﻿Mazmure.
58.
Dawiti Zammaareta Halaqaas Xaafida Woosa “Dhaysofa” geetetiya diitha cuudhethan yexetida woosa. Deriya haareysato, tuma hinte like odeteetii? Asa ubbaas xillo pirdeetii? 
Gidenna, hinte wozanan iitabaa halcheeta; hinte kushey biitta bolla geellaba oothees. 
Iita asi aaye ulope doomidi halees; yeletida gallasape doomidi, baleesinne wordo odetees. 
Enti shooshada yiishshara de7oosona; enti tulle gopeda si7okona. 
Biteysi ay cinca gidikoka, Gopey iya xeessi si7enna. 
Abeeti Xoossaw, gaammo achi daaniya enta achaa mentha; Godaw enta sakiliya dhuka. 
Enti gukida haathi gido; banta dongiya dukiya wode, donge toora ayfey dhayo. 
Enti maaydi dhayiya dhaadhe saassoda hano; aaye ulope hayqidi wodhiya, awa poo7o be7onna boshada hano. 
Enti agunthi gididi daayanape kase, enti buroo puuto gididi de7ishin, enta ba hanquwan dhaysana. 
Nagaranchota bolla halo keyiya wode xilloti ufaytana; iitata suuthan banta tohuwa meecetana. 
He wode asay, “Tuma xillotas woytoy de7ees; sa7a bolla pirdiya Xoossi de7ees” yaagana. 
