﻿Marqoosa Wongela.
1.
Haysi Xoossa Na7a Yesuus Kiristoosa wongelaa doomethi. 
Nabiya Isayaasi xaafida maxaafan Xoossay, “Heko, taani ta kiitanchuwa taani neepe sinthe yeddana. I ne ogiya giigisana. 
Issoy mela biittan ba qaala dhoqu oothidi, ‘Godaa ogiya giigisite; I hemetana horoga iyaw suurisite gis’ ” yaagees. 
Xammaqiya Yohaanisi asaa xammaqishe, “Hinte nagaraape simmidi xammaqetite; Xoossay hinte nagaraa atto gaana” yaagidi qaala odishe mela biittafe yis. 
Yihuda biittan de7iya asa ubbaynne Yerusalaame katamaa asa ubbay Yohaanisako yoosona. Banta nagara paaxin, Yohaanisi enta Yordaanose Shaafan xammaqees. 
Yohaanisi gimale ikisepe dadetida afila ma77ees. Ba xeessan dafo dancees; qassi boolenne degera eessi mees. 
Yohaanisi qaala odishe, “Taape guyera daro minneysi yees. Hari attoshin, taani iya caammaa wodoruwa hokada billanaw bessike. 
Taani hintena haathan xammaqayis, shin I hintena Geeshsha Ayyaanan xammaqana” yaagis. 
Yesuusi he wode Galila biittan de7iya Naazirete katamaape yin, Yohaanisi Yordaanose Shaafan iya xammaqis. 
Yesuusi haathaafe keyiya wode saloy dooyetin, Geeshsha Ayyaanay ba bolla holleda wodhishin be7is. 
Qassi salope, “Taani dosiya ta na7ay nena; ta nenan ufaytayis” giya qaalay yis. 
Iira Geeshsha Ayyaanay Yesuusa mela biitta efis. 
Yesuusi mela biittan Xalahen paacetishe oytamu gallas gam7is. Do7atara de7is, shin kiitanchoti yidi iya maaddidosona. 
Yohaanisi qashetidaape guye, Yesuusi Xoossaa kawotethaa Wongela odishe Galila biitta bis. 
Yan, “Wodey gakis; Xoossaa kawotethay matatis. Hinte nagaraape simmidi, Wongelan ammanite” yaagis. 
Yesuusi Galila Abbaa matara aadhishe, molo oykiya, Simoonanne iya ishaa Indiriyasa, banta gitiya abban yeggeyisata be7is. 
Entako, “Tana kaallite; taani hintena ase oythu tamaarsana” yaagis. 
Enti ellesidi banta gitiya yeggi aggidi Yesuusa kaallidosona. 
Yesuusi guuthi sinthe bidi, nam7u ishata Zabdiyoosa nayta, Yayqoobanne Yohaanisa wogoluwa giddon banta gitiya giigiseyisata be7is. 
I enta be7ida mela xeegis. Enti banta aawa Zabdiyoosa, iya oosanchotara wogoluwa giddon yeggi aggidi Yesuusa kaallidi bidosona. 
Enti Qifirnahooma katamaa gelidosona. Sambaati gelida mela Yesuusi ellesidi ayhude woosa keethi gelidi tamaarso oykis. 
Maatara de7iya asada tamaarsesipe attishin, higge astamaaretatho tamaarsonna gisho, asay iya timirtiyan malaaletidosona. 
He wode tuna ayyaanay oykida issi uray ayhude woosa keethi gelidi ba qaala dhoqu oothidi, 
“Naazirete Yesuusa, neeni nuupe ay koyay? Nuna dhaysanaw yadii? Neeni ooneko ta erayis; neeni Xoossaa Geeshshaa gidikii?” yaagis. 
Yesuusi he tuna ayyaana, “Hayza, ha addiyafe keya” gidi kiittis. 
Tuna ayyaanay uraa daferethidi, waassidi iyape keyis. 
Asa ubbay malaaletidi, “Haysi aybee? Ha uray ba maatan hari attoshin tuna ayyaanataka kiittees. Enti iyaw kiitetoosona; haysi aybi ooratha timirtee?” gidi, banta giddon issoy issuwa oychidosona. 
Yesuusa sunthay ellesidi Galila biittan de7iya heera ubban keyis. 
Yesuusi ayhude woosa keethafe keyidi, Yayqoobaranne Yohaanisara Simoona soonne Indiriyasa soo bis. 
Simoona mache aayiya qoxo misha hargada zin7idaaro Yesuusi yaa gakiya wode iyaw odidosona. 
I iiko shiiqidi, I kushiya oykidi, iyo denthidi essis. Qoxoynne mishay aggin iya enta mokasu. 
Hargida asa ubbaanne tuna ayyaanati oykida asa ubbaa omarsi away wullidaape guye, iyako ehidosona. 
Kataman de7iya asa ubbay he keetha kare shiiqidosona. 
Yesuusi dumma dumma hargen oyketida daro asaa pathidi, daro tuna ayyaanata kessis. I ooneko tuna ayyaanati erida gisho, enta odisonna diggis. 
Yesuusi wonta guura dendidi, asi bayna bessi bidi, yan Xoossaa woossis. 
Simooninne iyara de7eysati iya koyishe bidosona. 
Enti iya demmidi, “Asa ubbay nena koyees” yaagidosona. 
Yesuusi qassi enta, “He heeran de7iya hara katamata yedhite. Taani yiday Wongela odanaw gidiya gisho yanka qaala odanaw bessees” yaagis. 
Ayhude woosa keethatan qaala odishenne tuna ayyaanata kessishe, Galila biitta ubban yuuyis. 
Baroy oykida issi uray Yesuusako yidi, iya sinthan gulbatidi, “Neeni koyko tana geeshshanaw danda7aasa” yaagidi woossis. 
Yesuusi iyaw qadhetidi, ba kushiya yeddidi iya bochidi, “Taani koyayis, geeyiya” yaagis. 
Ellesidi baroy uraa yeddin uray paxis. 
Yesuusi uraa minthi naagisidi kessi yeddis. 
Yesuusi iya, “Nena era, haysa oodeska odopa. Shin bada ne asatethaa kahine bessa. Neeni ha77i geeshshi gididaysa asaa erisanaw, Musey kiitida yarshuwa yarsha” yaagis. 
Shin uray bidi, guta ubban asa ubbaas odis. Hessa gisho, Yesuusi qonce keyidi, katama gelanaw danda7ibeenna. Shin asi bayna bessan gaxan de7is; qassi asay ubba bessafe iyako yoosona. 
