Taani ha77i gaxa gakas woyko tanan bali baawa giike. Shin Kiristoos Yesuusi tana oykida gisho taani ta sinthan de7iya woytuwa oykanaw woxaysinne butetayis.
PHI 3:13 Ta ishato, taani hessa demmas gada qopike, shin taani issiba oothayis. Taape guyera de7eysa dogada sinthan de7eysa oykanaw zaaturayis.
PHI 3:14 Hessa gisho, taani gaxa gakanaw woxayis. Xoossay Kiristoos Yesuusa baggara salo de7uwas xeegida woytuwa ekanaw daaburayis.
PHI 3:15 Hiza, nuuni Ayyaanan gashtida ubbay hessa qopanaw bessees. Hintefe baggatas dummatiya qofi de7iko, hessaka Xoossay hintew qoncisana.
PHI 3:16 Gidikoka, nuuni hanno gakanaw de7ida de7uwan, ane sinthe boos.
PHI 3:17 Ta ishato, tana daanite; hessadaka, nu leemisuwa kaalliya asata akeekidi be7ite.
PHI 3:18 Taani hessa hintew kase daro toho odas, shin ha77ika zaarada afuthan odayis. Kiristoosa masqaliyas bantana morke oothida daro asati de7oosona.
PHI 3:19 Enta wursethay dhayo; enta uloy entaw xoosse. Yeellatanaw bessiyaban enti ceeqetoosona; qassi ha sa7aba xalaala qopoosona.
PHI 3:20 Nu biittay saluwana. Salope yidi nuna ashshiya Godaa Yesuus Kiristoosa naagoos.
PHI 3:21 Kiristoosi ubbaba ba maatape garsan oothanaw danda7iya ba wolqan nu daaburancho asatethaa laammidi ba boncho asatethaa daanisana.
PHI 4:1 Ta ishato, ta doseysato, ta laamoteysato, tana ufayseysato, tana gitayeysato, hiza, Godan minnidi eqite.
PHI 4:2 Ewoodanne Sinxika, hinte nam7ay, issi qofan, michida Godan daanada taani hintena zorayis.
PHI 4:3 Taara oothiya ammantheyso, neeni ha maccasata maaddana mela ta nena woossayis. Ha maccasati taara, Qeleminxoosaranne enta sunthay Xoossaa de7o maxaafan xaafetida haratara issife wongela ubba bessaa gathanaw daaburidosona.
PHI 4:4 Godaara hinte de7iya de7uwan ubba wode ufaytite. Taani hessa gujadaka odayis; ufaytite.
PHI 4:5 Asi ubbay hinte ashketetha ero; Goday matan yaana.
PHI 4:6 Hinte Xoossaa woossiya wode ubban iya galatishe, hintena koshshiyaba ubbaas woossitepe attishin, aybibaasika hirgofite.
PHI 4:7 Asa eratetha ubbaafe aadhiya Xoossaa sarotethay, hinte wozanaanne hinte qofaa Godaa Yesuus Kiristoosa baggara naagana.
PHI 4:8 Wursethan, ta ishato, hinte wozanan lo77obaanne galatisiyaba qopite. Tuma gidiyaba ubbaa, bonchoba ubbaa, qoho gidonnaba ubbaa, geeshshaba ubbaa, siiqoba ubbaanne ufaysiyaba ubbaa qopite.
PHI 4:9 Hinte taape tamaaridaba, ekidaba, si7idabanne be7idaba ubbaa oothite. Sarotethi immiya Xoossay hintera issife gidana.
PHI 4:10 Daro wodepe guye, hinte tabaa zaaridi qopanaw doomida gisho taani Godan daro ufaytayis. Hessa guussay, taw qopanaw hintew injetonna ixidaysafe attishin, taw qofaa aggibeketa.
PHI 4:11 Taani hessa tana metida gisho giike; taw de7iyabay gidana guussu tamaaras.
PHI 4:12 Taani metootetidi de7iya duussi erayis; qassi duretidi de7iya duussika erayis. Awun gidin qassi ay wodeka taani kalonne kosha, pacenne palaha tamaaras.
PHI 4:13 Kiristoosi taw immiya wolqan ubbaba oothanaw danda7ayis.
PHI 4:14 Gidikoka, hinte ta metuwa taara ekidaysan lo77o oothideta.
PHI 4:15 Filphisiyuusa asato, Wongela koyro odanaw taani Maqedoonepe keyiya wode immiyabanka ekiyabanka hinte woosa keethaafe attishin, hari tana maaddiboonaysa hinte ereeta.
PHI 4:16 Teselonqen metoy gakida wodeka tana zaari zaaridi maaddideta.
PHI 4:17 Taani, hintefe imota ekanaw koyada gidonashin, imope yaa anjuwa hinte ekana melasa.
PHI 4:18 Taani, hinte immida ubbaanne gididi palaheysa ekas. Hinte yeddida ubbaa Ephafiraditusape ekas; koshshiyaba ubbay taw de7ees. Hinte taw yeddida imoy Xoossaas sawo tonku giya, I dosiya, I ufaytiya yarsho mela.
PHI 4:19 Ta Xoossay ba boncho duretethaafe, Kiristoos Yesuusa baggara hintew koshshiyaba ubbaa immana.
PHI 4:20 Nu Aawa Xoossaas merinaape merinaa gakanaw bonchoy gido. Amin7i.
PHI 4:21 Kiristoos Yesuusa baggara Xoossaba gidida ubbaa saro giite. Taara de7iya ishati hintena saro goosona.
PHI 4:22 Xoossaba gidida asa ubbay, ubbaafe aathidi Kawa Qeesare keethan de7eysati hintena saro goosona.
PHI 4:23 Godaa Yesuus Kiristoosa aadho keehatethay hintera gido.
COL 1:1 Xoossaa shenen Kiristoosi Yesuusa hawaare gidida Phawuloosinne nu ishaa Ximotiyoosi,
COL 1:2 Qolaasiyasa kataman de7iya Kiristoosan geeshshatasinne ammanetida asaas xaafida kiitaa. Xoossaa nu Aawape aadho keehatethaynne sarotethay hintew gido.
COL 1:3 Nuuni hintew woossiya wode Xoossaa nu Godaa, Yesuus Kiristoosa Aawa ubba wode galatoos.
COL 1:4 Nuuni Kiristoos Yesuusan de7iya hinte ammanuwanne geeshshata ubbaas de7iya hinte siiquwa si7ida.
COL 1:5 Hessa hinte oothiday hinte ufaysay salon hintew naagetida gishosa. Hinte tuma kiitta gidida Wongela koyro ammanida wode he ufaysaa si7ideta.
COL 1:6 Hinte he Wongela si7ida wodenne Xoossaa aadho keehatetha tumaa shaaki erida wodepe doomidi hinte giddon hanidaysada biitta ubban diccishenne ayfishe de7ees.
COL 1:7 Hinte hessa nuura issife Kiristoosas oothiya ammanetida, dosetida Ephafirape tamaarideta.
COL 1:8 I hessa bolla gujidi Ayyaanay hintew immida siiquwaba nuus odis.
COL 1:9 Hessa gisho, nuuni hintebaa si7ida gallasaape doomidi, Xoossay ba sheniya hintena bessaana melanne, Geeshsha Ayyaanay immiya eratethaninne cincatetha ubban hintena kunthana mela ubba wode hintew Xoossaa woossoos.
COL 1:10 Hessadaka, hinte, Goday koyeysada daana mela, ubba wode iya ufaysana mela, lo77o ooso ubban hinte ayfe ayfana melanne Xoossaa aathidi erishe diccana mela Xoossaa woossoos.
COL 1:11 Xoossaa boncho wolqay hinte ubbaba gencanaadanne danda7anaada ba minotethaa immidi hintena ufayso.
COL 1:12 Qassi geeshshata poo7o kawotethaa laattana mela hintena oothida Aawa galatite.
COL 1:13 I nuna dhuma wolqaafe ashshidi ba dosiya na7aa kawotethaako ehis.
COL 1:14 Iyan wozetidi iya suuthan nagara atotethi demmida.
COL 1:15 Kiristoosi bentonna Xoossaas tuma leemiso. I medhetetha ubbaafe bayra.
COL 1:16 Ubbabay iya baggara medhetis. Bentiyabatinne bentonnabati, wolqatinne godati, haareysatinne maata aawati, saloninne sa7an de7iya ubbay iyawunne iya baggara medhetis.
COL 1:17 I ubbabaape kase de7ees. Ubbabay iyan ba bessan bessan oyketidi de7ees.
COL 1:18 I ba asatethi gidida woosa keethas huuphe. I ubbaafe bolla gidanaw hayqope dendon sinthenne bayra.
COL 1:19 Xoossay ba kumetha Xoossatethaara iyan daanaw koyis.
COL 1:20 Qassi masqaliya bolla gussida ba na7aa suuthan sarotethi medhidi saloninne sa7an de7iya ubbaa iya baggara baara sigethis.
COL 1:21 Haysafe kase hinte qofaa iitatethay hintena Xoossaafe shaakisinne iyara morke oothis; hinte oosoyka iita.
COL 1:22 Shin ha77i Kiristoosi ashon hayqida hayquwa baggara Xoossay hintena baara sigethidi, geeshshata, borey baynaysatanne xillota oothis.
COL 1:23 Hinte, hinte ammanuwan qaaxonna minnidinne xaphidi daanaw bessees. Hinte Wongela qaala si7ida wode ekida ufaysaa minthi oykite. He Wongelay hinte si7idaysanne biitta ubban sabbaketidaysa. Ta, Phawuloosika ha Wongelas oosancho gidas.
COL 1:24 Taani hinte gisho ha77i ekiya waayan ufaytayis. Kiristoosi iya asatethi gidida woosa keethaas ekida waayiya taani ta ashuwan polayis.
COL 1:25 Xoossaa qaala hintew polada odana mela taw imetida maatan woosa keethaas oosancho gidas.
COL 1:26 Ha qaalay kase aadhida wodiyan yeletethaa ubbaafe geemmidi de7is. Shin ha77i Xoossay ha xuuraa ammaniya ubbaas qoncisis.
COL 1:27 Xoossay Ayhude gidonna asaa giddon ha xuuraa boncho duretetha qoncisis. Ika boncho ufaysi gidida hinte giddon de7iya Kiristoosa.
COL 1:28 Hessa gisho, issi issi asi Kiristoosan kumetha asi oothidi shiishanaw cincatetha ubban asaa tamaarsoninne zoren Kiristoosaba sabbakoos.
COL 1:29 Xoossay ba gita wolqan tanan oothiya gisho, ha77i gakanaw iya wolqan baaxetaysinne daaburayis.
COL 2:1 Ta hintewunne Loodoqe kataman de7iya asaas, hessadaka tana ayfen be7iboona asa ubbaas ay mela baaxetiyako hinte erana mela koyayis.
COL 2:2 Ta baaxetiya gaasoyka enti banta wozanan minnidi, siiqon qashetidi, polo gidida kumetha akeeka duretetha demmidi Xoossaa xuuraa Kiristoosa erana melasa.
COL 2:3 Iyan Xoossay minjida eraynne cincatetha ubbay de7ees.
COL 2:4 Ta hessa oonika hintena cimo qaalan balethonna mela koyada gayis.
COL 2:5 Ta hintefe haakada de7ikoka ayyaanan hintera de7ayis. Hinte duussaa maaranne Kiristoosa hinte minnidi ammaneysa be7ada ufaytayis.
COL 2:6 Hinte Godaa Kiristoos Yesuusa ekidaysada iyan de7ite.
COL 2:7 Iyan xapho yeddite; iyan keexetite. Hinte tamaaridaysada ammanon minnite; Xoossaas kumidi palahida galataa immite.
COL 2:8 Kiristoosape gidonashin, asa woganinne ha alamiya coo wogan katida timirteninne asape yida eratethan oonika hintena cimi balethidi di77onna mela naagetite.
COL 2:9 Xoossaa Xoossatethay Kiristoosa asatethan kumethi de7ees.
COL 2:10 Hinteka maatasinne wolqa ubbaas huuphe gidiya Kiristoosan kumideta.
COL 2:11 Hinte Kiristoosa ammanidi qaxaretideta. Hessika asa kushen gidonashin, hintena iita hanotethaafe diggiya Kiristoosan oosetida qaxaretethi.
COL 2:12 Hinte xammaqetida wode Kiristoosara issife moogetidi, Kiristoosa hayqope denthida Xoossaa wolqaa ammanidi, Kiristoosara issife dendideta.
COL 2:13 Hinte, hinte nagaraa gishonne hinte ceega asatethaa qaxaretonna gisho hayqidi de7ishin, Xoossay hinte nagaraa atto gis. Kiristoosara hintew de7o immis.
COL 2:14 I nuna mootiyanne nuura eqetiya, nu bolla xaafetida acuwa daakidi masqaliya bolla dhishidi ogepe diggis.
COL 2:15 Kiristoosi wolqatanne maatata masqaliyan xoonidi, enta ola dancuwa bilisidi, di7etida asada enta qoncen yuushshi bessis.
COL 2:16 Hessa gisho, miyaban woyko uyaaban, ba7aale gallas woyko ageeni xeeriya qamma bonchon oonika hinte bolla pirdofo.
COL 2:17 Haysati sinthafe yaanaw de7iyabatas eesho, shin tumay Kiristoosa.
COL 2:18 Qoodhepe qommo ashketethaninne kiitancho goyinnon ceeqetiya oonika hintena hinte woytuwape ashshofo. Hessa mela asi ba be7ida qoncethan nashetishe ba asho qofan coo otortees.
COL 2:19 Hessa mela asaas huuphe gidida Kiristoosara gahetethi baawa. I asatethaa ubbaa shayaninne keson keson gathi oythidi muzidi dichees. Xoossay hessa mela ogen asatethaa ubbaas dichi immees.
COL 2:20 Hinte Kiristoosara hayqidi ha alamiya haariya ayyaanata wolqaafe la77a keydeta. Yaatin, ayis shaaketonna asada gididi ha wogatas haretetii?
COL 2:21 He wogati, “Oykofa; laacofa; bochofa” geeteteysata.
COL 2:22 Ha ubbay asa woganne timirte gidiya gisho ooso bolla pee7idaape guye dhayana.
COL 2:23 Ha kiitati bonchonne cincatethi daanidi bentanaw danda7oosona. Ha wogati Xoosse daro dosisiyaba, ashkenne hinte asatethaa haarisiyaba daanosona, shin nu iita amotetha bolla entaw wolqi baawa.
COL 3:1 Hiza, hinte Kiristoosara hayqope dendidaysada, Xoossaafe ushacha baggan uttida Kiristoosi de7iya bessan, salon de7iyabata koyite.
COL 3:2 Salon de7eyisata bolla hinte qofaa wothitepe attishin, sa7an de7iyabata bolla wothofite.
COL 3:3 Hinte hayqon shaaketida mela ha alamiyape shaaketideta. Hinte de7oy Kiristoosara issife Xoossan geemmis.
COL 3:4 Hintew de7o gidida Kiristoosi qonciya wode he wode hinteka iyara bonchon qoncana.
COL 3:5 Hessa gisho, hintenan de7iya alame amotta wodhite. Hessatika laymatethi, tunatethi, laymatanaw amotethi, eeqa goyinno mela gidida uuzetethi.
COL 3:6 Hayisata gaason Xoossaa hanqoy kiitetonna asaa bolla yaana.
COL 3:7 Hinteka kase he iita ogiyan biya asaa giddon de7ishe haysata oothideta.
COL 3:8 Ha77i hinte hessata oothopite. Qassi hanqo, ixo, kachi, zigirsinne borso oda hintefe diggit.
COL 3:9 Ceega asatethaa iya oosuwara hintefe qaarida gisho, issoy issuwas wordotopite.
COL 3:10 Xoossaa medho daaniya, eratethan laametida ooratha asatethaa ma7ite.
COL 3:11 Ha ooratha medhetethan, Girike asi woyko Ayhude asi, qaxaretiday woyko qaxaretonnay, Barbare asi woyko Iskute asi aylley woyko womaannoy baawa. Kiristoosi ubbaa; I ubban de7ees.
COL 3:12 Hessa gisho, Xoossan dooretida asada geeshshatanne dosetidaysata gididi, maarotethaa, keehatetha, ashketethanne danda7a ma7ite.
COL 3:13 Issoy issuwa danda7ite. Oonika ba laggiyan qohetidabay de7iko iyaw atto go. Goday hintew atto gidaysada hinteka wolis atto giite.
COL 3:14 He ubbaa bolla ubbaba issife shiishidi qachiya siiqo ma7ite.
COL 3:15 Xoossay hintena issi asi oothidi xeegiday, sarotethaas gidiya gisho Kiristoosa sarotethay hinte wozanaa haaro.
COL 3:16 Kiristoosa qaalay hinte wozanan kumidi de7o. Cincatetha ubban issoy issuwa tamaarsitenne zorite. Mazmuren, sabaninne ayyaana yethan Xoossaa wozanape galatishe yexite.
COL 3:17 Xoossaa Aawa Yesuusa baggara galatishe hinte odetiyaba woyko oothiyaba ubbaa Godaa Yesuusa sunthan oothite.
COL 3:18 Macheto, ammaniya asaas bessiyaba gidiya gisho, hinte azinatas haaretite.
COL 3:19 Azinatoo, hinte macheta siiqite; entaw iitopite.
COL 3:20 Nayto, hintena yelidaysatas ubbaban kiitetite; hessi Godaa ufaysiyabaa.
COL 3:21 Aawato, hinte nayti ufaysi qanxonna mela enta camethofite.
COL 3:22 Aylleto, sa7an hintew godaa gididaysatas ubbaban kiitetite. Godaa bonchishe suure wozanape kiitetidi enta ufaysitepe attishin, asi be7o gidi oothopite.
COL 3:23 Hinte oothiya ooso ubbaa asas gidonashin, Godaas oothiya mela wozanape oothite.
COL 3:24 Godaape laata woyto oothidi hinte ekeysa erite; hinte Godaa Kiristoosa haggaazeeta.
COL 3:25 Xoossay asa som7o be7idi pirdonna gisho, oonika iita ooso oothiko ba iita oosuwa gisho zaaro ekana.
COL 4:1 Godato, hintewuka qassi salon Goday de7eysa eridi, hinte aylletas xillotethaninne issuwa issuwafe shaakonna koshshiyaba oothite.
COL 4:2 Xoossaa barkidi galatishe qanxonna woossite.
COL 4:3 Xoossay ba qaalas penge dooyana melanne taani hessa gaason qashon de7iya Kiristoosa xuuraa awaajana mela nuuska woossite.
COL 4:4 Qassi taka besseysada qaala qoncisada odana mela taw Xoossaa woossite.
COL 4:5 Injetiya wode ubbaa go7etishe ammanonna asaa matan cincatethan de7ite.
COL 4:6 Hinte asa ubbaas koshshiya zaaro imo erana mela hinte oday ubba wode aadho keehatethan kumidaysanne maxineda mal7iyabaa gidanaw bessees.
COL 4:7 Nu siiqo ishay Tikiqoosi, taara issife Godaa oosuwan aylle gidida, ammanetiya oosanchoy, ta de7uwabaa hintew odana.
COL 4:8 Taani iya hinteko kiittiday, nu waanidi de7iyako hintew odidi hintena minthethana melasa.
COL 4:9 Anasmoosi, ammanetiya siiqo ishay, hinte baggay, iyara hinteko bees. Enti haysan haniyaba ubbaa hintew odana.
COL 4:10 Taara qashetida Arisxirokoosinne Barnabaasa ishaa na7ay Marqoosi, hintena saro yaagosona. Ta hintew kase odidaysada Marqoosi hinteko biiko iya mokite.
COL 4:11 Yesuusa geetetiya Yasxoosi hintena saro saro yaagees. Xoossaa kawotethaa gisho taara oothiya asata giddofe Ayhude gididaysati ha heedzata; enti tana daro minthethidosona.
COL 4:12 Hinte baggay, Kiristoos Yesuusa aylley, Ephafiri hintena saro saro yaagees. I hinte Xoossaa sinthan minnidi eqanaadanne Xoossaa sheniya eridi polana mela ubba wode Xoossaa hinte gisho woossees.
COL 4:13 I hinte gishonne Loodoqeninne Hirapolisa kataman de7iya asaa gisho daro daaburidaysa ta markatayis.
COL 4:14 Nu siiqo ishay dottorey Luqaasinne Deemasi, hintena saro saro yaagosona.
COL 4:15 Loodoqen de7iya nu ishatas, Nimfaasinne I keethan shiiqiya asaas nu sarothuwa odite.
COL 4:16 Ha dabdaabiya hinte nabbabidaape guye, Loodoqe woosa keethan nabbabisite. Hinteka Loodoqe woosa keethay hintew yeddiya dabdaabiya nabbabite.
COL 4:17 Qassi Arkiphaasa, “Goday new immida oosuwa polanaysa dogopa” yaagidi qofisite.
COL 4:18 Taani, Phawuloosi, ha sarothuwa ta kushen xaafas. Ta qashuwa qopite. Xoossaa aadho keehatethay hintera gido.
1TH 1:1 Phawuloosi Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafida kiita. Aadho keehatethaynne saroy hintew gido.
1TH 1:2 Nuuni Xoossaa woossiya wode ubban hintena qopishe hinte gisho ubba wode Xoossaa galatoos.
1TH 1:3 Xoossaa nu Aawa sinthan ammanon hinte oothida oosuwa, siiqon hinte daaburida daaburanne Yesuus Kiristoosan de7iya ufaysaa ekanaw hinte minnidi eqida equwa ubba wode nuuni qopoos.
1TH 1:4 Nu ishato, Xoossay hintena doseysanne ba ase oothidi hintena dooridaysa nuuni eroos.
1TH 1:5 Ayis giiko, nuuni Wongela doona xalaalan gidonashin, wolqan, Geeshsha Ayyaananinne Wongela tumaa ammanon hintew ehida. Nuuni hintera gam7ida wode ubban hinte gisho waanidi de7idaako hinte ereeta.
1TH 1:6 Hinte daro meto ekikoka Geeshsha Ayyaanay immiya ufaysan kiitaa ekideta; nunanne Godaa daanideta.
1TH 1:7 Hessa gisho, Maqedoonenne Akaya biittan de7iya ammaniya ubbaas leemiso gidideta.
1TH 1:8 Godaa qaalay hintefe keyidi, Maqedooneninne Akaya xalaalan gidonashin, Xoossaa hinte ammaneysi ubbason si7etis. Hiza, nuuni gaanabay aykoyka baawa.
1TH 1:9 Nuuni hinteko bida wode hinte nuna mokida mokuwanne hinte, hinte eeqa aggidi tumaanne de7o Xoossaa haggaazanaw hinte simmidaysa enti banta huuphen odoosona.
1TH 1:10 Qassi Xoossaa Na7ay, Yesuusi, Xoossay hayqope denthidaysi, sinthafe yaana Xoossaa hanquwafe nuna ashshanaysi, salope yaanaysa hinte naageysa enti markatoosona.
1TH 2:1 Ta ishato, nuuni hinteko biday mela gidonnaysa hinte, hinte huuphen ereeta.
1TH 2:2 Shin nuuni hinteko Teselonqe yaanape sinthe Filphisiyuusa kataman waayetidaysanne cayetidaysa hinte ereeta. Daro ixoy de7ikoka hintew iya Wongela odana mela Xoossay nuus minotethi immis.
1TH 2:3 Nuuni hintena zoriday balethon woyko cimon woyko genen gidenna.
1TH 2:4 Shin Xoossay nunan ammanetidi ba Wongela odana mela nuus hadara immida gisho odoos. Nu hessa oothey nu wozanaa be7iya Xoossaa ufaysanaasafe attishin, ase ufaysanaasa gidenna.
1TH 2:5 Nu miishe yaaridi wordo hintena sabbishe hinteko yoonnaysa loythidi ereeta; Xoossay nuus marka.
1TH 2:6 Nuuni hintefe gidin woyko hara asa oodefeka boncho koyibooko.
1TH 2:7 Nuuni Kiristoosa hawaare gideysada nuus koshshiyaba immite gidi ekanaw danda7oos, shin aayiya ba nayta dicheysa mela hinte giddon ashke gidida.
1TH 2:8 Nu hintena dosida gisho Xoossaa Wongela hintew shaako xalaala gidonashin, nu de7uwaka hintew immanaw giigida. Hinte nuus daro al7o.
1TH 2:9 Nu ishato, nu oosuwanne nu daabura ereeta. Hintew Xoossaa Wongela odishe, hintena waaysonna mela qammanne gallas oothida.
1TH 2:10 Nu de7oy hinte ammaneyisata mataninne Xoossaa sinthan geeshshi, xillonne boretonaysa gideysas hinte marka.
1TH 2:11 Nuuni hintew huuphen huuphen yelidaysati banta naytas haneysada hanidaysa ereeta.
1TH 2:12 Nu hintena zorida, minthethida. Qassi ba kawotethaanne ba bonchuwa shaakanaw hintena xeegiya Xoossaa ufaysiya de7o hinte daana mela hintew minthidi odida.
1TH 2:13 Hintew nuuni Xoossaa qaala odida wode asa qaalada gidonashin, Xoossaa qaalada si7idi ekida gisho nuuni ubba wode Xoossaa galatoos. I tuma Xoossaa qaala; Xoossaa qaalay ammaniya hintenan oothees.
1TH 2:14 Ta ishato, hinte Yihuda biittan de7iya woosa keethatanne yan Kiristoos Yesuusa kaalliya asatada hanideta. Enta Ayhudeti waaysidaysada hintenaka hinte biitta asay waaysidosona.
1TH 2:15 He Ayhudeti Godaa Yesuusanne nabeta wodhidosona; qassi nuna goodidosona. Enti Xoossaa ufaysonaysatanne ase ubbaa ixeyisata.
1TH 2:16 Enti hari attoshin, Ayhude gidonna asay attana mela nuuni entaw qaala odeysa diggoosona. Hessada hanidi enta nagaraa xuu7ay kumana gakanaw ubba wode nagara oothosona. Wursethan, Xoossaa hanqoy enta bolla wodhees.
1TH 2:17 Shin nu ishato, nuuni nu qofan gidonashin, ashon hintefe shaaketidi guutha wode gam7idaysan hintena daro laamotidi be7anaw koyida.
1TH 2:18 Nu simmi hinteko baanaw koyida. Taani ta huuphen hinteko baanaw koyas, shin Xalahey nuna diggis.
1TH 2:19 Hiza, nu Godaa Yesuus Kiristoosi yaa wode, nu ufaysay woyko nu ceeqetiya nu kallachay oonee? Hintena gideketiyee?
1TH 2:20 Tuma hinte nu bonchonne nu ufaysi.
1TH 3:1 Hessa gisho, nuus gencanaw danda7etonna ixin, Ateena kataman nurka attanaw qofa qachida.
1TH 3:2 Hintena zoranaadanne ammanon hintena minthethanaada nuura issife Xoossas ootheysanne Kiristoosa Wongela odiya nu ishaa Ximotiyoosa hinteko kiitida.
1TH 3:3 Hintena gakida goodan hintefe oonika guye simmofo. He gooday nuus Xoossa shene gideysa hinte, hinte huuphen ereeta.
1TH 3:4 Nu hintera de7iya wode goodi gakanaysa hintew koyrottidi odida. Hinte ereysa mela hessada hanis.
1TH 3:5 Hessa gisho, taw gencanaw danda7etonna ixin, “Ooni eri Xalahey enta paacidi nu daabura mela ashshona aggenna” gada hinte ammanuwaba eranaw Ximotiyoosa hinteko kiittas.
1TH 3:6 Ha77i Ximotiyoosi hinte matape yidi, hinte ammanuwabanne hinte siiquwaba lo77o wore nuus odis. Qassi hinte ubba wode nuus lo77o qopeysanne nuuni hintena be7anaw laamoteysada hinteka nuna be7anaw laamoteysa I nuus odis.
1TH 3:7 Ta ishato, nuna gakiya waayaninne nu meto ubban hinte ammanuwa gisho hintenan minetida.
1TH 3:8 Hinte Godan minnidi de7iko nuka de7on de7oos.
1TH 3:9 Hiza, nuuni hinte gaason demmida ufaysas Xoossaa waati galatino?
1TH 3:10 Nuuni hintena be7anawunne hinte ammanuwan pacidaba kunthanaw qammanne gallas nu kumetha wozanan Xoossaa woossoos.
1TH 3:11 Xoossay nu aaway ba huupheninne nu Goday Yesuus Kiristoosi nu hinteko baana ogiya giigiso.
1TH 3:12 Nu hintena daro doseysada Goday hinte issoy issuwa siiqiya siiqonne ase ubbaa siiqiya siiqo hintew darsonne gujo.
1TH 3:13 Nu Goday Yesuus Kiristoosi ba geeshshatara yaa wode Xoossaa, nu aawa sinthan hinte wozanay geeshshinne borey baynaysa oothidi I hintena minthethana.
1TH 4:1 Wursethan, ta ishato, Xoossaa ufaysanaw hinte waanidi daanaw bessiyako nuupe tamaarideta. Hessi hinte koyrope de7ida de7uwa, shin ha77i hinte kaseysafe aathidi oothanaada Godaa Yesuusa sunthan hintena woossosinne zoroos.
1TH 4:2 Nuuni Godaa Yesuusa maatan hintena kiitida kiitay awuseko ereeta.
1TH 4:3 Xoossay, hinte geeshshi gidana melanne laymatonna mela koyees.
1TH 4:4 Hinte issoy issoy, hinte machetara geeshshatethaninne bonchon daanaw bessees.
1TH 4:5 Xoossaa eronnanne ammanonna asada laymatetha amon xuugetofite.
1TH 4:6 Nu kase hintew odidaysadanne minthi zoridaysada Goday hessa melaba oothiya ubbaa pirdiya gisho, oonika haysatan ba ammaniya ishaa naaqanawunne cimmanaw bessenna.
1TH 4:7 Xoossay nuna geeshshatethan daana mela xeegisipe attishin, tunatethan daana mela xeegibeenna.
1TH 4:8 Hessa gisho, ha timirtiya ixiya oonika hintew Geeshsha Ayyaana immiya Xoossaa ixeesipe attishin, ase gidenna.
1TH 4:9 Hinte issoy issuwa waati siiqaneko Xoossay hintena tamaarsida gisho, ha77i siiqoba nu hintew xaafanaw koshshenna.
1TH 4:10 Qassi Maqedoone biittan de7iya ammaniya ishata ubbaa tuma hinte doseeta. Shin nu ishato, ha77ika hinte enta aathidi dosana mela hintena woossoos.
1TH 4:11 Nuuni kase hintew odidaysada wopu gida de7uwa de7ite. Hinte, hinte ooso oothidi hintew duussas koshshiyaba demmite.
1TH 4:12 Hessada haniko, ammanonayisata matan hinte bonchetana; qassi hintena koshshiyabas oonaka aaddasheketa.
1TH 4:13 Nu ishato, ammanidi hayqida asati hananaba hinte erana mela nu koyoos. Hinte enta gisho ufaysi bayna asada kayotofite.
1TH 4:14 Nuuni, Yesuusi hayqidaysanne qassi hayqope dendidaysa ammanoos. Hessadaka, Xoossay Yesuusa ammanidi hayqidaysata iyara wolla ehanaysa ammanoos.
1TH 4:15 Goday nuus odidaysada Goday yaa gallas iyara gahetanaw nuuni paxa de7eysati, hayqidaysatape sinthatoko.
1TH 4:16 Goday wolqaama kiitara, kiitanchota halaqa girsara, Xoossaa moyze punora, salope wodhana. Kiristoosa ammanidi hayqidaysati koyrottidi hayqope dendana.
1TH 4:17 Hessafe guye, he wode nuuni paxa de7eysati, Godaara shaaran gahetanaw entara issife salo eketana. Hessafe guye, nuuni Godaara issife merinaw daana.
1TH 4:18 Hessa gisho, ha qaalan issoy issuwa minthethite.
1TH 5:1 Ta ishato, ha hanoti hanana wodiyanne ageena hintew xaafanaw koshshenna.
1TH 5:2 Godaa Gallasay kaysoy qamma yeysada yaanaysa hinte loythi ereeta.
1TH 5:3 Asay, “Sa7i saro, aykoyka hanenna” yaagishin, maccas iqethi oykeysada dhayoy enti qoponna enta bolla yaana. Enti ay ogenka kessi ekokona.
1TH 5:4 Shin nu ishato, he gallasay hintew kaysoy yeysada yaanaw hinte dhuman de7eketa.
1TH 5:5 Hinte ubbay poo7o asinne gallasan de7iya asi; nuuni qamma asi woyko dhuma asi gidoko.
1TH 5:6 Hessa gisho, nuuni harati dhiskeysada dhiskanaw bessenna; nuuni barkanawunne giigidi daanaw bessees.
1TH 5:7 Dhiskeysati qamma dhiskoosona; mathoteysati qamma mathotosona.
1TH 5:8 Shin nuuni gallasa asi gidiya gisho giigidi daanaw bessees. Ammanonne siiqo xurureda tiran ma7idi, atotetha ufaysaa huuphen wothiya ola birata barneexada wothidi daanaw bessees.
1TH 5:9 Xoossay nuna nu Godaa Yesuus Kiristoosa baggara kumetha atotethi ekana mela doorisipe attishin, hanqos dooribeenna.
1TH 5:10 Nuuni paxa de7in woyko hayqin, Kiristoosi yaa wode iyara issife daana mela Kiristoosi nu gisho hayqis.
1TH 5:11 Hessa gisho, hinte kase ootheysada, issoy issuwa minthethitenne dichite.
1TH 5:12 Nu ishato, hinte giddon ootheyisata, hintena kaalethana melanne zorana mela Goday dooridaysata bonchana mela hintena woossoos.
1TH 5:13 Enti oothiya oosuwa gisho, enta daro bonchitenne siiqite. Issoy issuwara sarotethan de7ite.
1TH 5:14 Nu ishato, nuuni hintena zoroos. Boozata hanqite; babeyisata minthethite; daaburanchota maaddite; ase ubbaa danda7ite.
1TH 5:15 Oonika iita gisho iita zaaronna mela naagetite. Hinte wolisinne asa ubbaas lo77oba oothanaw minnite.
1TH 5:16 Ubba wode ufaytite.
1TH 5:17 Ubba wode Xoossaa woossite.
1TH 5:18 Ubbaban galatite. Kiristoos Yesuusa baggara Xoossay hintefe koyey hessa.
1TH 5:19 Geeshsha Ayyaana oosuwa toysopite.
1TH 5:20 Tinbite qaala kadhopite.
1TH 5:21 Ubbabaa paacite; lo77oba ekite.
1TH 5:22 Iita ooso ubbaafe haakite.
1TH 5:23 Saro immiya Xoossay ba huuphen hintena polo geeshsho. Nu Goday Yesuus Kiristoosi yaana gallasaas, Xoossay hinte ayyaana, hinte shempuwanne hinte kumetha asatethaa borey bayna naago.
1TH 5:24 Hintena xeegeysi ammanetidaysa gidiya gisho, hessa I polana.
1TH 5:25 Nu ishato, nuus Xoossaa woossite.
1TH 5:26 Ammaniya asa ubbaa geeshsha yeeretethan sarothite.
1TH 5:27 Hinte ha kiitaa ammaniya asa ubbaas nabbabanaada Godaa sunthan hintena woossayis.
1TH 5:28 Nu Godaa Yesuus Kiristoosa aadho keehatethay hintera issife gido. Amin7i.
2TH 1:1 Phawuloosi, Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafetida kiita.
2TH 1:2 Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
2TH 1:3 Nu ishato, hinte ammanoynne hinte issoy issuwanne harata siiqiya siiqoy daro dicciya gisho, nuuni hessas Xoossaa ubba wode galatanaw bessees.
2TH 1:4 Hintena gakida goodaninne waaye ubban gencaninne ammanon minnidi eqida gisho, nuuni nu huuphen Xoossaa woosa keethatan hintebaa markatishe hintenan ceeqetoos.
2TH 1:5 Hinte iya gisho gidi meto ekiya Xoossaa kawotethaas besseyisata gididi taybetana mela Xoossaa xillo pirdaas haysi malla.
2TH 1:6 Xoossay tuma pirdaa pirdana. Xoossay hintena waayseysata bolla waaye ehana.
2TH 1:7 Goday Yesuusi ba wolqaama kiitanchotara, tama lacora salope yaa wode waayetiya hintenanne nuna shempisana.
2TH 1:8 Qassi Xoossay bana eronnaysatanne nu Godaa Yesuus Kiristoosa Wongelas kiitetonayisata pirdana.
2TH 1:9 Enti Godaa sinthafenne iya bonchuwa wolqaafe shaaketidi merinaa dhayuwan pirdetana.
2TH 1:10 He gallas, I ba geeshsha asaaninne bana ammaniya ubban bonchetanawunne sabetanaw yaa wode nu hintew odida kiitaa hinte ammanida gisho, hinte iya boncheyisata giddoninne sabbeyisata giddon daana.
2TH 1:11 Nuuni hintew ubba wode Xoossaa woossey hessasa. Nu Xoossay hintena xeegida de7uwas besseyisata gididi taybetana mela nuuni woossoos. Hinte lo77oba oothanaw amotiya amuwanne hinte ammano oosuwa I ba wolqan polo.
2TH 1:12 Hessan nu Xoossaanne nu Godaa Yesuus Kiristoosa aadho keehatethan, Godaa Yesuusa sunthaa hinte bonchana; hintenaka I bonchana.
2TH 2:1 Nu ishato, nu Godaa Yesuus Kiristoosa yuussabaanne nu iyara gahetanaw shiiqanabas nu hintena woossoos.
2TH 2:2 Tinbiten woyko hara asape si7ida qaalan woyko nuupe ekida kiittada oothidi, “Godaa gallasay gakis” gidi hinte wozanay dagammofonne waabaqopo.
2TH 2:3 Hintena oonika ay ogenka balethofo. Kasetidi geellatethay qonconnanne dhayoy bessiya geella uray yoonna de7ishin, Godaa gallasay gakenna.
2TH 2:4 Asi goyinniyabanne xoossayaba ubbaa I ixananne bana dhoqu oothana. Hari attoshin, Xoossa keethi geli uttidi, “Taani Xoosse” gaana.
2TH 2:5 Taani hintera de7ashe hintew odidaysa akeekeketii?
2TH 2:6 I ba gallasan yaanape attishin, ha77i yaanaysa aybi iya teqiyako hinte ereeta.
2TH 2:7 Asaas qonciboonna geellatetha xuura wolqay ha77ika oothees, shin ha77i iya teqeysi de7ees. Iya teqeysi ogepe kichana gakanaw I qoncenna.
2TH 2:8 Hessafe guye, geella uray qoncana, shin Godaa Yesuusi ba doonape keyiya shempuwan, ba boncho yuussan iya wodhana.
2TH 2:9 Geella uray, Xalahe wolqan yidi wordo malaatatanne malaalsiyabata oothana.
2TH 2:10 Hessadaka, dhayos de7iya asata dumma dumma cimmiya iita ooson balethana. Enti dhayiday ashshiya tumaa dosidi ekonna ixida gishosa.
2TH 2:11 Hessa gisho, enti wordo gidiyaba ammanana mela Xoossay wolqaama baleso enta bolla yeddana.
2TH 2:12 Hessika, tumaa ammanonna asati, nagara ooson ufayteysati ubbay pirdetana melasa.
2TH 2:13 Goday dosiya nu ishato, nuuni Xoossaa hinte gisho, ubba wode galatanaw bessees. Hinte attana mela Xoossay Geeshsha Ayyaana wolqan hintena geeshshidaysanne hinteka tumaa ammanidaysan I hintena bayrada dooris.
2TH 2:14 Xoossay, nu hintew odida Wongela baggara hintena xeegiday, hinte nu Godaa Yesuus Kiristoosara issife bonchetanaasa.
2TH 2:15 Hiza, nu ishato, minnidi eqite. Nuuni hintena nu doonan gidin woyko dabdaabiyan gidin tamaarsida timirtiya oykite.
2TH 2:16 Xoossay nu aaway nuna dosees. I nuus keeha; I merinaa minthethonne lo77o ufaysaa nuus immis. Hinte ubba wode lo77oba oothanawunne odetanaw minthethana melanne maaddana mela nu Godaa Yesuus Kiristoosanne Xoossaa nu aawa woossoos.
2TH 3:1 Wursethan nu ishato, Godaa qaalay hinte giddon ellesidi dalganaadanne bonchetanaada nuus woossite.
2TH 3:2 Hessadaka, asi ubbay qaala si7idi ammanonna gisho, Xoossay geellatapenne iita asatape nuna ashshana mela nuus woossite.
2TH 3:3 Shin Goday ammanetidaysa; I hintena minthethananne Xalahepe naagana.
2TH 3:4 Nuuni hintena kiitteysa ha77ika sinthafeka hinte oothanaysas Godan nuuni ammanetoos.
2TH 3:5 Goday hinte wozanaa Xoossa siiquwakonne Kiristoosa danda7aako kaaletho.
2TH 3:6 Nu ishato, hinte nuupe ekida kiitaa kaallonaysatapenne ooso billiya azalla ammaniya asatape hinte shaaketanaada Godaa Yesuus Kiristoosa sunthan hintena kiittoos.
2TH 3:7 Nuuda hanidi daanaw besseysa hinte, hinte huuphen ereeta. Nuuni hintera de7iya wode ooso billibooko.
2TH 3:8 Nuuni oodefeka kathi mela mibooko. Nuus danda7etida mela qammanne gallas oothi daaburidi de7idape attishin, oodeska tooho gidibooko.
2TH 3:9 Nuuni hessa oothiday, hintew leemiso gidanaasafe attishin, hintefe maade oychanaw nuus maati dhayina gidenna.
2TH 3:10 Nu hintera de7iya wodeka, “Oothanaw koyonna asi oonika moopo” yaagidi kiitida.
2TH 3:11 Nuuni hessa giday, hinte giddon issi issi azallati de7eysa si7ida gishosa. He asati gelsonnaban gelidi harata ooso bilisoosonape attishin, aykoka oothokona.
2TH 3:12 Nuuni hessa mela asati maara de7o daanadanne bantana koshshiyaba oothidi demmanaada Godaa Yesuus Kiristoosa sunthan enta kiittoosinne zoroos.
2TH 3:13 Shin nu ishato, lo77o ooso oothanaw azallofite.
2TH 3:14 Ha77i nuuni ha dabdaabiyan kiitida kiittas kiitetonna asi oonika de7iko he uraa erite. I yeellatana mela iyape shaaketite.
2TH 3:15 Shin iya ishada seeritepe attishin, morkeda xeellofite.
2TH 3:16 Saro immiya Goday, ba huuphen hintew ubba wodenne ubba baggara saro immo. Goday hinte ubbaara gido.
2TH 3:17 Taani Phawuloosi, ha kiitaa ta kushen xaafas. Ta kiita ubbaas mallay haysa; taani hessada xaafayis.
2TH 3:18 Nu Godaa Yesuus Kiristoosa aadho keehatethay hinte ubbaara gido.
1TI 1:1 Nuna ashshiya Xoossaaninne nu ufaysan naagiya Yesuus Kiristoosan kiitetida, Yesuus Kiristoosa hawaare gidida, Phawuloosape,
1TI 1:2 ammanon taw tuma na7a gidida Ximotiyoosas. Xoossaa nu Aawa, nu Godaa Kiristoosa aadho keehatethay, maarotethaynne sarotethay new gido.
1TI 1:3 Taani Maqedoone bashe nena hadaridaysada, issi issi asati wordo timirtiya tamaarseysa digganaw ne Efesoonan gam7ana mela koyayis.
1TI 1:4 Enti go77i bayna hayse odanne banta kocha taybuwa agganaada oda. Hessa melabay palama kaaletheesipe attishin, ammanon oosetiya Xoossaa oosuwas maaddenna.
1TI 1:5 Ha kiitaa huuphe qofay geeshsha wozanape, lo77o kahapenne tuma ammanuwape bentiya siiquwa denthethanaasa.
1TI 1:6 Issi issi asati haysa aggidi, pathonna odako simmidosona.
1TI 1:7 Enti Xoossaa higgiya astamaare gidanaw koyoosona. Shin enti ay odiyako woyko tuma oothidi odeysi I aybeko erokona.
1TI 1:8 Asi besseysada higgiyan go7etiko higgey lo77o gideysa eroos.
1TI 1:9 Issiba akeekanaw koshshees. Higgey lo77o asaas medhetibeenna. Shin higgey, higge mentheyisata, worandzota, Xoosse yayyonnayisata, shempo wodheyisata, nagaranchota, geeshshatethi baynayisata, tunata, hari attoshin banta aayiw woyko aawa wodheyisata,
1TI 1:10 laammeyisata, addey addera laymateyisata, ase bayzeyisata, wordanchota, wordon caaqeyisata, woyko tuma timirtiyara gahetonna ay ooso ootheyisata seeranaw keyis.
1TI 1:11 He timirtey bonchonne anjetida Xoossay taani awaajana mela taw hadara immida Wongela giddon de7ees.
1TI 1:12 Taani oothiya oosuwan taw wolqaa immida nu Godaa Kiristoos Yesuusa galatayis. Tana ba oosuwas shuumidi he oosuwas besseysa gidi taybida gisho iya galatayis.
1TI 1:13 Taani haysafe kase iya cayeysa, iya yedetheysanne metootheysa gidikoka taani hessa eronnanne ammanonna oothida gisho Xoossay tana maaris.
1TI 1:14 Nu Goday ba aadho keehatetha ta bolla gussidi, he aadho keehatethaara ammanonne siiqo Kiristoos Yesuusa baggara taw immis.
1TI 1:15 “Kiristoos Yesuusi nagaranchota ashshanaw ha alamiya yis” giya qaalay ammantheysanne asa ubbay ekanaw besseysa. Ubbaafe aadhida nagaranchoy tana.
1TI 1:16 Shin merinaa de7uwa ekanaw iya ammaniya asaas taani leemiso gidana mela Yesuus Kiristoosi daro danda7is. Taw ubbaafe aadhida nagaranchuwas Xoossay ba maarota darsis.
1TI 1:17 Ayfen bentonnaysas, issi Xoossaas, hayqonaysas, merinaa Kawas, merinaape merinaa gakanaw galataynne bonchoy gido. Amin7i.
1TI 1:18 Ximotiyoosa, ta na7aw, kase nebaa nabeti odida qaala bolla eqada ha kiitaa hadara new immayis. Ne he qaala kaalliko lo77o olaa oletana.
1TI 1:19 Ammanoynne lo77o kahi new de7o. Issoti issoti kaha dhayidi markabey hobben dhayeysada banta ammanuwa dhaysidosona.
1TI 1:20 Hessa hanidaysata giddon Hemeneyoosinne Iskindirey de7oosona. Enti tamaaridi Xoossaa cayeysa aggana mela taani Xalahes entana aatha immas.
1TI 2:1 Ubbaafe sinthatada, asa ubbaas Xoossaa oychanaw, woossanaw, gaannatanawunne galatanaw besseysa taani nena akeekisayis.
1TI 2:2 Nuuni tuma ayyaana de7oninne geeshshatethan Xoossaa goyinnishe sarotethaninne wopu gida de7on daana mela kawotasinne shuumata ubbaas woossite.
1TI 2:3 Hessa mela woosay nuna ashshiya Xoossaa sinthan lo77onne ufaysiyabaa.
1TI 2:4 Xoossay asi ubbay attanaadanne tumaa eranaada koyees.
1TI 2:5 Issi Xoossi de7ees. Xoossafenne asape giddon gididi sigethiya issoy de7ees; ika ase gidida Kiristoos Yesuusa.
1TI 2:6 I asa ubbaa wozanaw bana aathidi immis. Xoossay ba wodiyan asa ubbaa wozanaw koyeysa bessiya markay haysa.
1TI 2:7 Xoossay tana Wongelas astamaarenne hawaare oothidi dooriday hessasa. Taani tuma odayis; wordotike; ammanoninne tuman Ayhude gidonna asaas markatana mela Xoossay tana shuumis.
1TI 2:8 Hessa gisho, ubba bessan de7iya addeti, bantana Xoossaas dummayidi, hanqonne palama diggidi, banta kushiya pude denthidi Xoossaa woossana mela koyayis.
1TI 2:9 Hessada maccasay bantana haaridaysa qoncisiya, bonchoynne maari de7iya ma7uwa ma7anaw bessees. Enti maari bayna huuphe dathan, worqan woyko inqon, woyko al7o afilan bantana alleeqisopo.
1TI 2:10 Shin Xoossaas goyinnayis giya maccasay bantaw besseysada lo77oba oothonna.
1TI 2:11 Maccasi kiitetethan si77i gidi tamaaro.
1TI 2:12 Taani maccasay tamaarsana mela woyko adde bolla aawatana mela gidonashin, si77i gidi daana mela koyayis.
1TI 2:13 Addaamey koyro medhetis; guyepe Hewaanna medhetasu.
1TI 2:14 Qassi cimetada Xoossaa higgiya menthiday maccasipe attishin, Addaame gidenna.
1TI 2:15 Shin maccasi ammanon, siiqoninne geeshshatethan bantana haaridi de7iko nayta yelon attana.
1TI 3:1 Oonika, “Woosa keethi kaalethiya asi gidanaw koyko lo77oba amottees” giya oday tuma.
1TI 3:2 Woosa keethaa kaalethiya asi boretonaysa, issi mache xalaali de7eysa, maaran de7eysa, bana haareysa, besseysada ootheysa, imathe mokeysa, tamaarsanaw danda7eysa,
1TI 3:3 mathotonaysa, ooyetonnaysa, palamonnaysa, miishe siiqonnaysa,
1TI 3:4 iya nayti iyaw kiiteteysanne boncheysa, ba keethaa aysanaw danda7eysa gidanaw bessees.
1TI 3:5 Issi asi ba keethaa aysanaw danda7onna ixiko, Xoossaa woosa keethi waati aysanaw danda7ii?
1TI 3:6 Otoron sugetidi, Xalahey Xoossaa pirdan kundidaysada kundonna mela, oorathi ammanida asi gidanaw bessenna.
1TI 3:7 Boreninne Xalahe xihen gelonna mela he uray ammanonna asa matan nasheteysa gidanaw bessees.
1TI 3:8 Hessada qassi woosa keethaa daaqoneti bonchetidaysata, nam7u doona odetonayisata, daro woyne ushshu uyonayisata, miishe yaaretonayisata,
1TI 3:9 ammanuwa xuuraa geeshsha kahan naageysata gidanaw bessees.
1TI 3:10 Enti koyrottidi paacetanaw koshshees; enta bolla borey bayna ixiko, woosa keethaa daaqone gididi ootho.
1TI 3:11 Hessadaka, enta maccasati bonchetidaysata, zigironnayisata, maaran de7eyisata, ubbaban ammaneteyisata gidanaw bessees.
1TI 3:12 Woosa keethaa daaqoneti issi machi xalaali de7eysa gido. Ba naytanne ba keethaa loythi ayseysa gidanaw bessees.
1TI 3:13 Woosa keethaa daaqone gididi, lo77o ooso ootheysati, entaw gita boncho qassi Kiristoos Yesuusan bantaw de7iya ammanuwaba odanaw daro minotethi demmana.
1TI 3:14 Taani ha kiitaa new xaafashe, ellesada neeko baana gada ufaysi wothayis.
1TI 3:15 Shin taani boonna gam7iko, Xoossaa Keethan asay waanidi daanaw bessiyako erana mela haysa new xaafayis. De7o Xoossaa keethay tumatethaas tuussinne baaso.
1TI 3:16 Nu ammanuwa xuuray sidhey bayna gita. Kiristoosi asho ma7idi qoncis; Iya tumatethaa Geeshsha Ayyaanay markatis. Kiitanchotas bentis; I kawotetha ubbaas sabbaketis. Alamen de7iya asan ammanetis; bonchon salo eketis.
1TI 4:1 Yaana wodiyan balethiya ayyaanatanne tuna ayyaanata timirte kaallidi, issi issi asay ammanuwa kaddanaysa Geeshsha Ayyaanay qoncisidi odis.
1TI 4:2 Hessa mela timirtey enta kahay doccin, asaa balethiya wordancho astamaaretape yees.
1TI 4:3 Hessa mela asati ekonne gelo qassi issi issi kathata moonna mela diggoosona. Shin ammaneysatinne tumaa ereysati Xoossaa galati woossidi maana mela Xoossay kathi medhis.
1TI 4:4 Xoossay medhida ubbabay lo77o. Xoossaa galatidi miiko wora wodhiyabay aybika baawa.
1TI 4:5 Ubbabay Xoossaa qaalaninne woosan geeshshi gidees.
1TI 4:6 Hessa gisho, neeni ha timirtiya ammaneyisata tamaarsiko, nu ammanuwaninne lo77o timirtiya kiitetada diccida, Kiristoos Yesuusa lo77o aylle gidana.
1TI 4:7 Shin go77i bayna tuma gidonna odapenne cima maccasa haysepe baqata. Tuma ayyaana de7on daanaw nena loohisa.
1TI 4:8 Asi ba asatethaa minthanaw oothiya oosoy guuthas maaddees. Shin tuma ayyaana de7on bana loohisoy ha77iska merinawuka de7o immiya ufaysi de7iya gisho, ubbaas maaddees.
1TI 4:9 Ha qaalay asa ubbay ekanaw bessiya tuma oda.
1TI 4:10 Nuuni asa ubbaa, ubbaafe aathidi ammaneyisata ashshiya de7o Xoossaafe ekana gidi ufaysan naagiya gisho, hessas nuuni ooson daaburosinne baaxetoos.
1TI 4:11 Haysa kiittanne tamaarsa.
1TI 4:12 Neeni yalaga gidiya gisho, nena oonika kadhopo. Shin ammaneysatas neeni odan, ooson, siiqon, ammanoninne geeshshatethan leemiso gida.
1TI 4:13 Taani yaana gakanaw asaas Geeshsha maxaafaa nabbabon, sabbakoninne tamaarson minna.
1TI 4:14 Tinbitey odetin, cimati banta kushiya ne bolla wothida wode neeni ekida, nenan de7iya Geeshsha Ayyaana imota kadhopa.
1TI 4:15 Ne dichay asa ubbaas qoncana mela hessa mintha qopa; haysa ubba wode ootha.
1TI 4:16 Ne huuphiyasinne ne timirtiyas naageta. Neeni hessa ubba wode oothiko nenanne nena si7eyisata ashshaasa.
1TI 5:1 Cima addeta ne aawada bonchafe attishin, hanqetofa. Yalaga addeta ne ishada oothada xeella.
1TI 5:2 Cima maccasata ne aayida, yalaga maccasata ne michida, polo geeshshatethan oyka.
1TI 5:3 Azini hayqida tuma am7eta boncha.
1TI 5:4 Shin am7ees nayti woyko nayta nayti de7iko, he nayti tuma ayyaana de7on de7eysa bessanaw bantana yelidaysatanne, banta wogga aayiwunne wogga aawa maaddidi kushe zaaro tamaaro. Hessi Xoossaa ufaysiyabaa.
1TI 5:5 Barka de7iya tuma am7iya Xoossafe maade demmanaw ufaysan naagasu. Gallasinne qamma Xoossay bana maaddana mela woossawusunne oychawusu.
1TI 5:6 Shin ha alamiyan lo77o duussaa xalaala koyiya am7iya paxa de7ashe hayqidaaro.
1TI 5:7 Oonika enta boronna mela ha kiitaa entaw imma.
1TI 5:8 Shin ba dabbotas, ubbaafe aathidi ba soo asaas qoponna oonika ba ammanuwa kaddidaysa; ammanonna asapeka aadhida iita.
1TI 5:9 Laythi usupun tammu kumiboona am7e sunthaa mazgaben xaafopa. Qassi hessa bolla iya ba azinaas ammanetidaro gidanaw koshshees.
1TI 5:10 Nayta dishon, imatha mokon, geeshshata tohuwa meechan, metootiya asaa maaden, lo77o ooso ubbaas bana aatha immidaaronne lo77o ooson eretidaaro gidanaw bessees.
1TI 5:11 Shin yalaga am7eta sunthaa mazgaben xaafopa. Entana azina gelo gelo giya asho amoy oykiya wode Kiristoosa aggana.
1TI 5:12 Enti koyro gelida qaala menthida gisho pirdetana.
1TI 5:13 Hessa bolla enti ooso dhayidi keethafe keethe yuuyana. Yuushsha xalaala gidonashin, zigirsaninne bantana gathonnaban gelidi bessonnaba odetoosona.
1TI 5:14 Hessa gisho, nu morketi nu bolla odetiya iitabaa demmonna mela yalaga am7eti azina gelidi, na7a yelidi, banta keethaa aysana mela zorayis.
1TI 5:15 Haysafe kase guutha am7eti Xalahe kaallanaw guye simmidosona.
1TI 5:16 Issi ammaniya maccasees soo asaa giddon am7eti de7iko, iya enta maaddanaw bessees. Hessada oothiko, woosa keethaas toohoy kawuyees. He wode woosa keethay maade bessiya tuma am7eta maaddanaw danda7ees.
1TI 5:17 Woosa keethi loythi heemmiya cimati, ubbaafe aathidi, qaala sabbakoninne tamaarson daabureysati dako boncho ekanaw bessees.
1TI 5:18 Geeshsha Maxaafay, “Wudumman kathaa yedhiya boora doona qachofa” hessadaka, “Oosanchoy ba damooziya ekanaw bessees” yaagees.
1TI 5:19 Nam7u woyko heedzu marki bayna, woosa keetha cima mootiyaba si7opa.
1TI 5:20 Harati yayyana mela nagara oothiya oonaka asa ubbaa sinthan hanqeta.
1TI 5:21 Neeni asa som7o be7onna, issuwa issuwafe dummayonna ha kiitaa naagana mela Xoossaa, Godaa Yesuus Kiristoosanne dooretida kiitanchota sinthan ta nena zorayis.
1TI 5:22 Oodde bollaka ne kushiya wothada shuumanaw ellesopa. Harata nagaran gelopa; nena geeshshatethan naaga.
1TI 5:23 Neeni ubba wode hargetiya gishonne ne ulo hargiya gisho haatha xalaala uyopa; guutha woyne uya.
1TI 5:24 Issi issi asata nagaray qonce; enta nagaray enta pirdanaw entafe sinthe aadhees, shin harata nagaray guyepe gam7idi qoncees.
1TI 5:25 Hessada, lo77o oosoyka qonce; qonconna ixikoka geemmanaw danda7enna.
1TI 6:1 Xoossaa sunthaynne nu timirtey cayetonna mela aylletethan de7eysati bantana haariya godata boncho.
1TI 6:2 Ammaniya godati de7iya aylleti, enta godati entaw isha gidiya gisho enta kadhopo. Enta oosuwan maadetiya godati, ammaneysatanne dosetidaysata gidiya gisho enti kasepe aathidi oothanaw bessees. Neeni haysa tamaarsanawunne enti oothana mela zoranaw bessees.
1TI 6:3 Oonika dumma timirte tamaarsiyaba gidiko, nu Godaa Yesuus Kiristoosa tuma qaalaranne nu ammano timirtiyara gahetenna.
1TI 6:4 He uray otoron sugeteesipe attishin, aykoka erenna. Entaw issi qofa bolla palamanawunne ooyetanaw iita amoy de7ees. Hessi qanaate, ooshshi, cashshe, iita sidhenne,
1TI 6:5 giigonna palama kaalethees. Qassi entaw iita wozani de7ees; tumaa balidosona; enti Xoossaa ammanoy duretethas oge gidi qopoosona.
1TI 6:6 Shin taw de7iyabay gidana giya asas tuma ayyaana de7oy gita wodhe.
1TI 6:7 Nuuni ha alamiya aykoka ehibooko; qassi iyape aykoka ekidi booko.
1TI 6:8 Nuus kathinne ma7oy de7iko hessi gidana.
1TI 6:9 Shin duretethi koyeysati paaceninne xihen geloosona. Qassi entana duge dafiyanne dhaysiya eeyatethinne qohiya amon kundoosona.
1TI 6:10 Miishe siiqoy iitatetha ubbaas pulto. Issoti issoti miishe amotishe ammanope baletidi daro meton bantana yeggidosona.
1TI 6:11 Shin neno, Xoossa aso, hessafe baqata. Xillotethaa, Xoossaa daano, ammano, siiqo, danda7anne ashketethi kaalla.
1TI 6:12 Ammano baaxiya loytha baaxeta. Daro asaa sinthan ne markatida ne ammanuwaba, Xoossay nena iyaw xeegida merinaa de7uwa oyka.
1TI 6:13 Ubbaas de7o immiya Xoossaa sinthaninne, Phenxe Philaxoosa sinthan lo77o marka markatida Kiristoos Yesuusa sinthan ta nena kiittayis.
1TI 6:14 Nu Godaa Yesuus Kiristoosi qoncana gakanaw ha kiitaa balinne borey bayna naaga.
1TI 6:15 Ba xalaala ubbaa haariya boncho Xoossay, kawota kawoy, godata Goday, ba qopida qamman Yesuus Kiristoosa zaari kiittana.
1TI 6:16 Issi iya xalaali hayqenna. Oonika shiiqanaw danda7onna poo7on de7ees. Oonika iya be7ibeenna; qassi be7anawuka danda7enna. Bonchoynne merinaa wolqay iyaw gido. Amin7i.
1TI 6:17 Ha alamiya dureti coo dhayiya shalon otortonna melanne ceeqonna mela oda. Nuus koshshiyaba palahisidi immiya nuna anjiya, dure Xoossan ammanetana mela enta kiitta.
1TI 6:18 Enti lo77o ooso oothanaada lo77o ooson duretanaada, keehatanne haratas shaakeyisata gidana mela kiitta.
1TI 6:19 Hessi entaw sinthas mino baaso gidiya gisho, he wode enti tuma de7oy ay daaniyako erana.
1TI 6:20 Ximotiyoosa, issi issi asay, “Eratethi” giya eeya palamapenne hada odape baqata; new imetida hadara naaga.
1TI 6:21 Issoti issoti nuus eratethi de7ees yaagishe ammanuwa aggidosona. Xoossaa aadho keehatethay hinte ubbaara gido.
2TI 1:1 Xoossaa shenen, Yesuus Kiristoosan bentida de7o ufaysaa markatanaw Yesuus Kiristoosa hawaare gidida Phawuloosape,
2TI 1:2 ta dosiya na7aa Ximotiyoosas kiitetida kiita. Xoossaa Aawapenne nu Godaa Kiristoos Yesuusape aadho keehatethay, maarotethaynne sarotethay new gido.
2TI 1:3 Taani, ta woosan qammanne gallas nena qopayis. Taani woossiya wode ta mayzata Xoossaanne taani lo77o kahan haggaaziya Xoossaa ne gisho galatayis.
2TI 1:4 Taani ne afuthaa qopayis; nena be7ada ufaytanaw daro laamotayis.
2TI 1:5 Qassi new de7iya tuma ammanuwa erayis. He ammanoy beni ne wogga aaye Loydininne ne aaye Ewuniqin de7iya ammanuwa mela.
2TI 1:6 Hessa gisho, taani ta kushiya ne bolla wothida wode Xoossay new immida imota neeni zaara eethana mela akeekisayis.
2TI 1:7 Ayis giiko, Xoossay nuus wolqaa, siiqonne nu huuphe haariya Ayyaana immispe attishin, yashsha ayyaana immibeenna.
2TI 1:8 Hiza, nu Godaas markatanaw yeellatopa; qassi iya gisho qashetida tananka yeellatopa. Shin Xoossay new immiya wolqan Wongela gisho, taara meto eka.
2TI 1:9 Xoossay ba sheneninne ba aadho keehatethan nuna ashshidi, ba geeshsha dere oothanaw nuna doorisipe attishin, nuuni oothida oosuwa gisho gidenna. Ha aadho keehatetha Kiristoos Yesuusa baggara merinaa wodetape sinthe nuus immis.
2TI 1:10 Ha77i ha aadho keehatethay nuna ashshiya Kiristoos Yesuusa yuussan qoncis. I hayqo wolqaa dhaysidi, Wongela baggara dhayonna de7o nuus qoncisis.
2TI 1:11 Taani Wongela sabaake, hawaarenne astamaare gidana mela Xoossay tana dooris.
2TI 1:12 Taani hessa gisho ha metuwa ekayis; shin ta ammaney ooneko eriya gisho yeellatike. Taw imetida hadara he gallasay gakanaw I naaganaw danda7eysa erayis.
2TI 1:13 Taani nena tamaarsida tuma qaala leemiso ootha oykada Kiristoos Yesuusa baggara nubaa gidida ammanuwaninne siiquwan de7a.
2TI 1:14 Nu giddon de7iya Geeshsha Ayyaana wolqan new imetida lo77o hadara naaga.
2TI 1:15 Iise biittan de7iya ubbay taape haakidaysa eraasa; enta giddon Figeluusinne Hermogeneesi de7oosona.
2TI 1:16 Anesfoori tana daro wode minthethida gisho Goday iya soo asaas qadheto. Taani qasho keethan de7iya wode I tanan yeellatibeenna.
2TI 1:17 Hessa bolla I Roome katamaa yida wode tana minthi koyidi demmis.
2TI 1:18 Wursetha gallasan Goday iyaw qadhetana mela taani Godaa woossayis. Efesoona kataman I tana ay mela maaddidaako ne loytha eraasa.
2TI 2:1 Hiza, ta na7aw, Kiristoos Yesuusan de7iya maarotethan minna.
2TI 2:2 Daro markata sinthan taani nena tamaarsida timirtiya, harata tamaarsanaw danda7iya ammanetida asaas hadara imma.
2TI 2:3 Yesuus Kiristoosas ammanthiya wotaadare gidada taara meto eka.
2TI 2:4 Ola wotaadarey ba tora mocona ufaysanaw giigeteesipe attishin, hara ooson bana peeshshenna.
2TI 2:5 Hessadaka, gaadde woxiya oonika bessiya ogera gaaddetonna ixiko woyto ekenna.
2TI 2:6 Goshshan daaburiya goshshanchoy ba daabura ayfiyape miya koyro asi gidanaw bessees.
2TI 2:7 Ne akeekana mela Goday nena maaddana gisho, ta new odidaba ne wozanan naaga.
2TI 2:8 Taani markatiya Wongela mela hayqope dendida, Dawita koche gidida Yesuus Kiristoosa qopa.
2TI 2:9 Taani wongela odiya gisho, iitabaa oothida asada, qashetada meto ekayis. Shin Xoossaa qaalay qashetenna.
2TI 2:10 Hessa gisho, Xoossay doorida asati Kiristoos Yesuusan de7iya atotetha merinaa bonchuwara ekana mela enta gisho ubbaban waayetayis.
2TI 2:11 Haysada giya tuma qaali de7ees; “Nuuni iyara hayqidaba gidiko, Iyara issife de7ana.
2TI 2:12 Nuuni genciko, iyara issife kawotana. Nuuni iya kaddiko, I nuna kaddana.
2TI 2:13 Nuuni ammanetona ixiko, I ammanetidaysa gididi daana. Ayis giiko, I bana kaddanaw danda7enna” yaagees.
2TI 2:14 Neeni enta haysa akeekisa; enti qaalata gaason palamonna mela, Godaa sinthan enta zora. Hessi si7eyisata dhaysesipe attishin, aykoka maaddenna.
2TI 2:15 Neeni tuma qaala suuretethan tamaarseysanne yeellayonna oosancho gidada, Xoossay nashshiya asada, nenatethaa iyaw immanaw minna.
2TI 2:16 Shin ha alamiyas injetiya go77onna odape baqata. Hessa mela oday ase Xoossaafe haassees.
2TI 2:17 Hessa mela oday asatethi midigiya paxonna woyzazire maduntha mela. Hessa mela odaa odeteyisata giddofe Hemeneyoosinne Filixoosi de7oosona.
2TI 2:18 Ha asati tuma ogiya aggidi, “Hayqida asay hayqope beni dendidosona” yaagidi guutha asata ammanuwa dhaysidosona.
2TI 2:19 Gidoshin, Xoossay mino zaalla hiixida gisho qaaxanaw danda7enna. Iya bolla, “Goday ba asaa erees. Godaa sunthaa xeegiya oonika iita oosope haako” giya qaalay xaafetis.
2TI 2:20 Issi gita keethan worqafe woyko birape oosetida miisheta xalaala gidonashin, mithafe woyko urqafe oosetida miishetika de7oosona. Hessatape baggati boncho oosos, qassi baggati tooshetiya oosos pee7osona.
2TI 2:21 Hessa gisho, oonika iita ubbaa aggikonne bana geeshshiko, boncho ooso oothiya miishe gidana. Enta de7oy geeshshinne Godaa ufaysiyabaa, qassi enti lo77o ooso ubbaa oothanaw danda7eyisata gidana.
2TI 2:22 Na7atetha iita amuwape baqata. Geeshsha wozanan Godaa xeegiya asatara issife, xillotethaa, ammanuwa, siiqonne sarotethaa kaalla.
2TI 2:23 Shin ooshshi medheysa erada eeyatethinne hada gidida palamape haaka.
2TI 2:24 Godaa oosanchoy asa ubbaas keeha, lo77o tamaarseysanne danda7ancho gidanaw besseesipe attishin, ooyetanaw bessenna.
2TI 2:25 I baara eqeteyisata ashketethan seereysa gidanaw bessees. Enti banta nagaraape simmidi tumaa eranaada Xoossay oothaneko ooni eri.
2TI 2:26 Enti banta wozanaako simmidi ba sheniya oothana mela enta oykida Xalahe xihiyape kessi ekana.
2TI 3:1 Wursetha gallasan un7ethiya wodey yaanaysa era.
2TI 3:2 Asay bantana doseyisata, miishe siiqeyisata, ceeqeteyisata, otoreyisata, cayeyisata, bantana yelidaysatas kiitetonaysta, galatonaysta, geeshshatethi baynayisata,
2TI 3:3 siiqoy baynayisata, maarotethi eronnayisata, zigireyisata, bantana haaronnayisata, wozana minota, lo77o dosonnayisata,
2TI 3:4 morkees aathidi immeyisata, qofi baynayisata, otoron sugeteyisata, Xoossaafe aathidi asho ufaysanaw doseyisata gidana.
2TI 3:5 Enti ammaniya daanosonape attishin, ammano wolqaa kaddoosona; neeni hessa mela asatape baqata.
2TI 3:6 Entafe issoti issoti asa keethaa gelidi nagaran oyketidaysatanne dumma dumma amon sugetiya daaburancho maccasata bolla godatosoona.
2TI 3:7 He maccasati ubba wode tamaarosonashin, tumaa eranaw danda7okona.
2TI 3:8 Yaanesinne Yambareesi Musera eqetidaysada ha asati guuggey oothonaysatanne ammanon kundida asata gidiya gisho tumaara eqetoosona.
2TI 3:9 Shin Yaanesanne Yambareesa eeyatethay qoncidaysada enta eeyatethayka asa ubbaa sinthan qoncana gisho entaw hanenna.
2TI 3:10 Shin neeni ta timirtiya, ta duussaa, ta qofaa, ta ammanuwa, ta danda7aa, ta siiquwa, ta gencaa,
2TI 3:11 ta goodetethanne ta metuwa eraasa. Anxooke, Iqoniyoonen, Lisxira katamatan tana gakidabaanne taani danda7ida metuwa eraasa; Goday tana he ubbaafe ashshis.
2TI 3:12 Kiristoos Yesuusan Xoossaa ufaysiya de7o daanaw koyiya ubbay goodettana.
2TI 3:13 Iita asatinne baletheysati bantaw baletishenne harata balethishe kasepe iiti iiti baana.
2TI 3:14 Shin ne tamaarida tumaaninne ne ammanida ammanuwan eqa. Ne oodefe tamaaridaako eraasa.
2TI 3:15 Neeni ne na7atethafe doomada Kiristoosa Yesuusa ammanada, atotethi demmiya cincatethi immanaw danda7iya Geeshsha Maxaafata eradasa.
2TI 3:16 Geeshsha Maxaafaa ubbay Xoossaafe imetida qaala. He maxaafay tumaa tamaarsanaw, balidaysata seeranaw, suurisanawunne xillotetha duussas koshshiya zore immanaw maaddees.
2TI 3:17 Xoossaa asi polonne lo77o ooso ubbaa oothanaw giigidaysa gidana mela maaddees.
2TI 4:1 Taani nena Xoossaa sinthaninne, kawo gididi haaranaw qonciya wode paxatanne hayqidaysata pirdanaw de7iya Kiristoos Yesuusa sinthan zorayis.
2TI 4:2 Qaala oda; wodey injetin injetonna ixin minnada oda. Daro danda7aninne tamaarson asaa zora seeranne denthetha.
2TI 4:3 Asay tuma timirtiya si7onna ixiya wodey yaana. Enti banta amuwa kaallidi, bantaw si7anaw ufaysiyabaa odiya astamaareta shiishosona.
2TI 4:4 Enti tuma timirtiya aggidi, tuma gidonna odaa si7anaw banta haytha zaarosona.
2TI 4:5 Shin neeni ubbaban nena haara. Meto danda7a. Wongela markatetha oosuwa ootha. New imetida Xoossaa ooso ubbaa pola.
2TI 4:6 Taani yarshetiya wodey gakis; ha alamiya aggada biya wodey matis.
2TI 4:7 Taani lo77o ola oletas; ta gaaddiya woxada wursas; ammanuwa naagas.
2TI 4:8 Sinthafe xillotetha kallachay tana naagees. Hessa xillo pirdaa pirdiya Goday he gallas taw immana. Hessa ta xalaalas gidonashin, iya qoncethaa amotiya ubbaas immana.
2TI 4:9 Ellesa yada tana be7a.
2TI 4:10 Deemasi ha77i alamiya dosidi, tana aggidi, Teselonqe katamaa bis. Qerqisi Galatiya biitta, qassi Titoy Dilmaxe biitta bis.
2TI 4:11 Luqaasa xalaali taara de7ees. Marqoosi Xoossa ooson tana maaddanaw danda7iya gisho, neera ekada ya.
2TI 4:12 Taani Tikiqoosa Efesoona katama kiittas.
2TI 4:13 Neeni yashe, Xiro7aada kataman Karpoosa matan aggada yida ta kootiyanne maxaafata taw ekada ya. Ubbaka galban xaafetida maxaafata ekonna yoopa.
2TI 4:14 Birata qoxiya Iskindirey tana daro qohis; Goday iya oosuwada iyaw zaarana.
2TI 4:15 I nu timirtiya daro ixiya gisho iyape nena naaga.
2TI 4:16 Koyro ta mootetiya wode ubbay aggidi bidosonape attishin, oonika tana maaddibeenna. Xoossay he naaquwa entaw taybopo.
2TI 4:17 Shin taani kumetha kiitaa Ayhude gidonna asa ubbaas markatin, enti si7ana mela Goday ta matan eqidi taw wolqa immis. Qassi koshatida gaammoda doona dooyida hayquwape tana ashshis.
2TI 4:18 Goday tana iita ubbaafe ashshidi ba salo kawotetha saron efana. Iyaw merinaape merinaa gakanaw bonchoy gido. Amin7i.
2TI 4:19 Phirisqillas, Aqilasinne Anesfoora soo asaas ta sarothuwa oda.
2TI 4:20 Erasxoosi Qorontoosa kataman attis. Xirofmoosi hargetida gisho, Milixe kataman aggas.
2TI 4:21 Balgoy gelanaape sinthe ellesada ya. Ewubulusi, Phudeesi, Linuusi, Qilaadeynne hara ammaniya asati ubbay nena saro goosona.
2TI 4:22 Goday Yesuus Kiristoosi ne ayyaanara gido. Xoossaa maarotethay hinte ubbaara gido.
TIT 1:1 Yesuus Kiristoosa hawaareynne Xoossa aylley, Phawuloosi, xaafida dabdaabiya. Xoossay doorida asaa ammanuwa dichanaadanne tuma ayyaana de7uwa waanidi daaneko bessiya tumaa eraako enta kaalethanaw taani kiitetas.
TIT 1:2 He ammanoynne eratethay merinaa de7uwa ufaysaa bolla zempis. Hessa daro wodepe sinthe wordotonna Xoossay nuus immana gidi qaala gelis.
TIT 1:3 Nuna ashshiya Xoossay ba woden ha kiitaa odana mela taw hadara immis.
TIT 1:4 Nu kothe ammanuwan ta tuma na7aa gidida Tito, Xoossaa Aawapenne nuna ashshiya Yesuus Kiristoosape aadho keehatethay, maarotethaynne sarotethay new gido.
TIT 1:5 Taani nena Qarxeesan aggada yiday, neeni attidaba giigisanaadanne taani kiittidaysada katamaa ubban woosa keetha cimata doorana melasa.
TIT 1:6 Cimi boretonaysa, issi mache azinaa, maara dhayon woyko kiitetetha ixon asi boronna ammaniya nayti de7iya asi gidanaw bessees.
TIT 1:7 Woosa keetha cimi Xoossaa oosuwa hadara ekida gisho, boretonaysa, otortonaysa, elle yilotonnaysa, mathotonaysa, oda medhonaysanne bessonna go77as dafetonaysa gidanaw bessees.
TIT 1:8 Shin imathe mokeysa, lo77oba ubbaa doseysa, akeekancho, xillo, geeshshinne bana haareysa gidanaw bessees.
TIT 1:9 Harata suure timirtiyan minthethanawunne he timirtiya ixeyisata zaaranaw ba tamaarida tuma qaalan minnidi eqanaw bessees.
TIT 1:10 Kiitetonaysati, pathonna oda odeteysati, cimmeysati ubbaka qaxaretetha wogaa naagiya daro asati de7oosona.
TIT 1:11 Enti bessonna ogen miishe demmanaw koyidi, tamaarsanaw bessonnaba tamaarsishe keetha asaa ubbaa iissiya gisho enta timirtiya teqanaw bessees.
TIT 1:12 Enta nabetape issoy, “Qarxeesa asay ubba wode wordo odetoosona; iita do7atanne azalla yarambata” yaagis.
TIT 1:13 Ha markatethay tuma markatethi. Hessa gisho, entaw tuma ammanoy daana mela enta hanqeta.
TIT 1:14 Tumaa ixiya asaa timirtiyanne Ayhudeta pathonna tossiya si7onna mela enta seera.
TIT 1:15 Bantaw geeshshi gididaysatas ubbay geeshshi, shin tunatasinne ammanonaysatas enta qofaynne kahay tunida gisho, entaw aybika geeshshi gidenna.
TIT 1:16 Enti nu Xoossaa eroos goosona, shin banta oosuwan iya kaddoosona. Enti Xoossan ixetidaysata, kiitetonaysatanne lo77o ooso ubbaas gidonnayisata.
TIT 2:1 Shin neeni suure timirtiya phalqonna timirte tamaarsanaw bessees.
TIT 2:2 Cima addeti bantana haareyisata, wopu gidaysata, bonchetidaysata, ammanon, siiqoninne danda7an, mino gidana mela zora.
TIT 2:3 Hessadaka, cima maccasay banta duussan geeshshata, zigironnayisata, woyne ushshan haaretonnaysatanne lo77oba tamaarseyisata gidana mela tamaarsa.
TIT 2:4 Enti hessada haniko yalaga maccasay banta azinatanne banta nayta siiqana mela tamaarsanaw danda7oosona.
TIT 2:5 Xoossaa qaalay boretonna mela bantana haareyisata, geeshshata, banta son ootheyisata, keehatanne banta azinatas kiiteteyisata gidana mela yalaga maccasa tamaarsonna.
TIT 2:6 Hessadaka, dondza addeti bantana haarana mela zora.
TIT 2:7 Neeni ne huuphen lo77o ooso ubban entaw leemiso gida. Neeni ne timirtiyan eqidaysanne ammanetidaysa gida.
TIT 2:8 Nu morketi nuna zigiranaw gaasoyabay entaw dhayin enti yeellatana mela neeni boretonna lo77o oda odeeta.
TIT 2:9 Aylleti ubbaban banta godatas kiitetana mela enta ufaysana melanne entara palamonna mela zora.
TIT 2:10 Enti banta godatape kaysotopo. Hessika, nuna ashshiya Xoossaa timirtey, ubba ogen dosetidaysa gidana mela banta oothiya oosuwan ammaneteyisata gideysa bessaana mela enta zora.
TIT 2:11 Ase ashshiya Xoossa aadho keehatethay asa ubbaas qoncis.
TIT 2:12 He aadho keehatethay, nu nagaranne ha alamiya amuwa aggidi, ha wodiyan nuna haaridi, tuma ayyaana de7uwaninne xillotethan daana mela nuna tamaarsees.
TIT 2:13 Nuuni anjetida ufaysaa gidida gita Xoossaanne nuna ashshiya Yesuus Kiristoosa boncho qoncethaa naagoos.
TIT 2:14 Iita ooso ubbaafe nuna wozanawunne lo77oba oothanaw amotiya ba geeshsha asi kessanaw nu gisho bana aathidi immis.
TIT 2:15 Neeni haysa tamaarsa; kumetha maatan zora, seera; oonika nena kadhopo.
TIT 3:1 Asay deriya haareysatas, aawatethay de7eysatas haaretanaw, kiitetanawunne lo77o ooso ubbaa oothanaw giigetidaysata gidana mela akeekisa.
TIT 3:2 Qassi enti oodde bollaka iita odetonna mela, saro asi gidana mela, ashketanne asa ubbaas qadheteyisata gidana mela zora.
TIT 3:3 Nuuni kase eeyata, kiitetonayisata, baletidaysata, dumma dumma asho ufaysasinne amos aylletidaysata. Nuuni iitatethaninne qanaaten kumidaysata; nu ase ixeyisata, asika nuna ixeyisata.
TIT 3:4 Shin ashshiya Xoossaa keehatethaynne siiqoy qoncida wode,
TIT 3:5 nu oothida xillo oosuwa gisho gidonashin, ba maarotethaa gisho nuna ashshis. Nuna I ashshiday, nam7antho yeletethaa meechaninne Geeshsha Ayyaana baggara immida ooratha de7uwana.
TIT 3:6 He Ayyaana, Xoossay nuna ashshiya Yesuus Kiristoosa baggara nu bolla darsidi gussis.
TIT 3:7 Ba aadho keehatetha baggara nuna xillisidi merinaa de7uwa laata ufaysaa oykana mela hessa oothis.
TIT 3:8 Ha qaalay ammanetida qaala. Xoossaa ammaneysati lo77o ooso oothanaw giigidaysata gidana mela ne ha qaala minthada odana mela ta koyayis. Haysati ase ubbaas lo77onne go77eyisata.
TIT 3:9 Shin eeyatetha palamape, kocha taybope, kachafenne higge gaason dendiya ooshshafe naageta. Hessi go77inne wodhey baynaba.
TIT 3:10 Shaahetethi medhiya uraa koyro zora; nam7antho hanqeta, hessafe guye, iyape haaka.
TIT 3:11 Hessa mela asi geellanne nagarancho; I ba bolla pirdeysa era.
TIT 3:12 Taani balgo yan shaacanaw qopida gisho, Arxemaasa woyko Tikiqoosa neeko kiittiya wode ne taako Niqophilyoona yaanaw minna.
TIT 3:13 Higge eriya Zeemasinne Aphiloosi oge biya wode entaw koshshiyabay paconna mela enta maadda.
TIT 3:14 Nu asayka pathonna asi gididi attonna mela bantaw koshshiyaba demmana mela lo77o ooso oothanaw minnidi tamaaro.
TIT 3:15 Taara de7iya ubbay nena saro goosona; ammanon nuna siiqiya asaa saro ga. Xoossaa aadho keehatethay hinte ubbaara gido. Amin7i.
PHM 1:1 Taani Phawuloosi, Yesuus Kiristoosa gisho qashon de7eysinne nu ishaa Ximotiyoosi, nuura oothiya nuuni dosiya Filmoonas,
PHM 1:2 ne son shiiqiya woosa keethatas, nu miche Afbiyaasinne nuura issife de7iya wotaadare Arkiphaasas xaafida kiita.
PHM 1:3 Xoossaa nu Aawapenne nu Godaa Yesuus Kiristoosape aadho keehatethaynne sarotethay hintew gido.
PHM 1:4 Neeni geeshshata doseysanne Godaa Yesuusa ammaneysa taani si7iya gisho, Xoossaa woossashe nena qopiya wode ubban ta Xoossaa galatayis.
PHM 1:6 Neeni ne ammanuwa haratas shaakeysi nuus Kiristoos Yesuusa baggara yaa lo77oba ubbaa erisana mela taani Xoossaa woossayis.
PHM 1:7 Geeshshata wozanay ne oosuwan minnida gisho, ta ishaw, taani ne siiquwan daro ufaysinne minthetho demmas.
PHM 1:8 Hessa gisho, neeni oothanaw bessiyaba oothana mela nena kiittanaw Kiristoosa baggara taw minotethay de7ees.
PHM 1:9 Taani, cimay Phawuloosi, Kiristoos Yesuusas ha77ika qashon de7eysi, siiqon nena woossayis.
PHM 1:10 Taani qashon de7ashe iyaw zoriya aawa gidada ta na7aa Anasmoosa gisho nena woossayis.
PHM 1:11 I kase nena maaddenna, shin ha77i nenaka tanaka tuma maaddiya asi.
PHM 1:12 Taani wozanape dosiya Anasmoosa neeko yeddayis. Taani Wongela gisho qashetidashin, ne gisho taw oothidi tana maaddana mela ta matan iya ashshanaw koyas.
PHM 1:14 Shin ne sheneda oothanaw koyasipe attishin, neera zorettonna wolqan aykoka oothanaw koyke.
PHM 1:15 Anasmoosi guutha wode neepe shaaketidaysi, ooni eri simmidi ubba wode neera de7onna aggenna.
PHM 1:16 Hiza, haysafe guye Anasmoosi aylle gidonashin, ayllefe I daro aadhees. I taw ay mela siiqo ishe! Qassi I new asa baggaraka Godaa baggaraka aadhida isha.
PHM 1:17 Hiza, neeni tana ne lagge giyaba gidiko tana mokeysada iya moka.
PHM 1:18 I nena qohidabay woyko I acotidabay de7iko taape eka.
PHM 1:19 He acuwa ta qanxana gada taani Phawuloosi, ta kushen xaafayis. Neeni taw ne shempuwa acota uttidaysa taani nena akeekisanaw koshshenna.
PHM 1:20 Ta ishaw, Godaa baggara neepe maade demmanaw koyayis. Kiristoosa baggara tana minthetha.
PHM 1:21 Taani gidaysafe daro neeni oothanaysa erada qassi ne taw kiitetanaysa ammanada haysa xaafayis.
PHM 1:22 Xoossay hinte woosa si7idi tana hinteko guye zaarana gada qopiya gisho, taw imathi shempiya keethi giigisa.
PHM 1:23 Kiristoos Yesuusa gisho taara qashon de7iya Ephafiri nena saro saro gees.
PHM 1:24 Qassi taara issife oothiya Marqoosi, Arsxirokoosi, Deemasinne Luqaasi nena saro goosona.
PHM 1:25 Godaa Yesuus Kiristoosa aadho keehatethay hinte ayyaanara gido.
HEB 1:1 Kase Xoossay, nu aawatas nabeta baggara dumma dumma ogen daro wode odis.
HEB 1:2 Shin ha wursetha wodiyan ubbaa iya laatisida qassi alame iya baggara medhida ba Na7aa baggara nuus odis.
HEB 1:3 Na7ay Xoossaa bonchuwa phoolethaanne kumetha Xoossa Xoossatetha ekidi, ba wolqaama qaalan ha alamiya katisidi oykis. Asaa enta nagaraape geeshidaape guye Ubbaafe Bolla Xoossaa ushacha baggan saluwan uttis.
HEB 1:4 Iyaw imetida sunthay kiitanchota sunthafe bolla gideysada I entafe bolla.
HEB 1:5 Hiza, Xoossay kiitanchotape oodeko, “Neeni ta Na7a; ta hachi new aawa gidas” gidee? Woyko qassi oodeko, “Taani iyaw aawa gidana; ika taw na7a gidana” gidee?
HEB 1:6 Qassi Xoossay ba bayra Na7aa ha alamiya kiittishe, “Xoossaa kiitanchoti ubbay iyaw goyinno” yaagis.
HEB 1:7 Xoossay kiitanchotaba odishe, “Xoossay ba Kiitanchota carko, ba aylleta tama laco oothees” yaagees.
HEB 1:8 Shin ba Na7aba odishe, “Xoossaw, ne araatay merinaw de7ees. Ne kawotethaa ne xillotethan aysaasa.
HEB 1:9 Neeni xillotethi dosadasa; iita ixadasa. Xoossay, ne Goday, nena ne laggetape aathidi dooris, ufaysa zayte nena tiyis” yaagees.
HEB 1:10 Xoossay Zaaridi, “Godaw, koyro neeni sa7a medhadasa; saloti ne kushe ooso.
HEB 1:11 Hessati ubbay dhayana; shin neeni daana. Enti ubbay afilada wurana.
HEB 1:12 Neeni enta saleenada xaaxana; qassi enti afilada laametana. Shin neeni ubba wode nena; ne laythayka wurenna” yaagees.
HEB 1:13 Shin Xoossay kiitanchotape oodeko, “Taani ne morketa ne tohoy yedhiyaso oothana gakanaw, haysan taape ushacha baggan utta” gidee?
HEB 1:14 Kiitanchoti ubbay atotethi demmanaw de7iya asata maaddanaw Xoossay kiitida ayyaanata gidokonaayee?
HEB 2:1 Hessa gisho, nuuni si7ida tumaape haraso eketonna mela he si7idaysa minthidi naaganaw bessees.
HEB 2:2 Hiza, kiitanchota baggara odetida qaalay tuma gidiko, iya naaqoynne kiitetonna ixoy pirda ehiyaba gidiko,
HEB 2:3 yaatin, nuuni haysa mela gita atotetha ixas giiko, waanidi attanee? Koyro Goday ba huuphen he atotetha odis; qassi iyape si7idaysati nuus geeshshidi markatidosona.
HEB 2:4 Qassi Xoossay malaatatan, oorathabatan, dumma dumma mallataninne ba sheniyada immida Geeshsha Ayyaana imotatan markatethaa minthis.
HEB 2:5 Xoossay ha nuuni odiya sinthafe yaana alamiya, kiitanchotas haarisibeenna.
HEB 2:6 Geeshsha Maxaafay issi bessan haysada yaagees: “Neeni asas qopanaw asi aybee? Woyko neeni iya naaganaw I aybee?
HEB 2:7 Ne iya kiitanchotape guutha wodes guuthadasa; Iya huuphen bonchonne saba kallacha wothadasa.
HEB 2:8 Qassi ubbaba iya tohuwape garsan wothadasa” yaagees. Xoossay ubbaba iyaw haarisiya wode iyaw haaretiboonabay aybika baawa. Shin ha77i ubbabay iyaw haaretishin nuuni be7ibooko.
HEB 2:9 Shin nuuni kiitanchotape guuthara guuxida Yesuusa be7oos. Xoossaa aadho keehatetha gaason Yesuusi asa ubbaas hayqis. I waaye hayqo hayqida gisho, bonchonne saba kallacha iya huuphen wothis.
HEB 2:10 Ubbabay iyawunne iya gaason medhetida Xoossay, daro nayta baara bonchisanaw enta atotetha huuphiya, Yesuusa waayen polo oothanaw iyaw bessees.
HEB 2:11 Yesuusinne he I geeshshida asa ubbay issi aawa nayta. Yesuusi enta, “Ta ishata” gidi xeeganaw yeellatonnay hessasa.
HEB 2:12 Yesuusi, “Taani ne sunthaa ta ishatas awaajana; deriya shiiquwan nena galatana” yaagees.
HEB 2:13 Qassi I, “Taani ta ammanuwa iya bolla wothana” Qassika, “Xoossay taw immida naytara ta haysan de7ayis” yaagees.
HEB 2:14 Nayti ashoynne suuthi de7eyisata gidiya gisho, Yesuusika entada ase gidis. I hessa oothiday, hayqo bolla wolqi de7iya Xalahiya ba hayquwan dhaysanaasa.
HEB 2:15 Qassi banta de7o laytha ubban hayqo yashshan aylletidi de7eyisata aylletethaafe wozanaasa.
HEB 2:16 Tuma Yesuusi yiday Abrahaame koche maaddanaasafe attishin, kiitanchota maaddanaasa gidenna.
HEB 2:17 Asaa nagaray atto geetetana mela Xoossaa sinthan maariyanne ammanetida kahine halaqa gidis. Hessa gisho, I ubbaban ba ishata daananaw bessees.
HEB 2:18 I ba huuphen paacen waayetida gisho paaceteyisata maaddanaw danda7ees.
HEB 3:1 Hessa gisho, Xoossay xeegida geeshsha ishato, nu ammanon Godaa gidi xeegiya hawaariyanne kahine halaqaa Yesuusa be7ite.
HEB 3:2 Musey Xoossaa Keetha ubban ammanetidaysada Yesuusika bana doorida Xoossaas ammanetidaysa.
HEB 3:3 Keethe keexeysi keethafe aadhidi boncheteysada Yesuusi Musepe aadhiya boncho ekanaw bessees.
HEB 3:4 Issi issi keethaa keexida asi de7ees, shin ubbaa giigisiday Xoossaa.
HEB 3:5 Musey Xoossaa Keetha ubban ammanetida aylle gididi, Xoossay sinthafe gaanabas marka gidis.
HEB 3:6 Shin Kiristoosi xoossa keethan na7ada ammanetidaysa. Nuuni ekana gidi naagiya ufaysaa minthidi naagiko Xoossaa keethi gidoos.
HEB 3:7 Hessa gisho, Geeshsha Ayyaanay geysada, “Hachi hinte Xoossay geysa si7iya wode,
HEB 3:8 mela biittan paaciya gallas, hinte aawati makallidaysada, hinte wozanaa minthofite.
HEB 3:9 Hinte aawati tana paacidosona; oytamu laythi ta oosuwa be7idosona.
HEB 3:10 Hessa gisho, ta he yeletethaa hanqetada, ‘Enti ubba wode banta wozanan baloosona; ta ogiya eribookona’ yaagas.
HEB 3:11 Hessa gisho, taani ta hanquwan caaqada, ‘Ta shempo bessaa ubbaka gelokona’ yaagas” yaagees.
HEB 3:12 Ta ishato, hintefe oodenka, de7o Xoossaafe hintena shaakiya iitanne ammanonna wozani doonna mela naagetite.
HEB 3:13 Hintefe oonaka nagari balethin, ba wozanaa minthonna mela “Hachi” yaagetidi xeegetishin gallas gallas issoy issuwara zoretite.
HEB 3:14 Nu koyro ammanuwa nuuni wursethi gakanaw minthidi naagiko, Kiristoosara issife laattana.
HEB 3:15 Geeshsha Maxaafan, “Hachi Xoossay geysa hinte si7iya wode, he wode enti makallatethan hanidaysada, hinte wozanaa minthofite” yaagis.
HEB 3:16 Xoossay giyaba si7idi makalliday oonee? Musey Gibxefe kaalethi kessida ubbaa gidokonaayee?
HEB 3:17 Xoossay oytamu laythi oona hanqetidee? Nagara oothidaysatanne enta ahay mela biittan wodhi attida asata gidokonaayee?
HEB 3:18 Qassi Xoossay, “Ta shempo bessaa geleketa” yaagidi caaqiday, iyaw kiitetonna ixida asaape attishin, oodesee?
HEB 3:19 Hiza, enti he shempo bessaa gelonna attiday ammanibona gisho, gideysa nu be7oos.
HEB 4:1 Hiza, Xoossay nuna ba shempo bessaa gelsana gida qaalay buroo sinthafe de7iya gisho, hintefe oonika he shempo bessaa gelonna attonna mela naagetoos.
HEB 4:2 Entaw Wongelay sabbaketidaysada, nuuska sabbaketis. Shin enti si7idaba ammanidi ekiboonna gisho enta go77ibeenna.
HEB 4:3 Gidoshin, alamey medhetoosape doomidi Xoossaa oosoy poletidaysa gidikoka, Xoossay, “Taani ta hanquwan caaqada, ta shempo bessaa ubbaka gelokona” gidaysada, nuuni ammanidaysati iya shempo bessaa gelana.
HEB 4:4 Laapuntha gallasaaba issi bessan, “Xoossay laapuntha gallasan ba ooso ubbaafe shempis” yaagis.
HEB 4:5 Qassika he bessan, “Enti ta shempo bessaa ubbaraka gelokona” yaagis.
HEB 4:6 Koyro Wongela si7idaysati kiitetonna ixidi shempo bessaa gelibookona. Yaaniya gisho, ha77ika he shempo bessaa gelana issi issi asati de7oosona.
HEB 4:7 Hessa gisho, Xoossay, “Hachi” gidi xeegishe issi gallas nuus qanxis. Daro wodepe guye Xoossay Dawita baggara, “Xoossay giyaba hachi hinte si7iya wode, hinte wozanaa minthofite” yaagidi odis.
HEB 4:8 Iyyasuy entaw shempuwa immidaba gidiyako, Xoossay hara gallasaba guyepe odennashin.
HEB 4:9 Hiza, Xoossaa asaas Sambaata shempoy naagetidi de7ees.
HEB 4:10 Xoossaa shempo bessaa geliya oonika, Xoossay ba oosuwape shempidaysada ika ba oosuwape shempana.
HEB 4:11 Hessa gisho, oonika he asaa kiitetetha ixuwa kaallidi, kundonaada Xoossaa shempo bessaa gelanaw minnoos.
HEB 4:12 Xoossaa qaalay de7onne ootheysa. Nam7u baggara qaratida mashshafeka aadhidi oco. I shempo, ayyaana, xaphonne kolize gakanaw kanthidi caddees. Qassi asa wozanan de7iya geemmida qofaanne amuwa shaakidi pirdees.
HEB 4:13 Xoossaa sinthafe qosetiyabay ayba medhetethika baawa. Iya ayfe sinthan ubbabay qoncenne kallo de7ees. Nuuni zaaro immanaw bessey iya sinthana.
HEB 4:14 Hiza, salo keyida gita kahine halaqay, Xoossaa na7ay Yesuusi, nuus de7iya gisho, nu ammanuwa minthidi naagoos.
HEB 4:15 Nu kahine halaqay nu daaburiya wode nuus qadhetanaw danda7eysa. I nuuda ubbaban paacetisipe attishin, nagara oothibeenna.
HEB 4:16 Hiza, maarotethaa ekanawunne maade koshshiya wode aadho keehatetha demmanaw aadho keehatethay de7iyasuwa Xoossaa araatako yayyonna shiiqoos.
HEB 5:1 Issi issi kahine halaqi asaa giddofe dooretidi, Xoossara gathiyaban asaa gisho imotanne nagara yarsho yarshanaw shuumetees.
HEB 5:2 I ba huuphen daaburancho gidiya gisho, eronnaysatasinne baleysatas qadhetanaw danda7ees.
HEB 5:3 I ba nagara gishonne asa ubbaa nagara gisho yarsho yarshanaw bessey hessasa.
HEB 5:4 Oonika ha bonchuwa baw ekanaw danda7enna, shin Aaroni kahine halaqa gidanaw xeegidaysada Xoossan xeegetanaw bessees.
HEB 5:5 Hessadaka, Kiristoosi kahine halaqa gidiya bonchuwa baw ekibeenna. Shin Xoossay iya, “Neeni ta Na7a; hachi ta new Aawa gidas” yaagees.
HEB 5:6 Qassi harason, “Malkexaadeqi kahine gididaysada, neeni merinaw kahine gidana” yaagees.
HEB 5:7 Yesuusi ase gididi ha alamiyan de7iya wode bana hayqope ashshanaw danda7iya Xoossaa daro yeehoninne afuthan woossis. I, iya bonchidi kiitetida gisho Xoossay iya woosa si7is.
HEB 5:8 Yesuusi Xoossaa Na7a gidikoka ba waayetida waayan kiitetethi tamaaris.
HEB 5:9 Hessanka, Yesuusi ba oosuwa polidaape guye baw kiitetiya ubbay merinaa atotetha demmana mela gaaso gidis.
HEB 5:10 Xoossay Malkexaadeqa shuumidaysada kahine halaqa oothidi iya shuumis.
HEB 5:11 Ha nu oda bolla guji odanabay darobay de7ees, shin hinte akeekay guutha gidiya gisho hintew odi gelsanaw waaysees.
HEB 5:12 Hinte hannoode astamaare gidanaw bessees, shin Xoossaa qaala koyro timirtiya hintena zaari tamaarsiya hara asi koshshees. Hinte mino kathi maanaw danda7onna gisho maathi koshshees.
HEB 5:13 Maathi paahetiya oonika yooga na7a gidiya gisho, lo77onne iita shaaki erenna.
HEB 5:14 Shin mino kathi lo77onne iita shaaki eriya kahaama asaasa.
HEB 6:1 Hiza, Kiristoosaba tamaarsiya koyro timirtiya aggidi Kiristoosan kahaamatethako boos. Hayqo oosope simobaanne Xoossaa ammanoba koyro timirtiyako guye simmoko.
HEB 6:2 Hessadaka, xinqatetaba, kushe wosobaa, hayqope dendobaanne merina pirdaba zaari tamaaroko.
HEB 6:3 Xoossay giiko nu hessa oothana.
HEB 6:4 Issi toho poo7oy poo7idaysata, salo imota ekidaysata, Geeshsha Ayyaanan shaaketidaysata,
HEB 6:5 lo77o Xoossaa qaalanne sinthafe yaana alamiya wolqaa be7idaysata,
HEB 6:6 guyepe kaddidaysata nagaraape nam7antho zaaranaw danda7etenna. Ayis giiko, enti banta dhayuwas Xoossaa Na7aa zaari kaqiya mela masqaliya bolla iya kaqosonanne asa sinthan kawushoosona.
HEB 6:7 Ubba wode I bolla bukiya ira uyada, goyida uraa maaddiya kathi immiya biittiya Xoossan anjetidaaro.
HEB 6:8 Shin agunthinne kinchote doliya biittiya aybibaaka maadduku; iw baadethay matatis; wursethan xuugetana.
HEB 6:9 Nu siiqo ishato, nuuni haysada odiyaba gidikoka, hintena atotethako kaalethiya lo77obay hintew de7eysa eroos.
HEB 6:10 Xoossay suure pirdeysa. Xoossay, hinte oothida oosuwanne kase gidin ha77ika ammaneyisata maaddidi, iyaw de7iya siiquwa bessidaysa dogenna.
HEB 6:11 Hinte ubbay ufaysan naageysa demmana gakanaw ha minotethaa wursethi gakanaw bessaana mela nu amottoos.
HEB 6:12 Hinte ammanoninne danda7an naagiya ufaysaa laattiya asaa daanana melape attishin, azalla gidana mela koyoko.
HEB 6:13 Xoossay Abrahaames immana gidi caaqida wode baape aadhiya hari giti bayna gisho ba huuphen caaqis.
HEB 6:14 Iyako, “Taani nena anjana; ne zerethaaka darsana” yaagis.
HEB 6:15 Abrahaamey danda7an naagidi Xoossay immana gida ufaysaa ekis.
HEB 6:16 Asi caaqishe baape gitatiya uran caaqees; he caaqoy geetetidaba minthidi, palama ubbaa teqees.
HEB 6:17 Hessa gisho, Xoossay ba laametonna qofaa ufaysa qaala laatteysatas qoncisanaw koyida gisho caaqon minthis.
HEB 6:18 Xoossay wordotenna. Iya ufaysa qaalaynne caaqoy, nam7ayka laametokona. Ha nam7ubatan nu sinthan de7iya ufaysaa oykanaw danda7ana mela geshe demmanaw iyako baqatida nuuni, wolqaama minthetho demmana.
HEB 6:19 Ha ufaysay nu shempuwa, markabey qaaxonnaada minthi oykiya birata mela. He ufaysay magarajuwafe guye baggan de7iya geeshsha bessaa gelis.
HEB 6:20 Yesuusi Malkexaadeqa shuumatethaada merinaw kahine halaqa gididi, nu gisho nuupe sinthatidi he bessaa gelis.
HEB 7:1 Malkexaadeqey, Saleema Kawoy, Ubbaafe Bolla Xoossaa kahine. He Malkexaadeqi Abrahaamey kawota oli xoonidi simmishin iyara gahetidi iya anjis.
HEB 7:2 Abrahaamey ba di77idaba ubbaafe iyaw asraata kessidi immis. Malkexaadeqa sunthay koyro “Xillotethaa kawa”, nam7antho, “Saleema kawo” birshethayka “Sarotethaa kawa” guussu.
HEB 7:3 Malkexaadeqas aayiya woyko aawu woyko kocha paydoy baawa. Iya yeletethaas doomethi woyko iya de7uwas wursethi baawa, shin Xoossaa Na7a daanidi merinaw kahine gidis.
HEB 7:4 Malkexaadeqi ay mela giteeko be7ite. Nu aawata mayzay, Abrahaamey, ba de77idabaape iyaw asraata immis.
HEB 7:5 Kahine gidiya Leewe kochay Isra7eele asape, hessika Abrahaame koche gidida banta ishatape asraata ekana mela higgey kiittees.
HEB 7:6 Malkexaadeqi Leewe koche gidonna ixikoka Abrahaamepe asraata ekis; ufaysa qaali de7iya Abrahaame anjis.
HEB 7:7 Guuthay gitan anjeteysi palanthenna.
HEB 7:8 Issi baggara, asraata ekeysati hayqiya asata, shin hara baggara asraata ekeysi de7on de7ees yaagidi odetidaysa.
HEB 7:9 Hiza, asraata ekiya Leewey, Abrahaame baggara asraata immis gaanaw danda7etees.
HEB 7:10 Ayis giiko, Malkexaadeqi Abrahaamera gahetiya wode Leewey yeletiboonnaba gidikoka, ba mayza Abrahaame gulbatan de7ees.
HEB 7:11 Isra7eele asaas higgey Leewe kahinetetha baggara imetis. Ha Leewe kahinetethay polo gididaba gidiyako Aaronaysa mela gidonashin, Malkexaadeqa mela hara kahine shuumanaw ayis koshshidee?
HEB 7:12 Hiza, kahineti laametiya wode higgeyka qassi laametanaw bessees.
HEB 7:13 Ha nu iyabaa odiya uray hara koche; iya sheeshape oonika yarsho bessan kahinetethan oothibeenna.
HEB 7:14 Nu Goday Yihuda sheeshape yidaysi eretidaysa. Gidoshin, Musey kahineteba odishe Yihuda kochaaba aybaka odibeenna.
HEB 7:15 Malkexaadeqa mela hara kahiney yidaba gidiyako ha nu odiyabay aadhidi qoncana.
HEB 7:16 I kahine gididay dhayonna de7o wolqanaape attishin, ba mayzaa wogaaninne higgen gidenna.
HEB 7:17 Geeshsha Maxaafay, “Malkexaadeqa kahinetetha mela, neeni merinaw kahine” yaagidi markatees.
HEB 7:18 Koyro higgey daaburanchonne maaddonnaba gidiya gisho shaaretis.
HEB 7:19 Muse higgey aybinka polo oothanaw danda7ibeenna. Shin nuuni iya baggara Xoossaako shiiqiya ubbaafe aadhiya ufaysa qaalay nuus imetis.
HEB 7:20 Kiristoosi kahine gidiya wode Xoossay caaqis, shin harati kahine gidida wode hessa mela caaqoy baawa.
HEB 7:21 Shin Yesuusi caaqon kahine gidis. Xoossay yaagidi caaqis; “Goday caaqis; I ba qofaa laammenna; ‘Neeni merinaa kahine’ ” yaagis.
HEB 7:22 Ha caaquwa gaason Yesuusi nuus ubbaafe aadhiya qaala caaquwas waase gidis.
HEB 7:23 Kahinetethan oothonna mela hayqoy enta diggida gisho koyro kahineta tayboy daro.
HEB 7:24 Shin Yesuusi merinaw de7iya gisho iya kahinetetha hari laattenna.
HEB 7:25 Hessa gisho, I ubba wode enta gisho gaannatanaw merinaw de7iya gisho Xoossaako iya baggara yeyisata polo ashshanaw danda7ees.
HEB 7:26 Hiza, nuus koshshiyaba immiya, geeshshay, boreynne tuni baynaysi, nagaranchotape shaaketidaysinne saluwape aadhidi dhoqida kahine halaqay nuus koshshees.
HEB 7:27 I hanko kahine halaqata mela koyro ba nagara gisho, kaallidi asaa nagaraa gisho gallas gallas yarsho yarshanaw koshshenna. I bana yarshida wode zaarethonna ogen issi toho bana yarshis.
HEB 7:28 Muse higgey daaburancho asaa kahine halaqa oothidi shuumees. Shin higgiyafe guye yida caaqo qaalay merinaw polo gidida Xoossaa Na7aa shuumis.
HEB 8:1 Nuuni haasaya gitabay hessa. Saluwan Ubbaafe Bolla Xoossaa araatape ushacha baggan uttida haysa mela kahine halaqay nuus de7ees.
HEB 8:2 I asan gidonashin, Godan eqida tuma dunkaaniyan xoossa keethan oothees.
HEB 8:3 Kahine halaqa ubbay imonne yarsho yarshanaw shuumetees. Hessa gisho, ha kahiney yarshanaw issibay daanaw koshshees.
HEB 8:4 Higgey kiiteysada yarshiya kahineti de7iya gisho, Kiristoosi sa7an de7iyaba gidiyako I kahine gidenna.
HEB 8:5 Enti kahinetethan oothiya dunkaaney salon de7eysas leemisonne kuya. Musey dunkaaniya essiya wode Xoossay iyako, “Taani nena zumaa bolla bessida leemisuwa kaallada ootha” yaagis.
HEB 8:6 Shin Yesuusi giddo gididi sigethiya caaqoy, koyro caaquwape aadheysada I ekida oosoy entaysafe aadhees. Hessi eqiday aadhiya caaqo qaalana.
HEB 8:7 Koyro caaquwan bali baynaba gidiyako nam7antho caaqo koshshenna.
HEB 8:8 Shin Goday enta boridi, haysada yaagis: “Taani Isra7eele asaaranne Yihuda asaara ooratha caaqo caaqiya wodey yaana.
HEB 8:9 He caaqoy ta enta aawata Gibxe biittafe kushiya oykada, goocha kessida wode entara caaqida caaquwa mela gidenna. Enti ta caaquwan ammanetibona gisho, taani enta yegga aggas yaagees Goday.
HEB 8:10 Shin hizape guye Isra7eele asaara ta caaqana caaqoy haysa yaagees Goday. Taani ta higgiya enta guuggiyan wothana; enta wozanan xaafana. Taani enta Xoossaa gidana; entika ta ase gidana.
HEB 8:11 Entafe oonika ba shooruwa woyko ba ishaa, ‘Godaa era’ yaagidi tamaarsenna. Enti guuthafe gita gakanaw ubbay tana erana.
HEB 8:12 Taani enta naaquwa atto gaana; enta nagaraa zaara qopike” yaagees.
HEB 8:13 Xoossay ha caaquwa “Oorathi” gidi xeegishe koyroysa gal7isis. Hiza, gal7aynne ceegay dhayiya wodey gakis.
HEB 9:1 Koyro caaquwas Xoossaa goyinniya wogaynne sa7a Xoossa Keethay de7ees.
HEB 9:2 Dunkaaney eqis. Iyan xompe wothiya kocay, xarpheezaynne Godaa sinthan wothiya uythay de7ees; he bessay Geeshsha Bessaa geetetees.
HEB 9:3 Nam7antho magarajuwafe guye baggara de7iya bessay Ubbaafe Geeshsha Bessaa geetetees.
HEB 9:4 Iya giddon ixaane cuyisiya worqa saaxineynne worqan meeshetida caaqo Taabotey de7ees. He caaqo Taabotiyan mannay de7iya worqa xaaroy, aacida Aarona xam7aynne Muse higgey xaafetida nam7u loche shuchati de7oosona.
HEB 9:5 He Taabotiyape bolla baggara atotetha kamaa banta qefiyan genthiya boncho kiruubeti de7oosona. Shin ha77i he ubbaa qoncisidi odanaw danda7oko.
HEB 9:6 Ha ubbay haysada giigidaape guye, kahineti ubba wode banta oosuwa oothanaw dunkaaniyas koyro kifiliya geloosona.
HEB 9:7 Shin kahine halaqaa xalaali dunkaaniyas nam7antho kifiliya laythafe issi toho gelees. I yaa gelishe ba nagaraa gishonne asay eronna oothida nagaraa gisho suutha yarsho ekonna gelenna.
HEB 9:8 Koyro dunkaaney eqidi de7ishin, Ubbaafe Geeshsha Bessaa efiya ogey buroo dooyetiboonaysa Geeshsha Ayyaanay hessan erisees.
HEB 9:9 Hessi ha wodiyas leemiso; Xoossas imetiya imoynne yarshoy goyinniya uraa kaha geeshshanaw danda7onaysa haysi bessees.
HEB 9:10 Hessati muussaba, ushshabaanne dumma dumma meecha wogata odeyisata. Enti ooratha wogay yaana gakanaw oosetiya kare bagga wogata.
HEB 9:11 Shin Kiristoosi ha77i nu demmida lo77obatas kahine halaqa gididi yis. I gelida dunkaaney gitanne polo gididaysa. He dunkaaney asa kushen oosetibeenna qassi ha alamiyaba gidenna.
HEB 9:12 Kiristoosi Ubbaafe Geeshsha Bessaa geliya wode deesha suuthinne mari suuthi ekidi gelibeenna. Shin merinaa atotetha immanaw ba suuthaa ekidi zaarethonna ogen issi toho gelis.
HEB 9:13 Deesha suuthaynne korma suuthay, xuugetida ussa bidoy, tunida asaa bolla dharcetidi entana geeshshiyaba gidiko,
HEB 9:14 merinaa Geeshsha Ayyaana baggara borey bayna yarsho oothidi, Xoossaas bana immida Kiristoosa suuthay, de7o Xoossaa goyinnana mela hayqo kaalethiya oosuwape nu kaha waati aathidi geeshshennee?
HEB 9:15 Hessa gisho, xeegetidaysati Xoossay immida merinaa laata ekana mela Kiristoosi ooratha caaquwas giddo gididi sigetheysa gidis. Hessi haniday asay koyro caaquwape garsan de7iya wode oothida nagaraape entana wozanaw I hayqidaysana.
HEB 9:16 Hiza, keekey de7iko, he keekida uraa hayqoy eretanaw koshshees.
HEB 9:17 Keekida uray hayqiko iya keekey minnees. Keekida uray hayqonna attiko iya keekey oothenna.
HEB 9:18 Hari attoshin, koyro caaqoyka suuthi bayna minnibeenna.
HEB 9:19 Musey higge kiita ubbaa asaas odidaape guye mara suuthinne deesha suuthi haathara walakidi, zo7o dorsa ikisenne hisoophe wurco ekidi, maxaafaa bollanne asaa bolla wurxis.
HEB 9:20 Musey asaako, “Hinte naagana mela Xoossay kiitida suutha caaqoy haysa” yaagis.
HEB 9:21 Hessadaka, dunkaaniya bollanne oothiya miishe ubbaa bolla suuthaa wurxis.
HEB 9:22 Tumaka higgey geysada guuthabatape attishin, ubbabay suuthan geeyees. Suuthi gukonnashin atotethi baawa.
HEB 9:23 Saluwabaas leemiso gididaysati ubbay mehe yarshon geeyanaw koshshees. Shin salobati banta huuphen hessafe aadhiya yarshuwan geeyanaw koshshees.
HEB 9:24 Kiristoosi tuma Xoossa keethaas leemiso gidida, asa kushen oosetida Ubbaafe Geeshsha Bessaa gelibeenna. Shin I ha77i nu gisho, Xoossaa sinthan bentanaw saluwa gelis.
HEB 9:25 Kahine halaqay laythan laythan ba suuthi gidonnaysa ekidi, Ubbaafe Geeshsha Bessa gelees. Shin Kiristoosi daro toho bana yarshanaw salo gelibeenna.
HEB 9:26 Hessada hanidaba gidiyako, Kiristoosi alamey medhetoosape doomidi daro toho waayetanaw koshshees. Shin ha77i wodiya wursethan nagara digganaw bana yarshidi zaarethonna ogen issi toho bentis.
HEB 9:27 Asi ubbay issi toho hayqanaw hessafe guye pirdetanaw bessees.
HEB 9:28 Hessadaka, Kiristoosi daro asaa nagara digganaw issi toho yarshetis. Shin I nagara tookanaw gidonashin, bana naageysata ashshanaw nam7antho qoncana.
HEB 10:1 Muse higgey yaanaw de7iya lo77obatas kuyape attishin, ba huuphen waanna gidenna. Hessa gisho, laythan laythan pacey bayna yarshetiya yarshoy goyinnanaw shiiqiya asaa polo oothanaw danda7enna.
HEB 10:2 Higgey enta polo oothanaw danda7idaba gidiyako enti yarsho yarsheysa agganashin. Qassi goyinnanaw shiiqiya asay banta nagaraape geeyana; enta kahayka entana bala gidi mootenna.
HEB 10:3 Shin he yarshoti laythan laythan nagara qofisoosona.
HEB 10:4 Ayis giiko, korma suuthinne deesha suuthi nagara digganaw danda7enna.
HEB 10:5 Hessa gisho, Kiristoosi ha alamiya yida wode haysada yaagis: “Neeni yarshonne imo koyabaaka; shin taw asho giigisadasa.
HEB 10:6 Neeni xuussa yarshoninne nagara yarshon ufaytabaaka.
HEB 10:7 He wode, ‘Ta gisho maxaafan xaafetidaysada, Godaw, taani ne sheniya oothanaw yas’ yaagas” yaagis.
HEB 10:8 Yarshoy yarshetana mela higgey kiittiyaba gidikoka, Kiristoosi koyro, “Neeni yarshonne imo, xuussa yarshonne nagara yarsho koyabaaka; entan ufaytabaaka” yaagis.
HEB 10:9 Kaallidika I, “Godaw, Heko taani ne sheniya oothanaw yas” yaagis. Hessa gisho, Kiristoosi nam7anthuwa essanaw koyroysa shaaris.
HEB 10:10 Yesuus Kiristoosi Xoossaa sheniya oothidi, zaarethonna ogen issi toho ba ashuwa yarshida gisho nuuni geeyida.
HEB 10:11 Kahine ubbay, nagara digganaw danda7onna he yarshota gallas gallas yarshishe eqidi ba oosuwa oothees.
HEB 10:12 Shin Kiristoosi ubba wodes gidiya issi nagara yarshuwa yarshidi, Xoossaafe ushacha baggan uttis.
HEB 10:13 He wodiyape doomidi iya morketi iya tohoy yedhiyabaa oothana gakanaw naagees.
HEB 10:14 I zaarethonna ogen issi toho bana yarshida yarshuwan geeshshata merinaw polo oothis.
HEB 10:15 Qassi Geeshsha Ayyaanay nuus haysa markatees. Koyro haysada yaagis:
HEB 10:16 “He gallasatape guye, taani entara caaqiya caaqoy haysa: Taani ta higgiya enta qofan wothana; enta wozanan xaafana” yaagees.
HEB 10:17 Kaallidika, “Taani enta nagaraanne enta iita oosuwa zaara qopike” yaagees.
HEB 10:18 Hiza, nagari atto geetetidaape guye nagaras yarshetiya yarsho koshshenna.
HEB 10:19 Hiza, ta ishato, nuuni Yesuusa suuthaa baggara Ubbaafe Geeshsha Bessaa gelanaw nuus minotethi de7ees.
HEB 10:20 Nu gelanay Kiristoosi ba magarajuwa, hessika ba ashuwa baggara nuus dooyida oorathinne de7o gidida ogiyana.
HEB 10:21 Nuus Xoossa Keetha bolla shuumetida gita kahine halaqay de7ees.
HEB 10:22 Nuuni iita kahape geeyanaw nu wozanaa wurxetidi, nu asatethaa xillo haathan meecetidi, suure wozananinne polo ammanon Xoossaako shiiqoos.
HEB 10:23 Nuus ufaysa qaala immida Xoossay ammanetidaysa gidiya gisho nu markatiya ufaysaa ushachi haddirsi goonna minthidi oykoos.
HEB 10:24 Issoy issuwa siiqosinne lo77o oosos waati denthethaneko ane qopoos.
HEB 10:25 Issoti issoti meeze oothidi shiiqeysa aggidaysada nuuni issife shiiqeysa aggoko. Shin Godaa gallasay matatidaysa hinte be7iya gisho hessa kaseysafe aathidi oothite.
HEB 10:26 Nuuni tuma eratethaa ekidaape guye erishe nagara oothiko, hizape nu nagaraa gisho yashetana yarshoy baawa.
HEB 10:27 Shin hiza attiday yashshiya pirdaanne Xoossaa morketa xuugganaw giigida wolqaama tama.
HEB 10:28 Muse higgiya kiitetonna ixida oonika nam7u woyko heedzu asi iya bolla markatiko qadhey baynashin hayqees.
HEB 10:29 Yaatin, Xoossaa Na7aa kadhida uray, bana geeshshida Xoossaa caaqo suuthaa tunabaada qopida uray, qassi aadho keehatetha Ayyaana cayida uray, ay mela iita pirdaa ekanaw bessiyako ane qopite.
HEB 10:30 Hiza, “Halo kesoy tabaa, ta kushe zaarana” gidaysa nu eroos. Qassika, “Goday ba asa pirdana” yaagis.
HEB 10:31 De7o Xoossaa kushen kundethi daro yashshees.
HEB 10:32 Hintew Xoossaa poo7oy poo7idaape guye hinte daro waayen, gita baaxen gencida beni wodiya qopite.
HEB 10:33 Issi issi toho hinte asa sinthan cayetideta; goodetideta; issi issi toho hessa mela waayey gakida asaara issife waayideta.
HEB 10:34 Qashon de7iya asaaska qadhetideta. Hintew lo77onne dhayonna shaloy salon de7eysa hinte erida gisho hinte shaloy bonqetiya wode ufaysan danda7ideta.
HEB 10:35 Hessa gisho, gita woytoy de7iya hinte minotethaa yeggofite.
HEB 10:36 Xoossaa sheniya polidi, I hintew immana gida ufaysaa ekana gakanaw gencanaw koshshees.
HEB 10:37 Hiza, Geeshsha Maxaafan, “I, yaana gidaysi yaana; gam7enna.
HEB 10:38 Shin ta xilloy, tanan ammanetidi daana; oonika guye simmiko tana ufaysenna” yaagees.
HEB 10:39 Nuuni ammanidi attiya asaa baggafe attishin, guye simmidi dhayiya asaa bagga gidoko.
HEB 11:1 Ammano guussay, demmana gidi ufaysan ammanetidi naagiyabanne nu be7onnaba be7iyada oothidi ekiyaba.
HEB 11:2 Beni aawati ammanon Xoossaafe markatethi ekidosona.
HEB 11:3 Alamey Xoossaa qaalan medhetidaysa nu ammanon eroos. Qassi bentiyabay bentonnabape medhetis.
HEB 11:4 Aabeli Qaayelape aadhiya yarsho Xoossaas yarshiday ammanonna. Xoossay Aabela imuwa ufaytidi ekida wode I xillo gididaysa markatis. Aabeli hari attoshin, hayqidika ba ammanuwan ha77i gakanaw odees.
HEB 11:5 Heenokey hayqonna salo biday ammanonna. Xoossay iya ekida gisho oonika iya be7anaw danda7ibeenna. Heenokey salo eketanaape sinthe I Xoossaa ufaysida asi gideysi odetis.
HEB 11:6 Ammanoy bayna oonika Xoossaa ufaysanaw danda7enna. Xoossaako yaa oonika Xoossay de7eysanne bana koyeysatas woyto immeysa ammananaw koshshees.
HEB 11:7 Nohey buroo bentonnabas Xoossi iyaw odida wode Xoossas yayidi, bananne ba soo asaa ashshanaw ammanon markabe keexis. Yaatidi ba ammanuwan alame pirdidi, ammanon bentiya xillotethi Xoossafe ekis.
HEB 11:8 Abrahaamey laata oothidi ekana biitta baana mela Xoossay iya xeegida wode hari attoshin, I aw biyako eronna ixikoka kiitetiday ammanonna.
HEB 11:9 Abrahaamey Xoossay iyaw immana gida biittan bete asada de7iday ammanonna. Xoossay he immana gidaysa iyara issife laattanaw de7iya Yisaaqaranne Yayqoobara wolla dunkaanen de7is.
HEB 11:10 I, Xoossay qopidi keexida xaala baasoy de7iya katamaa naagees.
HEB 11:11 Saara ba huuphen cimidabaa gidikoka ufaysi immida Xoossay ammanetidaysa gideysa erida gisho qanthatanaw wolqa demmiday ammanonna.
HEB 11:12 Hessa gisho, hayqida asi daaniya issi addiyafe salo xoolinto melanne abba gaxan de7iya tayboy bayna shafe mela zerethi yeletidosona.
HEB 11:13 He asa ubbay bantaw geetetida ufaysaa qaala ekonna ammanon hayqidosona. Shin haahora hessa be7idi, demmidaada oothidi, ufaysan ekidosona. Qassi enti sa7an imathenne bete asi gideysa eridosona.
HEB 11:14 Hessada giya asay banta biitta naageysa qoncen bessees.
HEB 11:15 Enti he aggidi keyida biitta guye qopidaba gidiyako guye simmanaw danda7oosona.
HEB 11:16 Shin ha77i aadhidi lo77iya salo biitta laamotosona. Hessa gisho, Xoossay entaw katama giigisida gisho, “Enta Xoossaa” geetetidi xeegetanaw yeellatenna.
HEB 11:17 Abrahaamey paacetida wode Yisaaqa yarshiday ammanonna. He ufaysa qaala ekida Abrahaamey ba issi na7aa yarshanaw giigis.
HEB 11:18 Xoossay Abrahaameko, “Ne kochay Yisaaqa baggara xeegetana” yaagidi odis.
HEB 11:19 Xoossay hayqope denthanaw danda7eysa Abrahaamey ammanida gisho, Yisaaqa hayqope paxi dendidaada oothidi zaari ekis.
HEB 11:20 Yisaaqi wodepe hananaba eridi Yayqoobanne Eesawe anjiday ammanonna.
HEB 11:21 Yayqoobi hayqana hanishe, issi issi Yoosefa nayta anjidaynne guufe bolla katidi goyinniday ammanonna.
HEB 11:22 Yoosefi hayqanaw matida wode Isra7eele asay Gibxefe keyanaysa odidaynne ba meqethaa oothanaba enta kiittiday ammanonna.
HEB 11:23 Musey yeletidaape guye iya aayanne iya aaway mala lo77o na7a gididaysa be7idi heedzu ageena qottiday ammanonna; enti kawa awaajuwa babibookona.
HEB 11:24 Musey diccidaape guye Gibxe kawa na7e na7a geetetanaysa ixiday ammanonna.
HEB 11:25 Musey nagaran guutha wodes ufaytanaape, Xoossaa asaara waaye ekanaysa dooris.
HEB 11:26 I wodepe demmana woytuwa tishshi oothidi xeellida gisho, Gibxe shaluwape aathidi Kiristoosa gisho boretanaysi daro aadhiya duretethi gididaysa eris.
HEB 11:27 Musey Kawa hanquwa yayyonna, Gibxefe keyday ammanonna. Bentonna Xoossaa be7ida asada hanidi ba qofan gencis.
HEB 11:28 Hayqo ehiya kiitanchoy Isra7eele asaa bayra nayta wodhonna mela Musey Paasikanne suutha wurxetha wogaa oothiday ammanonna.
HEB 11:29 Isra7eele asay mela biittara hemetiyada hemetidi, Zo7o Abbaa pinniday ammanonna. Shin Gibxe asay gelanaw paacidi be7iya wode haathay enta mittis.
HEB 11:30 Isra7eele asay Iyaarko katamaa shucha dirsaa laapun gallas yuuyidi, kundisiday ammanonna.
HEB 11:31 Laymiya Ra7aaba biitta wocheyisata mokida gisho, kiitetonna asaara hayqonna attiday ammanonna.
HEB 11:32 Hiza, haraa ta ay go? Gediyoonaba, Baaraqaba, Samsoonaba, Yoftaaheba, Dawitaba, Sameelaba, qassi nabetaba odanaw taw wodey gidenna.
HEB 11:33 Enti ammanon kawotethata xoonidosona; xillotethan aysidosona; Xoossay immana gida ufaysaa ekidosona; gaammota doona gordidosona;
HEB 11:34 tama wolqaa toysidosona; morketa mashshafe attidosona; banta daaburan minnidosona; olan wolqaama gididosona; allaga toora goodidosona.
HEB 11:35 Maccasati banta hayqidaysata hayqope paxin ekidosona. Qassi harati aadhiya hayqope dendo ekanaw koyidi qashope biletanaysa ixidosona.
HEB 11:36 Harati asan boretidi lisson garaafetidosona; harati santhalaatan qashetidi qasho keethan yegetidosona.
HEB 11:37 Enti shuchan cadetidosona; magaazen nam7a keyidi phalqetidosona; paacetidosona; mashshan hayqidosona; entaw ubbabay dhayin metootidosona. Dorsa itenne deesha ite ma7idi yuuyidosona.
HEB 11:38 Entaw ha alamey giigonna ixin mela biittan, dere bolla, gongoloninne olla giddon yuuyidosona.
HEB 11:39 Xoossay enta ammanuwaba markatikoka, he ubbay geetetida ufaysa qaala ekibookona.
HEB 11:40 Xoossay nuus lo77oba qopi wothida gisho enti nuuni bayna polo gidokona.
HEB 12:1 Hiza, shaarada nu yuushuwan darida haysa mela markati nu matan de7iya gisho nuna dhubiya ubbaanne oykidi haariya nagaraa diggidi, nu sinthan de7iya gaadde wothaa gencan woxoos.
HEB 12:2 Nu ammanuwas oge dooydaysanne nu wursetha poluwako nuna gathiya Yesuusa bolla nu ayfiya wothoos. Yesuusi wodepe de7iya ufaysaa gisho masqaliya waayiya danda7idi, yeella hayquwa kadhidi, Xoossaafe ushacha baggan uttis.
HEB 12:3 Hiza, hinte doccidi ufaysi qanxonna mela nagaranchota ixuwa danda7ida Yesuusa qopite.
HEB 12:4 Nagarara de7iya baaxiyan buroo suuthu gussana gakanaw eqetibeketa.
HEB 12:5 Xoossay ba qaalan, ba naytada hintena zoridaysa dogideta. “Ta na7aw, Xoossaa seera leqofa; I nena seeriya wode ufaysi qanxofa.
HEB 12:6 Goday ba dosiya uraa seerees; qassi ba na7ada ekiya ubba garaafes” yaagees.
HEB 12:7 Xoossay hintena ba naytada seeriya wode gencite; Aaway seeronna na7i oonee?
HEB 12:8 Xoossay ba nayta ubbaa seerees; hinte seerettonna ixiko tuma iya nayta gidonashin balako nayta.
HEB 12:9 Qassi nuna yelida nu aawati nuna seerosona; nuka entana bonchoos. Yaatin, nuuni nu ayyaana Aawas waanidi aathidi haaretoko?
HEB 12:10 Hiza, nu aawati bantaw lo77o daanida mela guutha wodes nuna seeridosona. Shin Xoossay nu go77as, nu iya geeshshatethan shaaketana mela seerees.
HEB 12:11 Nuuni seeretiya wode yiloyeesipe attishin, ufaysenna. Shin guyepe seeretethi meezetida asaas seeray, saroy kumida xillotethaa ayfe ayfisees.
HEB 12:12 Hiza, hinte argaacida qesiyanne hinte daaburida gulbata minthite.
HEB 12:13 Wobbey paxana melape attishin, aathidi meqonna mela hinte tohuwas suure oge giigisite.
HEB 12:14 Asa ubbaara saro daanawunne geeshshatethan daanaw minnite; geeshshatethi bayna oonika Godaa be7anaw danda7enna.
HEB 12:15 Hintefe oodeska Xoossaa aadho keehatethay paconnaada, qassi camo ayfe ayfidi daro asaa tunisiyanne dhaysiya zerethada gidonna mela naagetite.
HEB 12:16 Hinte giddon laymatiya asi woyko issi toho miya kathas ba bayratetha toochidi bayzida Eesawe mela asi doonna mela naagetite.
HEB 12:17 Guyepe Eesawey he anjuwa ekanaw koyida wode digetidaysa ereeta. I he anjuwa afuthan minnidi koykoka, demmanaw danda7ibeenna; I nagaraape simmanaw qaada demmibeenna.
HEB 12:18 Hinte kushen boshetiya Siina deriyako, eexiya tamaako, dhumaako, caaganaako, gotiyaako,
HEB 12:19 moyze punuko woyko qaalay si7etiya bessaako yibeeketa. He qaala si7ida asay hara guzha qaala si7onna mela woossidosona.
HEB 12:20 Ayis giiko, “Hari attoshin, do7i he zumaa bochiko, shuchan cadetidi hayqo” yaagida kiitaa enti tookanaw danda7ibookona.
HEB 12:21 He haniyabay daro daganthiyaba gidida gisho Museyka, “Taani yashshan kokoras” yaagis.
HEB 12:22 Shin hinte Xiyoone zumako, de7o Xoossay de7iya Yerusalaame katamaako, issife shiiqidi ufaytiya daro mukulu kiitanchotako saluwa yideta.
HEB 12:23 Enta sunthay salon xaafetida woosa keethaa bayra naytako, asa ubbaa dayna gidida Xoossaako, polo gidida xillo asaa ayyaanatako yideta.
HEB 12:24 Ooratha caaquwas giddo gididi sigethiya Yesuusako, Aabela suuthaafe aadhiyaba odiya wurxetida suuthako yideta.
HEB 12:25 Hintew odiya ura qaala ixas goonna mela naagetite. Kaseysati sa7an gididi odida kiita si7onna ixidi, kessi ekiboonnaba gidiko, yaatin, salon gididi odiya qaala nuuni ixas giiko waanidi kessi ekanee?
HEB 12:26 He wode iya qaalay sa7a qaathis. Shin ha77i taani, “Sa7a xalaala gidonashin, issi toho zaarada saluwaka qaathana” yaagis.
HEB 12:27 “Issi toho zaarada” giya qaalay qaaxonnabay minnidi daanaysa, qassi qaaxiya medhetidabati dhayanaysa bessees.
HEB 12:28 Nuuni qaaxanaw danda7onna kawotethaa ekiya gisho Xoossaa galatoos; Xoossaa ufaysiya ogen bonchoninne yashshatethan iya goyinnoos.
HEB 12:29 Hiza, nu Xoossay tuma xuuggiya tama.
HEB 13:1 Ammaniya asada issoy issuwara polo siiqetite.
HEB 13:2 Imathe mokeysa dogopite. Issi issi asati hessada oothishe eronna kiitanchota mokidosona.
HEB 13:3 Qashon de7eyisata hinteka entara issife qashon de7iyada oothidi entana qopite. Waaye ekiya asaara issife hinteka waaye ekiyada oothidi entana qopite.
HEB 13:4 Ekoynne geloy asa ubbaa matan bonchetidaba gido. Qassi Xoossay laymateysatanne laammeyisata pirdanaw de7iya gisho azinaynne machiya issoy issuwas ammanetanaw bessees.
HEB 13:5 Miishe siiqope hintena naagite; hintew de7iyaban alite. Xoossay, “Taani nena ubbaraka yeggike woyko aggike” yaagis.
HEB 13:6 Hessa gisho, nuuni ammanetidi, “Goday tana maaddeysa; ta yayyike; asi tana ay oothanee?” yaagos.
HEB 13:7 Xoossaa qaala koyro hintew odida hintena kaaletheyisata qopite. Enti waanidi de7idaako enta duussaa be7idi enta ammanuwa kaallite.
HEB 13:8 Yesuus Kiristoosi zineka hachika merinawuka laametenna.
HEB 13:9 Dumma dumma ooratha timirten haraso bidi dhayopite; boopite. Nu wozanay Xoossaa aadho keehatethan minnanaw besseesipe attishin, min go77onna kathan wogaa polon gidopo.
HEB 13:10 Shin dunkaaniya giddon oothiya kahineti he yarsho kathaafe maanaw entaw maati bayna yarsho bessay nuus de7ees.
HEB 13:11 Kahine halaqay nagara yarshos mehe suuthi ekidi yarshanaw Ubbaafe Geeshsha Bessaa gelees. Shin he mehiya ashuwa dirsaafe karen xuuggees.
HEB 13:12 Hessadaka, Yesuusi deriya nagaraape ba suuthan geeshshanaw katamaa pengiyafe karen waayetis.
HEB 13:13 Hiza, nuuni boriya tookidi dirsaafe kare iyako keyoos.
HEB 13:14 Hiza, nuus haysan merinaw de7iya katami baawa, shin nuuni yaana katamaa naagoos.
HEB 13:15 Hiza, Yesuusa baggara ubba wode iya sunthaas markatiya mettersha galata yarsho Xoossaas immoos.
HEB 13:16 Lo77oba oosonne hintew de7iyabaape metootida asaas imo dogopite. Hiza, hessa mela yarshoy Xoossaa ufaysees.
HEB 13:17 Hintena kaaletheysatas kiitetite; enti giyaba oothite. Enti banta oothiyabas Xoossaa sinthan oyshetanaw de7iya gisho, hintena heemmoosona. Hinte entaw kiitetiko, banta oosuwa ufaytidi oothana; hessi hanonna ixiko, enti azzanishe oothana; hessi hintena aybibaaka maaddenna.
HEB 13:18 Nuus Xoossaa woossite. Nu kahay geeshshi; nu ubba wode lo77oba oothanaw koyoos.
HEB 13:19 Taani hinteko ellesada yaana mela hinte taw minthidi Xoossaa woossana mela ta hintena hadara gayis.
HEB 13:20 Sarotethaa Xoossay, dorsa heemmiya nu Godaa Yesuusa, ba merinaa caaqo suuthan hayqope denthidaysi,
HEB 13:21 iya sheniya oothana mela lo77oba ubban I hintena danciso. Iya ufaysiyabaa Yesuus Kiristoosa baggara nunan Xoossay ootho. Yesuus Kiristoosa baggara Xoossaas merinaape merinaa gakanaw bonchoy gido. Amin7i.
HEB 13:22 Ta ishato, ta ha dabdaabiya hintew qanthan xaafida gisho, hinte ta zoriya saletonna ekana mela ta hintena woossayis.
HEB 13:23 Nu ishay, Ximotiyoosi qashope biletidaysa erite. I ellesidi taako yiiko ta iyara hintena bada be7ana.
HEB 13:24 Hintena kaaletheysatanne ammaniya ubbaa saro giite. Xaalepe yida ammaniya asay hintena saro yaagosona.
HEB 13:25 Xoossaa aadho keehatethay hinte ubbaara gido. Amin7i.
JAM 1:1 Xoossaanne Godaa Yesuus Kiristoosa aylley, Yayqoobi, biitta ubban laaletida tammanne nam7u sheeshatas kiitida kiita. Saro, ay mela de7eetii?
JAM 1:2 Ta ishato, hintena dumma dumma paacey gakiya wode hinte lo77oba demmidaada kumetha ufaysan ekite.
JAM 1:3 Hinte ammanuwa paacetethay danda7a hintew immeysa ereeta.
JAM 1:4 Hinte wursethi gakanaw danda7iko aybi pacey bayna polonne kumethi gideta.
JAM 1:5 Hintefe oodeska cincatethi dhayiko Xoossaa woosso. Iyaw imetana. Xoossay oonaka boronna ubbaas keehatethan immiya Xoosse.
JAM 1:6 Shin I woossiya wode sidhonna ammanon Xoossaa woosso. Sidhiya oonika carkoy sugin qaaxiya abba zule mela.
JAM 1:7 Nam7u qofi de7eynne ba ogiyan eqonna oonika Godaape aykoka demmana gidi qopofo.
JAM 1:9 Ammaniya manqo asati, Xoossay entana dhoqu oothiya wode ufayto.
JAM 1:10 Qassi ammaniya dure asati Xoossay entana ziqi oothiya wode ufayto. Dure asati ciishshada dhayana.
JAM 1:11 Away ba mishaara keyidi maata melisin, ciishshay qoletees; iya lo77otethayka dhayees. Hessadaka, dure asati banta oosuwan daaburishe dhayana.
JAM 1:12 Metuwa xoonidi aadhidaape guye, Xoossay bana siiqeysatas immana gidi qaala gelida de7o kallachaa ekana gisho, meton genciya asi anjetidaysa.
JAM 1:13 Oonika paacetiya wode, “Tana Xoossay paacees” goopo. Xoossay iitan paacetenna; qassi I oonaka paacenna.
JAM 1:14 Shin issi issi asi ba iita amuwan gooshetiya wodenne cimetiya wode paacetees.
JAM 1:15 Hessafe guye, amotethi qanthatidi nagara yelees; qassi nagari diccidi hayqo yelees.
JAM 1:16 Ta siiqo ishato, cimetofite.
JAM 1:17 Lo77o imoynne kumetha anjo ubbay salopenne saluwa poo7uwa medhida Xoossaa aawape yees. Xoossay kuyada ubba wode laametenna.
JAM 1:18 Nuuni, iya medhetethas koyro gidana mela nuna tuma qaalan ba shenen yelis.
JAM 1:19 Ta siiqo ishato, haysa akeekite. Asi ubbay si7anaw elleso, shin odetanawunne hanqetanaw ellesopo.
JAM 1:20 Asa hanqoy Xoossay koyiya xillotethaa ehenna.
JAM 1:21 Hessa gisho, tuna hanotanne iitatetha ubbaa diggidi, Xoossay hinte wozanan tokida hinte shempuwa ashshanaw danda7iya qaala aadatethan ekite.
JAM 1:22 Shin Xoossaa qaala ooson peeshshitepe attishin, sissa xalaalan hintena cimmofite.
JAM 1:23 Qaala si7idi oothonna asi, I ba som7uwa mastooten be7iya asa mela.
JAM 1:24 I ba som7uwa be7idi bees, shin I ay daaniyako ellesi dogees.
JAM 1:25 Shin oonika aylletethafe kessiya polo higgiya akeekan be7idi, kaallidi naagey, si7idaysa dogonna ooson peeshshiya uray, ba ooso ubban anjetana.
JAM 1:26 Ba inxarsaa naagonna ammanayis giya uray bana cimees; iya ammanoy hada.
JAM 1:27 Xoossaa Aawa sinthan borey bayna geeshsha ammanoy haysa: aayiya aawu bayna naytanne am7eta maadonne alamiya tunaape bana naago.
JAM 2:1 Ta ishato, hinte nu boncho Godaa Yesuus Kiristoosa ammaniyaba gidiko, asa som7o xeellidi ase bonchofite.
JAM 2:2 Leemisos, worqa migiddo aathidi, lo77o ma7o ma7ida dure asi hinte shiiquwa yis. Qassi curqa ma7o ma7ida manqo asika yis.
JAM 2:3 Lo77o ma7o ma7ida addiya hinte aathidi bonchidi, “Ne haysan lo77iya oydiyan utta” gidi, qassi manqo addiya, “Ne yan eqa woyko haysan ta tohuwa matan sa7an utta” geeta.
JAM 2:4 Yaatin, hinte, hinte giddon shaaketethi medheysatanne iita qofara de7iya daynnata mela gideketiyee?
JAM 2:5 Ta siiqo ishato, si7ite. Ammanon dure gidana melanne bana siiqeysatas immana gida salo kawotethaa laattana mela ha sa7an de7iya manqota Xoossay dooribeneyee?
JAM 2:6 Shin hinte manqota toocheta. Hintena un7etheysati dureta gidokonaayee? Hintena daynna sinthe goocheysati enta gidokonaayee?
JAM 2:7 Hinte xeegetida lo77o Godaa sunthaa cayeysati enta gidokonaayee?
JAM 2:8 Shin Geeshsha Maxaafan, “Ase ubbaa nena ne doseysada dosa” geetetidi xaafetida Xoossaa kawotethaa higgiya hinte poliko lo77o ootheeta.
JAM 2:9 Shin hinte asa som7o xeellidi bonchiko, nagara ootheeta qassi higgey hintena higge menthida asada pirdana.
JAM 2:10 Oonika higge ubbaafe issuwa menthidi, attida ubbaa naagiko ubbaa menthidaada taybetees.
JAM 2:11 “Laammofa” gida Goday, qassi “Wodhopa” gis. Shin neeni laammonna aggada wodhidaba gidiko, higgiya menthadasa.
JAM 2:12 Aylletethafe kessiya higgiya sinthan pirda ekanaw de7iya asada odetitenne oothite.
JAM 2:13 Ase maaronna oonaka Xoossay maaronna pirdana. Shin maarotethay pirdaa xoonees.
JAM 2:14 Ta ishato, hintefe issi asi taw ammanoy de7ees gidi, ba ammanuwa ooson bessonna ixiko iya ay maaddanee? Iya ammanoy iya ashshanaw danda7ii?
JAM 2:15 Leemisos issi ishay woyko issi michiya kallotikonne entaw miyabay dhayiko,
JAM 2:16 hintefe issi asi entako, “Saro biite! Tama kayite! Kallidi miite!” gidi, koshshiyaba entaw immonna ixiko enta ay maaddii?
JAM 2:17 Hessa gisho, oosoy bayna ammanoy barka hayqidaysa.
JAM 2:18 Shin issi asi, “New ammanoy de7ees; qassi taw oosoy de7ees. Neeni ne ammanuwa ne oosuwape shaakada tana bessa; taka ta ammanuwa ta oosuwan nena bessaana” gaana.
JAM 2:19 Neeni, issi Xoossay de7eysa ammanaasa; hessi lo77o. Tuna ayyaanatika ammanoosona; yashshan kokoroosona.
JAM 2:20 Neno eeyaw! Ammanoy oosope shaaketidi maaddonnaysa eranaw koyay?
JAM 2:21 Nu aawa Abrahaamey, ba na7aa Yisaaqa yarsho bessa bolla wothida wode ba oosuwan xillibeennee?
JAM 2:22 Iya ammanoynne iya oosoy issife oothidaysa be7ikii? Iya ammanoy iya oosuwan poletis.
JAM 2:23 Geeshsha Maxaafay, “Abrahaamey Xoossaa ammanis. Xoossay hessa iyaw xillotethi oothidi taybis” gidaysi poletis. Qassi I Xoossaa dabbo geetetidi xeegetis.
JAM 2:24 Asi ammano xalaalan gidonashin, ooson xilleysa be7aasa.
JAM 2:25 Hessadaka, laymiya Ra7aaba Isra7eelepe kiitetidaysata mokada hara ogera enta moyzida wode ba oosuwan xillabeekee?
JAM 2:26 Shempoy shaaketida asatethay hayqo gideysada, oosoy shaaketida ammanoyka hayqidaysa.
JAM 3:1 Ta ishato, hintefe daroti astamaare gidopo. Nu, astamaareti haratape aadhiya pirdaa ekanaysa hinte ereeta.
JAM 3:2 Nu ubbay daroban baletoos. Ba odan baletonna oonika banatetha naaganaw danda7iya polo asi.
JAM 3:3 Parati nuus kiitetana mela bixaala barsidi nuuni koyiya bessi ubbaa efoos.
JAM 3:4 Markabey hessa mela gita gidishe wolqaama carkuwan sugetikoka, enta laaggeysi ba koyiya bessi zaaridi laagiya guutha mithan laagetidi bees.
JAM 3:5 Hessada inxarsi asatethaa giddon guutha gidikoka daro gitaban ceeqetees. Guutha tami daro gita wora xuuggees.
JAM 3:6 Inxarsi tama mela. Inxarsi nu asatethaa giddon iitan kumida alame; asatethaa ubbaa tunisees. Gaannamepe keyiya tamada nu de7uwa wotha ubbaa xuuggees.
JAM 3:7 Do7atanne kafota, ulora goosheteysatanne abban de7iya medhetethata ubbaa asi haarees; entika haaretidosona.
JAM 3:8 Shin oonika inxarsi haaranaw danda7ibeenna. Inxarsi wodhiya marzey kumida haaretonna iita medhetethi.
JAM 3:9 Nu inxarsan, nu, Godaanne Xoossaa galatoos. Qassi iyara Xoossaa leemison Medhetida asaa baaddoos.
JAM 3:10 Issi doonape galatinne baadethi keyees. Ta ishato, hessada hananaw bessenna.
JAM 3:11 Pultoy issi ollafe mal7iya haathinne cammiya haathi pultanaw danda7ii?
JAM 3:12 Ta ishato, balase mithi shamaho ayfanaw danda7ii? Woyko woyne mithi balase mitha ayfe ayfanaw danda7ii? Camo haathaafe mal7o haathi keyanaw danda7enna.
JAM 3:13 Hinte giddon cincinne akeekanchoy oonee? Ba lo77o de7uwa, ashketethaninne cincatethan oosetida ooson besso.
JAM 3:14 Shin hinte wozanan cammiya qinaateynne bana dosoy de7iko ceeqetofite; tumaa bolla wordotopite.
JAM 3:15 Hessa mela cincatethay salope yidaba gidonashin, hessi asaba, alameba, xalaheba.
JAM 3:16 Qinaateynne bana dosoy de7iya son ooshshinne iita ooso ubbay de7oosona.
JAM 3:17 Shin bollafe yaa cincatethay ubbaafe sinthe geeshshi. Qassi sarotethi, aadatethi, si7idi ekeysa, qadheteysa, lo77o ayfey kumidaysa, ase shaakonnaysanne cubbotethi baynaysa.
JAM 3:18 Sarotethaa doseysati sarotethi zeridi xillotethi buucosona.
JAM 4:1 Ooshshinne oli hinte giddo awupe yii? Enti yey hinte asatethaa haaranaw oletiya hinte asho amuwape gidenneyee?
JAM 4:2 Hinte amotteeta, shin demmeketa; hessa gisho, wodheeta. Minthi koyeeta, shin demmanaw danda7eketa; hessa gisho, ooyeteetanne oleteeta. Hinte Xoossaa woossonna gisho koyaba demmeketa.
JAM 4:3 Hinte woosseta, shin demmeketa. Hinte asho amuwa polanaw wobbe ogen woossiya gisho demmeketa.
JAM 4:4 Hinteno, laymateysato! Ha alamiya dosey Xoossara morke gideysa ereketii? Ha alamiyara dabbotanaw koyey oonika Xoossara morke.
JAM 4:5 Geeshsha Maxaafay, “Xoossay nunan daana mela oothida Ayyaanay, nuuni iyaw buzo gidana mela amottees” gidaysa coo gidaba daanii?
JAM 4:6 Shin Geeshsha Maxaafay, “Xoossay otoranchota ixees, shin bantana ashketas maarotethi immees” giya gisho, Xoossay maarotethi darsidi immees.
JAM 4:7 Hessa gisho, Xoossaas haaretite; Xalahiyara eqetite; I hintefe haakana.
JAM 4:8 Xoossaako shiiqite; I hinteko shiiqana. Hinteno, nagaranchoto, hinte kushiya meecetite; nam7u qofi de7eysato, hinte wozanaa geeshshite.
JAM 4:9 Kayotite, yeekitenne afuxite. Hinte miichay yeehon, hinte ufaysay azzanon laameto.
JAM 4:10 Godaa sinthan hintenatethaa kawushite; hintena dhoqu dhoqu oothana.
JAM 4:11 Ta ishato, issoy issuwa zigiropite. Ba ishaa zigireynne iya bolla pirdey higge zigiresinne higge bolla pirdees. Neeni higge bolla pirdiko higge bolla pirdeysa gidaasape attishin, higge poleysa gidaka.
JAM 4:12 Higge immeynne pirdey Xoossaa xalaala. Ashshanawunne dhaysanaw danda7ey iya. Yaatin, ne asa bolla pirdey neeni oonee?
JAM 4:13 Hinte, “Nuuni hachi woyko wonto ya katamaa woyko ha katamaa baana; yan laythi uttana; zal7idi wodhisana” yaageysato, si7ite.
JAM 4:14 Wonto aybi hananeeko hinte ereketa. Hinte de7oy waananeko erey oonee? Hinte guutha wode bentidi dhayiya aka mela.
JAM 4:15 Hessa aggidi, “Goday giiko nuuni daana; haysa woyko hessa oothana” yaaganaw bessees.
JAM 4:16 Shin hinte ha77i otortetanne ceeqeteta. Hessa mela ceeqo ubbay iita.
JAM 4:17 Hessa gisho, lo77oba oothanaw erishe oothonna uraas hessi nagara.
JAM 5:1 Hinteno, dureto, hinte bolla iita metoy yaa gisho yeekitenne zeleelite.
JAM 5:2 Hinte shaloy buuqis; hinte afilayka bilan meetetis.
JAM 5:3 Hinte worqaynne hinte biray shi7is. He shi7ay hinte bolla marka gidana. I hinte asatethaa tamada maana. Hinte ha wurida qammatan hintew shalo dagayeeta.
JAM 5:4 Hinte gaden oothi pee7ida asaa une miishiya qanxibeketa. Hessi hinte bolla waassees. He asata waasoy wolqaama Godaa haythan si7etis.
JAM 5:5 Ha sa7an hinte ulo xalaalas qopidi, injen de7ideta. Shukas giigetida meheda hintena dhiikideta.
JAM 5:6 Hintera eqetanaw danda7onna xillo asa bolla pirdideta iya wodhideta.
JAM 5:7 Ta ishato, Goday yaana gakanaw gencite. Goshshanchoy torche iraynne sila iray yaana gakanaw gencidi al7o kathaa naagidi waati gathi ekiyako qopite.
JAM 5:8 He goshshanchuwada hinteka gencite. Godaa yuussay matatida gisho ufaysan naagite.
JAM 5:9 Ta ishato, Xoossay hinte bolla pirdonna mela issoy issuwa bolla zuuzumofite. Pirdeysi pengen eqis.
JAM 5:10 Ta ishato, waayan gencida, Godaa sunthan odida nabeta leemiso oothidi ekite.
JAM 5:11 Danda7an gencidaysata nuuni anjetidaysata goos. Iyyobi waanidi gencidaako hinte si7ideta. Goday wursethan iya waati maaddidaako be7ideta. I maarotinne qadhey kumida Godaa gidiya gisho hessa oothis.
JAM 5:12 Shin ubbaafe sinthe, ta ishato, saluwan gidin woyko sa7an gidin woyko hara aybinka caaqofite. Xoossaa pirdan hinte gelonnaada hinte oday ee gidiko, “Ee” giite; akay gidiko, “Akay” giite.
JAM 5:13 Hinte giddon meto ekiya oonika de7iko Xoossaa woosso. Ufaytiya oonika de7iko galatan yexo.
JAM 5:14 Hintefe hargetiya oonika de7iko woosa keetha cimata xeego. Enti Godaa sunthan shamaho zayte tiyidi iyaw Xoossaa woosso.
JAM 5:15 Ammanon woossida woosay harganchuwa pathana. Goday iya, hargiyafe denthana; I nagara oothidaba gidikoka Goday iya maarana.
JAM 5:16 Hessa gisho, hinte paxana mela hinte nagara issoy issuwas paaxitenne issoy issuwas woossite. Xillo asa woosay wolqaama ooso oothees.
JAM 5:17 Eeliyaasi nu mela ase. Iri sa7an bukonna mela minthidi Xoossaa woossin heedzu laythinne usupun ageena sa7an iri bukibeenna.
JAM 5:18 Zaaridi I Xoossaa woossin salope iri bukis; sa7ika kathi dolisees.
JAM 5:19 Ta ishato, hintefe oonika tuma ogiyape buutiko, haray iya tumaako zaariko,
JAM 5:20 nagaranchuwa iya bala ogiyape zaariya oonika, iya shempuwa hayqope ashsheysanne iya daro nagaraas maarota immeysa ero.
1PE 1:1 Taani, Yesuus Kiristoosa hawaarey Phexroosi; Phanxoosan, Galatiyan, Qaphadooqan, Iiseninne Bitaanen betanchoda laaletidi de7iya Xoossay doorida, asaas ha dabdaabiya xaafas.
1PE 1:2 Yesuus Kiristoosas hinte kiitetana melanne iya suuthan geeyana mela, Xoossaa Aaway ba kase eran dooridaysatasinne Geeshsha Ayyaanan geeyida, hintew aadho keehatethaynne sarotethay gido.
1PE 1:3 Yesuus Kiristoosa hayqope denthidi ba gita maarotethan nam7antho yeletethaanne dhayonna ufaysaa immida nu Godaa Yesuus Kiristoosa Aaway, Xoossay galatetto.
1PE 1:4 Qassi Xoossay hintew dhayonna, iitonnanne buuqonna laata salon giigisis.
1PE 1:5 He laatay wode wursethan qoncanaw de7iya atotethas Xoossaa wolqan ammanon hintew naagetidi de7ees.
1PE 1:6 Ha77i guutha wodes hinte dumma dumma paacen un7etikoka hessan ufaytite.
1PE 1:7 He paacey hintena gakiday, taman yeggin dhayiya worqafe hinte ammanoy aadhonne tuma gideysa bessanaasa. He paacetida ammanuwan Yesuus Kiristoosi qonciya wode galataa, bonchonne saba hinte ekana.
1PE 1:8 Hinte Yesuusa be7ibeeketa, shin iya siiqeta. Hinte ha77i iya be7iboonaba gidikoka, iya ammaneta. Qassi odan qoncisanaw danda7etonna ufaysaninne bonchon kumideta.
1PE 1:9 Hinte ammanon naagiya hinte shempuwa atotetha ekana.
1PE 1:10 Aadho keehatetha baggara hintew giigida ha atotethaaba nabeti eranaw gita koshshaninne naagon koydosona.
1PE 1:11 Entan de7iya Kiristoosa Ayyaanay iya waayabanne hessafe guye, yaana bonchuwaba kasetidi markatishe, awude woyko waanidi hananeeko akeekan pilgidosona.
1PE 1:12 Nabeti odida tinbitey bantaw gidonashin, hintew gideysa Xoossay hintew qoncisis. Ha77i asay hintew odida Wongela salope kiitetida Geeshsha Ayyaana wolqan hintew odidosona. Kiitanchotika hessa be7anaw amotidosona.
1PE 1:13 Hessa gisho, oosos hintena giigisite; hintena haarite. Yesuus Kiristoosi qonciya wode hinte ekana aadho keehatetha ufaysan naagite.
1PE 1:14 Xoossaa naytada iyaw kiitetite; hinte kase eronna oothida iita amuwa kaallopite.
1PE 1:15 Shin hintena xeegida Xoossay geeshshi gididaysada hinteka hinte duussa ubban geeshshi gidite.
1PE 1:16 Geeshsha Maxaafan, “Taani geeshshi gidida gisho hinteka geeshshi gidite” geetetidi xaafetis.
1PE 1:17 Asa som7o be7onna iya oosuwada pirdiya Xoossaa, “Nu Aawaw” gidi xeegiyaba gidiko, ha sa7aa imathatetha duussaa yashshan de7ite.
1PE 1:18 Hinte, hinte aawatape laattida pathonna de7uwape wozetidaysi, dhayiya biran woyko worqan gidonnaysa ereeta.
1PE 1:19 Borey woyko borsoy bayna dorsa suuthada al7o gidida Kiristoosa suuthan wozetideta.
1PE 1:20 Xoossay alamey medhetanaape kase Kiristoosa dooris, shin ha wursetha wodiyan Kiristoosi hinte gisho qoncis.
1PE 1:21 Hinte ammanoynne hinte ufaysay Xoossan gidana mela iya hayqope denthidi, bonchida Kiristoosa baggara Xoossan ammaneta.
1PE 1:22 Hinte tumatethaas kiitetidi hintenatethaa geeshshideta. Hinte issoy issuwa wozanape siiqeta, shin ha77ika tuma wozanape minthidi siiqite.
1PE 1:23 Hinte nam7antho yeletiday dhayiya zerethafe gidonashin, merinaw de7iya Xoossaa qaalan dhayonna kochaafe yeletideta.
1PE 1:24 Xoossaa qaalay, “Asi ubbay maata mela; iya boncho ubbay ciishsha mela. Maatay melees, ciishshayka qoletees.
1PE 1:25 Shin Godaa qaalay merinaw de7ees” yaagees. Hintew odetida Wongela qaalay haysa.
1PE 2:1 Hiza, iitatethi ubbaa, cimo ubbaa, cubbotethi qanaatenne zigirsi ubbaa hintefe diggite.
1PE 2:2 Goday keeha gideysa hinte eridi meezetidaysada ha77i yeletida guutha naytada hinte atotethan diccishe baanaw Xoossaa geeshsha qaala maatha ubba wode amotite.
1PE 2:4 Asan boretidi Xoossan dooretida al7o gidida de7o shuchaa, Godaa Yesuusako shiiqite.
1PE 2:5 Hinte Ayyaana keethi keexetiya de7o shuchata. Hinte Yesuus Kiristoosa baggara Xoossaa ufaysiya ayyaana yarsho yarshiya geeshsha kahineta.
1PE 2:6 Geeshsha Maxaafan, “Heko, taani Xiyoone kataman godaa xaphuwa minthiya, dooretida, al7o shuchaa wothas; iyan ammaniya oonika yeellatenna” yaagees.
1PE 2:7 Ha shuchay hintew ammaneysatas al7o, shin ammanonaysatas, “Gimbeysati kadhidi ixida shuchay godaa xaphuwa minthiya, ubbaafe aadhiya shuchu gidis.”
1PE 2:8 Qassika, “Ha shuchay ase dhubiya shuchinne ase kundisiya zaalla” yaagees. Enti hessas qaadetida gisho Xoossaa qaala kiitetonna ixidi dhubetidosona.
1PE 2:9 Shin Xoossay dhumape malaalsiya ba poo7uwako hintena xeegiday, hinte iya lo77otetha haratas odanaw dooretida koche, kawo kahine, geeshsha derenne Xoossaa dumma dere.
1PE 2:10 Hinte kase Xoossaa dere gideketa, shin ha77i hinte iya dere. Hinte kase maarotethi demmibeketa, shin ha77i maarotethi demmideta.
1PE 2:11 Ta ishato, hinte ha sa7an imathenne bete asi gididaysada hinte shempuwa oliya asho amope haakana mela taani hintena woossayis.
1PE 2:12 Ammanonna asay hintena iita oothiya asada zigirya wode Xoossay nuna be7anaw yaa gallas, enti hinte lo77o oosuwa be7idi Xoossaa galatana mela hintew lo77o de7oy de7o.
1PE 2:13 Godaa gisho gidi maatara de7iya asatas haaretite; ubbaafe bolla gidiya gisho kawuwasika haaretite.
1PE 2:14 Enti iita ootheyisata seeranawunne lo77o ootheyisata sabbanaw kawuwape kiitetida gisho deriya ayseysatas haaretite.
1PE 2:15 Hinte, hinte lo77o oosuwan eronna eeya asaa doona oythanaysi Xoossaa shene.
1PE 2:16 Xoossaa aylle gididi la77atethan de7itepe attishin, hinte la77atetha iita oosos kama oothopite.
1PE 2:17 Asa ubbaa bonchite; ammaniya asaa siiqite; Xoossaa yayyite; kawo bonchite.
1PE 2:18 Aylleto lo77o godatasinne keeha godata xalaalas gidonashin, iitataska bonchon haaretite.
1PE 2:19 Asi Xoossaa gisho gidi bessonna waaye waayetiko Xoossay iya anjana.
1PE 2:20 Shin hinte nagara oothin hintena dechiya wode hinte danda7iko hintew ay galati de7ii? Shin lo77oba oothidi waaye danda7iko Xoossay hintena hessas anjana.
1PE 2:21 Xoossay hintena xeegiday hessa gishosa; Kiristoosi hintew waayetis; hinte iya kaallana mela, hintew leemiso gidis.
1PE 2:22 I nagara oothibeenna; iya doonan wordoy bentibeenna.
1PE 2:23 Enti iya cayiya wode, zaaridi cayibeenna. Shin waaye ekishe xillo pirdiya Xoossaas ba pirda aggaagisipe attishin, mandibeenna.
1PE 2:24 Nuuni nagaras hayqidi xillotethas daana mela Kiristoosi ba ashuwan nu nagaraa masqaliya bolla tookis; hinte iya madunthan paxideta.
1PE 2:25 Kase hinte oge balidi dhayida dorsata mela, shin ha77i hinte shempuwa heemmeysakonne naageysako simmideta.
1PE 3:1 Hessadaka, macheto, hinte azinatape Xoossaa qaalas kiitetonaysati de7ikoka aykoka odetonashin, hinte yashshatethaanne hinte geeshsha de7uwa be7idi ammanana mela entaw haaretite.
1PE 3:3 Hinte, hinte huuphe pixoninne worqa alleeqon woyko lo77o ma7on hinte bolla asatethaa loyson gidopo.
1PE 3:4 Shin hinte wozanaa giddon de7iya yegelsatethay Xoossaa sinthan hintew daro al7o gididi dhayonna, ashkenne wopu gida ayyaana gido.
1PE 3:5 Xoossay immana gidaysa ammanida geeshsha maccasati beni wode banta azinatas haaretidi, bantana hessada daro loythidosona.
1PE 3:6 Hessada Saara Abrahaame, “Ta godaw” yaagada xeegashe, iyaw kiitetasu; hinteka aykoka yayyonna lo77oba oothiko I nayta.
1PE 3:7 Azinatoo, hinte macheti hintefe daaburancho medheta gideysa eridi, entana bonchite; hinte woosa dhubonna mela Xoossay immida de7uwa enti hintera issife laattiya gisho enta bonchite.
1PE 3:8 Wursethan, ubbay issi qofan de7ite. Issoy issuwas qadhetishe, ishada siiqetite; qassi issoy issuwas keehatanne ashketa gidite.
1PE 3:9 Iita gisho iita woyko cashsha gisho cayidi zaaropite; hessa aggidi, Xoossay hintew anjuwa immanaw hintena xeegida gisho anjite.
1PE 3:10 Ayis giiko, Geeshsha Maxaafay, “De7o doseynne lo77o wode be7anaw koyey oona gidikoka ba inxarsan iitabaanne wordo odeteysa aggo.
1PE 3:11 Iitabaa ootheysa aggidi lo77oba ootho; sarotethaaka keehi koyonne kaallo.
1PE 3:12 Godaa ayfey xillotako xeellees; qassi I ubba wode enta woosa hayzees. Shin Goday iitabaa ootheyisata ba hanqo som7uwan xeellees” yaagees.
1PE 3:13 Hinte lo77oba oothanaw amotiko hintena qohanay oonee?
1PE 3:14 Hari attoshin, xillotetha gisho hinte waayetiko anjetidaysata. Asas yayyofitenne hirgofite.
1PE 3:15 Kiristoosa hinte wozanan bonchitenne godayite. Xoossay hintew immida ufaysas gaaso oychiya oodeska zaaro immanaw ubba wode giigidi uttite, shin hessa ashketethaninne yashshan oothite.
1PE 3:16 Qassi Kiristoosan hinte de7iya lo77o de7uwa iitabaa oothidabaada, hintena cayiya asay zigiryaban yeellatana mela hinte kahay geeshshi gido.
1PE 3:17 Xoossay gidaba gidiko iitabaa oothida gisho waaye ekeysafe lo77oba oothida gisho waaye ekeysi lo77o.
1PE 3:18 Kiristoosi nuna Xoossaako shiishanaw baw xillo gididi de7ishe, nagaranchota gisho issi toho nagara ubbaas hayqis; I ba asatethan hayqis, shin ayyaanan paxis.
1PE 3:19 Qassi he ayyaanan I bidi qashon de7iya shempotas qaala odis.
1PE 3:20 Nohey markabiya keexiya wode he shempoti Xoossaas kiitetonna ixidosona, shin Xoossay entana danda7i gam7is. Hospun asa xalaali markabiyan gelidi, dhayo haathaafe attidosona.
1PE 3:21 He dhayo haathay ha77i hintena ashshiya xinqate leemiso gidis. Ha xinqatey bolla qita meecco gidonashin, lo77o kaha Xoossaafe ekanaw iya woossiya oge gididi, Kiristoosa denduwa baggara hintena ashshees.
1PE 3:22 I salo bidi Xoossaa ushachan uttidi, kiitanchota, maata aawatanne wolqaamata haarees.
1PE 4:1 Hessa gisho, Kiristoosi ba ashuwan nuus waayetida gisho hinteka he qofan hintena dancisidi minnidi eqite. Kiristoosa gisho gidi ba ashuwan waaye ekida uray nagara oothike gidi qanxida asi.
1PE 4:2 He uray ba attida laythan Xoossaa shene oothanaw koyeesipe attishin, iita asho amon deenna.
1PE 4:3 Kase hinte ammanonna asay de7idaysada de7ideta. Hinte iita amon, laymatethan, mathon, tunatethi denthethiya yethan, pokiya eeqa goyinnon kase de7ida duussay gidana.
1PE 4:4 Ammanonna asaara hinte shori bayna oosuwa oothonna gisho malaaletidi hintena cayoosona.
1PE 4:5 Shin enti paxata bollanne hayqida asaa bolla pirdanaw de7iya Xoossaas zaaro immana.
1PE 4:6 Hayqida asaas Wongelay sabbaketiday haysa gishosa. Enti asatho banta ashuwan pirdetana qassi banta ayyaanan Xoossaatho de7on daana.
1PE 4:7 Hiza, ubbabaas wursethay matatis. Hessa gisho, woossanaw danda7etana mela wopu gida wozani de7o; maarara de7ite.
1PE 4:8 Siiqoy daro nagara kammiya gisho, ubbaafe aathidi issoy issuwara wozanape siiqetite.
1PE 4:9 Zuuzumonna issoy issuwa imathatethan mokite.
1PE 4:10 Hinte Xoossaafe dumma dumma aadho keehatetha imota ekidaysada hinte issoy issoy he imuwa bessiyada oykidi issoy issuwa haggaazite.
1PE 4:11 Yesuus Kiristoosa baggara ubbaban Xoossay galatetana mela oonika odiyaba gidiko Xoossaafe qaala ekidaada odo. Qassi oonika maaddiyaba gidiko Xoossay iyaw immiya wolqaada maaddo. Bonchoynne wolqi merinaape merina gakanaw iyaw gido. Amin7i.
1PE 4:12 Ta ishato, hinte tamada xuuggiya waaye paaciya giddora aadhiya wode oorathabay hanidaada malaaletofite.
1PE 4:13 Shin iya bonchoy qonciya wode hinte ufaysay gita gidana mela Kiristoosa waayiya hinte ekeysan ufaytite.
1PE 4:14 Kiristoosa sunthaa gisho asi hintena cayiya wode, Xoossaa boncho Ayyaanay hinte bolla shempiya gisho hinte anjetidaysata.
1PE 4:15 Hintefe waaye ekiya oonika shempo wodhidaada woyko kaysotidaada woyko iita oothidaada woyko gelsonnaban gelidaada hanidi waayetofo.
1PE 4:16 Gidoshin, kiristaane gidiya gisho waayetiko Kiristoosa sunthaa gisho Xoossaa galatope attishin, yeellatopo.
1PE 4:17 Pirdi Xoossaa asaa bolla doomiya wodey gakis. Hiza, he pirday koyro nu bolla doomiyaba gidiko, Xoossaa Wongelas Kiitetonna asaa wursethay ay gidanee?
1PE 4:18 Xilloy un7an attiyaba gidiko, makallanchoynne nagaranchoy yaatin waananee?
1PE 4:19 Hessa gisho, Xoossa sheneda waaye ekeysati banta shempuwa bantana medhida, ammanthiya Xoossas hadara immishe lo77oba ootho.
1PE 5:1 Hiza, woosa keethaa cimatara cima gididaysi, Kiristoosa waayiya markateysinne qoncanaw de7iya bonchuwa shaaketanaw de7iya taani, hinte giddon de7iya cimata zorayis.
1PE 5:2 Hinte aawatethafe garsan de7iya Xoossaa wudiya heemmite. Xoossay koyeysada dosanaape attishin, un7etidi heemmofite. Qassi miishe koshshan gidonashin, haggaazanaw de7iya lo77o qofan heemmite.
1PE 5:3 Hinte aawatethafe garsan de7iya wudiyas leemiso giditepe attishin, godatopite.
1PE 5:4 Heemmeyisata halaqay qonciya wode qolettonna boncho kallacha hinte ekana.
1PE 5:5 Hessadaka, yalagato, cimatas haaretite. Hinte issoy issuwas ashke gidite. Geeshsha Maxaafan, “Xoossay otoranchota ixees, shin ashketas aadho keehatetha immees” yaagees.
1PE 5:6 Xoossay ba wode hintena bonchana mela wolqaama Xoossaa kushiyape garsan hintena kawushite.
1PE 5:7 I hintew qopiya gisho hintena hirgisiya ubbaa iya bolla yeggite.
1PE 5:8 Hinte morkey Xalahey, mittiyaba koyidi, gaammoda gudishe hinte matara yuuyiya gisho hintena haaritenne barkite.
1PE 5:9 Alamen de7iya hinte ishati hessada waaye ekeysa eridi, ammanon minnidi, Xalahiyara eqetite.
1PE 5:10 Ba merinaa bonchuwas Kiristoos Yesuusa baggara hintena xeegida aadho keehatetha ubbaa Xoossay, guutha wodes hinte waayetidaape guye, I ba huuphen hintena shiishana, katisana, minthidi essana, xaalisana.
1PE 5:11 Merinaape merinaa gakanaw Xoossay kawoto. Amin7i.
1PE 5:12 Ammanetida ishaa gada ta ekiya Sillaase baggara ha dabdaabiya hintew qanthan xaafas. Ta hessa hintew xaafiday, hintena zoranawunne Xoossaa aadho keehatethay tuma gideysa markatanaasa. He aadho keehatethan minnidi eqite.
1PE 5:13 Hintera issife dooretida Babiloonen de7iya woosa keetha asaynne ta na7aa Marqoosi hintena, “Saro saro” yaagees.
1PE 5:14 Siiqo yeeretetha yeeretishe, issoy issuwa sarothite. Kiristoosan de7iya hinte ubbaas saroy gido. Amin7i.
2PE 1:1 Yesuus Kiristoosa hawaareynne iya aylley, taani, Simooni Phexroosi, nu Xoossaanne nuna ashshiya Yesuus Kiristoosa xillotethaa baggara nuysa mela al7o ammano ekidaysatas ha dabdaabiya xaafas.
2PE 1:2 Xoossaanne nu Godaa Yesuusa eron aadho keehatethaynne saroy hintew kumo.
2PE 1:3 Ba bonchoninne lo77otethan nuna xeegida iya eron de7osinne Xoossaa daanidi daanaw koshshiyaba ubbaa Xoossay ba wolqan nuus immis.
2PE 1:4 Hinte iita amo gaason medhetiya ha alamiyan de7iya dhayope kessi ekanaadanne Xoossaa xoossatethan shaaketanaada, ha imotata baggara daro al7onne gita ufaysaa nuus immis.
2PE 1:5 Hessa gisho, minnidi, hinte ammanuwa bolla lo77otethi, lo77otetha bolla eratethi,
2PE 1:6 eratetha bolla bana haaro, bana haaro bolla genca, genca bolla Xoossaa daano,
2PE 1:7 Xoossaa daano bolla ishatetha keehatethi, ishatetha keehatetha bolla siiqo gujite.
2PE 1:8 Haysati hintew daridi de7iyaba gidiko, Godaa Yesuus Kiristoosa eron maaddiya asinne ayfera de7iya asi oothana.
2PE 1:9 Shin hessati bayna oonika matan de7iyaba xalaala be7iya qooqe. I ba kase nagaraape geeyidaysa dogis.
2PE 1:10 Hessa gisho, ta ishato, hinte xeessanne hinte dooruwa minthanaw kaseysafe aathidi minnite. Hinte hessata oothiyaba gidiko, dhubeteketa.
2PE 1:11 Hessan nu Godaanne nuna ashshiya Yesuus Kiristoosa merinaa kawotethaa geliya kumetha maatay hintew imetana.
2PE 1:12 Hessa gisho, hinte haysata eriyabaanne he oykida tuman minnidi de7iyaba gidikoka, taani haysata ubba wode hintena hassayiso aggike.
2PE 1:13 Taani shempora de7ida wode ubban hintena hassayisanaysi koshshiyaba gada qopayis.
2PE 1:14 Nu Godaa Yesuus Kiristoosi taw qoncisadaysada taani ha hayqiya asatethaa gam7onna qaara yeggada baanaysa erayis.
2PE 1:15 Taani hintefe shaaketikoka hinte haysata ubba wode akeekana mela taw danda7etiyaba ubbaa oothana.
2PE 1:16 Nuuni Godaa Kiristoosa wolqaanne iya yuussaba hintew odey, iya gita bonchuwa be7idipe attishin, medhi kessida hayse gidenna.
2PE 1:17 Daro wolqaama bonchuwafe, “Taani ufaytiya, ta dosiya na7ay haysa” giya qaalay yida wode, Xoossaa Aawape bonchonne galata ekis.
2PE 1:18 Nuuni geeshsha zumaa bolla iyara de7iya wode he qaalay salope yishin si7ida.
2PE 1:19 Nuus hessafe aadhiya ammanetida tinbite qaali de7ees. Sa7i wontana gakanawunne bakali hinte wozanan dolana gakanaw, dhuman poo7iya poo7o asi naageysada, hinte he qaala naagiko lo77o ootheeta.
2PE 1:20 Ubbaafe kasetidi haysa erite. Geeshsha Maxaafan xaafetida tinbite qaala oonika ba dosidaada birshanaw danda7enna.
2PE 1:21 Tinbite ubbaa, Xoossay kiitida asati Geeshsha Ayyaanay kaalethin, odidosonape attishin, asa shenen odibookona.
2PE 2:1 Shin wordo nabeti kase asaa giddon de7eysa mela ha77ika wordo astamaareti hinte giddon dendana. Enti bantana wozida, Godaa kaddidi, dhaysiya wordo timirtiya ehana. Hessan enti banta bolla ellesidi dhayo ehoosona.
2PE 2:2 Daro asay yeellayiya enta iita ogiya kaallana; enta gaason tuma ogey cayetana.
2PE 2:3 Wordo astamaareti miishe yaaridi bantaw medhi kessida haysen hintena bonqana. Benipe doomidi enta pirday giigidi uttis; enta dhayoyka entana naagidi uttis.
2PE 2:4 Nagara oothida kiitanchotas Xoossay qadhetonna, pirda gallas gakanaw gaanname dhuma ollan enta qachi yeggis.
2PE 2:5 Hessadaka, Xoossay xillotethabaa odiya Nohenne hara laapun asata ashshidi, Xoossaa goyinnona asay de7iya beni alamiya qadhetonna dhayo haathan dhaysis.
2PE 2:6 Geellatas leemiso gidana mela Xoossay Soodomenne Gamoora katamata bido oothidi xuuggidi dhaysis.
2PE 2:7 Higges kiitetonna laymatiya asata giddon waayetishe de7ida xillo Looxe Xoossay ashshis.
2PE 2:8 He xillo addey enta giddon de7ishe, enti oothiya iita oosuwa gallas gallas be7ida wodenne si7ida wode iya lo77o wozanay un7etees.
2PE 2:9 Hessa gidiko, Goday, bana goyinniya asata paacepe waati ashshaneko, qassi nagaranchota pirda gallasaas gakanaw waatidi seerishe naagisaneeko erees.
2PE 2:10 Ubbaafe aathidi tuna amon asho qofa kaalleysatanne maata aawata kadheyisata, pirda gallas gakanaw Goday naagisis. He asati ganje minonne otorancho gidiya gisho, salo medhetethata cayishe yayyokonna.
2PE 2:11 Shin kiitanchoti wordo astamaaretape wolqaninne minotethan daro aadhosonashin Godaa sinthan salo medhetethata cayokona.
2PE 2:12 Shin he asati banta eronnaban gelidi cayoosona. Enti oyketanawunne hayqanaw yeletida, wozani bayna do7a mela hanoosona; entika wora do7ada coo dhayana.
2PE 2:13 Enti gathida metuwada zaari metootana. Seeta gallas yexishe gupeysa ufaysiyabaa gidi qopoosona. Enti kawushatanne tunata gidi de7ishe hintera shaaketiya siiqo imatuwan ufaytoosona.
2PE 2:14 Laymatiya maccasi xeellidi aggonna ayfey entaw de7ees; qassi nagara ootheysa aggokona. Ammanon minniboonna asaa cimmoosona. Entaw ubba wode amotiya wozani de7ees; enti baadetidaysata.
2PE 2:15 Enti suure oge aggidi, makalla miishe siiqidi balida, Bi7oora na7aa Balaama ogiya kaallidosona.
2PE 2:16 I ba nagara gaason hanqetis; dooni bayna harey asada haasayidi nabiya gooshshatethaa teqis.
2PE 2:17 He asati melida pultota melanne carkoy tookidi efiya shaara mela; enta naagey sakana dhumaa.
2PE 2:18 Enti hadanne otoro oda odetishe balan de7iya asaa giddofe kessi ekidi buroo minniboonna asata laymatetha asho amon cimmidi balethoosona.
2PE 2:19 Enti bantaw dhayo aylletethan de7ishe haratako, “Hinte aylletethafe keyana” yaagosona. Ayis giiko, asi ba xoonetidaba ubbaas aylle.
2PE 2:20 Enti ashshiya nu Godaa Yesuus Kiristoosa eridi ha alamiya tunatethaafe kessi ekidaape guye, zaari qaxetidi xoonetiko kase de7iya de7uwape guyeysi entaw iita gidana.
2PE 2:21 Enti xillotetha ogiya eri simmidi aggeysafe koyrottidi geeshsha kiitta eronnaako entaw lo77oshin.
2PE 2:22 “Kani ba cooshshaako guye simmees” qassi, “Meecetida gudunthoy guye simmidi urqan gondoretees” giya leemisoy tuma gideysi enta bolla oothees.
2PE 3:1 Ta siiqo ishato, haysi ta hintew xaafida dabdaabey nam7antho. Taani ha nam7u dabdaabetaka hintew xaafiday, hinte suure qofaa qopanaada hintena denthethanaasa.
2PE 3:2 Qassi geeshsha nabeti beni odida qaalanne nuna ashshiya Goday, hawaareta baggara kiitida kiitta hinte hassayana mela koyayis.
2PE 3:3 Ubbaafe kasetidi, wode wursethan banta amuwa kaallidi ase toocheysati, toochishe yaanaysa erite.
2PE 3:4 Enti, “Ta yaana gidaysi awun de7ii? Nu aawati hayqidosona, shin ubbabay sa7i medhetoosape doomidi de7eysada de7ees” yaagosona.
2PE 3:5 Daro wodepe kase saloy Xoossaa qaalan medhetidaysa; qassi sa7i haathafenne haathan medhetidaysa erishe kaddoosona.
2PE 3:6 He wode de7iya sa7ay haathan mitetidi dhayis.
2PE 3:7 Shin ha77i de7iya saloynne sa7i, geellati pirdetiya gallasaynne dhayiya gallasay gakanaw he qaalan tamas naagetidi de7oosona.
2PE 3:8 Shin ta siiqo ishato, ha issiba dogopite. Godaa matan issi gallasi mukulu laytha mela gideysanne mukulu laythi issi gallasa mela gideysa dogopite.
2PE 3:9 Issoti issoti gam7is gidi qopeysada, Goday ba ufaysa qaala gisho gam7enna. Shin oonika dhayonna mela koyidi, ubbay banta nagaraape simmana mela hinte gisho gidi gencees.
2PE 3:10 Shin Godaa gallasay kaysoda yaana. He gallasan saloti wolqaama guunthan dhayana; salo medhetethati taman xuugetana; sa7inne iya bolla de7iya ubbay dhayana.
2PE 3:11 Hiza, ubbabay hessada hanida dhayiyaba gidiko hinte ay mela asi gidanaw bessii? Hinte geeshshinne Xoossaa daaniya de7o daanaw bessees.
2PE 3:12 Hinte sinthara yaa Xoossaa gallasaa naagishe hintew danda7etiyaba ubbaa oothidi he gallasaa eesoyite. He gallas salotinne iyan de7iyabay taman xuugetana; wolqaama suulan til7ana.
2PE 3:13 Shin nuuni xillotethi haariya ooratha salonne ooratha sa7a Xoossaa ufaysa qaalada naagoos.
2PE 3:14 Hessa gisho, ta siiqo ishato, nu he gallasaa naagiya gisho pokoynne borey baynayisata gididi, Godaara saron daanaw minnite.
2PE 3:15 Asi ubbay attana mela koyidi Goday danda7eysa dogopite. Qassi nu siiqo ishay, Phawuloosi, Xoossay iyaw immida cincatethan hessada hintew xaafis.
2PE 3:16 I ba dabdaabeta ubban hessataba xaafis. Iya dabdaabeta giddon akeekanaw waaysiya qofati de7oosona. Tamaariboonnanne minniboonna asati hara Xoossaa qaala mirqeysada ha kiitataka dhayanaw machidi mirqoosona.
2PE 3:17 Hessa gisho, ta siiqo ishato, hinte hessa eriya gisho makallata balan cimetidi, dhayonna melanne minnidi de7iya bessaafe kundonna mela naagetite.
2PE 3:18 Shin hinte nuna ashshiya nu Godaa, Yesuus Kiristoosa aadho keehatethaaninne eratethan diccite. Iyaw ha77ika merinawuka bonchoy gido. Amin7i.
1JO 1:1 Nuuni koyrope doomidi de7iya, nu haythan si7ida, nu xeellida, ayfen be7ida, nu kushen bochida de7o qaalaba hintew xaafoos.
1JO 1:2 He de7oy qoncin, nuuni iya be7idi, iyabaa markatoos. Aawa matan de7iya nuus qoncida, merinaa de7uwabaa hintew awaajos.
1JO 1:3 Nuura hintew issifetethi daana mela nuuni be7idaysanne si7idaysa hintew odoos. Hintew nuura issifetethi de7iya gisho, Aawaranne iya Na7aa Yesuus Kiristoosara issifetethi de7ees.
1JO 1:4 Nu ufaysay polo gidana mela hessa hintew xaafoos.
1JO 1:5 Nuuni de7o gidida iyape si7idi, hintew odiya kiitay haysa: “Xoossay poo7o; iyan dhumi baawa” yaageysa.
1JO 1:6 Nuus iyara issifetethi de7ees yaagishe dhuman de7iko, nu odaaninne nu oosuwan wordotoos.
1JO 1:7 Shin poo7on I de7eysada, nuka poo7on de7iko, nuus woli giddon issifetethi de7ees. Iya Na7aa, Yesuusa suuthay nagara ubbaafe nuna geeshshees.
1JO 1:8 Nuuni, nunan nagari baawa giiko nu nuna cimmoos; nunan tumi baawa.
1JO 1:9 Shin Xoossaas nu nagara paaxiko, I nu nagara atto gaanawunne nu qoho ooso ubbaafe nuna geeshshanaw, ammanetidaysanne tumaa.
1JO 1:10 Nuuni nagara oothibooko giiko Xoossaa wordancho kessoos; iya qaalayka nunan deenna.
1JO 2:1 Ta nayto, nagara hinte oothonna mela taani haysa hintew xaafayis. Shin oonika nagara oothiko Aawa matan nuus gaannatiya Xilloy, Yesuus Kiristoosi, de7ees.
1JO 2:2 Nu nagaray Kiristoosa baggara atto geetetees. I nu nagaraa xalaalas gidonashin, asa ubbaa nagaraas yashetis.
1JO 2:3 Nuuni Xoossaa kiitaa naagiko, sidhey baynashin, tuma nu iya eroos.
1JO 2:4 Oonika, “Taani iya erayis” yaagishe, iya kiitaa naagonna ixiko he uray wordancho; tumatethi iyan baawa.
1JO 2:5 Shin iya qaalas nu kiitetiyaba gidiko he uray Xoossaa siiqiya siiqoy polo gidees. Nuuni Xoossan de7eysas hessi baw tuma marka.
1JO 2:6 Taani, “Xoossan de7ayis” giya oonika Kiristoosi de7idaysada daanaw bessees.
1JO 2:7 Ta siiqo ishato, taani hintew koyrope de7iya gal7a kiitaa xaafaysipe attishin, ooratha kiita xaafike. Ika hinte si7ida he gal7a kiitaa.
1JO 2:8 Gidikoka, Kiristoosaninne hintenan tuma gididi de7iya, ooratha kiitaa xaafayis. Dhumay kichin, ha77i tuma poo7oy poo7ees.
1JO 2:9 “Poo7on de7ayis” gishe ba ishaa ixiya oonika, ha77ika dhuman de7ees.
1JO 2:10 Ba ishaa dosiya oonika poo7on de7ees. He uran hara asi dhubiyabay baawa.
1JO 2:11 Shin ba ishaa ixiya oonika dhuman de7ees; dhuman hemetees. Dhumay iya ayfiya qooqisida gisho aw biyako erenna.
1JO 2:12 Ta nayto, Kiristoosa sunthaa baggara hinte nagaray atto geetetida gisho taani hintew xaafayis.
1JO 2:13 Aawato, koyrope de7iya, iya hinte erida gisho hintew xaafayis. Yalagato, Xalahiya hinte xoonida gisho hintew xaafayis.
1JO 2:14 Guutha nayto, Xoossaa hinte erida gisho hintew xaafayis. Aawato, koyrope de7iya iya hinte erida gisho hintew xaafayis. Yalagato, hinte mino gidiya gisho, Xoossaa qaalay hintenan de7iya gishonne Xalahiya hinte xoonida gisho hintew xaafayis.
1JO 2:15 Alame woyko alamen de7iyaba dosopite. Alamiya dosiya oonika Xoossaa dosenna.
1JO 2:16 Alamen de7iya ubbabay, asho amotethi, ayfen be7idi amotiyabaynne miishen ceeqetethi alamebape attishin, Xoossafe gidenna.
1JO 2:17 Alameynne alamen asi amotiya ubbay aadhana, shin Xoossaa sheniya poliya oonika merinaw daana.
1JO 2:18 Ta nayto, wodiya wursethay matatis. Kiristoosa morkey sinthafe yaanaysa hinte si7idaysada hari attoshin, ha77ika iya morketi daroti dendidosona. Hessa gisho, wodiya wursethay matatidaysa nuuni hessan eroos.
1JO 2:19 He morketi nu bagga gidonna gisho nu giddofe keyidosona. Enti nu bagga gidiyako nu giddon de7ana, shin entafe oonika nu bagga gidonnaysi eretana mela nu giddofe keyidosona.
1JO 2:20 Shin Kiristoosi hinte bolla Geeshsha Ayyaana gussis; qassi hinte ubbay tumaa ereeta.
1JO 2:21 Tumaa hinte eriya gishonne tuman ayba wordoy baynaysa hinte eriya gisho, taani hintew xaafaysipe attishin, tumaa hinte eronna gisho gidenna.
1JO 2:22 Yesuusi, Xoossay dooridaysa gidenna gidi kaddiya asape hari wordanchoy oonee? Hessa mela asi Kiristoosa morke. I na7aa kaddiko Aawaka kaddees.
1JO 2:23 Na7aa kaddiya oodeska Aaway baawa; qassi Na7aas markatiya oodeska Aaway de7ees.
1JO 2:24 Hessa gisho, koyro hinte si7ida qaala hinte wozanan minthidi naagite. Koyro si7idaysa hinte naagiko hintew Na7aranne Aawara issifetethi daana.
1JO 2:25 Na7ay nuus merinaa de7uwa immana gidi qaala gelis.
1JO 2:26 Hintena balethiya asaa gisho taani haysa hintew xaafas.
1JO 2:27 Shin Kiristoosi hinte bolla ba Geeshsha Ayyaana gussis. Geeshsha Ayyaanay hintenan de7iya gisho oonika hintena tamaarso koshshenna. Iya Geeshsha Ayyaanay hintena tumaa tamaarsesipe attishin, wordo gidenna. Geeshsha Ayyaanay hintena tamaarsidaysada Kiristoosan de7ite.
1JO 2:28 Hiza, ta nayto, I qonciya wode nuuni yashshi baynanne iya yuussaa gallas iya sinthan nu yeellan qosetonna mela iyan de7ite.
1JO 2:29 Kiristoosi xillo gideysa hinte eriko xillo oothiya ubbay Xoossaa na7a gideysa erite.
1JO 3:1 Nuuni Xoossaa nayta geetetidi xeegetana mela Xoossay nuna ay mela dosidaako be7ite. Nuuni tumaka Xoossaa nayta. Ha alamey Xoossaa eronna gisho nunaka erenna.
1JO 3:2 Ta siiqo ishato, ha77i nuuni Xoossaa nayta; nuuni ay hananeeko buroo eretibeenna. Shin Kiristoosi qonciya wode nuuni iya daananaysa eroos. I tuma de7eysa nuuni be7ana.
1JO 3:3 Kiristoosa be7ana gidi ufaysan naagiya oonika, Kiristoosi geeshshi gididaysada bana geeshshees.
1JO 3:4 Nagari higge mentho gidiya gisho nagara oothiya ubbay Xoossaa higge menthees.
1JO 3:5 Kiristoosi asaa nagara dhaysanaw qoncidaysa hinte ereeta; iyan nagari baawa.
1JO 3:6 Kiristoosan de7iya oonika nagaran deenna. Qassi nagaran de7iya oonika iya be7ibeenna woyko eribeenna.
1JO 3:7 Ta nayto, hintena oonika balethofo. Kiristoosi xillo gididaysada xillo oothiya oonika xillo.
1JO 3:8 Xalahey koyrope nagara oothida gisho nagara ubba wode oothiya oonika Xalahe dabbo. Hessa gisho, Xoossaa Na7ay Xalahe ooso dhaysanaw qoncis.
1JO 3:9 Xoossaa na7a gidiya oonika Xoossaa Ayyaanay iyan de7iya gisho, I ubba wode nagaran deenna. Xoossay iya Aawa gidiya gisho nagaran deenna.
1JO 3:10 Xoossaa nayta giddoninne Xalahe nayta giddon de7iya dummatethay hessan eretees; xillo oothonna asi woyko ba ishaa dosonna asi Xoossaa Na7a gidenna.
1JO 3:11 Koyrope hinte si7ida kiitay, “Issoy issuwa dosanaw bessees” giya kiitaa.
1JO 3:12 Nuuni Qaayela mela gidanaw bessenna. Qaayela Xalahe dabbo gididi ba ishaa wodhis. I ba ishaa ayis wodhidee? Iya oosoy iita gidida gishonne iya ishaa oosoy lo77o gidida gisho wodhis.
1JO 3:13 Ta ishato, ha alamiya asay hintena ixiko malaaletofite.
1JO 3:14 Nuuni nu ishata siiqiya gisho, hayqope de7o pinnidaysa eroos. Ba ishaa dosonna oonika hayqo kuyan de7ees.
1JO 3:15 Ba ishaa ixiya oonika shempo wodhees. Qassi shempo wodhiya oodeska merinaa de7oy baynaysa hinte ereeta.
1JO 3:16 Kiristoosi ba shempuwa nu gisho aathidi immidaysan siiqoy aybeko nuuni erida. Nuka nu ishata gisho nu shempuwa aathidi immanaw bessees.
1JO 3:17 Shin dure gidida oonika metootanchuwa be7ishe, iyaw qadhetonna ixiko ba wozanan Xoossaa siiqoy de7ees gaanaw waanidi danda7ii?
1JO 3:18 Ta nayto, nuuni oosoninne tumatethan nu siiquwa qoncisanaw besseesipe attishin, coo oda xalaalan woyko doona xalaalan siiqetanaw bessenna.
1JO 3:19 Nuuni issoy issuwa siiqiko, nu tumaa bagga gideysa eroos; hessas Xoossaa sinthan yeellatoko.
1JO 3:20 Nu wozanay nu bolla pirdiyaba gidiko, Xoossay nu wozanaape gita gideysa eroos; I ubbaba erees.
1JO 3:21 Ta siiqo ishato, nu wozanay nu bolla pirdonnaba gidiko nuuni Xoossaa sinthan yayyoko.
1JO 3:22 Nuuni iya kiitaa naagiya gishonne iya ufaysiyabaa oothiya gisho woossiyaba ubbaa iyape ekoos.
1JO 3:23 Kiristoosi nuna kiittidaysada Xoossaa Na7aa Yesuus Kiristoosa sunthan ammananadanne issoy issuwa siiqanaada Xoossay nuna kiittis.
1JO 3:24 Xoossaa kiitaa naagiya oonika Xoossan de7ees; Xoossayka iyan de7ees. Xoossay nuus immida Geeshsha Ayyaana baggara I nunan de7eysa eroos.
1JO 4:1 Ta siiqo ishato, ayyaanata ubbaa ammanopite, shin enti Xoossafe yidaako paacidi be7ite. Ayis giiko, daro wordo nabeti alamen dendidosona.
1JO 4:2 Xoossaa Ayyaana gideysa hinte haysan erana; “Yesuus Kiristoosi ase gididi yidaysa markatayis” giya ayyaana ubbay Xoossafe yees.
1JO 4:3 Kiristoosi ase gididi yidaysa ammanayis goonna ayyaana ubbay Xoossaafe gidenna. Hessi Kiristoosa ixiya ayyaana. Hinte he ayyaanay yaanaysa kase si7ideta; I hari attoshin ha77ika alamen de7ees.
1JO 4:4 Ta nayto, hinte Xoossasa. Hinte giddon de7iya Geeshsha Ayyaanay alamen de7iya ayyaanape daro wolqaama gidiya gisho wordancho nabeta hinte xoonideta.
1JO 4:5 Enti ha alamiya ase gidiya gisho, ha alamiyaba odoosona; ha alamiya asay enta odaa si7oosona.
1JO 4:6 Nuuni Xoossaafe yeletida; Xoossaa eriya oonika nuna si7ees. Xoossaa eronna oonika nuna si7enna. Nuuni tuma ayyaananne wordo ayyaana hessan shaakos.
1JO 4:7 Ta siiqo ishato, siiqoy Xoossafe yaa gisho, ane issoy issuwara siiqetoos. Siiqiya oonika Xoossaa na7a; I Xoossaa erees.
1JO 4:8 Xoossay siiqo gidiya gisho siiqonna oonika Xoossaa erenna.
1JO 4:9 Nuuni Kiristoosa baggara de7uwa demmana mela Xoossay ba issi Na7aa ha alamiya kiittis. Xoossay nuna ba siiquwa hessan bessis.
1JO 4:10 Tuma siiqo guussay haysa: nuuni Xoossaa siiqida gisho gidonashin, Xoossay nuna siiqida gishonne nu nagaraape nuna maaranaw ba Na7aa kiitida gishosa.
1JO 4:11 Ta siiqo ishato, Xoossay nuna haysada siiqiko, nuka issoy issuwa siiqanaw bessees.
1JO 4:12 Xoossaa be7iday oonika baawa. Nuuni issoy issuwa siiqiko Xoossay nunan de7ees; iya siiqoyka nunan polo gidees.
1JO 4:13 Xoossay ba Geeshsha Ayyaana nuus immida gisho, nuuni Xoossan de7eysanne ika nunan de7eysa eroos.
1JO 4:14 Aaway ba Na7aa, ha alamiya ashsheysa gidana mela kiittidaysa nuuni be7idi markatoos.
1JO 4:15 Yesuusi Xoossaa Na7aa gideysa markatiya oodenka Xoossay de7ees; ika Xoossan de7ees.
1JO 4:16 Xoossay nuna siiqeysa nuuni eroosinne ammanoos. Xoossay siiqo. Siiqon de7iya oonika Xoossan de7ees; Xoossayka iyan de7ees.
1JO 4:17 Nu de7oy ha alamiyan Kiristoosi de7idaysa mela gidiya gisho, pirda gallas yayyonna iya sinthe shiiqanaw iya siiqoy nunan polo gidees.
1JO 4:18 Siiqon yashshi baawa, tuma siiqoy yashshi kessi holees. Yashshinne pirdi issife biya gisho, yayiya uraa siiqoy polo gidenna.
1JO 4:19 Xoossay koyro nuna siiqida gisho nu siiqoos.
1JO 4:20 Oonika, “Xoossaa siiqayis” gishe ba ishaa ixiko, I wordancho. Ayis giiko, be7iya ba ishaa siiqonna oonika be7iboona Xoossaa siiqanaw waanidi danda7ii?
1JO 4:21 Kiristoosi nuus immida kiitay haysa; “Xoossaa siiqiya oonika ba ishaa siiqanaw bessees” yaageysa.
1JO 5:1 Yesuusa, I Kiristoosa yaagidi, ammaniya oonika Xoossaa na7a. Aawa siiqiya oonika iya Na7aaka siiqees.
1JO 5:2 Nuuni Xoossaa siiqiya gishonne iya kiitaa naagiya gisho Xoossaa nayta siiqeysa eroos.
1JO 5:3 Nuuni Xoossaa siiqiko, iya kiitata naagoos. Iya kiitati deexo gidokona.
1JO 5:4 Ayis giiko, Xoossaa na7a gidiya oonika ha alamiya xoonanaw danda7ees. Nuuni ha alamiya xoonanay nu ammanuwana.
1JO 5:5 Alamiya xoonanaw danda7ey oonee? Yesuusi Xoossaa Na7aa gideysa ammaniya asa xalaali xoonana.
1JO 5:6 Yesuus Kiristoosi haatha xinqatiyaranne ba hayquwan gusida suuthara yis. I, haatharanne suuthara yisipe attishin, haatha xalaalara yibeenna. Geeshsha Ayyaanay tuma gidiya gisho, hessi tuma gideysa markatees.
1JO 5:7 Heedzu markati de7oosona.
1JO 5:8 Hessati, Geeshsha Ayyaana, haathaanne suuthaa. Ha heedzata markatethay issino.
1JO 5:9 Nu asay markateysa ammanoos. Shin Xoossaa markatethay asaysafe daro aadhees. Xoossay ba Na7aas markatida markatethay haysa.
1JO 5:10 Xoossaa Na7aa ammaniya uraa wozanan ha markatethay de7ees. Xoossaa ammanonna oonika Xoossay ba Na7aas markatida markatethaa ammanibona gisho, Xoossaa wordancho oothees.
1JO 5:11 Hiza, markatethay haysa; Xoossay nuus merinaa de7o immis; he de7oyka iya Na7an de7ees yaageysa.
1JO 5:12 Xoossaa Na7ay de7iya oodeska de7oy de7ees. Xoossaa Na7ay bayna oodeska de7oy baawa.
1JO 5:13 Xoossaa Na7an ammaniya hintew merinaa de7oy de7eysa hinte erana mela haysa hintew xaafas.
1JO 5:14 Xoossaa sheniyada aybibaaka iya woossiko, I si7eysa nuuni eriya gisho iyan ammanetoos.
1JO 5:15 Nuuni woossiya ubbaa I si7eysa eriko, nuuni woossiyaba I immanaysa eroos.
1JO 5:16 Oonika ba ishay hayqo bessonna nagara oothishin be7iko, Xoossaa iyaw woossanaw bessees. Hayqo bessonna nagara oothidaysatas Xoossay de7o immana. Hayqo bessiya nagari de7ees. Taani hintena hessas Xoossaa woossite giike.
1JO 5:17 Iita ooso ubbay nagara, shin hayqo bessonna nagari de7ees.
1JO 5:18 Xoossaa Na7ay iya naagiya gisho, Xoossaa na7a gidida oonika nagaran ubba wode de7onnaysa nuuni eroos. Xalahey iya qohanaw danda7enna.
1JO 5:19 Nuuni Xoossasa gideysanne ha kumetha alamey Xalahen haareteysa eroos.
1JO 5:20 Nuuni tuma Xoossaa eranaada Xoossaa Na7ay yidaysanne nuus akeeka immidaysa eroos. Nuuni iya na7a, Yesuus Kiristoosa baggara tuma Xoossan de7oos. Yesuusi tuma Xoossaanne merinaa de7uwa.
1JO 5:21 Ta nayto, eeqatape hinte haakite.
2JO 1:1 Ta cimay dooretida godatesinne I naytas kiitida kiita. Ta xalaala gidonashin, tumaa eriya ubbay hintena dosoosona.
2JO 1:2 Ha tumay nunan de7iya gishonne merinaw nuura daana gisho taani hintena tuma dosayis.
2JO 1:3 Xoossaa nu Aawanne iya Na7aa Yesuus Kiristoosa aadho keehatethay, maarotethaynne sarotethay tumanine siiqon issife nuura gido.
2JO 1:4 Aaway nuna kiittidaysada, ne naytape baggati, tumaas kiiteteysa be7ada taani daro ufaytas.
2JO 1:5 Godate, ha77ika nuuni ubbay issoy issuwa siiqana mela taani nena woossayis. Ha kiitay koyrope nuura de7iya kiitaape attishin, taani new ooratha kiita xaafike.
2JO 1:6 Tuma siiqoy nuuni Xoossaa kiitaa naagidi daanaysa. Qassi koyrope hinte si7idaysada iya kiitay, hinte ubbay siiqon daana melasa.
2JO 1:7 Yesuus Kiristoosi ase gididi yidaysa ammanonna, daro balethiya asati, alamen dendidosona. Hessa mela asi oonika baletheysanne Kiristoosa morke.
2JO 1:8 Hinte oothida kumetha woytuwa ekanaw minnite. Hinte oothidaysi dhayonna mela naagetite.
2JO 1:9 Kiristoosa timirtiyan doonnaysasinne iyape haakiya uraas Xoossay baawa. Kiristoosa timirtiyan de7iya uraas Aawaynne Na7ay de7oosona.
2JO 1:10 Oonika hinteko yishe ha timirtiya ehonna ixiko, hinte soo gelsofite; saroka goopite.
2JO 1:11 Iya saro giya oonika iya iita oosuwan iyara shaaketees.
2JO 1:12 Taani hintew xaafanaw koyida darobay de7ees, shin worqateninne qalamen xaafanaw koyke. Nu ufaysay poletana mela hintera som7on gahetada odetanaw hinteko baana gada qopayis.
2JO 1:13 Xoossay doorida ne miche nayti nena saro yaagosona.
3JO 1:1 Taani cimay, tumaa dosiya Gaayoosas kiitida kiita.
3JO 1:2 Ta siiquwaw, neeni ne shempuwan lo77o de7eysa ta ereysada new payyatethi daana melanne ne oothiyabay suurana mela new Xoossaa woossayis.
3JO 1:3 Guutha ammaniya asati yidi, ubba wode neeni tuman de7eysanne ne tumatethaba markatida wode taani daro ufaytas.
3JO 1:4 Ta nayti tumatethan de7eysa si7eysafe aadhidi, tana ufaysiyabay baawa.
3JO 1:5 Ta siiquwaw, enti new imathe gidikoka, neeni ammaniya asatas ammanthiya ooso oothaasa.
3JO 1:6 Enti ne siiquwaba woosa keethan markatoosona. Ha77ika enti biya ogiyan Xoossay doseysada oothada enta maaddiko lo77o oothaasa.
3JO 1:7 Enti Kiristoosa sunthaa gisho keyishe, ammanonna asatape aykoka ekibookona.
3JO 1:8 Nuuni tuma oosuwa entara issife oothanaw haysa mela asata maaddanaw bessees.
3JO 1:9 Taani woosa keethatas dabdaabe xaafas, shin enta halaqaa gidanaw koyiya Diyotrafisi nuuni geysa ekenna.
3JO 1:10 Hessa gisho, taani yaa biya wode I nu bolla odetiya iita odanne I oothida oosuwa odana. I hessi guuxis gidi, nu ishati yaa wode mokenna. Hari attoshin, enta mokanaw koyeysataka diggidi woosa keethafe kessees.
3JO 1:11 Ta siiquwaw, lo77oba daanape attishin, iitabaa daanopa. Lo77oba oothiya oonika Xoossaa asi, shin iitabaa oothiya oonika Xoossaa be7ibeenna.
3JO 1:12 Dimexroosi lo77o asi gideysa asa ubbay markatees. Tumay ba huuphen iyabaa markatees; nuka iyabaa markatoos; nu markatethay tuma gideysa hinte ereeta.
3JO 1:13 Taani new xaafanaw koyida darobay de7ees, shin qalameninne worqaten xaafanaw koyke.
3JO 1:14 Shin taani matara neera gahetanaw qopayis; he wode nuuni odetana.
3JO 1:15 Saroy new gido. Ne dabboti nena saro yaagosona. Nu dabbota ubbaa enta sunthaa sunthaa xeegada tana “Saro gis” yaaga.
JUD 1:1 Taani Yihudi, Yesuus Kiristoosa aylley, Yayqooba ishay, Xoossay xeegidaysatas, Xoossa Aaway doseysatasinne Yesuus Kiristoosan naagetidaysatas ha dabdaabiya xaafayis.
JUD 1:2 Maarotethi, sarotethinne siiqoy hintew kumo.
JUD 1:3 Ta siiqo ishato, nuuni issife shaaketiya atotethaaba hintew xaafanaw taani daro amottas. Shin ammaniya asaas issitohonne wursethi gakanaw imetida ammanuwas oletana mela hintena zorashe xaafanaysi taw koshshiyaba gidis.
JUD 1:4 Enta pirday benipe xaafetidi uttida, issi issi asati oonika eronna hinte giddo gelidosona. Enti Xoossaa eronnayisata, nu Xoossaa aadho keehatetha laymatanaw go7etiya oge oothidi ekoosona. Ba xalaala kawo gidida, nu Godaa Yesuus Kiristoosa kaddoosona.
JUD 1:5 Shin hinte ha ubbaa eriyaba gidikoka, Goday Isra7eele asaa Gibxe biittafe waati kessidaako, qassi guyepe ammanonayisata dhaysidaysa ta hintena akeekisanaw koyayis.
JUD 1:6 Banta de7iyasuwa aggidi, bantaw imetida maata naagiboonna kiitanchota, gita pirda gallasay gakanaw Xoossay enta dhumape garsan merinaa santhalaatan qachi wothis.
JUD 1:7 Hessada, Soodomenne Gamoora asaynne enta matan de7iya katamatan de7iya asay laymatidosona; laymatethara gahetiya tunatethi oothidosona. Enti merinaa taman pirdetanaysatas leemiso gididosona.
JUD 1:8 Hessadaka, ha amuhanchoti banta asatethaa tunisoosona; maata aawata kadhoosona; salo medhetethata cayoosona.
JUD 1:9 Shin kiitanchota halaqay Mika7eeli Muse ahaas Xalahera palamida wode, “Goday nena seero” yaagisipe attishin, iya bolla cashsha qaala odidi mootanaw koybeenna.
JUD 1:10 Shin ha asati bantaw eronnabaa ubbaa cayoosona; qassi enti wozani bayna meheda medhon eriya eray, I entana dhaysana.
JUD 1:11 Entana ayye! Enti Qaayela ogiyan bidosona. Miishe koyidi Balaama balan kundidosona. Qore geetetiya addey Xoossaa bolla dendidaysada enti Xoossaa bolla dendidi dhayidosona.
JUD 1:12 Ha asati, hinte siiqo gibira miya bessan hintera uttiya wode yeelli bayna kawushata. Enti bantana xalaala heemmeyisata. Enti carkoy efiya iri bayna shaara mela. Qassi ayfe woden ayfe ayfonna, xaphora shodetidi, nam7u toho melida mitha mela.
JUD 1:13 Enti hanqetida abba zuliya mela banta pokuwa goponteyisata. Enti merinaw sakana dhumay naagiya toylatiya xoolintota.
JUD 1:14 Addaamepe doomidi, laapuntha yeleta gidida Heenokey, ha asataba tinbite odishe, “Heko, Goday, ba daro mukulu geeshshatara yaana.
JUD 1:15 Asa ubbaa pirdana; geellata ubbaa enti oothida iita ooso ubbaa gishonne makallatethan enti Xoossaa bolla odetida iita odaa ubbaa gisho pirdana” yaagis.
JUD 1:16 He asati ubba wode zuuzumeysatanne oda koyeyisata. Qassi banta iita amuwa kaalloosona; bantanan ceeqosonanne bantana go77iyabaa demmanaw harata sabboosona.
JUD 1:17 Shin ta ishato, nu Godaa Yesuus Kiristoosa hawaareti kase hintew odida qaala akeekite.
JUD 1:18 Enti, “Wursetha wodiyan, banta amuwa kaallidi toocheysati yaana” yaagidosona.
JUD 1:19 He asati asaa giddon shaahetethi medheyisata, banta asho amuwas haareteysatanne Geeshsha Ayyaanay baynayisata.
JUD 1:20 Shin ta ishato, geeshshi gidida hinte ammanuwan hintena dichanaw minnite; qassi Geeshsha Ayyaana wolqan woossite.
JUD 1:21 Hintena merinaa de7uwako gathiya nu Godaa Yesuus Kiristoosa maarotethaa naagishe hintena Xoossaa siiquwan naagite.
JUD 1:22 Sidhey de7iya asaas qadhetite.
JUD 1:23 Issi issi asata tamape kessi ekite. Qassi iita amon tunida enta ma7uwa ixishe haratas yashshan qadhetite.
JUD 1:24 Hinte kundonna mela naaganaw borey baynaysatanne gita ufaysan kumidaysata oothidi ba bonchuwa sinthan hintena shiishanaw danda7iya,
JUD 1:25 nuna ashshiya issi Xoossaas, nu Godaa Yesuus Kiristoosa baggara bonchoy, gitatethi, wolqinne maati, kaseka, ha77ika, merinawuka iyaw gido. Amin7i.
REV 1:1 Eeson hananaw de7iyaba ba aylleta bessaana mela Xoossay iyaw immida Yesuus Kiristoosa qoncethay haysa. Yesuusi ba kiitanchuwa kiittidi, ba aylliya Yohaanisas qoncisis.
REV 1:2 Yohaanisi Xoossaa kiitaa, Yesuus Kiristoosi oothidabaanne odidaba ubbaa markatis.
REV 1:3 Ha ubbay hananaw wodey matida gisho, ha tinbite qaala nabbabiya oonika anjetidaysa; qassi ha qaala si7eysatinne xaafetida kiitaa naagiya ubbay anjetidaysata.
REV 1:4 Ha dabdaabey, Yohaanisape, Iise biittan de7iya laapun woosa keethatas xaafetis. Kaseka, ha77ika de7iya, sinthafeka yaanaw de7iya Xoossaafe, qassi iya araata sinthan de7iya laapun ayyaanatape, hessadaka, hayqope dendon koyro gididaysafe, sa7aa kawota haariya ammanetiya marka gidida Yesuus Kiristoosape, aadho keehatethaynne sarotethay hintew gido. Yesuusi nuna siiqees, qassi ba suuthan nagara aylletethaafe nuna la77a kessis.
REV 1:6 Nuuni Xoossaa iya Aawas oothana mela nuna kawotethaa kahine oothis. Iyaw merinaape merinaa gakanaw bonchoynne wolqay gido. Amin7i.
REV 1:7 Heko, Yesuusi shaarara yees. Asa ubbay hari attoshin, iya caddida asayka iya be7ana. Sa7an de7iya asa ubbay iya gisho yeekana. Hessi tuma hanana! Amin7i.
REV 1:8 “Kaseka, ha77ika de7eysi, sinthafeka yaana Goday, Ubbaafe Wolqaama Xoossay, Alfanne Omegi tana” yaagees Godaa Xoossay.
REV 1:9 Taani, Yohaanisi, hinte ishay, hintera issife Yesuusan waayiya, iya kawotethaanne iya danda7aa be7as. Taani Xoossaa qaala gishonne Yesuusaba markatida gisho, yuushoy abban teqetida biittan, Paximon de7ayis.
REV 1:10 Godaa gallasan ta Geeshsha Ayyaanan haaretada de7ayis; taape guyera moyze puno mela gita girsi si7as.
REV 1:11 He girsay tana, “Ne be7eysa maxaafan xaafada, Iisen de7iya laapun woosa keethatas, Efesoona, Samirneesa, Phargamoona, Tiyatiroona, Sardeesa, Filadelfiyanne Loodoqe yedda” yaagis.
REV 1:12 Taani taw odiya girsaa be7anaw guye simmada xompe wothiya laapun worqa kocata be7as.
REV 1:13 He kocata giddon asa na7a daaneysa be7as. I adussa afila ba tohuwa gathi ma7is, worqa dancon ba tiraa dancis.
REV 1:14 Iya huupheynne iya binaanay bootha dorsa ikise mela woyko shacha mela boothi; iya ayfey tama laco daanees.
REV 1:15 Iya tohoy taman seeridi zo77ida naase birata daanees; iya girsayka gita shaafa kooshincha mela.
REV 1:16 I ba ushacha kushen laapun xoolintota oykis. Iya doonape nam7u baggara qaratida mashshay keyees. Iya som7oy seeta gallasa awa ayfe daanees.
REV 1:17 Taani iya be7ida wode hayqida asada hanada iya tohuwa matan kundas. I ba ushacha kushiya ta bolla wothidi, “Yayyofa; Koyroynne Wursethay tana.
REV 1:18 Taani de7on de7ayis; taani hayqas, shin Heko meri merinawuka de7on de7ayis. Hayqonne Si7oole qulpey ta kushena.
REV 1:19 Hiza, ha77i haniyabanne sinthafe hananaba ne be7idaba xaafa.
REV 1:20 Neeni ta ushacha kushen be7ida laapun xoolintotanne laapun worqa kocata birshethay haysa: Laapun xoolintoti laapun woosa keethata kiitanchota; laapun worqa kocati laapun woosa keethata.”
REV 2:1 “Efesoona woosa keetha kiitanchuwas haysada yaagada xaafa. Ba ushacha kushen laapun xoolintota oykidaysinne laapun worqa kocata giddora hemeteysi haysada yaagees:
REV 2:2 Taani ne oosuwa, ne daaburanne ne gencaa erayis. Neeni iita asataba gencanaw danda7aboonaysa erayis. Qassi hawaare gidonashin bantana, hawaare geyisata pilga erada enti wordancho gideysa demmidaysa ta erayis.
REV 2:3 Neeni gencadasa; ta sunthaa gisho meto danda7adasa; xoonetabaaka.
REV 2:4 Gidoshin, ha77i ta nena boriyabay de7ees; hessika neeni, ne koyro siiquwa aggadasa.
REV 2:5 Hiza, ne ay mela dhoqa bessaafe kundidaako akeeka! Ne nagaraape simma; neeni kase oothiya oosuwa ootha. Neeni ne nagaraape simmonna ixiko, ne xompe wothiya kocaa iya bessaafe ekana.
REV 2:6 Ha77i ta nena nashshiya issibay de7ees; ta ixiya Niqolaweeta oosuwa neka ixadasa.
REV 2:7 Geeshsha Ayyaanay woosa keethatas giyaba si7anaw haythi de7iya oonika si7o. Xooniya oonika Xoossaa gannatiyan de7iya de7o mithee ayfepe maana mela maata immana.”
REV 2:8 Samirneesa woosa keethaa kiitanchuwas haysada yaagada xaafa. “Koyroynne wursethay, hayqidaysinne hayqope dendidaysi haysada yaagees:
REV 2:9 Taani ne waayanne ne manqotetha erayis; gidoshin neeni dure. Ayhude gidonashin bantana Ayhude geysati cayiya cashshaa ta erayis, shin enti Xalahe maabaran de7oosona.
REV 2:10 Neeni ekanaw de7iya waayiya babofa. Xalahey hintefe issota issota paacanaw qasho keethan yeggana; tammu gallas gakanaw hinte waayetana. Hayqana gakanaw ammanetidaysa gida; ta new de7o kallacha immana.”
REV 2:11 “Geeshsha Ayyaanay woosa keethatas giyaba si7anaw haythi de7iya oonika si7o. Xooniya oonika nam7antho hayquwan qohetenna.”
REV 2:12 “Phargamoona woosa keethaa kiitanchuwas haysada yaagada xaafa. Nam7u baggara qaratida mashshay de7eysi haysada yaagees:
REV 2:13 Taani ne de7iya bessaa erayis; neeni Xalahe araatay de7iya bessan de7aasa; ta sunthaa mintha naagadasa. Hari attoshin, Xalahey de7iya hinte kataman hayqida ta ammanetida markay, Antiphaasi, de7iya wodeka ammanuwa aggabaaka.
REV 2:14 Gidoshin, ta nena boriya guuthabati de7oosona. Hessika Isra7eele asay eeqas yarshetida kathaa midi tunana melanne laymatetha nagara oothana mela Balaaqa tamaarsida Balaama timirtiya ekida issi issi asati neera de7oosona.
REV 2:15 Hessadaka, Niqolaweeta timirtiya tamaariya asati neera de7oosona.
REV 2:16 Hessa gisho, neeni ne nagaraape simma. Hessi hanonna ixiko, ta neeko ellesa yada he asata ta doonape keyiya mashshan olana.”
REV 2:17 Geeshsha Ayyaanay woosa keethatas giyaba si7anaw haythi de7iya oonika si7o. Xooniya oodeska qosetidi de7iya mannafe immana. Qassi ekiya uraape attishin, hara asi eronna ooratha sunthay xaafetida bootha shuchu taani iyaw immana.
REV 2:18 “Tiyatiroona woosa keethaa kiitanchuwas haysada yaagada xaafa. Tama laco daaniya ayfey de7eysi, qassi taman seerida naase birata daaniya tohoy de7eysi, Xoossaa na7ay, haysada yaagees:
REV 2:19 Taani ne oosuwa, ne siiquwa, ne ammanuwa, ne oosuwanne ne gencaa erayis. Neeni koyro ootheysafe ha77i aathada ootheysaka erayis.
REV 2:20 Gidoshin, ta nena boriya issibay de7ees; bana nabe giya maccasiw, Elzabeelo, aykoka gabaaka. He maccasiya eeqas yarshetida kathaa midi tunanaadanne laymatanaada oothada ta aylleta balethasu.
REV 2:21 Iya ba nagaraape simmana mela ta iw wode immas, shin iya simmanaw koyabuku.
REV 2:22 Enti I bala ogiyape simmonna ixiko, ta iyo iita hargen yeggana; iira laymateysatika iita waaye waayetana.
REV 2:23 Taani I nayta wodhana; qassi woosa keetha ubbay ta asa qofanne asa wozana ereysa gideysa erana. Ta issuwas issuwas hinte oosuwada oosuwada immana.”
REV 2:24 Shin Tiyatiroonan de7iya harata, he iita timirtiya ekiboonaysatanne, “Xalahe gita xuura” geetetiya ha timirtiya tamaariboonna hintena hara deexo tooho toossike.
REV 2:25 Gidoshin, ta yaana gakanaw hintew de7iyaba minthi naagite.
REV 2:26 Xooneysasinne wursethi gakanaw taw kiitetiya oodeska kawotethata haarana mela maata immana.
REV 2:27 “I enta birata xam7an haarana; meqa miishedaka mentherethana.” He maatay taani ta aawape ekida maata mela.
REV 2:28 Qassi ta iyaw bakala xoolinto immana.
REV 2:29 Geeshsha Ayyaanay woosa keethatas giyaba si7iya haythi de7iya oonika si7o.
REV 3:1 “Sardeesa woosa keetha kiitanchuwas haysada yaagada xaafa. Laapun Xoossaa ayyaanatanne laapun xoolintota oykidaysi haysada yaagees: Taani ne oosuwa erayis; asi nena paxa de7ees giikoka, ne hayqadasa.
REV 3:2 Barka; attida guuthabanne hayqanaw matidaba mintha. Ne oosoy Xoossaa sinthan polo gidonnaysa demmas.
REV 3:3 Hiza, ne ekidabaanne si7idaba akeeka; naaga; ne nagaraape simma. Neeni barkonna ixiko ta kaysoda yaana; ta ay wode yaaneko ne eraka.
REV 3:4 Shin banta ma7uwa qitayonna guutha asati Sardeesan de7oosona. Entaw bessiyaba gidiya gisho bootha ma7o ma7idi enti taara hemetana.
REV 3:5 Xooniya oonika entaysada bootha ma7o ma7ana. Taani iya sunthaa de7o maxaafape quchike. Taani ta Aawa sinthaninne iya kiitanchota sinthan I tabaa gideysa markatana.
REV 3:6 Geeshsha Ayyaanay woosa keethatas giyaba si7iya haythi de7iya oonika si7o.
REV 3:7 “Filaadelfiya woosa keetha kiitanchuwas haysada yaagada xaafa. Geeshshaynne tumanchoy, Dawita qulpiya ba kushen oykidaysi, haysada yaagees: I gordin oonika dooyanaw danda7enna; qassi I dooyin oonika gordanaw danda7enna.
REV 3:8 Taani ne oosuwa eras; Heko ta ne sinthan oonika gordanaw danda7onna dooya penge wothas. Ne wolqay guutha gidikoka, ta qaala naagadasa; tana kaddabaaka.
REV 3:9 Ayhude gidonashin, bantana Ayhude giya wordotanne Xalahe baggata neeko ehananne ne sinthan gulbatisana. Ta nena doseysa entana erisana.
REV 3:10 Neeni, ‘Genca’ gada ta kiitida kiitaa naagida gisho, kumetha alamiya paacanaw yaa waaye wodiyape taani nena naagana.
REV 3:11 Taani ellesada yaana; oonika ne kallachaa ekonna mela new de7iyaba minthada oyka.
REV 3:12 Xoonidaysa ta xoossa keethan tuussu oothana; I yan merinaw daana. Taani ta Xoossaa sunthaanne ta Xoossaa katamaa sunthaa iya bolla xaafana; iyaka ta Xoossaa matape wodhiya ooratha Yerusalaame. Qassi taani ta ooratha sunthaaka I bolla xaafana.
REV 3:13 Geeshsha Ayyaanay woosa keethatas giyaba si7iya haythi de7iya oonika si7o.
REV 3:14 “Loodoqe woosa keetha kiitanchuwas haysada yaagada xaafa. Amin7i gidida ammanetida tuma markay, Xoossaa medhetetha haareysi haysada yaagees:
REV 3:15 Taani ne oosuwa ubba erayis; neeni irxa woyko misha gidaka; neeni nam7aafe issuwa gidiko lo77o!
REV 3:16 Neeni irxa woyko misha gidonashin, bol7o gidiya gisho ta nena ta doonape cuttana hanayis.
REV 3:17 Hiza, neeni, ‘Taani dure, shallora de7ayis, taw aybibayka pacibeenna’ yaagasa. Shin neeni metootancho, manqo, qooqenne kallotida asi gideysa eraka.
REV 3:18 Hessa gisho, ne duretanaw taman geeyida worqaa, ne yeella kalluwa kammanaw bootha ma7onne loytha xeellanaw danda7isiya ayfe dhale taape shammana mela nena ta zorayis.
REV 3:19 Ta doseysa seeraysinne hanqayis; hiza minna; ne nagaraape simma.
REV 3:20 Heko, ta karen eqada xeegayis. Oonika ta xeessaa si7idi, wulaa dooyiko, iyako gelana; iyara issife kathi maana; ika taara issife maana.
REV 3:21 Ta xoonada ta Aawara iya araatan uttidaysada xooniday taara ta araatan uttana mela maata immana.
REV 3:22 Geeshsha Ayyaanay woosa keethatas giyaba si7iya haythi de7ey oonika si7o” yaagis.
REV 4:1 Hessafe guye, taani salo xeelliya wode dooyetida penge be7as. Qassi ta kase si7ida moyze girsaa melay taako, “Ha keya; haysafe guye, hananaw de7iyaba ta nena bessaana” yaagis.
REV 4:2 He wode ta Ayyaanan haaretada de7ayis. Heko, saluwan araata bolla issoy uttidaysa be7as.
REV 4:3 He uttidaysa malay yasphedenne sardiyoone al7o shucha mela. Iya araata yuushuwan al7o margide shuchi daaniya zuulli de7ees.
REV 4:4 He araata yuushuwan laatamanne oyddu araatati de7oosona; enta bolla bootha ma7o ma7idi, huuphen worqa kallachaa wothida laatamanne oyddu cimati uttidosona.
REV 4:5 Araatape wol7anthi, guunthinne deshoy keyees. Araata sinthan laapun poo7iya xompeti de7oosona; enti laapun Xoossaa ayyaanata.
REV 4:6 Araata sinthan birille daaniya phooliya burcuko abbay de7ees. Sintharanne guyera ayfey de7iya oyddu de7ora de7iya medhetethati araata yuushuwaninne araata giddon de7oosona.
REV 4:7 Koyro medhetetha medhoy gaammo daanees; nam7anthoy boori daanees; heedzanthoy ase daanees; qassi oyddanthoy piradhiya arganthi daanees.
REV 4:8 Oyddu medhetethata ubbaas usupun qefey de7ees; enta asatethaa ubbay ayfen kumis. Enti qammanne gallas qanxonna, “Geeshshaw, geeshshaw, geeshshaw, Godaw, Ubbaafe Wolqaama Xoossaw, Kaseka, ha77ika de7eyso, sinthafe yaanayso” yaagosona.
REV 4:9 He medhetethati araatan uttidaysasinne merinaw de7eysas saba, bonchonne galata immida wode,
REV 4:10 laatamanne oyddu cimati araatan uttidaysanne merinaw de7eysa sinthan gufannidi goyinnidosona; banta kallachaa araata sinthan wothidi,
REV 4:11 “Nu Godaw, nu Xoossaw, neeni boncho, sabanne wolqaa ekanaw bessaasa. Neeni ubbaa medhadasa; ubbabay ne sheniyada hanis, medhetis” yaagidosona.
REV 5:1 Hessafe guye, araata bolla uttidaysa ushacha kushen giddoranne karera xaafetida laapun maatamen gordetida xaatha maxaafaa be7as.
REV 5:2 Issi mino kiitanchoy ba qaala dhoqu oothidi, “Maatamiya billanawunne maxaafaa dooyanaw bessey oonee?” yaagidi awaajishin be7as.
REV 5:3 Shin salon gidin sa7an woyko sa7ape garsan gidin he xaatha maxaafaa billanawunne gidduwa be7anaw danda7ey oonika bentibeenna.
REV 5:4 Xaatha maxaafaa billanawunne iya gidduwa be7anaw bessiya asi dhayida gisho ta daro yeekas.
REV 5:5 Yaatin, cimatape issoy taako, “Yeekofa! Heko, Yihuda koche gidiya gaammoy, Dawita sheeshay, laapun maatameta billanawunne maxaafaa dooyanaw danda7is” yaagis.
REV 5:6 Hessafe guye, shuketida Dorsay araatas, oyddu de7on de7iya medhetethatasinne cimatas giddon, eqidaysa be7as. Iyaw laapun kacetinne laapun ayfeti de7oosona. Hessati sa7a ubbaa kiitetida Xoossaa laapun ayyaanata.
REV 5:7 He Dorsay bidi, araata bolla uttidaysa ushacha kushepe xaatha maxaafaa ekis.
REV 5:8 I he xaatha maxaafaa ekida wode, de7on de7iya oyddu medhetethatinne laatamanne oyddu cimati Dorsa sinthan kundidosona. Enti issoy issoy diithinne geeshshata woosa gidida ixaaney kumida worqa shaate oykidosona.
REV 5:9 Enti, “Xaatha maxaafaa ekanaw, maatameta billanaw new bessees. Ayis giiko, neeni shuketadasa; koche ubbaafe, dumma dumma doonape, yaratapenne kawotethata ubbaafe ne suuthan Xoossaas wozadasa.
REV 5:10 Enti iya Xoossaa Aawas oothana mela entana kahine kawotethi oothadasa. Entika biitta ubbaa haarana” yaagidi ooratha mazmure yexidosona.
REV 5:11 Ta be7iya wode mukulu toho mukulunne tammu mukulu toho tammu mukulu gidiya kiitanchota girsaa si7as. Entika araata, oyddu de7on de7iya medhetethatanne, cimata yuushuwan eqidosona.
REV 5:12 He kiitanchoti dhoqu gida qaalan, “Shuketida Dorsay wolqaa, duretethi, cincatethinne minotethi, boncho, sabanne galataa ekanaw bessees” yaagidosona.
REV 5:13 Hessafe guye, sa7an, salon, sa7ape garsaninne abba giddon de7iya medhetethi ubbay, “Araata bolla uttidaysasinne Dorsaas, galatay, bonchoy, sabinne wolqi, meri merinaw gido” yaagidi yexishin si7as.
REV 5:14 Oyddu de7on de7iya medhetethati, “Amin7i” yaagidosona; qassi cimati gufannidi goyinnidosona.
REV 6:1 Dorsay laapun maatametape issuwa dooyishin be7as. Qassi oyddu de7on de7iya medhetethatape issoy, dada desho daaniya girsan, “Haaya!” yaagishin si7as.
REV 6:2 Heko bootha para be7as. He para toggidaysi donge oykis; iya huuphen kallachi de7ees. Ika xoonishe xoonanaw keyis.
REV 6:3 Qassi dorsay nam7antho maatamiya dooyida wode de7on de7iya nam7antho medhetethay, “Haaya!” yaagishin si7as.
REV 6:4 Qassi hara siha zo7o pari keyis. He para toggidaysas sa7ape saro dhaysana melanne asay woli wursana mela maatinne gita mashshay imetis.
REV 6:5 Dorsay heedzantho maatamiya dooyida wode de7on de7iya heedzantho medhetethay, “Haaya!” yaagishin si7as. Heko kareetha para be7as; ika ba kushen mizaane oykis.
REV 6:6 Oyddu de7on de7iya medhetethata giddofe, “Issi gallasa oosos damooze, bagga kilo giste; qassi issi gallasa oosos damooze, issi kilonne bagga banga gido. Shin zaytiyanne woyniya qohopa” yaagishin si7as.
REV 6:7 Dorsay oyddantho maatamiya dooyida wode oyddantho de7on de7iya medhetethay, “Haaya!” yaagishin si7as.
REV 6:8 Heko wanco para be7as. He para toggidaysa sunthay hayqo; iya geedo Si7ooley kaallees. Entaw alamepe oyddantho kushiya olan, koshan, gadoninne do7an wodhisana mela maati imetis.
REV 6:9 Dorsay ichashantho maatamiya dooyida wode enti Xoossaa qaala odida gishonne banta markatethan ammanetida gisho shuketida asaa shempota yarsho bessaafe garsan be7as.
REV 6:10 Enti banta qaala dhoqu oothidi, “Ubbaa haariya Godaw, geeshshaw, tumanchuwaw, sa7an de7iya asaa bolla ne pirdanaynne nu suuthaa gisho halo keyanay awudee?” yaagidosona.
REV 6:11 Enta issuwas issuwas bootha ma7oy imetis. Entaysada hanidi hayqanaw bessiya enta laggeta tayboy kumana gakanaw guutha wode shempana mela entaw odetis.
REV 6:12 Dorsay usupuntho maatamiya dooyida wode ta be7as; wolqaama biitta qaaxoy hanis. Awa ayfey kareexidi kayo ma7o mela gidis. Ageenayka zo77idi suuthu daanis.
REV 6:13 Wolqaama carkoy carkidi balase mitha qawu7e ayfiya qoqofeysada saluwa xoolintoti sa7an qoqofetidosona.
REV 6:14 Saloy xaatha maxaafada xaaxetidi aadhis; zumaynne yuushoy abban teqetida biittati banta bessaafe dhaydosona.
REV 6:15 Biitta kawoti, deriya haareysati, olla kaaletheysati, dureti, wolqaamati, aylletinne, womaannoti gongoloninne dere bolla de7iya zaalla hom7on qosetidosona.
REV 6:16 Entika zumakonne zaallako, “Nu bolla wodhite; nuna qosite; araatan uttidaysa ayfiyapenne Dorsa hanquwafe nuna genthite.
REV 6:17 Hiza, gita hanqo gallasay gakis; danda7idi eqanay oonee?” yaagidosona.
REV 7:1 Hessafe guye, oyddu kiitanchoti oyddu sa7aa gaxan eqidaysata be7as. He kiitanchoti sa7a bolla woyko abba bolla woyko ay mitha bolla carkoy oyddu sa7aa gaxape carkonna mela teqidosona.
REV 7:2 Qassi de7o Xoossaa maatamiya oykida hara kiitanchoy doloha baggafe keyeysa be7as. He kiitanchoy ba qaala dhoqu oothidi, sa7aanne abba qohanaw wolqi imetida oyddu kiitanchota,
REV 7:3 xeegidi, “Nuuni Xoossaa aylleta som7on maatamiya wothana gakanaw biitta woyko abba woyko mithaa qohopite” yaagis.
REV 7:4 Yaatin, taani Xoossaa maatamey som7on wosetidaysata payduwa si7as. Isra7eele mayzata ubbaafe 144000 asaas som7on maatame wothis.
REV 7:5 Yihuda kochaafe tammanne nam7u mukulu, Robeela kochaafe tammanne nam7u mukulu, Gaade kochaafe tammanne nam7u mukulu,
REV 7:6 Aseera kochaafe tammanne nam7u mukulu, Niftaaleme kochaafe tammanne nam7u mukulu, Minaase kochaafe tammanne nam7u mukulu,
REV 7:7 Simoona kochaafe tammanne nam7u mukulu; Leewe kochaafe tammanne nam7u mukulu, Yisakoora kochaafe tammanne nam7u mukulu,
REV 7:8 Zabloona kochaafe tammanne nam7u mukulu, Yoosefa kochaafe tammanne nam7u mukulu, Biniyaame kochaafe tammanne nam7u mukulu, asaa som7on maatame wothis.
REV 7:9 Hessafe guye, koche ubbaafe, kawotetha ubbaafe, yara ubbaafenne dumma dumma doonape zawi bayna daro asaa be7as. He asay bootha ma7o ma7idi, zamba haythi banta kushen oykidi, araata sinthaninne Dorsa sinthan eqidosona.
REV 7:10 Enti banta qaala dhoqu oothidi, “Atotethay araatan uttida nu Xoossaafenne Dorsaafe yees” yaagidosona.
REV 7:11 Kiitanchoti ubbay araata, cimatanne oyddu medhetethata yuushuwan eqidosona. Enti araata sinthan gufannidi Xoossaa goyinnidosona.
REV 7:12 “Amin7i! Anjoy, bonchoy, cincatethi, galati, sabi wolqi, minotethi meri merinaw nu Xoossaas gido. Amin7i!” yaagidosona.
REV 7:13 Cimatape issoy taako, “Ha bootha ma7uwa ma7ida asati oonantee? Enti awupe yidona?” yaagidi oychis.
REV 7:14 Taani zaarada, “Godaw, ne eraasa” yaagas. Ika taako, “Haysati daro waaye waaydi aadhidaysata. Enti banta ma7uwa Dorsa suuthan meeccidi geeshshidosona.
REV 7:15 Hessa gisho, enti Xoossaa araata sinthan gididi qammanne gallas iya keethan oothosona; araata bolla uttidaysi entaw kuya gidana.
REV 7:16 Hizape guye, enti koshatokona, saamotokona. Awi woyko mishi enta meenna.
REV 7:17 Araata giddon uttida Dorsay enta heemmana. De7o pulto haathaako enta kaalethana. Xoossay enta ayfepe afutha ubbaa quchana” yaagis.
REV 8:1 Dorsay laapuntha maatamiya dooyida wode bagga saate gideysa mela saloy si77i gis.
REV 8:2 Hessafe guye, taani laapun moyzeti imetida laapun kiitanchota Xoossaa sinthan eqidaysata be7as.
REV 8:3 Ixaane cuyisiya worqa shaate oykida hara kiitanchoy yidi, yarsho bessa matan eqis. I araata sinthan de7iya worqa yarsho bessa bolla geeshshata ubbaa woosaara gujidi yarshana mela iyaw daro ixaaney imetis.
REV 8:4 Ixaaniya cuyay geeshshata woosaara issife kiitanchuwa kushepe pude Xoossaako keyis.
REV 8:5 Hessafe guye, kiitanchoy ixaane cuyisiya shaatiya ekidi, iyan yarsho bessaafe bonqo tama kunthidi sa7a duge holis. Yaatin deshoy, wol7anthi, girsinne biitta qaaxoy hanis.
REV 8:6 Hessafe guye, laapun kiitanchoti banta moyziya punnanaw giigetidosona.
REV 8:7 Koyro kiitanchoy ba moyziya punniya wode shachinne suuthara walaketida tami salope bukis. Sa7aape sikoy xuugetis; mithafe sikoy xuugetis; cil7o maata ubbay xuugetis.
REV 8:8 Nam7antho kiitanchoy ba moyziya punnida wode wolqaama zuma daaniyabay taman eexishe abban yegetis. Yaatin, abbaafe sikoy suuthu gidis.
REV 8:9 Abban de7on de7iya medhetethaafe sikoy hayqis; markabetape sikoy dhayis.
REV 8:10 Heedzantho kiitanchoy ba moyziya punnida wode xompeda eexiya wolqaama xoolintoy shaafape sikuwa bollanne pultota bolla salope wodhis.
REV 8:11 He xoolintuwa sunthay Camo geetetees. Haathaafe sikuwa camisis; haathay cammida gisho, daro asay he haatha uyidi hayqidosona.
REV 8:12 Oyddantho kiitanchoy ba moyziya punnis. Awape, ageenapenne xoolintotape sikuwa dechis; enta poo7uwape sikoy dhumis. Gallasaape sikoy, qammaafeka sikoy dhumis.
REV 8:13 Issi arganthi salo dhoqu gidi, piradhishin be7as. He arganthay ba qaala dhoqu oothidi, “Attida heedzu kiitanchoti banta moyziya punnanaw de7iya gisho, sa7an de7iya asaa ayye! Ayye! Ayye!” yaagishin si7as.
REV 9:1 Hessafe guye, ichashantho kiitanchoy ba moyziya punnin salope duge sa7a kundida xoolinto be7as. He xoolintuwas wolqaama ollaa qulpey imetis.
REV 9:2 Xoolintoy ollaa dooyida wode dalga coocepe keyiya cuyaa mela cuyay he ollaafe keyis. He ollaafe keyida cuyan awinne saloy dhumidosona.
REV 9:3 He cuyape booley keyidi sa7an wodhis. Sa7an de7iya kornetas de7iya wolqaa mela wolqay booletas imetis.
REV 9:4 Xoossaa maatamey som7on bayna asaa xalaalape attishin, sa7an de7iya maata woyko mithi woyko ay cil7oba gidin qohonna mela booletas odetis.
REV 9:5 Booleti asaa ichashu ageena gakanaw paxa kaa7ana mela maati imetisipe attishin, asaa wodhana mela gidenna. Korney ase dukin zaameysa mela booley dukidi zaamisees.
REV 9:6 He gallasatan asay hayqo koyana, shin demmenna. Enti hayqanaw amottana, shin hayqoy entafe haakana.
REV 9:7 Booley olas giigidi uttida para daanees. Booliya huuphen worqa kallachi de7ees; enta som7oyka asa som7o daanees.
REV 9:8 Iya binaanay maccasa binaana mela adusse. Enta achayka gaammo achi daanees.
REV 9:9 Entaw tira bolla wothiya birata xururey de7ees; enta qefiya girsay oletanaw gaallabiya paranne para gaariya girsaa mela.
REV 9:10 Entaw korne goyna daaniya goyninne dukiya yiishshi de7ees. He goynan ichashu ageena asaa qohana mela maati imetis.
REV 9:11 Entana haariya kawoy de7ees; he kawoy olla kiitanchuwa. Iya sunthay Ibraawetho doonan Abdoona; qassi Girike doonan Apholiyoona geetetees. Iya sunthaa birshethay “Dhayseysa” guussu.
REV 9:12 Koyro ayyey aadhis; Heko, buroo hara nam7u ayyeti eeson hanana.
REV 9:13 Usupuntho kiitanchoy ba moyziya punnis. Xoossaa sinthan eqida, worqa yarsho bessan de7iya oyddu kacetape issi girsi si7as.
REV 9:14 He girsay moyze oykida usupuntho kiitanchuwako, “Efraxiisa geetetiya gita shaafan qashetida oyddu kiitanchota birsha” yaagis.
REV 9:15 Biitta bolla de7iya asaape sikuwa wodhana mela he saatiyas, he gallasaas, he ageenasinne he laythas giigidi uttida oyddu kiitanchoti birshetidosona.
REV 9:16 Ola para toggiya olanchota paydoy daro xeetu miloone gideysa si7as.
REV 9:17 Qassi ta qoncethan paratanne he parata toggida asaa be7as. He asay tiran wothiya birata xururey tama bonqo mela zo7o, yaakinte mela, kareetha kaalose melanne diinne mela ciliilo. Parata huuphey gaammo huuphe mela; enta doonape tami, cuyinne diinney keyis.
REV 9:18 Parata doonape keyida taman, cuyaninne diinniyan he heedzu gadotan sa7an de7iya asaape sikoy hayqis.
REV 9:19 He parata wolqay enta doona giddoninne goynan de7ees. Enta goynayka shoosha huuphe mela; enti iyara asaa qohoosona.
REV 9:20 Ha gadotape attidaysati banta kushe oosuwape simmibokona. Enti tuna ayyaanan worqafe, birape, naase biratapenne shuchafe oosetida eeqas goyinnoosona. Xeellanaw, si7anaw, hemetanaw danda7onna eeqatas goyinneysa aggibokona.
REV 9:21 Asay wodheysa, biteysa, laymateysanne kayseysa aggidi maarota oychibookona.
REV 10:1 Hessafe guye, ta hara wolqaama kiitanchoy salope sa7a wodhishin be7as. I shaara ma7is; iya huuphiya bolla zuulli de7ees. Iya som7oy awa mela; iya tohoy tama tuussa mela.
REV 10:2 He kiitanchoy dooya de7iya issi guutha xaatha maxaafaa ba kushen oykidi, ba ushacha tohuwa abba bolla, ba haddirsa tohuwa biitta bolla essis.
REV 10:3 Gudiya gaammoda ba qaala dhoqu oothidi waassis. I waassida wode laapun dadati banta guuntha sissidosona.
REV 10:4 Laapun dadati odetida wode ta xaafanaw giigetas. Shin salope, “Laapun dadati odidaysa maatamen gordafe attishin, xaafopa” giya girsaa si7as.
REV 10:5 Yaatidi, abba bollanne biitta bolla eqida, ta be7ida kiitanchoy, ba ushacha kushiya salo pude miccis.
REV 10:6 I miccidi saloninne iya giddon de7iya ubbaa, sa7aninne iya giddon de7iya ubbaa, abbanne iya giddon de7iya ubbaa medhida, merinaw de7iya Xoossaa sunthan caaqidi, “Hizape guye, Xoossay gam7enna.
REV 10:7 Shin laapuntha kiitanchoy ba moyziya punniya wode Xoossay ba aylle gidida nabeta baggara qoncisida xuura qofay poletana” yaagis.
REV 10:8 Hessafe guye, abba bollanne biitta bolla eqidi, “Iya kushen dooyetidi de7iya xaatha maxaafaa kiitanchuwa kushepe eka” yaagidi nam7antho taw odishin si7as.
REV 10:9 Taani he kiitanchuwako bada, guutha xaatha maxaafaa imma gada oychas. I taako, “Ekada ma; I ne ulon cammana, shin ne doonan eessada mal7ana” yaagis.
REV 10:10 Taani kiitanchuwa kushepe he guutha xaatha maxaafaa ekada mas; ta doonan eessada mal7is, shin ta ulon cammis.
REV 10:11 Hessafe guye, taako, “Neeni yara ubbaas, dere ubbaas, dumma dumma doonan odeteysatasinne kawotas tinbite zaara odanaw bessees” yaagis.
REV 11:1 Hessafe guye, taw wadha xam7a immidi, “Bada xoossa keethaanne yarsho bessa wadha; yan goyinniya asataka payda.
REV 11:2 Shin Xoossa Keetha kare dabaabay Ayhude gidonna asaas imetida gisho wadhonna aggaaga. Ayhude gidonna asay geeshsha katamaa oytamanne nam7u ageena haarana.
REV 11:3 Taani kayo ma7o ma7ida ta nam7u markata kiittana; enti 1,260 gallas tinbite odana” yaagis.
REV 11:4 He nam7u markati alamiya Godaa sinthan eqiya nam7u shamaho mithatanne nam7u xompe wothiya kocata.
REV 11:5 Oonika enta qohanaw koyko enta doonape tami keyidi, enta morketa dhaysees. Enta qohanaw koyiya oonika hessada hayqana.
REV 11:6 Enti tinbite odiya wode iri bukonna mela saluwa gordanaw entaw maati de7ees. Entaw haathe suuthi kessanaw, qassi enti koyida mela biitta dumma dumma gadon dhaysanaw entaw maati de7ees.
REV 11:7 Enti banta markatethaa ongidaape guye, ollaafe keyiya do7ay entana olana. He do7ay enta xoonana; wodhana.
REV 11:8 Enta Goday masqaliya bolla kaqetida gita katamaa ogiya bolla enta ahay yegetana. He katamay leemison Soodome woyko Gibxe geetetidi xeegetees.
REV 11:9 Qassi koche ubbaafe, yara ubbaafe, dumma dumma doonapenne kawotethi ubbaafe yida asay enta aha heedzu gallasinne bagga gakanaw be7ana. Enta ahay moogetonna mela asay diggana.
REV 11:10 Ha nam7u nabeti sa7an de7iya asaa waaysida gisho asay enta hayquwan ufaytana. Banta ufaysaa bessanaw issoy issuwas imota immana.
REV 11:11 Heedzu gallasinne baggafe guye, de7o ayyaanay Xoossaa matape yidi entan gelin, enti dendi eqidosona. Enta be7ida ubbay gita yashshi yayyidosona.
REV 11:12 Hessafe guye, he nam7u nabeti, “Haa pude keyite” giya qaala salope si7idosona. Enta morketi entana be7ishin, enti shaaran gelidi pude salo bidosona.
REV 11:13 He saatiyan biittay wolqaama qaaxo qaaxin, katamaape tammantho kushey dhayis. Qassi biitta qaaxon laapun mukulu asay hayqis. Attida asay daro kokoridi babidi; salo Xoossaas boncho immidosona.
REV 11:14 Nam7antho ayyey aadhis, shin Heko heedzantho ayyey eeson yaana.
REV 11:15 Laapuntha kiitanchoy ba moyziya punnis. Salope, “Sa7aa kawotethay nu Godaasinne Kiristoosas gidis; I merinaape merinaa gakanaw haarana” giya wolqaama qaalay si7etis.
REV 11:16 Yaatin, Xoossaa sinthan, banta araatan uttida laatamanne oyddu cimati gufannidi, Xoossas goyinnidi,
REV 11:17 “Ha77ika kaseka de7eyso, Godaw, Ubbaafe Wolqaama Xoossaw, neeni gita wolqaa oykadasa. Neeni haaranaw doomida gisho, nuuni nena galatoos.
REV 11:18 Ayhude gidonna asay hanqetidosona, shin ne hanqoy yis. Hayqidaysata bolla ne pirdiya wodey gakis; neeni ne aylleta, nabetas geeshshatasinne ne sunthaas yayyeysatas, guuthatasinne gitatas, enta oosuwada immiya wodey gakis. Alamiya dhayseysata dhaysiya wodey yis” yaagidosona.
REV 11:19 Salon de7iya Xoossa Keethay dooyetis; iya giddon Xoossaa caaqo Taabotey bentis. Qassi wol7anthi wol7amis, deshoy dechis; daday dhuuqis; biitti qaaxis; shachi bukis.
REV 12:1 Hessafe guye, salon wolqaama malaati bentis. Awa ma7ada, ageena bolla eqada, tammanne nam7u xoolinto kallacha ba huuphen wothida de7iya, issi maccasiya bentasu.
REV 12:2 He maccasiya qanthe; shin iyo iqethi oykin un7etada waassasu.
REV 12:3 Qassi hara malaati salon bentis. Laapun huuphetinne tammu kaceti de7iya gita zo7o dawey bentis. I ba huupheta bolla laapun kallacha wothis.
REV 12:4 He dawey ba goynan xoolintotape sikuwa salope dafidi sa7an yeggis. He dawey na7ay yeleti wodhida mela mittanaw koyidi, yelanaw eqetiya maccase sinthan eqis.
REV 12:5 He maccasiya kawotethaa ubbaa birata xam7an haaranaw de7iya adde na7a yelasu. Na7ay Xoossaakonne iya araatako pude eketis.
REV 12:6 Maccasiya 1,260 gallas gakanaw iyo naagana mela Xoossay iw giigisi wothida bessaa mela biitta baqatasu.
REV 12:7 Salon oli medhetis. Mika7eeli ba kiitanchotara dawiyara oletis; dawey ba kiitanchotara gididi zaari oletis.
REV 12:8 Shin dawey xoonetidi salon entaw de7iya bessi dhayidosona.
REV 12:9 Gita dawey, beni shooshay, sa7an yegetis. Ika Daabuloosa woyko Xalahe geetetiya alamiya baletheysa. I ba kiitanchotara issife duge alamiya yegetis.
REV 12:10 Hessafe guye, salon haysada giya qaala si7as. “Ha77i atotethay, wolqaynne kawotethay, nu Xoossasa; maatay Kiristoosas gidis. Hiza, qammanne gallas Xoossaa sinthan, nu ishata mooteysi salope duge holetis.
REV 12:11 Enti dorsa suuthaaninne banta markatethaa qaalan, iya olidi xoonidosona. Enti banta shempuwas mishetonna bantana hayqos aathidi immidosona.
REV 12:12 Hessa gisho, saloninne iya giddon de7eysato ufaytite. Shin biittanne abba ayye! Hiza, Xalahey baw guutha wodey attidaysa erida gisho, wolqaama hanqon hinteko wodhis” yaagis.
REV 12:13 Qassi dawey bana sa7a yeggidaysa be7ida wode adde na7a yelida maccasiw goodis.
REV 12:14 Maccasiw shooshay qohonna mela heedzu laythinne bagga mashenne uyashe iya naagetiya bessi mela biitta piradhada baana mela nam7u wolqaama argantha qefey iw imetis.
REV 12:15 Yaatidi, maccasiw di7oy di77idi efana mela dawey shaafa haatha mela ba doonape maccase guyera cooyis.
REV 12:16 Shin biittay maccasiw maaddis; biittay ba doona dooyidi dawiya doonape keyida haatha mittis.
REV 12:17 He dawey maccase bolla daro hanqetidi, I kochata, Xoossaa kiitaa naageysatanne Yesuusi qoncisida tumaas ammanetidaysata olanaw bidi.
REV 12:18 Abba gaxan de7iya shafiyan eqis.
REV 13:1 Hessafe guye, issi do7ay abbaafe keyishin be7as. Iyaw tammu kaceynne laapun huuphey de7ees. He tammu kaceta bolla tammu kallachati de7oosona. He huupheta bolla Xoossaa cashsha sunthati xaafetidi uttis.
REV 13:2 Ta be7ida do7ay maahe daanees; iya tohoy babantha toho mela; iya doonayka gaammo doona daanees. Dawey ba wolqaa, ba araatanne ba gita maata he do7aas immis.
REV 13:3 He do7aa huuphiyape issuwa bolla hayqos gathiya madunthi be7as, shin he madunthay paxis. Alamiya asa ubbay malaaletidi he do7aa kaallis.
REV 13:4 Dawey ba maata do7aas immida gisho asa ubbay dawiya goyinnidosona. Qassi asay, “Do7aa meli oonee? Iyara oletanaw danda7ey oonee?” yaagidi do7aas goyinnidosona.
REV 13:5 He do7aas otortana melanne cayana mela dooni imetis; oytamanne nam7u ageena haarana mela maati iyaw imetis.
REV 13:6 He do7ay Xoossaa, iya sunthaa, I de7iya bessaanne salon de7iya ubbaa baadethi oykis.
REV 13:7 He do7ay geeshshatara oletidi, entana xoonana mela wolqi iyaw imetis. Yara ubbaa, dere ubbaa, dumma dumma doona ubbaa bollanne koche ubbaa bolla maati iyaw imetis.
REV 13:8 Alamey medhetoosape doomidi, shuketida Dorsaa de7o maxaafan enta sunthay xaafetonna ha sa7an de7iya asa ubbay he do7aas goyinnana.
REV 13:9 Si7iya haythi de7iya asi si7o.
REV 13:10 Oonika di7etanaw de7ey di7etees. Mashshan hayqanaw de7ey mashshan shuketana. Hessanka geeshshata danda7aynne ammanoy eretana.
REV 13:11 Qassika, hara do7i sa7ape keyishin be7as. Iyaw dorsa kace daaniya nam7u kacey de7ees; iya oday dawe oda mela.
REV 13:12 He do7ay koyro do7aa bessan, iya maatan oothees. Ika hayqos gathiya madunthaafe paxida koyro do7aas; biittan de7iya asa ubbay goyinnana mela oothees.
REV 13:13 He nam7antho do7ay hari attoshin, tama salope asa ubbaa sinthan wodhisana gakanaw gita malaatata oothis.
REV 13:14 Koyro do7aa bessan oothana mela, iyaw imetida malaatatan sa7an de7iya asa ubbaa I balethis. Mashshan madunxidi paxida do7aa bonchoos misile giigisana mela entana kiittis.
REV 13:15 Nam7antho do7ay koyro do7aa misiliyas shempo immidi odetana melanne iyaw goyinnonaysati hayqana mela oothiya maati imetis.
REV 13:16 He nam7antho do7ay gitinne guuthi, manqoynne durey, womaanoynne aylley ba ushacha kushen woyko ba som7on malla wothana mela oothis.
REV 13:17 He do7aa sunthay woyko iya sunthaa payduwa mallay bayna asi oonika bayzanawunne shammanaw danda7enna.
REV 13:18 Cincatethi koshshey hessana. Eratethi de7iya oonika he do7aa payduwa birshethaa ero; he paydoy asa sunthi. He paydoy usupun xeetanne usupun tammanne usupuna.
REV 14:1 Hessafe guye, Dorsay Xiyoone zuma bolla eqidaysa be7as. Iyara iya sunthaynne iya Aawa sunthay enta som7on xaafetida, 144,000 asay de7ees.
REV 14:2 Salope gita haatha guunthunne dada guunthu daaniya wolqaama girsi si7as. Qassi ta si7ida girsay diithi diixishin si7etiya girsaa mela.
REV 14:3 144,000 asay araata sinthan, oyddu de7on de7iya medhetethata sinthaninne cimata sinthan eqidi entafe hara oonika tamaaranaw danda7onna ooratha mazmure yexidosona.
REV 14:4 Haysati maccasara bantana tunisonna naagida geeshshata. Enti dorsay biya bessi ubbaa kaalloosona. Enti Xoossaasinne Dorsaas bayra gididi, shiiqanaw sa7a asaa giddofe wozetidosona.
REV 14:5 Enti wordoynne borey bayna asata.
REV 14:6 Hessafe guye, merinaa Wongela sa7a bolla de7iya kawotethaa ubbaas, koche ubbaas, yara ubbaasinne dumma dumma doona ubbaas markatanaw salora piradhiya hara kiitancho be7as.
REV 14:7 He kiitanchoy ba qaala dhoqu oothidi, “Xoossay alamiya pirdiya saatey gakida gisho Xoossaas yayyite; iya bonchite. Salo, sa7aa, abbanne pulto haatha medhida Xoossaa goyinnite” yaagis.
REV 14:8 Koyroysa kaallidi hara nam7antho kiitanchoy, “Dere ubbaa tunanne mathoyiya woyne ushshida, gita Babilooney kundasu! Kundasu!” yaagidi waassis.
REV 14:9 Heedzantho kiitanchoy enta kaallidi, ba qaala dhoqu oothidi, “Do7aanne iya misiliya goyinniya qassi iya malla ba som7on woyko ba kushen wothiya oonika de7iko,
REV 14:10 iya hanqo xuu7an kumida Xoossaa hanqo woyniya uyana. Enti geeshsha kiitanchota sinthaninne Dorsa sinthan eexiya diinne taman waayetana.
REV 14:11 Enta waayiya cuyay meri merinaw cuyishe daana. Do7aanne iya misiliya goyinney qassi he do7aa suntha mallay de7iya oonika qammanne gallas shempoy bayna kaa7etana” yaagis.
REV 14:12 Xoossaa kiitaa naageysatinne Yesuusa ammaneteysati genciya minotethay qonciya wodey hessa.
REV 14:13 Hessafe guye, “Hizape Godan hayqeysati anjetidaysata” giya qaala salope si7as. Ayyaanay, “Ee tuma, enta oosoy enta kaalliya gisho, enti banta daaburaape shempana” yaagees.
REV 14:14 Hessafe guye, bootha shaara bolla uttida Asa Na7a daaneysa be7as. I ba huuphen worqa kallacha wothis; qassi ba kushen baaca oykis.
REV 14:15 Hara kiitanchoy Xoossa keethafe keyidi, shaara bolla uttidaysako ba qaala dhoqu oothidi, “Kathaa shiisho wodey gakida gisho ne baaca yeddada kathaa caka; sa7an de7iya kathay gakis” yaagis.
REV 14:16 Yaatin shaara bolla uttidaysi ba baaca sa7a yeddidi, sa7an de7iya kathaa cakis.
REV 14:17 Qassika salon de7iya Xoossa keethafe hara kiitanchoy keyis; iyawuka oco baaci de7ees.
REV 14:18 Tama bolla maati de7iya hara kiitanchoy yarsho bessaafe keyis. I ba qaala dhoqu oothidi oco baaca oykida kiitanchuwako, “Woyne ayfey teerida gisho neeni oco baaca yeddada, sa7an de7iya woyniyape qanxa” yaagis.
REV 14:19 He kiitanchoy ba baaca yeddidi, sa7an de7iya woyniyape qanxidi, Xoossaa gita hanquwa gum7iya bessan yeggis.
REV 14:20 Enti Katamaape gaxan de7iya woyne ayfe gum7iya bessan yedhetidosona. Suuthi woyne gum7iya bessaafe keyidi issi mukulunne usupun xeetu kilo mitire mela haakidi, para puulo gakidi, dhoqu gidi eellis.
REV 15:1 Taani salon hara gitanne malaalsiya malaata be7as. Xoossaa wursetha hanquwa qoncisiya laapun boshata oykida laapun kiitanchoti de7oosona.
REV 15:2 Qassi tamara walaketida burcuko abba daaneysa be7as. He abba gaxan do7aa, iya misiliyanne iya sunthaa taybuwa xoonidaysata be7as. Xoossay entaw immida diithaa oykidi eqidosona.
REV 15:3 Enti Xoossaa aylliya Muse mazmuriyanne Dorsa mazmuriya haysada yaagidi yexoosona. “Godaw, Ubbaafe Wolqaama Xoossaw, ne oosoy gitanne malaalsiyaba. Dere ubbaa kawaw, ne ogey xillonne tuma.
REV 15:4 Geeshshi ne xalaala gidiya gisho, Godaw, new yayyonnaynne ne sunthaa bonchonay oonee? Ne xillo oosoy asa ubbaas qonce gidiya gisho, kawotethi ubbay ne sinthe yidi goyinnana” yaagidi yexoosona.
REV 15:5 Hessafe guye, salon dooyetidi de7iya Xoossa Keethaa, ika Markatetha Dunkaaniya be7as.
REV 15:6 Laapun boshata oykida laapun kiitanchoti Xoossa keethafe keyidosona. Enti geeshshinne phooliya liino ma7o ma7idosona; banta tiran worqa danco dancidosona.
REV 15:7 Oyddu medhetethatape issoy, merinaw de7iya Xoossaa hanqoy kumida laapun worqa xuu7ata laapun kiitanchotas immis.
REV 15:8 Xoossaa bonchuwafenne iya wolqaafe dendoysan Xoossa Keethay cuyan kumis. Laapun kiitanchoti oykida laapun boshati poletana gakanaw Xoossa Keetha oonika gelanaw danda7ibeenna.
REV 16:1 Hessafe guye, Xoossa keethafe laapun kiitanchotako, “Bidi Xoossaa hanquwa laapun xuu7atape sa7an gussite” yaagidi, odiya wolqaama qaala si7as.
REV 16:2 Koyro kiitanchoy bidi, ba xuu7an de7eysa sa7an gussin, do7aa mallay de7eyisata bollanne iya misiliya goyinnidaysata bolla iitanne zaamiya madunthi keyis.
REV 16:3 Nam7antho kiitanchoy ba xuu7an de7eysa abban gussin, abbay hayqida asa suuthi daanis. Qassi abban de7iya medhetetha ubbay hayqis.
REV 16:4 Heedzantho kiitanchoy ba xuu7an de7eysa shaafataninne pulto haathatan gussin, haathati suuthi gididosona.
REV 16:5 Hessafe guye, haatha bolla maati de7iya kiitanchoy haysada yaagishin si7as. “Ha77ika benika de7iya geeshshaw, haysada ne pirdida gisho neeni xillo.
REV 16:6 Enti geeshshata suuthaanne nabeta suuthaa gussida gisho, enti suuthu uyana mela oothadasa. Enti bantaw bessiyaba ekidosona” yaagis.
REV 16:7 Yarsho bessaafe, “Godaw, Ubbaafe Wolqaama Xoossaw, ne pirday tumanne xillo” giya qaala si7as.
REV 16:8 Oyddantho kiitanchoy ba xuu7an de7eysa awa bolla gussin, away ba seelan asaa xuuggana mela awas wolqi imetis.
REV 16:9 Asay wolqaama seelan xuugetidi, he boshata bolla maati de7iya Xoossaa sunthaa baaddidosona; banta nagaraape simmidi Xoossaa bonchibookona.
REV 16:10 Ichashantho kiitanchoy ba xuu7an de7eysa do7aa araata bolla gussin, he do7aa kawotethay dhumis. Asay un7aa gisho, banta inxarsaa saxoosona.
REV 16:11 Qassi asay un7aa gishonne madunthaa gisho, salo Xoossaa baaddidosona; banta oothida nagaraape simmibokona.
REV 16:12 Usupuntho kiitanchoy ba xuu7an de7eysa gita Efraxiisa shaafan gussin, doloha baggafe yaana kawotas ogey giigana mela haathay melis.
REV 16:13 Hessafe guye, shodhe daaniya heedzu tuna ayyaanati dawiya doonape, do7aa doonapenne wordo nabiya doonape keyishin be7as.
REV 16:14 Enti malaatata oothiya tuna ayyaanata. He heedzu tuna ayyaanati Ubbaafe Wolqaama Xoossaa gita gallasan hananaw de7iya olas shiishanaw alame kawota ubbaako baana.
REV 16:15 “Heko, ta kaysoda yaana! Asa sinthan kallotonaadanne yeellatonnaada barkidi, ba ma7uwa naagiya uray anjetidaysa!” yaagis.
REV 16:16 He tuna ayyaanati kawota Ibraawetho doonan Armagedoone geetetiya bessan shiishidosona.
REV 16:17 Laapuntha kiitanchoy ba xuu7an de7eysa carko bolla gussin, xoossa keethan de7iya araatape, “Poletis” giya wolqaama qaalay yis.
REV 16:18 Hessafe wol7anthi wol7amis; daday dhuuqis, biittay qaaxis. Asi sa7an medhetoosape biitti hessa mela qaaxo qaaxibeenna. Hessi ubbaafe aadhida qaaxo.
REV 16:19 Gita katamay heedza keyidi shaaketis; biitta ubban de7iya katamati dhaydosona. Xoossay gita katamaa Babiloone qopidi, ba iita hanqo woyne ushshay kumida xuu7aa iw immis.
REV 16:20 Yuushoy abban teqetida biittati dhaydosona; deretika bentibookona.
REV 16:21 Asaa bolla oytamanne ichashu kilo giraame mela deexiya wolqaama shachi salope bukis. Boshay daro iita gidiya gisho asay shacha bosha gisho Xoossaa baaddidosona.
REV 17:1 Laapun xuu7ata oykida laapun kiitanchotape issoy taako yidi, “Haaya; daro haathata bolla uttida gita laymatiya maccase bolla yaanaw de7iya pirdaa ta nena bessaana.
REV 17:2 Alamiya kawoti iira laymatidosona; alamen de7iya asayka I laymatetha woyniya uyidi mathotidosona” yaagis.
REV 17:3 He kiitanchoy tana Geeshsha Ayyaanan mela biitta efis. Yan issi maccasiya cashsha sunthay I bolla ubban xaafetidi uttida, zo7o do7aa toggidaaro be7as; he do7aas laapun huupheynne tammu kacey de7ees.
REV 17:4 He maccasiya kaalose ma7onne zo7o ma7o ma7asu; iya worqan, boncho shuchaninne inqo geetetiya al7o shuchan alleeqetasu. Iya ba kushen borsiyabaanne laymatetha tunatethan kumida worqa xuu7a oykasu.
REV 17:5 I som7on xuura ooso birshethay de7iya sunthay, “Gita Babilooney, laymatethasinne sa7an de7iya tunabaa ubbaas aayo” giya xuufey xaafetidi uttis.
REV 17:6 Qassi he maccasiya geeshshata suuthaanne Yesuusas markatishe hayqidaysata suuthaa uyada mathotidaaro ta be7ada malaaletas.
REV 17:7 Kiitanchoy taako, “Neeni ayis malaaletay? Taani new maccase xuura odaanne iya tookida laapun huupheynne tammu kacey de7iya do7aa xuura odaa odana.
REV 17:8 Neeni be7ida do7ay koyro de7ees, shin ha77i baawa. He do7ay ciimmo ollafe keyidi dhayos baana. Sa7i medhetoosape doomidi, de7o maxaafan enta sunthay xaafetiboonna sa7an de7iya asay, do7aa be7idi malaaletana. Hiza, I kase de7ees; ha77i baawa, shin sinthafe yaana.
REV 17:9 “Haysi cincatethinne akeeka koyees. Laapun huupheti maccasiya uttiya laapun dereta; hessati qassi laapun kawota.
REV 17:10 Entafe ichashu kawoti kundidosona. Issoy ha77i gakanaw haarees; hanko Kawoy yibeenna. I yidi guutha wode takanaw bessees.
REV 17:11 Sinthe de7ida do7ay, ha77i baynaysi, I ba huuphen hospuntho do7aa. I laapun do7atape issuwa; I dhayanaw bees.
REV 17:12 “Neeni be7ida tammu kaceti haaro doomiboonna tammu kawota. Shin enti do7aara issife issi saate kawotidi haaranaw entaw maati imetana.
REV 17:13 Enta ubbaas issi qofay de7ees; enti banta wolqaanne banta maata do7aas immana.
REV 17:14 Enti Dorsaara oletana, shin dorsay godata Godaanne kawota Kawo gidiya gisho, I xeegidaysati, dooridaysatinne ammanetidaysati he kawota xoonana” yaagis.
REV 17:15 Kiitanchoy qassika taako, “Laymatiyara uttida he neeni be7ida haathati yarata, kawotethata, zerethatanne dumma dumma doonan odeteyisata.
REV 17:16 Qassi neeni be7ida tammu kaceynne do7ay laymatiyaro ixana. Enti iw de7iya ubbaba ekana. Qassi iyo kallo ashshananne I ashuwa midigana; yaatidi enti iyo taman xuuggana.
REV 17:17 Hiza, Xoossaa qaalay poletana gakanaw enta qofay issino gidana mela enti banta aysiya wolqaa do7aas immanaadanne Xoossay qopidaysa enti oothanaada enta wozanan Xoossay amo wothis.
REV 17:18 He neeni be7ida maccasiya sa7a kawota haariya gita katamiw” yaagis.
REV 18:1 Yaatidi, gita maati de7iya hara kiitanchoy salope wodhishin ta be7as. He kiitanchuwa bonchoy sa7a poo7isis.
REV 18:2 He kiitanchoy ba qaala dhoqu oothidi, “Iya kundasu! Gita Babilooney kundasu! Babilooney tuna ayyaanati aqiya bessi gidasu. Dumma dumma iitabatas keethe gidasu; tuna kafotinne do7ati shempiya bessi gidasu.
REV 18:3 Asa koche ubbaa ba laymatetha woyniya ushshasu. Sa7aa kawoti iira laymatidosona. I miikotethaafe dendoysan biittan de7iya zal7anchoti duretidosona” yaagis.
REV 18:4 Hessafe guye, ta salope haysada giya hara qaala si7as. “I nagaraa iira koxonna melanne, iya ekanaw de7iya seera hinte ekonna mela, ta deriyaw iipe keyite.
REV 18:5 Hiza, I nagaray salo gakanaw dooretis. Xoossay I naaquwa akeekis.
REV 18:6 Iya immidaysa mela zaaridi iw immite. Iya oothida oosuwas nam7u kushe iw zaarite. Iya giigisida ushsha bolla hinte nam7u kushe mathoyiya ushsha I xuu7an kunthite.
REV 18:7 Iya baw bonchetidaysadanne iw injetidaysa mela, iyo metoothitenne kayoyite. Iya ba wozanan, ‘Taani kaweeda uttas; ta azini bayna maccas gidike; taani ubbaka kayotike’ yaagasu.
REV 18:8 Hessa gisho, bosha ubbay, hargey, kayoynne koshi iyo issi gallas oykana. Qassi iya taman xuugetana; ayis giiko, I bolla pirdiya Xoossay wolqaama” yaagis.
REV 18:9 “Iira laymatidaysatinne I miikotethan de7ida, alamiya kawoti he katamiya xuugetin keyiya cuyaa be7ida wode iw waassidi yeekana.
REV 18:10 Enti he katame waayiya be7idi yayyida gisho, haaki eqidi, “ ‘Ha gita katame! Wolqaama katame! Babiloone, nena ayye! Neeni issi saate giddon ne pirda ekadasa’ yaagana.
REV 18:11 “Enta markabiya caana hizape shammiya asi bayna gisho, sa7an de7iya zal7anchoti he katamaas waassananne kayotana.
REV 18:12 Enta worqa, bira, boncho shuchu, al7o shucha, kaalose ma7o, liino ma7o, haare ma7o, zo7o ma7o, dumma dumma sawo mithi, dangarsa zaale, al7o mithi, naase birata, goole shuchu,
REV 18:13 qarafa, qimame, ixaane, karbe, shitto, woyne, zayte, lo77o dhiille, giste, mehe, dorse, para, para gaare, aylletanne hara asata shammiya oonika baawa.
REV 18:14 “Zal7anchoti maccaseeko, ‘Neeni amotida lo77oba ubbay neepe dhayis. Ne aqoynne alleeqetidaba ubbay neepe haakis. Neeni zaarada enta ubbaa demmaka’ yaagidosona.
REV 18:15 He kataman zal7idi duretida zal7anchoti I metuwa babidi iipe haakidi eqana. Enti yeekananne kayotana.
REV 18:16 Qassi, “ ‘Liino, kaalose ma7onne zo7o ma7o ma7ada, worqan, boncho shuchaninne inqo geetetiya al7o shuchan alleeqetida, he gita katamees ayye!
REV 18:17 Haysa mela gita shalo ubbay issi saate giddon dhayis’ yaagidosona. “Markabiya laagiya ubbay, markabiyan biya ubbay, markabiya bolla oothiya ubbaynne abban zal7iya ubbay haaki eqidosona.
REV 18:18 He katamiya xuugetin keyiya cuyaa be7ida wode, ‘Ha gita katamiw daaniya hara katami de7ishsha?’ yaagidosona.
REV 18:19 Enti banta huuphen baana qolidi, waassidosonanne kayotidosona. “ ‘Abbaa bolla markabeti de7iya ubbay, I shaluwan duretida ubbay, he katamiya issi saaten dhayida gisho, ayye! Ayye!
REV 18:20 Saluwaw, I dhayuwan ufayta! Geeshshato, hawaareto, nabeto, Xoossay hinte gisho I bolla pirdida gisho ufaytite’ yaagidosona.”
REV 18:21 Yaatin, mino kiitanchoy woxa daaniya gita shuchu denthidi abban holishe, “Gita katamiya Babilooney wolqan holettada haysada kundana; iya hachife guye ubbaka bentuku.
REV 18:22 Diithi diixeysatinne yexeysati, suusul7enne moyze punneysati, hizape guye ne giddon ubbaka si7etokona. Ay kocha zal7e zal7iya asika ne giddon bentenna. Woxa girsi hizape guye ne giddon si7etenna.
REV 18:23 Xompe poo7oy zaaridi ne giddon poo7enna. Macho ekeysinne azina geliyari qaali hizape guye ne giddon si7etenna. Ne zal7anchoti biitta ubban eretida wolqaamata. Ne bitan kawotethata ubbaa cimmadasa” yaagis.
REV 18:24 Nabeta suuthay, geeshshata suuthaynne biitta bolla hayqida asa ubbaa suuthay I giddon bentida gisho Babilooney pirdetasu.
REV 19:1 Yaatin, salon daro asay, “Xoossay galatetto! Atotethay, bonchoynne wolqay nu Xoossaas gido.
REV 19:2 Iya pirday tumanne xillo. Sa7aa tunisida iita laymiw Xoossay pirdis. Xoossay ba aylleta suuthaa iipe achis” yaagishin si7as.
REV 19:3 He asay zaaridi banta qaala dhoqu oothidi, “Xoossa galati gako. He katamiya merinaw cuyashe daana” yaagidosona.
REV 19:4 Laatamanne oyddu cimatinne de7on de7iya oyddu medhetethati araatan uttida Xoossaas gufannidi, “Amin7i! Xoossa galati gako” yaagidi goyinnidosona.
REV 19:5 Yaatin, “Xoossa aylleti, Xoosse yayiya guuthinne giti ubbay, nu Xoossaa galatite” giya qaalay araatape keyis.
REV 19:6 Yaatin, daro asada wocamiya, wolqaama shaafada guummiya, dadada dechiya girsay, “Xoossaa galati gako; nu Goday, Ubbaafe Wolqaama Xoossay kawotis.
REV 19:7 Dorsaa yaaganoy gakida gishonne iya geliyara giigida gisho, nu ufaytoos, galatoosinne Dorsaa bonchoos.
REV 19:8 Gelos giigidaara phooliyanne geeshshi gidida liino ma7ana mela iw imetis” yaagishin ta si7as. (Liino ma7oy geeshshata xillo ooso leemiso.)
REV 19:9 Hessafe guye, kiitanchoy taako, “Dorsa yaagano xeegetidaysati anjetidaysata” gada xaafa. He kiitanchoy gujidi, “Haysi Xoossaa tuma qaala” yaagis.
REV 19:10 He wode ta iya goyinnanaw iya tohuwa bolla kundas. Shin I, “Hessa oothofa! Taani Yesuusaba markatiya ne melanne ne ishata mela. Ne Xoossaa goyinna” yaagis. Hiza, Yesuusaba markatidaysatas nabetetha ayyaani de7ees.
REV 19:11 Yaatin, saloy dooyetin, yan bootha pari de7eysa be7as. He para toggidaysi Ammanetidaysanne Tumancho geetetees. I xillotethan pirdesinne oletees.
REV 19:12 Iya ayfey tama laco daanees; iya huuphen daro kallachi de7ees. Iya bolla I attishin, hari oonika eronna xaafetida sunthi de7ees.
REV 19:13 I suuthan muuketida ma7o ma7is; iya sunthayka Xoossaa Qaala.
REV 19:14 Phooliyanne geeshshi gidida liino ma7ida salo olanchoti bootha parata toggidi iya geedo kaalloosona.
REV 19:15 Kawotethata qanxiya qara mashshay iya doonape keyees. I birata xam7an asaa haarana. Ubbaafe Wolqaama Xoossaa hanqo woyne ushsha gum7iya bessaa I yedhana.
REV 19:16 Iya ma7uwa bollanne iya wodiriya bolla, “Kawota Kawuwanne godata Godaa” giya sunthay xaafetis.
REV 19:17 Hessafe guye, issi kiitanchoy awa bolla eqidaysa be7as. He kiitanchoy salora piradhiya kafo ubbaas ba qaala dhoqu oothidi, “Haa yiite! Xoossaa gibira maanaw issi bessi shiiqite.
REV 19:18 Yidi kawota ashuwa, shaalaqata ashuwa, wotaadareta ashuwa, parata ashuwa, parata toggeyisata ashuwa, asa ubbaa ashuwa, aylleta ashuwa, womaannota ashuwa, gitatanne guuthata ashuwa miite” yaagis.
REV 19:19 Do7ay, para toggidaysaranne iya olanchotara oletanaw sa7a kawotinne enta olanchoti issi bessi shiiqidashin be7as.
REV 19:20 Shin he do7aynne iya sunthan malaatata oothida wordo nabey iyara issife oyketis. He malaatatan do7aa mallay de7eysatanne iya misiliya goyinneyisata I balethis. Do7aynne wordo nabey nam7ayka diinnen eexiya tama abban paxa yegetidosona.
REV 19:21 Attidaysati para toggidaysa doonape keyiya mashshan hayqidosona. Kafoti ubbay enta ashuwa midi kallidosona.
REV 20:1 Zawi bayna olla qulpiyanne gita santhalaata ba kushen oykida issi kiitanchoy salope wodhishin be7as.
REV 20:2 I dawiya oykidi mukulu laythas qachis. He dawey koyro shoosha, Daabuloosa woyko Xalahe.
REV 20:3 Kiitanchoy zawi bayna ollan iya yeggidi, mukulu laythi wurana gakanaw kawotethata zaari balethonna mela qulpen gordidi attamis. Hessafe guye, dawey guutha wodes biletanaw bessees.
REV 20:4 Hessafe guye, araatatanne araatata bolla uttidi pirdana mela maati imetidaysata be7as. Yesuusas markatida gishonne Xoossaa qaala odida gisho banta qoodhiya goyretida asaa shempuwa be7as. Enti do7aa woyko do7aa misiliya goyinnibookona. Enti do7aa malla banta som7on woyko banta kushen wothibookona. Enti hayqope dendidi Kiristoosara issife mukulu laythi haaridosona.
REV 20:5 Haysi koyro denduwa; attida hanko hayqidaysati mukulu laythay wurana gakanaw hayqope dendibookona.
REV 20:6 Koyro denduwas qaadi de7eysati anjetidaysatanne geeshshata. Enta bolla nam7antho hayquwas wolqi baawa. Enti Xoossaasinne Kiristoosas kahine gidana; iyara issife mukulu laythi haarana.
REV 20:7 Mukulu laythay wuridaape guye Xalahey qashope biletana.
REV 20:8 I sa7aa gaxape gaxa gakanaw de7iya kawotethata, entika, Googenne Maagoge geeteteyisata balethidi olas shiishanaw keyana. Enta paydoy abba gaxan de7iya shafe mela.
REV 20:9 Enti biitta ubban laaletidi, geeshshata heeranne Xoossay dosiya katamaa teqidosona. Shin tami salope wodhidi entana mis.
REV 20:10 Enta balethida Xalahey, do7aynne wordo nabey yegetida eexiya diinne tama abban yegetis. Enti qammanne gallas merinaw paxa kaa7etana.
REV 20:11 Hessafe guye, gita bootha araata bolla uttidaysa be7as. Sa7inne saloy iya sinthafe baqatidosona; enti zaari bentibookona.
REV 20:12 Hayqidaysati, gitatinne guuthati araata sinthan eqidaysata be7as; maxaafati dooyetidosona; qassi de7o maxaafa gidida hara maxaafi dooyetis. Hayqidaysati maxaafan xaafetida banta oosuwada pirda ekidosona.
REV 20:13 Abbay ba giddon de7iya hayqidaysata immis; hayqoynne Si7ooley banta giddon de7iya hayqidaysata immidosona. Issi issi asi ba oosuwada pirda ekis.
REV 20:14 Yaatin, hayqoynne Si7ooley tama abban yegetidosona. He tama abbay nam7antho hayqo.
REV 20:15 De7o maxaafan iya sunthay xaafetiboonna asi oonika tama abban yegetis.
REV 21:1 Taani ooratha salonne ooratha sa7a be7as. Koyro saloynne koyro sa7i dhayis; abbayka dhayis.
REV 21:2 Geeshsha katamiya, ooratha Yerusalaamey, azina gelanaw alleeqetada giigada de7iya maccasada salope Xoossaa matape duge wodhishin be7as.
REV 21:3 Araatape haysada yaagidi, odiya gita qaala si7as; “Xoossa Keethay asaara de7ees; Xoossay ba bonchuwara asaara issife daana. Enti iya dere gidana; Xoossay ba huuphen entara daana; I enta Xoossaa gidana.
REV 21:4 Xoossay enta ayfepe afutha ubbaa quchana. Hizape hayqoy woyko kayoy woyko waasoy woyko waayey deenna. Gal77ay ubbay aadhis” yaagis.
REV 21:5 Araata bolla uttidaysi, “Taani ubbaa oorathi oothana” yaagis. Qassi zaaridi taako, “Taani odeysi ammantheysanne tuma gidiya gisho xaafa” yaagis.
REV 21:6 Qassi taako, “Poletis! Taani Alfanne Omega; Doomethinne Polo. Saamotida oonaka de7o haatha pultofe gate qanxonna coo ushshana.
REV 21:7 Xooniya oonika hessa ubbaa laattana; taani iyaw Xoossaa gidana; ika ta na7a gidana.
REV 21:8 Shin yashshanchota, ammanetonayisata, tunata, shempo wodheyisata, laymateyisata, biteyisata, eeqa goyinneysatanne wordanchota qaaday diinney eexiya tama abban gidana. Hessi nam7antho hayqo” yaagis.
REV 21:9 Laapun wursetha boshati kumida laapun xuu7ata oykida laapun kiitanchotape issoy taako yidi, “Haaya, taani nena gelos giigida Dorsaa machiw bessaana” yaagis.
REV 21:10 Kiitanchoy tana zuma huuphe Geeshsha Ayyaanan kessidi, geeshsha katamay, Yerusalaamey, salope Xoossaa matape duge wodhishin bessis.
REV 21:11 He katamay Xoossaa bonchon poo7ees. He katamaa poo7oy yasphide geetetiya al7o shuchaa mela; geeshsha birilleda phoolees.
REV 21:12 He katamaa dirsay wolqaamanne adusse. Iyaw tammanne nam7u pengetinne he pengeta naagiya tammanne nam7u kiitanchoti de7oosona. Pengeta bolla tammanne nam7u Isra7eele zerethata sunthay xaafetis.
REV 21:13 Doloha baggara heedzu pengeti, pudeha baggara heedzu pengeti, dugeha baggara heedzu pengetinne wuloha baggara heedzu pengeti de7oosona.
REV 21:14 Katamaa gimbe dirsay tammanne nam7u shucha baasota bolla eqis. Enta bolla tammanne nam7u Dorsaa hawaareta sunthay xaafetis.
REV 21:15 Taw odiya kiitanchuwas, katamaa, iya pengetanne iya dirsaa wadhiya worqa xam7ay de7ees.
REV 21:16 Katamaas oyddu maazaneti de7oosona; katamaa geesaynne gompay issi gina. Kiitanchoy katamaa ba xam7an wadhin, katamay tammanne nam7u mukulu kilo mitire gidis; katamaa geesay, gompaynne dhoqatethay issi gina.
REV 21:17 Kiitanchoy qassi dirsaa wadhin, kiitanchoy go7etiya asa kushen issi xeetanne oytamanne oyddu wadha gidis.
REV 21:18 Katamaa dirsay yasphide geetetiya shuchan diretis. Katamay mastooteda phooliya walahi bayna worqan oosetis.
REV 21:19 Katamaa dirsaa baasoy ubba qommo bonchetida shuchan alleeqetis. Koyro hiixetida shuchay yasphide, nam7anthoy sanpare, heedzanthoy kelqedoone, oyddanthoy baluure,
REV 21:20 ichashanthoy sardonkisa, usupunthoy sardiyoone, laapunthoy kiristiloobe, hospunthoy birille, uddufunthoy toophaze, tammanthoy kirisphiraasise, tammanne issinthoy yaakinte, tammanne nam7anthoy ametesxinoosa.
REV 21:21 Tammanne nam7u pengetas tammanne nam7u al7o shuchi de7ees. Issi issi pengey issi al7o shuchan oosetis. Katamaa wogga ogey mastooteda phooliya walahi bayna worqafe oosetis.
REV 21:22 Goday, Ubbaafe Wolqaama Xoossaynne Dorsay katamaas keethe gidiya gisho, ta he kataman Xoossa keethi be7abike.
REV 21:23 Xoossaa bonchoy he katamaas poo7iya gishonne Dorsay iyaw xompe gidiya gisho katamaas awa woyko ageena poo7o koshshenna.
REV 21:24 Kawotethati he katamaa poo7on hemetana; kawotika banta bonchuwa yaa ehana.
REV 21:25 Qammi yan bayna gisho katamaa pengeti ubba gallas dooya gidana; ubbaraka gordetokona.
REV 21:26 Kawotethata gitatethaynne bonchoy he katamaa yaana.
REV 21:27 Dorsaa de7o maxaafan sunthay xaafetidaysata xalaali attishin, tunabaa woyko yeellayaba oothey woyko wordotey oonika he katamaa gelenna.
REV 22:1 Yaatidi, kiitanchoy tana Xoossaa kawotetha araatapenne Dorsaa kawotethaa araatape goggiya mastooteda phooliya de7o haatha shaafa bessis.
REV 22:2 He shaafay katama ogiya giddora duge goggees. Shaafape hefintha baggaranne hafintha baggara ageenan issi toho; laythan tammanne nam7u toho ayfiya de7o mithi de7ees. He mitha boncoy kawotethata ubbaa hargefe pathees.
REV 22:3 He kataman aybi baadethika deenna. Xoossaa kawotetha araataynne Dorsaa kawotetha araatay he kataman daana. Xoossaa aylleti Xoossaas oothana.
REV 22:4 Enti iya som7uwa be7ana; iya sunthay enta som7on xaafetana.
REV 22:5 Hizape qammi deenna; Godaa Xoossay entaw xompe gidiya gisho entaw xompe woyko awa poo7o koshshenna. Enti meri merinaw kawotana.
REV 22:6 Kiitanchoy taako, “Ha ta odiya qaalay tumanne ammantheysa. Goday, nabeta ba Geeshsha Ayyaanan kiittiya Xoossay, matan hananaba ba aylleta bessanaw ba kiitanchuwa kiittis” yaagis.
REV 22:7 Yesuusi, “Heko ta ellesada yaana; ha maxaafan de7iya tinbite qaala naagiya oonika anjetidaysa” yaagis.
REV 22:8 Taani, Yohaanisi, he ubbaba si7as; be7as. Taani hessa si7ida wodenne be7ida wode hessa tana bessida kiitanchuwa goyinnanaw iya tohuwa bolla kundas.
REV 22:9 Shin kiitanchoy taako, “Hessa oothofa! Taani needa, nabetada ne ishatadanne ha maxaafan de7iya ubbaa kiitetiya aylleta mela; Xoossaa goyinna” yaagis.
REV 22:10 Kiitanchoy zaaridi, “Ha ubbay poletiya wodey matatida gisho ha maxaafan xaafetida tinbite qaala maatamen gordofa.
REV 22:11 Iita oothey gujidi iita ootho; tuney gujidi tuno. Lo77o oothey gujidi lo77o ootho; geeyey gujidi geeyo” yaagis.
REV 22:12 Yesuusi, “Heko, taani ellesada yaana. Issuwas issuwas iya oosuwada immanaw ta woytoy taara de7ees.
REV 22:13 Taani Alfanne Omega; Koyronne Wursethi; Doomethinne Polo.
REV 22:14 “Banta ma7uwa meeccidi geeshsheysati anjetidaysata. De7o mithee ayfiya maanawunne katamaa pengiyara gelanaw entaw maati imetis.
REV 22:15 Shin kanati, biteysati, laymateysati, shempo wodheysati, eeqa goyinneysati, wordo doseysatinne ootheysati karen de7oosona.
REV 22:16 “Taani, Yesuusi, ha markatethaa hintew, woosa keethatas odana mela ta kiitanchuwa kiittas. Taani Dawita sheeshinne koche. Taani poo7iya guura bakala” yaagis.
REV 22:17 Geeshsha Ayyaanaynne gelanaw giigida maccasiya, “Haaya” yaagosona. Qassi haysa si7iya oonika, “Haaya” yaago. Saamotida oonika haayo; de7o haatha koyiya oonika coo eko.
REV 22:18 Taani ha maxaafan xaafetida tinbite qaala si7iya oonaka zorayis. Oonika ha qaala bolla issiba gujiko, Xoossay ha maxaafan xaafetida bosha iya bolla gujana.
REV 22:19 Oonika maxaafan de7iya tinbite qaalape issiba pacisiko, Xoossay ha maxaafan xaafetida de7o mithaa ayfiyapenne geeshsha katamaape iya qaada pacisana.
REV 22:20 Ha ubbaa markateysi, “Tuma, taani ellesada yaana” yaagees. Amin7i; Godaa Yesuusa, haaya.
REV 22:21 Godaa Yesuus Kiristoosa aadho keehatethay hinte ubbaara gido. Amin7i.
