﻿Mazmure.
72.
Solomone Mazmure Xoossaw, ne suure pirdaa kawas, nu xillotethaa kawa na7aas imma. 
I ne asaas xillotethan pirdana; qohetidaysatas suuren daynnatana. 
Dereti duretethi, zumati xillotetha ayfe ne asaas ayfo. 
Kawoy qohetidaysata gisho mooteto; manqota ashsho; un7etheyisata mentho. 
Xoossaw, I awadanne ageenada de7o; yeletethaafe yeletethaa gakanaw de7o. 
Kawoy goshshan bukiya ira melanne biitta kalsiya puuse ira mela gido. 
Iya laytha ubban xillo asati daayo; ageeni dhayana gakanaw sarotethi daro. 
Abbaafe abba gakanaw, Efraxiisa shaafape sa7aa gaxa gakanaw I haaro. 
Bazzon de7iya asati iya goyinno; iya morketi baana laaco. 
Tarsesanne yuushoy abban teqetida biittata, kawoti iyaw giira giiro; Arabenne Tophe kawoti iyaw imota eho. 
Kawoti ubbay iyaw gulbato; kawotethati ubbay iyaw kiiteto. 
Iyako waassiya manqota, qohetidaysatanne maadoy baynayisata I ashshana. 
Manqotasinne daaburanchotas I qadhetees; manqota shempuwa hayqope ashshees. 
Enta suuthay iya sinthan al7o gidiya gisho, I, enta qohopenne iitape wozana. 
Kawoy daro laythi gam7o; Arabe biitta worqay iyaw yo. Asay iya gisho ubba wode woosso; gallas ubban I anjeto. 
Biittan kathi palaho; dereti kathan kametto. Libaanose deriya bolla kathi ayfiyada ayfo; denbi maatan kumiyada asay katamaa kumo. 
Kawa sunthay merinaw de7o; awada ubba wode xeegetishe gam7o. Asa ubbay iya baggara anjetana; kawotethati iya “anjetidaysa” yaagana. 
Malaalisiyaba barka oothiya Goday, Xoossay Isra7eele Xoossay galatetto. 
Iya boncho sunthay merinaw galatetto; iya bonchoy sa7a ubbaa kumo. 
Isseye na7aa Dawita woosay haysan poletis. 
