﻿Mazmure.
98.
Mazmure Goday malaalsiyaba oothida gisho, iyaw ooratha mazmure yexite. Iya ushacha kushey, iya geeshsha qesey iyaw xoono immis. 
Goday ba xoonuwa erisis; ba xillotethaa kawotethatas qoncisis. 
I Isra7eele asaa siiqeysanne entaw ammaneteysa hassayis. Sa7aa gaxaa gakanaw de7iya asa ubbay nu Xoossaa atotetha be7idosona. 
Sa7a bolla de7iya asaw, Godaas ufaysan yexite; ufaysan ililishe sabbite. 
Godaas diithi diixite; diithaninne mazmuren Godaa sabbite. 
Suusul7enne moyze punnishe, ufaysan Godaa nu kawa sinthan yexite. 
Abbaynne abba giddon kumida ubbay guummo; Sa7aynne sa7aa bolla de7iya ubbay yexo. 
Shaafati banta kushiya baqo; zumati issife Godaa sinthan ufaysan yexo. 
Goday sa7aa bolla pirdanaw yees; I ha sa7aa bolla xillotethan asaa bolla suuretethan pirdana. 
