﻿Mazmure.
132.
Pudethe keyishe yexiya mazmure Godaw, Dawitanne I danda7ida metuwa ubbaa qopa. 
Godaas I caaqidaysa, wolqaama gidida Yayqooba Xoossaas, I odidaysa hassaya. 
Godaas besse giigisana gakanaw, Wolqaama gidida Yayqooba Xoossaas, keethe keexana gakanaw, ta soo gelike; ta hiixan zin7ike. Ta ayfey qilim7enna, woyko tana dhiskoy ekenna. 
Nuuni Taabotiyabaa Efraatan si7ida; Yi7aarime biittan iya demmida. 
“Ane I de7iya bessaa boos; iya tohoy yedhiya bessan iya goyinnoos.” 
Godaw, denda! Ne minotethaa malla gidida ne Taabotiyara ne keethaa gela. 
Ne kahineti xillotethi ma7o; ne asay ufaysan yexo. 
Ne aylliya Dawita gisho, neeni tiyida kawa aggofa. 
Goday Dawitas laametonna caaqo haysada yaagidi caaqis; “Ne gulbatape keyida, ne naytape issuwa ne araatan utisana. 
Ne nayti ta caaquwanne ta tamaarsiya timirtiya naagiko, enta nayti ne araatan merinaw uttana” yaagis. 
Goday Xiyoone dooris; baw de7iya bessi oothanaw amotidi, haysada yaagis; 
“Haysi ta merinaw de7iya besse; taani amotida gisho haysan daana. 
Taani daro kathi immada Xiyoone anjana; iyan de7iya manqotaka kathi kalsana. 
Iyan de7iya kahineta atotethi mayzana; iyan de7iya xilloti ufaysan yexana. 
He bessan Dawita zeriyape kawo kessana; taani tiyida kawa kawotethan gam7isana. 
Taani iya morketa yeella mayzana; shin iya huuphen de7iya kallachay phoolana” yaagas. 
