﻿Mazmure.
97.
Goday kawotida gisho sa7an de7iya asay ufayto; yuushoy abban teqetida biittati ufayto. 
Shaarinne sakana dhumi iya yuushuwan de7ees; Xillotethinne tumatethi iya araata baaso. 
Tami iya sinthara bees; iya yuushuwan de7iya morketa xuuggees. 
Iya wol7anthay bitta ubbaa poo7isees; biittay hessa be7idi kokorees. 
Dereti Godaa sinthan, sa7aa ubbaa Godaa sinthan muqaadada til7idosona. 
Saloti iya xillotethaa awaajosona; asa ubbay iya bonchuwa be7oosona. 
Eeqata goyinneysatinne entan ceeqeteysati ubbay yeellato; eeqati ubbay Godaas gulbato. 
Abeeti Godaw, Xiyooney ne xillo pirdaa si7idi ufaytees; Yihuda macca naytika hashshu goosona. 
Abeeti Godaw, neeni sa7a ubba bolla dhoqa; xoossata ubbaafe neeni dhoqu gadasa. 
Godaa doseysato, iitaa ixite; iyan ammaneteyisata shempuwa I naagees; iitata kushepe enta ashshees. 
Xillota bolla poo7oy poo7ees; wozana suuretas ufaysi de7ees. 
Hinteno xilloto, Godan ufaytite; iya geeshsha sunthaa galatite. 
