﻿Mazmure.
85.
Zammaareta halaqaas xaafetida Qore nayta mazmure Godaw, neeni ne biittas keehadasa; Yayqooba kochaa di7ope guye zaaradasa. 
Ne asaa naaquwa atto gadasa; enta nagaraa ubbaa kammadasa. Salaha 
Ne yiluwa aggadasa; suulliya ne hanquwafe simmadasa. 
Abeeti nuna ashshiya Xoossaw, nuna guye zaara; nu bolla lancidaysa agga. 
Neeni nu bolla merinaw shenetayee? Ne hanquwafe simmikiyee? 
Nuuni nenan ufaytana mela, nuna zaarada oorathikiyee? 
Abeeti Godaw, ne merina siiquwa nuna bessa; nuna ashsha. 
Godaa Xoossay odiyaba taani si7ana; enti banta eeya ogiyako simmonna ixiko, I ba geeshsha deriyas sarotethi odees. 
Iya bonchoy nu biittan daana mela, Xoossaa yayyeyisata ashshanaw I matan de7ees. 
Siiqoynne tumatethi gahetidosona; Xillotethinne sarotethi idimetidosona. 
Tumatethi sa7aape pude keyees; xillotethi salope duge xeellees. 
Xoossay lo77oba nuus immana; nu biittay daro kathi ayfana. 
Xillotethi Godaa sinthan hemetana; iya ogiya giigisana. 
