﻿Ibraawe Kiita.
1.
Kase Xoossay, nu aawatas nabeta baggara dumma dumma ogen daro wode odis. 
Shin ha wursetha wodiyan ubbaa iya laatisida qassi alame iya baggara medhida ba Na7aa baggara nuus odis. 
Na7ay Xoossaa bonchuwa phoolethaanne kumetha Xoossa Xoossatetha ekidi, ba wolqaama qaalan ha alamiya katisidi oykis. Asaa enta nagaraape geeshidaape guye Ubbaafe Bolla Xoossaa ushacha baggan saluwan uttis. 
Iyaw imetida sunthay kiitanchota sunthafe bolla gideysada I entafe bolla. 
Hiza, Xoossay kiitanchotape oodeko, “Neeni ta Na7a; ta hachi new aawa gidas” gidee? Woyko qassi oodeko, “Taani iyaw aawa gidana; ika taw na7a gidana” gidee? 
Qassi Xoossay ba bayra Na7aa ha alamiya kiittishe, “Xoossaa kiitanchoti ubbay iyaw goyinno” yaagis. 
Xoossay kiitanchotaba odishe, “Xoossay ba Kiitanchota carko, ba aylleta tama laco oothees” yaagees. 
Shin ba Na7aba odishe, “Xoossaw, ne araatay merinaw de7ees. Ne kawotethaa ne xillotethan aysaasa. 
Neeni xillotethi dosadasa; iita ixadasa. Xoossay, ne Goday, nena ne laggetape aathidi dooris, ufaysa zayte nena tiyis” yaagees. 
Xoossay Zaaridi, “Godaw, koyro neeni sa7a medhadasa; saloti ne kushe ooso. 
Hessati ubbay dhayana; shin neeni daana. Enti ubbay afilada wurana. 
Neeni enta saleenada xaaxana; qassi enti afilada laametana. Shin neeni ubba wode nena; ne laythayka wurenna” yaagees. 
Shin Xoossay kiitanchotape oodeko, “Taani ne morketa ne tohoy yedhiyaso oothana gakanaw, haysan taape ushacha baggan utta” gidee? 
Kiitanchoti ubbay atotethi demmanaw de7iya asata maaddanaw Xoossay kiitida ayyaanata gidokonaayee? 
