﻿Mazmure.
140.
Dawita Mazmure Godaw, iitatape tana ashsha; makallanchotape tana naaga. 
Enti iita oothanaw maqetoosona; gallas gallas ola denthoosona. 
Banta inxarsaa shoosha inxarsada qarayoosona; enta doonan wodhiya marzey de7ees. Salaha 
Godaw, iitata kushepe tana ashsha; ta tohuwa qaxanaw qopiya makallanchotape tana naaga. 
Otorancho asati taw xihe wothoosona; gite hiixoosona; tana oykanaw gite yeggoosona. Salaha 
Godaa, “Neeni ta Xoossaa” gaana; Godaw, ta woosa si7a. 
Ubbaa Haariya Godaw, tana ashshiya minuwaw, ola gallas taw gondalle gidadasa. 
Godaw, iitatas enta amuwa immofa; enti otortonna mela enta maquwa polisopa. Salaha 
Ta morketan tana xoonisopa; enta doonape keyiya iitay enta bolla simmo. 
Enta bolla xuuggiya tama bonqoy qoletto; enti tama ollan yegeto; keyanaw danda7onna olla holeto. 
Yooyamati biitta bolla de7opo; buqeyisata iitabay yedethidi oyko. 
Goday manqotas pirdeysanne metootanchotas mooteteysa erayis. 
Xilloti tuma ne sunthaa galatana; suure asati ne sinthan daana. 
