﻿Leemiso.
19.
Ba doonan wordotiya eeya asape ba de7uwan borey bayna manqoy lo77o. 
Eri bayna dafetethi lo77o gidenna; eeso daroy oge balethees. 
Asi ba eeyatethan ba de7uwa iissees; yaatidi Godaa bolla yilotees. 
Duretethi daro lagge shiishees; shin manqotethi de7iya laggeta duuthees. 
Wordo marki seerettonna attenna; wordo odetey kessi ekenna. 
Daro asay shuuma som7o koyoosona; imota immiya asara asi ubbay dabbotees. 
Manqo asi hari attoshin iya ishati ixoosona; iya laggeti iyape haakoosona; I enta aaddashinka enti iya koyokona. 
Cincatethi demmiya asi ba shempuwa dosees; eratethi minthidi oykiya uraas injetees. 
Wordo marki seerettonna attenna; wordo odetey dhayana. 
Eeya asas inje de7oy bessenna; aylley halaqata haaroy daro iita. 
Cincatethi ase danda7a tamaarsees; qoho kadhidi aadhethi bonchisees. 
Kawa hanqoy gaammo gudetha mela; shin iya nashshoy maata aacisiya aka mela. 
Eeya na7i ba aawa dhaysees; doonama macha xokiya keetha mela. 
Asi keethenne shalo aawupe laattees; shin akeeka macho Goday immees. 
Azallatethi dhisko ehees; ooso oothonna asi koshatees. 
Kiita naagiya asi ba shempuwa naagees; shin qelli giya asi hayqees. 
Manqos keehiya asi Godaas tal7ees; Goday he lo77o oosuwa gisho woytees. 
Simo ufaysi de7ishin ne nayta seera; seeronna ixiko, ne enta dhaysaasa. 
Elle shenetiya asi ba gatiya ekanaw bessees; neeni iya issi toho ashshiyaba gidiko, hara wodeka ne iya hessada ashshanaysi attenna. 
Zore si7a; tamaaranaw koya; neeni wursethi gakanaw cinca gidana. 
Asi darobaa halchees; shin Goday gidabay poletees. 
Asape koyetey ammanetethi; wordo gidanaape manqo gideysi lo77o. 
Godaas yashshi de7oko kaalethees; iya yayiya asi kallidi de7ees; iiti iya bochenna. 
Issi issi asi daro azalla; hari attoshin woxen tushkida uythaa pude baaranaw waayetees. 
Neeni qelqisiya asi shociko, akeeki pacidaysi cincatethi tamaarana; akeeka asi ne hanqetiko, I eratethi demmana. 
Ba aawa bonqiya na7ay, ba aayiw yedethiya na7ay, yeellanne kawushatethi ehiya na7a. 
Ta na7aw, ne zore si7onna ixiko, era ogiyape haakaasa. 
Wordo marki suure pirda bolla qelqisees; iita asa dooni iitatethi mittees. 
Qelqisiya asas pirda eeyatas wadho koshshees. 
