﻿Isayaasa.
64.
Abeeti Godaw, salota daakada duge wodha; dereti ne sinthan kokoro. 
Tami eexidi haathe pentiseysada duge wodhada, ne suntha ne morketa erisa; kawotethataka ne sinthan kokorsa. 
Kase nuuni naagiboonna malaatata neeni oothida wode wodhadasa; dereti ne sinthan kokoridosona. 
Benipe doomidi, nena ammanetidi, naageysatas malaatata oothiday neepe attishin, hara Xoossi asa haythi si7ibeenna; asa ayfey be7ibeenna. 
Ufaytidi xillotethi ootheysatanne ne ogiya qopeyisata neeni maaddadasa. Shin nuuni nagara ooso aggonna ixida wode neeni hanqetadasa; nuuni waanidi attanee? 
Nuuni ubbay tuna asi gidida; nu xillotetha ooso ubbay tuna curqa mela. Nu ubbay boncoda qoletida; nu nagaray nuna carkoda pitidi efis. 
Neeni ne sinthaa nuupe genthadasa; nu nagaray nuna dhaysana mela aggadasa. Ne sunthaa xeegey deenna; nena minthidi oykanaw koyey baawa. 
Gidoshin, abeeti Godaw, neeni nu aawa; nuuni urqa; ne urqa medhadasa; nuuni ubbay ne kushen medhetida. 
Abeeti Godaw, daro hanqetofa; nu nagaraa merinaw qopofa. Nuuni ubbay ne ase gidiya gisho, nuna be7a. 
Ne geeshsha katamati mela biitta gididosona; Xiyoone katamay mela biitta, Yerusalaamey baysa gidis. 
Nu aawati iyan nena galatida geeshshinne lo77o gidida nu xoossa keethay taman xuugetis; nu lo77o bessa ubbay laaletis. 
Abeeti Godaw, neeni haysa ubbaa be7ashe si77i gaanee? ha ubbay hanin, nuuko simmikii? Neeni si77i gada zawi bayna seeranee? 
