﻿Mazmure.
114.
Isra7eele asay Gibxe biittafe keyida wode, Yayqooba sheeshay allaga qaalan, haasaya asaa aggidi bida wode, 
Yihuda asay Godaas geeshsha asi gidis; Isra7eele asay iyaw haaretis. 
Abbay hessa be7idi baqatis; Yordaanose shaafay guye simmis. 
Dereti deeshada gupidosona; zumati dorsa marada dozgidosona. 
Abbaw, ne ayis baqatadii? Yordaanose, ne ayis guye simmadii? 
Dereto, deeshada ayis gupidetii? zumato, dorsada ayis dozgidetii? 
Neno biittaw, Godaa sinthan, Yayqooba Xoossaa sinthan kokora. 
I zaalla eele haathi kessees; mino zaalla haatha pulto oothees. 
