﻿Isayaasa.
51.
Hinteno xillotethi kaalleysato, hinteno Godaa koyeysato si7ite. Hinte phalqetidi eketida shuchaa hinte booketidi keyida ollaa xeellite. 
Hinte aawa Abrahaamenne hintena yelida Saaro xeellite. I barka de7ishin, taani iya xeegada anjasinne taybon darsas. 
“Goday Xiyoonenne laaletida bessan de7iya asa ubbaa minthethana. I mela biitta Edene, kalotida biitta Godaa atakilte gadeda oothana. Yan ufaysinne hashshu guussi daana; galatinne mazmurey si7etana. 
“Ta asaw; ta odiyaba si7ite; ta deriyaw, hinte haythaa taako zaarite. Higgey taape keyees; ta suure pirday kawotethatas poo7o gidana. 
Ta xillotethay ellesidi shiiqana; ta atotethay matis; ta qesey kawotethatas suure pirdaa ehana. Yuushoy abban teqetida biittati ubbay tanan ammanetidi naagana; taani enta ta wolqan ashshanaysa ufaysan naagana. 
Pude dhoqu gidi salota xeellite; duge sa7aaka xeellite. Saloti cuyada laaletidi dhayana; sa7i afilada wurana; iyan de7iya asa ubbay udunxeda hayqana. Shin ta atotethay merinaw daana; ta xillotethay wurenna. 
“Hinteno xillotethaa ereysato, ta higgey hinte wozanan de7eysato, si7ite. Asaa bore yayyofite; enta cashshas dagammopite. 
Bili ma7o, dorsa ikise guxuney meysada, enti meetetana. Shin ta xillotethay merinaw daana; ta atotethay yeletetha ubbaas gidana” yaagees. 
Abeeti Godaw, denda! Denda! Godaa qesiyaw, wolqaa ma7a. Beni wodetaninne yeletethan hanidaysada denda; Ra7aaba geetetiya dawiya qanxerethidaynne caddiday nena gidikiyee? 
Abbaanne gita ciimmo haatha melisiday nena gidikiyee? Ne wozidaysati pinnana mela ciimmo abba oge oothiday nena gidikiyee? 
Goday wozidaysati yexishe simmidi Xiyoone yaana; merinaa ufaysay kallacha mela enta bolla uttana. Enti ufaysinne hashshu giyaba demmana; azzanoynne yeehoy entafe haakana. 
Goday, “Taani, hintena minthethey tana; yaatin, hayqiya asenne maatada shulliya asa na7a yayyanaw hinte oonee? 
Salota miccidanne sa7a baasuwa essida Godaa, hintena medhida Xoossaa dogideta. Enti hintena dhaysanaw un7ethiya asaa hanquwa gaason ubba gallas yashshan de7eeta. Shin hintena un7etheyisata hanqoy awun de7ii? 
Di7etidaysati eeson birshetana; qashetida ollan hayqokona; koshatokona.” 
“Taani Godaa, ne Xoossaa; guummana mela abba qaathey tana; ta sunthay Ubbaafe Wolqaama Godaa. 
Ta qaala ne doonan wothiday, ta kushe kuyan nena genthiday, salota micciday, sa7aa baasuwa essiday, Xiyooneko, ‘Neeni ta ase’ ” yaagiday tana. 
Neno, Godaa kushepe gandigarsiya hanqo xuu7aa ashshona uyida Yerusalaame, barka! Denda! Denda. 
Iya yelida naytape iyo kaalethiya issoyka baawa; iya dichida naytape I kushiya oykidi efida issoyka baawa. 
Ha nam7ubati ne qaada gididosona; hessati laaletethinne dhayo; koshinne mashshi ne bolla yaana; yaatin, nena ooni minthethanee? 
Ne nayti giten gelida gen7eda oge gaxan kundidi labbanidosona. Enti Godaa hanquwaninne ne Xoossaa seeran kumidosona. 
Hessa gisho, woyne ushshan gidonashin meton mathotidaysato, hinte haysa si7ite. 
“Ba asaas mootetiya ne Goday, ne Xoossay yaagees; Heko, nena gandigarisiya, ta hanqo xuu7aa taani ne kushepe ekas; neeni zaarada he mathoyiya ushsha uyaka. 
Taani hessa nena un7ethiya asaa kushen wothana; Enti neeko, ‘Nuuni ne bollara hemetidi aadhana mela zaqulla’ ” yaagidosona. Neeni enti aadhana gakanaw ne zokuwa entaw biittadanne ogeda oothadasa. 
