﻿Filmoona Kiitaa.
1.
Taani Phawuloosi, Yesuus Kiristoosa gisho qashon de7eysinne nu ishaa Ximotiyoosi, nuura oothiya nuuni dosiya Filmoonas, 
ne son shiiqiya woosa keethatas, nu miche Afbiyaasinne nuura issife de7iya wotaadare Arkiphaasas xaafida kiita. 
Xoossaa nu Aawapenne nu Godaa Yesuus Kiristoosape aadho keehatethaynne sarotethay hintew gido. 
Neeni geeshshata doseysanne Godaa Yesuusa ammaneysa taani si7iya gisho, Xoossaa woossashe nena qopiya wode ubban ta Xoossaa galatayis. 
Neeni ne ammanuwa haratas shaakeysi nuus Kiristoos Yesuusa baggara yaa lo77oba ubbaa erisana mela taani Xoossaa woossayis. 
Geeshshata wozanay ne oosuwan minnida gisho, ta ishaw, taani ne siiquwan daro ufaysinne minthetho demmas. 
Hessa gisho, neeni oothanaw bessiyaba oothana mela nena kiittanaw Kiristoosa baggara taw minotethay de7ees. 
Taani, cimay Phawuloosi, Kiristoos Yesuusas ha77ika qashon de7eysi, siiqon nena woossayis. 
Taani qashon de7ashe iyaw zoriya aawa gidada ta na7aa Anasmoosa gisho nena woossayis. 
I kase nena maaddenna, shin ha77i nenaka tanaka tuma maaddiya asi. 
Taani wozanape dosiya Anasmoosa neeko yeddayis. Taani Wongela gisho qashetidashin, ne gisho taw oothidi tana maaddana mela ta matan iya ashshanaw koyas. 
Shin ne sheneda oothanaw koyasipe attishin, neera zorettonna wolqan aykoka oothanaw koyke. 
Anasmoosi guutha wode neepe shaaketidaysi, ooni eri simmidi ubba wode neera de7onna aggenna. 
Hiza, haysafe guye Anasmoosi aylle gidonashin, ayllefe I daro aadhees. I taw ay mela siiqo ishe! Qassi I new asa baggaraka Godaa baggaraka aadhida isha. 
Hiza, neeni tana ne lagge giyaba gidiko tana mokeysada iya moka. 
I nena qohidabay woyko I acotidabay de7iko taape eka. 
He acuwa ta qanxana gada taani Phawuloosi, ta kushen xaafayis. Neeni taw ne shempuwa acota uttidaysa taani nena akeekisanaw koshshenna. 
Ta ishaw, Godaa baggara neepe maade demmanaw koyayis. Kiristoosa baggara tana minthetha. 
Taani gidaysafe daro neeni oothanaysa erada qassi ne taw kiitetanaysa ammanada haysa xaafayis. 
Xoossay hinte woosa si7idi tana hinteko guye zaarana gada qopiya gisho, taw imathi shempiya keethi giigisa. 
Kiristoos Yesuusa gisho taara qashon de7iya Ephafiri nena saro saro gees. 
Qassi taara issife oothiya Marqoosi, Arsxirokoosi, Deemasinne Luqaasi nena saro goosona. 
Godaa Yesuus Kiristoosa aadho keehatethay hinte ayyaanara gido.
