﻿Mazmure.
59.
Dawita wodhanaw iya keetha naagana mela Saa7oli ase kiittin, Dawiti zammaareta halaqaas xaafida woosa “Dhaysofa” geetetiya diitha cuudhethan yexetida woosa. Abeeti ta Xoossaw, ta morketape tana ashsha; ta bolla dendeysatape tana naaga. 
Iita ootheysatape tana ashsha; suuthu gussiya asatape tana ashsha. 
Abeeti Godaw, enti tana wodhanaw zugidi naageysa be7a. Abeeti Godaw, ta naaquwa gisho woyko ta nagaraa gisho gidonashin coo ta bolla tobboosona. 
Ta ay balaka oothonna tana qohanaw giigidosona; hessa be7a; tana maaddanaw denda. 
Abeeti Ubbaafe Wolqaama Xoossaw, Godaw, Isra7eele Xoossaw, kawotethata ubbaa pirdanaw barka; iita ootheyisata maaropa. Salaha 
Enti katamaa giddon yuuyishe pee7idi, kanatho laawishe simmoosona. 
Enta doonape keyeysa be7a; enta inxarsay mashsha mela; asi entana si7eysa qopokona. 
Shin abeeti Godaw, ne enta bolla miicaasa; kawotethata ubbaa leqisaasa. 
Xoossaw, ne ta miixaa gidiya gisho, ta ne wolqan ammanetayis. 
Ta Xoossay ba siiquwan taako yaana; ta Xoossay ta morketa xoonetethaa tana bessaana. 
Ta asati dogonna mela ne enta wodhopa. Abeeti Godaw, nu gondalliyaw, ne wolqan enta laallanne kawusha. 
Enta doonape keyiya nagaraa gisho enta inxarsaafe pultiya qaala gisho, banta otoruwan oyketo; enta baadethanne worduwa gisho, 
ne hanquwan enta dhaysa; enta kumethi digga. Hessan Xoossay Yayqooba zeretha haareysanne sa7aa gaxaa gakanaw haareysi eretana. Salaha 
Enti katamaa giddon yuuyishe pee7idi, kanatho laawishe simmoosona. 
Enti miyaba demmanaw toylatoosona; kallona attida laawiya kana gidoosona. 
Shin taani ne wolqaa sabbana; wonta ne siiquwa yexana. Neeni taw ta waayiya gallas, ta baqata attiya bessenne miixa. 
Abeeti taw wolqa gidida Xoossaw, ta nena sabbana. Ta qosetada attiya bessaynne siiquwa tana bessiya Xoossay nena. 
