﻿Mazmure.
147.
Godaa galatite! Nu Xoossaa saboy lo77o; iya saboy ufaysiyabaanne bessiyaba. 
Goday Yerusalaame oorathana; Isra7eelepe di7etidaysata shiishana. 
Wozani meqidaysata koolees; enta madunthaa pathees. 
I xoolintota taybuwa erees; enta ubbaa enta sunthan sunthan xeegees. 
Nu Goday gita; I wolqaama; iya akeekas zawi baawa. 
Goday aadata zempisees; shin iitata sa7an yeggees. 
Godaas galata yethi yexite; nu Xoossaas diithan yexite. 
I saluwa shaara mayzees; biittas ira immees; zumata bolla maata dolisees. 
Mehetas kathi, Koshatidi waassiya quuro naytas miyaba immees. 
I parata wolqaninne tooranchota minotethan ufaytenna. 
Shin Goday baw yayyeysataninne iya maarotan ammaneteysatan ufaytees. 
Yerusalaame, Godaa galata! Xiyoone, ne Xoossaa galata! 
I ne pengiya kobeta minthana; ne giddon de7iya ne asaa anjana. 
I ne zawa sarotethan naagana; nena lo77o gisten kalsana. 
I ba kiitaa biittas yeddees; iya qaalay eeson gakees. 
I shachi bullukoda miccees; caagana bidoda laallees. 
I shacha shuchada holees; iya meeguwan oonika eqanaw danda7enna. 
I ba qaala kiittidi shacha maaysees. I carkuwa kiittin haathi goggees. 
I ba qaala Yayqoobas, ba higgiyanne wogaa Isra7eeles awaajees. 
I hara kawotethatas hessa oothibeenna; enti iya higgiya erokona. Godaa galatite! 
